ኦርቶዶክሳዊ መጻሕፍት እና ጽሑፎች Tsegaye kiflu

https://youtu.be/NpZoAgTEovQ

ያን ጊዜም የክቡር ጊዮርጊስን ራስ በሰይፍ ይቆርጡ ዘንድ አዘዘ፡፡ ድል አድራጊ ጊዮርጊስም እጅግ ደስ አለው፡፡ እሳት ከሰማይ አውርዶ ሰባውን ነገሥት ያቃጥላቸው ዘንድ መከራውም ከክርስቲያን ወገን ጸጥ ይል ዘንድ ጌታችንን ለመነው፡፡ ወዲያው እሳት ወርዶ ከሠራዊታቸው ጋር ሰባውን ነገሥታት አቃጠላቸው፡፡

ከዚህም በኋላ የክብር ባለቤት ጌታችን ኢየሱስ ክርስቶስ ለቅዱስ ጊዮርጊስ ተገልጾ ብዙ ቃል ኪዳን ሰጠው፡፡ ‹‹በምድር መታሰቢያህን ለሚያደርግ ሁሉ እኔ ኃጢአቱን ሁሉ እደመስሳለሁ በመከራም ውስጥ ሁኖ በባሕርም ሆነ በየብስ ወይም በደዌ በስምህ የሚለምነኝን እኔ ፈጥኜ ከመከራው አድነዋለሁ፡፡›› ይህንንም ጌታችን ተናግሮ በክብር ወደ ሰማይ ወጣ፡፡
ከዚህ በኋላ ራሱን ዘንበል አድርጎ በሰይፍ ቆረጡት በመንግሥተ ሰማያት አክሊላትን ተቀበለ፡፡ ከአገልጋዮቹም የቀሩት ሥጋውን ወስደው በልብስ ጠቀለሉት ወደ ሀገሩ ልዳም ወሰዱት፡፡ ቤተ ክርስቲያንም ሠርተው በውስጥዋ አኖሩት ከእርሱም ቍጥር የሌላቸው ብዙዎች ድንቆች ተአምራቶች ተገለጡ፡፡

ለእግዚአብሔር ምስጋና ይሁን የቅዱስ ጊዮርጊስም በረከቱ፣አማላጅነትና ተራዳኢነቱ ሁላችን የክርስቲያን ወገኖችን ከሥጋና ከነፍስ መከራ ይጠብቀን ለዘላለሙ አሜን፡፡

ምንጭ፡- መጽሐፈ ስንክሳር ወርኃ ሚያዚያ

‹‹እንኳን ለሰማዕቱ ቅዱስ ጊዮርጊስ ሰባር ዐጽሙ ወይም ዝርወተ ዐጽሙ ዓመታዊ በዓል አደረሳችሁ!!››

አንድ አምላክ በሚሆን በአብ በወልድ በመንፈስ ቅዱስ በዚች ቀን ፀሐይና የአጥቢያ ኮከብ የተባለ ታላቅና ክቡር የሆነ የሰማዕቱ የቅዱስ ጊዮርጊስ የምስክርነት ፍጻሜ ሆነ፡፡

የሊቀ ሰማዕት ቅዱስ ጊዮርጊስ አባቱ አንስጣስዮስ የተባለ ከቀጰዶቅያ ሀገር የሆነ መስፍን ነው፡፡ እናቱም ቴዎብስታ የተባለች ፍልስጥዔማዊ ናት ታናሽ ሆኖ ሳለ አባቱ ዐረፈ፡፡

ዕድሜውም ሃያ ዓመትም በሆነው ጊዜ የአባቱን ሹመት ሊቀበል ወደ ንጉሥ ዱድያኖስ ዘንድ ሄደ፡፡ ንጉሡም ጣዖትን አቁሞ እንዲአመልኩ ሰዎችን ሁሉ ሲያስገድዳቸው አገኘው፡፡ ይህንንም አይቶ ቅዱስ ጊዮርጊስ እጅግ አዘነ በእርሱ ዘንድ ያለውን ገንዘቡን ሁሉ ለድኆች፣ለምስኪኖች ሰጠ ባሮቹንም ነፃ አወጣቸው፡፡

ከዚህ በኋላ በንጉሥ ፊት ቁሞ በክብር ባለቤት በጌታችን ኢየሱስ ክርስቶስ ታመነ፡፡ ንጉሡም አባበለው ብዙ ቃል ኪዳንም ገባለት እርሱ ግን አልተቀበለውም፡፡

ለመስማት እንኳ የሚያስጨንቅ ሥቃይን አሠቃየው ጌታችን ግን ያጸናዋል ቍስሉንም ያድነዋል ሦስት ጊዜም እንደሚሞት እርሱም እንደሚአስነሣው በዐራተኛውም የምስክርን አክሊልን እንደሚቀበል ነገረው፡፡ ቃል ኪዳንም ሰጠው ስሙ በዓለሙ ሁሉ የተገለጠ ይሆን ዘንድ በተጋድሎና መከራ በመቀበልም ጽኑዕ በሆነ ሥቃይም ሰባት ዓመት እንደሚኖር መላእክትም እንደሚአገለግሉት ነገረው፡፡

ንጉሡም ቅዱስ ጊዮርጊስ ባለመታዘዙና ባለመመለሱ እጅግ አዘነ፡፡ ስለዚህም አትናስዮስ የሚባል ታላቅ ሥራየኛ አመጣ እርሱም መርዝን ቀምሞ በጽዋ መልቶ አስማት ደግሞ እንዲጠጣ ለቅዱስ ጊዮርጊስ ሰጠው ወዲያውኑ የሚሞት መስሎት ነበር ቅዱሱም ያንን ጽዋ ጠጣው ምንም ጉዳት አልደረሰበትም፡፡

ያ መሠርይም በክብር ባለቤት በጌታ በኢየሱስ አምኖ በሰማዕትነት ሞተ፡፡ ከእርሱም ጋር ሌሎች ብዙዎች ሰዎች በሰማዕትነት ሙተው የሕይወት አክሊል ተቀበሉ ቁጥራቸውም ሠላሳ ሺህ ሰባት መቶ ነፍስ ነው፡፡

ቅዱስ ጊዮርጊስም በዱድያኖስና በሰባ ነገሥታት ፊት በቆመ ጊዜ በዚያም የተቀመጡባቸው የዕንጨት ወንበሮች ነበሩ፡፡ ቅዱሱንም እሊህን የተቀመጥንባቸውን ወንበሮች እንዲበቅሉ እንዲአብቡና እንዲአፈሩ ታደርጋቸው ዘንድ ከአንተ እንሻለን አሉት፡፡ በዚያን ጊዜ ጸለየ እንዳሉትም አደረጋቸው ይህንንም ድንቅ ሥራ አይተው ቍጥር የሌላቸው ብዙ አሕዛብ በጌታችን አመኑ፡፡

ከዚህም በኋላ ቅዱሱን ወስደው በጎድጓዳ ብረት ምጣድ ውስጥ አበሰሉት፡፡ አቃጥለው አሳርረውም ሥጋውንና ዐጥንቱን ፈጭተው አመድ አድርገው ከረጅም ተራራ ላይ በተኑት፡፡ ጌታችንም ነፍሱን ወደ ሥጋው መልሷት ደግሞ አስነሣው፡፡ ወደ ነገሥታቱም ተመልሶ በክብር ባለቤት በጌታችን ኢየሱስ ስም ሰበከ፡፡ ቍጥር የሌላቸው አሕዛብ አይተው አደነቁ በጌታችንም አምነው በሰማዕትነት ሞቱ፡፡

ነገሥታቱም ደግመው ሙታኖችን ብታሥነሣ አምላክህ እውነተኛ አምላክ እንደሆነ እናውቃለን፡፡ በእርሱም እናምናለን አሉት፡፡ ቅዱሱም ጸለየ ከጉድጓድም ውስጥ ወንዶችና ሴቶችን ጎልማሶችንም አስነሣላቸው እነዚያም በክብር ባለቤት በጌታችን ስም አስተማሩ የገሃነምንም ወሬ ተናገሩ፤ ጥምቀትንም ተቀብለው ተመልሰው ዐረፉ፡፡

ከሀድያን ነገሥታት ግን ሙታንን ያስነሣህ አይደለም የረቀቁ ሰይጣናትን አሳየህ እንጂ ብለው ተከራከሩ፡፡ ከዚያም ከጭንቀታቸው ብዛት የተነሣ ከአንዲት ድኃ ሴት ዘንድ አስጠበቁት እርሷም እንጀራ ልትለምንለት ወጣች የእግዚአብሔርም መልአክ በላዩ ከበጎ ነገር ሁሉ የተመላ ማዕድን አቀረበላት፡፡ የዚያች መበለትም የቤቷ ምሰሶ ቅርንጫፍን አበቀለ ታላቅ ዛፍም ሆነ፡፡

ያቺም መበለት በተመለሰች ጊዜ የቤቷ ምሰሶ ቅርንጫፍ አብቅሎ ታላቅ ዛፍ እንደሆነ ስለ ማዕዱም ይህን ታላቅ ምልክት አይታ የክርስቲያኖች አምላክ ሰው ተመስሎ ወደ እኔ መጣ አለች፡፡ ቅዱስም ‹‹እኔ አምላክ አይደለሁም፡፡ የአምላክ ባሪያ ነኝ እንጂ›› አላት፡፡ እርሷም እንዲህ ብላ ለመነችው ‹‹የአምላክ አገልጋይ ከሆንክ ቸርነትህ እንድትደርሰኝ እለምንሃለሁ፡፡ ዕውር ፣ ደንቆሮ፣ ዲዳ፣ ጎባጣ የሆነ ልጅ አለኝና ታድንልኝ ዘንድ እለምንሃለሁ፡፡›› ስለ ጌታችን እምነትም አስተማራትና በመስቀል ምልክት አማተበው ያን ጊዜም አየ፡፡ ቅዱሱም በሌላ ጊዜ እንዲሰማ፣ እንዲናገርና እንዲሔድ እንዲአገለግለኝም እኔ እሻለሁ›› አላት፡፡

በዚያን ጊዜ ንጉሡ በሀገሩ ሜዳ ውስጥ ሲዘዋወር ያቺን ዛፍ አይቶ አደነቀ ስለ እርሷም ጠየቀ ቅዱስ ጊዮርጊስ በእርሷ ዘንድ የተቀመጠባት የዚያች መበለት የቤቷ ምሰሶ እንደሆነ ነገሩት፡፡ ንጉሡም ተቆጣ ቅዱሱንም ከዚያ ወስዶ አስገረፈው በመንኰራኵርም አበራዩት ሙቶም ከከተማ ውጭ ጣሉት ጌታም ከሞት አስነሣው ወደ ነገሥታቱም ተመለከተ ንጉሡም አይቶ ደነገጠ ስለ ሕይወቱም አደነቀ፡፡

ከዚህም በኋላ ይሸነግለው ዘንድ ጀመረ በመንግሥቱ ላይም ሁለተኛ ያደርገው ዘንድ ቃል ገባለት ቅዱስ ጊዮርጊስም እየዘበተበት ‹‹ነገ በጥዋት ለአማልክቶችህ መሥዋዕትን አቀርባለሁ አንተም ሕዝቡ እንዲሰበሰቡ እዘዝ እኔ ስሠዋ እንዲአዩ›› አለው፡፡ ንጉሡም እውነት የሚሠዋ መስሎት ደስ አለው ወደ ቤተ መንግሥቱም እልፍኝ አስገብቶ አሳደረው፡፡ ለጸሎትም ተነሣ የዳዊትንም መዝሙር አነበበ የዱድያኖስ ሚስቱ እለስክንድርያ ንግሥት ሰምታ ቃሉ ደስ አሰኛት የሚያነበውንም ይተረጒምላት ዘንድ ለመናቸው፡፡ እርሱም እግዚአብሔር ዓለምን ከፈጠረበት ሰው እስከሆነበት ጊዜ የሆነውን ሁሉ ሊያስረዳትና ሊያስገነዝባት ጀመረ፡፡ ትምህርቱም በልቡዋ ተቀርጾ በክብር ባለቤት በጌታችን አመነች፡፡

በማግሥቱም ቅዱስ ጊዮርጊስ ለአማልክት ሲሠዋ ለማየት ሰው ሁሉ እንዲሰበሰብ ዐዋጅ ነጋሪ ዞረ የቤቷን ምሰሶ ያበቀለላት ያቺ መበለት ሰምታ እውነት መስሏት እጅግ እያዘነችነ ልጅዋን ተሸክማ እያለቀሰችም ወጣች፡፡

ቅዱስ ጊዮርጊስም በአያት ጊዜ ፈገግ አለ ‹‹ልጅሽን በምድር ላይ አኑሪው›› አላት፡፡ ከዚያም ልጅዋን ጠርቶ ‹‹ወደ አጵሎን ሂድ ወደ እኔም ይመጣ ዘንድ በክብር ባለቤት በጌታዬ ኢየሱስ ስም እዘዘው›› አለው፡፡ ያን ጊዜ ያ ልጅ ድኖ ቅዱስ ጊዮርጊስ እንዳዘዘው ወደ ጣዖቱ ቦታ ሄዶ አዘዘው፡፡ በጣዖቱ ያደረ ያ ርኵስ መንፈስም ከማደሪያው ወጥቶ ቅዱስ ጊዮርጊስ ወደ አለበት መጥቶ ‹‹እኔ ሰውን ሁሉ የማስት እንጂ አምላክ አይደለሁም›› ብሎ በሕዝቡ ሁሉ ፊት አመነ፡፡ ቅዱሱም ትውጠው ዘንድ ምድርን አዘዛትና ወዲያውኑ ዋጠችው፤ ጣዖታቱንም ከአገልጋዮቻቸው ጋራ አጠፋቸው ንጉሡም ከወገኖቹ ጋር ዐፈረ፡፡

ብስጭትና ቁጣንም እንደተመላ ወደ ንግሥት ሚስቱ ዘንድ ገባ፡፡ እርሷም ‹‹አምላካቸው ጽኑዕና ኃያል ነውና ክርስቲያኖችን አትጣላቸው አላልኩህምን›› አለችው፡፡ ይህንንም ከእርስዋ ሰምቶ በእርሷ ላይ እጅግ ተቆጣ ወደ ክብር ባለቤት ክርስቶስ እምነት የከበረ ጊዮርጊስ እንደአስገባት ዐወቀ፡፡

ከዚህም በኋላ ከከተማ ውጭ እንዲጎትቷትና በመጋዝም እንዲሰነጥቋት አዘዘ፡፡ የሰማዕትነት አክሊልንም በመንግሥተ ሰማያት ተቀበለች፡፡

በዚያም ጊዜ ስለ ቅዱስ ጊዮርጊስ ሥራ ነገሥታቱ ሁሉም ደነገጡ ኀፍረት ደግሞ እንዳይጨምርባቸው ከእርሱም እንዲአርፍ ራሱን በሰይፍ ይቆርጡ ዘንድ እንዲጽፍ ንጉሥ ዱድያኖስን መከሩት፡፡

https://youtu.be/Q4jAU32Jztg

የቤተክርስቲያንን መብትና ጥቅም ለማስከበርና
የሕግ ተጠያቂነትን ለማረጋገጥ በጥብቅ እየተሰራ ነው።
************

ጥንታዊት፣ታሪካዊትና ዓለም አቀፋዊት የሆነችው የኢትዮጵያ ኦርቶዶከስ ተዋሕዶ ቤተክርስቲያን መንፈሳዊ አገልግሎቷን ለማስፋፋት በምታደርጋቸው እንቅስቃሴዎች ሁሉ የሌሎችን መብትና ጥቅም ባለመንካት በትዕግሥትና በማስተዋል የምትጓዝ አገራዊ ኃላፊነት የሚሰማት ሰላምን አብዝታ የምትሰብክ መንፈሳዊት ተቋም መሆኗ ይታወቃል።

ቤተክርስቲያናችን ሥርዓተ አምልኮቷን ለማስፋፋት በተጓዘችባቸው አያሌ ዓመታት አገራችን ኢትዮጵያ የራሷ ፊደላትና የራሷ የቀን አቆጣጠር ባለቤት እንድትሆን ያስቻለች፣በሊቃውንቶቿ የመጠቀ እውቀት አማካኝነት የሥነ ጥበብ፣ የሥነ ስዕል፣ የዕጽዋትና የጠፈር ምርምርና ጥናቶችን በማከናወን ተጨባጭ ውጤቶችን ለዓለም ያበረከተች ጥንታዊት ተቋም ስለመሆኗም አያሌ ማስረጃዎችን ማቅረብ ይቻላል።

ይሁን እንጂ ይህች ለአገረ መንግስት መመስረትና መጽናት፣ ለእውቀት መስፋፋት፣ ለአብሮነት መጎልበት፣ ትውልድን በሥነ ምግባር ቀርጻ ፍቅርና አንድነትን በተግባር የሰበከች እናት ቤተክርስቲያን ከቅርብ ጊዜያት ወዲህ በተለያዩ አካላት መብትና ጥቅሟን የሚነኩ፣ በአስተምህሮቿ፣በዕምነቷ፣በንዋያተ ቅድሳቶቿ ላይ መሰረታቸውን ያደረጉና ትዕግስቷን የሚፈታተኑ ክብርና ሉአላዊነቷን የሚዳፈሩ እኩይ የትንኮሳ ተግባራት እየተፈጸመባት ይገኛል።

ስለሆነም በተደጋጋሚ እየተፈጸሙባት የሚገኙትን እነዚህን እኩይ ተግባራት ከዚህ በላይ በዝምታና በትዕግስት ማለፍ መንፈሳዊ ተልዕኮዋን በአግባቡ እንዳትወጣ የሚያደርጋት ከመሆኑም በላይ መብቷን በእጅጉ የሚጋፋ፣ጥንታዊያን አባቶች ለሥርዓተ አምልኮ መፈጸሚያ ሲጠቀሙባቸው የነበሩና በትውልድ ቅብብሎሽ አሁን ያለው ትውልድ የተረከባቸው ንዋያተ ቅድሳቶቿን አደጋ ላይ የሚጥል ሁኔታ ከመፈጠሩም በላይ በሥርዓተ አምልኮዋ ላይ በማላገጥ በምዕመናን ዘንድ ቁጣ እንዲቀሰቀስ የሚያደርጉ በርካታ ተግባራት እየተፈጸሙ በመምጣታቸው ምክንያት እነዚህ እኩይና ጸብ አጫሪ ተግባራት ሕጋዊ እልባት እንዲያገኙ ማድረግ የግድ የሚልበት ደረጃ ላይ ደርሳለች።

ስለሆነም ቅድስት ቤተክርስቲያናችን ጉዳዩን በልዩ ሁኔታ ማጥናት፣መከታተልና ሕግን መሰረት ያደረገ መፍትሔ እንዲያገኙ ማድግ አስፈላጊ ሆኖ ስላገኘችው ወቅታዊ ሁኔታውን በዝርዝር በማጥናት ተቋማዊ እልባት የሚያገኝበትን መንገድ የሚያጠና ኮሚቴ ተቋቁሞ ወደ ሥራ እንዲገባ ያደረገች ሲሆን የቤተክርስ
ቲያናችን የሕግ አገልግሎት መምሪያም በሕግ አግባብ ተጠያቂነትን በማረጋገጥ ፍትሕ ማግኘት የሚቻልበትን ሁኔታ ለመፍጠር አስፈላጊውን መረጃ በማሰባሰብና በማደራጀት ክስ መመስረት የሚያስችለውን ሁኔታ በማመቻቸት ወደ ተግባር ለመለወጥ በዝግጅት ላይ ይገኛል።

ከዚህ ጎን ለጎንም ከፍ ሲል እንደተገለጸው በጠቅላይ ቤተክህነት ከሚገኙ መምሪያዎች መካከል ጉዳዩ በቀጥታ የሚመለከታቸውን መምሪያዎች በማካተት የተቋቋመው ኮሚቴም ዝርዝር ጥናቶችን በሚገባ በማጥናትና ችግሮቹን ለይቶ ከመፍትሔ ሀሳብ ጋር በአጭር ጊዜ ውስጥ በማቅረብ በቤተክርስቲያኒቱ ማዕከላዊ አስተዳደር አማካኝነት ተቋማዊ አቋም የሚወሰድበትና በቅዱስ ሲኖዶስ ደረጃ የማያዳግም መፍትሔ የሚሰጥበትን ሁኔታ ለማመቻቸት የሚያስችል ሥራ በመሥራት ላይ መሆኑን እየገለጸች በሁለቱም ዘርፎች የተገኙ ውጤቶችን በተመለከተ በተከታታይ ለሕዝበ ክርስቲያኑ እንዲገለጽ የምታደርግ መሆኑን ከወዲሁ እያስታወቀች በጉዳዩ ዙሪያ ሙያዊ ድጋፍ ለመስጠት ፈቃደኛ የሆኑ ምዕመናንና ምዕመናት በተቋቋመው ኮሚቴ አማካኝነት የሚደረግ
ላቸውን ጥሪ ተቀብለው ለቤተክርስቲያናችን መብት መከበር የበኩላቸውን አስተዋጽኦ እንዲያበረክቱ እናት ቤተክርስቲያን ጥሪዋን ታቀርባለች።

የኢትዮጵያ ኦርቶዶክስ ተዋሕዶ ቤተክርስቲያን
መንበረ ፓትርያርክ ጠቅላይ ጽሕፈት ቤት
አዲስአበባ -ኢትዮጵያ
ጥር ፲፯ቀን ፳፻ ፲ወ፯ ዓ.ም

https://youtu.be/mMdM5H-3a_4

በጥምቀት በዓል በታቦተ ሕጉ ላይ የተሳለቁ ፣በማኅበራዊ ሚዲያ አላስፈላጊ መልእክት ያሠራጩ ግለሰቦች እና ቡድኖች በሕግ እንደሚጠየቁ ተገለጸ!

ጥር 15 ቀን 2017 ዓ.ም (ተ.ሚ.ማ/አዲስ አበባ)

የኢትዮጵያ የሃይማኖት ተቋማት ጉባኤ ሰሞኑን ግለሰቦችና ቡድኖች ሃይማኖታዊ ቅራኔ እና ጥላቻ ሊፈጥሩ የሚችሉ በቪዲዮ የለቀቁትን አሉታዊ መልእክቶችን እና ተግባራትን በፍጥነት ለማረም በጽሕፈት ቤቱ ጋዜጣዊ መግለጫ እና ማብራሪያ ለሚዲያ አካላት ሰጥቷል፡፡

በሰጠው ጋዜጣዊ መግለጫ እንዳብራራው ከእምነቱ ሥርዐት ባፈነገጠ መንገድ አንዳንድ ኃላፊነት የማይሰማቸው ግለሰቦችና ቡድኖች የሌላውን እምነትና ሥርዐት በማንቋሸሽ፣ ክብረ ነክ ተግባራትን በመፈጸም፤ በተለይም በጥምቀት በዓል ታቦተ ሕጉ ላይ በመሳለቅ፤ የኢስላማዊ አለባበስ መገለጫ የሆነውን ጀለቢያ በመልበስ ሙስሊሞች በመምሰል የትንኮሳ ስብከቶችና ዝማሬዎች በማቅረብ፣ የትንኮሳ አለባበሶች ጭምር በመጠቀም በማኅበራዊ ድረገጽ የለቀቁት አጫጭር ቪዲዮችዎች የእምነቱ ተከታዮችን ማስቆጣቱን ያብራራል፡፡

ይህ ዓይነቱ ተግባር በሀገራችን ለዘመናት የዘለቀውን የመከባበር፣ በሰላም አብሮ የመኖር እሴትን የሚሸረሽር ድርጊት መሆኑን የገለጸው መግለጫው፤ በሁሉም ሃይማኖቶች የሚወገዝ የድፍረት ድርጊት በመሆኑ ይህን የፈጸሙ ግለሰቦችና ቡድኖች በሕግ ሊጠየቁ እንደሚገባ፣መጠየቅም መጀመሩን መግለጫው ያስረዳል፡፡ ማንኛውም ግለሰብም ይሁን ቡድን ሃይማኖትን ሽፋን በማድረግ የሌሎችን መብትና ጥቅም በሚጻረር አግባብነት የሌለውና ግጭት ቀስቃሽ ተግባራት የሚፈጽም ማንኛውም ሕገ ወጥ ተግባር በዝምታና ሊታለፍ እንደማይገባው ይገልጻል፡፡

በመጨረሻም ማኅበራዊ ድረገጾችን እና ሚዲያዎችን በመጠቀም የጥላቻ ንግግሮች፣ ትንኮሳዎችና ክብረ ነክ ድርጊቶች የሚፈጽሙ ግለሰቦችና ቡድኖች ከሚመለከታቸው የመንግሥት አካላት፡- ከመገናኛ ብዙኃን ባለሥልጣን፣ ከፍትሕ የጸጥታ አካላት ጋር በቅርበት እየሠሩ እንደሆነ የወጣው መግለጫ ያስረዳል፡፡ አያይዞም ይህ ዓይነቱን ተግባር ለመከላከል የሚያስችል የሕግ ማዕቀፍ ሥርዐት ላይ በማዘጋጀት ላይ እንደሚገኝ የሃይማኖት ተቋማት ጉባኤ መግለጫ ያስረዳል፡፡

©EOTC TV

ለረ/ፕ መ/ር ግርማ ባቱ የምስጋና መርሐ ግብር ተካሔደ
________
(ቅድስት ሥላሴ ዩኒቨርሲቲ/ጥር 15 ቀን 2017 ዓ.ም)

ረ/ፕ መ/ር ግርማ ባቱ በቅርቡ የመንበረ ፓትርያርክ ጠቅላይ ቤተ ክህነት ጽ/ቤት ምክትል ሥራ አስኪያጅ በመኾን መሾማቸው ይታወቃል። ይህን ተከትሎም በመምህርነት በሚያገለግሉበት በቅድስት ሥላሴ ዩኒቨርሲቲ ዛሬ ጥር 15 ቀን 2017 ዓ.ም የምስጋና መርሐ ግብር ተካሒዷል።

የምስጋና መርሐ ግብሩን ያካሔዱት የዩኒቨርሲቲው መምህራን ሲሆኑ ለረጅም ዘመናት በዩኒቨርሲቲው በተለያዩ ሓላፊነቶችና በመምህርነት ለባረከቱት የላቀ አስተዋጽኦ ታሳቢ ያደረገ እንደኾነ የመርሐ ግብሩ አዘጋጆች ገልጸዋል።

በመርሐ ግብሩ ላይ የተገኙት የዩኒቨርሲቲው የበላይ ሓላፊ ፕሬዚደንት እና የደቡብ ኦሞና አሪ ዞኖች ሀገረ ስብከት ሊቀ ጳጳስ ብፁዕ አቡነ ፊልጶስ ዩኒቨርሲቲያችን ለቤተክርስቲያናችን ታላላቅ ሓላፊነቶች የሚያዘጋጅ አንጋፋ ተቋም ለመኾኑ የመ/ር ግርማ ባቱ ሹመት ምሥክር ነው ብለዋል። ከዚህ በፊትም ዩኒቨርሲቲው ለቤተክርስቲያናችን ጳጳሳትንና ዐለም አቀፍ ምሁራንን ሲያበቃ የነበረ መኾኑን በአባታዊ መልእክታቸው የገለጹት ብፁዕነታቸው አሁንም ምስጉን መምህራንንና መንፈሳዊ መሪዎችን እያዘጋጀ የሚያቀርብ የጀርባ አጥንት የኾነ አንጋፋ ተቋም መኾኑን በመግለጽ ለመ/ር ግርማ በመምህርነታቸው ላይ ካህንም ናቸው በማለት የእጅ መስቀል ሰጥተዋቸዋል።

በምስጋና መርሐ ግብሩ ላይ የዩኒቨርሲቲው አካዳሚክ ም/ፕሬዚደንት ፕ/ር አባ ኃይለ ገብርኤል ግርማ፣ የአስተዳድር ጉዳዮች ም/ፕሬዚደንት መልአከ ኃይል አባ ጽጌድንግል ፈንታሁን እና ለረጅም ዘመናት በመምህረነት ያገለገሉ ምሁራን መልእክት እና በጎ ምስክርነት ያስተላለፉ ሲሆን የትምህርት ክፍል ሓላፊዎችና መምህራን በዕንግድነት ተገኝተው ለመልካም አገልግሎታቸው ስጦታና ማስታወሻ ሰጥተዋቸዋል።

(የቅድስት ሥላሴ ዩኒቨርሲቲ ሕዝብ ግንኙነት)

#tsegayekiflu

https://youtu.be/PLCjHyJVIEw

https://youtu.be/BTSYPJ_N378

+• አሥራት ለምን ታወጣለህ? •+

አባ ታድሮስ ማላቲ “Stories for the Youth” በሚል ርዕስ ለወጣቶች ባዘጋጁት መጽሐፍ ላይ፥ ስለ አሥራት ጥቅም አንድ አጭር ታሪክ ጸፈዋል፤ እንደሚከተለው ተርጉሜ አቅርቤዋለሁ።
--
ከሃያ ዓመት ቆይታ በኋላ፥ በካሊፎርኒያ ከተማ አንድ የመንፈስ ልጄን አገኘሁት እና ወደ ቤቱ ወሰደኝ። ቤቱ እጅግ ግዙፍ እና ውብ ነበር። አብረን ተቀምጠን ሳለም፥ “አባ፥ የዛኔ በካሊፎርኒያ መኖር ስጀምር ትዝ ይልዎታል? ኑሮን ለማሸነፍ ትግል ላይ ነበርኩ፥ አሁን ግን እግዚአብሔር ከጠየቅሁትም በላይ ሰጥቶኛል።” አለኝ።

እኔም “ይህ የእግዚአብሔር ቸርነት ነው። በእውነቱ አምላካችን ያስብልናልና እናመሰግነዋለን።” አልኩት።

እርሱም ቀጠለና፥ “እግዚአብሔር ምን ያህል ቸርነት እንዳደረገልኝ ያውቃሉ? ከተወሰኑ ዓመታት በፊት ጀምሮ ‘እዚህ በምድር ላይ ስኬታማ ብሆን፥ መንግሥተ ሰማያትን ግን ካጣሁ ምን እጠቀማለሁ?’ እያልኩ መብሰልሰል ጀመርኩ። ከዚያ አንድ ቀን፥ በአምላኬ ፊት ተንበርክኬ፥ ሁኔታዬ ምንም ያህል ቢከፋ፥ ከማገኘው ገቢ ላይ አሥራቴን ላለመንካት ቃል ገባሁለት። አሥራት የእግዚአብሔር ነዋ! ቀጠልኩና ‘ጌታዬ ሆይ፥ ሁሉም ያንተ ስጦታ ነውና፥ ከዘጠኝ እጁ ላይ ደግሞ በእዚህ በአሜሪካም ሆነ በግብጽ ላሉ ነዳያን እመጸውታለሁ።’ አልኩት።

“ከዚያም በልግስና መስጠት ጀመርኩ፤ የገነት በሮችም ተከፈቱልኝ! በእውነቱ እግዚአብሔር ከሚያስፈልገኝ በላይ ሰጠኝ። አንዳንዴ፥ ተንበርክኬ እያለቀስኩ፥ ‘እባክህ በቃህ አምላኬ! ከዚህ በላይ ከሰጠኸኝ የሃብት ብዛት ነፍሴን እንዳያጠፋት እፈራለሁ’ ብዬ እለምነው ነበር። እርሱ ግን እንዲህ እያልኩም የበለጠ ይሰጠኝ ነበር።”

ከ Fresenbet GY Adhanom ገጽ የተወሰደ ።

ጥር 6 ጌታችን መድኃኒታችን ኢየሱስ ክርስቶስ ወደ ቤተ ግዝረት በመግባት የኦሪት ሕግ የሆነውን ግዝረት የፈጸመበት ዕለት ጥር ስድስት ቀን በቤተ ክርስቲያናችን ይከበራል፡፡ ሐዋርያው ቅዱስ ጳውሎስ ‹‹ጌታ ክርስቶስ በሥጋ ግዝረትን ተቀበለ፣ ለአባቶች የተሰጠውን ቃልኪዳን ይፈጽም ዘንድ›› ብሎ መስክሯል፡፡ (ሮሜ 15፥8)
መጽሐፈ ስንክሳር

እንኳን አደረሳችሁ አደረሰን !!!

https://youtu.be/5AgWkBctJTE

https://youtu.be/WXuqwXesAwg

አንድ አምላክ በሚሆን በአብ በወልድ በመንፈስ ቅዱስ ስም አሜን
ጥር 3-ከዐለት ላይ ውኃ እያፈለቁ ድውያንን የሚፈውሱት ተአምረኛውና አባት አባ ሊባኖስ ዘመጣዕ ዕረፍታቸው ነው፡፡ ይኸውም የአባታችን የተክለ ሃይማኖት ገዳም ‹‹ደብረ ሊባኖስ›› በስማቸው የተሰየመላቸው ናቸው፡፡
አባ ሊባኖስ፡-
አባታቸው አብርሃም እናታቸው ንግሥት ይባላሉ፡፡ እነርሱም በወርቅና በብር እጅግ የበለጸጉ ሮማዊ ናቸው፡፡ ልጃቸውን አባ ሊባኖስን በሃይማኖት በምግባር ኮትኩተው ካሳደጓቸው በኋላ ዕድሜያቸው ሲደርስ በቤተ ክርስቲያን ሥርዓት ያጋቧቸው ዘንድ ከቁስጥንጥንያ አገር ሚስት ባመጡለት ጊዜ እርሱ ግን ፈጽሞ እምቢ አለ፡፡ ወደጫጉላቤትም መግባትን እምቢ አለ፡፡ በዚህም ጊዜ ነቢዩ ሳሙኤልን እንደጠራው አባታችንንም እግዚአብሔር ሦስት ጊዜ በስማቸው ጠራቸውና ‹‹ከአባትህ ተለይ አንተ የመንግሥተ ሰማያት ሙሽራ ነህ እንጂ የዚህ ምድራዊ ዓለም ሙሽራ አይደለህም›› አላቸው፡፡ አባታችንም ‹‹ወዴት እሄዳለሁ? ምንስ ላድርግ?›› ባሉ ጊዜ ወዲያው የታዘዘ መልአክ በሌሊት መጥቶ ከአባታቸው ቤት አውጥቶ ታላቁ አባት አባ ጳኩሚስ ዘንድ አደረሳቸው፡፡ ታላቁ አባት አባ ጳኩሚስም ለአባ ሊባኖስ በዓት በመስጠት ገዳመ ሥርዓትን፣ አስኬማ መላእክትን፣ ቅናተ ዮሐንስን አስተምረዋቸው አመነኮሷቸውና ከ8ቱ ቅዱሳን ጋር እንዲገናኙ አደረጓቸው፡፡
ከዚህም በኋላ ያ ከአባታቸው ቤት ወስዶ አባ ጳኩሚስ ገዳም ያደረሳቸው ያ መልአክ ድጋሚ ተገለጠላቸውና ‹‹ወደ ቅድስት ሀገር ኢትዮጵያ ሂድና ተጋድሎህን በዚያ ፈጽም ዝናህ በስፋት ይነገራል፣ ለብዙዎችም አባት ትሆናቸዋለህ›› አላቸው፡፡ ቀጥሎም ራሱ መልአኩ ወደ ኢትዮጵያ አመጣቸውና በአክሱም ተቀመጡ፡፡ በዚያም ብዙ ከተጋደሉ በኋላ ወደ ሸዋ መጡና ወንጌልን ዞረው አስተምረው ብዙ ድውያንን ፈውሰው ከዓመታት ቆይታ በኋላ ተመልሰው አክሱም ሄዱ፡፡ በአክሱምም 7 የተለያዩ ጸበሎችን ከድንጋይ ላይ በተአምራት አፍልቀው ድውያንን ፈውሰው ዕውራንን አበሩ፡፡በዓታቸውንም ከአክሱም ጽዮን ፊት ለፊት አድርገው ሲኖሩ ከዕለታት በአንደኛው ቀን አባታችን በተአምራት ከጭንጫ ካፈለቁት ጸበል ‹‹ተራ ውሃ ነው›› ብላ አንዲት ሴት ልጇን አዝላ ልትቀዳ መጣች፡፡ ወዲውም ከቦታው ስትደርስ አድጧት ወደቀችና ልጇም አምልጧት ልቡን ድንጋይ መቶት ሞተ፡፡ ሴትዮዋም ስትጮህ አባ ሊባኖስ ፈጥነው ወጡና በልጁ ላይ ጸልየው በመስቀል ምልክት አማትበው ከሞት አስነሥተውታል፡፡ ሕፃኑ ልጅ ከሞት እንደተነሣ ‹‹አምላከ አባ ሊባኖስ›› ብሎ አመሰገነ፡፡
ይህንንም ደግ ሥራቸውንና ተአምራታቸውን ያዩ አንዳንድ እኩይ ካህናት በቅናት ተመልተው ‹‹ምትሃት ነው የሚያሳየው›› ብለው በጻድቁ ላይ ሕዝቡን አሳደሙባቸው፡፡ አባታችንም ካህናቱን ለመምከር ቢሞክሩም አላስቀምጥ አሏቸው፡፡ ይልቁንም ጦር ጦራቸውን ይዘው አሳደዷቸው፡፡ አባታችንም በዚህ እጅግ አዝነው ከአክሱም ተነሥተው ደርቃ ወደምትባል ቦታ ሄዱ፡፡ በዚያም በጾም በጸሎት እየተጋደሉ ሲኖሩ በእነዚያ በጠሏቸውና በክፋት በተነሡባቸው ካህናት አገር ግን ለ3 ዓመት ምንም ዝናብ ሳይዘንብ ቀረ፡፡ አባታችን በተሰደዱባት በደርቃ አገር ግን ብዙ ዝናብ ይዘንብ ነበር፡፡ አባታችን በዚያችም አገር እንደልማዳቸው ከዐለት ላይ ውኃ አፍልቀው በውኃው ብዙ ድውያንን ፈውሰውበታል፡፡ በዚያም ትልቅ በዓት መሥርተው በተጋድሎ ሲኖሩ በክፉ የተነሡባቸው እኩይ የሆኑ ካህናት መጥተው ‹‹አባታችን በከንቱ አምተንሃል በድለንሃልና ይቅር በለን፣በድርቅ ማለቃችን ነውና ዝናብም እንዲዘንብልን ጸልይን›› ብለው ከእግራቸው ሥር ወደቁ፡፡አባታችንም ይቅር ብለው ከፈጣሪ አማለዷቸው፡፡ ዝናቡም ወዲያው ዘነበላቸውና በአገሪቱ ጥጋብ ሆነ፡፡
ከዚህም በኋላ አባታችን አስቀድመው ወዳዩአት ወደ ሸዋ ምድር ግራርያ መጡና በዓታቸውን በአሰቦት ጫካ አደረጉ፡፡ ነገር ግን መልአኩ ተገልጦላቸው ‹‹ሊባኖስ ሆይ! ከዚህ ቦታ የአንተ መኖሪያ አይደለም፣ በዚህ ቦታ ላይ እግዚአብሔርንና ሰውን የሚያገናኝ የሚያስታርቅ ታላቅ ጻድቅ ይወጣበታልና ይህ ቦታ የእርሱ ርስት ነው፣ የብዙ መነኮሳትም መንደር ይሆናል ነገር ግን የቦታው ስም በአንተ ስም ይጠራልሃል›› አላቸው፡፡ በኋላ አባታችን ተክለ ሃይማኖት ተወልደው በዓታቸውን በዚያ ቦታ ላይ ሲያጸኑ ቦታው ግን ‹‹ደብረ ሊባኖስ›› ተብሎ በመጀመሪያው አባት ስም ተሰየመ፡፡ መልአኩም በሌሊት እየመራ ወደ አክሱም ወሰዳቸው፡፡ ከዚያም ‹‹ታሪክ ወደምትሠራበት ዕጣ ክፍልህ ወደሆነው ቦታ አደርስሃለሁ›› አላቸውና ወደ ኤርትራ አካለ ጉዛይ አውራጃ ልዩ ስሙ መጣዕ ወደተባለው ቦታ ወሰዳቸው፡፡ በዚያም አባታችን ድውያንን እየፈወሱ፣ ለምፃሞችን እያዳኑ፣ ሙታንን እያስነሡ ብዙ ተአምራትን እያደረጉ ወንጌልን እየሰበኩ ‹‹ሊባኖስ ዘመጣዕ›› የሚባለውን ትልቁን ገዳማቸውን መሠረቱ፡፡ በወቅቱ የነበረው ዐፄ ገብረ መስቀልም የመጀመሪያውን ቤተ ክርስቲያን አሠራላቸው፡፡
ቅዱስ ላሊበላ 23 ዓመት ሙሉ ካነጻቸው እጅግ ድንቅ 11 ቤተ መቅደሶች ውስጥ አንደኛውን በአባ ሊባኖስ ስም ሰይሞላቸዋል፡፡ በዐፄ ገብረ መስቀል ያሠራላቸው ሌላኛው ገዳማቸው ትግራይ ተንቤን ውስጥ ይገኛል፡፡ እጅግ ድንቅ ድንቅ ተአምራትን በማድረግ የሚታወቁት አባታችን እንደ ተስዓቱ ቅዱሳን ከሮም በመምጣት በሀገራችን ላይ ብርሃንን አብርተዋል፡፡ በመጨረሻም ጥቅምት 2 ቀን ተፀንሰው ሐምሌ 3 ቀን ተወለደው ጥር 3 ቀን ባታላቅ ክብር ዐርፈዋል፡፡ ቅዳሴ ቤታቸው ደግሞ ሐምሌ 3 ቀን ነው፡፡ ይኸውም ለመጀመሪያ ጊዜ በዐፄ ገብረ መስቀል ጊዜ በስማቸው ቤተ ክርስቲያን ተሠርቶ የተመረቀበት ዕለት ነው፡፡
የአባ ሊባኖስ ረድኤት በረከታቸው ይደርብን በጸሎታቸው ይማረን!

https://youtu.be/F1mSKkpZzLo

+ ወደ ሄሮድስ እንዳትመለሱ +

ሰብአ ሰገል ወደ ሄሮድስ ሔደው ስለተወለደው የአይሁድ ንጉሥ ጠየቁ:: ከዚያም በኮከብ ተመርተው ወደ ክርስቶስ ደረሱ:: ሔደውም ሰገዱለት:: እጅ መንሻም አቀረቡ::

ከዚያ በኋላ ግን "ወደ ሄሮድስም እንዳይመለሱ በሕልም ተረድተው በሌላ መንገድ ወደ አገራቸው ሄዱ" ማቴ. 2:12

ይህ መልእክት የተነገራቸው ስለ ሁለት ነገር ነው:: የመጀመሪያው ሄሮድስ ሕፃኑን ሊገድለው ስለሚፈልግ ለሄሮድስ መረጃ እንዳይሠጡ ሲሆን ሁለተኛው ደግሞ ስለተወለደው የአይሁድ ንጉሥ እየመሰከሩ የመጡበትን መንገድ ትተው አየነው እያሉ በሌላ መንገድ እንዲመሰክሩና የሕፃኑ ንጉሥ ዝና እንዲሰፋ ወንጌል እንዲስፋፋ ነበር::

መልአኩ ወደ ሄሮድስ አትመለሱ አለ እንጂ "ሄሮድስ ሊገድለው ነው" አላላቸውም:: ምክንያቱም ይህን ዜና ቢሰሙ ጦር ይዘው የመጡ ነገሥታት ናቸውና "እኛ እያለን እስቲ ይሞክረን" ብለው ውጊያ ሊያነሡ ይችሉ ነበር:: የሰላም አለቃ የተባለው ህፃኑ ክርስቶስም የውጊያ መነሻ ይሆን ነበር:: ክርስቶስ ግን የምትዋጋለት ሳይሆን የሚዋጋልህ አልፎም የሚወጋልህ አምላክ ነው::

በዚህ መሠረት ሰብአ ሰገል
"ወደ ሄሮድስም እንዳይመለሱ በሕልም ተረድተው በሌላ መንገድ ወደ አገራቸው ሄዱ"

ወዳጄ ክርስቶስን ሳታገኝ በፊት ሄሮድስ ጋር ብትሔድ ችግር የለውም:: ክርስቶስን ካገኘህ በኋላ ግን ወደ ሄሮድስ መመለስ ኪሳራ ነው:: እንደ ሰብአ ሰገል ለጌታ እጅ መንሻ አቅርበህ ፣ ዘምረህ ፣ የከንፈር መሥዋዕት አቅርበህ ነፍስህ መድኃኒትዋን አግኝታ ከተደሰተች በኋላ ሕይወት እንዴት ይቀጥላል?

ወደ ሄሮድስ ልትመለስ ይሆን? እንዳታደርገው! ሄሮድስ ጋር ያለው ኃጢአት ነው:: ሄሮድስ ጋር ያለው ክፋት ነው:: እመነኝ እንደ ሰብአ ሰገል ጌታህን ካገኘህ ወዲህ ወደ ሄሮድስ አትመለስ!

ወዴት ልሒድ ካልከኝ መልሱ እዚያው ላይ አለ :-

"በሌላ መንገድ ወደ ሀገራቸው ሔዱ"

እስቲ ሌላ መንገድ ሞክር! ትናንት ያልኖርክበትን ዓይነት ኑሮ ፣ ትናንት ያልሞከርከው የንስሐ መንገድ እስቲ ዛሬ ሒድበት! ሌላ መንገድ አልነግርህም "መንገድም ሕይወትም እውነትም እኔ ነኝ" ያለህ መድኃኔዓለም ክርስቶስ እርሱ ነው:: በእኔ ኑሩ እንዳለ በእርሱ ኑር:: አደራ ወደ ሄሮድስ እንዳትመለስ!

ዲ/ን ሄኖክ ኃይሌ (የመቄዶንያ አምባሳደር)
ጥር 2 2017

ሰውን ለመርዳት ሰው መሆን በቂ ነው!
8161 ላይ OK ብለው በመላክ መቄዶንያን ይርዱ!
መቄዶንያን ይጎብኙ!

ማስታወሻ :- የልደቴን ቀን አስመልክታችሁ ብዙ ምርቃትና መልካም ምኞት ላዘነባችሁልኝ ሁሉ ለእኔ የተመኛችሁትን ሁሉ ለእናንተ እጥፍ ድርብ ያድርግላችሁ:: ከመቼውም ጊዜ በላይ የሚያስፈልገኝ ጸሎታችሁ ነውና ተክለ ማርያም ብላችሁ አስቡኝ::

የልደት ሥጦታ ልሥጥህ ካላችሁ ደግሞ 8161 ላይ OK ብለው በመላክ መቄዶንያን ይርዱልኝ::

+• ምላሽዎ ምንድር ነው? •+

የጌታን መወለድ ሰምቶ የተግባር ምላሽ አለመስጠት ከባድ ነው። በመጽሐፍ ቅዱስ ውስጥ የጌታን መወለድ የሰሙ ሰዎች ሁሉ ምላሽ ሰጥተዋል። ይህ ምላሽ ግን በጎም ሆነ ክፉ ሊሆን ይችላል። ንጉሥ ሄሮድስ ስለ አይሁድ ንጉሥ በሰማ ጊዜ፥ በቅናት አብዶ በሕጻናት ላይ ሰይፉን አነሳ። ሰብዓ ሰገል የንጉሡን መወለድ ባወቁ ጊዜ ግን፥ ሀገር አቆራርጠው ለንጉሡ ሊሰግዱ ሄዱ።

ለንጉሡ መወለድ የእኛስ ምላሽ ምን ይሆን? ይህ ዜና ለጆሯችን የምስራች ነው ወይስ መርዶ? የምስራች ከሆነ፤ ስጦታን ይዘን መሄድ ይገባል። እንኳን ለንጉሥ ልደት ይቅርና፥ የትኛውም ሕጻን ሲወለድ ስጦታን ይዞ መሄድ ነባር ዓለምአቀፍ ባህል ነው። ባዶ እጅ መሄድም ነውር ነው።

የተወለደው ንጉሥ ከእኛ ወርቅ፥ እጣን እና ከርቤን አይጠብቅም። እርሱ ከእኛ የሚፈልገው እኛነታችንን ነው። ሐዋርያው "ሰውነታችሁን እግዚአብሔርን ደስ የሚያሰኝና ሕያው ቅዱስም መሥዋዕት አድርጋችሁ ታቀርቡ ዘንድ በእግዚአብሔር ርኅራኄ እለምናችኋለሁ" (ሮሜ 12፥1) ያለውን ብንሰማ፥ ሰውነታችንንም በንስሃ ንጹህ አድርገን በቅዱስ ቁርባን ጌታን ወደ ሕይወታችን ብንቀበል፥ በንጉሡ ዓይን ሞገስን እናገኛለን።

እርስዎም የጌታን መወለድ ሰምተዋል። ታዲያ ለዚህ በጎ ዜና ምላሽዎ ምን ይሆን?

እንኳን ለጌታችን ልደት በሰላም አደረሰን!

🖋 Fresenbet G.Y Adhanom

እንኳን አደረሳችሁ መልካም በዓል

የአእላፋት ዝማሬ በኢትዮጵያ አእምሯዊ ንብረት ባለ ሥልጣን የቅጂና ተዛማጅ መብቶች ተመዘገበ

በአዲስ አበባ ለሁለተኛ ግዜ በድሬደዋ ለመጀመሪያ ግዜ የሚደረገው የአእላፋት ዝማሬ ወይም "The Melody of Myriads" የተሰኘውን የዝማሬ መረሀግብር በገና ዋዜማ ታህሳስ 28 ቀን 2017 ዓ.ም ይካሄዳል።

በቤተ ክርስቲያኒቱ የሚካሔደውን ዓመታዊ የዝማሬ ሁነት የኢትዮጵያዊው ጃንደረባ ትውልድ የመጀመሪያውን የአእላፋት ዝማሬ በ2016 ዓ.ም ካደረገበት ማግሥት ጀምሮ የአእላፋት ዝማሬን በቅዱስ ፓትርያርኩ፣ በብፁዓን አበውና በምእመናን በተሠጠው ‘የአእላፋት ዝማሬ መቀጠል አለበት’ የሚል አደራ ምክንያት የአእላፋት ዝማሬን የተመለከቱ ሥራዎችን ሲያከናውን መቆየቱን ተገልፆል፡፡

በዚህም መሠረት ‘የአእላፋት ዝማሬ’ "The Melody of Myriads" የተሰኘውን በገና ዋዜማ በቤተ ክርስቲያኒቱ የሚካሔደውን ዓመታዊ የዝማሬ ሁነት በኢትዮጵያ አእምሯዊ ንብረት ባለሥልጣን የቅጂና ተዛማጅ መብቶች በማስመዝገብ የአእላፋት ዝማሬ በኢትዮጵያ ኦርቶዶክስ ተዋሕዶ ቤተ ክርስቲያን ብቻ ሊካሔድ የሚችልና የባለቤትነት መብቱም የኢትዮጵያዊው ጃንደረባ ትውልድ ሆኖ መመዝገቡን አዘጋጆቹ በሰጡት መግለጫ አስታውቀዋል፡፡

የ2017 ዓ.ም የአእላፋት ዝማሬ በአዲስ አበባና በድሬዳዋ የሚካሔድ ሲሆን ላለፉት ስምንት ወራት ለዚህ ታላቅ የዝማሬ ጉባኤ ከፍተኛ ዝግጅት ሲደረግ ቆይቶአልም ተብላል፡፡ በ2017 ዓ.ም የአእላፋት ዝማሬ መረሀግብስ የሚካሔደውም በአዲስ አበባ በቦሌ ደብረ ሳሌም መድኃኔዓለም እና በድሬዳዋ ለገሀር አደባባይ ብቻ ነውም ተብላል።

የአእላፋት ዝማሬ ዋነኛ ዓላማ ምእመናን ልደቱን በባለ ልደቱ ቤት’ በዝማሬ እንዲያከብሩ ለማድረግ በመሆኑ በዚህ ዕለት የአእላፋት ዝማሬ’ ስሙ እንደሚያሳየው አእላፋትን የሚያሳትፍ ዝግጅት በመሆኑ በከተማ ደረጃ በሀገረ ስብከቱ ሊቀ ጳጳስ ተባርኮ እንዲደረግና የአንድን ከተማ ሕዝብ በነቂስ ማሳተፍ በሚችል ደረጃ እንዲከናወን የታሰበ ዝግጅት መሆኑም ተጠልፆል።

የአእላፋት ዝማሬ በEOTC ቴሌቪዥን አንዲሁም፣ በሀገሬና በአርትስ ቴሌቪዥን ጣብያዎች በቀጥታ የሚተላለፍ ሲሆን ከአምስት በላይ ዓለም አቀፍ ሚድያዎችና ወደ ሰባት የሚጠጉ ሀገር አቀፍ የቴሌቪዥን ጣቢያዎች በሥፍራው ተገኝተው ለመዘገብ ፍቃድ ወስደዋልም ተብላል።

የዘንድሮውን የአእላፋት ዝማሬ ከአምናው በተለየ ጥራት ለማካሔድ ከፍተኛ ዝግጅት መደረጉን ያስታወቁት አስተናጋጆቹ በሥፍራው እስከተገኘ ድረስ የትኛውም ቦታ ላይ የቆመ ሰው የሚሰማው ድምፅም ሆነ የሚያየው ምስል እኩል እንዲሆን ከፍተኛ ጥረት ተደርጓልም ብለዋል፡፡

በዚህ ምክንያት በአዲስ አበባው የአእላፋት ዝማሬ 60 ላይናሬ ስፒከር እና 10 ሞንታርቮዎች አገልግሎት ላይ የሚውሉ ሲሆን በድምፅ መሐንዲሶች ከፍተኛ ጥረት መድረክ ላይ የሚሰማው ድምፅና ከሩቅ የሚሰማው ድምፅ እኩል እንዲሆን ለማድረግ ዝግጅት መጠናቀቁም አክለዋል፡፡

ከድምፅ በተጨማሪ 250 ካሬ ስክሪን ጥቅም ላይ የሚውል ሲሆን 18 ትላልቅ ስክሪኖች በየትኛውም ቦታ ላይ ያለ ሰው የመዝሙሩን ግጥም እያየ በዐውደ ምሕረቱ ላይ የሚዘመረውን ዝማሬ ለመዘመር እንዲችል ሆኖ ተዘጋጅቶልም ተብላል።

መልእክተ ቅዱስ ፓትርያርክ፤
በስመ አብ ወወልድ ወመንፈስ ቅዱስ አሐዱ አምላክ አሜን፡፡

በሀገራችን በኢትዮጵያ በገጠርና በከተማ የምትኖሩ፤
ከሀገር ውጭ በተለያዩ አህጉር የምትገኙ፤
የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፤
በሕመም ምክንያት በየፀበሉና በየሆስፒታሉ ያላችሁ፤
እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያት በሙሉ፤

በምሉእ ፍቅሩ ሰውን ከባርነት ወደ ነጻነት ለመመለስ በሥጋ ሰብእ የተወለደው ጌታችን ኣምላካችንና መድኃኒታችን ኢየሱስ ክርስቶስ እንኳን ለሁለት ሺሕ ዐሥራ ሰባት ዓመተ ምሕረት የልደት በዓል በሰላም አደረሰን አደረሳችሁ፡፡

“ስብሐት ለእግዚአብሔር በሰማያት ወሰላም በምድር ለዘሠምሮ ለሰብእ፤ ክብር በሰማያት ለእግዚአብሔር ይሁን›› በምድርም እጅግ ለወደደው የሰው ልጅ ሰላም ይሁን” (ሉቃ ፪÷፲፬)
ይህ ቃለ ሰላም በጌታችን ዕለተ ልደት የተነገረ ነው፣ ቃሉ የተነገረው እንዲሁ እንደ ተራ ነገር ሳይሆን በቃለ መዝሙር እየተደጋገመ ነው፡፡ የተዘመረውም በምድራውያን ደራሲዎች ሳይሆን በሰማያውያን መላእክተ እግዚአብሔር ነው፣ የያዘው መልእክትም ሰማያውያንና ምድራውያንን ሁሉ ያካለለ ነው፡፡ የመልእክቱ ገዢ ሓሳብም አምላክ ከሰውነታችን ጋር ባለመለያየት፣ ባለመጠፋፋት፣ ባለመቀላቀል፣ ባለመዋዋጥ፣ ባለመለዋወጥና ያለባዕድና አንድ አካል፣ አንድ ክዋኔ፣ አንድ ጠባይ ሆኖ በተዋሕዶ ተገልጾኣልና እግዚአብሔር ይክብር ይመስገን፡፡ የተዋሕዶውም ምስጢር ሰላምን ያሰፍናልና እግዚአብሔር ሰውን በእጅጉ መውደዱ ከዚህ ተዋሕዶ ዓውቀናል የሚል ነው፡፡

በእርግጥም እግዚአብሔር ሰውን ለመውደዱ ከዚህ የበለጠ ማሳያ ወይም ማስረጃ የለም፤ እንከን የለሽ ንጹህ አምላክ የእኛን ኃጢአተኛ ሰውነት አካሉ አድርጎ ተወለደ ሲባል ላስተዋለው ሰው ምንኛ ቢወደን ነው የሚለው ጥልቅ አድናቆትን ያጭራልና ነው፡፡ይህ ብቻም አይደለም በዚህ ነገረ ተዋሕዶ ምክንያት ሰውነታችን አምላክ ሆኖ በመንበረ ጸባኦት እንዲቀመጥ መብቃቱ የድኅነታችንና የክብራችን ከፍታ ምን ያህል አስተማማኝ ደረጃ ላይ እንደደረሰ መንፈሳችን በአንክሮ ይረዳዋል፡፡ድምር ውጤቱም በእግዚአብሔርና በሰው መካከል ፍጹምና አስተማማኝ ሰላም መፈጠሩን ያስረዳናል፤ ሰማያውያኑ መላእክተ እግዚአብሔር በመዝሙራቸው ያበሰሩን ይህንን የምስራች ነው፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት!

እኛ ክርስቲያኖች እግዚአብሔር ፍቅር ነው፣ እግዚአብሔር በእጅጉ ይወደናል ስንል እንዲሁ ከሜዳ ተነሥተን ኣይደለም፡፡ በበደላችንና በኃጢአታችን ሳይጸየፈን ሰውነታችንን በረድኤት ወይም በኅድረት ያይደለ በኩነት ተዋሕዶ ወደ አምላክነት ደረጃ ከፍ ስላደረገው ነው እንጂ፡፡ እግዚአብሔር በዚህ ፍጹምና ምሉእ ፍቅሩ ሰውነታችንን በመበረ ጸባኦት ኣስቀምጦ መላእክት ሳይቀሩ ፍጥረታትን በሙሉ እንድንገዛ አድርጎናል፤ ምክንያቱም መላእክት በዕለተ ልደት የዘመሩለት በተዋሕዶ አምላክም ሰውም ለሆነ ለቤተ ልሔሙ ሕፃን እንጂ ለመለኮት ብቻ ኣይደለምና ነው፡፡ የዕለተ ልደት መዝሙር ዛሬም በሰማያትም ሆነ በምድር በተዋሕዶ ሰውም ኣምላክም የሆነ አንዱ ኢየሱስ ክርስቶስ ይመለክበታል፣ ይመሰገንበታል፡፡የሰማዩና የምድሩ ዕርቅ ወደ ኋላ ላይመለስ ላንዴና ለመጨረሻ ጊዜ በዚህ ተከናውኖኣል፣ የእግዚአብሔር ፈቃድ የሰውም አዋጭ ምርጫ ይህ ዕርቅ ተጠብቆ እንዲኖር ነው፣ ያለ ዕርቅ ሰላም ሕይወት የለውምና፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት!

የእግዚአብሔር ክብርና ሰላም በእጅጉ የተሳሰሩና የተቆራኙ ናቸው፤ እኛ እግዚአብሔርን ካከበርነው፣ ካዳመጥነው፣ ከታዘዝነውና ከተከተልነው ሰላም አለ ማለት ነው፡፡ ለሱ ካልታዘዝንና እሱን ካላከበርን ግን ዘላቂ ሰላምን ማግኘት ፈጽሞ የማይታሰብ ነው፤ ምክንያቱም ሰላምን ጨምሮ መልካም ነገር ሁሉ ያለው በእግዚአብሔር እጅ ነውና፡፡ ዛሬ በሁሉም የዓለማችን ማዕዘን የሚታየው የሰላም መደፍረስ እግዚአብሔርን ካለማክበራችንና ለሱ ካለመታዘዛችን የተነሣ እንደሆነ መዘንጋት የለብንም፡፡ ዓለም ከእግዚአብሔር ቃል ርቃ ለመሄድ በእጅጉ እየኳተነች ነው፤ በዚህ እኩይ ተግባርዋ ደግሞ እግዚአብሔር ለስጋትና ለጉስቁልና አሳልፎ እየሰጣት ነው፡፡ እግዚአብሔር በምስጢረ ሥጋዌው ቢታረቃትም ዕርቁን ማክበር አቅቶአታል፤ ይህንን የእግዚአብሔር ጸጋ ቸል ብላ የምታደርገው ሩጫ የትም ሊያደርሳት እንደማይችል ብታውቅና በንስሓ ብትመለስ እግጅ ተጠቃሚ ትሆናለች፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት!

የእግዚአብሔር ቃል “እናንተስ ከማይጠፋ ዘር ተወለዳችሁ” ብሎ ተስፋውን እንደነገረን ምድባችን ከማይጠፋ ዘር እንዲሆን ክርስቲያኖች የሆን ሁላችን በአእምሮ ጐልብተን፣ በሥነ-ምግባር ኣምረን፣ ጤናማ ሕይወትን ልንመራ ይገባናል፡፡

የአምላካችንን በዓለ ልደት ስናከብር ነገረ እግዚአብሔርን፣ ነገረ ፍቅርን፣ ነገረ ዕርቅንና ነገረ ሰላምን በማኅበረሰባችን የማሥረጽ አጀንዳ ይዘን ልናከብር ይገባል፡፡
ጠቡ ፣ ጥላቻው፣ መለያየቱ፣ መጠፋፋቱ፣ ለወንድሜ ከማለት ይልቅ ለኔ ለኔ ማለቱ ሲጎዳን እንጂ ሲጠቅመን ኣላየንም፡፡ አሁንም ወደ ልባችን እንመለስና በፍቅር፣ በዕርቅና በእኩልነት፣ በስምምነትና በወንድምነት ወደሚገኝ አንድነት እንምጣ፤ የልደቱ መዝሙር ያስተማረን ይህና ይህ ብቻ ነውና፡፡ በሌሎቹ ክፍለ ዓለማት እንደሆነው ሁሉ በሀገራችን የተከሠተው አላስፈላጊ ግጭት ብዙዎችን አሳጥቶናል፤ ብዙዎችንም ከቤት ንብረታቸው አፈናቅሎ ሜዳ ላይ ፈሰው የሰቆቃ ኑሮ እንዲገፉ አድርጎብናል፡፡ የሀገር ሀብት እንዲወድም ሆኖአል፤ ልጆቻችን ምናለ ከእንግዲህ ወዲህ ቢበቃንና ምድሪቱን የሰላም አየር እንድትተነፍስ ብንፈቅድላት፤ ይህ የወቅቱ የቤተክርስቲያናችን ዋነኛ መልእክትና ጥሪ ነው፡፡

በመጨረሻም፡-

በዓለ ልደት የእግዚአብሔር በዓል ነውና፣ እግዚአብሔር በምድራችን ሰላምን ያወርድ ዘንድ ካለን ከፍለን ለተፈናቃዮች፣ ለነዳያን እና ለአካል ጉዳተኞች በመለገስ በዓሉን በመንፈሳዊ ደስታና በሰላም እንድናከብር አባታዊ መልእክታችንን በእግዚአብሔር ስም እናስተላልፋለን፤

መልካም በዓለ ልደት ያድርግልን፡፡
እግዚአብሔር ኢትዮጵያንና ሕዝቦችዋን ይባርክ
ወስብሐት ለእግዚአብሔር አሜን!

አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወዕጨጌ ዘመንበረ
ተክለሃይማኖት
ታኅሣሥ ፳፱ ቀን ፳፻፲፯ ዓ.ም
አዲስ አበባ ኢትዮጵያ

https://youtu.be/TagAS5LphJk

ከሰሞኑ ውዝግብ የፈጠረው የመንበረ ጸባኦት ቅድስት ሥላሴ ካቴድራል ወለል ላይ የታየው የመስቀል ቅርጽ 81 ዓመታትን ያስቆጠረ መሆኑ ተገለጸ !

ታኅሣሥ 25 ቀን 2017 ዓ.ም
ምስካየ ኅዙናን መድኃኔ ዓለም ገዳም
--------------------------
የመንበረ ጸባኦት ቅድስት ሥላሴ ቤተክርስቲያን ሰበካ ጉባኤ አስተዳደር ሠራተኞች እንደገለጹት ይህ መስቀል በቅርብ ጊዜ የተሠራ ሳይሆን 81 ዓመታትን እንዳስቆጠረ ገልጸው ፤ በአሁኑ ሰዓትም ጉዳዩን ለሚመለከተው አካል አቅርበው በምእመናኑ ላይ ለተፈጠረው ጥያቄ ዘላቂ መልስ እንደሚሰጡ አስታውቀዋል። አያይዘውም ከሚመለከታቸው አካላት ጋር በመነጋገር የእድሳት እና የማስተካከያ ሥራዎችን ለመሥራትም ጊዜ እንደሚፈልግ ገልጸዋል።

በተጨማሪም ምእመናን በማኅበራዊ ሚዲያዎች
ላይ የሚዘዋወሩትን ከቤተክርስቲያን የሚያስቀሩ እኩይ የሆኑ ሐሳቦችን በመተው በዕለቱ ተገኝተው የምርቃት መርሐ ግብሩን እንዲሳተፉ ጥሪ ያቀረቡ ሲሆን ያላቸውን ማንኛውንም ጥያቄ ሥርዓተ ቤተ ክርስቲያንን በጠበቀ መልኩ ለአስተዳደር አካላት ማቅረብ እንደሚችሉ ገልጸዋል።

የመንበረ ጸባኦት ቅድስት ሥላሴ ቤተ ክርስቲያን በቤተ መቅደሱና በዓውደ ምሕረቱ አካባቢ የሚገኙትን መስቀሎች በተመለከተ በተለያዩ ማኅበራዊ ሚዲያዎች ላይ እየተነሱ የሚገኙ ጥያቄዎች እንዳሉ እና ከእዚህም ጋር በተያያዘ ጥር 6 ቀን የቤተ ክርስቲያኑ እድሳት ተጠናቆ ሲመረቅ በማኅበራዊ ሚዲያ ምእመናን ክብረ በዓሉን ተገኝተው እንዳያከብሩም እንቅስቃሴዎች እየተደረጉ እንደሆነ የሚታወስ ነው።
+++++++++++++++++++++++++++++
ለሁሉም ይዳረስ ዘንድ share like follow ያድርጉ
ቤተሰብ ይሁኑ ለመከታተል ከታች ያለዉን ሊንክ ይጫኑ

ታኅሣስ 25 ቀን 2017 ዓ.ም

ትክክለኛ የአባታችን የአቡነ ተክለ ሃይማኖት ስዕል

ለ50 ዓመታት በሕገወጥ መንገድ በተደራጁ ኃይሎች ተወስዶ የነበረው የሽሮሜዳ መንበረ ስብሐት ቅድስት ሥላሴ ቤተ ክርስቲያን ይዞታ እንዲመለስ የፌደራል ሰበር ሰሚ ፍ/ቤት ወሰነ !!!
••••••••••••••••••••••••••••••••••••
ታኅሣሥ 23 ቀን 2017 ዓ.ም

ምስካየ ኅዙናን መድኃኔ ዓለም ገዳም

••••••••••••••••••••••••••••••••••••
በአዲስ አበባ ሀገረ ስብከት በቀድሞ እንጦጦ አውራጃ የሚገኘው እና በ1938 ዓ.ም በአባ ኃ/ሥላሴ መገኖ እንደተመሠረተ የሚነገርለት የሽሮሜዳ መንበረ ስብሐት ቅድስት ሥላሴ ቤተ ክርስቲያን ይዞታ የነበረው ቦታ በቤተ ክርስቲያኒቱ ሥር ለነጋዴዎች እየተከራየ ሲገለገል የቆየ ቢሆንም በግለሰቦች ብሎም በሕገወጥ ኃይሎች አማካይነት በግምት ስፋቱ ከ1000 ካ.ሜ በላይ የሚሆን ስፋት ያለውን የቤተ ክርስቲያኒቱን ይዞታ ሕገወጥ ካርታ በማውጣት እና በሽያጭ በማስተላለፍ ጭምር ሲደረግ የቆየው የቤተ ክርስቲያንን መሬት የመቀራመት ሂደት በቀድሞው የደብሩ ዋና አስተዳዳሪ መልአከ ፀሐይ አባ ብርሃነ ሥላሴ አስፋው ፣ በደብሩ ሰበካ መንፈሳዊ ጉባኤ ፣ በማኅበረ ካህናቱ ፣ በአካባቢው ምዕመናን ብርቱ ጥረትና ተሳትፎ የፌደራሉ ከፍተኛ ፍ/ቤት ልደታ ምድብ ችሎት መጋቢት 27 ቀን 2014 ዓ.ም በዋለት ችሎት ቦታው ሕጋዊ የቤተ ክርስቲያኒቱ ይዞታ መሆኑን በማረጋገጥ በቦታው ለተሰራው ሕንፃ በባለሙያ ግምት መሠረት ቤተ ክርስቲያኒቱ ዋጋውን ከፍላ እንድትረከብ የወሰነ ቢሆንም በተከሳሾች አማካይነት ይግባኝ በመጠየቁ ሂደቱ በፌደራሉ ሰበር ሰሚ ችሎት ጉዳዩ ሲታይ ነው የቆየው።

የፌዴራሉ ሰበር ሰሚ ችሎት ከዓመታት ቀጠሮ በሗላ ዛሬ ታህሳስ 23 ቀን 2017 በዋለው ችሎት የፌዴራል ጠቅላይ ፍርድ ቤት የወሰነውን ውሳኔ በማጽናት ይዞታው ለደብሩ ተመላሽ እንዲሆን ተወስኗል።

ከስድስት ዓመት በላይ በተደከመበት በዚህ ሂደት ከፍተኛ እንቅስቃሴ ሲያደርጉ የቆዩት የይዞታ አስመላሽ ኮሚቴ እና የነጻ አገልግሎት ሲሰጥ የቆየየው ጠበቃ ዲ/ን ደረጀ ሙሉጌታ መሆናቸው ነው የተገለጸው።

የዜና ምንጭ :- ተዋሕዶ ሚዲያ ማዕከል

‹‹አሐዱ አብ ቅዱስ፤ አሐዱ ወልድ ቅዱስ፤ አሐዱ ውእቱ መንፈስ ቅዱስ፤ አንዱ አብ ቅዱስ ነው፤አንዱ ወልድ ቅዱስ ነው፤ አንዱ መንፈስ ቅዱስ ቅዱስ ነው!!››

ሐዲስ ሐዋርያ አቡነ ተክለ ሃይማኖት ዘኢትዮጵያ
‹‹እንኳን ለጻድቁ አቡነ ተክለ ሃይማኖት የልደት በዓል በሰላም አደረሰን፤ አደረሳችሁ!!››

ከሃያ አራቱ ካህናተ ሰማይ ጋር ሆኖ የሥላሴን መንበር ያጠነው ጻድቁ አባት አቡነ ተክለ ሃይማኖት የተወለዱበት ዕለት የተቀደሰች ናት፤ ሊቀ መላእክት ቅዱስ ሚካኤል ለአባታቸው ካህኑ ጸጋ ዘአብና ለእናታቸው ቅድስት እግዚእ ኀረያ ባበሠራቸው መሠረትም በሰሜን ሸዋ ሀገረ ስብከት ልዩ ስሙ ኢቲሳ በሚባል ቦታ በታኅሣሥ ፳፬፤ ፲፪፻፲፪ ዓ.ም ተወለዱ፡፡ በሦስተኛው ቀን እሑድ ከጠዋቱ ሦስት ሰዓት ከእናታቸው ዕቅፍ ወርደው ‹‹አሐዱ አብ ቅዱስ፤ አሐዱ ወልድ ቅዱስ፤ አሐዱ ውእቱ መንፈስ ቅዱስ፤ አንዱ አብ ቅዱስ ነው፤ አንዱ ወልድ ቅዱስ ነው፤ አንዱ መንፈስ ቅዱስ ቅዱስ ነው›› በማለት ሥላሴን አመስግነዋል፡፡ ወላጆቻቸው ያወጡላቸው ስም ‹‹ፍሥሐ ጽዮን›› የሚል ቢሆንም ‹‹ተክለ ሃይማኖት›› ደግሞ የእግዚአብሔር መልአክ ቅዱስ ሚካኤል ያወጣላቸው ስም ነው፡፡ በ፲፭ ዓመታቸው ዲቊናን፤ በ፳፪ ዓመታቸው ደግሞ ቅስናን ከግብፃዊው ጳጳስ ከአባ ጌርሎስ (ቄርሎስ) ተቀብለዋል፡፡

ጻድቁ አባታችን አቡነ ተክለ ሃይማኖት በወጣትነቱ ከጅማ ወንዝ ማዶ በነበረው የዳሞት አረማዊ ንጉሥ ማቶሎሚ በርካታ አውዳሚ ጥቃቶች ደርሶበት ነበር፡፡ ከእነርሱም መካከል አንዱ እግዚአብሔር ኀረያን መጥለፋ ሲሆን እነርሱ ግን በእግዚአብሔር መልእክ ቅዱስ ሚካኤል ረዳትነት አመለጡት፤ ማቶሎሚም ማምለጣቸውን ሰመቶ አሳዶ ሊገላቸው ወደ እነርሱ አቅጣጫ ጦር ቢወረውርም ጦሩ እርሱ ወዳለበት አቅጣጫ ተመልሶ ዞሮ እራሱን ገደለው፤ በሊቀ መላእክት ሚካኤል አማላጅነትም ከጸጋ ዘአብ ጋር እንደገና መገናኘት ችለዋል፡፡

ከዕለታት አንድ ቀንም ወደ ጫካ ለአደን በሔዱበት ዕለት ጌታችን መድኃኒታችን ኢየሱስ ክርስቶስም ተገልጦላቸው ‹ሐዲስ ሐዋርያ› ተብሎም ቃሉን እንዲያስተምሩ ወንጌልን ወዳልተዳረሰበት ቦታ እንደሚልካቸው ነገራቸው፡፡ ቅዱስ ሚካኤልም አጋንንትን የማውጣትና ተአምራትን የማድረግ ሥልጣን እንደተሰጣቸው፤ ስማቸውም ‹ተክለ ሃይማኖት› እንደሚባልና ይኸውም የጽድቅ ፍሬን ያፈራ፣ ከኃጢአት ሐሩር ማምለጫ ዛፍ፣ ምእመናንን በቃለ ወንጌል ያጣፈጠ ቅመም፣ መዓዛ ሕይወቱ የሚማርክ፣ ቢመገቡት ረኃበ ነፍስን የሚያስወግድ ቅጠል፣ የጻድቃን መጠለያ ዕፅ ማለት በመሆኑ ብዙ ደቀ መዝሙሮች እንደሚያፈሩና ለብዙዎች ድኅነት እንደሚሆኑ አስረዳቸው፡፡

ከዚህም በኋላ ወደ በአታቸውም ተመልሰው ያላቸውን ንብረት ሁሉ ለቤተ ክርስቲያንና ለነዳያን ከሰጡ በኋላ ‹‹አቤቱ ጌታዬ ኢየሱስ ክርስቶስ ሆይ! የመንግሥተ ሰማያትን በር ትከፍትልኝ ዘንድ እነሆ ቤቴን እንደ ተከፈተ ተውኩልህ›› በማለት ቤታቸውን ትተው ወንጌልን ለማስተማር ፈጥነው ወጡ፡፡

ከዚያ ጊዜ ጀምረው በመላው ኢትዮጵያ እየተዘዋወሩ ወንጌልን በመስበክና ተአምራትን በማድረግ ብዙ አሕዛብን ከአምልኮተ ጣዖት ወደ አምልኮተ እግዚአብሔር፤ ከገቢረ ኀጢአት ወደ ገቢረ ጽድቅ መልሰዋል፤ ቤተ ክርስቲያንንም አንጸዋል፡፡ ‹ሐዲስ ሐዋርያ› የተባሉትም በዚህ ተልእኳቸው ነው፤ ትርጕሙም ሐዲስ ኪዳንን ወይም ሕገ ወንጌልን እየተዘዋወረ የሚያስተምር ሰባኬ ወንጌል፤ በክርስቶስ ስም ድንቅ ድንቅ ተአምራትን የሚያደርግ የክርስቶስ ተከታይ (ሐዋርያ) ማለት ነውና፡፡

ቅዱሱ አባታችን በተወለደባት ዕለት ቅዱሱን ከማመስገን በዘለለ በቅዱሱ ስም የተራቡትን ብናበላ፣ የታመሙትን ብንጠይቅ፣ የተጠሙትን ብናጠጣ፣ የታሠሩትን ብንጎበኝ የዚህን ጻድቅ አባት በረከት እንደምናገኝ ክርስቶስ አምላካችን በማይታበል ቃሉ ቃል ገብቶልናል። ዳሩ ግን እንዲህ ዓይነት መልካም የቅድስና ሥራ ስንሠራ አውሬው የተጣለው ዘንዶ ደስተኛ አይሆንም። በዘመናችን በዓላትን ማክበር የድኅነት ምንጭ የሆነው ለዚህ ነው፤ ነገር ግን ኋላ ቀር አስተሳሰብ ነው በሚል መናፍቃን ትውልዱን ከቅዱሳን አንድነት ለመለየት የአእምሮ ሥራ በሰፊው እየሠሩ ያሉት። ይህንንም እኩይ ሥራቸውን መዝሙረኛው ዳዊት አስቀድሞ ነቢዩ ዳዊት በመዝሙሩ ላይ ‹‹አንድ ሆነው በልባቸው በየሕዝባቸው ኑ፤ የእግዚአብሔርን በዓሎች ከምድር እንሻር አሉ›› ብሎ ተናግሮ ነበር። ትውልዱን ለሰይጣን አሳልፎ በሚሰጡ የሚያነፍዙ የምዕራባውያን በዓላትን እንዲያከብር ቀን ከሌት ሢሰሩ ይታያል። (መዝ. ፸፫፥፰)

‹‹ቀኖቹ ክፉዎች ናቸውና ዘመኑን ዋጁ›› ተብሎ እንደተነገረው ዘመኑን እየቃኘን እጅግ ተቀይሮና ዘምኖ የመጣውን የአውሬውን ውጊያ ስልት በመረዳት እራሳችንን ከመቼውም ጊዜ በላይ በቅዱስ ቃሉ እያነጽን በንስሓ እየተመላለስን በቁርባን እየቀደስን በንቃት የምንኖርበት ዘመን ላይ መሆናችንን መረዳት ያስፈልጋል። ‹‹አንተ የምትተኛ ንቃ›› እንዲል፤ (ኤፌ. ፭ ፥ ፲፬፣፲፮)

ሐዋርያው ጳውሎስ ‹‹በጎ ሥራ ለሚያደርጉ ሁሉ ምስጋናና ክብር ሰላምም ይሆንላቸዋል›› ብሎ እንደተናገረው የዚህን ቅዱስ አባት በተወለደበት ዕለት የሚገባውን ክብር በመስጠት፣ ቤተ ክርስቲያኑን በመሳለም እና የተቸገሩትን በመርዳት በማሳለፍ ለክርስቲያን የሚገባ በጎ ተግባር በመፈጸም በዓሉን እናክብር፡፡ (ሮሜ ፪፥ ፲)

የጻድቁ አባታችን አቡነ ተክለ ሃይማኖት አማላጅነት እና ተራዳኢነት አይለየን፤ አሜን!

ወስብሐት ለእግዚአብሔር!
ወለወላዲቱ ድንግል!
ወለመስቀሉ ክቡር!
አሜን!

ምንጭ :-የማኀበረ ቅዱሳን ዋናው ማእከል ጽህረ ገጽ ነው፡፡

https://youtu.be/usOBPpFEyNo

☞ ✞✞✞ ዮሴፍ ወጣት ነው ፣ ወይስ አረጋዊ ? ፤ ሳናውቀው የመናፍቃንን ድብቅ ክህደት እያስተላለፍን ነው! ።✞✞✞

ዛሬ ድረስ የፈረንጅ የሆነ ነገር ሁሉ ትክክል እና ነቅ የሌለው ምንጫችን ነው ። በጣም ይገርመኛል! ። ፎቷችንን በ'ሶሻል ሚዲያ' ላይ ስንለጥፍ ተጠንቅቀን ነው ፤ እሱስ ባልከፋ ፣ የሚከፋው ለሃይማኖታዊ ስዕሎቻችን ባለን የግንዛቤ እጥረት ሳቢያ የምንለቃቸው ሃይማኖታዊ ስዕላት ላይ ጥንቃቄ አለማድረጋችን ነው ። አንዳንዶቻችንም እነዚህን በክህደት የተሽሞኖሞኑ ስዕላትን በየቤታችን መስቀላችን አንሶን ለቤተ ክርስቲያን ገዝተን እስከ መስጠትም ደርሰናል ። በዚህ ጉዳይ ላይ ሌላ ጊዜ በሰፊው የምመለስበት ቢሆንም ወደ ዛሬ ጉዳዬ ልመለስ ።

በቤተ ክርስቲያናችን ትውፊት መሰረት የእመቤታችን የቅድስት ድንግል ማርያም ጠባቂ (እጮኛ) ዮሴፍ አረጋዊ ነው ። የ83 ዓመት ሽማግሌም ነው ። ይህንን መከራ የሚዘንብበትን ዓለምም የተሰናበተው በ114 ዓመቱ ሐምሌ 26 ነው ። ዮሴፍ እመቤታችንን ለመጠበቅ ከእግዚአብሔር በአደራ እስኪቀበልና በመላእክት ብርታት እስኪቀባላት ድረስ በትዳር ለ40 ዓመት የቆየና ሶስት ሴቶች እና አምስት ወንዶች ልጆች የነበሩት ጻድቅ ነው ፤ በትዳሩ ስኬታማ የሆነ ጻድቅ ነው ።

ክርስቶስ ከእመቤታችን ከስጋዋ ስጋ ከነፍሷ ነፍስ ነስቶ ሰው እንደሆነ ዮሴፍ አላወቀም ነበር ። ዮሴፍ ይህን ረቂቅ ምስጢር ያወቀው ፣ ክርስቶስ በበረት በተወለደ ጊዜ ነው ። ለክርስቶስ መላእክት ምስጋና ሲያቀርቡ ፣ ሰብዓ ሰገል ሲሰግዱለት እና እንስሳት በትንፋሻቸው ሲያሟሙቁት ሲመለከት ነው ዮሴፍ ድንግል ማርያም አምላክን እንደ ወለደች ያወቀው ። ለዚህም ነው ፣ "የበኩር ልጇን እስክትወልድ ድረስ አላወቃትም" ተብሎ ስለ ዮሴፍ የተጻፈው ።

ዮሴፍን ወጣት አድርገው የሚስሉት ሰዎች መነሻቸው "የበኩር ልጇን እስክትወልድ ድረስ አላወቃትም" የሚለውን የወንጌል ቃል በወንጀለኛ በመተርጎማቸው ነው ። መቼም ወንጌልን ያለ ይትበኅሉ መተርጎም ወንጀለኛነት እንጂ አዋቂነት አያስብልም ።

ሎቱ ስብሐት! ፣ በአንድ በተረገመ ትውልድ " ማርያም ከዮሴፍ ሌላ ልጆችን ወልዳለች" የሚል ሰይጣናዊ እና አጋንንታዊ ትምህርት ይሰጣል ። ይህን አጋንንታዊ ትምህርታቸውን ከሚያስተላልፉበት መንገድ አንዱ ስዕል አንዱ ነው ። የክርስቶስን ልደት የሚያሳዩ ከውጭ የሚመጡ ስዕላት ዮሴፍን ወጣት አድርገው የሚስሉትም 'ወጣቱ ዮሴፍ የብላቴናዋ ማርያም እጮኛ ነው ' ለማለት ፈልገው ነው ። አሁን አሁን ጠፋ እንጂ ከድፈረታቸው የተነሳ ዮሴፍ ለማርያም ቀለበት ሲያደርግላት የሚያሳይ ስዕልም አትመው ልከውልን ነበር ።

የለጠፍኩትን ስዕል በማስተዋል ተመልከቱት ። በቀይ ቀለም ክብ የተደረገባቸው ስዕሎች የጻድቁ አረጋዊ ዮሴፍ ስዕሎች ናቸው ። ወጣት ተደርጎ የተሳለው በአጠቃላይ ከውጭ የመጣ ነው ። አረጋዊ ሆኖ የተሳለው የዮሴፍ ስዕል ግን በአጠቃላይ በኢትዮጵያዊያን ሰዓሊያን የተሳለ ነው ። ትክክለኛው እና መጽሐፋዊ የሆነው የአሳሳል ጥበብ ግን ዮሴፍ አረጋዊ ሆኖ የቀረበልን የአሳሳል ጥበብ በመሆኑ ያንን እንጠቀም ።

ከዓመታት በፊት የቁስቋም በዓልን ለማክበር በእንጦጦ ቁስቋም ማርያም ተገኝቼ ነበር ። በወቅቱ የነበሩት ብፅዑ አቡነ መርሐ ክርስቶስ (አሁን በህይወተ ስጋ የሉም ፣ በረከታቸው ይደርብን) በዚህ ጉዳይ ላይ ሰፋ ያለ እና ቁጭት የተቀላቀለበት ትምህርት ማስተማራቸውን አስታውሳለሁ ። ያም ብቻ ሳይሆን ቅድስት ቤተ ክርስቲያናችን ለምታከናውናቸው ማናቸውም ተግባራት ምክንያቷ የጠለቀ እና መጽሐፋዊ በመሆኑ ልንሰማት ይገባል ።

ዘካርያስ ኪሮስ ከመርካቶ ።

https://youtu.be/jnhOwR2D5Is

እዚህ ደረጃ ላይ ደርሰናል። አቤት መዋረድ

ቅዱስነታቸው ለመላው የዓለም ማኅበረሰብእ በእንግሊዝኛ ቋንቋ ያስተላለፉት አባታዊ መልእክት የአማርኛ ትርጉም ከብፁዕ ወቅዱስ ፓትርያርክ ልዩ ጽሕፈት ቤት ደርሶን ከዚህ እንደሚከተለው አቅርበነዋል፦
ለመላው የዓለም ሕዝብ የተላለፈ የብፁዕ ወቅዱስ ፓትርያርክ
አባታዊ መልእክት
በስመ አብ ወወልድ ወመንፈስ ቅዱስ አሐዱ አምላክ አሜን !

የአጥማቂዎቹ ደብዳቤ በሌላ ደብዳቤ ተሸሯል
======
*** "ከመንበሩ ሥር በፈለቀ ጸበል" ሕዝቡን አጥምቁልን የሚለው ጥያቄ "በተሳሳተ መረጃ የተጻፈ ደብዳቤ" ነው ተብሎ ተሸሯል።
** የደብሩ ጥያቄ ግን ብዙዎችን ከማሳዘን ባሻገር ብዙ ጉዳዮችን እንድንመለከት ጋብዞናል።
** ደብሩ እንዲህ ያለ ጥያቄ እንዲጠይቅ ምክንያት የሆኑት ሊቀ ጳጳስ ለሕገ ወጥና ሥርዓት አልባው አጥማቂ የክህነት አባት ከመሆናቸውም በላይ ያለ ሀገረ ስብከታቸው ገብተው የፈጸሙት ሕገወጥነት ጉዳይ፣
** ገንዘብ ፍለጋ የቤተ ክህነት አስተዳደሮቻችን እየሄዱ ያሉብት ርቀት፣ ** በዚህ አያያዛችን እምነታችንን ጭምር compromise ማድረጋችን የደቀነውን አደጋ፣ ያሳየን ገመናችን ወዘተ ....
** ለመሆኑ "ከመንበሩ ሥር የፈለቀ ጸበል" የሚለው ትምህርት ከየት "የፈለቀ" እንግዳ ትምህርት ነው?
** ብዙ ብዙ ያስብላል ....

https://youtu.be/rKmaBTYNYlY

70 በላይ ምእመናን ያለ አግባብ መታሰራቸው ተገለጸ!
--------------------------------------------
ታኅሣሥ 15 ቀን 2017 ዓ.ም (ምስካየ ኅዙናን መድኃኔዓለም ገዳም
--------------------------------------------
በሁምቦ ወረዳ የጥንታዊውና የታሪካዊው የፊሾ ደብረ ከዋክብት አቡነ ገብረ መንፈስ ቅዱስ ቤተ ክርስቲያን ካህናትና ምእመናን ከትላንትናው ዕለት ጀምሮ በግፍ እየታሠሩ እንዳለ የሀገረ ስብከቱ ዋና ሥራ አስኪያጅ መልአከ ሰላም ቀሲስ ቦኪቻ ኢንጋ ለተዋሕዶ ሚዲያ ማዕከል ገለጹ።
በብፁዕ ወቅዱስ አቡነ ተክለ ሃይማኖት ፓትርያርክ ርዕሰ ሊቃነ ጳጳሳት ዘኢትዮጵያ ተባርኮ ለዘመናት የጥምቀት በዓል ሲከበርበት የቆየውን ሕጋዊ የጥምቀተ ባሕር ይዞታ የወረዳው አስተዳደር ልማትን ሽፋን በማድረግ ለሌላ ቤተ እምነት አሳልፎ ለመስጠት እያደረገ ባለው ያልተገባ አሠራር የተቃወሙ ካህናትና ምእመናን በትላንትናው ዕለት ማለትም ታኅሣሥ 14 ቀን 2017 ዓ/ም የዞኑ የሃይማኖት ተቋማት ተወካዮች ከዞኑ መንግሥት ተወካዮች ጋር በቦታው ጉዳይ ሰላማዊ ውይይት አድርገው ከተስማሙ በኋላ ስብሰባው ተጠናቆ ወደየ ቤታቸው በሚሄዱበት ሰዓት የወረዳው ፓሊስ ከየመንገዱ ያለምንም ተጨባጭ ምክንያት ከ 70 በላይ የሚጠጉ ምእመናንን ማሰሩ የሀገረ ስብከቱ ዋና ሥራ አስኪያጅ ገልጸዋል።
"ሁላችንም ከሕግ በታች ነን ፓሊስም ቢሆን ሕጋዊ ውሳኔዎችን ማክበር አለበት ፤ መታሰርንና ድብደባን ፈርቶ ቤተ ክርስቲያንን የሚክድና አሳልፎ የሚሰጥ ምእመን ስለሌለን ይህንን ተገንዝቦ የሚመለከተው አካል ያለ አንዳች ስሕተት በእምነታቸው ምክንያት በግፍ ለታሰሩ ካህናትና ምእመናን አስቸኳይ መፍትሔ ይስጥ" በማለት ጠይቀዋል።
የዜና ምንጭ :- ተዋሕዶ ሚዲያ ማዕከል

ዘንድሮም ቄሱ ተገደለ፤ ምዕመናን በግ ታስረው ተንገላቱ አዬ እንፍራንዝ!! ይህ በጎንደር ሆነ!! እጅጉን ይገርማል???

የጎንደር ክርስቲያኖች መከራ አያልፋቸው፤ መከራቸውን ሀገርም፣ መንግሥትም ወይ ህዝብ አያውቅላቸው፦
=አስራ አንድ አማኞቻችን መንግሥት ባስታጠቃቸው አክራሪ ሃይማኖተኞች ታግተው እየተሰቃዩብን ማስፈታት ካልቻልን፤
= ቄሱ እንደ በግ አንገቱን ተጠምዝዞና ተቀልቶ መሞቱ አልበቃው ብሎ በአስከሬኑ ሲጫወቱበና አስነዋሪ ነገር ሲፈጽሙበት፤ መስቀሉን እየወረወሩ ሲዘባበቱበትና ምራቃቸውን ሲተፉበት፤
= ዲያቆኑን ሲያሰቃዩት፣ ሲያንገላቱትና ሲሳለቁበት፤
=ማዳን እንኳን ቢያቅተን ሀዘናችን መግለጽ የማንችል ከሆነ።
= የዕምነት ብዝሃነት የሀይማኖት እኩልነትስ የት ላይ ነው?? ያውም ጉንደር ላይ?? አዬዬ ጊዜዜ!! አሁን ደከመኝ!!
= አሁን ደግሞ እንግዲህ አንደገና የምንከሰስ፣ የምንሳደድ፣ የምንወቀስ እኛ!! አዬ እኛ!! ወዮ ለኛ!! ይብላኝ ለእኛ!! አለ ሀዘንተኛ።

(የታገቱ ጠቅላላ የምዕመናን ብዛት አሰራ አንድ ሲሆን
አንድ ቄስ አንድ ዲያቆን ቀሪዎች ዘጠኙ ደግሞ ንጹሃን ገበሬዎች ኦርቶዶክሳውያን መከረኞቹ ናቸው።
=አንገቱን ተቀጭቶ የተገደለው ደግሞ ቄስ ኮከብ ታከለ ይባላል፤ ገዳዮች የሙስሊም ታጣቄዎች
ቦታ ጎንደር ዙሪያ ወረዳ እንፍራዝ ንዑስ ወረዳ ስር
ቀበሌ ሳሆር ሳር ውሃ
ልዪ ጎጥ ውቅሮ
ማብራሪያ ሽፍታ አንድ ልጅ አፍኖ ይወስዳል
ለደህንነታችን ስጋት አለብን ብለው የታጠቁ ሙስሊሞች 11ሰው ከስራ ቦታቸው አፍነው ይወስዳሉ
በመጨረሻም ቄሱን አንገቱን ቀልተው ገድለው ለመከላከያ ሰጡ ዛሬ ቃብሩ ተፈጸመ
የሟች ዕድሜ 52
የ7ሴት እና የ3ወንድ በድምሩ የ10 ልጆች አባትነው) አሁን ደግሞ እኛን ምን አጠፋችሁ ልንባል ይሆን!!!!!

አባ ዮሴፍ ደስታ የማ/ጎ/ ዋና ሥራ አስኪያጅ እንደጻፉት

በደስታው ቀን እሸቱ ለምን አለቀሰ?

መልሱን እራሱ እያነባ ነግሮናል። ቤተሰቡን፣ እንቅልፉን፣ ክብሩን ሁሉ ትቶ፤ አገልጋዮችን አስተባብሮ በዚያው በለንደን ላለች አንዲት ቤተ ክርስቲያን ማሠሪያ ለምኖ ሚልዮን ሲሰበስብ፤ በዚያው በለንደን ሌላዋ ቤተ ክርስቲያን የራሷ ትልቅ ሕንጻ ቤተ ክርስቲያን ቢኖራትም በካህናቱ መለያየት የተነሣ ሚልዮን ለጠበቃ ለዳኛ ተመዥርጦ ሲወድቅ ስላየ ስለሰማ ነው። በለመነላት ቤተ ክርስቲያን ያለው የጃማካውያኑን ካህናት መንፈሳዊነት፣ ከምእመናቸው ጋር ያላቸውን ፍቅርና አንድነት ባየበት ዐይኑ፤ በሰማበት ጆሮው፤ በሀብታሟ ቤተ ክርስቲያን ለንደን ደብረ ጽዮን ቤተ ክርስቲያን ኢትዮጵያውያኑ ካህናት ተለያይተው በጎቻቸውንም አለያይተው፣ አጣልተው፣ አናክሰው እንደነከሷቸው ስላየ ስለሰማ ነው። "ተዋሕዶ" ይሰበክባት ዘንድ እግዚአብሔር በመሠረታት ሕንጻ ቤተ ክርስቲያን "ልዩነትን" አቁመው የእኛ ተከታዮች ቅዳሜ፤ የእነዚያኞቹ ደግሞ እሑድ ያስቀድሱ፣ ይቁረቡ፤ ካልፈለጉም ገደል ይግቡ ብለው ለዘመናት እንደሚያሰቃዩአቸዉ ስለሰማ ስላየ ነው።

እሸቱ በቅርቡ ባየው ፍፁም የካህናት ሕይወትና የምእመናን አንድነት ተስቦ ለምኗል። ለምኖም የሚያገለግሉባትን ቤተ ክርስቲያን ሠርቶላቸዋል። እንኳንም እግዚአብሔር ፈቀደለት፤ እንኳንም ፀጋውን ሰጠው። ነገር ግን በዚያው በለንደን ቆይታዉ ያየው የሌሎቹ ካህናት መለያየት፤ ምእመናናቸውንም ማለያየት ልቡን ሰብሮት አልቅሷል። ዛሬ ስለቤተ ክርስቲያን ፍቅር ሰማያዊውን እንጂ ምድራዊ ዋጋ ሳይፈልጉ በተለይ በውጭው ዓለም ለአገልግሎት በዐውደ ምሕረቱ የቆሙ ሁሉ ስሜታቸው እንደእሸቱ ነው። እንጠግን ሲሉ ይሰበራሉ። እንሩጥ ሲሉ ይጎተታሉ። ይህ የሚሆነው ደግሞ በማንም አይደለም፤ በብዛት በገንዘብ አደር፣ ለክብራችን እንሞታለን በሚሉ "ካህናት" የተነሣ ነው። ለአገልግሎት ተጠርተው፣ “ሑሩ ወመሀሩ” ያለውን አምላካዊ ቃል ተቀብለው ወደባዕድ አገር መጥተው ፍፁም በሆነ ሕይወት የሚያገለግሉ፤ ለሚያገልግሏቸውም ምእመናን ፍቅር ሰጥተው በፍቅርና በአንድነት የሚያኖሩ አሉ። በአንጻሩ ግን ገንዘብ መሰብሰብን ዐቢይ ዓላማ አድርገው ውሸትን ጨምሮ የሚከፈለውን መሥዋዕት ኹሉ ከፍለው ከሀገር የወጡ አሉ። እነዚህ ዓላማቸው ሀብት ስለኾነ ክህነታቸውን ከነጓዙ ለዛው ያውሉታል። ስለገንዘብ ምእመናንን ይከፋፍላሉ፤ መዋቅራዊ አሠራር ጠላታቸው ነው። በመዋቅር ሥር ነን ይላሉ፤ ነገር ግን በተግባር የራቁ ናቸው፤ ሲችሉም ያዳክማሉ። ብዙ ማለት ይቻላል፤ ይገባልም።

እሸቱ መክሯል። ምክሩም ለንደን ቅድስት ማርያምን ለከፋፈሉ ካህናት አይደለም፤ በካህናቱ የተነሣ ለተከፋፈሉት ምእመናን ነው። አስታርቋቸው ብሏል። እውነቱን ነው። ከእሱ ውጪ ሌላ መፍትሔ የለም። በለንደንም ይሁን በሁሉም የውጭው ዓለም የቤተ ክርስቲያን ተስፋ ከደጋግ ካህናት ጋር ምእመናን ናቸው። ለገንዘብና ክብር አደር ካህናት እና ቤተ ክርስቲያንን ለኾነ ፍላጎት መጠቀሚያ ለማድረግ ለሚቀርቡ ሁሉ የተመቹ መኾን የለባቸውም። ቤተ ክርስቲያን የእነሱ ናት። የሚጠየቀውን መጠየቅ፤ የሚገሰጸውንም መገሰጽ ይጠበቅባቸዋል። መነዳት የለባቸውም። ከፊት የሚቆሙትን እያዩ የሚጠይቁ፣ የሚሞግቱ፣ መሥዋእትነትንም የሚከፍሉ ብሎም የሚቃወሙ ምእመናን ባይኖሩ ኖሮ ቤተ ክርስቲያን እዚህ አትደርስም ነበር። ታሪኳ ምስክር ነው።

ከአረጋውያኑ ብፁዐን አበው ጀምሮ በርካታ ሊቃውንተ ቤተክርስቲያን ከጠቅላይ ቤተ ክህነት እየተላኩ ብዙ ገንዘብና ጊዜ የባከነበት፤ ለጠበቃና ለፍርድ ቤት ሥራ ማስኬጃ ሚልዮን የወደመበት ብዙ ዓመታትን የወሰደው የለንደን ደብረ ጽዮን ቅድስት ማርያም ቤተ ክርስቲያን ችግር በእሸቱ ጥሪ መፍትሔ ያገኝ እንደኾነ፤ ከምንም በላይ መለያየቱ ከስደት ኑሮ ጋር ሕይወታቸውን ያከበደችባቸው ምእመናን እረፍት ያገኙ እንደሁ እናያለን።

እሸቱ ስላደረከውና ስለምታደርገው ሁሉ እናመሰግናለን። በአገልግሎታችሁ ጥራትና ብቃት የምናውቃችሁ ከእሸቱ ጋር አብራችሁ ስትደክሙ የሰነበታችሁ አባቶችና ወንድሞችም ምስጋና ይገባችኹአል።

ዶክተር መርሻ አለኸኝ እንደጻፉት

ማዕረግን መበደል !

ከግዜ ወደ ግዜ ክፉኛ እየተበላሸ እየተበረዘ አግባብነት ከሌለዉ ሥርዓት በራቀ መንገድ መዝሙርና አለባበሳችን ተያይዞም የማዕረግ አሰያየማችን አጓጉል እየሆነ መጥቷል !

ከመዓረግ ስም አሰያየም ጋር በተያየዘ ብዙ የቤተክርስቲያን መምህራን ሊቃዉንት ኃሳባቸዉን ሰጥተዉበታል ። የቤተክርስቲያን የማዕረግ ስም ሚዛኑ በተዛነፈ መልኩ እንደ ሸገር ዳቦ ረክሷል(ዳቦ እንኳን ተወዷል ሂኢ) ! ማንም እየተነሳ የሚገዛዉ ወይም የሚያስለጥፈዉ ስቲከር ሁኗል !

ይኽ ፍጹም ፍጹም አግባብነት የሌለዉ ሥርዓት አልበኝነት ነዉ ። ስያሜዉንም የሚሰጡት አካላት በስያሜዉ ዙሪያ ግንዛቤ ያላቸዉ አይመስለኝም !

በባዶ ጭንቅላት ፊደል ያለየዉ ሁሉ ጥምጧሙን አሹሮ ሊቃዉንቱ መሐል ጉብ ይላል...የራሱን የዘነጠ ካባ አሰርቶ ከማኅሌቱና ከንግሡ ፊት በኩራት ይንጎባለላል !

ማፈር የቀረበት ዐይን አዉጣነት ተርእዮ ከንቱ ዉዳሴን መሻት የነገሰበት አሳፋሪ ዘመን !

በዚሁ ከቀጠልን ሊቀ ምናምን የሚለዉን ስም ከቁምላቸዉና አደፍርስ ለይተን የምናየዉ አይመስለኝም !

ዘማሪያን ፕሊስ ፕሊስ በነገራችሁ የምታስጨንቁን ሳያንስ የማዕረግ ስም ለጥፋችሁ አታጨናብሱን !

በዲያቆን ዳዊት ታሲሳ

#ድምፅ_መስጠት_ተጀመሯል!

#አንቴክስ_ፉድ_ኤይድ_ፕላስ ባዘጋጀው BIWs prize ብፁዕ አቡነ ኤርምያስን የሰላም ዘርፍ እጩ ተሸላሚ አድርጓቸዋል።

ብፁዕ አቡነ ኤርምያስ በሰላም ዘርፍ ከአምስት እጩዎች ውስጥ ተክትተዋል የዘርፉ አሸናፊ ከሆኑ #10ሚሊየን ብር ይሸለማሉ!!!

ብፁዕነታቸውን BIWን በማስቀደም ኮድ08 (BIW08) በማስገባት በSMS - 9355 ላይ አሁኑኑ ይምረጡ!!!

ድምጽ መስጠቱ እስከ ሐሙስ ታህሳስ 17/2017 ዓም ከቀኑ 6፡00 ሰዓት ድረስ ብቻ ይካሄዳል!

በSMS 9355 ላይ BIW08 በማለት ብፁዕነታቸውን አሁኑኑ ይምረጡ!!!

#10ሚልዮን #አንቴክስ #ፉድኤይድፕላስ #biwsprize #BTM #ብፁዕአቡነኤርምያስ #ይምረጡ

Vote Abune Ermias now for the BIWs prize!

#AbuneErmias
#10million #BIWS2024 #Prize #ANTEXETHIOPIA #ANTEXTEXTILE #FOODAIDPLUS #BESHATUTOLEMARIAMMULTIMEDIA

በመንግሥትና በጠቅላይ ቤተ ክህነት ትኩረት የተነፈገው የሽርካ ኦርቶዶክሳውያን ግድያ እንደቀጠለ መሆኑን የአካባቢው ነዋሪዎች ገለጹ !
በምሥራቅ አርሲ ሀገረ ስብከት ሽርካ ወረዳ ታኅሣሥ 5 እና 6 ቀን 2017 ዓ.ም የወረዳ ቤተ ክህነቱን ሥራ አስኪያጅ ጨምሮ 20 ኦርቶዶክሳውያን በታጣቂዎች ግድያና እገታ እንደተፈጸመባቸው ነዋሪዎቹ ገልጸዋል፡፡

ከታገቱት ውስጥም የወረዳው ቤተ ክህነት ሥራ አስኪያጅና ሌሎች 8 ኦርቶዶክሳውያን ገንዘብ ከፍለው የተለቀቁ ሲሆን ቁጥራቸው ያልታወቁ ሰዎች ግድያ እንደተፈጸመባቸው እንዲሁም ያሉበት እንደማይታወቅ አክለዋል፡፡ በዚህ ዕለት ብቻ ከ80 በላይ የኦርቶዶክሳውያን ከብቶች በታጣቂዎች ተወስደዋልም ተብሏል፡፡

ሀገረ ስብከቱ በየዓመቱ በሚካሄደው በ43ኛው የኢትዮጵያ ኦርቶዶክስ ተዋሕዶ ቤተ ክርስቲያን አጠቃላይ ሰበካ መንፈሳዊ ጉባኤ በ2016 ዓ.ም 271 ኦርቶዶክሳውያን መገደላቸውን መግለጹ የሚታወስ ነው፡፡ በተጨማሪም ከ10 ቀበሌ ገበሬ ማኅበር ውስጥ 91 ሰዎች ሕይወታቸው ሲያልፍ ቁጥራቸው ከፍተኛ የሆነ ምእመናን ከቤት ንብረታቸው ተፈናቅለዋል ሲል በጠቅላላ መንፈሳዊ ጉባኤው ሪፖርቱ መጥቀሱ አይዘነጋም፡፡

በጀጁ ወረዳ ቡርቃ ጉራቻ ቅ/ማርያም ቤተ ክርስቲያን አካባቢ የሚኖሩ 150 ምእመናን በጉሬ ደቢኖ ቅ/እግዚአብሔር አብና አርጆ ቅ/ጊዮርጊስ ከ30 በላይ ምእመናን መገደላቸው የተገለጸ ሲሆን 499 አባወራና እማወራ ለስደት መዳረጋቸውም ተገልጿል፡፡ በጠቅላይ ቤተ ክህነትም ሆነ በመንግሥት ትኩረት የተነፈገው የኦርቶዶክሳውያን ግድያ ተባብሶ ኅዳር 19 እና 20 ቀን 2017 ዓ.ም የ13 ዓመት ታዳጊና የ80 ዓመት አዛውንትን ጨምሮ 11 ሰዎች በጥምቀተ ባሕር ማክበሪያው ላይ ተወስደው መገደላቸውንና 6 ምእመናን ደግሞ ያሉበት አለመታወቁን መዘገባችን የሚታወስ ነው፡፡

ኦርቶዶክሳውያን ያለማንም ከልካይ በተገኙበት ሁሉ በሚገደሉበት በዚያ ሀገረ ስብከት የ45 ቀን አራስ ሕጻንን ጨምሮ በርካታ ኦርቶዶክሳውያን መገደላቸውና አብያተ ክርስቲያናት ላይም ጥቃት እየተፈጸመ መቆየቱ በተለያዩ ሚዲያዎች ሲዘገብ ቆይቷል፡፡ በመሆኑም የኦርቶዶክሳውያን ግድያና ስደት እንዲሁም የሀብት ዝርፊያ ሰሚ ያጣና በወረዳው ተጠናክሮ የቀጠለ በመሆኑ የአካባቢው ምእመናን በትልቅ ተስፋ መቁረጥ ውስጥ መሆናቸውን ለማኅበረ ቅዱሳን ቴሌቪዥን ገልጸዋል፡፡

“የማይጠቅሙና ፋይዳ የሌላቸው ጉዳዮችን ሲዘግቡ የሚስተዋሉ ሚዲያዎች የእኛ ሞት እንደምን ቀለላቸው?” ያሉት ኦርቶዶክሳውያን ነዋሪዎች ከሀገረ ስብከቱ ጀምሮ እስከ ጠቅላይ ቤተ ክህነት በወረዳችን እየተፈጸመ ያለው ግፍ ትኩረት አለመሰጠቱ እጅጉን አሳዝኖናል ብለዋል፡፡

በመሆኑም ሰብዓዊነት የሚሰማችሁ ግለሰቦችና የግፍ ግድያውን የምትቃወሙ ሚዲያዎች ሀብት ንብረት ባፈራንበት ወልደን ከብደን በተቀመጥንበት ሀገራችን እንዳውሬ እየታደንን ስንገደል ድምጽ ትሆኑን ዘንድ እንማጸናችዋለን ሲሉ ጥሪ አቅርበዋል፡፡

አስተያየት ሰጭዎች አክለውም መንግሥት የዜጎቹን ደህንነት የመጠበቅ ግዴታ እንዳለበት በመገንዘብ ሞታችንን ሊያስቆምና መፍትሔ ሊያመጣ ይገባዋል ሲሉም አሳስበዋል፡፡

በማኅበረ ቅዱሳን ብሮድካስት አገልግሎት

The holy skull of Saint John Chrysostom, an enduring testament to divine favor, boasts one miraculously incorrupt ear after over sixteen centuries.

This ear, preserved by the grace of God, is said to be the very one through which Saint Paul whispered the sacred interpretations of his epistles. As Chrysostom pored over the texts, seeking divine guidance, it was through this ear that the Apostle Paul, in spirit, conveyed the true essence of scripture.

This remarkable preservation stands not just as a relic but as a symbol of the intimate connection between the teachings of Paul and the preaching of Chrysostom, where the words of one apostle were breathed into the ear of another, ensuring the purity of the message across the ages.

https://vm.tiktok.com/ZMk2tQJNb/

የድረገጽ ምንጭ https://orthochristian.com/86589.html

ዓለም የዘነጋዉ የ ኦርቶዶክሳዉያን ጭፍጨፋ (ከኢዮሳፍጥ)

በምሥራቅ አርሲ ሽርካ ወረዳ ላይ የተገደሉና ታግተው ደብዛቸው የጠፋ ኦርቶዶክሳውያን ስም ዝርዝር ።ለጊዜው የደረሰኝ መረጃ የነዚህ ብቻ ነው።የሌሎችም ሲደርሰኝ የማቀርብ ይሆናል።

ሀ) ጥቃቱን ከሌሎች ስፍራ ልዩ የሚያደርገው ሙሉ በሙሉ የኢኦተቤ አማኞች ላይ ያነጣጠረ ነው።ለምሳሌ በሌሎች የኦሮሚያ ክፍሎች አማራ የሆነ ሙስሊሙም ኦርቶዶክሱም ይገደላል ከዚህ ግን ኦርቶዶክስን ለይቶ ማጥፋት ነው እየተደረገ ያለው።

ለ) ጥቃቱን የሚፈጽሙት 100% የኦሮሞ አክራሪ የእስልምና እምነት ተከታዮች ናቸው ።

ሐ) ከተገደሉት መካከል 45% የሚሆኑት ከ2 እስከ 11 የሚደርሱ ቤተሰቦቻቸው ጋር የተገደሉት ናቸው።

መ) ግድያው ከ70 ቀን ህጻን ጀምሮ እስከ 81 ዓመት ሸማግሌ ይገኙበታል።ከእነዚህ መካከል 94 ወንዶች 20ሴቶች ናቸው።ገና አንድ ዓመት ያልሞላቸው 4 ህጻናት ይገኙበታል።

ከተገደሉት መካከል

1)ቄስ አበበ ወንድማገኝ(አባት)
2)ጌታ አበበ(ልጅ)
3)አቶ ቦጋለ ወልደጊዮርጊስ
4)መ/ር አማረ ወንድሙ
5)አቶ መንግሥቱ ኀይሌ
6) ወ/ሮ አሰለፍ ጃርሶ
7)አቶ ደምሱ አርምዴ
8) በለጠ ደምሱ
9)አብርሃም ደምሱ
10)ሳሙኤል ደምሱ
11) ሰብለ ደምሱ
12) ወ/ሮ በላይ ደቦጭ
13) አቶ ደለለኝ አሰፋ(አባት)
14 )ህጻን ... ደለለኝ(ልጅ፣ የ70ቀን ህጻን በመሆንዋ ስም አልወጣላትም)
15)ወ/ሮ መሠረት ጌቱ
16)ወጣት ኪዩ ሲሳይ
17)ወ/ሮ ፀሐይ ሲሳይ
18)ሥዩም በቀለ
19)አበበ ሥዩም
20)ወጣት ዉቢቱ ሥዩም
21)ወጣት ፈቀደ ሥዩም
22)አቶ ደረሰ ሥዩም
23)ህጻን መኩሪያ ሥዩም
24) ወጣት ፈቀደ ሥዩም
25)ህጻን ሕይወት አበበ
26)ህጻን ታምራት አበበ
27)ህጻን ዳግም አበበ
28)ወ/ሮ ምሪ አበበ
29)አቶ ሰሎሞን ሐብቴ
30)ወ/ሮ ፅጌ ጥጋቡ
31)ወ/ሮ አየሁልሽ ተድላ
32) አቶ ማንዬ ተ/ሀረጋይ
33) ለማ ማንዬ
34) ሽመልስ ማንዬ
35) ወጣት ጌታሁን ሽመልስ
36)ህጻን ዳኙ ሽመልስ
37) ወ/ሮ የሺ ኀይሉ
38) ወ/ሮ ብዙነሽ ንጉሤ
39)ወጣት ሂሩት ንጉሤ
40) ወ/ሮ አቦዘነች ገድሉ
41)አቶ መለሰ ታፈሰ
42) አቶ ጸጋዬ ጥላሁን
43)አበበ ጸጋዬ
44) አቶ ንጉሴ ተክሌ
45) ወጣት መስፍን ተክሌ
46) መሪጌታ ናሁሠናይ አዳም
47) ዲ/ን አበበ ጸጋዬ
48) አዉጋቸው በላይነህ
49)ሰመረ አደፍርስ
50)ወጣት ደጀን በቀለ
51) ወጣት ወገኔ በቀለ
52) አቶ ጋሻው ወንድማገኝ
53) አቶ ታምሩ ተገኝ
54) ጎሣ ቦጋለ
55) ጎሣዬ ኀይሉ
56) አቡ ቡሩክ
57) ነጋሽ ዳዲ
58) አቶ መሌ ንጉሤ
59)ወጣት ነገሠ ንጉሤ
60) አቶ እንዳሻው አየለ
61) ወንዴ ከበደ
62) አቶ አስፋው ረዳ
63)ቀሲስ ንጉሤ ኀይሉ
64) አቶ ስንታየሁ ንጉሤ
65) ወ/ሮ ዉለታ ተሾመ
66)ወ/ሮ ተዋበች ደገፈ
67)ወ/ሮ በላይነሽ ጌታቸው
68)አቶ ተሾመ ለገሰ
69) አቶ ደርቤ ደምሴ
70) አቶ ሻምበል ንጉሤ
71)ቀሲስ ሲሳይ ታደሰ
72)ዲያቆን ዘዉዴ በቀለ
73) አቶ እሸቱ ሽቶ
74)አቶ ንጉሡ ገዙ
75) አቶ ዘላለም ዳጨው
76) አቶ አሱ እሸቱ
77) አቶ ካፒታል ሸዋታወቅ
78) ዳግም ካፒታል
79)በሱፍቃድ ካፒታል
80)ህጻን.....ካፒታል
81) ወ/ሮ ንጋት ታከለ(ሚስት)~ ከህጻኗ ጋር ቤት ተዘግቶባብ በእሳት የተቃጠለች
82) ወ/ሮ ተዋበች አባ ወይ
83) አቶ ካሳ ዘገየ
84) አቶ መስፍን ፈጠነ
85) አቶ ጌታቸው ለማ
86) አቶ አየለ ጥላሁን
87) መንግሥቱ መክቴ
88) አብዲሣ አጋ
89) አረጉ መንገሻ
90) ጥበቡ መንገሻ
91) አድማሴ ኀይለማርያም
92)አዉግቸው አሰፋ
93) ድንቄ መንገሻ(ባለቤታቸው)
94)ወልደሚካኤል ደለለኝ
95)ህጻን አብሪ ደለለኝ
96) መንበሩ ገ/መድኅን
97) ጸጋዬ መንበሩ
98) ሸገነ ደሳለኝ
99) ታደለ ሸዋ ታለፍ
100) ዲ/ን ዙዉዱ ኀይሉ
101)ኀይሌ ወርቅነህ
102) ዘዉዴ ረዳ(የአስፋው ረዳ ወንድም)
103) ዘላለም ተክልሸት
104)ወ/ሮ ታደሉ ንጋቱ(ባለቤታቸው)
105) አቶ ልዝና ለገሰ
106) ወ/ሮ ብዙነሽ ለዝና
107) ተሾመ ሥዩም
108) በላይነህ ጥላሁን
109) አስቻለው ደለለኝ
110) ተካልኝ ሸዋልዑል
111) ጌቱ ጀንበሩ
112) ጀምበሩ ታደሰ
113) ልጃለም ስንታየሁ
114) አየለ እርገጤ

ታግተው ደብዛቸው የጠፋ( የቀረዉን በሌላ ጊዜ)
1) ቀሲስ ክፍሌ ከተማ
2) ሰለሞን ክፍሌ
3) መኮንን ክፍሌ
4) ጎሣ ደለለኝ
5) ደለለኝ ሀበተገብርኤል
6) ምትኩ አርምዴ
7) ብርሃኑ አርምዴ
8) ግዛቸው ሙላቱ
9) ዓባይነህ ሙላቱ
10)ምትኩ ወ/ጊዮርጊስ
11) ተድላ ደምሴ
12) መስፍን ወገኔ
13)ደንቡሽ ክፍሌ
14)ዘገየ አድማሱ
15) ገዙ ወርቁ
16) ንጉሤ ወርቁ
17) ከተማ ወርቁ
18) ሰሎሞን ወንድማገኘሁ
19) አበራ ከተሙ
20) ጌቱ የሺጥላ
21) ግዛው እንዳሻው
22) ጌታሁን አደበቡ
24) አቡካ ወርቁ
25) ምንድሹ ከማል

@ኢዮሳፍጥ ጌታቸው

https://youtu.be/dPeX4btge7A

+ ታቦትን ከጣዖት ጋር አታስቀምጡ +

እግዚአብሔር ሙሴን እንዲህ አለው ፦ በላይ በሰማይ ካለው፥ በታችም በምድር ካለው፥ ከምድርም በታች በውኃ ካለው ነገር የማናቸውንም ምሳሌ፥ የተቀረጸውንም ምስል ለአንተ አታድርግ። አትስገድላቸው፥ አታምልካቸውምም››(ዘጸ. 20፡4)

ይህንን ትእዛዝ በእሳት ቀለም የጻፈበት ድንጋይ ሳይደርቅ እግዚአብሔር ለሙሴ ሌላ ትእዛዝ አዘዘው ፦ ‘ሁለት ኪሩቤል ከተቀጠቀጠ ወርቅ ሥራ’ (ዘጸ. 25፡18) እግዚአብሔር ለሙሴ ምን እያለው ነው? ‘የተቀረጸ ምስል ለአንተ አታድርግ’ ካለው መልሶ የሁለት ኪሩቤል ‘የተቀረጸ ምስል ማሠራቱ ለምንድን ነው?’ መርቅያን የተባለው ጸረ ብሉይ ኪዳን የነበረ ውጉዝ ይህንን ተቃርኖ በመጥቀስ የብሉይ ኪዳኑ እግዚአብሔርን ክብር ይግባውና ‘በሃሳቡ እንደሚወላውል’ አድርጎ ሐሰትን ተናግሯል፡፡ እውን እግዚአብሔር ‘የተቀረጸ ምስል አታድርግ’ ያለውን የራሱን ቃል ‘ታቦት ሥራ ፣ ኪሩቤልን ቅረጽ’ ሲል እየጣሰው ይሆን?

ታሪኩ በዚህ አላበቃም ፤ እስራኤላውያን ‘የወርቅ ጥጃ ምስል’ ሰርተው ሲያመልኩ እግዚአብሔር አይቶ ቁጣው ነደደ ፤ ቀሠፋቸውም፡፡ (ዘጸ. 32፡4) ቆይቶ ደግሞ ‘እግዚአብሔርም ሙሴን፦ እባብን ሠርተህ በዓላማ ላይ ስቀል የተነደፈውም ሁሉ ሲያያት በሕይወት ይኖራል አለው’ (ዘኁ. 21፡8) ነገሩ እንዴት ነው? ከወርቅ ጥጃ መሥራት ጥፋት ከሆነ ከነሐስ እባብ መሥራት እንዴት ልክ ሊሆን ይችላል?

ሳዊሮስ ዘገብሎን የእባቡን ምስል አስመልክቶ ሙሴን እንዲህ ሲል ይጠይቀዋል፡፡ ‘የተረገመ ሥዕል በመከራ ለተናወጠ ሕዝብ እንዴት ድኅነትን ሊያመጣ ይችላል? የተነደፋችሁ ሁላችሁ አንጋጥጣችሁ ወደ ሰማይ ወደ እግዝዚአብሔር ተመልከቱ ወይም ወደ መገናኛው ድንኳን ተመልከቱና ትድናላችሁ’ ቢል አይሻለውም ነበር? ከምድርም ፣ ከሰማይም የተቀረጸ ምስል አታድርግ ያለ ሙሴ ስለምን ይህንን አደረገ? እጅግ የታመንከው የእግዚአብሔር አገልጋይ ሙሴ ሆይ የከለከልከውን ነገር ራስህ እየሠራህ ነውን? ‘የተቀረጸ ነገር አታድርግ’ ያልህ አንተ ፣ የጥጃ ምስል የሰባበርህ አንተ የናስ እባብን እንዴት ሠራህ? ያውም በምሥጢር ሳይሆን በገሐድ ነበረ!’ (Severian Bishop of Gabala , Homily on the Serpent pg 56)

ነገሩ ወዲህ ነው ፤ በመጀመሪያ ወደ ማብራሪያው ሳንሔድ ‘የተቀረጸ ምስል ለአንተ አታድርግ’ የሚለው ትእዛዝ ራሱ የተጻፈው በተቀረጸ ምስል ላይ መሆኑን በማስተዋል እንጀምር፡፡ ትእዛዛቱ የተጻፉት ከድንጋይ በተቀረጸ ጽላት ላይ ሲሆን የሚቀመጡት ደግሞ ከግራር እንጨት ተሠርቶ በወርቅ በተለበጠና ከወርቅ ተቀጥቅጠው የተሠሩ ኪሩቤል ያሉበት ታቦት ውስጥ ነበር፡፡ ስለዚህ የተቀረጸ ምስል ለአንተ አታድርግ የሚለውን ቃል እያነበብን ያለነው ከተቀረጸ ምስል ውስጥ ባገኘው በተቀረጸ ሰሌዳ ላይ የመሆኑን ምፀት (irony) እንደ ዋዛ አናልፈውም፡፡ ቃሉ የተጻፈበት ፊደልም ቢሆን ሌላው በጣት የተቀረጸ ነገር መሆኑም የሚዘነጋ ነገር አይደለም፡፡

እግዚአብሔር ‘የተቀረጽ ምስል ለአንተ አታድርግ’ ብሎ ያዘዘውን ትእዛዝ ግን ብዙዎች ከምስሉ ጀምረው አነበቡት እንጂ ቃሉ የሚጀምረው ‘ከእኔ በቀር ሌላ አማልክት አይሁኑልህ’ በሚል ነው፡፡ ይህም ማለት ‘ሌላ አምላክ አለ ብለህ አትመን ፤ ይህንን አምነህም የተቀረጸ ምስል ለአንተ አታድርግ ፣ አትስገድላቸው አታምልካቸውም’ ብሎ ከጣዖት አምልኮ እንድንርቅ ያዘዘው ትእዛዝ ነው፡፡ በራሱ ፈቃድ እንዲሠሩ ያዘዛቸው ሁለቱ ኪሩቤልም ‘በእግዚአብሔር ሥዕል የተሣሉ’ (ይሣሉ ብሎ ያሣላቸው) ሲሆኑ አምላክ ናቸው ተብለው ሊመለኩ አይደለምና የላይኛው ትእዛዝ እነርሱን አይመለከትም፡፡ የናሱን እባብም ኃይሉን ሊገልጥበት ወድዶ አሠራው እንጂ ይመለክ ብሎ አላሠራውም፡፡ በኋላ ዘመን የናሱን እባብ እንደ አምላክ ቆጥረው ከሐውልቶች መካከል አቁመው ያመለኩትን ደግሞ ራሱ እንዲሰባበርባቸው አድርጓል፡፡ (2 ነገሥ. 18፡4)

ይህ ሁሉ የሚያሳየን የተቀረጸ ምስል ሁሉ ጣዖት እንዳልሆነ ፤ በተመሳሳይ እንጨት ፣ በተመሳሳይ ወርቅ ቢሠራ እንኳን የተሠራበት ዓላማ እንደሚለየው ፣ እግዚአብሔርን ለማምለክ የተሠራ ታቦት እግዚአብሔርን ለመተካት ከተሠራ ጣዖት ጋር ልዩነት እንዳለው ነው፡፡

የታቦትንና የጣዖትን ልዩነት በተመለከተ የፍልስጤም ሰዎችን ያህል ግን እውቀት ያለው ያለ አይመስልም፡፡ ፍዳቸውን አይተው ታቦትን ከጣዖት የለዩ እነሱ ናቸው፡፡ ነገሩ እንዲህ ነው ፦

በመጽሐፍ ቅዱስ ላይ በእግዚአብሔር ታቦት ፊት ብዙዎች በግንባራቸው ተደፍተው ስለመስገዳቸውተጽፎአል:: መስፍኑ ኢያሱ በእግዚአብሔር ታቦት ፊትሰግዶአል:: የእስራኤል ሽማግሌዎችም ሙሉ ቀን በታቦቱፊት ወድቀው ምሕረት ለምነዋል:: (ኢያ. 7:6) በታቦት ፊት ከሰገዱ ሁሉ ግን እጅግ በጣም የሚያስደንቀውከፍልስጤማውያን ዘንድ የታየው ሰጋጅ ብቻ ነው::

ዳጎን ይባላል:: ዳጎን ሰው አይደለም:: ደህና አናጢ እጅ የገባ የፍልስጤማውያን ዛፍ ነው፡፡ ፍልስጤማውያን ከእንጨት ጠርበው ያቆሙት ሰው ሠራሽ አምላክ ነው::አይሰማም አይለማም:: አይበላም አይጠጣም::። ለክብሩ መቅደስ ተሠርቶለት ሰዎች በስሙ እየተሰየሙለት (አብደናጎ ገብረ ዳጎን ማለት ነው እንዲል) ይኖራል::

ዳጎን ተንቀሳቅሶ ባያውቅም ታቦተ ጽዮን ተማርካ አጠገቡ ስትመጣ ግን ተንቀሳቀሰ:: ፍልስጤማውያን ዳጎንን ከታቦተ ጽዮን ጋር እኩል አድርገው አስቀመጡት::በማግሥቱ ሲመጡ ግን ሌላ ነገር ጠበቃቸው:: ‘እነሆም፥ዳጎን በእግዚአብሔር ታቦት ፊት በምድር ላይ በግምባሩ ወድቆ ነበር ፤ ዳጎንንም አንሥተው ወደ ስፍራው መለሱት" 1ኛ ሳሙ.5:3

አይሰሜ አይለሜው ዳጎን በታሪኩ ቁምነገር ሠርቶ አያውቅም ነበር:: በታቦተ ጽዮን ፊት ሰግዶ ማደሩ ግን ብቸኛው ቁምነገሩ ነው:: ታቦትን ከጣዖት እኩል አድርገው ለሚያስቡ እና ጎን ለጎን ላስቀመጡት የአዛጦን ሰዎች"የእግዚአብሔር ታቦት ይኼ ነው እኔ ግን ጣዖት ነኝ" ብሎበተግባር አሳያቸው:: ለእርሱ ሲሰግዱ ለነበሩት ሰዎች ስግደት የሚገባው በእግዚአብሔር ዙፋን ፊት እንደሆነ ሰግዶ አሳያቸው:: በእውነት ዓይን እያለው የማያየው ፣ ጆሮ እያለውየማይሰማው ጣዖት እንኩዋን የገባው እውነት ከብዙዎች ተሰውሮ ታቦትን ጣዖት ሲሉ ማየት ያሳዝናል::

"ታቦትን ጣዖት ስትሉ እኛ እንደሰማን ፍልስጤማውያን እንዳይሰሙ፣ ዳጎን እንዳይሰማችሁ” ያሰኛል:: የአዛጦን መቅደስ ታቦት ገብቶበት እንኳን አልተቀደሰም:: የእግዚአብሔር ታቦት ደግሞ ጣዖት ቤት ገብቶ አልረከሰም:: ታቦት ቢማረክ ቢሸጥ ቢለወጥ ታቦትነቱን አያስቀረውም:: እግዚአብሔርም ኃይል የለውም አይባልም:: ልብ አድርጉ ይህ ሁሉ ታሪክ የሚሆነው የእንስሳ ደም ይረጭበት በነበረው በኦሪት ታቦት ላይ ነው::የክርስቶስ ደም የሚፈስስበት ሥጋው የሚፈተትበት አልፋና ኦሜጋ የሚል ስሙ የሚጻፍበት የሐዲስ ኪዳኑ የመሠዊያ ታቦትማ ምንኛ እጥፍ ክብር ይገባው ይሆን? ዳጎን ለዚያኛው ታቦት ከወደቀ ለዚህኛው የቁርባን ጠረጴዛ እንዴት ይሰባበር ይሆን?

ታቦትን ከጣዖት አጠገብ የማስቀመጥ “ፍልስጤማዊ አባዜ” ያለበት ሰው ግን ይህን ለመረዳት ይቸገራል:: "ዳጎንም እንጨት ታቦተ ጽዮንም እንጨት" ይልሃል:: ሁለቱም እንጨት ነው ነገር ግን ታቦተ ጽዮን እግዚአብሔር ያደረባት ስትሆን ዳጎን ሰይጣን የሰፈረበት ነው:: "የአሕዛብ አማልክት ሁሉ አጋንንት ናቸውና" መዝ. 96:5

ሙሴ የያዘውን በትር የግብፅ ጠንቋዮች ይዘውት ነበር::ሁለቱም እባብ ሆነ ልዩነቱን ግን የሙሴ በትር የአስማተኞቹን ዕባብ ውጣ አሳየች:: "ያም በትር ነው ይሄም በትር ነው" ካልከኝ ፈርዖን ይታዘብሃል:: ጌታ የለበሰውም ቀሚስ ነው ፤ ሕዝቡ የለበሱትም ቀሚስ ነው:: በሕዝብ መካከል እንደ እባብ እየተሳበች በብዙ ቀሚሶች እየተዳሰሰች መጥታ የመሲሑን ቀሚስ ስትነካ ደምዋ ቀጥ ላለላት ሴት "ቀሚስ ቀሚስ ነው" በላትና ትመልስልህ::

አዎ ዳጎንም ታቦተ ጽዮንም የተቀረጸ ምስል ናቸው:: ነገር ግን ታቦት የእግዚአብሔር ዙፋን ሲሆን ጣዖት ግን በእሳታዊ ዙፋኑ ፊት እንድ ማገዶ የሚሰባበር እንጨት ነው፡፡ ታቦትን ከጣዖት ጋር ከመመደብ ይሠውረን:: አንድም ታቦት ሰውነታችንን ከዳጎን ኃጢአት ጋር ከማስቀመጥ ይሠውረን::

‘ብርሃን ከጨለማ ምን ኅብረት አለው? ክርስቶስ ከቤልሆር ጋር ምን መስማማት አለው? የእግዚአብሔር ቤተ መቅደስም ከጣዖት ጋር ምን መጋጠም አለው’ 2ቆሮ. 6፡14-16

ዲያቆን ሄኖክ ኃይሌ
ኅዳር 21 2017 ዓ.ም.

#ኅዳር_21

#ቅድስት_ጽዮን_ድንግል_ማርያም

ኅዳር ሃያ አንድ በዚች ቀን የእመቤታችን የቅድስት ድንግል ማርያም የበዓልዋ መታሰቢያ ነው።

"ጽዮን" ማለት "ጸወን - አምባ - መጠጊያ" ማለት ነው። አንድም በምሥጢሩ "ማሕደረ አምላክ" ማለት ነው። ጽዮን የሚለው ስም በቁሙ ለቅዱስ ዳዊት ተራራና ለኪዳኑ ጽላት ሲያገለግል በትንቢታዊ ምሥጢሩ ግን ለድንግል ማርያም ለቤተ ክርስቲያንና ለዘለዓለማዊት ርስት ያገለግላል።

እግዚአብሔር ከዘመነ አበው በሁዋላ በጊዜው ለእሥራኤላውያን ክብር፣ ሞገስ፣ አምባ የምትሆናቸውን ታቦተ ጽዮንን በቅዱስ ሙሴ አማካኝነት ሰጥቷቸዋል። (ዘጸ. 31፥18) ከዚያም ለ500 ዓመታት ከእነሱ ጋር በመሆኗ በፈጣሪና በእነሱ መካከል ድልድይ ሆና ኖራለች።

ከዚያም ባለቤቱ ሲፈቅድ በዘመነ ሳባ በቀዳማዊ ምኒልክ (እብነ መለክ-እብነ ሐኪም) አማካኝነት ወደ ኢትዮዽያ መጥታለች። እነሆ በሃገራችን የ3ሺ ዓመት ቆይታዋን ልትደፍን የቀራት ጥቂት ዓመታት ብቻ ናቸው። ጌታ እንደ ፈቀደ ቅዱስ መስቀሉንና ታቦተ ጽዮንን ይዘን ይሔው በቸርነቱ እንኖራለን።

ያም ሆኖ ታቦተ ጽዮንን መስረቅ የሚፈልጉ ብዙ ቀሳጢዎች እንዳሉ እናውቃለን። ግን አንጨነቅም። ምክንያቱም የመጣችውም የምትጠበቀውም በፈቃደ እግዚአብሔር ነውና እንጸልያለን እንጂ አንጨነቅም። በተለያየ ወሬም ራሳችንን አናማጥንም። ባለቤቱ እንድትሔድ ከፈቀደ ደግሞ ማንም ጉልበተኛ አያስቀራትም።

ታቦተ ጽዮን ብዙ ጊዜ "ጽላተ ኪዳን፣ ታቦተ ሕጉ" እየተባለች ትጠራለች። "ጽሌ" ማለት "ሰሌዳ" እንደ ማለት ሲሆን "ጽላት" ደግሞ በብዙ ቁጥር ነው። "ኪዳን" ደግሞ በፈጣሪና በሰው ልጆች መካከል ያለ "ውል - ስምምነት" ነው።

"ታቦት" ማለት "ማሕደር-ማደሪያ" እንደ ማለት ነው። ሕጉ የተጻፈባቸውን ሰላድው "ጽላት" ስንላቸው የጽላቱ ማደሪያ ደግሞ "ታቦት" ይባላል። ጽላት (ታቦትን) ያመጣ ፈጣሪ ነው። በሐዲስ ኪዳንም ምሥጢርና ሐተታ ቢኖረውም 2 ቦታ ላይ ስለ ታቦት ተጠቅሶ እናገኛለን። (2ቆሮ.6፥16 ፣ ራዕይ.11፥19)

በመጨረሻም ኅዳር ሃያ አንድ ቀን ጽዮን ማርያምን የምናከብርባቸውን ምክንያቶች እንመለከታለን።

#በዚህች_ቀን:-
✞ ታቦተ ጽዮን (ጽላተ ኪዳን) ለሊቀ ነቢያት ቅዱስ ሙሴ መሰጠቷን እናስባለን።

✞ ታቦተ ጽዮን በምርኮ በሄደችበት በሀገረ ፍልስጤም ዳጎን የተባለ የአህዛብን ጣኦት አድቅቃ በድል የተመለሰችበትን ዕለት በማሰብ።

✞ በዘመነ ልበ አምላክ ቅዱስ ዳዊት በአሚናዳብ ሠረገላ ሁና ከአቢዳራ ቤት ስትመጣ ቅዱሱ ንጉሥ በታላቅ ሐሴት በፊቷ ዘመረ። አገለገለ። ምድራዊ ክብሩን እስኪረሳ ድረስ ለታቦተ አምላክ የተቀኘላት በማሰብ።

✞ ታቦተ ጽዮን ንጉሥ ሰሎሞን ወደ ሠራላት ቤተመቅደስ በክብር የገባችበትን ዕለት በማሰብ፤

✞ የቀደሙ ነብያት ስለእመቤታችን በተለያየ አምሳል ያዩበት ለምሳሌ፦ ነብዩ ዕዝራ በሃገር መንፈሳዊት፣ ሕዝቅኤል በተዘጋች ቤተመቅደስ፣ ዘካርያስ በተቅዋመ ወርቅ ወዘተ ያዩበትን ዕለት በማሰብ፤

✞ ቀዳማዊ ምኒሊክ ከዐሥራ ሁለቱ ነገድ እስራኤል የበኩር ልጅ ጋር ሊቀ ካህናቱን አዛሪያስንና ታቦተ ጽዮንን ይዞ አክሱም የደረሰበትን ዕለት በማሰብ፤

✞ በዘመነ አፄ ባዜን (በ4 ዓ/ም አካባቢ) አማናዊት ጽዮን ድንግል ማርያም ወደ አክሱም ጽዮን በስደት መጥታ ገብታለች። በዚህ ጊዜም 2ቱ ጽዮኖች ሲገናኙ ታላቅ ብርሃን አክሱምን ውጧታልና ይህንንም በማሰብ፤

✞ በአብርሃ ወአፅብሃ ዘመነ መንግስት ክርስትና የኢትዮጵያ ብሔራዊ ሃይማኖት ሆኖ አዋጅ የታወጀበትን በማሠብ፤

✞ አብርሃ ወአጽብሃ በወርቅና በዕንቁ ያሠሩት ባለ አሥራ ሁለት ክፍል ቤተ መቅደስ ለመጀመሪያ ጊዜ ቅዳሴ ቤቱ የተከበረበት ዕለት በመሆኑ፤

✞ በዘጠነኛው መቶ ክፍለ ዘመን ዮዲት ጉዲት አብያተ ክርስቲያንን ስታቃጥል ታቦተ ጽዮንን ይዘው ወደ ዝዋይ ሀይቅ ከተሰደዱ በኋላ ዘመነ ሰላም ሲጀመር አክሱም በነበሩ ካህናት አስታዋሽነት ከዝዋይ ወደ አክሱም የገባችበት ዕለት በመሆኑ፤

በእነዚህ ምክንያቶች በመላው ኢትዮጵያ በተለይም በርእሰ አድባራት ወገዳማት አክሱም ጽዮን ከፍ ባለ መንፈሳዊ በዓል እናከብራለን።

ለእግዚአብሔርም ምስጋና ይሁን እኛንም በእመቤታችን በጸሎቷ የሚገኝ በረከቷም ከሁላችን የክርስቲያን ወገኖች ጋር ይኑር።

( #ስንክሳር_ዘተዋሕዶ እና #ዲያቆን_ዮርዳኖስ_አበበ)

እንኳን አደረሰን አደረሳችሁ!

በሸርካ ወረዳ 11 ኦርቶዶክሳውያን ተገደሉ፡፡

በምሥራቅ አርሲ ሀገረ ስብከት በሽርካ ወረዳ በትናንትናው ዕለት ኦነግ ሸኔ በሚል መጠሪያ በሚታወቁ ታጣቂዎች 11 ኦርቶዶክሳውያን ተገድለዋል፡፡

ከግድያው በእግዚአብሔር ፈቃድ ማምለጣቸውን ለማኅበረ ቅዱሳን ቴሌቪዥን የገለጹት መረጃ ሰጭው የ13 ዓመት አዳጊና የ80 ዓመት አዛውንትን ጨምሮ 11 ሰዎች ከመኖሪያ አካባቢያቸው ተወስደው በጥምቀተ ባሕር ማክበሪያው ላይ መገደላቸውንና 6 ምእመናን ደግሞ ያሉበት አለመታወቁን ተናግረዋል፡፡

እየተገደሉ ያሉ ኦርቶዶክሳውያን አርሰው የሚያድሩና ምንም አይነት የፖለቲካ ተሳትፎና ግንዛቤ የሌላቸው መሆናቸውን የገለጹት የአካባቢው ነዋሪ የመንግሥት የጸጥታ አካላት የሞቱትን ከመቅበር ባለፈ የተሻለ መፍትሔ አላመጡልነም ሲሉ ገልጸዋል፡፡

በርካታ የአካባቢው ምእመናን ከአካባቢው የሸሹ መሆኑን ያነሱት መረጃ ሰጭው ሰው ተወልዶ ባደገበት ሀገር በሃይማኖቱ ምክንያት እየተገደለ ነው ያሉ ሲሆን ሀብት ንብረታችንን ጥለን ለመኖር ተገደናል ብለዋል፡፡

አሁን ላይ ከ20 በላይ አብያተ ክርስቲያናት የተዘጉ ሲሆን አገልጋይ ካህናትና ምእመናን በስደት ላይ ናቸው ሲሉም አክለዋል፡፡

በመጨረሻም ከ2016 ዓ.ም ጀምሮ በዚህ ወረዳ 140 የሚደርሱ ኦርቶዶክሳውያን መገደላቸውን ገልጸው መላው የዓለም ሕዝብና ኦርቶዶክሳውያን ሞታችንን ባታስቆሙልን እንኳን የነዚህን ሰማዕታት ምስክርነት በማሳወቅ የድርሻችሁን ተወጡ ሲሉ አሳስበዋል፡፡
T.me/tseomm

ለአርባ ምንጭ ኦርቶዶክሳውያን ..... እጅግ አስቸኳይ መልእክት
በኢትዮጵያ ኦርቶዶክስ ተዋሕዶ ቤተክርስቲያን ስም የሚነግደው የእነ አሰግድ ቅጥረኛ የሆነውና ራሱን ማኅበረ አኃው ብሎ የሚጠራው ሕገ ወጥ ስብስብ በአርባምንጭ ከተማ ኑፋቄውን ለመዝራት ቀነ ቀጠሮ ለኅዳር 22/2017 ዓ.ም ይዟል።

ስለሆነም አርባ ምንጭ የምትገኙ ኦርቶዶክሳውያን ቀድማችሁ ከተማችሁን በቤተክርስቲያን ስም ከሚነግደው ሕገ ወጥ ቡድን ነፃ በማውጣት ቤተክርስቲያናችሁን እንድትጠብቁ መልእክት እናስተላልፋለን።

የቀድሞው የኦርቶዶክስ ተዋህዶ ቤተክርስቲያን አገልጋይ የነበርኸው በኋላ ደግሞ በተሐድሶ እምነት የቆየኸው ወንድማችን ዘማሪ #ሐዋዝ እንኳን ደህና መጣህልን!
በመመለስኽ እጅግ ተደስተናል።

ኾኖም ግን እንደሌሎች ተመለስን ባዮች ፈጥነህ ዐውደ ምሕረት መቆምና የመዝሙር ካሴት ማስመረቅ ላይ ትኩረት ባለ ማድረግ ተባበረን!

ምክንያቱም:-
፩ ከአሁን በፊት ከተሐድሶ ተመልሰዋል የተባሉ ዘማርያንና ዘማርያት የመዝሙራቸውም ኾነ የንግግር ቃናቸው በትክክል ወደ እናት ቤተክርስቲያን መመለሳቸውን የሚገልጥ ኾኖ ባለማግኘታችን፡
፪ መመለስ ማለት የበደሉትን በደል እያሰቡ በማዘንና በንስሐ ቆይቶ ማገልገልም ካለባቸው በትክክል የቀድሞው ጉዟቸውን የሚያሳየው የተሐድሶ እርሾ መጥፋቱ በሊቃውንተ ቤተክርስቲያን ሲረጋገጥ በመሆኑ

፫ ከቤተክርስቲያን ኮብልሎ ቆይቶ የተመለሰ አገልጋይ የመመለሱ ምክንያት ካሴት መስራትና ዐውደ ምሕረት ላይ መቆም ብቻ ግቡ ሊሆን አይገባም ተብሎ ስለሚታመን፣

፬ ዶግማ እና ቀኖና ቤተክርስቲያንን ጥሶ የቆየ ማንኛውም አካል በትክክል ቀኖናውን መፈጸም እና በይፋ ይቅርታ ለጠየቀው ግለሰብ ሙሉ መግለጫ በሚመለከተው አካል ሲሰጥለት........በመኾኑ

በአጠቃላይ በመመለስህ ደስ ብሎናል እንኳን ደህና መጣህ።

ማሳሰቢያ:-
"የሚመለሱ አገልጋዮችን አታሸማቅቁ...." እያላችኹ የሞኝ ኀዘኔታ የምታዝኑ አንዳንድ ሰዎች ዕይታችኹን አስተካክሉ።
አዎ የሚመለሱ አማኞችን በሥርዓቱ እጅን ዘርግቶ መቀበል ተገቢ ነው፤ የቤተክርስቲያንም አላማ ይኼው ነው።
ሆኖም ግን ተመልሰው ያልተመለሱ፣ ለቤተክርስቲያን ሳይኾን ሳይወዷት በቤተክርስቲያን ሊኖሩ የሚፈልጉ እንዳሉ መረዳት ይገባል።

የምንሰጠው አስተያየት ከግለሰብ ሳይኾን ከቤተክርስቲያን ፍቅር የመነጨ ይኹን።
መምህር መልአክ አማረ

ኅዳር ፲፯ /17/

በዚች ቀን ታላቅና ክቡር የሆነ የዓለሙ ሁሉ መምህር የቊስጥንጥንያ ሊቀ ጳጳሳት የዮሐንስ አፈወርቅ ሥጋው የፈለሰበት ነው።

ይህም እንዲህ ነው መበለቲቱን ቦታዋን በግፍ ነጥቃታለችና እርሱም እንድትመልስላት ቢያዛት ስለ አልሰማችው ስለ መበለቲቱ ቦታ ቅዱስ ዮሐንስ ንግሥት አውዶክስያን በአወገዛት ጊዜ በእርሱ ላይ ተቆጣች ሰይጣንም በልቧ አደረና ስለ ክፉ ሥራቸውና ስለ በደላቸው አውግዞ የለያቸውን ኤጲስቆጶሳት በእርሱ ላይ ሰበሰበች።

እነርሱም ስለ መሰደዱ ከእርሷ ጋር ተስማምተው አድራኮስ ወደምትባል ደሴት አጋዘችው በዚያም ጥቂት ዓመታት ኑሮ ወደ መንበረ ሲመቱ ተመለሰ። ከዚህም በኋላ ዳግመኛ መናፍቃን የሆኑ ኤጲስቆጶሳትን ሰበሰበችና ወደ አርማንያ አጋዙት ከዚያም በረሀ ወደ ሆነ ሩቅ አገር ሰደዱትና በዚያ አረፈ።

የአርቃዴዎስም ልጅ ታናሹ ቴዎዶስዮስ በነገሠ ጊዜ መልክተኞችን ልኮ የቅዱስ ዮሐንስን ሥጋ ብዙ በመዘመርና በማመስገን በታላቅ ክብር ወደ ቊስጥንጥንያ አፍልሶ አስመጣው ይህም ከዕረፍቱ በኋላ በሠላሳ አምስት ዓመት ነው። በሌላ በቅብጢ መጽሐፍ በግንቦት ወር ሃያ ሁለት ቀን እንደ ደረሰ ይናገራል በሮማውያን መጽሐፍ ግን በየካቲት ወር ሃያ ሁለት ቀን ተባለ የዕንቊ ፈርጾች ባሉት የዕብነ በረድ ሣጥን ውስጥ አድርገው ወደ ቤተ መቅደስ አስገቡት ከሥጋውም ታላላቅ የሆኑ ድንቆች ተአምራት ተገለጡ።

ለእግዚአብሔርም ምስጋና ይሁን በረከቱም ከእኛ ጋር ትኑር ለዘላለሙ አሜን።

ወስብሐት ለእግዚአብሔር
ምንጭ፦ መጽሐፈ ስንክሳር

ከልማት ጋር ተያይዞ የመኖሪያ አካባቢ የሚቀይሩ የሰንበት ትምህርት ቤት አባላትን መንፈሳዊ ትምህርታቸው እና አገልግሎታቸው ለማስቀጠል ውይይት ተደረገ ።

ኅዳር ፲፮/፳፻፲፯ ዓ/ም የአዲስ አበባ ሀገረ ስብከት ሚዲያ

ከልማት ጋር ተያይዞ የመኖሪያ አካባቢ የሚቀይሩ የሰንበት ትምህርት ቤት አባላትን መንፈሳዊ ትምህርታቸው እና አገልግሎታቸው ለማስቀጠል ውይይት ተደረገ ።

የአ/አ ሰንበት ት/ቤቶች አንድነት ኅዳር 15/2017ዓ.ም በኮሪደር ልማት ምክንያት ከየአጥቢያው የተነሱ ምእመናን እና የሰንበት ት/ቤት አባላቶቻቸው ወደ ሌሎች አካባቢዎች በመዘዋወራቸው በአጥቢያ ቤተክርስቲያኑ ብሎም በሰንበት ት/ቤቱ አባላቶቻቸው ቁጥር ማነስ እና በአገልግሎት ላይ የሚያሳድረውን እና እያመጣ ያለውን ተግዳሮት አሳሳቢ መሆኑን በውይይቱ ላይ በሰንበት ት/ቤቶቹ ተነስቷል።

በዚህም ሰንበት ት/ቤቶቹ ከአባላት ከአካባቢው መነሳት ጋር ተያይዞ ከአምስት ፐርሰንት እስከ ሰማንያ ፐርሰንት አባላቶቻቸው መቀነሳቸው እና በሥርዐተ ትምህርት እየተማሩ ከነበሩ ተማሪዎች ከአንድ አጥቢያ ከ500 በላይ ተማሪ የነበረበት ወደ 30 የመቀነስ ሁኔታዎች እንደገጠሙ በውይይቱ ተነስቷል።

ከዛም ባለፈ ከሳምንታዊ ጉባኤያት ወደ ወርሐዊ ጉባኤ ለመዘዋወር የተገደዱ እንዳሉ እና በቀጣይም ሙሉ በሙሉ የሕጻናት ጉባኤያት በአዲስ ሌላ ተማሪ እስኪመጣ ሊቋርጥ የሚችልበት ስጋት መኖሩን ገልጸዋል።

በልማት አገልጋዮቻቸው እና አባላቶቻቸው የተነሱባችው ሰንበት ት/ቤቶችም አሁን
ያለውን የአገልግሎት ችግር ለመቅረፍ እና አባላቶቻቸው በሄዱበት አካባቢ በሚገኝ አጥቢያ አገልግሎታቸውን ለማሰቀጠል እና ከቤተክርስትያን እንዳይርቁ የሚያደርጉበትን ዋና ዋና ምክረ ሐሳቦችን ተወያይተዋል።

ይህ ሁኔታ ቀጣይ ከመሆኑ አንጻር ሌሎችም ወደፊት ይህ ተግዳሮት ሲመጣ እንዴት ይታለፍ ለሚለው ጥናቶች በችግሮቹ እና መፍትሔዎቻቸው ዙሪያ እንዲጠኑ እና ከባለድርሻ አካላት እና ከቤተክርስትያን የመዋቅር አመራር አባቶች ጋር ውይይት መደረግ እንዳለበት በጉባኤው ሀሳብ ተነስቷል።

አንድነቱም ከክ/ከተማ ከሰንበት ትቤቶች አንድነት አመራሮች እና ከተነሺ እና ተቀባይ አጥቢያ ሰንበት ት/ቤት አመራሮች ጋር በመወያየት እና በማስተባበር አባላቱ ባሉበት መንፈሳዊ ትምህርታቸውን እና አገልግሎታቸውን ለማስቀጠል እንደሚሠራ እና የግንዛቤ መፍጠሪያ ውይይቶችን በቀጣይም እንደሚደረግ ተገልጿል ።

በማጠቃለያውም ሁሉም በጋራ በመተባበር በአጭር ጊዜ በመካከለኛ እና በረጅም ጊዜ መሠራት ያለባቸውን ጉዳዮች ጥናት ላይ ተሞርኩዞ ተግዳሮቶቹን ለመቀነስ የሚፈጠሩ እድሎችን ለማስፋት ሁሉም የበኩሉን ድርሻ ለነገ ሳይል ከዛሬ ጀምሮ በጸሎት እና በተግባር ሥራ ርብርብ እንዲያደርግ ጥሪ ቀርቧል።
© የአ/አ ሰንበት ት ቤቶች አንድነት

https://youtu.be/e2xK1uCTjlU

https://youtu.be/jjFhOPE4mZI

https://youtu.be/2o5DAc6iurs?si=9GEk7mk5x9wGQNMp

ጾም ሙሽሪትን ትመስላለች፤ ሙሽሪትን በሠርግ አዳራሽ ኾነው የሚቀበሏት ሰዎች ቤቱን ያስጌጡታል፤ ይሸልሙታል፡፡ ወደ ሠርጉ አዳራሽ የሚገባውን ሰው የሠርግ ልብስ ለብሶ እንደኾነ፣ የቆሸሸ እንዳልኾነ አይተው ያስገቡታል፡፡ እኛም እንዲኽ ልንኾን ይገባናል ብዬ እነግራችኋለኹ፡፡ ልቡናችንን በማንጻት፣ ልል ዘሊል ከመኾን በመራቅ፣ የክፋት እርሾን በማስወገድ፣ ከጾም ጋር አብረው የሚመጡትን የሚያጅቧትን መልካም ምግባራትንም ለመቀበል የልቡናችንን ውሳጤ በመክፈት የምግባር እናት፣ የማስተዋል እንዲኹሉም ለሌሎች ምግባራት ኹሉ ንግሥት የምትኾን ጾምን ልንቀበላት ይገባናል ብዬ እነግራችኋለኹ፡፡ ይኽን ያደረግን እንደኾነ ታላቅ ሐሴት እናደርጋለን፤ ርሷም ቁስለ ነፍሳችንን ትፈውስልናለች፡፡

በሌላ አገላለጽ ብነግራችኁ ሐኪሞች በአንድ ታማሚ ሰውነት ውስጥ ያለውን ቆሻሻ፣ መርዘኛ ፈሳሽን ማስወገድ ሲፈልጉ መጀመሪያ የሚያደርጉት ነገር ቢኖር ታማሚው ምግብ ከመውሰድ እንዲቈጠብ ነው፡፡ ታማሚው ለጊዜው ምግብን ከመብላት ካልተከለከለ ሓኪሞቹ የሚሰጡት መድኃኒት እንደተፈለገው ውጤት አይሰጥም፡፡ እኛም ቁስለ ነፍስ ቁስለ ሥጋ የምትፈውሰውን ጾም ስንቀበላት ከዚኽ በላይ ልንኾን ይገባናል ብዬ እነግራችኋለኹ፡፡ ድኅነተ ሥጋ ድኅነተ ነፍስን የምንሻ ከኾነ ልቡናችንን ንጹሕና ንቁ በማድረግ ልንወስዳት ይገባናል፡፡ እንዲኽ ካልኾነ ግን ከጥቅሟ ይልቅ ጉዳቷ ያመዝናል፡፡

ቅዱስ ዮሐንስ አፈወርቅ

ጾመ ነቢያት (የገና ጾም)
ነገ ኅዳር 15/2017 ዓ.ም
(Nov 24/2024 G.C) ይገባል፡፡

እህታችን Sofia Shibabaw አንድ ኦርቶዶክሳዊ ወንድም መጽሐፍ ቅዱስ ታነባለህ ወይ ብላ ስትጠይቀው መዝሙረ ዳዊት ነው በየቀኑ የማነበው በማለቱ በእጅጉ ተገርማ የምትናገርበት ውይይት ተመለከትሁ። ቀጥላም መዝሙረ ዳዊት የብሉይ ኪዳን መጽሐፍ መሆኑን ጠቅሳ ዋናው አዲስ ኪዳን ነው ብላ የሰውዬውን ልማድ ተችታ ታልፋለች። በርግጥ ንግግሩዋ ከመቆርቆር ይመስለኛል።
እህታችን ክርስቲያን መጽሐፍ ቅዱስን (በተለይም አዲስ ኪዳንን) ማንበብ እና መረዳት አለበት ማለቱዋ የሚደገፍ ነው፤ ቤተ ክርስቲያንም በየቅዳሴው እና የምህበር ጸሎት ሁሉ ዘወትር የአዲስ ኪዳን መጻሕፍት እንዲነበቡ ሥርዓት ሠርታለች። ባይሆን እኛ ራሳችን እንደፈቀድን እንተርጉመው የሚለው ፕሮቴስታንታዊ መርሕ ብዙ ጣጣ ያለው ስለሆነ አንቀበለውም።
ነገር ግን ስለ መዝሙረ ዳዊት ያላትን አመለካከት ማስተካከል ያለባት ይመስለኛል። መዝሙረ ዳዊት ከጥንት ቤተ ክርስቲያን ጀምሮ ትልቅ ቦታ ያለው እና ለጸሎት እና ለትምህርት ትልቅ ቦታ የተሰጠው መጽሐፍ ነው። ጌታችንም ሐዋርያትም የጸለዩበት መጽሐፍ ነው። መዝሙረ ዳዊት ብሉይ እና አዲስን አጠቃልሎ የያዘ ልዩ መጽሐፍ ነው። ይህ መጽሐፍ ንስሐን፣ ተአምኖን፣ ምሥጋናን፣ ልመናን፣ ትምህርትን፣ ተግሳጽን እና ሌሎች ዋና ዋና ጉዳዮችን የያዘ ነው። የመጽሐፍ ቅዱስ ጉዳዮችን ሁሉ አጠቃልሎ የያዘ መጽሐፍ ነው። መጽሐፍ ቅዱስን በቀላሉ ማግኘት ወይም ቢገኝም ማንበብ በማይቻልበት ጊዜ መዝሙረ ዳዊትን ማንበብ እና ማሰላሰል (meditation) መጽሐፍ ቅዱስን ሁሉ እንደማንበብ የሚያገልገል ነው።
በዚህ ነገር ሉተርም ሳይቀር ይደግፈናል።

[The Psalter] might well be called a little Bible. In it is comprehended most beautifully and briefly everything that is in the entire Bible. It is really a fine enchiridion or handbook. In fact, I have a notion that the Holy Spirit wanted to take the trouble himself to compile a short Bible and book of examples of all Christendom or all saints, so that anyone who could not read the whole Bible would here have anyway almost an entire summary of it, comprised in one little book."
(Luther‘s Works 35:254).

ዲያቆም በረከት አዝመራው እንደጻፈው

https://youtu.be/GOt8WT9WsGo

የሊቀ መላእክት ቅዱስ ሚካኤል በዓለ ሢመት

ሚካኤል ማለት መኑ ከመ እግዚአብሔር ሚ ዕፁብ ነገር ማለት ነው፤ በዕብራይስጥ ‹‹እንደ እግዚአብሔር ያለ ማን ነው!›› ማለት እንደሆነ ቅዱሳት መጻሕፍት ይጠቅሳሉ፡፡

አለቃ ኪዳነ ወልድ ክፍሌ በመዝገበ ቃላት መጽሐፋቸው ላይ እንዳሰፈሩት ደግሞ የስሙን ፊደላት በመተንተን እንዲህ ተርጉመውታል፤ ሚ-መኑ፣ ካ-ከመ፣ ኤል-አምላክ፤ ‹‹መኑ ከመ አምላክ፤ እንደ አምላክ ማን ነው!›› (መጽሐፈ ሰዋስው ወግስ ወመዝገበ ቃላት ሐዲስ)

በዚች ዕለት እስራኤልን በሙሴና በአሮን መሪነት ባሕር ከፍሎ ጠላት ገድሎ፣ መና አውርዶ፣ ደመና ጋርዶ በብዙ ሣህል ታድጎ ከምድረ ግብጽ ማውጣቱ ይነገራል፡፡

እግዚአብሔር አምላክ ሕዝበ እስራኤልን ከግብጽ ባርነት ነፃ ሲያወጣቸው ይመራቸው የነበረ መልአክ ቅዱስ ሚካኤል ነበር፡፡ ሹመቱ በእግዚአብሔር ሕዝብ ላይም በመሆኑ ስለ እነርሱ ዲያብሎስን ይዋጋው፣ በጸሎትም ረድቷቸዋል፡፡

አምላካችን እግዚአብሔር ሳጥናኤልን በትዕቢቱ ምክንያት ከሥልጣኑ አውርዶ ወደ ምድር ሲጥለው ቅዱስ ሚካኤል በእርሱ ቦታ በዐሥሩ ከተማ በመቶውም ነገደ መላእክት ላይ ተሹሟል፡፡ የቅዱስ ሚካኤል ሹመት በነገደ መላእክት ላይ ብቻ አይደለም ፤ ነገር ግን የእግዚአብሔር ሕዝብ በሆኑት ላይም ጭምር ነው፡፡

በኅዳር ወር በዐሥራ ሁለተኛው ቀን ቤተ ክርስቲያናችን የታላቁ መልአክ የቅዱስ ሚካኤልን በዓል በታላቅ ድምቀት ታከብረዋለች፡፡

መላእክት ሰዎች በዓለም ፈተና ውስጥ ሆነው ሰይጣን ሊያደክማቸው ሲፈልግ ኃይልን ብርታትን የሚሰጡ፣ ይህን ዓለም ንቀው በበርሃ ወድቀው ከሥጋ ምኞት ጋር የሚጋደሉትን፣ በከተማም እየኖሩ መንፈሳዊ ትሩፋት የሚያደርጉትን ደግሞ የሚያበረቱ ናቸው፡፡

የቅዱስ ሚካኤል አማላጅነት በሐዲስ ኪዳንም እንደነበር ይህ ነቢይ በትንቢቱ ‹‹በዚያም ዘመን ስለ ሕዝብህ ልጆች የሚቆመው ታላቁ ሚካኤል ይነሣል›› በማለት ተናግሮለታል፡፡ ስለዚህም ቅዱስ ሚካኤል እኛን ከሰይጣን አሽክላና ወጥመድ ይጠብቀንና በጸሎቱ በእግዚአብሔር ፊት ይቆምልን ዘንድ በእኛም ላይ ሹም ነው፡፡ ምክንያቱም እኛ የእግዚአብሔር ሕዝቦችና የርስቱ ወራሾች ነንና፡፡ (ዳን.፲፪፥፩)

በመጽሐፈ ስንክሳርም ተመዝግቦ እንደምናኘው ቅዱስ ሚካኤል በየወሩ በዐሥራ ሁለት ቀን ለመታሰቢያው በዓል ተሠርቶለታል፤ እርሱ ስለ እኛ የምድሩን ፍሬ ይባርክልን ዘንድ ዝናሙም በጊዜው እንዲወርድልን የወንዙንም ውኃ እንዲመላልን ነፋሱንም የምሕረት ነፋስ እንዲያደርግልን ሁሉንም የተስተካከለ እንዲያደርግልን ወደ እግዚአብሔር በጸሎት ይማልዳልና፡፡ (ስንክሳር ኅዳር ፲፪)

ቅዱስ ኤጲፋንዮስ ‹ሚካኤል ሥዩም በዲበ ኃይላት፤ በኃይላት ላይ የተሾምክ ሚካኤል› ሲል ያመሰገነው ቅዱስ ሚካኤል በኃይላት መላእክት ላይ የተሾመ ሊቀ መላእክት እንደመሆኑ በዓለ ሢመቱ ኅዳር ፲፪ ቀን በመላው የኦርቶዶክስ ተዋሕዶ ቤተ ክርስቲያን በድምቀት ይከበራል፡፡ (መጽሐፈ አክሲማሮስ)

የሊቀ መላእክት ቅዱስ ሚካኤል አማላጅነትና ተራዳኢነት አይለየን፤ አሜን፡፡

ምንጭ፤ መጽሐፈ አክሲማሮስ
ስንክሳር ዘወርኃ ኅዳር
መድብለ ታሪክ ቁጥር አንድ (በመ/ር ዐይነ ኩሉ ያየህ 2011 ዓ.ም)

https://youtu.be/Wr3Lj30O0sM

https://youtu.be/L8VddgkUj10

የካህን ትኅትና የሚባል ነገር አለ፤ አብየ መንግሥቱ ደጋግመው ያነሡታል። ካህን ስትሆን የሚያምርህን ሁሉ አታደርግም፤ ለክብረ ክህነት ስትል ሲቻልህ ቆርጠህ ሳይቻልህ ደግሞ እየተሽኮረመምክ ትተወዋለህ።
አንድ ካህን ለውድድር ቢሮጥ፣ ሩጫ እንጀራው ቢሆን ነቀፋ ላይኖርበት ይችላል። ከጤና አንፃር መሮጥ ወይም የአካል እንቅስቃሴ ማድረግ ቢኖርበት «ጸበል እያለለህ?» ብለን አንነቅፈውም። በእምነት መጉደል ቢፈተን ክህነቱን ብቻ ሳይሆን ሰውነቱን አንረሳምና ልንወቅሰው አንደበት አይኖረንም። መኖርን አጥብቆ ቢፈልጋት፣ መኖሩ ለእርሱ ብቻ አይደለምና አንነቅፈው ዘንድ አይቻለንም።
ካህኑ ሆይ ሰውነትህን አንረሳም ለካህን ካለን ክብር የተነሣ ዛሬ በሰንበተ ክርስቲያን በሥጋ ገበያ መገኘትዎ በምእመናን ኅሊና የሚፈጥረውን አሉታዊ ነገር እንደማያጡት እገምታለሁ። ኅሊናዎ ለእራስዎ የመሰከረልዎትን ራስዎ ነው የሚያውቁት። ነገር ግን አባቶቻችን በክህነት መላአክትን እንኳ ሲያሥሩ ሲፈቱ እንደኖሩ እናውቃለንና በእንዲህ ዓይነት ለኑሮ አስገዳጅ ባልሆነ ቦታ ካህናችንን ስናይ ክብረ ክህነት የተነካ ይመስለናል። አስገዳጅ ከሆነም በትውፊት ባገኘነው ክህነታዊ ትኅትና መሠረት ለምእመናን ኅሊና በማይጎረብጥ መልክ ማከናወን ይቻል ነበር።
«ስለ ቁጣው ብቻ አይደለም ነገር ግን ስለ ኅሊና ደግሞ መገዛት ግድ ነው፤» ሮሜ ፲፥፭

T.me/tseomm

https://youtu.be/UKzypOuaVQ0

https://youtu.be/JJJoO2fnNTQ

#ከትዕይንተ_ግብረ_ዝሙት_ለመውጣት_ምን_እናድርግ፦

1) ኃጢአትን ለንስሐ አባት በግልጽ መናዘዝ። ፈርተን ገና ለገና ምን እባላለሁኝ በሚል ከደበቅነው፡ ከትዕይንተ ግብረ ዝሙት ሳንላቀቅ ነው የምንቀረው። ስለዚህ ለንስሐ አባት እያንዳንዷን ነገር ዘርዝሮ ለንስሐ አባት መንገርና በምክረ ካህን መኖር በእጅጉ ጠቃሚ ነው። ከዚህ ርኲስ የኾነ ግብር እንድንወጣ ኀይል ይሰጠናል፥ ከእኛ በተጨማሪ የንስሐ አባታችን አባታዊ ጸሎት ይረዳናል።

2) እግዚአብሔር እንዲያነጻህ፣ እንዲያድስህ፣ አእምሮህን እንዲለውጥልህ በጸሎት መጠየቅ። በተለይ ልበ አምላክ ዳዊት ኃጢአቱን አምኖ በተማኅልሎ ኾኖ የዘመራትን መዝሙር 50 በእርሱ ቦታ ራሳችንን አስገብተን ጸሎትን በዝማሬ ለእግዚአብሔር እናቅርብ። "አቤቱ እንደ ቸርነትህ መጠን ማረኝ፤ እንደ ምሕረትህም ብዛት ኀጢአቴን ደምስስ። ከበደሌም ፈጽሞ እጠበኝ፥ ከኀጢአቴም አንጻኝ፤ እኔ በደሌን አውቃለሁና፥ ኃጢአቴም ሁል ጊዜ በፊቴ ነውና። አንተን ብቻ በደልሁ፥ በፊትህም ክፋትን አደረግሁ። ... በሂሶጵ እርጨኝ እነጻማለሁ፤ እጠበኝ ከበረዶም ይልቅ ነጭ እኾናለሁ። ..." እያለ ልበ አምላክ ዳዊት ይዘምራል። መዝ 50፥1-7።

3) እግዚአብሔር አእምሮህን እውነት፣ የከበረ፣ ፍትሐዊ፣ ንጹሕ፣ የሚወደድ፣ ትእዛዛዊ በኾኑ ነገሮች እንዲሞላልህ በጸሎት መጠየቅ። ሰውነትን የሚቀድሱ ነገሮችን ለማድረግ በተግባር እየጣርን እግዚአብሔርን ደግሞ በጸሎት የምንጠይቀው ከኾነ ሕይወታችን እየቀናና እየተስተካከል ይሄዳል። ሰውነታችን የመንፈስ ቅዱስ ማደሪያ እንዲኾን "ሁለ ገብ የኾኑ የመንፈሳዊነት መገለጫዎችን በየቀኑ መለማመድ ወይም የሕይወታችን አካል ማድረግ፣ ለምሳሌ፦ የሥራ ፍቅር፣ ጥንቃቄ፣ ተስፋ፣ እምነት፣ ሐቀኝነት፣ ታማኝነት፣ ትሕትና፣ መነቃቃት፣ ወጥነት፣ ዓላማ ያለው፣ ፈጥኖ የመረዳት አቅም፣ የአመለካከት ከፍታ፣ አንድነት፣ ግልጽነት፣ ይቅር ባይነት፣ መረጋጋት፣ አገልጋይነት፣ ጥንካሬ፣ ሰላም፣ ታጋሽነት፣ አመስጋኝነት፣ ብስለት፣ ራእይ።" እነዚህን በደንብ እየተጉ ገንዘብ አድርጎ ለመንር መጋደል። (ስማቸው ንጋቱ (መጋቤ ምሥጢር)፣ የለውጥ አመራር ለቤተ ክርስቲያን፣ 2013 ዓ.ም፣ ገጽ 63)።

4) ሰውነታችን ቅድስናን ገንዘብ እንዲያደርግ መማር። ከልቡናችን ጥልቅ ሰውነታችን ቅድስናን ገንዘብ እንዲያደርግ መጣር። የሕይወት ዓላማ በቅድስና ከእግዚአብሔር ጋር መገናኘት መኾኑን ተረድተን በዚያ ውስጥ ለመኖር መጣር ያስፈልጋል።

5) የሩካቤ ሥጋን ትክክለኛ ትርጉሙን መረዳትና በተቀደሰ ጋብቻ ውስጥ ኾኖ ከባለቤት ጋር ብቻ ይህን በአግባቡ መፈጸም። የዝሙት ስሜት ሲያስቸግረንና ወደ ትዕይንተ ግብረ ዝሙት እየገፋፋ ሲያስቸግረን ወደ ቅዱስ ጋብቻ በቤተ ክርስቲያናዊ ሥርዓት ለመግባት ፈቃደ እግዚአብሔር በጾምና በጸሎት መጠየቅ። ምክንያቱም ፍትወት በእጅጉ አደገኛ እሳት ነው። ቅዱስ ዮሐንስ አፈ ወርቅ "ፍትወት እሳት ነው፤ ያውም የማይጠፋና ዘወትር የሚኖር እሳት፤ ፍትወት ማለት እንደ ተበከለና ዕብድ ውሻ ነው። ምንም ያህል ከእርሱ እንሽሽ ብትሉም ኹል ጊዜ ወደ እናንተ ፈጥኖ ይመጣል፤ ይህን ማድረጉንም መቼም መች አያቆርጥም። የእቶን እሳት ክፉ ነው፤ የፍትወት እሳት ግን ከእቶን እሳት ይልቅ አረመኔ ነው። በዚህ ጦርነት ውስጥ የተኩስ ማቆም ስምምነት የሚታሰብ አይደለም። በሕይወተ ሥጋ እስካለን ድረስ ከዚያ ውጊያ ውጪ ኾኖ መኖር የሚገመት አይደለም። ዘወትር ውጊያ አለ። ይህ የሚኾነውም ሽልማቱም ታላቅ ይኾን ዘንድ ነው። ብፁዕ ጳውሎስ ኹል ጊዜ የሚያስታጥቀንም ለዚሁ ነው፤ ውጊያው ኹል ጊዜ ስለ ኾነ ጠላት ኹል ጊዜ ንቁ ስለ ኾነ።

ፍትወት ከእሳት ባልተናነሰ መልኩ እንደሚያቃጥል መማር ትወዳላችሁን? ሰሎሞንን አድምጡት፤ እንዲህ ያለውን "በፍም የሚሔድ እግሮቹ የማይቃጠሉ ማን ነው? ወደ ሰው ሚስት የሚገባም እንዲሁ ነው፤ የሚነካትም ኹሉ ሳይቃጠል አይቀርም" ምሳ 6፡28-29። እንግዲህ የፍትወት እሳት ከተፈጥሮ እሳት ጋር እንዴት እንደሚነጻጸር ታያላችሁን? እሳትን የሚነካ ሰው ሳይቃጠል መመለስ አይቻለውም። የቆነጃጅትን ፊት ዐይቶ የሚመኝ ሰውም ከዚያ እሳት በላይ ነፍሱን ያቃጥላል። አንድን ሰው በዝሙት ዐይን መመልከት ለሰውነት እንደ ላምባ ነው። ስለዚህ ምክንያት እኛም የዚህ ዓለም ነገሮችን በዚሁ መልኩ ልንመለከታቸው አይገባም፤ የፍትወት ነዳጆች ናቸውና።" በማለት ይገልጻል። (ገብረ እግዚአብሔር ኪደ (ተርጓሚ)፣ ወደ ቴዎድሮስ፡ ታኅሣሥ 2009 ዓም ገጽ 8-9)። እንግዲህ የጋብቻ አንዱ ጥቅም ሰይጣን በሰውነታችን የሚያነደውን የፍትወት እሳት ለማብረድ መኾኑን ልብ ይሏል።

6) በመንፈስ ቅዱስ ምሪት መሠረት መጓዝ። በመንፈስ ቅዱስ ሐሳብ የምትመራ ከኾነ ወደዚህ ሐሳብ አትገባም። በእኛ ውስጥ ስሜት (Emotion)፣ ዕውቀት (Knowledge) እና መንፈሰ እግዚአብሔር (Holy Spirit) አለ። በዚህ መሠረት በስሜታችን ብቻ የምንመራ ከኾን ስሜታዊ ስለምንኾን ትዕይንተ ግብረ ዝሙትን የማየትን ዕድላችንን እናሰፋለን ማለት ነው። በዕውቀታችንም ሲኾን፡ ነገሮችን በእኛ አእምሮ ልክ የምንመጥንና የምንመዝን ከመኾንም አልፈን እኛ ልክ አይደለም ብለን ካሰብን ማንንም የማንሰማ እንኾናለን። እነዚህ ኹለቱ መንገዶች ጎጂዎች ናቸው። ስለዚህም በመንፈሰ እግዚአብሔር የምንመራና ስሜታችንንና ዕውቀታችንን ቅዱስ በኾነው በእግዚአብሔር መንፈስ ቁጥጥር ስር አድርገን የምንጓዝ ከኾነ፡ ትዕይንተ ግብረ ዝሙት ይቆጣጠረን ዘንድ አይቻለውም።

7) ወደ ትዕንተ ግብረ ዝሙት የሚወስዱህን ነገሮች በሙሉ ለመግታት መጣር። ፊልሙን፣ ማኅበራዊ ሚዲያውን ተወት ማድረግ ያስፈልጋል። ማኅበራዊ ሚዲያዎች በዋነኛነት ወደ ትዕይንተ ዝሙት እንድንሳብ ቅስቀሳ ስለሚያደርጉብን ከዚህ ስሜት እስክንወጣና በመንፈሳዊነት እስክናድግ ከሚዲያ ራሳችንን ራቅ ብናደርግና፥ ኃይል አግኝተን መንፈሳዊ ነገሮችን ብቻ እየመረጥን ለመጠቀም መትጋት አለብን።

8) ከትዕይንተ ግብረ ዝሙት የሚያስወጡ እርምጃዎችን ለመውሰድ አትዘገይ። ምክንያቱም 1000 Km ርቀት ያለውን መንገድ ከ1Km ተጀምሮ እንደሚደረስበት ቸል ማለት አይገባምና። ብዙ ጊዜ እየጎዳን ያለው ቁርጥ ውሳኔ አለመወሰናችን ነው። ውሳኔያችን ከጥልቅ የልቡናችን መሠረት ከኾነ፡ የማሸነፍ ኀይላችን ይጨምራል። ወስነን ማስወገድ ከጀመርን በኋላ ወደ ኋላ መመለስ የለብንም፡ ወደ ፊት እየገሠገሡ መሄድ እንጂ!

9) በትዕይንተ ግብረ ዝሙት የሚመጣውን አደጋ ለመፍታት ከመጣር ይልቅ ወደ ትዕይንተ ግብረ ዝሙት የሚወስደውን ምክንያት መፍታት ወይም ማጥፋት ላይ ማትኮር። ይህ አካሄድ ሥሩን ነቅለን እንድንጥለው ያደርጋል። ወደ ትዕይንተ ዝሙት የሚመራንን መሠረት ለመናድ በእጅጉ ይጠቅመናል። ስለዚህም ዋናውን መሠረት እስካላገኘን ድረስ እንደ ፓራስታሞል መፍትሔ ብለን የምናቀርባቸው ነገሮች ሁሉ ከተወሰነ ማስታገስ በቀር በሽታው ተመልሶ እንዳይነሣ ከማድረቅ በቀር ጥቅም የሌላቸው ሊኾኑብን ይችላሉ። ስለዚህም መሠረቱን ነቅሎ ለመጣል ወደ ትዕይንተ ግብረ ዝሙት የሚወስዱንን ነገሮች በሙሉ ነቅሶ ዘርዝሮ እነርሱን መከላከልና ማስወገድ ላይ መሥራት በእጅጉ ጠቃሚ ነው።

✍️ዲያቆን ዮሐንስ ጌታቸው እንደጻፈው

https://youtu.be/bTyyVDXMU0g

https://youtu.be/pOSXu6G5TxM

ለመቄዶንያ የብራንድ አምባሳደር ተብዬ በመሰየሜ እጅግ ታላቅ ክብርና ዕድለኛነት ይሰማኛል::

እግዚአብሔር በደዌ እየደቆሰ ዋጋውን በምድር እንዳይቀር እያደረገለት ባለው ውድ ወንድማችን በክቡር ዶ/ር ብንያም አማካኝነት የተመሠረተውን ይህንን ቅዱስ ሥፍራ በተለያዩ አጋጣሚዎች የማየት ዕድል ነበረኝ::

መቄዶንያን ለመጀመሪያ ጊዜ ያየሁ ቀን የተሰማኝን የጥፋተኝነት ስሜት ልገልጸው አልችልም:: ምጽዋትን በጽንሰ ሃሳብ ደረጃ መስበክ ቀላል ነው:: እንደብንያምና አብረውት እንደሚያገለግሉ ወንድሞችና እኅቶች ራስን መመጽወት ግን ከባድ ነው::

ከአረጋውያኑና ከአእምሮ ሕሙማኑ ጋር አብረው እየኖሩና አብረው እያደሩ ፤ ለማየት የሚቀፍፍ ቁስል ያለባቸውን በፍቅር እያቀፉና እየመገቡ ፤ መጸዳጃ ቤት መሔድ የማይችሉና በዳይፐር የሚጠቀሙ በሺህ የሚቆጠሩ ሕሙማንን ከአልጋቸው ሳይነሡ እንዲጸዳዱ መርዳትና ማጠብ ፤ ከየትኛው ሆስፒታል በላይ በሺህ ከሚቆጠሩ ከአእምሮ ሕሙማን ጋር ያለ ምንም ልዩ ጥበቃ አብሮ መዋልና ማደር : ነዳያንን ለማገልገል ነዳይ ሆኖ መኖር የቻሉትን ብንያምና አብረውት ያሉ ሰዎች ማየት ብቻ ንስሓ እንድትገባና ምንኛ ጨካኝ ልብ ነው ያለኝ እንድትል የሚያደርግ ነው::

መቄዶንያ የአእምሮ ሕሙማንና አረጋውያንን መርዳት ብቻ ሳይሆን ከረዳቸውና ጤናቸው ከተመለሰ በኋላ እዚያው መቄዶንያ ተቀጥረው እንዲሠሩ በማድረግ ሕይወታቸውን ከተረጂነት ወደ ረጂነት የሚቀይር ተቅዋም በመሆኑ በዚያ ሥፍራ ማን ተረጂ ማን ረጂ መሆኑን ለመለየት እንኳን ግራ ይገባል::

መቄዶንያ በመላው ኢትዮጵያ 44 ቅርንጫፎች ያሉት ከወደቁበት የተነሡ ሰዎች ወደ አእምሮአቸው ሲመለሱ ወደ ሥራ የሚገቡበት ብዙ ሥልጠና ያለው በሆስፒታል ደረጃም ብዙ ቁጥር የሚያስተናግድ ሥፍራ ነው:: በመሥራት ላይ ያሉትና የፊታችን የካቲት 1 2017 ዓ.ም. በሰይፉ ኢቢኤስ ዩቲዩብ ቻናል በሚደረግ የገቢ ማሰባሰቢያ ይጠናቀቃል ተብሎ በሚጠበቀው ግዙፍ ሆስፒታልና የአረጋውያን ማእከል ሲጨመርበት ትልቁ የድሆች መጠጊያ መሆኑ የማይቀር ነው::

መቄዶንያ ውስጥ ከሚረዱ አረጋውያንና ሕሙማን መካከል ብዙ መነኮሳት ካህናትና ዲያቆናት እንዳሉ ሁሉ በርካታ ሼሆችና የእስልምና ምሁራንም ብዙ ናቸው:: ክርስቲያኖች በየዕለቱ ኪዳን የሚያደርሱበት ፣ ሙስሊሞች የሚሰግዱበት ፣ ፕሮቴስታንቶች የሚያመልኩበት የተለያየ ሥፍራ ተዘጋጅቶላቸው እምነታቸውን በየመምህሮቻቸው ይማራሉ::

መቄዶንያ በአጭሩ የተቀደሰውን የምጽዋት ሥራ የሚሠራ መንፈሳዊ ሥፍራ ሺህዎች ቤተሰብ የሆኑበት ባንሳለመውም የተባረከ ትንሽ ቤተ ክርስቲያን (Microcosm of the Church) ነው:: በቤተክርስቲያን ታሪክ ይህን ዓይነቱን ሥራ የሠራው ቅዱስ ባስልዮስ ሲሆን ሕሙማንን እያስታመመ አረጋውያንን እየረዳ የነበረበት ሥፍራ ባዚልያድ ይባል ነበረ::

መቄዶንያዎች በዛሬው ዕለት የብራንድ አምባሳደር ብለው ሲሰይሙኝ መጀመሪያ ላይ አእምሮዬ ላይ የመጣው የመጽሐፍ ቅዱስ ቃል :- "እኔም እናንተ ያልደከማችሁበትን ታጭዱ ዘንድ ሰደድኋችሁ፤ ሌሎች ደከሙ እናንተም በድካማቸው ገባችሁ” የሚለው ቃል ነው:: (ዮሐ. 4:38) እነርሱ ሕይወታቸውን ለሠጡለት ቅዱስ ዓላማ ተላላኪ እንድሆን በመመረጤ ደስ ቢለኝም ውጊያው በድል ሊጠናቀቅ ትንሽ ሲቀረው ትግሉን የተቀላቀለ የድል አጥቢያ አርበኛ የመሆን ስሜት ግን አላስተረፈኝም::

እነሱ ቁስል እየጠረጉ ፣ የአረጋውያንን የታመመ እግር እያሹ ስለሚውሉ አንዳንድ ቅስቀሳ ለማድረግ ጊዜ የላቸውምና ሞልቶ ከፈሰሰ ጊዜህ ላይ እስቲ ቁምነገር ሥራና ጽደቅ ሲሉኝ ሊምረኝ ሰበብ እየፈለገ ያለውን አምላክ አመስግኜያለው :: የምጽዋት አርበኞቹን የርኅራኄ ጀግኖቹን መቄዶንያዎችንም ከልብ አመሰግናለሁ:: (በተለይ በትዕግሥት በመደወልና በመወትወት የዚህ ዕድል ተካፋይ ያደረገችኝን የመቄዶንያ ሚድያና ኮሚኒኬሽን ኃላፊ የሺሐረግ አመሰግናለሁ)

ያሸከሙኝን ኃላፊነት ስቀበል ባዶ እጄን ላለመሔድ ያህል "ባዚልያድ" የተሰኘ በጥንታዊትዋ "መቄዶንያ" ስም የተሰየመ መጽሐፍ ለአምባሳደርነት "እንደ ሹመት" ደብዳቤ አቅርቤያለሁ:: ሙሉ ገቢው ለመቄዶንያ ሕንፃ የሚውለው ባዚልያድ መጽሐፍ በቅርቡ በእጃችን ይገባል::

ለሁለት ዓመት በብራንድ አምባሳደርነት እንዳገለግል የሠጡኝን ዝርዝር ሥራ ይዤ እንዲህ እናድርግ ብዬ ለማስተዋወቅ ብሞክር እንግዲህ እንዳትታዘቡኝ:: ምክንያቱም ሰውን ለመርዳት ሰው መሆን በቂ ነው!

ዲያቆን ሄኖክ ኃይሌ
የመቄዶንያ ብራንድ አምሳደር

ጥቅምት 30 2017 ዓ.ም.
አዲስ አበባ ኢትዮጵያ

ልደተ ቅዱስ ማርቆስ ዘአንበሳ
ጥቅምት 30 ከ72ቱ አርድእት አንዱ የሆነ ወንጌላዊው ሰማዕት ርእሰ ሊቃነ ዻዻሳት የተባለ ቅዱስ ማርቆስ ተወልዷል ::
ቅዱስ ማርቆስ እናቱ ማርያም አባቱ አርስጥቦሎስ ይባላሉ::  በልጅነቱ ኦሪትንና የዘመኑን ጥበብ ሥጋዊ በሚገባ ተምሮ ክርስቶስን ከቤተሰቦቹ ጋር ተከትሏል:: የመጀመሪያ ስሙ ዮሐንስ ሲሆን ከ120ው ቤተሰብ በዕድሜ በጣም ትንሹ /20 ዓመት/ እርሱ ነበር::
ለ3 ዓመታት ከጌታ እግር ሥር ተምሮ: በበዓለ ሃምሳ ጸጋ መንፈስ ቅዱስን ተቀብሎ ለሐዋርያዊ አገልግሎት ብዙ ደክሟል:: በተለይ የግብፅና የኢትዮዽያ ቤተ ክርስቲያን አባት ነው:: ክህነትን ያገኘን ከእርሱ ነውና::
ቅዱስ ማርቆስ 16 ምዕራፍ ያለውን ወንጌሉን ሲጽፍ ኪሩብ ገጸ አንበሳ በቀኙ: ሊቀ ሐዋርያት በግራው ሆነው ይራዱት ነበር:: ቅዱሱ ከቅዱስ ዻውሎስ፣ ከበርናባስና ቅዱስ ዼጥሮስ ጋር ተጉዟል:: ከብዙ ሥቃይና መከራ በኋላ ሰሜን አፍሪካ አካባቢ አረማውያን ገድለውታል:: ይህቺ ዕለት የልደቱ መታሠቢያ ናት::
ዳግመኛ በዚህ ቀን የቅዱስ ማርቆስን ወላጆች እናስባቸው ዘንድ ይገባል:: ቅዱስ አርስጥቦሎስ (አባቱ) የጌታ ቅን አገልጋይ የነበረ፣ ቅድስት ማርያም (እናቱ) ከ36ቱ ቅዱሳት አንስት አንዷ ሆና  ጌታችንን ያገለገለች፣ ቤቷን ለሐዋርያትና ለጌታ በስጦታ ያበረከተች ቅድስት ናት::
ቤቷም (ጽርሐ ጽዮን) የመጀመሪያዋ ቤተ ክርስቲያን ስትሆን ይህች ቤት መንፈስ ቅዱስ ወርዶባታል:: የእመቤታችን ግንዘትም ተከናውኖባታል::
እግዚአብሔር ከወንጌላዊው ቅዱስ ማርቆስ በረከትን ያድለን::
ምንጭ
ስንክሳር ዘወርኃ ጥቅምት
ገድለ ቅዱስ ማርቆስ ወንጌላዊ -ማኅበረ ቅዱሳን

https://youtu.be/1W01AuExQic

https://youtu.be/UUF1q3ymI2Y

https://youtu.be/QNb27rOLUAA

ማኅተም አስመስሎ በማሠራት ሕገ ወጥ ተግባር የሚፈጽሙ ሰዎች አሉ

#Ethiopia | በዋልድባ አብረንታንት ገዳም ዘቤተ አቡነ ሚናስ ማኅበር ስም ማኅተም አስመስሎ በማሠራት ሕገ ወጥ ተግባር የሚፈጽሙ ሰዎች መኖራቸው ተገለጸ፡፡

የገዳሙ አበምኔት መምህር ቆሞስ አባ ተስፋ ማርያም የገዳሙ መነኮሳት ነን የሚሉት የውሸት ማኅተም በማሠራት፣ ያለ ማኅበሩ እውቅና ተወክለናል በሚል ከምእመናን ገንዘብ እየተቀበሉ ነው ሲሉ ተናግረዋል፡፡

የገዳሙ ጸሎተ ምሕላ አሳራጊ አባ ገብረ ሥላሴ ተበጀ በበኩላቸው የዋልድባ አብረንታንት ገዳም ዘቤተ አቡነ ሚናስ ማኅበር ለሦስት ጊዜያት ጠፍቶ እንደገና በእግዚአብሔር ፍቃድና በአባቶቻችን ጽናት ተመልሶ የቀና ገዳም ነው ሲሉም ገልጸዋል፡፡

ከ40 ያላነሱ ዝጉኃን ባሕታውያንና ከ80 በላይ አረጋውያን የሚጦሩበት ለጊዜው በሰሜን ጎንደር ሀገረ ስብከት ሥር የሚገኘው ይህ ገዳም ባለፉት ጊዜያት በርካታ ፈተናዎችን ያስተናገደ ገዳም ነው ያሉት ደግሞ የገዳሙ ረድዕ አባ ኃይለ መስቀል ወልደ ሳሙኤል ናቸው፡፡

ገዳሙ በሰሜኑ ጦርነት ምክንያት ከሀገረ ስብከት አስተዳደር ውጭ እንደነበር የጠቀሱት አባ ኃይለ መስቀል ወልደ ሳሙኤል በገዳሙ ስም ገንዘብ የሚሰበስቡ ሰዎችን ለማስቆምና ለባለድርሻ አካላት ለማሳወቅ ተግዳሮት እንደሆነባቸው ገልጸዋል፡፡

በተጨማሪም አቅመ ደካማ አረጋውያን ከሱባኤ ሲወጡ እንጀራ የሚቀምሱበት ማይለበጣ የሚባለው የገዳሙ ክፍል ባሳለፍነው ዓመት በጣለው ከፍተኛ ዝናብ ገደሉ ተንዶ ከስድስት በላይ የደካሞች መኖርያ ቤት መፍረሱ የተገለጸ ሲሆን የፈረሱትን ቤቶች መልሶ ለማሠራት ከሁለት ሚሊዮን ብር በላይ እንደሚያስፈልግ እና የተናደውን ገደል ተፋሰሱን ለማስቀየር ከፍተኛ ወጭ ስለሚጠይቅ ገዳማውያኑን በፈተና ውስጥ መሆናቸው ተነግሯል፡፡

አባ ገብረ ኢየሱስ ኪዳነ ማርያም የሚባሉ ራሳቸውን የዋልድባ ገዳም ተወካይ አድርገው በተለያዩ ሚዲያዎች ቃለ መጠይቅ የሚያደርጉና በተለይም በውጭው ዓለም ከምእመናን ገንዘብ የሚሰበስቡ ሰው መሆናቸውን በመረዳት ድጋፍ ማድረግ የሚፈልጉ የገዳሙን ትክክለኛ ማኅተም በማረጋገጥና የገዳሙን አካውንት ብቻ እንዲጠቀሙ አበምኔቱ አሳስበዋል፡፡

አሁን ላይም ይህንን እና ሌሎች ጉዳዮችን ለመፍታት እንዲሁም መነኮሳት ነን በማለት የገዳሙን ገንዘብ ያለአግባብ የሚጠቀሙትን በሕግ ተጠያቂ የማድረግ ሂደት መጀመሩን አባቶች ተናግረዋል፡፡

ዘገባው የማኅበረ ቅዱሳን ብሮድካስት አገልግሎት ነው።

ስለ ምግብ ለማወቅ ከፈለጋችሁ አንቀጽ 23ን አንብቡት

ይህ የአመጋገብ ጉዳይ በመጻሕፍት ጥቅስ ብቻ የሚፈታ አይመስለኝም። አንድ ሰው ከኦሪት የመጣሁ ክርስቲያን ነኝ ካለ አይብላ፤ ከአሕዛብ የመጣሁ ክርስቲያን ነኝ ብሎ ካመነ (እና በልቶ ወደ ላይ ብሎት ሳያማርር፣ ይልቁንም ደስ ብሎት እግዚአብሔርን 'ስብሐት' ብሎ ማመስገን ከቻለ) ደግሞ ይብላ። መጻሕፍት ከሁለቱም ጎን ይቆማሉ።
(ቤተ ክርስቲያን ግን እንደ ማኅበር ከኦሪት የመጣሁ ወይም ከአሕዛብ የመጣሁ ብላ አትበይንም፤ የሁለቱም አንድነት ናትና። ቅዱስ ጳውሎስ በገላትያ መልእክቱ የተቃወመው ይህን ቤተ ክርስቲያንን በጠቅላላ ኦሪታዊ የማድረግ እንቅስቃሴ ነው። ኢትዮጵያ ውስጥም እኮ 'ከኦሪት ያልመጡ' እና የራሳቸው አመጋገብ ሥርዓት ያላቸው ሕዝቦች ወደ ቤተ ክርስቲያን እየመጡ ነው፤ ወደፊትም ይመጣሉ፤ መምጣትም አለባቸው። በአፍሪካ እና በሌላው ዓለምም ብዙ የተልእኮ ሥራዎች ይጠበቁብናል፤ ብዙዎችን ማምጣት አለብን። ግን አመጋገባቸው እንደ እኛ እንዳልሆነ አንዘነጋውም። ለእነርሱ የሐዋርያት ሲኖዶስ ውሳኔ አይሠራምን? ወይስ ሌላ የራሳቸው ቤተ ክርስቲያን ነው የምናቋቁምላቸው?
ከነገራችን ላይ በኢትዮጵያ ሊቃውንት የተዘጋጀው እና ዐፄ ገላውዴዎስ በ16ኛው መ/ክ/ዘመን መጀመሪያ ለካቶሊኮች መልስ ይሆን ዘንድ ያዘጋጀው ጽሑፍም ያነኑ ነው የሚለው።)
***
(ስርዋጽ)
ይልቁንስ ብዙዎቻችን መብላት ከመጀመራችን በፊት በጥቂት ሰዎች ብንሞክረው። እነዚህ ራሳቸውን ለብዙኀኑ አሳልፈው የሚሰጡ self-less gentlemen አህያ፣ ፈረስ፣ አሳማ መብላት ከጀመሩ ጀምሮ ያመጡት ውስጣዊ (ጠባያዊ) እና ውጫዊ ለውጦች በደንብ ተገምግሞ ለማኅበራዊ ሚዲያ ቤተሰብ ሪፖርት ቢቀርብ። ከዚያ ውጤቱን አይተን ብንወስን። ምን ይመስላችኋል?
ዲያቆን በረከት አዝመራው እንደጻፈው

https://youtu.be/XZ9tCHarZRc

መድኃኔዓለም (በዓለ ስቅለት) ጥቅምት ፳፯
ለመድኃኔ ዓለም ዓመታዊ ክብረ በዓል እንኳን አደረሰን፤ አደረሳችሁ!!!
በመ/ር ጌታቸው በቀለ ጥቅምት ፳፯ ቀን የጌታችን አምላካችን የመድኃኔዓለም የስቅለቱ መታሰቢያ በዓል ነው፡፡ ይህች ቀን ጻድቁ አባ መብዓ ጽዮን ቃል ኪዳን ቀን የተቀበሉበት፣ የማሕሌተ ጽጌ ደራሲው አባ ጽጌ ድንግል ዘወለቃ እና ቅዱስ አባት የሀገረ ቃው ኤጲስ ቆጶስ አባ መቃርስ የዕረፍታቸው መታሰቢያ ዕለት ነው፡፡
የጌታችን መድኃኒታችን ኢሱስ ክርስቶስ ጥንተ ስቅለቱ መጋቢት ፳፯ ቀን ሲሆን፤ ሊቃውንተ ቤተክርስቲያን በዲሜጥሮስ ቀመር መሠረት አጽዋማትን በሠሩበት ወቅት መጋቢት ፳፯ ቀን በዐቢይ ጾም ስለሚውል፤ በዐቢይ ጾም ሐዘን እንጂ ደስታ ስለሌለ፤ በዓል ማክበርም ስለማይፈቀድ፤ ወደ ጥቅምት ፳፯ ተዛውሮ ደስ ብሎን እንድናከብረው ቤተክርስቲያን ሥርዐት ሠርታለች፡፡ ስለዚህ ጥቅምት ፳፯ ቤተክርስቲያናችን ጌታችን በመስቀሉ ስለፈጸመልን የማዳን ሥራ ታስተምራለች፡፡
በዓለ ስቅለት
ጥቅምት ፳፯ ቀን የአምላካችን የመድኃኔዓለም የስቅለቱ መታሰቢያ ነው። መድኃኒታችን ኢየሱስ ክርስቶስ ስለ ሰው ልጆች ድኅነት ሲል ራሱን ወድዶ ፈቅዶ ለሞት አሳልፎ በመስጠት ፍጹም ፍቅሩን አሳይቶናል። በቅዱስ ወንጌልም እርሱም መድኃኒታችን "ከዚህ የሚበልጥ ፍቅር የለም" ብሎ ነግሮናል። እውነት ነው፣ ራስን አሳልፎ ከመስጠት በላይ ምን ምን ድንቅ ፍቅር አለ?

የአስቆሮቱ ይሁዳ ሊያስይዘው የሊቃነ ካህናቱን አገልጋዮች እየመራ አመጣቸው። እነርሱንም “ማንን ትፈልጋላችሁ” ሲላቸው “የናዝሬቱ ኢየሱስን” አሉት፣ “እኔ ነኝ” ቢላቸው ወደ ኋላቸው ተስፈንጥረው ወደቁ። በኋላ በፈቃዱ ከያዙት በኋላ እያዳፉና እየጎተቱ በሰንሰለት አስረው ወደ ቀያፋና ሐና ግቢ ወሰዱት፣ እስከ ሦስት ሰዓትም አላሳረፉትም ሲያሰቃዩት አድረዋል፣ በራሱም ላይ የእሾህ አክሊል አደረጉበት፡፡ እያፌዙ ምራቃቸውን ይተፉበትና በዘንግም ደጋግመው ይመቱት ነበር። እየተፈራረቁ ያለ ምንም ርኅራኄ ስድስት ሺህ ስድስት መቶ ስድሳ ስድስት ጽኑዕ ግርፋትን ገርፈውታል። በሊቶስጥራ አደባባይ ያንን ዕርጥብ መስቀል አሸክመው ወደ ቀራንዮ ወሰዱት። እርሱ ግን ይህን ኹሉ ግፍ ሲያደርሱበት አንድም አልተናገረም ነበር። በቀራንዮም በአምስት ጽኑዕ ቅንዋት (ሳዶር፣ አላዶር፣ ዳናት፣ አዴራ እና ሮዳስ) ቸንክረው ሰቀሉት።

በዚህች ቀን ድንግል ማርያም ልቧ በሐዘን ተሰበረ፤ ወዳጁ ቅዱስ ዮሐንስም ፍጹም ለቅሶን አለቀሰ እናቱንም እናት ትሆነው ዘንድ በእግረ መስቀሉ አደራን ተቀበለ። ኢየሱስ ክርስቶስ በሥልጣኑ ቅድስት ነፍሱን ከቅዱስ ሥጋው ለየ። ሰባት ድንቅ የኾኑ ተአምራትንም አድርጎ አምላክ መኾኑን ገለጠ። ይህም ጽኑዕ የኾነ ለሰማይ ለምድር የከበደ ነገር ሲከሰት ፀሐይ አምላኬን ዕርቃኑ እንዴት አያለሁ ብላ ጨለመች። ጨረቃ ደም ኾነች፣ ከዋክብቱም ረገፉ፣ ንዑዳን ክቡራን ንጹሐን መላእክትም ትዕግሥቱን እያደነቁ በጽኑዕ ሐዘንና መደነቅ ከቅዱስ ዕፀ መስቀሉ ፊት እንደሻሽ ተነጠፉ። ዐሥራ አንድ ሰዓት በሆነም ጊዜ ዮሴፍና ኒቆዲሞስ ከታላቅ ክብርና ሐዘን ጋር ቅድስት ሥጋውን ከመስቀሉ አውርደው በክብር ገንዘው በአዲስ መቃብር ቀበሩት። በሦስተኛውም ቀን እንደተናገረ ተነሣ።

በዛሬዋ ቀን ቤተ ክርስቲያን የመድኃኔለምን የስቅለት በዓል በደማቁ ታከብራለች፤ ይህም የለውጥ በዓል ነው፡፡ ጌታችን መድኃኒታችን እየሱስ ክርስቶስ ደሙን ያፈሰሰው ሥጋውን የቆረሰው መጋቢት ፳፯ ቀን ነው፤ ይህ በዓል ግን በዐቢይ ጾም ስለሚውል በዐቢይ ጾም ሐዘን እንጂ ደስታ ስለሌለና በዓል ማክበር ስለማይፈቀድ፤ ወደ ጥቅምት ፳፯ ተዛውሮ እንዲከበር ቅድስት ቤተ ክርስቲያን ሥርዓት ሠርታልናለች፡፡
መጋቢት ፳፯ ቀን ኢየሱስ ክርስቶስ በመስቀል በተሰቀለ ጊዜ፤ የተሰቀለው የክብር ባለቤት ሰማይን የፈጠረ ነውና ፀሐይ ጨልማለች፣ ጨረቃ ደም ሆኗል፣ ከዋክብት ረግፈዋል። የተሰቀለው የክብር ባለቤት ምድርንም የፈጠረ ነውና በምድር የቤተ መቅደሱ መጋረጃ ከላይ እስከ ታች ለኹለት ተቀዷል፤ ምድር ተናውጣ ዐለቶች ተሠንጥቀዋል፤ መቃብራት ተከፍተዋል፤ ከ፭፻ በላይ ሙታን ተነሥተዋል (ማቴ ፳፯ )፡፡ “አዳምን የፈጠሩ እጆች በመስቀል ቀኖት ተቸነከሩ ወዮ፤ በገነት የተመላለሱ እግሮች በመስቀል ቀኖት ተቸነከሩ ወዮ፡፡” እንዲል ቅዳሴ ዮሐንስ አፈወርቅ በዝክረ ጥንተ ስቅለቱ በጥቅምት ፳፯ በመስቀል የተደረገልንን አስበን እናመሰግነዋለን፡፡ በዚሁ ቀን ዛሬዋ ቀን ቤተ ክርስቲያን የመድኃኔለምን የስቅለት በዓል በደማቁ ታከብራለች፡፡
አቡነ መብዓ ጽዮን

በዚህች ቀን ኢትዮጵያዊው ጻድቅ አቡነ መብአ ጽዮን የእረፍት ቀናቸው ነው፤ ትውልዳቸው ሸዋ ትጉለት ውስጥ ነው እኚህ ጻድቅ በጣም የሚታወቁበት ተጋድሎ አላቸው፤ ይህም ዓርብ ዓርብ ቀን የጌታችንን ሞቱን ለማሰብ ትልቅ ድንጋይ በጀርባቸው አዝለው እልፍ እልፍ እየሰገዱ ማታ ላይ ኮሶ ይጠጡ ነበር፤ ሐሞት መጠጣቱን ለማሰብ፤ ከጽድቃቸው ብዛት የተነሣ መቋሚያቸውን ቢተክሉት ሎሚና ትርንጎ አፈርቷል፡፡

አባ መብዓ ጽዮን በ፲፭ኛው መቶ ክፍለ ዘመን ልጅ በማጣታቸው በጾምና በጸሎት ፈጣሪያቸውን ከሚለምኑ ባልና ሚስት ተወለዱ። የንቡረ እድ ሳሙኤል ረባን የሆነው መብዓ ጽዮን አባቱ እስከ ዳዊት ያለውን ትምህርት አስተማረውና ዲቁናን ተቀበለ። ልጁ የትምህርት ዝንባሌ እንዳለው አባቱ ተረድቶ ቤተ ማርያም ከሚባለው ደብር ወስዶ ተክለ አማኅጸኖ ከሚባል የቅኔ መምህር ዘንድ አስገባው። በዚያም ቅኔና እና ሌሎች የቤተ ክርስቲያን ዕውቀቶችን ገበየ።

አባ መብዓ ጽዮን አባ ገብረክርስቶስ ጋር በመቀመጥ ሥርዓተ ምንኩስናን ካጠኑ በኋላ ከአባ ገብርኤል ዘንድ ሄደው የቅስናን ማእረግ ተቀበሉ። ከዚያም በኋላ በአበው ሕግ በምንኩስና ተወስነው፤ በበአታቸው ሆነው ‹‹ጌታዬ ኢየሱስ ክርስቶስ ሆይ የዕለተ ዓርቡን መከራህን አሳየኝ፤ ስለራሴ ፈጽሞ አለቅስ ዘንድ›› ብለው በጸልዩ ጊዜ “መከራ መስቀሉን ለማየት ትፈቅዳለህን?›› ብሎ ጠየቃቸው። ጻድቁ አባ መብዓ ጽዮንም ‹‹አዎ አይ ዘንድ እወዳለሁ” ሲሉ ለጌታቸው መለሱለት። ያን ጊዜም የጌታችን የኢየሱስ ክርስቶስ ዕፀ መስቀል ተተከለ። በመስቀሉ ላይም እጆቹና እግሮቹ ተቸንክረውና ተዘርግተው ታዩ ፤በራሱ ላይም የእሾህ አክሊል ደፍቶ ነበር። ጌታችን ለአባ መብዓ ጽዮንም ታያቸው። ከዚህም በኋላ አባ መብዓ ጽዮን የጌታችን የመድኃኔዓለምን ሕማሙን፣ መከራውን፣ ግርፋቱን፣ እስራቱን በጠቅላላ ፲፫ቱን ሕማማተ መስቀል በማሰብ ጀርባቸውን በአለንጋ ይገርፉ፤ ራሳቸውንም በዘንግ ይመቱ ነበር። የጌታን መከራ መስቀል እያሰቡ ዐይኖቻቸው አስከሚጠፉ ድረስ ያለቅሱ ነበር። ጌታችን ግንደ መስቀሉን (የመስቀሉን ግንድ) አንደተሸከመ በማሰብ ትልቅ ድንግያ ተሸክመው ይሰግዱ ነበር።

መራራ ሐሞት መጠጣቱን በማሰብ ዓርብ ዓርብ ኮሶ ይጠጡ ነበር። ጻድቁ አባ መብዓ ጽዮንም እንደ ዮሐንስ ወንጌላዊ የጌታችንን መከራ መስቀል እያሰቡ ከዓለም ተድላና ደስታ ተለይተው በትምህርት፣ በትሩፋት ፣ በገድል ጸንተው ኖረዋል። የጻድቁ መታሰቢያ በዓል በየዓመቱ ጥቅምት ፳፯ ቀን ከመድኃኔዓለም የስቅለት በዓል ጋር ይከበራል።

አባ ጽጌ ድንግል

በ፲፬ኛው መቶ ክፍለ ዘመን የነበረ ሊቅ ሲኾን፤ አባ ጽጌ ድንግል (ጽጌ ብርሃን) ሀገሩ ይፋት ሃይማኖቱ ኦሪት ነበረ፡፡ በንጉሥ ሰሎሞን ፈቃድና በካህኑ አዛርያስ መሪነት ታቦተ ጽዮንን ከኢየሩሳሌም ይዘው ወደ ኢትዮጵያ ከመጡትና የብሉያት መጻሕፍት ሊቃውንት ከነበሩት ከ318 ሌዋውያን (ከቤተ እስራኤላውያን) ነገድ ነው፡፡ የተወለደውም በሰሜን ሸዋ በይፋት አውራጃ ውስጥ ነው፡፡

አቡነ ዜና ማርቆስም ጽጌ ብርሃንን ለመዓርገ ምንኵስና አበቃው፤ የአባ ጽጌ ብርሃንም ጽጌ ድንግል የሚል ቅጽል ስም አለው፣ አባ ጽጌ ብርሃንም በወሎ ክፍለ ሀገር በወራይሉ አውራጃ፣ ልዩ ስሙ ደብረ ሐንታ ለሚባለው ገዳም ከጓደኛው ከአባ ገብረ ማርያም ጋር እንደ አንድ ቃል ተናጋሪ፣ እንደ አንድ ልብ መካሪ በመሆን፣ እመቤታችንንና ፈጣሪ ልጇን በጎ በጎ መዓዛ ባላቸው አበባዎችና ፍሬዎች እየመሰለ የሚያመሰግነውን ማኅሌተ ጽጌ የተባለውን ድርሰት፣ በአባቷ በዳዊት መዝሙር መጠን 150 አድርጎ ደረሰ፡፡ ፍሬ ከአበባ አበባም ከፍሬ እንደሚገኝ ኹሉ በማኅሌተ ጽጌ እመቤታችንን በአበባ፥ ጌታችን በፍሬ፤ ወይም እመቤታችንን በፍሬ፥ ጌታችን በአበባ እየተመሰሉ የሚመሰገኑበት ምስጋና ነው።

አባ ጽጌ ብርሃንና አባ ገብረ ማርያምም የዘመነ ጽጌ የማኅሌት አገልግሎትን ሳይለያዩ በሰላምና በፍቅር (በአንድነት) አገልግለዋል፣ ማለትም አንድ ዓመት አባ ገብረ ማርያም የክረምት መውጫና የዘመነ ጽጌ ዋዜማ በሆነው መስከረም ፳፭፣ ቀን ከደብረ ሐንታ መጥቶ ገዳመ ጽጌ (ደብረ ብሥራት) ገብቶ ከመስከረም ፳፮ ቀን እስከ ኅዳር ፭ ቀን ያለውን የዘመነ ጽጌ የ፵ ቀን አገልግሎትን ከአባ ጽጌ ብርሃን ጋር ፈጽሞ ኅዳር ፰ ቀን ወደ ደብረ ሐንታ ይመለሳል፤ በሚቀጥለው ዓመት ደግሞ አባ ጽጌ ብርሃን ከገዳመ ጽጌ (ከደብረ ብሥራት) ወደ ደብረ ሐንታ ሄዶ እንደዚሁ እንደ አባ ገብረ ማርያም 40ውን ቀን አገልግሎ ይመለሳል፡፡


የእግዚአብሔር ቸርነት የእመቤታችን ቅድስት ድንግል ማርያም አማላጅነት፤
የአቡነ መብዓ ጽዮን፣ የአባ ጽጌ ድንግል ጸሎት፣
ረድኤት በረከታቸው አይለየን፡፡ አሜን፡፡
ወስብሐት ለእግዚአብሔር

ዋቤ መጻሕፍት
✍️ ድርሳነ ማኅየዊ
✍️ ስንክሳር ዘወርኀ ጥቅምት
✍️ የማኅሌተ ጽጌ ትርጉምና ማብራሪያው
✍️ ገድለ አቡነ መብዓ ጽዮን

በጉራጌ ሀገረ ስብከት በመንበረ ጵጵስና ወረዳ ቤተ ክህነት ለሕጻናት ማቆያ እና ለተለያየ የገቢ ማስገኛ የተገነባው ሕንፃ ተጠናቆ ሥራ መጀመሩ ተገለጸ ፡፡

የጉራጌ ሀገረ ስብከት ሊቀ ጳጳስ ብፁዕ አቡነ መልከ ጼዴቅ ሣልሳይ በጉራጌ ሀገረ ስብከት በመንበረ ጵጵስና ወረዳ ቤተ ክህነት በጉብሬ ደብረ ሰላም ቅዱስ እስጢፋኖስ ቤተ ክርስቲያን የአካባቢው ኗሪ በሆኑት በጎ አድራጊ የተገነባውን የሕጻናት ማቆያ እና የገቢ ማስገኛ ሕንፃ ሥራ አስጀምረዋል።

ብፁዕነታቸው በጎ አድራጊዎችን አመስግነው ሁላችንም የሚጠበቅብንን ብናበረክት ቤተ ክርስቲያን የተከበረውን ንዋየ ቅድሳት በየመንገዱ ዘርግታ አትለምንም ነበር ሲሉ ገልጸዋል፡፡

ሕጻናት በዚህ ቅዱስ ስፍራ መዋላቸው ታላቅ እድል ነው ያሉት ብፁዕነታቸው ወላጆች ልጆቻችሁን ወደ ቤተ ክርስቲያን በማምጣት ምጽዋት መስጠትን ልታለማምዷቸው ይገባል ሲሉ አሳስበዋል፡፡

በመርሐ ግብሩ ላይ የሀገረ ስብከቱ እና የወረዳ ቤተ ክህነቱ የሥራ ኀላፊዎች፤ የደብሩ አገልጋዮች እና የአካባቢው ምእመናን ተገኝተዋል ሲል ሀገረ ስብከቱ ዘግቧል፡፡

https://youtu.be/7X4KNxoDigQ

https://youtu.be/-CrVHiP4z38

https://youtu.be/2rRwOnmOnc4

የኦሬንታል አብያተ ክርስቲያናት የጋራ ጉባኤ እና ሥርዓተ ቅዳሴ መርሐ ግብር (Oriental Orthodox Concelebration) የኦርቶዶክስ አብያተክርስቲያናት ቋሚ ጉባኤ (SCOOCH) አሰናጅነት በሰሜን አሜሪካ ኒውጀርሲ የማላንካራ ኦርቶዶክስ ቤተክርስቲያን (Old Tappan) ተካሄደ፡፡

በዚህም ሥነ ሥርዓት የኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ ዋና ጸሐፊ እና የኒውዮርክ ሀገረ ስብከት ሊቀ ጳጳስ ብፁዕ አቡነ ጴጥሮስን ጨምሮ የአርሜንያ ኦርቶዶክስ ቤተክርስቲያን ;የኮፕቲክ ኦርቶዶክስ ቤተክርስቲያን ; የኤርትራ ኦርቶዶክስ ተዋሕዶ ቤተክርስቲያን ; የሶርያ ኦርቶዶክስ ቤተክርስቲያን ሊቃነ ጳጳሳት ተሳትፈውበታል።
ዝግጅቱን ያሰናዱት ብፁዕ አቡነ ሞር ቴቶ ዬልዶ የማላንካራ ኦርቶዶክስ ቤተክርስቲያን ሊቀ ጳጳስ ናቸው፡፡ በመድረኩ ለብፁዕ አቡነ መቃርዮስ በሰሜን አሜሪካ ለኤርትራ ኦርቶዶክስ ተዋሕዶ ቤተክርስቲያን ሊቀ ጳጳስ እውቅና ሰጥቷል፡፡
በዝግጅቱ ከ400 በላይ ካህናት ዲያቆናትና ምእመናን ተገኝተዋል፡፡ የኦርቶዶክስ አብያተ ክርስቲያናት ቋሚ ጉባኤ The Standing Conference of Oriental Orthodox Churches in America እኤአ 1973 ዓ.ም የተመሠረተ ሲሆን የጋራ ቅዳሴ መርሐ ግብር በMORAN TV በቀጥታ ሥርጭት ተላልፏል፡፡
የኦርቶዶክስ አብያተ ክርስቲያናት በጋራ ጉዳዮች ላይ ምክክር የሚያደርጉበት ጉባኤ ሲሆን ; ባለፉት ዓመታት በርካታ የኦርቶዶክስ ቤተክርስቲያን የሃይማኖት አባቶች በየቤተ ክርስቲያኖቻቸው የጉባኤው አባል ሆነው በመወከል ለድርጅቱ እድገትና መስፋፋት ትልቅ አስተዋፅዖ አድርገዋል። በጉባኤው በርካታ የሥነ መለኮት ጉዳዮች ላይ ምክክር ሲያደርግ ቆይቷል።

EOTC

አሳዛኝ ዜና
በትግራይ ክልል የሚገኙ ሊቃነ ጳጳሳት የራሳቸውን ሲኖዶስ ማቋቋማቸውን ገለጹ

በትግራይ ክልል አህጉረ ስብከት የሚገኙ ሊቃነ ጳጳሳት፣ ያቋቋሙት “መንበረ ሰላማ ከሣቴ ብርሃን ከፍተኛ ቤተ ክህነት” ትላንት ባወጣው መግለጫ፣ “የትግራይ ኦርቶዶክስ ተዋህዶ ቤተክርስትያን ሲኖዶስ” በሚል መቋቋሙን አስታወቀ።

ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ በዚህ ላይ ጉዳይ ላይ እስከ አኹን የተባለ ነገር የለም። ኾኖም ቤተ ክርስቲያኒቱ በተለያዩ ጊዜያት ባወጣቻቸው መግለጫዎች ግን፥ እንቅስቃሴው ቀናኖውን የሚፃረር ሕገ ወጥ እንደኾነ አውግዛ፣ “አንድ መንበር አንድ ሲኖዶስ እና አንድ ፓትርያርክ” የሚለውን የቤተ ክርስቲያኗ አስተምህሮ እና ቀኖና ሊከበር እንደሚገባው በአጽንዖት አሳስባ ነበር።
(ዘገባው የአሜሪካ ድምፅ VOA ነው)

https://youtu.be/ksRzw9mjux8

https://youtu.be/uJpl4LzVb-w

https://youtu.be/9OdPJ7aE9YY

https://youtu.be/Q2gQ4-0eUro

የየኔታ ደጉ ዓለም ካሳ የተወደዱ ንግግሮች!

አንዳንድ ሰው ከእግዚአብሔር ጋር የሚታረቀው በድህነቱ ብቻ ነው፡፡

ደስታ ከመንፈስ ቅዱስ እንጂ ከገንዘብና ከቅንጦት ኑሮ አይደለም፡፡

የበረሀ አባቶችንና በምቹ አልጋ የሚገላበጠውን
አወዳድሩ፡፡ የትኛው "እህ"ይላል ?

ሰይጣን እንደ ውሻ ውጣ ስትሉት ይወጣል፤ ነገር ግን ቤቱ ሲከፈት ተመልሶ ይገባል፡፡

እግዚአብሔር ከተጣላህ 900 ሐኪም ቢሰለፍ አያድንኅም፡፡

የቆሸሸ ነፍስ እንኳን በውኃ በበረኪናም አይጠራም፡፡

መሳርያውን በተጠንቀቅ ያልያዘና እንቅልፉን የሚለጥጥ ሰው አንድ ቀን መሳርያ በያዘው ሠራዊት መማረኩ አይቀርም፡፡

ሕይወት በገንዘብ ቢሆን ኖሮ ባለጸጋ ሁሉ ከመቶ ዓመት በኋላ እየከፈለ በኖረ ነበር፡፡

ሰው ለመብል ብቻ ተፈጥሮ ቢሆን ሁለትና ከዚያ በላይ ሆድ ደግሞም ማስገቢያ ቀዳዳ በተሰጠው ነበር፡፡

አንድ ከፋብሪካ የሚመረት ዕቃ ማንዋል እንዳለው ሁሉ ወንጌልም ሰው የመሆን ማንዋል ናት፡፡

መጠየቅና መጠራጠር መናፍቅነት አይደለም፤ በዚያ መቅረት ግን …

ጸናጽል ቢሞላ ኖሮ ብዙ ባልተጸናጸለ ነበር፡፡
ፎርዖንን ያታለሉትና ያስታበዩት ኢያኔስና ኢያንበሬስ የተባሉ ጠንቋዮች ናቸው፡፡

ክርስቶስ ትሕትናን ለማስተማር እንጂ በሆሳዕና አህያን ለመንዳት አልመጣም፡፡

እናት ልጇ በሽንትና በጭቃ ተጨማልቆና ቆሽሾ ብታየው በዚያ አትተወውም፡፡ አጥባ ትስመዋለች እንጂ፡፡ እግዚአብሔርም…

ጥርስ ያበቀለ ሰው ሁል ጊዜ እያላመጡ አያጐርሱትም፡፡ ምሥጢራትን ያደላደለ ሰውም …

ገንዘብ ካላወቁበት ክፉና ጨቋኝ ጌታ ነው፤ ካወቁበት ግን መልካም አገልጋይ ነው፡፡

የሐዋርያት ኪስ መንፈስ ቅዱስ ነበር፤ የዘመኑ ግን..

አንድ ሰው ለአበበና ለከበደ ሊገዛ አይችልም፤ በአንድ ቀን አንዱ ወደ መቀሌ አንዱም ወደ ጐዴ ሊልከው ይችላልና፡፡

ዝንጀሮ ከሰው አናት የሚወጣው ወንድሜ ቅማል በላው ብሎ ሳይሆን ቅማልን ለመብላት ነው፡፡

https://youtu.be/BfPJkqMk_2c

https://youtu.be/e94qysdWHnY

የቅዱስ ሲኖዶስ ምልዓተ ጉባኤ የመክፈቻ ጸሎት መረሐ ግብር በመንበረ ፓትርያርክ ቅድስተ ቅዱሳን ማርያም ገዳም በመካሄድ ላይ ይገኛል።

በጸሎት እናግዛቸው መልካም ውሳኔዎች ይወሰኑ ዘንድ። 🙏🙏🙏🙏

ዳግማዊ ግርማ ወንድሙ የ“አጥማቂ“ ሔኖክ ተፈራ (ዘሚካኤል) ነገር

ወዳጄ ሕዝብን መብላትና መጋጥ ከፈለክ “ፈዋሽ ነኝ… እግዚአብሔር አሳየኝ መንገዱን ገለጠልኝ” ብለህ ቅረብ!

-ዳግማዊ ግርማ ወንድሙ “አጥማቂ“ ሔኖክ ተፈራ(ዘሚካኤል) አይነት በዩቲዩብ “ፈዋሽ ነን እግዚአብሔር ገለጠልኝ” በማለት የሚያስተላልፉትን አጋንንትን የሚሰብክ ትምህርት እና የሐሰት ሰይጣናዊ ምስክርነትን ማድመጥ አይጠቅመንም፡፡ ማቆም ይገባናል፡፡

-በኢትዮጵያ ኦርቶዶክስ ተዋሕዶ ቤተ ክርስቲያን በዚህ ዘመን አንዳንድ የፈውስ ዛር ሰፍሮብኛል፣ መተት አባራሪ ነኝ በማለት በፈዋሽነት ስም ከውስጥ እስከ ውጭ ድረስ በዩቲዩብ በምእመናን ላይ ፍርሐትና ጥርጣሬ ለማንገስ የሚያላግጡ “ፈዋሽ ነኝ… እግዚአብሔር አሳየኝ መንገዱን ገለጠልኝ” የሚሉ ወገኖች አሉና ብንጠነቀቅ መልካም ነው፡፡ ለምሳሌ በዩቲዩብ የቀሲስ ሔኖክ ተፈራ የሚባልን ሰው “ትምህርት” የሚከተል ካለ አጋንንት፣ደብተራ፣ጠንቋይ፣ሟርተኛ፣ ዛር፣ ቡዳ፣ መተተኛ፣ ልክፍት፣ ዓይነ ጥላ፣ የአየር አጋንንት፣ከእናት አባት የመጣ ዛር፣… በሚሉ የጋኔላም ትምህርት መገለጫ በሆኑት ቃላትን ሲጋትና ሲከታተል መክረሙ ነው፡፡ ሕዝቡ ለምን ይሆን በዩቲዩብ ፈውስ በማለት የሚለቁትን እና አጋንንታዊ ስብከትን ማድመጥና ማየት የመረጠው? በቀን Jun 25, 2022 “የፈውስ አገልግሎት ክፍል 4” በሚለው ርእስ በዩቲዩብ በቀሲስ ሔኖክ ፊት የቀረበች አንዲት ምስኪን እህት “ነጋዴዎች ነን አለችና፡፡ ሁሌ ከባለቤቴ ጋር ያንተን ከፍተን እናያለን አለች፡፡” ያሳዝናል፡፡ እንደዚች እህት በጣም ብዙ እህቶች ከአጋንንታዊ ትምህርት የሚያላቅቃቸው የሚፈልጉ ያሉ ይመስለኛል፡፡ ብዙ ሰዎች “ፈዋሽ ነን” በሚሉት ሰለባ እየሆኑ እንዳለ መገመት ይቻላል፡፡ የምጠይቀው ከወንዶች ይልቅ ለምንድር ይሆን ሴቶች እህቶችና እናቶች የፈዋሽ ነኝ ባዮች ሰለባ እየሆኑ ያሉት? በጣም ማሰብና መፍትሔ መፈለግ ያለብን ይመስለኛል፡፡ ወገኖቸ ጠንቋይ መተተኛ ከሚሉ ኮተታሞች ትኩረታቸው ያልሆነ ኢየሱስ ክርስቶስን የትምህርታቸው ማዕከል በማድረግ በዩቲዩብ የሚያስተምሩ የኦርቶዶክስ ቤተ ክርስቲያን መምህራንን እንወቅ እናሳውቅ፡፡

-ቪዲዮዎችን በአግባቡ ለተከታተለ ቀሲስ ሔኖክ ተፈራ(ዘሚካኤል) ማለት በብዙ መንገድ ዳግማዊ ግርማ ወንድሙ ማለት ነው፡፡ በተለይ ሴቶች እሰኪ ልብ ግዙ የማንም መቀለጃ አትሁኑ፡፡ “ፈዋሽ ነኝ” የሚሉ ጋኔል ሰባኪን የሚከታተለው ብዛቱ ይገርመኛል፡፡ እስኪ የማኅበረ ቅዱሳንና መሰል ዩቲዩቦችን የሚተላለፉትን ጠንካራ ትምህርቶችንና መልእክቶችን ተመልከቷቸው፡፡ በነገራችን ላይ የማኅበረ ቅዱሳን እና መሰል ዩቲዩብን የሚከታተለውን አጠቃላይ አጋንንታዊና የሐሰት ትምህርት ከሚያደምጠው ተመልካች ብንደምር በግማሽ እንኳን አይታይም አይደመጥም ማለት የሚቻል ይመስለኛል፡፡ በትክክል ማድመጥና መማር የሚገባን ግን የትኛውን ዩቲዩቦችን ነበር? ወዳጄ ሕዝብን መብላትና መጋጥ ከፈለክ “ፈዋሽ ነኝ …እግዚአብሔር አሳየኝ መንገዱን ገለጠልኝ፡” ብለህ በዩቲዩብ ሆነ በአካል ቅረበው!!

-ለምሳሌ ያህል በቀን May 27, 2022 ቀሲስ ሔኖክ ተፈራ በዩቲዩብ ከተናገራቸው በከፊል የሚከተለውን ማንሳት ይቻላል፡፡

1.) "ደስ ይበላችሁ የመተት እድሳት ማስቆም ተቻለ! የመተት እድሳት ማስቆሚያ የማያዳግም መፍትሄው ተገኘቷል!"

2.) “የመተት እድሳት ከዛሬ ጀምሮ ይቆማል፡፡ ምንድር ነው መፍትሔው እግዚአብሔር ይህን ማስቆም አይቻልም ወይ እግዚአብሔር ሆይ እስከ መቸ ድረስ ትተወናለህ እግዚአብሔር አሳየኝ …እግዚአብሔር አሳየኝ መንገዱን ገለጠልኝ፡፡ በእድሳት የተቸገራችሁ መፍትሔውን ዛሬ እነግራችኋለሁ፡፡ “

3.) “እግዚአብሔር የገለጠልኝን ነው ለእናንተ የምነግራችሁ፡፡ እግዚአብሔር ከገለጠልኝ ጀምሮ በዚህ በመተት እድሳቱ የሚሰቃዩ ሰዎችን በእግዚአብሔር ኃይል አግዟቸው የመተት እድሳቱ አቁሞላቸዋል፡፡”

4.) “ለመተት አድሳት የመጨረሻው ብቸኛ መፍትሔ አጋንንቱን ወደ መጣበት መመለስ ነው፡፡”

5.) “350 ሺ ብር በትዳርና በንብረት ላይ የተላከና በእድል የተሰራ መተት ተሸነፈ”

6.) ቀሲስ ሔኖክ ሰይጣን አለባት የተባለች አንዲት ምስኪን ሴት ቃለ መጠይቅ ሲያደርግ ምን ብላ መለሰች መሰላችሁ “አሜሪካ የምትኖረው ቄስ ሔኖክ የሚባለውን ላይክ አድርጊ ስልካቸውን እየፈለግን ነው አለች፡፡” ላይክ አድርጊ ሃሃሃ

7.) በቀን Nov 24, 2021 ካስተማረው በከፊል “በትዳራችን መተት እንደተደረገብን እንዴት እናውቃለን ሚስት መጥፎ ሽታ ባሏን እንዲሸታት ያደርጋል፣ በመኛታ ቤታችን በአልጋ ስር አይጥ ይበዛል፣ በየቀኑ ጭቅጭቅ፣ በትዳራችን ደስታ አልባ መሆን፣ የፍች ሐሳብና ንግግር ማድረግ…”

8.) "የመተት እድሳት ማስቆሚያ 5 ቱ ወሳኝ መንገዶች…"

-የተናገሩትን ስሜት አልባ ሐሳቦችን ስለጻፍን ፈዋሾቹ እና የፈዋሾቹ ደጋፊዎች ቅናት ነው ይላሉ፡፡ ድንቄም ቅናት አያ፡፡ “ሰይጣንን ቃለ ምልልስ በማድረግ ፈወስን” በሚሉ ሐሰተኞች ፈጽሞ የሚቀና የለም፡፡ መንፈሳዊ ቅናት የሚቀናው የሚናገሩትንና የሚያደርጉትን በሚያውቁ በአብነት ትምህርት በአግባቡ ተምረው በፆምና በጸሎት ተቀጥቅጠው የሚችሉትን ያህል በተረጋጋ መንፈስ ቤተ ክርስቲያንን አገልግለው ያለፉና አሁን ባሉ እውነተኛ ኦርቶዶክሳዊያን መምህራን ነው፡፡ ለምሳሌ በማን ትቀናለህ? ብባል “እግዚአብሔር የገለጠልኝን ነው ለእናንተ የምነግራችሁ” በሚል “ፈዋሽ ነኝ” በማለት በሚያጭበረብረው ሳይሆን የእቅበተ እምነት ጠበቃ በሆኑት አንብበው አንብበው ባልጠገቡት ከእውነተኛ ጸሎታቸው የተነሳ ልጃቸውን ከሞት ባስነሱት መልአከ ብርሃን አድማሱ ጀንበሬ እና መሰሎቹ እቀናለሁ፡፡

-ወገን እባካችሁ ጠቃሚ የሃይማኖት ትምህርት ያለበትን የኢትዮጵያ ቤ/ን ቲቪ እና ዩቲዩቦችን ለመማር እንጠቀም፡፡ “ፈዋሽ ነን እግዚአብሔር ገለጠልኝ” በሚሉ የሚያስተላልፉትን አጋንንታዊ ትምህርት እና የሐሰት ሰይጣናዊ ምስክርነትን ማድመጥ አይጠቅመንም፡፡ እናቁም፡፡

✍️yosef fisiha እንደጻፈው

https://youtu.be/9o3TQ5RRgVY

https://www.youtube.com/watch?v=6YEeRr3F4q8

https://youtu.be/YXd-jf3iYyk

https://t.me/divineliturgy12

ታላቅ ደስታ!

ኀዘን ያካፈሉትን ወገን ደስታን እንዴት ይደብቁታል!?

ያ የጮኽንበት፣ ብዙዎቻችን በጋራ የቆምንበት፣ አስጨናቂው ችግር መፍትሄ ተሰጥቶታል! ሊቀ ሊቃውንት ስምዐ ኮነ መልአክ ያስተምሩበት የነበረ ጉባኤ ቤት ወደ ቀደመ ክብሩ ተመልሷል!

መምህራችንም ወደ ወንበራቸው ተመለሰዋል! ተመስገን! ብፁዕ አቡነ አብርሃም የልጆችዎን ድምፅ ሰምተው ጉባኤ ቤቱን ወደ ሚመጥነው ልዕልና ስለመለሱት እጅጉን እናመሰግናለን።

ድሮም ጩኸታችንን ወደ እርስዎ ያበረታነው ይህንን መፍትሄ እንደሚሰጡን ስለምናውቅ ነበር። በዚህ ችግር ላይ ያዘናችሁ በጉባኤ ቤቱ መበተን የተከዛችሁ፤

ውግንናችሁን ለቤተ ጉባኤው ያአድርጋችሁ ወገኖቻችንና እንዲሁም ሁሉን ነገር ትታችሁ ቤተ ክርስቲያንን ለማገልገል ከምትሳሉበት ተቋም በግፍ የተባረራችሁ ደቀ መዛሙርት ሆይ እንኳን ደስ አላችሁ!

መምህር ምስጢሩ ታዬ እንደጻፉት

https://youtu.be/0yTSIvyyJ9A

የፌደራል ፍርድ ቤት ውሳኔ

እንዴት አደራችሁ?

ግብዣ👇👇👇👇

https://t.me/+so-wOHmNj-w4Nzk0

https://youtu.be/ZzXSeJ4NmJI?si=rP5DkI5mXa1mrSVf

በመስቀል ጉዳይ ከትውፊታውያን አብያተ ክርስቲያናት የምንጋራቸው ምንባባትና ሥርዓታት
--
1.ውዳሴና ክብረ መስቀል
ውዳሴ መስቀል የሚባል የአባ ጊዮርጊስ ዘጋስጫ ድርሰት አለ፡፡ በእንግሊዝኛ ከምናገኘው Exaltation of the Holy Cross የሚል የምሥራቃውያን ትውፊት ተዛምዶ ሊኖረው ይችል ይሆናል፡፡ የነገረ መስቀል ታሪክና ድርሰቶች በምሥራቁም በምዕራቡም ተቀራራቢነት አላቸው፡፡ ከመስቀል ጋራ የተገናኙ ተዛማጅ ምንባባት አሉን፡፡ እንጥቀስ፡- “ለመስቀልከ ንሰግድ ኦ ሊቅነ፣ ወለትንሣኤከ ቅድስት ንሴብሕ ኵልነ፣ ይዕዜኒ፡፡ ወዘልፈኒ - መምህራችን ሆይ! ለመስቀልህ እንሰግዳለን፣ ቅድስት ትንሣኤህን እናወድሳለን፣ ዛሬም ዘወትርም - Before thy Cross, we bow down in worship, O Master, and thy holy resurrection we glorify” ቅዱስ ቴዎፍሎስ ዘእስክንድርያ ‹‹The cross is the helper of the wretched, assisting all the oppressed.›› ሲል የደረሰው ድርሰት በቅ/ያሬድና አባ ጊዮርጊስ ቃል በቃል ‹‹ለአግብርት፡ ግዕዛን፣ ጽንዕ፡ ለድኩማን፡ መስቀል፡፡ - መስቀል ለባሮች ነጻነት፣ ለደካሞችም ረዳት ነው›› በሚል ሰፍሯል፡፡

በበረከት አዝመራው ( Bereket Azmeraw አነጋገር መስቀልን እንደ ግዑዝ ሳይሆን እንደ ሕያውና ሰማኢ ባለግዕዛን አካል አድርጎ መናገር (Personification) በእኛም በሌሎችም አለ፡፡ በፕ/ር ጌታች የተሰባሰበ የነገረ መስቀል ድርሳን፡- ‹‹ወሶበ ተቀኖከ መስቀል ምስለ እደ ክርስቶስ ክቡር፡፡ ሞተ መልአከ ሞት መኰንነ ኵሉ ፍጡር፡፡ ወሙታንሂ ተንሥኡ እምዝህር - መስቀል ሆይ! ከከበረ የክርስቶስ እጅ ጋራ ብትቸነከር፣ የፍጥረታት ሁሉ ገዢ የሆነ የሞት መልአክ ሞተ፣ ሙታንም ከመቃብር ተነሡ›› ይላል፡፡ መስቀልን እንደ ሰው ያናግረዋል፡፡ ግባጻውያን በውዳሴያቸው (Doxology) መስቀልን ግዕዛን ሰጥተው እንዲህ ያናግሩታል፡- ‹‹ We carry you, O Cross, the strength of the Christians, powerfully around our necks, and we proclaim openly. - የክርስቲያኖች ብርታት የምትሆን መስቀል ሆይ! በአንገታችን ዙሪያ አጽንተን እንይዝሃለን፤ በይፋም እንሰብክሃለን፡፡›› እንደ ሰው ያናግሩታል፡፡ ‹‹Hail to you, Praise to You, We bow down - ስብሐት ለከ፣ ንሰግድ ለከ - እናመሰግንሃለን፣ እንሰግድልሃለን›› የሚል መነሻ ያላቸው ድርሰቶች በሁላችንም ዘንድ አሉ፡፡ መስቀል ይከበራል፣ የጸጋ ስግደት ይሰገድለታል! የመስቀል ድርሰቶች ቢነጻጸሩ ዝምድናቸው ሰፊ ነው፡፡

---
2.መታሰቢያ
የመስቀል ከተዳፈነበት በንግሥት ዕሌኒ መውጣት ከሞላ ጎደል ዓለም አቀፋዊ ታሪክ ነው፡፡ አከባበሩና የሚከበርበት ቀን በመጠኑ ሊለያይ ይችል ይሆናል፡፡ መስቀል ሁለት ጊዜ ይታሰባል፡፡ መጋቢት 10 እና መስከረም 17፡፡ የመጋቢቱ ዐቢይ ጾም ወይም የኢየሱስ ጾም (ጾመ ኢየሱስ) ላይ ይውላል፡፡ (አሁን አሁን በንግሥ ዙሪያ ትውፊቱ ቢሸረሸርም) በኢየሱስ ስም በተሠየው ጾም በዓልን ያውም የአደባባይ በዓል ማክበርን ቀኖናችን አይፈቅድም፡፡ (መስቀሉንና የመስቀሉን ጌታ ልዩነት አበጥረን እናውቃለን! ብንል አጉል ትምክሕት አለመሆኑን እዚህ ላይ አስተውል!) በዓሉ የጌታን ጾም ክብር እንዳይጋፋ ተጠቃሎ መስከረም ላይ ይከበራል፡፡ መስቀል በዝክር ብቻ አይቀርም፡፡ በስሙ ቤተ ክርስቲያን ይታነጻል፡፡ ‹‹መስቀለ ኢየሱስ›› የሚባል ቤተ ክርስቲያን አለን፡፡ በወላጆቼ አካባቢ ‹‹ወር/ዕ/ያ መስቀል›› የሚባል ደብር አለ፡፡ በግብፆች፣ በምሥራቆችና በካቶሊኮች ‹‹Holy Cross Church of Coptic Orthodox Church, Holy Cross Greek Orthodox Church, Holy Cross Catholic Church›› በሚል ስም አብያተ ክርስቲያናት መትከል የተለመደ ነው፡፡
---
3.የመከበሩ ፋይዳ
መስቀል ለክርስቲያኖች የስቃይ ታሪክ ብቻ ሳይሆን ከስቃይ በኋላ የሚገኝ ድል አድራጊነት ይዘከርበታል፡፡ ተዘክሮውን Contemplation ሲሉት ሰምቻለሁ፡፡ ነገረ ድኅነት ይታሰብበታል፡፡ የድኅነት መሣሪያ (Instrument of Redemption) ይሉታል፡፡ በተደጋጋሚ እንደምንለው መስቀል የክርስትና አርማ ነው፡፡ ባንዲራ ነው፡፡ ባንዲራውን ስታይ አገርህ ትታሰብሃለች (ከፈለግህ ክልልህም ትዝ ትበልህ! ምሳሌ ነውና)፡፡ ባንዲራው ጨርቅ መሆኑ አይጠፋህም፣ አይጠፋንም፡፡ ውክልናው ግን ከፍ ይላል፡፡ የሚመጣልህ ሐሳብ ጨርቁ ከምን ተሠራ አይደለም፡፡ ለክብሩ የተከፈለው ዋጋ ነው፡፡ መስቀል ክቡር ደም ፈስሶበታል! የሌላ ደም አይደለም፡፡ የፈጣሪ ደም ነው! ‹‹አኮ ደመ ካልዕ፡ አላ ደመ ወልድ ክቡር!›› እንዲል መስተብቊዕ ዘመስቀል፡፡
---
4.ማማተብ
ማማተብን ዕድሜ ለብሔራውያንና ዓለም አቀፍ ስፖርተኞች የክርስትና ቋንቋ አድርገውታል፡፡ ስናማተብ ‹‹በስመ አብ ወወልድ ወመንፈስ ቅዱስ አሐዱ አምላክ›› እያልን ከግንባራችን ጀምረን ወደታች፣ ከዚያም ወደግራና ቀኝ እናማትባለን፡፡ ጸሎትና የእምነት አዋጅ ነው! ‹‹በሥላሴ ሦስትነትና አንድነት አምናለሁ!›› ብሎ እምነትን ማወጅ ነው፡፡ በዚህ አዋጅ ሠይጣንን እንገሥጻለን፡፡ ይህም ድንበር ተሸጋሪ ትውፊት ነው፡፡
--
5.ሥርዓቱና ደመራው
በእኛ ታሪኩ በቃል ብቻ ተነግሮ አይቆምም፡፡ መስቀሉ የወጣበት ሒደት በአደባባይ በተምሳሌት ይገለጻል፡፡ የክርስትናው የአምልኮ ጠባይ ነው፡፡ ከምዕራቡ ለየት ያደርገናል፡፡ የእኛ ከዊንን/ ክዋኔን (Performance) ሲከተል የምዕራቡ ቃላዊ ገለጻን (description) ያዘወትራል፡፡ በመስቀል ዙሪያ ጥቅሶችን እየነካኩ ‹መስቀል የተባለው እንደዚህ ነው፣ እንደዚያ ነው እንጅ ዕንጨት ማለት አይደለም› የሚል ተቃዋሚ ቢነሣ አይገርምም፡፡ ማለፍ ነው! የአምልኮ መንገዳችን ስለሚለያይ፡፡ የተግባሩን ገለጻ ጥሬ ቃልና ጥቅስ በመፍተል ለመዳኘት የሚደረግ የሚዛን መለያየት ያመጣው ጣጣ ነው፡፡ እንለፈው! ላደለው ምልጣኑ ላይ ያለቺው ንሺ (የቅብብሎሽ ዜማ) ‹‹እመኑ ብየ፡ ወእመኑ በአቡየ፡ አበርህ በመስቀልየ - በእኔ እመኑ፣ በአባቴም እመኑ፣ በመስቀሌ አበራለሁ / ጨለማውን እገፋለሁ/›› የሚል ነው፡፡
በመስቀሉ ያብራልን!

#ማስታወሻ:- የተያያዘው ቪዲዮ የግሪክ ኦርቶዶክሳውያን ሊቃውንት ስለ ነገረ መስቀል ያደረጉት ውይይት ነው፣ " ዮም መስቀል ተሰብሐ - The Cross is elevated today" ብሎ ይጀምራል።

✍️ደብተራ በአማን ነጸረ እንደጻፈው

እንኳን ለብርሃነ መስቀሉ በሰላም አደረሳችሁ❗

ከኢትዮጵያ ኦርቶዶክስ ተዋሕዶ ጠቅላይ ቤተ ክህነት የመስቀል ደመራ በዓል ፍፁም መንፈሳዊ በሆነ መልኩ ተከብሮ መዋል ይችል ዘንድ ሁሉም ባለድርሻ አካል የሚጠበቅበትን ሁሉ እንዲያደርግ መግለጫ ተሰጠ።
(#EOTCTV መስከረም ፲፬/፳፻፲፯ ዓ.ም )

ከኢትዮጵያ ኦርቶዶክስ ተዋሕዶ ጠቅላይ ቤተ ክህነት የመስቀል ደመራ በዓል ፍፁም መንፈሳዊ በሆነ መልኩ ተከብሮ መዋል ይችል ዘንድ ሁሉም ባለድርሻ አካል የሚጠበቅበትን ሁሉ እንዲያደርግ መግለጫ ተሰጠ።
ብፁዕ አቡነ አብርሃም የመንበረ ፓትርያርክ ጠቅላይ ቤተክህነት ዋና ሥራ አስኪያጅ፣ የባህር ዳርና የሰሜን ጎጃም አህጉረ ስብከት ሊቀ ጳጳስ የ፳፻፲፯ ዓ.ም የመስቀል ደመራ በዓልን በማስመልከት የእንኳን አደረሳችሁና የቅድመ ጥንቃቄ መልዕክት አስተላለፉ።

ብፁዕ ጠቅላይ ሥራ አስኪያጁ በዚሁ መልዕክታቸው ለመላው ሕዝበ ክርስቲያን እንኳን ለ፳፻፲፯ ዓ.ም የመስቀል ደመራ በዓል በሰላምና በጤና አደረሳችሁ በማለት በዓሉ በድምቀት፣ ባማረና በሰመረ መልኩ ተከብሮ እንዲውል ሕዝበ ክርስቲያኑ በንቃትና በኅብረት በመሆን ከጸጥታ አካላትና ቤተክርስቲያኒቱ ለዚሁ ዓላማ ካቋቋመቻቸው የኮሚቴ አባላት ጭምር በመተባበር እንዲሠራ አደራ ብለዋል።
ሕዝበ ክርስቲያኑ ከበዓላችን መንፈሳዊ ሥርዓት ውጪ የሆኑ መልዕክቶች፣ አለባበሶች እንዲሁም የቤተክርስቲያኒቱ መገለጫ ከሆኑ ዓርማዎች ውጭ መያዝ አይገባውም ያሉት ጠቅላይ ሥራ አስኪያጁ በዓሉ ሃይማኖታዊና መንፈሳዊ እንደመሆኑ መጠን ቤተክርስቲያኒቱን ከማይገልጹ ሆታዎችና ጭፈራዎች እንዲርቅ በአጠቃላይ የመስቀል ደመራ በሚከበርባቸው ቦታዎች ሁሉ ያልተፈቀዱ ነገሮችን ይዞ መገኘት ፍጹም መንፈሳዊ የሆነውን በዓላችንን የሚያደበዝዘው ስለሆነ ጥንቃቄ ማድረግ ይገባል ብለዋል።

አያይዘውም ብፁዕ ጠቅላይ ሥራ አስኪያጁ ወጣት የሰንበት ትምህርት ቤት ልጆቻችን ከሚያቀርቡት መንፈሳዊ ትርኢትና ዝማሬ ጎን ለጎን አካባቢያቸውን በመቆጣጠር በዓላችንን በሰላም እንዳናከብር የሚያደርጉ ሁኔታዎች እንዳይፈጠሩ በጥንቃቄ መጠበቅ ይኖርባቸዋል ብለዋል።

በሌላ መልኩም የሌሎች እምነት ተከታዮችም በነበረውና በኖረው የመከባበርና የመደማመጥ የአብሮነት ስሜት በዓሉ በሰላም ተከብሮ እንዲጠናቀቅ የበኩላቸውን እንዲወጡ የአደራ መልእክታቸውን አስተላልፈዋል።

የበዓሉ ዝግጅት በየደረጃው በተቋቋሙት የበዓል አዘጋጅ ኮሚቴዎች ጥረት በጥሩ ሁኔታ በማጠናቀቅ ላይ መሆኑን የገለፁት ብፁዕነታቸው ከንጉሠ ነገሥት አጼ ኃይለ ሥላሴ ዘመነ መንግስት ወዲህ ተደርጎ በማያውቅ ሁኔታ የአዲስ አበባ ከተማ አስተዳደር ለሦስተኛ ጊዜ የመስቀል ደመራ በዓልን በድምቀት ማክበር የሚያስችል የስቴጅ፣የድምጽ ማጉያና የክብር እንግዶች ማስተናገጃ ቦታዎችን በማዘጋጀት የሚያደርገውን ተሳትፎ ያደነቁት ብፁዕ አቡነ አብርሃም የከተማ አስተዳደሩ እያደረገ ላለው ከፍተኛ አስተዋጽኦ በራሳቸውና በኢትዮጵያ ኦርቶዶክስ ተዋሕዶ ቤተክርስቲያን ስም ምስጋናቸውን አቅርበዋል።

በመጨረሻም በዓሉን ስናከብር ፍቅር ሰላምንና አንድነትን እንዲሁም መግባባትን መርሕ ባደረገ አግባብ መሆን አለበት ያሉት ብፁዕ ጠቅላይ ሥራ አስኪያጁ በዓሉ ሥጋዊ ፈቃዶቻችንን የምንፈጽምበት ሳይሆን ንስሐ ያልገቡ ንስሐ የሚገቡበት የተጣሉ የሚታረቁበት የተለያዩ አንድ የሚሆኑበት የተራራቁ የሚቀራረቡበት ፍፁም የደስታና የሰላም በዓል ሆኖ እንዲከበር ማድረግ ይኖርብናል በማለት መልዕክታቸውን አጠናቀዋል።

ምንጭ:- የኢኦተቤክ ሕዝብ ግንኙነት