ወኔ እና ቅኔ -(ፈይሠል አሚን)

🛒 islamic wave  🛒መግባት የምትፈልጉ  የቻናል ባለቤቶች👤
⚫️⚫️
Above      500+
⚫️⚫️⚫️⚫️⚫️⚫️
▶️Above 🟢 800+ subscribers
▶️Above 🟢2k+ subscribers
▶️Above 🟢5k+ subscribers
▶️Above 🟢10+ subscribers

inbox አናግሩኝ " @EzedinM1👈

አልነገርኩሽም!
.
(#ፈይሠል_አሚን)
.
ነበልባል ልሳንሽ...
ያለ ሥም፣ያለ ግብሬ፣ ከአውሬነት ሲሰፋኝ፣
ምላሽ በአፌ ሞልቶ፣የምለው ሲጠፋኝ፤
በመተላለፍ እሳት
ውስጤን እንደከፋኝ.. .
አልነገርኩሽም!
.
ያጋመደን ዝናር፣መቀነት ሲላላ፣
የእንባ ማድጋዬ፣በስውር ሲሞላ፤
በጦረኛ ቃልሽ፣ ማነስ መደፈሬን፤
ከአጠገብሽ ሳለሁ፣ጉዞ መጀመሬን፤
አልነገርኩሽም!
.
ተስፋሽ በተስፋዬ ላይ ጨፍኖ መቆሙን፣
የደገፍኩት ጀርባሽ መንገድ መጠቆሙን፤
የማይከስም አብዮት፣እንደተለኮሰ፣
የማይታበስ እንባ፣ውስጤ እንደፈሰሰ፤
አልነገርኩሽም!
.
እሳት እና ጭድ. . .
ዓይን እና ናጫ፣
ተቃራኒ ሲኾን የተሠጠን ምርጫ፣
ደፋርም ጭስም ኾኜ. . .
እንዳበጀሁ መውጫ!
አልነገርኩሽም!
.
አላወቅንም እንጂ. . .
ምንም አንድ ቢኾን መስመር መንገዳችን፤
እንቅፋት ነበርን አንዳችን ለአንዳችን!
መቻቻል ያሉት ሕግ. . .
አንዱን ቻይ አድርጎ፣
ሌላውን ጥበብ ነፍጎ፤
በማይናበብ ሴማ. . .
አንድ እውነት ደብቆ፣ ጊዜ አቆያየን...
"የተገናኘን ቀን እንደተለያየን!"
.
@huluezih
@huluezih

ስለ መጽሐፉ እና ስለ 53,500 ብር
.
ከዓመት በፊት አንድ ባለኃብት "መድረኮች ላይ የምታቀርባቸውን ጽሑፎች እወዳቸዋለሁ! ለምን ሰብሰብ አድርገህ አታሳትማቸውም?" ሲለኝ ካነሣኸው አይቀር ብዬ "ተሰብስበው በባለሙያ ሳይቀር ተገምግመው አልቀዋል፤ አንዳንድ ጥቃቅን ጉዳዮችን ብቻ ማስተካከል እንጂ ለህትመት ዝግጁ ናቸው...ከፋይናንስ ውጪ" አልኩት። እሱም "ያልካቸውን ጥቃቅን ጉዳዮች ሁሉ ጨራርስና ለህትመቱ መፍትሔ አናጣም...ስትጨርስ አሳውቀኝ!" ብሎ ተስፋ ሠጥቶኝ ተለያየን። ከዚያ በኋላ በስልክም በአካልም በተለያዩ አጋጣሚዎች ተገናኝተን እየጨረስኩ መኾኔን አውግተን ስጨርስ እንድነግረውና ወደ ህትመት የሚገባበትን ጉዳይ ጣልቃ እንደሚገባበት ነግሮኛል።
.
በመጨረሻ መጽሐፉ እኔ በቂ በምለው ደረጃ አለቀ። ማለቁን ሳሳውቀው "እሺ! በጣም ጥሩ! መልሼ እደውልልሃለሁ!" ብሎ ንግግራችን ተጠናቀቀ። ከዚያ በኋላ ግን እንደ ወትሮው ስልክ ማንሳት፣ቴክስት መመለስና ራሱም ሳይደውል ጊዜያት አለፉ። እኔም የሰውዬው ሁኔታ እየከነከነኝ በራሴ ወይም በሌላ መንገድ የማሳትምበትን መንገድ ማሰብ ጀመርኩ። በኾነ አጋጣሚ ታዲያ ባለኃብቱ ጋር በቅርበት የሚሠራ አንድ ሰው አገኘሁ። በወሬ ወሬ መሐል ስለ ባለኃብቱ ድንገተኛ የሐሳብ መቀዛቀዝ አነሣሁ። ይኽው ሰው ስለ ጉዳዩ ባለኃብቱ አጫውቶት እንደነበረና
ባለኃብቱ መጽሐፍ ለማንበብ የሚኾን ጊዜ ስለሌለው መጽሐፉን ቢያሳትም የሚመጣበት "መዘዝ" መኖር አለመኖሩን ለማረጋገጥ በእኔ ዙሪያ ያሉ ሰዎችን እንደጠየቀና እንዳማከረ ነገረኝ።

እኔም መጽሐፌን ስለምተማመንበት፣ እሱም ቢያሳትመው ኩራትና ውለታ እንጂ ችግር ውስጥ የሚያስገባው አለመኾኑን መመስከር የሚችሉ ሥራውን ያነበቡና የገመገሙ ባለሙያዎችን ሳይቀር ለማገናኘት ፍቃደኛ መኾኔን ነገሬው ጨዋታችን ተቋጨ።
.
በሥራና በኑሮ ውጥረት ሳላስበው ጊዜው እንደ ንፋስ ሽው ብሎ አልፎ ከባለኃብቱ ቅርብ ሰው ጋር ዳግም በአካል ተገናኘን። እኔም ባገኘኋትን ትንሽ ቅጽበት ባለፈው ስላወጋነው የመጽሐፌ ጉዳይ በጨረፍታ አነሣሁበት። ባለኃብቱ እኔን የሚያውቁኝንና እሱ የሚያምናቸውን በመሐል ያሉ ሰዎችን "ላሳትምለት ወይስ ይቅርብኝ?" ብሎ እንዳማከረ ሰማሁ። እነዚህ በእኔና እሱ መሐል ያሉ "ታማኝ" ሰዎቹም ያላነበቡትንና ሐሳቡ እንኳ ስለምን መኾኑን በውል ሳያውቁ "ይቅርብህ!" ብለው ጥርጣሬ እንደዘሩበት ነገረኝ። ከአራት በላይ በደንብ የማያውቁኝ የሥነ-ጽሑፍ ሰዎች አንብበው የሚታረመውን አርመው የወደዱት ጽሑፍ በሚያውቁኝና መጽሐፌን ባላነበቡት ሰዎች ምክንያት መሰናከሉ ልቤን ሰብሮኝ ዶሴው ተዘጋ።
.
ከዚህ ሁነት በኋላ በወዳጆች ምክርና እገዛ
መድረክ አዘጋጅቼ ለሕዝብ ይፋ ተደርጎ በቅድመ-ክፍያ በመሸጥ ህትመቱን ማሳካት ነበር ቀጣዩ መንገድ። ኾኖም በአካልም ኾነ በቅርበት ከማውቃቸው ሰዎች ይልቅ ጥቂት በማኅበራዊ ትስስር ገጾች የሚያውቁኝ ሰዎች መጽሐፌን አምነው ቀድመው ገዝተውኛል። ባለብኝ የመጠየቅ ኀፍረትና የመሸማቀቅ ባሕሪ ገፍቼ ብዙ ባለመጠየቄ እስካሁን 53,500 ብር ላይ ለመቆም ተገድጃለሁ። ጥሬ ግሬ ራሴ ለመሙላት ባስብም በፍጥነትና በጥራት ወደ ህትመት መድረስ አዳጋች ኾኗል። በየቀኑ የሚጨምረው የወረቀት ንረት አንዱ መሰናክል ቢኾንም በየቀኑ የሚሻሻሉ ታሪኮችና የሐሳብ ብስለቶች ትንሽ ተስፋዬን ባለበት ያቆዩታል። አሁንም ብዙ ነገር ውስጥ እየገባሁ ለዚህ መጽሐፍ መታተም እየታተርኩ ነው...ቀድመው አምነው ለገዙኝ በአካል ለማያውቁኝ ሰዎች ክብሬ ከፍተኛ ነው። ለመዘግየቱ ይቅርታ እጠይቃለሁ።በዙሪያዬ ያሉ ግማሹን ብር በብድርም ኾነ በሌላ መንገድ መሙላት የሚችል ዘመድ፣ወዳጅ ወይም ሌላ ባለኃብት ሳይኾን በአካል ሳያውቁኝ እንደገዙኝና እንዳመኑብኝ ዓይነት ቀናዎች ጋር በአጋጣሚም ኾነ በስሌት ስላልተገጣጠምኩ፣ የራሴም ሁሉም ቦታ የመግባትና የመመላለስ ስብዕና ስላልታደልኩ ከማሳካት ይልቅ ለመዘግየት ቅርብ ኾኛለሁ።
.
አዘለም ተሸከመም አንዳንዴ ከጋዜጠኝነትና ከሥነ-ጽሑፍ ሥራዎቼ እየወጣሁ በሌላ ሙያዎች ውስጥ ለዚህ መጽሐፍ መፍትሔ እየፈለግኩ ነው። ከይቅርታችሁ በኋላ እንደምትረዱኝ ተስፋ አደርጋለሁ።
.
(#ፈይሠል_አሚን)
.
@huluezih
@huluezih

https://youtu.be/qSvJXPSY9mY?si=MebiAnjnb6Jvvj0j

አዲስ ዩቲዩብ ከፍቻለሁ...እንድትቀላቀሉኝ እፈልጋለሁ።

https://youtu.be/fU5YAvkKUF0?si=ju_QmMOHDdtdiUGX

. . .of the day!😎

. . .of the day!😎

. . .of the day!😎

. . .of the day!😎

@huluezih
@huluezih

. . .of the day!😎

ከልጅነት አንዲት ገጽ
.
(#ፈይሠል_አሚን)
.
በሕይወቴ ለመጀመሪያ ጊዜ የተሰደብኩት ስድብ ‹‹ከብት›› የሚል ነበር፡፡የሰውነት ማጎልመሻ መምህር ነበር የሰደበኝ፡፡ በወቅቱ ምንም አልመሰለኝም ነበር፡፡እየዋለ እያደር ግን ይነደኝ ጀመር፡፡ ስድቡ አይደለም. . .ግልጽ አለመኾኑ እንጂ፡፡ ‹‹ከብት ሲል ምን ማለቱ ነው? ብዙ ዓይነት ከብት አለ…የትኛውን ነው ሊለኝ የፈለገው? በሬ ነው? በግ ነው? ላም ነው? የጋማ ነው ወይስ ያልጋማ ነው?››

ለዚህ ስድብ ያበቃው. . .ሰውነታችንን እንዴት እንደምናጎለምስ ለማስተማር እየሞከረ ሳለ ከጓደኞቼ ጋር ስሳሳቅ በማየቱ ጓደኞቼ ፊት ሊያሸማቅቀኝ አስቦ ‹‹በዚያ በበጋ!›› የሚለውን መዝሙር እንድዘምር አዘዘኝ፡፡እኔም አሻፈረኝ አልኩት፡፡
.
በመሠረቱ በዚያ በበጋ የሚባለውን መዝሙር አሁንም ድረስ አልወደውም፡፡ አለመውደድ ብቻ ሳይኾን ይኽ መዝሙር የእኛን ትውልድ ያሰናከለና ዛሬም ድረስ ከመዝሙርነት የዘለለ ተልዕኮ እንዳለው አምናለሁ፡፡
.
ከሥር መሠረቱ ላስረዳ!
በእኛ ዘመን አንድ ተማሪ አዕምሮው ለትምህርት ዝግጁ መኾን አለመኾኑ ሳይጣራ ነው ወደ ትምህርት ቤት የምንላከው፡፡የቀኝ እጅህ በጭንቅላትህ ዞሮ ግራ ጆሮህን ከነካ አለቀ! ማምኮ ደብተርህን ይዘህ፣ የዳርማር ቆዳ ጫማህን ተጫምተህ፣ ከአባትህ ሱሪ በተረፈ ጨርቅ ዩኒፎርም ተሰፍቶልህ ወደ ትምህርት ቤት ትሔዳለህ፡፡ እኔ ተፈጥሮ እጄ አጭር ስለነበረ በዘጠኝ ዓመቴ ነው ትምህርት የጀመርኩት፡፡እጅህ ረጅም ከኾነ ደሞ በአራት ዓመትህም ተማሪ ቤት ከመግባት የሚያድንህ ምድራዊ ኃይል የለም!
.
የመጀመሪያ ቀን ትምህርት ቤት ስሔድ አባቴ ነበር ያደረሰኝ፡፡ ለራሱ ካስሰፋው ሱሪ በተረፈው ጨርቅ ዩኒፎርም ስላሰፋልኝ የዚያን ቀን አንድ ዓይነት ነበር አለባበሳችን፡፡ በዚህ ምክንያት የኾነ ባዕድ ስሜት እየተሰማኝ ነበር፡፡ የኾነ አለ አይደል. . .አባቴን ትምህርት ቤት የማደርሰው ዓይነት ስሜት፡፡
የመጀመሪያ ክፍለ ጊዜዬ ላይ አንዲት መምህርት ገብታ ‹‹በዚያ በበጋ›› የሚለውን መዝሙር ታዘምረን ጀመር፡፡ ግጥሙን ታስታውሳላችሁ?
‹‹በዚያ በበጋ፤በዚያ በበጋ
እጮኛ ጠፍቶ ፍለጋ!››
.
ጥያቄ አይኾንባችሁም?! አንድ ተማሪ በልጅነቱ ዕውቀትን ፍለጋ በሔደበት ትምህርት ቤት ‹‹ዕጮኛ ጠፍቶ ፍለጋ!›› የሚባለውን መዝሙር መማሩ ወደ ብልጽግና የምናደርገውን ጉዞ አያደናቅፍም ወይ?. . .አያሳስብም?
.
‹‹መሸበትና ሰው ቤት ገባ፣
ልጅቷን ዐያት፣ተከናንባ
ወደዳት! ወደዳት! ይዟት ጠፋ በለሊቱ. . .

ከዚህ ግጥም መረዳት ያለባችሁ የመጀመሪያው ነገር የእኛ ዘመን ልጆች እንደምንከናነብ ነው፡፡ ወላጆቻችን ብርድ እንዳይመታን የማያለብሱን ነገር አልነበረም፡፡ አጋነንክ አትበሉኝና አንድ ክረምት ላይ ብርድ እንዳይመታኝ እናቴ ጋቢ፣ብሉኮ፣ የአባቴን ጃኬትና የእሷን ፎጣ ደራርባ ብርድ እንዳይመታኝ ስትሞክር ሙቀት መታኝ! ከሰሚ ሰሚ የሰማሁት ነው!
.
እና የበዚያ በበጋ አስቀያሚው ነገር ጠያቂ ትውልድ እንዳይፈጠር ማድረጉ ይመስለኛል፡፡ ተከናንባ ዐይቶ የወደዳትን ልጅ ይዟት ጠፋ፣ ከዚያ ዓባይ ደርሰው ለመሻገር ሲጥሩ እሱ ምንም ሳይኾን እሷ ሠጠመች፡፡እሱ አልቅሶ እንደተመለሰ ነው ታሪኩ የሚነግረን፡፡
.
ብዙ መሠረታዊ ጥያቄዎችን የሚያስነሣ መዝሙር ነው፡፡ ለምሳሌ ልጅቷን ይዟት የጠፋው በበጋ ነው፡፡አባይ ደግሞ በበጋ አይሞላም፡፡ክረምት ቢኾን መስመጧ ያሳምነኝ ነበር፡፡ ‹‹በቃ ሞተች አዘነላት!›› በሚል ምክንያት እንዴት ከሕግ ሊያመልጥ ቻለ? ይኼ መዝሙር በፍትሕ ተስፋ እንድቆርጥ ያደረገኝ ያኔ ነው፡፡ ገድሏት አባይ በረሃ ላይ ቀብሯትስ ቢኾን? ይኼ መዝሙር ሊነግረን የፈለገው ነገር. . .ሲመስለኝ ‹‹እዚህ ሐገር ውስጥ የሚገደል ሰው ገዳዩ ተጣርቶ ለሕግ ስለማይቀርብ ተማሪዎች ከአንደኛ ክፍል ጀምሮ ፖለቲካ ውስጥ ላለመግባት መሞከር እንዳለባቸው ነው!››
.
ያ ሰውነቱ ያልጎለመሰ ሰውነት ማጎልመሻ መምህር ይኼን ዘምር ሲለኝ አልዘምርም ብዬ ነው እንግዲህ ‹‹ከብት!›› የተባልኩት፡፡ አድጌ ከዩኒቨርሲቲ ተመርቄ ወጥቼ እንኳ አንድ ቀን ያን መምህር አግኝቼ ‹‹ከብት! አይደለሁም!›› ብዬ ‹‹የከብትን ዘርፈ ብዙ የሌማት ትሩፋቶች›› ለማስረዳት ዕድሉን ባገኝ ብዬ እመኝ ነበር፡፡ ደስ የሚለው ነገር ምኞት ብቻ ኾኖ አልቀረም፡፡ የዛሬ አምስት ዓመት አካባቢ መምህርነቱን ትቶ በሌላ የሥራ ዘርፍ ተሠማርቶ አገኘሁት፡፡ አዲሱ ሥራ ምን ቢኾን ጥሩ ነው? ወተት አከፋፋይ! በስተመጨረሻም የከብት ጠቃሚነት ገብቶታል ማለት ነው! ይኼ….ከብት!
.
@huluezih
@huluezih

ትናንትና ስለ መጽሐፍ ምርቃቱ በቂ መረጃ ስላልሠጠሁ ይቅርታ እየጠየቅኩ ነገ ቅዳሜ ከቀኑ 9:00 ጀምሮ አራት ኪሎ በሚገኘው ዋልያ ቡክስ አሚን አሚንዬ የተሠኘውን መጽሐፍ በጋራ እንመርቃለን። እዚያው እንገናኝ!

ቅዳሜ የመጽሐፍ ምርቃት አለ! የሚመቻችሁ ተጋብዛችኋል!

"የሴቶች ቦታ ኩሽና ነው!"
.
ይኽ የተፈፀመው በሐገረ ጀርመን ነው። እየተካሔደ የነበረው የእግር ኳስ ጨዋታ በሴት ዳኛ እየተመራ ነበር። በጨዋታው መሐል በተፈፀመ የጨዋታ ሕግ-ጥሰት (Foul) እንስቷ ዳኛ ከሪም ዴሚርባይ ለተባለ ቱርካዊ ተጫዋች ቀይ ካርድ በመሥጠት ከሜዳ እንዲወጣ ትዕዛዝ ታስተላልፋለች። በውሳኔው የተበሳጨው ተጫዋች ውሳኔውን በጸጋ ከመቀበል ይልቅ ወደ ዳኛዋ ተጠግቶ "አንቺ ኩሽና ውስጥ ነው መኾን የነበረብሽ፣ቦታሽ እዚህ አይደለም!" ሲል ተደመጠ።
.
ከጨዋታው በኋላ ለፊፋ የከሰሰችው ዳኛዋ ጉዳይዋ በፍጥነት ትኩረት ተሠጥቶት ተጫዋች ለቅጣት ተዳረገ። ጉዳዩ እዚህ ጋር አያበቃም። በተጫዋቹ ላይ ከተላለፉት ቅጣቶች መካከል "ተጫዋቹ በጀርመን የታዳጊ ሴቶች ሊግ ዳኛ ኾኖ አምስት ጨዋታዎችን እንዲመራ" የሚል ይገኝበት ነበር። በውሳኔው መሠረት በመጀመሪያ የዳኝነት ቅጣቱ ላይ ካፖርቱን፣ ቡትስ ጫማውን በማድረግ ጨዋታ ሊመራ ሳይኾን ፊልም የሚሠራ ተዋናይ በመምሰል ጨዋታውን መምራት ጀመረ። በጨዋታውም ለ8 ሴት ታዳጊ ተጫዋቾች ስምንት ቀይ ካርዶችን ሠጥቷል።ከጨዋታው በኋላ "ለምን ይኽን አደረግክ?" ተብሎ ሲጠየቅ "ምክንያቱም ሴቶች ኳስ ሜዳ ሳይኾን ኩሽና ነው ቦታቸው!" የሚል ለቅጣት የዳረገውን ንግግር መድገሙ አነጋጋሪ ጉዳይ ኾኗል! 😏
.
@huluezih
@huluezih

ጥሩ እና መጥፎ!
.
(#ፈይሠል_አሚን)
.
መጥፎው ነገር. . .
ሕይወት ውስብስብ ናት፣የማትፈታ ትብታብ፤
የመባዘን መዝገብ፣የድባቴ ኪታብ።
.
መጥፎው ነገር. . .
ሕይወት ልክ እንደ ወንዝ ናት!
እንባችን እንጂ አይመለስም ትናንት።
ካገኘነው በላይ ያጣነው 'ሚገደን፣
ከማለሙ ቀድመን መታመሙን ለምደን!
.
ጥሩው ነገር. . .
ለመፍጠር የኛን ቀን. . .
ታግለን!
ተፋልመን!
አልያም ተናንቀን. . .
እንደ ዐፄ በጉልበት ወይ ደሞ በሰላም፤
ሁሉም ነገር ያልፋል. . .
ብንወድም ብንጠላም!
.
ጥሩው ነገር. . .
የማለዳ ተስፋችንን፣ቢበላውም ጤዛ፤
በሕላዌ መስክ ላይ. . .
ምን ትግል ቢበዛ፣
እኛም ልክ እንደ ሕይወት
አይደለንም ዋዛ!
.
@huluezih
@huluezih

. . . of the day!😎

. . .of the day!😎

. . .of the day!😎

. . .of the day!😎

. . . of the day😎 is back!

ግን እኔ ሰው አይደለሁም?!
.
(#ፈይሠል_አሚን)
.
የነካሁት ይረክሳል፣ያሰርኩት ይላላል፤
ዓለም ከእኔ ጋራ ቂም ያለው ይመስላል!
ሁሉ እንዲኾን በጎ. . .
ሁሉ እንዲኾን ደግ. . .
እሳት ጨብጫለሁ፣ልቤን ለመታደግ!
እንደ ሞላ ጭስ፣እንደ ነዲድ እጣን፣
መግቢያ አይጠፋውም. . .
የጠመደኝ ሰይጣን!
አታሎኝ. . .
አዝ'ሎኝ. . .
ማረፊያ ቀልሼ ለአፍታ አልቆየሁም፤
ግን እኔ. . . ሰው አይደለሁም?!
.
የሔድኩ ይመስለኛል. . .
መንገድ ሲያመነምነኝ፤
እንደ ሰፌድ ላይ ሩጫ. . .
ዞሬ ዞሬ እዚያው ነኝ!
በዕጣ መዝገቤ ላይ አምላክ ከነደፈው፤
ሽንፈት ብቻ ነው ወይ ለእኔ የተጻፈው?
በምን መላ አድርጌ ልቤን ላስተናብረው?
ከጦር ስጠብቀው ቃል እየሰበረው!
ተወራጨሁ. . .
ተገጫጨሁ. . .
ለማንም አልኾንኩም፣ለእኔም አልበቃሁም
ቆይ ግን ሰው አይደለሁም?
.
@huluezih
@huluezih

ይኽን ሁሉ ኖረናል? ወይስ ገና ለመኖር ደጋግመን እየሞከርን ፈር ሳይዝልን ነው እዚህ የደረስነው? ብዙ ኖረን ነው ከምናስታውሰው ይልቅ የረሳነው የበዛው? የሕይወት ትርጉም ዘልቆን ነው ወይስ ከሕይወት ተኳርፈን....ገና በወጣትነት እኩሌታ ላይ ቆመን የእርጅና ጫፍ ሐሳብ ሮጦ ያልጠገበ ልባችንን እንደ አለት ያከረደደው? "ምን ያህል ኖርን?" ይልቅ "ምን ያህል ቀረን?" ለእኛ የቀለለ ጥያቄ የኾነው መቼ ነው? ጨለማን በብዙ ለምደን ሲነጋ ጀንበሯ እየፀለመች እንጂ እየበራች መኾኗን ለማመን ይቸግረናል።ጨለማን የለመደ ትውልድ ውስጥ ንጋት ቅንጦት ይኾናል።ግን እኮ ወጣት መኾን ደስ ይል ነበር...በአንድ ወቅት...
ምን እያልኩ ነው? አላውቅም! የልደቴ ቀን ሲመጣ የተዘበራረቀ ሐሳብ አስባለሁ...ቢኾንም ደስ ይላል ወጣትነት...አበቃ ብለን ሲነጋ በአዲስ ኃይል ከምንም መጀመር ....ደስ ይላል...ሁሉም አዲስ ቀን ለወጣት አዲስ ነገር ይዞ መምጣቱ!
.
#ዝም_ብሎ_ሐሳብ
.
@huluezih

የዕጣ ፈንታ ጭፍራ
.
(#ፈይሠል_አሚን)
.
አልሜ አልተወለድኩም፣
ሥርፋ፣ዘመን፣ ሐረግ አልመረጥኩም!
በበልግ በክረምቱ፣
ደሞም በመከራው
እንደ ዱር ዛፍ. . .
የተጻፈልኝን ነው የማፈራው!
.
ታዲያ. . . ሳጠነጥን፣
እንደ ልደቴ ሁሉ . . .
ሞቴም አይደለም. . .የኔ ውጥን. . .

ምሕዋሩን ብናምስ፣ዳግም ብንወጥነው፤
እንደ "ሳብነው" እንጂ አይኾን እንዳሰብነው!
ለየቅል ተኾነ. . .
የሞት እና ሕይወት
የዕጣ ፈንታ ጭፍራው
"መኖርንስ" ለመድኩት. . .
ሞትን ለምን ልፍራው?
.
@huluezih
@huluezih

"የማለዳ ማስታወሻ ለምን ቀረ?"
🗣 ማለዳ መነሣት ስላቆምኩ!
.
"ግጥም በፎቶ ለምን አቆምክ?"
🗣 ስልኬ ስለተበላሸ!
.
"ክባዳም ትረካዎች ለምን ቀረ?"
🗣 ለመድረክ እያልኩ ስለምቆጥብ
.
መልሶቼ ለእኔም በቂ ምክንያት አይደሉም። የኾነ ጥልቅ ስንፍና ውስጥ መኾኔን ዐውቃለሁ። በተለያዩ ምክንያቶች ጽሑፍ መጻፍ እንደ ወትሮው ቀላል አልኾልኝም። በዚህ ሁሉ መሐል እስካሁን ስላላችሁ በጣም እኮራለሁ።ከልቤ አመሠግናችኋለሁ። በፍጥነት ወደ ራሴ ተመልሼ ዳግም ቶሎ ቶሎ እንደምጽፍ እና እስከዛ ድጋፋችሁ እንደማይለየኝ ተስፋ አደርጋለሁ። ክበሩልኝ🙏
.
(#ፈይሠል_አሚን)
.
@huluezih

ወደ ሰማይ መውደቅ!
.
(#ፈይሠል_አሚን)
.
ስዘል "ወደቀ"
ስዘም "ታጠፈ"
ዝም ብል "ፈራ" አሉ!
ብተው "ጨነገፈ"
በጠላቴ አፍ ላይ፣ቂም ስለታቀፈ
የሠራሁት ተጥሎ፣ያጠፋሁት ተጻፈ!
.
ሰው ነኝ!
ምሉዕ አይደለሁም፣ብዙ ነው የኔ እንከን
ስወድቅ ስነሣ ነው የወጣሁት እርከን!
ለናንተ ለናንተ. . .
ውድቀቴ አርክቶ፣ቢያበግን መነሣቴ
ዛሬም ሆድ ይሞላል፣አልጠፋም እሳቴ!
.
አትርሱት! አትርሱት!
የውድቀቴን ዐዋጅ በነጋሪት ስትጎስሙት
ለሣር ቅጠል ሳይቀር ለዓለም ስታሰሙት
ሳትዘነጉ አንሡት፣ ይኽ አወዳደቄን
ዐውቄበት በቅጡ፣ወደ ላይ መውደቄን!
.
@huluezih
@huluezih

በዓል ከሌላ ማህበራዊ ጉዳይ ጋር ተደርቦ ባይመጣ! (ርዕሱ ነው!)
.
(#ፈይሠል_አሚን)
.
እንደሚታወቀው ‹‹መውሊድ›› ታላቁ ነብይ (ዐ.ሰ.ወ) የተወለዱበት ተዓምራዊ ቀን ነው፡፡ በዓለም ላይ ሰዎች እንደየ ባሕላቸውና እንደየ ወጋቸው በዓሉን በተለያዩ መንገዶች ያከብሩታል፡፡ በሐገራችን ‹‹መውሊድ›› በአብዛኛው በድምቀት የሚከበረው በየመስጂዶች ነው፡፡
.
እኔም ታዲያ ትናንት ማታ ነገ በዓሉን አስመልክቶ ከእረፍቴ ጋር አዋህጄ ስለ ነብያችን እያነበብኩ ለመዋል አቅጄ የማነባቸውን መጽሐፍት አዘጋጅቼ ተኛሁ፡፡ መቼም ሰውና የራይድ መኪና ባሰበበት አይውልምና ሌሊት ከሰዓት ላይ ክፉ ሕልም ክው አድርጎ ቀሰቀሰኝ፡፡
.
በሕልሜ የሩቅ ጎረቤቴ የኾት ጋሽ ተዘራ ባዶ ሜዳ ላይ ተዘርረው ሞተው ዐየሁ፡፡በሚገርም ሁኔታ ላለፉት ሦስት ሳምንታት እኚህ ሰውዬ በተከታታይ ሦስት የተለያዩ አደጋዎች ሲደረሱባቸው ዐይቻለሁ፡፡ በሕልሜ የጋሽ ተዘራ መዘረር አዲስ ነገር አይደለም፡፡
.
የመጀመሪያ ሳምንት ላይ ጋሽ ተዘራ ማንም ሳይነካቸው በአናታቸው ሲደፉ ዐየሁ፣ በሳምንቱ ዛፍ ተገንድሶ ሲወድቅባቸው…በሦስተኛው ሳምንት ደሞ የፕራንክ ቪድዮ እሠራለሁ ብለው ባስደነገጡት ሰው ተደብድበው ሲዘረሩ ዐየሁ፡፡ቢጨንቀኝ ጎረቤቴ ያሉትን እማማ ሸንኮሬን አማከርኩ፡፡ እንደምታውቁት ሐበሻ ሕልሙን ማሳካት እንጂ ሕልሙን የማስፈታት ችግር የለበትም፡፡ማንም መንገደኛ ነው ሕልምህን ሚፈታልህ፡፡ እማማ ሸንኮሬ ሦስቱንም ሕልም ከሰሙ በኋላ ‹‹ሲሳይ ነው!›› ብለው ፈተቱት፡፡ ሕልሜን ፈተው ሲያበቁ ግን አመናጨቁኝ፡፡ ሕልም ሣይ እማማ ሸንኮሬ ለምን እንደሚበሳጩና ሳያብራሩ እንደሚፈቱልኝ አይገባኝም፡፡ ሕልም መፍታት አይችሉም እንዳልል የሰፈሩ ሰው የመሰከረላቸው ፈቺ ናቸው፡፡
እንደውም በሕልም ፍቺ ጥበባቸው ሲያሞኳሷቸው ‹‹እሳቸው እኮ የሕልም ጋራዥ ናቸው!›› ይሏቸዋል፡፡ ለተከታታይ ሦስት ሳምንታት ያየኋቸውን ተመሳሳይ ሕልሞች ስነግራቸው ቀንተው ነው መሰለኝ ‹‹ቆይ አንተ ግን ሁሌ እንዲህ እንደ አህያ ፊት አንድ ዓይነት ሕልም ምታየው ሰብስክራይብ አድርገህ ነው እንዴ?›› ብለው አሽሟጠጡብኝ፡፡
.
ይኸው ዛሬ ለሊት ጥሩንባ ተነፍቶ የጋሽ ተዘራ መርዶ ደረሰን፡፡አምሽተው ሲገቡ በማጅራት መቺዎች ተወግተው መገደላቸውን ሰማን፡፡
ያኔ እማማ ሸንኮሬ ሕልሜን ‹‹ሲሳይ ነው!›› ብለው ሲፈቱልኝ አምኜያቸው ነበር፡፡ዛሬ ሌሊት እንደደረሰን መረጃ ከኾነ ግን ጋሽ ተዘራን ‹‹ሲሳይ›› የሚባል የመንደራችን ዕውቅ ማጅራት መቺ እንደወጋቸው ሰማሁ፡፡
.
እነሆ! ከበዓሉ ዋዜማ በፊት የገጠመ የሩቅ ጎረቤት ለቅሶ ላይ ተገኝቻለሁ፡፡ እንደ ሕዝብ ለቅሶ ላይ አጉል አመል እንዳለብን ያስተዋልኩት እዚህ ለቅሶ ላይ ነው፡፡ አንዱ ለቀስተኛ የሟች ልጅ ጋር ጠጋ ብሎ ‹‹ታመው ነበር?›› ይላል፡፡ አባትዬው በማጅራት መቺ ተወግተው መገደላቸውን እያወቀ ነው ይኼን ሚጠይቀው፡፡ ልጁ ተናዶ ‹‹አዎ! የዛሬ ስምንት ዓመት ስኳር ይዞት ነበር!›› አለው፡፡ ልጁ ግን መጠየቁን አላቆመም፡፡ ‹‹ዶክተር ተኮላ ጋር እኮ ብትወስዷቸው አይሞቱም ነበር!››፡፡ እኔም ተናደድኩና ‹‹ዶክተር ተኮላ የማጅራት መቺ መድኃኒት ሠርተዋል?!›› አልኩት፡፡
ደንገጥ ብሎ ‹‹ያው ቢያንስ ከስኳራቸው አገግመው ቢኾን ሮጠው ማምለጥ አያቅታቸውም ለማለት ፈልጌ ነው!!›› ነው ብሎ አድበሰበሰ፡፡
.
ጋሽ ተዘራ በበዓል ቀን ቀብራቸው መፈፀሙ ለብዙዎቻችን ገርሞናል፡፡በዓል ሲነሣ አብረው ሚነሡ ሰው ናቸው፡፡ በዓል እጅግ ከመውደዳቸው የተነሣ ‹‹የበዓል አኒቨርሰሪ›› ሁሉ የሚያክብሩ ሰው ናቸው፡፡ ‹‹ቆንጆ ገና ያሳለፍንበት አራተኛ ዓመት!›› ይሉና ጳጉሜ ላይ ድል ያለ ድግስ ሊያሳናዱ ይችላሉ፡፡ ‹‹ጎረቤቶቼ›› የአረፋ በዓልን ክፍለ ሐገር ሔደው በማክበራቸው አብረናቸው ስላላከብርን ይሉና አረፋን ያለ ወቅቱ በሙክት ያከብሩልን ነበር፡፡
.
አንድ ጊዜ ድንገት ተሥተው ዛሬ በዓል ነው ብለው ዶሮ ገዝተው ሊ,ያርዱ ተሰናዱ፡፡ ዶሮው ግን የዋዛ አልነበረም፡፡ባርከው ሲያርዱት አንገቱን እዚያው ጥሎ ተነሥቶ በደመ-ነፍስ እግሬ አውጪኝ አለ፡፡ ክንፉን ዘርግቶ ያለ አንገት ቀጥ ብሎ ሲሮጥ አንገቱን የቆረጥንበት ሳይኾን ኮፍያ ያወለቅንበት ነበር የሚመስለው፡፡ ሳፋ ያለው ሳፋውን ይዞ፣ ሳፋ የሌለው ሰልፊውን ደግኖ ተከተለው፡፡
ዶሮው በዋዛ ሊያዝ አልቻለም፡፡ከምንም ጋር ሳይጋጭ ቀጥ ብሎ መንገዱን ይዞ ሩጫውን ቀጠለ፡፡ በዚህ ሁኔታ የተጨነቁት ጋሽ ተዘራ ከጭንቀት የመነጨ አስቂኝ ሐሣብ አመነጩ፡፡ ሮጦ የራቀው ዶሮ አንገቱን ግቢው ውስጥ ጥሎ ስለሮጠ ዓይኑ ቢሸፈን ተደናቅፎ ይወድቃል በማለት ‹‹ዓይኑን ያዙልኝ! በሕግ አምላክ ዓይኑን ጋርዱልኝ! ሲሉ ጮኹ፡፡
ይኼን የመሰለ ትዝታ ትተው ዛሬ ራሳቸው ጋሽ ተዘራ ዓይናቸው ለዘላለም ተሸፈነ፡፡
.
እነሆ. . .ዘመድ አዝማዱ መጥቶ ጋሽ ተዘራን ወደ ማይቀረው ቤታቸው ለመሸኘት ተሰብስበን በሐዘን ተቀምጠናል፡፡ እኔም ከቀብር በኋላ የበዓል እቅዴን ለማሳካት እያሰብኩ ነው፡፡ እግረ መንገድ ለቅሶው ላይ ሰዎችን እየታዘብኩ ነው፡፡
አንዱ ቲክቶክ ላይ ላይቭ ገብቶ ስለ ጋሽ ተዘራ መልካም ባሕሪ እያወራ ነው፡፡ ለጎረቤት ያላቸው ቅርበት፣ተጫዋችነታቸው የልጅነት ታሪካቸው ሁሉ አልቀረውም፡፡ በነገራችን ላይ ይኽ ላይቭ የገባው ልጅ ከአራት ቀናት በፊት እዚያ ማዶ ያለው ኮንዶሚኒየም ተከራይቶ የገባ ሰው ነው፡፡ ጋሽ ተዘራን በአካል ቀርቶ በፎቶም ያለዛሬ ያያቸው አይመስለኝም፡፡
.
አንዳንዶች ደግሞ እስኪነጋ ከሚደብረን ብለው አስከሬን ሳይወጣ ካርታ መጫወት ጀምረዋል፡፡ዓመት ባልሞላው ጊዜ ውስጥ ጋሽ ተዘራ ቤት ወደ አራት ለቅሶዎች ተከስተዋል፡፡ የባለፈው ለቅሶ ላይ አንዱ ቁማርተኛ ካርታ ሲጫወት ተበልቶ ያለውን ሰምቼ ሳላበቃ ዛሬም ዓይኑን በጨው አጥቦ እየተጫወተ ነው፡፡የባለፈው ለቅሶ ላይ ተሸንፎ ብሩን ሲበላ ጮክ ብሎ ‹‹ኤጭ! የዚህ ቤት ለቅሶ ደሞ አይቀናኝም!›› ማለቱን ነግረውኛል፡፡
.
በበዓሉ ቀን የጋሽ ተዘራ ግብዓተ-መሬት ተፈጽሞ ተመለስን፡፡ ከድንኳኑ ቀስ ብዬ ወጥቼ ቤቴ ሔጄ አረፍ ልል ሳስብ አያቴ ስልክ ደወለች፡፡ ‹‹በዓልም አይደል? ብቅ አትልም እንዴ?›› ብላ ጠየቀችኝ፡፡ በርግጥ ጥያቄ ይመስላል እንጂ ትዕዛዝ ነው፡፡
ወንዱ አያቴ በመውሊድ ቀን ወዳጆቻቸውን እና ቤተ-ዘመዱን ሰብስበው ታላቁ ነብይ ላይ ሰለዋት እያወረዱና እየዘከሩ የማሳለፍ ልምድ አላቸው፡፡ መንዙማው በላይ በላይ ሰለዋቱ ይከተላል፡፡ እኔ የሔድኩ እንደው ግን አያቴ እኔን ጎሸም የሚያደርግ ግጥም ጣል እያደረጉ ይዝናኑብኛል፡፡ስናደድ ደስ እላቸዋለሁ መሰለኝ፡፡ ባለፈው ዓመት የመውሊድ ቀን ተጠርቼ አርፍጄ ብገኝ. . . እኔን እያዩ እንዲህ ሚል ግጥም አወረዱ፡-

‹‹ለሰለዋት ብንጠራው፣ቀረ…ነገር መስሎት፤
የአንጎሉን ሽሆና ድፍን አር´ጎ ፈጥሮት!››
.
ታዲያ በአሽሙር ‹‹የአዕምሮህ ሽሆና ክፍት ነው!›› ማለታቸው ለጨዋታ መኾኑ ገብቶኝ እኔም ለጨዋታ አንድ ግጥም ጣል አደረግኩ፡፡ እንዲህ አልኩ. . .

ከባዳ አገኘሁት፤የጉንፋኑን ሳል
ከመንገደኛ መጣ፣ያሰቃየኝ ሳል፤
የሽኾና ክፍተት ግን ከአያት ይወረሳል!››
.
ይኽቺ ለጨዋታ የሰነዘርኳት ግጥም እንደ ሐገር ክህደት ወንጀል ታይታብኝ ከሞቀ በዓል ላይ ተባረርኩ፡፡‹‹ምንም መቀለድ የማይቻልበት ቤት!›› ብዬ እያጉረመረምኩ ወጣሁ፡፡ለእነሱ ሲኾን ጨዋታ ለእኛ ሲኾን ‹‹ነገር›› ነው መቼስ! ይኼን አስቤ ነው እንግዲህ ዛሬም ሔጄ ከምባረር ብዬ ወደ ቤቴ ለመሔድ የወሰንኩት፡፡
.
ቤቴ ስደርስ አከራዬ በዓልን ምክንያት በማድረግ ቤቴን ከፍተው አጽድተው፣እንደ ቋንጣ በገመድ ላይ ያንጠለጥልኳቸውን ካልሲዎቼን ዘፍዝፈው፣ አጫጭሰው ቡና እያፈሉ ደረስኩ፡፡ ደስ አለኝ፡፡ግን በግማሽ ልቤ. . .ቁልፌን አስቀርፀዋል ማለት ነው? ገመናዬን ደብቄ የዘጋሁበት ቤቴን ሊከፍተው የሚችል ሌላ ሰው መኖሩ አስፈራኝ፡፡የቤቴ ሳይኾን የገመናዬ ቁልፍ እሳቸው እጅ መኖሩ አስደነገጠኝ፡፡ግን ይኹን ጉርብትናው ይሻላል!›› ብዬ እያሰብኩ አከራዬ ‹‹ስማ!›› አሉኝ፡፡ አቤት ስላቸው. . . ‹‹ቁልፍህን ያስቀረጽኩበትን ገንዘብ ከቀጣይ ኪራይ ጋር አስበህ ትሠጠኛለህ!››
‹‹እንዴ! ጭራሽ እኔ ነኝ እንዴ ምከፍለው?›› ብዬ ተቆጣሁ……በሆዴ!
.
@huluezih
@huluezih

መስከረምን እወዳታለሁ! (6)
.
(በዓመት አንዴ ብቻ የሚነበበው ታሪክ እነሆ ክፍል 6)
.
(#ፈይሠል_አሚን)
.
የዓመት ሙሉ እንባዬን የማፈስበት በቂ ገንዳ የለም። ድፍን አንድ ዓመት የኾንኩትን ሁሉ ዘርዝሬ የምጽፍበት መዝገብ የለም፤ ቢኖርም ቃላት ለመግለጽ ድፍረው ልሣኔ ላይ አይሳፈሩም። ዝም ብዬ ጀምሬ ዝም ብዬ የጨረስኩት ዓመት ነበር።ዕድሜ ለመስከረም!
.
"እንዳስቀመጡት የሚያገኙት የለም!" ብለው የተረቱት አበው እኔን መቼ ዐዩ? ወርሃ መስከረም ቄንጠኛ አበቦችን ጠርቶ፣ የውርጭ ሠራዊትን ጥሶ፣ የዝናብ ቋትን እየደፈነ በጳጉሜ በር አልፎ ደጄ የቆመ ዕለት የደነገጥኩት ድንጋጤ ዓመቱ ሙሉ ፋታ ሳይወስድ ዛሬም ድረስ ልቤን ያርገበግባል። ከጃጀ መስከረም እስከ እንቡጥ መስከረም ልቤን በወረሰችው መስከረም ሳቢያ እፎይ የምልበት አንዲት ቅጽበት ተነፍጌ ይኸው ዘመን ስለውጥ!
.
ዘንድሮ ከሌላው ጊዜ በተለየ ስለ መስከረም የማወራው እልፍ ነገር ቢኖረኝም ለማውራት አቅምና ፍላጎት ያጥረኛል። ውስጤ ማመንዠጉን ለምጄበታለሁ። መብሰክሰክ እና ወደ ውስጥ መዋጥ ከማውራት በተሻለ መልኩ ስሜት ይሠጠኛል። እስከ ዛሬ አውርቼ የት ደረስኩ? ተናግሬ ምን አመጣሁ? ቁስል ማከክ ለመድማት፤ መግል ማፍረጥ ለመግማት! ሌላ ምን ጥቅም አለው?
.
አምና መስከረም የአልጋ ቁራኛ ስትኾን ብቸኛ አስታማሚዋ ኾኜ አልጋዋ እግር ሥር አልጠፋሁም። ህመሟ ከጤናዋ ቀጥሎ ሥራዬን ክብሬን እና ሥሜን ነጠቀኝ። አልደነቀኝም። የከፈልኩት መስዋዕትነት ራሴን አሳጣኝ። "ከበሽታዋ ስታገግም ውለታዬን ትረዳ'ለች፣ ልቧን ያሻከረው ህመሟ ሲሽርላት ፍቅሬ ልቧ ላይ የማይለ'ካ ሥፍራ ይወርሳል!" በሚል ቀብጸ-ተስፋ የማይከፈለው ሎሌ፣ የማይደክመው አሽከር ኾንኩላት። የኾነው ግን የተገላቢጦሽ ነው። ብቻ ስለ መስከረም ማውራት አልፈልግም! ቁስል ማከክ ለመድማት፣መግል ማፍረጥ ለመግማት!
.
ከበሽታዋ የዳነች የመጀመሪያወሰ ንጋት ላይ የተኛችበትን አልጋ እና እኔን ከአዕምሮዋ ሰሌዳ ሰረዘችን። ረሳችኝ። ታመው ወዳልጠየቋት ጓደኞቿ ተመልሳ "ጓደኝነቷን" አደሰች። አግብቶ ወደ ፈታው የቀድሞ ፓይለት ፍቅረኛዋ ዘንድ ካቆመችበት ቀጠለች። "እኔ ግን ለመስከረም ምኗ ነኝ?" ብዬ አስብ የነበርኩት ሰውዬ "መስከረም ግን እኔን እንደ ሰው ትቆጥረኛለች?" ወደ ሚል አስቀያሚ ጥያቄ ተሸጋገርኩ። ብቻ ስለሷ ማውራት አልፈልግም!
.
"ቂል አደረገችኝ ጃሌውን ሰውዬ!" አለ ዘፋኙ! ከዕውቀት ዕውቀት አላነሰኝ፤ ቀጥ ያለ ኩሩ ሥም ነበረኝ። አማራጮቼም ተቆጥረው የሚያልቁ አልነበሩም። ፈጣሪ ብዙ ነገር ሳይሰስት ይሠጥና የሠጠውን ነገር ሁሉ አደጋ ላይ የሚጥል የሚያሟልጭ ጠጠር የሠጠን ጋን ሥር ይሰነቅራል። ጋን በጠጠር እንደሚደገፈው ሁሉ ጠጠርም ጋንን ያክል ንብረት አሣስቆ ይጥላል። ትንንሽ ነገሮች ትልልቅ ነገሮችን በዋዛ ወደ መውደቂያው ይወረውራሉ። አንዲት ክብሪት ደን እንደ ምታነደው፣ አንዲት ዛቢያ ዛፍ እንደምትገነድሰው፣ አንዲት ጉንዳን አንበሳ እንደምታዘልለው....መስከረምም የተከበርኩትን ሰውዬ ሥም አልባ፣ መጠን አልባ አደረገችኝ። አዎ መስከረም ትንሽ ናት እያልኩ ነው። ትንሽዬ አዕምሮ ይሉኝታ ከሌለው ልብ ጋር የተሸከመች!
.
የጊዜን ኃያልነት የምረዳው በመስከረም እኩይነት ውስጥ ነው። እንደ ማዕበል በሚተራመስ ፈጣን ጊዜ ውስጥ ይኽን ሁሉ ዓመት አንዱ ላይ ሳይረጉ፣ "ይኽን አደረግኩ!" የሚሉት ታሪክ ሳይመዘግቡ እንደ ጋማ ከብት ዕድሜን በማይረባ ንዝህላልነት ማሳለፍ ትንሽነትን ከማሣየት ሌላ ምን ያሣያል? መስከረም የአባቷን ፍላጎት ሳታሟላ አባቷብ አጣች፣ ሕይወት ሊያስተምራት ሽቶ አልጋ ላይ ዓመቱን ሙሉ ሲያቆያት ክፉና ደጉን ሳትለይ ተሽሏት ተነሣች፤ የሚፈልጋትንና የሚያፈቅራትን ሰው ገፍታ የተዋትን ሕይወት መልሳ አሳደደች፣ ዛሬመረ።መስከረም ትንሽ ናት! ቢኾንም ስለሷ ማውራት አልፈልግም!
.
ዛሬ ጠዋት አንድ ሕጻን ልጅ በሬን አንኳኩቶ አደይ አበባ የያዘ መልዓክ ያለበት ሥዕል ግዛኝ ሲል ጠየቀኝ። ሥዕሉን የምገዛበት አምስት ብር እንዳጣሁ ሳውቅ በሩ ሥር ቁጭ ብዬ ሥዕሉን እያየሁ አነባሁ። ለመስከረም ስንት ነገር ልጣ? ልጁ ለቅሶዬን ፈርቶ ሥዕሉን ትቶልኝ ሔደ።
.
ከቀትር በኋላ መስከረም ደወለችልኝ። "በዓል ነው ዛሬ...ወጣ ብለን ኬክ አንበላም?" አለችኝ። ኬክ ከእኔ ጋር መብላት የመጨረሻ አማሯጯ እንደኾነ አልጠፋኝም። ፓይለቱ ሰውዬዋ በረራ ላይ መኾኑን ነገረችኝ። ይኽን ሁሉ ዓመት ታሪኬን የነገርኳችሁ ሁሉ እንደምታውቁት ከጠራችኝ እንደምሔድ ታውቃላችሁ። ጥቅም የሌለው ጊዜ ከሷ ጋር ላሳልፍ ልወጣ ነው። ከቁብ የማልቆጠርበት እና ወዲያው የምትዘነጋው ጊዜ ዕድሜዬ ላይ ልጨምር ልሔድ ነው! ማን ያውቃል ምናልባት ቀጣይ ዓመት በዚህ ሰዓት ሌላ ሰው ልኾን እችላለሁ! በሕይወት ካለሁ! መስከረም ለእኔ የተከለከለች በለስ መኾኗን ስብዕናዋ ይነግረኛል። በእሷ ካገኘሁት ሽረት ይልቅ ያተረፍኩት ቁስል ይበልጣል! ቢኾንም አሁን ስለሷ ማውራት አልፈልግም! ቁስል ማከክ ለመድማት፣ መግል ማፍረጥ ለመግማት!
.
የቀጣይ ዓመት ሰው ይበለን ብቻ!
.
@huluezih
@huluezih

ተዓምራዊው ዓመት
.
(#ፈይሠል_አሚን)
.
ይኽ ዓመት ለእኔ በጥሩ ሁኔታ አልጀመረም። አመጣጡ የማዕበል ያክል የምሳሳላቸውን እና የምወዳቸውን ነገሮች ደረማምሷል፣ሰባብሯል። በስብራት ላይ ስብራት፣ በድንጋጤ ላይ ድንጋጤ ተደራርበው 2016ቴን ባርከው አስጀመሩት።
.
በዚህ ዓመት ከምወደው ጋዜጠኝነት ለመውጣት ወስኜ ጫፍ ደርሼ ተመልሻለሁ።(ከውስጤ በወጣ ምክንያት ካልኾነ በቀር በውጫዊ ግፊቶች መውጣት እንደሌለብኝ ተምሬያለሁ) ፤ ከማከብራቸው ሰዎች ክብሬን የሚነኩ ቃላት የሰማሁበት፤ አስተዋይ የምላቸው ጭፍን ኾነው ያየሁበት፣ ዝምድና በሥራ ዓለም ተቀዳሚ ምርጫ ኾኖ አናት ላይ መቀመጡን ያስተዋልኩበት....፣ ከእልፍ ሰናይ ምግባር ይልቅ አንዲት "ስህተት" ምትመስል ነገር አብሮ መብላትን አስረስታ ከጠላት እንደምታስፈርጅ የታዘብኩበት፣ አልተመቸው ኾኖ እንጂ ሁሉም ሥልጣን ያገኘ ቀን አቅሙን ለማሣየት የሚሔድበትን ርቀት ሳልፈልግ የተማርኩበት. . . .ብዙ ብዙ...ሌላ ሌላም!
.
ከዚያ ዓመቱ ሲጋመስ በስብራቴ መጠን ካሣዎች የመጡበት ጊዜ ኾነ። በአሃዝ ሲቆጠሩ ትንሽ ቢኾኑም ለእኔ በኾኑልኝ ነገር ሲለኩ ግን የአላህን ተዓምራት ማሣያ "ሳምፕሎች" የኾኑ ወዳጆች እንዳሉኝ የተረዳሁበት፣ አቅሜን ችሎታዬን የፈተሽኩበት፣ ከነበርኩበት እርከን ከፍ ያልኩበት፣ ወደ 'ምወደው ሬድዮ የተመለስኩበት፣ ከሁሉም በላይ ሕይወቴ የተረጋጋና ሣቅ የበዛበት ያደረገችዋን ግራ ጎኔን ያገኘሁበት ነበር።
.
በአላህ ያለኝ እምነት ከባድ ውሳኔ እንድወስን፣ ለሰዎች ጭራ እንዳልቆላ፣ ለማይሞላ ሆድ ብዬ ጫማ እንዳ'ልስ ብርታት ሠጥቶኛል። ባልተጻፈ ሕግ እንዳልቀጣ፣በእኔ ቦታ ኾኖ፣በጫማዬ ቆሞ እውነቴን ለማየት ያልሞከረን ለማስረዳት እውነታውን እንዳልስት ዓይኔን ገልጦልኛል።
.
በዚህ ዓመት አቅጄው ያልተሳካልኝ መጽሐፌን የማሳተም ጉዳይ ነው። የገዙኝ ሰዎች ብዛትና የሚያስፈልገው ማሳተሚያ አለመመጣጠኑና በየጊዜው የወረቀት ዋጋ እየጨመረ መምጣቱ አንዱ እክል ነው። ሙሉ ዓመት ከተጨመረልን ለቀጣይ ዓመት የምናሳድረው የቤት ሥራ ይኾናል። ከዚህ የተሻለ ዓመት እንደሚኾን፣ እኛም ከዚህ የተሻልን ሰዎች እንደምንኾን አልጠራጠርም!
.
በዚህ ዓመት የተማርኩት ትልቁ ትምህርት ሕይወት ሙሉ ለሙሉ እንድትቀየር አንድ ውሳኔ ብቻ በቂ መኾኑን ነው። ድፍረት ካለን እንደምናስበው ሕይወት ውስብስብ አይደለችም! ወንዙ ጋር ሳንደርስ መሻገሪያው ስለሚያስጨንቀን ነው። መጀመሪያ ወንዙ ጋር መድረስ ይቀድማል። ወንዙን ስንደርስ እንሻገረዋለን።
.
እናንተስ? በዚህ ዓመት የተማራችሁት ትልቁ ትምህርት ምንድነው?
.
@huluezih
@huluezih

ትናንት፣ዛሬ እና ነገ ሌላ ነኝ!
.
(#ፈይሠል_አሚን)
.
ነጻነት ነበረኝ፤ ኣርነት!
ወፎች የሚመኙት፣
ሚስጥር ነበርኩ፤ ረቂቅ!
ሊቃን የሚቀኙት፣
"ሰሜ"ን ሲረዱት ነው፤
"ወርቄ"ን የሚያገኙት!
.
"ነበር!"
'ነበር!"
"ነበር!" ብቻ ኾነ፤
ማንነቴ ላይ የተጻፈው ምስል፤
ትናንትና ብቻ የሚያምር ይመስል!
ራሴን ለመግለጽ ምን አቅም ቢሳነኝ፤
ትናንት፣ዛሬ እና ነገ በርግጥ ሌላ ሰው ነኝ!
.
ልቤ ምስኪኑ. . .
ትናንቱ ገዝፎበት መልኩን እያጠረው፤
ያለፈውን ብቻ. . .
እንደ "ሕይወት" እየቆጠረው፤
"ማነህ?" ብለው ሲሉት. . .
"መቼ?" እያለ ነው መልሱን 'ሚጀምረው!
.
@huluezih
@huluezih

ቢንገዳገድ እንጂ. . .
በአምላኩ ምትሐት፣ሚዛኑን ጠብቆ፤
ቢታገል ነው እንጂ. . .
ወደፊት ለማዝገም፣ወገቡን አጥብቆ፤
አያውቅም በጭራሽ. . .
"የተገፋ ሰው" ወደ ኋላ ወድቆ!

(ለመጣል አስበው ላነሡን
ለመስበር ሲሉ ለጠገኑን
ሊያሳፍሩን ብለው ላኮሩን
ሊወነጅሉ ጥረው ላነፁን
አመስግኑ አሁን!🙏)
.
(#ፈይሠል_አሚን)©
.
@huluezih
@huluezih

ያልወለደ "እፎይ" የሚልበት ዘመን. . .
የወለደ ከዓለም ጦርነት ሚገጥምበት ጊዜ. . .
ወልዶ በሰቀቀን ያሳደገ "ጀግና" የሚባልበት. . .
እናቶች የጊዜውን መረንነት፣የሰውን ጭራቅነት ዐይተው ልጆቻቸውን ሆዳቸው ለመመለስ የተመኙበት ጥቁር ወቅት. . .
"ሰው" ሰው መኾኑን የጠላበት፣
"ወንድነት" መሰደቢያ የተደረገበት፣
ዓለም ከዚህ ወዲያ ብዙ ዕድሜ ይቀራት ይኾን? አይመስለኝም!
.
(#ፈይሠል_አሚን)
.
@huluezih
@huluezih

የወላድ አንጀት፣ ሲለበለብ
እንባ እንደ ወተት ጠዋት ማታ ሲታለብ
ፍትሕ ይባላል ወይ
በዳይ አስሮ መቀለብ?
ምን ቋንቋ ይግለፀው?
ከየት ይምጣ ፊደል?
ሞት ብቻ ያንሰዋል የአንዳንድን ሰው በደል!
.
(#ፈይሠል_አሚን)
.
@huluezih
@huluezih

ተዓምር ነው 'ምጠብቀው!
.
(#ፈይሠል_አሚን)
.
ጨረቃን ባሰላ፣ ከዋክብትን ብቆጥር፤
ዕጣና እድሌን፣ የነገዬን ሚስጥር፤
ማወቅ አይቻለኝም ያላንዳች ጥርጥር!
ምንጩን. . .
አመጣጡን. . .
ቀኑን የማላውቀው፣
ተዓምር ነው 'ምጠብቀው!
.
ሰው በዕውቀት ቢረ'ቅም፣
በልህቀት ቢጠልቅም፤
"ሰው" ሰው ብቻ ነው. . .
ነገውን አያውቅም!
እያንሰላሰለ. . .
እያመሳሰለ. . .
በምኞት ያመሻል፣በተስፋ ያነጋል፣
የሰው ልጅ አፈር ነው. . .
ተዓምር ይፈልጋል።
.
እኔም. . .
እንዴታውን ባላውቅም. . .
የደበተኝ አዚም ይተ'ናል እንደ ጠል፤
ማመን ነው ትርጉሙ ሕይወትን መቀጠል!
የእንቆቅልሼ ትብታብ፤
የፍርሃቴ ኪታብ፤
እያደር ይረግረባል፣ይፈ'ታል በኪኑ
ያልፋል ይኼ ሁሉ፣አምናለሁ በጽኑ!
.
ከሕይወት ትርጉም ውስጥ. . .
ብዙ ነው 'ማላውቀው፣
ብቻ ከልቤ ውስጥ
ተስፋ ነው 'ሚፈልቀው፣
ሰበብ አመጣጡን. . .
ቀኑን የማላውቀው፣
ተዓምር ነው ምጠብቀው!
.
@huluezih
@huluezih

https://youtu.be/J0Bxbml68lY

.
ጥሩው ነገር ግን እዚህ መድረሳችሁ ነው፡፡ዩኒቨርሲቲ የቀለም ትምህርት ብቻ ሳይኾን ሕይወትን የተማራችሁበት፣ከሰው ጋር እንዴት መኖር እንደሚቻል ያወቃችሁበት፣ የሕይወት ዘመን ጓደኞች ያፈራችሁበት፣ ከቤተሰብ ርቃችሁ ብዙ ነገር የተጋፈጣችሁበት ሥፍራ እንደመኾኑ ይኽን ሁሉ ይዛችሁ እዚህ መድረሳችሁ ሊያኮራችሁ ይገባል! ተስፋ ሳትቆርጡ፣ የጀመራችሁትን ሳታቋርጡ እዚህ ስለደረሳችሁ እንኳን ደስ አላችሁ! ለራሳችሁ ሞራል ሥጡ!
በድጋሚ እንኳን ደስ አላችሁ!
.
(#ፈይሠል_አሚን)
.
@huluezih
@huluezih

ለተመራቂዎች:-
.
• ዩኒቨርሲቲ ስትገቡ የቀይ ዳማ መልክ ይዛችሁ ገብታችሁ እንደ ዳማ መጫወቻ ጥቁርና ነጫጭባ ኾናችሁ የወጣችሁ…

• የካፌ ምግብ ጨጓራችሁን አስረጅቶ በከዘራ ድጋፍ የሚንቀሳቀስ ጨጓራ ባለቤት ያደረጋችሁ. . .

• 4 D 3C እና 2 F በመያዝ በቀጣይ ዓመት Add ለማድረግ ወደ ዪኒቨርሲቲ የምትመለሱና ቤተሰብ ጉዱን ሳያውቅ በሬ ጥሎ የደገሰላችሁ ተመራቂዎች. . .

• ሁሌ ከክላስ እየቀራችሁ፣ አስተማሪ ለምን ክላስ እንደማትገቡ ሲጠይቃችሁ ‹‹ብዙ ትኩረት መሣብ ስለማልወድ ነው!›› ስትሉ ተማሪዎች….
.
• አንዳንድ የሰላም መደፍረስ ያለባቸው ዩኒቨርሲቲ ገብታችሁ ካጠናችሁት ኮርስ በላይ ስልታዊ ማፈግፈግና ወታደራዊ ስትራቴጂ ተምራችሁ የወጣችሁ. . .

• የበሶ ውለታ ያለባችሁ ተመራቂዎች. . .

• በቴንሽንና በተመጣጠነ ምግብ እጦት ፈተና በደረሰ ቁጥር ፌንት እየበላችሁ ብዙ ተሸካሚ ወንድምና እህቶች ያፈራችሁ. . .
.
እናም ሌሎችም የዩኒቨርሲቲ ተማሪዎች እንኳን ለዚህ አበቃችሁ. . .እንኳን ደስ አላችሁ!
.

በተለያየ ዓመትና በተለያየ ዩኒቨርሲቲ ውስጥ ብንማርም ሁላችንም ዩኒቨርሲቲ የገባን ተማሪዎች አንድ ዓይነት ታሪክ እንጋራለን፡፡ በዚህም ምክንያት ወጣቶች ወደ ዩኒቨርሲቲ ሲገቡ እስኪወጡ ድረስ ምን ሊገጥማቸው ይችላል የሚለውን በመጽሐፍ መልክ በማዘጋጀት ትውልዱን ከመደናገር ለመታደግ አስቤያለሁ፡፡ርእሱም ‹‹እኛም እንናገር፣ተመራቂ አይደናገር!›› የሚል ነው፡፡
.
ከመጀመሪያው ስንጀምር. . . ሁላችንም ዩኒቨርሲቲ እንደደረሰን ስናረጋግጥ መጀመሪያ ላይ መጥተው ‹‹ምትፈልገውን ማንኛውም ነገር ካለ ንገረኝ! አትደብቀኝ! እኔ አሟላልሃለሁ!›› የሚሉ አጎቶችና አክስቶች አሉን፡፡ እንዲህ ካሉን በኋላ ግን ጠፍተው የምርቃታችን ቀን ነው በዓይነ ሥጋ የምናያቸው፡፡ አንዳንዴ ቸግሮን ስንደውልላቸው የማይገናኝ ምክንያት የሚያቀርቡ ዘመዶች ሁላችንም ጋር አሉ፡፡ ደውለን ‹‹የምትፈልገው ነገር ካለ ንገረኝ ብለኸኝ ነበር….›› ስንል ‹‹እቴኑ እኮ ሞተች!›› ብለው ወሬ የሚያስቀይሱ ዘመዶች እናንተ ጋር ብቻ ሳይኾን እኛም ጋ ነበሩ፡፡ ዘመን አይሽሬ ናቸው፡፡
.
እንደ ልማዳቸው የምርቃት ቀን ይመጡና ‹‹እንኳን ለዚህ አበቃህ! አሁን ሥራ ነው ሚያስፈልግህ…..በሰው በሰው አፈላልገን አንድ ቦታ እንሸጉጥሃለን!›› ብለው ሌላ ቃል ይገቡልሃል፡፡ ከዚያ አንተ በባስና በባቡር እየተሸጎጥክ ሥራ ፈልገህ ስታጣ ደውለህ…ቃል ገብተህ ነበር ስትለው. . .እንደ ልማዱ ‹‹እቴኑ እኮ ሞተች!›› ብሎ ወሬ ያስቀይሳል፡፡ እኔ ፍሬሽ ተመራቂ እያለሁ ይኼን የሚነግረኝ ሰው ቢኖር ደስ ይለኝ ነበር፡፡
.
የዚህ ዘመንን የዩኒቨርሲቲ ሕይወት ከእኛ ዘመን ትንሽ የሚለየው ሁለት ነገር ይመስለኛል፡፡አንደኛው በፊት ዩኒቨርሲቲ ገብተን ስንወጣ ነበር የምንመረቀው….አሁን አሁን ደሞ ቤተሰብ መርቆን ካልገባን በሰላም ለመውጣት እንቸገራለን፡፡
.
ሌላው ልዩነት ዩኒቨርሲቲዎች አዳዲስ ተማሪዎችን ለመጥራት የሚያወጡት ማስታወቂያ ይመስለኛል፡፡ ሐገሪቱ ባለችበት ሁኔታና እውነታ ምክንያት ዩኒቨርሲቲዎች አሁን አሁን ተማሪ አጠራራቸው ራሱ ያስደነግጣል፡፡
.
‹‹ማስታወቂያ ደብረ-ጤዛ ዩኒቨርሲቲ ለደረሳችሁ አዲስ ገቢ ተማሪዎች በሙሉ፡-
‹‹ደብረ-ጤዛ ዩኒቨርሲቲ የቀጣይ ዓመት መደበኛ ተማሪዎችን ከመጪው ማክሰኞ ጀምሮ ተቀብሎ የሚመዘግብ በመኾኑ ማንነታችሁን የሚገልጽ ሁለት ጉርድ ፎቶ ግራፎችን በመያዝ፣ ከላይ ከተጠቀሰው ውጪ አንሶላ፣ብርድልብስ፣ ሻንጣ እና በቆይታችሁ የምትጠቀሟቸውን ተጓዳኝ ምግቦች ሽፍታዎች ሊቀሟችሁ ስለሚችሉ ባትይዙ ይመረጣል፡፡በማስታወቂያ ላይ የተጠቀሱትን አሟልታችሁ ፈጣሪ ብሎ ድንገት በሕይወት ወደ መመዝገቢያ ስፍራው ከደረሳችሁ በአስቸኳይ የምናስተናግድዎ ይኾናል(በሕይወት ካለን!)፡፡ፈጣሪ በኪነ-ጥበቡ ይጠብቃችሁ!››
.
እንዲህና መሰል መከራዎችን አልፎ የተመረቀ ተማሪ በምርቃቱ ቀን ምንም ቢያደርግ ወዙ ሊመጣ አይችልም፡፡ ሁላችንም በምርቃታችን ቀን ሰቀቀኑ አክስቶንና አጥቁሮን፣በዲፌንስ ድንጋጤ ዓይናችን ቦግ ብሎ ቀርቶ፣አስተማሪ ሚመስል ሰው ባየን ቁጥር እየተደናበርን…… በምርቃታችን ቀን የተመረቀ ሰው ሳይኾን የመረቀነ ሰው ነው ምንመስለው፡፡
.
ለመጀመሪያ ጊዜ ዩኒቨርሲቲ የሔድኩት የኦረንቲየሽን ቀን ነበር፡፡ሁሉም ዲፓርትመንቶች በተወካያቸው በኩል አዳዲስ ተማሪዎች እንዲቀላቀሏቸው ሲያማልሉ ደረስኩ፡፡ እንደ ዩኒቨርሲቲ ተማሪ የመጀመሪያውን ሳክስ እና ግነት የምትሰሙት ኦረንቲየሽን ላይ ነው፡፡ በስስ ጎናችን በኩል ጀንጅነው፣ ሥራ አለ ብለው ያለ ፍላጎታችን ዲፓርትመንታቸውን እንድንቀላቀል የማይሉት ነገር የለም፡፡ የዚያን ቀን የአርኪዮሎጂ ዲፓርትመንትን ወክሎ የመጣው ሰውዬ እንዲህ አለ፡-
‹‹እንግዲህ እኛ ብዙ ራሳችንን ማስተዋወቅ የለብንም፤ጥሩ ነገር ማስታወቂያ አይፈልግም፡፡ የእኛ ዲፓርትመንት በጣም ሰፊ የሥራ ዕድል ያለው ዘርፍ ነው፡፡ እንደምታውቁት እስካሁን ሉሲ ብቻ ናት ሙሉ ለሙሉ የተገኘችው፡፡ገና አባትና እናቷ፣ ባለቤቷ እና ጎረቤቶቿ ስላልተገኙ እናንተ እነሱን በማግኘት ከበርቴ ልትኾኑ የምትችሉበት ዕድል ሰፊ ነው፡፡ የእኛ ተማሪዎች ጥንታዊ ቅሪተ-አካሎችን ለማግኘት የልምምድ ቁፋሮ በሚያደርጉበት ወቅት በድንገት ነዳጅ አግኝተው የራሳቸውንና የቤተሰቦቻቸውን ሕይወት ቀይረዋል፡፡ ስለዚህ እናንተም ከጸጋ በረከቱ ትቋደሱ ዘንድ እነሆ ተቀላቀሉን!››
.
እውነት ነዳጅ አገኛለሁ ብለህ ስትገባ ….ራስህን አስተማሪው ጀሪካን ሰጥቶ ለመኪናው ነዳጅ እንድታመጣ ሲልክህ ታገኘዋለህ!
.
በመጨረሻ የሚመር እውነት ሹክ ልበላችሁ፡፡ አሁን እየተሰማችሁ ያለው ስሜት እኛም ስንመረቅ ተሰምቶናል፡፡አሁን እያሰባችሁ ያላችሁትን ነገር እኛ አስበነው ነበር፡፡ ከምታስቡት ሐሳቦች መካከል የሚከተሉት ይገኙበታል፡-
‹‹አሁን ተመርቄያለሁ! ሥራ ይዤ ለፍቶ ያስተማረኝን ቤተሰቤን እየደጎምኩ፣ ከማገኘው ደሞዝ ቆጥቤ ዕዳዬን ከፍዬ ማስተርሴን እቀጥላለሁ!›› ብላችሁ የምታስቡ አላችሁ አይደል?
.
ሌሎቻችሁ ደሞ ‹‹ትምህርቱ ይበቃኛል፣ የራሴን ነገር ጀምሬ…ድርጅት አቋቁሜ ለብዙ ዜጎች የሥራ ዕድል እፈጥራለሁ›› ብላችሁ እያሰባችሁ ነው፡፡
.
የተቀራችሁት ደሞ ‹‹ስኮላርሺፕ አግኝቼ…ከሐገር ወጥቼ፣ በአውሮፓ ወይ በአሜሪካ ትምህርቴን ተምሬ፣ጥሩ ሥራ ይዤ ከኢትዮጵያ ሚስት አስመጥቼ ጥሩ ቤተሰብ መሥርቼ እኖራለሁ!››

እንደዚህ የምታስቡ አላችሁ አይደል! ይኼን ሐሳባችሁን እኛ ስንሰማ ምን እንደምንል ታውቃላችሁ? ‹‹ወላሂ! ኧረ? እንደዛ ነው!››
.
ሐቅ ሐቁን እናውራ ከተባለ….በተማርንበት ሙያ ላንሠራ እንችላለን፡፡ በኢንጂነሪንግ የተመረቀ ጓደኛዬ በሐገሪቱ ሁኔታ ምክንያት እሳት የላሰ ደላላ ኾኗል፡፡ ከየት እንዳመጣው ባላውቅም አሁን እንደሱ ሰውን የማሳመን ችሎታ ያለው ሰው የለም፡፡ ባለፈው የኾነ ቤት ሊያከራይ ደንበኞችን ይዞ ሲሔድ ቤቱ ሽንት ቤት የለውም፡፡ ‹‹ቤቱ እኮ ሽንት ቤት የለውም!›› ሲሉት ‹‹ችግር የለውም! ለጊዜው በዳይፐር ትጠቀማላችሁ!›› ብሏል፡፡

የድመቴ ጉዳይ!
.
"ድመትህን ጨክነህ አባረርከው?" የሚሉ ጥያቄ የሚመስሉ ውንጀላዎች ደርሰውብኛል😄 እርግጥ ተገቢ ጥያቄያዊ ውንጀላ ነው። ቢኾንም ግን እኔ ለዓመታት እንደ ልጄ አቅብጬ ያሳደግኩትን ድመት፣ በተመጣጠነ ምግብ እና በተመጣጠነ እንቅልፍ አሞላቅቄ ያኖርኩትን ድመት፣ መክሬ እና ዘክሬ ለአቅመ አዳም ያደርስኩትን ድመት. . . ሚስት አገባሁ ብዬ ባባርር ሚስቴ ራሱ ምን ትላለች? "ለድመትህ ካልኾንክ ለእኔም አትመለስም?" ብላ አትሰጋምን?
.
የተፈጠረው ነገር አሳሳቢ ነው። ድመቴ ግቢውን እንደ ግቢው ቆጥሮ አከራዬም እኔም ጋር እየተመላለሰ በነፃነት የሚኖር ቀበጥ ድመት ነው። አሁን ግቢውን እንደምለቅ ስታውቅ ድመቱን ይዤው እንደማልሔድ አስጠንቅቃ ነገረችኝ። ምክንያቷ ደሞ "ድመቶች አዲስ ቦታ የመልመድ ችግር ስላለባቸው ወደዚህ ለመመለስ በሚያደርገው ጥረት የመኪና እራት ይኾናል("የመኪና እራት" ማለት ግን ምን ማለት ነው? መኪና ነዳጅ እንጂ ድመት አይበላም ልበላት እንዴ?🙄 ፣ በዚያ ላይ ደሞ ይኼ ግቢ ካለ እሱ አይኾንም ጭር ይላል!" የሚል ነው መከራከሪያ ነጥቧ! ተከራክራኛለች።
.
እኔ አዲሱን ቤት ለመልመድ ተቸግሮ የመኪና እራት ቢኾን የሚለው ቢያሰጋኝም፣ ያሳደግኩትንና እኔን ብሎ ያን ግቢ የለመደን ድመት ጥዬ መሔድ አልችልም። ድመቴን እስካልሠጠሽኝ ድረስ የቤቱን ቁልፍ አልመልስም በማለት ክርክሩን ወደ ሌላ ምዕራፍ አሸጋግሬዋለሁ። ይኽ የድመት ይገባኛል ጥያቄ እየከረረ ሔዶ ፍርድ ቤት እንዳይደርስ በመስጋት ላይ እገኛለሁ😁 (አስባችሁታል ለድመት ጠበቃ ሳቆም😅)
.
በርግጥ አከራዬ ለድመቱ የተለየ ፍቅር አላት፣ ትንከባከበዋለች። ግን እኔ ደሞ እዚህ ድረስ አብሬው የመጣሁትን ድመት ጥሎ መውጣት ያስወቅሰኛል። እስቲ እንወያይበት....እርስዎ ቢኾኑ ምን ያደርጋሉ?😁
.
@huluezih
@huluezih

ትዳር መያዜን ሰምታችሁ ግሩፕ ውስጥ መልካም ምኞታችሁን የገለፃችሁልኝ ሰዎች እንደ ቤተሰብ የምንቆጣጠርበት ቻናል ውስጥ ማሳወቅ እንደነበረብኝ እንዲሰማኝ አድርጋችሁኛል። ምንም እንኳ የግል ጉዳይ ቢኾንም ከግል ሕይወት በመነሳት የምጽፋቸውንም ጽሑፎች ስታነቡ፣ስትነጋገሩበት፣ሐሳብ ስትጨምሩበት ቆይታችኋል። በዚህም ምክንያት አሁን ማግባቴን እንደ ቤተሰብ ቆጥሬ ለመናገር ተገድጃለሁ። አከብራችኋለሁ🙏