The 74 Media

တူရကီသားနှင့်ထိုးသတ်သည့် အောင်လအင်ဆန်ဒိုင်ပွဲရပ်​ဖြင့် ရှုံးနိမ့်

ဒန်ဗာ - စက်တင်ဘာ ၇၊ ၂၀၂၄။

One Championship သိုင်းပေါင်းစုံထိုးသတ်ပွဲတွင် တူရကီဖိုက်တာနှင့် ယနေ့နံနက်ပိုင်းက ထိုးသတ်ခဲ့သည့် အောင်လအင်ဆန်သည် ဒုတိယအချီ ၂ မိနစ်ကျော်တွင် အလှဲထိုးခံရပြီး ရှုံးနှိမ့်သွားသည်။

ပွဲအစ ပထမအချီတွင်ပင် အာဒိုဂန်က ချုပ်ကွက်များဖြင့်အသာစီးယူနိုင်ခဲ့ပြီး ဒုတိယအချီ ၂ မိနစ်ကျော်တွင် အလှဲထိုးအနိုင်ယူခဲ့ခြင်းဖြစ်သည်။

တူရကီဖိုက်တာအာဒိုဂန်မှာ ယနေ့ထိုးသတ်သည့် ပွဲစဉ်အပါအဝင် MMA ပြိုင်ပွဲပေါင်း ၁၀ ပွဲထိုးသတ်ခဲ့ပြီး ရှုံးပွဲမရှိ စံချိန်တင်ထားနိုင်သည့် ကစားသမားတစ်ဦးလည်းဖြစ်သည်။

အောင်လအင်ဆန်သည် One Championship နှင့် ဆယ်စုနှစ်တစ်ခုကြာလက်တွဲကာ MMA ပွဲစဉ်များတွင်ထိုးသတ်ခဲ့ပြီး သက်တမ်းတစ်လျှောက်အလှဲထိုးရှုံးနှိမ့်ထားခြင်းမရှိသော်လည်း ယနေ့ညပွဲတွင် အလှဲထိုး (Knock Out) ဖြင့်ရှုံးနိမ့်ခဲ့ခြင်းဖြစ်သည်။

One Champion ပြိုင်ပွဲ၏ One 168 ခေါင်းစဉ်နှင့်ကျင်းပသည့်ပွဲစဉ်ကို အမေရိကန်နိုင်ငံ၊ ကော်လိုရာဒိုပြည်နယ်၊ ဒန်ဗာမြို့ရှိ Ball Arena အားကစားရုံတွင်ကျင်းပနေခြင်းဖြစ်သည်။

အောင်လအင်ဆန်နှင့် ရှမေးလ်အာဒိုဂန်တို့ မစ်ဒယ်ဝိတ်တန်းနေရာတွင် ယှဉ်ပြိုင်ထိုးသတ်ရန်စီစဉ်ခဲ့သော်လည်း ပွဲမစမှီရက်ပိုင်းအလို ဝိတ်တန်းချိန်တွယ်ရာတွင် ဝိတ်တန်းမပြည့်မှီသည့်အတွက် Catchweight တန်းနေရာတွင် ထိုးသတ်ခဲ့သည်။

အသက် ၃၉ နှစ်အရွယ် အောင်လအင်ဆန်မှာ ယနေ့ပွဲစဉ်အပါအဝင် MMA ပြိုင်ပွဲပေါင်း ၄၄ ပွဲထိုးသတ်ရာတွင် ပွဲ ၃၀ နိုင် ၁၄ ပွဲ ရှုံးနိမ့်ထားသူဖြစ်သည်။

သတင်း - Thu Ta

စစ်ကောင်စီတပ်​က ပစ္စည်းခိုးပြီးမီးရှို့သဖြင့် ခင်ဦးမြို့နယ်တွင် ရွာရှစ်ရွာထက်မနည်း မီးလောင်ပျက်စီး

ခင်ဦး - စက်တင်ဘာ ၅၊ ၂၀၂၄။

စစ်ကောင်စီပူးပေါင်းတပ်ဖွဲ့က လေးရက်ဆက်တိုက် လိုက်လံမီးရှို့ခဲ့သောကြောင့် ခင်ဦးမြို့နယ် မြောက်ဘက်ခြမ်းရှိ ကျေးရွာရှစ်ရွာခန့် မီးလောင်ပျက်စီးခဲ့ကြောင်း သိရသည်။

မဒေါင်းလှကျေးရွာသို့ စစ်ကူလာသည့် စစ်ကောင်စီပူးပေါင်းစစ်ကြောင်းက အဆိုပါကျေးရွာအနီးရှိ ရွာများကို မီးရှို့ခဲ့ခြင်းဖြစ်သည်ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးက The 74 media ကိုပြောသည်။

“မဒေါင်းလှပျူရွာပတ်ပတ်လည်ရှို့တာ။ ဒီနေ့လည်းရှို့နေတာ တိုက်ခံရလို့ရှို့တာမျိုးလည်းမဟုတ်ဘူး သူတို့(စစ်ကောင်စီ)က ရှို့ချင်လို့ကို သက်သက်မဲ့ရှို့တာပါ။ ခင်ဦးနဲ့ ကန့်ဘလူအစပ်ကရွာတွေကို ရှို့တာ အခုလည်းစစ်ကြောင်းဆက်ထိုးနေတော့ ဆက်ရှို့မဲ့အနေအထားရှိတယ်။ မီးမရှို့ခင်မှာ သူတို့ယူချင်တာတော့ယူတာ ထုံးစံအတိုင်းပဲ သူတို့ရဲ့အစဉ်အလာတော့မချိုးဖောက်သေးပါဘူး မယူဘူးဆိုတဲ့နေရာတော့မရှိပါဘူး။ ယူချင်တာယူပြီး ရှို့တာ” ဟုပြောသည်။

အင်အား ၁၈၀ ခန့်ပါရှိသော စစ်ကောင်စီတပ်ဖွဲ့ဝင်များနှင့် ပျူစောထီးပူးပေါင်းတပ်ဖွဲ့က လိုက်လံမီးရှို့နေခြင်းဖြစ်ပြီး အဆိုပါ မဒေါင်းလှကျေးရွာအနီးတွင် ပြီးခဲ့သည့် ဩဂုတ်လကုန်ပိုင်းက တော်လှန်ရေးပူးပေါင်းတပ်နှင့် ပျူစောထီးတပ်ဖွဲ့ဝင်များကြား တိုက်ပွဲဖြစ်ပွားခဲ့ပြီးနောက် စစ်ရေးတင်းမာနေကြောင်း သိရသည်။

လက်ရှိအချိန်တွင် ငကြိုင်းကျေးရွာ၊ အင်ကြင်းပင်ကျေးရွာ၊ စောကြီးကျေးရွာ၊ သနပ်စိန်ကျေးရွာ၊ ဖန်းခါးကုန်းကျေးရွာ၊ ပေါက်တောကျေးရွာ၊ နှဲတွင်းကျေးရွာနှင့် ဆီဆုံလေးကျေးရွာတို့မှ အိမ်ခြေ ၂၀၀ ထက်မနည်း မီးရှို့ဖျက်ဆီးခံထားရကြောင်း သိရသည်။

စစ်ကောင်စီပူးပေါင်းတပ်ဖွဲ့က ဆက်လက်စစ်ကြောင်းထိုးနေပြီး လိုက်လံမီးရှို့နေသောကြောင့် ဒေသခံများကျေးရွာအတွင်း ပြန်လည်ဝင်ရောက်နိုင်ခြင်းမရှိသေးကြောင်း ပြည်သူ့လုံခြုံရေးအဖွဲ့ဝင်တစ်ဦးက ပြောသည်။

“မနေ့ကတော့ ပေါက်တောတော့သွားတယ်၊ ဒါပေမဲ့ မိုင်းထိလို့ပြန်ဆုတ်လာတယ်။ ဒီနေ့ နေ့လယ်ကျတော့ နှဲတွင်းလည်းရှို့တယ် ဆီဆုံလေးရောရှို့တယ်။ အခုလည်း အဲ့နားဝန်းကျင်က ရွာတွေကိုလျှောက်ရှို့မယ်လို့ သတင်းတွေထွက်နေတာပဲ။ အခုစစ်ကြောင်းထိုးတာက ပျူတွေလည်း ပါတယ် ဝါသဝလက်အောက်ခံပျူတွေအများဆုံးပါတာပဲ” ဟုပြောသည်။

စစ်ကောင်စီပူးပေါင်းတပ်ဖွဲ့က စစ်ကြောင်းဆက်ထိုးနေသောကြောင့် မီးရှို့ဖျက်ဆီးခံခဲ့ရသည့် ကျေးရွာရှစ်ရွာအပါအဝင် ကျေးရွာပေါင်း ၁၆ ရွာခန့်မှ ဒေသခံတစ်သောင်းကျော်ခန့် ထွက်ပြေးတိမ်းရှောင်နေရကြောင်းသိရသည်။

စစ်ကောင်စီတပ်ဖွဲ့ဝင်များနှင့် ပျူစောထီးပူးပေါင်းတပ်ဖွဲ့က ပြီးခဲ့သည့် ဇန်နဝါရီ ၉ ရက်နေ့ကလည်း ခင်ဦးမြို့နယ်၊ တဲစုကျေးရွာကို မီးရှို့ဖျက်ဆီးခဲ့သည်။

သတင်း - Dureng
ပုံ - ၂၀၂၃ ခုနှစ်၊ ဇူလိုင်လအတွင်း စစ်ကောင်စီစစ်ကြောင်း မီးရှို့ဖျက်ဆီးခဲ့သည့် ခင်ဦးမြို့နယ်၊ ကုန်းကြီးကျေးရွာ

မန္တလေးမှ မြစ်ကြီးနားသို့ ခရီးသည်တင်ယာဉ်ငယ်အချို့ ပြန်လည်ပြေးဆွဲ၊ ယာဉ်စီးခဈေးနှုန်းမြင့်မားပြီး ခရီးသွားချိန်ကြန့်ကြာသည်ဟုဆို

မြစ်ကြီးနား - စက်တင်ဘာ ၅၊ ၂၀၂၄။

တိုက်ပွဲများကြောင့်ပိတ်ထားရသည့် မြစ်ကြီးနား - မန္တလေးလမ်းတွင် နေရာအချို့ကို ကွင်းရှောင်လမ်းများမှ သွားနေရပြီး လမ်းခရီးမှာ နှစ်ညအိပ်သုံးရက်ခန့်ကြာမြင့်ကြောင်း သိရသည်။

လမ်းတစ်လျှောက်တွင် တိုက်ပွဲဖြစ်ပွားနေသောကြောင့် လမ်းပိုင်းနေရာအချို့ကို ပိတ်ထားရခြင်းဖြစ်ကာ ကွင်းရှောင်လမ်းမှသွားရသဖြင့် အချိန်ကြာမြင့်နေခြင်းဖြစ်သည်ဟု ခရီးသည်တင်ယာဉ်မောင်းတစ်ဦးက The 74 Media ကိုပြောသည်။

“နန့်စီးအောင်ကတော့ ဖွင့်တယ်ဗျ၊ အင်းတော်နဲ့ စီပိန်းကြားကို ကွင်းရတာ။ သွားတာရက်ကပုံမှန်အားဖြင့်တော့ သုံးရက်လောက်ကြာမှာ။ တကယ်လို့တိုက်ပွဲကြောင့် ကွင်းလို့မရဘူးဆိုရင်တော့ မပြောတတ်ဘူး” ဟုပြောသည်။

မြစ်ကြီးနား - မန္တလေးယာဉ်စီးခမှာ ယာဉ်လိုင်းအမျိုးအစားအလိုက် ကျပ်တစ်သိန်းသုံးသောင်းမှ တစ်သိန်းခွဲအထိ ပေါက်ဈေးရှိကြောင်း ခရီးသည်တင်ယာဉ်မောင်းများထံမှသိရသည်။

ကချင်ပြည်နယ်နှင့် စစ်ကိုင်းတိုင်းအစပ်ရှိ အင်းတော်မြို့သိမ်းတိုက်ပွဲစတင်ခဲ့သည့် ဩဂုတ်လ ၁၆ ရက်နေ့မှ စတင်ကာ မြစ်ကြီးနား - မန္တလေးကားလမ်းကို ၁၀ ရက်နီးပါးကြာပိတ်ခဲ့ပြီးနောက် ခရီးသည်တင်ကားများကို ကွင်းလမ်းမှသွားလာခွင့်ပြုသော်လည်း ကုန်းကားများသွားလာမှုကို လက်ရှိအချိန်ထိပိတ်ထားဆဲဖြစ်သည်။

ထို့အပြင် ဗန်းမော်မှ မန္တလေးသို့သွားလာရန်အတွက်လည်း ကွင်းလမ်းများမှသွားလာရသည့်အပြင် လမ်းခရီး အခက်ခဲကြောင့် ကားခနှုန်းထားများလည်းမြင့်တက်သွားကြောင်း အခြားယာဉ်မောင်းတစ်ဦးကဆိုသည်။

“အရင်တုန်းကတော့ ဗန်းမော်ကဈေးချိုတယ် နေ့ချင်းပေါက်တယ်လေ။ တကောင်းလမ်းအတိုင်းမောင်းရတာကိုး။ လမ်းအကောင်းမောင်းရတာပေါ့။ အခုကတော့တောကြိုတောင်ကြား ဇက်တွေ(စက်လှေ) ကူး။ တစ်ခါတလေ အခန့်မသင့်ရင် ထွန်စက်တွေနဲ့ဆွဲ။ လမ်းလည်းဝေးသွားတယ်။ အဲဒီလိုအနေအထားဖြစ်တဲ့အတွက် ဈေးတွေပိုသွားတာပေါ့” ဟုဆိုသည်။

ဗန်းမော် - မန္တလေးကားခ နှစ်သိန်းခွဲဝန်းကျင်ရှိပြီး မန္တလေးသို့ရောက်ရှိနိုင်ရန် ၃ ရက်ခန့်ကြာမြင့်ကြောင်းသိရသည်။

မြစ်ကြီးနား - မန္တလေးလမ်းတွင် ခရီးသည်တင်ကားအသေးများသာ ကွင်းရှောင်လမ်းများမှ ပြေးဆွဲနေပြီး ခရီးသည်တင်ကားကြီးများမှာ လက်ရှိအချိန်အထိ ပြန်လည်ပြေးဆွဲနိုင်ခြင်းမရှိသေးကြောင်း သိရသည်။

ကချင်ပြည်နယ်မှ မန္တလေးသွားလမ်း စစ်ကိုင်းတိုင်းအတွင်းရှိ အချို့မြို့နယ်များတွင် တော်လှန်ရေးပူးပေါင်းတပ်များက မြို့သိမ်းတိုက်ပွဲများဆင်နွှဲနေသည့်အတွက် တိုက်ပွဲများဖြစ်ပွားလျက်ရှိသည်။

သတင်း - Thu Ta
ဓါတ်ပုံ - ပုံဟောင်းဖြစ်သည်။

နိုင်ငံအနှံ့ရွာမီးရှို့ ဗုံးကြဲရန် အမိန့်ပေးစေခိုင်းသူ စစ်ခေါင်းဆောင်က တိုင်းရင်းသားလက်နက်ကိုင်အဖွဲ့အချို့ နယ်မြေချဲ့ထွင်နေသည်ဟု စွပ်စွဲ

နေပြည်တော် - စက်တင်ဘာ ၄၊ ၂၀၂၄။

နိုင်ငံရေးကြပ်တည်းမှုကို အခွင့်ကောင်းယူကာ တိုင်းရင်းသားလက်နက်ကိုင်အဖွဲ့အချို့က နယ်မြေချဲ့ထွင်ရေး ကြိုးပမ်းလုပ်ဆောင်နေသည်ဟု စစ်ခေါင်းဆောင်ကပြောကြောင်း ယနေ့ထုတ် မြန်မာ့အလင်းသတင်းစာတွင်ဖော်ပြထားသည်။

စစ်ခေါင်းဆောင် ဗိုလ်ချုပ်မှူးမင်းအောင်လှိုင်က ယမန်နေ့ တောင်ကြီးမြို့တွင်ပြုလုပ်ခဲ့သည့် ပြည်နယ်နှင့် ခရိုင်အဆင့်ဌာနဆိုင်ရာတာဝန်ရှိသူများနှင့် တွေ့ဆုံအမှာစကားပြောကြားစဉ် ထည့်သွင်းပြောကြားခဲ့ခြင်းဖြစ်သည်။

“အချို့သောတိုင်းရင်းသားလက်နက်ကိုင်အဖွဲ့များအနေဖြင့် နိုင်ငံတော်တွင် နိုင်ငံရေးအရ အကျပ်အတည်းများဖြစ်ပေါ်နေမှုကို အခွင့်ကောင်းရယူ၍ နယ်မြေချဲ့ထွင်ရန် ကြိုးပမ်းဆောင်ရွက်မှုများကို ကြုံတွေ့လာခဲ့ရ” ဟုပြောသည်။

ထို့အပြင် တော်လှန်ရေးတပ်ဖွဲ့များက တပ်သားသစ်များ အတင်းအဓမ္မစုဆောင်းနေမှုများလည်းရှိနေပြီး လက်နက်ကိုင်အဖွဲ့အစည်းများ၏ လုပ်ရပ်များကို အခြေအနေအရပ်ရပ်ပေါ်မှုတည်ပြီး လိုအပ်သလို တုံ့ပြန်သွားမည်ဖြစ်သောကြောင့် ပြည်သူများအနေဖြင့် လုံခြုံမှုရှိစေရန်အတွက် သတိပြုကြရန် ဆက်ပြောသည်။

စစ်ကောင်စီကသာ ပြည်သူ့စစ်မှုထမ်းဥပဒေနှင့် ပြည်သူ့လုံခြုံရေးတို့ကို အကြောင်းပြကာ နည်းလမ်းအမျိုးမျိုးဖြင့် တပ်သားသစ်များ စုဆောင်းနေကြကြောင်း စစ်ကိုင်းတိုင်းရှိ ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။

“သူတို့ (မင်းအောင်လှိုင်နှင့် ဇော်မင်းထွန်း) ပြောလိုက်တဲ့စကားတွေက ပြည်သူတွေပြောင်းပြန်ပဲ ယုံကြတော့တာ။ အခုဒီဘက်(စစ်ကိုင်းတိုင်း) အသက်မပြည့်သေးတဲ့ ကလေးတွေရော၊ အသက် ၆၅ ကျော်အရွယ်အဖိုးကြီးတွေကိုလည်း ဆွဲတာပဲ။ မြေပြင်မှာကသူတို့ပဲ အကြောင်းအမျိုးမျိုးပြပြီး ဆွဲနေတာ။ ကျွန်တော်တို့ဘက်တော့ သူတို့ရွာတစ်ရွာကို မီးရှို့လိုက်ရင် အဲ့တစ်ရွာလုံး PDF ဖြစ်သွားတာပဲ အတင်းစုဆောင်းစရာမလိုဘူး PDF လုပ်ဖို့ဖိအားပေးတာလည်း သူတို့ပဲ” ဟုပြောသည်။

စစ်ကောင်စီတပ်ဖွဲ့ဝင်များနှင့် ပျူစောထီးပူးပေါင်းတပ်ဖွဲ့က ဩဂုတ်လ ၂၇ ရက် နှင့် ၂၈ ရက်နှစ်ရက်အတွင်း မုံရွာမြို့ပေါ်တွင် လူကြီးလူငယ်မရွေး တပ်သားသစ်စုဆောင်းရန် ပြည်သူ အယောက် ၆၀ ဦးထက်မနည်း အတင်းအဓမ္မ ဖမ်းဆီးခဲ့ပြီး ဟုမ္မလင်းမြို့နယ်တွင်လည်း စစ်ကောင်စီလက်အောက်ခံ SNA တပ်ဖွဲ့ဝင်များက တပ်သားသစ်စုဆောင်းခြင်းများ ပြုလုပ်နေပြီး ဝင်ရောက်လိုခြင်းမရှိပါက ဒဏ်ငွေဆောင်ခိုင်းခြင်းများ ပြုလုပ်နေကြောင်း သိရသည်။

စစ်ကောင်စီသည် တပ်ဖွဲ့ဝင်အင်းအားတိုးလာစေရန်အတွက် ပြည်သူ့စစ်မှုထမ်း ဥပဒေပြဌာန်းခဲ့သကဲ့သို့ ပြီးခဲ့တဲ့ သြဂုတ်လ ၁၆ ရက်နေ့ကလည်း ပြည်သူ့လုံခြုံရေးနှင့် အကြမ်းဖက်နှိမ်နှင်းရေး ဗဟိုကြီးကြပ်မှုအဖွဲ့ ဖွဲ့စည်းပြီး ပြည်သူ့လုံခြုံရေးအတွက်ဟုဆိုကာ အရွယ်သုံးပါးမရွေး လူသစ်စုဆောင်းနေကြောင်း သိရသည်။

သတင်း - Dureng

စစ်ကောင်စီတပ်က ခြိမ်းခြောက်ထားသောကြောင့် ပိတ်မိနေသည့် ဒေသခံပြည်သူများ အစားအသောက်အတွက် အခက်အခဲဖြစ်နေ


အင်းတော် - စက်တင်ဘာ ၄၊ ၂၀၂၄။


ထွက်ပြေးပါကပစ်မည်ဟု စစ်ကောင်စီတပ်ဖွဲ့ဝင်များ ခြိမ်းခြောက်ထားသောကြောင့် စစ်ကိုင်းတိုင်း၊ အင်းတော် မြို့မဘုန်းကြီးကျောင်းတွင် ပိတ်မိနေသည့်စစ်ဘေးရှောင်ရာနှင့်ချီ စားသောက်ရေးအတွက် အခက်ကြုံနေရကြောင်း သိရသည်။


အင်းတော်ဒေသခံများ မြို့မဘုန်းကြီးကျောင်းတွင်စစ်ဘေးတိမ်းရှောင်နေရသည်မှာ ရက်ပေါင်း ၂၀ နီးပါးရှိလာပြီး အကူအညီမရသည့်အပြင် စစ်ကောင်စီတပ်ဖွဲ့ဝင်များက ထွက်ခွာခွင့်မပြုသောကြောင့် အခက်ကြုံနေကြရသည်ဟု ထွက်ပြေးလွတ်မြောက်လာသူနှင့်နီးစပ်သူတစ်ဦးက The 74 Media ကိုပြောသည်။


“လူတွေများတယ်။ စားစရာမလောက်ဘူးပေါ့။ နေစရာလည်း သမံတလင်းပေါ်အိပ်ရတာအဆင်မပြေဘူးပေါ့။ လွတ်မြောက်လာသူတွေရဲ့ပြောကြားချက်အရ ထွက်ပြေးလို့အပစ်ခံရသူတွေတောင်ရှိတယ်” ဟုဆိုသည်။


အဆိုပါဘုန်းကြီးကျောင်းအတွင်းပိတ်မိနေသူ ၅၀၀ ဝန်းကျင်ခန့်ရှိနိုင်ကြောင်း ထွက်ပြေးလွတ်မြောက် လာသူများနှင့်နီးစပ်သူများကဆိုသော်လည်း The 74 Media အနေဖြင့် သီးခြားအတည်ပြုနိုင်ခြင်းမရှိသေးပါ။
လက်နက်ကြီးကျရောက်ပေါက်ကွဲမှုကြောင့် ထိခိုက်သေဆုံးသူများရှိပြီး ဒဏ်ရာရှိထားသူများမှာလည်း ဆေးကုသခွင့်မရရှိကြောင်း အခြားဒေသခံတစ်ဦးက ဆိုသည်။


“မြို့ထဲမှာလက်နက်ကြီးကျလို့ထိပြီးတော့ဒဏ်ရာရတာရှိတယ်။ ကလေးငယ်လေးတွေဆိုလည်း ခေါင််းတွေကွဲ၊ ကျောတွေကွဲ။ ဆေးဝါရည်နဲ့ပဲဖြစ်သလိုကုပေးနေရတာ” ဟုဆိုသည်။


လက်နက်ကြီးစထိမှန် ဒဏ်ရာရရှိခဲ့သူများတွင် ဆေးကုသခွင့်မရရှိသောကြောင့် အသက် ၂၈ နှစ်အရွယ် အမျိုးသမီးတစ်ဦးနှင့် အသက် ၂၀ အရွယ်အမျိုးသားတစ်ဦးသေဆုံးခဲ့ပြီး နှစ်ဦးစလုံးကို ဘုန်းကြီးကျောင်းဝန်းအတွင်း မြေမြုပ်သင်္ဂြိုဟ်ပေးခဲ့သည်ဟု ထွက်ပြေးလွတ်မြောက်လာသူများပြောကြောင်း သိရသည်။


အဆိုပါဘုန်းကြီးကျောင်းအတွင်းမှထွက်ပြေးလာသူများတွင် စစ်ကောင်စီလက်အောက်ခံ Non-CDM ဝန်ထမ်းများလည်းပါဝင်ပြီး ထိုသူများကိုပြည်သူ့ကာကွယ်ရေးတပ်များက ကူညီကယ်ဆယ်ပေးထားကြောင်း အင်းတော်ဒေသခံအမျိုးသားတစ်ဦးကဆိုသည်။


“ထွက်ပြေးလွတ်မြောက်လာသူတွေကို သူ့ဆွေမျိုးသားချင်းရှိတဲ့ရွာ၊ မရှိရင်လည်း စစ်ရှောင်စခန်းကိုပို့ပေးပါတယ်။ Non-CDM လိုလူမျိုးတွေကိုတော့ တနေရာမှာနေရာချထားပေးတယ်။ လိုအပ်တာတွေကူညီပေးထားပါတယ်။ သူတို့လည်း ခံဝန်ထိုးပြီးနောက်ဆို လွပ်လပ်စွာသွားလာခွင့်ပေးမှာပါ” ဟုဆိုသည်။


မြို့မဘုန်းကြီးကျောင်းတွင် စစ်ကောင်စီတပ်က အခိုင်အမာတပ်စွဲထားပြီး ဒေသအခေါ် ဂျပန်လိုဏ်ဂူကုန်းနှင့် တစ်တန်းတည်းရှိသည့်အတွက် စစ်ကောင်စီတပ်ကင်းစခန်းများလည်းရှိကြောင်းသိရသည်။


ပြီးခဲ့သည့် ဇွန်လ ၂၂ ရက်နေ့ကလည်း အင်းတော်မြို့နယ်၊ နန့်သာကျေးရွာဘုန်းကြီးကျောင်းကို စစ်ကောင်စီတပ်က လေကြောင်းမှဗုံးကြဲတိုက်ခိုက်ခဲ့သောကြောင့် လူသားဒိုင်းအဖြစ်ဖမ်းဆီးခံထားရသည့် ၅ နှစ်အရွယ် ကလေးငယ်တစ်ဦးအပါအဝင် ၁၇ ဦးသေဆုံးခဲ့ပြီး အများအပြားထိခိုင်ဒဏ်ရာရရှိခဲ့သည်။


သတင်း - Thu Ta
ပုံ - ဒေသခံပြည်သူများ‌ စစ်ဘေးတိမ်းရှောင်နေသည့်အင်းတော်မြို့မ ဘုန်းကြီးကျောင်း

မြစ်ကြီးနားတွင် ခြေထောက်ပြတ်ပြီး သေဆုံးနေသည့် အမျိုးသမီးတစ်ဦး၏ရုပ်အလောင်းတွေ့

မြစ်ကြီးနား - စက်တင်ဘာ ၄၊ ၂၀၂၄။

ညာဘက်ခြေထောက်ပြတ်ပြီး သေဆုံးနေသည့်အမျိုးသမီးတစ်ဦး၏ ရုပ်အလောင်းကို မြစ်ကြီးနားမြို့၊ ကြာရာပတ္တီးရပ်ကွက်တွင် တွေ့ရှိခဲ့ကြောင်းသိရသည်။

ပြတ်တောက်နေသည့်ခြေထောက်ကို ခွေးတစ်ကောင်ကိုက်ဆွဲလာသဖြင့် ဒေသခံများက ရှာဖွေရာမှအလောင်းကို တွေ့ရှိခဲ့ခြင်းဖြစ်သည်ဟု ကြာရာပတ္တီးရပ်ကွက်နေ အမျိုးသားတစ်ဦးက The 74 Media ကိုပြောသည်။

“ခွေးတစ်ကောင်က အဲ့အမျိုးသမီးရဲ့ခြေထောက်ကိုက်လာလို့သိရတာဟုတ်တယ်။ အဲ့ဒါကိုနွားကျောင်းတဲ့ ကလေးတစ်ယောက်က သိလာတာ။ ရွာကိုပြောပြီးသွားကြည့်တာ အလောင်းကတော့ ပုပ်ပွနေပြီလေး။ လောက်တွေတောင်အများကြီး” ဟုပြောသည်။

သေဆုံးသူမှာ အသက် ၂၆ နှစ်အရွယ်ရှိ အမျိုးသမီးတစ်ဦးဖြစ်ပြီး ခြေမျက်စိမှ ပြတ်နေခြင်းဖြစ်သည်။

ရုပ်အလောင်းကို ကားလမ်းမကြီးနှင့် ပေ ၅၀ ခန့်အကွာရှိ အကွက်ရိုက်ထားသည့်ခြံအနီးတွင် မှောက်လျက်အနေအထားဖြင့် စက်တင်ဘာလ ၁ ရက်နေ့က တွေ့ရှိခဲ့ခြင်းဖြစ်ကြောင်း ဒေသခံအခြားအမျိုးသားတစ်ဦးက ပြောသည်။

“ခွေးကခြေထောက်ပြတ်တဲ့အထိက မကိုက်လောက်ဘူး။ ချိုးပေးထားတာလား၊ ခုတ်ပေးထားတာလား မပြောတက်ဘူး။ သေနေတာတော့ ငါးရက်လောက်ကြာနေပြီထင်တယ်။ မှောက်လျက်အနေအထားဆိုတော့ တခြားဒဏ်ရာတွေက မတွေ့ရဘူး” ဟုပြောသည်။

မြစ်ကြီးနားမြို့တွင် ဖုန်းနှင့် အင်တာနက်လိုင်းများပြတ်တောက်နေသဖြင့် သေဆုံးသူနှင့်ပတ်သက်သည့် အချက်အလက်များကို ဆက်သွယ်မေးမြန်းရန်ခက်ခဲနေသည်။

ပြီးခဲ့သည့် ဇွန်လ ၂၉ ရက်နေ့ကလည်း မြစ်ကြီးနားမြို့၊ ရာဒါကောင်ရပ်ကွက်နှင့် အေးစေတီတို့တွင် Shan Ni Judiciary – SNJ ဟူသောစာသားပါကတ်ပြားကပ်ထားပြီး ဓါးဒဏ်ရာများဖြင့် သေဆုံးနေသည့် အမျိုးသားနှစ်ဦး၏ရုပ်အလောင်းတွေ့ရှိခဲ့သည်။

သတင်း - Sin Li