People's Spring

ချင်းညီနောင်အဖွဲ့မှ ရဲဘော်များနှင့် ဖလမ်းမြို့မှ စစ်ကောင်စီတပ်စွဲရာနေရာများ။ ဓာတ်ပုံ - The Chin Journal

ချင်းညီနောင်၏ ဖလမ်းမြို့သိမ်းတိုက်ပွဲ ဆက်လက်ပြင်းထန်

ဟန်နွေ/People’s Spring

ချင်းပြည်နယ် ဖလမ်းမြို့ရှိ စစ်ကောင်စီတပ်စခန်းကို ချင်းညီနောင်နှင့် မဟာမိတ်တပ်များက ထိုးစစ်ဆင်တိုက်ခိုက်လျက်ရှိရာ ယနေ့(နိုဝင်ဘာ ၂၁ရက်)တွင် တိုက်ပွဲပြင်းထန်နေသည်ဟု ချင်းသတင်းရင်းမြစ်က ပြောသည်။

ဖလမ်းနှင့် မင်းတပ်မြို့သိမ်းတိုက်ပွဲကို နိုဝင်ဘာ ၉ရက်ကစတင်၍ ချင်းညီနောင်နှင့် မဟာမိတ်များက ဆင်နွှဲနေခြင်းဖြစ်သည်။

" အခုဒီနေ့ကတော့ ဖလမ်းမြို့နယ်မှာတိုက်ပွဲ အပြင်းအထန်ရှိပါတယ်။ စကစ လေယာဉ်သုံးပြီးမှ ဗုံးအလုံး ၅၀ကျော်လောက် ဗုံးကြဲတိုက်ခိုက်နေတယ်။ အဲဒီ ချင်းညီနောင်မဟာမိတ်တွေကနေအခု ဖလမ်း စကစတပ်ကုန်းကို တိုက်ခိုက်ပြီးမှ ကာကင်းအထိ သိမ်းပိုက်နိုင်တယ်။ တပ်ကုန်းအထဲကတော့ အခုတိုက်ခိုက်နေဆဲဖြစ်ပါတယ်။အဲဒါကြောင့် စကစတွေက လေယာဉ်နဲ့ Y12နဲ့လည်းပစ်ခတ်တိုက်ခိုက်ပါတယ်"ဟု ချင်းသတင်းရင်းမြစ်က ပြောသည်။

ချင်းညီနောင်အနေဖြင့် ဖလမ်းနှင့် မင်းတပ်မြို့အခြေပြု စစ်ကောင်စီတပ်စခန်းများအား တပြိုင်တည်း ထိုးစစ်ဆင်တိုက်ခိုက်နေကြောင်းသာ အသိပေးထားပြီး တိုက်ပွဲသတင်းများ ထပ်မံ ထုတ်ပြန်အသိပေးခြင်းမရှိပေ။

" ဖလမ်းမြို့ထဲပဲ အတိအကျ ရပ်ကွက်တော့ မသိနိုင်ဘူး။ အဝေးကနေ ကြည့်မယ်ဆိုရင် ၂နေရာလောက် မီးလောင်နေဆဲဖြစ်ပါတယ်"ဟု ချင်းသတင်းရင်းမြစ်က ဖလမ်းမြို့တိုက်ပွဲ အခြေအနေနှင့်ပတ်သက်ပြီး ပြောသည်။

ထို့အပြင် ချင်းပြည်နယ် မင်းတပ်မြို့သိမ်းတိုက်ပွဲသည်လည်း တိုက်ပွဲစတင်ချိန်မှ ပြီးခဲ့သည့် ရက်ပိုင်းအထိ တိုက်ပွဲပြင်းထန်ကာ စစ်ကောင်စီက လေကြောင်းမှ အပြင်းအထန်ခုခံတိုက်ခိုက် လျက်ရှိသည်။

မင်းတပ် ချင်းဒေသကာကွယ်ရေးတပ်(CDF) ပြောရေးဆိုခွင့်ရှိသူ ဆလိုင်းဟာအွမ်က မြို့ပေါ် တိုက်ပွဲ ဆက်ဖြစ်နေကြောင်းကို ပြီးခဲ့သည့် ရက်အနည်းငယ်က အတည်ပြုထားသော်လည်း စစ်ရေးအခြေအနေများ လိုအပ်မှသာ ထုတ်ပြန် အသိပေးမည်ဟု ပြောထားသည်။

မင်းတပ်ဒေသခံကလည်း ယမန်နေ့(နိုဝင်ဘာ ၂၀ရက်)တွင် မြို့ပေါ် အခြေအနေကို လူမှုကွန်ရက်တွင် ရေးသားဖော်ပြခဲ့ရာ စစ်ကောင်စီက လေကြောင်း ဗုံးကြဲတိုက်ခိုက်မှုဆက်လုပ်နေသလို ပြည်သူလူထု နေအိမ်များမီးရှို့ဖျက်ဆီးမှုများ ဆက်လုပ်ဆောင်နေသည်ဟု ဆိုသည်။

ချင်းဒေသကာကွယ်ရေးတပ်ဖွဲ့(CDF)များဖြင့် စုဖွဲ့ထားသည့် ချင်းညီနောင်သည် မဟာမိတ်အာရက္ခတပ်တော်(AA)နှင့် ပူးပေါင်းပြီး မတူပီမြို့သိမ်းတိုက်ပွဲ၊ ကန်ပက်လက်မြို့နယ် ကျင်ဒွေးမြို့သိမ်းတိုက်ပွဲများ အောင်မြင်မှုရရှိထားသည်။

ယခု မင်းတပ်နှင့် ဖလမ်းမြို့စစ်ဆင်ရေးတွင် AA ပါဝင်ခြင်းရှိ၊မရှိ တရားဝင်ထုတ်ပြန် ထားခြင်းမရှိသေးပေ။ သို့သော် ချင်းညီနောင်၏ အကူအညီတောင်းခံမှုကြောင့် မဟာမိတ်အဖွဲ့အစည်းအချို့သည် မိတ်ဖက်အဖွဲ့အစည်း အိမ်နီးချင်းကောင်း ပီသစွာဖြင့် စစ်ဆင်ရေးတွင် ပူးပေါင်းပါဝင်လျက်ရှိသည်ဟု အသိပေးထားသည်။

(သေဆုံးနေသော စစ်ကောင်စီတပ်ဖွဲ့အချို့နှင့် သိမ်းဆည်းရရှိသော လက်နက်ခဲယမ်းများအား တွေ့ရစဉ်။ ဓာတ်ပုံ - NUG အမှတ်(၁)စစ်ဒေသ)

မတ္တရာတိုက်ပွဲ စစ်ကောင်စီဘက်မှ ၁၂ဦးသေဆုံး၊ သေနတ် ၉လက်ရဟု NUG အမှတ်(၁)စစ်ဒေသထုတ်ပြန်

အိမ်သွင်၊ ဇေအောင်/People’s Spring

မန္တလေးတိုင်း၊ မတ္တရာမြို့နယ် ဆောက်ခြုံပေါက်ရွာသို့ ဝင်ရောက်လာသည့်အမှတ် (၉၁၀)စစ်အင်ဂျင်နီယာတပ်ရင်းမှ ထွက်လာသော စစ်ကောင်စီတပ်ကို တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၂ဦးသေဆုံးပြီး သေနတ် ၉လက်နှင့် လက်နက်ခဲယမ်းအများအပြားသိမ်းဆည်းရရှိခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန အမှတ်(၁)စစ်ဒေသကထုတ်ပြန်သည်။

ဆောက်ခြုံပေါက်ရွာအနီးတွင် နိုဝင်ဘာ ၁၇ရက်က တိုက်ပွဲဖြစ်ပွားခဲ့ခြင်းဖြစ်သည်။

"လတ်တလော နယ်မြေကောင်းကောင်း မရှင်းလင်းရသေးဘဲနဲ့ အလောင်း ၁၂လောင်းရယ် ဂန်းငယ်တွေကော၊ စက်သေနတ်တွေကော ရလိုက်တယ်။ လက်နက်တွေက အသစ်တွေလို့ပြောတယ်" ဟု ကာကွယ်ရေးရဲဘော်များနှင့် နီးစပ်သူတစ်ဦးက ပြောသည်။

ထိုစစ်ကောင်စီစစ်ကြောင်းသည် သနပ်ကုန်း၊ ငယ်တိုး၊ သဖန်းဒေါင့်ကျေးရွာ များ၌လည်းကောင်း၊ ဆောက်ခြုံပေါက်ရွာ အရှေ့ဘက် ၂ မိုင်ခန့်အကွာရှိ ရွှေချောင်းပျူရွာ၌လည်းကောင်း အထိုင်ချထားကြောင်း ဒေသခံအချို့က ပြောသည်။

လက်ရှိ တိုက်ပွဲဖြစ်ပွားခြင်းမရှိသေးသော်လည်း
ယနေ့(နိုဝင်ဘာ ၂၁ရက်) နေ့လယ်ပိုင်းက ငယ်တိုးရွာမှ စစ်ကောင်စီတပ်က လက်နက်ကြီးဖြင့် ပစ်ခတ်၍ ​ဒေါင်းကျွန်းရွာသို့ လက်နက်ကြီးကျကာ ပြည်သူတစ်ဦးဒဏ်ရာရရှိခဲ့ကြောင်း Wetlet Informational Networkအဖွဲ့က ပြောသည်။

စစ်ကောင်စီတပ်သည် မတ္ထရာမြို့နယ်အနောက်ခြမ်းကို နိုဝင်ဘာ ၉ ရက်မှစတင်ပြီး စစ်ကြောင်းထိုးခဲ့ပြီး တော်လှန်ရေးအဖွဲ့များနှင့် တိုက်ပွဲများဖြစ်ပွားခဲ့ခြင်းဖြစ်သည်။

စစ်ကောင်စီ၏ ခြေမြန်တပ်ရင်း(၇၀၁)မှ ဗိုလ်မှူးကျော်ဇေယျဦးစီးပြီး ခမရ(၇၀၁၊ ၇၀၃၊ ၇၀၄)အင်အား(၇၀)ကျော်ပါ စစ်ကြောင်းအား ပြင်ဦးလွင်ခရိုင်ကွပ်ကဲရေးမှူး၏ကွပ်ကဲမှုနှင့် အမှတ်(၅၁၀)တပ်ရင်း၊ မန္တလေးခရိုင် ပကဖ၊ မဟာအောင်မြေမြို့နယ်၊ ချမ်းမြသာစည်မြို့နယ်၊ မတ္တရာမြို့နယ် ပကဖ ပူးပေါင်းအဖွဲ့တို့က တိုက်ခိုက်ခဲ့ကြောင်း အသိပေးသည်။

စစ်ကောင်စီစစ်ကြောင်းသည် အောင်မြေသာစံမြို့နယ်ရှိ စအရ-၉၁၀(အမှတ်-၉၁၀ စစ်မြေပြင်အင်ဂျင်နီယာတပ်ရင်း)တွင် အင်အားစုဖွဲ့ပြီး သဖန်းဒေါင့်ရွာမှတဆင့် ဝင်ရောက်လာခြင်းဟု ဆိုသည်။

အဆိုပါတိုက်ပွဲ၌ စစ်ကောင်စီဘက်မှ(၁၂)ဦးသေဆုံးပြီး MA-15 (ငါးကြင်းမြီး)နှင့် MA-10 (RPG)အပါ လက်နက်(၉)လက်၊ RPG ဒုံးသီး(၈) လုံး၊ ၆၀ မမ ဗုံးသီး(၅)လုံး၊ အီနာဂါ ဗုံးသီး(၅) လုံး၊ 5.56 ကျည်(၃၅၁)တောင့်၊ G-3 ကျည်(၂၄၈)တောင့်၊ MA ကျည်အိမ်(၇)ခု၊ ကျည်အိမ်အဝိုင်း(၁)ခု၊ MA-15 ကျည်ခါးပတ်(၁)ခု၊ Equipment(၁)ခု၊ ယူနီဖောင်း(၂)စုံသိမ်းဆည်းရရှိကြောင်း အမှတ်(၁)စစ်ဒေသက ထုတ်ပြန်ထားသည်။

ထိုနေ့(နိုဝင်ဘာ ၁၇ရက်)ညနေပိုင်းတွင် စစ်ကောင်စီက Mi35၊ ဂျက်ဖိုက်တာတို့ကိုအသုံးပြု၍ လေကြောင်းမှ ခြောက်ကြိမ်ထက်မနည်းတိုက်ခိုက်ခဲ့ကြောင်း သတင်းထုတ်ပြန်ထားသည်။

မတ္တရာမြို့နယ်အတွင်း ပြည်သူ့ကာကွယ်ရေးတပ်မတော်(မန္တလေး)က သိမ်းထားသည့် တပ်စခန်းများကို ပြန်လည်ရရှိရန် စစ်ကောင်စီက လက်နက်ကြီးနှင့် လေကြောင်းတိုက်ခိုက်မှုများသာမက မြေပြင်စစ်ကြောင်းများကိုပါ အသုံးပြုပြီး တန်ပြန်ထိုးစစ်ဆင်နေသော်လည်း သိမ်းထားသည့် စခန်းများအား အပြည့်အဝထိန်းချုပ်ထားဆဲဖြစ်ကြောင်း မန္တလေး PDFက အောက်တိုဘာ တတိယပတ်အတွင်းက အသိပေးထားသည်။

မတ္တရာမြို့နယ်မှ စစ်ကောင်စီစခန်း ၄၀ကျော်ကို ပြည်သူ့ကာကွယ်ရေးတပ်ဖွဲ့များက ထိန်းချုပ်ထားသည်။

မြန်မာနိုင်ငံမှာ စစ်တပ်ရဲ့လုပ်ဆောင်နေမှုတွေက အာဆီယံရဲ့ အဓိက အကျဆုံးအခြေခံ မူဝါဒတစ်ခုကို အားလျော့လာစေနိုင်တယ်လို့ စင်ကာပူ ကာကွယ်ရေး ဝန်ကြီးက သတိပေး ပြောကြားလိုက်ပါတယ်။ မြန်မာ့ လက်ရှိအကျပ်အတည်းတွေအတွက် အာဏာသိမ်းစစ်တပ်ရဲ့ လုပ်ရပ်တွေက လွန်ခဲ့တဲ့ ဆယ်စုနှစ် နှစ်ခုလောက်အတွင်း ကာကွယ်ရေးဆိုင်ရာ ပူးပေါင်းညှိနှိုင်းဆောင်ရွက်မှုတွေမှာ အာဆီယံက ဗဟိုချက်အဖြစ် ရပ်တည်အောင် တည်ဆောက်လာတဲ့ မူဝါဒကို အများကြီး အနှောင့်အယှက် ဖြစ်လာစေတယ်လို့ ဝန်ကြီး ဒေါက်တာ အန်ဂန်ဟန်က ပြောပါတယ်။ မြန်မာနိုင်ငံမှာ ၂၀၂၁ နှစ်ဆန်းပိုင်းတုန်းက စစ်တပ်က အာဏာသိမ်းခဲ့တဲ့နောက် လက်နက်ကိုင် တော်လှန်ရေးတွေအင်အားကောင်းကောင်းနဲ့ ပေါ်ပေါက်လာပြီး စစ်တပ်ဟာ အာဏာကို ထိန်းချုပ်ထားနိုင်ဖို့ အသည်းအသန် ရုန်းကန်နေရပါတယ်။

◾️ပေါက်မြို့နယ် ကိုင်းလယ်ရဲစခန်းအပါအဝင် စစ်ကောင်စီတပ်စွဲရာနေရာများကို တော်လှန်ရေးတပ်များတိုက်ခိုက်

မကွေးတိုင်း၊ ပေါက်မြို့နယ်ရှိ ကိုင်းလယ်နယ်မြေရဲစခန်းအပါအဝင် စစ်ကောင်စီတပ်စွဲထားတဲ့ နေရာသုံးခုကို ဒရုန်းဖြင့် ဗုံးသီး ၃၀၀ကျော်ကြဲချတိုက်ခိုက်ခဲ့တယ်လို့ ပေါက်မြို့နယ်ပြည်သူ့ကာကွယ်ရေးအဖွဲ့(ပကဖ)ဒရုန်းတပ်ဖွဲ့မှ တာဝန်ရှိသူတစ်ဦးက ပြောပါတယ်။ ဒရုန်းစစ်ဆင်ရေးအား နိုဝင်ဘာ ၄ရက်မှ ၁၁ရက်အထိ ကိုင်လယ်နယ်မြေရဲစခန်း၊ နိုဝင်ဘာ ၁၅ရက်မှ ၁၉ ရက်အထိ ပျူစောထီးအားကောင်းရာ ယာကြီးပြင်ကျေးရွာမှ ပျူခေါင်းဆောင်နေအိမ်နဲ့ ဘန်ကာများအပါအဝင် နိုဝင်ဘာ ၁၆ ရက်နဲ့ ၁၈ ရက်မှာ ပျူစောထီးအားကောင်းရာ ဒီးဒုတ်ကွင်းကျေးရွာတို့အား တိုက်ခိုက်ခဲ့တာလို့ ဆိုပါတယ်။ ကိုင်းလယ်နယ်မြေရဲစခန်းအား တိုက်ခိုက်ရာတွင် စခန်းရှိ စစ်ကောင်စီတပ်နဲ့ ရဲများ စခန်းစွန့်ထွက်ပြေးသွားတယ်လို့ သိရပါတယ်။

“ညနေခင်းသတင်းလွှာ”

ဒီနေ့ (နိုဝင်ဘာ ၂၁ ရက်) ညနေခင်းသတင်းတွေကို People’s Spring က တင်ဆက်ပေးပါမယ်။

◾️KIAသိမ်းပိုက်ထားတဲ့ ကန်ပိုက်တီမြို့မှာ ကချင်အမျိုးသားအလံလွှင့်ထူ

ကချင်လွတ်လပ်ရေးတပ်မတော်(KIA)က သိမ်းပိုက်ထားပြီးဖြစ်တဲ့ ကချင်ပြည်နယ် ဝိုင်းမော်မြို့နယ် ကန်ပိုက်တီ နယ်စပ်မြို့မှာ ကချင်အမျိုးသားအလံ လွှင့်ထူထားတယ်လို့ သတင်းရင်းမြစ်များက ပြောပါတယ်။ ကချင်အထူးဒေသ(၁)မှာ သိမ်းပိုက်ဖို့ နောက်ဆုံးကျန်နေတဲ့ မြို့ဖြစ်တဲ့၊ တရုတ်-မြန်မာတရား၀င်နယ်စပ်ကုန်သွယ်ရေး မြို့လည်းဖြစ်တဲ့ ကန်ပိုက်တီကို KIAက မနေ့မနက်ပိုင်းက စတင်ထိုးစစ်ဆင်ခဲ့ပြီး ညနေပိုင်းမှာ အပြီးသတ်သိမ်းနိုင်ခဲ့တာပါ။ သိမ်းပိုက်ပြီးနောက် နယ်စပ်ဂိတ်နေရာနဲ့ ကချင်အထူးဒေသ(၁) ရုံးအဆောက်အဦးနေရာတွေမှာ ကချင်အမျိုးသားအလံ လွှင့်ထူတာ တွေ့ရပါတယ်။

◾️မြန်မာ့အရေး ဆုံးဖြတ်ချက်အဆိုမူကြမ်းကို ကုလလုံခြုံရေးကောင်စီ အဖွဲ့ဝင်နိုင်ငံအချို့ တားဆီးပိတ်ပင်

စစ်ကောင်စီအပေါ် ကုလသမဂ္ဂလုံခြုံရေးကောင်စီရဲ့ ချက်ခြင်းအရေးယူမှုကို မြန်မာပြည်သူများက လိုအပ်နေပေမယ့် အနည်းငယ်သော ကောင်စီအဖွဲ့ဝင်နိုင်ငံအချို့က ကြန့်ကြာအောင်လုပ်ဆောင်နေတယ်လို့ ဗြိတိန်သံအမတ်ကြီး ဘာဘရာဝုဒ်ဝါ့ဒ်က ပြောပါတယ်။ ကုလသမဂ္ဂလုံခြုံရေးကောင်စီဟာ ဗြိတိန်ရဲ့ ကမကထပြုမှုကြောင့် မြန်မာ့အရေးတံခါးပိတ်ဆွေးနွေးပွဲကို မနေ့ ဇန်နဝါရီ ၂၀ရက်မှာ ပြုလုပ်ခဲ့ရာ အဲဒီ ဆွေးနွေးပွဲ မကျင်းပမီ အထက်ပါ ကုလသမဂ္ဂဆိုင်ရာ ဗြိတိန်သံအမတ်ကြီးနဲ့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းတို့က သတင်းထောက်များအား ရှင်းလင်းပြောကြားခဲ့ပါတယ်။ ပြီးခဲ့တဲ့ စက်တင်ဘာမှာ ဗြိတိန်ဦးဆောင်ကာ ကုလသမဂ္ဂလုံခြုံရေးကောင်စီအဖွဲ့ဝင်နိုင်ငံများက မြန်မာ့အရေးဆုံးဖြတ်ချက်မူကြမ်းတရပ် တင်သွင်းခဲ့ပေမယ့် အနည်းငယ်သော အဖွဲ့ဝင်နိုင်ငံအချို့က တားဆီးပိတ်ပင်ခဲ့တယ်လို့ ဗြိတိန်သံအမတ်ကြီးက ရှင်းလင်းပါတယ်။ အဲဒီအနည်းငယ်သော ကောင်စီအဖွဲ့ဝင်နိုင်ငံအချို့ရဲ့ အမည်ကို ဗြိတိန်သံအမတ်ကြီးက ထုတ်ဖော်ပြောဆိုခြင်းမရှိပါဘူး။ ဒါပေမဲ့ ကုလလုံခြုံရေးကောင်စီ အမြဲတမ်းအဖွဲ့ဝင် ၅နိုင်ငံထဲမှာ အာဏာသိမ်းစစ်ကောင်စီကို ထောက်ခံကူညီပံ့ပိုးနေတဲ့ ရုရှားနဲ့ တရုတ်နိုင်ငံတို့ ရှိနေပါတယ်။

◾️ငဖဲတိုက်ပွဲ စစ်ကောင်စီတပ်အထိနာဟု PRA ပြော

ရက္ခိုင်ပြည်နယ် အမ်းမြို့နှင့်နယ်မြေချင်းဆက်စပ်နေတဲ့ မကွေးတိုင်း၊ ငဖဲမြို့နယ်မှာ တိုက်ပွဲဖြစ်နေတယ်လို့ သိရပါတယ်။ ငဖဲမြို့နယ်၊ ဂုတ်ကြီးကျေးရွာ အရှေ့ဘက်မှာ မနေ့က စစ်ကောင်စီတပ်နှင့် တိုက်ပွဲထပ်မံဖြစ်ပွားခဲ့ပြီး စစ်ကောင်စီတပ် သေဆုံးထိခိုက်မှုရှိခဲ့တယ်လို့ လူထုတော်လှန်ရေးမဟာမိတ်အင်အားစု(PRA-Magway)က ဒီနေ့ သတင်းထုတ်ပြန်ပါတယ်။ အနောက်ပိုင်းတိုင်းစစ်ဌာနချုပ်(နပခ)ရှိရာ အမ်းမြို့သိမ်းတိုက်ပွဲကို အာရက္ခတပ်တော်(AA)က ဆင်နွှဲနေပြီး လက်ရှိ တိုက်ပွဲပြင်းထန်နေပါတယ်။

◾️တောင်ကုတ်မြို့တွင်း တိုက်ပွဲပြင်းထန်​နေ

ရက္ခိုင်ပြည်နယ် တောင်ကုတ်မြို့ထဲမှာ မြို့တွင်းတိုက်ပွဲဖြစ်နေပြီး ဒေသခံပြည်သူ သုံးသောင်းခန့် မြို့တွင်းမှာ ပိတ်မိနေသလို လေကြောင်းနဲ့ လက်နက်ကြီးထိမှန်၍ အရပ်သားထိခိုက် သေဆုံးမှုများလည်း ရှိနေပါတယ်။ အာရက္ခတပ်တော်(AA)နဲ့ စစ်ကောင်စီတပ်ဟာ နိုဝင်ဘာ ၁၅ ရက်မှစ၍ တောင်ကုတ်မြို့ပေါ် ထိတွေ့မှုရှိခဲ့ပြီး နိုဝင်ဘာ ၁၇ ရက်မှာ KBZ ဘဏ်အနီးမှာ တိုက်ပွဲပြင်းထန်ခဲ့တယ်လို့ မြို့မှ စစ်ရှောင်တစ်ဦးက ပြောပါတယ်။ လက်ရှိ တောင်ကုတ်မြို့မှာ ဒေသခံပြည်သူ သုံးသောင်းခန့် ပိတ်မိနေပြီး ၎င်းတို့အား ဘေးကင်းရာပို့ဆောင်ရေးနဲ့ လတ်တလောစားနပ်ရိက္ခာအကူအညီပေးနိုင်ရေးဟာ အရေးပေါ်အခြေအနေဖြစ်နေတယ်လို့ စစ်ဘေးရှောင်တစ်ဦးက ပြောပါတယ်။

◾️စစ်ကောင်စီ ထိုးစစ်နဲ့ လက်နက်ကြီးပစ်ခတ်မှုကြောင့် လွိုင်ကော်မြို့အနီး ကျေးရွာများရွှေ့ပြောင်း

စစ်ကောင်စီတပ်ရဲ့ ထိုးစစ်နဲ့ လက်နက်ကြီးပစ်ခတ်မှုများကြောင့် လွိုင်ကော်မြို့အနီးရှိကျေးရွာ ၁၀ရွာထက်မနည်းရွှေ့ပြောင်းနေရတယ်လို့ ကရင်နီလူ့အခွင့်အရေးအဖွဲ့ဦးဆောင်သူ ဦးဗညားက ပြောပါတယ်။ လွိုင်ကော်မြို့နှင့် ခြောက်မိုင်ခန့်အကွာ မြို့ အနောက်ဘက်ခြမ်းရှိ ကျေးရွာများမှာ မနေ့ကစ၍ ရွှေ့ပြောင်းနေရတယ်လို့ ဆိုပါတယ်။ ဒေါပေါ်ကလဲ၊ ဒေါဆော်လဲ၊ နိုးကိုးစံပြကျေးရွာ၊ ဒေါလိုရှေး၊ နိုးကိုးရွာမ၊ နိုးကိုးစိုက်ကွင်း၊ ဆော်ခီးဒေါ၊ ကယားညေးခူ၊ ဒေါစဲနဲ့ ရေယို စတဲ့ ကျေးရွာများဟာ ဒီးမော့ဆိုမြို့နယ် အနောက်ခြမ်းသို့ ရွှေ့ပြောင်းလိုက်ရတယ်လို့ အသိပေးပါတယ်။

◾️မြန်မာစစ်တပ်ရဲ့လုပ်ရပ်တွေက အာဆီယံအတွက် မူဝါဒပိုင်း အားနည်းမှုမျိုး ကြုံလာစေတယ်လို့ စင်ကာပူ ကာကွယ်ရေးဝန်ကြီး ဝေဖန်