CRPH Myanmar

ပြည်ထောင်စုလွှတ်တော်ကိုယ်စားပြုကော်မတီ၊ ဖက်ဒရယ်ရေးရာကော်မတီနှင့် အမျိုးသားညီညွတ်ရေးအစိုးရ၊ ဖက်ဒရယ်ပြည်ထောင်စုရေးရာဝန်ကြီးဌာနတို့ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီ၊ ဖက်ဒရယ်ရေးရာကော်မတီနှင့် အမျိုးသားညီညွတ်ရေးအစိုးရ၊ ဖက်ဒရယ်ပြည်ထောင်စုရေးရာဝန်ကြီးဌာနတို့သည် အသွင်ကူးပြောင်းရေးကာလ ဖက်ဒရယ်ဒီမိုကရေစီပြည်ထောင်စု ဖော်ဆောင်မှုဆိုင်ရာ ကိစ္စရပ်များနှင့်စပ်လျဉ်း၍ ၂၀၂၅ ခုနှစ်၊ ဇန်နဝါရီလ ၂၃ ရက် (ကြာသပတေးနေ့)၊ နေ့လယ် ၂ နာရီတွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် ဖက်ဒရယ်ပြည်ထောင်စုရေးရာဝန်ကြီးဌာန၊ ပြည်ထောင်စုဝန်ကြီးက ဝန်ကြီးဌာနအနေဖြင့် ဖက်ဒရယ်အသွင်ကူးပြောင်းရေး အစီအမံများဆိုင်ရာ ဥပဒေမူကြမ်း (Articles of Federal Transitional Arrangements - AFTA) တို့တွင် ပါရှိသည့် သဘောတူညီချက်များ၊ အခြေခံသဘောထား အယူအဆများ၊ ထည့်သွင်းစဉ်းစားသင့်သည့် အချက်များနှင့် ရှေ့လုပ်ငန်းစဉ် အစီအမံများအား ရှင်းလင်းပြောကြားခဲ့သည်။

ထို့နောက် တက်ရောက်လာသည့် အဖွဲ့ဝင်များက သိရှိလိုသည်များ ပြန်လည်မေးမြန်းခဲ့ကြပြီး ဖက်ဒရယ်ရေးရာကော်မတီနှင့် ဝန်ကြီးဌာနတို့အနေဖြင့် ဆက်လက်ပူးပေါင်းဆောင်ရွက်သွားမည့် ဖက်ဒရယ်အသိပညာပေးဆိုင်ရာသင်တန်းကိစ္စများအား အတူလက်တွဲ ဖော်ဆောင်သွားနိုင်ရန် ဆွေးနွေးညှိနှိုင်းတိုင်ပင်ခဲ့ကြသည်။

အစည်းအဝေးသို့ ဖက်ဒရယ်ရေးရာကော်မတီ ဥက္ကဋ္ဌနှင့် အဖွဲ့ဝင်များ၊ အမျိုးသားညီညွတ်ရေးအစိုးရ၊ ဖက်ဒရယ်ပြည်ထောင်စုရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျန်မှုန်းဆာခေါင်း၊ ဒုတိယဝန်ကြီးများဖြစ်သည့် မိုင်းဝင်းထူး၊ ဦးချစ်ထွန်းနှင့် အခြားတာဝန်ရှိသူများ တက်ရောက်ဆွေးနွေးခဲ့ကြပြီး အစည်းအဝေးအား ညနေ ၄ နာရီတွင် ရုပ်သိမ်းခဲ့သည်။

ပြည်ထောင်စုလွှတ်တော်ကိုယ်စားပြုကော်မတီ

Website Link : https://crphmyanmar.org/publications/crph-federal-affairs-committee-and-mofua-met-for-discussions/

ပြည်ထောင်စုလွှတ်တော်ကိုယ်စားပြုကော်မတီနှင့် ချင်းပြည်နယ်၊ ကချင်ပြည်နယ်၊ ကယား/ကရင်နီပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်၊ ရှမ်းပြည်နယ်တို့မှ ပြည်ထောင်စုလွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များနှင့် ချင်းပြည်နယ်၊ ကချင်ပြည်နယ်၊ ကယား/ ကရင်နီပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်၊ ရှမ်းပြည်နယ်တို့မှ ပြည်ထောင်စုလွှတ်တော်ကိုယ်စားလှယ်များသည် လက်ရှိနိုင်ငံရေးအခြေအနေများ၊ လွှတ်တော်ဆိုင်ရာလုပ်ငန်းစဉ်များနှင့် ရှေ့လုပ်ငန်းစဉ်များအတွက် ၂၀၂၅ ခုနှစ်၊ ဇန်နဝါရီလ ၂၁ ရက် (အင်္ဂါနေ့)၊ ၀၉၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ၊ အတွင်းရေးမှူးအဖွဲ့ဝင် ဦးထွန်းမြင့်က နှုတ်ခွန်းဆက်စကား ပြောကြားပြီးနောက် ပြည်ထောင်စုလွှတ်တော်ကိုယ်စားလှယ်များက လွှတ်တော်အခန်းကဏ္ဍအနေဖြင့် ပိုမိုပီပြင်စွာ ဆောင်ရွက်သွားသင့်သည့်လုပ်ငန်းစဉ်များ၊ အမျိုးသားညီညွတ်ရေးအစိုးရနှင့် ပူးပေါင်းချိတ်ဆက်ဆောင်ရွက်နေသည့် အခြေအနေများ၊ အကြမ်းဖက်စစ်ကောင်စီက ပြုလုပ်မည့် အတုအယောင်ရွေးကောက်ပွဲနှင့်စပ်လျဥ်း၍ လွှတ်တော်အနေဖြင့် ဆောင်ရွက်ထားရှိသည့်အခြေအနေများ၊ ရှေ့ဆက်ဆောင်ရွက်သွားမည့် မဟာမိတ်အင်အားစုများနှင့် တွေ့ဆုံဆွေးနွေးရေးဆိုင်ရာလုပ်ငန်းစဉ်များအား မေးမြန်းခဲ့ကြသည်။ ထို့နောက် ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များက ပြန်လည်ဖြေကြားဆွေးနွေး၍ ပြည်နယ်များတွင် တွေ့ကြုံနေရသည့်မြေပြင်အခြေအနေများအား အပြန်အလှန် မျှဝေခဲ့ကြကာ ၁၂၀၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ၊ အတွင်းရေးမှူးအဖွဲ့ဝင် ဦးထွန်းမြင့်နှင့် အဖွဲ့ဝင်များ၊ လွှတ်တော်ရေးရာကော်မတီများမှ ဥက္ကဋ္ဌများနှင့် အတွင်းရေးမှူးများ၊ ချင်းပြည်နယ်၊ ကချင်ပြည်နယ်၊ ကယား/ ကရင်နီပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့မှ ပြည်ထောင်စုလွှတ်တော်ကိုယ်စားလှယ်များ တက်ရောက်ခဲ့ကြသည်။


ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီနှင့် စစ်ကိုင်းတိုင်းဒေသကြီး၊ မကွေးတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များနှင့် စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များသည် လက်ရှိနိုင်ငံရေးအခြေအနေများ၊ လွှတ်တော်ဆိုင်ရာလုပ်ငန်းစဉ်များနှင့် ရှေ့လုပ်ငန်းစဉ်များအတွက် ၂၀၂၅ ခုနှစ်၊ ဇန်နဝါရီလ ၂၀ ရက်(တနင်္လာနေ့)၊ ၀၉၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ၊ အတွင်းရေးမှူးအဖွဲ့ဝင် ဦးထွန်းမြင့်က နှုတ်ခွန်းဆက်စကား ပြောကြားပြီးနောက် ပြည်ထောင်စုလွှတ်တော်ကိုယ်စားလှယ်များက လွှတ်တော်အခန်းကဏ္ဍအနေဖြင့် ပိုမိုပီပြင်စွာ ဆောင်ရွက်သွားသင့်သည့် လုပ်ငန်းစဉ်များ၊ နိုင်ငံတကာနှင့်ချိတ်ဆက်ဆောင်ရွက်နေမှုများ၊ စစ်ကိုင်းတိုင်းနှင့်မကွေးတိုင်းရှိ မြေပြင်အခြေအနေများ၊ လွှတ်တော်အချင်းချင်းအကြားတွင် ပိုမိုချိတ်ဆက်ဆောင်ရွက်သွားနိုင်ရေးအတွက် လုပ်ဆောင်သင့်သည့်ကိစ္စရပ်များ၊ အမျိုးသားညီညွတ်ရေးအစိုးရအပါအဝင် အမျိုးသားညီညွတ်ရေးအတိုင်ပင်ခံကောင်စီ၊ မဟာမိတ်တိုင်းရင်းသားအင်အားစုတို့နှင့်အတူ ပူးပေါင်းဆောင်ရွက်နေမှုများနှင့် အခြားသိရှိလိုသည့်မေးခွန်းများအား မေးမြန်းခဲ့ကြရာ ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များက အပြန်အလှန်ဆွေးနွေးဖြေကြား၍ ၁၂၀၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ အတွင်းရေးမှူးအဖွဲ့ဝင် ဦးထွန်းမြင့်၊ မိုင်းလမင်းထွန်းနှင့် အဖွဲ့ဝင်များ၊ လွှတ်တော်ရေးရာကော်မတီများမှ ဥက္ကဋ္ဌများနှင့် အတွင်းရေးမှူးများ၊ စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီနှင့် ပဲခူးတိုင်းဒေသကြီး၊ မန္တလေးတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များနှင့် ပဲခူးတိုင်းဒေသကြီးနှင့် မန္တလေးတိုင်းဒေသကြီးမှ ပြည်ထောင်စုလွှတ်တော်ကိုယ်စားလှယ်များသည် လက်ရှိနိုင်ငံရေး အခြေအနေများ၊ လွှတ်တော်ဆိုင်ရာလုပ်ငန်းစဥ်များနှင့် ရှေ့လုပ်ငန်းစဥ်များအတွက် ၂၀၂၅ ခုနှစ်၊ ဇန်နဝါရီလ ၁၉ ရက်(တနင်္ဂနွေနေ့)၊ ၁၀၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့် က အဖွင့်နှုတ်ခွန်းဆက်စကားပြောကြားရာတွင် "စစ်ကောင်စီက မကြာသေးခင်က ပြုလုပ်ခဲ့သည့် သန်းခေါင်စာရင်းအရ ၎င်းတို့ ထိန်းချုပ်ထားနိုင်သည့် ရာခိုင်နှုန်းကို သိရှိနိုင်သကဲ့သို့ စာရင်းမှန်ကန်မှုလည်း မရှိသည်မှာ ရှင်းရှင်းလင်းလင်း မြင်တွေ့နိုင်ပါကြောင်း၊ သို့သော် ရန်သူသည် ၎င်းတို့ လုပ်ဆောင်ချင်သည်များကို ဖြစ်အောင်ရှေ့ဆက်နေပါကြောင်း၊ မိမိတို့အနေဖြင့် ပြည်တွင်း၊ ပြည်ပက အသိအမှတ်ပြုထားမှုနှင့်အတူ စစ်ကောင်စီ၏ အတုအယောင်ရွေးကောက်ပွဲအပေါ် ဗျူဟာတစ်ရပ်ဖြင့် မိမိတို့အားလုံး ဝိုင်းဝန်းပူးပေါင်းတုံ့ပြန်သွားရန် လိုအပ်ကြောင်း” ပြောကြားခဲ့သည်။

ထို့နောက် တက်ရောက်လာကြသည့် ပြည်ထောင်စုလွှတ်တော်ကိုယ်စားလှယ်များက လွှတ်တော် အခန်းကဏ္ဍအနေဖြင့် ပိုမိုပီပြင်စွာ ဆောင်ရွက်သွားသင့်သည့်လုပ်ငန်းစဥ်များ၊ နိုင်ငံတကာနှင့် ချိတ်ဆက်ဆောင်ရွက်နေမှုများ၊ ရှေ့ဆက်ဆောင်ရွက်သွားမည့်အခြေအနေများနှင့် အခြားသိရှိလိုသည့်မေးခွန်းများအား မေးမြန်းဆွေးနွေးကြရာ ပြည်ထောင်စုလွှတ်တော်ကိုယ်စားပြုကော်မတီမှ အဖွဲ့ဝင်များက ပြန်လည်ဖြေကြားကာ ၁၁၄၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ လွှတ်တော်ရေးရာကော်မတီများမှ ဥက္ကဋ္ဌများနှင့် အတွင်းရေးမှူးများ၊ ပဲခူးတိုင်းဒေသကြီးနှင့် မန္တလေးတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ ပုံမှန်လုပ်ငန်းညှိနှိုင်းအစည်းအဝေးတွင် ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာနက လုပ်ငန်းဆောင်ရွက်ချက်များအား ရှင်းလင်းတင်ပြ

၂၀၂၅ ခုနှစ်၊ ဇန်နဝါရီလ ၁၇ ရက် (သောကြာနေ့) ၁၉၀၀ နာရီအချိန်တွင် ပြုလုပ်ကျင်းပခဲ့သည့် ပြည်ထောင်စုလွှတ်တော်ကိုယ်စားပြုကော်မတီ ပုံမှန်လုပ်ငန်းညှိနှိုင်းအစည်းအဝေး အမှတ်စဉ် (၃/၂၀၂၅) သို့ အမျိုးသားညီညွတ်ရေးအစိုးရ၊ ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာနအနေဖြင့် တက်ရောက်၍ ဝန်ကြီးဌာန၏ လုပ်ငန်းဆောင်ရွက်ချက်များ၊ ရှေ့လုပ်ငန်းစဥ်များနှင့် ပူးပေါင်းချိတ်ဆက်လုပ်ဆောင်သွားနိုင်မည့် လုပ်ငန်းများအား ဗီဒီယိုကွန်ဖရင့်မှတစ်ဆင့် တင်ပြဆွေးနွေးခဲ့သည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီမှ အတွင်းရေးမှူးအဖွဲ့ဝင် ဒေါ်ဖြူဖြူသင်းက နှုတ်ခွန်းဆက်စကား ပြောကြားပြီးနောက် ပြည်ထောင်စုဝန်ကြီး ဦးထင်လင်းအောင်က ဝန်ကြီးဌာနမှ ဆောင်ရွက်ထားရှိသည့် လုပ်ငန်းများအနေဖြင့် Radio NUG လုပ်ငန်းများ၊ မဟာဗျူဟာ ဆက်သွယ်ရေးဗျူရို (Bureau of Strategic Communications - BOSC) ၏ လုပ်ငန်းဆောင်ရွက်မှုများ၊ ဝန်ကြီးဌာန၏ ကိုယ်ပိုင်တာဝါတိုင်များ စိုက်ထူသုံးစွဲနေမှုအခြေအနေများ၊ Federal Net လုပ်ငန်းစဥ်များနှင့် အင်တာနက်သုံးစွဲနိုင်မှုအခြေအနေများ၊ တော်လှန်ရေးမဟာမိတ်အဖွဲ့များနှင့် ပူးပေါင်းဆောင်ရွက်နေမှုများအပါအဝင် ရှေ့ဆက်ဆောင်ရွက်သွားမည့်ကိစ္စရပ်များအား ရှင်းလင်းတင်ပြခဲ့သည်။

ထို့အပြင် ပြည်ထောင်စုဝန်ကြီးက IT လုပ်ငန်းဆောင်ရွက်ချက်များအနေဖြင့် Smart Gov Website အသစ် စတင်ဖွင့်လှစ်ထားရှိမှုများ၊ ၎င်း Website တွင် Support Center လည်း ပါရှိပြီး Support Center မှတစ်ဆင့် Smart Gov Product တိုင်းအတွက် တောင်းဆိုချက် (Request)၊ ‌ထောက်ပံ့မှု (Support) နှင့် တုံ့ပြန်ချက် (Feedback) များကို ပြုလုပ်နိုင်ကြောင်းနှင့် Website တွင် ပါဝင်သော Products များမှာ Go.NUG၊ Edu.NUG၊ Metafind၊ Ask.NUG၊ DATA.NUG နှင့် Postmaster တို့ဖြစ်ကြောင်းလည်း ရှင်းလင်းတင်ပြခဲ့သည်။

Smart Gov Website : https://smartgov.nugmyanmar.org/

Support Center : https://smartgov.nugmyanmar.org/support

ထို့နောက် ရေးရာကော်မတီအဖွဲ့ဝင်များအနေဖြင့်လည်း သိရှိလိုသည့် ဆက်သွယ်ရေးဆိုင်ရာကိစ္စရပ်များနှင့် မြေပြင်အခြေအနေများအား ဆွေးနွေးမေးမြန်းခဲ့ကာ အစည်းအဝေးအား ၂၀၃၀ နာရီအချိန်တွင် ရုတ်သိမ်းခဲ့သည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ၊ အတွင်းရေးမှူးအဖွဲ့ဝင်များဖြစ်သည့် ဒေါ်ဖြူဖြူသင်း၊ ဦးထွန်းမြင့်၊ မိုင်းလမင်းထွန်းနှင့် ရေးရာကော်မတီများမှ အဖွဲ့ဝင်များ၊ အမျိုးသားညီညွတ်ရေးအစိုးရ၊ ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီးဌာန၊ ပြည်ထောင်စုဝန်ကြီး ဦးထင်လင်းအောင်နှင့် တာဝန်ရှိသူများ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

လက်ရှိနိုင်ငံရေးအခြေအနေများနှင့် လွှတ်တော်ဆိုင်ရာ ရှေ့လုပ်ငန်းစဉ်များအပေါ် ပြည်ထောင်စုလွှတ်တော်ကိုယ်စားလှယ်များ တွေ့ဆုံဆွေးနွေး

၂၀၂၅ ခုနှစ်၊ ဇန်နဝါရီလ ၁၆ ရက် (ကြာသပတေးနေ့)၊ ၀၉၀၀ နာရီအချိန်တွင် ပြည်ထောင်စုလွှတ်တော်ကိုယ်စားပြုကော်မတီသည် ရန်ကုန်တိုင်းဒေသကြီး၊ ဧရာဝတီတိုင်းဒေသကြီးနှင့် တနင်္သာရီတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များနှင့် ဗီဒီယိုကွန်ဖရင့်မှတစ်ဆင့် တွေ့ဆုံ၍ လက်ရှိနိုင်ငံရေးအခြေအနေများ၊ လွှတ်တော်ဆိုင်ရာလုပ်ငန်းစဥ်များနှင့် ရှေ့လုပ်ငန်းစဥ်များအပေါ် ဆွေးနွေးခဲ့ကြပါသည်။

ဆွေးနွေးပွဲတွင် လက်ရှိပြည်တွင်းနိုင်ငံရေးဖြစ်စဉ်များနှင့် ကမ္ဘာ့နိုင်ငံများ၏ သဘောထားအမြင်များ၊ ပြည်ထောင်စုလွှတ်တော်ကိုယ်စားပြုကော်မတီ၏ အခန်းကဏ္ဍ၊ လက်ရှိတော်လှန်ရေးတွင် ပါဝင်ဆောက်ရွက်ထားရှိမှုများနှင့် ဆောင်ရွက်သွားမည့် ကဏ္ဍများ၊ နိုင်ငံတကာနှင့် ချိတ်ဆက်ဆောင်ရွက်နေမှုများ၊ အမျိုးသားညီညွတ်ရေးအစိုးရနှင့် လွှတ်တော်အကြား ပူးပေါင်းဆောင်ရွက်နေမှုများ၊ တော်လှန်ရေးအင်အားစုများနှင့် ပူးပေါင်ဆောင်ရွက်နေမှုများ၊ အကြမ်းဖက်စစ်ကောင်စီ၏ အတုအယောင်ရွေးကောက်ပွဲအပေါ် တုံ့ပြန်ဆောက်ရွက်သင့်သည်များ၊ လွှတ်တော်ကဏ္ဍမှ ဆက်လက်ဆောင်ရွက်သွားသင့်သည်များကို ဆွေးနွေးခဲ့ကြပါသည်။

ထို့ပြင် လွှတ်တော်ကိုယ်စားလှယ်များက သိရှိလိုသည်များနှင့်စပ်လျဉ်း၍ မေးခွန်းမေးမြန်းမှုများကို ပြည်ထောင်စုလွှတ်တော်ကိုယ်စားပြုကော်မတီနှင့် သက်ဆိုင်ရာ လွှတ်တော်ရေးရာကော်မတီများက ဆွေးနွေးဖြေကြားခဲ့ပြီး ၁၁၄၀ နာရီအချိန်တွင် အစည်းအဝေးအား ရုပ်သိမ်းခဲ့ပါသည်။

ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်က “တော်လှန်ရေး အမြန်ဆုံးအောင်မြင်နိုင်ရေးအတွက် ၂၀၂၅ ခုနှစ်တွင် လွှတ်တော်ကိုယ်စားလှယ်များ၏ ပါဝင်ဆောင်ရွက်မှုကို တိုးမြှင့်နိုင်ရန် ဖွဲ့စည်းမှုနှင့် လုပ်ငန်းဆောင်ရွက်မှုများကို တိုးမြင့်လုပ်ဆောင်သွားရန်ရှိပြီး လွှတ်တော်ကိုယ်စားလှယ်များအနေဖြင့် ပူးပေါင်းဆောင်ရွက်ပေးကြရန်” တိုက်တွန်းခဲ့ပါသည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ လွှတ်တော်ရေးရာကော်မတီများမှ ဥက္ကဋ္ဌများနှင့် အတွင်းရေးမှူးများ၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီးနှင့် တနင်္သာရီတိုင်းဒေသကြီးတို့မှ ပြည်ထောင်စုလွှတ်တော်ကိုယ်စားလှယ်များ တက်ရောက်ခဲ့ကြပါသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ၏ သတင်းစဉ် အမှတ် (၄၃)

ပြည်ထောင်စုလွှတ်တော်ကိုယ်စားပြုကော်မတီက ထုတ်ပြန်ခဲ့သော သတင်းစဉ်များကို CRPH Website တွင် ရယူနိုင်ပါသည်။

https://crphmyanmar.org/publication/newsletter/

ပြည်ထောင်စုလွှတ်တော်ကိုယ်စားပြုကော်မတီ

CRPH Website : https://crphmyanmar.org
CRPH Facebook : https://www.facebook.com/crph.officia...
CRPH Youtube : https://www.youtube.com/@crphmyanmar
CRPH Twitter : https://x.com/CrphMyanmar
CRPH Telegram : https://t.me/crphmyanmar

ပြည်ထောင်စုလွှတ်တော်ကိုယ်စားပြုကော်မတီနှင့် စစ်ကိုင်းဖက်ဒရယ်ယူနစ် လွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီနှင့် စစ်ကိုင်းဖက်ဒရယ်ယူနစ်လွှတ်တော်ကိုယ်စားလှယ်များသည် ၂၀၂၅ ခုနှစ်၊ ဇန်နဝါရီလ ၁၂ ရက်နေ့၊ ၀၉၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

တွေ့ဆုံဆွေးနွေးပွဲတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် စစ်ကိုင်းဖက်ဒရယ်ယူနစ်လွှတ်တော်ဥက္ကဋ္ဌတို့က နှုတ်ခွန်းဆက်စကားများ ပြောကြားခဲ့ပြီးနောက် စစ်ကိုင်းဖက်ဒရယ်ယူနစ်မှ ဆောင်ရွက်ပြီးစီးခဲ့သော လုပ်ငန်းစဉ်များနှင့် ရှေ့လုပ်ငန်းစဉ်များကို ယူနစ်လွှတ်တော်ဥက္ကဋ္ဌ ဦးမြင့်ထွေးက ရှင်းလင်းပြောကြားခဲ့သည်။

ယင်းနောက်တွင် စစ်ကိုင်းဖက်ဒရယ်ယူနစ် ကြားကာလဖွဲ့စည်းပုံအခြေခံဥပဒေ (မူကြမ်း) ၏ အပေါ်တွင် ပြည်ထောင်စုလွှတ်တော်ကိုယ်စားပြုကော်မတီမှ တက်ရောက်လာသူများက သုံးသပ်အကြံပြုဆွေးနွေးခဲ့ကြကာ ယူနစ်လွှတ်တော်ကိုယ်စားလှယ်များဘက်မှလည်း ပြန်လည်ရှင်းလင်း‌ ဖြေကြားခဲ့ကြပါသည်။ ထို့နောက် ရှေ့လုပ်ငန်းစဉ်ကိစ္စရပ်များအပေါ် အပြန်အလှန်ဆွေးနွေးညှိနှိုင်းခဲ့ကြကာ ၁၁၅၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အဆိုပါတွေ့ဆုံဆွေးနွေးပွဲတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ ဥပဒေရေးရာကော်မတီမှ အဖွဲ့ဝင်များ၊ စစ်ကိုင်းဖက်ဒရယ်ယူနစ်ဘက်မှ ယူနစ်လွှတ်တော် ဥက္ကဋ္ဌ၊ ဒုတိယဥက္ကဋ္ဌနှင့် လွှတ်‌တော်ကိုယ်စားလှယ်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

(၆၂) နှစ်မြောက် တအာင်းအမျိုးသားတော်လှန်ရေးနေ့ပေးပို့သောသဝဏ်လွှာ

၂၀၂၅ ခုနှစ်၊ ဇန်နဝါရီလ ၁၂ ရက်

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီနှင့် တအာင်း(ပလောင်)အမျိုးသားပါတီတို့ တွေ့ဆုံဆွေးနွေး

၂၀၂၅ ခုနှစ်၊ ဇန်နဝါရီလ ၉ ရက်နေ့၊ ၁၇၀၀ နာရီအချိန်တွင် ပြည်ထောင်စုလွှတ်တော်ကိုယ်စားပြုကော်မတီနှင့် တအာင်း(ပလောင်)အမျိုးသားပါတီတို့သည် နှစ်ဖက် ပူးပေါင်းဆောင်ရွက်သွားနိုင်မည့်ကဏ္ဍများအပေါ် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် တအာင်း(ပလောင်)အမျိုးသားပါတီ အထွေထွေအတွင်းရေးမှူး မိုင်းနိုင်ဂေါင်ဂျားတို့က အသီးသီး နှုတ်ခွန်းဆက်စကား ပြောကြားခဲ့ကြသည်။

ယင်းဆွေးနွေးမှုတွင် နှစ်ဖက်အဖွဲ့အစည်းတို့က လွှတ်တော်ကဏ္ဍ၊ နိုင်ငံရေးနှင့် မြေပြင်လိုအပ်ချက်များတွင် ရှေ့ဆက် လက်တွဲပူး‌ပေါင်းဆောင်ရွက်သွားမည့် အခြေအနေများအား အပြန်အလှန် ဆွေးနွေးညှိနှိုင်းတိုင်ပင်ကာ ၁၈၃၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ တအာင်း (ပလောင်) အမျိုးသားပါတီမှ ဗဟိုအလုပ်အမှုဆောင်‌ ကော်မတီဝင်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

အင်္ဂလိပ်ဘာသာဖြင့် CRPH Website တွင် ဖတ်ရှုနိုင်ပါသည်။
https://crphmyanmar.org/publications/crph-and-taang-palaung-national-party-met-for-discussions/

(၇၇) နှစ်မြောက် လွတ်လပ်ရေးနေ့သဝဏ်လွှာ

၂၀၂၅ ခုနှစ်၊ ဇန်နဝါရီလ ၄ ရက်

ပြည်ထောင်စုလွှတ်တော်ကိုယ်စားပြုကော်မတီ

https://youtu.be/_T9n7Tjk58I

အသိပေးကြေညာခြင်း

ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်၏ ၂၀၂၅ ခုနှစ်၊ နိုင်ငံတကာနှစ်သစ်ကူးနေ့ ဆုတောင်းစကားဗီဒီယိုအား ယနေ့ည ၁၂ နာရီအချိန်တွင် CRPH YouTube Channel နှင့် CRPH Facebook Page တို့တွင် ထုတ်လွှင့်သွားမည် ဖြစ်ကြောင်း ကြိုတင်အသိပေးကြေညာအပ်ပါသည်။

CRPH YouTube Channel : https://www.youtube.com/@crphmyanmar
CRPH Facebook Page : https://www.facebook.com/crph.official.mm/

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ၏ သတင်းစဉ် အမှတ် (၄၂)

ပြည်ထောင်စုလွှတ်တော်ကိုယ်စားပြုကော်မတီက ထုတ်ပြန်ခဲ့သော သတင်းစဉ်များကို အောက်ပါ CRPH ဝက်ဘ်ဆိုက်လင့်ခ်မှတစ်ဆင့် ရယူနိုင်ပါသည်။

https://crphmyanmar.org/publication/newsletter/

ပြည်ထောင်စုလွှတ်တော်ကိုယ်စားပြုကော်မတီ

CRPH Website : https://crphmyanmar.org
CRPH Facebook : https://www.facebook.com/crph.officia...
CRPH Youtube : https://www.youtube.com/@crphmyanmar
CRPH Twitter : https://x.com/CrphMyanmar
CRPH Telegram : https://t.me/crphmyanmar

ဖက်ဒရယ်ရေးရာကော်မတီ၊ နိုင်ငံတကာဆက်ဆံရေးကော်မတီနှင့် NUCC ရေးရာကော်မတီတို့က ဖက်ဒရယ်နိုင်ငံများ၏ ဖက်ဒရယ်စနစ်ကျင့်သုံးမှုဆိုင်ရာ ဆွေးနွေးပွဲများ စီစဉ်ဆောင်ရွက်ခဲ့

ပြည်ထောင်စုလွှတ်တော်ကိုယ်စားပြုကော်မတီ၊ ဖက်ဒရယ်ရေးရာကော်မတီ၊ နိုင်ငံတကာဆက်ဆံရေးကော်မတီနှင့် NUCC ရေးရာကော်မတီတို့သည် International IDEA ၏ ထောက်ပံ့ကူညီမှုဖြင့် ဖက်ဒရယ်နိုင်ငံများ၏ ဖက်ဒရယ်စနစ်ကျင့်သုံးမှုဆိုင်ရာ ဆွေးနွေးပွဲများအား အပတ်စဥ် တနင်္ဂနွေနေ့တွင် ဗီဒီယိုကွန် ဖရင့်မှတစ်ဆင့် စီစဥ်ပြုလုပ်ခဲ့သည်။

အဆိုပါဆွေးနွေးပွဲများအား မြန်မာနိုင်ငံ၏ ဖက်ဒရယ်ဖော်ဆောင်ရေးလုပ်ငန်းစဉ်တွင် ကဏ္ဍပေါင်းစုံမှ ပါဝင်ဆောင်ရွက်လျက်ရှိသည့် လွှတ်တော်အသီးသီးမှ ကိုယ်စားလှယ်များအနေဖြင့် ဖက်ဒရယ်ဆိုင်ရာ အသိပညာဗဟုသုတများ တိုးပွား၍ တူညီသော ဖက်ဒရယ်ဒီမိုကရေစီဆိုင်ရာအသိအမြင်များဖြင့် အနာဂတ်ဖက်ဒရယ်ပြည်ထောင်စု တည်ဆောက်ရာတွင် လက်တွေ့ကျကျ အသုံးပြုနိုင်ရန် ရည်ရွယ်၍ ပြုလုပ်ခဲ့ခြင်း ဖြစ်ပါသည်။

၂၀၂၄ ခုနှစ်၊ ဩဂုတ်လမှ ဒီဇင်ဘာလအတွင်း အပတ်စဥ် ဆွေးနွေးပွဲ (၁၇) ကြိမ်အား ပြည်တွင်းကျွမ်းကျင်ပညာရှင် ဦးကျော်စွာက ဦးဆောင်ဆွေးနွေးခဲ့ကာ ယင်းဆွေးနွေးပွဲများတွင် ဖက်ဒရယ်နိုင်ငံများအနေဖြင့် ရေးဆွဲကျင့်သုံးလျက်ရှိသည့် ဖွဲ့စည်းပုံအခြေခံဥပဒေများ၊ ပြည်ထောင်စုမြေပုံအသစ်ရေးဆွဲရေးအတွေ့အကြုံများ၊ အာဏာခွဲဝေမှုများ၊ ဥပဒေပြုရေးစနစ်၊ တရားစီရင်ရေးစနစ်၊ ဘဏ္ဍာရေးစနစ်များ၊ ပြည်သူ့ရေးရာ စီမံခန့်ခွဲခြင်းနှင့် ဖက်ဒရယ်နိုင်ငံအချို့မှ စံနမူနာယူရမည့် ဖက်ဒရယ်ပြောင်းလဲမှုဖြစ်စဥ်များနှင့် သင်ခန်းစာယူသင့်သည့် အကြောင်းအရာများကို တစ်နိုင်ငံချင်းစီအလိုက် အသေးစိတ်လေ့လာချက်များကို ဆွေးနွေးမျှဝေခဲ့ကြသည်။

ဆွေးနွေးပွဲများသို့ ပြည်ထောင်စုလွှတ်တော်ကိုယ်စားပြုကော်မတီအဖွဲ့ဝင်များ၊ ရေးရာကော်မတီများမှ အဖွဲ့ဝင်များ၊ တိုင်းဒေသကြီးနှင့် ပြည်နယ်အသီးသီးမှ ပြည်ထောင်စုနှင့် တိုင်းဒေသကြီး၊ ပြည်နယ် လွှတ်တော်ကိုယ်စားလှယ်များ တက်ရောက် လေ့လာဆွေးနွေးခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

(၂၇၆၄) ခုနှစ်၊ ကရင်အမျိုးသားနှစ်သစ်ကူးနေ့သို့ ပေးပို့သည့်သဝဏ်လွှာ

၂၀၂၄ ခုနှစ်၊ ဒီဇင်ဘာလ ၃၀ ရက်


၁။ (၂၇၆၄) ခုနှစ်၊ ကရင်အမျိုးသားနှစ်သစ်ကူးနေ့အခါသမယတွင် ပြည်ထောင်စုဖွား ကရင် တိုင်းရင်းသားလူမျိုးများနှင့်တကွ အခြားတိုင်းရင်းသား ပြည်သူများအားလုံးတို့သည် ကျက်သရေ မင်္ဂလာအဖြာဖြာ စုံညီစွာဖြင့် ဘေးအန္တရာယ်အပေါင်း ကင်းဝေးပါစေကြောင်း ဆုတောင်းမေတ္တာ ပို့သအပ်ပါသည်။

၂။ ကရင်သက္ကရာဇ် ၂၆၇၇ ခုနှစ်၊ စနေနေ့ (မြန်မာသက္ကရာဇ် ၁၂၉၉ ခုနှစ်၊ ပြာသိုလဆန်း၊ ၁ ရက်နေ့) အား ကရင်အမျိုးသားနှစ်သစ်ကူးနေ့အဖြစ် စတင်သတ်မှတ်၍ နှစ်စဥ် ပျော်ရွှင်စွာ ရိုးရာ ဓလေ့ထုံးတမ်းများနှင့် ပြုလုပ်ကျင်းပခဲ့သော်လည်း လက်ရှိကာလများတွင် အကြမ်းဖက်စစ်အုပ်စု သည် နည်းလမ်းမျိုးစုံဖြင့် စစ်ဘောင်ချဲ့ကာ အကြမ်းဖက်လုပ်ရပ်များအား ပိုမိုအရှိန်မြှင့် လုပ်ဆောင် လျက်ရှိသည့်အတွက် နိုင်ငံတဝှမ်းရှိ တိုင်းရင်းသားပြည်သူလူထုအားလုံးတို့သည် နေ့စဥ် အတိဒုက္ခ ရောက်ကြရကာ အခက်အခဲ၊ ကြပ်တည်းမှုများစွာဖြင့် ရင်ဆိုင်နေကြရပါသည်။

၃။ မည်သို့သော ပင်ပန်းဆင်းရဲမှုဒဏ်များ၊ ရင်းနှီးပေးဆပ်ရမှုများ ကြုံတွေ့ခံစားရသော်လည်း ကရင်တိုင်းရင်းသားများအပါအဝင် ပြည်သူလူထုတစ်ရပ်လုံးသည် ယနေ့အချိန်ထိတိုင် ကျရာကဏ္ဍ ၌ တာဝန်ကျေပွန်စွာ ပူးပေါင်းဆောင်ရွက်ကာ စစ်အာဏာရှင်များ ကြောက်လန့်ကြရသည့် ပြည်သူ လူထု၏ စုစည်းခိုင်မာမှုအင်အားကို အစဥ်တစိုက် ကြိုးစားထုတ်ဖော်ပြသလျက်ရှိသည့်အတွက် မိမိတို့အားလုံး၏ ရည်ရွယ်ချက်ပန်းတိုင်ဆီသို့ ဧကန်မုချ အရောက်လှမ်းနိုင်မည်ကို ယုံကြည်ပါသည်။

၄။ ကရင်တိုင်းရင်းသားများအနေဖြင့် ခေတ်အဆက်ဆက်တွင် ကရင်အာဇာနည်ခေါင်းဆောင် ကြီးများ မျှော်ရည်ထားရှိခဲ့သော ဒီမိုကရေစီစံနှုန်းများနှင့်အညီ တန်းတူရေးနှင့် ကိုယ်ပိုင်ပြဋ္ဌာန်းခွင့် တို့ ပြည့်ဝစုံညီသည့် အနာဂတ်ဖက်ဒရယ် ဒီမိုကရေစီ ပြည်ထောင်စုကြီးအား လက်တွေ့ကျကျ အကောင်အထည်ဖော်ဆောင် တည်ဆောက်နိုင်ပါစေကြောင်း ဆုမွန်တောင်းလျက် ဤ (၂၇၆၄) ခုနှစ်၊ ကရင်အမျိုးသားနှစ်သစ်ကူးနေ့ သဝဏ်လွှာအား ဂုဏ်ယူစွာ ထုတ်ပြန်အပ်ပါသည်။

ပြည်ထောင်စုလွှတ်တော်ကိုယ်စားပြုကော်မတီ

(၁၀၄) နှစ်မြောက် အမျိုးသားအောင်ပွဲနေ့သဝဏ်လွှာ

၂၀၂၄ ခုနှစ်၊ နိုဝင်ဘာလ ၂၅ ရက်

ပြည်ထောင်စုလွှတ်‌တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ၏ သတင်းစဉ် အမှတ် (၄၀)

ပြည်ထောင်စုလွှတ်တော်ကိုယ်စားပြုကော်မတီက ထုတ်ပြန်ခဲ့သော သတင်းစဉ်များကို အောက်ပါ CRPH ဝက်ဘ်ဆိုက်လင့်ခ်မှတစ်ဆင့် ရယူနိုင်ပါသည်။

https://crphmyanmar.org/publication/newsletter/

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ(CRPH)နှင့် မကွေးဖက်ဒရယ်ယူနစ်လွှတ်တော်(၃)ရပ် လွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီနှင့်မကွေးဖက်ဒရယ်ယူနစ်လွှတ်တော်(၃)ရပ် လွှတ်တော်ကိုယ်စားလှယ်များသည် ၂၀၂၄ ခုနှစ်၊ နိုဝင်ဘာလ ၁၂ ရက်နေ့၊ ၀၉၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

တွေ့ဆုံဆွေးနွေးပွဲတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်က နှုတ်ခွန်းဆက်စကားပြောကြားခဲ့ပြီး မကွေးဖက်ဒရယ်ယူနစ်၏ လွှတ်တော်ဥက္ကဋ္ဌက လွှတ်တော်၏ ဆောင်ရွက်ပြီးစီးခဲ့သော လုပ်ငန်းစဉ်များနှင့် ရှေ့လုပ်ငန်းစဉ်များကို ရှင်းလင်းပြောကြားခဲ့သည်။

ယင်းနောက်တွင် ကြားကာလအစီအမံရေးဆွဲရေးကြိုတင်ပြင်ဆင်မှုဆိုင်ရာကော်မရှင်အနေဖြင့် အစီအမံပေါ်ပေါက်ရေးအတွက် ဆောင်ရွက်ထားရှိမှုအခြေအနေများအား ရှင်းလင်းတင်ပြရာ ပြည်ထောင်စုလွှတ်တော်ကိုယ်စားပြုကော်မတီမှ တက်ရောက်လာသူများက ဆွေးနွေးမေးမြန်း၍ ယူနစ်လွှတ်တော်ကိုယ်စားလှယ်များဘက်မှလည်း ပြန်လည်ရှင်းလင်း‌ ဖြေကြားခဲ့ကြသည်။ ထို့နောက် ဆက်လက်ချိတ်ဆက်ဆောင်ရွက်သွားနိုင်ရေးလုပ်ငန်းစဥ်များအား အပြန်အလှန် ဆွေးနွေးညှိနှိုင်းခဲ့ကြကာ ၁၂၃၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့သည်။

အဆိုပါတွေ့ဆုံဆွေးနွေးပွဲတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ မကွေးဖက်ဒရယ်ယူနစ်လွှတ်တော်(၃)ရပ်မှ လွှတ်တော်ကိုယ်စားလှယ်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနက ပြည်သူ့လုံခြုံရေးအဖွဲ့ (ပ.လ.ဖ) ဆိုင်ရာ သင်တန်းသား (၉၃၂) ဦးနှင့် ပြည်သူ့အုပ်ချုပ်ရေး (ပ.အ.ဖ) ဆိုင်ရာ သင်တန်းသား (၉၆) ဦး မွေးထုတ်ပေးနိုင်ခဲ့

၂၀၂၄ ခုနှစ်၊ နိုဝင်ဘာလ ၈ ရက်နေ့တွင် ဗီဒီယိုကွန်ဖရင့်မှတစ်ဆင့် ကျင်းပခဲ့သော ပြည်ထောင်စုလွှတ်တော်ကိုယ်စားပြုကော်မတီ ပုံမှန်လုပ်ငန်းညှိနှိုင်းအစည်းအဝေး (၄၆/၂၀၂၄) တွင် အမျိုးသားညီညွတ်ရေးအစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာန၏ လုပ်ငန်းဆောင်ရွက်ချက်များနှင့် ရှေ့လုပ်ငန်းစဥ်များအား ရှင်းလင်းတင်ပြခဲ့သည်။

အစည်းအဝေးတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ က အဖွင့်အမှာစကား ပြောကြားပြီး အတွင်းရေးမှူး မိုင်းလမင်းထွန်းက က နှုတ်ခွန်းဆက်စကားပြောကြားခဲ့သည်။ ထို့နောက် ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာန ပြည်ထောင်စုဝန်ကြီး ဦးလွင်ကိုလတ်က ဝန်ကြီးဌာန၏ ဆောင်ရွက်လျက်ရှိသော သင်တန်းများတွင် ပြည်သူ့လုံခြုံရေးအဖွဲ့ (ပ.လ.ဖ) ဆိုင်ရာ သင်တန်းများအနေဖြင့် အမှုစစ်အခြေခံသင်တန်း၊ စစ်သည်တော်ကျင့်ဝတ်သင်တန်းများအား အကြိမ်ရေ (၃၂) ကြိမ်ဖြင့် သင်တန်းသား (၉၃၂) ဦးအတွက် အွန်လိုင်းပို့ချမှုနှင့် မြေပြင်တွင် လက်တွေ့ သင်ကြားပို့ချပေးနိုင်မှု အခြေအနေများ၊ ပြည်သူ့အုပ်ချုပ်ရေးအဖွဲ့ (ပ.အ.ဖ) ဆိုင်ရာ သင်တန်းများအား သင်တန်းသား (၉၆) ဦးအတွက် စီစဉ်ပို့ချပေးမှုများ၊ တိုင်ကြားစာများ လက်ခံရရှိမှုနှင့် ကိုင်တွယ်ဆောင်ရွက်မှု အခြေအနေများ၊ အုပ်ချုပ်ရေးအကယ်ဒမီကျောင်း ဖွင့်လှစ်နိုင်ရေးအပါအဝင် ဆက်လက်ဆောင်ရွက်မည့်လုပ်ငန်းများအား ရှင်းလင်းပြောကြားခဲ့သည်။ ၎င်းနောက် တက်ရောက်လာသည့် ကော်မတီဝင်များက သက်ဆိုင်ရာဒေသအလိုက် ကြုံတွေ့နေရသည့် မြေပြင်အခြေအနေများနှင့်စပ်လျဥ်း၍ ဝန်ကြီးဌာနအနေဖြင့် ဆောင်ရွက်သင့်သည်များအား အကြံပြုဆွေးနွေးကာ သိရှိလိုသည်များလည်း မေးမြန်းခဲ့ရာ ပြည်ထောင်စုဝန်ကြီးက ပြန်လည်ရှင်းလင်း ဖြေကြားခဲ့သည်။

ဆက်လက်၍ ရေးရာကော်မတီများအလိုက် လုပ်ငန်းဆောင်ရွက်ချက်များ တင်ပြဆွေးနွေးရာတွင် ပညာရေးဆိုင်ရာကိစ္စများ၊ ဥပဒေကြမ်းကိစ္စများ၊ နိုင်ငံတကာဆက်ဆံရေးကိစ္စများနှင့် အထွေထွေကိစ္စများ တင်ပြဆွေးနွေးကြကာ အစည်းအဝေးအား ၂၃၁၅ နာရီတွင် ရပ်နားခဲ့သည်။

အစည်းအဝေးသို့ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ၊ အတွင်းရေးမှူးများနှင့် အဖွဲ့ဝင်များ၊ ရေးရာကော်မတီအဖွဲ့ဝင်များ၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန ပြည်ထောင်စုဝန်ကြီးနှင့်တာဝန်ရှိသူများ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

Statement on the 4th Anniversary of the 2020 Multi-Party Democratic General Election

8 November 2024

The Committee Representing Pyidaungsu Hluttaw

၂၀၂၀ ပြည့်နှစ်၊ ပါတီစုံဒီမိုကရေစီအထွေထွေရွေးကောက်ပွဲ (၄) နှစ်ပြည့် အထိမ်းအမှတ် ထုတ်ပြန်ချက်

၂၀၂၄ ခုနှစ်၊ နိုဝင်ဘာလ ၈ ရက်


၁။ ဒီမိုကရေစီကို လိုလားကြသည့် မြန်မာပြည်သူတစ်ရပ်လုံးက မိမိတို့၏ လိုလားချက်နှင့် သဘောထားဆန္ဒအမှန်ကို ရဲဝံ့စွာ ဖော်ထုတ်နိုင်ခဲ့သည့် ၂၀၂၀ ပြည့်နှစ်၊ ပါတီစုံဒီမိုကရေစီ အထွေထွေ ရွေးကောက်ပွဲသည် ယနေ့ဆိုလျှင် (၄) နှစ်ပြည့် ဖြစ်ပါသည်။ အရပ်သားအစိုးရက ကျင်းပသည့် ပထမဆုံးသော ရွေးကောက်ပွဲကြီးသည် လွတ်လပ်၍ တရားမျှတမှု ရှိခဲ့သည်သာမက ပြည်သူ့ဆန္ဒ အမှန်ဖြစ်သည်ကို ၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် စစ်တပ်က အာ‌ဏာသိမ်းယူ‌မှုနောက် နိုင်ငံတဝှမ်းဆန္ဒပြမှုများနှင့် လက်ရှိအချိန်ထိ အကြမ်းဖက်စစ်တပ်ကို ခုခံတွန်းလှန်နေကြသည့် ခုခံတွန်းလှန်မှုများက သက်သေပြလျက်ရှိပါသည်။

၂။ အကြမ်းဖက်စစ်တပ်က လက်နက်အင်အားဖြင့် တည်ဆဲအရပ်သားအစိုးရထံမှ နိုင်ငံတော် အာဏာကို ဥပဒေမဲ့လုယူခဲ့ခြင်းဖြစ်ကာ နိုင်ငံတော်ပုန်ကန်မှုရာဇဝတ်မှု ကျူးလွန်ခဲ့ခြင်းဖြစ်ပါသည်။ ထိုမျှ ရာဇဝတ်မှုကို ကျူးလွန်ခဲ့သည်သာမက ဥပဒေမဲ့အာဏာသိမ်းမှုနောက် နိုင်ငံတော်အာဏာအား ဆက်လက်ထိန်းချုပ်ထားနိုင်ရန် နိုင်ငံ့ခေါင်းဆောင်များနှင့် ပြည်သူများအား အပြစ်မဲ့ ဖမ်းဆီး ထောင်ချခြင်း၊ သေစေနိုင်လောက်အောင် ညှဉ်းပန်းနှိပ်စက်ခြင်း၊ သတ်ဖြတ်ခြင်း၊ လိင်ပိုင်းဆိုင်ရာ နှောင့်ယှက်စော်ကားခြင်း၊ ဆေးကုသခွင့်မပေးခြင်း၊ နေအိမ်များကို မီးရှို့ဖျက်ဆီးခြင်း၊ ကျေးရွာ၊ မြို့များရှိ လူနေအိမ်များ၊ စာသင်ကျောင်းများ၊ ဘာသာရေးအဆောက်အုံများနှင့် စစ်ဘေးရှောင် စခန်းများကို လေကြောင်းဖြင့်တိုက်ခိုက်ခြင်း စသည့် စစ်ရာဇဝတ်မှုများကို လူမဆန်စွာ ကျူးလွန် လုပ်ဆောင်ခဲ့ပါသည်။ မကြာသေးမီက စစ်ကိုင်းတိုင်း၊ ဘုတလင်မြို့နယ်ရှိ စီပါကျေးရွာမှ ပြည်သူ များအား ဦးခေါင်းနှင့် ခန္ဓာကိုယ်များကို ခုတ်ထစ်၍ ရက်ရက်စက်စက်သတ်ဖြတ်ခဲ့ပါသည်။

၃။ ပွင့်လင်းမြင်သာမှုရှိသည့် ယနေ့အချိန်မှာပင် အကြမ်းဖက်စစ်တပ်က ရာ‌ဇဝတ်မှုများကို ပေါ်ပေါ်တင်တင် ကျူးလွန်လုပ်ဆောင်လျက်ရှိရာ ထိုပြစ်မှုများအပြင် ခေတ်အဆက်ဆက်၌ တိုင်းရင်းသားလူနည်းစုများ၊ ရိုဟင်ဂျာလူမျိုးများအပါအဝင် ဒီမိုကရေစီအရေး၊ လူ့အခွင့်အရေး၊ အမျိုးသားတန်းတူရေးတို့အတွက် လုပ်ဆောင်ခဲ့သူများအပေါ် ရက်စက်စွာ ကျူးလွန်လုပ်ဆောင် ခဲ့သည့် ပြစ်မှုကျူးလွန်သူများကို ထိထိရောက်ရောက်အပြစ်ပေးအရေးယူနိုင်ရေးအတွက် နိုင်ငံတကာ အသိုက်အဝန်း၏ ယခုထက်ပိုမိုသော ပံ့ပိုးကူညီမှုများ၊ ပူးပေါင်းဆောင်ရွက်မှုများရရှိရန် လွှတ်တော် ကဏ္ဍမှ တိုးမြှင့်လုပ်ဆောင်သွားမည် ဖြစ်ပါသည်။ ထို့ပြင် ရာဇဝတ်မှုများ ဆက်လက်ကျူးလွန်နေ သည့် အကြမ်းဖက်စစ်ကောင်စီအား ပံ့ပိုးကူညီခြင်းများသည် အကြမ်းဖက်လုပ်ရပ်များကို လက်ခံ အသိအမှတ်ပြုခြင်းဖြစ်ကာ လက်ရှိပဋိပက္ခကို ပိုမိုကြီးထွားစေရန် ပံ့ပိုးနေခြင်းပင်ဖြစ်သဖြင့် ပြည်သူ့ကိုယ်စားလှယ်များအနေဖြင့် ကန့်ကွက်ထုတ်ဖော်ပြီး တားမြစ်နိုင်ရေးအတွက် ဆက်လက် ကြိုးပမ်းသွားမည် ဖြစ်ပါသည်။

၄။ ယနေ့အချိန်တွင် အာဏာသိမ်းစစ်ကောင်စီသည် ၂၀၂၅ ခုနှစ်တွင် အတုအယောင် ရွေးကောက်ပွဲတစ်ရပ် ကျင်းပနိုင်ရေးအတွက်လည်း လုပ်ဆောင်နေသည်ကို တွေ့ရှိရပါသည်။ အကြမ်းဖက်စစ်တပ်သည် နိုင်ငံ‌တော်အာဏာအား လုယူထားသည့် အကြမ်းဖက်အဖွဲ့အစည်း တစ်ရပ်သာဖြစ်ပြီး ရွေးကောက်ပွဲအား ကျင်းပရန် လုပ်ပိုင်ခွင့်မရှိပါ။ ပြည်သူလူထုနှင့် နိုင်ငံတကာ အသိုက်အဝန်းက အသိအမှတ်ပြုထားသည့် ၂၀၂၀ ပြည့်နှစ်၊ ရွေးကောက်ပွဲသည် မြန်မာနိုင်ငံ၏ တရားဝင်ရွေးကောက်ပွဲ ဖြစ်ပါသည်။ အကြမ်းဖက်စစ်ကောင်စီ၏ ရွေးကောက်ပွဲ ကျင်းပနိုင်ရန် ပံ့ပိုး ကူညီနေမှုသည် ဒီမိုကရေစီ၏ အနှစ်သာရကို ပျက်ယွင်းစေသည်သာမက မြန်မာပြည်သူတို့၏ ဆန္ဒကို မလေးစားခြင်းအဖြစ် ပုံဖော်လျက်ရှိပါသည်။

၅။ အာဏာသိမ်းစစ်ကောင်စီ၏ မတရား ဟန့်တားနှောင့်ယှက်မှုများရှိသည့်ကြားမှပင် ၂၀၂၀ ပြည့်နှစ်၊ အထွေထွေရွေးကောက်ပွဲတွင် ပြည်သူလူထု၏ ဒီမိုကရေစီနည်းကျ ရွေးကောက် ခံခဲ့ကြရသည့် လွှတ်တော်ကိုယ်စားလှယ်များသည် နည်းပညာကို အသုံးပြုပြီး လွှတ်တော်လုပ်ငန်း များကို အွန်လိုင်းမှတစ်ဆင့် ဆက်လက်ဆောင်ရွက်လျက်ရှိကြပါသည်။ ပြည်ထောင်စုလွှတ်တော် ကိုယ်စားပြုကော်မတီအနေဖြင့် တော်လှန်ရေးအင်အားစုများနှင့် ဆွေးနွေးတိုင်ပင်ညှိနှိုင်းကာ အမျိုးသားညီညွတ်ရေးအစိုးရကို တရားဝင်အစိုးရအဖြစ် ဖွဲ့စည်းတာဝန်‌ပေးအပ်နိုင်ခဲ့ပါသည်။ လွှတ်တော်ကိုယ်စားလှယ်များအနေဖြင့် အွန်လိုင်းနှင့်မြေပြင်တွင် လွှတ်တော်ကိုယ်စားလှယ် တာဝန် များကို ထမ်းဆောင်‌နေသည်သာမက အမျိုးသားညီညွတ်ရေးအစိုးရအနေဖြင့်လည်း ပြည်သူ့ ဝန်ဆောင်မှုလုပ်ငန်းများနှင့်အုပ်ချုပ်ရေးယန္တရားကို ကျယ်ကျယ်ပြန့်ပြန့် ဆောက်ရွက်လျက်ရှိပါသည်။

၆။ ၂၀၂၀ ပြည့်နှစ်၊ အထွေထွေရွေးကောက်ပွဲမှ ပြည်ထောင်စုလွှတ်တော်ကိုယ်စားလှယ် အများစုသည် ပြည်သူ့ဆင့်လွှဲအာဏာအရ လွှတ်တော်လုပ်ငန်းများကို ဆက်လက်ထမ်းဆောင်နေ ခြင်းကြောင့် နိုင်ငံတကာပါလီမန်များအဖွဲ့ (IPU) က မြန်မာနိုင်ငံအား အဖွဲ့ဝင်အဖြစ် ဆက်လက် သတ်မှတ်ခဲ့ပြီး ပြည်ထောင်စုလွှတ်တော်ကိုယ်စားလှယ်များက ဖွဲ့စည်းထားသည့် ပြည်ထောင်စု လွှတ်တော်ကိုယ်စားပြုကော်မတီအား တရားဝင်လွှတ်တော်အဖွဲ့အစည်းအဖြစ် ၂၀၂၁ ခုနှစ်၊ မေလ တွင် ကျင်းပခဲ့သည့် (၁၄၂) ကြိမ်မြောက်၊ နိုင်ငံတကာပါလီမန်များညီလာခံ၏ အမှုဆောင်ကောင်စီ အစည်းအဝေးက ဆုံးဖြတ်ခဲ့ပါသည်။

၇။ မိမိတို့ လွှတ်တော်ကိုယ်စားလှယ်များသည် တရားမဝင်အာဏာသိမ်းသည့်နေ့မှပင် ဥပဒေမဲ့အာဏာသိမ်းမှုကို ပြင်းပြင်းထန်ထန်ကန့်ကွက်ရှုတ်ချခဲ့ပြီး စစ်အာဏာရှင်စနစ် အဆုံးသတ် ရေးနှင့် ဖက်ဒရယ်ဒီမိုကရေစီစနစ် တည်ဆောက်နိုင်ရေးတို့အတွက် ရှင်းလင်းပြတ်သားသော နိုင်ငံရေး ရည်မှန်းချက်ကို အများပြည်သူသို့ ထုတ်ပြန်ထားပြီး ဖြစ်ပါသည်။ ယင်းနိုင်ငံရေး ရည်မှန်းချက်များ နှင့်အညီ အမျိုးသားညီညွတ်ရေး၊ ၂၀၀၈ ခုနှစ်၊ ဖွဲ့စည်းပုံအခြေခံဥပဒေ ဖျက်သိမ်းရေး၊ ဖက်ဒရယ် ဒီမိုကရေစီပဋိဉာဉ် ရေးဆွဲရေးတို့ကို ဦးဆောင်ကြိုးပမ်းခဲ့ပါသည်။ လက်ရှိအချိန်တွင်လည်း ဖက်ဒရယ် အုပ်ချုပ်ရေးစနစ်နှင့် ဥပဒေမူဘောင် ခိုင်မာအားကောင်းလာစေရေးအတွက် သက်ဆိုင်ရာ အင်အားစုများနှင့်အတူ လက်တွဲကြိုးပမ်း‌လျက် ရှိပါသည်။

၈။ ယခုကဲ့သို့ အကြမ်းဖက်စစ်ကောင်စီအနေဖြင့် အဖက်ဖက်မှ ကျရှုံးမှုများကို ကြီးမားစွာ ရင်ဆိုင်နေရပြီး တော်လှန်ရေးအင်အားစုများသည် သိသာထင်ရှားသောအောင်မြင်မှုများ ရရှိ ပိုင်ဆိုင်နေချိန်တွင် ဒီမိုကရေစီအင်အားစုများအကြား ယုံကြည်မှုတည်ဆောက်ရေးလုပ်ငန်းစဉ်များ အပါအဝင် အသွင်ကူးပြောင်းရေးလုပ်ငန်းစဉ်များကို အမြန်ဆုံး အကောင်အထည် ဖော်ဆောင်နိုင်ရေး အတွက် ကုလသမဂ္ဂ၊ ကမ္ဘာ့ဒီမိုကရေစီနိုင်ငံများ၊ အိမ်နီးချင်းနိုင်ငံများအပါအဝင် နိုင်ငံတကာ အသိုက်အဝန်းအနေဖြင့် ပံ့ပိုးကူညီမှု၊ ပူးပေါင်းဆောင်ရွက်မှုများကို တိုးမြှင့်ပေးအပ်ရန် ထပ်လောင်း တောင်းဆို တိုက်တွန်းအပ်ပါသည်။

၉။ ၂၀၂၀ ပြည့်နှစ်၊ အထွေထွေရွေးကောက်ပွဲတွင် တခဲနက် ရဲဝံ့စွာ ဆန္ဒထုတ်ဖော်ပေးခဲ့ ကြသည့် ပြည်သူလူထုနှင့် စစ်အာဏာရှင်စနစ် အဆုံးသတ်နိုင်ရေးနှင့် ဖက်ဒရယ်ဒီမိုကရေစီ ပြည်ထောင်စုသစ် တည်ဆောက်နိုင်ရေးအတွက် ပါဝင်ကြိုးပမ်းနေကြသည့် ပြည်သူများ၊ တိုင်းရင်းသားအဖွဲ့အစည်းများ၊ တော်လှန်ရေးအင်အားစုများကို အထူးကျေးဇူးတင်ရှိပါသည်။ အကြမ်းဖက်စစ်ကောင်စီထံ လက်နက်များနှင့် စစ်ဘက်သုံး အသုံးအဆောင်များအား ထောက်ပံ့ ပေးနေသည့် လူပုဂ္ဂိုလ် ၃ ဦးနှင့် အဖွဲ့အစည်း ၄ ခုအပေါ် မကြာသေးမီက ဗြိတိန်နိုင်ငံ၊ ကနေဒါနိုင်ငံ နှင့် ဥရောပသမဂ္ဂတို့က ပူးတွဲပိတ်ဆို့အရေးယူခဲ့မှုအပေါ် အထူးကျေးဇူးတင်ရှိကြောင်း ထပ်လောင်း ဖော်ပြအပ်ပါသည်။ အလားတူ မြန်မာပြည်သူများ၏ ဒီမိုကရေစီအရေးကြိုးပမ်းမှုအတွက် ပံ့ပိုးကူညီ ခဲ့ကြသည့် ကမ္ဘာ့နိုင်ငံများ၊ အဖွဲ့အစည်းများ၊ လူပုဂ္ဂိုလ်များကို ကျေးဇူးအထူးတင်ရှိပါကြောင်း ယနေ့တွင် ထပ်လောင်း မှတ်တမ်းတင် ထုတ်ပြန်အပ်ပါသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် မန္တလေးဒေသ ကြားကာလ နိုင်ငံရေးအစီအမံ ဖော်ထုတ်မှုဆိုင်ရာ ချိတ်ဆက်ညှိနှိုင်းရေးနှင့် မူကြမ်းရေးဆွဲရေးလုပ်ငန်းကော်မတီတို့ တွေ့ဆုံခြင်း

ပြည်ထောင်စုလွှတ်တော်ကိုယ်စားပြုကော်မတီနှင့် မန္တလေးဒေသ ကြားကာလ နိုင်ငံရေးအစီအမံ ဖော်ထုတ်မှုဆိုင်ရာ ချိတ်ဆက်ညှိနှိုင်းရေးနှင့် ရေးဆွဲရေးလုပ်ငန်းကော်မတီတို့သည် ၂၀၂၄ ခုနှစ်၊ နိုဝင်ဘာလ ၇ ရက်နေ့တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြသည်။

အစည်းအဝေးတွင် နှစ်ဖက် အပြန်အလှန် မိတ်ဆက်ကြပြီးနောက် မန္တလေးလုပ်ငန်းကော်မတီအနေဖြင့် မန္တလေးဒေသကြားကာလနိုင်ငံရေးအစီအမံ (မူကြမ်း) ရေးဆွဲရေးလုပ်ငန်းစဉ်နှင့် လက်ရှိဆောင်ရွက်နေမှုများအား တာဝန်ရှိသူများက တင်ပြမျှဝေခဲ့သည်။ ထို့နောက် CRPH ဥက္ကဋ္ဌနှင့်တကွ အဖွဲ့ဝင်များက မန္တလေးလုပ်ငန်းကော်မတီ၏ ဆွေးနွေးမေးမြန်းမှုများအပေါ် ပြန်လည်ဖြေကြားပြီး အကြံပြုချက်များလည်း ပြောကြားခဲ့ကြသည်။ ထို့အပြင် ကြားကာလနိုင်ငံရေးအစီအမံနှင့်စပ်လျဥ်း၍ အပြန်အလှန် သဘောထားများ၊ အမြင်များကို ရင်းနှီးပွင့်လင်းစွာ ဆွေးနွေးဖလှယ်ခဲ့ကြသည်။ ရှေ့ဆက်လုပ်ငန်းစဥ်များအတွက်လည်း လိုအပ်သလို ချိတ်ဆက်တွေ့ဆုံကြရန် ဆွေးနွေးသဘောတူခဲ့ကြသည်။

တွေ့ဆုံပွဲသို့ ပြည်ထောင်စုလွှတ်တော်ကိုယ်စားပြုကော်မတီဥက္ကဋ္ဌ ဦးအောင်ကြည်ညွန့်နှင့်တကွ CRPH အဖွဲ့ဝင်များ ပါဝင်တက်ရောက်ကြပြီး မန္တလေးလုပ်ငန်းကော်မတီမှလည်း ကော်မတီဝင်များ တက်ရောက်ခဲ့ကြသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ(CRPH)နှင့် စစ်ကိုင်းဖက်ဒရယ်ယူနစ် လွှတ်တော်ကိုယ်စားလှယ်များ တွေ့ဆုံဆွေးနွေး

ပြည်ထောင်စုလွှတ်တော်ကိုယ်စားပြုကော်မတီနှင့် စစ်ကိုင်းဖက်ဒရယ်ယူနစ်လွှတ်တော်ကိုယ်စားလှယ်များသည် ၂၀၂၄ ခုနှစ်၊ နိုဝင်ဘာလ ၅ ရက်နေ့၊ ၀၉၀၀ နာရီအချိန်တွင် ဗီဒီယိုကွန်ဖရင့်မှတစ်ဆင့် တွေ့ဆုံဆွေးနွေးခဲ့ကြပါသည်။

တွေ့ဆုံဆွေးနွေးပွဲတွင် ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်က နှုတ်ခွန်းဆက်စကားပြောကြားခဲ့ပြီး စစ်ကိုင်းဖက်ဒရယ်ယူနစ်၏ ဆောင်ရွက်ပြီးစီးခဲ့သော လုပ်ငန်းစဉ်များနှင့် ရှေ့လုပ်ငန်းစဉ်များကို ယူနစ်လွှတ်တော်ဥက္ကဋ္ဌ ဦးမြင့်ထွေးက ရှင်းလင်းပြောကြားခဲ့ပါသည်။

ယင်းနောက်တွင် စစ်ကိုင်းဖက်ဒရယ်ယူနစ်ကြားကာလဖွဲ့စည်းပုံအခြေခံဥပဒေ (မူကြမ်း)အပေါ်တွင် ပြည်ထောင်စုလွှတ်တော်ကိုယ်စားပြုကော်မတီမှ တက်ရောက်လာသူများက သုံးသပ်အကြံပြုမေးမြန်းကာ ယူနစ်လွှတ်တော်ကိုယ်စားလှယ်များဘက်မှလည်း ပြန်လည်ရှင်းလင်း‌ဖြေကြားခဲ့ကြပါသည်။ ထို့နောက် ရှေ့လုပ်ငန်းစဉ်ကိစ္စရပ်များအပေါ် အပြန်အလှန်ဆွေးနွေးညှိနှိုင်းခဲ့ကြကာ ၁၁၁၀ နာရီအချိန်တွင် အစည်းအဝေးအား အောင်မြင်စွာ ရုပ်သိမ်းခဲ့ပါသည်။

အဆိုပါတွေ့ဆုံဆွေးနွေးပွဲသို့ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်နှင့် အဖွဲ့ဝင်များ၊ ဥပဒေရေးရာကော်မတီနှင့် ဖက်ဒရယ်ရေးရာကော်မတီတို့မှ အဖွဲ့ဝင်များ၊ စစ်ကိုင်းဖက်ဒရယ်ယူနစ်ဘက်မှ ယူနစ်လွှတ်တော် ဥက္ကဋ္ဌ၊ ဒုတိယဥက္ကဋ္ဌနှင့် လွှတ်တော်ကိုယ်စားလှယ်များ တက်ရောက်ခဲ့ကြပါသည်။

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ၏ သတင်းစဉ် အမှတ် (၃၉)

ပြည်ထောင်စုလွှတ်တော်ကိုယ်စားပြုကော်မတီက ထုတ်ပြန်ခဲ့သော သတင်းစဉ်များကို အောက်ပါ CRPH ဝက်ဘ်ဆိုက်လင့်ခ်မှတစ်ဆင့် ရယူနိုင်ပါသည်။

https://crphmyanmar.org/publication/newsletter/

ပြည်ထောင်စုလွှတ်တော်ကိုယ်စားပြုကော်မတီ

မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး(မကဒတ) ဖွဲ့စည်းတည်ထောင်ခြင်း (၃၆) နှစ်မြောက် နှစ်ပတ်လည်နေ့သို့ ပေးပို့သည့်သဝဏ်လွှာ

၂၀၂၄ ခုနှစ်၊ နိုဝင်ဘာလ ၁ ရက်

ပြည်ထောင်စုလွှတ်တော်ကိုယ်စားပြုကော်မတီ

ဟိန္ဒူဘာသာဝင်များ၏ မီးထွန်းပွဲတော် ဒီပါဝါလီနေ့သဝဏ်လွှာ

၂၀၂၄ ခုနှစ်၊ အောက်တိုဘာလ ၃၁ ရက်

ပြည်ထောင်စုလွှတ်တော်ကိုယ်စားပြုကော်မတီ

ပြည်ထောင်စုလွှတ်တော်ကိုယ်စားပြုကော်မတီ၊ ပြည်သူ့ရေးရာကော်မတီ၏ ၂၀၂၃-၂၀၂၄ ဘဏ္ဍာရေးနှစ် CDM ထောက်ပံ့မှုအား ပြည်သူများထံသို့ အသိပေးထုတ်ပြန်ခြင်း

ပြည်ထောင်စုလွှတ်တော်ကိုယ်စားပြုကော်မတီ၊ ပြည်သူ့ရေးရာကော်မတီသည် CDM ပြည်သူ့ဝန်ထမ်းများ၏ အခက်အခဲများကို တစ်ထောင့်တစ်နေရာမှ ကူညီထောက်ပံ့ပေးနိုင်ရန်အတွက် အမှန်တကယ်အကူအညီလိုအပ်လျက်ရှိသည့် CDM ဝန်ထမ်းများ၏ အရေးပေါ်ကိစ္စရပ်များအား ၂၀၂၁ ခုနှစ်၊ မတ်လမှ စတင်၍ ကူညီပံ့ပိုးလျက်ရှိပါသည်။

ပြည်သူ့ရေးရာကော်မတီ၏ အရေးပေါ်ကူညီပံ့ပိုးမှုများတွင် ကျန်းမာရေး၊ မီးဖွားစရိတ်၊ စားဝတ်နေရေး စသည့် ခေါင်းစဉ်(၃)ခုဖြင့် အဓိကပံ့ပိုးပေးလျက်ရှိပြီး ရေဘေး၊ နေအိမ်မီးရှို့/ဖျက်ဆီးခံ၊ နေအိမ်ရွှေ့ပြောင်း၊ ဖမ်းဆီးခံနှင့် နာရေးထောက်ပံ့မှုများအတွက်လည်း ပံ့ပိုးကူညီပေးလျက်ရှိပါသည်။ ပြည်သူ့ရေးရာကော်မတီအနေဖြင့် ၂၀၂၃ ခုနှစ်၊ အောက်တိုဘာလမှ ၂၀၂၄၊ စက်တင်ဘာလအထိ CDM ဝန်ထမ်း (၁,၂၅၅) ဦးအတွက် မြန်မာကျပ်ငွေ သိန်းပေါင်း (၇၆၉) သိန်းကျော်ကို ကူညီပံ့ပိုးနိုင်ခဲ့ပြီးဖြစ်ပါသည်။

ပြည်သူ့ရေးရာကော်တီသို့ သက်ဆိုင်ရာ တိုင်းဒေသကြီး/ပြည်နယ် လွှတ်တော်ကိုယ်စားလှယ်များ၊ Ahlu Shin Facebook Page နှင့် သက်ဆိုင်ရာဝန်ကြီးဌာန Focal Person များမှတစ်ဆင့် ချိတ်ဆက်၍ ထောက်ပံ့မှုများအား ပေးပို့တင်ပြနိုင်ပါသည်။

ပြည်သူ့ရေးရာကော်မတီအနေဖြင့် CDM ပြည်သူ့ဝန်ထမ်းသူရဲကောင်းများအား နိုင်ငံတကာ အလှူရှင်များမှ လှူဒါန်းငွေများ၊ Ahlu Shin Application နှင့် Spring Legends YouTube Channel တို့၏ ကြော်ငြာများမှရရှိသည့် ဝင်ငွေများဖြင့်သာ ပြန်လည်ထောက်ပံ့နေရသည့်အတွက် ပြည်သူများ အနေဖြင့်လည်း Ahlu Shin Application နှင့် Spring Legends YouTube Channel တို့တွင် ဝင်ရောက်ကြည့်ရှုကလစ်ခြင်းအားဖြင့် CDM သူရဲကောင်းများအား တစ်ဖက်တစ်လမ်းမှ ပါဝင် ကူညီနိုင်ပါသည်။

Ahlushin Facebook Page
https://www.facebook.com/ahlushin.mm

Ahlushin App
iOS Version Link
https://apps.apple.com/ph/app/ahlu-shin/id1629192579

Play Store Link
https://play.google.com/store/apps/details?id=com.cdmsupport.ahlushin

Direct Link
https://bit.ly/3oDwRfI

Spring Legends YouTube Channel
https://youtube.com/@springlegends7763

သတင်းထုတ်ပြန်ချက်

ဆွစ်ဇာလန်နိုင်ငံ၊ ဂျနီဗာမြို့၌ ၁၃-၁၀-၂၀၂၄ ရက်နေ့မှ ၁၇-၁၀-၂၀၂၄ ရက်နေ့အထိ ကျင်းပခဲ့သည့် (၁၄၉) ကြိမ်မြောက် နိုင်ငံတကာပါလီမန်များညီလာခံနှင့် ဆက်စပ်အစည်းအဝေးများသို့ ပြည်ထောင်စုလွှတ်တော်ကိုယ်စားလှယ် ဒေါက်တာဝင်းမြတ်အေး၊ ဒေါ်သန္တာ၊ အကြံပေးများအဖြစ် ဒေါက်တာမြသီတာနှင့် ဒေါ်နန်းစုမွန်အောင် (ပြင်သစ်နိုင်ငံဆိုင်ရာ NUG ကိုယ်စားလှယ်) တို့ ပါဝင်သော မြန်မာလွှတ်တော်ကိုယ်စားလှယ်အဖွဲ့ ပါဝင်တက်ရောက်ခဲ့ပါသည်။

ညီလာခံကာလအတွင်း မြန်မာလွှတ်တော်ကိုယ်စားလှယ်အဖွဲ့သည် ညီလာခံအစည်းအဝေးများ၊ အမှုဆောင်ကောင်စီအစည်းအဝေး၊ General Debate အစီအစဉ်၊ အမြဲတမ်းကော်မတီအစည်းအဝေးများနှင့် ဆက်စပ်ဆွေးနွေးပွဲများသို့ ပါဝင်တက်ရောက်ခဲ့ပါသည်။ မြန်မာလွှတ်တော်ကိုယ်စားလှယ်အဖွဲ့ခေါင်းဆောင် ဒေါက်တာဝင်းမြတ်အေးသည် ၁၆-၁၀-၂၀၂၄ ရက်နေ့တွင် "Harnessing science, technology and innovation for a more peaceful and sustainable future." ဆောင်ပုဒ်ဖြင့် ပြုလုပ်ခဲ့သည့် ညီလာခံ၏ General Debate အစီအစဉ်တွင် မိန့်ခွန်းပြောကြားခဲ့ပါသည်။

ထို့ပြင် မြန်မာလွှတ်တော်ကိုယ်စားလှယ်အဖွဲ့သည် နိုင်ငံတကာပါလီမန်များအဖွဲ့၏ ဥက္ကဋ္ဌ၊ နယူးဇီလန်နိုင်ငံ၊ ဆွီဒင်နိုင်ငံ၊ မလေးရှားနိုင်ငံ၊ ထိုင်းနိုင်ငံ၊ ဒိန်းမတ်နိုင်ငံ၊ ပြင်သစ်နိုင်ငံ၊ ဘယ်လ်ဂျီယမ်နိုင်ငံ၊ ယူကေနိုင်ငံ၊ ဂျာမနီနိုင်ငံ၊ ယူဂန်ဒါနိုင်ငံနှင့် ဂါနာနိုင်ငံတို့မှ လွှတ်တော်ကိုယ်စားလှယ်အဖွဲ့တို့နှင့် သီးခြားစီတွေ့ဆုံ၍ မြန်မာ့အရေးအခြေအနေများကို ရှင်းလင်းပြောကြားကာ ပူးပေါင်းဆောင်ရွက်ပေးစေလိုသည့် ကိစ္စရပ်များကိုလည်း တောင်းဆိုခဲ့ပါသည်။

(၂၁၄) ကြိမ်မြောက် အမှုဆောင်ကောင်စီအစည်းအဝေးက ပြည်ထောင်စုလွှတ်တော်ကိုယ်စားပြုကော်မတီအား နိုင်ငံတကာပါလီမန်များအဖွဲ့ (IPU) ၏ တရားဝင်မိတ်ဖက်ဆွေးနွေးဖက်အဖြစ် ဆက်လက်အသိအမှတ်ပြုရန် ဆုံးဖြတ်ခဲ့ပါသည်။ ထို့ပြင် “Response by parliamentarians to the urgent plea by the UN Secretary-General to recommit to multilateralism for global peace, justice and sustainability” ခေါင်းစဉ်ဖြင့် တင်သွင်းသည့် အရေးကြီးအဆိုတွင် မြန်မာ့အရေးအား ပါဝင်ရန် ကြိုးပမ်းနိုင်ခဲ့ပြီး အမှုဆောင်ကောင်စီအစည်းအဝေးက ၁၇-၁၀-၂၀၂၄ ရက်နေ့တွင် ဆုံးဖြတ်အတည်ပြုခဲ့ပါသည်။
ယင်းအရေးကြီးအဆိုအား ပြင်သစ်နိုင်ငံ၊ ယူကေနိုင်ငံ၊ ဂျာမနီနိုင်ငံ၊ နယ်သာလန်နိုင်ငံနှင့် ကနေဒါနိုင်ငံတို့မှ လွှတ်တော်ကိုယ်စားလှယ်အဖွဲ့များက ပူးပေါင်းတင်သွင်းခဲ့ခြင်းဖြစ်ပါသည်။

မြန်မာလွှတ်တော်ကိုယ်စားလှယ်အဖွဲ့သည် မြန်မာနိုင်ငံ၏ အခြေအနေနှင့် အကြမ်းဖက်စစ်ကောင်စီက ကျူးလွန်လုပ်ဆောင်ထားသည့် အကြမ်းဖက်မှုများအခြေအနေ၊ ရွေးကောက်ခံလွှတ်တော်ကိုယ်စားလှယ်များအပေါ် ကျူးလွန်လုပ်ဆောင်လျက်ရှိသည့် လူ့အခွင့်အရေးချိုးဖောက်မှုအခြေအနေများနှင့် နိုင်ငံတကာအသိုက်အဝန်းထံသို့ တောင်းဆိုတိုက်တွန်းချက်များပါဝင်သည့် လက်ကမ်းစာစောင်များကိုလည်း ကိုယ်စားလှယ်အဖွဲ့များသို့ ဖြန့်ဝေခဲ့ပါသည်။

မြန်မာလွှတ်တော်ကိုယ်စားလှယ်အဖွဲ့အနေဖြင့် ၂၀၂၃ ခုနှစ်၊ မတ်လတွင် ဘာရိမ်းနိုင်ငံ၊ မနားမားမြို့၌ ကျင်းပခဲ့သည့် (၁၄၆) ကြိမ်မြောက် နိုင်ငံတကာပါလီမန်များညီလာခံမှစ၍ ညီလာခံအစည်းအဝေးများသို့ လူကိုယ်တိုင်သွားရောက် တက်ရောက်လျက်ရှိပြီး မြန်မာပြည်သူများ၏ အသံများကို နိုင်ငံတကာအသိုက်အဝန်းက ကျယ်ကျယ်ပြန့်ပြန့် သိရှိနားလည်နိုင်စေရေး ကြိုးပမ်းဆောင်ရွက်လျက်ရှိပါသည်။

ပြည်ထောင်စုလွှတ်တော်ကိုယ်စားပြုကော်မတီ

နိုင်ငံတကာပါလီမန်များအဖွဲ့ (IPU) က ပြည်ထောင်စုလွှတ်တော်ကိုယ်စားပြုကော်မတီအား ဆက်လက်အသိအမှတ်ပြုကြောင်း အတည်ပြုခဲ့

ဆွစ်ဇာလန်နိုင်ငံ၊ ဂျနီဗာမြို့၌ ကျင်းပခဲ့သည့် (၂၁၄) ကြိမ်မြောက် အမှုဆောင်ကောင်စီအစည်းအဝေးက ပြည်ထောင်စုလွှတ်တော်ကိုယ်စားပြုကော်မတီအား IPU ၏ တရားဝင်မိတ်ဖက်ဆွေးနွေးဖက်အဖြစ် ဆက်လက်အသိအမှတ်ပြုရန် ဆုံးဖြတ်ခဲ့ပါသည်။ (၂၁၄) ကြိမ်မြောက် အမှုဆောင်ကောင်စီအစည်းအဝေးအား (၁၄၉) ကြိမ်မြောက် နိုင်ငံတကာပါလီမန်များညီလာခံကာလအတွင်း ယနေ့ (၁၇-၁၀-၂၀၂၄ ရက်နေ့) နေ့လယ်ပိုင်းတွင် ကျင်းပခဲ့ခြင်း ဖြစ်ပါသည်။

အမှုဆောင်ကော်မတီအစည်းအဝေးက ဆုံးဖြတ်ချက်မချမှတ်မီ မြန်မာလွှတ်တော်ကိုယ်စားလှယ်အဖွဲ့ခေါင်းဆောင်က ဝင်ရောက်ဆွေးနွေးရာတွင် “မြန်မာနိုင်ငံ၌ အကြမ်းဖက်စစ်တပ်သည် မြေပြင်တွင် နယ်မြေဆုံးရှုံးမှုများ ပိုမိုများပြားနေခြင်းကြောင့် လေကြောင်းတိုက်ခိုက်မှုများ၊ အရပ်သားပြည်သူများကို ပစ်မှတ်ထားတိုက်ခိုက်မှုများကို ပိုမိုလုပ်ဆောင်လျက်ရှိပါကြောင်း၊ လက်ရှိပဋိပက္ခများအကြားမှ အာဏာသိမ်းစစ်တပ်သည် ၂၀၂၅ ခုနှစ်တွင် အတုအယောင်ရွေးကောက်ပွဲတစ်ရပ်ပြုလုပ်ရန် ပြင်ဆင်လျက်ရှိပါကြောင်း၊ ယင်းသည် ဒီမိုကရေစီနည်းမကျနိုင်သည်သာမက ပြည်သူ့ဆန္ဒကိုလည်း ထင်ဟပ်နိုင်မည် မဟုတ်ပါကြောင်း၊ တော်လှန်ရေးအင်အားစုများသည် ဖက်ဒရယ်ဒီမိုကရေစီဖွဲ့စည်းပုံ အခြေခံဥပဒေသစ်တစ်ရပ် ရေးဆွဲပြီးနောက်မှသာ အားလုံးပါဝင်နိုင်သည့် ရွေးကောက်ပွဲတစ်ရပ် ကျင်းပသွားရန်ဖြစ်နိုင်မည်ဖြစ်ကြောင်း သဘောတူညီထားပါကြောင်း၊ ယင်းသည် တိုင်းပြည်အတွင်း ထာဝရငြိမ်းချမ်းရေးနှင့် ရေရှည်တည်တံ့ဖွံ့ဖြိုးရေးအတွက် တစ်ခုတည်းသော လမ်းကြောင်းဖြစ်ပါကြောင်း၊ ထို့ကြောင့် အာဏာသိမ်းစစ်တပ်၏ ရွေးကောက်ပွဲအား အသိအမှတ်မပြုရန်နှင့် ပြည်ထောင်စုလွှတ်တော်ကိုယ်စားပြုကော်မတီအား ဆက်လက်အသိအမှတ်ပြုရန် ၂၀၂၀ ပြည့်နှစ်၊ မြန်မာ့ရွေးကောက်ခံလွှတ်တော်ကိုယ်စားလှယ်များနှင့် ပြည်သူများကိုယ်စား အမှုဆောင်ကော်မတီအား တိုက်တွန်းကြောင်း” ဆွေးနွေးခဲ့ပါသည်။

နိုင်ငံတကာပါလီမန်များအဖွဲ့(IPU) သည် အကြမ်းဖက်စစ်တပ်၏ တရားမဝင်အာဏာသိမ်းမှုနောက် ရွေးကောက်ခံလွှတ်တော်ကိုယ်စားလှယ်များဖြင့် ဖွဲ့စည်းထားသည့် ပြည်ထောင်စုလွှတ်တော်ကိုယ်စားပြုကော်မတီအား မြန်မာနိုင်ငံ၏ တရားဝင်ကိုယ်စားပြုအဖွဲ့အစည်းအဖြစ် အသိအမှတ်ပြုခဲ့ပါသည်။ နိုင်ငံတကာပါလီမန်များအဖွဲ့ (IPU) ၏ ညီလာခံအစည်းအဝေးများအား (၆) လတစ်ကြိမ် ကျင်းပပြီး (၁၅၀) ကြိမ်မြောက် နိုင်ငံတကာပါလီမန်များညီလာခံအား ဥဇဘက်ကစ္စတန်နိုင်ငံတွင် ကျင်းပသွားမည်ဖြစ်ပါသည်။

ပြည်ထောင်စုလွှတ်တော်ကိုယ်စားပြုကော်မတီ

နိုင်ငံ (၄) နိုင်ငံမှ ကိုယ်စားလှယ်အဖွဲ့များနှင့် မြန်မာလွှတ်တော်ကိုယ်စားလှယ်အဖွဲ့ သီးခြားစီ တွေ့ဆုံဆွေးနွေးခဲ့

၂၀၂၄ ခုနှစ်၊ အောက်တိုဘာလ ၁၇ ရက်နေ့

ဆွစ်ဇာလန်နိုင်ငံ၊ ဂျနီဗာမြို့၌ ကျင်းပလျက်ရှိသည့် (၁၄၉) ကြိမ်မြောက် နိုင်ငံတကာပါလီမန်များညီလာခံနှင့် ဆက်စပ်အစည်းအဝေးများသို့ တက်ရောက်လျက်ရှိသည့် မြန်မာလွှတ်တော်ကိုယ်စားလှယ်အဖွဲ့သည် ၁၆-၁၀-၂၀၂၄ ရက်နေ့၊ နေ့လယ်ပိုင်းတွင် ဘယ်လ်ဂျီယမ်နိုင်ငံ၊ ယူကေနိုင်ငံ၊ ဂျာမနီနိုင်ငံနှင့် ယူဂန်ဒါနိုင်ငံတို့မှ လွှတ်တော်ကိုယ်စားလှယ်အဖွဲ့များနှင့် သီးခြားစီတွေ့ဆုံခဲ့သည်။

တွေ့ဆုံဆွေးနွေးစဉ် မြန်မာလွှတ်တော်ကိုယ်စားလှယ်အဖွဲ့သည် မြန်မာနိုင်ငံ၌ လက်ရှိဖြစ်ပေါ်နေသည့် အရေးအခြေအနေများ၊ အကြမ်းဖက်စစ်ကောင်စီက ကျူးလွန်လုပ်ဆောင်လျက်ရှိသည့် လေကြောင်းတိုက်ခိုက်မှုများ၊ အရပ်သားပြည်သူများ သေဆုံးမှုအခြေအနေများ၊ အကြမ်းဖက်စစ်ကောင်စီက ပြုလုပ်ရန် စီစဉ်လျက်ရှိသည့် အတုအယောင်ရွေးကောက်ပွဲနှင့် နောက်ဆက်တွဲဖြစ်ပေါ်လာနိုင်သည့် အခြေအနေများ၊ ပြည်ထောင်စုလွှတ်တော်ကိုယ်စားပြုကော်မတီ၏ လုပ်ငန်းဆောင်ရွက်ချက်များကို ရှင်းလင်းဆွေးနွေးခဲ့ကာ မြန်မာနိုင်ငံ၌ စစ်အာဏာရှင်စနစ် အဆုံးသတ်နိုင်ရေး၊ တည်ငြိမ်အေးချမ်းမှုရရှိရေး၊ ဒီမိုကရေစီပြန်လည်ရရှိရေးတို့အတွက် ပူးပေါင်းဆောင်ရွက်သွားစေလိုသည့် ကဏ္ဍများကို တောင်းဆိုတိုက်တွန်းခဲ့ပါသည်။

ယင်းသို့ တွေ့ဆုံစဉ် မြန်မာလွှတ်တော်ကိုယ်စားလှယ်အဖွဲ့သည် မြန်မာနိုင်ငံ၏ အခြေအနေနှင့် အကြမ်းဖက်စစ်ကောင်စီက ကျူးလွန်လုပ်ဆောင်ထားသည့် အကြမ်းဖက်မှုများ၊ ရွေးကောက်ခံလွှတ်တော်ကိုယ်စားလှယ်များအပေါ် ကျူးလွန်လုပ်ဆောင်လျက်ရှိသည့် လူ့အခွင့်အရေးချိုးဖောက်မှုအခြေအနေများနှင့် နိုင်ငံတကာအသိုက်အဝန်းထံသို့ တောင်းဆိုတိုက်တွန်းချက်များပါဝင်သည့် လက်ကမ်းစာစောင်များကိုလည်း ပေးအပ်ခဲ့ပါသည်။


ပြည်ထောင်စုလွှတ်တော်ကိုယ်စားပြုကော်မတီ

သတင်းထုတ်ပြန်ချက်

ဆွစ်ဇာလန်နိုင်ငံ၊ ဂျနီဗာမြို့၌ ကျင်းပလျက်ရှိသည့် (၁၄၉) ကြိမ်မြောက် နိုင်ငံတကာပါလီမန်များညီလာခံနှင့် ဆက်စပ်အစည်းအဝေးများသို့ တက်ရောက်နေသည့် မြန်မာလွှတ်တော်ကိုယ်စားလှယ်အဖွဲ့‌ခေါင်းဆောင် ပြည်ထောင်စုလွှတ်တော်ကိုယ်စားလှယ် ဒေါက်တာဝင်းမြတ်အေးသည် ညီလာခံ စတုတ္ထနေ့ ၁၆-၁၀-၂၀၂၄ ရက်နေ့တွင် “Harnessing science, technology and innovation for a more peaceful and sustainable future” ခေါင်းစဉ်ဖြင့် ဆွေးနွေးလျက်ရှိသည့် ညီလာခံ၏ General Debate အစီအစဥ်တွင် တက်ရောက်မိန့်ခွန်းပြောကြားခဲ့ပါသည်။

မြန်မာလွှတ်တော်ကိုယ်စားလှယ်အဖွဲ့၏ မိန့်ခွန်းတွင် အောက်ပါအချက်များ အဓိက ပါဝင်ပါသည်-

- မိမိတို့တိုင်းပြည်ရဲ့ အနာဂတ်အတွက် မျှော်မှန်းထားချက်သည် ရေရှည်တည်တံ့တဲ့ ငြိမ်းချမ်းရေးနှင့် ဖွံ့ဖြိုးတိုးတက်ရေးပင် ဖြစ်ပါကြောင်း၊ မိမိတို့၏ တော်လှန်ရေးအစ ပထမနေ့မှာကတည်းက ကျွန်တော်တို့ရဲ့ ရည်မှန်းချက်ကို ပြည့်ဝစွာ ဖော်ဆောင်နိုင်ရန် နည်းပညာဟာ အရေးကြီးသော အစိတ်အပိုင်းဖြစ်ပါကြောင်း၊

- သင့်လျော်သောနည်းပညာပလပ်ဖောင်းများကို အသုံးပြုပြီး ပြည်ထောင်စုလွှတ်တော်ကိုယ်စားပြုကော်မတီ (CRPH)၊ အမျိုးသားညီညွတ်ရေးအစိုးရ (NUG) နှင့် တိုင်းရင်းသားလူမျိုးပေါင်းစုံအပါအဝင် တော်လှန်ရေးအင်အားစုများသည် နည်းပညာကို အသုံးပြုပြီး ကျွန်တော်တို့ရဲ့ အသံများကို ကျယ်ကျယ်ပြန့်ပြန့်သိရှိစေရန်နှင့် အဖွဲ့အစည်းဖွံ့ဖြိုးတိုးတက်မှုကို အားကောင်းအောင် လုပ်ဆောင်နိုင်ခဲ့ပါကြောင်း၊ ကယ်ဆယ်ရေးလုပ်ငန်းများနှင့် ဝန်ဆောင်မှုပေးအပ်မှုများကို ချိတ်ဆက်ဆောင်ရွက်နိုင်ခဲ့ပါကြောင်း၊ ပြည်ထောင်စု၊ ပြည်နယ်နှင့် ဒေသန္တရအဆင့်များအကြား ညှိနှိုင်းဆောင်ရွက်မှုကို တိုးမြှင့်ဆောင်ရွက်နိုင်ခဲ့ပါကြောင်း၊

- ၂၀၂၁ ခုနှစ်၊ စစ်တပ်၏ အာဏာသိမ်းမှုသည် မြန်မာလွှတ်တော်ကိုယ်စားလှယ်များက ပြည်သူတွေကို ကိုယ်စားပြုခြင်းကို မတားဆီးနိုင်ခဲ့ပါကြောင်း၊ ထို့အပြင် အီလက်ထရောနစ်နည်းပညာကို ပြည့်ပြည့်ဝဝ အသုံးပြုလည်ပတ်သည့် လွှတ်တော်တစ်ရပ်အဖြစ် ဆက်လက်နိုင်ခဲ့ပါကြောင်း၊

- လူမှုကွန်ရက်နှင့် အခြားသော ဒီဂျစ်တယ်နည်းပညာများကို မိမိတို့၏ အလုပ်အကြောင်းများကို သိရှိစေရန်၊ လူသားချင်းစာနာထောက်ထားမှုဆိုင်ရာ အကူအညီများအတွက် ရန်ပုံငွေရှာဖွေခြင်းနှင့် အာဏာသိမ်းစစ်တပ်၏ လူ့အခွင့်အရေးချိုးဖောက်မှုနှင့် အကြမ်းဖက်မှုများကို သိရှိအောင် လုပ်ဆောင်ခြင်းများအတွက် အသုံးပြုနိုင်ခဲ့ပါကြောင်း၊

- မိမိတို့အနေဖြင့် ငြိမ်းချမ်းရေးအတွက် နည်းပညာကို အသုံးပြုနေချိန်တွင် အာဏာသိမ်းစစ်တပ်သည် ၎င်းတို့၏ အာဏာကို တည်ဆောက်ရန် အသုံးပြုနေပါကြောင်း၊ ၎င်းတို့၏ တိုက်ခိုက်မှုတွေနဲ့ ဆိုးရွားတဲ့ အကြမ်းဖက်မှုတွေကို ဖုံးကွယ်ဖို့ အင်တာနက်အသုံးပြုမှုကို ပိတ်ပင်ထားပါကြောင်း၊

- အာဏာသိမ်းမှုနောက် အာဏာသိမ်းစစ်တပ်က အနည်းဆုံး ပြည်သူ ၅,၃၅၀ ကို သတ်ဖြတ်ခဲ့ပါကြောင်း၊ ယင်းသည် လွန်ခဲ့တဲ့ ၆ လလောက်ကစပြီး တစ်လကို ပြည်သူ ၁၀၀ ခန့်ကို သတ်ဖြတ်နေခြင်း ဖြစ်ပါကြောင်း၊

- ယခုချိန်တွင် ပြည်သူ ၃.၃ ကျော်သည် စစ်ဘေးရှောင်နေရပြီး ၁၈.၆ သန်းကျော်သည် လူသားချင်းစာနာထောက်ထားမှုအကူအညီလိုအပ်လျက်ရှိပါကြောင်း၊ လူပေါင်း ၂၇,၄၀၀ နီးပါးကို ဖမ်းဆီးထားပြီး ၂၀၂၄ ခုနှစ်၊ ဖေဖော်ဝါရီလမှာ စစ်တပ်က မဖြစ်မနေ စစ်မှုထမ်းရန် လူငယ်များအား ဖိအားပေးခိုင်းစေနေမှုနောက်ပိုင်း ဖမ်းဆီးခံအရေအတွက်သည် တိုးမြင့်လျက်ရှိပါကြောင်း၊ လူငယ်တွေသည် ကိုယ့်ပြည်သူကို ပြန်တိုက်ခိုက်ရန် ဆန္ဒမရှိခြင်းကြောင့် နိုင်ငံရပ်ခြားသို့ ထွက်ပြေးနေကြရပါကြောင်း၊

- အာဏာသိမ်းစစ်တပ်က အာဆီယံဘုံသဘောတူညီချက် (၅) ရပ်ကို ထိထိရောက်ရောက် အကောင်အထည်ဖော်ရန် အပြုသဘောဆောင်သည့်လက္ခဏာကို ပြသခဲ့ခြင်းမရှိသည်မှာ အင်မတန်သိသာပေါ်လွင်ပါကြောင်း၊

- ပြည်သူများ၏ ဆန္ဒကို လေးစားမှုမရှိဘဲ အာဏာသိမ်းစစ်တပ်က ၂၀၂၅ ခုနှစ်မှာ ပြုလုပ်ရန် ပြင်ဆင်နေသည့် ရွေးကောက်ပွဲသည် မြန်မာနိုင်ငံ၏ လက်ရှိပဋိက္ခကို ဖြေရှင်းနိုင်မည် မဟုတ်ပါကြောင်း၊ အာဏာသိမ်းစစ်တပ်သည် ရွေးကောက်ပွဲပြုလုပ်ခွင့်မရှိပါကြောင်း၊ အဓိက အတိုက်အခံအင်အားစုတွေလည်း ပါဝင်ကြမှာမဟုတ်ဘဲ လက်ရှိပဋိပက္ခကို ပိုမိုဆိုးရွားစေမည် ဖြစ်ပါကြောင်း၊ အစိတ်စိတ်အမွှာမွှာ ပိုမိုဖြစ်စေပြီး နောက်ထပ်အကြမ်းဖက်မှုများဆီ ဦးတည်စေပါလိမ့်မည်ဖြစ်ပါကြောင်း၊

- အမျိုးသားညီညွတ်ရေးအစိုးရနှင့် မဟာမိတ်အင်အားစုများတွင် ပြီးပြည့်စုံသည့် လမ်းပြမြေပုံတစ်ရပ် ရှိပါကြောင်း၊ ယင်းလမ်းပြမြေပုံသည် ဒီမိုကရေစီ၊ လူ့အခွင့်အရေးနဲ့ အမျိုးသားညီညွတ်ရေးကို ဦးစားပေးပါကြောင်း၊

- မိမိတို့ကို ပံ့ပိုးကူညီပြီး အာဏာသိမ်းစစ်တပ်အား ပံ့ပိုးကူညီခြင်းမလုပ်ရန်နှင့် မိမိတို့အတွက် တရားမျှတမှုဖော်ဆောင်ပေးရန် တောင်းဆိုပါကြောင်း။

မြန်မာလွှတ်တော်ကိုယ်စားလှယ်အဖွဲ့သည် ယနေ့နေ့လယ်ပိုင်းတွင် ညီလာခံအစည်းအဝေးများနှင့် ဆက်စပ်အစည်းအဝေးများသို့ ဆက်လက်ပါဝင်တက်ရောက်လျက်ရှိပြီး နိုင်ငံအလိုက် ကိုယ်စားလှယ်အဖွဲ့များနှင့် သီးခြားစီတွေ့ဆုံဆွေးနွေးသွားမည် ဖြစ်ပါသည်။

ပြည်ထောင်စုလွှတ်တော်ကိုယ်စားပြုကော်မတီ

သတင်းဓာတ်ပုံ

၂၀၂၄ ခုနှစ်၊ အောက်တိုဘာလ ၁၆ ရက်

ဆွစ်ဇာလန်နိုင်ငံ၊ ဂျနီဗာမြို့၌ ကျင်းပလျက်ရှိသည့် (၁၄၉) ကြိမ်မြောက် နိုင်ငံတကာပါလီမန်များညီလာခံနှင့် ဆက်စပ်အစည်းအဝေးများသို့ တက်ရောက်နေသည့် မြန်မာလွှတ်တော်ကိုယ်စားလှယ်အဖွဲ့‌ခေါင်းဆောင် ပြည်ထောင်စုလွှတ်တော်ကိုယ်စားလှယ် ဒေါက်တာဝင်းမြတ်အေးသည် ညီလာခံ စတုတ္ထနေ့ ၁၆-၁၀-၂၀၂၄ ရက်နေ့ နံနက်ပိုင်းတွင် “Harnessing science, technology and innovation for a more peaceful and sustainable future” ခေါင်းစဉ်ဖြင့် ဆွေးနွေးလျက်ရှိသည့် ညီလာခံ၏ General Debate အစီအစဥ်တွင် မိန့်ခွန်းပြောကြားခဲ့ပါသည်။

သတင်းအပြည့်အစုံကို ယနေ့ည ၈ နာရီတွင် ဆက်လက်ထုတ်ပြန်သွားမည် ဖြစ်ပါသည်။

ပြည်ထောင်စုလွှတ်တော်ကိုယ်စားပြုကော်မတီ

Updated သတင်းများ သိရှိနိုင်ရန် >>> https://x.com/CrphMyanmar