Behzod Fazliddin

***
Дўст-ёрнинг юзида малол бор гоҳи,
Кўзида таънали савол бор гоҳи,
Қай марднинг тамаъдан холи нигоҳи –
Бир Отам, биргина Онамдан бўлак?

Кўчамдан беғараз ўтмайди ҳеч ким,
Меҳр кўрмай меҳр тутмайди ҳеч ким,
Бекордан-бекорга кутмайди ҳеч ким –
Бир Отам, биргина Онамдан бўлак.

Жонлари ҳалакдир, сал қовоқ уйсам,
Адолар бўлгайдир, заррача куйсам,
Ким бошим силайди, пойига қўйсам,
Бир Отам, биргина Онамдан бўлак?

Ўзимнинг ўзимга келмайди раҳмим,
Шу оддий ҳикматга етмайди фаҳмим:
Аввал – Сен, бошқаси суймайди, Раббим,
Бир Отам, биргина Онамдан бўлак.

2010 йил

© Беҳзод Фазлиддин @Behzod_Fazliddin

#Тушларингдан_чиқиб_келдим

Ғийбат қилиб сен туфайли гуноҳга қолмасликлари учун баъзи одамларнинг ёнидан ўтгинг ҳам келмайди...

#Йўл_йўлакай #Таҳрирсиз_хаёллар

@Behzod_Fazliddin

***
Кўнглимни чўктирди кўнгилсизликлар,
Кўнгилга яқин бир кўнгил изладим.
Кўнглимни оздирди кўнгилбозликлар,
Узмадим, Кўнгилдан кўнгил узмадим.

Кўнгилни коптокдай ўйнади ҳаёт,
Эзилиб-эзилиб синган кўнгилман.
Кўнгил ўйинини қўймади ҳаёт,
Кўнмаган кўнгилман, кўнган кўнгилман.

Бу дунё асли бир кўнгилзор эди,
Кўнгилни кўнгилдан кечирмаганлар.
Наҳотки сизда ҳам кўнгил бор эди,
Кўнглимнинг кўзини очирмаганлар?!

© Беҳзод Фазлиддин @Behzod_Fazliddin

https://www.facebook.com/100003319579634/posts/1944568538997113/

Шунча вақт ичида янги бир Дунё яратса ҳам бўларди...

#Йўл_йўлакай  #Таҳрирсиз_хаёллар

@Behzod_Fazliddin

ҲАЁТ СПЕКТАКЛИ

Кечаги ёш бола бугун кемшик чол –
Биров туғилганда биров ўлади.
Яна ўша ўзим хоҳламаган роль...
Дунё томошабин бўлиб кулади.

Одамларга айтар бошқа гапим бор,
Тугаб боряпман-у, нега барча жим?
Мени маъзур тутинг, жаноб Режиссёр,
Бахтлилар ролини ўйнаб чарчадим...

2006

© Беҳзод Фазлиддин @Behzod_Fazliddin

#Сен_қачон_гуллайсан

***
Кимнинг ҳузури деб ким сарсон бўлди,
Биров биров билан андармон бўлди.
Тарози палласи тенг келмади ҳеч,
Ким қиммат талашди, ким арзон бўлди.

***
Дерларки, жангдан сўнг ботир кўпаяр,
Иш осон кўринса, шотир кўпаяр,
Атрофда дарди йўқ талабгор бўлса,
Майдонда хашаки шоир кўпаяр.

***
Не учун ҳолимга ачинмайди тил,
Эртанги сўроқдан чўчимайди тил?
Оғзимга тош солиб, жим турай дейман –
Бекордан-бекорга қичимайди тил.

2009

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Шахсий манфаат бор жойда Холислик хижолат тортиб бир чеккага чиқиб турармиш...

***
Қўлингиздан келса, фикрламанг. Фикрлаганнинг кўрган куни қурсин, ёронлар!

***
Интеллигенция аллақачон улоқни шовқинчиларга бериб қўйган ва ҳали-бери қайтариб ололмайдиганга ўхшайди.

#Йўл_йўлакай #Таҳрирсиз_хаёллар

@Behzod_Fazliddin

Илми борнинг – ҳилми бор. Ва шу ҳилмда ҳам ҳайбат, ҳам салобат мужассам. Алқисса, илм – ҳилм демак.

#Йўл_йўлакай #Таҳрирсиз_хаёллар

@Behzod_Fazliddin

***
Чиқиб кетса эди шу иблис қондан,
Сўнг топа олмаса мангуга изим.
Бир Ҳаёт бошласам ўшал ҳур ондан,
Ўз олдимда шувут бўлмаса юзим.

Қайтадан тозарсам – севсам қайтадан,
Чалғитмаса машъум хаёллар бир зум,
Арш сари зиналар қўйсам тавбадан,
Саодат асрини эслатса умрим...

2010

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Ҳаммамиз “индамаслик касали”га чалинганмиз. Оқибати нима бўларкан?!

***
Силлиққина бўлиб юриш ҳам санъат. Айниқса, тобора дағаллашаётган ҳозирги ҳаётимизда. Яш-ша-воринг-ей, силлиқлар!

***
Кимдир уни алдайди, у сизни, сиз эса мени алдайсиз, мен бировни алдайман, ўша биров яна кимнидир… Қарабсизки, ора очиқ. Ҳисобли дунё бу!

***
Бошқаларнинг қўли билан ёмонлик қиладиган одам ўша ижрочидан кўра тубанроқдир.

***
Фарзандлари маддоҳ юрт қудратсиз бўлур.

***
Киши Яратган қошида ўзини қанча ожиз сезса, одамлар олдида шунча кучлидир.

Беҳзод Фазлиддин

#Йўл_йўлакай #Таҳрирсиз_хаёллар

@Behzod_Fazliddin

Ер билан битта бўлиб
Ётган миллат меники...

Беҳзод Фазлиддин

https://www.facebook.com/100003319579634/posts/1528972257223412/

@Behzod_Fazliddin

?..

Йўқ, ҳали олдинда видо онлари,
Фақат бир қайрилиб ортимга боқдим.
Мени деб ёришди кимнинг тонглари,
Кимнинг қароғига шамчироқ ёқдим?

Йиртиб отмайдиган шеърларим борми?
Менга қарши гувоҳ бўлмасми сўзлар?
Ранжитганим йўқми қишни, баҳорни?
Рози кетдимикан меҳмон ёз, кузлар?

Бир куни Юрагим тилга кирганда,
Суйганим ўзимга бўлмасми зиён?
Кўзларим барини сотиб турганда,
Мени қутқаргани келарми Иймон?

Қандай бўлар экан ишонч меваси?
Эккан-тикканларим пушмон бермасми?
Оғир ботмасмикан қалбим шеваси?
Қаттиқроқ йўталим исён эмасми?..

2008 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Ўт кетганда бор жаҳонимга,
Ёмғирмиди кўзимнинг хасми?..

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

ОҒРИҚ

Қанча кунлар қазо бўлди,
Жонимизга жазо бўлди.
Биздан кимлар ризо бўлди?
Эгамизга нима деймиз?

Иймон азим дарахтдир хўб,
Япроғидан меваси кўп,
Шохларини синдирдик хўп,
Эгамизга нима деймиз?

Капалакка қўл бермадик,
Чумолига йўл бермадик,
Дил олмадик, дил бермадик,
Эгамизга нима деймиз?

Уйғонгимиз келмас сира,
Кўзимизни босган шира,
Борган сари кўнгил хира,
Эгамизга нима деймиз?

Шайтон бунча соҳибжамол?!
Қонимизда топар камол,
Ҳаётимиз – битта савол:
Эгамизга нима деймиз?

2007 йил

© Беҳзод Фазлиддин @Behzod_Fazliddin

#Сен_қачон_гуллайсан

Бир пайтлар кўпроқ самовий ҳисларга боғланадиган нафис санъат, сирли шеърият осмондан ерга тушиб, лойга ботганига, бошқа оламлардан деб қараладиган шоир халқи кундалик “ер одами”га айланганига анча бўлган. Жуда аччиқ бўлса ҳам, ҳақиқат шуки, айни замон шоири оммага аралашиб, туртиниб-суртиниб, саросимада изғиб юрган, нари борса, шеър тилида митти исёнлар қилаётган ночор одамдир, холос.

#Йўл_йўлакай #Таҳрирсиз_хаёллар #Ижод_ва_эътиқод #Эски_дардлар

@Behzod_Fazliddin

Ҳуда-беҳудага ранжитмай турса,
Тинглаб чарчамайман устоз Ҳаётни...

© Беҳзод Фазлиддин @Behzod_Fazliddin

Лермонтов “Ўйлар”и бугунимизга нақадар уйқаш

***
Замондош наслимга қарайман ғамгин,
Унинг келажаги – нурсиз, шарафсиз,
Дунё, таниш-билиш, гумонлар юкин
Кўтариб кексаяр бекор ва нафсиз.
Оталар хатосин, кеч кирган фаҳмин
Мерос қилиб олдик бешикдан бизлар,
Турмуш бизни, гўё бегона базми,
Гўё мақсадсиз йўл, чарчатар, эзар.
Яхши-ёмонликка бешарму бефарқ,
Умр бошидаёқ жангсиз сўлармиз.
Хавфлар қаршисида шарманда-қўрқоқ,
Ҳокимлар қошида манфур қуллармиз...

... Ақлимизни сўрди самарасиз фан,
Шубҳа таҳқир этган эҳтиросларнинг
Олийжаноб сасин, умид-ихлосларни
Ҳасад-ла яширдик яқин дўстлардан...
Санъат дурдонаси, шеърий орзулар
Завқидан уйғонмас бизнинг фаросат.
Биз титраб сақлаган қолдиқ туйғулар –
Хасислик дафн этган, фойдасиз бисот.
Севгимиз – тасодиф, нафратимиз ҳам,
Йўлида ҳеч нарса қилмаймиз қурбон.
Қонда ёшлик ўти қайнаб турган дам
Сирли бир совуқлик қалбда ҳукмрон...

Тез унут бўлғучи мунгли тўдадай,
Давр учун бирорта доҳиёна иш,
Бирор самарали фикр қолдирмай,
Дунёдан ўтамиз беиз, бетовуш.
Мулкин сотиб ичган ота қабрида
Аламли кулгандай алданган ўғил,
Гражданлик ҳаққи билан, хокимиз узра
Нафратли шеър ўқир келгуси бўғин.

Михаил Лермонтовнинг "Ўйлар" ("Дума", 1838) шеъридан.

Асқад Мухтор таржимаси.

***
Фақат рус адабиётининггина эмас, жаҳон поэзиясининг ҳам порлоқ юлдузларидан саналган Михаил Лермонтов (1814–1841) жуда қисқа (27 йилга етар-етмас!) умри давомида ўзидан нодир адабий мерос қолдирди. Шоирнинг шу каби шеърлари ўз вақтида бутун Россияни ларзага келтирган, эрксевар қалбларда зулму разолат, жаҳолатга қарши шеърий исён ўлароқ акс садо берган ва ҳали-ҳануз шеърият шайдолари, озод руҳ ошиқларини ошно этиб келаётир. Атоқли рус мунаққиди Виссарион Белинский Лермонтов ижодига ўз даврида муносиб баҳо берган эди...

М.Лермонтов асарларини Ғафур Ғулом, Ойбек, Мақсуд Шайхзода, Миртемир, Усмон Носир, Асқад Мухтор каби атоқли ижодкорлар ўзбек тилига маҳорат билан таржима қилганлар.

Лермонтов ижоди ва шахсияти, ҳавола этилган шеърлар “биография”си билан қизиққанлар махсус адабиётларга мурожаат қилишлари, асарларини синчиклаб ўқиб чиқишларини истаган бўлардик.

Беҳзод Фазлиддин

#Жаҳон_адабиёти #Таржима #Ижод_ва_эътиқод

@Behzod_Fazliddin

Кўп жойларда фақат жосуслик қилиш – ходимларнинг ҳар бир қадами, ён-атрофдагиларнинг хатти-ҳаракати ҳақида бошлиққа қўшиб-чатиб ахборот бериб туриш эвазига мояна олиб юрадиганлар бор. Яна буни сотқинлик ҳам дейиш мумкин.

Одам бундай жирканч ишлардан ҳазар қилиши керак!

Бу гап интернетдаги жосусларга ҳам тегишли, албатта.

#Йўл_йўлакай #Таҳрирсиз_хаёллар #Бу_ҳам_муҳим

@Behzod_Fazliddin

***
Ҳар ким ўз қисмати қошида ёлғиз,
Гарчи атрофимда дўстлар бор – холис,
Улар уммондаги хас каби ожиз,
Ўзингдан ўзгага айтар дардим йўқ.

Оғир бу йилларнинг тоши енгилми,
Биров очолмади тилсим севгимни,
Учратмасанг, қайдан топай тенгимни,
Ўзингдан ўзгага айтар дардим йўқ.

Умримни чўқилаб зоғлар алмашди,
Йўқолиб-йўқолмай доғлар алмашди,
Елкамдан тушолмай тоғлар алмашди,
Ўзингдан ўзгага айтар дардим йўқ.

Ўйларим – кишанда, кўнглим – кишанда,
Сўрадим, сўрашни қилмадим канда,
Авлиё бўлса ҳам, бандаси – банда,
Ўзингдан ўзгага айтар дардим йўқ.

Савобу гуноҳда беқарордирман,
Ажаб, шу ҳолимга сервиқордирман,
Умидсизлик аро умидвордирман,
Ўзингдан ўзгага айтар дардим йўқ!

2009 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Қонун адолатни ҳимоя қила олмас экан, одамларнинг ўзлари ҳар хил “қонун” яратиб олаверади.

#Йўл_йўлакай #Таҳрирсиз_хаёллар

@Behzod_Fazliddin

Тушга ўхшар бутун ҳаётим,
Кўзим очсам – унутилгудай...

© Беҳзод Фазлиддин @Behzod_Fazliddin

Агар қизбет экансан,
Белбоғингни ечиб қўй!..

© Беҳзод Фазлиддин @Behzod_Fazliddin

#Эски_дафтардан

Бугун энг қадрсиз меҳнат – адабий меҳнатдир.

#Йўл_йўлакай #Таҳрирсиз_хаёллар

@Behzod_Fazliddin

Изғириннинг қалами тегиб,
Гулзор бўлиб кетди дераза...

© Беҳзод Фазлиддин @Behzod_Fazliddin

#Кайфият #Эски_дафтардан

“Томга қўйдим шотини,
Анов кимнинг хотини?”

Шуям шеърми?! – дер экан Рауф Парфи “жўқиёна шеър”лар ҳақида...

#Йўл_йўлакай #Ижод_ва_эътиқод

@Behzod_Fazliddin

ИТОБ

Ўз бахтинг қадрини ўзинг билмасанг,
Ўзни ўзинг этсанг балога дучор,
Берган неъматига тоқат қилмасанг,
Бу дунёни ноҳақ айблашинг бекор.

Қара, йиғлаб қолди йиллар ортингдан,
Сен бой бериб қўйган лаҳзалар гирён.
Не чиқди дил деган бадбин юртингдан,
Нимага дунёни айблайсан, Инсон?!

Ёлғон дунё дейсан, бевафо дейсан,
Ўзинг бир бор Ҳаққа қилдингми вафо?
Қалбинг хусуматга, ҳасадга ватан,
Асли, сенинг ўзинг – ёлғончи дунё!

Кўнгил деразасин чертди неча бор,
Сен қарши олдингми кўкламни кулиб?
Эритолмай қалбинг музларин зор-зор,
Баҳор қайтиб кетди бағрини тилиб...

Етар, маломатга нуқта қўй энди,
Эрк берма беҳуда нолаларингга.
Меҳринг ила ташна дилларни қондир,
Оқибатни ўргат болаларингга.

Илло, Ҳақ ишқи-ла бағрини ёқиб
Яшаган мардларга толе ёр бўлсин.
Ўз бахти кўзига ўзи чўп суқиб,
Дунёни қарғаган номард кўр бўлсин!..

2000 йил

© Беҳзод Фазлиддин @Behzod_Fazliddin

#Онамнинг_кўнглига_кетамиз #Эски_дафтардан

ОДАМХЎР

Отасини еб бўлди,
Онасини еб бўлди.
Энди... ўзини ейди.

2004 йил

#Эски_дафтардан

© Беҳзод Фазлиддин @Behzod_Fazliddin

***
Умр – томчи-томчи тўкилган фурсат,
Лаҳзалик ёмғирдай ўтар бу муддат.
Ҳақ дея келгансан, ўзингни кўрсат,
Мунғайиб бир четда турмагин, Шеърим.

Муҳаббат қўлингда ҳур байроқ бўлсин,
Эл ичра пешонанг ярқироқ бўлсин,
Қадаминг пок бўлсин, йўлинг оқ бўлсин,
Ножоиз жойларда юрмагин, Шеърим.

Яшашдан чалғитар ўйларинг – мубҳам,
Холиқнинг ҳукмига этма шак-шубҳа,
Илҳом – дил покловчи илоҳий туҳфа,
Ижодни ўйинга бурмагин, Шеърим.

Минг турфа манзилу маконлар бўйлаб,
Ўтмишинг унутма, эртангни ўйла,
Ишқ бобида ёлғон эртаклар сўйлаб,
Ёш қалбларни йўлдан урмагин, Шеърим.

Бағрингдан таралсин шуълаи ёлқин,
Бор, бани башарнинг дардини олгин,
Мен ўтарман, Ҳақ деб сен мангу қолгин,
Замонлар заволин кўрмагин, Шеърим!

© Беҳзод Фазлиддин  @Behzod_Fazliddin

Яхшироқ қарасанг, бу олтин деворлар орасидан қон оқиб турганини кўрасан...

#Йўл_йўлакай #Таҳрирсиз_хаёллар

@Behzod_Fazliddin

ОСМОНДА ЁЗИЛГАН ШЕЪР

Еру осмон ораси – ҳаёт,
Сафаримнинг номи – алданиш.
Бунда менга ҳамма нарса ёт,
Бунда менга ҳаммаси таниш.

Ёпилмоқда илинж дарчаси,
Кўчишлардан бўлганман ҳориб.
Унутмоқчи эдим барчасин
Пўлат лочин бағрига кириб.

Бир ён булут, бир томон туман,
Қайга олиб қочай кўзимни?
Ҳар йўловчи нигоҳи билан
Тафтиш этдим яна ўзимни.

Учган сайин улғаяр ғуссам,
Хавотирнинг кўзлари лўқдир.
Андак мизғиб олайин десам,
Осмонда ҳам ҳаловат йўқдир.

Тошкент – Москва – Ҳамбург – Берлин

2009 йил

© Беҳзод Фазлиддин @Behzod_Fazliddin

Сал “халқим”ласанг, эл-юртга меҳру муҳаббат ҳақида жўшар бўлсанг, “маддоҳ”, “лаганбардор” дея маломат қилиб, беаёв тош отадилар, муаммо ё иллатлардан сўз очсанг, дарров “халқ душмани”га чиқариб қўядилар.

***
“Қучоқ очиб халқ ичига борайлик” деганда қайси халқни назарда тутгандингиз, Чўлпон домла? Қучоқ очиб борадиган халқни ҳали кўрмаяпмиз, деган экан қизиқ устида бир ғариби бечора.

***
“Юртим, сенга жоним фидо”, “Шу халқ учун қурбон бўламан!” деб тўймайдиганлар қачон гапига жавоб берар экан-а! Бу орада қанча миллат жонфидолари қурбон бўлиб кетди. Боягилар эса ҳамон майдон ўртасида – “Жоним фидо”, “Қурбон бўлай” дея ўйин қилади.

***
Мағлубиятини олдиндан аниқ билган ва тан олган одамнинг кураш майдонига чиқ(арил)иши нақадар аянчли!

Беҳзод Фазлиддин

#Йўл_йўлакай #Таҳрирсиз_хаёллар #Ижод_ва_эътиқод #Эски_дардлар

@Behzod_Fazliddin

Маънавият ҳақида “чистон”:
У нимадир, оти бор-у, ўзи йўқ?

#Йўл_йўлакай #Таҳрирсиз_хаёллар

@Behzod_Fazliddin

***
Муроса керакдир ҳамиша, илло,
Ниҳол ҳам тиргаксиз ўсолмас тикка.
Келишса бўлади ит билан ҳатто,
Лек қандай кўнарсан мунофиқликка?!

Иғволар – ўткинчи, ғам – ўз йўлига,
Ҳасад маҳв этолмас бутун иймонни.
Ҳар он озор етиб турса дилига –
Ҳақсизлик ўлдирар бир кун Инсонни.

2016

© Беҳзод Фазлиддин @Behzod_Fazliddin

***
Кўкдан элчиларни қабул қилди-да,
Оҳиста оқ чойшаб ёпинди борлиқ.
Ҳар лаҳза ажойиб эртак бўлди-да,
Бўғотлар бўйнида самовий ёрлиқ.

Бу ёғи не бўлар – елка қисар ер,
Дарахтлар гунг, гўё тушган асирга.
Битиб улгурмовди мен бошлаган шеър,
Энди нима дейман янги фаслга?!

Керагидан зиёд боқдим-у ортга,
Ҳануз юрагимдан кетмас титроқлар.
Кечаги умримни солмоқда ёдга
Бандида дийдираб турган япроқлар.

Қорга ўхшаб кетар қурмағур ҳаёт,
Бир кун эриб, бирда айланар музга.
Аёз деразамга гул солган заҳот
Ҳали қўшиқларим кўп эди кузга...

2010

© Беҳзод Фазлиддин @Behzod_Fazliddin

Токи бугунги шовқинларга уйқаш ижтимоий тармоқларнинг одамни чалғитувчи беҳуда оҳанжамалари-ла машғул эканмиз, катта ишлар қилиш орзулигича қолаверади.
Бу ўринда вақтимиз, кўз нуримиз, асабларимиз, куч-қувватимиз – умримизни сўриб бораётган виртуал дунёнинг ўзимиз ҳали илғаб-илғамаган ўта кучли оғуга эврилаётгани назарда тутилаётир.
Глобал тармоқда икки дунёнгиз учун фойдали ишлар билан машғул бўлсангиз, бу энди бошқа гап. Акс ҳолда, аҳвол оғир...

#Йўл_йўлакай #Таҳрирсиз_хаёллар #Бу_ҳам_муҳим

@Behzod_Fazliddin

Ҳаёт эмас ҳаётдан тўйиб кетган одамнинг аҳволини тушунасизми? Яшаб туриб ҳам яшамаётганларни-чи? Дарддош сезасизми ўзингизни бахтиқароларга?!

Аслида, мўмин қалб ҳар ишда ҳикмат борлигига ишонади. Бошга неки тушса, ўз ҳолига яраша эканини англайди. Фақат...

Ахир зотинг қирилгур Зулмнинг қўллари узун бўлса, буқаламун Ёвузлик лаҳза ўтмай турланаверса, Ёлғоннинг умри мангулик қадар чўзилса... Бу ҳолда башарият қисмати не кечади?..

Назаримда, оғриқ ана шу тушуниш ва ҳамдардликдан бошланади. Тушунганинг сари кучая боради оғриқлар. Шу маънода, шеър – чин инсоний оғриқларнинг оҳангга эврилишидир. Дард – шеърнинг яна бир номи, шоир – дардхуржуни ўзидан катта йўловчи.

...Бу шеърларни оҳангдор оғриқлар деса ҳам бўлар; улар – битиб-битмаган кўнгил яраларидан сатрларга сачраган қонюқлар, афсус-надомат, орзу-армонларнинг сўзга кўчиб-кўчмаган сувратлари...

Дарвоқе, кимдир дард-ҳолини шеър тилига ўгиришга уринаркан, бировдан юпанч-тасалли, марҳамат кутмайди. Зотан, ҳамма-ҳаммасини бир Зот кўриб-кузатиб турганининг ўзи буюк таскиндир.

Беҳзод Фазлиддин

2013 йил 12 декабрь

-----------------------------------
***
Кўксим оғриқлари кучайиб кетди,
Ғамлар томиримни кесиб боради.
Буюк орзуларим кичрайиб кетди,
Армоннинг бўйлари ўсиб боради.

Бир бора дардимни олмайди вужуд,
Дунёга тиз чўкиб толмайди вужуд,
Барибир, яшашни билмайди вужуд,
Руҳимнинг йўлини тўсиб боради.

Ҳаёт бир шафқатсиз ёвга ўхшайди,
Бировнинг ўрнига биров яшайди,
Гуноҳ қилган мен-у, болам қақшайди,
Умримни туманлар босиб боради...

Батафсил: https://www.facebook.com/100003319579634/posts/475003132620335/

#Кайфият #Эски_дардлар

@Behzod_Fazliddin

***
Бунинг ҳам жони бор демайсиз,
Бир қошиқ қони бор демайсиз,
Кетар бир они бор демайсиз,
Билмайсиз, дардимни билмайсиз.

Сўзимда қолмади ҳаловат,
Беғараз севмак ҳам жасорат...
Адолат қаерда, адолат?
Кўнгилни назарга илмайсиз.

Ўзимни кўмганман қалбимга,
Ачинмай қўйганман қадримга,
Ўлиблар кетсам ҳам, қабримга
Таънаю тамаъсиз келмайсиз.

2011

© Беҳзод Фазлиддин @Behzod_Fazliddin

#Кайфият #Бадиҳа

ҚОРХАТ

Субҳаналлоҳ, оппоқ нур ёғар кўкдан,
Лаҳзада ўзгарар мезон куйлари.
Оқ яктак кийгач ҳам оғочлар ўктам,
Борлиққа ярашиб турар бўйлари.

Аста гулга дўнар шаффоф томчилар,
Севгимиздай нафис, меҳримиздай пок.
Гўё Орзу сари йўллар очилар,
Олдга бошлар ҳассос илоҳий идрок.

Ҳикматлар ўқиймиз оппоқ дунёдан,
Бахтли саҳфаларни очиб бирма-бир.
Сўзлар ярми кумуш, ярми тиллодан,
Олам тўла маъно, олам тўла сир.

Бу қор биринчи ё охиргисимас,
Биздан олдин, биздан кейин ҳам бордир.
Хотималар абас, ҳижронлар абас,
Ҳали ҳаётимиз биринчи қордир.

Шукрона илмини ўргансин юрак,
Ёмғирига шукур, қорига шукур.
Менинг қорхатим ҳам шу эзгу тилак:
Борига барака, барига шукур!

2011

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

АҲВОЛ

Куйиб битдим – нима ўзгарди?
Қачонгача ўзимни ейман?
Беҳудага юзим қизарди,
Ё бемаврид келдимми, дейман.

Аҳмоқ қилди, гар гапга кирсам,
Ожизлигим инжиқлик бўлди.
Маҳмадона чиқдим гапирсам,
Жим турганим писмиқлик бўлди.

Гул чеҳралар самимий сохта,
Тўхтаб қолган соатлар бебурд.
Қололмайман узоқ бу шохда,
Кетай десам, у томон ҳам мўрт.

2008 йил

© Беҳзод Фазлиддин @Behzod_Fazliddin

Қуйидаги туркум шеърлар 2017 йили "Муштум" журналининг "Назм хумдони"да чиққан эди. Бош муҳаррир ташаббуси билан.

Ўтган 2023 йил "Муштум" 100 ёшга тўлди. Муштум бобонинг умри янада узун бўлсин!

Батафсил: https://www.facebook.com/100003319579634/posts/1487146098072695/

Балодан қўрққанчалик
Худодан қўрқамизми?!

#Йўл_йўлакай #Таҳрирсиз_хаёллар

@Behzod_Fazliddin

#Кайфият  #Лаҳзалар

2000 йил. Жиззах. Республика ижодкор ёшларининг анъанавий Зомин анжуманидан сурат-лавҳа.

Буни устоз шоиримизнинг қизлари эълон қилган экан. Ўшанда матбуотда ҳам берилганди, чоғи. Яна ўша кунларга қайтгандай бўлдим. Ажойиб дамлар эди!..

Шеърдан бошқа дардимиз йўқ эди гўё. Ўзимча "Мен дунёга шеър дардини бериб кетай..." деб юрган пайтларим...

Абдулла Орипов, Муҳаммад Юсуф каби "тирик шоир"лар билан мулоқот...
Жўшиб-тошиб шеър ўқишлар...

Шеър ва шоир шахсияти, ижод ва эътиқод борасидаги қарашларимда руҳимда яна бир "силкиниш" бўлган ўша пайтдаги баъзи ҳолатлар хотирамда муҳрланиб қолган.

Барибир, жуда яхши дамлар эди...

@Behzod_Fazliddin

Бутун бошли жамиятнинг ўзи носоғ бўлса, дардингни кимга айтасан?!

#Йўл_йўлакай #Таҳрирсиз_хаёллар

@Behzod_Fazliddin

ЁРУҒ НИЯТ

Нафас ростлаб олай, имкон бер,
Бошқа биров ёзмас, ёзмасам.
Юрагимни кўтарарми шеър –
Қалбдан чиққан ҳар сўзим – қасам.

Уйғотгувчи Сўз сўраб ўсдим,
Достон-достон бўлар ғам-ғуссам.
Майли, мени ўқима, дўстим,
Дарддан сўйлаб кўнглингни бузсам.

Қоғозсиз ҳам куним ўтарди –
Ер юзида қайси шоир тўқ?!
Шуни билиб қалам кўтардим –
Ўлмай туриб ташлаб кетиш йўқ.

Кулма дардим кучайган пайти,
Ким қўйибди бизга миннатни?
Юпатмоқчи эдим шеър айтиб
Кўнгли тўлиб кетган миллатни...

2008 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Шунчаки ҳаваскорлар ёки адабиёт атрофида айланиб юрганлар тузган “энг яхши”лар рўйхати – турли “юзлик”, “ўнлик”лар ва уларнинг пала-партиш фикрларига кўз тушиб қоляпти.

Замонавий ўзбек адабиётига баҳо беришдан аввал мана буларни яхшилаб англаб олинг:

Қайси шоир-ёзувчи қайси авлодга мансуб?
Ижодининг ўзига хослиги нимада?
Асарлари бадиияти қандай – профессионал даражадами?

Ҳеч бўлмаса, шуларни билгандан кейин рўйхат тузинглар, барака топкурлар!

#Йўл_йўлакай #Бу_ҳам_муҳим #Ижод_ва_эътиқод

@Behzod_Fazliddin

Кечаги умримни солмоқда ёдга
Бандида дийдираб турган япроқлар...

© Беҳзод Фазлиддин @Behzod_Fazliddin

Авлодлар ортидан авлодлар келаётир. Лекин бутун бир авлодга айланиш жараёни ҳали кўп куттиради, чоғи...

***
Идеаллар ҳам ўзгариб, майдалашиб кетди...

#Йўл_йўлакай #Таҳрирсиз_хаёллар

@Behzod_Fazliddin

Сизнинг йўлингизни берсин кўпга ҳам,
Қалбида Қуръонни олиб юрганлар!..

© Беҳзод Фазлиддин @Behzod_Fazliddin

Гуруҳ-гуруҳ бўлиб олиб бир-бирини кўтар-кўтар қилаётган, интернетда ҳам ўзаро "лайкиллашиб" ётган тўдадан узоқроқ юраверган маъқул.
Муносабатлар холис, беғараз ва самимий бўлганига не етсин!

#Йўл_йўлакай #Таҳрирсиз_хаёллар

@Behzod_Fazliddin

Сизни тушунаман ўзимдан кўпроқ,
Бошимда ёғолмай турган булутлар...

© Беҳзод Фазлиддин @Behzod_Fazliddin

Уларни афв этгил,  улар билмаслар,
Билдиргин, билсалар, бундай қилмаслар.

© Беҳзод Фазлиддин @Behzod_Fazliddin

ЖАРЧИ

Қулоқни ёрса ҳам овозинг гарчи,
Бировнинг измини айтурсан, жарчи.

Ҳайитбой Абдусодиқ

“Ёнингдагиларга чивин чаққанчалик таъсиринг йўқ-ку, шу туришда бутун миллатни уйғотмоқчимисан?..” деган экан қизиқ устида ўзига ўзи бир ғариби бечора.

#Йўл_йўлакай #Таҳрирсиз_хаёллар

@Behzod_Fazliddin

Илоҳий мезонлар турганда дунёвий ўлчовлар не гап?!

#Йўл_йўлакай #Таҳрирсиз_хаёллар

@Behzod_Fazliddin

Одобинг – бахтинг. Бахтсиз бўлма!

#Йўл_йўлакай #Таҳрирсиз_хаёллар

@Behzod_Fazliddin

***
Жаноза ўқидим қанча сатримга,
Не-не ҳисларимни айладим қурбон.
Соғинчлар кафанлар бичди сабримга,
Ҳануз жон озурда, ҳамон дил сарсон.

Қайғулар кулдилар, мунғайди қувонч,
Йилларнинг ҳукмига кўндим-кўнмадим.
Неча бора ўлиб-тирилди ишонч,
Ўзимга қонмадим, Ўзга қонмадим.

Нима у – ҳеч қўймас ҳоли-жонимга,
Ҳаётимни остин-устун қилган не?
Ўлатдай ёпишган гирибонимга...
Умрим, азиз умрим кетмасми зое?

Очила қолсайди ул қулфи махзан,
Энг кескир сўзлар-ла ёрдим дилимни.
Мени кашф этаркан қайси бир лаҳза,
Қай аср тушунар экан тилимни?!

2010

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Яшаш учун кураш

Кўпчилик назаридаги “яшаш учун кураш”да ҳаддан ортиқ зўриқиш, ўзингни ва бошқаларни қийнаш, зулм, тажовузкорлик, ёлғон, ҳалол ва ҳаромни фарқламаслик, ўзгалар ҳақига хиёнат...лар бордек.

Бунақа “яшаш” одамни ҳаётдан ҳам баттар шафқатсиз қилиб қўяди, боз устига, жуда тез ҳолдан тойдиради. Шунданми, имкон қадар “яшаш учун курашмай” яшаяпман...

#Йўл_йўлакай #Таҳрирсиз_хаёллар

@Behzod_Fazliddin

Жонимизни Жабборга бериб қилаётган ишларимиз кўпроқ ҳарфхўрлик тусини олаётгандек...

#Йўл_йўлакай #Таҳрирсиз_хаёллар

@Behzod_Fazliddin

#Эски_дардлар

МАНА – БИЗ МИЛЛИОНЛАРНИ ҚАНДАЙ АЛДАЙМИЗ!

Телевидениега жиддий бир кўрсатув учун суҳбатга бордим. Очиғи, бир пайтлардаги экранга ишқибозлик, “кўриниб туриш”га ҳавасмандлик бугун анча “босилиб” қолгани боис даставвал кўпам қизиқмадим. Аммо суҳбат ёшлар ва адабиёт масалаларига бағишланганини билгач, бу борадаги айрим мулоҳазаларимни айтиб олиш имкони туғилганидан хурсанд бўлдим. Аммо...

Студияга кирдим-у, бошловчининг икки оғиз гапидан сўнг “ўчиб” қолдим. У шундай пафосда чуғурлар эдики, карахт бўлдим, ўша тилда айтганда, “шокка тушдим”. Бир қарашда сўзларида ҳеч қандай хато йўқ, ўз таъбирича, эга-кесими жойида. Ҳаммаси чиройли, гўё қовушган жумлалар. Бироқ саволлардан тайинли бирор нима илғай олмадим. Ўта умумий ва “қип-қизил”, кимларнингдир оғзидан тушиб қолган гаплар. “Саволларингиз жуда умумий экан”, десам, “У ҳолда, умумийроқ қилиб жавоб бераверинг”, дейди. “Билмадим, бизни ҳатто академиклар ҳам критиковать қилмаганди”, дея қўшиб қўяди яна. Зўрға чидаб ўтирибман. Ўзимни худди терговчи сўроқларига жавоб бераётган айбланувчидай ҳис қилдим.

Буёғи “бугунги адабий жараён ва унда ёшларнинг ўрни”, “ҳозирги адабиётимизнинг ютуқ ва камчиликлари”дан тортиб “атомдан кучли бўлган адабиётнинг глобаллашув даврида таъсир кучи қолмаётгани”, “ёшлар ижодида қаҳрамон ким” экани, “замонавий асарларда миллийлик” (саволлар шу тахлит давом этади) ҳақида деярли қуруқ гаплар... “Бу нимаси, – дейман ичимда ўзимга ўзим. – Экран ҳадисини олгандинг-ку, гапирсанг-чи. Бурро эдинг-ку, сайрамайсанми!..” Йўқ, сўз келмаяпти, гапира олмаяпман. Устига-устак, ҳар қанча уринмай, бошловчи гапларимни “силлиқлаш”га ҳаракат қилади. Ҳар икки-уч жумладан сўнг “Шу гапингизни бошқачароқ айтинг”, дейди. Ортиқ чидаб бўлмади. Охири “қўл кўтардим” – бошқа гапим йўқлигини айтдим. Бу туришда бирон нима чиқмаслигини билган “суҳбатдош”им ҳам кўна қолди. Ниҳоят, суҳбатга якун ясалди. Охири ҳаммасини монтажга қолдирдик. “Хоҳлаганича кесишсин, агар кесадиган жойи бўлса”, дейман ичимда. Ростдан ҳам, кўрсатув “сип-силлиқ” чиққан кўринади. Ўзим озгина томоша қилдим-у, кўрмасликни афзал билдим.

Дийдиё қилаётганга ўхшаб кетган бўлсам, маъзур тутасиз. Бироқ икки-уч кун шу воқеа таъсирида юрдим. Бу ижодкорга хос ўткинчи кайфият эмас. Жуда хафа бўлдим ўзимдан. Ахир шундай бўлишини олдиндан билардим. У ерга шунчаки кўриниб қўйиш ёки кимларгадир ҳисобот бериш учун бормаган бўлсам-да, кўрсатувнинг ўзи шундай эканини тахмин қилгандим. Мана – биз миллионларни қандай алдаймиз. Мана – нега бизни халқ тингламайди (ўқимайди, қизиқмайди). Мен “ақлли” эса бу сафар ҳам ҳаммаси яхши бўлишига умид қилгандим.

Бу битиклардан мақсад кимнидир қоралаш ё ўзни оқлаш эмас. Узр, ҳозирча айтадиган бошқа гапим қолмабди...

2013 йил, ноябрь

P. S. Ўн йиллар аввал ижтимоий тармоқда шуларни ёзиб қўйган эканман. Фейсбук эслатди яна. Ҳозир шунақа нарсаларни ёзгим ҳам келмайди. Шунчаки беҳуда баҳсга айланмасин, дейман. Аммо кимларгадир яхши маънода таъсири бўлар, дея умидланасан одам...

@Behzod_Fazliddin

#Кайфият #Йўл_йўлакай #Таҳрирсиз_хаёллар #Сизга_гапим_бор

https://www.facebook.com/100003319579634/posts/461953850591930/

ЧОРА

У қадар мураккаб эмасди дунё,
Унча ҳам қўрқинчли эмасди дардинг.
Тушуниш илмига тобинг йўқ, илло,
Барчасини ўзинг тўқиб чиқардинг.

Гар аслинг қародир, оқ бўлолмассан,
Риё либосига ўранган билан.
Осмон бўлолмассан, тоғ бўлолмассан,
Бу ҳолда милён йил чиранган билан.

Ҳеч неъмат беҳикмат этилмас ато,
Нимага шамаъдир Ойнинг тўлгани?
Самодан бир назар керакдир, ҳатто
Эшак бозорига даллол бўлгани.

Азалнинг тупроғи нақадар хушбўй!..
Ўзингга ўзингдан шифо бер – тузал.
Қадамингдай майда қаричингни қўй,
Бошингни эгиб кўр – ҳаммаси гўзал!

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Совуқ яшаяпмиз, жуда ҳам совуқ,
Муз каби қотмоқда қалбда гул ҳислар...

***
Умид элчиларин йўллайверар Ҳақ...

© Беҳзод Фазлиддин @Behzod_Fazliddin

Болалик – энг ширин туш,
Уйғонмагим келяпти...

@Behzod_Fazliddin

#Кайфият #Лаҳзалар

***
Ҳаёт – тушунмаган фалсафам менинг,
Умр – кундаликка ўхшаган дафтар.
Дунё – кипригимда қотиб қолган мунг,
Ажал – руҳ кўкида ёввойи каптар.

Осмон – оламларга сиғмас вужудим,
Қуёш – ёниб турган юрагим менинг.
Иймон – олам аро менинг бор-будим,
Бардош – ерга тегмас курагим менинг.

Шеърим – нафасимнинг тиргаги – ҳаво,
Қалам – оқ қоғозда титраган кўнглим.
Адолат – сувлари қуриган дарё,
Ҳақиқат – юраги қонаган синглим.

Орзу – осмонларга сиғмаган оққуш,
Армон – орзуларнинг синган қаноти,
Бахт – мен кўролмаган гўзал-гўзал туш,
Дард – шоир одамнинг яна бир оти.

Шодлик – тор кулбамнинг эрка меҳмони,
Алам – юрагимни забт этган мезбон.
Поклик – умримнинг гоҳ ожиз томони,
Шуҳрат – томиримда оқолмаган қон.

Ҳижрон – орамизни бузган ёсуман,
Севги – мен рангини англолмаган гул,
Рашк – ишқим кўкини қоплаган туман,
Висол – мен бошини тополмаган йўл.

2000 йил

© Беҳзод Фазлиддин @Behzod_Fazliddin

#Онамнинг_кўнглига_кетамиз китобидан.

Билмасангиз, жим туринг, яхши билмасангиз, янаям кўпроқ жим туринг!

#Йўл_йўлакай #Таҳрирсиз_хаёллар

@Behzod_Fazliddin

Ҳиндистон хотиралари: Тожмаҳал!

“Ҳеч бўлмаса, Тожмаҳални кўриш учун ҳам Ҳиндистонга борса бўлади”, деб юрардим бир пайтлар. Ниҳоят, мана, ўша мўъжиза шундоққина ёнимизда, қўл чўзса етгулик...

Дарвоқе, бу ерларда юрар эканман, ушбу муаззам иморатнинг “муҳаббат қасри” экани хаёлимга ҳам келгани йўқ. Йўлбошловчи(гид)нинг сўзлари эса бу қулоғимдан кириб унисидан чиқиб кетди; айни соҳир онлар ўз оламимда гўзал хаёлларим оғушида сармаст эдим...

Тожмаҳални уч маҳал – эрта тонгда, туш пайти ва кун ботар чоғи уч жойдан томоша қилдик. Муҳташам бино тонгда бошқа, пешин ва намозшом пайти яна ўзгача рангга киради – турфа тусда товланади. Айниқса, ёдгорлик атрофидаги оромижон боғ шоир хаёлларимга хуш ёқди. Оҳ, ўз даврида бу маскан қандай дилоро бўлган эса!..

Лекин хаёлларимдаги Тожмаҳал бошқача эди ва шундай бўлиб қолаверади...

2014 йил, ноябрь

@Behzod_Fazliddin

P.S. Ўз вақтида Ҳиндистон сафари таассуротлари билан интернетда ўртоқлашиб келгандик. Фейсбук ўша кунларни ёдга солди яна...

#Кайфият #Лаҳзалар

Шеър ўқимайдими, демак, зиёли эмас.

#Йўл_йўлакай #Таҳрирсиз_хаёллар

@Behzod_Fazliddin

***
Беҳуда чиқиллаб толиқди соат,
Лаҳзалар карвони бўлолмади жам.
Қиёфа жангидан чекинди суврат,
Ўзини кутишдан тўймади Одам.

Йиллар оқиб кетди – юзлари сўлғин,
Таъмини йўқотган туйғулар тахир.
Тонгни бедор кутди безовта, дилхун,
Илинжнинг ўлгиси келмайди ахир.

Қадарда борига қилмади зарда,
Сўзласа, сукутдан баланд сўзлади.
Ва лекин энг сўнгги сонияларда
Илиниб қолмаса эди кўзлари...

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Ўзига кўпчилик эътиборини қаратиш учун таниқли шахслар, машҳур кишиларга тош отиш бўлмағур ва майда одамларнинг машғулотидир.

#Йўл_йўлакай  #Таҳрирсиз_хаёллар

@Behzod_Fazliddin

НОЯБРЬ

Ёмғир қуя бошлади бирдан,
Савалайди биллур қамчилар.
Панароққа қочгани билан,
Топиб олар йўлни томчилар.

Парво қилмас симёғоч – хумпар,
Бошдан-оёқ ҳўл бўлган жиққа.
Рақсга тушар олтин япроқлар
Шитир-шитир – ёмғирқўшиққа.

Мўлтирайди бекатлар юпун,
Маъюс тортар ёлғиз хиёбон.
Ниманидир эслатиш учун
Гумбурлайди қоп-қора осмон.

Шу баҳона ютмади заҳар –
Ёмғир ювиб кетди барини.
Ғуборлардан зериккан шаҳар
Чайиб олди кўйлакларини.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

***
Бир менми ўзини йўлга қантариб,
Икки ўт ичида қоврилаётган?
Ҳар нафас имкондан имкон ахтариб,
Бор-йўғи ҳавога соврилаётган?

Оҳларим оҳорли куй каби қуйма,
Умримдан таралган оҳанглар чинми?
Бир менми юраги қиймаю қийма,
Яшагандай бўлиб юрган бир менми?..

2010

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Ўзига нима ёқмаса ё кимда қасди бўлса, ўшани “танқид” қилиб чиқадиган “журналист”лар тоифаси бор. Интернетда уларнинг уруғи баттар кўпайган. Ёзганларида шахсий манфаат, бирёқламалик, нуқул ўзини тўғри, бошқаларни ноҳақ деб кўрсатишга уриниш яққол сезилади. Холислик, жамоат фикрини ўрганиш, касб этикаси каби тушунчалар бундайларнинг тушига ҳам кирмаса керак. Тили ҳам алламбало – кўпи кўча гаплари.

Масалан, бир ташкилот унинг ишини битириб бермади ёки кимдир кўзига ёмон кўриниб қолди. Ёинки арзон бир ошхонага кирди-да, хизматчилар муомаласидан кўнгли тўлмади, дейлик. Дарров “мақола” тайёр – сарлавҳаси ҳам одамнинг қитиқ патига тегадиган. Энг ёмони, бундайлар шахсий адоват бадбўйи келиб турган ёзилдиқларини миллат тақдирига дахлдордек қилиб кўрсатмоқчи бўлади...

Бир қарашда гўё халқ дарди, жамият муаммоларини ҳис қилиб айтилаётгандек бу чиқишлар азага бориб ўз дардини айтиб йиғлайдиган хотинлар нағмасидан кам фарқ қилади. Аксига олиб, бунақа “жўшиш”ларни қаҳрамонлик, жасорат дея талқин қилаётганлар ҳам кўп. Отарчиларни реклама қилишга “ихтисослашган журналист”лар, миш-мишу иғво эвазига кун кечирадиган айрим мухбирлар ҳам шу тоифадан кам фарқ қилади.

Жамият, халқ бундай “журналистика”дан ҳеч қандай манфаат кўрмайди. Бу журналистика эмас, муттаҳамлик, бу журналистика эмас, шаллақиликдир!

#Йўл_йўлакай #Таҳрирсиз_хаёллар #Бу_ҳам_муҳим #Эски_дардлар

@Behzod_Fazliddin

https://www.facebook.com/100003319579634/posts/1590130057774298/

...шайтоний илҳом ҳам бор!..

***
Бизни оғусўздан қутқар, малҳамсўз бер!

#Йўл_йўлакай #Таҳрирсиз_хаёллар

@Behzod_Fazliddin

Қоғозни қоралаб нима қиламан,
Шеърга арзимайди куйдирганларим...

#Эски_дафтардан

© Беҳзод Фазлиддин @Behzod_Fazliddin

БЕГОНАЛАР

Ёнимдаги узоқ одамлар,
Ҳаётимга тузоқ одамлар.

Майли эди, бўлса бегона,
Улар менга ҳамроҳ, ҳамхона.

Айбим шудир, жиндай феълим чарс,
Бир қўлдан ҳам чиқар экан қарс.

Ачингандай бўларлар тағин,
Осмон менга улардан яқин.

Юрагимдан кўчириб музлар,
Тушунади мени юлдузлар.

Дардлашаман тун бўйи дилдан –
Олис-олис яқинлар билан.

2009

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

“Биз очилдик” эмас, ҳеч бўлмаса, “Биз ишга тушдик!” ё “Биз иш бошладик!” деб ёзинглар, барака топкурлар!

#Йўл_йўлакай #Бу_ҳам_муҳим #Тил_тақдири

@Behzod_Fazliddin

ПАХТА ҚЎШИҒИ

“Пахта, пахта, жон пахта”,
Юртга шараф-шон пахта,
Ўзинг-ку ойдеккина,
Нега бағринг қон, пахта?

Кимлар сенга осилган,
Кимлар сендан ноз қилган,
Замин узра ёзилган
Оппоқ дастурхон – пахта.

Бировга шерикчилик,
Бировга тирикчилик,
Кимларга тирриқчилик,
Кимгадир виждон пахта.

Кўпга келган васиқа:
Ғанимат ҳар дақиқа.
Кимлар учун ҳақиқат,
Кимларга ёлғон пахта.

Кундан-кунга очилган,
Кекса-ёшни шоширган;
Эгатларга сочилган
Жон сендан арзон, пахта.

Қайнар ҳаёт қозони,
Ким шотир, ким кайвони,
Дунё – ўйин майдони,
Сен зўр қаҳрамон, пахта.

Гоҳ осмонда, гоҳ хоксан,
Нечун бунча ғамноксан,
Сен оппоқсан, сен поксан,
Ўзимиз ёмон, пахта.

03.10.2013

© Беҳзод Фазлиддин @Behzod_Fazliddin

#Йўл_йўлакай #Кайфият #Бадиҳа

Тил билиш бу ҳали яхши фикрлаш дегани эмас.

#Йўл_йўлакай #Таҳрирсиз_хаёллар

@Behzod_Fazliddin

***
Йилларни бир коса сувдай сипқордим,
Тош кунлар аямай бошимни ёрди.
Яшолмайман, дедим – Худога бордим,
Худо яна мени Сенга юборди.

Ўзимни кўнглингда адаштирайми,
Сен мени ўзингга ўзинг топиб бер.
Умримни кўзингга алмаштирайми,
Кўзинг тўла орзу – кўзинг тўла шеър.

Боримча кўнглимга ўралган эдим,
Мен яна тақдирга ютқазиб ютдим.
Аввалимда Ишқдан яралган эдим,
Охирда ҳам Ишққа айланиб кетдим...

2006 йил

© Беҳзод Фазлиддин @Behzod_Fazliddin

#Сен_қачон_гуллайсан

Токи инсоний муносабатлар, ўзаро муросаю мадорани мустаҳкамламас экансиз, ақлингиз, иқтидорингиз ўзингизга қарши, зарарингизга ишлайверади.

Муҳитга кўр-кўрона мослашиш – бу энди бошқа масала.

Афсуски, бизда кўпинча машъум мослашувчанликка ўргатишади. Ана ундан кейин одам муросага ҳам кўнмайдиган бўлиб қолади.

#Йўл_йўлакай #Таҳрирсиз_хаёллар

@Behzod_Fazliddin

***
Севганман, севилганман,
Орзуга берилганман.
Гоҳ аламдан мунғайиб,
Гоҳ мағрур керилганман.

Осмонларга дил шайдо...
Наҳот Бахтдан йўл айро?!
Тошқин сойдай юрагим
Бу дам сокин бир дарё

О, қайдасиз, ойюзлар,
Ерда юрган юлдузлар,
Мен сочин тортмасам ҳам
Ортимдан қувган қизлар?

Недан кўнгил ғашлиги,
Қани ул бебошлигим?
Кўзларимдан ёш бўлиб
Оқиб борар ёшлигим!..

Севганман, севилганман,
Армонга эврилганман.
Чақирганда Бахт қизи,
Боришга эринганман...

2022

© Беҳзод Фазлиддин @Behzod_Fazliddin

Эски ҳақиқат:
Даъвогар суст бўлса, қози муттаҳам бўлади.

@Behzod_Fazliddin

ҲАЙФ

Дийданг қотиб борар, юрак тошланиб,
Ёниб-куйишингдан кимга нима наф?
Эсиз аччиқ-аччиқ кўзинг ёшлари,
Кўнглингнинг беғараз оҳ-додлари ҳайф.

Бир лаҳза тинмакка ўзни қўймадинг,
Ўйладинг, оқибат нени ўйладинг,
Беҳуда чирандинг, бекор сўйладинг,
Сўзингнинг қалампир, новвотлари ҳайф.

Қул эмас, ботирлар туғгувчи йўқми,
Бузғунч бул ғояни бўғгувчи йўқми,
Магарки муносиб ўқувчи йўқми,
Довоту қоғози – ижодлари ҳайф.

Дарё узра сувга зор бўлиб ўтса,
Кенг дунё кўзига тор бўлиб ўтса,
Ҳақиқат ҳажрида хор бўлиб ўтса,
Бу халққа қайишмас беҳ зодлари ҳайф!

2012

© Беҳзод Фазлиддин @Behzod_Fazliddin

#Кайфият  #Эски_дардлар

***
Юборсанг Ўзингнинг ёнингга юбор,
Чақирсанг Ўзингнинг қошингга чақир.
Кўзимдан кетолмай саргашта ғубор,
Номингни айтганга нажот бор ахир.

Ёдинг-ла банди эт саркаш хаёлим,
Бошқани ўйламай, бошқани демай.
Соҳиби қудратим, Соҳибкамолим,
Ўзгани Ўзингдай севдирма – севмай.

Қўрқаман ёлғондан, қўрқаман чиндан,
Ҳаётбахш сўзларга тилимни бойла.
Тазарру – мендандир, мағфират – Сендан,
Раҳм айла, раҳм айла, яна раҳм айла.

Манглайга Ошиқ деб дастхат битиб қўй.
Тоабад дунёга ишқим тушмасин.
Муҳтожман, бундан-да муҳтож этиб қўй –
Ўзингдан бошқага ишим тушмасин.

Нуқтача бўлолмай қотдим қаршингда,
Осий ҳисларимни буткул даф этгин.
Вужудим бахшида, Руҳим бахшида,
Севгимни Севгингга мушарраф этгин.

2010 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

***
Соғиндим, соғиндим, хумор соғиндим,
Кўзимга тўкилди Ойнинг доғлари.
Минг бора сочилдим, минг бор йиғиндим,
Ҳувиллаб қолмишдир кўнгил боғлари.

Майли, келма, майли, тағин куттиргин,
Бўйларинг келтирсин шамоллар – қутли.
Айрилиқ қўшиғин давом эттиргин,
Севгингдан-да суйгун соғинчинг тотли.

Қаён боқмай, кўзга чўғлар тегадир,
Ҳолбуки, кунларим совумаётир.
Негадир, ишқзада юрак негадир
Соғина-соғина овунаётир...

2009 йил

© Беҳзод Фазлиддин @Behzod_Fazliddin

Бунча катта кетмасанг, Ҳақиқат,
барибир, сотиласан-ку!

#Йўл_йўлакай #Таҳрирсиз_хаёллар

@Behzod_Fazliddin

Сени узоқлардан излаб адашдим,
Дук-дук уриб турган юрагимсан, Бахт!..

© Беҳзод Фазлиддин @Behzod_Fazliddin

“Гулистон”да ишлар эдим. Маҳмуд Саъдий деган ходимимиз бозорда китоб айирбошлаётган экан, милиция ушлаб олиб кетибди. У жуда билимдон, китобхўр; биз уни Шайх деб атар эдик…
Менинг илтимосим билан милиционер идорага келди, ёшгина лейтенант экан.
Гапни узоқдан бошламоқчи бўлдим:
– Ибн Сино Бухоронинг китоб растасида Форобийнинг Арастуга шарҳларини топиб олганда хурсандчилигидан бир зумга ҳушини йўқотган экан…

– Форобий деган шоирни эшитганман, у ҳам сизда ишлайдими?

– Йўқ, бизда фақат Шайх Саъдий ишлайди.

Ҳазил-мутойиба ўтмади. Аниқ гап қилдим:
– Бу йигит уйланганида келинни ошхонага тушириб келган. Чунки уч хонали уйининг ҳамма хоналари лиқ тўла қитоб бўлган. У шунақа китоб жинниси.

– Жиннилигига справкаси борми?

Асқад Мухтор “Тундаликлар”идан.

#Иқтибос #Устозлар #Ижод_ва_эътиқод

@Behzod_Fazliddin

***
Бардош либосининг иплари тиғдан,
Амаллаб кийдингми, ечишдан не наф?
Кўзингни яширма кўнгли мунглуғдан,
Сева олиш шараф, севилиш шараф.

Дақёнусдан қолган бу даҳри дунда
Бир янги заррадай кўзга илинсам.
Муродим гуллари очилган кунда,
Не тонг, яшаш учун маҳкум қилинсам!

Сўнгги нафасгача эшиклар очиқ,
Ўз ҳолидан ўзи гумонда гумон.
Наздимда, кўрмаган бу қадар Ошиқ
Бир томчи Дийдорга ғарқ бўлган жаҳон...

2008 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Худойим, барибир, раҳмим келади
Ўзига сиғинган “худоча”ларга...

© Беҳзод Фазлиддин @Behzod_Fazliddin

#Эски_дафтардан

***
Яшайсан де, ўлмайсан деб айт,
Айтгин: Умринг кетмас шамолга.
Ахир қуёш ботмоқда бу пайт,
Кун айланиб борар заволга.

Оҳ, қўрқаман, хавотирдаман,
Кўрганларим туш чиқмасми деб.
Энди олам бўлганда чаман,
Икки қўлим бўш чиқмасми деб.

Яшайвер де, севавер дегин,
Чекинмасин юракдан ғайрат.
Ишончимга куч-қудрат бергин,
Руҳ булбулин бетиним сайрат.

Ўтса ўтди, бўлса бўлгандир,
Не десам ҳам жон аччиғида.
Жуда бахтли бўлгим келганди
Кўзларимнинг очиқлигида.

Яшайсан де, ўлмайсан деб айт,
Айтгин: Умринг кетмас шамолга.
Гарчи қуёш ботмоқда бу пайт,
Кун айланиб борар заволга...

2010

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Бошқаларнинг вақтига жуда кўп хиёнат қиламиз.

#Йўл_йўлакай #Таҳрирсиз_хаёллар

@Behzod_Fazliddin

Томчилаб-томчилаб бўлмоқда адо
Ўз-ўзига ҳадди сиғмаган кўнгил...

© Беҳзод Фазлиддин @Behzod_Fazliddin

#Иқтибос

ҲИЛМ

Ҳилм деб бўлар-бўлмас ишга аччиғланмайдурган, арслон юракли, юмшоқ табиатли бўлмоқни айтилур.
Ҳилм инсонларнинг табъидан хусумат, адоват, ғазаб, ҳиддат каби ёмон хулқларни йўқ қиладурган ҳар кимча мақбул бир сифатдур.

Ҳилм илми ахлоқ юзасидан инсонга энг керакли нарсадур.

Нафснинг роҳати, қалбнинг матонати, фикрнинг саломати, виждоннинг ҳаловати ҳалим табиат бўлмоқ ила ҳосил бўлур. Чунки ҳалим кишилар ҳар қанча қувват ва қудрат соҳиби бўлса ҳам, ўзидан ожиз кишиларга шиддат ила муомала қилмас. Фикри саломат кишиларнинг қалби ҳалим, табъи карим ўлур. Зероки, вужудимиздан пайдо бўладирган афъол ва ҳаракотимизнинг манбайи ҳавас ва орзудур. Бу ҳавас ва орзуга фақат ҳилм ила ғолиб келурмиз ва бу васила ила тўғри йўлга кируб, яхши хулқ соҳиби, дин ва миллат ходимларидан бўлурмиз.

Дунёда чин инсон бўлмак учун ҳаваснинг қўлига нафснинг жиловини бермайдирган, бўлар-бўлмас нарсалардан аччиғланмайдурган, совуққонли, юмшоқ табиатли, мулойим сўзли, ҳалим ва сабрли бўлмак лозимдур...

Расули акрам набиййи муҳтарам афандимиз: «Алҳилму саййидал ахлоқ – Ҳилм хулқларнинг саййидидур», – демишлар.

Суқрот ҳаким: «Шиддат ила муомала қилган кишиларга ман виқор ва ҳалимлик ила муқобила қилурман, чунки ҳилм шиддатни, хусуматни паст қилур. Лекин кишини ожиз ва хорлик даражасига тушурадурган ҳалимликдан ман безор», – демиш.

Бу сўзга қараганда, саховатнинг ифроти исроф ўлдиғи каби ўринсиз ерда ҳилм истеъмол қилмак инсоннинг виқор ва эътиборини поймол қилур. Шунинг учун ҳилмият ҳудудидан – чегарасидан чиқмай, ғазаб, ҳиддат каби ерларда ҳилм истеъмол қилуб, нафснинг ҳароратини паст қилмолидур. Лекин тепса тебранмайдурган, туртса тинг этмайдиган бўлуб, ғайрат, шижоат ўринларига ҳам мулойимлик ишлатув ҳалимлик ҳудудидан ошуб, бўшлик, анқовлик дунёсига чиқмакдур. Бундай ҳалимликдан қочмак, ҳазар қилмак керак...

Абдулла Авлоний

“Туркий Гулистон ёхуд ахлоқ”дан.

#Миллат_мунавварлари

@Behzod_Fazliddin

Календарга қараб ёзмайман,
Кўнглимнинг ўз тақвими бордир...

@Behzod_Fazliddin

#Йўл_йўлакай #Таҳрирсиз_хаёллар

Ҳар хил экстрасенсу азайимхонларнинг айби йўқ: улар алдангиси келганларни алдайди.

© Асқад Мухтор

@Behzod_Fazliddin

ЭЪТИРОФ

Осмонларга учмоқ истасам,
Елкамдаги қанотим – Тилим.
Дунёларни қучмоқ истасам,
Менинг учқур Ғиротим – Тилим.

Мен булбулга ҳавас қилибман,
Сенсиз нўноқ қарға эканман.
Мен дулдулга ҳавас қилибман,
Сенсиз чўлоқ йўрға эканман.

Гарчи содда шеърлар тўқидим,
Гарчи сўзга айладим ихлос;
Мен ўзимни ўзим чўқидим,
Сени яхши билмаслигим рост.

Меники шу яланғоч сўзлар,
Ночор буни замонга йўйдим.
Қаён боқмай, шундай оч сўзлар,
Наҳот сени унутиб қўйдим?

Забонимни тилиб кетдими
Ўзга боғнинг барг – ниналари?
Навоийда қолиб кетдими
Сўз мулкининг ганжиналари?

Хорижий тил – жаҳонга кўприк,
Пайти келса, бу ҳам бир иқбол.
Ўз тилингда сўз кетганда лек,
Дудуқланиб турсанг… Бу не ҳол?!

Юрагимни тешади ўқлар,
Сенсиз менинг эртам куларми?
Она тилим, мендай дудуқлар
Фарзандликка ярай оларми?

Бас, дардингни олмасдан туриб,
Ўзга тилни уқмайман, Тилим,
Сени яхши билмасдан туриб,
Хорижга ҳам чиқмайман, Тилим!

2002 йил

© Беҳзод Фазлиддин @Behzod_Fazliddin

#Тушларингдан_чиқиб_келдим китобидан.

2008 йил сурати.

Қўйиб берсанг, қотилнинг ҳам ўз ҳақиқати бор...

#Йўл_йўлакай #Таҳрирсиз_хаёллар

@Behzod_Fazliddin

#Кайфият #Лаҳзалар

***
Шамоллар абадий, ёмғирлар мангу,
Биздан сўнг ҳам оппоқ қорлар қолади.
Шаксиз, яшайверар қувончу қайғу,
Изҳорлар, иқрорлар, зорлар қолади.

Минг йилларки, аслин ўзгартмас тоғлар,
Салобати ўша, виқори ўша.
Таровати сўнмас дилоро боғлар –
Ҳануз тошқин ҳислар талпинган гўша.

Бехос такрор-такрор чорладим, чоғи,
Япроқлар тизилиб келди сўзимга.
Қобирғаси синган хазонлар оҳи
Оҳангдор ҳасратдек туюлмас кимга!..

Шунчаки тақлидга ўхшарми бу ҳол –
Демангиз, бу фақат илҳом онлари.
Руҳимда яшади шундай безавол
Ҳаёт деган шеърнинг қаҳрамонлари.

Шамоллар. Ёмғирлар. Дарёлар. Тоғлар...
Азал нафасини келтиргай абад.
Япроқлари оят ўқиган боғлар...
Табиат тилида илоҳий суҳбат.

2011

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

2015 йил. Дўрмон сурати

Ўзимдан буюкроқ Қалбим бор десам,
Ўша ҳам бировнинг мулкига ўхшар...

© Беҳзод Фазлиддин @Behzod_Fazliddin

Ғажишга шай турган бўриларни ҳам
Чақиргим келади биродарликка...

© Беҳзод Фазлиддин @Behzod_Fazliddin

Маърифатпарвар бойлар кўпайиши керак.
***
Агар одамлар жон ҳар лаҳзада айрилиб қолиш хавфи бор омонат эканини англаб етганида, аллақачон бир-бирларини кечириб юборган бўлармиди...
***
Яхшиликни кўзлаб аччиқроқ гапираётган одамнинг оғзига урманг! Ширинсўз ёлғончилардан эса узоқроқ юринг.

#Йўл_йўлакай #Таҳрирсиз_хаёллар

@Behzod_Fazliddin

Осмон мени қўйиб юборса,
Ёмғир бўлиб сизга қайтаман...

© Беҳзод Фазлиддин @Behzod_Fazliddin

#Сен_қачон_гуллайсан

Ўзига ишончни кибр, ишончсизликни андиша деб ўйламанг.

#Йўл_йўлакай #Таҳрирсиз_хаёллар

@Behzod_Fazliddin