Addis Standard Amharic

ዜና: “#ካናዳን ጨምሮ #አውሮፓም ይሁን #አሜሪካ ዜጎችን ሥራ ለማሰማራት የሰጠሁት ውክልና የለም” - የሥራና ክህሎት ሚኒስቴር

የሥራና ክህሎት ሚኒስቴር “ወደ አውሮፓ እና አሜሪካ ዜጎችን ሥራ ለማሰማራት ለየትኛውም አካል የሰጠው ውክልና አለመኖሩን” አስታወቀ።

ሚኒስቴሩ “ካናዳን ጨምሮ በተለያዩ የአውሮፓ ሀገራት ለሥራ ዜጎችን እንልካለን፤ ለዚህም ከሚመለከታቸው አካላት ፍቃድ አግኝተናል በሚል በተለያዩ የማህበራዊ ትስስር ገጾች ህገ-ወጥ ማስታወቂያዎች እየተሰራጩ ነው” ሲል አሳስቧል።

ዜጎች በስምሪቱ ተጠቃሚ ለመሆን ህጋዊ አማራጮችን ብቻ በመጠቀም ካላስፈላጊ ወጪ፣ እንግልትና ሌሎች አስከፊ አደጋዎች ራሳቸውን እንዲጠብቁ ሲልም አስጠንቅቋል።

“ህብረተሰቡን ላላስፈላጊ ወጪና እንግልት እየዳረጉ በመሆኑ መሰል የማጭበርበር ተግባር እየፈፀሙ የሚገኙ አካላትን በህግ ተጠያቂ ለማድረግ እየሰራሁ ነው” ሲል ሚኒስቴሩ በይፋዊ የማህበራዊ ሚዲያ ገጾቹ ባጋራው መረጃ አመላክቷል።

“የሁለትየሽ ስምምነት በተፈረመባቸው መዳረሻ ሀገራት የሥራ ዕድል ማግኘት ከፈለጉ የሚከተለውን ማስፈንጠሪያ (lmis.gov.et) በመጠቀም ሊሆን ይገባዋል” ሲልም አሳስቧል።

================
የአዲስ ስታንዳርድ አማርኛ የማኅበራዊ ትስስር ገጾችን ይቀላቀሉ፡
ቴሌግራም: https://rb.gy/rekjr
ፌስቡክ: https://rb.gy/xwxb3
ትዊተር (X)፡ https://rb.gy/34uh4
ዩቲዩብ፡ https://rb.gy/bjcbg
ድረገጽ: https://rb.gy/5td6n
ቲክቶክ፡ https://rb.gy/jgdsjm

ዜና: #በኮሬ ዞን ደመወዛቸው ያለአግባብ መቆረጡን የተቃወሙ ከ60 በላይ መምህራን ታሰሩ

በደቡብ #ኢትዮጵያ ክልል ኮሬ ዞን ሳርማሌ ወረዳ ከፍላጎታቸው ውጪ ያለአግባብ ደሞዛቸው መቆረጡን የተቃወሙ ከ60 በላይ የሚሆኑ መምህራን መታሰራቸው ተገለጸ።

የመምህራኑ ደመወዝ ከነሐሴ 2016 ዓ.ም ጀምሮ መቆረጥ መጀመሩን እና እንዲመለስላቸው ጥያቄ ቢያቀርቡም ምላሽ አለማግኘታቸውን ተከትሎ የሥራ ማቆም አድማ ማድረጋቸውን የታሳሪ መምህራን ቤተሰቦች ለቪኦኤ አስታውቀዋል።

ባለቤታቸው መታሰሩን እና እስሩ ከመምህራኑ ተቃውሞ ጋር የተያያዘ መሆኑን ለጣቢያው የገለጹ ወ/ሮ አስቴር አበበ "ባለቤቴ ታስሮ ነው የሚገኘው፤ ወረዳው ደመወዛችን ይመለስ ብለን ብንጠይቅም እምቢ ብሎናል" ሲሉ ተደምጠዋል።

ይህን ተከትሎ ባለቤታቸውን ጨምሮ የታሰሩ በርካታ መምህራን በፖሊሶች ድብደባ እንደተፈጸመባቸው ያስታወቁት ወ/ሮ አስቴር አበበ በድብደባው ቆስለው እስከአሁን ድረስ ህክምና ለማግኘት የተከለከሉ መምህራን መኖራቸውን ጠቁመዋል።

በወረዳው መምህር የሆኑት አቶ ወረደ ዋኪሶ በበኩላቸው መምህራኑ ከደመወዛቸው ላይ እስከ 25 በመቶ ያለአግባብ መቆረጡን አስረድተዋል።

በዚህም ምክንያት መምህራኑ አቤቱታቸውን በመምህራን ማሕበር አማካኝነት ለወረዳው ትምህርት ጽ/ቤት እና ለወረዳው አስተዳደር ቢያቀርቡም "የምታመጡት ነገር የለም፤ እኛ የላክናቸው ካድሬዎች አስማምተው በመጡት መሰረት ነው ደመወዛችሁን የቆረጥነው።" የሚል ምላሽ እንደተሰጣቸው ተናግረዋል።

የሳርማሌ ወረዳ አስተዳዳሪ አቶ ጎሹ ጌታቸው የመምህራኑን መታሰር አረጋግጠው "መምህራኑ የታሰሩት ሌሎች መምህራን እንዳያስተምሩ በማሳመጻቸው" ነው ብለዋል።

ዜና: #የአዲስ አበባ ዩኒቨርሲቲ ራስ ገዝ ለመሆን የሚያካሂደው የሽግግር ጊዜ በዚህ ዓመት ይጠናቀቃል ተባለ

የአዲስ አበባ ዩኒቨርሲቲ ራስ ገዝ ለመሆኑ የሚያካሂደው የሽግግር ጊዜ በተያዘው ዓመት የሚጠናቀቅ መሆኑን የትምህርት ሚኒስቴር አስታወቀ፡፡

ዩኒቨርሲቲW ባለፉት ሁለት የሽግግር አመታት ሽግግሩን የሚመራ አመራር ተመድቦለት፤ ስትራቴጂ፣ ፖሊሲ ዶክመንቶች እና የተማሪዎች አድሚሽን ፖሊሲ እንዲሁም የተለያዩ የዩኒቨርሲቲው መተዳደሪያ አካዳሚክ ሕግ እና የፋይናንስ አስፈላጊ የሚባሉ ዶክመንቶች መዘጋጀታቸው ተጠቁሟል።

በተያዘው ዓመትም ቀሪ አስፈላጊ ዶክመንቴሽን ሥራ የማዘጋጀት ሥራውን የሚያከናወን ሲሆን ከሰኔ ወር በኋላ ዩኒቨርስቲው ራስ ገዝ የሚሆን ይሆናል ሲሉ በትምህርት ሚኒስቴር የከፍተኛ ትምህርት ተቋማት አስተዳደርና ልማት መሪ ሥራ አስፈጻሚ ሰሎሞን አብርሃ (ዶ/ር) አስታውቀዋል።

የዩኒቨርሲቲዎች ራስ ገዝ መሆን የአካዳሚ፣ የአስተዳደር፣ የፋይናንስ እና የሰው ሀብት አስተዳደራቸው ላይ ነፃነት እንዲኖራቸውና የራሳቸውን ሀብት ለማመንጨት የሚያስችል መሆኑን ጠቅሰው፤ ይህም ከፍተኛ የትምህርት ተቋማት ጥሩ የመማር ማስተማር የሚካሄድባቸው እና ለምርምር ሥራዎች የተለየ ትኩረት እንዲሰጡ የሚያደርግ መሆኑን ተናግረዋል፡፡

በሀገሪቱ የአዲስ አበባ ዩኒቨርስቲን ጨምሮ ጎንደር ዩኒቨርስቲ፣ ሀዋሳ ዩኒቨርስቲ፣ ባሕር ዳር ዩኒቨርስቲ፣ ጅማ ዩኒቨርስቲ፣ አርባ ምንጭ እና ሐረማያ ዩኒቨርስቲ ጨምሮ በአጠቃላይ ዘጠኝ ዩኒቨርስቲዎች በቀጣይ ራስ ገዝ እንደሚሆኑ ሃላፊው መጠቆማቸውንም ከኢፕድ ያገኘነው መረጃ ያሳያል፡፡

ዩኒቨርስቲዎች ራስ ገዝ መሆን ጠንካራ ተቋማት በመፍጠር ለትምህርት ጥራትና ተቋማዊና ሀገራዊ ተልዕኮን ለማሳካትም ሁሉም አካል በጋራ መተባበርና መሥራት አለባቸው ሲሉ ተናግረዋል፡፡

ዜና: #የኢትዮጵያ የምግብና መድኃኒት ባለሥልጣን “RELIEF የተባለ መድኃኒት እንዳትጠቀሙ” ሲል አስጠነቀቀ

የኢትዮጵያ የምግብና መድኃኒት ባለሥልጣን በሕገወጥ መንገድ ለገበያ ቀርቧል ያለውን “RELIEF የተባለ መድኃኒት ህብረተሰቡ ከመጠቀም እንዲቆጠብ” ሲል አሳሰበ።

መድሃኒቱ በህገወጥ መንገድ ገብቶ “በኢትዮጵያ ገበያ እየተዘዋወሩ መሆኑን ደርሸበታለሁ” ያለው ባለስልጣኑ “በመስሪያ ቤታችን ያልተመዘገበ በመሆኑ ጥራቱ፣ ደህንነቱና ውጤታማነቱ አይታወቅም” ሲል አስጠንቅቋል።

የዚህ መድኃኒት የጎንዮሽ ጉዳቶች በሚል በባለስልጣኑ ከተዘረዘሩት መካከል “የምግብ ፍላጎት ማጣት፣ ተቅማጥ፣ የሆድ ህመም፣ ማቅለሽለሽ፣ ማስታወክ፣ እንቅልፍ ማጣት፣ ድካም፤ የእይታ መዛባት፤ መፍዘዝ፣ ራስ ምታት፣ የቆዳ ሽፍታ፣ የጉበት ኢንዛይሞች መጨመር” የሚሉት ይገኝበታል።

መድሃኒቱ ለረጅም ጊዜ መጠቀም “ከባድ የጉበት፣ የኩላሊት ጉዳት፣ የልብ ድካም እና ስትሮክ የመያዝ እድልን ከፍ ሊያደርግ እንደሚችል ጥናቶች ያሳያሉ” ብሏል።

ባለስልጣኑ በሕገወጥ መንገድ የገባ ነው ሲል የገለጸው “RELIEF” የተባለው መድኃኒት “በውስጡ ዲክሎፌናክ፣ ፓራሲታሞል፣ ክሎረፊኒራሚን እና ማግኒዥየም ትራይሲሊኬት እንዳለው ይገመታል” ሲል አስጠንቅቋል።

“በመሆኑም ህብረተሰቡ ይህንን መድኃኒት ከመጠቀም እንዲቆጠብ” ሲል ያሳሰበው ባለስልጣኑ መድኃኒቱን በአካባቢዎት ካገኙ በነጻ ስልክ ቁጥር 8482 ደውለው፣ ለኢትዮጵያ የምግብና የመድኃኒት ባለስልጣን ወይም ለክልል ጤና ተቆጣጣሪ አካላት እንዲጠቁሙ ሲል ጠይቋል።

==
የአዲስ ስታንዳርድ አማርኛ የማኅበራዊ ትስስር ገጾችን ይቀላቀሉ፡
ቴሌግራም: https://rb.gy/rekjr
ፌስቡክ: https://rb.gy/xwxb3
ትዊተር (X)፡ https://rb.gy/34uh4
ቲክቶክ፡ https://rb.gy/jgdsjm

ዜና፡ የሲቪል ማህበረስበ ድርጅቶች ባለስልጣን የመብቶች እና ዴሞክራሲ ዕድገት ማዕከልን (ካርድ) አገደ

የሲቪል ማህበረስበ ድርጅቶች ባለስልጣን፣ የመብቶች እና ዴሞክራሲ ዕድገት ማዕከል (ካርድ) "ከፖለቲካ ገለልተኛ መሆን ሲገባው፣ ከዓላማው ውጭ በመንቀሳቀስ የአገርን ጥቅም የሚጎዱ ተግባራት ላይ መሰማራቱ” በመረጋገጡ ከሥራው መታገዱን አስታወቀ።

ከካርድ በተጨማሪም ስብስብ ለሰብአዊ መብቶች ኢትዮጵያ (AHRE) የተሰኘ የሲቪል ማኅበረሰብ ድርጅት በባለስልጣኑ መታገዱ ተገልጿል።

ካርድ ለመታገድ የተሰጠው ምክንያት “ከእውነታው የራቀ መሆኑን” አበክሮ በመግለጽ ባለሥልጣን መሥሪያ ቤቱ እግዱን ለመጣል እንደ ምክንያት የገለጸው የምርመራ ሒደት ስለመከናወኑ ድርጅቱ ምንም ዓይነት መረጃ ያልነበረው ከመሆኑም ባሻገር፣ ውሳኔው አስፈላጊ የሆኑትን ሕጋዊ አካሄዶችን አለተከተለም ሲል ቅሬታ አሰምቷል።

ተጨማሪ ያንብቡ፦ https://addisstandard.com/Amharic/?p=6019

ዜና: የይሁንታ ፈቃድ ሳያገኙ ኘሮጀክቶችን በሚጀምሩ አካላት ላይ እስከ 10 ሚሊዮን ብር ቅጣት የሚደነግግ የአካባቢያዊ ተፅዕኖ ግምገማ አዋጅ መዘጋጀቱ ተገለጸ

#በኢትዮጵያ የሚተገበሩ ፕሮጀክቶች ለአከባቢ ተጽእኖ ያላቸው አስተዋጽኦ ተገምግሞ የይሁንታ ፈቃድ ሳያገኙ በሚጀምሩ አካላት ላይ እስከ 10 ሚሊዮን ብር ቅጣት የሚደነግግ የአካባቢያዊ ተፅዕኖ ግምገማ አዋጅ መዘጋጀቱ ተገለጸ።

ባለ ፕሮጀክቶች በየሁለት ዓመቱ የአካባቢና ተፅዕኖ ግምገማ ማድረግ እንደሚገባቸውም በቀረበው ረቂቅ አዋጅ ላይ ተመላክቷል።

ይሁንታ ፈቃድ ያገኙ የፕሮጀክት ባለቤቶች በየሶስት ዓመቱ የአካባቢና ማህበራዊ ተፅዕኖ አጠባበቅ ዕቅዶችን ለባለሥልጣኑ ሊያቀርቡ እንደሚገባ በረቂቅ አዋጁ ተመልክቷል።

በኢትዮጵያ በሥራ ላይ የሚገኘው የአካባቢ ግምገማ ተፅዕኖ አዋጅ ከ21 ዓመታት በፊት የጸደቀ ሲሆን አሁን የሚሻሻለው አዋጁ ወቅቱ የደረሰበትን ኢኮኖሚያዊ፣ ማህበራዊና ሌሎች ለውጦች ከግምት ውስጥ ያስገባ መሆኑ ተገልጿል።

የውሃ ፣ መስኖ እና ቆላማ አካባቢና የአካባቢ ልማት ጉዳዮች ቋሚ ኮሚቴ በአዋጁ ዙሪያ ከባለድሻ አካላት ጋር ይፋዊ የሕዝብ ውይይት አካሂዷል።

የቀድሞው አዋጅ ያልዳሰሳቸውን ጉዳዮች በማካተት አዲሱ ረቂቅ አዋጅ የአካባቢያዊ ተፅዕኖ ግምገማ አዋጅ በሚል መዘጋጀቱ ተገልጿል።

ኘሮጀክቶች ተግባራዊ በሚሆኑበት ወቅት በአካባቢና በማህበረሰቡ ላይ የሚያደርሱትን ተፅዕኖ በአግባቡ የመገምገም አቅም እንደሚያሳድግ ተመላክቷል።

https://web.facebook.com/AddisstandardAmh/posts/pfbid02Gz15mL31HG6PDoCdzYgxDTyLeJKjmzWicYYvKSptggsJDDeGJW6R1yRBUPaWsnaXl

የሚኒስትሮች ምክር ቤት 581.98 ቢሊየን ብር ተጨማሪ በጀት በማጽደቅ ለህዝብ ተወካዮች ምክር ቤት መራ

የሚንስትሮች ምክር ቤት ትናንት ህዳር 12 ቀን 2017 ዓ.ም ባካሄደው 40ኛ መደበኛ ስብሰባ በተለያዩ ጉዳዮች ላይ ተወያይቶ ውሳኔ አሳልፏል።

ምክር ቤቱ ተወያይቶ ውሳኔ ካሳለፈባቸው ጉዳዮች መካከል በፌደራል መንግስት የተጨማሪ በጀት እና የወጪ አሸፋፈን ማስተካከያ ይገኝበታል።

የተጨማሪ በጀት እና የወጪ አሸፋፈን ማስተካከያው የተሻሻለውን የ2017-2021 የመካከለኛ ዘመን የማክሮ ኢኮኖሚ እና ፊስካል ማዕቀፍ ማስፈጸም በሚያስችል መልኩ የመንግስት የፋይናንስ አቅምና ተጠባቂ ገቢዎችን ታሳቢ በማድረግ እንዲሁም የተጨማሪ በጀት ታሳቢዎችንና የወጭ ታሳቢዎችን ግምት ውስጥ በማስገባት መዘጋጀቱን ከጠ/ሚኒስትር ጽ/ቤት የተገኘው መረጃ ያመለክታል።

በዚሁ መሰረት ለመደበኛ ወጪዎች እና የወጪ አሸፋፈን ለማስተካከል የሚውል 581.9 ቢሊዬን ብር ለምክር ቤቱ ቀርቦ ውይይት ከተደረገበት በኋላ ማስተካከያ ረቂቅ አዋጁ ወደ ህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡

ምክር ቤቱ ረቂቅ አዋጁን ያፀደቀው የህዝብ ተወካዮች ምክር ቤት ለ2017 በጀት አመት አንድ ትሪሊየን ብር የሚጠጋ በጀት ካፀደቀ ከአምስት ወራት በኋላ መሆኑ ተጠቁሟል።

ይህም የ2017 ዓ.ም አጠቃላይ በጀት ከ1.5 ትሪሊየን ብር በላይ እንደሚያደርገው ተመላክቷል።

================
የአዲስ ስታንዳርድ አማርኛ የማኅበራዊ ትስስር ገጾችን ይቀላቀሉ፡
ቴሌግራም: https://rb.gy/rekjr
ፌስቡክ: https://rb.gy/xwxb3
ትዊተር (X)፡ https://rb.gy/34uh4
ድረገጽ: https://rb.gy/5td6n
ቲክቶክ፡ https://rb.gy/jgdsjm

ለአንድ ጊዜ የሚያገለግሉ የፕላስቲክ ምርቶች ወደ ሀገር ቤት እንዳይገቡ የሚከለክል ረቂቅ አዋጅ ለምክር ቤቱ ተመራ

የሚኒስትሮች ምክር ቤት ለአንድ ጊዜ ግልጋሎት የሚውሉ የፕላስቲክ ምርቶች ወደ ሀገር ቤት እንዳይገቡ የሚከለክል ረቂቅ አዋጅ ለህዝብ ተወካዮች ምክር ቤት መምራቱ ተገለጸ።

ረቂቅ አዋጁ በሀገሪቱ የደረቅ ቆሻሻ አሰባሰብ፣ አጓጓዝ፣ አከመቻቸት፣ መልሶ አጠቃቀም፣ መልሶ ኡደት እና አወጋገድ ላይ ሥርዓት እንዲኖር ያደርጋል ሲሉ የአካባቢ ጥበቃ ባለስልጣን ዳይሬክተር ኢንጂነር ሌሊሴ ነሜ ተናግረዋል።

ለህዝብ ተወካዮች ምክር ቤት የተመራው ረቂቅ አዋጁ የዜጎችን በንጹሕ እና ጤናማ አካባቢ የመኖር መብት ለማረጋገጥ የላቀ ፋይዳ እንዳለውም ተገልጿል።

በተጨማሪም የሀገሪቱን ዕድገት፣ የከተሞችን መስፋፋት እና እየጨመረ የመጣውን የህዝብ ቁጥር የሚመጥን ዘመናዊ የቆሻሻ አወጋገድ ሥርዓት ለመፍጠር እንደሚያግዝም ዋና ዳይሬክተሯ ለኢቢሲ አመላክተዋል።

አዋጁ በህዝብ ተወካዮች ምክር ቤት ጸድቆ ወደ ሥራ ሲገባ በዜጎች ጤና እና በስነ-ምህዳር ላይ ከባድ አሉታዊ ተጽእኖ እያሳደረ የሚገኘውን የፕላስቲክ ምርት ጉዳት ለመቀነስ እንደሚያግዝም አስገንዝበዋል።

የ #ኢትዮጵያ ተወካይ ከተመራጩ የ #ሶማሊላንድ ፕሬዚዳንት ጋር ተወያዩ

በሶማሊላንድ የኢትዮጵያ ቆንጽላ ኃላፊ ተሾመ ሹንዴ በቅርቡ ከተመረጡት ከሶማሊላንድ አዲሱ ፕሬዚዳንት አብዱልራህማን ሞሓመድ አብዱላህ ጋር ተወያይተዋል፡፡

በትላንትናው ዕለት ተሾመ ሹንዴ ከኢትዮጵያ ወታደራዊ አታሼዎች እና ከቆንጽላ ስራ ኃላፊዎችን ጋር በመሆን ከኢትዮጵያን መንግስት የተላከ የእንኳን ደስ አላችሁ መልዕክት አድርሰዋል።

በዚህ ወቅት ተሾመ ከአዲሱ ተመራጩ የሶማሊላንድ ፕሬዝዳንት አብዱልራህማን ሞሓመድ አብዱላህ ጋር፤ ቀጠናዊ ደህንነትን እና የንግድ ትብብርን ጨምሮ በኢትዮጵያ እና ሶማሊላንድ መካከል ግኑኝነትን በማጠናከር ዙሪያ መወያየታቸውን ሆርን ዲፕሎማት ዘግቧል።

የኢትዮጵያ መንግስት የሶማሊላንድ ህዝብ ላካሄደው “ሰላማዊና ዴሞክራሲዊ ምርጫ” የእንኳን ደስ አላችሁ ሲል መልዕክት ማስተላለፉ ይታወሳል።

ሶማሊላንድ ሰሞኑን ባካሄደችው ምርጫ የዋዳኒ ፓርቲ መሪ የሆኑት አብዲራህማን ሞሀመድ አብዲላሂ (ሲሮ)፤ ከኢትዮጵያ ጋር የባህር በር ስምምነት የተፈራረሙትን የወቅቱን የሶማሊላንድ ፕሬዝዳንት ሙሴ ቤሂ አብዲን በማሸነፍ ተመርጠዋል።

ሙሴ ቢሂ ከኢትዮጵያ ጋር የተፈራረሙትን የመግባቢያ ሰነድ በሀርጌሳ ለሚገኘው የሀገሪቱ ፓርላማ አቅርበው ዝርዝር ጉዳዮቹን የፓርላማው አባላት እንዲወያዩበት ባለመደረጉ አዲሱ ተመራጩ አብዲራህማን ሞሀመድ መቃወማቸው ይታወቃል።

በዚህም ሳቢያ አሸናፊዊ ፕሬዝዳንት አብዱራህማን አብዱላሂ ከኢትዮጵያ ጋር የተደረሰውን የመግባቢያ ስምምነት በተመለከተ በምርጫ ቅስቀሳቸው ወቅት “ፓርቲያቸው ስምምነቱን እንደሚገመግመው” ተናግረው ነበር። ለዚህም በምክንያትነት ያስቀመጡት የተደረሰው ስምምነት ዝርዝር ጉዳይ አለመታወቁ የሚለው ይገኝበታል።

ዜና: #በአማራ ክልል ተጠልለው የሚገኙ ስደተኞች በየቀኑ ጥቃት እየተፈጸመብን ነው፣ ወደ ሌላ አከባቢ አዛውሩን ሲሉ ጠይቀዋል

በአማራ ክልል በመንግስት የጸጥታ ሀይሎች እና በፋኖ ታጣቂዎች መካከል እየተካሄደ ባለው ግጭት ሳቢያ በክልሉ በተለያዩ የመጠለያ ካምፖች የሚገኙ #የኤርትራ እና #ሱዳን ስደተኞች ህይወታችን ከፍተኛ አደጋ ውስጥ ይገኛል ሲሉ ገለጹ።

በየቀኑ በሚባል መልኩ ታጣቂዎች መጠላያችን ላይ ጥቃት ይፈጽማሉ፣ የተሻለ የጸጥታ ሁኔታ ወዳለበት አከባቢ መጠለያችንን አዛውሩልን ሲሉም ጠይቀዋል።

የታጠቁ ሀይሎች በየግዜው ወደ መጠለያው በመግባት ዘረፋ እንደሚፈጽሙ፣ ስደተኞችን አፍነው እንደሚወስዱ፣ በስደተኞች ላይ አካላዊ ጥቃት እንደሚያደርሱ ኤርትራውያን ስደተኞች እንደነገሩት ድረገጹ በዘገባው አስታውቋል።

መጠለያ ካምፑን እንዲጠብቁ በመንግስት የተመደቡት የአከባቢው ሚሊሻዎች መሆናቸውን ስደተኞቹ ነግረውኛል ያለው ድረገጹ ነገር ግን ጠባቂዎቹ “አንዳንድ ግዜ ከጥቃት ይጠብቁናል፣ አንዳንድ ግዜ ደግሞ ታጣቂዎች ወደ መጠለያው በመግባት የፈለጉትን እንዲያደርጉ ይፈቅዱላቸዋል፣ ሌላ ግዜ ደግሞ ራሳቸው ወደ መጠለያው ገብተው ይዘርፉናል” ሲሉ እንደነገሩትም አስታውቋል።
https://addisstandard.com/Amharic/?p=6016

ዜና፡ የ #ኦሮሚያ ከልል መንግስት እና የኦሮሞ ነጻነት ግንባር በደራ “በፋኖ ታጣቂዎች” ተፈጽሟል የተባለውን አሰቃቂ ድርጊት አወገዙ

የኦሮሚያ ከልል መንግስት እና የኦሮሞ ነጻነት ግንባር በሰሜን ሸዋ ዞን ደራ ወረዳ “በፋኖ ታጣቂዎች” የ17 አመት ወጣት ላይ ተፈጽሟል የተባለውን አሰቃቂ ድርጊት በተናጠል ባወጡት መግለጫ አወገዙ።

የኦሮሚያ ክልል ኮሚኒኬሽን ቢሮ ኃላፊ ኃይሉ አዱኛ ዛሬ ህዳር 12/2017 በሰጡት መግለጫ “የጽንፈኛ የፋኖ አካላት ድርጊቱ ለብሄር ብሄረሰቦች እና ለኦሮሞ ዝህብ ያላቸውን ንቀት የሚያሳይ ብቻ ሳይሆን የሚያስብ አዕምሮ እንደሌላቸውና ነገን የማያውቁ እራስ ወዳድ መሆናቸውን በተጨባጭ አሳይቷል” ብሏል።

አክለውም “ፋኖ ይህን የጭካኔ ድርጊት ሲፈጽም ሸኔ ህዝቡን ቅጥቅ በማስፈታት ሁኔታውን አመቻችቷል” ብለዋል።

የኦሮሞ ነጻነት ግንባር በበኩሉ ባወጣው መግለጫ፤ “በፋኖ ታጣቂዎች እና በመንግስት ኃይሎች በህዝባችን ላይ እየተፈጸመ ያለው አሰቃቂ ግድያ ከባድ የጦር ወንጀል ነው” ብሏል። ፓርቲው በመግለጫው በተፈጸመው የጭካኔ ግድያ ከፋኖ ታጣቂዎች በተጨማሪ መንግስትን ከሷል።

ተጨማሪ ያንብቡ፦ https://addisstandard.com/Amharic/?p=6012

ዜና: በ #አማራና #ኦሮሚያ ክልሎች እገታ እና የነፍስ ማጥፋት ወንጀል የፈጸሙ ግለሰቦች ላይ እስከ ዕድሜ ልክ የሚደረስ ጽኑ እስራት ተወሰነ

በአማራ እና በኦሮሚያ ክልሎች እገታ እና የነፍስ ማጥፋት ወንጀል የፈጸሙ ግለሰቦች ላይ እስከ ዕድሜ ልክ የሚደርስ ጽኑ እስራት ውሳኔ መሰጠቱ ተገልጿል።

በአማራ ክልል #ማዕከላዊ_ጎንደር ዞን አንዲትን የዘጠኝ ዓመት ሕፃን አግተው “ከነሕይወቷ በወራጅ ወንዝ እንድትወሰድ” አድርገዋል የተባሉና ገንዘብ የጠየቁ ሦስት ወንጀለኞች ከ21 ዓመት እስከ ዕድሜ ልክ እስራት እንዲቀጡ ውሳኔ መተላለፉን ዶቼ ቬለ ዘግቧል።

የወንጀል ድርጊቱ የተፈጸመው ነሐሴ 22 ቀን 2016 ዓ.ም ሲሆን ግለሰቦቹ ኬብሮን ደርበው የተባለችን የዘጠኝ ዓመት ህፃን ከቤት በማስወጣት አፏን በጨርቅ አፍነው ሲያሰቃዩ ከዋሉ በኋላ ምሽት 1:30 ላይ ህጻኗን ቀያ ወደ ተሰኘ ወንዝ ወስደው ከነሕይወቷ እንደጣሏትና አንድ ሚሊየን ብር መጠየቃቸውን ወላጅ አባት ገልጸዋል።

በተመሳሳይ በኦሮምያ ክልል ምዕራብ ሸዋ ዞን ወልመራ ወረዳ #ሆለታ ከተማ የሰባት ዓመት ታዳጊን አግተው በሚሊዮን የሚቆጠር የማስለቀቂያ ገንዘብ የጠየቁ ሥስት ግለሰቦች 11 ዓመት ጽኑ እሥራት እንደተፈረደባቸው የአሜሪካ ድምጽ በዘገባው አመልክቷል።

ያንብቡ፦ https://addisstandard.com/Amharic/?p=6009

ዜና ትንታኔ፡- #በደራ ወረዳ በአንድ ወጣት ላይ የተፈፀመው አሰቃቂ ግድያ ቁጣ ቀስቅሷል፣ ባለፉት አራት ወራት ብቻ ከ43 በላይ ንፁሀን ተገድለዋል

ከሳምንቱ መጀመሪያ ቀናት ወዲህ በማህበራዊ ሚዲያ በመሰራጨት ላይ ያለው የደራ ወረዳ ነዋሪ የሆነ የ17 አመት ወጣት አንገቱ ሲቆረጥ የሚያሳየው ቪዲዮ በርካቶችን ያሳዘነ፣ ቁጣን የቀሰቀሰ ተግባር ሁኗል።

አሰቃቂ ግድያውን የሚያሳይ ቪዲዮ ከመሰራጨቱ በፊት በአከባቢው በታጣቂዎች በሚፈጸም ተደጋጋሚ ጥቃት ከመኖሪያ ቤታቸው ተፈናቅለው በጫካ ውስጥ የተደበቁ ሰዎች ፎቶግራፎች በተለያዩ የማህበራዊ ሚዲያ ዘዴዎች በስፋት ተጋርተዋል።

ከቅርብ አመታት ወዲህ #በኦሮሚያ ክልል ሰሜን ሸዋ ዞን የምትገኘው የደራ ወረዳ የጦርነት አውድማ ሆናለች፣ በወረዳዋ በመካሄድ ላይ ያሉት ግጭቶች ከፍተኛ ውድመት አስከትለዋል።

በተለይም ከ2015 በኋላ በመንግስት ሃይሎች፣ በኦሮሞ ነጻነት ሰራዊት እና በፋኖ ታጣቂዎች መካከል የተደረጉ ከፍተኛ ውጊያዎች ወረዳዋን ወደ አሳዛኝ የግጭት ማዕከልነት ቀይሯታል፤ በዚህም የበርካታ የአከባቢው ነዋሪዎች ህይወት ተቀጥፏል፣ ማህበረሰቡን ለከፍተኛ ቀውስ ዳርጓል።

ከሀምሌ ወር 2016 ዓ.ም እስከ ጥቅምት ወር 2017 ዓ.ም ባሉት አራት ወራት ውስጥ በመንግስት ሀይሎች እና በታጣቂዎች መካከል በተደረጉ ግጭቶች ከ43 በላይ ንፁሀን ዜጎች ህይወት ማለፉን አዲስ ስታንዳርድ ከደራ ወረዳ ነዋሪዎችን ያሰባሰበው መረጃ ያሳያል።
https://addisstandard.com/Amharic/?p=6000

ከንቲባ አዳነች ደረሰኝ ላይ የተመሰረተ ግብይትን ማስፈጸም ለማስቀጠል ቁርጠኛ መሆናቸው ገለጹ

የአዲስ አበባ ከተማ ከንቲባ አዳነች አቢቤ ሰሞኑን በመርካቶ ደረሰኝ ከመቁረጥ ጋር በተያያዘ የተከሰተውን መስተጓጎል በተመለከተ ለከተማው ምክር ቤት አስረድተዋል።ማክሰኞ ዕለት ለምክር ቤት አባላት ባደረጉት ንግግር መንግስት ቀደም ሲል በችርቻሮ ነጋዴዎች ላይ ያተኮረ ጥረት ማድረጉን በመጥቀስ "የሸቀጦችን ምንጭ መከታተል ወሳኝ ነገር ግን ችላ የተባለ ጉዳይ ነው" ብለዋል።

ከንቲባዋ ግማሹ ግብር እየከፈለ ሌላው የማይከፍልበት አሰራር መኖሩን ገልጸዋል። አክለውም ግብር ለማስከፈል እና ደረሰኝ እንዲቆርጡ ለማድረግ ባደረግነው ሂደት “በሀሰት ውዥንብር በመንዛት መጋዘኖችን በመዝጋት በምሽት እቃዎች ሲጫኑ ተመልክተናል” ብለዋል።

“ግብር መክፈል እና ደረሰኝ መቁረጥ ግዴታ ነው። ይህንን ሂደት ጀምረናል፤ አንተውም" ያሉት አዳነች፤ መንግስት ስርዓቱን ለማስፈፀም ያለውን ቁርጠኝነት አፅንዖት ሰጥተዋል።

ይመልከቱ!

በፎቶ፡ በ #ትግራይ 320 የቀድሞ ታጣቂዎችን ትጥቅ የመስፈታት እና ወደ ተሓድሶ ስልጠና ማዕከላት የማስገባት ስራ ተጀምሯል።

በዛሬው ዕለት የመጀመሪያው ዙር የ #መቀለ የተሓድሶ ስልጠና ማዕከል የሚገቡ የትግራይ ክልል የቀድሞ ታጣቂዎች የነፍስ ወከፍ እና የቡድን የጦር መሳሪያ ትጥቃቸውን ለሀገር መከላከያ ሠራዊት ማስረከባቸው የመንግስት መገናኛ ብዙኃን ዘግበዋል።

በርክክብ ሥነ-ስርዓቱ ላይም የብሔራዊ ተሃድሶ ምክትል ኮሚሽነርና የመከላከያ ሰራዊት ተወካይ ብርጋዴር ጄኔራል ደርቤ መኩሪያ፣ የመከላከያ ሠራዊት ወታደራዊ መኮንኖች፣ የብሔራዊ ተሃድሶ ኮሚሽነሮች፣ የትግራይ ክልል ጊዜያዊ አስተዳደር ተወካዮች፣ የአፍሪካ ሕብረት፣ የአውሮፓ ሕብረት፣ የተባበሩት መንግስታት ድርጅትና ሌሎች ተባባሪ አካላት ተገኝተዋል።

የብሔራዊ ተሃድሶ ኮሚሽነር ተመስገን ጥላሁን፤ በትግራይ ክልል መቀሌ፣ እዳጋ ሀሙስ እና ዓድዋ በተዘጋጁ ሶስት ማዕከላት በሚቀጥሉት አራት ወራት 75 ሺህ የቀድሞ ታጣቂዎችን ትጥቅ በማስፈታት በዘላቂነት የማቋቋምና ወደ ማህበረሰቡ የመቀላቀል ስራ እንደሚከናወን አስታውቀዋል።