Sidaamu qoqqowi jireenyu paarte Sidaamu Afii Huuro

Si/Da/Qo Wodiidi Sidaami Zoone Jireenyu Paarte 5kki Diri Safote Ayyaani Xawadu Garinni Ayirrisamanni Afamannota Xawinsi

Barete aana leelle afiifanote hasaawa assinohu Wodiidi Sidaami Zoone Qaru Gashshaanchi Ayirradu kalaa Mangashi Fiitamohu coyiranni Nugusu gashshootinni hanafe dagate aana iillitanno hekko batidhanni daggeenna daga gashshootubba xiibbe aaninsanni hoo'litanna soorro suffanna techo barrira iillinoonnita coyrino.

Gashshaanchu ledeno Soorrote gashshooti dayeenna Jireenyu Paarte safantunku Sidaamu deerrinni Qoqqowo ikke tantanamatenni kayise batinye poletiku, ikkonoometenna dagoomittete latishshi soorro maareekkisiisa dandiinoonnita xawisino.

Qoleno, Tophiyu deerrinnino Jajjabba pirojektubba hanafa calla ikkikkinni gunde leellisha dandiinoonnita xawise, jireenyu paarte qote uurrine tenne hanafantino xaphooma latishshu hanafo kaajjite guuttanno assatenni gobbate lopho sufisa hasiissannota sokka saysino.

.

Sidaamu Dagata Yanna Kiirsiisinno Xa'mo Dawartino Jireenyu Paarte Safantino Barri Baxxinno Garinni Ayirrinsi.

Zoonete jireenyu paarteha 5ki diri safote ayyaana "Hedote Roorrimma Duuchu Dani Jireenyira" yaanno massagote qaalinni paanalete hasaawinni ayirrinsoonni.

Battalate aana sa'u onte dirranni jireenyu paarte massagonni loosantino loossanni daggino soorro haammata jifo giddoonni sa'e gobba sufissinno jawaata massagooshshu wolqanna daggino gumma hattono aantete paarte roore kaajishshannore titirshunni hasaamboonni.

Zoonete Jireenyu paarte sinu borro mini sooreessi kalaa Tsaadiqu Baxisohu Sidaamu dagata sanu aleenni keeshshitino xa'mo dawartinota ikkasenni Jireenyu paarte safantino barri sidaamu daga wolaphote dawaro afidhinoha ikkasinni addi tiro afi'rinoho yiino.

Saeennanno hammata latishshunna danchu gashshooti xa'mo xinqite tirtanni noota ikkasera gobbaanni haammata mitiimma giddoonni sa'e gobbate utuwimma buuxisatenni gobba diigamatenni gatissinno paarteetino yiino.