የኤፍሬም እይታዎች (መ/ር)

....

" ድካሟን የምታውቅ ነፍስ የተባረከች ናት ይህ እውቀት በእግዚአብሔር ምሕረት ላይ እንድትደገፍ ያደርጋታልና "
ቅዱስ ኤፍሬም ሶርያዊ
ደካሞችን ስንሆን ብርቱዎች የምንሆነው በእርሱ ምሕረት ነው!"

✍️የኤፍሬም እይታዎች👇

@ephrem_views

☝በቴሌግራም ለመቀላቀል☝

መንፈሳዊ ሕይወት ከየት ይጀምራል?
....................................
ጥልቅ መንፈሳዊ ህይወታችን የሚጀምረው ነፍሳችን አጥብቃ እግዚአብሔርን መመኘት ስትጀምር እና እውነተኛ ዳኛ በሆነው በህሊናችን እራሷን ማስመከር ስትጀምር ነው። ይኼም የሚነድ የገሃነም እሳትን በመፍራት ሳይሆን በተቃራኒው በፍጹም ፍቅሩ ከወደደን አምላክ ጋር የመዋሃድ ፍላጎትን በመናፈቅ ነው።መንፈሳዊ ሕይወት ከየትኛውም ዓይነት የዕውቀት ትንተና እና ደረጃ አይጀምርም።መንፈሳዊነት ንጹህ፣ትሁት፣ቅንና የተሰበረ ልብን ይፈልጋል።በዚህም ናፍቆታችን የሆነውን ክርስቶስን ጥልቅ በሆነ መሻት በእምነት መፈለግና በፍቅሩ ጥላ ውስጥ ለመኖር መዘጋጀት፣በተጎሳቆለ የኃጢአት ሕይወት ውስጥ እንኳን ሆነን የአምላክ የምህረቱን ጽናት በመመልከት በፍጹም ፈሪሃ እግዚአብሔር ወደ እርሱ የምህረት ጥላ (ንስሐ) ለማረፍ መቅረብ ከግዙፉ ዓለምና ሀሳብ በመራቅ በመንፈስ ቅዱስ ለመመራት ሁለተናን በማዘጋጀትና በአምላክ ሀሳብ ለመኖር በሚመች አካሄድ ለመጓዝ መፍቀድ ነው። መንፈሳዊነት የምንመኘው ሳይሆን የምንኖረው።መንፈሳዊነት አይመረመርም። መንፈሳዊ ሕይወት የእያንዳንዱ ክርስቲያን ግብ ነው። ክርስቶስን ወደ መምሰል ማደግ።ለዚያም ነው የማይቻል እንዳይመስለን ቅዱስ ጳውሎስ "እኔ ክርስቶስን እንደምመስል እኔን ምሰሉ"ያለን። ክርስቲያን የሆንነው ክርስቶስን ለመምሰል ነው።

✍️የኤፍሬም እይታዎች
@ephrem_views

የጌታ ልደት የአምላክ ትሕትና የድንግል ልዕልና የታየበት ነው!
+-------------------------- --------------------------------------+
እግዚአብሔር ለሰው ልጅ ያለውን ፍጹም ጥልቅ ፍቅር የገለጸው ሰው በመሆን ነው። ከሁሉ በላይ አምላክ ለእኛ ያለው ጥልቅ ፍቅር ማሳያ ዘለዓለማዊ አምላክ፣ያለና የሚኖር ጌታ፣ ለመንግሥቱ ፍጻሜ፤ለግዛቱም ወሰን የሌለው ፤ከዓለማት በፊት የነበረ እርሱ በሁሉ የመላ መለኮት የሰውን ባሕርይ ባሕርይው አድርጎ ከአንዲት ታናሽ ብላቴና በተናቀ ስፍራ በከብቶች ግርም መወለዱ ነው። በአባቴ ቤት ብዙ መኖሪያ አለ ያለ ጌታ ማደሪያ/መኖሪያ አጥቶ በከብቶች በረት ተወለደ።

ይህን ድንቅ ነገር እናስተውል አምላክ ሰውን ወዶ ያለ ልክ ከፍ ከፍ ያደርገው ዘንድ ጌታ ያለ ልክ ዝቅ ዝቅ እንዳለ እንመልከት። በዚህም ያለ ልክ በፍጹም ትሕትና ራሱን አዋርዶ አምላክ ሰው በመሆኑ፤በጥንተ ፍጥረት አምላክ ሰውን ምን ያህል እንዳከበርነው አወቅን።

የአዳምን የቀደመ መልኩን ይመልስለት ዘንድ ሰው ሆኗልና።
ታላቁ ቅዱስ አትናቴዎስ “ሰው አምላክ ይሆን ዘንድ እግዚአብሔር ሰው ሆነ” እንዳለን።

አምላክ ሰው ለመሆን ሰው አስፈለገው። ሰው ማለት በመጀመሪያ ያልበደለው የአዳም ስም ነው። እግዚአብሔር በአርአያውና በመልኩ አክብሮ የፈጠረው የሰው ልጅ ስም ነው "ሰው" ስለዚህም የአዳምን የቀደመ ሰዋዊ ክብሩን ይመልስለት ዘንድ " ሰው" ለመሆን ጌታ ሰው ፈለገ።

እናም በጎሰቆለው ዓለም ብቸኛ ሰው ሆና የተገኘች ሰው ድንግል ማርያም ናት "ነጭ እንቁ በአዳም ገላ" እንዳለ ቅዱስ ያሬድ።የሰው ልጅ ክብር በማርያም በኩል ተገለጠ።

ሰው ሆና ስለተገኘች ንጽሕት የሰርጉ አዳራሽ ስለ ቅድስት ድንግል ማርያም ሊቁ አውግስጢኖስ ሲናገር "ማርያም በማኅፀንዋ ሳትፀንሰው ቃሉን በልብዋ ፀነሰች " ምክንያቱም ሰው ሁሉ ከክብር በጎደለበት በዚያ ዘመን ሰው ሆና ተገኝታለችና አምላክ ሰው ለመሆን እናቱ ትሆን ዘንድ መረጣት።በዚህም በእርሱ ትሕትና እንደነቃለን፤ በድንግል ልዕልና እንገረማለን።

ምክንያቱም አምላክ ሰው ሲሆን እርሷን እናቱ ትሆን ዘንድ አክብሮ መርጧታልና። አምላክ ሰው በመሆኑ ድንግል ማርያም የአምላክ እናት፣የፈጣሪ እናት፣የዘለዓለም ንጉሥ እናት ሆነች። የእርሷ እናትነት ከህሊና በላይ የሆነ እናትነት ነው። ደንግልም እናትም ተባለች።በሚገባ ሆና ተገኝታለችና። ይህ እጅግ አስደናቂ ልዕልና ነው።

ከላይ ሳይጎድል በዙፋኑ እንዳለ፤ከታችም ሳይጨመር ሰው የሆነ አምላክ የማይወሰነው ተወስኖ፤የማይጨበጠው ተዳሶ በታላቅ ትሕትና በከብቶች ግርግም ተወልዶ ማየት፣የድንግል እሹሩሩ ማለት፣በጀርባዋ ማዘል፣ከአምላክ ጋር መዋል ማደር ያስደንቃል። ምክንያቱም የእርሱ ትሕትና የእርሷ ልዕልና የታየበት ታላቅ ምስጢር ነውና።

ዳዊት የተጠማው የቤተልሔም ውሃ የአባቱ የዳዊትን ጥም ለመቁረጥ የማያስጠማ የሕይወት ውሃ በቤተልሔም ከድንግል ተወለደ ። ይህ የሕይወት ውሃ ሰው በሚቆጠርበት ቀን ተወልዶ ከእኛ ጋር ተቆጥሮ ከእርሱ ጋር እንድንቆጠር አደረገን።

የጌታን ልደት ስናከብር አምላክ እኛን በመውደዱ የእኛን ባሕር ባሕርይው አድርጎ የቀደመ መልካችንን ይመልስ ዘንድ የተወለደ የእግዚአብሔር ልጅ መሆኑን እናስተውል።

የጌታን ልደት ስናከብር " የእግዚአብሔር ቤተመቅደስ" የሆነ የከበረ የክርስቶስ አካል የሆነ ሰውነታችን ለኃጢአት ተላልፈን እንዳንሰጥ እናስተውል።

የጌታን ልደት ስናከብር ሰው ሆና የተገኘች እመቤታችንን አምላክ እናቱ ትሆን ዘንድ እንዴት እንደመረጣት፣ እንዳከበራት፣ከሥጋዋን ሥጋን እንደነሳ፤ከነፍሷም ነፍስን ነስቶ በፍጹም ተዋህዶ ፍጹም አምላክ ፍጹም ሰው መሆኑን እናስተውል።

👉 አንዳንዶች የእመቤታችንን እናትነት ለመቀበል ሲቸገሩ እመለከታለሁ። እኔም ይህንን እጠይቃለሁ ❗️

👉 ወንድሞች ሆይ ለእናንተ የድንግልን እናትነቷን ለመቀበል የተቸገራችሁ እስኪ ልጠይቃችሁ?

❤በውኑ የክርስቶስ ፣የአምላክ የጌታና እናት የሆነች ቅድስት ንጽሕት ማርያም ለእናንተ እናትነቷ አነሰባችሁን ?

❤ የጌታዬ እናት ለእኔ እናትነቷ ክብሬ ነው፣እናት ብዬ ብቀበላት ክብሩም ለእኔ ነው እንጂ ለእርሷስ አይደለም።
እርሷማ በሚገባ የአምላክ እናት ናትና።

የጌታዬ እናት❗️

✍️የኤፍሬም እይታዎች
@ephrem_views

ጥር 2-2017-ዓ.ም
ከናዝሬት ገሊላ ሳይሆን ከናዝሬት -አዳማ
........

በናዝሬት ደብረ ጸሐይ ቅድስት ማርያም ካቴድራል (አዳማ) የእመቤታችን ወርኃዊ የልደት መታሰቢያ ጉባኤ በአገልግሎት ግሩም ምሽት አሳለፍን። እግዚአብሔር ጉባኤውን ያስፋ ይጠብቅልን።

❤ለተወደደው የጌታ ልደት በዓል እንኳን አደረሳችሁ❗️

በናዝሬት ደብረ ሰላም ቅዱስ ገብርኤል ካቴድራል(አዳማ) የነበረን የታኅሣሥ 30 የምሽት ሳምንታዊ ጉባኤ አገልግሎት እጅግ ደስ የሚል ነበር።እግዚአብሔር ጉባኤውን ይጠብቅ።

🙏መልካም የክርስቶስ ልደት በዓል ይሁንልን።

"የእግዚአብሔር ልጅ የሰውን ልጆች የእግዚአብሔር ልጆች ያደርጋቸው ዘንድ የሰው ልጅ ሆነ።" ቅዱስ ጎርጎርዮስ

🙏እንኳን ለብረሃነ ልደቱ በሰላም አደረሳችሁ።

እንኳን ለብሥራተ ገብርኤል ታላቅ ዓመታዊ ክብረ በዓል በሰላምና በጤና አደረሳችሁ🙏❤ @ephrem_views

" የልብ ንጽህና ላይ የደረሰ ሰው የእግዚአብሔርን ክብር በሁሉም ስፍራ ያያል"

❤ቅዱስ ኤፍሬም ሶርያዊ

MK TV || ዐውደ ስብከት || ኢየሱስን አግኝተነዋል
https://youtube.com/watch?v=Mcl5aZVL9_I&si=Lj5rNCFG62u-YYxd

በጌታ መንገድ የጠፉትን መፈለግ!
+--—------------- ---------------------+
" ውሃ አጠጪኝ"
ጌታ ወደ ሰምራዊቷ የቀረበው " ውኃ አጠጪኝ " በሚል የልመና ንግግር ነው። እንደሚያስፈልጋት ሳይሆን እንደምታስፈልገው በመንገር። " ውኃ አጠጪኝ ? "
በእርግጥ ጌታ ከእርስዋ የሚፈልገው ነገር ቢኖር እርሷን ነው።
.....................
ጌታ ሆይ እኔን የተጠማህ አንተ "ውኃ አጠጣኝ ብለህ ወደ እልፍኜ ጓዳ መጥተህ ስንት ጊዜ ከልክዬህ ይሆን?

“ከሰማርያ አንዲት ሴት ውኃ ልትቀዳ መጣች። ኢየሱስም፦ ውኃ አጠጪኝ አላት” /ዮሐ. 4፥7/ ። ይላል ቅዱስ ዮሐንስ።

በአምላክ ሰው መሆን እጅግ ከሚያስደንቁ ነገሮች አንዱ ለሁሉ የሚሰጥ የማያልቅበት ባለጸጋ ለማኝ መሆኑ ነው።

ከእናቱ ድንግልናዊ ወተትን እየለመነ ያደገው ጌታችን አሁን ደግሞ ውኃ አጠጪኝ በማለት ሳምራዊቷን ሴት ለመነ ።
ውኃ ነጻ ስጦታ ነው አይሸጥም። ውሃ " የሬሳ ማጠቢያ ነው"ይላሉ አበው። ውኃ ሕይወት ነው። ውኃ በቀላሉ ለሁሉም በሁሉም ቦታ የሚገኝ ነው። ውኃ ምድር የጸናችበት ነው።ውኃ በመጀመሪያው ቀን ሰማይና ምድር ሲፈጠር አብሮ የተፈጠረ ነው፡፡ ውኃ ዛሬም የምድርን ሦስት አራተኛ ሲሸፍን የሰውነታችን ሁለት ሶስተኛ (67%) ደግሞ ውኃ ነው፡፡ የሰው ልጅ ከተሠራባቸው አራቱ ባህርያተ ሥጋ መካከልም አንዱ ውኃ ነው፡፡

ውኃ የጠማው ሁሉ በነጻ የሚያገኘው የእግዚአብሔር ስጦታ ነው።በድሮ ዘመን በሀገራችን ሰው ሊጠማው ይችላል ተብሎ ቀዝቃዛ ውኃ ከነመጠጫው ደጅ ላይ ይቀመጣል ። መንገደኛውም ቀድቶ እየጠጣ ያልፋል ።
በእስራኤል ልማድም እንዲሁ ነው።ዛሬ ግን የምናውቀው ነው። የቀደመ ፍቅራችንን ይመልስልን።

ጌታችንም ይህን ቃል ደግሞታል፡-“የእግዚአብሔርን ስጦታና፡- ውኃ አጠጪኝ የሚልሽ ማን መሆኑንስ ብታውቂ፥ አንቺ ትለምኚው ነበርሽ የሕይወትም ውኃ ይሰጥሽ ነበር አላት” /ዮሐ. 4፥10/ ። ውኃ የእግዚአብሔር ስጦታ ነው ።

እኛን ተጠምቶ ሰው የሆነ ጌታ በመዋዕለ ሥጋዌ ሲመላለስ ሁለት ጊዜ ውኃ እንደ ለመነ ተጽፏል ። የመጀመሪያው በያዕቆብ ጉድጓድ አጠገብ ሲሆን ሁለተኛው በመስቀል ላይ “ተጠማሁ” በሚለው ጩኸቱ ነው ። ሁለት ጊዜም ውኃ አላገኘም ። ውኃ የእግዚአብሔር ስጦታ ነው ብሎ የሚያስበው ማኅበረሰብ ጌታችን ሲለምነው ለመስጠት ፈቃደኛ አልነበረም ። ጌታችን እንኳን የአምላክነቱን አይደለም የሰው ልጅን ያህል እንኳ አቀባበል አላገኘም ። ትንሽ የሚመስለውን ነገር ለተነፈጉ ቤዛ ሊሆናቸው ትንሹንም ትልቁንም ጥቅም አጣ ።

ሁለቱንም ጊዜ ከውኃው በላይ የተጠማው የሰዎቹን መልካምነት ነው ። ሳምራዊቷ ሴት ካመነች በኋላም ውኃውን አልጠጣም ። በመስቀል ላይም በውኃው ፈንታ ሆምጣጤ ቢያቀርቡለት አልጠጣውም ። ውኃን ለመስጠት ዘርን ጎሣን የሚያስጠይቅ ማንነት በሳምራዊቷ ሴት ነበረ ። ውኃን ለለመነ ሆምጣጤ የሚያቀርብ ማንነት በሰቃዮች ውስጥ ነበረ ። ከስጦታው በላይ ስጦታው የሚወጣበት ልብ እንዲቀደስ ጌታችን ፈለገ ።

ልባቸው ቢቀደስ ለውኃ ብቻ ሳይሆን ሕይወታቸውን ለመስጠትም አይሰስቱም ። የመጨረሻውን ስጦታ የዘላለም ሕይወትን የሚሰጠው ጌታችን የመጨረሻውን ትንሽ ስጦታ ውኃን ለመነ ።ውኃን የለመነባቸው ሰዓቶች በሰማርያ ደክሞ ፣ በመስቀል ላይ ታሞ ነው ። ከግለሰብ እስከ ሕዝብ ፣ ከሳምራውያን እስከ አይሁዳውያን ውኃን ነፈጉት ። ራሱ የፈጠረውን ውኃ ተነፈገ።
ዛሬ ያልፈጠርነውን ቢነፍጉን ታዲያ ለምን ደነቀን ?

ጌታችን ይህችን ሴት ብዙ መንገድ ተጉዞ ፣ በሐሩር ተቃጥሎ ፣ በብርቱ ደክሞ ሊያገኛት መጣ ። ምሥጢሯን እንዳይሰሙ ደቀ መዛሙርቱን የማይበላውን ምግብ እንዲገዙ ወደ ከተማ ላካቸው ። ደቀ መዛሙርቱ የመጡት ይህች ሴት አምና ለምስክርነት ልትሰማራ ስትል ነው ። ምን ያህል ሰዓት እንደሚያናግራት ያውቅ ነበር ። ይህን ሁሉ የሕሊና ጥበቃ ካደረገላት በኋላ አሁን ደግሞ እንዳትደናገር ውኃ አጠጪኝ አላት ።

በውኃ ጉድጓድ አጠገብ የውኃ ጥያቄ ማንሣት የሚያግባባ ርእስ ነው ። ጌታችን ትልቅ የስብከት ዘዴ እንደ ተጠቀመ እንረዳለን ። የስብከት ዘዴ ማለት ከሚያግባባው ርእስ መነሣት ማለት ነው ። የሰውን ሕሊናና ክብር ጠብቆ ለንስሐ ማብቃት ፣ በመራራት ሰዎችን ማከም ማለት ነው ።

ሰው ማለት ነጻ ፈቃድ ያለው ፤ ለባዊት ፣ ነባቢትና ሕያዊት ነፍስን የተቀዳጀ ፣ በአምላክ የፍርድ ዙፋን ፊትም ራሱን ችሎ የሚቆም ክቡር ፍጥረት ነው ። ይህንን ሰው እንደ እንስሳ ንቆ ፣ እንደ ጣዖት ፈርቶ ሳይሆን እንደ ሰው አክብሮ ማነጋገር ይገባል ። ዛሬ ዛሬ ደኃውን የሚንቁ፣ለባለጸጋ የሚያሸረግዱ ብዙዎች ናቸው። ክርስትና ግን ሰውን በሰውነቱ ብቻ ማክበር ነው።

ስለዚህም ለሰው ስሜት መጠንቀቅ ተገቢ ነው። ስብከት ማለትም ሰውን በፈቃዱ የምንማርክበት መለኮታዊ መሣሪያ ነው ። ይልቁንም ያለንበት ዘመን የሰዎች አእምሮ በብዙ የሕሊና ትግል ውስጥ የሚያልፍበት ፣ በሕመምና በጭንቀት የተጎዱበት በመሆኑ በጥንቃቄና በፍቅር ልናክማቸው ይገባል እንጂ በጭካኔ ቊስላቸውን ልንነካቸው አይገባም።

“እናትና ልጅ ሲጣሉ ሞኝ እውነት ይመስለዋል” ይባላል ።
እግዚአብሔርና ሰውም በጣም ይዋደዳሉና ሲጣሉ እንደ ሞኝ ልናስብ አይገባም ። ነቢዩ ዮናስ የእግዚአብሔርን ምሕረቱን ብቻ ማሰቡ ፍርዱን እንዳስረሳው ፣ እኛም ፍርዱን ብቻ ማሰብ ምሕረቱን እንዳያስረሳን መጠንቀቅ አለብን ።

“ካነጋገር ይፈረዳል ካያያዝ ይቀደዳል” የሚባለው ለዚህ ነው ። ንግግር ራሱን የቻለ ጥበብ ይፈልጋል ። ጥበብ ውሸት አይደለም ። ለማን ምን መናገር ፣ እንዴት መናገር እንዳለብን የምናውቅበት ነው።

ስብከት ማለት ሰውና እግዚአብሔርን ማስታረቅ ማለት ነው። ሰው የበዳይ አኩራፊ ሁኖ ተቀምጧል ። እግዚአብሔር ደግሞ ከልጄ አስታርቁኝ ብሏል ። አስታራቂ ሰው ሽማግሌ ነውና ጠንቃቃ ፣ ንግግር አዋቂ መሆን አለበት። አሊያ አባትና ልጅን አለያይቶ ሊቀር ይችላል።

ተወዳጆች ሆይ ሁላችን ክርስቲያኖች የክርስቶስ መልእክተኞች ነንና ለኃጢአተኞች በመራራት ልንመላለስ ይገባል። በፍቅርና በመውደድ ወንጌል ልንሰብካቸው ይገባል።

ጌታችን በወቅቱ ከሚያግባባው ርእስ ከውኃ በመነሣት ትልቅ የስብከት ጎዳናን አሳየን። እንዴት እንደ ተጠነቀቀላት ተመልከቱ። ይህች ሴት ከዚህ በፊት አይታው የማታውቀው ፣ የአለባበሱ ሁኔታ አይሁዳዊ የሚመስል ሰው በማየቷ መደንገጧ እርግጥ ነው ። የንግግሩ መክፈቻ ግን የሚያግባባ በመሆኑ ድንጋጤዋ ወደ መገረም ተለወጠ።

ወገኖቼ ሳምራውያን እንኳን እኔ ባጠለቅሁበት መቅጂያ አይቀዱም፣ እርሱ አይሁዳዊው እንዴት በእኔ ማጥለቂያ ውኃ ይጠጣል ? ወደሚል አግራሞት ተሻገረች ።

ምከንያቱም በዚያች ከተማ የእርስዋን ሕመም ሳይረዳ እንደ ርካሽ የሚቆጥራት ብዙ ነው። ዝሙተኛ አድርጎ የሚያስባት ፣ ዕድለ ቢስ አድርጎ የሚፈርጃት በንቀት፤ በአሽሙር አምስት ባሎቿን የቀበረች ገፊ አድርጎ የሚነቁራት እልፍ ነው። ይህ ነው በቀትር በጠራራ ጸሐይ ማድጋዋን አዝላ ከሰው ተደብቃ ለብቻዋ ወንዝ እንድትወርድ ያደረጋት። ከሰው አፍ ጠራራ ጸሐይን መረጠች። ጸሐይ አካሏን ሲያደክማት የሰው አፍ ግን ልብ ይሰብራልና ከሚሰብረው የሰው ቃል፣የምታቃጥለውን ጸሐይን መረጠች።

ጌታ ይህ የልብ ስብራቷን ያውቃልና በፍቅር ቀረባት።
ሕሊናን የፈጠረው የሕሊናን ምቾት ይጠብቃልና በብዙ ትዕግሥት እምነትዋን አሳደገላት።

የሚፈለገው ጌታ በመፈለግ መጣ ። የሚጠየቀው ጌታ ጥያቄዋንና መልሷን ይዞ ተገለጠ ። የሚሰጠው ጌታ በልመና ጀመረ ። ፍጻሜው ምን ሆነ?

በልመና የጀመረው ግንኙነት የዘላለምን ሕይወት በመስጠት ተደመደመ። በውኃ የጀመረው ርእስ መሢሕና መድኃኔዓለም በማለት ተፈጸመ። አንዲትን ሴት በመማረክ መላው ከተማ ተማረከች። ለናቋት ሰዎች የእርቅ ምክንያት ሆነች።በሚያስጠማው ውኃ የሸሿት ሳምራውያን በሕይወት ውኃ ግን ተከተሏት።አንድ ጽዋ ውኃ ለመስጠት የተከራከረች እንስራዋን ጥላ ሄደች።

ብዙ የተተወለት በብዙ ይወዳልና። ብዙ ኃጢአቷ ተትቶላታልና ወደ ከተማ ገብታ ድምጿን ከፍ አድርጋ መሰከረች። የጠፉ ነፍሳትን ማርከን ወደ ጌታ በረት የምንጨምረው እንዲህ ባለው የፍቅር ስብከት ነው።

ጌታ ሆይ እኔን የተጠማህ አንተ ጠጥተህ ትረካ ዘንድ ስለ ኃጢአቴ እንዳነባ የንስሐ እንባን አድለኝ።

✍️ኤፍሬም ሀብተ ማርያም
@ephrem_views

ይህም አምላክ የሚሰጠን የመንፈስ ቅዱስ ኃይል ነው።
" የተስፋ አምላክም በመንፈስ ቅዱስ ኃይል በተስፋ እንድትበዙ በማመናችሁ ደስታንና ሰላምን ሁሉ ይሙላባችሁ" ሮሜ 15:13። ተስፋ ያጸናል
እግዚአብሔርን ተስፋ ማድረግ ወደ ተስፋ መቁረጥ ፈጽሞ አይመራንም። ምክንያቱም እርሱን ስንመለከት በእኛ ላይ ያለው አላማና ዕቅድ ይታየናል። በቁስ እኛነታችንን አንለካም። በሌለንም ምድራዊ ነገር አንሸነፍም።
በተስፋ የተሞላ የወደፊት አዲስ ሕይወት በእርሱ ዘነድ አለና።"ለአንተ በእርግጥ የወደፊት ተስፋ አለህ፣ እናም ተስፋህ አይቋረጥም።" ምሳ 23÷18። ከሁሉም በላይ ዘለዓለማዊ ክብርን አጎናጽፎናልና።

በማንኛውም ሁኔታ ውስጥ ብሆን፣ቀኑ ቢጨልምብን፤ ያመነው ቢከዳን ፤ተስፋ ያደረግነው ቢተወን በራሳችን በፍጹም ተስፋ መቁረጥ የለብንም። " መጀመሪያውኑ ተስፋ ያደረኩት ማንን ነው? ብለን እንጠይቅ።

ዘለዓለማዊ ተስፋችንን በእግዚአብሔር ላይ እናድርግ።
ሸክማችንን የሚያስወግድ ታሪክ ቀያሪ እርሱ ነውና።

✍️ ኤፍሬም ሀብተ ማርያም
አዳማ-ኢትዮጵያ
@ephrem_views
...

ተስፋ የምታደርገው ማንን ነው?
+===========≡=======+
ተስፋ ምኞትና ናፍቆት ሳይሆን አለኝታና መተማመን የሚገኝበት የአምላክ ውድ ስጦታ ነው። ተስፋ በዚህ ዓለም ብቻ የማይወሰን፣ በቁስ የማይገደብ የማይታየውን የምናይበት ፤ አሁን ባይታይም በሰማያዊ ስፍራ የተረጋገጠና የማይጠፋ በሚመጣው ዓለም የእግዚአብሔር መንግሥት ከመለኮታዊ ክብሩ የጸጋ ተካፋዮች ለመሆናችን ማረጋገጫን ነው።

ተስፋ በእምነት ላይ የተገነባው ሕይወት ፍሬውን እንደሚያፈራ ማረጋገጫ የእምነት ኃይል ነው።
ተስፋ በሕይወታችን ምንም እንኳን ድቅድቅ ጨለማ እና የከፋ ኃጢአት ውስጥ ብንወድቅም ፣ የእግዚአብሔር ፍቅር፣ ቸርነት፣ ይቅርታ፣ ብርሃን በእኛ እና እኛ ራሳችን ማድረግ የማንችለውን ለእኛ ለማድረግ የሚያስችል መተማመን እንዳለን የምናስረግጥበት ኃይል ነው።

ተስፋ እንደ እምነት ሁሉ የማይታይ ነው።
"ተስፋ የሚደረግበቱ ነገር ቢታይ ተስፋ አይደለም፤ የሚያየውንማ ማን ተስፋ ያደርገዋል? የማናየውን ግን ተስፋ ብናደርገው በትዕግሥት እንጠባበቃለን።ሮሜ 8÷25 እንዳለ ቅዱስ ጳውሎስ።የሰው ልጆች ዋነኛው ብርታትና አቅም ተስፋ ማግኘትና በተስፋ መኖር ነው፡፡ጽኑ የማይከዳ እውነተኛ ተስፋ እግዚአብሔር መሆኑን ማወቅና መረዳት ነው።

አንዳንድ ጊዜ ባልገመትነው ጊዜ ፤ባልጠበቅነው ሰዓት ምክንያቱን ለመረዳት ማሰብ እስኪያቅተን ድረስ በነገሮች ላይ ተስፋ የመቁረጥ ስሜት ሊሰማን ይችላል።

በዚህም ጊዜ ያለማቋረጥ እንዲህ ያሉ ስሜቶችና ሀሳቦች በውስጣችን ሊፈጠሩ ይችላሉ:-

ነገን በተስፋ ከማየት ዘንግተን፤ ትናትን ከዛሬ ጋር በማነጻጸር ሌሎች ያላቸውን እኛጋር የሌሉ የመሰሉንን ነገሮች በመቁጠር "እኔ እኮ ይኼ የለኝም፣ በዚህ ዕድሜዬ ይህንን ማሳካት አልቻልኩም፣በተማርኩበት መቀጠር፣ ሰርቼ መለወጥ፣ነግጄ ማትረፍ አልሆነልኝም። የዕድሜ እኩዮቼ የሚነዱት መኪና፣ የሚኖሩበት ቤት፣ የሚዝናኑበት ስፍራን መቼ ነው እኔ የማሳካው? ሌላው ቢቀር አስተምረው ለወግ ያበቁኝን ቤተሰቦቼን እንኳን ለማዕረግ ማብቃት አልቻልኩም። የእኔ መኖር ለማንና ለምንድ ነው? እኔ የምረባ የምጠቅም ሰው አይደለሁም። እኔ በሕይወቴ ሙሉ ሰው አይደለሁም፣ ወደ ፊትም መሆን አልችልም"

እያልክ በነገሮች ሁሉ ተስፋ እንድትቆርጥ ተስፋ ቢስም እንድትሆን ሰይጣን የክፋት መረቡን በአእምሮህ ውስጥ ይዘረጋል። የሚደንቅህ ወዳጄ ሆይ ሰይጣን በዚህኛውም በወዲያኛውም ዓለም ተስፋ የለውም። ነገር ግን አንተን ተስፋ ለማስቆረጥ ባንተ ላይ ተስፋ አይቆርጥም።
አንተን ግን ምድራዊም ሰማያዊም ዘለዓለማዊ ተስፋ አለህ። " ነፍሳችን እግዚአብሔርን ተስፋ ታደርገዋለች፥ ረዳታችንና መጠጊያችን እርሱ ነውና" መዝ 33:20። ባለ ተስፋው አንተን ተስፋ የሌለው ሰይጣን ተስፋ ለማስቆረጥ ያለማቋረጥ በአንተ ላይ ይሰራል።አንተ ግን እወቅበት።

ታዲያ አንተ ባለ ተስፋ ከሆንክ ስለምን በራስህ ላይ ተስፋ ትቆርጣለህ።

ሕይወት ብርቱ ሰልፍ ናት።ሕይወት በውጣ ውረድ የተሞላች ናት።በየቀኑ ስትወድቅ አትደነቅ፣ ተስፋ አትቁረጥ በድፍረት ቁም እንጂ።አንተ ሰው ብቻ አይደለህም በመከራ ጊዜ "ስሜ ክርስቲያን" ነው የምትል የቅዱስ ቂርቆስ ልጅ ነህ።

አንዲት በሆነች ሥርዓተ ጥምቀት በዳግም ልደት ከማህፀነ ዮርዳኖስ ከአብራከ መንፈስ ቅዱስ ከማይጠፋ ዘር የሥላሴን ልጅነት በማግኘት የማይጠፋ ዘለዓለማዊ ስም የተሸከምክ ዘለዓለማዊ ፍጥረት ነህ። ያንተ ተስፋ በምድራቂ ቁስ አይገደብምም። ያንተም ስኬት ኃላፊና ጠፊ በሆነ የሀብት መጠን አይለካም። በምድር ላይ ያለ ሀብት ሁሉ ቢከማች፣ ሰማይና ምድርም ቢጨመሩ ክብራቸው አክብሮ በአምሳሉ ከፈጠረህ ካንተ አይበልጡም።

ሰማይና ምድር ያልፋሉ አንተ ግን ክቡርና ዘለዓለማዊ የእግዚአብሔር ፍጥረት ነህ። የሌለህ ለዘለዓለም ካንተ ጋር የማይኖረው ኃላፊና ጠፊ ቁስ ነው። ለዘለዓለም የሚያኖርህ አምላክህ ግን በማንኛውም ሁኔታ ውስጥ ብትሆን ካንተ ጋራ ነው።እርሱን አጥብቀህ ከያዝክ ሁሉም ያንተ ይሆናል።

ዓለም ላይ ያለ ፈተና ሁሉ እንደ እዮብ ቢቀርብልህ
"እግዚአብሔር ሰጠ እግዚአብሔር ነሳ " የምትል
ተስፋህ ከእግዚአብሔር የሆነ ተስፋህ ከተስፋው ጋር የሚስማማ ሕይወት ያለህ፤አስቀድመህ መንግሥቱንና ጽድቁን ስትፈልግ ሌላው ሁሉ የሚጨመርለህ ድንቅ ፍጥረት ነህ።

ተወዳጆች ሆይ የሁሉም በሆነች ዓለም ስንኖር በሕይወታችን የሚያሳዝኑ ነገሮች ሊያጋጥሙን ይችላሉ። ነገር ግን ባለን በኑሮአችን ሁኔታ በመከፋት ተስፋ መቁረጥ ውስጥ መግባት በፍጹም የለብንም፤ ዛሬ ቢጨልምብን ነገ ብርሃን ይሆናል፡፡ የማይነጋ ሌሊት የማያልፍም ጨለማ የለምና። እግዚአብሔር ረስቶኛል አምላኬም ትቶኛል ብለህ በፍጹም ተስፋ እንዳትቆርጥ እንኳን አንተ የራስህ ጸጉር እንኳን በእግዚአብሔር የተቆጠረና የታወቀ ነውና።

ይህንን አስደናቂ ዓለም የፈጠረ በውስጡም ድንቅ ፍጥረታትን ፈጥሮ ያኖረ።ግዕዛን ፍጥረታትን እንኳን የማይዘነጋ፣ የሰማይ አእዋፋትን የማይረሳ እግዚአብሔር በአርአያውና በአምሳሉ አክብሮ የፈጠረህ አንተን ይረሳህ ዘንድ እንዴት ይቻለዋል ?።በፍጹም አይተውህም።

ነገር ግን በነገሮች ተስፋ እንዳትቆርጥ ትዕግስተኛ ሁን።

በሕይወት ውጣ ውረድ በተፈተንን ጊዜ ወደ እግዚአብሔር የሚያደርሰን ትዕግሥት ነው። ትዕግሥት ቁጣን የሚቀጣ፥ አንደበትን የሚገታ፥ አእምሮን የሚመራ፥ ሰላምን የሚጠብቅ፥ትዕቢትን የሚያስወግድ፣ ሰውን በብልጽግና ውስጥ ትሁት፣በመከራ ውስጥ ደፋር፣በደረሰበት ጉዳትና ስድብ የዋህ የሚያደርገው ትዕግሥት ነው።የተስፋን ልዕልና ከፍ የሚያደርገው ትዕግሥት ነው። ትዕግሥት ካለህ ተስፋ አለህ።ተስፋ ካለህ የማያልፍ የመሰለህ ነገር ሁሉ ያልፋል።የዛሬን ጨለማ ተሻግረህ የነገን ብርሃን ታያለህ።

በአንድ ወቅት እስራኤልን የሚገዛ፣ ሁሉ በእጁ ሁሉ በደጁ የሆነለት ንጉሥ ዳዊት እንዲህ ብሎ ይጠይቃል።
ወንድሞቼ ረስተውኝ፤አባቴም ዘንግቶኝ፣ በሁሉ በተናኩ ጊዜ ያስታወሰኝ ተስፋዬ እግዚአብሔር ነበር። በሠራዊት ብዛት ተከብቤ፣ በወርቅ በተንቆጠቆጠ ፣በአልማዝ ባሸበረቀ ቤተ መንግሥት ውስጥስ " አሁንስ ተስፋዬ ማን ነው? መዝ 25÷3 ብሎ ይጠይቅና ራሱ ሲመልስ "እግዚአብሔር ነው" ይለናል።
እውነት ነው እውነተኛ ተስፋ የሚመጣው ከእግዚአብሔር ብቻ ነው።ተስፋ ወደ መቁረጥ ውስጥ የምንገባው ተስፋ በሌላቸው ነገሮች ላይ ተስፋ ስናደርግ ነው።
አንዳንድ ጊዜ ምንም ተስፋ በሌላቸው ነገሮች ላይ ተስፋ እናደርጋለን። በሰዎች ተስፋ እናደርጋለን፣ገንዘብ ተስፋ እናደርጋለን፣ሥልጣንን ተስፋ እናደርጋለን፣ መኪና ቢኖረኝ ብለን ተስፋ እናደርጋለ።በትዳር ጓደኛችን ተስፋ እናደርጋለን የትዳር ጓደኛችን እውነተኛ ተስፋ ሊያመጣ አይችልም ምክንያቱም የትዳር ጓደኛችን ችሎታው እሱ ወይም እሷ ሊቆጣጠሩት በሚችሉት ነገር ላይ ብቻ የተገደቡ ናቸና።

ተስፋ የቆረጥንባቸው፤የሉንም ያልናቸው ነገሮች በሙሉ
ከእግዚአብሔር ጋር ከሆንንን የእኛ ይሆናሉ።

የሚያሻግር የሚያሳርፍ እውነተኛ ተስፋ የሚመጣው ተስፋን ከሰጠን ከእግዚአብሔር ነው። እውነተኛ ተስፋ የሚመጣው ሁኔታዎች አስቸጋሪ ቢሆኑም እንኳ እግዚአብሔርን በማመን ነው። በአምላክ ላይ ጽኑ እምነት እንዳለን የምናሳይበት አንዱ መንገድ በፈተና ጊዜ ለቃሉ እየታዘዝን በመኖራችን ነው። ለጌታ መታመን ታዛዥነትን ያፈራል ተስፋን ያመጣል ይህም በፍጻሜው ደስታን እና ሰላምን ያመጣል።

አላማውን የለየ ውጤት ተኮር ጉባኤ❗️
+--------------------- +
በምዕራብ ሐረርጌ ሀገረ ስብከት በበዴሳ መካነ ሰላም ቅድስት ማርያም ቤተክርስቲያን ከሕዳር 27-29 ለ3 ተከታታይ ቀናት የተዘጋጀው ትምህርተ ወንጌልና ሥልጠና እጅግ ግሩም በሆነ መልኩ ተጠናቋል። ይህ ጉባኤ ለየት የሚያደርገው አስቀድሞ ልዩ ትኩረት የተሰጠበት ተግባር ተኮር መሆኑ ነው። ቀን ከ3:00 -9:00 ሰዓት ለማኅበረ ካህናት " ክብረ ክህነትና የንስሐ ልጅ አያያዝ" በተመለከተ፣ለማኅበራትና ለሰ/ት ቤት ወጣቶች ፤ለጽዋ ማህበራትና ለሀገር ሽማግሌዎች፣ ለካህናት የንስሐ ልጆች ደግሞ በምድብ በምድብ አስፈላጊውን መሠረታዊ ስልጠናዎች በተመሳሳይ ሰዓት በድንኳንና ባሉ አዳራሾች የተሰጡ ሲሆን። ከምሽት 11:00 -4:00 ሰዓት ደግሞ ትምህርተ ወንጌልና ዝማሬ ይከናወናል።

በዚህ ሁሉ የጉባኤ አዘጋጆቹ ትጋትና ፍቅር፣የካህናቱ አንድነትና ለለውጥ የሚያሳዩት ትጋት፤የምእመናን ያለመሰላቸት ከስልጠና እስከ ጉባኤ መገኘትና በትጋት መከታተል አስደናቂ ነበር።

የሀገረ ስብከቱ ምክትል ዋና ሥራ አስኪያጅ ክቡር መላከ ምሕረት ቀሲስ አበበ ከአርብ እስከ እሁድ ከስልጠናው እስከ ጉባኤው ከወረዳ ቤተክህነቱ ዋና ሥራአስኪያጅ መላከ ብርሃን እንግዳሰው ማሞ እና መላከ ሰላም ቀሲስ ደረሰ ክፍሌ የበዴሳ ሁለቱ አድባራት አስተዳዳሪ ከጉባኤ ሳይለዩ አበረታተዋል።

ይህንን መርሐግብር ያዘጋጃችሁ ፣በመሰናበቻ ቀን አልቅሳችሁ የሸኛችሁን ፣ፍጹም ፍቅርን ያሳያችሁን እህትና ወንድሞቻችንውዱ ወንድሜ መብሬ፣ደስታ፣እነ ተስፋ ሁላችሁንም የድካማችሁን ፍሬ ጌታ ያሳያችሁ።


✍️ኤፍሬም ሀብተ ማርያም(ሊ/ት) ዘደብረ ወገግ

አሰበ -ተፈሪ -ሐረርጌ
....

ዓመታዊው ተግባር ተኮር " የነገረ ንስሐ ጉባኤ" በትምህርርተ ወንጌል ተጀመረ❗️
+========== ================+
በናዝሬት መካነ ጻድቃን አቡነ አረጋዊ ቤተክርስቲያን ለተከታታይ 12 ወራት ሲያከናውን የነበረውን የርዕሰ ጉዳይ ጉባኤ የማጠናቀቂያ መርሐግብር የሆነው የንስሐ ጉባኤ በትምህርተ ወንጌል ዛሬ ተጀምሯል። ትምህርቱ በወጣቱ ትንታግ ወንጌላዊ በተወዳጁ የወንጌል ገበሬ መጋቤ ሐዲስ አድነው ወንድሙ ( Adinew Wondimu) " ንስሐም እንድትገባ ጊዜ ሰጠኋት"
(የዮሐንስ ራእይ 2:21) በማንሳት ለንስሐ የሚቀሰቅስ ፤መንገዱንም ገልጦ የሚሳይ እጅግ የሚያሳርፍ ጥልቅ ትምህርት ተሰጥቷል።

በዝማሬ ተወዳጁ ዘማሪ ዲያቆን እንዳለ ደረጀ (Endale Dereje) እና በደቂቀ ማርያም መዘምራን ድንቅ አገልግሎት ቀርቧል።

ክራር ተወዳጁ በኃይሉ ተሊላ (Behailu Telila)

❤ ነገ ሕዳር 18 ከ10:30 ጀምሮ 12 ካህናት አባቶች በተዘጋጀላቸው የመካነ ንስሐ ስፍራ ተቀምጠው ቀኖና እና ምክረ ካህን ይሰጣሉ።

#Share በማድረግ ላልሰሙ እናሰማ❗️

እንኳን ለቅዱስ ሚካኤል የመታሰቢያ ክብረ በዓል በሰላምና በጤና አደረሳችሁ። የእስራኤል ታዳጊያቸው፤የችግረኞች ረዳታቸው፤የሞት ደብዳቤን ቀያሪ፤ለጠሩት ፈጥኖ ደራሽ ሃያሉ ሚካኤል ለሀገራችን ሰላም አድነቷን ይመልስልን።

የኢትዮጵያ ኦርቶዶክስ ተዋህዶ ቤ/ክ በስልታዊ እቅድ፣ በተቋማዊ መነቃቃት፤ በአስተዳደራዊ ክትትልና እገዛ ዘመኑን በዋጀና ወጣቱን ማዕከል ባደረገ ወንጌል ላይ ካልሰራች ነገ ያስፈራኛል።

✍️የኤፍሬም እይታዎች

መንግሥተ ሰማያትና ገሃነመ እሳት !
...............................
ብዙ ጊዜ ከሞት በሗላ ስለ ሚኖረን ሕይወት ማሰብ አንፈልግም። አንዳንድ ጊዜ በውስጣችን ጥያቄው ቢመላለስም ደጋግመን ለማሰብ ፈቃደኞች አይደለም።
የሰው ልጅ ሞቱን ማሰቡ ስለ ዘለዓለማዊ ቤቱ እንዳይዘናጋ ያደርገዋል። ምክንያቱም የሰው ሕይወት በመወለድ ተጀምሮ በሞት የሚጠናቀቅ እንዳልሆነ ስንዱዋ እመቤት ቤተክርስቲያን በሚገባ አስተምራናለችና።

ከሞት በሗላ ሕይወት አለ። ወይ የመከራ ወይም የደስታ።
ገነትና ሲኦል ሗላም መንግተ ሰማያት እና ገሃነመ እሳት አሉ።
መንግሥተ ሰማያት አስቀድማ በመንፈሳዊ ሕይወት በሚመላለሱትና በሚመሩት መካከል ትገኛለች። ጌታችንና መድኃኒታችን ኢየሱስ ክርስቶስን ፈሪሳውያን ቀርበው " የእግዚአብሔር መንግሥት መቼ ትመጣለች? " ብለው በጠየቁ ጊዜ "የእግዚአብሔር መንግሥት በመጠባበቅ አትመጣም ከዚህ አለች ከዚያ የለችም አትባልም የእግዚአብሔር መንግሥት እነሆ በመካከላችሁ ናት" እንዳላቸው። ሉቃ 10÷20-21።

ታጥቦ ጸድቶ፣ነጩን ልብስ ለብሶ መብራቱን ይዞ ለሚጠብቅ ሰው መንግሥተ ሰማያት ከእርሱ ጋር ናትና።
መንፈሳዊ ሰው በመንፈስ ቅዱስ እየተመራ፤ በክርስቶስ እና በቤተክርስቲያን የሚያውቀውን ሕይወት የሚገኝበት ትምሕርት በሕይወት እየገለጠ፣ በዘመናት መጨረሻ ላይ ሰዎች ሁሉ እንዲያዩት በኃይል እና በክብር በግርማ መለኮቱ ጌታ ሲገለጥ ለማየት " አሜን ጌታ ሆይ ቶሎና እያለ ሙሽራውን በናፍቆት የሚጠብቅ ነው።

የክርስቶስ የመጨረሻ መምጣት በሰው ሁሉ ላይ ለመፍረድ ይሆናል። ያንጊዜ ጌታ የሚመጣው ለእያንዳንዱ እንደ ሥራው መጠን ለመክፈል ነው።

አሁን ሰዎች ያለ ክርስቶስ ፍቅር በሕይወታቸው (በአካለ ሥጋ) መኖር ይችላሉ። በነፍስ ሞተው በሥጋ ቆመው። ክርስቶስ፣ መንፈስ ቅዱስ፣ቤተ ክርስቲያን፣ መንፈሳዊ ሕይወት የሌለ እስኪመስል ድረስ ይህንን ሁሉ ዘንግተው ሊኖሩ ይችላሉ። እርሱን ባለማወቅ ሊመላለሱ ይችላሉ። ነገር ግን ቃሉ ይፈርድ ዘንድ ወንጌል ለሰው ልጅ ሁሉ ይሰበካል። "ጆሮ ያለው መስማትን ይስማ " እያለች ቤተክርስቲያን ታውጃለች።

ነገር ግን በዘመናት መጨረሻ ላይ ይህ ሁሉ በክርስቶስ ፍርድ ያበቃል።በመጨረሻም ክፉዎችም፣ መልካሞችም ፣ጻድቃንም ፣ኃጥአንም ፣የወጉትም የሰቀሉትም፤የተፉበትም የገረፉትም ፤ሰዎች ሁሉ የእርሱን ፊት በግርማው ያያሉ።

ስለ እኛ ሲል ስለ መዳናችን ከሰማይ የወረደውን ከድንግል ማርያም ከሥጋዋ ሥጋ ከነፍሷ ነፍስ ነስቶ የእኛን ሥጋ የለበሰውን ... በጴንጤናዊው በጲላጦስ ዘመን መከራ የተቀበለውን፣ እርሱን የገደሉት ክብሩን እየተመለከቱ “ሞቶ የነበረውንና ሕያው የሆነው” (ራዕይ 1፡17) እርሱ ክርስቶስ ለፍርድ በግልጥ ይመጣል።

በዚህም ጊዜ ጌታን ለሚወዱ፣የእርሱን መምጣት በናፍቆት የሚጠብቁ ፤በምግባር በሃይማኖት ያጌጡ፣መብራታቸውን ከዘይታቸው ጋር የያዙ ፤የእርሱ መምጣት ማለቂያ የሌለው ዘለዓለማዊ ፍጹም ደስታና እረፍት፣ የዘላለም ሕይወት ይሆንላቸዋል። በመንግሥተ ሰማያትም ከእርሱ ጋር በሕይወት ይኖራሉ።

በጉ ክርስቶስን የዘነጉ፣ ከምግባር ከሃይማኖት የተራቆቱ፤
ጌታን ለሚጠሉ፣የዘይት ማድጋቸው ባዶ የሆነ፤ መብራታቸውን ያልያዙ፤ ከጽድቅ ከቅድስና የተራቆቱ፤ ለዘለዓለም ማለቂያ በሌለው ስቃይ ፤ያለ እረፍት እግዚአብሔርን አጥተው፤ ከክርስቶስ መንግሥት ተለይተው የዘላለም ሞት ያገኛቸዋል። በገሃነመ እሳትም ከግብር አባታቸው ከዲያብሎስ ጋር ወደ ሥቃይ ይጣላሉ።

በእግዚአብሔር እውነተኛ ፍርድም ከእዚህ ዓለም አምሮትና ምኞት የራቁ፤ለጽድቅ ሥራ የመነኑ ፣በእምነት ያጌጡ በመጨረሻ መለኮታዊ የፍርድ ፍጻሜ የዘለዓለም ሕይወት ያገኛሉ። ዓለምና አምሮቷ ያታለላቸው፣ደሃ የበደሉ ፍርድ ያጓደሉ፣ከሕገ እግዚአብሔር ፈቀቅ ያሉ፣በእምነትና ምግባር ያላጌጡ ሁሉ ለራሳቸው፣ለዘለዓለም ቤታቸው ጥሪት አልቋጠሩምና ለዘለዓለም ማለቂያ በሌለው ስቃይ ቅጣታቸውን እና ሞታቸው ይሆናል። የእነርሱም ፍርድ “ልቅሶና ጥርስ ማፋጨት” ወዳለበት ይሆናል። (ማቴ 25 )

በዚህን ጊዜ የሰው ልጅ መላእክቱን ይልካል ከመንግሥቱም ስንዴውና እንክርዳዱን እንዲለዩ ስንዴውን ወደ ጎተራ (መንግሥተ ሰማያት) እንክርዳዱንም ወደ እቶን አሳት (ገሃነመ እሳት) ይጥሉአቸዋል። በዚያ ሰዎች ያለቅሳሉ ጥርሳቸውንም ያፋጫሉ። ያን ጊዜ ጻድቃን በአባታቸው መንግሥት እንደ ፀሐይ ያበራሉ (ማቴ 13፡41–43)።

በእግዚአብሔር መንግሥት መምጣት ኃጢአተኞችን የሚበላው “እሳት” በቅዱሳን ላይ በድምቀት የሚያበራው “እሳት” ነው። የእግዚአብሔር ፍቅር "እሳት" ነው። (ዕብ 12:29) " ይህ "እሳት" እግዚአብሔርን ለሚወዱ እና ፈቃዱንም ለሚፈጽሙ/ለፈጸሙ በእርሱ ውስጥ ያሉትን ፍጥረታት ሁሉ ለሚወዱ የሚያበራ ብርሃን እና የማይነገር ደስታ የሚሰጥ እሳት ነው። እግዚአብሔርን ለማይወዱ እና ጨርሶ ፈቃዱንም ላልፈጸሙ፣ ይህ “የሚበላ እሳት" ነው።

ስለዚህ እግዚአብሔር ሰውን በቁሳዊ እሳት ወይም አካላዊ ሥቃይ እንደማይቀጣው የቤተክርስቲያን መንፈሳዊ ትምህርት እንደሆነ እንረዳለን። እሳቱ ከዚህም ያበሰ
" እግዚአብሔርን ማጣት" ያስከተለው እረፍት የማይሰጥ የሚያቃጥል ማብቂያ ማለቂያ የሌለው የእሳት ስቃይ ነው።

በመንግሥተ ሰማያት ደግሞ በቅዱሳን ላይ የሚያበራ፣ በአማናዊት ምስራቅ በድንግል ማርያም በኩል የወጣ የጽድቅ ጸሐይ ክርስቶስ እያበራ፣ማለቂያ ፣ማብቂያ በሌለው በዘለዓለማዊ ደስታ ውስጥ ሆነን ያለ ማቋረጥ በቤተክርስቲያን ሐብረት ውስጥ ከድንግል ማርያም ጋር ከቅዱሳኑ ጋር በጌታ ቀን በጌታ ፊት ለዘለዓለም በምስጋና እንኖራለን።

❤ተወዳጆች ሆይ እናንተስ በየት መኖር ትፈልጋላችሁ ?

👉በመንግሥተ ሰማያት ወይስ በገሃነመ እሳት ?

#መልሳችሁ :- በመንግሥተ ሰማያት ከሆነ ጌታ መቼ እንደሚመጣ አታውቁምና ነጩን ልብስ ለብሳችሁ መብራታችን ይዛችሁ ፤በጋኖቻችሁ ዘይትን ሞልታችሁ ተቸጋጅታችሁ ጠብቁ።ተዘጋጅተን እንጠብቅ።
👉 @ephrem_views
@ephrem_views 👈

✍️ ኤፍሬም ሀብተ ማርያም
የህዳር ሥላሴ ተጻፈ
7/3/2016 አምና

#መካነ_ወንጌል_ደብረ_መዊዕ❗️
በአዲስ አበባ ሀገረ ስብከት በጥንታዊው በደብረ መዊዕ አዲሱ ሚካኤል ካቴድራል(መርካቶ) ለ6 ተከታታይ ቀናት በተዘጋጀው ዐቢይ ጉባኤ የመጀመሪያው ቀን አጅግ ግሩም የአገልግሎት ጊዜን አሳለፍን። ጉባኤውን ያስፋልን።

https://youtu.be/XsL1T6xLbfU?si=npeNycIAAeqYRD2D

" #የስም_ክርስቲያን_ነበርኩ "
...................................
👉 ጊዜ ሰጥተው ያንብቡት -👉Share በማድረግ ያጋሩት!

" ይገርምሃል ያኔ ወጣት ሳለሁ ለእግዚአብሔር በሕይወቴ ውስጥ ቦታ ሰጥቼ ለክርስትናዬም ዋጋ ሰጥቼ አልኖረውም ነበር ። ኦርቶዶክስ ነበርኩ ግን በስም ብቻ። አዘውትሬ ወደ ቤተ ክርስቲያን አልሄድም ፣ አልጾምም፤ የንስሓ አባትም አልነበረኝም።
ቢሆንም ግን በውስጤ ከፍ ያለ ሃይል እንዳለ ሁል ጊዜ ይሰማኝ ነበር፣ ግን ይህ የሩቅ ምስጢር ሆኖ የቀረ ነው። አንዳንድ ጊዜ አምላክ እንዳለ እና እሱን ለማወቅ የሚያስችል መንገድ ይኖር ይሆን ብዬ አስብ ነበር።
ያደግኩት ጥብቅ ማህበራዊና ሃይማኖታዊ መስተጋብር ባለባት በናዝሬት ከተማ 09 ነው። ቤተ ክርስቲያንም አልፎ አልፎ ቢሆንም እሄዳለሁ። ግን በልማድ ሲሄዱ ለመሄድ።

ኦርቶዶክስ ብሆንም ስለ ሃይማኖቴ ምንም የማውቀው ነገር ስለሌለ ወደ ሌሎች እምነትም አማትር ነበር እውነቱን ፍለጋ። ከሆነ ጊዜ በሗላ መንፈሳዊ እውቀትን በጥልቀት ለመረዳትና ለማወቅ ፈለግሁ። የትኛው ሃይማኖት ነው ትክክል የሚለውን ማጥናት ጀመርኩ። ማንበብ ፣ ማሰላሰልን ተያያዝኩ። በዚህ ጊዜ ሁሉ ከኦርቶዶክስ ቤተ ክርስቲያን ጋር የነበረኝ ግንኙነት አነስተኛ ነበር።

ለጥያቄዬ መልሱ በኦርቶዶክስ ተዋህዶ ቤተክርስቲያን ውስጥ በአፍንጫዬ ስር እንደነበረ አልተገነዘብኩም ነበር። ኦርቶዶክስን የወረስኩት ከቤተሰብ ነው። የኔ ቤተሰቦች ጠንካራ መሠረተ እምነት ነበራቸው።
ይህም በተግባር የተገለጠ በሕይወት የሚኖር እንጂ በቃል የሚነገር አልነበረም። ለእነርሱ ቤተክርስቲያን እና የህይወት እንቅስቃሴዎች ሁሉም የተዋሃዱ ነበሩ እንጂ በጥቅስና በማስረጃ የተደገፉ አልነበሩም። የሚኖር ክርስትና ነው ያላቸው። ለካም ክርስትና ከእውቀት በላይ የሚኖር ነው።

የኔ ሕይወት ግን በጥያቄ የተሞላ ነበር። የቱ ነው እውነት ?
አንዳንዴም ለዘለዓለም በሕይወት እንደምኖር ይሰማኝ ነበር። በሥጋ የማልሞት።

ሟች የመሆኔ እውነታ ስለ ሕይወት ዓላማ ጥያቄዎችን ማንሳት የጀመርኩት ሚስት ካገባሁ ጀምሮ በጥቂቱ ሲሆን 50 ዓመት ገደማ ስደርስ ግን እየበረታ መጣ። ከሚስቴና ከልጆቼ ጋር በየጊዜው ወደ ቤተ ክርስቲያን ስሄድ በኦርቶዶክስ ሥርዓት እና ትምህርት እየተማረኩ መጣሁ።

ወደ 40 እና 50 ዕድሜ የሚጠጉ፣ ብዙ ሰዎች የሕይወትን ዓላማ ማሰላሰል ይጀምራሉ። ይህ ሕይወት ለዘላለም እንደማይቆይ መገንዘብ ይጀምራሉ. ዕድለኛ የሆኑት ይህ ሕይወት ለሚመጣው የዘላለም ሕይወት መዘጋጃ ብቻ እንደሆነ ይማራሉ። እኔም እግዚአብሔር አብ አንድያ ልጁን ኢየሱስ ክርስቶስን ስለ ሰው ልጆች ፍቅር መስዋዕት አድርጎ መስጠቱን በተግባር የተማርኩት በዚህ ጊዜ ነበር።

ይህም ነገረ እግዚአብሔርን ማወቅ፣መረዳትና እና ከእርሱ ጋር አንድ መሆን ይቻላል የሚለው ሀሳብ በኦርቶዶክስ እምነት ያለ ማዕከላዊ እውነት እንደሆነ ተማርኩ። እግዚአብሔርን ማወቅ የሚቻለው በሕጉ በኩል፣ ከምስጢራት ሱታፌ በማድረግ፤የሚያውቁትን እውነት በሕይወት በመኖር ወደ መለኮታዊ ባሕርይ ተካፋይነት ማደግ እንደሚቻል በደንብ ተገነዘብኩ።

አንድ ሰው በትክክል ክርስትናን ሲኖረው ወደዚህ እውነት እና ሕይወት እንደሚደርስ ገባኝ።

አንድ ሰው ከእግዚአብሔር ጋር ለመዋሃድ ትክክለኛውን መንገድ ኦርቶዶክስ እንደሆነ ገባኝ።በዚህም ፈውስ የሚያስፈልገው የታመመ ነፍስ እንዳለችኝ ተረዳሁ። አሁን በጣም ደስ ብሎኛል ምክንያቱም ህመሜን አግቼዋለሁ። መድኃኒቱንም አውቄዋለሁ። ምክንያቱም በክርስቶስ የተመሰረተችው ቅድስት ቤተክርስቲያን የጠፋሁትን እኔን መፈለግ ዓላማዋ ይህ እንደሆነ ተገንዝቢያለሁና።

ቤተክርስቲያን ወደ ዘለዓለማዊ ሕይወት የምታደርስ የእግዚአብሔር መንገድ እንደሆነች ባወቅኩበት ቅጽበት ከእርሱ ጋር አንድ ለመሆን መንፈሳዊ መመሪያን በካህናት በኩል ፈለግሁ ።እናም ክርስቶስ በቤተክርስቲያን በኩል የሰጠንን የህይወት መንገድ መከተል ጀመርኩ።ለቤተሰቤም ንስሐ አባት ያዝኩ። እኔም ቤተሰቤም የንስሐ ሕይወትን ጀመርን። ከምስጢራትም ተሳተፍን። ጋብቻችን በቅዱስ ቁርባን ዳግም በልጆቻችን ታጅበን አደስን።

በእውነት በሂደት የቤተክርስቲያንን ታሪኳን ሳጠና፣ የኦርቶዶክስ ቤተ ክርስቲያን ከክርስቶስ በሐዋርያት በኩል የተላለፈውን ይህን ሁለንተናዊ፣ ምሥጢራዊ እና የማይለወጥ እውነተኛ መንገድ ሰንሰለት ጠብቃ በትውፊት ቅብብሎሽ እዚህ እንደደረሰች ተረድቻለሁ። የሚገርመው ከልማድ ጉዞ ወደ እውነተኛ የእምነት መመላለስ ወደ ኦርቶዶክስ ቤተክርስቲያን መግባት ስጀምር ሁሉም አምልኮአዊ ሥርዓቶች ሰማያዊ ሥርዓት በምድር እየተከናወነ እንደሆነ ትገነዘባለህ።
የዕጣን ሽታ፣ የዝማሬው ውበት፣ በተመስጦ የሚደረገው ጸሎት፣ የቅዳሴው ሥርዓት ፤ማኅሌቱ ሰዓታቱ በቃ ሁሉም ነፍስህን ከሥጋህ የሚለዩ ድንቅ ሥርዓት ናቸው። ከዚህ ሕብረት ነበር ነፍሴ ተለይታ የኖረችው። አሁን እኔም ቤተሰቤም ከምስጢራት እሁድ እሁድ እንሳተፋለን። በሰዓታቱ በማኅሌቱ አንለይም።

ከመሸ መጣሁ። ዕድሜዬ ከገፋ ደጅ ጠናሁህ ብዬ ሳለቅስ ባለቤቴ " አርፍዶ ለመጣም ፣ቀድሞ ለመጣም ዋጋ ከፋዩ ቸርነውና ዋጋውን አያሳንሰውም " ትለኛለች። ከዚህ ሰማያዊ ምስጢርና አምልኮ አንድነት ሳልሳተፍ ምነው አረፍዱኩ ብዬ ሁሌም እቆጫለሁ። የስም ክርስቲያን ብቻ ሆኜ የኖርኩበት ዕድሜ፣ ማስቀደስ እየቻልኩ በዘፈንኩበት ዕድሜዬ፣ መስገድ እየቻልኩ የጨፈርኩበት ዘመኔ በዕለተ ሰንበት ሰዎች ወደ ቅዳሴ ሲሄዱ ወደ መጠጥ ፣ወደ መሸታ ቤት መሄዴ ሁሌም ይቆጨኛል። የንስሓ አባቴ ይህን ስል ሲሰሙ " የማይጠቅም ጸጸት ነው ፣ቀጣዩ ሩጫህን በትዕግሥት ሩጥ። ክርስትና ሩጫውን ከመጀመሪያውም ጀምር ከመኻል ማጠናቀቁ ላይ ነው ምስጢሩ ስለዚህ በቀጣዩ ጉዞህ በርታ ልጄ" እያሉ ያበረታቱኛል።

ዛሬ ቤቴም እኔም በእውነተኛው ሰላም በክርስቶስ ተባርከናል። ከጠፋሁበት የፈለገኝ፤እርሱን ካለማወቅ የጨለማ ሕይወት አውጥቶ ወደ ሚደንቅ ብርሃን ያመጣኝ ፣ስረሳው ያልረሳኝ፣ብተወው ያልተወኝ እግዚአብሔር የተመሰገነ ይሁን።" አለኝ። እኔም ስለ እርሱ አምላኬን አመሰገንኩ። ብዙ ተጨዋወትን ፤ብዙም ነገር አወጋን። ቀጠሮ ይዘን ተለያየን።

ለካ ክርስቲያን ሆኖም የስም ክርስቲያን መሆን አለ??

ተወዳጆች ሆይ እኛስ የቱ ጋር እንሆን ?

👉 እሩቅ ወይስ የቅርብ ሩቅ ?

ኤፍሬም ሀብተማርያም (መ/ር)
👉 @ephrem_views

✍️ናዝሬት-አዳማ ኢትዮጵያ

በሞቱ ሞትን ሽሮ በስልጣኑ ሙስና መቃብርን ድል አድርጎ የተነሳው፤ የማንነታችን ምክንያት የህይወታችን ምስጢር ፤ጀርባው ስለእኛ የደማ፤ በደሙ ያነጻን፤ ዘለዓለማዊ የልጅነት ክብርን ያደለን ቸሩ መድሃኔ ዓለም ክብርና ምስጋና ለእርሱ ይሁን🙏ዘመን የማይቆጠርለት፤ ለግዛቱ ወሰን የሌለው፤ በፍቅሩ አለምን የሚገዛ በያላችሁበት ሰላማችሁን ያብዛላችሁ!❤እንኳን አደረሳችሁ🙏

@ephrem_views
@ephrem_views
....
....

ለመጀመሪያ ጊዜ በአዳማ ከተማ የተዘጋጀው "ምዕራግ " ትምህርተ ወንጌልና ኦርቶዶክሳዊ የኪነ ጥበብ መርሐግብር እጅግ በአስደናቂ መልኩ ተጠናቀቀ 🙏❤🙏

https://vm.tiktok.com/ZMhxoQRsd/

አስደናቂው አባት❗️

" ለምን ታለቅሳለህ? "
.........................
ዛሬ ጥቅምት 20 የቅዱስ ዮሐንስ ሐጺር እረፍቱ ነው❗️

ታላቁ አቡነ ዮሐንስ ሐጺር ቁመታቸው አጭር ስለነበር ‹‹ዮሐንስ ሐጺር›› አጭሩ ዮሐንስ ተብለዋል፡፡ በ18 ዓመታቸው አስቄጥስ ገዳም ገቡ።‹‹በምድር ያለ መልአክ ነው›› በማለት አባ ባይሞይ ይመሰክርለት ነበር።

አቡነ ዮሐንስ ሐጺር ሌላው የሚታወቁበት አንድ ትልቅ ግብራቸው የአትናስያን ሞት ወደ ሕይወት የለወጡበት ነው፡፡ አትናስያ መጀመሪያ ላይ ጻድቅ ነበረች፣ በገንዘቧ ገዳማትንና መነኮሳትን የምትረዳ አገልጋዮችን የምትራዳ ደግ ሴት ነበረች ነገር ግን በኋላ ላይ ጠላት ሰይጣን በወጥመዱ ጣላትና በዝሙት እንድትወድቅ አደረጋት፡፡ ዘማዊ ሴትም ሆነች፡፡ በቀድሞ የቅድስና ሕይወቷ የሚያውቋት መነኮሳት ሁሉ መክረው ሊመልሷት ቢሞክሩ አልመለስላቸው አለች፡፡ ይልቁንም ሊመክሯት ሲመጡ እየሳቀችባቸው ታሾፍባቸው ጀመር፡፡ በመጨረሻም መነኮሳቱ አቡነ ዮሐንስ ሐጺርን ላኳቸው፡፡ እርሳቸውም ተራ ሰው መስለው ወደ ቤቷ ገቡ፡፡ ለዝሙት የመጣ ተራ ሰው መስሏት በደስታ ተቀበለችው፡፡ ልታጫውተውም ስትሞክር ዮሐንስ ሐጺር ማልቀስ ጀመረ፡፡ ‹‹ለምን ታለቅሳለህ?›› ብትለው ‹‹መልክሽ ደስ ብሎኝ›› አላት፡፡ እርሷም ‹‹ታዲያ ደስ የሚል መልክ ያስቃል እንጂ መች ያስለቅሳል?›› ስትለው ‹‹የለም ነገ ገሃነም እንደምትወርጂ ታይቶኝ ነው፣ እነሆ የሰይጣን ማደሪያ ሆነሽ ብዙ አጋንንት በሰውነትሽ ሲወጡ ሲወርዱ አያለሁ…›› እያሉ ብዙ መክረው አስተማሯት፡፡ እርሷም ዓይነ ልቡናዋ ተከፍቶላት ወደ ልቧ ተመለሰች፡፡

አትናስያም በጣም ደንግጣ በመጸጸት ‹‹ታዲያ ምን ባደርግ ይሻለኛል?›› አለቻቸው፡፡ ‹‹ንስሃ ግቢ›› አሏት፡፡ ‹‹በውኑ አሁን እኔ ምሕረት አገኛለሁን? ኃጢያቴ ብዙ ነው፣ ከእግዚአብሔር ጋር ማን ያስታርቀኛል?›› ስትላቸው ‹‹እኔ አስታርቅሻለሁ ተከተይኝ›› ብለው ወጥተው ሄዱ፡፡ እርሷም ልዋል ልደር ሳትል በሯ እንደተከፈተ ቤት ንብረቷን ትታ አባ ዮሐንስን ተከተለቻቸው፡፡ እሳቸው ላይ ለመድረስ እየሮጠች ስትሄድ በልስላሴ የኖረ እግሯ እየቆሰለና እየተሰነጣጠቀ ደሟ እንደ ውኃ በመሬት ላይ ፈሰሰ፡፡ ሲመሽ ከገዳሙ በር ላይ ደርሳ የምታርፍበትን ቦታ ለይተው ሰጧትና እዚያ ተኛች፡፡ አባ ዮሐንስ ሌሊት ለጸሎት ሲነሡ መላእክት ሲወጡ ሲወርዱ ተመልክተው ‹‹ይህ የማየው ነገር ምንድን ነው?›› በማለት አንዱን መልአክ ጠየቁት፡፡ ‹‹ትላንትና አንተን ተከትላ የመጣችው ሴት ሞታ ነፍሷን እያሳረግን ነው›› አላቸው፡፡ ‹‹እግዚኦ ንስሓ ሳትገባ›› ብለው ደነገጡ፡፡ መልአኩም ‹‹አንተን ልትከተል ገና አንድ እግሯን ከቤት ስታወጣ ኃጢአቷ በሙሉ ተፍቆላታል፤ አሁን ወደ ገነት እየወሰድናት ነው›› አላቸው፡፡ አባ ዮሐንስ ሐጺርም ተገርመው እግዚአብሔርን እያመሰገኑ ‹‹የመቃብሯስ ነገር እንዴት ነው?›› ብለው ጠየቁት፡፡ መልአኩም ‹‹አንበሶች ይመጣሉ የመቃብሯን ቦታ ለክተህ አሳያቸው›› ብሏቸው ተሰወረ፡፡ አንበሶቹም መጥተው አባ ዮሐንስ ቦታውን ለክተውላቸው አንበሶቹ መቃብሩን ቆፍረው በክብር ቀብረዋታል፡፡ በአንዲት ዕለት ወደ በዓታቸው ሲገቡ ጌታችን ተገልጦላቸው ዕለተ ሞታቸው መቅረቡን ከነገራቸው በኋላ ታላቅ ቃልኪዳን ሰጥቷቸው ጥቅምት 20 ቀን 409 ዓ.ም በሰላም ዐርፈዋል፡፡

👇 ቴሌግራም 👇
@ephrem_views
@ephrem_views
................

https://www.tiktok.com/@ephrata79/video/

https://youtu.be/Yl-ytcw_7sA?si=S670tPz6SBaLlhRe

Live stream started

የሐዋርያው የቅዱስ ያዕቆብ መልእክት ተከታታይ ትምህርት!
................
ዛሬ ምሽት ይቀጥላል❗️

ከምሽት 3:00 ሰዓት ጀምሮ በዚሁ ገጽ በOnline ይጠብቁ።

👉ለሌሎች እንዲደርስ Share / Forward ያድርጉ❗️

    👇ትምህርቱን ለመከታተል በዚህ ይቀላቀሉ 👉 

@ephrem_views
..........

Live stream finished (48 minutes)

Live stream started

"ቃለ ሕይወት ያሰማልን" ማለት ምን ማለት ነው?
....................... ................ ..................
በጉባኤ ወይም በልዩ ልዩ ስፍራ ሰባኪው ወንጌል አስተምሮ ሲያበቃ እኛም ለመምህሩ" ቃለ ሕይወት ያሰማልን" ስንል መምህሩም እንዲህ በማለት ይመልሳል።
" አሜን አብሮ ያሰማን" በማለት።
ይህንን ምርቃት የምናስተላልፈው በአብዛኛው የእግዚአብሔርን ቃል ላስተማረን መምህር ወይም ማንኛውም ቃለ እግዚአብሔር ላስተማረን ወይም ላካፈለን ሰው ሊሆን ይችላል።

ይህን ምልልስ ባለመረዳት ብዙዎች የሚመስላቸው በልማድ የምንናገረው ቃል ወይም ለጉባኤ ድምቀት ነው። ነገር ግን ቃለ ህይወት ያሰልማልን ስንል ድንቅና ዋጋ የሚያሰጥ ምርቃት ለመምህሩ እያቀረብን እኛም ከመምህሩ እየተቀበል ነው።

"ቃለህይወት ያሰማልን" የሚለው ምርቃት በእኛ በኢትዮጵያ ኦርቶዶክስ ተዋህዶ ምዕመናን ዘንድ ከተለመዱት ምርቃቶች መካከል አንዱ ነው።

❤ለመሆኑ "ቃለ ሕይወት"ምንድን ነው?

"ቃለ ሕይወት ያሰማልን" ስንልስ ምን ማለታችን ነው?

"ቃለ ሕይወት" ማለት በአማርኛ "#የህይወት_ቃል" ማለት ሲሆን ..ቃለ ህይወት ያልሰማልን ማለታችን ደግሞ ቃሉን አድምጠው ፤ በተማሩት ትምህር የእግዚአብሔርን ቃል ጠብቀው እንደ ቃሉ ለኖሩ ልብን የሚመረምር አምላክ
" እነሆ፥ በቶሎ እመጣለሁ፥ ለእያንዳንዱም እንደ ሥራው መጠን እከፍል ዘንድ ዋጋዬ ከእኔ ጋር አለ።" ራእ 22:12 እንዳለን ....የሰው ልጅ በክብር በግርማ መለኮቱ ተገልጦ በሚመጣበት ጊዜ (ማቴ.25፥31) በጎቹን ከፍየሎች በሚለይበት ጊዜ፤ ጻድቃንን በቀኙ ኃጥአንንም በግራው አቁሞ ሲፈርድ በግራው የቆሙት የሚደርስባቸውንና የሚሰሙትን የወቀሳ ቃል ሳይሆን በቀኙ የቆሙት የሚሰሙትን .. (ማቴ.25፥34) " ኑ እናንተ የአባቴ ቡሩካን ኑ ዓለም ከተፈጠረበት ጊዜ ጀምሮ የተዘጋጀላችሁን መንግሥት ውረሱ። " ብሎ ጌታ የሚፈርደው ፍርድ የሕይወት ቃል ይባላልና ለእኛ ከማር ከወተት የጣፈጠውን ቃለ እግዚአብሔር እንዳሰማኸን አንተም በሥራ ገልጠኸው ጌታ ለፍርድ ሲመጣ የተወደደ፣ ዘለዓለማዊ የሚሰጥ ቃል ያሰማህ፤ ከቀኙ ከሚቆሙት ቅዱሳን ይደምርህ ማለታችን ነው።

መምህሩም መልሶ :-" አሜን አብሮ ያሰማን " ማለቱ የተማራችሁት ትምሕር የሰማችሁት የእግዚአብሔር ቃል እንዲፈረድባችሁ ሳይሆን እንዲፈረድላችሁ ያድርጋችሁ። የተማራችሁትን በሥራ ገልጣችሁ "ተርቤ አብልታችሁኛል ...." ብሎ ለድኅነት ለሕይወት ይሁናችሁ " ሲለን ነው።
አንድም እኔም አስተምሬ እናንተም ተምራችሁ ተስፋ የምናደርጋትን መንግሥተ ሰማያት አብረን ለመውረስ ያብቃን ሲለን ነው።
ስለዚህ ሁልጊዜ ቃለ ሕይወት የሆነውን የእግዚአብሔር ቃል ያሰሙንን " ቃለ ሕይወት " ያሰማልን በማለት በምላሹ የሚገኘውን በረከት ለእኛም እንውሰድ።

🙏 #Share በማድረግ ለሌሎችም እናሳውቅ!!!

👉 ለመቀላቀል 👉 @ephrem_views

✍️የኤፍሬም እይታዎች

በድጋሜ የተለጠፈ

የቅዱስ ያዕቆብ መልእክት
ምዕ 3÷1-12 የዕለቱ ጥናት
+=================+
"ወንድሞቼ ሆይ፥ ከእናንተ ብዙዎቹ አስተማሪዎች አይሁኑ፥ የባሰውን ፍርድ እንድንቀበል ታውቃላችሁና። ሁላችን በብዙ ነገር እንሰናከላለንና፤ በቃል የማይሰናከል ማንም ቢኖር እርሱ ሥጋውን ሁሉ ደግሞ ሊገታ የሚችል ፍጹም ሰው ነው። እነሆ፥ ፈረሶች ይታዘዙልን ዘንድ ልጓም በአፋቸው ውስጥ እናገባለን፥ ሥጋቸውንም ሁሉ እንመራለን።

እነሆ፥ መርከቦች ደግሞ ይህን ያህል ታላቅ ቢሆኑ በዐውሎ ነፋስም ቢነዱ፥ የመሪ ፈቃድ ወደሚወደው ስፍራ እጅግ ታናሽ በሆነ መቅዘፊያ ይመራሉ። እንዲሁም አንደበት ደግሞ ትንሽ ብልት ሆኖ በታላላቅ ነገር ይመካል። እነሆ፥ ትንሽ እሳት እንዴት ያለ ትልቅ ጫካ ያቃጥላል።

አንደበትም እሳት ነው። አንደበት በብልቶቻችን መካከል ዓመፀኛ ዓለም ሆኖአል፤ ሥጋን ሁሉ ያሳድፋልና፥ የፍጥረትንም ሩጫ ያቃጥላል፥ በገሃነምም ይቃጠላል።

የአራዊትና የወፎች የተንቀሳቃሾችና በባሕር ያለ የፍጥረት ወገን ሁሉ በሰው ይገራል፥ ደግሞ ተገርቶአል፤ ነገር ግን አንደበትን ሊገራ ማንም ሰው አይችልም፤ የሚገድል መርዝ የሞላበት ወላዋይ ክፋት ነው።

በእርሱ ጌታንና አብን እንባርካለን፤ በእርሱም እንደ እግዚአብሔር ምሳሌ የተፈጠሩትን ሰዎች እንረግማለን፤
ከአንድ አፍ በረከትና መርገም ይወጣሉ። ወንድሞቼ ሆይ፥ ይህ እንዲህ ሊሆን አይገባም።

ምንጭስ ከአንድ አፍ የሚጣፍጥንና የሚመርን ውኃ ያመነጫልን? ወንድሞቼ ሆይ፥ በለስ ወይራን ወይስ ወይን በለስን ልታፈራ ትችላለችን? ከጨው ውኃም ጣፋጭ ውኃ አይወጣም።"

እግዚአብሔር ቢፈቅድና ብንኖር ነገ ምሽት ማብራሪያውን እንመለከታለን። ነገ ዕለተ ሰንበት (ማኅሌተ ጽጌ) በመሆኑ መርሐግብር አይኖረንም። የምትችሉ በአቅራቢያችሁ በሚገኝ ቤተክርስቲያን ተገኝታችሁ የወላዲተ አምላክ የስደቷን ወራት መታሰቢያ የምስጋና ሌሊት ከበረከቱ ተሳተፉ።ያልቻላችሁ ጠዋት በቅዳሴ ተገኝታችሁ ከበረከቷ ተቀበሉ።

የቅዱስ ያዕቆብ በረከቱ ይደርብን።

Live stream finished (1 hour)

Live stream started

በትዕግሥት እጠብቅሃለሁ!
.......................... .......
ክርስቲያን በማስተዋል የሚራመድ፤በጥበብም የሚጓዝ ነው። መንገዱ የተቃና ፍጻሜውም ያማረ እንዲሆን ደግሞ ፍጹም ታጋሽ መሆን አለበት።በነገር ሁሉ ለእግዚአብሔር መታዘዝ ትዕግስትን ይጠይቃልና። የተወደደ ሐዋርያ ቅዱስ ጳውሎስ ትዕግሥትን “ከመንፈስ ፍሬዎች” አንዱ አድርጎ ይዘረዝረዋል (ገላ 5፡22)።

በጥቅሉ ትዕግስት ማለት በጊዜውም ያለጊዜው የሚመጣን መከራን በጽናት መታገስ ማለት ነው።በሁሉም መከራዎች እና ፈተናዎች በድፍረት እና በተስፋ ጌታን መጠበቅ ማለት ነው። ትእዛዙን ለመጠበቅ እና ፈቃዱን ለመፈጸም በየዕለቱ በምናደርገው ጥረት ቀስ በቀስ በእግዚአብሔር ጸጋ ማደግ ራስን እና ሌሎችን መታገስ ማለት ነው። ታጋሾች ብቻ እንደ ክርስቶስ እምነት በልባቸው ውስጥ ከተዘሩት የእግዚአብሔር ቃል ዘሮች ፍሬ ያፈራሉ።

በመልካሙም መሬት ላይ ቃሉን ሰምተው በቅንነትና በበጎ ልብ የሚይዙት በትዕግሥትም ፍሬ የሚያፈሩ እነዚህ ናቸው (ሉቃስ 8፡15)።

በስደት ጊዜ፣በእስራት ጊዜ፣በማጣት ጊዜ፣የምንይዘው የምንጨብጠው ሲጠፋን፤ ችግር እንደተራራ ሲገዝፍን ክርስቲያን ነንና በትግሥት ከክርስቶስ መልስ መጠበቅ።
ስለ ስሙ ብንጠላ፣ ብንገፋ፣ ክፉዎች ቢነሳሱ፣አሕዛብም ቢያጉረመርሙ እርሱን በትዕግሥት መጠበቅ።

" እንግዲህ፥ ወንድሞች ሆይ፥ ጌታ እስኪመጣ ድረስ ታገሡ። እነሆ፥ ገበሬው የፊተኛውንና የኋለኛውን ዝናብ እስኪቀበል ድረስ እርሱን እየታገሠ የከበረውን የመሬት ፍሬ ይጠብቃል።እናንተ ደግሞ ታገሡ፥ ልባችሁንም አጽኑ፤ የጌታ መምጣት ቀርቦአልና።ወንድሞች ሆይ፥ እንዳይፈረድባችሁ እርስ በርሳችሁ አታጉረምርሙ፤ እነሆ፥ ፈራጅ በደጅ ፊት ቆሞአል። ወንድሞች ሆይ፥ የመከራና የትዕግሥት ምሳሌ የሆኑትን በጌታ ስም የተናገሩትን ነቢያትን ተመልከቱ። እነሆ፥ በትዕግሥት የጸኑትን ብፁዓን እንላቸዋለን፤ ኢዮብ እንደ ታገሠ ሰምታችኋል፥ ጌታም እንደ ፈጸመለት አይታችኋል፤ ጌታ እጅግ የሚምር የሚራራም ነውና።" ያዕ 5÷7-11። ክርስቲያን ሁልጊዜም ልቡ ጌታ ሆይ እንደ እዮብ ብፈተንም፣እንደ ዳንኤል ወደ አናብስት ጉድጓድ ብጣል፣ አንደ ሠለስቱ ደቂቅ ወደ እሳት ብወርድም አንተ ከኔ ጋር ነህና በትዕግሥት እጠብቅሃለው የሚል ነው መሆን ያለበት።

ብዙ ጊዜ ሰዎች ወደ መንፈሳዊ ህይወት ሲቀርቡ መሠረቱ ትዕግስትና በጎነት መሆኑን ይረሳሉ። ሁሉንም ነገር መጸለይ፣ማስቀደስ፣መጾም በጀመሩ ማግሥት መልስ ይጠብቃሉ። በትንሽ ጥረት እና በትንሽ ልፋት ሁሉም ነገር በአንድ ጊዜ ይጠብቃሉ።ክርስትና እንዲህ አይደለም እስከ መጨረሻው በትዕግሥት መጽናት ነው።

ብዙ ጊዜ፣ ደግሞ፣ መታገስ የሚፈልጉ ሰዎች በጎነት የእግዚአብሔር ጸጋ እና የመንፈስ ፍሬ መሆኑን ይረሳሉ። ከራሳቸው እና ከሌሎች ጋር በሚኖራቸው መስተጋብር በትዕግስት የሚገጥማቸውን ቢያልፉም የፈተናቸውን አካል ግን ለዋጋ ነው ለበጎ ነው ብለው በይቅርታ ልብ አያልፉትም።እንደነዚህ ያሉት ሰዎች ለነፍሳቸው ሰላም አያገኙም።በትዕግሥት ከሚያገኙት በረከትም ይዘገያሉ።

የትዕግስት በጎነት የሚገኘው በእግዚአብሔር ላይ በታመነ ልብ ጽናት ውስጥ ነውና። የጌታን ፈቃድ ብቻ በማድረግ ምንም ይሁን ምን "በመስቀል ላይ የመቆየት" ኃይል ነው. ትዕግስት ከእምነት፣ ተስፋ፣ ፍቅር፣ ትህትና እና ታዛዥነት ጋር የተዋሃደ ነው።
አንድ ሰው ትዕግሥትን ገንዘብ ለማድረግ በቤተክርስቲያን ውስጥ ከእግዚአብሔር ጋር በጾም፣ በጸሎት እና በኅብረት በየቀኑ የዛለ ማንነቱን ማደስ አለበት።

ክርስቲያን እግዚአብሔርን ለማስታወስ፣ በክርስቶስ ለመኖር እና ሁሉንም ነገር በእግዚአብሔር መንግስት ብርሃን ለማየት እራሱን ማዘጋጀት አለበት። አንድ ሰው መታገስ ከፈለገ ከክርስቶስ ጋር አንድ መሆን እና በመንፈስ ኃይል መኖር አለበት።

ቅዱስ ጳውሎስ " ለሰው ሁሉ ከሚሆነው በቀር ምንም ፈተና አልደረሰባችሁም፤ ነገር ግን ከሚቻላችሁ መጠን ይልቅ ትፈተኑ ዘንድ የማይፈቅድ እግዚአብሔር የታመነ ነው፥ ትታገሡም ዘንድ እንድትችሉ ከፈተናው ጋር መውጫውን ደግሞ ያደርግላችኋል " (1ኛ ቆሮ 10፡13)ይለናል።

ተስፋው አምላኩ የሆነ ፤በበደለም ጊዜ መመሸጊያውን ከእርሱ ዘንድ ያደረገ አምላኩን ሁልጊዜ "ከአንተ ወዴት እሄዳለው " የሚለው ቅዱስ ዳዊትም"ሸክምህን በእግዚአብሔር ላይ ጣል እርሱም ይደግፍሃል። እርሱ ጻድቅ እንዲናወጥ ፈጽሞ አይፈቅድም" (መዝ 55.22) ይለናል። ስለዚህ "ትዕግስት የጥበብ መንገድ ናት ወደ እግዚአብሔር የምንደርስባት። ነገር ግን "ትዕግስት መራራ ናት ፍሬዋ ግን ጣፋጭ ነው" ከእግዚአብሔር ዘንድ ያለ ትዕግስት ደስ የሚያሰኝ ነገር ማግኘት አንችልም። የተሻለውን ለመቀበል፣የበለጠውን ለማግኘት ፣የከበረውን ለመውሰድ ልባችንን በሰማይ በአርያም ካለው አምላካችን ጋር አጽንተን የምናቆይባት ጥበብ ትዕግሥት ናት።ጌታ ሆይ ከስጦታህ የሚያዘገየኝ ምንድን ነው? ትዕግሥት ማጣቴ፣አንተን ለመጠበቅ አለመፍቀዴ አይደለምን። አንተን በትዕግሥት የምጠብቅበትን የጸና ልብ፣ፈተናዎችን ሁሉ በትዕግሥት የምሻገርበት አቅም አንተ ስጠኝ ብለን በመጸለይ ጸንተን እንጠብቅ። ምክንያቱም የዘገየ ቢመስልም ጌታን የሚቀድመው የለም።

የከበረውን ሽልማት ለማግኘት በፊታችን ያለውን ሩጫ በትዕግሥት እንሩጥ።
@ephrem_views

✍️የኤፍሬም እይታዎች
ጥቅምት 1/2016
አዳማ-ኢትዮጵያ

በተደራራቢ አገልግሎት ምክንያት ዛሬ መርሐግብር አይኖረንም።ነገ ምሽት እንቀጥላለን።

የቅዱስ ያዕቆብ በረከት ይደርብን።

Live stream finished (58 minutes)

Live stream started

የሐዋርያው የቅዱስ ያዕቆብ መልእክት ተከታታይ ትምህርት!
................
ዛሬ ምሽት ይቀጥላል❗️

ከምሽት 3:00 ሰዓት ጀምሮ በOnline ይጠብቁ።

👉ለሌሎች እንዲደርስ Share / Forward ያድርጉ❗️

    👇ትምህርቱን ለመከታተል በዚህ ይቀላቀሉ 👉  @ephrem_views
..........

..........

Live stream finished (37 minutes)

Live stream started

#አማኑኤል ካለ...
........................
“አብርሃምም በግምባሩ ወደቀ፥ሳቀም፥ በልቡም አለ፦ የመቶ ዓመት ሰው በውኑ ልጅ ይወልዳልን ዘጠና ዓመት የሆናትም ሣራ ትወልዳለችን?”ዘፍ 17፥17 ።አምላክ ተናግሯልና ሣራም ወለደች ይስሐቅን በ90 ዓመቷ ታቀፈች! አማኑኤል ካለ የአራት ቀን ሬሳ ከመቃብር ይወጣል። አማኑኤል ካለ ለ12 ዓመታት የፈሰሰ ደም ቀጥ ይላል። አማኑኤል ካለ በባዶ ግንባር ላይ በጭቃ ዓይን ይፈጥራል። አማኑኤል ካለ 2ቱ እንጀራ 5 ሺህ ሰው ይመግባል። አማኑኤል ካለ ውሃው ወደ ወይን ይቀየራል። ወዳጄ ሆይ አንተ ብቻ እንዲህ በል " ጌታ ሆይ ቃል ብቻ ተናገር ድካሜ ሁሉ ይፈወሳል !" ያንጊዜ አማኑኤል ካለ ሁሉ ይቻላል።

❤መራራው ሕይወቴ ይጣፍጥ ዘንድ አማኑኤል ሆይ ቃል ብቻ ተናገር❗️

@ephrem_views

✍️የኤፍሬም እይታዎች

Live stream finished (1 hour)

Live stream started

የሐዋርያው የቅዱስ ያዕቆብ መልእክት ተከታታይ ትምህርት!
................
ክፍል ሦስት 4ኛ ቀን ዛሬ ምሽት ይቀጥላል❗️
ከምሽት 3:00 ሰዓት ጀምሮ በOnline ይጠብቁ።

👉ለሌሎች እንዲደርስ Share / Forward ያድርጉ❗️

    👇ትምህርቱን ለመከታተል በዚህ ይቀላቀሉ 👉  @ephrem_views
..........

..........