عبد الرحمن حمادة

🔔 العقليات الفقيرة دايماً بتشكّك:

فيه وظايف في البلد بس مش لأي حد

👈 لأ مفيش الكلام دا انا دفعتي كلها على القهوة

فيه ناس بتقبض بعملة اجنبية ودخلهم كويس

👈 مفيش الكلام دا انا عندي 35 سنة ولسة بقبض 3 الاف جنيه

فيه ناس بتشتغل 6 ساعات في اليوم

👈 بلاش نصب إذا كان انا بشتغل 12 ساعة وساعتين مواصلات كمان

فيه وظايف في الخليج

👈ياباشا الخليج قفل من بدري واللي لحق لحق

---------

🟥 عقلية النمو دايماً بتسأل:

فيه وظايف بس مش لأي حد

👈 طيب مين دول وازاي ابقى زيهم؟

فيه ناس بتقبض بعملة أجنبية ودخلهم كويس

👈 طيب عملوا كدا ازاي لو سمحت؟

فيه ناس بتشتغل 6 ساعات فقط في اليوم ومن البيت

👈 بجد؟ طيب إيه طبيعة شغلهم اللي تسمحلهم بكدا

فيه وظايف بمرتبات محترمة في الخليج

👈 طيب إيه الحاجات المطلوبة مني عشان اسافر والاقي وظايف زي دي

✅ اطرح دايماً اسئلة وابحث عن إجابات، هاتتفاجيء إن الكون أوسع من مخيلتك

🔔 چاك ويلش لما مسك جنرال اليكتريك من الحاجات اللي عملها وعجبتني انه بص على الشركة وصنف المشاريع اللي فيها (باستثناء اللي ناجحة فعلا) ل 3 حاجات:

1- مشاريع هاتتصلح
2- مشاريع هاتتباع
3- مشاريع هاتتقفل

يعني من الاخر لو ينفع اصلح المشروع دا هاعمل كدا.
لو منفعش هابيعك.
لو منفعتش تتباع هاقفلك واخلص منك.

مش هاينفع معايا حالة الغيبوبة اللي هي انت عايش ومش عايش (يوم تدخل جنيه ويوم ماتدخلش) لإن وقتك اللي بتاخده مني اخليه أولى لحاجات فعلا بتحققلي فلوس

كمان عمل حاجة حلوة أوي بخصوص الموظفين وصنفهم لأربع فئات:

أ- موظفين نجوم
ب- موظفين كويسين بس محتاجين زقة
ج- موظفين على أد حالهم بس معندهمش مانع من انهم يتغيروا وبيحاولوا
د- موظفين على أد حالهم بس مش عايزين يتغيروا

قالك الفئة الأولى دي بديها امتيازات حلوة جدا
الفئة التانية كانت محتاجة زقة
الفئة التالتة بفضل احاول معاهم طالما بيحاولوا
الفئة الرابعة بطردهم مباشرة

-----

منهج التصنيف والتخلص وحسم الأمور دا من الحاجات اللي عجبني جدا وأعتقد الواحد ممكن يطبقه في حياته العملية.

عندك كتب كتير.. مشاريع كتير.. ملفات كتير في اللاب والموبايل..

ميزة المنهج دا انه بيخليك خفيف ودماغك مرتبة وبتركز على اللي بيحقق فايدة حقيقية وملموسة.

* جاك لما عمل كدا سموه "النيوتروني" عشان قفل وباع مشاريع كتير ومشى عمال كتير، بس النتيجة انه عمل نمو في الشركة 2000% تقريبا وأخد لقب مدير القرن ⚡🔥

🔔 خد بالك وانت بتاخد قرار (فيه وجهين للقرار اللي بتاخده)

أي قرار بتاخده بيبقى فيه وجهين ليه:

1- نتائج اتخاذ القرار دا
2- نتائج عدم اتخاذه (دا قرار في حد ذاته)

بقولك ليه خد بالك؟

عشان الناس دايما بتركز مع 1 ومبياخدوش بالهم من 2

هاديك مثال عملي حصل معايا:

بشتغل مع أحد العملاء، فقرر انه يلغي الشحن المجاني على القطعتين عشان البنزين غلى الشحن.

هنا هو فكر بشكل مباشر: هالغي الشحن المجاني عشان اوفر (واضحة)

النتيجة المتوقعة المترتبة على القرار دا ايه؟

انخفاض في المبيعات

وبالتالي احتمال انخفاض في الأرباح

ولما تيجي تعمل حسبة إجمالية تلاقي نفسك:

وفرت 10 جنيه بس خسرت قصادها 15

يبقى الصافي: خسارة 5 جنيه

----

يبقى اتخاذ القرار = 5 خسارة
عدم اتخاذ القرار= 5 مكسب

⚡ اذن لما تيجي تاخد قرار بعد كدا هات صفحة واقسمها نصين وسميهم ايجابيات وسلبيات او اتخاذ و عدم اتخاذ.. الخ

وشوف النتيجة الإجمالية هاتطلعلك ايه

🔔🔴 استمر في النشر عشان ماتعرفش مين اللي بيتابعك. عايز اقولك ان اعظم فرص جاتلي في حياتي كانت من اماكن انا مكنتش اظن انها تيجي منها ابدا.

إنتاج المحتوى المستمر = فرص أكتر

*السكرين من حسابي على لينكد إن

التفكير في عدد الخطوات محبط ومش هايخليك تبدأ أي حاجة، وهاتحس ان عمرك هايضيع في اللا شيء.

من كام يوم كنت عايز ابدأ حاجة معينة وشيطاني وسوسلي:
"يانهار ابيض انت لسة هاتعمل دا كله"

حسيت ساعتها بالإحباط وكنت على وشك إني الغي الفكرة، بعدها افتكرت الوضع اللي انا فيه وقلت:
طيب ما انا عملت قبل كدا حاجات كتير جداً بس نسيت خلاص وبقي شيء من الماضي واتعودت وتأقلمت مع وضعي الجديد فإيه اللي يمنع اني اعمل حاجات تاني وتالت وعاشر..
_______
خليني اقولك مثلاً لو انت قررت تتعلم تسويق وشيطانك وسوسلك بالتفكير في عدد الخطوات، إيه اللي هايحصل معاك:

1- انت لسة هاتتعلم أساسيات تسويق؟
2- بعدها هاتقرر تدخل أنهي تخصص؟
3- بعدها تجيب مصادر تتعلم منها؟
4- بعدها تبدأ تتعلم وتاخد كورس واتنين؟
5- بعدها تبدأ تتطبق وتغلط وتستشير ناس.. إلخ؟
6- بعدها تدور على شركة تشتغل فيها؟
7- هايدوك كام يعني بعد دا كله؟
8- عايز تشتغل فري لانسر وبعدها تبدأ تتعلم ازاي تجيب عملاء؟
9- عايز تتعلم ازاي تتفاوض مع العملاء وتسعر شغلك؟
10- هايطلبوا منك تعديلات على الشغل.
11- هاتاخد كام يعني بعد دا كله.. عشرة خمستااااشر.
12- انت عارف اقل عربية محترمة تمنها كام؟ مليون يابني، يعني شغل كتير أوي.
.
.
.
__________
الكلام دا لو حصل معاك فحابب اقولك انه وهم وبمجرد التعود على وضعك الجديد، هايبقى جزء من شخصيتك ومش هاتفكر في الموضوع إطلاقا.

فاكر لما اتعلمت سواقة عربية جديد؟

كنت بتبص في المراية اليمين والشمال ومراية الصالون وقافش في الدركسيون، ومركز مع العربية اللي جنبك ومركز مع الطريق والحفر والمطبات والناس اللي بتعدي... مليون حاجة.
دلوقتي انت بتعمل الكلام دا بصباع رجلك وممكن تكون ماسك الموبايل وبتبص فيه وبتكلم اللي جنبك وفاتح الراديو (دا كلام غلط ماتعملوش بس انا بوصفلك أد إيه الموضوع بقي تعود وجزء من شخصيتك خلاص)

كذلك لما هاتفتح عمل تجاري:
هاتلاقي نفسك بتعمل مليون حاجة بس انت مش حاسس( بتخلص ضرايب.. بتكلم عملاء.. موردين.. بتفاصل.. إلخ وكل خطوة من دول تحتها خطوات أكتر)
_____
الملخص:
ماتفكرش في عدد الخطاوي عشان دي خدعة (هاتتعود على اللي عايز تعمله وهايبقى جزء من شخصيتك ومع الوقت هاتعمله بشكل سريع جدا ولا واعي)

🔔 فاكر بوست لو وصلت لسن التلاتين ومبتعملش نص مليون
في السنة تبقى ظالم لنفسك؟

تعالى بقى اقولك فعلاً امتى تبقى ظالم لنفسك على المستوى المهني:

1- لو كل فترة بتتنطط من مجال لمجال ومن شغلانة لشغلانة.

الموضوع دا هايخليك دايماً زي المبتدئين، يعني لو
انت اعظم مبرمج في التاريخ وجيت تبدأ في مجال
المبيعات مثلاً، السوق هايحاسبك زيك زي أي حد
مبتديء في المبيعات.

2- لو بتشتغل في وظايف تقليدية لمدة طويلة، يسهل الاستغناء
عنها بسهولة واللي يقدروا يشتغلوها كتير.

يعني إيه؟

كاشير لمدة خمس سنين مثلاً.. أعمال سكرتارية كذلك.. كول سنتر.. إلخ

*من مشاكل المهن دي كمان، إنك لما بتطول فيها
وسنك بيكبر، الشركة بتفكر انها تستغنى عنك، عشان
تخلص من زياداتك السنوية فيقرروا يجيبوا حد أصغر
مكانك معندوش طموحات مالية ولا مسئوليات
زي الجواز وغيره.

3- لو بتشتغل في وظيفة ماينفعش تقلبها لبيزنس أو
تشتغل بيها بشكل حر بطولك.

*نفس الوظايف السابقة.
_______
طيب امتى تشتغل الوظايف اللي فاتت دي؟
لما تبقى في بداية حياتك أو الظروف صعبة أوي
ومفيش غيرك قدامها.

تشتغلها لمدة أد إيه؟

سنة سنتين بالكتير أوي، لإن مع أبسط مشكلة في الشغل
سواء خناقة، سواء ظروف مالية للمكان اللي شغال فيه،
هايتم التضحية بيك أول واحد.
________
طيب المفروض تعمل ايه؟

انا عندي معيارين للشغل:

1- يكون مطاط (تشتغله مع نفسك- تقلبه بيزنس - تشتغله بشكل حر).
من الآخر يكون فيه حاجتين من التلاتة على الأقل.

2- المجال يكون معروف إن نهايته فيها فلوس.

دي تقدر بقى تعرفها من الناس اللي شغالة في المجال.

كنت بتفرج على شخص مشهور وشغال فري لانسر وعنده
بزنس خاص بيه، كان بيتكلم في حاجة مشابهة.
كان مقدم على وظيفة، فسأل الناس القديمة اللي شغالين
بقالهم مدة طويلة:

إيه أعلى مرتب هنا؟

قالوله فلان هنا بقاله 20 سنة تقريباً ومرتبه وصل لـ 5 الاف.
قالهم طيب سلام عليكم.
_______
عندي معيار خاص بيا، بس انت غير ملزم بيه من وجهة نظري
وهو "الوقت"

إيه المدة اللي اقدر اوصل فيها للدخل الكبير دا؟

يعني لو حد قالي هاتوصل بعد 20 سنة شغل هاقوله لأ
مش عايز، عشان كدا اخترت التسويق: مالوش سقف في
الدخل، ومالوش مدة محددة عشان توصل، دايماً
كل حاجة فيه بتكون نسبية، على حسب الشخص وظروفه.

🔔 اللي بيعرف يبيع وعنده أساسيات التسويق لو مبقيش غني،
على الاقل هايعرف ياكل عيش في الوقت اللي أغلب الناس
فيه بتعاني.

التسويق ميزته إنه ينفع مجال مستقل، وينفع تدمجه
مع مجالك أياً كان.

يعني عادي تبقى مسوق وبس.
وعادي تبقى دكتور ومسوق
مهندس ومسوق
كاتب ومسوق
فني ومسوق

ادمج أساسيات التسويق مع مجالك وهاتبقى 🔥⚡️
_______
التطبيق:

أساسيات التسويق تتعلمها منين؟

جاوبت على السؤال كتير هنا على القناة وعلى اكونت الفيس بوك

بس تاني:

1- كتاب الماركيتنج بالمصري (هاتلاقيه pdf)
2- تقرأ عن الـ inbound marketing + outbound marketing
3- تختار تخصص وتكمل فيه

بعد اربع خمس سنين، هاتوصل للحرية في إنك
تعرف تجيب فلوس في الوقت اللي انت عايزه
والوظيفة هاتبقى بالنسبالك خيار ثانوي.

*بفضل الله أولاً وأخيراً

الكلمتين دول بفلوس، بس رمضان كريم.

🔔 خش كدا أي جروب تجارة لمجال معين
(ملابس، أجهزة منزلية، خشب.. إلخ)

واسألهم ناوي افتح بإذن الله إيه رأيكم ادخل ولا لأ؟

معظم اللي هايجاوبوك كالآتي:

- ياباشا كان زمان دلوقتي مابقتش جايبة همّها.
- ياريس تفتح ايه اذا كان احنا عايزين نسيبها.
- واحد يمنشن صاحبه: دا ناوي يفتح مايعرفش اننا
عايزين نقلب النشاط سوداني وترمس.

الحاجات دي في الأول كنت بصدّقها وبقول فعلاً
همّا أدرى بس بعد كدا حصل معايا موقف أيام لمّا
كنت شغال في المبيعات غير تفكيري 180 درجة.

سيبت الشركة واتفقت اني اشتغل معاهم بيع بشكل
حر يعني عمولة فقط، وريحتلي كدا شهرين تلاتة من
الشغل ولما نويت ابدأ ابيع سألت زمايلي:

أخبار البيع إيه ياجماعة؟

صياااااااح:

- بيع!.. بتقول بيع هههه 😂
- لأ الدنيا مريحة خالص.
بلا بلا بلا

نفسي اتسدت وقولت الموسم مش حلو يعني المجهود
مش هايبقى جايب همّه فخلّيني ادور على حاجة تانية.

بعد سنة روحت اسلم على صاحب الشركة واقعد معاه شوية..
ايه الدنيا ازيك ياعوبد..

كويس والله بخير، انتوا إيه الدنيا عرفت إن الدنيا ريحت السنة دي.
قالي مين قالك كدا؟
قولتله الناس اللي هنا!!
قالي مفيش الكلام دا كلهم حققوا التارجت.

ساعتها انا بقى اتعلمت الدرس، ومبقيتش اصدق بسهولة
غير لمّا اشوف بنفسي واسأل كذا مرة واسأل بكل الطرق
الممكنة لغاية ما اجيب ناهية الموضوع.

وساعتها بردو اكتشفت إن دي سمة في الطبيعة البشرية
أو عند المصريين بشكل خاص الله أعلم.

شغل بقى داري على شمعتك تقيد، أو حسد.. ماتعرفش.

كام مرة سألت واحد عن الخليج وقالك:
- خليج إيه ياباشا ماتصلي على النبي
- ياباشا الخليج حلو بس دا كان من عشر سنين
- خليج؟! دا بيفنشونا ياحبيبي

عارف بقى الكلام دا بيتقال من إمتى؟
من أول الخليج ما ظهر على الخريطة أساساً.

فلمّا تلاقي حد بعد كدا يقولك حاجات زي دي، اسأل نفسك:

طيب لما الخليج وحش كدا هو مارجعش ليه؟
ولما الخليج وحش كدا أو النشاط التجاري اللي شغال فيه
بايظ أومال النعمة اللي ظاهرة عليه دي منين؟
_________
المهم بقى إنك ماتصدّقش بسهولة، لا اللي يقولك
خربااااانة، ولا اللي يدهنهالك عسل ابيض، عشان
النوعين دول بنسبة كبيرة هايلبسوك.

صدق النوعية دي:
- الخليج حلو ياريس بس لو انت محضر نفسك
كويس انجليزي ومهارات.. انما لو جيت وانت صفر يبقى
انت وحظك بس المعظم بيعاني، فطوّر نفسك من بلدك وتعالى.

- عايز تفتح النشاط الفلاني تمام، بس انصحك تشتغل
عند حد الأول ست شهور أو سنة وبعدها تقرر بنفسك.

طوّلت عليك بس قلت اما اديك تجربتي في الموضوع عشان
خسرت بسببها حاجات كتير.

مثال أخير افتكرته دلوقتي:

أيام 2017 كان الفيس بوك في عزه والشغل عليه نار
لما كنت اسأل في الجروبات، كان يترد عليّا:

"مابقاش جايب همه ياريس"

🔔 الذهب سعره بينزل.. اوعى تكون اشتريت بالغالي وتخاف فتجري تبيع.. اثبت مكانك

قالّي: انا عايز اعمل مشروع محدش عمله.

قولتله: سيبك من الكلام دا واعمل مشروع اتعمل
كتير، بس اعمله بطريقة قليل اللي بيعملها زيك.
__
مثال:
مشروع فول وطعمية (موجود كتير أوي)

بس اللي مش موجود:
- صنايعي لابس نضيف ومهندم.

- محل بيهتم بنظافة المكان والادوات، مش الدهون ملزّقة
على الحيطان.

- زيت مايكونش اتقلى فيه مليون مرة لغاية مايتحرق.

- قرص طعمية عليه شوية خضرة أزيد شوية من باقي المحلات.

- مخلل معمول حلو.

- رغيف عيش مش رديء زي اللي بيستخدمه معظم المحلات.

- إنك انت اللي تروح للعميل وتدور عليه وهاتلاقيه.

لغاية ماتعمل قاعدة عملاء تشغّلك وتخلي الماكينة تدور لوحدها
*كله بينتظر العميل يجيله ويحط إيده على خده.

- إنك تفهم في الحسابات وازاي تدير الفلوس

✅ مجموعة تحسينات بسيطة في كل بند، هاتؤدي في النهاية
لنتيجة ممتازة على المستوى الكلّي.
__
النتيجة:

- الأكل أغلى شوية من باقي المحلات.

- الزبون اللي غاوي هايجيلك (كتير مش قليلين بالمناسبة وانا واحد منهم).

- هاتفضل محافظ على عميلك عشان محدش هايعمل زيك،
وكله هايبقى فاكر إنك محظوظ، بس محدش عارف انت من
خلف الكواليس بتعمل ايه (قليل أوي اللي هاياخد باله، وعشان
يقلدك هاياخد وقت ومجهود)
------
الملخص:

المشاريع مرطرطة في السوق، وأي فكرة جديدة حتى لو جاية من
كوكب المريخ لو اتنفذت، تاني يوم هاتتقلد.

"اللي صعب يتقلد هو انت"
__
قصة بسيطة:

حد نعرفه مقتدر جداً وبيشتري أكل جودته منخفضة، ولما
بيتعرض عليه أكل نضيف بيقول لأ غالي مع انه كان بيعجبه.

في البيت عندنا معندناش ربع إمكانياته المادية، بس
مانقدرش نتنازل في الجودة بتاعة أكلنا حتى لو هانقلل
الكميات.

أبويا قبل مايتجه لشغل الجملة كان عنده محل مواد غذائية
قطاعي (سرجة: زيت حار.. طحينة.. عسل اسود.. ) وكان مش
بيتنازل عن الجودة ابداً..

كان بيجيله زباين من أماكن بعيدة أوي وكان بيستغرب ازاي
ممكن حد يجيله من مكان زي دا عشان ربع طحينة وربع عسل!!
صديق ليا كان ساكن في شارع بعيد عن المحل، وابوه كان بيخليه
يروح مخصوص يشتري من عندنا.

لما كبرنا، قولتله المحل دا كان بتاعنا.

قالي إيه!!.. أول مرة اعرف، دا انا كنت بكره مشواره جداً عشان
ابويا كان بيبعتني ليه، مع ان كان فيه محل تحت بيتنا، بس كان
يقولي لأ.. روح اشتري من المحل دا عشان حاجته حلوة.

ملخص القصة:

الموضوع مش حكاية فلوس (انا حكيتلك قصة الشخص اللي نعرفه،
وقصتنا، وقصة صاحبي، وقصة باقي عملائنا).

الموضوع عقلية وأولويات، اللي مهتمين بالفلوس كتير، والمهتمين
بالجودة بردو كتير. الفكرة إنك تعرف توصل للناس اللي انت مستهدفهم.

وكل واحد وليه استراتيجية مختلفة في الشغل.

*نسيت: سعرنا كان أغلى من المحلات اللي جنبنا وهما كانوا شغالين، واحنا كنا شغالين.

----

الاكونت بتاعي على الفيس بوك بنزل حاجات سناكس خفيفة في التسويق والشغل الأونلاين ماتتناسبش مع قناة التليجرام عشان انا مخصصها للمواضيع اللي فيها كتابة طويلة (مش بحب انزلك على القناة أي حاجة وخلاص)

"مارك كوبان" ملياردير وبيطلع ضمن فريق مستثمرين شارك تانك، حد بعتله سؤال:

لو قدامك 6 شهور فقط عشان تعمل أقصى فلوس تقدر عليها، ومش معاك غير تليفون و 500 دولار فقط، ممكن تعمل ايه؟

قاله: أولاً دا أعظم سؤال جالي في حياتي.
ثانيا: هاروح اشتغل في المبيعات، وافهم في الحاجة اللي انا ببيعها أكتر من أي حد تاني.
-------
على المستوى الشخصي هاحكيلك حاجة بخصوص أهمية إنك تفهم في الحاجة اللي انت بتبيعها:

انا بدأت اشرب قهوة من فترة قصيرة أوي، وحبيتها جداً لدرجة اني فهمت فيها حاجات كتير أوي (إيه النوع اللي فيه كافيين عالي، ولو عايز فنجان تستمتع بيه تعمل ايه، ولو عايز حاجة تفوقك تشرب ايه.. وهكذا)

وبدأت اشوف الناس بتحب فنجان القهوة يكون عامل ازاي، ولقيتهم بيدوروا على حاجتين:
إن الوش يبقى كريمي، وإن القهوة ماتبقاش طعمها زي التراب.

المهم أنا لو مكانش معايا شغلي، كنت عادي اقدر اشتغل في بيع القهوة واكبّر حجم الناس اللي بتتعامل معايا بكل سهولة (بإذن الله)

لما نشرت تجربتي وشاركتها مع الناس، بدأت تجيلي الأسئلة:
ممكن ترشحلي نوع اشربه.. ممكن تقولي اعمل فنجان قهوة مفهوش مرارة ازاي.. عايز حاجة تكون طعمها حلو وخفيفة.. إلخ

كل دا في فترة وجيزة جداً، ولو أخدت الموضوع بشكل احترافي وحطيته في دماغي، أنا واثق في ربنا إني اقدر احقق فيه نتايج كويسة جداً، وابقى واحد من الأشخاص اللي الناس بتاخدهم مرجع في مجال البن ☕️ ودا طبعاً هايتّرجم لمبيعات (فلوس).
_____
تعمل ايه عشان تستفيد من التدوينة دي؟

1- تشوف حاجة انت بتستخدمها وبتحبها (زي سماعة تليفون بتاعتك مثلا وشايف انها مبهرة وفيها مميزات كتير)
2- تطلع على أي حد بيبيع السماعة دي، وتقوله مقابل كل سماعة ابيعهالك هاخد نسبة كذا..
3- تبدأ بقى تتكلم عن السماعة دي في كل مكان، وازاي انها مفيدة ليك وساعدتك في شغلك.. إلخ
4- تنشر إعلانات بشكل مستمر (المنصات المجانية كتير)

5- دا الأكونت الاحتياطي بتاعي على الفيس بوك، ابقى تعالى هناك هاتستفيد لإني بنشر عليه حاجات قصيرة هاتعجبك، بس مش بتتناسب مع طبيعة القناة هنا

دا تعليق دكتور محمد عبد العزيز (مدير تسويق في شركة طبية كبيرة) على التدوينة.

بعد كدا هاخد منكم فلوس الموضوع منتهي 😂

⛔️ من اقوى الحاجات اللي نفعتني في حياتي (معلومة من الكنترول)

"اني بوصّل الناس ببعض"

عارف مثلاً شخص قوي في مجال معين أو حاجة معينة.. إلخ
واعرف حد تاني قوي بردو في مجال تاني أو نفس المجال.. إلخ

اعمل ايه؟

اروح معرفهم على بعض وننزل نخرج.

احنا التلاتة بنبقى مثلث قوي جداً (بسميه مثلث الاختراق ♻️)

ودا بيسمحلي بالانتشار بشكل أكبر لإن كل واحد انا قدمتله قيمة مضافة فبشكل أو بآخر هو بيبقى عايز يردلي الخدمة اللي عملتهاله.

انما شغل احتفظ بعلاقاتك لنفسك والعبط دا مش هايأكل الواحد عيش.
___
ملحوظة 1:
مش هاتعرف تخش في علاقة غير لما تكون قوي.

ملحوظة 2:
ماتطلبش من حد يدخلك في علاقة بدون مايكون
عندك قيمة مضافة، لإنك هاتفسدله شبكة علاقاته
مع الآخرين، بالإضافة إلى إنه لو دخلك بردو محدش
هايكون مهتم أوي.

ملحوظة 3:
نقطة البداية هي إن يكون عندك قيمة قوية، وساعتها
كل شيء هايكون مسألة وقت.

ملحوظة 4:
مفيش شيء أقوى من العلاقات، يعني مثلاً معظم
الشغل قبل مايتم الإعلان عنه بيكون اتهرس بين
شبكة العلاقات، ولما مش بيلاقوا حد مناسب بيضطروا
يعلنوا عنه.. يعني انت بتاخد بقايا الفرص بعد ماتكون
اتصّفت و اتمصمصت.

فكرة انتاج الفيديوهات رجعتلي من تاني بعد ماكنت وقفتها، فكنت عايز رأيك بخصوص الصوت.

1- الصوت في الفيديو اللي بالعرض احسن.

https://www.facebook.com/61552167975334/posts/pfbid0KABHDSb6cjkrvtSRx2HELpNFKLnn2n9iDkJH9cZKNZYHYrdWhJ1PczZkxc8X2exvl/?app=fbl

2- الصوت اللي في الفيديو اللي بالطول احسن

https://www.facebook.com/61552167975334/posts/pfbid0PZBadSFkXBPDJZMCfAwoXeXszbz823xw9c6R5jipruHfTYnJzDBWi6LA7EosD45Xl/?app=fbl

تدوينة ابعتها لصاحبك اللي حقه ضايع في الشغل
(او ممكن تكون انت ومش واخد بالك!!)

شايف العطر دا؟
بنسبة كبيرة انت نفسك تقتنيه حتى لو مش
هاترش منه.
ليه؟
عشان نقلك إحساس بالفخامة، والنضافة والروقان..

تخيل بقى لو نفس البرفان دا شوفته في كيس
ابيض بلاستيك!

أراهنك مش هاتبقى مهتم بيه، او اهتمامك هايقل
بنسبة كبيرة.

مع ان قيمة العطر هي هي..
وتركيزه هو هو..
وثباته وفوحانه ما اتغيرش.

بس الظروف المحيطة بيه اتغيرت فخسفت بقيمته
الأرض ↙️ ↙️
------

انت كذلك، ممكن يكون عندك قيمة عالية بس
بتضيع حقك بإيدك وانت مش واخد بالك.

ممكن تكون مقتنع ان "الجوهر أهم من المظهر"
بس دا غلط تماما

الجوهر مهم، والمظهر داعم ليه وهاينقله لبعد آخر 🔥

بتظلم نفسك (بكررها تاني: بتظلم نفسك)
لو ركزت على الجوهر على حساب المظهر.

يتطلب منك شغل، فتعمله حلو أوي بس تقدمه
بشكل ممل فالنتيجة إنك تلاقي ناس طلعت فوقك
وانت مش فاهم ليه؟!!

هاتتجنن وهاتبقى عايز تعض في الأرض.. انا ايه
اللي ناقصني، دا انا بعمل الشغل احسن منهم!!!

انا مصدقك، بس مش دا اللي هايأكلك عيش.

🛑 عارف احنا عندنا قانون في دستور التسويق :

"مش مهم قيمة المنتج إيه، المهم إن العميل يبقى مدرك للقيمة دي"

لما تعمل شغلك اعمله باحترافية وقدمه كمان باحترافية.

- هاتقدم تقرير عن شغلك؟
ماتبعتوش واتس.
اعمل ايميل محترم.. نسق الأرقام.. لو فيه رسومات بيانية.. الخ

- هاتروح شغلك؟
مش أي حاجة تتلبس، لبسك مايكونش مكرمش..
وتقول أصل المهم النتيجة.
خد الدش التمام.. البس حاجة مكوية.. حط برفان لطيف.. ساعتك الجميلة.. لمع شعرك.. شعرك وحش احلقه.. خلي جسمك رياضي وضهرك مفرود.. الخ.
---
ابعت التدوينة دي لصاحبك اللي مضيع حقه
في السوق وقوله:

عبد الرحمن حمادة بيقولك:
"الشغل مابيتكلمش عن نفسه"

🔴 🟡 عارف ب 100 ألف دهب سنة 1996 يعملوا كام دلوقتي؟

10 مليون جنيه!!

طيب عارف ب 100 ألف دهب سنة 2016 يعملوا كام دلوقتي؟

770 ألف

نصيحة كان نفسي حد يقولهالي أول لما ابتديت شغل من 4 سنين:

أي فلوس تجيلك بشكل شهري اشتري بيها ذهب، وبالمناسبة انت مش محتاج مبلغ مهول، لإن السبايك بتبدأ من 1 جرام يعني هاتعرف تشتري.

طيب لو الجرام بردو بالنسبالك كتير؟

العبها بذكاء وخش انت واخوك أو صاحبك في جرام مع بعض بالنص، والشهر اللي بعده اشتروا واحدة تانية وكل واحد ياخد الجرام بتاعه.

دا بقى الادخار الذكي اللي:

1- هايحافظ على قيمة فلوسك
2- هايزيد مع الوقت بدون مجهود.
3- هايمنعك من إنك تمد إيدك على الفلوس وتشتري حاجات مالهاش لازمة
4- هايحسسك إنك عملت فلوس من الشغل بتاعك مش زي ماروحت زي ماجيت والفلوس اتبخرت.
5- هايحفزك إنك تجيب فلوس أكتر عشان تنمى ثروتك الصغيرة بدل مابيجيلك يأس لما تشوف قيمة فلوسك اتدهورت ورجعت لنقطة الصفر مرة تانية.
__
قواعد:

✅ الذهب استثمار طويل الأجل يعني تحتفظ بيه بداية من سنتين تلاتة.. أقل من كدا احتمال تخسر فيه.

✅ اشتري الذهب سواء سعره غلي أو رخص ماتشغلش بالك، لإن الذهب دايماً بيرفع وعملة موثوق فيها منذ آلاف السنين.. انما أي عملة تانية معرضة للانهيار لو بلدها انهارت، يعني لو امريكا حصل فيها هزة الدولار هايروح في داهية وهاياخد في وشه كل العملات المرتبطة بيه.

✅ كل اما تبدأ في شراء الذهب انت وصغير دا أحسن ليك بكتير، وبيزود فرصك إن يبقى معاك فلوس مستقبلاً

✅ الدهب احسن من الدولار إلا لو هاتحتاج الفلوس خلال مدة قليلة ست سبع شهور لإن الذهب سعره متقلب في الفترات القصيرة.

✅ أي حد يقولك انا خسرت في الذهب، قوله عشان انت حاولت تضارب فيه يعني تشتري النهاردة فلما سعره ينزل بكرا تخاف وتجري تبيعه.

✅ الذهب طلع نزل خليك أسد مكانك ولا يهزك و زي ماقولتلك اشتري بشكل دوري إلا في وقت الهوجة المريبة تستني كام يوم كدا.

أكونت الفيس بوك الاحتياطي

🟡🔴