BnSamy

من امبارح في 6 اصحابي بعتوا لي خبر ان شركات الموبايل هتزود اسعار الخدمات؛ وبعتوه ليا مش عشان اعرفه لكن عشان انا في 4 نوفمبر قولت لهم ان قرار زيادة اسعار المكالمات وخدمات الاتصالات اللي بقالهم سنة بيأجوه هيتم خلال ايام خلاص دا عشان اشاعات بتقول ان الشركات قالت للدولة يعني عاوزنا نقفل IMEI وعاوز تضيف E-SIM ونشغل 5G ونجيب نص مليار دولار من بره مصر رسوم لل 5G.. يبقي ترمي بياضك؛ ادينا نديك؛ هات فلوس عشان نعرف نصرف...

*️⃣ فكنت بقول لاصحابي ان مش هنشوف E-SIM ولا اي تغيرات زي IMEI غير لما يتوافق لهم علي زيادة وطول ما مشوفتوش زيادة يبقي الدنيا أمان ومفيش تغييرات؛ ومش زيادة صغيرة مش 15% لا دا ممكن يوصلوا 50%... امبارح NTRA سابتها عايمة قالت من حق الشركات تزود عشان التكلفة زادت 😁 مقالوش كام...

*️⃣ وادي الحكومة رمت بياضها وحدفت الكورة للشركات وحان وقت رد الكورة من الشركات للدولة

⬅️ طبعاً معروف مين الكورة اللي عمالة تتحدف يمين وشمال 🫣🫣

⬅️⬅️ بكرهه لما بكون صح في مواضيع الخوازيق 😔😔

اعتباراً من 1 ديسمبر خلاص الفيسبوك والواتس آب وبالتبعية كل الخدمات هتفعل ال UIN في الحسابات الضريبية... هو كنت اتكلمت ايه دا قبل كده بس نقول تاني عادي مهو الريتش مش هيوصل لكل الناس عالفيسبوك

*️⃣ أي حد بيعمل اعلان او بيستخدم خدمة بيتحط عليه 14% قيمة مضافة يعني لو عمل اعلان ب 10 الاف فالفيسبوك يدفعه 11.4 الف ... الشركات اللي تخش تكتب رقم قيمة مضافة بيتشال الضريبة دي (يعني لو عمل اعلان ب 10 الاف بيروح يدقع 10 الاف وهو بيبلغ الضرايب بنفسه ويسدد لهم).

*️⃣ النقطة ان مكانش في أي اثبات؛ فالناس الافراد اللي بتمارس نشاط تجاري تحط أي رقم خلاص فل مش هتدفع؛ يعني أنتا فرد اهو ممكن تشوف اعلانات التليفزيون واخرها يقولك رقم التسجيل الضريبي كذا كذا... خد الرقم حطه عندك و هيتشال ال 14% من عليك 😁 يا عم اضرب 9 أرقام وعادي برضك هتتشال.

*️⃣ الضرايب قالت لك لا يا حبيبي؛ بص من 1 ديسمبر مش بس هتكتب الرقم اللي كل الناس عارفاه دا؛ لا وهحط لي UIN محدش يعرفه غير شخص ليه صلاحية الدخول لحساب الشركة الضريبي... وبكده كل اللي كان بيضرب رقم هيدفع 14%

*️⃣ وعلي صعيد آخر فاكرين الهرايين بتوع نروح دبي نفتح شركة ونهرب من ضرايب المواقع دي 🤣 اهي الصورة بتقولك الضريبة بتتحط عليك سواء كان عنوانك مصر أوووو بتعمل اعلان بيستهدف مصر... يعني لو انتا منتجع في المالديف بتعمل اعلان يستهدف مصريين هتدفع 14% يا برنس 😁 عشان تقول هروح دبي تاني وفاكر انها مجاتش في بالهم... طيبين قوي بتوع سريلانكا دول 🤣.

- ايوا فاهم ان الناس بتروح الخليج وتستهدف مصر وحساب دولاري وتدفع 5% في دبي ومتدفعش في مصر؛ بس دا مخالف للقانون حسب دورة حضرتها وعشانهم اتعمل قانون بتاع الرقم الضريبي في الاعلان لازم يكون موجود؛ فلووو حظك وحش واترصد اعلان بدون رقم ضريبي هيتعمل لك قضية؛ ولو اترصد فيه رقم ضريبي ومش مسجل عندهم بيصرف برضك هيتعمل لك قضية؛ والضرايب بتعمل قواضي ل 5 سنين لورا؛ يعني لو ممكن سنة 2024 يجيبوا قضية تهرب علي اعلانات في 2024 😁- فكله هيتجاب وهيتسخدموا الذكاء الصناعي عشان يحللوا الداتا ويجيبوا المخالفين -

لو انتا بتحب الافلام الهندي ال 4 ساعات
اووو كنت كائن فضائي نفسك طويل قوي

⬅️⬅️ الحلقة مع ابو زيد نزلت؛ نزلها كما هي غالبا ال 4 ساعات 🤣🤣

*️⃣ تقريباً عشان بنصور حلقة كل سنتين يبقي نطلع عدد دقايق سنتين مع بعض 😁

*️⃣ أنا مليش دعوة أنا أي حد يتكلم معايا بقعد أرغي عادي بال 3 و 4 و 5 ساعات؛ رغاي ومرة قعدت ارغي واحكي حواديت مع أصدقاء بدأت من مدينتي ووقفت عشان وصلنا مرسي مطروح 🤣🤣 بجد مش بهزر ؛ هما يمنتجوا بقي أنا بحكي حواديت ابلة فضيلة 😁😁

https://youtu.be/zl6sSc-H0CA?si=HEt9MOuuTAIDxgbo

بيدي لا بيد عمرو

*️⃣ الحكومة تطلع تقولك نتوقع مرونة وليونة ورشاقة للدولار؛ بدون ما يفكروا المواطن هيفهم ايه... فالناس تقولك منتظرين تعويم دا اتقال 55 دا 60 دا 70 دا 80؛ فالناس اللي معاها دولار توقف بيعه الا لو مضطر بس في اضيق الحدود؛ الصرافات والبنوك الدولار عندهم يقل... فيرجعوا يقولوا للمسافرين مفيش؛ خد 300 دولار خد 500 دولار بعد ما كنت لغاية قريب بتاخد الرقم اللي انتا عاوزه (وحصلت معايا شخصياً) دلوقتي يقولك (مفيش بيع المعروض قليل والناس مستنية تعويم).

*️⃣ كده يبقي ضربنا رصاصة علي صوابع رجلينا؛ نيران صديقة في نفسنا؛ نعمل أزمة لنفسنا عشان معداش علينا في يوم حتي مقال لل (الاقتصاد السلوكي) ومعتبرين ان عادي اي حد عشان مهندس يقدر يطلع يتكلم في الاقتصاد كدولة. انتم السبب يا مهندسين 🫣🫣.

*️⃣ يا جدعان الاقتصاد السلوكي مهم مهم مهم... لازم تفكر في تأثير أي تصريح لغير متخصص في الاقتصاد... لما بنشوف تصريحات جيروم باول في أمريكا تحس انه اتدرب 100 مرة واختار كل حرف يقوله بعناية بحيث ميحملش كذا معنى عشان ميضرش البلد... لكن احنا نموت في اننا نضر نفسنا بنفسنا؛ لسه هنستني الظروف الخارجية تموتنا... بيدي لا بيد عمرو.

النهاردة حطيت بوست في تليجرام، مجرد صورة لحكم المحكمة بخصوص عدم دستورية ثبات الإيجار القديم، وبصراحة حصلت نقاشات جميلة في التعليقات؛ لأول مرة أشوف نقاشات وناس مختلفة وناس متضاربة المصالح ومحدش يشتم حد؛ حاجة غريبة قوي 🤣.

*️⃣ المهم لفت نظري كام نقطة، ولما رُحت شوفت بوستات وتعليقات على الفيسبوك، أخدت بالي من تكرارها.

1️⃣ الناس متعرفش التاريخ؛ ومتعرفش إن مصطلح "تعديلات الإيجار القديم" دي تعود للشقق اللي تم إيجارها من أيام الحرب العالمية الثانية (الإيجار القديم زيه زي مجانية التعليم غير الجامعي، قوانين من العصر الملكي وليس الناصري) ولغاية سنة 1996... أي إيجار قديم بعد 1996 خلاص ده مكمل الـ59 سنة بتوعه.

2️⃣ الناس متعرفش إن الموضوع مكانش اختياري؛ مكانش فيه أوبشن أصلاً الناس تأجر قديم ولا جديد؛ ميعرفوش إن مصطلح "جديد" ظهر مع قانون 1996 دا... زمان كان إجباري إن الإيجار ثابت حتى وإنك شايف العملة بتقل قيمتها؛ ده إجباري مش اختياري. عشان كده حقبة الثمانينيات كان فيها "الخلو" مرتفع نسبياً كتعويض تخيلي للعقد الأبدي، لكن عشرات السنين قبلها مكانش فيه ده بل في عقود شفتها بعيني من الستينات لشقق بـ3 جنيه والمالك ملزم بالصيانة تخيلوا 🤣🤣.

3️⃣ الناس برضو مكانتش تعرف إن العقود مكانتش حرة؛ فمثلاً عبد الناصر كان ساعات يصحى يقولك عاوز أبسط الشعب، يلا قرار تخفيض الإيجارات؛ إنت بتدفع كام؟ 5 جنيه؛ من الشهر القادم إيجارك بقى 4 جنيه غصب عن المالك؛ مش عاجبك يا مالك، طيب القرار يطبق بأثر رجعي سنة فاتت أو سنتين؛ يعني ليك فروقات يا مستأجر اقعد بيها كام شهر 🤣🤣.

4️⃣ ودي أهم نقطة؛ بالرغم إن القرار بتاع النهاردة لا فيه إلغاء ولا حاجة، ده بيقولك الإيجار مفروض يزيد، ميفضلش ثابت؛ مفروض بقى الدولة تعمل قانون تاني يخلي الإيجار يزيد... بس كده، شكراً... لكن لقيت تعليقات كتير بتتعامل كإن الإيجار القديم اتلغي، وشفت اللي يقولك الملاك هيطردوا الناس في الشوارع ويسكنوا مكانهم سودانيين، ويقولك طبعاً المالك هيرفض يعمل للناس عقد بـ4 و5 آلاف جنيه، ويروح يجيب سودانيين بـ15 ألف... ودي بقى النقطة اللي صدمتني.

*️⃣ الإيجار القديم زي ما قولنا هو للشقق قبل سنة 1996؛ يعني أحدث عقد إيجار قديم يسري عليه أي قانون عمره 28 سنة... فالعقود عمرها 30 و40 و50 و60 و80 سنة... يعني إنت عقدك ده عمره 50 سنة مثلاً يعني بقالك إنت وأبوك 50 سنة بتدفعوا للمالك وأبوه، ورغم كده شايف إن لو جت فرصة للمالك هيطردكوا بعد 50 سنة جيرة ويجيب مكانكم سودانيين... وده معناه حاجة من اتنين:

*️⃣ إما إن الناس بقت أوساخ قوي لدرجة تضحي بربع قرن ونص قرن من المعرفة والجيرة وتكون جشعة وترمي الناس عشان الفلوس؛ مش متخيل شكل المجتمع اللي فيه ناس تضحي بنصف قرن معرفة بحد وترميه في الشارع.

*️⃣ الخيار التاني هو إن الناس علاقاتها زفت ببعض؛ الجيران؛ لأي سبب كان بقى، سواء المالك قال للمستأجر عاوز الشقة فقاله الشقة دلوقتي تساوي مليون جنيه، هات ربع أو نص مليون واسيبهالك فتبقى خناقة... أو المالك كان بيعمل خناقات مع المستأجرين وقضايا وتلاكيك عشان يمشيهم... بس الخلاصة إن الناس خايفة من بعضها؛ جيران يعرفوا بعض بقالهم نص قرن وحاسس إن لو رقبته جت تحت سكينة جاره من عشرات السنين؛ فالجيران دول مش هيسمي عليه وهيذبحه...

*️⃣ إنتم متخيلين شكل وبشاعة التفكير في الخيارين؟ شكل التفكك المجتمعي إنك مش مآمن جارك.

*️⃣ عامة للتوضيح، الإيجار القديم يمثل 7% من إجمالي الوحدات السكنية بعدد 3 مليون شقة، منهم 1 مليون شقة مغلقة لأسباب مختلفة وأهمها وجود سكن آخر لدى الأسرة. فمهواش الرقم الضخم المؤثر مجتمعياً.

*️⃣ بس يفرق كتير مع الدولة؛ تخيل 3 مليون شقة يتأجروا بمتوسط ليكن 3-4 آلاف جنيه يعني 1 مليار جنيه... الدولة تاخد 10% ضريبة...

ايه دا 🤔 الكلام كان واصلي علي ضريبة عقارية وسيستم عقاري جديد

بس غريب جدا الخبر دا

عامة دا مجرد ايجارات؛ والايجار القديم ككل يمثل 7% من السكن في مصر او أقل كمان وهما 3 مليون شقة منهم 1 مليون مغلق لسبب أو آخر

بس غريب الخبر


تحديث

⬅️⬅️⬅️ يا جدعان المحكمة قالت مينفعش الايجار يفضل ثابت؛ يعني مفروض الايجار يتغير؛ مش معني دا ان الايجار القديم هيتلغي؛ لكن معناه ان ممكن لاحقاً يطلع قانون عشان زيادة ايجارات الايجار القديم ميبقاش ثابت... لازم قانون تاني يطلع.... لكن مفيش فيه الغاء الايجار ولا اي حاجة

من النقاط المغمورة اللي متفق عليها مع صندوق النقد وصراحة نفسي أشوفها بتتحقق ضمن (الإصلاح الاقتصادي) طلب خاص بجهاز حماية المنافسة ومكافحة الاحتكار.

*️⃣ في جهات في مصر زي البنك المركزي مع البنوك و جهاز تنظيم الاتصالات مع شركات المحمول والأرضي والانترنت ليهم سلطات عقابية يعني لو البنك المركزي لقي مخالفة من بنك ما يقدر يطلع قرار غرامة فورية ب ملايين و عشرات الملايين كمان... نفس الحكاية في NTRA وعادة هو كل 6 شهور بيغرم شركات الموبايل لسوء الخدمة.

*️⃣ أما بقي جهاز مكافحة الاحتكار فلما يرصد مخالفات بيحولهم للمحكمة؛ ويحيينا ويحييك ربنا بقي لما ياخدوا حكم يتغرموا...

*️⃣ الصندوق بقي طالب ان الجهاز يحصل علي استقلالية واسعة ويبقي ليه سلطة اجراءات عقابية مباشرة زي المركزي وهيئة الرقابة المالية... بحيث يكون رادع للشركات لإن قصة لما نتمسك لسه هنروح محكمة ونقعد شهور وسنين وحكم واستئناف ووو بتخلي الشركات تحتكر عادي ومش خايفه.

*️⃣ الصندوق مفروض متفق مع الحكومة ان شهر أكتوبر الماضي كان مفروض يتعرض عالبرلمان تعديلات قانون الجهاز بحيث يمنحة السلطات الواسعة لتحقيق شغله... ومش معروف هنعمل ايه في البند دا الصراحة

ففي حاجات كويسة في اتفاق مصر مع الصندوق علي فكرة؛ مش كله شر؛ حتي الشرير ساعات بيقول كلام حلو 😁.

ساعات الواحد بييجي له شوية معرفة أو علم في موضوع ما؛ فأول حاجة مخه يفكر فيها هي يااااه لو كانت عندي من زمان دا أنا خسرت فرص كذا وكذا وكذا بسبب الموضوع دا؛ لو كنت أعرف اللي عرفته دا.

الغريبة هي اننا بنقول يااه لو كنا عرفناه من زمان بس مش بنقول يااااه لو كنت كملت باقي حياتي معرفش الحاجات دي..

سبحان الله الإنسان دا كائن ناكر للنعم

لا حضرتك هو أنا عارف إن الحكومة عليها سداد من النهاردة حتي نهاية السنة 9.5 مليار دولار تقريباً أقساط وقروض منهم 4.5 لجهات محلية وحبايبنا في الأهلي ومصر فهنجدد ومش هنسدد 😁 وكده بقينا هنسدد 5 مليار دولار بس

*️⃣ بس ألاقي بلومبيرج النهاردة والمواقع كلها طالعة النهاردة تقولك في 3 مليار دولار لبنوك خليجية يوم 24 نوفمبر؛ ينوك مش الدول؛ الدول حبايبنا وبنجدد ودايعهم والكويت تشهد؛ كده بقي علينا 8 مليار دولار حتي 31 ديسمبر...

*️⃣ لا دي كده فيها مرونة سعر الصرف ل 51 جنية 😁 ما إحنا قولنا مرن يعني عندنا ضغط وتضخم نطلعه؛ والدنيا رحرحت ننزلة؛ كده ضغط كبيرة يمط معانا مرونة موتزاريلا 1-2 جنية... مهي النوعية اللي بنستخدمها من الجبنة مش هتمط معانا أكثر من كده؛ أي مط إضافي هتتقطع مننا واحنا مش بنحبها تتقطع عشان بتبهدل الدنيا؛ انتم عارفين لما الجبنة تمط كثير وهوبا تتقطع بترد في هدومنا وتلزق وفيها زيت وكاتشب أحمر... فهي مطة صغيرة زي الفل كويسة لزوم شكل البيتزا يبقي واقعي.

*️⃣ فاكرين لما قولت لكم أي تحليل بيكون بناء على معطيات عندك؛ تكتشف معطي جديد يبقي القديم خلاص بخ اللون راح زي ما قولت من يومين في البوست.

*️⃣ عامة من موقعي هذا تقبل أي عزومة علي البيتزا 🍕🍕🍕 أو شاورما شغال؛ نحط عليها جبنة وتمط برضك 🌯🌯

الإمارات أعلنت ارتفاع نسبة تملك المساكن (الإماراتي اللي عايش في ملكيته مش إيجار) إلي 91%...

*️⃣ الشهر الماضي أعلنت السعودية وصول نسبة تملك المساكن ل 63.7% بقفزة ضخمة من 47% في عام 2016

*️⃣ مصر طبقاً لبحث الدخل والانفاق آخر اصدار ديسمير 2020 أعلنت إن 65.7% من المصريين عايشين في تمليك و 18.1% في منزل (هبة) يعني بتاع حد بس مقعدهم فيه زي شقة ملك الأب أو الأم أو قريب و 8.9% شقق إيجار جديد و 6.7% ايجار قديم... يعني فعليا المصريين 83.8% بشكل أو آخر في تمليك و 16.2% في إيجار.

*️⃣ نسبة تملك العقارات المرتفعة في مصر بتضغط على دخل المواطن الضعيف لإنه معندوش مثل الخليجي رفاهية الدخل المرتفع فيقدر يدبر الأساسيات + يدفع قسط شقة... فهنا المواطن بيفضل يسكن في تمليك ويدخل عياله مدرسة حكومة ويعالجهم في التأمين الصحي... لإنه مش هيقدر يتحمل قسط شقة ومدارس خاصة وعلاج خاص... وخاصة لإن الفائدة فيها مرتفعة في مصر...

*️⃣ الإمارات مثلاً فيها مبادرات زي برنامج الشيخ زايد لإسكان للمواطنين اللي بيخلي (المواطن) محدود الدخل يقدر يشتري سكن بالتقسيط علي 25 سنة بدون فوايد... والسعودية فيها مبادرات برضك تهدف لإن السعودي يسكن في منزل ملك وليس إيجار. وطبعاً مصر برضك فيها سكن اقتصادي ب 1.5 و 2 مليون جنية وسكن محدود الدخل ب نص مليون و ثلاثة ارباع مليون تسليم 36 شهر وطبعا دا سعر التقسيط.

مبروك للاخ ترامب خلاص تقريباً قفلها وهيقفلها باكتساح... هو الكوكب الوسخ كده محتاج فعلا ترامب عشان يكمل؛ انا قولتها من 2016 لازم الاوساخ ييجوا عشان نوصل أسرع للقاع...

*️⃣ أهو درس لولاد ال... الديمقراطيين انهم يركزوا في حاجة تانية غير البسكلته ويتعلموا ان أصوات الأقليات من لاتنيين وأسيويين وعرب مضمونة for granted... هما الاثنين أوساخ فاهم الاكلاشيه دا بس الديمقراطيين كانوا شوية بيراعوا لكن دلوقتي مبقوش يراعوا غير البسكلتات...

*️⃣ يلا ولع في الكوكب يا ترامبو هو كوكب يستحق الصراحة 😂😂

⬅️⬅️ وعلى صعيد آخر شكرا يا شباب ع الدوس عاللينك في البوست السابق؛ لسه عاوزين زقة كمان عشان في حد هندي حط علينا 😂😂😂 عددهم كثير ولاد الايه

يا شباب يا شباب

الجماعة بتوع RedotPay عاملين مسابقة هيدوا أكثر 5 كارت فعلي ابو 100 زرار 💲 دا 😂 وأنا عاوزة يلا بينا

الموضوع سهل؛ هتدوس بس علي لينك المسابقة؛ بس خلاص دوست شكراً... مش مطلوب منك حاجة تاني 😁 عاوز بقي تشترك وتعمل انتا كمان وتشير مع اصحابك عيش

⬅️⬅️⬅️⬅️⬅️ اللينك اهو

https://t.me/LuckyDrawMasterBot/app?startapp=Y2g9cmFuOHMyVndaNyZnPWxvJmw9cmFuOHMyVndaNyZzbz1TaGFyZSZ1PTEzOTEzNTA4

واللي عاوز يعرف قصة الكارت ايه انا كنت حكيته في لينك سابق اهو

https://t.me/BnSamyPosts/1316

يلا دوس عاللينك الأول 😁 عاوز الكارت 😍😍

هجوووووووووم 😁

أيام ما كنت في كلية العلوم كنت بحب قوي معمل الكيمياء؛ كان في مصطلح كثير بنسمعه من الدكتور وهو "اللون راح منك".

*️⃣ بتكون الفكرة في التجربة بتحط كميات محددة وعامل محفز ممكن يبقى تسخين أو مواد تانية... المهم أي تغير في النسب ممكن يؤدي إلى منتج تاني اللي هو لونه غير اللون اللي عاوزينه (احنا فعلياً بنكون منتج مش لون لكن اللون مؤشر على وجود المنتج).

*️⃣ فإنتا تسخن شوية زيادة فخلاص بخ مركب تاني؛ زودت في مواد وسيطة بتتضاف برضك بخ مركب تاني.

*️⃣ بغض النظر إني بعدت عن عالم العلوم وجو البالطو والمعامل دا وبقيت في معسكر الأشرار بتاع الاقتصاد لكن لسه القاعدة اللي اتعلمتها وهي اللون راح مننا ولا لسه مراحش.

*️⃣ الاقتصاد شغال بنفس طريقة المعمل بالظبط؛ شوية معطيات ومعاهم عوامل محفزة تؤدي إلى نتائج محددة... ممكن تفضل المركبات ثابته لكن العامل المحفز (الظروف الخارجية) اتغيرت فدا يخلي النتيجة مختلفة.

*️⃣ ساعات ييجي البعض يقولك هتكون النتيجة Y؛ فهنا نفكر هي المركبات اتغيرت؟ لا هي هي... طيب العوامل المحفزة اتغيرت؟ لا برضك... طيب ليه متوقع Y دلوقتي؟؟؟

*️⃣ والعكس برضك ساعات تكون بتقول لحد توقع معين وتقوله التفاعل دا هيدي X وبعد فترة الظروف والعوامل تتغير فتكون النتيجة Z فتلاقي الشخص دا يرجع يقولك مش أنتا قولت التفاعل دا هينتج X ؟ عندنا Z ليه؟

*️⃣ الخلاصة إن كل تحليل وكل توقع بتقراه فدا مبني على معطيات محددة لحظية؛ أي شيء يتغير في المعطيات ممكن طبعاً يؤدي إلى تغير النتيجة... مش محتاجة تتشرح.. لو انتا فاكر إنك لو غيرت المعطيات ولسه قاعد متخيل توصل لنفس النتيجة فإنتا اللي عندك الخلل على فكرة.

*️⃣ بعد بكره في معطي كبير هيتغير في الكوكب وخاصة الاقتصاد؛ الانتخابات الأمريكية؛ يا ترى بقى هيؤدي إلى ايه محدش عارف بس أخواتنا بتوع الاقتصاد بره بقوا يسموه "Trump Trade" ... دا ممكن يأثر على سعر الدولار (عالمياً) والذهب والتجارة والركود العالمي وو...

الخلاصة لو المعطيات تغيرت فهنا عيد حساباتك بلاش عناد

بعثة صندوق النقد هتوصل بعد بكره لإجراء مراجعتها... نقول هتقعد 10-12 يوم يعني قدامنا أسبوعين كده من النهاردة فيهم حاجات هتحصل والبعثة هتراجع عليهم.

*️⃣ الحاجات دي ملهاش علاقة بالتعويم؛ الصندوق مش جاي يراجع عليهم بل على نقاط تانية واديت تقرير المراجعة الثالثة ل ChatGPT وخليته يلخص ايه اللي لسه لم يتم تنفيذه.

*️⃣ هحط لكم في التعليقات تحت النقاط ؛ وطبعا دا لا يعني ان كل دا هيتعمل في أسبوعين؛ لكن هيتعمل حاجات منه.

صندوق النقد دايماً معترض إننا بنصنف وندبر لناس وناس لا

البنك المركزي قالك عنيا من النهاردة؛ أي دكر هيعرف يجيب ورقه سليم يتفضل هندبر له؛ بس يفكر هيدخله إزاي من الجمارك

شحنتك هيكون مطلوب منها تحليل نسبة البروتين في لبن العصفور؛ هتقولي بقي بيبض هقولك انتا اللي بتتلكك؛ خلي شحنتك في الميناء وبتعد عليك ارضيات لغاية ما تجيب لنا تحليل لبن العصفور

ففكر كويس والبنك مفتوح هتقوله هات هيديك عشان الصندوق واقف؛ عقلك في راسك يا مستورد.

⬅️ توضيح كل ما سبق دا كلام تخيلي طبعاً لا يمكن يحصل في مصر 😁

نصايح تليفونية باقتراح من مراتي لإن في حيل صغيرة ناس متعرفهاش في أجهزتها؛ يعني أنا بحسها حاجات الناس كلها عارفاها بس هي شايفه غير كده فقولت أقول 3 منها عالسريع كده...

1️⃣ لأسباب تقنية الاندرويد مش بيقدر يفتح الكاميرا في البرامج عكس الآي فون؛ انتا فاكر إنك في الواتس آب ولا تليجرام لما تدوس جوا البرنامج تصوير وتصور صورة حاجة وتبعتها انك فعليا كده استخدمت الكاميرا؛ دا فعلياً أقرب ل سكرين شوت ولو عملت زوم هنضيع الجودة؛ الأندرويد بدائي (في الموضوع دا) وميعرفش يوصل للكاميرات بكامل قدرتها ففعلياً شبه بيفتح لك سكرين شوت... برنامج تليجرام عشان متطور لقي حل؛ افتح تليجرام ومتدوسش علي تصوير؛ لا دوسة طويلة علي تصوير هتلاقيه نقلك لبرنامج الكاميرا؛ هنا تقدر تصور وتستخدم الخواص كاملة والزوم والجودة الكاملة؛ بعدها تدوس OK ترجع ل تليجرام تبعت الصورة... الواتس آب بقي معندوش الحوار دا للأسف... جرب دلوقتي في تليفونك في تليجرام. (تحديث ممكن برضك في الواتس زي ما حد وضح لي)

2️⃣ أخونا الواتس آب بقي جه دوره؛ لو معاك تليفون تاني او جبت تليفون جديد وعاوز تفتح فيه الواتس آب لغاية ما تنقل برامجك؛ بس مش عاوز تقفله في القديم... فنزل الواتس آب في تليفونك الجديد وفي الخطوة بتاعة دخل رقم التليفون؛ بص يمين فوق هتلاقي ال 3 نقط... دوس عليهم هتلاقي خيار
Use as companion device

*️⃣ هتدوس عليها وهيفتح اك QR وهتعمله سكان من الموبايل القديم اللي الواتس شغال فيه... تماماً زي ما بنشغل الواتس الكومبيوتر بس هنا هنشغله على تليفون تاني.

3️⃣ جوجل مابس : كذا مرة أركب مع حد في Didi ويقولي سوري النت والخريطة مش شغالة ووو... نزل الخرايط للأماكن اللي بتتحرك فيها اوفلاين... خش بحث جوجل مابس واكتب Ok Maps هيفتح لك مربع كده الخريطة حمل خريطة المكان اللي بتروحه.. وطبعاً لا ننس برنامج OsmAnd العبقري اللي فيه ارقام العمارات في كل مكان في الكوكب؛ دا تقريباً مفروض يبقي مع كل حد بتاع ديليفري 😁.

⬅️⬅️ بوست سريع عالسخان كده؛ استرجاع ذكريات 10 سنين لورا لما كانت شغلتي اليومية اللي بقبض مرتبي آخر الشهر فيها هي الكتابة عن الآي فون وأبل والتقنية.. ياااه عالزمن الجميل؛ أنا حاسس إني تخلفت تقنياً وفقدت مهارتي في هذا المجال بس بحاول لسه كل فترة أستعيد الذكريات عشان الحنين للماضي.

*️⃣ بفكر أكتب زي زمان بوست عن أبل والأندرويد؛ ويتلم الناس عليا في التعليقات؛ ب الميزة هنا هتكون أمان 100% مفيش جهة ممكن أخاف انها تيجي لي الفجر بسبب بوست عن أبل ولا جوجل 😂😂😂؛ هيحرموني من السيرش في جوجل 😁.

*️⃣ المضحك إن البوست دا والماضي والقادم و 90% من بوستاتي بتكتب على تليفوني السامسونج الأندرويد 😁؛ لا كومبيوتر ولا اي باد؛ كلهم عالموبايل الاندرويد؛ بس هيتقال برضك عميل أبل 🫣🫣.

من 10 أيام، مصر والصندوق كانوا مقموصين من بعض؛ والصندوق في توقعه للتضخم في مصر قال: "نتوقع 21.2% بنهاية العام المالي الحالي".

*️⃣ قوم إيه، مصر آخر يومين خلاص اتصالحنا تاني وقلنا بعثة الصندوق هتيجي بعد زيارة كريستالينا تراجع على خطواتنا؛ وقلنا إننا مش عاوزين زيادة في القرض؛ وقلنا إننا هنراجع قوانين الجمارك خلال أسبوعين قبل زيارة البعثة؛ وهنراجع كمان وثيقة ملكية الدولة (التخارج).

*️⃣ قوم إيه، يا أخي، نفس الجهات والمواقع اللي قالت التضخم 21.2% بقت دلوقتي تقولك التضخم هيبقى 16% في يونيو يعني نهاية العام المالي الحالي... يا سبحان الله، يوم 22 أكتوبر يتقال تضخم متوقع 21% ويوم 30 أكتوبر يتقالك 16%.

*️⃣ المؤسسات الدولية دي حرفيًا مش فارقة حاجة عن اليوم الساقع وكام إعلامي عارفينهم كلنا... بيشتغلوا بالكوين كده؛ وشغالين بالمثل اللي جدتي وأمي، الله يرحمهم، كانوا بيقولوه: (حبيبك يبلع لك الزلط وعدوك يتمنالك الغلط)... نبقى صحابهم يقولوا لك "اسكت، مش بصينا في الورق لقيناك زي الفل؛ إيه الحلاوة دي"... تختلف معاهم يقولوا لك "إحنا حاسين إن ذوبان الجليد في القطب الشمالي وارتفاع أسعار عصير البرتقال عالميًا هيأثر على الناتج المحلي بتاعك فخد تقرير اقتصادي زي الزفت عن مستقبلك المالي".

*️⃣ يلا يا شوية مؤسسات احم احم زمبلك بكوين؛ مش كده يعني اعملوها بشكل أنضف شوية... أما صندوق صحيح يعني (قفص) بس قفص مقفل.

الدولار جاب 49 الناس اتخضت.. يا جدعان ما احنا من ساعة التعويم بنقول 47-50 قاعدين نلعب فيها... ما روحنا فوق 49 في أغسطس؛ وكنا بنخبط علي باب ال 50؛ ايه الديجافو ونفس الرسايل والبوستات دي 😂😂... بصوا الخلاصة عشان أنا رديت عالسؤال دا بتاع 10 مرات النهاردة. وهشيل الكسور للتسهيل

⬅️ الدولار من 47-50 عادي شغل تقليدي مفيش ذرة قلق.

⬅️ الدولار كسر 51 هنا تقلق بقى.

⬅️ الدولار وصل 55 لا خاف وهرش واسهر بالليل تفكر.

⬅️ الدولار جاب 60 "في وقت قريب" هنا بقى تروح تكتب الوصية عشان كده 100+ على مرمى البصل. واه هي بصل عشان مفيش بصر خلاص.

*️⃣ فطول ما احنا تحت ال 50 يبقى زي ما إحنا وخليهم يتسلوا. ومش يمكن نبيع بيعه حلوه تاني فتجيب قرشين.

*️⃣ حاجة أخيرة قولتها في اللايف من يومين؛ متخليش الدولار هو تركيزك؛ الأسعار أهم من الدولار... طيب ما الدولار شبه ثابت بقاله 7 شهور؛ ها ايه أخبار الأسعار ثابته زي الدولار؟

*️⃣ الأسعار بيأثر عليها سعر الدولار طبعاً وبيأثر عليها سعر البنزين والكهرباء وبيأثر عليها التعريفة الجمركية اللي رئيس الوزراء قال خلال أسبوعين هنعمل تعديلات بالجمارك؛ وبيأثر عليها القيمة المضافة لو معفية ونزل عليها. بيأثر عليها صعوبات الشحن الدولي وبيأثر عليها العقبات الجمركية زي العربيات مثلاً؛ بيأثر عليها الرواتب لما تزيد؛ بيأثر عليها الفساد والرشاوي؛ بيأثر عليها التصدير زي الأسمنت اللي زاد مؤخراً بسبب كثافة تصديره لدول مجاورة منها ليبيا مثلاً. ييأثر عليها الفايدة بتاعة البنك لما تبقي عالية فلازم تكسب كثير وغيرها من التأثرات.

*️⃣ فمش ممكن ال 100 مليون سايبين كل شيء ومركزين مع سعر الصرف بس؛ طيب والباقي يا كابتشن؟ بلاش تبص عالعصفورة... ولا بلاش ليه ما دي الخطة بحيث لما تلاقي الدولار ثابت والأسعار بتزيد يبقى الزيادة سببها الأشرار التجار لإننا فاكرين أن التسعير هو دولار بس ولو الدولار ثابت يبقي الأسعار مفروض متزدش 😂😂 طيبين قوي بتوع سريلانكا دول ...

*️⃣ عالعموم اليوم الساعة هتتغير؛ فمن الساعة 11 بالليل ل 2 البنوك تقريباً مش هتبقى شغالة تحويلات ووو... فلو عندك أي شيء مهم ابعته.

*️⃣ وعشان كل بوست فيه سؤال على الذهب؛ فالذهب عالمياً النهاردة نزل اللي طلعه آخر 7 أيام... يمكن دا يكون التصحيح وهنا تشتري بقى ... الذهب أحسن من الدولار حالياً و في 2025 حسب المعطيات الحالية.

*️⃣ كفاية كده أنا نيتي كنت أكتب بس إن الصين هتعمل حزمة اقتصاد ب 1400 مليار وألمانيا بتاخد استشارات مرض مزمن من الصندوق واقفل... بس الموضوع فتح معايا.

*️⃣ كده هبوظ خطتي للشهور القادمة اللي ناوي فيها كل أسبوع مثلاً اجيب لكن دولة وأشرح لكم مشاكل بتواجهه اقتصادها حالياً... مهي الدنيا مش ربيع ولا الجو بديع في العالم.. كله بيواجهه مشاكل بس مع اختلاف شكل التحديات... يعني انتا ك مواطن مصري هتبقى قاعد بتشوف مشاكلهم واحساسك زي "الكحيت في مسلسل ناس وناس لو حد فاكرة" مش لاقي العيش وقاعد بتسمع عن مواطن بيعاني بسبب ارتفاع اسعار المرسيدس ولا غلاء السيمون فيميه ويصعبوا عليك.... فبفكر أجيب أمريكا والصين وانجلترا واستراليا والامارات والسعودية واليابان وكده في سلسلة بوستات.

⬅️⬅️⬅️ ملحوظة غبية... لما نقول ألمانيا بتعاني ومشاكل وتخلف ووو فهنا بنقارن مع أمريكا وكندا وفرنسا واليابان والصين وكوريا وسنغافورة ... ماشي يا كابتن عشان متفتكرش إنهم نفس المعاناه عندنا... هما سباحين مهرة لكن دخلوا في نوة فبيعانوا... احنا بنغرق عالشط. فمتقارنش دولنا العربية بيهم من فضلكم... هو توضيح غبي بس قولت هيطلع لي حد يقارن بينا وبينهم 😁.

مبلغ 1400 مليار دولار أو 1.4 ترليون دولار هو قيمة حزمة تحفيز اقتصادي الصين أعلنته لتنشيط الاقتصاد الصيني اللي بيعاني من أزمات صعبة قوي... أيوا الاقتصاد الصيني في أزمة يا عم... طيب سيبك من الصين عارف مين كبير أوروبا؟ ألمانيا

*️⃣ أهي الشيخوخة ضربت في الاقتصاد الألماني وصندوق النقد بقى يديهم استشارات اقتصاديه 😂 يا مراحب يا أخواتنا الألمان؛ تحس ان اللي يساند ولاد ال... لازم اللعنة تصيبة في اقتصاده 😁؛ طبعاً بهزر الاقتصاد الألماني بيعاني شيخوحة وأمراض مزمنة بل البعض بيعتبرها شيخوخة بلا علاج... هيعجز ويمرض ويموت... تحسهم هياخدوا لقب أسد أوروبا المريض.

*️⃣ الاقتصاد الألماني عنده سلسلة مشاكل وخد عندك بالمختصر قوي:

1️⃣ زيادة الشيخوخة في الشعب؛ تقريباً ثلث الشعب الألماني بقى فوق 60 سنة... الناس اللي بتطلع معاش كل سنة وتخرج من سوق العمل أكبر من اللي بيدخلوا سوق العمل من الشباب "الألماني"... والحل طبعاً هو زيادة الإنجاب ودا خلاص مستحيل لإنهم بقوا يفضلوا يربوا كلب عن إنهم يشيلوا مسئولية طفل... والثاني هو زيادة المهاجرين.

2️⃣ البيئة لعنة أصابت ألمانيا... الألمان من أكثر دول العالم دعماً لحوارات البيئة دي؛ فأخدوا الموضوع على صدرهم وقالك اقفل المفاعلات واقفل محطات الفحم والسولار ووو... جميل قوي يا برنس تيجي بقى روسيا وتتخانق مع أوروبا فهنا تفقد ألمانيا الغاز السهل الرخيص فالنتيحة نستخدم بدائل؛ الكهرباء تبقى غالية كمان مش متوفرة كثير... فالمصانع الألمانية تعاني وبقى أي حد يفكر ألف مرة قبل ما يقولك أفتح مصنع عاوز طاقة في ألمانيا لإنها بلد متعرفش مستقبل ليها في الطاقة.

3️⃣ ختم النسر الألماني... أصدقائنا في ألمانيا يحكوا بقى لنا هنا... عارف مدام عفاف في الدور الرابع؛ في بنت خالتها بس أسمها "آنا" شغالة في الدور 27 وبتمضي وتختم ورقة برضك زي مدام عفاف... احنا ك دولة عالم 3 عادي معانا مدام عفاف بس دول العالم الأول خلاص مفيش شيء اسمه ورق وختم وبيروقراطية؛ في دول أوروبية نسيوا يعني ايه ورق... ألمانيا بقى ممكن تعمل تمثال للبيروقراطية في أوروبا... في مصر عندنا درج بيخلص البيرقراطية بس ألمانيا هما بيحبوا البيرقراطية من باب حبها مش عشان يفتحوا الدرج... فالموضوع مأساة والعالم بيتقدم وهما لسه شغالين بالإجراءات الروتينية.

4️⃣ النهضة الصينية... عاوز أحسن سيارات؟ الألماني... الماكينات؟ الألماني... صناعات كميائية؟ ألمانيا... صناعة الاتصالات؟ ألمانيا... دي كان الوضع من 40 و 30 و 20 و 10 سنين فاتوا... دلوقتي في نهضة صينية مرعبة في كل المجالات؛ طبعاً لسه الألماني ألماني بس الصيني بقى قريب في الجودة وبسعر أقل بكثييييير قوي... فالكرسي بيتحسب من تحت رجلين ألمانيا.

5️⃣ صناعات الأسلحة روتينية... في الوقت اللي فيه نهضة عسكرية فرنسية لدرجة إن فرنسا 2 أكبر مصدر أسلحة في العالم لكن ألمانيا تواصل التراجع وبقت رقم 5 في صناعة الأسلحة ومتركز قوتها في تقنيات قديمة يعتبر... فرنسا متطورة في الطيران والتقنيات الحديثة لكن ألمانيا في الماكينات؛ مدفعية قذائف مدرعات وغواصات... الأسلحة الألمانية لسه الأفضل في مجالها بس لو رجعت 10 سنين هتلاقيهم نفس الأسئلة وغواصات دولفين ولو 20 سنة نفس الوضع... الآخرين تطوروا في الطيران والطائرات بدون طيار وصناعات السفن وو...

6️⃣ التقنية كل سنة وانتا طيب وتعيش انتا يا حاج... ممكن حد يقولي كام شركة ألمانية ضمن أكبر 100 شركة تقنية في العالم؟ شركة تكنولوجية عامة بلاش برمجية... تقريباً مش هتلاقوا غير SAP و شركة ديليفري هيرو (اللي عندنا طلبات في مصر)... لكن معندهمش شركات تقنية مرعبة زي أمريكا ولا حاجة قابله الكوكب زي هواوي في الصين ولا حاجة زي سامسونج في كوريا و TSMC في تايوان ولا ASML في هولندا...

7️⃣ البنية التحتيه ضعيفة... معلش كلام غريب بس أول شيء صندوق النقد عليه عليه في نصايحة لألمانيا هو إنها محتاجة تفك الكيس شوية وتصرف على تطوير البنية التحتيه؛ فوق قولنا عندها مشاكل في الطاقة وعندها مشاكل في شبكات النقل ومشاكل في البنية التحتية الرقمية يعني الناس وخاصة في الأرياف بتعاني من اطفي الراوتر وافتحه تاني 😁.

8️⃣ التقشف الألماني... من سنين ألمانيا موقفة تقشف ودا من أسباب الأزمة الحالية؛ بالمناسبة ألمانيا سنة 2019 و 2020 كانت بتستلف (سندات) آجل 10 سنين بفائدة -0.5% ومعرفش شوفت السالب أم لا... يعني تدي ألمانيا فلوس ترجعهالك بعد 10 سنين ناقصين؛ أنتا اللي هتدفع لألمانيا فلوس عشان هي تستلف منك... ودلوقتي بعد الفائدة ما زادت بقت تدفع 2% لأجل 10 سنين... ورغم كده هما مش بيستلفوا عشان يطوروا شيء. ولا معاهم يطوروه... سايبين البلد تعجز.

دي مجرد عينة من المشاكل في ألمانيا بشكل سوبر مختصر