#KALTUBE

በእሳትና በውኃ


📖“በራሳችን ላይ ሰውን አስረገጥኸን፤ በእሳትና በውኃ መካከል አለፍን፥ ወደ ዕረፍትም አወጣኸን።”

            — መዝሙር 66፥12


ሰሞኑን ከሳምንቱ በአንደኛው ቀን የእጅ ስልኬ ላይ አንድ ተንቀሳቃሽ ምስልን ተመለከትኩ። ዓይኖቼ በሚያዩትና ጆሮቼ በሚሰሙት ነገር በመሳባቸው ትኩረቴን ሰጠሁት። ከስልኬ ውስጥ እንዲህ የሚልን ንግግር ሰማሁ፦ "እግዚአብሔር ስጦታ ሲሰጥህ በመከራ ወረቀት አሽጎት ነው።" ቀጠል አድርጎም ላነሳው ሀሳብ ደጋፊነት ያላቸውን ቃላቶች ተናገረ። "ምክንያቱም እርሱ የሚሰጠው ነገር እጅግ ዋጋ ያለው በመሆኑ ስጦታውን ለመቀበል ዝግጁ እንደሆንክ ማረጋገጥ ይፈልጋል።"


ይህንን ካደመጥኩ በኃላ ራሴን እንደዚህ በማለት ጠየኩት፦ "ስንት ጊዜ ይሆን የመከራ ማሸጊያ ወረቀቶችን መክፈት ባለ መፈለጌ ምክንያት ዕንቁ የሆኑ ስጦታዎቼን ያጣሁት?" ብዙዎቻችንን ተመሳሳይ ቁጭት እንዳለን እገምታለሁ።


ዳዊት የመከራን አስፈላጊነት ባጎላ መልኩ እንደዚህ በማለት ይናገራል፦ “በራሳችን ላይ ሰውን አስረገጥኸን፤ በእሳትና በውኃ መካከል አለፍን፥ ወደ ዕረፍትም አወጣኸን።” (መዝ 66፥12) “በእሳትና በውኃ” መካከል ማለፍ ቀላል ላይሆን ይችላል። በጊዜው የሚሰማን ስሜት ጥልቅ ነው። ነገር ግን እሳቱ ሊፈጀን ሳይሆን ወደ እኛ የሚመጣው እንደ ወርቅ አንጥረኛ ሊያጠራንና እንደ ሸክላ ሰሪ ጥሩና የተስተካከለ ቅርፅ ሊያሲዘን ነው። በውሃ ውስጥ ማለፋችን ግድ የሚለን ጠራርጎ ሊያጠፋን ሳይሆን እንደ ግንበኛ ባለንበት ፀንተን እንድንቆም ሊያጠነክረን፣ በሁኔታዎች ተፈረካክሰን እንዳንወድቅ ሊገነባን ነው።


ባለ ቅኔው ምን አልባት “በራሳችን ላይ ሰውን አስረገጥኸን፤ በእሳትና በውኃ መካከል አለፍን፥” ብሎ ቢያቆም ልባችን ሊያዝን ይችላል። ግና በዛ አልተቋጨም። “ወደ ዕረፍትም አወጣኸን” በማለት ይናገራል። ወገኖቼ፣ በእሳትና በውኃ መካከል ማለፋችንን አንጥላው። በመከራ ወረቀት የታሸጉ ስጦታዎቻችንን ለመክፈት ልባችን አይራድ። ሕይወታችን በዚህ አያበቃም። የኅላ ኅላ ሁሉ ነገር ወደ በረከት ይመጣልና።


🛐ፀሎት፡ አምላኬ ሆይ፣ ዕረፍቴና በረከቴ ስለሆንክ አከብርሃለሁ። በእሳትና በውኃ መካከል ማለፍ ግድ ሲሆንብኝ አንተን መታመንን አስተምረኝ። አሜን።

የህይወት ስንቅ ~ #BT
| KALTUBE
  "Daily Spiritual Feeding"
👇💐👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ IN CHRIST
ክፍል 21

   በክርስቶስ የተሰጡን የፀጋ ስጦታዎች
ነገር ግን መንፈስ ቅዱስን መግለጥ ለእያንዳንዱ ለጥቅም ይሰጠዋል። ለአንዱ ጥበብን መናገር በመንፈስ ይሰጠዋልና፥ ለአንዱም በዚያው መንፈስ እውቀትን መናገር ይሰጠዋል፥ለአንዱም በዚያው መንፈስ እምነት፥ ለአንዱም በአንዱ መንፈስ የመፈወስ ስጦታ፥ ለአንዱም ተአምራትን ማድረግ፥
ለአንዱም ትንቢትን መናገር፥ ለአንዱም መናፍስትን መለየት፥ ለአንዱም በልዩ ዓይነት ልሳን መናገር፥ ለአንዱም በልሳኖች የተነገረውን መተርጎም ይሰጠዋል፤ 1ቆሮ 12:7-10

➢የፀጋ ስጦታ በአዲስ ኪዳን ቤተክርስቲያን ውስጥ የክርስቶስ ኢየሱስ ቤተክርስቲያን ሁለንተናዊ እድገት፣ቅርፅ፣እና ሙላት ይኖራት ዘንድ መንፈስ ቅዱስ እንደወደደ ለእያንዳንዱ አማኝ የሚሰጠው መንፈሳዊ ስጦታ ነው።
የጸጋ ስጦታ የሚለውን የግሪኩ ቃል = Charisma  የጸጋ ስጦታ ተብሎ ተተርጉሟል።~Charis (ካሪስ) ማለት ደግሞ ጸጋ ማለት ነው።

➢ያለ ፀጋ ስጦታዎች የእግዚአብሔርን መንግስት አገለግላለሁ ብሎ ማሰብ አይቻልም። የመንፈ ስ ቅዱስ ስጦታ የሚሰጠው አማኙ እግዚአብ ሔርን እንዲያገለግል ለቤተ ክርስቲያን ጥቅም ነው።

የፀጋ ስጦታዎች ትኩረት ካልተደረገባቸው  ቤ/ክ ወስጥ እውን ሆነው አናይም።አንዳንድ ቤ/ክ ውስጥ የፀጋ ስጦታ ዋጋ ስለማይሰጠው  ቴክኒክና የሰው ብልሀት ገኖ ይታያል።ያለ ፀጋ ስጦታ ማገልገል የቤ/ክንን አገልግሎት እጅግ አታካችና አሰልቺ ያደርጋል።

➢ቤተክርስቲያን የሚያስፈልጋት በፀጋ ስጦታዎች የታጠቁ አማኞች ናቸው። መናፍስት የሚለዩ ፣ትንቢት የሚናገሩ፣ጥበብና እውቀት የሚናገሩ ፣በልሳን የሚናገሩ ፣ልሳንን የሚተረጉሙ ፣ የሚፈውሱ ፣ተአምራት የሚያደርጉ አማኞች ያስፈልጋሉ። ምክንያቱም ክርስትና የኃይል ጉዳይ ነው። ክርስትና የኃይል ውጤት ነው። ማለትም የትንሳኤ ኃይል ውጤት ነው። ወንጌል ያለ ኃይል በትክክል ሊሰበክ አይችልም።

እምነታችሁም በእግዚአብሔር ኃይል እንጂ በሰው ጥበብ እንዳይሆን፥ ቃሌም ስብከቴም መንፈስንና ኃይልን በመግለጥ ነበረ እንጂ፥ በሚያባብል በጥበብ ቃል አልነበረም።
1ቆሮ 2:5

➢በእናንተ ቤ/ክ ሰዎች ከአጋንንት እስራት እየተፈቱ ነው? ሰዎች እየዳኑ ነው? ወንጌል በቴክኒክ ሳይሆን በኃይል እየተሰበከ ነው??
የፀጋ ስጦታዎች ይበረታታሉ ወይስ ዋጋ የላቸውም?
እግዚአብሔር የሰጣችሁ የፀጋ ስጦታ እንዲዳፈን አትፍቀዱ

➢ቤተክርስቲያን ውስጥ ደንዝዘው ሊያደነዝዟች ሁ፣ ግራ ገብቷቸው ግራ ሊያጋቧችሁ የሚፈልጉ  የቀዘቀዙ ሰዎች ሊኖሩ ይችላሉ። ነገር ግን መቼም ቢሆን በእነዚህ ሰዎች ተፅዕኖ ስር እንዳትወድቁ። ፀጋችሁ እንዲገለጥ መክፈል ያለባችሁን ዋጋ ለመክፈል ተዘጋጁ። እግዚአብሔር ይጠቀምባችኋል። ይሰራባችኋል። ለፀጋ ስጦታዎችና ለእናንተ ለፀጋው ተሸካሚዎች ዋጋና ቦታ የምትሰጥ  ቤ/ክ ውስጥ ብቻ ቆዩ። ያኔ በእናንተ ውስጥ ያለው የፀጋ ስጦታ እየተገለጠ ይመጣል።

➢የፀጋ ስጦታዎች በሂደትና፣ በተግባር፣ በአገልግሎት ውስጥ እየጎለበቱ፣በተፅዕኖ አድማስ እየሰፉና እየበረቱ የሚመጡ ናቸው።
በተቀበልከው የፀጋ ስጦታ የበለጠ ለማደግ  በተከፈተልህ በር ማገልገልህን ልትቀጥል ይገባል። አግልግሎት ሳትንቅ የሰዉን ብዛት ሳታይ በታማኝነት አገልግል።

✍መሳይ አለማየሁ(ነቢይ)
ክፍል 22 ይቀጥላል

👇💐👇💐👇💐👇💐
            @KALTUBE
            @KALTUBE
            @KALTUBE

" ትልቁ ህመም ታሞ ጤነኛ መምሰል ነው" ሰይፉ ዘሪሁን

https://youtu.be/wExrxHnzuqw?si=3QHKtWfbxby2L4CN

በቸርነትህ ዓመትን ታቀዳጃለህ
============================

📖“በቸርነትህ ዓመትን ታቀዳጃለህ፥ ምድረ በዳውም ስብን ይጠግባል።”

         — መዝሙር 65፥11


ዕድሜ ፀጋ ነው። በራሳችን ጥረን ግረን የምንጨምረው ነገር ሳይሆን ከሕይወት ባለቤት የሚቸር ስጦታ ነው። አንደኛውን ዘመን አልፎ ቀጣዩን ማየት የሚቻለው እስትንፋሳችንን በእጁ የያዘው እግዚአብሔር ሲፈቅድ ብቻ ነው። በሀገረ አሜሪካ የሚኖር አንድ ሰው ሁሌም ሲታይ ወጣት መሆንን በመናፈቅና እርጅናን በመፍራት እረብጣ ሚሊዬን ዶላሮችን እንዳወጣ የሚናገርን ዜና አነበብኩ። ከንቱ  ልፋት! ይህን የሰው ልጅ ከንቱነት ጌታችን እንደዚህ በማለት ገልጦታል፦ “ከእናንተ ተጨንቆ በቁመቱ ላይ አንድ ክንድ መጨመር የሚችል ማን ነው?” (ማቴ 6፥27)


ባለ መዝሙሩ ዳዊት ይናገራል፦ “በቸርነትህ ዓመትን ታቀዳጃለህ፥ ምድረ በዳውም ስብን ይጠግባል።” (መዝ 65፥11) ዕድሜን ከፀጋ ጋር ደርቦ መስጠት የሚቻለው እግዚአብሔር ብቻ ነው። ይህ ፈቃር አምላክ ቸርነቱን በማደል አንደኛው ዘመን በሌላኛው ይቀይራል፤ አለቀ ደቀቀ የተባለውን ምድረ በዳ የነገሰበትን ሕይወታችንን ያለመልመዋል።


ወዳጆቼ፣ የዕድሜ ዘመናችን ስንት ነው? እንዲሁ ቁጥር ብቻ ነው? ወይንስ በዕድሜያችን ልክ ተጠቅመንበታል? ይህ ሁላችንም ልንጠይቀው የሚገባ ወሳኝ ጥያቄ ነው። እኔ አንድ የሕይወት ናፍቆት አለኝ። እርሱም በምሕረቱ ትላንትናዬን ቆልፎ፣ በተስፋ ነገዬን ለከፈተልኝ፣ በይቅርታው ሰው ላደረገኝ፣ በፍቅሩ ወደ እርሱ ለሳበኝና በቸርነቱ ዓመታትን ላቀዳጀኝ አምላክ ዕድሜዬን መስጠት።


እናንተስ?


🛐ፀሎት፡ አምላኬ ሆይ፣ የሕይወቴ መሪ ስለሆንክ አከብርሃለሁ። በሰጠኸኝ ዕድሜ ደግሞ እንዳገለግልህ በፀጋህ እርዳኝ። አሜን።

የህይወት ስንቅ ~ #BT
| KALTUBE
  "Daily Spiritual Feeding"
👇💐👇💐👇💐👇💐👇💐
            @KALTUBE
            @KALTUBE
            @KALTUBE

ጸሎቴን ስማኝ

📖“አቤቱ፥ ወደ አንተ በለመንሁ ጊዜ ጸሎቴን ስማኝ፥ ከጠላትም ፍርሃት ነፍሴን አድን።”

             — መዝሙር 64፥1


እግዚአብሔር አምላክ አንዴ ፈጥሮን ብቻ አለመተው ያስደንቀኛል። በእያንዳንዱ የሕይወት እንቅስቃሴያችን ውስጥ ዘውትር አብሮን በመሆን አባትነቱን በተግባር ገለፀ። የእርሱ አብሮነት ለፈለጉት ሁሉ ነውና ፍቅሩን ለሚሻ ሰርክ ይሰጠዋል።


ምን አልባት ወደዚህ ምድር የቀላቀሉን ወላጆቻችን ይረሱን፣ ይተውኑም ይሆናል። “በውኑ ሴት ከማኅፀንዋ ለተወለደው ልጅ እስከማትራራ ድረስ ሕፃንዋን ትረሳ ዘንድ ትችላለችን? አዎን፥ እርስዋ ትረሳ ይሆናል፥ እኔ ግን አልረሳሽም።” (ኢሳ 49፥15) ነገር ግን እግዚአብሔር ለአፍታ እንኳን አይረሳንም። አዎ፣ ዘውትር ስለ እኔ ግድ የሚለው፣ እኔን ከማጣት ይልቅ ራሱን ማጣት መርጦ በመስቀል ላይ የተጠረቀው፣ ስሜን በደሙ ነጠብጣብ ላይጠፋ የፃፈው፣ እስከ ዘመን ማብቂያችን ሳይሰለች የሚሸከመን ቸር አባት አለን። “እስከ ሽምግልና ድረስ እኔ ነኝ፥ እስከ ሽበትም ድረስ እሸከማችኋለሁ፤ እኔ ሠርቻለሁ እኔም አነሣለሁ፤ እኔ እሸከማለሁ እኔም አድናለሁ።” (ኢሳ 46፥4) ክብር ለእርሱ ይሁን!


ታዲያ ይህን አምላክ እንዴት መተው ይቻላል?! በሀዘን ይሁን በደስታ፣ በማጣት ይሁን በማግኘት፣ በውድቀት ይሁን በስኬት ዘውትር ልንጠማጠመው ይገባል። እርሱ በቀረበን ልክ እንቅረበው። ዳዊት ከእግዚአብሔር ጋር ቀረቤታን መፍጠሪያ ስለሆነ አንድ መንገድ ይናገራል። ጸሎት! ለዚህም ነው በጨነቀው ሰዓት “አቤቱ፥ ወደ አንተ በለመንሁ ጊዜ ጸሎቴን ስማኝ፥ ከጠላትም ፍርሃት ነፍሴን አድን።” (መዝ 64፥1) በማለት የቀረበው።


ጸሎት ከእግዚአብሔር ጋር ያለንን ሕብረት የበለጠ እንዲጠነክር ያደርገዋል። ጸሎት የእግዚአብሔርን ሀሳብ ማስቀየሪያ መሳሪያ ሳይሆን ፈቃዱን ጠንቅቆ ማወቂያ መንገድ ነው። ዘውትር ምሪቱ ያስፈልገናልና ዘውትር መፀለይን ልማዳችን ልናደርገው ይገባል። የሚፀልይ ሰው ፈተናን መቋቋምና ጠላትን ድል መንሳት ከቶ አያቅተውም። በፀሎት ውስጥ የእግዚአብሔር ኃይል ይገለጣልና አጥብቆ የሚፀልይ ሰው ኃይልን ይጎናፀፋል።


🛐ፀሎት፡ አምላኬ ሆይ፣ ከእኔ ጋር አብረህ መሆን የምትወድድ መልካም አባት ስለሆንክ አከብርሃለሁ። ይህን ሕብረት ደግሞ መናድ አልፈልግምና መፀለይን አስተምረኝ። አሜን።

የህይወት ስንቅ ~ #BT
| KALTUBE
  "Daily Spiritual Feeding"
👇💐👇💐👇💐👇💐👇💐
            @KALTUBE
            @KALTUBE
            @KALTUBE

በመኝታዬ አስብሃለሁ


📖“በመኝታዬም አስብሃለሁ፥ በማለዳም እናገርልሃለሁ፤”

            መዝሙር 63፥6


በተቃራኒ ፆታ መካከል የሚፈጠር ፍቅር ደስ ይላል። ሁለቱን ወገኖች አንድ አድርጎ ያጣመራቸው ፍቅርና ፍቅር ብቻ ነውና ለጥላቻ ስፍራ የላቸውም። እርሷ ለእርሱ ትዝታው ናት። እንስቷም አዳሟን ዘውትር ታስበዋለች። በእንደዚህ አይነት የሕይወት መስመር ያለፋችሁ ይህን ስሜት ጠንቅቃችሁ ታውቁታላችሁ ብዬ አስባለሁ።


ዳዊት ዘውትር ናፍቆቱ ስለሆነ አንድ አካል ይናገራል። ይህን አካል ሲነሳ፣ ሲቀመጥ፣ ሲተኛ፣ ሲነቃ ሰርክ ያስበዋል። ይህንም እውነት እንደዚህ በማለት ያትመዋል፦ “በመኝታዬም አስብሃለሁ፥ በማለዳም እናገርልሃለሁ፤” (መዝ 63፥6)


እግዚአብሔር ዘውትር ትዝታችን ሊሆን ይገባል። በእያንዳንዱ እንቅስቃሴያችን ውስጥ አብሮን እንዲሆንና መንገዱን እንዲያሳየን የተከፈተ ልቦና ይኑረን። የምንወደውን ሰው ሁልጊዜ እንደምናስበው ለእኔና ለእናንተ ሲል ዋጋ የከፈለልንን ፈቃር አምላክ እናስበው። ልባችን እግዚአብሔርን የሚፈልገው ችግር ውስጥ በገባን ሰዓት ብቻ አይሁን። ስንቀመጥ፣ ስንቆም፣ ስንተኛ፣ ስንነሳ፣ ስንራመድ ዘውትር ትዝታችን እግዚአብሔር ይሁን። ስለዚህ “እኔም ዛሬ አንተን የማዝዘውን ይህን ቃል በልብህ ያዝ። ለልጆችህም አስተምረው፥ በቤትህም ስትቀመጥ፥ በመንገድም ስትሄድ፥ ስትተኛም፥ ስትነሣም ተጫወተው።” (ዘዳ 6፥6-7)


🛐ፀሎት፡ አምላኬ ሆይ፣ በዘላለማዊ ፍቅር ስለ ወደድከኝ አከብርሃለሁ። ዘውትር ደግሞ ትዝታዬ እንድትሆን በፀጋህ እርዳኝ። አሜን።

የህይወት ስንቅ ~ #BT
| KALTUBE
  "Daily Spiritual Feeding"
👇💐👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ IN CHRIST
ክፍል 20
          በክርስቶስ የተዋጀ
እንዲህም እያሉ አዲስ መዝሙር ዘመሩ፤
“መጽሐፉን ልትወስድ፣ማኅተሞቹንም ልትፈታ ይገባሃል፤ምክንያቱም ታርደሃል፤በደምህም ከነገድ ሁሉ፣ ከቋንቋ ሁሉ፣ ከወገን ሁሉ፣ ከሕዝብ ሁሉ ሰዎችን ለእግዚአብሔር ዋጅተሃል።” ራእይ 5፥9

መዋጀት የሚለው ቃል ዋጋ ከፍሎ “መግዛት”  ማለት ነው። በክርስቶስ ከኃጢአት፣ከሞት ፍርድ፣ከሰይጣንና ከአገዛዙ ሁሉ ተዋጅተናል።
በዚህ ክፍል ጌታ ከዋጀን ነገሮች አንዱን ብቻ ነጥለን እንመለከታለን።

ከላይ በመግቢያ ጥቅሳችን ላይ  እንዳነበብነ ው። ጌታችን ኢየሱስ ክርስቶስ ከነገድ ሁሉ፣ ከቋንቋ ሁሉ፣ ከወገን ሁሉ፣ ከሕዝብ ሁሉ ሰዎችን ለእግዚአብሔር እንደዋጀ እንብበናል።
ይህ መዋጀት እንዲያው በቀላሉ የተደረገ ሳይሆን ነፍስ ተከፍሎ፣የጌታችን ደም ፈሶ የተደረገ መዋጀት ነው።

➢መዋጀት የክርስትና ህይወት መሰረት ነው።
ይህ በክርስቶስ ኢየሱስ የተደረገውን መዋጀት በጥልቀት ልንረዳ ያስፈልጋል። በመዋጀት
በክርስቶስ ኢየሱስ የሰማይ ዜጋና በክርስቶስ አንድ ሰው ሆነናል።
አይሁዳዊ ወይም የግሪክ ሰው የለም፥ ባሪያ ወይም ጨዋ ሰው የለም፥ ወንድም ሴትም የለም፤ ሁላችሁ በክርስቶስ ኢየሱስ አንድ ሰው ናችሁና። (ገላ3:28)

➢ይህ ቃል በዘረኝነት አባዜ ውስጥ ለሚገኙ ላላመኑም ለክርስትያኖችም ጭምር ፍቱን መድኃኒት ነው። በክርስቶስ ድኜ የሰማይ ዜጋና የእግዚአብሔር ልጅ ነኝ እያሉ በዘረኝነት ልባቸው ያበጠ ከእኔ በቀር ሌላው የሰው ዘር አይደለም የሚሉ፣ በቋንቋና በበብሔር አድሎና መድሎ የሚፈፅሙ ጥቂቶች አይደሉም። ከየትኛውም ዘርና ነገድ ልትሆን ትችላለህ ነገር ግን የትኛውም ዘር አያፀድቅም! የየትኛውም ብሔር አካል ልትሆን ትችላለህ ነገር ግን የምድር ብሔር ከሞት ያንተ ቋንቋ ከፍርድ አያድንም፣ ከሰይጣንም አገዛዝ ነፃ ሊያደርግህ አይችልም።  ዘረኝነት አለማችን ከተፈጠረች ጊዜ አንስቶ እሰካሁን ድረስ ለሰው ልጆች እልቂት፣ለምድር ህዝቦች መከፋፈል፣የብዙ ጦርነቶች መንስኤ የሆነ ክፉ መሳርያና ክፉ አስተሳሰብ ነው።

➢አማኝ ሆነህ ዘረኛ መሆን ከኢየሱስ ክርስቶስ የመስቀል ስራ ጋር ግጭት መፍጠር ነው።እግዚአብሔር በእኩል አይን የሚያየውን እና የሞተለትን ህዝብ በብሔርተኛ  እና በዘረኝነ ት አይን ማየት ከዳነ ሰው የማይጠበቅ እና በእግዚአብሔር ፊት የሚያስጠይቅ ትዕቢት ነው። የራስህንም የሌላውንም ባህልና ቋንቋ አክብረህ በሰላም ለመኖር ክርስትያናዊ ግዴታ አለብህ። ክርስቲያን ሆነህ ምድራዊ ዘርህ ከክርስትና ህይወት ከበለጠብህ ይህ መንፈሳዊ በሽታ ነው። በአስቸኳይ ልትታከም ይገባል!

➢እግዚአብሔር በዚህ ምድር ላይ ሰውን በሰውነቱ እንጂ በዘሩ ልዩ ስፍራ አይሰጠውም ። ጌታችን ኢየሱስ ለሰው ልጆች የሞተው ያለ አድሎ እና ያለ ልዩነት ነው።ኢየሱስ ክርስቶስ የሁሉም፣ ሁሉም ደግሞ ለእርሱና በእርሱ ተፈጥሯል። እዚህ ምድር ላይ በእግዚአብሔር አምሳል እና መልክ የተፈጠረ ሰው ሁሉ በሰውነቱ እኩል ነው።

   የፈጠረውንም ምሳሌ እንዲመስል እውቀትን ለማግኘት የሚታደሰውን አዲሱን ሰው ለብሳችሁታል  በዚያም የግሪክ ሰው አይሁዳዊም የተገረዘም ያልተገረዘም አረማዊም እስኩቴስም ባሪያም ጨዋ ሰውም መሆን አልተቻለም፥ ነገር ግን ክርስቶስ ሁሉ ነው፥ በሁሉም ነው። ቆላ 3:10-11

➢አንተ በክርስቶስ የሰማይ ዜጋ ነህ፣ የምድር ጨው ነህ፣የአለም ብርሀን ነህ። እውነተኛ በሆነው ማንነትህ ታጥቀህ ተገለጥ ! የምድሩ አላፊ ነው። ሰማይም ምድርም ያልፋሉ ስለዚህ ለሚያልፈው ሳይሆን ለማያልፈው አለም ኖሮ ለማለፍ ወስን!!

ዓለሙም ምኞቱም ያልፋሉ፤ የእግዚአብሔርን ፈቃድ የሚያደርግ ግን ለዘላለም ይኖራል። 1ዮሐ2:17

ክፍል21 ይቀጥላል
✍መሳይ አለማየሁ(ነቢይ)

👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ IN CHRIST
ክፍል 19

   በእምነት መመላለስ
     መፅሐፍ ቅዱስ ስለ እምነት አስፈላጊነት እና በእምነት ድል ስላደረጉ ሰዎች እንዲሁም በእምነት ስለተደረጉ ታላላቅ ነገሮች ያስተምረ ናል።ክርስትና የእምነት ህይወት እንጂ የብል ሀት ውጤት አይደለም። እምነትን ከክርስትና ህይወት ነጥሎ ማየት አይቻልም።

➢ እምነት የእግዚአብሔር የተስፋ ቃሎች እንደሚፈፀሙ እርግጠኛ መሆን  እና የማይታየው ነገር እውን እንደሆነ መረዳት ነው።( ዕብ 11፥1)
➢መፅሐፍ ቅዱስ ውስጥ የተጠቀሱ አባቶች የስኬት ምስጢር ብልጣብልጥነት ሳይሆን እምነት ነበር። አሁን ባለንበት በዚህ ዘመናዊ አለም ውስጥ ከእምነት በላይ ለዘመናዊነት  የተለየ ግምት የሚሰጡ ጥቂቶች አይደሉም።
አንዳንዶች እምነት የማይሰራና ያልተረጋገጠ ( DISPROVEN BELIEF ) ነው በማለት የሚገልፁ  ፕሮፌሰሮች ሊቃውንት አና ፈላስፋዎች እጅግ ብዙ ናቸው።

➢ነገር ግን አባቶቻችን በህይወታቸው፣ በጤንነታቸው፣ በትዳራቸው፣ በስራቸው፣ በራዕያቸው፣በአግልግሎታቸው እና በፈተናዎች ወቅት ምላሽ ይሰጡ የነበረው በእምነት ነበር።
እምነት በሰው ላብራቶሪ የሚረጋገጥ እና በሰው ረቂቅ ጥበብ የሚመረመር አይደለም።
--ድንግል በድንግልናዋ መፀነሷ በየትኛው ዶክተር ይመረመራል?!
-- የኤርትራ ባህር በእምነት ተከፈለ ብለን ስናምን የትኛውም የውሀ መሀንዲስ-መርምሮ ይደርስበታል ?!
--ጌታችን ኢየሱስ ወደ ሰማይ ዐረገ ብለን ስናምን የትኛውም የፊዚክስ ሊቅ ሊተነትነው ይችላል?!
       እምነት  እጅግ አስፈላጊ ነው።
ምክንያቱም
1ኛ- ያለ እምነት እግዚአብሔርን ደስ ማሰኘት አይቻልም።
ደግሞም ያለ እምነት እግዚአብሔርን ደስ ማሰኘት አይቻልም፤ ምክንያቱም ወደ እግዚአብሔር የሚቀርብ ሁሉ እግዚአብሔር መኖሩንና ከልብ ለሚሹትም ዋጋ እንደሚሰጥ ማመን አለበት። ዕብ 11፥6

2ኛ-ያለ እምነት የዚህን ዓለም ፈተናዎች ማሸነፍ አይቻልም።
ምክንያቱም ከእግዚአብሔር የተወለደ ሁሉ ዓለምን ያሸንፋል። ዓለምን የሚያሸንፈውም እምነታችን ነው።1ዮሐ5፥4

3ኛ-ያለ እምነት እንደ እውነተኛ አማኝ(ክርስቲያን)መመላለስ አይቻልም።
“ጻድቅ በእምነት ይኖራል” ተብሎ እንደ
ተጻፈው። ሮሜ 1፥17

➢ እግዚአብሔርን በማመን በእለት እለት ህይወትህ እንደ አሸናፊ ክርስትያን ለመመላለ ስ እምነትን መገንባት ያስፈልጋል።
እምነት ዘር ነው ማለትም የቃሉ ዘር። ይህ ዘር ይበቅላል፣ያድጋል፣ፍሬ ያፈራል። እምነትን ለመገንባት ፍርሀትን እና ጥርጣሬን ከሚፈጥሩ አሉታዊ ወሬዎችና ዜናዎች ጆሮህን መጠበቅ አለብህ። አለበለዚያ ፍርሀት የእምነትን ስፍራ ይዞ ግራ የገባው ክርስትያን ያደርግሀል።

እምነት በልብህ ውስጥ የሚመነጨው ቃሉን በመስማት ሲሆን እምነትህ ፀንቶ የሚቆየው ቃሉን እለት እለት በመስማት ስትፀና ነው።
እንግዲያስ   እምነት ከመስማት ነው መስማትም በእግዚአብሔር ቃል ነው።
ሮሜ:--10:17

✍መሳይ አለማየሁ(ነቢይ)
ክፍል 20 ይቀጥላል

👇💐👇💐👇💐👇💐
            @KALTUBE
            @KALTUBE
            @KALTUBE

"አስር የጣደች..."

አንዳንዴ የአበው አባባሎች ለሚሰማ ጆሮ ለሚያስተውል ልቦና ለሕይወት የሚጠቅም ስንቅ ሰንቀዋል ከነዚህ ቢሂሎች መካከል አንዱ "አስር የጣደች አንዱንም አታማስልም"ወይም ይሄንን የሚስለው "አስር የሚያባርር አንዱንም አይዝም " የሚል ነው። የብዙዎቻችን ችግር ሁሉንም ጉዳይ በአንድ ጀንበር ካልገደልን የምንል የማንችለውን የምንገጥም ተግባሮቻችንን በቅደም ተከተል እና በፕሮግራም የማንከውን ሰዎች መሆናችን ከትልልቅ ስኬቶች ላይ ካለመድረስ አለፎ ለተለያዩ ጨንቀቶች አጋልጦናል።

ያለን አቅም ችግሮቻችንን በአንድ ጀንበር እንድንፈታ የሚያስችለን አይደለም ስለዚህ የተወሰኑ እና ቅድሚ የሚሰጣቸው ጉዳዮች ላይ ትኩረት ማድረግ ግዴታ ነው። ያለዚያ ብዙ የምንጀምር አንዱንም የማናጠናቅቅ ብዙ የምንፎክር ግን ድል የማናደርግ እንሆናለን። አስር ድስት ጥደን ሁሉንም የምናሳርር ከመሆን አንዱን በትኩረት ሰርተን እጅ የሚያቆረጥም ወጥ መወጥወጡ የተሻለ ነው። ያለዚያ የምናሰበውን የማናደርግ ያሰብነውን ባለማድረጋችን የምንጨነቅ ብዙ ችግር ለመፍታት የምናስብ ነገር ግን ተጨማሪ ችግር የምናዋልድ እንሆናለን።

ወዳጄ ሆይ አንተ ግን ሁሉ ቦታ አትገኝ፤ ትኩረትህን መጥን፤ ሀይልህን አታባክን፤ ለድርጊትህ ከአላማ አንጻር ቅድመ ተከተል አኑር የጀመርከውን ነገር አድምተህ ስራ ይሄንን ብታደርግ ከጭንቀት እየራክ ለስኬት እየቀረብክ ትመጣለህ።

አገልጋይ ሰይፉ ዘሪሁን

New Album #Pastor_Endale

" እስከ አሁን ድረስ እግዚአብሔር ረድቶናል፡ ሲል አቤንኤዘር ብሎ ጠራው።
በጌታ የተወደዳችሁ ቤተሰቦች ሰላም ይብዛላችሁ...
ከእኔ አቅምና ብርታ ሳይሆን ከእርሱ ምህረትና እርዳታ የተነሳ 23 ዝማሬዎችን የያዘው አልበም እነሆ ተጠናቀቀ
በሰማይ እና በምድር ክበር ለእርሱ ብቻ ይሁን🙌🙌ስለሆነም በ ሕዳር 21-2017 ቅዳሜ ከሰሃት ከ 8 ሰሃት ጀምሮ በአዲስ አበባ ቤተምህረት ቤ/ክ አምላካችንን ለቅድስናው መታሰቢያ እየዘመርን በማምለክ አልበሙን በይፋ እንለቃለን...አብራችሁን ጌታን ለማምለክ እንደ ጌታ ፈቃድ በዚያው እንገናኝ ያምላኬ መልካምነት ከፊታችሁ ይቅደም🙏🏾🙏🏾

በክርስቶስ  IN CHRIST
ክፍል 18

  በክርስቶስ በውስጥህ ያለውን የገደብ
          ኃይል መሰባበር
BREAKING THE POWER OF INNER LIMITATIONS

የድንኳንሽን ስፍራ አስፊ፥መጋረጃዎችሽንም ይዘርጉ፤ አትቈጥቢ፤አውታሮችሽን አስረዝሚ ካስሞችሽንም አጽኚ።በቀኝና በግራ ትሰፋፊያለ ሽና፥ዘርሽም አሕዛብን ይወርሳልና..(ኢሳ54:2)

➢የሰው ልጅ ሰው ሆኖ በእግዚአብሔር አምሳል በመፈጠሩ ብቻ በውስጡ የተከማቸ በጎ ተፅዕኖ መፍጠር የሚችል ብቃት አለ።
ሰው በክርስቶስ አምኖ ሲድን ደግሞ ጌታ በውስጡ  የሚያስቀምጠው ውድ የሆነ ስጦታ ፣ታለንት፣ራዕይ፣ የፀጋ ስጦታ እና የተለያዩ አይነት የመፍትሔ ሀሳቦች አሉ። እንደ አማኝ በዚህ ምድር ላይ ያለነው ለተልዕኮ ነው። ተልዕኳችንን ፈፅመን ለመሄድ ደግሞ በዚህ ምድር ላይ የምንጋፈጣቸው ተቀናቃኞች ኃይላት አሉ። ከእነሱ ውስጥ አንዱ የገደብ ኃይል ነው።

➢እንደ አማኝ ጌታ በውስጣችን ያስቀመጠው ን ብቃትና በጎ ተፅዕኖ የመፍጠር አቅም ልንነንቀው አይገባም።በእግዚአብሔር የተሰጠንን ማወቅ በራስ መተማመንን ከፍ ያደርጋል። ለራስህ ያለህ ግምት ከፍ ይላል።

በራስ መተማመን ማለት እግዚአብሔር አንተን በሚያይበት እይታ እራሰህን ማየትና እግዚአብሔር እንዳከበረህ እራስህን ማክበር ነው። እግዚአብሔር ላንተ ያለውን ፍቅርና አክብሮት ለራስህ እውቅና ልትሰጥ ይገባል ያኔ በውስጥህ ያለውን እንቁ ነገር አውቀህ ማውጣት ትጀምራለህ።

➢አዳማዊ ማንነት ገደብን ያስቀምጥብሀል፣
መንፈሳዊ ማንነትህ ግን ገደብን ሁሉ ይሰባብ ራል። አማኝ ስትሆን ወደ ተራ የሀይማኖት ቡድን አልተቀላቀልክም። የተቀላቀልከው ወደ አንበሶች መንጋ ነው። የመንጋው መሪ ደግሞ የይሁዳ አንበሳ የሆነው የእግዚአብሔር ልጅ ኢየሱስ ክርስቶስ ነው።
ለአንበሳ ዱር ውስጥ ያለው አራዊት ሁሉ ቁርስ፣ምሳና እራቱ ናቸው። አንበሳ የቱንም አራዊት አይፈራም።ሁሉንም የሚያየው ለመብልነት ብቻ ነው።  ለዛ ነው የአራዊቶች ንጉስ የተባለው።ቃሉ ''ክፉ ሰው ማንም ሳያሳድደው ይሸሻል፤ ጻድቅ ግን እንደ አንበሳ ልበ ሙሉ ነው።'' ይላል። ምሳሌ 28፥1

➢ ስለዚህ በዚህ መፅሐፍ ቅዱሳዊ መረዳት ላይ ቆመህ በውስጥህ ያለውን የገደብ አስተሳሰብ እና አላስፈላጊ ድንበር  ስበረው።

''አንተ ኃጢአተኛ ነህ፣አትረባም፣አትጠቅምም፣ ተራ ሰው ነህ'' የሚል ድምፅ በውስጥህ ሲጮህ '' በክርስቶስ ኢየሱስ ላሉት አሁን ኩነኔ የለባቸውም'' ተብሎ ተፅፎልኛል ብለህ ለራስህ ንገረው።ሀይልን በሚሰጠኝ በክርስቶስ ሁሉን አንደምትችል ለውሰጠኛው ሰው ንገረው።

   በውስጥህ ያለውን የአትችልም መንፈስ
  ለመስበር :-
1ኛ በክርስቶስ ማን እንደሆንህ ጠንቅቀህ እወቅ።(ከእግዚአብሔር ተወልደሀል፣የአለም ብርሀን፣የምድር ጨው ነህ)
2ኛ በክርስቶስ የተሰጠህን ብቃት(ፀጋ) እወቅ።
3ኛ በፀጋው ላይ ተማመን
4ኛ እለት እለት በአዕምሮ መታደስ ቁልፍ መሆኑን ተረዳ(ሮሜ12:2-3)
5ኛ የእግዚአብሔር መንግስት ጉዳይ ያሳስብህ

ክፍል 19 ይቀጥላል

✍መሳይ አለማየሁ (ነቢይ)

👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ  IN CHRIST
ክፍል 17

     በክርስቶስ የሀሳብ ጦርነቶችን ማሸነፍ

የመዳንንም ራስ ቁር የመንፈስንም ሰይፍ ያዙ እርሱም የእግዚአብሔር ቃል ነው። ኤፌ 6:17

ኃጢአትም ፅድቅም የሚጀምረው ከአስተሳሰብ ነው።ያላሰብነውን አናደርግም።ለምሳሌ አንድ ሰው ስርቆት ሲፈፅም መጀመርያ በሀሳቡ ይሰርቃል ከዛ ቀጥሎ በእጁ(በተግባር) ይሰርቃል።እያንዳንዳችን የሀሳባችን ተጠቂዎች ነን።ከሀሳባችን ማምለጥ አንችልም።ሀሳባችን እውነተኛው ማንነታችን ነው። የእግዚአብሔር ቃል በአስተሳሰብ እና በሀሳብ ስለመሻሻል ስለመለወጥ በተደጋጋሚ ያስተምረናል።ምክንያቱም እግዚአብሔርን የምን
መስለው በአስተሳሰባችን ነው። እንዲሁም መንፈሳዊ ውጊያዎችን ድል የምናደርገው በሀሳባችን ነው።
የሰው አዕምሮ የጦር ሜዳ ነው፤ሀሳብ ደግሞ የጦር መሳርያ ነው።

➢እንደ ክርስቲያን የተለያዩ አይነት ሀሳቦች ከሰይጣን እና ከስጋችን ወደ አዕምሯችን ሊወረወሩ ይችላሉ።አንድ ክርስትያን መቼም ቢሆን ከክፉ ሀሳብ ፍላፃ ነፃ ሊሆን አይችልም። ነፃ ሊሆን የሚችለው ወደ ጌታ ሲሄድ ብቻ ነው።
እዚህ ምድር ላይ እስካለን ድረስ የተለያዩ አይነት ክፉ ሀሳቦች ይወረወራሉ ነገር ግን በቃሉ ከመከትናቸው ይመክናሉ።
ወደ አዕምሯችን ክፉ ሀሳቦች መጡ ማለት እኛ ክፉ ነን ማለት አይደለም። ክፋቱ የሚጀምረው የመጣውን ክፉ ሀሳብ ማሰላሰል፣ደጋግሞ ማሰብ እና ለመጣው ሀሳብ አዎንታዊ ምላሽ የሰጠን ቀን ነው።

አንድ አማኝ እዚህ ምድር ላይ እያለ የሀሳብ ጦርነቶችን እየተዋጋ የተቀደሰውን ሀሳብ እየያዘ በድል እንዲኖር የእግዚአብሔር ቃል አስፈላጊ ነው።

➢ሰይጣን ጌታችንን በፈተነ ሰአት ሶስት የተለያዩ ሀሳቦችን አመጣበት፤ ነገር ግን ሶስቱንም የፈተና ሀሳቦች ያሸነፈው በሀሳቡ ሳይሆን በቃሉ ነበር። (ማቴ:4:1-5)  ሰይጣን  ወደኛ የሚወረውረውን ሀሳብ በእኛ ብልጠት ሳይሆን በቃሉ ብቻ ነው የምናሸንፈው። ምክንያቱም ሰይጣን ከእኛ በላይ ብልጥ ነው። የብዙ ሺህ አመት ልምድ እንዳለው መርሳት የለብንም። ለዲያብሎስ መምዘዝ ያለብን የቃሉን ሰይፍ እንጂ የራሳችንን ብቃት አይደለም።

➢ '''ከአናታችን በላይ የምትበረዋን ወፍ እንዳትበር መከልከል አትችልም፤ ነገር ግን ወፏ በአናትህ ላይ ጎጇዋን እንዳትቀልስ መከልከል ትችላለህ'' የሚል የቆየ አባባል አለ።

ሰይጣን፣ አለምና ስጋችን ወደኛ የሚወረውሩ ትን ሀሳብ ማስቆም አንችልም። ነገር ግን ሀሳባቸው አዕምሯችን ውስጥ እንዳይበቅል ማድረግ እንችላለን።

እግዚአብሔር እንድትሆኑ ኃይል ያላስታጠቃችሁን እንድትሆኑ አይጠይቃችሁም።

➢የሀሳብ ጦርነቶችን በድል ለመወጣት 3 መንፈሳዊ ምስጢራት አሉ :--

1- ቃሉ ( ኤፌ 6:17)
2- ፀሎት (ኤፌ 6:18)
3-የኢየሱስ ደም ራዕ 12:11

እነርሱም ከበጉ ደም የተነሣ ከምስክራቸውም ቃል የተነሣ ድል ነሡት፥ ነፍሳቸውንም እስከ ሞት ድረስ አልወደዱም። (ራዕ 12:11)

ክፍል 18 ይቀጥላል
✍ መሳይ አለማየሁ(ነቢይ)

👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ  IN CHRIST
ክፍል16

        በክርስቶስ ኢየሱስ ያለ ስርአት
ብዘገይ ግን፥ በእግዚአብሔር ማደሪያ ቤት መኖር እንዴት እንደሚገባ ታውቅ ዘንድ እጽፍልሃለሁ፤ ቤቱም የእውነት ዓምድና መሠረት፥ የሕያው እግዚአብሔር ቤተ ክርስቲያን ነው። 1ጢሞ 3:15

ሐዋርያው ጳውሎስ በእግዚአብሔር ቤት ወይም እንደ ክርስትያን እንዴት መመላለስ እንደሚገባ የኤፌሶን ቤተክርስትያን ፓስተር ለነበረው ፓስተር ጢሞቲዎስ የፃፈውን ከላይ እንብበናል። ይህ በእግዚአብሔር ቤት ያለ  ስነስርዓት የክርስትና ህይወት መገለጫ ነው።

ስነስርዓት ማለት "ብቁ ገጸ ባህሪን ወይም የባህሪ ዘይቤ ወይም የህይወት አካሄድ ነው።
ስነስርዓት የክርስቲያን ሕይወት ተፈጥሯዊ አካል ነው። በህይወታችን ውስጥ ምንም አይነት ትርጉም ያለው ነገር ያለ ስነስርዓት አይከናወንም።
➢የተለያዪ ሰዎች በቤተክርስቲያን ውስጥ የስነስርአት አስፈላጊነት ሲወራ መንፈስን ማጥፋት ነው ብለው ያምናሉ፤ ስለዚህ እንደፈለጉ መሆን ደግሞ መንፈሳዊነትና በመንፈስ መነዳት እንደሆነ ሲናገሩ ይደመጣል።ስለዚህ ለእንደነዚህ አይነት ክርስትያኖች ስነስርዓት  ያን ያክል አሳሳቢ ጉዳይ ስላልሆነ እንዲህ ሲሉ ይደመጣሉ:-

''ብቻ ቤ/ክ ውስጥ መንፈስ ካለ ህግ ምናምን አልሰማም'' ''የምን ማካበድ ነው??'' እያሉ መረን መውጣት፣
'''መንፈስቅዱስ በሰው ስርአት አይመራም' በሚል ሰበብ ቤ/ክ ላይ ማጉረምረም በትዕቢት መነፋት ፣
''እዛ ቸርች ስርአታቸው የኦሮቶዶክስ ያክል ነው'' እያሉ ስርአት አልባ መሆን፣
'' እዛ ቸርች ስርአታቸው የብሉይ ኪዳን ነው'' እያሉ ለቤ/ክ አሰራር አለመገዛተ፣
'''ክርስትና ፎርሙላ የለውም'' እያሉ ሊበራል መሆን እና ህይወትን እንደፈለጉ ለመኖር ሸነጥ የሚያደርጋቸው ጥቂት አይደሉም።

➢እንደ ክርስትያን ስነስርዓትን መገንባት እንድ ወታደር የውትድርናን ስርአት ለመገንባት የሚያደርገው ቆራጥነት  ያስፈልጋል። አለማችን ላይ ከፍተኛ ስነስርዓት ከሚጠይቁ ሞያዎች አንዱ ውትድርና ነው።ይህ ሞያ የህይወት መስዋዕትነት ድረስ የሚያደርስና ከፍተኛ በሆነ ዲስፒሊን የሚገነባ ሞያ ነው። እንደ አማኝ ለስጋ ሞተን ለመንፈስ ህያዋን ሆነን ለመኖር ከስጋ ጋር የሞት ትንቅንቅ በማድረግ የመንፈስ ስርአትን በህይወታችን እና በእግዚአብሔር ቤት ውስጥ ልንገነባ ያስፈልጋል።እንደ አማኝ ሁላችንም ክርስቶስን አምኖ የእግዚአብሔር ልጅ በመሆን ደረጃ እኩል ነን። ነገር ግን የተሰራ እና ያልተሰራ ህይወት ሰፊ ልዩነት ይፈጥራል።ይህ ልዩነት በመጨረሻው ቀን የምንቀበለውን ሽልማትም ይወስናል። ምክንያቱም መዳን በፀጋ ቢሆንም ሽልማት ግን በመሰጠትና በክርስትያናዊ አኗኗር የሚመጣና የሚገኝ ነው።

➢ቤ/ክ ውስጥ የአምልኮ ስርአት፣የአነጋገር ስርአት ፣የአለባበስ ስርአት ፣የፀሎት ስርአት ፣ እና ሌሎችም አሰፈላጊ የሆኑ ስርአቶችን  መገንባት መንፈስን ማጥፋት አይደለም። እግዚአብሔር ሁሉ ነገር በስርአት እንዲሆን የሚፈልግ አምላክ ነው ምክንያቱም የተተረማመሰ ነገር እናዝብርቅርቅ ያለ ነገር አይመቸውም።
➢እስቲ በምናባቹ አስቡት ሰማይ ቤት ያለውን ዲስፒሊን ??! እንዴት የተዋበ ይሆን?! እንዴት አስደናቂ ይሆን?!

➢ስነስርአት በሂደት የሚመጣ የተለወጠ አስተሳሰብ ውጤት ነው።በአንድ ሌሊት የሚመጣ ለውጥ ባይኖርም በአስተሳሰብ ለውጥ ይህን ስርአት መገንባት ይቻላል። (ቆላስ3፡9-10)።
➢ እንደ አማኝ በእግዚአብሔር ቤት ስንመላለስ አካሄዳችንን፣አምልኳችን፣ ፀሎቶቻን፣ቤ/ክ ለብሰን የምንመጣው አለባበስ ሳይቀር ፣አስተሳሰባችን፣ አነጋገራችንን ሁሉ የሚመዝን አምላክ ስላለ ለእሱ የሚገባውን ህይወት ለመኖር መትጋት አለብን።
➢የእግዚአብሔር ቤት እንደፈለግን የምንሆንበት ስርአት አልባ ቤት አይደለም።ቤቱ የእውነት አምድ እና የህያው እግዚአብሔር ቤ/ክ ነው።ቤቱ ባለቤት አለው?የቤቱ ባለቤት እግዚአብሔር የቤቱ ራስ ክርስቶስ ነው።

ክፍል17 ይቀጥላል

   ✍መሳይ አለማየሁ (ነቢይ)

👇💐👇💐👇💐👇💐
            @KALTUBE
            @KALTUBE
            @KALTUBE

♦አልቻልኩበትም♦

አልሆንልሽ አለኝ ዝምታ
አቅም'ም አጣሁ ለፀጥታ
ቸርነትህ በረታ ምህረትህም ገነነ
ስጦታህ በረከተብኝ ሆነ ያልተመጠነ
ሞላ ተትረፈረፈ የምቀበለው ከእጅህ
ስለሰጠኸኝ ያለልክ እንዳይቆጠር አድርገህ
የጠየኩህ ብዙ ነበረኝ እኔ ለእኔ ያሰብኩት
እፍኝ የማይሞላ ጥቂት ለቅርብ ቀኔ ያልኩት
ጩኸትም ልኬ ነበረ ወደ ማደሪያ ድንኳንህ
ቆይቼ ስጠናም ነበር እንዲከፈትልኝ ደጅህ
ሰማኸውም ጩኸቴን አደመጥከውም እዬዬን
ከአድማስ ያልተሻገረ ቅርብ ያደረ ልመናዬን
አባቴም ስለሆንክልኝ ስለምታውቀኝ ጠንቅቀህ
ውሃ ባያነሳም ጉዳዬ ሚዛን ባይደፋም በፊትህ
አልሳክብኝም ከቶውን አላልከኝምም ለዚሁ
እኔም ለኔ እንዳላውቅ ከምክር ቃልህ ተማርሁ
እንደምታውቅልኝ አንተ እንደሚበልጥም የአንተ
አወቀ ተረዳልኝ ልቤ ከልብህም ፍቅርን ሸመተ
እንድትሳሳልኝ በብርቱ እንድትራራልኝም በብዙ
እንዴትም እንደምትወደኝ ሳውቅ ሲበራልኝ ልኩ
ከድካሜ በሚልቅ ከስንፍናዬም በሚበልጥ
በእልፍ ም'ረትህ ስማር በይቅርታህ ስሰምጥ
ትከሻዬ እስካይችል ድረስ መሸከም እስከሚያቅተኝ
ባርኮትህ ዝም ብሎ ሲፈስስ ውለታህም ሲበዛብኝ
አልቻልኩበትም ዝምታ አልሆንልሽ አለኝ ፀጥታ
ሳይ'ገባኝ ስላደረከው ስላትረፈረፍከው ስጦታ
ለውድ አባቴ ለእግዚአብሔር ለእኔ ባለውለታ
ባይመጥንህም ቃላቴ ባይደርስም ያንተን ከፍታ
ስላልቻልኩበት ፀጥታ ስላልሆነልኝ ዝምታ
ተመስገን ልበልህ እንጂ ምከፍልህ የለኝም ወሮታ
ተወደስ ልበልህ እንጂ ምሰጥህ የለኝም ወሮታ!!!

ምህረት ግርማ

💐SHARE💐SHARE💐SHARE💐
@KALTUBE
@KALTUBE
@KALTUBE

በክርስቶስ IN CHRIST
ክፍል 15
በአዕምሮ መታደስ
➢እንደ አማኝ ካመንበትና ከዳንበት ቅፅበት ጀምሮ በአስተሳሰብ ለውጥ ውስጥ እንድንመላለስ የእግዚአብሔር ቃል ያዘናል።
የመንፈሳችን መዳን ምንም እንኳ ቅፅበታዊ
ቢሆንም የአስተሳሰብ ለውጥ ግን ሂደት ነው።
የአስተሳሰብ ለውጥ የህይወት ለውጦች ሁሉ መጀመሪያ ነው። አዕምሮ ሳይለጥ ምንም በህይወታችን የሚለወጥ እውነተኛ ነገር የለም።

''የእግዚአብሔር' ፈቃድ እርሱም በጎና ደስ የሚያሰኝ ፍጹምም የሆነው ነገር ምን እንደ ሆነ ፈትናችሁ ታውቁ ዘንድ በልባችሁ መታደስ ተለወጡ እንጂ ይህን ዓለም አትምሰሉ።'' ሮሜ12:2

➢አዕምሯችን የህይወታችን ማዕከላዊ የለውጥ ስፍራ ነው። ለውጥ የሚጀምረው ከስራ፣ከትምህርት ፣ከአገልግሎት ሳይሆን ከአዕምሮ ነው።አዕምሮ በእግዚአብሔር ቃል ካልታደሰ የትኛውም የህይወት ክፍል እንደነበር ይቀጥላል።

➢ያልተለወጠ አዕምሮ የእግዚአብሔርን ፈቃድ ማወቅ አይችልም። የእግዚአብሔርን ቃል አለማወቅ ደግሞ የህይወት ምስቅልቅልና ጭለማ ውስጥ መኖር ነው።የአዕምሮ መታደስ የእድሜ ልክ የለውጥ ሂደት ነው።

➢የአስተሳሰብ ለውጥ አገልጋይ ስንሆን የሚያበቃ፣ድንቅና ተአምራት ስንሰራ የሚቆም የለውጥ ሂደት አይደለም።በየቀኑ በአዕምሮ መታደስ በመንፈሳዊ ህይወት ልቆ ለመኖር አስፈላጊ ነው።በአዕምሮ ስንታደስ ለእግዚአብሔር ስራ ምቹ እንሆናለን። አለበለዚያ የእግዚአብሔር አሰራር ተቃዋሚ ልንሆን እንችላለንን።

➢ስለዚህ በአዕምሮ ለመታደስ ትልቁ መሳርያ የእግዚአብሔር ቃል ነው። የእግዚአብሔር ቃል ህያውና የሚሰራ በመሆኑ በመንፈስ ስናነበውና ስናሰላስለው አስተሳሰባችን በቃሉ ይቃኛል። ይህ ሲሆን አዕምሮአችን ከእግዚአብሔር ቃል አንፃር ነገሮችን ማሰብ፣ማየት፣ ማመዛዘን፣ መወሰን ይጀምራል።
➢አናስተውል እግዚአብሔር በህይወታችን ያየልን ፍፃሜ ለውጥ ነው። ነገሮችን ሁሉ በቃሉ በተቃኘ አዕምሮ እንመልከት። በዚህ ጊዜ ህይወት ሌላ ትርጉም እንዳላት መረዳት እንጀምራለን። አሰልቺ፣ግራ አጋቢ ጉዳዮች ከህይወታችን ይቆረጣሉ።

በክርስትናችን ደስተኛ፣በተድላና በሰላም የተሞላ ህይወት ማጣጣም እንችላለን።

✍መሳይ አለማየሁ (ነቢይ)

ክፍል 16 ይቀጥላል

👇💐👇💐👇💐👇💐
            @KALTUBE
            @KALTUBE
            @KALTUBE

መሥዋዕት ሙሉ አልበም ተለቋል!እግዚአብሔር ይመስገን!
https://youtube.com/@hannatekleofficial?si=sy_KvMQ29iIBPPKT

በክርስቶስ  IN CHRIST
ክፍል 14

          በመንፈስ መመላለስ
በመንፈስ መመላለስ ሶስት አይነት ገፅታዎች ያለው ሲሆን የመጀመርያው በመንፈስ ፍሬ መመላለስ ሲሆን ሁለተኛው ደግሞ በመንፈስ ቅዱስ ምሪት መመላለስ ነው ሶስተኛ እንደ እግዚአብሔር ቃል መመላለስ ነው።

1ኛ  በመንፈስ ፍሬ መመላለስ

➢የመንፈስ ፍሬ ሲባል ፍቅርን፣ ደስታን፣ ሰላምን፣ ትዕግሥትን፣ ቸርነትን፣ በጎነትን፣ ታማኝነትን፣ የውሃትን፣ ራስን መግዛት ተብለው የተጠቀሱት ናቸው። (ገላ 5፡24)
1. ፍቅር፡እግዚአብሔርንና ሌሎች ሰዎችን መውደድ ነው።
2. ደስታ፡ የመንፈስ እርካታ እና መረስረስ ነው።
3. ሰላም፡ ከጭንቀት እና ከጭንቀት ነፃ  መሆን ነው። (ፊልጵ 4፡6–7)።
4. ትዕግስት፡ ንዴትን የመቆጣጠር ብቃት ነው።
5. ቸርነት፡ የሌሎችን ፍላጎት እና አሳሳቢ ጉዳዮች ትኩረት መስጠትና ረጂ መሆን ነው።
6. በጎነት፡ ተግባራዊ ቅድስና ነው።
7. እምነት፡- ፈተናዎችን እና መከራዎችን ስንጸና እግዚአብሄርን አንተወውም ወይም ጀርባችንን አንሰጥም።
8. ገርነት፡ የትህትና መንፈስ ነው።
9. ራስን መግዛት፡ በኃጢአት ግፊት አለመሸነፍ ነው። ከላይ የተጠቀሱት 9ኙ የመንፈስ ፍሬዎች በመንፈስ የሚመላለስ ክርስትያን መገለጫዎች ናቸው።

2ኛ በመንፈስ ቅዱስ ምሪት መመላለስ
በዮሐንስ 10: 27: በጎቼ ድምፄን ይሰማሉ እኔም አውቃቸዋለሁ ይከተሉኝማል፤ ተብሎ ተፅፏል። በመንፈስ የመመላለስ ሌላው ገፅታ በመንፈስ ቅዱስ ምሪት መመላለስ ነው። ይህ ማለት መንፈስ ቅዱስን በቀጥታ በመታዘዝ መመላለስ ነው።መንፈስ ቅዱስ በተለያዩ መንገዶች እንደሚናገር ቅዱስ ቃሉ ያስተምረናል።
እግዚአብሔር በአንድ መንገድ በሌላም ይናገራል፤ሰው ግን አያስተውለውም።በሕልም፥ በሌሊት ራእይ፥ አፍላ እንቅልፍ በሰዎች ላይ ሲወድቅ፥ በአልጋ ላይ ተኝተው ሳሉ፥ በዚያን ጊዜ የሰዎችን ጆሮ ይከፍታል፥በተግሣጹም ያስደነግጣቸዋል፥ ኢዮብ 33:14-16

3ኛ እንደ እግዚአብሔር ቃል መመላለስ
የእግዚአብሔር ቃል የክርስትና ህይወት አዉራመንገድ ወይም ሃይዌይ ነው። ቃሉ የህይወታችን መሪ እና አቅጣጫ ጠቋሚ ነው።
ህይወታችን ከተፃፈው ቃል ጋር ተስማምቶ የሚጓዝ ከሆነ በመንፈስ የመመላለስ መገለጫ ነው።

“ስለዚህ ይህን ቃሌን ሰምቶ የሚያደርገው ሁሉ ቤቱን በዓለት ላይ የሠራ ልባም ሰውን ይመስላል። (ማቴ 7:24)
➢በመንፈስ ለመመላለስ ራሳችንን በፈቃዳችን ለእግዚአብሔር ልናስገዛ ያስፈልጋል።መንፈስ ቅዱስ እንዲረዳን እራሳችን ከሀይለኛው በታች ዝቅ እናድርግ። ብቃትችን መንፈስቅዱስ መሆኑን ተረድተን በእርሱ ላይ እንደገፍ። በድካማችን ወደ ሚራራልን ጌታ እንቅረብ፣ በፆምና በፀሎት ፊቱን ሁልጊዜ እንፈልግ። ቃሉን እናንብብ፣ እናጥና ፣እናሰላስል!

ክፍል15 ይቀጥላል

✍መሳይ አለማየሁ (ነቢይ)

👇💐👇💐👇💐👇💐
            @KALTUBE
            @KALTUBE
            @KALTUBE

በክርስቶስ IN CHRIST
ክፍል 13

በክርስቶስ ያገኘነውን ነፃነት መጠበቅ

በገላትያ 5፡1-15፣ ሐዋርያው ​​ጳውሎስ ስለ ክርስቲያናዊ ነፃነት ምንነት ሲናገር፣ “ክርስቶስ አርነት ባወጣን ነፃነት ጸንታችሁ ቁሙ እንደ ገናም በባርነት ቀንበር አትያዙ።(ገላትያ 5:1)ይላል

➢አንድ ሰው በክርስቶስ ኢየሱስ አምኖ ከዳነ በኋላ ዳግም ወደ ህግ እስራት እንዲመለስ  የሚዳርጉ ነገሮች

1ኛ-ሰው በፀጋ ከዳነ በኋላ በራስ መልካምነ ትና መልካም ስራዎች ላይ መደገፍ ሲጀምር  (ኤፌ 2:7)

2ኛ- ፀጋ ላይ ከመደገፍ ይልቅ በህግ ወይም በራስ ፅድቅ ላይ ትኩረት ማድረግ (ኤፌ 2:8)

3ኛ የተለያዩ አይነት ግራ የተጋቡ መምህራንንና ትምህርቶችን በመስማት ከእውነተኛው የፀጋ ትምህርት ፈቀቅ ማለት።(ገላቲያ 3)

4ኛ  መጽሐፍ ቅዱስ ስለ ፀጋ ከሚያስተምረው አስተምህሮ ዉጪ የተለጠጠና የተጋነነ እንዲሁም ፅንፍ የረገጠ ፣ስጋ ተኮር አስተምህሮዎችን መከተል፣ (ሮሜ 6:1)

5ኛ ፀጋና ህግን የደባለቀ (HYBRID) አስተሳሰብ።ክርስትና የሁለቱ ጥምረት ውጤት ሳይሆን የፀጋ ብቻ ውጤት ነው። ( ገላቲያ 3)

6ኛ ቀድሞ የሰማነውን እውነት ከጊዜ በኋላ ትኩረት አለመስጠት እና አለመፅናት(ቆላሰ2:7

7ኛ በአዕምሮ አስተሳሰብ አለመለወጥ።(ሮሜ 12:3)

8ኛ ከጊዜ የተነሳ አስተማሪ መሆን ሲገባ እንጭጭ ሆኖ መቅረት(ዕብ 5:12) እንደ ምክንያት መነሳት ይችላሉ።

➢በክርስትና ህይወታችን የምንሰማቸው ትምህርቶች ወይ እምነታችንን ከፍ ያደርጋሉ አሊያም ይበርዛሉ። በተለይ በደህንነታችን እና በፀጋ ዙርያ የምንሰማው ትምህርት የህይወታችን ማዕከል ስለሆነ በተረዳነው እውነት ፀንተን ልንኖር ያስፈልጋል።
➢ህግን የቀላቀሉ፣የተምታቱ እና ወደ ክርስቶስ ሙላት የማያስጠጉ የትምህርት ነፋሶች ይዘውን እንዳይሄዱ በአለቱ ላይ ቤታችንን መስራት አለብን።

“አንተ ግን በተማርህበትና በተረዳህበት ነገር ጸንተህ ኑር፥ ከማን እንደ ተማርኸው ታውቃለህና፤”— 2ኛ ጢሞቴዎስ 3፥14

✍መሳይ አለማየሁ(ነቢይ)

ክፍል 14 ይቀጥላል

👇💐👇💐👇💐👇💐
            @KALTUBE
            @KALTUBE
            @KALTUBE

መሥዋዕት!
ስለሁሉ እግዚአብሔር ይመስገን! መሥዋዕት ቁጥር 4 አልበም በዚህ ሳምንት ይለቀቃል!እስከዚያው ከአልበሙ ውስጥ"በማለዳ"በተሰኘው አዲስ ዝማሬ ተባረኩ!
https://youtu.be/binGZ6i8-yI?si=kcGoXx-QIYBNh9Hz

https://youtube.com/@hannatekleofficial?si=Vu4U3C8z-QtxX1jV