Беларуская музыка

Сябры! Пакуль музычныя навіны на святочнай паўзе, дазволю сабе літаратурны офтоп. Запрашаю вас на прэзентацыю маёй новай кнігі ў Варшаве. Гэта зборнік апавяданняў, аб’яднаных у адну няўтульную гісторыю. Яна пра нас: герояў і злодзеяў, правільных і няправільных, тутэйшых і не тутэйшых. Яна пра нашы слёзы. Нашае жыццё і нашу смерць. Буду рады вас бачыць!

Далучайцеся —> https://www.facebook.com/events/2780730195445367

Сябры! Я вельмі ўдзячны кожнаму і кожнай з вас за тое, што былі побач у гэтым шалёным 2024 годзе. Спадзяюся, вам было камфортна і цікава са мной тут, у «Міністэрстве сепультуры» і дзе-там-яшчэ-таго-чарнуху-паказваюць. Кожны год я абяцаю вам, што працягну займацца сваёй справай і прынясу вам яшчэ больш цікавых гісторый пра беларускую музыку. Ну дык хай гэта і будзе нашай добрай традыцыяй. Вельмі люблю і цаню кожнага і кожную з вас. Дзякуй за падтрымку і да сустрэчы ў 2025 годзе! Будзе шмат прыемных сюрпрызаў, абяцаю❤️

А вось і апошні выпуск Сепультуры ў гэтым годзе. Самы аб'ектыўны рэйтынг беларускіх альбомаў 2024! Глядзіце, пішыце ў каментарах пад ролікам свае варыянты. Давайце спрачацца!

https://youtu.be/MKVHiiir58E

Беларуская музыка pinned «Прывітанне, сябры! Прынёс вам плэй-ліст з майго топ-10 самых крутых альбомаў года (+2 бонусы). Забірайце сабе і слухайце. Там шмат прыгажосці! https://open.spotify.com/playlist/6Ti6cxHNrsyxydvA6gSF6e?si=b3b67468d6dc4569»

Прывітанне, сябры! Прынёс вам плэй-ліст з майго топ-10 самых крутых альбомаў года (+2 бонусы). Забірайце сабе і слухайце. Там шмат прыгажосці!

https://open.spotify.com/playlist/6Ti6cxHNrsyxydvA6gSF6e?si=b3b67468d6dc4569

На цяперашняга Міхалка балюча глядзець, а яго канцэрты — гэта проста сорам. Чаму так адбылося? Дакладнай інфармацыі бракуе, таму я сабраў для вас пяць тэорый. Залятайце глядзець!

https://youtu.be/u70iDTBqnmM

У самым канцы мінулага году здарылася неспадзяванка: на YouTube з’явіўся кліп абсалютна новага праекту Sw@da x Niczos. І гэта было вельмі свежа і натхняльна! Сапраўдны падляскі рэйв, аўтэнтычны і сучасны адначасова, сыры і дужа вайбовы.
За год праект Нікі Юрчук і саўндпрадусара Sw@da навыпускаў багата трэкаў і выступіў шмат на якіх беларускіх фестывалях, а ўжо пад канец 2024 году (лічыце, праз год пасля свайго дэбюту) музыканты выдалі дэбютны альбом #Indawoods.

Большасць трэкаў з гэтага рэлізу ўжо выходзіла асобнымі сінгламі. І тая самая Chadžu ja, для альбома перазапісаная ў студыйным фармаце, і нааўтацюнены бэнгер Nakrashana з усходнім вайбам, і ідэальны саўндтрэк для вашай шалёнай вечарыны Vysoko Letaju, і больш павольны і атмасферны Mahnit. Фактычна, для альбома музыканты падрыхтавалі тры новыя кампазіцыі, але яны ідэальна кладуцца ў логіку #Indawoods.

Гэта лаканічны, але і вельмі змястоўны альбом, які спалучае і сучасную электроніку, і аўтэнтычную падляскую гаворку, і класныя мелодыі. У Sw@da x Niczos шмат зусім юнацкай і абсалютна чароўнай і абаяльнай энергіі, і гэта адразу адчуваецца ў альбоме: гэта хіба не самыя мудрагелістыя песні, але гучаць яны настолькі шчыра і нахабна, што ты верыш у іх і хочаш, каб гэтая вечарына працягвалася. Ні нудоты, ні непатрэбнага акадэмізму, ні фанабэрыстасці — зразумелая выдатная канцэпцыя і пульсуючая маладая энергія. На такіх складніках можна збіраць шматтысячныя рэйвы.

https://youtube.com/playlist?list=OLAK5uy_mMn7ryE_taQYDRWXBgF3e2SrcSOUWGI3A&si=i9jcEO6Eeg-Y1LJG

Прынёс вам дужа цікавую гісторыю. Памятаеце гурт "Радиоволна"? Яны яшчэ спрабавалі паехаць у 2018 годзе на Еўрабачанне, але паехаў Alekseev. Дык вось, вакаліст гурта цяпер зорка ва Ўкраіне і нашмат больш актуальны, чым той жа Alekseev. А вось яго былы паплечнік — гітарыст гурта Trubetskoy. Карацей, там шмат усяго цікавага! Залятайце і глядзіце

https://youtu.be/_mAB_o7Lswo

Вітаю, сябры!

Сёння я прыйшоў да вас з навінамі і распавяду, што цікавага з’явілася ў нашым утульным Міністэрстве сепультуры.

А з’явіліся новыя прапановы для супорцераў канала —> https://buymeacoffee.com/charnukha/membership

Распавяду падрабязна пра кожную з іх.

💀Прыёмная (7 еўра на месяц)

Па гэтай падпісцы вы атрымаеце ранні доступ да выпускаў Міністэрства сепультуры, а яшчэ доступ да плэй-ліста з беларускай музыкай на Spotify, які будзе рэгулярна папаўняцца новымі песнямі.

💀Пінжак (15 еўра на месяц)

Гэта варыянт падпіскі для тых, хто хоча атрымліваць і штомесячны плэй-ліст з сусветнай музыкай, і мець доступ да плэй-лісту з беларускай музыкай. Бонусам — ранні доступ да выпускаў Міністэрства сепультуры.

💀Намеснік міністра (100 еўра на месяц)

Самы дарагі і эксклюзіўны варыянт падпіскі, але і прапанова вельмі цікавая. Намеснікі міністра атрымаюць доступ да штомесячных стрымаў з вядомымі беларускімі музыкантамі ў фармаце інтэрв’ю. Вы будзеце мець магчымасць задаваць свае пытанні ў чаце і быць актыўнымі ўдзельнікамі кожнага стрыма. Да таго ж, вы атрымаеце поўны пакет доступаў да іншых фарматаў: ранні доступ да новых відэа, доступ да плэй-ліста з новай музыкай, доступ да штомесячных плэй-лістоў з сусветнай музыкай і штомесячны эксклюзіўны матэрыял пра незвычайных музыкантаў.

Дзякуй вам за тое, што падтрымліваеце Міністэрства сепультуры. Без вас яго б папросту не існавала. Да таго ж, падтрымліваючы канал, вы даеце магчымасць гледачам унутры краіны глядзець новыя відэа. Гэта важна!

На наступным тыдні вас чакае новае відэа з дужа нечаканай гісторыяй. Да сустрэчы ў Міністэрстве!

Ваш міністр.

Калі вам спадабаўся выпуск пра Пятлю, можаце сказаць мне дзякуй вось тут. Дарэчы, планую ў хуткім часе дадаць новыя прапановы для падпісчыкаў Міністэрства сепультуры. Раскажу вам пра іх у чацвер, а пакуль збіраю вашыя ідэі: што б хацелася ўбачыць сярод новых падпісак? Магчымасць прапанаваць тэму для выпуску? Беларускія плэй-лісты? Пішыце свае варыянты ў каментарах!

https://buymeacoffee.com/charnukha

Сабраў для вас усе альбомы «Петли пристрастия» і паказваю, як гурт ледзь не аддалі рускаму року. Як гэта было? Залятайце глядзець!

https://youtu.be/-CbirNjiFlg

Адбыўся наш музычны батл з Сашам Табольскім на кайфовым канале «Падабайка». Як думаеце, хто перамог?

Адказ шукайце тут —> https://www.youtube.com/watch?v=U47JiHZFkog

Сёння выйшаў новы альбом дуэта Zui. Калі ніколі пра яго не чулі, то вось крыху кантэксту. Гэты гурт стварылі акцёры Міхась Зуй і Алена Зуй-Вайцяхоўская — дэбютны альбом выйшаў у 2016 годзе. Добра запісаны, разнастайны, але з даволі прамалінейнымі мелодыямі. З таго часу гурт знаходзіўся на паўзе і зрэдку выступаў. Былі іншыя праекты, была Шчучыншчына. Са спячкі гурт мог выштурхнуць толькі вельмі магутны імпульс — і Arka менавіта такая!

Можна лічыць, што гурт пачаў усё з самага пачатку. Матэрыял вельмі моцна адрозніваецца ад папярэдняга альбому: «дзевачкавыя» тэксты сталі больш іранічнымі, змястоўнымі і трапнымі, саўнд паляцеў ў бок змрочнай сінтовай хвалі, а мелодыі сталі больш вынаходлівымі.

У «Арцы» восем песень, вельмі розных па настроі. Ёсць рэтра-вэйв «Аркаша», які пачынаецца са словаў «Няма куды падзецца: усё не тое, чым падаецца», а вырульвае ў прыпеў «Аркаша, дэнс фор мі». Ёсць польскамоўны Żegman się з круцейшым меладычным хукам. Ёсць сумная і хітовая «Вар’яты і бамжы», якая вісіць «над прорваю у жыце». Ёсць выбуховы і агрэсіўны трэк «Мінск Юнацтва». Ёсць далікатны і пранізлівы фінал «Арка» з фантастычным рэфрэнам «Ты п'еш, як героі Быкава, я — як гераіні Рэмарка, і ляцяць журавы праз трыумфальную арку» і неверагодным саксафонным сола.

Альбом слухаецца на адным подыху і прасядае хіба на трэках Thank Youth і Bez, але і яны проста троху слабейшыя за астатні матэрыял. Цудоўны альбом, у якім поўна круцейшых мелодый, трапных тэкстаў і неблагіх аранжыровак. У Zui атрымалася сапраўдная творчая сінергія, дзе ўсё нарэшце на сваіх месцах — вельмі б хацелася, каб гэта была паўнаварстасная рэанімацыя праекту, бо новы матэрыял гэтага варты.

А вы што скажаце? Ці спадабаўся вам гэты альбом? Абавязкова напішыце сваё меркаванне ў чаце.

Ну і буду ўдзячны за падтрымку канала вось тут.

https://open.spotify.com/album/4EaKbnrRGTEcEMlxB2kloc?si=U5N6BFzaTi-f7zNs0MDChg&nd=1&dlsi=bbfb409b0149413c

Колькі Песняроў вы ведаеце? Сёння я пакажу вам кожны калектыў, які выступаў ці выступае пад гэтай шыльдай пасля 2003 году. І раскажу, як дзяржаўныя Песняры ваююць з астатнімі. Тут будуць гісторыі пра выступы на трэшовых расійскіх шоў, таямнічы чувашскі ансамбль, Змея і помсту за 2020 год. Сапраўдная анталогія шматлікіх Песняроў і іх незайздросны лёс.

https://youtu.be/Ll57QHucOEw

Сёння выйшаў сёмы альбом «Петли пристрастия» і першы беларускамоўны паўнафарматны рэліз гурта. Ён называецца «Суперпазіцыя» і даволі моцна адрозніваецца ад папярэдніх прац калектыву. Тут шмат чаго адбываецца ўпершыню. Беларускамоўная лірыка, акустычныя гітары, электроніка, візуал — нібыта гурт хоча перафармуляваць сябе і выскачыць з уласнага фармату.

Мы ўжо чулі два сінглы з гэтага альбому — даволі бляклы і няўпэўнены «Жыццё як жах» і традыцыйны для «Петли пристрастия» трагічны баявік «Квант». «Квант» у выніку трапіў на альбом першым нумарам, а вось «Жыццё як жах», як вынікае, не зусім задаволіла і саміх музыкантаў: на «Суперпазіцыі» песня «Жах» ужо ў зусім іншай (і не тое каб больш удалай) версіі — гэта ўсё яшчэ вельмі сыры трэк.

Напэўна, першае, што трэба адзначыць, гэта гучанне альбома. Упершыню вакал Іллі Чарапко гучыць такім чынам, што не заўсёды можна разабраць словы — і гэта, натуральна, моцна псуе ўражанне, бо «Петля пристрастия» заўсёды была пра моцныя, дакладныя і афарыстычныя тэксты. Але «Суперпазіцыя» гэтага адчування не дае. Натуральна, Чарапко не працуе ніжэй за пэўны ўзровень, але розніца паміж гатункамі лірыкі, напрыклад, «Гипнопедии» ці «Фобоса» і цяперашнім матэрыялам відавочная.

На «Суперапазіцыі» ёсць класныя трэкі. Той жа «Квант» дакладна стане канцэртным хітом гурта. «Алоха» — вельмі шчыры і нават пяшчотны трэк з далікатнай мелодыяй. Магутны «Дэдлайн» з фірмовымі манатоннымі гітарамі (гэта нешта сярэдняе паміж «Небо-молот» і «Автоматизмом») гучыць як споведзь на магіле ў псіхатэрапеўта. Ёсць менш удалыя «Хавай» і «Катлаван», якія проста маглі б прагучаць лепш пры пэўных маніпуляцыях з гучаннем.

Ёсць і зусім нечаканыя рэчы. Ныпрыклад, песня «Штосьці добрае», якая гучыць як мікс Coldplay і «Мегаполиса» — менш за ўсё чакаеш пачуць вось такую «Петлю пристрастия» у фінале альбому, але пасля трэку «Катастрофа» разумееш, што тут можа здарыцца ўсё, што заўгодна. Гэта самы спрэчны момант «Суперпазіцыі» — абсалютна недарэчны трэк, без якога альбом нічога б не згубіў і з якім страціў нейкі ўнутраны стрыжань.

Складваецца адчуванне, што музыканты вельмі спяшаліся зрабіць альбом і не давялі справу да канца. «Суперпазіцыя» сыраватая, у ёй хапае недасканаласцяў і спрэчных момантаў, і частка гэтага матэрыялу магла б апынуцца на бі-сайдах. Але трапіла на альбом. Ён не дрэнны, але ў параўнанні з выдатным «Не тот человек» гэта крок назад.

https://open.spotify.com/album/27FvWyFCWHZCDcFDejwVgf?si=wgbBZUyvQveBN4dwn1L2oQ

У пятніцу выйшаў новы альбом беларускага гурта Intelligency, які ўжо добры дзясятак год намацвае сваю сцежку і шукае аўтарскі почырк. Ці атрымалася знайсці яго на The Ideals? Шаснаццаць трэкаў, у якіх можна ўбачыць адлюстраванне шмат якіх гуртоў, але толькі не беларускага.

З Intelligency цікавая гісторыя. Я назіраю за ім прыкладна з 2013 году, і ўвесь гэты час хлопцы працуюць з дастаткова простымі і зразумелымі музычнымі прыёмамі — вакальныя партыі, нібыта заканспектаваныя за класікамі, не дужа вынаходлівыя гітарныя сэмплы, і зацыкленыя кампазіцыі амаль без развіцця. Гурт увесь гэты час нібыта чакаў з’яўлення TikTok, каб аднойчы ўварвацца ў яго са сваім галоўным і адзіным хітом August, які прынёс Intelligency вельмі крутыя лічбы на стрымінгах, якія так і не канвартаваліся ў рэальную аўдыторыю. Гэтае блуканне па лічбавых пляцоўках працягваецца дагэтуль: добры прыклад цяперашняй папулярнасці гурта — прэзентацыя новага альбома ў віленскім бары Pahonia.

Але давайце пра сам матэрыял. Гурт працягвае шукаць сябе і свой твар у папулярных плынях электроннай музыкі і, падаецца, адкрыў для сябе Caribou і альбом Swim. Не самы паганы прыклад, але паміж Swim і The Ideals прыкладна 14 год розніцы.

Intelligency працягваюць працаваць з тымі ж музычнымі прыёмамі і першакрыніцамі. Таму я проста паўтару: вакальныя партыі, нібыта заканспектаваныя за класікамі, не дужа вынаходлівыя гітарныя сэмплы, і зацыкленыя кампазіцыі амаль без развіцця. Клікбэйтны матэрыял, які спачатку слухаць цікава, а пасля не вельмі — настолькі ён прадказальны. Альбом-сэмпл, альбом-клікбэйт, альбом-мазаіка, у якім ёсць, падаецца, усё акрамя асобы музыкантаў.

The Ideals — далёка не самы дрэнны ўзор сучаснай беларускай музыкі. Калі б гэта быў дэбютны альбом маладога гурта з яшчэ не змарнаваным крэдытам даверу, можна было б толькі парадавацца за поспехі калектыву. Але перад намі гурт з гісторыяй у бясконцыя і манатонныя 11 год — ад ад яго чакаеш зусім іншага падыходу.

https://open.spotify.com/album/3mm1gyXEvEc3E6jH9YknPL?si=JidC8rTORJm1aEzOmrGaEA

Сёння будзе вельмі важны выпуск, бо менавіта з гэтага гурта пачынаўся беларускі рок. Абавязкова паглядзіце, пастаўце лайк і напішыце каментар пад відэа, каб яго ўбачыла як мага больш людзей!

https://youtu.be/zTez7K_usSw

Сёння ў мяне ёсць цудоўная нагода распавесці вам пра дужа цікавы новы альбом! Упэўнены, што вы нічога не чулі пра гурт Аум! І, магчыма, нешта чулі пра Autonomicon. Цяпер самы час выпраўляцца: разам яны выдалі вельмі круты рэліз пад назвай Bestiarium. Насычаны метафарамі, разнастайны і нестандартны, пранізлівы і сумны — і дужа прыгожы!

Антыфолк-гурт Аум! паводзіць сябе дужа актыўна. Напрыклад, у гэтым годзе музыканты ўжо выдавалі альбом Baroque. Можаце зацаніць хаця б вельмі атмасферны кліп на гіпнатычную песню «Яшчур» з гэтага рэлізу.

А цяпер ужо супольны з Дзянісам Autonomicon (адданы баец беларускага андэграунда) альбом Bestiarium. У ім таксама антыфолкавы падмурак, але з выкарыстаннем шматлікіх цытат і музычных міксаў. Вось вам, напрыклад, шыкоўная трып-хопавая песня «Кахаць» — з дабавым сінтэтычным басам, сырой перкусіяй і гіпнатычным вакалам. Ці індустрыяльны гімн «Оленёнок Бэмби» з магутным тэкстам.

Тэксты, дарэчы, гэта асобная і вельмі цікавая дэталь рэлізу. Часам гэта інтравертныя рэфлексіі на глабальныя тэмы як, напрыклад, у песні «Зверь» (верь, зверь, человек - это больше, чем ты. верь, зверь, верь, что люди полны доброты. верь, зверь, верь, что больше не будет войны. верь, зверь, я умру, я умру, но останешься ты). Часам маніфэстацыі і плакатныя хайлайты як у «Оленёнок Бэмби» (Оленёнок Бэмби никогда не умрёт, Ленин, Ленин, Ленин, Ленин - Жил, живёт, заживёт. Оленёнок Бэмби никогда не умрёт, он олениненивает который уж год). Часам дзіцячыя песні для дарослых як «Шэры зайка» (Шэры-шэры зайка, чаму ты дрыжыш? Я бягу сам ад сябе, я дрыжу сам ад сябе).

Bestiarium — гэта няўтульнае і прывабнае адначасова музычнае падарожжа па ўнутраным і знешным свеце. У гэтай пяшчотнай музыцы прыхаваная такая чорная трывога, што можна заблукаць у ёй і доўга шукаць выйсце. Будзе ўважлівыя і абавязкова напішыце, ці спадабаўся вам гэты альбом!

А я нагадаю, што падтрымаць гэта канал і «Міністэрства сепультуры» можна вось тут! Дзякуй вам❤️

https://aumart.bandcamp.com/album/aum-autonomicon-bestiarium

Афанасьева 90-х — топ! І вы ў гэтым пераканаецеся, калі паглядзіце новы выпуск «Міністэрства сепультуры». Дзяўчынку з вёскі пад Магілёвам насіў на руках Машэраў, яна крута спявала па-польску і ганяла на гастролі ў ЗША. Адмовілася ехаць у Расію, была ў стасунках з Захаравым і асудзіла гвалт у 2020-м. Ці не зашмат для біяграфіі аднаго чалавека? А вось і не! Гісторыя каралевы беларускай папсы — у новым відэа.

https://youtu.be/CZZCxmWT_8M

Новы альбом Molchat Doma падабаецца ўсім акрамя беларусаў? Сабраў самае цікавае пра яго!

Ці праўда, што ён вельмі падобны на Depeche Mode? Вокладку для яго зрабіў штучны інтэлект? А пры чым тут Twenty one pilots? А ці знойдзеце вы ў гэтым запісе гукі Мінску?

Новы выпуск ужо на канале! https://youtu.be/QMoPxe05yKg

Сёння самы папулярны беларускі гурт у свеце Molchat Doma выдаў свой чацвёрты альбом — «Белая полоса». Гэта складанка з дзесяці кампазіцый, якія зусім па-іншаму раскрываюць гурт і яго ўдзельнікаў.

Мы з вамі ўжо слухалі сінглы з гэтага запісу — агрэсіўны і энергічны «Ты же не знаешь, кто я» з пругкімі сінтамі і трывожнай атмасферай, пост-панкавы «Сон» з цоеўскімі інтанацыямі і празрыстым, пранізлівым прыпевам і, бадай, кульмінацыю ўсяго запісу, шыкоўную «Белую полосу», нібыта адшуканую недзе на бі-сайдах дэпешмодаўскага Ultra.

Гэтага б ужо хапіла, каб зазначыць радыкальныя трансфармацыі гурта. Ад пашарпаных часам і саўнд-эфектамі папярэдніх альбомаў Molchat Doma пачалі рухацца ў бок дэталізаванага, празрыстага саўнда, у якім можна корпацца ў дэталях і працаваць з якаснымі рэферэнсамі. Сярод іх у першую чаргу Depeche Mode, The Cure і «Кино», якія прысутнічаюць амаль у кожным трэку альбома, але паспрабуйце папрацаваць з такімі першакрыніцамі і зрабіць з гэтага сапраўды цікавы матэрыял. Molchat Doma на гэтай сцежцы робяць упэўненыя крокі. На новым альбоме я б вылучыў «Черные цветы» з вельмі характэрнай гатычнай лірыкай, вельмі атмасферны інструментал «Безнадежный вальс» і вяртанне да каранёў у заключным трэку «Зимняя».

Трэба сказаць, што музыканты вельмі якасна прагрэсуюць. Ягор Шкутко спявае больш упэўнена і працуе з больш разнастайнымі інтанацыямі, басовыя партыя Паўла Казлова больш вынаходлівыя, але, канешне, галоўны рэспект прадзюсару альбома Раману Камагорцаву: ён максімальна наблізіў гучанне «Белой полосы» да пажаданых першакрыніц.

У выніку я б назваў «Белую полосу» пачаткам новай старонкі ў біяграфіі гурта, але гэта толькі пачатак.

А вам як гэты альбом? Ці спадабаўся? Пішыце ў каментарах і падтрымлівайце канал.

👻👻👻 Выбіраем галоўны саўндтрэк беларускага лета 2024! Як?

Памятаеце, я распавядаў пра тое, што зрабіў адмысловы плэй-ліст для платформы «Новая Беларусь». У ім было 18 кампазіцый беларускіх артыстаў, усе яны выйшлі цягам апошніх трох месяцаў. А пасля ўжо вы дадавалі ў гэты спіс свае любімыя кампазіцыі, і ў выніку плэй-ліст пашырыўся да 30 песень! Вось тут можна яго зацаніць.

Але гэта не ўсё! Цяпер у аплікацыі «Новая Беларусь» можна прагаласаваць за любімы трэк — і такім чынам мы з вамі вызначым галоўную песню лета. Калі для вас гэта бяспечна, залятайце ў аплікацыю і галасуйце. Зрабіць гэта можна да 7 верасня 23:00, а 9 верасня «Новая Беларусь» абвесціць пераможцу.

Але галоўнае — слухайце беларускую музыку, любіце беларускую музыку. І да сустрэчы ў Міністэрстве!

👻 Сёння раскажу вам пра новыя беларускія альбомы, якія слухаў апошнім часам. Вельмі розныя і вельмі класныя. Тут будзе шыкоўны эмбіент, джаз, пра які піша культавы Wire, новая яскравая поп-музыка і шмат чаго яшчэ. Паслухайце іх абавязкова і напішыце сваё меркаванне.

💀 Parus — зусім новы праект дасведчаных беларускіх музыкантаў. Яны вось толькі выдалі дэбютны рэліз: чароўны альбом Zara, у якім заміксаваўся генетычны код Беларусі. Гэта містычнае спалучэнне палявых запісаў, далікатнага эмбіенту, традыцыйных спеваў — а ўсё разам яно пераўтвараецца ў шчымлівы саўндтрэк да рэчаіснасці. Слухайце ўважліва!

💀 Homebound — яшчэ адзін зусім свежы гурт. Мікс англамоўных і беларускамоўных песень з вельмі адчувальным брытанскім вайбам. Лаканічны, густоўны матэрыял з неблагімі мелодыямі, у якім адчуваецца і прафесійны падыход, і добрая падача. Гучыць даволі пярэста і неаднародна, каб зразумець нейкі канцэптуальны падыход, але на ўзроўні візітоўкі — добры старт.

💀 Нястомны Віктар Сямашка і яго фры-джазавы праект Fantastic Swimmers выпусцілі шмат новага матэрыялу. Самы свежы — альбом «3’33», які выйшаў у апошні дзень лета. Як заўсёды, небанальная праца: музыка, якая выбівае з-пад цябе зэдлік, і прымушае слухаць сябе вельмі ўважліва. Пра Віктара, яго праекты і музычную перадачу «Кракатук» напісаў вось толькі-толькі культавы часопіс Wire. І вы таксама звярніце ўвагу!

💀 За гуртом «Галантерея» я сачу вельмі даўно і пісаў пра дэбютны альбом, калі яшчэ працаваў на Анлайнеры. З таго часу музыка «Галантереи» вельмі змянілася: замест падлеткавага мінімалістычнага індзі цяпер рабята робяць яскравую поп-музыку з класнымі аранжыроўкамі і шыкоўнымі мелодыямі.

💀 І троху бруду на дэсерт. Гурт «Бычий цепень» і альбом «r.i.p.». Няўтульнае гучанне, дэпрэсіўныя і дзёрзкія тэксты — музыканты распрацоўваюць нішу дэз-року, напэўна, самае змрочнае і цёмнае адгалінаванне пост-панку. Лавіце атмасферу, слухайце трэкі і атрымлівайце асалоду ад вокладкі гэтага альбома.

Што вам спадабалася больш за ўсё? Пішыце ў каментарах і не забывайцеся, што падтрымаць гэты канал і «Міністэрства сепультуры» можна вось тут.

Балюча аж да слёз.
Пра што будзе новы твор Чарнухі «Гвалт»?

Аляксандр Чарнуха піша новую кнігу. Ён сцвярджае, што ўсе мы ахвяры і гвалтаўнікі адначасова. Чаму? Адказ на гэтае пытанне акурат можна будзе знайсці ў зборніку апавяданняў «Гвалт». Пра што будуць гэтыя творы? І чаму кнігу варта пачытаць?

⚡️Сёння мы пачынаем распавядаць пра ідэі, якія можна падтрымаць на платформе Gronka.

Знаёмцеся бліжэй з праектам «Гвалт» і яго аўтарам і не забывайце падтрымліваць праект 🧡

А вось падрабязнасці пра маю новую кнігу. Сёння апошні дзень краўдфандынгавай кампаніі. Падпісвайцеся на канал Gronka, каб не прапускаць іншыя цікавыя праекты!

Ролік зноў на канале. Залятайце глядзець, калі яшчэ не глядзелі. Стаўце лайкі, пішыце каменты — гэта дапаможа прасунуць відэа

https://youtu.be/DpzQn3Pr4jI

Прыйшоў да вас з навінамі. Новы ролік Міністэрства сепультуры пра гурт ЛСП выдалены з YouTube. Гэта першы такі выпадак на канале. Тут былі розныя відэа, у тым ліку даволі крытычныя.
Але сёння я атрымаў на пошту ліст пра тое, што ролік выдалены праз скаргу праваўладальніка. Не аўтаматычную, бо ў роліку выкарыстоўваюцца выключна азнаямляльныя фрагмент не больш за 5 секунд. Фармальная нагода — парушэнне аўтарскіх правоў. Але на YouTube багата кампліментарных ролікаў пра ЛСП, у якіх выкарыстоўваюцца фрагменты песень гурта. То бок прычына менавіта ў кантэксце відэа Міністэрства сепультуры. Такога не рабілі нават сёстры Груздзевы.
Мы абавязкова перазальем відэа, каб вы змаглі яго паглядзець, калі яшчэ не бачылі. Ну, а ЛСП поспехаў на бясконцых расійскіх канцэртах.