ወግ ብቻ

የኔ እህት አዚህ ሰፈር ነሽ?
(አሌክስ አብርሃም)

አንድ የሰፈራችን ባለሱቅ የሆነ ቀን በበሩ ሳልፍ "ወንድሜ" ብሎ በአክብሮት ጠራኝና እዚህ ሰፈር ነው የምትኖረው? ብሎ ጠየቀኝ! "አወ" አልኩት እንዴት ረሳኝ ብየ በመገረም! የረዢም አመት ደንበኛየ ነበር። ቀጠል አድርጎ
ሲጃራ ታጨሳለህ እንዴ?
አይ አላጨስም
አቁመህ ነው?
አይ ከመጀመሪያውም አላጨስም
ጫትስ ትቅማለህ እንዴ?
አይ አልቅምም
አቁመህ ነው?
ቅሜ አላውቅም! ለምንድነው ግን የምትጠይቀኝ አልኩ ገርሞኝ ። ጥያቄየን ችላ ብሎ

እ...የስልክ ካርድ ከኔ ትወስድ ነበር እንዴ?
አወ (ደግሞ እውነቴን ነው ከሱ ሱቅ ነበር የምገዛው)

ባለስንት ነበር የምትገዛው?
ባለመቶም ፣ ባለ ሃምሳም ...ባለ ....

ተወው አስታወስኩ! የመቶ ብር ካርድ አለብህ ስምህን መዝገብ ላይ አይቸዋለሁ
ማነው ስሜ ?
ስምህ ምን ያረጋል ጋሸ? ዋናው ካርዱ ነው ....😀

በኋላ ስሰማ ይሄ ሚስኪን ባለሱቅ አእምሮውን ታሞ አማኑኤል ሆስፒታል ገብቶ ነበር አሉኝ። ሚስቱን ነበር ሱቁ ውስጥ ለረዢም ጊዜ የማያት! እና ዘለግ ላለ ጊዜ ታክሞ ከአማኑኤል ተሽሎት ወጣ። ሁሉ ነገር ተስተካክሎ አንድ ነገር ብቻ ትንሽ ልክ አልመጣለትም እየተባለ ይወራል። ማንኛውም በሱቁ በር የሚያለፍ ሰው ዱቤ ወስዶ ያልከፈለው ይመስለው ስለነበር እያስቆመ አጭር መስቀለኛ ኢንተርቪው ያደርጋል። ከምንም በላይ ግን ያሳቀቀን እትየ ማርታን ጠርቶ ጠየቃት የተባለው ነገር ነው። እትየ ማርታ ዕድሜዋ 40 የተሻገረ ዘናጭ ሴት ናት!
"እህቴ ይቅርታ እዚህ ሰፈር ነሽ?" አላት
አወ ምን ልርዳህ? አለች በሚያምር ፈገግታ
ፔሬድ ማየት አቁመሻል እንዴ ወይስ ታያለሽ ? አበደች ...
"ስድ ምናባህ አገባህ?" በኋላ ባሏ ተነግሮት ሊያናፍጠው ወደሱቁ ሲሄድ "ሞዴስ በዱቤ ወስዳ ያልከፈለችኝ መስሎኝ ነው ጋሸ ! ግን ከመጣህ አይቀር ታጨሳለህ እንዴ.....😀"

@wegoch
@wegoch
@paappii

ቅዳሜ ቀትር ላይ፡፡

ባለትዳሮች ቤት፡፡

እሷ- ዛሬ ቅዳሜ ነው፡፡ በዚያ ላይ ውጪ ከበላን ስንት ጊዚያችን! እስቲ ምሳ ጋበዘኝ?

እሱ- ደስ ይለኛል፡፡ የት ልውሰድሽ?

እሷ- እ…ታቦር ጋር ሸክላ ጥብስ ብንበላስ?

እሱ- አሪፍ! በይ ቶሎ ልበሺና እንሂዳ..አርፍደን ደህና ስጋ እንዳናጣ፡፡

እሷ- እሺ…ማሬ…ከምሳ በኋላ ሌላ ቦታ ሄደን አሪፍ ቡና ትጋብዘኛለህ፡፡

እሱ- ታቦር ጋር ምን የመሰለ ቡና አለልሽ አይደል…? ሁሌ የምታደንቂው ቡና ከነጭሱ፡፡ በልተን ስንጨርስ እዛው ብትጠጪስ?

እሷ- እሱማ አሪፍ ቡና አላቸው ግን ያው ከወጣን ላይቀር ቤት ቀይረን ትንሽ እንድንዝናና..ፈታ እንድንል ብዬ ነው…
እሱ- አሪፍ ቡና ከፈለግሽ የምታውቂው ቦታ እያለ…ለዚያውም እዛ ምሳ እየበላን ለምን ሌላ ቦታ እንንከራተታን ብዬ እኮ ነው፡፡

እሷ- አንተ ደግሞ… አዲሳባ የጀበና ቡና እዚያ ብቻ ነው እንዴ ያለው..? ምን ችግር አለው ዞር ዞር ብንል…ትንሽ ንፋስ ቢመታን?

እሱ- በዚህ ፀሃይ ንፋስ ነው ጸሃይ የሚመታን…?እንግልቱ አይበልጥም?

እሷ-እኔ እኮ የሚገርመኝ… ለምንድነው ቀላሉን ነገር የምታወሳስበው…? እዚያ ምሳ በልተን ምናለ ሌላ ቦታ ሄደን ቡና ብንጠጣ…? ተሸከመኝ አላልኩህ…በራሴ እግር ነው የምሄደው…፡፡

እሱ- ሆይ ሆይ….እኔ አሁን እንደዚያ ወጣኝ..? በይ እሺ ቶሎ ልበሺና እንሂድ…ደስ እንዳለሽ እናደርጋለን፡፡

እሷ- ኤጭ! ተወው እንደውም

እሱ- እንዴ…ምኑን የምተወው…?

እሷ- ምሳውን…መውጣቱን…

እሱ- እንዴ ለምን…?

እሷ- ደግሞ ለምን ትለኛለህ…እየተነጫነጭክ ይዘኸኝ ከምትወጣ ቢቀርብኝ አይሻልም…? ይሻልሃል፡፡

እሱ- ኦኬ! ደስ እንዳለሽ….

እሷ- አየህ…ትንሽ እንኳን ልታባብለኝ ልታግደረድረኝ አልሞከርክም…

እሱ- እንዴ!

እሷ- አስሬ እንዴ እንዴ አትበልብኝ…መውጣት ካልፈለግህ መጀመሪያውኑ እምቢ…አልፈልግም አትልም…

እሱ - --------

እሷ- በል ተወው…የትላንቱን ሹሮ አሙቄ እበላለሁ…ሰው ሲሸልስ ሄዶ ቢች ዳር ይጋበዛል ለእኔ የሰፈር ጥብስ አረረብኝ…. እርግማን አለብኝ መቼስ…አትዝናኚ…አትደሰቺ ..እርር እንዳልሽ ሙቺ የሚል…

እሱ- -------

By Hiwot Emishaw

@wegoch
@wegoch
@paappii

ሌላ ሴት ልታገባ ያልክ ቀን እንኳ ብደውልልህ እሷን ትተህ እኔ ጋር ነው አይደል የምትመጣው? እለዋለሁ ሁሌ …. ፈገግ ብሎ ያየኝና “ደፋር ኮ ነሽ….ይለኛል።

ካለሁ ነገር ሁሉ እኔን አስበልጦ እንደሚወደኝ አውቃለሁ። ሲሳሳልኝ:ከራሱ ሲያስቀድመኝ: ሲጨነቅልኝ: ለኔ ሲኖር አይቻለሁ። ( በእርግጥ እንዲ ማለት ከባድ ይመስላል። እኔ ግን አይኑን ሳያርገበግብ : ይሄን ልጅ ግን ምን አስነክታው ነው እስኪባል የሚያውቁን ሁሉ እስኪገረሙ ድረስ ….ሳናድደዉ :ሳበሳጨው ችሎ በክፉ ቀናቶቼ ላይ ለደስታዬ ሲፈጋ: አብሮነታችንን ለማቆም ብዙ ሲለፋ አውቅ ነበር።)

ይመስለኛል የበዛ መውደዱ: የትም አይሄድም ብዬ እንዳስብ ለኛ እንዳልጨነቅና በተወዳጅነት ተኮፍሼ ለሚሰጠኝ መውደድና ክብር ትንሽ እንኳ አፀፌታን መስጠት የማልችል ሴት አደረገኝ።

ከዛ በአንዱ ቀን በትንሽ ነገር ተጋጨንና ….ሂድልኝ አልኩት። ለመነኝ:አስለመነኝ….ከቀልቤ መሆን ያልቻልኩት እኔ ግን ግድ አልሰጠኝምና ምንም እንደጎደለብኝ አልተሰማኝም። መሄዱ እንደሚያም: እንዴት እንደሚናፍቀኝ ለመረዳት ብዙ ረፈደብኝ።

ሄደ። ከዛ አልተመለሰም። ልመልሰዉ ሞከርኩ….መሄድ አለማምጄው ኖሮ መመለስ አቃተኝ።

እናማ አሁን የገፋሁት እኔ: ወዶኛል አይጠላኝም ያልኩት እኔ: በተራዬ እጅግ እየናፈቀኝ:እያመመኝ :እያስመሰልኩ አብሮነታችን ማክበር ያልቻልኩት እኔ … ሲያቅፈኝ ህይወት እንደሚቀለኝ: ችግሮቼን ችሎ ማሸነፍ ብቻን ያለማመደኝ እሱ እንደነበር:በጣም እንደሚናፍቀኝ :በጣም እንደማመሰግነው ያልነገርኩት እኔ የሄደበትን ቀን ሻማ እያበራሁ አከብራለሁ።

በስመአብ ጊዜው እንዴት ይሮጣል? አትመጣም በቃ?

By Ma Hi

@wegoch
@wegoch
@paappii

እንኳን አደረሳችሁ✝️

@wegoch

አልጣሽ

ገፃቸው በመታከት ዳምኗል።አይኖቻቸውን ቡዝዝዝዝ አድርገው ፊትለፊታቸው የሚነታረኩትን የልጅ ልጆቻቸውን በአርምሞ ሲያዩ ከቆዩ በኋላ "አይ አለመታደሌ!" ብለው በረጅሙ ተነፈሱና እያዘገሙ ወደ ኩሽናው ዘለቁ። ተንበርክከው የምጅጃውን እሳት በእፍታ የሚታገሉትን ባለቤታቸውን በጨረፍታ ቃኝተው አለፉና መደቡ ላይ በቁማቸው ወደቁበት።

አያ ቢምር እና እመይቴ አልጣሽ በስተርጅና የልጅ ልጆቻቸው ሞግዚት ሆነው የአፍታ እረፍት የሰማይ ያህል እንደራቃቸው ውለው ሌላ የድካም ቀን እስኪመጣ ያሸልባሉ።የመጀመሪያ ልጃቸው  ሁለቱን የእራት አመት መንታ  ልጆቿን፣ሁለተኛው ልጃቸው ደግሞ እህል በአፏ ከሌለ አርፋ የማትቀመጠዋን የሁለት አመት ልጁን ጥለውባቸው ወደ አጨዳ ያቀናሉ።
"እመይ...አበይ...ደኅና አድራችኋል?ንሱ ልጆይን ፍቀዷቸው...ህደናል" ይሏቸዋል።

ዛሬም እንደወትሯቸው ሶስቱ ህፃናት የወላጆቻቸው ዳና ከመጥፋቱ እየተፈራረቁ ጎጆይቱን በአንድ እግሯ ያቆሟት ጀመር።መንትዮቹ ፍቅሩ እና ሰውነት ከውልደታቸው አንስቶ ተስማምተው አያውቁም።እንደውም የቆዬው የልምድ አዋላጅ "አይ ሰውነት!ያኔም የእናታቸው ምጥ ሲመጣ...ወይ እሱ አይወጣ...ወይ ወንድሙን አያስወጣ...አናቱን በእግርና በእግሩ መሃል ደፍጥጦ  ይዞ ብርሌ አስመስሎት ቀረ...ይኸው አድጎም አልተወው"ይላሉ መንትዮቹ ሲጣሉ ባዩ ቁጥር።ረፋዱ ላይ እመይቴ አልጣሽ  ያቀጠኑትን ሊጥ ተሸክመው ወደ ምጣዳቸው አቀኑ።ሊጡን በኩባያ እየጠለቁ እንደ ረሀብተኛ ልዥ ሆድ መሃሏ የጎደጎደው ምጣዳቸው ላይ ያፈሱትና በክብ ቅርፅ በተሰራችው የጣውላ ማለስለሻቸው ዙሪያዋን ያለብሷታል።እንደ ሽማግሌ ጥርስ ዙሪያው የተፈረካከሰ ሙግዳቸውን አንስተው ምጣዳቸውን ከመክደናቸው ሰውነት ሲከንፍ መጥቶ ሊጡ ላይ አንድ ጆግ ውሃ ይሞጅርበትና እያሽካካ ይሮጣል።የ 80 አመት ጉልበታቸው አሯሩጦ መያዝን ባይፈቅድላቸው
"ሃይ!...ሃይ!...ሃይ!...ምነ ምነ አንዳች ያልታሰበ ቢያጥለቀልቅህ!"ረግመውት  ወደ ሊጡ ይዞሩና
"አይ አለመታደሌ!"ብለው ከጎን ያለው ምድጃ ላይ አብሲት ሊጥዱ ገለባ መማስ ይጀምራሉ።ከእሳት ጋር ሲታገሉ አልፈዋቸው ከመደቡ የወደቁትን ባለቤታቸውን እየቃኙ
"ይኸ ተንከሲስ... ሊጡን አቅጥኖ አፈር አልብሶኝ አያ ቢምር!...አብሲት እስክጥል ማታ ከድኘ ያኖርኳት ሞሳ ባጨላ አለች በሳህኔይቱ...ይህዱ ጓዳ እሷን እየቀመሱ ይቆዩኝማ" ብለው አባብለው አሰወጧቸው።አያ ቢምር በጋሬጣና በእንቅፋት ጥፍሮቻቸው የወለቁ እግሮቻቸውን እየጎተቱ ወደ ጓዳ አቀኑ።መሃል ወለል ላይ ትንሿ የልጅ ልጃቸው በሁለቱም ጉንጮቿ ሞልታ የምታኝከው ባቄላ መፈናፈኛ አሳጥቷት በጭንቅ ስትቃትት አገኟት።ከ60 አመት በላይ ሞፈር የታዘዘለት እጃቸውን ወደ ማጅራቷ ሰደው መሬትን በአፍንጫ አስልሰው ካቃኗት በኋላ
"ኧረ አፈሩን ብይው!ይችን የመጋዣ ልጅ መጋዣ! "ሲሉ ተራግመው እመይቴ አልጣሽ የጠቆሟቸውን ሳህን ሲያማትሩ ከአጠገቧ እርቃኑን ተቀምጦ አዩት።እጆቻቸውን ወደላይ ሰቅለው
"አይ አለመታደሌ!" ካሉ በኋላ እንደ አመጣጣቸው እያገዘሙ ወደ ባለቤታቸው ተመልሰው መደቧ ላይ ተጠቅልለው ተኙ።

እንጀራና ወጡ ተዘጋጅቶ የምሳ ወጉ ከደረሳቸው በኋላ አያ ቢምር ከልብ ወዳጃቸው ጋር ሊያወጉ ወደ መንደር ዘለቁ።እመይቴይቱ ግን ፣ ቁሞ በመዋል የተብረከረኩ ጉልበቶቻቸውን ታቅፈው፣እሳት ያሟሸሻቸውን አይኖቻቸውን ከመክደናቸው እዛው ኩሽናው ወለል ላይ እንደተጋደሙ የልጅ እንቅልፍ ወሰዳቸው።ለአፍታ ካሸለቡ በኋላ ከአለት የከበደ አንዳች ነገር ጆሯቸውን ሲጫናቸው እየጮኹ ተነሱ።ዙሪያቸውን እየተፈራረቁ ከሚስቁት ሶስት ህፃናት ጋር  እላያቸው ተበግራ የቆመችዋን ጥጉቧን አህያቸውን እያባረሩ የተረገጠ ጆሯቸውን በሻሻቸው ጥፍንግ አድርገው አስረው እዬዬአቸውን ያወርዱት ጀመር።ፍቅሩ ፈገግታው ከገፁ ሳይጠፋ እየተጠጋቸው
"እመይ...ሰውነት'ኮ ነው የኩሽናውን በር ከፍተን አህያይትን እናስገባትና ምጣዱን ትስበረው ያለኝ"አለ ወንድሙን በስርቆሽ እያየ።
"ይሄይ?ይኸ?ይኸማ ቢሆንለት በተኛሁበት ቢያነደኝ ነበር ደስታው...ምነ አንተ ዝም ያልከው እንግዲያ?"
" 'አፍርጨ ነው የምጥልህ' እ...እያለኝ"
"ፈ...ርጠህ ቅር በለ...ው እንደ እ...ንቧይ"ከማለታቸው በተረገጠው ጆሯቸው በኩል አንዳች ነገር 'ጭውውውውውውው' ሲልባቸው ታወቃቸው።

አመሻሽ ላይ ተረኛው እረኛ ታሪክ
"እመይቴ አልጣሽ....ከብቶይን አምጥቻቸዋለሁ አስገቧቸው" ብሎ ጮኸና ምላሻቸውንም ሳይሰማ ወደሌሎች ባለከብቶች አቀና።

አያ ቢምር ከዋሉበት ወግ ሲመለሱ መንትዮቹ እንደወትሯቸው እየተነታረኩ፣ትሁንም ከምሳ አትርፈው የከደኑት መሶብ ላይ ለብቻዋ ሰፍራ እየታገለች፣ከብቶቻቸውም የጎረቤታቸው ማሳ ላይ ሲምነሸነሹ አገኟቸው።ከብቶቹን ከበረታቸው ጨምረው ባለቤታቸውን ጥሪ ገቡ።
"አልጣሽ!...ኧረ አልጣሽ!ኧረ 'ምኑ ገባሽ?"እያሉ ዋናውን ቤት ቆጡ ሳይቀራቸው አሰሱት።እየተጎተቱ ወደ ኩሽናው ሲዘልቁ እመይቴ አልጣሽ እጥፍጥፍ ብለው ተኝተዋል።
"ኧግ የደረባኑ መልአክ!ምነ አልጣሽ ምነ?አስርና ክያ እነጀራ አወጣሁ ብለሽ እስካሁን መኝታ?ኧረግ የኔይቱ ወይዘሮ!"ብለው እላያቸው ላይ ጣል ያረጉትን ኩታ ሲገልጡት አፀድ የመሰለው ሻሻቸው በደም ርሶ፣የጆሮ ግንዳቸውና የአንገታቸው ስር የደም ድልህ ተጋግሮበት አገኙት።ያዩትን ስለተጠራጠሩ ኩታውን ወደነበረበት መልሱና አይኖቻቸውን ማሻሸት ገቡ።ፍቅሩ ሲበር መጣና
"አበይ...ይኸ ሰውነት እመይን በተኛይበት ጥጉቢትን አህያ አስረገጣት።ጥሩ ውሃ ስጭኝ ብየ ብጠራት ብጠራት አኩርፋ ነው መሰል ዝም አለችኝ።ናማ አንተ ስጠኝ"

የእመይቴ አልጣሽ ቀብር ላይ አንድ ወዳጃቸው እንዲህ ሲሉ ሙሾ አወረዱላቸው።
"አንች የኔ ጉልበታም እንዲህ ነበርሽ ወይ
ክያ እንጀራ አውጥተሽ ማረፍሽ ነወይ
አንች ተደከመሽ እኔ እጋግራለሁ
ጠጅሽን ያሉ እንደሁ እንዴት አደርጋለሁ
ቀና በይ አልጣሽ ቅጅልኝ ከጠጁ
የጠላሽ አይጠፋም ሞልቷል የልጅ ልጁ"

ዘማርቆስ
(@wogegnit)

@wegoch
@wegoch
@wegoch

አንድ አስናቀች
(ገብርኤላ ይመር)

እንደ ኑሮአችን እነርሱም ተደጋግፈው ከተሰሩት   ከምኖርባት መንደራችን በአዲስ ዓመት ጠዋት  ላይ አበባይሆሽ የሚጨፍሩ ልጆች ድምጽ  ከተንጋለልኩበት ፍራሼ ላይ ሆኜ በስሱ የከፈትኳትን ሙዚቃ ሰብሮ ገርብብ ያለ በሬን አልፎ በጆሮዬ ዘለቀ

"የመስቀል ለታ
የደመራው
ንፍሮ ቀቅዬ ብላ ብለው ጉልቻ አንስቶ ጎኔን አለው ከጎኔም ጎኔ ኩላሊቴን እናቴን ጥሯት መድሓኒቴን እሷን ካጣችሁ መቀነቷን አሸተዋለሁ እሷን እሷን..." ይላሉ።

ኩላሊቴን ሳይሆን ልቤን ካለው ነገር እንደ ወጌሻ የእናት ፍቅሯ አሽቶ እንዳይጠገኝ እናትዬ ካረፈች ልክ 3 ዓመቷ ነው። እርሷን እርሷን የማሸተው መቀነት ባትተውልኝ ዘመኗን አብሪያት ስኖር የምትከፍታት አስናቀች ወርቁ ስቀመጥ፣ ስነሳ፣ስተኛ ስጓዝ እሰማታለሁ፣ በትዝታ ክራሯ አንጀቴን እየከረከረች፣ ከምናፍቃት እናቴ እቅፍ ትጥለኛለች።

ከአመሻሽ ገበያተኛ መኖሪያችንን ልትቃርም ወደ ጉሊቷ ልትመለስ ስትል  "እንቅልፍ ጥሎሽ ማደሪያ እንዳታሳጪኝ  ሳትሸነቁሪ ገርበብ አርገሽ በሩን  ተይው እሺ " ትለኝና ፣ መለስ ብላ ደግሞ "እንዳይደብርሽ  ቴፑን ክፈቺ" ብላኝ እስክትመጣ የተገረበበ በሬ ላይ ዓይኔን ጥዬ ከአስናቀች ወርቁ ጋር የምጠብቃት፣ ተመልሳ  ለራታችንን የሚሆን ስታዘገጃጅ ከጎኗ ተቀምጬ የእርሷን ወግና አስናቀችን እኩል እየቀዳሁ ዝም ብዬ የማያት፣  ስነሳ እንደ ጠዋት ዜና ከቁርሳችን እኩል ት/ቤት እስክሄድ የምሰማት፣ እናቴ ስትደሰት፣ ስታዝን፣ ስትሰራ፣ ስትቆዝም ሁሉ ከዚህች ሴት ወዲያ የማታውቅ የምትመስለኝ እንደውም ዘመድ ረግጦት የማያውቅ ቤታችን ውስጥ አስናቀችና ክራሯ የልብ ዘመዶቻችን ነበሩ።

አሁንም በትመጣ እንደው ገርበብ ያረኩት በሬ ኩላሊቴን ሳይሆን፣ ልቤን ወዳለው ሰው በረርኩ።
ሳገኘው ሁለተኛ ዓመት የግቢ ተማሪ ነበርኩ።

እንደለመድኩት  ኤርፎኔን በጆሮዎቼ ከትቼ አስናቀችን እየሰማሁ፣ ቦርሳዬን ይዤ ልወጣ ስል በአንዱ አልጋ ከላይ ጸጉሯን እየሰራች ያነበረችው ማሂ " እንደለመድሽው ገርብብ አድርገሽ ሄደሽ ከዚህ እንዳታስወርጂኝ ፣ በሩን ገጥመሽ ዝጊው አለችኝ ፈገግ ብላ  በፍጹም ሰው ካላስታወሰኝ በቀር በር እስከመጨረሻው ዘግቼ አልወጣም፣  እንደ እናትዬ ገርበብ እንዳለ ነው የምተወው እንደኔ በተስፋ የሚጠብቀኝ ካለ ብዬ ይሆናል።

በሩን እንዳለቺኝ ገጥሜ ከላየረብሪው  ስደርስ ከውስጥ በፍጥነት እየተመናቀረ የሚወጣ ልጅ ገፈታትሮኝ በእጄ ያለውን ስልክ አስጣለኝ
"ቀስ አትልም? ያምሀል" ልለው ስዞር  ቀድሞኝ "ያምሻል" ብሎ እየጠራ ያለው ስልኩን አንስቶ ወደ ላይ ሄደ

በሆዴ "ሆ ያምሻል? " አልኩና የወደቀ ስልኬ  ደህና መሆኑን አገላብጬ አይቼ ወደ ለመድኩት ቦታዬ ስሄድ ተይዞ ተበቀኝና ከአጠገቡ ካለው 4 ሰው የሚያስቀምጥ ወንበር  ሄጄ ከፊትለፊቴ የተከፈተ ላፕቶፕ ቦርሳውን ዞር አድርጌ ተቀመጥኩ። ትንሽ ቆይቶ ወዳለሁበት ወንበር በፍጥነት እርምጃ የደረሰ፣ የሚያለከልክ ልጅ ተቀመጠ። ያ የገፈተረኝ። ራሱ ገፍትሮ ደርሶ ያምሻል ማለቱ አናዶኝ ነበርና ፊቴን አጠቆርኩ እርሱ ግን ሀሳቡ ሁሉ በስልኩ ላይ ነበርና የሆነ ነገር ሊሰማ ወደ ጆሮው ሲያስጠጋ አልሰማ ስላለው   ያጠቆርኩበት ፊቴን ሳያይ  ላፕቶፑ ላይ የተሰካውን ኤርፎን ሲነቅለው ሲሰማ የነበረው ሙዚቃ ላይብሪውን አመሰው።

በራኬብ ቤት እንደተንጠለጠለ ቀይ ግምጃ  የጠላው ውቃቢዬን አባሮ መውደድ ሰፈረበት፣ "ያመሃል እንዴ" ብላ በጩኸት እንደ ኢያሪኮ ልታፈርሰው የነበረች ምላሴን መሰብሰቤ በጀኝ።  እንደ ራኬብ ከመፍረስ የሚታደገው ቀይ ግምጃ ከላፕቶፑ ወጣች ።አስናቀች ወርቁ
ፈገግ አልኩ

ሰው ሁሉ ወደርሱ በማየቱ አይኖቹን የሚያሸሽበት ነገር ሲፈልግ ፈገግ ብለው የሚያዩት ዓይኖቼ ላይ አረፈ።
  ግራ በተጋባ ፊቱ ገረመመኝና፣ የተከፈተውን ለመዝጋት አቀረቀረ።

"ደህና ነህ "አልኩት ቀስ ብዬ
ከሰው ጋር ገጥሞ አለማውራቴ ጉድ ባስባለበት ግቢ የማላውቀውን ልጅ ደርሼ ደህና ነህ ማለቴ ጉድ ነበረ።

ከዚያ ቀን በኋላ ከዚያች ወንበር ከፊትለፊቱ መቀመጥ ልማዴ ሆነ። በመተያየት፣ ሰላምታ፣ ከሰላምታ ወደ መጠያየቅ ወደ መተዋወቅ ተሻገርን። በላይብሪ የታጠረ ድንበራችንን ሰብረን የቀንተቀን ጓደኛ ሆንን
"የት ነሽ?" ለሚለው ጥያቄ
"ሱራፌል ጋር "የሁልጊዜ መልሴም ሆነ።

ብዙውን ጊዜ  የዛ ቀን እርሱንም ልቡንም ስላመናቀረችው ቤዛ የምትባል ሴት  ይነግረኛል፣ ልክ የእናትዬን ወግና አስናቀችን ዝም ብዬ እንደምሰማ ሁሉ እንዴት፣ ወዴት፣ መቼና ምን ሳልል ዝም ብዬ እሰማዋለሁ።  አውርቶኝ፣ አውርቶኝ  ሲበቃው "አውርተሽኝ አታውቂም አውሪኝ እንጂ" ይለኛል። ዝም እለዋለሁ። እጆቼን ይይዝና "ነገ ስንገናኝ አንቺ ነሽ የምታወሪው" ይለኝና የያዛቸው እጆቼን ከዛ ግንባሬን ይስመኛል ። ዝም ብዬ አየዋለሁ። "ከመሄዳችን በፊት ግን  አንድ አስናቀችን" ብሎ አንዱን የኤርፎን ጆሮ ይሰጠኛል። ትከሻው ላይ ራሴን ጥዬ፣እርሱ በጸጉሮቼ እየተጫወተና ለምን ለእርሱ የምትዘፍን እንደሚመስለው እየነገረኝ ዳግም እንደ እናትዬ የእርሱን ወግ ከአስናቀች ጋር አደምጣለሁ።
እኔ ዝም ብሎ በማዳመጥ ብኖርም ግን ህይወት ዝም አትልምና የት፣ ምን፣ እንዴት ያላልኳት ቤዛ ዳግም ተመለሰች። እንዲሁ አንድ ቀን ከመሄዳችን በፊት አስናቀችን እየሰማን ስልኩ ጠራ አየሁት "ቤዝዬዬዬዬዬ"  ይላል ብዙ ዬ ነበረው። ከስልኩ የነበረቀውን ኤርፎን ነቅሎ ሊያወራት ከኔ ራቅ አለ። ከዚያች ቀን በኋላም ከእኔ ራቅ ራቅ እያለ ሄደ ። እኔም  በኋላ ማናት ብዬ መልኳን እንኳን ለማየት ያልጠየኳት ቤዛን አወኳት፣ አብረው። ወትሮ ነገርን መዝጋት የማያውቀው ጎኔ ባስለመደኝ ሰዓት እስኪደውል እጠብቃለሁ፣ በየሄድንባቸው ቦታዎች ልክ እንደናትዬ እስኪመጣ አያለሁ ግን አልነበረም። እርሱ ገርበብ አድርጎ የጠበቃት ፍቅሩ ስትመለስ፣ የኔን በር ገርበብ አድርጎት ሄደ።

ሶስተኛ ዓመት ከዛም ወደ መመረቂያ ዓመቴ ስገባ ገርበብ ያረኩትን ልቤን ለራሴ ስል ዘጋሁት። ግን እሰማለሁ "ቤዛ እኮ ጥላው ሄደች በናትሽ የታባቱ" የዶርሜ ልጆች እኔን ሊያስደስቱ እየተሳሳቁ  ያወጉኛል። ዝም።" ደግሞ ሌላ ሴት ይዟል ማን ነው ስሟ" ይጠያየቃሉ። ዝም።
የቤዛን እጆቿን አይዛትም ነበር ፣ በጸጉሮቿ አይጫወትም፣  በመሀላቸው ገርበብ ያለ ክፍተት አለ፣ ሌላም ካሏት፣ ከሌላዋም፣ ከቀጣየም አብሯቸው ሆኖ አየዋለሁ ፣  በሴቶቹና እሱ መሀል እንደ በሬ የተገረበበ ክፍተት አለ። ዝም።  ባለበት ቦታ ካለሁ  ዓይኖቹ ግን የሆነ ነገር ሊሉኝ በመፈለግ  እኔ ላይ ናቸው።
የመመረቂያ ቀናችን ደርሶ፣ ተመርቀን እንደ ነገ ልንሄድ እንደ ዛሬ ከግቢው ቡና ቤት ተሰይመናል። በአንድ ጓደኛችን ስልክ እዛው ካለው ሞንታርቦ ስልኩን አገናኝተን ሙዚቃ እየከፈትን የስንብት እንጨዋወታለን። የነርሱ ዲፓርትመንት ለመመረቅ ሁለት ዓመት ቢቀረውም  እግር ጥሎት ከጓደኞቹ ጋር እኛ ከተቀጥንበት ፊትለፊት መጥቶ ተቀመጠ። ዓይኖቹ ሰውነቴ ላይ እንደሆኑ አውቄዋለሁ ግን ወደ ማብቃቱ አካባቢ ከመሄዳችን በፊት" አንቺ የምትፈልጊው ሙዚቃ የለም?" አለኝ ስልኩን ከሞንታርቦ ጋር ያገናኘው ጓደኛችን። ያለችኝን አንድ አስናቀችን  ላኩለትና ከፈታት። ቀና ብዬ ፊትለፊት አየሁ፣ አየኝ  እስከ መጨረሻው ከመሄዴ በፊት አንድ አስናቀች። በዝምታ

By Gabriela

@wegoch
@wegoch
@paappii

አባቴ ካጠገቡ የማትጠፋ ራዲዮ ነበረችው። ኹለት ስፒከር አላት ካሴትም ታጫውታለች...

ፀሐይ በራኺን አስሬ ይሰማታል። አክስቴ ትመስለኝ ነበር፤ ድምጿ እኛ ቤት አይጠፋም ስትዘፍን እኩል እላለሁ ከሙዚቃው ጋር...

"መጀመርታ ፍቅሪ
ኣብ መን ተጀመረ
ኣዳምን ሔዋንን
አለም ምስተፈጥረ
ኣነ ከይፈለጥኩ
አብ ልበይ ሐደረ
እንታይ እሞ ክገብር
ዕድለይ ካብ ኮነ አይ..አይይ*

አባቴ ወታደር ነበር። ጠይም ነው መከፋቱ ፊቱ ላይ ብዙ አይታይም፤ ማጣቱ በየምክንያቱ አንደበቱ ላይ አይንፀባረቅም ....ዝምም ይላል

ረጋ ያለ ነው ።

ጥርሱን ሳያሳይ ነው ደስ ብሎኛል ፈገግታ ፈገግ የሚለው፤ ተገርሜያለሁ ፈገግታ ፈገግ የሚለው ተበድያለሁ ፈገግታ ፈገግ የሚለው አጠገቤ ሲሆን እረጋጋለሁ።

ሰሞኑን ሰውነቴ እንደከሳ፤ ፊቴ ማዘን እንደታከከው፤ ድብርት ነገር እንዳንጃበበብኝ አወቀ። አባትም አይደል? ንብረቱም አይደለሁ? ዋጋ ከፍሎብኝም የለ?

ፊቴን አይቶ "ደህና ነህ ህሉፌ ...?" አለኝ።

'እ ...ትንሽ ደከመኝ...
አሻግሬ ማየት እያቃተኝ... ቶሎ ቶሎ እጅ እየሰጠው ..." አልኩት።

ረጅም ሰዓት ዝም አለ ...

"ታስታውሳለህ በረሃ እያለሁ የምፅፍላችሁ ደብዳቤ፤ በርቱልኝ፥ ምን ጎደላችሁ፥ እወዳችኋላሁ፥ በቅርብ እደውልላችዋለሁ፥ እመጣለሁ፥ ዓይነት ይዘት ያለው ፅሁፍ ?! ።"

"ባሩድ እየሸተተኝ ነበር፥ አብሬው የዋልኩት ጓደኛዬ ሞቶብኝ፥ ፍንጣሪ ጥንት መ'ቶኝ፣ ጠላት ሊፈጀን እያቀደብን፣ ጀኔራላችን ምሽግ ሰብራችሁ ግቡ ሊለን እንደሚችል እያወቅን፥ የተቀበረ ቦንብ ልንረግጥ እንደምችል እያወኩ፥ ከአውሮፕላን የተወረወረ ፈንጅ ሊያወድመን እንሚችል እያወኩ፥ ነበር...አሻግሬ ተስፋ የማየው..."

ፋታ ወስዶ ቀጠለ...

"ልጆቼን እንደማገኛቸው፥ አባት እንደምሆንላቸው፥ ሚስቴን ዳግም እንደማገኛት ፤ቤተክርስትያን እንደምሳለም የፈንጂ ድምፅ ሳልሰማ እለት እለት የወደቀ ሬሳ ሳልሻገር እንደምኖር ተስፋ አደርግ ነበር ...

ስለመግደል የሚታቀድበት ስፍራ ላለመሞት የሚዘየድበት ቦታ አንድ ቀን እንደማልኖር አምን ነበር ...!

ተስፋን ሙጥኝ ብዬ ነው ዛሬን ያየሁት ። ያጋጠመኝን መውደቅ እና ሃዘን ህመም ችላ ብዬ ነው ያን በርሀ የተሻገርኩት !!

አጆኻ ዝወደይ ..
ሁሉም ሰው መስቀል አለው ልዩነቱ አይነቱ እና አሸካከሙ ነው !!"

By Adhanom Mitiku

@wegoch
@wegoch
@paappii

ይህም ባህሌ ነው

ከሃያ ስድስት አመት በፊት፣ ገና ወደ ሆላንድ እንደመጣሁ ጓደኞቼ 'አምስተርዳም ውስጥ የምናሳይሽ ድንቅ ነገር አለ' ብለው ይዘውኝ ሄዱ። ከሮተርዳም በባቡር የ45 ደቂቃ መንገድ ተጉዘን እስክንደርስ ድረስ እነዚህ በሰው በሰው ያወቅኳቸው ሃበሻ ጓደኞቼ “የነጮቹን ጉድ ታያለሽ---” እያሉ እስክንደርስ ድረስ ልቤን በጉጉት ሰቀሉት። አይደረስ አይቀር Red light destrict የሚባል ቦታ ደረስን። ሴተኛ አዳሪዎች በተገለጠ መስታዎት ውስጥ ጡት ማስያዢያ እና የውስጥ ሱሪ ብቻ ለብሰው ሰው በሚያማልል አኳኋን ተቀምጠው ሚውዝየም እንደሚታይ እንሰሳ ወይም ዕቃ በጎብኚዎች ይታያሉ። አየሁ፣ ዞር ዞር ብዬ የሚያይዋቸውንም ቃኘሁ፣ የነጭ ገላ እንዲህ ተገላልጦ ሳይ የመጀመሪያዬ በመሆኑ በመጠኑ ተገረምኩ። ነገር ግን ጓደኞቼ እንደጠበቁት በጣም አልተደመምኩም። አለመደንገጤ ወይም በስመአብ ብዬ አማትቤ አገሬ መልሱኝ አለማለቴ አወዛገባቸው። ከጎኔ እየተራመደች ስትመራኝ የነበረችው ጠይሟ ፍንጭት ልጅ “ከባህላችን ጋር ስለማይሄድ ብዙ ሃበሾች ይደነግጣሉ” አለችና መልስ ፍለጋ ትቃኝኝ ጀመር። ነገሩን አይቼ አለማጋነኔ ያበሳጫት ትመስል ነበር። አልፈረድኩባትም። ግን ምን ልበላት?

አኔ፣ ትግስት፣ የቤት ስሜ ሚሚ፣ የአቶ ሳሙኤል ማቴዎስ በቀለ ልጅ፣ መርካቶ ከፍተኛ 5 ቀበሌ 17 የቤት ቁጥር 475 ነበር መኖሪያዬ ልበላት? ከሰፈሬ አንድ አስፋልት ከፍ ብሎ የነበረው የሴተኛ አዳሪዎች ሰፈር ቀበሌ 12 ይባል ነበር ልበላት? ሁለተኛ ደረጃ ትምህርቴን ያጠናቀቅኩት አዲስ ከተማ ትምህርት ቤት ነው ልበላት? ከቤቴ ወደ ትምህርት ቤቴ ለመድረስ በ12 ቀበሌ ሰፈር ውስጥ ውስጡን ስጓዝ ያልተሳለምኩት ሴተኛ አዳሪ አልነበረም ልበላት? አንዷ በጉርድ ቀሚስ፣ አንዷ በቀይ ጫማ፣ አንዷ በውሰጥ ልብስ፣ አንዷ ስትታጠብ፣ አንዷ ስትቀባ፣ አንዷ ስታማልል ጠባብ ሱሪ አጥልቃ፣ አንዷ በጠዋቱ፣ አንዷ በከሰአት፣ አንዷ አመሻሽ ላይ፣ በነጻነት ቆመው ሁሉን አይቻለሁ ልበላት? የትዬ እንትና ባል፣ ያ ጠጅ አዘውታሪው፣ 3 ቀን ሙሉ ተፈልጎ ጠፋ። ሚስቲቱ ሰክሮ ቦይ ውስጥ ወድቆ ሞቷል ብላ ተንሰቅስቃ አለቀሰች። የሰፈሩ ሰው ተገልብጦ ወጥቶ ባልየው ሲፈለግ፣ የ12 ቀበሌዋ ሴተኛ አዳሪ ስላጽ “አኔ ጋር ነው ግን አልከፈለኝም” ብላ ያሳበቀች ዕለት፣ ሰውዬው ተጎትቶ ከቤቷ ሲወጣ፣ እኔም እዛ ነበርኩ ልበላት?

አባቴ የአትዮጵያ አየር መንገድ ይሰራ ስለነበር የተለያዩ አገሮች ለስራ ሲጓዝ የሚሸጡ አልባሳትና ጫማዎች ያመጣ ነበር። አንድ ጊዜ ከታይላንድ ሲመለስ ብዙ የሚሸጡ ቦርሳዎች አምጥቶ ለእናቴ እና ለእህቶቹ ሸጠው አንዲያተርፉ አከፋፈላቸው። በጣም የምወዳት አክስቴ አራት ቦርሳ አስይዛኝ ወደ ሴተኛ አዳሪዎቹ ሰፈር ላከችኝ። ትጠብቅሻለች የተባልኩት ስሟን በቅጡ የማላስታውሰው ቀይ ዳማዋ ሴተኛ አዳሪ ቤት ስደርስ ከደንበኛዋ ጋር ነበረች። በጣም ያረጀ፣ አውራ ጣቱ ጫፍ ተበላልቶ የተቀደደ፣ ቡናማ የወንድ ቆዳ ጫማ አልጋው ስር ይታያል። ከንፈሩ ሳይሳም ከሚያድር ቢታረዝ የሚመርጥ ሰውዬ አልጋዋ ላይ እደነበረ ከጫማው ገምቼ ነበር። በመጋረጃ ከተከለለው አልጋዋ ተስፈንጥራ ወጥታ ይዤ የነበረውን አራቱንም ቦርሳዎች አንድ በአንድ ቃኝቻቸው። ከመጋረጃው ጀርባ ሰውዬው በስሱ ያስላል። የቱን እንደምትመርጥ ዓይንአዋጅ ሆነባት መሰለኝ በርጩማ ላይ አስቀምጣኝ ትንሽ እንድጠብቃት አዝዛኝ ወደ ደንበኛዋ ተመለሰች።

ታዲያ የአምስተርዳም አስጎብኚዬን ምን ልበላት? እኔ ትግስት፣ የአቶ ሳሙኤል ማቴዎስ በቀለ ልጅ፣ አንዲት የቀይ ዳማ ሴተኛ አዳሪ በመጋረጃ ተከልላ ከደንበኛዋ ጋር አንሶላ ስትጋፈፍ አኔም እዛው ክፍል ነበርሁ ልበላት? አራት ከታይላንድ የመጡ ቦርሳዎች አቅፌ፣ እሱ ዚፑን ሲከፍት፣ የአልጋ ላይ ግብግብ፣ አሷ ስታቃስት፣ እሱ ሲያለከልክ፣ እንዳልተቃኝ ማሲንቆ የሽቦ አልጋዋ ሲያለቅስ ሰምቻለሁ ልበላት? በኋላም ሰውዬው ከመጋረጃ ጀርባ ሲለባብስ፣ ከፍሎ ሲወጣ ትዝ የሚለኝ ጀርባው ነበር። ደርዙ የተተረተረ ሱሪው .... ልበላት? አጠገቤ መጥታ እንደገና ቦርሳ ስትመርጥ፣ የሩካቤ ምርቃናዋ ሳይበርድ፣ ላብ ያዘፈቀውን ሰውነቷን አይቻለሁ ልበላት? ይህም ባህሌ ነው ልበላት?

By ትግስት ሳሙኤል

@wegoch
@wegoch
@paappii

የሆነ ሰዓት እሽኮለሌሌሌ ያሉ ጥንድ ጓደኞች ነበሩኝ። ነገራቸው ሁሉ እንዳይሆን እንዳይሆን ነበረ(እንኳንም ትለያያላችሁ የምንለው አይነት😅)

ከዛ በቃቸው መሠለኝ በአሪፍ ፀብ ተጣሉ ፥ በመኻል የእሱ እናት ሞተች።

ኧረ ይደብራል መኼድ አለብሽ ምናምን ብዬ ሰባብኬ በሰልስቱ ይዣት ሄድኩ ።

ወግ ነው መቼም ብላ ጠጋ ብላ "እንዴት ነህ በረታህ ?" ስትለው ምን አላት :-

"ሀዘኔን ልትቀሰቅሺብኝ ነው ከተፅናናሁ በኋላ የመጣሽው ?" 😂

By beza wit

@wegoch
@wegoch
@paappii

ከአዲስ አበባ ወደ ዋሽንግተን ዲሲ የሚመበር የኢትዮጵያ አየር መንገድ ላይ ከባለቤቴ ጋር የተመደበልልን ቦታ ቀደም ብለን ይዘናል፡፡

ግዙፉ የኢትዮጵያ አየር መንገድ ለቀጣይ አሰራ ሁለት ሰዓታት ለሚያደርገው ጉዞ ዝግጅቱን አጧጡፎታል፡፡

እኔና ባለቤቴ መቀመጫችንን የሚጋራውን ሶስተኛውን ሰው ስንጠብቅ አንዲት በአምሳዎቹ መጨረሻ ላይ የሚገኙ ሰው ከተፍ አሉ፡፡ በእጃቸው ከዘራ በሌላኛው እጃቸው የሚጎተት ሻንጣ ይዘዋል፡፡

ሻንጣቸውን ከላይ የሚገኘው ማስቀመጫ ላይ እንዳኖርላቸው ለጠየቁኝ እርዳታ ፈጠን ብዬ ተቀብዬ ሰቀልኩኝ፡፡

ምስጋናዬን ተቀብዬ ከመቀመጤ መዳረሻችን ስንደርስ ካወረድክላቸው በኃላ ላግዞት፣ ልግፍ አንዳትል አለች፡፡

ደግሞ ምን ችግር አለው፡፡ የሀገሬ ሰው ባግዝ፡፡ አንድ ሁለት ተባባልን፡፡

ቀጥላ ይህንን የአንዲት ተሳፋሪ ታሪክ አጫወተችኝ፡፡

አንድ መዳረሻውን ዱባይ ያደረገ አውሮፕላን ውስጥ ከእኔ ቀጥሎ አንዲት ተለቅ ያለች ሴት ትመጠጣና የያዘቸውን የእጅ ቦርሳ ከላይ ባለው የእቃ ማስቀመጫ ላይ እንዳኖርላት ትጠይቀኛለች፡፡ ነገር ግን ከእኔ ትይዩ ተቀምጦ የነበረው ሰው ቀልጠፍ ብሎ ተቀብሎ የተጠየኩትን ድጋፍ አደረገ፡፡

ሴትዩዋ ከጎኔ መቀመጫዋን ካመቻቸችና መታጠቂያ ቀበቶዋን ካሰረች በኃላ አክብሮት የተሞላ ወሬ ጀመረችኝ፡፡ በረራችን አንደተጀመረ ብዙም ሳንጓዝ ሆዷን ቁርጠት እንዳጣደፋት ነገረችኝ፡፡ የበረራ አስተናጋጅ ጠርቼ አባካችሁን እርዷት አልኩኝ፡፡ እነሱም መጥተው ድጋፍ አደረጉ፡፡ ከዚያች ቅፅበት ጀምሮ ሴትዩዋ ልጄ እያለች እኔን መጥራት ጀመረች፡፡ ያው ላደረጉት ነገር ይሆናል ብዬ ተቀበልኩ፡፡ ሁሉም ሰው አብረን እንደሆንን ማሰብ ጀመረ፡፡

ልክ ዱባይ ስንደርስ መጀመሪያ ሻንጣውን በማስቀመጥ የረዳት ሰው ሻንጣውን ካወረደላት በኃላ ወደእኔ ጠጋ ብሎ በፍጥነት ከሴትዮዋ እንድርቅና ለበረራ አስተናጋጆቹ አብረን እንዳልሆንን እንዳሳውቃቸው ነገረኝ፡፡

ማስጠንቀቂያው ዋጋ አልነበረውም፡፡

የበረራ አስተናጋጆቹ ከሴትዮዋ ጋር ያለንን ግንኙነት ጠየቁኝ፡፡ እዚሁ አውሮፕላን ላይ መገናኘታችንን ተናገርኩ፡፡ ሴትዮዋ የእጅ ቦርሳዋን እንዳግዛት ለመነችኝ፡፡ ትንሽ ተወዛገብኩ፡፡ ያ ሰው በምልክት እንዳላግዛት አልፎም የበረራ አስተናጋጆቹ አገዛ መጠየቅ እንደሚቻል በቃል ተናገረኝ፡፡

ስሜቱ ቀላል አልነበረም ድንገት የታመመ ሰው አግዙኝ ሲል ጥሎ መሄድ ግን የሰውየውን ምክር ተቀብዬ ዊልቼር እንድትጠብቅ አድርጌ ትቻት መራመዴን ቀጠልኩ፡፡ በደቂቃዎች ውስጥ ከባድ ረብሻ ተፈጠረ፡፡ ከመጣላት ዊልቸሩ ላይ ቦርሳዋን ይዛ ለመራመድ ስትሞክር የኤርፖርት ፖሊስ በቁጥጥር ስር አዋላት፡፡

ከመቅፅበት ልጄ ልጄ እያለች ወደእኔ መጣራት ጀመረች፡፡ ጥያት እየሄድኩ እንደሆነ ወነጀለችኝ፡፡

ለካንስ ሴትዮዋ ከህገወጥ አደንዛዥ እፅ ዝውውር በተያያዘ ተይዛ ነው፡፡

እኔም ተያዝኩ፡፡ የሆነውን አስረዳው፡፡ ፖሊስ ሙሉ ስሜን እንድትናገር ጠየቃት፡፡ መጥራት አልቻለችም፡፡ ቦርሳዬ ተበረበረ፡፡ አሻራዬ ተመሳከረ፡፡ ምንም አይነት ትስስሮች ማግኘት ስላልተቻለ በመጨረሻ ነፃ ወጣው፡፡

ይህ ገጠመኝ በህይወቴ ትልቁን ትምህርት አስተማረኝ፡፡ በጉዞ ላይ ምንም አንኳ ሰውን መርዳት ጥሩ ቢሆንም ቅሉ የራስ ሻንጣ የራስ ነው፡፡ የሰው ሻንጣ ደግሞ የሰው፡፡

ታሪኩን ሰምቼ ስጨርስ ከጎኔ የተቀመጡትን ሴትዬዋን ተመለከትኩ፡፡

ከአስራ ሁለት ሰዓት በረራ በኃላ ስንደርስ አንደመጀመሪያው ሳይሆን በግማሽ ልቤ የሰቀልኩትን ቦርሳ አውርጄ ሰጠውኝ፡፡

አመሰገኑኝ፡፡

የገረመኝ መዳረሻችን የሆነው Washington Dulles International Airport የተቀበለን ባለማቋረጥ የሚነገረው የሰው ሻንጣ እንዳትይዙ፣ እንዳትረዱ . . . የሚለው ማስጠንቀቂያ ነበር፡፡

መልካም ሁኑ ግን ህይወታችሁ መልካምነታችሁን ብቻ ዋጋ ሊያስከፍለው ይችላልና መጠንቀቁ አይከፋም፡፡

ደግ አይለፍችሁ❤️

@wegoch
@wegoch
@paappii

By Tesfaye Haile

አደፍርስ


አብዬ አደፍርስ የሚስታቸውን ግልምጫ ያመልጡበት፣የልጆቻቸውን ሆድ ይሞሉበት መላው ቸግሯቸዋል።የዛሬ አራት ወር ገደማ በጥበቃነት ይሰሩበት የነበረው ባንክ የዘረፋ ሙከራ ተደርጎበት የነበረ ጊዜ ዘራፊዎቹን በጉልበታቸው መመከት እንደማይችሉ ሲያውቁት በድረሱልኝ ጥሪ ቢዘርሯቸውም የባንኩ ማናጀር እሳቸውን አባሮ በቦታቸው ከሳቸው በእድሜ አነስ የሚል ጎልማሳ ከመቅጠር ወደኋላ አላለም።ይኸው ከተባረሩ አንስቶ ሁሌ ማለዳ ማለዳ ከስራ ሰዓት ቀደም ብለው ያደረ ሽንታቸውን ከቤት ይዘውት ይወጡና ባንክ ቤቱ አጥር ስር ሲደርሱ ነው ቀበቷቸውን የሚፈቱት።

ስጋ ለበስ ብትራቸውን አራግፈው ከሱሪያቸው ስር እየወሸቁ
"ኡኡ ባልኩ?እንደ ሴት ጮሄ ባስጣልኩ?" ይላሉ።አሁን አሁን ግን ረሀቡ ጠናባቸው።የሶስት ልጆቻቸው አንጀት እግርና እግራቸውን ተብትቦ ይዞ አላራምድ አላቸው።ሚስታቸው ከጉሊት ውለው ሲመጡ ከሬሳ የከረሰሰ ሽሮ ያቀርቡላቸውና
"አንቱ የሴት ገንዘብ ምን ምን ይላል?እስቲ ቀምሰው ይንገሩኝ" ይሏቸዋል።
ሁለመናው ከትዕግስታቸው ቋት እየፈሰሰ አልሆን ሲላቸው ሂሩትን አማከሯት...የመንደራቸውን አድባር።ሂሩት በመንደሩ ብቸኛዋ አጭር ቀሚስና ሂል ጫማ የምትለብስ የመንግስት ሰራተኛ ናት።እንዳማከሯትም አላሳፈረቻቸውም ማንበብና መፃፍ የሚችል ሰው ሁሉ ሊሰራው የሚችል ስራ አገኘችላቸው።አላምናት ብለው
"አየ ሂሩት...ይኸን ሽማግሌ ልቀልድበት ብለሽ ነው መቸም"
"አባቴን ይንሳኝ የምሬን ነው!"
"እንዴት ያለ ነው ስራው?"
"አልጋ ቤት ነው የሚሰራው አብዬ...አንድ ቀን በቀን ፈረቃ ሌላ ቀን በማታ ሆኖ አልጋ የሚይዘውን ሰው መታወቂያ ይዘው ስም እየመዘገቡ ብር ተቀብሎ ማሳደር ነው።የማታ ሲሆኑ ማደሪያዎትን ቆንጆ አልጋ ይዘጋጅልዎታል።"

"አልጋ ቤት?"አሉ ቅሬታ በተሞላ ድምፀት።
"አዎ...መንገደኛና የሰው አገር ሰዎች...ነጋዴዎች አልጋ ተከራይተው ሲያድሩ እነሱን መመዝገብ ነው አብዬ።"
"እንዴት ነው እነሱ ተኝተው እኔ ስጠብቃቸው ላድር ነው?ተይ ተይ ቤቱን ዘርፈውት የሄዱ እንደሁ በጉዴ እወጣብሻለሁ ሂሩቴ"
"ኧረ ቤቱ የራሱ ጥበቃ አለው!የርስዎ ስራ መዝግቦ መተኛት ነው"ስትላቸው እያቅማሙም ቢሆን ተስማሙ።

የመጀመሪያውን ቀን በቀን ፈረቃቸው አቀላጥፈው ሰሩ።ይጠፉብኛል ብለው የፈሯቸው ፊደላት ሁሉ እንደ ይስሐቅ ታዘዟቸው።ያሞጨሞጩ አይኖቻቸውም የዋዛ አልነበሩምና ከየሰዉ መታወቂያ ላይ ጥቁሩን ከቀዩ፣ጠይሙን ከቀይ ዳማው አበጥረው ለዩት።አመስግነው ቤታቸው ሲገቡ ባለቤታቸው ከወትሮው በተለየ በትኩስ ሽሮ ተቀበሏቸው።አቦል ይሁን በረካ ባይለይም ቡና ተፈልቶላቸው አንድ ሲኒ ጠጡ።ለወትሮው ጀርባቸውን ይሰጧቸው የነበሩት እመይቴ አማረች ጡትና ጡታቸው መሃል አስተኝተው ራሳቸውን ሲዳብሷቸው አመሹ።
በሁለተኛው ቀን በማታ ፈረቃቸው ሰዓታቸውን አክብረው ተገኙ።አንድ ሶስት መንገደኞችን መዝግበው ቁልፍ ከሰጡ ወዲያ ሁለት ወጣቶች ተቃቅፈው መጡና አጠገባቸው ቆሙ።ሲታዩ እድሜአቸው እምብዛም አይራራቅም።ሴቲቱ ከማውራት ይልቅ ፈገግታና መሽኮርመም ይቀናታል።ወንዱ የጤና በማይመስል ሁኔታ ይቁነጠነጣል...ችኩል ችኩል ይላል።

"እ ፋዘር...አልጋ አለ ኣ?"
"አለ...ሁለት ነው አንድ የፈለጋችሁ?"
"ኧረ ቆጥበን እንጠቀማለን ሃሃሃ...ባለ አንዱ ስንት ነው?"
"ሁለት መቶ ብር"
"ሁለ'መቶ?" አለና ግንባሩን ክስክስ አድርጎ አጠገባቸው ያለውን አልጋ እያየ
"እንደዚህ ነው እንዴ አልጋው?"ጠየቀ።
"ኧረ ይች የኔ የብቻየ ስለሆነች ነው...ውስጥ ያለው ሰፋፊ ነው"አሉ እያፈሩ።ልጅቷ የልጁን ጎን በስስ ቦክስ ነካ አርጋ በዝግታ "አንተ አታፍርም?"ትላለች።
" ሀዬ በቃ መዝግቡና ፋዘርዬ" አለ መታወቂያውን ፍለጋ ኪሱን እያመሰ።ወዲያው ነገር በድንገት ብልጭ እንዳለለት ሰው እያደረገው
"ውውውውውይ በናትሽ!...ለካ አይ.ዲ.ዬን ያ ዘበኛ እንደያዘው ነው...ያንቺን አምጪው በቃ" ሲላት ቅር እያላት መታወቂያዋን አውጥታ ሰጠች።አብዬ አደፍርስ ፎቶዋን አበጥረው አዩና ወደ ስሟ ወረዱ።ለአፍታ ከመረመሩት በኋላ የሚያውቁት ፊደል ሲያጡ ቀና አሉና።
"ማነው ስምሽ"? አሉ።
"የኋላ'ሸት"
"እና ምነ በአማርኛ ቢፃፍ?" አሉና ስሟን ሊመዘግቡ ፊደላቱን ከአዕምሯቸው ጓዳ ያተራምሷቸው ጀመር።እየተንቀጠቀጡ ስሟን ፅፈው ሲጨርሱ
"የአባትሽስ?"
"ይበልጣል"
አሁንም እየተንቀጠቀጡ ሊመዘግቡ ሲያቀረቅሩ ልጁ ትዕግስቱ ተሟጦ
"ፋዘር እኔ ልመዝግበው የፈጠነ?"
"እ?"
"የፈጠነ...እኔ ፃፍ ፃፍ ላርገው?"
"ቆይ እስቲ...ይ...በ...ል...ጣ...ል...ይበልጣል"አሉና ቀጠል አርገው
"ስራ?"
"ተማሪ ነን"
"ተ...ማ...ሪ...ተማሪ"ይህንንም በዘገምታ አስፍረው ስልክ ቁጥር ከመዘገቡ በኋላ ክፍያ ተቀብለው ቁልፉን አስረከቧቸው።ለክፋቱ የዚያን ቀን የቀረው ብቸኛ ክፍል ከሳቸው ምኝታ ቤት ቀጥሎ ያለው ነበር።

አገር አማን ብለው ሊያሸልባቸው ሲል ከመሬት መንቀጥቀጥ ያልተናነሰ መናወጥ ከሰመመናቸው አባነናቸው።ተገስ እስኪል ጠበቁና ወደ ክፍሏ በር ጠጋ ብለው አንኳኩ።

"የኔ ልጅ"
"ምንድነው ፋዘር?"
"እንደው አደራህን የኔ ዓለም የአልጋው ብሎን እንዳይረግፍ...ደሃ ነኝ የምከፍለውም የለኝ...ወይ ፍራሹን ታወርዱት"?
"ሀዬ በቃ ይወርዳላ!"
ወደምኝታቸው ተመልሰው ፀሎታቸውን እያነበነቡ በድጋሚ ሊያሸልባቸው ሲል የድረሱልኝ ጥሪ የሰሙ መስሏቸው ብርግግ ብለው ተነሱ። ጆሯቸውን ቀስረው ሲያዳምጡ ጩኸቱ ከጎረቤት ነው።ጭንቅ ሲላቸው የስልካቸውን ራዲዮ ከፍተው ወደ ጆሯቸው ለገቡት።
"እንግዲህ አድማጮቻችን ከምሽቱ 12:00 የጀመረው የመዝናኛ ዝግጅቻችን እንደቀጠለ ነው።በያላችሁበት እጅግ ያማረ ጊዜን እያሳለፋችሁ እንደሆነ አንጠራጠርም።ታሪኳ ይነበብ ከሞጣ 'አትጠገቡም' ብላናለች።...ሆዴ ሞላ ከደጀን...እግዜሩ ባይከዳኝ ከጎንደር...ብርአልጣ ዘለዓለም ከማርቆስ 'ዝግጅታችሁ ተወዳጅ ነው' ብለውናል።ከኤፍሬም ታምሩ ሙዚቃ በኋላ ተመልሰን የምንገናኝ ይሆናል።አብራችሁን ቆዩ"

"...ወይ ዘንድሮ(2X)...ወይ ዘንድሮ(2X)
ወይ ዘንድሮ አያልቅም ተነግሮ"
ሙዚቃው ሲያልቅ የስልካቸውን ራዲዮ እየዘጉ
"ወይ የአንት ያለህ!!!እንዴት ያል ዘመን መጣብና?ወንዱ እንደ ሴት እየጮኸ? ኧረግ የእንድማጣው!ቱ!ቱ!ቱ! ሞት ይሻል የለም ወያ አንድ ፊቱን!"እያሉ ይብሰለሰሉ ጀመር።ለሊት ከሞቀ እንቅልፋቸው ሶስቴ ተቀስቅሰው፣አልጋው ረገበ አልረገበ በስጋት ተሰቅዘው አደሩና እንዳይነጋ የለ ነጋላቸው።ልጆቹ መታወቂያ ሊወስዱ ሲመጡ አብዬ አደፍርስ አልጋውን ሳላይ ገመድ ባንገቴ አሉ።አገላብጠው ካዩትና ከመረመሩት በኋላ
"እውነትም ላያስችል አይሰጥ!"ብለው አልጎመጎሙና ልጆቹን አሰናበቷቸው።በቀን ፈረቃ የሚሰራው ተተኪ ሰራተኛ እስኪመጣ ጠብቀው ስራ መልቀቃቸውን ነግሩትና ወደ ቤታቸው አዘገሙ።እመይቴ አማረች ወሬውን ቀድመው ከሂሩት ሰምተውት ኖሮ መሸት ሲል መጥተው የከረሰሰ ፊት ከከረሰሰ ሽሮ ጋር አቀረቡላቸው።
"አንቱ የሴት ገንዘብ ምን ምን ይላል?እስቲ ቀምሰው ይንገሩኝ "

ዘማርቆስ
@wogegnit

@wegoch
@wegoch
@wegoch

መተውን የመሰለ ነገር የለም!
(አሌክስ አብርሃም)

ይታያችሁ ሴቶች በማወቅም ይሁን ባለማወቅ በቀን ብዙ ጊዜ የሚነካኩት የሰውነታቸው ክፍል ምናቸውን ይመስላችኋል? (ወንዶች አትባልጉ በቃ ከሱ ሌላ ሀሳብ የላችሁም?) ፀጉራቸው ነው። በትንሹ በቀን ከ96- 140 ጊዜ ይነካኩታል ይላል አንድ ጥናት። ምን ይሄ ብቻ አንዲት መደበኛ ሴት ፀጉሯን እንደነገሩ ለመንከባከብ (መታጠብ ፣ ማድረቅ መፈሸን ወዘተ) በሳምንት በትንሹ 9 ሰዓታትን ስትወስድ ለውበት ከፍ ያለ ቦታ የምትሰጥ ሴት ደግሞ እስከ 16 ሰዓት ታጠፋለች። በወር ካሰላነው 64 ሰዓት በዓመት 768 ሰዓት ማለት ነው። እንደኛ ባለው አገር የፀጉር ቤት ወረፋ ሲደመርበት የትየለሌ ነው። ይሄ የጊዜ ጉዳይ ነው ወደገንዘብ ከመጣን ለሻምፖ ኮንዲሽነር፣ የተለያየ ትሪትመንት፣ ለቀለም፣ ለቅባት፣ ለፍሸና አንዲት ሴት የምታወጣው ወጭ ጆሮ ጭው ያደርጋል። ይሄ ሁሉ ሆኖ አሳዛኙ ነገር የሴቶች ፀጉር ካለፉት አምስት አስርተ ዓመታት ጋር ሲነፃፀር ጥንካሬው ብዛቱ እና ርዝመቱ በግማሽ ቀንሷል። ይህም ከመዋቢያ ኬሚካሎች፣ ከአየር ፀባይ ፣ ከአመጋገብ፣ ከውሃ ከአኗኗር ስታይልና እና ረፍት ከማጣት ጋር ይያያዛል። እና ምን ተሻለ ....ተማር ያለው ከዙሪያው ይማራል፤ የአውሮፓን ዴርማቶሎጅስቶች ዝብዘባ ተውትና ወዲህ ተመልከቱ!

ሰሞኑን "የኦነግ ሸኔ አባላት የነበሩ እጅ ሰጥተው ወደሰላም ተመለሱ" የተባሉ ሰወችን አይተናል፣ እነዚህ ሰወች በዱር በገደል ከረሙ የተባሉ ፣በጦርነት ያለፉ ወዘተ ናቸው እንደተነገረን። በሚገርም ሁኔታ ግን ከተማ ሴቶቻችን በፆም በፆሎት፣ በዘመነ ትሪትመንት ኢንች ማስረዘም የተሳናቸው ፀጉር እነዚህ ጫካ የከረሙ ተዋጊወች ላይ ተዘናፍሎና ትከሻቸው ላይ እየተርመሰመሰ የህንድን ዊግ አስንቆ መገኘቱ አስገራሚ አይደለም? ምን ቢያደርጉት ነው? ምንም! በቃ ስለተውት ነው! ቢበዛ ቅቤ ይቀቡት ይሆናል።

የእነዚህ ተዋጊወች እጅ መስጠት ለህብረተሰቡ ያስገኛል ከተባለው "ሰላም" ይልቅ ለሴት እህቶቻችን የፀጉር እንክብካቤ ትልቅ ትምህርት የሚሰጥ ነው። እህቶቸ! ፀጉራችሁን የትም በሚመረት ኬሚካል ፍዳውን ከምታበሉት ጊዜና ገንዘባችሁን ከምታቃጥሉ መፍትሄው ቀላል ነው ተውት! መተውን የመሰለ ነገር የለም፤ ተፈጥሮ እድል ሲሰጣት ራሷን ማከም ትችላለች። (ደግሞ ፀጉር ለማሳደግ ብላችሁ ጫካ እንዳትገቡ...እናተና ውበትኮ...) እዳሪ መሬት ስለሚባል ነገር ሰምታችኋል? የተጎዳ እርሻን ለተወሰነ ጊዜ ሳያርሱ ሳይዘሩ ክፍቱን መተው ማለት ነው፤ ተፈጥሮ ታክመዋለች! በቀጣይ ሲዘራበት እንደጉድ ያመርታል። ያደከማችሁን ነገር እስኪ ተውት...ለሁሉም ነገር መተውን የመሰለ ነገር የለም። ለተፈጥሮ የማሪያም መንገድ ስጧት!

@wegoch
@wegoch
@paappii

የዱር አበባ

የገጣሚ ቴዎድሮስ ካሳ የግጥም መፅሐፍ የፊታችን ቅዳሜ ሕዳር 28 ከ ቀኑ 11 ፡ 00 ጀምሮ መገናኛ በሚገኘው ሞሰብ የሙዚቃ ማዕከል ቅጥር ግቢ ውስጥ በድምቀት ይመረቃል ።

በእለቱ ሁላችሁም ተጋብዛችኋል።

@getem

እንኳን አገር አጥበው ቀሽረው ሊያወርሱን ...
(አሌክስ አብርሃም)

በፈረንጆቹ 2011 ጃፓን ውስጥ Fukushima የተባለ አካባቢ የመሬት መንቀጥቀጥ ተከሰተ። ያውም በሬክተር ስኬል 9.0 የተመዘገበ። በሰዓታት ውስጥ 20 ሺ ህዝብ በዘግናኝ ሁኔታ አለቀ ፣6ሺ ሰው ከከፍተኛ እስከቀላል የአካል ጉዳት ደረሰበት ፣ 2500 ሰው የደረሰበት ጠፋ ፣ ግማሽ ሚሊየን ህዝብ ቤት ንብረቱን ጥሎ ተፈናቀለ። በእንቅርት ላይ ጆሮ ደግፍ እንደሚሉት የኛ አበወች ከነገሩ በላይ ዓለምን ያስደነገጠ ሌላ ዜና ተሰማ ። ለልጅ ልጅ የሚተላለፍ ጣጣ!

ይሄ ጦሰኛ አደጋ የተከሰተባት ከተማ ወጣ ብሎ የሚገኝ የኒውክሌር ማብለያ ተቋም አለ። Fukushima Daiichi nuclear power plant ይባላል። በዓለማችት ካሉ 25 የኒውክሌር ሀይል ማምረቻወች አንዱ ነው። በአደጋው ከዚህ ግዙፍ ተቋም የራዲዮ አክቲቭ ጨረር አፈትልኮ ወጣ። ራዲዮ አክቲቭ በቀጥታ ካገኘ ማንኛውንም ህይወት ያለው ፍጡር የሚገድል እንዲሁም ውሃ ይንካ ድንጋይ ሁሉንም ቁስ በመበከል ወደገዳይ ቁስነት የሚቀይር መራዢ ጨረር ነው። በአካባቢው ላይ ለአመታት በመቆየትም ይታወቃል። ከዚህም የከፋ ነው ኬሚስትሪው። ተጠቅቶ ከአደጋ መትረፍ ቢቻል እንኳን መትረፍ አይበለው። ዓለማችንን የሚያስጨንቃት የኒውክሌር መሳሪያ የሚፈራበት አንዱ ምክንያት ይሄው ነው።

አደጋው ጋፕ ሲል ከአካባቢውን ከገዳዮ ብክለት ለማፅዳት መላው ጃፓናዊ ተረባረበ። ይሄን ሁሉ መከራ ያወራኋችሁ ቀጥሎ ለምነግራችሁ የሚያስቀና ጉዳይ ነው። በእርግጥ ብክለቱን ማፅዳት፣ ጉዳቱንም መቀነስ ይቻላል ፣ ግን መጥረጊያህን አንስተህ በሞራል ዘው የምትልበት ዘመቻ አይደለም! የረቀቀ ሳይንስ ነው። በክር ላይ የመራመድ ያህል ጥንቃቄ ልምድና ዕውቀት እንዲሁም ዕድል የሚጠይቅ ነገር! በደመነፍስ ቦታው ላይ መገኘት ወዲያው ከመሞት የእድሜ ልክ ካንሰር ፣ለሌሎችም ዘግናኝ ጉዳቶች ሊዳርግ ይችላል። መቸስ ችግር ጀግኖችን ይፈጥራል። መላው ዓለም
"Fukushima 50"ብሎ የሰየማቸው ጡረታ የወጡ ሽማግሌወች ይህን ራዲዮ አክቲቭ ጉዳት ለመከላከል በፈቃደኝነት ከፊት ተሰለፉ።

እነዚህ ሰወች የጡረታ ክፍያቸው ያነሰባቸው ፣ ከዚህ ኑሮ ሞት ይሻላል ያሉ ጧሪ አልባ ሽማግሌወች እንዳይመስሏችሁ ፣ ከፍተኛ የኒውክሌር ኢንጅነሮች፣ ተመራማሪወች የነበሩ ጡረታ ወጥተው የተንደላቀቀ ኑሮ የሚኖሩ ጃፖናዊያን አባቶች እንጅ። ብቸኛ ዓላማቸው የድርሻችንን ኑረናል ይህን የኒውክሌር ተቋም የመሰረትነውም እኛ ነን ሀላፊነቱን መውሰድ ያለብን እኛ ነን፣ ልጆቻችንና ለቀጣዮ ትውልድ ይሄን ገዳይ ቆሻሻ አናወርስም! የድርሻውን ንፁህ አገር ይረከብ ዘንድ ሞትም ቢሆን ዋጋ እንክፈል የሚል ነበር። አንዷ የ72 ዓመት ጡረተኛ እንዲህ አለች "My generation built these nuclear plants. So we have to take responsibility for them. We can't dump this on the next generation,"እናም ወጣቶቹንና ብዙ ሊሰሩ የሚችሉትን ኢንጅነሮች ተክተው በዛ ቀውጢ ወቅት ወደተበከለው ተቋም ባጭር ታጥቀው ገቡ።

በእርግጥም ይህን ከባድ ሀላፊነት በመወጣት አደገኛውን ስራ በመፈፀም ከኋላ ለሚመጡ ወጣት ኢንጅነሮች እና ብክለቱን ለማፅዳት ለተሰለፉ ሁሉ መንገድ ጠረጉ። ጣቢያው ውስጥ ለቀናት በመቆየትና ሪአክተሩን በማቀዝቀዝ ጃፓን ይገጥማት ከነበረ የሚሊየኖች ሞት ታደጓት! ትውልድን ከቆሻሻና የሀዘን ታሪክ ውርስ ታደጉ!! የሚደንቀው ነገር አንድኛቸውም በአደጋው አልሞቱም!! አገር ለትውልድ እንዲህ ታጥቦ ተቀሽሮ በውርስ ይሰጣል ። እኛስ? እንኳን አገር አጥበው ቀሽረው ሊያወርሱን የኛን ዕድሜ የሚቀሙ፣ የቀጣዮ ትውልድ ዕጣፋንታ ላይ የጥላቻ ቆሻሻ ደፍተው የሚፎክሩ አባቶች ልጆች ሆንን ! አየህ ወጣትን እየማገዱ ኑሯቸውን ለሚያመቻቹ የጠነዙ ፖለቲከኞቻችን ይሄ ጅልነት ነው። ጃፓን እንደምን ሰለጠነች ይሉናል አገራችን እንደምን ሰየጠነች ብለን ስንጠይቅ!

@wegoch
@wegoch
@paappii

አልፈልግም ስትለኝ እምባዬ እንዳይመጣ ታግዬ ፈገግ አልኩኝ ። ለእምባዬ ፊት መስጠት አልፈለኩም ። የሄደን ሰው እምባ አይመልሰውም ብዬ ነው መሰለኝ !

ግን ከፋኝ ፦

ተደግፌባት ነበር ። አደጋገፌ በጥርጣሬ አልነበረም ። ከኔ እሷን አምናት ነበር ፣ እንዳልጎዳት ስጣጣር ነበር ። እንዳላሳዝናት ሁኔታዬን ሁሌ አየው ነበር !

አልፈልግህም ስትለኝ ....

ጭር አለብኝ በግርግር ውስጥ ጭርታ ስሜት እንዴት ይወለዳል ? ጭርታው አስፈራኝ ጭርታው ድብርት ወለደ ። ስታብራራ መልስ መስጠት አልፈለኩም ። እንዲ ስለው እንዲ ይላል ብላ ምላሽ ተሸክማ እንደመጣች ገብቶኛል ።

ምላሽ ካጠና ሰው ጋር ውይይት ትርፍ የለውም ። ማን ለማን ብሎ ከማን ጋ ይሆናል ? ይሄ መስቀል ሳላጉረመርም የምሸከመው ነው !!

ግን ይሄን ሁሉ ሲሰማኝ ፈገግ ብዬ ነበር ።

እሷም አልፈልግህም ስለው ፈገግ ብሎ ነበር ትል ይሆናል ።

By Adhanom Mitiku

@wegoch
@wegoch
@paappii

አዲስ አበባ የምትገኙ ከ 35 - 40 አመት ያላቹ ወንዶች ለተለያዩ ማስታወቂያዎች እየመለመልን ስለሆነ በደንብ የሚታዩ ጥሩ 3 ፎቶዎችን ከስልካቹ ጋር @Ribki30 ላይ ላኩልን።

ጥገኛን ተውና ታታሪውን አሳድገው!

የሆነ ጊዜ የዩናይትድ አረብ ኤመሬትስ መስራች ሼህ ረሺድን ኢንተርቪው አድርጌው ነበር። ስለነገዋ ዱባይ ስጠይቀው የሰጠኝ መልስ አስገርሞኝም አስደንቆኝም ነበር

ምን አለ?

"አያቴ ግመል ይጋልብ ነበር፣ አባቴም ግመል ይጋልብ ነበር፣ እኔ ደግሞ መርሰዲስ እየነዳሁ ነው። የኔ ልጅ ላንድሮቨር ይነዳል። የልጅ ልጄም እንደዚያው ላንድሮቨር ይነዳል። የልጅ ልጅ ልጄ ግን ግመል መጋለቡ አይቀሬ ነው!"

"ለምን ?"
ለምን ካልከኝማ!

"ክፉ ጊዜ ጠንካራ ሰዎችን ይፈጥራል። ጠንካራ ሰዎች ደግሞ ሁሉ ነገር ቀላል የሆነበትን ጊዜ ይፈጥራሉ።ቀላል ጊዜያት በተራቸው ደካማ ሰዎችን ይፈጥራሉ። ደካማ ሰዎች ደግሞ ክፉ ጊዜን መልሰው ያመጡታል። ብዙዎች አይገነዘቡት ይሆናል ፣ ነገር ግን ይህ እንዳይመጣ ታታሪዎችን ማሳደግ አለብን። ያ ሲሆን ጥገኞች አይፈጠሩም።"

By Melaku Berhanu

@getem
@getem
@paappii

ቀልድ
*

ልጅቷ ለትምህርት ቻይና ሄዳ ( በርግጥ አንዳንዶች ለንግድ ነውም ይላሉ፤ እኛ ለምን ለካራቴ ውድድር አትሄድ ምንም አያገባንም) ... ቻይና ሄዳ አንድ ቻይናዊጋ ጾታዊ ፍቅር መጀመር ከዛ በቃ ተጋቡ

ሀገር ቤት ይዛው ስትመጣ እናቷ ማመን ያቃታቸው ቻይናዊ የማግባቷ ነገር ሳይሆን የቀለቡ ነገር ነው

ቢያዩ ጊንጥ፤ ቅንቡርስ በረሮ የጉንዳን ቆሎ ወዘተረፈ

አንድ ቀን እነዚህን ነገሮች ይዞ መጥቶ ይሰራልኝ አለ

እናትየው: እውውይይ እንደው አደራ የውሻው አጥንት በሚቀቀልበት ድስት ስሩለት የኔን እቃ እንዳታነካኩ😂

የቻይናው ምግብ በኮረሪማ በበሶብላ የመሳሰሉት ቅመሞች አብዶ ተሰራለት እና ጣቱን እስኪቆረጥም አነከተ

ሆንቾፖ ኪሊቾቺቿቶኮዃ ሲንፊቻቹዎ አላቸው

እናትየው: ምንድን ነው የሚለኝ ሰውዬሽ

ልጅቷ: እማዬ ጣት ያስቆረጥማል በጣም አመሰግናለሁ ነው ያለሽ

ሾሆ ሲጆቾ ፖጂሊሃኪቾ ቺኒማማ

ኧረረረረ በቃ ምንም አይናገር አፉን እንደቆረበ ሰው አፍኖ ይቀመጥ ፌንጣዎቹ ዘለው እንዳይወጡ ይተወኝ ዝም ይበል ምስጋናው በቃኝ

ልጅቷ: አይ እማዬ እሱማ እያለ ያለው በጣም ጠግቤአለሁ የተረፈውን ከድናችሁ አስቀምጡልኝ በኋላ እበላዋለሁ

🧐: ኧ? ከድናችሁ? ምን እንዳይ ገባበት? በረሮው ውስጥ በረሮ እንዳይገባ ነው? ጊንጣ ጊንጥ ውስጥ ጉንዳን እንዳይገባ ነው?

ኧ🙄

በማስተዋል አሰፋ የተፃፈ

@wegoch
@wegoch

አልቃሽና አጫዋች
(በእውቀቱ ስዩም)

ቦጋለ በሚባል ስም የሚታወቁ ሁለት ስመጥር ሰዎችን አውቃለሁ፤ የመጀመርያው የ”ፍቅር እስከመቃብሩ” ገበሬ፥ ቦጋለ መብራቱ ነው፤ ሁለተኛው በገሀድ ኖሮ አልፏል፤ድሮ በጎጃም ሽማግሌዎች ክፉ ሰው ሲራግሙ፥ “ ቦጋለ ያይኔ አበባ ስምህን ይጥራው “ይሉ ነበር ይባላል፤

ቦጋለ ያይኔ አበባ ስመጥር አልቃሽ ነበር፤ የጥንት አልቃሾች ቀላል ሰው እንዳይመስሏችሁ፤ በለቅሶ ወቅት የሚታየውን ትርምስ እና ጫጫታ ወደ ኪነጥበብ ትርኢት የሚቀይሩበት ተሰጥኦ ነበራቸው ::

ቦጋለ ያይኔ አበባ በወጣትነቱ ያገሩን መሬት አርሷል፤ እንዲሁም ያገሩን መሬት በእግሩ አዳርሷል፤ ወደ አልቃሽነት ሙያ እስኪገባ ድረስ ግን የረባ ስኬት አላገኘም ነበር፤ ይህንን በማስመልከት፥ እንደ ግለ-ታሪክ እና Cv በምትቆጠርለት እንጉርጉሮው እንዲህ ብሎ ነበር፤

“አርሼም አየሁት ፥
ነግጄም አየሁት
አልሰሰመረም ሀብቴ
አልቅሼ እበላለሁ እንደ ልጅነቴ “

ቦጋለ ያይኔ አበባ ከዘመናት ባንዱ ወግ፥ ደርሶት ሴት ልጁን ዳረ፤ እንጀራ ሆኖት የቆየው ሞት አሁን በሌላ ገጹ ተከሰተ፤ ሙሽሪት በሰርጓ በሳምንቱ ተቀጠፈች፤ እልልታው ወደ እሪታ የተቀየረበት ቦጋለ በተሰበረ ልብ ይቺን ውብ እንጉርጉሮ ወረወረ፦

“እንዲህ ያለ አምቻ፥ ክብሩን የዘነጋ
በፈረስ ሰጥቼው ፥ መለሰልኝ ባልጋ”

ኪነጥበብ ፥ አስቀያሚ መከራን ወደ ውበት መቀየር እንደምትችል ይቺ እንጉርጉሮ ምስክር ናት፤

ከሞት ሁሉ ቅስም ሰባሪው የልጅ ሞት ይመስለኛል ፤ ከወሎ የፈለቀች ከወዳጄ የሰማሁዋት ፥አንድ ጨዋታ ትዝ ትለኛለች፤ አያ ሙሄ የተባለ ገበሬ ልጁ ሞቶበት ፥ጎጆው በርንዳ ላይ ከርትም ብሎ ይቆዝማል ፤ ባለንጀራው አዋ ይመር አጠገቡ ተቀምጧል፤ አዋ ይመር ወዳጁን በቃል ማጽናናት በቂ ሆኖ አላገኘውም ፤ የወዳጁን ልጅ የቀሰፈውን ፈጣሪ ለመበቀል ስለፈለገ ፥ ጠመንጃውን አነጣጥሮ ወደ ሰማይ ተኮሰ፤

ተኩሱ በረድ ሲል አዘንተኛው አያ ሙሄ ወዳጁን እያየ እንዲህ አለ፤

“ካገኘከው ገላገልኸን፤ ከሳትኸው ግን አስፈጀኸን”🙂

@wegoch
@wegoch
@paappii

የ #yohabi ደብዳቤ
የማይድን ናፍቆት.... 'የተረሳው ክፍል'

"ስትሄድ ያልከኝን መርሳት አቅቶኛል"

@wegoch
@wegoch
@paappii

ያከሸፈቻቸው ያከሸፏት አገር!
(አሌክስ አብርሃም)

የ8ኛ ክፍል ተማሪወች እንደነበርን ነው። አንድ ቀን የሆነ አስተማሪ ቀረ። በዛ ክፍት ክፍለጊዜ ሁላችንም ደስ ያለንን ስንሰራ (አብዛሀኞቻችን ወሬና መንጫጫት) አንድ ምስጋናው? የሚባል የክፍላችን ልጅ ብላክቦርድ ላይ በወዳደቀ ቾክ ሁለት ሰወችን ሳለ። ስዕል ስላችሁ ይሄ ዝም ብሎ የልጅ ስዕል አይደለም፣ ባስታወስኩት ቁጥር የሚገርመኝ የግንባራቸው መስመር፣ ፊታቸው ላይ ያረፈው ጥላ ልብሳቸው ላይ ያለው ፓተርን ሳይቀር ፎቶ የሚመሳስሉ ፖርትሬቶች። ደግሞ የሳለው ምንም እያየ አልነበረም። እማሆይ ቴሬሳ ሁለት እጆቻቸውን እንደህንዶች ሰላምታ አገናኝተው ግንባራቸውን እንዳስነኩ እጃቸው መሀል መቁጠሪያ ተንጠልጥሎ፣ እንዲሁም ቀዳማዊ ሀይለስላሴ ከነንጉሳዊ ልብሳቸው። ወደጎን ዞር ብለው። ሁላችንም ተገረምን ተደነቅን። የስእሎቹ መጠን የእውነት ሰው ያክሉ ነበር።

ቀጣዮ ክላስ ጅኦግራፊ ነበር። ኮስታራው አስተማሪያችን ገባና ስዕሎቹን አየት አድርጎ "ማነው የሳለው?" አለ ። በአንድ አፍ "ምስጋናው" አልን በአድናቆት ጭምር። ራሱ ወደምስጋናው ወንበር ተራምዶ የያዘው ልምጭ ተሰባብሮ እስከሚያልቅ ቀጠቀጠው። እና በቁጣ "ይሄ የተከበረ የትምህርት ገበታ ነው ! ማንም እየተነሳ የሚሸናበት አይደለም ደደብ" ብሎ ደነፋ። ዳስተሩን አንስቶ አንዴ እጁን ሲያስወነጭፈው ሀይለስላሴን ለሁለት እማሆይ ቴሬሳን አናታቸውን ገመሳቸው። አጠፋፍቶ ማስተማሩን ቀጠለ። ምስጋናው ከዛ በኋላ እንኳን ሰሌዳ ላይ ወረቀት ላይ ሲስል አላስታውስም።

ብዙ ዓመታት አለፉ። አንድ ቀን አዲስ አበባ ፒያሳ መርከብ የምትባል ምግብ ቤት ምሳ በልተን ስንወጣ በር ላይ አንድ የጎዳና ተዳዳሪ በፌስታል ፍርፋሪ ሲበላ አየሁ ምስጋናው ነበር። ቢጎሳቆልም አልጠፋኝም። ዛሬ በምን አስታወስኩት? አንድ አሜሪካዊ ህፃን ሰሌዳ ላይ በቾክ የሳለው ስእል በአስተማሪዎቹና በትምህርት ቤቷ ርዕሰ መምህር ስለተደነቀ በቀስታ ሰሌዳውን አንስተው አንድ ቢሮ ግድግዳ ላይ እንደሰቀሉት አነበብኩ። ስዕሉ ለዓመታት እንዲቆይ የሆነ ነገር እናስደርጋለን ብላለች ርዕሰ መምህርቷ። አገር ባከበረቻቸው ትከብራለች ባከሸፈቻቸው ትከሽፋለች። ይህ ሒሳብ የገባቸው ብፁአን ናቸው። ለትውልድ ፍቅር ያወርሳሉና።

@wegoch
@wegoch
@paappii

እማማ አፀደ የሚባሉ ጎረቤት አሉን የእናቴ ጓደኛ ናቸው። እማማ አፀደ አመም አድርጓቸው ህመማቸው በባሰ ቁጥር እናቴን ጠሏት።

ይሰድቧታል ሌባ ናት ይላሉ።
መሰሪ ናት ይላሉ።
ልትገለኝ ትፈልጋለች ይላሉ።
መርዝ አበላቺኝ ይላሉ ። አትምጣብኝ ብለው ስሞታ ይናገራሉ ሌሊት እቤቴ ልትገባ ነበር ይላሉ ።

ሰው እንዳትመስላችሁ ይላሉ ። እናቴ ቤታቸው መሄድ አቆመች ።

ከቤት መውጣት እያቆሙ ግቢያቸው መዋል ጀመሩ ....

እናቴ እሷ መሆኗን አትንገሩ ብላ ፤ ምግብ ትልክላቸዋለች ። በእህታቸውን ልጅ ፤ ምን ጎደለ ጤናቸው እንዴት ነው እያለች ትሰልላቸዋለች...

ንዴት ሊገድለኝ ይደርሳል ። እቆጣታለሁ << ስምሽን እያጠፉሽ እየሰደቡሽ እየጠሉሽ አትተያቸውም ወይ?>> እላታለሁ!!

<<ጭንቅላታቸው እጢ ወጥቶባቸዋል እሱ ነው ትንሽ ቀየር ያደረጋቸው እንጂ ፤ እሳቸው እንኳን ሳልበድል ብበድላቸው እንኳን በክፉ አያነሱኝም>> ትለኛለች።

ምግብ ትልክላቸዋለች ። በእህታቸው ልጅ በኩል የሚያስፈልጋቸውን መድኃኒት መግዣ ከኛ ወስዳ ... ተበድራም ቢሆን ትገዛላቸዋለች ። እሳቸው ያቺ ምናምንቴ ፣ ድግምታም ያቺ ነጠላ እያሉ ጮክ ብለው እናቴን ሲሰድቧት ይውላሉ ።

ጠላኋቸው !!

አንድ ቀን ለምን ግን እንዲ ስምሽን እያጠፉ እየጠሉሽ እያልፈለጉሽ አልጠላሻቸውም? ብዬ እናቴን ጠየቅኋት።

<<ጓደኛዬ ናቸው! እዚህ ሰፈር ስመጣ እሳቸው ናቸው ያለመዱኝ ። እድር ያስገቡኝ ፥ የሌለኝን እቃ ያዋሱኝ ፥ የተቆረቆሩልኝ ፥ የአረሱኝ ፣የመከሩኝ...

እንዲህ አይባልም እያሉ መንገድ ያሳዩኝ እርሳቸው ናቸው ። ድንገት ታመው ነው የተቀየሩት ።ከሁሉም ጋር ነው መጣላት የጀመሩት እኔ ላይ ትንሽ ጠንከር አሉ እንጂ ...

በክፉ ግዜ እንኳን ወዳጅ ላይ ጠላት ላይ አይጨከንም!!

የጨዋ ሰው ልክ የሚታየው ሲጣሉት ነው ። በፍቅር ግዜ ሰው አይመዘንም ክፉ ግዜ ነው ሰው የሚያጠለው ....

አፀዱ እንዴት አይነት ጥሩ ሰው መሰሉህ ዛሬ ህመም ተጣብቷቸው እን'ጂ ። ስንት ቀን መሰለህ እጦት በሳቸው ሳብያ ከቤታችን የተባረረው ።
አፀደ ደግ 'ሩህሩህ ናቸው...

እናንተ ሳትወለዱ ማንም ሳይኖረኝ ነው ከኔ ጋር የነበሩት...

የአፀደ ውለታ አለብኝ !>>

By Adhanom Mitiku

@wegoch
@wegoch
@paappii

አዲስ አበባ የምትገኙ ብቻ ከትምህርት ጋር የተገናኙ ማስታወቂያዎችን ለመስራት ከ10-15 አመት ያሉ ሴት እና ወንድ ካስቶች እየመለመልን ስለሆነ 3 የተለያዩ ፎቶዎችን ወላጆች ከስልካቹ ጋር @Ribki30 ላይ ላኩልን።

'ለምን' ብዬ ልጠይቅ ከማሰፍሰፌ ምክንያታቸው ተገለጠልኝና አስችለኝ ብዬ
"ታዲያ ከሳቸው ደስታ የሚበልጥ ምን አለ ሚጡዬ?በቃ የመረጡልሽን አድርጊ እናትሽ አይደሉ?" ብዬ አባበልኳትና አቅፌአት የጨጓራዬን ጭስ ወደ ባዶው አየር ለቀቅሁት።

የመሞሸሪያችን ቀን እሳቸውን የቻለ ትዕግስቴን ጎረቤቶቻቸውና ወዳጆቻቸው ሲፈታተኑት ዋሉ።እዮብም እንዲህ መፈተኑን እንጃ!ታላቅ ወንድሟ ካሳሁን ጓደኞቹን ሰብስቦ ሰርጌን የጀማሪ ክብደት አንሺ የቅርፅ ዉድድር አስመሰሉት።   በሌባ ጣቱ መሬቱን እየጠቆመ
"ሎ...ሎጋው  ሽቦ...ቦ" ሲል
"ኧረ የምን ሎጋው ሽቦ?እስቲ ሌላ ትከሻ እሚፈትን ዘፈን አምጡ"አሉ  ጎረቤታቸው እትየ አስካል።የቀለም ትምህርቱም ሆነ ህይወት ራሷ ባስተማረችኝ ልፈታው ያልቻልኩት ትልቁ እንቆቅልሽ ሴት ስታርጥ ለምን አሽሙረኛ እንደምትሆን ነው።አዛውንቱን ቀርቶ ወጣቱን የሚያስት ጥርሳቸውን ብልጭ እያደረጉ ያቀነቅኑ ገቡ።
አንች የኔ አበባ ነሽ የኔ አበባ...
አንች የኔ አበባ ነሽ የኔ አበባ(ተቀባይ)
....
መላ ነው ነይ መላ
እነው መላ መላ(ተቀባይ)(2x)
የዘውድነሽን ልጅ ነይ መላ
እነው መላ መላ(ተቀባይ)
ወዴት አገኛት       "      "
አለ እናቷ ጓዳ      ''      "
መታያም የላት      "      "
የኔማ ዘውድነሽ       "        "
እጇ ያረፈበት           "        "
ለአልፎ ሂያጅ ይበቃል  "       "    
ማጠር አያውቅበት  "     "
እየው እየው መላ

አሉና ለ ሁለት ደቂቃ ያህል ትከሻቸው እስኪገነጠል ተንዘፍዝፈው ከከበባቸው ተቀባይ መሃል ወጡ።የሳቸውን መንዘፍዘፍ ተከትሎ አማቴ በኩርፊያ ተነፋፍተው ወደ ጓዳ እያቶሰቶሱ ሲገቡ ታዝቤ ነበር።
በነጋታው  የተከራየነዉን ቬሎ መልሰን በአማቴ ሰፈር በኩል አለፍን...ሰይጣን ሹክ ብሎን ነው መቼስ!እትየ ዘውዴ ቤት ስንደርስ በርከት ያለ ሰው ተሰብስቦ ስላየን  ጠጋ አልን።አማቴ እያማረሩ ለተሰበሰበው ህዝብ ስሞታ ያቀርባሉ።

"ምነው ነገር በኔ መግነኑ?አጭር አምቻ በኔ አልተጀመረ!ምነው ዘቢዳር በርጩማ እሚያህል አምቻ ስታመጣ ምን ተባለ?ደሞ ደግሸ ባበላሁ እኔ ላይ አሽሙር አስካል?እኔ ላይ?... ቁመት ቢረዝም ምን ሊረባ??በቁመት የጎዳውን በጠባይ ክሶት የለ?...እንደአንች አምቻ ነጋ ጠባ ከሚጎረጉጫት ኧረ የሽቶ ጠርሙስ አክሎ መኖር በስንት ጣዕሙ?..."እያሉ የጥያቄ ናዳ ሲያዥጎደጉዱ እትየ ዘቢዳር የተሰበሰበውን ሰው እየገፈታተሩ እትየ ዘውዴ ላይ ደረሱ

"እከከከከከከ!ይች ናት ዘቢዳር!የማን አምቻ ነው በርጩማ አንች?የኔን አምቻ ነዋ ምሽቱ ብብትና ብብቱን ይዛ አልጋ ላይ እምታሰቅለው!አልሰማንም'ኮ አሉ...አልሰማንም...አሁን ማን ይሙት ከአንች አምቻ የሚወደለው እንቅፋት ሆኖ የሰው ጥፍር አይልጥም? " እያሉ ሲውረገረጉ
ሹልክ ብዬ ወጣሁና ከጥቂት እርምጃ በኋላ ያገኘኋቸውን አንድ የኔ ቢጤ አባት ሰላም ብዬ ጥያቄዬን አስከተልኩ።

"አባቴ እንደው መዘጋጃ ቤቱ በየት በኩል ይሆን?"
"ማን ሞቶ ነዉ?" ደንገጥ ብለው ጥያቄዬን በጥያቄ መለሱት።
ቃል አጠሮኝ ጉዞየን ቀጠልኩ።ለካ ፍታትና ቀብር ለሞተ ብቻ ነዉ።

ዘማርቆስ

@wegoch
@wegoch
@paappii

Gize Wegoch, [Oct 21, 2024 at 8:57 PM]
አይጠሩ
...........

   በአማት መወደድ ለጥቂት ዕድለኛ ኢትዮጵያውያን ብቻ የተሰጠ ፀጋ ይመስለኛል።በተለይ ደግሞ በቁመት የምትበልጥህን ሴት ልታገባ እየተዘጋጀህ ከሆነ!ነፍሳቸውን ይማርና ጎረቤታችን አብዬ በላቸው
"ፍቅር ምን ድረስ ክፉ ነው?"ተብለው ሲጠየቁ
"እኔና ሰዋለምን እስቲያጋባን ድረስ" ይሉ ነበረ አብረው ሲቆሙ በጡታቸው ትክክል የሚሆኑትን ሚስታቸውን እያሰቡ።የሞቱት አብሯቸው የኖረው አስም በሌሊት አፍኗቸው ነው ቢባልም የመንደራችን 'ፓፓራዚዎች' እንደሚሉት ከሆነ ግን ለሞት ያበቃቸው አስሙ ብቻ ሳይሆን በባለቤታቸው ጡቶች መሃል አፍንጫቸው መታፈኑ ነበር።
እሰቡት 1.50 ሆኜ 1.75 የምትረዝም እጮኛ ስይዝ! አብዬ በላቸው ከነሚስታቸው ድቅን ይሉብኛል። ከመጋባታችን አንድ ወር አስቀድማ ከቤተሰቦቿ ጋር አስተዋወቀችኝ።ያደገችው ከአሽሙረኛ እናቷና ከጉልቤው ወንድሟ ጋር ነው።ውበቷን ያየ የእናቷን ወግ አጥባቂነት እና የወንድሟን ኃይለኝነት መገመት አያቅተውም።ልታስተዋውቀኝ ቤቷ የወሰደችኝ ቀን እናቷ እትየ ዘውዴ ከእግር እስከራሴ አልቢን በሚያስንቅ አይናቸው እንደሽንኩርት ከላጡኝ በኋላ የሚያበሽቅ ሳቃቸውን አስከትለው
"እንዴት ያለ ኮረሪማ አግኝተሻል ሚጡ!ና እስቲ ሳመኝ"ብለው ሱባኤ እንደገባ ገዳምተኛ ወገባቸዉን በነጠላቸዉ አሰሩና ከምድር ወገብ የሚሰፋ ሽክርክሪት መቀነታቸዉን እየቋጩ ጎንበስ አሉ። መና እንደወረደለት ሰዉ ወደ ላይ ቀና  ስል ከመቅፅበት ትከሻዬን እንደቅቤ ቅል እየናጡ አገላብጠው ሳሙኝ።ልጃቸው በሷ እንደወጣች ቁመታቸው ይናገራል።ከፊት ለፊታቸው ስቆም ከአይናቸው ይልቅ ከጡታቸው ጋር ነው የምፋጠጠው።ጃንሆይም እንደሳቸው ጡት መውደቃቸውን እጠራጠራለሁ።እንኳን የሳቸው ጡት ሁለት ልጅ የጠባው ይህች ጉደኛ ሀገር ራሷ ደርግ አይጥ እንደቀመሰው ካልሲ ቦትርፏት፣ኢህአዴግ እንደ ገና ዳቦ በላይ በታች አንድዷት፣የአሁኑ ጉድ በወሬ ፓትራ እስከጥግ ነፋፍቷት...የሳቸውን ጡት ያህል ዝቅ አላለችም።

  ሳሎናቸው ግድግዳ ላይ የተሰቀለውን የቤተሰብ ፎቶ ሳይ "አቤት ግጣም በልክ ሲገኝ!" አሰኘኝ።ባለቤታቸው ከእሳቸው የበለጡ ብቅል አውራጅ ቢጤ ናቸው።ወንዱ ልጃቸው ከሚጡ ትንሽ ይረዝማል።ደፍሬ ሳሎናቸውን የረገጥኩ የመጀመሪያው ስንዝሮ እኔ ሳልሆን አልቀርም።

ወደ ምግብ ጠረጴዛው ስናዘግም አሽሙር የተካነ አፋቸውን አሸራመው እየቃኙኝ
"ሶፋው ላይ እንሁን መሰል ጠረጴዛው አለቅጥ ረጅም ነው" አሉኝ።ጠረጴዛው የረዘመብኝ እንደሁ ሌላ ዝርጠጣ ስለሚከተለኝ ጥያቄአቸውን ተቀብዬ ወደ ሶፋው አመራን።ከመቀመጣችን ሌላ ብቅል አውራጅ ባልቴት እየተንጎማለሉ ዘለቁ።ሚጡ ወደ ጆሮዬ ጠጋ ብላ
"አክስቴ ናት ኃይልሻ" አለችኝ።
እትየ ዘውዴ
"ህብስቴ መጣሽ?ቀረሽ ብየ ነበር'ኮ እመዋ" አሉና አገላብጠው ከሳሟቸዉ በኋላ አቆልቁለው እያዩኝ
"ነይ ሳሚው የሚጡን ባል...እየውልሽ እንዴት ያለውን ምጥን የወንድ አውራ እንዳመጣችው"
"ኧግ!የቢያዝኔ ምትክ...እምጷ...የአባቷ ምትክ...እምጷ...የት አገኘሃት?... እምጷ ይችን መለሎ...እምጷ"
የሞት ሞቴን  ፈገግ ብዬ ከመቀመጤ በእህታቸው እግር ተተክተው ይወጉኝ ገቡ።
"ዋዋዋዋዋ...እንደው ከየት አገኘሃት?ማነበር ያልከኝ ስምህን"

"ኃይሌ"
"ምንድን ነዉ ስራህ?"
 'ገጣሚ ነኝ' ልላቸው ፈለኩና የዘመኔ ገጣምያን  በህሊናየ ድቅን አሉብኝ።
በእዉቄ እንኳን ቁመቱ ጊዜ ጠብቆ የሚጨምረዉ ግጥም ወይም ወግ ሲያነብ ብቻ ነዉ። ምክንያቱም ተመልካቹ ሁሉ ተቀምጦ ስለሚያዳምጠው።
ብዙዎችን በአይምሮዬ ማሰላሰል ስጀምር ገጣሚነቴ ተኖ ጠፍብኝ ።
"ምን አልከኝ ?"ሲሉኝ
"እ የዩኒቨርሲቲ መምህር ነኝ" አልኳቸዉ በደባልነት የያዝኩትን ሙያዬን።
"እ...መምህርነት ሸጋ ነው!...እና ከየት አገኘሃት በል ይችን መለሎ?"
"እህ...ህ...ህ...ትውውቃችን እንኳን ከድሮም ነው...ከትምህርት ቤት"
"ኧረግ ኧረግ ኧረግ ኧረግ!!...መቸም ተፊት ተቀምጣ እየከለለችህ አስቸግራህ ነው እሚሆን...እሂ...ሂ...ሂ...ሂ"
'ጥርስዎት ለሙቅ አይትረፍ!ድዳም'

"ኧረ በነገር አትያዣቸው ህብስቴ ምሳው ይቅረብ" አሉና አማቴ ሰፋ ባለ ትሪ ዶሮ ወጣቸውን በአይብ አጅበው አቀረቡት።
'ሰው ከረዘመ ሞኝነት አያጣውም' የሚለው አባባል እዚህ ቤት አይሰራም።እንደውሃ ሙላት እያሳሳቁ መግደልን ተክነውበታል።

ህይወቴ በረጃጅም ሴቶች ዙሪያ እንዲሽከረከር ማን እንደፈረደብኝ ባላውቅም 8ኛ ክፍል እያለን በደብዳቤ የጠየቅኋት መለሎዋ ማህሌት ራሱ  ደብዳቤውን ለስም ጠሪ ሰጥታ ተማሪዎች ፊት ከማስነበብ የከፋ አልጨከነችብኝም። የልብ ስእል ለመሳል የቀደድኩትን ወረቀት እናቴ ሰብስባ ሶስት እንጀራ ከነ ካሲናዉ እንዳወጣችበት ሳስታዉሰዉ ይደንቀኛል።
በጦር ተወግቶ ለሚደማው ልቤ ማሳያ ይሆነኝ ዘንድ አባቴ በፀሀፊነት ከሚያገለግልበት የሰፈሩ እድር የተቀበለውን ብቸኛ ቀይ እስኪብሪቶ በማገንፈሌ አንድ ፌርሜሎ ከሰል ተቀጣጥሎ ለሳምንት ወጥ መስሪያ የሚሆን በርበሬ ታጥኜ ነበር።ይህን ሁሉ መስዋዕትነት ከፍዬ
"ያም አለ ያም አለ የአተር ገለባ ነው
ሰው ይዋደድ እንጅ ቁመት ለአገዳ ነው" ብዬ መጻፌን ሳስታውስ እንደቂል በራሴ እስቃለሁ።

  ዶሮው ተበልቶ ሲያበቃ ያመጣሁት ውስኪ ተከፈተና አንድ ሁለት እያልን ጨዋታ ቀጠልን።በመሃል አማቴ ግድግዳ ላይ የተሰቀለውን የባለቤታቸውን ፎቶ አዩና አንደ መሳቅም እንደማልቀስም እያደረጋቸው

"አየ....የ...የ...ቢያዝኔ ዛሬ ነው  የሞትክ!አየ የኔ ጠምበለል!"ወዲያው ወደ ሚጡ ዞረው
"አይደለም እንዴ አንች?ዛሬ አይደለሞይ የሞተው?እንዲህ አለምሽን ሳያይ...አይ ቢያዝኔ!" ብለው በተቀመጥኩበት ከአፈር የሚደባልቅ አስተያየት አከሉልኝ።

የቁመቴን ማጠር የኪሴ መወፈር አካካሰው እንጂ እናትየው የዛኑ ቀን ከኔ በሚረዝም በቡሀቃ ማማሰያቸው እያጠደፉ ቢያባርሩኝ እንዴት ደስ ባላቸው!ባስተዋወቀችን በሳምንቱ የኔዋ ጉድ ከሰርጉ በኋላ የምንገባበትን ቤት እናቴ ካላየችው ብላ እየጎተተች አመጣቻቸው።ሳሎኑን በገረፍታ አዩና ምኝታ ቤት ዘው ብለው ገቡ።አልጋው ላይ አፍጥጠው
"ምነው እንዲህ ሰፋ?በራይ ልትወጡበት ነው?ባይሆን ቁመቱን ጨምሩት!" አሉ።የልጃቸውን ቁመት ያህል በእግዚሀሩ እንኳን መመካታቸውን እንጃ!

  ሰርጉ ሳይሰረግ እንዲህ የቋንጃ እከክ የሆኑብኝ ከተሰረገ ወዲያ ሊኖረኝ የሚችለውን ህይወት ሳስበው ሚጡን ማውራት እንዳለብኝ ተሰማኝ።
"እትየ ዘውዴ ከሰርጉ በኋላ ለበዓል ካልሆነ እንዲመጡ አልፈልግም!"አልኩ ምርር ብዬ

"ምን ማለትህ ነው ኃይልሻ?እናቴ'ኮ ናት!"

"ለኔ ደግሞ አማቴ ናቸው!የማይወዱኝ አማቴ!ጣልቃ ገብነትም'ኮ ልክ አለው።አንቺ ለምታገቢኝ የሳቸው አቃቂር አውጭነት ምን ይሉታል?"

"ኢሂ...ሂ...ሂሂሂ...እማዬ'ኮ ተጫዋች ስለሆነች ነው...ደግሞም የምትወደው ሰው ላይ ነው የምትቀልደው...አትቀየማት"ብላ በጥርሷ አዘናጋችኝ።

ሰርጉ 3 ቀን ሲቀረው ለንቦጯን ጥላ መጣች።
"ምን ሆነሽ ነው?" ዝም

"አንቺ ሚጡ ምን ሆነሽ ነው?" ዝም

"አትናገሪም እንዴ?"

"ከእማዬ ጋር ተጣላን"ብላ ለንቦጯን ይብስ ዘረጋችው።

"በምን?ምን ተፈጠረ?"

የስልኳን ፎቶ ማከማቻ ከፍታ አንድ ሂል ጫማ አሳየችኝና
"ይሄን ጫማ ለሰርጌ አደርገዋለሁ ብዬ የዛሬ ወር ነው የገዛሁት።ትናንትና ማታ አይታው 'የዘውዴ መቃብር ሳይማስ ይኸን ለብሰሽ አትሞሸሪም!' " አለችኝ።
Gize Wegoch, [Oct 21, 2024 at 8:57 PM]

ይኸውልህ ሉሌ ፤ ለአንዳንድ ስራዎች ውሏችንም አመሻሻችንም ሃያ ሁለትና አከባቢው ነው። የኔ ጎደኛም(ባለ ታሪኩ ማለት ነው) አውራሪስ አከባቢ ትልቅ የግል ድርጅት አለው። እንደነገርኩህ ሃያ ሁለት በምንውልበት ሰዐት ብዙውን ስራችን በስልክ እየተደዋወልን ስለምንሰራው፣ የሆነች ድራፍትም ይሁን ቢራ የሚሸጥበት ቤት ገብተን ምሳችን በልተን እየጠጣን ውለን ነበር ምናመሸው።

አንድ ቀን በአዲሱ አስፖልት አከባቢ የሆነች አዲስ ቤት አግኝተን እዛው ስንጫወት ውለን አመሸን። ባለቤቲቷ በጣም ጥሩ ጨዋና ስርዓት ያላት ሴት ነበረች። እቤቱ ውስጥ ምታስተናግድና ሂሳብ ምትሰራ ልጅም ነበረች። የታላቅ ወንድሟ ልጅ እንደሆነችና እሷ እንዳሳደገቻት አወራችን። ያስተናገደችን ልጅ ውበቷ ልዩ ነው ፤ ትከየፍባታለህ ። ጓደኛየም ልጅቷን ደስ ብላው ስለ ነበር እየተመላለስን በቃ በዛው ከስተመር ሆንና ፤ ተዛመድን። በሂደትም ከልጅቷ ጋር ክንፍ ያለ ፍቅር ውስጥ ወደቁ። (በነገራችን ላይ ጓደኛየ ባለ ትዳር ነው።)

ከልጅቷ ጋር በፍቅር ላይ እያሉ ለሁለት አመት ግዜ ያህል ከአገር የሚያስወጣ ጉዳይ (በጦርነቱ ግዜ ትግሬ ሲሳደድ ግዜ) ይገጥመውና እስከ ሙሉ ቤተሰቡ ካናዳ ይከርማል። እኛ ጓደኞቹም የምንሰራው ስራ ብዙ ግዜ የሱ ስለነበረ እሱ ከተለየን ቡሃላ መገናኘታችን እየቀዘቀዘ ወደ ሃያ ሁለት የሚያስኬደን ጉዳይም ብዙ ስላልነበር ጀምዓው ተበተነ።

ከሁለት አመት ቡሃላ ፤ ነገር ሲረግብ ፥ ፍሬንድ ሚስትና ልጁን እዛው ትቶ ተመልሶ መጣ። ጀምዓውም እንደገና መሰባሰብ ጀመረ ። አንድ ቅዳሜ ተደዋውለን ምሳ እንብላ እንባባልና አሹ ስጋ ቤት እንሰባሰባለን። እዛው ስንጫወት ዋልን። በግምት ከምሽቱ ሁለት ሰአት አከባቢ ሲሆን መበታተን ጀመርን።ከአሹ እየወጣን እያለ 'ጓደኛየ ምናወራው ነገር ስላለ ግማሽ መንገድ ልሸኝህና ከዛ RIDE ትይዛለህ' ብሎኝ እሱ መኪና ውስጥ ገባሁ።

በጉዞ ላይ አትላስ መብራት ልንደርስ ስንል በተቃራኒው መንገድ Street ላይ የሆነች ልጅ አይቶ ዳር ይዞ "ቲና" እያለ ይጣራል። ልጅቷም ተሻግራ ስትመጣ ያቺ ከሁለት አመት በፊት በፍቅር ክንፍ ያለላት አስተናጋጅ ልጅ ነበረች።( የመጣ ሰሞን ሲፈልጋት ነበር፣ አጋጣሚ የነበረችበት ቤት ሄደን ሌሎች አዳዲስ ሰዎች ናቸው የሚሰሩበት) እኔም ወርጄ አቅፌ ሰላም አልኳት። ወደ መኪናው ግቢ አላት። ገባች።

መኪናውን ከአትላስ ወደ መድሃኔአለም አቅጣጫ እያሽከረከረ ይዞን ሄደ። (ልጅቷ በወቅቱ የStreet ስራ ጀምራ ነበር። የዚ ታሪክ ረጅም ነው ፤ ይቅርብህ )። በቃ ፥ በዚህ አጋጣሚ ጨዋታውን አስቀጥለነው እናመሻለን አለን። እኔና ቲናም በሃሳቡ ተስማምተንና ግብዣውን ተቀብለን ሶስታችን አንድ ላይ አልኮል ስንጠጣ አመሸን። የለሊቱ ከሰዐት አከባቢ ስለደከመኝ ወደቤት ልግባ ብየ RIDE ጠራሁ። ሁለቱም ተያይዘው የነበርንበት አካባቢ Room ይዘው አደሩ።

ከዛ ቡሃላ በተደጋጋሚ የተለያዩ ጊዚያቶች እኔ ባልኖርም እዛች አትላስ ያገኘናት አከባቢ ሄዶ ፒክ ያረጋትና አብረው አምሽተው ያድራሉ። የሆነ ግዜ ግን በተደጋጋሚ ቢሄድም ሊያገኛት አልቻለም። የሚገርምህ ፤ ስልኳ አልነበረውም ፤ እዚህ ስትመጣ ታገኘኛለህ ነበር መልሷ እሱ እንደነገረኝ)

የዚህ ሁሉ ታሪክ አስገራሚውም አስደንጋጩም ነገር የሚፈጠረው እዚህ ላይ ነው።ያቺ ሚስኪን ጨዋ ትሁት የሬስቱራንቱ ባለቤት ፣ የልጅቱ አክስት የነበረችው ሴት ጉርድሾላ Century Mall ለሆነ ስራ ጓደኛየጋ ሄደን በሩ አካባቢ አገኘናት። ትንሽ ጉስቁልቁል ብላለች ወዟም ጠፍቷል። ሰላምታ በደንብ ከተለዋወጥን ቡሃላ ...

"ምነው ታመሽ ነበር እንዴ?"አልኳት

"እረ ደህና ነኝ። ከወንድሜ ልጅ ሞት ቡሃላ ልክ አደለሁም። አጋዤን፣ ያሳደግኳት ልጄን ካጣኋት ቡሃላ መኖር ሁሉ አስጠላኝ ወይኔ ቲናየ" ብላ እምባዋን ታዘራው ጀመር።

"እንዴ ቲና ምን ሆነች? መቼ? ምናምን እያልን መንተባተብ ስንጀምር ...

"ኣጣኋት ። መኪና በላብኝ። አንተ ውጭ ልትሄድ ከተሰናበትከን ቡኋላ በሶስተኛው ወሩ አካባቢ ቦሌ ርዋንዳጋ ልጄ መኪና በላት" ብላ አምርራ ለቅሶውን አቀለጠችው። የዛኔ ድብልቅልቅ አለብኝ። ታድያ ከውጭ ከመጣ ቡሃላ ያገኘናት ማናት????????????!!!

እንደምንም ብየ ሊፈነዳ ያለውን ጭንቅላቴን አረጋግቸ ፤ እሷን መጠየቅ ጀመርኩ ። መች አደጋ እንደደረሰባት? የፖሊስ ምርመራ ሪፖርት መኖሩና አለመኖሩ?የሆስፒታል የሞት ሰርተፊኬት? የት እንደተቀበረች? የመሳሰሉት ግራ እየተጋባችም ቢሆን ጠየቅናት። ሰኀሊተ ምህረት እንደተቀበረች፤ ኧረ ያንን ቀን ወስዳ መቃብሯ ሁሉ አሳየችኝ።

ታድያ ጓደኛየ ከካናዳ ከተመለሰ ቡሃላ ያቺ በተደጋጋሚ ስትገናኘው የነበረችውና አሁን የተሰወረችው 'ቲና' ማናት??? Right now, my friend is not normal, ሉሌ. He already got insane. አልኮል ውስጥ እራሱ ደብቋል ።

ለልዕል ተወልደ የተላከ

@wegoch
@wegoch
@paappii

እናንተ የምወድዳችኹ ፤
ስነ-ፅሁፍን የምትወድዱ ፤
የግጥም ነፍስ ያላችኹ ፤
ወንድሞቼ ፤ እህቶቼ ፤ ወዳጆቼ ፤ ታላላቆቼ እና በደስታዬ ደስ የሚላችኹ የዘመን ተጋሪዎቼ ኹሉ ፤ ይቺን የመጀመሪያ ስራዬን ቅድሚያ ገዝታችሁ ፤ ከጓዳ ወደ አደባባይ እንድትሸኙልኝ ስል ፤ የተወደደ የወዳጅነት ግብዣዬን እጋብዛችዃለሁ ።

ከወዲኹ ...
እጅግ እጅግ አመሰግናችዃለሁኝ
ኑሩልኝ !
ቴዎድሮስ ካሳ

____

የመፅሐፍ ቅድመ ሽያጭ ማስታወቂያ
Reserve yours now—it's on pre-order!

ርዕስ /Title - የዱር አበባ / Wild Flower
ዘርፍ / Genres - ስነ-ግጥም /Poetry
ዋጋ/ price - 300 ብር/ birr

የባንክ ቁጥር / Bank Accounts :
ቴዎድሮስ ካሳው አስረሴ
Tewodros Kassaw Asresse
ንግድ ባንክ / CBE - 1000360039847 ወይም 1000292025185 (ናትናኤል እሸቱ)
አዋሽ ባንክ /Awash Bank - 01320885596200
ሲቢኢ ብር / CBE Birr - 0972338625
ቴሌብር/ Tellebirr - 0972338625

[ ማሳሰብያ : ዃላ ለማስታወሻ ይረዳኝ ዘንድ Screenshot አንስታችሁ በውስጥ በሜሴንጀሬ አልያም በቴሌግራም አድራሻዬ @Poet_tedi መላኩን እንዳትረሱት ይሁን ።]

ነገረ ጠንቋይ. . .

ባልና ሚስት ሶስት ልጆች ወለዱ። ሶስቱም ባልጩት የመሰሉ ጥቁር ነበሩ። ቢቸግራቸው መፍትሔ ፍለጋ ጠንቋይ ቤት ሄዱና ችግራቸውን ነገሩ። ቀይ ልጅ መውለድ ነው ፍላጎታችን አሉት።

ጠንቋዩም "አክራብ አክራብ ኩርማንኩር ወዘተመረ ለቀጨነ" አለና "የምላችሁን ካደረጋችሁ ቀይ ልጅ ለመውለድ ቀላል ነው የናንተ መፍትሔው" አላቸው። "ምን እናድርግ?" አሉት።

"ይኸውላችሁ፣ ስትዳከሉ አቶ ባል የቸንቸሎህን ጫፍ ጫፉን ብቻ አስገባ። ከዚያ የሚወለደው ልጅ ቀይ ነው የሚሆነው" አለ አቶ ጠንቋይ። ባልና ሚስት አመስግነው፣ እጅ ስመውና ከፍለው ወደቤታቸው ሄዱ።

ማታ ላይ ስራ ተጀመረ። ባል በታዘዘው መሠረት በጫፍ በጫፉ 🙈 መደከል ጀመረ! (ቱ! ለኔ)

ሚስት በመሀል "ውዴ!" አለች

ባል "ወዬ!"

ሚስት "ልጁን ትንሽ ብናጠይመውስ?"

ባል 😊😊 ግማሽ ግማሹን ሰደደ (🙈🙈🙈)

ከደቂቃ በኋላ ሚስት አሁንም "ማሬ!"

ባል "ወዬ!"

ሚስት "እኔ የምልህ. . . ልጅ አይደለ? ቢጠቁር ምን ይሆናል?"

* * *

By Gemechu merera fana


@wegoch
@wegoch
@paappii

የእኛ ሰፈር ስለት ርዕሱ ነው:-

አንዴ እንደማመጥ እንደማመጥ አሉ የሰፈሩ አድባር ሽማግሌ።ሁሉም የሰፈር ሰው ፀጥ አለ።
እህህ እህህ ያው በየ አመቱ እንደምናደርገው መጠጡ ተአቅማችን በላይ ሆኖ ታለ አቅማችን ከርሞ ማቅረብ የማንችለውን ስለት እንዳንሳል ይሄኔ ወደ ሞቅታ እየገባን እያለ በየተራ እየተነሳን ስለታችን እንሳል ወንዶች በጭብጨባ ሴቶች በእልልታ ቸር እንመኛለን።

እሺ ቀጥይ እሟሃይ አስረበብ:-

#እማሆይ:-የዛሬ አመት ሁላችንም ከቁጥር ሳንጎድል እንዲሁ እንዳለን በሰላም ከደረስነ አስር እንጀራ

እልልል ጨብጨብጨብ

አጉረምራሚው ጀማ:-አይ እሟሃይ አልሳልም አይሉም እንዴ ከቁጥር ሳንጎድል የሚሉ አሁን በለጠ ሊከርም ነው ኤዲሱና ትቪው እያጣደፈው እስከ ተሳስም በባጄ

ቀጥል አቶ አስማማው።

#አስማማው:-የዛሬ አመት ጦርነቱ አቁሞ የሰላም አየር ከተነፈስነ ሁለት ካሳ ቢራ

እልልል ጨብጨብጨብ

አጉረምራሚው ጀማ:-ልጁ ሚኒሻ ስለሆነ ነው እንጂ አሁን አስሜ የአገሩ ሰላም አሳስቦት አሄሄ ስለቱ ቢደርስስ የሁለት ካሳ ቢራ የት ሊያገኝ ነው ቂቂቂ የአረቄ እዳ አለበት እያለች አስካለ ስትፈልገው አደል የምትውል ክክክ

ወዘሮ ብርቄ ቀጥይ:-
#ብርቄ:-አዲሳባ ያለችው ልጄ ቤቷ እስከ ከርሞ ካልፈረሰ አንድ ዶሮ

እልልል ጨብጨብጨብ

አጉረምራሚው ጀማ:-ያቺ እንግዳ ሲሄድባት ፊቷ የማይፈታው ናት?አይደለም የእሷማ ፈርሶባት አረብሀገር ሄዳለይ አሉ የትንሽቱን ነው እንጂ

አቶ ዘነበ ቀጥል:-
#ዘነበ:-ጅማ ያለው ልጄ እስከ ዛሬ አመት ወረሞ ከሆነ አንድ ጠቦት በግ አስገባለሁ

እልልል ጨብጨብጨብ

አጉረምራሚው ጀማ:-አቶ ዘነበ ደሞ ወጉ ሁሉ ግራ ነው ባለፈው መጥቶ እያለ ሀጠራው አካምጅርታ እያለ አልነበር ተያ በላይማ ከወረመ ይኦንግበታል ኪኪኪ ኧረ እንዳይሰማ ቀስ በሉ

ቀጥል ልጅ ኩራባቸው:-

#ኩራ:-የዛሬ አመት ከመካከላችን ስድስት ሰው ብቻ ከሞ ተ አንድ በግና አራት ካሳ ቢራ

የሰፈሩ ሰው:- ኤድያ እንደው ይሄ ደግሞ አንድ ቀን ከአፉ ደና ነገር ሳይወጣው እንዲህ እንዳለ አረጀ

ምኑ ሟርተኛ ነው በእንድማጣው

እናቱ በአራስነቱ ጥላው ወጥታ ነው አሉ እንዲህ ቡኖ የቀረ

አይ ኩራ አረቄ ከቀመሰ በቃ አፉ ድሮን ነው ጥሩ ነገር አይወጣውም

ቆይ እንጂ ልጁን ውሻ አታርጉት እውነቱን ነውኮ

ሲጀመር አምና የተሳለውን ሳያመጣ ለምን እድል ሰጣችሁት አስወጡት

ሂድ ተኛ ሂድ ተኛ አስወጡት ይሄንን ጅል


By Koan AD


@wegoch
@wegoch
@paappii

አልዋሸሁም

==============

22 ማዞሪያ፡፡

መንገዱ በሰው ተወሯል፡፡

ለታክሲ በተሰለፉ መአት ሰዎች፣ ከጣሪያ በላይ እየጮሁ ይሄንንም ያንንም በሚሸጡ ነጋዴዎች፣ አጎንብሰው ከነጋዴዎቹ ጋር በሚከራከሩ ገዢዎች፣ በሁሉም አቅጣጫ በቀስታ፣ ቶሎ ቶሎ በሚራመዱ እግረኞች፡፡ ቆመው ስልክ በሚያወሩ ሰዎች፡፡

እኔስ ምን እያደረግሁ ነው?

እየሮጥኩ ነው፡፡ በፍጥነት፡፡ ጠና ካለች ሴትዮ ነጥቄ የያዝሁትን ቅንጡ ቦርሳ በቀኝ እጄ ደረቴ ላይ አጣብቄ ይዤ በግራ እጄ አየሩን እየቀዘፍኩ እሮጣለሁ፡፡

ሁኔታዋ ደህና ብር እንደያዘች ነግሮኛል፡፡

ልክ ኦሎምፒክ ላይ ቀነኒሳ የሐይሌን መቅረት ባለማመን አስሬ ወደ ኋላ እየተገላመጠ እንዳየው አንድ ሁለቴ ዞር ብዬ የተከተለኝ ሰው አለመኖሩን እያየሁ ነው የምሮጠው፡፡

ቦርሳዋን የነጠቅኳት ሴት እንጥሏ እስኪቃጠል እየጮኸች ነበር፡፡

አንድ ወጠምሻ እየተከተለኝ ነበር፡፡ በጎ አድራጎት መሆኑ ነው፡፡ እኔ የምለው…ሰዉ ግን ለምን የራሱን ኑሮ አይኖርም…? ምነው በየጎዳናው የበጎ ሰው ሽልማት ካልሸለማችሁኝ ባዩ በዛ፡፡ ሆ!

ዞር አልኩ፡፡
የለም፡፡
ኡፎይ፡፡

ወያላ ‹‹ፒያሳ በላዳ!›› እያለ ከሚጮህላቸው ተደርድረውና በር ከፍተው ከሚጠብቁ ላዳዎች አንዱ ጋር ስደርስ የሁዋላ ወንበሩ ላይ ገብቼ ዘ---ፍ እንዳልኩኝ እዛው አገኘኋት፡፡

ቦርሳዋን የወሰድኩባት ሴትዮ አይደለችም፡፡ የፊዚክስ ህግ እዚህ ቀድማኝ እንድትገኝ አይፈቅድላትም፡፡

ግን እሷ ብትሆን ይሻለኝ ነበር፡፡

ሳሮን ነበረች፡፡ ሳሮን ገላልቻ፡፡ የሃይስኩል ጓደኛዬ፡፡ የሃይስኩል ፎንቃዬ፡፡ ከአስር ዐመት በላይ ያላየኋት፣ ዛሬም በሚያፈዝ ሁኔታ የምታምረው ሳሮን፡፡

በቁልቢው! ካልጠፋ ቀን፣ ካልጠፋ ሰዐት፣ ካልጠፋ ቦታ ዛሬ፣ እዚህ፣ እንዲህ ላግኛት?

የሰረቅኩትን ቦርሳ ኪሴ ውስጥ አጣጥፌ አስቀምጬው የነበረ ጥቁርና ከውጪ የማያሳይ ፌስታል ውስጥ በፍጥነት ጎሰርኩና ፊት ለፊት ገጠምኳት፡፡

ሳቀች፡፡

‹‹ኤርሚዬ! እውነት አንተ ነህ?›› ብላ አቀፈችኝ፡፡
ስታምር፡፡ መአዛዋ ሲጥም፡፡
አዬ መከራዬ!

ደማቅና ሞቅ ያለ ሰላምታ ተለዋውጠንና ላዳው ሞልቶ መንገድ ስንጀምር ዛሬ ስላለንበት ሁኔታ ማውራት ጀመርን፡፡

‹‹እሺ…ሳሮንዬ እንደተመኘሽው አሪፍ ዶክተር ሆንሽ…?›› አልኳት ፌስታሉን ጠበቅ አድርጌ እየያዝኩ፡፡

በጣም እንዳላበኝ ያስተዋለች አትመስልም፡፡ ምናልባት ከረጅም ጊዜ በኋላ በድንገት በመገናኘታችን የደነገጥኩት መስሏት ይሆናል፡፡

‹‹ሃሃ…አዎ…ጎንደር ዩኒቨርስቲ ህክምና ተምሬ ዶክተር ሆኜልሃለሁ›› አለች ያንን የሚያምር ፈገግታዋን ይበልጥ አድምቃ፡፡

ሆኜልሃለሁ፡፡ ግራ እጇን የጋብቻ ወይ የቃልኪዳን ቀለበት ለማግኘት በአይኖቼ ፈተሸኩ፡፡

ባዶ፡፡
ልቤ ቀለጠ፡፡ የባሰ አላበኝ፡፡

ሹፌሩ ጋቢና የተቀመጠውን ተሳፋሪ ሂሳብ ሰብሳቢ አድርጎ እንደሾመ ቶሎ ብዬ ብር አወጣሁና የእሷንም ከፈልኩ፡፡ ሳትግደረደር ፈገግታዋን ለገሰችኝ፡፡

መልስ ተቀብዬ አየት አደረግኋትና ልክ እንደእሷ ፈገግ ለማለት እየጣርኩ፣

‹‹ጠብቄ ነበር፡፡ ትዝ ይለኛል ባይሎጂ ላብ ስንገባ እነዚያን ምስኪን እንቁራሪቶች እየሳቅሽ ስትሰነጣጥቂያቸው፡፡ ሌሎቻችን ላለማስመለስ ስንታገል አንቺ ግን ደስ ይልሽ ነበር …›› አልኩ፡፡

በጣም ሳቀችና ‹‹አንተስ ኤርሚዬ? ሁሌ እንደምልህ ህግ አጠናህ አይደል?›› አለችኝ፡፡

ጥያቄዋ የጥፊ ያህል አመመኝ፡፡

እዚህ ላዳ ውስጥ ዘልዬ ከመግባቴ በፊት፣ እሷን ከማግኘቴ በፊት የተፈጠረው ነገር ሁሉ ልክ እኔ ሳልሆን ሌላ ሰው ሲያደርገው ቆሜ የታዘብኩ ይመስል ትእይንቱ በዐይኔ ላይ ዞረ፡፡

ይህቺ የልጅነት ህልምና ተስፋዬን የምታውቅ፣ ግን ደግሞ ያለፉት አስር አመታት እንዴት አድርገው ተስፋዬንም ህልሜን እንደቀሙት የማታውቅ ከድሮ ሕይወቴ በድንገት ተወንጭፋ የመጣች ልጅ ጥያቄዋ አሳመመኝ፡፡

ስሰርቅ ዛሬ የመጀመሪያዬ ሆኖ አይደለም፡፡

ስርቆትን መቁጠር እስካቆም፣ የጥፋተኝነት ስሜት ሽው እንኳን እስካይለኝ ለአመታት ሰልጥኜበታለሁ፡፡

አሁን ግን፣ ያኔ ማንም ሳያየኝ በፊት አይታኝ፣ ‹‹ኤርሚዬ አንተ ንግግርና ክርክር ላይ…ቋንቋ ላይ ጎበዝ ስለሆንክ አሪፍ ጠበቃ ወይ ዳኛ ይወጣሃል፡፡ ህግ ነው ማጥናት ያለብህ›› ካለችኝ ልጅ ጋር ተቀምጨ የሆንኩትን ነገር ሳስበው ሃፍረት ወረረኝ፡፡

ቢሆንም ፈገግ አልኩና ‹‹ አዎ…ህግ አካባቢ ነኝ›› አልኳት፡፡

መልሴን አጢኖ ለመረመረው አልዋሸኋትም፡፡

By Hiwot Emishaw

@wegoch
@wegoch
@paappii

የምወደው ልጅ ነበር ። እርጋታው ህልሙ መልኩ ሁኔታውን
እወደዋለሁ ስህተቱን ድክመቱን ሳይቀር ነበር የምታገሰው ።

ብጥር ...ብጥር... ከኔ ጋ ማቆየት አልቻልኩም ።

ጊዜ ሄደ ...

እኔም ሄድኩኝ

ሌላ መስመር ሌላ ኑሮ ሌላ ጠዓም አየሁኝ እሱ
ዘግይቶ ወደ ምፈልገው መንገድ መጣ

ዳር ዳር አለ እንዳልገባኝ ሆንኩኝ እብረን እንድንሆን ጠየቀኝ ..ዋጋሽ ገብቶኛል ወድጄሻለሁ አለኝ ።

አልታበይኩም አልጎረርኩም ሰነፍ ነው ቀድሞ ደርሶ ባረፈደ የሚያሾፈው ። ብስለት የሚለካው የሆነልን ሲመስለን በያዝነው አቋም እና ሁኔታ ነው ።

በትህትና አልችልም አልኩት ።

Timing is every thing ፀሎቴ ውስጥ ህልሜ ውስጥ ቅዠቴ ውስጥ ማሳካት የምፈለገው ውስጥ እምይዘው አቋም ውስጥ እሱ ነበር ። ጊዜ ሁኔታ አጋጣሚ ተደራረበ እና አንዱም ውስጥ ጠፋ !!

ምንም ስላላዋጣ ግዜ ልቤ ውስጥ የተወለደውን ፍቅር አደብዝዞት ነበር ። ልቤ ውስጥ የተከማቸውን ፍቅር ስላልወደደው ፍቅሬን ፊት ነስቼው በግዜ ብዛት ተነነ ።

ብቻ መወደድ ከብዶኝ ስለነበር ሳስታውሰው እረፍት አይሰማኝም ነበር ። እረፍት የሌለው ፍቅር ምኑን ፍቅር ነው ??

ናፍቆኝ ጓጉቼ ሳገኘው አይኑ ለኔ ስሜት አልባ እንደሆነ ስለሚነግረኝ ናፍቆቴ ወደ ድብርት ይቀየራል ።

የሚለኝን ያደረገውን የሆነውን ሁኔታውን ትርጉም አየሰጠው ስቀምር የማድር እንደነበርኩ እኔን ካልሆነ አይገባውም !!

ዛሬ ሁኔታሽ አንቺነትሽ ሁሉ ትርጉም ሰጠኝ አብረን እንሁን አለኝ ። ዘግይቶ ነበር Timing is every thing

እንደማይሆን እያወኩ ፍላጎት እንዳለኝ ምልክት ሰጥቼ አልበድለውም !!

" አልችልም" አልኩት

ቁርጣችንን አልነግር እያሉ እንደሚበድሉን መሆን አልፈለኩም ተፈላጊ የመሆኔን እርሃብ ለማስታገስ ወለም ዘለም እያልኩ አልበድለውም

በትህትና " አልችልም ሌላ የህወት መንገድ ላይ ነኝ " አልኩት ። እየመከርኩ አልተመፃደኩም ። መልካሙን ሁሉ እንዲገጥመው ግን በልቤ ተመኝቼለታለሁ ።

ትክክለኛ ነገር ትክክለኛ የሚያደርገው timing ነው !
timing is every thing እንዲሉ አበው!!

By Adhanom Mitiku

@wegoch
@wegoch
@paappii

God,have mercy! This woman is so obsessed with her life. With her home and her family.

በጠዋት ትነሳለች ቁርስ ትሰራለች ቤተሰቦቿን ታበላለች ታጠጣለች መጥገባቸውን ታረጋግጣለች ከዛም ወደየሚሄዱበት ትሸኛቸዋለች። ቀጥላ ወደቤቷ ጽዳት ፣ ወደእንጀራ ጋገራ ፣ ምሳ ማሰናዳት ወዘተ.... አቤት ያላት ፅናት! ለጉድ ነው! ቤት ጠርጋ ወልውላ አጫጭሳ ልብሶች አጥባ እቃዎቹ ታጥበው ደርቀው በየቦታቸው ተደርድረው።
ወጡ ችክን ብሎ ተሰርቶ፣ ቡናው ትክን ብሎ ፈልቶ እጣኑ እየጤሰ ምሳ 'ሳት ይደርሳል። በር በሩን እያየች የቤተሰቧን መምጣት ትጠብቃለች ሲመጡላት በሚገባ ታስተናግዳቸዋለች።

በፈገግታ እና በምግብ ከፈወሰቻቸው በኋላ መልሰው ወደየሩጫቸው! "አመሠግናለሁ"ን እንኳን ሳትጠብቅ በሳቅ በፈገግታ ሸኝታ ወደቤቷ! የተበላበትን የተጠጣበትን እቃ አጥባ፣ የተዝረከረከውን ቤት አበጃጅታ ስታበቃ ደግሞ ለእራት ዝግጅት ጉድ-ጉድታዋን ትጀምራለች። ጣፋጭ ምግብ አብስላ፣ ሙቅ ሾርባ ሰርታ ቤቷን አሟሙቃ ትጠብቃለች። ወዳሞቀችው ጎጆ ይሰበሰባሉ ከእጇ ፍሬም ይበላሉ።

ይሔ ብቻ አይደለም she is psychiatrist ,she is economist, she is event organizer, she is expert in negotiation and an incredible socialist!

ይህች ሴት እናቴ ናት❤️

ምኞትሽ ምንድነው ብባል " እንደሷ መሆን" እላለው።


By Magi

@wegoch
@wegoch
@paappii

አገባሁ...ወለድኩ...ደገምኩ...ሠለስኩ:: እሱን እያፈቀርኩ ከወንድሙ ሦስት ልጆች ወለድኩ:: እሱን እየተመኘው ወንድሙን አገባሁ:: ካሳለፍናቸው 3 የUniversity ጓደኝነት አመታት በኃላ እንደተመረቅን ነበር ላገኘው እንደምፈልግና ብቻውን እንዲመጣ የነገርኩት ገና ተደላድሎ ከመቀመጡ ነው " አፈቅርሀለው" ያልኩት ::ሳቀ በሀይል ሳቀ
"አንቺ ያምሻል እንዴ ለቁም ነገር ነው ምፈልግህ ስትይኝኮ ምን ሆነች ብዬ ስንት ነገር ነው ጥዬ የመጣሁት ትቀልጃለሻ አንቺ ሆሆ " አየሁት .. እነዛ መጀመሪያ ካየዋቸው ቅፅበት ጀምሮ ራሴን ያሳጡኝን አይኖቹን ትኩር ብዬ አየዋቸው ::ሚያረገው እየጠፋው ሁሌ እንደሚጠራኝ
" ቃሊ የምርሽን ነው እንዴ "
"አዎ አፈቅርሀለው" ፊቱን በአንዴ ወደ ግራ የተገባ ፊት ቀይሮ " ከመቼ ጀምሮ ቃሊ?"
"ከመጀመሪያው የሁለተኛ አመት የትምርት ቀናችን ከማክሰኞ ከመስከረም 22 ጀምሮ" ደነገጠ " ቃሊ please አታሹፊብኝ " ፊቱ ሲቀላ እየታወቀኝ መጣ
"ምንም እንድትለኝ አይደለም ብንጋባ ብታፈቅረኝ ምንምን በደስታ ልሞትብህ ስለምችል አላቅም ግን እህቴ ነሽ ምናምን እንዳትለኝ ደሞ" መንተባተብ ጀመርኩ ::
"ቃሊ"
"ወዬ" ልቤ በፍጥነት ስትመታ ይታወቀኛል
"ኤላኮ ያፈቅርሻል" ፊቱ ማላቀውን እሱን ሆነብኝ..ውስጤ ሲፈረከስ ተሰማኝ ኤላ ማለት? ኤላ የሱ ወንድም? ማለት መንታ ወንድሙ ኤላ ? ኤላ ጓደኛዬ? ኤላ ኤላ ውስጤ ተተራመሰ.....በመልክም በአመልም ምንም አለመመሣሠላቸው ሲገርመኝ ነበር ሶስቱን የጓደኝነት አመታት ያሳለፍነው :: ሁሌም አብረን ነበርን እሱም..ኤላም...እኔም :: በሁለት መንታ ወንድማማቾች መሀል ያለው ብቸኛ ጓደኛቸው በመሆኔ ጊቢ ውስጥ እንደኔ ደስተኛ ሰውም የነበረ መኖሩን እኔንጃ እኔን መሀል አርገው ሲተራረቡ መስማት...ሲበሻሸቁ...አንዳቸው እንዳቸው ላይ ሲቀልዱ ...እጄን የኔው ተፈቃሪ እንደቀልድ በቦክስ ሲመታኝ ኤላ ሲቆጣው...ተሸክመውኝ ሲሯሯጡ ላየን 3 መንታዎች እንጂ ማልዛመዳቸው መሆኔን ማንም አይጠረጥርም አንዳንዶቹ ደሞ የማንኛው ናት እንደሚሉም አቃለው :: የጊቢው ሴቶች ደሞ ኤላን ይወዱት ስለነበር እንዳጣብሳቸው ሚወተውቱት እኔን ነው ኤላ ግን ወይ ፍንክች ስለሚል ማጣበሱ አልተሳካልኝም ነበር :: ሲፈጥረኝ ከሴት አትዋደጂ ያለኝ ይመስል ከልጅነቴ ጀምሮ ሴት ጓደኛ ኖሮኝ አያውቅም ጊቢ ገብቼም የመጀመሪያውን freshman አመት ከማንም ጋር አልግባባም ነበር ከዛ ግን ሁለተኛ አመት ላይ ምንማረውን ትምርት መርጠን ስንመደብ እነሱን አገኘው ለዛም ነበር በጓደኝነታችን ደስተኛ የነበርኩት :: ከ6ኪሎ ጊቢ በታች ያሉ ማሚ ቤቶች ሄደን ምሳ ስንበላ በእጄ ከአንድ ጉርሻ በላይ ስጎርስ አላስታውስም በሁለቱ የፉክክር ጉርሻ ነበር ጠግቤ ምነሣው በዛ ላይ ሳየው ገና ልቤ የደነገጠለት ልጅ ጓደኛ ሆኜ ስስቅ መዋል ..ደስታ ማለት እኔ ነበርኩ:: "ጉድና ጅራት ወደ ኃላ ነው" አሉ....ያን ቀን "ኤላኮ ያፈቅርሻል " ሲለኝ ጉሮሮዬም ልቤም አይምሮዬም ደረቀብኝ ጎኔ ያለውን ግማሽ ኮካ አንስቼ ጨለጥኩት ::
"ኤላ የቱ" አይኖቼ ሲፈጡ ይታወቀኛል
"ቃሊ ኤላ የኛ ነዋ "ፊቱ የማላቀው ቋንቋ ፅሁፍ ሆነብኝ አየዋለው አይገባኝም ::
"ከመቼ ጀምሮ?" እሱ እንዳለኝ እኔም አልኩት ማወቄ ይቀይረው ያለ ነገር ይመስል
"ካየሽ ቀን ጀምሮ ቃሊ ትዝ ይልሻል class እንደጀመርን ካፌ አጊኝተንሽ ብቻሽን ከምትበዪ ከኛ ጋር ምሳ አብረን እንብላ ብዬሽ አብረሽን የዋልሽ ቀን " እንዴት እረሳዋለው ያን ቀን በአይን ካፈቀርኩት ሰውጋር አምላክ አገናኘኝ ብዬ በደስታ ስፈነድቅ ነበር የነጋው :: ፀጥ ብዬ ሳየው ወሬውን ቀጠለ "ያን ቀን ማለት ኤላ ካላስተዋወከኝ ብሎ ሲለምነኝ ነበር ታውቂያለሽ ቃሊ ኤላን ከማህፀን ጀምሮ ሳውቀው ከአፉ ወቶ ሚያውቀው የሴት ስም ያንቺ ብቻ ነበር :: ቃሊ ኤላ አንቺን ስለማግባት ካንቺ ስለመውለድ ብቻ ነውኮ ሚያልመው ደሞ እሱም ከዛሬ ነገ እነግራታለው እያለ ነውኮ የተመረቅነው ቃሊ ኤላን ያዢው ወንድሜ እስከነፍሱ የሚያፈቅራት ሴት ታፈቅረኛለች ብሎ ማሰቡ ለኔም በሽታ ነው ቃሊ ደና ዋይ ኤላን ያዢው" ብሎኝ ነበር በተቀመጥኩበት ጥሎኝ የሄደው "ኤላን ያዢው" ይሄን ነበር ያለኝ :: .....እኔም ኤላን በእጄ በልቤ እሱን ይዤ ይኸው ሶስተኛ ልጃችንን ወለድን:: .....ኤላ ህልሙን ኖረ እሺ እኔስ?? የሱ ህልም ማስፈጸሚያ ልሆን ነበር የተፈጠርኩት? ያፈቀሩትን ስለማግኘት ኤላ ያሟላው እኔ ያጎደልኩት መስፈርትስ ምን ነበር??? ልጆቼስ አጎታቸውን በልቤ አግብቼ እንደምኖር ያወቁ እንደሆነ እንዴት ይዳኙኝ ይሆን ? እንጃ....ሁሉም ያፈቀረውን አያገባም..ልክ እንደኔ::


By ቃል_ኪዳን


@wegoch
@wegoch
@paappii

የሄደበትን የመጨረሻ ቀን አስባለሁ።

ኩራቱን ተገፎ ሀፍረትን ተከናንቦ እርቃኑን እንደቆመ ሠው ዐይኔን ሽሽት አንገቱን ደፍቶ መሬት መሬት እያየ "እሜትዬ በድዬሻለሁ…" ያለበትን ቃና እሰማለሁ። ምህረት ፍለጋ ለይቅርታ አልመጣም ነበር። አንዳንድ ሀጥያቶች ስርየት የላቸውም፤ ስለአንዳንድ በደሎቻችን ከራሳችንም እርቅ አይኖረንም። ለዋለው ክህደት ይቅርን አልፈለገምና የኔ ይቅር ማለት ትርጉም አልነበረውም። የኔ ምህረት መስጠት ኩራትና ክብሩን ከወደቀበት ሊያነሳለት አቅም አልነበረውም። አንገቱን ደፍቶ በገባበት በር አንገቱን ደፍቶ ሲወጣ ቃል አልወጣኝም። አልተከተልኩትም በዐይኔ አልሸኘሁትም። ልቤ መመለሱን ቢሻ ከበደሉ ሊያልቀው ግን አልተቻለውም። በሰው ለውጦሻል ተይው ይሂድ አለ፡፡ ተውኩት፣ ሄደ…አልተመለሠም ።

ዘመናቶቼ መኸል ግን እጠብቀው ነበር። አንዱን ቀን ይመጣል ብዬ በር በሩን አማትሬያለሁ። ወሬውን ፍለጋ ጆሮዎቼ እልፍ ጊዜ ቆመው የደጁን ድምፅ ሲቃርሙ ኖረዋል። ብዙ ጠብቀዋል፤ ለማንም ሳልነግር በደሉን ውጫለሁ። ባሻዬ ከዳኝ ሳልል ይቅር ብዬ ነበር። ፍለጋ ባልወጣ የት ሄደ ባልል በልቤ በእየዕለቱ 'አንተ ትሻላለህ፤ ተመለስ ግድ የለም' እል ነበር።

እወደው ነበር፤ ኩራት በሸበበው ፈገግታ ቢደበቅም ቅሉ ሳየው ልቤ የፈካ ቀለምን ትፈነጥቅ ነበር። እንደነዛ የመጀመሪያ ቀናት ጠጁን እየተጎነጨ ጓዳውን ሲያማትር በዐይኑ ሲፈልገኝ ትንሿ ልቤ በመጋረጃ ተከልላ እያየች ትደልቅ እንደነበረው፤ እንዲያ…እንዲያ እወደው ነበር። እነዛ ጊዜ ሸምኗቸው ጋቢ ሆነው የለበሳቸው የጥጥ ማጎች ስለሱ እያሠብኩ ሳሾራቸው፤ ተበጥሰው እንደተንከባለሉ ስንት ወድቀው ስንት እንደተነሱ፤ ስንት እንዝርት እንደሰበሩ አያውቅም፤ አልነገርኩትም ለፍቅር ሰነፍ ነበርኩ ።

By Beza Wit

@wegoch
@wegoch
@paappii

< "እናርግ" አለኝ እኮ፣ ያ ውሻ >

ምናለበት እሺ ብትዪው ? ምትወጂው ከሆነ ስሜቱ ለጋራ ነው ፣ አይደለም እንዴ?

< አንተ ሐይሚን አርገሀታል? ንገረኝ። >

"አድርገሀታል" ማለት? ምን አደረኳት? "

< ሒይ ! እያወክ አትገግም። >

"በድተሀታል ወይ ? ማለት ፈልገሽ ከሆነ ፣ በድቻታለሁ። ብድትድት ነው ያረኳት። ካንቺ ጓደኞች ያልበዳሁት የለም። "

< እህ ? ውሻ! ውሻ ነህ ።>

አዎ ነኝ ! ዉው ዉው ኣዉዉዉዉዉ ። ሀያትንም በድቻታለሁ።

ሀያት ነች ያስተዋወቀችን። ሀያት የጥቁር ቆንጆ ፣ እንደ እሳት ቅልብልብ ፈጣን ውልብልብ እጅግ ብልህና በትምህርትም ጎበዝ ተማሪ የነበረች ናት። ኤለመንተሪ ከሀያት ጋር ስንማር ጥያቄ ና መልስ ውድድር እኔና እሷ ከፍላችንን እየወከልን ዞረናል። ሀይስኩል እንደገባን ሀያት ናት ከዚህችኛዋ አለም ጋር ያስተዋወቀችን። ከአስረኛ ክፍል በሁዋላ ሀያት የት እንደገባች አናውቅም። እኔና አለም ግን አስር አመት ሆነን። በጓደኝነት። ንፁህ የሚባለው አይነት ጓደኝነት።

*_*_*_*_*_*_*_*_*_*_*_*_*_*

አለም

< ወዬ >

" አለም የሚል ስም ይዘሽ እንዴት መንፈሳዊት አማኝ ሆንሽ ? "

< አንተማ ለይቶልሀል። >

ሁሌም ከፍቅረኞቿ ምትለያየው የወሲብ ጥያቄ ሲያቀርቡላት ነው። እሷ "ከጋብቻ በሁዋላ" ትላቸዋለች። እነሱ ጥለዋት ሲሄዱ መጥታ እኔ ላይ ታለቅስብኛለች። ይበዳኛል ብላ ሰግታ አታውቅም።

እኔ ብበዳሽስ ? እላታለሁ።

ሁሌም < ሐይሚን አርገሀታል? እስካሁን ስንት ሴት አወጣህ? > ትለኛለች።

"ስንቷን ሴት ስንት ስንት ጊዜ እንዳወጣሁ ልንገርሽ ? ሐይሚን ...ሐያትን ደሞ እእእ ?"

< ኡህ! አንተስ ባልገሀል >

ትለኛለች።

*_*_*_*_*_*_*_*_*_*_*_*_*_*

በስጋ እናትም አባትም። ቤተሰቦቿ አሳዳጊዎቿ ናቸው። እና እኛ። እኛ ማለት እኔና ሌላ ማላውቃቸው ጓደኞቿ።

< አንተ ቤተሰብ ስላለህ እድለኛ ነህ > ትለኛለች።

" እኔ ቤተሰብ እዳ ነው " እላታለሁ።

*_*_*_*_*_*_*_*_*_*_*_*_*_*

ያኔ ሐያት ከእሷ ጋር ካስተዋወቀችን ማግስት ወደኔ ክላስ እየተጎተተች መጣች። ፀይም ነበረች ግን አመዳም። ፀጉሯ ረጅም ነው፣ ግን ደረቅ ነው። ጥቁር ሻርፕ አንገቷ ላይ ጣል ታደርጋለች ፣ ለምን እንደምታደርግ አይገባኝም። እናም ያግባባን ብቸኛ ነገር እኔ ብልህ እንደሆንኩ ማሠቧ ና እሷ ብርቱ ስለሆነች ከእሷ ጋር እንደምስማማ ስለምታስብ ነው።

እኔስ ? እኔ ትምህርት ላይ እየቀነስኩ አሪፍ መስሎ መታየት ላይ እየበረታሁ ነበረ። ቀንደኛ ቀልደኛ ሚባሉት ተማሪዎችን ጎራ ተቀላቀልኩ። ሁሉም ጓደኞቼ ድንግል ሆነው ሳሉ ቀድሜ ገርልፍሬንድ ያዝኩ፣ ቆንጆ ሴት፣ ከሌላ ክፍል፣ ሐይማኖትን ። በርግጥ ኤለመንተሪ እያለሁ የሔርሜላን አንገት ስሜያለሁ። ከነሱ መፍጠኔ ለእኔ አይገርመኝም።

እና ይህቺ አለም < ትምሕርትህ ይበጅሀል። እሷን ተዋት። ገና ልጅ ነህ። ደግሞም ቆንጆ አይደለችም።> ትለኝ ነበረ።

ግን ሁለታችንም በእድሜ እኩያሞች ነን። እሷን መካሪ እኔን ተመካሪ ያደረገን እሷን ለይቶ የመከራት ኑሮ ነው።

ኑሮ ያስተማራትን ትምህርት በደንብ ይዛዋለች። ፈተናውንም አልፋዋለች። አሁን ዘናጭ ነች። ፀይም መልኳም ፀጉሯም ወዝ ኖሮታል። ለስራ ሌላ ሀገር የሄደች ጊዜ ገንዘብ እኔ አበድራት ነበረ። ሁለት ጊዜ ሌባ ሙልጭ አድርጎ ዘርፏታል። አሁን እኔ ገንዘብ ሲቸግረኝ ከእሷ ነው የምበደረው። የወር ገቢዋ ከእኔ የወር ደመወዝ አስር እጥፍ ነው።

*_*_*_*_*_*_*_*_*_*_*_*_*_*

አስረኛ ክፍል ተዋወቅን ፣ አስር አመት አብረን አሳለፍን ። አሁን ልታገባ ነው። ሰርጓ በቅርብ ነው።

<አንተ መቼ ነው ምታገባው ? >

ብዙ ፍቅረኞች አሉኝ ። የቷን ላግባ?

< ባለጌ

ሐይሚን አሁን ብታገኛትስ ? >

አስር አመት ሙሉ ሐይሚን ያልረሳሻት ለምንድን ነው ?

< ሐይሚን አይደለም ያልረሳሁት። ያንን የግቢውን ቆንጆ፣ ብልህና ትንሽዬ ልጅን ልረሳው ያልቻልኩት። የአስራስድስት አመቱን ያንን ናሁ መሆን እፈልግ ነበር። አሁን ላይ ግን እዚህ ሆነን ደግሜ እሱ ራሱን ሆኖ ማየት እመኛለሁ >

" እመኚኝ። እኔ ምንም ከስሬ አላውቅም። እናም የራሴን መንገድ አገኛለሁ። ሚስትም አገባለሁ።

አንቺ ትንሽ ቀደም ብለሽ ሒጂ። አግቢ። እኔ ባንቺ መንገድ አልሄድምና። መልካም መንገድ። መልካም ጋብቻ።

ለባልሽ የምነግረው ነገር አለኝ ፦ " እሷን እቅፌ ላይ ለብዙ ቀን እንዳሳደርኳትና ከእሷ ገላ ላይ የወሰድኩት ምንም ነገር እንደሌለ ነው።

ስላልፈለኩ። ወይ ፈልጌ ስላልቻልኩ። ወይ ችዬም ታማኝ ሆኜ ይሆናል።

እኔ ባለቤቷ ነኝ። አሁን አንተ ባሏ ልትሆን ነው። ይትባረክ"


By Nahu senay

@wegoch
@wegoch
@paappii

«ካባዬ»
(ከለእርቃን ሩብ ጉዳይ መፅሐፍ)

ክፍል አንድ

------------
ይሄንን ኮንዶሚኒየም ቤት ለማግኘት ከሦስት ወር በላይ ተንከራትቻለሁ።

ኪራይ ነው።
ዛሬ ዛሬ አዲስአበባ ላይ ፍላጎትንም፣ አቅምንም አጣጥሞ የሚገኝ የኪራይ ቤት
ማግኘት ሕልም ነው። እኔ ደግሞ የብር ችግር እንደሌለበት ሰው ስመርጥ ዐይን
የለኝም። ሀብታም ስላልሆንኩ ጠባብ ቤት መኖር ይፈረድብኝ፣ ግን ጠባብም
የተግማማም መሆን አለበት?



የለበትም።
ለዚህ ነው ይህንን አራተኛ ፎቅ ላይ የሚገኝ በጣም ጠባብ ግን ንጹህና ሰላማዊ
ስቱዲዮ ኮንዶሚኒየምለማግኘት ሦስት ወራት የፈጀብኝ። ከንጽሕናው ፀጥታው፣
አራተኛ ፎቅ ጥግ ላይ ክትት ብሎ መገኘቱ ማረከኝና ተከራየሁት።


ግን ይሄ ታሪክ ስለ ተከራየሁት ስቱዲዮ ኮንዶሚኒየም አይደለም።
ስለንጽሕናውና ስለፀጥታውም አይደለም። ስለሰፈሩ ከተማ መሀል መገኘትም
አይደለም። ስለ አዲሷ ጎረቤቴ እትዬ እማዋይሽ ነው።


ታኅሳስ ላይ ቤቱን ቀለም አስቀብቼ፣ እቃዎቼን ሸክፌ ገባሁ።


በገባሁ ዕለት ነው እትዬ እማዋይሽን ያገኘኋት እና የተዋወቅኳት።

ቅዳሜ ነበር። ከቀኑ ዘጠኝ ሰዐት ይሆናል።

እሷ፣ ፎቁን እያረፈች እንደወጣች በሚያስታውቅ ሁኔታ ትንፋሽዋ ቁርጥ ቁርጥ እያለና እያለከለከች በሬ አጠገብ የሚገኘው በሯ ጋር የቤቷን ቁልፍ እያንቀጫቀጨች ስትደርስ፣ እኔ ደግሞ ውስጥ ያለውን እስካስተካክል ውጪ የተውኳቸውን ኮተቶቼን ወደ ቤት ለማስገባት ስወጣ ነው፣ ፊት ለፊት የተገጣጠምነው።

እንዳየኋት የተሰማኝ ነገር ያለቦታዋ የምትገኝ ሰው መምሰሏ ነበር።

በዕድሜ ስልሳ ቤት ትሆናለች።

ነገር ግን ሙሉ በሙሉ የሸበተው ጸጉሯ ብዙ ጊዜ ዕድሜያቸው የሄደ ሰዎች ላይ እንደማየው ስስና እንክብካቤ ያጣ አልነበረም። ዘንፋላና በሥነ-ሥርአት የተተኮሰ ነበር። አለባበሷ አሁንም በእሷ ዕድሜ ያሉ ሴቶች እንደሚዘወትሩት ሰፊ ልብስ ላይ ሌላ ሰፊ ልብስ፣ ግራጫ ቀለም ላይ ቡናማ፣ ወፍራም ሹራብ ላይ ወፍራም የአንገት ልብስ ዓይነት አልነበረም።
ደልደል ያለና ውብ ሰውነት አላት።

በልኳ ግን ሳይጠብ የተሰፋ ቆንጆና ደማቅ ቢጫ ቀሚስ፣ አጠር ካለ ሰማያዊ ክፍት ሹራብ ጋር ለብሳለች። ተረከዙ አጭር፣ ፊቱ ሹል ጥቁር ጫማ አድርጋለች። የምታምር ትንሽዬ ቡናማ ቦርሳ አንግታለች።

ደርባባ ነች። ዘንጣለች።

“እንዴት ዋልሽ ልጄ?” ስትለኝ ነው ዕድሜዋን ከዝነጣዋ ያስታረቅኩት።

“ደህና ይመስገን” አልኩኝ ፈጠን ብዬ።

“ጎረቤትሽ ነኝ… እንኳን ደህና መጣሽ… እማዋይሽ እባላለሁ”
“አመሰግናለሁ… ኤደን እባላለሁ” መለስኩላት።
“ሳናግዝሽ ገባሽ… አሁን ምን ልርዳሽ?” አለች ዐይኖቿን ተመሳቅለው
የተኮለኮሉት ውጪ የተዘረገፉ እቃዎች ላይ አሳርፋ።

“ግዴለም ብዙ አይደለም ጨርሻለሁ” አልኩ አሁንም ፈጥን ብዬ።

“በይ ስትረጋጊ ቤቴ ነይና ቡና ጠጪ” አፈር አልኩና፣

“አይ…. እሱ እንኳን ሌላ ቀን” አልኩ። እያግደረደረችኝ ከሆነ መግደርደሬ ነበር።

“ኖንሴንስ… እያግደረደርኩሽ አይደለም… ጎረቤት መተዋወቅ አለበት። ቡና
ማፍላቴ ስለማይቀር እቃሽን ቦታ ቦታ አስይዢና እንጠጣለን”

አሁን ጥያቄ አልነበረም።

ትልቅ ሰውም ስለሆነች፣ ጥያቄም ስላልነበር ምርጫ አጥቼ እሺ አልኳት።
ዐሥራ አንድ ሰዐት ገደማ ላይ የብረት በሬ ተንኳኳች።

እማዋይሽ ነበረች።

“ነያ ቡናው ደርሷል” አለችኝ።

በሬን ቆልፌ ተከትያት ቤቷ ገባሁ።

ቤቷ፣ አዲስ በተቆላ የቡና ጠረንና ለአፍንጫ በሚጥም ዕጣን ጭስ ተጨናንቃ
ተቀበለችኝ።

ረከቦትና ስኒዎቹን በዐይኔ ብፈልግ የሉም። ዕጣን ማጨሻውን ለማግኘት ብሞክር
አልቻልኩም።

ከመቀመጤ፣ “ዛሬ ገብተሽ መቼስ ምግብ አልሠራሽም” ብላ ምን የመሰለ
ፍርፍር አበላችኝ።

ጎንደር ያለችውን ባለሙያ እናቴን አስታወሰኝ።

(ይቀጥላል)

By Hiwot Emishaw


@wegoch
@wegoch
@paappii

ሌሶቶ

በዝግታ የሚራመዱ ሰዎች ሃገር (Kingdom of the mountains ይላሉ ራሳቸውን ሲያቆላምጡ)
ከፍ ካለ ተራራማ ሃገር ስለመጣሁ "Kingdom of the slow walkers" እላቸዋለሁ እኔ ደግሞ።

ማሴሩ ተራሮች መሃል የከተመች ከተማ ።
ፀጥ ያለች
የተረጋጋች
ወከባ የማይታይባት።

እግረኞቿና አሽከርካሪዎቿ ብንሮጥም የትም አንደርስም የሚሉ ይመስላሉ።

በጠራራ ፀሃይ ብርድልብስ እና ቦት ያደረገ በግ ነጂ ከጂፕ ነጂ ጋር የሚተላለፍባት፣

ደረቅ፣ ነፋሻማና ቀዝቃዛ
(መዘዞ፣ መሃል ሜዳ ወዘተን የምታስታውስ)፣

ሁሉንም ሱቆቿን 12 ሰአት ላይ ዘግታ ወደ ቤቷ የምትከተት፣

በአንዱ የተራራ ጫፍ ትልቅ ነጭ መስቀል የሰቀለች፣ በዚህም አዲግራትን የምታስታውስ።

ባገሬ መስከረም መጋቢትን የመሰለ ደረቅ ወቅት ላይ ተገኘሁ።
እዚህ የክፍል ማሞቂያ 25 ላይ ይደረጋል ከቅዝቃዜ ለመሸሽ (እንደ ኳታር ባለ ሃገር ደግሞ ማቀዝቀዣ 25 ላይ የሚደረገው ከውጪው ሙቀት ለመሸሽ ነው።)

2800 ሜትር አናት ላይ አድጌ 1600 ሜትራቸውን ማድነቅ አልቻልኩም። በመጓዝ ብዛት የገባኝ ተራራ ለብዙ የአፍሪካ ሃገራት ብርቅ መሆኑ ነው /ደብረሲናን፣ ደሴን፣ አሰላን፣ አርሲ ቀርሳን፣ አዲስአበባን ላየ ሰው ማሴሩ የጉብታ ከተማ ነው/።

የዚህ ሃገር ሰዎች ንጉሳቸውን ይወድዳሉ።
ወይም የሚወዱ ይመስላሉ።

ከባድ ባለስልጣን የተባለው ብርድልብስ ለብሶ ስብሰባ ሊመጣ ይችላል።

ሁሉም በሚባል ሁኔታ ክብ ባርኔጣ ያደርጋሉ።

ዶላር ወደ ሌሶቶ ሎቲ መቀየር ፈልገን ካረፍንበት ሆቴል ፊትለፊት ወዳለ ካፌ ነገር መሩን። ሃበሾች ተሰብስበው ያወራሉ። የካፌውም ባለቤት፣ ዶላር ቀያሪውም የኛው ሰዎች ናቸው። ባልተለመደ ሁኔታ እዚህ የሚኖረው ሃበሻ አብዛኛው Expat ነው። የ አፍሪካ ህብረት፣ የ UN ሰራተኛ ወይንም በፕሮጀክቶች የተቀጠረ ሃኪምና ኢንጂነር።

" አንድ የሃበሻ ሬስቶራንት አለ ለበአል እዚያ እንወስዳችኋለን" አሉን።

ድሮ ድሮ የበአል መንገድ ያማርረኝ ነበርና
አንድ ቀን እናቴን
"መንገድ አማረረኝ የበአል ሰሞን ልቅርና በአዘቦት ቀን እየመጣሁ ልጠይቅሽ?" አልኳት።
መለሰች
" ስንት በአል የምናከብር ይመስልሃል ከዚህ በኋላ? ስሞት ትቀራለህ አትቸኩል።"

ዛሬ የአደይ አበባ፣ የበአል ግርግር፣ የመስከረም ምልክት አንዱም በማይታይበት ከተማ ሆኜ ንግግሯን አስታወስኩ።
እንቁጣጣሽ ሲያመልጠኝ ሁለተኛዬ ነው (የዛሬ አመት በጦርነት ምክንያት መንገድ በመዘጋቱ፣ ዘንድሮ በስራ)። ስንት እንቁጣጣሽ እንደቀረኝ ባላውቅም፣ ለኔ ለራሴ የበአል ጉጉቱ ባይኖረኝም ከቤተሰቤ ጋር(ከምወዳቸውም ሁሉ ጋር) የሚኖረኝ ጊዜ የተገደበ ነውና አለመገኘቴ አስደበረኝ።

የመንገዱ ሰልፍና ምሬት፣ የበአል ገበያ፣ የበአል ዘፈኖች፣ የእናቴንና እህቴን ቤት ውስጥ ወዲያ ወዲህ ማለት፣ የአባቴን ደጁን ለእርድ ማስተካከል፣ የወንድሜን ለቅዳሴ ለመሄድ መዘጋጀት፣ አልፌ የምሄድባቸውን አረንጓዴና አበባ የለበሱ ሜዳዎችና ተራሮች እናፍቃለሁ።

ከቤተክርስቲያን መልስ ስለምንበላው ጥብስ፣ ከፋዘር ጋር ተጋግዘን ስለምንገፈው በግ፣ በደምብ ስለማላውቃቸው ጎረቤቶች፣ ስለ ብዙ የስልክ ጥሪዎችና መልዕክቶች፣ ስለ ድፎ ዳቦ፣ ስለ ቡና አስባለሁ።

እዚህ ያለው ቡና በጣም ቢቀጥንብኝ ከኢትዮጲያ መሆኔን አውቃ "ሰላም ነው?" ያለችኝን አስተናጋጅ ፈልጌ ጠራሁ።
"This coffee is too weak I need somthing strong"
"Our coffee is not like yours".

የጀበና እጣቢ የሚመስል ነገር እየጠጣሁ አለሁ። ሆድ ለባሰው ....

ከበአል ድባብ ያላመለጠኝ ብቸኛ ነገር የፌስቡክ ፖስትና የቴሌግራም ስቶሪ ነውና ....

ሁላችሁንም እንኳን አደረሳችሁ።
መልካም አዲስ አመት።

ወንድማችሁ ነኝ ከጉብታዎች አናት ማሴሩ።

By haileleul Aph

@wegoch
@wegoch
@paappii

"ትንሽ ቦታ"

ስሜታዊ ሆኖ ለተናገረን ፣ ሊረዳን ፈልጎ ለሳተ ፣ ኑሮ አስክሮት ለገፋን ፣ ንዴት ገፍቶት ላጠፋ ፣ ግዜ አጣሁ ብሎ ላልጎበኘን ፣ ስናሸንፍ ላላጨበጨበ፣ ስንወድቅ ላላነሳን ፣ ስናስብለት ላልተረዳን ፣ ማደጋችንን ላላየ ፦

"ትንሽ ቦታ ለይቅርታ" አኑረናል

አማረልን ብለን ላሳዘንን ፣ አጉል ተስፋ ለሰጠነው ፣ ውድቀት ላይ ለሳቅነው ፣ ብልግናን ላጎላናው ፣ ድድብናን ላነፈስነው ፣ ማድረግ ችለን ላላደረግነው ፣ ችለን ለተጣመምነው ።

ለራሳችን ይቅርታ አደርገናል...

ቺርስ ለአዲስ ዘመን
ቺርስ ለተስፋችን
ቺርስ❤🙏.


By Adhanom Mitiku

@wegoch
@wegoch
@paappii

ብ-ት-ን-ት-ን
-----------------------



ወላጆቼና አያቴ የጎረቤቶቻቸው ቤት ዘወትር በቦምብ እየተደበደበ፣ ጥይት እንደ ወፍ በጣራቸው ላይ እየበረረ ከዚህ ቦታ ሽሹ ብላቸውም አንገታችን ይታረዳል አሉ፡፡



ይሄ የወንድማማቾች ጦርነት ከተጀመረ አንስቶ ነጋ ጠባ ቀብር ላይ ናቸው፡፡ ባለፉት ጥቂት ወራት ማህበርተኞቻቸውን፣ አብሮ አደጎቻቸውን፣ ጎረቤቶቻቸውን፣ ዘመድ ወዳጆቻቸውን በየተራ፣ በሰልፍ ቀብረዋል፡፡ 



ትላንት ማታ ራሱ ወይዘሮ ታየች- የእማዬ የሴት ማህበር አጣጭ፣ የስንት ዘመን ባልንጀራና የታናሽ እህቴ የክርስትና እናት በሯ ላይ ተገድላ ተገኘች፡፡  ተባራሪ ጥይት ነው አሉ፡፡



‹‹በፈጠራችሁ ተለመኑኝ! አሁንም ከዚህ ሳይብስ ከዚህ እንሂድ›› ብዬ ተለማመጥኳቸው፡፡ ዛሬ ልመናዬ ውሃ ቢያነሳ ብዬ የደብራችንን ቄስ ለምኜ ይዤ መጥቻለሁ፡፡ አጠገቤ ቆመዋል፡፡



ካልሄድን ብዬ ልማለድ ስመጣ ይሄ አራተኛዬ ጊዜዬ ነው፡፡ ብዙ ሳትርቅ የምትገኘው ከተማ ውስጥ አነስተኛ አንድ ክፍል ቤት ተከራይቼ እኖራለሁ፡፡ ደልቃቃ ቤት አይደለችም ግን ቢያንስ ከጦር ሜዳው ሩቅ ናት፡፡



‹‹ልጄ! ቤታችን እዚህ ነው፡፡ ቀያችን ይሄ ነው፡፡ የት ነው ጥለነው የምንሄደው…?ለማን ጥለነው ነው የምንሄደው…? ጎጇችን ምን ይሆናል…እንስሶቻችንስ ማን ይይዝልናል?››  ብለው እንደ ሁልጊዜው አፍ አፌን አሉኝ፡፡




ቄሱ እምብዛም አላገዙኝም፡፡ ‘አረ እባክዎ እርዱኝ ! ›› ብዬ ብጠይቃቸው ይባስ ብለው፤
‹‹ተያቸው በቃ!  እንደ ፈቀዳቸው ይሁኑ፡፡ እዚሁ ይቆዩ›› አሉ፡፡
‹‹አባ! እዚህ ቆይተው ይሙቱ ነው የሚሉት?›› ብዬ እንደ መጮህ አደረገኝ፡፡ እማዬ አፍታም ሳትቆይ ቄሱን ልቆጣ በመድፈሬ ክፉኛ ተቆጣችኝ፡፡



ወዲያው ደግሞ ሁሉ ነገር ሰላም ይመስል ራት ሰርታ አብልታን ‹‹በይ አንቺ ነገ በጠዋት ወደ ሃገርሽ…ነገር ሳይጋጋል›› አለችኝ፡፡


እኔ እንድሄድ ይፈልጋሉ፡፡ እኔ እንዳልጎዳ ይፈልጋሉ፡፡


የአብዛኞቹ ከመንደሩ ወጥተው ከተማ የሚገኙ እኩዮቼ እጣ ፈንታ እንደሚደርሰኝ አውቀው ነበር፡፡ አንዱን ቀን ተደውሎ ቤታችሁ ጋዬ፣ እናት አባትሽ፣ አያትሽ ተገደሉ እንደምባል አውቀው ነበር፡፡


የእኔም ቤተሰቦች ተራ አሃዝ እንደሚሆኑ ልቦናዬ ያውቀው ነበር፡፡



ለመጨረሻ ልመናዬ ከመጣሁ ሳምንት እንኳን ሳይሞላኝ እንደማይቀርልኝ ያወቅሁትን መርዶ ተረዳሁ፡፡  ቤታችሁ በመትረየስ ተመቷል አሉኝ፡፡ እናትሽም.፣ አባትሽም፣ አያትሽም ሞተዋል አሉኝ፡፡



ከቀናት  ለቅሶ በኋላ ነገር ተረጋግቷል ሲባል እኔና ታላቅ ወንድሜ አውቶቢስ ይዘን ወደ ድሮ ቤታችን ተጓዝን፡፡


አይ ቤታችን እቴ! ቤታችን ወደነበረበት ባዶ ሜዳ ብል ይቀላል፡፡

ማልቀሱንስ ሳለቅስ ነው የከረምኩት፡፡



ነገር ግን እማዬ አባዬ እንደነገሩ አጣጥሮላት እንደ ጭስ ቤት የምትጠቀምበት ቦታ ላይ ያ የምወደውን ምስር ወጥ የምትሰራበት ሸክላ ድስት ብትንትን ብሎ ሳየው ግን ለአባባይ እስካስቸግር ማንባት ጀመርኩ፡፡



እኔ ልበታተንልሽ አባዬ፡፡  እኔ ብትንትን ልበል የኔ ዓለም፡፡

@wegoch
@wegoch
@paappii

By Hiwot emishaw

‹‹አልተበላሸም››


÷÷÷÷÷÷÷÷÷÷÷
1989 ዓ.ም.



አስራ ስድስት ዓመቷ ነበር፡፡ የአስረኛ ክፍል ተማሪ ነበረች፡፡ ድርስ ነፍሠ ጡር ነበረች፡፡



የልጇ አባት (የልጅሽ አባት ሲባል ደስ አይላትም፡፡ ያስረገዘኝ  ወንድ በሉ ትላለች) የሰባት ወር ቦይፍሬንዷ ነበር፡፡ ማርገዟን እንደሰማ ብን ብሎ ጠፋ፡፡



ለመጀመሪያ ጊዜ ያፈቀረችው ወንድ ነበር፡፡ ለመጀመሪያ ጊዜ የሳማት፡፡ ለመጀመሪያ ጊዜ ሰውነቷን የሰጠችው፡፡ 



ከብዙ ማባበል በኋላ ስትለምደውና ስትወደው በአንዱ ቀን እንዲህ አላት፤
‹‹አጎቴ ተከራይቶ የሚኖርበት ቤት እዚሁ ቤላ ጋር ነው፡፡ ለስራ ሐረር ሲሄድ ቁልፍ ሰጥቶኛል፡፡ ለምን እዚያ ሄደን በነጻነት ስናወራ አንውልም?››

‹‹አጎቴ ቤት ልወስድሽና ድንግልናሽን ልወሰደው ›› የሚል ወንድ የለ መቼስ፡፡ 



እጁን ይዛ ተከተለችው፡፡  የአጎቱ አንድ ክፍል ቤት በአግባቡ ከተነጠፈ ፍራሽ፣ ከብዙ መፅሐፍትና ከትልቅ ቴፕና አጠገቡ ከተዘረገፉ ካሴቶች በስተቀር ዐይን የሚገባ ነገር አልነበራትም፡፡



ፍራሹ ላይ አደላድሎ እንዳስቀመጣት ሰንደል ለኮሰ፡፡

‹‹ዘና እንድንል ነው፡፡ በዚያ ላይ ቤቱ ተዘግቶ ስለዋለ ይናፈስ ብዬ ነው›› ብሎ፡፡ 

‹‹ሰንደል በየት ሃገር ነው የታፈነ ቤት የሚያናፍሰው..?ይልቅ ለምን መስኮቷን አትከፍታትም?›› አላለችውም፡፡


‹‹አጎቴ ሙዚቃ በሃይል ይወዳል፡፡ የወጣ ካሴት አያመልጠውም፡፡ ቆይ ሰሞኑን የወጣ የፍቅራዲስ ካሴት አለ፡፡ እሱን ልክፈተው ለሙድ›› አላት ቀጥሎ፡፡
ለሙድ፡፡



ምንም አላለችውም፡፡


ከዚያ….



ፍቅርአዲስ ቤቱን በአስረቅራቂ ድምፅዋ ስትሞላው የእሱ ከንፈሮች አንገቷ ላይ ነበሩ፡፡


ሰላማዊት ተነክታ የማታውቀው ቦታ ስትነካ ፍቅርአዲስ አትርሳኝ እያለች በሚያባብል ድምፅዋ ታለቃቅስ ነበር፡፡

ፍቅርአዲስ ፣
‹‹ሄደሃል አሉ ብዙ ርቀህ እንደኔ ሆነህ አንተም ናፍቀህ
ምናለ ሆዴ ብትመጣልኝ ብታስብልኝ››  ብላ ስትለማመጥ
‹‹እንዲመችሽ ጃኬትሽን አውልቂው›› ብሎ እየተለማመጣት ነበር፡፡

በስልምልም ዐይኖቹ ሲለማመናት፣ በምትወደው ድምፁ ሲያባብላት ታዘዘችለት፡፡



በዚያ ላይ ቀኑን ሙሉ እህል አልበላችም ነበር፡፡ ከምሳ በፊት አስፎርፏት ስትወጣ ምሳቃዋን ረስታ፡፡
ሲገቡ ከሱቅ ካስመጣላት ሙቅ ሚሪንዳ በቀር ሆዷ ባዶ ነበር፡፡ 
እንደማቅለሽለሽ እያላት ነበር፡፡

እስከዛሬ ድረስ ሙቅ ለስላሳ አልጠጣም ብላ ስትከላከል ብዙ ሰዎች ‹‹ብርድ አይደል…ምን ማለትሽ ነው?›› ሲሏት አታብራራም፡፡ ግን ካልቀዘቀዘ ለስላሳ፣ በተለይ ሚሪንዳ አትነካም፡፡


እስከዛሬ ድረስ ፍቅርአዲስን ስትሰማ ዐይኖቿ በእምባ ይሞላሉ፡፡  ምን ሆንሽ ብሎ የሚጠይቃት ሲኖር መልሷ አንድ ነው፡፡

‹‹ድምጽዋ ደስ ስለሚለኝ ነው››
ግን ውሸቷን ነው፡፡ ፍቅርአዲስ በአትርሳኝ ሙዚቃ አጃቢነት በአንዲት ቀን አስረግዞ የረሳት የመጀመሪያ ቦይፍሬንዷን ስለምታስታውሳት ነው፡፡ ድምፅዋ ሃዘን የሃዘን በረዶ ያወርድባታል፡፡



ከሶስት ወራት በኋላ የኮከበ ፅባህን ግምብ ተደግፈው እያወሩ ‹‹አርግዣለሁ›› ስትለው አመዱ የጨሰው ሳሙኤል ብን ብሎ ጠፋ፡፡

ምስጢረኛ ጓደኞቿ ‹‹ድሮስ ከቅምቢቢት ዱርዬ ምን ይጠበቃል?›› ብለው አብረዋት አለቀሱ፡፡

አማራጭ ስላልነበራት ቤት ሄዳ የሆነችውን ስትናገር አባቷ ያለችውን የሰሙበትን ጆሯቸውን ማስቆረጥ ቢችሉ ደስ ይላቸው ነበር፡፡ እናቷም ከአንግዲህ ዐይኔ እንዳያይሽ አለቻት፡፡



ልብሷን ሸክፋ ወደ ብቸኛ መሸሸጊያዋ - ወደምትወዳት አክስቷ- ከመሄዷ በፊት ግን እናቷ ለሚቀጥሉት ሃያ አመታት ላትዘነጋው የወሰነችውን ነገር ተናገረቻት፡፡

‹‹ሕይወትሽን ጨርሰሽ አበላሽተሽዋል፡፡ ከእንግዲህ የትም አትደርሺም›› ብላ፡፡



እርግዝናዋ የኮከበጽባህ ትምህርት ቤት ርእሰ ሃሜት ሆኖ ቢከርምም በአክስቷ ፍቅርና ማበረታቻ ተደግፋ አስረኛ ክፍልን ከገፋ ሆዷ ጋር አገባደደችና ሰኔ 12/1989 ልጇን ወለደች፡፡


ሚካኤሏ አለቻት፡፡ የሰኔ ሚካኤል ልጅ ስለሆነች፡፡

አክስቷ ጥላ፣ አክስቷ ግድግዳና ማገር ሆናላት ሚካኤላን ከልጆቿ ጋር ስታሳድግላት መራር የእናቷን የእርግማን ቃል እንደምታመክን ቃል አስገብታት ነበር፡፡


‹‹ዛሬ ተሳስተሻል ማለት እስከወዲያኛው ሕይወትሽ ተበላሽቷል ማለት አይደለም፡፡ ይሄን እውነት ኖረሽ ካሳየሽኝ ልፋቴን ካስሽው ማለት ነው›› ብላ  የልጅነትእኩያ ልጇን ከጎኗ፣ የሰላማዊትን ጨቅላ በእቅፏ አድርጋ ስትመክራት ጉልበት ሆናት ነበር፡፡






ጥር 2016

የአርባ አራት ዐመቷ ሰላማዊት ከሃያ ስድስት ዐመት እኩያ ልጇ ሚካኤሏ ጋር እስክስታ ትወርዳለች፡፡
የሚካኤሏ ሰርግ ነው፡፡

በቅርበት የማያውቃቸው ሰው ሁሉ ደጋግሞ እንዲህ ይላል፡፡

ቀልዳችሁን ነው…እናቷ ልትሆን አትችልም፡፡ ታናሽ እህቷ ናት!
አይሆንም!
እውይ ደስ ሲሉ!
ታድለው!

ትንሽ ቆይቶ፣
ጭፈራው አድክሟት በሚዜና አጃቢዎቿ ታጅባ ከአዲሱ ባሏ ጋር የምትጨፍረውን ሙሽራ ልጇን እያየች ቁጭ ያለችው የሙሽሪት እናት ሙቅ ሚሪንዳዋን እየጠጣች ለራሷ-
‹‹ምንም የተበላሸ ነገር የለም፡፡ ሁሉም ነገር ግሩም ነው›› አለችና፤

ወዲያው በሰዎች ምርጫ ሙዚቃ ወደሚያጫውተው ዲጄ ለመሄድ ወሰነች፡፡


‹‹የፍቅርአዲስ ዘፈን ይኖረው ይሆን?›› ብላ እያሰበች፡፡

By Hiwot Emishaw

@wegoch
@wegoch
@paappii

"እማዬኮ ሔዱ"
.
.
ባውሮፕላን ሔዱ። ጎረቤቶቻቸው አዋጥተው በአውሮፕላን አበረሯቸው።
ፎቶ እንኳ እንደሌለን ያወቅኩት ሲሔዱ ነበር። ሙሉ ጊቢውን ጠየቅኩ ማንም የለውም።
"ሳላገኘው ልሔድ ነው?" እያሉ ሳለ ትናንት ከአዲስ አበባ መጣሁ።
"እማዬ ማናቸው?"
የዩቲዩብ ትምህርቶቼን የሚከታተል ድምጻቸውን ሳይሰማ አይቀርም።
..
"ለምን ሔዱ?"
.
ምክንያታቸውን ሲናገሩ...
"ደከመኝ! የሽንት ውሀ ማንጠልጠል እያቃተኝ መጣ"
" ደጁ ላይ አስቀምጡልኝ ብለው አላቀብሎትም ያለ ሰው አለ? መሔድ ደስ ካላሎት ለምን አይቀሩም ?"
🥺 " ላዬ ላይ ሲያመልጠኝስ? ምን ታደርጋላችሁ?"
.
እማዬ ለምን በዚህ መሆን ፈለጉ?
.
1. ሀሜት አለ።
አራት አመት ገደማ ሆኗቸዋል ድሬዳዋ ከገቡ። የወሎ ሰው ናቸው።
ተመልሶ ወደ ልጆቻቸው መሔድ ደስ አላላቸውም። ስጋ እንደ ባዳ እንደማይደላ ደመነፍሳቸው ነግሯቸዋል። ዘመድ ስጋን እንጂ ስነልቦናን አይረዳም።
.
ባዳ መሀል ሀሜት አለ። ሀሜትኮ ንሰሀ ነው አይምሮን ያጸዳል። ቅርጥፍ አድርጎ ማማት ያልቻለ ሰው paranoid የመሆን እድሉ ሰፊ ነው። በአጭሩ ሀሜት #የአይምሮ_ሰገራ ይመስላል። ቆሻሻ ነው ግን መውጣት አለበት ልክ እንደ አር። አማናዊው ሰገራ በባለቤቱ ግፊት በምጥ ይወጣል! የአይምሮ ሰገራ ለማውጣት ግን #ባዳ ይፈልጋል።
.
#ባል ባዳ ነው። ለዛ ነው ሚስቱን #የሚበዳው። ባዳው ባል ከሚስቴ ጋር ይሕ #ስጋዬ ነው ይህ #ስራዬ ነው #ሳይል በሀሜት ከተንበለበለ አይምሮው ጤነኛ ይሆናል! ረጅም ይኖራል። "ሴትንኳ ስራዋ ነው" 🤭 አላልኩም ስርአት!!! ሚስትም ከጎረቤት ማማት ትታ ከባሏ ጋር በማማት ከተባበረች #እባብ ፈጣሪን የሚያሳማው ባዳ አያገኝም።
..
2. ትዕዛዝ አለ።
.
ዘመድ እንደባዳ እርጅናን አያከብርም። አሮጊቷን አንቺ ሲል ያቀረበ ይመስላል። ፍቅር ክብርን የሚበልጥ የሚመስለው ይኖራል። በፍቅር እንደልብ መታዘዝ የለም በክብር እንጂ። አልገባንም ከምናፈቅረው ለምናከብረው እንታዘዛለን። ከእናት በላይ ለአባት እንደማለት።
.
የምናፈቅረው ላይ የምናከብረው ነገር ከተገኘ አቤት መታደላችን።
.
#እማዬ ይከበራሉ። #ደም ለማየት ወራት የቀሯትን የደረሰች ልጅ ሲልኩ በሞገስ ነበር። ማንም የእርጅና ዘውዳቸውን እያየ ይታዘዝላቸዋል። ምናልባትምኮ ልጅቱን ከ 20 ሜትር የጠሯት አንድ እርምጃ ርቀት ላይ ያለች ከሰል እንድታቀብላቸው ነው። ፊቷን ቅጭም እንዳደረገች አቤት ሳትል ታቀብላቸዋለች። እግረመንገድ ለሚያወሯት ዝብዛብ አትመልስም! አቀብላቸው ስትመለስ እየተጉመጠመጠች ነው።
"አንቺ አስቀያሚ ስለምወድሽ ነውኮ!" ምናምን ይላሉ። "ኧረ ጎረመሰች" ይላሉ።
ሌላ ትእዛዝ እንዳይደግሟት እየጸለየች አጎንብሳ ትፈተለካለች። የልጅ ልጃቸው ብትሆንስ?😁
(አንድ የልጅነት ጓደኛዬ አጨባሽ አያቱ በመላክ አማረውት "ጂፓሱ ሸርተት ብሎ በወደቀባቸው" ይለኝ ነበር)
.
.
3. ሰላምታ ያገኛሉ።

ኦኦ እማዬ ሰላምታ ነፍሳቸው ነው። ማንም ሰላም ሳይል አያመልጣትም! በጊቢው 12 ተከራይ አለ። ከአንዱ ቤት ቢያንስ 2 ሰላምታ አያጡም። ሀያአራት ደና አደርክ እና ደና አመሸህ። አንዳንዴም እድል ከቀናም ስምንት ደናእደሩ ይደርሳቸዋል።
.
በሳቸው እድሜ ይሔ ቀላል ሀብት እንይመስልህ። ደሞ ትንሽ ስኳርና ሌላም በሽታ አላቸው/አለባቸው። ስለዚህ በትንሹ ሁለት ረዘም አድርጎ ጤናቸውን ጠያቂ ይገኛል። እግረመንገድህን ስለጤናህ ተመክረህ ታልፋለህ። ምናልባት ከትናንት ወዲያ አንዷ ጎረቤትህ እናትህ ከሪፍትቫሊ #የገዛችውን(ማነው ያገኘችውን! No ያመጣችውን! ይሔም አይሆንም ብቻ whatever u call it) የዲግሪ ወሬ ሰምተዋል።
"እንኳን ደስ አላት...ምን ተማረች...አንተን የመሰለ አድራሳ ምነው እስካሁን...😁" ብዙ ወሬ! ቲክቶክና ፌስቡክ የማይጠቀሙ ሰዎች መሰንበቻ የሚሆን ወሬና ጨዋታቸውን ከየት ያመጣሉ? እንደዚህ ነዋ የሚሸቃቅሉት። በስጋቸው መሀል ይሔም የለም።
.
.
5. ከሰል ይሸጣሉ።

ይሔ ደሞ እንድሜ ለመብራትሀይል መላ ሰፈሩን ወደሳቸው ይነዳዋል።
በህጻን አዋቂው "እማዬ የሉም" መባል ቀላል አይምሰላችሁ። በቀደም በመልክ የማያውቀኝ አንዱ
"የበሀይሉ መጸሀፍ አለ?" ሲሉት ጃፈር ጎን ቆሜ የተሰማኝን ሙቀት አልረሳም። 😊
ጃፊ በአይኑ አይኔን እያጠቀሰ "አልቃለች..." ሲልማ እዛው ገልቤ ልመታ ምንም አልቀረኝ።😁
እማዬ...
"ዝርዝር ይዛችሗል?
ማነው ስምህ አንተ? አባትህ ይቅማል? በል ቀጣይ ስትመጣ ፌስታል ይዘህ ከመጣህ ለበጎቻችሁ የተረፈ ሰላጣና ድንች አዘጋጅልሀለሁ። ምነው አጠርክብኝ ደሞ"
" ኧረ እናቴ ላጭታኝ ነው"
" በልሺ ሒድ አጭበርባሪ ቁመትህን የማላውቅ መስሎህ ነው አ?" (ይቺ ሁለት መስመር እንኳ ነገር አማረልኝ ብዬ ልቦለድ ሳደርጋት ነው። እማዬ አይሞጣሞጡም። አይናፋር አሮጊት ናቸው)
.
ልጆቻቸው ጋር ሲሔዱ ቅላታቸውን እና ክብራቸውን የሚፈታተን ከሰል መሸጥ አይችሉም። ከሰል መሸጥ እናት ማውረድ መስሏቸው። የዋህነታችን!
.
.
6. ትረባ
ትረባ አስለምጃቸው ነበር። የተለመደ ሰላምታቸው ሲያሰለቸኝ የፈጠርኩት መላ ናት። ለተፈሳው ለተገሳሁ ሁሉ ሊመክሩኝ ሲሞክሩ ቤት ገብቼ መሀል ጣት እስከማውጣት ስፈተን ትረባ አስለመድኳቸው።
.
"ምንስለሆኑ ነው እርሶ ሚካኤልን የማያስገቡት" ሙስሊም ናቸውና ይቀኑ ይሆናል ነጭ የለበሱ ጎረቤቶቻቸው ግቢውን አስታቅፈዋቸው ሲጠፉ። ሳቁ አይገልጸውም ፈነዱ! የወለቀ ሶስት ጥርሳቸው ፊት ሻሻቸውን ሳይጎትቱ። ተመልሰው ለመጡ አንጋሽ ጎረቤቶቻቸው እያወሯት ሰላምታቸውን አረዘሙ።
.
በቀደም ከውጪ ሲገቡ አይቼ..
"ከየት ነው?" ስላቸው ገቡልኝ
" ወክ ወጥቼ። ጠበስኩኮ!" 😂😂
ኦቲስቲኩ በሀይሉ ከውስጤ ምን ይላል...
"እንዴ በስተርጅና" ግም!
አፌ " መቼ ነው የሚያስተዋውቁን?"
አፋቸውን አፍነው 🤭 " በል አልችልህም ውጣልኝ"
.
ከሗላዬ...
"ሰላም ይመልስህ በል! ደና እደር..."
መቼም አመል ቶሎ አይለቅ።
.
እኚ ናቸው የሔዱት።

#በሃይሉ_ሙሉጌታ

@wegoch