ULUL ALBAB - The People of Intellect

Ibn al-Qayyim rohimahulloh aytadilar:
"Musofir to yo'lida davom etarkan, manziliga mutlaqo yetadi. To'g'ri yo'lni o'ziga lozim tutadi va kechalari uyg'onadi. Lekin to'g'ri yo'ldan og'ishgan va (yurish o'rniga) tunda uxlagan odam qanday qilib manziliga yetsin?!". (Al-Fawaid)

Yo'lga tushgan odam oxir-oqibat manziliga yetadi.
Tez yursa ham, sekin yursa ham, yiqilsa ham, qoqilsa ham, toki "uxlamas" ekan, toki to'g'ri yo'lda ekan, manziliga yetadi.

Yo'lini aniqlamay turib, yo'lga tushmay turib, bir narsaga erishmoqchi bo'lganlar ko'p bugun.

@weareululalbab

Qur'on bilan rishta qurolmayapman. Nima qilay?

➡️Bardavom duo. Busiz bo'lmaydi. Allohdan kalomiga sizni bog'lashini, bunga vositalarni yo'llashini, uning fahmi, tilovati, hifzini va u orqali islohni oson qilishi so'rang.

➡️Endi, qadam tashlang. Undan afzal so'z, undan afzal kitob yo'qligini o'zingizga singdiring. Vaqt qizg'onmang. Og'rinmang. Harakatni to'xtatmang. Tushunishga nima talab qilinsa, hammasini qilib ko'ring. Balki oylar ketar, balki yillar - farqi yo'q, siz arqonni qo'yib yubormang.

➡️Oshiq bo'ling. Sevgan, vaqt ajratadi. Ustuvorlik beradi.
Allohni sevgan, Kitobini ham sevadi. Boshqacha bo'lishi mumkinmas. Bahonasi bo'lishi mumkinmas.
Oshiq mahbubiga shoshgani kabi mushtoq bo'ling.
Mus'hafni ochganingiz onda qalbingiz yayrasin.
Tilovatini eshitganingiz onda ruhingiz rohatlansin, aqlingiz uyg'onsin.

O'ylab ko'ring:
Biri bilan baxtli bo'lish uchun vaqt ajratamiz-ku, munosabat ustida ishlaymiz-ku, mehr beramiz-ku! Bu munosabat ham shunday mehrga muhtoj.

@weareululalbab

Mana bu "Ongli muslima" 1-mavsumiga ilk bor (4 oy oldin) berilgan e'lon. Shugina ma'lumot bilan, Allohga tavakkal qilib, xayr istab, ariza to'ldirishgan ekan-da, deb o'ylayapman hozir. Niyatlariga baraka bergandir-ki, kecha 2-bosqichga yo'l olishdi.

Loyihaning 2-mavsumiga bergan e'lonimiz ham deyarli ayni.
Bu loyiha haqida biladiganlar biladi, lekin so'raganlar uchun faqat bularni aytolamiz. Loyiha:
- maqsadi - o'z nomi bilan "ongli" bo'lishga intilish.
- haqiqiy muslima bo'lish, o'zidagi salbiyotlardan kechish yo'llari va ikki dunyoga foyda bo'ladigan odatlar shakllantirishga ko'maklashadi.
- haftalik vazifalar (asosan, xulq va boshqa tomonlama rivojlanishga oid) yuklaydi va bajarish talab qilinadi. Bajarilmasa, chora-tadbir ko'riladi.
Biz hech nimaga majburlamaymiz, faqat ko'maklashamiz, qo'llaymiz. Katta narsalar va'da qilmaymiz, lekin darslardan o'zingiz anglashlar bilan harakatga kelasiz, Alloh izn bersa.

Yetarli "otziv"larimiz va ijobiy harakatlar bisyor, lekin maqsadimiz loyihani reklama qilish emas. Yo'limiz tutashsa, loyihada ko'rishamiz. Bo'lmasa, sizni undan yaxshisiga yo'llab qo'ysin, amiyn.

@weareululalbab

"Nega xafasan?", desalar, ularga haqiqatni ayt:

"Kamdan-kam istig'for aytaman va Qur'on o'qishni tark qilganman"...

#kitobdan

Javobni allaqayerlardan qidirib yurmaylik, sababi oddiy va ravshan aslida.

@weareululalbab

#ustoz_darsda #reflection

Bu hayotdan olib ketolmaydigan narsalaringiz nima?

O'shalarning hammasi dunyo hisoblanadi.

Alloh esa (to'plagan) dunyoyingizga qaramaydi.

@weareululalbab

Vanihoyat, uzoq kutilgan

"Ongli muslima: Foundation (Poydevor)" loyihasi 2-mavsumiga qabul ochiq!

Qizlar uchun har tomonlama rivojlanishga ilk qadam.
📝Haftada bir dars, amaliy vazifalar, tajriba almashinuvi, insaytlar va monitoring.
🗓 Bosqich 3 oy davom etadi.
🎟 Muvaffaqiyatli bitirganlar sertifikat bilan keyingi bosqichga o'tishadi.
💳 3 oylik lohiya uchun to'lov 300.000 so'm (oyiga 100.000, faqat ikkiga bo'lib to'lash mumkin).

Shartlar:
✅Vazifalarni muntazam bajarish va belgilab borish. Bajarilmasa, minimum jarima to'lashga rozi bo'lish.
❗️Oxirigacha borishga qasd qilsangizgina bu arizani to'ldiring:

Arizalar 21.11.2024, 23:59gacha qabul qilinadi.
Qabul tanlov asosida bo'ladi.

"Jumadan jumagacha aytgan so'zlarini sanab bera oladiganlarni bilaman".

© Fuzayl ibn Iyyoz rohimahulloh

Kamroq gap ➡️ kamroq xato;
kamroq xato ➡️ kamroq gunoh;
kamroq gunoh ➡️ yaxshiroq xotira;
yaxshiroq xotira ➡️ ko'proq ilm;
ko'proq ilm ➡️ ko'proq amal.

@weareululalbab

Uyquga oid tez-tez so'raladigan savollar: #youasked

1. So'nggi kun/oylarda ko'p uxlaydigan bo'lib qoldim.
- O'zingizni o'rganing. Tanangiz, miyangiz, ongingiz, qalbingiz qanday ishlaydi? Izlangandan so'ng, harakatga o'ting, ularni boshqarishga yo'l toping.

2. Qanday qilib uyqumni tartiblashim mumkin?
- Erta uyg'onish va erta uxlash orqali. Erta turish choralari.

3. Bu taqvoimga, ilm olishimga, dunyoimga katta ta'sir qilyapti.
- Balki uyqu bularga emas, bular uyquga ta'sir qilayotgandir. Ilmga rag'batni oshiring, uyquga zo'rg'a vaqt topadigan bo'lasiz.

4. Qancha harakat qilsam ham, yenga olmayapman.
- Qiziq, qancha jiddiy harakat qildik?

5. Hayotga qiziqishni qanday qilib yangilasam bo'ladi?
- Iymonni yangilash (bu) orqali.

@wearaululalbab

Bemavrid uyqu kelganda, uxlab qolmaslik uchun:

- shaytondan panoh tilang;
- charchoq, dangasalikni ketkazishini so'rab duo qiling;
- joyingizni/xonangizni alishtiring. Yorug'roq joyga chiqing;
- tashqariga/tabiatga qarang yoki chiqing;
- chuqur va uzun nafas olib-chiqarish mashqlarini bajaring;
- yuzni sovuq suv bilan yuving;
- tahorat oling va ikki rak'at namoz o'qing;
- 5-10 daqiqalik sport qiling;
- asal, zanjabil, limon, yalpizli suv iching;
- meva yoki yong'oqlar yeng;
- o'zingizga o'zingiz gapiring, "uxlamaysan, ishing ko'p", deng.

@weareululalbab

Ba'zan to'xtash - bir joyda turish, degani emas.
To'xtash yo'qotish, degani. Ortga ketish degani.

To'xtaganda nima yo'qotamiz?
Vaqt, shakllantirgan mahoratlarimiz, o'rgangan odatlarimizni yo'qotamiz.
Shuning uchun ham to'xtatgan darslarimizga qaytishimiz qiyin.
Mutolaasiz 1-2 kundan keyin bu odatga qaytish qiyin.
Tanaffusdan keyin sport zalga chiqish qiyin bo'lganidek.

To'xtagingiz kelsa, chumoli qadamida yuring.
To'xtab qolsangiz, bir qadam oldinga tashlang.
Bir qadam ortga tashlasangiz, ikki qadam oldinga tashlang.
Lekin bir joyda turmang, to'xtamang.

@weareululalbab

Shunday onlar bo'ladi-ki, ularni ta'riflashga so'z yetmaydi. Kecha shunday kunlardan biri edi.

Alloh inoyatidan uzoq kutilgan diydorni nasib qildi. Read & Lead oilasini jamlagan, to'lqinlantirgan, yig'latgan, kuldirgan fayzli kun bo'ldi. Mikrafon ortidagi ovoz sohibalari, notanish bo'lsa-da, avval bir-birini tanigan ruhlardek bir-biriga qovushdi.

Do'st-birodarlarni ilm yo'lida orttiring, chunki unda dunyoviy sabab bo'lmaydi.Yaratgandan xayrli maqsadlarda jipslashtirib, roziligi yo'lida sobitqadam qilishini so'rab qolamiz.

Tadbirimiz ishtirokchilariga xursandchilik atagan homiyimiz @qamarbooks va xotirjam o'tishiga hissa qo'shgan @omonatstyle xizmatlaridan Alloh rozi bo'lsin. Barokatlar yog'dirsin.

@weareululalbab

#lifehack

Negativchilarga ahamiyat bermay, xafa bo'lmaslik uchun tushuningki, ularning negativi ularga tegishli.

Masalan, birov sizga mahsulotini o'tkazmoqchi bo'lsa, siz uni sotib olishinga majburmisiz? Yo'q.
Shunday, negativ va yomon gaplarni ham o'zingizga qabul qilishingiz shartmas.

Bu negativ ularning mulki, deng, o'zingizga.
Bu menga tegishli narsa emas, deng.
Kishi o'zida nima bo'lsa faqat shuni taqdim qiladi.
Sizda yaxshilik bo'lsin.

@weareululalbab

#zikr_oson

Azon, elektron mus'haf, xatm uchun eslatma va menga eng yoqadigan zikrlar qismi - hammasi shu ilovada. Zikrlarda sanoq tugamaguncha keyingisiga o'tmaydi.

Playmarket va Appstore da ham bor.

Faqat arab va ingliz tilida.

@weareululalbab

Kamroq yeyishga yordam beradigan odatlar:

- reja bilan ma'lum vaqt taomlanish;
- taomdan 30-40 daqiqa oldin suyuqlik ichish, aralash yemaslik;
- kichik hajmdagi idish (kosa o'rniga salat idishi) va qoshiqda taomlanish;
- "bismillah" bilan boshlash;
- oshqozonni uchdan biriga yeyish;
- tizzani ko'ksiga bukib o'tirib, taomlanish;
- ne'matning foydalari haqida tafakkur qilish;
- sekin va ko'proq chaynash;
- qoshiq/vilkani har og'izga olib borgandan so'ng pastlatish, dasturxonga qo'yish va yana qayta ko'tarish;
- oxirigacha to'ymay taomdan chiqish;
- shukr qilish;
- jasad va organlarni ro'zaga o'rgatish.

@weareululalbab

"Kuz, yomg'ir, xazon," romantikami?

Yaqinda Madinada ikki marta qattiq yomg'ir yoqqanida, uyga sharros suv o'tib, parta ivib-ishib, deraza tomchilar zarbidan singudek bo'lgandi. Qisqa muddatga bo'lsa-da, havo sovib, muzdek bo'lib ketgandi. Ancha tafakkur kelgandi.

Bir video orqali yana eslatildik. Uyi chodir bo'lganlar, tomi yo'qlar, ko'chada yashayotgan, 395 kundan beri shunday yashayotganlar qancha?! Bir necha yillardan beri shunday kun ko'rayotganlar qancha?!

Ular kuzni eslasa, qish yodiga keladi.
Tark etilish, boshpanasizlik, izg'irin,...
O'tgan yil ham sovuqotishgan.
Hech nima/kim isitolmagan.
Iymonlariga suyanishgan.

Yomg'ir-qorni ko'rib, "romantika"dan avval boshqalarning ahvoli qalbimizdan o'tmaguncha, hali ko'p islohga muhtojmiz. Alloh barchaga qish-u yozni birdek ne'mat qilsin.

@weareululalbab

O'zingni sevma!

O'zini sevib yashash kishini baxtli qilmaydi.
Qaysi "psixolog" shunday desa ham.

O'zini koyib, nafsni sindirib yashash baxtli qiladi.
Insonlarni yaxshi ko'rib, qusuriga ko'z yumib, rivojlanishga intilib, ular uchun komfortdan kechib, yonib-kuyib yashash baxtli qiladi.
O'zi qonab tursa ham, boshqaning yarasi bitishiga ko'maklashish baxtli qiladi.

Shuning uchun "ummat dardi" degan narsa bor.
Shuning uchun ham "din xizmati" degan narsa bor.
Hech biri "avvalo, o'zingni sev", demaydi.
"O'zingga ravo ko'rgan narsangni birodaringga ham ravo ko'r", deydi. "Yaxshilik va taqvoda birlash", deydi.

@weareululalbab