تكنولوبيا

أوليكساندر توم تشوك

صحي من النوم على موقع شركته واقع وفريق الشركة بيجري ورا بعضه مش فاهم ايه اللي بيحصل..

بس اكتشفوا.. ان ChatGPT بيحاول يبلع كل بايت داتا من موقعهم!!!! 👀

بعد ما فاق من الصدمة

بدأ فريق الشركة Triplegangers

يكتشف حاجات مرعبة:

1. السبب ورا المشكلة

ان العناكب الرقمية بتاعت OpenAI

اللي بتتمشى في الانترنت وبتجنع الداتا من المواقع عشان الشركة تستخدمها ف تدريب نماذج الذكاء الاصطناعي بتاعتها، بتحاول تعمل داونلود لنوقع الشركة بالكامل

2. ده معناه ان العناكب Crawlers دي

بتحاول تعمل داونلود لأكتر من 65 ألف صورة

بدقة عالية جدا، وكل الوصف النصي بتاع كل واحدة منهم

3. دي كارثة ف حد ذاتها لان الصور دي بتاعت

أجسام بشر حقيقيين معمولها Scan بكل تفاصيلها وأجواءها من ايدين ورجلين ووجوه وشعر وجلد وحتى الندبات الجروح التجاعيد الوحمات وكل مللي متر من أجسامهم حرفيا

(الموقع ده متخصص في بيع مجسمات رقمية لكل أشكال البشر بتنوعاتها للمصممين وبتوع الجيمز والسينما والجرافيكس اللي بيحتاجوا مودلز رقمية ف شغلهم )

فطبعا تحميل الداتا دي اختراق مرعب لخصوصية ناس حقيقيين 🥶

4. فريق الشركة اكتشف ان OpenAI

استخدمت حوالي 600 رقم تعريفي IP Address

عشان تعمل تحميل للداتا دي كلها في نفس الوقت

5. الشركة اتصدمت بعد بتاع 5 أيام من التحميل المستمر للداتا دي كلها ان فاتورة استخدامها لسيرفرات أمازون AWS ضربت في 10 بسبب كم التحميلات المهول اللي بيحصل، واللي معدي بكتييير معدل الاستهلاك اللي الموقع متعود عليه من سنين!!

صاحب الشركة معرفش حتى يكلم OpenAI

عسان يفرملوا عناكبهم ولكنه لجأ للطريقة

اللي وقفت العناكب نفسها مباشرة..

وهي ملف ال robot.txt🤖

وده ملف مفروض بترميه مواقع الويب في قلب الكود بتاعها عشان تكلم العناكب اللي جاية من شركات كتيرة عشان تسحب داتا من المواقع دي وتقولها ايه الداتا المسموح انها تاخدها وايه لأ..

وبالمناسبة،

الشركات اللي بتبعت عناكبها دي

مش ملزمة قانونا انها تحترم حتى تعليمات الrobot.txt دي.. بس من حسن حظ الشركة ان عناكب OpenAI فهمت.. وبطلت اللي بتعمله.. ع الاقل لحد دلوقتي!

٣ حاجات هيقلبوا انستجرام اليومين الجايين 🔥

🔴 الرييلز هتبقى 90 ثانية

🔴 الصور والفيديوهات في البوستات هتبقى مستطيل مش مربع

🔴أي فيديو أو رييلز تعملها لايك أو تكومنت عليها هتظهر لصحابك واللي عاملينلك فولو 🙈😅

مساءو

من شوية المحكمة العليا الأميركية أعلنت انها بتأيد قرار الكونجرس بأن تيك توك قدامه لحد بعد بكرة الأحد 19 يناير.. اما يتباع لكيان او رجال اعمال امريكان أو هيتقفل في أمريكا!!

كدا كدا القرار مش هتنفذه ادارة بايدن،
انما ادارة ترامب هي اللي هتنفذ لانه حفل تنصيبه
هيبقى يوم الاتنين 20 يناير 😅

تقارير كانت بتقول ان

🔴 تيك توك بتجهز بجد عشان تقفل يوم الاتنين ف امريكا

🔴 الصين عايزة إيلون ماسك يشتري تيك توك

🔴 إدارة ترامب كدا كدا هتدي مهلة أطول لتيك توك لتنفيذ قرار الكونجرس، والتمديد ممكن يبقى 90 يوم كمان

🔴 كدا كدا إيلون ماسك ضلع من أضلاع نظام ترامب الجديد وبالتالي ممكن جدا يدخل يشيل عادي!

🔴 بالمناسبة مستر بيست كان عارض يشتري بالتعاون مع مجموعة مليارديرات أمريكان

🔴 كمان أمازون وأوراكل كانوا على الخط برضو في صفقة الشرا

🔴 في وسط بقى كل الهبد ده، فيه اتنين ابلكيشنز الامريكان طاروا عليهم وهاجروا ليهم من تيك توك الايام اللي فاتت دخلهم فوق النص مليون أمريكي وهم ابلكيشن Xiaohongshu واللي معناه الكتاب الاحمر الصغير فالامريكان سموه RedNote، وده بيقدم تجربة قريبو اوي من انستجرام..
اما الابلكيشن التاني فهو Lemon8 وده ياسيدي موجود من 2023 والمضحك جدا انه اصلا من تطوير بايت دانس يعني مش بس ابلكيشن صيني، لا ده كمان مطورته هي نفس مطورة تيك توك اللي بيتحظر 🤣

ويجي بقى واحد يقولي: لا كلو الا التفاااااحيييه🍎😏

أبل وقفت ميزة Notification Summary بعد كوارث عملها الـAI مع النوتفكيشنز اللي جاية من ابلكيشنز الاخبار بخصوص أخبار عاجلة.. اختصار عناوين الاخبار الحقيقية اتسبب اما في عناوين مختصرة غلط اساسا وبتروج معلومات مغلوطة، أو اتسببت في نشر معلومات قديمة مش جايبة تطورات الاحداث اللي بتعرضها العناوين الصحفية الحقيقية اللي كتبها الصحفيين..

الAI بيعك.. ولسا☝🏻

🤔 يعني ايه نوتفكيشن سومري دي؟!

دي ميزة نزلتها ابل مع تحديث iOS 18.2
بتخلي الذكاء الاصطناعي يلخص النوتفكيشنز ويعرضلك ملخصها ده على الشاشة وانت قفل الشاشة lock screen.

🔴 السكرين شوتات من تصميم Sky News البريطانية

ست فرنساوية عندها حاجة وخمسين سنة ضيعت تحويشة عمرها على براد بيت..تقريبًا!

الخمسينية Anne نزلت انستجرام على موبايلها في فبراير 2023 وكانت في الكنافة منه..
بتدخل تفر وتتفرج ع الشبكة ومش ف دماغها اوي..
في يوم واحدة دخلت كلمتها قالت انها أم براد بيت، وبتدور على عروسة لإبنها المشهور.. زي آن كدا بظبط.. والله زي ما بقولك كدا 😅
المهم، وقتها آن أصلا
كانت متجوزة بيزنس مان مريش والدنيا كانت وردي بس الرومانسية مكنتش أد كدا..

بعد تواصل الأم، براد بيت نفسه بقى كلم آن..!

الدردشة جابت دردشة
والكلام احلو أوي،
وعم براد شعشعت معاه يبعت للمحبوبة هدية غالية أوي..
وبعتهالها فعلا، بس للأسف..
الجمارك كانوا محتاجينه يدفع 9000 يورو عليها عشان الهدية توصلها..

براد مكنش عارف يدفع عشان حساباته في البنك مجمدة بسبب إجراءات طلاقه هو أنجيلينا جولي..
ابن اللعيبة حابكها حتة حبكة 😅

المهم يا سيدي،
آن وهي بتحكي قالت:
"وعادي دفعت زي الهبلة.. وفي كل مرة كنت بشك، كان بيقدر يهندلني ويخليني أعديها"..

الهبرة الكبيرة جت لما براد بعتلها انه بيعمل عملية بسبب إصابته بسرطان في الكبد، وطلب سلفة منها.. هنا آن شكت!!

ابن اللذينا عشان يقنعها عمل شوية صور لبراد بيت بجد بالـAI كإنه متصور سيلفي في المستشفى!!!

آن راحت تدور على الصور أو على أي أخبار أونلاين، ملقيتش أي حاجة، فدماغها – العجيبة – بدل ما تشككها أكتر، وديتها على انه أكيد الصور دي صورها لنفسه وبعتهالها هي وبس!!

آن اتطلقت، وخدت من جوزها في الطلاق 775 ألف يورو.. وكلهم دفعتهم لبراد 😲

آن وهي بتحكي قال: "أنا قولت لنفسي، عادي طالما هنقذ حياة بني آدم".. المحزن إن آن كانت متعافية من السرطان!
آن اتدايقت بقى لما لقت صور لبراد بيت نازلة في مجلات الفضايح وإنه على علاقة مع حبيبة جديدة ومنزلين صورهم سوا..
قام "براد" باعت لها فيديو متفبرك لفقرة في برنامج بيتكلم على إن براد بيت على علاقة ببنت جديدة اسمها آن 🤣

آن اكتشفت النصباية لما شافت براد بيت الحقيقي وحبيبته على شاشة التلفزيون😅

وبعدها النصابين حاولو ياخدوا فلوس منها عن كريق انهم كلموها على انهم الFBI وبيكلمها العميل حون سميث ومزنوق ف قرشين لاجل عملية سرية.. قامت راحت مبلغة البوليس بقى وقتها 🤣

امبارح نزلت ميزة Tasks في قلب ChatGPT ..
ودي حولته من روبوت دردشة الى مساعد شخصي!

الميزة دي بتخليك تقدر:

1. تعمل لحد 10 تاسكات، شات جي بي تي يفكرك بيهم بانه يبعتلك نوتفكيشن
2. تحدد الساعة اللي عايزه يبعتلك فيها النوتفكيشن
3. تختار دورية تكرار النوتفكيشن، يعني يفكرك كل يوم ولا كل اسبوع ولا كل شهر
4. تعمل التاسكات دي بطريقتين، اما عن طريق انك تكتب أمر عادي وتشرح فيه اللي انت عايزه أو تروح على موقع الويب بتاع شات جي بي تي وتفتح الTasks Editor ومن هناك تضيف تاسك جديدة
5. تشغل أو توقف أي تاسك زي ما تحب

🤔 تشغلها ازاي؟ 🤔
1. افتح شات جي بي تي (لازم تكون مشترك في باقة Plus أو Pro او Teams)
2. هتيجي على ليستة المودلز من فوق واختار GPT-4o with Tasks
3. انجوي😄

مساءو

المعركة الجاية هتبقى في الفضاء.. وش!

فريق بحثي صيني طلع بفكرة خزعبلية
عمل محاكاة لأسلوب داهية يخليه يقدر
يتابع ويرصد ويتجسس، وممكن.. يدمر👀

1400 قمر صناعي من أقمار ستارلينك
وده باستخدام 99 قمر صناعي صيني بس!!

المحاكاة دي بتستخدم نفس فكرة أسلوب صيد الحيتان
الفريق بيعتمد على آلية مرنة جدا بتستوعب أماكن تواجد
كل قمر من الأقمار الـ1400 في المدار المنخفض حوالين الأرض
ده غير انه بيظبط سرعة وارتفاع كل قمر من الـ99 بحيث
يحقق المعادلة الصعبة.. يفضل قريب من أقمار ستارلينك
وفي نفس الوقت يسيب مساحة آمنة بينهم عشان ميدمرهمش
ولا يلفت أي انتباه ليهم!! 😱

المحاكاة قدامها تحديات كتيرة جدا برضو،
زي الطاقة اللي هتحتاجها الأقمار الصناعية الصينية عشان تفضل شغالة
لأطول فترة ممكنة.. ودي قالوا انهم هيحلوها عن طريق انهم يغطوا سطح
الأقمار الـ99 بخلايا شمسية تولد طاقة وقت ما يكون متاح ليها..

كمان الاستخدامات العسكرية للتشكيل الـ99 ده هيكون مصدر وجع دماغ لبكين لو اتكشف.. وبالتالي برضو الفريق البحثي بيسعى انه يخلي أقماره.. شبه شفافة خفية! 😳

باحث أمني بعت لميتا
يبلغ عن ثغرة في سيرفرات الاعلانات بتاعت فيسبوك..
بس واضح ان الثغرة كان خطيرة
لدرجة ان ميتا ردت عليه وطلبت يبعتلها
طريقة سد الثغرة..
وخلص في الطريقة وبعتها في ساعة واحدة بس
ودفعتله مكافأة 100 ألف دولار!!

مساءو

شوف الأبلكيشنز: https://bit.ly/4h7lGoI

واحد عمل مدفع وربطه بـ.. ChatGPT

معرض CES 2025 السنة دي كان مليان روبوتات بشكل رهيب جدًا، وكل روبوت في المعرض كان عنده فكرة عبقرية مختلفة عن التاني. مثلًا عندك الروبوت LOOi اللي جسمه مليان سنسورز رهيبة، يخليه رفيق مثالي على مكتبك سواء وانت بتذاكر أو بتشتغل. الفكرة العبقرية إن رأس الروبوت هو موبايلك، وبتنزله أبلكيشن يخلي شاشته تبقى وشه، وبيبدأ يتفاعل معاك بضحك، بعياط، أو حتى لما يزعجك شوية بهذاره. سعره كمان عبقري جدًا، 160 دولار، على الرغم من كل الإمكانيات الذكية اللي فيه.

وفيه كمان روبوت الترابيزة "Mi-Mo" من شركة Jizai AI، اللي فعليًا بيحسسك إنه طالع من فيلم كرتون بيكسار. الترابيزة لها ست أرجل مصنوعة من مزيج بين المعدن والخشب الطبيعي، وعليها أباجورة تكمل الشكل الجمالي. الروبوت ده مش مجرد ديكور، لكنه بيتفاعل معاك وبيقدر يستجيب للأوامر الصوتية، ويجيب لك مشروبك لحد عندك من غير ما يدلقه. الشركة بدأت الحجز المسبق ليه بسعر 30 ألف دولار.

وكمان شفنا تطورات في روبوتات التنظيف مع "SwitchBot K20+ Pro" من شركة "سويتش بوت". الروبوت ده مش بس بينضف البيت، لكنه كمان بيقدر يتحول لنظام مراقبة أمان منزلي، بفضل كاميرا 360 درجة ممكن تثبيتها عليه. ومن الحاجات العبقرية إنه ممكن يشيل حاجات، يعقم الجو، ويوزع الروائح. الشركة كمان وعدت بتوفير إكسسوارات جديدة تضيف ليه إمكانيات أكتر.

وفيه روبوت تاني لفت الأنظار، "Saros Z70" من شركة روبوروك. ده مش مجرد مكنسة روبوتية، لكنه مزود بذراع ذكية "OmniGrip" تقدر تشي حاجات لحد 300 جرام، عشان يفضي الطريق أو يجمع الملابس للغسيل. الذراع دي كمان فيها كاميرا ومستشعرات عشان تتعرف على الحاجات حواليها بدقة. الروبوت ده هيبقى متاح في الأسواق 10 فبراير بسعر 1600 دولار.

أما عن شركة سامسونج، فبعد خمس سنين من الانتظار، نزلت روبوتها "Ballie" أخيرًا. الروبوت ده فكرة مختلفة تمامًا، لأنه بيقدر يعرض فيديوهات وصور على أي حيط باستخدام بروجيكتور مدمج. وكمان بيتفاعل معاك بالأوامر الصوتية أو حتى بحركات رجليك اللي بيقراها باستخدام الكاميرات والمستشعرات.

مساءو #CES2025

بصراحة مش عارف أجيبها لك إزاي، ولكن اللي إنفيديا أعلنت عنه الفجر النهارده هيغير العالم على الأقل لحوالي 50 سنة قدام!

جنسن هوانج، مدير إنفيديا، وقف وقال إن دلوقتي بدأ عصر جديد تمامًا للذكاء الاصطناعي، وهو شايف فيه فرصة ممكن الشركات تعمل بها تقريبًا مليارات الدولارات.

العصر اللي بيتكلم عليه مؤسس إنفيديا هو عصر الروبوتات بكل أشكالها...

سواء روبوتات مادية، اللي هي شبه البشر أو أيا كان شكلها إيه بس ليها جسم ملموس على أرض الواقع...

أو كمان روبوتات برمجية، أو اللي قريب هتبدأ تتعود إنك تسميها AI Agents!

إنفيديا النهارده نزلت كمية أدوات برمجية مش طبيعية بتستهدف بيها إن كل المطورين والشركات في كل المجالات يقدروا يستخدموا الذكاء الاصطناعي ويعملوا به روبوتات برمجية تقدر تساعد كل الموظفين مهما كانت درجة بساطة أو تعقيد المهمة اللي هم محتاجين يقوموا بيها.

كمان، إنفيديا نزلت مجموعة أدوات بتحل مشكلة صعبة جدًا، تقريبًا كل اللي شغالين في مجال الذكاء الاصطناعي الكم أسبوع اللي فاتوا اشتكوا منها، وهي قلة البيانات المتاحة لتدريب نماذج الذكاء الاصطناعي عشان تتطور وقدرتها تبقى أحسن.

الأدوات دي بكل بساطة بتركز على فكرة إنها تنتج محتوى بشكل معين عشان نماذج الذكاء الاصطناعي تحللها وتتدرب عليها فتفهم وتتطور أكثر.

والكلام ده على مستوى تدريب النماذج اللي هتشغل الروبوتات البرمجية أو كمان الروبوتات المادية...

فمثلًا لو عندك نماذج ذكاء اصطناعي بتشغل روبوتات مادية بتستهدف قطاع المصانع والمخازن، فإنت ممكن تستخدم الأدوات بتاعة إنفيديا دي عشان تعمل كم ضخم جدًا من الفيديوهات اللي بتعرض سيناريوهات ومواقف مختلفة بيتعرض لها الروبوتات وهي شغالة في المصانع والمخازن، وبعد كده الفيديوهات دي بتدخل لنماذج الذكاء الاصطناعي تتدرب عليها، وبعد كده توصل لدماغ الروبوتات، اللي بالحالة دي تبقى اتعلمت بالظبط زي البشر!

المسألة الثانية اللي اشتغلت عليها إنفيديا إنها قدمت نماذج ذكاء اصطناعي خاصة بها بتشتغل بكل الطرق، سواء محليًا، يعني نماذج الذكاء الاصطناعي تشتغل وتعالج البيانات على جهاز المستخدم نفسه من غير إنترنت خالص، أو في الكلاود.

ده غير إنها كمان نزلت نماذج ذكاء اصطناعي مفتوحة المصدر بالتعاون مع أكبر منصات شغالة في سوق نماذج الذكاء الاصطناعي مفتوحة المصدر، وعلى رأسهم طبعًا ميتا.

ضيف لي كده كمان إنها نزلت نماذج ذكية جديدة تمامًا اسمها كوزموس، ودي هدفها الرئيسي إنها تحلل أي شكل من أشكال المحتوى المصور من صور أو فيديوهات عشان تقدر الشركات المختلفة إنها تستفيد من المحتوى اللي بتلقطه أشكال كثيرة من الكاميرات اللي موجودة في حياتنا، زي كاميرات المراقبة في كل مكان، وكمان كاميرات العربيات ذاتية القيادة، وكمان كاميرات الدرونز، وغيرها من الكاميرات. ده طبعًا اللي بيبقى ليه تطبيقات كثيرة جدًا في مجالات مختلفة زي المراقبة والأمان والمصانع وغيرهم.

ضيف لي كده كمان إن النوع ده من نماذج الذكاء الاصطناعي ممكن يفتح باب كبير من الخدمات والتطبيقات على مستوى المحتوى الترفيهي. زي مثلًا النماذج دي ممكن تشغل مزايا جديدة على تطبيقات بث المحتوى، زي نتفليكس وشاهد وغيرهم، بأنك تعرف مثلًا معلومات عن لاعب معين أو تعرف تاريخه وأداءه في المباريات اللي فاتت والماتش شغال وهكذا.

في جزء برضه من نماذج كوزموس دي اسمه كوزموس وورلد، وده نوع من النماذج بيعلم الروبوتات المادية إزاي تتحرك وتتفاعل وتتعامل مع العالم اللي حواليها زي البشر بالظبط. النماذج دي متدربة على تقريبًا 20 مليون ساعة من الفيديوهات اللي بتعرض البشر وهم بيتحركوا، وبيمشوا، وبيجروا، وبيتفاعلوا مع حاجات كثيرة بإيديهم ورجليهم وجسمهم عشان الروبوتات تقدر تفهم وتعرف إزاي تتعامل مع العالم بشكل آمن وسليم.

إنفيديا كمان علّت على نفسها ونزلت مجموعة أدوات بتخليها تقدر تعلم الروبوتات من خلال المحاكاة. يعني الروبوت يتعلم من خلال إنه يشوف البني آدم إزاي بيعمل المهمة دي، وده ممكن يتعمل من خلال تتبع ورث حركة جسم الإنسان وإن الداتا دي تتنقل في الآخر للروبوت نفسه. إنفيديا هنا ضربت مثال مهم جدًا باستخدام نظارة أبل فيجن برو، إن الإنسان يبقى لابسها وهو بيعمل مهمة معينة وفي نفس الوقت الداتا دي تروح للروبوت يقلد الإنسان في نفس اللحظة!

إنفيديا ما وقفتش لحد الروبوتات، إنما كمان دخلت على العربيات، لأنها نزلت مجموعة أدوات هتستخدمها شركات كثيرة زي أوبر، إنها تبدأ تخلق كم كبير من الداتا اللي تعلم بيها سياراتها ذاتية القيادة إزاي تسوق في ظروف وبيئات ومواقف مختلفة من غير ما تحتاج تمشي في شوارع وتخوض التجربة أو تتعلم بالطريقة الصعبة. فكده هيبقى متوفر كمية داتا ضخمة جدًا كلها بتعمل محاكاة للظروف اللي ممكن العربيات تمر بيها في الحقيقة، بس كل ده بيحصل في بيئة افتراضية في قلب الذكاء الاصطناعي!

كمان إنفيديا دخلت في سوق الجيمز واستغلت أدواتها وتقنياتها الخاصة بإنشاء اللي إحنا اتكلمنا عليه فوق، اللي هو AI Agents، عشان تقدم شخصيات افتراضية جوه الألعاب تكون مفيدة لتجربة اللاعبين. فمثلًا إنفيديا تعاونت مع مجموعة ألعاب من أهمهم وأشهرهم ببجي عشان تعمل صديق رقمي للاعب يساعده جوه اللعبة، ويبدأ يقترح عليه إزاي ممكن يحقق أكبر عدد من النقاط جوه اللعبة، وطبعًا كله قانوني وما فيهوش غش!

جنب كل ده، إنفيديا نزلت جيل جديد طبعًا من معالجة الجرافيكس ضمن عيلة جديدة RTX 50!

العيلة الجديدة بثلاث إصدارات:

- RTX 5090
- RTX 5080
- RTX 5070 & RTX 5070i

طبعًا جيل الـ 5090 هو الجيل الرائد والقوي جدًا، واللي نازل بميموري 32 جيجا بايت، وده سعره 1999 دولار.

أما جيل الـ 5080 فده نزل بأداء متوسط بميموري 16 جيجا بايت.

والـ 5070 نازل بـ549 دولار.

المرعب في القصة إن الأخير ده جاي بنفس أداء المعالج العالي RTX 4090 الطفرة بتاعة السنة اللي فاتت... بتلت التمن تقريبًا!! لأنه كان عامل وقتها 1599 دولار 🤯.

بص، إنفيديا مش عايزة تسيب حاجة ليها علاقة بالذكاء الاصطناعي من قريب أو بعيد إلا وتاكل منها عيش، الخوف كله إن كل اللي بتعمله إنفيديا ده يقطع عيشنا إحنا... والرزق على الله بقى 🤷🏻‍♂.

سلطانية شوربة عادية جدا.. صح؟ 🤔

👀 شايف الكائن الابيض اللي ع الطرف ده؟

اهو ده روبوت بينفخ ف الشوربة عشان تبرد 😅

والله مبهذرش🤷🏻‍♂️

وسعره 25 دولار 👀

فكرة عبقرية عشان تأمن الفلاشة بباسورد
من غير ما اللي جمبك يضرب عينه ف الكيبورد يشوف الباسورد😅👀😝

سامسونج عايزة تـFold العالم!

في CES 2025،
الشركة نزلت شوية أفكار عبقرية:

1- شاشات للأجهزة المحمولة
واحدة منهم Slidable Flex Duet
ودي بتتمدد أفقيا من الناحيتين بطريقة الSlide
ودي بتكبر من 8.1 بوصة إلى 12.4 بوصة

التانية Slidable Flex Solo
دي بتتمدد أفقيا برضو بس في ناحية واحدة
فبتكبر من 13 بوصة إلى 17.3 بوصة

التالتة Slidable Flex Vertical
دي بقى بتكبر رأسيا لفوق من 5.1 بوصة إلى 6.7 بوصة (أقرب للموبايل أوي)

2- سامسونج قررت كمان تدخل بقوة سوق شاشات السيارات الذكية
فعملت حاجة اسمها Real Black HUD ودي ياسيدي طريقة ذكية
عشان اللي بيسوق يبقى شايف قدامه أهم المعلومات اللي محتاجها
وهو بيسوق زي السرعة وحرارة العربية والبنزين وغيرهم..

الفكرة خرافية لانها بتعتمد على شاشة OLED بتتحط ورا الدركسيون
وهتبقى مصممة عشان تعكس الشاشة محتواها على مساحة باللون الأسود
قدام عين اللي سايق ع الزجاج الأمامي للسيارة..
وبكدا هيبص ع الطريق ويشوف الداتا دي قدام عينه من غير ما يحتاج يبص
ورا الدركسيون أصلا..

الحاجة التانية سامسونج دخلت تقنية Under Display Camera أو يعني UDC واللي هتخلي مصنعين العربيات يقدروا يحطوا كاميرا لمراقبة درجة انتباه اللي سايق طول الوقت، وده هيبقى تحت ازاز الشاشة اللي ورا الدركسيون..

التالتة والجاحد هنا هي الشاشة اللي في نص التابلوه بتاعت العربية
حجمها 18.1 بوصة، وكمان قابلة للطي Foldable
بحيث وانت سايق، الشاشة تبقى قافلة نفسها
أما لو مشغل القيادة الذاتية والعربية سايقة نفسها
فالشاشة هتوسع مساحة الرؤية شوية عشان اللي ف كرسي السوق يتفرج براحته لانه كدا كدا مش مركز اوي ع الطريق..
اما لو العربية واقفة خالص.. فالشاشة هتتفرد ع الآخر
وكلو أوتوماتيك من غير تدخل من البني آدم! :O

3- آخر حاجة بقى هي شاشة 18.1 بوصة
ودي ممكن تستخدم كلابتوب كامل لو مفرودة، ولو مقفول طيها
هتبقى 13.1 بوصة وتقدر تستخدمها مع كيبورد!

صباحو #CES2025

دلوقتي لو فاتح واتساب من الكمبيوتر (أبلكيشن الديسكتوب مش موقع الويب)
تقدر تخزن Save أي صور تجيلك بسهولة جدا،
من خلال انك تفتح الصورة، ومن الكيبورد دوس CTRL + S..
ودوس Enter!

بس خلاص شكرا كدا 💁

صباحو

في 2021
وزارة التعليم في الصين
أصدرت قرار انه كل المقاطعات والمدن لازم تبدأ تنظم استخدام الطلبة للموبايلات جوا المدارس..
بس في نفس الوقت لازم يقدموا بدايل عشان الطلبة تقدر تتواصل مع الأهل وقت الحاجة..

عشان كدا المدارس فعلا بدأت تطبق ده تدريجيا من وقتها
وامبارح مدينة تشنجتشو بقت أول مدرسة صينية تحظر استخدام الموبايل بالكامل جوا الحرم المدرسي إلا لأغراض تعليمية!

اللطيف ان التليفونات العامة (زي ميناتل عندنا كدا زمان) كان من البدايل بتاعت الموبايل للتواصل.. والألطف ان المدارس في تشنجتشو حولت كروت الهوية ID بتاعت الطلبة اتجددت، واتحط فيها NFC عشان يتم شحنها رصيد، ويتكلموا عن طريق التليفونات دي جوا المدرسة!

صباحو

أعتقد هتبقى واحدة من أروع صور السنة 2025😅

🧠 عشان تفهم:
دي عربية سايبرترك "من تصنيع تسلا بتاعت إيلون ماسك" ولعت وفرقعت قدام فندق ترامب في لاس فيجاس..

لسا مش لاقط؟ 👀 (ماسك دعم ترامب ف انتخابات الرئاسة الأمريكية، لحد ما كسب والاتنين خاربين الدنيا حاليا بتحالفهم ده).. فالصورة نبذة عن طبيعة التعاون بينهم😁

مساءو

امبارح بليل نزل أبلكيشن تليفوني Telephony
رسمي على متاجر التطبيقات على آيفون وأندرويد

(( الغريب انه لما تسيرش عليه على آب ستور يظهرلك بسهولة
حتى لو بتسيرش في جوجل..
إنما على جوجل بلاي ستور مبيظهرلكش خالص لا جوا الستور ولا في السيرش وعشان ألاقيه دخلت دورت على أبلكيشن My NTRA
ومنه روحت على صفحة المطور NTRA ومن هناك لقيت الأبلكيشن بتاع "تليفوني" ))

طيب نيجي بقى للمهم:

1- ايه لزمة أبلكيشن تليفوني Telephony؟

- الأبلكيشن ده مهم عشان تتأكد ان موبايلك معليهوش أي رسوم جمركية

- أي موبايل مستورد واتحط فيه شريحة بعد 1 يناير هيبقى عليه رسوم جمركية ده في حالة انك مصري مقيم في مصر واشتريت موبايل التاجر مستورده (وده العادي لاننا منصنعش موبايلات) وشغلته بعد 1 يناير، أو انك مصري جاي من الخارج ومعاك موبايل جديد من برا وهتفعله لأول مرة في مصر على شريحة عادية أو eSIM في مصر

- لو أنت سايح وجاي فترة مصر ليك 90 يوم ببلاش استخدام على الشبكات المصرية بعدها لازم تدفع الرسوم الجمركية

2- إزاي أستخدم أبلكيشن تليفوني Telephony؟

- الأبلكيشن بسيط جدا، بتنزله وبيطلب منك تدخل الـIMEI الخاص بموبايلك
- لو الموبايل بتاعك بيدعم شريحتين، هتلاقي فيه رقمين IMEI، واحد لكل شريحة.. ولو مشغل كمان eSIM، هتلاقي واحد كمان

- بمجرد ما تدخل رقم الـ IMEI بتاع أي شريحة من الاتنين أو التلاتة
هيقولك على طول إن كان موبايلك تمام متسجلة كل الـ IMEI بتاعته ولا عليك فلوس (وبيظهرلك قيمتها)

فيه نقطتين كمان مهمين أوي:

🔴 مبدئيا تقدر توصل لأرقام الـIMEI بتاعتك بطريقتين:

1- تسيرش في الإعدادات Settings على كلمة IMEI وبرضو تقدر تلاقيها مباشرة في الAbout جوا الاعدادات

2- تقدر تتصل بكود *#06# (من اليمين للشمال) وهيطلعلك الIMEI على طول

🔴 لو موبايلك شغال بالفعل من قبل 1 يناير، وشغال عليه حتى شريحة واحدة (وهو بشريحتين) هتلاقي ان الشريحتين عادي متفعلين ومعليكش فلوس

ولكن لو موبايلك بيدعم ESIM بس مشغلتهاش، غالبا لما تيجي تشغلها لازم هتدفع فلوس على الـIMEI بتاعها لانها مش شغالة بشكل تلقائي زي الشريحتين..

أبسطهالك،
يعني لو موبايلك فيه شريحتين، وانت عمرك ما استخدمت إلا فتحة واحدة لشريحة اتصالات واحدة، هتلاقي مخرج الشريحتين تمام الIMEI بتوعهم متسجل عادي.. إنما الـeSIM لازم تفعلها عشان يظهرلك الـiMEI بتاعها وبالتالي لما تشغلها بعد 1 يناير.. هتلاقي لازم تدفع (بنسبة 99%)

صباحو

وما أضحكش عليك، برده هواوي بدأت تعمل Ecosystem بيجي مع كل أجهزتها الذكية ويسهل على المستخدم إنه يستفيد بتجربة متكاملة بينها كلها، سواء من نقل للملفات بينها وبين بعض أو إنه يبدأ ينجز شغله على جهاز ويقدر يكمل على جهاز تاني. الخطوة دي كمان خلت هواوي تقدر تحط نفسها رأس برأس مع أبل، اللي بيتضرب بيها المثل في نقطة الـEcosystem. وكمان تثبت للسوق كله إنها لسه موجودة وقادرة تنافس رغم حرمانها من المعالجات الأمريكية بتاعة كوالكم وكمان حرمانها من أندرويد بتاع جوجل!

ما أضحكش عليك، بدأت أحس إن سوق السوشيال ميديا شوية بدأ يروح أكتر ناحية التواصل الخاص، اللي هو الـPrivate Social Media. تقريبًا كل الشبكات في 2024 حاولت إنها تقدم أدوات تساعد المستخدم إنه يحافظ على خصوصية بياناته ويحافظ على خصوصية اللي بيشاركه على السوشيال ميديا. وكمان بدأوا ينزلوا أدوات جديدة تسهل على المستخدم إنه يشارك محتوى أكتر مع الناس اللي يهمه. وده طبعًا جزء كبير منه بيتعمل بالذكاء الاصطناعي. واللي متفردة بصراحة في المسألة دي هي ميتا، اللي نزلت Meta AI في قلب فيسبوك، إنستجرام، واتساب، وماسنجر. المساعد الذكي ده بقى يقدر يتفاعل مع المستخدمين ويقدم ليهم اقتراحات بناءً على المحتوى اللي بيتكلموا عنه أو بيشاركوه.

في الوقت نفسه، ثريدز قدرت تاخد خطوات كتير عشان تكون جزء من السوشيال ميديا اللامركزية أو الـDecentralized Networks. دلوقتي أي حد على ثريدز يقدر يعمل فولو لأي حد على شبكات تانية زي ماستودون، وكمان يتفاعل مع المحتوى اللي هناك بشكل طبيعي. ده غير طبعًا المزايا الجديدة اللي الشبكة قدمتها عشان تجاري المنافسة القوية اللي حصلت بسبب بلو سكاي. بلو سكاي اكتسبت رواج واسع جدًا بعد ما ترامب كسب في الانتخابات الأمريكية اللي فاتت في نوفمبر، وده خلّى المنصة تحقق ارتفاع قياسي في عدد المستخدمين الجدد، خصوصًا بعد الهجرة الجماعية اللي حصلت من منصة إكس (تويتر سابقًا) بسبب دعم إيلون ماسك للرئيس الأمريكي الجديد.

أما بخصوص الروبوتات، مع التطور الكبير اللي حصل في نماذج الذكاء الاصطناعي وقدرتها على إدراك العالم وفهم اللي بيحصل حواليها بشكل أفضل، ظهرت طفرة كبيرة في سوق الروبوتات. بقى فيه كمية روبوتات جديدة ضخمة جدًا، وكلها بتتروج على إنها روبوتات معتمدة على الذكاء الاصطناعي، وفي قلبها نماذج ذكية بتخليها تقدر تتفاعل مع البشر بشكل طبيعي وآمن. ظهرت روبوتات منزلية زي روبوت Neo Beta من شركة 1X، واللي بيقدر يساعد في الشغل اليومي في البيت. كمان فيه روبوتات متخصصة زي Figure 02 اللي بيشتغل في خطوط إنتاج مصانع BMW وبيساهم في تحسين الكفاءة وتقليل الأخطاء في التصنيع.

غير كده، ظهرت أدوات برمجية ومنصات جديدة بتسهل على الشركات تدريب الروبوتات دي بطرق مبتكرة. التدريب اللي كان زمان بيعتمد على إدخال قواعد بيانات أو فيديوهات بتصنيفات واضحة بقى دلوقتي يعتمد على إن الروبوت يتفرج على الفيديوهات بنفسه ويفهمها بشكل مباشر. الخطوات دي بتقربنا أكتر من فكرة إن الروبوت يبقى جزء من حياتنا اليومية، سواء في الشوارع، الكافيهات، السوبر ماركت، أو حتى في أماكن الشغل.

بالنسبة للنظارات الذكية، 2024 كانت من أحسن السنين اللي عدت على السوق ده. نظارة أبل "Apple Vision Pro" أخيرًا وصلت للسوق بعد ما كانت مخصصة للمطورين بس في 2023، بس أبل نفسها قالت إن المنتج ده مش معمول للجمهور العادي، وده بسبب تصميمه الفخم وسعره العالي.

في المقابل، ميتا لسه متفوقة بمنتجاتها زي Meta Quest 3 وMeta Quest 3S، واللي بقت تعتبر من أقوى النظارات الذكية في السوق.

الميزة الكبيرة اللي بتميز ميتا هي التركيز على تطوير الألعاب والمحتوى، بجانب فرق السعر الضخم اللي بيخلي منتجاتها متاحة لعدد أكبر من المستخدمين مقارنةً بأبل.

النظارة الجديدة من ميتا، Meta Ray-Ban، دخل فيها الذكاء الاصطناعي بشكل قوي جدًا.

بقى فيها مساعد ذكي اسمه Meta AI، واللي بيقدر يتفاعل مع المستخدم بالصوت، وكمان يجاوب على أي استفسارات بخصوص الحاجات اللي المستخدم شايفها قدامه. الكاميرا المدمجة في النظارة بتخلي المساعد ده يقدر "يشوف" اللي قدام المستخدم ويتفاعل معاه.

على الجانب التاني، جوجل دخلت المنافسة وطرحت نظام تشغيل جديد للنظارات الذكية اسمه Android XR، وده اتطور بالشراكة مع سامسونج وكوالكوم. أول نظارة بتشغل النظام ده متوقع إنها تنزل السوق في 2025، وده هيزود المنافسة بشكل كبير بين اللاعبين الرئيسيين في السوق.

مساءو

عندك 10 دقايق؟ 🤔
تعا نلم السنة🏃🏻‍♂️.. يلا بينا 👇🏻🔥

ممكن خلال سنة 2024 يكون فيه طفرة كبيرة في نماذج الذكاء الاصطناعي سواء على مستوى التكست أو الفيديوهات أو الصور.

على مستوى التكست، نماذج الذكاء الاصطناعي بدأت تقدر تفهم أكتر كلام واستفسارات المستخدمين أحسن من قبل كده بكتير، وكمان بتقدر تعرض معلومات أدق بكتير لأنها بقت جواها قدرة أكبر على البحث على الإنترنت مع إظهار المصادر.

طبعًا ده غير إنها بقت قادرة على التفاعل الصوتي مع المستخدمين، فالتجربة ما بقتش أقرب للشات النصي، إنما أقرب لدردشة لايف بين اتنين أصحاب. وطبعًا ضيف على كده كمان إنها بتقدر تفهم أحسن اللي هي شايفاه بالكاميرا!

برده المجالات اللي اتطورت بشكل كبير هو إنشاء الصور بالذكاء الاصطناعي.

دقتها أعلى شوية من الأول، بس التطور اللي حصل السنة دي واللي أنا شايفه بشكل قوي هو إن الميزة دي بقت متاحة في منصات كتير جدًا زي ميتا ومختلف شبكاتها زي واتساب وماسنجر.

وأكيد التطور الكبير اللي حصل في دقة النماذج اللي أصلًا بتصمم صور زي ميدجيرني وImagen 3 من جوجل، وأكيد DALL-E في قلب ChatGPT. برده ما أقدرش أنسى أبدًا التطور الكبير اللي حصل في النماذج الخاصة بإنشاء الفيديوهات واللي ظهرت بقوة خلال الأسابيع القليلة اللي فاتت، وعلى رأسهم أكيد Sora من شركة OpenAI وأكيد كمان Veo2 من جوجل، وضيف عليهم طبعًا Pika 2 وKling AI 1.6 وRunway 3.

الغالبية العظمى من النماذج دي بقت تقدر تفهم بشكل أفضل بكتير العلاقات بين العناصر جوه الفيديوهات اللي بيعملوها، وبالتالي بيتم مراعاة عوامل كتير زي الجاذبية، طبيعة الأسطح، جغرافية الأماكن. وده بيخلي الفيديوهات تظهر واقعية جدًا، ما عدا إن لسه برده تصميم البشر وحركة أجزاء جسمهم المختلفة من أهم العيوب اللي بتسهل التعرف على إن الفيديو ده حقيقي فعلًا ولا معمول بالذكاء الاصطناعي.

برده فعليًا حصل تطور كبير في إنشاء الصوتيات بالذكاء الاصطناعي، سواء على مستوى المزيكا أو على مستوى كمان إنشاء مقاطع صوتية بأصوات بشرية سواء كلها مصطنعة ومش حقيقية أو بتقلد أصوات بشر حقيقيين.

وبصراحة، في التلات مجالات حصل تطور وطفرة ضخمة جدًا هتساعد صناع المزيكا إنهم يبدعوا أكتر.

في نفس الوقت، عملت أزمات كبيرة بين بعض المغنيين بسبب انتحال أصواتهم وانتهاك حقوق ملكيتهم لأصواتهم، وده عمل أزمات مع شركات الإنتاج وكمان خلق حالة من الخلاف بين بعض المغنيين بسبب إن جمهورهم عمل أغاني بالذكاء الاصطناعي بأصواتهم عشان يشتموا بعض!

وطبعًا مش هتكلم عن إن كل أدوات الذكاء الاصطناعي اللي اتطورت بشكل ضخم جدًا السنة دي تم استخدامها في عدد كبير جدًا من الاختراقات وعمليات الاحتيال الإلكتروني والهجمات السيبرانية!

في الوقت اللي حصل فيه تطور ضخم جدًا في نماذج الذكاء الاصطناعي وقدرتها وطرق تدريبها وتطورها، كان فيه مجموعة من الشركات بتحاول إنها تستخدم النماذج دي وتوظفها لخلق جيل جديد من الأجهزة الذكية.

بس للأسف، بشكل كبير، كل المحاولات ما حققتش النجاح المتوقع منها، بل بالعكس بعضها فشل فشل ذريع. والمشكلة الرئيسية كانت إن المستخدمين ما كانوش قادرين يحددوا بالظبط إيه الميزة الفارقة بجد اللي تخليهم ياخدوا قرار إنهم يشتروا جهاز جديد بمئات الدولارات وأحيانًا بتوصل لآلاف الدولارات.

النوع ده من الأجهزة لسه برده مش قادر يحط في خطط الماركتينج بتاعته الميزة الأساسية أو اللي بنسميها الـKiller app اللي تخلي الجهاز يبيع بالظبط. كده زي الموبايلات، فالـKiller app مثلًا في الموبايل هو إنك بتقدر تعمل مكالمات، تبعت مسجات، تدخل على الإنترنت من أي مكان وفي أي وقت. ده خلّى الموبايل جهاز ما نقدرش كلنا نستغنى عنه، وهي دي النقطة اللي لسه الجيل الجديد من الأجهزة المعتمدة بالكامل على الذكاء الاصطناعي مش قادر يحققها!

2024 ما كانتش سنة الموبايلات قوي. كل الشركات تقريبًا كانت بتحاول إنها تدخل الذكاء الاصطناعي بشكل أو بآخر. ويمكن أتقل اتنين في القصة دي كانوا أبل وسامسونج، والاتنين المزايا بتاعتهم ما كانتش أقوى حاجة، ولا كانت السبب الرئيسي في مبيعات موبايلاتهم. بس ده ما يمنعش برده إن مواصفات الموبايلات وتصميمها وقدرتها على مستوى الأداء، البطارية، العدسات، الكاميرات لعبت دور مهم في إن الشركات دي تقدر تبيع بمليارات الدولارات.

يمكن اللي كانت بتغرد شوية خارج السرب هي هواوي، اللي قدرت بشكل كبير إنها تحقق حاجة كانت محتاجة تعملها من زمان، وهي إنها تنزل نظام تشغيل مخصوص لنفسها سواء يشغل موبايلاتها أو كمان يشغل كل الأجهزة بتاعتها من أول اللابتوبات والموبايلات ولحد السيارات الكهربائية.

وكمان حاطة خطوة مهمة جدًا وهي إن موبايلاتها اللي بتشغل نظام تشغيلها الخاص مش هتقدر تسطب تطبيقات الأندرويد التقليدية المتاحة أون لاين من برة ستور جوجل، واللي بتبقى عبارة عن ملفات موجودة على مواقع أون لاين بامتداد APK.

تعرف إن حواسك ونقاطك الشعورية في جسمك بتقدر تجمع تقريبا تريليون نقطة بيانية (Trillion Bits of Data) في الثانية الواحدة..

ولكن مخك بيقدر يادوب بس يعالج 10 نقاط بيانية في الثانية عشان يقدر يعمل المهام الطبيعية بتاعتك زي انك تتكلم وترد وتشرب وتاكل وتكتب وتفكر وهكذا..!

مساءو

خدت بالك من العلامات الجديدة للكتابة Typing والتسجيل Recording في واتساب؟ 🤨

جوجل حاليا ضهرها للحيط..

وزارة العدل الأمريكية بتطالبها انها تفصل متصفح جوجل كروم عنها عشان تنهي بشكل كبير احتكارها لسوق السيرش (اللي هي بالعة منه 90%) ويبقى كروم شركة مستقلة بذاتها

كمان الوزارة بتطالب ان جوجل تفضل تحت المراجعة الورقابة القانونية لمدة 10 سنين، ومتدخلش سوق السيرش تاني قبل 5 سنين، لا بمنتج جديد ولا تستثمر حتى في سوق المتصفحات أو الذكاء الاصطناعي اللي معتمد على البحث!

الخطوة دي بتضرب جوجل فعليا في قلبها، لإن إعلانات السيرش هي كل حاجة بالنسبة لجوجل، و99% من حركة جوجل سيرش وشهرته جاية من جوجل كروم على البراوزرات..

الأزمة ان العدل الأمريكية حطت اختيار تاني لو كل الاجراءات اللي فاتت دي مكسرتش احتكار جوجل لسوق السيرش، وهو ان جوجل تفصل نظام التشغيل أندرويد ويستقل بشكل كامل..

لإن برضو أندرويد بيساهم بشكل كبير في ان جوجل سيرش يسيطر، سواء من خلال أبلكيشن جوجل، أو ان معظم الناس بتلاقي by default ان السيرش جوا أي براوزر بيودي على جوجل أوتوماتيك!

دي برضو كانت من النقط المهمة، ان جوجل دافعة مليارات لشركات موبايل زي أبل سامسونج وشركات براوزر زي Opera وMozilla عشان تحط جوجل سيرش محرك البحث الافتراضي على كل دول!

🗣️ رأيي المتواضع،
لو تم تأييد الحكم واتطبق وانفصل كروم عن جوجل،
جيميناي هيبقى طوق النجاة للشركة في حتة تصفح الويب
لإن برضو جوجل عاملة أرشفة لصفحات الويب (ما يعرف بالـ Web Indexing) بشكل قوي جدا مينفعش يتساب ولا يتحط في قلب منتج
يخليه يقدر يتصفح الإنترنت بشكل سهل ومنظم..
جيميناي بيطور بشكل كبير أوي في حتت كتيرة خاصة بتكامله مع خدمات جوجل، بس لازم الشركة تركز أكتر على ان جيميناي يبقى أشطر في السيرش من جوجل سيرش نفسه!

كمان أبل من الشركات اللي هتخسر كتير أوي في القضية دي
لان متوقع جدا يبقى من ضمن القرارات التنظيمية انه صفقات جوجل مع الشركات تقف، وده هيقطع مبلغ سنوي بيدخل جيب أبل عشان تخلي جوجل سيرش محرك البحث الافتراضي على الآيفون.. يُقدر سنويًا بحوالي 20 مليار!

صباحو

هواوي فتحت امبارح باب حجز مسبق لموبايلها Mate 70..

130 ألف نسخة اتحجزت بالفعل في 10 ساعات!🔥

الموبايل نازل رسمي 26 نوفمبر

صباحو

لازم نقفش عليك يعني... 🤣

مساءو

جوجل عاملة قلق في جيميناي!

🔴 دلوقتي جوجل خلتك تقدر تعمل نسخة مخصصة من جيميناي جوا ميزة Gems، واضافت ليها ميزة انك تعلم النسخة دي حاجات مختلفة عن اللي انت عايزه يساعدك فيه، زي انك تضيف ملفات عن تفاصيل شركتك ومنتجاتها، أو طريقة كتابتك لأي حاجة بتكتبهت، في صورة ملفات مختلفة بكل صيغها من وورد لـ pdf وغيره..

الميزة متاحة لجيميناي أدفانسد وطبعا مشتركين البيزنس والتعليم في جيميناي..

دي طبعا ميزة عتيقة في كلاودي وChatGPT بس هايل اضافتها لجيميناي هتخلي يدوس ف المنافسة!

🔴 كمان جوجل نزلت أبلكيشن جيميناي رسمي على آيفون جنب انك تقدر تستخدمه جوا ابلكيشن جوجل وكمان على موقع الويب!

🔴 الاروع بقى ان فيه تسريب من قلب كود ابلكيشن جوجل على اندرويد بيأكد ان جيميناي لايف قريب هينزله ميزة انك ترفعله ملفات، فتقدر ترفع الفايلات بتاعتك وتدردش مع جيميناي لايف عنها! 🔥

صباحو

إل جي مجنونة في الشاشات!! 🤯

دي شاشة إل جي جديدة كشفت عنها الشركة بتقدر:

1. تتمط Stretch لحد 20% - 50% زيادة في حجمها
2. ممكن تتمط 10000 مرة عادي
3. الشاشة دقتها هايلة 100 بيكسل للبوصة
4. بتعرض دقة ألوان عظيمة RGB
5. تطبيقاتها ملهاش آخر

الشركة عرضت تصميم مرعب للشاشة دي
جوا عربية، مفروض الشاشة 12 بوصة بتتمط لحد 18 بوصة وهنا التمدد ده بيحصل عشان الشاشة تتحول وتتفاعل مع حركة ايد الشخص ف العربية، ويتغير كمان على الشاشة المحتوى المعروض ومعاه ستغسر شكل الشاشة الملموس!!

كمان إل جي قالت انها عملت برضو نموذج تاني
لاستخدام الشاشة، بحيث تتحط على لبس رجال المطافي، عشان تعرض تحديثات مستمرة من معلومات الكوارث الطبيعية أو الحالات الطارئة اللي بيتعاملوا معاها!!

الفكرة وهمية!

الروبوت Ai-Da
الموهبة: فنانة وبترسم
قدراتها: بتستخدم الذكاء الاصطناعي عشان تقدر ترسم بدقة عالية أعمال فنية عظيمة

اللوحة؟ 🤔
لا دي عادي لوحة اسمها Alan Turing "على اسم ابراحل اللي عمل اختبار اسمه Turing Test عشان يقفش الروبوتات والأنظمة البرمجية ان كانت روبوتات ولا بشر"..
واتباعت في مزاد بمليون دولار، وبكدا تبقى أول لوخة مرسومة باستخدام الAI تتباع أساسا!

منصة ChatGPT في أكتوبر (الشهر الي فات)
وصل عدد الزيارات شهريا
إلى 3.7 مليار زيارة..

الرقم ده طبعا يقولك اد ايه شات جي بي تي سابق منافسيه
اللي أرقامهم كانت كالتالي:

Gemini جيميناي.. 291.6 مليون زيارة
Perplexity بيربلكستي .. 90.8 مليون زيارة
Claude كلاودي.. 84.1 مليون زيارة
Copilot كوبايلوت .. 69.4 مليون زيارة
NotebookLM نوت بوك إل إم.. 31.5 مليون زيارة

🔴 خليني أقولك ان مايو كان نقطة تحول في عدد مستخدمين ChatGPT
لما قدرت OpenAI تشتري دومين Chatgpt . com وتخليه يودي على منصتها الذكية بدل ماكانت بتعتمد على الدومين الفرعي Chat . openai . com .. في مايو ده منحنى نمو عدد الزيارات طار ووصل إلى 2.2 مليار مستخدم!

صباحو

بدايةً من شهر يونيو السنة دي، واتساب بدأ يخلي النسخة الاحتياطية بتاعته تأخذ من مساحة جوجل درايف عندك على الموبايل، طبعا لو موبايلك أندرويد. وبالتالي الـ 15 جيجابايت المجانية اللي بتنزلهم جوجل مع كل حساب بيتعمل عندها بقى بيروح جزء منهم للنسخة الاحتياطية بتاعت واتساب.

ده طبعا غير إن باقي الـ 15 جيجابايت المجانية بيتوزعوا على الإيميلات اللي بتجيلك على الجيميل وكل الملفات اللي بتتبعت لك كملفات مرفقة (attachments)، وضيف على كده كمان صورك اللي بتعمل لها نسخة احتياطية على جوجل فوتوز وأكيد الملفات بتاعتك اللي بتعمل لها نسخة احتياطية على درايف.

تخيل بقى إن كل ده هيكفيه الـ 15 جيجابايت المجانية بس؟!

عشان كده، عرفت ناس كتير جدًا السنة دي واتساب بتاعهم باظ وضيع ملفاتهم والمحادثات المهمة والباك أب بتاعهم. لما واتساب حاول يعمل نسخة احتياطية على جوجل درايف واستهلك من الـ 15 جيجا، اكتشف إنه مفيش مساحة كافية، وبالتالي النسخة الاحتياطية ما اتعملتش وضاعت المحادثات والملفات المهمة. واليوزر المسكين بقى عليه إنه يا إما يدفع عشان ياخد مساحة زيادة عند جوجل عن طريق الاشتراك في خدمة Google One، أو يضحي بالنسخة الاحتياطية للمحادثات القديمة خالص، ويشتغل على محادثات اليوم بيومه وكل القديم يتمسح وما يتعملوش نسخة احتياطية أساسا، ودي طبعا كارثة كبيرة ما حدش يقدر يستحملها!

🤔 طيب ليه واتساب عمل كده؟

لأنه ببساطة، أقل نسخة احتياطية واتساب بيحتاج يعملها بتبقى تقريبا 5 جيجابايت، فتخيل بقى إن مستخدمي واتساب اللي عددهم معدي المليار شخص كل واحد فيهم عنده داتا حوالي 5 جيجا. يعني بنتكلم في 5 مليار جيجابايت! طبعا كل الداتا دي محتاجة سيرفرات عند جوجل عشان تتخزن فيها، وأكيد "الحداية ما بتحدفش كتاكيت" 🤷.

🔴 باعتبار إن شفت المشكلة دي مع أكتر من حد وللأسف الحل الوحيد اللي بينفع هو إنك تشتري مساحة عند جوجل. وإياك تفكر إنك تغير حساب الجيميل اللي بتعمل عليه النسخة الاحتياطية في واتساب، لأنك لو عملت كده هتضيع النسخة الاحتياطية القديمة 😅.

كمان إياك تتناصح وتفكر إنك تنقل المحادثات يدوي لأن الموضوع مش بينفع بالشكل اللي متخيله 😅. وأخيرًا، خلي بالك طول ما أنت أونلاين، مفيش حاجة ببلاش 🤷.

بص، أنا مش هضحك عليك وأقول لك إن جوجل لسه واقفة وإن السيرش بتاعها هو الأقوى وإن اللي نزلته OpenAI من سيرش في قلب ChatGPT عادي..

لا، بصراحة اللي عمله شات جي بي تي عظيم جدًا ومريح جدًا في البحث، منظم وبيجيب من الآخر وموثق.. بس ده ممنعش جوجل تحاول برضو!

جوجل بدأت تجربة جديدة في الهند جوه تطبيق جوجل، ولما تعمل سيرش بالصوت، تقدر تسأل أسئلة متتالية بعد ما تطلع لك نتائج البحث، وده بيخليك تعيش تجربة بحث صوتي مميزة جدًا، وبتظهر لك المصادر قدامك على طول، وكمان بتطلع لك إجابة سؤالك مكتوبة في الأول خالص فوق كل نتائج البحث.

بس بصراحة، أنا شايف إن اللي بيقدمه شات جي بي تي أفضل، وبرضه اللي بتقدمه جوجل مع جيميناي لايف حلو جدًا، حتى لو بالعربي. إنما فكرة إن أنا أتكلم مع مربع البحث ويظهر لي نتائج البحث في لينكات، حتى لو بيظهر الإجابة المباشرة في شكل نصي فوق، التجربة نفسها وتصميمها مش مريح للعين ولا عملي للاستخدام. وده طبعًا رأيي الشخصي!

مساءو

ميتا شغالة على أداة جديدة هتبدأ تطبقها على مستوى فيسبوك وإنستجرام من أول 2025 عشان تلقط علامات كتير تتأكد إن لو طفل أو مراهق بيحاول يعمل أكاونت على الشبكات دي ما يقدرش يضحك على السيستم في سنه الحقيقي!

السيستم ده هيشتغل على تتبع طبيعة المحتوى والناس اللي بيتابعها الشخص على السوشيال ميديا وكمان الإيميلات المرتبطة بأكاونتاته، وما يقدرش يعمل بيها أكتر من أكاونت بأعمار مختلفة. ده غير كمان إنه هيتم تتبع الأرقام التعريفية المميزة للأجهزة زي IP Address وMAC Address عشان يتعرف على عمر الشخص من استخدامه للسوشيال ميديا عامة وما يقدرش يكذب في عمره!

بمجرد ما الأداة تلقط إن في حد كدب في عمره، الأكاونت بيتحول لأكاونت مراهقين وساعتها بيبقى أكاونت برايفت وما يقدرش يبعت أي مسجات لناس غريبة مش عنده في الفريندز، ولا كمان يقدر يغير في إعدادات الأكاونت إلا بموافقة ولي أمره!

لو في شخص شايف إن الإجراء ده اتاخد ضده بالغلط، ممكن بسهولة يطلب إعادة نظر من إدارة فيسبوك في الإجراء من خلال إنه يقدم صورة الباسبور أو بطاقته القومية، أو طبعًا كمان يقدر يعمل توثيق هوية من خلال لايف فيديو!

مساءو

العالم بيتغير والكون بيجري
والذكاء الاصطناعي في كل مكان
وكل الشركات بتتسابق حرفيا عشان تلحق..

أبل:
مخرج شحن الماوس هيفضل في مكانه.. من تحت
فلو عايز تشحن، بطل تستخدم الماوس، واقلبها على ضهرها!

ليه؟ لا بجد ليه..🐸

دي فيديو كوول دخلها إيلون ماسك مع مسؤولين من الخطوط الجوية القطرية
لتجربة الإنترنت الفضائي من ستار لنيك في قلب رحلة طيران مع طيارة Boeing 777
وسرعة النت.. 215 ميجابت في الثانية الواحدة .. على ارتفاع أكثر من ١٠ كيلومتر من سطح الأرض!

مساءو

واحدة من التجارب العظيمة في السيرش دلوقتي على أندرويد هي براوزر Arc Search اللي نزل من اسبوع..

احلى ميزة هي Browse for Me،
بتخليك تكتب اللي هتسيرش عليه، وتختار زرار Browse for Me..

ساعتها الابلكيشن بيعمل صفحة ويب ضخمة بيرتب فيها كل الداتا اللي لقاها في شكل بلوكات معلومات بعناوين فرعية عن الموضوع الرئيسي..

وف الاخر تلاقي المصادر!


صباحو

لا تعليق.. 🤯

5 الفجر بتوقيت القاهرة،

في قلب كاليفورنيا، جوا واحد من استديوهات Warner Bros السينمائية،

بكل استعراض وقف إيلون ماسك وقال:

"المستقبل بيبدأ دلوقتي.. من انهاردة فكرة نقل الركاب والبضائع ومساعدة البشر.. هتتغير للأبد"!

🔴 تسلا كشفت عن سيارتها الذكية للتاكسي CyberCab

ودي عربية تاكسي بدون لا دواسات ولا دركسيون

بتطلب الخدمة بالموبايل زي أوبر

يجيلك نوتفكيشن لما العربية تقرب..

العربية يادوب تكفي شخصين

فيها شاشة 15 بوصة قدام

تتفرج عليها على أي محتوى

تاخد اجتماعاتك الأونلاين عليها وانت راكب

أو حتى تكتب وترسم عليها زي ما انت عايز

فيها مكان واسع للشنطة عشان تحط حاجاتك

تصميم العربية واخد من روح سيارات التسلا السيدان وكمان الهيكل الخارجي لشاحنة السايبرترك..

العربية بتتشحن بتقنية الشحن التوصيلي Inductive Changing ( وده مختلف تماما عن الشحن التقليدي للسيارات من خلال منفذ جانبي، الشحن الجديد بيشتغل من خلال قاعدة شحن ارضية، بتتوصل بمنطقة الشحن ف بطن العربية من تحت، واعتقد ده تمهيدا لتنفيذ فكرة شحن السيارات الكهربائية وهي ماشية على الطرق المجهزة بالتقنية دي، واللي السويد بالفعل شغلتها من ٢٠٢٢)

العربية هتدخل انتاج ممكن 2026 او اول 2027

متوقع تكلفتها تبقى بين 20 و30 ألف دولار

وهتنزل الخدمة في كاليفورنيا وتكساس في 2025

🔴 كمان تسلا كشفت عن Tesla Robovan

عربية ڤان تشيل لحد 20 راكب، وممكن تخصص للبضايع

ماسك قال ان الروبو فان هتخفض تكلفة النقل الى ٥ او ١٠ سنت للميل الواحد

وهي هتلعب ف الاساس على انها تكون جزء من شبكة تيسلا للنقل ذاتي القيادة للركاب والبضايع Tesla Network وكمان ممكن عادي تنزل للمؤسسات والافراد

🔴 برضو تسلا نزلت روبوتها أوبتيموس

يتمشى حوالين الجمهور ويقدم مشروبات واكياس هدايا ويلعب حجرة ورقة مقص..

بس الكلام ده مكنش ماشي خالص مع اللي قاله ماسك عن الروبوت ف الايفنت:

"اوبتيموس جاهز يعمل كل حاجة،

يساعد ف البيت ف التنضيف وشيل الحاجات والتنظيم وكمان يشيل الحاجات من العربية، لا ويقعد ع السفرة مع العيلة ويلعبوا، وممكن كمان يقدم المشاريب للضيوف ".. ساحر يعني ماشاء الله، وآخره طلع بيرقص ف اوضة ازاز!

بالمناسبة، ماسك ف ابريل قال للمستثمرين،

على اخر ٢٠٢٤ اوبتيموس هينجز مهام كتيرة مفيدة

وهينزل السوق يتباع على ٢٠٢٥!

السعر المتوقع للروبوت ينخفض بعد فترة ويبقى ٢٠ ل ٣٠ الف دولار.. ده كدا بعد الانخفاض😶‍🌫️🤣

صباحو