Ayeyarwaddy Times

ချင်းပြည်နယ်တွင် ဒေသခံအရပ်သားသေဆုံးမှုအများဆုံးမှာ စစ်ကောင်စီ၏ လေကြောင်းတိုက်ခိုက်မှုကြောင့်ဖြစ်

ဧရာဝတီတိုင်းမ်
(ချင်း)၊ ဇန်နဝါရီလ ၁၄ ရက်

အာဏာသိမ်းပြီးနောက် ချင်းပြည်နယ်တွင် လေးနှစ်ကာလအတွင်း စစ်ကောင်စီတပ်၏ လေကြောင်း တိုက်ခိုက်မှုကြောင့် အရပ်သား ၁၁၆ ဦးသေဆုံးပြီး ၂၄၂ ဦး ဒဏ်ရာရခဲ့ကြောင်း ချင်းလူ့အခွင့်အရေးအဖွဲ့ (CHRO)၏ ထုတ်ပြန်ချက်အရ သိရသည်။

လေကြောင်းတိုက်ခိုက်မှုကြောင့် ဘာသာရေးအဆောက်အဦး ၂၅ ခု ၊ စာသင်ကျောင်း ၂၂ ခု ၊ ကျန်မာရေးအဆောက်အဦး ၈ ခု ၊ဘုန်းကြီးကျောင်း ၇ ခု နှင့် လူနေအိမ်များအပါအဝင် အဆောက်အအုံ စုစုပေါင်း ၄၁၂ ခု ပျက်စီးဆုံးရှုံးခဲ့ကြောင်းထုတ်ပြန်ချက်တွင် ဖော်ပြထားသည်။

‌"သတ်ဖြတ်ခံရတဲ့ ပြည်သူတွေက အများအားဖြင့် တိုက်ပွဲမရှိဘဲ စစ်ကောင်စီက တမြင်သက်သက်နဲ့ လေကြောင်းတိုက်ခိုက်မှုကြောင့် အပြစ်မဲ့ဒေသခံတွေ သေဆုံးတာများတယ်။ ဒုတိယအနေနဲ့တော့ လက်နက်ကြီးရမ်းသန်းပစ်ခတ်မှုကြောင့် ဒေသခံတွေ သေဆုံးမှုများတယ်။ တတိယအနေနဲ့တော့ ဆေးဝါးလုံလောက်မှုမရှိတဲ့အတွက် ကျန်းမာရေးနဲ့ သေဆုံးမှုလည်းရှိတယ်"ဟု ချင်းလူ့အခွင့်အရေး အဖွဲ့(CHRO)၏ Fileဒါရိုက်တာဆလိုင်းတေရက ဧရာဝတီတိုင်းမ်ကို ပြောကြားသည်။

စစ်တပ် အာဏာသိမ်းပြီးနောက် ချင်းပြည်နယ်တောင်ပိုင်းတွင် ငှက်ဖျားရောဂါအဖြစ်များမှုကြောင့် ဒေသခံသေဆုံးမှုများပြားပြီး ဝမ်းရောဂါကြောင့် ကလေးသူငယ်များနှင့် သက်ကြီးရွယ်အို သေဆုံးမှုများလည်း ရှိသည်။

ထို့အပြင် မြေမြှုပ်မိုင်းကြောင့် ဒေသခံတချို့သေဆုံးမှုများလည်းရှိနေပြီး ခြေလက်အင်္ဂါထိခိုက် ချို့ယွင်းသူလည်း များပြားကြောင်းသိရသည်။

စစ်ကောင်စီတပ်သည် အာဏာသိမ်းထားသည့် လေးနှစ်တာကာလအတွင်းတွင် လေကြောင်းဖြင့် အကြိမ် ၈၆၀ ကျော်တိုက်ခိုက်ခဲ့ပြီး ချင်းပြည်နယ်၏ မြို့နယ် ကိုးမြို့နယ်တွင် မင်းတပ်မြို့နယ်ကို လေကြောင်းတိုက်ခိုက်မှုအကြိမ်ရေအများဆုံး တိုက်ခိုက်ခဲ့ကြောင်းသိရသည်။

ပုံစာ-လေကြောင်းတိုက်ခိုက်မှုကြောင့် သေဆုံးသွားသော ချင်းပြည်သူများ(ပုံဟောင်း)

#ချင်းပြည်နယ် #လေကြောင်းတိုက်ခိုက်မှု #ဒေသခံအရပ်သားသေဆုံးမှုအများဆုံး #Ayeyarwaddy_Times

ထိုင်းနိုင်ငံအပေါ် တရုတ်ခရီးသွားများ၏ ယုံကြည်မှုပြန်လည်ရစေရန် ခရီးသွားကမ်ပိန်းများကို လုပ်ဆောင်ရန် ထိုင်းအစိုးရစီစဉ်

ဧရာဝတီတိုင်းမ်
ဇန်နဝါရီ ၁၄ ရက်

ထိုင်းနိုင်ငံမှ တဆင့် မြန်မာနိုင်ငံအတွင်းသို့ တရုတ်သရုပ်ဆောင်တစ်ဦး လူကုန်ကူးခံခဲ့ရပြီးနောက် ထိုင်းသို့ အလည်လာရန် စိုးရိမ်နေကြ‌သည့် တရုတ်လူမျိုးများ၏ ယုံကြည်မှုကို ပြန်လည်ရရှိစေရန် ထိုင်းအစိုးရက ခရီးသွားလုပ်ငန်းဆိုင်ရာ ကမ်ပိန်းများကို တိုးမြှင့်လုပ်ဆောင်ရန် စီစဉ်နေကြောင်း သိရသည်။

ထိုင်းဝန်ကြီးချုပ် ပေထုန်တန်ရှင်နာဝပ် (Paetongtarn Shinawatra) က ခရီးသွားများ၏ ယုံကြည်မှုကို ပြန်လည်ရရှိစေရန် ကမ်ပိန်းများ စတင်လုပ်ဆောင်ရန် ခရီးသွားနှင့်အားကစား၀န်ကြီးဌာနကို ညွှန်ကြားခဲ့သည်ဟု ယမန်နေ့ ဇန်နဝါရီ ၁၃ ရက်တွင် ထိုင်းအစိုးရ၏ပြောရေးဆိုခွင့်ရှိသူ Mr. Jirayu Huangsap က ပြောဆိုခဲ့သည်။

"မြန်မာနိုင်ငံမှာ ပျောက်ဆုံးနေတဲ့ တရုတ်သရုပ်ဆောင်ကို ရှာတွေ့ခဲ့ပေမယ့် ဒီဖြစ်ရပ်က တရုတ် ခရီးသွားတွေရဲ့ ယုံကြည်မှုကို ထိခိုက်ခဲ့ပါတယ်” ဟု ဝန်ကြီးချုပ်က ပြောခဲ့‌ကြောင်းလည်း အဆိုပါ ပြောရေးဆိုခွင့်ရှိသူထံက သိရသည်။

ဆက်လက်၍ ထိုင်းဝန်ကြီးချုပ်က ဒစ်ဂျစ်တယ်စီးပွားရေးနှင့်လူ့အဖွဲ့အစည်း ဝန်ကြီးဌာနအား သတင်းတု များကို ကိုင်တွယ်ဖြေရှင်းရန်နှင့် တရုတ်ခရီးသွားများ၏ ယုံကြည်မှုကို ပြန်လည်ရရှိ‌ရေးအတွက် တရုတ်အာဏာပိုင်များနှင့် အနီးကပ် ပူးပေါင်းဆောင်ရွက်သွားရန် ညွှန်ကြားထားကြောင်း သိရသည်။

လက်ရှိတွင် ခရီးသွားများ ဘေးကင်းစေရန် ခရီးသွားရဲ အရေအတွက် လုံလုံလောက်လောက် ရှိစေရေးအတွက် ရဲချုပ်ကိုလည်း ညွှန်ကြားထားပြီး ရဲများ အနေဖြင့် အန္တရာယ်ရှိသောနေရာများတွင် ကင်းလှည့်ရန်ကိုလည်း ညွှန်ကြားထားကြောင်း သိရသည်။

ထိုင်းနိုင်ငံအတွင်းသို့ ပြီးခဲ့သည့် ၂၀၂၄ ခုနှစ်က ကမ္ဘာလှည့်ခရီးသွား ၃၅.၅ သန်း ဝင်ရောက်ခဲ့ပြီး ၆.၇ သန်းမှာ တရုတ်နိုင်ငံသားများဖြစ်ကြောင်း သိရသည်။

တရုတ်မင်းသားလူကုန်ကူးမှုဖြစ်စဉ်ကြောင့် လာမည့်တရုတ်နှစ်သစ်ကူး ပိတ်ရက်အတွက် ထိုင်းနိုင်ငံသို့ လာရောက်လည်ပတ်မည့် တရုတ်ခရီးသွား အရေအတွက်မှာ ၂၀ ရာခိုင်နှုန်း ဝန်းကျင် လျော့ကျသွားနိုင်ကြောင်း ထိုင်းခရီးသွားဝန်ဆောင်မှုအဖွဲ့အစည်းက ဆိုထားသည်။

ကိုးကား - Bangkok Post
#Ayeyarwaddy_Times

ရှမ်းတောင်တွင် ယခုနှစ်ဆန်းပိုင်းမှစတင်ကာ တကျော့ပြန် စစ်ရေးတင်းမာမှု ဖြစ်ပွားနေ

နိုင်မင်းလွင်/ဧရာဝတီတိုင်းမ်
ဇန်နဝါရီ ၁၄ ရက်

ရှမ်းပြည်နယ်(တောင်ပိုင်း)ရှိ မြို့နယ်များတွင် စစ်ကောင်စီ၊ ပအိုဝ်းပြည်သူ့စစ်အဖွဲ့ (PNO/PNA)နှင့် တော်လှန်ရေး အင်အားစုများအကြား ယခုနှစ်မှစ၍ တကျော့ပြန် စစ်ရေးတင်းမာ ဖြစ်ပွားနေပြီး အရပ်သား သောင်းနှင့်ချီကာ စစ်ဘေးတိမ်းရှောင်နေရကြောင်း ပအိုဝ်းလူငယ်အစည်းအရုံး (PYO)ထံက သိရသည်။

ယခု ၂၀၂၅ ခုနှစ်၊ ဇန်နဝါရီ ဒုတိယပတ်ထိ ဆီဆိုင်၊ ပင်လောင်း၊ မောက်မယ်နှင့် ဖယ်ခုံ စသည့် မြို့နယ်များတွင် စစ်ကောင်စီနှင့် တော်လှန်ရေးတပ်ဖွဲ့တို့အကြား မြေပြင်ထိတွေ့ တိုက်ပွဲများ ပြန်လည် ဖြစ်ပွားခဲ့ပြီး အရပ်သားနေအိမ်နှင့် ကျေးရွာများကို စစ်ကောင်စီက လေကြောင်း၊ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း သိရသည်။

“ပင်လောင်း နဲ့ ညောင်ရွှေမြို့နယ် တို့မှာ စစ်ရေးတင်းမာနေတယ်။ အချိန်မရွေး တိုက်ပွဲ ဖြစ်နိုင်တဲ့ အခြေအနေ ဖြစ်ပါတယ်။ ဆီဆိုင်နဲ့ ဖယ်ခုံမြို့နယ်ကတော့ မြေပြင်တိုက်ပွဲ ဖြစ်ပွားနေတယ်” ဟု ပအိုဝ်း လူငယ်အစည်းအရုံး (PYO) ဒုဥက္ကဋ္ဌ ခွန်ဦးက ဧရာဝတီတိုင်းမ်ကို ပြောသည်။

လက်ရှိတွင် မြို့နယ်အချို့၌ နှစ်ဖက်စစ်အင်အား ဖြည့်တင်းမှု၊ စစ်ရေးပြင်ဆင်မှုများ အားကောင်း နေသလို ယခုရက်ပိုင်းအတွင်း ဆီဆိုင်မြို့နယ်၊ ရွှေတဂူကျေးရွာတွင် အထိုင်ချထားသည့် စစ်ကောင်စီ တပ်နှင့် PNA ဂိတ်စခန်းကိုလည်း တော်လှန်ရေး အင်အားစုများက တိုက်ခိုက်သိမ်းပိုက်ကာ စစ်သုံ့ ပန်းများ ဖမ်းဆီးရမိခဲ့ကြောင်း သိရသည်။

စစ်တပ်အာဏာသိမ်းပြီးနောက် တော်လှန်ရေး အင်အားစုများသည် ပြီးခဲ့သည့် ၂၀၂၄ ခုနှစ်၊ ဇန်နဝါရီ ၂၂ ရက်မှစတင်၍ ရှမ်းပြည်တောင်ပိုင်း၊ ဆီဆိုင်၊ ပင်လောင်း၊ ညောင်ရွှေ၊ ဟိုပုံး၊ မောက်မယ်၊ လွိုင်လင်နှင့် ဖယ်ခုံ စသည့်မြို့နယ်များတွင် စစ်ကောင်စီ၊ ပအိုဝ်းပြည်သူ့စစ်အဖွဲ့ (PNO/PNA)တို့နှင့် တိုက်ပွဲပြင်းထန် စွာ ဖြစ်ပွားခဲ့ကြောင်း သိရသည်။

ထို့နောက် စစ်ကောင်စီက လေကြောင်းတိုက်ခိုက်မှုဖြင့် အသာစီးရခဲ့သော်လည်း လက်ရှိ ၂၀၂၅ ခုနှစ်တွင် တကျော့ပြန် စစ်ရေး တင်းမာလာခဲ့ခြင်းဖြစ်ပြီး ယခင်နှစ် စစ်ဘေးရှောင်များအပြင် ထပ်မံတိမ်းရှောင် ရသူများကြောင့် အရပ်သား စုစုပေါင်း ၆၅၀၀၀ ခန့် ဘေးလွတ်ရာသို့ တိမ်းရှောင်နေရကြောင်း PYO ထံက သိရသည်။

စစ်ကောင်စီ၏ လေကြောင်း၊ လက်နက်ကြီး ပစ်ခတ်တိုက်ခိုက်မှုသည် ၂၀၂၄ ခုနှစ်အတွင်း အကြိမ်ရေ ၅၇၀၀ ဝန်းကျင်ရှိပြီး စျေး၊ ဆေးရုံ/ဆေးခန်း၊ လမ်းတံတား၊ စာသင်ကျောင်း၊ ဘာသာရေး အဆောက် အအုံနှင့် အရပ်သားနေအိမ် ၁၅၀၀ ဝန်းကျင် ထိခိုက်ပျက်စီးခဲ့သလို လူတစ်ရာကျော် သေဆုံးခဲ့ကြောင်း သိရသည်။

ယင်းအပြင် စစ်ကောင်စီသည် စစ်ဘေးရှောင်များကို နေထိုင်ခွင့် ပိတ်ပင်ခြင်းများဖြင့် ဖိအားပေးလျက်ရှိ နေသောကြောင့် သောက်သုံးရေ၊ စားနပ်ရိက္ခာမရရှိဘဲ တောထဲသွားရောက် နေထိုင်ရကာ အတင်းအဓမ္မ နေအိမ်သို့ပြန်ခိုင်းပြီး မပြန်ပါက အိမ်ချိတ်ပိတ်၊ ပစ္စည်းသိမ်း၊ ဒဏ်ငွေဆောင်ရမည်ဟု ခြိမ်းခြောက် လျက်ရှိကြောင်း သိရသည်။

ထိုသို့ အကြောင်းအမျိုးမျိုးကြောင့် နေရပ်ပြန်လာကြရသည့် စစ်ရှောင်ဒေသခံ ပြည်သူများသည် ဆက်တိုက်ဆိုသလို မိုင်းအန္တရာယ်များကို ရင်ဆိုင်ကြုံတွေ့ ထိခိုက်မှုများ ရှိနေကြပြီး ကျန်ရှိ စစ်ဘေးရှောင်များမှာ အရေးပေါ် စားနပ်ရိက္ခာ၊ အကူအညီများ လိုအပ်မှုမြင့်မားနေကြောင်း PYO နှင့် ဒေသခံများထံက သိရသည်။

ပုံစာ- ပအိုဝ်းပြည်သူ့စစ်အဖွဲ့ (PNO/PNA) တပ်ဖွဲ့ဝင်များကိုတွေရစဉ် (ပုံဟောင်း)

#ရှမ်းတောင် #နှစ်ဆန်းပိုင်း #တကျော့ပြန်စစ်ရေးတင်းမာမှု #ဖြစ်ပွား #Ayeyarwaddy_Times

၂၀၂၄ ခုနှစ်အတွင်း တရုတ်ရဲ့ မြေရှားသတ္ထု ပြည်ပတင်ပို့မှု မြင့်တက်

ဧရာဝတီတိုင်းမ်
ဇန်နဝါရီ ၁၄ ရက်

တရုတ်နိုင်ငံရဲ့ မြေရှားသတ္ထုတင်ပို့မှုဟာ ၂၀၂၄ ခုနှစ်အတွင်း ၆ ရာခိုင်နှုန်း မြင့်တက်ခဲ့တယ်လို့ အကောက်ခွန်ဌာန အချက်အလက်တွေအရ သိရပါတယ်။

တရုတ်နိုင်ငံဟာ ပြီးခဲ့တဲ့နှစ်က လျှပ်စစ်ကားမှ လူသုံးကုန် အီလက်ထရောနစ်အထိ ကုပစ္စည်းအ မျိုးမျိုး ထုတ်လုပ်ရာမှာ အသုံးပြုတဲ့ တန်ချိန် ၅၅၄၃၁ ရှိတဲ့ မြေရှားသတ္ထု ၁၇ မျိုး တင်ပို့ခဲ့တယ်လို့ အ ကောက်ခွန်ဌာန အချက်အလက်တွေက ဖော်ပြပါတယ်။

ယခုပမာဏဟာ တရုတ်နိုင်ငံရဲ့ မြေရှားသတ္ထုတင်ပို့မှု စံချိန်တင်တဲ့ ၂၀၁၄ ခုနှစ်နောက်ပိုင်း အ မြင့်မားဆုံးပမာဏဖြစ်ပြီး ပြည်တွင်းဝယ်လိုအားကို အကန့်အသတ်ထားပေမယ့် ပြည်ပတင်ပို့မှု မြင့် တက်ခဲ့တာပါ။

တရုတ်နိုင်ငံရဲ့ ပြီးခဲ့တဲ့လက မြေရှားသတ္ထုတင်သွင်းမှုမှာ ၂၀၂၃ ခုနှစ်က တင်သွင်းခဲ့တဲ့ တန်ချိန် ၉၆၄၅ ထက် ၄၁ ဒသမ ၁ ရာခိုင်နှုန်း လျှော့နည်းခဲ့ပါတယ်။

တရုတ်နိုင်ငံရဲ့ ၂၀၂၄ ခုနှစ်အတွင်း မြေရှားသတ္ထုတင်သွင်းမှု လျှော့နည်းတာဟာ ကမ္ဘာပေါ်မှာ အ ဓိက မြေရှားသတ္ထုထုတ်လုပ်တဲ့ အမေရိကန်နဲ့မြန်မာမှ တင်သွင်းမှုလျှော့နည်းတာကြောင့်လို့ လေ့လာသူ တွေက ပြောပါတယ်။

တရုတ်နိုင်ငံသို့ မြေရှားသတ္ထုတွေ အဓိကတင်ပို့ရာ သတ္ထုမိုင်းတစ်ခုကို ထိန်းချုပ်ခဲ့တယ်လို့ မြန် မာစစ်ကောင်စီကို တိုက်ခိုက်နေတဲ့ KIA အဖွဲ့က အောက်တိုဘာလအတွင်း ပြောကြားခဲ့ပါတယ်။

အမေရိကန်နဲ့မြန်မာမှ မြေရှားသတ္ထုတင်သွင်းမှုဟာ ပြီးခဲ့တဲ့နှစ် ပထမ ၁၁ လအတွင်း နှစ်အ လိုက် ၁၄ ဒသမ ၆ ရာခိုင်နှုန်းနဲ့ ၃၁ ဒသမ ၆ ရာခိုင်နှုန်း လျော့နည်းခဲ့တယ်လို့ အကောက်ခွန်ဌာန အ ချက်အလက်တွေက ဖော်ပြခဲ့ပါတယ်။

ကိုးကား - Reuters
Ref; China's rare earth exports in 2024 climb as home demand limited

#Ayeyarwaddy_Times

မြန်မာ့နိုင်ငံ၌ကုန်သွယ်မှုဆိုင်ရာလုပ်ငန်းများ ဆောင်ရွက်ရာတွင် ပို့ကုန်/သွင်းကုန် ကုန်သွယ်မှု ဆိုင်ရာ လုပ်ငန်းနှင့်ပတ်သက်၍ အခက်အခဲများရှိဟု အိန္ဒိယစီးပွားရေးလုပ်ငန်းရှင်များပြော

‌ဧရာဝတီတိုင်းမ်
ဇန်နဝါရီ ၁၄ ရက်

မြန်မာနှင့် ကုန်သွယ်ဖက်နိုင်ငံဖြစ်‌သော အိန္ဒိယနိုင်ငံသည် မြန်မာ့ကုန်သွယ်မှုဆိုင်ရာလုပ်ငန်း ပို့ကုန်/သွင်းကုန်ကဏ္ဍတွင် အခက်အခဲရှိနေကြောင်း အိန္ဒိယစီးပွားရေးလုပ်ငန်းရှင်များ၏ ပြောကြားချက်အရ သိရသည်။

မြန်မာနိုင်ငံကုန်သည်များနှင့် စက်မှု လက်မှုလုပ်ငန်းရှင်များအသင်းချုပ် (UMFCCI) နှင့် အိန္ဒိယ-မြန်မာ ကုန်သည်ကြီးများအသင်း (IMCC) တို့ ပြီးခဲ့သည့် ဇန်နဝါရီ ၁၀ ရက်နေ့က တွေ့ဆုံရာတွင် ယင်းကဲ့သို့ ပြောကြားခဲ့ခြင်းဖြစ်သည်။

UMFCCI နှင့် IMCC တို့ တွေ့ဆုံပွဲသို့ မြန်မာနိုင်ငံတွင်ရင်းနှီးမြှုပ်နှံပြီး စီးပွား‌ရေးလုပ်ငန်းများ ဆောင်ရွက်သော အိန္ဒိယစီးပွားရေးလုပ်ငန်းရှင်များ ၃၀၀ ကျော်ခန့်တက်ရောက်ခဲ့ပြီး လက်ရှိတွင် ကွန်တိန်နာ အခက်အခဲနှင့် သယ်ယူပို့ဆောင်မှု၊ ပို့ကုန်သွင်းကုန်လိုင်စင်ဆိုင်ရာကိစ္စရပ်များ၊ ဆေးဝါးနှင့် အလှကုန်တင်သွင်းမှုအတွက် FDA မှတ်ပုံတင်ရာတွင် ကြန့်ကြားမှုများရှိကြောင်း စီးပွားရေးလုပ်ငန်းရှင်များထံက သိရသည်။

"ကွန်တိန်နာပို့ဖို့။ သွင်းဖို့ဆိုရင်အထောက်အထားစာရွက် စာတမ်းတွအများကြီးလိုတယ်။ ဌာနဆိုင်ရာ ထောက်ခံချက်တွလိုတယ်ပေါ့။ အဲဒါတွေပြီးလို့ဆိပ်ကမ်းရောက်ရင်လည်း coustoms က ရစ်တာ ရှိတယ်။ import တွေဆိုရင်လည်း coustoms မစစ်ဆေးရသေးလို့ မထုတ်နိုင်တာတွေ အများကြီးပဲ။ လက်စားမှုတွေပိုများလာတယ် " ဟု export/import ကိုယ်စားလှယ်လုပ်ငန်းဆောင်ရွက်သူ အမျိုးသား တစ်‌‌ဦးက ဧရာ၀တီတိုင်းမ်ကို ပြောသည်။

လက်ရှိတွင်လုပ်ငန်းပြီးပြတ်နိုင်ရန်အတွက် export နှင့် import တင်သွင်း၊ တင်ပို့လိုသော ကုန်ပစ္စည်းကိုတာဝန်ယူစစ်‌ဆေးရသည့် သက်ဆိုင်ရာဝန်ကြီးဌာနများအပြင် အကောက်ခွန်ဦးစီးဌာနက စာရွက်စာတမ်းတစ်ခါပြီးရန်အတွက် ကျပ်သိန်းနှင့်ချီလာဘ်စားမှုများရှိကြာင်း export/import ကိုယ်စားလှယ်လုပ်ငန်းဆောင်ရွက်သူထံက သိရသည်။

ထို့ပြင် လယ်ယာထွက်ကုန်များ တင်ပို့ရာတွင် Phyto Certificate လျှောက်ထားမှုနှင့် လယ်ယာ ထွက်ကုန် အရည်အသွေးဆိုင်ရာ ကိစ္စရပ်များ၊ ကျပ်-ရူပီး အသုံးပြုမှုလုပ်ငန်းစဉ်နှင့် ပို့ကုန်ရငွေ (Export Earning) ကိုင်ဆောင် အသုံး ပြုခွင့်အကန့် အသတ်များရှိကြောင်းသိရသည်။

ထိုသို့ အကန့်အသတ်များရှိသော်လည်း နှစ်နိုင်ငံအကြား ကုန်သွယ်မှုလုပ်ငန်းများ ပိုမိုဆောင်ရွက် နိုင်ရန်အတွက် ကျပ်-ရူပီး တိုက်ရိုက်ငွေပေးချေမှုစနစ်ကို ဆောင်ရွက်နေပြီး ကုန်သွယ်မှုဆိုင်ရာ ဖြေလျှော့ပးနေကြာင်း စစ်ကောင်စီ၏ စီးပွားရေးနှင့် ကူးသန်းရောင်းဝယ်‌ရေးဝန်ကြီး ဌာန၊ ဒုတိယဝန်ကြီး ဦးမင်းမင်းက ပြောကြားထားသည်။

ဓာတ်ပုံ - ဧရာဝတီတိုင်းမ်
#ကုန်သွယ်မှုအခက်အခဲ #အိန္ဒိယစီးပွားရေးလုပ်ငန်းရှင် #export #import #Ayeyarwaddy_Times

အပြည်ပြည်ဆိုင်ရာ စာနာမှုဉပဒေကို လိုက်နာကြဖို့ မြန်မာရှိ အဖွဲ့အစည်းအားလုံးကို ကုလ တိုက်တွန်း

ဧရာဝတီတိုင်းမ်
ဇန်နဝါရီ ၁၄ ရက်

ယခုသီတင်းပတ်အတွင်း ရခိုင်ပြည်နယ်မှာ လူပေါင်း ဒါဇင်နဲ့ချီ သေဆုံးခဲ့တဲ့ စစ်ကောင်စီရဲ့ လေ ကြောင်းတိုက်ခိုက်မှုဖြစ်ပွားပြီးနောက် အပြည်ပြည်ဆိုင်ရာ လူသားချင်းစာနာမှုဉပဒေကို လိုက်နာကြဖို့ မြန်မာနိုင်ငံရှိ အဖွဲ့အစည်းအားလုံးကို ကုလသမဂ္ဂက တိုက်တွန်းလိုက်ပါတယ်။

မြန်မာနိုင်ငံမှာ ပြည်တွင်းစစ် (၄) နှစ်ကြာမြင့်လာချိန်မှာ မြန်မာစစ်ကောင်စီရဲ့ အရပ်သားတွေအ ပေါ် တိုက်ခိုက်မှု ဖြစ်လာတာပါ။

စစ်ကောင်စီက ဗုဒ္ဓဟူးနေ့ နေ့လည်ပိုင်းက ရမ်းဗြဲမြို့နယ်၊ ကျောက်နီမော်ရွာကို လေကြောင်း တိုက်ခိုက်ခဲ့ရာ နေအိမ် ၅၀၀ ခန့် ပျက်စီးခဲ့ပြီး လူ (၄၀) ကျော် သေဆုံးခဲ့တယ်လို့ ကုလသမဂ္ဂနဲ့ အမျိုး သားညီညွတ်ရေးအစိုးရ (NUG) ရဲ့ ထုတ်ပြန်ချက်အရ သိရပါတယ်။

အာရက္ခတပ်တော် (AA) က စစ်ကောင်စီရဲ့ လေကြောင်းတိုက်ခိုက်မှုဖြစ်စဉ်ကို ဖော်ပြခဲ့ပြီး သေ ဆုံးသူ မူဆလင်ရွာသား (၂၅) ဉီးနဲ့ ဒဏ်ရာရရှိသူ (၁၂) ဉီးရဲ့အမည်ကို ထုတ်ပြန်ခဲ့ပါတယ်။

စစ်တပ်က ၂၀၂၁ ခုနှစ်၊ ဖေဖော်ဝါရီလမှာ နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည် ရဲ့ ရွေးကောက်ခံအစိုးရကို ဖြုတ်ချပြီးနောက်ပိုင်း မြန်မာနိုင်ငံဟာ ကစဉ့်ကလျားဖြစ်နေခဲ့ပြီး လူထုဆန္ဒပြ ပွဲတွေဟာ မျက်နှာစာပေါင်းစုံမှာ လက်နက်ကိုင်တော်လှန်မှုအဖြစ် ပြောင်းလဲသွားခဲ့ပါတယ်။

လေယာဉ်ဆီ ထောက်ပံ့နေတဲ့ စီးပွားရေးလုပ်ငန်းတွေကို မြန်ဆန်စွာ ဒဏ်ခတ်ပိတ်ဆို့ရေး စစ် ကောင်စီရဲ့ ဝင်ငွေရပေါက်တွေကို ဖြတ်တောက်ဖို့လုပ်ဆောင်နေတဲ့ Blood Money Campaign က တိုက်တွန်းခဲ့ပါတယ်။

“စစ်ကောင်စီထံ လေယာဉ်ဆီထောက်ပံ့တဲ့ကုမ္ပဏီတွေကို ဒဏ်ခတ်ပိတ်ဆို့မှသာ လေကြောင်း တိုက်ခိုက်မှုတွေ အမှန်တစ်ကယ် အဆုံးသတ်မှာဖြစ်ပါတယ်” လို့ Blood Money Campaign ရဲ့ ပြောရေး ဆိုခွင့်ရှိသူ မူလန်က ပြောပါတယ်။

ကိုးကား - Reuters
Ref; UN urges all parties in Myanmar to uphold humanitarian law after air strike

#Ayeyarwaddy_Times

စစ်ကောင်စီတပ်များ မကျီးဇင်ရွာအတွင်းသို့ တပ်ဆုတ်လာပြီး ရွှေသောင်ယံရှိအမြောက်တပ် တွင်လည်း အင်အားဖြည့်ကာ ခံစစ်ပြင်ဆင်

ဧရာဝတီတိုင်းမ်
ဇန်နဝါရီ ၁၀ ရက်

ဧရာဝတီတိုင်း၊ ပုသိမ်မြို့နယ်၊ မကျီးဇင်ကျေးရွာနှင့် ရခိုင်ပြည်နယ်၊ ဂွမြို့နယ်နယ်စပ်ရှိ ကုလားချောင်း၊ ဂျိုင်လယ်ကျေးရွာများတွင် ခံစစ်ပြင်ထားသည့် စစ်ကောင်စီတပ်များမှာဇန်နဝါရီ ၉ ရက်နေ့ မနက်ပိုင်းက မကျီးဇင်ရွာအတွင်းထိ တပ်ပြန်ဆုတ်လာကြောင်း ​သိရသည်။

" ကုလားချောင်း၊ ဂျိုင်လယ်ဘက်က တပ်တွေ ရွာထဲအထိ တပ်ဆုတ်လာကြတယ်။ AA က ခုချိန်အထိ ဘယ်နားရှိမှန်းတောင် သိရသေးတာမဟုတ်ဘူး။ ဂွမသိမ်းခင်ကတည်းက တပ်စွဲထားတာနဲ့ ခုပြန်ဆုတ်လာတာနဲ့ဆိုတော့ စစ်တပ်တင်မနည်းများနေပြီ"ဟု ဒေသခံတစ်ဦးက ဧရာဝတီတိုင်းမ်ကို ပြောသည်။

ဂွမြို့ကို AA က စတင်တိုက်ခိုက်နေချိန်ကတည်းက မကျီးဇင်ကျေးရွာရှိ ဂွချောင်းတံတားထိပ်နှင့် ကျေးရွာအတွင်း စစ်ကောင်စီတပ်များမှာ ယနေ့အချိန်အထိ တပ်စွဲထားကြောင်း ဒေသခံများက ဆိုသည်။

အဆိုပါ ကုလားချောင်း၊ ဂျိူင်လည် ကျေးရွာတို့အပြင် မကျီးဇင်၊ ဘောမိ စသည့် ကျေးရွာတို့မှ ​ဒေသခံများသည်လည်း ပုသိမ်မြို့နှင့် သာပေါင်းမြို့များသို့ ရှောင်တိမ်းနေကြရကြောင်း သိရသည်။

"ကုလာချောင်းနဲ့ ဂျိုင်လယ်က ရွာသားတွေတော့ ဒီရက်ပိုင်းပဲ ပြေးကြတယ်။ မပြေးပဲကျန်နေသူတွေလည်း ပြေးဖို့ပြင်ထားကြတယ်"ဟု ဒေသခံတစ်ဦးက ပြောသည်။

ထို့အပြင် ရွှေသောင်ယံမြို့ရှိ အမြောက်တပ်တွင်လည်း ပုသိမ်မြို့ရှိ အနောက်တောင်တိုင်းစစ်ဌာနချုပ်(နတခ)မှ စစ်ကား လေးစီးဖြင့် တပ်အင်အားဖြည့်တင်းကာ ခံစစ်ပြင်ဆင်မှုများပြုလုပ်နေကြောင်း ဒေသခံများထံ သိရသည်။

"ကမ်းခြေအတိုင်းလာရင် မကျီးဇင်က လှေနဲ့ကူးတာနဲ့ သဘော့ကန်၊ အဲ့ကဆက်လာရင် ရွှေသောင်ယံအရင်ရောက်မှာ။ ပြီးမှ ချောင်းသာဆိုတော့ ခံစစ်ကြိုပြင်နေတာပဲဖြစ်မယ်"ဟု ဒေသခံတစ်ဦးက ဧရာဝတီတိုင်းမ်ကို ပြောသည်။

ဇန်နဝါရီလ ၂ ရက်နေ့ကလည်း မကျီးဇင်၊ ဘောမိ စသည့်ကျေးရွာများတွင် ဂွမြို့မှ ထွက်ပြေးလာသည့် စစ်ကောင်စီတပ်အချင်းချင်းမှားယွင်းပစ်ခဲ့မှုဖြစ်ပွားခဲ့ကြောင်း သိရှိရသည်။

အာရက္ခတပ်တော် AA က ပြီးခဲ့သည့် ဒီဇင်ဘာလကုန်ပိုင်းတွင် ရခိုင်ပြည်နယ်၊ ဂွမြို့နယ်ကို တိုက်ခိုက်သိမ်းပိုက်ခဲ့ပြီးနောက် ဧရာဝတီတိုင်းအတွင်း တိုက်ပွဲဖြစ်ပွားဖြစ်ပွားမည်ကို စိုးရိမ်နေသည့် ဝန်ကြီးချုပ်နှင့် တိုင်းစစ်ကောင်စီအနေဖြင့် မော်တင်စွန်းဘုရား၌ ယတြာချေခြင်း၊ Non-CDM ဝန်ထမ်းများကို အပတ်စဥ် ပရိတ်ရွတ်ခိုင်းခြင်းများ လုပ်ဆောင်နေကြောင်း စစ်ကောင်စီနှင့် နီးစပ်သူများထံမှ သိရသည်။

ဓာတ်ပုံ - လူမှုကွန်ရက်
#မကျီးဇင် #ဂျိုင်လည် #ကုလားချောင်း #ခံစစ်ပြင် #စစ်ကောင်စီတပ် #တပ်ဆုတ် #Ayeyarwaddy_Times

"အဘနှင့် သူ၏စတန်းဒက်အာမီ"

ကာတွန်း - လက်ပံတန်း

#Ayeyarwaddy_Times #ကာတွန်း #လက်ပံတန်း

ချင်းကာကွယ်ရေးတပ်ဖွဲ့(ဟားခါး)ထံ စစ်ကောင်စီလက်အောက်ခံ ပြည်သူ့စစ် ၃ ဦး လက်နက်ခဲယမ်း များနှင့်အတူ အလင်းဝင်

ဧရာဝတီတိုင်းမ်
(ဟားခါး)၊ ဇန်နဝါရီလ ၉ ရက်

ချင်းပြည်နယ်၊ ဟားခါးမြို့တွင် တာဝန်ထမ်းဆောင်နေသော စစ်ကောင်စီလက်အောက်ခံ ပြည်သူ့စစ် တပ်ဖွဲ့ဝင် သုံးဦးသည် လက်နက်ခဲယမ်းများနှင့်အတူ ချင်းကာကွယ်ရေးတပ်ဖွဲ့(ဟားခါး)ထံ အလင်းဝင် ရောက်လာကြောင်းသိရသည်။

အဆိုပါစစ်ကောင်စီလက်အောက်ခံ ပြည်သူ့စစ်တပ်ဖွဲ့ဝင် သုံး ဦးတို့သည် ပြီးခဲ့သည့် ဇန်နဝါရီလ ၃ ရက်၊ ၆ ရက်နှင့် ၇ ရက်နေ့တို့တွင် အလင်းဝင်လာခြင်းဖြစ်ပြီး စစ်ကောင်စီလက်အောက်တွင် တာဝန် ထမ်းဆောင် လိုခြင်းမရှိသည့်အတွက် ပြည်သူများထံ လာရောက်ပူးပေါင်းခြင်းဖြစ်ကြောင်း ချင်းကာကွယ်ရေးတပ်ဖွဲ့ (ဟားခါး)က ထုတ်ပြန်ထားသည်။

ထို့သို့ အလင်းဝင်လာကြသော ပြည်သူ့စစ်တပ်ဖွဲ့ဝင် သုံးဦးကို ချင်းကာကွယ်ရေးတပ်ဖွဲ့(ဟားခါး)က ဆုငွေများအသီးသီးချီးမြှင့်ခဲ့ပြီး လွတ်မြောက်နယ်မြေအထိ တာဝန်ယူဆောင်ရွက်ပေးခဲ့ကြောင်း ထုတ်ပြန်ချက်အရ သိရသည်။

စစ်ကောင်စီလက်အောက်တွင် တာဝန်ထမ်းဆောင်လိုခြင်းမရှိဘဲ ပြည်သူများနှင့် ပူပေါင်းပါဝင်လိုသော စစ်ကောင်စီတပ်ဖွဲ့ဝင်များကို ချင်းကာကွယ်ရေးတပ်ဖွဲ့(ဟားခါး)အနေဖြင့် အမြဲကြိုဆိုနေပြီး အချိန် မရွေးဆက်သွယ်နိုင်ကြောင်းနှင့် လွတ်မြောက်နယ်မြေရောက်သည်အထိ တာဝန်ယူဆောင်ရွက်ပေးမည် ဖြစ်ကြောင်းCDF-Hakha က ထုတ်ပြန်ချက်တွင် အသိပေးဖော်ပြထားသည်။

စစ်ကောင်စီလက်အောက်ခံပြည်သူ့စစ်တပ်ဖွဲ့ဝင် သုံး ဦး အလင်းဝင်ရောက်လာမှုနှင့် ပတ်သက်ပြီး CDF-ဟားခါးကို ဧရာဝတီတိုင်းမ်အနေဖြင့် ဆက်သွယ်ခဲ့သော်လည်း ဖုန်းလိုင်းအခက်အခဲကြောင့် ဆက်သွယ် ၍ မရခဲ့ပေ။

ပုံစာ-CDF-ဟားခါးထံ အလင်းဝင်ရောက်လာသော ပြည်သူ့စစ် ၃ ဦး။

#ချင်းကာကွယ်ရေးတပ်ဖွဲ့ #ဟားခါး #စစ်ကောင်စီလက်အောက်ခံ #ပြည်သူ့စစ်၃ဦး #လက်နက်ခဲယမ်းများ #အလင်းဝင် #Ayeyarwaddy_Times

ထိုင်းနိုင်ငံ ယာဉ်တိုက်မှုမှာ မြန်မာမှ တရားမဝင် ရွှေ့ပြောင်းအမျိုးသမီး သေဆုံးပြီး နှစ်ဦး ဒဏ်ရာရ

ဧရာဝတီတိုင်းမ်
ဇန်နဝါရီ ၉ ရက်

ဇန်နဝါရီလ ၈ ရက် အစောပိုင်းက ထိုင်းနိုင်ငံ၊ ဆောင်ခလာဘူရီခရိုင်မှာ တရားမဝင် ရွှေ့ပြောင်း တွေကို သယ်ဆောင်လာတဲ့ ထရပ်ကားနှစ်စင်း တိုက်မိခဲ့ရာ မြန်မာနိုင်ငံမှ အမျိုးသမီးတစ်ဦးသေဆုံးကာ အမျိုးသားနှစ်ဦး ဒဏ်ရာရရှိခဲ့ပါတယ်။

သန်းခေါင်ယံချိန်ပြီးပြီးချင်း ယာဉ်မတော်တဆမှု ဖြစ်ပွားခဲ့တာလို့ ဆောင်ခလာဘူရီခရိုင် ရဲတပ် ဖွဲ့ အကြီးအကဲ ရဲမှူး ချန့်ဖေါင်သမ်မာဆွန်က ပြောပါတယ်။

ဗန်ကောက်ယာဉ်နံပါတ်ပါ ဒရိုင်ဘာမရှိတဲ့ ထရပ်ကားတစ်စင်းကို ရဲတပ်ဖွဲ့ဝင်တွေနဲ့ ကယ်ဆယ် ရေးသမားတွေက တွေ့ရှိခဲ့ပါတယ်။ နာခွန်ပသွန်နံပါတ်ပါ နောက်ထပ်ထရပ်ကားတစ်စင်းကို လမ်းဘေး မြောင်းထဲ စွန့်ပစ်ထားတာကို တွေ့ရှိခဲ့ပါတယ်။

မြန်မာနိုင်ငံမှ တရားမဝင် ရွှေ့ပြောင်းအမျိုးသမီးတစ်ဉီးကို သေဆုံးလျက် တွေ့ရှိခဲ့ပြီး အမျိုးသား နှစ်ဉီး ဒဏ်ရာရရှိကာ ဒဏ်ရာရရှိသူတွေကို ဆောင်ခလာဘူရီဆေးရုံသို့ ပို့ဆောင်ခဲ့ပါတယ်။

နောင်လူရှိ လုံခြုံရေးစစ်ဆေးရေးဂိတ်ကို ရှောင်ရှားဖို့ မြန်မာနိုင်ငံမှ လူ ၃၀ ပါအဖွဲ့ဟာ သဘာဝ ဖြတ်လမ်းတစ်ခုကို အသုံးပြုပြီး နယ်စပ်ကို တရားမဝင် ဖြတ်ကျော်ဝင်ရောက်ခဲ့တာလို့ ဒဏ်ရာရရှိသူနှစ် ဉီးက ရဲတပ်ဖွဲ့ကို ပြောပါတယ်။

ထိုင်းမြေကို ရောက်ရှိတဲ့အခါ ယာဉ်တိုက်မှုမှာပါဝင်တဲ့ ထရပ်ကားနှစ်စင်းက ၎င်းတို့ကို စောင့် ဆိုင်းနေတာလို့ ဒဏ်ရာရရှိသူနှစ်ဉီးက ဆိုပါတယ်။

ယာဉ်မောင်းနှစ်ဉီးစလုံးဟာ တရားမဝင် အခြားရွှေ့ပြောင်းတွေနဲ့အတူ ယာဉ်တိုက်မှုဖြစ်ပွားပြီး နောက် ထွက်ပြေးသွားခဲ့ပါတယ်။

ရဲတပ်ဖွဲ့ဟာ မော်တော်ကားတွေရဲ့ မှတ်ပုံတင်ထားတဲ့ ပိုင်ရှင်တွေကို စစ်ဆေးတာအပါအဝင် စုံ စမ်းစစ်ဆေးမှု ဆက်လက်ပြုလုပ်နေပါတယ်။

ကိုးကား - Bangkok Post
Ref; Illegal migrant killed, 2 injured in crash near border

#Ayeyarwaddy_Times

ကျုံပျော်မြို့နယ်တွင် ဒေသခံလယ်မြေများကိုသိမ်းပြီး စစ်ကောင်စီက ရဟတ်ယာဥ်ကွင်းတည်ဆောက်ရန်ပြင်ဆင်

ဧရာဝတီတိုင်းမ်
ဇန်နဝါရီ ၉ ရက်

ဧရာ၀တီတိုင်း ၊ ကျုံပျော်မြို့နယ်၊ ငါးပြေမရိုးကျေးရွာရှိ ဒေသခံများ၏ လယ်မြေများကို သိမ်းယူပြီး စစ်ကောင်စီက ရဟတ်ယာဥ်ကွင်း တည်ဆောက်ရန် ဇန်နဝါရီ ၄ ရက်နေ့က ပြင်ဆင်နေကြောင်း သတင်းရရှိသည်

ငါးပြေမရိုးကျေးရွာအနီးရှိ လယ်မြေကိုးဧကကို သိမ်းယူပြီး ရဟတ်ယာဥ်ကွင်းတည်ဆောက်ရန် စစ်ကောင်စီတပ်က ကားကြီးသုံးစီးဖြင့် လာရောက်တိုင်းတာခဲ့ကြောင်း သိရှိရသည်။

"လောလောဆယ်တော့ အလံနီတွေစိုက်ထားတယ်။ ရဟတ်ယာဥ်ကွင်းလား၊ လေယာဥ်ကွင်းလားတော့မသိသေးဘူး။ အရေးပေါ်ဆောက်မယ့်ပုံစံပဲ"ဟု ဒေသခံတစ်ဦးမှ ဧရာ၀တီတိုင်းမ်ကို ပြောသည်။

အဆိုပါရဟတ်ယာဥ်ကွင်းတည်ဆောက်မည့်နေရာသည် ကျုံပျော်မြို့အခြေစိုက် ခလရ ၃၆ တပ်၏ အနောက်ဘက်တွင်နီးကပ်စွာတည်ရှိသောကြောင့် တိုက်ပွဲများဖြစ်ပေါ်လာပါက စစ်ရေးအရအကူအညီပေးရန်ဆောက်လုပ်ခြင်းဖြစ်နိုင်ကြောင်း စစ်ကောင်စီနှင့်နီးစပ်သူတစ်ဦးမှ ပြောသည်။

ပြီးခဲ့သည့် ၂၀၂၄ ခုနှစ် နှစ်ကုန်ပိုင်းကလည်း ရေကြည်မြို့နယ်ရှိ အမြောက်တပ် ၃၄၄ အနီးတွင် တစ်မိုင်ပတ်လည်ရှိ လေယာဉ်ကွင်းကို တည်ဆောက်ခဲ့သည်။

အာရက္ခတပ်တော် AA မှ ဧရာဝတီတိုင်းနှင့် ဂွမြို့နယ်အစပ်ရှိ စစ်ကောင်စီ၏ ဗေဒါစစ်ဆေးရေးဂိတ်ကို ဝင်ရောက်တိုက်ခိုက်သည့်နောက်ပိုင်းတိုင်း ယခုကဲ့သို့ အရေးပေါ် ရဟတ်ယာဉ်ကွင်းများတည်ဆောက်လာခြင်းဖြစ်သည်။

ပုံစာ- ၂၀၂၂ ခုနှစ်က ဂွမြို့နယ် ဘောလုံးကွင်း၌ ရဟတ်ယာဉ်ကွင်းပြုလုပ် နေသည်ကိုတွေ့ရစဉ်

#ကျုံပျော်မြို့နယ် #ဒေသခံလယ်မြေများ #စစ်ကောင်စီ #ရဟတ်ယာဥ်ကွင်း #တည်ဆောက်ရန်ပြင်ဆင် #Ayeyarwaddy_Times

အမ်း-ပဒါန်းလမ်းပေါ်ရှိ အမ်း ရိုးမဘက်ခြမ်းမှ စစ်ကောင်စီစခန်းအားလုံးကို AA သိမ်းပိုက်ထိန်းချုပ်

ဧရာဝတီတိုင်းမ်
ဇန်နဝါရီ ၉ ရက်

အမ်း-ပဒါန်းလမ်းပိုင်းရှိ အမ်းမြို့နယ်ဘက်ခြမ်းတွင်ရှိ သည့် စစ်ကောင်စီစခန်းအားလုံးကို အာရက္ခတပ်တော် (AA) က သိမ်းပိုက်ထိန်းချုပ်ထားပြီဖြစ်ကြောင်း သိရသည်။

အမ်းရိုးမဘက်ခြမ်းမှ မကွေးတိုင်းအစပ်ထိ စစ်ကောင်စီတပ်စွဲထားရာ စခန်းအားလုံးကို AA က သိမ်း ပိုက်ထိန်းချုပ်လိုက်ပြီး အမ်းရိုးမတစ်ခုလုံးကို ထိန်း ချုပ်လိုက်ခြင်းဖြစ်ကြောင်း သိရသည်။

"အမ်းဘက်ခြမ်းကို AA ကအပြည့်အဝထိန်းချုပ်လိုက်ပြီ။ ပဒါန်းလမ်းပိုင်းမှာတော့ တော်လှန်ရေးပူးပေါင်းတပ်တွေ နေရာယူထားတယ်။ စစ်တပ်က ပဒါန်းကနေ ကပစ တွေဘက် ဦးလှည့်လာမှာ စိုးရိမ်နေတယ်"ဟု ရခိုင်စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။

ရခိုင်ရိုးမဘက်ခြမ်းရှိ ပဲပဒုံ၊ ပတ်ကွေ့၊ ဆင်ဂုံတိုင်၊ တောင်စောက်ဂိတ်၊ ငပြယ်၊ ကြက်ရေစမ်း၊ ပိန်းရေ စမ်း အစရှိသည့် စစ်ကောင်စီဂိတ်စခန်းများကို AA က ထိန်းချုပ်လိုက်ခြင်းဖြစ်သည်။

ပြီးခဲ့သည့်ရက်ပိုင်းအတွင်းက စစ်ကောင်စီ၏ တောင် စောက်ဂိတ်နှင့် တရုတ်ဓာတ်ငွေ့ပိုက်လိုင်းစက်ရုံတို့ကို AAက သိမ်းယူထားပြီး ကျန်ရှိနေသည့် စခန်းအားလုံးကို ယမန်နေ့ ဇန်နဝါရီ ၈ ရက်နေ့တွင် အပြီးသတ်သိမ်းပိုက်လိုက်ကြောင်း သိရသည်။

စစ်ကောင်စီသည် အမ်းသို့ ပြန်လည်ထိုးစစ်ဆင်ရန် ပြင်ဆင်ထားသည့် နတ်ရေကန်စခန်းဘက်တွင် အင်အားဖြည့်တင်း နေပြီး အမ်း အနောက်ပိုင်းတိုင်းစစ်ဌာနချုပ် (နပခ)အတွင်းသို့လည်း လေကြောင်းတိုက်ခိုက်မှု ပြုလုပ်လျက်ရှိကြောင်း သိရ သည်။

AA သည် လတ်တလောတွင် အမ်း-ပဒါန်းလမ်းရှိ အမ်း ဘက်ခြမ်းကို ထိန်းချုပ်လိုက်ပြီး တောင်ကုတ်-ပန်း တောင်းလမ်းရှိ တောင်ပုံကြီးစခန်းကို သိမ်းပိုက်ကာ တောင်ကုတ်လမ်းပိုင်းကိုပါ ထိန်းချုပ်ထားကြောင်း သိရ သည်။

ထို့အပြင် ဂွနှင့် ဧရာဝတီတိုင်းတို့ ထိစပ်လျက်ရှိသည့် ဂွ-ငါးသိုင်းချောင်းလမ်းကိုလည်း ပိတ်ဆို့ဖြတ်တောက်ရန် ကြိုးပမ်းနေပြီး နယ်ချင်းစပ်လျက်ရှိသည့် ဗေဒါဂိတ်စခန်းကိုပါ AA က သိမ်းယူထားသည်။

ပုံစာ-ဒီဇင်ဘာလက ဂွမြို့အား AAသိမ်းပိုက်ခဲ့စဥ်။

#အမ်း #ပဒါန်း #အမ်းရိုးမ #စစ်ကောငီ #စခန်း #AA #သိမ်းပိုက် #ထိန်းချုပ် #Ayeyarwaddy_Times

တောင်ကုတ်-ပြည်ပန်းတောင်းလမ်းပေါ်ရှိ တောင်ပုံကြီးဂိတ်စခန်းကို AA သိမ်းပိုက်ထိန်းချုပ်

ဧရာဝတီတိုင်းမ်
ဇန်နဝါရီ ၉ ရက်

တောင်ကုတ်-ပြည်ပန်းတောင်းလမ်းပေါ်ရှိ စစ်ကောင်စီ၏ တောင်ပုံကြီးဂိတ်စခန်းကို အာရက္ခ တပ်တော် (AA) နှင့်ပူးပေါင်းတပ်ဖွဲ့ များက သိမ်းပိုက်ထိန်းချုပ်လိုက်ကြောင်း သိရသည်။

AA သည် ပြီးခဲ့သည့် ဇန်နဝါရီ ၆ ရက်နေ့ကတည်းက တောင်ပုံ ကြီးဂိတ်ကို ပိတ်ဆို့ထားပြီး ယမန်နေ့ ဇန်နဝါရီ ၈ ရက်နေ့က စခန်းကို အပြီးသတ်သိမ်းပိုက်လိုက်ကြောင်း စစ်ရေးသတင်းရင်းမြစ်ထံက သိရသည်။

"ရက်ပိုင်းအတွင်းမှာပဲ ပိတ်ဆို့လိုက်နိုင်ပြီး စစ်ကူတွေကိုဖြတ်တောက်လိုက်နိုင်တာပေါ့။ တောင်ပုံကြီး စခန်း ကို ရပါပြီ"ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။

စစ်ကောင်စီတပ်သည် ပန်းတောင်းမြို့အဝင်ဂိတ်ထိ တပ်ဆုတ်သွားပြီးနောက် အရေးပေါ်ခုခံစစ်ကို ပြင်ဆင်၍ စစ်ကူအင်အားများပါတိုးချဲ့ထားပြီး တောင်ပုံကြီးဂိတ်စခန်းကို အဓိကကွပ်ကဲနေသည့် (စကခ-၅) တပ်မမှူး ဗိုလ်မှူးချုပ်ကောင်းမြတ်နှင့်အဖွဲ့သည် စခန်းကိုစွန့်ခွာကာ ပြည်ဘက်သို့ ထွက်ပြေးသွားကြောင်း ဒေသတွင်း သတင်းဌာနများ၏ ဖော်ပြချက်အရ သိရသည်။

တောင်ကုတ်-ပြည်ပန်းတောင်းလမ်းရှိ နောက်ဆုံးကျန် ရစ်သည့် စစ်ကောင်စီဂိတ်စခန်း သိမ်းဆည်းခံရချိန်တွင် စစ်ကောင်စီက ပန်းတောင်းမြို့နယ်၊ ဥသျှစ်ပင်မြို့အတွင်းသို့ ပုသိမ်-မုံရွာလမ်းပိုင်းမှ စစ်ကားများဖြင့် အင်အားအများအပြား ပို့ဆောင်နေကြောင်း ဒေသတွင်း သတင်းရင်းမြစ် ဒို့ပြည်ထံက သိရသည်။

တောင်ပုံကြီးတိုက်ပွဲအတွင်း သေဆုံးခဲ့သည့် စစ်ကောင်စီတပ်ဖွဲ့ဝင်များကို ပြည်မြို့သုဿာန် တွင် မီးသင်္ဂြိုဟ်ခဲ့ကြောင်း သိရသည်။

ထို့ပြင် စစ်ကောင်စီက ၎င်းတို့၏ နောက်ဆုံးဂိတ်စခန်း ဆုံးရှုံး သွားချိန်တွင် ရခိုင်ရိုးမနှင့် ပဲခူးရိုးမ အစပ်တွင်ရှိသည့် ကျောက်မိုင်းများကို ပိတ်ကာ ဖောကားများကို အင်အားပို့ဆောင်ရန် ချောဆွဲထားကြောင်း သိရသည်။

ပုံစာ-AA တပ်ဖွဲ့ဝင်များ (ပုံဟောင်း)
#တောင်ကုတ် #ပြည် #ပန်းတောင်း #ဥသျှစ်ပင် #‌စစ်ကောင်စီ #တောင်ပုံကြီးစခန်း #AA #ပူးပေါင်းတပ်ဖွဲ့ #သိမ်းပိုက် #Ayeyarwaddy_Times

မဏိပူရ်ပြည်နယ်ရှိ မြန်မာစစ်ဘေးရှောင်များကို အာဏာပိုင်အဖွဲ့မှ နေရပ်ပြန်ရန် ဖိအားပေး

ဧရာဝတီတိုင်းမ်
ဇန်နဝါရီ ၈ရက်

အိန္ဒိယနိုင်ငံ၊ မဏိပူရ်ပြည်နယ်၊ ဂျန်ဒေခရိုင်၊ တင်နိုပယ်ခရိုင်နှင့် ကမ်ဂျွန်ခရိုင်ရှိ မြန်မာစစ်ဘေးရှောင်များ ၆,၀၀၀ ကျော်ကို နေရပ်ပြန်ရန် ခရိုင်အုပ်ချုပ်ရေးအဖွဲ့မှ ဖိအားပေးနေကြောင်း စစ်ဘေးရှောင်တာဝန်ရှိသူထံက သိရှိရသည်။

ကမ်ဂျွန်ခရိုင်ရှိ မြန်မာစစ်ဘေးရှောင်များသည် ဇန်နဝါရီ ၉ ရက်နေ့ နောက်ဆုံးထား၍ ထွက်ခွါပေးရမည်ဖြစ်ကြောင်း ခရိုင်အုပ်ချုပ်ရေးအဖွဲ့က ယမန်နေ့ ဇန်နဝါရီ ၇ ရက်တွင် စစ်ဘေးရှောင်များကို အကြောင်းကြားထားသည်။

"အစကတော့ ပြန်ရမယ်ထဲ ကျောင်းသားကလေးတွေ မပါဘူးပေါ့။ ကလေးတွေက ကျန်ခဲ့ပြီး ကျောင်းဆက်တက်ရမယ်။ နောက်တော့မှ တာဝန်ရှိသူတွေက ထပ်လာပြောတယ်။ ကျန်းမာရေးမကောင်းတဲ့သူတွေကလွဲရင် ကျောင်းသား ကလေး၊ လူကြီးအပါအဝင် အကုန်လုံး ပြန်ရမယ်တဲ့။ အဲလိုဆိုတော့ ကလေးတွေ ပညာရေးထိခိုက်နစ်နာသွားတာပေါ့” ဟု စစ်ဘေးရှောင်တာဝန်ရှိသူက ဧရာဝတီတိုင်းမ်ကို ပြောသည်။

ခရိုင်အုပ်ချုပ်ရေးအဖွဲ့၏ ဖိအားပေးမှုကြောင့် ကမ်ဂျွန်ခရိုင်ရှိ စစ်ဘေးရှောင်များသည် ယနေ့မှစ၍ မြန်မာပြည်သို့ နေရပ်ပြန်နေပြီဖြစ်ကြောင်း သိရှိရသည်။

အလားတူ တင်နိုပယ်ခရိုင်နှင့် ဂျန်ဒေခရိုင်ရှိ မြန်မာစစ်ဘေးရှောင်များကိုလည်း အခုရက်ပိုင်းတွင်း ဒေသအာဏာပိုင်အဖွဲ့က လာရောက်ပြီး နေရပ်ပြန်ရန် မကြာခဏ ဖိအားပေးသည့်အတွက် စစ်ဘေးရှောင်များသည် နေရပ်ပြန်နိုင်ရန် ပြင်ဆင်နေပြီဖြစ်ကြောင်း သိရှိရသည်။

"ဒီဘက်က စစ်ဘေးရှောင်တွေကိုလည်း အာဏာပိုင်အဖွဲ့တွေရော၊ ဒေသတွင်း လက်နက်ကိုင်အဖွဲ့တွေ၊ ဒေသခံတွေရော နည်းမျိုးစုံနဲ့ ဖိအားပေးနေတာ။ အခုပစ္စည်းတွေ မြန်မာပြည်ဘက်ရွှေ့တာတောင် ဒေသခံတွေက ဒီဘက်ကနေ မလာနဲ့ ဟိုဘက်ကသွားဆိုပြီး ပြောနေတယ်။ နယ်စပ်ဂိတ်လည်း အဲအတိုင်းပဲ စစ်ဆေးတင်းကြပ်တာတွေ အမျိုးမျိုးလုပ်ကြတယ်” ဟု စစ်ဘေးရှောင်တာဝန်ရှိသူတစ်ဦးက ဧရာဝတီတိုင်းမ်ကို ပြောသည်။

တင်နိုပယ်ခရိုင်၊ ဂျန်ဒေခရိုင်နှင့် ကမ်ဂျွန်ခရိုင်ရှိ မြန်မာစစ်ဘေးရှောင်များသည် ပြီးခဲ့သည့် ၂၀၂၃ ခုနှစ်၊ ဒီဇင်ဘာလတွင် စစ်ကိုင်းတိုင်း၊ တမူးမြို့နယ် တိုက်ပွဲတွင်း ထွက်ပြေးတိမ်းရှောင်လာကြသည့် စစ်ဘေးရှောင်များဖြစ်သည်။

ပြီးခဲ့သည့် ၂၀၂၄ ခုနှစ်၊ ဇွန် ၆ ရက်နေ့ကလည်း ကမ်ဂျွန်ခရိုင်၊ နန်မလီ ကျေးရွာမှ မြန်မာစစ်ဘေးရှောင် ၅၀၀ ကျော်သည် ဒေသတွင်း အာဏာပိုင်အဖွဲ၊ လက်နက်ကိုင်အဖွဲ့နှင့် ဒေသခံတို့၏ ဖိအားပေးမှုကြောင့် နေရပ်ပြန်ခဲ့ရသည်။

#မဏိပူရ်ပြည်နယ် #မြန်မာစစ်ဘေးရှောင်များ #အာဏာပိုင်အဖွဲ့ #နေရပ်ပြန်ရန်ဖိအားပေး #Ayeyarwaddy_Times

မဏိပူရ်ပြည်နယ်ရှိ မြန်မာစစ်ဘေးရှောင်များကို အာဏာပိုင်အဖွဲ့မှ နေရပ်ပြန်ရန် ဖိအားပေး

ဧရာဝတီတိုင်းမ်
ဇန်နဝါရီ ၈ရက်

အိန္ဒိယနိုင်ငံ၊ မဏိပူရ်ပြည်နယ်၊ ဂျန်ဒေခရိုင်၊ တင်နိုပယ်ခရိုင်နှင့် ကမ်ဂျွန်ခရိုင်ရှိ မြန်မာစစ်ဘေးရှောင်များ ၆,၀၀၀ ကျော်ကို နေရပ်ပြန်ရန် ခရိုင်အုပ်ချုပ်ရေးအဖွဲ့မှ ဖိအားပေးနေကြောင်း စစ်ဘေးရှောင်တာဝန်ရှိသူထံက သိရှိရသည်။

ကမ်ဂျွန်ခရိုင်ရှိ မြန်မာစစ်ဘေးရှောင်များသည် ဇန်နဝါရီ ၉ ရက်နေ့ နောက်ဆုံးထား၍ ထွက်ခွါပေးရမည်ဖြစ်ကြောင်း ခရိုင်အုပ်ချုပ်ရေးအဖွဲ့က ယမန်နေ့ ဇန်နဝါရီ ၇ ရက်တွင် စစ်ဘေးရှောင်များကို အကြောင်းကြားထားသည်။

"အစကတော့ ပြန်ရမယ်ထဲ ကျောင်းသားကလေးတွေ မပါဘူးပေါ့။ ကလေးတွေက ကျန်ခဲ့ပြီး ကျောင်းဆက်တက်ရမယ်။ နောက်တော့မှ တာဝန်ရှိသူတွေက ထပ်လာပြောတယ်။ ကျန်းမာရေးမကောင်းတဲ့သူတွေကလွဲရင် ကျောင်းသား ကလေး၊ လူကြီးအပါအဝင် အကုန်လုံး ပြန်ရမယ်တဲ့။ အဲလိုဆိုတော့ ကလေးတွေ ပညာရေးထိခိုက်နစ်နာသွားတာပေါ့” ဟု စစ်ဘေးရှောင်တာဝန်ရှိသူက ဧရာဝတီတိုင်းမ်ကို ပြောသည်။

ခရိုင်အုပ်ချုပ်ရေးအဖွဲ့၏ ဖိအားပေးမှုကြောင့် ကမ်ဂျွန်ခရိုင်ရှိ စစ်ဘေးရှောင်များသည် ယနေ့မှစ၍ မြန်မာပြည်သို့ နေရပ်ပြန်နေပြီဖြစ်ကြောင်း သိရှိရသည်။

အလားတူ တင်နိုပယ်ခရိုင်နှင့် ဂျန်ဒေခရိုင်ရှိ မြန်မာစစ်ဘေးရှောင်များကိုလည်း အခုရက်ပိုင်းတွင်း ဒေသအာဏာပိုင်အဖွဲ့က လာရောက်ပြီး နေရပ်ပြန်ရန် မကြာခဏ ဖိအားပေးသည့်အတွက် စစ်ဘေးရှောင်များသည် နေရပ်ပြန်နိုင်ရန် ပြင်ဆင်နေပြီဖြစ်ကြောင်း သိရှိရသည်။

"ဒီဘက်က စစ်ဘေးရှောင်တွေကိုလည်း အာဏာပိုင်အဖွဲ့တွေရော၊ ဒေသတွင်း လက်နက်ကိုင်အဖွဲ့တွေ၊ ဒေသခံတွေရော နည်းမျိုးစုံနဲ့ ဖိအားပေးနေတာ။ အခုပစ္စည်းတွေ မြန်မာပြည်ဘက်ရွှေ့တာတောင် ဒေသခံတွေက ဒီဘက်ကနေ မလာနဲ့ ဟိုဘက်ကသွားဆိုပြီး ပြောနေတယ်။ နယ်စပ်ဂိတ်လည်း အဲအတိုင်းပဲ စစ်ဆေးတင်းကြပ်တာတွေ အမျိုးမျိုးလုပ်ကြတယ်” ဟု စစ်ဘေးရှောင်တာဝန်ရှိသူတစ်ဦးက ဧရာဝတီတိုင်းမ်ကို ပြောသည်။

တင်နိုပယ်ခရိုင်၊ ဂျန်ဒေခရိုင်နှင့် ကမ်ဂျွန်ခရိုင်ရှိ မြန်မာစစ်ဘေးရှောင်များသည် ပြီးခဲ့သည့် ၂၀၂၃ ခုနှစ်၊ ဒီဇင်ဘာလတွင် စစ်ကိုင်းတိုင်း၊ တမူးမြို့နယ် တိုက်ပွဲတွင်း ထွက်ပြေးတိမ်းရှောင်လာကြသည့် စစ်ဘေးရှောင်များဖြစ်သည်။

ပြီးခဲ့သည့် ၂၀၂၄ ခုနှစ်၊ ဇွန် ၆ ရက်နေ့ကလည်း ကမ်ဂျွန်ခရိုင်၊ နန်မလီ ကျေးရွာမှ မြန်မာစစ်ဘေးရှောင် ၅၀၀ ကျော်သည် ဒေသတွင်း အာဏာပိုင်အဖွဲ၊ လက်နက်ကိုင်အဖွဲ့နှင့် ဒေသခံတို့၏ ဖိအားပေးမှုကြောင့် နေရပ်ပြန်ခဲ့ရသည်။

#မဏိပူရ်ပြည်နယ် #မြန်မာစစ်ဘေးရှောင်များ #အာဏာပိုင်အဖွဲ့ #နေရပ်ပြန်ရန်ဖိအားပေး
#Ayeyarwaddy_Times

ဘိုကလေးတွင် စစ်ကောင်စီခန့် ရပ်ကွက်အုပ်ချုပ်ရေးမှူးက ပြည်သူ့စစ်မှုထမ်းအ​ကြောင်းပြ၍ ငွေတောင်း

ဧရာဝတီတိုင်းမ်
ဇန်နဝါရီ ၈ ရက်

ဧရာဝတီတိုင်း၊ ဘိုကလေးမြို့နယ်တွင် စစ်ကောင်စီခန့် ရပ်ကွက်အုပ်ချုပ်ရေးမှူးက ပြည်သူ့စစ်မှုထမ်းအ​ကြောင်းပြ၍ ငွေတောင်းနေကြောင်း ဒေသခံများထံက သိရသည်။

ဘိုကလေးမြို့ ၁ ရပ်ကွက် အုပ်ချုပ်ရေးမှူးမှာ ဦးပိစိဖြစ်ပြီး ရပ်ကွက်အတွင်းရှ်ိ စက်ရုံအလုပ်ရုံများမှ အလုပ်သမားများကို ပြည်သူ့စစ်မှုထမ်းအကြောင်းပြ၍ ခြိမ်းခြောက်ကာ ငွေတောင်းယူမှုပြုလုပ်သည်ဟု ဒေသခံများကပြောသည်။

"တော်တော်ဆိုးနေတာ စစ်မှုထမ်းဖိုဆိုပြီး ရပ်ကွက်အတွင်းက စက်ရုံအလုပ်ရုံတွေ ကအလုပ်သမားတွေကို အနိုင်ကျင့်
​ပြီး ပိုက်ဆံကောက်တာ မနည်းတော့ဘူး။ ပထမ ငွေတောင်းတယ်၊ အခုလဲတောင်းနေတာ။ ခုကတော်တော်လေးကို မခံနိုင်လွန်းလို့ပါ၊ ဘယ်သူ့မှ ဂရုမစိုက်ဘူးဆိုပြီး လုပ်ချင်တာလုပ်နေတာပါ"ဟု (၁) ရပ်ကွက်အတွင်း နေထိုင်သူတစ်ဦး ဧရာဝတီတိုင်းမ်က်ိုပြောသည်။

စက်ရုံအလုပ်ရုံရှိအတွင်း အလုပ် လုပ်ကိုင်သူတစ်ဦးလျှင် ပထမအကြိမ် တစ်သိန်းကျပ်တောင်းယူပြီး ဒုတိယအကြိမ်တွင် ငါးသောင်းကျပ် တောင်းယူကြောင်း ဘ်ိုကလေးမြို့ခံများကပြောသည်။

အုပ်ချုပ်ရေးမှူး ဦးပိစိသည် ၎င်းနှင့် ဆွေမျိုးတော်စပ်သူများကို ငွေတောင်းယူမှု ချန်လှပ်ထားပြီး စက်ရုံအလုပ်ရုံများမှ အလုပ်သမားများကိုသာ ငွေတောင်းယူမှုပြုလုပ်သည်ဟု မြို့ခံများက ပြောသည်။

အဆိုပါအုပ်ချုပ်ရေးမှူးသည် ယခု ဇန်နဝါရီလ လကုန်ပိုင်းတွင် အုပ်ချုပ်ရေးမှူးတာဝန် ရပ်နားရမည်ဖြစ်ပြီး အုပ်ချုပ်ရေးမှူးတာဝန် မရပ်နားရရေးအတွက် စစ်ကောင်စီတပ်မှ အရာရှိများက်ိုလည်း လာဘ်ငွေပေးနေရကြောင်း ဒေသခံများကပြောဆိုသည်။

ဧရာဝတီတိုင်းတွင် စစ်ကောင်စီခန့် ရပ်ကွက်၊ ရပ်ကျေးအုပ်ချုပ်ရေးမှူးအများစုမှာ ၂၀၂၄ ခုနှစ် အောက်တိုဘာလက စတင်ပြီး ပြည်သူ့စစ်မှု‌ထမ်းအကြောင်းပြ ခြိမ်း‌ခြောက်၍ ငွေကြေးတောင်းယူမှုများကို ပိုမိုလုပ်ဆောင်လာကြကြောင်း ဒေသခံများကပြောသည်။

ဧရာဝတီတိုင်းတွင် မြို့နယ်စုစုပေါင်း ၂၆ မြို့နယ်ရှိပြီး မြို့နယ်အလိုက် နည်းအမျိုးမျိုးဖြင့် ပြည်သူ့စစ်မှုထမ်းများကို စုဆောင်းလျှက်ရှိရာ သက်ဆိုင်ရာ တပ်မတော်တန်းမြင့်လေ့ကျင့်ရေးကျောင်းသို့ ပို့ဆောင်ကာ သင်တန်းပြီးဆုံးက ‌ရှေ့တန်းသို့ပိုဆောင်လျှက်ရှိကြောင်း တပ်တွင်းသတင်းရင်းမြစ်ထံကသိရသည်။

#ဘိုကလေး #စစ်ကောင်စီခန့် #ရပ်ကွက်အုပ်ချုပ်ရေးမှူး #ပြည်သူ့စစ်မှုထမ်းအ​ကြောင်းပြ #ငွေတောင်း
#Ayeyarwaddy_Times

ရေကြည်မြို့နယ် အမြောက်တပ်အနီးရှိ ကျေးရွာများတွင် ဗုံးခိုကျင်းတူးခြင်းနှင့်စစ်ဘေးရှောင်ခြင်းမပြုရန် စစ်ကောင်စီအမိန့်ထုတ်

ဧရာဝတီတိုင်းမ်
ဇန်နဝါရီ ၈ ရက်

ဧရာ၀တီတိုင်း၊ ရေကြည်မြို့နယ် ၊ မြောက်စမ်းကျေးရွာရှိ စစ်ကောင်စီရှိ အမြောက်တပ် အမှတ် ၃၄၄ အနိီး၀န်းကျင် ကျေးရွာများတွင် ဗုံးခိုကျင်းတူးခြင်းနှင့် စစ်ဘေးရှောင်ခြင်းများပမပြုလုပ်ရန် ဇန်နဝါရီ ၈ရက်နေ့က စစ်ကောင်စီမှ အမိန့်ထုတ်ထားကြောင်း ဒေသခံများထံက သိရသည်။

အမြောက်တပ်အနီးတွင် တောင်စမ်း၊ ကျောက်ချောင်း၊ ကွင်းချောင်း၊ ဖန်ခါးပြင် စသည့်ကျေးရွာများရှိပြီး အုပ်ချုပ်ရေးမှုးများမှ လိုက်လံပြောကြားနေခြင်းဖြစ်ကြောင်း သိရသည်။

"ငါးသိုင်းချောင်းအနားကိုတိုက်ပွဲတွေကရောက်လာပြီ၊ ဒေသခံပြည်သူတွေကို ဓါးစာခံလုပ်ခြင်တဲ့သဘောထင်တယ်။ စစ်တပ်ထဲက အရာရှိ မိသားစုတွေကတော့ မြို့တွေကိုပြောင်းပြေးတာကြာပြီ "ဟု ဒေသခံတစ်ဦးမှ ဧရာ၀တီတိုင်းမ်ကို ပြောသည်။

အဆိုပါအ​မြောက်တပ်သည် ရခိုင်နှင့် ငါးသိုင်းချောင်းထိစပ်နေသောနေရာများသို့ နေ့စဥ် လက်နက်ကြီးများဖြင့်ပစ်ခတ်နေသောကြောင့် ဒေသခံများ ထိတ်လန့်စွာနေထိုင်နေရပြီးလယ်ယာနှင့် သစ်တောတွင်းထင်းရှာသည့် အလုပ်များရပ်ဆိုင်းထားရကြောင်း သိရသည်။

ပြီးခဲ့သည့် ဇန်နဝါရီလ ၅ ရက်နေ့ကလည်း အာရက္ခတပ်တော် AA က ဧရာဝတီတိုင်းနှင့် ဂွမြို့နယ်အစပ်ရှိ စစ်ကောင်စီ၏ ဗေဒါစစ်ဆေးရေးဂိတ်ကို သိမ်းယူလိုက်ကြောင်း သတင်းများထွက်ပေါ်လာသည့်နောက်ပိုင်းအမြောက်တပ် အနီးရှိဒေသခံများအနေဖြင့် စစ်ပွဲဖြစ်လာပါကရှောင်တိမ်းရန်ပြုလုပ်နေသည်ကို စစ်ကောင်စီမှယခုကဲ့သို့ တားဆီးခဲ့ခြင်းဖြစ်သည်။

#ရေကြည်မြို့နယ် #အမြောက်တပ် #ဗုံးခိုကျင်း #စစ်ဘေးရှောင်ခြင်းမပြုရန် #စစ်ကောင်စီအမိန့်ထုတ်
#Ayeyarwaddy_Times

ထိုင်နိုင်ငံမှတစ်ဆင့် ရွှေကုက္ကိုသို့ လူကုန်ကူးခံရသည့် တရုတ်မင်းသား ငွေလိမ်သူအဖြစ် လေ့ကျင့်ခံရ၊ ထိုင်းဝန်ကြီးချုပ်က ခရီးသွားလုပ်ငန်း ထိခိုက်မှုမှန်သမျှကို ကာကွယ်မည်ဟုပြော

ဧရာဝတီတိုင်းမ်
ဇန်နဝါရီ ၈ ရက်

ထိုင်း-မြန်မာ နယ်စပ်တွင် ပျောက်ဆုံးခဲ့သည့် တရုတ်မင်းသား Wang Xing မှာ မြန်မာနိုင်ငံ ရွှေကုက္ကိုဒေသတွင် လူကုန်ကူးခြင်းခံခဲ့ရပြီး တရုတ်နိုင်ငံအတွင်းသို့ ငွေလိမ်လည်ရန် လေကျင့်ခြင်း ခံခဲ့ရကြောင်း သိရသည်။

တရုတ်မင်းသား Wang Xing သည် မြန်မာနိုင်ငံအတွင်းသို့ ဖြတ်ကျော်ကာ လူကုန်ကူးခံခဲ့ရပြီးနောက် တရုတ်လူမျိုးများကို ပစ်မှတ်ထားလိမ်လည်သည့် စာတိုများကို ရိုက်တတ်ရန် သင်ယူခဲ့ရပြီး လိမ်လည်သူအဖြစ် ၂ ရက် ၃ ရက်ခန့် လေ့ကျင့်သင်ကြားခြင်း ခံခဲ့ရကြောင်း သိရသည်။

တရုတ်မင်းသားမှာ နယ်စပ်ဖြတ်ကျော်၍ မြန်မာနိုင်ငံသို့ ရောက်ခဲ့ပြီးနောက် လိမ်လည်ခံရပြီဖြစ်ကြောင်း သိရှိရသော်လည်း ခုခံရန် အစွမ်းအစမရှိဟု မင်းသားကဝန်ခံခဲ့‌ကြောင်း ထိုင်းလူကုန်ကူးမှု တားဆီးနှိမ်နင်းရေးဌာန(TICAC) ဒါရိုက်တာ ရဲချုပ်သက်ချိုင်း ပီတာနီလာဘော့တ်၏ ပြောကြား ချက်အရ သိရသည်။

ထိုင်းစစ်ဆေးသူများကို Wang Xing ၏ ပြောကြားချက်အရ လူကုန်ကူးမှုတွင် ထိုင်းလူမျိုးမပါဝင်ဘဲ တရုတ်-တရုတ် လိမ်လည်မှုစစ်ဆင်ရေးသာ ဖြစ်ကြောင်းလည်း သိရသည်။

“ဒါက ခရီးသွားလုပ်ငန်းနဲ့ပဲ ပတ်သက်တာ မဟုတ်ဘူး၊ ဒါဟာ နည်းပညာလုံခြုံရေး နဲ့ နိုင်ငံဖြတ်ကျော် လိမ်လည်လှည့်ဖြားမှု ဖြစ်တဲ့ call စင်တာ လိမ်လည်မှု အပါအ၀င် ကျယ်ပြန့်တဲ့ စိုးရိမ်ပူပန်မှု‌‌တွေကို မီးမောင်းထိုးပြနေတယ်" ဟု ထိုင်းဝန်ကြီးချုပ် Paetongtarn Shinawatra (ပေထုံတန် ရှင်နာဝပ်) က မှတ်ချက်ပြု‌ပြောဆိုခဲ့သည်။

ယမန်နေ့ ဇန်နဝါရီ ၇ ရက်တွင် မြန်မာနိုင်ငံအတွင်းမှကယ်တင်ခံခဲ့ရသည့် တရုတ်မင်းသား Wang Xing ၏ လူကုန်ကူးမှုဖြစ်ပွားပြီးနောက် ထိုင်းနိုင်ငံသည် မလုံခြုံကြောင်း ကောလာဟလများ နှင့် စိုးရိမ်မှုများ ဆိုရှယ်မီဒီယာပေါ်တွင် တိုးပွားလာ ကြောင်း သိရသည်။

"ကျွန်မတို့ရဲ့ ခရီးသွား လုပ်ငန်းအပေါ် ထိခိုက်မှု မှန်သမျှကို ကာကွယ်ဖို့ ဒီအခြေအနေကို ထိထိ ရောက်ရောက် စီမံခန့်ခွဲရမှာ ဖြစ်ပါတယ်” ဟု ပေထုံတန် ရှင်နာဝပ် ပြောကြားခဲ့ပြီး ဒစ်ဂျစ်တယ်စီးပွားရေးနှင့်လူမှု‌ရေးရာ ဝန်ကြီးဌာနကိုလည်း အခင်းဖြစ်ပွားမှုနှင့် ပတ်သတ်သည့် အွန်လိုင်းပြောဆိုမှုများကို စောင့်ကြည့်စီမံခန့်ခွဲရန် တာဝန်ပေးအပ်ခဲ့သည်။

တရုတ်မင်းသား Wang Xing ကို လိမ်လည်သူသည် လူသိများသည့် ထိုင်းဖျော်ဖြေရေး ကုမ္ပဏီကြီး တစ်ခုဖြစ်သည့် GMM Grammy ကိုကိုယ်စားပြုသူဟု WeChat မှတစ်ဆင့် ဆက်သွယ်ကာ လိမ်လည်လှည့်ဖြားခဲ့ပြီးနောက် သရုပ်ဆောင်ရွေးချယ်ခံရန် ထိုင်းနိုင်ငံသို့ လိုက်လာခဲ့ရာမှ ယခုကဲ့သို့ လူကုန်ကူးခံခဲ့ရခြင်းဖြစ်ကြောင်း သိရသည်။

GMM Grammy ကမူ အဆိုပါဖြစ်ရပ်တွင် ၎င်းတို့ကုမ္ပဏီမှာ ပါဝင်ပတ်သက်ခြင်းမရှိကြောင်း တရုတ် ဘာသာဖြင့် ပြတ်ပြတ်သားသား ငြင်းဆိုထားသည့် ကြေညာချက်တစ်ရပ်ကို ထုတ်ပြန်ခဲ့သည်။

Wang Xing ကို ထိုင်းနိုင်ငံသို့ ပြန်လည်ခေါ်ဆောင်ရာတွင် မြန်မာတိုင်းရင်းသား လက်နက်ကိုင် အဖွဲ့အစည်းများနှင့် ညှိနှိုင်းဆောင်ရွက်ခဲ့ကြောင်းလည်း သိရပြီး စစ်ဆင်ရေးအတွင်း Xing Xing အပါအဝင် တရုတ်လူမျိုး ၅၀ ဦးကို ပါပြန်လည်ခေါ်ဆောင်ခဲ့ကြောင်း သိရသည်။

ယခုအခါ ထိုင်းလူကုန်ကူးမှု တားဆီးနှိမ်နင်းရေးဌာန(TICAC) မှ Wang Xing နှင့် ၎င်း၏မိသားစုမှ အဆင်သင့်ဖြစ်ပါက လာမည့် တစ်ရက် နှစ်ရက်အတွင်း တရုတ်နိုင်ငံသို့ပြန်နိုင်ရန် တရုတ်သံရုံးနှင့်ညှိနှိုင်း ဆောင်ရွက်မည်ဟု ပြောကြားခဲ့ကြောင်း သိရသည်။

ကိုးကား - Khaosod English

#ရွှေကုက္ကိုလ် #လူကုန်ကူးခံရ #တရုတ်မင်းသား #ငွေလိမ်သူ #လေ့ကျင့်ခံရ #ထိုင်းဝန်ကြီးချုပ် #ခရီးသွားလုပ်ငန်း #ထိခိုက်မှုကာကွယ်မည် #Ayeyarwaddy_Times

ရိခေါဒါရ်ဂိတ်တွင် လူအဝင်/အထွက်ကို အိန္ဒိယအစိုးရက ကန့်သတ်ပိတ်ပင်

ဧရာဝတီတိုင်းမ်
(ရိခေါဒါရ်)၊ ဇန်နဝါရီ ၈ ရက်

မြန်မာ-အိန္ဒိယနယ်စပ် ရိခေါဒါရ်ဂိတ်ကို ပြီးခဲ့သည့် ဇန်နဝါရီ ၁ ရက်နေ့မှ စတင်၍ အိန္ဒိယဗဟိုအစိုးရက ကန့်သတ်ပိတ်ပင်ခဲ့ပြီး လူအဝင်၊ အထွက်များကိုလည်း ကန့်သတ်ထား​ကြောင်းသိရသည်။

ယခင်က နှစ်နိုင်ငံနယ်စပ်ဂိတ် ရိခေါဒါရ်ဂိတ်မှ လွတ်လပ်စွာ ဖြတ်သန်းသွားလာနိုင်သော်လည်း လက်ရှိတွင် ဖြတ်သန်းသွားလာနိုင်ရန်အတွက် ရိခေါဒါရ်မြို့၊ မြို့အုပ်ချုပ်ရေးမှူးနှင့် ရပ်ကွက်အုပ်ချုပ်ရေးမှူးများထံမှ ထောက်ခံချက်ရယူပြီးမှသာလျှင် ဖြတ်သန်းခွင့်ပြုကြောင်းသိရသည်။

" အိန္ဒိယဗဟိုအစိုးရကနေ အမိန့်ကျလာတဲ့အတိုင်းပေါ့နော်၊ တရက်ကို လူအယောက် ၁၀၀ အတွက် ခွင့်ပြုချက်ထုတ်ပေးတာပေါ့နော်။ ထုတ်ပေးတာက ခုနှစ်ရက်စာရှိမယ်။ ခုနှစ်ရက်ပြီးတာနဲ့ ပြန်ပြီးမှ သက်တမ်းတိုးရမှာပေါ့” ဟု ရိခေါဒါရ်မြို့၊ ဒေသခံအမျိုးသားတစ်ဦးက ဧရာဝတီတိုင်းမ်ကို ပြောသည်။

ရိခေါဒါရ်ဂိတ်ကို အိန္ဒိယဗဟိုအစိုးရက ကန့်သတ်ပိတ်ပင်မှုကြောင့် နှစ်နိုင်ငံနယ်စပ်ရှိ ဒေသခံပြည်သူများအနေဖြင့် အနည်းငယ်ဒုက္ခကြုံနေကြကြောင်းသိရသည်။

အိန္ဒိယနိုင်ငံ၊ ဗဟိုအစိုးရက ရိခေါဒါရ်ဂိတ်အား ကန့်သတ်ပိတ်ပင်ခြင်းသည် ပထမဆုံးအကြိမ်ဖြစ်ပြီး ကန့်သတ်ပိတ်ပင်မှုနှင့် ပတ်သက်၍ ဆက်လက်စောင့်ကြည့်နေဆဲဖြစ်ကြောင်းဒေသခံများထံက သိရသည်။

" ဗဟိုအစိုးရက မြန်မာနိုင်ငံလူဝင်မှုကိစ္စတွေကို နည်းနည်းအာရုံစိုက်လာတဲ့ သဘောလို့ မြင်ပါတယ်။ နှစ်နိုင်ငံဖြတ်သန်းသွားလာမှုကိစ္စတွေကို သူတို့က ကြိုးစားလာတော့လေ ဒီဟာတွေလည်း သူတို့အနေနဲ့ ခြေလှမ်းတခုအနေနဲ့ အသုံးပြုလာတာလားလို့လည်း ထင်မြင်
သုံးသပ်မိပါတယ်” ဟု ရိခေါဒါရ်မြို့၊ ဒေသခံအမျိုးသားတစ်ဦးက ပြောဆိုသည်။

အိန္ဒိယ - မြန်မာ နှစ်နိုင်ငံနယ်စပ်လွတ်လပ်စွာဖြတ်သန်းသွားလာခွင့်တင်းကြပ်မှုနှင့် ပတ်သက်ပြီး ပြန်လည်ရုပ်သိမ်းပေးရန်အတွက် မီဇိုရမ်အခြေစိုက် Zo Re-unification Organization - ZORO က ဇန်နဝါရီ ၆ ရက်နေ့တွင် တောင်းဆိုခဲ့ကြောင်း သိရသည်။

ဓာတ်ပုံ-မြန်မာ-အန္ဒိယနယ်စပ်၊ ရိခေါ်ဒါရ်ဂိတ်။

#မြန်မာ #အိန္ဒိယနယ်စပ် #ရိခေါဒါရ်ဂိတ် #အိန္ဒိယဗဟိုအစိုးရ #လူအဝင် #အထွက် #ကန့်သတ်ပိတ်ပင်
#Ayeyarwaddy_Times

အသားတင်ကြွယ်ဝမှု ဒေါ်လာ သန်း ၄၀၀ ကျော်ရှိတယ်လို့ ထိုင်းဝန်ကြီးချုပ် ပေထောင်တန် ကြေညာ

ဧရာဝတီတိုင်းမ်
ဇန်နဝါရီ ၄ ရက်

ဒေါ်လာ (၂) သန်းကျော်တန်ကြေးရှိ လက်ကိုင်အိတ် ၂၀၀ ကျော်နဲ့ ဒေါ်လာ (၅) သန်းကျော် တန် ကြေးရှိ ဇိမ်ခံနာရီ ၇၅ လုံးအပါအဝင် ပိုင်ဆိုင်မှုပစ္စည်း ဒေါ်လာ သန်း ၄၀၀ ကျော်ရှိကြောင်း ထိုင်းဝန်ကြီး ချုပ် ပေထောင်တန်ရှင်နာဝပ်ထရာက ဒီဇင်ဘာလ ၃ ရက်မှာ ကြေညာခဲ့ပါတယ်။

တယ်လီကွန်း ဘီလျှံနာနဲ့ ဝန်ကြီးချုပ်ဟောင်း သက်ဆင်ရှင်နာဝပ်ထရာရဲ့ သမီးအငယ်ဆုံး ပေ ထောင်တန်ဟာ စက်တင်ဘာလအတွင်း ဝန်ကြီးချုပ်ဖြစ်လာခဲ့ပြီး နှစ် (၂၀) အတွင်း ထိုင်းအစိုးရတစ်ရပ် ကို ဉီးဆောင်တဲ့ စတုတ္ထမြောက် ဖုထိုင်းပါတီဝင်တစ်ဉီး ဖြစ်ပါတယ်။

ပေထောင်တန်အနေနဲ့ သူ့ရဲ့ ပိုင်ဆိုင်မှုပစ္စည်းတွေကို ထိုင်း အဂတိလိုက်စားမှုတိုက်ဖျက်ရေး ကော်မရှင် (NACC) ထံ ကြေညာရတာဖြစ်ပါတယ်။

သူ့မှာ ပိုင်ဆိုင်မှုပမာဏ ဒေါ်လာ သန်း ၄၀၀နဲ့ ညီမျှတဲ့ ဘတ် ၁၃ ဒသမ ၈ ဘီလီယံရှိတယ်လို့ ကြေညာခဲ့ကြောင်း မီဒီယာဝဘ်ဆိုဒ်တွေ မှာ ဖော်ပြထားတဲ့ မှတ်တမ်းတစ်ခုအရ သိရပါတယ်။

ပေထောင်တန်ရဲ့ ရင်းနှီးမြှုပ်နှံမှုဟာ ဘတ် ၁၁ ဘီလီယံ တန်ကြေးရှိပြီး နောက်ထပ် ပိုင်ဆိုင်မှု တွေဟာ အပ်နှံငွေတွေ၊ ငွေသားတွေဖြစ်တယ်လို့ ကြေညာချက်က ဖော်ပြပါတယ်။

ပေထောင်တန်ရဲ့ ပိုင်ဆိုင်မှုတွေထဲမှာ ဘတ် ၁၆၂ သန်းတန်ကြေးရှိ နာရီ ၇၅ လုံး၊ ဘတ် ၇၆ သန်း တန်ကြေးရှိ လက်ကိုင်အိတ် ၂၁၇ လုံးအပြင် လန်ဒန်မြို့နဲ့ ဂျပန်နိုင်ငံရှိ အိမ်ခြံမြေတွေ ပါဝင်ပါတယ်။

ပေထောင်တန်မှာ အခြားစီးပွားရေးလုပ်ငန်းတွေမှာ ရင်းနှီးမြှုပ်နှံမှု ဘတ် ၅ ဘီလီယံရှိလို့ အသား တင် ကြွယ်ဝမှုဟာ ဘတ် ၈ ဒသမ ၉ ဘီလီယံအထိ ရှိတယ်လို့ NACC က ဆိုပါတယ်။

ဒေသန္တရမီဒီယာတွေ ဖော်ပြတဲ့ အချက်အလက်တွေဟာ တိကျမှုရှိတယ်လို့ အာဏာရ ဖုထိုင်းပါ တီမှ ကိုယ်စားလှယ်တစ်ဉီးက အတည်ပြုခဲ့ပါတယ်။

မန်ချက်စတာစီးတီး ဘောလုံးအသင်းကို ပိုင်ဆိုင်ဖူးတဲ့ ထိုင်းဝန်ကြီးချုပ်ဟောင်း သက်ဆင်ဟာ အသားတင်ပိုင်ဆိုင်မှု ဒေါ်လာ ၂ ဒသမ ၁ ဘီလီယံရှိရာ ထိုင်းနိုင်ငံရဲ့ ဒသမမြောက် အချမ်းသာဆုံးပုဂ္ဂိုလ် လို့ Forbes မဂ္ဂဇင်းက ဖော်ပြခဲ့ပါတယ်။

ကိုးကား - AFP
Ref; Thai PM declares millions in watches and bags among US$400 million assets

#Ayeyarwaddy_Times

"တကောင်ထဲအူ"

ကာတွန်း - လက်ပံတန်း

#Ayeyarwaddy_Times #ကာတွန်း #လက်ပံတန်း

၂၀၂၄ ခုနှစ်အတွင်း စစ်ကောင်စီ၏ တရားလက်လွတ် သတ်ဖြတ်မှုများအပါအဝင် လူ့အခွင့်အရေး ချိုးဖောက်မှု ၇၀၀၀ ကျော်ရှိပြီး ယခင်နှစ်ထက် ၂ ဆနီးပါး မြင့်တက်လာဟု NUG ပြော

နိုင်မင်းလွင်/ဧရာဝတီတိုင်းမ်
ဇန်နဝါရီ ၃ ရက်

အာဏာသိမ်းပြီးနောက် စစ်ကောင်စီက တရားလက်လွတ် သတ်ဖြတ်မှုများအပါအဝင် လူ့အခွင့်အရေး ချိုးဖောက်မှုများ ကျူးလွန်ခဲ့ပြီး ပြီးခဲ့သည့် ၂၀၂၄ ခုနှစ်အတွင်း ခုနှစ်ထောင်ကျော်ရှိကာ ယခင်နှစ်ထက် နှစ်ဆနီးပါး မြင့်တက်လာကြောင်း အမျိုးသားညီညွတ်ရေးအစိုးရ(NUG) ထံက သိရသည်။

အဆိုပါ ၂၀၂၄ ခုနှစ်အတွင်း လူ့အခွင့်အရေး ချိုးဖောက်မှုများသည် စစ်ကိုင်းတိုင်း၌ အများဆုံးဖြစ်ပွား ကျူးလွန်ခဲ့ကြောင်း NUG လူ့အခွင့်အရေးဆိုင်ရာဝန်ကြီးဌာနမှ တာဝန်ရှိသူများက ယနေ့ ဇန်နဝါရီ ၃ ရက် ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

"၂၀၂၃ နဲ့ ယှဉ်ကြည့်မယ်ဆိုရင် နှစ်ဆနီးပါးလောက် မြှင့်တက်သွားတဲ့ သဘောရှိတယ်။ စစ်ကောင်စီက မြေပြင်မှာ ကျရှုံးမှုတွေရှိလာလေ ပြည်သူလူထုအပေါ်မှာ ပိုပြီးရက်ရက်စက်စက် သတ်ဖြတ်၊ လူ့ အခွင့်အရေး ချိုးဖောက်တာတွေ များများလုပ်လာခဲ့တယ်" ဟု လူ့အခွင့်အရေး ဒုဝန်ကြီး ဦးအောင်ကျော်မိုးကပြောသည်။

စစ်ကောင်စီ ကျူးလွန်ခဲ့သည့် လူ့အခွင့်အရေး ချိုးဖောက်မှုများအနက် တရားလက်လွတ် သတ်ဖြတ်မှုမှာ ၁၇၈၇ မှုထိရှိပြီး အများဆုံးဖြစ်ပြီးကာ ပစ္စည်းဥစ္စာများကို ဖျက်ဆီးခြင်း ၁၃၅၅ မှု၊ အခြား ကျူးလွန်မှု ၁၂၄၅ မှု၊ အတင်းအဓမ္မ ခိုင်းစေခြင်း ၇၆၈ မှု စသည့်ချိုးဖောက်မှု စုစုပေါင်း ၇၃၉၄ မှုရှိကြောင်း သိရသည်။

ထို့အပြင် တိုင်း/ပြည်နယ်အလိုက် ကျူးလွန်မှုများတွင် စစ်ကိုင်း ၁၁၅၂ မှု၊ ပဲခူး ၁၀၄၂ မှု၊ ရခိုင် ၉၈၈ မှု၊ မန္တလေး ၈၇၄ မှု၊ မကွေး ၇၆၀ မှု၊ ရှမ်း ၆၀၀ မှု စသည်တို့အပါအဝင် မြန်မာပြည်ပြင်ပ ၃၂ မှုထိရှိပြီး ယခင်နှစ်ကမူ လူ့အခွင့်အရေး ချိုးဖောက်မှု ၄၃၇၂ မှုရှိခဲ့ကြောင်း သိရသည်။

ယင်းအချက်များကို ကြည့်မည်ဆိုလျှင် လက်ရှိစစ်ကောင်စီ ကျူးလွန်နေမှုသည် သာမန်လူ့အခွင့်အရေး ချိုးဖောက်မှုတွင်သာမက စစ်ပွဲဆိုင်ရာ ရာဇဝတ်မှု၊ လူသားမျိုးနွယ် တစ်ခုလုံးကို ကျူးလွန်သည့် ရာဇဝတ်မှု၊ လူမျိုးတုန်း သတ်ဖြတ်မှုတို့ဖြစ်ကြောင်း NUG လူ့အခွင့်အရေးဝန်ကြီး ဦးအောင်မျိုးမင်းက ဆိုသည်။

"အဲဒါကြောင့်မို့လို့ ကျွန်တော်တို့အနေနဲ့ နိုင်ငံတကာ ရာဇဝတ်မှုတွေထဲမှာ မြန်မာနိုင်ငံနဲ့ သက်ဆိုင်တဲ့ ရာဇဝတ်မှု သုံးမှုကို ရွေးချယ်ပြီတော့ စုဆောင်းတင်ပြတာ၊ ဒါနဲ့ပတ်သက်ပြီး အရေးယူနိုင်ဖို့ လုပ် ဆောင်နေပါတယ်" ဟု ဝန်ကြီး ဦးအောင်မျိုးမင်းက ပြောသည်။

အမျိုးသားညီညွတ်ရေးအစိုးရ-NUG အနေဖြင့် ကျူးလွန်ခံရသူများအတွက် တရားမျှတမှု ဖော်ဆောင်နိုင်ရန်၊ ယခုကဲ့သို့ နိုင်ငံတကာ ရာဇဝတ်မှုများကို ကျူးလွန်နေသော စစ်ကောင်စီကို အရေးယူနိုင်ရန် အတွက် နိုင်ငံတကာတွင် ကြိုးပမ်းဆောင်ရွက်လျက်ရှိသလို စိန်ခေါ်မှုများလည်း တွေ့ကြုံရင်ဆိုင်နေရကြောင်း သိရသည်။

#၂၀၂၄ခုနှစ် #စစ်ကောင်စီ #တရားလက်လွတ်သတ်ဖြတ်မှုများ #လူ့အခွင့်အရေးချိုးဖောက်မှု #၇၀၀၀ကျော် #၂ဆနီးပါးမြင့်တက် #NUG #Ayeyarwaddy_Times

ဧရာ၀တီတိုင်းအတွင်းရှိ မြို့နယ်အချို့တွင် မိနစ်ပိုင်းသာလျှပ်စစ်မီးရရှိ

ဧရာဝတီတိိုင်းမ်
ဇန်နဝါရီ ၃ ရက်

ဧရာ၀တီတိုင်းအတွင်းရှိ မြို့နယ်အချို့တွင် ၂၀၂၅ ခုနှစ် ဇန်နဝါရီ ၁ ရက်နေ့မှ စတင်ကာ လျှပ်စစ်မီးများ ဆိုးဝါးစွာပြတ်တောက်နေပြီး မီးလာချိန် မိနစ်ပိုင်းသာ ရရှိကြောင်း ဒေသခံများထံမှ သိရှိရသည်။

မြောင်းမြမြို့နယ်အတွင်း တစ်နေ့လျှင် လျှပ်စစ်မီးရရှိချိန် ပျှမ်းမျှမိနစ် ၂၀ ခန့်သာရှိ​ပြီး မီးပျက်သည့်အချိန်က များနေကြောင်း ဒေသခံများက ပြောသည်။

"ပေးရင်လဲ တစ်နေ့တစ်နာရီလောက်ပဲပေးပါ။ ခုက တစ်ခါလာမှ မိနစ် ၂၀ နဲ့ ၁၅မိနစ်လောက်က ဘာမှ လုပ်လို့မရဘူးလေ။ ထမင်းဟင်းချက်မရ၊ ရေတင်မရနဲ့ဒုက္ခရောက်တယ်"ဟု မြောင်းမြမြို့ခံတစ်ဦးမှ ဧရာ၀တီတိုင်းမ်ကို ပြောသည်။

ပုသိမ်မြို့နယ်တွင် နေ့စဉ် မီးလာချိန်မိနစ်ပိုင်းသာမီးရခြင်း မီးလာချိန်တွင်လည်း မီးအားလုံလောက်မှုမရှိခြင်းများကြောင့် အသေးစားစက်မှုလုပ်ငန်းလုပ်ကိုင်သူများ အခက်အခဲကြုံနေကြောင်း သိရှိရသည်။

"လျှပ်စစ်မီးနဲ့ ကိုယ်ပိုင်လုပ်ငန်းလုပ်နေရတဲ့သူတွေအတွက် နစ်နာရပါတယ်၊ မီးရရေးအတွက် ဆိုလာတို့၊ မီးစက်တို့အသုံးပြုရတဲ့အတွက် လည်း၀န်ဆောင်မှုစရိတ်တွေ ပိုကြီးလာတာပေါ့။ အလှည့်ကျသတ်မှတ်ပြီး တစ်နာရီဆိုတစ်နာရီလောက်အတိအကျပေးစေချင်တယ်"ဟု ဖုန်းပြုပြင်ရေး ဆိုင်ပိုင်ရှင်တစ်ဦးမှဧရာ၀တီတိုင်မ်းကို ပြောသည်။

ဧရာ၀တီတိုင်းအတွင်းရှိမြို့နယ်များတွင် ယခင်က တစ်နေ့လျှင် လေးနာရီခန့် လျှပ်စစ်မီး အလှည့်ကျ ရရှိခဲ့သော်လည်း၂၀၂၅ ခုနှစ် အစပိုင်းတွင် မိနစ်ပိုင်းသာရရှိသည့်အခြေအနေနှင့် ကြုံနေရခြင်း ဖြစ်သည်။

#ဧရာ၀တီတိုင်း #မြို့နယ်အချို့တွင် #မိနစ်ပိုင်းသာ #လျှပ်စစ်မီးရရှိ #Ayeyarwaddy_Times

ဖလမ်းမြို့သိမ်းတိုက်ပွဲတွင် CNDF က ရဟတ်ယာဥ် ၁ စင်းကို ပစ်ခတ်ခဲ့ရာ ထိခိုက်ပျက်စီးမှုရှိ

ဧရာဝတီတိုင်းမ်
(ဖလမ်း)၊ ဇန်နဝါရီ ၃ ရက်

ချင်းပြည်နယ်၊ ဖလမ်းမြို့သိမ်းတိုက်ပွဲတွင် စစ်ကူနှင့် ရိက္ခာလာချပေးသော MI 17 ကို ချင်းအမျိုးသားကာကွယ်ရေးတပ်ဖွဲ့(CNDF)က ပြီးခဲ့သည့် ဒီဇင်ဘာ ၃၁ ရက်နေ့တွင် ပစ်ခတ်ခဲ့ရာ ထိခိုက်ပျက်စီးမှုကြောင့် လှည့်ပြန်ခဲ့ပြီး ကလေးမြို့တွင် အရေးပေါ်ဆင်းသက်နေရကြောင်းသိရသည်။

ဖလမ်းမြို့သိမ်းတိုက်ပွဲတွင် စစ်ကောင်စီဘက်က လေကြောင်းဖြင့် ပြင်းပြင်းထန်ထန်တိုက်ခိုက်နေသလို လေကြောင်းဖြင့် စစ်ကူချပေးမှုများကို ပြုလုပ်ခဲ့ကြောင်းသိရသည်။

"ကျွန်တော်တို့ဘက်ကို MI 17 လာတဲ့အခါကျတော့ ပစ်ခတ်မှုတွေ လုပ်တဲ့ဟာ ရှိပါတယ်။ ဆိုတော့ အဲ့ဒီရဟတ်ယာဉ် ပြန်လှည့်သွားတာပေါ့။ ဖရဲသီးတွေဆီကနေ ကျွန်တော်တို့ကြားရတာကတော့ ထိခိုက်မှုတွေ ရှိနေတယ်ပေါ့လေ" ဟု CNDFပြောခွင့် ရဆလိုင်းတင်မီက ဧရာဝတီတိုင်းမ်ကို ပြောသည်။

ဖလမ်းမြို့တွင် လေကြောင်းဖြင့် စစ်ကူချပေးသော စစ်ကောင်စီတပ်ဖွဲ့ဝင်များကို ချင်းအမျိုးသားကာကွယ်ရေးတပ်ဖွဲ့နှင့် မဟာမိတ်ပူးပေါင်းတပ်များက တိုက်ခိုက်မှုကြောင့် အများအပြားသေဆုံးပြီး စစ်သုံ့ပန့်အများအပြားလည်း ဖမ်းဆီးရမိထားကြောင်းသိရသည်။

"စစ်ကူချတာကတော့ ဒီဇင်ဘာလ ၁၆ ရက်နေ့မှာ လူဦးရေ ၁၀၀ နီးပါးပေါ့။ အဲ့ဒါတွေကိုတော့ ဒီဇင်ဘာ ၂၆ ရက်နေ့အထိ ချေမှုန်းနိုင်ခဲ့တယ်။စစ်သုံ့ပန့်တွေကိုလည်း တဝက်ထက်ကျော်ဖမ်းမိထားတဲ့ဟာ ရှိတယ်။အခုလက်ရှိလည်း ဖမ်းမိထားတဲ့ဟာရှိတယ်ဆိုတော့ ကျွန်တော်တို့ကြားသိတာကတော့ ၅ ယောက်လောက်ပဲ ကလေးမြို့ဘက်ကို ရောက်သွားတယ်လို့ ကြားသိရပါတယ်။တခြားဟာတော့ ကျွန်တော်တို့ သုတ်သင်ရှင်းလင်းနိုင်တဲ့ အခြေအနေမှာ ရှိတယ်" ဟု ဆလိုင်းတင်မီက ဆက်လက်ပြောဆိုသည်။

ချင်းညီနောင်သည် ဖလမ်းမြို့သိမ်းတိုက်ပွဲကို ပြီးခဲ့သည့် နိုဝင်ဘာလ ၉ ရက်နေ့မှ စတင်၍ တိုက်ပွဲဖော်ဆောင်ခဲ့ပြီး တပ်စခန်းအများအပြားကို သိမ်းပိုက်နိုင်ခဲ့သလို လက်ရှိတွင် ဖလမ်းမြို့အခြေစိုက် ခလရ ၂၆၈ တပ်ရင်းကို ဆက်လက်ထိုးစစ်ဆင်တိုက်ခိုက်လျက်ရှိကြောင်းသိရသည်။

ပုံစာ-ဟားခါးမြို့တွင် ပျက်ကျသော ရဟတ်ယာဥ်(ပုံဟောင်း)

#ဖလမ်းမြို့သိမ်းတိုက်ပွဲ #ချင်းအမျိုးသားကာကွယ်ရေးတပ်ဖွဲ့ #CNDF #ရဟတ်ယာဥ်၁စင်း #ပစ်ခတ် #ထိခိုက်ပျက်စီးမှုရှိ #Ayeyarwaddy_Times

တီးတိန်မြို့တွင် တိုက်ပွဲဖြစ်ပွားမည်ကို စိုးရိမ်၍ ပြည်သူများ ပြောင်းရွှေ့

ဧရာဝတီတိုင်းမ်
ဇန်နဝါရီ ၃ရက်

ချင်းပြည်နယ်၊ တီးတိန်မြို့သိမ်းတိုက်ပွဲ ဖြစ်ပွားလာမည်ကို စိုးရိမ်ကြသည့်အတွက် ဒေသခံ ပြည်သူများသည် ပြီးခဲ့သည့် ဒီဇင်ဘာ ၂၉ ရက်နေ့မှစ၍ ကြိုတင်ပြီး ပစ္စည်းများကိုပြောင်းရွှေ့နေကြောင်း ဒေသခံများထံက သိရှိရသည်။

တီးတိန်မြို့သည် ချင်းညီနောင်အဖွဲ့ဝင်ဖြစ်သည့် PDF-Zoland ၏ နယ်မြေဖြစ်သလို ချင်းညီနောင်အဖွဲ့၏ တစ်ခုတည်းသော ထိုးစစ်ဆင်တိုက်ခိုက်ရန် ကျန်ရှိသည့်မြို့ဖြစ်သည့်အတွက် အချိန်မရွေး တိုက်ပွဲများဖြစ်လာနိုင်သောကြောင့် သေခံပြည်သူများအနေဖြင့် ကြိုတင်ပြင်ဆင် ဆောင်ရွက်နေကြခြင်းဖြစ်သည်။

"တိုက်ပွဲက ဘယ်နေ့ဖြစ်မလဲဆိုတာ မသိနိုင်ဘူးလေ။ အဲဒါကြောင့် အခုကတည်းက ပစ္စည်းတွေကို ကြိုတင်ပြောင်းရွှေ့ထားလိုက်တဲ့ သဘောပါ။ လူကတော့ ဘယ်အချိန်ဖြစ်ဖြစ် ကိုယ်လွတ်ရုန်း ထွက်ပြေးတိမ်းရှောင်လို့ရတယ်။ အခုလောလောဆယ်တော့ တိမ်းရှောင်နေကြတဲ့သူတွေက သိပ်မရှိသေးပါဘူး” ဟု တီးတိန်မြို့ဒေသခံတစ်ဦးက ဧရာဝတီတိုင်းမ်ကို ပြောသည်။

ဒေသခံပြည်သူများသည် ပစ္စည်းများကို အသိမိတ်ဆွေများ၊ ဆွေမျိုးများရှိရာ တီးတိန်မြို့နယ်နှင့် တွန်းဇံမြို့နယ်ရှိ တိုက်ပွဲကင်းလွတ်သည့် ကျေးရွာများ၊ စစ်ကိုင်းတိုင်း ကလေးမြို့နယ်နှင့် တမူးမြို့နယ်တို့သို့ ပြောင်းရွှေ့နေကြခြင်း ဖြစ်သည်။

တီးတိန်မြို့သိမ်းတိုက်ပွဲနှင့်ပတ်သက်၍ ချင်းညီနောင်အဖွဲ့က တစ်စုံတစ်ရာ ထုတ်ပြန်ထားခြင်းမရှိသော်လည်း ဒေသခံပြည်သူများက ချင်းညီနောင်အဖွဲ့၏ မြို့သိမ်းတိုက်ပွဲဆင်နွှဲလာမည်ကို စိုးရိမ်နေကြသည်။

"အရင်နှစ် တိုက်ပွဲတုန်းက အရပ်သားတွေ သေကြတယ်။ လူနေအိမ်တွေလည်း အတော်များများ မီးရှို့ဖျက်ဆီးခံရတဲ့အတွက် တိုက်ပွဲပြန်ဖြစ်မှာကို ဒေသခံတွေက မလိုလားကြတော့ဘူး။ တိုက်ပွဲဖြစ်မှာကို စိုးရိမ်နေကြရတယ်။ အခုအချိန်ထိတော့ တိုက်ပွဲမဖြစ်ရှိသေးဘူး ပုံမှန်ပါပဲ” ဟု တီးတိန်မြို့ဒေသခံတစ်ဦးက ဧရာဝတီတိုင်းမ်ကို ပြောသည်။

တီးတိန်မြို့ကို ချင်းညီနောင်အဖွဲ့က ပြီးခဲ့သည့် ၂၀၂၄ ခုနှစ်၊ မေလ ၂၆ ရက်နေ့ကပထမအကြိမ် မြို့သိမ်းတိုက်ပွဲ ဆင်နွှဲခဲ့ပြီး စစ်ကောင်စီဘက်က ထိခိုက်သေဆုံးမှုများသော်လည်း မြို့ကိုသိမ်းပိုက်နိုင်ခြင်းမရှိကြောင်း သိရှိရသည်။

အဆိုပါ မြို့သိမ်းတိုက်ပွဲတွင် အရပ်သား ငါးဦးထက်မနည်း သေဆုံးပြီး လူနေအိမ် ၇၀ ကျော် မီးရှို့ဖျက်ဆီးခံရကာ ဒေသခံ တစ်သောင်းကျော်သည် ထွက်ပြေးတိမ်းရှောင်နေကြရသည်။

ပုံစာ - တီးတိန်မြို့တွင်း တစ်နေရာကို တွေ့ရစဥ်။(ပုံအဟောင်း)

#တီးတိန်မြို့ #တိုက်ပွဲဖြစ်ပွါးမည် #စိုးရိမ်၍ #ပြည်သူများပြောင်းရွှေ့ #Ayeyarwaddy_Times

သံသယဖြစ်ဖွယ်ရာ တရုတ် ရေအောက်ဒရုန်းတစ်စင်းကို ဖိလစ်ပိုင် တွေ့ရှိ

ဧရာဝတီတိုင်းမ်
ဇန်နဝါရီ ၃ ရက်

ဖိလစ်ပိုင်နိုင်ငံအလယ်ပိုင်း ရေပိုင်နက်အတွင်း တရုတ်နိုင်ငံမှလို့ယူဆရတဲ့ ရေအောက်ဒရုန်းတစ် စင်းကို ပြန်ရခဲ့တယ်လို့ ရဲတပ်ဖွဲ့က ဇန်နဝါရီလ ၂ ရက်မှာ ပြောကြားခဲ့ပြီး အမျိုးသားလုံခြုံရေးအတွက် ဂ ယက်ရိုက်ခတ်မှုတွေရှိလာနိုင်တယ်လို့ သတိပေးလိုက်ပါတယ်။

တံငါသည် (၃) ဉီးက တနင်္လာနေ့မှာ Masbate ပြည်နယ်၊ ဆန်ပတ်စ်ချူရယ်ကမ်းလွန် ၉ ကီလိုမီ တာဝန်းကျင်မှာ ဒရုန်းကို တွေ့ရှိခဲ့တာပါ။

တောင်တရုတ်ပင်လယ်အတွင်း ပင်လယ်ရေကြောင်း အခွင့်အရေးတွေအပြင် သန္တာကျောက် တန်းတွေ၊ ကျွန်းစုတွေ ပိုင်ဆိုင်မှုနဲ့ပတ်သက်လို့ ဖိလစ်ပိုင်နဲ့တရုတ်ကြား နှစ်နဲ့ချီ အငြင်းပွားခဲ့တာပါ။

တရုတ်နိုင်ငံက တောင်တရုတ်ပင်လယ်တစ်ခုလုံးကို ပိုင်ဆိုင်တယ်လို့ ဆိုထားပြီး အခြားတိုင်း ပြည်တွေရဲ့ တောင်းဆိုချက်တွေနဲ့ အပြည်ပြည်ဆိုင်ရာ ဆုံးဖြတ်ချက်ဟာ အခြေအမြစ်မရှိဟုဆိုကာ ပယ ချခဲ့ပါတယ်။

ပင်လယ်ပြင်မှာ မျောပါနေတဲ့ HY-119 ဒရုန်းကို အာဏာပိုင်တွေထံ လွှဲမပြောင်းမီ တွေ့ရှိခဲ့တာ လို့ ရဲတပ်ဖွဲ့ အကြီးအကဲ အန်ဒရေဒီဇွန်က ပြောပါတယ်။ အဆိုပါဒရုန်းဟာ အလျား ၂ မီတာခန့်နဲ့ တော် ပီဒိုပုံစံ ရေဘယက်တွေ ပါရှိပါတယ်။

“အင်တာနက်မှာ တွေ့ရှိခဲ့တဲ့ သုတေသန အရင်းအမြ်စ်တွေအရ HY-119 ဆိုတာ တရုတ် ရေ အောက်ဒရုန်းတစ်ခုကို ရည်ညွှန်းပါတယ်” လို့ အန်ဒရေဒီဇွန်က ဆိုပါတယ်။ “ဒီဒရုန်းမှာ အင်တင်နာတစ် ခု ပါရှိပြီး စောင့်ကြည့်တာနဲ့ ကင်းထောက်တာမှာ အသုံးပြုနိုင်ပါတယ်” လို့ သူက ရှင်းပြပါတယ်။

ဒရုန်းမှာ လက်နက်မတပ်ဆင်ထားဘဲ ရဲတပ်ဖွဲ့က အင်္ဂါနေ့မှာ ဖိလစ်ပိုင်ရေတပ်ထံ လွှဲပြောင်း ပေးခဲ့တယ်လို့ ၎င်းက ဆက်ပြောပါတယ်။

ကိုးကား - AFP
Ref; Philippines recovers suspected Chinese submarine drone

#Ayeyarwaddy_Times

ရုရှားရောက် မြောက်ကိုရီးယားတပ်ဖွဲ့ဝင်တွေ စိတ်ဓာတ်ကျဆင်းနေပြီး ထိခိုက်သေကျေမှု မြင့်မား

ဧရာဝတီတိုင်းမ်
ဇန်နဝါရီ ၃ ရက်

ယူကရိန်းစစ်ပွဲမှာ တိုက်ခိုက်ဖို့ ရုရှားသို့ စေလွှတ်ထားတဲ့ မြောက်ကိုရီးယားစစ်သားတွေရဲ့စိတ် ဓာတ် ဆိုးရွားလာနေပြီး အချို့က နှစ်သစ်ကူးအကြိုမှာ အရက် အလွန်အကျွံသောက်ကာ ထိခိုက်သေ ကျေမှု မြင့်မားနေတယ်လို့ ယူကရိန်းမီဒီယာတွေက ဖော်ပြပါတယ်။

“မြောက်ကိုရီးယားစစ်သားတွေ စိတ်ဓာတ်ကျဆင်းနေပါပြီ” လို့ ယူကရိန်းစစ်တပ်ရဲ့ ထောက် လှမ်းရေးဌာနကို ကိုးကားပြီး ယူကရိန်းမီဒီယာတွေက ဖော်ပြပါတယ်။

ရုရှားတပ်မှူးတွေက မြောက်ကိုရီးယားစစ်သားတွေ ထိခိုက်သေကျေမှု မြင့်မားတာကို လျှော့ တွက်ကာ အထက်အရာရှိတွေထံ သတင်းမှားတွေ တင်ပြတယ်လို့ ယူကရိန်း ထောက်လှမ်းရေးဌာနက ဆိုပါတယ်။

တပ်ဖွဲ့ဝင်တွေ ထိခိုက်သေကျေမှု မြင့်မားရတဲ့အကြောင်းရင်းကို စုံစမ်းစစ်ဆေးဖို့ အဆင့်မြင့် မြောက်ကိုရီးယားစစ်ဘက်အရာရှိတစ်ဉီးကို ရုရှားနိုင်ငံ၊ ကာတ်စ်ဒေသသို့ စေလွှတ်ခဲ့တယ်လို့ ယူကရိန်းမီ ဒီယာတွေက ဒီဇင်ဘာလ ၂၇ ရက်မှာ ဖော်ပြခဲ့ပါတယ်။

ကာတ်စ်ဒေသမှာ မြောက်ကိုရီးယားစစ်သည် ၃၀၀၀ ကျော် ကျဆုံး သို့မဟုတ် ဒဏ်ရာရရှိခဲ့တယ် လို့ ယူကရိန်းသမ္မတ ဇီလန်စကီးက ဒီဇင်ဘာလ ၂၃ ရက်မှာ ပြောကြားခဲ့ပါတယ်။

ပြီးခဲ့တဲ့တစ်ပတ်အတွင်း မြောက်ကိုရီးယားစစ်သည် ၁၀၀၀ ကျော် ကျဆုံး သို့မဟုတ် ဒဏ်ရာရရှိ ခဲ့တယ်လို့ အိမ်ဖြူတော်က ဒီဇင်ဘာလ ၂၇ ရက်မှ အတည်ပြုခဲ့ပါတယ်။

ရုရှားစစ်တပ်က မြောက်ကိုရီးယားတပ်ဖွဲ့ဝင်တွေ ထိခိုက်သေကျေတဲ့အရအတွက်ကို ဖုံးကွယ် ကာ တပ်ဖွဲ့ဝင်တွေ ထပ်မံစေလွှတ်ဖို့ ဆက်လက်လုပ်ဆောင်နေပါတယ်။

ထပ်မံရောက်ရှိလာတဲ့ မြောက်ကိုရီးယားတပ်ဖွဲ့ဝင်တွေကို ကာတ်စ်ဒေသရှိ စစ်ဘက်အခြေစိုက် စခန်းတွေသို့ စေလွှတ်ခဲ့တယ်လို့ ယူကရိန်း ဒေသန္တရမီဒီယာတွေက ဖော်ပြပါတယ်။

ကိုးကား - Korea JoongAng Daily
Ref; North Korean troops deployed to Russia suffering low morale and mass casualties, reports say

#Ayeyarwaddy_Times

အင်အားပြည့်မီစွာမရှိဘဲ ဖွဲ့စည်းပုံပျက်နေသည့် ပြည်ဒကစ ဝင်‌ရောက်တိုက်ခိုက်ခံရမှာ စိုးရိမ်နေရ

ဧရာဝတီတိုင်းမ်
ဒီဇင်ဘာ ၉ ရက်

ရခိုင်ပြည်နယ် မြို့သိမ်းတိုက်ပွဲများအဆက်မပြတ်ဖြစ်ပွားနေပြီး အနောက်ပိုင်းတိုင်းစစ်ဌာနချုပ် (နပခ) တစ်ခုလုံး လက်လွှတ်ရမည့်အခြေ အနေဖြစ်ပေါ်နေသည့်အတွက် အင်အားမပြည့်မီဘဲ ဖွဲ့စည်းပုံပျက်နေသည့် ပြည်ဒကစရှိ စစ်ကောင်စီတပ်အရာရှိများက စိုးရိမ်နေကြောင်း တပ်သတင်းရင်းမြစ်ထံက သိရသည်။

စစ်တွေဒေသကွပ်ကဲမှုစစ်ဌာနချုပ် (စစ်တွေ-ဒကစ)ကို သိမ်းယူနိုင်ရန် ဝိုင်းပတ်ပိတ်ဆို့ထား နိုင်ပြီဖြစ်ကြောင်း ပြီးခဲ့သည့် ဇူလိုင် ၇ ရက်နေ့ကတည်းက အာရက္ခတပ်တော် (AA) က ထုတ်ပြန်ခဲ့သည်။

ပြည်ဒေသကွပ်ကဲမှုစစ်ဌာနချုပ်(ပြည်-ဒကစ) ရှိ လက် အောက်ခံတပ်ရင်း တပ်ဖွဲ့များမှာ လက်နက်အင်အား၊ လူအင်အားပြည့်မီခြင်းမရှိတော့ဘဲ စုဖွဲ့မှုများပင်ပျက်ကာ ဖွဲ့စည်းပုံပျက်သည့်အခြေ အနေပင်ရောက်နေသည့်အတွက် ပန်းတောင်းမှတစ်ဆင့် တော်လှန်ရေးတပ်ဖွဲ့များ ဝင်ရောက်တိုက်ခိုက်မည်ကို ဒကစမှူးနှင့် လက်အောက်စစ်အရာရှိများက စိုးရိမ်နေကြကြောင်း သိရသည်။

"ပြည်ဒကစက အခြားဒကစတွေလောက် စစ်ရေးစီမံမှုမရှိဘူး။ တိုက်ပွဲအတွေ့အကြုံမရှိဘူးပြောရမှာပေါ့။ ရှိတဲ့ တပ်ရင်းတွေလည်း ရှေ့တန်းရောက်နေတာတွေနဲ့ ကပစကအင်အားတွေလည်း အနှံ့ပို့ထားရတော့ စုဖွဲ့မှု ပျက်နေတယ်ပြောရမှာပေါ့၊ ပြည်ကိုဝင်လာမှာ စိုးရိမ်ရတဲ့အနေအထားဖြစ်နေတယ် "ဟု ပန်းတောင်း ခလရ ၂၉ မှ တပ်သတင်းရင်းမြစ်က ဧရာဝတီတိုင်းမ်ကို ပြောသည်။

ပြီးခဲ့သည့် နိုဝင်ဘာလအစက ပြည်-ဒကစလက် အောက်ခံတပ်ရင်းများကို ရခိုင်ပြည်နယ် တောင်ကုတ် စကခ ၅ ကို ပြည်-ပန်းတောင်းလမ်းမှတစ်ဆင့် ပို့ဆောင်ခဲ့ကြောင်း သိရသည်။

ပြည်-ဒကစလက်အောက်ခံ ခလရ ၉၂ (ပန်းတောင်း)၊ခလရ ၅၃ (ပေါက်ခေါင်း)၊ ခလရ ၇၅ (ပြည်)တို့ဖြစ်ပြီး ယင်းတပ်ရင်းများမှ အင်အားအချို့ကို ရခိုင်ပြည် နယ်သို့ ပို့ဆောင်ထားသည့်အတွက် အင်အားနည်းကာ စစ်မှုထမ်းဥပဒေဖြင့် ‌စစ်သင်တန်းဆင်းလာသည့် သင်သန်းသားသစ်များဖြင့်သာ စုဖွဲ့ထားရကြောင်း သိ ရသည်။

ပဲခူးတိုင်းအနောက်ခြမ်းတွင် တော်လှန်ရေးတပ်ဖွဲ့များ မှလည်း မကြာခဏတိုက်ပွဲဖော်ဆောင်နေသည့် အတွက် ပြည်-ဒကစမှ တပ်ဖွဲ့များဖြင့် အင်အား ဖြည့်တင်းထားရသည့်အတွက် ဒကစတွင်အင်အား လျော့နည်းလျက်ရှိကြောင်း သိရသည်။

ပြီးခဲ့သည့် ဖေဖော်ဝါရီလက ပြည်-ဒကစနှင့်မဝေးသည့် စစ်ကောင်စီ၏ စရဖ(SB)နှင့် မှုခင်းရဲတပ်ဖွဲ့ (CID)အိမ်ရာဝန်းတို့ကို တော်လှန်ရေးတပ်ဖွဲ့များက ဗုံး ခွဲတိုက်ခိုက်မှုကိုပင် လုံခြုံရေးအပြည့်ယူပေးနိုင်ခြင်း မရှိသည်ကို တွေ့ရသည်။

ပြည်နဝဒေးတံတား အဝင်အထွက်ကိုလည်း လုံခြုံရေး ယူထားပြီး ဖြတ်သန်းသွားလာသူများကို အထူးကြပ် မတ်စစ်ဆေးလျက်ရှိကြောင်း ဒေသခံများထံမှ သိရသည်။

အင်အားအများအပြား ပို့ဆောင်ထားသည့် တောင်ကုတ်မြို့၏ စကခ-၅ ကျသွားပါက ပြည်ဒကစထဲကို AA နှင့် တော်လှန်ရေးအဖွဲ့များ ဝင်ရောက်တိုက်ခိုက်ပြီး လွယ်လင့် တကူသိမ်းပိုက်သွားမည်ကို စစ်အရာရှိများမှ အထူးစိုးရိမ်လျက်ရှိကြောင်း သိရသည်။

#ပဲခူး #ပြည်ဒကစ #ဖွဲ့စည်းပုံပျက် #အင်အားလျော့နည်း #တိုက်ခိုက်ခံရမည် #စစ်ကောင်စီအရာရှိများ #စိုးရိမ်နေ
#Ayeyarwadd_Times

ရွှေသောင်ယံမြို့သို့ ရခိုင်စစ်ဘေးရှောင် များစွာဝင်ရောက်နေပြီး စစ်ကောင်စီမှ သွားလာခွင့်များတင်းကြပ်ထား

ဧရာဝတီတိုင်းမ်
ဒီဇင်ဘာ ၉ ရက်

ဧရာ၀တီတိုင်း၊ ပုသိမ်မြို့နယ်၊ ရွှေသောင်ယံမြို့သို့ ဒီဇင်ဘာလအတွင်း ရခိုင်ပြည်နယ်မှ စစ်ဘေးရှောင်များဆက်တိုက်၀င်ရောက်နေကြောင်း သတင်းရရှိသည်။

အဆိုပါ ရခိုင်စစ်ဘေးရှောင်များကို စစ်ကောင်စီတပ်နှင့် အုပ်ချုပ်ရေးပိုင်းမှ စည်းကမ်းတင်းကြပ်ထားပြီး မြို့ပြင်ထွက်ခွင့် နှင့် သစ်တောများအတွင်း ဝင်ရောက်ခွင့်များပိတ်ထားကြောင်း သိရှိရသည်။

"စစ်ဆေးရေးဂိတ်မှာ ရခိုင်မှတ်ပုံတင်တွေ့တာနဲ့ အခြားမြို့တွေကိုပေးမသွားဘူး။ တောတက်ပြီး ထင်းခုတ်၊ဝါးရှာခွင့်လုံး၀လုပ်ခွင့်မပေးဘူး "ဟု ရခိုင်စစ်ဘေးရှောင်အမျိုးသားတစ်ဦးမှ ဧရာ၀တီတိုင်းမ်ကို ပြောသည်။

လက်ရှိတွင် ရခိုင်ပြည်နယ် ဂွနှင့်အမ်းမြို့များမှ စစ်ဘေးရှောင်သူ ၅၀၀ကျော်ရောက်ရှိနေပြီး ဒေသခံများ၏နေအိမ်များကို ဌားရမ်းနေထိုင်ခြင်းနှင့် အုန်းခြံများတွင် နေအိမ်ဆောက်လုပ်၍ နေထိုင်ခြင်းကြကြောင်း သိရှိရသည်။

လက်ရှိတွင် ဧရာ၀တီတိုင်းနှင့်ထိစပ်နေသော ရခိုင်ပြည်နယ်တွင် ရခိုင့်တပ်တော် AA နှင့်စစ်ကောင်စီတို့ကြား တိုက်ပွဲပြင်းထန်စွာဖြစ်ပွားနေပြီး စစ်ဘေးရှောင်ပြည်သူများသည် ပုသိမ်၊ရေကြည်၊ ငါးသိုင်းချောင်း၊ရွှေသောင်ယံ၊ သာပေါင်းမြို့များသို့ ရွှေ့ပြောင်းနေထိုင်နေရကြောင်း သိရသည်။

#ရွှေသောင်ယံမြို့ #ရခိုင်စစ်ဘေးရှောင် #စစ်ကောင်စီ #သွားလာခွင့်များတင်းကြပ်ထား #Ayeyarwaddy_Times

အနောက်ပိုင်းတိုင်းစစ်ဌာနချုပ်တွင် ပိတ်မိနေသည့် စစ်ကောင်စီတပ်သားများကို လက်နက်ချရန် AA က အသံချဲ့စက်ဖြင့်အော်နေပြီး စစ်​ကောင်စီ​က လေ​ကြောင်းမှဗုံးကြဲ

ဧရာဝတီတိုင်းမ်
ဒီဇင်ဘာ ၉ရက်

အမ်းမြို့အတွင်း တစ်ခုတည်းသာကျန်ရှိတော့သည့် စစ်ကောင်စီ၏ အနောက်ပိုင်းတိုင်းစစ်ဌာနချုပ်အတွင်း မြေအောက် ဘန်ကာထဲတွင် စစ်ကောင်စီတပ်ဖွဲ့ဝင်များ ပိတ်မိနေပြီး စစ်ကောင်စီက ပေါင် ၁၀၀၀ဗုံးများဖြင့် လာရောက်ကြဲချနေကြောင်း သိရသည်။

နပခအတွင်းမြေအောက်ဘန်ကာထဲတွင် စစ်ကောင်စီတပ်သား ၄၀၀ခန့်ပိတ်မိနေပြီး အင်အား ၁၀၀ခန့်မှာ AAထံတွင် လက်နက်ချအညံ့ခံခဲ့ရာ ကျန်ရှိနေသည့် စစ်ကောင်စီတပ်ဖွဲ့ဝင်များကို လက်နက်ချ အလံဖြူထောင်ရန် AAက နပခဝန်းအတွင်းသို့ အသံချဲ့စက်ဖြင့် အော်၍ တိုက်တွန်းနေကြောင်း သိရသည်။

"ဒဏ်ရာရ အရာရှိအပါအဝင် စစ်သား ၁၀၀နီးပါး လက်နက်ချတယ်။ AAက ဘန်ကာထဲကလူတွေကို အကုန်ထွက်လာဖို့ အော်နေတယ်" ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။

ပြီးခဲ့သည့် ဒီဇင်ဘာ ၆ရက်နေ့တွင် အမ်းမြို့တစ်ခုလုံးကို ထိန်းချုပ်ပြီး စစ်ကောင်စီ၏ တပ်စခန်း ၃၀ကျော်ကိုပါ သိမ်းဆည်းကာ တိုက်ခိုက်ရန် နပခဌာနတစ်ခုသာ ကွက်၍ ကျန်ရှိတော့ကြောင်း AAက ထုတ်ပြန်သည်။

စစ်ကောင်စီ၏ နပခဌာနချုပ်မှာ AA၏ ပိတ်ဆို့မှုကို ခံနေရပြီး လက်နက်၊ခဲယမ်းနှင့် ရိက္ခာကိုလည်း လေကြောင်းမှပင်ပို့ကာ လေယာဉ်မှဗုံးကြဲတိုက်ခိုက်နေရပြီး အပြင်းအထန်ခုခံကာကွယ်နေရကြောင်း သိရသည်။

လက်ရှိတွင် အမ်း နပခနည်းတူ တောင်ကုတ် စကခ ၅မှာလည်း အပြင်းအထန်ထိုးစစ်ဆင်ခံနေရပြီး မောင်တောရှိနောက်ဆုံးကျန်သည့် နခခ၅ကိုလည်း AA က သိမ်းယူထားပြီးဖြစ်သည်။

#အမ်း #နပခ #ဘန်ကာ #စစ်ကောင်စီ #ပိတ်မိ #လက်နက်ချရန် #AA #အသံချဲ့စက်ဖြင့်အော် #Ayeyarwaddy_Times

ပုသိမ်မြို့ င၀န်မြစ်အတွင်း စစ်သင်္ဘောမောင်းနှင်မှုကြောင့် ဒေသခံရေလုပ်သားများ၏ ငါးဖမ်းပိုက်များ ပျက်စီး

ဧရာဝတီတိုင်းမ်
ဒီဇင်ဘာ ၉ ရက်

ဧရာ၀တီတိုင်း၊ ပုသိမ်မြို့ရှိ င၀န်မြစ်အတွင်းတွင် ဒီဇင်ဘာ ၇ရက်နေ့ညနေပိုင်းက စစ်ကောင်စီ၏ ရေတပ်သင်္ဘော ကြောင့် ဒေသခံ ရေလုပ်သားများ၏ ငါးဖမ်းပိုက်များပျက်စီးသွားကြောင်း သိရှိရသည်။

ပုသိမ်မြို့အခြေစိုက် စစ်ကောင်စီရေတပ် ဖြစ်သော အမှတ် (၂၆)စစ်ရေယာဥ်စုမှ သဘ်ောတစ်စီး အရှိန်ဖြင့်မောင်းနှင်ခဲ့ပြီး င၀န်မြစ်အတွင်းမှ ဒေသခံများ၏ ငါးသလောက်ပိုက်တန်းများကို တိုက်သွားခြင်းဖြစ်ကြောင်းသိရှိရသည်။

"ခုရာသီက ငါးသလောက် ချိန်ဆိုတော့ တော်တော်များများ ပိုက်ချထားကြတာ။ စစ်သင်္ဘောက အရှိန်နဲ့လာပြီးဦးပိုင်းနဲ့ထိုးခွဲသွားတာ။ မြစ်ထဲမှ ပိုက်တန်းလေးတွေတွေ့ရင် တစ်ခြားသင်္ဘောတွေဆိုရှောင်ပြီးမောင်းပေးတာထုံးစံဖြစ်နေပြီ။ ခုက စစ်တပ်ဆိုတော့ အလျော်လဲမရ ပိုက်ကလဲ ပြန်၀ယ်ဖို့ ဈေးကလဲကြီးနေတော့ ခက်ကုန်ရော"ဟု ငါးဖမ်းပိုက်ဆုံးရူံးခဲ့သူအမျိုးသားတစ်ဦးက ဧရာ၀တီတိုင်းမ်ကိုပြောသည်။

စစ်သင်္ဘော၏ တိုက်မှုကြောင့် ဒေသခံ ရေလုပ်သား ( ၁၅)ဦးခန့်၏ငါးသလောက်ပပိုက်တန်းများဆုံးရူံးခဲ့ပြီး ကာလတန်ဖိုး သိန်း(၁၀၀)ကျော်ခန့်ရှီကြောင်းသိရှိရသည်။

အဆိုပါစစ်သင်္ဘောသည် ပုသိမ်မြို့မှ သာပေါင်းမြို့သို့ စစ်ကောင်စီတပ်သားများတင်ဆောင်ကာ သွားရောက်ပို့ဆောင်ခဲ့ခြင်းဖြစ်ကြောင်း စစ်ကောင်စီတပ်နှင့်နီးစပ်သူများထံမှသိရသည်။

ဓာတ်ပုံ-ငဝန်မြစ်

#ပုသိမ်မြို့ #င၀န်မြစ် #စစ်သင်္ဘော #မောင်းနှင်မှုကြောင့် #ဒေသခံရေလုပ်သားများ #ငါးဖမ်းပိုက်များပျက်စီး #Ayeyarwaddy_Times

ဗန်းမော် တိုက်ပွဲဆက်လက်ပြင်းထန်နေပြီး မြို့ပေါ် ၁၆ ရပ်ကွက်လုံးတွင် ကျန်ရှိနေသည့် စစ်ကောင်စီတပ်ဖွဲ့ဝင်များကို KIA ရှင်းလင်း

ဧရာဝတီတိုင်းမ်
ဒီဇင်ဘာ ၉ရက်

ဗန်းမော်မြို့တွင်း တိုက်ပွဲဆက်လက်ပြင်းထန်နေပြီး ကချင်လွတ်လပ်ရေးတပ်မတော် (KIA) က မြို့ပေါ်ရှိ နေရာအများစုကို သိမ်းပိုက်နေရာယူထားပြီး ဖြစ်ကြောင်း သိရသည်။

ယမန်နေ့ ဒီဇင်ဘာ ၈ ရက်နေ့ ညပိုင်းက မြို့ပေါ် ၁၆ ရပ်ကွက်လုံးနှင့် မြို့ပြင်ကိုပါ ဆက်လက်ရှင်းလင်းနေပြီး စစ်ကောင်စီထံက လက်နက်ခဲယမ်းအချို့ပါသိမ်းဆည်းရရှိထားကြောင်း ကချင်သတင်းရင်းမြစ်ထံက သိရသည်။

"Grand Hotel၊ Friendish Hotelတွေနားထိ KIA က နေရာယူထားပြီ။ စကခ ၂၁ ထဲက လက်နက်ကြီးတွေနဲ့ ထုထားတယ်။ ပိတ်မိနေတဲ့ ပြည်သူတွေရှိနေတုန်းပဲ" ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။

ထို့အပြင် မြို့မရဲစခန်းအပါအဝင် ဌာနဆိုင်ရာပေါင်းစုံ ရုံးချုပ်ကြီးနှင့် အထပ်မြင့်ဟိုတယ်များကိုပါ KIA က ဝင်ရောက်နေရာယူထားနိုင်ပြီဖြစ်ကြောင်း သိရသည်။

စစ်ကောင်စီ၏ စကခ ၂၁ဌာနချုပ်အတွင်းသို့လည်း ၁၂၀မမ ဗုံးသီးများဖြင့် ပစ်ခတ်ထားနိုင်ခဲ့ပြီး တပ်ရင်း တပ်စခန်းအချို့ကိုလည်း KIA က စစ်မျက်နှာဖြန့်တိုက်ခိုက်နေကြောင်း သိရသည်။

ပြီးခဲ့သည့် ဒီဇင်ဘာလ ၄ ရက်နေ့ နံနက် ၄နာရီခန့်က စတင်ခဲ့သည့် ဗန်းမော်မြို့သိမ်းတိုက်ပွဲအတွင်း လေယာဉ်ဗုံးကြဲခံရမှုနှင့် စကခ ၂၁ အတွင်းမှပစ်ခတ်သည့် လက်နက်ကြီးများကြောင့် ဒေသခံ ဒါဇင်ကျော် သေဆုံးမှုရှိကြောင်း စစ်ရှောင်လာသည့် ဒေသခံများထံက သိရသည်။

ဗန်းမော်တွင် စစ်ကောင်စီ၏ အမှတ်(၂၁) စစ်ဆင်ရေးကွပ်ကဲမှုဌာနချုပ် (စကခ-၂၁) ဌာနချုပ်အပါအဝင် စစ်ဖက်ရေးရာလုံခြုံရေးတပ်စု၊ ခလရ ၄၇၊ ခလရ၂၃၆၊ ခလရ ၂၃၇၊ ထပခ ၉၃၃ ထောက်ပံ့ပို့ဆောင်ရေးတပ်၊ အမှတ် (၁၁) စစ်မြေပြင်ဆေးတပ်ရင်း၊ ဆက်သွယ်ရေးတပ်၊ အမတ (၃၁၄) အမြောက်တပ်၊ အမှတ် (၃၆၆)အမြောက်တပ်၊ အမှတ် (၅၀၁၄)တင့်ကားတပ်ရင်း၊ အမှတ် (၇၀၀၆) သံချပ်ကာတပ်ရင်း၊ အမှတ် (၉၁၄)စစ်အင်ဂျင်နီယာတပ်၊ အမှတ် (၉၄၄)ဆောက်လုပ်ရေးအင်ဂျင်နီယာတပ်ခွဲ၊ တပ်မ (၈၈)လက်အောက်ခံ တပ်ရင်း သံုးခုတို့ရှိကြောင်း သိရသည်။

ဗန်းမော်မြို့သိမ်း ၅ရက်တာတိုက်ပွဲအတွင်း စစ်ကောင်စီ၏ ကာကင်းစခန်းများနှင့် တပ်စခန်း ၁၀ခုကျော်ကို KIAက သိမ်းပိုက်ထားကြောင်း သိရသည်။

ဓာတ်ပုံ-ကချင်တောင်တန်း
ပုံစာ- စကခ ၂၁အတွင်း လက်နက်ကြီးဖြင့်ပစ်ခတ်နေစဉ်

#ဗန်းမော် #တိုက်ပွဲပြင်းထန် #မြို့ပေါ်၁၆ရပ်ကွက် #KIAနေရာယူ #Ayeyarwaddy_Times

နခခ ၅မှ ထွက်ပြေးသွားသည့် စကခ ၁၅ကွပ်ကဲရေးမှူး ဗိုလ်မှူးချုပ်သူရိန်ထွန်းနှင့် စစ်အရာရှိများ ARSAတပ်ဖွဲ့ဝင်များကို AAဖမ်းမိ

ဧရာဝတီတိုင်းမ်
ဒီဇင်ဘာ ၉ရက်

အာရက္ခတပ်တော် (AA) သိမ်းပိုက်ရယူလိုက်သည့် မောင်တော အမှတ်(၅) နယ်ခြားစောင့်စခန်း (နခခ-၅) မြို့သူကြီး အတွင်းမှ ARSA တပ်ဖွဲ့၏ အကူအညီဖြင့် နတ်မြစ်အတွင်း ထွက်ပြေးသွားသော စကခ ၁၅ ကွပ်ကဲရေးမှူး ဗိုလ်မှူးချုပ် သူရိန်ထွန်းကို AA က ဖမ်းဆီး ရမိခဲ့ကြောင်း သိရသည်။

ယမန်နေ့ ဒီဇင်ဘာ ၈ရက်နေ့ ညပိုင်းတွင် ဗိုလ်မှူးချုပ်သူရိန် ထွန်းအပါအဝင် စစ်ကောင်စီတပ်ဖွဲ့ဝင်များနှင့် ARSA တပ်ဖွဲ့ဝင် အင်အား ၈၀ ပါအဖွဲ့ကို AAက ဖမ်းဆီးရမိခဲ့ကြောင်း သိရသည်။

"နတ်မြစ်ကနေ လှေနဲ့ပြေးဖို့ လုပ်နေကြတာလို့ သိရပါတယ်။ ညပိုင်းကဖမ်းမိသွားတယ်ဆိုတာ အတည်ပြုနိုင်ပါတယ်" ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။

အမှတ်(၁၅) စစ်ဆင်ရေးကွပ်ကဲမှုဌာနချုပ် (စကခ-၁၅) ကွပ်ကဲရေးမှူး ဗိုလ်မှူးချုပ် သူရိန်ထွန်းသည် နခခ ၅အတွင်း လက်နက်၊ခဲယမ်းနှင့် စားနပ်ရိက္ခာမရှိတော့ဘဲ ပိတ်မိနေသည့် အောက်ခြေစစ်သားနှင့် ရဲများကို ထားခဲ့ကာ စစ်အရာရှိတချို့နှင့် ကိုယ်လွတ်ရုန်းထွက်ပြေးသွားခဲ့ခြင်းဖြစ်ကြောင်း သိရသည်။

နတ်မြစ်မှတဆင့် စစ်ကောင်စီသင်္ဘောများထံ လှေနှင့်ထွက်ပြေးရန်အတွက် ARSA၊ ARA၊ RSO စသည့် မူဆလင်လက်နက်ကိုင်အဖွဲ့များ၏ အကူအညီကိုရယူခဲ့ကြောင်း သိရသည်။

မူဆလင်လက်နက်ကိုင်အဖွဲ့များက ဗိုလ်မှူးချုပ်သူရိန်ထွန်းနှင့်အဖွဲ့ လွတ်မြောက်ရန် AAကို တိုက်ခိုက်ခဲ့သည့်အတွက် နတ်မြစ်၌ တိုက်ပွဲများ ဆက်လက်ရှိနေခဲ့ပြီး ယမန်နေ့ညပိုင်းက မူဆလင်လက်နက်ကိုင်အချို့နှင့် ဗိုလ်မှူးချုပ်သူရိန်ထွန်းတို့ကို AAက ဖမ်းဆီးရမိခဲ့ခြင်း ဖြစ်သည်။

ဗိုလ်မှူးချုပ်သူရိန်ထွန်းသည် ဘူးသီးတောင်နှင့်မောင်တောရှိ ဒေသခံများသတ်ဖြတ်ခံရမှုနှင့် AAအလိုမရှိကြောင်း ဆန္ဒပြပွဲများ၊ မူဆလင်လက်နက်ကိုင်များနှင့်ပူးပေါင်း၍ ဒေသခံများ၏ နေအိမ်များကို မီးရှို့ဖျက်ဆီးမှုများကို အဓိက ဦးဆောင်ခဲ့ခြင်းဖြစ်ကြောင်း ဒေသခံများထံက သိရသည်။

နတ်မြစ်တလျှောက် စစ်ကောင်စီအဖွဲ့များနှင့် ARSA၊ARA၊ RSO အစရှိသော လက်နက်ကိုင်အဖွဲ့များ ထွက်ပြေးလွတ်မြောက်နေသည့်အတွက် နတ်မြစ်ဝန်းကျင်ကို အသုံးမပြုကြရန် ယမန်နေ့ ဒီဇင်ဘာ ၈ရက်နေ့ ညနေပိုင်းတွင် AA က ထုတ်ပြန်ထားသည်။

ပုံစာ-ဗိုလ်မှူးချုပ်သူရိန်ထွန်း

#မောင်တော #စကခ၁၅ #ကွပ်ကဲရေးမှူး #ဗိုလ်မှူးချုပ်သူရိန်ထွန်း #AA #ဖမ်းမိ #Ayeyarwaddy_Times

ယူကရိန်းသို့ ဒေါ်လာ ၉၈၈ သန်းတန်ကြေးရှိ လုံခြုံရေးအကူအညီပေးမယ်လို့ အမေရိကန် ကြေညာ

ဧရာဝတီတိုင်းမ်
ဒီဇင်ဘာ ၉ ရက်

ရုရှားကျူးကျော်စစ်ကို ဆက်လက်ပြီး ခုခံနိုင်ဖို့ ယူကရိန်းသို့ ဒေါ်လာ (၉၈၈) သန်းတန်ကြေးရှိ စစ်လက်နက်တွေ ထောက်ပံ့မယ့်အစီအစဉ်တစ်ခုကို အမေရိကန်နိုင်ငံက ကြေညာလိုက်ပါတယ်။

အမေရိကန်အစိုးရဟာ ပြည်တွင်းကာကွယ်ရေးကုမ္ပဏီတွေထံမှ စစ်လက်နက်တွေဝယ်ယူဖို့ လုပ် ဆောင်လျက်ရှိပြီး ယခုအစီအစဉ်ဟာ ယူကရိန်း လုံခြုံရေးအကူအညီအစီအစဉ်ရဲ့ ဒေါ်လာ ၂ ဒသမ ၂၁ ဘီ လီယံကို ထက်ဝက်သက်သာစေပါတယ်။

အမေရိကန်နိုင်ငံက ယူကရိန်းသို့ပေးအပ်မယ့် စစ်လက်နက်တေွထဲမှာ HIMARS ဒုံးကျည်တွေ၊ ဒရုန်းတွေနဲ့ အမြောက်ကိရိယာတွေ ပါဝင်တယ်လို့ ပင်တဂွန်က ပြောပါတယ်။

ကယ်လီဖိုးနီးယားပြည်နယ်မှာကျင်းပတဲ့ ရီဂင်ကာကွယ်ရေးဖိုရမ်မှာ ကာကွယ်ရေးကုမ္ပဏီတွေနဲ့ မူဝါဒချမှတ်သူတွေ တွေ့ဆုံစဉ် အမေရိကန်နိုင်ငံက ယူကရိန်းသို့ စစ်လက်နက်ထောက်ပံ့ဖို့ ကြေညာခဲ့ တာပါ။

အရေးပေါ်အခြေအနေမှာ ကွန်ဂရက်ရဲ့ အတည်ပြုချက်မလိုပဲ စစ်လက်နက်တွေကို ယူကရိန်းသို့ လွှဲပြောင်းပေးဖို့ သမ္မတ ဂျိုးဘိုင်ဒင်အစိုးရက Presidential Drawdown Authority ကို မကြာခဏဆိုသ လို အသုံးပြုခဲ့ပါတယ်။

၂၀၂၄ ခုနှစ်အတွင်း ခွင့်ပြုထားတဲ့ ရန်ပုံငွေတွေ အပါအဝင် အမေရိကန်အစိုးရမှာ ကွန်ဂရက်က ခွင့်ပြုထားတဲ့ ရန်ပုံငွေ ဒေါ်လာ (၆) ဘီလီယံခန့် ရှိနေဆဲလို့ သိရပါတယ်။

၂၀၂၂ ခုနှစ်၊ ဖေဖော်ဝါရီလ ရုရှားကျူးကျော်စစ်နောက်ပိုင်း အမေရိကန်နိုင်ငံဟာ ယူကရိန်းသို့ ဒေါ်လာ (၆၂) ဘီလီယံတန်ကြေးရှိ လုံခြုံရေးအကူအညီပေးဖို့ ကတိပြုခဲ့ပါတယ်။

ကိုးကား - Reuters
Ref; US unveils $988m aid package for Ukraine including rockets and drones

#Ayeyarwaddy_Times

နိုင်ငံတော်သစ္စာဖောက်မှု၊ အာဏာအလွဲသုံးစားမှုနဲ့ တောင်ကိုရီးယားသမ္မတ ယွန်ဆတ်ခ်ယိုအား စုံစမ်းစစ်ဆေးနေ

ဧရာဝတီတိုင်းမ်
ဒီဇင်ဘာ ၉ ရက်

နိုင်ငံတော်သစ္စာဖောက်မှု၊ အာဏာအလွဲသုံးစားမှုနဲ့ သမ္မတ ယွန်ဆတ်ခ်ယိုအား စုံစမ်းစစ်ဆေးနေ တယ်လို့ တောင်ကိုရီးယား အစိုးရရှေ့နေရုံးမှ အကြီးတန်း တာဝန်ရှိသူတစ်ဉီးက ပြောပါတယ်။

မဲပေးသူမပြည့်မီတာကြောင့် သမ္မတ ယွန်ဆတ်ခ်ယိုအား တရားစွဲဆိုဖို့အဆို မအောင်မြင်ခဲ့ပြီး နောက် တနင်္ဂနွေနေ့က ဆိုးလ်မြို့တော်ရှိ လွှတ်တော်ရှေ့မှာ လူအုပ်တွေ စုဝေးခဲ့ပါတယ်။

သမ္မတ ယွန်ဆတ်ခ်ယိုအား စစ်အုပ်ချုပ်ရေးအမိန့် ထုတ်ပြန်ဖို့ အကြံပြုခဲ့တဲ့ ကာကွယ်ရေးဝန်ကြီး ဟောင်း ကင်ယောင်ဟွန်ကိုလည်း တနင်္ဂနွေနေ့က ဖမ်းဆီးခဲ့ပါတယ်။

ပြည်ထဲရေးဝန်ကြီး လီဆန်မင်ကလည်း တနင်္ဂနွေနေ့က ရာထူးမှနှုတ်ထွက်ဖို့ တင်ပြခဲ့ပါတယ်။ ယွန်ဆတ်ခ်ယိုကို မကူညီနိုင်တဲ့ သူ့ရဲ့တာဝန်ကို ရိုးသားစွာ ဝန်ခံကြောင်း လီဆန်မင်က ပြောကြားခဲ့ပြီး ပြည်သူတွေကို တောင်းပန်လိုက်ပါတယ်။

ပြည်ထဲရေးဝန်ကြီး လီဆန်မင်ရဲ့ နှုတ်ထွက်စာကို လက်ခံခဲ့ပြီလို့ တောင်ကိုရီးယားသမ္မတရုံးက ပြောကြားပါတယ်။

ယွန်ဆတ်ခ်ယိုရဲ့ စစ်အုပ်ချုပ်ရေးအမိန့် ကြေညာချက်နဲ့ပတ်သက်လို့ တိုင်တန်းမှုတွေများစွာ လက်ခံရရှိခဲ့တယ်လို့ တောင်ကိုရီးယားအစိုးရရှေ့နေရုံးက ပြောပါတယ်။

ဝန်ကြီးချုပ်နဲ့ အစိုးရအဖွဲ့အကြီးအကဲက ဖွဲ့စည်းပုံအခြေခံဉပဒေနဲ့မညီဘဲ နိုင်ငံတော်ရေးရာကို တာဝန်ယူပါက ဒုတိယအကြိမ် သူပုန်ထမှုဖြစ်လိမ့်မယ်လို့ အကြီးမားဆုံး အတိုက်အခံ ဒီမိုကရက်တစ်ပါ တီခေါင်းဆောင် လီဂျေမြောင်က ပြောပါတယ်။

ယွန်ဆတ်ခ်ယိုအား တရားစွဲဆိုဖို့ သေချာပေါက် လုပ်ဆောင်မယ်လို့ သူက ဆက်ပြောပါတယ်။ ဒီ မိုကရက်တစ်ပါတီက သမ္မတအား တရားစွဲဖို့ နောက်ထပ်အဆိုတင်သွင်းဖို့ စီစဉ်နေပါတယ်။

ကိုးကား - NHK
Ref; South Korean President Yoon probed for alleged treason, power abuse

#Ayeyarwaddy_Times

ဆီးရီးယားအာဏာရှင် အာဆတ်နဲ့မိသားစု ရုရှားနိုင်ငံသို့ ထွက်ပြေး

ဧရာဝတီတိုင်းမ်
ဒီဇင်ဘာ ၉ ရက်

ဆီးရီးယားသမ္မတဟောင်း ဘာရှားအယ်လ်အာဆတ်နဲ့ သူ့ရဲ့မိသားစုဟာ မော်စကိုမြို့သို့ ရောက် လာခဲ့ပြီလို့ ရုရှားနိုင်ငံပိုင် RIA သတင်းဌာနက သမ္မတရုံး သတင်းရင်းမြစ်တစ်ခုကို ကိုးကားပြီး တနင်္ဂနွေ နေ့က ပြောပါတယ်။

ရုရှားနိုင်ငံက လူသားချင်းစာနာထောက်ထားမှုကို ထည့်သွင်းစဉ်းစားကာ အာဆတ်နဲ့မိသားစုကို ခိုလှုံခွင့်ပြုခဲ့တာလို့ အဆိုပါသတင်းရင်းမြစ်က ပြောပါတယ်။

ရုရှားနိုင်ငံက ဆီးရီးယားအကျပ်အတည်းအတွက် နိုင်ငံရေးအဖြေရှာမှုကို ထောက်ခံကာ ကုလသ မဂ္ဂရဲ့ ဉီးဆောင်မှုအရ စေ့စပ်ညှိနှိုင်းမှုတွေ ပြန်လည်စတင်ဖို့ လိုအပ်တယ်လို့ သတ်မှတ်ကြောင်း သတင်း က ဖော်ြပပါတယ်။

ဒမာစကပ်မြို့ဟာ အာဆတ်ရဲ့လက်ကနေ လွတ်မြောက်ပြီဖြစ်ကာ ယင်းမြို့ကို ထိန်းချုပ်လိုက်ပြီ ဖြစ်လို့ အာဆတ်ရဲ့အုပ်ချုပ်မှု ပြီးဆုံးသွားပြီလို့ အစိုးရဆန့်ကျင်ရေးအဖွဲ့က နိုင်ငံပိုင်ရုပ်သံဌာနမှတစ်ဆင့် ကြေညာခဲ့ပါတယ်။

ဒမာစကပ်မြို့ရဲ့ အခြေအနေက ရှင်းရှင်းလင်းလင်း မသိရသေးဘဲ သမ္မတ အာဆတ်က ထွက်ပြေး သွားပြီလို့ သူပုန်အဖွဲ့တွေက ပြောပါတယ်။ သူပုန်တွေရဲ့ပြောဆိုချက်ဟာ မမှန်ကန်ဘူးလို့ အာဆတ်အစိုး ရက လူမှုကွန်ရက်မှာ ပြောပါတယ်။

သူပုန်အဖွဲ့တွေက ဆီးရီးယားတောင်ပိုင်း ဒေသအများစုကို ထိန်းချုပ်ခဲ့ပြီး အစိုးရတပ်ဖွဲ့တွေက အနောက်တောင်ပိုင်း ဒေသ (၃) ခုမှ ဆုတ်ခွာခဲ့ရတယ်လို့ ဆီးရီးယား လူ့အခွင့်အရေး စောင့်ကြည့်လေ့ လာရေးအဖွဲ့က ပြောပါတယ်။

ပြီးခဲ့တဲ့သီတင်းပတ်အနည်းငယ်အတွင်း အတိုက်အခံတပ်ဖွဲ့တွေဟာ လက်ဘနွန်နဲ့ယူကရိန်း ပဋိပက္ခတွေကို အားသာချက်ရယူကာ နယ်မြေသိမ်းပိုက်မှုတွေ ရရှိခဲ့ပါတယ်။

အဆိုပါပဋိပက္ခတွေက အာဆတ်အစိုးရအဖွဲ့ထံ လက်ဘနွန်နိုင်ငံအခြေစိုက် ဟစ်ဇ်ဘိုလာအဖွဲ့နဲ့ ရုရှားနိုင်ငံရဲ့ စစ်ရေးအကူအညီပေးဖို့ ကြိုးပမ်းမှုတွေကို ဟန့်တားမှုဖြစ်စေပါတယ်။

ကိုးကား - Xinhua/NHK
Ref; Assad and his family arrive in Moscow

#Ayeyarwaddy_Times

ဖာပွန်ရှိ မထောစစ်ကောင်စီစခန်းကို တစ်စစ်ကော ထိုးစစ်ဆင်ခဲ့သည့် စခန်းသိမ်း တိုက်ပွဲတွင် စစ်ကောင်စီတပ်ဖွဲ့ဝင် ၉ ဦးနှင့်အထက် သေဆုံး

ဧရာဝတီတိုင်းမ်
(ဖာပွန်)၊ နိုဝင်ဘာ ၂၃ ရက်

ကရင်ပြည်နယ်၊ ဖာပွန်မြို့နယ်၊ မထောရွာရှိ နှစ်ပေါင်း ၇၀ ကျော်ကြာ တပ်စွဲထားသည့် စစ်ကောင်စီ၏ မထောစခန်းကို နိုဝင်ဘာ ၁၆ ရက်မှ စတင်၍ တော်လှန်ရေးပူးပေါင်းတပ်ဖွဲ့များက ထိုးစစ်ဆင်ခဲ့တိုက်ခိုက်ခဲ့ရာ နိုဝင်ဘာ ၂၂ ရက်နေ့တွင် စခန်းသိမ်းပိုက်ရရှိခဲ့ကြောင်း သိရသည်။

ဖာပွန်မြို့အထွက် မထောရွာအနီးတွင် တပ်စွဲထားသော စစ်ကောင်စီစစ်ကြောင်းကို နိုဝင်ဘာ ၁၆ ရက်နေ့ကစတင်ကာ တိုက်ခိုက်ခဲ့ပြီး အဆိုပါတိုက်ပွဲတွင် စစ်ကောင်စီတပ်ဖွဲ့ဝင် ငါး ဦးသေဆုံးခဲ့ပြီး နောက်ရက်များတွင်လည်း ထပ်မံတိုက်ခိုက်ခဲ့ရာ တပ်ဖွဲ့ဝင် လေး ဦး သေဆုံးခဲ့ကြောင်း သိရသည်။

ထို့ပြင် ဆက်လက်၍ နိုဝင်ဘာ ၂၂ ရက်နေ့အထိ မထောရွာဝန်းကျင်ရှိ စစ်ကောင်စီ စစ်ကြောင်း နှင့် ၎င်းတို့အထိုင်ချတပ်စွဲထားသည့် မထော စခန်းကို နေ့စဉ် ထိုးစစ်ဆင် တိုက်ခိုက်ခဲ့ရာ အပြီးသတ်စခန်းသိမ်းပိုက် ရရှိခဲ့ကြောင်း တောင်ပိုင်းစစ်ဒေသထံက သိရသည်။

"ထိခိုက်သေဆုံးမှုကိုတော့ အတိအကျစိစစ်အတည်ပြုနိုင်ခြင်းမရှိပါဘူး။ ဘာကြောင့်လဲဆိုတော့ သူတို့ စခန်းစွန့်ခွာထွက်ပြေးသွားကြတာဆိုတော့လေ။ အဓိကကတော့ အဲ့စခန်းကို ကျွန်တော်တို့ကတစ်ပတ်ကြာ ပိတ်ဆို့တိုက်ခိုက်ပြီးတဲ့နောက်ပိုင်းမှာ စခန်းစွန့်ခွာထွက်ပြေးသွားကြတာ။ ပထဦးဆုံးအနေနဲ့ နယ်မြေရှင်းလင်းရေးကိုလုပ်ဆောင်ပြီး စခန်းဧရိယာ သက်ဆိုင်ရာနယ်မြေအတွင်းမှာရှိတဲ့ ရှင်းလင်းရေးလုပ်ငန်းစဉ်တွေကိုအရင်လုပ်ဆောင်တာဖြစ်ပါတယ်။ ဒီဧရိယာအတွင်းမှာ စစ်ကောင်စီတပ်ဖွဲ့ဝင် လက်ကျန်ရှိမရှိကိုတော့ ရှာဖွေစိစစ်ဆဲဖြစ်ပါတယ်" ဟု တောင်ပိုင်းစစ်ဒေသ၊ အမှတ်(၂) စစ်ဒေသခွဲပြန်ကြားရေး တာဝန်ရှိသူက ဧရာဝတီတိုင်းမ်ကို ပြောသည်။

စခန်းသိမ်းတိုက်ပွဲအတွင်း စစ်ကောင်စီတပ်သား သေဆုံးမှု အရေအတွက်ကို ဆက်လက်စီစစ်နေဆဲဖြစ်ပြီး စစ်ကောင်စီ၏ လက်နက်ကြီးပစ်ကူ၊ လေယာဉ်ပစ်ကူများဖြင့် တိုက်ခိုက်မှုများကြောင့် တော်လှန်ရေး ပူးပေါင်းတပ်ဖွဲ့မှ ရဲဘော်တစ်ဦး ကျဆုံးခဲ့ကြောင်း သိရသည်။

လက်ရှိတွင် မထောစစ်ကောင်စီစခန်း သိမ်းပိုက်နိုင်ပြီးနောက် စစ်ကောင်စီက ဖာပွန်သို့ သက်ဆိုင်ရာတပ်ရင်းအကူများပေးပို့ထားပြီး တပ်အင်အားထပ်မံဖြည့်တင်းရန်လုပ်ဆောင်နေကြောင်း သိရသည်။

တော်လှန်ရေးပူးပေါင်းတပ်ဖွဲ့များသည် ကူးဆိပ်စစ်ကောင်စီစခန်း သိမ်းပိုက်ပြီးနောက် တော်လှန်ရေးပူးပေါင်းတပ်ဖွဲ့များက စတင်ကာ ထိုးစစ်တိုက်ခိုက်ခဲ့ခြင်းဖြစ်သည်။

ယခုအခါ ဖာပွန်ဒေသတွင် စစ်ကောင်စီ၏ ဖာပွန်ဗျူဟာ၊ တပ်ရင်းအနည်းငယ် နှင့် စခန်းငယ် အနည်းစုသာ ကျန်ရှိတော့ပြီး နယ်မြေထိန်းချုပ်နိုင်မှုမှာလည်း မရှိတော့ကြောင်း ဖာပွန် စစ်ရေးသတင်းရင်းမြစ်ထံက သိရသည်။

ပုံစာ - မထောရွာစခန်းသိမ်းတိုက်ပွဲတွင် သိမ်းဆည်းရမိခဲ့သော ခဲယမ်းများ

#ဖာပွန် #မထောစခန်း #စခန်းသိမ်းပိုက် #စစ်ကောင်စီ #သေဆုံး #KNLA #PDF #Ayeyarwaddy_Times

ရေကြည်တွင် စစ်ကောင်စီခန့် ရပ်ကွက်အုပ်ချုပ်ရေးမှူးက လူငယ်များ၏ နေအိမ်များကို ခြိမ်းခြောက်ငွေတောင်း

ဧရာဝတီတိုင်းမ်
နိုဝင်ဘာ ၂၃ ရက်

ဧရာဝတီတိုင်း၊ ရေကြည်မြို့နယ်၊ ပတောက်ချောင်ကျေးရွာအုပ်စုတွင် စစ်ကောင်စီခန့် ရပ်ကွက်အုပ်ချုပ်ရေးမှူးနှင့် စစ်ကောင်စီတပ်တို့က ပြည်သူ့စစ်မှုထမ်းအကြုံးဝင်သည့် အသက် ၁၈နှစ်မှ ၃၅နှစ်ရှိ လူငယ်များ၏ နေအိမ်များကို ခြိမ်းခြောက်၍ ငွေများတောင်းယူနေကြောင်း ဒေသခံများထံကသိရသည်။

အသက် ၁၈နှစ်မှ ၃၅နှစ်ရှိ လူငယ်တစ်ဦးကို ခုနှစ်သောင်းကျပ်တောင်းယူသည့်အပြင် လူငယ်နှစ်ဦးရှိလျှင် တစ်သိန်းလေးသောင်းကျပ်ပေးဆောင်ရပြီး လူငယ်များမရှိသည့် နေအိမ်များက်ို တစ်သောင်းခွဲကျပ်စီ တောင်းယူကြောင်း ဒေသခံများကပြောသည်။

"အုပ်ကြီးနဲ့ စစ်သားတွေရောက်လာပြီး ပေါ်တာဆွဲဖို့ လုပ်ကြတယ််၊ လူရှာမရတော့ ညပိုင်း အစည်းအဝေးတွေ အတင်း​ခေါ်တယ်။ လူငယ်တွေရှောင်နေကြတော့ အချ်ို့ကျ လူငယ်ရှိတဲ့နေအိမ်တွေကို ငွေတောင်းယူကြတော့တာပဲ"ဟု ရေကြည်မြို့နယ်ရှိ ဒေသခံတစ်ဦးက ဧရာဝတီတိုင်းမ်ကိုပြောသည်။

ပတောက်ချောင်းကျေးရွာအုပ်စု ရပ်ကျေးအုပ်ချုပ်ရေးမှူးမှာ ဦးမြင့်ဌေးဖြစ်ပြီး စစ်
ကောင်စီတပ်သားများနှင့် ပူးပေါင်းကာ ယခုကဲ့သို့ ခြိမ်းခြောက်၍ နေ့စဥ်ငွေတောင်းယူမှုများ ပြုလုပ်နေသည်ဟု ဒေသခံများကဆိုသည်။

ပတောက်ချောင်းကျေးရွာအုပ်စုအတွင်း ပြည်သူ့ စစ်မှုထမ်းအကြုံဝင်သည့် လူငယ်များ၏ နေအိမ်များနှင့် လူငယ်များမရှိနေအိမ်မှာ သုံလတစ်ကြိမ် အချိုးကျငွေပေးဆောင်ရမည် ဟူ၍လည်း ဒေသခံများက ဆက်လက်ပြောသည်။

ထို့ပြင် ဖျာပုံမြို့နယ်တွင် စစ်မှုထမ်းဥပဒေကိုအကြောင်းပြပြီး ကျေးရွာအတွင်း ငွေသိန်းရာချီ တောင်းယူခဲ့သော အုပ်ချုပ်ရေးမှူးတစ်ဦးကို ဒေသခံများ၏ တိုင်ကြားသဖြင့် စစ်ဆေးပြီး နို၀င်ဘာလအတွင်းက ရာထူးမှ အနားပေးရုံသာပြစ်ဒဏ်ချမှတ်ခဲ့ကြောင်း သိရှိရသည်။

ဧရာဝတီတိုင်းတွင် မြို့နယ်စုစုပေါင်း ၂၆မြို့နယ်ရှိပြီး စစ်ကောင်စီခန့် ရပ်ကျေးအုပ်ချူပ်ရေးမှူးများနှင့် စစ်ကောင်စီတပ်တို့ပူးပေါင်းကာ အောက်တိုဘာလက စတင်ပြီး ပြည်သူ့စစ်မှုထမ်းဥပဒေကို အကြောင်းပြ၍ ငွေတောင်းယူမှုများ ပိုမိုလုပ်ဆောင်လာကြသည်။

ဓာတ်ပုံ- ပြည်သူ့စစ်မှုထမ်းသင်တန်းသားများ

#ရေကြည် #စစ်ကောင်စီ #ရပ်ကွက်အုပ်ချုပ်ရေးမှူး #အသက်၁၈နှစ် #၃၅နှစ် #လူငယ်များ #နေအိမ်တွေကို #ခြိမ်းခြောက်ငွေတောင်း #Ayeyarwaddy_Times

စစ်မှုထမ်းဥပဒေအကြောင်းပြပြီး သိန်းရာချီတောင်းယူခဲ့သော ဖျာပုံမြို့နယ်မှ အုပ်ချုပ်ရေးမှူးတစ်ဦးကို တာ၀န်မှအနားပေးရုံသာပြစ်ဒဏ်ပေး

ဧရာဝတီတိုင်းမ်
နိုဝင်ဘာ ၂၃ ရက်

ဧရာ၀တီတိုင်း၊ ဖျာပုံမြို့နယ်တွင် စစ်မှုထမ်းဥပဒေကိုအကြောင်းပြပြီး ကျေးရွာအတွင်း ငွေသိန်းရာချီ တောင်းယူခဲ့သော အုပ်ချုပ်ရေးမှူးတစ်ဦးကို ဒေသခံများ၏ တိုင်ကြားသဖြင့် စစ်ဆေးပြီး နို၀င်ဘာလအတွင်းက ရာထူးမှ အနားပေးရုံသာပြစ်ဒဏ်ချမှတ်ခဲ့ကြောင်း သိရှိရသည်။

ကြက်ဖမွေးစောင်းကျေးရွာ၏ အုပ်ချုပ်ရေးမှူး ဖြစ်သူ ဦးဟိန်းထက်ကို ဒေသခံများ၏ တိုင်ကြားမှုကြောင့် တိုင်းအဆင့်နှင့်ခရိုင်စစ်ကောင်စီမှစစ်ဆေးပြီး ဖမ်းဆီးအရေးယူခြင်းမရှိပဲ ယခုကဲ့သို့ ပြစ်ဒဏ်ပေးမှုအပေါ် ဒေသခံများမှ ကျေနပ်မှုမရှိကြောင်း သိရှိရသည်။

"ရွာမှ လူငယ်တွေရှိတဲ့အိမ်တွေကို စစ်မှုမထမ်းချင်ရင် သိန်းဘယ်လောက်သတ်မှတ်ပြီးကောက်တာ။ လစဉ်ထောက်ပံ့ဖို့ဆိုပြီး ကောက်တာရော လူစားထိုးငှါးဖို့ဆိုပြီးကောက်တာ လတိုင်းလိုလိုပဲ။ စစ်တဲ့သူတွေကိုလဲ ဘယ်လောက်လဘ်ထိုးလိုက်လဲမသိဘူး။ နောက်ပြီး ဖျာပုံမြို့နယ်ကကောင်စီဗိုလ်မှူးကလည်းသူ့ဘက်ကပဲ အတူတူစားထားကြတာ၊ ရွာကလူတွေကတော့ အာဏာအလွဲသုံးစားလုပ်မှုနဲ့ လိမ်လည်ငွေတောင်းမှုတွေကြောင့်ထောင်မကျတော့မကျေနပ်ကြဘူး"ဟု ဒေသခံတစ်ဦးမှ ဧရာ၀တီတိုင်းမ်ကိုပြောသည်။

အဆိုပါအုပ်ချုပ်ရေးမှုးသည် စစ်မှုထမ်းအပါတ်စဥ်တိုင်းအတွက် ကျေးရွာအတွင်း လူငယ်များရှိသည့် နေအိမ်များအပါအ၀င် ရာအိမ်မှူးများ၏နေအိမ်များကိုပါ ထောက်ပံကြေးဟုဆိုကာ လိုက်လံကောက်ခံငွေ စုစုပေါင်း သိန်း၅၀၀ခန့်ရှိကြောင်း သိရှိရသည်။

ဧရာ၀တီတိုင်း အတွင်းရှိ မြို့နယ်များတွင် ရပ်ကွက်၊ကျေးရွာ အုပ်ချုပ်ရေးမှူးများမှ စစ်ကောင်စီ၏ စစ်မှုထမ်းဥပဒေကို အသုံးပြုပြီး စိတ်ထင်သလိုလုပ်ဆောင်နေကြသော်လည်း တိုင်ကြားပါက စစ်မှုထမ်းရမည်ဟု ခြိမ်းခြောက်ခြင်း စစ်ကောင်စီမှ စစ်ဆေးသော်လည်း လုံလောက်စွာအရေးယူမှုမရှိသောကြောင့် တိုင်ကြားခြင်းမပြုသူများကြောင်း ဒေသခံများထံမှသိရှိရသည်။

#စစ်မှုထမ်းဥပဒေ #သိန်းရာချီတောင်း #ဖျာပုံမြို့နယ် #အုပ်ချုပ်ရေးမှူး #တာ၀န်မှအနားပေး #ပြစ်ဒဏ်ပေး
#Ayeyarwaddy_Times

ရွေး ကောက်ပွဲအကြိုကာလအတွင်း မဲဆန္ဒရှင်စာရင်း ကြေညာပြသခြင်း၊ မဲဆွယ်စည်းရုံးခြင်း၊ ကြိုတင်မဲပေးခြင်းနှင့် ရွေးကောက်ပွဲနေ့မဲပေးခြင်း၊ ဆန္ဒမဲများရေတွက်ခြင်း စသည့်လုပ်ငန်းစဉ်တို့အပြင် မဲရလဒ်များစုစည်းသည့် လုပ်ငန်းစဉ်များကို တိုင်းဒေသကြီးနှင့် ပြည်နယ် အသီးသီးတွင် စောင့်ကြည့်လေ့လာမှုများ ပြုလုပ်ခဲ့ကြပါသည်။

၂၀၂၀ပြည်နှစ်ရွေးကောက်ပွဲတွင် မဲမသမာမှုများ ပြုလုပ်သည်ဟု စစ်တပ်က စွပ်စွဲထားသော်လည်း ၂၀၂၀ ရွေးကောက်ပွဲ ရလဒ်များသည် မဲဆန္ဒရှင်အများစု၏ သဘောထားနှင့်အညီ ရရှိလာသော ရွေးကောက်ပွဲရလဒ်များ ဖြစ်သည်ကို ပြည်တွင်းရွေးကောက်ပွဲ စောင့်ကြည့်လေ့လာရေးအဖွဲ့များ အနေဖြင့် တွေ့ရှိရသည်ဟု အဖွဲ့အစည်း ၁၁ ဖွဲ့ပါဝင်သည့် Myanmar Network Organization for Free and Fair Elections -MYNFREL က ၂၀၂၁ ဇန်နဝါရီ ၂၉ ရက်နေ့တွင် ထုတ်ပြန်ခဲ့သည်။

ဓာတ်ပုံ- စစ်ကောင်စီ

#စစ်ကောင်စီ #၂၀၂၀ရွေးကောက်ပွဲ #လုပ်ကြံ #Website #MobileApplication #ဘာသာစကား၅မျိုး #ထုတ်လွှင့် #Ayeyarwaddy_Times

၂၀၂၀ ရွေးကောက်ပွဲအပေါ် မဟုတ်မမှန် လုပ်ကြံထားသော Website နှင့် Mobile Application တို့ကို ဘာသာစကား ၅ မျိုးဖြင့် စစ်ကောင်စီ ထုတ်လွှင့်

နိုင်မင်းလွင်/ဧရာဝတီတိုင်းမ်
နိုဝင်ဘာ ၂၃ ရက်

မဲစာရင်း အကြောင်းပြ၍ အာဏာသိမ်းခဲ့သည့် စစ်ကောင်စီက ၎င်းတို့မရှုမလှ စစ်ရှုံးလာချိန်တွင် ၂၀၂၀ ရွေးကောက်ပွဲအား မဟုတ်မမှန် လုပ်ကြံထားသော Website နှင့် Mobile Application တို့ကို ဘာသာစကားငါးမျိုးဖြင့် တရားဝင်ကြေညာ ထုတ်လွှင့်ဖော်ပြလာကြောင်း သိရသည်။

ပြီးခဲ့သည့် ၂၀၂၀ ရွေးကောက်ပွဲတွင် မဲမသမာမှုများ ဖြစ်ပေါ်ခဲ့သည်ဟု စစ်ကောင်စီက စွပ်စွဲထားပြီး ထိုအပေါ်စုံစမ်းစစ်ဆေး တွေ့ရှိချက်များဟူ၍ ပြည်တွင်းပြည်ပ လေ့လာကြည့်ရှုနိုင်ရန် Website နှင့် Mobile Application တို့ကို ပြုလုပ်ခြင်းဖြစ်ကြောင်း သိရသည်။

"မဲရေတွက်ရတာ ပြည်သူအများရှေ့မှာ၊ တစ်ချို့ကိုယ်စားလှယ်တွေဆို NLD မဲဆိုရင် သူတို့ရှေ့မှာ သေချာဖြန့်ပြရတာ။ ဘယ်လိုမှ မသမာမှု လုပ်မရဘူး တီချယ့်အတွေ့အကြုံအရ ပြောပြတာပါ" ဟု လှိုင်မြို့နယ်တွင် မဲရုံမှူးလုပ်ခဲ့သူ CDM ပါမောက္ခတစ်ဦးက ဧရာဝတီတိုင်းမ်ကို ပြောသည်။

စစ်ကောင်စီက ထိုသို့ရေးဆွဲ လွှင့်တင်နိုင်ရေးအတွက် ဝန်ကြီးဌာနများနှင့် လုပ်ငန်းစဉ် ၇ ရပ် ပါဝင်သည့် လုပ်ငန်းစီမံချက် ရေးဆွဲ၍ ၂၀၂၄ ခုနှစ်၊ ဇူလိုင် ဒုတိယပတ်မှ ယခုနိုဝင်ဘာ ဒုတိယပတ်အတွင်း ပူးပေါင်းညှိနှိုင်း အကောင်အထည်ဖော် ဆောင်ရွက်ခဲ့ကြောင်း သိရသည်။

ထိုအတွက် လွှင့်တင်ခြင်း အခမ်းအနားကို ယမန်နေ့ နိုဝင်ဘာ ၂၂ ရက်က စစ်ကောင်စီ လက်အောက်ခံ ပြည်ထောင်စုရွေးကောက်ပွဲ ကော်မရှင်(UEC)ရုံး၌ ပြုလုပ်ခဲ့ပြီး ၂၀၂၀ ရွေးကောက်ပွဲတွင် မဲစာရင်းများ ကြီးမားစွာ မှားယွင်းမှု၊ မဲမသမာမှုနှင့် တရားမဲ့ ပြုကျင့်မှုများ ဖြစ်ပွားခဲ့သည်ဟု စစ်ကောင်စီခန့် UEC ဥက္ကဋ္ဌ ဦးကိုကိုက ဆိုသည်။

စစ်ကောင်စီရုံးသည် အဆိုပါ Website နှင့် Mobile Application ရေးဆွဲလွှင့်တင်နိုင်ရေးအဖွဲ့ကို စစ်ကောင်စီလက်အောက်ခံများဖြစ်ကြသည့် UEC ၊ ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြန်ကြားရေးဝန်ကြီးဌာန၊ ပညာရေးဝန်ကြီးဌာနနှင့် သိပ္ပံနှင့် နည်းပညာ ဝန်ကြီးဌာနတို့ဖြင့် ဖွဲ့စည်းပေးခဲ့ကြောင်း သိရသည်။

၂၀၂၀ ရွေးကောက်ပွဲကို သက်ဆိုင်ရာ ကြီးကြပ်သူများအပြင် ပညာရေး ဝန်ထမ်းများ၊ ပြည်တွင်းနှင့် နိုင်ငံတကာ အဖွဲ့အစည်းများက စောင့်ကြည့်လေ့လာကြပြီး ပြည်သူများအနေဖြင့်လည်း မိမိမဲစာရင်း မပါဝင်သည့်တိုင် အကြိမ်ကြိမ် ပုံစံဖောင်တောင်း၍ စနစ်တကျ မဲပေးခဲ့ကြောင်း သိရသည်။

ထို့အပြင် လွတ်လပ်မျှတသည့် ရွေးကောက်ပွဲလည်း ဖြစ်တည်ခဲ့ပြီး ယင်းအပေါ် စစ်ကောင်စီနှင့် အပေါင်းအပါတို့က လက်မခံဘဲ မဲစာရင်း အကြောင်းပြ အာဏာသိမ်းလိုက်ခြင်းသည် ပြည်သူလူထုကို စနစ်တကျ စော်ကားလိုက်ခြင်းဖြစ်ကြောင်း မဲထည့်ခဲ့သူ CDM ဆရာမတစ်ဦးက ဧရာဝတီတိုင်းမ်ကို ပြောသည်။

"အဲဒါကို မဲလိမ်မဲခိုးလို့ဆိုပြီး ခေါင်းစဉ်တပ် အာဏာသိမ်းလိုက်တာဟာ ပြည်သူကို စနစ်တကျ အစီအစဉ်ထားပြီး စော်ကားလိုက်တာ။ နိုင်ငံတကာအပေါ်လည်း ဗြောင်ကျကျ လိမ်ချလိုက်တာပါပဲ။ မဲလေ့လာ စောင့်ကြည့်တဲ့ အဖွဲ့အစည်းတွေကိုပါ မြောင်းထဲကန်ချလိုက်တာပါ" ဟု ၎င်းက ဆိုသည်။

စစ်ကောင်စီကမူ အာဏာသိမ်းပြီနောက် ၂၀၂၀ ရွေးကောက်ပွဲသည် ဖွဲ့စည်းပုံ အခြေခံဥပဒေ၊ ပြည်ထောင်စုရွေးကောက်ပွဲ ကော်မရှင်ဥပဒေ၊ သက်ဆိုင်ရာလွှတ်တော် ရွေးကောက်ပွဲဥပဒေ၊ နည်းဥပဒေများနှင့် ညီညွတ်မှု၊ လွတ်လပ်၍ တရားမျှတမှု မရှိဟုဆိုကာ ရလဒ်အား ပယ်ဖျက်ခဲ့ကြောင်း သိရသည်။

လက်ရှိ ထုတ်လွှင့်လိုက်သည့် Website နှင့် Mobile Application တို့တွင် ၂၀၂၀ ရွေးကောက်ပွဲ အကြိုကာလ၌ ကြိုတင်ကြံစည် ဆောင်ရွက်ခဲ့မှုများ၊ ရွေးကောက်ပွဲကာလ ဆောင်ရွက်ခဲ့မှုများ၊ ရွေးကောက်ပွဲ အလွန်ကာလ ဖြစ်စဉ်များကို စစ်ကောင်စီက မမှန်မဟုတ် ထည့်သွင်းဖော်ပြထားကြောင်း သိရသည်။

ယင်းအပြင် နောင်အလားတူ ဖြစ်စဉ်မျိုး မဖြစ်ပွားစေရန်နှင့် လေ့လာလိုသူများ ပိုမိုပြည့်စုံစွာ ကြည့်ရှုနိုင်ရန်အတွက် မြန်မာ၊ အင်္ဂလိပ်၊ တရုတ်၊ ရုရှား၊ ဂျပန် စသည့် ဘာသာစကား (၅)မျိုးဖြင့် လွှင့်တင်ခြင်း ဖြစ်ပြီး နိုဝင်ဘာ ၂၂ ရက်မှ စတင်၍ ဖတ်ရှုနိုင်ပြီဟု ထုတ်ပြန်ထားသည်။

၂၀၂၀ ရွေးကောက်ပွဲသည် တရားမျှတ၍ အမှားကင်းသည်ဟု ရှုမြင်မိကြောင်း မဲစိစစ်ရေးကော်မတီ ဥက္ကဋ္ဌအထိ လုပ်ဆောင်ခဲ့သော ကလေးမြို့ အစိုးရနည်းပညာ အထက်တန်းကျောင်းမှ ကထိက/ဌာနမှူး လည်းဖြစ် လက်ရှိ Mobile Medical Team (MMT West Division) တာဝန်ခံ ဒေါ်ရတီအုန်းက ဆိုသည်။

"တတ်နိုင်သမျှ အမှားကင်းအောင် ဆောင်ရွက်ခဲ့ပါတယ်။ မဲပေးတဲ့ ရက်မှာလည်း မဲရေတွက်ချိန်ထိ မျက်မြင်စောင့်ကြည့်ခဲ့ပါတယ်။ လုပ်ငန်းစဉ်တွေမှာ မသမာမှု ဖန်တီးဖို့ အတော်ခက်ပါမယ်။ လူအများရှေ့ မှောက်မှာ သေချာလုပ်ခဲ့တာပါ" ဟု ၎င်းက ဧရာဝတီတိုင်းမ်ကို ပြောသည်။

စစ်ကောင်စီသည် ထိုအရာဖြင့် နိုင်ငံတကာ အသိအမှတ်ပြု အကူအညီရအောင်နှင့် ပြည်တွင်း၌ ၎င်းတို့ ဘက်ပေါင်းစုံ အရေးနိမ့်နေမှုအတွက် နောက်ဆုံးထွက်ပေါက်ဟု ယူဆထားသော ရွေးကောက်ပွဲ တစ်ရပ် ပြန်ကျင်းပနိုင်ရန် ရည်ရွယ်၍ NLD ပါတီကို ပုံဖျက်ခြင်ဖြစ်ကြောင်း လေ့လာသူများက သုံးသပ်သည်။

မြန်မာစစ်ကောင်စီက အရပ်သားတွေအပေါ် တိုက်ခိုက်မှုတွေ အရှိန်မြှင့်နေဟု ကုလကျွမ်းကျင်သူ ပြော

ဧရာဝတီတိုင်းမ်
နိုဝင်ဘာ ၂၃ ရက်

မြန်မာစစ်ကောင်စီဟာ အတိုက်အခံတပ်ဖွဲ့တွေထံ ဆုံးရှုံးသွားတဲ့ ကျေးရွာတွေအပေါ် တိုက်ခိုက် မှုတွေ အရှိန်မြှင့်နေပြီး ခေါင်းဖြတ်သတ်ခြင်း၊ အုပ်စုလိုက်မုဒိမ်းကျင့်ခြင်းနဲ့ နှိပ်စက်ကလူပြုခြင်းတို့ ပြု လုပ်နေကာ ကျူးလွန်ခံရသူတွေထဲမှာ အမျိုးသမီးတွေ၊ ကလေးငယ်တွေနဲ့ သက်ကြီးပြည်သူတွေ ပါဝင် တယ်လို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး စုံစမ်းစစ်ဆေးရေးမှူးက အစီရင်ခံစာသစ်တစ် ခုမှာ ပြောပါတယ်။

မြန်မာစစ်ကောင်စီဟာ စစ်ရေးရှုံးနိမ့်မှုတွေနဲ့ နယ်မြေဆုံးရှုံးမှုတွေကို အရပ်သားတွေအပေါ် ခေတ်မီလက်နက်တွေနဲ့ တိုက်ခိုက်ခြင်း၊ မထိန်းချုပ်နိုင်တော့တဲ့မြို့တွေကို ဖျက်ဆီးခြင်းနဲ့ လက်တုံ့ပြန်ခဲ့ တယ်လို့ မြန်မာနိုင်ငံဆိုင်ရာ လူ့အခွင့်အရေး အစီရင်ခံစာတင်ပြသူ သောမတ်အန်ဒရူးက ကုလသမဂ္ဂ အ ထွေထွေညီလာခံကိုတင်ပြတဲ့ အစီရင်ခံစာမှာ ပြောပါတယ်။

စစ်ကောင်စီတပ်ဖွဲ့ထံ စစ်လက်နက်၊ လက်နက်ပစ္စည်းနဲ့ လေယာဉ်ဆီ လွှဲပြောင်းပေးခြင်းအား ဖြင့် ကမ္ဘာ့နိုင်ငံအစိုးရတွေက မြန်မာပြည်သူတွေအပေါ် ရက်စက်ကြမ်းကြုတ်မှုတွေ အရှိန်မြှင့်လာတာကို ထောက်ကူနေတယ်လို့ သူက ဆိုပါတယ်။

စစ်ကောင်စီထံ စစ်လက်နက်စီးဆင်းမှု ရပ်တန့်ခြင်း၊ အကူအညီလိုအပ်တဲ့ သန်းနဲ့ချီတဲ့ပြည်သူ တွေထံ လူသားချင်းစာနာမှု အကူအညီပေးအပ်မှု တိုးမြှင့်ခြင်း၊ လူ့အခွင့်အရေး ချိုးဖောက်သူတွေကို တာ ဝန်ခံစေရေး ကြိုးပမ်းခြင်းအားဖြင့် လူ့အခွင့်အရေးနဲ့ လူသားချင်းစာနာမှု အကျပ်အတည်းကို ဖြေရှင်းဖို့ သူက ကမ္ဘာ့နိုင်ငံတွေကို တောင်းဆိုလိုက်ပါတယ်။

မြန်မာစစ်ကောင်စီက ၂၀၂၅ ခုနှစ်နှောင်းပိုင်းမှာ ရွေးကောက်ပွဲကျင်းပဖို့ စီစဉ်တာဟာ တရားဝင် မှုရရှိဖို့နဲ့ နိုင်ငံတကာရဲ့ဖိအား လျှော့စေဖို့ လိမ်လည်မှုတစ်ခုသာဖြစ်တယ်လို့ ၎င်းက ဆိုပါတယ်။

မြန်မာစစ်တပ်စာ အရပ်သား ၅၈၀၀ ကျော်ကို သတ်ဖြတ်ကာ နေအိမ် ၁၀၀၀၀၀ ကျော်ကို ဖျက် ဆီးခဲ့ပြီး နိုင်ငံရေးအကျဉ်းသား ၁၂၀၀၀ ကျော်ကို ချုပ်နှောင်ထားဆဲလို့ သူက ပြောပါတယ်။

ကိုးကား - Daily Mail
Ref; UN expert: Myanmar's desperate military ramps up attacks including beheadings, rapes and torture

#Ayeyarwaddy_Times

တရုတ်၊ ရုရှားနဲ့ နျူကလီးယားစစ်မဖြစ်အောင် အမေရိကန်က ရှောင်ကြဉ်ရမယ်လို့ အစီရင်ခံစာက ဖော်ပြ

ဧရာဝတီတိုင်းမ်
နိုဝင်ဘာ ၂၃ ရက်

တရုတ်နိုင်ငံက ထိုင်ဝမ်ကို စစ်ရေးအရ အရေးယူရင် အမေရိကန်နိုင်ငံက တရုတ်နဲ့ နျူကလီး ယားစစ်မဖြစ်အောင် ရှောင်ကြဉ်သင့်ကြောင်း ကျွမ်းကျင်သူတွေက ပြောကြားတယ်လို့ အမေရိကန်အဖွဲ့ အစည်းတစ်ခုရဲ့ အစီရင်ခံစာက ဖော်ပြပါတယ်။

ထိုင်ဝမ်နဲ့ယူကရိန်းကို စစ်ရေးနည်းလမ်းတွေနဲ့ သိမ်းပိုက်ဖို့ကြိုးပမ်းနေတဲ့ တရုတ်နဲ့ရုရှားရဲ့ အာ ရှ-ပစိဖိတ်နဲ့ ဉရောပတိုက်မှာ အမေရိကန်နိုင်ငံရဲ့မဟာမိတ်တွေကို နျူကလီးယား တိုက်ခိုက်မှုတွေ ပြု လုပ်လာနိုင်တယ်ဆိုတဲ့ ပညာရှင် (၅) ဉီးရဲ့ တုံ့ပြန်မှုတွေကို အစီရင်ခံစာမှာ ဖော်ပြထားပါတယ်။

အစီရင်ခံစာကို ဝါရှင်တန်မြို့တော်အခြေစိုက် မဟာဗျူဟာနှင့် နိုင်ငံတကာလေ့လာရေးဗဟိုဌာန ရှိ နျူကလီးယားပြဿနာများ စီမံကိန်းက တနင်္လာနေ့မှာ ထုတ်ပြန်ခဲ့တာပါ။

တရုတ်နိုင်ငံက ထိုင်ဝမ်ကို စစ်ရေးနည်းလမ်းနဲ့ သိမ်းပိုက်ပါက အမေရိကန်နိုင်ငံက တရုတ်နဲ့ နျူ ကလီးယားစစ်မဖြစ်အောင် ရှောင်ကြဉ်သင့်တယ်လို့ ပညာရှင်အားလုံးက သဘောတူပေမယ့် အခြား မ ဟာဗျူဟာမြောက်ရည်မှန်းချက်တွေကိုတော့ သဘောမတူပါဘူး။

ဉရောပတိုက်နဲ့ အာရှ-ပစိဖိတ်ဒေသမှာ နျူကလီးယားတင်းမာမှုတွေ မြင့်တက်နေစဉ် ယခုအစီ ရင်ခံစာကို ထုတ်ပြန်ခဲ့တာပါ။
နျူကလီးယားအင်အားကြီးတိုင်းပြည်က ထောက်ခံတဲ့ ဘယ်နိုင်ငံကမဆို ရုရှားနိုင်ငံအပေါ် သ မားရိုးကျတိုက်ခိုက်ရင် နျူကလီးယား အသုံးပြုပြီး လက်တုံ့ပြန်ဖို့ ရုရှားသမ္မတ ဗလာဒီမာပူတင်က အ ပြောင်းအလဲတွေ ပြုလုပ်ခဲ့ပါတယ်။

ရုရှားနိုင်ငံအတွင်းပိုင်းကို တာဝေးပစ် အမေရိကန်ဒုံးကျည်တွေနဲ့ ယူကရိန်းကို တိုက်ခိုက်ခွင့်ပြုဖို့ အမေရိကန်နိုင်ငံက ဆုံးဖြတ်ခဲ့ပါတယ်။

တရုတ်စစ်တပ်ဟာ စက်တင်ဘာလအတွင်း နျူကလီးယားထိပ်ဖူး သယ်ဆောင်နိုင်တဲ့ DF-31AG တိုက်ချင်းပစ်ပဲ့ထိန်းဒုံးကျည်တစ်စင်း စမ်းသပ်ပစ်လွှတ်ခဲ့ရာ ဆယ်စုနှစ် (၄) ခုကျော်အတွင်း ပထမဆုံးအ ကြိမ် စမ်းသပ်မှုဖြစ်ပါတယ်။

တရုတ်နိုင်ငံကလည်း ထိုင်ဝမ်ကို တရုတ်ပြည်မကြီးရဲ့ အစိတ်အပိုင်းတစ်ခုအဖြစ် သတ်မှတ်ပြီး အင်အားသုံးသိမ်းပိုက်ဖို့ ဝန်မလေးဘူးလို့ ကြေညာထားပါတယ်။

ကိုးကား - South China Morning Post
Ref; US must avoid ‘uncontrollable escalation’ into nuclear war with China and Russia, report says

#Ayeyarwaddy_Times

ဧရာ၀တီနှင့် ရခိုင်ပြည်ထိစပ်နေသော ကမ်းခြေဒေသများကို စစ်ကောင်စီမှ စားသောက်ကုန်သယ်ယူခွင့် ကန့်သတ်

ဧရာဝတီတိုင်းမ်
နိုဝင်ဘာ ၁၈ ရက်

ဧရာ၀တီတိုင်းနှင့် ရခိုင်ပြည်ထိစပ်နေသော ကမ်းခြေရွာများတွင် နို၀င်ဘာလအတွင်း စစ်ကောင်စီတပ်မှ စားသောက်ကုန်၊ စက်သုံးဆီ သယ်ယူခွင့်ကန့်သတ်မှုများ ပိုမိုပြုလုပ်လာကြောင်း သိရှိရသည်။

ရွှေသောင်ယံ၊ မကျီးစင်၊ ဘောမိကမ်းခြေကျေးရွာအုပ်စုများနှင့် သာပေါင်းမြို့နယ်အတွင်ကမ်းခြေများတွင် စစ်ကောင်စီတပ်များ အင်အားတိုးချထားကာ တင်းကြပ်စွာစစ်ဆေးနေကြောင်း ဒေသခံများကပြောသည်။

"လယ်အတွက် ဒီဇယ်လေးဂါလံနှစ်ပုံး မြို့က၀ယ်လာတာတောင် ဂိတ်တွေကပေးမဖြတ်ဘူး။ အုပ်ချုပ်ရေးမှုးထောက်ခံစာကို ရွာမှာပြန်ယူပြရတယ်။ CPကြက်တွေဘာတွေ ငါးကောင် အထက်ဆိုလဲ သယ်ခွင့်မပြုတော့ဘူးစစ်ဆေးရေးဂိတ်ကို ကြိုပြီးငွေနဲ့ညှိနေရတယ် "ဟု သာပေါင်းမြို့နယ် ကမ်းခြေဒေသခံတစ်ဦးမှ ဧရာ၀တီတိုင်းမ်ကိုပြောသည်။

ရွှေသောင်ယံမြို့ ကမ်းခြေဒေသရှိကျေးရွာများတွင် ဆန်အိတ်၀ယ်ယူရန်အတွက် အုပ်ချုပ်ရေးမှူးများထံတွင် ထောက်ခံစာပြုလုပ်ရပြီး ဆန်အိတ်သယ်ယူရာလမ်းရှိ စစ်ဆေးရေးဂိတ်များကို အဆိုပါထောက်ခံစာပြကာ သယ်ယူရကြောင်း ဒေသခံများက ပြောသည်။

"၂၄ပြည်တစ်အိတ်ကို ထောက်ခံစာဖိုးက တစ်သောင်းပေးရပါတယ်။ ဒါတောင် လမ်းမှာဂိတ်ကရစ်လို့ စားသောက်ကုန်တွေ အသိမ်းခံရတာအများကြီးရှိနေတယ်။ သက်သက်ဒုက္ခ ပေးနေတာ" ဟု ဘောမိကျေးရွာဒေသခံတစ်ဦးမှ ဧရာ၀တီတိုင်မ်းကို ပြောသည်။

ရခိုင်ပြည်နယ်အတွင်း စစ်ကောင်စီ၏ တပ်စခန်းတစ်ချို့က်ို ရခိုင့်တပ်တော် AA မှ သိမ်းယူနိုင်ခဲ့ပြီးနောက်ပိုင်း ဖေဖေါ်ဝါရီလ တတိယပတ်မှစတင်၍ ယနေ့ထိ ကုန်စည်ပို့ဆောင်ခွင့်ကို ပိတ်ထားခြင်းဖြစ်ပြီး သယ်ယူသည့် ကားများကိုလည်း ဖမ်းဆီးနေကြောင်း ကုန်စည်ပို့ဆောင်ရေး လုပ်ငန်းရှင်များထံမှ သိရှိရသည်။

ပြီးခဲ့သည့် စက်တင်ဘာလအတွင်းက ရခိုင်သို့ စားသောက်ကုန်များနှင့် စက်သုံးဆီများကို ဧရာ၀တီတိုင်းမှတစ်ဆင့်စီးပွားရေးသမားများနှင့် အကျိုးတူပူးပေါင်းပြီး ပို့ဆောင်ခွင့်ပေးခဲ့သော အနောက်တောင်တိုင်းစစ်ဌာနချုပ်မှ စစ်ဦးစီး ဗိုလ်မှူးကြီး အောင်ဆန်းလွင်၊ ဗိုလ်မှူးကြီး မျိုးညွန့်ဦးအပါအဝင် အရာရှိ ၁၉ ဦးခန့်ကို စစ်ဘက်ရေးရာလုံခြုံရေးတပ်ဖွဲ့(စရဖ)မှ ဝင်ရောက်ဖမ်းဆီးမှု ဖြစ်ပွါးခဲ့သည်။

#ဧရာ၀တီ #ရခိုင်ပြည် #ကမ်းခြေဒေသများ #စစ်ကောင်စီ #စားသောက်ကုန် #သယ်ယူခွင့်ကန့်သတ် #Ayeyarwaddy_Times

မောင်တော နခခ-၅ ရှိ စစ်ကောင်စီတပ်ဖွဲ့ဝင်များနှင့် အဆက်အသွယ်ပြတ်တောက်နေ၍ ဖခင်ကယ်တင်ပေးပါ ဟု စစ်ကောင်စီတပ်လော်ဘီများက တောင်းဆိုနေ

ဧရာဝတီတိုင်းမ်
နိုဝင်ဘာ ၁၈ရက်

ရခိုင်ပြည်နယ်၊ မောင်တောရှိ နောက်ဆုံးကျန်ရစ်သော စစ်ကောင်စီ၏ နယ်ခြားစောင့်စခန်းစခန်း နခခ-၅ မြို့သူကြီးနှင့် အဆက်အသွယ်ပြတ်တောက်သွား၍ စစ်ကောင်စီတပ်ဖွဲ့ဝင်များကို ကယ်ထုတ်ပေးပါရန် စစ်ကောင်စီတပ်လော်ဘီများနှင့် တပ်ဖွဲ့ဝင်မိသားစုများက တောင်းဆိုလျက်ရှိကြောင်း သိရသည်။

မောင်တော နခခ ၅ အတွင်းရှိ စစ်ကောင်စီတပ်ဖွဲ့ဝင်များနှင့် ယနေ့ နိုဝင်ဘာ ၁၈ရက်နေ့တွင် အဆက်အသွယ် လုံးဝပြတ်တောက်သွားသည့်အတွက် စစ်ခေါင်းဆောင်ဗိုလ်ချုပ်မှူးကြီး မင်းအောင် လှိုင်ကို ဖခင်ကယ်တင်ပေးပါ ဟု စစ်‌တပ်ထောက်ခံသူများက လူမှုကွန်ရက်စာမျက်နှာ များတွင် တောင်းဆိုထားသည်။

"လက်အောက်ငယ်သားတွေကို ဖုန်းပေးမသုံးလို့ အဆက်အသွယ်မရတာ တစ်လကျော်ပြီ။ အခုက စစ်အရာရှိတွေနဲ့ပါ အဆက်အသွယ်မရတော့တာလို့ ပြောပါတယ်။ အခြေအနေတွေဆိုးကုန်ပြီထင်ပါ တယ်" ဟု တပ်မိသားစုဝင်တစ်ဦးက ဧရာဝတီတိုင်းမ်ကို ပြောသည်။

နခခ-၅ မြို့သူကြီး၏ သုံးဆင့်ကာရံထားသည့် ခြံစည်းရိုးနှင့် မိုင်းကွင်းများမှာလည်း စစ်ကောင်စီတပ်က ပစ်ချသည့် ဗုံးများကြောင့် အချို့မှာ ပြိုကျပျက်စီးသွားပြီး အာရက္ခတပ်တော် (AA) ၏ အနီးကပ် တိုက်ခိုက်ခြင်းကို ခံနေရကြောင်း သိရသည်။

စစ်ကောင်စီထောက်ခံ တယ်လီဂရမ်ချန်နယ်များတွင် "နခခ၅ ကျသွားပြီ။ တပ်ဆုတ်စရာ နတ်မြစ် လမ်းကြောင်းကို ကမ်းထိုးရေယာဉ်များကပ်ပြီး စစ်ကောင်စီတပ်ဖွဲ့များကို ကယ်ထုတ်ပေးပါ ဖခင်" ဟု ရေးသားတောင်းဆိုနေကြသည်။

AAအနေဖြင့် မောင်တောမြို့တစ်ခုလုံးကို ထိန်းချုပ်ထားပြီး မောင်တောမြို့ပြင်တွင် တစ်ခုတည်း ကျန်ရှိသည့် စစ်ကောင်စီ၏ နခခ ၅ ကို သိမ်းပိုက်ရန်ကြိုးစားလျက်ရှိကြောင်း ပြီးခဲ့သည့် နိုဝင်ဘာ ၁၃ရက်နေ့က ထုတ်ပြန်ထားသည်။

ဆက်သွယ်ရေးလိုင်းများ ပြတ်တောက်သွားသည်မှာ မောင်တောတစ်နေရာတည်းတွင်သာ မကဘဲ အမ်း နပခဌာနချုပ်နှင့်ပါ အဆက်အသွယ် ပြတ်တောက်သွားခြင်းဖြစ်ကြောင်း သိရသည်။

နခခ-၅ အတွင်းရှိ စစ်ကောင်စီအရာရှိများအနေဖြင့် လက်အောက် ငယ်သားများကို ဖုန်းပေးမသုံးခြင်း၊ စားနပ်ရိက္ခာအပြည့်အဝမပေးခြင်းနှင့် လစာမပေးခြင်းတို့ကို ပြုလုပ်လျက်ရှိကြောင်းလည်း နခခ ၅ မှ မိသားစုဝင်အချို့က ဧရာဝတီတိုင်းမ်ကို လာရောက်ပြောဆိုမှုများရှိသည်။

မောင်တော နခခ-၅ ကို AA က သိမ်းဆည်းရမိသည့်ဆိုသည့် သတင်းနှင့်ပတ်သက်၍ ဧရာဝတီတိုင်းမ် အနေဖြင့် အတည်ပြုနိုင်ခြင်းမရှိသေးဘဲ ဆက်လက်စုံစမ်းလျက်ရှိသည်။

#မောင်တော #စစ်ကောင်စီ #နခခ၅ #အဆက်အသွယ်ပြတ်တောက် #ကယ်တင်ပေးရန် #တောင်းဆို #Ayeyarwaddy_Times

ဧရာဝတီနှင့်ရခိုင် နယ်နိမိတ်ထိစပ်နေသည့် ကမ်းခြေဒေသများတွင် စစ်ကောင်စီက လေယာဉ် အသုံးပြု၍ ကင်းထောက်လှမ်းမှုများပြုလုပ်နေ

ဧရာဝတီတိုင်းမ်
နိုဝင်ဘာ ၁၈ ရက်

ဧရာတီတိုင်းတွင် တိုက်ပွဲများဖြစ်ပွားမှု မရှိသော်လည်း ရခိုင်ပြည်နယ်နှင့် ထိစပ်နေသည့် ကမ်းခြေ ဒေသများတွင် စစ်ကောင်စီတပ်က ကင်းထောက်လေယာဉ်အသုံးပြု၍ စောင့်ကြည့်မှုများ ပြုလုပ် နေကြောင်း သိရသည်။

လေယာဉ်အသေးစား အပေါ့စားလေယာဉ်အသုံးပြုကာ ကင်းပတ်သည့်သဘောဖြင့် နေ့စဉ်ပျံသန်း လေ့ရှိကြောင်း ကမ်းခြေဒေသနေထိုင်သူများထံက သိရသည်။

“ တစ်နာရီ တခါလောက်ပတ်နေတာပဲ ပင်လယ်ဘက်ကို ပတ်တာတော့ မဟုတ်ဘူး။ တောတွေထဲကို နိမ့်နိမ့်လေး ပတ်ပျံတာ”ဟု ချောင်းသာကမ်းခြေတွင် နေထိုင်သည့် ဒေသခံ အသက် ၃၀ အရွယ် အမျိုးသမီးတစ်ဦးက ဧရာဝတီတိုင်းမ်ကိုပြောသည်။

တိုက်ပွဲဖြစ်ပွားမှုမရှိသော်လည်း အာရက္ခတပ်တော်(AA) တပ်ဖွဲ့ဝင်များ ဝင်ရောက်လာမည်ကို ကြောက်သဖြင့် ရေကြောင်းတွင် ရေတပ်မှစောင့်ကြည့်နေပြီး ကုန်းပေါ်တွင်လည်း လေယာဉ်ဖြင့် ထောက်လှမ်းမှုပြုလုပ်ခြင်းဖြစ်နိုင်ကြောင်း ၎င်းကဆက်လက်ပြောဆိုသည်။

စစ်ကောင်စီတပ်သည် ကမ်းခြေဒေသများတွင် ထောက်လှမ်းမှုများပြုလုပ်ရာ၌ လူနှစ်ဦးခန့်စီးနိုင်သော အရွယ်အစားရှိသည့် လေယာဉ်မျိုးဖြင့် လာလေ့ရှိကြောင်း ဒေသခံများက ဆိုသည်။

#ဧရာဝတီတိုင်း #ရခိုင်ပြည်နယ် #နယ်နိမိတ်ထိစပ် #ကမ်းခြေဒေသများ #စစ်ကောင်စီ #လေယာဉ်အသုံးပြု #ကင်းထောက် #Ayeyarwaddy_Times

အမ်းရှိ နပခနှင့် တပ်ရင်းများ၏ အသက်သွေးကြော ထောက်ပံ့နှင့်ပို့ဆောင်ရေးတပ်ကို AAသိမ်းပိုက်

ဧရာ၀တီတိုင်းမ်
နိုဝင်ဘာ ၁၈ ရက်

အမ်းရှိ အနောက်ပိုင်းတိုင်းစစ်ဌာနချုပ် (နပခ) နှင့် တပ်ရင်းများကို ထောက်ပံ့ပို့ဆောင်နေရသည့် အမှတ် (၉၂၆) ထောက်ပံ့နှင့်ပို့ဆောင်ရေးတပ်ခွဲ (ထပခ-၉၂၆) ကို အာရက္ခတပ်တော် (AA) က သိမ်းပိုက် လိုက်ကြောင်း သိရသည်။

AA သည် ပြီးခဲ့သည့် နိုဝင်ဘာ၁၅ရက်နေ့ကတည်းက ထပခ ၉၂၆ကို သိမ်းယူခဲ့ကာ အနောက်ပိုင်းတိုင်း စစ်ဌာနချုပ်နှင့် စစ်ကောင်စီ၏ တပ်ရင်းတပ်ဖွဲ့များသို့ မြေပြင်ထောက်ပို့သည့် လမ်းကြောင်းကို ဖြတ်တောက်လိုက်ခြင်းဖြစ်ကြောင်းသိရသည်။

"တပ်ထိန်းတပ်ခွဲ-၁၀ ဘက်မှာလည်း လက်နက်ကြီး၊ လက်နက်ငယ်သံတွေ မနေ့ကတည်းက တိတ် သွားပြီး လေယာဉ်ကပဲ လာကြဲတော့တယ်‌ပြောတယ်။ တပ်ထိန်းတပ်လည်း ပါသွားလောက်ပါပြီ" ဟု အမ်းဒေသခံနှင့် နီးစပ်သူတစ်ဦးက ဧရာဝတီတိုင်းမ်ကိုပြောသည်။

‌AA သည် ထပခ ၉၂၆ တပ်ကို ပြီးခဲ့သည့် နိုဝင်ဘာ ၁၂ရက်နေ့ကတည်းက ပိတ်ဆို့တိုက်ခိုက်ပြီး မြေပြင် ဆက်သွယ်ရေးလမ်းကြောင်း ပိတ်ဆို့ဖြတ်တောက်ထားခဲ့ခြင်း ဖြစ်သည်။

ယမန်နေ့ နိုဝင်ဘာ ၁၇ရက်နေ့ အထိ ခမရ ၃၇၁ ပျဉ်းတောရွာအနီးနှင့် အောက်ရွာတို့တွင် တိုက်ပွဲ ပြင်းထန်စွာဖြစ်ပွားနေပြီး စစ်ကောင်စီက လေကြောင်းမှ ဗုံးကြဲတိုက်ခိုက်လျက်ရှိကြောင်း သိရသည်။

တပ်ထိန်းတပ်ခွဲ တထခ-၁၀၊ အောက်ရွာ၊ ဆီဆိုင်ကုန်းနှင့် လေယာဉ်ကွင်း တို့တွင် တိုက်ပွဲပြင်းထန်နေပြီး စစ်ကောင်စီသည် ပြီးခဲ့သည့် နိုဝင်ဘာ ၁၆ရက်နေ့က ဗုံးအလုံးရေ ၂၀ကျော် လာရောက်ကြဲချခဲ့ကြောင်း သိရသည်။

"တစ်မိုင်ကုန်းက ဆုတ်လာတဲ့တပ်တွေ အောက်ရွာမှာ စီးပြီး ခုခံနေလို့ တိုက်ပွဲပြင်းထန်နေတာလို့‌ ပြောပါတယ်" ဟု အမ်းဒေသခံနှင့် နီးစပ်သူတစ်ဦးက ဆက်လက်ပြောကြားသည်။

အမ်း နပခအနီး တိုက်ပွဲများပြင်းထန်နေချိန်တွင် စစ်ကောင်စီက အမ်းရှိ ဖုန်းလိုင်းအချို့ကို ဖြတ် တောက်ခဲ့၍ ပြည်သူ ၃၀၀၀ ခန့် ပိတ်မိပြီး အဆက်အသွယ်ပြတ်တောက်သွားကြောင်း သိရသည်။

"အမ်း နပခကို ဝင်တိုက်ခံရပါတယ်။ အနီးကပ်တိုက်ပွဲပုံစံဖြစ်သွားတယ်ပြောတယ်။ အဆက်အသွယ်တွေပြတ်တောက်နေပါတယ်" ဟု တပ်တွင်းသတင်းရင်းမြစ်က ဧရာဝတီတိုင်းမ်ကို ပြောသည်။

လတ်တလောတွင် AA က အမ်း၊ မောင်တော၊ တောင်ကုတ်နှင့် ဂွတို့ရှိ စစ်ကောင်စီစခန်းများကို ပိတ်ဆို့ တိုက်ခိုက်နေပြီး တပ်စခန်းအများစုကို သိမ်းယူထားပြီးဖြစ်ကြောင်း သိရသည်။

ဓာတ်ပုံ-AA Info Desk

#အမ်း #ထပခ၉၂၆ #ထောက်ပံ့နှင့်ပို့ဆောင်ရေးတပ် #AAတိုက်ခိုက်သိမ်းပိုက် #Ayeyarwaddy_Times

တရုတ်နဲ့ဆက်ဆံရေးမှာ စည်းလေးခု မကျော်ဖို့ အမေရိကန်ကို ရှီကျင့်ဖျင် တောင်းဆို

ဧရာဝတီတိုင်းမ်
နိုဝင်ဘာ ၁၈ ရက်

ထိုင်ဝမ်ကို ထောက်ခံအားပေးရာမှာ စည်းလေးခု မကျော်ဖို့ တရုတ်သမ္မတ ရှီကျင့်ဖျင်က အမေရိ ကန်နိုင်ငံကို မေတ္တာရပ်ခံလိုက်ပါတယ်။

ထိုင်ဝမ်အရေး၊ ဒီမိုကရေစီ၊ လူ့အခွင့်အရေး၊ တရုတ်နိုင်ငံရဲ့ နိုင်ငံရေးနဲ့ စီးပွားရေးစနစ်နဲ့ ဖွံ့ဖြိုးတိုး တက်မှု အကျိုးစီးပွားတွေဟာ တရုတ်နိုင်ငံရဲ့ အနီရောင်မျဉ်းလေးခုဖြစ်တယ်လို့ ရှီကျင့်ဖျင်ကို ကိုးကားပြီး နိုင်ငံပိုင်ရုပ်သံဌာန CCTV က ဖော်ပြပါတယ်။

ပီရူးနိုင်ငံ၊ လီးမားမြို့တော်မှာကျင်းပတဲ့ အေပက်ထိပ်သီးဆွေးနွေးပွဲရဲ့ ဘေးပန်းအဖြစ် အမေရိ ကန်သမ္မတ ဂျိုးဘိုင်ဒင်နဲ့ တွေ့ဆုံချိန်မှာ သူက အခုလို သတိပေးခဲ့တာလို့ သိရပါတယ်။

အမေရိကန်နိုင်ငံအနေနဲ့ နှစ်နိုင်ငံအငြင်းပွားမှုတွေမှာ မစွက်ဖက်သင့်သလို တောင်တရုတ်ပင် လယ်တွင်း ရန်လိုမှုအပြုအမူတွေကို မထောက်ခံသင့်ဘူးလို့ ၎င်းက ထောက်ပြပါတယ်။

အဆိုပါအချက်တွေက တရုတ်-အမေရိကန် ဆက်ဆံရေးမှာ အရေးပါဆုံး အာမခံမှုတွေဖြစ်တယ် လို့ ရှီကျင့်ဖျင်က မီးမောင်းထိုးပြခဲ့ပါတယ်။

ထိုင်ဝမ် တာဝန်ရှိသူတွေရဲ့ ခွဲထွက်ရေးအပြုအမူတွေကို သူက ရှုတ်ချခဲ့ပြီး ဒေသတွင်း ငြိမ်းချမ်း ရေးနဲ့ လုံခြုံမှုရှိရေး တန်ပြန်လုပ်ဆောင်မယ်လို့ ပြောပါတယ်။

ကိုးကား - SANA
Ref; Chinese President calls on US not to cross ‘Four Red Lines’ in relations with Beijing

#Ayeyarwaddy_Times

တိုင်ဖွန်းမုန်တိုင်း မန်ရီအရှိန်ကြောင့် မြန်မာနိုင်ငံတွင် ၂ရက်ဆက်တိုက် မိုးရွာမည်ဖြစ်ပြီး စပါးရိတ်သိမ်းချိန် အဖျက်မိုးအဖြစ်ကြုံတွေ့နိုင်

ဧရာဝတီတိုင်းမ်
နိုဝင်ဘာ ၁၈ ရက်

တောင်တရုတ်ပင်လယ်ပြင်သို့ရောက်ရှိနေသာ တိုင်ဖွန်းမုန်တိုင်း မန်ရီ အရှိန်ကြောင့် မြန်မာနိုင်ငံတွင် ၂ ရက်ဆက်တိုက်မိုးရွာမည်ဖြစ်ကြောင်း စစ်ကောင်စီ၏ မိုးလေဝသနှင့်ဇလဗေဒညွှန်ကြားမှု ဦးစီးဌာန (မိုး/ဇလ)က ယနေ့ နိုဝင်ဘာ ၁၈ ရက်နေ့တွင် ထုတ်ပြန်သည်။

လာမည့် ၂ ရက်အတွင်း နေပြည်တော်၊ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီ တိုင်းအပါအဝင် ရှမ်းပြည်နယ်၊ ကရင်နီ ( ကယား)ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်ကျားမှ နေရာကျဲကျဲ မိုးရွာနိုင်မည်ဖြစ်ကြောင်းသိရသည်။

လက်ရှိမိုးစပါးရိတ်သိမ်းချိန်တွင် လေပွေလှိုင်းများအာရှတိုက်ကုန်းမြေဘက်သို့ ဝင်ရောက်မှုများပြား နိုင်သဖြင့် အဖျက်မိုးအဖြစ်ကြုံတွေ့ရနိုင်ကြောင်း အမျိုးသားညီညွတ်ရေးအစိုးရ(NUG)၊ လူသားခြင်း စာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က အသိပေး ထားသည်။

ယခုနှစ်မုတ်သုံရာသီပြီးဆုံးချိန်ကာလတွင် မနှစ်ကထက် တောင်တရုတ် ပင်လယ်ပြင်နှင့် ပစ္စိဖိတ် သမုဒ္ဒရာအနောက်ပိုင်းတွင် တိုင်ဖွန်းမုန်တိုင်းနှင့်ဆက်စပ်သော လေပွေလှိုင်းများ ဝင်ရောက်မှု များပြီး အဆိုပါ အရှေ့လေပွေလှိုင်းနှင့် မုန်တိုင်းငယ် သက်ရောက်မည့်အခြေအနေများကို နိုဝင်ဘာ၊ ဒီဇင်ဘာလအထိသတိပြုရန်လိုကြောင်း NUG ၏ MOHADM က ယနေ့ နိုဝင်ဘာ ၁၈ ရက်နေ့ ရက်စွဲဖြင့် ထုတ်ပြန်ထားသည်။

ဓာတ်ပုံ - မိုး/ဇလ

#တိုင်ဖွန်မုန်တိုင်း #မန်ရီ #တောင်တရုတ်ပင်လယ် #MOHADM #မိုးဇလ #Ayeyarwaddy_Times

မြောက်ကိုရီးယားက ရုရှားသို့ တပ်ဖွဲ့ဝင်တစ်သိန်းအထိ စေလွှတ်ဖွယ်ရှိ

ဧရာဝတီတိုင်းမ်
နိုဝင်ဘာလ ၁၈ ရက်

ရုရှားရဲ့ ယူကရိန်းကျူးကျော်စစ်ကို ကူညီပေးဖို့ မြောက်ကိုရီးယားနိုင်ငံက တပ်ဖွဲ့ဝင်တစ်သိန်းအ ထိ စေလွှတ်နိုင်ရာ သမ္မတ ဗလာဒီမာပူတင်ရဲ့ ယူကရိန်းမှာ တိုက်ပွဲဝင်နေတဲ့ တပ်ဖွဲ့ဝင်အင်အားကို (၂၀) ရာခိုင်နှုန်း တိုးလာစေမယ်လို့ အစီရင်ခံစာတစ်ခုအရ သိရပါတယ်။

ရုရှားနဲ့မြောက်ကိုရီးယားကြား ဆက်ဆံရေး ကောင်းမွန်တာကြောင့် ကင်ဂျုံအန်ဟာ ယူကရိန်း တပ်ဖွဲ့တွေကို တိုက်ခိုက်ဖို့ ရုရှားသို့ မြောက်ကိုရီးယားတပ်ဖွဲ့ထောင်ချီ စေလွှတ်ဖို့ ပြင်ဆင်နေတယ်လို့ G-20 နိုင်ငံတွေရဲ့ အစီရင်ခံစာတစ်ခုက ဖော်ပြပါတယ်။

၂၀၂၄ ခုနှစ်အစမှာ ခန့်မှန်းချေ တပ်ဖွဲ့ဝင်အင်အား ၄၇၀၀၀၀ ရှိနိုင်တဲ့ ရုရှားတပ်ဖွဲ့ဟာ မြောက်ကို ရီးယားတပ်ဖွဲ့ဝင်တွေကြောင့် အင်အားတိုးလာမယ်လို့ သိရပါတယ်။

မြောက်ကိုရီးယားတပ်ဖွဲ့ကြောင့် ယူကရိန်းစစ်ပွဲမှာ အထိနာနေတဲ့ ရုရှားရဲ့ အင်အားလိုအပ်ချက် ကို ဖြည့်ဆည်းပေးမှာဖြစ်ပါတယ်။ ၂၀၂၂ ခုနှစ်၊ ဖေဖော်ဝါရီလနောက်ပိုင်း ရုရှားတပ်ဖွဲ့ဝင် ၇၀၀၀၀၀ ကျ ဆုံး သို့မဟုတ် ဒဏ်ရာရရှိခဲ့တယ်လို့ အနောက်နိုင်ငံ တာဝန်ရှိသူတွေက ခန့်မှန်းထားပါတယ်။

တစ်ရက်လျင် ရုရှားတပ်ဖွဲ့ဝင် ပျမ်းမျှ ၁၅၀၀ ခန့်ကို သုတ်သင်ခဲ့ပြီး စက်တင်ဘာလအထိ ရုရှား တပ်ဖွဲ့ဝင် ၈၀၀၀၀ သေဆုံးခဲ့ပြီး ၄၀၀၀၀၀ ဒဏ်ရာရရှိခဲ့တယ်လို့ ယူကရိန်းနိုင်ငံက ပြောပါတယ်။

ရုရှားက ရှေ့တန်းစစ်မျက်နှာတစ်လျှောက် ပုံမှန် နယ်မြေသိမ်းပိုက်မှုတွေ ဆက်လက်ပြုလုပ်နေ စဉ် ခန့်မှန်းချေ တပ်ဖွဲ့ဝင်အင်အား ၃၃၀၀၀၀ ခန့်သာရှိတဲ့ ယူကရိန်းစစ်တပ်က အင်အားတည်ဆောက်ဖို့ ရုန်းကန်နေရပါတယ်။

တပ်ဖွဲ့တွေ စေလွှတ်မှုနဲ့အတူ မြောက်ကိုရီးယားနိုင်ငံဟာ စစ်ဘက်ဆိုင်ရာ သဘောတူညီချက်ရဲ့ တစ်စိတ်တစ်ပိုင်းအဖြစ် ရုရှားသို့ ထောင်နဲ့ချီတဲ့ လက်နက်ကြီးကျည်တွေနဲ့ စစ်လက်နက်တွေ ပို့ဆောင်ခဲ့ ပါတယ်။

ကိုးကား - New York Post
Ref; North Korea may supply Putin with 100,000 soldiers for Ukraine war: report

#Ayeyarwaddy_Times

ထိုစည်းသုံးစည်းမှာ မြန်မာနိုင်ငံတွင် ပြည်တွင်း မတည်မငြိမ်ဖြစ်မှုနှင့် ပြည်တွင်းစစ် ဖြစ်ပွား၍မရခြင်း၊ အာဆီယံလမ်းကြောင်းမှ ကင်းကွာသွား၍မရခြင်း၊ ပြင်ပအင်အားစုများ ထင်သလိုစိမ့်ဝင် ဝင်ရောက် စွက်ဖက်မှုကို ခွင့်မပြုခြင်းတို့ဖြစ်ကြောင်း သိရသည်။

ယင်းအပြင် မစ္စတာဝမ်ယိသည် မြန်မာနိုင်ငံခရီးစဉ်အတွင်း စစ်ခေါင်းဆောင်၊ စစ်ကောင်စီခန့် နိုင်ငံခြားရေးဝန်ကြီး ဦးသန်းဆွေအပြင် အာဏာရှင်ဟောင်း ဗိုလ်ချုပ်မှူးကြီး(ငြိမ်း) သန်းရွှေတို့နှင့်ပါ တွေ့ဆုံကာ EROs အဖွဲ့များ၏ ရှမ်းမြောက် မြို့ရွာများအပေါ် ဖြစ်စဉ်များနှင့် ပတ်သက်၍ ဆန့်ကျင်ကြောင်း ဆိုသည်။

မစ္စတာ ဝမ်ယိ၏ ပြောဆိုချက်များသည် မြန်မာ့အရေးကို သိသာထင်ရှားစွာ ဝင်ရောက်စွက်ဖက် လာသည့် တရုတ်ခြေလှမ်းသစ်တစ်ခု၊ အထူးသဖြင့် စစ်ရှုံနေသည့် စစ်ကောင်စီကို နောက်ဆုံးအခွင့်အရေး ပေးလိုက်ခြင်းမျိုး ဖြစ်သည်ဟုလည်း တရုတ်-မြန်မာရေး အကဲခတ်လေ့လာ သူများက သုံးသပ်ကြသည်။

♦️တရုတ်သံအမတ် အပြောင်းအလဲ

တရုတ်အစိုးရသည် စစ်တပ်အာဏာသိမ်းပြီး သုံးနှစ်ကျော်အကြာ ဩဂုတ် ၁၂ ရက်က မြန်မာနိုင်ငံသို့ ပထမဆုံး အမျိုး သမီး သံတမန်နှစ်ဦး စေလွှတ်ခဲ့ပြီး ၎င်းတို့မှာ (၂၀)ဦးမြောက် မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျားနှင့် မန္တလေးမြို့အခြေစိုက် တရုတ်ကောင်စစ်ဝန်ချုပ် မစ္စကောင်းဖျင်တို့ ဖြစ်သည်။

၎င်းတို့နှစ်ဦးသည် မြန်မာနိုင်ငံဆိုင်ရာ တရုတ်သံအမတ်ကြီး မစ္စတာ ချန်းဟိုင်နှင့် ကောင်စစ်ဝန်ချုပ် မစ္စတာချန်းချန်း နေရာတွင် အစားထိုးပြောင်းလဲ တာဝန်ယူမည်ဖြစ်ပြီး တရုတ်နိုင်ငံ၏ အာရှရေးရာ အထူး ကိုယ်စားလှယ် မစ္စတာ တိန့်ရှီကျွန်း ခရီးစဉ်အပြီး ခန့်အပ်လာမှုက ရှမ်းမြောက်စစ်ဆင်ရေး အရှိန်မြင့်နေချိန်နှင့် တိုက်ဆိုင်လျက်ရှိသည်။

မစ္စမာကျားသည် ၁၉၉၅ ခုနှစ်မှ ၁၉၉၈ ခုနှစ်အထိ ရန်ကုန်မြို့ရှိ တရုတ်သံရုံးတွင် တတိယ အတွင်းဝန်အဖြစ် စတင်တာဝန်ထမ်းဆောင်ခဲ့ပြီး ပါကစ္စတန်နိုင်ငံ၊ ဂျပန်နိုင်ငံ၊ စင်ကာပူနိုင်ငံ၊ ဗြိတိန်နိုင်ငံ၊ မြောက်အိုင် ယာလန်နိုင်ငံ၊ မလေးရှားနိုင်ငံနှင့် အိန္ဒိယနိုင်ငံတို့ရှိ သံရုံးများတွင်လည်း သံတမန်ဆိုင်ရာ တာဝန်များကို ထမ်းဆောင်ခဲ့သူဖြစ်ကြောင်း သိရသည်။

ထို့အပြင် ၂၀၁၈ ခုနှစ်မှ ၂၀၁၉ ခုနှစ်အထိ တရုတ်နိုင်ငံ၊ ဟိုင်နန်ပြည်နယ်၊ စန်းရမြို့တွင် ဒုတိယမြို့တော်ဝန်အဖြစ် တာဝန်ထမ်းဆောင်ခဲ့ပြီး ၂၀၁၉ ခုနှစ်မှ မြန်မာနိုင်ငံဆိုင်ရာ တရုတ်နိုင်ငံ သံအမတ်ကြီးအဖြစ် တာဝန်မထမ်းဆောင်ခင်အထိ အိန္ဒိယနိုင်ငံ တရုတ်သံရုံးတွင် သံမှူးကြီးနှင့် သံအမတ်အဖြစ် တာဝန်ထမ်းဆောင်ခဲ့ကြောင်း သိရသည်။

♦️TNLA ကို ကျိုးနွံအောင် ဆုံးမမည်ဟု သတိပေး

ထို့နောက် လက်ရှိ ရှမ်း-မန်း စစ်ဆင်ရေး ဆင်နွှဲနေသည့် တအာင်းတပ်မတော် (TNLA) ကို ဩဂုတ် ၂၉ ရက် ရက်စွဲဖြင့် တရုတ်နိုင်ငံ၊ ရွှေလီမြို့ နိုင်ငံတော်လုံခြုံရေးကော်မတီမှ သတိပေးခြိမ်းခြောက်စာ ပေးပို့လာပြီး တိုက်ပွဲများ ချက်ချင်းရပ်ရန်နှင့် မရပ်တန့်ပါက ကြောက်ရွံ့ကျိုးနွံနှင့် ဆုံးမသွန်သင် နည်းလမ်းများကို ပိုမိုလုပ်ဆောင်မည်ဟု ပါရှိသည်။

ထိုသို့ TNLA ကို တိုက်ပွဲများ ချက်ချင်းရပ်ရန် တရုတ်အစိုးရက ရာဇသံပေး ခြိမ်းခြောက်စာ ပေးပို့လာမှုနှင့် ပတ်သက်၍ သက်ဆိုင်ရာ EROs များနှင့် အမျိုးသားညီညွတ်ရေး အတိုင်ပင်ခံကောင်စီ (NUCC)၊ အမျိုးသားညီညွတ်ရေးအစိုးရ (NUG) အပါအဝင် တော်လှန်ရေး အင်အားစုများက တုံ့ပြန်ခဲ့ကြသည်။

အဆိုပါကိစ္စနှင့် ပတ်သက်၍ တရုတ်သံရုံးကလည်း AFP သတင်းထောက်၏ မေးမြန်းမှုကို ၎င်းတို့အနေဖြင့် မြန်မာနိုင်ငံ မြောက်ပိုင်းအခြေအနေ အရှိန်လျော့ကျလာစေရန် မြှင့်တင်ဖော်ဆောင် သွားမည်ဟု တရုတ်အစိုးရ၏ ပြောခွင့်ရ Mr. Lin Jian က ဖြေဆိုခဲ့ကြောင်း ဩဂုတ် ၃၁ ရက်တွင် ထုတ်ပြန်ထားသည်။

♦️ကိုးကန့်တပ်ကို NUG နှင့် အဆက်ဖြတ်ခိုင်း

ယင်းနောက် တရုတ်အစိုးရ၏ ဖိအားပေးလာမှုကြောင့် MNDAA သည် စက်တင်ဘာ ၁၈ ရက်တွင် အမျိုးသားညီညွတ်ရေးအစိုးရ (NUG) နှင့် စစ်ရေး၊ နိုင်ငံရေးအရ ပူးပေါင်းခြင်း၊ စစ်မြေပြင်များ ချဲ့ထွင်ခြင်း၊ မန္တလေးနှင့် တောင်ကြီးကို ထိုးစစ်ဆင် တိုက်ခိုက်ခြင်းများ လုံးဝပြုလုပ်မည် မဟုတ်ကြောင်း ဒုတိယအကြိမ် ထုတ်ပြန်ခဲ့ရသည်။

ထိုအတောအတွင်း တရုတ်အစိုးရ၏ ကြားဝင်စေ့စပ်မှုဖြင့် နှစ်ဖက်တွေ့ဆုံ ယာယီအပစ်အခတ် ရပ်စဲခဲ့သော်လည်း ခြောက်ကြိမ်မြောက် ဟိုင်ဂင် ဆွေးနွေးပွဲမှစ၍ စစ်ကောင်စီဘက်က တက်ရောက်ခြင်း မရှိ တော့ဘဲ ညီနောင်သုံးဖွဲ့ကို အကြမ်း ဖက်အဖြစ် ကြေညာကာ မြေပြင်ထိုးစစ်နှင့် လေကြောင်းတိုက်ခိုက်မှုများ ပိုမိုလုပ်ဆောင်ခဲ့သည်။

မြောက်ပိုင်းအဖွဲ့များကို စစ်ဆင်ရေးများအပေါ် တရုတ်အစိုးရက တွေ့ဆုံ၍ အပြင်းအထန် ဖိအားပေး ခြိမ်းခြောက်ကာ ၎င်းတို့နှင့် ဆက်စပ်နေသည့် နယ်စပ်ဂိတ်များကို ပိတ်ဆို့ခဲ့သော်လည်း စစ်ကောင်စီ၏ တစ်ဖက်သတ် လေကြောင်းထိုးစစ်ဆင် တိုက်ခိုက်နေမှုကိုမူ တရုတ်အစိုးရက နှုတ်ဆိတ်နေခဲ့သည်။

တရုတ်အစိုးရသည် အောက်တိုဘာ ၁၈ ရက်မှစတင်၍ မြန်မာ-တရုတ် နယ်စပ်ဂိတ်များအနက် ၁၄ ခုထက်မနည်းကို ကာလအကန့်အသတ်မရှိ ပိတ်ဆို့ထားလိုက်ပြီး EROs များအပေါ်လည်း ‘ဖြတ်ငါးဖြတ်’ အဖြစ် လျှပ်စစ်၊ ရေ၊ အင်တာနက်၊ ထောက်ပို့နှင့် လူအင်အားများ ဖြတ်တောက်ခဲ့ကြောင်း သိရသည်။

ယင်းသို့ မြန်မာ့အရေး အပြောင်းအလဲများ ဖန်တီးလာသော တရုတ်အစိုးရသည် ပထမဆုံးအကြိမ် စစ်ခေါင်းဆောင်ကို ဒေသတွင်းဆိုင်ရာ အစည်းအဝေးများ တက်ရောက်ရန် ဖိတ်ကြားခဲ့ပြီး ယင်းခရီး စဉ်အတွင်း တရုတ်ဝန်ကြီးချုပ် လီချန်းနှင့် တွေ့ဆုံစဉ် စစ်ခေါင်းဆောင်က ၎င်းတို့ စစ်ရှုံးနေမှုများကို အဓိကထား တိုင်ကြားခဲ့ကြောင်း သိရသည်။

အလားတူ တရုတ်ဝန်ကြီးချုပ်က မြန်မာ့ပြည်တွင်း တည်ငြိမ်အေးချမ်းရေးနှင့် စစ်ကောင်စီ၏ ရှေ့လုပ်ငန်းစဉ် ငါးရပ်ကို အပြည့်အဝထောက်ခံကာ တရုတ်နိုင်ငံအနေဖြင့် အားပေးကူညီသွားမည် ဖြစ်ပြီး ပဋိ ပက္ခများကို နိုင်ငံရေးအရ ဖြေရှင်းနိုင်ရေး ဖိတ်ခေါ်မှုကိုလည်း ချီးကျူးကြောင်း ပြောဆိုခဲ့သည်။

ထို့အပြင် ရွေးကောက်ပွဲ အောင်မြင်စွာ ကျင်းပနိုင်ရေး ကူညီမည်ဖြစ်ပြီး မြောက်ပိုင်းဒေသ တည်ငြိမ်အေးချမ်းရေးသည် အရေးကြီးသလို တရုတ်နိုင်ငံအတွင်း အခြေပြု၍ မြန်မာနိုင်ငံ၏ အကျိုးကို ပျက်စီးအောင် ဆောင်ရွက်နေမှုများကို လက် သင့်ခံမည် မဟုတ်ဟု ပြောဆိုခဲ့ကြောင်း စစ်ကောင်စီက ထုတ်ပြန်ထားသည်။

တရုတ်ပြည်သူ့သမ္မတနိုင်ငံ ဝန်ကြီးချုပ် Mr. Li Qiang ( လီချန်း)သည် ပြီးခဲ့သည့် နိုဝင်ဘာ ၆ ရက်နေ့က ကူမင်းမြို့တွင် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံစဉ် မြန်မာ - တရုတ် နှစ်နိုင်ငံ နယ်စပ်ဂိတ်များသည် အစိုးရများ၏ စီမံခန့်ခွဲမှုအောက်တွင်ရှိရမည် ဖြစ်ကြောင်းပြောဆိုခဲ့သော်လည်း လက်ရှိတွင် နှစ်နိုင်ငံ နယ်စပ်ဂိတ်အများစုကို EROs က ထိန်းချုပ်ထားသည်။
#ရမခကျရှုံး #တရုတ်ဖန်တီး #နိုင်ငံရေးအပြောင်းအလဲများ #ဆောင်းပါး #Ayeyarwaddy_Times

ရမခ ကျရှုံးပြီးနောက် တရုတ်ဖန်တီးလာသည့် နိုင်ငံရေး အပြောင်းအလဲများ (ဆောင်းပါး)

နိုင်မင်းလွင်/ဧရာဝတီတိုင်းမ်
နိုဝင်ဘာ ၁၆ ရက်

၂၀၂၁ ဖေဖော်ဝါရီတွင် စစ်တပ် အာဏာသိမ်းပြီး ၃၂ လအကြာ ၂၀၂၃ အောက် တိုဘာ ၂၇ ရက်တွင် မြောက်ပိုင်းမဟာမိတ် ညီနောင်များဖြစ်သည့် ကိုးကန့်တပ်မတော် (MNDAA) ၊တအာင်းတပ်မတော် (TNLA) နှင့် အာရက္ခတပ်တော် (AA) သုံးဖွဲ့ စတင်ဖော်ဆောင်ခဲ့သော "၁၀၂၇ စစ်ဆင်ရေး" သည် စစ်ကောင်စီကို မရှုမလှစစ်ရှုံး အထိနာစေပြီး အရှက်ရစေခဲ့သည်။

အာဏာသိမ်း စစ်ကောင်စီနှင့် ပိုမိုထိတွေ့ ဆက်ဆံလာရသော တရုတ်အစိုးရသည် ကျားဖြန့်(ခ) အွန်လိုင်းငွေလိမ်ဂိုဏ်းများကြောင့် နိုင်ငံတကာတွင် နာမည်ပျက်နေရသည့်အတွက် မြန်မာပြည်တွင်းရှိ ထိုဂိုဏ်းများကို နှိမ်နင်းပေးရန် စစ်ကောင်စီထံ အကြိမ်ကြိမ်တောင်းဆိုခဲ့သည်။

သို့သော်လည်း စစ်ကောင်စီက ထိရောက်စွာ ဆောင်ရွက်နိုင်ခြင်း မရှိသဖြင့် တရုတ်အစိုးရက ၎င်းတို့နှင့် ပတ်သက်ဆက်နွယ်နေသော မြောက်ပိုင်းမဟာမိတ် ညီနောင်အဖွဲ့များကို မီးစိမ်းပြ တိုက်တွန်းရာမှ အဆိုပါ "၁၀၂၇ စစ်ဆင်ရေး" ပေါပေါက်လာခြင်း တစ်ရပ်ဖြစ်သည်ဟု လေ့လာစောင့်ကြည့်သူတို့က ဆိုကြသည်။

အလားတူ ညီနောင်သုံးဖွဲ့ကလည်း ၁၀၂၇ စစ်ဆင်ရေး ဖော်ဆောင်ခြင်း၏ ထုတ်ပြန်ချက်တွင် ကျားဖြန့်နှင့် ပတ်သက်၍ အဓိကအချက်အနေဖြင့် ထည့်သွားပြောဆိုထားပြီး အဆိုပါလုပ်ငန်း လုပ်ကိုင်နေသည့် တရုတ်အလိုရှိရာများကို ဖမ်းဆီးလွှဲပြောင်းပေးခဲ့ကြောင်း သိရသည်။

ယင်းဂိုဏ်းများသည် ကမ္ဘောဒီးယားနှင့် ဗီယက်နမ်နိုင်ငံတို့တွင် ဖြစ်ပွားနေရာမှ စစ်တပ် အာဏာသိမ်း ပြီးနောက် မြန်မာနိုင်ငံသို့ ကူးစက်ရောက်ရှိလာခြင်းဖြစ်သည်ဟု စစ်ကောင်စီက ပြောဆိုထားသလို လက်ရှိတွင် ကရင်ပြည်နယ်၊ ရွှေကုက္ကိုလ်အပါအဝင် တာချီလိတ်၊ ကိုးကန့်၊ ‘ဝ’၊ မိုင်းလား စသည့် နယ်စပ်ဒေသများတွင်သာမက ရန်ကုန်၊ မန္တလေး မြို့ကြီးများထိပါ ပျံ့နှံ့လှုပ်ရှား လာကြောင်း သိရသည်။

♦️သမိုင်းဝင် "အရှေ့မြောက်တိုင်းစစ်ဌာနချုပ်(ရမခ)" ကျရှုံးမှု

သို့သော်လည်း ကိုးကန့်တပ်မတော် (MNDAA) ဦးဆောင်၍ ညီနောင်မဟာမိတ်များဖြစ်သော တအာင်းတပ်မတော် (TNLA) နှင့် အာရက္ခတပ်တော် (AA) တို့အပြင် တော်လှန်ရေး တပ်ဖွဲ့များပါ ပူးပေါင်းပါဝင်လာသော ရှမ်း မြောက်အခြေပြု အဆိုပါစစ်ဆင်ရေးအတွင်း စစ်ကောင်စီ၏ စစ်ရေးနှင့် စီးပွားရေးအရ အရေးပါသော မြို့များနှင့် တပ်စခန်းများကို ဆက်လက်သိမ်းပိုက်နိုင်ခဲ့သည်။

ထို့အပြင် ၎င်းတို့အတွက် သမိုင်းအစဉ်အလာ ကြီးမားသည့် လားရှိုးမြို့ရှိ အရှေ့မြောက်တိုင်း စစ်ဌာနချုပ်(ရမခ)ကို ယခုနှစ်၊ ဩဂုတ် ၃ ရက်တွင် တိုက်ခိုက်သိမ်းပိုက်ခဲ့သည့်အတွက် မြန်မာ့အရေးကို ချိန်ခွင်ကိုင် ကစားနေသော တရုတ်အစိုးရ၏ ခြေလှမ်းများ သိသာပြောင်းလဲစေခဲ့သည်။

တရုတ်အစိုးရသည် များပြားလှသော ၎င်းတို့အကျိုးစီးပွားကို ထိခိုက်စေသည့် မြန်မာ့အာဏာသိမ်းမှုကို မလိုလားခဲ့သော် လည်း ဒီမိုကရေစီစနစ်အား မနှစ်သက်၊ အထူးသဖြင့် အနောက်အုပ်စုများ စိုးမိုးလာမည်ကို စိုးရိမ်သောကြောင့် နေပြည်တော် စစ်အုပ်စုဘက်သို့ သိသိသာသာ ရပ်တည် ပြလာသည်ဟု လေ့လာသူများက ဆိုသည်။

♦️တိန့်ရှီကျွန်းနှင့် နေပြည်တော်ဘက် ရပ်တည်မှု

ရှမ်းမြောက်စစ်ဆင်ရေး ပြင်းထန်နေချိန် တရုတ်နိုင်ငံ၏ အာရှရေးရာ အထူးကိုယ်စားလှယ် မစ္စတာ တိန့်ရှီကျွန်းသည် နေပြည်တော်ကို ဩဂုတ် ၈ ရက်က လာရောက်၍ စစ်ခေါင်းဆောင်နှင့် တွေ့ဆုံကာ ဟိုင်ဂင်ဆွေးနွေးပွဲ ကိစ္စရပ်အပါအဝင် ရွေးကောက်ပွဲ ကျင်းပနိုင်ရေးအတွက် ဆွေးနွေးခဲ့သည်။

တရုတ်အစိုးရ၏ ကြားဝင်စေ့စပ်မှုဖြင့် ကူမင်းမြို့တွင် မြောက်ပိုင်းညီနောင် မဟာမိတ်သုံးဖွဲ့နှင့် ခြောက်ကြိမ်မြောက် တွေ့ဆုံသွားမည့် ဟိုင်ဂင်ဆွေးနွေးပွဲကို စစ်ကောင်စီဘက်က မတက်ရောက် သောကြောင့် မစ္စတာတိန့်ရှီကျွန်း လာတွေ့ခြင်းလည်းဖြစ်ကြောင်း သိရသည်။

ထိုတွေ့ဆုံမှုတွင် နှစ်နိုင်ငံအကြား ချစ်ကြည်ရင်းနှီးမှုနှင့် သံတမန် ဆက်ဆံရေး၊ ပြည်တွင်း ငြိမ်းချမ်းရေး၊ နယ်စပ်ဒေသ တည်ငြိမ်အေးချမ်းရေးဆိုင်ရာ ကိစ္စရပ်များကိုလည်း ဆွေးနွေးခဲ့သည်ဟု စစ်ကောင်စီ၏ ထုတ်ပြန်ချက်အရ သိရသည်။

မစ္စတာ တိန့်ရှီကျွန်းသည် တစ်ဖက်တွင်လည်း “ဝ” တပ်မတော် (UWSA)အပါအဝင် ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ (FPNCC)အဖွဲ့ဝင် မြောက်ပိုင်းမဟာမိတ် ညီနောင်အဖွဲ့များအား ခေါ်ယူတွေ့ဆုံ သတိပေးတားမြစ်မှုများ ပြုလုပ်ခဲ့ကြောင်း သိရသည်။

♦️ဝမ်ယိပြောတဲ့ စည်းသုံးစည်း

တရုတ်နိုင်ငံခြားရေးဝန်ကြီး မစ္စတာ ဝမ်ယိသည် ထိုင်းနိုင်ငံ၊ ချင်းမိုင်မြို့တွင် ကျင်းပခဲ့သည့် (၉) ကြိမ်မြောက် လန်ချန်း-မဲခေါင် ပူးပေါင်းဆောင်ရွက်မှု (LMC) နိုင်ငံခြားရေးဝန်ကြီးများ အစည်းအဝေးကို ပူးတွဲသဘာပတိအဖြစ် တက်ရောက်ရင်း မြန်မာနိုင်ငံသို့ ဩဂုတ် ၁၄ ရက်တွင် ရောက်ရှိလာခဲ့သည်။

အဆိုပါ LMC အစည်းအဝေးတွင် မြန်မာ့အခြေအနေမှာ စိတ်ပူပန်စရာ ဖြစ်သည့်အတွက် ကျော်လွန်မရသော စည်းသုံးခုကို ခိုင်မာစွာ ထိန်းသိမ်းသွားမည်ဟု ဝမ်ယိက ပြောဆိုခဲ့ပြီး ထိုအရာသည် မြန်မာနိုင်ငံ၏ အချုပ်အခြာအာဏာနှင့်ပြည်သူ့သဘောဆန္ဒများကို စော်ကားခြင်းဖြစ်ကြောင်း လေ့လာ သူတို့က ထောက်ပြသည်။

နောင်ချိုတွင် တိုက်ပွဲပြင်းထန်စွာဖြစ်ပွားနေပြီး စစ်ကောင်စီတပ်ရင်းမှူး အပါအဝင် တပ်ဖွဲ့ဝင် သေဆုံးမှုများပြားကာ ၄ ဦးကို အရှင်ဖမ်းဆီးရမိ

ဧရာ၀တီတိုင်းမ်
နိုဝင်ဘာ ၁၆ ရက်

ရှမ်းပြည်နယ်မြောက်ပိုင်း နောင်ချိုမြိုရှိ တောင်ခမ်းအမြောက်တပ်စခန်း (၃၅၄) နှင့် (၉၀၂) တပ်စခန်းတွင် တအာင်းအမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီတပ်တို့ ယနေ့ နိုဝင်ဘာလ ၁၆ ရက်နေ့က တိုက်ပွဲပြင်းထန်စွာဖြစ်ပွားခဲ့ရာ စစ်ကောင်စီတပ်ရင်းမှူးအပါအဝင် အခြားအရာရှိ အဆင့်နှင့် တပ်ဖွဲ့ဝင်သေဆုံးမှုများပြားပြီး လက်နက်ခဲယမ်းများ သိမ်းဆည်းရမိကြောင်း သိရသည်။

ယနေ့ဖြစ်ပွားသည့် တိုက်ပွဲအတွင်း စစ်ကောင်စီ၏ တပ်မ(၁၁) ခမရ-၂၁၃ မှ တပ်ရင်းမှူး ဗိုလ်မှူး၊ ဗိုလ်ကြီး အဆင့်ရှိသူနှင့် တပ်သားများ သေဆုံးခဲ့ပြီး စစ်ကောင်စီတပ်၏ လက်နက်ခဲယမ်းများ နှင့် စစ်အသုံးအဆောင်ပစ္စည်းများလည်း သိမ်းဆည်းရမိခဲ့ကြောင်း TNLA က ထုတ်ပြန်ထားသည်။

စစ်ကောင်စီတပ်သည် ရှမ်းပြည်နယ်တောင်ပိုင်း ရပ်စောက်-ကျောက်ဂူမှ နောင်ချိုမြိုနယ်အတွင်း စစ်အင်အားဖြည့်တင်းရန် ကြိုးပမ်းကာ ထိုးစစ်ဆင်လာသောကြောင့် တိုက်ပွဲဖြစ်ပွားခဲ့ခြင်းဖြစ်ပြီး လက်နက်ခဲယမ်းများနှင့်အတူ စစ်ကောင်စီတပ်ဖွဲဝင်လေးဦးကိုလည်း အရှင်ဖမ်းဆီးနိုင်ခဲ့ကြောင်း TNLA ထံက သိရသည်။

စစ်ကောင်စီသည် နောင်ချိုမြို့ရှိ တောင်ခမ်းအမြောက်တပ်စခန်း ကျဆုံးမှုမရှိစေရန်နှင့် ထိန်းချုပ်နိုင်ရန် အတွက် ရှမ်းပြည်နယ်တောင်ပိုင်း ရပ်စောက်-ကျောက်ဂူမှတစ်ဆင့် စစ်အင်အားဖြည့်တင်းနေပြီး လေကြောင်းမှတစ်ဆင့်လည်း စစ်လက်နက်ခဲယမ်းများ ဖြည့်တင်းနေကြောင်း သိရသည်။

ထိုအပြင် စစ်ကောင်စီတပ်သည် တိုက်ပွဲဖြစ်ပွားခြင်းမရှိသည့်နေရာတွင်လည်း လက်နက်ကြီးများ ပစ်ခတ်ခြင်း၊လေကြောင်းဖြင့် ဗုံးကြဲတိုက်ခိုက်မှုများ လုပ်ဆောင်လျက်ရှိကြောင်း TNLA က ထုတ်ပြန်ထားသည်။

ဓာတ်ပုံ-TNLA

#နောင်ချို #တိုက်ပွဲပြင်းထန်စွာဖြစ်ပွား #စစ်ကောင်စီတပ်ရင်းမှူး #တပ်ဖွဲ့ဝင်သေဆုံးမှုများပြား #၄ဦးအရှင်ဖမ်းဆီးရမိ #Ayeyarwaddy_Times

ဧရာဝတီတိုင်းမှာ ဝန်ထမ်းတွေကို ဖိအားပေးကာ စတုဒိသာကျွေးခိုင်း

ဧရာဝတီတိုင်းမ်
နိုဝင်ဘာ ၁၆ ရက်

တိုက်ပွဲတွင်ဖြစ်ပွားခြင်းမရှိတဲ့ ဧရာဝတီတိုင်းမှာတန်ဆောင်တိုင်ပွဲတော်စည်းကားစေရေးအတွက် လက်အောက်ခံ ဌာနဆိုင်ရာဝန်ထမ်းတွေကို ဖိအားပေးကာ စတုဒီသာကျွေးခိုင်းခဲ့တယ်လို့ သိရပါတယ်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times 

ငပုတောမြို့နယ်မှာ စစ်မှုထမ်းအစားထိုးငှားရန် ကျေးရွာများရှိ နေအိမ်တိုင်းကိုငွေတောင်း

ဧရာဝတီတိုင်းမ်
နိုဝင်ဘာ ၁၆ ရက်

ဧရာ၀တီတိုင်း၊ငပုတောမြို့နယ်၊ ကန့်မလာကျေးရွာအုပ်စုရှိရွာတွေမှာ အုပ်ချုပ်ရေးမှူးမှ စစ်မှုထမ်းအစားထိုးလူငှားရန်ဟုဆိုကာ နေအိမ်တိုင်းကို ငွေကောက်ခံနေတယ်လို့ ဒေသခံတွေရဲ့ ပြောကြားချက်အရ သိရပါတယ်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times 

ဧရာဝတီတိုင်းတွင် ဝန်ထမ်းများကို ဖိအားပေးကာ စတုဒိသာကျွေးခိုင်း

ဧရာဝတီတိုင်းမ်
နိုဝင်ဘာ ၁၆ ရက်

တိုက်ပွဲတွင်ဖြစ်ပွားခြင်းမရှိသည့် ဧရာဝတီတိုင်းတွင် တန်ဆောင်တိုင်ပွဲတော်စည်းကားစေရေးအတွက် လက်အောက်ခံ ဌာနဆိုင်ရာဝန်ထမ်းများကို ဖိအားပေးကာ စတုဒီသာကျွေးခိုင်းခဲ့ကြောင်း သတင်းရရှိသည်။

တိုင်းဒေသကြီး၏ မြို့တော်ဖြစ်သည့် ပုသိမ်မြို့တွင် တန်ဆောင်တိုင်ပွဲတော်စည်ကားစွာ ကျင်းပရေးအတွက် တိုင်းဝန်ကြီးချုပ် ဦးတင်မောင်ဝင်း ကိုယ်တိုင်ဦးဆောင်ပြီး တိုင်းအဆင့်ဌာနဆိုင်ရာများအား ခေါ်ယူကာ အောက်တိုဘာလကုန်ပတ်က အစည်းဝေးပြုလုပ်ခဲ့ကြောင်း စစ်ကောင်စီတပ်နှင့်နီးစပ်သူများထံမှ သိရသည်။

“ ဌာနဆိုင်ရာအကုန်လုံးပါတယ် ၊ ဌာနတစ်ခုကို တမျိုးကျွေးရတာပေါ့။ မြို့တော်ခန်းမရှေ့ ရှုခင်းသာရင်ပြင်မှာ အကုန်ဌာနဆိုင်ရာတန်းစီပြီး ကျွေးမွေးရတာ။ စိတ်ပါလည်းလုပ် မပါလည်း လုပ်ရတာ။ ဝန်ထမ်းတွေက ပိတ်ရက်လေးမိသားစုနဲ့အတူတူ ရှိချင်တာ။ ဒါပေမယ့် တာဝန်ပေးတော့ လုပ်ရတာပေါ့”ဟု စစ်ကောင်စီတပ်လက်အောက်ခံ ဌာနဆိုင်ရာ ဝန်ထမ်း အသက် ၃၀ ကျော်အရွယ် အမျိုးသားတဦးမှ ဧရာဝတီတိုင်းမ်သို့ ပြောသည်။

ပုသိမ်မြို့၊ အမှတ် (၄)ရပ်ကွက်၊ ကမ်းနားလမ်း မြို့တော်ခန်းမရှေ့တွင် ပြုလုပ်သည့် တန်ဆောင်တိုင်မီးထွန်းပွဲတော်ကို စစ်ကောင်စီခန့် ဧရာဝတီတိုင်းဝန်ကြီးချုပ် ဦးတင်မောင်ဝင်းတက်ရောက်ခဲ့ပြီး လမ်းများပိတ်ကာ လုံခြုံရေးအများအပြားဖြင့် ပြုလုပ်ခဲ့သည့်အပြင် ဒရုန်းများအသုံးပြုကာ စောင့်ကြည့်မှုများပြုလုပ်ခဲ့ကြောင်း သိရသည်။

အဆိုပါပွဲကို စားဝတ်နေရေးအခက်အခဲဖြစ်နေသည့် ဒေသခံအများစုသွားရောက်ပြီး စတုဒိသာစားသောက်ခြင်းများရှိသလို လူစည်ကားသည့်အချိန်စောင့်ကာ စစ်ကောင်စီတပ်လက်အောက်ခံ သတင်းဌာနများမှ ဓါတ်ပုံမှတ်တမ်းများယူနေခြင်းကိုတွေ့ရှိခဲ့ကြောင်း ပုသိမ််မြို့ခံများထံမှ သိရသည်။

ပြီးခဲ့သည့် ၂၀၂၃ ခုနှစ် တန်ဆောင်တိုင်ပွဲတွင် ဗုံးပေါက်ကွဲမှုဖြစ်ပွားခဲ့ပြီး လူထိခိုက်မှုမရှိခဲ့ကြောင်း ဒေသခံများ၏ ပြောကြားချက်များအရ သိရသည်။

#ဧရာဝတီတိုင်း #ဝန်ထမ်း #ဖိအားပေး #စတုဒိသာကျွေးခိုင်း #Ayeyarwaddy_Times

အိန္ဒိယဆေးရုံ မီးလောင်မှုကြောင့် မွေးကင်းစကလေးငယ် (၁၀) ဦး သေဆုံးပြီး (၁၆) ဦး အသက်အန္တရာယ် စိုးရိမ်ရ

ဧရာဝတီတိုင်းမ်
နိုဝင်ဘာ ၁၆ ရက်

နိုဝင်ဘာလ ၁၅ ရက်က အိန္ဒိယနိုင်ငံရှိ ဆေးရုံတစ်ရုံမှာ အောက်ဆီဂျင်စက် ပျက်ယွင်းမှုကြောင့် မီးလောင်မှုတစ်ခု ဖြစ်ပွားခဲ့ရာ မွေးကင်းစကလေး (၁၀) ဦး သေဆုံးခဲ့ပြီး (၁၆) ဦး အသက်အန္တရာယ် စိုး ရိမ်ရတယ်လို့ သိရပါတယ်။

အရည်အသွေးမပြည့်မီတဲ့ တည်ဆောက်မှုနဲ့ ဘေးကင်းလုံခြုံရေး သတ်မှတ်ချက်တွေကို မလိုက် နာမှုကြောင့် အိန္ဒိယနိုင်ငံမှာ အဆောက်အအုံ မီးလောင်မှုတွေ မကြာခဏဆိုသလို ဖြစ်ပွားလေ့ရှိပါတယ်။

နယူးဒေလီမြို့တော်ရဲ့တောင်ဘက် ကီလိုမီတာ ၄၅၀ ဝန်းကျင်အကွာ ဂျန်စီမြို့ရှိ မဟာရာနီ လက်ချ်မီးဘိုင် ဆေးကောလိပ်မှာ နိုဝင်ဘာလ ၁၅ ရက် ဒေသစံတော်ချိန် ည ၁၀ နာရီ ၃၀ မိနစ်မှာ မီး လောင်မှု ဖြစ်ပွားခဲ့တာပါ။

“မွေးကင်းစကလေး (၁၀) ဦး သေဆုံးခဲ့ပါတယ်။ အလောင်း (၇) လောင်းကို ဘယ်သူဘယ်ဝါဆို တာ ဖော်ထုတ်ပြီးဖြစ်ပေမယ့် (၃) လောင်းကိုတော့ မဖော်ထုတ်ရသေးပါဘူး” လို့ ဉတာပရာဒက်ရှ်ပြည် နယ် ဒုတိယဝန်ကြီးချုပ် ဘရာဂျက်ပါသတ်ခ်က သတင်းထောက်တွေကို ပြောပါတယ်။

မီးလောင်မှုဖြစ်ပွားပြီးနောက် မွေးကင်းစကလေး (၁၆) ဉီးမှာ အရေးပေါ်အခြေအနေဖြစ်တယ်လို့ ဒေသန္တရသတင်းဌာန Times Now က ဖော်ပြခဲ့ပါတယ်။

“မီးလောင်မှုဖြစ်ပွားရတဲ့ အကြောင်းရင်းကို စုံစမ်းစစ်ဆေးမှာဖြစ်ပါတယ်။ မီးလောင်မှုမှာ တာဝန် ရှိတဲ့သူတွေကို ပြင်းထန်စွာ အရေးယူမှာဖြစ်ပါတယ်” လို့ ဘရာဂျက်ပါသတ်ခ်က ဆိုပါတယ်။

ဆေးရုံမီးလောင်မှုကြောင့် မွေးကင်းစကလေးတွေ သေဆုံးရတာ စိတ်နှလုံးမချမ်းမြေ့ဖွယ်ရာ ဖြစ် စဉ်လို့ အိန္ဒိယဝန်ကြီးချုပ် နာရင်ဒရာမိုဒီက လူမှုကွန်ရက် X မှာ ရေးသားခဲ့ပါတယ်။

ကလေးငယ်တွေရဲ့ ကျန်ရစ်သူမိသားစုဝင်တွေကို အမေရိကန်ဒေါ်လာ ၇၉၆၀ နဲ့ညီမျှတဲ့ ရူပီး ၅၀၀၀၀၀ လျော်ကြေးပေးမယ်လို့ ဉတာပရာဒက်ရှ် ပြည်နယ်ဝန်ကြီးချုပ် ယိုဂီအဒက်ယာနက်က ကြေ ညာခဲ့ပါတယ်။

ကိုးကား - AFP
Ref; 10 newborns killed, 16 critical in India hospital fire

#Ayeyarwaddy_Times

ဖာပွန်ခရိုင်တွင် စစ်ကောင်စီတပ်များနှင့် တစ်လတာတိုက်ပွဲအတွင်း တပ်သား ၂၉ ဦးသေဆုံးခဲ့ပြီး ၃၀ ဝန်းကျင် ထိခိုက်ဒဏ်ရာရရှိ

ဧရာဝတီတိုင်းမ်
(ဖာပွန်)၊ နိုဝင်ဘာ ၅ ရက်

ကရင်အမျိုးသားအစည်းအရုံး(KNU)၊ တပ်မဟာ-၅ ဖာပွန်ခရိုင်အတွင်း ပြီးခဲ့သည့် အောက်တိုဘာ တစ်လတာအတွင်း စစ်ကောင်စီတပ်များနှင့် ထိတွေ့တိုက်ပွဲများအတွင်း စစ်ကောင်စီဘက်မှ ၂၉ ဦးသေဆုံးခဲ့ပြီး ၃၀ ဦးဝန်းကျင် ထိခိုက်ဒဏ်ရာရရှိခဲ့ကြောင်း သိရသည်။

တပ်မဟာ-၅ နယ်မြေအတွင်း အောက်တိုဘာတလတာ၌ စစ်ကောင်စီတပ်နှင့် ထိတွေ့မှုပေါင်း ၁၃၆ ကြိမ်ဖြစ်ပွားခဲ့ပြီး စစ်ကောင်စီ၏ တပ်ရင်းမှူး၊ ဒု-တပ်ရင်းမှူး နှင့် တပ်ခွဲမှူး တို့မှာလည်း ထိခိုက်ဒဏ်ရာ ရသူများအထဲ ပါဝင်ခဲ့ကြောင်း သိရသည်။

တိုက်ပွဲများအတွင်း စစ်ကောင်စီထံမှ လက်နက်ခဲယမ်းအများအပြား သိမ်းဆည်းရမိခဲ့ပြီး တော်လှန်ရေးတပ်ဖွဲ့များဘက်မှ စစ်ကောင်စီ၏ စစ်ဘက်ဆိုင်ရာအဆောက်အ‌ဦ ၁၉ လုံးကို ဖျက်ဆီးနိုင်ခဲ့ကာ စစ်မော်တော်ယာဥ်
တစ်စီးကိုလည်း ဖျက်ဆီးနိုင်ခဲ့ကြောင်း KNU ထုတ်ပြန်ချက်အရ သိရသည်။

ထို့ပြင် စစ်ကောင်စီက လေကြောင်းတိုက်ခိုက်မှုများလည်း ပြုလုပ်ခဲ့ပြီး တိုက်ခိုက်မှုအတွင်း ဗုံးအလုံးပေါင်း ၃၆၉ လုံးအထိ ကြဲချခဲ့ကာ လက်နက်ကြီးပစ်ခတ်မှုများလည်း ပြုလုပ်ခဲ့သည်။ အဆိုပါတိုက်ခိုက်မှုများကြောင့် ဒေသခံ သုံးဦးသေဆုံးခဲ့ပြီး ငါးဦးထိခိုက်ဒဏ်ရာရရှိခဲ့သည်။ ထို့အပြင် လူနေအိမ်များ၊ ဘုရားကျောင်း၊ စာသင်ကျောင်း၊ မူကြိုကျောင်းတစ်ကျောင်း၊ မူလတန်းကျောင်းတစ်ကျောင်းနှင့် ကျောင်းဘော်ဒါဆောင် တစ်ဆောင်တို့မှာလည်း ထိခိုက်ပျက်စီးခဲ့ရကြောင်း သိရသည်။

ဖာပွန်မြို့နယ်အတွင်း ပြီးခဲ့သည့် အောက်တိုဘာ ၂၉ ရက်နေ့က သိမ်းပိုက်နိုင်ခဲ့သည့် ခေါပုတ်စခန်းသိမ်းတိုက်ပွဲတွင်လည်း စစ်ကောင်စီထံမှ လက်နက်ခဲယမ်းအများအပြားရရှိခဲ့ပြီး စစ်ကောင်စီတပ်သား ၁၄ ဦးသေဆုံးကာ ထွက်ပြေးသွားသည့်စစ်ကောင်စီတပ်သားများကို လိုက်လံဖမ်းဆီးရာတွင်လည်း ၁၇ ဦးအရှင် ဖမ်းဆီးရမိခဲ့ ကြောင်း သိရသည်။

ဓာတ်ပုံ - KNU-Mutraw News

#ဖာပွန်ခရိုင် #အောက်တိုဘာ #စစ်ကောင်စီ #သေဆုံး #တိုက်ပွဲ #စခန်းသိမ်း #Ayeyarwaddy_Times

ရေကြည်နှင့် ကျုံပျော်မြို့နယ်များတွင် ဆိုင်
ကယ်ခိုးယူခံရမှုများ ပိုမိုများပြားလာ

ဧရာဝတီတိုင်းမ်
နိုဝင်ဘာ ၅ ရက်

ဧရာ၀တီတိုင်း၊ ရေကြည်မြို့နယ်နှင့် ကျုံပျော်မြို့နယ်များတွင် အောက်တိုဘာလက စတင်ပြီး ညစဥ်တိုင်း နေအိမ်များနှင့်ခြံ၀န်းများကို ၀င်ရောက်၍ ဆိုင်ကယ်ခိုးယူမှုများ ပိုမိုများပြားလာကြောင်း မြို့ခံများကပြောသည်။

အောက်တိုဘာလက စတင်ကာ ရပ်ကွက်
တွင်း နေအိမ်များရှေ့တွင် သော့ခတ်ရပ်ထားသည့် ဆိုင်ကယ်များအပြင်၊ နေအိမ်များအတွင်းမှ ဆိုင်ကယ်များကိုပါ ဝင်ရောက်ခိုးယူမှုဖြစ်ပွါးခဲ့သည့်အပြင် မြို့တက်၍ စျေးဝယ်သူအချို့မှာလည်း ဆိုင်ကယ်များ မကြာခဏဆိုသလို ပျောက်ဆုံးနေကြောင်း ဒေသခံများကပြောသည်။

"သူခိုးတွေက အခုနေရာတိုင်းမှာ အချိတ်ဆက်တွေ နယ်တိုင်းမှာထားကြတယ်။ ခိုးတဲ့သတင်း နေရာအချို့မှာ ပြန့်နေရင် သတင်းမထွက်တဲ့ တစ်ခြားနေရာက ဆိုင်ကယ်ကို လှည့်ခိုးတယ်။ ဟိုရက်ကလဲ အသိနှစ်ယောက်ဆိုင်ကယ် အခိုးခံလိုက်ရတယ်။ နေ့ဘက်ရောညဘက်ရော ဆိုင်ကယ်တွေသော့ခတ်လဲစိတ်မချရဘူး"ဟု ရေကြည်မြို့ခံတစ်ဦးက ဧရာ၀တီတိုင်းမ်ကိုပြောသည်။

အဆိုပါ ဆိုင်ကယ်ပျောက်ဆုံးမှုများနှင့် ပတ်သက်၍ ဆိုင်ကယ်ပိုင်ရှင်များက စစ်ကောင်စီလက်အောက်ခံ ရဲတပ်ဖွဲထံ အမှုဖွင့်တိုင်ကြားခဲ့သော် ယနေ့အချိန် ထိ ဖမ်းဆီမှုပြုလုပ်နိုင်ခြင်းမရှိသေးကြော​င်း ဒေသခံအချို့ကဆိုသည်။

ထို့ပြင် ရေကြည်မြို့နယ်နှင့် ကျုံပျော်မြို့နယ်များအပြင် ဧရာဝတီတိုင်းအတွင်းရှိ ကျန်မြို့နယ်များ၌လည်း အလားတူ ဆိုင်ကယ် ခိုယူခံရမှုများ မကြာခဏ ဖြစ်ပွါးလျှက်ရှိကြောင်း သိရသည်။

#ရေကြည် #ကျုံပျော် #ဆိုင်ကယ်ခိုးယူခံရ #ပျောက်ဆုံးမှု #ပိုမိုများပြားလာ #Ayeyarwaddy_Times

စစ်ခေါင်းဆောင်၏ တရုတ်ခရီးစဉ်အ​ပေါ် စိုးရိမ်သော်လည်း ဒေသတွင်း ဖိုရမ်တစ်ခုသာဖြစ်ဟု NUG ပြော

နိုင်မင်းလွင်/ဧရာဝတီတိုင်းမ်
နိုဝင်ဘာ ၅ ရက်

တရုတ်အစိုးရ၏ ဖိတ်ကြားချက်အရ ပထမဆုံးအကြိမ် သွားရောက်သည့် အာဏာသိမ်း စစ်ခေါင်းဆောင်၏ တရုတ်ခရီးစဉ်အပါ် စိုးရိမ်သော်လည်း ဒေသတွင်းဆိုင်ရာ ဖိုရမ်တစ်ခုကိုသာ တက်ရောက်ခြင်းဖြစ်ကြောင်း အမျိုးသားညီညွတ်ရေးအစိုးရ (NUG) ထံက သိရသည်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် တရုတ်နိုင်ငံ၊ ကူမင်းမြို့တွင် ကျင်းပမည့် ထိပ်သီးအစည်းအဝေးများ တက်ရောက်ရန်နှင့် တရုတ်အစိုးရ တာဝန်ရှိသူများအား တွေ့ဆုံဆွေးနွေးရန် ယနေ့ (နိုဝင်ဘာ ၅ ရက်) နံနက်ပိုင်းက တရုတ်နိုင်ငံသို့ သွားရောက်ခဲ့ကြောင်း သိရသည်။

အဆိုပါခရီးစဉ်နှင့် ပတ်သက်၍ ကြိုတင်သိရှိရသလို တရုတ်အစိုးရထံ လိပ်မူ၍ ပြန်လည်
စဉ်းစား သုံးသပ်ရန် မေတ္တာရပ်ခံစာ ပေးပို့ခဲ့ပြီး ထိုသို့ ဖိတ်ကြားမှုသည် စစ်ကောင်စီအား မျက်နှာမူသော ဆက်ဆံရေးမျိုး ဖြစ်နေခြင်းကြောင့် နှစ်နိုင်ငံအကြား အဖုအထစ် ဖြစ်သွားမည်ကို စိုးရိမ်မှုရှိကြောင်း NUG နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။

“ကျွန်မတို့ နောက်ပိုင်း သိရသလောက် ဒါဟာ နိုင်ငံတော်အဆင့် ခရီးစဉ်မဟုတ်ဘဲ၊ ပြည်နယ်တစ်ခုမှာလုပ်တဲ့ ဒေသတွင်းဆိုင်ရာ ဖိုရမ်တစ်ခုကိုပဲ တက်ရောက်တာ ဖြစ်တယ်" ဟု ၎င်းက ယနေ့ပြုလုပ်သည့် NUG နှင့် K2C ပူးတွဲသတင်းစာ ရှင်းလင်းပွဲတွင် ထည့်သွင်းပြောဆိုသည်။

စစ်ခေါင်းဆောင်သည် ထိုတရုတ်ခရီးစဉ်အတွင်း မဟာမဲခေါင်ဒေသခွဲ ထိပ်သီးအစည်းအဝေး၊ ဧရာဝတီ-ကျောက်ဖရား- မဲခေါင် စီးပွားရေး ပူးပေါင်းဆောင်ရွက်မှု မဟာဗျူဟာ ထိပ်သီးအစည်းအဝေးနှင့် ကမ္ဘောဒီးယား-လာအို-မြန်မာ-ဗီယက်နမ် ပူးပေါင်းဆောင်ရွက်မှု ထိပ်သီးအစည်းအဝေးတို့ကို တက်ရောက်မည်ဖြစ်ကြောင်း သိရသည်။

ထိုသို့ တက်ရောက်ရန် တရုတ်ဝန်ကြီးချုပ် လီချန်က ဖိတ်ကြားခြင်းဖြစ်ပြီး ၎င်းအနေဖြင့် ထိပ်သီးအစည်းအဝေးများအပြင် တရုတ်အစိုးရအဖွဲ့ တာဝန်ရှိသူများနှင့် တွေ့ဆုံဆွေးနွေးခြင်း၊ အထင်ကရ နေရာများ၊ တက္ကသိုလ်များနှင့် စက်ရုံ၊ အလုပ်ရုံများကို လေ့လာသွားမည်ဟု စစ်ကောင်စီ၏ ထုတ်ပြန်ထားသည်။

လက်ရှိတွင် စစ်ခေါင်းဆောင်သည် တရုတ်နိုင်ငံသို့ ရောက်ရှိနေပြီး တရုတ်စီးပွားရေးလုပ်ငန်းရှင်များနှင့် တွေ့ဆုံခဲ့ကြောင်း သတင်းထုတ်
ပြန်ထားသည်။ စစ်ခေါင်းဆောင်နှင့် အပေါင်းအပါများ နေပြည်တော်မှ ထွက်ခွါပြီးနောက် နာရီပိုင်းအတွင်း အေလာလေဆိပ်ကို အသေခံ ဒရုန်းနှစ်စင်းဖြင့် တိုက်ခိုက်ခံခဲ့ရကြောင်း သိရသည်။

#စစ်ခေါင်းဆောင် #တရုတ်ခရီးစဉ် #စိုးရိမ် #ဒေသတွင်းဖိုရ မ် #NUG #Ayeyarwaddy_Times

ပုသိမ်မြို့နယ်တွင် စစ်မှုထမ်းဥပဒေနှင့်ပတ်သက်ပြီး ငွေတောင်းယူသည့် အုပ်ချုပ်ရေးမှူးနှင့် ရာအိမ်မှူးအချို့ ဖမ်းဆီးခံရ

ဧရာဝတီတိုင်းမ်
နိုဝင်ဘာ ၅ ရက်

ဧရာ၀တီတိုင်း ၊ ပုသိမ်မြို့နယ်တွင် ပြည်သူ့စစ်မှုထမ်းဥပဒေကို အကြောင်းပြပြီး ငွေတောင်းယူမှုပြုလုပ်ခဲ့သည့် စစ်ကောင်စီခန့် ကျေးရွာအုပ်ချုပ်ရေးမှူးနှင့် ရာအိမ်မှူးအချို့ကို အောက်တိုဘာနောက်ဆုံးပါတ်အတွင်းက ဖမ်းဆီးအရေးယူခဲ့ကြောင်း သိရသည်။

ပုသိမ်မြို့နယ် မြင်းကကွင်းကျေးရွာအုပ်စု အုပ်ချုပ်ရေးမှူး ဦးဝင်းဇော်၊ မဏ္ဏပ်ကျေးရွာ ရာအိမ်မှူး ဦးမြင့်သိန်းနှင့် ကံကော်ကြောရွာ ရာအိမ်မှူး ဦးဝင်းဇော် တို့ သုံးဦးကို မြင်းကကွင်းနယ်မြေရဲစခန်းမှ ရဲများက လာရောက်ဖမ်းဆီးသွားကြောင်း ဒေသခံများထံမှ သိရှိရသည်။

"သူတို့က နံမည်ထွက်နေတာကြာပြီ။ ရွာသားတွေကို စစ်မှုမထမ်းခြင် ဘယ်လောက်ဆိုပြီး​သိန်းချီတောင်းတဲ့အပြင် စစ်မှုထမ်းပါတဲ့သူကိုထောက်ပံ့ရမယ်ဆိုပြီး ရွာမှာ ထပ်ကောက်တာတွေလုပ်နေတာ။ အမှန်ကတော့ သူတို့အထက်က မြို့နယ်အုပ်ချုပ်ရေးတွေနဲ့စစ်မှုထမ်းခေါ်တဲ့အဖွဲ့တွေနဲ့ ပေါင်းစားနေကြတာပါ။ ခုကဘာမကျေမလည်ဖြစ်လို့ ဖမ်းတာလဲတောမသိဘူး"ဟု ဒေသခံတစ်ဦးမှ ဧရာ၀တီတိုင်းမ်ကိုပြောသည်။

အဆိုပါဖမ်းဆီးထားသူများကို မြင်းကကွင်း နယ်မြေရဲစခန်းတွင်ထားရှိပြီး လစ်လပ်သွားသော ကျေးရွာအုပ်ချုပ်ရေးမှုး ၏ နေရာကို ကျေးရွာကြံ့ခိုင်ရေးပါတီ အတွင်းရေးမှူးမှ ယာယီ တာ၀န်ယူနေကြောင်းသိရှိရသည်။

ဧရာ၀တီတိုင်းအတွင်းရှိ မြို့နယ်များတွင် ရပ်ကွက်၊ကျေးရွာ အုပ်ချုပ်ရေးမှူးများမှ စစ်ကောင်စီ၏ စစ်မှုထမ်းဥပဒေ ကို အသုံးပြုပြီး စိတ်ထင်သလိုလုပ်ဆောင်နေကြသော်လည်း တိုင်ကြားပါက စစ်မှုထမ်းရမည်ဟု ခြိမ်းခြောက်သောကြောင့် တိုင်ကြားခြင်းမပြုသူများကြောင်း ဒေသခံများထံမှ သိရှိရသည်။

#ပုသိမ်မြို့နယ် #စစ်မှုထမ်းဥပဒေ #ငွေတောင်းယူ #အုပ်ချုပ်ရေးမှူး #ရာအိမ်မှူး #ဖမ်းဆီးခံရ
#Ayeyarwaddy_Times

စစ်ခေါင်းဆောင် တရုတ်သို့ ထွက်ခွာပြီး နာရီပိုင်းအတွင်း အေလာလေဆိပ် ဒရုန်းဖြင့် တိုက်ခိုက်ခံရ

ဧရာဝတီတိုင်းမ်
နိုဝင်ဘာ ၅ ရက်

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နှင့် အပေါင်းအပါများ တရုတ်နိုင်ငံသို့ ထွက်ခွာပြီး နာရီပိုင်းအတွင်း နေပြည်တော်ရှိ အေလာလေဆိပ်ကို ဒရုန်းဖြင့် တိုက်ခိုက်ခံခဲ့ရကြောင်း စစ်ရေးသတင်းရင်းမြစ်အချို့ထံက သိရသည်။

ယနေ့ နိုဝင်ဘာ ၅ ရက်နေ့ နံနက် ၈ နာရီ ၂၀ မိနစ်အချိန်ခန့်တွင် အေလာလေဆိပ်ကို အသေခံဒရုန်းနှစ်စင်း ကျရောက်ပေါက်ကွဲခဲ့ခြင်းဖြစ်သည်။

"စစ်ခေါင်းဆောင်ရဲ့ လေယာဉ်တက်ပြီး နာရီပိုင်းကြာပြီးတဲ့နောက်မှာ အသေခံဒရုန်းနဲ့ တိုက်ခိုက်ခံရတာ။ ကားပါကင်ကို ကျပြီး ပေါက်ကွဲတာပါ။ နောက်ထပ်ပစ်ချတဲ့ ဒရုန်းတွေလည်း ရှိပါတယ်” ဟု ဧရာဝတီတိုင်း၏ စစ်ရေးသတင်းရင်းမြစ်က ပြောသည်။

ဒရုန်းတွင် PVC ပိုက်အမာနှင့် ပြုလုပ်ထားသည့် လက်လုပ်မိုင်းများတပ်ဆင်ထားပြီး အဆိုပါတိုက်ခိုက်ခံရမှုကြောင့် လေဆိပ်အနီး လုံခြုံရေးတင်းကြပ်ကာ ရှာဖွေမှုများလုပ်ဆောင်ခဲ့ကြောင်း သိရသည်။

ယနေ့ နံနက်ပိုင်းတွင် စစ်ခေါင်းဆောင်သည် အဋ္ဌမအကြိမ်မြောက် မဟာမဲခေါင်ဒေသခွဲထိပ်သီးအစည်း အဝေးတက်ရောက်ရန် စစ်ကောင်စီခန့်ဝန်ကြီးများနှင့်အတူ တရုတ်
နိုင်ငံ ကူမင်းမြို့သို့ နေပြည်တော်မှ အပြည်ပြည်ဆိုင်ရာ မြန်မာ့လေကြောင်း (MAI)အထူးလေယာဉ်ဖြင့် ထွက်ခွါသွားခဲ့ခြင်းဖြစ်သည်။

ယခုတိုက်ခိုက်မှုနှင့် ပတ်သက်၍ တော်လှန်ရေးအင်အားစုများဘက်မှ သတင်းထုတ်ပြန်ခြင်းမရှိသေးပဲ ယခင်ကလည်း နေပြည်တော်
လေဆိပ်ကို တော်လှန်ရေးအင်အားစုများက
ဒရုန်းများဖြင့် တိုက်ခိုက်ခဲ့ဖူးသည်။

#စစ်ခေါင်းဆောင် #ဗိုလ်ချုပ်မှူးကြီး #မင်းအောင်လှိုင် #တရုတ်နိုင်ငံ #ကူမင်း #နေပြည်တော် #လေဆိပ် #အေလာ #ဒရုန်း #တိုက်ခိုက်ခံရ #Ayeyarwaddy_Times

မြောက်ကိုရီးယားတပ်ဖွဲ့တွေ ရုရှားသို့ စေလွှတ်တာကို အလွန်အမင်း စိုးရိမ်မိဟု ကုလအကြီးအကဲ ပြော

ဧရာဝတီတိုင်းမ်
နိုဝင်ဘာ ၅ ရက်

မြောက်ကိုရီးယားတပ်ဖွဲ့တွေ ရုရှားနိုင်ငံမှာ ရောက်ရှိနေတဲ့သတင်းတွေနဲ့ ယူကရိန်းစစ်ပွဲ အရှိန် မြှင့်လာမှာကို ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်က အလွန် စိုးရိမ်နေတယ်လို့ သူ့ရဲ့ ပြောရေးဆိုခွင့်ရှိသူက ပြောပါတယ်။

“ပဋိပက္ခဇုန်ကို ဖြန့်ကြက်နိုင်တဲ့ မြောက်ကိုရီးယားတပ်ဖွဲ့တွေကို ရုရှားနိုင်ငံကို စေလွှတ်တယ်ဆို တဲ့ သတင်းတွေနဲ့ပတ်သက်လို့ ကုလသမဂ္ဂ အတွင်းရေးမှူးချုပ်က အလွန် စိုးရိမ်နေပါတယ်” လို့ ကုလ သမဂ္ဂ အကြီးအကဲရဲ့ ပြောရေးဆိုခွင့်ရှိသူ စတီဖန်ဒူဂျာရစ်က ပြောပါတယ်။

“မြောက်ကိုရီးယားတပ်ဖွဲ့တွေ ရုရှားကို စေလွှတ်တာ အလွန်အန္တရာယ်ကြီးမားတဲ့ ယူကရိန်းစစ်ပွဲ ကို ပြင်းထန်လာစေနိုင်ပါတယ်။ ပဋိပက္ခ အရှိန်မြှင့်လာတာကိုရှောင်ရှားဖို့ အရာအားလုံး လုပ်ဆောင်ရပါ မယ်” လို့ သူက ထုတ်ပြန်ချက်တစ်ခုအတွင်း သတိပေးခဲ့ပါတယ်။

ယူကရိန်းနိုင်ငံမှာ တာရှည်ခံသော၊ အားလုံးပါဝင်သော ငြိမ်းချမ်းရေးရရှိဖို့ အဓိပ္ပာယ်ရှိတဲ့ ကြိုး ပမ်းမှုအားလုံး လုပ်ဆောင်ကြဖို့ အန်တိုနီယိုဂူတာရက်စ်က တောင်းဆိုခဲ့ပါတယ်။

မြောက်ကိုရီးယားတပ်ဖွဲ့ဝင် ၁၀၀၀၀ ဝန်းကျင်ဟာ ရုရှားနိုင်ငံ၊ ကာတ်စ်ဒေသမှာ ရောက်ရှိနေပြီ လို့ အမေရိကန်အစိုးရရဲ့ ပြောကြားချက်အရ သိရပါတယ်။

မြောက်ကိုရီးယားတပ်ဖွဲ့ဝင် ၁၂၀၀၀ ဝန်းကျင် ရုရှားနိုင်ငံမှာ ရောက်ရှိနေပြီး ရုရှားစစ်ဝတ်စုံတွေ ဝတ်ဆင်ပြီး လက်နက်တွေကိုင်ဆောင်ထားတဲ့ တပ်ဖွဲ့ဝင် ၇၀၀၀ ကျော်ကို ယူကရိန်းနယ်စပ်အနီးမှာ တပ်စွဲထားတယ်လို့ ယူကရိန်း စစ်ဘက်ထောက်လှမ်းရေးအဖွဲ့က ပြောပါတယ်။

မြောက်ကိုရီးယားတပ်ဖွဲ့တွေကို စစ်မြေပြင်သို့ မပို့ဆောင်နိုင်အောင် ၎င်းတို့ကို လေ့ကျင့်ပေးနေ တဲ့ စစ်စခန်းတွေကို တိုက်ခိုက်ခွင့်ပြုဖို့ ယူကရိန်းသမ္မတ ဇီလန်စကီးက မဟာမိတ်တွေထံမှ ခွင့်ပြုချက်ရ ရှိဖို့ ကြိုးပမ်းနေပါတယ်။

“မြောက်ကိုရီးယားတပ်ဖွဲ့ဝင်တွေကို လေ့ကျင့်ပေးနေတဲ့ ရုရှားနိုင်ငံတွင်းက စစ်စခန်းတွေကို လက်ဉီးမှုရယူပြီး တိုက်ခိုက်ရပါမယ်။ ဒါပေမယ့် မြောက်ကိုရီးယားစစ်တပ်က ယူကရိန်းပြည်တွေအပေါ် စတင်တိုက်ခိုက်ချိန်အထိ အမေရိကန်၊ ဗြိတိန်နဲ့ ဂျာမနီတို့က စောင့်ကြည့်နေပါတယ်” လို့ သူက ဆိုပါ တယ်။

တောင်ကိုရီးယားက ရုရှားနိုင်ငံရောက် မြောက်ကိုရီးယားတပ်ဖွဲ့ရဲ့ ပါဝင်မှုနဲ့ ရုရှားထံမှ မြောက် ကိုရီးယားနိုင်ငံရရှိတဲ့ အကျိုးအမြတ်တွေကို စောင့်ကြည့်မယ်လို့ နိုင်ငံခြားရေးဝန်ကြီး ချိုတေးယူလ်က ပြောပါတယ်။

ကိုးကား - Independent
Ref; UN chief ‘very concerned’ about reports of North Korean soldiers in Russia for deployment in Ukraine

#Ayeyarwaddy_Times

အမ်းရှိ လေကြောင်းရန်ကာကွယ်ရေးတပ်ကို AA သိမ်းပိုက်

ဧရာဝတီတိုင်းမ်
‌နိုဝင်ဘာ ၅ရက်

အမ်း၊ အနောက်ပိုင်းတိုင်း စစ်ဌာနချုပ် (နပခ) အနီးရှိ စစ်ကောင်စီ၏ လေကြောင်းရန်ကာကွယ်ရေးတပ်ကို အာရက္ခတပ်တော် (AA) က ထပ်မံသိမ်းပိုက်လိုက်ကြောင်း သိရသည်။

စစ်ကောင်စီ၏ လေကြောင်းရန်ကာကွယ်ရေးတပ်ကို ပြီးခဲ့သည့် နိုဝင်ဘာ ၃ ရက်နေ့တွင် AA က ဝင်ရောက် တိုက်ခိုက်သိမ်းပိုက်လိုက်ပြီးနောက် စစ်ကောင်စီက Y 12 လေယာဉ်များနှင့် ဗုံးကြဲချတိုက်ခိုက်ခဲ့ကြောင်း သိရသည်။

စစ်ကောင်စီ၏ ခမရ ၃၇၃ ဆေးတပ်၊ အမှတ် (၂) တပ်မ တော်ဆေးရုံ၊ စရဖတပ်တို့နှင့်လေကြောင်း ကာကွယ်ရေးတပ်တို့သည် တဆက်တည်း တည်ရှိနေပြီး AA က မဲတောင်မှစ၍ အဆိုပါတပ်ရင်းတပ်ဖွဲ့အားလုံးကို သိမ်းယူနိုင်ခဲ့ခြင်းဖြစ်ကြောင်း သိရသည်။

"အခု အမ်းမှာက နေရာလေးခုထက်မနည်း တိုက်ပွဲ ဖြစ်နေတယ်။ ပဲပဒုံ၊ ဒိုင်ကြီး၊ ခမရ ၃၇၁၊ တပ်ဆေးရုံ နားမှာ တိုက်ပွဲပြင်းထန်နေတယ်။ မနေ့ကတော့ တပ်ဆေးရုံဘက်ကို စစ်ကူသွားတဲ့တပ်တွေ နောက်ပြန်လန်သွားတယ်လို့ သိရတယ်။ ဒရုန်းနဲ့လေကြောင်း အကာအကွယ်တွေအတွက် အဓိကဖြစ်တဲ့ လေကြောင်းကာကွယ် ရေးတပ်လည်း ကျသွားပြီ။ မဲတောင်ကနေ နပခ ဂိတ်အနီး ဘယ်တပ်မှ မကျန်တော့ဘူး" ဟု ရခိုင်သတင်းရင်းမြစ်က ဧရာဝတီတိုင်းမ်ကိုပြောသည်။

စစ်ကောင်စီသည် အမ်းမြို့နယ် တစ်မိုင်ကုန်းနှင့် ၎င်းတို့၏ ဂေါက်ကလပ်အနီးဝန်းကျင်ကို ပြီးခဲ့သည့် နိုဝင်ဘာ ၃ ရက်နေ့က Y 12 လေယာဉ်ဖြင့် ဗုံးကြဲကာ နယ်မြေရှင်းလင်းပြီးနောက် ရဟတ် ယာဉ်လေးစင်းဖြင့် စစ်ကူအင်အားဖြည့်ခဲ့ကြောင်း သိရသည်။

AA သိမ်းပိုက်ထားသည့် အမှတ် ( ၂) ကုတင် ၃၀၀ ဆံ့ တပ်မတော်စစ်ဆေးရုံ တဆရ ၂/၃၀၀ တမာတော ဆေးရုံဘက်ကိုလည်း စစ်ကောင်စီက စစ်အင်အား ဖြည့်တင်းကာ ပြန်လည်ထိုးစစ်ဆင်လာသည့်အတွက် တိုက်ပွဲအပြင်း အထန်ဖြစ်ပွားနေကြောင်း သိရသည်။

ထို့အပြင် ဂျင်တောင်အနီး ဒိုင်ကြီးကျေးရွာတွင် စစ် ကောင်စီတပ်များ အခြေပြုတပ်စွဲလာသည့် အတွက် AA က ထိုးစစ်ဆင်တိုက်ခိုက်နေပြီး ဒေသခံများဘေးလွတ်ရာ တိမ်းရှောင်နေရကြောင်း သိရသည်။

ထို့အပြင် အမ်းမြို့နယ်၊ မြို့သစ်ရပ်ကွက်ရှိ စစ်ကောင်စီ၏ ခြေမြန်တပ်ရင်း ခမရ ၃၇၁ အနီးဝန်းကျင်တွင်လည်း တိုက်ပွဲဖြစ်ပွားနေပြီး မြေပြင်ထောက်ပို့လမ်းကြောင်း ပိတ်ဆို့ခံထားရသည့် အတွက် ခမရ ၃၇၁ ကို AA သိမ်းပိုက်နိုင်တော့မည်ဖြစ်ကြောင်း ဒေသခံများက ဆိုသည်။

လက်ရှိတွင် စစ်ကောင်စီ၏ ဗျူဟာသုံးခုနှင့် တပ်ရင်း တပ်စခန်းပေါင်း ၁၂ ခုကျော်ကို AA က သိမ်းပိုက်ထားနိုင်ခဲ့ပြီး စစ်ကောင်စီက လေ ကြောင်းပစ်ကူအတွက် ပုသိမ်နှင့် မကွေးမှ လေကြောင်းပစ်ကူကို အဓိကအားထားနေရကြောင်း သိရသည်။

ပုံစာ- အမ်း​လေဆိပ်နှင့် သံတွဲ​မောင်​ရွှေ​လေး​ရေတပ်(ပုံ​ဟောင်း)

#ရခိုင် #အမ်း #လေကြောင်းရန်ကာကွယ်ရေးတပ် #AAသိမ်းပိုက် #Ayeyarwaddy_Times

"သင့်အားတပ်အင်အားမှထုတ်ပယ်လိုက်သည်"(အသံလွှင့်ဆောင်းပါး)
ဧရာဝတီတိုင်းမ်
နိုဝင်ဘာ ၃ ရက်
“သင့်အား တပ်အင်အားမှထုတ်ပယ်လိုက်သည်”ဘာအပြစ်တွေကျူးလွန်ခဲ့လို့ တပ်အင်အားကနေထုတ်ပယ်လိုက်ရတာလဲ ထင်မှာပဲ။ ရဲရင့်စွာ သေဆုံးသွားသူရဲ့ ခေါင်းရင်းနားမှာရပ်ပြီး သင့်အားတပ်အင်အားမှထုတ်ပယ်လိုက်သည်။ သင်သွားလိုရာ သွားနိုင်ပြီဆိုတဲ့ ပြန်တမ်းစာကို မတုန်မလှုပ် ဖတ်ပြနိုင်ဖို့အတွက် အတော်အားယူရတယ်လို့ ကိုနွေဦးက ပြောပါတယ်။
ကိုနွေဦးဟာ စစ်ကိုင်းနယ်က ပြည်သူ့ကာကွယ်ရေးတပ်ဖွဲ့ (PDF) တစ်ခုရဲ့ ခေါင်းဆောင်တစ်ဦးဖြစ်ပြီး ‌တော်လှန်ရေးတပ်ဖွဲ့ ခေါင်းဆောင်ဖြစ်တာကြောင့် အမိန့်ပြန်တမ်းထုတ်ပြီး ကျဆုံးသွားတဲ့ လူစွမ်းကောင်းတွေနဲ့ ခွဲခွာရဖို့ ပြောရတာဟာ အခက်ခဲဆုံးပါပဲလို့ ဆိုပါတယ်။
တော်လှန်ရေးကြီးပြီးရင် သင့်အားငါတို့၏ တော်လှန်ရေးတာဝန်များမှ ငြိမ်းချမ်းစွာ အနားပေးလိုက်သည်။ အနားယူကြပါတော့လို့ ကျွန်တော် ထုတ်ပြောမယ်လို့ ကိုနွေဦးက ထပ်လောင်းပြောပါတယ်။
တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times #သင့်အားတပ်အင်အားမှထုတ်ပယ်လိုက်သည် #အသံလွှင့်ဆောင်းပါး

ကျောက်ကြီးမြို့နယ် ရွာကြီးအင်းရွာတွင် တပ်စွဲရန်ဝင်လာသည့် စစ်ကောင်စီတပ်ကို တော်လှန်ရေးတပ်ဖွဲ့များ ပူး ပေါင်းတိုက်ခိုက်မှုကြောင့် ၁၀ ဦးသေဆုံး

ဧရာဝတီတိုင်းမ်
‌နိုဝင်ဘာ ၃ ရက်

ပဲခူးတိုင်းအ‌ရှေ့ခြမ်း၊ ကျောက်ကြီးမြို့နယ်၊ ရွာကြီးအင်းရွာကို ဝင်ရောက်လာသည့် စစ်ကောင်စီတပ်ကို တောင်ပိုင်းတိုင်းစစ်ဒေသတော်လှန်ရေးတပ်ဖွဲ့များက ပူးပေါင်းတိုက်ခိုက်ခဲ့ကြရာ စစ်ကောင်စီတပ်ဖွဲ့ဝင် ၁၀ ဦးသေဆုံးခဲ့ကြောင်း သိရသည်။

ကျောက်ကြီးမြို့နယ်၊ ရွာကြီးအင်းရွာထိပ် ကျွန်းဘုန်းကြီး ကျောင်းတွင် တပ်စွဲရန်ဝင် ရောက်လာသည့် စစ်ကောင်စီတပ်ကို ပြီးခဲ့သည့် နိုဝင်ဘာ ၁ ရက်နေ့တွင် တော်လှန်ရေးတပ်ဖွဲ့များက ပူးပေါင်းတိုက်ခိုက်ခဲ့ကြခြင်းဖြစ်ကြောင်း သိရသည်။

အဆိုပါတိုက်ခိုက်မှုအတွင်း စစ်ကောင်စီဘက်မှ ဂျက်ဖိုက်တာများဖြင့် ပစ်ကူတိုက်ခိုက်မှုများရှိခဲ့သော်လည်း တော် လှန်ရေးတပ်ဖွဲ့များ၏ တိုက်ခိုက်မှုကြောင့် စစ်ကောင်စီတပ်ဖွဲ့ဝင် ၁၀ ဦးသေဆုံးကာ ၁၅ ဦးထိခိုက်ဒဏ်ရာရရှိခဲ့ကြောင်း တောင်ပိုင်းတိုင်းစစ်ဒေသက ထုတ်ပြန်ထားသည်။

တပ်စွဲရန်ဝင်ရောက်လာသည့် စစ်ကောင်စီတပ်ကို ကရင်အမျိုးသားလွတ်မြောက်ရေးတပ်မတော် (KNLA) နှင့် ပြည်သူ့ကာကွယ်ရေးတပ်မတော်(PDF) တောင်ပိုင်းတိုင်းစစ်ဒေသ၊ အမှတ် (၂) စစ်ဒေသခွဲ၊ P2-7803 ရိုးမ (၁) စစ်ကြောင်း၊ အထူးကွန်မန်ဒိုတပ်ရင်း P2-9914 ရိုးမ (၂) စစ်ကြောင်းနှင့် ဖြူးပြည်သူ့ကာကွယ်ရေးအဖွဲ့တို့မှ ပူးပေါင်းတိုက်ခိုက်ခဲ့ကြကြောင်း သိရသည်။

စစ်ကောင်စီတပ်၏ လှုပ်ရှားစစ်ကြောင်းသည် ပြီးခဲ့သည့် အောက်တိုဘာ ၂၉ ရက်က ဒရုန်းဖြင့် ဗုံးကြဲတိုက်ခိုက်ခဲ့ရာ ကျောက်ကြီးမြို့နယ်၊ ရွာသာယာကျေးရွာမှ တစ်နှစ်အရွယ် ကလေးငယ်သေဆုံးကာ နေအိမ်နှင့် ခရစ်ယာန်ဘုရားကျောင်း ပျက်စီးခဲ့ကြောင်း KNU က ထုတ်ပြန်ထားသည်။

ထို့အပြင် ကျောက်ကြီး၊ လယ်ဒိုမြို့နယ်အပါအဝင် ညောင်လေးပင်ခရိုင်(ခလယ်လွီထူးခရိုင်)အတွင်း စစ်ကောင်စီက ပြည်သူလူထုအား ပစ်မှတ်ထား၍ တိုက်ခိုက်မှုများကြောင့် အရပ်သားပြည်သူထိခိုက်သေဆုံး မှုအခြေအနေများကို ယမန်နေ့ နိုဝင်ဘာ ၂ ရက်နေ့က အသိပေးထုတ်ပြန်ထားသည်။

ဓာတ်ပုံ-တောင်ပိုင်းတိုင်းစစ်ဒေသ (ပုံဟောင်း)

#ပဲခူးအရှေ့ခြမ်း #ကျောက်ကြီး #ရွာကြီးအင်းရွာ #စစ်ကောင်စီ #စစ်ကြောင်း #တော်လှန်ရေးပူးပေါင်းတပ် #တိုက်ခိုက် #၁၀ဦးသေဆုံး #Ayeyarwaddy_Times

မောင်တော တိုက်ပွဲပြင်းထန်နေပြီး စစ်ကောင်စီက‌ နေ့စဥ်နီးပါး ဆက်တိုက်ဗုံးကြဲ၊ စစ်ရှောင်များ ခိုလှုံနေသည့်ဘုန်းကြီးကျောင်းဗုံးကြဲခံရ၍ စစ်ရှောင် ၄ဦးသေဆုံး

ဧရာဝတီတိုင်းမ်
နိုဝင်ဘာ ၃ရက်

ရခိုင်ပြည်နယ်၊ မောင်တောမြို့နယ်၊ ပြားသားကျေးရွာရှိ ဘုန်းတော်ကြီးကျောင်းကို စစ်ကောင်စီက ဗုံးကြဲချခဲ့၍ စစ်ရှောင်လေးဦးသေဆုံးပြီး နှစ်ဦးထိခိုက်ဒဏ်ရာရခဲ့ကြောင်းသိရသည်။

ယမန်နေ့ နိုဝင်ဘာ ၂ရက်နေ့ ည ၇နာရီ ၁၃မိနစ်ခန့်မှစ၍ စစ်ကောင်စီက လေကြောင်းမှ ဗုံးနှစ်ကြိမ် လာရောက်ကြဲချခဲ့ရာ စစ်ရှောင်များခိုလှုံနေသည့် ဘုန်းတော်ကြီးကျောင်း ဗုံးထိမှန်ပြီး စစ်ရှောင်လေးဦးသေဆုံးကာ သက်တော် ၇၂ နှစ်ရှိ ဆရာတော်အပါအဝင် နှစ်ဦး ဒဏ်ရာ ရရှိခဲ့ကြောင်း ဒေသခံများထံက သိရသည်။

မောင်တော အမှတ် ၁ရပ်ကွက်မှ စစ်ရှောင်လာသည့် ဒေါ်မစောရီ(ခ) ဒေါ်မစိန်ဘု (၆၄) နှစ်၊ ဦးရွှေကျော်(ခ) ဦးညီချေ(၅၇) နှစ်၊ မောင်ထွန်းထွန်းဝင်း(၁၇) နှစ်၊ အမှတ်၃ရပ်ကွက်မှ ဦးမောင်သန်း(၆၄)နှစ်တို့ သေဆုံးခဲ့ကြောင်းသိရသည်။

သက်တော် ၇၂နစ်အရွယ် အရှင်တေဇောဘာသနှင့် ဦးထွန်းထွန်းနိုင်တို့မှာ ပြင်းထန်ဒဏ်ရာ များရရှိခဲ့ကြောင်း သိရသည်။

"ဗုံးက နှစ်ကြိမ်လာကြဲတာမှာ လေးနေရာလောက်ကို ကျကွဲတယ်။ နောက်ဆုံးအခေါက်ကြဲတာမှာ ပြားသားဘုန်းကြီးကျောင်းကို ထိပြီး လူထိခိုက်ကုန်တာ။ ဗုံးလာကြဲတာ နေ့စဉ်နီးပါးပဲ" ဟု မောင်တောဒေသခံအမျိုးသမီးတစ်ဦးက ဧရာဝတီတိုင်းမ်ကို ပြောသည်။

စစ်ကောင်စီနှင့် အာရက္ခတပ်တော် AA တို့ နခခ ၅မြို့သူကြီးတွင် တိုက်ပွဲအပြင်းအထန်ဖြစ်ပွားနေပြီး စစ်ကောင်စီက အောက်တိုဘာ ၂၈ရက်မှစကာ နေ့စဉ်နီးပါး ဂျက်ဖိုက်နှင့် Y12 တို့ဖြင့် ဗုံးကြဲ ချတိုက်ခိုက်ခဲ့သည်။

ပြီးခဲ့သည့် နိုဝင်ဘာ ၁ရက်နေ့နှင့် ယမန်နေ့ နိုဝင်ဘာ ၂ရက်နေ့တို့တွင်လည်း မောင်တော ၃မိုင်၊ ၄မိုင်နှင့် ဆင်နှစ်ကောင်ဘုန်းတော်ကြီးကျောင်း အနီးတဝိုက်ကို စစ်ကောင်စီက ပေါင် ၅၀၀ဗုံးများ အသုံးပြု တိုက်ခိုက်ခဲ့ကြောင်း သိရသည်။

#မောင်တော #စစ်ကောင်စီ #ဗုံးကြဲ #စစ်ရှောင် #၄ဦးသေဆုံး #Ayeyarwaddy_Times

မြောက်ကိုရီးယားတပ်ဖွဲ့ဝင် ၇၀၀၀ ကျော်ကို နယ်စပ်အနီးသို့ ရွှေ့ပြောင်းလိုက်ပြီလို့ ယူကရိန်း ပြော

ဧရာဝတီတိုင်းမ်
နိုဝင်ဘာ ၃ ရက်

ရုရှားနိုင်ငံဟာ အရှေ့ဖျားဒေသမှ မြောက်ကိုရီးယားစစ်သည် ၇၀၀၀ ကျော်ကို ယူကရိန်းနယ်စပ် သို့ ရွှေ့ပြောင်းလိုက်ပြီလို့ ယူကရိန်း စစ်ထောက်လှမ်းရေးအဖွဲ့က ပြောပါတယ်။

အောက်တိုဘာလ နောက်ဆုံးအပတ်မှာ မြောက်ကိုရီးယားစစ်သည်တွေကို ရွှေ့ပြောင်းခဲ့တာလို့ ယူကရိန်း စစ်ထောက်လှမ်းရေးအဖွဲ့က လူမှုကွန်ရက်မှာ ပြောပါတယ်။

မြောက်ကိုရီးယားတပ်ဖွဲ့ဝင်တွေကို စက်သေနတ်တွေ၊ ညကြည့်ကိရိယာတွေ၊ အခြားကိရိယာ တွေ ထောက်ပံ့ပေးထားတယ်လို့ ယူကရိန်း စစ်ထောက်လှမ်းရေးအဖွဲ့က ပြောပါတယ်။

အောက်တိုဘာလလယ်မှာ ယူကရိန်းအာဏာပိုင်တွေ ထုတ်ပြန်ခဲ့တဲ့ ရုပ်သံဖိုင်ထဲမှာ အရှေ့ဖျားဒေ သရှိ စစ်သင်တန်းကျောင်းတစ်ခုမှာ မြောက်ကိုရီးယားတပ်ဖွဲ့ဝင်တွေ ထောက်ပံ့ပစ္စည်းတွေ လက်ခံနေ တာကို မြင်တွေ့ရပါတယ်။

ရုရှားသို့ စေလွှတ်ခဲ့တဲ့ မြောက်ကိုရီးယားစစ်သည် ၁၀၀၀၀ အနက် ၈၀၀၀ ခန့်ကို အနောက်ပိုင်း ကာတ်စ်ဒေသမှာ တပ်စွဲထားတယ်လို့ အမေရိကန် နိုင်ငံခြားရေးဝန်ကြီး အန်တိုနီဘလင်ကန်က ပြောပါ တယ်။

ယူကရိန်းက နယ်စပ်ဖြတ်ကျော် တိုက်ခိုက်မှုတွေ လုပ်ဆောင်လျက်ရှိရာ ကာတ်စ်ဒေသမှာ လာ မယ့်ရက်ပိုင်းအတွင်း မြောက်ကိုရီးယားစစ်သည်တွေ တိုက်ပွဲမှာ ပါဝင်လာနိုင်တယ်လို့ သူက ဆိုပါတယ်။

မြောက်ကိုရီးယားတပ်ဖွဲ့တွေဟာ တိုက်ခိုက်ရေး အတွေ့အကြုံရရှိကာ ဒရုန်းတွေကို ဘယ်လိုကိုင် တွယ်ရမလဲဆိုတာ သင်ယူခွင့်ရဖို့ မျှော်လင့်နေကြောင်း အမေရိကန်အခြေစိုက် Institute for the Study of War က ပြောပါတယ်။

ရုရှားက မြောက်ကိုရီးယားတပ်ဖွဲ့ဝင်တွေကို အမြောက်စာအဖြစ် အသုံးပြုပါက မြောက်ကိုရီးယား က ဘယ်လိုစစ်မြေပြင် သင်ခန်းစာတွေ သင်ယူဖို့ မျှော်လင့်စေကာမူ တပ်ဖွဲ့ဝင်တွေ ထိခိုက်သေကျေမှုများ မယ်လို့ အဆိုပါ ဉာဏ်ကြီးရှင်အဖွဲ့က ပြောပါတယ်။

ကိုးကား - NHK
Ref; Ukraine intelligence: Over 7,000 N.Korean soldiers moved close to border

#Ayeyarwaddy_Times

သံတောင်ကြီးတွင် တပ်ရင်းမှူးသင်တန်းတက်‌ရောက်ရန်လာသည့် စစ်ကောင်စီတပ်မှ သမားတော် ဗိုလ်မှူးကို ဖမ်းမိ

ဧရာဝတီတိုင်းမ်
(သံတောင်ကြီး)၊ နိုဝင်ဘာ ၂ ရက်

ကရင်ပြည်နယ်၊ သံတောင်ကြီးမြို့ တပ်မတော်(ကြည်း) တိုက်ခိုက်ရေးကျောင်း သို့ တပ်ရင်းမှူး သင်တန်းတက်ရောက်ရန်လာသည့် စစ်ကောင်စီ ဗိုလ်မှူးတစ်ဦးကို ဖမ်းဆီးရမိခဲ့ကြောင်း ရန်ကုန်တိုင်းစစ်ဌာနမှ ယနေ့ နိုဝင်ဘာ ၂ ရက်နေ့တွင် ထုတ်ပြန်ထားသည်။

ဖမ်းဆီးရမိခဲ့သည့် ဗိုလ်မှူးမှာ တပ်မတော်ဆေးရုံ တဆရ - ၁၂/၁၀၀ (ထားဝယ်)မှ ပါရဂူသမားတော် ဗိုလ်မှူးထိန်တောက် ဆိုသူဖြစ်ပြီး တပ်ရင်းမှူး သင်တန်းတက်ရောက်ရန်လာစဉ် ပဲခူးတိုင်းတစ်နေရာတွင် မိသားစုနှင့် အတူဖမ်းဆီးရမိခဲ့ခြင်းဖြစ်သည်။

"သတင်းပေးချက်အရ လမ်းပိုင်းမှာ စစ်ဆေးဖမ်းဆီးရမိခဲ့တာပါ။ တပ်အကြီးပိုင်းတွေရဲ့ ကျန်းမာရေးစောင့်ရှောက်မှုပေးရတဲ့ ဗိုလ်မှူးလို့သိရတယ်။ ဇနီးနဲ့ ကလေးလည်းပါတယ်" ဟုရန်ကုန်တိုင်းစစ်ဌာန တာဝန်ရှိသူတစ်ဦးက ဧရာဝတီတိုင်းမ်ကို ပြောသည်။

အဆိုပါ ဖမ်းဆီးရမိသော ဗိုလ်မှူးထိန်တောက်ကို ရန်ကုန်တိုင်းစစ်ဌာန၊ တပ်ရင်း (၅၁၀၂) မှ ၎င်းနှင့် မိသားစုဝင်များကို စစ်သုံ့ပန်းမူဝါဒနှင့် အညီ ထိန်းသိမ်းထားပြီး လူ့အခွင့်အရေးအပြည့်အဝ ရရှိစေရန် ဆောင်ရွက်ထားကြောင်းကိုလည်း ထုတ်ပြန်ချက်တွင် ဖော်ပြထားသည်။

သံတောင်ကြီးမြို့တွင် စစ်တပ်အခြေစိုက် ဘုရင့်နောင်တပ်မြို့ တည်ရှိပြီး တိုက်ခိုက်ရေးကျောင်း၊ တပ်ရင်းမှူးသင်တန်း၊ တပ်စုမှူးသင်တန်း၊ လက်နက်ကြီးသင်တန်းတို့ ပေးရာ တပ်မြို့တစ်ခုဖြစ်ကြောင်းလည်း သိရသည်။

ဓာတ်ပုံ - တောင်ပိုင်းစစ်ဒေသ၊ အမှတ်-၂စစ်ဒေသခွဲ

#သံတောင်ကြီး #လေ့ကျင့်ရေးကျောင်း #စစ်ကောင်စီ #ဗိုလ်မှူး #ပါရဂူ #PDF #ဖမ်းဆီးရမိ #Ayeyarwaddy_Times

ကလေးမြို့တွင် စစ်ကောင်စီက နှစ်ရက်ဆက်တိုက် တပ်အင်အားနှင့် လက်နက်ခဲယမ်းများ ဖြည့်တင်း

ဧရာဝတီတိုင်းမ်
နိုဝင်ဘာ ၂ရက်

စစ်ကိုင်းတိုင်း၊ ကလေးမြို့တွင် စစ်ကောင်စီတပ်က ယမန်နေ့ နိုဝင်ဘာလ ၁ရက်နှင့် ယနေ့ နိုဝင်ဘာလ ၂ရက်နေ့တွင် လေကြောင်းဖြင့် တပ်အင်အားနှင့် လက်နက်ခဲယမ်းများ ဖြည့်တင်းနေကြောင်း ဒေသခံများထံက သိရှိရသည်။

ကလေးမြို့ရှိ လေယာဉ်ကွင်းတွင် ယမန်နေ့ညနေပိုင်းကလေကြောင်းဖြင့် လက်နက်ခဲယမ်းများချပေးပြီး ယနေ့မနက်ပိုင်းတွင် တပ်အင်အား ထပ်မံဖြည့်တင်းခြင်းဖြစ်သည်။

"မနေ့ညက လက်နက်ခဲယမ်းတွေ ချပေးပြီး စစ်သားတွေ ထရပ်ကားတွေနဲ့ သွားသယ်တာတွေ့ရတယ်။ ဒီနေ့မနက်မှာ လူအင်အားတွေ ထပ်ချပေးတယ်။ သင်တန်းဆင်းခါစ တပ်သားသစ်တွေထင်တယ်။ အကုန်လုံးက လူငယ်တွေချည်း” ဟု ကလေးမြို့ဒေသခံတစ်ဦးက ဧရာဝတီတိုင်းမ်ကို ပြောသည်။

စစ်ကောင်စီတပ် ချပေးသည့် လက်နက်ခဲယမ်းများကို ထရပ်ကားများဖြင့် ကလေးမြို့ ဒကစဘက်သို့ သယ်ဆောင်သွားကြောင့် ၎င်းက ဆိုသည်။

ကလေးမြို့နယ်တွင် စစ်ကောင်စီက ပွင့်လင်းရာသီရောက်ရှိလာပြီဖြစ်သည့်အတွက် စစ်ရေးနှင့်ပတ်သက်၍ ယခုကဲ့သို့ လက်နက်အင်အားနှင့် တပ်အင်အားဖြည့်တင်းပြီး ကြိုတင်ပြင်ဆင်ခြင်းဖြစ်ကြောင့် တော်လှန်ရေးတပ်ဖွဲ့ဝင်များက သုံးသပ်ထားသည်။

"ကလေးမှာ ပွင့်လင်းရာသီရောက်ပြီဆိုတော့ တိုက်ပွဲတွေ ပိုဖြစ်လာနိုင်တဲ့အတွက် စစ်ကောင်စီက စစ်ရေးနဲ့ပတ်သက်ပြီး ကြိုတင်ပြင်ဆင်နေတဲ့သဘောပါ။ အဲ့ဒီအတွက် အခုကတည်းကနေ လူအင်အား၊ လက်နက်အင်အားစုဆောင်းထားတာဖြစ်တယ်” ဟု ကလေးမြို့နယ်အခြေစိုက် ပြည်သူ့ကာကွယ်ရေးတပ်ဖွဲ့တစ်ဦးက ဧရာဝတီတိုင်းမ်ကို ပြောသည်။

လက်ရှိကလေးမြို့တွင် တိုက်ပွဲမရှိသော်လည်း စစ်ကောင်စီက ညအချိန်တွင် အင်းအားအများပြားဖြင့် ကား၊ ဆိုင်ကယ်တို့နှင့် ကင်းလှည့်ပြီး လမ်းသွားလမ်းလာ အရပ်သားများကို စစ်ဆေးမှုများ ပြုလုပ်နေသည်။

#ကလေးမြို့ #စစ်ကောင်စီ #နှစ်ရက်ဆက်တိုက် #လက်နက်ခဲယမ်း #ဖြည့်တင်း #Ayeyarwaddy_Times

ယူကရိန်းသို့ ဒေါ်လာ ၄၂၅ သန်းတန်ကြေးရှိ လုံခြုံရေးအကူအညီပေးဖို့ အမေရိကန် ကတိပြု

ဧရာဝတီတိုင်းမ်
နိုဝင်ဘာ ၂ ရက်

ယူကရိန်းသို့ ဒေါ်လာ ၄၂၅ သန်းတန်ကြေးရှိ လုံခြုံရေးအကူအညီ ထောက်ပံ့ပေးဖို့ အမေရိ ကန် နိုင်ငံက ကြေညာလိုက်ပါတယ်။

အမေရိကန်နိုင်ငံက ယူကရိန်းသို့ပေးအပ်မယ့် စစ်ရေးအကူအညီထဲမှဦ လေကြောင်းရန် ကာ ကွယ်ရေးစနစ်တွေ၊ ဒုံးကျည်တွေ၊ လက်နက်ကြီးကျည်တွေ၊ သံချပ်ကာယာဉ်တွေနဲ့ တင့်ဖျက်လက်နက် တွေ ပါဝင်ပါတယ်။

“ယူကရိန်းနိုင်ငံရဲ့ အရေးကြီးတဲ့ လုံခြုံရေးနဲ့ ကာကွယ်ရေးလိုအပ်ချက်တွေကို ဖြည့်ဆည်းပေး မယ့် ထပ်တိုး လုံခြုံရေးအကူအညီကို ကာကွယ်ရေးဝန်ကြီးဌာနက ကြေညာခဲ့ပါတယ်။ ယခုကြေညာ ချက်ဟာ အမေရိကန်အစိုးရရဲ့ ၆၉ ကြိမ်မြောက် စစ်ရေးအကူအညီပေးမှုဖြစ်ပါတယ်” လို့ ပင်တဂွန်က ထုတ်ပြန်ချက်တစ်ခုအတွင်း ပြောပါတယ်။

ခန့်မှန်းချေ ဒေါ်လာ ၄၂၅ သန်းတန်ကြေးရှိ စစ်ရေးအကူအညီထဲမှာ လေကြောင်းရန်ကာကွယ် ရေးပစ္စည်းတွေ၊ ဒုံးကျည်တွေ၊ အမြောက်ကျည်တွေ၊ သံချပ်ကာယာဉ်တွေနဲ့ တင့်ဖျက်လက်နက်တွေ ပါ ဝင်တယ်လို့ ပင်တဂွန်က ဆိုပါတယ်။

မြောက်ကိုရီးယားစစ်သည် ၁၀၀၀၀ ခန့် ရုရှားနိုင်ငံမှာ ရောက်နေပြီး ကာတ်စ်ဒေသသို့ ၈၀၀၀ ခန့် စေလွှတ်ထားတယ်လို့ နိုင်ငံခြားရေးဝန်ကြီး အန်တိုနီဘလင်ကန်က ကြေညာပြီးနောက် အခုလို ထပ်တိုး အကူအညီ ပေးတာပါ။

“မြောက်ကိုရီးယားတပ်ဖွဲ့တွေကို ယူကရိန်းတပ်ဖွဲ့ကို တိုက်ခိုက်ရာမှာ အသုံးပြုတာ မတွေ့ရ သေးပေမယ့် လာမယ့်ရက်တွေအတွင်း ယူကရိန်းစစ်ပွဲမှာ မြောက်ကိုရီးယားတပ်ဖွဲ့တွေ ပါဝင်လာဖို့ မျှော် မှန်းရပါတယ်” လို့ သူက ဆိုပါတယ်။

ရုရှားက မြောက်ကိုရီးယားတပ်ဖွဲ့တွေကို လက်နက်ကြီး၊ ဒရုန်း၊ အခြေခံ ခြေလျင်စစ်ဆင်ရေး သင်တန်းတွေ ပေးနေပြီး ရှေ့တန်းစစ်ဆင်ရေးတွေမှာ အသုံးချဖို့ ရည်ရွယ်ထားပါတယ်လို့ သူက ဆိုပါ တယ်။

ကိုးကား - ANI
Ref; US pledges USD 425 million to Ukraine, defence package includes armoured vehicles, anti-tank weapons

#Ayeyarwaddy_Times

မြန်မာ့စစ်တပ်ကို လေယာဉ်ဆီမရောင်းရန် ကုလသမဂ္ဂလုံခြုံရေးကောင်စီထံ တောင်းဆို

ဧရာဝတီတိုင်းမ်
အောာက်တိုဘာ ၂၅ ရက်

အရပ်သားပြည်သူများအပေါ်လေကြောင်းတိုက်ခိုက်ရေးများဆက်တိုက်လုပ်ဆောင်နေသာ မြန်မာ့စစ်တပ်ထံ လေယာဉ်ဆီနှင့်စစ်လက်နက်များရောင်းချခြင်းမပြုရန် ကုလသမဂ္ဂလုံခြုံရေးကောင်စီထံ တောင်းဆိုကြောင်း ယမန်နေ့တွင် Fortify Rights က ထုတ်ပြန်သည်။

ကုလသမဂ္ဂလုံခြုံရေးကောင်စီအနေဖြင့် မြန်မာစစ်တပ်ထံလေယာဉ်လောင်စာဆီနှင့် စစ်လက်နက်များ ထောက်ပံ့မှုအပေါ် အလျင်အမြန်ပိတ်ဆို့အရေးယူသင့်ကြောင်းထုတ်ပြန်ချက်တွင်ပါဝင်သည်။

“ မြန်မာစစ်ကောင်စီဟာ ပြစ်ဒဏ်ခံရခြင်းလုံးဝမရှိဘဲ သူတို့ရဲ့ဂျက်လေယာဉ်တွေနဲ့ အရပ်သားပြည်သူတွေအပေါ် ဆက်လက်တိုက်ခိုက်ဖိနှိပ်နေတာကို တစ်ကမ္ဘာလုံးက နှုတ်ဆိက်ကာကြည့်နေဆဲပါပဲ” ဟု Fortify Rights မှ လူ့အခွင့်အရေးဆိုင်ရာတာဝန်ခံ ချစ်ဆိုင်းက ပြောကြားသည်။

လက်ရှိတွင်စစ်ကောင်စီဆုံးရှုံးထားသည့် အနောက်မြောက်တိုင်းစစ်ဌာနချုပ်ရုံးစိုက်ရာ ရှမ်းပြည်နယ်( မြောက်ပိုင်း) လာရှိုးမြို့အတွင်း ယခုရက်ပိုင်းတွင်ဆက်တိုက်လေယာဉ်ဖြင့်ဗုံးကြဲချမှုကြောင့် နာမည်ကြီး ရိုးရာအရက်ချက်စက်ရုံနှင့် ရွှေမြင်းနှစ်ကောင် ဓာတ်ခွဲစက်ရုံပျက်စီးသွားပြီး လူသေဆုံးသူများရှိကြောင်း ဒေသခံများထံမှ သိရသည်။

စစ်ကောင်စီလေယာဉ်ဆီရောင်းချသည့်နိုင်ငံများတွင် စင်ကာပူ၊ တရုတ်၊ ယူအေအီး၊ ဗီယက်နမ်နိုင်ငံများထံမှ လမ်းကြောင်းအသစ်များဖြင့် မြန်မာနိုင်ငံထံရောက်ရှိလာကြောင်း နိုင်ငံတကာလွတ်ငြိမ်းချမ်းသာခွင့်အဖွဲ့ ( AI ) က ထုတ်ပြန်ထားသည်။

ပြီးခဲ့သည့် ၂၀၂၃ ခုနှစ် ဧပြီမှ ၂၀၂၄ ခုနှစ် ဇွန်လအထိ စစ်ကောင်စီတိုက်ခိုက်မှုကြောင့် ကလေး ၃၃၄ ဦး အပါအဝင် အရပ်သား ၂၄၁၄ ဦးပါဝင်ပြီး ထိုထဲမှ လေကြောင်းတိုက်ခိုက်မှုကြောင့် အရပ်သား ၆၃၃ ဦးသေဆုံးပြီး လက်နက်ကြီးထိမှန်မှုကြောင့် အရပ်သား ၆၃၇ ဦးသေဆုံးကြောင်း ကုလသမဂ္ဂလူ့အခွင့်အရေးဆိုင်ရာမဟာမင်းကြီးရုံး ( OHCHR) ထုတ်ပြန်ချက်အရသိရသည်။


ဓာတ်ပုံ - လူမှူကွန်ရက်
#စစ်ကောင်စီထံ‌လေယာဉ်ဆီမရောင်းရန် #လူ့အခွင့်အရေးအဖွဲ့တောင်းဆို #Fortify Rights #ကုမလုံခြုံရေးကောင်စီ
#Ayeyarwaddy_Times

ငပုတောတွင် စက်လှေမှောက်ပြီး နယ်ထိန်းရဲ ၂ ဦး ရေနစ်သေဆုံး

ဧရာဝတီတိုင်းမ်
အောက်တိုဘာ ၂၅ ရက်

ဧရာ၀တီတိုင်း၊ ငပုတောမြို့တွင် ရဲတပ်ဖွဲ့၀င် များ စီးနင်းလာသော စက်လှေတိမ်းမှောက်သဖြင့် နယ်ထိန်းရဲနှစ်ဦး ရေနစ်သေဆုံးခဲ့ကြောင်း သိရှိရသည်။

အောက်တိုဘာ ၂၃ ရက် ညပိုင်းက ငပုတောမြို့မရဲစခန်းမှ ရဲတပ်ဖွဲ့ဝင်များသည် ကျင်စက်အသုံးပြု ငါးရှာနေသူများကိုဖမ်းဆီးရန် ပုလဲနှင့်ငါးလုပ်ငန်းမှ စက်လှေကို အသုံးပြုပြီး သွားရောက်ဖမ်းဆီးစဉ် ကံစိတ်ရွာအနီး ကျား‌ဘော(ငါးဖမ်းပိုက်များတွင် ဗောသီးအဖြစ်အသုံးပြုထားသောပစ္စည်း)ဖြင့် တိုက်မိကာ စက်လှေတိမ်းမှောက်ရာမှ နှစ်ဦးသေဆုံးခဲ့ခြင်းဖြစ်ကြောင်းရဲတပ်ဖွဲ့နှင့်နီးစပ်သူများထံမှသိရှိရသည်။

"မြို့မစခန်းက ရဲ နှစ်ယောက် ရေနစ်ပြီး သေတယ်လို့ပဲကြားတာ ၊ ဒီမနက်မှ စက်လှေမှောက်ကြတာလို့သိရတယ်။ သူတို့က ညဘက်ဆို သောက်စားမူးနေကြတော့လည်းဖြစ်မှာပေါ့"ဟု ငပုတောမြို့ခံတစ်ဦးမှ ဧရာ၀တီတိုင်းမ်ကိုပြောသည်။

သေဆုံးသွားသူများမှာ ငပုတောမြို့မရဲစခန်းမှ ဖျံရေကျော်ကျေးရွာအုပ်စု နယ်ထိန်း အောင်ကျော်ဦးနှင့် တမာန်ချောင်းကျေးရွာအုပ်စုမှ နယ်ထိန်းမျိုးကိုတို့ဖြစ်ကြောင်း ဒေသခံများ၏ ပြောကြားချက်အရ သိရှိရသည်။

"ရဲတပ်သားနှစ်ယောက် ရေနစ်သေဆုံးပြီး ၊ သေနတ်တစ်လက်ပါ ရေထဲမြုပ်သွားလို့ စခန်းမှာ ပြသနာတွေတက်နေတယ်"ဟု ရဲတပ်ဖွဲ့နှင့်နီးစပ်သူတစ်ဦးမှ ဧရာ၀တီတိုင်မ်းကိုပြောသည်။

အဆိုပါ နယ်ထိန်းရဲနှစ်ဦး သေဆုံးမှုအတွက် ငပုတောမြစ်တစ်လျှောက်တွင် စက်လှေများဖြင့် ရှာဖွေနေသော်လည်း ရုပ်အလောင်းများပြန်လည်မရသေးကြောင်း ဒေသခံများက ပြောကြားသည်။

#ငပုတော #စက်လှေမှောက် #နယ်ထိန်းရဲ၂ဦး #ရေနစ်သေဆုံး #Ayeyarwaddy_Times

"သတင်းမီဒီယာ လွတ်လပ်ခွင့်မရှိတဲ့နေရာတွေက ပြည်သူလူထုအတွက်တော့ လူ့အခွင့်အရေးတွေ ဆုံးရှုံးနေမှာပါ”(Red News Agency မှ အယ်ဒီတာနှင့် ဆက်သွယ်မေးမြန်းခြင်း)

ဧရာဝတီတိုင်းမ်
အောက်တိုဘာ ၂၅ ရက်

ကချင်လွတ်လပ်ရေးတပ်မတော် (KIA) ကဖမ်းဆီးထားသည့် သတင်းထောက် ကိုတာလင်းမောင်နှင့် ကိုနောင်ရိုးတို့ကို ပြန်လွှတ်ပေးရန် ပြည်တွင်းပြည်ပသတင်းမီဒီယာအဖွဲ့အစည်းများက တောင်းဆိုထားကြသည်

ကိုတာလင်းမောင်သည် Red News Agency မှ သတင်းထောက်တစ်ဦး ဖြစ်သည်။ သို့ဖြစ်ပါ၍ ကိုတာလင်းမောင်အပါအဝင် ဖမ်းဆီးခံသတင်းထောက်များ၏ အခြေအနေနှင့် ပတ်သက်ပြီး Red News Agency သတင်းဌာန၏ အယ်ဒီတာတစ်ဦးကို ဧရာဝတီတိုင်းမ်သတင်းဌာနက ဆက်သွယ်မေးမြန်းထားခြင်း ဖြစ်သည်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times #သတင်းမီဒီယာ #လွတ်လပ်ခွင့် #လူ့အခွင့်အရေး #RedNewsAgency #ဆက်သွယ်မေးမြန်းခြင်း

စစ်အာဏာရှင်ဟောင်း ဦးသန်းရွှေ၏သားမက် ဒေါက်တာနေစိုးမောင်ကို ဖမ်းဆီးပြီးအမှုဖွင့်ထားဟု စစ်ကောင်စီထုတ်ပြန်

ဧရာဝတီတိုင်းမ်
အောက်တိုဘာ ၂၅ ရက်

စစ်အာဏာရှင်ဟောင်း ဦးသန်းရွှေသားမက် ဒေါက်တာနေစိုးမောင်ကို လူမှုကွန်ရက်မှာ နိုင်ငံတော်တည်ငြိမ်ရေးနဲ့ အစိုးရယန္တရားပျက်ပြားစေရန် လှုံ့ဆော်တယ်လို့ဆိုကာ စစ်ကောင်စီက ဖမ်းဆီးအမှုဖွင့်ထားတယ်လို့ မနေ့က အောက်တိုဘာ ၂၄ ရက်နေ့ရက်စွဲနဲ့ ထုတ်ပြန်ထားပါတယ်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times 

ပြီးခဲ့သည့်ဘဏ္ဍာနှစ်တွင် မြန်မာနှင့် အိန္ဒိယကုန်သွယ်မှု ကန်ဒေါ်လာ တစ်ထောင်ကျာ်ရှိ

ဧရာဝတီတိုင်းမ်
အောက်တိုဘာ ၂၅ ရက်

မြန်မာနိုင်ငံ၏ သတ္တမမြောက်ကုန်သွယ်ဖက် နိုင်ငံအဖြစ် အိန္ဒိယနိုင်ငံက ရပ်တည်နေပြီး ယခင်နှစ် ၂၀၂၃ - ၂၀၂၄ ဘဏ္ဍာနှစ်တွင် နှစ်နိုင်ငံကုန်သွယ်မှု အမေရိကန်ဒေါ်လာ သန်းတစ်ထောင်ကျော်ရှိကြောင်းစစ်ကောင်စီထုတ်ပြန်ချက်အရ သိရသည်။

ယမန်နေ့ကလည်း မြန်မာနှင့် အိန္ဒိယနိုင်ငံတို့ကြား မြန်ဆန်စွာအကျိုးဖြစ်ထွန်းစေမည့် ( Quick Impact Project - QIPs) အကောင်အထည်ဖော်ရန် နားလည်မှုစာချွန်လွှာကို နေပြည်တော်တွင် ထိုးခဲ့ကြသည်။

နှစ်နိုင်ငံကုန်သွယ်မှုတွင် အမေရိကန်ဒေါ်လာ သန်းပေါင်း ၁၁၅၀ ဒသမ ၁၈၁ ရှိပြီး အပြန်အလှန်ကုန်သွယ်မှုတိုးမြှင့်နိုင်ရန်
ဆောင်ရွက်နေသည်ဟုလည်း စစ်ခေါင်းဆောင်က ဆိုသည်။

လက်ရှိမြန်မာနိုင်ငံတွင် ရင်းနှီးမြှပ်နေသည့် နိုင်ငံပေါင်း ၅၃ နိုင်ငံရှိကာ ယခုနှစ် ဇန်နဝါရီအထိ စာရင်းများအရ အိန္ဒိယနိုင်ငံက အဆင့် ၁၁ တွင်ရှိကြောင်း၊ အိန္ဒိယနိုင်ငံသည် တကယ့်မိတ်‌ဆွေကောင်းဖြစ်ကြောင်း စစ်‌ခေါင်းဆောင် ဗိုလ်ချုပ်မှုးကြီး မင်းအောင်လှိုင်က ပြောကြားသည်။

မြန်မာနိုင်ငံမှ အိန္ဒိယနိုင်ငံထံ ပဲမျိုးစုံတင်ပို့ပြီး အိန္ဒိယမှ ဆေးဝါးမျိုးစုံ၊ စက်သုံးဆီ၊ နေကြာစေ့၊ ဝါစေ့များတင်သွင်းပြီး ငွေပေးချေရာတွင် ကျပ်နှင့် ရူပီးတိုက်ရိုက်ပေးချေနိုင်ရန်ဆွေးနွေးလျက်ရှိသည်။

အာဏာသိမ်းစစ်တပ်နှင့် အိန္ဒိယနိုင်ငံသည် စစ်သုံးပစ္စည်းထောက်ပံ့ရေးအပါအဝင် နည်းပညာနှင့် စီးပွားရေးပူးပေါင်းဆောင်ရွက်မှုဆက်လက်လုပ်ဆောင်နေခြင်းဖြစ်သည်။

အိန္ဒိယသည် စစ်ကောင်စီအာဏာသိမ်းထားသည့် ၂၀၂၁ ခုနှစ် ဇန်နဝါရီမှ ၂၀၂၄ ခုနှစ် စက်တင်ဘာအထိ ဘွဲ့လွန်ပညာသင်ဆု ၉၀၀ ကျော်ပေးထားကြောင်းလည်းသိရသည်။

အိန္ဒိယနိုင်ငံသည် အမေရိကန်ဒေါ်လာ သန်း ၅၀၀ တန်ဖိုးဖြင့် မြန်မာနိုင်ငံရှိ ရခိုင်ပြည်နယ်တွင် ကုလားတန်မြစ်ဘက်စုံစီမံကိန်းအကောင်အထည်ဖော်လျက်ရှိရာတွင် လက်ရှိနယ်မြေအများစုကို ရခိုင်တပ်တော် ( AA) သိမ်းပိုက်ထားသည်။

ဓာတ်ပုံ - MOI
#မြန်မာ #အိန္ဒိယ #ကုန်သွယ်မှု #ဒေါ်လာသန်းတစ်ထောင်
#Ayeyarwaddy_Times

ပြင်ဦးလွင်မြို့အနီးအထိ တိုက်ပွဲများနီးကပ်လာတာကြောင့် ဒေသခံအချို့နဲ့တပ်မိသားစုများ ရှောင်တိမ်း

ဧရာဝတီတိုင်းမ်
အောက်တိုဘာ ၂၅ ရက်

မန္တလေးတိုင်း၊ ပြင်ဦးလွင်မြို့အနီးမှာ တိုက်ပွဲများနီးကပ်လာတာကြောင့် မြို့နေဒေသခံအချို့ ရှောင်တိမ်း ထွက်ခွာသူများရှိနေတယ်လို့ သိရပါတယ်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times

စစ်ကောင်စီက သန်းခေါင်စာရင်း ကောက်ယူနိုင်ရေး ဘာသာပေါင်းစုံ၊လူမျိုးပေါင်းစုံကို ခေါ်ယူ၍ အကူအညီတောင်း

နိုင်မင်းလွင်/ဧရာဝတီတိုင်းမ်
အောက်တိုဘာ ၂၅ ရက်

အာဏာသိမ်းပြီးနောက် စစ်ကောင်စီသည် ဆယ်နှစ်တစ်ကြိမ် ကောက်ယူလေ့ရှိသော ၂၀၂၄ ခုနှစ် သန်းခေါင်စာရင်းကို နိုင်ငံတဝန်းလုံး ကောက်ယူနိုင်ရေး ဘာသာပေါင်းစုံ၊ လူမျိုးပေါင်းစုံကို ခေါ်ယူတွေ့ဆုံ၍ မက်လုံးပေး စည်းရုံးကာ အကူအညီတောင်းခံခဲ့ကြောင်း သိရသည်။

စစ်ကောင်၏ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်သည် နေပြည်တော်တွင် ဘာသာပေါင်းစုံ၊ လူမျိုးပေါင်းစုံမှ ကိုယ်စားလှယ်များကို ယခုရက်အတွင်း ခေါ်ယူတွေ့ဆုံ၍ သန်းခေါင်းစာရင်းကိစ္စ ဆွေးနွေးခဲ့ကြောင်း ၎င်းတို့ဝါဒဖြန့် သတင်းစာအရ သိရသည်။

ထိုတွေ့ဆုံမှုသည် စစ်ကောင်စီအနေဖြင့် ၎င်းတို့အား ထောက်ခံနေသော အင်အားစုများ၏ အကူအညီကို ရယူခြင်းဖြစ်သလို တစ်ဖက်လှည့်ဖြင့် မက်လုံးပေးကာ စည်းရုံးခြင်း သဘောမျိုးဖြစ်ကြောင်း လေ့လာစောင့်ကြည့်သူများ၏ ထောက်ပြသုံးသပ်ချက်အရ သိရသည်။

“ဒီအဖွဲ့တွေ ကိုယ်တိုင်က အကြမ်းဖက် စစ်တပ်နဲ့ ပူးပေါင်းပြီး လုပ်ဆောင်နေတယ် ဆိုမှတော့ ဒါတွေက သက်ဆိုင်ရာ လူမျိုးစု၊ ဘာသာရေး အဖွဲ့တွေကို တကယ်ကိုယ်စားပြုရဲ့လား မေးခွန်းထုတ်စရာ ရှိပါတယ်” ဟု စစ်ကိုင်းဒေသခံ နိုင်ငံရေးသမား ကိုစိုးဝင်းဆွေက ဧရာဝတီတိုင်းမ်ကို ပြောသည်။

အဆိုပါ တွေ့ဆုံမှုအတွင်း စစ်ကောင်စီခန့် ဝန်ကြီး ဦးမြင့်ကြိုင်က သန်းခေါင်စာရင်း ကောက်ယူရန် ကျန်ရှိနေသူများ၊ Unique ID နံပါတ်ရရှိခြင်း မရှိသေးသူများအား ၎င်းတို့နှင့် ဆက်သွယ်နိုင်ရေး အသိပေးတိုက်တွန်း နှိုးဆော်ပေးရန် တက်ရောက်လာသူများကို အကူအညီတောင်း ပြောဆိုခဲ့ကြောင်း သိရသည်။

ထို့အပြင် သန်းခေါင်းစာရင်း ကောက်ယူခြင်းသည် ၎င်းတို့ ကျင်းပရန် ရည်ရွယ်ထားသော ရွေးကောက်ပွဲအတွက် မဲပေးပိုင်ခွင့်ရှိသူ နိုင်ငံသားတိုင်း ကိုင်ဆောင်ကတ်ပြား တစ်မျိုးမျိုး ကိုင်ဆောင်မဲပေးနိုင်ရေးနှင့် မဲဆန္ဒရှင်စာရင်း တိကျမှန်ကန်စွာ ပြုစုနိုင်ရေး ဆောင်ရွက်နေခြင်းဖြစ်ကြောင်း ဆိုသည်။

“သူတို့ သတ်မှတ်ထားတဲ့ ကောက်ယူကွက်တွေ မပြည့်စုံဘူး။ ကျန်တာ ရက်တိုးကောက်မယ်လို့ ပြောပါတယ်။ ပြီးတာ ဘယ်လောက်ရာခိုင်နှုန်း၊ ကျန်တာ ဘယ်လောက်ရာခိုင်နှုန်းဆိုတာ မတွေ့သေးပါ” ဟု အမည်မဖော်လိုသူ လေ့လာစောင့်ကြည့်သူ အမျိုးသားတစ်ဦးက ဧရာဝတီတိုင်းမ်ကို ပြောသည်။

လက်ရှိတွင် သန်းခေါင်စာရင်း ကောက်ယူမှုကို စာရင်းစစ်၊ စာရင်းကောက် ၄၂၀၀၀ ခန့်ဖြင့် ပြီးခဲ့သည့် အောက်တိုဘာ (၁) ရက်မှ (၁၅) ရက်အထိ (၁၅) ရက်ကြာ ကောက်ယူခဲ့ပြီး ကျန်ရှိခဲ့သူများအား အောက်တိုဘာ (၃၁) ရက်အထိ ဆက်လက်ကောက်ယူမည်ဟု စစ်ကောင်စီက အောက်တိုဘာ ၁၆ ရက်တွင် ထုတ်ပြန်ထားသည်။

စစ်ကောင်စီသည် ထိုသန်းခေါင်စာရင်းကို ရွေးကောက်ပွဲ ပြုလုပ်၍ ထွက်ပေါက်ရှာချင်သဖြင့် အကောက်ပြ သဘောမျိုး လုပ်နေခြင်းဖြစ်ပြီး ၎င်းတို့ ထိန်းချုပ်ထားနိုင်သည့် ဒေသတချို့တွင်သာ ကောက်ယူနိုင်ကာ နယ်ဘက်ရှိ ကျေးရွာများတွင်မူ စစ်ကြောင်းထိုး၍ သတ်ဖြတ်နေဟု ကိုစိုးဝင်းဆွေက ပြောသည်။

“စာရင်းတွေက ဘယ်လောက်မှန်နိုင်လဲ ဆိုရင်တော့ နာဂစ်တုန်းကဆိုလဲ သိတဲ့အတိုင်းပဲ ဒီလောက် နာဂစ်မုန်တိုင်းဖြစ်ပြီးတော့ လူတွေသိန်းနဲ့ သန်းနဲ့ချီပြီးတော့ သေနေတာတောင်မှ ၂၀၀၈ အခြေခံ ဥပဒေကြီးကို အတည်ပြုတယ်။ ဘယ်သူမှ မဲလာထည့်တာမဟုတ်ဘူး“ ဟု ၎င်းက ဆက်လက်ပြောသည်။

စစ်ကောင်စီသည် သန်းခေါင်စာရင်းကို နိုင်ငံတကာ အကူအညီမရှိဘဲ ဒေါ်လာသန်းချီသုံး၍ ကိုယ်ထူကိုယ်ထ လုပ်ဆောင်ကာ ကွန်ပျူတာ အထောက်အကူပြု လူတစ်ဦးချင်း ကောက်ယူသည့်စနစ် (CAPI) နည်းပညာဖြင့် Mobile Tablet များ အသုံးပြုပြီး ယခင်ထက် မေးခွန်းပုံစံ တိုးမြှင့်ကောက်ယူခဲ့ကြောင်း သိရသည်။

ထို့အပြင် ၎င်းတို့အနေဖြင့် ပြည်သူများ၏ ဖြေကြားချက်နှင့် အချက်အလက်များကို လုံခြုံစိတ်ချမှု ရှိစေရန်၊ ဘက်လိုက်သော ခန့်မှန်းမှုများ မရှိစေရန်အတွက် အထူးအလေးထား ဆောင်ရွက်လျက်ရှိသည်ဟု ထုတ်ပြန်ထားသော်လည်း ပြည်သူများက ထိုအပေါ် ယုံကြည်မှု မရှိဘဲ စိုးရိမ်ပူပန်နေကြောင်း သိရသည်။

ဓာတ်ပုံ - စစ်ကောင်စီ
#စစ်ကောင်စီ #သန်းခေါင်စာရင်း #ဘာသာလူမျိုးပေါင်းစုံ #အကူအညီတောင်း #Ayeyarwaddy_Times

ရန်ကုန်မှာ မိုးကြီးလို့ ရေကြီးရေလျှံမှုဖြစ်ပေါ်နေစဉ် ငမိုးရိပ်နဲ့မဟူရာတမံရဲ့ ရေပြည့်အမှတ်အထက် ၁ ပေကျော်ပိုနေ

ဧရာဝတီတိုင်းမ်
အောက်တိုဘာ ၂၂ ရက်

ယခုရက်ပိုင်းမိုးကြီးမှုကြောင့် ရန်ကုန်မြို့အတွင်းရေကြီးရေလျှံမှုဖြစ်ပေါ်နေချိန် ငမိုးရိပ်နဲ့ မဟူရာတမံတွေမှာလည်း ကန်ရေပြည့်မှတ်အထက် ၁ ပေကျော်ပိုနေတယ်လို့ သိရပါတယ်။

တည်းဖြတ်/ထုတ်လုပ် - ဧရာဝတီတိုင်းမ်
#Ayeyarwaddy_Times

စစ်ကောင်စီက KNU ဌာနချုပ်ကို ဗုံးကြဲတိုက်ခိုက်မှုသည် ခြိမ်းခြောက်ခြင်း ဖြစ်ဟုဆို

နိုင်မင်းလွင်/ဧရာဝတီတိုင်းမ်
အောက်တိုဘာ ၂၂ ရက်

စစ်ကောင်စီက အာဏာသိမ်းပြီးနောက် ပထမဆုံးအကြိမ်အဖြစ် ကရင်အမျိုးသား အစည်းအရုံး(KNU) ဌာနချုပ်ကို ဒရုန်းဖြင့် ဗုံးကြဲတိုက်ခိုက်မှုသည် ခြိမ်းခြောက်ခြင်းပင်းဖြစ်ကြောင်း ဒေသတွင်း စစ်ရေးလေ့လာ စောင့်ကြည့်သူတို့က သုံးသပ်ကြသည်။

စစ်ကောင်စီသည် မြန်မာ-ထိုင်း နယ်စပ်ရှိ KNU ဌာနချုပ် တပ်မဟာ(၇)၊ သေ့ဘေထစခန်းကို ယနေ့ အောက်တိုဘာ ၂၂ ရက်၊ နံနက် ၁၀ နာရီခန့်က ဒရုန်းဖြင့် ဗုံးလေးလုံးကြဲချ တိုက်ခိုက်ခဲ့ကြောင်း သိရသည်။

“စစ်တပ်က ပြောလေ့ရှိတဲ့ စကားတစ်ခွန်းရှိတယ်။ အဲ့ဒါဘာလည်းဆို ဘယ်ရန်သူရဲ့ ဌာနချုပ် စခန်းကို မဆို သူတို့လုပ်ချင်ရင် လုပ်လို့ရတယ်ဆိုတာပဲ။ အခုလည်း ခြိမ်းခြောက်ခြင်း သဘောလို့ ကျွန်တော် ထင်တယ်” ဟု ကရင်ဝါရင့် နိုင်ငံရေးသမား အမျိုးသားတစ်ဦးက ဧရာဝတီတိုင်းမ်ကို ပြောသည်။

စစ်ကောင်စီက ကြဲချခဲ့သည့် ဗုံးလေးလုံးအနက် ဗုံးတစ်လုံးသာ ပေါက်ကွဲခဲ့ပြီး ထမင်းစားဆောင် ပျက်စီးကာ တပ်ဖွဲ့ဝင် နှစ်ဦး အနည်းငယ် ထိခိုက်ဒဏ်ရာ ရရှိခဲ့ကြောင်း KNU နှင့် နီးစပ်သူအပြင် ဒေသခံများထံက သိရသည်။

“တပ်မဟာ (၇)ကို ဒရုန်းတွေနဲ့ လာကြဲတယ်၊ ၂၄ ဘက်ကို ကြဲတာပေါ့။ ရွာထဲက တချို့ကတော့ ဟိုဘက်ကမ်း ကူးကုန်ပြီ၊ ကျွန်တော်တို့တော့ ခဏစောင့်ကြည့်နေတယ်” ဟု ဒေသခံ အမျိုးသားတစ်ဦးက ဧရာဝတီတိုင်းမ်ကို ပြောသည်။

လက်ရှိတွင် အဆိုပါနေရာ၌ စစ်ရေးအခြေအနေ ငြိမ်သက်နေပြီး စစ်ကောင်စီ၏ အဆိုပါလုပ်ရပ်သည် တပ်မဟာ (၇) ကို စစ်ပွဲထဲ ဆွဲသွင်းခြင်းဖြစ်ကြောင်း ဒေသတွင်း စစ်ရေး လေ့လာစောင့်ကြည့်သူ အမျိုးသားတစ်ဦးက သုံးသပ်ထောက်ပြသည်။

“အချိန်တစ်ခုတော့ စောင့်ကြည့်ရမယ် ထင်တယ်။ ဒါဟာ သွေးတိုးစမ်းတာ ဖြစ်နိုင်သလို၊ Target point ရှာတာမျိုးလည်း ဖြစ်နိုင်တယ်” ဟု စစ်ရေး လေ့လာစောင့်ကြည့်သူ အမျိုးသားတစ်ဦးက ဧရာဝတိုင်းမ်ကို ပြောသည်။

ကရင်အမျိုးသား အစည်းအရုံး(KNU) ဌာနချုပ်ကို စစ်ကောင်စီက ဒရုန်းဖြင့် ဗုံးကြဲတိုက်ခိုက်မှုနှင့် ပတ်သက်၍ KNU ၏ ပြောခွင့်ရ ပဒိုစောတောနီးကို ဧရာ၀တီတိုင်းမ် သတင်းဌာနက ဆက်သွယ်မေးမြန်း ထားသော်လည်း ပြန်လည် ဖြေကြားခြင်းမရှိသေးပေ။

စစ်ကောင်စီသည် ၎င်းတို့ အာဏာသိမ်းပြီးနောက် တိုက်ပွဲဖြစ်ပွားမှု မရှိသလောက် နည်းပါးခဲ့သော KNU တပ်မဟာ ၇ နယ်မြေကို ယခုကဲ့သို့ ဒရုန်းဖြင့် ဗုံးကြဲတိုက်ခိုက်မှုသည် ပထမဆုံးအကြိမ်ဖြစ်ကာ စွယ်တော်ကုန်းအမြောက်စခန်း လက်လွှတ်ရမှုနှင့်လည်း သက်ဆိုင်မှုရှိနိုင်ကြောင်း နိုင်ငံရေးလေ့လာ သူများက သုံးသပ်သည်။

ကရင်ပြည်နယ်၊ လေးကေ့ကော်မြို့အနီးရှိ စွယ်တော်ကုန်း အမြောက်စခန်းကို ပြီးခဲ့သည့် အောက်တိုဘာ ၂၇ ရက်က KNU လက်အောက်ခံ ကရင်အမျိုးသား လွတ်မြောက်ရေး တပ်မတော် (K.N.L.A) ဦးဆောင်သော တော်လှန်ရေး ပူးပေါင်းတပ်ဖွဲ့ များမှ တိုက်ခိုက်သိမ်းပိုက်ခဲ့ကြောင်း သိရသည်။

ဓာတ်ပုံ-KNU (ပုံဟောင်း)

#စစ်ကောင်စီ #KNUဌာနချုပ် #ဒရုန်း #ဗုံးကြဲတိုက်ခိုက် #ခြိမ်းခြောက် #Ayeyarwaddy_Times

စစ်ကောင်စီက မတ္တရာမြို့နယ်ရှိ အရပ်သားများကို လေကြောင်းမှဗုံးကြဲပြီး ထွက်ပြေးသူများကို စက်သေနတ်ဖြင့်လိုက််လံပစ်ခတ်၍ ၁ နှစ်သားကလေးနှင့် မိခင်ဖြစ်သူတို့ သေဆုံး

ဧရာဝတီတိုင်းမ်
အောက်တိုဘာ ၂၂ ရက်

မန္တလေးတိုင်း၊ မတ္တရာမြို့နယ် ဧရာဝတီမြစ်ကမ်းတ လျှောက်ရှိ ကျေးရွာများကို စစ်ကောင်စီတပ်က လေ ကြောင်းမှ ပစ်ခတ်တိုက်ခိုက်ခဲ့ကြောင်း သိရသည်။

စစ်ကောင်စီသည် မတ္တရာမြို့နယ် အနောက်ခြမ်း ဧရာဝတီမြစ်ဘေးတစ်လျှောက်ရှိ ကျေးရွာများကို ယမန်နေ့ အောက်တိုဘာ ၂၁ ရက်နေ့ ညနေ ၄ နာရီဝန်းကျင်မှစတင်၍ လေကြောင်းတိုက်ခိုက်မှုများ ပြုလုပ်ခဲ့ခြင်းဖြစ်သည်။

ညနေ ၄ နာရီ ၇ မိနစ်၊ ၁၄ မိနစ်၊ ၄၈ မိနစ်နှင့် ၆ နာရီ ၂၆ မိနစ်ခန့်တို့တွင် မိတ္ထီလာမှတက်လာသည့် ဂျက်ဖိုက်တာတစ်စင်း၊ တံတားဦးမှတက်လာ သည့် ဂျက်ဖိုက်တာ သုံးစင်းနှင့် MI 35 နှစ်စီး စုစု‌ပေါင်း ခြောက်စင်း တို့ဖြင့် မတ္တရာနယ် ဝန်စုရွာနှင့် ဝေါစုရွာအပြင် ဧရာဝတီမြစ်ကမ်းတစ်လျှောက်ရှိ ကျေးရွာများကို ပစ်ခတ်တိုက်ခိုက်ခဲ့ကြောင်း ဒေသခံများနှင့် Wetlet Information Network ထံက သိရသည်။

"ဂျက်ဖိုက်တာနဲ့ အရင်ဆုံးလာပစ်တယ်။ နောက် MI 35 တက်လာပြီးထပ်ပစ်တာ ၁၄ မိနစ်ကနေ ၄၈ မိနစ်ထိ။ တတိယအကြိမ်ပစ်တဲ့ အချိန်မှာစက်သေ နတ်မှန်ပြီး သားမိနှစ်ဦးသေဆုံးပြီး လေးဦးထိခိုက်ဒဏ် ရာရရှိခဲ့တယ်"ဟု Wetlet Information Network ထံက သိရသည်။

ယင်းသို့ စစ်ကောင်စီက တိုက်လေယာဉ်များဖြင့် ဗုံး ကြဲတိုက်ခိုက်ခဲ့ပြီး ထွက်ပြေးသူများကို စက်သေနတ်များဖြင့်ပါလိုက်လံ ပစ်ခတ်ခဲ့သည့်အတွက် အသက် ၂၈ နှစ်အရွယ်အမျိုး သမီးနှင့် အသက်တစ်နှစ်ကျော်သာရှိသေးသည့် ကလေးငယ်တို့ သေဆုံးခဲ့ကြောင်း သိရသည်။

စစ်ကောင်စီတပ်သည် ဝေါစုရွာ၊ ဝန်စုရွာနှင့် အနီးတစ်ဝိုက်ကျေးရွာများကို ဂျက်ဖိုက်တာများဖြင့် ဗုံးကြဲခြင်းကြောင့် ဒေသခံများက မြွေတလိုင်းရွာဘက်သို့ထွက်ပြေးရာတွင် အပေါ်မှ စက်သေနတ်များဖြင့် လိုက်လံပစ်ခတ်သတ်ဖြတ်ခဲ့ခြင်းဖြစ်ကြောင်း ဒေသခံများထံက သိရသည်။

ဓာတ်ပုံ-Wetlet Information Network

#မန္တလေး #မတ္တရာအနောက်ခြမ်း #စစ်ကောင်စီ #ဗုံးကြဲ #စက်သေနတ်ပစ်ခတ် #သားအမိနှစ်ဦး #သေဆုံး
#Ayeyarwaddy_Times

ထားဝယ်ထောင်မှ နိုင်ကျဉ်းတစ်ဦး လေဖြတ်၍ ပြင်ပ ဆေးရုံတင်ထားစဉ်သေဆုံး၊ ယခုနှစ် ၁၀ လ အတွင်း ဆေးဝါးမလုံ လောက်မှုကြောင့် သေဆုံးခဲ့ရသည့် နိုင်ကျဉ်းပေါင်း ၁၅ ဦးအထိရှိလာ

ဧရာဝတီတိုင်းမ်
(ထားဝယ်)၊ အောက်တိုဘာ ၂၂ ရက်

တနင်္သာရီတိုင်း၊ ထားဝယ်မြို့နယ်၊ ထားဝယ်အကျဉ်းထောင်တွင် ပြီးခဲ့သည့် အောက်တိုဘာ ၁၇ ရက်နေ့က လေဖြတ်ခြင်းကြောင့် ထားဝယ်ဆေးရုံသို့ ပို့ဆောင်ထားရသည့် နိုင်ငံရေးအကျဉ်းသားတစ်ဦး သေဆုံးခဲ့ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ထံက သိရသည်။

သေဆုံးခဲ့သည့် နိုင်ငံရေးအကျဉ်းသားမှာ အသက် (၆၂) နှစ်အရွယ် ဦးရဲအောင်ဖြစ်ပြီး စက်တင်ဘာလ ၂၇ ရက်နေ့တွင် လေဖြတ်သွားပြီးနောက် ထောင်တွင်း ဆရာဝန်လောက်ငှမှုမရှိသည့်အတွက် ထောင်ပြင်ပ ထားဝယ်ဆေးရုံသို့ ပို့ဆောင်၍ ဆေးကုသမှုခံယူ နေစဉ် သေဆုံးခဲ့ခြင်းဖြစ်ကြောင်း သိရသည်။

ဦးရဲအောင်မှာ ပုဒ်မ-၅၀(ည) နှင့် ပုဒ်မ-၅၂ တို့ဖြင့် မတရား ဖမ်းဆီးထိန်းသိမ်းခြင်းခံထားရသည့် နိုင်ငံရေးအကျဉ်းသားတစ်ဦး ဖြစ်ကြောင်း သိရသည်။

"ထားဝယ်ထောင်မှာက ထောင်ဆေးရုံကအစကတည်းကမရှိတာ ပြီးဝော့ာ အရည်အချင်းပြည့်ဝတဲ့ ဆရာဝန်တွေကလည်း ထားဝယ်ထောင်မှာမရှိဘူး ဆေးမှူးလိုမျိုးအဆင့်လောက်နဲ့ပဲ ထားဝယ်ထောင်မှာ ပုံမှန်နေမကောင်းတာတွေကို ကုသပေးနိုင်တာမျိုးပဲရှိတယ်။ ဒီလိုအခြေအနေမှာ လေဖြတ် သွားတဲ့အတွက် ထောင်ပြင်ပကိုပို့ပေးခဲ့တာဖြစ်ပါတယ်။ လက်ရှိထောင်ပြင်ပမှာ လေဖြတ်တဲ့ဝေဒနာကို ခံစားရရင်း ဆေးရုံတင်ထားတဲ့အခြေအနေမှာ ကျဆုံးသွားတယ်လို့သိထားရတယ်။ ဘာရောဂါနဲ့ ကျဆုံးရတယ်ဆိုတာ ကျွန်တော်တို့ သိရှိရဖို့ကြိုးစားနေဆဲဖြစ်ပါတယ်" ဟု PPNM မှ ကိုသိုက်ထွန်းဦးက ဧရာဝတီတိုင်းမ်ကို ပြောသည်။

ယခုကဲ့သို့ အကျဉ်းထောင်တွင်း ကျန်းမာရေး စောင့်ရှောက်မှု မလုံလောက်မှုများ ကြောင့် သေဆုံးခဲ့ရသည့် နိုင်ငံရေးအကျဉ်းသားပေါင်းမှာ ယခု ၂၀၂၄ ခုနှစ်အတွင်း ၁၅ ဦးအထိ ရှိလာပြီဖြစ်ကြောင်း သိရသည်။

ပြီးခဲ့သည့် အောက်တိုဘာ ၇ ရက်နေ့က အိုးဘိုထောင်တွင် အကျဉ်းကျခံနေရသည့် မန္တလေးတိုင်း ဝန်ကြီးချုပ် ဒေါက်တာ ဇော်မြင့်မောင် သေဆုံးမှုသည်လည်း ထောင်တွင်းကျန်းမာရေး စောင့်ရှောက်မှု လုံလောက်စွာ မရရှိခြင်းကြောင့်ဖြစ်ပြီး စစ်ကောင်စီသည် နိုင်ငံတကာနှင့်လူ့အခွင့်အရေး အဖွဲ့အစည်းများ၏ ဝေဖန်ထောက်ပြမှုများကို ယခုအချိန်အထိ လျစ်လျှူရှုထားဆဲဖြစ်ကြောင်း သိရသည်။

"လက်ရှိအထိတော့ စစ်ကောင်စီရဲ့အကျဉ်းဦးစီးဌာနဘက်ကတော့ အပြုသဘောဆောင်တဲ့ ပြောင်းလဲ ပြင်ဆင်မှုတွေလုပ်တာကိုတော့ အရမ်းကြီးမတွေ့ရသေးဘူး" ဟု ထောင်တွင်းကျန်းမာရေး စောင့်ရှောက်မှုနှင့် ပတ်သတ်၍ ကိုသိုက်ထွန်းဦးက ဆက်လက်ပြောဆိုသည်။

စစ်ကောင်စီက အာဏာသိမ်းပြီး သုံး နှစ်ကျော်ကြာကာလအတွင်း ပြီးခဲ့သည့် အောက်တိုဘာ ၇ ရက်အထိ စာရင်းများအရ အကျဉ်းထောင်တွင်း ဆေးဝါးကုသမှုလုံ လောက်စွာမရသည့်အတွက် သေဆုံးခဲ့ရသည့် နိုင်ငံရေးအကျဉ်းသားပေါင်း ၆၃ ယောက်အထိ ရှိပြီဖြစ်ကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) ၏ ထုတ်ပြန်ချက်အရ သိရသည်။

ဓာတ်ပုံ - လူမှုကွန်ရက်

#ထားဝယ်ထောင် #နိုင်ကျဉ်းသေဆုံး #ဆေးဝါးကုသမှု #လုံလောက်စွာမရ #PPNM #Ayeyarwaddy_Times

လှိုင်မြို့နယ်တွင် ရွှေ ၅ ပိဿာပါသည့် သေတ္တာ ၃ လုံး သေနတ်ပစ်ဖောက်၍ လုယက်ခံရ

ဧရာဝတီတိုင်းမ်
အောက်တိုဘာ ၂၂ ရက်

ရန်ကုန်တိုင်း၊ လှိုင်မြို့နယ်တွင် ရွှေဆိုင်သိမ်းပြီးပြန် လာသည့်ကားကို သေနတ်ပစ်ဖောက်ပြီး လုယက်ခံရရာ ရွှေသေတ္တာသုံးလုံးပါသွားကြောင်း သိရသည်။

ယမန်နေ့ အောက်တိုဘာ ၂၁ ရက်နေ့ ညနေ ၆ နာရီကျော်ဝန်းကျင်ခန့်တွင် ရွှေဆိုင်သိမ်းပြီးပြန်လာစဉ် လှိုင်မြို့နယ်၊ (၄) ရပ်ကွက်၊ အေးရိပ်မွန်လမ်းမကြီး၊ ခြံအမှတ် (၂) ၊ နေအိမ်ရှေ့အရောက်တွင် သေနတ်ပစ်ဖောက်ပြီး ကားနောက်တွင်ထားသည့် ရွှေသေတ္တာများကို လုယက်ယူဆောင်ခံရခြင်း ဖြစ်ကြောင်း သိရသည်။

"ပိုင်ရှင်အမျိုးသမီးက ဆိုင်သိမ်းပြီး အိမ်ကိုပြန်ရောက်ပြီ။ အိမ်ရှေ့အရောက်မှာ နောက်ကလိုက်လာပြီး လုသွားတာ။ ကားသမားကို သေနတ်နဲ့ချိန်ပြီးပစ်တာမထိလိုက်ဘူး။ ကားနောက်‌ လေကာမှန်ကိုရိုက်ခွဲပြီး ရွှေတွေထည့်ထားတဲ့ သေတ္တာတွေကို ယူသွားတာ။ လူထိခိုက်မှုတော့မရှိဘူး" ဟု ရဲတပ်ဖွဲ့ဝင်နှင့် နီးစပ်သူက ဧရာဝတီတိုင်းမ်ကို ပြောသည်။

သေနတ်ကိုင်ဆောင်ထားသူ အမျိုးသားနှစ်ဦးက ရွှေငါးပိဿာ ထည့်ထားသည့် သံသေတ္တာ သုံးလုံးကိုယူဆောင်ပြီး ကားဖြင့်ထွက်ပြေးသွားကြောင်း သိရပြီး လက်ရှိအချိန်တွင် သဲလွန်စတစ်စုံ တစ်ရာရရှိခြင်းမရှိသေးဘဲ ဖမ်းဆီးနိုင်ခြင်းမရှိသေးကြောင်း သိရသည်။

အဆိုပါ အမျိုးသမီးသည် အင်းစိန်လမ်းနှင့် ဆင်ရေတွင်းလမ်းထောင့်တွင် မြရွှေယုံဆိုသည့် ရွှေဆိုင်ကို ဖွင့်လှစ်ထားခြင်းဖြစ်ကြောင်း သိရသည်။

#ရန်ကုန် #လှိုင် #ရွှေငါးပိဿာ #လုယက်ခံရ #Ayeyarwaddy_Times

ဝက်သားကို ဈေးကြီးရောင်းသည်ဟု ပြောသည့် အုပ်ချုပ်ရေးမှူးကို ကြံ့ခိုင်ရေးပါတီဝင် ဝက်သားသည် က ဓားနှင့်ထိုးသတ်

ဧရာဝတီတိုင်းမ်
အောက်တိုဘာ ၂၂ ရက်

ရန်ကုန်တိုင်း၊ မှော်ဘီမြို့နယ်တွင် စစ်ကောင်စီခန့် အုပ်ချုပ်ရေးမှူး ဓားဖြင့်အချက်ပေါင်းများစွာ ထိုးသတ် ခံရပြီး သေဆုံးခဲ့ကြောင်း သိရသည်။

ပြီးခဲ့သည့် အောက်တိုဘာ ၁၉ ရက်နေ့ ညနေ ၆ နာရီ ၃၀ မိနစ်ခန့်တွင် မှော်ဘီမြို့နယ် အထယု ကျေးရွာအုပ်ချုပ်ရေးမှူး ဦးထိန်လင်းသည် ဘီယာသောက်ရင်း ဝက်သားရောင်းသူ ကိုဇော်မင်းထွန်း ဆိုသူနှင့် စကားများရာမှ ဓားဖြင့်ထိုးသတ်ခံရခြင်းဖြစ်ကြောင်း သိရသည်။

အုပ်ချုပ်ရေးမှူး ဦးထိန်းလင်းသည် ကျေးရွာထိပ်ရှိကုန်စုံဆိုင်တွင် အုပ်ချုပ်ရေးအဖွဲ့ဝင်များ၊ ကြံ့ခိုင်ရေး ပါတီဝင်အချို့နှင့် ဘီယာသောက်နေစဉ် ဝက်သားတစ်ပိဿာ ကျပ်နှစ်သောင်းခွဲ (၂၅၀၀၀) ဖြင့် ရောင်းသည့် ကိစ္စပြောဆိုခြင်းကြောင့် ဓားဖြင့်ငါးချက်ထက်မနည်း ထိုးသတ်ခံရခြင်းဖြစ်ကြောင်း ဒေသခံများ ထံက သိရသည်။

"အုပ်ချုပ်ရေးမှူးက ဘီယာသောက်နေရင်း ဝက်သား ရောင်းတဲ့ဇော်မင်းထွန်းကိုခေါ်ပြီး ဝက်သား တစ်ပိဿာ နှစ်သောင်းခွဲနဲ့ ရောင်းတဲ့ကိစ္စပြောပြီး မင်းတို့ထိန်တောမိုးညိုသားတွေက ဦးစားပေးလို့ ကိုမရဘူး။ လူမိုက်တွေ" ဟု ဦးထိန်လင်းကပြောဆိုခဲ့ကြောင်း မှုခင်းမှတ်တမ်းအရ သိရသည်။

ထို့ကြောင့် ကိုဇော်မင်းထွန်းဆိုသူက စိတ်ဆိုးပြီး ဓားဖြင့်ထိုးရာ ဦးထိန်လင်းတွင် မျက်လုံးအောက်၊ လည်ပင်း၊ ရင်အုံ၊ နံစောင်း၊ ခါးတို့တွင် ထိုးသွင်းဒဏ်ရာများရရှိပြီး လှည်းကူးဆေးရုံသို့ ပို့ဆောင်စဉ် သေဆုံးခဲ့ခြင်းဖြစ်သည်ဟု ဆိုသည်။

အုပ်ချုပ်ရေးမှူးကို ဓားဖြင့်ထိုးသတ်သူ ဝက်သားသည် ကိုဇော်မင်းထွန်းသည် ကြံ့ခိုင်ရေးပါတီဝင် တစ်ဦးဖြစ်ပြီး အတူတူဘီယာထိုင်သောက်နေစဉ် ဝက်သားရောင်းသည့်ကိစ္စပြောဆိုရာမှ ဓားဖြင့် ထိုးသတ်ခြင်းဖြစ်ကြောင်း သိရသည်။

လက်ရှိတွင် တရားခံဖြစ်သူကိုဇော်မင်းထွန်းမှာ ထွက်ပြေးတိမ်းရှောင်နေပြီး ဖမ်းဆီးရမိခြင်းမရှိသေး ကြောင်း သိရသည်။

#ရန်ကုန် #မှော်ဘီ #အုပ်ချုပ်ရေးမှူး #ကြံ့ခိုင်ရေးပါတီဝင် #ဝက်သားသည် #ဓားဖြင့်ထိုးသတ်
#Ayeyarwaddy_Times

တောင်ကိုရီးယားက ရုရှားသံအမတ်ကို ဆင့်ခေါ်ပြီး မြောက်ကိုရီးယားတပ်ဖွဲ့တွေ ရုတ်သိမ်းပေးဖို့ တောင်းဆို

ဧရာဝတီတိုင်းမ်
အောက်တိုဘာ ၂၂ ရက်

ယူကရိန်းကျူးကျော်စစ်မှာ ရုရှားနိုင်ငံကို ကူတိုက်ပေးဖို့ ထောင်ချီတဲ့ စစ်သားတွေ စေလွှတ်တဲ့ မြောက်ကိုရီးယားနိုင်ငံရဲ့ ဆုံးဖြတ်ချက်ကြောင့် တောင်ကိုရီးယားနိုင်ငံက တနင်္လာနေ့မှာ ရုရှားသံအမတ် ကို ဆိုးလ်မြို့တော်သို့ ဆင့်ခေါ်ခဲ့ပြီး တပ်ဖွဲ့တွေ ချက်ချင်း ရုတ်သိမ်းပေးဖို့ တောင်းဆိုခဲ့ပါတယ်။

မြောက်ကိုရီးယား အထူးတပ်ဖွဲ့ဝင် ၁၅၀၀ ခန့်ဟာ လက်ရှိမှာ ရုရှားနိုင်ငံမှာ ရောက်ရှိနေပြီး မ ကြာမီ ရှေ့တန်းသို့ သွားရောက်ဖွယ်ရှိတယ်လို့ တောင်ကိုရီးယား ထောက်လှမ်းရေးအဖွဲ့ အကြီးအကဲက ပြောပါတယ်။

ဇွန်လအတွင်း ကင်ဂျုံအန်နဲ့ ရုရှားသမ္မတ ဗလာဒီမာပူတင်တို့ စစ်ဘက်ဆိုင်ရာ သဘောတူညီ ချက်တစ်ရပ် လက်မှတ်ရေးထိုးပြီးနောက် မြောက်ကိုရီးယားတပ်ဖွဲ့တွေ ရုရှားသို့ စေလွှတ်မှုအပေါ် စိုးရိမ် တယ်လို့ တောင်ကိုရီးယားနိုင်ငံက ထုတ်ဖော်ပြောခဲ့ပါတယ်။

နျူကလီးယားလက်နက်ပိုင် မြောက်ကိုရီးယားဟာ ရုရှားသို့ စစ်လက်နက်တွေ ထောက်ပံ့ပေးနေ တယ်လို့ တောင်ကိုရီးယားနိုင်ငံက ပြောပါတယ်။

မြောက်ကိုရီးယားရဲ့ မကြာသေးမီက ရုရှားသို့ တပ်ဖွဲ့တွေ စေလွှတ်မှုကို တောင်ကိုရီးယားနိုင်ငံ က အလွန်အမင်း စိုးရိမ်ပြီး မြောက်ကိုရီးယားတပ်ဖွဲ့တွေ အမြန်ဆုံး ရုတ်သိမ်းဖို့နဲ့ ဆက်စပ် ပူးပေါင်း ဆောင်ရွက်မှုတွေ ရပ်ဆိုင်းဖို့ တောင်ကိုရီးယား ဒုတိယ နိုင်ငံခြားရေးဝန်ကြီး ကင်ဟောင်ကျွန်က ပြော ကြားခဲ့တယ်လို့ ဝန်ကြီးဌာနက ထုတ်ပြန်ချက်တစ်ခုအတွင်း ပြောပါတယ်။

မြောက်ကိုရီးယားက ရုရှားသို့ တပ်ဖွဲ့တွေ၊ စစ်လက်နက်တွေ ထောက်ပံ့တာဟာ တောင်ကိုရီး ယားကိုသာမက နိုင်ငံတကာအသိုင်းအဝိုင်းအတွက် သိသာတဲ့ လုံခြုံရေး ခြိမ်းခြောက်မှုတစ်ခုလို့ ၎င်းက ရုရှားသံအမတ်ကြီး ဂျော်ဂျီဇီနိုဗက်ဗ်ကို ပြောကြားခဲ့ပါတယ်။

မြောက်ကိုရီးယားနိုင်ငံရဲ့ ယင်းသို့သောလုပ်ရပ်ဟာ ကုလသမဂ္ဂ လုံခြုံရေးကောင်စီ ဆုံးဖြတ်ချက် နဲ့ ကုလသမဂ္ဂ ပဋိညာဉ်စာချုပ်ကို ချိုးဖောက်တာလို့ သူက ဆိုပါတယ်။

ကိုးကား - AFP
Ref; Seoul summons Moscow envoy to demand withdrawal of North Korean troops from Russia

#Ayeyarwaddy_Times