ዐውደ በረከት

https://t.me/awde_Beki

የልብ ዐይን ያለው አይቶ ያልቅስ!

     ሊቁ ቅዱስ ኤፍሬም ስለእመቤታችን ገናንነትና ክብር ሲናገር እንዲህ ብሎ ነበር የገለጠው "የድንግልን ገናንነቷን ሊናገሩት አይቻልም።" ሲል መስክሯል እውነትም የክብሯን ነገር መናገር የሚቻለው ማን ነው? እመቤታችን የመላዕክት ናፍቆት የአዳም ተስፋ የአበው ጸሎት የነቢያት ትንቢትና መሻት ናት። ንጉስ ዳዊት በዘመን መጋረጃ አጮልቆ በወርቅ ልብስ ተጎናጽፋና ተሸፋፍና ቢመለከታት አምላኳና አምላኩ የሆነው ንጉስ ውበቷን እንደወደደው  የምድር ባለጸጋዎች ሁሉ በፊቷ አምሃን እያመጡ የሚለምኗትና የሚማጸኗት መሆኗን አይቶ አድንቋታል። ልጁ ሰሎሞንም በትንቢት መነጸር አሻግሮ ቢመለከታት “ይህች እንደ ማለዳ ብርሃን የምትጐበኝ፥ እንደ ጨረቃ የተዋበች እንደ ፀሐይም የጠራች፥ ዓላማ ይዞ እንደ ተሰለፈ ሠራዊት የምታስፈራ ማን ናት?” መኃ.6፥10 ሲል ግርማዋን ያደንቃል። በሐዲስ ኪዳንም ፍቁር ዮሐንስ ወንጌላዊ ይህን ግርማ አይቶ እንዲህ ነግሮናል “ታላቅ ምልክትም በሰማይ ታየ ፀሐይን ተጐናጽፋ ጨረቃ ከእግሮችዋ በታች ያላት በራስዋም ላይ የአሥራ ሁለት ከዋክብት አክሊል የሆነላት።” ራእይ12፥1 ብሎ ስለእርሷ ነግሮናል። ታዲህ ይህን ግርማዋን ማን ሊገልጸው ይችላል?

             ይህች ግርምት ድንግል ይህች ዕፅብት ንግስት ተሰደደች መባሉ ታዲያ አያስለቅስምን? ሊነገር የማይችል ክብርና ገናንነት ያላት ማርያም እንዴት ማረፊያ እንዳጣ የምድረ በዳ ወፍ ተንከራተተች? ፀሐይና ወርቅን የተጎናጸፈቸው ከለበሰቻት ልብስ ወጪ ቅያሬ ልብስኳ ሳይኖራትና ሳትይዝ ተንከራተተች የምድር ነገስታት ሁሉ ከፊቷ አምሃን እያመጡ የሚማጸኗት እርሷ ተቸገረች ፍርፋሪን ለመነች እርሱንም የሚሰጣት አጥታ በርሃብ ተንከራተች መጠጊያን አጥታ ዛፍ ተጠግታ አረፈች ጨረቃን የተጫማች እርሷ በባዶ እግሯ ተሰደደች የአሸዋው ግለት እግሯን ለበለባት እሾሁ ወጋት እንቅፋቱ አሰቃያት  ያ ግርማው የሚያስደነግጥ ከፀሐይ ሰባት እጅ የሚያበራው ገጿ በበርሃው አቧራ ተሞላ  ብርድና ሙቀት ተፈራረቀበት በተረገመች ባሪያ እጅ በጥፊ ተመታ እንደ ቀይ ሐር ፈትል ያማሩት ከናፍሮቿ ከውሃ ጥም የተነሳ ተሰነጣጠቁ እንደ ርግብ ዐይን ያማራውና ርኀራሔን የተሞላው ውብ ዐይኖቿ በእንባ ብዛት ደፈረሱ በስደት ሀገር የምታውቀው የለምና የሚያስጠጋትም አጥታለችን ዘመዶቿን በመናፈቅ ሀገሯንም በማሰብ አዘነች።

          ይህች ምስጊን የግብጽ ስደተኛይቱን እስኪ ተመልከቷት ሁሉን ማድረግ የሚችለውን በጀርባዋ አዝላለች ግን ይህን አድርግልኝ ስትል አትማጸነውም። ሁሉን በሁሉ ማድረግ የሚችለውን አምላክን ወልደሽ ከሰው መዳን በቀር አንድም ቀን ይህንን አድርግልኝ ያላልሽ የትህትና መዝገብ በእውነት አንቺ ልዩ ነሽ። መከራው ቢጸናባትም አንድም ቀን ግን በደረሰባት መከራ ጽናት አላለቀሰችም በስደቷ ሁሉ ስለ ልጇ ስትል ብቻ ነው ስታለቅ የምናገኛት የወርቅ ጫማው በጠፋ ጊዜ ወንበዴዎች ሲማከሩ ልጄን ሊገሉብኝ ነው ብላ በማሰብ ልጇን ከእጇ ነጥቀው ወደመሬት በጣሉት ጊዜ ይህንና ይህን በመሳሰሉት ስለልጇ ስትል አልቅሳለች እንጂ ራበኝ ጠማኝ አሸዋው አቃጠለኝ ሰው ገላመጠኝ እያለች ስለመከራዎቿ ስለታለቅ አናገኛትም። ይህ የሆነው መከራው ቀሏት ይመስላችኋልን? አይደለም ሊቁ በሰቆቃወ ድንግል እንደመሰከረ "በማንኛውም ጊዜ እንደሷ ያለ ስደትና መከራ የደረሰበት ማንም የለም።" ታዲያ ስለምን ነው ብትሉ ለዚህ ነው እላችኋለው። ልጇና አምላኳ አሰቀድሞ “አውከውኛልና ዓይኖችሽን ከፊቴ መልሺ" መኃ6፥5 ሲል ሰምታወላችና የእርሷን ዕንባና ሀዘን ተመልክቶ ዐይኖቿ አውከውት የተሰደደውን አዳም ተሰዶ ሳይመልስው እንዳይቀር በማሰብ ስደቷም የጠፋውንና የተሰደደውን አዳም ለመመለስ እንደሆነ ስለተረዳች ነው። ልጇ እንባዋን አይቶ መታገስ እንደማይችል ሰቆቃወ ድንግል ላይ እንዲህ ይገልጽልናል፦"ሕጻኑ እናቱ ማርያምን ስታለቅስ ባያት ጊዜ፤ በለምለም የእጁ ጣቶች እንባዋን ጠረገና፤የተረገመ የደም አፍሳሽ እጅ አያገኘኝምና፤ እናቴ ሆይ ስለእኔም አታልቅሽ ብሎ በሚጥም ቃሉ አረጋጋት።"
       
             አዳም ሆይ ተስፋ የሆነችህ ከሀዘንህም የተጽናናህባትን ድንግልን ከአንተ የተወለዱ ልጆችህ ሲያሳድዷት በርሀቧ ሲጨቅኑበታ በጥሟ ሲሳለቁባት  ሲሰድቦትና ሲያሽሟጥጧት ምን ብለህ አልቅሰህ ይሆን? አንበሳው ንጉስ ዳዊት ሆይ ልጅህን ቀበሮው ሔሮድስ ሲያሳድዳት በሰው ሀገርም ማረፊያ አጥታ ስታያት ምን ብለህ ይሆን ልጅህስ ሰሎሞን ምን እያለ አንብቶ ይሆን? በእኔ በዚህ ምድር ያለው ጎስቋላው ልጇ የደረሰባትን መከራ መረዳት የሚችል የልብ ዐይን አጥቼ ስደቷን በእንባ መዘከር ተስኖኛል። ያቺ በቤተመቅደስ ሠማያዊ መና እየተመገበች የማያልቅ ወይንን በሠማያዊ ጽዋ እየጠጣች ያደገች ድንገል ከርሀቧ ጽናት በየሰው ቤት የእንጀራን ፍርፋሪ መለመኗን ሰምቼ ማልቅስን አቅቶኛል። ከቤተመቅደስ ወጥታ  የማታውቀው የምትኖርበትን ከተማ እንኳን የማታውቀው ድንግል ሆይ በሰው ሀገር በየት ይሆን የምሸሸው እያልች መጨነቋን በማሰብ አብሬያት መጨነቅ ተስኖኛል። ሊቁ "ርዕዮ ለይብኪ ዐይነ ልብ ዘቦ" እንዳለ የልብ ዐይን አጥቻለሁና መከራሽን አይቼ አለቅስ ዘንድ የልብ ዐይንን አድይኝ። እስከዛው የሊቁን ልቅሶ ልቅሶዬ አድርጌ እንዲህ እላላለሁ፦ "የራሴ አክሊል የሱፍ አበባ ማርያም ሆይ፤ በበርሓው የፀሐይ ሐሩር እንዳንቺ  ልቃጠል።"

በዲ/ን በረከት ንጉሤ
https://t.me/awde_Beki

የገነትን ደጅ የከፈታት ማን ነው?

ያቺ በአባታችን አዳምና በእናታችን ሔዋን በደል ተዘግታ የነበረችውን የገነትን ደጅ ማን ከፈታት? ሱራፊ በእሳት ሰይፍ እየጠበቃት ተዘግታ የኖረችዋ የተድላ ደስታ ስፍራዋን ገነትን ማን ከፈታት? ሲል ሊቁ አባ ጽጌ ድንግል ይጠይቃል። እውነትም ግን በአምላክ ላይ በማመጽ በመፈንቅለ አምላክ ሙከራ ምክንያት የተዘጋችውን የገነትን ደጅ ማን ከፈታት? ሊቁ ጠይቆ ብቻ አያቆምም መልሱን አስቀድሞ ከላይ እንዲህ ሲል መልሶልናል፦ ከአንቺ ጽድቅ ውጪ የገነትን ደጅ የከፈታት ማን ነው። የገነት ደጅ የተከፈተው በእመቤታችን ጽድቅ መሆኑን አስረግጦ ይነግረናል።

ይህ ገነትን ያስከፈተ የቀድሞውን በደል የካሰ ጽድቅ እንዴት ያለ ነው? መልሱም ይኸውም ጽድቋ የማኀጸኗ ፍሬ ኢየሱስ ክርስቶስ ነው። ስለምን ጽድቋ ብሎ ጠራው ከተባለም ከሥጋዋ ሥጋን ከነፍሷም ነፍስን ነስቶ ከርሷ የነሰውንም ሥጋውን ቆርሶ ደሙን አፍሶ በደሙ ማኀተምነት የገነት ደጅ ተከፍቷልና ጽድቅሽ ብሎ ጠራው። አንድም በንጽሕና በቅድስና ሆና ቢያገኛት በጽድቋ ምክንያት ከእርሷ ለመወለድ መርጧልና የአምላክ ከእርሷ መወለድ ከእግዚአብሔር ሁሉን ቻይነት ቀጥሎ የእርሷ በጽድቅ(በንጽሕና በቅድስና) መገኘት አስፈላጊ ነውና ጽድቅሽ ሲል ጠርቶታል። ይህ መዐዛ ቅድስናዋ መዐዛ ንጽሕናዋ የፍጥረታትን ንጉስ የገነትን ጌታ ወደምድር ሳበው። ከበደለው ከሰው ልጅ ጋርም አስታራቀው። የገነትን ፈጣሪ ወደዚህ ምድር ከሳበው ከሰው ጋር ካስታረቀው ከዚህ ከጽድቅሽ በቀር የገነትን ደጅ የከፈታት ማን ነው ሲል ነው ሊቁ።በዚህ ጽድቅሽም አዳም ወደ ቀድሞ ስፍራው ወደ አበባዋ ምድር ወደ ተድላዋ ስፍራ ገነት ተመለሰ እናታችን ሔዋንም አጥታው የነበረውን ገነት አግኝታለችና ከገነት ጣዕም የተነሳ በደስታ ዘለለች።

       ድንግል ሆይ እኛም ዛሬ በኃጢአታችን ምክንያት ዘወትር የምንዘጋትን የገነት ደጅ የሚከፍትልን ከአንቺ ጽድቅ በቀር ማን ነው? ስለዚህ ቸል አትበይን አትተይንም የገነትንም ደጅ ምሪን  መንገዱን ዘንግተናዋልና ፍለጋዋንም ጠቁሚን በዓለም ማዕበል በመባዘን መንገዷን ስተናልና። የገነትን ደጅ ዘግቶ የምትገለባበጥ ሰይፍ ሆኖ እንዳንገባ የሚከለክለን ኃጢአታችንንም ከእኛ አርቂልን ወደ ቀደመ ሥፍራችን እንገባ ዘንድ እንደ እናታችን ሔዋንም ከደስታ ብዛት ለመዝለል ያበቃን ዘንድ የገነትን ደጅ በጽድቅሽ ክፈቺልን የገነትን መዐዛዋን አሽትተን እንታደስ ዘንድ የገነትን ጣዕም አቅምሽን የገነትን ደጅ የሚያስከፍት ምንም ጽድቅ በእኛ ዘንድ የለምና።

     ወደ ቀደመ ነገራችን እንመለስና የገነትን ደጅ ነገር እንመርምር የሊቁ ምሥጢር በዚህ ብቻ የሚያበቃ አልመሰለኝምና ግሩም የሆነውን ይህንን ምስጢር እንረዳ ዘንድ አምላካችንን እንለምነው የተሰወረውን የሚያውቅ ምስጢርን የሚገልጥ እርሱ ነውና እንማጸነው። ይህች የገነት ደጅ ሯሷ ድንግል ማርያም ናት። በር ከውጭ ያለው ወደ ውስጥ እንዲገባ ምክንያት እንዲሆን ከገነት ውጭ የነበርን እኛ በእርሷ ምክንያት ወደ ገነት ገብተናልና  ወደገነት የገባንባት የገነት ደጃችን እርሷው ናት። ጽድቅሽ ያለውም መድኀኒታችን ኢየሱስ ክርስቶስን ነው። ሊቁ"እንበለ ጽድቅኪ መኑ ለአንቀጸ ገነት ዘአርኀዋ" ማለቱ ፍጹም የሆነ የድንግልናዋን ነገር ማንሳቱ ነው። አስቀድሞ ሕዝቅኤል በትንቢቱ ከወደ ምስራቅ ያያት ከኃያላን ጌታ በቀር ማንም ያልገባባት በምስራቅ የተተከለችዋ ደጅ ገነቲቱ እመቤታችን ናት።

     ድንግለ ሆይ የገነትን መዐዛ እንናፍቃለንና የገነት መዐዛ የተባለ መዐዛሽን አሻችን በኃጢያት የከረፉውን ሰውነታችንን በመዐዛሽ ይታደስልን ዘንድ። በምልጃሽ ቁልፍነትም የገነትን ደጅ ክፈቺልን።

በጌጋየ አዳም ወሔዋን ሱራፊ ዘዐፀዋ
እንበለ በጽድቅኪ መኑ ለአንቀጸ ገነት ዘአርሃዋ
ተፈስሒ ድንግል መያጢተ አዳም እምጼዋ
በተዓምርኪ ውስተ ምድረ ነኪር አቲዋ
ከመ ጣዕዋ አንፈርዓፀት ሔዋ

ዲ/ን በረከት ንጉሴ

እንዴት ልከተልሽ?

የኔ እናት የጭንቅ ጊዜ ማለፊያዬ የመከራ ጊዜ መሸሻዬ ከስደቴ የማርፍብሽ ከሀዘኔ የምጽናናብሽ በጎዶሎዬ ሁሉ የምትሞይልኝ እናቴ የስደት ጉዞ መጀመርሽ እንዴት ያስደንቃል። ጨረቃን የተጫማሽ ስትሆኝ ስለሰው መዳን ስትይ በአሸዋው ግለት በባዶ እግርሽ መንከራተትሽን ሰምቶ የማይደነቅ ማን ነው? ለፍጥረት ሁሉ መጋቢ የሆነውን የሕይወት እንጀራን የተሸከመችው ድንግል ማርያም የተራበችውን ሔዋንን ታጠግብ ዘንድ በየሰው ቤት  ፍርፋሪን  ልመና ደጅ ጠናች። ሊቁ በቅኔቸው እንዲህ ብለው እንደተናገሩ፦
          "ማርያም ድንግል ዘኢትፈርህ ሐሜተ ፍርፋራተ ኀብስት ሰአለት በፍና እንዘ ትፀውር ሕብስተ፤ ሐሜት የማትፈራው ድንግል ማርያም የሕይወት እንጀራን ተሸክማ በመንገድ ላይ የእንጀራ ፍርፋሪን ለመነች።"

    የስደተኞች መጠጊያ ተሰደደች የሐዘንተኞች መጽናኛ አዘነች ለተራቡት የእንጀራ ገበታቸው እርሷ ተራበች የፊቷ ጸዳል ከፀሐይ ሰባት እጥፍ የሚያበራው  ያ ገጿ ስለሰው መዳን በግብጽ የአሸዋ ብናኝ ተሸፈነ ስለዚህ ስደትሽ ምን ማለት ይቻለኛል? ይህን ሀዘንሽን እንዴት መግለጽ ይቻላል? የመከራሽ መጠኑንስ ማንስ መረዳት ይችላል? ሊቁ በሰቆቃወ ድንግል ድርሰቱ እንደተናገረ የእመቤታችን መከራ በእንባ የሚጻፍ የሚያነበውም ወዮ እያለ የሚያነበው እንደሆነ ይናገራል ይህን የእመቤታችንን ሐዘን መረዳት የሚችለው የልብ ዐይን ያለው እንደሆነ ሲመሰክርም "ርእዮ ለይብኪ ዐይነ ልብ ዘቦ" ብሎ ተናግሯልና የልብ ዐይንን አድለሽኝ እያለቅስኩ አብሬሽ መሠደድን እመኛለሁ።

       ስደተኛይቱ ድንግል ሆይ በዚህ የመከራሽ ወቅት አብሬሽ መሠደድን እመኛለሁ። በስደትሽ እከተልሽ ዘንድ እሻለሁና እንዴት ልከተልሽ? በመከራዬ በሀዘኔ በችግሬ በጭንቀቴ ሁሉ እናቴ እንድልሽ በመከራ ጉዞሽ እንዴት ልከተልሽ? ከፊትሽ ቀድሜ ወደግብጽ ልሒድን? የበረኻውንስ ክበደት ተመልክቼ ልመለስን የመንገዱን ርዝመት ለክቼ ልንገርሽን? ከፊትሽ ቀድሜ ድንጋዮችን ላንሳልሽን? አቀበቱን ቁልቁለቱን የምትሔጂበት መንገዱን ላዘጋጅ? ሽፍቶች መኖራቸውንስ አይቼ ልምጣ? የግብጽ ሀገር ሰዎች ውሻ እንዳይለቁብሽ ቀድሜሽ ሔጄ ልመክትልሽ?ወይስ እግሬን ካንቺ ማስቀደሜን ልተው? በመከራዬ ቀን እናቴ ብዬ እንድጠራሽ በመከራሽ በስደትሽ እንዴት ልከተልሽ? እንደ አረጋዊዮሴፍ አብሬሽ ልከተል ዳገት ቁልቁለቱን  አብሬሽ ልንከራተትን? የበረሐውን ዋዕይ  የውሃውን ጥም የርኀብሽን መጠን ልካፈልን?አህያውን ልያዝ? በመከራዬ ቀን እናቴ እንድልሽ በመከራ ጉዞሽ እንዴት ልከተልሽ? ወይንስ እንደ ሠሎሜ ከኋላሽ ልከተል ስንቅሽን ልሸከም የረገጥሽውን ልርገጥ የሔድሽበትን ልሒድ የተጓዝሺውን ልጓዝን? በመከራሽ ሀገር በስደትሽ መንደር በእጄና በጀርባዬ ስንቅሽን ተሸክሜ ልከተልን? የሌሊቱን ቍር የቀኑንን ዋዕይ አብሬሽ ልካፈልን?እናቴ ሆይ መከራዬ የሚቀለው ባንቺው ነውና መከራሽን እንዴት ልካፈልሽ?እንደ ዮሳ ታምሜ በገሊላ ልቅርን አንቺን የመከተል አቅምን እስካገኝ ከህመሜ እስክድን ከአልጋ እስክነሳ በገሊላ ልቀመጥን? የሄሮድስን እቅድና ክፋት የሠልፈኛውን ዜና ይዤ ልድረስብሽን? ከስደት የማርፍሽ እናቴ በስደትሽ እንዴት ልከተልሽ? ከሀዘኔ የምጽናናብሽ እመቤቴ ሆይ ሀዘንሽን እንዴት ልካፈልሽ? ጭንቄን የማልፍብሽ መድኃኒቴ ሆይ ጭንቅሽን እንዴት ልጋራሽ? በመከራሽ ዘመን በስደትሽ ወቅት እንዴት ልከተልሽ?

      ሊቁ "ገብርኪሰ እመ ሀሎኩ በውእቶን ዓመታት እምፈተውኩ ይርከበኒ ምስሌኪ ስደት፤ እኔ አገልጋሽ ግን በእነዚያ ዓመታት ኑሬ ቢሆን ከአንቺ ጋር ብሰደድ በወደድሁ ነበር።" እንዳለ ካንቺ ጋር መሰደዱን እመኛለሁ በበረሓው የፀሐይ ሐሩር እንዳንቺ ልቃጠል። እንደ ሊቁ ምኞት የረገጥሽውን መሳም እመኛለው ያረፍሽበትን ዓለት መላስ እመኛለሁ የእንባሽ ጠብታ ያረፈባትን አፈር መብላትን እመኛለሁ። የገሊላ ሠዎች ሆይ እንቦሳይቱ ከበረቷ ወደየት ሔደች? ዜናዋን ንገሩኝ መንገዷን አሳዩኝ ወደ ሔደችበት ሁሉ በለቅሶ እከተላት ዘንድ የሔደችበትን ጠቁሙኝ የደረሠባን በልብ ዐይን አይቼ አለቅስ ዘንድ። የኢየሩሳሌም ቆነጃጅት ሆይ ማርያምን በቁስቋም ተራራ በጫካውም ካገኛችኋት በመከረኛ ዓለም በጭንቅ ያለሁ የጎስቋላ አገልጋዮን ልመናና ለቅሶ ትነግሯት ዘንድ በኃያሉ አምላክ ስም አምላችኋለሁ። በመከራዋ አብሬት ልሆን እመኛለሁና በስደቷ እንዴት ልከተላት? ሀዘኔን ጭንቀቴን መከራ ችግሬን ያቀለለችውና የምታቀለው እርሷ ናትና በስደቷ እንዴት ልከተላት?

"ድንግል ሆይ በመከራዬ ቀን እናቴ ብዬ እንድጠራሽ በመከራ ጉዞሽ እንዴት ልከተልሽ?"

ዲ/ን በረከት ንጉሴ
#ጽጌ_Challenge 1

"ስለ እኔ እንዳታስብ"

         ስለ ህጻናት ስናስብ ከምንም ቀድሞ ትውስ የሚለን የዋኀነትና ንጽህናቸው ነው አብሮም ከዚህ የሚመነጭ ጥያቄያቸውና ሀሳቦቻቸው ሊዘነጉ አይችሉም። በአንድ የአሜሪካ ትምህርት ቤት ህጻናቱ ለእግዚአብሔር የጻፋትን ደብዳቤ እየተመለከትኩ ብዙዎች ከጥያቄዎቻቸው የተነሳ የዋኀነታቸውን እየተመለከትኩ ፈገግ ማለትን ሳልተው ከመካከል ያለውን ዳኒ የተባለ የ6 ዓመት ህጻን የጻፈውን ደብዳቤ ተመለከትኩኝ እንዲህ ይላል። "ውድ እግዚአብሔር ስለ እኔ እንዳታስብ እሺ። ሁል ጊዜ መንገድ ስሻገር ግራና ቀኝ በደንብ አይቼ ነው።"

       ተመልከቱት ይሔን የዋህ ህጻን ግራና ቀኝ አይቶ መሻገር ስለቻለ ብቻ እግዚአብሔር  የማያስፈልገው መስሎታል።እርሱን በመጠበቅ ስራ እንዳይበዛበት እግዚአብሔር እንዳይሰቸግርው ሰግቷል በዛ ላይ አሁን እንዳደገና ለራሱ መሆን እንደሚችል ተሰምቶታል፤ ስለዚህ  እግዚአብሔርን ሊያሳርፈውና በራሱ ሊንቀሳቀስ ስለፈለገ እግዚአብሔርን ስለእኔ እንዳታስብ የሚል መልዕክትን ለእግዚአብሔር  ልኳል።

           ይህን መልዕክት ከአንድ የ6 ዓመት ልጅ ያገኘነው በመሆኑ በየዋህነቱ ፈገግ ብለን ብናልፈው። ይህ ዓይነቱ የልጅነት ጠባይ በእኛ ህይወት ውስጥም በተደጋጋሚ ይስተዋላል። በአቅማችን በችሎታችን በእውቀታችን ተማምነን በዚህ ነገርማ እግዚአብሔር አያስፈልገንም በሚመስል መልኩ ፈቃደ እግዚአብሔር ሳንጠይቅ የወሰናቸው ያረግናቸው ነገሮች ሁሉ ስለእኔ እንዳታስብ ካለው የህጻኑ ደብዳቤ ጋር አንድ አይነት ነው። ስለዚህ ይህ አይነቱን የልጅነት ጠባይ እንሻርና ወደ አለማወቃችንን በመመለስ አንተ ምረኛ እንበል ሳበኝ ከአንተም ኋላ እከተላለው ብለን እግዚአብሔርን እናስቀድመው። ወደየትንም እንደሚያሰማራን እንማጸን ጌታዬ ሆይ ወደየትስ ታሰማራኛለህ እንበል።

ጌታዬ ሆይ ወደየት ታሰማራኛል? ሳበኝ ከአንተም ኋላ እከተላለሁ። ስለዚህም ስለ እኔ በመጨነቅ አንተ ምራኝ።

ዲ/ን በረከት ንጉሴ
መስከረም 18/2017     
https://t.me/awde_Beki