Иқбол МИРЗО шеърлари @iqbol_mirzo_ijodi Channel on Telegram

Иқбол МИРЗО шеърлари

@iqbol_mirzo_ijodi

Ҳурматли канал кузатувчилари! Бу ерда Ўзбекистон халқ шоири Иқбол МИРЗОнинг шеърлари, шоир ижодидаги янгиликлар, фото ва видео тасвирлар билан танишиш имкони мавжуд.

Иқбол МИРЗО шеърлари (Uzbek)

Ҳурматли канал кузатувчилари! "Иқбол МИРЗО шеърлари" каналида Ўзбекистон халқ шоири Иқбол МИРЗОнинг энг зур шеърлари, шоир ижодидаги янгиликлар, фото ва видео тасвирлар билан танишингиз мумкин. Ушбу каналда Иқбол МИРЗОнинг танинган ва танимаган шеърлари билан танишганда, унинг тартибига фон кўрасиз ва тадқиқ этиш имкониятини топасиз. Иқбол МИРЗОнинг шеърлари асосида ушбу канал фаолият кўрсатади ва шоирнинг ташқи ижоди хакида янгиликлар ёзилади. Бу ерда Ўзбекистон шоирларнинг улуҳиётли представительларининг ижодига ишонч киритганлик суратдаги шеърлари ва танинган шеърлари кўрсатилади. Сизга Иқбол МИРЗОнинг энг зур шеърлари ва шоир ижодидаги янгиликлар муким қилинган мавзуда фото ва видео тасвирлар билан танишиш имкониятини берувчи маҳсулот тақдим этилади. Сизга ташкил этилган бу каналга аъзо бўлиш омад эга бўлишини тилаймиз!

Иқбол МИРЗО шеърлари

14 Feb, 06:15

14 февраль — шоҳ ва шоир Заҳириддин Муҳаммад Бобур таваллуд топган кун.

“БОБУРНОМА” ИЛҲОМИ

Замон фарроши бўлсайдим, шу замонни супургайдим,
Димоғимга тутиб енгим, тўрт томонни супургайдим.

Супургайдим ҳаром луқма, ҳаром айшу тарабларни,
Супургайдим ҳам товоқни, ҳам қозонни супургайдим.

Ювардим кул билан ойни доғидан холи бўлгунча,
Исларини узиб, юлқиб-ки осмонни супургайдим.

Кўзёшимдан сепиб сувлар гузарларга, кўнгилларга,
Хиёнатни, ҳасад, ўчни ва гумонни супургайдим.

Супургайдим хурофотни, жаҳл, худбин раёсатни,
Ўрлатиб чангини кўкка оломонни супургайдим.

Кичик Мирзо бўлиб Иқбол улусга яхшилиқ айлаб,
“Ёмонлиқ бўлмағай бўлғай” ҳар ёмонни супургайдим.

✍️ Иқбол МИРЗО
530
Иқбол МИРЗО шеърлари

13 Feb, 03:30

ҚОРА РЎЙХАТ

Шўро замонини эсларсиз балким,
Бир рўйхат бўларди – аждаҳо коми.
Қизил қолипларга тушмас эса ким
Қора рўйхатларга тушарди номи.

Тақиқ муҳри тушар бўлса агарда,
Ҳатто марҳумлар ҳам топмасди омон.
Ўша рўйхатда ҳам Темур саркарда,
Ўша сафларда ҳам Бобуршоҳ сарбон.

Ким у рўйхатбоши? Ким у муҳрдор,
Маликлар устидан ҳукм чиқазган?
Ким у азизларни хўрлаган мурдор,
Ким у нурпош номни қорада ёзган?

Пешона экан-да, кўрдик кейинроқ,
Мезонларни бузиб кимки этса баҳс,
Кимки буюк бўлса, сурилди ногоҳ,
Рўйхатларга тушди кимки бўлса Шахс.

... эшиклар ёпилар юзларга таққа,
Тўнини тескари кияр матбуот.
Сен гўё оқ бўлдинг шу тахлит халққа,
Номинг қора бўлди гўё, одамзод...

Сургун қилинарми узлатга инсон,
Қулфлаб қўйиларми ғорга зоҳид ҳам?
Дўрмонда Абдулла Ориф дили қон,
Маҳзун жилмаяди Эркин Воҳид ҳам...

Рост бўлсин битгани мустабид замон!
Қора рўйхатларнинг қораси ўчсин!
Ошкора айтилсин ким бўлса ёмон,
Яхши бўлса номи юракка кўчсин!

Фақат... истиҳола бор пича бизда,
Шукр, йўқмиз қора рўйхатларида.
Фақат... не гина бор дўстларимизда,
Нега номимиз йўқ тўйхатларида?

Ҳамон чўнтакларда рўйхатлар борми,
Қонда қолганмикин шўравий иллат?
Биз қачон оқ деймиз сабуҳий қорни,
Қачон оқ от минар оқкўнгил миллат?

Тафаккур ҳурлиги – қутли иноят,
Бир учқун ялтирар юрак қатида.
Тўғри яшайвергин, бўлгайсан шояд
Азал Котибининг оқ рўйхатида.

Иқбол МИРЗО
818
Иқбол МИРЗО шеърлари

09 Feb, 07:38

НАВОИЙ

Навоий бу — кўламга кўра
Адоқсиз ва бениҳоядир.
Навоий бу — миллий мафкура,
Навоий бу — миллий ғоядир.

Аҳли аёл тутмабдир Ҳазрат,
Эл лол: «Қандай ҳаёт бўлади?»
Навоийни англаган миллат
Навоийга авлод бўлади.

✍️ Иқбол МИРЗО
3,091
Иқбол МИРЗО шеърлари

05 Feb, 11:32

БЕШЛИК

Зиғирнинг гулидек ёлғонга қарши,
Ёлғондан гуллаган инсонга қарши,
Инсонга айланган шайтонга қарши
Бош кўтармас бўлсанг бирор марта ҳам,
Қандай бош кўтариб юрасан, одам?!

✍️ Иқбол МИРЗО

2022
2,436
Иқбол МИРЗО шеърлари

30 Jan, 14:53

ЎТАР

Укам Валижонга

Руҳингни эзади чилла куйлари,
Мусиқа юракдан зор бўлиб ўтар.
Тошкентнинг ёмғири довондан нари –
Фарғона томонга қор бўлиб ўтар..

Фарғона томонлар туманли, лойли,
Тумани чиройли, лойи чиройли,
Во ажаб, бугун ҳам Кумуш ва Лайли
Сочлари белида дор бўлиб ўтар.

Мен нима ахтардим, нени изладим?
Кимга эрмак бўлди гўзал ҳисларим?
Синфдош қизларим, дилдош қизларим –
Кимларга кўнгилсиз ёр бўлиб ўтар.

Марҳум дўстни ўйлаб, ортади ғуссам,
Шум хаёллар ёвдек қайтади, қувсам.
Жўралар тизилиб келар кўз юмсам,
Бори йўқ, йўқлари бор бўлиб ўтар.

Ҳар ким ҳам ўзини чандон аяйди,
Савалаганда ҳам аяб савайди.
Ҳар кимса ўзини одам санайди,
Ўзининг юкига нор бўлиб ўтар.

Ҳар кимнинг ёмондир умр йўлдоши,
Эсиз йигит ёши, тузсиз нон-оши.
Фарзандига қараб эгилар боши,
Кенг дунё кўзига тор бўлиб ўтар.

Тошкентнинг ёмғири довондан нари –
Фарғона томонга қор бўлиб ўтар.
Кимга тоғ кўринса бировнинг қири –
Хор бўлиб, хор бўлиб, хор бўлиб ўтар.

✍️ Иқбол МИРЗО
3,259
Иқбол МИРЗО шеърлари

30 Jan, 07:00

БЕЧОРА

Укпардай қор ташлаётганди,
Лопилларди элакдек фалак.
Нигоҳимга ногоҳ илинди
Оқ капалак, оппоқ капалак.

Сибирда-я? Қора қишда-я?
Сенга ёлғон, менга эса чин.
У қор ора учарди қия
Пириллатиб нафис қанотин.

У бечора гул қидирарди,
У бечора... теварак яйдоқ...
Уни асраб қолсак бўларди,
Сен кўчага чиқмадинг бироқ.

✍️ Иқбол МИРЗО

1987
Томск
2,394
Иқбол МИРЗО шеърлари

27 Jan, 04:39

У ДУНЁ

У дунё ҳам чакки бўлмаса керак,
Ҳеч ким таърифини айтиб келмади:
Қанча инжиқ хотин, қанча қўрс эркак
Тўғри келмади, деб қайтиб келмади.

✍️ Иқбол МИРЗО
4,589
Иқбол МИРЗО шеърлари

25 Jan, 07:48

ЎЗИНГИЗНИ ЭҲТИЁТ ҚИЛИНГ
Қараганга қараманг, хоним,
Кўзингизни эҳтиёт қилинг.
Балки энди бўлмас имконим,
Ўзингизни эҳтиёт қилинг.

Оч нигоҳдан ва паст назардан,
Шарманда тор қилган шаҳардан,
Узук кўзидаги заҳардан
Ўзингизни эҳтиёт қилинг.

Бегонадир сизга ҳасратим,
Девонадир кўнгил ҳазратим.
Сизни мен ўзимдан асрадим,
Ўзингизни эҳтиёт қилинг.

Сиздан бошқа кимим бор бугун?
Дилим ҳуфтон, юрак-бағрим хун.
Бир илтимос, битта мен учун
Ўзингизни эҳтиёт қилинг.

Юрагимга эгизак қизни
Ўйлаб, адо бўлдим… ҳа, сизни…
Ўзи мени танияпсизми?
Ўзингизни эҳтиёт қилинг.

Сизни-ку бир тараф қўйганман,
Гуллар билан ўраб қўйганман.
Худодан ҳам сўраб қўйганман,
Ўзингизни эҳтиёт қилинг.

Санасангиз ҳамки етти ёт,
Эҳтиёт шарт қилдим эҳтиёт.
Жон сақладим сизни этиб ёд,
Ўзингизни эҳтиёт қилинг.

✍️ Иқбол МИРЗО
3,880
Иқбол МИРЗО шеърлари

24 Jan, 07:08

СОҒУНИЙ АРМОНИ

Барча хонни енгган ғолиб — дастурхон,
Ош ейман деганни егандир қурсоқ.
Қанийди, бирлашиб, бир мақсад томон
Ошга борган каби ошиқсак, ўртоқ...

✍️ Иқбол МИРЗО

2020
6,330
Иқбол МИРЗО шеърлари

22 Jan, 11:18

ТУМАНЛАРДА

Ёсуман деб қўйибдилар туманни,
Кўзлар хира, бод бўғинлар қақшайди.
Парда ташлаб, оширади гумонни,
Туманларда хўтик тойга ўхшайди.

Туманларда мудроқланар фаҳминг ҳам,
Ўз жонингга келиб кетар раҳминг ҳам.
Соя ташлаб лопиллайди ваҳминг ҳам,
Намиққан йўл қўнғир сойга ўхшайди.

Ўз тубини ёритолмас чироқлар,
Бир қадамда яқинларинг йироқлар.
Кўзёшисиз ҳўл бўлади яноқлар,
Ўз қишлоғинг ўзга жойга ўхшайди.

Дуо кетган Қўқон туманларига,
Учкўприги, Бувайдаси... барига.
Шўнғийсан-да номаълумлик қаърига,
Ҳар одимда ҳолинг войга ўхшайди.

Халққа раҳмат, тутақиш йўқ, ёниш йўқ,
Арзи-дод йўқ, минғир-синғир нолиш йўқ.
Уй солишда бир-биридан қолиш йўқ,
Тўйин кўрсанг, Тошкентбойга ўхшайди.

Изларингни ямлаб ютгай туманлар,
Туман-туман булут тутгай туманлар.
Бошимиздан қачон кетгай туманлар?
Туманларда қуёш ойга ўхшайди.

✍️ Иқбол МИРЗО

2021
3,530
Иқбол МИРЗО шеърлари

20 Jan, 08:04

ОНА ҚАДРИ

Онанинг дийдори офтобга тенглигин
Олисда юрганда биласан, бола.
Онанинг кимлигин, меҳрнинг нелигин
Онангни кўрганда биласан, бола!

✍️ Иқбол МИРЗО

2022
3,886
Иқбол МИРЗО шеърлари

14 Jan, 05:55

🌐@Iqbol_Mirzo_ijodi
3,947
Иқбол МИРЗО шеърлари

14 Jan, 03:55

БОТИРЛАР

Юртни мардлар қўриб келаётирлар,
Ватан деса, жони нисор ботирлар.
Баланд-пастни кўриб келаётирлар,
Бургутми ё лочинми, сор ботирлар.

Алпомишга Барчиндек ёр муносиб,
Сизни ўйлаб, қиз юраги потирлар.
Исмингизни юрар тумордек осиб,
Унутмангиз буни зинҳор, ботирлар.

Ботирлар-ов, элнинг сара аскари,
Сиз уйғоқ, эл осойишта ётурлар.
Тангри, ёвнинг юзин қилгин тескари,
Ёв дегани туллак, маккор, ботирлар.

Катта бобом қалам йўнган қиличда,
Найза билан қўшиқ ёзган шоирлар.
Бировга қўл узатмаган илинжда,
Кўмакка қўл берган такрор ботирлар.

Ботирларим толқонни тоғ демаслар,
Тоғни толқон қилишга ҳам қодирлар.
Саболарнинг йўлин тўсган эмаслар,
Бўронларга метин девор ботирлар.

Ўралмаса гулзор пайҳон бўлмасми,
Ўз боғини пулламасми шотирлар?
Кўздан қочирмайлик номард, нокасни,
Улар иблис билан ҳамкор, ботирлар!

Сиз оламдан ҳамиша огоҳ бўлинг!
Кимлар фурсат пойлаб писиб ётурлар.
Эл бахтига омон бўлинг, соғ бўлинг!
Ёнингизда Иқбол ҳам бор, ботирлар!

✍️ Иқбол МИРЗО
4,314
Иқбол МИРЗО шеърлари

13 Jan, 11:56

РАШК

Соқол қиртишласанг ҳам рашк,
Атир “пиш-пиш”ласанг ҳам рашк.

Маюс ўтирсанг бир бало,
Кулиб, ирғишласанг ҳам рашк.

Мавзу бўлғай қатиқчи қиз,
Тошқурут тишласанг ҳам рашк.

Сувпаридан хавотир бор,
Гар балиқ ушласанг ҳам рашк.

Уйқу назоратда, тавба,
Тушингда кишнасанг ҳам рашк.

Қўшиқчига қарсак урсанг
Ё сонга муштласанг ҳам рашк.

Бекор юрсанг қиёматдир,
Сенатда ишласанг ҳам рашк.

Ўлиб, кўклаб чиқиб бўлган
Артистни хушласанг ҳам рашк.

Ёшроқ кўринсанг ҳам савол,
Эрта кун “пишмасанг” ҳам рашк.

Рашшок хотинлардан қочиб
Дўрмонда қишласанг ҳам рашк.

✍️ Иқбол МИРЗО

2021
3,535
Иқбол МИРЗО шеърлари

10 Jan, 09:35

ОЗОДҚУЛ

Мен озод қулман. Ўзимда эрким,
Кўчага чиқаман, ишга бораман.
Мажлисларда яшайман эркин,
Товушсиз овоз бераман.

Ҳушим келса, китоб ўқийман,
Ёпаман келмаса хуш.
Эринмасам, эртак тўқийман,
Ё сизни кўраман туш.

Билагимдан қисмайди тақиқ,
Истасам, ўзимда ихтиёр.
Арвоҳлар қилмайди таъқиб,
Хоҳласам, бўламан бахтиёр.

✍️ Иқбол МИРЗО

2022
5,649
Иқбол МИРЗО шеърлари

08 Jan, 04:13

8 январь — Ўзбекистон халқ шоири, устоз Анвар Обиджон таваллуд топган кун

🌐@Iqbol_Mirzo_ijodi
4,126
Иқбол МИРЗО шеърлари

06 Jan, 09:19

САМАРҚАНД. СИРЛИ НИГОҲ

Самарқандни кезсанг, ажиб синоат,
Елкангга қўйгандек кимдир кафтини –
Ҳис қилаверасан бетиним, бот-бот,
Бир сирли нигоҳнинг илиқ тафтини.

Бу не ҳол? Не юмуш бажардинг, деган
Ялангтўш Баҳодир сўроқларими?
Ё энг олис юлдуз қатига етган
Улуғбекнинг тийрак нигоҳларими?

“Бизлар қурган эдик, шукур, болалар
Томоша-сайрга яраб турибди”, –
Уятдан ёноғи бўлиб лолалар –
Балки Бибихоним қараб турибди.

Ҳар қалай, шунчаки кўзлар эмас бу,
Юракка етгудек сеҳри бор ўхшар.
Толиб Алишербек лабида кулгу,
Ўсмирнинг самимий меҳри бор ўхшар.

Ҳар замон бир зотнинг замони бўлган,
Ҳирийда Шайбоқнинг бўзларими бу?
Фирдавсмонанд шаҳар армони бўлган
Бобурбекнинг ўткир кўзларими бу?

Син солиб термулар бир соҳир нигоҳ:
“Кимсан? Матлабинг не? Сўйла, ғофил кас?”
Йўқ, Темур кўзлари эмас бу, иллоҳ –
Темур нигоҳига бардош топилмас!

✍️ Иқбол МИРЗО
4,185
Иқбол МИРЗО шеърлари

31 Dec, 20:53

"Иқбол МИРЗО шеърлари" kanali uchun @TGStat'dan yil natijalari
3,887
Иқбол МИРЗО шеърлари

31 Dec, 19:26

ЯНГИ ЙИЛ

Қор заррасин тутиб қололмас нигоҳ,
Гоҳ зарра нигоҳдан бағрим тилинди.
Қор ёғсин – ёпилсин изларинг, гуноҳ.
Янги йил, яхши йил бўлиб кел энди.

Қорми – кул остида милтирайди чўғ,
Кетганлар жон узиб кетмаганлар, йўқ!
Сенга етганлар бор, етмаганлар йўқ,
Янги йил, яхши йил бўлиб кел энди.

Деҳқоннинг уйини тўлдир буғдойга,
Сабр бер мискинга, инсоф бер бойга.
Тинчлик, кўнглитўқлик шоҳу гадойга,
Янги йил, яхши йил бўлиб кел энди.

Қирқ йилда бир йигит келар оламга,
Йигит юрагимни кўмма аламга.
Яна қирқ йил хизмат қилай онамга,
Янги йил, яхши йил бўлиб кел энди.

Арчажон, юмшатгил игналарингни,
Кел, ташла, аразу гиналарингни.
Кўкка чиқай босиб зиналарингни,
Янги йил, яхши йил бўлиб кел энди.

Кўк тоқига ҳилолчироқ илинди,
Ёруғ ғуссаларга ошно дил энди.
Киприклар ҳам оппоқ атиргул энди,
Янги йил, яхши йил бўлиб кел энди.

✍️ Иқбол МИРЗО
5,842
Иқбол МИРЗО шеърлари

29 Dec, 23:17

***
Ановларга сен сир бой берма,
Урдим, дегин, лойга қордим, де.
Мени ташлаб кетди у, дема,
Жонга тегди, ҳайдавордим, де.

Иқбол МИРЗО
5,133
Иқбол МИРЗО шеърлари

28 Dec, 07:02

УСТОЗ ЭРКИН ВОҲИД САБОҚЛАРИ

Бир киши берди савол Дўрмонда юрган чоғлар:
“Не учун булбул кўринмас, майна кўп, ўртоқлар?”

Эркин устоз кулги бирла унга айди: “Эй жўра,
Сен бунинг боисини, бор, майнавозлардан сўра!”

✍️ Иқбол МИРЗО

2017

📱 Telegram | 🌐 Instagram | 🎞 YouTube
6,069
Иқбол МИРЗО шеърлари

28 Dec, 04:00

28 декабрь — Ўзбекистон Қаҳрамони, Ўзбекистон халқ шоири Эркин Воҳидов таваллуд топган кун

ҚАНДАЙ ЗЎР УСТОЗИМ БОР ЭДИ

Қандай зўр устозим бор эди, дўстлар,
Кибру ҳаво, ғийбат бегона эди.
Дурга айланарди у тутган сўзлар,
Эркин Воҳид эди – ягона эди.

Саломлар йўлларди турли давралар,
Эртага устозга айтаман, дердим.
Бир кун имкон бўлса, ишдан кетиб, шарт
Ёнига бутунлай қайтаман дердим.

Сиз кўрганмидингиз у зотни, дўстлар,
Сиз ҳам китобларин излармидингиз?
Синчков кўзларига тушганда кўзлар
Ҳазрат Навоийни эслармидингиз?

Ғўрман-да, ўтаман ғўралигимча,
Эл меҳрин устозга сўйламабман ҳам.
Тасаввур қилмабман кадарни ҳечам,
Бир кун кетади деб ўйламабман ҳам.

Улуғ шоирларнинг андуҳи буюк,
Сурури ҳам сиғмас Баҳри Муҳитга.
Eтти ёт оролда кумушсоч бир турк
Саломлар йўллади Эркин Воҳидга.

Азада тўкмаган ёш қалқди, дўстлар,
Дил сўзларни тезроқ айтгим келяпти.
Эртароқ тугаса қани бу сафар...
Устозим ёнига қайтгим келяпти...

✍️ Иқбол МИРЗО

2018

📱 Telegram | 🌐 Instagram | 🎞 YouTube
5,518
Иқбол МИРЗО шеърлари

26 Dec, 11:08

ҚЎШХАЁЛ

Отам билан мен бир супада,
Юлдуз живир-живир тепада.
Мени бир ўй ўйлантиради:
“Отам қачон уйлантиради?”
Отам ўйлар: “Ҳовли чолдевор,
Тўй қилишга ҳали пича бор”.
Юлдуз чақнар менинг ўйимда:
“Доллар сочсам, ўйнаб тўйимда”.
Оғир хаёл босар отамни:
“Учратсайдим Хизр – ҳотамни,
Ҳиммат қилса, сўйиб юзта қўй,
Бирор ҳафта берар эдим тўй”.
Тап-тап ерга тушар жоноқи,
Қалқиб кетар олманинг шохи.
Хаёлимда: “Асал қиз Гули,
Қопда эмиш отасин пули”.
Отам ўйлар: “Топволсам олтин,
Қаср солсам тўйдан ҳам олдин.
Қарасалар дўппини ушлаб,
Ғаним қолса бошига муштлаб!”
Мен ўйлайман: “Зўр нарса Нигор,
Отасининг мол бозори бор...”
Отам ўйлар: “Бўлиб бой ота,
Миниб юрсам тўйда Тойота.
Худо бизга изн берсайди,
Ҳоким бува қизин берсайди”.
Қўшни боғда “ҳммм” дейди новвос,
Хўрсинамиз бизлар жўр овоз.
Қандай яхши – саҳар паллада
Битта хаёл икки каллада.

✍️ Иқбол МИРЗО

2022

📱 Telegram | 🌐 Instagram | 🎞 YouTube
3,599
Иқбол МИРЗО шеърлари

23 Dec, 10:14

СИНАМА

Қиймалаб юракни, дўстни синама,
Қийнама эркакни, дўстни синама,
Мақсадинг нима, эй дўсти ғарибим?
Сенга дўст керакми? Дўстни синама.

✍️ Иқбол МИРЗО

2022

📱 Telegram | 🌐 Instagram | 🎞 YouTube
4,300
Иқбол МИРЗО шеърлари

20 Dec, 07:24

БАХТ

Икки ёш турмуш қурдик,
Бир ўғил-бир қиз кўрдик.
Нозаниндек аёлим,
Аёлимда хаёлим.
Аввал китоб ўқирди,
Тунлари шеър тўқирди.
Ғашим келар, на қилай?
Шоир хотин... ноқулай.
Бир кун дедим: “Бўлди, бас!
Шоиралик сенгамас.
Эр керакми, шеър керак?”
“Шеър керакмас... эр керак...”
Хуллас, шеърни ташлади,
Рўзғор гуллай бошлади.
Ўнгланди уй-жойимиз,
Қишлоқнинг энг бойимиз.
Бор кўлик, дўконимиз,
Очил дастурхонимиз.
Бахтми? Ўта бахтлимиз,
Уйғонамиз вақтли биз.
Ғизиллаймиз Қўқонга,
Мол ташиймиз дўконга.
Кундузи савдо – талаш,
Оқшомдан сўнг – пул санаш.
Обрў-эътибор, ҳай-ҳай,
Ўсар доллар курсидай.
Аммо... бахтни ҳар банда
Ҳар хил ҳис қиларкан-да:
Кечалари бетиним
Йиғлаб чиқар хотиним...

✍️ Иқбол МИРЗО

2022

📱 Telegram | 🌐 Instagram | 🎞 YouTube
5,775
Иқбол МИРЗО шеърлари

18 Dec, 12:31

КИБР

Осмон чумдугимда, дер эмиш лайлак,
Оёғи қамишу думи бир тутам.
Тоғга ўхшатармиш ўзини тезак...
Кибр сизга қайдан илашди, бўтам?

Биздан пинҳон хислат, сирингиз борми?
Хизр қўлин тутган пирингиз борми?
Ё ановга яқин ерингиз борми?
Кибр сизга қайдан илашди, бўтам?

Эгилса, синади такаббур нина,
Топдингизми нина чекиб хазина?
Ёки озиқтирган сизни ажина...
Кибр сизга қайдан илашди, бўтам?

Кибор кўришганда кўзга қарамас,
Гапга сўз танламас, сўзга қарамас.
Савобга ярамас, шундай, ярамас...
Кибр сизга қайдан илашди, бўтам?

Сувга ўзин солиб бақа маҳлиё,
Сиз сеҳрли кўзгу топдингизми ё?
Сиздан бошқа одам одаммас гўё...
Кибр сизга қайдан илашди, бўтам?

Сизга шифо тилаб, дилимда нидо,
Ахир сизсиз дунё бўлади адо.
Ўзингизни қилинг ўзингиз дуо...
Кибр сизга қайдан илашди, бўтам?

✍️ Иқбол МИРЗО

2022

📱 Telegram | 🌐 Instagram | 🎞 YouTube
6,032
Иқбол МИРЗО шеърлари

16 Dec, 04:35

МЕНИНГ ДАРДИМ

Салим Ашурга

Эрта келган ўхшар хазон фасли, Салим,
Новдаларда бемор юрак расми, Салим.
Атиргулни шеърга солиб улгурмадик,
Атиргул деб келган эдик асли, Салим.
Сенинг дардинг менинг дардиммасми, Салим?

Шамол ялаб адо қилган дуволмидик,
Тошлоққа туп қўёлмаган ниҳолмидик?
Қорда қолган қалдирғочдек уволмидик,
Осмон – юксак, замин – тубан, пастми, Салим,
Сенинг дардинг менинг дардиммасми, Салим?

Оқимга терс сузган наҳанг оқиб кетди,
Оғаларим зару зўрга оғиб кетди.
Ултон хўрлаб, илигимни чақиб кетди,
Балчиқдаги балиқ – қадриммасми, Салим,
Сенинг дардинг менинг дардиммасми, Салим?

Чилвир отиб, қад кўтарган токни кўрдим,
Асрий қора хат кўтарган зоғни кўрдим.
Оймомани даст кўтарган тоғни кўрдим,
Шавқи баланд соғлар мудом мастми, Салим,
Сенинг дардинг менинг дардиммасми, Салим?

Жувонмаргнинг қабрин қучиб, чим куяди,
Ёшин ютиб, жигарлари жим куяди.
Лек жувонмарг орзуларга ким куяди?
Хунни сўраб, кимдан олай қасдни, Салим,
Сенинг дардинг менинг дардиммасми, Салим?

Атиргулни тебратмаса, ел бўптими,
Хуш бўйларин таратмаса, гул бўптими?
Бир дард билан оғримаса, эл бўптими,
Бу дард биздан кўра қадиммасми, Салим,
Сенинг дардинг менинг дардиммасми, Салим?

✍️ Иқбол МИРЗО

📱 Telegram | 🌐 Instagram | 🎞 YouTube
3,525
Иқбол МИРЗО шеърлари

13 Dec, 10:19

ТАЖРИБА

Ҳаёт ўзи тенгсиз доно муаллим,
Тажриба инсоннинг мулки бўлади.
Арслон қариганда мушукдай ҳалим,
Бўри қариганда тулки бўлади.

✍️ Иқбол МИРЗО

2023

📱 Telegram | 🌐 Instagram | 🎞 YouTube
5,983
Иқбол МИРЗО шеърлари

11 Dec, 05:30

УЙҒОТ

Бир асрки, аччиқ дод-фарёд
Кечалари чарх урар, ҳайҳот!
Мудрамагин, кўзни оч, дўстим,
Ичингдаги жадидни уйғот.

Жувонмарг ул боболар ҳаққи,
Болам, деган нидолар ҳаққи,
Ўққа учган дуолар ҳаққи
Ичингдаги жадидни уйғот.

Юрагингнинг тубида нур бор,
Нурга чўмган капалак – ҳур бор.
Қутқар уни, ҳовучлаб қўйвор,
Ичингдаги жадидни уйғот.

Беҳбудийнинг қони қонингда
Жўш уради тийрак онингда.
Уйғоқ нуқта бордир онгингда,
Ичингдаги жадидни уйғот.

Кўзи очиқ ухлаётган зот,
Тубсизликка қулаётган зот,
Омонатдир сенга бу ҳаёт,
Ичингдаги жадидни уйғот.

У уйғонса, чекинар зиллат,
Йўқ бўлади бидъату иллат.
У уйғонса, уйғонар миллат,
Ичингдаги жадидни уйғот.

Боболаринг китоблар ортган
Карвонларни эл аро тортган.
Улар одамзотни уйғотган,
Ичингдаги жадидни уйғот.

Кўзларингни қачон босди гард?
Қайдан келди ғафлат деган дард?
Сен дунёни қутқаришинг шарт,
Ичингдаги жадидни уйғот.

✍️ Иқбол МИРЗО

2024

📱 Telegram | 🌐 Instagram | 🎞 YouTube
5,054
Иқбол МИРЗО шеърлари

06 Dec, 08:50

Пойтахтимиздаги "Ғалаба боғи"да Маърифат уйи очилди.
3,776
Иқбол МИРЗО шеърлари

06 Dec, 06:00

ЎҚ

“Қатағон қурбонлари” музейида бир ўқ кўргазмага қўйилган

Шу ўқ атрофида айланиб қолдим:
Икки мисқол келар-келмас қўрғошин.
Тирноқдек шу маъдан юз йилча олдин
Мунавварқорининг егандир бошин...

Не дилбар зот эди Қодирий ҳазрат!
Отабеги ўққа учганми ё йўқ?
Ҳазрат юрагида орзулар қат-қат,
Шуларнинг ёнида қолгандир шу ўқ.

Қумри "ҳуғу"лаган салқин куз шоми
Қарсиллаган садо ойни титратди.
На "бисмилло"си бор ва на-да "омин"...
Шайтон шаҳид қилди домла Фитратни.

Ташқари чиқаман. Осмон тубидан
Мўлжал олиб учар юлдуз мисли чўғ.
Малъун оқшоммиди, мудҳиш субҳидам,
Чўлпон жигарини тешгандир шу ўқ.

Далилий ашё бу, рақамланган, рост,
Кўриб-кўрмай ўтар сиполар, шўхлар.
Оёқлар остида писмиқ, беовоз
Сизни кузатади зериккан ўқлар.

Шу ўқ атрофидан кетолмай қолдим...
Юз йилки, учишга шайланади Ер.
Лекин иложи йўқ, бошин эгиб жим
Шу ўқ атрофида айланади Ер.

✍️ Иқбол МИРЗО

2024

📱 Telegram | 🌐 Instagram | 🎞 YouTube
4,268
Иқбол МИРЗО шеърлари

05 Dec, 05:35

ОДДИЙ АРИФМЕТИКА

Тахтага суркалиб уваланар бўр,
Ҳиcоб-китоб оддий, ечими содда.
Тўққизга бешни қўш – бўлади ўн тўрт,
Тўртини ёзамиз
ва бири ёдда.

Бир думалаб “олти” бўлади “тўққиз”,
Aғдарсанг “икки”га айланар “беш”инг.
Ўйланар биринчи партадаги қиз,
Унинг ўйламига кириш ташвишинг.

Бесўроқ йилларга қўшилди йиллар,
Aрмонлар кўпайди, йўлни қайирди.
Қайси кун иккига бўлинди диллар,
Қайси қонун сени мендан айирди?

Қайдасан, биринчи партадаги қиз?
Қарашлари тоза, самимий, содда.
Тенгдошлар, дафтарга ёзиқ исмингиз,
Фақат бири дилда,
биттаси ёдда...

✍️ Иқбол МИРЗО

1998
4,048
Иқбол МИРЗО шеърлари

02 Dec, 09:08

КЎЗИМГА ИШОНМАЙМАН

Сочинг булоқ сувидек бармоғим аро тошди,
Вужудинг шамол каби қучоғим аро тошди.
Ҳилолни чилтор этиб, кипригинг чалди чолғу,
Юрагим селоб бўлиб, қароғим аро тошди:
«Кўзимга ишонмайман, наҳотки ўзингсан шу?!»

Биринчи бор кузатдим нур сирғалиб оқишин,
Биринчи бор чақмоққа тўлдирдим қиз оғушин.
Биринчи бор аламсиз руҳга қоришди ёғду.
Биринчи бор ўзимга ёқиб қолди товушим:
«Кўзимга ишонмайман, наҳотки ўзингсан шу?!»

Тунги чорбоғда анор тисирлаб ёрилади,
Энг сара доналари тупроққа қорилади.
Дилгир ётарман тинглаб, кўзга келмайди уйқу,
Наҳот мудом камолдан заволга борилади?
«Кўзимга ишонмайман, наҳотки ўзингсан шу?!»

Гоҳи шундайки, ўша чоғни топмоқ мумкиндай,
Ўшандай қучмоқ яна, шундай ўпмоқ мумкиндай,
Яна кўрмоқ мумкиндай лабингда тоза кулгу,
Жавоби шарт бўлмаган гўзал сўроқ мумкиндай:
«Кўзимга ишонмайман, наҳотки ўзингсан шу?!»

✍️ Иқбол МИРЗО

1996

📱 Telegram | 🌐 Instagram | 🎞 YouTube
3,594
Иқбол МИРЗО шеърлари

28 Nov, 05:12

📺 «Изларим» телекўрсатувининг Ўзбекистон халқ шоири Иқбол Мирзо ҳаёти ва ижодига бағишланган сони

📱 Telegram | 🌐 Instagram | 🎞 YouTube
7,777
Иқбол МИРЗО шеърлари

22 Nov, 10:43

ПАРИ ҲАҚИДА ҲИКОЯ

Билагингдан, лабингдан
Бинафша бўйи келар.
Йиғи келар қалбимдан,
Бўғзимни ўйиб келар.

Қайда эртаклар юрти,
Қай томонда Хоразм?
Фироқ жонимдан ўтди,
“Галди сани гўрасим”.

Тола сочинг куйдирдим,
Учиб келдинг. Серзарда.
Мен жим турдим. Тек турдим.
О, агарда, агарда..!

Дердинг: “Нетаётирсан,
Мени тинч қўй, илтимос.
Сен бор-йўғи шоирсан,
Яъни одамсан, холос!”

Менга текканди пари,
Йўқ, тўғриси, жин чалди.
Пирпиради лабларим:
“Сани гўрасим галди...”

Ҳайрон турдинг. Бўшашдинг,
Чақилди ишқ чақмоғи.
Мен ошиқдим. Мен шошдим.
Гулга тўлди қучоғим.

Билагингдан, лабингдан
Бинафша бўйи келди.
Бир ўт чиқди қалбимдан,
Томоғим куйиб келди.

Шивирладинг: “Шоирим,
Ишқ ёлғондир, йиғингил.
Муҳаббатнинг охири
Пушаймондир, йиғингил”.

Сочинг юзимга сурдим,
О, кўзимнинг қораси.
Қайда эртаклар юрти,
Қай томонда Хоразм?

Тонгда фироқ муқаррар,
Ҳижрон кутар саҳарда,
Бирга ичайлик заҳар,
О, агарда, агарда..!

...Парилар ҳийласини
Билмас одам боласи.
Кўйлагим тугмасига
Боғланган соч толаси...

✍️ Иқбол МИРЗО

1995

📱 Telegram | 🌐 Instagram | 🎞 YouTube
5,138
Иқбол МИРЗО шеърлари

19 Nov, 11:21

ЧИРОЙЛИ ҚИЗ ҲАҚИДА ҲИКОЯ

Сен чиройли қиз эдинг,
Сен чиройли кулардинг.
Сал хунукроқ бўлсайдинг,
Ўзимники бўлардинг.

Мен кетаман, гулғунча,
Қараб қолмагин, дедим.
Мен муродга етгунча
Қариб қолмагин, дедим.

Висол нима, дедим мен,
Ҳижрон керак шеър учун,
Қийноқ керак шеър учун
Армон керак шеър учун.

Қаттиқ боқдинг сўнгги пайт,
Лабинг титради лекин:
“Яхши кўрасанми, айт,
Яхши кўраман, дегин!”

Ўйин қилдим, кўнглингни
Капалакдек ҳайдадим.
Сендан топган сўзимни
Чайнаб ютдим, айтмадим.

Хайр, қишлоқ, мен кетдим
Орзули кўнглим билан,
Севгим кўзин беркитдим
Қаламли қўлим билан.

Атай қилдим ҳаммасин,
Атай сени куйдирдим.
Очилди шеър саҳнаси –
Бари ёлғон, уйдирма.

Билиб туриб кечдим мен
Энг чиройли оламдан.
Аросатга тушдим мен –
На шоир, на одамман.

Қалбқозон қайнай-қайнай,
Қуюлди, чўкди секин:
“Яхши кўрасанми, айт,
Яхши кўраман, дегин!”

Умр кетгани сари
Йўқлигинг сезилади.
Сени ўйлаб тунлари
Юрагим эзилади.

Уйимга келди бойлик,
Етаклади омадим.
Аммо сендан чиройли
Ва ғамгин шеър топмадим.

Мен ким эдим, не учун
Шунча йўлим қарадинг?
Хазон бўлдинг мен учун,
Мени кутиб қаридинг.

Салом, қишлоқ, мен келдим
Аламли кўнглим билан.
Ёнимда хушнуд келин,
Эркатой ўғлим билан.

Оқшом пайти кўчадан
Бир товушни илғадим,
Туриб оёқ учида
Юрак ютиб тингладим.

Кимдир менинг ўғлимни
Эркаларди, суярди.
Миттигина қўлини
Ўпиб-ўпиб қўярди.

Бир гап сўрарди тинмай,
Жавоб кутмасди лекин:
“Яхши кўрасанми, айт,
Яхши кўраман, дегин!”

✍️ Иқбол МИРЗО

1995
4,739
Иқбол МИРЗО шеърлари

18 Nov, 04:52

🇺🇿 ЎЗБЕКИСТОН БАЙРОҒИ

Қалбимиз тўла сурур,
Тўтиё юрт тупроғи.
Ҳилпираб турар мағрур
Ўзбекистон байроғи.

Ранги – ҳаёт мисоли,
Юлдузлари, ҳилоли.
Мустақиллик тимсоли —
Ўзбекистон байроғи.

Гумбазларда, юксакда,
Пештоқларда, фалакда,
Кўнгилларда, юракда
Ўзбекистон байроғи.

Ифтихор дилимизда,
У йўлдош йўлимизда,
Юксалар қўлимизда
Ўзбекистон байроғи.

✍️ Иқбол МИРЗО
5,471
Иқбол МИРЗО шеърлари

15 Nov, 15:33

ЭСИНГИЗГА КИМЛАР ТУШДИ

Маржон-маржон турналарга термулдингиз,
Сўнг паришон хўрсиндингиз, сўнг кулдингиз.
Лекин кулги хўрсиниқдан оғир бўлди,
Хаёлингиз қайга учди, билолмадим,
Эсингизга кимлар тушди, билолмадим.

Турна сафи пайкон каби кетди тамом,
Яна нени излаяпсиз кўкдан ҳамон?
Кўзингизга тушган томчи – ёмғир бўлди,
Нигоҳингиз нени қучди, билолмадим,
Эсингизга кимлар тушди, билолмадим.

Сўрай десам, биламанки, алдагайсиз,
Эсим-ҳушим, муҳаббатим сенда, дейсиз.
Кўзёш томиб ишқ шароби тахир бўлди,
Мажнун уни қандоқ ичди, билолмадим,
Эсингизга кимлар тушди, билолмадим.

Наҳот менга йўлдош бўлса ёлғон севги,
Қачонлардир, кимлардандир қолғон севги.
Наҳот ҳаёт шунчалар тошбағир бўлди,
Не деб ўзни овутишни билолмадим,
Эсингизга кимлар тушди, билолмадим.

Бошқа қизда эди менинг кўнглим ахир,
Мана мен ҳам айрилмоққа кўндим ахир.
Сизни менга боғлаб қўйган тақдир бўлди,
Бу ўнгимми ёки тушми, билолмдим,
Эсингизга кимлар тушди, билолмадим.

✍️ Иқбол МИРЗО
4,638
Иқбол МИРЗО шеърлари

13 Nov, 05:38

13 ноябрь — ўзбек халқининг буюк шоири Усмон Носир таваллуд топган кун

УСМОН НОСИР

Мен дунёдан кўз юммадим, йўқ,
Дунё юмди мендан кўзини.
Сўзлар – курагимга ботган ўқ,
Дўстлар аямаслар сўзини.

Ватаним, мен сени севардим,
Кел, лабларим босайин, тупроқ.
Тупроқ, сен биларсан не дардим,
Ўзим сенга ўхшайман кўпроқ.

Замон, сенга қўлларим керакми,
Оёғим керакми? Мана, ол!
Мен байроқ қилганман юракни,
У – дастурхон. Дастурхон – ҳалол.

Юртим, қора киймагин зинҳор,
Йиғлама, бағримни ўйма.
Туғилмаган усмонларинг бор,
Ўшаларни бой бериб қўйма!

Дунё, кўзларингда не қайғу,
Ё англаб етдингми ўзингни?
Мен ахир кўзимни юмдим-ку!
Сен энди очдингми кўзингни?!

✍️ Иқбол МИРЗО

19.IX.1988

📱 Telegram | 🌐 Instagram | 🎞 YouTube
6,559
Иқбол МИРЗО шеърлари

08 Nov, 08:06

🎭 16 ноябрь куни Ўзбекистон халқ шоири Иқбол Мирзо асари асосида композитор Беҳзодбек Турсунбоев томонидан басталанган "Усмон Носир" опера-ораториясининг премьераси бўлиб ўтади.

Барчани намойишга таклиф этиб қоламиз.

🏛 Ўзбекистон давлат консерваторияси
⏰ 18:00

📱 Telegram | 🌐 Instagram | 🎞 YouTube
5,627
Иқбол МИРЗО шеърлари

05 Nov, 09:58

🎧 ДЕРАЗА ПАРДАСИ

🎤 Охунжон МАДАЛИЕВ
✍️ Иқбол МИРЗО

📱 Telegram | 🌐 Instagram | 🎞 YouTube
4,726
Иқбол МИРЗО шеърлари

05 Nov, 09:52

ДЕРАЗА ПАРДАСИ

Дераза пардаси елкандай шишди,
Яна сени ўйлаб кўнглим увишди.
Сени олиб кетди қайси дарёлар?
Ҳамроҳинг бўлдилар қандай саболар?

Хонамга настарин бўйи бўйлади,
Сочлари райҳоним, сени ўйладим.
Бўйинг тўкилдими олис боғларга?
Кўнглинг кўникдими қарға, зоғларга?

Каптарлар бир-бирин суйиб ўпишди,
Хаёлим сен томон қуш бўлиб учди.
Сен нечун кетдинг, мен нечун кетказдим?
Қанотимга ўзим шикаст етказдим.

Дераза рахига бошимни қўйиб,
Ўйладим, ёмғирсиз ўтдими тўйинг?
Йиғламадим, фақат хўрсиндим холос,
Боладек жимгина ўксиндим холос.

✍️ Иқбол МИРЗО

📱 Telegram | 🌐 Instagram | 🎞 YouTube
6,407
Иқбол МИРЗО шеърлари

31 Oct, 06:22

🇺🇿 ОТА ТИЛИМ, О, ОНА ТИЛИМ!
✍️ Иқбол МИРЗО

📱 Telegram | 🌐 Instagram | 🎞 YouTube
4,008
Иқбол МИРЗО шеърлари

30 Oct, 05:15

📝 АЛВИДО

✍️ Иқбол МИРЗО
🎙 Дийдора ҲОЖИЕВА

📱 Telegram | 🌐 Instagram | 🎞 YouTube
4,437
Иқбол МИРЗО шеърлари

28 Oct, 10:19

АЛВИДО

Алвидо, эй хуш хаёлларим,
Сизни чангдай пуфлаб учирдим.
Ҳаёт, сизга йўқ саволларим,
Ҳаёт, ҳаммасига тушундим.

Енгим билан артдим ёшимни,
Кўз олдимдан тарқади туман.
Энди юртнинг гулу тошини
Ақл кўзи билан кўраман.

Кечагина ҳув элас-элас
Юлдуз менинг дея ўйлардим.
Титроқ эмас, қалтироқ эмас,
Мен қалдироқ бўлиб куйлардим.

Юзларимга сув урди само,
Сескандиму ўзимга келдим.
Кимлигимни сездим аввало,
Кейин ҳеч киммаслигим билдим.

Бу камолми ёки заволим,
Қуврадимми ё қайта ундим,
Ҳаёт, сизга йўқдир саволим,
Ҳаёт, гапингизга тушундим.

✍️ Иқбол МИРЗО

1995

📱 Telegram | 🌐 Instagram | 🎞 YouTube
4,276
Иқбол МИРЗО шеърлари

24 Oct, 17:02

📝 ЖАДИДЛАР ЕТИШМАЯПТИ

✍️ Иқбол МИРЗО
🎙 Аҳмаджон ҳожи ИСМОИЛОВ

📱 @Iqbol_Mirzo_ijodi
4,759
Иқбол МИРЗО шеърлари

23 Oct, 08:35

АЗОБЛАРИМ

Набижон акага

Ҳилол янглиғ очиқ қолди сўроқларим,
Еллар қувнаб-қувнаб титди вароқларим.
Ўйнаб-ўйнаб тўкилдилар япроқларим,
Япроқларим бирин-кетин кетаверди,
Кетган сари азобларим ортаверди.

Жилға бўлиб етолмадим дарёларга,
Турна бўлиб кетолмадим самоларга,
Карвон бўлиб кўмилмадим саҳроларда,
Карвонларим турнақатор ўтаверди,
Ўтган сари азобларим ортаверди.

Чанг тегмаган гул кўрмадим гулзорларда,
Бир покиза дил кўрмадим дилдорларда,
Бу дилдорлар қатор туриб бозорларда
Кўнгилларин матоҳ каби тутаверди,
Тутган сари азобларим ортаверди.

Ота уйим эшигида чим бўлмадим,
Сўритокни боғлаган бир сим бўлмадим,
Биродарлар, ким бўлдим мен, ким бўлмадим?
Онам юзим унутса-да кутаверди,
Кутган сари азобларим ортаверди.

Энди, айтинг, мен қарими, отам қари?
Мен отамдан кўра сўнгги йўлга қарийб.
Дилим ўлди фожеамдан шеър ахтариб,
Пешонамга ҳаёт шеърлар битаверди,
Битган сари азобларим ортаверди.

✍️ Иқбол МИРЗО

📱 Telegram | 🌐 Instagram | 🎞 YouTube
5,082
Иқбол МИРЗО шеърлари

21 Oct, 13:38

🇺🇿 Ота тилим, о, Она тилим!
✍ Иқбол МИРЗО

📱 @Iqbol_Mirzo_ijodi
5,009
Иқбол МИРЗО шеърлари

21 Oct, 11:17

❗️
Ona tilim o‘lmaydi!

O‘zbek tiliga bag‘ishlangan she’rlar va hikmatli so‘zlar

✍️ Alisher NAVOIY
✍️ Abdulla AVLONIY
✍️ Alixontoʻra SOG‘UNIY
✍️ Ismoil G‘ASPRALI
✍️ Ahmad Zakiy VALIDIY
✍️ Abdurauf FITRAT
✍️ Abdulla QODIRIY
✍️ Abdulla QAHHOR
✍️ ELBEK
✍️ MIRTEMIR
✍️ Jumaniyoz JABBOROV
✍️ Erkin VOHIDOV
✍️ Abdulla ORIPOV
✍️ Rauf PARFI
✍️ Halima XUDOYBERDIYEVA
✍️ Saʼdulla HАKIM
✍️ Shukur QURBON
✍️ Xurshid DAVRON
✍️ Muhammad YUSUF
✍️ Sirojiddin SAYYID
✍️ Odil IKROM
✍️ A’zam O‘KTAM
✍️ Eshqobil SHUKUR
✍️ Zebo MIRZO
✍️ Iqbol MIRZO
✍️ G‘ayrat MAJID
✍️ Jo‘rabek RAMAZON
✍️ Dadaxon MUHAMMADIYEV
✍️ Islom QO‘CHQOROV
✍️ Mansur JUMAYEV
✍️ Navoiylik ALISHER
✍️ Shohsanam NISHONOVA
✍️ Charos BURHON
✍️ Quddus ASAD
✍️ Nilufar ERGASHEVA

✅Jadidmedia’ga obuna bo‘ling
4,688
Иқбол МИРЗО шеърлари

21 Oct, 06:37

🇺🇿 ОТА ТИЛИМ, О, ОНА ТИЛИМ

Қат-қатингда кўринур феълим,
Юрагимсан, қалбим ва дилим.
Бирлаштирдинг, халқ бўлди элим,
Ота тилим, о, Она тилим!

Билга ҳоқон ҳайқириғи сен,
Қошғарийнинг чақириғи сен,
Тангриқутнинг адл туғи сен,
Она тилим - ягона тилим!

Сенда сурон солмишди Темур,
Сенда собит қолмишди Темур,
Бир сўз-ла юрт олмишди Темур,
Она тилим - мардона тилим!

Тойғоқ, Араб-Ажамдан то Чин
Қанот ёйдинг мисоли лочин.
Хуросонда очдинг қулочинг,
Она тилим - дурдона тилим!

Алишернинг илкида чечак,
Кимга меҳнат, кимгадир эмгак.
Шайбонийдан армонли эртак,
Она тилим - афсона тилим!

Ўралтовлар қайраган тилим,
Ҳинди элда яйраган тилим,
Сандувочлар сайраган тилим,
Она тилим - мастона тилим!

Соғинганлар сени деб адо,
Видоларда берурсан садо.
Яхши сўзсан, мен сенга гадо,
Она тилим - шоҳона тилим!

✍️ Иқбол МИРЗО
6,840
Иқбол МИРЗО шеърлари

17 Oct, 09:41

ИЗСИЗ КЕТДИ

Изсиз кетди шарқираган анҳорларим,
Эсиз кетди гуркираган баҳорларим,
Кўзларимдан киприк каби тўкилдилар
Севганларим, дилбарларим, дилдорларим.

Севдим юртнинг шамшодию арчасини,
Суйдим сойнинг сокинлиги, сачрашини.
Ўнта қизни севган бўлсам, ўрни бошқа,
Қирқта бўлса, қилиғи хуш барчасининг!

Мен дарахтман, япроғи бор, илдизи йўқ,
Хазон қучган тупроқдирман, гул иси йўқ.
Осмон тўла юлдузларни кашф айлаган
Мунажжимман – манглайида юлдузи йўқ.

Гоҳо гуллар сочди менга куз-қишларим,
Гоҳо куллар сочди таниш-билишларим.
Бугун ёлғиз ўйланаман, ўртанаман:
Урмадими гўзалларнинг қарғишлари?

Бу йўл менга сайр эди, сайил эди,
Севгисиз кун – ҳафта эди, ой – йил эди.
Мен қизларни алдашни кўп истамасдим,
Қизлар ўзи алданишга мойил эди.

✍️ Иқбол МИРЗО

📱 Telegram | 🌐 Instagram | 🎞 YouTube
4,753
Иқбол МИРЗО шеърлари

15 Oct, 05:06

КУЗНИ БЕЛГИЛАМАС

Кузни белгиламас биттагина қуш,
Қайғурманг бир дона япроқ сарғайса.
Ҳали боғингизда куртак отар ниш,
Ернинг ҳовуридек чайқалар майса.

Тасодиф деб билинг ранжитган бўлсам,
Пайқамасдан янги кўйлагингизни.
Эҳтимол хаёлга чўмганман бир дам,
Соғиниб баҳорий бўйларингизни.

Эсингизда борми?
Ҳеч ким йўқ эди,
Ҳеч нарса йўқ эди севгидан бўлак.
Қорнимиз муҳаббат билан тўқ эди,
Севгимиз – бошпана, севгимиз – кўйлак.

Тўпидан эртароқ учар тентакқуш,
Эртароқ сарғаяр энг заиф япроқ.
Фожиа эмасдир ёлғиз хўрсиниш,
Ишқ шаъмин ўчирмас биттагина оҳ.

Аммо эслайсизми?
Қўқон шамоли
Сочингизни ҳамроҳ айлаган пайти
Юзингизни икки кафтимга олиб,
Илк бор исмингизни бошқача айтдим.

Эслолмайсиз.
Майли, куюнманг зинҳор,
Жовдираб осмонга, боғларга боқманг.
Ёдимда, ўшанда бошланган баҳор
Битта сўз, битта қуш, битта япроқдан.

✍️ Иқбол МИРЗО

📱 Telegram | 🌐 Instagram | 🎞 YouTube
4,753
Иқбол МИРЗО шеърлари

14 Oct, 09:32

ЯПРОҚ

Заррабин нигоҳли қадимшунослар
Қатлама тошларни авайлаб кесиб,
Топдилар бус-бутун сақланган бир барг –
Афтидан, ибтидо даврига мансуб.

Балки, бу шунчаки тўкилган япроқ,
Номсиз дарахтларнинг илтижосидир.
Балки, ибтидоий дилдаги титроқ –
Боқий муҳаббатнинг ибтидосидир.

Эҳтимол, тошйигит тошқизни суйиб,
Юрак шаклидаги япроқни тутган.
Балки, қиз йиғлаган лабларин қўйиб,
Кейин тошлар аро беркитиб кетган...

Қадимшуносларнинг топгани – тахмин,
Моҳият ҳақида жиддий гапим бор:
Фақат муҳаббатда мўъжиза мумкин,
Мангуликка фақат севги дахлдор!

Тошдек думалайди ҳали асрлар,
Даврлар ўтади кийикдек чопиб,
Ҳали ечилади чувалган сирлар,
Фалак асрорин ҳам оларлар топиб.

Қадимшуносларми, одамшунослар,
Тошкент тошларини кесаркан бир кун
Ҳайратдан барчаси эсидан озар –
Менинг юрагимни топиб бус-бутун!

Гоҳо ишқ йўлида бўлар қурбонлик,
Лекин ўзга олам севги ва илм.
Ҳозир бир сўзингга келажак боғлиқ,
Тошбағир севгилим, тошдил севгилим!

✍️ Иқбол МИРЗО

1995

📱 Telegram | 🌐 Instagram | 🎞 YouTube
4,467
Иқбол МИРЗО шеърлари

09 Oct, 06:30

СЕНИ ЎЙЛАСАМ

Гул, келдинг умримнинг куз палласида,
Шамоллар гувлайди сени ўйласам.
Гулбўрон – илк қорлар арафасида
Юрагим гуллайди сени ўйласам.

Қайси феълим ёқиб меҳрибон худо
Сендай гулни менга айлади ато?
Энди хато қилсам бўлади хато,
Худойим қўллайди сени ўйласам.

Қайтмас бўлиб мендан кетган гулюзлар,
Ёнимга қайтишга ёниб йўл излар.
Олисдан кўз қисиб бир-бир юлдузлар,
Бўсалар йўллайди сени ўйласам.

Тилим – юрагимнинг давомидир, гул,
Юрагим икки юрт довонидир, гул,
Довонда бир гулнинг товонидир гул,
Ўлиб ҳам бўлмайди сени ўйласам.

✍️ Иқбол МИРЗО

📱 Telegram | 🌐 Instagram | 🎞 YouTube
5,809
Иқбол МИРЗО шеърлари

03 Oct, 06:35

😀
“Jadid” gazetasi bosh muharriri, Oʻzbekiston xalq shoiri Iqbol Mirzo Fargʻona davlat universitetining faxriy professori unvoni bilan taqdirlandi

📱 Batafsil: jadid-media.uz

😄Jadidmedia’ga obuna bo‘ling
4,950
Иқбол МИРЗО шеърлари

01 Oct, 05:41

✨ ТЎҒРИ ЧИЗИҚ✨

Биринчи ўқитувчим
Дилбарой ОХУНОВАга

Болаликни қўмсаб кезаман тунда,
Юлдузлар нурига беланар хаёл.
Кулиб келаверар қаршимдан шунда
Мунаввар бир аёл, дилбар бир аёл.

У – Сиз...
Хотиралар аста жонланар:
Синф. Бўёқ ҳиди. Ўттиз полапон.
Бу – мен. Меҳрибон қўл бошимни силар:
“Чизиқдан чиқмасдан ёзинг, Иқболжон!”

Опа, хотирадир у кунлар, опа,
Опа, у кунларга бугун интиқман.
Бугун хатоларим қилмасми хафа,
Чиқиб кетмадимми тўғри чизиқдан?!

Опа, қолиплардан зерикканман хўб,
Дафтар чизиғининг йўриғи бошқа.
Опа, бу дунёнинг чизиқлари кўп,
Лекин ҳаммаси ҳам элтмас Қуёшга.

Меҳрингиз соғиниб кезаман тунда,
Чироқлар нурига беланар хаёл.
Кулиб келаверар қаршимдан шунда
Мунаввар бир аёл, дилбар бир аёл.

У – Сиз...
Эски сурат аста жонланар:
Синф. Китоб ҳиди. Ўттиз полапон.
Бу – мен. Меҳрибон қўл бошимни силар:
“Чизиқдан чиқмасдан ёзинг, Иқболжон!”

✍️ Иқбол МИРЗО
8,615
Иқбол МИРЗО шеърлари

27 Sep, 09:26

Ичи оғуга тўлган Захароваларга

Олисдаги маҳмадана, эй эски олчоқ,
Менга қадам ташламоқни ўргатмагин сен!
Ўзингга боқ, кейин, майли, ноғорангни қоқ,
Менга қандай яшамоқни ўргатмагин сен!

Тинчлик дея юрак бағри куйик элдир бу,
Яратганнинг қошида энг суюк элдир бу,
Ўтмиши ҳам, эртаси ҳам буюк элдир бу,
Менга қандай яшамоқни ўргатмагин сен!

Дала – даштлар ўз-ўзидан Эрам бўлмагай,
Лекин сендан беминнат бир карам бўлмагай,
Ўзбек эли ҳеч кимсага қарам бўлмагай,
Менга қандай яшамоқни ўргатмагин сен!

Китобингда даҳоларим сўзлари бордир,
Деворингда боболарим излари бордир,
Мағрур элнинг эту тирноқ дўстлари бордир,
Менга қандай яшамоқни ўргатмагин сен!

Агар жаннат кўкда бўлса,
остидадир Ўзбекистон,
Агар жаннат ерда бўлса,
устидадир Ўзбекистон!

✍️ Иқбол МИРЗО

📱 Telegram | 🌐 Instagram | 🎞 YouTube
12,299
Иқбол МИРЗО шеърлари

25 Sep, 04:33

БИР ПАЙТЛАР...

Тизза бўйи ёғар эди қор,
Уч-тўрт марта томни курардик.
Гуллар чизиб музларди анҳор,
Терлаб-пишиб чана сурардик.

Жиддий эди табиат — ота,
Тўғри, феъли бироз тор эди.
Улов камёб, кўплар пиёда,
Кўпчиликда виждон бор эди.

Кечикмасдан келарди баҳор,
Ўз вақтида гуллаб бодомлар.
Шафақларга берарди оҳор
Истараси иссиқ одамлар.

О, бор эди руҳимда жило,
Қулоғимда ҳамон кулгиси.
Эслаб қўйсам рангланар дунё,
Исмин айтсам, келар гул иси.

Бошин тўлғаб, кўк — мовий шамол,
Ўш пиримга бориб қайтарди.
Ғунча қучган капалак беҳол
Мангуликка қўшиқ айтарди.

Илиққина ёз ёмғирлари
Узиб-узиб қуйилар эди.
Инсоннинг бор эди сирлари,
Ҳаёт сирли туюлар эди.

Кеча... Кўнгил соғ эди кеча.
Кеча ойдин эди ўй-дардим.
Кеча осмон сувини ича
Энди ўлмайман деб ўйлардим.

Совидими Тангри бизлардан,
Ахир саноғида бор эдик!
Нечук мадор кетди тиззадан?
Қаримасдан туриб ҳоридик...

Асли мендан кетди оқибат,
Оқибат мен кетдим ўзимдан.
Мана, бугун соҳиби санъат
Гулпардани олди кўзимдан.

Бугун юрак бошин босган қор
Бугун хаёлларим фаромуш.
Бугун табиатим беқарор,
Бугун қалбим, руҳим аро қиш.

Бугун ҳасса билан қўзғаб чўғ,
Ўз қўйнимга қўл соляпман мен.
Давр-павр билан ишим йўқ,
Ёшлигимни қўмсаяпман мен.

✍️ Иқбол МИРЗО
8,819

2025 All Right Reserved

Disclaimer: The content displayed on this website is solely provided by the respective Telegram channels. We hold no ownership or responsibility for the content shared by these channels.