Myawady&Measot Meadia

လမ်းဘေးမှာ ရပ်ထားတဲ့ကားကို ခိုးယူမောင်းပြေးသွားတဲ့ မြန်မာနိုင်ငံသား တစ်ဦး လမ်းဘေးမီးတိုင်တိုက်မိပြီး ဖမ်းဆီးခံရ

မဲဆောက်၊ ဒီဇင်ဘာ ၈

ထိုင်းနိုင်ငံ၊ ပထုံဌာနီခရိုင်၊ ခေါင်လွှမ်မြို့နယ်၊ ခေါင်ဆောင်ကျေးရွာအနီးက လမ်းဘေးမှာ ရပ်ထားတဲ့ကားကို ခိုးယူမောင်းပြေးသွားတဲ့ မြန်မာနိုင်ငံသား တစ်ဦး လမ်းဘေးမီးတိုင်တိုက်မိပြီးဖမ်းဆီးခံရတဲ့ဖြစ်စဉ်တစ်ခု ဒီနေ့ ဒီဇင်ဘာ လ ၈ ရက် မနက်ပိုင်းက ဖြစ်ပွားခဲ့တယ်လို့ သိရပါတယ်။

ထိုင်းနိုင်ငံသား ဖိချစ်ဖွန် ဘွန်ထေ့ဆိုသူဟာ ပထုံဌာနီခရိုင်၊ ခေါင်လွမ်မြို့နယ်၊ ခေါင်ဆောင်ကျေးရွာအနီး လမ်းဘေးတစ်နေရာမှာ ကားရပ်တန့်ပြီး Seven Eleven စတိုးဆိုင်ထဲဈေးဝင်ဝယ်နေချိန် မြန်မာနိုင်ငံသားတစ်ဦးက အဆိုပါ ရပ်ထားတဲ့ကားကို တွေ့ရှိပြီး ခိုးယူမောင်းပြေးသွားတာပါ။

အဲဒီလို ခိုးယူမောင်းပြေးသွားပြီးနောက် လမ်းကွေ့တစ်နေရာမှာ အရှိန်မထိန်းနိုင်ဘဲ လမ်းဘေးမီးတိုင်ကို ဝင်တိုက်မိပြီး ယာဉ်တိမ်းမှောက်မှု ဖြစ်ပေါ်နေချိန် ကားခိုးယူခံရလို့ အနောက်ကနေလိုက်လာတဲ့ ကားသမားအဖွဲ့နဲ့တွေ့ရှိပြီးတော့ ဖမ်းဆီးခံခဲ့ရတာဖြစ်ပါတယ်။

ဖြစ်စဉ်ကြောင့် ကားပေါ်မှာတင်ဆောင်လာတဲ့ ကုန်ပစ္စည်း (၁) တန်ခန့်ပျက်စီး ဆုံးရှုံးခဲ့ရပြီး၊ ကားခိုးယူမောင်းပြေးသွားသူ မြန်မာနိုင်ငံသားကတော့ ကားထဲ မှာပိတ်မိနေလို့ ကားသမားနဲ့အဖွဲ့က အပြင်ကိုဆွဲထုတ်ပေးခဲ့ရကာ ထိခိုက်ဒဏ် ရာတွေ ရရှိခဲ့အတွက် သူ့ကို ဆေးရုံကိုလည်း ပို့ဆောင်ပေးခဲ့ရတယ်လို့ သိရပါတယ်။

အဆိုပါ ကားခိုးယူသွားသူဟာ အသက် ၂၄ နှစ်အရွယ်ရှိ လင်းလင်းကို ဆိုသူဖြစ်ပြီး ယာဉ်တိမ်းမှောက်မှုကြောင့်ရရှိခဲ့တဲ့ ဒဏ်ရာတွေ ဆေးရုံမှာ ကုသမှုခံ ယူပြီးတာနဲ့ သူ့ကို ထိုင်းရဲတပ်ဖွဲ့က ဥပဒေအရ အရေးယူဆောင်ရွက်သွားမယ်လို့ သိရပါတယ်။

#မြဝတီမဲဆောက်မီဒီယာ

ယာဉ်မတော်တဆမှုကြောင့် အသက်ဆုံးရှုံးခဲ့ရသည့် မြန်မာနိုင်ငံသားတစ်ဦး ၏ ကျောက်ကပ်တစ်စုံကို ကျန်ရစ်သူမိသားစုမှ မဲဆောက်ဆေးရုံကြီးသို့ လှူ ဒါန်းပေးအပ်ခဲ့

မဲဆောက်၊ ဒီဇင်ဘာ ၇

ထိုင်းနိုင်ငံ၊ မဲဆောက်မြို့တွင် ယာဉ်မတော်တဆမှုကြောင့် အသက်ဆုံးရှုံးခဲ့ရသည့် မြန်မာနိုင်ငံသားတစ်ဦး၏ ကျောက်ကပ်တစ်စုံကို ကျန်ရစ်သူမိသားစုမှ မဲဆောက်ဆေးရုံကြီးသို့ လှူဒါန်းပေးအပ်ခဲ့ကြောင်း သိရသည်။

ယာဉ်မတော်တဆမှုကြောင့် အသက်ဆုံးရှုံးခဲ့ရသူမှာ အသက် (၄၁)နှစ်အရွယ် ရှိ ကိုနေဝင်းမောင်ဆိုသူဖြစ်ပြီး ကျန်ရစ်သူမိသားစုက မဲဆောက်ဆေးရုံကြီးမှ တာဝန်ရှိသူများနှင့်တိုင်ပင်ဆွေးနွေး၍ ယမန်နေ့ ဒီဇင်ဘာလ ၆ ရက် နေ့လယ် ၁ နာရီအချိန်က လှူဒါန်းခဲ့ခြင်းဖြစ်ကြောင်း သိရသည်။

ထိုသို့ မွန်မြတ်သော လှူဒါန်းပေးအပ်ခဲ့မှုနှင့်ပတ်သက်၍ မဲဆောက်ဆေးရုံအုပ်ကြီးနှင့် တာဝန်ရှိသူများက ကျန်ရစ်သူမိသားစုဝင်များကို ကျေးဇူးတင်စကား ပြောကြားပြီး ဘဝတစ်ပါးကူးပြောင်းသွားသူကိုနေဝင်းမောင်အား ကောင်းရာသုဂတိ ရောက်ရှိစေရန် ဆုတောင်းမေတ္တာပို့သပေးခဲ့ကြသည်။

အဆိုပါ လှူဒါန်းပေးအပ်ခဲ့သည့် ကိုနေဝင်းမောင်၏ ကျောက်ကပ်တစ်စုံအား မဲဆောက်ဆေးရုံးကြီးမှ ကျောက်ကပ်မကောင်းသည့် လူနာများကို အစားထိုးကုသပေးသွားမည်ဖြစ်ကြောင်း သိရသည်။

#မြဝတီမဲဆောက်မီဒီယာ

စမွတ်ဆာခွန်ခရိုင်ရှိ စက်ရုံတစ်ရုံတွင် ပတ်စပို့စ်၊ ဗီဇာ၊ Work permit စသည်များကို သက်တမ်းတိုးရန် ငွေကြေးကောက်ခံမှုများပြား၍ လျှော့ချကောက်ခံရန် မြန်မာအလုပ်သမား ၁၀၀ ကျော် တောင်းဆို

မဲဆောက်၊ နိုဝင်ဘာ ၇

ထိုင်းနိုင်ငံ၊ စမွတ်ဆာခွန်ခရိုင်၊ ကထုန့်ဘဲင်မြို့နယ်ရှိ စက်ရုံတစ်ရုံတွင် ပတ်စပို့စ်၊ ဗီဇာ၊ ဝပ်ပါမစ် (Work permit) စသည်များကို သက်တမ်းတိုးရန် ငွေ ကြေးကောက်ခံမှုများပြား၍ လျှော့ချကောက်ခံရန် မြန်မာအလုပ်သမား ၁၀၀ ကျော်က တောင်းဆိုခဲ့ကြကြောင်း သိရသည်။

ယမန်နေ့ ဒီဇင်ဘာ ၆ ရက် နံနက် ၉ နာရီအချိန်က စမွတ်ဆာခွန်ခရိုင်၊ ကထုန့်ဘဲင်မြို့နယ်ရှိ စက်ရုံတစ်ရုံတွင် အလုပ်လုပ်ကိုင်နေသည့် မြန်မာအလုပ်သမား ၁၀၀ ကျော်က ၎င်းတို့၏ ပတ်စပို့စ်၊ ဗီဇာ၊ ဝပ်ပါမစ်(Work Permit)များ သက်တမ်းတိုးရန် စက်ရုံဘက်မှ တစ်ဦးလျှင် ဘတ် ၁၂၅၀၀ ကောက်ခံမည်ဖြစ်ကြောင်း စာထုတ်သည်ကို ကျေနပ်ခြင်းမရှိ၍ တောင်းဆိုခဲ့ခြင်းဖြစ်သည်။

"စက်ရုံက ပတ်စပို့စ်၊ ဗီဇာ၊ ဝပ်ပါမစ်သက်တမ်းတိုးဖို့အတွက် တစ်ယောက်ကို ဘတ် ၁၂၅၀၀ ကုန်ကျမယ်လို့ စာကပ်ထားတယ် ဒါကို ကျွန်တော်တို့ကမပေးနိုင်ဘူး အဲဒါကြောင်မို့ ကျွန်တော်တို့ အလုပ်သမားတွေက တောင်းဆိုကြတာ ကျွန်တော်တို့အလုပ်သမားတွေဘက်ကလည်း မဖြစ်နိုင်တာမတောင်းဆိုပါဘူး အခု အပြင်မှာ ၈၅၀၀ ပေါက်နေတယ် ဒီဈေးလောက်ဆိုရင် ကျွန်တော်ဘက်က လက်ခံမှာပါ ဒီနေ့ ညှိနှိုင်းမှုအဆင်မပြေရင် စက်ရုံမှာရှိတဲ့ အလုပ်သမား ၇၀၀ ကျော်က အကုန်တောင်းဆိုသွားမှာပါ" ဟု မြန်မာအလုပ်သမားတစ်ဦးက ပြောသည်။

ထိုသို့ အလုပ်သမားများက တောင်းဆိုခဲ့ကြသဖြင့် ဒီဇင်ဘာ ၆ ရက် နေ့လယ် ၁ နာရီအချိန်တွင် စက်ရုံဘက်မှ တာဝန်ရှိသူများက အလုပ်သမားများကို ခေါ် ယူတွေ့ဆုံညှိနှိုင်း၍ ယခင်ကသတ်မှတ်ထားသည့် ဘတ်‌ ၁၂၅၀၀ အစား ဘတ် ၈၀၀၀ သာ ကောက်ခံရန် သဘောတူညီခဲ့ကြကြောင်း သိရသည်။

ပြီးခဲ့သည့် ဒီဇင်ဘာ ၄ ရက်နေ့ကလည်း ထိုင်းနိုင်ငံ၊ စမွတ်ပရာကန်ခရိုင်၊ ဘန်ဖီမြို့နယ်ရှိ မော်တော်ကားအပိုပစ္စည်း ထုတ်လုပ်ရေးစက်ရုံတွင် အလုပ်လုပ် ကိုင်နေသည့် မြန်မာအလုပ်သမား ၄၀၀ ကျော်က (Work Permit) သက် တမ်းတိုးကြေး အဆမတန်ကောက်ခံသဖြင့် ဖြစ်သင့်သောဈေးဖြင့်ကောက်ခံရန် စက်ရုံတာဝန်ရှိသူများကို ဆန္ဒပြတောင်းဆိုခဲ့ကြသေးသည်။

#မြဝတီမဲဆောက်မီဒီယာ

နိုင်ငံကူးလက်မှတ်ပတ်စပို့စ်စာအုပ်နဲ့ CI ကိုင်ဆောင်ထားတဲ့ မြန်မာလုပ်သားတွေကို ထိုင်းနိုင်ငံအတွင်း ( ၂ ) နှစ်ယာယီ အလုပ်လုပ်ကိုင်ခွင့် ပေးမှာဖြစ်လို့ စာအုပ်သက်တမ်းတိုးဆောင်ရွက်ကြဖို့ မြန်မာသံရုံးအသိပေး

မဲဆောက်၊ ဒီဇင်ဘာ ၇

ထိုင်းနိုင်ငံအစိုးရအဖွဲ့မှ နိုင်ငံကူးလက်မှတ် ပတ်စပို့စ်စာအုပ်နဲ့ CI ကိုင်ဆောင်ထားတဲ့ မြန်မာအလုပ်သမားတွေကို ထိုင်းနိုင်ငံအတွင်း သက်တမ်း ၂ နှစ် ယာ ယီနေထိုင်လုပ်ကိုင်ခွင့်ပေးအပ်မှာဖြစ်တာကြောင့် နိုင်ငံကူးလက်မှတ်တွေနဲ့ CI စာအုပ်တွေ သက်တမ်းတိုးဖို့ လိုအပ်တယ်လို့ ဘန်ကောက်မြို့ မြန်မာသံရုံးက ဒီကနေ့ ဒီဇင်ဘာလ ၇ ရက်မှာ အသိပေးထုတ်ပြန်ထားပါတယ်။

နိုင်ငံကူးလက်မှတ် ပတ်စပို့စ်စာအုပ်နဲ့ မည်သူမည်ဝါဖြစ်ကြောင်းသက်သေခံလက်မှတ် CI ကိုင်ဆောင်သူတွေကို ( ၂ )နှစ် သက်တမ်းတိုးဆောင်ရွက်ပေးရာမှာ ပုံမှန်အားဖြင့် စာအုပ် သက်တမ်းအနည်းဆုံး (၂) နှစ် (၆) လခန့်ကျန်ရှိရန် လိုအပ်တယ်လို့ ဆိုပါတယ်။

သို့‌သော်လည်း ထိုင်းအစိုးရအနေဖြင့် စာအုပ်လက်ကျန်သက်တမ်းအတွင်း ယာယီနေထိုင်အလုပ်လုပ်ကိုင်ခွင့် ၀ပ်ပါမစ် (Work Permit) ၊ နိုင်ငံကူးလက်မှတ် ဗီဇာ (Visa) ကို ခွင့်ပြုဆောင်ရွက်ပေးပါက စာအုပ်သက်တမ်းကုန်ချိန်ရောက်ရှိမှသာ မြန်မာသံရုံး (ဘန်ကောက်) နဲ့ ကောင်စစ်၀န်ရုံး (ချင်းမိုင်) တို့မှာ စာအုပ်အသစ်ပြုလုပ်ခြင်း၊ စာအုပ်နှစ်အုပ်မှာ တစ်ဦးတည်းဖြစ် ကြောင်း ထောက်ခံချက် (လိုအပ်ပါက) ပြုလုပ်ပေးခြင်းတို့ကို ဆောင်ရွက်ပေးမှာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

အလားတူ စက်ရုံ/ အလုပ်ရုံတွေနဲ့ ဆောက်လုပ်ရေးလုပ်ငန်းတွေမှာ နိုင်ငံကူးလက်မှတ် သက်တမ်းတိုးရမဲ့ အလုပ်သမားသမားအရေအတွက် (၄၀၀) ဦးနဲ့ အထက်ရှိပါက လုပ်ငန်းမရပ်တံ့စေဖို့အပြင် အလုပ်သမားတွေ နေ့တွက်စရိတ်မဆုံးရှုံးစေရေး ရည်ရွယ်ပြီး မြန်မာသံရုံးတာဝန်ရှိသူတွေက လုပ်ငန်းခွင်အထိ (Mobile Team) ဖြင့် စေလွှတ်လုပ်ဆောင်ပေးမှာဖြစ်တယ်လို့ သိရပါတယ်။

ဒါ့ကြောင့် လုပ်သားစာရင်းကို သက်မှတ်ပုံစံဖြည့်စွက်ပြီး လုပ်ငန်းခွင်ရဲ့ HR Manager ရဲ့ ထောက်ခံချက်နဲ့အတူ မြန်မာသံရုံး/ ကောင်စစ်၀န်ချုပ်ရုံးရှိ ကောင်စစ်ဌာနကို အခု ဒီဇင်ဘာလ ၉ ရက်နေ့မှစတင်ကာ လာရောက်တင်ပြကြဖို့လိုအပ်တယ်လို့ ထုတ်ပြန်ချက်မှာ ပါရှိပါတယ်။

CI စာအုပ် သက်တမ်းတိုးလုပ်ငန်းစဉ်တွေကိုတော့ ဆက်လက်အသိပေးသွားမှာ ဖြစ်ပြီး စက်ရုံ/အလုပ်ရုံနဲ့ ဆောက်လုပ်ရေး လုပ်ငန်းခွင်မှာရှိကြတဲ့ မြန်မာလုပ်သားတွေအနေနဲ့ အခုဖော်ပြပါကိစ္စရပ်တွေကို HR Manager တွေဆီ ဆက်လက်အသိပေးကြဖို့ ဘန်ကောက်မြို့၊ မြန်မာသံရုံးက တိုက်တွန်းပြောကြားထားပါတယ်။

#မြဝတီမဲဆောက်မီဒီယာ

“ မိန်းမယူရတာလဲ မီးစက်ဝယ်သုံးရသလိုဘဲ ”
=========================


ကာတွန်း : လူလူအောင်

#မြဝတီမဲဆောက်မီဒီယာ

ထိုင်းနိုင်ငံသို့ MoU စနစ်ဖြင့် အလုပ်လုပ်ကိုင်ရန် မြန်မာအလုပ်သမား ၂၇၂ ဦးကို ရန်ကုန်-ဒွန်မောင်း လေကြောင်းလိုင်းဖြင့် ထပ်မံစေလွှတ်ခဲ့

မဲဆောက်၊ ဒီဇင်ဘာ ၇

ထိုင်းနိုင်ငံသို့ MoU စနစ်ဖြင့် အလုပ်လုပ်ကိုင်ရန် မြန်မာအလုပ်သမား ၂၇၂ ဦးကို ပြည်ပအလုပ်အကိုင်အကျိုးဆောင် အေဂျင်စီ ၃ ခုမှ ထပ်မံစေလွှတ်ခဲ့ကြောင်း သိရသည်။

MoU စနစ်ဖြင့် ထိုင်းနိုင်ငံသို့ အလုပ်လုပ်ကိုင်ရန် ယမန်နေ့ ဒီဇင်ဘာ ၆ ရက် နံနက်ပိုင်းက ရန်ကုန်-ဒွန်မောင်း လေကြောင်းလိုင်းဖြင့် စေလွှတ်ပို့ဆောင်ပေးခဲ့ကြသည်။

ယင်းသို့ မြန်မာ MoU အလုပ်သမားများအား စေလွှတ်ပို့ဆောင်ခဲ့ရာတွင် ရွှေတော်ဝင်မန္တလေး အေဂျင်စီမှ အလုပ်သမား ၁၉၃ ဦး၊ ထူးသစ်ဇေ အေဂျင် စီမှ အလုပ်သမား ၆၄ ဦး၊ ရွှေစင်ကိုးပွင့် အေဂျင်စီမှ အလုပ်သမား ၁၅ ဦး၊ စုစုပေါင်း ၂၇၂ ဦးတို့ဖြစ်ကြောင်း သိရသည်။

ယမန်နေ့ ဒီဇင်ဘာ ၆ ရက် နံနက်ပိုင်းက ရန်ကုန်မြို့မှတဆင့် ထိုင်းနိုင်ငံ၊ ဘန် ကောက်မြို့သို့ ထွက်ခွါသွားသော မြန်မာလုပ်သားများသည် အီလက်ထရောနစ်ထုတ်လုပ်ရေးလုပ်ငန်း၊ အလူမီနီယံလုပ်ငန်း၊ စားသောက်ကုန်ထုတ်လုပ်ရေးလုပ်ငန်း၊ ဘက္ထရီထုတ်လုပ်ရေးလုပ်ငန်း စသည့် လုပ်ငန်းများ၌ လုပ်ကိုင်ရမည်ဖြစ်ကြောင်း သိရသည်။

ထိုင်းနိုင်ငံ၊ ဘန်ကောက်မြို့၊ ဒွန်မောင်းလေဆိပ်သို့ ရောက်ရှိလာသည့် မြန်မာ MoU အလုပ်သမား ၂၇၂ ဦးတို့အား သက်ဆိုင်ရာ အေဂျင်စီများမှ တာဝန် ရှိသူများနှင့် အလုပ်သမားခေါ်ယူမည့် ထိုင်းကုမ္ပဏီများမှ တာဝန်ရှိသူများက လုပ်ငန်းခွင်အသီးသီးသို့ ဆက်လက်ပို့ဆောင်ပေးသွားမည်ဖြစ်ကြောင်း သိရသည်။

#မြဝတီမဲဆောက်မီဒီယာ

ဓါတ်ပုံ- ယမန်နေ့ ဒီဇင်ဘာ ၆ ရက် နံနက်ပိုင်းက ထိုင်းနိုင်ငံသို့ MoU စနစ်ဖြင့် သွားရောက်လုပ်ကိုင်ရန် ပြည်ပအလုပ်အကိုင်အကျိုးဆောင် ထူးသစ်ဇေ အေဂျင်စီမှ စေလွှတ်ပို့ဆောင်ပေးခဲ့သည့် မြန်မာအလုပ်သမားများကို ရန်ကုန် အပြည်ပြည်ဆိုင်ရာလေဆိပ်တွင် တွေ့မြင်ရစဉ်

#ထိုင်း #မြန်မာMoUအလုပ်သမား #စေလွှတ် #ရန်ကုန်ဒွန်မောင်း #လေကြောင်း

ထိုင်းရောက်မြန်မာအလုပ်သမား သက်တမ်းတိုးဆောင်ရွက်သူတွေကို စလစ်ကြေး ၁၈၀၀ ဘတ်နဲ့ အခွန်ကောက်ခံခြင်းမရှိဘူးလို့ ဘန်ကောက်၊ မြန်မာသံရုံးကြေညာ

မဲဆောက်၊ ဒီဇင်ဘာ ၆

ထိုင်းနိုင်ငံရောက် မြန်မာရွှေ့ပြောင်းအလုပ်သမားတွေ ဗီဇာ/၀ပ်ပါမစ် သက် တမ်းတိုးဆောင်ရွက်ရာမှာ စလစ်ကြေး ၁၈၀၀ ဘတ်နဲ့အခွန်ငွေကောက်ခံခြင်းမရှိဘူးလို့ ဘန်ကောက်မြို့ရှိ မြန်မာသံရုံးကို ဒီနေ့ ဒီဇင်ဘာ ၆ ရက်မှာ အသိ ပေးကြေညာထားပါတယ်။

ထိုင်းနိုင်ငံအနေနဲ့ ၂၀၂၅ ခုနှစ်၊ ဖေဖော်၀ါရီ ၁၃ ရက်နေ့မှာ သက်တမ်းကုန်မဲ့ မြန်မာနိုင်ငံသား ရွှေ့ပြောင်းအလုပ်သမားတွေကို MoU ပုံစံဖြင့် နိုင်ငံကူးလက်မှတ် ပတ်စပို့စ် စာအုပ်အနီ၊ (သို့မဟုတ်) မည်သူမည်၀ါဖြစ်ကြောင်း သက်သေခံလက်မှတ် CI စာအုပ်အစိမ်း ကိုင်ဆောင်ထားပါက ထိုင်းနိုင်ငံအတွင်း ၂ နှစ်သက်တမ်းရှိတဲ့ ယာယီနေထိုင်အလုပ်လုပ်ကိုင်ခွင့်လျှောက်ထားနိုင်ပြီး ထပ်မံ ၂ နှစ်သက်တမ်းတိုးခွင့်ရှိကာ စုစုပေါင်း ၄ နှစ်ခွင့်ပြုပေးမှာဖြစ်တယ်လို့ ထုတ်ပြန်ချက်မှာ ပါရှိပါတယ်။

အခုလုပ်ငန်းစဉ်ကို ဆောင်ရွက်နေရာမှာ အချို့သောအေဂျင်စီတွေရဲ့ဖော်ပြချက်အရ “မြန်မာသံရုံးကို စလစ်ကြေး ၁၈၀၀ ဘတ်” ပေးဆောင်ရမယ်လို့ ထည့်သွင်းဖော်ပြထားတာကြောင့် ဒီဖြစ်စဉ်နဲ့ပတ်သက်ပြီး မြန်မာသံရုံး၊ ဘန် ကောက်၊ ကောင်စစ်၀န်ချုပ်ရုံး (ချင်းမိုင်)၊ အလုပ်သမား သံမှူးရုံး၊ ဘန် ကောက် အစရှိတဲ့ ရုံးတွေက သက်တမ်းတိုးလုပ်ငန်းစဉ်အတွက် ငွေကြေးကောက်ခံမှုမရှိဘူးလို့ ထုတ်ပြန်ချက်မှာ ဖော်ပြပါတယ်။

အခွန် ၂% ရာခိုင်နှုန်း ကောက်ခံရာမှာလည်း သီးသန့်ကောက်ခံမှု မပြုလုပ်ဘဲ နိုင်ငံကူးလက်မှတ်နဲ့၊ CI စာအုပ် လဲလှယ်ချိန်သာ သတ်မှတ်နှုန်းထားအတိုင်း ဘဏ်ကောက်ဘဏ်နဲ့ 7/11 ဆိုင်တွေမှာ တိုက်ရိုက်ငွေပေးသွင်းရမှာဖြစ်ပြီး ပေးသွင်းပြီးကြောင်း ပြေစာပြသကာ စာအုပ်ပြုလုပ်ရမှာဖြစ်တယ်လို့ ဆိုပါတယ်။

သက်တမ်းကုန်လုနီးပါးဖြစ်သော CI စာအုပ်တွေကို အသစ်ပြုလုပ်ရေးလုပ် ငန်းစဉ်စတင်နိုင်ရေး ထိုင်းနိုင်ငံအလုပ်သမားဦးစီးဌာနနဲ့ ညှိနှိုင်းဆောင်ရွက်ပြီးဖြစ်သလို အထောက်အထားမရှိတဲ့ မြန်မာနိုင်ငံသားတွေ၊ နိုင်ငံကူးလက်မှတ် CI မရှိသူတွေအတွက် ထိုင်းနိုင်ငံမှ ပန်းရောင်ကတ်ထုတ် ပေးရေးလုပ်ငန်းစဉ်ဆောင်ရွက်နေချိန်မှာ ယခင်နှစ်အတိုင်း CI စာအုပ်ကိုပါ ပူးတွဲထုတ်ပေးနိုင်ရေးစီစဉ်သွားမှာဖြစ်တယ်လို့ သိရပါတယ်။

ဒါကြောင့် ထိုင်းရောက် မြန်မာရွှေ့ပြောင်းအလုပ်သမားတွေအနေနဲ့ သက်ဆိုင် ရာဌာနရဲ့ လမ်းညွှန်မှုနဲ့အညီ ဆက်လက်ဆောင် ရွက်သွားဖို့လိုအပ်ပြီး အကျိုး ဆောင်အေဂျင်စီတွေအနေနဲ့ မရှင်းလင်းပါက မြန်မာသံရုံး၊ ကောင်စစ်ဌာနကိုလာရောက်ပြီး ဆက်သွယ်မေးမြန်းနိုင်တယ်လို့ ဘန်ကောက်မြို့၊ မြန်မာသံရုံးက အသိပေးကြေညာထားပါတယ်။

#မြဝတီမဲဆောက်မီဒီယာ

ထိုင်းမိုးပျံတံတားဆောက်လုပ်ရေးလုပ်ငန်းခွင်အတွင်း သံဘောင်ပြုတ်ကျခဲ့ရာက မြန်မာအလုပ်သမား (၄)ဦးအပါအ၀င် သေဆုံးသူ (၆)ဦးအထိရှိလာ

မဲဆောက်၊ နို၀င်ဘာ ၂၉

ထိုင်းနိုင်ငံ၊ စမွတ်ဆာခွန်ခရိုင်၊ မဟာချိုင်မြို့သစ်၊ ဖလန်စောင်လမ်းမပေါ်ရှိ တည်ဆောက်နေဆဲ မိုးပျံဂုံးကျော်တံတားပေါ်ကို ကရိန်ဖြင့် သံဘောင်တင်နေချိန် ပြုတ်ကျမှုဖြစ်ပွားကာ မြန်မာအလုပ်သမား(၄) ဦးအပါအ၀င် သေဆုံးသူ ၆ ဦးအထိရှိလာပြီး ၁၀ ဦးထက်မနည်း ဒဏ်ရာရရှိခဲ့တယ်လို့ နောက်ဆုံးရရှိတဲ့သတင်းအရ သိရပါတယ်။

ဒီနေ့နို ၀င်ဘာ ၂၉ ရက် နံနက် ၄ နာရီ ၃၅ မိနစ်အချိန်က မဟာချိုင်မြို့သစ်၊ ဖလန်စောင်လမ်းမပေါ်မှာ တည်ဆောက်နေဆဲ မိုးပျံဂုံးကျော်တံတား‌ေပါ်ကို ကရိန်းဖြင့် သံဘောင်များတင်ခြင်း၊ ချိတ်ဆက်ခြင်းများပြုလုပ်နေချိန်မှာ ပြုတ်ကျမှုဖြစ်ပွားခဲ့တာပါ။

ဖြစ်စဉ်အတွင်း သေဆုံးသူတွေထဲမှာ မြန်မာအလုပ်သမားတွေဖြစ်တဲ့ မောင်ဧရာ၊ မောင်ချစ်ကိုကို၊ မောင်ဖြိုးကိုကို၊ မောင်အောင်သိန်းဌေးတို့(၄)ဦးနဲ့ ထိုင်းနိုင်ငံသား (၁)ဦး အပါအဝင် မည်သူမည်ဝါဖြစ်ကြောင်း အတည်မပြုနိုင်သေးသူ (၁)ဦးနဲ့ပါဆိုရင် (၆) ဦးသေဆုံးခဲ့ပြီး၊ အလုပ်သမား (၁၀) ဦးထက်မနည်း ထိခိုက်ဒဏ်ရရှိခဲ့ကြပါတယ်။

လက်ရှိ ထိခိုက်ဒဏ်ရာရရှိသူတွေကို လူမှုကယ်ဆယ်ရေးအဖွဲ့တွေက နီးစပ်ရာဆေးရုံတွေမှာ တင်ပို့ထားပြီး စမွတ်ဆာခွန် ဆေးရုံမှာ ၅ ဦး၊ အေကချိုင်ဆေး ရုံမှာ ၁ ဦး၊ ၀ိချိုင်ဝေ့စမွန်ဆာခွန်ဆေးရုံးမှာ ၁ ဦး၊ မဟာချိုင်ဆေးရုံမှာ ၁ ဦး၊ စုစုပေါင်း ၈ ဦး၊ ဆေးကုသမှုဆက်လက်ခံယူနေကာ ဒဏ်ရာမပြင်းထန်သူတွေကတော့ ဆေးရုံကနေ ဆင်းခွင့်ပြုလိုက်ပြီဖြစ်တယ်လို့ သိရပါတယ်။

ဒီနေ့ မွန်းလွဲ ၁၂ နာရီအချိန်က ဖြစ်စဉ်အတွင်း ဒဏ်ရာရရှိတဲ့သူတွေကို စမွတ်ဆာခွန်ခရိုင် အုပ်ချုပ်ရေးမှူး နလစ် နိလာမိုင်၀ုံက လာရောက်တွေ့ဆုံကာ အား ပေးစကားပြောကြားခဲ့ပြီး လက်ဆောင်ပစ္စည်းတွေလည်း ပေးအပ်ခဲ့တယ်လို့ သိရပါတယ်။

အဆိုပါ ဖြစ်စဉ်နဲ့ပတ်သက်ပြီး ထိုင်းနိုင်ငံတာဝန်ရှိ‌သူတွေက စုံစမ်းစစ်ဆေးမှုတွေပြုလုပ်နေကာ ထိုင်းလူမှုကယ်ဆယ်ရေးအဖွဲ့တွေကလည်း ပြိုကျပျက်စီးခဲ့တဲ့ အပျက်အစီးအပိုင်းအစတွေအောက်ကို ဆက်လက်ရှာဖွေနေတယ်လို့ သိရပါတယ်။

#မြဝတီမဲဆောက်မီဒီယာ

မဟာချိုင်တွင် တည်ဆောက်နေဆဲ ဂုံးကျော်တံတားပေါ်သို့ ကရိန်းဖြင့် သံဘောင်တင်နေစဉ် ပြုတ်ကျမှုဖြစ်ပွားကာ မြန်မာလုပ်သား (၃)ဦး အပါအဝင် (၄) သေဆုံး၊ (၁၁) ဦးထိခိုက်ဒဏ်ရာရရှိ

မဲဆောက်၊ နိုဝင်ဘာ ၂၉

ထိုင်းနိုင်ငံ၊ စမွတ်ဆာခွန်ခရိုင်၊ မဟာချိုင်မြို့သစ်၊ ဖလန်စောင်လမ်းမပေါ်ရှိ တည်ဆောက်နေဆဲ ဂုံးကျော်တံတားပေါ်သို့ ကရိန်းဖြင့် သံဘောင်တင်နေစဉ် ပြုတ်ကျမှူဖြစ်ပွားကာ မြန်အာအလုပ်သမား(၃)ဦး အပါအဝင်(၄)ဦးသေဆုံး ကာ (၁၁)ဦးထိခိုက်ဒဏ်ရာရရှိခဲ့ကြောင်း သိရသည်။

ယနေ့ နိုဝင်ဘာ ၂၉ ရက် နံနက် ၄ နာရီ ၃၅ မိနစ်အချိန်က မဟာချိုင်မြို့သစ်၊ ဖလန်စောင်လမ်းမပေါ်တွင် တည်ဆောက်နေဆဲဖြစ်သည့် ဂုံးကျော်တံတားပေါ် သို့ ကရိန်းဖြင့် သံဘောင်တင်ရာမှ ပြုတ်ကျမှုဖြစ်ပွားခဲ့ခြင်းဖြစ်သည်။

"ဖြစ်တာက မြန်မာအခေါ် တလာ့တ်နီလာဈေးအနီးမှာပါ သေဆုံးတဲ့သူ ၄ ဦး က ကွန်ကရစ်တုံးတွေနဲ့ သံဘောင်တွေအောက်မှာပိနေတယ် မြန်မာလုပ်သား တွေလည်ပါတယ်ပြောတယ် သူတို့ကို ကယ်ဆယ်ရေး အဖွဲ့တွေက ဆွဲထုတ်ဖို့လုပ်နေတယ် ဒဏ်ရာရတဲ့သူက ၁၀ ဦးကျော်တယ်" ဟု မဟာချိုင်မြို့တွင် အလုပ်လုပ်ကိုင်နေသည့် မြန်မာလုပ်သားတစ်ဦးက ပြော သည်။

ဖြစ်စဉ်ကြောင့် တံတားတည်ဆောက်ရေးလုပ်ငန်းတွင် အလုပ်လုပ်ကိုင်နေသူ မြန်မာအလုပ်သမား (၃)ဦးနှင့် ထိုင်းနိုင်ငံသားတစ်ဦးတို့မှာ အခင်းဖြစ်နေရာ၌ သေဆုံးသွားပြီး၊ အလုပ်သမား ၁၁ ဦးထက်မနည်း ထိခိုက်ဒဏ်ရာရရှိခဲ့သည်။အဆိုပါ ထိခိုက်‌ဒဏ်ရာရရှိသူများကို လူမူကယ်ဆယ်ရေးအဖွဲ့များက ဆေးရုံသို့ ပို့ဆောင်ပေးခဲ့ကြကြောင်း သိရသည်။

အဆိုပါ သေဆုံးသူ မြန်မာအလုပ်သမား (၃) ဦးအနက်က မောင်ချစ်ကိုကို၏ အချက်အလက်ကိုသာ သိရှိရသေးပြီး၊ ကျန်လုပ်သားနှစ်ဦးမှာ မည်သူ မည်ဝါဖြစ်ကြောင်း သိရှိရခြင်းမရှိသေးပေ။

လက်ရှိတွင် ဖြစ်စဉ်နှင့်ပတ်သက်၍ တာဝန်ရှိသူများက စုံစမ်းစစ်ဆေးမှုများပြုလုပ်နေပြီး ကွန်ကရစ်တုံးများနှင့် သံဘောင်များအောက်၌ ပိ၍ သေဆုံးနေသူ အလုပ်သမားများ၏ရုပ်အလောင်းများကို အပြင်သို့ ထုတ်နိုင်ရန် ဆောင် ရွက်လျက်ရှိကြောင်း သိရသည်။

#မြဝတီမဲဆောက်မီဒီယာ

ထိုင်းမှာ အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်မြောက်လာတဲ့ မြန်မာနိုင်ငံသား ၁၈၃ ဦးကို ထိုင်းအာဏာပိုင်တွေက နေရပ်ပြန်လည်ပို့ဆောင်

မဲဆောက်၊ နိုဝင်ဘာ ၂၈

ထိုင်းနိုင်ငံ တောင်ပိုင်းက အကျဉ်းထောင်အသီးသီးမှာ အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်မြောက်လာတဲ့ မြန်မာနိုင်ငံသား (၁၈၃) ဦးကို ထိုင်းအာဏာပိုင်တွေက ရနောင်း-ကော့သောင်း နယ်စပ်ဂိတ်ကတဆင့် နေရပ်ပြန်လည်ပို့ဆောင်ပေးခဲ့တယ်လို့ သိရပါတယ်။

ဒီနေ့ နိုဝင်ဘာလ ၂၈ ရက် မွန်းလွဲ ၁၂ နာရီအချိန်က ထိုင်းနိုင်ငံမှာ ပြစ်ဒဏ်ကျခံပြီးနောက် လွတ်မြောက်လာတဲ့ မြန်မာနိုင်ငံသား (၁၈၃) ဦးကို ထိုင်းအာ ဏာပိုင်းတွေက ထိုင်းနိုင်ငံ၊ ရနောင်းမြို့ကနေ စက်လှေဖြင့် မြန်မာနိုင်ငံ၊ ကော့ သောင်းဘက်ကို လွှဲပြောင်းပို့ဆောင်ပေးခဲ့တာပါ။

အဆိုပါ နေရပ်ပြန်လာတဲ့ မြန်မာနိုင်ငံသားတွေကို ကော့သောင်းဒေသအာဏာ ပိုင်တွေက လက်ခံကြိုဆိုခဲ့ပြီး တာဝန်ရှိသူတွေက ကိုဗစ်-၁၉ ရောဂါ စစ်ဆေးတာ၊ ကိုယ်ရေးအချက်အလက်စစ်ဆေးတာ၊ အသိပညာပေး စတဲ့ မှာကြားမှုတွေပြုလုပ်ခဲ့တယ်လို့ သိရပါတယ်။

အခုလို ထိုင်းနိုင်ငံကနေ နေရပ်ပြန်ဝင်လာသူတွေကို ကော့သောင်းအခြေစိုက် ခမရ(၂၆၂)တပ်က ဖမ်းဆီးပြီး တပ်သားသစ်စုဆောင်းတာတွေပြုလုပ်လေ့ရှိတာကြောင့် နေရပ်ပြန်လည်ဝင်ရောက်လာသူတွေနဲ့ သူတို့ရဲ့ မိသားစုဝင်တွေက စိုးရိမ်မှုတွေမြင့်တက်နေတယ်လို့ ကော့သောင်းမြို့ခံတစ်ဦးက ဆိုပါတယ်။

" ပြန်လွတ်လာတဲ့သူတွေထဲမှာ ကော့သောင်းဒေသခံပါတွေဆိုရင်တော့ သူတို့မိသားစုအသိုင်းအဝိုင်းကလာရွေးတော့ပြန်လွတ်ပေးတယ် အခြားတိုင်းနဲ့ပြည် နယ်ကသူတွေဆိုရင်တော့ မသေချာဘူး ခမရ (၂၆၂) က တပ်ထဲခေါ်သွားပြီး စစ်သားစုဆောင်းတာတွေအမြဲမြဲလိုလို လုပ်လေ့ရှိတယ်"လို့ ကော့သောင်းမြို့ မှာ နေထိုင်သူတစ်ဦးက မြဝတီ&မဲဆောက်မီဒီယာကို ပြောပါတယ်။

#မြဝတီမဲဆောက်မီဒီယာ

လာ့ခ်ျဘူရီခရိုင်မှာ ရွှေ့ပြောင်းမြန်မာကျောင်းသားကလေးငယ် (၄၀) ကျော် လိင်ပိုင်းဆိုင်ရာပြုကျင့်ခံရ

မဲဆောက်၊ နိုဝင်ဘာ ၂၈

ထိုင်းနိုင်ငံ၊ လာ့ခ်ျဘူရီခရိုင်၊ စဝမ်ဖှုန့်မြို့နယ်ရှိ ထိုင်းအစိုးရ စာသင်ကျောင်းတစ်ကျောင်းမှာ တက်ရောက်ပညာသင်ကြားနေတဲ့ ရွှေ့ပြောင်းမြန်မာကျောင်း သားကလေးငယ် (၄၀) ဟာ ထိုင်းနိုင်ငံသား ကျောင်းဆရာတစ်ဦးရဲ့ လိင်ပိုင်း ဆိုင်ရာပြုကျင့်ခံခဲ့ရပါတယ်။

ပြီးခဲ့တဲ့ နိုဝင်ဘာ ၂၅ ရက်က လာ့ခ်ျဘူရီခရိုင်၊ စဝမ်ဖှုန့်မြို့နယ်ရှိ ထိုင်းအစိုးရစာသင်ကျောင်းတစ်ကျောင်းမှာတက်ရောက်ပညာသင်ကြားနေတဲ့ ရွှေ့ပြောင်း မြန်မာကျောင်းသားကလေးငယ်(၁၈)ဦးကို ထိုင်းနိုင်ငံသားကျောင်းဆရာတစ်ဦးက လိင်ပိုင်းဆိုင်ရာပြုကျင့်မှုနဲ့ စဝမ်ဖှုန့်ရဲစခန်းမှာ မိဘအုပ်ထိန်းသူတွေကတိုင်ကြားခဲ့တာပါ။

လိင်ပိုင်းဆိုင်ရာ အမြတ်ထုတ်ခံခဲ့ရသူတွေထဲမှာ အသက် ၉ နှစ်အရွယ်ကနေ အသက် ၁၄ နှစ်အရွယ် ကျောင်းသားတွေ ပါဝင်ပါတယ်။ အဲဒီ ကျောင်းသား ငယ်တွေအများစုဟာ အကြောင်းအမျိုးမျိုးကြောင့် မြန်မာနိုင်ငံကနေ ထိုင်းနိုင်ငံဘက် လာရောက်ခိုလှုံနေတဲ့ ကရင်တိုင်းသားများရဲ့ ရင်သွေးငယ်‌လေးတွေဖြစ်တယ်လို့ သိရပါတယ်။

စစ်ဆေးချက်အရ ကျောင်းသားကလေးငယ်တွေအပေါ် လိင်ပိုင်းဆိုင်ရာပြု ကျင့်ခဲ့သူဟာ အသက် ၃၀ အရွယ်ရှိ ဆရာတွေ့ဆိုသူဖြစ်ပြီး ဥပါယ်တံမျဉ်ဖြင့် ကျောင်းသားငယ်‌ေတွကို လှည့်စားကာ စာသင်ကျောင်းမှာရှိတဲ့ သူ့ရဲ့နားနေခန်းနဲ့ အိမ်သာအဆောင်ဘက် ခေါ်ဆောင်ပြီးတော့ ပြုလုပ်ခဲ့တာဖြစ်တယ်လို့ ရဲတပ်ဖွဲ့က ဖော်ထုတ်သိရှိခဲ့ပါတယ်။

အဆိုပါ ပြစ်မှုကျူးလွန်သူထိုင်းကျောင်းဆရာဟာ အခင်းဖြစ်ပွားခဲ့တဲ့ စာသင် ကျောင်းကို ပြောင်းရွှေ့လာတာ ၂ နှစ်ခန့်ရှိပြီဖြစ်ပြီး၊ ၂ နှစ်တာကာလအတွင်း သူ လိင်အမြတ်ထုတ်ခဲ့သူ ကျောင်းသားငယ်ပေါင်း ၄၀ ကျော်အထိရှိတယ်လို့ သိရပါတယ်။

ဖြစ်စဉ်နဲ့ပတ်သက်ပြီးတော့ ထိုင်းကျောင်းဆရာက ကလေးငယ်တွေကိုမြင်ရင် စိတ်မထိန်းနိုင်တာကြောင့် ပြုလုပ်ခဲ့တာဖြစ်တယ်လို့ ရဲစခန်းမှာ ဝန်ခံထွက်ဆိုထားပါတယ်။ ထိုင်းရဲတပ်ဖွဲ့က နစ်နာသူ ကျောင်းသားငယ်များကို စစ်ဆေးမှုတွေပြုလုပ်နေကာ ပြစ်မှုကျူးလွန်သူ ထိုင်းကျောင်းဆရာကို ဥပဒေအရ အရေးယူဆောင်ရွက်သွားမယ်လို့ သိရပါတယ်။

#မြဝတီမဲဆောက်မီဒီယာ

အရက်သေစာသောက်စားပြီး မူးယစ်သောင်းကြမ်းနေကြောင်း သတင်းအရ သွားရောက်စစ်ဆေးရာက မြန်မာလုပ်သား ၁၀၀ ကျော်ဖမ်းဆီးခံရ

မဲဆောက်၊ နိုဝင်ဘာ ၂၇

ထိုင်းနိုင်ငံ၊ ချွန်ဘူရီခရိုင်က ဆောက်လုပ်ရေးလုပ်ငန်းခွင်တစ်ခုမှာ အရက်သေ စာသောက်စားပြီး မူးယစ်သောင်းကြမ်းနေကြောင်း သတင်းအရ သွားရောက်စစ်ဆေးရာက မြန်မာလုပ်သား ၁၀၀ ကျော်ဖမ်းဆီးခံရတယ်လို့ သိရပါတယ်။

နိုဝင်ဘာလ ၂၆ ရက် မနက် ၁၁ နာရီအချိန်က ချွန်ဘူရီခရိုင်၊ နောင်ယိုင်မြို့ နယ်၊ ဟန့်စူန်ကျေးရွာရှိ ဆောက်လုပ်ရေးလုပ်ငန်းခွင်တစ်ခုမှာ အရက်သေစာ သောက်စားပြီး မူးရစ်သောင်းကြမ်းနေကြောင်း သတင်းအရ ထိုင်းရဲတပ်ဖွဲ့က သွားရောက်စစ်ဆေးရာကနေ ဖမ်းဆီးခံခဲ့ရတာပါ။

စစ်ဆေးမှုအတွင်း မြန်မာလုပ်သား ၁၁၀ ဦး ဖမ်းဆီးခံရပြီး၊ ဖမ်းဆီးခံသူ ၁၁၀ ဦးအနက် ၈၅ ဦးက တရားမဝင် လုပ်သားတွေဖြစ်ကာ ကျန် ၂၅ ဦးကတော့ ပတ်စပို့စာအုပ်ရှိတယ်လို့ သိရပါတယ်။ သူတို့ ၂၅ ဦးကိုင်ဆောင်ထားတဲ့ ပစ်စပို့စ်စာအုပ်တွေကိုလည်း ထိုင်းရဲတပ်ဖွဲ့က စစ်ဆေးမှုတွေပြုလုပ်နေပါတယ်။

ဖမ်းဆီးခံရသူ လုပ်သား ၁၁၀ ဦးထဲက ၈၅ ဦးဟာ ထိုင်းနိုင်ငံမှာ အလုပ်လုပ် ကိုင်ဖို့ တစ်ဦးကို ပွဲစားခ ဘတ် ( ၁၇၀၀၀) ထောင်ပေးပြီး မြန်မာနိုင်ငံကနေရောက်ရှိတာ ၂ ရက်ခန့်သာရှိသေးပြီး သူတို့ဟာ အလုပ်တောင် မဆင်းရသေးဘူးလို့ တာဝန်ရှိသူတွေ စစ်ဆေးမေးမြန်းချိန်မှာ အလုပ်သမားတစ်ဦးက ဝန်ခံထွက်ဆိုတယ်ပါတယ်။

အဆိုပါ ဖမ်းဆီးရမိသူများကို ထိုင်းဥပဒေအရ အရေးယူဆောင်ရွက်ပြီးတာနဲ့ မြန်မာနိုင်ငံကို ပြန်လည်ပို့ဆောင်သွားမယ်လို့ သိရပါတယ်။

လက်ရှိ ထိုင်းနိုင်ငံမှာ ထိုင်းအမျိုးသားရေးတက်ကြွလှုပ်ရှားသူတွေရဲ့ လှုံ့ဆော်မှုများကြောင့် ထိုင်းနိုင်ငံအတွင်း တရားမဝင်ဝင်ရောက်နေထိုင်လုပ်ကိုင်နေကြတဲ့ မြန်မာအလုပ်သမားတွေကို ထိုင်းအာဏာပိုင်တွေက လိုက်လံစစ်ဆေးဖမ်း ဆီးမှုတွေပြုလုပ်နေပါတယ်။

#မြဝတီမဲဆောက်မီဒီယာ

ထိုင်းနိုင်ငံ၌ တရားမဝင်နေထိုင်လုပ်ကိုင်နေသည့် မြန်မာ အပါအဝင် နိုင်ငံခြား သားအလုပ်သမားများကို လာမည့် ဒီဇင်ဘာ ၃၀ ရက်တွင် ပန်းရောင်ကတ်ပြု လုပ်ပေးရန် အလုပ်သမားဝန်ကြီးဌာနက ထိုင်းအစိုးရထံ ထပ်မံ၍ တင်ပြထားကြောင်း သိရသည်။

#မြဝတီမဲဆောက်မီဒီယာ

ထိုင်းစစ်တပ်က မြဝတီမြို့နယ်ရှိ ကျားဖြန့်လုပ်ငန်းမှ ထွက်ပြေးလာသည့် နိုင်ငံခြားသား (၃၉) ဦးကို ကယ်တင်ပေးခဲ့ (ရုပ်/သံ)

အုပ်စုလိုက် ဆိုင်ကယ်ပတ်စီးနေတဲ့ ရေမချိုးဂိုဏ်းသားတွေကို ထိုင်းရဲဖမ်းဆီး

မဲဆောက်၊ နိုဝင်ဘာ ၂၄

ထိုင်းနိုင်ငံ၊ ဖေ့ချဘွန်ခရိုင်မှာ ဒီနေ့ နိုဝင်ဘာလ ၂၄ ရက် မနက်ပိုင်းက အုပ်စုလိုက် ဆိုင်ကယ်ပတ်စီနေတဲ့ ရေမချိုးဂိုဏ်းသားတွေကို ထိုင်းရဲတပ်ဖွဲ့က ဖမ်း ဆီးလိုက်ပါတယ်။

အခြားခရိုင်တစ်ခုက‌နေ ဖေ့ချဘွန်ခရိုင်ထဲကို ထိုင်းဘာသာနဲ့ "နမ်းမိုက်အတ်" လို့ခေါ်တဲ့ ရေမချိုးဂိုဏ်းအဖွဲ့ ဆိုင်ကယ်အစီး (၄၀၀) ကျော်နဲ့ ဝင်ရောက်လာကြောင်း သတင်းအရ ဖေ့ချဘွန်ခရိုင်ရဲတပ်ဖွဲ့က စစ်ဆေးဂိတ် (၃) ဂိတ်ချပြီး ဖမ်းဆီးခဲ့တာပါ။

အဆိုပါ စစ်ဆေးရေးဂိတ်တွေထဲ မောင်းနင်ဝင်ရောက်လာတဲ့ ရေမချိုးဂိုဏ်းသားတွေရဲ့ ဆိုင်ကယ်အစီးရေ (၄၀၀)ကျော်ကို ရဲတပ်ဖွဲ့က တားစီးစစ်ဆေးခဲ့ရာ ဆိုင်ကယ်အစီး(၄၀၀)ကျော်အနက်က ယာဉ်စည်းကမ်းဥပဒေလိုက်နာခြင်းမရှိတဲ့ ထိုင်းလူငယ် (၇၂) ဦးကို တွေ့ရှိရတာကြောင့် ဖမ်းဆီးအရေးယူထားတယ်လို့ သိရပါတယ်။

ဖမ်းဆီးခံရသူတွေထဲမှာ ဆိုင်ကယ်လိုင်စင်နံပါတ်ပြားမတတ်ဆင်ထားသူ ၃၈ ဦး၊ ယာဉ်မောင်းလိုင်စင်မရှိသူ ၁၆ ဦး၊ ဆိုင်ကယ်ဦးထုပ်မဆောင်သူ ၁၇ ဦးနဲ့ အခွန်မဆောင်သူ ၁ ဦးတို့ ပါဝင်ပါတယ်။

ထိုင်းနိုင်ငံ နေရာအတော်တော်များများမှာ ထိုင်းလူငယ်တွေစုပေါင်းပြီး ဂိုဏ်းဖွဲ့ကာ တစ်ဂိုဏ်းနဲ့တစ်ဂိုဏ်း ခြိမ်းဆိုပြီးတော့ အဖွဲ့လိုက်ဖြစ်စေ၊ တစ်ဦးခြင်းဖြစ်စေ ဆိုင်ကယ်မောင်းပြိုင်ပွဲ ပြုလုပ်ကြရှိပါတယ်။ အဲဒီလို ပြိုင်ပွဲတွေပြု လုပ်တဲ့အခါ ဆိုင်ကယ်သံတွေ ဆူညံမှုကိုနားမခံနိုင်တဲ့ ဒေသခံပြည်သူတွေက တိုင်ကြားလာရင် ရဲတပ်ဖွဲ့က လိုက်လံဖမ်းဆီးလေ့ရှိပါတယ်။

#မြဝတီမဲဆောက်မီဒီယာ

ထိုင်းနိုင်ငံ၊ ထောင်ဌာနီမြို့တွင် နိုဝင်ဘာ ၂၃ ရက်က ကျင်းပပြုလုပ်ခဲ့သည့် “ DREAM FOR LOVE ” ဖျော်ဖြေပွဲတော်သို့ သာမန်အရပ်ဝတ်အစားဖြင့် တက်ရောက်လာသော ထိုင်းဘုရင်နှင့်မိဘုရားတို့အား တွေ့မြင်ရစဉ်။

#မြဝတီမဲဆောက်မီဒီယာ

Myanmar Hard Talk မီဒီယာအနေဖြင့် သတင်းခိုးယူဖော်ပြခဲ့မှုအပေါ် ဝန်ချတောင်းပန်ရန် ထပ်မံသတိပေးခြင်း

#မြဝတီမဲဆောက်မီဒီယာအယ်ဒီတာအဖွဲ့

ထိုင်းလေကြောင်းလိုင်းတစ်ခုကို ဖေါက်ခွဲမည်ဟု ဖုန်းဖြင့်ခြိမ်းခြောက်ခဲ့သည့် စင်္ကာပူနိုင်ငံသားတစ်ဦး ဖမ်းဆီးခံရ

မဲဆောက်၊ နိုဝင်ဘာ ၂၃

ထိုင်းနိုင်ငံ၊ ဘန်ကောက်မြို့တော်ရှိ ဒွန်မောင်းအပြည်ပြည်ဆိုင်ရာလေဆိပ်မှ ဘန်ကောက်-ဟတ်ယိုင် ပျံသန်းနေသည့် လေကြောင်းလိုင်းတစ်ခုကို ဖေါက်ခွဲမည်ဟု ဖုန်းဖြင့်ဆက်သွယ်ခြိမ်းခြောက်ခဲ့သော စင်္ကာပူနိုင်ငံသားတစ်ဦး ဖမ်း ဆီးခံရကြောင်း သိရသည်။

ဖြစ်စဉ်မှာ ပြီးခဲ့သည့် နိုဝင်ဘာ ၂၁ ရက် နံနက်ပိုင်းက စင်္ကာပူနိုင်ငံသားတစ်ဦးသည် ဒွန်မောင်းလေဆိပ်၏ " Information Center " သို့ ဖုန်းဖြင့်ဆက်သွယ်၍ ဘန်ကောက်-ဟတ်ယိုင် ပျံသန်း‌နေသည့် လေယာဥ်တစ်စီးကို ဖောက်ခွဲရန်အတွက် လေယာဉ်ပေါ်၌ ဗုံးတပ်ဆင်ထားသည်ဟု ခြိမ်းခြောက်ပြောဆိုခဲ့ကြောင်း သိရသည်။

လေဆိပ်တာဝန်ရှိသူများက ဖုန်းဖြင့် ဆက်သွယ်ခြိမ်းခြောက်ခဲ့သည့်အတွက် ခရီးသည် ၁၆၂ ဦးဖြင့် ဒွန်မောင်းလေဆိပ်မှ ဟတ်ယိုင်သို့ ထွက်ခွါသွားသည့် လေယာဉ်မှူးများထံ အရေးပေါ်ဆက်သွယ်၍ ဟတ်ယိုင်သို့ဆက်လက်ပျံသန်းခြင်းမပြုဘဲ ဒွန်မောင်းလေဆိပ်သို့ ပြန်လည်ဆင်းသက်လာရန် ညွှန်ကြားခဲ့ရ ကြောင်း သိရသည်။

ထိုသို့ အရေးပေါ်ဆက်သွယ်ပြီး ညွှန်ကြားလာသဖြင့် လေယာဉ်မှူးများသည် ဟတ်ယိုင်မြို့သို့ ဆက်လက်ပျံသန်းခြင်းမပြုဘဲ ဒွန်မောင်းလေဆိပ်သို့ ပြန် လည်ဆင်းသက်ခဲ့ကြသည်။

အဆိုပါ လေယာဉ် လေဆိပ်သို့ရောက်ရှိလာသောအခါ အသင့်စောင့်နေသည့်လုံခြုံရေးတပ်ဖွဲ့ဝင်များက ခရီးသည်များကို ဘေးကင်းရာသို့ခေါ်ဆောင်သွားပြီး‌နောက် စစ်ဆေးမှုများပြုလုပ်ခဲ့ရာ လေယာဉ်ပေါ်တွင် ပေါက်ကွဲစေတတ် သည့် အရာဝတ္ထုများ ရှာ‌ဖွေတွေ့ရှိခဲ့ခြင်းမရှိကြောင်း သိရသည်။

ထို့ကြောင့် သတင်းအချက်အမှားပေး၍ လေယာဥ်အား ဖေါက်ခွဲမည်ဟု ခြိမ်း ခြောက်ပြောဆိုခဲ့သူ၏ဖုန်းနံပါတ်ကို ထိုင်းအာဏာပိုင်းများမှ ခြေရာခံ၍လိုက် လံဖမ်းဆီးခဲ့ရာ ယမန်နေ့ နိုဝင်ဘာ ၂၂ ရက် ည ၇ နာရီအချိန်တွင် ဒွန်‌မောင်း လေဆိပ်အတွင်း၌ ဖမ်းဆီရမိခဲ့ကြောင်း သိရသည်။

အဆိုပါ ခြိမ်းခြောက်ပြောဆိုခဲ့သူသည် စင်္ကာပူနိုင်ငံသား Mr. Ho Wai Chong ဆိုသူဖြစ်ကာ ယင်းသို့ ပြောဆိုခဲ့ခြင်းမှာ မိသားစုပြဿနာကြောင့် စိတ်ရှုပ်ထွေးကာ ပြုမှုလုပ်ဆောင်းခဲ့ခြင်းဖြစ်ကြောင်း ရဲစခန်းတွင် ဝန်ခံထွက်ထားပြီး ၎င်းအား ထိုင်းရဲတပ်ဖွဲ့က ဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။

#မြဝတီမဲဆောက်မီဒီယာ

#ထိုင်း #ဘန်ကောက် #ဒွန်မောင်းအပြည်ပြည်ဆိုင်ရာလေဆိပ် #ဟတ်ယိုင် #စင်္ကာပူနိုင်ငံသား #‌ဖေါက်ခွဲ #ခြိမ်းခြောက်

ထိုင်းတွင် အုပ်စုဖွဲ့၍ အွန်လိုင်းပေါ်၌ နာမည်ကြီးနေသည့် မြန်မာလူငယ်ဂိုဏ်းကိုဖမ်းဆီးစစ်‌ဆေးရန် ထိုင်းရဲချုပ်အမိန့်ပေး

မဲဆောက်၊ နိုဝင်ဘာ ၂၃

ထိုင်းနိုင်ငံတွင် အုပ်စုဖွဲ့၍ အွန်လိုင်း‌ပေါ်၌ နာမည်ကြီးနေသည့် မြန်မာလူငယ်ဂိုဏ်းကို ဖမ်းဆီးစစ်ဆေးရန် နိုဝင်ဘာ ၂၂ ရက်က ဘန်‌ကောက်မြို့၌ ကျင်းပပြုလုပ်ခဲ့သည့် ထိုင်းရဲတပ်ဖွဲ့ချုပ်၏ ဗဟိုအစည်းအဝေးအပြီးတွင် ထိုင်းရဲချုပ် ကစ်လတ် ဖန်ဖင်က အမိန့်ပေးခဲ့ကြောင်း သိရသည်။

ထိုင်းရဲချုပ်မှ ဖမ်းဆီးစစ်ဆေးရန် အမိန့်ပေးခံရသော မြန်မာလူငယ်အဖွဲ့သည် ကရင်တိုင်းရင်းသားလူငယ်များဦးဆောင်မှုဖြင့်ဖွဲ့စည်းထားသော အဖွဲ့အစည်းတစ်ခုဖြစ်ပြီး အွန်လိုင်းပေါ်၌ ၎င်းတို့အဖွဲ့ သွားလာလှုပ်ရှားနေသည့် Video ဖိုင်များကို ထုတ်လွှင့်ခဲ့ကြသည်။

ထိုသို့ ထုတ်လွှင့်ခဲ့သည့် Video ဖိုင်များသည် လူစုလူဝေးနှင့် တွေ့ဆုံပြော ဆိုနေခြင်းဖြစ်ပြီး၊ ၎င်းတို့ ပြောဆိုနေသည့် ဘာသာစကားကို နားမလည်သည့် ထိုင်းနိုင်ငံသားများကအပြင်းအထန်ဝေဖန်ခဲ့ကြသဖြင့် ထိုင်းရဲချုပ်က ဖမ်းဆီး ရန် အမိန့်ပေးခဲ့ခြင်းဖြစ်သည်။

"အွန်လိုင်းမှာ ရွှေ့ပြောင်းလုပ်သားတွေရဲ့ အပြုအမှုအနေထိုင်နဲ့ ပတ်သက်တဲ့ Video ဖိုင်တွေကိုတွေ့ရှိရတယ် သူတို့က ဂိုဏ်းဂဏပုံစံမျိုးဖွဲ့စည်းထားတာမျိုးဖြစ်ပြီး ဒါဟာ ထိုင်းနိုင်ငံရဲ့ဥပဒေကို စိန်ခေါ်နေသလိုဖြစ်နေတဲ့အတွက် ရဲမှူးချုပ် ထနာ ချူဝုန်င်ကို Video ဖိုင်တွေနဲ့ပတ်သက်ပြီး စစ်ဆေးဖို့ တာဝန်ပေးထားပြီး တကယ်လို့ ဒီ Video ဖိုင်တွေဟာ ထိုင်းနိုင်ငံမှာ ရိုက်ကူးထားတာဆိုရင် ဖမ်းဆီးအရေးယူဖို့ ညွှန်ကြားထားတယ်" ဟု ထိုင်းရဲချုပ်က ပြော သည်။

ထို့ပြင် ထိုင်းနိုင်ငံ၌ နိုင်ငံခြားလုပ်သားများက ယခုကဲ့သို့ လာရောက်ပြုမှုလုပ် ဆောင်ခြင်းကို ခွင့်မပြုကြောင်း၊ သက်ဆိုင်ရာ နယ်မြေအသီးသီးရှိ တာဝန်ရှိသူများအနေဖြင့် ကြပ်ကြပ်မတ်မတ်ကိုင်တွယ်ရန်နှင့် အဆိုပါ ဂိုဏ်းဂဏများကို ကိုယ်ကျိုးစီးပွားအတွက် အကာအကွယ်ပေးထားကြောင်း စစ်ဆေးတွေ့ရှိရပါက သက်ဆိုင်ရာဌာနမှ တာဝန်ရှိသူများအား ဥပဒေအရ ပြတ်ပြတ်သားသားအရေးယူဆောင်ရွက်သွားမည်ဖြစ်ကြောင်း ထိုင်းရဲချုပ်က ဆိုသည်။

လက်ရှိတွင် အွန်လိုင်းပေါ်၌ လူစုလူဝေးဖြင့် Video ရိုက်ကူး၍ ထုတ်လွှင့်ခဲ့သည့် နေရာများကို စစ်ဆေးမှုများပြုလုပ်နေပြီး၊ အဆိုပါ ဖြစ်စဉ်အတွင်း ပါ ဝင်သူများအား ဖမ်းဆီးအရေးယူနိုင်ရန်အတွက် ထိုင်းရဲတပ်ဖွဲ့က စုံစမ်း စစ် ဆေးမှုများပြုလုပ်လျက်ရှိကြောင်း သိရသည်။

#မြဝတီမဲဆောက်မီဒီယာ

လက်ရှိ ထိုင်းအစိုးရပါတီဖျက်သိမ်းဖို့ တိုင်ကြားမှုကို ထိုင်းအ‌ခြေခံဖွဲ့စည်းပုံဥပဒေတရားရုံးက ပယ်ချ

မဲဆောက်၊ နိုဝင်ဘာ ၂၂

ထိုင်းဝန်ကြီးချုပ်(ဟောင်း) သက်ရှင် ရှင်နာဝပ်ဟာ လက်ရှိ အာဏာရပါတီ ဖုယာ့ထိုင်း(ဖွေထိုင်း)ပါတီအပေါ် ဩဇာလွှမ်းမိုးပြီး ထိုင်းအစိုးရအဖွဲ့အပေါ် ဝင်ရောက်စွက်ဖက်မှုတွေရှိနေတယ်လို့ဆိုကာ အချက်(၆)နဲ့ လက်ရှိထိုင်းအစိုးရကို မထောက်ခံသူအချို့ရဲ့ တိုင်ကြားမှုကို အခြေခံဖွဲ့စည်းပုံဥပဒေတရားရုံးက ဒီနေ့ နိုဝင်ဘာလ ၂၂ ရက်မှာ လက်ခံခြင်းမရှိဘဲ ပယ်ချလိုက်ပါတယ်။

ပြီးခဲ့တဲ့ အောက်တိုဘာလပိုင်းက လက်ရှိထိုင်းအစိုးရကို မထောက်ခံသူအချို့က တိုင်ကြားခဲ့ခြင်းဖြစ်ပြီး၊ အဆိုပါ တိုင်ကြားမှုကို ထိုင်းအ‌ခြေခံဖွဲ့စည်းပုံဥပ ဒေတရားရုံးက လက်ခံပြီး အပြစ်ရှိကြောင်း ဆုံးဖြတ်ခဲ့မယ်ဆိုရင် အာဏာရ ဖု့ယာထိုင်းပါတီအနေနဲ့ ပါတီဖျက်သိမ်းခံရတဲ့အထိ အရေးယူခြင်းခံရမှာဖြစ်ပါတယ်။

အဆိုပါ တိုင်းကြားမှုဟာ လက်ရှိထိုင်းအစိုးရ ချမှတ်ထားတဲ့ ပေါ်လစီတွေနဲ့ အုပ်ချုပ်ရေးပိုင်းမှာ အဟန့်အတားတစ်ခုဖြစ်ခဲ့ပြီး ဒီနေ့ နိုဝင်ဘာ ၂၂ ရက်မှာ ထိုင်းအခြေခံဖွဲ့စည်းပုံတရားရုံးတော်က တိုင်ကြားမှုကို လက်မခံဘဲ ပယ်ချခဲ့တာကြောင့် ထိုင်းအစိုးရအတွက် ခေါင်းခဲစရာမရှိတော့ဘူးလို့ ဆိုရမှာပါ။

ထိုင်းအခြေခံဖွဲ့စည်းပုံတရားရုံးရဲ့ ဆုံးဖြတ်ချက်ဟာ ထိုင်းအစိုးရအဖွဲ့တင်မက ထိုင်းနိုင်ငံမှာ တရားမဝင် အလုပ် လုပ်ကိုင်နေကြတဲ့ မြန်မာ၊ ကမ္ဘောဒီးယား၊ လာအို၊ ဗီယက်နမ် အလုပ်သမားတွေအတွက် ဝမ်းသာစရာသတင်းကောင်းတစ်ခုဖြစ်ပြီး၊ မကြာခင် တရားဝင် နေထိုင်ခွင့်အထောက်အထား ပန်းရောင်ကတ်လက်မှတ်ပြုလုပ်ပေးတော့မယ်လို့ သုံးသပ်ယူဆမိကြောင်း ထိုင်းရောက်မြန်မာလုပ်သားအရေးကူညီဆောင်ရွက်ပေးနေသူတစ်ဦးက ပြောပါတယ်။

#မြဝတီမဲဆောက်မီဒီယာ

ထိုင်းရဲလိုက်ဖမ်းလို့ မောင်းပြေးရာကနေ လမ်းဘေးမီးတိုင်ကို ဝင်တိုက်မိပြီး သေဆုံးခဲ့ရတဲ့ မြန်မာအလုပ်သမား(၇)ဦးအနက်က ဇနီးမောင်နှံနှစ်ဦးအတွက် (M.H.A.C) မဟာမိတ်အဖွဲ့မှ လိုက်ပါကူညီဆောင်ရွက်ပေးနေ

မဲဆောက်၊ နိုဝင်ဘာ ၂၁

ထိုင်းရဲလိုက်ဖမ်းလို့ မောင်းပြေးရာကနေ လမ်းဘေးမီးတိုင်ကို ဝင်တိုက်မိပြီး သေဆုံးခဲ့ရတဲ့ မြန်မာအလုပ်သမား(၇)ဦးအနက်က ဇနီးမောင်နှံနှစ်ဦးအတွက် ထိုက်သင့်တဲ့ နစ်နာကြေးများရရှိအောင်(M.H.A.C)မဟာမိတ်အဖွဲ့မှ လိုက် ပါကူညီဆောင်ရွက်ပေးနေတယ်လို့ သိရပါတယ်။

ပြီးခဲ့တဲ့ နိုဝင်ဘာလ ၁၉ ရက် ည ၁၁ နာရီကျော်အချိန့်ခန်က နခွန်ပထုံခရိုင်၊ ဘန်လင်မြို့နယ်၊ ဘန်လင်ကျေးရွာအနီးမှာ ဖွင့်လှစ်ထားတဲ့ စတိုးဆိုင်အရှေ့ ရပ်ထားတဲ့ ပစ်ကပ်ကားတစ်စီးကို ထိုင်းရဲတပ်ဖွဲ့က ခေါ်ယူစစ်ဆေးခဲ့ရာ ကားသမားက စစ်ဆေးမှုမခံယူဘဲ မောင်းပြေးရာကနေ လမ်းကွေ့တစ်နေရာမှာ အရှိန်မထိန်းဘဲ လမ်းဘေးမီးတိုင်ဝင်တိုက်မိပြီး ကားပေါ်မှာ လိုက်ပါလာသူ မြန်မာလုပ်သား (၇) ဦးလုံး သေဆုံးခဲ့တာပါ။

သေဆုံးသူတွေထဲမှာ ကားမောင်းသူ ကိုအောင်အောင်ဦး အသက် ၂၉ နှစ်နဲ့၊ ကိုလင်းဇော်အောင် အသက် ၃၁ နှစ်၊ မဇာဇာဦး အသက် ၃၁ နှစ်၊ မသီရိကို ကို အသက် ၂၄ နှစ်၊ မနှင်းကိုကို အသက် ၂၁ နှစ်၊ မအေးသက်မွန် အသက် ၂၉ နှစ်၊ မအေးမြတ်မွန် ၂၇ နှစ်တို့ ပါဝင်ပါတယ်။

အဆိုပါ Accident ဖြစ်ပွားခဲ့တဲ့ ပစ်ကပ်ကားဟာ ပထုံဌာနီခရိုင်၊ တလာ့တ်ထိုင်းဈေးကနေ အခြားခရိုင်တစ်ခုမှာ သွားရောက် အလုပ်လုပ်ကိုင်ဖို့အတွက် မြန်မာလုပ်သား ၆ ဦးကို ယာဉ်မောင်း ကိုအောင်အောင်ဦးက ခေါ်ဆောင်လာတာဖြစ်ပြီး နခွန်ပထုံခရိုင်၊ ဘန်လန်မြို့နယ်၊ ဘန်လင်ကျေးရွာအနီးရောက်ရှိလာချိန် ထိုင်းရဲက လိုက်ဖမ်းလို့ မောင်းပြေးရာကနေ လမ်းဘေးမီးတိုင်ကို ဝင်တိုက်မိပြီး အသက်ဆုံးရှုံးခဲ့ရတာဖြစ်ပါတယ်။

ဖြစ်စဉ်အတွင်း သေဆုံးခဲ့သူ မြန်မာလုပ်သား ၇ ဦးအနက် ဇနီးမောင်နှံနှစ်ဦးရဲ့ ကျန်ရစ်သူမိသားစုဝင်များကို ကိုရဲမင်း ဦးဆောင်တဲ့(M.H.A.C)မဟာမိတ်အဖွဲ့က လိုက်ပါကူညီဆောင်ရွက်ပေးနေပြီး၊ ကျန်ရှိတဲ့ ၅ ဦးအတွက်ကိုတော့ ထိုင်းရောက်မြန်မာလုပ်သားအရေး ကူညီဆောင်ရွက်ပေးနေတဲ့ NGO အဖွဲ့အစည်းတစ်ခုက လိုက်ပါ‌ေဆာင်ရွက်ပေးနေတယ်လို့ သိရပါတယ်။

#မြဝတီမဲဆောက်မီဒီယာ

ထိုင်းနိုင်ငံသို့ MoU စနစ်ဖြင့် အလုပ်လုပ်ကိုင်ရန် ပြည်ပအလုပ်အကိုင်ရှာဖွေ ရေး Mya Yeik Hlyan Yan အေဂျင်စီမှ စေလွှတ်ခဲ့သည့် မြန်မာအလုပ် သမား ၆ ဦးသည် ထိုင်းနိုင်ငံသို့ရောက်ရှိလာပြီးနောက် (၃)လကြာသည်အထိ အလုပ်မရရှိသေးသဖြင့် အခက်အခဲများကြုံတွေ့နေကြောင်း သိရသည်။

#မြဝတီမဲဆောက်မီဒီယာ

#MinistryOfLabourMyanmar #SafeMigration #MyanmarLabourAttacheOffice #MoeafThai

မြန်မာဘက်ကို ပို့ဆောင်မယ်လို့ယူဆရတဲ့ ဆေးခြောက် ကီလို (၃၀) ခန့် မဲဆောက်မှာ ပိုင်ရှင်မဲ့ သိမ်းဆည်းရမိ

မဲဆောက်၊ နိုဝင်ဘာ ၁၈

ထိုင်း-မြန်မာ နယ်စပ်၊ ထိုင်းနိုင်ငံ၊ မဲဆောက်မြို့နယ်မှာ မြန်မာနိုင်ငံ၊ မြဝတီဘက်ကို ပို့ဆောင်မယ်လို့ ယူဆရတဲ့ ဆေးခြောက် ကီလို (၃၀) ခန့် ပိုင်ရှင်မဲ့ သိမ်းဆည်းရမိခဲ့တယ်လို့ သိရပါတယ်။

ပြီးခဲ့တဲ့ နိုဝင်ဘာလ ၁၄ ရက် နေ့လယ် ၃ နာရီခွဲအချိန်က မဲဆောက်မြို့နယ်၊ အမှတ် (၉)၊ မဟာဝမ်ကျေးရွာအုပ်စု၊ မဟာဝုန်ကျေးရွာအနီးက သောင်ရင်း မြစ်ကမ်းစပ်မှာ ထိုင်းစစ်တပ်က တွေ့ရှိပြီး ပိုင်ရှင်မဲ့အဖြစ် သိမ်းဆည်းခဲ့တာပါ။

ဖြစ်စဉ်နဲ့ပတ်သက်ပြီး ထိုင်းစစ်တပ်က သိမ်းဆည်းရမိခဲ့တဲ့ဆေးခြောက် ကီလို ၃၀ ခန့်ကို မှတ်တမ်းပြုလုပ်ကာ မဲဆောက်မြို့၊ အကောက်ခွန်ရုံးကို လွှဲပြောင်းပေး အပ်ခဲ့တယ်လို့ သိရပါတယ်။

လွန်ခဲ့တဲ့ ဩဂုတ်လ ၂၂ ရက်ကလည်း မဲဆောက်မြို့နယ်၊ တပ်မဟာကျေးရွာ ဘက်ကို ထိုင်းလုံခြုံရေးတပ်ဖွဲ့ဝင်တွေ လှည့်ကင်းဆောင်ရွက်နေချိန် ဝါးရုံတစ် ရုံအောက်ကနေ စက္ကူဂျပ်ဖာ ၄ ဖာနဲ့ ခရီးဆောင်အိတ် ၁ လုံးထဲမှာ ထည့်ထားတဲ့ ဆေးခြောက် ၂၂.၉ ကီလိုကို ပိုင်ရှင်မဲ့ သိမ်းဆည်းရမိခဲ့ပါသေးတယ်။

#မြဝတီမဲဆောက်မီဒီယာ

#ထိုင်းမြန်မာနယ်စပ် #မဲဆောက် #မြဝတီ #ဆေးခြောက် #ပိုင်ရှင်မဲ့

မလေးရှားကို သွားရောက်အလုပ်လုပ်ကိုင်မဲ့ မြန်မာနိုင်ငံသား ၁၈ ဦး ဖိုးဖမြို့နယ်မှာ ဖမ်းဆီးခံရ

မဲဆောက်၊ နိုဝင်ဘာ ၁၇

ထိုင်း-မြန်မာ နယ်စပ်၊ ထိုင်းနိုင်ငံ၊ တာ့က်ခရိုင်၊ ဖိုးဖမြို့နယ်၊ ဖိုးဖကျေးရွာမှာ မလေးရှားနိုင်ငံကို သွားရောက်အလုပ်လုပ်ကိုင်ဖို့ ကရင်ပြည်နယ်၊ မြဝတီခရိုင်ဘက်‌နေ တရားမဝင်ဝင်ရောက်လာတဲ့ မြန်မာနိုင်ငံသား ၁၈ ဦး ဒီနေ့ နိုဝင်ဘာ ၁၇ ရက် မနက် ၄ နာရီခွဲအချိန်က ဖမ်းဆီးခံရတယ်လို့ သိရပါတယ်။

ဖမ်းဆီးခံရသူတွေထဲမှာ အမျိုးသား ၁၂ ဦး၊ အမျိုးသမီး ၄ ဦး၊ ကလေးငယ် ၂ ဦးတို့ ပါဝင်ပါတယ်။ သူတို့ဟာ ကရင်ပြည်နယ်၊ မြဝတီခရိုင်ဘက်ကနေ ထိုင်းနိုင်ငံ၊ တာ့က်ခရိုင်၊ ဖိုးဖမြို့နယ်ကတဆင့် ထိုင်း-မလေး နယ်စပ်ဖြတ်ပြီး မလေးရှားနိုင်ငံကို သွားရောက်အလုပ်လုပ်ကိုင်ဖို့ ဝင်ရောက်လာတာဖြစ်တယ်လို့ သိရပါတယ်။

လက်ရှိမှာ ဖမ်းဆီးရမိသူများကို ဖိုးဖမြို့နယ်ရဲစခန်းမှာ ထိန်းသိမ်းထားပြီး ဥပဒေအရ အရေးယူဆောင်ရွက်ပြီးတာနဲ့ မြန်မာနိုင်ငံကို ပြန်လည်ပို့ဆောင်သွားမယ်လို့ သိရပါတယ်။

ပြီးခဲ့တဲ့ နိုဝင်ဘာလ ၁၆ ရက် နေ့လယ် ၃ နာရီအချိန်ကလည်း ထိုင်းနိုင်ငံမှာ အလုပ်လုပ်လိုင်ဖို့ မဲဆောက်မြို့ကနေ ကရင်ပြည်နယ်၊ မြဝတီဘက်ပစ္စည်းပို့ပြီးပြန်လာတဲ့ ကုန်တင်ကားပေါ်မှာ ပုန်းအောင်းလိုက်ပါလာတဲ့ မြန်မာနိုင်ငံသား ၈ ဦးကို ထိုင်းအာဏာပိုင်တွေက တွေ့ရှိပြီး ဖမ်းဆီးအရေးယူထားပါတယ်။

#မြဝတီမဲဆောက်မီဒီယာ

#ထိုင်းမြန်မာနယ်စပ် #ဖိုးဖ #မြဝတီ #မဲဆောက် #မြန်မာနိုင်ငံသား #တရားမဝင်

မဲဆောက်မြို့ကနေ မြဝတီဘက် ပစ္စည်းသွားပို့တဲ့ ထိုင်းကုန်တင်ကားပေါ် ပုန်းအောင်းလိုက်ပါလာတဲ့ မြန်မာနိုင်ငံသား (၈) ဦး ဖမ်းဆီးခံရ

မဲဆောက်၊ နိုဝင်ဘာ ၁၇

ထိုင်းနိုင်ငံ၊ မဲဆောက်မြို့ကနေ ကရင်ပြည်နယ်၊ မြဝတီဘက် ပစ္စည်းသွားပို့ပြီး ပြန်လာတဲ့ ထိုင်းကုန်တင်ကားပေါ်မှာ ပုန်းအောင်းလိုက်ပါလာတဲ့ မြန်မာနိုင်ငံသား (၈) ဦးကို ထိုင်းအာဏာပိုင်တွေက ဖမ်းဆီးလိုက်ပါတယ်။

နိုဝင်ဘာလ ၁၆ ရက် နေ့လယ် ၃ နာရီအချိန်က ထိုင်းနိုင်ငံ၊ မဲဆောက်မြို့ကနေ ကရင်ပြည်နယ်၊ မြဝတီဘက်ကို ပစ္စည်းပို့ဆောင်ပြီး ထိုင်း-မြန်မာ အမှတ် (၂) တံတားပေါ်ကနေ မဲဆောက်မြို့ကို ပြန်လည်ဝင်ရောက်လာတဲ့ ထိုင်းကုန်တင်ကားတစ်စီးကို စစ်ဆေးရာ‌ကနေ ဖမ်းမိခဲ့တာဖြစ်ပါတယ်။

ဖမ်းဆီးရမိသူတွေထဲမှာ အမျိုးသား ၆ ဦး၊ အမျိုးသမီး ၂ ဦး ပါဝင်ပါတယ်။ သူတို့ဟာ ထိုင်းနိုင်ငံမှာ အလုပ်လုပ်ကိုင်ဖို့ မြဝတီမြို့ကို ပစ္စည်းလာပို့တဲ့ ကုန်တင်ကားပေါ်မှာ ပုန်းအောင်းလိုက်ပါလာတာဖြစ်တယ်လို့ သိရပါတယ်။

ဖြစ်စဉ်နဲ့ပတ်သက်ပြီး ဖမ်းဆီးရမိသူ မြန်မာနိုင်ငံသား (၈) ဦးနဲ့ သူတို့ကို ကုန်တင်ကား‌နဲ့တင်ဆောင်လာတဲ့ ထိုင်းနိုင်ငံသားယာဉ်မောင်း အုပ်နိထိအပါအဝင် ပြစ်မှုကျူးလွန်ရာမှာ အသုံးပြုခဲ့တဲ့ ၁၈ ဘီးကားကို သက်သေခံအဖြစ် သိမ်း ဆည်းပြီး မဲဆောက်ရဲစခန်းမှာ ထိန်းသိမ်းထားကာ ဥပဒေအရ ဆက်လက်အရေးယူဆောင်ရွက်သွားမယ်လို့ သိရပါတယ်။

#မြဝတီမဲဆောက်မီဒီယာ

#ထိုင်းမြန်မာ #အမှတ်၂တံတား #ကရင်ပြည်နယ် #မြဝတီ #မဲဆောက် #ကုန်တင်ကား #မြန်မာနိုင်ငံသား #ပုန်းအောင်း

ထိုင်းမှာ မြန်မာအချင်းချင်း သေနတ်နဲ့ပစ်သ ္ တ်ပြီး ကား (၂)စီးနဲ့ ပစ္စည်းလုယက်ယူဆောင်သွားတဲ့ တရားခံ(၃)ဦး မဲဆောက်မှာ ဖမ်းမိ

မဲဆောက်၊ နိုဝင်ဘာ ၁၅

ထိုင်းနိုင်ငံ၊ လာ့ခ်ျဘူရီခရိုင်၊ စဝမ်ဖှုန့်မြို့နယ်၊ အမှတ် (၇)၊ စဝမ်ဖှုန့်ကျေးရွာလမ်းမပေါ်မှာ နိုဝင်ဘာလ ၁၃ ရက်မနက်ပိုင်းက မြန်မာနိုင်ငံသားအချင်းချင်း သေနတ်နဲ့ပစ်သ ္ တ်ပြီး ပစ်ကပ်ကား(၂)စီးနဲ့အတူ ပစ္စည်းလုယက်ယူဆောင်သွားတဲ့ တရားခံ (၃) ဦးကို မဲဆောက်မြို့ဝင် စစ်ဆေးရေးဂိတ်မှာ ဖမ်းမိခဲ့တယ်လို့ သိရပါတယ်။

လုယက်မှုအတွင်း မြန်မာနိုင်ငံသား ကိုဆန်းဝင်းနဲ့ ကိုဇော်ဇော်တို့ (၂) ဦး သေ ဆုံးခဲ့ပြီး၊ ပြစ်မှုကျူးလွန်သူတွေက သေဆုံးသူ(၂)ဦးနဲ့ ကားနဲ့အတူလိုက်ပါတဲ့ ကိုအာကာ ဝတ်ဆင်ထားတဲ့ ရွှေ(၃)ကျပ်သား၊ ဘတ်ငွေ ၁ သိန်းခန့်နဲ့ ပစ်ကပ်ကား (၂) စီး အပါအဝင် လက်ကိုင်ဖုန်း‌တွေကို လုယူထွက်ပြေးသွားခဲ့တာပါ။

ပြစ်မှုကျူလွန်သူတွေဟာ လာ့ခ်ျဘူရီခရိုင်ကို သွားမယ်ဆိုပြီး ဖြစ်စဉ်အတွင်း အသက်ဘေးကလွတ်မြောက်လာသူ ကိုအာကာနဲ့ သေဆုံးသူ (၂) ဦးတို့ဆီကနေ ပစ်ကပ်ကား (၂) စီးကို ဘတ်ငွေ ၅ ထောင်နဲ့ ငှားရမ်းခဲ့ပြီးနောက် လမ်းခု လတ်အရောက်မှာ ကားပိုင်ရှင် (၃) ဦးအနက်က (၂) ဦးကို သေနတ်နဲ့ပစ်သ ္ တ်ပြီး ကား (၂) စီးနဲ့ ပစ္စည်းတွေ လုယက်ယူဆောင်သွားတာဖြစ်ပါတယ်။

"စဝမ်ဖှုန်မြို့နယ်ထဲက လမ်းကွေ့တစ်နေရာရောက်တော့ သေနတ်သံ (၂)ချက် ကြားရတယ်လို့ပြောတော့ ကျွန်တော်ကားပေါ်မှာလိုက်လာတဲ့ (၂) ယောက်က ပြောတယ် တောတွင်းတိရိစ္ဆာန်တွေကိုပစ်တာဖြစ်မယ်ပေါ့ ခဏနေတော့ ကျွန် တော်လည်ပင်းကို ဓါးနဲ့ထောက်ပြီး ကျွန်တော်ဝတ်ထားထားတဲ့ ရွှေဆွဲကြိုး (၃) ကျပ်သား၊ ဘဏ်စာရင်း Password တောင်းတယ် ဘဏ်ထဲမှာ ဘတ် ၁ သိန်းနီးပါရှိတယ် ပြီးတော့ အင်္ကျီချွတ်ခိုင်းပြီး ကားပေါ်နေ ကန်ချခဲ့တာ " လို့ ကားပိုင်ရှင် ကိုအာကာက ပြောပါတယ်။

ဖြစ်စဉ်အတွင်း အသက်ဘေးကနေ လွတ်မြောက်လာခဲ့သူ ကိုအာကာဟာ နိုဝင်ဘာ ၁၃ ရက် မနက်မိုးလင်းချိန်မှာ မြန်မာနိုင်ငံသားများရဲ့ အကူအညီနဲ့ ဇနီးဖြစ်သူဆီ ဖုန်းဖြင့်ဆက်သွယ်အကြောင်းကြားခဲ့ပြီး ဖြစ်စဉ်နဲ့ပတ်သက်ပြီး စဝမ်ဖှုန့်ရဲစခန်းမှာ အမှုဖွင့်တိုင်ကြားခဲ့တယ်လို့ သိရပါတယ်။

စဝမ်ဖှုန့်ရဲတပ်ဖွဲ့က အခင်းဖြစ်နေရာကို သွားရောက်စစ်ဆေးပြီးနောက် ပြစ်မှု ကျူးလွန်သူတွေထွက်ပြေးသွားရာလမ်းကြောင်းကို CCTV မှတ်တမ်းကတဆင့် ခြေရာခံပြီး ဖမ်းဆီးရမိနိုင်ရေးအတွက် အခြားနယ်မြေရှိ ရဲတပ်ဖွဲ့များနဲ့ ချိတ်ဆက်ဆောင်ရွက်နေချိန် နိုဝင်ဘာလ ၁၄ ရက် မနေ့က မဲဆောက်မြို့နယ်၊ မဲ့လမောင်းကျေးရွာရှိ ဟွေ့ယအုစစ်ဆေးရေးဂိတ်မှာ တရားခံ (၃) ဦးကို သူတို့ယူဆောင်သွားတဲ့ ကား (၂) စီးနဲ့အတူ ဖမ်းဆီးရမိခဲ့တယ်လို့ သိရပါတယ်။

အဆိုပါ ပြစ်မှုကျူးလွန်သူ (၃) ဦးဟာ နေလင်းထွန်း အသက် ၂၉ နှစ်၊ မျိုး အသက် ၂၇ နှစ်၊ ခိုလာဘူ အသက် ၃၉ နှစ်တို့ဖြစ်ပြီး မဲဆောက်ရဲတပ်ဖွဲ့က ဖမ်းဆီးရမိသူ တရားခံ (၃) ဦးကို စဝမ်ဖှုန့်ရဲစခန်းကို လွှဲပြောင်းပေးအပ်ခဲ့ပြီး စဝမ်ဖှုန့်ရဲစခန်းက ဥပဒေအရ ဆက်လက်အရေးယူဆောင်ရွက်သွားမယ်လို့ သိရပါတယ်။

#မြဝတီမဲဆောက်မီဒီယာ

အွန်လိုင်းငွေလိမ်ဂိုဏ်းက ရာဇ၀တ်မှုရှိသူတွေ နယ်စပ်ကတဆင့် ဖြတ်သန်းမှုမရှိစေဖို့ ထိုင်းတော်၀င်ရဲတပ်ဖွဲ့ လက်ထောက်ရဲချုပ်ရဲမှူးကြီးနဲ့အဖွဲ့လာ‌ရောက် စစ်ဆေး

မဲဆောက်၊ နို၀င်ဘာ ၁၄

ထိုင်း- မြန်မာ နယ်စပ်ကတဆင့် အွန်းလိုင်းငွေလိမ်ဂိုဏ်း၊ ကျားဖြန့် လုပ်ငန်းလုပ်ကိုင်နေကြတဲ့ ရာဇ၀တ်မှုရှိ သူတွေဖြတ်သန်းမှုမရှိစေရေး ထိုင်းတော်၀င်ရဲတပ်ဖွဲ့ ရဲချုပ် လက်ထောက်ရဲမှူးကြီးဦးဆောင်တဲ့ ထိုင်းအာဏာပိုင်အဖွဲ့က လာ‌ရောက်စစ်ဆေးခဲ့တယ်လို့ သိရပါတယ်။

ပြီးခဲ့တဲ့ နိုဝင်ဘာလ ၁၂ ရက်က တာ့က်ခရိုင်၊ မဲဆောက်မြို့ကို ရောက်ရှိလာတဲ့ လက်ထောက်ရဲချုပ်ရဲမှူးကြီးနဲ့အဖွဲ့ဟာ ထိုင်း-မြန်မာ အမှတ် (၁) တံတား ကိုသွားရောက်ခဲ့ပြီး ဒေသအာဏာပိုင်တွေနဲ့ အစည်းအဝေးပြုလုပ်ခဲ့တယ်လို့ သိရပါတယ်။

အစည်း‌အဝေးပွဲကို အမှတ် ၃ စစ်တိုင်းမှူးနဲ့ တာ့က်ခရိုင် လူ၀င်မှူကြီးကြပ်ရေးဌာနအပါအ၀င် မဲဆောက်မြို့ ရဲဌာန၊ နယ်ခြားစောင့် ရဲတပ်ဖွဲ့၊ သက်ဆိုင်ရာဌာနတာ၀န်ရှိသူတွေ တက်ရောက်ခဲ့တယ်လို့ သိရပါတယ်။

အစည်းဝေးမှာ တရားမ၀င် နှစ်နိုင်ငံရာဇ၀တ်မှုရှိသူတွေ နယ်စပ်ဖြတ်ကျော်မှု၊ လူကုန်းကူးခံရမှု၊ မြဝတီနဲ့ ရွှေက္ကိုဒေသရှိ အွန်လိုင်းငွေလိမ်ဂိုဏ်းတွေက လိမ် လည်ဖြားယောင်းပြီး ငွေကြေးမက်လုံပေးခေါ်ယူကာ လူကုန်ကူးခံရသူများကို ကူညီကယ်ထုတ်နိုင်ရေးနဲ့ အဆိုပါ တရားမဝင် လုပ်ငန်းတွေကို တားစီးနှိမ်နင်းနိုင်ရေးကိစ္စရပ်တွေကို ညှိနှိုင်းဆွေးနွေးခဲ့တယ်လို့ သိရပါတယ်။

ကရင်ပြည်နယ် မြ၀တီမြို့နဲ့ ရွှေက္ကိုဒေသဟာ အွန်းလိုင်းငွေလိမ်ဂိုဏ်း (ကျားဖြန့်) လုပ်ငန်းတွေကို အဓိကလုပ်ကိုင်နေတဲ့ ဒေသဖြစ်ပြီး တရုတ်မာဖီးယားဂိုဏ်းတွေက ဦးဆောင်ကာ လောင်းကစား၊ ဒစ်ဂျစ်တယ်ငွေကြေးလိမ် လည်မှု၊ မူးယစ်ဆေး၊ ပြည့်တန်ဆာလုပ်ငန်းတွေအတွက် အထိုင်ချကာလုပ်ကိုင်‌ေနတာဖြစ်တယ်လို့ နာမည်ကြီးပါတယ်။

လက်ရှိမြန်မာနိုင်ငံရေးအခင်းအကျင်းအနေအထားရ မြ၀တီမြို့နဲ့ ရွှေက္ကိုဒေသကို ကရင်လက်နက်ကိုင်တပ်ဖွဲ့တွေက အများစုထိန်းချုပ်ထားတာဖြစ်လို့ စစ်ကောင်းစီအနေနဲ့ ဥပဒေအရအရေးယူမှုနဲ့ ထိထိရောက်ရောက်ကိုင်တွယ်နိုင်တာမျိုးမရှိတဲ့အတွက် ထိုင်းနိုင်ငံအ‌ေနနဲ့ နယ်စပ်လုံခြုံရေးဆောင်ရွက်ရာမှာ အဟန့် အတားဖြစ်နေတယ်လို့ ဆိုပါတယ်။

#မြဝတီမဲဆောက်မီဒီယာ

#ထိုင်းမြန်မာနယ်စပ် #မြဝတီ #ရွှေကုက္ကို #တရုတ် #ကျားဖြန့် #အွန်လိုင်း

မြဝတီ-မဲဆောက် ချစ်ကြည်ရေးအမှတ် (၁) တံတား ပုံမှန်အတိုင်းဖွင့်လှစ်ထား (ရုပ်/သံ)

မဲဆောက်၊ နိုဝင်ဘာ ၁၄

ထိုင်း-မြန်မာ နယ်စပ်၊ မြဝတီ-မဲဆောက် ချစ်ကြည်ရေးအမှတ် (၁) တံတား ပုံမှန်အတိုင်းဖွင့်လှစ်ထားပြီး နှစ်နိုင်ငံဒေသခံပြည်သူများနှင့် ရွှေ့ပြောင်းအလုပ် သမားများ ဖြတ်သန်းသွားလာလျက်ရှိသည်။

ကရင်ပြည်နယ်၊ မြဝတီမြို့မှတဆင့် ထိုင်းနိုင်ငံ၊ မဲဆောက်မြို့သို့ သွား‌ရောက်ရာတွင် (Border Pass) ယာယီနယ်စပ်ဖြတ်သန်းခွင့်လက်မှတ် (၇) ရက် နေထိုင်ခွင့်ကတ်ပြုလုပ်၍ သွားလာနိုင်သည်။

အဆိုပါ ယာယီနယ်စပ် ဖြတ်သန်းခွင့်လက်မှတ်ဖြင့် ထိုင်းနိုင်ငံ၊ မဲဆောက်မြို့ နယ်၊ ဖိုးဖမြို့နယ်နှင့်၊ မဲ့လမတ်မြို့နယ်တို့သို့ သွားရောက်လည်ပတ်နိုင်ပြီး ထိုင်းနိုင်ငံဘက်ခြမ်းတွင် (၇) ရက်နေထိုင်ခွင့်ရှိကာ သတ်မှတ်ရက်ထက်ကျော်လွန်နေထိုင်ပါက ဒဏ်ငွေပေးဆောင်ရမည်ဖြစ်သည်။

ကုန်ကျစရိတ်အနေဖြင့် မြန်မာဘက်ခြမ်းတွင် တံတာလက်မှတ်ပြုလုပ်ခ လူသစ်/ လူဟောင်း တစ်ဦးကို ၂၀၀၀ ကျပ်၊ ထိုင်းဘက်ခြမ်းတွင် လူသစ်တစ်ဦးကို ဘတ် ၆၀၊ လူဟောင်းဆိုပါက ဘတ် ၄၀ ကျသင့်မည်ဖြစ်ကာ နိင်ငံသားစီစစ်ရေးကတ်နှင့် UID ကတ်ပါရှိယုံဖြင့် ကရင်ပြည်နယ်၊ မြဝတီမြို့မှ ထိုင်းနိုင်ငံ၊ မဲဆောက်မြို့သို့ သွားရောက်လည်ပတ်နိုင်သည်။

ထို့ပြင် နိုင်ငံကူးလက်မှတ် PJ, CI စာအုပ်တို့ဖြင့်လည်း သတ်မှတ်ထားသည့် အထောက်အထားပြည့်စုံပါက ဖြတ်သန်းသွားလာနိုင်ပြီး မြဝတီမြို့မှ ထိုင်းနိုင်ငံ၊ မဲဆောက်ဘက်သို့ PV အလည်ပတ်စပို့စ်ကိုင်ဆောင်၍ သွားရောက်သူများအား တင်းကြပ်ထားကြောင်း သိရသည်။

#မြဝတီမဲဆောက်မီဒီယာ

#ထိုင်းမြန်မာနယ်စပ် #မြဝတီ #မဲဆောက် #အမှတ်၁တံတား #ဖွင့်လှစ် #ယာယီနယ်စပ်ဖြတ်သန်းခွင့်လက်မှတ် #PJ #CI #PV #နိုင်ငံကူးလတ်မှတ်

မြန်မာ အပါအဝင် နိုင်ငံခြားသားလုပ်သားတွေ ငှားရမ်းခိုင်းစေတဲ့ လုပ်ငန်းရှင် (၄၀၀) ကျော်နဲ့ ထိုင်းအလုပ်သမားဝန်ကြီးဌာန၊ ညွှန်ချုပ်တို့ တွေ့ဆုံဆွေးနွေး

မဲဆောက်၊ နိုဝင်ဘာ ၁၄

မြန်မာ အပါအဝင် နိုင်ငံခြားသားလုပ်သားတွေ ငှားရမ်းခိုင်းစေတဲ့ လုပ်ငန်းရှင် (၄၀၀) ကျော်နဲ့ ထိုင်းအလုပ်သမားဝန်ကြီးဌာန၊ ညွှန်ကြားရေးမှူးချုပ် စုံချိုင် မော်လကွတ်စီစဝမ်တို့ ဒီကနေ့ နိုဝင်ဘာလ ၁၄ ရက် မနက် ၁၀ နာရီအချိန်က တွေ့ဆုံဆွေးနွေးခဲ့တယ်လို့ သိရပါတယ်။

အဆိုပါ တွေ့ဆုံဆွေးနွေးပွဲမှာ ဖေဖော်ဝါရီလ ၁၃ ရက် ၂၀၂၅ ခုနှစ်မှာအလုပ်လုပ်ကိုင်ခွင့် (Work Permit) သက်တမ်းကုန်ဆုံးမဲ့ မြန်မာ အလုပ်သမားတွေ အပါအဝင် နိုင်ငံခြားသားလုပ်သားတွေကို (၂) နှစ်ကို တစ်ကြိမ်နှုန်းဖြင့် သက်တမ်း (၂) ကြိမ် တိုးပေးသွားမယ်လို့ ထိုင်းအလုပ်သမားဝန်ကြီးဌာနက ထိုင်းလုပ်ငန်းရှင်တွေကို ရှင်းလင်းပြောကြားပါတယ်။

ဒါ့အပြင် ဖေဖော်ဝါရီလ ၁၃ ရက်၊ ၂၀၂၅ ခုနှစ်မှာ (Work Permit ) အလုပ်လုပ်ကိုင်ခွင့်လက်မှတ် သက်တမ်းကုန်မဲ့ အလုပ်သမားတွေအနေနဲ့ မိမိတို့နေရပ်(နိုင်ငံ)ကို ပြန်စရာမလိုဘဲ ထိုင်းနိုင်ငံမှာဘဲ သက်တမ်းတိုးခွင့်ပြုပေးသွားမှာဖြစ်ပြီး တကယ်လို့ မိမိတို့ နေရပ်နိုင်နိုင်ငံကို ပြန်ပြီးသက်တမ်းတိုးလိုပါကလည်း ခွင့်ပြုပေးသွားမယ်လို့ သိရပါတယ်။

အလားတူ ထိုင်းနိုင်ငံမှာ အလုပ်လုပ်ကိုင်နေတဲ့ နိုင်ငံခြားသား ရွှေ့ပြောင်းလုပ် သားတွေကို အလုပ်ရှင်‌အဟောင်းကနေ အလုပ်ရှင်အသစ်ပြောင်းလဲတဲ့ချိန်မှာ ကျဲ့အော့/ကျဲ့ခေါက် ပြုလုပ်ဖို့ ရက် (၆၀) ခွင့်ပြုပေးထားပါတယ်။ အဆိုပါ သတ်မှတ်ရက်အတွင်း လုပ်ငန်းမပြီးပြတ်ပါက ထပ်မံသက်တမ်းတိုးပေးသွားမယ်လို့ ထိုင်းအလုပ်သမားဝန်ကြီးဌာနက ဆိုပါတယ်။

#မြဝတီမဲဆောက်မီဒီယာ

မဲဆောက် တန်ဆောင်တိုင်ဈေးပွဲတော်ကို ထိုင်း-မြန်မာ အမှတ်(၁) အနီးရှိ တနင်္ဂနွေဈေးနေရာတွင် ပြောင်းရွှေ့ကျင်းပ

မဲဆောက်၊ နိုဝင်ဘာ ၉

ထိုင်း-မြန်မာ နယ်စပ်၊ ထိုင်းနိုင်ငံ၊ မဲဆောက်မြို့၊ တန်ဆောင်တိုင်ဈေးပွဲတော်ကို ထိုင်း-မြန်မာ အမှတ်(၁)တံတားအရှေ့တွင် ကျင်းပပြုလုပ်နေရာမှ ယမန် နေ့ နိုဝင်ဘာလ ၈ ရက် ညပိုင်းမှစတင်ကာ အမှတ်(၁)တံတားအနီးရှိ ယခင် တနင်္ဂနွေဈေးနေရာတွင် ပြောင်းရွှေ့ကျင်းပလျက်ရှိသည်။

#မြဝတီမဲဆောက်မီဒီယာ

ထိုင်းနိုင်ငံတွင် သက်တမ်းလွန်နေထိုင်သော မြန်မာနိုင်ငံသားများ ပြည်၀င်ခွင်ပိတ်ပင်ခံရသည့်အထိ အရေးယူခံရနိုင်ကြောင်း မြန်မာသံရုံးအသိပေး

မဲဆောက်၊ နို၀င်ဘာ ၈

ထိုင်းနိုင်ငံအတွင်း အကြောင်းအမျိုးမျိုးဖြင့် ရောက်ရှိနေထိုင်လျက်ရှိသည့် မြန်မာနိုင်ငံသားများအ‌နေဖြင့် မည်သို့‌သော အထောက်အထားလက်မှတ်ကိုင်ဆောင်သူထားမဆို သက်တမ်းကျော်လွန်နေထိုင်ပါက ထိုင်းလူ၀င်မှုကြီးကြပ်ရေးဗျူရိုမှ ချမှတ်ထားသည့် စည်းမျဉ်းများအရ ပြည်၀င်ခွင့်ပိတ်ပင်ခံရသည့်အထိ အရေးယူခြင်းခံရနိုင်ကြောင်း ထိုင်းနိုင်ငံဆိုင်ရာ မြန်မာသံရုံးက ယနေ့ နို၀င်ဘာ ၈ ရက် ရက်စွဲဖြင့် အသိပေးထုတ်ပြန်ထားသည်။

ထိုင်းလူ၀င်မှုကြီးကြပ်ရေးဗျူရိုမှ ချမှတ်ထားသည့် စည်းမျဉ်းစည်းကမ်းများ အရ ထိုင်းနိုင်ငံအတွင်း သက်တမ်းကျော်လွန်နေထိုင်ပါက တစ်ရက်လျင်ဘတ် ၅၀၀ နှုန်းဖြင့် စုစုပေါင်း ဘတ် ၂၀,၀၀၀ ထက်မပိုသောဒဏ်ကြေးငွေကို ချွင်းချက်မရှိ ပေးဆောင်ရမှာဖြစ်ပြီး သက်တမ်းလွန်နေထိုင်သူများအား ၎င်းတို့နေထိုင်ခဲ့သည့် သက်တမ်းလွန်ကာလအလိုက် ထိုင်းနိုင်ငံအတွင်း ပြန်လည်၀င်ရောက်ခွင့် ပိတ်ပင်သွားမည်ဖြစ်ကြောင်း ထုတ်ပြန်ချက်တွင် ပါရှိသည်။

ထိုသို့ ပိတ်ပင်ရာတွင် ရက်ပေါင်း (၉၀) နှင့်အထက် ကျော်လွန်နေထိုင်ပါက ထိုင်းနိုင်ငံသို့ ပြန်လည်၀င်ရောက်ခွင့် (၁) နှစ်ပိတ်ပင်ခံရမည်ဖြစ်ပြီး၊(၁) နှစ်အထက်ကျော်လွန်နေထိုင်ပါက ပြန်လည်၀င်ရောက်ခွင့် (၃) နှစ်နှင့်၊ (၃) နှစ်အထက်နေထိုင်ပါက ပြန်လည်၀င်ရောက်ခွင့် (၅) နှစ်၊ ((၄) နှစ်မှ (၅) နှစ်) အထက်နေထိုင်ပါက ပြန်လည်၀င်ရောက်ခွင့် (၁၀)နှစ် စသည်ဖြင့် ထိုင်းနိုင်ငံအတွင်း ပြန်လည်၀င်ရောက်ခွင့်နှင် အလုပ်လုပ်ကိုင်ခွင့်တို့ကို ပိတ်ပင်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထိုင်းတော်၀င်ရဲတပ်ဖွဲ့၊ လူ၀င်မှုကြီးကြပ်ရေးဗျူရိုအနေဖြင့် လူ၀င်မှုကြီးကြပ်ရေးအက်ဥပဒေ (B.E.2522) နှင့်အညီ နေထိုင်ခွင့် သက်တမ်းတိုးခြင်းဆိုင် ရာကိစ္စရပ်များကို အထူးအလေးထား အရေးယူ‌ဆောင်ရွက်ရှိရာ ယင်း ချမှတ်ထားသည့် စည်းမျဉ်းစည်းကမ်းများနှင့်အညီ လိုက်နာခြင်းမရှိဘဲ ထိုင်းနိုင်ငံအတွင်း သက်တမ်းကျော်လွန်နေထိုင်သူများကို ဒဏ်‌ငွေရိုက်ခြင်းနှင့် ပြည်၀င်ခွင့်ပိတ်ပင်သည်အထိ အရေးယူဆောင်ရွက်ခြင်းများ ပြုလုပ်လျက်ရှိ‌ကြောင်း သိရသည်။

ထို့ကြောင့် ထိုင်းနိုင်ငံတွင် အကြောင်းအမျိုးမျိုးဖြင့် ရောက်ရှိနေကြသည့် မြန်မာနိုင်ငံသားများအနေဖြင့် ထိုင်းလူဝင်မှုကြီးကြပ်‌ရေးဗျူရိုမှ ချမှတ်ထားသည့် စည်းမျဉ်းစည်းကမ်းများအား သတိပြုလိုက်နာခြင်းဖြင့် ထိုင်းနိုင်ငံ၌ သက်တမ်းကျော်နေထိုင်ခြင်း၊ ဒဏ်ကြေးပေးဆောင်ရခြင်းနှင့်ပြည်ဝင်ခွင့်ပိတ် ပင်ခံရခြင်းတို့ မဖြစ်ပွား‌စေရေး ဘန်ကောက်မြို့၊ မြန်မာသံရုံးက အသိပေးနှိုးဆော်ထားသည်။

#မြဝတီမဲဆောက်မီဒီယာ

ဖေဖော်ဝါရီ ၁၃ ရက် ၂၀၂၅ ခုနှစ်တွင် ယာယီ နေထိုင်ခွင့်နှင့် အလုပ်လုပ်ကိုင်ခွင့် သက်တမ်းကုန်မည့် မြန်မာအလုပ်သမားများ နိုင်ငံကူးလက်မှတ် (သို့) CI စာအုပ်သက်တမ်း အနည်းဆုံး သက်တမ်း (၂) နှစ်ကျန်ရှိရမည်

မဲဆောက်၊ နိုဝင်ဘာ ၇

ဖေဖော်ဝါရီ ၁၃ ရက် ၂၀၂၅ ခုနှစ်တွင် ယာယီ နေထိုင်ခွင့်နှင့် အလုပ်လုပ်ကိုင်ခွင့်သက်တမ်းကုန်ဆုံးမည့် မြန်မာအလုပ်သမားများအနေဖြင့်ဆက်လက်သက် တမ်းတိုးရန်အတွက် နိုင်ငံကူးလက်မှတ်(သို့)CI စာအုပ်သက်တမ်းအနည်းဆုံး (၂) နှစ် ကျန်ရှိရမည်ဖြစ်ကြောင်း ထိုင်းနိုင်ငံဆိုင်ရာ မြန်မာသံရုံးမှ အသိပေးထုတ်ပြန်ထားသည်။

ထိုင်းနိုင်ငံတွင် နိုင်ငံကူးလက်မှတ်(သို့)မည်သူမည်ဝါဖြစ်ကြောင်း သက်သေခံ လက်မှတ် CI စာအုပ်များကိုင်ဆောင်၍ အလုပ်လုပ်ကိုင်လျှက်ရှိသော မြန်မာအလုပ်သမားများသည် ဖေဖော်ဝါရီလ ၁၃ ရက် ၂၀၂၅ ခုနှစ်တွင် ယာယီ နေ ထိုင်ခွင့်နှင့် အလုပ်လုပ်ကိုင်ခွင့် သက်တမ်းကုန်ဆုံးမည်ဆိုပါက ဆက်လက်နေ ထိုင်/လုပ်ကိုင်ခွင့် ရရှိရန်အတွက် သက်တမ်းတိုးရမည်ဖြစ်သည်။

ထိုသို့ သက်တမ်းတိုးရာတွင် ထိုင်းနိုင်ငံအတွင်း ယာယီနေထိုင်အလုပ်လုပ်ကိုင်ခွင့်အား (၂) နှစ်စီ (၂) ကြိမ်ဖြင့်၊ ထိုင်းအစိုးရက စုစုပေါင်း (၄) နှစ် ခွင့်ပြုသွားမည်ဖြစ်၍ မိမိတို့ ကိုင်ဆောင်ထားသည့် နိုင်ငံကူးလက်မှတ်(သို့) CI စာ အုပ်တွင် စာအုပ်သက်တမ်း အနည်းဆုံး (၂) နှစ် သက်တမ်းကျန်ရှိရမည်ဖြစ် ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် မြန်မာအလုပ်သမားများအနေဖြင့် မိမိတို့ ကိုင်ဆောင်ထားသည့် စာအုပ်တွင် အနည်းဆုံး သက်တမ်း(၂)နှစ်ကျော်မကျန်ရှိပါက ဘန်ကောက်မြို့ရှိ မြန်မာသံရုံးနှင့် ချင်းမိုင်မြို့၊ မြန်မာကောင်စစ်ဝန်ချုပ်ရုံးတို့၌ နိုင်ငံကူးလက်မှတ်သက်တမ်းတိုး သွားရောက်ဆောင်ရွက်နိုင်ကြောင်း ထုတ်ပြန်ချက်တွင် ပါရှိသည်။

ထို့ပြင် CI စာအုပ်မှ နိုင်ငံကူးလက်မှတ်သို့ လဲလှယ်လျှောက်ထားလိုသူများအနေဖြင့် စမွတ်ဆာခွန်ခရိုင်၊ မဟာချိုင်မြို့ရှိ သာမန်မြန်မာနိုင်ငံကူးလက်မှတ် ထုတ်ပေးရေးဌာနစိတ် (TDCC) ၌ သွားရောက်ဆောင်ရွက်နိုင်ပြီး၊ CI စာ အုပ်အဟောင်းမှ စာအုပ်အသစ် လဲလှယ်ဆောင်ရွက်နိုင်ရေးအတွက် ညှိုနိုင်းမှု များပြုလုပ်ပြီးပြီဖြစ်၍ မကြာမီ ထုတ်ပြန် ကြေညာသွားမည်ဖြစ်ကြောင်း သိရသည်။

ထို့အတူ စက်ရုံ၊ အလုပ်ရုံများတွင် အလုပ်လုပ်ကိုင်နေသည့် မြန်မာလုပ်သား များအနေဖြင့် Passport မှ Passport သို့လည်းကောင်း CI စာအုပ်မှ Passport သို့လည်းကောင်း Mobile Team ဖြင့် ဆောင်ရွက်လိုပါက မြန်မာသံရုံး၊ ကောင်စစ်ဌာနသို့သွားရောက်ပြုလုပ်နိုင်ကြောင်း ထိုင်းနိုင်ငံဆိုင် ရာ မြန်မာသံရုံးမှ အသိပေးကြေညာထားသည်။

#မြဝတီမဲဆောက်မီဒီယာ

အလုပ်ရှင်မှ အပြစ်တစ်စုံတစ်ရာမရှိဘဲ အလုပ်သမားတစ်ဦးဦးအား အလုပ်မှထုတ်ပယ်လျင် နစ်နာကြေးပေးအပ်ရမည်ဟု ထိုင်းဥပဒေတွင် ပြဌာန်းထား

မဲဆောက်၊ နိုဝင်ဘာ ၂

ထိုင်းနိုင်ငံတွင် အလုပ်ရှင်မှ အပြစ်တစ်စုံတစ်ရာမရှိဘဲ အလုပ်သမားတစ်ဦး ဦးအား အလုပ်မှထုတ်ပယ်လျင် နစ်နာကြေးပေးအပ်ရမည်ဟုထိုင်းဥပဒေတွင် ပြဌာန်းထားသည်။

ထိုင်းဥပဒေအရ အလုပ်သမားသည် လုပ်ငန်းခွင်၌ ရက်ပေါင်း(၁၂ဝ)အထက် လုပ်ကိုင်ထားပြီး (၁) နှစ်အောက် လုပ်သက်ရှိပါက အလုပ်သမား၏ နောက် ဆုံးရရှိခဲ့သည့် လုပ်ခလစာအတိုင် ရက် (၃၀) စာ လုပ်အားခနှင့် ညီမျှသော နစ်နာကြေးအား အလုပ်ရှင်မှ ပေးအပ်ရမည်ဖြစ်သည်။

အလုပ်သမားအနေဖြင့် လုပ်ငန်းခွင်၌ (၁) နှစ်အထက် အလုပ်လုပ်ကိုင်ခဲ့ပြီး ၃ နှစ်အောက် လုပ်သက်ရှိပါက အလုပ်သမား၏ နောက်ဆုံးရရှိခဲ့သည့် လုပ်ခ လစာအတိုင်း ရက် (၉၀) စာ လုပ်အားခနှင့် ညီမျှသော နစ်နာကြေးငွေအား အလုပ်ရှင်မှ ပေးအပ်ရမည်ဖြစ်သည်။

ထို့အတူ လုပ်ငန်းခွင်၌ (၃) နှစ်ဆက်တိုက် အလုပ်လုပ်ကိုင်ခဲ့ပြီး (၆) နှစ်အောက် လုပ်သက်ရှိသည့် အလုပ်သမားအား အပြစ်တစ်စုံတစ်ရာမရှိဘဲ အလုပ်မှထုတ်ပယ်ခဲ့ပါ အလုပ်ရှင်အနေဖြင့် ရက် (၁၈၀) စာ လုပ်ခလစာနှင့် ညီမျှသော နစ်နာကြေးငွေအား ပေးအပ်ရမည်ဖြစ်သည်။

ထို့ပြင် အလုပ်သမားသည် လုပ်ငန်းခွင်၌ (၁၀) နှစ် (သို့မဟုတ်)၊ (၁၀) နှစ်အထက်လာပ်သက်ရှိပါက အလုပ်သမား၏ နောက်ဆုံးရရှိခဲ့သည့် လုပ်ခလ စာအတိုင်း ရက် (၃၀၀) စာ လုပ်အားခနှင့် ညီမျှသော နစ်နာကြေးငွေအား အလုပ်ရှင်မှပေးအပ်ရမည်ဟု ထိုင်းဥပဒေတွင် ပြဌာန်းထားသည်။

#မြဝတီမဲဆောက်မီဒီယာ

#ထိုင်းဥပဒေ #အလုပ်ရှင် #အလုပ်သမား #အလုပ်ထုတ် #နစ်နာကြေး

မြ၀တီ-ကော့ကရိတ် လမ်းပိုင် (၄)ခုမှ မော်တော်ယာဉ်များ ပုံမှန်အတိုင်းဖြတ်သန်းသွားလာနိုင်

မဲဆောက်၊ နို၀င်ဘာ ၂

ထိုင်း-မြန်မာ နယ်စပ်၊ ကုန်သွယ်ရေးလမ်းကြောင်း‌တွေဖြစ်တဲ့မြ၀တီ-ကော့ကရိတ် လမ်းပိုင်း(၄)ခုမှ ခရီးသည်တင်ယာဉ်များနဲ့ ကုန်ကားများပုံမှန်အတိုင်းသွားလာနိုင်ပြီဖြစ်တယ်လို့ သိရပါတယ်။

ဒေါနတောင်‌ပေါ်လမ်း အပါအ၀င် (၁၀၁၈) လမ်း၊ (ဒေသအခေါ် ၁၈ လမ်း)၊ ထို့ကော်ကိုးလမ်း၊ ကြက်ဥတောင်လမ်းပိုင်းများ ပြန်လည်ကောင်းမွန်နေပြီဖြစ်တာကြောင့် မော်ယာဉ်အကြီး၊ အသေးမျိုးစုံ တိုက်ရိုက်ဖြတ်သန်းသွားလာနိုင်ပြီဖြစ်တယ်လို့ မြ၀တီ-မော်လမြိုင် လမ်းကြောင်းပြေးဆွဲနေတဲ့ ယာဉ်မောင်းတစ်ဦးက ပြောပါတယ်။

“အခုသွားလို့ရတဲ့ လမ်းသွယ်ကတော့ ၄ ခုရှိတယ်။ ကားသေးကတော့ ဒေါနတောင်လမ်းဟောင်း နဲ့ ၁၀၁၈ လမ်းပေါ့ အဲကသွားကြတယ်။ ကျွန်တော်တို့ လည်း ၁၀၁၈ လမ်းကပဲသွားတယ်။ မော်လမြိုင်- မြဝတီ ကားခက ခရီးသည်တစ်ဦးကို အနိမ့်ဆုံး (၁)သိန်းကနေ (၁)သိန်း (၂)သောင်းလောက်ထိ ပေးရတယ်။ အရင်ကတော့ ခုနစ်သောင်းလောက်ပဲရှိတော့ ထက်၀က်လောက်ကွာ သွားတယ်။ ဂိတ်ဖြတ်ရတာ ဂိတ်ကြေးပေးရတာမျိုးတွေက အရင်ကထက်တော့အဆင်ပြေတယ်" လို့ ၎င်းက ဆက်လက် ပြောပါတယ်။

ပြီးခဲ့တဲ့ မိုးရာသီတစ်လျှောက် မြ၀တီကိုသွားတဲ့ တောင်တက်လမ်းပိုင်တွေပျက်စီးမှုနဲ့ နယ်မြေမငြိမ်သက်မှုအခြေအနေတွေကြောင့် ခရီးသည်တစ်ဦးကို ယာဥ်စီးခ ကျပ် ၁၅၀၀၀၀ အထိဈေးမြင့်တက်ခဲ့ကာ လမ်းတလျှောက် စစ်ဆေးရေးများပြားခြင်း၊ ဂိတ်ကြေးပေးဆောင်ရမှုများပြားခြင်းတို့ကြောင့် မြ၀တီ-ကော့ကရိတ်၊ မြ၀တီ-မော်လမြိုင်၊ မြ၀တီ-ရန်ကုန် သွားလာရေးမှာ အဆင်မပြေမှုတွေ မျိုးစုံကြုံတွေ့ခဲ့ရတာပါ။

မြ၀တီ-ကော့ကရိတ် လမ်းပိုင်းမှာ စစ်ဆေးရေးဂိတ် ၁၀ ခုကျော်နဲ့ မြ၀တီ- မော်လမြိုင်သွားလမ်းပိုင်းမှာတော့ စစ်ဆေးရေး ဂိတ် ၂၀ ကျော်နီးပါးဖြတ် သန်းရပြီး စစ်ဆေးရေး ဂိတ်တစ်ဂိတ်ကို ကားသေးတစ်စီးလျှင် အမြင့်ဆုံး ၃၀၀၀၀ ကျပ် ၁၀၀၀၀ မှ အနိမ့်ဆုံး ကျပ် ၅၀၀၀ ထိဖြတ်သန်းခပေးရပြီး တပိုင်တနိုင်ပစ္စည်းတင်ဆောင်လာပါက စစ်ဆေးတာ၊ သိမ်းဆည်းတာမျိုးတွေရှိတာကြောင့် လမ်းပိုင်းမှာရှိတဲ့ စစ်ဆေးရေးဂိတ်တွေကို ငွေကြေးပေးဆောင်မှသာ ဖြတ်သန်းသွားလာခွင့်ရတာလို့ မြ၀တီ-ကော့ကရိတ်လမ်းပိုင်းမှာ ပြေးဆွဲနေတဲ့ ယာဉ်မောင်း‌တွေဆီက သိရပါတယ်။

#မြဝတီမဲဆောက်မီဒီယာ

ဓါတ်ပုံ- CJ

#ထိုင်းမြန်မာနယ်စပ် #မြဝတီကော့ကရိတ်လမ်းပိုင်း #မော်တော်ယာဉ် #ဖြတ်သန်းသွားလာ #စစ်ဆေးရဂိတ်

ထိုင်းအစိုးရက ပညာရေးပိုင်းမှာ ထူးချွန်တဲ့ မြန်မာကျောင်းသားတွေကို ထိုင်းနိုင်ငံသားဖြစ်ခွင့်ပေးအပ်

မဲဆောက်၊ နို၀င်ဘာ ၁

ထိုင်းအစိုးရကျောင်းတွေမှာ တက်ရောက်ပညာသင်ကြားနေတဲ့ မြန်မာကလေးတွေဟာ ပညာရေးနဲ့အားကစားကဏ္ဍတစ်ခုခုမှာထူးချွန်ပြီး နိုင်ငံတကာအဆင့် ပြိုင်ပွဲများအထိ ၀င်ရောက်ယှဉ်ပြိုင်ခွင့်ရပါက ထိုင်းအစိုးရက အထူးအခွင့်အ ရေးအနေနဲ့ နိုင်ငံသားဖြစ်ခွင့်ပေးအပ်ပါတယ်။

ထိုင်းနိုင်ငံမှာ အလုပ်လုပ်ကိုင်နေကြတဲ့ မြန်မာရွှေ့ပြောင်းအလုပ်သမား အမိ၊ အဖနှစ်ဦးက မွေးဖွားပြီး ထိုင်းစာသင်ကျောင်းတွေမှာ ပညာသင်ကြားခွင့်ရနေတဲ့ မြန်မာကလေးငယ်တွေထဲက ပန်းချီ၊ စာပေ၊ ရသ၊ အားကစားကဏ္ဍတစ်ခု ခုမှာထူးချွန်ပြီး မြို့နယ်အဆင့်ကနေ နိုင်ငံအဆင့်အထိ ရွေးချယ်ခံရကာ နိုင်ငံ တကာအဆင့်ပြိုင်ပွဲတွေအထိ ၀င်ရောက်ယှဉ်ပြိုင်ခွင့်ရပါက ထိုင်းနိုင်ငံသားဖြစ်ခွင့်ကို အထူးအခွင့်အရေးအနေနဲ့ ပေးအပ်တာပါ။

ဒါ့အပြင် ထိုင်းနိုင်ငံမှာမွေးဖွားပြီး ထိုင်းအစိုးရကျောင်းတွေမှာပညာသင်ကြားခွင့်ရတဲ့ မြန်မာကလေးတွေအ‌ေနနဲ့ အထက်တန်းအောင်မြင်ပြီး ထိုင်းနိုင်ငံရှိ တက္ကသိုလ်တစ်ခုခုက မည်သည့်ဘာသာရပ်နဲ့မဆို ဘွဲ့ရရှိပါက ထိုင်းနိုင်ငံသားဖြစ်ခွင့် လျှောက်ထားရယူနိုင်ပါတယ်။

ပြီးခဲ့တဲ့ အောက်တိုဘာလ ၂၉ ရက်နေ့က ထိုင်းနိုင်ငံမှာ နှစ်ပေါင်းများစွာ‌ေရွှ့ ပြောင်းနေထိုင်သူ (၈) သိန်းကျော် အနက်က (၅)သိန်းနီးပါးကို နိုင်ငံသားဖြစ်ခွင့်ပေးမယ်လို့ ထိုင်းအစိုးရက ကြေညာခဲ့ပါတယ်။

အဲဒီလို ကြေညာပြီး ၂ ရက်အကြာ မနေ့က အောက်တိုဘာလ ၃၁ ရက်မှာ မဲဆောက်မြို့နယ်၊ ထာ့ဆိုင်လွှက်ကျေးရွာအတွင်း နေထိုင်တဲ့ (၁၀) နှစ်ခံကတ်နဲ့ (၅) နှစ်ခံကတ်ကိုင်ဆောင်ထားသူ မြန်မာနိုင်ငံသားတွေကို ကျေးရွာအုပ်ရေးတာဝန်ရှိသူတွေကဆင့်ခေါ်ကာ ကျေးရွာအတွင်း နေထိုင်ခြင်းရှိ/မရှိနဲ့ နာမည်စာရင်း ကိုက်ညီမှုရှိ/မရှိ စစ်ဆေးတာတွေပြုလုပ်နေပါတယ်။

#မြဝတီမဲဆောက်မီဒီယာ

#ထိုင်း #နိုင်ငံသား #မြန်မာနိုင်ငံသား #ပေးအပ် #ကျောင်းသား

ထိုင်းနိုင်ငံအတွင်း၀င်ရောက်ပြီး ရရာအလုပ်ကို အောက်ခြေသိမ်း လုပ်ကိုင်နေ ကြရတာပါ။

မြန်မာလုပ်သားတွေဟာ ထိုင်းနိုင်ငံရဲ့ အောက်ခြေသိမ်းအလုပ်တွေလုပ်ကိုင်နေရပေမဲ့ စိတ်ချလက်ချမဟုတ်သေးပါဘူး။ အလုပ်လုပ်ရင်း ထိုင်းရဲကားအသံကို လည်းနားစွင့်နေကြရပါသေးတယ်။ အဖမ်းအဆီးတွေလာပြီဆိုရင် တောထဲ၀င်ပြေးရ ခြုံတွေထဲညအိပ်ရနဲ့ အိပ်မပျော်တဲ့ည တွေကို အထိပ်တလန့်နဲ့ကာလရှည်ကြာ ဖြတ်သန်းနေကြရတယ်လို့ ထိုင်းနိုင်ငံ၊ နခွန်ပထုံခရိုင်က ဆောက်လုပ်ရေးလုပ်ငန်းတစ်ခုမှာ ၀င်ရောက်အလုပ်လုပ်ကိုင်နေသူတစ်ဦးက ပြောပါတယ်။

ဒါက ထိုင်းနိုင်ငံတွင်း တရားမ၀င်အလုပ်လုပ်ကိုင်နေကြရတဲ့ လုပ်သားတွေကြီးဘဲ ခံစားရတာမျိုးမဟုတ်ပါဘူး။ ပြည်ပ အလုပ်အကိုင် ရှာဖွေရေးအေးဂျင်စီတွေကတဆင့် တရား၀င် MoU စနစ်နဲ့ လာရောက် အလုပ်လုပ်ကိုင်နေကြတဲ့ မြန်မာ အလုပ်သမားတွေမှာလည်း စာချုပ်ပါစည်းကမ်းချက်တွေဖောက်ဖျက်ခံရတာ၊ လုပ်ငန်းခွင်တွေထဲမှာ အလုပ်သမားအခွင့်အရေး ချိုးဖောက်ခံကြရတာ၊ အလုပ်က ထုတ်ပယ်ခံရတာတွေဟာ မကြာခဏဖြစ်ပွားနေပြီး တရား၀င်အလုပ်လုပ်ကိုင်ကြသူတွေဟာလည်း သူ့နည်း သူ့ဟန်နဲ့ တရား၀င် ဒုက္ခရောက်နေကြရတာပါပဲ။

ဒီပြဿနာတွေကို စေလွှတ်အေဂျင်စီတွေက တာ၀န်ယူဖြေရှင်းပေးတာမရှိတဲ့အပြင် စစ်ကောင်စီရဲ့ အလုပ်သမား၀န်ကြီးဌာန ဘက်ကလည်း ကြပ်မတ်ဆောင်ရွက်ပေးတာ၊ အလုပ်သမားတွေကို အခက်အခဲတွေကို ဖြေရှင်းပေးတာမျိုး မရှိခဲ့ပါဘူး။ ဒီလို မရှိလိုလဲ ထိုင်းနိုင်ရောက်မြန်မာလုပ်သားတွေက အလုပ်သမားအရေးဆောင်ရွက်ပေးနေတဲ့ NGO အဖွဲ့အစီးတွေကိုသာ အား ကိုးရာအဖြစ် အကူအညီတောင်းခံနေကြရတာဖြစ်တယ်လို့ ထိုင်းနိုင်ငံရောက်ရွှေ့ပြောင်းအလုပ်သမားတွေက ပြောပါတယ်။

အလုပ်သမားတွေရဲ့ အခက်အခဲတွေကို ရင်ဆိုင်ဖြေရှင်းမပေးပေမယ့် တာ၀န်ယူမှု တာ၀န်ခံမှုအားနည်းတဲ့ စစ်ကောင်စီရဲ့ အလုပ်သမား၀န်ကြီးဌာနက ပြည် ပထွက်ခွာအလုပ်လုပ်ကိုင်နေကြတဲ့ လုပ်သားတွေရဲ့ လစာငွေ ၂၅ ရာခိုင်နှုန်း မိသားစုထံ တရား၀င် လမ်းကြောင်းကနေ ငွေလွှဲပို့ဖို့အတွက် တင်းတင်းကြပ်ကြပ်ဆောင်ရွက်နေပြီး အလုပ်သမားတွေဆီက အခွန်အမျိုးမျိုး ကောက်ခံဖို့ကိုတော့ မပျက်ကွက်ခဲ့ပါဘူး။

တကယ်တော့ ပြည်တွင်းအထွေထွေအကြပ်အတည်းတွေကြားက မိသားစုစား၀တ်နေရေး အဆင်ပြေဖို့ရည်ရွယ်ချက်နဲ့ နေရပ်စွန့်ခွာပြီး သူများနိုင်ငံက အောက်ခြေသိမ်းအလုပ်တွေကို လုပ်ကိုင်နေကြရတဲ့ မြန်မာရွှေ့ပြောင်းအလုပ် သမားတွေဟာ နောက်လှည့်ကြည့်ရင် ကျောပဲရှိတော့တဲ့ဘ၀တွေပါ။

ကူရာကယ်ရာမဲ့နေကြရပြီး မိမိတိုင်းပြည်မှာကျန်ရစ်နေခဲ့တဲ့ မိသားစုတွေထံ လစဉ်ငွေလွှဲပို့နိုင်ဖို့ နေနေသာသာ အလုပ်သမား ၀န်ကြီးဌာနက နည်းလမ်းမျိုးစုံနဲ့တင်းကြပ်ထားတဲ့ အကောက်ခွန်တွေကိုပေးဆောင်ကြရပြီး သူများနိုင်ငံမှာ ရရာအလုပ်ကိုလုပ်ကိုင်းရင်း ဒုက္ခအခက်အခဲမျိုးစုံကို နေ့စဉ် ရင်ဆိုင်ကြုံတွေနေကြရပါတော့တယ်။

#မြဝတီမဲဆောက်မီဒီယာ

ဓါတ်ပုံ- တရားမဝင် နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသားများကို ထိုင်းအာဏာပိုင်တွေက ဖမ်းဆီးထားစဉ် (ပုံဟောင်း)

တာ၀န်ယူသူမရှိဘဲ ကူကယ်ရာမဲ့နေကြရတဲ့ မြန်မာရွှေ့ပြောင်းအလုပ်သမားဘ၀တွေ

မဲဆောက်၊ အောက်တိုဘာ ၃၁ #သတင်းဆောင်းပါး

သုံးနှစ်ကျော်ဆိုတဲ့ အချိန်ကာလဟာ တစ်ရွေ့ရွေ့နဲ့ ပြီးဆုံးသွားခဲ့တာဆိုပေမဲ့ မြန်မာနိုင်ငံအတွင်းမှာရှိနေကြတဲ့ ပြည်သူလူထု အတွက်ကတော့ တစ်ဘ၀စာလို့ သတ်မှတ်လို့တောင်ရပါတယ်။ ဒီကိစ္စတွေက ၂၀၂၁ ခုနှစ် မြန်မာနိုင်ငံမှာ စစ်တပ်အာဏာသိမ်းတဲ့ ဖြစ်စဉ်က စတင်ခဲ့တယ်ဆိုရင်းလည်း မမှားပါဘူး။

ပြည်သူတွေရွေးကောက်တင်မြှောက်ထားတဲ့ အရပ်သားအစိုးရထံက အာဏာ သိမ်းခဲ့တဲ့ စစ်ကောင်စီကို အမေရိကန်၊ ဥရော ပသမဂ္ဂ၊ ကနေဒါ၊ အဂ်လန်၊ ဩစတြေးလျ အစရှိတဲ့ နိုင်ငံကြီးတွေက စီးပွားရေးပိတ်ဆို့ ဒဏ်ခက်အရေးယူထားပါတယ်။ နိုင်ငံတွင်း လျှပ်စစ်မီးပုံမှန်မရလို့ စက်ရုံ၊ အလုပ်ရုံတွေအပြည့်အ၀ မလည်ပတ်နိုင်တာ၊ ဘဏ်အပ်ငွေတွေလိုသလောက်ထုတ် မရတာ၊ နိုင်ငံခြားငွေလဲနှုန်းတွေကို ပုံသေသက်မှတ်ပြီး ဒေါ်လာငွေအားလုံးကို စစ်ကောင်စီဗဟိုဘဏ်ရဲ့ သက်မှတ်ငွေလဲနှုန်းနဲ့ လဲလှည်သိမ်းဆည်းတာတွေဟာ ပြည်တွင်းစီးပွားရေးကို သိသိသာသာရိုက်ခတ်ခဲ့ပါတယ်။

စီးပွားရေးလုပ်ငန်းတွေက ပို့ကုန်သွင်းကုန်ကဏ္ဍဆိုရင်လည်း နိုင်ငံခြားတင်ပို့ကုန်ကရတဲ့ ဒေါ်လာငွေရဲ့ (၆၅) ရာခိုင်နှုန်းကို စစ်ကောင်စီဗဟိုဘဏ်က သူတို့သက်မှတ်ငွေလဲဈေးနှုန်းနဲ့ လဲလှယ်သိမ်းယူပြီး ကျန်တဲ့ (၃၅) ရာခိုင်နှုန်းကိုသာ ပို့ကုန်လုပ်ငန်းရှင်ကရရှိတာပါ။အကျိုးဆက်ကတော့ ပြည်တွင်းမှာ သွင်း ကုန်တွေကျဆင်းကာ ကုန်စည်ပျက်လက်ပြီး ကုန်ဈေးနှုန်းတွေ နှစ်ဆ၊ သုံးဆခုန်တက်ကုန်တာပါပဲ။

ဒီလိုအခြေအနေက ရန်ကုန်မြို့လို့ စီးပွားရေးမြို့ကြီးတွေမှာတောင် သိသိသာသာလှုပ်ခက်ခဲ့ပြီး ဆန်ဈေး၊ ဆီဈေး၊ ကုန် ခြောက်၊ ဟင်းသီး/ဟင်းရွက်၊ အသားငါးအပါအ၀င် ဆေး၀ါးနဲ့ လူနေထိုင်မှုစရိတ်တွေပါကြီးမြင့်လာခဲ့ပါတယ်။ သယ်ယူ ပို့ဆောင် ရေးကဏ္ဍမှာလည်း ဒေါ်လာငွေလိုသလောက်၀ယ်မရမှုကနေ စက်သုံးဆီးဈေးတွေမြင့်တက်လာခဲ့ပြီး ကုန်ပစ္စည်း သယ်ယူပို့ ဆောင်စရိတ်တွေ၊ ခရီးသွားစရိတ်တွေဟာ ယခင်ဈေးထက် နှစ်ဆလောက်မြင့်တက်ခဲ့ပါတယ်။

ဒီဖြစ်စဉ်တွေကို ခါးစီးခံနေရတာကတော့ အခြေခံလူတန်းစား အလုပ်သမားတွေပါပဲ။ တိုင်းပြည်ရဲ့နေရာအနှံ့အပြားမှာ တိုက်ပွဲ တွေကြောင့် နေရပ်စွန့်ခွာထွက်ပြေးနေရတဲ့ စစ်ဘေးရှောင်မိသားစုတွေနဲ့ တိုင်းဒေသအသီးသီးကနေ ရန်ကုန်မြို့ကိုလာရောက်ပြီး စက်ရုံလုပ်ငန်းတွေမှာ အလုပ်လုပ်ကိုင်နေကြသူတွေ၊ တစ်နိုင်တပိုင်ကုန်ပစ္စည်းရောင်းချကြသူတွေဟာ ၀င်ငွေနဲ့ ထွက်ငွေမျှတမှုမရှိဘဲ သိသိသာသာ မိသားစုစား၀တ်နေရေး၊ ငွေကြေးကြပ်တည်းမှုတွေကို ရင်ဆိုင်လာရပါတော့တယ်။

ဒီအကြပ်အတည်း ဖြစ်စဉ်တွေလောက်နဲ့ မြန်မာပြည်သူလူထုရဲ့ ဒုက္ခတွေက အဆုံးမသတ်သေးပါဘူး။ အာဏာသိမ်း စစ်ကောင်စီက အသက် ၁၈ နှစ်ကနေ ၃၅ နှစ်အတွင်းရှိတဲ့ အမျိုးသားတွေ စစ်မှုမထမ်းမနေရဆိုတဲ့ ဥပဒေကိုအသက်သွင်းပြဌာန်းလိုက်ပြီး စစ်ကောင်စီရဲ့ အလုပ်သမား၀န်ကြီးဌာနကလည်း အသက် ၂၃ နှစ်ကနေ ၃၂ နှစ်ကြားအမျိုးသားတွေကို ပြည်ပထွက်ခွာ အလုပ်လုပ်ကိုင်ခွင့် ပိတ်ပင်လိုက်ပါတယ်။

ကုန်ဈေးနှုန်းကြီးမြင့်မှု၊ မိသားစု စား၀တ်နေရေး အကြပ်အတည်းတွေကို ဖြေရှင်းဖို့နဲ့ စစ်မှုထမ်းဥပဒေကို ရှောင်လွှဲနိုင်ဖို့က ပြည်တွင်းမှာရှိတဲ့ လူငယ်အမျိုး သား၊ အမျိုးသမီးတွေအတွက် နောက်ဆုံးထွက်ပေါက်အဖြစ် ပြည်ပနိုင်ငံတွေကို နည်းလမ်းမျိုးဆုံးနဲ့ထွက်ခွာ အလုပ်လုပ်ကိုင်ဖို့ဖြစ်လာတာပါပဲ။

ဒါကြောင့် အသက်ရွယ်ကောင်းအမျိုးသားတွေနဲ့ အမျိုးသမီးတွေဟာ မြန်မာအိမ်နီးချင်းနိုင်ငံတွေဖြစ်တဲ့ ထိုင်း၊ မလေး၊ တရုတ်၊ လာအို၊ ဘရူနိုင်း အစရှိတဲ့နိုင်ငံတွေအပါအ၀င် စင်ကာပူ၊ ကိုရီးယား၊ ဒူဘိုင်း၊ ဂျပန်နိုင်ငံတို့ကိုပါ တရား ဝင်နည်းလမ်းနဲ့ရော တရားမ၀င်နည်းလမ်းတွေနဲ့ပါထွက်ခွာ အလုပ်လုပ်ကိုင်လာကြပါတယ်။

အခုလို ထွက်ခွာအလုပ်လုပ်ကိုင်ကြတဲ့အခါမှာ မြန်မာနိုင်ငံနဲ့ နယ်နိမိတ်အများဆုံးထိစပ်နေတဲ့ ထိုင်းနိုင်ငံထဲကို မြန်မာနိုင်ငံသားတွေဟာ နယ်စပ်ဖြတ်‌ကျော် ဝင်ရောက်ပြီး တရားမ၀င်နည်းလမ်းနဲ့ နေထိုင်အလုပ်လုပ်ကိုင်ကြတာက ပိုမိုများပြားလာ တယ်လို့ဆိုရမှာပါ။ မြန်မာရွှေ့ပြောင်းလုပ်သားတွေ များပြားလာတာနဲ့အမျှ ထိုင်းနိုင်ငံမှာ တရားမ၀င်လုပ်သားတွေဟာလည်း ဆက်တိုက်ဆိုသလို ဖမ်းဆီးခံရမှုတွေရှိလာပါတယ်။

ထိုင်းနိုင်ငံအတွင်းကို တရားမ၀င်ရောက်ရှိ အလုပ်လုပ်ကိုင်နေတဲ့ ရွှေ့ပြောင်းအလုပ်သမားတွေကို ထိုင်းအစိုးရက ရက် ၁၂၀ စီမံချက်နဲ့ ပြီးခဲ့တဲ့ ဇွန်လ ၅ ရက်ကနေ အောက်တိုဘာလ ၂ ရက်အထိ နိုင်ငံတစ်မှာ၀ှမ်းရှိ စက်ရုံ၊ အလုပ် ရုံတွေနဲ့ လုပ်ငန်း ခွင်တွေထဲအထိ ၀င်ရောက်စစ်ဆေးဖမ်းဆီးခဲ့ပြီး အဲထဲကမှ မြန်မာရွှေ့ပြောင်းအလုပ်သမား (၂) သိန်းကျော်အထိ အများဆုံးဖမ်း ဆီးခံခဲ့ရတယ်လို့ ထိုင်းအလုပ်သမားဝန်ကြီးဌာနရဲ့ ထုတ်ပြန်ချက်အရ သိရပါတယ်။

အဲဒီဖမ်းဆီးခံခဲ့ရတဲ့ မြန်မာရွှေ့ပြောင်းအလုပ်သမားတွေဟာ မိမိတို့နေရပ်မှာ စီးပွားရေးကြပ်တည်းမှုတွေ၊ စစ်ဘေးဒုက္ခတွေ၊ စစ်မှုထမ်းဥပဒေအတွက် ရပ်ကွက်အုပ်ချုပ်ရေးမှူးတွေရဲ့ အမည်စာရင်းကောက်ယူမှုတွေကြောင့် မိသား စုကိုခွဲခွာပြီး ပိုင်ဆိုင် သမျှ ထုခွဲရောင်းချပေါင်နှံတာနဲ့ အတိုးတွေမတန်တဆပေးပြီး ငွေချေးငှားကာ ပွဲစားတွေရဲ့အကူအညီနဲ့ တရားမဝင် နယ်စပ်ဖြတ်ကျော်ကာ

မဲဆောက်မှာ ထိုင်းနိုင်ငံသားဖြစ်ခွင့်ပေးမဲ့ မြန်မာနိုင်ငံသားတွေကို စတင်စာရင်း‌ကောက်ယူပြီး စီစစ်နေ

မဲဆောက်၊ အောက်တိုဘာ ၃၁

ထိုင်း-မြန်မာနယ်စပ်၊ ထိုင်းနိုင်ငံ၊ မဲဆောက်မြို့နယ်၊ ထာ့ဆိုင်လွှက်ကျေးရွာမှာ ထိုင်းနိုင်ငံသားဖြစ်ခွင့်ပေးမဲ့ မြန်မာနိုင်ငံသားတွေကို ဒီနေ့ အောက်တိုဘာ ၃၁ ရက် မနက်ပိုင်းမှာ ကျေးရွာအုပ်ချုပ်ရေးပိုင်းတာဝန်ရှိသူတွေက ခေါ်ယူတွေ့ဆုံပြီး စာရင်း‌ ကောက်ယူကာ စီစစ်မှုတွေ ပြုလုပ်နေပါတယ်။

ထိုင်းနိုင်ငံမှာ နှစ်ပေါင်းများစွာရောက်ရှိနေထိုင်လျက်ရှိတဲ့ မြန်မာနိုင်ငံသားတွေကို ထိုင်းနိုင်ငံသားဖြစ်ခွင့်ပေးမဲ့ ကိစ္စနဲ့ပတ်သက်ပြီး မဲဆောက်မြို့နယ်၊ ထာ့ဆိုင်လွှက်ကျေးရွာအတွင်း နေထိုင်သူတွေအနေနဲ့ မိမိကိုင်ဆောင်ထားတဲ့ (၁၀) နှစ်ခံကတ်၊ (သို့မဟုတ်) (၅) နှစ်ခံကတ်ကို မိတ္တူ (၁) စုံကူးပြီး၊ ကျေး ရွာအုပ်ချုပ်ရေးရုံးကို နိုဝင်ဘာလ ၂ ရက်အတွင်း လာရောက်သတင်းပို့ဖို့ ကျေးရွာအုပ်ချုပ်ရေးအဖွဲ့က အသိပေး‌ကြေညာထားပါတယ်။

" အရင်ဆုံး ကျမရဲ့ (၁၀) ကတ်နဲ့ နာမည်စာရင်းကိုကြည့်တယ် စာရင်းမှာပါတယ်လို့ပြောတယ် အခုလာမဲ့ တနင်္ဂနွေနေ့ကြရင် မယ်တော်ဘုန်းကြီးကျောင်းကိုလာဖို့ ထပ်ချိန်းလိုက်တယ် အဲဒီနေ့ကြမှ ဘာလုပ်ရမလဲဆိုတာ အသေးစိတ်ပြောပြမယ်လို့ သူတို့ကပြောတယ်"လို့ မဲဆောက်မြို့နယ်၊ ထာ့ဆိုင်လွှက်ကျေး ရွာမှာ နှစ်ပေါင်း ၄၀ ခန့်နေထိုင်လာသူ အဖွားငယ်က မြဝတီ&မဲဆောက်မီဒီယာကို ပြောပါတယ်။

ထိုင်းအစိုးရက ပြီးခဲ့တဲ့ အောက်တိုဘာ ၂၉ ရက်မှာ ထိုင်းနိုင်ငံအတွင်း နှစ်ပေါင်းများစွာရောက်ရှိနေထိုင်လျက်ရှိတဲ့ မြန်မာနိုင်ငံသားများအပါအဝင် ရွှေ့ ပြောင်းနေထိုင်သူ (၈၂၅,၆၃၅) ဦးရှိတဲ့အနက်က (၄၈၃,၆၂၆) ဦးကို ထိုင်းနိုင်ငံသားဖြစ်ခွင့်ပေးမယ်လို့ကြေညာခဲ့ပြီးနောက် ဒီနေ့ အောက်တိုဘာလ ၃၁ ရက်မှာ မဲဆောက်မြို့နယ်၊ ထာ့ဆိုင်လွှက်ကျေးရွာအတွင်း နေထိုင်တဲ့ (၁၀) နှစ်ခံကတ်နဲ့ (၅)နှစ်ခံကတ် ကိုင်ဆောင်ထားသူ မြန်မာနိုင်ငံသားတွေကို စတင်စာရင်းကောက်ယူပြီး စီစစ်မှုတွေပြုလုပ်နေတာဖြစ်ပါတယ်။

#မြဝတီမဲဆောက်မီဒီယာ

ဓါတ်ပုံ- မြန်မာနိုင်ငံသူအမျိုးသမီးတစ်ဦးကိုင်ဆောင်ထားတဲ့ (၅)နှစ်ခံကတ်အား တွေ့မြင်ရစဉ်

#ထိုင်းအစိုးရ #နိုင်ငံသား #ပေးအပ် #ရွှေ့ပြောင်းနေထိုင် #မြန်မာနိုင်ငံသား #တိုင်းရင်သား #၁၀နှစ်ခံကတ် #၅နှစ်ခံကတ်

ထိုင်းနိုင်ငံအတွင်း အနေကြာသည့် လူဦးရေ(၅)သိန်းခန့်ကို နိုင်ငံသားဖြစ်ခွင့်ပေးမည်

မဲဆောက်၊ အောက်တိုဘာ ၃၀

ထိုင်းနိုင်ငံတွင် နှစ်ပေါင်းများစွာရောက်ရှိနေထိုင်လျက်ရှိသည့်မြန်မာနိုင်ငံသားများအပါအဝင် ရွှေ့ပြောင်းနေထိုင်သူ (၅) သိန်းခန့်ကို နိုင်ငံသားဖြစ်ခွင့်ပေရန် အတွက် ထိုင်းအစိုးရအဖွဲ့ထံထိုင်းအမျိုးသားလုံခြုံရေးကောင်စီကတင်ပြထား ကြောင်း ထိုင်းအစိုးရ၏ပြောခွင့်ရပုဂ္ဂိုလ် ကျိလာယု ဟွမ်စတ်က ပြောသည်။

ယမန်နေ့ အောက်တိုဘာ ၂၉ ရက်က ပြုလုပ်ခဲ့သည့် နိုင်ငံသားပေးအပ်မှုနှင့်ပတ်သက်သည့် ထိုင်းအစိုးရအဖွဲ့အစည်းအဝေးအပြီး သတင်းစာရှင်းလင်းပွဲ၌ ထိုင်းအစိုးရ၏ ပြောခွင့်ရပုဂ္ဂိုလ် ကျိလာယု ဟွမ်စတ်က ပြောကြားခဲ့ခြင်းဖြစ် သည်။

ထိုင်းနိုင်ငံအတွင်း အနေကြာသူများအား နိုင်ငံသားပေးအပ်ခြင်းကို အုပ်စု (၄)စုခွဲထားမည်ဖြစ်ကာ ပထမအုပ်စုတွင် ၁၉၈၄ ခုနှစ်မှ ၁၉၉၉ ခုနှစ်ကြား ရွှေ့ပြောင်းနေထိုင်သူ(၁၂၀,၀၀၀)ဦးခန့်၊ ဒုတိယအုပ်စုတွင် ၂၀၀၅ ခုနှစ်မှ ၂၀၁၁ ခုနှစ်ကြား ရွှေ့ပြောင်းနေထိုင်သူ(၂၁၅,၀၀၀)ဦးခန့်တို့ပါဝင်ကြောင်း သိရသည်။

ထို့ပြင် တတိယအုပ်စု၌ ထိုင်းနိုင်ငံအတွင်းမွေးဖွားသည့် တိုင်းရင်းသားလူမျိုး စုများ၏ ကလေးငယ်(၂၉,၀၀၀)ဦးနှင့် အထောက်အထားမရှိသည့် မိဘများမှမွေးဖွားသည့် ကလေးငယ် (၁၁၃,၀၀၀) ဦးခန့်တို့ အပါအဝင် စုစုပေါင်း (၄၈၃,၆၂၆)ဦးတို့ကို ထိုင်းနိုင်ငံသားအဖြစ်ပေးအပ်ရန် ထိုင်းအမျိုးသားလုံခြုံ ရေးကောင်စီက တင်ပြထားကြောင်း သိရသည်။

လက်ရှိအချိန်၌ ထိုင်းနိုင်ငံတွင် အချိန်ကာလကြာ မြင့်စွာရွှေ့ပြောင်းနေထိုင်သူ စာရင်းဝင်ဦးရေ (၈၂၅,၆၃၅) ဦးရှိရာမှ (၄၈၃,၆၂၆) ဦးကို နိုင်ငံသား‌ေပး အပ်ရန်တင်ပြခဲ့ခြင်းဖြစ်ပြီး ၎င်းတို့အား "နိုင်ငံသားအဖြစ်ပေးအပ်ပါက ထိုင်းနိုင်ငံအတွင်း လွတ်လပ်စွာ သွား/လာနိုင်မည့်အပြင် ထိုင်းနိုင်ငံ၏ စီးပွားရေးဖွံ့ဖြိုးတိုးတက်မှုကိုလည်း အထောက်အကူပြုမည်ကိုယုံကြည်သည်ဟု" ထိုင်းအစိုးရအဖွဲ့ ပြောခွင့်ရပုဂ္ဂိုလ်က ပြောကြားခဲ့သည်။

#မြဝတီမဲဆောက်မီဒီယာ

#ထိုင်းအစိုးရ #နိုင်ငံသား #ပေးအပ် #ရွှေ့ပြောင်းနေထိုင် #မြန်မာနိုင်ငံသား #တိုင်းရင်းသား

ပရာကျင်ဘူရီခရိုင်မှာ ဓါတုစက်ရုံပေါက်ကွဲမှုဖြစ်ပွားပြီး မြန်မာ ၂ ဦးသေဆုံးပြီး ၇ ဦး ဒဏ်ရာရရှိ

မဲဆောက်၊ အောက်တိုဘာ ၂၉

ထိုင်းနိုင်ငံ၊ ပါရာကျင်ဘူရီခရိုင်၊ ကဘန်ဘူရီမြို့နယ်၊ ဘော်ထောင်ကျေးရွာရှိ ဓာတုစက်ရုံမှာ အောက်တိုဘာလ ၂၆ ရက် မနက်ပိုင်းက ပေါက်ကွဲမှုဖြစ်ပွားပြီး မြန်မာအလုပ်သမား ၂ ဦးသေဆုံးကာ ၇ ဦးဒဏ်ရာရရှိခဲ့တယ်လို့ သိရပါတယ်။

သေဆုံးသူ မြန်မာအလုပ်သမား ၂ ဦးဟာ ကိုသက်ဝေနဲ့ ကိုမင်းအောင်တို့ဖြစ်ကြပြီး ကိုသက်ဝေက မွန်ပြည်နယ်၊ ဘီးလင်းမြို့မှာနေထိုင်သူဖြစ်ကာ ကိုမင်း‌ အောင်ကတော့ ပဲခူးတိုင်းဒေသကြီးမှာ နေထိုင်သူဖြစ်တယ်လို့ သိရပါတယ်။

ပေါက်ကွဲမှုအတွင်း သေဆုံးခဲ့သူနှစ်ဦးနဲ့ ထိခိုဏ်ရာရရှိခဲ့သူ ၇ ဦးတို့ဟာ ဓာတုစက်ရုံမှာ MoU စနစ်နဲ့ အလုပ်လုပ်ကိုင်နေတဲ့ လုပ်သားတွေဖြစ်ပြီး သူတို့ကို ပြည်ပအလုပ်အကိုင်ရှာဖွေရေး အောင်ပြည့် အေဂျင်စီက စေလွှတ် ပို့ဆောင်ပေးခဲ့တာ ဖြစ်တယ်လို့ အလုပ်သမားတစ်ဦးက ပြောပါတယ်။

ဖြစ်စဉ်နဲ့ပတ်သက်ပြီး ပေါက်ကွဲမှုကြောင့် သေဆုံးခဲ့ရသူ ကိုသက်ဝေရဲ့ ကျန် ရစ်သူမိသားစုဝင်များက ကိုသက်ဝေ နာရေးကိစ္စနဲ့ ထိုက်သင့်တဲ့နစ်နာကြေးရ ရှိဖို့အတွက် ထိုင်းရောက် မြန်မာလုပ်သားအရေး ကူညီဆောင်ရွက်ပေးနေတဲ့ (M.H.A.C) မဟာမိတ်အဖွဲ့ ကိုရဲမင်းဆီ အကူအညီတောင်းခံခဲ့တယ်လို့ သိရပါတယ်။

အကူအညီတောင်းခံလာမှုနဲ့ပတ်သက်ပြီး (M.H.A.C) မဟာမိတ်အဖွဲ့က ဒီနေ့ အောက်တိုဘာလ ၂၉ ရက်မှာ အခင်းဖြစ်ရာစက်ရုံကိုသွားရောက်ပြီးတော့ အလုပ်ရှင်၊ အလုပ်သမား၊ ကျန်ရစ်သူမိသားစုနဲ့သက်ဆိုင်ရာ မြန်မာအေဂျင်စီမှ တာဝန်ရှိသူတွေနဲ့တွေ့ဆုံ ညှိုနှိုင်းဆောင်ရွက်ပေးခဲ့ပြီး ကိုသက်ဝေ သေဆုံးခဲ့ရမှုအတွက် ထိုက်သင့်တဲ့နစ်နာကြေးများရရှိအောင် ဆက်လက်ကူညီဆောင် ရွက်ပေးနေတယ်လို့ သိရပါတယ်။

"ဒီဖြစ်စဉ်အတွင်း သေဆုံးခဲ့တဲ့ မြန်မာအလုပ်သမာနှစ်ဦးအနက်က ကိုမင်းအောင်အတွက်ကိုတော့ မြန်မာအေဂျင်စီနဲ့ အလုပ်ရှင်က ကျန်ရစ်သူမိသားစုကိုအကြောင်းကြားပြီး နစ်နာကြေး ပေးအပ်ထားတယ်လို့ပြောတယ်။ ကိုမင်းအောင်ရဲ့ကျန်ရစ်သူမိသားစုက ကျွန်တော်တို့ဆီ မဆက်သွယ်တော့ အသေး စိတ်တော့ မသိရဘူးပေါ့နော်။ ကိုသက်ဝေ သေဆုံးခဲ့ရမှုနဲ့ ထိခိုက်ဒဏ်ရာရရှိသူတွေအတွက် ထိုက်သင့်တဲ့ နစ်နာကြေးများရရှိအောင် ကျွန်တော်တို့ရုံးအဖွဲ့က လိုက်ပါကူညီဆောင်ရွက်ပေးနေပါတယ်။ အထူးသဖြင့် ကိုသက်ဝေရဲ့သေဆုံးခဲ့ရမှုအတွက် နစ်နာကြေး ဘတ် (၁) သန်းကျော်ရရှိအောင်ရရှိအောင် ကူညီဆောင်ရွက်ပေးနေပါတယ်" လို့ ကိုရဲမင်းက ပြောပါတယ်။

အဆိုပါ ပေါက်ကွဲမှုဖြစ်စဉ်အတွင်း သေဆုံးခဲ့သူ မြန်မာအလုပ်သမား ၂ ဦးရဲ့နာရေးကို ကဘန်ဘူရီဘုန်းကြီးကျောင်းမှာ ဗုဒ္ဓဘာသာဓလေ့ထုံးတမ်းနဲ့အညီ ပြုလုပ်ပေးခဲ့ပြီး၊ ကိုမင်းအောင်ရဲ့ နာရေးကို မနေ့က အောက်တိုဘာလ ၂၈ ရက်မှာ ပြုလုပ်ခဲ့ကာ ကိုသက်ဝေရဲ့နာရေးကိုတော့ ဒီကနေ့ မနက်ပိုင်းက ပြု လုပ်ပေးခဲ့တယ်လို့ သိရပါတယ်။

#မြဝတီမဲဆောက်မီဒီယာ

ဓါတ်ပုံ- (M.H.C.A) ကိုရဲမင်း, matichon online

#ထိုင်း #မြန်မာMoUလုပ်သား #ဓာတုစက်ရုံ #ပေါက်ကွဲမှု #ပရာကျင်ဘူရီ #ကဘန်ဘူရီ

" လူပျောက်ကြော်ငြာ "
==============

ရန်ကုန်တိုင်းဒေသကြီး၊ ရွှေပြည်သာမြို့နယ်၊ အမှတ် ၆ ရပ်ကွက်၊ မ/၆/၁၂/၁၀၀ ဧရာဝတီပတ်လမ်းနေ အသက် ၁၈ နှစ်အရွယ်ရှိ(ဘ)ဦးကျော်စိုးလင်း၏သမီးဖြစ်သူ မအိအိမိုးသည် (၂၅.၁၀.၂၀၂၄)ရက်နေ့ (၀၅:၃၀) အချိန်တွင် အဒေါ်ဖြစ်သူနေအိမ်မှအလုပ်သွားမည်ဟာဆိုကာထွက်သွားရာမှ အလုပ်သို့ရောက်ရှိလာခြင်းမရှိ / နေအိမ်သို့လဲပြန်လည်ရောက်ရှိလာခြင်းမရှိဘဲ ပျောက်ဆုံးနေပါသဖြင့် တွေ့ရှိပါက မိသားစုဝင်၏ဖုန်းနံပတ် 09970351314 သို့ ဆက်သွယ်အ‌ကြောင်းကြားပေးပါရန် မေတ္တာရပ်ခံအပ်ပါသည်။

#မြဝတီမဲဆောက်မီဒီယာ

ထိုင်းတွင် ကထိန်ပွဲအတွက် မီးရှူးမီးပန်းပြုလုပ်ရာမှ ပေါက်ကွဲမှုဖြစ်ပွားကာ ၂ ဦးသေဆုံးပြီး ၇ ဦးဒဏ်ရာရရှိ

မဲဆောက်၊ အောက်တိုဘာ ၂၆

ထိုင်းနိုင်ငံအရှေ့မြောက်ပိုင်း အီဆန်ဒေသတွင် ကထိန်ပွဲအတွက် မီးရှူးမီးပန်းပြုလုပ်ရာမှ ပေါက်ကွဲမှုဖြစ်ပွားကာ (၂) ဦးသေဆုံးပြီး (၇) ဦးဒဏ်ရာရရှိခဲ့‌ကြောင်း သိရသည်။

ယမန်နေ့ အောက်တိုဘာလ ၂၅ ရက် ညပိုင်းက ကာလစင်ခရိုင်၊ ကမလာဆိုင်မြို့နယ်၊ ကျောက်ထကျေးရွာအုပ်စု၊ ကောင်နွဲ့ကျေးရွာရှိ လမ်းမပေါ်တွင် ရွာ သားများစုပေါင်း၍ ကထိန်ပွဲအတွက် မီးရှူးမီးပန်းပြုလုပ်ရာမှ ပေါက်ကွဲမှုဖြစ် ပွားခဲ့ခြင်းဖြစ်သည်။

ပေါက်ကွဲမှုကြောင့် (၂) ဦးသေဆုံးပြီး (၇) ဦးထိခိုက်ဒဏ်ရာများရရှိခဲ့သဖြင့် လူမှုကယ်ဆယ်ရေးအဖွဲ့များက ကမလာဆိုင်ဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။

အဆိုပါ ဖြစ်စဉ်နဲ့ပတ်သက်ပြီး တာဝန်ရှိသူများက အခင်းဖြစ်နေရာသို့ သွား ရောက်၍ စစ်ဆေးမေးမြန်းမှုများ ပြုလုပ်နေကြောင်း သိရသည်။

#မြဝတီမဲဆောက်မီဒီယာ

ขอบคุณรูปภาพ : หน่วยกู้ภัยกาฬสินธุ์

#ထိုင်း #အီဆန်ဒေသ #ကာလစင် #မီးရှူးမီးပန်း #ပေါက်ကွဲ

စမွတ်ဆာခွန်ခရိုင်မှာ ဧည့်စာရင်းမတိုင်ကြားတဲ့အတွက် မြန်မာအလုပ်သမား ၃၀ ဦး ဖမ်းဆီးခံရ

မဲဆောက်၊ အောက်တိုဘာ ၂၅

ထိုင်းနိုင်ငံ၊ စမွတ်ဆာခွန်ခရိုင်၊ မူယန်မြို့နယ်မှာ ဧည့်စာရင်း မတိုင်ကြားတဲ့ အတွက် မြန်မာအလုပ်သမား ၃၀ ဦးကို ထိုင်းအာဏာပိုင်တွေက ဖမ်းဆီးထားတယ်လို့ သိရပါတယ်။

ဒီနေ့ အောက်တိုဘာလ ၂၅ ရက် မနက်ပိုင်းက ထိုင်းလဝက ဦးဆောင်တဲ့ ပူး ပေါင်းအဖွဲ့ဟာ စမွတ်ဆာခွန်ခရိုင်၊ မူယန်မြို့နယ်၊ ခုတ်ခန်ကျေးရွာရှိ မြန်မာရွှေ့ပြောင်းလုပ်သားတွေနေထိုင်တဲ့ တန်းလျားတစ်ခုကို ဝင်ရောက်စစ်ဆေးရာကနေ ဖမ်းဆီးခံခဲ့ရတာပါ။

အဆိုပါ ဖမ်းဆီးရမိသူတွေကို ဧည့်စားရင်တိုင်ကြားရန်ပျက်ကွက်မှု ပုဒ်မ ၃၇ (၂) ၊ ၃၈ တို့ဖြင့် အရေးယူဆောင်ရွက်သွားမှာဖြစ်တယ်လို့ စမွတ်ဆာခွန်ခရိုင် လဝကမှူး ပုတ်ချတ် ချိုင်စုကဝတ်က ပြောပါတယ်။

ထိုင်းဥပဒေရ မြန်မာ အပါအဝင် နိုင်ငံခြားသားရွှေ့ပြောင်းအလုပ်သမားတွေအနေနဲ့ မိမိတို့နေထိုင်တဲ့ခရိုင်ကနေ အခြားခရိုင်တစ်ခုကို သွားရောက်တဲ့အခါ တစ်ရက်အထက် ပိုကြာမယ်ဆိုရင် ၂၄ နာရီအတွင်း သက်ဆိုင်ရာ နယ်မြေရှိ လူဝင်မှုကြီးကြပ်ရေးဌာနမှာ ဧည့်စာရင်းတိုင်ကြားရမယ်လို့ ပြဌာန်းထားပါတယ်။

ဧည့်စာရင်းတိုင်ကြားဖို့ပျက်ကွက်ပါက ထောင်ဒဏ် ၁၅ ရက်ကနေ ၁ လအထိပြစ်ဒဏ် ချမှတ်နိုင်သလို၊ ဒဏ်ငွေ ဘတ် ၈၀၀ ထောင်ကနေ ဘတ် ၁၀၀၀၀ သောင်းအထိ ပေးဆောင်ရမယ်လို့ ထိုင်းဥပဒေမှာ ပြဌာန်းထားပါတယ်။

#မြဝတီမဲဆောက်မီဒီယာ

ขอบคุณรูป/ภาพ โจโฉ

#ထိုင်း #စမွတ်ဆာခွန်ခရိုင် #မြန်မာအလုပ်သမား #ဧည့်စာရင်း #ဖမ်းဆီး

Tiktok တွင် Live လွှင့်ပြီး အလုပ်သွင်းပေးမည်ဟုပြောသည့် ပွဲစားစကားကို ယုံကြည်မိ၍ မြန်မာအလုပ်သမား ၆ ဦး ဘတ် ၅ သောင်းကျော်အလိမ်ခံရ

မဲဆောက်၊ အောက်တိုဘာ ၂၄

လူမှုကွန်ရက် TikTok စာမျက်နှာတွင် Live လွှင့်ပြီး အလုပ်သွင်းပေးမည်ဟုပြောသည့် ပွဲစားစကားကို ယုံကြည်မိ၍ မြန်မာအလုပ်သမား ၆ ဦး ဘတ် ၅ သောင်းကျော် လိမ်လည်ခံခဲ့ရသည့် ဖြစ်စဉ်တစ်ခု အောက်တိုဘာ ၁၇ ရက်က ထိုင်းနိုင်ငံ၊ မဟာချိုင်မြို့တွင် ဖြစ်ပွားခဲ့ကြောင်း သိရသည်။

ထိုင်းနိုင်ငံ၊ ချွန်ဘူရီမြို့ရှိ နွန်းလီစက္ကူစက်ရုံ၌ အလုပ်သမားများ ခေါ်ယူနေကြောင်း အမျိုးသမီးတစ်ဦးက Tiktok တွင် Live လွှင့်၍ ပြောကြားခဲ့သည်ကိုယုံကြည်မိပြီး အလုပ်သစ်ရှာနေသော အလုပ်သမား ၆ ဦးသည် ယင်း အမျိုးသမီးထံ ဆက်သွယ်ခဲ့ကြကြောင်း သိရသည်။

အဆက်အသွယ်၍ရရှိသောအခါ ယင်း အမျိုးသမီးမှ အလုပ်သမား ၆ ဦးအား ချွန်ဘူရီမြို့ရှိ နွန်းလီစက္ကူစက်ရုံတွင် အလုပ်သွင်းပေးမည်ဟုပြောဆိုကာ ၎င်းတို့ထံမှ အလုပ်ရှင်ပြောင်းခ အပါအဝင် အလုပ်စမတ်ကြေး စုစုပေါင်း ဘတ် (၅၂၂၀၀)အား အခြားပွဲစား အမျိုးသမီး ၂ ဦးနှင့် ပေါင်း၍ လိမ်လည်သွားခဲ့ခြင်းဖြစ်ကြောင်း သိရသည်။

အဆိုပါ ငွေကြေးလိမ်လည်ခံရသူ အလုပ်သမားများက ထိုင်းရောက်မြန်မာလုပ်သားအရေး ကူညီဆောင်ရွက်ပေးနေသည့် (M.H.A.C) မဟာမိတ်ရုံး ကိုရဲမင်းထံ ဆက်သွယ်အကူအညီတောင်းခံထားကြောင်း သိရသည်။

ဖြစ်စဉ်နဲ့ပတ်သက်၍ (M.H.A.C) ရုံးအဖွဲမှ အချက်အလက်များကိုစီစစ်နေပြီး စီစစ်ပြီးစီးပါက သက်ဆိုင်ရာနယ်မြေ ရဲစခန်းတွင် အလုပ်သမားများထံမှ ငွေကြေးလိမ်လည်သွားသူ ပွဲစား အမျိုးသမီး ၃ ဦးကို တိုင်ကြားသွားမည်ဖြစ်ကြောင်း သိရသည်။

#မြဝတီမဲဆောက်မီဒီယာ

ဓါတ်ပုံ- ငွေကြေးလိမ်လည်ခံရသည့် မြန်မာအလုပ်သမား ၆ ဦးကို တွေ့မြင်ရစဉ်

#လူမှုကွန်ရက် #Tiktok #Live #အလုပ်ရှာ #မဟာချိုင် #ချွန်ဘူရီ #ပွဲစား #မြန်မာအလုပ်သမား

ထိုင်းနိုင်ငံရေး အရှုပ်အထွေးတွေကြားမှာ တရာမဝင် မြန်မာလုပ်သားတွေမျှော်လင့်ချက် ပျောက်ဆုံးရတော့မှာလား

မဲဆောက်၊ အောက်တိုဘာ ၂၃

ထိုင်းဝန်ကြီးချုပ်(ဟောင်း) သက်ရှင် ရှင်နာဝပ်ဟာ လက်ရှိ အာဏာရပါတီ ဖုယာ့ထိုင်း(ဖွေထိုင်း)ပါတီအပေါ် ဩဇာလွှမ်းမိုးပြီး ထိုင်းအစိုးရအဖွဲ့အပေါ် ဝင်ရောက်စွက်ဖက်မှုတွေရှိနေတယ်လို့ဆိုကာ လက်ရှိထိုင်းအစိုးရကို မထောက်ခံသူအချို့က ရွေးကောက်ပွဲကော်မရှင်ကို တိုင်ကြားခဲ့ပါတယ်။

အဲဒီ တိုင်ကြားချက်ကို ရွေးကောက်ပွဲကော်မရှင်က ပြီးခဲ့တဲ့ အောက်တိုဘာလ ၁၈ ရက်နေ့မှာ လက်ခံခဲ့ပါတယ်။ တိုင်းကြားမှုနဲ့ပတ်သက်ပြီး ကော်မတီတစ်ခုဖွဲ့စည်းကာ ၁ လအတွင်း လက်ရှိအာဏာရပါတီကို စုံစမ်းစစ်ဆေးမှုတွေစတင်ပြုလုပ်တော့မှာဖြစ်တယ်လို့ ဆိုပါတယ်။

ကော်မတီရဲ့ စုံစမ်းစစ်ဆေးမှုအတွင်း အပြစ်ရှိကြောင်း ပေါ်ပေါက်ခဲ့ရင်တော့ အာဏာရပါတီအနေနဲ့ ပါတီဖျက်သိမ်းရတဲ့အထိ အရေးယူခံရမှာဖြစ်တယ်လို့ ဆိုပါတယ်။ လက်ရှိ အာဏာရပါတီကို တိုင်ကြားသူဟာ ပြီးခဲ့တဲ့ ၂၀၂၃ ခုနှစ် ရွှေးကောက်ပွဲမှာ အနိုင်ရရှိခဲ့တဲ့ Moved Forward ပါတီကို ဖျက်သိမ်းဖို့ ရွေး/ကော်ကို တိုင်ကြားခဲ့သူလည်းဖြစ်ပါတယ်။

အပေါ်ယံ သာမန်အမြင်နဲ့ကြည့်မယ်ဆိုရင်တော့ ထိုင်းနိုင်ငံရေးနဲ့ တရားမဝင် မြန်မာရွှေ့ပြောင်းလုပ်သားအရေးဟာ မပတ်သက် မဆက်နွယ်ဘူးလို့ ထင်ရပေမဲ့ တကယ်တော့ ပတ်သက် ဆက်နွယ်မှုတွေရှိနေပါတယ်။

ဥပမာ အနေနဲ့ပြောရရင် ပြီးခဲ့တဲ့ ဇွန်လ ၅ ရက်က မြန်မာ အပါအဝင် တရားမဝင် နိုင်ငံခြားသားလုပ်သားတွေကို တရားဝင် နေထိုင်ခွင့် အထောက်အထားလက်မှတ်ပန်းရောင်ကတ်ပြုလုပ်ပေးဖို့အတွက် ထိုင်းအလုပ်သမားဝန်ကြီးဌာနက အစိုးရကို တင်ပြခဲ့ပါတယ်။

အဲဒီလိုတင်ပြပြီး လအနည်းငယ်အကြာမှာ ထိုင်းဝန်ကြီးချုပ် စေ့ထာ ထဝီဆင်ကိုဖွဲ့စည်းပုံအခြေခံတရားရုံးက အတွင်းဝန်ကြီးတစ်ဦးခန့်အပ်မှုနဲ့ပတ်သက်ပြီး ရာထူးကနေ ဖယ်ရှားခဲ့တဲ့အတွက် တရားမဝင် နိုင်ငံခြားသားတွေကို ပန်းရောင်ကတ်ရိုက်ပေးဖို့အရေး ဝန်ကြီးချုပ်အနေနဲ့ ဘာမှမလုပ်ပေးနိုင်ခဲ့ပါဘူး။

ဝန်ကြီးချုပ် စေ့ထာ ထဝီဆင် ရာထူးကနေ ဖယ်ရှားခံရပြီးနောက် ဘီလျှံနာ သူဌေးကြီး သက်ဆင်ရဲ့ သမီးဖြစ်သူ ဖယ်ထောင်ထန်ကို ဝန်ကြီးချုပ် ခန့်အပ်ပြီး အစိုးရသစ်တစ်ရပ် ဖွဲ့စည်းခဲ့ပါတယ်။

အစိုးရသစ်ဖွဲ့စည်းပြီးနောက် ထိုင်းအလုပ်သမားဝန်ကြီးဌာနက စက်တာဘာလ ၂၄ ရက်‌နေ့မှာ ထိုင်းနိုင်ငံအတွင်း တရားမဝင် နေထိုင်လုပ်ကိုင်နေတဲ့ နိုင်ငံ ခြားသားလုပ်သားတွေကို ပန်းရောင်ကတ်ပြုလုပ်ပေးဖို့ ထပ်မံတင်ပြခဲ့ပါတယ်။

တရားမဝင် နိုင်ငံခြားသားအလုပ်သမားတွေကို တရားဝင် အလုပ်သမားဖြစ်အောင် ပန်းရောင်ကတ်ရိုက်ပေးဖို့ အစိုးရအဖွဲ့ကိုတင်ပြထားတဲ့ချိန်မှာ လက်ရှိ အစိုးရ မထောက်ခံတဲ့သူအချို့ရဲ့ တိုင်ကြားချက်ကို ရွေး/ကော်က လက်ခံခဲ့ပြီး တိုင်ကြားမှုအပေါ် စုံစမ်းစစ်ဆေးမှုတွေပြုလုပ်တော့မှာဖြစ်တယ်လို့ သိရပါတယ်။

ထိုင်းအလုပ်သမားဝန်ကြီးဌာနက တရားမဝင် နိုင်ငံခြားသားလုပ်သားတွေကို ပန်းရောင်ကတ်ပြုလုပ်ပေးဖို့ တင်ပြထားပေမဲ့ ထိုင်းအစိုးရက လက်မှတ်မထိုးပေးသေးတဲ့အတွက် ထိုင်းနိုင်ငံရေး အရှုပ်အထွေး တွေကြားမှာ တရားမဝင်မြန်မာအလုပ်သမားတွေဟာ ရတက်မအေးစရာ ဖြစ်‌လို့နေပါတယ်။

တကယ်လို့သာ ရွေး/ကော်က လက်ရှိအာဏာရပါတီကို အပြစ်ရှိတယ်လို့ ဆုံး ဖြတ်ခဲ့မယ်ဆိုရင်တော့ မြန်မာ အပါအဝင် တရားမဝင်နိုင်ငံခြားသားလုပ်သား တွေရဲ့ မျှော်လင့်ချက်ဟာ ပျောက်ဆုံးသွားရမှာဖြစ်ပြီး၊ နောက်တက်လာမဲ့ အစိုးရသစ်ကို ထပ်မံစောင့်မျှော်ရတော့မှာပါ။

ဒါကြောင့် ရွေး/ကော်ရဲ့ စုံစမ်းစစ်ဆေးမှုတွေ ပြုလုပ်နေစဉ်အတွင်း ကြားကာ လမှာ ထိုင်းအစိုးရက အမြန်ဆုံးလက်မှတ်ရေးထိုးပေးဖို့ တရားမဝင် နိုင်ငံခြား သား လုပ်သားတွေအနေနဲ့ ဆုတောင်းရတော့မှာပဲ ဖြစ်ပါတယ်။

#မြဝတီမဲဆောက်မီဒီယာ

မြဝတီခရိုင်ဘက်နေခိုးဝင်လာတဲ့ ရိုဟင်ဂျာ ၁၃ ‌ဦးနဲ့ လာကြိုသူထိုင်းနိုင်ငံသား ၂ ဦး ဖိုးဖမြို့နယ်မှာ ဖမ်းဆီးခံရ

မဲဆောက်၊ အောက်တိုဘာ ၂၃

ကရင်ပြည်နယ်၊ မြဝတီခရိုင်ဘက်ကနေ ထိုင်းနိုင်ငံ၊ တာ့က်ခရိုင်၊ ဖိုးဖမြို့နယ်ထဲ ခိုးဝင်လာတဲ့ ရိုဟင်ဂျာ ၁၃ ဦးနဲ့ သူတို့ကိုလာကြိုသူ ထိုင်းနိုင်ငံသား ကားသမား ၂ ဦးကို ထိုင်းစစ်တပ်က ဖမ်းဆီးလိုက်ပါတယ်။

အောက်တိုဘာလ ၂၂ ရက် ည ၁၁ နာရီအချိန်ခန့်က ထိုင်းလုံခြုံရေးတပ်ဖွဲ့ဝင်များဟာ ဖိုးဖမြို့အတွင်းကင်းလှည့်နေစဉ် မသင်္ကာဖွယ်ရာ ပစ်ကပ်ကား ၂ စီးကိုတွေ့ရှိရတာကြောင့် ခေါ်ယူ စစ်ဆေးရာကနေ ဖမ်းဆီးခံခဲ့ရတာပါ။

ဖမ်းဆီးခံရသူတွေထဲမှာ ရိုဟင်ဂျာ အမျိုးသား ၇ ဦး၊ အမျိုးသမီး ၆ ဦး အပါ အဝင် သူတို့ကိုလာကြိုတဲ့ ထိုင်းနိုင်ငံသား ကားသမား ၂ ဦး ပါဝင်ပါတယ်။

ထိုင်းစစ်တပ်က ဖမ်းဆီးရမိသူ ရိုဟင်ဂျာ ၁၃ ဦးနဲ့ လာကြိုတဲ့ ထိုင်းနိုင်ငံသားကားသမား ၂ ဦးကို ဥပဒေအရအရေးယူဆောင်ရွက်နိုင်ဖို့ ဖိုးဖမြို့နယ်ရဲစခန်း ကို လွှဲပြောင်းပို့ဆောင်ပေးအပ်ထားတယ်လို့ သိရပါတယ်။

ပြီးခဲ့တဲ့ အောက်တိုဘာလ ၁၇ ရက်နေ့ကလည်း မြဝတီခရိုင်ဘက်ကနေ ထိုင်းနိုင်ငံ၊ မဲဆောက်ဘက်ကို တရားမဝင် ဝင်ရောက်လာပြီး ပွဲစားရဲ့စီစဉ်ပေးမှုနဲ့ မဲဆောက်ကတဆင့် ထိုင်း-မလေး နယ်စပ်၊ ဆုန်ခလာခရိုင်ကိုအသွားမှာ ကားပေါ်မှာလိုက်ပါလာတဲ့ ရိုဟင်ဂျာ ၂၆ ဦးအနက်၊ ၃ ဦးဟာ ကားထဲမှာ အသက်ရှုကြပ်ပြီး သေဆုံးသွားကာ ၇ ဦး မူးမေ့လုနီးပါးဖြစ်နေတာကြောင့် ထိုင်းအာဏာပိုင်တွေက ဆေးရုံကိုပို့ဆောင်ပေးခဲ့ရပါတယ်။

#မြဝတီမဲဆောက်မီဒီယာ

#ထိုင်း #ကရင်ပြည်နယ် #မြဝတီ #ဖိုးဖ #ရိုဟင်ဂျာ #ခိုးဝင် #ဖမ်းဆီး

(၅) ဆက်မြောက်ရာမဘုရင်၏ မွေ့နေ့အထိမ်းအမှတ်အဖြစ် ကလေးငယ်များနှင့် သက်ကြီးရွယ်အိုများကို ထိုင်းနိုင်ငံတစ်ဝှမ်းတွင်ရှိ တိရိစ္ဆာန်ရုံ (၇) ခုအား အခမဲ့လည်ပတ်ခွင့်ပြု

မဲဆောက်၊ အောက်တိုဘာ ၂၃

(၅) ဆက်မြောက်ရာမဘုရင်၏ မွေ့နေ့အထိမ်းအမှတ်အဖြစ် ကလေးငယ်များနှင့် သက်ကြီးရွယ်အိုများကို ယနေ့ အောက်တိုဘာ ၂၃ ရက်တွင် ထိုင်းနိုင်ငံတဝှမ်းရှိ တိရိစ္ဆာန်ရုံ (၇) ခုအား အခမဲ့လည်ပတ်ခွင့်ပြုထားကြောင်း သိရသည်။

အခမဲ့ လည်ပတ်ခွင့်ပြုထားသည့် တိရိစ္ဆာန်ရုံ (၇) ခုမှာ ချင်းမိုင် တိရိစ္ဆာန်ရုံ၊ နခွန်လာ့ချစီမာ တိရိစ္ဆာန်ရုံ၊ ခေါင်ကယ် တိရိစ္ဆာန်ရုံ၊ ဆုံခလာ တိရိစ္ဆာန်ရုံ၊ ဥဘွန်လာ့ချဌာနီ တိရိစ္ဆာန်ရုံ၊ ဆုလင် တိရိစ္ဆာန်ရုံနှင့်ရေမြင်းပေါက်လေးရှိသော ခေါင်ခီယို တိရိစ္ဆာန်ရုံတို့ဖြစ်ကြောင်း သိရသည်။

ယနေ့ အောက်တိုဘာ ၂၃ ရက်သည် (၅) ဆက်မြောက်ရာမဘုရင်၏ မွေးနေ့ဖြစ်သဖြင့် အစိုးရရုံးဌာနများနှင့် စာသင်ကျောင်းများလည်း ပိတ်ထားသည်ကို တွေ့ရှိရသည်။

#မြဝတီမဲဆောက်မီဒီယာ

ထိုင်းမှာ ကလေးမီးဖွားစရိတ်မရှိလို့ ထွက်ပြေးသွားတဲ့ မြန်မာမိသားစုကို ပြန်လိုက်ခေါ်ပြီး ဆေးရုံက ကုန်ကျစရိတ်တာဝန်ယူပေးခဲ့

မဲဆောက်၊ အောက်တိုဘာ ၂၃

ထိုင်းနိုင်ငံ၊ နခွန်းပထုံဆေးရုံကြီးကနေ ကလေးမီးဖွားစရိတ်မရှိလို့ ထွက်ပြေးသွားတဲ့ မြန်မာမိသားစုကို ပြန်လိုက်ခေါ်ပြီး ဆေးရုံက ကုန်ကျစရိတ်တာဝန်ယူပေးခဲ့တယ်လို့ သိရပါတယ်။

ပြီးခဲ့တဲ့ အောက်တိုဘာလ ၂ ရက်က မြန်မာနိုင်ငံသား ခင်ပွန်းဖြစ်သူက ဇနီးသည်ကို နခွန်းပထုံဆေးရုံကြီးမှာ ခေါ်ဆောင်လာပြီး မီးဖွားပေးခဲ့ပြီးနောက် အောက်တိုဘာလ ၂၂ ရက်နေ့မှာ (၁၉)ရက်သားသာ ရှိနေသေးတဲ့ သားငယ်လေးကိုပွေ့ချီပြီး ဆေးရုံကနေ ထွက်ပြေးသွားခဲ့တယ်လို့ သိရပါတယ်။

ဆေးရုံတာဝန်ရှိသူတွေက သူတို့သားအမိသားအဖ(၃)ဦးပျောက်သွားအတွက် လိုက်လံရှာ‌ဖွေခဲ့ရာ မတွေ့ရှိရတာ‌ကြောင့် CCTV မှတ်တမ်း ကနေ စစ်ဆေးကြည့်ရှုချိန်မှာ မိဘနှစ်ပါးက ကလေးငယ်ကိုပွေ့ချီပြီး ထွက်ပြေးသွားတာကို သိရှိခဲ့ရတာပါ။

ထွက်ပြေးသွားတာကို သိရရှိရပြီးနောက် ဆေးရုံတာဝန်ရှိသူတွေက ကလေးငယ်မှာ ဆီးအိမ်ပိုးဝင်နေတဲ့ ရောဂါရှိနေတဲ့အတွက် အချိန်မီ ဆေးကုသမှုခံယူမှသာ အသက်ရှင်နိုင်မှာ ဖြစ်တာကြောင့် ကလေးလာရောက်မီးဖွားစဉ်က ပေးခဲ့တဲ့ နေရပ်လိပ်စာအတိုင်း သူတို့မိသားစုကိုရှာပေးဖို့ ရဲတပ်ဖွဲ့ကို အကူ အညီတောင်းခံခဲ့တယ်လို့ သိရပါတယ်။

ဆေးရုံတာဝန်ရှိသူတွေရဲ့ အကူအညီတောင်းခံမှုကြောင့် ရဲတပ်ဖွဲ့က လိုက်လံစုံစမ်းရာ နခွန်ပထုံခရိုင်၊ နခွန်ချိုင်စီမြို့နယ်၊ ထာ့နာကျေးရွာရှိ အလုပ်သမားတွေနေထိုင်တဲ့ တန်းလျားတစ်ခုမှာ ကလေးငယ်နဲ့အတူ မိဘနှစ်ပါးကိုတွေ့ရှိခဲ့တယ်လို့ ဆိုပါတယ်။

ရဲတပ်ဖွဲ့က မိဘဖြစ်သူနှစ်ဦးကို ဆေးရုံကနေ ထွက်ပြေးသွားရတဲ့ အကြောင်းအရင်းကို မေးမြန်းတဲ့အခါ မိဘဖြစ်သူနှစ်ဦးက “ကျွန်တော်တို့ ကလေးမီးဖွားခမတတ်နိုင်လို့ ထွက်ပြေးလာခဲ့တာပါ " လို ပြန်လည်ဖြေကြားခဲ့ကြောင်း သိရပါတယ်။

မြန်မာမိသားစုရဲ့ အခက်အခဲကို သိရှိသွားတဲ့ ဆေးရုံအုပ်ကြီး Mr. စူရချိုင် ချုတ်ခမ်ချစ်ချိုင်က ကုန်ကျစရိတ်အားလုံးကို ဆေးရုံကတာဝန်ယူပေးမှာဖြစ် ကြောင်း အားပေးနှစ်သိမ့်စကား ပြောကြားပြီး သူတို့မိသားစု (၃) ဦးကို ပြန် လည်ခေါ်ဆောင်သွားတယ်လို့ သိရပါတယ်။

#မြဝတီမဲဆောက်မီဒီယာ

#ထိုင်း #နခွန်ပထုံ #ဆေးရုံ #မြန်မာမိသားစု #မီးဖွား #ကုန်ကျစရိတ်

ထိုင်း-မြန်မာ ချစ်ကြည်ရေးအမှတ် (၁) တံတားပေါ်မှ ဖြတ်သန်းသွားလာသည့် CDM ဝန်ထမ်းများ နေ့စဉ်လိုလို ဖမ်းဆီးခံနေရ

မဲဆောက်၊ အောက်တိုဘာ ၂၁

ကရင်ပြည်နယ်၊ မြဝတီမြို့ရှိ ထိုင်း-မြန်မာ ချစ်ကြည်ရေးအမှတ် (၁) တံတားပေါ်မှ ထိုင်းနိုင်ငံ၊ မဲဆောက်ဘက်သို့ သွားရောက်သည့် CDM ဝန်ထမ်းများ နေ့စဉ်လိုလို ဖမ်းဆီးခံနေရကြောင်း သိရသည်။

ဖမ်းဆီးခံရသူများတွင် ပညာရေးနှင့် ကျန်းမာရေးဌာနမှ CDM ပြုလုပ်ထားသည့်ဝန်ထမ်းအများစုပါဝင်ကြောင်း မြဝတီရဲတပ်ဖွဲ့အသိုင်းအဝိုင်းနှင့် နီးစပ်သူတစ်ဦးက မြဝတီ&မဲဆောက်မီဒီယာသို့ အတည်ပြုသည်။

"အရင်တုန်းက ၇ ရက်‌ေနထိုင်ခွင့် လက်မှတ်လုပ်ပြီး အမှတ် (၁) တံတားကနေ မြဝတီ-မဲဆောက်ကို အဝင်အထွက်လုပ်နေကြတာ ပြဿနာ သိပ်မရှိပေမဲ့အခုက UID ကတ်ရှိမှ သွားလို့ရတော့တာ Computer နဲ့ UID ကတ်ကို စစ်လိုက်ရင် သွားမဲ့သူရဲ့ ကိုယ်ရေးအချက်အလက်တွေ အကုန်ပေါ်တာ အခု အဖမ်းခံရတာက UID ကတ်ကြောင့်လို့ ပြောရမှာပေါ့"ဟု မြဝတီရဲတပ်ဖွဲ့နှင့် နီးစပ်သူတစ်ဦးက ပြောသည်။

အဆိုပါ ဖမ်းဆီးခံရသူ CDM ဝန်ထမ်းများကို မြဝတီမြို့မရဲစခန်းသို့ ခေါ်ဆောင်သွားပြီး စစ်ဆေးမေးမြန်းမှုများပြုလုပ်ကာ မြဝတီရဲတပ်ဖွဲ့နှင့်ညှိနှိုင်း ၍ ပြန်လွှတ်ပေးခြင်းမျိုးတွေရှိသလို ဝန်ထမ်းအချို့အား တရားစွဲဆိုထားကြောင်း သိရသည်။

#မြဝတီမဲဆောက်မီဒီယာ

ဓါတ်ပုံ- CJ

#ကရင်ပြည်နယ် #မြဝတီ #မဲဆောက် #ထိုင်းမြန်မာအမှတ်၁တံတား #CDM #ဝန်ထမ်း #ဖမ်းဆီး

စမွတ်ဆာခွန်ခရိုင်မှာ အလုပ်ရှင်က လုပ်အားခ ၂ လစာ မရှင်းပေးလို့ မြန်မာအလုပ်သမား ၅၀ ဦး အခက်အခဲတွေနဲ့ ရင်ဆိုင်ကြုံတွေ့နေရ

မဲဆောက်၊ အောက်တိုဘာ ၂၁

ထိုင်းနိုင်ငံ၊ စမွတ်ဆာခွန်ခရိုင်ရှိ အွန်လိုင်းရှော့ပင်လုပ်ငန်းတစ်ခုမှာ အလုပ်လုပ်ကိုင်နေတဲ့ မြန်မာလုပ်သား ၅၀ ဦးဟာ အလုပ်ရှင်က လုပ်အားခ ၂ လစာ မရှင်းပေးတာကြောင့် အခက်အခဲတွေနဲ့ ရင်ဆိုင်ကြုံတွေ့နေရတယ်လို့ AAC မဟာမိတ်အဖွဲ့ဆီက သိရပါတယ်။

ထိုင်းအလုပ်အကိုင်ရှာဖွေရေး အေဂျင်စီတစ်ခုက မြန်မာအလုပ်သမားတွေကို စာရွက်စာတမ်းကြေးနဲ့ အလုပ်ရှင်ပြောင်းခအပါအဝင် ဝန်ဆောင်ခ တစ်ဦးကို ဘတ် (၁၀၅၀၀) စီကောက်ခံပြီး အွန်လိုင်းရှော့ပင်လုပ်ငန်းကို ပို့ဆောင်ပေးခဲ့တာလို့ ဆိုပါတယ်။

မြန်မာလုပ်သား ၅၀ ဦးဟာ ပြီးခဲ့တဲ့ ဩဂုတ်လပိုင်းတုန်းက ထိုင်းအေဂျင်စီရဲ့ ပို့ဆောင်မှုနဲ့ လုပ်ငန်းခွင်ထဲ ရောက်လာခဲ့ကြတာဖြစ်ပြီး၊ ခိုင်းသမျှအလုပ်မှန်သမျှကိုမငြိုမငြင်နဲ့လုပ်ကိုင်ပေးခဲ့ကြပေမဲ့ အလုပ်ရှင်က ၂ လပြည့်အထိ လုပ် အားခ မရှင်းပေးဘဲ တာဝန်မဲ့စွာနဲ့ပစ်ထားတယ်လို့ အလုပ်သမားတွေက ပြောပါတယ်။

ဖြစ်စဉ်နဲ့ပတ်သက်ပြီး နစ်နာသူ မြန်မာအလုပ်သမားတွေက သူတို့ရင်ဆိုင်ကြုံ တွေ့နေရတဲ့ အခက်အခဲတွေကို ကူညီဖြေရှင်းပေးဖို့ ထိုင်းရောက်မြန်မာအလုပ် သမားအရေးကူညီဆောင်ရွက်ပေးနေတဲ့ AAC မဟာမိတ်အဖွဲ့ ဦးခိုင်ကြီးဆီ အကူအညီတောင်းခံထားတယ်လို့ သိရပါတယ်။

မြန်မာအလုပ်သမားတွေရဲ့ လုပ်ခလစာများ ရရှိ‌နိုင်ရေးအတွက် AAC မဟာ မိတ်အဖွဲ့က ဒီနေ့ အောက်တိုဘာလ ၂၁ ရက် မနက်ပိုင်းမှာ နစ်နာသူ လုပ်သားတွေကိုခေါ်ဆောင်ပြီး စမွန်ဆာခွန်ခရိုင်၊ အလုပ်သမားကာကွယ်စောင့်ရှောက်ရေးရုံးကို တိုင်းကြားခဲ့တာကြောင့် တာဝန်ရှိသူတွေက သက်ဆိုင်ရာ လုပ်ငန်းရှင်ကို လာရောက်ဖြေရှင်းပေးဖို့ ဆင့်ခေါ်ထားတယ်လို့ သိရပါတယ်။

#မြဝတီမဲဆောက်မီဒီယာ

ဓါတိပုံ- AAC မဟာမိတ်အဖွဲ့

#ထိုင်း #စမွတ်ဆာခွန် #မြန်မာလုပ်သား #လုပ်အားခ #အလုပ်ရှင် #အခက်အခဲ #တိုင်ကြား

စမွတ်ပရာကန်ခရိုင်မှာ မီးလောင်မှုဖြစ်ပွား၊ မြေးအဖွားနှစ်ဦးသေဆုံးပြီး ၃ ဦးပျောက်ဆုံးနေ

မဲဆောက်၊ အောက်တိုဘာ ၂၀

ထိုင်းနိုင်ငံ၊ စမွတ်ပရာကန်ခရိုင်၊ မူယန်မြို့နယ်၊ ဘန်ပလုံကျေးရွာမှာ ဒီနေ့ အောက်တိုဘာလ ၂၀ ရက် မနက်အစောပိုင်းက နေအိမ်တစ်လုံးက‌နေ မီးစ တင်လောင်ကျွမ်းမှုဖြစ်ပွားပြီးတော့ မြေးအဖွားနှစ်ဦး နေအိမ်အတွင်း ပိတ်မိကာ သေဆုံးပြီး၊ ၃ ဦးပျောက်ဆုံးနေတယ်လို့ သိရပါတယ်။

မီးလောင်မှုအတွင်း သေဆုံးခဲ့သူနှစ်ဦးမှာ အသက် ၄၇ နှစ်အရွယ် အဖွားဖြစ်သူနဲ့ အသက် ၁၁ နှစ်မိန်းကလေး(မြေး)ငယ်တို့ဖြစ်ပါတယ်။ မီးငြိမ်းသတ်ပြီးချိန်မှာ အဖွားက မြေးမလေးကိုပွေ့ဖက်ထားတဲ့ပုံစံနဲ့ သေဆုံးနေတာကို တွေ့ရှိရတယ်လို့ တာဝန်ရှိသူတွေက ဆိုပါတယ်။

ဒါ့အပြင် အဖွားအိုတစ်ဦး၊ အသက် ၉ နှစ်နဲ့ အသက် ၁၁ နှစ်အရွယ် ကလေးငယ် ၂ ဦးအပါအဝင် မြေးအဖွား ၃ ‌ဦးလည်းမီးလောင်မှုအတွင်း ပျောက်ဆုံးနေပြီး မီးငြိမ်းသတ်ပြီးတဲ့အချိန်အထိ ရှာမတွေ့သေးဘူးလို့ သိရပါတယ်။

ဖြစ်စဉ်ကြောင့် လူနေအိမ် ၁၀ လုံး မီးလောင်ပျက်စီးခဲ့ရပြီး ၂ ဦးသေဆုံးကာ ၃ ဦးပျောက်ဆုံးနေပါတယ်။ အဆိုပါ မီးလောင်မှုဖြစ်ပွားရတဲ့ အကြောင်းရင်းကို တာဝန်ရှိသူတွေက စစ်ဆေးမေးမြန်းမှုတွေပြုလုပ်နေပြီး ကျေးရွာအုပ်ချုပ်ရေးအဖွဲ့ကတော့ မီးလောင်ပျက်စီးခဲ့ရတဲ့ နေအိမ်များကို အစားထိုးပြန်လည်ဆောက်လုပ်ပေးဖို့ အစိုးရဆီတင်ပြသွားမယ်လို့ သိရပါတယ်။

#မြဝတီမဲဆောက်မီဒီယာ

#စမွတ်ပရာကန် #မီးလောင် #နေအိမ် #ပျက်စီး

ထိုင်း-မြန်မာ နယ်စပ်၊ မြဝတီ-မဲဆောက် ချစ်ကြည်ရေးအမှတ် (၁) တံတား ယနေ့ အောက်တိုဘာ ၁၉ ရက် ညနေပိုင်းမြင်ကွင်း

#မြဝတီမဲဆောက်မီဒီယာ

#ထိုင်းမြန်မာနယ်စပ် #မဲဆောက်မြဝတီ #အမှတ်၁တံတား #ဖွင့်လှစ်