MMWeather

"နောက်လာမည့် ရက်သတ္တပါတ် ၁ ပါတ်အတွင်း ပြည်နယ်တိုင်းများအလိုက် ဖြစ်နိုင်မည့် အမြင့်ဆုံးအပူချိန်-အနိမ့်ဆုံးအပူချိန်များ"
ဇန်နဝါရီလ ၉ ရက် - နေ့လည် ၁ နာရီ
====

အနိမ့်ဆုံးအပူချိန်(ညအပူချိန်)များသည် နံနက်အစောပိုင်း ၆ နာရီ ခန့်တွင် အပူချိန်အကျဆုံး(အအေးဆုံး)ဖြစ်ပြီး အမြင့်ဆုံးအပူချိန်(နေ့အပူချိန်)များသည် မွန်းလွဲ ၂ နာရီဝန်းကျင်တွင် အပူချိန်အမြင့်ဆုံး(အပူဆုံး)ဖြစ်ကြောင်းတွေ့ရပါတယ်။

ယနေ့ ဇန်နဝါရီ ၉ ရက် မှ ဇန်နဝါရီ ၁၅ ရက်အထိ ချင်းပြည်နယ်၊ ကချင်ပြည်နယ်၊ ရှမ်းပြည်နယ်၊ ကယားပြည်နယ်နှင့် ကရင်ပြည်နယ်မြောက်ပိုင်းဒေသများမှအပ ကျန်ပြည်နယ်တိုင်းဒေသအားလုံးတွင် နေ့အပူချိန်များသည် ၃၀ °C အထက်ဆက်လက်ရှိနေမှာဖြစ်ပြီး -
ည အပူချိန်များသည် ကရင်ပြည်နယ်တောင်ပိုင်း၊ မွန်ပြည်နယ်တောင်ပိုင်းနှင့် တနင်္သာရီတိုင်းဒေသများမှအပ ကျန်ပြည်နယ်တိုင်းဒေသအားလုံးတွင် ၂၀ °C အောက်သို့ ကျဆင်းပြီး အအေးပိုလာနိုင်ပါသည်။

⚠️ အထူးသတိပြုရန် ⚠️
နံနက်အစောပိုင်းအေးနေသော်လည်း နေ့လည်ပိုင်းတွင် ပူပြင်းခြောက်သွေ့သည့် ရာသီဥတုအခြေအနေက -
🔸 မီးလောင်ခြင်းကို အားပေးနေသည့်အတွက်လည်းကောင်း၊
🔸 မီးလောင်သည့်အချိန် မီးဧရိယာကျယ်ပြန့်လျှင် ပြင်ပမှတိုးဝင်လာသည့် အားပြင်းသောလေပြင်းများကြောင့်လည်းကောင်း "မီးလောင်ရာ လေပင့်"သည့်အခြေအနေဖြစ်နိုင်တာကြောင့် မီးဘေးအန္တရာယ်ကို အထူးသတိထားကြရမှာဖြစ်ပါတယ်။

"ဇန်နဝါရီလအတွင်းမှာ ဆက်လက်ဝင်ရောက်လာမဲ့ မြောက်ဘက်က လေအေးတွေကြောင့် အအေးပိုလာပါဦးမယ်"
ဇန်နဝါရီလ ၇ ရက် ညနေ ၅ နာရီ ၁၅ မိနစ်
======

ပြီးခဲ့တဲ့ ၂၀၂၃ အကုန်-၂၄ ခုနှစ် အစပိုင်းမှာ အယ်လ်နီညိုဖြစ်ခဲ့လို့ အပူဆုံးနွေရာသီကို ခံစားခဲ့ကြရပြီး၊ ၂၀၂၄ ခုနှစ် နှစ်လယ်ပိုင်းနဲ့ နှစ်ကုန်ပိုင်းတွေမှာ ရေနှင့်ပတ်သက်သောသဘာဝဘေးများ ကြုံတွေ့ခဲ့ကြရပြီး ထိခိုက်ဆုံးရှုံးမှုတွေလဲများခဲ့ပါတယ်။

ဒီနှစ် ၂၀၂၅ ခုနှစ်မှာတော့ ဇန်နဝါရီလ/ဖေဖေါ်ဝါရီလတွေမှာ လာနီညာဖြစ်နိုင်ခြေ ၅၉% ရှိနေပြီး မတ်လ/ဧပြီလ/မေလ တွေမှာ အစွန်းရောက်ရာသီမဟုတ်တဲ့ ပုံမှန်(Neutral)ဖြစ်လာနိုင်မယ်လို့ ဒီဇင်ဘာလ ၁၂ ရက်မှာ အမေရိကန် ရာသီဥတုကြိုတင်ခန့်မှန်းရေးစင်တာ(CPC)က ထုတ်ပြန်ထားပါတယ်။
လွန်ကဲသော အအေးလှိုင်းဖြစ်ပေါ်မှုများက မြန်မာနိုင်ငံရဲ့ မြောက်ဘက် ဟိမဝန္တာတောင်ကြောနဲ့ တိဗက်ကုန်းမြင့်တွေဘက်နဲ့ အမေရိကတိုက်မြောက်ပိုင်း ကနေဒါနိုငံနဲ့ အမေရိကန်ပြည်ထောင်စုမြောက်ဘက်ခြမ်းဒေသတွေမှာ ဖြစ်နေတာရှိပြီး မြန်မာနိုင်ငံမှာတော့ အအေးလှိုင်းဖြစ်ပေါ်မဲ့အခြေအနေ မရှိပါ။

ဇန်နဝါရီလအတွင်းမှာ ညအပူချိန်တွေဆက်လက်ကျဆင်းနေဆဲဖြစ်ပြီး မြန်မာနိုင်ငံတောင်ဘက်ခြမ်း ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်နဲ့ တနင်္သာရီတိုင်းတွေမှာလဲ မနက်အစောပိုင်းအပူချိန်တွေက ၂၀ °C အောက်ကို ကျဆင်းလာတာတွေ့ရပါတယ်။ ကျန်တဲ့တိုင်းနဲ့ ပြည်နယ်တွေမှာတော့ ဇန်နဝါရီလဆန်းပိုင်းမတိုင်ခင် ဒီဇင်ဘာလ လယ်လောက်ကတည်းက ၂၀ °C အောက်အထိကျနေပြီးပါပြီ။

ဒီဇင်ဘာ ၈ ရက်နေ့မှာတော့ မြန်မာနိုင်ငံအထက်ပိုင်း၊ ကချင်ပြည်နယ်မှာ နေရာစိပ်စိပ် မိုးအနည်းငယ်ရွာနိုင်ကြောင်း ရွာရန်ရာခိုင်နှုန်း ၇၅ % မှ ၁၀၀ % အထိ ရှိနေပြီး အချို့နေရာတွေမှာ မိုးရေချိန် ၁၅ မီလီမီတာအထက်(၀.၆ လက်မ ခန့်)ရွာသွန်းနိုင်ကြောင်း ကြိုတင်ခန့်မှန်းချက်တွေမှာ တွေ့ရပါတယ်။ ကျန်ပြည်နယ်နဲ့ တိုင်းဒေသတွေမှာတော့ မိုးရွာနိုင်ချေမရှိပါ။

မြန်မာနိုင်ငံပြည်နယ်တိုင်းမြို့များ၏ ၄ ရက်အတွက် မိုးလေဝသအခြေအနေကြည့်ရန် - https://www.mmweather.org/divisional-cities-weather

အေးလာပါပြီ။ ၂ လ ပိုင်းအကုန်လောက်အထိ ဒီအတိုင်းဆက်အေးနိုင်ပါမယ်။

ဒီနေ့ည မနက်ဖန်မနက်အစောပိုင်း၊ ညအပူချိန်တွေကျနိုင်မဲ့ အခြေအနေ
(Weather Stations' data ည ၁၁ နာရီခွဲ)

ကလောမှာ ၁၀ °C အောက်ကိုကျနိုင်
တောင်ကြီးနဲ့ ကလောမှာ ၁၅ °C အောက်ကို ကျနိုင်ပြီးတော့
ရန်ကုန် မြောက်ပိုင်းခရိုင်တွေ(ထန်းတပင်/လှည်းကူး) ၂၀ °C အောက်ကို ကျလာနိုင်ပါမယ်။
ဧရာဝတီတိုင်းတောင်ပိုင်းနဲ့ ရန်ကုန်မြို့တွင်းမြို့နယ်အတော်များများမှာတော့ ည အပူချိန်တွေက ၂၀ °C အထက်မှာ ဆက်ရှိနေနိုင်ပါမယ်။

"နှစ်သစ်မှာ သတိထားကြရမဲ့ သဘာဝဘေး ... "မီးဘေးအန္တရာယ်"
၂၀၂၅ ခုနှစ် ဇန်နဝါရီလ ၁ ရက် နံနက် ၁၁ နာရီ ၂၀ မိနစ်
======

၂၀၂၅ ခုနှစ်ကို ကူးပြောင်းပြီး နှစ်သစ်တစ်နှစ်အတွက် ကြုံတွေ့ရနိုင်မဲ့ ရာသီဥတုအခြေအနေတွေက ပြီးခဲ့တဲ့ ၂၀၂၄ ခုနှစ်လောက် ဆိုးရွားနိုင်ဘွယ်မရှိပါ။ အစွန်းရောက်ရာသီဥတုဖြစ်စဉ်တွေဖြစ်ကြတဲ့ အယ်လ်နီညို၊ လာနီညာ နဲ့ အိန္ဒိယနီညို လို့ခေါ်တဲ့ Indian Ocean Dipole-IOD ဖြစ်စဉ်များအားလုံးက ၂၀၂၅ ခုနှစ်အတွင်း ပုံမှန်(Neutral)မှာသာရှိနိုင်ကြောင်း ခန့်မှန်းချက်များ ရှိနေကြောင်း တင်ပြပေးခဲ့ပြီးဖြစ်ပါတယ်။

🔸 MMWeather Site မှ "၂၀၂၅ ခုနှစ် အတွင်းဖြစ်ပေါ်နိုင်သည့် ရာသီဥတုနှင့်မိုးလေဝသဖြစ်စဉ်များ" စာမျက်နှာမှာ တင်ပေးထားပါတယ်။ https://www.mmweather.org/2025-weather-forecast

🔸 ၂၀၂၅ ခုနှစ် နှစ်သစ်အစပိုင်းမှာ ဇန်နဝါရီလ ၁ ရက်နေ့က စတင်ပြီး ဒေသအားလုံးနီးပါး ညအပူချိန်တွေကျဆင်းလာမယ်၊ ညအပူချိန် ၂၀ °C အောက် ကျဆင်းနိုင်မဲ့ ဒေသတွေများလာပါမယ်။

🔸 အီကွေတာအနီး(မြောက်လတ္တီတွဒ် ၁၀ ° ပတ်ဝန်းကျင်)မှာသာ မုန်တိုင်း/လေဖိအားနည်းရပ်ဝန်းဖြစ်နိုင်ချေတွေရှိနေပြီး အထက်ဘက်ကို တက်မလာနိုင်တော့တာကြောင့် အခါလွန်မိုးရွာနိုင်မဲ့ အခြေအနေလည်း မရှိတော့ပါ။

🔸 နေ့အချိန်(အထူးသဖြင့် မွန်းလွဲ-နေ့လည်ပိုင်းအချိန်တွေ)မှာ တိမ်ကင်းစင်နေပြီး၊ နေ့အပူချိန်တွေလဲမြင့်တက်လာမှာကြောင့် ဒီအချိန်ဒီကာလမှာ အထူးသတိထားရမှာကတော့ မီးဘေးအန္တရာယ်(မီးကူးစက်လောင်ကျွမ်းနိုင်တဲ့အခြေအနေ)တွေသည် မြို့ပြ/ကျေးရွာ/ရပ်ကွက်တွေမှာရော သစ်တောဧရိယာတွေမှာရော မြင့်တက်လာကြောင်း တွေ့ရပါတယ်။

🔸 "နွေစပါးနဲ့ နွေသီးနှံများအောင်ရေ ရရှိနိုင်ရန်အတွက်" ပြင်ဆင်သင့်တာပြင်ဆင်ထားကြပြီး၊ လယ်ကွင်းများမီးရှို့တာ၊ သစ်တောဧရိယာများ မီးရှို့ရှင်းလင်းတာ .. စ တဲ့ မီးဘေးအန္တရာယ်စိုးရိမ်စရာဖြစ်လာမဲ့ ဆောင်ရွက်ချက်တွေကို အသိ/သတိနဲ့ လုပ်ကြပါလို့ ၂၀၂၅ နှစ်သစ်ရဲ့ ပထမဆုံး post အနေနဲ့ တင်ပြအသိပေးလိုက်ပါတယ်။

"၂၀၂၅ ခုနှစ် လာနီညာဖြစ်နိုင်ချေ နှင့် ၂၀၂၅ ခုနှစ် မြန်မာနိုင်ငံတွင် ဖြစ်ပေါ်နိုင်မည့် ရာသီဥတုအခြေအနေ ကြိုတင်ခန့်မှန်း"
https://www.mmweather.org/2025-weather-forecast#h.br568xbse7pg

၂၀၂၄ ၏ နောက်ဆုံးရက်၊ ဒီဇင်ဘာ ၃၁ ရက်နေ့ည နှင့် နှစ်သစ်ကူးရက်(၂၀၂၅ ခုနှစ် ဇန်နဝါရီ ၁ ရက်)နံနက် အစောပိုင်းတွင် ရခိုင်ပြည်နယ်မှအပ မြန်မာတနိုင်ငံလုံးတွင် တိမ်အသင့်အတင့်ဖြစ်ထွန်းနိုင်ပြီး၊ တနင်္သာရီတိုင်းတောင်ပိုင်းတွင် တိမ်ထူထပ်နေနိုင်ပါသည်။

နှစ်သစ်ကူးညပိုင်းနှင့် ၂၀၂၅ ခုနှစ် ဇန်နဝါရီလ ၁ ရက် နံနက်အစောပိုင်းတွင် ရန်ကုန်တိုင်း၊ ပဲခူးတိုင်း၊ ဧရာဝတီတိုင်းတောင်ပိုင်း၊ မွန်ပြည်နယ်၊ ကရင်ပြည်နယ်နှင့် တနင်္သာရီတိုင်းတို့တွင် အပူချိန် ၂၀ °C အထက်တွင်ဆက်လက်ရှိနေနိုင်ပြီး ကျန်ပြည်နယ်တိုင်းဒေသများတွင် အပူချိန် ၂၀ °C အောက်ကျဆင်းနေနိုင်ပါသည်။

၂၀၂၅ ခုနှစ်၊ ဇန်နဝါရီလ ပထမပတ်နှင့် ဒုတိယပတ်အတွင်း(ဇန်နဝါရီ ၁၃ - ၁၄ ရက်နေ့အထိ)ပြည်နယ်တိုင်းအားလုံးတွင် အနိမ့်ဆုံးအပူချိန်များသည် ၂၀ °C အောက်သို့ ကျဆင်းနေနိုင်ပါမည်။

GFS, ECMWF-AI, GEFS, GEPS ာmodel တွေရဲ့ ၂၀၂၅ ခုနှစ် ဇန်နဝါရီ ၃ ရက်နေ့မှာ ဖြစ်နိုင်မဲ့ အနိမ့်ဆုံးအပူချိန်များ။
(နံနက် ၃ နာရီမှ ၆ နာရီအတွင်း အပူချိန် အနိမ့်ဆုံးကျဆင်းခြင်းဖြစ်နိုင်သည်)

Attach လုပ်ပေးထားတဲ့ ဖိုင် မှားသွားတာကြောင့် တောင်းပန်ပါတယ်။ အခု ပြန်တင်ပေးထားပါတယ်။

၂၀၂၄ ခုနှစ်အတွင်း မြန်မာနိုင်ငံတွင်ဖြစ်ပေါ်ခဲ့သည့် “ရာသီဥတုအခြေအနေ”နှင့် ကြုံတွေ့ခဲ့ရသည့် “သဘာဝဘေးများ”ကို ပြန်လည်သုံးသပ်ခြင်း
Review of the "weather conditions" and "natural disasters" experienced in Myanmar during 2024

ဘင်္ဂလားပင်လယ်အော်အနောက်တောင်ပိုင်းမှ လေဖိအားနည်းရပ်ဝန်း (INVEST-91B)သည် ဒီဇင်ဘာ ၂၅ ရက် ညပိုင်းတွင်လည်းကောင်း၊ တောင်တရုတ်ပင်လယ်တောင်ပိုင်းမှ မုန်တိုင်း (TS PABUK) သည် ဒီဇင်ဘာ ၂၆ ရက် ည ပိုင်းတွင်လည်းကောင်း အသီးသီးအားပျော့ပျက်ပြယ်သွားကြမည်ဖြစ်ကြောင်း ကြိုတင်ခန့်မှန်းချက်များတွင် တွေ့ရသည်။

မြောက်ဘက် တိဗက်ကုန်းမြင့်ဒေသနှင့် ဟိမဝန္တာတောင်တန်းများပေါ်မှ လေအေးစီးကြောင်းများသည်"တောင်ဘက်" (မြန်မာ၊ အိန္ဒိယနှင့် ဘင်္ဂလားဒေ့ရှ်နိုင်ငံများဘက်)သို့ ဦးတည်တိုက်ခတ်နေသောကြောင့်လည်း မြန်မာနိုင်ငံဒေသအားလုံးတွင် နေ့အချိန်များ၌သာယာပြီး ညပိုင်းတွင်အအေးပိုလာနိုင်တော့မည်ဖြစ်ပါသည်။

ဒီဇင်ဘာ ၂၅ ရက် - နေ့လည် ၁ နာရီ
🎄 Merry Christmas and Happy New Year to you All! 🎄

ဘင်္ဂလားပင်လယ်အော်တောင်ပိုင်းမှ လေဖိအားနည်းရပ်ဝန်း အခြေအနေ update
ဒီဇင်ဘာ ၇ ရက်၊ ည ၇ နာရီ ၃၀ မိနစ်
======

အိန္ဒိယသမုဒ္ဒရာမြောက်ပိုင်း မြောက်လတ္တီတွဒ် ၅ ဒီဂရီအောက်ဘက်(4.248 ºN, 89.380 ºE)တွင် ဖြစ်ပေါ်လျှက်ရှိသည့် လေပွေလှိုင်းသည် -
🔸 ယနေ့နံနက် ၉ နာရီခွဲအချိန်တွင် လေဖိအားနည်းရပ်ဝန်းဖြစ်လာကြောင်း၊ 🔸 အနောက်-အနောက်မြောက်ဘက်သို့ ဆက်လက်ရွေ့လျားရင်း ၂၄ နာရီအတွင်း သိသာထင်ရှားသောလေဖိအားနည်းရပ်ဝန်း(Well-Marked Low-Pressure Area)ဖြစ်လာနိုင်ကြောင်း၊
🔸 အနောက်-အနောက်မြောက်ဘက်သို့ဆက်လက်ရွေ့လျားပြီး ဒီဇင်ဘာ ၁၁ ရက်နေ့တွင် ဘင်္ဂလားပင်လယ်အော်အနောက်တောင်ပိုင်း၊ သီရိလင်္ကာနှင့်တမီလ်နာဒူးကမ်းခြေကို ဖြတ်ကျော်ဝင်ရောက်နိုင်ကြောင်း အိန္ဒိယမိုးလေဝသဌာနက ထုတ်ပြန်ထားပါတယ်။

🔸 အပြည်ပြည်ဆိုင်ရာ မုန်တိုင်းစောင့်ကြည့်လေ့လာရေးအဖွဲ့များ(JTWC နှင့် CIMSS)မှ အဆိုပါလေဖိအားနည်းရပ်ဝန်းကို "စောင့်ကြည့်ရမည့် system - INVEST-90B"အဖြစ်သတ်မှတ်ထားပြီး၊ ဒီဇင်ဘာ ၇ ရက် ည ၆ နာရီ ၃၇ မိနစ်အချိန် D-PRINT data အရ INVEST-90B ၏ အမြင့်ဆုံးလေတိုက်နှုန်းမှာ 18 knots(20.7 mph)ရှိနေကြောင်းတွေ့ရပါတယ်။

သင်္ချာပုံစံပြုမော်ဒယ်တွေရဲ့ ကြိုတင်ခန့်မှန်းချက်များအရ -
🔸 လေဖိအားနည်းရပ်ဝန်းအရှိန်ကြောင့် မြန်မာနိုင်ငံဘက်သို့ရွေ့လျားမှုမရှိနိုင်သည့်အပြင်၊
🔸 မြန်မာနိုင်ငံဘက်တွင် မိုးရွာသွန်းနိုင်သည့်သက်ရောက်မှုမရှိကြောင်း တွေ့ရပါတယ်။

"ဒီဇင်ဘာလ ဒုတိယပတ်အတွင်း ဘင်္ဂလားပင်လယ်အော်အနောက်တောင်ပိုင်းတွင် လေဖိအားနည်းရပ်ဝန်းတခုဖြစ်ပေါ်နိုင်ကာ မြန်မာနိုင်ငံဒေသအချို့တွင် မိုးအသင့်အတင့်ရွာနိုင်ကြောင်းတွေ့ရ"
ဒီဇင်ဘာ ၆ ရက် နေ့လည် ၂ နာရီ
====

🔸 တောင်တရုတ်ပင်လယ်တောင်ပိုင်း၊ ထိုင်းပင်လယ်ကွေ့၊ ထိုင်းနိုင်ငံတောင်ပိုင်း၊ မာလက္ကာရေလက်ကြား၊ စုမတြာကျွန်းတွေကို ဖြတ်ကျော်ပြီး ကပ္ပလီပင်လယ်တောင်ပိုင်းကိုဝင်ရောက်လာတဲ့ လေပွေလှိုင်း(UPPER AIR CYCLONIC CIRCULATION-UACC)က အနောက်ဘက်ကို ဆက်လက်ရွေ့လျားပြီး ဘင်္ဂလားပင်လယ်အော်အနောက်တောင်ပိုင်းမှာ လေဖိအားနည်းရပ်ဝန်းတခု ဖြစ်လာနိုင်ပါတယ်။

🔸 အိန္ဒိယမိုးလေဝသဌာမှ ဒီဇင်ဘာ-၆ ရက်နေ့စွဲနဲ့ ထုတ်ပြန်ချက်မှာတော့ ၃.၁ ကီလိုမီတာ အမြင့် အထက်လေထုလွှာအတွင်း လေပွေလှိုင်းတခုဖြစ်ပေါ်နေကြောင်း၊ ဒီဇင်ဘာလ ၇ ရက်နေ့ဝန်းကျင်မှာ ပိုမိုအားကောင်းလာပြီး လေဖိအားနည်းရပ်ဝန်း(Low Pressure Area-LPA)တခုဖြစ်လာနိုင်ကြောင်း၊ အနောက်-အနောက်မြောက်ဘက်ကို ဆက်လက်ရွေ့လျားပြီးတော့ သီရိလင်္ကာကျွန်းမြောက်ဘက်မှတဆင့် ဘင်္ဂလားပင်လယ်အော် အနောက်တောင်ပိုင်း တမီလ်နာဒူးပြည်နယ်ကမ်းခြေအနီးသို့ ဒီဇင်ဘာလ ၁၂ ရက်နေ့မှာ ရွေ့လျားရောက်နိုင်ကြောင်း .. စသည်ဖြင့် ခန့်မှန်းထားပါတယ်။

🔸 ECMWF Model ကြိုတင်ခန့်မှန်းချက်များအရ ဒီဇင်ဘာ ၁၉-၂၀ ဝန်းကျင်မှာ အားကောင်းတဲ့ လေဖိအားနည်းရပ်ဝန်းတခုအဆင့်ကို ရောက်လာနိုင်ကြောင်းတွေ့ရပါတယ်။

💦 ဒီလေဖိအားနည်းရပ်ဝန်းဖြစ်လာတဲ့ အရှိန်ကြောင့် ...
မြန်မာနိုင်ငံတောင်ပိုင်း-ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ မကွေးတိုင်း၊ နေပြည်တော်၊ မန္တလေးတိုင်း၊ စစ်ကိုင်းတိုင်း၊ ချင်းပြည်နယ်၊ ကယားပြည်နယ်၊ ရှမ်းပြည်နယ်၊ ကချင်ပြည်နယ်တွေမှာ တိမ်အသင့်တင့်မှ တိမ်ထူထပ်စွာဖြစ်ပေါ်လာနိုင်ပြီး၊ မိုးအသင့်အတင့်နေရာကွက်ပြီးရွာသွန်းနိုင်မဲ့ အခြေအနေများ "ဒီဇင်ဘာလ ၁၉-၂၀ ရက်နေ့များအတွင်း"ဖြစ်ပေါ်နိုင်ကြောင်း ကြိုတင်ခန့်မှန်းထားတာတွေ့ရပါတယ်။

🔸 ဆက်လက်စောင့်ကြည့်တင်ပြပေးသွားပါမယ်။

၂၀၂၅ ခုနှစ် နှစ်ဆန်းပိုင်း(ဇန်နဝါရီလ)မှ ဧပြီလ အထိ ရာသီဥတု(မိုးရွာသွန်းနိုင်မှု)ဖြစ်နိုင်ချေ ကြိုတင်ခန့်မှန်းခြင်း
၂၀၂၄ ခုနှစ်၊ ဒီဇင်ဘာလ ၄ ရက် - ညနေ ၅ နာရီ
=====

🔸 ၂၀၂၅ ခုနှစ် နှစ်ဆန်းပိုင်း ဇန်နဝါရီနှင့်ဖေဖေါ်ဝါရီလများတွင် မိုးရွာသွန်းနိုင်သည့်အခြေအနေသည် နှစ်စဉ်ရွာသွန်းမြဲအတိုင်းသာ ရွာသွန်းနိုင်မည့်အခြေအနေတွေ့ရသည်၊ မိုးပိုမည်မဟုတ်/မိုးနည်းနိုင်မည်လည်းမဟုတ်ပါ။
(ပြီးခဲ့သောနှစ်များက ဤကာလအတွင်း မိမိနေထိုင်ရာဒေသအတွင်း မိုးရွာသွန်းမှုမရှိလျှင် မိုးရွာနိုင်မည်မဟုတ်ဟု ဆိုလိုပါသည်)။
နှစ်ဆန်းပိုင်း ပထမ ၂ လအတွင်း၊ ကချင်ပြည်နယ်တွင်တော့ မိုးရွာသွန်းနိုင်ချေသည် ရွာသွန်းမြဲအောက်သို့ကျနိုင်မည်၊ ပြီးခဲ့သောနှစ်များထက် မိုးရွာသွန်းမှုနည်းနေမည်ဟု တွေ့ရပါသည်။

🔸 ၂၀၂၅ ခုနှစ် မတ်လ တွင် မြန်မာနိုင်ငံတောင်ပိုင်းဒေသ(တနင်္သာရီတိုင်း၊ မွန်ပြည်နယ်နှင့် ကရင်ပြည်နယ်)တွင် နှစ်စဉ်ရွာသွန်းမြဲအထက် မိုးပိုမိုရွာသွန်းနိုင်ကြောင်းတွေ့ရသည်၊ ၂၀၂၂ ခုနှစ် မတ်လက တနင်္သာရီတိုင်း၊ ကရင်ပြည်နယ်နှင့် မွန်ပြည်နယ်တို့တွင် မတ်လ ၂၁ ရက်နေ့က ၂၄ နာရီအတွင်း မိုးရေချိန် ၁၂ မီလီမီတာရွာသွန်းခဲ့ရာ၊ မတ်လအတွင်း တရက်ရက်တွင် ဤမိုးရေချိန်ထက် ပိုမိုရွာသွန်းမည်ဟု ဆိုလိုခြင်းဖြစ်သည်။

🔸 ၂၀၂၅ ခုနှစ်၊ ဧပြီလတွင် မန္တလေးတိုင်း၊ ရှမ်းပြည်နယ်တောင်ပိုင်း၊ နေပြည်တော်၊ ကယားပြည်နယ်၊ မကွေးတိုင်းတောင်ပိုင်း၊ ပဲခူးတိုင်း၊ ရခိုင်ပြည်နယ်တောင်ပိုင်း၊ ဧရာဝတီတိုင်း၊ ရန်ကုန်တိုင်း၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်းတို့တွင် နှစ်စဉ်ရွာသွန်းမြဲထက် မိုးပိုမိုရွာသွန်းနိုင်ကြောင်းတွေ့ရသည့်အတွက် "မိုးကြိုကာလဖြစ်သော ဧပြီလ ၁၆ ရက်မှ မေလ ၁၅ ရက်အတွင်း" မိုးအသင့်အတင့်မှ မိုးများနိုင်မည် သို့မဟုတ် မိုးဦးကာလ မိုးရွာချိန် အနည်းငယ်စောနိုင်မည်ဟု သုံးသပ်ရပါသည်။

🔸 အယ်လ်နီညိုမဟုတ်၊ လာနီညာမဟုတ် အစွန်းရောက် ရာသီဥတုဖြစ်စဉ်များမရှိသည့် ကြားနေ(NEUTRAL)ရာသီဥတုသည် ၂၀၁၃ ခုနှစ်နောက်ပိုင်း မရှိခဲ့ မဖြစ်ခဲ့သည်မှာ ၁၁ နှစ်ကြာခဲ့ပြီဖြစ်၍ အစွန်းရောက်ရာသီဥတုများမဖြစ်သည့် ကြားနေနှစ်(Neutral Year)လည်းဖြစ်နိုင်ချေရှိသဖြင့်(နောက်ဆုံးပုံတွင်ကြည့်ပါ) - ၂၀၂၅ ခုနှစ်သည့် ရာသီဥတုမှန်နိုင်ပြီး စိုက်ပျိုးရေးလုပ်ငန်းများ ပုံမှန်ဆောင်ရွက်နိုင်မည်ဖြစ်ကြောင်း ကြိုတင်ခန့်မှန်းတင်ပြလိုက်ရပါသည်။

၂၀၂၄ ခုနှစ်၊ ဒီဇင်ဘာလ ၄ ရက်၊ SOUTH-ASIA ENSEMBLE MODELS FORECAST(တောင်အာရှတိုက် ကြိုတင်ခန့်မှန်းရေးမော်ဒယ်များ၏ ပျမ်းမျှခန့်မှန်းချက်)ကို ကိုးကား၍ သုံးသပ်ထားပါသည်။

📋 ဤ သုံးသပ်တင်ပြချက်အား MMWeather Site တွင်လည်း မှတ်တမ်းတင်ထားပါမည်။

မြန်မာနိုင်ငံတောင်ပိုင်းဒေသတွေအပြင်၊ ရှမ်းပြည်နယ် အင်းလေးဒေသမှာလဲ "နေ့အပူချိန်တွေ"က ဆောင်းတွင်းမှာတောင် ပြန်လည်မြင့်တက်နေတာတွေ့ရပါတယ်။
မင်္ဂလာဒုံ နေ့အပူချိန်က မနေ့ကထက် 0.7 ºC မြင့်တက်လာကြောင်းနဲ့ အင်းလေးဒေသမှာ နေ့အပူချိန် မနေ့ကထက် 2.7 ºC မြင့်တက်နေကြောင်း တပ်ဆင်ထားတဲ့ weather station များရဲ့ real-time data တွေက ဖေါ်ပြနေပါတယ်။

ဒါကြောင့် ...
⚠️ နေ့လည်နေ့ခင်းအပြင်ထွက်တဲ့အခါ ခံစားရတဲ့အပူချိန်(Temperature Feels Like)ကို သတိပြုကြပါရန် အသိပေး/သတိပေးလိုက်ပါတယ်။

၂၀၂၄ ခုနှစ် နှစ်ကုန်ပိုင်း(ဒီဇင်ဘာလ)မှ ၂၀၂၅ ခုနှစ် နှစ်ဆန်းပိုင်း(ဧပြီလ)အထိ ရာသီဥတု(အပူချိန်)ဖြစ်နိုင်ချေ ကြိုတင်ခန့်မှန်းခြင်း
၂၀၂၄ ခုနှစ်၊ ဒီဇင်ဘာလ ၄ ရက် - နေ့လည် ၁ နာရီ
=====
ရက်ဝေးရာသီဥတု(အပူချိန်)ကြိုတင်ခန့်မှန်းချက်များအရ -
၂၀၂၄ ခုနှစ် ဒီဇင်ဘာလအတွင်း ရန်ကုန်တိုင်း၊ ပဲခူးတိုင်း၊ မကွေးတိုင်း၊ မန္တလေးတိုင်း၊ နေပြည်တော်၊ ကယားပြည်နယ်၊ စစ်ကိုင်းတိုင်းအောက်ပိုင်းတို့တွင် နှစ်စဉ်ဖြစ်မြဲအပူချိန်ထက် ၁.၅ ºC မှ ၂ ºC အထိ အပူချိန်ပိုနိုင်ပြီး ကျန်ပြည်နယ်နှင့်တိုင်းများတွင် ၀.၅ ºC မှ ၁.၅ ºC အထိ အပူချိန် ပိုနေနိုင်ပါတယ်။ ဒါ့ကြောင့် - လာမည့် ၂၀၂၄ ခုနှစ်၊ ဆောင်းရာသီကာလအတွင်း (ဒီဇင်ဘာလအတွင်း) မြန်မာနိုင်ငံအနှံ့တွင် အများအားဖြင့် ပုံမှန်ထက် အအေးပေါ့နေနိုင်ပါမယ်။

၂၀၂၅ ခုနှစ် ဇန်နဝါရီမှ ဧပြီလအထိ နှစ်ဆန်းကာလ ၄ လ တာအတွင်းမှာတော့ ၂၀၂၄ နှစ်ဆန်းပိုင်းကာလတုန်းကလို အပူချိန်ပြင်းထန်ခြင်းများမရှိနိုင်တော့ပဲ နှစ်စဉ်ဖြစ်မြဲပုံမှန်အပူချိန်ခန့်သာ ရှိနိုင်မှာဖြစ်ကြောင်း၊ ပြင်းထန်သောအပူချိန်ဖြစ်နိုင်ချေမရှိတာကြောင့် ၂၀၂၅ ခုနှစ် နှစ်ဆန်းပိုင်း ၄ လ တာကာလအတွင်းမှာ ရာသီဥတုအခြေအနေများသည် အပူလွန်ကဲခြင်း/အအေးလွန်ကဲခြင်းစသည့် ထူးခြားသော အခြေအနေများဖြစ်နိုင်ရန်မရှိ၊ ပုံမှန်အတိုင်းသာရှိနေနိုင်ပါကြောင်း ခန့်မှန်းရပါတယ်။

၂၀၂၄ ခုနှစ်၊ နှစ်ဆန်းပိုင်းမှာ ပူပြင်းခြောက်သွေ့သည့်"အယ်လ်နီညို-အစွန်းရောက်ရာသီဥတုဖြစ်စဉ်" ဖြစ်ပေါ်ခဲ့တာကြောင့် ၂၀၂၄ ခုနှစ်အတွင်း အပူချိန်များစံချိန်တင်မြင့်တက်ခြင်း၊ ရေကြီးရေလျှံမှုများ ဆိုးရွားစွာဖြစ်ပေါ်ခဲ့ခြင်းတို့ ကြုံတွေ့ခံစားခဲ့ကြရပါတယ်။

၂၀၂၄ ခုနှစ်နှစ်ကုန်ပိုင်းနဲ့ ၂၀၂၅ ခုနှစ်၊ နှစ်ဆန်းပိုင်းကာလအတွင်းမှာ "အေးမြစိုစွတ်သည့် လာနီညာ-အစွန်းရောက်ရာသီဥတုဖြစ်စဉ်" ဖြစ်နိုင်ချေ ၅၇% အထိသာရှိနေပြီး အယ်လ်နီညိုမဟုတ်-လာနီညာမဟုတ်သော ပုံမှန်(NEUTRAL)ရာသီဥတုအခြေအနေသာ ဖြစ်နိုင်ကြောင်း နိုင်ငံတကာ ရာသီဥတုကြိုတင်ခန့်မှန်းလေ့လာရေးဌာနကြီးများမှ ထုတ်ပြန်ထားတာတွေလဲ ရှိနေတာကြောင့် ၂၀၂၅ ခုနှစ်အတွင်းမှာတော့ "ဆိုးရွားတဲ့သဘာဝဘေးဖြစ်ပေါ်နိုင်ချေများ" လျော့နည်းနိုင်ကြောင်း ကြိုတင်ခန့်မှန်းသုံးသပ်၍ တင်ပြလိုက်ရပါကြောင်း။

မိုးကုန်ပြီဆိုရင် မြေဆီလွှာစိုထိုင်းဆခမ်းခြောက်မှုအခြေအနေနှင့် မိုးခေါင်နိုင်မှုအတိုင်းအတာတွေက စိုက်ပျိုးရေးတောင်သူများအားလုံးအတွက် စောင့်ကြည့်လေ့လာရမှာဖြစ်လာပါပြီ - အဲ့ဒီအတွက် MMWeather Knowledge site မှာလေ့လာရန်တင်ပေးထားတာ ၁ နှစ် ပြည့်ပါပြီ -
=====
မိုးခေါင်နိုင်ခြင်း ပြင်းထန်မှုအတိုင်းအတာအခြေအနေ၊
စိုက်ပျိုးမြေတွင် နှစ်စဉ်ပျမ်းမျှမြေဆီလွှာစိုထိုင်းဆတည်ရှိမှုအခြေအနေ (Drought Intensity, Moisture Anomaly and Soil Moisture)နှင့်
နောက်ဆုံးရ မြေဆီလွှာစိုထိုင်းဆခန့်မှန်းချက်(Soil Moisture)တို့ကို စောင့်ကြည့်လေ့လာပြီး ကြိုတင်ပြင်ဆင်နိုင်ရန် စီမံဆောင်ရွက်ခြင်းသည် -
စိုက်ပျိုးရေးလုပ်ငန်းဖြင့်အသက်မွေးနေသည့်တောင်သူများအတွက်၊ ရေအရင်းအမြစ်ပြဿနာကို ဖြေရှင်းပေးနိုင်မည့် ဌာနဆိုင်ရာအဖွဲ့အစည်းများ၊ ပုဂ္ဂလိကအဖွဲ့အစည်း-ကုမ္ပဏီများအတွက် အလွန်အရေးကြီးသည့် သတင်းအချက်အလက်စောင့်ကြည့်လေ့လာခြင်းအစီအစဉ်ဖြစ်ပါသည်။

အထက်ဖေါ်ပြပါ အခြေအနေများကိုလေ့လာနိုင်ရန်အတွက် Windy App. မှ Drought Intensity(မိုးခေါင်ခြင်းနှင့် မြေဆီလွှာစိုထိုင်းဆ)စောင့်ကြည့်သည့်မြေပုံကို MMWeather website စာမျက်နှာတွင် ထည့်သွင်းဖေါ်ပြပေးထားပြီး မိမိစိုက်ပျိုးမြေဧရိယာအား ကိုယ်တိုင်လေ့လာကြည့်ရှုနိုင်ရန် စီစဉ်ပေးထားပါသည်။

မြေပုံကြည့်ရှုနည်း

မိမိ လုပ်ကိုင်နေသည့် စိုက်ပျိုးမြေလယ်ယာတည်ရှိရာ နေရာသို့ Flag(အလံကို လက်ဖြင့်ဖိဆွဲပြီးရွှေ့ပြောင်းပေးပါ -
(Desktop/Laptop ကွန်ပျူတာဖြင့်ကြည့်လျှင် မိမိပြောင်းရွှေ့လိုသည့်နေရာကို mouse click လုပ်၍ အလံကို ရွှေ့ပြောင်းနိုင်ပါသည်)

မြေအောက်အနက် သုည စင်တီမီတာမှ ၄၀ စင်တီမီတာ(သုည လက်မ မှ ၁၅.၇၄၈ လက်မ အနက်အထိ)

မြေအောက်အနက် သုည စင်တီမီတာ မှ ၁၀၀ စင်တီမီတာ(သုညလက်မ မှ ၃၉.၃၇ လက်မအထိ) မိမိရယူလိုသည့်မြေအောက်အနက်ကို ရွေးပါ။

Drought Intensity(မိုးခေါင်နိုင်သည့်အခြေအနေ)၊ (Moisture anomaly)နှစ်စဉ်ပျမ်းမျှမြေဆီလွှာစိုထိုင်းဆမှတ်တမ်း၊ (Soil Moisture)နောက်ဆုံးရ မြေဆီလွှာစိုထိုင်းဆ ခန့်မှန်း တို့မှ မိမိစစ်ဆေးကြည့်ရှုလိုသည့် အချက်အလက်ကိုရွေးချယ်ပါ။

Windy App မြေပုံတွင် ၉ ရက်အတွက် ခန့်မှန်းချက်ပြောင်းလဲကြည့်နိုင်မည်ဖြစ်၍ လတ်တလောအခြေအနေနှင့် နောက်လာမည့် ၉ ရက်တွင် ဖြစ်လာနိုင်မည့် မြေဆီလွှာအခြေအနေများကို သိရှိနိုင်ရန် ရက်စွဲများပြောင်းလဲ ကြည့်ရှုပါ။

မြေပုံတွင် ပြသသည့်ဧရိယာ ချုံ့/ချဲ့ကြည့်ရန်အတွက် ပုံ ညာဘက်အပေါ်ဒေါင့်ရှိ ➕ နှင့် ➖ လက္ခဏာများပေါ်တွင်နှိပ်၍ပြောင်းပါ။

မြေပုံပြောင်းလဲမှုများပြုလုပ်ပြီးနောက် မူလအနေအထားပြန်လည်ရောက်ရှိရန် refresh လုပ်၍ဖြစ်စေ၊ ဘယ်ဘက် Menu မှ ပြလည်ဝင်ရောက်၍ဖြစ်စေ မူလပုံသို့ ပြန်လည်ရောက်ရှိနိုင်ပါမည်။

ဤ link မှ တဆင့် ဆက်လက်လေ့လာပါ။
https://www.mmweather.org/drought-monitoring

နောက် ၄ ရက်အတွင်း ရန်ကုန်တိုင်းနှင့် တနင်္သာရီတိုင်းမှအပ ကျန်ပြည်နယ်တိုင်းများတွင် ည အပူချိန်များ သိသိသာသာကျဆင်းပြီး အအေးပိုလာနိုင်ပါမယ်။
https://www.mmweather.org/divisional-cities-weather
ကချင်ပြည်နယ်၊ ချင်းပြည်နယ်၊ ရှမ်းပြည်နယ်တို့တွင် ညအပူချိန်များ ၁၅ ºC အောက်နှင့် ၁၀ ºC အောက်အထိ ကျဆင်းနိုင်ကြောင်းတွေ့ရပါတယ်။

နေ့စဉ် ရရှိနေတဲ့ သစ်တောပြုန်းတီးမှု Alert message တွေက ကျနော်တို့နိုင်ငံရဲ့ ရာသီဥတုပြောင်းလဲမှုတွေကို ပိုမိုပြင်းထန်စေပြီး သဘာဝဘေးဖြစ်နိုင်ချေတွေ ပိုများလာစေနိုင်ပါတယ်။
အခုတင်ပေးလိုက်တဲ့ ပုံက ဒီနေ့ ရရှိတဲ့ သစ်တောပြုန်းတီးမှု သတိပေး EMail တွေထဲက ဧရာဝတီတိုင်းတခုထဲ အတွက်ပါ။ ဒီလို EMail တွေကို Global Forest Watch မှ ပြည်နယ်တိုင်းအားလုံးအတွက် Alert ရှိရင် ရှိသလို နေ့စဉ် လက်ခံရရှိနေတာပါ။
စိုက်တဲ့သူတွေက စိုက်၊ ရှင်းတဲ့သူတွေကရှင်းဆိုတော့ကာ ...
သစ်တောပြုန်းတီးမှုဖြစ်စဉ်က နာလံမထူနိုင်၊ သက်ဆိုးရှည်နေပြီး အပူပိုင်းသစ်တောဧရိယာ(Humid Primary Forest ဧရိယာ)က နှစ်စဉ် လျော့ကျနေတယ် - အနှုတ်ပြနေတယ်လို့လဲ တွေ့ရပါလိမ့်မယ်။ (view graph)
နှစ်စဉ်ဖြစ်ပေါ်နိုင်မဲ့ သဘာဝဘေးတွေလျှော့ချဘို့ဆိုတာ အားလုံးက ဝိုင်းဝန်းပညာပေး/ထိန်းသိမ်းဆောင်ရွက်ကြမှ ရမှာပါ။
ကျနော်ကတော့ သိထား/လေ့လာထားတာတွေ မျှဝေပေးရုံပါဘဲ။

နိုဝင်ဘာ ၃၀ ရက် ပင်လယ်ပြင်အခြေအနေ

ဆိုင်ကလုန်းမုန်တိုင်း FENGAL အိန္ဒိယကမ်းခြေသို့ ချဉ်းကပ်ချိန်နှင့် ကုန်းတွင်းဝင်ရောက်ချိန်အတွင်း၊ ချင်းပြည်နယ်တွင် နောက် ၄ ရက်ဖြစ်နိုင်မည့် မိုးလေဝသအခြေအနေ -
https://www.mmweather.org/divisional-cities-weather/chin-state

ဆိုင်ကလုန်းမုန်တိုင်း FENGAL -

PUDUCHERRY မြို့အနီး အိန္ဒိယအရှေ့တောင်ဘက်၊ တမီလ်နာဒူးပြည်နယ်ကမ်းခြေသို့ ချဉ်းကပ်စဉ် နောက်လာမည့် ၇၂ နာရီအတွင်း - မြန်မာနိုင်ငံဘက်၌ ချင်းပြည်နယ်တွင်သာ မိုးအနည်းငယ်ရွာနိုင်မည့်အခြေအနေများဖြစ်ပေါ်နိုင်သည်။

နိုဝင်ဘာ ၃၀ ရက် နံနက် ၈ နာရီ
(CON Model forecast for 3 Days Rain Accumulation)

နိုဝင်ဘာလ ၃၀ ရက်မှ ဒီဇင်ဘာလ ၅ ရက် အထိ နောက်မည့် ၆ ရက်အတွင်း မိုးရွာနိုင်မည့်အခြေအနေပြမြေပုံ။
၆ ရက်အတွင်း မိုးအနည်းငယ်သာရွာနိုင်မည့်ဒေသများ ပါဝင်နိုင်ပါမည်။

အိန္ဒိယမိုးလေဝသဌာန(IMD)က 1200UTC(မြန်မာစံတော်ချိန် ၆ နာရီခွဲမှာ ဆိုင်ကလုန်းမုန်တိုင်း FENGAL ဖြစ်ကြောင်း ထုတ်ပြန်ကြေညာပါတယ်။ ထုတ်ပြန်ချက် copy တွေကို မြန်မာနိုင်ငံ နေပြည်တော် မိုးဇလအပါအဝင် နိုင်ငံပေါင်း ၁၄ နိုင်ငံကို ပို့ပေးပါတယ်။

မိုး/ဇလက ည ၇ နာရီ ၁၁ မိနစ်မှာ မုန်တိုင်းငယ်က အားပိုကောင်းလာပြီး ဆိုင်ကလုန်းမုန်တိုင်း FENGAL ဖြစ်ကြောင်းကြေညာချက် ဆိုရှယ်မီဒီယာမှာ တင်ပေးထားပါတယ်။

ဆိုရှယ်မီဒီယာကို အဆင့်ဆင့်ကျော်ခွပြီးမှ ကြည့်ရတဲ့ ကျနော်တို့ လေ့လာသူများထံကိုတော့ ည ၈ နာရီ ခွဲမှာရောက်ပြီး ဆိုင်ကလုန်းမုန်တိုင်း FENDAL ဖြစ်လာကြောင်း အတည်ပြုသိရှိနိုင်ပါတယ်။

အိန္ဒိယမိုးလေဝသဌာနက ထုတ်ပြန်ကြေညာချိန်မှ ၂ နာရီ နောက်ကျပြီး ဆိုင်ကလုန်းမုန်တိုင်းဖြစ်လာကြောင်း အတည်ပြုမှတ်သားနိုင်ခဲ့ပါတယ်။

မုန်တိုင်းတလုံးဖြစ်လာတဲ့အခါ အတည်ပြုချက်နဲ့ မှတ်တမ်း ဘယ်လိုရနိုင်သလဲဆိုတာကို လေ့လာမှတ်တမ်းတင်ထားတာဖြစ်ပါတယ်။

မုန်တိုင်းကိုယ့်ဘက်မလာရင်၊ မုန်တိုင်းကမ်းခြေကျော်ဖြတ်မဲ့အချိန် နောက် ၃ ရက် ၄ ရက်လောက်လိုနေသေးရင်တော့ ကိစ္စမရှိပါဘူး၊ ကြိုတင်ပြင်ဆင်ချိန်တွေ ကောင်းကောင်းရကြပါတယ်။ ကမ်းကို ဖြတ်ကျော်ကာနီးမှ ဆိုရင်တော့ ပြင်ဆင်ချိန်၊ ကယ်ဆယ်ရွှေ့ပြောင်းချိန် မလုံလောက်တော့ပါ။

ဘင်္ဂလားပင်လယ်အော်အနောက်တောင်ပိုင်းမှ အားကောင်းသော မုန်တိုင်းငယ်(DEEP DEPRESSION) update
နိုဝင်ဘာ ၂၉ ရက် ညနေ ၄ နာရီ ၃၀ မိနစ်
====

🔸 အိန္ဒိယမိုးလေဝသဋ္ဌာန မှ ၁၅၃၀ နာရီ ထုတ်ပြန်ချက်အရ -
ထုတ်ပြန်ချိန် ညနေ ၃ နာရီခွဲမှ နောက် ၃ နာရီအတွင်း ပိုမိုအားကောင်းလာပြီး အနောက်မြောက်ဘက်(အိန္ဒိယကမ်းခြေဘက်)သို့ ရွေ့လျားရင်း ဆိုင်ကလုန်းမုန်တိုင်းဖြစ်လာမည်။

🔸 နိုဝင်ဘာ ၃၀ ရက် နံနက်ပိုင်းတွင် အားအကောင်းဆုံးအခြေအနေဖြစ်လာပြီး အမြင့်ဆုံးလေတိုက်နှုန်း (70-80 to 90 km/h - တနာရီ ၅၆ မိုင်နှုန်း)အထိ ဖြစ်လာနိုင်မည်။

🔸 နိုဝင်ဘာ ၃၀ ရက် ညနေပိုင်းမှ စ တင်၍ တမီလ်နာဒူးပြည်နယ်ကမ်းခြေအား ပူဒူချယ်ရီ(PUDUCHERRY)မြို့အနီးမှ ဖြတ်ကျော်ဝင်ရောက်မည်။

🔸 ညနေ ၄ နာရီ ၁၅ မိနစ်တွင် D-MINT မှ ရရှိသည့် အချက်အလက်အရ လေတိုက်နှုန်းအမြင့်ဆုံး 34 knots to 39 knots(တနာရီ ၃၉ မိုင်မှ တနာရီ ၄၅ မိုင်ခန့်အထိ ရှိလာပြီဖြစ်ကြောင်းတွေ့ရသည်။

🔸 ညနေ ၄ နာရီ ၂၀ မိနစ်တွင် D-PRINT အချက်အလက်များအရ အမြင့်ဆုံးလေတိုက်နှုန်း 41 knots(တနာရီ ၄၇.၁၈ မိုင်နှုန်း)ရှိလာပြီဖြစ်ကြောင်းတွေ့ရသည်။

🔸 အမြင့်ဆုံးလေတိုက်နှုန်း 34 knots ဖြင့် ၁၀ မိနစ်ကြာအောင် ဆက်တိုက် တိုက်ခတ်ခြင်းရှိလျှင် ဆိုင်ကလုန်းမုန်တိုင်းအဖြစ် သတ်မှတ်သည်။

🔸 မြန်မာနိုင်ငံဘက်သို့ ဦးတည်ရွေ့လျားခြင်းမရှိသည့်အတွက် မြန်မာနိုင်ငံဒေသများတွင် မိုးရွာသွန်းနိုင်ချေအနည်းငယ်ရှိနိုင်သည်မှအပ သဘာဝဘေးများဖြစ်စေနိုင်သောကြီးမားသည့် မုန်တိုင်းအရှိန်သက်ရောက်မှု မရှိပါ။

အားကောင်းတဲ့ မုန်တိုင်းငယ် - Deep Depression) ထိုင်းမိုးလေဝသ chart မှာ TD(Tropical Depression) က မြောက်လတ္တီတွဒ် ၉ ဒီဂရီအထိ ရောက်လာပြီ။
Deep IR Intensity(D-PRINT) record မှာလဲ အခုည ၇ နာရီ ၃၅ မိနစ်မှာ ဆိုင်ကလုန်းလေတိုက်နှုန်းကို ပြည့်မှီတဲ့ လေတိုက်နှုန်း 36 knots ကိုရောက်လာတာတွေ့ရပြီ။
ဆိုင်ကလုန်းမုန်တိုင်းဖြစ်ကြောင်းကြေညာဘို့ အတော်နီးလာပါပြီ။
(နိုဝင်ဘာ ၂၇ ရက်၊ ည ၇ နာရီ ၄၀ မိနစ်)

နိုဝင်ဘာလ ၂၇ ရက် နေ့လည် ၂ နာရီ ခွဲမှာ ထွက်လာတဲ့ အိန္ဒိယမိုးလေဝသဌာန(IMD)ရဲ့ ထုတ်ပြန်ချက်အရ နောက်လာမဲ့ ၁၂ နာရီအတွင်း ဆိုင်ကလုန်းမုန်တိုင်းဖြစ်လာပါမယ်။

မုန်တိုင်းလမ်းကြောင်းက အရင်နေ့တွေက ကြိုတင်ခန့်မှန်းထားချက်များအတိုင်း အိန္ဒိယအရှေ့တောင်ဘက် တမီလ်နာဒူးပြည်နယ်ကမ်းခြေကိုဘဲ ဦးတည်ရွေ့လျားမှာဖြစ်ကြောင်းတွေ့ရပါတယ်။

ဒီနေ့ည ပိုင်းနဲ့ မနက်ဖန်မနက်အစောပိုင်းမှာ ဆိုင်ကလုန်းမုန်တိုင်းဖြစ်လာပြီးတဲ့နောက် မုန်တိုင်းအရွယ်အစားနဲ့ အမြင့်ဆုံးလေတိုက်နှုန်းတွေကို လေ့လာပြီးတဲ့အခါ မြန်မာနိုင်ငံဘက်ကို သက်ရောက်နိုင်မဲ့ အခြေအနေကိုအသေးစိတ်ထပ်မံလေ့လာပြီးတော့ တင်ပြပေးသွားပါမယ်။

လက်ရှိအချိန်အထိမှာတော့ မူလခန့်မှန်းချက်အတိုင်း ချင်းပြည်နယ်နယ်မှာ မိုးများနိုင်ပြီး စစ်ကိုင်းတိုင်း၊ မန္တလေးတိုင်းနဲ့ ရှမ်းပြည်နယ်မြောက်ပိုင်းတွေမှာ မိုးအသင့်အတင့်ရွာနိုင်မဲ့အခြေအနေကိုဘဲ တွေ့နေပါသေးတယ်။

Site မှာ တင်ပေးထားပြီး Weather Widget တွေကတဆင့် မိမိဒေသမှာ ဖြစ်နိုင်တဲ့ မိုးရွာသွန်းနိုင်မဲ့အခြေအနေကို လေ့လာကြစေချင်ပါတယ်။
https://www.mmweather.org/divisional-cities-weather

(နိုဝင်ဘာ ၂၇ ရက် ည ၆ နာရီ ၂၀ မိနစ်)

ဘင်္ဂလားပင်လယ်အော်အနောက်တောင်ပိုင်း သီရိလင်္ကာကျွန်း အရှေ့ဘက်ကပ်လျှက်ပင်လယ်ပြင်မှာ ဆက်လက်တည်ရှိနေတဲ့ မုန်တိုင်းငယ်(INVEST 99B) က မြောက်-အနောက်မြောက်ဘက်ကို ဆက်လက်ရွေ့လျားနေပြီး D-MINT, D-PRINT data တွေအရ လေတိုက်နှုန်းက ဆိုင်ကလုန်းမုန်တိုင်းအဆင့်ရောက်လုနီးပါး အခြေအနေဖြစ်နေတာတွေ့ရပါတယ်။ ဆိုင်ကလုန်းမုန်တိုင်း လေတိုက်နှုန်း သတ်မှတ်ချက်(IMD)က 34 knots(တနာရီ ၃၉.၁၂ မိုင်) ဖြစ်ပါတယ်။
မ‌နေ့က အိန္ဒိယမိုးလေဝသဋ္ဌာန(IMD)ထုတ်ပြန်ချက်အရတော့ ဒီနေ့ နိုဝင်ဘာ ၂၇ ရက် ည ပိုင်းမှာ ဆိုင်ကလုန်းမုန်တိုင်းဖြစ်လာမယ်လို့ တွေ့ရပြီး JTWC ရဲ့ မနေ့က ထုတ်ပြန်ချက်မှာလဲ ၂၄ နာရီအတွင်း ဆိုင်ကလုန်းမုန်တိုင်းဖြစ်လာနိုင်ကြောင်း ထုတ်ပြန်ချက်များရှိထားပါတယ်။
မြန်မာနိုင်ငံဘက်မှာ မိုးရွာနိုင်မဲ့ အခြေအနေက အရင် တင်ပေးထားတဲ့အတိုင်း ပြောင်းလဲမှု မရှိပါ။ https://www.mmweather.org/divisional-cities-weather
နိုဝင်ဘာ ၂၇ ရက် - ၁၁ နာရီ ၃၀ မိနစ်

🔸💦 ချင်းပြည်နယ်(ဟားခါး)မှာတော့ ၂၈ - ၂၉ ရက်နေ့တွေမှာ မိုးများပါလိမ့်မယ်။
💦 ဒီဇင်ဘာ ၁ ရက်နေ့အထိ ချင်းပြည်နယ်မှာ မိုးဆက်ရွာနိုင်ပါတယ်။

အိန္ဒိယမိုးလေဝသဋ္ဌာန(IMD)ထုတ်ပြန်ချက်အရ -

🔸 နိုဝင်ဘာ ၂၇ ရက် ညပိုင်းတွင် ဆိုင်ကလုန်းမုန်တိုင်းဖြစ်လာမည်။
🔸 အမြင့်ဆုံးလေတိုက်နှုန်း 35 knots(တနာရီ မိုင် ၄၀ မှ မိုင် ၅၀ အထိ)ရှိနိုင်မည်။(ပုံ-၁ မုန်တိုင်းအင်အားဇယားတွင်ကြည့်ပါ)
🔸 မြောက်-အနောက်မြောက်ဘက်(အိန္ဒိယအရှေ့တောင်ဘက် တမီလ်နာဒူးပြည်နယ်ကမ်းခြေဘက်)သို့ ဦးတည်ရွေ့လျားနိုင်မည်။(ပုံ-၃ လမ်းကြောင်းပုံ)
🔸 မြန်မာနိုင်ငံဘက်သို့ ဦးတည်ရွေ့လျားရန် မရှိ။(ပုံ-၃ လမ်းကြောင်းပုံ))
🔸 မြန်မာ့ပင်လယ်ပြင် ကမ်းနီးရေလုပ်ငန်းလုပ်ကွက်များအထိ မုန်တိုင်းအရှိန်သက်ရောက်မှု နည်းပါးမည်။(ပုံ-၄ ပင်လယ်ပြင်အခြေအနေပြပုံ)

မြန်မာနိုင်ငံ တိုင်းနှင့်ပြည်နယ်မြို့များ၏ နောက် ၄ ရက်စာ မိုးလေဝသအခြေအနေကြည့်ရန်(ကြည့်နည်းနမူနာပုံ နောက်ဆုံးတွင်တွဲတင်ပေးထားသည်) - https://www.mmweather.org/divisional-cities-weather

နိုဝင်ဘာ ၂၆ ရက် ည ၈ နာရီ

ECMWF Chart(Including Cyclone Genesis) Update အရ နိုဝင်ဘာ ၂၈-၂၉-၃၀ ရက်တွေမှာ လက်ရှိအားကောင်းသော လေဖိအားနည်းရပ်ဝန်း(မုန်တိုင်းငယ်)သည် ဆိုင်ကလုန်းမုန်တိုင်းဖြစ်လာနိုင်ချေ ရာနှုန်းပြည့်ရှိနေကြောင်း တွေ့ရပါတယ်။

အိန္ဒိယမိုးလေဝသဋ္ဌာန(IMD)ကလည်း ဘင်္ဂလားပင်လယ်အော် အနောက်တောင်ပိုင်းမှာ ဖြစ်ပေါ်နေတဲ့ အားကောင်းသောလေဖိအားနည်းရပ်ဝန်း(Deep Depression) သည် နောက် ၂၄ နာရီအတွင်း ဆိုင်ကလုန်းမုန်တိုင်းဖြစ်လာပြီး တမီလ်နာဒူးပြည်နယ်ကမ်းခြေကိုဝင်ရောက်တိုက်ခတ်နိုင်တာကြောင့် ကြိုတင်ပြင်ဆင်ထားကြဘို့ သတင်းထုတ်ပြန်တာတွေတွေရပါတယ်။
TEXT QUOTE ....
The IMD warns that a deep depression over the Southwest Bay of Bengal is likely to strengthen into a cyclonic storm within 24 hours, potentially impacting Tamil Nadu's coast. Authorities urge readiness and caution as the system develops.
END QUOTE
Article link:
https://www.indiatoday.in/india/south/story/coastal-tamil-nadu-andhra-pradesh-high-alert-rough-seas-southwest-bay-of-bengal-cyclonic-formation-2640299-2024-11-26

🔸 မုန်တိုင်းငယ်(လက်ရှိအချိန် ပြည်ပြည်ဆိုင်ရာမှ စောင့်ကြည့်ရမဲ့ System Invest-99B)အားပိုကောင်းလာပြီး ဆိုင်ကလုန်းမုန်တိုင်းဖြစ်လာပေမဲ့ မြန်မာနိုင်ငံဘက်မှ ဝေးရာကိုဦးတည်ရွေ့လျားမှာဖြစ်ပြီး မြောက်ဘက်မှ လေအေးများဝင်ရောက်နေတာကြောင့် မြန်မာနိုင်ငံအပေါ်မုန်တိုင်းအရှိန်သက်ရောက်နိုင်မှုကတော့ အရင် ကြိုတင်ခန့်မှန်းချက်များအတိုင်း နည်းပါးမှာဖြစ်ပါတယ်။

💦 ချင်းပြည်နယ်၊ စစ်ကိုင်းတိုင်း၊ မန္တလေးတိုင်းနဲ့ ရှမ်းပြည်နယ်မြောက်ပိုင်းဒေသအချို့မှာသာ မိုးအသင့်အတင့်မှ မိုးများနိုင်မှာဖြစ်ကြောင်း၊ ကျန်ပြည်နယ်တိုင်းဒေသတွေမှာတော့ မိုးအနည်းငယ်သာရွာသွန်းနိုင်မှာဖြစ်ကြောင်း ကြိုတင်ခန့်မှန်းချက်များမှာ တွေ့နေရဆဲပါဘဲ။
https://www.mmweather.org/divisional-cities-weather

(နိုဝင်ဘာလ ၂၆ ရက် ညနေ ၅ နာရီ)

"ဘင်္ဂလားပင်လယ်အော်တောင်ပိုင်းမှာဖြစ်လာရန်ရှိသော လေဖိအားနည်းရပ်ဝန်းက အမည်ရ ဆိုင်ကလုန်းမုန်တိုင်းဖြစ်လာနိုင်ကြောင်းတွေ့ရ"
နိုဝင်ဘာ ၂၁ ရက် ညနေ ၅ နာရီ
=====

မြန်မာနိုင်ငံဘက်ကို ဦးတည်ရွေ့လျားမှာမဟုတ်သလို သက်ရောက်မှုလဲ များနိုင်မှာမဟုတ်တဲ့ ဘင်္ဂလားပင်လယ်အော်တောင်ပိုင်းက လေဖိအားနည်းရပ်ဝန်း(လက်ရှိအချိန်မှာ အထက်လေထုလွှာအတွင်းဖြစ်နေတဲ့ လေပွေလှိုင်း - UACC)က ဆိုင်ကလုန်းမုန်တိုင်းအဆင့်ရောက်နိုင်ချေ ၁၀၀% အထိရှိကြောင်း ECMWF cyclone genesis chart မှာ တွေ့လာရပါတယ်။

အိန္ဒိယမိုးလေဝသဌာန(IMD)ရဲ့ နိုဝင်ဘာ ၂၁ ရက် ထုတ်ပြန်ချက်မှာ လေဖိအားနည်းရပ်ဝန်းသည် နိုဝင်ဘာ ၂၅ ရက်နေ့မှာ ဖြစ်လာနိုင်ပြီး နောက်လာမည့် ၉၆ နာရီမှ ၁၄၄ နာရီ (၄ ရက် မှ ၅ ရက်အတွင်း) ဆိုင်ကလုန်းမုန်တိုင်းဖြစ်နိုင်ချေ HIGH လို့ မှတ်ချက်ပြုထားတာတွေ့ရပါတယ်။

ECMWF Chart မှာ နိုဝင်ဘာ ၂၅ ရက် နဲ့ နိုဝင်ဘာ ၂၆ ရက်နေ့များတွင် ဆိုင်ကလုန်းမုန်တိုင်းဖြစ်နိုင်ချေ ၁၀၀% ရှိကြောင်းပြထားတာနဲ့ သင်္ချာပုံစံပြု မော်ဒယ်များရဲ့ ခန့်မှန်းချက်တွေ တပြေးညီ တူလာတဲ့အချက် ၂ ချက်ကြောင့် ဘင်္ဂလားပင်လယ်အော်တောင်ပိုင်းမှာ ၂၀၂၄ ခုနှစ်ရဲ့ နောက်ဆုံးသော အမည်ရဆိုင်ကလုန်းမုန်တိုင်းဖြစ်လာနိုင်မဲ့ အခြေအနေကများလာတာတွေ့ရပါတယ်။

ဒါကြောင့် နောက်လာမဲ့ရက်တွေမှာ ဘင်္ဂလားပင်လယ်အော်တောင်ပိုင်းက မုန်တိုင်း တကယ်ဖြစ်လာတဲ့အခြေအနေကို စောင့်ကြည့်ပြီး "အမည်ရ ဆိုင်ကလုန်းမုန်တိုင်း"ဖြစ်လာတဲ့အခါ ဘယ်နိုင်ငံရဲ့ အလှည့်ကျအမည်က ဘယ်လိုရလာနိုင်မယ်ဆိုတာ ဆက်လက်တင်ပြပေးသွားပါဦးမယ်။ အခု post တင်ချိန်မှာတော့ လေဖိအားနည်းရပ်ဝန်းတောင် ပီပီပြင်ပြင်မဖြစ်သေးပါ။

ပင်လယ်ပြင်အခြေအနေ ကြိုတင်ခန့်မှန်းချက်
နိုဝင်ဘာ ၂၁ ရက် ညနေ ၃ နာရီ UPDATE
====

ဘင်္ဂလားပင်လယ်အော်အနောက်တောင်ပိုင်းတွင်ဖြစ်ပေါ်လာနိုင်သည့် အားကောင်းသောလေဖိအားနည်းရပ်ဝန်း (မုန်တိုင်းငယ်) အိန္ဒိယအရှေ့တောင်ဘက်ကမ်းခြေအားချဉ်းကပ်စဉ် နိုဝင်ဘာ ၂၈ - ၂၉ ရက်နေ့များတွင် ပင်လယ်ပြင်၌ ဖြစ်ပေါ်နိုင်သည့် လှိုင်းကျဲ(Swell) နှင့် Significant Wave အမြင့်ဆုံးလှိုင်း အခြေအနေများ။

METEOBLUE APP - NOAA WW3 MODEL ENSEMBLE data

"ဘင်္ဂလားပင်လယ်အော်အနောက်တောင်ပိုင်းတွင် ဖြစ်ပေါ်နိုင်မည့်လေဖိအားနည်းရပ်ဝန်း(DEPRESSION)နှင့် မြန်မာနိုင်ငံအပေါ်သက်ရောက်နိုင်ချေများ ကြိုတင်ခန့်မှန်းခြင်း" ၂
နိုဝင်ဘာ ၂၁ ရက် နံနက် ၉ နာရီ
===

သင်္ချာပုံစံပြု မိုးလေဝသကြိုတင်ခန့်မှန်းရေး Multi models တွေမှာ တွေ့ရတဲ့ အချက်အလက်တွေအရ -

🔸 ဘင်္ဂလားပင်လယ်အော်တောင်ပိုင်း လတ္တီတွဒ် ၅ ဒီဂရီရဲ့ အောက်ဘက်၊ ကော့သောင်းမြို့ အနောက်တောင်ဘက် မိုင် ၅၄၀ ခန့်၊ ထိုင်းနိုင်ငံဖူးခက်မြို့ အနောက်တောင်ဘက် မိုင် ၄၂၀ ခန့်မှာ လေပွေလှိုင်းတခု အစပျိုးနေပြီး တဖြည်းဖြည်း အားကောင်းလာနိုင်ပါမယ်။

🔸 မြောက်-အနောက်မြောက်ဘက်ကို ဆက်လက်ရွေ့လျားရင်း အားပိုကောင်းလာပြီး နိုဝင်ဘာ ၂၈ ရက် နံနက်ပိုင်းမှာ အားကောင်းတဲ့လေဖိအားနည်းရပ်ဝန်း(Deep Depression)ဖြစ်လာနိုင်ပါမယ်။

🔸 နိုဝင်ဘာ ၂၈ ရက် ည ပိုင်း၊ ၂၉ ရက် မနက်အစောပိုင်းမှာ အိန္ဒိယနိုင်ငံအရှေ့တောင်ပိုင်း တမီလ်နာဒူးပြည်နယ် ချင်နိုင်းမြို့အနီးမှ ကုန်းတွင်းကိုဝင်ရောက်သွားနိုင်မှာဖြစ်ကြောင်း မော်ဒယ်များမှ တပြေးညီကြိုတင်ခန့်မှန်းချက်တွေ တွေ့ရပါတယ်။

🔸 မြန်မာနိုင်ငံဘက်ကိုဦးတည်ရွေ့လျားလာမှာမဟုတ်သော်လည်း နိုဝင်ဘာ ၂၈-၂၉-၃၀ ရက်များမှ ဒီဇင်ဘာလဆန်း ၁ ရက် ၂ ရက် နေ့များအထိ မြန်မာနိုင်ငံရဲ့ ပြည်နယ်တိုင်းဒေသအချို့မှာ မိုးအနည်းငယ်၊ မိုးအသင့်အတင့်နဲ့ နေရာကွက်ပြီး မိုးများနိုင်မဲ့အခြေအနေတွေဖြစ်ပေါ်နိုင်ပါတယ်။

အသေးစိတ်ကြိုတင်ခန့်မှန်းချက်တွေအရဆိုရင်တော့ -
🔸 ဧရာဝတီတိုင်းမြောက်ပိုင်းနဲ့ ဧရာဝတီတိုင်းအနောက်ဘက်ခြမ်းက ကမ်းရိုးတန်းဒေသများ၊ ပဲခူးတိုင်း၊ ရခိုင်ပြည်နယ်၊ ချင်းပြည်နယ်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ကချင်ပြည်နယ်တောင်ပိုင်း၊ ရှမ်းပြည်နယ်၊ ကယားပြည်နယ်နဲ့ နေပြည်တော်အပါအဝင် ပြည်နယ်တိုင်းဒေသအချို့မှာ မိုးအနည်းငယ်မှ မိုးအသင့်အတင့်ရွာနိုင်ပြီး -
🔸 ရခိုင်ပြည်နယ်မြောက်ပိုင်းနဲ့ ချင်းပြည်နယ်ဒေသအချို့မှာ နေရာကွက်၍ မိုးများနိုင်တာကို ကြိုတင်ခန့်မှန်းချက်များမှာ တွေ့နေရပါတယ်။

** ပြည်နယ်တိုင်း မြို့များအတွက် ၄ ရက်စာ မိုးလေဝသအခြေအနေ ကြိုတင်ခန့်မှန်းချက် weather widget များကို MMWeather Site မှာ တင်ပေးထားပါတယ်။ https://www.mmweather.org/divisional-cities-weather

"ဘင်္ဂလားပင်လယ်အော်အနောက်တောင်ပိုင်းတွင် ဖြစ်ပေါ်နိုင်မည့်လေဖိအားနည်းရပ်ဝန်း(DEPRESSION)နှင့် မြန်မာနိုင်ငံအပေါ်သက်ရောက်နိုင်ချေများ ကြိုတင်ခန့်မှန်းခြင်း"
နိုဝင်ဘာ ၂၀ ရက် ည ၉ နာရီ
=====

📃 အိန္ဒိယမိုးလေဝသဌာနထုတ်ပြန်ချက်အရ ကပ္ပလီပင်လယ်ပြင်တောင်ပိုင်း အထက်လေထုလွှာအတွင်း လေပွေလှိုင်း(Upper Aar Cyclonic Circulation - UACC)တခုဖြစ်ပေါ်နေပြီး၊ နိုဝင်ဘာ ၂၃ ရက်နေ့တွင် လေဖိအားနည်းရပ်ဝန်းအစပျိုးခြင်း(Low Pressure Area - LPA)ဖြစ်လာနိုင်ကြောင်း၊ နိုဝင်ဘာ ၂၃ ရက်မှ နောက် ၂ ရက်အတွင်း အနောက်-အနောက်မြောက်ဘက်သို့ ဆက်လက်ရွေ့လျားနိုင်ပြီး ပိုမိုအားကောင်းလာကာ လေဖိအားနည်းရပ်ဝန်း(Depression)ဖြစ်လာနိုင်ကြောင်း ထုတ်ပြန်ထားပါတယ်။

📃 သင်္ချာပုံစံပြုမော်ဒယ်များဖြစ်တဲ့ GFS, ECMWF နဲ့ ICON model များကလည်း နိုဝင်ဘာလ ၂၅ ရက် ည - ၂၆ ရက် နံနက်ပိုင်းမှ စတင်ပြီး သီရိလင်္ကာကျွန်း-အရှေ့ဘက်ကမ်းခြေမှ မိုင်၁၀၀ ကျော်ခန့်ဝေးကွာသော ဘင်္ဂလားပင်လယ်အော်အနောက်တောင်ပိုင်း ပင်လယ်ပြင်မှာ လေဖိအားနည်းရပ်ဝန်း(Depression)ဖြစ်လာနိုင်ကြောင်း ကြိုတင်ခန့်မှန်းချက်ကို တွေ့ရပါတယ်။

🔸 ECMWF model ရဲ့ လမ်းကြောင်းခန့်မှန်းချက်အရ နိဝင်ဘာလ ၂၉ ရက် ညပိုင်းမှာ လေဖိအားနည်းရပ်ဝန်းက အိန္ဒိယနိုင်ငံ အရှေ့တောင်ဘက်၊ တမီလ်နာဒူးပြည်နယ်၊ ချင်နိုင်းမြို့တောင်ဘက်အနီး ကမ်းခြေကို ဖြတ်ကျော်ဝင်ရောက်နိုင်ကြောင်း၊
🔸 GFS Model လမ်းကြောင်းခန့်မှန်းချက်က မြောက်ဘက်ကို ပိုမိုရွေ့လျားပြီး ဒီဇင်ဘာ ၁ ရက်နေ့မှာ အိန္ဒိယနိုင်ငံ အရှေ့တောင်ဘက်၊ တမီလ်နာဒူးပြည်နယ်၊ ချင်နိုင်းမြို့ မြောက်ဘက်အနီးကမ်းခြေကို ဖြတ်ကျော်ဝင်ရောက်နိုင်ကြောင်း၊
🔸 ECMWF - AI ကြိုတင်ခန့်မှန်းချက်မှာလဲ မြောက်ဘက်ကို ပိုမိုရွေ့လျားပြီး ဒီဇင်ဘာ ၁ ရက် ည၊ ဒီဇင်ဘာ ၂ ရက်နေ့ မနက်အစောပိုင်းမှာ အိန္ဒိယနိုင်ငံ အရှေ့တောင်ဘက်၊ တမီလ်နာဒူးပြည်နယ်၊ ချင်နိုင်းမြို့ မြောက်ဘက်အနီးကမ်းခြေကို ဖြတ်ကျော်ဝင်ရောက်နိုင်ကြောင်း အသီးသီးကြိုတင်ခန့်မှန်းထားတာတွေ့ရပါတယ်။

🔸 ECMWF-AI နဲ့ GFS model ခန့်မှန်းချက်များမှာ လေဖိအားနည်းရပ်ဝန်းမှ အားကောင်းသောလေဖိအားနည်းရပ်ဝန်း(မုန်တိုင်းငယ်)အဆင့်အထိ ပိုမိုအားကောင်းလာနိုင်ကြောင်း ခန့်မှန်းချက်ကိုလည်းတွေ့ရပါတယ်။

မြန်မာနိုင်ငံအပေါ်သက်ရောက်နိုင်မည့် အခြေအနေများကို ကြိုတင်ခန့်မှန်းချက်များမှာ လေ့လာကြည့်တဲ့အခါ -

🔸 နိုဝင်ဘာလ ၂၉ ရက်၊ ၃၀ ရက်နဲ့ ဒီဇင်ဘာလ ၁ ရက်နေ့တွေမှာ ..
GFS Model က ရခိုင်ကမ်းရိုးတန်းတလျှောက်၊ ချင်းပြည်နယ်၊ မကွေးတိုင်း၊ စစ်ကိုင်းတိုင်းတောင်ပိုင်း၊နေပြည်တော်၊ မန္တလေးတိုင်းနဲ့ ရှမ်းပြည်နယ်တောင်ပိုင်းနဲ့ ကယားပြည်နယ်တွေမှာ မိုးရွာနိုင်မဲ့ အခြေအနေက - နေရာကွက်ကျား မိုး အသင့်အတင့်မှ မိုးများနိုင်ကြောင်း ခန့်မှန်းချက်ထွက်တာတွေ့ရပါတယ်။

🔸 ECMWF - AI ခန့်မှန်းချက်မှာတော့ ရခိုင်ကမ်းရိုးတန်းတလျှောက် နဲ့ ချင်းပြည်နယ်တွေမှာ မိုးအသင့်တင့်မှ မိုးများနိုင်ပြီး မကွေးတိုင်း၊ မန္တလေးတိုင်း၊ နေပြည်တော်နဲ့ ရှမ်းပြည်နယ်တောင်ပိုင်း၊ ကယားပြည်နယ်တွေမှာ မိုးအသင့်အတင့်မှ အနည်းငယ်သာရွာနိုင်ကြောင်း ကြိုတင်ခန့်မှန်းချက်ကို တွေ့ရပါတယ်။

အခုလို မတူညီတဲ့ မော်ဒယ်များမှ ကြိုတင်ခန့်မှန်းချက်များအရ -
🔸 လက်ရှိအချိန်တွင် အစပျိုးလျှက်ရှိသည့် လေပွေလှိုင်းသည် မုန်တိုင်းငယ်အဆင့်ရောက်လာပြီး အိန္ဒိယနိုင်ငံတောင်ပိုင်း တမီလ်နာဒူးပြည်နယ်ကမ်းခြေကို နိုဝင်ဘာလ ၂၉ - ၃၀ ရက်နဲ့ ဒီဇင်ဘာလ လဆန်း ၁ ရက် ၂ ရက်အတွင်းမှာ ဖြတ်ကျော်ဝင်ရောက်နိုင်ကြောင်း၊
🔸 မုန်တိုင်းအရှိန်ကြောင့် မြန်မာနိုင်ငံအပေါ် "အခါလွန်မိုး"ရွာသွန်းခြင်း သက်ရောက်နိုင်ချေမှာ နည်းပါးကြောင်း၊
🔸 ဒေသအချို့မှာနေရာကွက်ပြီး မိုးများနိုင်ချေရှိသော်လည်း ရက်ဝေးခန့်မှန်းချက်များဖြစ်နေသေး၍ မိုးရွာနိုင်ချေကြိုတင်ခန့်မှန်းခြင်းသည် ရာနှုန်းပြည့် မသေချာနိုင်သေးကြောင်း ..... စသည်ဖြင့် သုံးသပ်တင်ပြလိုက်ရပါတယ်။

"ဘင်္ဂလားပင်လယ်အော်တောင်ပိုင်းမှာ လေဖိအားနည်းရပ်ဝန်း/မုန်တိုင်းဖြစ်လာနိုင်သော်လည်း မြန်မာနိုင်ငံအပေါ် သက်ရောက်မှုမရှိ"
နိုဝင်ဘာလ ၁၉ ရက် ည ၈ နာရီ ၁၅ မိနစ်
=====

ဘင်္ဂလားပင်လယ်အော်မှာ နိုဝင်ဘာလ လကုန် ရက်ပိုင်းများအတွင်း လေဖိအားနည်ရပ်ဝန်း-မုန်တိုင်းဖြစ်ပေါ်လာနိုင်ချေရှိပါတယ်။

အဲ့သလိုဖြစ်လာပြီးရင်တော့ အနောက်ဘက် အိန္ဒိယနိုင်ငံတောင်ပိုင်းနဲ့ သီရိလင်္ကာကျွန်းဘက်ကို ဆက်လက်ရွေ့လျားသွားမှာမို့ မြန်မာပြည်ဘက်ကို သက်ရောက်နိုင်ချေ မရှိပါ။

ကြိုတင်ခန့်မှန်းးသည့် model များအနက် NOAA - GFS model ကြိုတင်ခန့်မှန်းချက်က မုန်တိုင်းအဆင့်အထိရောက်နိုင်ကြောင်းခန့်မှန်းသော်လည်း ဥရောပ model တွေဖြစ်တဲ့ ICON နဲ့ ECMWF, ECMWF မော်ဒယ်များစုပေါင်းခန့်မှန်းချက်တွေမှာတော့ လေဖိအားနည်းရပ်ဝန်းအဆင့်သာဖြစ်နိုင်တာတွေ့ရပါတယ်။

လေဖိအားနည်းရပ်ဝန်း/မုန်တိုင်းဖြစ်လာလျှင် နောက်လာမဲ့ ၁၆၈ နာရီ(၇ ရက်အတွင်း)အနောက်ဘက်ကို ဆက်လက်ရွေ့လျားနိုင်မဲ့ လမ်းကြောင်းများ ကြိုတင်ခန့်မှန်းချက်ကို "ECMWF မော်ဒယ်များစုပေါင်းခန့်မှန်းချက်" မှာ တွေ့ရပါမယ်။

MMWeather Site ပေါ်က ပြည်နယ်တိုင်းမြို့များရဲ့ ၄ ရက်စာမိုးလေဝသအခြေအနေကို ကြည့်တဲ့အခါ ... မြန်မာနိုင်ငံဒေသအတော်များများမှာ ဒီဇင်ဘာ ၁ ရက်အထိ မိုးရွာနိုင်မဲ့ အခြေအနေ မတွေ့ရတော့ပါ။
https://www.mmweather.org/divisional-cities-weather

တချို့ဒေသတွေမှာတော့ ဒီနေ့မှ ဒီဇင်ဘာ ၁ ရက်နေ့အတွင်း .. ၂၄ နာရီအတွင်း မိုးရေချိန် ၁၀ မီလီမီတာ(၀.၄ လက်မ)ခန့်ရှိနိုင်မဲ့ မိုးဖွဲကျနိုင်ပါတယ်။ ပုံတွေမှာ တွေ့ရပါမယ်။

မုတ်သုံမျဉ်းက အီကွေတာမြောက်ဘက်မှ တောင်ဘက်ကို ဆက်လက်ဆင်းနေချိန်အတွင်း
တနင်္သာရီတိုင်းတောင်ပိုင်းအစွန်က ကော့သောင်းမြို့မှာတော့ ဒီဇင်ဘာလဆန်းပိုင်းအထိ နေ့စဉ် မိုးရေချိန် မီလီမီတာ ၂၀ ခန့်(၀.၇၈ လက်မခန့်)ရွာနိုင်မဲ့ မိုးအသင့်အတင့် ဆက်ရွာနေပါဦးမယ်။

၁၇ ရက် ည ၉ နာရီမှ ၂၄ နာရီအတွင်း မိုးအနည်းငယ် ရွာနိုင်ချေရှိသည့် ဒေသများ ECMWF Update

"စူပါတိုင်ဖွန်းမုန်တိုင်း MAN YI(ဖိလစ်ပိုင်အမည် PEPITO)ကြောင့် မြန်မာနိုင်ငံတောင်ပိုင်းဒေသအချို့တွင် မိုးအနည်းငယ် ရွာသွန်းနိုင်"
(နိုဝင်ဘာ ၁၆ ရက် ည ၁၀ နာရီ ၅၅ မိနစ်)
=====

🔸 ဖိလစ်ပိုင်နိုင်ငံကို ဦးတည်တိုက်ခတ်လာတဲ့ စူပါတိုင်ဖွန်းမုန်တိုင်း "MAN YI" - ဖိလစ်ပိုင်အမည် PEPITO က ဒီနေ့ ည ပိုင်းမှာ ဖိလစ်ပိုင်အရှေ့ဘက်ကမ်းခြေအနီးချဉ်းကပ်လာစဉ် အဆင့်-၅(CATEGORY-5)စူပါတိုင်ဖွန်းမုန်တိုင်းကြီးဖြစ်လာကြောင်း၊ တနာရီလေတိုက်နှုန်း မိုင် ၁၆၀ ခန့် ရှိနေကြောင်း သိရပါတယ်။

🔸 မုန်တိုင်းများရဲ့ လမ်းကြောင်းအရွယ်အစားနဲ့ အင်အားလေ့လာဆန်းစစ်တဲ့ CIMSS က လဲ လေတိုက်နှုန်း 140 knots(တနာရီ ၁၆၁ မိုင်နှုန်း)ရှိကြောင်းအတည်ပြုထားတာတွေ့ရပါတယ်။

🔸 စူပါတိုင်ဖွန်းမုန်တိုင်း MAN YI(PEPITO)သည် မနက်ဖန် နိုဝင်ဘာ ၁၇ ရက် မြန်မာစံတော်ချိန် နံနက် ၉ နာရီ ဝန်းကျင် ဖိလစ်ပိုင်နိုင်ငံ အရှေ့ဘက်ကမ်းခြေကို Maria Aurora မြို့အနီးမှ ဖြတ်ကျော်စဉ် အဆင့်-၃(CATEGORY-3)တိုင်ဖွန်းမုန်တိုင်းအဖြစ်အားလျော့သွားပြီး၊ ကုန်းတွင်းပိုင်းကို ARITAO နဲ့ BAGUIO မြို့များအနီးမှ ဖြတ်ကျော်ပြီးတဲ့နောက် ဖိလစ်ပိုင် အနောက်ဘက်ကမ်းခြေမြို့ SAN FERNANDO မြို့အနီးမှ တောင်တရုတ်ပင်လယ်ထဲကို နိုဝင်ဘာ ၁၇ ရက် ည ၈ နာရီခန့်မှာ စတင်ဝင်ရောက်မယ်၊ တောင်တရုတ်ပင်လယ်တွင်း စတင်ဝင်ရောက်ချိန်မှာ CATEGORY-1 တိုင်ဖွန်းမုန်တိုင်းအဆင့်အထိ အားလျော့သွားနိုင်မှာဖြစ်ကြောင်း အတည်ပြုခန့်မှန်းချက်များမှာတွေ့ရပါတယ်။

🔸 တောင်တရုတ်ပင်လယ်ထဲမှာ အနောက်ဘက်(ဗီယက်နမ်ကမ်းခြေဘက်)ကိုရွေလျားရင်း တဖြည်းဖြည်းအားလျော့လာပြီး ဗီယက်နမ်ကမ်းခြေကို ဖြတ်ကျော်ဝင်ရောက်ချိန်မှာတော့ အပူပိုင်းမုန်တိုင်းအဆင့်ဖြင့်သာ ဖြတ်ကျော်ဝင်ရောက်ကာ ဗီယက်နမ်ကမ်းခြေကို ဖြတ်ကျော်ဝင်ရောက်ပြီး ချက်ချင်း အားပျော့ပျက်ပြယ်သွားမှာဖြစ်ကြောင်း ကြိုတင်ခန့်မှန်းထားပါတယ်။

🔸 လက်ရှိအချိန်မှာ မုန်တိုင်းအရှိန်သက်ရောက်မှုက မြန်မာနိုင်ငံကို သက်ရောက်နိုင်ချေ အလွန်နည်းပါးမှာဖြစ်ပြီး၊ နိုဝင်ဘာ ၁၇ ရက် ည ပိုင်းနဲ့ ၁၈ ရက်နေ့များတွင် - ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်၊ ပဲခူးတိုင်းအရှေ့ခြမ်း+အနောက်ခြမ်း ဒေသအချို့မှာ မိုးအနည်းငယ်(၁၅ မီလီမီတာ - လက်မဝက်ကျော်ကျော်ခန့်) ရွာသွန်းနိုင်ကြောင်းတွေ့ရပါတယ်။

🔸 အထက်ဖေါ်ပြပါ ပြည်နယ်တိုင်းဒေသအချို့မှာ မိုးဖွဲရွာသွန်းနိုင်မဲ့ အခြေအနေက နိုဝင်ဘာ ၁၈ ရက်မှ ၁၉ ရက် အထိ မိုးဖွဲဖွဲ ပြတ်တောင်းရွာနိုင်ချေ ဆက်လက်ရှိနေမှာဖြစ်ကြောင်း တွေ့ရတဲ့အတွက် စပါးရိတ်/စပါးလှမ်းနေဆဲတောင်သူများ သတိထားနိုင်ကြပါရန် အသိပေးတင်ပြလိုက်ပါတယ်။

ကျနော်ကတော့ လက်ပတန်းမှာ ကြိုတင်သတ်မှတ်ထားတဲ့ရက်အတိုင်းစက်သွားထိုင်နိုင်အောင်ပြင်ဆင်နေတာ ပြီးပါပြီ။
ဒီတခေါက်တော့ စက်ထိုင်မဲ့နေရာ location LAT-LON တွေကို အိမ်ကနေတခါထဲထည့်ပြီးပြင်ဆင်သွားမှာ။ လက်ပတန်းရောက်တော့မှ တည်နေရာ အတိအကျ နည်းနည်းထပ်ညှိလိုက်ရင် ရပြီ။
လောလောဆယ်တော့ လက်ပတန်းနာမည်(TEST)နဲ့ လိုင်းပေါ်အရင်တင်ပြီး စမ်းနေပြီ။ စမ်းသပ်ချိန် ၆ နာရီလောက်ကြာပြီးရင်တော့ ပြန်ဖြုတ်ပြီး packing ပြန်လုပ်၊ ခရီးစဉ်အတွက် ပြင်ဆင်တာ ဆက်လုပ်ရမယ်။
လောလောဆယ် မိုးလေဝသအခြေအနေတွေက ကောင်းနေပါတယ်။ ဘင်္ဂလားပင်လယ်အော်ထဲမှာ လေဖိအားနည်းရပ်ဝန်းဖြစ်ရင်တောင် ကျနော်တို့ဘက် သက်ရောက်မှုမရှိနိုင်တော့ပါ၊ မိုးရွာရင်လဲ မိုးဖွဲဖွဲ(Shower)အဆင့်လောက်သာ ရွာမှာမို့ ရိတ်သိမ်းဆဲတောင်သူများအတွက်လဲ မစိုးရိမ်ရတော့ပါ။
Weather widget တွေလဲ တင်ပေးထားတာကြောင့် ကြည့်ကြပါဗျ - https://www.mmweather.org/divisional-cities-weather

လှည်းးကူးနဲ့ ကလောမှာ ဒီနေ့ မိုးဖွဲလေးတွေ ကျတယ် အတော်နည်းတဲ့ မိုးရေချိန်ပါ။

"တောက်တဲ့"တွေနဲ့ "ဖား"တွေအကြောင်း
နိုဝင်ဘာ ၁၅ ရက် နေ့လည် ၁ နာရီခွဲ
====
"တောက်တဲ့" တွေ "ဖား" တွေ များလေ ခန့်မှန်းတွက်ချက်ရတာတွေက ပိုကောင်းလေ ... ဆိုတဲ့ မိတ်ဆွေကြီးတယောက်ပြောစကားကို နည်းနည်း အကျယ်ချဲ့ပြီး ရေးချင်လို့ပါ။
"တောက်တဲ့" တွေ အော်တဲ့အခါ ရှေးလူကြီးတွေက မိုးလား/လေလား .. စသည်ဖြင့် လိုက်မှတ်ပြီး တောက်တဲ့အော်သံဆုံးရင် "လေလား" နဲ့ ထပ်တူကျတော့ လေတိုက်မှာ "မိုးလား"နဲ့ ထပ်တူကျရင် မိုးရွာမှာ စသည်ဖြင့် မိုးရွာတာလေတိုက်တာကို ခန့်မှန်းခဲ့ကြပါတယ်။
"ဖား" တွေကတော့ မိုးကျတာနဲ့ အသံပေါင်းစုံ ညံနေအောင် အော်ကြတာကြောင့် ဖားအော်သံတွေညံနေရင် မိုးရွာပြီ၊ မိုးကျနေပြီ၊ မိုးရွာဘို့ နီးပြီ၊ မိုးကျပြီးသွားပြီ စသည်ဖြင့် မှတ်ယူပါတယ်။
အဲ့ဒီတော့ ..
"တောက်တဲ့" ဆိုတာက ကြိုတင်ခန့်မှန်းတာ၊ "ဖား" ဆိုတာ real-time အခြေအနေအတွက်လို့ မှတ်ယူမယ်ဆိုရင် ...
WINDY, METEOBLUE, ACCUWEATHER, WORLD WEATHER ONLINE .. etc. etc weather APP တွေက "တောက်တဲ့" တွေဖြစ်ပြီး အချိန်နဲ့ တပြေးညီ အချက်အလက်တွေ တောက်လျှောက်ရနေတဲ့ weather station တွေက "ဖား" တွေပေါ့ဗျာ။
"တောက်တဲ့"ပေါင်းစုံ(Multi APPs တွေ)ကရတဲ့ မိုးလေဝသအချက်အလက် ကြိုတင်ခန့်မှန်းချက်တွေနဲ့ "ဖား" တွေ(weather station)တွေက ရတဲ့ အချက်အလက်တွေပေါင်းပြီး ခန့်မှန်းတဲ့အခါ အတော်ကို နီးစပ်မှန်ကန်တဲ့ မိုးလေဝသအချက်အလက်တွေ ရလာပါတယ်။
"တောက်တဲ့"များများကို မှီငြမ်းတာထက် အရည်အချင်းပြည့်တဲ့"တောက်တဲ့" ၁ ကောင် ၂ ကောင်က ပိုကောင်းသလို၊ ကြည့်ရမဲ့ ဧရိယာကျယ်လေ အချိန်နဲ့တပြေးညီ update လုပ်ပေးနိုင်မဲ့ "ဖား" အကောင်ရေများများလဲ လိုသဗျ။
အရည်အချင်းပြည့်တဲ့ "တောက်တဲ့" ဆိုတာက
🔸 Weather App တခုမှာ သင်္ချာပုံစံပြုမော်ဒယ် ဘယ်လောက်များများ သုံးထားလဲ၊
🔸 အဲ့ဒီ မော်ဒယ်တွေက ဘယ်နှစ်နာရီတကြိမ် update ပေးနိုင်သလဲ၊
🔸 ကြည့်ရှုသူနားလည်လွယ်မဲ့ interface ကို app developer က ဘယ်လောက်အထိ ရှင်းလင်းလွယ်ကူအောင် ရေးထားသလဲ ဆိုတာတွေပေါ်မှာ "တောက်တဲ့" အရည်အချင်းကို သတ်မှတ်ပြီး အရည်အချင်းပြည့်မှီတဲ့ "တောက်တဲ့"ကို သုံးဘို့လိုပါမယ်။
🔸 အခုတော့ ကျနော်တို့ "ဖား" လို့ခေါ်တဲ့ weather station တွေ ရသလောက် တတ်နိုင်သလောက် ဧရိယာတခုကိုကာမိအောင် ထိုင်နေပါတယ်။
🔸 "တောက်တဲ့"တွေထဲမှာလဲ ဘယ်တောက်တဲ့ က အရည်အချင်းပြည့်မီတဲ့ တောက်တဲ့လဲ ဆိုတာ တချိန်လုံး ဆန်းစစ်လေ့လာ(Analyze)လုပ်နေရပါတယ်။
🔸 အဲ့ဒီတော့မှဘဲ တကယ်လိုအပ်တဲ့ဒေသတွေ သဘာဝဘေးအန္တရာယ်ကျရောက်နိုင်ချေများတဲ့ဒေသတွေက ပြည်သူတွေအတွက် ထိရောက်တဲ့ မိုးလေဝသနဲ့ ရာသီဥတုအခြေအနေတွေ ခန့်မှန်းပေးနိုင်ပါလိမ့်မယ်။

သုံးတဲ့ APP, APP မှာပါတဲ့ model, Model ရဲ့ update time တွေက ကြိုတင်ခန့်မှန်းချက်တွေကို အများကြီး ပြောင်းလဲစေနိုင်သလို၊ ကွာခြားမှုလဲ များနိုင်ပါတယ်။ အသေးစိတ်တွက်ယူလို့ ရမဲ့ App နဲ့ အဲ့ဒီ App မှာ သုံးတဲ့ model တွေထဲက ဘယ်မော်ဒဘ်က ပိုမှန်တယ်ဆိုတာ ချင့်ချိန်ပြီးမှ ခန့်မှန်းချက် သတင်းကို ရေးတာ အကောင်းဆုံးပါဘဲ။
ပုံက ရှမ်းပြည်နယ်-ကျေးသီးအတွက် .. WINDY App, ECMWF model, update time အခုစာရေးချိန်မှာ ၆ နာရီ ကြာသွားပါပြီ။ မကြာခင် နေ့လည် ၂ နာရီ ၁၀ မိနစ်နစ်မှာ နောက်ထပ် update တကြိမ်ထပ်ထွက်လာပါမယ်။

နိုဝင်ဘာလ၊ လကုန်ရက်များအတွင်း အချိန်အခါမဟုတ်မိုး "အနည်းငယ်" ရွာနိုင်ကြောင်း အသိပေးတင်ပြခြင်း
နိုဝင်ဘာ ၁၅ ရက်၊ နံနက် ၁၁ နာရီ
=====

နိုဝင်ဘာ ၁၈-၁၉ ရက်နေ့မှာ ဖိလစ်ပိုင်နိုင်ငံကို ဖြတ်ကျော်တိုက်ခတ်ပြီး တောင်တရုတ်ပင်လယ်ထဲကိုဝင်ရောက်လာမည့် (လက်ရှိအချိန်မှာ CATEGORY-1 တိုင်ဖွန်းမုန်တိုင်း) MAN-YI - ဖိလစ်ပိုင်အမည် PEPITO ကတွန်းပို့လိုက်မည့် မိုးတိမ်အချို့နဲ့ အရှေ့လေပွေလှိုင်းအချို့က မြန်မာနိုင်ငံဘက်အထိ မိုးအနည်းငယ် သယ်ဆောင်လာနိုင်ပါတယ်။

နိုဝင်ဘာ ၁၈-၁၉-၂၀ ရက်တွေအတွင်း -
🔸 ရှမ်းပြည်နယ်တောင်ပိုင်းမှာ မိုးအသင့်အတင့်(၂၄ နာရီအတွင်း မိုးရေချိန် ၄၀ မီလီမီတာအထက် - ၁လက်မခွဲကျော်ခန့်) နဲ့
🔸 နေပြည်တော်၊ ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ ကယားပြည်နယ်၊ ကရင်ပြည်နယ်၊ တနင်္သာရီတိုင်းဒေသအချို့မှာ နေရာကွက်ပြီး အချိန်အခါမဟုတ်မိုးအနည်းငယ် ရွာသွန်းနိုင်ပါတယ်။

🔸 နိုဝင်ဘာ ၁၈-၁၉ ရက်တွေမှာ မိမိဒေသဘက်ကို မိုးတိမ်တောင်များဝင်လာတာတွေ့ရင်၊ မိုးတွေအုံ့လာရင် - ရိတ်သိမ်းပြီး/ရိတ်သိမ်းဆဲ သီးနှံတွေ မိုးမထိအောင်သတိထားပြီးကာကွယ်နိုင်အောင် ကြိုတင်ပြင်ဆင်ထားကြဘို့တော့ အကြံပေးချင်ပါတယ်။ မိုးများမှာမဟုတ်တဲ့အတွက် အရမ်းစိုးရိမ်စရာလဲ မလိုပါ။

ပြည်နယ်တိုင်းမြို့များအတွက် ၄ ရက်စာ မိုးလေဝသအခြေအနေကြိုတင်ခန့်မှန်းချက်တွေကို MMWeather Site မှာတင်ပေးထားတာလဲ ကြည့်ကြပါ။
https://www.mmweather.org/divisional-cities-weather

မိုးလေဝသတိုင်းတာတဲ့ station ဆိုတာလေးတွေ ထိုင်ပြီးရင် ဘာတွေရမလဲ
ဘယ်လိုအကျိုးရှိမလဲ?
နိုဝင်ဘာ ၁၁ ရက် ညနေ ၄ နာရီ ၅၅ မိနစ်
====
မိုးလေဝသ station တခုထိုင်ပြီးရင် လျှပ်စစ်မီးပြတ်တောက်မှု မဖြစ်မချင်းချိတ်ဆက်ထားတဲ့ အင်တာနက်ပြုတ်မသွားမချင်း ထိုင်ထားတဲ့ ဒေသ/မြို့ရဲ့ နေ့စဉ်မိုးလေဝသဆိုင်ရာ အချက်အလက်တွေကို ၂ မိနစ်တကြိမ် အလိုအလျှောက် update ဖြစ်နေတာ ရရှိပါမယ်။
Station က အာရုံခံကိရိယာတွေ(Sensor array)မှ ရတဲ့ အချက်အလက်တွေက Ambient Weather Network Cloud database ကို အလိုအလျှောက်ရောက်ရှိပြီး အဲ့ဒီက အချက်အလက် CSV file(Comma-Separated Values file) တွေကို နေ့စဉ်/တလတကြိမ်/တနှစ်တကြိမ် လိုသလို download လုပ်ပြီး သိမ်းဆည်းထားနိုင်ပါတယ်။ သိမ်းဆည်းထားတဲ့ csv file တွေကို excel workbook xlsx ဖိုင် format ပြောင်းပြီးလိုသလို စစ်ဆေးကြည့်ရှုနိုင်ပါမယ်။
သိမ်းဆည်းထားတဲ့အချက်အလက်တွေကို စစ်ဆေးကြည့်ရှု၊ သိမ်းဆည်း၊ လေ့လာ၊ မှတ်သားတာတွေ လုပ်ပြီးတဲ့အခါ-
နေ့စဉ်၊ လစဉ်မိုးလေဝသဆိုင်ရာအချက်အလက်များမှ နှစ်စဉ် ရာသီဥတုဖြစ်ပေါ်ပြောင်းလဲနိုင်မဲ့ အခြေအနေများကို တွက်ချက်ခန့်မှန်းနိုင်လာပါမယ်။
ထူးခြားမိုးလေဝသဖြစ်စဉ်များနဲ့ သဘာဝဘေးအန္တရာယ်အမျိုးမျိုးသည် ဆက်စပ်ဖြစ်ပေါ်နေတာကြောင့် ထူးခြားမိုးလေဝသဖြစ်စဉ်များဖြစ်လာတဲ့အခါ station တပ်ဆင်ထားတဲ့နေရာတွေရဲ့ မိုးလေဝသအချက်အလက်တွေ/အခြေအနေတွေကို real-time(အချိန်နဲ့တပြေးညီ)သိနေရမှာလဲ ဖြစ်ပါတယ်။

မနေ့က တပ်ဆင်ပေးလိုက်တဲ့ ဖျာပုံမြို့မိုးလေဝသတိုင်းတာရေး station က ၂ မိနစ်တကြိမ်ရရှိနေတဲ့ အချက်အလက်တွေကို ဒီနေ့မှာ ပုံမှာပါတဲ့အတိုင်း အလိုအလျှောက်မှတ်တမ်းတင်တာ စ တင်လုပ်ဆောင်နေပြီဖြစ်ပါတယ်။
ဒီအချက်အလက်တွေအရ နိုဝင်ဘာ ၁၁ ရက်နေ့အတွက် ဖျာပုံမြို့မှာ -
အပူချိန်အမြင့်ဆုံးဘယ်လောက်၊ ခံစားးရတဲ့ အပူချိန်က ဘယ်လောက်၊ ပျမ်းမျှနဲ့ အနိမ့်ဆုံးအပူချိန်တွေက ဘယ်လောက်၊ လေတိုက်နှုန်းတွေက အမြင့်ဆုံး အနိမ့်ဆုံး ပျမ်းမျှ ဘယ်လောက်ရှိနေပြီး ဘယ်အရပ်က တိုက်နေတယ်ဆိုတာလဲ သိနေရပါမယ်။ အဲ့ဒါအပြင် ဒေသရဲ့ လေထုစိုထိုင်းဆ၊ လေထုဖိအားတွေကိုလဲ ရနေပါမယ်။ နေရောင်ခြည်စွမ်းအင်က ဆိုလာပြား ၁ စတုရန်းမီတာကျယ်ရင် ဒီနေ့အတွက် အမြင့်ဆုံး Watt ဘယ်လောက်အထိ ထွက်နိုင်မယ်၊ ခရမ်းလွန်ရောင်ခြည်အညွှန်းကိန်းက ဘယ်လိုရှိနေမလဲစသည်ဖြင့် တန်ဘိုးရှိတဲ့ မြေပြင်မိုးလေဝသအချက်အလက်တွေကို နေ့စဉ်ရရှိနေမှာဖြစ်ပါတယ်။
ဒီလိုမိုးလေဝသဆိုင်ရာအချက်အလက်တွေက စိုက်ပျိုးလုပ်ငန်းအတွက်ရော ရေလုပ်ငန်းအတွက်ရော၊ ဒေသတွင်းနေထိုင်ကြတဲ့ ပြည်သူများအတွက်ရော၊ မိုးလေဝသနဲ့ ရာသီဥတုဆိုင်ရာ လေ့လာနေကြသူများအတွက်ရော နောက်လာမဲ့ လ တွေ နှစ်တွေအထိ အကျိုးဖြစ်ထွန်းမှုများစွာကို ဆောင်ကြဉ်းလာနိုင်ပါလိမ့်မယ်။
စာကြွင်း - လက်ရှိဖြစ်ပေါ်နေတဲ့ ဘင်္ဂလားပင်လယ်အော်နဲ့ တောင်တရုတ်ပင်လယ်များဘက်မှ ထူးခြားမိုးလေဝသဖြစ်စဉ်များကမြန်မာနိုင်ငံအပေါ်သက်ရောက်မှု မရှိသလောက်နည်းပါးနေမှာဖြစ်တာကြောင့် တင်ပြပေးရန် မရှိပါ။

ဒီနေ့ ဖျာပုံ မှာ Weather Station ၁ လုံး ထပ်ထိုင်ပြီးသွားပါတယ်၊ ဧရာဝတီတိုင်အတွက်တော့ ပထမဆုံး GSM Weather Station ပါ။
ဒါးက(ကန်ကြီးဒေါင့်)နဲ့ လက်ပတန်းမှာ ၁ လုံးစီထပ်ထိုင်ဘို့လုပ်နေပါတယ်။

အသစ်ဖြစ်လာတဲ့ လေဖိအားနည်းရပ်ဝန်းက မြန်မာနိုင်ငံအပေါ် သက်ရောက်မှုရှိမှာမဟုတ်လို့ ရာသီဥတု ပြန်လည် သာယာနေတုန်း အပြင်အလုပ်တွေ ပြီးအောင်လိုက်လုပ်နေတာကြောင့် ထူးခြားဖြစ်စဉ်တင်ပြရန်မရှိပါ။

တပ်ဆင်ပြီး GSM မိုးလေဝသ station များမှ ရရှိသည့် ည ၈ နာရီ အပူချိန်များ
====
ကျောက်ဆည် = ၂၅.၆ ºC
တောင်ကြီး = ၁၇.၁ ºC
ကလော = ၁၆.၈ ºC
အင်းလေး = ၂၀.၁ ºC
ထန်းတပင် = ၂၃.၆ ºC
လှည်းကူး = ၂၃.၈ ºC
သက္ကလ = ၂၅.၄ ºC
မင်္ဂလာဒုံ = ၂၄.၂ ºC
ရန်ကုန်လေဆိပ် = ၂၅ ºC
လှိုင်သာယာ = ၂၄.၃ ºC
ကမာရွတ် = ၂၃.၈ ºC
သီလဝါ = ၂၄.၆ ºC

WINDY ရဲ့ မော်ဒယ် ၃ ခုက ဖျာပုံမှာ ဒီနေ့ မိုးတိတ်မယ်ဆိုတာတော့ ပြနေတယ်၊ အချိန်တွေတော့ မတူဘူး၊ model forecast နဲ့ မေပြင်က အခြေအနေ ဘယ်လိုကွာခြားလဲဆိုတာ လေ့လာပြီး မှတ်ထားရပါမယ်။

"၂၀၂၄ ခုနှစ်၊ နိုဝင်ဘာလ မှ - ၂၀၂၅ ခုနှစ်၊ မတ်လ အထိ လာနီညာဖြစ်ပေါ်နိုင်ချေနှင့် ၂၀၂၄-၂၅ မတ်လအထိ ရာသီဥတုဖြစ်နိုင်ချေများကို သုံးသပ်တင်ပြခြင်း"
နိုဝင်ဘာ ၈ ရက်၊ ည ၁၀ နာရီခွဲ
=====
ဒီပေါ်မှာ ပုံတွေရော ဗီဒီယို embedding လုပ်တာရော များနေလို့ site ပေါ်မှာပဲ တင်ပေးထားပါတယ်။
Link: https://www.mmweather.org/2024-weather-forecast

နိုဝင်ဘာ ၈ ရက် ညနေပိုင်း ကျောက်ဆည်မှာ GSM weather station တလုံးထပ်ထိုင်လို့ ပြီးသွားပါပြီ။
မန္တလေးတိုင်းထဲက ကျောက်ဆည်၊ ကူမဲ၊ တံတားဦးမှ မန္တလေးအထိ ဖြစ်လာနိုင်မဲ့ မိုးလေဝသအခြေအနေနဲ့ ကြိုတင်ခန့်မှန်းချက်တွေ ပိုပြီးမှန်မှန်ပေးနိုင်အောင် မှတ်တမ်းတွေပြုစုပြီးလေ့လာရမဲ့ Station တခု တိုးလာတာပါ။
အသိပညာပေးခြင်းနည်းလမ်းမှတဆင့် သဘာဝဘေးအန္တရာယ်တွေကြောင့် ဆုံးရှုံးရခြင်းများကို အတိုင်းအတာတခုအထိတော့ ကျနော်တို့လျှော့ချနိုင်လာပါလိမ့်မယ်။
ဝိုင်းကူပေးကြသူများအားလုံးကို ကျေးဇူးတင်ပါတယ်ဗျာ။ ❤️

Facebook Comment copy
=========

ပဲကြဲမဲ့တောင်သူများအတွက် ၁၀ ရက်နေ့မှာ နေပြန်ပွင့်ပြီးမှ ကြဲကြပါလို့ အခု မိုးတွေ များမလာခင်ကတည်းက ကြိုတင်အသိပေးခဲ့ ပြောခဲ့ပါတယ်။
တောင်တရုတ်ပင်လယ်ဘက်က တိုင်ဖွန်းမုန်တိုင်းကြောင့် ဖျက်မိုးအန္တရာယ်မရှိနိုင်ကြောင်းလဲ post တခု တင်ပေးထားပါတယ်။
မိမိနေထိုင်လုပ်ကိုင်ကြတဲ့ဒေသအလိုက် ၄ ရက်စာ မိုးလေဝသအခြေအနေကြိုတင်ခန့်မှန်းချက်တွေကိုလဲ ကြည့်ကြပါ။ အားလုံးအတွက် အလိုအလျှောက် update ဖြစ်နေအောင် ကျနော် လုပ်ပေးထားပါတယ်။
Site ပေါ်ကိုကြည့်တဲ့အခါ VPN ခံစရာလဲ မလိုပါ။
ကြည့်နည်းနမူနာပုံလဲ ဒီမှာ ထပ်တွဲတင်ပေးထားပါမယ်။
ကိုယ်တိုင် ကြည့်ရှုလေ့လာတဲ့ တာဝန်လေးတော့ ယူပေးကြပါ။
https://www.mmweather.org/divisional-cities-weather

🔶 တောင်တရုတ်ပင်လယ်ထဲရောက်လာတဲ့ CAT-2(Category-2)တိုင်ဖွန်းမုန်တိုင်း YINXING က
စိုးရိမ်ရသလား?
မစိုးရိမ်ရပါ။
နိုဝင်ဘာ ၁၂ ရက် နေ့လည်ပိုင်း ဗီယက်နမ်ကမ်းခြေကို ရောက်လာပြီးတဲ့နောက် အားလျော့သွားမှာဖြစ်ကြောင်း မုန်တိုင်းများလေ့လာဆန်းစစ်အတည်ပြုခြင်းဆောင်ရွက်နေကြတဲ့ အပြည်ပြည်ဆိုင်ရာအဖွဲ့တွေက အတည်ပြုပေးထားပါတယ်။

🔶 မြန်မာနိုင်ငံအပေါ် သက်ရောက်မှု ဘာတွေ ရှိနိုင်မလဲ?
🔶 အခါလွန်မိုး/ဖျက်မိုးအန္တရာယ်တွေလာနိုင်သေးလား?
၆၀% ရှိနေတဲ့ လာနီညာဖြစ်မှာကို စောင့်ကြည့်နေတဲ့ LA-NINA WATCH အခြေအနေမှာ အရှေ့ဘက်က ကုန်သည်လေစီးကြောင်းအားကောင်းနေတယ်။ အရှေ့မြောက်မုတ်သုံလေစီးကြောင်းလဲ အားကောင်းနေပါတယ်။ မြန်မာပြည်ဘက်ကို မိုးတိမ်တွေသယ်ဆောင်လာနိုင်မဲ့ လေစီးကြောင်းက စက်တင်ဘာ၊ အောက်တိုဘာလတွေတုန်းကလို အရှေ့ဘက်တည့်တည့်သယ်ဆောင်လာတာမဟုတ်ပဲ အရှေ့မြောက်ဘက်မှ အနောက်တောင်ဘက်(ထိုင်းနိုင်ငံတောင်ပိုင်း၊မလေးရှားကျွန်းဆွယ်နဲ့ စင်္ကာပူဘက်)ကိုသာ သယ်ဆောင်မှုများတာကြောင့်...

📌 မိုးရွာရင် မိုးများရင် မြန်မာနိုင်ငံတောင်ပိုင်းစွန်း တနင်္သာရီတိုင်းတောင်ဘက်အစွန်မှာသာ မိုးရွာနိုင်/မိုးများနိုင်မဲ့ အခြေအနေဖြစ်ပေါ်နိုင်ပါတယ်။

📌 တနင်္သာရီတိုင်းမြောက်ပိုင်းရဲ့ အထက်ဘက် မြန်မာနိုင်ငံအပေါ်ပိုင်းဒေသတွေဆီ မိုးရွာနိုင်မဲ့ အခြေအနေအလွန်နည်းသွားပါတယ်။ မြေပြင်နဲ့ လေထုအပူချိန်တွေလဲ ကျဆင်းနေပြီဖြစ်တာကြောင့် မိုးရွာရင်လဲ ဆောင်းသီးနှံများအတွက် လိုအပ်တဲ့ မိုးဖွဲလောက်သာ ကျနိုင်ပါမယ်။

မိုးရွာတာတွေ ရပ်ပြီး ရာသီဥတု သာယာလာချိန်မှာ - "၂၀၂၄ ခုနှစ်၊ နိုဝင်ဘာလ မှ - ၂၀၂၅ ခုနှစ်၊ မတ်လ အထိ လာနီညာဖြစ်ပေါ်နိုင်ချေနှင့် ၂၀၂၄-၂၅ မတ်လအထိ ရာသီဥတုဖြစ်နိုင်ချေများကို သုံးသပ်တင်ပြခြင်း" ဆိုတာ တင်ပေးပါဦးမယ်။ လောလောဆယ်တော့ မိုးများလို့/မိုးများခဲ့လို့ အခက်အခဲကြုံနေရတာတွေကို အရင် ရှင်းအောင် လုပ်ကြရဦးမှာပါ။

၂၄ နာရီ မိုးရွာသွန်းနိုင်သည့်အခြေအနေများ တဖြည်းဖြည်းလျော့ကျနိုင်မှု ကြိုတင်ခန့်မှန်း။
=========
နိုဝင်ဘာ ၈ ရက်နေ့ နံနက် ၁၁ နာရီမှ ၉ ရက်နေ့ နံနက် ၁၁ နာရီ ၂၄ နာရီအတွင်း ဧရာဝတီမြစ်ဝကျွန်းပေါ်ကမ်းရိုးတန်းဒေသများ အထူးသဖြင့်ပင်လယ်ကမ်းစပ်အနီးတွင် မိုးအလွန်များနေကြောင်းတွေ့ရသည်။

နိုဝင်ဘာ ၈ ရက်နေ့ ည ၆ နာရီမှ ၉ ရက်နေ့ ည ၆ နာရီ ၂၄ နာရီအတွင်း ဧရာဝတီမြစ်ဝကျွန်းပေါ်ကမ်းရိုးတန်းဒေသများ အထူးသဖြင့်ပင်လယ်ကမ်းစပ်အနီးတွင် မိုးများသည့်အခြေအနေ လျော့ကျလာကြောင်းတွေ့ရသည်။

နိုဝင်ဘာ ၈ ရက်နေ့ ည ၁၂ နာရီမှ ၉ ရက်နေ့ ည ၁၂ နာရီ ၂၄ နာရီအတွင်း ဧရာဝတီမြစ်ဝကျွန်းပေါ်ကမ်းရိုးတန်းဒေသများ အထူးသဖြင့်ပင်လယ်ကမ်းစပ်အနီးတွင် မိုးများသည့်အခြေအနေ ဆက်လက်လျော့ကျလာကြောင်းတွေ့ရသည်။

နိုဝင်ဘာ ၉ ရက်နေ့ နေ့လည် ၂ နာရီမှ ၁၀ ရက်နေ့ နေ့လည် ၂ နာရီ ၂၄ နာရီအတွင်း ဧရာဝတီမြစ်ဝကျွန်းပေါ်ကမ်းရိုးတန်းဒေသများအပါအဝင်၊ တနိုင်ငံလုံးအတိုင်းအတာဖြင့် မိုးရွာမှု မရှိတော့သလောက်ဖြစ်ပြီး ရာသီဥတု ပြန်လည်သာယာလာနိုင်ကြောင်းတွေ့ရသည်။

တပ်ဆင်ထားပြီး မိုးလေဝသ station များမှ နိုဝင်ဘာ ၈ ရက် နေ့လည် ၁၂ နာရီ ၂၀ မိနစ်အထိ ရရှိပြီး အပူချိန်နှင့် မိုးရွာသွန်းမှုအခြေအနေမှတ်တမ်းများ -

မိုးနည်းတာများတာဘယ်လို သတ်မှတ်တယ်ဆိုတာ သိပြီဆိုတော့ -
နိုဝင်ဘာ ၇ ရက် နံနက် ၇ နာရီမှ ၈ ရက် နံနက် ၇ နာရီ(၂၄ - နာရီအတွင်း) ရှမ်းပြည်နယ်အရှေ့ပိုင်းမှာ ရွာနိုင်မဲ့မိုးရေချိန်ကို ဒီလိုတွေ့ပါတယ်။ နည်းမယ် များမယ် ပြောကြည့်လို့ ရအောင်ပါ။

မိုးရွာတဲ့အခါ -
မိုးနည်းတယ်၊
မိုးအသင့်အတင့်ရွာတယ်၊
မိုးများတယ်၊
မိုးအလွန်များတယ် .. ဆိုတဲ့ အများနားယဉ်ပြီးသား ဝေါဟာရတွေနဲ့ ပြောကြတယ်။ အဲ့ဒီမှာမှ လျှပ်စီးလေးလက် မိုးကြိုးလေးပစ်လိုက်ရင် ထစ်ချုန်းမိုးရွာတယ်ပေါ့။ လေပါပြင်းပြင်းတိုက်တော့ မိုးသက်လေပြင်းကျတယ်၊ မိုးရော လေရော ကြမ်းလိုက်တာ ပြောကြတယ်။
မိုးရွာလိုက်တာ ရေအတော်ပါတယ်ဟ! လို့ ပြောကြတာလဲ ရှိသေးတယ်။

ဒီနေရာမှာ အဲဒီ ဝေါဟာရတွေထဲက မိုးနည်းတယ် မိုးများတယ် မိုးအသင့်အတင့် ဆိုတာတွေကို ဘယ်လိုတိုင်းပြီး ဘယ်လို သတ်မှတ်တယ်ဆိုတာတော့ မသိကြတာများတယ်။ အဲ့ဒါကို ခွဲခြားသိကြရအောင်တော့ ရှင်းပြပါဦးမယ်။

မိုးရွာခြင်းအနည်းအများက မီလီမီတာနဲ့ စင်တီမီတာနဲ့ လက်မနဲ့ ဖေါ်ပြကြရာမှာ ကျနော်တို့ မြန်မာနိုင်ငံမှာတော့ လက်မနဲ့ဖေါ်ပြတာကိုဘဲ သိကြတယ်။ ဘယ်နှစ်လက်မဆိုများတယ်ဆိုတာ တန်း သိကြတာလဲရှိတယ်၊ မသိကြတာလဲ ရှိတယ်။

အိန္ဒိယမိုးလေဝသဋ္ဌာနရဲ့ SOP(Standard Operation Procedure)မှာ ဒီလိုဖေါ်ပြထားတယ်။
"၂၄ နာရီ" ၁ ရက်အတွင်း ရွာတဲ့ မိုးရေချိန်တွေက -
မိုးနည်း/အလွန်နည်းတာကို Very light rainfall - 2.4 mm = 0.01 inch
တလက်မရဲ့ ဆယ်ပုံပုံ - ၁ ပုံလောက်ပဲ ရွာတာ

မိုးနည်းတယ် light rain - 2.5 to 15.5 mm = 0.01 inch to 0.61 inch
လက်မဝက် ကျော်ကျော်လောက်အထိရွာတာ

မိုးအသင့်အတင့် moderate rain - 15.6 to 64.4 mm = 0.61 to 2.53 inch
လက်မဝက်ကျော် - ၂ လက်မ ခွဲလောက်အထိရွာတာ

မိုးများ heavy rain - 64.5 - 115.5 mm = 2.53 - 4.55 inch
၂ လက်မခွဲကျော်မှ ၄.၅၅ လက်မဆိုတော့ ၅ လက်မ နီးပါးပေါ့

မိုးအလွန်များ - Very Heavy Rain - 115.6 - 204.4 mm = 4.55-8.04 inch
၅ လက်မ နီးပါးမှ ၈ လက်မ ကျော်အထိရွာတာ

မိုးအလွန့်အလွန်များ - Extremely heavy rain - 204.5 mm or 21 cm up - ၈ လက်မ အထက်ပေါ့

အိန္ဒိယမိုးလေဝသဋ္ဌာန SOP မှာ နောက်ဆုံးပြထားတဲ့ Exceptional Heavy Rainfall ဆိုတာကတော့ မိုးလေဝသစခန်း(station)တခုရဲ့ မိုးအများဆုံးစံချိန်တင်ထားတဲ့ မိုးရေချိန်နီးနီးရွာတာ ဒါပေမဲ့ ၁၂ စင်တီမီတာထက်တော့ ပိုရမယ်လို့ ဆိုတယ်။

မိုးတွေအရမ်းသည်းနေပေမဲ့ နောက်တနည်းပြောရရင် တနာရီအတွင်းမိုးရွာတဲ့နှုန်း rain rate က များနေပေမဲ့ အခုပြောတဲ့ ၂၄ နာရီအတွင်းရှိရမဲ့ မိုးရေချိန်ကို မှီချင်မှ မှီမယ်။ ၂၄ နာရီအတွင်း ရရှိတဲ့ မိုးရေချိိန်ပမာဏပေါ်မူတည်ပြီးမှသာ မိုးနည်းတယ် မိုးများတယ်ပြောလို့ရပါတယ်။

မိုးများမှာလား နည်းမှာလား မေးချင်သူတွေများလို့ ဒီ SOP ကို ရှင်းပြတာပါ။
https://www.mmweather.org/divisional-cities-weather
ဒီလင့်မှာကြည့် - ပြီးရင် တရက်အတွင်း မိုးရေချိန်ကြိုတင်ခန့်မှန်းထားတာကိုကြည့် - မိုးနည်းမလား မများများမလား ကိုယ်တိုင်ကိုယ်ကျ ဆုံးဖြတ်ကြပေတော့ဗျ။
နမူနာပုံလေး ထပ်တွဲပေးလိုက်ပါဦးမယ်။

ဘင်္ဂလားပင်လယ်အော် အနောက်တောင်ပိုင်းတွင်ဖြစ်ပေါ်နိုင်မည့် လေဖိအားနည်းရပ်ဝန်း မြန်မာနိုင်ငံဘက်သို့ သက်ရောက်နိုင်သည့် မိုးလေဝသအခြေအနေများအပေါ် နိုဝင်ဘာ ၂ ရက် နေ့လည် ECMWF Model UPDATE အရ သုံးသပ်တင်ပြခြင်း
(နိုဝင်ဘာ ၂ ရက် နေ့လည် ၂ နာရီ ၃၀ မိနစ်)
========

ECMWF model ရဲ့ ဒီနေ့ နေ့လည်ပိုင်း update မှာ - ဘင်္ဂလားပင်လယ်အော် အနောက်တောင်ပိုင်းမှာဖြစ်နိုင်မဲ့ လေဖိအားနည်းရပ်ဝန်းက တနင်္သာရီတိုင်း ရေးမြို့အနီးမှဖြတ်သန်းသွားတဲ့ မြောက်လတ္တီတွဒ် ၁၅º ရဲ့ အောက်မှာပဲ ရှိနေပြီး အနောက်ဘက် အိန္ဒိယနဲ့ သီရိလင်္ကာကျွန်းမြောက်ပိုင်းအဖျားကဖြတ်ပြီး အာရေဗျပင်လယ်ထဲကို ဆက်လက်ရွေ့လျားနိုင်မယ်လို့ တွေ့ရပါတယ်။

ဒီအခြေအနေကြောင့် နိုဝင်ဘာ ၆ ရက် နေ့လည် ၁၂ နာရီမှ နိုဝင်ဘာ ၇ ရက်နေ့လည်၁၂ နာရီအထိ ၂၄ နာရီအတွင်း-
စစ်ကိုင်းတိုင်းတောင်ပိုင်း၊ မန္တလေးတိုင်း၊ ရှမ်းပြည်နယ်၊ နေပြည်တော်၊ မကွေးတိုင်း၊ ပဲခူးတိုင်း၊ ဧရာဝတီတိုင်းမြောက်ဘက်ပိုင်း၊ ရန်ကုန်တိုင်းတွေမှာ မိုးအသင့်အတင့် (၂၄ နာရီအတွင်း မိုးရေချိန် ၁ လက်မ ကျော်ခန့် )မိုးရွာနိုင်ပြီး၊ ရှမ်းပြည်နယ်မှာတော့ ၂၄ နာရီအတွင်း မိုးရေချိန် ၆၂ မီလီမီတာအထက်(၂ လက်မခွဲခန့်)အထိ မိုးရွာနိုင် မိုးများနိုင်ကြောင်းတွေ့ရပါတယ်။

ဒီမိုးရေချိန်က ပြီးခဲ့တဲ့ ရေကြီးမှုဖြစ်စဉ်များကိုဖြစ်ပေါ်စေခဲ့သော မုန်တိုင်းအကြွင်းအကျန်တိမ်တိုက်များနှင့်လေပွေလှိုင်းဝင်ရောက်လာခြင်းကြောင့် ရွာသွန်းခဲ့တဲ့ မိုးရေချိန်ပမာဏရဲ့ ၃ ပုံ ၁ ပုံခန့်သာ ရှိနိုင်ပါမယ်။ ဒ်ကြောင့် ရေကြီးခဲ့ပြီးတဲ့ ရှမ်းပြည်နယ်ဒေသများအတွက် ရေပြန်ကြီးမှာကို စိုးရိမ်စရာမလိုပါ။

ရှမ်းပြည်နယ်မှအပ ကျန်ပြည်နယ်တိုင်းတွေဖြစ်တဲ့ စစ်ကိုင်းတိုင်းတောင်ပိုင်း၊ မန္တလေးတိုင်း၊ နေပြည်တော်၊ မကွေးတိုင်း၊ ပဲခူးတိုင်း၊ ဧရာဝတီတိုင်းမြောက်ဘက်ပိုင်း၊ ရန်ကုန်တိုင်းတွေမှာတော့ မိုးရေချိန်များများရွာမှာမဟုတ်သော်လည်း စပါးရိတ်သိမ်းချိန် ပျိုးလှမ်းချိန်တွေနဲ့ တိုက်ဆိုင်နေတာကြောင့် အမှတ်မထင်ရွာလာနိုင်မဲ့ ဖျက်မိုးအန္တရာယ်ကို ဂရုစိုက်ကြရပါမယ်။

နိုဝင်ဘာ ၉ ရက်နောက်ပိုင်း အခုဖြစ်လာနိုင်တဲ့ လေဖိအားနည်းရပ်ဝန်း အာရေဗျပင်လယ်ဘက်ရွေ့လျားသွားပြီးရင်တော့ မြန်မာတနိုင်ငံလုံး ရာသီဥတု သာသာယာယာပြန်ဖြစ်လာနိုင်ပါမယ်။

နိုဝင်ဘာ ၆ ရက် ၇ ရက်ဝန်းကျင် ဘင်္ဂလားပင်လယ်အော်အလယ်ပိုင်းနှင့် အနောက်အလယ်ပိုင်း ပင်လယ်ပြင်အတွင်း အထက်လေထုအလွှာ(ပေ-၅၀၀၀ အမြင့်)မှာ လေပွေလှိုင်း - လေဖိအားနည်းရပ်ဝန်း ဆိုပြီး အဆင့်ဆင့်ဖြစ်လာနိုင်မယ်ဆိုတာကိုတော့ သင်္ချာပုံစံပြုမော်ဒယ်တွေက ပြတာတွေ တူညီလာတာတွေ့ရပါပြီ။ မုန်တိုင်းအဆင့်အထိ ရောက်နိုင်မရောက်နိုင်ကိုတော့ လေပွေလှိုင်းစဖြစ်လာနိုင်မဲ့ နိုဝင်ဘာ ၆ ရက်လောက်အထိ စောင့်ကြည့်ရပါမယ်။

နိုဝင်ဘာ ၆ ရက်နေ့မှာ စတင်ဖြစ်လာနိုင်မဲ့ လေပွေလှိုင်းနဲ့ လေဖိအားနည်းရပ်ဝန်းအရှိန်သက်ရောက်မှုကြောင့် မိုးရွာသွန်းနိုင်ချေအများဆုံးနဲ့ မိုးရေချိန်အများဆုံးရွာနိုင်မှာကတော့ ရှမ်းပြည်နယ် တခုလုံးပါဘဲ။ တာချီလိတ်၊ တောင်ကြီးနဲ့ လားရှိးမြိုများမှာ နိုဝင်ဘာ ၆ ရက် ၇ ရက် နေ့တွေရွာသွန်းနိုင်မဲ့ မိုးရေချိန်က ၂၄ နာရီအတွင်း ၄၀ မီလီမီတာအထက်(၁.၆ လက်မခန့်)ရှိနိုင်ပါတယ်။ ဒီအခြေအနေသည် ပြီးခဲ့တဲ့ စက်တင်ဘာလအတွင်း ရေကြီးရေလျှံခြင်းတွေဖြစ်ပွားခဲ့စဉ်က ရွာခဲ့တဲ့ မိုးရေချိန်ထက်တော့ အများကြီးနည်းပါတယ်။

ရှမ်းပြည်နယ်ကဲ့သို့ မိုးများနိုင်တဲ့ ဒေသက ကယားပြည်နယ်နဲ့ ဧရာဝတီတိုင်းဖြစ်ပြီး ကယားပြည်နယ်က-ငွေတောင်နဲ့ ဧရာဝတီတိုင်းက လပွတ္တာကို စံပြုထားတဲ့ ကြိုတင်ခန့်မှန်းချက်က နိုဝင်ဘာ ၇ ရက် ၁ ရက်ထဲမှာ ၂၄ နာရီအတွင်း ၅၀ မီလီမီတာအထက်(၂ လက်မ နီးပါး)ရွာသွန်းနိုင်တာကြောင့် "မရိတ်သိမ်းရသေးတဲ့ စပါးခင်းတွေအတွက်၊ အမိုးအကာအောက်မရောက်သေးတဲ့ ရိတ်သိမ်ပြီးစပါးတွေအတွက်" စိုးရိမ်စရာဖြစ်ပါမယ်။

ရန်ကုန်တိုင်း၊ ပဲခူးတိုင်း၊ နေပြည်တော်၊ မကွေးတိုင်း၊ စစ်ကိုင်းတိုင်း၊ မန္တလေးတိုင်း၊ ရခိုင်ပြည်နယ်၊ ချင်းပြည်နယ်၊ ကချင်ပြည်နယ်နဲ့ ကယားပြည်နယ်တွေမှာတော့ မိုးရွာသွန်းနိုင်မဲ့အခြေအနေရှိပေမဲ့ မိုးရေချိန် ၂၀ မီလီမီတာ(၀.၇၈ လက်မခန့် - တလက်မ မပြည့်)ခန့်သာရွာသွန်းနိုင်ပြီး မိုးများနိုင်မှာ မဟုတ်ပါ။ ဆောင်းသီးနှံ စိုက်ပျိုးကြမဲ့တောင်သူတွေအတွက်တော့ လိုအပ်နေတဲ့ မြေအစိုဓါတ်ရအောင်ရွာသွန်းပေးနိုင်မဲ့ မိုးရေချိန် ရပါလိမ့်မယ်။
မွန်ပြည်နယ်၊ ကရင်ပြည်နယ်နဲ့ တနင်္သာရီတိုင်းတွေမှာတော့ လေဖိအားနည်းရပ်ဝန်းဖြစ်ပေါ်ချိန် နိုဝင်ဘာ ၆ ရက် ၇ ရက်တွေမျာ မိုးရွာနိုင်သော်လည်း မများပါ။

ကမ်းနီးပင်လယ်ပြင်များမှာလဲ နိုဝင်ဘာလ ဒုတိယရက်သတ္တပါတ်ကုန်ဆုံးသည်အထိ လေတိုက်နှုန်း ၁၅ မိုင်မှ ၂၅ မိုင်ခန့်အထိ ရှိနိုင်ပြီး လှိုင်းအမြင့် ၂ ပေမှ ၅ ပေခန့်သာရှိနိုင်ပါတယ်။
အခုပြည်နယ်တိုင်းအလိုက် မိုးလေဝသဖြစ်နိုင်ချေ ကြိုတင်ခန့်မှန်းချက်များသည် လေဖိအားနည်းရပ်ဝန်းတကယ်ဖြစ်လာချိန်မှာ ပြောင်းလဲမှု အနည်းငယ် ရှိလာနိုင်ပါတယ်။ မိုးများနိုင်မဲ့ ဒေသများက မိုးရေချိန်ခန့်မှန်းပုံများကိုသာ post မှာ တွဲတင်ပေးထားပါတယ်။
(နိုဝင်ဘာ ၂ ရက် နေ့လည် ၁၂:၃၀ နာရီ)

အခု ကြိုတင်ခန့်မှန်းထားတဲ့ မုန်တိုင်းငယ် ဖြစ်လာရင် - ၄၈ နာရီအတွင်းရွာသွန်းနိုင်တဲ့ မိုးရေချိန်ပမာဏက ၁ ရက် ပျမ်းမျှ ၄၀ မီလီမီတာကျော်ကျော်(၁.၆ လက်မ ခန့် )ရှိပါမယ်။ အများဆုံးရွာနိုင်တာတော့ ရှမ်းမြောက်/ရှမ်းတောင်/ရှမ်းအရှေ့ ဒေသတွေပါဘဲ။

"ဘင်္ဂလားအော်တွင် မုန်တိုင်းဖြစ်နိုင်ချေ ကြိုတင်ခန့်မှန်းချက် UPDATE"
(နိုဝင်ဘာ ၁ ရက် နံနက် ၁၁ နာရီခွဲ)
=====

🔸 ဘင်္ဂလားပင်လယ်အော် အနောက်တောင်ပိုင်းနဲ့ အနောက်အလယ်ပိုင်းပင်လယ်ပြင်မှာ မုန်တိုင်းဖြစ်လာနိုင်ချေက ECMWF AI မှာရော NOAA ရဲ့ GEFS မှာရော ပြနေတာတွေ့ရပါတယ်။

🔸 WINDY ရဲ့ GFS, ICON နဲ့ ECMWF model တွေက ဘင်္ဂလားပင်လယ်အော်တောင်ပိုင်းမှာ အမြင့်ပေ ၅၀၀၀ အထက် လေထုလွှာအတွင်း လေပွေလှိုင်းတခု နိုဝင်ဘာ ၆ ရက် ညပိုင်းမှာ စတင်ဖြစ်ပေါ်နိုင်မယ်လို့ တွေ့ရပါတယ်။

ဒီအခြေအနေကြောင့် -
🔸 မြန်မာနိုင်ငံ အလယ်ပိုင်းဒေသများနဲ့ ရှမ်းပြည်နယ်ဘက်မှာ မိုးပါးပါးရွာနိုင်ချေရှိပြီး၊ ရှမ်းပြည်နယ်တောင်ပိုင်းနဲ့ အရှေ့ပိုင်းတွေမှာတော့ နိုဝင်ဘာ ၆ ရက် ည ၉ နာရီမှ နိုဝင်ဘာ ၇ ရက်နေ့ည ၉ နာရီအထိ(၂၄ နာရီအတွင်း မိုးရေချိန် ၅၄.၆ မီလီမီတာ(၂.၁၅ လက်မခန့်) မိုးရွာနိုင်/မိုးသည်းထန်နိုင်ကြောင်းတွေ့ရပါတယ်။

🔸 နိုဝင်ဘာလ ၆ ရက်မှ ၈ ရက်နေ့အတွင်း မြန်မာနိုင်ငံတောင်ပိုင်း ဧရာဝတီတိုင်း၊ ပဲခူးတိုင်း၊ ရန်ကုန်တိုင်း၊ မကွေးတိုင်း၊ စစ်ကိုင်းတိုင်း၊ မန္တလေးတိုင်း၊ ရှမ်းပြည်နယ်(ဒေသအားလုံး)မှာတော့ အများအားဖြင့် ဆောင်းသီးနှံအတွက်လိုအပ်မဲ့ "မိုးပါးပါး(၂၄ နာရီအတွင်း ၂၀ မီလီမီတာ- ၀.၈ လက်မ)ထက် မများနိုင်သောမိုး" ရွာသွန်းနိုင်ပါတယ်။

🔸 မိမိသက်ဆိုင်ရာ မြို့များနဲ့ အနီးတဝိုက်က မိုးလေဝသအခြေအနေ ကြိုတင်ခန့်မှန်းချက်များကို ဒီမှာဆက်ကြည့်ပေးပါ -
https://www.mmweather.org/divisional-cities-weather

၂၀၂၄ ခုနှစ် နှစ်ကုန်ပိုင်းနှင့် ၂၀၂၅ ခုနှစ်အစပိုင်းကာလများအတွက် "လာနီညာ" ဖြစ်နိုင်ချေ ထပ်မံလျော့ကျ
အောက်တိုဘာ ၂၅ ရက် ည ၁၁ နာရီ ၄၅ မိနစ်
====

ဩစတေးလျှ မိုးလေဝသဗျူရိုနဲ့ ဥရောပ ရာသီဥတုလေ့လာခန့်မှန်းရေးအဖွဲ့များ၊ အမေရိကန်နိုင်ငံ အမျိုးသားမိုးလေဝသဌာန၊ ရာသီဥတုကြိုတင်ခန့်မှန်းရေးစင်တာ တို့မှ ထုတ်ပြန်ချက်များအရ -

👍 ၂၀၂၄ ခုနှစ်၊ နှစ်ကုန်ပိုင်းနိုဝင်ဘာလနှင့် ဒီဇင်ဘာလများအတွင်း အစွန်းရောက်ရာသီဥတုဖြစ်စဉ် "လာနီညာ"ဖြစ်နိုင်ချေသည် ၆၀% အထိထပ်မံ၍လျော့ကျလာကြောင်း၊
👍 ယခု ကြိုတင်ခန့်မှန်းချက် ၆၀% မှ လာနီညာရာသီဥတုဖြစ်လာလျှင်ပင် အားအလွန်ပျော့သော လာနီညာအဆင့်သာဖြစ်နိုင်ကြောင်း၊
👍 လက်ရှိလာနီညာဖြစ်နိုင်ချေသည် ၂၀၂၅ ခုနှစ် ဇန်နဝါရီ၊ ဖေဖေါ်ဝါရီလများအထိ ဆက်လက်တည်ရှိမှာဖြစ်ကြောင်း ထုတ်ပြန်ထားပါတယ်။

ထို့အတူ ..
👍 "အိန္ဒိယနီညို" ဟုလည်းခေါ်တွင်သော Indian Ocean Dipole -Negative ဖြစ်စဉ်သည်လည်း နိုဝင်ဘာလအတွင်း၌သာ အားအနည်းငယ်ရှိပြီး ဒီဇင်ဘာလမှ စတင်၍ ဖြစ်နိုင်ချေနည်းသွားပြီး ပုံမှန် Neutral IOD ရာသီဥတု အဖြစ်သာဆက်လက်တည်ရှိနိုင်ကြောင်း ခန့်မှန်းထုတ်ပြန်ထားပါတယ်။

ရရှိထားပြီး အစွန်းရောက်ရာသီဥတုအခြေအနေများဖြစ်သည့် "အယ်နီညို"၊ "လာနီညာ"နှင့် "အိန္ဒိယနီညို - IOD Negative"တို့ ဖြစ်နိုင်ချေလျော့ကျလျှက်ရှိခြင်းကြောင့် -
👍 ၂၀၂၄ ခုနှစ်နှစ်ကုန်ပိုင်းနှင့် ၂၀၂၅ ခုနှစ်နှစ်ဆန်းပိုင်းကာလများတွင် ပုံမှန်ရာသီဥတုအခြေအနေသာရှိနိုင်ပြီး အစွန်းရောက်ရာသီဥတုဖြစ်စဉ်များဖြစ်နိုင်ချေ အလွန်နည်းပါးကြောင်း၊
👍 "အပူလွန်ကဲခြင်း"၊ "အအေးလွန်ကဲခြင်း"နှင့် "အခါလွန်မိုးလွန်ကဲခြင်း"စသည့် အစွန်းရောက် ရာသီဥတုအခြေအနေများ ဖြစ်နိုင်ချေမှာ နည်းပါးသွားပြီဖြစ်ကြောင်း နိုင်ငံတကာ-ရာသီဥတုကြိုတင်ခန့်မှန်းရေးဌာနများ၏ထုတ်ပြန်ချက်များအား ကိုးကားတင်ပြလိုက်ပါတယ်။

MMWeather App announcement bar update.

CIMSS Archer plot update:
အောက်တိုဘာ ၂၅ ရက် နံနက် ၁၀ နာရီ

အားကောင်းသော ဆိုင်ကလုန်းမုန်တိုင်း DANA သည် -
မူလခန့်မှန်းလမ်းကြောင်း၏မြောက်ဘက် ၈ မိုင်ခန့်အကွာမှကုန်းတွင်းသို့ဖြတ်ကျော်ဝင်ရောက်လျှက်ရှိပြီး -
အရှေ့မြောက်လေအားကောင်းနေသည့်အတွက် မုန်တိုင်းတိမ်တိုက်များ မြန်မာနိုင်ငံဘက်သို့ရွေ့လျားခြင်းမရှိပဲ မိုးရွာနိုင်ချေလျော့နည်းနေခြင်းဖြစ်ကြောင်းတွေ့ရသည်။

ဆိုင်ကလုန်းမုန်တိုင်း DANA အောက်တိုဘာ ၂၄ ရက် ည ကုန်းတွင်းဝင်မည့်လမ်းကြောင်းအသေးစိတ် ခန့်မှန်းပုံ
ပုံ-၁ CIMSS ARCHERY
ပုံ-၂ ECMWF path drawing

မြန်မာနိုင်ငံဘက်တွင် မိုးအနည်းငယ်ရွာနိုင်ပြီး မိုးများနိုင်မည်မဟုတ်ပါ။

ဖူဂျီဝါရာ သက်ရောက်မှုအကြောင်းကို post တင်ပေးရှင်းပြပေးခဲ့ပြီးပါပြီ။
https://www.facebook.com/uwinnaing/posts/pfbid0CQH8LXMg61wjwUfszMkTu2G93MEm3rUzM5DtDgKoqgJT3tHkjCT1cDemGs9qjN1Tl

လက်ရှိအချိန်မှာ ဖိလစ်ပိုင်နိုင်ငံမြောက်ပိုင်းကို ဖြတ်ကျော်ဝင်ရောက်လျှက်ရှိပြီး တောင်တရုတ်ပင်လယ်ထဲကို ဆက်လက်ဝင်ရောက်လာမဲ့ တိုင်ဖွန်းမုန်တိုင်း TRAMI က ဖူဂျီဝါရာ effect ကြောင့်၊ နောက်ကြောင်းပြန်လှည့်မယ်ဆိုတာအတွက် ဆန်းစစ်အတည်ပြုချက်များကို ထပ်ပြီး လေ့လာတဲ့အခါ -

တောင်တရုတ်ပင်လယ်မှ ဗီယက်နမ်တောင်ပိုင်းကမ်းခြေကို ချဉ်းကပ်လာပြီး အဲ့ဒီနာမှာ လေဖိအားနည်းရပ်ဝန်းအဖြစ်အားပျော့သွားနိုင်မယ်လို့ COAMPS က အတည်ပြုခန့်မှန်းပေးထားတာရှိသလို ဟိုင်နမ်ကျွန်းတောင်ဘက် ပင်လယ်ပြင်မှာတင် အရှေ့ဘက်ကို ပြန်လည်ချိုးကွေ့နိုင်မယ်လို့ CIMSS မှ အတည်ပြုခန့်မှန်းထားပေးတာလဲ ရှိပါတယ်။

လေ့လာသူများအတွက်တော့ စောင့်ကြည့်လေ့လာသင့်တဲ့ ထူးခြားသောမုန်တိုင်းအရွေ့တခုပါဘဲ။

Cyclone DANA (SCS) track IMD

အောက်တိုဘာ ၂၄ ရက် နံနက် ၆ နာရီခွဲမှာ ဘင်္ဂလားပင်လယ်အော် အနောက်အလယ်ပိုင်းမှ ဘင်္ဂလားပင်လယ်အော် အနောက်မြောက်ပိုင်းထဲကို ရွေ့နေပြီ။

ဒီနေ့ မနက်ပိုင်းမှာ မြန်မာနိုင်ငံ မြောက်ပိုင်းတွင်သာ တိမ်ထူထပ်နေတာ တွေ့ရပါတယ်။ ကျန်တပြည်လုံး တိမ်ကင်းစင်သလောက်ရှိနေတာလဲ တွေ့ရပါမယ်။

"မုန်တိုင်းတလုံး၏ အဖျက်စွမ်းအားကို တိုင်းတာခြင်း"
၂၀၂၄ ခုနှစ်၊ အောက်တိုဘာ ၂၄ ရက် နံနက် 01:25 နာရီ

====

မုန်တိုင်းတလုံးရဲ့ အဖျက်စွမ်းအားကို တိုင်းတာသတ်မှတ်ရာမှာ -
လေတိုက်နှုန်းပြင်းအား(INTENSITY)နဲ့ မုန်တိုင်းရဲ့အရွယ်အစားတွေက အရေးကြီးပါတယ်။

မုန်တိုင်းအရွယ်အစားတိုင်းတာတဲ့အခါ လေတိုက်နှုန်း 15 m/s(တနာရီ ၃၅ မိုင်)ထက်ကျော်လွန်တဲ့ လေစီးကြောင်းစက်ဝန်းရဲ့အချင်းကို တိုင်းတာရတာဖြစ်ပြီး-
🔸 အချင်း ၅၀၀ ကီလိုမီတာ(၃၁၀ မိုင်)ထက်လျော့နည်းရင် သေးငယ်တဲ့မုန်တိုင်းအရွယ်အစား(Small Storm)
🔸 အချင်း ၅၀၀ ကီလိုမီတာ မှ ၇၉၉ ကီလိုမီတာ(၃၁၀ မိုင် မှ ၄၃၅ မိုင်)ရှိနေရင် 🔸 ကြီးမားတဲ့ မုန်တိုင်းအရွယ်အစား(Large Storm)
🔸 ၈၀၀ ကီလိုမီတာ အထက်(၄၉၇ မိုင်နှင့်အထက်)ရှိနေရင် အလွန်ကြီးမားသောမုန်တိုင်းအရွယ်အစား(Super Large Storm)လို့ သတ်မှတ်ပါတယ်။

မိုင်တွေ ကီလိုမီတာတွေနဲ့တိုင်းတာပြီးတဲ့အခါ မှတ်ရလွယ်အောင် ပြောရရင် -
🔸 အားပြင်းသော်လည်း သေးငယ်တဲ့မုန်တိုင်း(Strong but Small)
🔸 အားမပြင်းသော်လည်း ကြီးမားတဲ့မုန်တိုင်း(not strong but large)
🔸 အားပြင်းပြီးကြီးမားတဲ့မုန်တိုင်း(strong and large) ဆိုပြီး ခွဲခြားသတ်မှတ်နိုင်ရင် ဒီမုန်တိုင်းရဲ့ အဖျက်စွမ်းအားဘယ်လောက်အထိ ကြီးမားနိုင်မယ်၊ လျော့နည်းနိုင်မယ်ဆိုတာတွေ ခန့်မှန်းလို့ ရလာပါမယ်။


မုန်တိုင်းရဲ့ အဖျက်စွမ်းအားကိုသိပြီဆိုရင် မုန်တိုင်းဝင်တိုက်မဲ့လမ်းကြောင်းပေါ်က ဒေသသည် -
🔸 လူဦးရေထူထပ်တာလား၊ လူဦးရေနည်းသလား
🔸 တိုက်တာအဆောက်အဦတွေရှိတဲ့ လူနေရပ်ကွက်/မြို့/ရွာလား ဒါမှမဟုတ်
🔸 ခိုင်ခန့်မှုအားနည်းတဲ့ သစ်သားအိမ်/တဲအိမ်တွေလား ဆိုတာအပြင်
🔸 အဲ့ဒီဒေသရဲ့ မြေပြင်အနေအထားက ပင်လယ်ရေမျက်နှာပြင်အထက် ဘယ်နှစ်ပေရှိမလဲ
🔸 မုန်တိုင်းဒီရေ(Storm Surge)တွေ အမြင့်ဘယ်နှစ်ပေနဲ့ ဝင်ရောက်လာရင်/တက်လာရင် ရေလွှမ်းမိုးမှုကဘယ်နှစ်ပေမြင့်သွားနိုင်မလဲ
🔸 ရေထုအဖျက်စွမ်းအားကိုခံနိုင်ရည်ရှိမဲ့ ခိုင်ခန့်တဲ့ လှိုင်းတားတမံတွေတည်ဆောက်ထားတာရောရှိရဲ့လား ... စသည်ဖြင့် ဆန်းစစ်သုံးသပ်ပြီး
🔸 ကယ်ဆယ်ရွေ့ပြောင်းပေးရေးအစီအစဉ်ကို အချိန်မှီဆက်လုပ်ကြရပါမယ်။

🔸 ဆိုင်ကလုန်းမုန်တိုင်း "DANA" အခြေခံတိုင်းတာတွက်ချက်ထားတာဖြစ်လို့ ဒီလိုမျိုး မုန်တိုင်းကြီးတွေတိုက်ရိုက်ဝင်ရောက်တာရှိလာရင် အသက်ဆုံးရှုံးမှုလျော့နည်းနိုင်သမျှလျော့နည်းအောင် ဘယ်လိုတွေ စီမံဆောင်ရွက်ထားမလဲဆိုတဲ့အသိ ကျနော်တို့ ပြည်သူတွေမှာ ရှိနေဘို့လဲ လိုအပ်တာကြောင့် ဒီ article ကို ရေးပေးရတာ ဖြစ်ပါတယ်။

🔸 MMWeather Knowledge Site Article Link:
https://www.mmweather.org/cyclone-prediction-verification#h.8o1vbou3xgac

"FUJIWHARA EFFECT ဟုခေါ်သည့် "ဖူဂျီဝါရာသက်ရောက်မှု"အကြောင်းကို မိုးလေဝသပညာရှင်ဆရာကြီးများထံမှလည်ကောင်း၊ ပြည်ပမိုးလေဝသပညာရှင်များထံမှလည်းကောင်း များစွာကြားခဲ့၊ သိခဲ့၊ မှတ်သားခဲ့ရဘူးပါသည်။
ဤဝေါဟာရကို ဂျပန်လူမျိုး မိုးလေဝသပညာရှင် Sakuhei Fujiwhara က စတင်တွေ့ရှိသောကြောင့် အဆိုပါ မိုးလေဝသပညာရှင်၏ အမည်ဖြင့် Fujiwhara Effect ဟုခေါ်ဝေါ်သတ်မှတ်ခဲ့ကြပြီး လေဖိအားနည်းရပ်ဝန်း သို့မဟုတ် မုန်တိုင်း ၂ လုံး နီးကပ်စွာဖြစ်ပေါ်သည့်အခါ ဤသက်ရောက်မှုကြောင့် ဖြစ်ပေါ်လာနိုင်သည့်နောက်ဆက်တွဲဖြစ်စဉ်များကို လေ့လာခဲ့ကြပါသည်။

ဖူဂျီဝါရာသက်ရောက်မှုသည် ပင်လယ်တခုအတွင်း၊ သို့မဟုတ် ကပ်လျှက်တည်ရှိနေသည့် ပင်လယ် ၂ ခုတွင် လေဖိအားနည်းရပ်ဝန်း/မုန်တိုင်း ၂ ခုဖြစ်ပေါ်ပြီး တခုနှင့်တခုအကွာအဝေး မိုင် ၁၂၀၀ သို့မဟုတ် ၂၀၀၀ ကီလိုမီတာအတွင်းရှိနေသည့်အခါ ယင်းတို့ ၂ ခုမှ အပြန်အလှန်တုန့်ပြန်မှုကြောင့် - အားပို၍ငယ်သော လေဖိအားနည်းရပ်ဝန်း/မုန်တိုင်းသည် အားပိုကြီးသည့် လေဖိအားနည်ရပ်ဝန်း/မုန်တိုင်းနှင့် ပူးပေါင်းသွားပြီး ပိုမိုအားကောင်းသော မုန်တိုင်း ၁ ခု ဖြစ်ပေါ်လာစေခြင်းဖြစ်ကြောင်း ကနဦးမှတ်သားခဲ့ရပါသည်။

အသေးစိတ်ထပ်မံလေ့လာရာမှ ဤသက်ရောက်မှုသည် မုန်တိုင်း၂ လုံးအား အောက်ဖေါ်ပြပါ သက်ရောက်မှုများကို ဖြစ်ပေါ်စေကြောင်းတွေ့ရှိရပါသည် -
(၁) မုန်တိုင်း တလုံးနှင့်တလုံး လှည့်ပတ်ရွေ့လျားစေခြင်း
(၂) မုန်တိုင်း တလုံးနှင့်တလုံး ဆွဲငင်အားဖြင့်ပေါင်းစည်းသွားပြီး ပိုမိုအားကောင်းလာစေခြင်း
(၃) မုန်တိုင်းတလုံးနှင့်တလုံး တွန်းကန်၍ ပိုမိုဝေးကွာသွားစေခြင်း

Fujiwhara Effect ကြောင့် တောင်တရုတ်ပင်လယ်မှ တိုင်ဖွန်း TRAMI နောက်ကြောင်းပြန်လှည့်ခြင်းဖြစ်စဉ်(ကြိုတင်ခန့်မှန်း)
တောင်တရုတ်ပင်လယ်အတွင်း ဗီယက်နမ်ကမ်းခြေသို့ ဦးတည်ရွေ့လျားသည့် တိုင်ဖွန်းမုန်တိုင်း TRAMI သည်၊ နောက်ကြောင်းပြန်လှည့်ကာ ဖိလစ်ပိုင်နိုင်ငံအရှေ့ဘက်တွင် တိုင်ဖွန်းမုန်တိုင်းဖြစ်လာမည့်(လက်ရှိအချိန်တွင် INVEST-98W)၏ ဆွဲအားကြောင့် အောက်တိုဘာလ ၂၈ ရက်နေ့တွင် နောက်ကြောင်းပြန်လှည့်မည်ဖြစ်ကြောင်း ကြိုတင်ခန့်မှန်းချက်များမှ သိရှိကြရပြီးဖြစ်ပါသည်။

ECMWF Model Forecast
အောက်တိုဘာ ၃၁ ရက် နံနက် ၁ နာရီတွင် တဘက်ပင်လယ်မှ(လက်ရှိအချိန်တွင် INVEST-98W)သည် ဂျပန်နိုင်ငံတောင်ဘက်ပင်လယ်ပြင်ဆီသို့ ရွေ့လျားရင်းအားပျော့သွားသည့်အတွက် Fujiwhara Effect ပျက်ပြယ်ပြီး တိုင်ဖွန်း TRAMI သည် အနောက်ဘက်သို့ ပြန်လှည့်လာစဉ် မူလလမ်းကြောင်းမှ မြောက်ဘက်သို့ပိုမိုရောက်ရှိသွားပြီးနောက် ဟိုင်နမ်ကျွန်း၏အရှေ့မြောက်ဘက် တရုတ်ပြည်မကမ်းခြေကိုဖြတ်ကျော်ဝင်ရောက်သွားမည်ဟု ECMWF ကြိုတင်ခန့်မှန်းချက်တွင် တွေ့ရပါသည်။

GFS Model Forecast
GFS Model ကြိုတင်ခန့်မှန်းချက်တွင်မူ လက်ရှိ INVEST-98W က အားပိုကောင်းလာပြီး တိုင်ဖွန်း TRAMI ကို ဝါးမြိုသွားမှာဖြစ်ကြောင်း(TRAMI လုံးဝပျက်ပြယ်သွားမှာဖြစ်ကြောင်း)တွေ့ရပါသည်။

AI Forecast
ECMWF AI forecast တွင် လက်ရှိ INVEST-98W ၏ သက်ရောက်မှုကြောင့် တိုင်ဖွန်း TRAMI နောက်ကြောင်းပြန်လှည့်အပြီး FUJIWHARA EFFECT သက်ရောက်မှုမှလွတ်မြောက်ချိန်တွင်အားလျာ့သွားကာ ဗီယက်နမ်ကမ်းခြေကို လေဖိအားနည်းရပ်ဝန်းအဖြစ်ဖြင့်သာ ချည်းကပ်ဖြတ်ကျော်ပြီး အားပျော့ပျက်ပြယ်သွားမှာဖြစ်ကြောင်း တွေ့ရပါသည်။

ယခု တွေ့ရှိပြီး ကြိုတင်ခန့်မှန်းချက်များကြောင့် တိုင်ဖွန်းမုန်တိုင်း TRAMI သည် -
(၁) ရွေ့လျားလာရာ အရှေ့ဘက်အရပ်သို့ ဂငယ်ကွေ့(U-TURN)ပြန်လည်ကွေ့နိုင်ပါမည်။
(၂) မူလလမ်းကြောင်းအတိုင်း အနောက်ဘက်(ဗီယက်နမ်ကမ်းခြေဘက်သို့) ပြန်လည်ရွေ့လျားချိန်တွင် လုံးဝအားပျော့ပျက်ပြယ်ခြင်း(သိ့မဟုတ်)ဗီယက်နမ်ကမ်းခြေအနီးတွင် အားပျော့ပျက်ပြယ်ခြင်း ၂ ခု အနက် ၁ ခု ဖြစ်နိုင်ကြောင်းတွေ့ရပါသည်။

ထို့ကြောင့် တောင်တရုတ်ပင်လယ်မှ တိုင်ဖွန်းမုန်တိုင်း TRAMI ကြောင့် မုန်တိုင်းအကြွင်းအကျန်များ မြန်မာနိုင်ငံဘက်သို့ရွေ့လျားလာပြီး မိုးများနိုင်/ရေကြီးနိုင်မည့် အန္တရာယ်မရှိနိုင်ပါကြောင်း လေ့လာသုံးသပ်တင်ပြလိုက်ပါသည်။

၂၀၂၄ ခုနှစ် အောက်တိုဘာလအတွင်း ဖြစ်ပေါ်နိုင်မည့် ထူးခြားမိုးလေဝသအခြေအနေများ
(စက်တင်ဘာ ၂၆ ရက် ညနေ ၄ နာရီ ၅၀ မိနစ်)

====
🔸 မိုးလေဝသဖြစ်နိုင်ချေ
၂၀၂၄ ခုနှစ်ရဲ့ စက်တင်ဘာလ အကုန် အောက်တိုဘာလအကူးမှာ -
တောင်တရုတ်ပင်လယ်ရဲ့ မြောက်ပိုင်းနဲ့ အရှေ့ဘက်(ဖိလစ်ပိုင်အရှေ့)မှာ မုန်တိုင်းတွေဖြစ်လာပေမဲ့ တောင်တရုတ်ပင်လယ်ထဲကို ဝင်လာမဲ့ အရိပ်အယောင်မတွေ့ရပါဘူး။

🔸 တရုတ်ပြည်မကြီးပေါ်နှင့် အိန္ဒိယသမုဒ္ဒရာမြောက်ပိုင်း၊ အာရေဗျပင်လယ်နှင့် ဘင်္ဂလားပင်လယ်အော်တို့၏ လေဖိအားများ/လေဖိအားနည်းကွာခြားချက်များကြောင့် အရှေ့မြောက်ဘက်မှ လေစီးကြောင်းနှင့်အတူ မိုးတိမ်များရွေ့လျားဝင်ရောက်လာနိုင်သည့် အခြေအနေကိုလည်းတွေ့နေရပါတယ်။ (ပုံ-၁)

🔸 ထူးခြားသော မိုးရွာသွန်းနိုင်သည့်အခြေအနေ
💦💦 ကချင်ပြည်နယ်နှင့် စစ်ကိုင်းတိုင်းအထက်ပိုင်း၊ ဧရာဝတီမြစ်နှင့်ချင်းတွင်းမြစ်ဖျားပိုင်းတို့တွင် မိုးရွာသွန်းမှု အလွန်များနိုင်မည့်အခြေအနေတွေ့နေရပါသည်။ (ပုံ-၂)

🔸 အောက်တိုဘာလအတွင်းပြည်နယ်နှင့်တိုင်းများအလိုက် ရွာသွန်းနိုင်သည့် မိုးအခြေအနေ (ပုံ-၃)
💦 ကချင်ပြည်နယ်၊ စစ်ကိုင်းတိုင်းအထက်ပိုင်း၊ ချင်းပြည်နယ်၊ ရခိုင်ပြည်နယ်၊ မကွေးတိုင်းတောင်ပိုင်း၊ နေပြည်တော်၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်း တို့တွင် နှစ်စဉ်ရွာသွန်းမြဲအထက် မိုးရွာသွန်းပြီး၊

💦 စစ်ကိုင်းတိုင်းအောက်ပိုင်း၊ မန္တလေးတိုင်း၊ ရှမ်းပြည်နယ်၊ ကယားပြည်နယ်၊ ကရင်ပြည်နယ်မြောက်ပိုင်းတို့တွင် နှစ်စဉ်ရွာသွန်းမြဲမိုးရေချိန်အတိုင်းသာ ရွာသွန်းနိုင်မည်ဖြစ်ကြောင်း ... တွေ့ရပါတယ်။

မြန်မာပြည်မှာ ရာသီဉတုပြောင်းလဲခြင်းတွေကြောင့် စိုက်ပျိုးရေးတောင်သူများနဲ့ ပြည်သူတွေမှာ ဘယ်လိုသဘာဝဘေးတွေနဲ့ တွေ့ကြုံရတယ်၊ မုတ်သုံအကြောင်း၊ မိုးကြိုးလျှပ်စီးအကြောင်းစသည်ဖြင့် မိုးလေဝသပညာရှင် ဆရာကြီးဒေါက်တာဦးထွန်းလွင်က ဟောပြောပွဲတခုမှာ တော်တော်လေးအသေးစိတ်ရှင်းပြပေးထားတာ ဖြစ်ပါတယ်။ သိမှတ်လေ့လာစရာတွေ များတာကြောင့် ၁ နာရီကျော်ကြာတဲ့ ဒီ ဟောပြောချက်တွေက အရမ်းကို တန်ဘိုးကြီးမားပါတယ်။

"လေဖိအားနည်းရပ်ဝန်း အားပျော့သွားပြီဖြစ်သော်လည်း ကုန်းတွင်းတွင် ဆက်လက်တည်ရှိနေဆဲ"
(စက်တင်ဘာ ၂၅ ရက်၊ မွန်းလွဲ ၂ နာရီ)

=====
ဘင်္ဂလားပင်လယ်အော်အနောက်မြောက်ပိုင်းတွင် ဖြစ်ပေါ်ခဲ့သည့် လေဖိအားနည်းရပ်ဝန်းသည် အနောက်ဘက် အိန္ဒိယနိုင်ငံကုန်းတွင်းသို့ ရွေ့လျားရင်း အားပျော့လာပြီဖြစ်ကြောင်း၊ လေထုအထက်အလွှာ ၅ ကီလိုမီတာအထက်အထိ ဆက်လက်တည်ရှိနေဆဲဖြစ်ကြောင်း၊ အိန္ဒိယမိုးလေဝသဌာနမှ နံနက် ၉ နာရီခွဲအချိန်တွင် ထုတ်ပြန်ထားပါသည်။

ဤအခြေအနေကြောင့်
စက်တင်ဘာလ ၂၅ ရက် ညနေ ၄ နာရီမှ စက်တင်ဘာ ၂၆ ရက် ညနေ ၄ နာရီအထိ(၂၄ နာရီအတွင်း) -
မန္တလေးတိုင်း(မန္တလေးမြို့အထက်ဘက်)၊ စစ်ကိုင်းတိုင်း(မုံရွာမြို့အထက်ဘက်)၊
နာဂကိုယ်ပိုင်အုပ်ချုပ်ခွင့်ရဒေသများ၊ ကချင်ပြည်နယ် စသည့် ပြည်နယ်/တိုင်းဒေသများတွင်သာ မိုးရေချိန် ၃၀ မီလီမီတာမှ ၅၀ မီလီမီတာ(၁.၂ လက်မခန့်မှ ၂ လက်မခန့်အထိ)မိုးများပြီး ...

ကျန်ပြည်နယ်တိုင်းများတွင် အများဆုံး မိုးရေချိန် ၁၅ မီလီမီတာအောက်(၀.၆ လက်မခန့်)မျှသာ မိုးရွာနိုင်မည်။

ဘင်္ဂလားပင်လယ်အော် အနောက်မြောက်ပိုင်းမှ လေဖိအားနည်းရပ်ဝန်းအခြေအနေ
စက်တင်ဘာ ၂၅ ရက် နံနက် ၁၀ နာရီ
=======

ဘင်္ဂလားပင်လယ်အော် အနောက်မြောက်ပိုင်းမှာ ဖြစ်နေတဲ့ လေဖိအားနည်းရပ်ဝန်းက စက်တင်ဘာ ၂၅ ရက် နံနက် ၆ နာရီ ခွဲအချိန်က စ ပြီး အိန္ဒိယအရှေ့ဘက် အန်ဒရာပရာဒက်ရှ်ပြည်နယ်နဲ့ ဩရိဿပြည်နယ်ကမ်းခြေကို ဖြတ်ကျော်ဝင်ရောက်နေပြီဖြစ်ပါတယ်။

နေ့လည် ၁၂ နာရီခွဲရင် ဖြတ်ကျော်ဝင်ရောက်မှုပြီးသွားမယ်လို့ GEFS model ခန့်မှန်းချက်မှာတွေ့ရပြီး၊ ည ၆ နာရီခွဲမှာတော့ အိန္ဒိယနိုင်ငံကုန်းတွင်းထဲအထိ ဝင်ရောက်သွားပြီးဖြစ်မယ်လို့ခန့်မှန်းထားပါတယ်။

ဒီအခြေအနေကြောင့် ဘင်္ဂလားပင်လယ်အော်နဲ့ ကပ္ပလီပင်လယ်ပြင်မှာ အားကောင်းနေတဲ့ အနောက်တောင်မုတ်သုံလေ အားလျော့သွားကာ စက်တင်ဘာ ၂၆ ရက်နေ့မှာ တနိုင်ငံလုံးအတိုင်းအတာနဲ့ မိုးအားလျော့ကျသွားနိုင်ပါမယ်။

အနောက်တောင်မုတ်သုံလေအားကောင်းခြင်း/အားလျော့ခြင်းအခြေအနေ ၂ မျိုးနဲ့ အရှေ့ဘက်မှ ဝင်ရောက်လာတဲ့ လေပွေလှိုင်းများအနေအထားပေါ်မူတည်ပြီး မုတ်သုံဆုတ်ခွာမှုပြီးစီးချိန်နဲ့ မိုးနှောင်းကာလကုန်ဆုံးချိန်အထိ မွန်းလွဲညနေပိုင်းတွေမှာတော့ မိုးရွာသွန်းခြင်းများ ဆက်လက်ဖြစ်ပေါ်နေနိုင်ပါဦးမယ်။

"အိန္ဒိယမိုးလေဝသဋ္ဌာနမှ လေဖိအားနည်းရပ်ဝန်းဖြစ်ကြောင်းကြေညာ၊
ဆက်လက်အားကောင်းလာနိုင်မည့်အခြေအနေမရှိ"
စက်တင်ဘာ ၂၄ ရက် နေ့လည် ၁ နာရီ ၄၀ မိနစ်
=====

စက်တင်ဘာ ၂၄ ရက် နေ့လည် ၁၂ နာရီ ၃၀ မိနစ်မှာ အိန္ဒိယမိုးလေဝသဋ္ဌာနက ဘင်္ဂလားပင်လယ်အော် အနောက်အလယ်ပိုင်းနှင့် ဆက်စပ်လျှက်ရှိသည့် ဘင်္ဂလားပင်လယ်အော်အနောက်မြောက်ပိုင်းတွင် လေဖိအားနည်းရပ်ဝန်းဖြစ်ပေါ်ကြောင်း ကြေညာပါတယ်။

သင်္ချာပုံစံပြုမော်ဒယ်အများစုရဲ့ ကြိုတင်ခန့်မှန်းချက်များအရ ဆက်လက်အားကောင်းလာနိုင်မဲ့အခြေအနေမရှိပဲ အနောက်ဘက်(အိန္ဒိယကမ်းခြေဘက်)ကို ဦးတည်ရွေ့လျားသွားမှာဖြစ်ကြောင်း တွေ့ရပါတယ်။

ဒီလေဖိအားနည်းရပ်ဝန်းအရှိန်သက်ရောက်မှုနည်းပါးပေမဲ့ -
သူ့ရဲ့ညာဘက်ခြမ်းက ရခိုင်ပြည်နယ်၊ ချင်းပြည်နယ်၊ ရှမ်းပြည်နယ်၊ ကယားပြည်နယ်နဲ့ တနင်္သာရီတိုင်းတောင်ပိုင်းဒေသအချို့မှာ မိုးအသင့်အတင့်မှ မိုးများနိုင်ပြီး၊ ကျန်ပြည်နယ်တိုင်းဒေသတွေမှာ မိုးအသင့်အတင့်သာရွာနိုင်မဲ့ အခြေအနေများ စက်တင်ဘာ ၂၅ ရက် ညပိုင်းအထိ ဆက်လက်ဖြစ်ပေါ်နေနိုင်ပါမယ်။

စက်တင်ဘာလ ၂၆ ရက် နေ့မှ စ ပြီး တနိုင်ငံလုံးမှာ မိုးအားလျော့နည်းသွားနိုင်ပါတယ်။

စက်တင်ဘာလ လကုန်ပိုင်းတွင် ဖြစ်လာနိုင်မည့် မိုးလေဝသအခြေအနေများကို ကြိုတင်ခန့်မှန်းခြင်း
Reference: ECMWF ENSEMBLE, GFS ENSEMBLE models
စက်တင်ဘာ ၂၄ ရက် နံနက် ၀၀:၄၅ နာရီ
=====
🔸 ဖြစ်ပေါ်ပြီးခဲ့သည့် သဘာဝဘေးအခြေအနေများ -
တိုင်ဖွန်းမုန်တိုင်း "ယာဂိ" အကြွင်းအကျန်များဝင်လာကာ စက်တင်ဘာ ၁၀-၁၁ ရက်များအတွင်း မိုးအလွန်များခဲ့တာကြောင့် ရေကြီးရေလျှံခြင်းတွေ ဆိုးဆိုးရွာရွာဖြစ်ပေါ်ခဲ့ပြီး ခုချိန်အထိ အဲ့ဒီဒေသတွေအတွင်းမှ နာလန်ပြန်ထူနိုင်ဘို့ ကြိုးစားနေကြရဆဲပါဘဲ။ အရင်လိုပြန်လည်ဖြစ်လာနိုင်ဘို့က လနဲ့ချီပြီး ကြာမြင့်သွားနိုင်သလို စားဝတ်နေရေးအခက်အခဲတွေပုံမှန်ပြန်ဖြစ်လာဘို့က နှစ်နဲ့ချီပြီးတောင် ကြာမြင့်သွားနိုင်ပါတယ်။

အဲ့ဒီနောက်ပိုင်း အပူပိုင်းမုန်တိုင်း "ဆိုးလစ်" ကတော့ စိုးရိမ်ပူပန်ခဲ့ကြသလောက်မပြင်းထန်တော့ပဲ နေရာကျဲကျဲမိုးနည်းနည်းများခဲ့ပြီးခဲ့ကာ သူ့အရှိန်တွေနဲ့ ဘင်္ဂလားပင်လယ်အော်အတွင်း လေဖိအားနည်းရပ်ဝန်းအသစ်တခုဖြစ်လာနိုင်မဲ့ ခြိမ်းခြောက်မှုက စက်တင်ဘာ ၂၃-၂၄ ရက်တွေမှာဖြစ်လာနိုင်ကြောင်း ကြိုတင်ခန့်မှန်းခဲ့ကြပါတယ်။

"ယာဂိ" ကြောင့်ရေကြီးခဲ့ပြီးကတည်းက အင်တာနက်လိုင်းတွေနှေးကွေးကုန်တာကြောင့် သတင်းအချက်အလက်များများယူကာ မုန်တိုင်းတွေကို အသေးစိတ်လေ့လာဆန်းစစ်နိုင်တဲ့ site တချို့ လုံးဝတက်မရဖြစ်ခဲ့ပြီး ဒီနေ့တော့ ပြန်ရလာပါတယ်။

🔸 ထပ်မံဖြစ်ပေါ်လာနိုင်သည့် မိုးလေဝသအခြေအနေများ
လက်ရှိဘင်္ဂလားပင်လယ်အော်အလယ်ပိုင်းမှာ နောက် ၂၄ နာရီအတွင်း ဆက်လက်ဖြစ်လာနိုင်မဲ့လေဖိအားနည်းရပ်ဝန်း အခြေအနေကို လေ့လာဆန်းစစ်တဲ့အခါ -

လက်ရှိဖြစ်ပေါ်နေတဲ့ လေဖိအားနည်း cell မှ အားပိုမိုကောင်းလာပြီး စက်တင်ဘာ ၂၄ ရက် နံနက်ပိုင်းမှာ လေဖိအားနည်းရပ်ဝန်းဖြစ်လာနိုင်ကြောင်း၊ အနောက်ဘက်ကို ဆက်လက်ရွေ့လျားနိုင်ပြီး အားအကောင်းဆုံးအချိန် စက်တင်ဘာ ၂၅ ရက် ည ပိုင်းမှာ လေဖိအားနည်းရပ်ဝန်း ဖြစ်လာပြီးတဲ့နောက် အိန္ဒိယနိုင်ငံ အရှေ့ဘက်ကမ်းခြေကို ဖြတ်ကျော်ဝင်ရောက်ကာ ကုန်းတွင်း လေဖိအားနည်းရပ်ဝန်းအဖြစ် အနောက်ဘက်ကို ဆက်လက်ရွေ့လျားသွားမှာဖြစ်ကြောင်း ECMWF ENS model, GFS ENS(GEFS) model တွေရဲ့ ခန့်မှန်းချက်မှာတွေ့ရပါတယ်။

🔸 ခြုံငုံသုံးသပ်ချက်
စက်တင်ဘာလကုန်အထိ ဖြစ်ပေါ်နိုင်သည့် မိုးအခြေအနေ -
"တောင်တရုတ်ပင်လယ်ဘက်မှာ အနောက်ဘက်(ဗီယက်နမ်ဘက်)ရွေ့လျားလာနိုင်တဲ့မုန်တိုင်းများ ထပ်မံမဖြစ်မချင်း" ... မြန်မာနိုင်ငံဘက်က မိုးများနိုင်မဲ့ အခြေအနေတွေဟာ စက်တင်ဘာ ၂၅ ရက်နောက်ပိုင်းက စ ပြီး လျော့နည်းသွားတော့မှာဖြစ်ပါကြောင်း ခန့်မှန်းရပါတယ်။

ယနေ့ ညနေ ၄ နာရီ ၄၅ မိနစ်အချိန်အထိ Weather Station များမှ ရရှိသော ရန်ကုန်တိုင်းအတွင်းမှ မိုးရွာသွန်းမှု မှတ်တမ်း -
ထန်းတပင် - ၁.၁ မီလီမီတာ = ၀.၀၄ လက်မ
လှိင်သာယာ - ၂၈.၂ မီလီမီတာ = ၁.၁၁ လက်မ
မင်္ဂလာဒုံ - ၂.၂ မီလီမီတာ = ၀.၀၉ လက်မ
လှည်းကူး - ၃၂.၇ မီလီမီတာ = ၁.၂၇ လက်မ
မှော်ဘီ - ၁၅ မီလီမီတာ = ၀.၅၉ လက်မ
လှိုင်သာယာနှင့် လှည်းကူးတွင် မိုးအနည်းငယ်ဆက်လက်ရွာနေဆဲဖြစ်သည်။

CHAT မှာ ပြောပြီးသားတွေကို ပြန်စုပြီး info post ပြန်တင်ပေးတာပါ။
=====
လေဖိအားနည်းရပ်ဝန်းက ဖြစ်လာမှ တင်ပေးပါတော့မယ် IMD အိန္ဒိယ မိုးလေဝသက နောက် ၂၄ နာရီအတွင်း ဖြစ်လာနိုင်မယ် ပြောထားပါပြီ။
နေပြည်တော်အောက်ဘက် တောင်ပိုင်းဒေသတွေနဲ့ အထက်ဘက် ကချင်ပြည်နယ် စစ်ကိုင်းတိုင်းအထက်ပိုင်းတွေမှာတော့ ၂၅ ရက်အထိ မိုးဆက်ရွာ၊ နေရာကွက်ပြီးမိုးများ ... ဖြစ်နေပါဦးမယ်။
ကချင်ပြည်နယ်၊ မွန်ပြည်နယ်၊ ကရင်ပြည်နယ်၊ ရခိုင်ပြည်နယ်မြောက်ပိုင်း၊ မန္တလေးတိုင်းအထက်ပိုင်း၊ စစ်ကိုင်းတိုင်းအထက်ပိုင်း၊ ရန်ကုန်တောင်ပိုင်း(ခရမ်း-သုံးခွဘက်)တွေမှာ နောက် ၄၈ နာရီ ၂၅ ရက်အထိ မိုးများ(၇၉ မီလီမီတာ - ၁ ရက်ကို မီလီမီတာ ၃၀ အထက်)မိုးရေချိန်များများ မိုးရွာနေပါဦးမယ်။
(စက်တင်ဘာ ၂၃ရက် ညနေ ၄ နာရီ)

၂၃ စက်တင်ဘာ နံနက် ၀၀:၄၀ နာရီတွင် -
လေဖိအားနည်းဆဲလ်(LPC) သိသာသောရွေ့လျားမှုမရှိ အနည်းငယ်အားပိုမိုကောင်းလာသည်ကိုတွေ့ရသည်။

စစ်တွေပေါ်နဲ့ ဘင်္ဂလားဒေ့ရှ်ပေါ် တိမ်ထုတော်တော်ထူနေတာဘင်္ဂလားဒေ့ရှ်မှာတော့ မိုးများမဲ့အကြောင်း သတိပေးနေပြီ။
ျနော်တို့ဘက်တော့ ပြောပြီးသားမို့ ထပ်မပြောတော့တာပါ။
စစ်ကိုင်းတိုင်းအောက်ပိုင်း၊ ချင်းပြည်နယ်၊ ရခိုင်ပြည်နယ်မြောက်ပိုင်းနဲ့ မကွေးတိုင်းတွေ မိုးများလိမ့်မယ်။
ရန်ကုန်တိုင်းတောင်ဘက်ခြမ်းနဲ့ မွန်ပြည်နယ်လဲ တိမ်တွေအ‌ရှေ့ဘက်ကဝင်လာတာ များပါတယ်။

ဘင်္ဂလားပင်လယ်အော်တွင် အစပျိုးလာသည့် သိသာထင်ရှားခြင်းမရှိသေးသော လေဖိအားနည်းရပ်ဝန်းအခြေအနေတင်ပြခြင်း
(ECMWF, GFS, ICON forecasts .. at 22SEP 1200MST)
===
လက်ရှိအချိန်မှာ အားနည်းနေဆဲဖြစ်ပြီး(ရေပြင်ညီလေတိုက်နှုန်း တနာရီ ၂၅ မိုင်ခန့်သာရှိနေသေးသည်)၊ တိမ်ထုစုဖွဲ့မှုသည်လည်း သိသာထင်ရှားခြင်းမရှိသေးတာကြောင့် သက်ဆိုင်ရာမိုးလေဝသဌာနများမှ တရားဝင်ထုတ်ပြန်ကြေညာခြင်းမရှိသေးပါ။ အိန္ဒိယမိုးလေဝသဌာနကတော့ ၂၃ ရက်နေ့မှာ လေဖိအားနည်းရပ်ဝန်းဖြစ်လာနိုင်ကြောင်း ကြိုတင်ခန့်မှန်းကြေညာထားပါတယ်။
လေစီးကြောင်းများအခြေအနေကိုလေ့လာဆန်းစစ်ကြည့်တဲ့အခါ စက်တင်ဘာ ၂၂ ရက် နေ့လည် ၁၂ နာရီမှာ ECMWF, GFS နဲ့ ICON model များက ရတဲ့အချက်အလက်တွေအရ -
ပင်လယ်ရေပြင်ညီအမြင့်(MSL)မှ အမြင့်ပေ ၅၀၀၀(850hPa height)နဲ့ အမြင့်ပေ ၁၄,၀၀၀ အထိ လက်ဝဲရစ်လေစီးကြောင်းဆက်စပ်ဖြစ်ပေါ်နေပြီးဖြစ်တာကြောင့် မြောက်လတ္တီတွဒ် 14.733°N, အရှေ့လောင်ဂျီတွဒ် 87.948°E မှာ လေဖိအားနည်းရပ်ဝန်းဖြစ်နေပြီလို့ ပြောလို့ ရပါပြီ။
လက်ရှိတွေ့ရတဲ့ အထက်အမြင့်လေထုလွှာအတွင်းမှ လေဖိအားနည်းဗဟိုချက်က အနောက်-အနောက်တောင်ဘက်ကိုတိမ်းစောင်းနေတာကြောင့် အနောက်ဘက်ကိုဆက်လက်ရွေ့လျားနိုင်ကြောင်း၊ မြန်မာနိုင်ငံဘက်ကို ဦးတည်ရွေ့လျားမှာမဟုတ်ကြောင်း ပထမဆုံးတင်ပြလိုပါတယ်။
ဒုတိယတချက်အနေနဲ့ ဒီလေဖိအားနည်းရပ်ဝန်းရဲ့အရှိန်ကြောင့် သူ့ရဲ့ညာဘက်ခြမ်း၊ မြန်မာနိုင်ငံအတွင်းမှ ရခိုင်ပြည်နယ်၊ ကချင်ပြည်နယ်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ချင်းပြည်နယ်တောင်ပိုင်း၊ ရှမ်းပြည်နယ်တောင်ပိုင်း၊ ကယားပြည်နယ်၊ ပဲခူးတိုင်း(အရှေ့ခြမ်း)၊ ဧရာဝတီတိုင်းကရင်ပြည်နယ်၊ မွန်ပြည်နယ်နဲ့ တနင်္သာရီတိုင်းတွေမှာ နောက်လာမဲ့ ၇၂ နာရီ(၃ ရက်အတွင်း)မိုးရေချိန် တရက်ပျမ်းမျှ ၃၀ မီလီမီတာအထက်ရွာသွန်းပြီး မိုးသည်းထန်နိုင်မဲ့အခြေအနေများဖြစ်ပေါ်နိုင်ပါတယ်။
ပုံမှာ ၃ ရက်အတွင်းရွာသွန်းနိုင်မဲ့မိုးရေချိန်အနည်းအများကြည့်ရန် အရောင်အညွှန်းထည့်ပေးထားပါတယ်။

နံနက် ၁ နာရီ ၁၅ မိနစ် AWN Radar

ထိုင်းနိုင်ငံ TAK မြို့အ‌ရှေ့ဘက် ၃၆ မိုင်ခန့်၊ မြဝတီမြို့ရဲ့အရှေ့ဘက် ၇၇ မိုင်ခန့်ဝေးကွာပြီး အထက်လေထုလွှာအတွင်းမှာ ဆက်လက်ရွေ့လျားနေတဲ့ အပူပိုင်းမုန်တိုင်း SOULIK ၏ အကြွင်းအကျန်လေပွေလှိုင်းက စက်တင်ဘာလ ၂၂ ရက် နံနက်ပိုင်းနှင့် နေ့လည်ပိုင်းအချိန်၊ မုတ္တမကွေ့၊ ပဲခူးတိုင်းအရှေ့တောင်ပိုင်းနဲ့ ရန်ကုန်တိုင်းမြောက်ပိုင်းကိုဖြတ်ကျော်ပြီး ဧရာဝတီတိုင်းအပေါ်ကို ရောက်လာတဲ့အခါ၊ ဘင်္ဂလားပင်လယ်အော်အတွင်းအားယူစပြုနေတဲ့ အထက်လေထုလွှာအတွင်းက လေဝဲစီးကြောင်း(UACC)နဲ့ပေါင်းသွားမယ်လို့ ခန့်မှန်းရပါတယ်။
ပြီးမှ တဖြည်းဖြည်းပိုမိုအားကောင်းလာပြီး ၂၃ ရက်နေ့၊ ဘင်္ဂလားပင်လယ်အော်အနောက်အလယ်ပိုင်းပင်လယ်ပြင်မှာ လေဖိအားနည်းရပ်ဝန်းသစ်တခု ဆက်လက်ဖြစ်ပေါ်လာနိုင်ပါတယ်။

ဒီအခြေအနေတွေကြောင့် - စက်တင်ဘာ ၂၂ ရက် မွန်းတည့် ၁၂ နာရီ မှ စက်တင်ဘာ ၂၃ ရက် မွန်းတည့် ၁၂ နာရီအထိ(၂၄ နာရီအတွင်း) အနောက်တောင်၊ တောင်နဲ့ အရှေ့အရပ်က မိုးတိမ်တွေဝင်ရောက်လာပြီး -

နေပြည်တော်၊ မန္တလေးတိုင်း၊ မကွေးတိုင်း၊ စစ်ကိုင်းတိုင်း(အထက်ပိုင်း+အောက်ပိုင်း)၊ ချင်းပြည်နယ်၊ ကချင်ပြည်နယ်၊ ကယားပြည်နယ်၊ ပဲခူးတိုင်းအရှေ့ခြမ်း၊ ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်းမြောက်ပိုင်း(ထားဝယ်အထက်)၊ ရှမ်းပြည်နယ်တောင်ပိုင်း၊ ရခိုင်ပြည်နယ်တို့တွင် ၄၀ မီလီမီတာမှ ၈၀ မီလီမီတာအထက်အထိ မိုးရေချိန်ရရှိစေနိုင်မဲ့ မိုးများရွာသွန်းနိုင်ပါတယ်။

တနိုင်ငံလုံးနေရာစိပ်စိပ်မှ နေရာအနှံ့အပြားမိုးရွာသွန်းနိုင်သော်လည်း ရှမ်းပြည်နယ်အရှေ့ပိုင်းနဲ့မြောက်ပိုင်းမှာတော့ မိုးလျော့နည်းနိုင်ပါတယ်။

စက်တင်ဘာ ၂၃ ရက်မှ ၂၅ ရက် အထိ တနိုင်ငံလုံးမှာမိုးဆက်လက်ရွာသွန်းနိုင်ပြီး၊ ရှမ်းပြည်နယ်မြောက်ပိုင်းနဲ့ အရှေ့ပိုင်းဒေသများမှအပ ကျန်တပြည်လုံးမှာ မိုးဆက်လက်များနေနိုင်ဦးမှာဖြစ်ကြောင်း ကြိုတင်ခန့်မှန်းရပါတယ်။

(စက်တင်ဘာ ၂၂ ရက် နံနက် ၁ နာရီခွဲ)

အပူပိုင်းမုန်တိုင်း SOULIK ၏ အကြွင်းအကျန် လေပွေလှိုင်းသည် စက်တင်ဘာလ ၂၁ ရက် ည ၉ နာရီကျော်မှာ - ထိုင်းနိုင်ငံ Phitsanulok မြို့ ပေါ်သို့ ရောက်ရှိနေပြီး၊ မြဝတီမြို့အရှေ့ဘက် ၈၅ မိုင်ကျော်ခန့်မှ အနောက်ဘက် ကျယ်ပြန့်သောလေဖိအားနည်းဧရိယာဘက်သို့ ရွေ့လျားလျှက်ရှိပါတယ်။

ဒီအခြေအနေကြောင့် မနေ့က ကြိုတင်ခန့်မှန်းပေးခဲ့ပြီးတဲ့အတိုင်း ၂၄ နာရီအတွင်း မိုးရွာနိုင်/မိုးများနိုင်မဲ့ဒေသတွေက ဆက်လက်ရှိနေပါမယ်။
(ပုံဟောင်းပြန်တွဲပေးထားပါတယ်)

အမြင့်ပေ ၅၀၀၀ အထက်မှ လေပွေလှိုင်းဖြစ်ပြီး ကျယ်ပြန့်သော လေဝဲစီးကြောင်းဖြစ်၍ လေတိုက်နှုန်းမပြင်းပါ။

နိုင်ငံအနှံသို့ အရှေ့ဘက်နှင့် အနောက်ဘက်မှ ဝင်ရောက်လာနိုင်မည့် မိုးတိမ်တောင်ကြီးများနှင့် ရန်ကုန်တိုင်းနှင့် ဧရာဝတီတိုင်းတို့အပေါ် ရှိ ကျယ်ပြန့်သောလေဖိအားနည်းရပ်ဝန်းအတွင်း မိုးထစ်ချုန်းရွာပြီး ခေတ္တမျှနေရာကွက်၍ မိုးသည်းထန်ခြင်းများဖြစ်ပေါ်နိုင်ပါတယ်။

🔸 ရုတ်တရက် လေပြင်းတိုက်ခတ်ပြီး မိုးသည်းထန်မှု ဖြစ်ပေါ်စေတဲ့ Down Burst(စိုက်ဆင်းလေပြင်း)ကို သတိပြုကြပါရန်။

(စက်တင်ဘာ ၂၁ ရက် ည ၉ နာရီ ၂၀ မိနစ်)

စက်တင်ဘာ ၂၁ ရက် နံနက်ပိုင်း အိန္ဒိယမိုးလေဝသဋ္ဌာန-IMD မှ ထုတ်ပြန်ချက်အရ -
ဘင်္ဂလားပင်လယ်အော်အနောက်အလယ်ပိုင်း-ဆက်စပ်လျှက်ရှိသည့်ဘင်္ဂလားပင်လယ်အော်အနောက်တောင်ပိုင်းနှင့် ထိုင်းနိုင်ငံမြောက်ပိုင်း ၂ နေရာတွင် ပင်လယ်ပြင်(ပင်လယ်ရေမျက်နှာပြင်အထက် အမြင့် ၃ ကီလိုမီတာ)အမြင့်၌ အထက်လေဝဲစီးကြောင်း(Upper Air Cyclonic Circulation - UACC)ဖြစ်ပေါ်နေကြောင်း ထုတ်ပြန်ထားပါသည်။
(ထိုင်းနိုင်ငံဘက်မှ UACC သည် မုန်တိုင်းအကြွင်းအကျန် လေပွေလှိုင်းကိုရည်ညွှန်းဟန်တူသည်)

ဘင်္ဂလားပင်လယ်အော်မှ UACC သည် စက်တင်ဘာ ၂၃ ရက်ဝန်းကျင်တွင် လေဖိအားနည်းရပ်ဝန်းဖြစ်လာနိုင်ကြောင်း ထုတ်ပြန်ထားသည်ကို တွေ့ရသည်။

🔸 အဆိုပါလေဖိအားနည်းရပ်ဝန်းဖြစ်လာပြီးမှ မြန်မာနိုင်ငံအပေါ်ဖြစ်လာနိုင်သည့် မိုးလေဝသအခြေအနေများကို သီးခြားတင်ပေးပါမည်။
(စက်တင်ဘာ ၂၁ ရက် - မွန်းလွဲ ၂ နာရီခွဲ)

ရန်ကုန်မြစ် ဒီရေတက်ရက်နှင့် အချိန်များ
စက်တင်ဘာနှင့် အောက်တိုဘာ လဆန်းပိုင်း