ናይናን - Naynan

#የፍቅሩ_መገለጫ

የፍጥረትን ጅማሬ የሚነግረን የዘፍጥረት መጽሐፍ የእግዚአብሔር ፍቅር የተገለጠበትም ነው።ፍቅሩን የጀመረው በአምስቱ ቀን ውስጥ ለሰው ልጆች የሚያስፈልጉትን ነገሮች በመፍጠር አሳይቷል።ሰው የሚኖርበትን ምድር ፣ የሚበላውን ፍራፍሬ እና አትክልት እንዲሁም የሚስማማውን የአየር ሁኔታና የሚጠጣውን ውኃ አዘጋጅቶለት በስድስተኛው ቀን ሰውን ፈጠረው።#እግዚአብሔር_ባለቀ_ጉዳይ_ላይ_ሰውን_አምጥቶ_አስቀመጠው።በተጨረሰ ገነት እንዲቀመጥ ያለምንም ተሳትፎ አስገባው።ሥራውን የጨረሰው እግዚአብሔር ሰውን አሥጥቶ በገነት አኖረው።በተጨረሰ ሥራ ሰው ገባ።እንዲሁም እግዚአብሔር ሰውን በክርስቶስ አማካኝነት በጨረሰው የጽድቅ ሥራ ውስጥ አስገብቶታል።
#በእርግጥ_አዳም_ገነት_ለመግባት_ነጻ_ፈቃዱን_ባይጠቀምም_ለመውጣት_ግን_ነጻ_ፈቃዱን_ተጠቅሟል።በአዲሱ ኪዳንም በክርስቶስ የተሠራውን በማመን ወደዚህ ወደተጨረሠው ሥራ መግባት ሆኖልናል።መውጣት ከፈለግንም ደግሞ መብታችን እንደተጠበቀ ነው።እረኛውን ሳይወድዱ በግ መሆን አይቻልምና።የተወደድንበትን ፍቅር ማራከስም አክብሮ ምላሽ መስጠትም በነጻ ፈቃድ ውስጥ የተካተተ ነው።እግዚአብሔር እዚያው ዘፍጥረት ላይ ለሰው የሚያስፈልጉ ጉዳዮችን ጨርሶ ገነት ሲያኖረውም ፤ ከገነት መውጫም ሆነ እዚያው መቆያ ውሳኔውን እንዲወስን የእውቀት ዛፍንም ሲፈጥርለት ፍቅሩን እያሳየው ነው።የፍቅሩ ብዛት ተገደን ሳይሆን ወደን እንድንወደው መርጠንም እንድንከተለው መፈለጉ ነው።

በዚህች ዓመት ተዋት

የአሜሪካ መንደድ በሃጢአቷ መብዛት ነው የሚሉ ዲስኩሮች ተበራክተዋል።የአመቱ ምርጥ ቀልድ ቢባልም አይበዛበትም።እውን አሜሪካዊያኑን የበለጠ የኃጢአት ክምር በቅድስት ተብዬዋ ኢትዮጵያ የለም ወይ? ሰው አጋድመን አላረድንም ወይ? ህጻናት እና ሴቶች በየቀኑ አልተደፈሩም ወይ? በዚህች በቅድስት ተብዬዋ ኢትዮጵያችን ክፋት አደባባዩን አልወረሰም ወይ? ወይስ የቲክቶክ ብልግናችንን እንደ ጽድቅ አይተነው ነው?እህቶቻችን በየቲክቶክ ገጹ ሰውነታቸውን ለጊፍት ብለው አልቸበቸቡም ወይ?ነቢያት ተብዬዎች ህዝቡን አልዘረፉትም ወይ? ክርስትና በራሱ አማኞች አልተሰደበም ወይ? ሃይማኖታዊ እሴት እንኳ ጠፍቶ ቢላዋ እና ገጀራ የሚይዙ ወጣቶች አልበዙም ወይ? ``አጅ በእጅ ብትቀጣው ማን ይቆማል'' የሚል መዝሙር የምንዘምር የአሜሪካን እጅ በእጅ መቀጣት እንናገራለን።ቅድስቲቷ ኢትዮጵያ በየቀኑ ንጹሐን ይገደሉባታል።ሰዎች በዘረኝነት በየቀኑ ይፋለማሉ።የደም ጎርፍ ምድሪቱን አጥለቅልቋታል።ቀላል የማይባሉ ግፎች በምድራችን ሞልተው ዛሬም ግን ጣታችንን ሌላው ላይ ለመቀሠር እንሯሯጣለን።በምድራችን ላይ እግዚአብሔርን መፍራት ከጠፋ ሰንብቷል።እነርሱ ለምን ነደዱ ከማለት እኛ ለምን አልነደድንም ብለን ማሠብ ይበጀናል።ምሥጢሩ ምህረቱ ብቻ ነው።``በዚህች ዓመት ደግሞ ተዋት'' ተብለን መኖራችንን በመረዳት በንሥሐ ወደፊቱ እንቅረብ።ስለ ምህረቱም እናመሥግነው።በሌሎች መሞት ሳይሆን በእኛ መኖር እንደነቅ።

ምህረት የማይነጥፍብህ ሆይ ተመስገን

ጌታ ሆይ

የፍቅር ገጽህን የሸፈነብን ለሌሎች ነገሮች የያዘንን ፍቅር ከላያችን አንሣው!!

አማኑኤል

የጨለማው ዘመን የአምላክን ሀልዎት የከለከለ ነበር።እግዚአብሔር መልዕክቱን ያልሰጠበት ዘመን ነበርና ጭንቁ የበዛ ችግሩ የተቆለለ ነበር።እግዚአብሔር አብሮት ያይደለ ህዝብ ሆኖ መኖርን እንደ እስራኤላውያን የሚራ ያለም አይመስልም።አብሮነቱ ከግብጽ አውጥቶ በምድረበዳ እየመራቸው እንኳ ከነዓን ትገባላችሁ እኔ ግን ከእናንተ ጋር አልወጣም ማለቱ ታላቅ ሐዘንን ሲጭንባቸው ወርቅና ብራቸውንም ሲያስወልቃቸው ተመልክተናል።በእርግጥ ሰው ሁሉ አምላክ ይፈልጋል።ባለፉት ዘመናት ሰዎች ወንዝ፣ተራራ፣ዛፍ እና የመሣሠሉትን ነገሮች ሲያመልኩ ነበር።ይህም ደግሞ ሰዎች ምን ያህል የሚደገፉበት አምላክ ፈላጊ ፍጥረቶች እንደሆኑ ማሣያ ነው።ስለዚህም እግዚአብሔር ከሰው ጋር ለመሆን የፈለገውም ሰው ያለ እግዚአብሔር ምንም ስለሆነ ነበር።

የእግዚአብሔር አብሮነት ደግሞ አብሬያችሁ ነኝ በሚል ቃል ብቻ ሳይሆን የእውነትም በመሆን አሣየን።የእግዚአብሔር አብሮነት በልጁ በክርስቶስ ለአለም ሁሉ ተበሥሯል።አማኑኤል የሚያጽናና ቃል ነው።ሰው ለሌለንና ግራ ለገባን በዓለምም ላይ ለተቅበዘበዝን እግዚአብሔር አብሮን ሊሆን መጣ።ለበሽተኞች መድኃኒት ሊሆን ፣ ለምንቀበዘበዝ መንገድ ሊሆነን ፣ ሙት ለሆንነው ደግሞ ሕይወትን ሊሰጠን እግዚአብሔር በክርስቶስ አብሮን ሆነ።እርሱ አባታችን እኛም ልጆቹ ሆንን።እግዚአብሔር በክርስቶስ ተዛመደን።አብሮን ሆነ።በመካከላችንም ደኮነ።እነሆ የኢሳይያስ ትንቢት ተፈጸመ።አምላክ ከድንግል ተወልዶ በእኛ አደረ።አምላክ ሥጋ ለብሶ ሰው ሆነ።ኢሣይያስ እንዳለው ጨለማ የዋጠን እኛ ብርሃንን አየን።የሞት ጥላ ያንዣበብንም ሕይወትን አየን።አማኑኤል እግዚአብሔር ከእኛ ጋር ሆኗል።

መጽሐፍ ቅዱስ መስታወቱ የሆነለት ክርስቲያን በቃሉ ውስጥ ራሱን ያያል።ራሳችንን ከቃሉ አንጻር እየመረመርን መኖር በእግዚአብሔር ፊት መልካም ነው።በህይወታችን ዘመን መመሪያችንም ሆነ መሪ ብርሃናችን ቃሉ ብቻ ሊሆን ይገባል።የዕለት ተዕለት የህይወት ጉዟችን በቃሉ መሠረት ላይ ከታነጸ በፈተናዎቻችን ውስጥ እንኳ ድልን ማግኘት እንችላለን።

የብልፅግና ወንጌል ተብዬው የራሱን መምህራን ብልግና አደባባይ ያወጣ ነው።ሰፈራቸው አንድ ፎቅ በተሠራ ቁጥር በወንጌል ምክንያት እንደሆነ የሚደሰኩሩ ፤ እብድ ለማዳን መቃብር ሰፈር ድረስ የሄደ ጌታ እናመልካለን የሚሉ ግን ደግሞ በልማት ሰበብ እብድ ጠፋ ብለው የሚደሰቱ ናቸው።(ተፈውሶ ጠፍቶ ቢሆን ኖሮ እሰየው)ሌሎቹ ደግሞ ምዕመኑን ይሰድቡታል።ደም የሚፈሳት ሴት ስትነካው የፈቀደ እና ከተናቁት ጋር የዋለ ጌታ እናመልካለን የሚሉቱ ያልታጠበ አይቅረበኝ ይላሉ።የእነርሱ ብልጽግና አዕምሯቸውን ሳይሆን የሚሰበሰቡበትን አዳራሽ የሚያንቆጠቁጥ እንጂ ሌላ አይደለም።ለማንኛውም ከወንጌሉ እውነት ጋር የማይስማማ ትምህርታቸው ብዙዎችን እየበከለ ይገኛል።እኛ ግን ሀብታም ደሃ ፣ ቆሻሻ ንጹሕ ሳንል ሰዎችን እንድንቀበል እግዚአብሔር ይርዳን!!

አዳራሽ መከራየት ቤተክርስቲያን መትከል አይደለም!!

በዘመናችን ያሉ አገልጋዮች ቤተክርስቲያን ተከላ ላይ እንደተሳካላቸው ይናገራሉ።ለዚህም ደግሞ በየቦታው የከፈቷቸውን ቤተክርስቲያን ተብዬዎቻቸውን በምስክርነት ይጠራሉ።ነገሩ ግን ወዲህ ነው! ምክንያቱም አዳራሽ የከፈቱ እንጂ ቤተክርስቲያን የተከሉ ብዙም ስላይደሉ ነው።ባዶ አዳራሽ ያገኛሉ ፤ ይከራዩትና የ1 ሳምንት ተከታታይ ኮንፍራንስ ያዘጋጃሉ ፤ ከዚያ ታዋቂ የተባሉ የቲክቶክና ዩቲዩብ አገልጋዮች ይጋበዛሉ ፤ ሰዉ ግርር ብሎ ይመጣል ፤ ኮንፍራንሱ ሲያልቅ ግን አምስት አባላት ይቀራሉ።እነርሱም ቢሆኑ ሁለቱ የነቢዩ ጓደኞች የሆኑ ጀማሪ ነቢያት ሲሆኑ የራሳቸውን አዳራሽ እስኪከራዩ ድረስ ከነቢዩ ጎን የሚኖሩ ናቸው።የቀሩት ሶስቱ ደግሞ አንዷ የነቢዩ ሚስት ስትሆን አንዱ የ'ርሷ ወንድም እና አዳራሹን ያከራዩት ሰውዬ ሚስት ናቸው።ከዚያ ጥቂት የሰፈሩን ሰው ካንጫጩትና ከተንጫጩበት በኋላ በተመሳሳይ መልኩ ሌላ ሰፈር ወይም ሌላ ከተማ ይጀምራሉ።ይህ አንድም ምዕመኑን የሚጠቅም ነገር የሌለው ነው።ከዚህ ይልቅ አዳራሹን በተከራዩበት እና የሙዚቃ መሣሪያ በተከራዩበት ገንዘብ በብዙ የእግዚአብሔርን መንግሥት የሚጠቅም ሥራ በሠሩበትም ነበር።እንግዲህ እነዚህ ናቸው ባለራዕይ ተብለው በቤተክርስቲያን ተከላ የተሳካላቸው።የቤተክርስቲያን ተከላ በወንጌል ስብከት ድነው ከጨለማው ያመለጡ ሰዎችን ኅብረት ፈጥረውዉ

ክርስቲያን ሆይ ከእነዚህ በየሰፈሩ ከተፈለፈሉ ቃሉን ከማያውቁ ቃሉም በክፋታቸው ከሚያውቃቸው ጨካኞች ራስህን ጠብቅ።

በሳል ክርስቲያን በጸሎት መልሶች ሳይሆን በጸሎት የሚኖር ነው።

``የምትፈልጉትን ማንኛውንም ነገር ጥሩት ይመጣል'' የሚል ትምህርት የሰማች አንዲት እህት የምትወደውን አንድ ወንድም ተመልክታ ``አንተ ወጣት ባሌ እንድትሆን በእምነት እጠይቃለሁ ፤ አምኜ ተቀብያለሁና ባሌ ነህ ፤ ምንም ማድረግ አትችልም'' አለችው።የምትፈልጉትን ነገር ሁሉ ማግኘትና ከድህነት መውጣት የመንፈሣዊ ልህቀት ደረጃ ማሣያ አይደለም።

ሊቀርበን ሮጠ

እግዚአብሔር ዓለሙን የወደደበት ፍቅሩ ልጁን ኢየሱስን እስከመስጠት እንደሆነ መጽሐፍ ቅዱሳችን ይናገራል።ይህ ደግሞ የፍቅሩን መጠንና የማይጨክን ልቡን ከዔደን የኮበለለ ልጁን ፍለጋ ዘወትር ሲናፍቅ እንደነበር ያሣያል።አዳም ተረከዙን አንስቶ የወጣበት ዔደን የእረፍት ቦታው ነበር።ይሁን እንጂ ከእውነተኛው እረፍቱ ይልቅ እረፍት መሣዩን ወድዶ መሄዱ ያ የጠፋው ልጅ ታሪክ ላይም ተደግሟል።ሳይጎድልበት እንደጎደለበት እየተሰማው ሙላት የመሰለው እንደ ውሃ አሳስቆ ከሞት ሲጨምረው ፤ የደስታው ጀንበር ገና ከማለዳው ስትጠልቅበት ፤ አባቱ ግን ዘወትር ስለ ልጁ ይጨነቅ ነበር።በር በሩን የሚያይ የአባታችን ምሣሌ የሆነው የልጁ አባት የልጁን መመለስ ሲመለከት ቤቱ እስኪደርስ እንኳ ሳይጠብቅ ልጁን ሊቀርበው ሮጠ።ጥቂት መመለስ ብዙ የእግዚአብሔርን ወደልጆቹ መመለስ ይፈጥራልና።

አዳም ኤደንን ትቶ ከወጣ ከረጅም ዘመናት በኋላ እግዚአብሔር በክርስቶስ ቀረበን።ወደ እኛም ሮጠ።በእርግጥም እግዚአብሔር ሊቀርበን ሮጠ።ይህም በማይጨከነው ጨክኖ ልጁን በመስቀል ላይ አንጠለጥለው።ክርስቶስ እርቃኑን በቀራኒዮ ሲንጠለጠል እግዚአብሔር በክርስቶስ ሊቀርበን ወደኛ መሮጡ ነበር።ትተነው እንኳ እየሮጥን ሊቀርበን ሮጠ።ጀርባውን ለልጁ ፊቱን ደግሞ ለእኛ አበራልን።የተጨከነበት ልጁ ክርስቶስም ከስሞች ሁሉ በላይ የሆነ ስምን ተቀጃጅቷል።የፍቅሩ ብዛት ልጁ ላይ እስኪጨክን ድረስ አድርጎት ነበር።እንዲህ ባለ ፍቅር እግዚአብሔር ሊቀርበን ሮጠ።ቀረበንና አዳም ትቶ ወደወጣው የእረፍት ስፍራ መለሰን።እርሱ ራሱም እረፍታችን ሆነ።በእርግጥም ያ አባት ወደ ልጁ እንደሮጠው እግዚአብሔር በክርስቶስ ሊቀርበን ወደ እኛ ሮጧል።ሳንወደው እንኳ ወደ እኛ የተመለሰ እግዚአብሔር ይመስገን።

ተሐድሷዊያኑን የማያቸው የጎሪጥ ነው!!

በተለያዩ ቆንጆ ዝማሬዎች የምናውቀው ዘማሪ ሐዋዝ ከነበረበት የተሐድሶ አባልነት ወደ ኦርቶዶክስ ተመልሷል።በጸጋ መዳንን ለመስበክ የቆረጠው ሐዋዝ በሕግ ሥራ ጽድቅን ለማግኘት ኮብልሏል።ኢየሱስ ብቻ ሲል የቆየው ሐዋዝ አሁን ላይ ተቀጥላዎችን ጨምሮ የኢየሱስን ብቻ ብቁ መሆን ክዶታል።ይህ እውነት የገባቸው በሚመስሉ ግን ባልገባቸው ወገኖች ዘንድ የሚታይ ነው።በእርግጥ ሐዋዝ የወንጌል አማኝ ሳይሆን ተሐድሶ ስለነበር እንደ ተቋም የሚመለከተን ነገር አይኖርም።ይሁን እንጂ ወንጌላውያኑ ማኅበረሰብ ለተሐድሶአውያኑ ካለው ፍቅር አንጻር የሐዋዝ መመለስ ቆጭቶታል።

ሐዋዝ ወንጌሉ የበራላቸው ሰዎች የጻፉትን ዝማሬ ሲዘምር የኖረ እንጂ ገብቶት የዘመረ ነው ለማለት አልደፍርም።በእርግጥ ተሐድሶአውያኑን የጎሪጥ ማየት የጀመርኩት እነ ሰለሞን አቡበከር ጋር ከነበረው ግብግብ ጀምሮ ነው።ምክንያቱም ከኦርቶዶክስ ይውጡ እንጂ ሙሉ ለሙሉ ወጥተዋል ለማለት እቸገራለሁ።ነገ ላይ አሰግድም ቢሆን ሊመለስ እንደሚችል እገምታለሁ።ምክንያቱም የቆሙበት መሠረት ኦርቶዶክስን ማደስ የሚል ሐሳብ እንጂ ተቋማዊ መሠረት የያዘ አይደለም።ለዚህም ነው ጥቂት አለመግባባቶች ሲፈጠሩ ወደ ሌሎች ተቋማት ከመሄድ ይልቅ ወደ ወጡበት የሚመለሱት።በክርስቶስ ያልነበረ ሰው ተቋምን ሲቀያይር ይኖራል።ጻፍከኝ ብሎ የዘመረው ኢየሱስን ከነበረ አሁን ደግሞ እንደተጻፈም ሊጠራጠር ነው።

ሐዋዝ በእግዚአብሔር ቤት እንዲኖር እንዲመለስም ጸሎቴም ምኞቴም ነው።ግን ቢመለስም ወደ ወንጌላውያን አብያተክርስቲያናት ቢመጣ ብዬ እላለሁ።በጋሻው ፣ ዘርፌ እና ትዝታው እስካሁን ወደ ኦርቶዶክስ ያልተመለሱበት ምክንያት ተሐድሷዊ ሳይሆን ተቃርኗዊ አቋም ስለያዙ ነው ብዬ አስባለሁ።የተወሰኑ የማውቃቸው የተሐድሶ አባላት ጴንጤ እንዳልሆኑ እና እውነተኛ ኦርቶዶክስ እንደሆኑ ሲናገሩ ሰምቻለሁ።ሉተር ትልቋን ካቶሊክን ከማደስ ይልቅ ፕሮቴስታንትን ማቋቋም ቀላል እንደሆነ አሳይቶናል።ስለዚህ ኦርቶዶክስን ለማደስ ከመሞከር ይልቅ ትልቅ ተቋምን መስርቶ ወንጌል ለሚያስፈልጋቸው ሁሉ መስበክ ያዋጣል።በሐዋዝ መመለስ ልባችሁ የተሰበረ አንድ ምክር ለእናንተ አለኝ።እንኳን ሐዋዝ ይቅርና ጴጥሮስም ክርስቶስን ክዶት ያውቃልና ብዙ አትከፉ።ይልቅስ እናንተም የቆማችሁ የመሠላችሁ እንዳትወድቁ ተጠንቀቁ።


በረከት ከበደ

ወዳጄ ተመከር #2

በአገልግሎትህ ሰዎች ሲገፉህና ስላንተ መጥፎ ሲያወሩ ተስፋ አትቁረጥ።በሞተ ውሻ ላይ ድንጋይ የሚወረውር የለምና።ስለዚህ አገልግሎትህን ይዘህ ቀጥል።ብድራትን ከሰው ሳትጠብቅ አገልግል።

ወዳጄ ተመከር #1

አምላክህን የማትፈራበት የእምነት ጥብቅና ይቅርብህ።

በዚህ ዘመን የሚመክሩ እና የሚገስጹ አገልጋዮች እንደተራ ነገር መቆጠራቸው እና ሰሚ ማጣታቸው የሚያሳዝን ነው።እንዲሁም ባህሪያችን ሊሆን የሚገባውን ፍቅርን ጥለን እርስበርስ መነካከሳችን የማይገባ ነገር መሆኑን ሳንረዳ ስሜታችንን ብቻ ተከትለን መጓዛችን የሚያሳፍር ነው።የሐዋርያት ዘመንም ቢሆን ከዚያ በኋላ የነበሩት ቤተክርስቲያናት በፍቅር የሚታወቁ እንደነበሩ ታሪክ የሚያረጋግጥልን እውነት ሲሆን በተጨማሪም ለወንጌል ዋጋ ለመክፈል አለመቁረጣችን እና ፈተና በመጣ ቁጥር እየደነበርን መኖራችን በእግዚአብሔር ላይ ያለን እምነት ከቶ ያልጠበቀ መሆኑን ያስገነዝበናል።የዚህ ዘመን ቤተክርስቲያን እና አገልጋዮቿ በድህረ ዘመናዊነት አስተሳሰብ ትንቅንቅ ውስጥ እንደሚገኙ ስንመለከት የሚኖሩበትን ዘመን በማወቅ እና በመገምገም ዘመናቸውን መዋጀት የሚችሉባቸውን መንገዶች ማወቅ እንደሚኖርባቸው ልንረዳ ይገባል። ስለዚህ በቤተክርስቲያን የሚያገለግሉ አገልጋዮች የተለያዩ ትምህርቶችን ከጥንቷ ቤተክርስቲያን በመቅሰም በእምነት እና በመንፈሳዊ ድፍረት ሊገለጡ ያስፈልጋቸዋል።

በሳርቤቶች ሙሉ ወንጌል ወጣቶች የተዘጋጀ ልዩ የትምህርት እድል በነገረ-ክርስቶስ እና ነገረ-ድኅነት አስተምህሮ ላይ።

📍በሳርቤቶች ሙሉ ወንጌል አማኞች ቤተ-ክርስቲያን (https://maps.app.goo.gl/m7eujBa3KvuebChr5)

⏰ ዘወትር ሰኞ ማታ ከ12፡30 - 2፡00 ጀምሮ

የምዝገባ ቀን ከህዳር 1 - 5 ፣ ለመመዝገብ እና ቦታ ለማስያዝ ይህንን ማስፈንጠሪያ (link) ይጠቀሙ
https://docs.google.com/forms/d/e/1FAIpQLSeMFu8AZFJNa7mnZiE17h63sHt3h_U9z1eVD4wQmXtt7htLcg/viewform?usp=sf_link

ኢየሱስን በምናምንበት ጊዜ እግዚአብሔርን እንድንታዘዝና እንድናከብረው የሚያስችለን አዲስ ባህሪይ ወይም ተፈጥሮ ይሰጠናል።(2ቆሮ 5:17)አዲሱ ተፈጥሮአችን ምን ማድረግ እንደሚገባን የሚነግረንን ለመፈጸም የሚያስችለንን ኃይል እንዲሰጠን መንፈስ ቅዱስ በእኛ ውስጥ ይኖራል።ይሁን እንጂ የኃጢአት ተፈጥሮአችንም ሥጋዊ ሞትን እስክንሞት ድረስ ከእኛ ጋር ይኖራል።ስለዚህ በውስጣችን የሚጣሉ ስሜቶች ይኖሩናል ማለት ነው።አንደኛው ስሜት ወይም ባህሪያችን እግዚአብሔርን ማክበርንና መታዘዝን ይፈልጋል።ሌላኛው ደግሞ ሥጋችን የሚፈልገውን ለማድረግ ይፈልጋል።(ሮሜ 7:7-25)በመንፈስ ቅዱስ ስንመራና ለእርሱ ስንገዛ ግን እኛ የምንፈልገውን ሳይሆን እግዚአብሔር የሚወደውን እናደርጋለን።(ገላ 5:25)ነገርግን ሥጋዊ ፍላጎታችንን የምንታዘዝ ከሆነ ዓመጸኞች እንሆንና የምንፈልገውን ብቻ እናደርጋለን።

የኢየሱስ ሰው መሆንን አስመልክቶ ለተነሳ ጥያቄ የተሰጠ ምላሽ በዩቲዩብ ቻናላችን ተለቋል።አድምጡት👇
https://youtu.be/dS2BjNZ7MGI?si=N6VilMz5_StliI4J

ኢየሱስ ፍርድ አጥቶ በጲላጦስ ፊት ቆመ።ዛሬም ፍርድ አጥተው ከቆሙት ጋር አብሮ ቆሟል።የክርስቶስን መስቀል መሸከም ማለት መከራ መቀበል ብቻ ሳይሆን መከራ ከሚቀበሉትም ጋር አብሮ መሆን ነው።መታረዝ ብቻ ሳይሆን የሚታረዙትን መታደግ መስቀሉን መሸከም ነው።ለኢየሱስ የገበታ ሳይሆን የመስቀል ወዳጆች በመሆን የተራበ ፤ የታረዘ ፤ የተጨነቀም ስንመለከት ከጎኑ መቆም ይኖርብናል።ይህን ስናደርግ የመስቀሉ ወዳጆች መሆናችንን እናሳያለን።ለዚህም ነው ጌታችን ኢየሱስ ከእነዚህ መካከል ለአንዳቸው ያደረግነው ለእርሱ እንዳደረግን ተደርጎ እንደሚቆጠር የተናገረው።ይህ የክርስቶስን ፍቅር ለሌሎች መግለጥም ነው።ፍቅሩ በፍቅራችን ይገለጣልና።

ሰማዕትነት እንደ ዘመኑ ነው

የቀድሞው ሰማዕትነት የንጉስን አዋጅ እምቢ ብሎ በእሳት መቃጠል ወይም በሰይፍ መሞት፤በእሳት መቃጠል ነው።
የዛሬው ሰማዕትነት ደግሞ የዚህን አለም ክብር መጠየፍ ራስ ወዳድነትን እና ምኞትን እምቢ ማለት ነው።
የዛሬው ሰማዕትነት በኑሮ የሚገለጥ ከኃጢአት የመራቅ እና ለዚህ ምድር ተድላ ባለመሸነፍ መኖር ነው።

ወዳጆቼ

ለኢየሱስ ብለን ምን ትተን ይሆን????
ጓደኛ ነው?
ገንዘብ ነው?
የማያምን ፍቅረኛ ነው?
ስልጣን ነው?
ዝና ነው?
ዕውቀት ነው?

እነዚህ ሁሉ ሥጋችን የሚደሰትባቸው ሆነው ሳሉ ለኢየሱስ ብለን ወይም ለክርስትናችን ብለን ብንተዋቸው በእግዚአብሔር ዘንድ አክሊልን እንቀበላለን።
ምክንያቱም ሰማዕትነት እንደ ዘመኑ ነው።

ዛሬ አንድ ጽሁፍ እየጻፍኹ በአጋጣሚ ጥቂት ሲደክመኝ ጠረጴዛው ላይ አቀረቀርኹ።ወዲያው ግን ``እንዲሁ እንዳቀረቀርኹ ብሞትስ?'' ብዬ ራሴን ጠየቅሁት።በእርግጥ ቤተሰቦቼና የቅርቤ ሰዎች በእጅጉ ያዝናሉ።የሚያውቁኝ ሁሉ ደግሞ ፎቶዬን ለጥፈው በማኅበራዊ ሚዲያ ስለ እኔ ይናገራሉ።ከዚያ ከሁለት ወይም ሶስት ቀናት በኋላ ሁሉ አብቅቶ እኔም ተረስቼ ሰዎችም ኑሯቸውን ይኖራሉ።ወይም ደግሞ ሌላ ሟች ከተገኘ የሐዘን መግለጫቸው ለእርሱ ይቀጥላል።ታዲያ በዚህ ስንሞት ከሁለት ቀን በኋላ በምንረሳበት ዓለም ውስጥ የሚረሱንን ለማስደሰት መሯሯጣችን አሳዛኝ ዕጣ ክፍላችን ነው።ከዚያ ይልቅ ለዘላለማዊው ቤታችን ምን ያህል እናስባለን የሚለው ትልቁ ጥያቄ ይሆናል።ከአምላክ ይልቅ ሰውን ለማስደሰት መሯሯጥ ውጤቱ ክስረት ነው።

በእግዚአብሔር ምህረት ሳይሆን በጎረቤቴ ኃጢአት የምጽናና ሆኛለሁና ማረኝ

ብዙ ሃብትና የተትረፈረፈም ንዋይ ቢኖረን ከሞት መሻገር የሚችል ግን የለም።ከመቃብር ወዲያ ያለ ወዳጃችን ገንዘባችን ወይም ዝናና ስማችን አይደለም።ዛሬ የምንጓጓላቸው ነገሮች ቀሪ ናቸው።መቃብርን ተሻግረው አብረውን መቆም የማይችሉ የዘላለም ወዳጅ መሆን አይችሉም።እግዚአብሔር ግን ከመቃብር ወዲያ አብሮን የሚሆነን ወዳጅ ነው።ከመቃብር ወዲህ ላለው እየለፋን ከመቃብር ወዲያ ያለውን ችላ ማለት አይገባንም።

ኢየሱስ ክርስቶስ እስራኤልን ወድዶ ኢትዮጵያውያንን አለመጥላቱ የፍቅሩን ልክ ያሳየናል።አህዛብ የሆንን ርቀን የኖርነው በመስቀሉ ጥልን ገድሎ ከእግዚአብሔር ጋር አስታርቆናል።በኃጢአት የወደቀውን የሰው ዘር የሚወድደው እርሱ አህዛብንም አይሁድንም በእኩል ፍቅር ይወዳቸዋል።#ይወደኛል_ብሎ_የሚዘምር_ኢትዮጵያዊ_ፍልስጥኤማዊውን_አልተወደድህም ሊለው አይችልም። ፍቅሩ ያልጎደለበት ክርስቶስ ሁሉን ይወዳል።

ለመራመድ እግሮቼን ባነሳሁ ቁጥር አጥንቶቼን ያበረታህ አንተ ነህ።ስለቻልኩ ያደረኩት የለም።አስቸለኸኛልና ተመስገን።የቸርነትህ ብዛት ቀኑን ሰጥቶኝ በደግነትህ ስላመሸሁ አይኖቼ ጥበቃህን አይተዋልና እባርክሃለሁ።የፍቅር መንግስትህ ተመችቶኝ በልቤም ደስታህ ፈስሶልኝ አለሁና ተባረክ።የፍቅርህ ቀመር #እንዲሁ ነውና።አወዳደድህን መተንተን አይሞከርም።ብቻ አመሠግንሃለሁ።

የሰይጣን ደስታ ለሦስት ቀናት ብቻ ነው።ጌታችን ኢየሱስን ካስገደለው በኋላ ደቀመዛሙርቱ እና የክርስቶስ ወዳጆች ሁሉ ሲያዝኑ ሰይጣን ግን ዓላማውን ያሳካ ይመስል ነበር።ይሁን እንጂ ደስታውና ሐሴቱ ከሦስት ቀናት ሊበልጥ አልቻለም።ሦስት ቀናት ያዘኑት ለዘለዓለም ሊስቁ ፤ ሦስት ቀናት የሳቀውም ለዘለዓለም ሊያዝን ነገሩ ተገለበጠ።ዛሬም በህይወታችን በሚደርስብን መከራ ሰይጣን ቢስቅብንም የሰይጣን የሳቁ ዕድሜ አጭር ነውና አንሸበር።ረጅሙ ሳቅ የእኛ ነው።ሦስት ቀናት ማለትም ለአጭር ጊዜ ብናዝንም ለዘለዓለም እንስቃለን።የሰይጣን ሳቅና ሹፈት ጊዜያዊ ነው።እግዚአብሔር የሚያስቀን ሳቅ ግን ዘላለማዊ ነው።

የሮሜ መልዕክት ጥናት (ክፍል 8)
#የአህዛብ_በደል

#ምዕራፍ 1:18-32

ወንድም በረከት ከበደ

#አዳምና_ሔዋን በኤደን ገነት እግዚአብሔር የሰጣቸውን ትዕዛዝ በመጣስ ለእግዚአብሔር ቃል ሳይታዘዙ ቀሩ።#አይሁድም የተጻፈላቸውን ሕግ ይዘው በአለመታዘዛቸው ጸኑ።#አህዛብ ደግሞ የኅሊና ሕግ እያላቸው ለእግዚአብሔር ከመታዘዝ ይልቅ አለመታዘዝን መረጡ።ስለዚህ በአለመታዘዝ ለወደቀው የሰው ዘር ሁሉ መድኃኒትን ያመጣው የወንጌል መልዕክት ነው።የወንጌሉ መልዕክት ደግሞ በኢየሱስ ክርስቶስ በኩል ከእግዚአብሔር ጋር መታረቅ ነው።

🔔 ማስታወቂያ

ሰላም ቅዱሳን የቻናሉ ተከታታዮች በዚህ ቻናልና በዩቲዩብም የሚተላለፉ መደበኛ ፕሮግራሞች ተቋርጠው መቆየታቸው ይታወቃል።የነገሮች አለመመቻቸት በዚህ ቻናል እንዳልገኝ ትምህርቶችን እንዳላዘጋጅ አድርገውኝ ቆይተዋል።እግዚአብሔር ፈቅዶ ደግሞ በቻልኩት መጠን ከነገ ጀምሮ ወደ አገልግሎቱ የምመለስ ይሆናል።አክብራችሁ የምትከታተሉ እንዲሁም በእነዚህ ጊዜያቶችም ስትጽፉልኝ የነበራችሁ አመሠግናለሁ።

በረከት ከበደ

ረዓብ እና ሩት አህዛብ የሆኑ ግን ደግሞ በክርስቶስ የዘር ሐረግ ውስጥ መግባታቸው እግዚአብሔር አህዛብን ወደ እርሱ ለማቅረብ የሄደበትን ርቀት ያስመለክተናል።እስራኤላዊነት አያኮራም ፤ አህዛብነትም አያሳፍርም።ምክንያቱም ሁሉ በክርስቶስ አንድ ሆኗልና።በእርሱ ሥራ ወደ እርሱ የመግባት ድፍረት አግኝተናል።እግዚአብሔር በክርስቶስ አህዛብን እንደሚያድን ተስፋውን ሲያሳይ በቀዩን ፈትል ረዓብን ከሞት ታድጎ ፡ በቦዔዝ በኩል ደግሞ ሩትን ተቤዣት።እግዚአብሔር አህዛብን የማዳን ዕቅዱ ከዘመናት በፊት እንጂ በአንድ ወቅት የቀየረው አይደለም።የእግዚአብሔር ሰውን መውደድ ሲገለጥ አህዛብ የሆንን ሁላችን በክርስቶስ ከእግዚአብሔር ጋር ታረቅን።ከእግዚአብሔርም ጋር ብቻ ሳይሆን እርስበርስም አንድነት ሆኖልናል።

የእግዚአብሔር መጋቢነት ለፍጥረቱም ለልጆቹም መሆኑ ሁሉን ወዳጅ መሆኑን ያሳያል።በእርሱ ዘንድ ተበላላጭ ፍቅር ተለዋዋጭ ባህሪይም የለምና ፓስተሩም ሆነ ሌባው እኩል ተፈቃሪ ናቸው። የፍቅር ልክ የሆነ ፍቅርም ራሱ ደግሞ የፍቅር መምህርም ራሱ ነው። በእርሱ ዘንድ ጥላቻ የለም። ኃጢአቱን ባይወድም ኃጢአተኛውን ግን ይወደዋል። ሌላውን መርጦና ፍቅሩን ገፍቶ የሄደበትን ሁሉ የእንደገና እድል እያደለ ከእቅፉ ይሰበስባል።

ሸክላ መሆኔን ዘነጋሁት መሠል የምሰበር እንኳ አይመስለኝም።የትዕቢት ኃይሌ ጎልብቶ አኗኗሬን ከምድር በላይ በደመናት ላይ ያደረግሁ ይመስል ራሴን ወጥሬዋለሁና።ቸሩ ሆይ ማረኝ

#አዋላጅ_እና_አዋቂ_ያጋጠመውን_ሁሉ_አይናገርም!!

የህይወታችን ምህዋር ወደተለያዩ አቅጣጫዎች ይወስደናል።እነዚህ ሁሉ ግን አደባባይ መውጣት የለባቸውም።የምንኖርበት ዘመን ደግሞ ትንሹም ሆነ ትልቁ ነገር ለሚዲያ ፍጆታ የሚውልበት ነው።በተለይም የቲክቶክ ዘመን እንደመሆኑ አደጋም ሆኑ ደስታ በፍጥነት ይቀረጻሉ።አንዳንድ ጊዜ የሚረዳቸውን የሚፈልጉ ሰዎች በቲክቶክ የሌሎች መሸቀያ መንገድ ይደረጋሉ።የህይወት መንገድ ውስጥ ከሚኖሩን ነገሮች አንዱ ደግሞ ትዳር ነው።ትዳር ደግሞ ጤናማ የሆነ የእርስበርስ ግንኙነትን ይፈልጋል።አሁን ላይ የተጋባ ሁሉ Couples Content ለመሥራት ይጣደፋል።ከጴንጤዎቹ Babi and Grace ጀምሮ እስከ ዓለማዊያኑ አየለ እና አየለች ድረስ ያሉት ሁሉም ተጋቢዎች ጥላቸውም እርቃቸውም አደባባይ ላይ ነው።የሰሞኑ ኮሜዲያን ናቲም ቢሆን የዚሁ ሰለባ ነው።ልባም ያላት ሴት በደንብ ልባም ስትሆን አይተናል(ያው ልባምነቷ እርሱ ባሰበው መንገድ ባይሆንም)።

ሰው ገቢውን፣ የቤተሰቡን ጉዳይና የፍቅር ግንኙነቱን ሚስጥር ቢያደርግ መልካም ነው።ገቢውን ሲናገር ጠላት ያፈራል።አንዱ አይፎን ተልኮለት ገና ፌስቡክ ላይ post እንዳደረገ የሰፈራቸው ዱርዬ የመጀመሪያውን like ገጭቶታል።ገቢን በየሚዲያው መለፍለፍም ከዘራፊ ብታመልጥ እንኳ ትርፉ ተበዳሪ ማሰለፍ ነው። የቤተሰብ ጉዳይ የቤተሰብ እንጂ የአደባባይ አይደለም።በቤተሰብ ማለቅ አለበት።የፍቅር ግንኙነትም ቢሆን በጋብቻ ወቅት ይፋ ስለሚሆን ከአሁኑ ይፋ አድርጎ live መኖር አያዋጣም።አሁን ላይ live የሚኖሩ የበሉትን የምናውቅላቸው ባለትዳሮች አሉ።ልጅ ወለድን ቢሉን እንዴት ብለን comment ብናደርግ ሙሉ አሠራሩን ለማየት የዩቲዩብ ቻናላችንን ይቀላቀሉ እንዳይሉን ነው ምፈራው።በነገራችን ላይ እገሌ አገባ ፣ እገሊት ወለደች የሚሉ ጉዳዮች አይመለከቱንም።ዛሬ ለባሌ የሰራሁለትን ያለ ሥጋ የሚሠራ ቋንጣ ፍርፍር አሳያችኋለሁ ብትዪ ለባልሽ ከመሥራትሽ ጉዳይ ባይኖረንም ቋንጣ ፍርፍር ያለ ሥጋ መሠራቱ ከኑሮ በዘዴ ጋር ይያያዛልና እንሰማሻለን።ከእርሱ ይልቅ ለባሌ የገዛሁለት ሸሚዝ ፣ ለሚስቴ ከአዞ ቆዳ ያሠራሁላት ጫማ ምናምን አትበሉን።አዞው ቢበላችሁ ራሱ ግድ አይሰጠንም(ለጨዋታ ነው)።

ከቤቢዬ ጋር የጠጣነው የስፔን እንትን በጣሊያን እንትን ብላችሁ ዲፕሎማሲያዊ መጠጥ አትንገሩን። ሚስቴ የወር አበባ ላይ ስትሆን የምሠራላት የሙዝና የአናናስ ፍቅፋቂ በሎሚ ቆዳ.... ወዘት ወዘት አትበሉን።#አይመለከተንም።ደግሞ ህዝቡም አያፍርም እነርሱን እየተከተለ ትዳር እንደ እነርሱ እየመሠለው ለቀጣይ ቲክቶከርነት ራሱን ያዘጋጃል።#Couples _Content_መሥራት_የግድ_ነው የተባለ ይመስል
አብዛኞቹ ተጋቢዎች ዝግጅት ላይ ናቸው።የሰፈራችን ሴቲዮ ስትተርት #አዋላጅ_እና_አዋቂ_ያጋጠመውን_ሁሉ_አይናገርም ትላለች።ያየነውንና የገጠመንን ሁሉ አደባባይ ማውጣት ትርፉ እይታ ማብዛት ነው።ያገኘነውን ሁሉ ይዘን ወደ ሚዲያ አንሩጥ።የእኛ መናገር የሚፈጥረውን ውጤት ማጤን ይኖርብናል።ሰወር እንበል።

ብዙ ድንቅ ሰዓሊያን አውቃለሁ።#ዳቪንቺ ዓለም ዘምሮለታል።የሠራው እየተተነተነ ጉድ ተብሎለታል።#ፓብሎ_ፒካሶን የመሠለ ድንቁ ሠዓሊም ሃያኛውን ክፍለ ዘመን አናውጦታል።#ሚካኤል_አንጄሎም ቢሆን ድንቅ ቀራጺና ሠዓሊ ነበር።ሁሉም ድንቅ ናቸው።ምድራዊ የስዕልና የቅርጻቅርጽ ጥበባቸው በዓለም ዘንድ የተደነቀላቸው ናቸው።ከእነዚህ ሁሉ በላይ ግን አንድ መንፈስ ቅዱስ የተባለ አስደናቂ ሰዓሊ አውቃለሁ።ኢየሱስን ልቤ ላይ በመሣል ድንቅ የሆነ ሰዓሊነቱን አሳይቶኛል።በተበጠበጠ ቀለም ሳይሆን በቃሉ ፤ በሸራ ላይ ሳይሆን በልቤ ላይ ኢየሱስን ይስለዋል።የእርሱ መልክ ደግሞ በህይወቴ እንዲገለጥ ጸጋውን እያበዛ ያኖረኛል።

መንፈስ ቅዱስ ሆይ አሁንም ኢየሱስን በልቤ አድምቀህ ሳለው።

ዮሴፍ በከነዓን ሲሸጥ በግብጽ ይገዙታል ። እኛም አንድ ቦታ አይፈልጉንም ሌላው ቦታ ግን በውድ ይገዙናል ። ዮሴፍ ወንድሞቹ ሲገፉት ባዕዳን ይቀበሉታል ። እግዚአብሔርን የሚያውቁ ሲከፉበት አያውቁም የሚባሉ ይራሩለታል ። ወኅኒ ጣልነው ሲሉ ቤተ መንግሥት ያገኙታል ።መገፋታችን የእግዚአብሔር ክብር መገለጫ ይሆናልና ደስ ይበለን። እልፍ ስንልም እልፍ እናገኛለን።

ቅድስና ማለት ከአንደበታችን በሚወጣው ቃል ፤ በአዕምሯችን በምናውጠነጥነው ሐሳብ ፍጹም ንጹሕ መሆን ማለት ነው።ቅድስና ገና ለገና የሚሰጠኝ ሳይሆን ከእግዚአብሔር የተቀበልሁትና በሕይወቴ የሚገለጠው ነው።እግዚአብሔር የበረከት ሕይወትን ለመኖር መጠቀሚያችን አይደለም።ቅዱሳን እንድንሆን ፈጥሮናል ፤ሊያድነን የመጣውም ከኀዘኔታ ስሜት የተነሳ ሳይሆን እዚህ ቅድስና ላይ ሊያደርሰን ነው።
የአንዳንድ ሰዎች ስብከት ቅድስና የሌለን መሆናችንን የሚያሰየን ከሆነ ቅር ሊለን ይችላል።ወንጌል በትክክል ሲሰበክ ኃጢአተኛ መሆናችንን ቁልጭ አድርጎ ያሳየናል።ይሁን እንጂ መቀደስን እንድንፈልግ ጽኑ ረሃብና ጥማትን በልባችን ይፈጥራል።እግዚአብሔር ለሰው ልጆች ያለው ዕቅድ አንድ ብቻ ነው።እርሱም ቅድስና ነው።


ኦዝዋልድ ቻምበርስ

ዓለማችን በየዕለቱ ራሳቸውን የሚያጠፉ ሰዎች እየበዙባት ነው።የዓለም የጤና ድርጅት (WHO) ባወጣው መረጃ በቀን ውስጥ 2200 ሰዎች ራሳቸውኝ ያጠፋሉ።ይህ ለመኖር አቅም ማጣትን ያሳያል።ለመኖር አቅም ያጣ ደግሞ አምላኩ እስኪጠራው መጠበቅ ተስኖት ራሱን እየጠራ ይቸኩላል።አትመጣም ወይ ከሚል መዝሙርና ጸሎት ተሻግረው አንመጣም ወይ ማለት የጀመሩ በርክተዋል።አንዳንዶች ራሳቸውን የማያጠፉት ራስን ማጥፋት ኃጢአት ነው ብለው ስለሚያስቡ ብቻ ነው።ተስፋ የመኖር አቅም ነው።ተስፋውን የተነጠቀ ከመኖር ይልቅ ሞቱን ይናፍቃል።በዚህ ሁሉ ውስጥ ግን ተስፋ ማዴረግ ሳይሆን ማንን ተስፋ ላድርግ የሚለው ትልቁ ጥያቄ ነው።እግዚአብሔርን ተስፋ ማድረግ ብቻ ያጸናናል።ጽኑ ለመሆን ጽኑውን ተስፋ ማድረግ ይበጃል።ተስፋችን እግዚአብሔር ስሙ ይክበር።የማይሸነፍ ጦረኛ ፤ የማይሰለች አቃፊ ፤ የማይከዳ ወዳጅ ፤ የማያስቀይም ጓደኛ ፤ የሚያጠግብ ባለጠጋ እግዚአብሔር ነውና በእርሱ ተስፋ የሚያደርግ አንድም ቀን አያፍርም። የማያሳፍር ተስፋችን እግዚአብሔር ነው።

ሰላም ቅዱሳን የናይናን ቻናል ተከታታዮች ላለፉት ጥቂት ቀናቶች በዚህ ቻናል እንዳልተገናኘን ይታወቃል።ጌታ ቢፈቅድ ከነገ ጀምሮ ወደ መደበኛ አገልግሎቶቻችን የምንመለስ ይሆናል።

እግዚአብሔር የተመሠገነ ይኹን!!

ሰላም ቅዱሳን የናይናን ቻናል ተከታታዮች ከአቅም በላይ በሆነ ምክንያት ከዛሬ ጀምሮ ለአንድ ሳምንት በዚህ ቻናል አገልግሎት አይኖረንም።ጌታ ቢፈቅድ እና ብንኖር ከአንድ ሳምንት ቆይታ በኋላ በዚህም በዩቲዩብም የጀመርናቸውን ትምህርቶች እንቀጥላለን።

ጸጋ እና ሰላም ይብዛላችሁ!!
በረከት ከበደ

#የምሥጋና_ምክንያት

አጭር ትምህርት
ወንድም በረከት ከበደ

በዚህ ዘመን አገልግሎት ፍየሎችን በግ የማድረግ አገልግሎት ሳይሆን በግ የመሰራረቅ አገልግሎት ነው።ወዳጆቼ አገልግሎታችን ወደ ተሰበሰቡት ህዝቦች ሳይሆን ያልተሰበሰቡትን የሚሰበስብ ሊሆን ይገባል።ያኔ እውነተኛውን ፍየሎችን በግ የማድረግ አገልግሎት ማገልገላችን ይታወቃል!!

መለወጥ በመንፈስ ቅዱስ በመነካት ውስጥ ያለ እውነተኛና የሚታይ ነገር ነው።በጳውሎስም ሕይወት ደግሞ መለወጥን ስንመለከት የመጣበትን ዓላማ ትቶ ዓላማ እንዲቀይር ሲያደርገው ፤ ዕይታው ተቀይሮ መንፈሣዊውን ዓለም እንዲያይ ሸፍኖት እና ከልሎት የነበረው ቅርፊት ሲነሳለት እንዲሁም ባቀደው ሳይሆን በታቀደለት እንዲኖር ህይወት ሲቀጠልለት እናያለን።
የጳውሎስ ሕይወት ከእኛ ህይወት አንጻር ስንመለከተው ዓለም የሰጠችንን ዓላማ የጻፍንበትን ደብዳቤ በእውነተኛው መለኮታዊ ደብዳቤ ቀይረን ዕይታችንን በሚቀይረው ዕውቀት ቅርፊታችን ተራግፎ ባቀድነው ሳይሆን ባቀደልን ውስጥ እየኖርን እውነተኛውን የለውጥ ጎዳና ማጣጣም ይገባናል።ስለዚህ ወደቃሉ ብርሃን ወደ መንፈሱም መጠጋት ይጠበቅብናል።

ለሁሉም ዘመን አለው።ዛሬ የምናየው ሁሉ አላፊ ነው።ዛሬ በነገ ይተካል።የለመለመውም ይደርቃል።ሁሉም በየዘመኑ ውብ ነው።ይህ ውበት ደግሞ የየዘመኑን ድርጊት ተቀብሎ በመኖር ይወሰናል።የዛሬ አፍሮዎች የነገ ራሰ-በራዎች ሊሆኑ ይችላሉ።ሁሉም የሚሸሽበት ዘመን አለ።ሁሉ የሚቀርብበትም እንደዛው።በቀረቡን ከተደገፍን በሚርቁን ዘመን እንጎዳለን።ስለዚህ ዘመን በማይወስነው መደገፍ ያስፈልገናል።

ዘመናትን የፈጠረ እርሱ ዘመንን ይቆጣጠራል።የብርሃንንም ሆነ የጨለማን ዘመናት እርሱ ይቆጣጠራቸዋል።መጽሐፉም ``ሁሉን የሚቆጣጠር'' ብሎ ይጠራዋል።የዘመናት ጌታ ነውና በሚቆጣጠረው ዘመን ላይ ከመደገፍ በተቆጣጣሪው ላይ መደገፍ ያዋጣናል።ሲለዋወጡ ለማልቀስ በሚለዋወጠው ዘመን ከመደገፍ ያው በሆነው በእርሱ መደገፍ በእርግጥ እረፍት ይሰጣል።

Watch "የቄስ ተክለማርያም ኢየሱስ #Apostolic #Protestant" on YouTube
https://youtu.be/JHqs9IKVF2I?si=3NE3ztKzxmYzQpwL

ከኢየሱስ ውጪ ወደ አብ የሚሠሩ ድልድዮች ሁሉም ፈራሽ ናቸው።ምክንያቱም አብ በድልድይነት አያውቃቸውም።

ከእግዚአብሔር በቀር እምነት፣ተስፋ፣ፍቅር የምንጥልበት ማንኛውም ነገር ጣዖት ነው።

ለሁሉም የደም ዓይነት ቢለገስ ተስማሚና ፈዋሹ የኢየሱስ ደም ነው።

#አሁን_ሰላም_ነው

የሰው ልጅ በኤደን ገነት ከአምላኩ ጋር ተለያየ።በፈጣሪውም ላይ ተረከዙን አንስቶ የሰማውን የሰይጣንን ምክር ተግብሮ አምላኩን አስቀየመ።እግዚአብሔርም ወዲያው ፍርዱን ፈረደ።በእርግጥ እየፈረደም ፍቅሩን ገለጠ።የድኅነትን በር እየከፈተ የሰውን ልጅ ከገነት አስወጣው።ከፍቅሩ የተነሣ ያኔውኑ ተስፋ እየሰጠ የመዳንን በር እየከፈተ ነበር።ከዚያ ጊዜ ጀምሮ የሰው ልጅ ከእግዚአብሔር ጋር ጦርነት ውስጥ ገባ።ወንድሙን የሚገድል ፤ ግንብ ገንብቶ ሰማይ ካልደረስኩ የሚል ትዕቢተኛ ሆነ።እግዚአብሔርም በየጊዜው ሊረዳው ቢፈልግም የማልክለትን ነቢያት እየገደለ ፤ በመላዕክቱ ሳይቀር ፍትወት እየተመኘ ወዲያ በልልኝ አለው።እግዚአብሔር ግን ተስፋውን ሊፈጽም ከእሰይ ግንድ በትር አወጣ።እርሱም ኢየሱስ ክርስቶስ ነው።ኢየሱስ ክርስቶስም ጥልን በመስቀሉ ገድሎ እግዚአብሔር እና ሰውን አዛመደ።

በሚያስደንቅ ሁኔታ እና በማይታመን መልኩ #በኢየሱስ_ክርስቶስ_ሞት_እግዚአብሔር_እና_ሰው_ተጨባበጡ።
የሰው ልጅም ከአምላክ ታርቆ በልቡ ሰላም ተሰማው።#አሁን_ሰላም_ነው!
እግዚአብሔር ቁጣውን ልጁ ላይ አብርዶ ይቅር ብሎናልና ከእግዚአብሔር ጋር ሰላም ነው።ከእግዚአብሔር ጋር ዕርቅ ወርዶ ጠብ ተወግዷል።በክርስቶስ አማካኝነት ጠላቶቹ የነበርነውን ወዳጆቹ አድርጎናል።አስታራቂው ኢየሱስ አስታርቆን ከእግዚአብሔር ጋር አሁን ሰላም ነው!!ይህ ትልቁ የማመስገኛ ምክንያታችን ነው።

ክብር ለእግዚአብሔር ይኹን!!

ወገኖቼ

በክርስቶስ የተደረገው ካልገባን በክርስቶስ የሆንነውም አይገባንም።በክርስቶስ የሆንነውም ካልገባን አሁን ያለንበትን ሥፍራም አናውቅም።አሁን ያለንበትን ሥፍራ ካልተረዳነው በመጨረሻ የምናገኘውንም አንረዳም።በክርስቶስ #ምን_አገኘን?#ምንስ_ሆንን?#ምንስ_ተገፈፈልን?እነዚህን ማወቅ በተስፋ የተሞላ የእረፍት ኑሮን ይሰጠናል!!

የሮሜ መልዕክት ጥናት (ክፍል 7)
#በወንጌል_አላፍርም

#ምዕራፍ 1:16-17

ወንድም በረከት ከበደ

ሰው ሁሉ #የወታደሩን ዓይነት የመዳን ጥያቄ ይጠይቃል።የጥያቄውን ምላሽ ደግሞ #በወንበዴው መዳን ውስጥ ያገኛል።

ተለቋል

https://youtu.be/rvLpk66sPhc?si=10tAsp5aG0nbLpnv