ምርጥ መጣጥፎች

የተስፋ እስር ቤት

“ሰው ከምግብ ውጪ አርባ ቀን መኖር ይችላል፤ ከውኃ ውጪ ሶስት ቀን ሊኖር ይችላል፤ ከአየር ውጪ ስምንት ደቂቃዎች መኖር ይችላል፤ ከተስፋ ውጪ ግን ከአንዲት ደቂቃ በላይ መኖር አይችልም” – Hal Lindsey

በአሁን ሰአት ያለህበትን ወዳጅነት፣ የፍቅር ግንኙነትት፣ ስራ፣ ንግድም ሆነ ማንኛውንም በየእለቱ ጠዋት መንጋቱን የምትጠብቅበትን ነገር ተመልከተው፣ በዚያ ነገር ውስጥ ያለህ ተስፋ ነው እንደዚያ የሚደርግህ፡፡ በአንድ ነገር ላይ ተስፋ እንደሌለህ እንዳሰብክ ወዲያውኑ አቅም የማጣት ስሜት፣ እንቅልፍ መጣትና አንዳንዴም መኖር ያለመፈለግ ስሜት ይጫጫንሃል፡፡ ተስፋ ማለት የነገ መሄጃ ነውና ተስፋ ከሌለ ወደየት ይኬዳል?

ተስፋ የጉልበት ምንጭ ነው፡፡ ተስፋ ዛሬ ካለህበት ሁኔታ ወጥተህ ነገ እንዲሆን ከምታስበው ነገር ጋር አጣብቆ የሚያቆይህ ወሳኝ ሂደት ነው፡፡ ሆኖም ተስፋ ለአንዳንድ ሰዎች የሕመም ምክንያት ሊሆን ይችላል፡፡ ይህ የሚሆንበት ምክንያት የማይሞላን ተስፋ ከሰዎች በመጠበቅ ከአመት እስከ አመት ሲኖሩ ነው፡፡

ሰዎች በተለያየ ጊዜ በተስፋ እንድንጠብቃቸው ቃል በመግባት ያስጠብቁናል፡፡ የምንወዳቸውንና የምናምናቸው ሰዎች በተስፋ መጠበቅ የጨዋዎች ምልክት ነው፡፡ ነገር ግን የተገባው ተስፋ ከመጠን ያለፈ ፈተና ውስጥ በሚጨምረን ጊዜና ዝም ብለን የምንጠብቅ ከሆነ፣ የተስፋ እስር ቤት ውስጥ እንዳለን ማወቅ አለብን፡፡

ወይ በተስፋው ምክንያት በጉጉት አንኖር፣ ወይም ደግሞ አንደኛችንን የራሳችንን መንገድ አንከተል፣ እንዲሁ ተስፋውን በመጠበቅ እንደ እስረኛ እንከርማለን፡፡ ሰዎች በማይሞላ ተስፋ ውስጥ አንጠልጥለውን እየኖርን እንደሆነ ከተሰማን ሰዎቹን እውነተኛነት ለመመዘን የሚከተሉት ጥያቄዎች መጠየቅ እንችላለን፡-

1. ተስፋ የሰጡን ሰዎች ጉዳዩን የሚያስታውሱት እኛ ስናነሳላቸው ብቻ ሲሆን

2. ተስፋውን የመጠበቃችን ሁኔታ አመታቶቻችንንና እድሜያችንን የሚበላ ሲሆንና ስጋት ውስጥ ስንገባ

3. ሰዎቹ የሚያደርጉት ነገር ከምንጠብቀው ተስፋ አንጻር ተቃራኒ ሲሆን

4. ስለተሰጠን ተስፋ ለመወያየት ስንፈልግ (ልክ እንደተጠራጠርናቸው በማሳየት) በእኛ ላይ የቁጣና የንዴት ስሜት የሚያሳዩ ከሆነ

ከላይ የተጠቀሱትንና መሰል ሁኔታዎች ከተመለከትን መስጠት ከምንችላቸው ምላሾች መካከል የሚከተሉት ይገኙበታል . . .

1. ግልጽ ውይይት የማድረግ ጉዳይ አጽንቶ በመጠየቅ የሚቻለውን ያህል መታገስ

2. ሁኔታዎች ግልጽ ባለመሆን ከቀጠሉ የጊዜ ገደብ በማስቀመጥ አቋምን ግልጽ ማድረግ

3. ልብን ከስብራት ለመጠበቅ መዘጋጀትና ከተገባልን ተስፋ ውጪ መኖር እንደምንችል ራስን ማሳመን

4. የተገባውን ተስፋ በማይጣረስ መልኩ የግል ሕይወትን እቅድ በማውጣት ራስን የመቻል ሂደት መጀመር

በማይሞላ ተስፋ ድባብ ውስጥ ለአመታት መኖር አደገኛ የሆነ “የተስፋ እስር ቤት” ነውና ዛሬውኑ ተነሱና ከዚህ እስር ቤት ውጡ!

ከትንንሽ ገጠመኞችህ በልጠህ ተገኝ!

ታሪኩ ከተከሰተ ትንሽ ሰንበት ብሏል፡፡ በፈረንጆቹ አቆጣጠር በ1989 ዓ/ም በጸሐፊነቱና በቀስቃሽ ተናጋሪነቱ የታወቀው ዴኒስ (Dennis Waitley) ከሺካጎ ከተማ ወደ ሎስ አንጀለስ የሚሄደውን የበረራ መስመር ቁጥር 191 ለመያዝ በመንገድ ላይ እንዳለ ትንሽ በመዘግየቱ ምክንያት በረራው ለጥቂት ያመልጠዋል፡፡ በአየር ማረፊያው ደርሶ ለመግባት ሲጣደፍ አይኑ እያየ የመቀበያውን ደጆች ሲዘጉት ተመለከተ፡፡

የዘገየው ለጥቂት በመሆኑ ምክንያት ወደ በረራው ለመግባት እንዲፈቀድለት ቢማጸንም እንኳን ስላልተፈቀደለት በጣም ይበሳጫል፡፡ በዚያው ቀን ከምሳ በኋላ ዋና ተናጋሪ ሆኖ ሊቀርብበት የሚገባው ስብሰባ ቀጠሮ በዚህ ምክንያት ተበላሸበት፡፡ ከአካባቢው ዘወር በማለት በመነጫነጭ ላይ እያለ፣ ከሃያ ደቂቃዎች በኋላ አንድ ሰበር ዜና ቀልቡን ይስበዋል፡፡ ለጥቂት ያመለጠው በረራ ገና በመነሳት ላይ አያለ በመከስከሱ በውስጡ ያሉት ሰዎች በሙሉ መሞታቸውን ተመለከተ፡፡ ንዴቱና ቅሬታው ወደ ድንጋጤ፣ ወደ ኃዘንና በኋላም “በረራው እንኳን አመለጠኝ” ወደሚል ሃሳብ ተለወጠ፡፡

ከአየር ማረፊያው ወትቶ ሆቴል በመያዝ ወደ ክፍሉ ገብቶ አረፍ ለማለት ሞከረ፡፡ በእጁ ላይ ያለውን የበረራ ትኬት በመመለስ ገንዘቡን ከመቀበል ይልቅ ትኬቱን ለማስታወሻነት ለማስቀመጥ ወሰነ፡፡ ይህ ትኬት የዘወትር አስታዋሹ ሆነለት፡፡ በአንድ ነገር በሚበሳጭበት ጊዜ ሁሉ ባለቤቱ እጁት ትይዘውና ወደዚያ ለማስታወሻነት ወደተቀመጠ የበረራ መስመር ቁጥት 191 ትኬት በመውሰድ ሁሉም ነገር ለመልካም እንደሆነ ታስታውሰዋለች፡፡

ዴኒስ፣ “እያንዳንዱ ቀን በሙሉ ኃይላችን ልንኖረው የሚገባን ስጦታ ነው” ሲል ይደመጣል፡፡ በዚህም መልእክቱ፣ መለወጥ የማንችለውን እውነታ ከመታገል ይልቅ ለመኖር ስለተፈቀደልን ደስተኞች ልንሆን እንደሚገባን ያስታውሰናል፡፡

ልክ እንደ ዴኒስ ምንም ብታደርግ ልትለውጣቸው የማትችላቸው “አናዳጅ” የገጠመኝ መሰናክሎች ዘወትር ከመንገድህ ላይ አይጠፉም፡፡ እነዚህ በየጊዜው መንገድህ ላይ የሚደነቀሩና ካሰብከው ሩጫ የሚገቱህ ገጠመኞች የሚሰጡህ ያለመመቸት ስሜት ወደ ስሜታዊነትና በዚያም ስሜታዊነት ተነድቶ ውሳኔን ወደመቀያየር ቀጠና እንዳያስገባህ መጠንቀቅ አለብህ፡፡

ይህ አይነቱ የየእለት ገጠመኝና “እንቅፋት” በተገቢው ሁኔታ ካልተያዘ ለዋና ዋና የሕይወት አቅጣጫዎችህ እንቅፋት የሚሆንን ምላሽ እንድትሰጥ ሊጋብዝህ ይችላል፡፡

ከጣልቃ-ገብ ትንንሽ ገጠመኞችና ሁኔታዎች በልጠህ ተገኝ … በትንንሽ አመለካከት ከተጠመዱ ጣልቃ-ገብ ሰዎች ልቀህ ተገኝ … ከአንተ ቁጥጥር ውጪ ከሆኑ ጣልቃ-ገብ ክስተቶች ገዝፈህ ተገኝ … አትቁም … አትገታ … ትንንሽ ገጠመኞችን ስትተርክ ጊዜህን አታባክን … አናሳነትን ከሚወዱ ሰዎች ጋር ስትነታረክ ጊዜህን አታስበላ … ህይወት ከትንንሽ ገጠመኞችና ለተራ ነገር ለመስከን ከወሰኑ ሰዎች በላይ ነች … አንተም ከዚያ በላይ ነህ!!!

#ስሜቶችህ_አሻንጉሊት_የሆንክ_ያህል_ይጫወቱብሀል

“ሃሳቦችህን እንዲህ ሰድራቸው - አንተ ሽማግሌ ነህ፤ ከዚህም በኋላ ጥቂት እድሜ ብቻ ነው ያለህ - በእነዚህ ነገሮች ከዚህ በኋላ አትገዛም፤ እያንዳንዱ ስሜቶችህ እንደ አሻንጉሊት አይጎትቱህም፤ አሁን ላይ ስላለህ ሕይወት አታማርርም ወይም መጻኢ ቀናቶችህን በፍርሃት አትጠብቃቸውም”
#ማርከስ_አውሬሊየስ

ሰው መጥቶ እኛን ሊያዘን እና አለቃ ሊሆንብን ሲሞክር እንበሳጫለን። እንዴት እንደምለብስ አትነግረኝም፣ እንዴት እንደማስብ፣ ስራዬን እንዴት እንደምሰራ፣ እንዴት መኖር እንዳለብኝ… ይህም የሆነው እኛ ነጻ ሰው ነን ብለን ስለምናስብ ነው።

ለራሳችን እኛው ራሳችን በቂ ነን።

ይህንንም ነው ለራሳችን ስንነግረው የኖርነው።
ሆኖም የማንስማማበትን ሃሳብ የሆነ ሰው ካቀረበልን፣ ውስጣችን እንድንሞግተው ይነግረናል። የሆነ ሰው የማንወደውን ነገር ካደረገብን እንበሳጫለን። መጥፎ ሁነት ሲገጥመን እናዝናለን፤ ድባቴ ውስጥ እንገባለን ወይም እንጨነቃለን። ሆኖም ከጥቂት ደቂቃዎች በኋላ መልካም ነገር ከሆነልን በድንገት ደስተኛ፣ ተጫዋች እና ተጨማሪ ፈላጊዎች እንሆናለን።

ማንም ሰው ከስሜቶቻችን በላይ በእኛ ላይ አይጫወትም። ልክ አሻንጉሊት እንደሆንን ሁሉ ስሜቶቻችን ይጫወቱብናል፤ ይህን ማስተዋል ስንጀምር በስሜቶቻችን መመራት ማቆም እንዳለብን እንረዳለን።

ስሜቶቻችን ሳይሆኑ እኛ ነን አለቃ መሆን ያለብን፤ ምክንያቱም ለራሳችን እኛው ራሳችን በቂ እና ነጻ የሆንን ነንና።

#የለት_ፍልስፍና መጽሐፍ
#ምርጥ_መጣጥፎች

#ለስኬታማነት_4_ቀላል_ሚስጥሮች

1ኛ የምታደርጉትን እወቁ!

2ኛ የምታደርጉትን እመኑበት!

3ኛ የምታደርጉትን ውደዱት!

4ኛ በምታደርጉት ነገር በፍፁም ተስፋ እንዳትቆርጡ!
#ምርጥ_መጣጥፎች

#አትረበሽ!
ሰዎች አንተን ለመርዳት ወደ ኋላ ካሉ፣ ይህንን የአንስታይንን ቃላት አስታውስ፦
"እምቢ ያሉኝን ሰዎች ሁሉ አመሰግናለሁ፣ በእነሱ ምክንያት ራሴ አድርጌዋለሁ።"
#ምርጥ_መጣጥፎች

“#የውሻዬና_የመኪናው_ነገር”
የምትፈልገው (Your wants) እና የሚያስፈልግህ (Your needs)

አንድ ሰው ለወዳጁ እንዲህ ብሎ አጫወተው፡፡ “የውሻዬና የመኪናው ነገር በጣም ነው ያደከመኝ፡፡ በሰፈራችን ያለፈው መኪና ሁሉ አንድም አይቀረውም፣ በብርቱ እየተከታተለ ይጮሃል፡፡ ያየውን መኪና ሁሉ ለተወሰነ ርቀት ካሳደደው በኋላ ተመልሶ ይመጣል፡፡ ከጥቂት ጊዜ በኋላ እንደገና ሌላ መኪና ሲመጣ ጠብቆ ያንኑ ነገር ይደግማል፡፡ ስለእርሱ እኔ ደከመኝ”፡፡

ወዳጁ ይህንን ከሰማ በኋላ አንድ ጥያቄ ጠየቀው፣ “ለመሆኑ፣ ውሻህ መኪናን አባርሮ የሚደርስበት ይመስልሃል?” ሰውዬውም መልሱ እንዲህ የሚል ነበር፣ “እኔን የጨነቀኝ የመድረስ ብቃቱ አይደለም፣ ከዚህ በፊት በቀስታ የሚሄዱ መኪናዎች ላይ ሲደርስ አይቻለሁ፡፡ ልክ ሲደርስባቸው ፊቱን አዙሮ ይመለስና ሌላ የሚያልፍን መኪና እንደገና ለማሳደድ ይጠብቃል፡፡ አንዳንድ ጊዜ ቀኑን ሙሉ ይህንን ሲያደርግ ነው የሚውለው፡፡ ውሻዬ የሰው ቋንቋ ቢችል፣ ጊዜህን በአግባብ ተጠቀምበት ብዬ እመክረው ነበር”፡፡

“የስኬት የመጀመሪያው መመሪያ ፍላጎት ይባላል - የምትፈልገውን ማወቅ፡፡ ፍላጎት አለህ ማለት ዘርህን ዘራህ ማለት ነው” - Robert Collier

አሁን በጽኑ የምትፈልገውን ነገር ቆም ብለህ አስበው፣ ብትደርስበትና በእጅህ ቢገባ ምን ታደርጋለህ? ለዚህ ጥያቄ ብዙም ሳታስብና ሳትጨናነቅ ቁልጭ ያለ መልስን መስጠት ካልቻልክ ምናልባት የምትከታተለው ነገር ለምንም ጥቅም የማይውል ጊዜ ማባከኛ ነው፡፡ ብዙ ሰዎች የሚፈልጉት ነገር ምን እንደሆነ አያውቁትም፡፡ በአንድ ነገር ላይ ገንዘባቸውን ያፈስሳሉ፣ ጊዜአቸውን ይሰዋሉ፣ ብዙ ኪሎ ሜትር ይጓዛሉ፣ ከዚያም ያንን ነገር ልክ እጃቸው እንዳስገቡት ሲያውቁ ቀድሞውንም የሚፈልጉት ነገር እንዳልሆነ ይገነዘባሉ፡፡ ከዚያም እንደገና ሌላ ነገር መከተል ይጀምራሉ፤ አዙሪቱ ይቀጥላል፡፡

አሁን በብርቱ የምትከታተለውን፣ ብዙ ጊዜህን የምታጠፋበትን፣ ገንዘብህን ያባከንክበትን ነገር በእጅህ ብታስገባው፣ በህይወትህ ካለህ ዋነኛ ዓላማ ጋር አብሮ ካልሄደና ወደትምሄድበት የሕይወት አቅጣጫ አንድ እርምጃ ካላራመደህ ጊዜህን በከንቱ እያባከንክ ነው፡፡ የማያዛልቅን ነገር ማባረር! የምትከተለው ነገር በምትሄድበት የሕይወት ዓላማ አቅጣጫ መሆኑን ማወቅ የአዋቂነት ሁሉ አዋቂነት ነው፡፡ መመለስ ያለበት ጥያቄ፣ “የምትፈልገው ነገር ምንድን ነው?” የሚለው ነው፡፡

ፍላጎትህን በማወቅ ስትደላደል ሌላው ሰው ላይ አይተኸው ያማረህ ነገር ሁሉ የግድ እንደማያስፈለግህ ማስተዋል ትጀምራለህ፡፡ በሕይወትህ በምትፈልገው (Your wants) እና በሚያስፈልግህ ነገሮች (Your needs) መካከል ለይተህ ማወቅ በብዙ ይጠቅምሃል፡፡ የምትፈልገው ነገር ሁሉ የሚያስፈልግህ ላይሆን ይችላል፤ በተቃራኒው ደግሞ አንዳንድ ጊዜ የሚያስፈልግህን ሁሉ ለጊዜው ላትፈልገውና ልታስተላልፈው ትችላለህ፡፡ የእነዚህን ሁለት ነገሮች ልዩነት ጥርት ባለ መልኩ መለየት አለብህ፡፡ የምትመኛቸውንና የምትፈልጋቸውን ሁሉ ከመከተል ይልቅ በሚያስፈልጉህ ነገሮች ላይ ማተኮር ስትጀምር፣ ሁኔታው ለሌሎች ግር ቢልም ለአንተ ግን እውነታው ኩልል ብሎ ይታይሃል፡፡

በሚያስፈልገንና በእርግጥም ብንደርስበትና በእጃችን ብናስገባው ለመልካም አላማ ልንጠቀምበት በምንችል ነገር ላይ ትኩረትን መጣል ራስን የመግዛት ዲሲፕሊን ይጠይቃል፡፡ ራስን የመግዛት ዲሲፕሊን የንግስና ሁሉ ንግስና ነው፡፡

“እኔ በእርግጥ ንጉስ ነኝ፣ ምክንያቱም ራሴን መግዛት አውቅበታለሁና” - Pietro Aretino
#ምርጥ_መጣጥፎች

#ነገሮችን_በህሊናችን_መሳል 

👉 ሁሉም ነገር ሃሳብ ነበር። ምንም ነገር እውን ሆኖ ከማየታችን በፊት በአንድ ሰው አይምሮ ውስጥ የተጠነሰሰ ሃሳብ ነበር። የምንፈልገውን ነገር እውን ሆኖ ከማየታችን በፊት በህሊናችን መሳል ትልቁ የስኬት ሚስጥር እንደሆነ ብዙዎች የተስማሙበት ነው። አላማችን ቁልጭ ብሎ በህሊናችን ከታይን ለጉዟችን ትልቅ ጉልበት አገኘን ማለት ነው። ምክንያቱም የጊዜ ጉዳይ ነው እንጂ እንደሚሳካ አእምሮአችን እየነገረን ነው።
#ምርጥ_መጣጥፎች

#የደስተኝነት_ምስጢሮች

ደስተኝነት እንዲያው በዘፈቀደና እንደ አጋጣሚ ሳይሆን በፍላጎት ወይም ደስተኛ መሆንን በመምረጥ እንዲሁም ደስተኛ ለመሆን በመዘጋጀት ሊገኝ የሚችል በጎ ስሜት ነው፡፡
   ደስተኝነትን ለማዳበር የሚረዱ አምስት        ምስጢራት
👉 ተስፈኝነት ፦ ተስፈኛ ሰዎች በብርጭቆ ውስጥ በከፊል የሞላን "ውሀ ግማሽ ሙሉ " ብለው ሲጠሩት ተስፈኛ ያልሆኑት ፀለምተኞች "ግማሽ ጎዶሎ" ይሉታል፡፡ ተስፈኞች ህልማቸው ሊሳካ የሚችለው አዎንታዊውን የአስተሳሰብ መንገድ በመከተል እንደሆነ ያውቃሉ፡፡ ተስፈኝነት የአዎንታዊ አስተሳሰብ ትሩፋት ሲሆን የደስተኝነትም ዋነኛ ግብአት ነው፡፡
👉  ትህትና ፦ ደስተኛ ሰዎች ለራሳቸውም ሆነ ለሌሎች ትሁትና አዛኝ መሆንን ይመርጣሉ። ራሳቸውንም ሆነ ሌሎችን የሚያስተናግዱበት መንገድ ለሚሰማቸው ስሜትና በአጠቃላይም የማንነታቸው መገለጫ መሰረት እንደሆነ ይገነዘባሉ።
👉 ይቅር ባይነት ፦ ደስተኛ ሰዎች የጎዷቸው ሰዎች ላይ እንኩዋን ቢሆን የቂም እና የበቀል ስሜቶችን በውስጣቸው አምቀው ማቆየት የሚቻላቸው አይደሉም። በሰዎች ማህበራዊ ግንኙነት ውስጥ የሚያበሳጭ ፣ የሚያስቀይም እና የሚያስከፋ ፀባይ ጠፍቶ የማያውቅ ቢሆንም ደስተኞችን ልዩ የሚያደርጋቸው ባህሪይ ግን በእንዲህ ያለው ስብእና መጠለፍ ፈፅሞ የማይፈቅዱ መሆናቸው ነው። ደስተኞች በሌላው ፀባይ ላይ ከመፍረድ ይልቅ ሀዘኔታ የሚሰማቸው ናቸው።
👉 በፀጋ መቀበል ፦ ደስተኛ ሰዎች መቆጣጠር የሚችሉትንና የማይችሉትን ጠንቅቀው ያውቃሉ። ደስተኛ ያልሆኑ ሰዎች ግን ሁሉንም ሰው ወይም ሁኔታ ለመለወጥ ሁልጊዜ ጥረት እንዳደረጉ ናቸው። በዚህ የተነሳ ዘወትር ምቾት የማጣት ሁኔታ ይስተዋልባቸዋል። ደስተኞች ግን በምንም አይነት ሁኔታ ሁሉንም ነገር መቆጣጠር እንደማይችሉ ፣ እንደማያስፈልጋቸው ጭምር ስለሚረዱ መላ ትኩረታቸውን መቆጣጠር በሚችሉት ነገር ላይ ያሳርፋሉ።
👉 አመስጋኝነት ፦ ደስተኛ ሰዎች የሌሏቸውን ነገሮች በማሰብ ምሬት ውስጥ የሚገቡ ሳይሆኑ ስላላቸው ነገር የሚያመሰግኑ ናቸው። መስማት ፣ መናገር ፣ ማየት ወይም መራመድ ያልታደሉት እንኳን በርካቶቹ ደስተኞች የሚሆኑበት ምስጢር ትኩረታቸውን ባጡት ነገር ላይ ሳይሆን ባሏቸው ነገሮች ላይ ማድረግ መቻላቸው ነው።
#ምርጥ_መጣጥፎች

#ቀናተኛው_ንስር
👉የጥንት አፈ-ታሪክ ሁለት በአንድ አካባቢ ያደጉ ንስሮች እንደነበሩ ይነግረናል፡፡ እነዚህ ንስሮች ፈጣንና ወደ ከፍታ በመብረር አደናቸውን ከሩቅ በማየት የታወቁ ነበሩ፡፡ በመካከላቸው ግን ከባድ የሆነ ውጥረት አለ፡፡ አንደኛው ንስር ከሌላኛው ንስር የበለጠ ከፍታ የመብረር ብቃት ስለነበረው ከእርሱ እኩል መብረር ያቃተው ንስር እጅግ ይቀናበት ነበር፡፡ ቅንአቱ እየበረታ ሲሄድበት ይህንን በከፍታ የበለጠውን ጓደኛውን ለማጥፋት ወሰነ፡፡ በምን መልክ ሊያጠፋው እንደሚችል ሲያሰላስል ሳለ አንድ ቀስትን በእጁ የያዘ አዳኝ ሰው አገኘ፡፡
ወደ እርሱም ቀረብ በማለት ችግሩን አጫወተው፡፡ “ያ ንስር ይታይሃል?” አለው ቀና ብሎ በሚያስገርም ከፍታ ላይ በመብረር ላይ ያለውን ንስር እያሳየው፡፡ የማየት ብቃቱ ከንስር አይን ጋር ሊወዳደር ያልቻለው አዳኝ ሰው በመዳፉ የጸሃዩን ጨረር እየተከላከለ ለማየት ቢሞክርም ንስሩን ሊመለከተው አልቻለም፡፡ ይህ ሰው፣ “ንስሩ አይታየኝም፣ እጅግ ሩቅ ነው” ብሎ ለቀናተኛው ንስር መለሰለት፡፡ ይህ መልስ የቀናተኛውን ንስር ልብ ይበልጥ በምቀኝነት አቃጠለው የጓደኛውን ወደከፍታ የመብረር ብቃት አስታውሶታልና፡፡ ጥቂት ጊዜ ከጠበቁ በኋላ ንስሩ አዳኙ ሊያየው ወደሚችልበት ቅርበት ስለወረደ ንግግራቸውን ቀጠሉ፡፡ ቀናተኛው ንስር ለአዳኙ፣ “እባክህ ይህንን ንስር በቀስትህ ግደልልኝ” አለው፡፡ አዳኙም፣ “ለምን?” አለው፡፡ ቀናተኛው ንስር “ከእኔ በላይ ከፍ ብሎ መብረር ስለሚችል ቀንቼ ነው”፡፡ አዳኙም፣ “በእኔ እምነት ከእርሱ ለመሻል ከመታገል ለመሻሻል ብትጥር ይሻልሃል፡፡ ያም ሆነ ይህ፣ ቀስት ጨርሻለሁ እንጂ የጠየከኝን ነገር አደርግልህ ነበር” ብሎ መለሰለት፡፡ ቀናተኛው ንስር ጥቂት ካሰበ በኋላ፣ አንደኛውን ክንፉን ጠጋ በማድረግ “አንዲትን ላባ ከክንፌ ላይ ንቀልና እንደ ቀስት ተጠቀምበት” አለው፡፡ በዚህ ተስማሙና አንድን ላባ ከንስሩ ክንፍ ላይ በመንቀል ቀስቱን ለጥጦ ተኮሰ፡፡ ኢላማውን ግን አላገኘውም፡፡ ይቅርታ ይህንን ንስር ቀስቴ አላገኘውም ብሎት ጉዞውን ሊቀጥል ሲል፣ ቀናተኛው ንስር አንዴ በድጋሚ እንዲሞክር ለመነው፡፡ ከሌላኛው ክንፉ ሌላን ላባ ነቅሎ ከተኮሰ በኋላ አሁንም ኢላማውን ስለሳተው ለመሄድ ተነሳ፡፡ ቀናተኛው ንስር ግን በቀላሉ ሊለቀው አልቻለም፡፡ በዚህ ሁኔታ ክንፉን እያፈራረቀ ለአዳኙ እየሰጠው ብዙ ላባ ካስነቀለ በኋላ ሰውየው ስለደከመው ጥሎት ሄደ። በሁኔታው የተበሳጨው ቀናተኛ ንስር ጉዞውን ለመቀጠል ሲሞክር ለካ ላባው ሁሉ ከክንፉ ላይ ተነቅሎ አልቆ ነበር፡፡ መብረር አልቻለም፡፡ ይህ ሕይወቱን ሙሉ በከፍታ ላይ በመብረር የታወቀው ንስር “ዶሮ” ሆኖ ቀረ፡፡ ቅንአት ትኩረታችንንና ጊዜያችን ሁሉ በማፍረስ ላይ እንድናውል ስለሚያሳውረን የገነባነው አንዳች ነገር እንደሌለ የሚገባን፣ በኋላ ስንባንን ነው ፡፡ ቅንአት ያለ የሌለንን ኃይል ለተቃውሞ እንድናውል ስሚያደነዝዘን ደግፈን ወደፊት ያራመድነው አንድም ቁም ነገር እንደሌለን የምንገነዘበው በኋላ ስንነቃ ነው፡፡ ቅንአት ከመንቀል ሌላ ተልእኮ ስለማይሰጠን አንድም ነገር ተክለን እንዳላለመለምን ወደማወቅ የምንመጣው ከድንዛዜው ስንወጣ ነው፡፡ በቅንአት እሳት ስንነድና ስንግለበለብ አይኖቻችን የተከፈቱትና ትኩረታችንን የሳበው ማን ምን ደረጃ እንደደረሰና በእንዴት አይነት ሁኔታ ያንን ሰው መግታት እንደሚቻል እንጂ እኛ ራሳችን በምን አይነት ሁኔታ አሁን ካለንበት ደረጃ ወጥተን ወደ ተሻለው ደረጃ እንደምንደርስ አይደለም፡፡
• ቅንአት የአናሳነት ምልክት ነው፡- የቅንአት መንስኤው አናሳነት ስለሆነ አቅምህንና በራስህ ላይ ያለህን አመለካከት ገንባ፡፡
• ቅንአት አክሳሪ ነው፡- ቅንአት ያለበት ሰው ሌላውን በማጥፋት ሂደት ውስጥ በራሱ ላይ የሚመጣውን ክስረት ስለማያስተውለው ከሳሪው እሱ ነው፡፡
• ቅንአት ጨካኝ ነው፡- ቅንአት ያለበት ሰው የበለጠውን በመሰለው ሰው ላይ ምንም ነገር ከማድረግ አይመለስም፡፡ የአለማችን የጭካኔ ጥጎች አብዛኛዎቹ መነሻቸው ቅንአት ነው፡፡
• ቅንአት የስራ ፈትነት ምልክት ነው፡- ሰዎች በራሳቸው ስራና እድገት ላይ ሲያተኩሩ የሌላውን ሰው እድገት እንደመነሳሻ እንጂ እንደ መበለጥ አያዩትም፡፡ የራሳቸው አላማና ስራ የሌላቸው ሰዎች የሌላውን እድገት እያዩ ከመቃጠል ውጪ ሌላ ስራ የላቸውም፡፡
ንስር ሆነህ ተወልደህ ዶሮ ሆን እንዳታልፍ ቅንአትን ጣልና አብሮ መስራትን አንሳ!
ምንጭ፦ ዶ/ር ኢዮብ ማሞ
#ምርጥ_መጣጥፎች

#ሃሳብህን_ተረዳው!
፨፨፨/////////፨፨፨
ያለምንም ዝግጂት፣ ያለምንም ጥናትና እውቀት በአንዴ ከመሬት ተነስቶ የሚሰራ ነገር የለም። ከዚህ በፊት የማንበብ ልምድ ከሌለህ፣ እውቀትህ ውስን ከሆነ፣ ከብዙ አቅጣጫ ግንዛቤን ካላገኘህ በሃሳብና በፍላጎት፣ በግለትና በመነቃቃት ብቻ ልታሳካው የምትችለው ነገር የለም። ለሁሉም ነገር ብስለት ያስፈልግሃል፤ እውቀት ሊኖርህ ይገባል፤ በጥልቀት የተመዘነ ጥናት ያስፈልግሃል። አለማወቅ አዲስ ባይሆንም ማወቅ ግን ለየትኛውም አዲስ፣ የተሻለና ውጤታማ ተግባር እጅግ ወሳኝ ነው። መኖር የምትፈልገውን ህይወት መኖር የምትችለው እንደ እውቀትህ ልክና እንደ ግንዛቤህ መጠን ነው። ከጅምሩ የማታውቀውና ለማወቅም ፍላጎቱ የሌለህ ነገር አንተ ጋር ምንም አይሰራም። አብዝተህ የምትፈልገውን ነገር ለማወቅ የማታደርገው ነገር አይኖርም። እውቀቱ በሌለበት፣ ግንዛቤው ሳይኖርህ፣ ምንም ፍንጭ ሳትይዝ፣ አሰራሩ ሳይገባህ በሃሳብ ረጅም ብትጓዝም በተግባር ግን እዛው ነህ፤ ልጅ ሆነህ ትቀራለህ፤ በእራስመተማመን ሊኖርህ አይችልም።

አዎ! ጀግናዬ..! ሃሳብህን ተረዳው! ማድረግ ስለምትፈልገው ነገር እውቀት ይኑርህ፤ አጀማመሩን፣ አሰራሩን፣ አደራረጉን በሚገባ መርምር። የሚያውቁት ነገር ምንጊዜም ቀላልና ግልፅ መሆኑ አይቀርም። የኋላኋላ ሊመጣ የሚችለውን ውጤት መገመት ትችላለህና የምታውቀውን ነገር ለመፈፀም ፍረሃትም ሆነ የበዛ ስጋት አይኖርም። እውቀት በእራስመተማመንን ይጨምራል፤ ያበረታል፤ ወደፊት ይገፋል፤ ሃይል ይሆናል፤ ስራውን ያቀላል፤ ውጤቱን ያፈጥናል። ውስጥህ የማያቋርጥ ሃሳብ ካስቸገረህ፣ መጀመር እንዳለብህ የሚሰማህ ስራ ካለ፣ መሔድ ያለብህ ቦታ እንዳለ ከተረዳህ ከምንም በፊት ስለሃሳብህ፣ ስለስራውና ስለስፍራው በጥልቀት መርምረህ እወቅ፤ ግንዛቤህን አስፋ፤ አረዳድህን አጎልብት።

አዎ! ብዙ ጊዜ አንድን ነገር ለመጀመር ወይም ለማከናወን ድፍረት የሚያንሰን፣ ፍረሃት የሚወረን፣ ተነሳሽነታችን በየጊዜው እየመጣ የሚጠፋው ስለጉዳዩ በቂ እውቀት ስለሌለን ነው። በሰው ፊት ቆመህ ስለምታቀርበው ፅሁፍም ሆነ ሪፖርት በቂ እውቀት ከሌለህ ሳትጀምር መፍራትህና መርበትበትህ የማይቀር ጉዳይ ነው። ፍረሃት በእርግጥም ተፈጥሮህ ሳይሆን የምትናገረውን ነገር በሚገባ ባለመረዳትህና በለማወቅህ የሚመጣ ስሜት ነው። ለምታቀርበው፣ ለምታከናውነውና ለምታስረዳው ለእያንዳንዱ ነገር እውቀት እጅግ ወሳኝ ነው። ስኬትህ ስለስራህ ባለህ እውቀት ይመዘናል፤ በእራስ መተማመንህ፣ ተነሳሽነትህ፣ ንቃትህ፣ ወኔና ድፍረትህ በጥልቅ እውቀትህ ልክ የሚመጣ ነው። የምትችለውና የማትችለውን፣ የሚገባህንና የማይገባህን፣ የሚመጥንህንና የማይመጥንህን ተግባር ማወቁ በእራሱ የተሻለው ከፍታህ ሚስጥር ነው። በማታውቀው ጉዳይ ውስጥ ገብተህ ግራ ከምትጋባ ወይም ጉዳዩን እወቀው፣ ካልሆነም የምታውቀው ላይ አተኩር።
#ምርጥ_መጣጥፎች

#አዕምሮህን_አሰልጥን!

፨፨፨፨////////፨፨፨፨

አነቃቂ ንግግር ባትሰማ፣ አነቃቂ ፅሁፍ ባታነብ፣ አይዞህ በርታ የሚልህ ሰው ባታገኝ፣ ከጎንህ የሚቆም አጋዥ ባታገኝ ህይወትህን ሙሉ በሙሉ በእራስህ አነቃቂነትና በችግሮችህ አስገዳጅነት የምትቀይረው ይመስልሃል? ሁሌም ንቁ አትሆንም፤ ሁሌም ዝግጁ አትሆንም። ነገር ግን ከምንም በላይ ንቁና ዝግጁ የሚያደርግህን ተግባር በመፈፀም ንቃትን መላበስና ዝግጁ መሆን ትችላለህ። ያለህበት የገንዘብ እጦት የሚጠበቅብህን ሁሉ እንድታደርግ ካላነሳሳህ አንድ አነቃቂ ንግግር ወይም ፅሁፍ ሊያነቃና ሊያነሳሳህ አይችልም። አንተ ካለህበት ሁኔታ በተሻለ ጠንካራ ሰው እንድትሆን የሚያደርግህ ነገር የለም። የህመምህን ስሜት ታውቀዋለህ፤ የማጣት ስቃይ ደርሶብሃል፤ የመናቅ፣ የመገፋት ሃፍረት አጋጥሞሃል። በሌለህ ነገር መለካት ምንያክል እንደሚያም ታውቀዋለህ።

አዎ! ጀግናዬ..! አዕምሮህን አሰልጥን! እራስህ ላይ ሰልጥን፤ ማንነትህ ላይ ንገስ። ማድረግ ያለብህን ለማድረግ፣ መገኘት የሚገባህ ቦታ ለመገኘት ቆራጥ ሁን። ማመንታት የስኬትህ ጠላት ነው። መወሰን ባለብህ ነገር ላይ በፍጥነት ወስን። ህልምህን ለመኖር ብዙ ያልተሟሉ ነገሮች ይኖራሉ፤ ነገር ግን አዕምሮህን ካሰለጠንክ፣ ማንነትህን ከህልምህ ጋር ካዋሃድክ፣ በአዎንታዊ አመለካከት ከተሞላህ ባለህ ነገር ህልምህን መኖር ትችላለህ። ስልጡን አዕምሮ አነቃቂ (motivation) አይጠብቅም፤ ህልመኛ ማንነት ሰበብ (excuse) አያበዛም፤ አዎንታዊ ስብዕና የአላማውን መሰናክሎች (obstacles) አይቆጥርም። ወደፊት የምትሔደው ሲመችህና የሚገፋህ ስታገኝ ብቻ አይደለም፤ ጉዞህን የምትቀጥለው አበረታች ድጋፍ ስታገኝ ብቻ አይደለም።

አዎ! ማድረግ ላለብህ ነገር የሚያስፈልግህ ምክንያት ሳይሆን ምግባር ነው። እያስጠላህ ጠንክሮ የመስራት ምግባር፤ እየታመምክ እስከጥግ የመታገል ምግባር፤ በማጣት ውስጥ የመፍጨርጨር ምግባር፣ እየተገፉ፣ እየተጠሉ፣ እየተሰደቡና እየተተቹ ህልምን የመኖር ምግባር። ማንም ቢሆን ሰው የሚያወጣው አዕምሮው ውስጥ ያለውን ሃሳብ እንጂ አንተን የሚገልፀውን ነገር አይደለም። እንደምታስጠላ ሲናገር እራሱን እየሰደበ እንደሆነ አይረዳም፤ አትችልም ሲልህ ለእራሱ እንደማይችል እያረጋጋጠ መሆኑ አይገባውም። የምትባለውን እንዳልሆንክ አምነህ ለእራስህ በሰጠሀው ልክ መጓዝም እራሱን የቻለ አንድ ትልቅ ምግባር ነው። በህልሙ ጉዳይ ከማንም የማይደራደር፣ ለራዕይው እውንነት ምንም ምክንያት የማያቀርብ፣ አላማውን ለማሳካት ማንንም የማይጠብቅ መሪ የሆነ ስልጡን አዕምሮ አለህ። በምንም ሁኔታ እንዲረበሽና በአሉታዊ አስተሳሰብ እንዲመረዝ አትፍቀድ። ስልጡኑን አዕምሮ ተጠቅመህ በምትፈልገው መንገድ፣ የምትፈልገውን ህይወት ኑር።
#ምርጥ_መጣጥፎች

👉 ያልበለፀገ አዕምሮ የበለፀገ ማንነትም ሆነ የፖለቲካ ፓርቲን አያስገኝም!
(እ.ብ.ይ.)

ማንም ሰው ከእውቀት ጋር አልተወለደም፡፡ ሰው ሲወለድ እውቀት የሚያመነጭበትን አዕምሮ ይዞ ነው የተወለደው እንጂ ጥበበኛ ሆኖ አልተወለደም፡፡ ጥበብ ከማሰብ ብዛት፣ ከምርምር፣ ከጥናት፣ ከንባብ የሚገኝ ነው፡፡ ዕውቀት በቅን አስተሳሰብ፣ በበጎ ሕሊና፣ በአዕምሮ ድካም፣ በማሰብ ሂደት፣ የተለያዩ ሃሳቦችን በማስተናገድ የሚመጣ ነው፡፡ እናቱ ሆድ ውስጥ ሆኖ ሁሉን ያወቀ የሰው ልጅ የለም፡፡ ሁሉም ዕውቀትና ጥበብ፤ ክሂልና ልዩ ሃሳብ የተገኘው በመማር፣ በልምምድና በትጋት ነው፡፡
የሰው ልጅ ሲወለድ ማሰቢያ ማሽን ተገጥሞለት ነው የተወለደው፡፡ ይሄ ማሽን የማይታክት፣ የማይደክም፣ የማይሰለች፣ በቀንም ሆነ በሌት ዕረፍት የሌለው፣ መቼም ከስራው የማይዛነፍ ነው፡፡ ሰው ጤንነት ጎድሎት ቢያብድ እንኳን አዕምሮ የእብድ ሃሳብ ከማመላለስና ከመከወን አያርፍም፡፡ አዕምሮ የረባም ሆነ ያልረባን ሃሳብን እንደግብዓት ተጠቅሞ ውጤቱን የሚሰጥ ልዩ ማሽን ነው፡፡ ጥሩ ውጤት ለማግኘት ግን ጥሩ ግብዓት መስጠት ግድ ይላል፡፡ የስንዴ እህል ወፍጮ ቤት ወስዶ የጤፍ ዱቄት መጠበቅ ሞኝነት ነው፡፡ የሰጠነውን አሳምሮ የሚሰጥ ነው ውዱ ሐብታችን (Give and take ነው ጨዋታው)፡፡ ያልሰጠነውን አይሰራም፤ የሰጠነው እንክርዳዱንም ቢሆን እህል አድርጎ አያወጣም፡፡

የአዕምሮ ጥሬ እቃ ሃሳብ ነው፡፡ ቁልፉ ደግሞ ማሰብ ነው፡፡ ማሰብና ሃሳብ ደግሞ በአሳቢው ይወሰናል፡፡ የአዕምሮ ቁልፉ ያለው በአዕምሮው ባለቤት በግለሰቡ እጅ ላይ ነው፡፡ ይሄ ቁልፍ ነው ሰውን በሞራል፣ በስብዕና፣ በምግባር ከፍም ዝቅም የሚያደርገው፡፡ ግለሰባዊ የሃሳብ ልዩነት የመጣው የአዕምሮ ምርቱ የተለያየ በመሆኑ ነው፡፡ የተለያየ አዕምሮ እንደአስተሳሰቡና እንደሃሳቡ ይለያያል፡፡ የሃሳብ ልዩነቱ እንዳጠቃቀማችን ይወሰናል፡፡ አዕምሮውን በርግዶ የመክፈትም ሆነ ጠርቅሞ የመዝጋት ፈቃዱ ያለው እያንዳንዱ ግለሰብ ላይ ነው፡፡ አዕምሮ እንዲያስብ ማሳሰብ ያለበት ግለሰቡ ነው፡፡ ጥልቅ አሳቢ ሰው የአዕምሮውን ቁልፍ ለመጠቀም የሚፍጨረጨር ነውና፡፡

አዕምሯዊ ብልጽግና የሃብት ሁሉ ቁንጮ ነው፡፡ በሃሳብ ሳይሰለጥኑ፣ በማሰብ ሳይዘምኑ፣ በቅን አስተሳሰብ ከፍ ሳይሉ ውስጣዊ ብልጽግና አይገኝም፡፡ መርማሪ ሕሊና፣ አመዛዛኝ ልቦና፣ የነቃ አዕምሮ ባለቤት መሆን የሚቻለው በሃሳብ መበልፀግ ሲቻል ነው፡፡ በማሰብ የጠለቀ፣ በሃሳብ የረቀቀ፣ በበጎ ስራ የከበረ አዕምሮ የበለፀገ ነው፡፡ በማሰቡ ሃይል፣ በሃሳቡ ጥልቀት የሚመካ ደግሞ በሃሳብ ይበለፅጋል፡፡ በዚህ ዘመን የሚያስፈልገን የበለፀገ አዕምሮ እንጂ ስሙ ብልፅግና የሆነ ፓርቲ አይደለም፡፡ ፓርቲ የሰዎች ስብስብ ነው፡፡ አባላቱ ሳይበለፅጉ የፓርቲያቸው ስም ብልጽግና ቢሆን ስምና ግብር ለየቅል ይሆናል፡፡ ስሙ ይቆየን፤ ግብሩ ይቅደመን!

አዕምሮ የሌሎች ሐብቶች ሁሉ ምንጭ ቢሆንም ሰው ሐብት ፍለጋ ከአዕምሮው ኮብልሎ የውጪውን ዓለም ነው የሚያማትረው፡፡ ራሱን የዘነጋ መቼም ቢሆን ከአዕምሮው ጋር ተስማምቶ መኖር አይችልም፡፡ ከራሳችን ጋር መጣላት የምንጀምረው የራሳችንን ሐብት ዘንግተን ሌላ ሐብት ፍለጋ መባከን ስንጀምር ነው፡፡ ያሰብነው ዓለማዊ ሐብት በእጅ ቢገባ እንኳን ያለአዕምሮ አይደላደልም፡፡ በማሰብ ያልተዘጋጀ አዕምሮ እንግዳ ነገር ሲገጥመው መልስ ለመስጠት ደመነፍሱን ይጠቀማል፤ ስሜቱን ያስቀድማል፡፡ ሰው አይደለም ለቁሳዊ ሐብቱ ቀርቶ ለመንፈሳዊ ሐብቱ ጭምር አዕምሮውን መጠቀሙ ግድ ይለዋል፡፡ የደስታና ሐዘን፣ የእርካታና ርሃብ መሰረቱ አዕምሮ ነውና፡፡ ሰላምም ሆነ ጦርነት በዓለማችን ላይ የሚከሰተው አዕምሮን ከማሰራት እና ካለማሰራት ነው፡፡ ነገር ግን የተሰጠን ሐብት ድንቅ ቢሆንም አብዛኞቻችን የሚደነቁ ስራዎችን ያልሰራነው አዕምሯችንን ባለመበልጸጉ ነው፡፡

አዎ በዚህ ዘመን ድንቁን አዕምሮ በበቂና በብቃት የሚጠቀምበት ሰው እምብዛም ነው፡፡ ጥቂት ሰዎች በተለያየ ዘመን ተነስተው አዕምሯቸውን በሙላት ተጠቅመዋል፡፡ እነዚህ ሰዎች ከራሳቸው አልፈው የአለምን አካሄድ የሚቀይር ችግር ፈቺ ሃሳቦችንና ቴክኖሎጂዎችን ፈጥረው ወደመጡበት ተመልሰዋል፡፡ አዕምሮን በሙላት መጠቀም ከራስ አልፎ ለዓለምም ያስተርፋል፡፡ አይደለም ለሰፊው ዓለም ቀርቶ ለአንድ ሰው እንኳን መትረፍ ደስታው ምን ያህል እንደሆነ መገመት አይከብድም፡፡

ወዳጄ ሆይ.... ከሁሉ ከሁሉ የአዕምሮ መክሊትህን በሙላት ተጠቀም፡፡ አምላክ የሰጠህ ተጠቅመህ እንድታተርፍበት እንጂ ቀብረህ እንድታባክነው አይደለም፡፡ አውቀህ ባትወለድም በንባብ፣ በምርምርና በማሰብ ሃይል እውቀትና ጥበብን በእጅህ ማድረግ ትችላለህ፡፡ ያገኘኸውን አዕምሯዊ ሀብት ደግሞ ለዓለም አስቀርተህ ወደማይቀረው መሄድ ትችላለህ፡፡ አዕምሮህን በሙላት መጠቀም ስትጀምር ከመምሰል ዓለም ወጥተህ በመሆን ውቅያኖስ ውስጥ ትዋኛለህ፡፡ መሆን እንጂ መምሰልና ማስመሰል የሌለበት ህይወት የምትጎናፀፈው አዕምሮህ ሲበለፅግ ብቻ ነው፡፡ ከፓርቲህ በፊት አዕምሮህን አበልፅግ፡፡ ያልበለፀገ አዕምሮ የበለፀገ ማንነትም ሆነ የፖለቲካ ፓርቲን አያስገኝም፡፡

‹‹በማሰብ ያልሰለጠነ፣
በሃሳብ ያልዘመነ፣
በሕሊና ያላደገ፣
በቅንነት ያልበለፀገ፣
መክሊቱን ቀበረ፣
አዕምሮውን ከሰረ፡፡››

#ምርጥ_መጣጥፎች