✍ግጥም እና ቅኔ✍

ጉዳዩ:- እልልታን ስለመጠየቅ

"የተሠራውን አናፈርስም፤ የተሠራውን እናድሳለን እንጂ!"

"እልልልልልልል!"

"እንኳን ደስ አላችኹ! ...ኢትዮጵያ የከርሰ ምድር ሀብቷን መጠቀም ጀመረች፤ የነዳጅ ዘይት ድፍድፍ አወጣን!"

"እልልልልልልል!"

"ኢትዮጵያ ወደ ጠፈር ሳተላይቷን አመጠቀች!"

"እልልልልል!"

"እንኳን ደስ አላችኹ! ...የጸብ ድልድዩ ተሰበረ፤ 'የኹለት አገር አንድ ሕዝቦች' መባል ቀረ! ...ኤርትራ ከኢትዮጵያ ጋር ሰላም አወረደች።"

እልልልልልልል!

"እንኳን ደስ አላችኹ! ...ኢትዮጵያ የወደብ ባለቤት ኾናለች!"

"እልልልልልል!''

ኡኡይ! ...በሕግ አምላክ! እልልታዬን መልሱልኝ!

@Mejnun_Leyla_poem

ፈረንሳይ ሃገር በተራራማ ቦታ የሚገኝ አንድ ታዋቂ የገደል ማሚቶ ቦታ አለ ተራራዉ አፋፍ ላይ ተሁኖ ስም ሲጠራበት በሚገርም ድምጽ እየደጋገመ የሚያሰማ እናም ከተለያዩ ቦታዎች በሚመጡ ጎብኝዎች ይጎበኛል አንድ ጊዜ ይህ ነገር ተከሰተ
አሜሪካዊ ጎብኝ ተራራዉ ጫፍ ላይ ቆሞ ስሙን ተጣራ
"Tom"
የገደል ማሚቶ ደጋግሞ አስተጋባ
"Tom tom tom tom"
ከዛም አንድ እንግሊዛዊ መጣና ስሙን ጮክ ብሎ ጠራ
"james
የገደል ማሚቶ ደጋግሞ አስተጋባ
"james james james james"

ለሶስተኛ ግዜ አንድ ጀርመናዊ ተራራዉ ጫፍ ላይ ሆኖ ስሙን ተጣራ
"flipe"

የገደል ማሚቶ ደጋግሞ አስተጋባ

"flipe flipe flipe flipe"

በመጨረሻም ኢትዮጵያዊዉ ወደተራራዉ ጫፍ ወጥቶ ጮክ ባለ ድምፅ ስሙን ተጣራ

"----------"
የገደል ማሚቶዉም በድንጋጤ

"what?"

ከዛ በኋላ ተራራዉ የት እንደደረሰ የታወቀ ነገር የለም

በ----ዳሹ ቦታ ላይ የገመታችሁትን ስም ማስገባት ትችላላችሁ😅

@Mejnun_Leyla_poem

እዚህ መንደር ሀና የምትባይ ልጅ ካለሽ

ታክሲ ውስጥ አልማዝ ቃል ጋ ደውላ እያማችሽ ነው ።

የሰማሁት እውነት ከሆነ ግን ቅሌታም* ነሽ

ጀርባ ይጠና ስትሉ ምን ትዝ አለኝ ...
(አሌክስ አብርሃም)

"ከእያንዳንዱ ስኬታማ ወንድ ጀርባ አንዲት ጠንካራ ሴት አለች" የምትሉት ተደጋጋሚ ጥቅስ አልበዛም? አልሰለቸም? ዝም ስንል እውነት መሰላችሁ? ብዙ ሀብታሞች ከጀርባየ የሊስትሮ ሳጥን እንጅ ሴት ነበረች ሲሉ ተሰምተው አያውቁም! የሆነ ሆኖ ግን እውነት ነው ቢባል እንኳን ከእያንዳንዱ ሰንደል ሰክቶ ከሚዞር ወንድ ጀርባም ፓኮ ሙሉ ሰንደል ይዛ ሲያልቅበት እየለኮሰች የምታቀብል ሴትም አለችኮ! ዋሸሁ? በየሰፈራችሁ ያሉ የአዕምሮ ህመምተኞችን በምን አበዱ ብላችሁ ጠይቁ!

አንዴ ጓደኛየ ጋር በጎፋ ስናልፍ ግንብ ተደግፎ ሲጋራ የሚያጨሰውን ሰውየ እያሳየኝ ሚሊየን ጊዜ የሰማሁትን የዛን "የማትመጣ ሴት ይጠብቃል" የሚባለውን ሰው ታሪክ ሊነግረኝ በመቋመጥ...."ስማ አብርሽ ከዚህ ሰውየ ጀርባ ምን እንዳለ ታውቃለህ?" አለኝ "አዎ! ለኮሪደር ልማት ያልፈረሰ ግንብ ይታየኛል" አልኩት፤ተቀየመኝ!

ለዚህ ሚስኪን ሰው ሁሉም ኢትዮጵያዊ ገጣሚ "ጥበቃ" የሚል ግጥም ፅፏል። ሰውየው በመቆም ብቻ ለኢትዮጵያ ስነፅሁፍ ባበረከተው አስተዋፅኦ አለመሸለሙ ይገርመኛል። በተለይ ሴት ገጣሚያን ሁሉም የሰውየውን ፅናት በግጥሞቻቸው ስላዳነቁ ከሰውየው ይልቅ ቁመው ያልጠበቋቸውን ወንዶች እንደሚያሸሙሩ ያልገባን ይመስላቸዋል። የሆነ ሆኖ ይሄ ሁሉ ግጥምና ዘፈን ሰውየውን ከቆመበት አላንቀሳቀሰውም። የሆነ ቀን ወደአእምሮው ቢመለስ እንኳን ሰንደሉ ሲያልቅበት እየለኮሱ የሚያቀብሉ የጥበብ ሰወች ከኋላው ተሰልፈው አይዞህ እያሉት በየት በኩል? ውድቀታችሁ የጥበበኞችን የመፃፍ ሙድ የሚያነሳሳ "ቪያግራ" ከመሆን ይጠብቃችሁ።

ይችን ጨምሬ ልጨርስ፤ አንድ ታዋቂ የአገራችን ባለሀብት ታሪክ ነው። የሆነች የገጠር ከተማ ገና ፎከታም የአስረኛ ክፍል ተማሪ እያለ አንዲት የሀብታም ልጅ አፈቀረ። ቤተሰቦቿ ያንን ችጋራም የስንቅ ተማሪ ልጃቸው ጋር ሲያዩ አነሰራቸው። "አሁን ይሄ ልጅ ቢያስረግዛት ደሃ የሚባል፣ ሁለት አፍ፣ አራት ሆድ፣ ሰባት ጆሮና ምንም እጅ የሌለው ፍጥረት ልትወልድብን አይደለምን?" አሉና ልጅቱን ወደአዲስ አበባ ላኳት። አዲስ አበባ ያኔ አሜሪካ በሉት። በቀጣዮ ቀን ሁልጊዜ የሚገናኙበት ቦታ ቁሞ ሲጠብቃት የለችም፣ በቀጣዮም ቀን የለችም ፤ በሶስተኛው ቀን ቤተሰቦቿ አዲስ አበባ እንደላኳት ከሰፈሯ ልጅ ሰማ! ልቡ ክፉኛ አዘነ ፣ ደማ ...እንባው በአይኑ ግጥም አለ ....ከተማ ሄዶ ጥንቢራው እስኪዞር መስከር ፈለገ።

ወዲያው ግን እዛው እንደቆመ የገጠር ሰወች እንቁላል ሊሸጡ በዘንቢል ሞልተው ወደከተማ ሲሄዱ ተመለከተ። ያችን ልጅ ለመጋበዝ አልበላም አልጠጣም ብሎ ያጠራቀማት ኪሱ ውስጥ የተቀመጠች አምስት ብር አስታወሰ ፣ ከተማ ባዶ እጀን ከምሄድ አለና ጊዜው ደህና ነበር ያኔ ዘንቢል ሙሉ እንቁላል ገዝቶ ከተማ ወስዶ አትርፎ ሸጠው። ትርፉን ሲያየው ደነገጠ፤ መጠጡን ትቶ አሪፍ ጥብስ በላ። ያ የተኮራመተ የተማሪ አንጀት ላይ ሲያርፍ ጥብሱ እንደድራግ አነቃቃው! ከዛች ቀን ጀምሮ ትምህርቱንም ልጅቱንም ትቶ ንግዱ ላይ አተኮረ ...ዛሬ ከቡና እስከሌጦ፣ ከሪል ስቴት እስከከተማው ሴት የግል ርስቱ ሆኗል። ማን ግጥም ፃፈለት? ማንም። ሊሞዚኑን ተደግፎ ለቆመ ሰው ማን ግጥም ይፅፋል። ገጣሚው ከቅናት የተረፈ ጊዜ አይኖረውም። እንደውም አስደግሞ ነው ይሉታል። ወንድሜ እመነኝ ጠንካራ ከሆንክ ሴቶች ብቻ ሳይሆኑ ወንዶችም አገሮችም መንግስቶችም ዕድሎችም ከኋላህ ናቸው። አያምጣውና እያለቃቀስክ ከቆምክ ግን የተደገፈከው ግምብ ይሸሽሀል።

ለዚህ ሐብታም ባለታሪካችን በኢትዮጵያ የመጀመሪያ የሆነ በፍቅር ላልወደቀ ሰው የተዘጋጀ ቅኔ እንደሚከተለው እዘርፋለሁ ፦

ደሀ ፍቅርን በቤተሰብ ተከለከለ
ደሀ ፍቅርን በቤተሰብ ተከለከከለ
ዓይኑን ከሴት እግሩን ከትምርት ነቀለ
ሐብታም እከሌ በቆመበት
ከንቁላል ተፈለፈለ
ከሌለህ ከኋላ ማንም የለ

ድገመው!😀

@Mejnun_Leyla_poem

ብሔሯ ምን ይሆን?
(አሌክስ አብርሃም)

አንድ ሲበዛ አክራሪ ብሔረተኛ ወዳጅ አለኝ። ምንም ነገር ይወራ ጎትቶ ወደብሔሩ ነው የሚወስደው። ቁንጅና ከተባለ "የኛ ብሔር ሴቶች መለአክ ነው የሚመሳስሉት" ...ብሎ ይጀምራል...እህትህ ከሌላ ብሔር ነች እንዴ ማለት ቢያምረኝም ዝም እላለሁ። የሞርጋን ፍሪማን መንትያ የመሰለች እህት አለችው። ስለትምህርት ከተወራ የኛ ወረዳ ልጆች ጭንቅላት የትም የለኮ ይላል! ወረዳቸው ውስጥ ማትሪክ ከወሰዱ አስራ አንድ ሺ ተማሪወች 17 ብቻ ማለፋቸውን ዜና ከሰማን ገና ሳምንታችን ነውኮ!

እና ባለፈው ሰመር (የፈረንጆቹ ፀሐያማ ወቅት) እንደአገሬው ባህል ተያይዘን ከምንኖርበት ከተማ ወጣ ብሎ ወደሚገኝ ውቂያኖስ ሄድን። እኔ ሐሳቤ ዳርቻው ላይ ተቀምጨ ሀብ ሀብ መጋጥና ያው ዳርቻው ላይ የሚታየውን "ዘርፈ ብዙ ውበት" ማድነቅ ነበር። እሱ ግን በአየር የሚነፋ እና በረዢም መቅዘፊያ የሚቀዘፍ ጀልባ ከመኪናው እየጎተተ አወጣ። "ምን ልትሆን ነው?" ብለው ስለብሔሩ ዋናተኛነት፣ አዞ አፍንጫ ላይ ቁሞ አሳ እንደሚያጠምድ ፣ውሃ ማለት በቃ መሬት በለው ለኛ ብሔር ምናምን ብሎ ከደሰኮረ በኋላ "በል እንቅዘፍ" አለኝና አንዱን መቅዘፊያ ዘረጋልኝ። እምቢ ማለት ብሔሬን ማሰደብ መስሎ ስለተሰማኝ ዘራፍ የአባይ የጣና የቦርከና ጌታ ብየ ተዘጋጀሁ።

መቸስ ቢያጋንንም እኔን ለማትረፍ የሚሆን የዋና ችሎታ አያጣም ብየ ማሰቤን ግን አልደብቅም። መቅዘፊያችንን ይዘን ተነሳን። ያው ነጮቹ እንደሚያደርጉት ጀልባችንን እየገፋን ወደጥልቁ ገባን! ብቻ ሰይጣን ይሁን ምን እንጃ በደይቃወች ውስጥ እንደሰው መቅዘፊያየን ከእጀ ሲቀማኝና ወደሰማይ ሲያጉነኝ ነው የማስታውሰው! በአፍንጫየ የገባ ውሃ በአይኔ የወጣም መስሎኛል። ከደይቃወች በኋላ ሁለታችንም ሆዳችን ከበሮ አክሎ በነብስ አድን ሰራተኞች ተጎትተን ተረፍን። ምን ይሳነዋል አንድየ! አሸዋ ላይ ዘርግተው ሆዳችንን ሲጫኑት ውሃና ጉራ ባፍ ባፍንጫችን ቡልቅ እያለ ወጣ። ምን ዋጋ አለው ...ነፍሱ መለስ ከማለቱ እያሳለ "በኛ ብሔር የሰጠመ ሰው ስናተርፍ..." ብሎ ጀመረ...

አፍህን ዝጋ! ሙትሀል ሙቻለሁ ሬሳ ብሔር የለውም!! ልለው ፈልጌ ነበር፤ ግን በዋና ልብስ ከጎኔ ተቀምጣ ደረቴን በሁለት እጇ እየተጫነች አየር ስትሰጠኝ የነበረችውን ልጅ ከነወርቃማ ረዢም ፀጉሯ አስታወስኩ። አጨንቁሬ ነበር ያየኋት። እንደገና ካልሰመጥኩ በስተቀር እሷም እኔም ይሄን እድል አናገኝም! በጎ ስራ ሰርታ ገነት እንዳትገባ እድሏን መዝጋት ንፉግነት ነው ብየ ስላሰብኩ ራሴን እንደሳትኩ ትንሽ ቆየሁ! ወደአፌ ስታጎነብስ ፀጉሯ ፊቴ ላይ ይርመሰመሳል። አየር ጣዕም የለውም ያለን አስተማሪ እንደተሳሳተ የገባኝ ያኔ ነው ፣ አየር ጣዕም አለው! ደስ የሚል የቻፕስቲክና የሆነ ነገር ጣዕም! እንደውም እንደዛን ቀን ጥሞኝ አያውቅም😀 አይኔን እንደጨፈንኩ ይች አፏን ከአፌ ገጥማ ባህር ተሻግሮ የመጣ ሰው ለማትረፍ የምትታገል ቆንጆ ፈረንጅ ብሔሯ ምን ይሆን አልኩ!! ከዛ ወዲህ ባስታወስኳት ቁጥር ከግዜር ቀጥሎ ትንፋሽ ያበደረችኝ ህይወት የቀጠለችልኝ ይመስለኛል።

@Mejnun_Leyla_poem

አከተምሽ?

ውኃ መጠጫዬ
          ጡሊዬ ቢያረጅም፤
ቆሎ መያዣዬ
          ፎጣዬ ቢጠቁርም፤
ይሄን ያህል ዘመን
          ደረሳ ተብዬ
          በስሙ ስጠራ፤
እውነት እልሻለሁ
          ሸድሸዱን አልችል
          ወይ ውጥጥ አልቀራ፤
ወይ ሀርፎችን አልለይ
          ኪፍዳንና ከስራ፤
ዕድሜ ዘመን ሙሉ
          ከዓሊም ፊት ቀርቤ
          አንዴም ሳልስሰማ፤
አንቺ አከተምሽ አሉ
          ዘለቅሽ ሙቀዲማ፡፡

እኔ ሙረሰሱ
          የፍቅርሽ መጅኑን፤
አሁንም አሁንም
          አሊፍ በል ይሉኛል
          ላክርርልሽ ምኑን?

አሊፍን ስችለው
           ባ- በታች ታ- በላይ
           የሚሉት ይመጣል፤
ባፍቃሪ ልቦና
          ይሄ አግድም መሥመር
          ነጥብ አለው ተብሎ
           እንዴት ይነበባል?

እንዴት ይወጣጣል?
          እንዴት ይኻፈዛል?

የባትሪውን ድንጋይ
          ሆድ'ቃ ዘርግፌ፤
ሙጫዉን ደብልቄ
          በውኃ ዘፍዝፌ፤
በአመድ የታጠበ
          ሉኼን አጋድሜ፤
አሊፍን ሳልከትብ
          ሳልጽፍ በቀለሜ፤
ተራምዳህ አለፈች
          አከተመች ቢሉኝ
          አደርኩኝ ታምሜ፡፡

ኪታብ ልትቀሪ
          ልትሄጂ ነው አሉ፤
እየሰፋ መጣ
          በመሀከላችን ማያያዣዉ ኹሉ፡፡
በመድረሳዉ መስኮት
          ተደብቄ 'ማይሽ
          የቅንጦት ኾኖብኝ፤
ይብሱን አክትመሽ
          ልትሄጂ ነው አሉኝ፡፡

ምኑን ተስሰምቼ
          ምኑን ኪታብ ልቅራ?

ዛሬም አሊፍ… ባ… ታ
          ነገም ዶማ… ከስራ፤

ወይ አሊፍነስባ
          ወይ ደግሞ አልሃምዱ፤
ምኑን ቃል ቀርቼ
          ወደ ምትሄጅበት
          ልድረስ ከመንገዱ?

እንዲሁ ተነሥተው
          ልትሄጂ ነው አሉኝ፤

ቁርአን ቤት ላላይሽ
          ቁርአን ቤት ላታይኝ፤

ከቢእሩ ቀድቼ
          ውኃ ላላጠጣሽ፤
መዓዱን በጥብጨ
          ፍቅሬን ላልገልጽልሽ፤

እንዲሁ እንደዋዛ
          ልትሄድ ነው አሉኝ
          ቁርአን ጨርሳ፤

አንቺን አስበልጦ
          ፍቅር ያከተመው
          የኔ ነገርሳ?

ምን ነካቸው ዑስታዝ?
እንዴት ዘዴ ይጡ
          አንድ አንቺን ለመያዝ?

ገና ነሽ እያሉ
         ብዙ ለማስቀራት፤
በሰበብ አስባቡ
         መንገድሽን ማስዘግየት፤
እንዴት ተታለሉ
          ዑስታዝ ምን ነካቸው?
ይህ ኹሉ ደረሳ
           አንድ አንቺኑ ብሎ እንደሚርመሰመስ
           እንዴት ተሳታቸው?

እሷ ሄደች ብሎ
          ኹሉ ነቅሎ ቢሄድ፤
ማንን ሊያስቀሩ ነው
          ማን ሊመጣ መስጅድ?

አገሩ ይቁጠረዉ
          ያን ኹሉ ደረሳ፤
አንድ አንቺኑ ብሎ
          ጡሊዉን የረሳ፡፡
የራሳቸዉ ጉዳይ!

እንደኔ አይወዱሽም
          ኹሉም ተደምረው፤

ይሄው አሁን እንኳን
          መሀላቸው ኾኜ
          ልቤ ካንቺ ጋር ነው፡፡
አጅነብይን ሽሮ
          ማን ያርገኝ ከጎንሽ?
ከቶ በምን መንገድ
          ፍቅሬን ልግለጽልሽ?
ተይው ግዴለሽም
          ቀድሜ ልበለው
          የመስጅዱን አዛን፤
ሴት ወንዱ ተንጋግቶ
          ለሶላት ሲወጣ
          እንዳየዉ ዐንይሽን፡፡

ዑስታዝ አይቆጡም
          ድንገት እንኳን ቢያዩኝ፣
አሊፍን ያልለየ
          ገና ልጅ ነው 'ሚሉኝ፣
እኔ ምን ተዳዬ
          አሊፍን ባላውቃት
          አንቺን ዐውቃለሁኝ፡፡

ውኃ መጠጫዬ
          ጡሊዬ ቢያረጅም፤
ቆሎ መያዣዬ
          ፎጣዬ ቢጠቁርም፤
ውጥጥ የማልቀራ
          ሸዱም የማይገባኝ፤
ዛሬም አልሃምዱ
          ነገም እልሃምዱ
          አሊፍነስባ ነኝ፡፡

መድረሳ አብረን ገብተን
          አንቺ ግን በቃ ሄድሽ፤
ካይኔ ልትርቂ ነው
          እውነትም አከተምሽ፡፡
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

12ተኛ ክፍል ጨርሼ ፍልስፍና ለመማር እንደምፈልግ ስናገር ጉድ ተባለ። "ሆሆይ" ተባለ። "ምናለ አርፎ ትምህርቱን ቢማር" ተብሎ ቀልድ ቢጤ ተወረወረ። አባቴ እሳት ጎርሶ እሳት ለብሶ አይኑን እያጉረጠረጠ
"ጥጋብ'ኮ ነው....ምን ታረግ እንደላባ የለሰለሰ እንጀራ እየበላህ ባትወጣጠር ነበር የሚገርመኝ...ስማ አንተ እኔ ስማርኮ...."እያለ ረጅም ሀተታ ያለው የወጣትነት ገድሉን ሲነዛብኝ አመሸ።
እናቴ በበኩሏ "ወይኔ አሳድጌ አሳድጌ ዶክተር ትሆናለህ ብየ ስጠብቅ የተጨማደደ ኮሌታና የተዛነፈ ኮት አርገህ የምትዞር ፈላስፋ ልትሆን(ቆይ ማነው ላገሬ ሰው ደራሲዎችና ፈላስፋዎች ሸሚዝ መተኮስ አይችሉም ብሎ የሰበከው)...አሄሄ ክንዴን ሳልንተራስ አታረገውም" ብላኝ እርፍ።

መንደርተኛውም አለ "ሲያልቅ አያምር"(ቆይ መቼ አለቀ?)።

ሮዛ ራሷ(የጓደኛዬ እህት) " በቃ አመረርክ?"አለች።አባቷ እኮ በቴሌቭዥን ማስታወቂያ ነው የሚዘበዝበው። እስኪ ይታያችሁ" አድራሻችን 22 ማዞሪያ፣  ለለስላሳ ቆዳ፣..." ምናምን ብሎ መለፈፍ ስራ ነው? ለኔ ጮክ ብሎ ከማንበብ አይበልጥም። አለ አይደል የ3ተኛ ክፍል አማርኛ አስተማሪዎች 'ማነው ተነስቶ የሚያነብ' ሲሉን ተነስተን እንደምናነበው።

ነፍስ አባታችንም አሉ:- " ቱ ቱ ቱ ምን ስትል አሰብከው....ፍልስምና ደግማ'ዶል እምነት ያስክዳል( በዚች ሰዓት ጎረምሣ ልጃቸው ኢሳያስ የጫት ቀንበጥ እየበጠሰ እንደሆነ ማን በነገራቸው)...ብቻ ብዙ ብዙ ተባለ።
ተማሪ እያለሁ አጎቴን አንድ ቀን ልጠይቀው ተቀጣጥረን እንዲህ ሆነ። ስራ ከምፈታ ብዬ(የፈተናም ሰሞን ስለነበረ) አንድ The history of philosophy የሚል መፅሀፍ ይዤ ወደ ቀጠሮው ቦታ ሄድኩ። ካጎቴ ጋር የባጥ የቆጡን ስናወራ ቆይተን አጎቴ ወደያዝኩት ጥራዝ እየጠቆመ
"ባይዘዌይ(አቤት ይቺን ባይዘዌይ ሲወዳት ፤ሰው ብትሆን በስቅታ ሞታ ነበር)...እሱ ነገር ከትምህርትህ ጋር አይጋጭም" ብሎኝ እርፍ። ፍልስፍና እንደምማር ስነግረው ከት ብሎ ሳቀና" አይ የዛሬ ልጆች...እብዶችኮ ናችሁ"አለ። ለስሙ መሀንዲስ ነው። ለስሙ የምርቃት ፎቶውን የዘመመች የጭቃ ቤታችን ግድግዳ ላይ ሲሰቅል ከቤቱ የመጀመሪያው ነው።ሊያውም ኒሻን በኒሻን የሆነውን ያያቴን ያርበኝነት ፎቶ አውርዶ። ያን ቀን 'አይ አለማወቅ' አላልኩም። ይልቅስ ምን አልኩ? "አይ ማወቅ"።

ባጠቃላይ ህብረተሰቡ ነጠል ስትል አይወድም። ህዝቡ አንድ ላይ ተማግዶ ከሚነድበት ምድጃ ተለይቼ እፈናጠራለሁ ስትል" ሄይ ወዴት ነው...እዚችው አብረን እንነዳታለን" የሚል ቀጭን ትዕዛዝ ይሰጥሀል።
ግን አስቆመኝ? በጭራሽ። እንዲያውም ከፍ ያለ ነጥብ አምጥቼ ተመርቄ ስራ እስካገኝ ከቤተሰብ ጋር ልከርም ወዳገሬ ተመለስኩ። ስራ ፍለጋ የምትለውን ሀሳብ ሲሰማ መንደርተኛው ከወር በፊት የበላው የጎመን ቅሪት ጥርሱ ውስጥ እስኪታይ ሳቀ። "ስራ ማግኘቴ አይቀርም" ባልኩ ቁጥር ሰፈርተኛው በነቂስ የፀሀዬ ዮሀንስን 'ተባለ እንዴ' የተሰኘ ሙዚቃ ጋበዘኝ።
"እስከ12 ብቻ ተምሮ ስራ ይፈለጋል እንዴ?" ተብሎም ሌላ ቀልድ ታከለ።
ግን እዚህጋ ሟርታቸው ሰመረ።ስራ ጠፋ። ስራ የጠፋው አንድ ሰሞን ነጋዴ ሱቁ ውስጥ ደብቆት እንደሚጠፋው ዘይትና ስኳር አልነበረም። ስራ የጠፋው በልጅነቴ ለውትድርና ሄዶ በዛው ደብዛው እንደጠፋው ታላቅ ወንድሜ ነው። አለ አይደል ትንሽ ጭላንጭል ተስፋ ይዘን ይመጣ ይሆናል የምንለው አይነት።ስራ ፍለጋም እንደዛ ነው። በተለይ በኔ ፊልድ። ድሮውንም ያለ ነገር 'የስራ ዕድል' አላሉትም። እጣ ቢሆን አይደል?

እናም እላለሁ
የሰው ልጅ የሚፈልገውን ተምሮ ስራ የሚያገኝበት ሀገር መች ነው የሚኖረን? ሁኔታውኮ ጤፍ መዝራት ፈልገህ ማሽላ አዘርቶ ይባስ ብሎ ምርትህን እንዳትሰበስብ አግዶ አልቦ ጎተራ የሚያስታቅፍ ስርዓት ሆነብን።
                        
@Mejnun_Leyla_poem

እረፍ
ቆመህ ላትሻገር
ጊዜን አትደገፍ 

ተው
አትዋብ
አትኳል
በር ያጣ መዳፍህ
ግድግዳ ያንኳኳል

በር አልባ ግድግዳ
ቤት አልባ  ምሶሶ
ብርሃን ነው ይላል
አይንህን ደርምሶ

ተው
አይተህ ላትጠግብ
ቀላውጠህ ላቶዛ
መስታዬት አትግዛ

ሞላ ያለ ከንፈር
የሚያሳሳ ጉንጭህ
ህይወትን ድል አርጎ
ፅዋ አያስጎነጭህ

ሰው አይደለህም ወይ
የፍቅር ቃል አምሳል
ህያው ገፅ አትመህ
በቀን መልክ አትዛል

የአዱኛን ውበት
የዱንያን አህዋል
ስታስስ አትዋል

ተው

የራስህን ጣዕም
ቀምሰህ ላትጨርሰው
ባለንጀር ፍለጋ
ደጁን አታስሰው

@Mejnun_Leyla_poem

እኔ...
ለሥጋ ታጋይ ፥ ለቅንጥብጣቢ
ገላው ቆሽሾ ፥ ስሙን አጣቢ
ሕይወት ትርዒት ፥ ኑሮም ድራማ
ሲገበርለት ፥ ጀማው ከራማ

የሙጥኝ ብዬ ፥ ያዳም ከል ቅርሴን
እንኳን ወዳጄን ፥ እንኳን ራሴን
አምላኬን እንኳን ፥ ምንኛ አለፋሁ
ስጠፋ አገኘኝ ፥ ሲያገኘኝ ጠፋሁ!

አትራራልኝም ፥ ዓለም አጅሪት
ክብ ሆኖብኛል ፥ ሕይወት አዙሪት
ኢያሪኮዬን ዛሬም ፥ ልዙረው
ትላንቴን አይደል ፥ ነገ ምኖረው?

ባሮጌ አንቀልባ ፥ ነፍሴን አዝያት
ሾልካ ጭቃ ላይ ፥ ስትወድቅ እያት
ቀኔ ሲጓደል ፥ ሲርቀኝ ቆሌ
"አሁን አድን" ነው ፥ ፍጻሜ ቃሌ!

አሁን አድነኝ...
በጆችህ ልዋል ፥ ሁነኝ ጠራቢ
አንፀኝ ጌታ ፥ አድነኝ ረቢ
አድክመኝ ላንተ ፥ ቆሜ ላለክልክ
አሳደህ ያዘኝ ፥ በሽሽቴ ልክ

አሁን አድነኝ...
ፈውሰኝ ረቢ ፥ እስቲ ላገግም
ዕምባዬን አብስ ፥ አላልቅስ ዳግም
መሮጥ ቢያቅተኝ ፥ በስሱ ላዝግም

አሁን አድነኝ...
ይደገፍ በ`ጅህ ፥ መንገዳገዴ
ዋጀው ዕድሌን ፥ ይግደድህ ገዴ
በእቶን አባብለኝ ፥ አልሁን ለጋ
ሞት ደጃፍ አልሂድ ፥ ሕይወት ፍለጋ!

አሁን አድነኝ...
ይፋፋም እንጂ ፥ ሕቅ እንቅ ትግል
ሥጋና ነፍሴን ፥ አላሸማግል
እንኳን ገላዬ ፥ ሃሳቤ አይዘሙት
ዓለም ትሙተኝ ፥ ለዓለም ልሙት!

አሁን አድነኝ...
ክንፌን ስበረው ፥ ይብቃ መክነፌ
ሥጋ ይሸነፍ ፥ በመሸነፌ
ዓለም ትርበድበድ ፥ በመርበድበዴ
እነሆኝ ፊትህ ፥ መንታ ወንበዴ
ምኞት ሹክሹክታው ፥ ሲነዘንዘኝ
በፍቅርህ ገድለህ ፥ እስቲ ገንዘኝ!

አሁን አድነኝ...
ምኞት ሲንጣት ፥ ሲያርገፈግፋት
መልሳት ነፍሴን ፥ ልቤን ደግፋት!

@Mejnun_Leyla_poem

Hi. 
I am Ryan. 
My gramps is the one who named me Ryan, it is arabic name. 
It means Door of Heaven.
Sometimes I say it out loud, hoping to lift my spirits, 
but the letter  e  often feels silent to my ears. 
I don't exactly know what I’m escaping from or pursuing, 
but some days, life feels like a race I can’t quite keep up with.

Enough about me.
Tell me about yourself, what part of your name is silent?

@Mejnun_Leyla_poem

#እረፉ!!!!

“ዘመመ!” ብላችሁ የሰው ቤት አትግፉ
እሾህ ለማሳመር አበባ አታርግፉ።

እረፍ!!!!
“ቆሜያለሁ!” ለማለት አጥሬን አትደገፍ
ለአመዳም ወዘናህ ቆዳዬን አትግፈፍ።

እረፍ!!!!
በመስመርህ ፍካ በድንበርህ ለምልም
በየአልጋህ እደር በየእንቅልፍህ አልም።

እረፊ!!!
በኩረጃ ንባብ ትርጉም አትግደፊ
በሰባራ መርፌሽ የሰው ልክ አትስፊ።

ማን አንደጠለፈኝ ማን እንደሰበረኝ
ጠያቂ አጣሁ እንጂ መልስማ ነበረኝ።
ምክንያት ታመመ መፍትሄ ታመመ
ከጥያቄው በፊት መልሱ እየቀደመ።

ሌብነት ገነነ
ግርግር ገነነ
ብልጭልጭ ገነነ
ድንግርግር ገነነ
ኪሳራ ገነነ
ደላሎች ገነኑ፣ ደላሎች ጀገኑ
ባልዋለ ገበያ ዋጋ እየተመኑ!!!!!

ምክንያት ታመመ መፍትሔ ታመመ
ከጥያቄ በፊት መልስ እየቀደመ ::

በረከት በላይነህ
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

ሽሮ የሚበላ በሞላበት ሀገር...

አዝመራው
(በእውቀቱ ስዩም)

አንድ ዲያስፖራ ጓደኛ ነበረኝ፤ ስለኢትዮጵያ ባወጋ ቁጥር “ያገሬ ሴቶች እሸት እኮ ናቸው ‘ ይላል፤ “ ፈጣሪየ! ከአገሬ እሸቶች አንዷን መርቀህ ስጠኝ” እያለ እንደሚጸልይ ሁሉ አጫውቶኛል፤ አንድ ቀን ከአሜሪካ ወደ አገሩ ገብቶ ፥ከአየር ማረፍያ ወደ እናቱ ቤት በታክሲ እየሄደ ነው፤ ባጋጣሚ በወቅቱ፥የሴቶች ታላቅ ሩጫ ቀን ነበር፤ የመዲናይቱ ቆነጃጅት በሙሉ አረንጓዴ ማልያና ቁምጣ ለብሰው አስፓልቱን ሞልተው ይሮጣሉ፤ አጅሬ ታክሲው ውስጥ ሆኖ እያየ አሁንም አሁንም ምራቁን ሲውጥ ከቆየ በሁዋላ እንዲህ አለ፤

“ ጌታየ ሆየ ቸርነት አያልቅብህ! አንዲት እሸት ስለምንህ አዝመራው መሀል ጣልኸኝ”

ትናንትና ወደ ወደ ፒያሳ ወክ ሳደርግ አራትኪሎ አስፓልት ላይ ከመቶ እማያንሱ ቆነጃጅት ባለ አበባ ቀሚስ ለብሰው አሸንዳ ይጨፍራሉ፤ ልቀላቀላቸው ፈለግሁ፤ ግን “እኔጋ ና እኔ ጋ ና” እያሉ እንዳይጣሉብኝና ፤ መንግስት ባህል አሸበርህ ብሎ እንዳይከሰኝ ሰጋሁ፤ ያም ሆኖ በስሜት ተነድቼ በመካከላቸው ራሴን አገኘሁት፤

ሴቶቹ ድንገት ተጠቃቀሱና ጭፈራቸውን አቆሙ፤

ዋናዋ አቀንቃኝ “ይቅርታ! ወንድ መጨፈር አይችልም” አለቺኝ፤

“ ከበሮ በመምታት እህቶቼን እንዳገለግል ይፈቀድልኝ “ አልኳት፤

“ ከበሮ የሚመቱ በቂ እህቶች አሉን” አለች ክርር ባለ ድምጽ፤

“እሺ ለለውጥ ያክል ክራር እየመታሁ ወይም እምቢልታ እየነፋሁ ላጅባችሁ”

ሴቶቹ በህብረት ገላመጡኝና እየጨፈሩኝ ትተውኝ አለፉ፤

የእርመን ቤተክሲያን አካባቢ ሲደርሱ በእግረኛ መንገድ ሳይክሌን እየጋለብኩ ደረስኩባቸው ፤

“ችግርህ ምንድነው?’ አለችኝ አቀንቃኚዋ፤

”ምን አጠፋሁ?”

ልጇን እንደምትመክር እናት ጎንበስ ብላ፤ እንሶስላ የሞቀ መዳፏን ተከሻየ ላይ ጭና ፥
“ አሸንዳ የሴቶች በአል ነው፤ ወንድ አይደባለቅበትም ፤ አይገባህም?” ብላ ጮኸችብኝ፤

“ ሽልማት መስጠትስ አልችልም? ”አልኳት፤

“ ወደ ቤትህ ሂድና ሽልማቱን በእህትህ ላከው “

ዛሬ በትንንሽ ምሬት ይሞላና ጊዜ ይለወጣል።

ምንም የረባ ሳይደረግ ሰዎች ወዲያና ወዲህ ይራራቃሉ፣

የተያያዙ ይፈታታሉ፣

ፍቅር የገመዳቸው ይበታተናሉ።

ሁሌም ሚስጥር ነው።

ለምን እንደወደድንም ለምን እንዳልወደድንም ሚስጥር ነው።

***
#እቴሜቴ_ሎሚ_ሽታ

ዲያቢሎስ ሀገሩ የት ነው ?
“የሠው ልብ” አይደለምን !? —··
___
“𝙲𝚘𝚠 𝚋𝚘𝚢 𝚋𝚎𝚋𝚘𝚙” የተሰኘ ፊልም ላይ ያለ አንድ ገፀ - ባህሪ እንዲህ ሲል ይደመጣል....

«𝙳𝚘 𝚢𝚘𝚞 𝚋𝚎𝚕𝚒𝚟𝚎 𝚒𝚗 𝚝𝚑𝚎 𝚍𝚎𝚟𝚒𝚕? 𝚑𝚞𝚑...
𝚃𝚑𝚎 𝚠𝚘𝚛𝚕𝚍 𝚒𝚜 𝚏𝚞𝚕𝚕 𝚘𝚏 𝚊𝚕𝚕 𝚔𝚒𝚗𝚍𝚜 𝚘𝚏 𝚋𝚎𝚒𝚗𝚐𝚜
𝙼𝚢 𝚏𝚛𝚒𝚎𝚗𝚍 , 𝚋𝚞𝚝 𝚠𝚎 𝚖𝚊𝚔𝚎 𝚞𝚙 𝚒𝚖𝚊𝚐𝚒𝚗𝚊𝚛𝚢 𝚘𝚗𝚎𝚜 𝚠𝚒𝚝𝚑 𝚙𝚘𝚒𝚗𝚝𝚢 𝚑𝚘𝚛𝚗𝚜 𝚊𝚗𝚍  𝚙𝚒𝚝𝚌𝚑 𝚏𝚘𝚛𝚔𝚜.»

ትላንት ያንን አሠቃቂ ድርጊት ከሰማሁ በኋላ ቀኑን ሙሉ ሲመላለስብኝ የነበረ ሃሳብ ነው — ይሄ።  ዓለምን ጠላሁ ፤ ራሴን ደግሞ ፈራሁ ። ውስጣችን ጥልቅ ውቅያኖስ ነው አይደል!? ሆዳችን ከሀገራችን ይሰፋል ። እና በዚያ ውስጥ ማን ያልፋል? የልባችን ክፍሉ ምን ያህል የእኛ ነው?  ከገላችን ውስጥ ከእኛ ሌላ ማን ይኖራል? በጥልቅ ዝምታ እና ብቸኝነት መሀል ወደ ጭንቅላታችን የሚመጡ ሃሳቦች የማን ናቸው? በደም ስራችን ስር ከደማችን ሌላ ምን ይመላለሳል?  በራሳችን ባለቤትነት ምን ያህል እርግጠኞች ነን?  ትከሻችን ላይ ተፈናጥጦ የሚጋልበን እርኩስ መንፈስ ቢኖርስ?
ወይም በውስጣችን ውቅያኖስ ስር እየተርመሰመሰ የሚያዝዘን ጋኔል? 𝙰 𝚍𝚎𝚟𝚒𝚕 𝚌𝚊𝚗 𝚍𝚠𝚎𝚕𝚕 𝚒𝚗𝚜𝚒𝚍𝚎 𝚞𝚜.
ወደ ልባችን ገብተን ማን አብሮን እንደሚኖር እንፈትሽ እስኪ...
ደቂቃ በማትሞላ ቅጽበት ስር በልባችን ጎዳና በኩል ሽው ብላ የምታልፈውን እንግዳ ስሜትና ሃሳብ ጉሮሮዋን አንቀን እንመርምራት—···“ከየት ነሽ ?” ፡ “የማን ነሽ?” ፡ “ማን አመጣሽ?” እንበላት ። አጠገባችን ወዳሉ ሰዎች ከመዞራችን በፊት ወደ ራሳችን እንመልከት  ። ዲያቢሎስ ገላና መልካችንን ለብሶ አብሮን መኖር ከጀመረ ከራርሟልና ለድርጊቶቻችን ማን ኃላፊነት እንደሚወስድ አናውቅም።
በዕውቀቱ ስዩም በአንድ ግጥሙ ላይ....
“...ሰይጣን ይሉት ነገር፥ የተጭበረበረ
ዋዛ ነው ቧልት ነው ፥ ብዬ አስብ ነበረ
ይሄው እውነት ሆኖ፥  ዋዛና ተረቱ
ባይኔ በብረቱ
ዲያቢሎስን አየሁት፥ በሸሚዝ ዘንጦ
እልፍ ግዳይ ጥሎ ፥ ቸብቸቦ ጨብጦ ።” ይላል ።

ዲያቢሎስ ሸሚዝ ይለብሳል ። ዲያቢሎስ ያስቀድሳል ። ዲያቢሎስ ሶላት ይሰግድ ይሆናል ። መልኩም እንደእኔና እንደእናንተ ያለ ነው ።
ተረት የሚመስለን ጭራቅ ሰባት ቅል ራስ እና ሀያ ረጃጅም ጥፍሮች የሉትም ። ቆንጆ ነው ። መልከመልካም ። ምናልባት ግጥምና ወግ ይጽፋል ። ኳስ ያያል ። የፌስቡክ አካውንትም አለው ። “#ፍትሕ ለምናምን” ብሎ ይፖስታል ።
አስባለሁ ያቺን ለጋ ህፃን ደፍሮ የገደለው ዲያቢሎስ ከዚህ በፊት ተመሳሳይ ወንጀል ሲሰማ ከሰው ለመምሰል ብሎ “እንዴት ያለ ዘመን ላይ ደረስን? ” ብሎ ይሆናል ። ቦታው ላይ ሲቆም ግን ያደረገውን አደረገ ። እኛ  ነገ አንደግመውም ወይ?
ሰው ብቻ ነን ወይ የምር?

ቅዱስም...ንጉሥም....እርኩስም....

🥰አንቺን ነበር ለካ🥰

  
እናትና አባቴ ላኩኝ ትምርት ቤት፣
ክላስ ተቀምጬ እውቀት እንድሸምት፣
እኔ ግን ብመጣም ክላስ ብቀመጥም፣
አንቺን ሳይ ነው እንጂ ሳዳምጥ አልውልም፣
ቀኑን ሙሉ እኔ ባንቺ ላይ አፍጥጬ፣
ነውኮ ምውለው ክላስ ተቀምጬ፣
ውሎየን ልንገርሽ በጥሞና አድምጭኝ፣
የየቀን ተግባሬን ጉዴን እወቂልኝ፣
በመጀሪያው ቀን ከሳናምቱ ቀናት፣
ተነሳሁ ማለዳ ልሄድ ትምሮ ቤት፣
በትንሽ አዕምሮ አንቺን እየሳልኩኝ፣
እጄን ታጠብኩና ቁርሴንም በላሁኝ፣
ተማሪ ለመምሰል ዩኒፎርም ለበስኩኝ፣
ባዶ እጄን እንዳልሆን ደብተር ተሸከምኩኝ፣
ወደ ሰፈር ወጣሁ ጓደኞቼን ጠራሁ፣
አንቺን እያሰብኩኝ ትምሮ ቤት መጣሁ፣
እናም ልደርስ ስል በመንገድ ላይ ሳለሁ፣
አጃዒብ የሚያስብል አንድ ነገር አየሁ፣
የምን ጨረቃ ናት እዛጋ ያለችው፣
አሁን ኮ ነግቷል ብዬ ጠየኳቸው፣
እነሱም ተገርመው ተዓምር ነው አሉኝ፣
እስኪ ልያት ብዬ መገስገስ ጀመርኩኝ፣
እዛው ደረስኩና በደንብ ስመለከት፣
አንቺን ነበር ለካ ጨረቃ ናት ያልኩት፣

✍ዑስማን(ዘሚር)
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

« ከመታጠቢያ ቤት ወጥቼ
ሲበርደኝ ወደ አንቺ እደውላለሁ ።
ድምፅሽ ዳር ቁጭ ብዬ
እንደ እሳት እሞቀዋለሁ ።
ልቤም ጆሮውን ከፍቶ
ያንቺን ትንፋሽ ያጫውታል ።
ገነት ከሲኦል ወዲያ ማዶ ፡ ሩቅ ሀገር
ይመስለኝ ነበር ።
ድምፅሽ በሽቦ ተስቦ
እንዲህ ነብሴን ካነገሳት መንግስተ ሰማይ አቅርቦ
ትንፋሺሽ አይራቀኝ አቦ ። »
___
—— ጋሽ ነብይ መኮነን
(ነፍስህ በሰላም ትረፍ 🖤)

ሀገርህ ናት በቃ!
——
ይቺው ናት ኢትዮጵያ
ሀገርህ ናት በቃ!
በዚች ንፍቀ-ክበብ፤
አይምሽ እንጂ መሽቶ፣ ማታው ከጠረቃ
የነቃም አይነተኛ የተኛም አይነቃ።

ይቺው ናት ዓለምህ፤ ብቻዋን የተኛች ከዓለም
ተደብቃ!!
አኪሯ ቀዝቅዞ፤ ያንቀላፋች ውቢት ያንተው
የክት ዕቃ!
ምን ትሆን እንግዲህ ሀገርህ ናት እሷ!
ልቧን አታውልቃት አትጨቅጭቃት በቃ፤
አብረህ አንቀላፋ፤ ወይ አብርሃት ንቃ!!

በነብይ መኮንን

ነፍስ ይማር
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

ለዓረፋ የተገዛ አንዳች የሚያክል ሙክት ወገብ ዛላዬን ብሎኝ
ቲያበቃ ፣ ልሳኔንም ቢዘጋኝ ጊዜ ነው ዝም ያልኳችሁ ወንድማወንድሞች እህታእህቶች ..

ዒድ ሙባረክ 😊

ሽል ሳለሁ ጀምሮ
ሕይወቴ የፍርሃት
የመባከን ኖሮ
ስለምን ሳይሰማኝ
ሳለቅስ ሳይገደው
እንደ ሰው ስሞክር
እንደ አምላክ ሲንደው
ጀንበር ወዲያ ስትርቅ
ፀሐይ ስትጠልቅብኝ
ከንግዲህ ለጸሎት
ምን ዕዳ አለብኝ ?

በተመስቃይ መንገድ
ቅርቃር ተሰንቅሬ
ወቅት ሲፈራረቅ
እዚያው ተገትሬ
ሞት ሳይገለኝ ሞቼ
ተስፋዬን ገንዤ
የ’ኔን ብቻ ሳይሆን
የሰው ዕድል ይዤ
የወደደኝን ሰው
በመኖር ስበድል
መጽናኛ ሳላገኝ
የምሽት እንኳ ድል
እንደ ሕፃን ልሮጥ
እንደ ወጣት ላልም
ከንግዲህስ በቃኝ
“ተው ስማኝ” አልልም!

ሕልሞቼ ሳይወጡ
ሰውነት ሳይለብሱ
ልይዛቸው ሳልችል
አልፈውኝ ሲነፍሱ
ስጠኝ ስለው
ፊቱ ቆሜ
በመለመን ተዳክሜ
ዝም እንዳለ
ጭጭ እንዳለ …

የመጠየቅ ወራት አልፎ
ግድ የማጣት ዘመን መጣ
ልቤ ከመጠበቅ
ከምህላ ነጻ ወጣ
ይህን የጓዝ ሕይወት
ስኖረው . . .
ስኖረው . . .
ስኖረው . . .
እርፍ የማለት ነው
አሁን ላይ የቀረው

እልሀለሁ ስማ…
መጠበቅም አልፏል
መጠየቅም አልፏል
መመኘትም አልፏል
ተስፋ ማድረግ አልፏል
ከሰማኸኝ ስማኝ
አንዳች አልፈልግም
መልስ ካረፈደ
ምንም አያደርግም
ፈርሷል… ተንዷል…
ሕይወት ላይጠገን
ካልፈለክም ተወው
ከፈለክ ተመስገን።
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

የውበትን አምላክ---
በቅርበት የሚያውቁት ፣
❝ውብ ማለት ምንድነው?❞
ብለው ሲጠይቁት ፣
በጥያቄው ቅለት እየተገረመ ፣
❝በቃ ልክ እንደሷ❞
ብሎ እንደጠቆመ......

(እንዲሁ እንደ ዘበት.....)
እንዲሁ እንደ ቀላል፣
(ባንድ ዕይታ ብቻ....)
መገመት ይቻላል።
⬤
(አታምርም??)
ውብ ናት ---- የሱ ተአምር፣
(የውቦች የውበት ድምር )
ያደይ አበባ--- የፅጌ ክምር።

አጀብ!
መገን ያንትያለህ !

ፊደላት ቃላት ተልፈሰፈሱ....!
ከውበቷ ስር (መ)ቅኔ ጨረሱ፣
መቆም አልቻሉም...
(መግለፅ አልቻሉም )
እያነከሱ...!

ብቻ ግን እሷ....
(ብቻ ግን እሷ....)
⬤

₁
በነፍስ ጭራ እንደወጠሩት....
እንደ ልብ ወዳጅ
(እንደ ማሲንቆ፣)
ድምጿ ሚያባባ ከልብ ዘልቆ።
⬤
₂
አበባ ናት -- ግን እሾህ የላትም...!
ወዳጇን ማድማት አያስችላትም።
እንስፍስፍ አንጀት...
(ሩህሩህ ማጀት)
የማታስመስል ፣
በስጋ ገጿ ቅጥፈት አት'ስል ፣
(ውሸት አት'ኩል............!)
"ነፍሷን አየሁት ባይኖቿ በኩል" ።
⬤
₃
ገር ናት የተረጋጋች !!
በዘመን ሰማይ ድንገት የነጋች !
(የጠዋት ፀሐይ የጀምበር አምሳል...)
የጥርሷ ጨረር ገላን ያድሳል ፣
ሳቋ ብቻውን ሳቅ ይመልሳል።
⬤
₄
በመልኳ ጓዳ በጉንጯ ስርጉድ ፣
የመውደድ አሽከር ይላል ሽርጉድ ።
(ወይ ጉድ !!)
⬤
የወርቅ ካባ...!
የጣኦስ ላባ ....!
የባህር ዕንቁ......!
ሙሉ ጨረቃ.......!
እንደ ህፃን ሳቅ.....
(እንደ ቡረቃ.....!)
እንዲያ ናት በቃ !!!!
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

ኦ አምላኬ !
ስቃይ ፈርቼ . . .
የሲዖል ወበቅ ነፍሴን ኣርዷት
አምልኬህ እንደኹ በቋፍ በስጋት

እንዳትራራልኝ
አቃጥለኝ በእሳት  !

ደግሞም ለስሙ
እንደ ተራ አማኝ ፤
ከጅዬዉ እንደኹ
የገነቱን ወይን ልክ እንደ ለማኝ  ፤
የሆዴ ነገር . . .
የእረፍቴ ነገር አቅሌን ቀምቶኝ ድሎት ናፍቄ ፤
አምልኬህ እንደኹ
እንደ ማስመሰል  ፡  እንደ ኑፋቄ

      ፋቅ ይኼን ስሜን
        ከገነት መዝገብ 
      አንድደኝ በእሳት
             ነፍሴ ትንገብገብ !

ነገር ግን እኔ  !
በኹለንተናህ
በጣዕም ጥፍጥናህ
በሽቱ ቃናህ . . .
አምልኬህ እንደኹ ... በዉብ ቁመናህ
አትደብቅብኝ የዉበትክን ፀዳል 
የዉበትህን ጉንጉን
              የዉበትህን ጓል ፤

ስጠጣዉ ልኑር
     የፍቅርህን ኑር  ።
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

በዚህ በኩል
ሳቅ ጨዋታው
መጀናጀን መቃለዱ ፣
ከአንዳንዶች ጋ
ትግል መግጠም
ነጋ ጠባ መሳደዱ ፣
ቀኔን ሌቴን እየበላ
ትኩረት ቀልቤን እያላላ
ቃላት አምሮት ቀረ
የሀዘኔ ምዕራፍ።
በምን ሰዓት ይፃፍ?
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem

አየር ላይ
(በእውቀቱ ስዩም)

ትናንት ከፓሪስ ወደ አዲስአበባ የሚበረውን የኢትዮጵያ አውሮፕላን ተሳፈርሁ፤
የአውሮፕላኑ ነጂ ከፊትለፊቱ የተደቀኑትን የግብጽ እና የሴኔጋል አውሮፕላኖች ደጋግሞ “ ክላክስ “ በማድረግ ከፊትለፊቱ ገለል እንዲሉ ካደረገ በሁዋላ ለማኮብኮብ ተዘጋጀ፤

ሰማይ ላይ እንደተደላደልን ካፒቴኑ ፤ “ ክቡራን እና ክቡራት መንገደኞቻችን ዛሬ ወደ አዲስአበባ በምናደርገው በረራ፤ በመካከላችን አንድ የተከበሩ እንግዳ ይገኛሉ” በማለት አወጀ፤
እሰይ! ኢትዮጵያ በመጨረሻም ለልፋቴ የሚመጥን ክብር ሰጠችኝ፤ ሀብቱ እና ንብረቱ ደግሞ ቀስ ብሎ ይደርሳል! “ ብየ አስቤ ደስ አለኝ፤

ካፒቴኑ ግን “ እኒህ የተከቡሩ እንግዳ የኢትዮጵያ ፕሬዚዳንት ወይዘሮ ሳህለ ወርቅ “ ብሎ በመጀመር የደስታየን እድሜ አሳጠረው፤

በግሪክ አየር ክልል ውስጥ እንደገባን አንድ ወጣት የበረራ አስተናጋጅ ቀረበኝና በትህትና
“ እንኩዋን ደና መጣህ! ምን እንጋብዝህ አለኝ?”

“ አመሰግናለሁ! ግን አትቸገር !”

“ የምትፈልገውን ንገረኝ”

‘ ከተቻለ ወደ ፈርስት ክላስ ብታሻግሩኝ ደስ ይለኛል"

“ ፈርስት ክላስ እድሳት ላይ ሲሆን ቢዝነስ ክላስ ደግሞ ሙሉ ነው”

“ መንገድ ላይ እሚወርድ ወይም እሚዘል የለም?”

“ርግጠኛ አይደለሁም”

“ እሺ! ቀይ ወይን አምጣልኝ '፤ ሞቅ ሲለኝ ኢኮኖሚክ ክላስ ውስጥ እንደተቀረቀርሁ እረሳለሁ"

ብዙ ሳይቆይ አንዲት ትንሽየ ጠርሙስ ወይን እና ሰሀን ሙሉ ቆሉ አቀረበልኝ
የአውሮፕላኑ ተሳፋሪዎች በግርምት ያዩኛል፤ የንጉስ ልጅ ሳልመስላቸው አልቀረሁም! ቆሎውን አፈፍ አርጌ አጠገቤ የተቀመጡትን እንግሊዛዊና ፈረንሳዊ ፥

“ Let us mange “ አልኩዋቸው ( “ እንብላ “ ማለቴ ነው)
ፈረንሳዩ፤ “ የተባረከ ይሁን” ይለኛል ብየ ስጠብቅ፥

“ ከሌላው መንደኛ ሁሉ ለይቶ ወይን ያቀረበልህ ለምንድነው ?” ሲል አፋጠጠኝ፤

“ ታዋቂ ሰው ስለሆንኩ ነው”

“ እውቅናህ በምን ዘርፍ ነው?”

“ ታዋቂ ጸሀፊ ነኝ ልልው አሰብኩና ጽሁፍህ ስለምንድነው ፤ እስቲ ተርጉምልኝ እያለ ሊያደርቀኝ ታየኝ፤

“ታዋቂ የወይን ቀማሽ ነኝ ዠለስ” አልሁት!

ፈረንጁ በጣም ተደንቆ ፓስፖርቱ ላይ አስፈረመኝ ፤

ከራት በሁዋላ ከፊትለፊቴ ባለው ስክሪን ፥ በሞንጎልያ አርብቶ አደሮች ዙርያ የሚያጠነጥን ዶክመንታሪ ማየት ጀመርሁ፤ በመሀል ግን ወደ ቢዝነስ ክላስ አካባቢ፥ የበግ ጩኸት የሰማሁ መሰለኝ! ወድያው አስተናጋጁዋን ጠርቼ “ ለእኛ ሩዝ በቲማቲም ቅንጣቢ አቅርባችሁልን ለፕሬዚዳንትዋ ሙክት ማረዳችሁ ከህገ መንግስቱ አንጻር አግባብ ነው ? “ ብየ ልሞግታት ተሰናዳሁ፤ ወድያው ግን የበጉ ጩኸት ፥ ከማየው ዶክመታሪ እንደመነጨ ተገንዝቤ አደብ በቅናሽ ገዛሁ፤
( ትግስት ካለዎት የዙረቱን ታሪክ በቀጣይ አቀርብልዎታለሁ)
━━━━━━✦✗✦━━━━━━━
   ምርጫዎ ስለሆነ እናመሰግናለን 😘

አዘጋጅ፦ ግጥም እና ቅኔ

➳➳ ከወደዱት ለሌሎች ሼር ያድርጉ
@Mejnun_Leyla_poem