Nodir Jonuzoq | she’r va shuur

"Oʻzbek tilining xorijlik doʻstlari" turkumidan. Eulogio Crespin (AQSh)

@n_jonuzoq

OʻZBEK TILI BAYRAMI KUNI MUBORAK BOʻLSIN!

@n_jonuzoq

​​18-oktabr – Samarqand shahri kuni

SAMARQAND

Koʻz ilgʻamas manzildan yoʻlga chiqqan karvonim –
Avaylab olib kelar moziy yukin Samarqand.
Alp Er Toʻnga qoʻlida yaraqlagan farmonim:
“Xazinamda tengi yoʻq olmos mulkim – Samarqand!”

“Roʻyi zamin sayqali” deya unvon bermish kim!?
Ne shaharlar suqlanib, havas bilan boqar jim,
Saf tortadi izingda Kioto, Balx, Tabriz, Rim...
Muriding moʻl, imomlik senga mumkin, Samarqand!

Sarbadorlar dorda ham xirgoyi qilgan kuysan,
Sohibqiron safarda sogʻinib qolgan uysan,
Yarim dunyo boshida bulut – bir qovoq uysang,
Ellarni baxtli qilmish bitta kulging, Samarqand!

Ulugʻbek koʻzin taxtdan samo sari burganim,
Navoiy bilan tunlar nazmiy suhbat qurganim,
Mirzo Boburni bot-bot tushda yoʻqlab turganim,
Azizlar qalbidan rang olgan gulgun Samarqand.

Har koshining – sevgi va qudratning bir boʻlagi,
Shohizinda – abadiy tirik ruhlar yoʻlagi,
Ularga sirdosh dilning mumkin emas oʻlmagi,
Xizr kabi barhayot, uygʻoq tun-kun Samarqand.

Ne zamon edi, zer-u zabar boʻlding zirqirab,
Koʻhna harflar koʻzingdan sachradi-ku tirqirab,
Moturudiy, Sogʻarjiy faryod urdi chirqirab,
Ipakday zarqogʻozing boʻldi kukun, Samarqand.

Ozodlik paygʻomidan titilib ketdi yogʻiy,
Ne uchunkim, iqboling falak lavhida boqiy!
Tole mayin sipqorib ichaver, odil soqiy
Piyolangdan pokladi zahar yuqin, Samarqand.

Olamni chorlar yana  “Tillakori”, “Sherdor”ing,
Quchoq ochar Registon – bagʻrikeng-u bedoring,
Dildoshlik nagʻmasini chalar nay, ud, setoring,
Kuy avjidek yuksaltding doʻstlik tugʻin, Samarqand.

Husningga jilo berar davronim – usta naqqosh,
Davradoshlaring – Xiva, Buxoro, Margʻilon, Shosh,
Mehr-u ishq mehrobiga yoʻnalgaydir adil bosh,
Shu muqaddas mehrobga mangu yukun, Samarqand!

Umrimga bezak erur senda kechgan har onim,
Chanqasam – Zarafshonim, ochqasam – Siyob nonim...
Koʻz ilgʻamas manzilni koʻzlab borar karvonim,
Eltaver kelajakning nurli yukin, Samarqand!

—————————

САМАРҚАНД

Кўз илғамас манзилдан йўлга чиққан карвоним –
Авайлаб олиб келар мозий юкин Самарқанд.
Алп Эр Тўнга қўлида ярақлаган фармоним:
"Хазинамда тенги йўқ олмос мулким – Самарқанд!"

"Рўйи замин сайқали" дея унвон бермиш ким!?
Не шаҳарлар суқланиб, ҳавас билан боқар жим,
Саф тортади изингда Киото, Балх, Табриз, Рим...
Муридинг мўл, имомлик сенга мумкин, Самарқанд!

Сарбадорлар дорда ҳам хиргойи қилган куйсан,
Соҳибқирон сафарда соғиниб қолган уйсан,
Ярим дунё бошида булут – бир қовоқ уйсанг,
Элларни бахтли қилмиш битта кулгинг, Самарқанд!

Улуғбек кўзин тахтдан само сари бурганим,
Навоий билан тунлар назмий суҳбат қурганим,
Мирзо Бобурни бот-бот тушда йўқлаб турганим,
Азизлар қалбидан ранг олган гулгун Самарқанд.

Ҳар кошининг – севги ва қудратнинг бир бўлаги,
Шоҳизинда – абадий тирик руҳлар йўлаги,
Уларга сирдош дилнинг мумкин эмас ўлмаги,
Хизр каби барҳаёт, уйғоқ тун-кун Самарқанд.

Не замон эди, зеру забар бўлдинг зирқираб,
Кўҳна ҳарфлар кўзингдан сачради-ку тирқираб,
Мотурудий, Соғаржий фарёд урди чирқираб,
Ипакдай зарқоғозинг бўлди кукун, Самарқанд.

Озодлик пайғомидан титилиб кетди ёғий,
Не учунким, иқболинг фалак лавҳида боқий!
Толе майин сипқориб ичавер, одил соқий
Пиёлангдан поклади заҳар юқин, Самарқанд.

Оламни чорлар яна  “Тиллакори”, “Шердор”инг,
Қучоқ очар Регистон – бағрикенгу бедоринг,
Дилдошлик нағмасини чалар най, уд, сеторинг,
Куй авжидек юксалтдинг дўстлик туғин, Самарқанд.

Ҳуснингга жило берар давроним – уста наққош,
Даврадошларинг – Хива, Бухоро, Марғилон, Шош,
Меҳру ишқ меҳробига йўналгайдир адил бош,
Шу муқаддас меҳробга мангу юкун, Самарқанд!

Умримга безак эрур сенда кечган ҳар оним,
Чанқасам – Зарафшоним, очқасам – Сиёб ноним...
Кўз илғамас манзилни кўзлаб борар карвоним,
Элтавер келажакнинг нурли юкин, Самарқанд!

2024

@n_jonuzoq

"QAQNUS" KOʻRSATUVI

Bugun soat 19:30 da “Madaniyat va maʼrifat” telekanalining "Qaqnus” koʻrsatuvida sheʼrxonlik qilamiz.

@n_jonuzoq

Assalomu alaykum!
Shu soʻz ham Sizdan saboq,
Bilim va adab koni, ey, siyrati mumtozlar.
Shogirdlar kamolini koʻrib yuring mudom sogʻ,
Bayramingiz muborak boʻlsin, aziz Ustozlar!

@n_jonuzoq

Oʻzbek tilida xatosiz yozishga yordam beruvchi “Sof til” nomli bot ishga tushirildi

Bot (https://t.me/softil_bot) Respublika Maʼnaviyat va maʼrifat markazi tomonidan yaratilgan bo‘lib, o‘zbek tilida xatosiz yozishni keng targ‘ib qilish maqsadida ishlab chiqilgan.

Agar siz reklamalarda, peshlavhalar, ovqatlanish joylari, savdo shoxobchalari va qayerda bo‘lmasin o‘zbek tilida xato yozilgan so‘zlarni ko‘rsangiz, uni suratga oling va softil_botga yuboring. Suratdagi manzil va o‘zingiz haqidagi ma`lumotlarni ham kiriting.

Mutaxassis va mas`ullar bilan birgalikda siz yuborgan manzildagi xatolik bartaraf etiladi.

Tilimizga befarq bo‘lmang!

https://t.me/otabek_khasanov

​​​​OʻN UCH

Oʻzbekiston zafarining timsoli oʻn uch ekan,
Ushbu sonning hosilasi gʻalaba-yu kuch ekan.

Oʻn uch medal oldik, yana oʻn uchinchi oʻrinni,
Shohsupada avval oʻn uch dilbandimiz koʻrindi.

Qayta-qayta quchoq ochdi bizga sirli bu raqam,
Oʻn uchinchi boʻldi, koʻring, parasportchilar ham!

Ikki karra sabot bilan shodalab nishon oldi,
Ikki karra oʻn uch, doʻstlar, axir, yigirma olti!

Hisob ilmi lozim erur, shak-shubhasiz, har ishda,
Jamlasak gar, oʻttiz toʻqqiz medal boʻpti Parijda!

Bu – uch karra oʻn uch demak, boʻlsin oʻn uch ming tahsin,
Singlim, qizim, deyman suyib gʻoliblar oʻn uchtasin!

“Omadsiz son” degan bidʼat, xurofotlar puch ekan,
Kuchli boʻlsang, xosiyatga toʻla son oʻn uch ekan!

To yuksakda bayrogʻimiz – orzumiz gʻuj-gʻuj boʻlgay,
Hilol bilan yulduzlarni qoʻshsak, ha, oʻn uch boʻlgay!

Oʻn uch asli ikki raqam – bir va uchdan iborat,
Bu juftlikda namoyondir kelajakka ishorat.

Hali bir kun bundan-da zoʻr kuch-quvvatga toʻlgaymiz,
Olimp jadvalida bir yo kamida uch boʻlgaymiz!

Mayli, shunda keng olamga solarkan magʻrur razm,
Qulluq, deymiz doʻstlarga ham, oʻn uch bor qilib taʼzim.

Bizga havas qilganlar ham Xizr bilan boʻlsin duch,
Omad kulib boqsin mudom, hamrohi boʻlsin oʻn uch!

Oʻn uch karra baxtiyorman, oʻn uch bor shodon shu payt,
Sheʼrim bitdi. Oʻqib koʻrsam, boʻpti u ham oʻn uch bayt!

—————————

ЎН УЧ

Ўзбекистон зафарининг тимсоли ўн уч экан,
Ушбу соннинг ҳосиласи ғалабаю куч экан.

Ўн уч медаль олдик, яна ўн учинчи ўринни,
Шоҳсупада аввал ўн уч дилбандимиз кўринди.

Қайта-қайта қучоқ очди бизга сирли бу рақам,
Ўн учинчи бўлди, кўринг, параспортчилар ҳам!

Икки карра сабот билан шодалаб нишон олди,
Икки карра ўн уч, дўстлар, ахир, йигирма олти!

Ҳисоб илми лозим эрур, шак-шубҳасиз, ҳар ишда,
Жамласак гар, ўттиз тўққиз медаль бўпти Парижда!

Бу – уч карра ўн уч демак, бўлсин ўн уч минг таҳсин,
Синглим, қизим, дейман суйиб ғолиблар ўн учтасин!

"Омадсиз сон" деган бидъат, хурофотлар пуч экан,
Кучли бўлсанг, хосиятга тўла сон ўн уч экан!

То юксакда байроғимиз – орзумиз ғуж-ғуж бўлгай,
Ҳилол билан юлдузларни қўшсак, ҳа, ўн уч бўлгай!

Ўн уч асли икки рақам – бир ва учдан иборат,
Бу жуфтликда намоёндир келажакка ишорат.

Ҳали бир кун бундан-да зўр куч-қувватга тўлгаймиз,
Олимп жадвалида бир ё камида уч бўлгаймиз!

Майли, шунда кенг оламга соларкан мағрур разм,
Қуллуқ, деймиз дўстларга ҳам, ўн уч бор қилиб таъзим.

Бизга ҳавас қилганлар ҳам Хизр билан бўлсин дуч,
Омад кулиб боқсин мудом, ҳамроҳи бўлсин ўн уч!

Ўн уч карра бахтиёрман, ўн уч бор шодон шу пайт,
Шеърим битди. Ўқиб кўрсам, бўпти у ҳам ўн уч байт!

10.09.2024

@n_jonuzoq

ASILA

Respublika Maʼnaviyat va maʼrifat markazi tomonidan tayyorlangan videorolikda sheʼrdagi ifodalar yorqinroq aks etibdi.

Siz ham bir koʻring-chi...

@n_jonuzoq

​​ASILA

Asil elning asil qizi Asila,
Asil tilla jarangi bor sasida.
Yangiladi oʻttiz yillik marrani,
Yengil uchib chopagʻonlar asrida.

Parijdan-ku avval gʻolib qaytgandi,
Tokiodan kumush olib qaytgandi,
Hali oltin olaman, deb aytgandi,
Malikadir oltin-kumush qasrida.

Parvozidan qummas, zarlar sachradi,
Yetolmayin ne ohular charchadi,
Ildam chopib, eng uzoqqa sakradi,
Bu – elimning qadamidir aslida!

Yurt Sarvari jondan suyib, qizim, der,
Surma qilar har bir bosgan izin yer...
Ogʻang boʻlay, jon singiljon, izn ber,
Qoʻzgʻalaman qalqon boʻlmoq qasdida.

Yeldek uchar, yoʻllaridan qoch, dunyo,
Toʻqnashmagil, koʻzlaringni och, dunyo!
Shu tilla qiz – boshingdagi toj, dunyo,
Tashbehlar ham ojiz uning vasfida.

Omad derlar... Hurkakkina qush – omad,
Kuchliga doʻst, kuchsizlarga tush – omad.
Qahramon qiz! Soʻzimda yoʻq xushomad,
Bagʻishlasam arzir yuzta qasida.

Asil elning asil qizi Asila,
Har gʻalabang – suyunchiga  vasila.
Shohsupaning ziynatisan – tengi yoʻq,
Doʻst-u raqib kuzatgay havas ila!

———————

АСИЛА

Асил элнинг асил қизи Асила,
Асил тилла жаранги бор сасида.
Янгилади ўттиз йиллик маррани,
Енгил учиб чопағонлар асрида.

Париждан-ку аввал ғолиб қайтганди,
Токиодан кумуш олиб қайтганди,
Ҳали олтин оламан, деб айтганди,
Маликадир олтин-кумуш қасрида.

Парвозидан қуммас, зарлар сачради,
Етолмайин не оҳулар чарчади,
Илдам чопиб, энг узоққа сакради,
Бу – элимнинг қадамидир аслида!

Юрт Сарвари жондан суйиб, қизим, дер,
Сурма қилар ҳар бир босган изин ер...
Оғанг бўлай, жон сингилжон, изн бер,
Қўзғаламан қалқон бўлмоқ қасдида.

Елдек учар, йўлларидан қоч, дунё,
Тўқнашмагил, кўзларингни оч, дунё!
Шу тилла қиз – бошингдаги тож, дунё,
Ташбеҳлар ҳам ожиз унинг васфида.

Омад дерлар... Ҳуркаккина қуш – омад,
Кучлига дўст, кучсизларга туш – омад.
Қаҳрамон қиз! Сўзимда йўқ хушомад,
Бағишласам арзир юзта қасида.

Асил элнинг асил қизи Асила,
Ҳар ғалабанг – суюнчига васила.
Шоҳсупанинг зийнатисан – тенги йўқ,
Дўсту рақиб кузатгай ҳавас ила!

2024

@n_jonuzoq

​​HURRIYAT

Istibdodning jodisidan omon qolgan jonim – Sen,
Qizil dajjol jodusidan buzilmagan qonim – Sen.
Jadidlarning yurakdagi yarasida ungan gul,
Yangi oydek balqib, yana   yaraqlagan nomim – Sen!

Mustaqilligimizning 33 yilligi barchamizga muborak boʻlsin!

———————

ҲУРРИЯТ

Истибдоднинг жодисидан омон қолган жоним – Сен,
Қизил дажжол жодусидан бузилмаган қоним – Сен.
Жадидларнинг юракдаги ярасида унган гул,
Янги ойдек балқиб, яна ярақлаган номим – Сен!

Мустақиллигимизнинг 33 йиллиги барчамизга муборак бўлсин!

@n_jonuzoq

​​HAYOT

Usmon Nosir xotirasiga

Uzum donasini choʻqilab qochgan
Maynaday qalbimni taladi hayot.
Doʻst edim men unga sirini ochgan,
Sirimni pulladi – aldadi, hayhot.

Mergan u – koʻzlaydi dilning sogʻini,
Sanamas qurbonlar son-sanogʻini,
Ayamay boʻshatar yoy sadogʻini,
Oʻqlarin koʻksimga qadadi sayyod.

Mehmon deb chorladi avval toʻriga,
Sovqatsam – muzkoʻrpa soldi soʻriga,
Terlasam – oʻt yoqib qalbim qoʻriga,
Hasrat koʻmirini qaladi bot-bot.

Mastona sayragan bir bulbul edim,
Kuyimga begona zanjir, gʻul, dedim,
Qul boʻlsam, koʻnglimga faqat qul edim,
Tikonzor ichiga qamadi jallod.

Chirpirak boʻldi-ku chechak chogʻlarim,
Qoraygan qaygʻuzor – chaman, bogʻlarim,
Bagʻrimdan qabarib chiqdi dogʻlarim,
Koʻnglimmas, qoʻlimga qaradi – ha, yot.

Kulgiday yoyildi zardasi tashda,
Aldamchi chashma u adoqsiz dashtda,
Qoningga tashna-yu, joningga tashna,
Billur yoshlarimni yaladi shaddod.

Aylanib avradi, baxting mangu, deb,
Oʻchmagay hech qachon toleng rangi, deb.
Mana, koʻr, yuraging qanday yangi, deb,
Juvoldiz ignada yamadi, ay, dod!

Garchi yuragimni tinmay choʻqidi,
Chuqurroq sanchsa-da paykon-oʻqini,
Xilvatda sheʼrimni yigʻlab oʻqidi,
Soʻnggi dam tavbaga yaradi shoyad...

Hurriyat!
Jilvangdan yorugʻdir yuzim,
Elimda jaranglar bu kun har soʻzim.
Yoʻqlik oʻpqoniga ketdi u tuzum –
Men hayotman, uni yamladi mamot...

———————

ҲАЁТ

Усмон Носир хотирасига

Узум донасини чўқилаб қочган
Майнадай қалбимни талади ҳаёт.
Дўст эдим мен унга сирини очган,
Сиримни пуллади – алдади, ҳайҳот.

Мерган у – кўзлайди дилнинг соғини,
Санамас қурбонлар сон-саноғини,
Аямай бўшатар ёй садоғини,
Ўқларин кўксимга қадади сайёд.

Меҳмон деб чорлади аввал тўрига,
Совқатсам – музкўрпа солди сўрига,
Терласам – ўт ёқиб қалбим қўрига,
Ҳасрат кўмирини қалади бот-бот.

Мастона сайраган бир булбул эдим,
Куйимга бегона занжир, ғул, дедим,
Қул бўлсам, кўнглимга фақат қул эдим,
Тиконзор ичига қамади жаллод.

Чирпирак бўлди-ку чечак чоғларим,
Қорайган қайғузор – чаман, боғларим,
Бағримдан қабариб чиқди доғларим,
Кўнглиммас, қўлимга қаради – ҳа, ёт.

Кулгидай ёйилди зардаси ташда,
Алдамчи чашма у адоқсиз даштда,
Қонингга ташнаю, жонингга ташна,
Биллур ёшларимни ялади шаддод.

Айланиб авради, бахтинг мангу, деб,
Ўчмагай ҳеч қачон толенг ранги, деб.
Мана, кўр, юрагинг қандай янги, деб,
Жуволдиз игнада ямади, ай, дод!

Гарчи юрагимни тинмай чўқиди,
Чуқурроқ санчса-да пайкон-ўқини,
Хилватда шеъримни йиғлаб ўқиди,
Сўнгги дам тавбага яради шояд...

Ҳуррият!
Жилвангдан ёруғдир юзим,
Элимда жаранглар бу кун ҳар сўзим.
Йўқлик ўпқонига кетди у тузум –
Мен ҳаётман, уни ямлади мамот...

2024

@n_jonuzoq

​​MAKTUB

Tongda maktub yozdim.
Boshqa gapim yoʻq,
Ammo yana senga yozgim keladi.
Ayriliq savdosi tobora quyuq,
Telbarib, aqldan ozgim keladi.

Dunyo – gʻam boʻyicha zoʻr mutaxassis,
Hijronga saxiy-u, visolga xasis,
Barmoqlaring tekkan har bitta aziz
Buyumga labimni bosgim keladi.

Sogʻinch – olov, derlar...
Yutyapman ichga,
Ey, toqati qalin, qoshi ingichka!
Bir payt paltong turgan kiyimilgichga
Chidolmay oʻzimni osgim keladi!

Telefon bir chetda yotar soqov, gung,
Uning ham quvvatin olgan gʻussa, mung...
Bexos jaranglaydi qoʻngʻiroq kulging –
Yoprilib roʻyoli bosqin keladi.

“Oʻldiraman!” debsan,
Qulluq, ming rahmat!
Yuzta maktubimga javob – shu bir xat,
Hukmingga roziman. Bilayin, faqat,
Meni oʻldirmakka, yoz, kim keladi?!

————————

МАКТУБ

Тонгда мактуб ёздим.
Бошқа гапим йўқ,
Аммо яна сенга ёзгим келади.
Айрилиқ савдоси тобора қуюқ,
Телбариб, ақлдан озгим келади.

Дунё – ғам бўйича зўр мутахассис,
Ҳижронга сахию, висолга хасис,
Бармоқларинг теккан ҳар битта азиз
Буюмга лабимни босгим келади.

Соғинч – олов, дерлар...
Ютяпман ичга,
Эй, тоқати қалин, қоши ингичка!
Бир пайт палтонг турган кийимилгичга
Чидолмай ўзимни осгим келади!

Телефон бир четда ётар соқов, гунг,
Унинг ҳам қувватин олган ғусса, мунг...
Бехос жаранглайди қўнғироқ кулгинг –
Ёприлиб рўёли босқин келади.

“Ўлдираман!” дебсан,
Қуллуқ, минг раҳмат!
Юзта мактубимга жавоб – шу бир хат,
Ҳукмингга розиман. Билайин, фақат,
Мени ўлдирмакка, ёз, ким келади?!

2024

@n_jonuzoq

​​SAMARQAND. SHARQ TARONALARI

Sohibqiron koʻzga surib, poytaxt qilgan
Samarqandga xush keldingiz, Samarqandga.
Zar sochishni Quyosh tole, Oy baxt bilgan
Samarqandga xush keldingiz, Samarqandga.

Bobo Tarix bolaligin koʻrgandir u,
Bobil bilan uzun suhbat qurgandir u,
Boqiy shahar – muhabbatga qoʻrgʻondir u,
Samarqandga xush keldingiz, Samarqandga.

Bibixonim atirlarin isi shunda,
Ulugʻbekning charaqlagan “Ziji” shunda,
Navoiyning pok, munavvar izi shunda,
Samarqandga xush keldingiz, Samarqandga.

Kimlar kelib tarix yozdi davron bilan,
Koʻngil uzmay ketdi kimlar armon bilan…
Buyuk Ipak Yoʻlidagi karvon bilan
Samarqandga xush keldingiz, Samarqandga.

Ona Yerning taftin olgan issiq noni,
Duo toʻla ochiq kaftday Registoni,
Ey, qadrdon, ey, jonimning egiz joni,
Samarqandga xush keldingiz, Samarqandga.

Koʻring, qanday yosharmoqda eski shahar,
Har niyati, har amali ezgu shahar,
Yangi davr shiddatiga koʻzgu shahar,
Samarqandga xush keldingiz, Samarqandga.

Dunyo bugun hofiz, olam mashshoq bugun,
Taralgaydir “Tanavor”u “Ushshoq” bugun,
Roʻyi zamin koʻrki Sizga mushtoq bugun,
Samarqandga xush keldingiz, Samarqandga.

Navolarning toʻlqinida sel boʻlamiz,
Ohang bilan koʻchgan epkin, yel boʻlamiz,
Bir qoʻshiqni kuylab, bitta el boʻlamiz,
Samarqandga xush keldingiz, Samarqandga!

– – – – – – – 

САМАРҚАНД. ШАРҚ ТАРОНАЛАРИ

Соҳибқирон кўзга суриб, пойтахт қилган
Самарқандга хуш келдингиз, Самарқандга.
Зар сочишни Қуёш толе, Ой бахт билган
Самарқандга хуш келдингиз, Самарқандга.

Бобо Тарих болалигин кўргандир у,
Бобил билан узун суҳбат қургандир у,
Боқий шаҳар – муҳаббатга қўрғондир у,
Самарқандга хуш келдингиз, Самарқандга.

Бибихоним атирларин иси шунда,
Улуғбекнинг чарақлаган “Зижи” шунда,
Навоийнинг пок, мунаввар изи шунда,
Самарқандга хуш келдингиз, Самарқандга.

Кимлар келиб тарих ёзди даврон билан,
Кўнгил узмай кетди кимлар армон билан…
Буюк Ипак Йўлидаги карвон билан
Самарқандга хуш келдингиз, Самарқандга.

Она Ернинг тафтин олган иссиқ нони,
Дуо тўла очиқ кафтдай Регистони,
Эй, қадрдон, эй, жонимнинг эгиз жони,
Самарқандга хуш келдингиз, Самарқандга.

Кўринг, қандай ёшармоқда эски шаҳар,
Ҳар нияти, ҳар амали эзгу шаҳар,
Янги давр шиддатига кўзгу шаҳар,
Самарқандга хуш келдингиз, Самарқандга.

Дунё бугун ҳофиз, олам машшоқ бугун,
Таралгайдир “Танавор”у, “Ушшоқ” бугун,
Рўйи замин кўрки Сизга муштоқ бугун,
Самарқандга хуш келдингиз, Самарқандга.

Наволарнинг тўлқинида сел бўламиз,
Оҳанг билан кўчган эпкин, ел бўламиз,
Бир қўшиқни куйлаб, битта эл бўламиз,
Самарқандга хуш келдингиз, Самарқандга!

@n_jonuzoq

Xushxabar

TABRIKLAYMIZ!

Oʻzbekiston Respublikasi Prezidenti Farmoni bilan Vatanimiz mustaqilligining oʻttiz uch yilligi arafasida jonkuyar ziyolilar qatorida Oʻzbekiston Yozuvchilar uyushmasining bir guruh aʼzolari ham yuksak davlat mukofotlari bilan taqdirlandi. Ular:

“Oʻzbekiston Respublikasida xizmat koʻrsatgan yoshlar murabbiysi” faxriy unvoni bilan – Ismoil Mahmud;

“Doʻstlik” ordeni bilan – Neʼmat Arslon, Bobur Bobomurod, Qurbon Muhammadrizo, Orazbay Satbayev, Nafas Shodmon;

“Shuhrat” medali bilan – Abdunabi Boyqoʻziyev, Axtamqul Karim, Hakimjon Karimov, Turob Niyoz, Ibodat Rajabova, Vafo Fayzullo, Zilola Xoʻjaniyozova.

Mukofotlangan barcha ijodkorlarni chin yurakdan tabriklaymiz!

@n_jonuzoq

“Madaniyat va maʼrifat” telekanali isteʼdodli xonanda Shuhrat Daryo tomonidan kuylangan “Zafar chorlovi” qoʻshigʻiga videorolik ishlabdi.  Soʻz, musiqa va tasvir uygʻunlashsa, asarning taʼsirchanligi oshishi ushbu videorolikda ham koʻrinibdi.  Olimpiada gʻoliblarini tarannum etgan sanʼatkorimiz hamda telekanal ijodiy jamoasiga  minnatdorlik bildiramiz.

@n_jonuzoq

​​ONAM

Tovonimga kirgan tikanning uchi
Onam yuragiga borib qadalar.
Junjikib, chuchkirsam – tushda koʻrguvchi,
Sahardan duosi menga atalar.

Jismidin jon uzib ato qilganim,
Balki tugʻilganim – xato qilganim...
Yoshin mildiratib, ado qilganim,
Sogʻinchi koʻksida silqib, maddalar.

Garchand malikaday koʻrinar  begʻam,
Oltin bekaman, der, baxti but, bekam.
Onalar otaga aylanar ekan –
Xudoning qasriga ketsa dadalar.

Shoir yuragim bor, kim nima desin,
Har kim oʻz yoʻlida yugurib-yelsin.
Mengamas, onamga rahmingiz kelsin,
Sheʼrimdan bezor-u mendan zadalar.

Kuygan koʻkayimga puflayman goho,
Oʻchmasa, tutayman – uflayman goho.
Ochiq qalbimni ham qulflayman goho,
Koʻmilar oʻzimga bergan vaʼdalar...

Kelsa, olib kelar qishloq  gardini,
Yoʻlma-yoʻl taratib rayhon atrini.
Mendan yaxshi bilar onam qadrini
Boshiga soyabon oʻrik, sadalar.

Yoʻl qarab qarigan onajonginam!
Hech kimga taʼnam yoʻq, oʻzimga – ginam.
Koshki poyingizda boʻlsaydim  gilam,
Kerak boʻlmas edi taskin-daldalar...

–––––––––

ОНАМ

Товонимга кирган тиканнинг учи
Онам юрагига бориб қадалар.
Жунжикиб, чучкирсам – тушда кўргувчи,
Саҳардан дуоси менга аталар.

Жисмидин жон узиб ато қилганим,
Балки туғилганим – хато қилганим...
Ёшин милдиратиб, адо қилганим,
Соғинчи кўксида силқиб, маддалар.

Гарчанд маликадай кўринар  беғам,
Олтин бекаман, дер, бахти бут, бекам.
Оналар отага айланар экан –
Худонинг қасрига кетса дадалар.

Шоир юрагим бор, ким нима десин,
Ҳар ким ўз йўлида югуриб-елсин.
Менгамас, онамга раҳмингиз келсин,
Шеъримдан безору мендан задалар.

Куйган кўкайимга пуфлайман гоҳо,
Ўчмаса, тутайман – уфлайман гоҳо.
Очиқ қалбимни ҳам қулфлайман гоҳо,
Кўмилар ўзимга берган ваъдалар...

Келса, олиб келар қишлоқ  гардини,
Йўлма-йўл таратиб райҳон атрини.
Мендан яхши билар онам қадрини
Бошига соябон ўрик, садалар.

Йўл қараб қариган онажонгинам!
Ҳеч кимга таънам йўқ, ўзимга – гинам.
Кошки пойингизда бўлсайдим  гилам,
Керак бўлмас эди таскин-далдалар...

17.08.2024

@n_jonuzoq

"Olimpiada daftari" turkumidagi sheʼrlar "Jadid" gazetasining bugungi sonida juda chiroyli qilib berilibdi. Gazeta tahririyatiga samimiy minnatdorlik bildiramiz!

@n_jonuzoq

"Gʻalabaga talpin!"

Nodir Jonuzoq sheʼri
Shuhrat Daryo ijrosida

@n_jonuzoq