Mana Murtii Waliigalaa Oromiyaa

Sirni Eegalchiisa Mana Harka Qalleeyyii Mana Murtii Waliigalaa Oromiyaatiin Ijaarsi Isaa Gaggeeffamu Godina Hararge Bahaa, Aanaa Dadar, Bulchiinsa Magaalaa Qobbootti Gaggeeffame
—————————-
(Sadaasa 5,2017, MMWO, Caffee Araaraa, Finfinnee)- Sirni eegalchiisa mana harka qalleeyyii Mana Murtii Waliigalaa Oromiyaatiin ijaarsi isaa gaggeeffamu Godina Hararge Bahaa, Aanaa Dadar Bulchiinsa Magaalaa Qobbootti gaggeeffameera. saganticha irratti argamuun ijaarsicha kan jalqabsiisan Pirezidaantii Mana Murtii Ol'aanaa Godina Harargee Bahaa kabajamoo Obbo Bukhaar Kadiirooti.
Sagantichi bakka hoggansi bulchiinsa magaalichaa fi maatiin harka qalleeyyii argamanitti gaggeeffame.Manni Murtii Waliigalaa Oromiyaa tajaajila abbaa seerummaa kennuun cinaatti tajaajila tola ooltummaa gara garaa irratti kan hirmaatu ta'uun isaa ni beekama.

Beeksisa Waamicha  Qormaata Barreeffamaa
------------------
(Sadaasa 3,2017 MMWO,Caffee Araaraa,Finfinnee)-Dorgomtoota Gargaaraa Abbaa Seeraa Kallattii irratti dorgoman irratti calalliin gaggeeffamaa turee booda baay'ina dorgomtootaa tilmaama keesa galchuun  namoota dorgommiif dhiyaatan daangessuun barbaachisaa ta'ee waan argameef Dhi-(CGPA 3.2fi isaa ol),Dubartoota (CGPA 2.0fi isaa ol fi Qaama Miidhamtoota 2.5 fi isaa ol) qormaata barreeffamaaf akka dhiyaatan murtaa'eera.
Waan ta'eefis dorgomtoonni maqaan keessan armaan gaditti tarreeffame Sadaasa 6,2017 ganama keessaa sa'aatii 3:00 irratti magaalaa Adaamaa Galma Aanaa Angaatuu (Karaa Hararitti geessu irra 'Amadee' bakka jedhamutti bu'uun 'Alem Hotel' cinaan harka bitaa gara kolleejjii geessu irra  meetira 200 ol seenuun) akka argamtan ni beeksifna.
Hub-1-Kutaa qormaataa seerota kamuu (hard cooy) qabatanii seenuun kan danda'amu yammuu ta'u, barreeffamoota seerotaan alaa garuu kan hin hayyamamne ta'uu  fi  waraqaa eenyummaa qabatanii seenuun  dirqama ta'uu ni hubachiifna.
2-Dorgomtoonni manneen murtii Oromiyaa keessa hojjataa jiraniifi xiinxalli naamusaa isaanii 'D' ta'e fi mana murtii keessatti muudama gara garaa irratti muudanii waggaa lama kan hin guunne fi dorgommii Gargaaraa Abbaa Seeraa Leenjii ILQSn boodaa irratti kanneen galmaa'anii turan  dorgommii  kana keessaa kan baafaman ta'uu ni hubachiifna.

Beeksisa
-------------
(Sadaasa 3,2017 MMWO,Caffee Araaraa,Finfinnee)-
Manni Murtii Waliigalaa Oromiyaa dorgomtoota Gargaaraa Abbaa Seeraa Leenjii ILQSOn boodaa irratti dorgomanii qabxii waliigalaan caalamanii eeggataa ta'anii fi isaanitti aananii jiran kan maqaan isaanii armaan gaditti tarreeffame fedhii isaanii jiddu gala godhchuun gitoota banaa gara garaa irratti muudee hojjachiisuu barbaada.Waan ta'eefis dorgomtoonni maqaan keessan armaan gaditti tarreeffame sadaasa 5, 2017 ganama sa'aatii 3:00 irratti Magaalaa Finfinnee,Mana Murtii Waliigalaa Oromiyaa, Caffee Araaraatti argamutti akka argamtan ni beeksifna.

Beeksisa Waamicha Eeggataa
--------------------------------
(Onkoloolessa 19,2017 MMWO,Caffee Araaraa,Finfinnee)-Leenjifamtoota Gargaaraa Abbaa Seeraa Ieenjii akka seenaniif murtaa'e keessaa Mahaammad Boonsoo Ulii hanga ammaatti leenjii kan hin galle ta'uun waan mirkanaa'eef bakka isaa eeggataa 8ffaa kan ta'e Lalisaa Guutaa Mul'ataa leenjii akka galu waamichi taasifameera.
Waan ta'eefis dorgomaan maqaan armaan olitti caqasame hanga gaafa 21/2/2017tti ILQSO seenuun leenjii akk jalqabdu ni beeksifna.

-------------------------------
Gama qulqullina Kenna Tajaajila Abbaa Seerummaa fooyyessuu ilaalchisee:dhimmi qulqullinaa xiyyeeffannoon addaa itti kennamee hojjetamuu akka qabu gamaaggama raawwii bara darbee keessatti kan hubatamee waan ta’eef hojiiwwan sirnoota diriirsuu, hubannoo uumuun fi dandeettii cimsuu akkuma eegametti ta’ee dhimma qulqullina raawwii nama dhuunfaatti hidhuun irratti hojjechuuf karoorfamee hojjetamaa jira. Haaluma kanaan agarsiiftuu qulqullina safaruuf adda ba’an keessaa dhimmoota Ol-iyyannoon Mana Murtii itti aanutti dhihaatanii diigaman ilaalchisee Sadarkaa sadanitti gara %9.09tti gadi xiqqeessuun danda’amee jira. Tilmaamamummaa fi wal-fakkeenyummaa hiikkoo seeraa fooyyessuu ilalchisee dhimmoota 3,123 irratti hiikkoo seeraa dirqisiisoo hordofuun murtiin kennamee jira.
---------------------------
Hojii gaarummaa bulchiinsa keessoo fi ijaarsa dandeettii ilaalchisee: Gama Kanaan hojii hedduun karoorfamanii kan hojjetamaa jiran yoo ta’u, Yaa’iin Abbootii seeraa Oromiyaa 6ffaan Magaalaa Finfinnee Caffee Araaraatti haala ho’aa ta’een gaggeeffamee jira. Yaa’ii kana irratti barreeffamni ajandaa ta’ee dhihaate kallattii Caffeen kaa’een dhimma qulqullina irratti akka xiyyeeffatu taasifamee Mata duree”Rifoormiiwwan Qulqullina Tajaajila Manneen Murtii Oromiyaa Fooyyessuuf Taasifamanii fi bu’aawwan argaman” jedhu irratti qophaa’ee bakka keessummootni olaanoon Federaalaa fi Naannoolee argamanitti bifa addaatiin kabajamee jira.Yaa’ii kana kan adda taasisu Manni Murtii Waliigala Oromiyaa yeroo jalqabaatiif handhuura oromiyaa Magaalaa Finfinnee Caffee Araaraatti gamoo fi galma Mataa isaatti yaa’ichi gaggeeffamuu isaati. Gama biraatiin raawwii hojii bara 2016 keessatti Manneen Murtii Ol’aanaa fi abbootii seeraa Mana Murtii Waliigalaa raawwii olaanaa galmeessaniif beekkamtiin kennamee jira.
Tajaajila lammummaa ilaalchisee hojiin Manneen Murtii Sadarkaan jiraniin hojjetame akkuma jirutti ta’ee baasii Qar. Mili.1.5 tilmaamamuun Magaalaa Walisotti maanguddoo harka qalleeyyii ta’aniif ijaarame meeshaa guutuu waliin kennameefii jira.
Akka waliigalaatti hojiin kurmaana 1ffaa hojii qophii karooraa fi raawwataa qopheessuu waan ta’eef hojiin karooraa fi raawwataa qopheessuu bal’inaan erga hojjetameen booda karoorri bara 2017 ”Karoora Milkaa’inaa 2ffaa Manneen Murtii Oromiyaa” jedhamee moggaafamee gara hojiitti seenamee bu’aan armaan olitti ibsame kun kan galmaa’edha.

Raawwii Hojii Manneen Murtii Oromiyaa Kurmaana 1ffaa Bara 2017
*********
(Onkoloolessa 17, 2017 MMWO, Caffee Araaraa, Finifinnee)-Manneen Murtii Oromiyaa hanqinaalee kenna tajaajilaa abbaa seerummaa fi bulchiinsa keessoo keessatti mul’atan bu’uura irraa furuuf karoora tarsiimoo Sirna Karoora Bu’aa Irratti Xiyyeeffateen qopheeffachuun erga hojiitti seenanii waggaan Afur xumuramee waggaa 5ffaan eegalamee jira. Haaluma kanaan, karoora bara 2017 irratti hoggansaa fi Hawaasa Manneen Murtii sadarkaan jiran waliin mariin taasifamee; hojilee hojjetamuu qaban, Agarsiiftuu, Ragaa ka’umsaa fi Mannii akkasumas bu’aalee bara kana eegaman irratti erga walii galameen booda hoggansa sadarkaan jiru waliin sirni Sanada Waadaa Hojii Waliif Mallatteessuu raawwatamee gara hojiitti seenamee jira. Bu’uuruma kanaa, dhimmoota Ijoo Tarsiimoo Afran(1ffaa,Qulqullina Kenna Tajaajila Abbaa Seerummaa Fooyyessu, 2ffaa, Dhaqqabamummaa, Si’oominaa fi Bu’a qabeessumma Tajaajila Abbaa Seerummaa Dabaluu, 3ffaa,Bilisummaa, Itti Gaafatamummaa fi Iftoomina Manneen Murtii mirkaneessuu,4ffaa Gaarummaa Bulchiinsa keessoo fi Dandeetti Raawwachiisummaa Manneen Murtii Cimsuu) irratti xiyyeeffannoon hojjetamaa jira. Kurmaanni 1ffaa akka Manneen Murtiitti yeroo boqonnaa Abbootii seeraa yoo ta’e illee kuufama galmee maqsuuf hojii yeroo gannaa karoorfachuun hojii hojjetameen raawwiin gurguddoon kurmaana kanaa haala armaan gadiitiin qindaa’ee jira.
-----------------------------------
Haaluma Kanaan, Si’oominaa fi bu’a qabeessummaa Tajaajila Abbaa seerummaa fooyyessuu ilaalchisee Yeroon gannaa yeroo boqonnaa Abbootii Seeraa ta’us dhimmootni dhihaatan furmaata akka argataniif ol’aantummaan seeraa akka mirkanaa’eef karoorri hojii ganna addatti qophaa’uun Gumiidhaan mirkanaa’ee hojii hojjetameen Manneen Murtii sadarkaa sadanitti dhimmoota sochii irra turan Galmee 128,268 keessaa Galmeen 92,051 (%71.76) furmaata argatee jira. Galmee akka waliigalaatti murtii argatan kana keessaa Galmeen 89,092(%96.79)daangaa yeroo kaa’ame keessatti murtii argateera. Akka waliigalaatti Galii tajaajila abbaa seerummaa irraa Qr. 96,364,696.26 mootummaaf galii ta’ee jira. Dhaddachi Maatii fi Daa’immaniis dhimmoota 25,007 dhihaate keessaa 17,690(%70.74) irratti furmaatni kennamee jira.
---------------------------
Dhaqqabamummaa Tajaajila Abbaa seerummaa dabaluu ilaalchisee dhimmoota 6,066 irratt abbootii dhimmaa 19,785 Viidiyoo Konfereensiin keessummeessun baasii abbaa dhimmaa Qar.158,280,000 tti tilmaamamu hambisuun danda’amee jira. Tajaajila E-faayiliingiitiin dhimmootni 31,999 keessummeeffamee abbootiin dhimmaa 35,975 tajaajila argachuun baasiin abbaa dhimmaa Qar. 71,950,000tti tilmaamamu hanbisuun danda’ameera. Tajaajilli Abukaatoo bilisaa namoota harka qalleeyyii 4,349 kennamee baasiin Qar.21,745,000 tti tilmaamami abbootii dhimmaa irraa hambisee jira.
-------------------------
Tajaajilli Deggersaa fi Gorsa Seeraa (komii barreessuu, Deebii bareessuu fi kkf) bilisaa namoota 14,208 ta’aniif kennamee baasii Qar. 14,208,000 tti tilmaamamu hambisee jira.Dhaddachi dhaabbii fi naannawaatti itti siqeenyaan dhimmootni 1906 keessummeeffameera.Dhimmootani 6,238 Jaarsummaatti qajeelfaman keessaa dhimmootni 4114(%69.16) xumura argateera.
---------------------------------------
Manneen Murtii Aadaa sadarkaa jalqabaa dhimmoota 149,833 dhihaateef keessaa 109,161(%72.86)tti furmaata kennee jira. MM Aadaa Ol-dabarfatee dhimmoota 6,112 dhihaateef keessaa 4305 (%70.44) irratti furmaata kennee jira. Akka Waliigalaatti Manni Murtii Aadaa hundaa’uun uummatni aadaa fi duudhaa isaa ganamaatti deebisaa jiraachuu isaa irra iyyuu baasii abbootii dhimmaa tilmaama Qar. 567,330,000 abbootii dhimmaa irraa hanbisee jira.
Mana Murtii Aadaa cimsuu hedduun kan hojjetame yoo ta’u Konfereensiin Mana Murtii Aadaa Oromiyaa Magaalaa Finfinneetti gaggeeffamee qorannoo lama karaa IKQSO fi OSU dhihaate irratti mariin gaggeeffamee jira. Murtiilee barsiisoon Mana Murtii Aadaa jildii 1ffaan kan Murtii barsiisoo 80 of keessatti hammate yeroo jalqabaatiif maxxanfamee eebbifameera.

Gamaaggama Raawwii Hojii Manneen Murtii Oromiyaa Kurmaana 1ffaa
-----------------------
(Onkoloolessa 16,2017 MMWO,Caffee Araaraa,Finfinnee)-Gamaaggamni raawwii hojii Manneen Murtii Oromiyaa Kurmaana 1ffaa magaalaa Adaamaatti gaggeeffamee jira.Waltajjii marii kana irratti miseensonni Koree Bulchiinsaa,Qindeessitoonni Dhaddachaa, Gaggeessitoonni Dhimmaa Mana Murtii Waliigalaa Oromiyaa, Pirezidaantonnii fi miseensonni koree bulchiinsaa Manneen Murtii Ol'aanaa   dhimmi illaalltu hirmaataniiru.Bal'ina odeeffannichaa gara booodaa kan isiniin geenyu ta'a.