FDRE Defense Force -የኢፌዴሪ መከላከያ ሰራዊት

ህዳር 2 ቀን 2015 ዓ.ም

በፌዴራል መንግስት እና በህወሃት አመራሮች መካከል የሚደረገዉን የሰላም ዉይይት የአላማጣ የኮረም እና ጨርጨር ከተማ ነዋሪዎች አደነቁ።

በፌዴራል መንግስት እና በህወሃት አመራሮች መካከል እየተደረገ ያለዉን የሰላም ዉይይት ተከትሎ በሰፈነው አንፃራዊ ሰላም በተለያዩ ዕለታዊ ፍጆታዎች ላይ የዋጋ ቅናሽ እና መረጋጋት በመታየቱ መደሰታቸውን ነዉ የአላማጣ የኮረም እና ጨርጨር ከተማ ነዋሪዎች የተናገሩት።

ነዋሪዎቹ እጅግ ባጠረ ጊዜ የመብራት እና የስልክ አገልግሎት ማግኘት መቻላቸውም ለዕለት ተዕለት ኑሯቸው እገዛ እንዳደረገላቸዉ ገልፀዋል።

በግጭት ወቅት በተከሰተው የሠላም እጦት ምክንያት ሰላም እርቋቸዉ መረጋጋት ተስኗቸዉ ህይወታቸዉን አንድ ቦታ ላይ ሆነዉ መምራት ያልቻሉ መሆናቸዉን ያወሱት ነዋሪዎቹ ከጦርነት ኪሳራ እንጅ ትርፍ አይገኝም በማለት ትዝባታቸዉን ለመከላከያ ሚዲያ ገልፀዋል።

አሁን ላይ መንግስት በእነኝህ አካባቢዎች እና የጦርነት ቀጠና በነበሩ አካባቢዎች አስፈላጊ ድጋፎችን ለህብረተሰቡ ከማደረስ ጀምሮ እንደቴሌ መብራት እና ዉሃ የመሰሰሉ መሰረታዊ እና ለሰዉ ልጅ አስፈላጊ መሰረተ ልማቶችን በፍጥነት እየገነባ መሆኑንም ገልፀዋል፡፡

ስለሆነም ነዋሪዎቹ በፌዴራል መንግስት እና በህወሃት አመራሮች መካከል የሚደረገዉን የሰላም ዉይይት አድንቀዉ በህብረት የኢትዮጵን የዕደገት ግስጋሴ ለማፋጠን ዝግጁ መሆናቸዉን ተናግረዋል፡፡

የኃላሸት ሶረሳ
ፎቶግራፍ በየኃላሸት ሶርሳ

ጥቅምት 17 ቀን 2015 ዓ.ም

"ቆስለንም እየታከምን ነው።" ፦ እጃቸውን ለመከላከያ ሰራዊታችን የሠጡ የህወሓት ታጣቂዎች

አሸባሪው ህወሓት በደረሰበት ምት መበታተኑን እጃቸውን ለመከላከያ ሰራዊት የሠጡ ታጣቂዎች አረጋግጠዋል።

እጃቸውን ለመከላከያ ሰራዊታችን የሠጡ ታጣቂዎች እንደገለፁት በመከላከያ ሠራዊቱ የተደረገልን አቀባበል ከተነገረን በተቃራኒው ሆኖ አግኝተነዋል።

መከላከያ ሠራዊቱ ሲማርከን እንደቤተሰቡ ነው የተቀበለን ያሉት መኮንን ጉድላክ እና ከማኢስ አመሀ እጅ በመስጠታችን እድለኞች ነን ቆስለንም እየታከምን ነው ብለዋል።

ሽመልስ ሹምዬ
ፎቶግራፍ ሽመልስ ሹምዬ

ለተጨማሪ መረጃዎች ከታች ያሉትን ሊንኮች ይጠቀሙ::
ፌስቡክ
https://www.facebook.com/fdredefense.official

መከላከያ ሠራዊት በወሰደው ርምጃ የሽብር ቡድኑ ታጣቂዎች በሁሉም ግንባር እጅ እየሰጡና እየተበተኑ ነው።

የኢትዮጵያ መከላከያ ሠራዊት በወሰደው ከባድና ፈጣን ርምጃ የሕወሐት ታጣቂዎች ተበትነዋል፤ የታደሉት እጅ ሰጥተዋል። ሌሎች ደግሞ በተሳሳተ መረጃ ተደናግረው ምን ማድረግ እንዳለባቸው ግራ እንደተጋቡ መረጃዎች አመልክተዋል።

በቅርቡ ለመከላከያ እጅ የሰጡ የአሸባሪው ሕወሓት ታጣቂዎች የክፋት አዝማቾቻቸውን ሁኔታ በአንድ ጥሩ የትግርኛ ምሳሌያዊ አነጋገር ገልጸውታል። ማሽላውን ከአደጋ ለመከላከል የከበበው አጥር ለማሽላው እንጂ ራሱ አጥሩን አልጠቀመውም። ይሄም ጁንታው እንጂ ታጣቂዎቹ ከጦርነቱ ያተረፉት እልቂት ብቻ መሆኑን ያሳያል።

በመሆኑም የተበተኑና ከጁንታው የጥፋት ወጥመድ ማምለጥ የሚፈልጉ የጁንታው ታጣቂዎች መከላከያ ወደ ተቆጣጠራቸው የትግራይ አካባቢዎችና ወደ አጎራባች ክልሎች በመሄድ እጃቸውን በሰላም እንዲሰጡ የመከላከያ ሠራዊት ጥሪ ያቀርባል።

እጃቸውን ለሚሰጡ የጁንታው ታጣቂዎች አስፈላጊው ክብካቤ እንዲደረግ መመሪያ ተላልፏል። የአጎራባች ክልሎችና ከህወሓት የተላቀቁ የትግራይ አካባቢዎች ሕዝብ፣ እጅ የሚሰጡ የጁንታው ታጣቂዎችን በመቀበል፣ ተንከባክቦ ለመከላከያ ሠራዊቱ እንዲያስረክብ መከላከያ መልእክት ያስተላልፍላችኋል።

ጥቅምት 16 ቀን 2015 ዓ.ም

“የጥንካሬያችን ምንጭ ሕዝባችን ነው!!” በሚል መሪ ቃል የመከላከያ ሠራዊት ቀንን በአትሚስ የሚገኘው የኢትዮጵያ 7ኛ ሞተራይዝድ ሻለቃ የሠራዊት አባላት በፓናል ውይይት አከበሩ።

የ7ኛ ሞተራይዝድ ሻለቃ ዋና አዛዥ ኮ/ል ወዳጅ ቦጋለ በፓናል ውይይቱ ላይ ተገኝተው እንደተናገሩት ኢትዮጵያ ለመጀመሪያ ጊዜ የራሷን ሠራዊት በሚኒስቴር መስሪያ ቤት ያቋቋመችበትን ቀን ጥቅምት 15/1900 ዓ.ም የሠራዊት ቀን ሆኖ መከበሩ ለሠራዊቱ ከፍተኛ አስተዋፆ አለው።

የኢትዮጵያ መከላከያ ሠራዊት በሁሉም አካባቢ እና ቀጠና የተሰጠውን ግዳጅ በአመሪቂ ድል ሲፈፅም ጠንካራው ህዝባችን ከጎናችን አልተለየም ይህንንም በዓል ስናከበር ህዝባችንንም እያወደስን እና እያመሰገንን መሆን አለበት ሲሉ ተናግረዋል።

ከፍተኛ መኮንኑ አክለውም የአለም መንግስታት በሶማሊያ የሰጡንን ትልቅ ኃላፊነት እና አደራ በብቃት እና በጥራት በመወጣት ላይ እንገኛለን ይህንንም ተግባር አጠናክረን ለመቀጠል ይህ በዓል ከፍተኛ አበርክቶ አለው ብለዋል።

በፓናል ውይይቱ ላይ ተሳታፊ ከነበሩት የሠራዊት አባላት መካከል ሻ/ል ዘመኑ አበራ እና አስር አለቃ ደመላሽ ጌትነት በሰጡት አስተያዬት የመከላከያ ሠራዊት ቀንን በአትሚስ ተልዕኮ ላይ ሆነን ስናከብር ለምንፈፅመው ግዳጅ ትልቅ አስተዋፆ አለው ብለዋል።

ፍፁም ከተማ
ፎቶግራፍ አማላይ ገደፋው

ነሐሴ 1 ቀን 2014 ዓ.ም

✍ የወጣቱ ተጋድሎ በደጎሎ

ሀገራችን ኢትዮጵያ በተለያዩ ጊዜያት የውጪም ሆነ የውስጥ ጠላቶች ሲያጋጥሟት ዜጎቿም በአንድ አይነት አስተሳሰብ እና በአንድ አይነት ዓላማ በደም እና በህይወታቸው ቤዛነት የማያልፍ ታሪክ ሰርተው ህዝብና ሀገርን አፅንተዋል።

ህዝቦቿ የሀገርን ሉዓላዊነትን ለመዳፈር ለሚሞክሩ ማንኛውም ፀረ ሠላም ሃይሎች በተባበረ ክንዳቸው "ዶጋመድ" እንደሚያደርጉት ለማወቅ የታሪክ ድርሳናትን ማገላበጥ አይጠበቅብንም። ምክንያቱም በቅርቡ እንኳን አሸባሪው እና ወራሪው የህውሃት ቡድን ኢትዮጵያን አፈርሳለሁ ብሎ ሲቋምጥ የሀገራችን ህዝቦች ከሊቅ እስከ ደቂቅ ከህፃን እስከ አዛውንት ግንባር መዝመታቸው ብቻ ሁነኛ ምስክር መሆን ስለሚችል።

ሀገራችን ኢትዮጵያ በገጠማት ፈተናዎች ሁሉ ቆራጥ ጀግና እና ሀሞተ ኮስታራ ጀግኖች በየዘመኑ ነበሩ አሁንም አሉ ወደ ፊትም ይኖራሉ።

አሸባሪው እና ወራሪው የህውሃት ቡድን ወረራ ባደረገባቸው አንዳንድ የአማራ ክልል ወረዳዎች እንዲሁም በአፋር የተወሰኑ አካባቢዎች ለማመን የሚከብዱ አፀያፊ ተግባራትን መፈፀሙ የአደባባይ ሚስጥር ሆኖ በጥቁር አሳፋሪ መዝገብ ተከትቧል።

በደቡብ ወሎ ዞን በጃማ ደጎሎ ወረዳ አንድ ወጣት ስለሰራው አስገራሚ ጀብዱ ልነግራችሁ ወደድኩ።

ወጣት ቴዎድሮስ ታደሰ ይባላል ውልደቱም እድገቱም ጃማ ዶጎሎ ነው። ለቤተሰብ ደግሞ የበኩር ልጅ ነው ይህ ወጣት አሸባሪው እና ወራሪው የህውሀት ቡድን በጀግናው የሀገር መከላከያ ሠራዊት ድባቅ ተመትቶ ከመሸሹ በፊት በወረራ ይዞት በነበረው ጃማ ዶጎሎ ውስጥ በርካታ ጥፋትን ሲያደርስ እንደነበረ ያነሳል።

ለወጣት ቴዎድሮስ ታደሰ የመጀመሪያ ጥያቄዬን ጠየኩት ጥያቄው ደግሞ ከአሸባሪው የህውሃት ቡድን አባላት ጋር እንዴት ተገናኛችሁ የሚል ነበር?

በሰፈራችን ሁለት የእነሱ ታጣቂዎች መጡ አንደኛው ክላሽ ይዟል ሌላኛው ደግሞ ዱላ ነበር የያዘው እኔ ደግሞ እቤቴ ደጃፍ ቁጭ ብዬ ነበር እዚህ ጠላት ወይም አብዮታዊ አሉ አለኝ "መከላከያ ሠራዊቱን ማለታቸው ነው"። አረ የለም አልኳቸው በመቀጠል ሁለቱ በትግረኛ አውርተው ወደ እኛ ቤት ለመግባት ተስማሙ።

በመቀጠል አንደኛው መሳሪያ የያዘው በረንዳ ላይ ቁጭ አለ አንደኛው ደግሞ ሳሎን ቤት ገብቶ በመበርበር የእህቴን የአንገት ወርቅ እና የጆሮ ጌጥ እንዲሁም 5ሺህ ብር ይዞ ወጣ እና ለጓደኛው የፈለግነውን አግኘተናል አለው። መሳሪያ የያዘው ሌላ ነገር ምን አላችሁ? አለኝ ይላል ወጣት ቴዎድሮስ

እኔም በማስከተል ተጨማሪ ጥያቄ ጠየኩት ምን አልካቸው?

በጓሮ የሚሸጡ በጎች ነበሩን እና ድምፅ ስለሰሙ ከዋሸሁ እንዳይገሉኝ የሚሸጡ በጎች አሉ አልኩት ፍጠን አምጣ አለኝ "ወዲ ዘኸድጊ" እያለ እኔም ከሚሸጡት በጎች መካከል አንዱን አመጣሁ እና ሰጠሁት።

ስንት ብር ነው የሚሸጠው አለኝ 1500 ብር አልኩት እየሳቀ ለመከላከያ ቢሆን ኖሮ በነፃ ነበር የምትሰጠው ብሎ ተፋብኝ እኔም ዝም ብዬ በውስጤ አንድ ሃሳብ እያሰብኩ ነበር።

ክላሽ የያዘው ጓደኛውን ጠርቶ በጉን ያዝ እንሂድ አለው እሱም እሺ አለው እና በጉን ተሸክሞ ወጣ አንደኛው ደግሞ ክላሽ አንግቶ ሊወጣ ሲል መሳሪያውን ከትከሻው ላይ በፍጥነት ቀማሁት በዚህ ጊዜ ሁለቱም እግሬ አውጪኝ ብለው ፈረጠጡ።

ክላሹን ከተቀበልክ በኋላ ምን አደረክ የእኔ ጥያቄ ነበር?

ክላሹ በእጄ ሲገባ አንደኛው በጉን ጥሎ ወደ ግራ ታጠፈ አንደኛው ደግሞ ወደ ቀኝ ታጠፈ እኔም ክላሹን ወደ ቀኝ ወደታጠፈው እየተካስኩ ተከተልኩት ነገር ግን አለገኘሁትም።

ከእነሱ የወሰድኩትን መሳሪያ ይዤ ወደ ጫካ ገባሁ ከዛ በኋላ እነሱን አግኝቻቸው አላውቅም ብሎ ሃሳቡን ያጠቃልላል።

አሸባሪውን እና ወራሪው የህውሃት ቡድን በወረራቸው አካባቢዎች የሚገኙ ነዋሪዎች ይህንን የሽብር ቡድን የታጠቃቸውን መሳሪያዎች የዘረፋቸዉን የህዝብ እና የመንግስት ንብረት ይዞ እንዳይወጣ መማረክ እና መደምሰስ እንደሚያስፈልግ በአስቸኳይ ጊዜ አዋጅ ዕዝ በተሰጠው አቅጣጫ መሠረት ጀግናው ወጣት ቴዎድሮስ ታደሰ ከአሸባሪው የህውሃት ቡድን የማረከውን መሳሪያ ለሌሎችም ሀገር ወዳድ የአካባቢዉ ወጣቶች ጥሩ አብነት ይሆናል።

ጀግናዉ ቴዎድሮስ ታደሰ በአሁን ሰዓት ከጁንታዉ የማረከዉን ክላሽ ታጥቆት የአካባቢውን ሠላም እያስጠበቀበት ይገኛል።

ለሀገር እና ለህዝብ ክብር መቆም ይሉሃል ይህ ነው።

ኢትዮጵያ አሸንፋለች።

ፍፁም ከተማ
ፎቶግራፍ አከለ አባተ

ለተጨማሪ መረጃዎች ከታች ያሉትን ሊንኮች ይጠቀሙ።

ፌስቡክ 👇
https://www.facebook.com/fdredefense.officia

ሰኔ 24 ቀን 2014 ዓ.ም

በደቡብ ሱዳን ያምቢዮና ታምቡራ ግዳጁን እየፈፀመ የሚገኘው የ15ኛ ምተራይዝድ ሰላም አሰከባሪ ሻለቃ ዝግጁነቱ የተሟላ መሆኑን የዩናሚስ ኢንቫይሮሜንታል ኢንሰፔክሽን ተወካይ ሻለቃ እርድኔኪስይ ሳድኖማር ተናገሩ።

በሻለቃው የግዳጅ ቀጠና የተገኙት ሻለቃ እርድኔኪስይ ሳድኖማር የአካባቢ ደህንነት አያያዝ፣ የቀለብ አቅርቦት፣ የንፁህ ውሃ አቅርቦትና ስርጭት፣ የጤና አገልግሎት አሰጣጥ፣ የማብሰያ እና የመመገቢያ እቃዎችን እና አዳራሾችን ተዘዋውረው ተመልክተዋል።

ሻለቃ እርድኔኪስይ ሳድኖማር እንደተናገሩት በየካምፑ ተዘዋውረን ባደረግነው ምልከታ የሻለቃው አባላት ሠፊ የግዳጅ ቀጠናን ሸፍነው ተልኳቸውን በተሟላ ቁመና እየተወጡ እንደሚገኙ አረጋግጠናል።

የ15ኛ ሞተራይዝድ ሰላም አሰከባሪ ሻለቃ ምክትል አዛዥ ሎጀሰቲክስ ሌ/ኮሎኔል ጌቱ ጥላሁን በበኩላቸው በተሰማራንባቸው የግዳጅ ቀጠናዎች ሁሉ የሀገራችንን ክብርና ዝና ከፍ በሚያደርጉ ተግባራት ላይ ትኩረት በማድረግ ተልኳችንን በብቃት በመወጣት ላይ እንገኛለን ብለዋል።

ታደሰ ታምራት
ፎቶግራፍ ሰለሞን ጌታቸው

@FDRE_DEFENCE_FORCE

ሰኔ 23 ቀን 2014 ዓ.ም

በመከላከያ ትምህርትና ስልጠና ዋና መምሪያ ስር የሚገኙ ኮሌጆች፣ አካዳሚዎች እና ማሰልጠኛ ትምህርት ቤቶች የተሻለ የስራ አፈፃፀም ማስመዝገባቸው ተገለፀ፡፡

በዋና መምሪያው የአመቱ የስራ አፈፃፀም ማጠቃለያ ላይ የተገኙት የመከላከያ ጠቅላይ ኢታማዦር ሹም ክቡር ፊልድ ማርሻል ብርሃኑ ጁላ በመከላከያ ትምህርትና ስልጠና ዋና መምሪያ ስር የሚገኙ ኮሌጆች፣ አካዳሚዎች፣ ማሰልጠኛ ትምህርት ቤቶች እና የዋና መምሪያው ስታፎች የተሻለ የስራ አፈፃፀም ማስመዝገባቸውን ገልፀዋል።

ዋና መምሪያው ከህግ ማስከበርና የህልውና ዘመቻው ጎን ተቋሙ የሰጠውን ግዳጅና ተልዕኮ በአስቸጋሪ ሁኔታ ሆኖ ጦርነቱን በመደገፍ እና ዝግጁነትን በማጠናከር የተወጣው ሚና ከፍተኛ መሆኑን ተናግረዋል።

ፊልድ ማርሻል ብርሃኑ ጁላ ፕሮፌሽናል ሰራዊትን ለመገንባት ከፖለቲካዊ ወገንተኝነት የፀዳ እና ኢትዮጵያን የሚያበለፅግ፣ ከብሄር የማይወግን፣ የሃገራችንን አንድነት ማስቀጠል የሚችል ጠንካራ ሰራዊት መፍጠር የማሰልጠኛ ተቋሞቻችን ግንባር ቀደም ሚና በመሆኑ ተጠናክሮ መቀጠል አለበት ብለዋል።

የመከላከያ ትምህርትና ስልጠና ዋና መምሪያ ኃላፊ ሌ/ጀኔራል ይመር መኮነን በበኩላቸው መከላከያ በሠለጠነ የሰው ሃይል የተደራጀ እና አዳዲስ ዘመኑ የሚጠይቀውን ቴክኖሎጂ መጠቀም የሚችል ሙያተኞችን በማፍራት ረገድ ትኩረት ተሠጥቶ ተሠርቷል ብለዋል።

ጀኔራል መኮነኑ አክለውም ተቋሙ የሰጠንን ግዳጅ በህግ ማስከበር የህልውና ዘመቻ ውስጥ ሆነን በሁሉም ማሰልጠኛ ትምህርት ቤቶች አካዳሚዎች፣ ኮሌጆች ለስልጠናው መሳካት ከከፍተኛ አመራሩ እስከ ታችኛው የአመራር እርከን ድረስ በእልህና በቁጭት በማሰልጠን ከፍተኛ ሚናቸውን ተወጥተዋል፡፡

በቀጣይ ተቋሙ በሚሰጠን ግዳጅና ተልዕኮ በበለጠ እና በትጋት መስራት ይጠበቅብናልም ብለዋል፡፡

መኮንን ፈንታው
ፎቶግራፍ ምትክ ንጉሴ

@FDRE_DEFENCE_FORCE

ሰኔ 23 ቀን 2014 ዓ.ም

የሁርሶ የኮንቲንጀንት ማሰልጠኛ ትምህርት ቤት ያሰለጠናቸውን የሰላም አስከባሪ ወታደሮች አስመረቀ።

በአፍሪካ ህብረት ስር በሶማሊያ ለሚሰማራው የኢትዮጵያ የሰላም አስከባሪ የቅድመ ስምሪት ስልጠና የምርቃት ዝግጅት ላይ የክብር እንግዳ በመሆን የስራ መመሪያ ያስተላለፉት የመከላከያ ህብረት የሰው ሀብት ዋና መምሪያ ኃላፊ ሌ/ጀኔራል አጫሉ ሸለመ ናቸው።

ሀገራችን በአለም አቀፉና በአህጉራዊ የሰላም ማስከበር ተልዕኮ ላይ አኩሪ ታሪክ እንዳላት ያወሱት ጀኔራል መኮንኑ ተመራቂዎች የቀደምት የኢትዮጵያ የሰላም አስከባሪዎችን ጀግንነትና በጎ ታሪክን መድገም እንደሚኖርባቸው አሳስበዋል።

ለበርካታ አመታት በሰላም እጦትና በሽብርተኞች እየተሰቃየች የምትገኘው የጎረቤት ሀገር ሶማሊያ የሀገራችንን ሰላምና እድገት የማይፈልጉ የቀጠናው የጥፋት ኃይሎችም መገኛ በመሆኗ ግዳጃቸውን በላቀ ወኔና በብቃት እንዲወጡ አሳስበዋል ።

የሁርሶ የኮንቲንጃንት ማሰልጠኛ ት/ቤት አዛዥ ኮ/ል አዲሱ ተርፋሳ ባቀረቡት ሪፖርት የአንደኛ ዙር የአትሚስ (ATMIS) ተመራቂዎች የግዳጁን ሁኔታ በመለየት በተሻሻለ የስልጠና ዘዴ በንድፈ ሀሳብና በተግባር ሰልጠናቸውን አጠናቀው ለምርቃት መብቃታቸውን ገልፀዋል።

ተመራቂ የሰላም አስከባሪዎች በአፍሪካ ህብረት በኩል ብቃታቸው መረጋገጡን የገለፁት የት/ት ቤቱ አዛዥ ሀገርና ተቋማቸው የሰጧቸውን አደራ በታላቅ ኃላፊነትና በጀግንነት እንዲወጡ አሳስበዋል።

ተመራቂ የሰላም አስከባሪዎችም ሀገራቸው የሰጠቻቸውን ታላቅ ኃላፊነት ለመወጣት የሚያስችል ስልጠና ማግኘታቸውንና በቀጣይም ግዳጃቸውን በላቀ ወኔና በጀግንነት ለመፈፀም ቁርጠኛ መሆናቸውን ተናግረዋል።

በሶማሊያ የታየውን የሰላም መሻሻልና የሶማሊያ መንግስትና የፀጥታ ኃይሉ እየተጠናከረ መሄዱን ተከትሎ በተወሰነው የሶማሊያ የሽግግር ዕቅድ መሰረት በሀገሪቱ በሰላም ማስከበር ላይ የሚገኘው የሰላም አስከባሪ ሀይል መጠሪያውን ከአሚሶም ወደ አትሚስ ከለወጠ በኋላ ስልጠናቸውን በማጠናቀቅ ወደ ሀገሪቱ የሚሰማሩ የመጀመሪያ የሰላም አስከባሪዎች ናቸው።

በምረቃ ዝግጅቱ ላይ ከፍተኛ የሰራዊቱ አመራሮች፣ የአካባቢው መስተዳደሮች እና ጥሪ የተደረገላቸው እንግዶችም ተገኝተዋል።

ብዙአየሁ ተሾመ
ፎቶግራፍ ተሰማ ኡርጌሳ

@FDRE_DEFENCE_FORCE