الشاعر محمد الجماسي

مولد السيدة رقية عليها السلام
متباركين ان شاء الله


،،،،،،،،
أجمل ورده الاجمل أب
عطر المحفل منچ هب
يارقيه..يارقيه
...
بسبعطش من شعبان
انولدت ايه بقران
چن ورده ابصورة انسان
تشبه جدتهه الزهره

ازغيرونه وتحمل اسرار
بالشام اتلم الزوار
امبارك هذا المولد صار
للخدام اكبر بشره

كوثر من كوثر من نور
ابكاروكج ريحة عاشور
يارقيه يارقيه
...
محتار اهديلچ مبروك
وابرجليچ الهسه الشوك
ناگه اتركبين وكاروك
واگماطج سوط ويچوي

مولوده استوچ تبچين
وادموعچ توجع بحسين
ابشيبات الغالي اتشمين
ياعالم حبنه العلوي

وجهچ مولاتي ايگولون
أرقه امن أغصان الزيتون
يارقيه..يارقيه
...
بسم الله ماشاء الله
نورچ عالدنيه اشمحلاه
عمچ عباس إبيمناه
هالليله ايهز بالرايه

ابچفيته الخظره ايغطيج
يضحكلچ وايلاعب بيچ
يانور اعيوني ايسميچ
تسوين الشط ومايه

جيتي وجبتي الخير اوياچ
يابنت احسين اشمحلاچ
يارقيه..يارقيه
...
ميلادچ اجمل ميلاد
هنيالچ يخت السجاد
فرشو سفره وصبو زاد
والتمو كل الاحباب

ام عباس اعليچ اتدور
وبالحيطان اتخلي ابخور
وزينب گالت هذا النور
طالع من اطهر اصلاب

وبهالمولد فرحانات
سكنه وكل العلويات
يارقيه ..يارقيه
...
واحنه الشيعه اوياكم دوم
مو بس هاليوم وكل يوم
والدنيه المابيهه انجوم
ضلمه اتصير وماتنعاش

داير ماداير شمعات
جبنالچ واحلى الهوسات
الليله ابابچ حوريات
ايطيرن بجناح الفراش

ودينه الگبرچ زوار
مشتاكين ازغار اكبار
يارقيه ..يارقيه

محمد الجماسي


#اللهم_عجل_لوليك_الفرج

صلو على اقمار شعبان
صلو على اقمار شعبان
..
اول قمر شع بالنور
حاكم الدنيه بعاشور
رجع اجناح الفطرس
ورجع الخاطر مجبور
حاضر جبريله
ابجنحه ايوليله
الزهره اتسميله
واتبوسه ابنحره

ابيوم الولاده وهوه عطشان
صلو على اقمار شعبان
...
ثاني قمر عالميعاد
اسمه الامام السجاد
هذا القمر ابن احسين
سيد جميع الاسياد

يضون وجناته
فرح عماته
واسمه اشمحلاته
سجاد العتره

چنه دعاء ابهيئة انسان
صلو على اقمار شعبان
..
وثالث قمر كله احساس
اسمه ابوالفضل العباس
وي اللبن خبطوله
غيره ومراجل ياناس

محلات احروفه
باسوله اجفوفه
زينبنه اتطوفه
واتكمطه ابرايه

وام البنين اتشوفه قران
صلو على اقمار شعبان

#محمد-الجماسي
#اللهم-عجل-لوليك-الفرج

#أبوذية

الليله بالولاده الفرح يراد
وعله الضدك يكون ايهجم يراد
نخيتك يابوعبدالله يراد
جنح فطرس ترد النه البقيه

#محمد-الجماسي
#اللهم_عجّل_لوليك_الفرج

#أبوذية

يميل الجدم عن دربه واعدله
واتاني واحسب اليومه واعدله
شوكت يمليها من قسطه وعدله
ويلمنا بمسجد السهلة سويه


محمد الجماسي

#اللهم_عجل_لوليك_الفرج

بالسجن بس ماكطع راسي الشمر
فرق بين العالرمح والعالجسر
يحسين يحسين
...
كاعد بطاموره.. اضلوعي هم مكسوره
وابجي بحنين
هذا بيه الصاير..ومارفسني الحافر
مثل الحسين
اختي مامسبيه.. ابجو عالعلويه
يامؤمنين
صاح آخر صوتي..كتبو بتابوتي
مات السجين
كاطع السندي عليّ  حتى الهوه
بالسجن بس اني والميت سوه
يحسين يحسين
...
اوي اهلي مااتواجه..وقصتي تتشابه
وي العليل
اخيال صاير جسمي..القيد حافر عظمي
ومثله نحيل
والزمن وداني..من سجن للثاني
ودمعي يسيل
العمتي تعمه اعيوني.. بزينب ايذكروني
الفوك الهزيل
ياسجن ادخله موحش بي ضلام
جن خرابة زينب وحرك الخيام
يحسين يحسين
...
السجن قفلو بابه.. احسين ليش اثيابه
سلبوهه اله
الخنصر ايكطعونه..ونعشي ايربطونه
بالسلسله
بالزنازن اني.. وكل سجين ايتاني
جية هله
وانه مو بالهيمه.. ولا جوتني الخيمه
ياكربله
عالاقل تابوت شالو جسمي بي 
احسين مذبوح وخواته بالسبي
يحسين يحسين
...
امن الشمس حرموني..بالسجن خلوني
جوه الارض
والسلاسل حاسس..جنهه خيل اترافس
بيه وترض
وحدي وامكيديني..وعالحبايب عيني
ماتنغمض
والفرج بالجمعه..صاح صوت الدمعه
حان الفرض
ياعلي ابن سويد بلغ شيعتي
كلهم ايصيحون يم اجنازتي
يحسين يحسين
....
احسين ماخذ بالي.. هذا جدي الغالي
بروحي انكتب
مو سهل عاشوره.. اجفوف اخوه مبتوره
وضعنه انسلب
كل غراض الخيمه..اتطشرن بالهيمه
وكلشي انهب
هو جسمه اتثلم..وانجتل بمحرم
وانه برجب
خامس وعشرين من هذا الشهر
صيحو وايلي عله الكلبه انكسر
يحسين يحسين
....

محمد الجماسي
اللهم عجل لوليك الفرج

بين الامام الكاظم والامام المهدي
(عليهما السلام)

آنه السم مرد جبدي
عايش بالسجن وحدي
غايب وابچي عالغايب
كل دمعي عله المهدي
ــــــــــــــــــــــــــــــــــــــ
گاعد بالسجن واتخيّل الغيبه
يمكن حته برموشه طلع شيبه
ديوان الحسن هذا ومضيف احسين
لاكن ذبّحوه بالطف معازيبه

هوّه القائم الغايب
وآنه الكاظم الراهب
اليوم ابمجلسي موجود
يصرخ آه ياجدّي
ــــــــــــــــــــــــــــــــــــــ
رگبتي إمن السلاسل خلهه تتحفر
فترة غيبتي اخمسطعش مو اكثر
آنه اعله الاقل يمي الرضه السلطان
هوّه ابلا رضا ولا موسى لا جعفر

آه الدمعته الحمره
هسه صاير اشكبره
امحدّب طوله من الضيم
يمكن صاير ابگدّي
ــــــــــــــــــــــــــــــــــــــ
آنه إوياه سويّه نطلع الجمعه
بس آنه بجنازه وهوه بالدمعه
ماتوله ضحايه اثلثطعش معصوم
عله الحيطان يوميه يدگ قطعه

مجلس عنده يوميه
ماخلصن بواچيه
هوه الشمر الاماذيه
وآني اذاني السندي
ــــــــــــــــــــــــــــــــــــــ
تابوتي ابسلاسل لافّه الجائر
والمهدي غربته تكسر الخاطر
الكل تعرف مكاني يم جسر بغداد
وهوّه بيا كهف وبيا نوى صاير

وحيد امفارگ اعزازه
ويوميه وره اجنازه
يگعد يم ضريح احسين
وبمجلس عزاه يبدي
ــــــــــــــــــــــــــــــــــــــ
سردابي الـمقر بس للعبوديه
ساجد للاله وادعي يوميه
وسرداب الامام المهدي ياشيعه
چن مجلس عزاء والدمعه لطميه

والمامنوخذ ثاره
هايم ليله وانهاره
الشام وكربله اباله
وحادي إبعمّته يحدي
ــــــــــــــــــــــــــــــــــــــ
باچر بالجنازه المهدي تلگونه
وي مشايتي يلطم عله اعيونه
واويلي عله المسموم هم ايصيح
وياكم ولاكن ماتشوفونه

هوّه والرضه يبچون
فوگ الجسر يتلاگون
واحد يشبگ الثاني
ذوله من اعز ولدي


محمد الجماسي

#اللهم_عجل_لوليك_الفرج

اليوم موسى الكاظم اندگ بابه
انريد مهدينه يجي امن اغيابه
ــــــــــــــــــــــــــــــــــــــ
عدنه يم باب الحوائج غايه
انريد يظهر قائد المشايه
ايجهز الجيش ويشيل الرايه
الدنيه غابه وهوه سبع الغابه
ــــــــــــــــــــــــــــــــــــــ
گالو الدگ باب موسى الكاظم
مايرد فشلان يفرح لازم
رايدين احنه ظهور القائم
انصير خدامه ونبوس اترابه
ــــــــــــــــــــــــــــــــــــــ
چم علي بن سويد بينه ايتاني
ايصيح ياربي الصبر چواني
وين البوجهه ضوه رباني
المهدي مامعقوله ينسه احبابه
ــــــــــــــــــــــــــــــــــــــ
اليوم يم باب الامام الرافضه
اتصيح سهلنه الامر يابوالرضه
يللي ساگك بالحديد امرضرضه
ويومك ايفت الفؤاد امصابه
ــــــــــــــــــــــــــــــــــــــ
انريد الابشاره تعبنه امن السؤال
سيدي ولا تنطي للشامت مجال
ندعي من الله العظيم الـمتعال
ايعجلنه بالفرج واسبابه
ــــــــــــــــــــــــــــــــــــــ
الدنيه ظلمه وبس ابوصالح ضوه
خل يمر عالمختنگ نسمة هوه
واستقرت وين بالمهدي النوه
المثله ماجابت ابد جيابه
ــــــــــــــــــــــــــــــــــــــ
ناس گالو بدعويه قصته
وناسه سموهه خرافه غيبته
وين ابوصـالح يبين حوبته
ابسطرة ايده ويخرس الجذابه


محمد الجماسي

#اللهم_عجل_لوليك_الفرج

جوه الأرض حطو سمه
سابع غصن من فاطمه
مسموم ابوالرضه..شيعو يرافضه
موسى ابن جعفر
....
جوه الأرض ضل صاحب القداسه
والسجن كالو بس متر قياسه
سكف السجن ياناس دمه راسه
وهارون ضل ايشدد الحراسه

بالضلمه خلص مدته
بجسر الرصافه اجنازته
بجبده الالم مضه..شيعو يرافضه
موسى ابن جعفر
...
تدرون شنهي التهمه والجنايه
جي جده حيدر صاحب الولايه
بطاموره ضلمه صارت البدايه
واعله الجسر تابوته بالنهايه

جابوه احماميل اربعه
وهزت الدنيه الفاجعه
بسم الحقد كضه..شيعو يرافضه
موسى ابن جعفر
....

ابليل السجن يتذكر الخرابه
من نومو عماته عالترابه
اخمسطعش عام وعايش ابعذابه
لااهل فزعوله ولاكرابه

هم شفتو واحد بالحبس
كل عمره ماشايف شمس
وإبأهله ماحظه..شيعو يرافضه
موسى ابن جعفر
....
طرز ادموعه للعشك مناره
ساجد ابليله وقائم بنهاره
لاكن الكاظم اثبت انتصاره
بهاي الأفواج التكصد الزياره

كل زاير ايطب للصحن
جن داخل ابجنة عدن
وادموعه فايضه..شيعو يرافضه
موسى ابن جعفر
...
سابع بدر لمن دنت وفاته
امدد لكوه متغطي ابعباته
هذا الغريب الطيب بصفاته
خلص ابزنزانة ضلم حياته

وكل شيعته صاحو سوه
جيبوله ياوادم دوه
لساكه المرضرضه..شيعو يرافضه
موسى ابن جعفر
....
وين الرضه مولانه هالمسيه
ويانه يمشي الحظرته البهيه
مشي مشي ونوصل الكاظميه
وانسوي اكبر مجلس وعزيه

واهلا اتنادي فاطمه
بأهل الصدور اللاطمه
مسموم ابوالرضه..شيعو يرافضه
موسى ابن جعفر

محمد الجماسي
اللهم عجل لوليك الفرج

#نعي

لمولاي موسى بن جعفر
روحي فداه

يبوابراهيم شو مالك عشيره
وين الصيت والهيبه الچبيره
السلاسل موالك والغربه مولاي
ليش اجنازتك مثل الاسيره
احماميل اربعه اعله الجسر خلوك
ماشالوك للدفنه ابحصيره
كل هذا ونگول اتهون الاحزان
مثل احسين مامذبوح عطشان
ولا بالشام عندك مشن نسوان
وتصگع روسهن حر الضهيره
يبوابراهيم شو مالك عشيره

محمد الجماسي

#اللهم_عجل_لوليك_الفرج

اخذوني وياكم يزوار
ادخل ضريحه وتبرد النار
ــــــــــــــــــــــــــــــــــــــ
اخذوني وأخذوا ادموع العيون
خلوني اطوف اوي اليطوفون
موسى بن جعفر چان مسجون
وهسه اسد بغدادكم صار
ــــــــــــــــــــــــــــــــــــــ
اخذوني يم عطّاي الامراد
اطبخ واوزع للخدم زاد
حــيـــهم اصيحن هايلاولاد
الكاظم وحيد ورايد انصار
ــــــــــــــــــــــــــــــــــــــ
خلوني يم الحضره ياناس
لازملي ريشه وابقه كناس
خدمة الكاظم تاج عالراس
هذا ابو الملگه المالح الحار
ــــــــــــــــــــــــــــــــــــــ
مشتاكه روحي للجوادين
بشوفة گببهم تفرح العين
امجدي على باب الامامين
حالف اظلن ليل وانهار
ــــــــــــــــــــــــــــــــــــــ
اشلون الشمس يدفنهه سرداب
وايظل وحيد ابعازة احباب
الله فتحله للفـرج باب
ومن كل بقاع الدنيه ينزار
ــــــــــــــــــــــــــــــــــــــ
للكاظميه الليله عناي
وي المواكب امشي مشاي
شايل الرايه وابني وياي
وانعوف اهلنه وكل الاديار

محمد الجماسي

#اللهم_عجل_لوليك_الفرج

شفت الشجرة
أداء: الرادود حيدر السعد
كلمات: الشاعر محمد الجماسي
رابط القصيدة https://youtu.be/Yt6CLIohf-w?si=q8LwKB-i7R5CJD0l
مجالس عزاء - ذكرى وفاة السيدة زينب (عليها السلام)
1446 هـ - 2025 م
موكب أنصار العقيلة (عليها السلام)
الحلة - القاسم

ياهضمة السادة وعظم بلوتهم
نامت بالكبر هالليله عمتهم
...
ماتت بت علي وجبنه جنازتهه
واتذكرنه يوم الفكدت اخوتهه
زينب شيبت حته عبايتهه
من طبت ابسوك الشام ناكتهه
جاوين الهواشم وين فزعتهم
نامت بالكبر هالليله عمتهم
...
افراك احسين والعباس شيبهه
ودرب الشام حيل اهواي تعبهه
هذا ايطكهه سوطه وذاكه الايسبهه
دم المهدي يبجي من مصايبهه
ذرية الزهره انريد وكفتهم
نامت بالكبر هالليله عمتهم
.....
هالليله نصبنه الفاتحه اعليهه
اكبر فاتحه لازم نسويهه
انعزب باللطم والدمعه نجريهه
هاي الثوبت للنار رجليهه
حي الله الخدم حي الله همتهم
نامت بالكبر هالليله عمتهم
...
زينب لازم العباس يدفنهه
وبس احسين جائز هوه يحظنهه
ام عباس والزهره يغسلنهه
وبالرايه علي هوه اليچفنهه
وجاسم وي الاكبر تجري دمعتهم
نامت بالكبر هالليله عمتهم
....
ياخدام ابوالسجاد عينوهه
هاي البالقصر مجتوفه خلوهه
اجنازة زينب اعله الراس شيلوهه
واويلي عله المسبيه نادوهه
واللطامه خل اتزود لطمتهم
نامت بالكبر هالليله عمتهم
...
الهسه امتونهه أمن السوط مهدوله
مثل امهه بقت بالشام مجهوله
اتموت ومايجي العباس معقوله
امتانيتك تراهه ام عون كلوله
وجهالك يابوفاضل هيه ربتهم
نامت بالكبر هالليله عمتهم
....

ياحركة كلبنه وكسرة الخاطر
هالليله ابصحنهه ماكو اي زاير
زينب موتتهه ليلة العاشر
وموتهه الحسين وسحكة الحافر
واعيال الاحسين انطفت شمعتهم
نامت بالكبر هالليله عمتهم
...

محمد الجماسي
اللهم عجل لوليك الفرج

هالليله هالليله ماتت اخت العباس
هالليله هالليله ماتت زينب ياناس
ــــــــــــــــــــــــــــــــــــــ
ماشافت منچ خير _ يادنيه يادنيه
تتنقل مثل الطير _ يادنيه يادنيه

كل يوم ابسفر كل يوم مسبيه
يوم ابنص خرابه وتقره لطميه
ماتت وي اخوهه احسين جوه الخيل
وماتت وي ابو فاضل فدائيه

بالغربه بالغربه اتودع آخـر انفاس
ــــــــــــــــــــــــــــــــــــــ
مرتين اتطب للشام _ ياويلي ياويلي
وانكسرت كسر الجام _ ياويلي ياويلي

مره اعله الهزل مره بالجنازه
ياعباس صاحت عازتك عازه
اريد اخواني بيه اتروح جنازه
وآنه ادري اخوتي ايردون الامجازه

شيلوها شيلوها اجنازه زينب عالراس
ــــــــــــــــــــــــــــــــــــــ
صوت المسبيه ايصيح _ يالساده يالساده
يا اسرع من الريح _ يالساده يالساده

افزعو للغريبه ابنيت الزهره
سوو انكاب بچفافيكم الخضره
ممنوع الغريب ايشيع الحوراء
ماتت يالهواشم طيرة الحضره

زينبكم زينبكم مخلوقه امن الاحساس
ــــــــــــــــــــــــــــــــــــــ
كلنه بفاتحة ام عون _ لطامه لطامه
واهل البيت يريدون _ لطامه لطامه

تستاهل حزن نصبغ ملابسنه
واعليهه برجب ننصب مجالسنه
هاي الي نقدسهه وتقدسنه
لوما زينب احنه ماتنفسنه

بنت حيدر بنت حيدر _ حته ترابچ ينباس
ــــــــــــــــــــــــــــــــــــــ
نتمنه اوي الخوان _ مدفونه مدفونه
كون ابطف الاحزان _ مدفونه مدفونه

مابين الگمر واحسين نتمنه
الحضره الزينبيه والهه نتعنه
الميت بالدفن اهله يحضرونه
زينب ياهو اجاهه ابليلة الدفنه؟

والحضره والحضره الهسه بحاجة حرّاس

محمد الجماسي

#اللهم_عجل_لوليك_الفرج

متباركين ❤️

أمنيات السيدة زينب (عليها السلام)

ياموت اخذني أمن الغرب
متني انشلع من الضرب
وديني يم هلي يم فاطمه وعلي
ياموت اخذني
ــــــــــــــــــــــــــــــــــــــ
سافر يموت برحلتي الاخيره
خلصني من احچاية الاسيره
خل ارجع المملكة الاميره
عد الله زينب عالـمه وچبيره

جهلوني ذول أهل الأرض
خليني بجناحك اكض
خلينه نعتلي يم فاطمه وعلي
ياموت اخذني
ــــــــــــــــــــــــــــــــــــــ
من عالم العالم أخذني دمعه
وهذا السفر نهائي ماكو رجعه
تابوتي فوگ اوي الشمس ارفعه
هوه الضوه لازم ضوه يشيعه

لاهلي وعمامي اهواي احن
الشام احس بيهه سجن
ترجع الهيبه إلي يم فاطمه وعلي
ياموت اخذني
ــــــــــــــــــــــــــــــــــــــ
محد رحمني الدنيه چنهه غابه
شايف أميره وتگعد بخرابه
واحسين كاسر خاطري بمصابه
تاجي انسلب من سلبّو ثيابه

أمن الخيم للتل ركضتي
طلعت شيب بصفنتي
ماعندي ظل ولي يم فاطمه وعلي
ياموت اخذني
ــــــــــــــــــــــــــــــــــــــ
أخذ الجنازه ولفهه بالعبايه
موكب نروح العالم النهايه
ياموت عجّل خلصت الحكايه
ماريد أشم ريحة بچي وسبايه

عاين عله امتوني الحمر
وتعرف اشسوالي الشمر
أذاني عاذلي يم فاطمه وعلي
ياموت اخذني
ــــــــــــــــــــــــــــــــــــــ
بالشام أول شي چنت سبيه
بس ثاني جــيه من اجل رقيه
لازم العالم تفهم القضيه
واهنا تصير الحضره زينبيه

بالحضره نسوان وزلم
يايوم اشوفن هالحلم
والصحن ممتلي يم فاطمه وعلي
ياموت اخذني
ــــــــــــــــــــــــــــــــــــــ
والراد مني ايحصل البشاره
خل يبچي كون بحرگه وبحراره
الراسم اباله الگبه والمناره
يتوفق أن شاء الله للزياره

كل عام وآنه امتانيه
يمي تصير التعزيه
واهمومي تنجلي يم فاطمه وعلي
ياموت اخذني

الشاعر محمد الجماسي

#اللهم_عجل_لوليك_الفرج

ياجواد الائمه يالولي
..
جوادي ابفؤادي وانادي
يمن بيك اعتقادي
جمالك دلالك كمالك
ينبأ عن خصالك

اجيت ابمولدك رايد هديه
محمد يالجواد وحن عليه
اريدك أنته تأخذني أمن لديه
لابو الحظره العظيمه المشهديه

يباب الموعظه
اخذني للرضه..اخذني للأنيس
ياجواد الائمه يالولي
...
سلامي احترامي الامامي
الك حبي وغرامي
يجنّه ومحنّه التلمنه
يواحد من اهلنه

مثل يحيى ولكن مو نبيا
وآتيناهو الحكمَ صبيا
محمد أنتَ أم أنتَ عليا
جوادا والشموخو رضويا

كرامة مولدك
فرح بيهه والدك.. رغم العاذلين
ياجواد الائمه يالولي
...
عباده واراده وسعاده
النه هالولاده
مهابه ونقابه ورتابه
من اول شبابه

زغير أنته يالامحير الفطاحل
كأنك علي بالميدان نازل
تجاوب مستمر وماتجامل
عله اتلاثين الف من المسائل

نباهه بحكمتك
بلاغه بكلمتك.. ينور المؤمنين
ياجواد الائمه يالولي
...

محمد الجماسي
اللهم عجل لوليك الفرج

مو غريبه واحنه اهلهه امحزمين
فاتحة زينب حضر بيهه الحسين
ــــــــــــــــــــــــــــــــــــــ
لاتگول الشام اخذهه ومااجت
لاتگول ابعيده صارت وانست
ابراية العباس اهلهه اتحزمت
وعالطبخ هالواگفه ام البنين
ــــــــــــــــــــــــــــــــــــــ
الفواتح يوم يومين وتطيح
وفاتحة زينب تظل مثل الضريح
نتعبلهه ونلطـم ومانستريح
عالنياحه وعالبواچي امعلمين
ــــــــــــــــــــــــــــــــــــــ
احسين گاعد بيهه هاي الفاتحه
فاتحة زينب تحب النايحه
بيهه حاضر ابو چفوف الطايحه
اشلون يلطم واهوه مگطوع اليمين
ــــــــــــــــــــــــــــــــــــــ
ابو فاضل من تراب الطف طلع
بلل انگابه دمع لـمّن سمع
اباب چادرها ابو فاضل وگع
وگام بزنوده يدگ اعله الجبين
ــــــــــــــــــــــــــــــــــــــ
صاح وآ أُختاه أي وآ زينبي
والله لو موجود مارحتي ابسبي
عالرمح واسمع كلام الأجنبي
ايگلچ الوحدچ بقيتي إبلا معين
ــــــــــــــــــــــــــــــــــــــ
فاتحة زينب حضر بيهه العليل
عمه گام ايصيح يام حزن الثگيل
يللي گلتي مارأيت إلا جميل
ايروحلچ فدوات زين العابدين
ــــــــــــــــــــــــــــــــــــــ
افاتحة زينب رفع جاسم علم
شايل الدله ويوزع عالخدم
وصاح الاكبر آخ من حرگ الخيم
حرگت اگلوب الائمه الطاهرين
ــــــــــــــــــــــــــــــــــــــ
احسين شيخ وگاعد ابصدر الجميع
امنوم ابحظنه رقيه والرضيع
والحسن فزاع جاي أمن البقيع
ايصيح قد قام العزاء يامؤمنين

الشاعر محمد الجماسي

#اللهم_عجل_لوليك_الفرج

البدايه بحرگ الاخيام
نهاية قصّتي الشام
علي ابچو يخدّام
لقد حانت وفاتي
ــــــــــــــــــــــــــــــــــــــ
دارت الليالي وكلشي مابقالي
والبالاعيون يسكنون غفو بالـمگبره

واحد ابحوافر وصله وصله صاير
واعله الارماح قصص راح يسولف منحره

وواحد ابغيابه راحت المهابه
صابه عامود والازنود هوت عالگنطره

وأنه المابين هامه ونحر يجري
عله التل خلصت ثلثين عمري
وحگ حيدر طلع من شيلتي الشيب
واخيرا راح انام ابوسط گبري

اريد اشويه ارتاح
من احچاية الراح
السوط ايورم الاصفاح
وأثر خله بعباتي
ــــــــــــــــــــــــــــــــــــــ
عمري بس مناحه ماكو استراحه
وآنه ماوين درت عين طلع سوط الشمر

ابنيت الـزچيه وانوخذ سبيه
والله مأسات حرامات اطبن للقصر

بار الـمحمد بالجنازه اصعد
من ألاگيه اراويه الامتون الحمر

وعلي التابوت من ايفگه بيده
ثلث شغلات يلگاهن اكيده
العبايه البيهه دم والشيب والسوط
ويصيح احاه زينب ياوحيده

صار العمر خمسين
وبعدني ابچي عله احسين
المناحه ودمعة العين
مثل صومي وصلاتي
ــــــــــــــــــــــــــــــــــــــ
من عرش وقاري امشي بالصحاري
واليشمتون يحطون عله اجروحي الملح

زينب اسمي هيبه وأصبحت غريبه
اجناحي مكسور والاطيور تموت إبلا جنح

بالخرابه اغفه گطره گطره اطفه
عمري انباگ والافراگ ظلام بلا صبح

والاجروح الـيلچمني چبيرات
واتلاگن قديمات وجديدات
اهل الشام اجو يمنه يهـوسون
خوات احسين جبناهن سبيات

صفينه ابطبت السوگ
نتلّبد وره الـنوك
كلشي بعيني محروگ
حته ذكرياتي
ــــــــــــــــــــــــــــــــــــــ
عمة الهواشم واشبعت شتايم
ماكو فزاع يجي بساع يردني للوطن

ارد اشوفن اهلي يازماني گلي
اشمالك وياي تره اهواي شفت منك محن

عالرماح اخوتي ياعيوني موتي
والحچي صار للاحجار واديه ورمن

واگول ايهون حزني ودمعة العين
رقيه أتموت خل تموت مرتين
بس الـمشكله بالشايل الروس
بس ايميل يوگع راس الاحسين

ثكيله طيحة الراس
والاثگل نظرة الناس
عگب اعيون عباس
ولاثمره بحياتي
ـــــــــــــــــــــــــــــــــــــ
آخر الاريده واختم القصيده
كون عباس عله الراس يحط اجنازتي

آنه زينب أخته وبعيوني شلته
چنت اباريه واسميه كفيلي وهيبتي

شو مشه وجفاني وما سمع حناني
قادر ايگوم يجي اليوم ينشف دمعتي

علي الرد الشمس گبل النهايه
ومو صعبه عله العباس هايه
يحظر دفنتي وبدموعه عباس
وداعًا يختي يكتب عالعباية

أنه الماعندي خوان
وصرت من غير دفان
بعيده عن الاوطان
هذن هنه صفاتي

الشاعر محمد الجماسي

#اللهم_عجل_لوليك_الفرج

*[ الغايب يلتحبونه ]*

أداء: الملا #مرتضى_الحميداوي
كلمات: الشاعر #محمد_الجماسي

https://youtu.be/T3Mv6oIBz9c

مجالس شهر محرم الحرام لسنة 1446 هـ - 2024 م
ذكرى إستشهاد مولانا الإمام التقي علي بن محمد الهادي صلوات الله عليه وآله
عزاء هيئة الجبار المركزي - العراق - بغداد - الحميدية

مونتاج: مقتدى موفق
إخراج: سالم الزركاني
مكساج: علي الوائلي
تنفيذ: فدك للإنتاج الحسيني
النشر الشبكي: علاء بركات العاملي

https://youtu.be/UCq4cprlF40?si=AvyzrIPDX__HJgB6

خدّامك نظل وانروحلك فدوه
الدنيه ابلا عزائك كلشي ماتسوه
ــــــــــــــــــــــــــــــــــــــ
لاتحرمنه من هذا الكرم والجاه
ابجاه اوليدك الاكبر وعبدالله
هذا مجلسك سبحان من سواه
يحب بس الترافه ويكره القسوه
ــــــــــــــــــــــــــــــــــــــ
غير الخدمه گلّي شيملك ابن آدم
واحنه اوياك وي غيرك منتوالم
العالم الهه دنيه ومجلسك عالم
يارب العشگ يالصحبتك حلوه
ــــــــــــــــــــــــــــــــــــــ
وين انروح انته اتروح ويانه
اموفقنه وعزائك هوّه سوّانه
وامخلّي اعله كل السان ذكرانه
منطينه التماسُك انته والقوه
ــــــــــــــــــــــــــــــــــــــ
تاخذنه الحياة ونمشي مدري الوين
واتحرك مؤشر جذبتك يحسين
ونرجعلك حمام ونصفگ الجنحين
وابنار الندم مولاي نتچوّه
ــــــــــــــــــــــــــــــــــــــ
اشما ذب الشباك ابليس بينه وصاد
اتذكرنه بمناجاة ابنك السجاد
ابو والابو ابطبعه ايسامح الاولاد
وكل غيمه وراهه انشوفلك صحوه
ــــــــــــــــــــــــــــــــــــــ
تتكالب علينه الدنيه وانّاجيك
واتلمنه ابعباتك واحنه نفرح بيك
زحفاً ياحسين الكربلاء نأتيك
واتزيد الصلابه ابگاعنه الرخوه
ــــــــــــــــــــــــــــــــــــــ
مولاي الرجال ادموعهم ليرات
واحنه ابمجلسك دمعاتنه ارخيصات
شيكض الدمع والـمشن علويات
وي چتال اخوهن لليسر گوه
ــــــــــــــــــــــــــــــــــــــ
الذله اباب غيرك ذله عد الناس
وابابك كرامه وبيهه رفعة راس
واحضرنه عليك ابداعة العباس
لوصرنه جنايز بالارض جوّه

محمد الجماسي

#اللهم_عجل_لوليك_الفرج

ياراس السنه ايهمني# وهم بي
احتفال الناس مو طبعي# وهم بي
راس احسين شاغلني# وهم بي
الوذ برحمته ويستر عليه

أبوذيات ..لسيد محمد سبع الدجيل ع...



يالسيفك بروس الزلم.. جاسم
وابوك الهادي من اعداك.. جا سم
كالعباس چنك يابو.. جاسم
توزع امراد كل صبح ومسيه
...
أهل البيت مثل البيت.. حيهم (حجهم)
ميتهم ذهب وألماز ..حيهم
ابابك صحنه يامولاي..حيهم
ونسمعك صحت محلوله القضيه
....
التخالف شوركم الله..نذرهه
وكون ادموعنه ابابك..نذرهه
الماعدهه ولد باسمك..نذرهه
تفكه وتطش يمك واهليه
...
عليك الگلب ماتخفاش..ونته
واذا عفنه ضواك انحير..ونته
ابسامره علي والحسن..وانته
ابّلد يابوالمنارات البهيه

محمد الجماسي
اللهم عجل لوليك الفرج

ابگد مسافات اليسر حنينه
أنزور مرقد زينب اشتاگينه
...
چان مفتوح الطريق إبلا جهد
كل سنه انروحلهه زوار أو نرد
هالسنه أنزور العقيله امن البُعد
الحادي هذا العام ما مر بينه
...
كل سنه ابذاك الصحن نرفع علم
وندخل أمن الباب الاخضر يالخدم
نلطم اعله الراس حفاي الجدم
ذكريات المرقد اتبچينه
...
أمن العراق السوريه انصير ازدحام
امعاهدين ام عون منعوف المقام
صدگ ردت زينب الذاك الضلام
والضريح الناصبه امحوطينه
...
فاتحة زينب منو ايسويهه غاد
لاطبخ لاصوت ناعي بهالبلاد
نحترگ من حقنه وانصبح رماد
من نشوف المرقد امقفلينه
...
بت رسول الله محمدنه النبي
اجنبي ايشتمهه وايسبهه اجنبي
مرتين اشلون زينب تنسبي
مايمسوهه وحگ مهدينه
...
الشمر لو مد ايده نگطلعه الادين
واحنه شيعة علي واجنود الحسين
عالحدود اهناكه جيش امرابطين
وسيف ابوالحمله علي امحضرينه
...
لو نختنه وحيّهم الحوراء تصيح
عله الشام اسيوف بتاره نطيح
اويانه ابوفاضل حمايه اعله الضريح
والخزر مرقدهه نفگس عينه
...
خلو مرقد زينب ايعيش بأمان
احنه ميكظنه زمان ولا مكان
إن چان ياهالناس تنطونه ضمان
ابدينه موسه وعيسه يبقه ابدينه
....
محمد الجماسي
اللهم عجل لوليك الفرج

بين الهادي وجده الحسين (عليهم السلام)

مـا سلّبو عباتي       ولا قيّدو بناتي
والمحبس النزعته        من اصبعي برضاتي
بالاخيول 00 انه ما إجوني
عله احسين 00 ابچن ياعيوني
ــــــــــــــــــــــــــــــــــــــ
چانو يمّي ناسي ويمّي ربعي
صدري ابخير محّد داس ضلعي
نزعت الخاتم ابكيفي امن اصبعي
ماطگني ابحجر شبث ابن ربعي

الليله انصب حدادي     وابني الحسن ينادي
يابويه عنّي رايح     وللامّه انته هادي
ابحصيره 00 اني ماخذوني
عله احسين 00 ابچن ياعيوني
ــــــــــــــــــــــــــــــــــــــ
زراك ابجسمي من السم نعم صار
ابلون امتون زينب من الاحجار
واحس باحشائي ياشيعه تشب نار
وچان افراشي بارد مو رمل حار

ماطگ خواتي ظالم      چنت ابحجرتي نايم
ومن رفسة الحوافر     ياشيعه جسمي سالم
مُعزّز 00 مُقدر شيعوني
عله احسين 00 ابچن ياعيوني
ــــــــــــــــــــــــــــــــــــــ
أنه الهادي أنه الظلمتني دنياي
ولاكن مابقيت ابعازة الماي
مو فرجه صرت للرايح وجاي
تره اشويه رجب وامحرم اهواي

سامره صح بعيده      وبيهه بشر عنيده
بس زينب آ يزينب      بالطف بقت وحيده
تنادي 00 ورمّو متوني
عله احسين 00 ابچن ياعيوني
ــــــــــــــــــــــــــــــــــــــ
ائمّه اثنينه آنه والاحسين
بس كلش فرق بين المصابين
رقيه اتصيح يابويه رحت وين
وانه ابنياتي مامچتوفه الايدين

جدّي عزيز الزهره     العباس كاسر ظهره
وابنه الرضيع العطشان     السهم ذابح نحره
أنه ابخـير 00 الگبري وصلوني
عله احسين 00 ابچن ياعيوني
ــــــــــــــــــــــــــــــــــــــ
بني العبّاس ماخلوني مرتاح
كل ليله اعله بيتي تهجم اشباح
أُسود اعليه هدّو والحرس صاح
السجن مقفول بابه ابلايه مفتاح

واحسين هم اجنه      اسباع الفله و بچنّه
عترة محمد احنه      ماينوكل لحمنه
ابطوامير 00 ظلمه دخلوني
عله احسين 00 ابچن ياعيوني
ــــــــــــــــــــــــــــــــــــــ
ابسامره اليجي زاير نحييهْ
والإيــدگ بابنه مِيّت هلا بيهْ
نقضيله المهمات ونجازيهْ
ويم جدنه النبي باچر نزكيهْ

سامره صح قديسه      بس كربله الرئيسه
موسى گبل اجاهه      وقبّل ثراهه عيسه
تمنّيت 00 بيهه يدفنوني
عله احسين 00 ابچن ياعيوني

محمد الجماسي

#اللهم_عجل_لوليك_الفرج

https://youtu.be/F44LHC3CZ18?si=YfewgP_jDE3Ng6CJ

شيخة الخدام

ام البنين وشيخة الخدّام والوفايه
گالتله گدام الظعن يوليدي علّي الرايه
العباس يبني .. عالراس يبني
حب احسين
ــــــــــــــــــــــــــــــــــــــ
حان .. الوعد گوم .. يالاسد
وين .. يالولد ارباي .. بالمهد

تذكر من صرت والناس .. متعجبه بتفاصيلك
لاانته گمر واتغيب .. لا جاهل والوليلك
اول ماصرت زلمه .. تكسر ظهر الايشيلك
رضّعتك وفه وغيره .. واحسين اليناغيلك

ومن طبت النسوان الي گاللني شسّمونه
گتلهن اوليدي گمر فدوه ودخيل اعيونه
الكفال اسمه .. خيّال اسمه
هذا الزين
ــــــــــــــــــــــــــــــــــــــ
وين .. خوّتك احسين .. كشختك
دَين .. برگبتك شيل .. رايتك

تفرح زينب الحوراء .. من اترفرف الرايه
واريدك حارس اعله النوگ .. يامن بيك الاكفايه
وصليلي صلاة الحب .. وباسمي رتل الآيه
محرابك نهر عطشان .. واچفوفك امصلايه
واهناكه يبني بكربله دوس اعله اكبر شارب
وتترادم الخيل وزلم لمن تشوفك غاضب
صگّار انته .. اشگد حار انته
عالسبعين
ــــــــــــــــــــــــــــــــــــــ
روح .. ياگمر شيخ .. عالنهر
صيت .. إوفخر احزام .. للظهر

خليهه تگول الناس .. ياهيبه الامربيته
زلمه لوجبل عباس .. شو ماينكسر صيته
ريشات الشجاعه اثنين .. وامحزّم ابچفيته
حته الهوه ايصيح الله .. لـمّن يدخل ابريته

الله يرسمة حاجبك والعين چنهه امرايه
والمايصلي اعله النبي ابعينه تطب سلايه
مخلوق للحب .. للذوق والحب
مو من طين
ــــــــــــــــــــــــــــــــــــــ
هاك .. معصبي انطيه .. الزينبي
هاي .. بت نبي خاف .. تنسبي

واخذ اعبايتي وياك .. خاف اتعوز النسوان
وراسك عالرمح جامع .. ونظرة عينك الاذان
طب گدامهه وهوس .. لمن تدخل الميدان
گللهم خدر زينب .. هذا ابمنزلة قران

والفكر ايمس الخدر أگطع عرج تفكيره
آنه اللي ماراضع لبن راضع شجاعه وغيره
زلزال بيه .. والعال بيه
يشرد وين
ــــــــــــــــــــــــــــــــــــــ
نور .. بالظعن سور .. بالمحن
بيك .. يلتقن الماي .. والوطن

يوليدي اعتمادي اعليك .. واعرف انته متقصر
ابتلاثتهن اتحارب .. بسيفك بالخزر تسطر
ظهرك بي بشر هادود .. وجهك بي علي ايشور
وزينب لو تريد الماي .. اريدك عالخيم تمطر

موش الخوالك طلعتك طالع لبوك الهيبه
چنك مضيف المجتبه ومافشل امعازبيه
الدلات بيدك .. حلوات بيدك
مثلك وين
ــــــــــــــــــــــــــــــــــــــ
صاح .. الوفي احسين .. مصحفي
الكون .. ينچفي بنار .. مرهفي

يايمه وأنه العباس .. ماعوفن ابد ثاري
زينب اگلبلهه الطف .. لوجابوهه بالطاري
ولعيون الحبيب احسين .. اضحي ايميني وايساري
افرحيلي وارفعي الراس .. لو توصلچ اخباري

يايمه باچر عالنهر لمن تظل الرايه
اجروحي امواكب تنبني وتتكاثر المشايه
حياك صاحت .. محلاك صاحت
نور العين

محمد الجماسي

#اللهم_عجل_لوليك_الفرج

هذا يوم البي تلم احبابهه
والقضاء الحاجه تفتح بابهه
...
هذا يوم الاسمه توزيع الفخر
يختلف عن باقي ايام الدهر
من ضوه الشمعه لحد نور القمر
مستعده اتقدم الطَلّابهه
...
هذا يوم ام البنين المخلصه
العالي اسمهه بالنجوم ومانصه
للأمور الهامه متخصصه
وحاسبه الكل القضايه احسابهه
...
مجلس أم الضحت بأربع زلم
المجلس الروحاني والكلش مهم
بالكرم فائض بحر هذا الاسم
والعقول اتحيرت ألبابهه
...
جرب وانخه الوفيه الطاهره
فورا اتحققلك امنيتك تره
موخرافه والكلام انسطره
أقره شتكول السيَر كتّابهه
...
طائعه ابدرب الامامه وصالحه
اوياهه تاجر بالتجاره الرابحه
بس مجرد لوقريت الفاتحه
اتيسر الشدّه وتحل اسبابهه
....
الحَبت آل البيت طبعاً تعتلي
ومايموت الشايل بكلبه علي
اتصيح غير احسين بالدنيه شلي
والزمن طول سفر غيّابهه
..
بالحشر باجر يناس بكل يقين
فاطمه الزهره تجازي ام البنين
عن مدامعهه وألم ذيج السنين
جائزه اتقدملهه عن اتعابهه
...
واحنه من ام البنين الفاضله
انريد اسمنه بالشفاعه اتسجله
وكون ترزقنه زيارة كربله
بكل خميس انشم نسيم اترابهه
....
محمد الجماسي
اللهم عجل لوليك الفرج

ليالي الشام سون عمله بيه
مثل وحشة الطف اتمر عليه
وصلولي يخويه الحگ يعباس
وإحتلو ضريحي الناصييه
هالمره الرصاص إبدال الاسياط
يطگن بالصحن واشگف بديه
هسه آنه چبيره اتحمل الضيم
المصيبه ابحظرة الطفله رقيه
اذا محد فزعلي بهاي الايام
احسبو احسابكم يهل الحميه
ينبشون الگبر هالمره الإرهاب
واروح بجثتي اوياهم سبيه

محمد الجماسي
اللهم عجل لوليك الفرج

أويلاه يا فاطمة (قصيدة تشييع السيدة فاطمة الزهراء عليها السلام)
أداء: الرادود حيدر السعد
كلمات: الشاعر محمد الجماسي
رابط القصيدة https://youtu.be/knqoo5XRzAI?si=nwPVPB9WQa52Q6ux
مجالس عزاء - الليالي الفاطمية 1446 هـ - 2024 م
ديوان الحاج جاسم الهنون
كربلاء المقدسة - الحسينية / البوحويمد

https://youtu.be/6duahc5F0tQ?si=VZMZFtB2hdZ6s2UZ

هذا العهد
أداء: الرادود حيدر السعد
كلمات: الشاعر محمد الجماسي
رابط القصيدة https://youtu.be/JgSP79Gw6NE?si=DkV5dLXkkzviTJNy
الليالي الفاطمية 1446 هـ - 2024 م
ديوان الحاج جاسم الهنون
كربلاء المقدسة - الحسينية / البوحويمد

https://youtu.be/TM3jbHlgNlo?si=-eLmwYggzVXBXErv

هالليله بأصوات النحيب
نصرخ وداعا يالغريب
واقاسما..واقاسما
...
مثل مانحيي الليالي الفاطميه
ننصب اعله القاسم الليله العزبه
انواسي ابوه المندفن بالكاظميه
وللرضا انقدم تعازي بهالمسيه

ياوسفه اشراف العباد
كل واحد ايموت ابلاد
واقاسما...واقاسما
....
فاطمه المعصومه كون الليله يمه
بآخر انفاسه تواسيه وتشمه
ابشوفة احبابه الغريب ايزول همه
وماتضل الدنيه بين اعيونه ضلمه

معصومه يمه الليله كون
اخت واخوهه يلتقون
واقاسما..واقاسما
...
عنده بس ابنيه ياناس وزغيره
لااهل يمه ولايمه عشيره
بآخر انفاسه بقه الناظر يديره
عله احسين اللمو اضلوعه ابحصيره

هذا الامام اشكد حنين
يبجي وينادي اهلي وين
واقاسما..واقاسما
...
ناس الامضيفينه من شافو يعاني
والعمر ماباقي ينعد بالثواني
ناشدو عن اسمه كال القاسم آني
ابن موسى الكاظم وسيد زماني

بس الوكت بايامي دار
خلاني احن ليل ونهار
واقاسما..واقاسما
....
كلهم اخذو ابنيتي لو رحتو الوطنه
هيه الاتدليكم اعله ابيوت اهلنه
وانتو ماقصرتو يالكلكم محنه
بالحشر ويانه مثواكم الجنه

ومن غمض اعيونه الامام
سووله بالحله مقام
واقاسما..واقاسما
....
كون هاي الليله نلتم بمزاره
نلطم بحركتنه وانون بحراره
بالكلب بانين اله كبه ومناره
يا الهي ارزقنه للقاسم زياره

اخو الرضه وللحاجه باب
هالليله غطوه بالتراب
واقاسما..واقاسما
....
محمد الجماسي
اللهم عجل لوليك الفرج

قصيدة للامام القاسم الغريب ابن الكاظم ع..

وين اهلكم
وين اهلكم
يالساده چاليش متطشر شملكم
...
عدكم ابجسر الرصافه مات امام
وواحد ابابل أكل عمره الحنين
منكم المسموم والساحگته خيل
وما سٌلم من الذبح حته الجنين
ليش ماعدكم هلا بذيچ الديار
إبوين ماعدالله گاع امطشرين

صعبه صعبه
دنيه غربه
وابراحة البال مانوّخ جَملكم
...
بيكم بسامره وبگاع الدجيل
وبيكم بإيران شعلو چبده نار
وجعفر الطيار بالاردن غريب
وابوطالب حتى ماعنده مزار
وفاطمه الزهره بلا گبه وضريح
والامام المهدي ملّ الانتظار

نار اجتكم
شتتكم
واشما تضجون محد يفزع إلكم
...
عدكم اباخمره دعبل عنه گال
ومرقد الحمزه غريب اعله الجبال
وبَعلبك محتظه جوهرة الحياء
وبمصر ماتت نفيسه ام الدلال
ومسلم بكوفان طاح أمن السطوح
وشدو برجلينه ياوسفه الحبال

ذبّحوكم
هجّروكم
ياأكرم الناس يالمحد مثلكم
...
عائلة أشرف نبي وتتشردون
وعدكم اجروح ابقيع النائبات
وباراضي الشام خير أمن الله ضيم
دفنو اهناكه بنات امگبعات
زينب وغربتهه ماشالتهه گاع
آه يم عون ودموعچ جاريات

لو رقيه
هم سبيه
آ يالبعيدين يالمحد وصلكم
....
زفره من أحشائنه الليله تصيح
آ يالقاسم يبن موسى الحبيس
روحك ابقم اعله معصومه تطوف
وامنياتك يم علي ذاكه الانيس
الحله خدامك يقاسم موغريب
وانته عالحله وضواحيهه رئيس

ياجرحنه
شيعه احنه
خدام الاحسين سجلونه ابسجلكم
...
عندك أبنيه عفتهه إبلا حنان
فاطمه ويامحله هالاسم العظيم
وي امهه وجدهه راحت للحجاز
عبرت الصحراء بالعقل الحكيم
مثل ماامهه الزجيه بالحساب
اتعبّر الشيعه السراط المستقيم

صح زغيره
بس اميره
هوه انتم ابواب للرحمه اصلكم
....
محمد الجماسي
اللهم عجل لوليك الفرج

ياالم شفته..بحادثة مؤته. يجعفر
...
يبن ابوطالب سلام الله عليك
وبت اسد والدتك ومفتخره بيك
يالرحت للموت كبلن مايجيك
جعفر الطيار يالكطعو اديك
يالجنت ثوره..شانك اشكبره..يجعفر
...
ذو الجناحين انته يانسل الاباة
عوضك ربك بدال التضحيات
مثلك العباس هم اعله الفرات
الجربه بدوهه وجفوفه امبترات
خيركم باقي..انته والساقي..يجعفر
...
يافخر يكفيك يالحيدر اخوك
والكفل طه محمد ذاكه ابوك
انتم بيوم الحشر چنكم ملوك
بالسره اعلينه توزعون الصكوك
والشفاعتنه..انته جنتنه..يجعفر
...
جعفر الطيار ربك لقباك
ابجنتك طاير چبير مستواك
انته ليكدام والباقي وراك
خيمتك من نور والشيعه بحماك
ايحبك الهادي..بسمك ينادي..يجعفر
...
جاهدت وي النبي وماقصريت
امكطعات اجفوفك وواكف بقيت
بالشهاده ارضيت بالذل مارضيت
انته مثل النخله ميت ماهويت

گلبك الابيض..للأذه اتعرض..يجعفر
...

6/جمادي ذكرى استشهاد جعفر الطيار ع

الشاعر محمد الجماسي
اللهم عجل لوليك الفرج

https://youtu.be/DwmxbN2_mmo?si=t3y9Iz0HZpmLSlNB

اشكركم جميعاً مانسيتوني
طيّبتو ابدمعكم سطرة اعيوني
ــــــــــــــــــــــــــــــــــــــ
ماقصرتو لا والله يخدامي
واسيتو علي وحققتو احلامي
ابكل مجلس اشوف الفزعه گدامي
يامظلومه يالزهره تسمّوني
ــــــــــــــــــــــــــــــــــــــ
على المحسن دمعكم يجري يوميه
الخاطر لطمتي اتسوون لطميه
وآنه گعدتي اباب الحسينيه
اشارك باللطم بس ماتشوفوني
ــــــــــــــــــــــــــــــــــــــ
الحاضر مجلسي حاضر بتشييعي
واليجري الدمع شيعي وابن شيعي
أنه أمن اسياطهم زرگه اصابيعي
والهسه الاثر باقي عله امتوني
ــــــــــــــــــــــــــــــــــــــ
يبياض الوجه يالرافعين الراس
يحباب الگلب انتم أعز الناس
گواكم علي ويحفظكم العباس
كون الله نصركم يالنصرتوني
ــــــــــــــــــــــــــــــــــــــ
سويتو العمر ياشيعه عاشورين
عاشور الضلع والثاني باسم احسين
تدرون المواقــف كلهه دين ابدين
وآنه ام الشفاعه واوفي بديوني
ــــــــــــــــــــــــــــــــــــــ
عفتو ابيوتكم واحضرتو الاقرايه
ابيوت احزان صارت عدكم اهوايه
بالليل الزلم والصبح ملايه
ماردتو الاجر بس ردتو ترضوني
ــــــــــــــــــــــــــــــــــــــ
يخدام الـمجالس والفرج قادم
قريبا تفرحون بجية القائم
اتمنالكم خير وأجر دايم
باچر بالحشر كلكم تضيفوني

محمد الجماسي

#اللهم_عجل_لوليك_الفرج

الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
الليله ننخاچ 00 واجيناچ 00 يباب الرحمه
من تقبلين 00 علينه 00 تزيد النعمه
طبع الانسان 00 يحب حيل 00 وصول القمه
واحنه والله 00 يزهراء 00 نريد الخــدمه

بهالدرب ثبتينه الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
الله سواچ 00 اميره 00 على املاكه
حبج النور 00 بقه ايدور 00 ضوه بافلاكه
خيرچ وهاذ 00 عطائچ 00 صعب ادراكه
تبقه الاجيال 00 تجدد 00 زمانچ ذاكه

وبالضلع ذكرينه الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
بالعزائات 00 كملات 00 تطور بينه
المنبر ايذيع 00 خطابات 00 عِبر ينطينه
اجمل ادروس 00 مقالات 00 تره اتوعينه
نحفظ اشياء 00 عن الدين 00 صدگ تحيينه

مجلسـچ يهدينه الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
فاطميون 00 اسمنه 00 القيام الساعه
وبيت الاحزان 00 بالاگلوب 00 تظل اوجاعه
مهدويون 00 نقدم 00 السمع والطاعه
احسينچ احنه 00 يزهراء 00 نظل اتباعه

ابجاه الامسلبينه الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
ابصبرچ وبل 00 جراحات 00 رعبتي الـجاني
صحتي ياناس 00 أميرة 00 نبيكم اني
بت محمد 00 كأني 00 محمد ثاني
اثمنطعش عام 00 ولاكن 00 چبيره احزاني

ياشرف ماضينه الخدمتچ وفقينه
يام الاحسين يام الاحسين
ــــــــــــــــــــــــــــــــــــــ
باچر ايكون 00 بالاعيون 00 ضريحچ آيه
واحنه كل عام 00 بالاعلام 00 نجي مشايه
لازم اهناك 00 عله الباب 00 نسوي اقرايه
وابو فاضل 00 بله اچفوف 00 يشيل الرايه

من يجي مهدينه الخدمتچ وفقينه
يام الاحسين يام الاحسين

محمد الجماسي

#اللهم_عجل_لوليك_الفرج

https://youtu.be/7f4VWaIbReQ?si=vMvqUncO4PFLkVbP

بين الزهراء وريحانتها الحسين
(عليهم السلام)

احسين يمه اگعد تعال اگبالي
اليوم خل غالي و يودّع غالي
ــــــــــــــــــــــــــــــــــــــ
يمه اسولفلك اريد اعله الزمان
اسوالف الام عافيه وتگطر حنان
آنه اول ميته ماعندي مكان
ولا گبر مثل البشر يبرالي
ــــــــــــــــــــــــــــــــــــــ
آنه أظل إبلا گبر وابلا صحن
كبري يظهر وي ظهور ابن الحسن
وانته عاري اتظل ييمه بلا چفن
وهوّه چتالك نفس چتالي
ــــــــــــــــــــــــــــــــــــــ
آنه بالبسمار اتلوّع وأگول
ليش ياهالناس خالفتو الرسول
وانته يامظلوم تنداس بخيول
وزينب التنعاك هم تنعالي
ــــــــــــــــــــــــــــــــــــــ
ضلعي من ينعاب اصبح كالخيال
وانته تتطشر وذر فوگ الرمال
تعطش وماتشرب الماي الزلال
وآنه أظل بمجلسك للتالي
ــــــــــــــــــــــــــــــــــــــ
زينب اعله التل تنادي ياحسين
لو عدل انهض يبوالگلب الحنين
السوط يضربني واصدن باليمين
وباليسار احمي وجوه اطفالي
ــــــــــــــــــــــــــــــــــــــ
يمه والمحسن الماشاف الضوه
من سقط طولي مثل سعفه انلوه
لچن عبدالله المثل شم الهوه
هوه أكثر طفل شاغل بالي
ــــــــــــــــــــــــــــــــــــــ
احسين واليبچي بعزائك لو ينوح
لو يعلگ رايتك فوگ السطوح
كل تعب محسوب عندي ومايروح
تاج البسه وقصر ياخذ عالي


محمد الجماسي

#اللهم_عجل_لوليك_الفرج

شهيدة الامامة

عمري الوجودك فدوه
اوياك الـمواقف تسوه
لجلك يحيدر ضحيت
وانكسر ضلعي وناديت
عمري الوجودك فدوه
ــــــــــــــــــــــــــــــــــــــ
آنه بمقامك عارفه .. وهذا سبب تضحيتي
البسمار اخذ حيلي ومشه .. والباب أخذ عافيتي
كله اعله مودك ياعلي .. غير أنته كشخة بيتي
ربيتلك أعظم ولد .. وانطيتهم حنيتي

اگبالك اغطّي السطره
خاطر اصون العشره
طردوني حته من البيت
وانكسر ضلعي وناديت
عمره الوجودك فدوه
ــــــــــــــــــــــــــــــــــــــ
عصروني بالباب وطحت .. طيحت شمس من قمه
يافضه أدركيني صحت .. راح الولد من أمه
امقدره احساسك ياعلي .. ومااريد ازيدك لچمه
وجه ابوجه من نلتقي .. عنك اغطي اللطمه

مثل الشمع بسكوتي
من أبچي اخفض صوتي
يمك علي ماونيت
وانكسر ضلعي وناديت
عمري الوجودك فدوه
ــــــــــــــــــــــــــــــــــــــ
عشرتنه چانت ياعلي .. بالدنيه اجمل عشره
مايوم زعلتك ولا .. قولك اخالف أمره
تاج الـولايه أنته علي .. وبالتاج آنه الشذره
لله حبيتك علي .. وانته تحب الزهره

ابوجهك محمد شفته
اسمك حرز شايلته
مايوم عني اتخليت
وانكسر ضلعي وناديت
عمري الوجودك فدوه
ــــــــــــــــــــــــــــــــــــــ
ماهمني بسمار النبت .. بضلوعي همني احساسك
ايأذيني ظل حته الهوه .. ومحتاجه اشم انفاسك
أهل السقيفه وكل حكم .. ياعلي جوه امداسك
لومتت لاتحفر گبر.. خليني شيبه براسك

موزوجي احس بيك ابني
وآنه ادري حيل اتحبني
يمك أظل اتمنيت
وانكسر ضلعي وناديت
عمري الوجودك فدوه
ــــــــــــــــــــــــــــــــــــــ
أذكر احاديث النبي .. عنك اشگال وعني
گال اليحبك ياعلي .. معناهه هم ايحبني
وآنه الله لو أرضه رضه .. ويغضب عله الزعلني
كل هذا والثاني جسر .. شال ايده حيل وطگني

طگني وطحت ياحيدر
والقرط مني اتناثر
شكوه الـمحمد وديت
وانكسر ضلعي وناديت
عمري الوجودك فدوه
ــــــــــــــــــــــــــــــــــــــ
مااريد اودعك يالولي .. اوداعك أشد من كسري
لاكن يحماي الحمه .. ماباقي شي من عمري
ابتغسيلي اصبر لوشفت .. بسمار جارح صدري
وانته اوي الحسين وحسن .. گعدو سوه يم گبري

مجلس عزاء سوولي
واعله السبي اقرولي
الزينب وحقك حنيت
وانكسر ضلعي وناديت
عمري الوجودك فدوه

محمد الجماسي

#اللهم_عجل_لوليك_الفرج

https://youtu.be/cIXGrlg_AlQ?si=N728zzCaT4lzmJfB

ودعناك ودعناك سيد حسن ودعناك
...
ماتطيح الرايه بس جرحك جبير
يالفراغك مايسدونه الف
حسن نصر الله يالامبجي اليهود
اليوم نبجي اعليك ومصابك كلف
اليوم بثمانين صاروخ اقصفوك
الكاع بالضربات خسفوهه خسف
ريت اوياك ريت اوياك
متنه سوه ريت اوياك
ودعناك ودعناك
سيد حسن ودعناك
.....
اثنين وتلاثين عام أمن الجهاد
وخطبتك عالطاغي مثل الزلزله
يالاتذكرنه بصبر گلب الحسين
أنته كل لحظه بحياتك كربله
دائما هيهات من الذل تصيح
وانتصاراتك تضل امسجله
ماننساك ماننساك
طول الزمن ماننساك
ودعناك ودعناك
سيد حسن ودعناك
....
من اجو داعش چنت سدا منيع
والك بصمه أمن الجهاد بهالوطن
لوعت گلب المراجع من مشيت
اعيونهم لمصيبتك من دم بجن
الخامنائي وعلي السستاني رثوك
كسرتك بالضهر ياسيد حسن
من ذكراك من ذكراك
ماينشبع من ذكراك
ودعناك ودعناك
سيد حسن ودعناك

اللهم عجل لوليك الفرج
محمد الجماسي

قصيدة گعدية /بمناسبة ذكرى شهادة التابعي سعيد ابن جبير رضوان الله عليه...


(ياسعيد الاحرار/ رافضيه رافضيه
صحت للذل هيهات/,كتب دمك آيات
رافضيه)
...
الجهاد اقسام ندري وهاي تذكرهه المصادر
وأعظم الاقسام كلمة حق تقال ابوجه جائر
وانته عالحجاج ثوره اطلقتهه بصوت ثائر

گللك تعال اخظع الي.. گتله آنه من طينة علي
عالي واضلن معتلي.. عالي واعله أمن المناير

وآنه احمل افكار/حيدريه حيدريه
ماأغير المنهاج... وصرختي يالحجاج
رافضيه
....
قيّد اچفوفك ابضلمه الصوت مايگدر يقيده
الاحرار اتضل تناهض كل حكومه مُستبده
بكربلاء آلاف وگفو والحسين نشوفه وحده

وانته أمن الاحسين أورثت
هذا الصمود وماخفت
عايش بقيت ومامتت... بكل سنه ذكرك نخلده

اشما چوت بينه النار/ الامويه الامويه
والله منعوف احسين.. اللطمه وادموع العين
رافضيه رافضيه
...
گتله يالحجاج بعدي أبد ماتهنه بحياتك
قصّرت عمرك بذبحي ودعوتي أتعجل وفاتك
قصرك وحكمك يزول وماتحقق أمنياتك
اقسم وحگ رب الفلق
ابحلمك اصيرنلك قلق
وتعرف بأنَّ الله حق
لمن اتفز من سباتك

من تزيغ الابصار.. بالمنيه بالمنيه
ابگبرك اتشوف اهوال..وانه اخلف اجيال
رافضيه رافضيه
....
ياسعيد وهذا مجدك شامخ ومحد يوكعه
واليحب حيدر اكيدا حب علي باجر ينفعه
هذا نصر الله المجاهد مثل شرعك جان شرعه
أبوجه الكيان اشكد هتف
وبتل أبيب اشكد قصف
ماشرد من خوف ورجف
عمره خلص شمعه شمعه

واحنه هم نبقه أنصار/المرجعيه المرجعيه
والنجف تبقه اشراع.. وتبقه تنجب هالكاع
رافضيه رافضيه
....
اتلث رؤوس السير كالت نطقن بوكت الشهاده
راس يحيى والحسين ايرتل ايات العباده
ورأسك الثالث سعيد اتلكم بزود واراده

بس ياسعيد الفاجعه
جثة احسين امكطعه
واضلوع صدره امشلعه
وسوو باهله أباده

جسمه صاير طشار/عالوطيه عالوطيه
وزينب اعله المذبوح
تبجي واتصب اجروح
رافضيه رافضيه

اللهم عجل لوليك الفرج
محمد الجماسي

ياابالزهراء..يارسول الله
...
لو اكول اسمك تزول اوهامي
وينفتح باب الكرم كدامي
ياسبب ديني وشرف اسلامي
يمته ازورنك وانول احلامي
كبرك شمحلاه..يارسول الله
...
يالقبل ادم تشع انوارك
وبمحافلنه تفوح ازهارك
بالقلوب امحبتك وآثارك
بيك نفخر يالنبي ونتبارك
ياعظيم الجاه..يارسول الله
...
بمحفلك يالمصطفى التمينه
مثل الاشموع التشع ضوينه
مسلمين وبسمك اتسمينه
والعلي والفاطمه هنينه
نهجك اتبعناه..يارسول الله
...
اعليك من انصلي يامولانه
الرزق كله يفك بيبانه
يارسول الله وعطر قرانه
اشكد بخيل المايصلي اويانه
الصوت عليناه...يارسول الله
...
يالوصيتك بالكلب محفوره
من كنت مولاه اجمل صوره
علي يامحله بهائه ونوره
العدل والميت وجوب يزوره
كلنه حبيناه..يارسول الله
...
من ينابيعك شربنه اهوايه
العترتك صرنه خدم وفايه
للحسن ابنك رفعنه الرايه
وللاحسين بكل سنه مشايه
احسين ماعفناه..يارسول الله
❤️❤️❤️
اللهم عجل لوليك الفرج
محمد الجماسي

نظرة لقلوبنا يامولاي
اللهم ارزقنا البلوغ الى أعتاب بابك وحجتك و وليك 🙏

يا ربي عجل أمره
وينه عزيز الزهره
ــــــــــــــــــــــــــــــــــــــ
ازغيرون وامي اتسولف وتحچيلي
ابحب الامام الـمهدي شدت حيلي
بالليل ابچي وتگعد اتلوليلي
مهدي يمهدي اتگول واتناغيلي

وما اسأل اعله الفطره
وينه عزيز الزهره
ــــــــــــــــــــــــــــــــــــــ
عالحب كبرت اووالدي وصّاني
يوليدي گلي من اموتن اني
زوّرني حيدر علي لا تنساني
وبعدين للسهله أخذ جثماني

واهناكه إگعد واقره
وينه عزيز الزهره
ــــــــــــــــــــــــــــــــــــــ
ايگولون عد بيت الله يوم اظهوره
يتسند اعله الحايط بهالصوره
وجهه يشع إويترس المعموره
والشمس تتداين ضوه من نوره

واحنه نتاني البشره
وينه عزيز الزهره
ــــــــــــــــــــــــــــــــــــــ
بين الركن وامقامه يرفع رايه
ويم بير زمزمهه يگول احجايه
كون ابثواب احسين نشرب مايه
وبداخل الكعبه يسوي اقرايه

مل الصبر من صبره
وينه عزيز الزهره
ــــــــــــــــــــــــــــــــــــــ
وايروح يم گبر النبي وايقبله
مظلوم ياجدي الرسول ايگله
وايسوي گبر الزهره مثل القبله
هوه الامام المنتظر يندله

والمخفي يصبح حضره
وينه عزيز الزهره
ــــــــــــــــــــــــــــــــــــــ
يايوم يلتم الشمل وانشوفه
وگبر الحسين اوي الامام انطوفه
وعباس ابو فاضل دخيل احروفه
ايفك الجفن وايبوس عطر اچفوفه

والزينب ايهل عبره
وينه عزيز الزهره

محمد الجماسي

#اللهم_عجل_لوليك_الفرج

ضجت بهليوم سامرائنه
نوحي عالمسموم يازهرائنه
مات الحسن يافاطمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
يالزهره الله ابهالمصيبه ايعظم اجرج
كل يوم لوعه وفاجعه ايراويج دهرج
هذا الخبر يمكن كسر ثاني يكسرج
شدي الرحال ابهالمسيه وعجلي بامرج

روحي للعسكري وسوي اقرايه
اليوم طاحت من كببكم رايه
ناحت عليه ارض وسمه ..واويلاه
والمهدي ناصب مآتمه..واويلاه
نوحي عالمسموم يازهرائنه
....
اليوم ثامن يوم اله ينازع من السم
ونار الجبد تسعر مثل نار المخيم
نرجس غريبه ابفكده والمهدي تيتم
مات ابومحمد والشمل هيهات يلتم

لمن العسكري اينام ابكبره
تبدي يافاطمه الغيبه الصغره
والدنيه تصبح مضلمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
زمرة بني العباس ماحفظت حرمته
يوميه تدخل داره وتخوف أسرته
نص بالسجن كضه العمر نص بغربته
والمعتمد خطط اله ونفذ غدرته

لحد ماسوه اليريده وناله
كومي شوفي اوليدج بياحاله
غدرته الايد الآثمه..واويلاه
والمهدي ناصب مآتمه..واويلاه
نوحي عالمسموم يازهرائنه
....
الكوكب الحادي عشر اعلن غيابه
وغسلو جسمه وشيعو نعشه بمهابه
مومثل جسم احسين ضل اعله الترابه
ابحر الشمس والحافر ايجر بثيابه

آنه ادري السيد ايقدرونه
احسين ليش ابحافر ايرفسونه
خلو اضلوعه امهشمه..واويلاه
والمهدي ناصب مآتمه..واويلاه
نوحي عالمسموم يازهرائنه
...
بثامن ربيع انهدم ركن أمن الامامه
واصبحت سرَ من رأى مثل القيامه
الغيبة المهدي المنتظر لاحت علامه
والشيعه من بعده ولاشافو سلامه

هذا حال اولادج اتعرفينه
يمته ياخذ ثارهم مهدينه
سم وذبح سبي وضمه..واويلاه
والمهدي ناصب مآتمه..واويلاه
نوحي عالمسموم يازهرائنه
...
اللهم عجل لوليك الفرج
محمد الجماسي

اليوم بيت العسكري بياحاله
والامام المهدي غاب اهلاله
...
چان بيت العسكري يشع بالضوه
صار خنگه وماكو بي نسمة هوه
اليوم خل نشبع بچي ونلطم سوه
اقرايه تشفي الگلب خنقراله
...
عائلة هالبيت أشرف عائله
گظت لو سم لو ضحايه امچتله
اليوم ياعُظم المصيبه النازله
بياجنايه المعتمد يغتاله
...
سَمه من واحد ربيع الثامنه
بهالسبعتيام كَون الله إنحنه
كل سنه انسوي مجالس كل سنه
والأرض سامره نتعناله
...
حگهه لو سر مَن رأى الليله تضج
والشوارع بالبشر كلهه تعج
للجبال الشامخه الصيحه ترج
ريّض ابهالنعش ياشياله
...
لا تروح وتأخذ اعزيز الگلب
اتيتم المهدي اذا طال الدرب
هاي أول دمعه من عينه تصب
خمسه عمره والحزن يبراله
...
ازغيّر ابعمره وچبير أهل الأرض
وعالجنازه كبّر وقام الفرض
كل علوم اجداده حافظهن حفظ
المهدي ربك بالحقيقه اوحاله
...
ونرجس أم المهدي من راح الامام
ماتت ابداخل طوامير الضلام
عگب ال البيت عالدنيه السلام
واليحبهم ياالف هنياله
.......
اللهم عجل لوليك الفرج
محمد الجماسي

*[ بوية ودعيني ]*

أداء: الملا #مرتضى_الحميداوي
كلمات: الشاعر #محمد_الجماسي

https://youtu.be/CS-yWpfdvOc

مجالس شهر ربيع الأول لسنة 1445 هـ - 2023 م
مجالس ليالي إستشهاد سيدة النساء الطاهرة البتول الصديقة الكبرى فاطمة الزهراء صلوات الله عليها وآلها (الفاطمية الأولى)
عزاء موكب الزهراء عليها السلام - العراق - بغداد - ناحية الوحدة

مونتاج وإخراج: أحمد الزهيري
مكساج: كرار الموالي
مخطوطات: علي باسم
غلاف: أمير علي
النشر الشبكي: علاء بركات العاملي

عهداً علينا يارسول الله

يامحمد ما نعوف 000 الكتاب وعترتك
ــــــــــــــــــــــــــــــــــــــ
يامحمد ياشمس تضوي بسمانه
الكتاب وعترتك عدنه امانه
حبك وحبهم تره اكبر ضمانه
الزهره خيمتنه وعلي مالك هوانه

وبضريحه من نطوف 000 والله نشتم ريحتك
يامحمد ما نعوف 000 الكتاب وعترتك
ــــــــــــــــــــــــــــــــــــــ
يارسول الله كتابك يبقه قمّه
والحرگ آياته بيته اعليه نهجمه
هذا قرآن السماء الكله رحمه
طابعينه بالضماير كلمه كلمه

والأسائو للكتاب 000 ذوله خارج ذمتك
يامحمد ما نعوف 000 الكتاب وعترتك
ــــــــــــــــــــــــــــــــــــــ
بآخر انفاسك تصيح الدنيه الساعه
وبس علي الكرار اهلاً للشفاعه
واحنه آمنه ابعلي وبأتباعه
وكتبنالك بالدمه سمعاً وطاعه

شيعه نبقه للامام 000 يالرسول وشيعتك
يامحمد ما نعوف 000 الكتاب وعترتك
ــــــــــــــــــــــــــــــــــــــ
ونشهد ابهذا الكلام الگلته النه
احسين منك يالرسول وانته منه
واحنه واليناه ومانتخله عنه
وكل خميس ابكربلاء الحب يلمنه

واليطوف اعله الشهيد 000 يعني طاف ابحضرتك
يامحمد ما نعوف 000 الكتاب وعترتك
ــــــــــــــــــــــــــــــــــــــ
يانبينه وللاسف بعض الصحابه
طبّو البيتك مثل طبّة عصابه
ظلمو الزهره بلا رحمه ومهابه
وقالع الباب احترگ يالهادي بابه

مارفع سيفه الفقار 000 ملتزم بوصيتك
يامحمد ما نعوف 000 الكتاب وعترتك
ــــــــــــــــــــــــــــــــــــــ
اجنازتك عالمغتسل شوف العجايب
وابعزائك حته ماسوو الواجب
بالسقيفه اتقاسمو كل المناصب
الله يلعنهم هذول اكبر نواصب

بس متت يالـصطفى 000 اتنازلو عن صحبتك
يامحمد ما نعوف 000 الكتاب وعترتك

محمد الجماسي

#اللهم_عجل_لوليك_الفرج

فراق رسول الله (صلى الله عليه وآله)

بويه اوداعك يعمي اعيوني
ــــــــــــــــــــــــــــــــــــــ
كون انه الـميته ولا انته
يالهادي او يومك مو وكته
ياهو الـمثلك يترك بنته
وإخلافك تدري ايضلموني
ــــــــــــــــــــــــــــــــــــــ
اظلم صار الكون ابموتك
يالشايل عمري بتابوتك
فك عينك ارد اسمع صوتك
ياريت ابلحدك دفنوني
ــــــــــــــــــــــــــــــــــــــ
اشلون اتعوف الزهره وترحل
زهرة عمرك باچر تذبل
لو كون الـميّت يتبدل
چا گبلك غمضت اجفوني
ــــــــــــــــــــــــــــــــــــــ
ظلمه وصارن سود ايامي
بس شالو نعشك گدامي
أسأل ضلعي وخدي الدامي
يحچيلك عن الأذوني
ــــــــــــــــــــــــــــــــــــــ
يقتل طفلي ويحرگ بابي
ترضه افلان ايدوس اعتابي
نار وتوصل يم اثيابي
وايورم بالسوط امتوني
ــــــــــــــــــــــــــــــــــــــ
حيدر بالاكراه ايبايع
مايگدر عن بيته ايدافع
ظنو يطفه النور الساطع
شمس الله شلون ايطفوني
ـــــــــــــــــــــــــــــــــــــ
الشيخيين الاول والثاني
يابويه وتعرف بالجاني
عدوانك ذوله وعدواني
سموك وردو عصروني
ــــــــــــــــــــــــــــــــــــــ
واتصور يابويه اتصور
ابفاتحتك واگف بس حيدر
وانه ابنص الدار اتحسر
واعليك الطم ماخلوني

محمد الجماسي

#اللهم_عجل_لوليك_الفرج

اليوم اجينه أمن الشام
لكبور اهلنه
وين اخونه العباس
خل يفزعلنه
....
اليوم من درب اليسر ردينه
يم مكابرهم سوه التمينه
صحنه وين الكطعو جفينه
للوطن عباس يرجع بينه

من ابونه الكرار
هوه الكفلنه
وين اخونه العباس
خل يفزعلنه
....
لويكول السهم طفه اعيوني
آنه زينب ورمولي امتوني
لويكول ابهامتي طبروني
آنه اكلله بحبل جروني

أمن السفر تعبانين
يهل المحنه
وين اخونه العباس
خل يفزعلنه
...
عادة اليرجع يلاكي اخوانه
واحنه شو ماواحد اتلكانه
مامش امعزب فرش ديوانه
وين ابوالغيره اليكف اردانه
نكعد اعله التربان
لو يفرشلنه
وين اخونه العباس
خل يفزعلنه
....
خل يكوم وكبره يفتح بابه
لو اغرك بالدموع اترابه
ليش ماحاسب اخوي احسابه
حتى ماباني خيم لحبابه

بالخيم لسه النار
توجع كلبنه
وين اخونه العباس
خل يفزعلنه
....
انه اخته وهوه اخوي الغالي
وارد اسولفله اعله شلت حالي
هند مهيوبه بقصرهه العالي
وآنه كل السوك شاف اخيالي

دنيه من غير اخوان
مابيهه معنه
وين اخونه العباس
خل يفزعلنه
...
اليوم اسوي اعله الفرات اقرايه
وانه اصيرن عالكمر ملايه
الشام خنكتني واريد الرايه
اشم بيهه ذكريات اهوايه

رايتك يالكفال
جانت تلمنه
وين اخونه العباس
خل يفزعلنه
.....
اللهم عجل لوليك الفرج
محمد الجماسي

https://www.tiktok.com/@jamasi313?_r=1&_d=ea02al9223338a&sec_uid=MS4wLjABAAAAjVByNdCigl3nALVb9e6Dd148VGdB_kCgeFLdhxjCTk2fjIkj671GI6hHXnjfWjCK&share_author_id=7275758858348872709&sharer_language=ar&source=h5_m&u_code=ea02bb5igdfhlg&timestamp=1724233797&user_id=7275758858348872709&sec_user_id=MS4wLjABAAAAjVByNdCigl3nALVb9e6Dd148VGdB_kCgeFLdhxjCTk2fjIkj671GI6hHXnjfWjCK&utm_source=copy&utm_campaign=client_share&utm_medium=android&share_iid=7345251224667408134&share_link_id=2375686e-e4a1-49ff-8e14-c25a0635d1ed&share_app_id=1233&ugbiz_name=ACCOUNT&ug_btm=b8727%2Cb4907&social_share_type=5&enable_checksum=1

نرجو من الاحبة خدام الحسين ع

الاشتراك والدعم بقناتنا التيك توك

ولكم خالص الشكر والتقدير

https://youtu.be/oBLnHX-46Oc?si=TjedGd_Y8BStclY8

https://youtu.be/zC0JeoP-80A?si=pvWD_HTv5bJmtb9N

جــــديــــد
قصيدة يا حبيب الزهرة وحبيبي
الرادود: حيدر السعد
الشاعر: محمد الجماسي
رابط مشاهدة القصيدة كاملة https://youtu.be/8G39dtk2Jhs?si=sjw1UdxVLbH0JO49
مجالس العشرة الثالثة من شهر محرم الحرام
1446 هـ 2024 م
هيئة سيد الماء
العراق / الناصرية / قضاء النصر

https://youtu.be/ETTiT_TmIX0?si=XwygGNIBpICdBwHJ