قصائد حسينية مكتوبة_ الشاعر ابو باقر الساعدي

يا مسموم والينه
يا مسموم والينه
ـــــــــــــ
الشيعه اليوم حزنانه
جينه بلوعة ابجانه
جبنه اجروحنه ويانه
يالكاظم تلكانه
ويه الزهره ونينه
يا مسموم والينه
ـــــــــــــ
شيعه اتعنتك تنحب
نارك بالكلب تلهب
غريب وعمرك امعذب
نعشك عالجسر ينذب
صابو بيك هادينه
يا مسموم والينه
ـــــــــــــ
اجو زوارك ينوحون
للكضه العمر مسجون
فاضن من دمعنه اعيون
نلعن ظالمك هارون
ونلعن كلمن ايعينه
يا مسموم والينه
ـــــــــــــ
لمصابك ينوح الدين
والفكدك جرت جم عين
جينه بنوح متعنين
نواسي ام الحسن واحسين
بالحسرات نادينه
يا مسموم والينه
ـــــــــــــ
يمك نكصد ابكل عام
مشايه ونضل خدام
صوت ايرجف الظلام
جفنك عالظلم ما نام
للكلفات تحدينه
يا مسموم والينه
ـــــــــــــ
دمعة اتصيح يالكاظم
صبرك يهزم الظالم
لاجلك هالحزن دايم
لمن يظهر القائم
واينشف بواجينه
يا مسموم والينه
ـــــــــــــ
يا راعي الصبر يمك
خاسر ينهزم خصمك
جان امحسب ايهزمك
باذن الله ارتفع اسمك
كبر العاندك وينه
يا مسموم والينه
ـــــــــــــ
جينه وكل كلب مجروح
جيناك بونين ونوح
يمك كل تعبنه ايروح
ابابك يا حبيب الروح
كل الخير يلفينه
يا مسموم والينه
ـــــــــــــ
انجمعنه ابابك الليله
والعاداك يا ويله
نعشك نكصد انشيله
حركه المدمع انسيله
ويانه ايصيح مهدينه
يا مسموم والينه
ـــــــــــــ
يمك جينه مشايه
نضل كل عام وفايه
بحبك نوصل الغايه
دمنه اليرفع الرايه
ما فد يوم ملينه
يا مسموم والينه
<<<>>>
مشي ابكل عام نتعناك
يفجرونه ونضل نهواك
نضل للموت ما ننساك
نصرخ نلعن العاداك
لكل ظالم تحدينه
يا مسموم والينه
<<<>>>
خدام المواكب دوم
تخدم زاير المسموم
تصيح بصوت يا مظلوم
جرحك كل رجب ملجوم
الخادم دمعته بعينه
يا مسموم والينه
<<<>>>
ابو باقر الساعدي

أويلاه - يالكاظم
أويلاه- يالكاظم
ــــــــــــــــــ
يا تاسع انوار الهدى
جبدك السم ايمرده
شيعتك با الهم كاصده
زوار وانغيظ العده
ملعون ذاك الظالم
أويلاه- يالكاظم
ــــــــــــــــــ
ملعون كلمن حاربك
بالسجن كام ايعذبك
بالصبر واضح مطلبك
ما خاب كلمن يندبك
يا حجة الله العالم
أويلاه- يالكاظم
ــــــــــــــــــ
شيعتك متعنيه ابحزن
يم بابك اتنوح وتون
والينه ميت بالسجن
صرخاتنه ابابه علن
كل شيعي يمك خادم
أويلاه- يالكاظم
ــــــــــــــــــ
مشايه اجينه الحضرتك
بالكلب تجوي امصيبتك
نتشرف احنه بخدمتك
كل سنه اتزيد ازيارتك
مجنون بيك وهايم
أويلاه- يالكاظم
ــــــــــــــــــ
تبقى المواكب عامره
تعزي الرسول وحيدره
تواسي الزجيه الطاهره
والمهدي يحضر زايره
وايصيح وي هالوادم
أويلاه- يالكاظم
ــــــــــــــــــ
بيك الحسن سمو غدر
واحسين مذبوح النحر
زين العباد المنكسر
والباقر ابدفنك حضر
يا حزن ابوك الدايم
أويلاه- يالكاظم
ــــــــــــــــــ
يا لغـربتك مثل الرضا
يمك جواد الرافضه
تشبه علي البسم كضـى
والعسكري بدربك مضى
وللباطل ابنك هادم
أويلاه- يالكاظم
ــــــــــــــــــ
مسموم يا ابن المصطفى
بالكون نورك ما طفى
أصل العلم والمعرفه
والجود يم بابك غفى
والدين باسمك قايم
أويلاه- يالكاظم
ــــــــــــــــــ
باب الحوائج للبشر
يم بابك ايزيل العسر
حاجتنه يا راعي الامر
تعجل ظهور المنتظر
بيه كل جرح يتلايم
أويلاه- يالكاظم
ــــــــــــــــــ
نصرخ بصوت الفاجعه
واكلوب بيك امصدعه
بيكم الشيعه املوعه
واعيون ضلت دامعه
للذله لا ما نسالم
أويلاه- يالكاظم
ــــــــــــــــــ
ما يوم مر بينه الفرح
نخيط جرح ينزف جرح
ما بين تفجير وذبح
من دمنه مصبوغ الصبح
بكل بيت صاير ماتم
أويلاه- يالكاظم
ــــــــــــــــــ
ملينه من كثر الدمع
يوميه لازم ننفجع
حسراتنه تذوب الشمع
واليوم يمك نجـتمع
ندعي لضهور القائم
أويلاه- يالكاظم
ــــــــــــــــــ
ابو باقر الساعدي

دمعنه ابحضرتك يرفع تعازينه
نواسي المهدي يالكاظم تعنينه
ـــــــــــــــ
هتف صوت الحزن صرخاته مسموعه
لمصابك كل موالي اتعنه باللوعه
مواكب للدمع هالليله مجموعه
بيارغ للحزن رايتنه مرفوعه
مصاب البسجن يالمهدي يجوينه
نواسي المهدي يالكاظم تعنينه
ـــــــــــــــ
على مصابك حزينه اليوم دنيانه
مشينه وكل كلب يتوجه باحزانه
لكينه الزهره تبجي ابحسره ويانه
كصدنالك يبن جعفر تلكانه
غريب اعلى الجسر نعشك يوالينه
نواسي المهدي يالكاظم تعنينه
ـــــــــــــــ
يميزان الصبر منك تعلمنه
ندوس اعلى الجروح اشما تألمنه
ولا مره ابجفوف الذله سالمنه
بميادين الوفه ابعزمك تحزمنه
ندوسه بصايتك كلمن يعادينه
نواسي المهدي يالكاظم تعنينه
ـــــــــــــــ
يا آذان الكرامه العالم ايسمعه
يثوره اعلى الظلم ما تنروي ابدمعه
لجن بينه الجروح اهوايه متوسعه
امام الكون مرمي ومحد ايشيعه
بحزن لمصابك اويه الزهره ونينه
نواسي المهدي يالكاظم تعنينه
ـــــــــــــــ
اجيناك وكلبنه امحمل اجروحه
وجرت فوك الوجن دمعتنه مفضوحه
وصفت فرحة عمرنه ابونه مذبوحه
نون ون اليتيم الما يفك نوحه
مثل ليل الحزن جرحك يأذينه
نواسي المهدي يالكاظم تعنينه
ـــــــــــــــ
بجينالك دمع يشرح مصايبنه
وزمان اهل الظلم حالف يعذبنه
على مصابك الف مره تصوبنه
واذا ضاك الصدر نندب يا غايبنه
يتامه وننطر الجيتك يمهدينه
نواسي المهدي يالكاظم تعنينه
ـــــــــــــــ
ابو باقر الساعدي

عادو ابغداد طف الغاضرية
وسممو موسى بسجون الكاظمية
حسين ضل ابلا دفن
وموسى ميت بالسجن
بالكاظمية
ــــــــــــــــ
نازل جرح وحي العين يقره المصاب الليلة
وابكلبي شكبان اهموم بس الطفوف اتشيله
وينه الي مثلي ايحب نوح نكعد دمعنه انسيله
عن لوعة المتغربين هاليوم اريد احجيله
اجفوف حنت للطم تلهب جمرتي
جيت ادك ابابهم صاحت دمعتي
حسين سحكو جثته
وموسى سمو جبدته
بالكاظمية
ــــــــــــــــ
ابمحراب سجنك ونات صارت ألم تاليها
امصلايتك جبرائيل شمها وتبرك بيها
ربك على الدنيا اشكال لعيونك امخليها
جمرة الطفوف وتجويك بجروحك امخليها
كام جرحك يكبر وماله نهايه
ويه حسرات الي ودوهن سبايه
صار سجانك شمر
شمر جثتك عالجسر
بالكاظمية
ــــــــــــــــ
شايل على اجفوفك كون ضلت الدنيا ابجالك
بطاموره وافراشك ليل متغرب امن اعيالك
زادك جرح ينزف آه بس كربله التبرالك
بعاشر محرم مولاي بزنزانه من يقرالك
مجلس اتسوي بسجونك للمصيبه
وياهو ينعى العمتك الراح تغريبه
عمر عشته ابغربتك
وتالي صارت دفنتك
بالكاظمية
ــــــــــــــــ
اثنياتكم غربه وصار عدكم فروق اهوايه
واحد سجين ومسموم بس دفنته الوفايه
يم الفرات العطشان بس ما شرب من مايه
واجروح ما الها احساب واهوي مو بس هايه
البسجن ميت يلفونه بعباته
والذبيح ابكبرله سلبو خواته
ذاك مذبوح النحر
وهاذ بالسم انغدر
بالكاظمية
ــــــــــــــــ
مسموم واحد مسجون والثاني تروي اطفوفه
ما شفنه ميت يا ناس والجامعه بجفوفه
ولا شفنه راس اعلى ارماح واخته الغريبه اتشوفه
ما راكبه اخته اعلى النوك وتتفرج اهل الكوفه
راح كافلها وبقت زينب وحيده
والاطفال اتنوح كافلها تريده
جسمه ضل ابكربله
وهاذ ما حضروه له
غريب غريب
ــــــــــــــــ
نعيم ابو باقر الساعدي

(قصيدة كعده للامام موسى الكاظم عليه السلام)

موسى الكاظم شع نوره
ما خنگوه ابطاموره
صبره ايذل سجان
ضل مثل القران
ما خنگوه ابطاموره
ـــــــــــــــــــ
شوف بعيون البصيره واخذ من دنياك حكمة
كل بشر ميت ضميره ايشوف لكن گلبه اعمه
وفرق بين الصار لعنه وبين واحد خالد اسمه
هارون شوفه اشگد ملك- ارض وسمه بحكمه امتلك
من حارب الكاظم هلك
ضلت الوادم تشتمه

تعرف هاي امن اتزوره
ما خنگوه بطاموره
شامخ عالي الشان
ضل مثل القران
ما خنگوه ابطاموره
ـــــــــــــــــــ
راد هارون اللعين ايخلي ابن جعفر ابمحنه
ونطفة الباطل خبيثه اليوم چم هارون عدنه
ولو ملك ابسط وظيفه ايروح للكاظم يسجنه
من يستتب عند الامن-يشمر الكاظم بالسجن
خالد بها الدنيا يضن
غرروه وخاب ضنه

هذا الكاظم دستوره
ما خنگوه بطاموره
خل يوعى الانسان
ضل مثل القران
ما خنگوه ابطاموره
ـــــــــــــــــــ
هاي دنيانا امتحان اهناك توزيع النتائج
ايجوز الي اتغرك صلاته ینحشر ويه الخوارج
هناك حتى العين تحجي البشر ما يگدر یحاجج
تنتهي هناك المعمعه- وتسقط وجوه واقنعه
والي يريد المنفعه
ايصيح يا باب الحوائج

طب اگلوب المكسوره
ما خنگوه بطاموره
يسمع كل حيران
ضل مثل القران
ما خنگوه ابطاموره
ـــــــــــــــــــ
چان يوسف نبي وراد ربه يعرف قدر صبره
ولون ما مستغفر الله يجوز حتى اسمه يخسره
وموسى ابن جعفر امام وبالسجن گضاه عمره
ما طلب حاجه من بشر-عابد واراضي بالقدر
شنطاه ربه من صبر
مقصد الحاجات گبره

ينطي امراد الي ايزوره
ما خنكوه بطاموره
ما سد البيبان
ضل مثل القران
ما خنگوه ابطاموره
ـــــــــــــــــــ
صار دكتور الامراض وكل دوه تلگاه عنده
وكلمن ايصفيها نيته وينتخيه لا ما يرده
كل مريض وكل حزين ايروح للكاظم يگصده
اسمه ابو طلبه انعرف- چم شده بيها الي وكف
بحر الكرم واصل الشرف
هذا ابو الزهراء جده

تشهد كل المعموره
ما خنگوه بطاموره
وي كل الازمان
ضل مثل القران
ما خنگوه ابطاموره
ـــــــــــــــــــ
نعیم ابو باقر الساعدي

الفاگد اعزازه اشيداوي اجروحه
ايساعده الله البيده دافن روحه
كلفة دمعة عينك
فاگد الله ايعينك
يا علي
ـــــــــــــ
كلمن ايفارگ له غالي اسنينة تخلص بس نحيب
واليلچمنة السوالف جرحه ينزف ما يطيب
ماله خلگ الناس كلها ابينهم عايش غريب
والدفن زهرة حياته اشلون راسه ما يشيب
اشگد گبل يرتاح من يشكي لها
اليوم جثة وماله حيل يشيلها
بفاطمة مصوبينك
فاكد الله ايعينك
يا علي
ـــــــــــــ
الليلة يابو حسين جرحك يلچم صوابه وغميج
جانت الزهرة بحياتك والدة وزوجة وصديج
چنت تشكي هموم ضيمك يمها لو صدرك يضيج
اليوم جثة وشيعوها وما بقه عندك رفيج
بالگبر من نزلتها ابايدك
اتدير بالك عاليتامة تريدك
ازغار منتظرينك
فاكد الله ايعينك
يا علي
ـــــــــــــ
الليلة يابو حسين شدة يا علي اشثكله المصاب
ذكريات اجروح گلبك كلها مرسومة اعلى باب
بالگبر مدفونة روحك بيدك اتهيل التراب
من دفنت الزهرة بيدك صارن ايامك عذاب
چانت الشمعة التضوي بليلك
من شلتها يا علي انهد حيلك
اليوم ظلمة سنينك
فاكد الله ايعينك
يا علي
ـــــــــــــ
انته ابو كلفات حيدر قالع الباب الصقيل
تريد سلمان اليعينك عالجنازة مستحيل
هاي يعني الشدة كلفة يا علي صوابك ثجيل
وهوه ياهو الشاف مثلك صابر وما ضل عليل
تريد سلمان اليعينك ويلي
تگله فكد الزهرة اخذ كل حيلي
چنك امشيعينك
فاكد الله ايعينك
يا علي
ـــــــــــــ
ردّت الناس وبقيت اعلى الكبر تقره السلام
شفت روح الزهرة طافت يمك بهيئة حمام
يا علي زينب يتيمة الليلة ما تكدر تنام
زينب اتخاف الوحدها الدنيا يا حيدر ظلام
من اجيت وصحت زينب وينها
ابغرفة امها وشوف دمعة عينها
اطفالك امتانينك
فاكد الله ايعينك
يا علي
ـــــــــــــ
نعيم ابو باقر الساعدي

يا فاطمة يا فاطمة
كسر الضلع ينزف دمه
ـــــــــــــــــــــ
قرانج اشموعه انطفن
وآيـاته ونه اترتلن
اعيون السمه الحزنج جرن
حتى الكواكب اظلمن
لمصيبتج ظلمه السمه
كسر الضلع ينزف دمه
ـــــــــــــــــــــ
جرحج يضل ما له دوه
مصابج خنك حتى الهوى
شيداوي لجمات الضوه
وياج الفرح غايب سوى
حيدر سماه امغيمه
كسر الضلع ينزف دمه
ـــــــــــــــــــــ
صعبه اعلى زينب غيبتج
يل سكته صارت دفنتج
بــــشيلتها تشــــتم ريحتج
من طاح اخوها احتاجتج
بيوم انسبت يا عالمه
كسر الضلع ينزف دمه
ـــــــــــــــــــــ
عد راسج اينوح الحسن
ويم رجلج احسينج يون
من شافو اشموعج طفن
لا كبه عندج لا صحن
والضالمج كون انعمه
كسر الضلع ينزف دمه
ـــــــــــــــــــــ
شافج علي وصبره اختنك
من غسلج جرحه انفتك
لمصيبتج كلبه احترك
يهمل دمع عينه وشهك
شاف الضلع من هشمه
كسر الضلع ينزف دمه
ـــــــــــــــــــــ
كل احنه يتمنه الضلع
كل ما نمر بيه ننفجع
بهاي المجالس ننجمع
لمصيبتج يجري الدمع
جرحج صعب يا فاطمه
كسر الضلع ينزف دمه
ـــــــــــــــــــــ
نعيم ابو باقر الساعدي

دخيلج فاطمه دخيلج فاطمه
انخاج لو ضمني الكبر واترابه
ــــــــــــــــــ
مفطوم جفني اعلى الدمع من يوم الولاده
جفين شبن باللطم لاتكول حزني عاده
لو سال دمعي الفاطمه هاي اعظم عبادة
مجنون ماخذ بالعشك من حيدر شهادة
اليخدمج منتصر نجح يوم الحشر
مكتوب خادم فاطمه بكتابه
انخاج لو ضمني الكبر واترابه
ــــــــــــــــــ
ما اريد دنيه ابخدمتج لا رايد تجاره
لا اريد اسمي ينعرف وايزيد اشتهاره
خدام بس عدنه طلب وانريد البشاره
للناس لو صاحو حشر ما نبقه حياره
ربيت بخدمتج دخيل برايتج
هالليله احلفج بالنحر واصوابه
انخاج لو ضمني الكبر واترابه
ــــــــــــــــــ
هالموت لو باجر اجه وحط ايده اعلى بابي
مدفون وحدي ابمكبره ومتوسد ترابي
شيشوف منكر لو يجي من يفتح كتابي
يلكون ما عندي عمل بس دمعي ومصابي
تجين بغربتي وحيد بحفرتي
تكولين يمي عثرته واحسابه
انخاج لو ضمني الكبر واترابه
ــــــــــــــــــ
كلتلها كافي يا نفس من هالليلة توبي
جم دوب تبقه فاطمه اتضل تستر عيوبي
مو خاف باجر انكتب مطرود من ذنوبي
واتروح كلها خدمتي وهاي الخدمه ثوبي
انه المالي عمل خدمتج هي امل
غركان كلبي بالذنب واحجابه
انخاج لو ضمني الكبر واترابه
ــــــــــــــــــ
يالزهره كاتب لج عهد مادام بحياتي
ما عوف ديني وغيرتي وما ابطل صلاتي
من تزيغ عيني لأي مره اتذكر خواتي
بس كون اريدج فاطمة اتحضريني بمماتي
الج كاتب عهد واضل اعلى الوعد
الموت لو طب وعلي سد بابه
انخاج لو ضمني الكبر واترابه
ــــــــــــــــــ
ابو باقر الساعدي

الف هنياله اليخلص عمره خادم فاطمه
والائمة كلها يمه
بكل عزه حاضرين
ـــــــــــــــــ
جلمه كال النبي /وافتهم حكمته
بالعــــمل ينكتب /كــلمن ونيته
المجلس الينبني/ للبجي غايته
باليقين اعتقد/ فاطمه حضرته
والبجه اعلى الزهره دمعه اتفيده ساعة دفنته
والي يلطم خلي يفهم ما يعوفه الحسين
والائمة كلها يمه ابكل عزه حاضرين
ـــــــــــــــــ
بالمجالس ضوه/هالدمع من يصب
والنبي من يجي/تنكشف له الحُجب
العاصي خل ينتبه فاطمه من تطب
بلكي دمعه التصب بيها يستر ذنب
يكلها يا ام احسين تايب توبتي بمجلسج
اقبليني / سجليني / خادم الطاهرين
والائمة كلها يمه ابكل عزه حاضرين
ـــــــــــــــــ
يلي جابك دمع/للمجالس عشك
نفّس ابعبرتك /صدرك المختنك
بابه حزنك خشب/خوفي لايحترك
لا تهشم ظلع/عالصدر من تدك
والي يلطم ضلعه يذكر كسر ضلع ام الحسن
عين حمره وبيها سطره تلعن الظالمين
والائمة كلها يمه ابكل عزه حاضرين
ـــــــــــــــــ
لمجلس ام الحسن/جاي طه النبي
من يون ونته/بيها ريحة سبي
والجفوف التدك/تلعن الناصبي
يعلى صوت اللطم/والدمع زينبي
والحسن واحسين حضرو/ مجلس الطاهره
واخو زينب كام ينحب يلطم ابلا ادين
والائمة كلها يمه ابكل عزه حاضرين
ـــــــــــــــــ
هناك مجلس لطم/عقدوا هل السمه
جان تحضر مره/بنصهم امحزمه
من تهل الدمع/منها ينزف دمه
ثاري ام الوفه/اتطوعت خادمه
بالعزى ام عباس تخدم/ والمدامع تهل
بالمجالس عدها واهس حتى ام البنين
والائمة كلها يمه ابكل عزه حاضرين
ـــــــــــــــــ
شفنه واحد دخل/نازع اعمامته
شاب محني الضهر/حاير ابدمعته
من صرخ بالبجي/الوادم اتلكته
المهدي صاحو وصل/معتني الجدته
يلطم ودمعاته حمره/وكلبه شايل جمر
بالمدامع عمره ضايع شايب امن الونين
والائمة كلها يمه ابكل عزه حاضرين
ـــــــــــــــــ
نعيم ابو باقر الساعدي

(شوط كربلائي للزهراء)
ــــــــــــــــــــــ
الك يا ابن الحسن نرفع تعازي وجرحك اشكبره
انعصر كلب الحسن وحسين لمن عصرو الزهره
ــــــــــــــــــــــ
ضعيفه انتي وثكيله الباب-عرف بيج وبقه يدفعج
انكطع نفسج يا روح حسين- نخيتي ومحد يسمعج
يضل ابن النذل يعصر-جمع حيله وكسر ضلعج
بقيتي ابمحنتج وحدج
نخيتي الخادمه تسندج
تشوفه اليسطر بخدج
وكع محسن شهيد احقاد
ولا شاف الضوه ابعمره
ــــــــــــــــــــــ
صدك بنت النبي المختار- اللقيط بحيله يدفعها
بقت من تمشي محنيه - تخاف الكسر يوجعها
تضم ونتها ما رادت ابو الحسنين يسمعها
الوجع من تمشي كام يزيد
من تدعي بقت فرد ايد
تناشغ والدمع شيفيد
صعب كسر الضلوع اشلون
التهشم ضلعه شيجبره
ــــــــــــــــــــــ
صدك من غسلج حيدر كسر ضلعج هدم حيله
اضن ما غسلج بالماي جسد من دمعه تغسيله
علي ما ضل بعد بيه حيل نعشج فاطمه يشيله
حيدر قالع البيبان
يا وسفه الوكت بيه خان
يكله اوياي يا سلمان
بعد يا عمي ما ضل حيل
وهذا الينكسر ظهره
ــــــــــــــــــــــ
حضن ولده علي الكرار- يتامه بحزنه واساهم
مسح راس الحسن وحسين- جبيره اليوم بلواهم
زينب جابت ام كلثوم- تنوح وتلطم وياهم
علي وياهم تسيل العين
يصبر عالحسن وحسين
شكبر ضيمه وبنات ثنين
يتامه وطاحو اعلى امهم
وتشب تحت الضلع جمره
ــــــــــــــــــــــ
ابد مو سهله لو واحد- تحرمه المگبره امن امه
تره الام شمعة تضوي البيت- بلايها يضل ظلمه
شكثر صعبه الطفل لو صار- يتيم او واحد يظلمه
تفز زينب تريد امها
يتيمه الفركه تهظمها
الجفن يادمعه الي ايضمها
تدور اعلى امها نص الليل
تحس وي كل نفس عصره
ــــــــــــــــــــــ
صعب عالطفله نص الليل- تفز واتدور اعلى امها
وزينب جانت ابكل ساع - تبوس الزهره واتشمها
بيا عين وتشوف اليوم- الحنينة امفيضه ابدمها
تون تسمعها بالسكته
الضلع مو سهله سالفته
كسر ما تنجبر علته
والي يعيش الكسر ما ضن
يحس بالراحه كل عمره
ــــــــــــــــــــــ
بقت زينب يتيمه وهاي- عليج ادريها موسهله
تنام امعلمه ابحضنج -على امها امعوده الطفله
واذا حيدر يطب للبيت- عليج ابنيتج اتساله
يبويه تكله اريد امي
جنت صبح ومسه يمي
يبويه ما خلص همي
يابويه اهواي مشتاكه
احس كلبي نفذ صبره
ــــــــــــــــــــــ
نعيم ابو باقر الساعدي

الليلة يا زينب وداع وهاي هيه
البيت باجر ظلمه بيه بس المنية
بالكبر امج تنام
كلهن ايامج ظلام
يمه زينب
ـــــــــــــ
انفتح سيل الجفن يرسم مصيبه
علينه هاالمصايب مو عجيبه
تدني وصيري يا زينب قريبة
اسولف لج مصايب يالغريبة

الليله اخر ليلة يا زينب احضنج
باجر ايشيب الطفل لو شاف حزنج
اقره بدموعج كلام
كلهن ايامج ظلام
يمه زينب
ـــــــــــــ
تكلها الزهره يا زينب تعالي
وامسحي ادموعج التجري اعلى حالي
رغم كل المصاب الي جرالي
مصابج صعبة لو مر اعلى بالي

سهله كل هذا المصاب الصار بيه
شلون يا زينب يجتفونج سبيه
يرعى اطفالي الامام
كلهن ايامج ظلام
يمه زينب
ـــــــــــــ
عزيزة اعلى امها ترتاح ابحضنها
تسولف كامت وتبجي اعلى ونها
تعاين زينب اعلى امها وحزنها
وبدت تمسح ظلوع الصوبنها

شلون يا يمه اذا باجر تموتين
انصير بغيابج يتامه آنه واحسين
الحسن يرمونه بسهام
كلهن ايامج ظلام
يمه زينب
ـــــــــــــ
تلوج ام الحسن يلجم وجعها
ولا يخفي الدمع لجمة ظلعها
تصبر زينب وتمسح دمعها
تون بالسكته ما واحد سمعها

اتكلها يا يمه المصايب كلها سهله
وانتي يا زينب مصابج ماكو مثله
لا كفيل ولا خيام
كلهن ايامج ظلام
يمه زينب
ـــــــــــــ
تضم زينب دمعها وعدها غايه
ييمه اويه الحزن باجر بدايه
تكلها الزهره يا بنيتي المنايه
تصيب الكافل وترحن سبايه
يمه يا زينب اوصيج بوصيه
احسين اريد ابمنحره شميه اليه
وصدره منبت للسهام
كلهن ايامج ظلام
آه يزينب آه يزينب
ـــــــــــــ
وبعد عندي طلب للهاشمية
وصية ميت وهاي الوصية
اذا هجمو عليج الناصبيه
ما اريد الشمر يسطر رقيه
طفلة احسين العزيزيه وحيل احبها
لا تخلين الشمر يجرح كلبها
عني بلغيها السلام كلهن ايامج ظلام
آه يزينب آه يزينب
ـــــــــــــ
نعيم ابو باقر الساعدي

(موشح)

انكسر ضلع الرسول وصابوا لعتره
والي يكسرون ضلعه ابكل نفس عصره
يعيني اجري ابحزن لمصيبة الزهره
اصرخ يا دمعنه الزهره مضلومه
ـــــــــــــــــــــــ
مظلومه الزجيه وتشهد الاحزان
وتشهد كل صلاه مرفوعه بالآذان
اشعجب بيت النبي بيه تلتهب نيران
واركان العداله اشبيها مهدومه
ـــــــــــــــــــــــ
انعصر ضلع الهدايه وصوبه المسمار
انظلم باب الوحي ابيوم اشتعل بالنار
وكع محسن شيد وندري شنهي الصار
انخسف صدر الطهر من نزفت ادمومه
ـــــــــــــــــــــــ
لنكسر ضلع الامامه وبالحقد معصور
وعلى باب النبي تاج العدل منحور
ابتدت من عدها عملة كربلا وعاشور
ضل يجري الدمع وايسولف اهمومه
ـــــــــــــــــــــــ
من ذاك الوكت ذبحو رضيع احسين
وابجرف الشريعه انكطعن الجفين
انكتب عاشور حزنه ابلوعة الباجين
مشت زينب سبيه ابحسره مهضومه
ـــــــــــــــــــــــ
انسبت بنت النبي من يوم حرك الباب
واحقاد السقيفه اتوضح الاسباب
دمع الشيعه من ذاك الوكت سجاب
انختم كلب الموالي ابحسره من يومه
ـــــــــــــــــــــــ
من يوم السقيفه اللوعه ضكناها
وعلينه ابكل زمن لمت رزاياها
طفوف وكربلا وطعنات جبناها
ابحزن ليل المصايب لملم اغيومه
ـــــــــــــــــــــــ
وي دمع الزجيه الشيعه تجري ادموع
من ذاك المصاب الشيعي ضل مفجوع
يضل صوت النحيب ابكل زمن مسموع
والحسره ابمصاب ولوعه مرسومه
ـــــــــــــــــــــــ
صار النه الحزن ثوب ودمعنه اوشا
وصبح سيف الظلم والنايبه الذباح
على اجفوف الغدر دمنه ابسهوله انباح
نحور من الذبح تلكاها مرسومه
ـــــــــــــــــــــــ
عهد للزهره من دمنه النزف صغنا
ما ننسه الضلع واحسين ما ننساه
عهدنه ويه الزجيه ابدمنه خطيناه
لمن يضهر المهدي ويحل يومه
ـــــــــــــــــــــــ
نعيم ابو باقر الساعدي

قالَ الرسول روحي البتول
يؤذيني من آذاها كيفَ غداً يلقاها
ـــــــــــــــــ
هالرواية اتواترت - من الفريقين انروت
كلها موثوقه الروات الي رووها
مسنده الرب السمه – الهادي كال بفاطمة
الزهرة روحي والصحابة الأيدوها
بيّنة ومو مبهمة – معنى واضح نفهمه
يعني مــو اسلام ذوله الروعوها

الجان النبي ايشمها ويبوس اديها
يدري المصايب تنكتب عليها
والبابُ كان رَمز الأمان
تباً لمن أرداها كيف غداً يلقاها
ـــــــــــــــــ
كل رسول ابدعوته – اصحابه تحفظ عترته
بيهم ايشوفون نوره المنها رايح
بس محمد أمته – عدها ثار ابعترته
بس رحل ســـــووها مـــن بعده مذابح
ناس باعوها الذمم- والعلى داره هجم
دين ما عــــنده فقـــط دينه المصالح
كالوله خلف الباب بنت الهادي
كلهم وإن اعصرها جداً عادي
إبن الخنا لما دنى
بنت النبي ابكاها كيف غداً يلقاها
ـــــــــــــــــ
نزعت الناس الشيم – صاحت الزهرة ابالم
كومي يا اسماء وينج سنديني
ضلعي احس بيه انكسر- ومحسن اوياي انعصر
عمداً ابسمارهم ذبحو جنيني
ضمي دمعج والحزن – وانه اضل بسكوت اون
لان ما اريدن علي يسمع ونيني
ما اريد ابو زينب يشوف ادموعي
لمن يغسلني يشوف اضلوعي
كان المصاب يوم العذاب
تعسا لمن ادماها كيف غداً يلقاها
ـــــــــــــــــ
حادثة باب الألم – طف مصغر وانرسم
وجان للطف الجبير اول بداية
بيها نيران وجرح- الطفل الاول ينذبح
صرخة الايتام تتحول مناية
هنانه سطره اعلى الوجن- هناك سوط اعلى المتن
اتمثلت بادوارهن صورة سبايه
يالمهدي يوم الباب طف الثاني
بس اختلاف البيه اسم الجاني
في كربلاء عم البلاء
قد مثلو بطه كيف غدا يلقاها
ـــــــــــــــــ
باجر ابيوم الحشر – محكمة الكل البشر
والشهود اضلوع مكسورة ومناحر
يرجع الخان النبي- والخذه اعياله سبي
والخيول الداست اطفال ابحوافر
ومن تجي ام الحسن- جايبه اجفوف ابصحن
اتصيح يارب ثار ابو فاضل اناطر

يبجي النبي وابرسه ماكو اعمامه
واحنه النكون ابها العزى لطامه
يوم الحساب عاد المصاب
وقدمت شكواها كيف غداً يلقاها
ـــــــــــــــــ
ابو باقر الساعدي

(فزاعية)
يا رسول الله محمد
يل مصابك يوم الاسود
يا رسول الله
يا رسول الله
ــــــــــــــــــ
يا شهيد المات بالسم بيك صابو فاطمة
فجعو العترة بمصابك هالعصابة المجرمة
غابت انوار الرسالة وغيمت ظلمه السمه
يا رسول الله المصايب تدري ضلت قائمة
لعن الله المنافق والايادي الظالمة
جمرة مصابك بعدها لهذا يومك مضرمه
جمرتك ما يوم تبرد
يل مصابك يوم الاسود
يا رسول الله
يا رسول الله
ــــــــــــــــــ
الكون لابس ثوب الاسود محزن اعلى مصيبك
غابت انوار الرساله ابيوم شالو جثتك
ونزل جبرائيل ناعي ويجري دمعه الفركتك
طافت اشباح النوايب يا الرسول بأمتك
واجتمع حقد السقيفه وطلعوه ابضعتك
والاكلوب ابنار تلهب يبو الزهره نادتك
تدري كسرى اليوم عيد
يل مصابك يوم الاسود
يا رسول الله
يا رسول الله
ــــــــــــــــــــــ
ياجرح يفتح مصايب يالنبي وما خلّصن
والاكلوب ابيوم فكدك يل الرسول اتصوبن
جينه بدموع المصيبه انواسي كلب ام الحسن
شفنه دمعات النوايب للسمه ويانه جرن
تشب جمرات اعلى فكدك يالرسول وما طفن
ماتوفي دموع عيني شما بجيتك لو عمن
حزنك بكل يوم يشتد
يل مصابك يوم الاسود
يا رسول الله
يا رسول الله
ـــــــــــــــــــــ
اظلم الكون ونجومه والكواكب اظلمت
والسنن ساعة مصابك يالرسول اتصوبت
بعدك الزهره غريبه وللمصيبه اتحزمت
عالوجن دمعتها تجري وبالاحزان اتيتمت
صارو والادك يتامه اليوم دمعتهم جرت
حيدر الدمعات زاده ونارحزنك ما طفت
والظلم بعدك تسيد
يل مصابك يوم الاسود
يا رسول الله
يا رسول الله
ــــــــــــــــــــ
يا نبي المبعوث رحمه سيدي فراكك صعب
نلبس اسود للمصيبه ابمجلسك دمعة تصب
نار فكدك يا نبينه اليوم تجوي ابكل كلب
بعدك نعيش ابأ لمنه والكلب يطفى ويشب
ننتظر طلعه بدرنه وعين تربي اعلى الدرب
ابفكدك اتغير وضعنه وصاح لاجلك كل محب
جن سن كل ساعة تنعد
يل مصابك يوم الاسود
يا رسول الله
يا رسول الله
ــــــــــــــــــــ
نعيم ابو باقر الساعدي

يا مظلوم يا مسموم
يا بو الزهرة
ـــــــــــــــــــ
يابو الزهره العالم ينحب
والدين ابهااليله امصوب
نار امصابك ظلت تلهب
يا مسموم فراكك يصعب
يا مظلوم يا مسموم
يا بو الزهرة
ـــــــــــــــــــ
ظلمه الكون وجهه اتغير
شخصك للاسرار المصدر
نور الدنيا اليوم اتكور
ينحب لمصابك ضل حيدر
يا مظلوم يا مسموم
يا بو الزهرة
ـــــــــــــــــــ
سر الاسرار ومعناها
جثتك ياكبر الغطاها
والأمه اشتدت بلواها
لجمة فكدك ما ننساه
يا مظلوم يا مسموم
يا بو الزهرة
ــــــــــــــــــ
بعدك جم ظيم المر بينه
كل يوم وفتنه اتمر بينه
ايتام خلافك ظلينة
وابلوعه فاكد نادينه
يا مظلوم يا مسموم
يا بو الزهرة
ــــــــــــــــــ
من بعدك هالناس بظلمه
شنحجي وشنسولف يالجمه
من بعدك خانتنه الأمه
والمجروح ايلوج بهمه
يا مظلوم يا مسموم
يا بو الزهرة
ـــــــــــــــــ
نعيم الساعدي

(فزاعية)
لعن الله الذي سم الرسول
ـــــــــــــ
مو حرام اللعن للرايد جواب
بيه جواز ونازل بنص الكتاب
اصلن اليعلن الظالم بيه ثواب
والتسم الها نبي اتشوف العذاب
ولهذا بكل زمن نبقه نكول
لعن الله الذي سم الرسول
ـــــــــــــــ
لعن الله الخبيثة الظالمه
فجعت حسين وحسن هالمجرمه
خلت ادموع العرش تنزل دمه
شايله احقاد وبغض ضد فاطمه
فرحت بيوم انكسر ضلع البتول
لعن الله الذي سم الرسول
ــــــــــــــ
واضح القران كل حجيه عدل
واليدور عالحقيقة ما يزل
گال ان مات محمد او قتل
يعني قصه اغتياله تنعقل
هاي آية وشوف اسباب النزول
لعن الله الذي سم الرسول
ـــــــــــــــــ
صابت الزهره وعلي بهاي المحن
كل هدفها تفجع حسين وحسن
تالي نص الليل ابو الزهرة اندفن
والمصايب من سقيفتهم بدن
هالحزن للموت باقي ما يزول
لعن الله الذي سم الرسول
ــــــــــــــ
تشرح اخبار الرواية بمذهبي
هالجريمة امخططه لقتل النبي
مشترك بيها اللقيط الناصبي
ينفذون احفادهم دور السبي
قطعة من كلب النبي اتدوسه الخيول
لعن الله الذي سم الرسول
ــــــــــــــــ
نعيم ابو باقر الساعدي

(موشح)

مجالسنه بدمع لاجلك بنيناها
ومآتم كل سنه الجرحك عقدناها
يا مسموم يابو الزهره
يا مظلوم يابو الزهره
ـــــــــــــــــــــــــــــ
بدت كل المصايب يالنبي بفكدك
وبقينه بها الحزن ياسيدي بعدك
يباب الله الوسيع وتنطي اليكصدك
اذا قامت قيامه نحتمي بسدك
باجر عالخلك بالخدمه نتباها
يا مسموم يابو الزهره
يا مظلوم يابو الزهره
ــــــــــــــــــــــــــ
بدينه اول مصاب امصاب ابو الأمه
سنه اندارت علينه واحنه بالخدمه
وعقدنه العترتك لجمه بعد لجمه
كضو بين الذبح بين الجرع سمه
مصايب عترتك بالهم رويناها
يا مسموم يابو الزهره
يا مظلوم يابو الزهره
ــــــــــــــــــــــــ
نضل كل ما يمر امصابك انذكره
ونواسي بها المجالس فاطمة الزهرة
بغيابك يا محمد ظلموا لعتره
بدت اول رزية الباب والسطره
تعازي العترتك دمعه رفعناها
يا مسموم يابو الزهره
يا مظلوم يابو الزهره
ــــــــــــــــــــــــ
عهدنه امسجلينه بدمعة ايتامك
تمر بينه السنين ونبقى خدامك
وتضل تجوي بجرحنه جمرةآلامك
نكضيها ابحزن وابلوعه أيامك
مصيبه ابدمعه احبابك كتبناها
يا مسموم يابو الزهره
يا مظلوم يابو الزهره
ــــــــــــــــــــــــ
يبو الزهره اعلى بابك هلت الدمعه
نعشك بالنوايب والبجي انشيعه
يتامه احبابك ابها الليله مجتمعه
على امصابك عهد للغايب انرفعه
نموت اعلى العقيده وما نسيناها
يا مسموم يابو الزهره
يا مظلوم يابو الزهره
ــــــــــــــــــــــــــ
نعيم الساعدي

سممو جبد الرسول
صابوا لزهره البتول
والحسن واحسين- صارو بعدك ايتام
ــــــــــــ
نزل جبرائيل ناعي والوحي الليلة انختم
كل نبي ومرسل حزين ويعتصر كلبة الالم
حيدر الكرار يمك ينحب وحيلة انهدم
والزجيه اتصيح بويه الدنيا ما بيها طعم
لاجللك العالم نعى
والاكلوب امصدعه
يا رسول الله بغيابك ظلمة الايام
والحسن واحسين- صارو بعدك ايتام
ــــــــــــ
حيدرة الكرار ينعى ودمعه بلل شيبته
راسك بحضنه وتنازع ظلمه بعدك دنيته
السممت جبدك خبيثة اليوم صابت جبدته
فاطمة الزهره تشوفه اشلون صبت دمعته
نادته يا بالحسن
باجر اشوف المحن
لمن ايطبرون راسك ناس ظلام
والحسن واحسين- صارو بعدك ايتام
ــــــــــــ
يا فجيعه المنها ظلمه الكون دمعاته جرت
غاب نورالدنيا عنها والكواكب احزنت
فاطمة الزهرة بغيابك يالرسول اتيتمت
غابت انور الرسالة اليوم وياك انطفت
والاحسين بعبرته
يواسي اخوه ابدمعته
فاطة بفكدك حزينه وشافت الالم
والحسن واحسين- صارو بعدك ايتام
ــــــــــــ
الدنيا لوداعك كئيبة وحزنت انجوم السمه
والشمس ساعه مصابك يبو الزهره مضلمه
والعرش ناح اعلى فكدك صارت ادموعه دمه
بالالم هاليله ضلت تبجي لاجلك فاطمه
بويه جرحك بالكلب
ظلت ادموعي تصب
راح اضل انعى لمصابك جفني ما نام
والحسن واحسين- صارو بعدك ايتام
ــــــــــــ
يمك الزهره حزينه ادموع تجري الفركتك
وانته بفراش المنيه ابحزن نادت بضعتك
بويه من بعدك غريبه اشلون افارك بسمتك
غاب طيف الفرح مني ابيوم شالو جثتك
بويه صوبني الدهر
من متت ظهري انكسر
ضاعت اليوم بغايبك كل الاحلام
والحسن واحسين- صارو بعدك ايتام
ــــــــــــ
نعيم ابو باقر الساعدي

اول جريمة قتل اخر نبي
جانت بداية ذبح نحر وسبي
فاتحة رزايه بكربله النهايه
ـــــــــــــ
أول دليل الينذكر قرأن من تقرونه
آياته جانت واضحه أنّ النبي ايقتلونه
والدخلو الدين بغصب جان النبي يكرهونه
جانت الخطة لمقتله من بيته الي ايسمونه
وي كسرى والروم تحالف ينعقد
كون الينفذ عليه شايل حقد
جانت البداية بكربله النهايه
ـــــــــــــــــ
بالدنيا مغروره النفس دنيا الوهم خداعه
ابليس يؤمر والامر لازم تنفذه اتباعه
والخالفو نهج النبي لابليس عدهم طاعه
ينكسر ضلع لفاطمه خططو ذيج الساعه
بأمر السقيفه الخبيثة المجرمه
كسرو ضلعها والوديعه فاطمة
بغدره عدها غايه بكربله النهايه
ـــــــــــــــــــــ
تنقل روايات بسند هذا الخبر مضمونه
بيوم النبي شابك علي وضلت تفيض عيونه
من شافه حيدر هم بجه واهل السمه يشوفونه
كله امن اموتن يا علي هم راسك يطبرونه
الله العينك عليهم يا علي
من بعد موتي بفتنهم تبتلي
وجانت الرواية بكربله النهايه
ــــــــــــــــــــ
جان الحسن كل ما يجي يشتاك يشبك جده
من حلكه يشتمه يضل غايه النبي هم عنده
من هاي عرفت فاطمه ينمرد بالسم جبده
نفس الايادي السممت جده عليه تتعده
باحضان كسرى ارتمو اهل الفتن
عدهم طبيعي يسمون الحسن
فاجعة ومنايه بكربله النهايه
ـــــــــــــــــــ
جان النبي كل ما يجي ويدخل لبيت الزهره
يشبك على حسين ويضل يبوسه ويشمه بنحره
لمن تساله فاطمه يضل مختنك بالعبره
صعبه يكلها بكربله بالخيل ينرض صدره
من فاطمه اتشوف دمعته السايله
عرفت ابنها ذبيح بكربله
عالشريعه رايه بكربله النهايه
ــــــــــــــــــ
جان بسقيفتهم شمر بس يختلف عنوانه
ينازع على فراشه النبي وهوه جمع اعوانه
يذبح حسين بكربله وبخيامه شب نيرانه
من عنده جان المقترح يمشن سبي نسوانه
نفس الذي كال على الهادي هجر
بالطف لكيناه لبس ثوب الشمر
مثل الغوايه بكربله النهايه
ـــــــــــــــــ
نعيم ابو باقر الساعدي

ليش الكبر يتخير الزين
يوميه يفجع كلب الاحسين
مكسور ظهره بدفنته
صاحت يزينب دمعته
راح الحسن راح - راح الحسن راح
ـــــــــــــ
ثاري الاخو احزام الضهر واخوانه بيه تتباها
بالشده من يوكف سند يا وكفته اشمحلاها
والخالي بيته امن الزلم الموته يتمناها
ياحسين دنياك اشكثر صبت مطر بلواها
ظلع امك اخضر بعده ما طاب
والطبره منها ابكلبك اصواب
هذا الحسين وغربته
صاحت يزينب دمعته
راح الحسن راح - راح الحسن راح
ـــــــــــــ
كل ميت ايضن يندفن يم اهله اليحبونه
ولو جان من نسل النبي الناس يحترمونه
ليش انته نعشك يالحسن صار بنبل يرمونه
مرفوض صاحو هالجسد يم النبي اتدفنونه
يا ميت المثلك فلا صار
يرمون نعشه الناس بحجار
بالكلب ضلت جمرته
صاحت يزينب دمعته
راح الحسن راح - راح الحسن راح
ـــــــــــــ
من ابعيد ابو فاضل وكف بعيونه يخز ر بيهم
واحسين شافه ابها الوضع شبل الفحل يفنيهم
كله اعلى كيفك يا الابي اهل الغدر خليهم
باجر يجون الكربله وامجادك اتراويهم
عباس كال انطيني ساعات
هالسيف اجربه بها الحثالات
بكربله سيفك ساعته
صاحت يزينب دمعته
راح الحسن راح - راح الحسن راح
ـــــــــــــ
افراك الاخو يكسر ضهر تنزف تضل لجماته
والعاف اخوه ابمكبره تفرح تضل شماته
دفان اخيه اشما يصب لمصاب اخوه دمعاته
ما تبرد وتلهب تضل وسط الكلب جمراته
هذا الحسين بكلبه ملجوم
مغدو اخيه ومات مسموم
تكسر الخاطر حالته
صاحت يزينب دمعته
راح الحسن راح - راح الحسن راح
ـــــــــــــ
صعبه البشر من ينغدر ويضحك يضل فجاره
والناس شيمتها المكر جف الحقد غداره
من مات مسموم الحسن مهجوره ضلت داره
وانتاني ابو صالح يجي يا يوم ياخذثاره
وايصيح هذا المات مظلوم
فوك المصايب كبره مهدوم
ننطر المهدي ورايته
صاحت يزينب دمعته
راح الحسن راح - راح الحسن راح
ـــــــــــــ
نعيم ابو باقر الساعدي

ابيت الحسن نوح ونحيب
لا يوم كيومك يا غريب
ـــــــــــــــــ
مصايب منها راس البمهد شيب
ولا يطفى الجمر ضل كل وكت يلهب
مصيبه عن مصيبه اشما جرت اصعب
مثل جبد الحسن جبد النبي تصوب
نح الحزن ون الحبيب
لا يوم كيومك يا غريب
ـــــــــــــــــ
كعد يم راس اخيه ينوح ابو الاكبر
تشب حسراته وي نار الجبد تسعر
يبو القاسم مصابك بالكلب أثر
يخويه بفركتك جرح الحزن يكبر
صاح الحسن يوم رهيب
لا يوم كيومك يا غريب
ــــــــــــــــــــ
نظر ليه الحسن والجمره بيه تلهب
يبو السجاد اريدك خويه ليه اكرب
مصابك من مصابي يالغريب اصعب
يعطشان وغريب وجبدك امصوب
فوك الترب خدك تريب
لا يوم كيومك يا غريب
ـــــــــــــــــ
انه امن اذكر محنتك يالغريب احتار
يبو الاكبر مصابك لا جره ولا صار
تواسيني بمصابي لو رمتني اقدار
تشب ناري الخيامك من توج النار
دامي الحر جسمك سليب
لا يوم كيومك يا غريب
ـــــــــــــــــ
سمع صوت الغريبه الصوباها البين
اجت زينب لخوها بحركه تجري العين
همس بهداي ياخويه ينور العين
الطشت غطيه اجت زينب يخويه احسين
فوك الرمح راسك خضيب
لا يوم كيومك يا غريب
ـــــــــــــــــ
تصد زينب لخوها وبالجرح لجمه
وكلب ذاب ابونينه ويغرك ابهمه
تشوف احسين يطويه الحزن يمه
قرت صورة حزن بعيون ابو اليمه
جرح السبي لا ما يطيب
لا يوم كيومك يا غريب
ــــــــــــــــــــ
نعيم ابو باقر الساعدي

نت المعزى سيدي يا صاحب الزمان
ـــــــــــــ
شكثر كلبك بعد يابن الحسن يحمل
عشت عمرك غريب وغربتك تكتل
اضل انحب عليك امن الحزن ما امل
ولا تلكه المصاب ابجرحي متبدل
اسولف لك مصايب والكلب يجفل
شفت جبد الحسن ضل مدمعك يهمل

انت المعزى سيدي يا صاحب الزمان
ـــــــــــــــ
نواسيك بكلب يلهب يمهدينه
جرح سابع صفر جمرة وتجوينه
نصبنه المجلس وكلبك يحس بينه
على مصاب الحسن كثرت بواجينه
بدمعنه الما نشف نكتب تعازينه
نريد ابدفترك تكتب اسامينه

انت المعزى سيدي يا صاحب الزمان
ــــــــــــــ
الجرح فوك الجرح يالمهدي بغيابك
ولا فرحه بجذب شفناها بكتابك
يبو دموع الحمر ما يخلص مصابك
ولا سهم اليصيب العتره ما صابك
شفت ناعي المصيبه ايلملم احبابك
مثل واحد يتيم ابدمعه دك بابك

انت المعزى سيدي يا صاحب الزمان
ــــــــــــــــ
مصابك ما يطيب ابلطمه وابدمعه
يحس بيك الموالي اشما لطم ضلعه
شفت جبد الحسين والسم بده يكطعه
كعد يم راسه أخيه حسين وايودعه
همس صوت الحسن لازينب اتسمعه
يخويه حسين جسمك ياهو اليشيعه

انت المعزى سيدي يا صاحب الزمان
ــــــــــــ
جنت يم الحسن من غمضت اعيونه
واهل بيت الوحي نورك يعرفونه
تسولف دمعتك عمك يشيعونه
وشفت نعشه بسهم كامو يضربونه
تذكرت الغريب الي يذبحونه
جسد فوك الرمل عاري ويسحكونه
انت المعزى سيدي يا صاحب
____
نعيم أبو باقر الساعدي