Ўзбекистон тумани ҳокимлиги

“Қудашобод” маҳалласи еттилиги янгиланган масканда иш бошлади

Ўзбекистон туманидаги “Қудашобод” маҳалла фуқаролар йиғини ҳудуддаги таъмирланиб, қулай шароитлар яратилган янги масканда иш бошлади.

Ташкил топганига уч йил бўлган ва 2 минг 450 нафардан зиёд аҳоли вакиллари истиқомат қиладиган маҳалланинг идораси шу кунга қадар замон талабларига мос бўлмаган шароитдаги бинода фаолият кўрсатиб келаётган эди.

Ҳудудда бўш турган масканда йиғин учун бинолар ажратилиб, ҳомийлик маблағлари асосида таъмирланди. Маҳалласи еттилигини муносиб иш олиб бориши учун зарур барча шароит яратилди.

Бугун қудашободликлар ушбу хайрли ташаббус ижобати муносабати билан янги масканда жам бўлдилар. Тадбирда туман сектор раҳбарлари ва жамоатчилик иштирок этди. Унда сўзга чиққан туман ҳокими Шерзоджон Юлдашев сўнгги йилларда маҳалла фуқаролар йиғинлари жамиятнинг қуйи бўғини сифатида барча инсоний фазилатларни кенг намоён этиб, оилаларда тинчлик-тотувликни таъминлайдиган, жиноятчиликнинг олдини олиб, фаровон ва обод турмушни кафолатлайдиган серфайз гўшага айланганини алоҳида таъкидлади.

Маҳалла фаолларининг жонкуярликлари, фидоийлиги алоҳида эътироф этилиб, эзгу амаллар бардавом, обод масканлар кўпайишига тилаклар билдирилди. Яхши ниятлар билан дарахт кўчатлари экилди.

@uzbaxborotxizmati

Ўзбекистон туманидаги мактабгача таълим ташкилоти ташаббус натижасида замонавий ва кўркам қиёфа касб этди

“Ташаббусли бюджет” лойиҳаси фуқароларнинг ижтимоий фаоллигини ошириш ва жойлардаги муаммоларни қисқа муддатда ҳал этишнинг самарали ечими сифатида хизмат қилмоқда.

Ўзбекистон тумани “Даштхасан” маҳалласидаги 37-давлат мактабгача таълим ташкилотининг бино-иншоатлари ҳам айни дастур доирасида мукаммал таъмирланиб, фойдаланишга топширилди.

Шу муносабат билан бугун бўлиб ўтган тадбирда туман ҳокими Шерзоджон Юлдашев ва сектор раҳбарлари, вилоят мактабгача ва мактаб таълими бошқармаси ҳамда унинг тумандаги бўлими мутасаддилари, муассаса жамоаси, МТТ директорлари, маҳалла аҳли ва ота-оналар вакиллари иштирок этди.

1979 йилда қурилган ва ўтган давр мобайнида кўзга кўринарли таъмирлаш ишлари олиб борилмаган боғча инфратузилмасини яхшилашга оид илгари сурилган таклиф энг кўп овозлардан тўплаб, лойиҳа ғолиблигига эришди.

Бюджетдан ажратилган 1 миллиард 200 миллион сўмдан зиёд маблағ эвазига пудратчи ташкилот “Бешариқ идеал” масъулияти чекланган жамияти томонидан масканда таъмирлаш-бунёдкорлик ишлари амалга оширилди. Натижада таълим даргоҳи буткул янгича ва замонавий кўринишга эга бўлиб, унда таълим-тарбия олувчи 230 нафар болалар ва устоз-мураббийлар учун муносиб шароитлар яратилди.

Тадбирда сўз олган туман раҳбари барча йиғилганларни янгиланган муассаса билан самимий қутлади. Мазкур эзгу ташаббус атрофида бирлашиб, юрт ободлиги учун ҳисса қўшаётган барча фаолларга миннатдорлик билдирилди.

Шу куни “Яшил макон” умуммиллий лойиҳаси доирасида муассаса ҳовлисига эзгу ниятлар билан мевали ва манзарали дарахт кўчатлари ҳам қадалди.

@uzbaxborotxizmati