د.تَيسِير الصّادِق🔻|مُمكن نصلّ على الحبيب!

صحبتنا حفظت من القرآن ٢٤ جزء اللهم بارِك ♡

الفترة الأخيرة حصلَت ليها ظروف صعبة كتيرة، هجوم المليشيا على قريتهم
ومرض أمها وأخواتها بحُمى الضنك، ووفاة أعمامها ..

رسّلت لَي
قالت ما قادرة تراجع ولا تحفظ الستة أجزاء الأخيرة!

الكهرباء والموية قاطعين بالشهور
والخوف من المرض والقلق على أهلها وكم حاجة تانية ..

حاولتَ أهوّن عليها، قلتَ ليها الحمدلله إنك
بتحفَظي
وبديتي = القرآن صاحِب وأنيس
خاصة في الظروف الصعبة اللي زي دي

الحِفظ ومُراجعة وتثبيت الآيات بنقدَر نصل ليهم
بإذن الله
بِكثرة التّكرار، و دي زاتها نِعمة بالمناسبة لأنك بتاخدي أجر
وثواب على كُل حرف بتقريهُ ♡

القرآن عزيز ..
ندّيهُ أحسن وأفضل
أوقات يومنا = حنشوف البرَكة والسعادة وراحة البال
بإذن الله تعالى

سبحان الله
بعد كلامي معاها دخلتَ الفيسبوك لقيت الصور دي قِدّامي مع الخبَر الجميل ده
ماشاء الله تبارك الله 😍

تخريج ٣٤ من حَفَظة كتاب الله
بـمركز التيجان لتعليم القرآن الكريم ، فرع الضعين .

طوالي رسّلتُه ليها عشان تتشجّع شويّة!

جيت لقيتها مرسّلة لَي تسجيل صوتي،
قالت :
جبتَ مصحفي وناديت أختي عشان نسرُد سوا

الإنشغال بالقرآن نعمة ،، وما حأقوم من هنا إلا
وأنا مُراجعة
خمسة أجزاء بإذن الله 😁

يخوانّا مهما حصل
إيَّاك ثم إيَّاك ..
تتنازل عن أمنِيتك بحفظِ القرآن ♥️

ومهما تتعَب
وتحصل ليك حاجات تشغِلَك، إتذكّر = البِحب ربنا ما بتوقّفوا الظروف!

وكل تعب في سبيل الله نهايتُه جنَّة
إن شاء الله ♡

#القرآن
#السودان

فاللهم إني أسألُك إتقان القرآن والعمل بالقرآن وصُحبة القرآن، اجعلني ممّن تعلّم القرآن وعلّمَه، أن تجمّل أخلاقي وحياتي بالقرآن، وتُكرمني وكلّ مَن قال آمين كرماً يتعجّب له أهل السماء والأرض♥️

ممكن نصلّ على الحبيب!
#تيسير_الصادق
🌱

الحمدلله الذي بِنعمته تتمّ الصالحات 😍

الجيش يحرّر
الحاج عبدالله، مهلة، الطلحة، الكمر الجعليين
قرية سابع دليب وقرية أبو سقرة 🔥

عُقبال كل السودان بإذن الله
{ نصرٌ مِن الله وفتحٌ قريب }

ممكن نصلّ على الحبيب !❤️
#السودان

" كنزٌ يدوم وحياةٌ تطِيب بإذن الله " ♥️

قالت :
رجب الفات أختي رسلت لي مقطع لواحد من المشايخ
بيتكلم عن فضل الإستغفار ..

حسيت إني مقصّرة !
ذنوبي كتيرة وإستغفاري قليل شديد

قلت خلاص من هنا لحدي رمضان أثبّت ورد إستغفار يومي
وبديت أستغفر بالسبحة عشان أركّز

شوية شوية لقيت نفسي بستغفر
طُول اليوم ماشاءالله = وأنا بنضف أو بساعد أمي في المطبخ
وحتى لمن أقعد مع ناس لساني بكون شغال إستغفار ♡

في يوم من الأيام أبوي وقع وكسر الحوض بتاعه وفي المستشفى
كنت معاه أنا وأخوي ، المساء لمن صليت العشاء
اتذكرت إني
ما استغفرت الليلة زي كل يوم !

حزنت قلبي وجعني
قمت طوالي دعيت:
يارب اشفي أبوي ووفّقني لذِكرك وطاعتك

لمن نمت
شفت رؤيا في النوم إني واقفة في الروضة الشريفة
وقدامي الرسول ﷺ
وقال لي :
لا تحزني، فقد غفر الله لك 😍

#الإستغفار

فاللهمّ اغفر لنا وارحمنا، عافِنا برحمتك واعفُ عنا، أن ننال في عُمرنا ما نتمنى، فتدثّرنا بالنعيم وتؤتنا الهِبات والدرجات العالية .

#أوتروا
ممكن نصلّ على الحبيب !♥️
#تيسير_الصادق
🌱

الحوقلة ♥️

صحبتي ماشاءالله حامل ومستقرة في الخليج
وكانت عايزة تسافر
لناس أمها في أمريكا عشان عايزة تولد معاهم ..

قدّمَت عشان تمشي المقابلة في السفارة
وكل الناس الحوليها
قالوا ليها
ما تتعبي ساي وتمشي لأنو ما حيدّوك التأشيرة!

كانت بتقول ليهم :
ربنا قادر يخلّيهم يدّوني
وبإذن الله حاخد التأشيرة وأسافر ♡

أمها قالت ليها
قولي الحوقلة
"لا حول ولا قوة إلا بالله" وانتي متوكّلة على ربنا

اللهم بارِك
بدت الحوقلة بدون عدد ،، من مية لآلاف المرات كل يوم

سبحان الله مشت المُقابلة
وأدّوها التأشيرة من أول مرة، وحاليّاً مع ناس أمها
ولدت والبيبي عُمرها ٣ أسابيع 😍

..

قال عنها النبي ﷺ لأبي موسى الأشعري : "ألا أدلّك على كنز من كنوز الجنة : لا حول ولا قوة إلا بالله"

#الذكر
#الحوقلة

فاللهمّ أخرِجني من حولي وقوّتي إلى حولِك وقوّتِك ، اجبر خاطري ويسّر أمري وأصلِح برحمتك حالي ، أن تطِيب نهايتي و فأخرج من الدنيا وأنت راضٍ عني ومستقرّي الجنة.

ممكن نصلّ على الحبيب !♥️
#تيسير_الصادق
🌱

صحبتي بتحكي لي عن أمها وأبوها ..
قالت أمبارح
زواجهم تمّ ٣٥ سنة

اللهم بارِك ♡

وكل واحد فيهم قعد يحكي عن المواقف الحلوة
الشافها من الطرف التاني

أبوي قال :
اتزوجت أمكم وكانت أصغر زول في بيتهم
وكنا في غُربة وبصراحة كنت خايف ما تقدر
تشيل المسؤولية 😁 لكن ماشاءالله من يوم اتزوجتها ما مقصّرة في واجبها، والأهم إنها محترمة صلّاية صوّامة وقوّامة

بعد ما ولدَت أخوانكم الكبار الإتنين، حصل لينا
حادث حركة!

الحمدلله هي وأخوانكم ما حصل ليهم حاجة
وربنا أراد
إنو أنا أتصاب ورجلي تتقطع لحدي الركبة ..

الحصل إنو أمكم عملت المافي زول عملو
ساندتني
ووقفت معاي
في رحلة مرضي واهتمت بعلاجي كلو
وفوق ده ساعدتني في الشُغل

وبدت شغل خاص بيها من البيت لأول مرة في حياتها
ومعاها طفلين صُغار!

كانت مجتهدة شديد ماشاءالله، ولمن أقول ليها المسؤولية كترت عليك
بتقول لي :
عشان ما نحتاج نَمِد لي زول يديننا !

لا كلّت لا ملّت ولا سمعت منها كلمة شينة💕

أختي الصغيرة قالت لأبوي :
أول مرة أسمع التفاصيل دي يا أبوي، أمي الله يديها العافية ما قصّرت معاك أبداً ..

أمي ردّت ليها:
أبوكم ما قصّر معاي قبلها
من يوم اتزوجني وأنا عايشة زي الملكة

ماشاءالله والحمدلله

طلباتي بلقاها قدامي قبل ما أقولها
وعايشة مرتاحة وسعيدة ومستورة

أبوي قعد يتبسّم
وقال لينا:
لله الحمد اتوفّقت أزرع الخير
أيام العافية

تصدّقوا
كل الناس مفتكرانا عايشين بدون هُموم ومشاكل!

لكن القصة كلها
إننا عايشنّها بدون أذى، محترمين بعض وخاتّين مخافة الله قبل أي حاجة تانية ♡

#الزواج

فاللهم آتِ القلوب لخير مَن يرعاها، أن تسعد في جوارٍ يزيدها حُبّاً وألقاً، فتنتثر السعادة حتى تملأ البيوت وساكِنيها.

ممكن نصلّ على الحبيب! ❤️
#تيسير_الصادق
#بيوت_متطمنة
💕

البرد اليومين ديل ذكّرني قصة حصلت لي
في الشتاء الفات!

كان عندي ألم في ضُرسي شديد
وحجزت في عيادة الأسنان، لقيت أقرب مواعيد بعد أسبوعين
فتّشتَ كم عيادة ما لقيت ..

اها الضرس يوم صحّاني بالليل
و وجَعُه زي ما عارفين، حاجة كده إنما إيه 😁

أخدتَ مسكّن ولسه واجعني، جبت قرنفلة ختّيتها فيهُ وما عملت لي حاجة، عملت سيرش في النت لقيت مكتوب التوم بتاع الأكل ده بينفع!

وكلو ما نفع سبحان الله ..

فجأة ربنا وفّقني أتذكر الدعاء بأسمائه الحُسنى ♥️
طوالي قعدتَ أدعي

يا رحمن تيسّر أمري وتشفيني
يا رحيم ترحمني وتخفّف عني ألم الضرس
يا لطيف تلطُف بَي وتوفقني أتعالج في أقرب وقت

سبحان الله بعد دقائق بس = كل الألم إختفى!
ونمت الحمدلله

الصباح جاني تلفون من ناس العيادة وقالوا
في زول لغى موعده، لو حابّة ممكن أجي في زمنو وأقابل الدكتورة

بعد المكالمة سجدتَ سجدة شُكر لله

أدعوا بأسماء الله الحُسنى وألِحّوا، وخلّيكم واثقين إنه الدعاء
حيتحقّق بإذن الله 😍

#الدعاء

فاللهم يسّر لنا طاعةً تُحيِينا وغيّر حالنا لحالٍ يُرضيك، آتنا خيراً وجبراً وعافية، أن نؤتى أمانينا مع حُسن الخاتمة، فنسعد في الدنيا ونهنأ في الآخرة في أعلى الجنان.

#أوتروا
ممكن نصلّ على الحبيب! ♥️
#تيسير_الصادق
🌱

قريبتنا الله يديها العافية
عندها أمراض مُزمِنة ، ومع الحاصل ده الدواء جنبهم بِقى
ما بيتلَقي بسُهولة !

قالت لي :
جات بِنَيَّة صغيرونة دقّت الباب ، أحفادي فتحوا ليها الباب ،
قالت جيعانة وعايزة مُساعَدة أمها عيّانة ..

تحت مخدتي خاتّة قروش أدّاني ليهُم ولدي الصباح ،
قلت أدّيها منهم
تاني قُلتَ أحسن أديهُم ليها كلهم عشان تقدَر تعالِج أمها ، وبناتي ختّوا ليها أكلَت .

لمّن شالَت القروش و حسَبَتها
اتخلَعَت ونطّطَت عيونها ببراءة شديدة
وقالت لي :
ديل كُلَّهِن أشيلِن ؟!

قلت ليها :
أي يا بِتي ، ودّي أمك الدكتور واشتري ليها العِلاج ♡

اللحظة اللي طلعَت فيها البِنَيّة دي من باب بيتنا
اتصّل بي ولدي :
يا أمي أحمِدي الله وأشكُريهُ
لِقِيت الأدوية بتاعتِك كُلّها في صيدلية وحدة بعد ما قرَّبت أقنَع خلاص !

واتصّلَت خالتي قالت ليك :
عندِك قروش ناسياها عندها ، لمن ورّاني المبلغ
طلَع بالضبط
ضِعف اللي شالَتُه البِنَيّة قبل دقايق بس ، سبحان الله ♡
..

اللي بساعِد الناس
ربنا بسخِّر ليهُ اللي يساعدُه ، واللي بِرَضّي الناس ربنا برضّيهُ ويطمّن قلبه

وكلما تنفِق كلام جميل
وتعامُل طيّب وتجبُر الخاطِر ،، حتعيش مُرتاح وسعيد .

وكل شي بتقدِّمُه بتلقاهُ في واحد من دُروب الحياة
بإذن الله ♡

#الصدقة

فاللهمّ هذا قلبي وأنت تعلمُ حقيقته ، يسّر له الدروب التي تثقُل الموازين وتؤتِي الخيرات ، افتَح عليّ برحمتِك ما يُدخلني الجنّة ، راضٍ عني مُحقّقةً رجائي في آخرتي ودُنياي .

#أوتروا
ممكن نصلّ على الحبيب !♥️
#تيسير_الصادق
🌿🥀

يُحكى أنّه عاد لصلاة الفجر في وقتها وأذكار الصباح والمساء، حافظ على
صلاة الضُّحى وقيام الليل ..

كما عاد لوِرده القرآني وصدقة السِرّ 💕

لَزِم سورة البقرة، ووثّق عينه بِغض البصر
عن كلّ حَرام

فاصطلحت نفسه مع الله
وبدأت تنفك العُقد واحدةً تلو الأخرى!

خليها على صفحتك ،، ذكّر غيرك ،، في ميزان حسناتك

ممكن نصلّ على الحبيب!♥️
#القران
#سورة_البقرة

الليلة دي مُختلِفة ، عارفين ليه ؟!

أي عمل كنت بتعملهُ
قبل الليلة دي بِقى أتقَل في ميزانك بدخول رجب!

شهر رجب هو واحد من = الأشهر الحُرُم ♡

اللي ارتكاب المعاصي والذنوب فيها بتبقى أشد وِزراً وأعظم حُرمة من الأشهر العادية ..

ويُضاعِف الله فيه الحسنات ، عشان كده نجتهد ونحسن
ونكتّر من أعمال الخير :
الذكر ، بِرّ الوالدين ، الصدقة ، النوافِل ، صيام التطوّع ،
وكل الطاعات😍

وما ننسى نذكّر غيرنا ♡

فاللهمّ اغننا بك وطَمئننّا بقُربِك ورِضاك، أن تجبر خواطرنا وتيسّر أمرنا، وتُبارِك لنا في رجب وشعبان فنبلغ رمضان وأنت راضٍ عنّا .

ممكن نصلّ على الحبيب!♥️
#تيسير_الصادق
🥀..

أذكر درسًا للشيخ/محمد حسين يعقوب على قناة الناس، وكان يتحدث فيهِ عن مصارف الزكاة الثمانية، فتلا قوله تعالى: "إنما الصدقات للفقراء والمساكين.." الآية.

فأخطأ وعدّهم سبعةً فقط ونسي واحدًا، فأعاد الآية ثانية فنسي واحدًا آخر، فأعادها الثالثة فنسي واحدًا غير السابقين.. كلمّا تذكّر واحدًا نسي غيره.. فلمّا شقّ عليه ذلك قال: القرآنُ عزيزٌ لا يُغالب، وفتح المصحف وقرأ منه، فوالله لقد عدّهم من المصحف ناقصين واحدًا ولم ينتبه، وأكمل كلامه وهو لا يدري أنه أخطأ..

أخذتني الدهشةُ من ذلك جدًا ساعتها، وقلتُ في نفسي لعلها قِلّة مراجعة من الشيخ _حفظه الله_ والقرآن غالب نعم، لكنْ ما علاقة هذا بالمراجعة!.

تذكرت هذا الموقِف اليوم وأنا أُراجع سورةَ يوسف، فارتجت عليّ القراءة عند قوله تعالى: "واستبقا الباب.." الآية.. نسيت كلمة "واستبقا" تمامًا، أينعم متذكر المعنى جيدًا، وأنهما تسارعا إلى الباب، وأذكر كلمة "الباب" وبقية الآيات، لكني حاولت تذكّر كلمة "واستبقا" بكل ما أُتيتُ من ذاكرة= فعزبت عني ولم أهتدِ لها، فلم تطاوعني نفسي أنْ أفتح المصحف لأنظر فيه، وكان أخي بجواري فسألته _وهو لا يحفظ القرآن، لكنْ سورة يوسف كما تعلمون يندُر أنْ لا يحفظها أحد_ فقال لي: اقرأ وأنا أتذكرها، فقرأتُ ما قبلها وما بعدها فقال لي: "واستبقا" فجُنّ جنوني، ولِله في خلقه شؤون، وما كنتُ أحسبني أخرِم شيئًا من سورة يوسف يومًا من الأيام، ولو نُسِّيتُ القرآن كلّه!

وحينها تذكرتُ كلمة شيخي _حفظه الله_ ومعلمي القرآن وهو ينهانا عن الزهو بحفظ القرأن والتبجح بذلك والافتخار به، ويدعونا للتخلي عن الحول والقوّة في الحفظ..

فقال: لو سألتني هل تحفظ القرآن _وهو حفظه الله المصحف في الحفظ_ لقلتُ لك: إنْ شاء الله، فالله أعلم رُبّما أنساه كله وأنا أُحدّثك الآن.

فاللهم علمنا منه ما جهلنا وذكرنا منه ما نُسينا.. آمين.

-لقائله

ممكن نصلّ على الحبيب!♥️
#القران

صحبتي ماشاء الله عليها بترسّل لبنات جيرانهم
تذكير بصيام
الإثنين والخميس مع الأيام البيض ❤️

يوم حصل بينهم سُوء تفاهم وكان يوم السبت ، يوم
الأحد رسّلت ليهم تذكير الصيام عادي ..

دقايق بس والباب دقّ
جوها في البيت شايلين كيك وزلابية ، قالوا ليها :
رسالتك اللي جات في مواعيدها
وما لغيتيها خلّتنا نجي نتفاهم معاكِ والغلطان يعتذر
للتاني ، المحبة في الله
اللي بيننا ما بتستحِق تنتهي بأي طريقة !♡
ويلا جهّزي الشاي 😁

..

قالت :
متزوّجين لينا ٩ سنين ماشاء الله
وزوجي كلما يصلّي الفرض في المسجد ، بيرجَع
يصلّي السُنّة في البيت ❤️

أول ما أفرُش مُصلايتي مع أولادي ، بجهّز مُصلايته
عشان لمّن يرجع يلقاها جاهزة ..

بعد الفجر بنقعد نقرأ قرآن ونقرأ التفسير سوا ،
بالإضافة للتسبيح و للأذكار ♡

وبعد المغرب بنقرأ حديث ونتناقش فيهُ أو نراجع
كتاب بنكون اتفقنا نقراهُ أو محاضرة ..

يوم حصلت بيننا مشكلة
زوجي مشى الصلاة وجاء راجع لِقاني جهّزت مُصلايته
زي كل يوم ، وبعد صلّينا قال لي :
شُكراً ليكِ ..
الموقف ده خلّاني أحترمِك أكتر ، والحمدلله رجعنا أحلى
من زمان ♡
..

العلاقات أيّاً كانت اللي ارتبطَت برِضا ربنا
وطاعتُه ،
وكانت المحبّة فيها خالصة لوجه الله ، بنلقى إنها مُحاطة
بالتقدير وحُسن الظن بين الرّفاق ♡

صحبك اللي حِفظت معاه القرآن ، و رفيقتِك
في الحج والعُمرة ،
صُحبة المسجد والحلقات ، و رِفقة التهجٌّد والتراويح ..

دي كُلها وغيرها
صُحبة أساسها حُب ربنا ، وبتكون محفوفة بالبركة
والخير بإذن الله .

الواحد بكون همّه رِضا رب العالمين عشان كده
إذا حصل فيها خِصام ، مُدّته ما بتكون طويلة
ده غير حُب ربنا ❤️

قال الله تعالى في الحديث القدسي :
" حقّت مَحبّتي للمُتحابين فيَّ، وحقّت مَحبّتي للمُتناصحين فيَّ، وحقّت مَحبّتي للمُتزاورين فيَّ، وحقّت مَحبّتي للمُتباذلين فيَّ "

أعملوا مع أصحابكم وأزواجكم حاجة لربنا
عشان تجمعكم الطاعة وتاخدوا الأجر مع بعض ، ويكون
بينكم المحبة في الله ♡

#الصحبة
#المحبة

فاللهمّ محبّتك التي تسرّ القلوب ، و رفقاء الدّرب ممّن تطيب
الحياة بوجودهم ، أحيِنا بنُورِك وضيائك واجعلنا من عبادك المُتقين الأخيار ، طيّبين تامّين الإيمان واليقين ، وأسعَد عبادك في الدنيا والآخرة .

#الوتر
ممكن نصلّ على الحبيب !❤️
#تيسير_الصادق
🌹..

لمن قريت خبر التاجر السوداني اللي مشى البنك يحوّل قروش
تجارته في البصل
وكانت بتعادل ١١ ترليون جنيه ماشاءالله تبارك الله

اتذكّرت قصة صحبتنا قارية طب أسنان
و زولة مجتهدة وشاطرة اللهم بارِك ❤️

دخلت صناديق وجمّعت مبلغ مالي
وفجأة
قالت لأخوانها تعالوا نبدأ تجارة ومشروعنا يكون
التسالي ..

أخوها الصغير قال ليها
التسالي الرخيص ده لكن ما فيهُ قروش!

باقي أخوانها قالوا ليهُ
التسالي الرخيص ده بيعمل قروش كتيرة بتوفيق ربنا و القصة
كلها برَكة وتوفيق من رب العالمين

صحبتي قالت لي
سبحان الله ربنا وفّقنا نردّد الدعاء :
" و بارِك لنا فِيما أعطَيت " ، و قد كانت الإجابة لله الحمد والمنة

ومن مبلغ يعتبر حاجة ما كبيرة شديد
تجارتهم كِبرَت
واشتروا لأهلهم بيت وعربات ماشاءالله تبارك الرحمن

عشان كده :
في أي عطاء أو تفصيل من تفاصيل الدنيا
البرَكة بتفرِق معانا شديد ، لأنها بتخلّي القليل كتير وكافي لسعادة القلوب سبحان الله !

والدعاء ده جميل لمّن نتمعّنُه ،
وبينطبق على حاجات كتيرة في حياتنا : الرزق والعلاقات و الماديّات ، و حتى المشاعر والأحاسيس

و بالبركة = حاجات في نظرنا في قِمة البساطة
ممكن تبقى بالغة التّمام بإذن الكريم ..

اها بديتوا تجارة البصل ولا لسه ؟😁

#الدعاء
#الوتر

فاللهم بارِكني و بارِك لي فيما أعطَيتني و رزقتَني ، لا تُعلّق قلبي بما ليس لي ولا تحوّجني ما لا تريده لي ، أن تطِيب نفسي بالرِّضا والعافية ، وأظلّ طيّبةً نقيّةَ كاملة الإيمان واليقين .

ممكن نصلّ على الحبيب !♥️
#تيسير_الصادق

سورة الفاتحة ♥️

صحبتي عندها ولد خالتها شاب
فجأة دخل في غيبوبة!

أهله قابلوا بيهُ دكاترة
في عدد من الدول وكانوا بقولوا ليهم ما عنده حاجة
والغيبوبة إستمرّت شهور طويلة قريب السنة

شيخة أختهم بتحفّظها القرآن
قالت ليها :
أقروا ليهُ سورة الفاتحة مع الدعاء .

سبحان الله في أقل من أسبوع الولد
فتّح ورجع طبيعي كأنه ما كان في حاجة ♡
..

جارتنا عندها حفيدها صغيروني
إتولد بمُشكلة في الكلى
ودخل عمليات كتيرة لكن مشكلته ما اتعالجَت!

أمه وأبوه بدوا يقروا ليهُ سورة الفاتحة يومياً = لمّن مشوا أول مقابلة بعدها، الدكتور قال ليهم الكلى دي سليمة

انتو متأكّدين ما أخد علاج
في مكان تاني ؟
..

سورة الفاتحة أو أمّ الكتاب
أو السّبع المثاني، هي الشافِية الكافِية بإذن الله
تعالى .

#سورة_الفاتحة

فاللهُم إحفظ عبادك من كل شرٍّ وسُوء، زيّن حياة الطيّبين بالصحة والسلامة والعافية، فتنتثِر المسرّات في أيامهم جبراً، وتختِم لهم دُنياهم بصالِح الأعمال.

#أوتروا
ممكن نصلّ على الحبيب!♥️
#تيسير_الصادق

حنِّينا يا مدينة رسول الله!♥️

اللهم صلِّ وسلم وبارك على نبينا الأكرم وعلى آله وصحبه الأطهار، اللهمّ اكتب لنا في المدينة مقاماً ورزقاً حلالا ..

ممكن نصلّ عليه ؟

صحبتي شغالة في صيدلية وعندها أختها متزوّجة
ساكنة في نفس عمارة الصيدلية ،
بت أختها بتقرأ في الأساس
بتقوم تجي تقعُد معاها وقت الدوام يتونّسوا 😂♥️

قالت لي :
في يوم قاعدين في الصيدلية ، كنت بحفّظ في بت أختي
سورة الواقِعة ونكرّر فيها ، جات داخلة وحدة و رِيحة
العطر بتاعها دخلت قِدّامها من قُوّتها !

بت أختي طوالي عايَنَت لي وبِعَفَويّة شديدة
قالت لي :
يا نينا ، مش قُلتي لي ما نعمل رِيحة "عطر" ونحنا
طالعين برة البيت
عشان الرسول ﷺ قال اللي بتعمل
كده بتبقى زانية ، طيب ليه خالتو دي متريّحة "مُتعطّرة" ؟!

أنا اتخلَعت وبِقيت أتمتِم عشان المرة اتحرَجَت .

اتلَفَتت للمرة وقلت ليها :
نحنا علّمناها حديث رسولنا الكريم ﷺ
اللي قال فيهُ :
[ أيُّما امرأةٍ استعطَرَت فمرَّت علَى قومٍ ليجِدوا من ريحِها ؛ فَهيَ زانيةٌ ]

المرة قالت لي :
ما مُشكِلة ،
وهي كلامها صاح لأنه ده حديث الرسول ﷺ ♡

بعد كم يوم المرة جات تاني سبحان الله
وكان معاي بت أختي ، جات ما عاملة أي عطور
وكمان المرّة دي ما عاملة مكياج ولبسها أوسَع
اللهم بارِك ♡

لمّن وقفَت قِدّامنا ، قالت لِبت أختي وهي مُبتَسمة :
رأيك شنو يا سُكّرة فيني الليلة ؟!♥️

وناولَتها كيس فيهُ شيبس وشوكولاتات ،
وقالت لي :
بت أختك صغيرة
والموقف كان مُفاجيء لكن صراحة خلّاني وقفت
مع نفسي ، وراجَعت موضوع إني أطلَع متعطّرة وبِقت
لي سبب كمان أراجع لبسي والمكياج برّة البيت ♡

#بيوت_متطمنة

فاللهم اجعلني من التقيّات العفيفات الصّالحات ، أن ألقاكَ قائمةً على جميل تَعَبُّدي ، مستورةً وصميم أمنيتي جِنانك ، ومكتوبٌ لي الهِداية وقُرّة عينٍ لا تنقطع مع نعيم الدنيا والآخرة.

#الوتر
ممكن نصلّ على الحبيب !♥️
#تيسير_الصادق
🎀..

🎉🎉🎉عدنا والشوق بأعيننا🎉🎉🎉
نستكمل اليوم الاربعاء دروس التربية مع المعلمة الغالية د.تيسير الصادق

الساعة
1:30م بتوقيت السودان
2:30م  بتوقيت مكة

على مقرأتنا رواء الروح 💛

الرابط في قناة بيوت متطمّنة
https://t.me/+s91S3b6i0jE1ZGRk

اللقاء نسائي 🌸

‏قال رسولنا الحبيب ﷺ:

‏"عليكم بقيامِ الليلِ فإنَّه دأبُ الصالحينَ قبلكم، و قربةٌ إلى اللهِ تعالى، و منهاةٌ عنِ الإثم، و تكفيرٌ للسيئات، و مطردةٌ للداءِ عنِ الجسد"
‏
#الوتر💛

قال :
كنت مخنوق شوية فقُلت أنزل أتمشّى
جمب البيت .

وأنا ماشي لاقيت راجل سوداني بسيط
في الخمسين
من عُمره قاعد في رصيف الشارع
وماسِك قلم رصاص وبيكتب ويردّد آيات القرآن ♡

سَلّمت عليهُ وسألته :
بتعمل كده ليه ؟

قال إنه ما قادر
يحفظ في البيت، وما قادر يغلِب نفسه!

قام طلع في الشارع = عشان يكمّل حِفظ القرآن
ويكسِر نفسه (يغلبها ويأدّبها)

حكى لَي
عن بركة القرآن في حياته وعن تزكية النفس 💕
وعن مدى
قِصَر الدنيا وحقارتها!

حكى لَي
كمان عن التسويف وعن العزيمة والإصرار
وعن التوكل على الله ♡

كان بيتكلَّم من قلبُه 🥹 كأنّه طالِع يقول
الكلمتين ديل!

حكى لَي كمان عن زوجته الحافظة لِكتاب الله
وإنها علَّمَته التجويد
وبتشجِّعه على حفظ القرآن الكريم حتى وهي بعيدة
في بلد تاني!♡

وفي الآخر ذكّرني إنه :
حفظ كتاب الله = إحتياج وضرورة
وليس إختيار .

وقال لَي :
أنوي و أبدأ من الليلة؛ لأنه بُكرة ما مضمون!

وهنا اتذكّرت حديث النبي ﷺ :
«رُبَّ أشعثَ
أغبَرَ مدفوعٍ بالأبواب، لو أقسَمَ على الله لَأَبَرَّه» 🥹

الحمد لله
الذي يسّر لِي سماع هذا الكلام ويسّر له تذكيري به!♡

إستأذنتُه أصوّر الأوراق وأنقُلها
=وافَق واتبسَط كمان 😍

#القران

فاللهمّ ذلك الحال وطِيب المآل، اجعلني لكِتابِك مُتدبّرةً تالية، ثبِّتهُ في قلبي وارزُقني صُحبته واجعلني به عامِلة، أن أسِير في الدنيا مُتخلِّقةً به وأكونَ طيّبة الحُضور والأثَر، فأسعَد ما حَيِيتُ بقُربِك دائماً وأهنأ برؤياكَ في الفردوس الأعلى .

ممكن نصلّ على الحبيب!♥️
#تيسير_الصادق
🌿

ولعلّ القادم
إستقرار وأمان
ولمة مع الحبايب في السودان!

أبشروا ❤️
#الوتر

البرد ده جاكُم ولا لسه ؟!♥️

صحبتي ماشاء الله تبارك الرحمن
بتقيم الليل طول السنة ، تصحى في الثلث الأخير
وتصلّي وتدعي ربنا ..

وبتصُوم الإتنين والخميس برضو في كل الشهور
إلا يكون عندها عذر أو مريضة !

قبل يومين لقيتها مرسّلة لي فرحانة :
يا تيسير ،
الشتاء جانا الحمدلله ♡

أنا بحبه لأنه النهار أقصر والليل طويل ، الصيام والقيام
في الشتاء فرِق من باقي الشهور ..

لمّن قريت رسالتها اتذكّرت الحديث :
عن أبي سعيد الخدري
رضي الله عنه قال : قال رسول الله ﷺ :
«من صام يوماً في سبيل الله بعَّد الله وجهَه عن النار سبعين خريفاً» ♡

والحديث الجميل اللي بتكلّم عن قيام الليل
في الليالي الباردة :

عن ابن مسعود أنّ رسول الله ﷺ حدّثهم :
" إن اللَّه ليَضحَك إلى رجُلَين ،
رجلٌ قام في ليلةٍ باردة
من فِراشه ولحافه ودثاره فتوضَّأَ ثمّ قام إلى الصّلاةِ ..

فيقولُ اللَّه عزّ وجلّ لملائكته :
ما حملَ عبدي هذا على ما صنع ؟!

فيقولون :
ربنا رجاء ما عندَك وشفقةً ممّا عندَك ..

فيقول جلّ في عُلاه :
فإنّي قد أعطيتهُ ما رجا وآمنتُه ممّا يخاف " ♥️

#الوتر
#الصيام

فاللهم اجعلني ممّن صلّت فرضها وأرضَت ربها ، أسألك بلُطفك أن تعيدني في كل مرةٍ إليك ، أن تجبُر خاطري و تُيسّر أمري و تجعل خاتمة عُمري الجنة .

ممكن نصلّ على الحبيب !♥️
#تيسير_الصادق
💕

مُغترب مُقيم في السعودية
قال :
في رمضان
كفيلي ساقني معاهُ عشان نوزِّع زكاة المال بتاعتُه ♡

مشينا لحدي خط الساحل اللي فيهُ القرى الفقيرة
وكانت القروش مُوَزّعة
في ظروف
كل ظرف فيهُ خمسة ألف ريال .

لمّن طلعنا من وحدة من القُرى كنا ماشّين على خَط
جدة جيزان
قابلنا راجل كبير
عمره ٧٠ سنة ماشي في الشارع العام
لكن صحّته كويسة ماشاء الله تبارك الرحمن.

صحبي قال لي :
ده بيعمَل شنو في المكان ده وفي الوقت ده ؟

دي صحراء!

السوّاق قال لينا :
أكيد يماني داخل تهريب .

وقفنا عند الراجل وسلّمنا عليهُ وسألناه :
مِن وين اﻷخ ؟

قال :
من اليمن .

قلنا ليهُ :
ماشي وين ؟

قال :
مشتاق إلى بيت الله 💕

قلنا ليهُ : داخل نظامي بطريقة رسميّة ؟

قال : ﻻ والله تهريب!
ﻻزم أدفع
ألفين ريال تأمين، وأنا ما عندي إﻻ 200 ريال!

ركبت ب 100 ريال وباقي 100 ريال ..

صحبي سألُه :
طيّب يا عمي، ليك كم وأنت ماشي ؟

قال :
6 أيام .

سألناهُ : فاطر؟

قال : ﻻ صائم ♡

سألناهُ :
طيّب أنت اتجاوزت أكتر من 5 نقاط تفتيش أمن
كيف اتجاوزتها ؟!

قال :
والله الذي ﻻ إله إﻻ هو، بجي مارّي ومافي زول
اتكلّم معاي!

"والله أنا جاي مُشتاق إلى بيت الله
أبغي أسوّي عمرة، رايح مكة" ♡

قبل نص ساعة قبضتني دوريّة شُرطة قبل مسافة
50 كيلومتر، وجابوني قسم
على بُعد كيلومتر واحد من هنا، سألوني وأطلقوا سراحي.

قلت في نفسي :
سبحان الله ربنا جهّز رجال اﻷمن ينقلوهُ بسرعة
لي هنا!

صحبي أدّاهُ ظرفين وقال ليهُ :
شِيل دي زكاة المال، عملة سعودية
أفتح الظرف
و دِسّ القروش في حزامك عشان ما تضيع!

الراجل فتَح الظرف وشاف العشرة ألف ريال، عايَن لينا
و وقع في غيبوبة .

نزلنا من السيارة وبقينا نرشُّه بالموية .

فتح عيونه وبقى يبكي ويقول :
القروش دي كلها لَي ؟!

ركّبناهُ العربية معانا عشان يتقدّم شويّة
وسالناهُ ليه بتبكي كده يا عمي ؟

قال :
أنا عندي بيت في اليمن، وعندي قطعة أرض جنب البيت
وهَبتها لله
وبنينا عليها مسجد أنا وعيالي من الحجر والطين ♡

المسجد خلص من البناء لكن كان باقي لينا الفرش
وحاجات بسيطة
وكنت قاعد أفكر كيف أفرش المسجد ده!

كلنا بكينا بكاء عجيب واتذكّرنا :
"مَن كان همّه اﻵخرة = جُلِبَت له الدنيا بحذافيرها"💕

وقول رسولنا ﷺ :
"مَن كانت اﻵخرة همّه جعل الله غِناه في قلبه
وجمَع له شمله
وأتَته الدنيا وهيَ راغمة .. ومَن كانت الدنيا همّه
جعل الله فقره بين عَينيه
وفرّق عليه شمله، ولم يؤتِه من الدنيا إﻻ ما قُدّر له!"

بعدها أشّرتَ لصَحبي إنه يزيد ليهُ القروش
فأداهُ ظرفين زيادة
وبِقى مع العَم عشرين ألف ريال!

نزل من السيارة وهو يبكي ويتَمتِم ويدعي 🥹♥️

فعلاً :
"مَن كان همّه اﻵخرة
=جُلِبَت له الدنيا بحذافيرها"♡

فاللهمّ إني وكّلتُك أمري فسُبحانك لِي خَير وكيل، أنتَ العلِيمُ بِقلبي وحالي فاحفَظ يقيني وراحةَ بالِي، أن أتلذّذ بِرحمتِك وعطائك، محفوفةٌ بالسرور والرضا في الدنيا، وهانئةٌ في الفردوس الأعلى مع أحبّتي أجمعين.

ممكن نصلّ على الحبيب!♥️
#تيسير_الصادق

لعلّ القادم حجّة وعُمرة وزيارة للحرمين!

أبشروا ♥️
#الوتر

في فترة اشتغلت في صيدلية مُستشفى ❤️
زمیلتي كانت ما لابسة حجاب ..

لمّن یجي وقت صلاة الضحى بتذکّرنا کلنا في القِسم حتى اللي شغالين برة الصيدلية ، ونفس الشي وقت الظهر ♡

كان معانا ناس مُستغربين فيها إنه کیف هي ما محجبة
وبتحرِص علیٰ الصلاة الفرض وكمان النافِلة !

الواضح إنها
كانت من جوّاها مهتمّة بالآخرة ، لكن ما أطاعت ربنا بإنها تتحجّب ..
ومع كده ساعية عشان ترضيهُ سبحانه وتعالى
ولو إنه ده ما مُبرّر للتخلّي عن الحجاب ، ولا تأكيد للتهاوُن
بالتمسُّك بيهُ !

بعد اتحوّلْت لصيدلية تانية
كنا متواصلين بالتلفون ، يوم اتصلت بي بعد صلاة الفجر
اتخلَعت قلت ان شاء الله خير ..

قالت لي :
أنا قرّرت أتحجّب الحجاب الشرعي ، لي يومين ما نايمة
حاسّة إني قصّرت شديد ، لكن دايماً من جوّاي
كنت بحب أرضي ربنا من نواحي تانية ، وصادقة معاهُ
في باقي الطاعات وبعملها بإخلاص ❤️

كلامها ده ذكّرني قصة سُهيل بن عمرو ،
جاء في الأثر إنه كان مُسافر معاهُ زوجته .

وفي الطريق اعترضهم قُطَّاع طرق ، و أخدوا كل اللي
معاهم من أكل و أموال !

قاموا اللصوص قعدوا يأكلوا من الأكل بتاع سُهيل ،
فانتبه سُهيل إنه القائد بتاع اللصوص ديل ما بياكل معاهم
من الأكل ده !

فقام سأله :
ليه ما بتاكُل معاهم ؟!

قام القائد ردّ عليه :
أنا صائم ..

اندهش سهيل ، وقال ليهُ :
تسرق وتصوم !

القائد قال ليهُ : إني أترك باباً بيني وبين الله ♡
لَعَلّي أدخل منه يوماً ما ..

وبعدها بِسنة أو سنتين سهيل شافه في الحج
متعلّق بأستار الكعبة
و بِقى زاهِد عابِد سبحان الله !

ولمن شاف سهيل عِرفُه ،
فقال ليهُ :
أوَعَلِمت ، مَن ترك بينه وبين الله باباً
دخل منه يوماً ما ♡

عشان كده دايرة أقول ليكم :
راهنوا دايماً علیٰ النقطة الصافية الطيّبة
في نفسكم وقلوبكم ..

سعي واحد صادق لِباب ربنا ، ممكن ينجّينا
من أدق التفاصيل في حياتنا
اللي ممكن تكون مُرهِقة أو ما واضحة لينا !

کُلنا بنعمل الذنب ونتوب منه ، كتار فينا اللي بيقروا قرآن
لكن لسه بيسمعوا أغاني .

فينا الحريصين على الصلاة
في وقتها لكن ذنوبهم في الغيبة والنميمة كتيرة !

مننا اللي بكونوا بارّين بوالديهم جداً ، لكن قلوبهم
في العبادات ما خالصة لوجه الله ..

الحاجة المهمة إنه :
نسأل ربنا التوفيق والثبات ،، لأنه بدون توفيق ربنا
نحنا ولا حاجة !

ونركّز مع نفسنا ونسعى إنه ننمّيها ونطوّرها في الدين
وفي كل نواحي الحياة ،
بدون ما نحكُم على غيرنا ونتابع النقص اللي فيهم ونتعمّد إحراجهم وتقليل شأنهم ..

ولازم نفهم تماماً إنه : سلعة الله غالية ❤️
وبتستاهَل نتعب عشانها ، والدنيا دي مهما نعيش
ما حنكون مُخلَّدين فيها !

والسعيد هو اللي بيجتهد يحسن عبادة ربنا ♡

#متقين

فاللهم استودعناك خيراً وطِيباً نشأنا عليه أن ينبت بين كفّينا ، أن تهدينا وتهدي بنا وتحبّبنا في دينك فوق ما أحببنا ، أن تقينا شرّ الغفلة في يومٍ آخره ليس في الدنيا ، وتُيمّن كِتابنا وتُنير صحائفنا يوم يبعثون .

ممكن نصلّ على الحبيب !❤️
#تيسير_الصادق
🎀💕

قالت :
سِمِعت بنات في الجامعة بيتكلّموا فيني ، كانوا بِعَلّقوا
على إنه عِندي عِبايتين بس بجي بيهُم !

أبوي وضعُه بسيط ومصاريف الجامعة كتيرة ، قروشي
كُلها بتمشي في شِراية المراجع والشيتات ..

نادِر ما أفطُر في الجامعة
ومرات بمشي مسافات طويلة عشان أوفّر حَقّ المواصلات
وأجيب بيهُ حلاوة لأخواني الصُغار 💕

مرة رَجَعت من الكُلية عيوني مُوَرَّمة من البِكاء و وشي
مُحَمِّر ومنفوخ ، أمي سألَتني مالِك يا بِت ؟!
كذّبت عليها
وقلت ليها : مُتضايقة شوية من ظروفنا واللي نحنا فيهُ !

قعَدت تضحَك وتشاغِل فيني إنه أنا حلوة حتى وأنا باكية
وقالت لي :
"أحفَظي القرآن ،
حيبقى ليكِ راحة من كل الأحزان " ♡

وفهَّمَتني إنه حِفظ القرآن ده
هو اللي حيكون زي الحاجِز بيني وبين أي ضَرر ممكن
يصيب قلبي وأي تعب يهِد روحي بإذن الله ..

وعملت بكلامها وسجّلت في مركز تحفيظ ، اجتهَدت
وبديت أحفظ وأراجِع وأكرّر كتير
ماشاء الله بقيت
مُصاحبة القرآن وعلاقتي بشيختي
كل يوم بتبقى أقوى وبقينا صحبات ، توجّهني وترشدني للصاح
وفي مرة حكَت لي موقف عن الرسول ﷺ ♥️

قالت لي :
بتعرفي أنس بن مالك ؟!

قلت ليها :
أي بعرِفُه ..

قالت لي :
أنس بن مالك كان خادِم رسول الله ﷺ
ولمّن عمرُه بِقى عشرة سنين
أمّه ساقَتُه للرسول ﷺ وقالت ليهُ يخلّيهُ معاهُ عشان يخدمِه وطلبت من رسولنا الكريم إنه يدعي ليهُ ♡

عارفة الرسول ﷺ دعا ليهُ ب شنو ؟!

-شنو ؟!

" اللهُمّ أكثِر ماله، وولده، وبارِك له، وأدخله الجنَّة " 💕

أنس رضي الله عنه عاش ٩٩ سنة
وربنا رزقه أولاد وأحفاد كُتار ، و رِزقه كان فيهُ بَرَكة ، بقى عنده بستان وكان بيحصِد منه الفاكهة في السنة مرتين !♡

ومن يوم شيختي قالت لي الدعاء ده
وأنا كل يوم بقولُه ، و واثقة إنه ربنا حيرزُقني ويبارِك لَي
زي أنس رضي الله عنه

والليلة أنا بحكي قِصة حياتي كأفضَل إستشاريّة
في المنطقة ، وبحكي كيف ربنا رزَقني من فضلُه بزوج طيّب وأطفال حِلوين
ووسّع رِزقي ، وأولادي ال ٣ ختموا حِفظ القرآن الكريم ♡

اللي عايزة أقوله إنه عُمرك ما حتنجَح وانت بعيد
من ربنا سبحانه وتعالى !

وما حترتاح وانت هاجِر مصحفك المليان تُراب ..

والرزق والعوض ما حيجوك إلا وانت بتذكُر ربنا
و بتدعي وقلبك مليان باليقين ♡

#القران
بيوت_متطمنة

فاللهمّ آتِ كلاً منا سؤله ، اجبُر خواطرنا وارزقنا جمال الأُنس بقُربِك ، خاتِمتنا الشهادة ومُستقرّنا جنات النعيم .

ممكن نصلّ على الحبيب !♥️
#تيسير_الصادق

-{فلا تخضعن بالقول}

🌸ليه ؟!
={فيطمَع الذي في قلبه مرض}

🌸طيب نعمل شنو ؟!
={وقُلنَ قولًا معروفا}

🌸بس كده ؟!
={وَقَرن في بيوتكن ولا تبرّجن تبرُّج الجاهلية الأولى}

🌸تمام ، خلاص كده ؟!
- {وأقِمن الصلاة وآتين الزكاة وأطِعن الله ورسوله}

🌸عشان شنو ده كله ؟!
={إنما يُريد الله ليُذهِب عنكم الرّجس أهل البيت ويُطهّركم} ♡

فاللهمّ اجعلني من التقيّات العفيفات الطّاهرات، أصلِحني كُلما أخطأت ونقّني كلما أذنَبت، لِجَنّتِك سائلة وبرحمتِك دوماً ناجية، رفيعة القَدر مادُمت لِعَطفِك راجية، ويَملؤني اليقين أنّ وُجودك ناصِري .

ممكن نصلّ على الحبيب !♥️
#بيوت_متطمنة
🎀..

قال :
- أنا ما بخاصم زول لكن
بغيّر رتبتو عندي !

=كيف ؟

- ما بتواصل معاهو ،
ما بستجيب ليهو ، بغيّر مكانتو عندي و ما حتبقى زي كما كانت.
ما بدّيهو الوقت اللي كنت بدّيهو ليهو زمان ..

ما بفكر فيهو ولا بدّيهو اهتمام زي ما كنت في الأول!

ما بخصّو بالدعاء زي ما كنت بعمل ،
و ممكن أغيّر اسمو زاتو في تلفوني !

القاعدة دي عظيمة شديد ، فيها اقتباس من القرآن الكريم وقول الله سبحانه عز وجل :
"واهجُرهُم هَجراً جَمِيلاً" 🌸

الناس اللي بتأذيك
وما بتقدّر قيمتك ، ابتعد عنها طوالي .

ما تشغل بالك بيهم
و حاول ما تختلط بيهم في خير ولا في شر .

أحسِن الهجر ،
ارتقِ بي نفسك عنهم ، و خليك خلوق حتى في الخصومة ، و خلّيهم يحسّو إنك بقيت ما زي زمان !

الفكرة كلها في انك تعرف تتجاوز ،
الحقد والتفكر في الكيد بتخليك عايش في دوامة من التعب النفسي والتفكير بي الناس اللي ما بتستاهل ولا بتستحق .

فاللهمّ املأ قلبي بطاعتك و حُبّك ، هَب لأيامي الطمأنينة و السرور بقُربِك ، ألّا أشقى ولا يشقى بصُحبتي أحداً ما حييت ، و اجمعني بأطيب القلوب و أكرمها في الدنيا و الآخرة على سُرُرٍ مُتقابلين .

#اتزان
ممكن نصلّ على الحبيب؟! ❤️
#تيسير_الصادق

قال :
قبل يومين ، بعد صلاة الصبح
زوجتي لقتني بقرأ في سورة البقرة ❤️

طلعت الشغل و رجعت البيت ،
بعد صلاة المغرب جابت الشاي لقتني بقرأ في
سورة التوبة .

وقفت مسافة و قالت لي :
بقيت تقرأ السور من غير ترتيب !
مالك غيّرت طريقة قرايتك في الختمة ؟!

كنت عايز أوضّح ليها
بس هي انشغلت و أنا أخدني الوقت مع حاجات في البيت .

المساء كان نهاية أسبوع
قلنا نطلع نفسّح الأولاد شوية برة البيت ،
أنا بقيت جاهز و مسكت مصحفي و بقيت أقرأ الحمد لله.

زوجتي و الأولاد اتأخروا
وأنا ما انتبهت للوقت لأني كنت عايش بكل جوارحي مع
قصص القرآن الكريم ♡

بصراحة شديدة
زمان قبل الزواج كنت بنفعل في أخواتي لمن يتأخروا في
الطلعة ، و مرات بحرَد ليهم عديل !

وبعد اتزوجت
نفس الشي ، بزهج من الإنتظار و طوالي الشكلة تدوّر مع
المدام .

اها المرة دي ما اتكلمت معاهم
ولا سألتهم اتأخرتوا مالكم !

كنت بقرأ بصوت عالي شوية
و زوجتي و الأولاد سامعين تلاوتي ♡

بعد طلعو خلاص
سألوني : مالك الليلة ساكت ساي كده و نحنا
متأخرين ؟ 😁

قلت ليهم :
قلت أخلّيكم على راحتكم ،
لي سنين طويلة بكورك و انفعل ، أخدوا وقتكم في الإستعداد .

اليوم التاني قبل فطور الجمعة
مسكت مصحفي و قريت جزئين ، فطرت و قريت شوية حتى مشيت للصلاة .

المساء مشيت لزميلي عندي معاهُ شغل
استأذن عنده صيانة في البيت و بقيت قاعد في الصالون
منتظره ، الحمدلله مصحفي في جيبي ♡
فتحته و قريت .

يوم الأحد مشيت مع ولد أخوي زيارة ل عمي عيّان ،
خليتو هو يسوق
و الشارع زحمة عجيبة !

فتحت مصحفي و بقيت أقرأ ، والله ما حسّيت بجوطة
ولا بقفلة الشارع ولا بأي شي !

ما انتبهت إلا لمن قال لي :
يا عمي وصلنا خلاص .

لله الحمد والشكر
ختمت المصحف في ٦ يوم ❤️

لكن متين؟!
كلها أوقات انتظار سبحان الله.

الأوقات اللي بنتظر فيها دي كانت أسخف الأوقات
في يومي !
و لازم انفعل فيها و اتضايق شديد ، مع إني بجي بندم
على الإنفعال .

لكن في ال ٦ أيام دي
ما حصل انفعلت ولا اتضايقت ولا زهجت الحمد لله،
بكون بقرأ و مرتاح و سعيد بكل آية بتمُر علي
في تلاوتي .

حقيقي على قدر السعادة بالإنجاز ده
على قدر ما حاسي بحسرة و ندم على كل ثانية ضاعت
من عُمري ساي !

و من أجمل الحاجات اللي حصلت في ال ٦ يوم دي
كلام زوجتي ،
قالت لي :
كلما تقرأ سورة و تمشي للتانية بجيني إحساس طمأنينة
و سعادة الحمد لله .

و الأولاد بِقوا مُلاحظين روقتك
و الهدوء اللي انت فيهُ .

و علّقوا على جمال تلاوة القرآن ، و بقى كل واحد يقرأ
و يقول :
أنا حأبقى زي بابا لمن أبقى كبير ❤️

التعليقات دي من زوجتي
خلّتني أقرب أبكي من الفرح الحمد لله، كونه أبقى قدوة
لأطفالي بتلاوة القرآن دي حاجة ما هينة أبداً .

ياربي ضاعت علينا كم لحظة
كان ممكن نكون فيها مبسوطين و حاسين بالأمان !

خلاص قررت تاني ما حأفرّط في أي دقيقة
و أنا قاعد منتظر حاجة ، و أولادي ما حيشوفوا مني إلا
القدوة اللي مفروض يشوفوها بإذن الله ♡

#القران
#بيوت_متطمنة

فاللهمّ أبقِ جماله فينا وزيّن به ومعه قلوبنا وحياتنا ، اجعلنا به هُداةً مُهتَدين ، نفوسنا مسرورة وخواطرنا مجبورة .

ممكن نصلّ على الحبيب !❤️
#تيسير_الصادق
🥀..

قال :
بعد سنتين من زواجي من الإنسانة
اللي حبّاها قلبي 🌸
حسيت إنو مشاعري ناحيتها بدت تقل شوية شوية!

ما فهمت السبب شنو!

بالذات انو تصرفاتها و معاملتها معاي ما اتغيرت نهائي ،
و مبادلاني كل الإحترام و المحبة ،
لكن هي كانت حاسة بي انو في تجاهل من ناحيتي و قلة اهتمام ، كانت متضايقة شديد لانو مافي سبب واضح يخليني أعاملها بي البرود و الجفاء ده!

عشان كده قرّرت أمشي لي دكتور أمراض نفسية
أتونس معاهو شوية و أحكي ليهو الحاصل ده ، يمكن يلقى تفسير لي حالتي دي .

مشيت الدكتور و سألني :
بتعرف بنات غير زوجتك ؟

قلت ليهو :
أيوة بعرف ..

قال لي :
بتتعدّى حدودك معاهم لمن تتواصل معاهم ؟!

قلت ليهو :
دي صحبة فيسبوك ساي ، مرات بنقول لي بعض كلام حلو و لطيف ، لكن بي احترام يا دكتور !

قام الدكتور قال لي :
يلا قوم معاي نسقي الزهور اللي موجودة في حوش العيادة ، عشان نكمّل كلامنا هناك .

قام الدكتور طلب مني أمسك خرطوش الموية و مشى فتحها ،
و سألني لو الموية قوية وماشة كويس ؟!

فقلت ليهو :
ماشة كويسة الموية .

قام الدكتور غيّر خرطوش الموية بي واحد تاني
مقدود في محلات كتيرة و الموية بتتسرّب منو !
وقال لي اها الموية ماشة كيف ؟!

قلت ليهو :
الموية بقت ضعيفة شديد ، قرّبت تقطع عديل !

- قال لي :
ليه ؟
تتوقع السبب شنو انو الموية بقت ضعيفة كده ؟

قلت ليهو :
لأنو الخرطوش التاني فيهو قدود كتيرة ومانع وصول الموية كلها !

قال لي :
الموية في الحالة دي عامل زي الحب و المشاعر اللي في قلبك ، و القدود دي زي علاقتك بالبنات التانيات غير زوجتك !
في النهاية حتلقى نفسك
بتستنزف مشاعرك ، و قلبك بقى فاضي من كل شعور ، حتى لي زوجتك زاتها !

في اللحظة ديك فهمت كلام الدكتور ،
بدل ما تمشي مشاعرنا وتصرفاتنا اللطيفة والجميلة للزول اللي بستحقها ، تمشي المحل الغلط اللي ما مفروض تصلو أساساً !
ليه ؟
عشان ختّينا قدود كتيرة عبر التلفون
أو الفيس أو في الشغل أو غيرهم ..
وبالتالي نبقى ناس قلوبنا فارغة ، و مشاعرنا مُستَنزفة ،
ده غير غضب رب العالمين!

عشان كده وصيتي للناس المخطوبين
أو المقبلين على الزواج أو المتزوجين ، لازم يعرفو انو :
"لايُمكنكَ الإنتصار بالحب إلاَّ إذَا منحتهُ لشخصٍ واحد" ! 🌸

فاللهمّ أحفظ البيوت من كل سوء ، هَب لكل رفيقَين الأمان و السعادة و حُسن المُعاشَرة ، أن يصدق إحساسنا دوماً و تذهب كل التخمينات سُدىً و سراب .

#بيوت_متطمنة
ممكن نصلّ على الحبيب! ❤️
#تيسير_الصادق

صحبتنا بتحكي عن قصة شاب سعودي
على لسان أخته :

أخوي في السجن ومحكوم عليه قَصاص و دِيّة
مقدارها ١٠٠ مليون ريال!

شفت مقطع عن الإستغفار والصلاة على النبي ﷺ
فحسيت بيها رسالة من الله تعالى وبديت أسبّح طوالي وأدعي
إنه المبلغ ينزل ويتخفّض ..

فجأة أم الولد المتوفى اتصلت
قالت
خفّضوا الديّة لـ ١٥ مليون ريال!

بعدها شفت مقطع تاني
بقول :
اطلب من الله المستحيلات 💕

فقلت ليه أنا دعيت ربنا ينزّل المبلغ، وما طلبت
منه سبحانه إنه المبلغ كلّه ينتهي
وأخوي يطلع من السجن!

دخل علينا رمضان وبقيت أختم
القرآن وأدعي
لأنه كنت خايفة ينفّذوا عليه الإعد ام ..

وحقيقي كنت أنا وأهلي عاجزين = ما قادرين نساعد أخوي
بحاجة ..!

وفي يوم صلّيت الفجر والضحى
ودعيت
ونمت على مصلايتي، صحيت لقيت المبلغ إتخفّض ل ١٠٠ ألف ، وبعد دقائق = إتدخل شخص معروف وساعدنا بجزء من المبلغ
واليوم داك
لقيت عدد كبير من الناس
بتواصلوا معاي عشان يسدّدوا لأخوي ويساعدوهُ

وسابع يوم في العِيد أخوي
طلع البيت الحمدلله رب العالمين ❤️
..

ونحنا بنتمنى شنو ؟
بنطلب من ربنا كل حاجة، ولا ما بتتذكّر عبادة الدعاء!

خلّونا نتفق إننا
ندعي بيَقين ونطلب من الله المستحيلات
ونتوكل عليه سبحانه ..

ونتذكّر إنه
"البِتّكي على الله ما بِنكَفي"!

#الدعاء
#القران

فاللهمّ اعطِ كلاً منا سُؤله، اشفِ مرضانا وارحم موتانا، يسّر أمرنا واجبُر خواطرنا، أنت الرحمن الرحيم فارزقنا سعادة الدنيا والآخرة.

ممكن نصلّ على الحبيب!❤️
#تيسير_الصادق
🌱..

خالتو بتحكي لينا
قالت :
لي ٦ سنين و ٩ شهور بقرأ سورة البقرة يومياً
الحمدلله ..

كنت بشوف أخواتي وأمي الله يرحمها بيقروا سورة البقرة، وبقول
السورة طويلة وما بقدر أقراها!
وبعد بديت
الحصل لي
حلو وما بيتوصِف وحاجات كتيرة جميلة الحمدلله ❤️

ممكن أختصرها وأقول = حياتي إتغيّرت من الألف للياء!

بقيت مبسوطة وسعيدة، ربنا كشَف لي أي إنسان نواياهُ
ما سليمة معاي، وكل حاجة صعبة بقت يسيرة
بطريقة عجيبة سبحان الله ..

ولدي كان ٢٤ ساعة في مشاكل برة وجوة البيت، ما نفع معاهُ كلام ولا عِقاب ولا أي شي!
فجأة بعد بديت سورة البقرة بِقى
عاقل ورايق
وغير دراسته والمسجد ما عنده هَم، وقرّب يختم القرآن ماشاءالله اللهم بارِك ..

عندي بتي إتولدت بعيب خُلقي وسافرنا بيها
ما خلّينا دكتور، كلهم قالوا مافي علاج لحالتها!

بعد بديت سورة البقرة بتلاتة شهور
ربنا كتب لينا
نقابل دكتور بالصُدفة، وبدأ ليها العلاج وشُفيَت تماماً
الحمدلله والشكرلله 💕

القصص كتيرة، كل مرة بحكي ليكم حاجة 😁

#سورة_البقرة

فاللهم إني أسألك طِيب الحال وراحة البال، أن ترزقني اليُسر والجبر مع العافية، فتسعَد أيامي وتُحسِن خاتمتي مُستَقَرّي أعلى الجنانً

#الوتر
ممكن نصلّ على الحبيب!❤️
#تيسير_الصادق
🌱..

صحبتي بتحكي لي :
على غير العادة كنت مرهقة
و حاسة بزهج غريب ، ما قدرت أطبخ ولا أنضّف ولا أعمل أي شي في البيت!

راجلي جا داخل سألني :
مالك ؟

قلت ليهُ :
ما عارفة بس ما عندي نفس أعمل أي شي .

قال لي :
كله هيّن و بيتعمل ، المهم انتي تبقي بخير ❤

كلامه ده نسّاني أي فتَر و أي زهج ، بقيت أتضاحَك و أتبسّم
و كل الأحاسيس العجيبة اختفت الحمد لله ..

و جاتني طاقة عجيبة ماشاءالله 😁
نضّفت البيت ركن ركن و طبخت بعد داك!
اللهم بارِك ♡

صحبتنا تانية قالت لي :
أمي كلّفتني أعمل ليها كم حاجة
و أشتري ليها حاجات ، المهم الموضوع فيهُ جري و كده .

قضّيت ليها حاجاتها
و كنت مضغوطة عندي دراسة و التزامات كتيرة ..
بعد انتهيت من حاجات أمي
قالت لي :
الله يوفقك و يهوّن عليك كل قاسي ♡

كلام أمي ده طلّعني من دوّامة
مافي زول حاسّي بيها غيري ، و وصّلني لراحة نفسية
كانت رايحة لي ،
أنجزت حاجاتي و قريت و اتبسطت شديد الحمدلله .
..

عارفين ؟
مرات الزول القِدّامنا ده أو المعانا
بكون مُحتاج يسمع مننا بس (كلمة) أو اتنين يجبروا بخاطره ، و ممكن كلامنا ده يغيّر ليهُ يومه كله ♡

الكلمة الطيبة ما صعبة ، و حروف جبر الخواطر ما معدومة ولا قاسية ، بس نحنا نطلّعها كيف ؟

كما قيل :
أنت لا تدري ماذا تفعل كلماتك في قلوب الآخرين!
قد تُحيي أملاً ، تُرجِع وُداً ،
تفتح قلباً طال به الحزن و تُحيي نفساً مُتعَبة ❤️

وفي الخِتام :
ياريت نقدّم السمح
و نطلّع الحاجات الجميلة اللي فينا = تبقى لينا حسنات
و لغيرنا طمأنينة وجبر خاطر وسرور ♡

فاللهم لا يسري على ألسنتنا وأفواهنا إلا جمالاً يضيء عتمة مَن حولنا .

ممكن نصلّ على الحبيب!❤
#تيسير_الصادق
🥀..

الحمدلله الذي بنعمته تتم الصالحات 💕

تم تحرير سنجة .. وقريباً تحرير كل البلاد
بإذن الله

ممكن نصلّ على الحبيب!❤️
#السودان

حكى واحد من المشايخ :

في وحدة من الدول العربية
بعد الصلاة في المسجد جاني راجل كبير في السن
قال لي :
يا شيخ
أنا بتي عمرها ٣٧ سنة و نفسي اشوفها عروس، جاها ود الحلال زول كويس ومحترم واتخطبت لكن ما عندي المبلغ البجهّزها بيهُ و أعمل دعوة زواجها ولا حتى بالبسيط!

نفسي أفرح بيها و هي نفسها تبقى أم ، و سمعت إنه الصلاة على الرسول ﷺ بتفرّج الهموم ، الكلام ده صحيح ؟!

فكان رد الشيخ إنه
نعم صحيح = تُكفَى همّك و يُغفَر ذنبُك 🌸

و بعد فترة الراجل قابل الشيخ
و وراهُ إنه بصلّي على الحبيب ﷺ بعد كل صلاة و في كل وقت ، لكن لسه الفرج ما جا!

الشيخ طمّنه و قال ليهُ خليك واثق إنه ربنا ما حيخذلك
انت واصل
وأكيد حيكرمك في أقرب وقت ..

بعد يومين اتصل رجل أعمال بالشيخ
وقال ليهُ :
أنا عندي صفقة في الشغل و نذرت نذر إنه إذا اتوفّقت فيها حألتزم بتكاليف زواج بت يكونوا أهلها ما مستطيعين مادياً ، و قلت أسألك لو بتعرف أسرة متعفّفة عندهم بت حتتزوج و ما قادرين يعملو ليها التجهيزات و دعوة الزواج!

شفتوا كَرَم ربنا ده كيف، يرزق مَن يشاء بغير حساب ❤️

عايز تتزوج ، عندك ديون ، أمورك معكسة ، شغلك واقف ، همومك واصلة الحدّ ، شيّبت من الغمّ ؟!

صلّ على الحبيب المصطفى ﷺ ..

قالت :
بعرف ناس بتصلّ على رسولنا الحبيب ﷺ بالمئات و الآلاف ، كل ايام الاسبوع صباح و مساء .. عشان ترتاح و يطمئن ليها بال وسط الدنيا و مآسيها ، و عشان ما تنكسر ولا تتهزم ..

سألتها صحبتها :
اها و حصل انكسرت ؟!

و كان ردّها :
ما حصل أبداً ، لأنه ربنا بجبُر خواطرنا قبل نكمّل شكوانا!

هو البتّكي على الله بينكَفي ؟

فاللهم افتح علينا فتح عبادك الأتقياء ، اغفر لنا و ارحمنا و عافِنا و اهدِنا و ارزقنا و اجبُرنا ، و متّعنا بالعافية و جميع أحبتنا و هَب لنا نفوساً رضيّة و قلوب نقية لا تميل عن طاعتك و عبادتك حتى يوم نلقاك .

ممكن نصلّ على الحبيب! ❤️
#تيسير_الصادق
🌸..

من أجمل الرسائل اللي قريتها أمبارح ❤️

جاني عريس بعد نزحنا مدني، أبيت أتزوّج قلت لناس
أمي وأبوي عايزة أتِم قرايتي!

أخوي قال لي
إستخيري وإتوكّلي على الله، وبإذن الله تكمّلي
قرايتِك وانتي في بيتك ..

سبحان الله بعد الإستخارة قلبي إتطمّن والزواج تمّ
بسرعة، لقيته محترم وأخلاقه عالية ماشاء الله، صلاته في وقتها ويقيم الليل، علاقته بالقرآن جميلة
وبخاف الله فيني الحمدلله الحمدلله

الأيام دي عندي إمتحانات
بيقعد يقرأ معاي ويصحّيني نراجع قبل الفجر!

اللهم بارِك
وسبحان مَن جعل المودة والرحمة بينهُما 💕

#بيوت_متطمنة

يارب ترزق كل قلب شريك الحياة اللي يخاف الله فيهُ ويسعده، أجبُر خواطر كل الناس، وطمّن قلوبهم وأسعدها.

ممكن نصلّ على الحبيب! ❤️
#تيسير_الصادق
🥀..

صحبتنا ماشاء الله تبارك الرحمن
مهما يحصل ليها في الدنيا دي من إبتلاءات ، تلقاها مُبتَسمة و مُتطمّنة!♥️

يوم وحدة من صحباتنا سألَتها ، قالت ليها :
اللهم بارِك
كلما الزمن يمشي بحِس بيكِ زايدة يقين ، و قدر ما الدنيا دي تضغطِك بتكوني رايقة
وما بنشوف عليكِ ضِيق ولا جزَع مهما يكون..!

ورّينا السّر بتاعِك ده 😁

ردّت ليها وقالت :
ما عندي سِرّ والله ، كل الحاصل
إني ما بفرّط في عبادتي وطاعة ربنا ، وهي السبب في راحة بالي و الروقة اللي انتو شايفنّها .

صلاتي الفرض في وقتها وبصلّي النوافِل ،
وِرد القرآن ما بجامِل فيهُ أبداً ، ببدأ يومي بسورة البقرة اللي ملَت حياتي برَكة بمعنى الكلمة .

صلاة الضّحى
أجمل حاجة في الصباح وقيام الليل ومُناجاة ربنا ،
وما بوقّف التسبيح والإستغفار!

و ده اللي مُخلّيني عايشة
في حالة من الطمأنينة والتفاؤل والسعادة ، ربنا يثبّتني ويزيدني و يوفّق كل الناس للطّاعة والعِبادات ♥️

..

فاللهم لكَ الحَمد على كل مرةٍ يسّرتَ لي فيها طاعتك وهدَيتَني و نجّيتَني وطيّبْتَ مآلي ، فبِرَحمتِك اجبُر خاطري وفرّج كُربتي وأرِح بالي ، أن تختِم عُمري كما ترضى ، مُستقّري يكون في الجنة وأن أُوتَى صحيفتي باليمين .

ممكن نصلّ على الحبيب!♥️
#تيسير_الصادق
🌿🥀

..

وفي آخر اليوم بقول ليكم :
أي شي يكتبوا ربنا معناها فيهُ خير لينا .. وخير كتير كمان!

وكلما تضيق .. نكتّر نحنا الدعاء

حتُفرَج قريب بإذن الله
وكل الهموم دي حتبقى من الماضي وتبقى ذكرى ..

بس نحنا نتيقّن وندعي كتير! ♥️

ربي يجبر خاطركم كلكم، وإن شاءالله يوم ما تضوقوا مُر ولا تعرفوا طعم الشقا.

ممكن نصلّ على الحبيب! ♥️
#الوتر

عصيت ربنا وخايف ترجع ليهُ، وخايف ما يقبلَك ؟!

شيخ محمد سيّد حاج عليه رحمة الله حكى
في مدارج السالكين قِصة
واحد من الصالحين عَبَد ربنا ٦٠ سنة ♡

قام عمل معصية مرّة، فكأنه دخل على قلبه = إنه طالما
عبَد وعرَف
وإستقام ولَزِم = كونه عصى، إذا رجع إلى الله لن يقبله!

فعصَى ٦٠ سنة أخرى = خلاص اتمادى ..

لمّن وصل عمره ١٢٠ سنة
بِقى ما عنده طريقة زاتو للمعصية!

قول داير يزني = يزني كيف ؟!
مافي طريقة ..

قول داير يلعب قُمار = يلعب مع منو ؟!
والله إلا مع ضُلُّه!

الزول ده قِنِع، قال ربنا ما حيقبَلني ..
اتحكّر وقعد خلاص، الجامع جنبه ما قادِر يمشي عليهُ!

ربنا ساق ليهُ عِظة وعبرة عشان يردّه ليهُ♡

أم و طفلها اتشاكلوا قِدّامُه ..

الأم شايلة المُقشاشة وجارية ورا ولدها
قالت ليه :
بكُتلَك وبكسِر رقبتك، الولد جرى من أمه .

الأم دخلت قفلت الباب زهجانة وغضبانة، والولد لفّ الحلة
دي كلها ما عِرِف يمشي وين!

جا راجِع لِقى الباب مقفول
خاف يخبّط الباب؛ لأنه ما زال في باله وَعِيد أمه :
بكسر رقبتك وبكُتلَك!

قام لكن رقَد جنب الباب💔

أمه المسكينة لمن الواطة مَغرَبَت قامت تكوسُه
لِقَته راقد جنب الباب مُغَبَّر
بكت وشالتُه ونفّضت منه التراب وقَلَدتُه ♡

وقالت :
يا ولدي أما عَلِمتَ ألّا ملجأ لك إلا إليّ؟

أنا اشفِقُ عليك ولا تحملني بِعِنادِك على أن أعاقبك!

قام الصالح وقف على حيلُه
وقال :
ربي عبدتك ٦٠ وعصيتك ٦٠ ولا ملجأ لي إلا إليك ،
فاقبلني ♡

..

أضاف شيخنا قائلاً :
إن الله أحنّ بِعباده من الأم بِولدها 🥹

وعبودية التوبة من أحب العبوديات إلى الله

و يقول جلّ جلالُه في كتابه الكريم
{ إِنَّ اللَّهَ يُحِبُّ التَّوَّابِينَ }♡

لأقول :
أما حان الوقت لتتُوب وترجِع إلى الله؟

#مدارج_السالكين

فاللهم أقمنا على بابِك واجعلنا هُداةً مُهتَدين، تُب علينا واغفر لنا وارحمنا ولا تجعلنا من المُفسِدين، أن توفّقنا لذِكرِك وشُكرك وحُسن عبادتِك، نجّنا من الدنيا فلا تضيع علينا آخِرتنا واهدِنا الصراط المُستقيم .

ممكن نصلّ على الحبيب!♥️
#تيسير_الصادق
🌹..

في راجل سعودي اسمه حمَد، قرّر يتزوج بنوتة
باكستانيّة ..

كلّم أهله إنه عايز يتقدّم ليها، رفضوا تماماً وقالوا
ليهُ ما تتزوّجها = شُوف غيرها!

أصَرّ على موقِفه واتزوّج الباكستانيّة ،، لكن لِقى تريَقة
شديدة من أهله
فقام سافر مع زوجته وعاش مع جِدّه .

زوجة حمَد أنجبَت عدد من الأولاد كلهم حافظين
القرآن الكريم ماشاء الله تبارك الرحمن ♡

حمَد اتوفى ربنا يرحمه ويغفر ليهُ
وبعد سنتين من وفاته = واحد من أولاده بِقى
إمام الحرم المكّي الشريف💕

وبعدها أهل حمَد بِقوا يتقبوا من أولاد حمد ويتباهوا
بيهم وسط الناس،
بعد ما كانوا رافضين زواج أمهم وأبوهم سبحان الله!

عِرِفتوا إمام الحرم منو ؟!

=أيوة هو الماهِر بالقُرآن
فضيلة الشيخ : ماهِر بن حمَد المعيقلي
"جزاهُ الله خيرا"

{ وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ}♥️

..

ربنا خلقنا كلنا بشر زي بعض، مافي زول فينا أحسن
من التاني إلا بالتقوى 💕

والعاقل فينا بيفهم إنه جنسيّة الواحد وشكله
ولونه ونسبه = دي حاجات
إختارها لينا ربنا سبحانه وتعالى ♡

مافي إنسان بيختارها أو بيقدر يحدّدها!

وما أي حاجة
تترفِض معناها غلط أو فيها مشكلة ..!

وسبحان الله ممكن الناس كلهم يرفضوا حاجة معينة
و ربنا يجعل فيها الخير الكتير
لِي قِدّام ،، و وقتها حيعرفوا الحِكمة ♡

#بيوت_متطمنة

فاللهم اختَر لِي ولا تُخيّرني، ارضِني بما كتبتَ وطَمئن قلبي، أن تُدَثِّرني بخَير القول والقلبِ والعَمَل، فتَقَبّل يا رحيم سَعيِي وكل مُحاولاتي الآمِلة.

ممكن نصلّ على الحبيب!♥️
#تيسير_الصادق
🌿🌹

الحالة أو الاستوري دي كانت قبل سنة من الليلة!

إتمنّيت حاجة ودعيت بيها كتير
لدرجة ما تتخيّلوها = واقفة ، جالسة ، بصلّي ، بقرأ قرآن
ساجدة ، وقت المطرة صابّة ، ..

يعني كنت
بتحرّى أوقات الإجابة، وبدعي بإلحاح شديد!
طيب الحصل شنو يا تيسير ؟😁

ماشاء الله لاقوة إلا بالله
اللهم بارِك
الليلة عايشة إستجابة الدعاء ده!

وواللهِ .. وقتها مافي
أي علامة ولا دليل إني حأوصل للحاجة دي!

الدعاء قادر يغيِّر مسار حياتنا كُلها
ويرسم لينا دروب أحلى وأفضل من اللي كنا بنتمنّاها في يوم من الأيام
طريق العبادة والدعاء واللجوء لربنا .. وانت شايل في قلبك اليقِين والتوكّل مع القرآن = حيوصّلك بإذن الله

يا رب
ترزقنا أحلامنا كلها .. وتخلّي دعواتنا مُحَقّقة ♥️
اللهم مافي قلوبنا وأكثر

ممكن نصلّ على الحبيب!♥️
#تيسير_الصادق
..

🎉🎉عدنااااا والعووود أحمد🎉🎉❤️

نبشركم بعوودة لقاءات د.تيسير الصادق مع سلسلة جديدة ممتعة ومفيدة نرزع فيها البذرة لبناء جيل سوي تربوي ينصر الأمة وتقر به الأعين❤️
نبدأ مستعينين بالله سلسلة التربية ضمن لقاءات بيوت متطمنة

اليوم الأحد الساعة
2:00م بتوقيت السودان
3:00م بتوقيت مكة المكرمة

على مقرأتنا رواء الروح 🌹

الرابط في قناة بيوت متطمّنة :
https://t.me/+s91S3b6i0jE1ZGRk

صحبتي عندها خالها وضعُه ممتاز
ماشاء الله ، وعايش مع أولاده مُستقرّين وسعيدين ♥️

فجأة وفي لحظة وحدة حياتهم اتغيّرت تماماً ..
بقى ما شغال
وقدر القروش اللي عندهُم بِقَت ماشة ناقصة ، لحدّي ما انتهَت كُلّها !

الدنيا ضاقت عليهُم شديد سبحان الله
بتحكي لي إنه
يوم وهو طالِع من المسجد بعد صلاة المغرب ، لاقاهُ راجل سألُه من وصف مكان
و وقفوا يتونسوا مع بعض واتبادلوا الكلام

الراجل بدون سبب قال ليهُ :
أنا كنت مارّي بظروف صعبة جداً ، بقيت أقول الصلاة الإبراهيمية كل يوم وبأعداد كبيرة ♡

في الأول بتحِس بيها تقيلة
لكن شوية شوية
لسانك بتعوّد وبتبقى أسهل بإذن الله ، بدأ طوالي لحدي ما وصل بيتُه وحكى لزوجته الموقف وبِقوا كلهم مع بناتهم يقولوها

اللهمّ بارِك
بعد أقل من أسبوعين جاتُه وظيفة رهيبة
وأفضل من الأولى بكتير ،
حياتهم رجعت أحسن مما كانت ماشاء الله تبارك الرحمن

وأي زول يلاقيهُ يحكي ليهُ
ويقول :
صلّ على الرسول
والصلاة الإبراهيمية ما تخلّي لسانك يقيف منها ، وأدعي معاها كتير ؛ أنا حصلت لي حاجات عجيبة وحياتي بِقت مُسَهَّلة ♡

فاللهمّ صلّ على محمد وعلى آل محمد كما صليت على إبراهيم وعلى آل إبراهيم، وبارِك على محمد وعلى آل محمد كما باركت على إبراهيم وعلى آل إبراهيم إنك حميد مجيد .

ممكن نصلّ عليه !♥️
#تيسير_الصادق

اللهم إنا استودعناك أهلنا في الهلالية 💔

لاحول ولا قوة إلا بالله العلي العظيم
اللهم يا مغيث أغثنا ..

يارب نحن العاجزون وأنت القادر!

اللهم عليك بِمَن غرّه حلمك وزاد في طغيانه فقـتل ونهـب وسـرق واعتـدى على أهلنا في الجزيرة وفي كل بقاع السودان .

اللهم إنّ الأرض أرضك، والسماء سماؤك، والجند جندك، والأمر أمرك، والنصر منكَ وحدك، وأنت القويّ العزيز فانصرهم نصرًا عزيزًا من عندك ..

ممكن نصلّ على الحبيب!
#الجزيرة
#الهلالية
#السودان

..

ومافي حاجة حتملأ قلبك راحة
وسعادة زي تلاوة وسمَاع القرآن!♥️

#الوتر
#القران

قالت :
ولدي مرض فجأة ونحنا في غُربة!

حالته اتدهورت سريع و رقَدنا مستشفى ، مرضه خطير و نسبة العلاج ضعيفة ، كانت أسوأ
أيام حياتي لكن ما فقدت الثقة في ربنا أبداً ♡

قدر ما أخاف بسبّح
و كلما أتضايق أستغفر ، و مع أي دمعة بتنزل من ولدي كنت بدعي ربنا و أنا مليانة يقين إنه ما حيخذلني

و الحمدلله ولدي اتعالج ، و الأيام الصعبة بَقتنا أقوى و زادت ترابطنا كأسرة و اتقربنا من ربنا أكتر ..

مهما أحكي ما بقدر أوصف قُدرة ربنا ، ربنا رحيم
و كريم يا تيسير 💚

بتحكي :
أختي لمّن امتحنت شهادة كان نفسها تدخل كلية معينة و نسبة القبول زادت من السنة القبلها و زعلنا شديد ، لكن قدّمنا ..

بتذكر يوم أربعاء صبت مطرة ، طلعنا انا و أمي الحوش و دعينا ليها شديد لحدي ما المطرة انتهت ♡

يوم الخميس الصباح جانا تلفون من مكتب القبول ، قال تجي يوم الأحد معاها الرقم الوطني و الشهادة ، و حسي اختي ماشاء الله نازلة سنة تانية .

والله ربنا ما بنسى زول 💚
..

الفرح بإستجابة الدعاء ، إنتصار جيشنا ، إستقرار بلدنا ، رجعتنا لبيوتنا ، التوفيق في شغل ، النجاح بعد خوف من إمتحان ، التفوق في دراسة

وغيرها الكتير من أسباب السعادة
كلها
بنقدر نحقّقها = بقُدرة ربنا وحُسن ظنّنا بالله تعالى

ضاقَت عليك الدنيا ؟

معليش أصبُر وأحتسب
الدنيا دار إبتلاء

" غداً نلقى الأحِبة ، مُحمداً و حِزبه " ♡

فاللهم يقيناً يسندنا في منعطفات الحياة ، و توكُّلاً ينتشلنا من أعماق كل حيرة ، و حُسن ظنٍّ بك يجعل الأيام تضحك في وجوهنا عند كل خذلان .

ممكن نصلّ على الحبيب!💚
#تيسير_الصادق
..

قريبتنا قاعدة في وحدة من قُرى الجزيرة
مع نسابتها
لكن أهلها في قرية تانية ..

قالت لي :
اليومين الفاتوا
لحظات ما بقدر أوصفها، من الخوف والقلق
ضغطي إرتفع شديد لمن بِقيت اليوم كلّه مُصدّعة

وتفكيري وبالي في أطفالي
وناس أبوي وأمي البعيدين وما قادرة أصل ليهُم!

زوجي قال لي سبّحي كتير وحوقِلي ، اللحظات دي
محتاجين نذكُر فيها ربنا
ونتوكّل عليهُ = بإذنه تعالى عوجة بِتجينا مافي!

ومن اللحظة ديك
لساني ما وقَف من [ لاحول ولا قوة إلا بالله ] 🥀

سبحان الله هدأتَ لدرجة غريبة
لمّن بقيت أطمّن
في باقي الناس حوليني ، وربنا يسّر لينا طلعنا ووصلنا دُوكة بالسلامة ، وقدرت إتواصلتَ مع أهلي وإتطمّنت عليهم

الحمدلله
ولا حول ولا قوة إلا بالله 🥀
..

قال فيها النبي ﷺ لأبي موسى الأشعري : "ألا أدلّك على كنز من كنوز الجنة: لا حول ولا قوة إلا بالله"

فاللهمّ أسألك سلاماً يعانق بلادي وأماناً يُطمئن القلوب ، أن ترزقني تيسيراً لا حَدّ له ولا نهاية ، فيكون دَربي هيّناً ليّناً محفوفاً بكرَمِك ورحمتك ، وأعيش مُطمئنةً سعيدةً قريرة العَين والفؤاد.

ممكن نصلّ على الحبيب!❤️
#تيسير_الصادق
..

الحمدلله إنتهت معاناة قرية ود النورة
وبعض القرى
المجاورة بدخول الجيش .

وكذلك قُرى جنوب غرب الجزيرة 🇸🇩

القلب متألم موجوع
لكن كلنا ثقة ويقين أنّ الفرج قريب بإذن الله

ممكن نصلّ على الحبيب!❤️
#السودان

نحتسب عند الله شهداء السريحة 💔
فقد تمت استباحتها بعد سقوط أبناءها شهداء

لله الأمر من قبل و من بعد
استطاعت القوة المهاجمة دخول أزرق!

اللهم إنّ الأرض أرضك، والسماء سماؤك، والجند جندك، والأمر أمرك، والنصر منكَ وحدك، وأنت القويّ العزيز فانصرهم نصرًا عزيزًا من عندك ..

ممكن نصلّ على الحبيب!
#السودان

قريبتنا حكت لينا :
كان عندي إمتحان ما قريت ليهُ كويِّس وإتأخّرتَ،
طلعتَ من البيت وساعدتَ بت جيراننا في الشارع كانت شايلة كيس
تقيل براها .

وصلتَ الإمتحان ولقيتُه إتأجّل ساعة!🌸

قعدتَ راجعتَ
والإمتحان
طلع ساهل، جاء بَس من الحاجات القارياها!

وجبتَ A عديل 😁

-صحبتنا كان عندها حساسية ومُصدِّعة
خلّصَت شغلها
وطالعة من المستشفى ماشة على الأسانسير لاقَت خالتو شغالة في قسم النضافة، سلّمَت عليها ببُرود ما زي طبيعتها .

قالت أحسن أرجع أسألها من حالها
عشان ما تاخُد في خاطِرها

لمن رجعت إتونّست معاها شوية ومشت على الأسانسير
لِقتَه إتعطّل في الدقائق
اللي رجعت فيها دي بالتحديد!

سبحان الله جبَرت خاطر خالتو وربنا حفظها
وسلَّمها 🌸

جَبر الخاطر ما ساهِل
والـ بيجبُر خاطر الناس = خاطرُه بيتجبِر أكيد بإذن الله.

ده غير إنه جَبر الخاطِر عِبادة!

فاللهم اجعلني طيّبة الأثر كالغَيث أينما حلّت خُطاي، أن أسعَد في حياتي تقيّةً بقُربِك، وتُكرمني بحُسن الخاتِمة وتجعل مستقرّي أعلى الجِنان.

ممكن نصلّ على الحبيب!♥️
#الوتر
#تيسير_الصادق
🌸..

بشائر النصر هلّت 🔥♥️

تم تحرير عدة مناطق في الجزيرة
منها :
ود النورة، الحريز، وحفيرة ..

اللهم لا يأتي الشهر المُقبل
إلّا وقد نصرت جيشنا نصراً عزيزاً مُؤزّرا

و دحَرتَ
الدعم السريع وأهلَكتَه وكل مُعاوِنيه .

وجبَرت
خواطرنا جميعاً وأعطَيت كلاً منا سؤله 😍

ممكن نصلّ على الحبيب!♥️
#تيسير_الصادق

كل مرة غيّروا المكان
اللي بتصلّوا فيهُ ،، ما تثبتوا في مكان واحد!

إستغفروا وسبّحوا وأذكروا الله
في أي شارع
وأي مكان بتجوا مارّين بيهُ = لأنه الأماكن دي حتشهد ليكم
بكُل عمل صالح عملتوهُ فيها يوم القيامة 💕

قال عطاء الخراساني :
" ما مِن عبدٍ يسجُد لله سجدة في بقعة من بِقاع الأرض إلا شهدت له بها يوم القيامة، وبكت عليه! "

خلّيها على صفحتك ،، ذكّر غيرك ،، في ميزان حسناتك

ممكن نصلّ على الحبيب!♥️
#الذكر
#الإستغفار

قالت :
حبوبة أبوي ماشاء الله تبارك الله صلّاية وبتذكُر الله كتير
دائماً سِبحتها في يدها ..

ما كانت بتعرف تقرأ وتكتب، عشان كده ما قِدرَت
تقرأ القرآن من المصحف!

لكن مما فتّحنا في الدنيا دي لقيناها
بتشغّل الراديو جنب سريرها ♡

سبحان الله
حِفظت سُور كتيرة بالسّماع ده ،، وكانت يومياً
بتقرأ
سورة المُلك وسورة السجدة قبل النوم
من حِفظها من رأسها .

بعد ما إتوفت ربنا يرحمها ويغفر ليها، شُفتها في رُؤيا
وسألتها :
حبوبة، كيف حالك ؟

قالت لي :
أنا مرتاحة وفرحانة شديد مع القرآن
وسورة المُلك والسجدة 💕
..

رسولنا الحبيب ﷺ قال :
" إن سورة من القرآن ثلاثون آية
شفَعَت لِرجُلٍ حتى غُفِر له، وهي سورة تبارك الذي بيده المُلك"

وكان ﷺ لا ينام في لَيلة حتى يقرأ سورة السجدة!

#سورة_الملك

فاللهم طيّب عمَلي وبارِك بلُطفك سعيي وطاعاتي، أعوذ بكَ من عذاب القبر وفِتنته، أن تُحسِن خاتِمتي وتكتُبني وأحبّتي من أهل الجنّة.

ممكن نصلّ على الحبيب!♥️
#تيسير_الصادق
..

🍂 يتجدد اللقاء مع الغالية: د.تيسير الصادق 🥀

في سلسلة لقاءات بيوت متطمنة
مع تكملة موضوع اللقاء الماضي بعنوان:                          
【 عايــزة الجنـَّـة ولا النـَّـار ؟! 】2⃣

 مع مفاجأه بنهاية المحاضرة ترقبـونا 😌🌸❤️

🗓 اليوم
🕰 ٥:٠٠ عصراً توقيت مكة 🇸🇦
🔘 ٤:٠٠ عصراً توقيت السودان 🇸🇩


🔗 تُنقل عبــر مقرأة أخذها بــركة 💜
https://t.me/+LXDuswq1rPc5NTQ0

وينزل التسجيل بقناة بيوت متطمّنة 🌷
https://t.me/+5pNdx-xVmhE3OWI0

أنشروا رابط القناة بين النساء وليكِ أجر كل مستفيدة إن شاءالله ♡

وما تنسي :
"الدال على الخير كفاعِله" 💜

أيام الخِدمة كان في دكتورة نزلت جديدة معانا في المستشفى، طيبة وفرفوشة اللهم بارِك .

بعد أسبوع جات مهمومة وكان واضح عليها
إنها متضايقة!

ما حبّيت أتدخّل
أو أسألها، لكن قعدتَ أتونّس معاها وحاولتَ أطلّعها
من جو الحُزن ده ..

سبحان الله بعد الدوام إنتهى لحقَتني برّة جنب باب
المُستشفى، وقالت لي عايزة أفضفض
معاك شوية .

مما بدَت كلامها دموعها نزلَت طوّالي
وكانت بتشتكي
من ناس علاقتها معاهم كانت جميلة وقدّمَت ليهم
كل الخير، لكن فجأة إتغيّروا في التعامُل معاها!

قلت ليها :
كلُّه لخير ليكِ بإذن الله، وبتعرفي الحِكمة لقِدّام .

عامّةً في الدنيا دي
الباب الحيقفِل في وشّك والناس الإنتهَت علاقتك معاهم
ما حيكونوا نهاية ليك إنتي!

دي نهايات وجودهم في حياتِك و عطائهم ليك .

وبعد كده
ما ح يضيفوا ليك حاجة = كانت مرحلة و خلصَت!♥️

وخلّيك واثقة إنه أي حاجة
انتهَت حتبدأ غيرها حاجة تانية، و كل باب اتقفل حيتفتِح غيره
بدل الباب الواحد بابين وتلاتة

حتى الشعور بيتعوّض ،، والفكرة البِتفشَل حتلقي غيرها
أفكار تانية!

الحاجات والمواقف بتحصل
عشان تصنع منك شخصيّة أقوى، وتزيد ليك الوعي وتقدري تعيشي بيهُ الفترات الجاية من عُمرك .

وطالما واثقة إنك ما ظلمتي إنسان، وما قدّمتِ غير الخير
فما تضيّعي وقتك وصحّتك في التركيز في حاجات وعلاقات مُنتهية!

انتي البِتختاري
أثر الناس والمواقف عليك = كبّري الكوم البِفرّحك ويبسطك،
والبزعّلك أنسيهُ وانتي الكسبانة!

#الحياة

فاللهم اجعلني طيّبة القلب صاحبة الخير في الدنيا، أن تنثُر الحِكمة في تعاملي مع الأحداث من حولي، عزيزةٌ أنال قسمتي بقلبٍ راضٍ ونفسٍ مُطمئنة، زائدة الخير مأمونة الجانب ماحَييت .

ممكن نصلّ على الحبيب!♥️
#تيسير_الصادق
🌹

قالت :
قريت طب بشري ، وكنت عايزة أتخصّص
تخصُّص معيّن 🌸

استخرت و مشيت أسجّل ، لقيت البنك قفل
و ده كان آخر يوم للتسجيل!

سبحان الله اتسهّل لي تخصّص مختلف تماماً
من التخصّصين اللي فاتوا ، و ربنا وفّقني أبدعت فيهُ و بقيت من المتميّزين عالمياً ماشاءالله تبارك الله ♡

قالت :
اتفصلت من شغلي بدون سبب واضح ، وفي نفس الفترة
خطيبي قال لي ما بقدر أواصل معاك!

اتكسرت شديد لِدرجة بقيت زي العيانة من
الهموم و عدم الأكل .

الحمدلله الحمدلله ربنا وفّقني
و لقيت شغل أحسن من الأول بِمليون مرة ، و بعد سنة و شوية ربنا رزقني زوج مهذب
محترمني و مبسوطة معاهُ ❤️

قال :
كنت أستاذ في مدرسة و راضي جداً من شُغلي ، حصل سوء تفاهم بيني و بين أستاذ زميلي ..

المدير من غير ما يفهم الحاصل
قال لينا :
جزاكم الله خير ، قدمو استقالتكم!

ربنا سهّلها علَي
و فتحت بزنس خاص بَي ،
و اتفتحت علَي أبواب الخير من كل الجهات 🌸

و الحمد لله رب العالمين
بقيت فترة الصباحية اللي كنت بمشي فيها المدرسة ، بمشي حلقات تلاوة
و حفظت القرآن الكريم كامل ، أسأل الله الثبات و القبول .

🌸🌸..

شفتوا ربنا كريم و رحيم كيف!
و عوضُه
جميل شديد لمّن بنسّينا كل الوجع اللي عِشناهُ .

عشان كده ما تفقدوا الأمل مهما يحصل!

خليكم متفائلين و واثقين إنه ربنا حيجبُر خواطركم
و إنها حتتيسّر بإذنه تعالى ❤️

ولازم نتعلم نعيش و نحنا راضين بالـ كتبُه
لينا ربنا ..

الرضا بجيب البركة و الرزق
و الرضا بخلّينا متطمّنين و مُرتاحين بال

واتذكروا دايماً إنه :
حنقعد نفكر ونخطّط= وتجي ترتيبات ربنا
تودّينا لِمكان تاني
أحسن بِكتير ،، و عمرنا ما كنا متخيّلنُّه!

فالحَمدُ لله على خطواتٍ لم تكتمل ، نسأله الرضا و اليقين و حُسن الظنّ به ، أن يهَبنا البركة و التيسير فيما سيأتي ، و تطِيب أيامنا بأجمل الإختيارات .

ممكن نصلّ على الحبيب!❤️
#تيسير_الصادق
..

قالت :
أخدتَ وقت طويل حتى قدرتَ أواظِب على قيام الليل!

مرة أنوم ومرة أقفِل المنبه بدون ما أشعُر
ومرات أمشي أتوضأ
والشيطان يوسوِس لي "نُومي نُومي وأقيمي الليل بُكرة"

حاولتَ كتير
ودعيت كتير ،، وضبطتَ منبّهات كتيرة ،، ووصّيت ناس بيتنا
كتير لحدي
ما ربنا وفّقني أناجيهُ كل يوم في الثلث الأخير من الليل ♡

حصَل لي شنو ؟!

أي حاجة بتمنّاها بشُوفها قِدّامي، وأي دعاء بقولُه
بلقاهُ مُستجاب
وحتى الكلام البقولُه بيني وبين نفسي بيبقى حقيقة!

قيام الليل ممكن يكون هو [الخبيئة]
بينك و بين الله تعالى
لِقول رسولنا ﷺ " مَنِ استطاعَ منكم أنْ يكونَ لَهُ خِبْءٌ مِنْ عمَلٍ صالِحٍ فلْيَفْعَلْ "..

#قيام_الليل

فاللهم اجعلني مّمن صلّت فرضها و أرضَت ربها و قامَت ليلها، أن تحفظني يوم يفزع الناس، و قِني شر غفلة في ليلةٍ صُبحها ليس في الدنيا .

ممكن نصلّ على الحبيب!♥️
#تيسير_الصادق
🥀

خالتو جارتنا بناتها صحباتنا، يوم كنا قاعدين سوا
قالت لينا :
بعد ما إتزوّجتَ ، قعدتَ خمسة سنين ونُص ربنا ما رزقني
أطفال .

كنت مقلّقة وخايفة من كلام الناس!

بِقيت أقرأ دعاء سيدنا زكريا في كل سجدة ،، وإشتريت لَي
سِبحة عشان أتذكّر أسبّح طُول اليوم

أول مرة في حياتي أستغفر بالأعداد الكبيرة
ألف وألفين وخمسة آلاف!

القلق راح وبعد فترة بسيطة
والحمدلله ربنا رزقني ولدي البِكر، وبعدُه جوني البنوتات
الغلباويّات ديل 😁

كانوا زي كل الأطفال
بيلعبوا ويوسّخوا البيت ويصرّخوا ويبكوا، مرات بكون
تعبانة ومساهرة أو عيّانة = لمن أتضايَق شديد

بتذكّر إنه كيف كنت زمان بتمنّى واحد بس منهم!

وبقول لنفسي :
معليش، ديل نِعمة من رب السماء ♥️
..

كلام خالتو ده ذكّرني
قريبتنا الكانت عايزة تبدأ بزنس ودائماً تقول لينا :
أدعوا لَي
منتظرة متين أبدأ وأحقّق حلمي ،، ولمن بدت ماشاء الله
تبارك الله اتوفّقَت وعملت زبائن

لكن كانت زهجانة من كترة الطلبيّات والتعب!

وذكّرني أخو صحبتنا اللي حكَت لينا عنّه
وقالت :
من الثانوي بقول لأبوهُ
أنا منتظر متين أتخرّج عشان أساعدك في المسؤولية

بعد إتخرّج وإشتغل، بِقى ينقنِق في الدوام وطُوله!

وإتذكّرتَ الطالبة
البِتقول للشيخة في حلقة التحفيظ :
أدعي لي بالزوج الصالح 🙈

وبعد ما إتزوّجت ،، بقت تشتكي من المسؤولية!

كل القِصص دي وغيرها بتخلّينا نتأكّد تماماً
إنه النعمة = ميقاتها عند الله سبحانه وتعالى، و كل حاجة عنده بقدر .

وكل الأهداف والإنجازات في الحياة
ما مربوطة
بأي عُمر ولا زمن!

ولمّن نصل لأهدافنا ولمّن أحلامنا تبقى حقيقة = ياريت
نحمِد ربنا عليها ونقدّرها ♡

#بيوت_متطمنة

فاللهم بلّغني رجائي برحمتِك ويسّر أمري بلُطفك، أن تكرمني في داري البسيطة وتُبلّغ قاربي الصغير مراسيه الآمِنة، فأظل سعيدةً بقُربك ومُطمئنةً بطاعتك وخاتِمتي الجنة.

ممكن نصلّ على الحبيب!♥️
#تيسير_الصادق
🥀

ماشاء الله تبارك الرحمن 😍

إتنين من الجميلات إتعالجوا من تعطيل الزواج وتمّ
عقد القِران
وحدة قبل أسبوع والتانية قبل ٩ يوم .

واحدة من الجميلات
كان عندها تعطيل حِمل وسمعت الرّقية وبشّرتني بحِملها قبل يومين ،، ربنا يتمم ليها على خير
ويسعدها برؤية مولودها يارب العالمين

جميلة تانية زوجها كان مُخاصمها، وما بيتكلم معاها
بدون سبب!
بعدما سمعت الرُّقية، زوجها رجع طبيعي معاها
وأحسن من أول .

ولِسّه في رسائل ما قريتها!

اللهم بارِك
اللهم بارِك

القصة إنهم
كلهم إتوكّلوا على الله ،، حافظوا على صلواتهم والأذكار
وأكثروا من الدعاء بيَقين

جزء منهم كمان كانوا بيعملوا رُقية الفاتحة ♡

(الرُّقية في قناتنا النسائية[بيوت متطمّنة] في تيليغرام)

#بيوت_متطمنة

فاللهم عافِ فؤادي بالجَبر والأمان والمسرّات الوفيرة، أدخِلني فردوسك وقد زال كدَري وسكنَت نفسي في رِضوانك.

ممكن نصلّ على الحبيب!♥️
#تيسير_الصادق
🥀

لقاءنا اليوم نستكمل فيه الحديث عن الطلاق وما بعده لنصل لبيوت متطمنة🌿 مع الغالية د.تيسير الصادق🌿

الساعة
2:00م بتوقيت السودان
3:00م بتوقيت مكة

على مقرأتنا رواء الروح، الرابط في قناة
بيوت متطمّنة:
https://t.me/+5pNdx-xVmhE3OWI0

صحبتي ماشاء الله تبارك الرحمن
حافظة القرآن الكريم ، و لطيفة و بتحِب الخير للناس ♥️

عندها بت عمّتها أصغر في العُمر اتخطَبَت
وبنات خالاتها اتنين عقدوا عليهم في نفس الأسبوع اللهم بارِك ، و صحباتها اتنين زواجهم بعد كم شهر ..

كنا بنتونّس قامت حكَت لي بيهم
وقالت لي :
ماشاء الله بنات أهلي و صحباتي اليومين ديل خُطوبات و عقودات وأعراس ربنا يسعدهم كلهم يارب .

شاغلْتَ أمي قلت ليها :
شنو يعني العرسان ديل يمشو بي جاي و بي جاي
وما بجونا ، وقعدنا نضحك 😁

وكانت سعيدة ليهُم والفرحة واضحة في كلامها !

قلت ليها :
إن شاء الله قريب نفرح بيكِ انتي كمان ♥️
وقفَلنا ..

بعد ربع ساعة رسّلت لي :
يا تيسير ،
بعد قفَلتَ منك فتحت إذاعة القرآن الكريم في تلفوني
ولقيت الشيخ بيقرأ :
{وَلَقَدْ آتَيْنَاكَ سَبْعًا مِّنَ الْمَثَانِي وَالْقُرْآنَ الْعَظِيمَ ¤ لَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ}
لآخر الآيات من سورة الحِجر ..

دموعي جرَت والله
أنا فرحانة ليهم كلهم و ربنا عالِم بي ، لكن حسّيت إنه دي رسالة من ربنا لي !

سجدت حمدت ربنا على نِعمة القرآن اللي في قلبي ♡

واللي عنده القرآن معناها
عنده الدنيا كلها وما ناقصاهُ حاجة تاني !

فاللهم اغنِنا بِك وتُب علينا وارحَمنا ، اغفِر لنا إن مدَدنا نظَرنا لما يملك الغَير ونسِينا ما أنعمتَ به علينا ، نسألك من نعيمِك الدائم مجبوري الخاطر و قَريرِي الأعيُن والفؤاد .

ممكن نصلّ على الحبيب !♥️
#تيسير_الصادق
🌿🥀

..

لعلّ القادِم سَرد كتاب الله في مكة!

أبشِروا ♥️
#الوتر

تحمّل صهيب الرومي نصيبه من أذى المشركين وقاسى
من عذاب قريش ما إن أُنزِل على جبلٍ لَهَدّه!

تلقّى ذلك كله بنفسٍ صابرةٍ مُحتَسبة
لأنه كان يعلم
أن طريق الجنة محفوفٌ بالمكارِه .

ولمّا أذن رسول الله ﷺ لأصحابه بالهجرة إلى المدينة، عزم صهيب على أن يمضي في صُحبة الرسول ﷺ وأبي بكر رضي الله عنه.

لكن قريش علمت بعَزمه على الهجرة!

فصدّته وأقامت عليه الرُّقَباء حتى لا يفلت من أيديهم، ولا يحمل معه ما درّته عليه التجارة ..

ظل صهيب بعد هجرة الرسول ﷺ وصاحبه يتحيّل الفُرص ليَلحق بهما = فلم يفلح!

وفي ليلة باردة أكثر صهيب الخروج إلى الخلاء كأنه يقضي الحاجة، فكان لا يرجع من قضاء حاجته حتى يعود إليها مرةً أخرى
فقال بعض الرقباء لبعضهم:
طِيبوا نفساً فإن اللاة والعُزّى شغلاه ببطنه، ثم أوَوا إلى مضاجعهم وأسلموا عيونهم إلى نومٍ عميق

فتسلّل صهيب وتوجّه نحو المدينة ♡

لم يمضِ غير قليل على رحيل صهيب حتى إنتبه الرقباء وامتطوا خيولهم حتى أدركوه!

فلما أحسّ بهم وقف على مكانٍ عالٍ وأخرج سهامه ووتَر قوسه
وقال :
يا معشر قريش، لقد علمتم والله
أني من أرمى الناس وأحكمهم نصاباً، ووالله لا تصِلون إليّ حتى أقتل بكُلّ سهم معي رجلاً منكم، ثم أضربكم بسيفي ما بقي معي بشيءٍ منه

قال قائل منهم :
والله لا ندعك تفوز منا بنفسك وبمالك، لقد أتيت مكة صعلوكاً فقيراً فاغتنيت وبلغت ما بلغت!

فقال :
أرأيتم إن تركت لكم مالي فهل تخلون سبيلي ؟

قالوا :
نعم

فدلّهم على موضع ماله في بيته في مكة، فمضوا إليه وأخذوه منه ثم أطلقوا سراحه 🥺

أخذ صهيب يغزُّ السير نحو المدينة فارّاً بدِينه غير آسفٍ على المال الذي بذَل الوقت والعُمر لِجَنيِه!

وكان كل ما أصابه التعب استفزّه الشوق إلى رسول الله ﷺ، فيعود إليه نشاطه ويواصل سيره ..

فلما بلغ قُباء رءاهُ رسول الله ﷺ مُقبِلاً، ففَرِح برؤيته،
وقال :
ربِح البيع أبا يحيى، ربِح البيع 💛
(وكررها ثلاثاً)

فعلَت الفرحة وجه صهيب
وقال :
والله ما سبقني اليك أحدٌ يا رسول الله وما أخبرك به إلا جبريل!

#السيرة_النبوية

حقاً لقد ربِح البيع وصدّق ذلك وحي السماء وشهِد عليه جبريل حيث نزل في صهيب قول الله ﷻ :
﴿وَمِنَ النّاسِ مَن يَشري نَفسَهُ ابتِغاءَ مَرضاتِ اللَّهِ وَاللَّهُ رَءوفٌ بِالعِبادِ﴾ 🍂

فاللهم أحيِنا وأمِتنا على سُنّته، احشُرنا في زُمرَته وارزقنا شفاعته، وأورِدنا حوضَه هانئين مُطمئنين ومُكرَمين برؤية وجهك الكريم.

ممكن نصلّ عليه!💛
🍂..

..

..

لأي زول عنده ولده، أخوه، صحبه
ف الجيش

ربنا يحفظه
وتحتفلوا بالنصر سوا قريب🤲
#السودان

-عايزة أتطلق
-شنووووو👀

-عايزة اتطلق
-يااا زوووله كدي استهدي بالله

-لالا دقيقة 😂
🌿عايزة أتطلق دا عنوان لقاءنا اليوم في بيوت متطمنة مع الغالية د.تيسير الصادق نتناقش فيه عن الطلاق ، ونسعى بيه لِبيوت متطمنة كما تعودنا دائماً🌿

كونوا حضوراً مع مَن تحبون
الساعة
5:30 بتوقيت السودان
6:30 بتوقيت مكة المكرمة

على مقرأتنا رواء الروح، الرابط في قناة بيوت متطمّنة:
https://t.me/+5pNdx-xVmhE3OWI0

🚫 يمنع دخول وإسماع الرجال

..
الحمدلله 😍

الدروشاب جنوب ،، المُدرّعات 🔥♥️

#السودان