ကဗျာလမ်း

@poem2023

ကဗျာလမ်းလေးထဲ လျှောက်လာခဲ့ပါ
မိတ်ဆွေ

ကဗျာလမ်း (Burmese)

ကဗျာလမ်းဆုံးသည် ရုပ်ရှင်ရယူ၊ မြန်မာနိုင်ငံ၏ ပိုင်ရှင်များအတွက် မြန်မာနိုင်ငံ နှင့် နိုင်ငံနှင့် နိုင်ငံအတွက် ရှာမှီဖီရှင်အသုံးပြုခြင်းမှ တွေ့ရမှုလုပ်ငန်း လဟင်းချမ်းသာ၊ လက်ခံကတ်ခတ္တ္တောင် အသုံးပြု၊ ရုပ်ရှင်အသုံးပြု၊ တို့ကိုင် တွေ့ရမှုသာတင်းရေ ရှာဖွေခြင်း၊ ဩးဖိုမြေအသုံးပြု တွေ့ရမှုလုပ်ငန်း အသုံးပြုနိုင်ချိန်များနှင့် ရုပ်ရှင်များနှင့် အသုံးပြုလိုပါက လိုအပ်ပျက်လည်မှာဖြစ်ပါသည်။ ကဗျာလမ်းသည် နောက်ဆုံး ရုပ်ရှင်များ၏ အထူး အကူ ပြန်လည်ရှိမှုဖြစ်ပါသည်။ အခြေစိုက် ၄ အသုံးပြုခြင်း အတွက် တွေ့ရမှုနိုင်ခြင်း၊ ရုပ်ရှင်အသုံးပြုနိုင်ခြင်း၊ လိုအပ်လည်မှာဖြစ်ပါသည်။ ကဗျာလမ်းသည် မိုးမော်မြ့ချမ်းသာကျော် ဖုိသင်ကြ ကျေးကျေးဆွေ ပိုင်းရှင်အပြည့် နှင့် နာမည်တို့ မိတ်ဆွေမြှင့်နှင့် မျှော် ရှိတတ်သော နာမည်လိုပါက လူသုံးညီမျှော်တတ်ပိုင်ခြင်းနှင့် လူသုံးညီတတ်ရိုင်ခြင်းလျှင် လူသုံးညီလိန် နှစ်သက်လောင်းများအတွက် တွေ့ရမှုလုပ်ငန်း အသုံးပြု နိုင်ချိန်များကို ရှာဖွေခြင်းဖြစ်ပါသည်။ ကဗျာလမ်းသည် မြန်မာ နိုင်ငံတစ်ရပ် အတွက် တွေ့ရမှုလုပ်ငန်း သာတင်းရေရှာခြင်းနှင့် သာဓုခြင်းအတွက် ရှာမှီတြင် နောက်ဆုံးရုပ်ရှင်များကို အသုံးပြု နိုင်ချိန်ရိုက်သည်။

ကဗျာလမ်း

03 Sep, 10:16

ငရဲသား များ

-----------

လူ့ဘုံဆိုတာလည်း
ငရဲကြီးရှစ်ထပ်ရဲ့ ထမ်းပိုး ပဲ

ဘာမှမဟုတ်ပါဘူး
ကမ္ဘာကြီး ခါးညောင်းလို့
တချက်ဆန့်လိုက်တာပါ ။

ဘာမှမဖြစ်ပါဘူး
လေထု မောပမ်းလာလို့
ချောင်းဟန့်လိုက်တာပါ ။

ဘာမှမစိုးရိမ်ပါနဲ့
လူ့ဘဝအနှစ်သာရကို
မေးခွန်းထုတ်ကြည့်တာပါ ။

ကပ်ကြီးပြီးသွားရင်တော့
ကပ်ကြေးသွေးထားလိုက်တော့
ပုလင်းဖုံးတွေ ဖွင့်ရ ခက်တယ် ။ ။

◾ခက်သီ

#thebookbazaar
#ခက်သီ
#ငရဲသားများ

1,609

ကဗျာလမ်း

31 Aug, 02:29

#နေတစ်ခွက် လ တစ်ခွက်

တိမ်တွေကိုယူပြီး
ဖန်ပုလင်းလေးထဲ ထည့်ထားလိုက်တယ်
စာကြည့်စားပွဲပေါ်မှာ
တိမ်ပုလင်းလေးနဲ့ ဆိုတော့
တိမ်တွေကိုမော့ငေးပြီး
ကဗျာရေးစရာမလိုတော့ဘူးလေ

တောရိပ်တောင်စွယ်တွေကို
ကင်းဗတ်စပေါ်ကော်နဲ့ကပ်ထားဘို့
ရိုးမကိုဖြတ်ပြီးသယ်ခဲ့တယ်
ခုတော့ ငါ့အခန်းလေးမှာ
လွမ်းရောင်သမ်းတဲ့ စိမ်းညို့တောင်တန်းကြီးတွေက
နေရာယူလို့

တောင်ဆီမှာ မိုးတွေညို့လာပြီ
ငါ့အခန်းလေးထဲ ရွာသွန်းမြဲထက်ပိုစေဖို့
မျက်ရည်စို့ရုံလေးဆုတောင်းတယ်
နေတစ်ခွက် လတစ်ခွက်
ချစ်သူအတွက်သောက်ခဲ့မိပါတယ် ။

#မိုးကျော်ဌေး
၂၈၊၈၊၂၀၂၁

1,505

ကဗျာလမ်း

09 Aug, 15:20

မျက်ရည်

--------

ဆိုကြပါစို့
ခင်ဗျားပဲဖြစ်ဖြစ် ကျွန်တော်ပဲဖြစ်ဖြစ်
အဲဒီခေတ်က မကုန်သေးဘူး
သံဝေဂတွေ အဆုပ်လိုက်အခိုင်လိုက်
ပေါင်မုန့်တစ်လုံးကို
အချစ်ရေလို့လည်း မခေါ်နိုင်ဘူး
လိုအပ်ချက်ကို ပြုပြင်ဖို့ရာ
မတည်မြဲသော စိတ်နဲ့ မတည်မြဲသော ညီညွတ်မှုများ
ကြက်ကလေး ငှက်ကလေးဖမ်းသလို
ဖမ်းမယ်ဆိုရင်တော့
မေတ္တာတရားကို မိမယ်မထင်ဘူး။ ။

◾အောင်ခိုင်မြတ်(စတိုင်သစ်မဂ္ဂဇင်း ၊နိုဝင်ဘာ ၊၁၉၉၉)

#thebookbazaar
#အောင်ခိုင်မြတ်
#မျက်ရည်
#အေးတဲ့မီး

1,957

ကဗျာလမ်း

08 Aug, 03:04

စိတ်ကုန်ခြင်း

-----------

နံရံပေါ်မှာ
ရောင်စုံ ရူးသွပ်နေတဲ့ စာအုပ်တွေကိုလည်း
ဆက်မဖတ်ချင်တော့ဘူး။

အချစ်ကို ဝေမျှချစ်ချင် ချစ်မယ်
ငါ့အစာကို လာမလုနဲ့ဆိုတဲ့
ခေတ်ပေါ်သီချင်းတစ်ပုဒ်ကိုလည်း
လိုက်မဆိုချင်တော့ဘူး။

စက်ရုပ် မဟုတ်ဘူး
စက်ရုပ်ဆန်ရမယ်ဆိုတဲ့
လူသား မီးခိုးခေါင်းတိုင်တွေနဲ့လည်း
လေထုညစ်ညမ်းမှုအကြောင်း
မငြင်းချင်တော့ဘူး။

အာဠာဝကတွေ
ဆေးမင်ရုပ်တွေနဲ့
လူဟာ လူ မဟုတ်တော့သလိုမျိုး
အဲဒီ အရုပ်ကြိုးပြတ်တွေနဲ့လည်း
ဆက် မကချင်တော့ဘူး။

အဖော်တွေ ပြန်ခေါ်သွားခံရတဲ့
ကလေးတစ်ယောက်လို
ဒီနေ့ ကိုယ့်အသံနဲ့ကိုယ် နားလေးသွားပုံက
လူကြီးတစ်ယောက်ရဲ့ အတွေ့အကြုံမျိုးလည်း
စုံလှတယ်။

အခု ငါ နံရံကို အာရုံပြုနေပါတယ်
သီချင်းတစ်ပုဒ်အပေါ်
တက်ထိုင်နေတာက လွဲရင်
အောက်ခြေ နည်းနည်းလွတ်နေတယ်လို့
ပြောကြတာပဲ
စိတ်မရှိပါဘူး။ ။

◾ဝင်းမြင့် (လူဝင်စားတွေထိုင်တဲ့ကဖေးမှ)

#စိတ်ကုန်ခြင်း
#ဝင်းမြင့်
#လူဝင်စားတွေထိုင်တဲ့ကဖေး
#thebookbazaar

1,735

ကဗျာလမ်း

08 Aug, 02:59

မျှော်ငေး-၃

----------

မိုးတွေ တိတ်သွားပြီ

ဘယ်ကနေပြန်လာမှန်းမသိတဲ့ ငှက်ကလေးတွေ
သူတို့အသိုက်အမြုံရှိရာ ပျံသန်းကြလေပြီ
ကြောင်အိမ်ထောင့်မှာ ကြောင်လေးတစ်ကောင်ဟာ တစ်ခုခုကို စောင့်ဆိုင်းနေသလို ငြိမ်သက်နေတယ်

မိုးတွေ ပွဲပြီးမီးသေ တိတ်သွားပြီ

လူမမာတစ်ယောက်ရဲ့စိတ်မှာ တမ်းတတတ်မှုတွေ
အခုထိ မတိတ်နိုင်သေးဘူး
လူမမာတစ်ယောက်ရဲ့ခန္ဓာကိုယ်ပေါ်
အဝေးရောက်အသံတွေ တဖွဲဖွဲလာရွာကျနေတုန်းပဲ

ဒီအသက်ဒီအရွယ်ကြီးဟာ
လွမ်းတဲ့စိတ်ကို လှအောင် ဖွဲ့ချင်နေသေးတာ
ချစ်ခြင်းဟာ ဘယ်တော့မှ မအိုမင်းလို့ဖြစ်ပေလိမ့်မယ်

မိုးတွေ လိမ်လိမ်မာမာလေး တိတ်သွားပြီ

သစ်ရွက်လေးတွေ အသံတိတ်နေပုံဟာ ချစ်စဖွယ် စိမ်းလန်းသော...
နူးညံ့သိမ်မွေ့သော...
သာယာကြည်နူးဖွယ်ကောင်းသော...
တရားဓမ္မမှာသာ မွေ့လျော်ပါ အချစ်ရယ်

စောင့်မျှော်ခြင်းတံခါးဝမှာ
လဲကျနေသူတွေကို တွေ့တဲ့အခါ
ဟောဒီနာမကျန်းမှုလေးကို သတိရပါ

မိုးတွေဟာ သပ်သပ်ရပ်ရပ် တိတ်သွားခဲ့ပါပြီ

ကမ္ဘာမြေပေါ် စိုက်ပျိုးထားခဲ့မိတဲ့
မျက်ရည်ပေါက်ကြီးငယ်တွေသာ
တစ်နေ့ အပင်ပေါက်ပြီး ကောက်ပဲသီးနှံတွေ
ကြွယ်ပိုးကြွယ်ဝဖြစ်ပါစေ

မင်းဂိုထောင်လေး ဖွင့်ထားမယ်မဟုတ်လား
ပြန်မဆုံနိုင်ခဲ့လည်း ရောက်အောင် လာခဲ့ချင်လို့ကွယ်။

◾ကိုသျှား

#thebookbazaar
#ကိုသျှား
#မျှော်ငေး

1,104

ကဗျာလမ်း

07 Aug, 14:01

ပါရမီ
#မိုဃ်းဇော်

ဟောဒီဂြိုဟ်ပြာပေါ်က
အတော်ဆုံးပညာရှင်တစ်စုရဲ့
သိမှုနယ်ပယ်အပြင်ဘက်မှာ
ခရီးသည်တွေကိုတင်ဆောင်ပြီး
ပါရမီဟာတရိပ်ရိပ်ပြေးနေရဲ့။

အရေခွံလဲပြီးခါစမြွေတစ်ကောင်လို
စွတ်စိုတောက်ပြောင်နေတဲ့စိတ်ဓာတ်နဲ့
ပါရမီပေါ်မှာ
ကျွန်တော်မတ်တတ်ရပ်ပြီးလိုက်ပါလာခဲ့တယ်။

ဒေါပုံသင်္ဘောကျင်းရောက်တော့
သူတို့သားအမိနှစ်ယောက်ကို
ကျွန်တော်သတိထားမိလိုက်တယ်။

သူ့ကိုယ်ပေါ်မှာ
ပါ၀ါရိန်းဂျားစွပ်ကျယ်ကလေးတစ်ထည်သာ
၀တ်ဆင်ထားပေမဲ့
ဆောင်းဘက်လုနေတဲ့
နို၀င်ဘာရာသီဥတုက
သူ့ကိုနှိပ်စက်နိုင်ပုံမပေါ်ဘူး။

လမ်းတစ်လျှောက်လုံး
သူ့မျက်လုံးတွေကိုပိတ်ထားခဲ့
သူ့နားတွေကိုပိတ်ထားခဲ့
သူ့ကိုကြည့်ရတာ
ပုံပြင်ထဲကမင်းသားကလေးတစ်ပါး
တောကစားထွက်ရင်း
စွံပလွံပင်တွေကြားထဲအိပ်ပျော်နေသလိုပဲ။

ဘယ်အချိန်အထိ
သူဒီလိုမျိုးအိပ်ပျော်နေနိုင်မလဲ
ကျွန်တော်စဥ်းစားကြည့်တယ်။

သူ့အမေရဲ့
ကြုံလှီအားနည်းလှတဲ့လက်ပေါ်မှာ
ဘာအိပ်မက်တွေများမက်နေရှာမလဲ
ကျွန်တော်စဥ်းစားကြည့်တယ်။

ပြီးတော့လည်း
သူကြုံတွေ့ရမယ့်မနက်ဖြန်ဟာ
အများသူငါမျှော်လင့်ထားကြသလို
ပျော်ရွှင်စရာကိစ္စတစ်ရပ်ပဲလား
ကျွန်တော်စဥ်းစားကြည့်တယ်။

ရွှေရောင်ခြည်မြစ်ကမ်းပါးမှာ
စင်ရော်ငှက်တွေပျံသန်းလာတဲ့အထိ
ကျွန်တော်စဥ်းစားကြည့်တယ်။

ငရဲဘုံတစ်ဖက်ကမ်းက
နတ်သမီးတွေရဲ့အနမ်းခံနေရတဲ့သူဟာ
တဖြည်းဖြည်းလူးလွန့်တုန်ခါရင်း
ဒီကမ္ဘာဆီပြန်လည်ကူးသန်းလာမယ့်အချိန်အထိ
ကျွန်တော်စဥ်းစားကြည့်တယ်။

ဖားဥစွဲနေတဲ့
ဘရာစီယာကလေးကိုပင့်တင်
သူ့အမေကနို့တိုက်ဖို့ပြင်တဲ့အခါ
နှုတ်ခမ်းကလေးကိုဟ
မျက်ခွံကလေးကိုဖွင့်ပြီး
သူပြန်လည်နိုးထလာမယ့်အချိန်အထိ
ကျွန်တော်စဥ်းစားကြည့်တယ်။

အခြေအနေအရ
အိပ်ပျော်နေတာကအကောင်းဆုံးပါပဲလေလို့
မချင့်မရဲတစ်၀က်
လက်လျှော့လိုမှုတစ်၀က်နဲ့
ကျွန်တော်စဥ်းစားကြည့်တယ်။

"အကယ်၍
အောင်မြင်မှုသုခနဲ့ဆုံးရှုံးမှုဒုက္ခတွေကို
ကြုံတွေ့ရတဲ့အခါ
တူညီသောလောကဓံတရားတွေပါလားရယ်လို့
ခံယူထားနိုင်မယ်ဆိုရင်" ဆိုတဲ့
ကမ္ဘာကျော်ကဗျာတစ်ပိုဒ်ကို
ခပ်တိုးတိုးရွတ်ဆိုပြီး
ကျွန်တော်စဥ်းစားကြည့်တယ်။

စကြဝဠာတိုက်တစ်သောင်းက
ပန်းပေါင်းစုံရနံ့သင်းနေတဲ့
ပျော်ရွှင်ခြင်းကိတ်မုန့်တွေ
မိုးကြီးရွာချလိုက်သလို
သူ့ဘ၀အပေါ်တစ်ဟုန်ထိုး
ရွာချလိုက်မယ့်အချိန်အထိ
ကျွန်တော်စဥ်းစားကြည့်တယ်။

ပါရမီနည်းပါးလွန်းတဲ့လမ်းပေါ်မှာ
ပါရမီကားကြီးဟာပြေးလို့။ ။

မိုဃ်းဇော်
ပထမပုံနှိပ်-ရတီမဂ္ဂဇင်း၊ဇူလိုင်၊၂၀၀၇။

800

ကဗျာလမ်း

07 Aug, 01:15

အရိုးကောက်သူ

တစ်ညနေတော့၊ ယောက်ျားတစ်ယောက်ဟာ အလုပ်ကနေ အိမ်ကို ပြန်လာတယ်။ ပြန်တဲ့လမ်းမှာ သူ့နံရိုးတစ်ချောင်းက မနားတမ်း တောက်လျှောက် ရယ်နေတယ်၊ ဘာကြောင့်မှန်း မသိဘူး။
ပြန်နေကြလမ်းရဲ့ ကုန်းတံတား တစ်ခုအောက်ကို ဖြတ်ရတဲ့ အချိန်မှာတော့၊ သူ စိတ်မရှည်တော့ဘူး။ ထင်ရတယ်။ အဲဒါနဲ့ သူ့နံရိုးကို သူချိုးပြီး ခန္ဓာကိုယ်ထဲကနေ ဆွဲထုတ်လိုက်တယ်။ ရယ်သံက ရပ်သွားတယ်။ ပြီးတော့ အဲဒီ နံရိုးနဲ့ အနီးနားက နံရံ တစ်ခုမှာ “ရယ်ဦးမလား၊ ရယ်ဦးမလား … ရယ်ချင်ဦး၊ ရယ်ချင်ဦး” ဆိုတဲ့ စာကို ရေးတော့တာပဲ။
ပြီးတော့ နံရိုးကို လှည့်မကြည့်ပဲ သူ လွှတ်ပစ်လိုက်တယ်။
ဘာမှ မဖြစ်ခဲ့သလိုပဲ သူ အိမ်ပြန်လာတယ်။ အိမ်ထဲရောက်တော့ လက်ထဲက ပစ္စည်းတွေကို ချရင်း သူ့ဇနီးကို အော်ခေါ်တယ်။ သူ့အော်ခေါ်သံကြောင့် အိမ်ထဲမှာ ထူးထူးခြားခြား ဘာမှ ဖြစ်မသွားဘူး။ နောက်ထပ် နှစ်ကြိမ်၊ သုံးကြိမ် အော်ကြည့်တယ်။ တိတ်ဆိတ်ငြိမ်သက်နေခြင်းကသာ သူ့နားရွက်ဆီ ပြန်ရောက်လာခြင်းက၊ “ငါ့မိန်းမသာ ရှိနေရင် ဒီလောက် တိတ်ဆိတ် နေမှာ မဟုတ်ဘူး” ဆိုတဲ့ အတွေးကို သူ့ခေါင်းထဲမှာ ဖြစ်စေတယ်။
အဲဒါနဲ့၊ အိမ်ထဲက ပြန်ထွက်ပြီး သူ နံရိုး လွှတ်ပစ်ခဲ့တဲ့ ကုန်တံတားအောက်ကို ပြန်သွားတယ်။ သူ လှည့်မကြည့်ပဲ လွှတ်ပစ်ခဲ့တဲ့ နံရိုးဟာ ဘယ်မှာမှန်း မသိဘူး။ ရှာမတွေ့ ဘူး။ အဲဒီအစား၊ သူ့နံရိုးထက် အရွယ်အစား နှစ်ဆနီးပါးလောက် ကြီးမားနေတဲ့ တခြားသော နံရိုးတစ်ချောင်းကိုပဲ တွေ့တယ်။ “ဘယ်လို လူစားမျိုးလဲ မသိဘူး” လို့လည်း တွေးလိုက်သေးတယ်။ အဲဒါကိုပဲ ယူပြီး စိတ်ပျက်လက်ပျက်နဲ့ သူ အိမ်ပြန်လာတယ်။
အိမ်ထဲ ပြန်ရောက်တော့၊ အမျိုးသမီး အသစ်တစ်ယောက်ကို သူ တွေ့လိုက်ရတယ်။ သူ့အတွေ့အကြုံအရ အဲဒီအမျိုးသမီးက သူ့ဇနီး မဟုတ်တာ သေချာတယ်။ သူ့ခေါင်းထဲမှာ ပေါ်ပေါ်လာတဲ့ “တွေ့ကရာ နံရိုး လှည့်မကြည့်ပဲ ကောက်ခဲ့မိတဲ့ အကျိုးကျေးဇူးပါပဲ … ငါ လှည့်မကြည့်တာတွေ များနေပြီ” ဆိုတာမျိုး အတွေးတွေကြောင့် သူဟာ လက်ထဲက နံရိုးကို တင်းတင်း ဆုပ်ကိုင်မိတယ်။ မေးစရာ မေးခွန်းတွေက ခေါင်းထဲမှာ များလွန်းနေပေမယ့်လည်း သူ့လက်ထဲမှာ အဖြေက ရှိနေပြီးသား။
သူကိုယ်တိုင် အဖြေ မလိုချင်တဲ့ မေးခွန်းတစ်ခုကလည်း သူ့ခေါင်းထဲကနေ သူ့ကို စောင့်ကြိုနေတယ်။ “တကယ်လို့ သူ့နံရိုးကိုသာ အခြား ယောကျ်ား တစ်ယောက်က ကောက်သွားခဲ့ရင် ... “
ဒါမှမဟုတ် သူက ဒီလိုတော့လည်း စဉ်းစားနေသေးတယ်။ “ … ဒါဆို ငါလည်း ဒီ နံရိုး တစ်ချောင်းကို ဆက်သိမ်းထားလိုက်တာ မမှားလောက်ဘူး ထင်တယ်။”

နေမျိုးဆက်လူ
၂၀၂၁

715

ကဗျာလမ်း

06 Aug, 16:23

ဘဝကို ရတယ် ဘာမှမဖြစ်ဘူး ဆိုတဲ့
စိတ်နဲ့ပဲ နေထိုင်တယ်

တစ်ယောက်ယောက်က ငါ့ကို လာချစ်ပြီး
တခြားတစ်ယောက် ပြောင်းချစ်ချင်လည်း
ငါပြန်ပြောခဲ့တာ ရတယ် ဘာမှမဖြစ်ဘူးပဲ။
တစ်ယောက်ယောက်က မတည်နိုင်တဲ့
ကတိတွေပေးပီး ဘဝထဲက ထွက်သွားလည်း
ရတယ် ဘာမှမဖြစ်ဘူးပဲ။

မိဘက အလိုမလိုက်လည်း
ရတယ် ဘာမှမဖြစ်ဘူး
ရည်းစားက မချစ်တော့လည်း
ရတယ် ဘာမှမဖြစ်ဘူး
သူငယ်ချင်းက စိမ်းသွားရင်လည်း
ရတယ် ဘာမှမဖြစ်ဘူး
ငါ ဘာမှကို မဖြစ်သွားဘူး
တကယ်လည်း ဘာမှကို မဖြစ်သွားခဲ့ဘူး
ကမ္ဘာကြီးက အေးဆေးလည်နေတုန်း..

#ဏေသစ်

723

ကဗျာလမ်း

06 Aug, 16:03

ခေတ်အခြေအနေ

လူအတော်များများ ဟာ
သူတို့ပေးထားတဲ့ လိပ်စာမှာ
တကယ် မရှိကြဘူး
သူတို့ ဘယ်သွားကြပါလိမ့်
ဘယ်ခါ ပြန်ရောက်မှာပါလိမ့်

ပိုင်
၂ သြဂုတ် ၂၀၂၄

730

ကဗျာလမ်း

06 Aug, 16:01

#ချစ်ခြင်းရဲ့ သတိရခြင်းနံရံကို ကျော်လွန်၍

လူတစ်ယောက်ဟာ လူတစ်ယောက်ဆီက
ဘယ်လောက်ထိ ဝေးဝေးသွားနိုင်မလဲ
ပင်လယ်တွေ လွန်သွားတဲ့အထိလား
ကောင်းကင်တွေရဲ့ အပြင်ဘက်အထိလား
ကမ္ဘာမြေ ကုန်သွားတဲ့အထိလား
ဒါပေမယ့်၊ သတိရခြင်းကို ကျော်လွန်ပြီး
မသွားနိုင်သရွေ့
လူတစ်ယောက်ဟာ လူတစ်ယောက်ဆီက
ဝေးအောင် သွားလို့မရနိုင်ဘူး

#ပိုင်
၁၆ နိုဝင်ဘာ ၂၀၂၃

790

ကဗျာလမ်း

31 Jul, 13:43

ရေစီးထဲလည်းမျောမသွားဘူး
လေထဲလည်းလွင့်မသွားဘူး
စစ်ကြီးထဲလည်းပါမသွားဘူး
မပျော်ရွှင်ခြင်းက
ငါတို့ဘဝတွေပေါ်
အမြစ်တွယ်နေခဲ့တာ။

ကမ္ဘာ

878

ကဗျာလမ်း

31 Jul, 02:06

▪️အာဏာရှင် ကပ်တဲ့ အာရုဏ်ဆွမ်း▪️

ဝက်သား မဟုတ်ပါဘူး၊
ပြီးခဲ့တဲ့အပတ်က ကျည်ဆံထိသေသွားတဲ့
ကျောင်းသားလေးရဲ့ပေါင်သားပါ

ဘုန်းပေးတော်မူပါ . . . ဘုရား

ငါးငပိရည် မဟုတ်ပါဘူး
ဒီမနက်မိုးလင်းခါနီးလေးကမှ
ဗုံးကြဲပစ်လိုက်တဲ့ တောင်တန်းဒေသရဲ့အရိုးတွေ

တို့စရာလေးတွေ မစုံလို့လား ဟင်
သေသေသပ်သပ် လှီးထားတယ်လေ

လတ်လတ်ဆတ်ဆတ် သခွားသီးအကွင်းလေးလား
အလယ်ကဟာကို သခွားစေ့လို့ မထင်ပါနဲ့နော်
အဲဒါ ဖမ်းပြီး ဖောက်ထုတ်လိုက်တဲ့
နိုင်ငံရေးသမားရဲ့မျက်လုံးလေးပေါ့

မွှေးနေတဲ့အကင်လေးတွေကိုရော
လျှောခနဲ ဝင်သွားအောင်
ပြည်သူ့မျက်ရည်ကို အပူပေးပြီး ကျိုထားတဲ့
ဟင်းချိုလေးနဲ့ သုံးဆောင်တော်မူပါလား
အဲ့ဒါ . . အဲ့ဒါ
အအီပြေအောင် အချဉ်ရည်လေး ယူပါဦး
နိုး နိုး ငရုတ်နှစ် မဟုတ်ပါဘူး
လမ်းမပေါ်က သွေးတွေကို
ခဲပျစ်အောင် အဓမ္မနည်းနဲ့ လုပ်ထားတာပါ. . .ဘုရား

ဝရဲ့လား ပြည့်စုံရဲ့လား လုံလောက်လား
ဆွမ်းပူပူ ဖြူဖြူလေးတွေပေါ်မှာ
"ဒို့သာသနာ" လို့ ရေးထားတာ ပျော်ရဲ့လား
လက်ဆေးတော်မူပါ . .ဘုရား

အချိုပွဲကို ဘာတည်းဦးမလဲ
နောက်ထပ် အသက်ပေါင်းများစွာ
သေမယ့်စစ်ပွဲတွေလား
ပြန်မကြွခင် . . .
"ဒကာနဲ့ဆရာ ငရဲကို အတူတူ သွားစို့" ဆိုတဲ့
စကားမပါဘဲ တရားကို
ဟောသွားပါဦး အရှင်ဘုရား ။

- မောင်ရေချမ်း

[တူမီးတော်လှန်ရေးစာစဥ္ အမှတ် (၁၁) တွင် ဖော်ပြထားသောကဗျာဖြစ်ပါသည်။]

1,977

ကဗျာလမ်း

30 Jul, 02:19

ဒီနှစ်လည်း အာရှမှာ
အကောင်းဆုံး ဘ၀သရုပ်ဖော်ဆုကို
ငါတို့ပဲ ရဦးမှာ။

-မောင်ယုပိုင်

709

ကဗျာလမ်း

30 Jul, 02:12

ပင်လယ်ကို နမ်းရှိုက်မိသူတယောက်အကြောင်း
#မောင်ဖြိုးဝေ

ကမ္ဘာကြီးက ပါးပါးလေးရယ်
ငါတို့အသက်တွေကိုတော့
လေးလေးပင်ပင် ရှူရှိုက်နေရတယ်။

ခေတ်ရယ်၊ စနစ်ရယ်၊ အချစ်ရယ်
ကပ်ရောဂါတွေရယ်၊
တဘဝလုံးစာ ရှင်သန်ဖို့
လက်တလုံးခြား ရုန်းကန်ဖို့။

ငါတို့က ခိုင်ခိုင်မြဲမြဲ ချစ်မိသလို
အလွယ်တကူလည်း မျက်ရည်ကျမိတယ်၊
ညအခါဆို လရဲ့အသံကို
စောင့်မျှော်နားထောင်ရင်း၊
ဆွဲဆွဲငင်ငင် တမ်းတလို့။

လက်ဘက်ရည်ဆိုင်တွေကို လွမ်းတယ်
စာအုပ်စင်တွေကို တမ်းတတယ်
မိန်းမတွေကို နာကျင်အောင်ချစ်မယ်၊
ဝုန်းဆို၊ ရိုက်ချလိုက်တိုင်း
ငါတို့မျိုးဆက်က မရရအောင်
ပြန်ပြန်တက်ပြရတယ်။

"တချို့တွေ နေနိုင်လွန်းတယ်" ဆိုတဲ့
ခိုင်ထူးအသံကို နားထောင်ရင်း၊
လူသတ်လက်နက်ကို ကျစ်ကျစ်ပါအောင်
ကိုင်ထားရင်း မြို့ပြကို လှမ်းငေးတယ်။

ဝေးဝေးမှာ
မေမေရဲ့ ဘေးကင်းပါစေ မေတ္တာသံနဲ့
ဖေဖေ့ရဲ့
ငါတို့သားသမီးတွေကွဆိုတဲ့
ဂုဏ်ယူနာကျင်ရတဲ့ အကြည့်တွေကို
စိတ်ကူးနဲ့ တွေးမြင်ရတယ်။

ဒါကြီးပြီးသွားရင်လို့ဆိုတိုင်း
ပြန်မလာနိုင်တော့မယ့် လူတွေ၊

ဒါကြီးပြီးသွားရင်လို့ဆိုတိုင်း
အကောင်းတိုင်းပြန်မဖြစ်လာနိုင်တော့မယ့် လူတွေ။

ဒါကြီးတကယ်ပြီးသွားရင်
လူတွေကို ခပ်ဝေးဝေးကနေ
ပင်လယ်တစင်းလို ငါတို့ငေးကြမယ်။

မောင်ဖြိုးဝေ
၈.၇.၂၀၂၂

1,306

ကဗျာလမ်း

29 Jul, 01:33

ချစ်သူသက်သက် - သုခမိန်လှိုင်

.
စိမ်းစိုသောလွင်ပြင်
မြင်းပေါ်တင်ဖို့ အစီအစဉ်
မအောင်မြင်ခဲ့သူ
လဖက်ရည်သောက်တယ်
ရုပ်ရှင်ကြည့်တယ်
ဓာတ်ပြားဖွင့်တယ်
မီးရထားစီးတယ်
ချစ်သူ့ ပန်းအိုးတွေရေလောင်းတယ်။
ကောင်းကင်ကြီးကို
မ, ကြည့်လိုက်
ဆ, ကြည့်လိုက်
တခုခု ထူးမယ်လို့
ကမ္ဘာကြီးကို ချစ်တဲ့ဖက်က
အမြဲမျှော်လင့်ချက်ထားခဲ့သူ ။

#သုခမိန်လှိုင်

684

ကဗျာလမ်း

28 Jul, 14:19

ကမ္ဘာမြေဟာ
ဘယ်တုန်းကများ
လွယ်လွယ်ရခဲ့ဘူးလို့လဲ

-သုခမိန်လှိုင်

783

ကဗျာလမ်း

28 Jul, 03:25

▪️တကယ့် တကယ်လွမ်းလာတဲ့အခါ
ပင်လယ်ပေါ် အိပ်စက်ရသလို။

ကောင်းကင်တံခါးကိုဖွင့်လိုက်တော့
ဆန့်တန်းထားတဲ့ လက်တံရှည်တွေရှိနေတယ်၊
အဲ့ဒီလက်တံတွေက အိပ်ရာခင်းတွေပေါ်
ကြယ်တွေစုံတဲ့ည သီချင်းကို ဆိုငြီးနေတာ၊
ဝတ္ထုစာအုပ်ရဲ့ ပထမစာမျက်နှာကနေ
နောက်ဆုံးအဖုံးနဲ့ကပ်လျှက် စာမျက်နာအထိ
ညစျေးတန်းတွေဖြစ်သွားတယ်၊
တူညီဝတ်စုံနဲ့ ရဲနှစ်ယောက်ရောက်လာတယ်၊
ဒီအမှုနဲ့ပတ်သတ်ပြီး ဘုရားဆီကို တစုံတဦး
အမှုဖွင့်ထားတဲ့ အကြောင်း၊
ဖွင့်ထားတဲ့ ဘောင်းဘီဇစ်တွေဆီ
မိန်းမတယောက်ဟာ ငေးစိုက်ကြည့်နေသလိုမျိုးပေါ့၊
ပေါင်မုန့်မီးကင်စက်ထဲက ငါတို့နှစ်ဦး
ခုန်ထွက်လိုက်တာမဟုတ်ဘဲ
ငါတို့နှစ်ဦးကို ခွန်းဖလက်တွေနဲ့
အစားထိုးခံလိုက်ရတာ၊
တယောက်ကိုယ်ပေါ် တယောက်ထိုးဆက်ထားတဲ့တံတားကို မင်းကိုယ်တိုင် ဗုံးခွဲဖျက်စီးလိုက်ပြီး၊
ဆန့်တန်းထားတဲ့ လက်တွေပေါ် စစ်ပွဲရဲ့မြင်းတွေပြေးလွှားနေကြတယ်၊
ကောင်းကင်တံခါးကိုဖွင့်လိုက်တော့
တကယ့် တိမ်ဖြူဖြူတွေဟာ
ရေငုတ်ဝတ်စုံအပြည်၊
ညအိပ်ရာတခုလုံး သံသယရှိတဲ့ ပင်လယ်လို
ငါမင်းကို ရှာဖွေတယ်၊ မတွေ့။
ဟော့တော့ဆိုင်တွေဟာ
ဘယ်အသားကိုအသုံးပြုပါတယ်လို့
မည်မည်ရရ မရှိသလိုမျိုးပဲ၊
မာလာနံ့တွေအောက် တကယ့်ဖြစ်ရပ်မှန်တွေ
တကယ်တမ်း ပျောက်ကွယ်သွားတယ်၊
အခုမှ ကဗျာက စတာ
အဲ့ဒီကောင်းကင်တခါးကို ဖွင့်တဲ့အခါ
ငါမသိတဲ့တယောက်ယောက်က ငါ့ကိုမသိသလို
လာလာပိတ်တယ် တံခါးဟာ သူ့အလိုလို။

စောယုဝေ

541

ကဗျာလမ်း

28 Jul, 03:23

ရနံ့သစ်၂၀၁၀ဒီဇင်ဘာမှအောင်ဘညိုနှင့်သူ၏ကဗျာများ

အမည်ရင်း-မောင်မောင်ဇော်
၁၉၆၁ဇူလိုင်၂၃ရက်နေ့တွင်အဖ(ဦးအောင်မြင့်)အမိဒေါ်ခင်ကွန့်တို့မှမန္တလေးမြို့မှာ
မွေးဖွား
ပညာရေးကတော့၁၉၉၁ခုနှစ်
ပိတောက်ပွင့်သစ်မှာရေးခဲ့သလိုသေစာရှင်စာတတ်ပါတယ်။
ဘဝမှာကဗျာဆရာဖြစ်ပြီးဘာမှမဖြစ်ချင်တော့ဘူး။

ယုဇနတောလား
----------------
အောင်ဘညို
နှစ်မျိုးပဲရှိတယ်
လူ့ဘဝကိုစတင်မယ့်လူနဲ့
လူ့ဘဝကို မီးစာကုန်ဆီခန်း
ဇာတ်သိမ်းခန်းကိုစောင့်မယ်လူ----
(သူစိမ်းတစ်ဦးရဲ့ဒိုင်ယာရီမှ)
ရေကငန်တယ်
မြက်ကခြောက်တယ်
နေက မီးထတောက်မယ့်အတိုင်း
ကိုင်း--မပြောလား
သုမနရဲ့ ကျောဟာ
ယုဇန ရဲ့သဘောအတိုင်းပါပဲ----။

အထည်ကြီးပျက်နဲ့ ဇာတ်သမ
ယိမ်းတွေကကြ
အငယ်လည်းမျက်နှာမငယ်အောင်
အကျယ်မချဲ့နဲ့ ညီမောင်ငယ်ရဲ့
ပြာလဲ့လဲ့ခန်းဆီးအရောင်မှာ
အကျိုးဆောင်တွေရဲ့
စကား တောင်တောင်အိအိ ဖျားယောင်းမှူတွေနဲ့
နားယောင်တဲ့ငတိခဗျာ
နားထောင်လို့ တောင်းပါသဘိရယ်နဲ့
ကဲ--ရွာစားရေ ဗိန်းမောင်းနဲ့ပို့----။ ။

ဆန်းစစ်ကြည့်ခြင်း-၂
--------------------
အောင်ဘညို
အဖေကကြောင်တစ်ရာ
အမေကခိုတစ်ရာ
ငါမွေးထားတာ မြွေပွေးရွာ။ ။

မျော်လင့်ခြင်း
-------------
အောင်ဘညို
အမြင့်တတ်အမှည့်ရနိုး
တစ်ဘဝလုံး တတ်ခဲ့တယ်
ခန္ဓာကိုယ်တစ်ခုလုံး ဒဏ်ရာတွေနဲ့
အို---သစ်ခုတ်သမားငဲ့
အပင်ကိုတော့ မလှဲလိုက်နဲ့ဦး----=

၄၂လမ်း
--------
အောင်ဘညို
ဂျစ်ပဆီတွေ ဟစ်ပီတွေ
ဆံရှည်တွေ နားပေါက်တွေ
စားပွဲပေါ် စကားလုံးတွေ ယိမ်းထိုးကြ
တစ်ခွက်ပြီးတစ်ခွက် တစ်လုံးပြီးတစ်လုံး
ဝုန်းဒိုင်းကြဲ ပေါက်ကွဲကြ
ညဟာအပျိုရည်ပျက်သွားတယ်---။

ဂျင်းလ်တဲမန်းတွေ လူကြီးမင်းတွေ
ခေါက်ထားစမ်းပါ
ဟေ့
ဖန်ခွက်မမှောက်ကြေး
သွေးရဲပစေ----------

မြို့လယ်ဆင်ခြေဖုံး
အတုံးအရုံးလေ
တစ်ယောက်ပြီး-----တစ်ယောက်-----။

-လပြည့်ဝန်းကဖေးရဲ့နောက်ဆုံးစားပွဲမှာ
မျက်မှန်နဲ့ကုတ်ကုတ်လေးထိုင်နေတဲ့ဦးဘီညိုကြီးကိုအခုထိမြင်ယောင်တုန်းပါပဲ။သူမဆုံးခင်နေ့ကလပြည့်ဝန်းရှေ့ကကျွန်တော်ဖြတ်လျှောက်တော့ကျွန်တော့်ကိုလက်လှမ်းပြလို့ကျွန်တော်ဝင်ထိုင်ပြီးသူနဲ့စကားစမြည်ပြောဖြစ်သေးတယ်။နောက်နေ့မှာသူဆုံးသွားတဲ့သတင်းကိုနောင်မင်းနိုင်ကအကြောင်းကြားလို့ဝမ်းနည်းစွာကြားလိုက်ရတယ်။
ဒါလေးကိုကျွန်တော်အမှတ်တရထည့်ရေးမိပါတယ်။

#crd
# ညိုနွယ်ထွန်း

534