ኦርቶዶክሳዊ የመጽሐፍ ቅዱስ ጥናት [The Orthodox study bible]

የቅዱስ ጳውሎስ መልዕክት ወደ ሮሜ ሰዎች ምዕራፍ 8 ላይ የሚነሱ ጥያቄዎች

📖 “እርሱም ብቻ አይደለም፥ ነገር ግን የመንፈስ በኵራት ያለን ራሳችን ደግሞ የሰውነታችን ቤዛ የሆነውን ልጅነት እየተጠባበቅን ራሳችን በውስጣችን እንቃትታለን።” ሮሜ 8፥23

👉 የፍጥረት መቃተትና ምጥ ተብሎ የተገለጸው ፍጥረት ሁሉ በሰው ልጅ የደረሰውን መከራ እንደተሳተፈ ነው። ሰው በኃጢአት ምክንያት በምጥና በመቃተት ይኖራል ከዚሆ ይድን ዘንድም በተስፋ በዳግም ምጽዓት ለሰው ልጅ የሚገለጠው ክብር ይጠባበቃል። አዳም ሲበድል ምድርም ተረግማ ነበር ይህም የበደሉን ውጤት ምድርም እሾህና አሜኬላ በማብቀል ከርግማኑ ተሳትፋ እንደነበር ኃጢአት እስከ ውጤቱ ከሰው በሚወገድበት በዳግም ምጽዓቱ ጊዜም ፍጥረትም ሰው ያገኘውን ክብር ይሳተፋሉ (በርግማኑ እንደተሳተፉ በክብሩም ይሳተፋሉ) አሁን  ከነበረበት በተሻለ ሁኔታ ሆኖ ይለወጣል። አሁን በዚህ ዓለም የምናያቸው ጉድለቶች የመሬት መንቀጥቀጥ እሳተ ገሞራ የመሳሰሉት ኃጢአትን ተከትሎ የመጣ የፍጹምነት መጉደል (Imperfection of the  creation) ናቸው። እኚህ ሁሉ ጉድለቶች ሁሉ ፍጻሜ ያገኛሉ። ፍጥረትም የእግዚአብሔር ልጆች የሚያገኙትን ክብር በሚመስል ወደ አዲስነት ይታደሳሉ።

ቅዱስ ጳውሎስ ይህ የፍጥረት መቃተት ብቻ ሳይሆን የመንፈስ በኲራት ያለን እኛም እንቃትታለን ይላል። መቃተት ማለት ማዘን መድከም መጨነቅ ማለት ነው። 

👉 "የመንፈስ በኩራት ያለን" ሲል የመንፈስ ቅዱስ የመጀመርያው ልጅነት ጸጋ መንፈስ ቅዱስ እኛ የክርስቶስ ቤተሰዎች ፤ ጸጋ መንፈስ ቅዱስን መጀመርያ የተቀበልን ሲል ነው። ይህም ሊመጣ ያለውን ጣዕመ መንግሥተ ሰማያትን በዚህ ምድር ሳለን መቅመስን ያሳያል።

👉 ስለዚህ ፍጥረት ብቻ አይደለም የሚቃትተው ሊመጣ ያለውን ጣዕመ መንግሥተ ሰማያትን የሚመስሉ ጸጋ መንፈስቅዱስን በዚህ ምድር ሳለን የተቀበልን እኛም ጭምር እንቃትታለን ይላል። ተጠምቀን የመንፈስ ቅዱስ ማደርያ ሆነናል። የልጅነት ክብር እስኪፈጸምልን ሥጋችን ከመበስበስ ወደ አለመስበስ ክብር እስኪደርስ ድረስ በውስጣችን እንቃትታለን። የልጅነት ክብራችን የሚፈጸመው ሥጋችን ከሞት ተነስቶ ከመበስበሰሰ ነጻ ሲሆን ነው። የጌታችንን ምጽዓት በኃዘን በመከራ ሆነኖ በተስፋ እንጠባበቃለን ለማለት ነው ይህ የተነገረው።

👉 "የሰውነታችን ቤዛ የሆነውን ልጅነት እየተጠባበቅን" ሲል በጥምቀት የእግዚአብሔር ልጅነትን ጸጋ ስላላገኘን አይደለም። ይልቁኑ በጌታችን ዳግም ምጽዓት በሙታን ትንሳኤ የሚበሰብሰው ሥጋችን በማይበሰብሰው በከበረ ሰውነት ሲለወጥ የልጅነት ክብርን በምልዓት እንጠባበቃለን ሲል ነው። “እርሱም ሁሉን እንኳ ለራሱ ሊያስገዛ እንደሚችልበት አሠራር፥ ክቡር ሥጋውን እንዲመስል የተዋረደውን ሥጋችንን ይለውጣል።” ፊልጵ.3:21 እንዲል። ዳግመኛም ቅዱስ ጳውሎስ  "ይህ የሚበሰብሰው የማይበሰብሰውን ሊለብስ ይህም የሚሞተው የማይሞተውን ሊለብስ ይገባዋልና።" 1ኛ ቆሮ.15:53 ይላል። ስለዚህም ይህ ተስፋ የመንፈስ ቅዱስን ጸጋ የተቀበልን እኛ የልጅነት ክብርን በምልዓት እስክናገኘው ድረስ በትዕግሥት መከራ እንድንቀበል ያደርገናል።

እንኳን ለብርሃነ መስቀሉ በሰላም አደረሳችሁ!

  ✝ በአምላኩ ደም የተቀደሰ ከፈጣሪው ጎን በወጣ ውኃም የተጠመቀ ዕጽ እንዴት ያለ ነው። ለገነት ዛፎች አክሊል  ለገዳም ዛፎችም ክብር የሆናቸው ዕጽ እንዴት ያለ ነው!

✝ ለአሸናፊ የእግዚአብሔር በግ መሰዊያ የሆነው ዕጽ እንዴት ያለ ነው! ለእስራኤል አምላክ የፋሲካው መሰዊያ የሆነ ዕጽ እንዴት ያለ ነው። የጎለጎታዊው የምስጢር ወይን መፍለቂያ የሆነ ዕጽ እንዴት ያለ ነው።

✝ ከእርሱ ምዕመናንን ለማተም የሕግና የሥርዓት ደምን ያንጠባጠበ ዕጽ ምን ዓይነት ነው። ቡሩካን በጎችን ለማጠቢያ የሚሆን ምንጭን ያወጣ ዕጽ ምን ዓይነት ነው።

✝ ምድርን የቀደሳት ሰማይን ያማተበበት ዓለምን ሁሉ በአብ በወልድ በመንፈስ ቅዱስ በረከት የባረከ ዕጽ እንዴት ያለ ነው። ሰማያውያንን ከምድራውያን ያስተሳሰራቸው ዕጽ እንዴት ያለ ነው።

  ✝ በመስቀልህ የትዕቢተኞችን ብርታት የሻርክ የቅዱሳንንም ጸሎት ከፍ ከፍ ያደረግክ ሆይ ታላቅነትን ከአንተ ዘንድ ስጠኝ።

✝ በመስቀልህ ቤተ ክርስቲያንህን የባረክሃት በስምህም የቀደስካት ከጎንህ በወጣው ውኃም ያጠብካት ሆይ እኔንም እጠበኝ ከኃጢአቴም አንጻኝ ከበደሌም አጥራኝ።

✝ በመስቀልህ ሲዖልን የቀጠቀጥካት ያጠፋሃትም ሆይ በእኔ ላይ የሚነሣሡብኝን ምሽጋቸውን አፍርስ።

✝ በመስቀልህ በቀኝ የተሰቀለውን ሽፍታ አንተን ወደ ማመን የመለስከው ወደ መንግሥተ ሰማያትም አስቀድሞ መግባትንም የሰጠኸው ሆይ  እኔንም ወደ ቅዱሳን የደስታቸው አዳራሽ አግባኝ።

[ውዳሴ መስቀል: አባ ጊዮርጊስ ዘጋስጫ]

የቅዱስ ጳውሎስ መልዕክት ወደ ሮሜ ሰዎች ምዕራፍ 8 ንባብ ላይ የሚነሱ ጥያቄዎች

📖 "ፍጥረት ለከንቱነት ተገዝቶአልና፥ በተስፋ ስላስገዛው ነው እንጂ በፈቃዱ አይደለም፤"
ሮሜ.8:20

ካለፈው የቀጠለ...👆👇👆👇

  👉ቅዱስ ጳውሎስ ፍጥረት የሚናፍቀበትን ምክንያት ሲያስቀምጥ "ፍጥረት ለከንቱነት ተገዝቷልና" ይላል።

👉 ቅዱስ ዮሐንስ አፈወርቅ ከንቱነት ለተባለው በስነፍጥረት ላይ የደረሰው ጥፋትና ጉስቁልና ምክንያት ሰው መሆኑን ሲገልጽ "ሰው ሆይ ይህ የሆነው ባንተ ምክንያት ነው። ለመከራ የተጋለጠ (የተሰጠ) ምውት ስጋን ስለተሸከምህ ምድርም ተረገመች እሾህና አሜኬላንም አበቀለች። ከምድር ጋር የታመሙት ሰማያት እንኳ ወደ ተሻለ ሁኔታ ይለወጣሉ።  እንዲህ የሚለውን የነቢዩን ቃል ስማ " ዘመኖቼ እንደ ጥላ አዘንብለዋል፤ እኔም እንደ ሣር ደርቄአለሁ።አቤቱ፥ አንተ ከጥንት ምድርን መሠረትህ፥ ሰማያትም የእጅህ ሥራ ናቸው። እነርሱ ይጠፋሉ፥ አንተ ግን ትኖራለህ፤ ሁላቸው እንደ ልብስ ያረጃሉ፥ እንደ መጐናጸፊያም ትለውጣቸዋለህ፥ ይለወጡማል፤" መዝ.102:25-26።

ዳግመኛም ነቢዩ ኢሳይያስ “ዓይናችሁን ወደ ሰማይ አንሡ፥ ወደ ታችም ወደ ምድር ተመልከቱ፤ ሰማያት እንደ ጢስ በንነው ይጠፋሉ፥ ምድርም እንደ ልብስ ታረጃለች፥ የሚኖሩባትም እንዲሁ ይሞታሉ፤ ማዳኔ ግን ለዘላለም ይሆናል፥ ጽድቄም አይፈርስም።” ኢሳ 51፥6 ይላል። እኚህ አገላለጾች "ፍጥረት ለከንቱነት ተገዝቷል" የሚለውንና ከዚህ ጥፋትና ጉስቁልና እንዴት ነጻ ይወጣል የሚለውን የሚተረጉሙ ናቸው።

ፍጥረት በራሱ ኃጢአትን ሳያደርግ ካንተ የተነሳ በክፋት የተከበበና የጎሰቆለ ሆኗል። ስለ አንተ ተብሎም  አለመበስበስ ይሆናል (በዳግም ምጽዓቱ) በተስፋ ስላስገዛው የሚለውም ከዚህ የተነሳ ነው። ሐዋርያው "በፈቃዱ አይደለም" ሲል በፍጥረቱ ላይ ስለደረሰው ለመግለጥ ሳይሆን የእግዚአብሔርን ሁሉን አቃፊ የሆነ መግቦትና የፍጥረቱ መዳን(ፈውስ) ከራሱ የሚመነጭ እንዳልሆነ ሊያስረዳን ወዶ ነው።" ይላል።

በሰው ምክንያት ፍጥረት ሁሉ የደረሰበት ጥፋትና ጉስቁልና ከገለጸ በኋላ ተስፋውን ሲገልጽ “ተስፋውም ፍጥረት ራሱ ደግሞ ከጥፋት ባርነት ነፃነት ወጥቶ ለእግዚአብሔር ልጆች ወደሚሆን ክብር ነፃነት እንዲደርስ ነው።” ሮሜ 8፥21 ይላል።

👉 ፍጥረት የሚጠብቀው ተስፋ ምንድነው ቢሉ ለጥፋትና ለመበስበስ ከመሰጠት ነጻ የሚወጣበትን ነው። [2ኛ ጴጥ.3:13፤ 1ኛ ዮሐ.3:3] ለእግዚአብሔር ልጆች ከሚሆነው የከበረ ነጻነት ፍጥረትም ተካፋይ ይሆናል። በዳግም ምጽዓት ሰው ከመበስበስ ወደ አለመበስበስ ሲለወጥ ፍጥረትም ለጥፋት ባርያ ከመሆን ነጻ ይሆናል። ሰማይና ምድርም ያልፋሉ። ቅዱስ ጳውሎስ ፍጥረት ከሰው ልጅ ጋር ይከብራል አላለም። ምክንያቱም እንዲህ ያለው ክብር አዕምሮ ላላቸው ለሰዎች ብቻ የሚሰጥ ነውና ስለዚህም "ከጥፋት ባርነት" በማለት ብቻ ገለጸው።

አባ ታድሮስ ማላቲ ይህን  የንጉስን ልጅ በሚያሳድግ አስተማሪ ይመስሉታል። የንጉሱ ልጅ የአባቱን ስልጣን ሲወርስ አስተማሪውም ልጁ ካገኘው በረከት የሚሳተፍ ይሆናል። በእኛ እና በፍጥረት መካከል ያለውም ይህን ይመስላል መምህራን የሚሆኑን ፍጥረታት ስለርሱ ብለው የተፈጠሩት ፍጥረታት የሰው ልጅ ክብርን ሲያገኝ እነርሱም የሚሳተፉ ይሆናሉ።

የቅዱስ ጳውሎስ መልዕክት ወደ ሮሜ ሰዎች ምዕራፍ 8 ላይ የሚነሱ ጥያቄዎች

📖 "ፍጥረት ለከንቱነት ተገዝቶአልና፥ በተስፋ ስላስገዛው ነው እንጂ በፈቃዱ አይደለም፤"
ሮሜ.8:20

👉 ቅዱስ ጳውሎስ የፍጥረት ናፍቆት የእግዚአብሔርን ልጅ መገለጥ ይጠባበቃል [ሮሜ.8:19] በማለት ከሰው ልጅ የበደል ውጤት ከሆነው የፍጥረት ጉስቁልና የሚድኑበትን ጊዜ የሚጠባበቁ እንደሆነ ፍጥረትን በሰው ምሳሌ አድርጎ ይገልጻል። እግዚአብሔር አምላክ ዓለሙን ፈጥሮ በአምሳሉ የፈጠረው የሰው ልጅ እንዲገዛው ሹሞት ነበር። አዳምም ሕገ እግዚአብሔርን ተላልፎ ወደቀ። ይህ የአዳም ውድቀት በተፈጠረው ፍጥረት ሁሉ ላይ ተጽዕኖ ነበረው። "አዳምንም አለው፦ የሚስትህን ቃል ሰምተሃልና፥ ከእርሱ እንዳትበላ ካዘዝሁህ ዛፍም በልተሃልና ምድር ከአንተ የተነሣ የተረገመች ትሁን፤ በሕይወት ዘመንህም ሁሉ በድካም ከእርስዋ ትበላለህ፤እሾህንና አሜከላን ታበቅልብሃለች፤ የምድርንም ቡቃያ ትበላለህ።" ዘፍ.3:17-18 እንዲል። ሰው በእግዚአብሔር ላይ በማመጹ ፍጥረት ሁሉ በሰው ላይ ዓመጸ። ቅዱስ ጳውሎስ ፍጥረትን እንደ ሰው አድርጎ የክርስቶስን መምጣት የሚናፍቅ አድርጎ አቅርቦታል።

👉 ሊቁ ቅዱስ ዮሐንስ አፈወርቅ ይህን አገላለጽ አስመልክቶ "ቅዱስ ጳውሎስ ዓለምን እንደ አንድ ሰው አድርጎ ያቀርበዋል። ነቢያቱም ከዚህ አስቀድሞ ወንዞችን በእጃቸው ሲያጨበጭቡ መዝ.98፥8 ኮረብታ ሲዘል ተራሮች ሲንቀሳቀሱ በማለት በሰውኛ አድርገው ሲገልጹ ነበር። ይህም ግዕዛን የሆኑ ፍጥረታትን ሳይቀር ያንቀሳቀሰና ያናወጠ ተብሎ የተገለጸውን ሊመጣ ያለውን በረከት ታላቅነት እንረዳ ዘንድ ነው። ነቢያቱ እንዲህ እያሉ ይገልጹ የነበሩት እኚህ ፍጥረታት ሕያውና ልቡና አላቸው ብለን እናስብ ዘንድ አይደለም። ይህን ዓይነቱን አገላለጽ 'የወይን ልቅሶ የቤተ መቅደሱ ምሰሶ ጩኸት' የሚመስሉ አገላለጾች የሰውን ክፋት ለመግለጽ ተጠቅመውበታል። ቅዱስ ጳውሎስም የነቢያቱን ዘይቤ በመጠቀም ሊመጣ ያለውን ታላቅ ነገር ለመግለጽ ፍጥረትን እንደ ሰው የሚቃትቱና የሚጮሁ አድርጎ አቅርቧቸዋል።" ይላል።

ይቀጥላል...

እንደምን ቆያችሁ የእግዚአብሔር ቤተሰቦች በተለያዩ ጊዜያት በተለያዩ ምክንያቶች ሲቋረጥ የነበረው የመጽሐፍ ቅዱስ ጥናታችን በአዲሱ ዓመት ካቆምንበት ለመቀጠል አስበናል። በጸሎት አስቡን!

ወርኃ ጳጉሜን ለሀገራችንና ለቤተ ክርስቲያን ሰላምን ያደርግልን ዘንድ ቸሩ አምላካችንን በጸሎት እንጠይቀው!

የቅዱስ ጳውሎስ መልዕክት ወደ ሮሜ ሰዎች ምዕራፍ 8 ንባብ ላይ የሚነሱ ጥያቄዎች

📖 "አባ አባት ብለን የምንጮኽበትን የልጅነት መንፈስ ተቀበላችሁ እንጂ እንደገና ለፍርሃት የባርነትን መንፈስ አልተቀበላችሁምና።" ሮሜ 8፥15

👉 ቅዱስ ጳውሎስ በክርስቶስ አምነን ተጠምቀን ክርስቲያን የሆንን ካገኘናቸው ጸጋዎች አንዱ የልጅነት ጸጋ እንደሆነ ይገልጻል። የልጅነት መንፈስ የሚለውም የልጅነት ስጦታ ማለት ነው።  እግዚአብሔር አምላክም በጸጋ አባታችን ሆኗል። ዮሐ.1:12። ኢየሱስ ክርስቶስ ከመገለጡ በፊት የሰው ልጆቼ ኩነኔን ይፈሩ ነበር። "...በሕይወታቸውም ሁሉ ስለ ሞት ፍርሃት በባርነት ይታሰሩ የነበሩትን ሁሉ ነጻ እንዲያወጣ፥ በሥጋና በደም እንዲሁ ተካፈለ።”ዕብ. 2፥14-15 እንዲል። ጌታችን ከተገለጠ በኋላ ግን ምዕመናን ገሃነም እንወርዳለን በእግረ አጋንንት እንረገጣለን ወይም የዲያብሎስ ባርያዎች እንሆናለን ብለው አይፈሩም። "እግዚአብሔር የኃይልና የፍቅር ራስንም የመግዛት መንፈስ እንጂ የፍርሃት መንፈስ አልሰጠንምና።" 2ኛ ጢሞ. 1፥7 እንዲል።

👉 አንዱ ሊቅም ይህን ሲተረጉም "ጳውሎስ ይህን የሚለው መንፈስ ቅዱስን ከተቀበልን በኋላ ክፉ ሥራን ከመፍራት ነጻ ወጥተናል። አስቀድመን በፍርሃት ነበርን ምክንያቱም ሕጉ ከተሰጠ በኋላ ሁሉም በደለኛ እንደሆነ ታስቧልና። ጳውሎስ ሕጉን የፍርሃት መንፈስ ይለዋል ምክንያቱም ስለ ኃጢአታቸው [on account of their sin) የሚፈሩ አድርጓቸዋልና። የልጅነት መንፈስ የሚለው የእምነት ሕግ ደግሞ ኃጢአታችንን ይቅር በማለት ከፍርሃት ያወጣንና ደኅንነትን የሰጠን በመሆኑ ነው። በእግዚአብሔር ጸጋ ከፍርሀት ነጻ ወጥተን የልጅነትን መንፈስ ተቀብለናል። በጸጋው እግዚአብሔርን አባ ብለን ለመጥራት ድፍረትን አግኝተናል።  ስለዚህም ምክንያት ጳውሎስ እምነታችን ወደ ትዕቢት እንዳይወርድ ያስጠነቅቃል። ግብራችን "አባ አባት" ብለን ከምንጮህበት ቃል የማይስማማ ከሆነ እግዚአብሔርን አባታችን በማለት መስደብ ይሆንብናል።" ይላል።

👉 ሐዋርያው ቅዱስ ጳውሎስ ጸጋ መንፈስ ቅዱስ በጥምቀት እንደተሰጠን የልጅነት ጸጋ እንዳገኘን ተናግሯልና። በብሉይ ኪዳን "ከፊትህ አትጣለኝ፥ ቅዱስ መንፈስህንም ከእኔ ላይ አትውሰድብኝ።" መዝሙር 51፥11 ተብሎ እንደተጠቀሰው የመንፈስ ቅዱስ ጸጋ ነበረ ወይ ተብሎ ለሚነሳ ጥያቄ መንፈስ ቅዱስ በብሉይ ኪዳን ነቢያትን ትንቢት ያናገረ ነው። 2ኛ ጴጥ.1:21። የኦሪቱና የሐዲሱ ልዩነት በኦሪት የመንፈስ ቅዱስ ስጦታ ማንም ሰው እንዳይጠቀምበት የታሸገ የውኃ ጉድጓድ ዓይነት ሲሆን የሐዲሱ ግን ሁሉም እንዲጠቀምበት የሆነ የውኃ ፈሳሽ ዓይነት ነው። በኦሪት የመንፈስ ቅዱስ ስጦታዎች ይሰጡ የነበሩት ለተወሰኑ ሰዎች ለነቢያት ለሃይማኖት አገልጋዮች ብቻ የነበረ ሲሆን በሐዲሱ ሥርዓት ግን ጌታ ባርያ ወንድ ወይም ሴት ሳይለይ ለሁሉም ይሰጣል። ስለዚህ ነው ሐዋርያው “ጴጥሮስም አፉን ከፍቶ እንዲህ አለ፦ እግዚአብሔር ለሰው ፊት እንዳያደላ ነገር ግን በአሕዛብ ሁሉ እርሱን የሚፈራና ጽድቅን የሚያደርግ በእርሱ የተወደደ እንደ ሆነ በእውነት አስተዋልሁ።”
ሐዋ.10፥34-35 ያለው። ይህም አስቀድሞ በነቢዩ ኢዩኤል የተነገረው ትንቢት ይፈጸም ዘንድ ነው። ኢዩ.2:28-29።

የቅዱስ ጳውሎስ መልዕክት ወደ ሮሜ ሰዎች ምዕራፍ 8 ላይ የሚነሱ ጥያቄዎች

📖 “ክርስቶስ በእናንተ ውስጥ ቢሆን ሰውነታችሁ በኃጢአት ምክንያት የሞተ ነው፥ መንፈሳችሁ ግን በጽድቅ ምክንያት ሕያው ነው።” ሮሜ 8፥10

👉 ሰውነታችሁ ሲል ሥጋችሁ ውጫዊ አካላችሁ  ለማለት ነው። "መንፈሳችሁ" ሲል ደግሞ ነፍሳችሁ ፣ ውስጣዊ ሰውነታችሁ ለማለት ነው። “በውስጡ ሰውነቴ በእግዚአብሔር ሕግ ደስ ይለኛልና፥” ሮሜ 7፥22 እንዳለ። "ሰውነታችሁ በኃጢአት ምክንያት የሞተ ነው" በማለት ክርስቶስ ከእናንተ ጋር ከሆነ ኃጢአት መስራት አትችሉም፤ ለኃጢአት አትበረቱም ማለት ሲሆን "መንፈሳችሁ በጽድቅ ምክንያት ሕያው ነው" ማለት ደግሞ ውስጣዊ ሰውነታችሁ የጽድቅ ሥራ ለመስራት ይበረታል ሲል ነው። [መጋቤ ሐዲስ ስቡሕ አዳምጤ ከሮሜ እስከ ገላትያ]

👉 ክርስቶስ በእናንተ ቢኖር ማለት የክርስቶስ መንፈስ በእናንተ ቢኖር ሲል ነው። መንፈሱ በእናንተ ቢኖር ሲልም መንፈስ ቅዱስ በእናንተ ቢኖር ሲል ነው።   ክርስቶስ በናንተ ቢያድር ሥጋችሁ የጥንተ አብሶ ውጤት ለሆነው ተፈጥሮኣዊው ሞት ብቻ ይገዛል። ክርስቶስ በማዳኑ በሰጠን ጸጋ ምክንያት ነፍሳችን ምግባርን መሥራት ተችሏታልና መንፈሳችን የዘላለም ሕይወትን ታገኛለች ሲል ነው። “ከክርስቶስ ጋር ተሰቅዬአለሁ፤ እኔም አሁን ሕያው ሆኜ አልኖርም ክርስቶስ ግን በእኔ ይኖራል፤ አሁንም በሥጋ የምኖርበት ኑሮ በወደደኝና ስለ እኔ ራሱን በሰጠው በእግዚአብሔር ልጅ ላይ ባለ እምነት የምኖረው ነው።” ገላ. 2፥20፤ 2ኛ ቆሮ.5:17 ፊልጵ.1:21።

በመቀጠልም ጌታችንን ከሙታን ያስነሳው እግዚአብሔር አብ እንደሆነ ይናገራል። ጌታችን በስልጣኑ ሞትን ድል አድርጎ ተነስቷል። ነገር ግን የእርሱ ሥልጣን የአብ እና የመንፈስ ቅዱስ ሥልጣን ስለሆነ  አብ ወልድና መንፈስ ቅዱስ በሥልጣን አንድ መሆናቸውን ለመግለጽ እግዚአብሔር አስነሣው ወይም መንፈስ ቅዱስ አስነሣው ይላል። ከእግዚአብሔር ወልድ ጋር በሥልጣን በመለኮት በክብር አንድ የሆነው መንፈስ (እግዚአብሔር መንፈስ ቅዱስ) ለሚሞተው ሰውነታችሁ ሕይወትን ይሰጠዋል በዕለተ ትንሣኤ ሰውነታችንን ያስነሳዋል በማለት ይናገራል።

እንደምን ሰነበታችሁ የእግዚአብሔር ቤተሰቦች?

በተለያዩ ምክንያቶች ከዚህ ቻናል ጠፍተን ስለቆየን ይቅርታ እየጠየቅን በቀጣይ የሮሜ መልዕክት የመጽሐፍ ቅዱስ ጥናትን ካቆምንበት በመቀጠል ለመጨረስ እንሞክራለን። አስተያየትዎን በ @teklemaryam19 በኩል ያድርሱን::

በጸሎታችሁ አስቡን!

የመጽሐፍ ቅዱስ ጥናታችን ከሰኞ ጀምሮ ካቆመበት ይቀጥላል።

Contemplation on The Nativity of Our Lord and Savior Jesus Christ

ክፍል ሁለት

👉 በልደቱ ጊዜ ሁለት አካላት ጌታችንን አግኝተዋል የመጀመሪያዎቹ ሰብዓ ሰገል ሲሆኑ ሁለተኛዎቹ ደግሞ የበጎቹ እረኞች ናቸው። እኚህ የበጎች እረኞች የተባሉት ሰዎች የሚያግዱት በጎችን ነው፡። በዚያች ሌሊት በጎችን ለማገድ ያደረጋቸው ምክንያት በጎቹ ለኦሪት መስዋዕትነት የሚቀርቡ ስለሆነ በአውሬ እንዳይበሉ በእረኞች ይጠበቁ ነበር። ለኦሪቱ መስዋዕት የሚሆኑትን እረኞች በሌሊት ሲጠብቁ  አማናዊው በግ ኢየሱስ ክርስቶስ ተወለደ። እኛስ አማናዊው በግ ኢየሱስ ክርስቶስ ተወልዶ የድሮ በጎቻችንን ለመሰዋት የድሮ በግ ዝሙት ዳንኪራ ዘፈን ውስጥ ያለን ስንቶቻችን ነን?

👉 እረኞች የጌታችንን ልደት ለመስማት ከ ሰብዓሰገል የቀደሙ ሆነዋል። ሰብዓ ሰገል ባለ ዕውቀት ባለ ጥበብ ናቸው ረጅም ጉዞን ካደረጉ በኋላ ነው ጌታችንን ያገኙት ለርሱ ስጦታንም ያቀረቡት ምንም የማያውቁት የዋሃን የሆኑት የሆኑት እረኞች ግን የጌታችንን ልደት በቅርብ ርቀት ነው የተረዱት። ይህ የሚያስተምረን ሌላው ነገር ቢኖር ወደ እግዚአብሔር ለመድረስ ሁለት መንገዶች ያሳየናል የመጀመሪው ልክ እንደ ሰብዓ ሰገል ረጅሙና አድካሚው በጥበብና በእውቀት የሚገኘው መንገድ የተጓዙ ሲሆኑ ሁለተኛው ደግሞ ያልተማሩ ነገር ግን የዋሀን የሆኑት እረኞች የተጓዙበት የትህትና እና የየዋህነት መንገድ ነው። እግዚአብሔርን በቀላሉ ለማግኘት የየዋኅነትን የትህትናን መንገድ መከተል ይገባል ሲል ነው።

👉 ጌታችን የተወለደባት ቤቴልሔም ሌላው ጉዳይ ነው። ። በቤቴልሔም እንስሳት ለጌታችን እስትንፋስን ገብረውለታል። ሰው ግን ጌታችንን እያሳደደ ነበር። ሰው ያሳደደውን አምላክ እንስሳት እስትንፋስ ገበሩለት። መላዕክት መጥተው አመሰገኑ ብስራትን አደረጉ መላዕክት ሰው ሰላም በማግኘቱ ደስ ይሰኛሉ። ለኛ ብሎ የመጣውን አምላክ መላዕክት ደስ ሲሰኙበት ለኛ ብሎ የመጣውን አምላክ ግን ከልደቱ አንስቶ እስከ ሞቱ ድረስ ያሳደደው ሰው ነው። የጌታችን ፍቅር በምን ይገለጣል? ላድነው ብመጣ አሳደደኝ ብሎ ሰውን ከመውደድ ያልተመለሰ አምላካችን እንደምን ያለ ነው?

👉 የጌታችን ትዕግስት የተገለጠበት ሌላው ጉዳይ ጌታችን አምላክ ሆኖ ሳለ ወዲያው ልደግ በቅጽበት ልደግ አላለም ወንጌል በጥቂት በጥቂቱ አደገ አለን። 9 ወር በማህጸን ቆየ። ቅዱስ ኤፍሬም ይህን ይዞ  አትሰላቹ ደካማ አትሁኑ ጌታችን ለመወለድ አምላክ ሆኖ ሳለ ዘጠኝ ወርን በማህጸን ታግሶ የለምን? በክፉዎች አይሁድ መሃል 30 ዓመት ቆይቶ የለምን? በማለት ይናገራል።

✍ ተክለ ማርያም [ጅማ ሐመረ ኖኅ ኪዳነ ምሕረት]

እንኳን ለጌታችንና ለመድኃኒታችን ለኢየሱስ ክርስቶስ የልደት በዓል በሰላም አደረሰን!

በጌታችንና የመድኃኒታችን የኢየሱስ ክርስቶስ ልደት ተመስጦ [Contemplation On Nativity Of Our Lord and Savior Jesus christ]
       
        ክፍል- ፩

👉 በጌታችን የልደት በዓል ሰማያዊው ንጉስ እኛን ለማዳን የወረደበት የአምላካችንን ትሕትናውንና ፍቅሩን ያየንበት ነው። ይህን የአምላካችንን ፍቅር ትሕትና ሰው ሆነን ካላሳየን በዓሉን ማክበራችን ምሉዕ አይሆንም። ባልንጀራችንን ጠልተን ቂም በቀል ቋጥረን ቅናት ትዕቢት ተሸክመን ስለ ፍቅር አምላክ መምህረ ትህትና ጌታችን ኢየሱስ ክርስቶስ ልደት መናገር ራስን ማሞኘት ይሆንብናል።

👉 ልክ ሰብዓ ሰገል በጌታችን ልደት ቀርበው ስጦታዎችን እንዳቀረቡለት በንስሐ የተሰበረ ልባችንን ቸርነቱን ዘንግተን በበደል ላይ በደል ጨምረን በማሳዘናችን በመጸጸት የእንባ መባን ማቅረብ ይገባናል።  ዳግመኛም ሰብዓ ሰገል ቀድሞ በመጡበት መንገድ ሳይሆን በሌላ መንገድ ወደ ሀገራቸው እንደ ተመለሱ [ማቴ.2:12] በኃጢአት እግዚአብሔርን በማሳዘን የመጣንበትን መንገድ ትተን በሌላይቱ ቅድስናን በምትሰጠው የንስሐ መንገድ ልንመለስ ይገባናል።

👉 በዓለ ልደቱን ስናከብር በመርገም በኃጢዓት በፍዳ በጉስቁልና ተይዘን በነበርንበት ዘመን በመኃሪነቱ ጌታችን ወደ ምድር መጥቷል አማኑኤል በሚል ስመ ስጋዌ ተዛምዶናል። እኛም ከአምላካችን መኃሪነትና ፍቅር ተምረን እግዚአብሔር ከኛ ጋር እንደሆነ ሁሉ እኛም ሰው ከሌላቸው ከደካሞች ከነዳያን ጋር ልንሆን ነገረ ልደቱን በሕይወታችን ጭምር ማሰብ ይገባናል። 

👉 ስለ በዓሉ ስናስብ የአንድ ቀን ሁነት ወይም ክስተት ብቻ ሆኖ የምናልፈው አይደለም የልደቱን ነገር እመቤታችን በልቡናዋ ትጠብቀው ነበር በማለት ወንጌሉ እንደሚነግረን እኛም የጌታችንን በዓላት ስናስብ ዛሬ በተመስጦ ነገ ደግሞ በሌላ ማንነት  ሳይሆን ዘውትር በልቡናችን እያሰብን ልንኖር ያስፈልጋል።

ክፍል -፪ ይቀጥላል...

እንደምን አመሻችሁ?

የዛሬው እራት በዚህ መልኩ ተሰናድቷል


እንኳን ለጌታችንና ለመድኃኒታችን ለኢየሱስ ክርስቶስ የልደት በዓል አደረሳችሁ አደረሰን!

3ኛ ቀን- እራት ፫  [28/04/15]

👉 "ከአብ የማይለይ ረጅም ፈትል ሰማይና ምድርን የፈጠርህ በፈቃድህ ከሰማይ ወረድህ የድንግል ማሕጸን ወሰነህ የድሆች ልጅ ትንሽ ብላቴና ገሊላዊት አቀፈችህ ነፍሷን አከበርህ ስጋዋንም አነጻህ አጸናሃት ባንተ አልደነገጠችም። በቤተልሔም ተወለድህ እንደ ሰውም ታየህ።" የያዕቆብ ዘሥሩግ ቅዳሴ

👉 "የዛሬዋ ዕለት እግዚአብሔር በሥጋ የተወለደባት እለት ናት። በዚህችን ዕለት በዘመዶች ሞት፣ በበሽታ፣ በሀብቱ መጥፋት የሚያዝን፣ የሚያለቅስ ሰው በሰማያት ደስታ የለውም። በወንድሙ ቂም የያዘ፣ የተጣላ በዚህችም ዕለት ይቅር ያላለ ይህ ዐሥራ አራት እልፍ ከአራት ሺህ ሕጻናትን የገደለ የሄሮድስ ወንድም ነው። በዚያች ዕለት ሰላምን ለማድረግና ራሱን ዝቅ የሚያደርግ ግን ከሄሮድስ የሸሸ ክርስቶስን ይመስለዋል። በዚህችን ዕለት ርኅራኄን፣ ምጽዋትን የሚያደርግ እጣው ከሰብአ ሰገል ጋር ይሆናል።" [ርቱዓ ሃይማኖት ገጽ.42]

👉 "እርሱ በአብ ዕሪና ሳለ በድንግል ማሕጸን ተወሰነ። ከእርሷም ተወለደ። በእናቱ ክንድ ላይ ሳለ በነፋስ ክንፍ ይመላለስ ነበር። መላዕክትም ይሰግዱለት ነበር። " ሃይማኖተ አበው ዘቅዱስ ኤራቅልስ

አዘጋጅ:-  ተክለ ማርያም [ጅማ ሐመረ ኖኅ ኪዳነ ምሕረት]

አጭር የምሳ መልዕክት

ጌታችን ሲወለድ በጎችን ይጠብቁ የነበሩት እረኞች በዚያ ሌሊት በጎችን የመጠበቃቸው ምክንያት ለኦሪት መስዋዕት ሊቀርቡ የሚያስፈልጉ ስለሆኑ አውሬ እንዳይበላቸው  ነው። ለኦሪት መስዋዕት የሚሆኑትን በጎች በሚጠብቁበት በዚያች ሌሊት ግን የሐዲስ ኪዳኑ መሥዋዕት እውነተኛው [አማናዊው] በግ  ኢየሱስ ክርስቶስ ተወለደ።

ተወዳጆች ሆይ! እኛስ ጌታ በተወለደበት በዚህ ዕለት ስንቶቻችን ነን ሕይወት የማናገኝባቸውን በጎቻችን እየጠበቅን እየተንከባከብን ያለነው? በዓሉን በጭፈራ በዝሙት በስካር ለማክበር ያቀድን ስንቶቻችን ነን? ዛሬም የጌታን ልደት አስበን ከመላዕክት ጋር እንድንዘምር ቤተ ክርስቲያን ኑ ልጆቼ ብላ ትጠራናለች።

በቤተ ክርስቲያን ተገኝታችሁ በምትሰሙትና በምታዩት ሁሉ ደስ ተሰኝታችሁ እንደ እረኞቹ እግዚአብሔርን እያመሰገናችሁ ትመለሳላችሁ!

"እረኞችም እንደ ተባለላቸው ስለ ሰሙትና ስላዩት ሁሉ እግዚአብሔርን እያመሰገኑና እያከበሩ ተመለሱ።" ሉቃ.2:20

አደራ የጌታን ልደት እንድንዘነጋ በሚያደርግ የዘፈን የስካር የጭፈራ የዝሙት በሆነው የሰይጣን ወጥመድ ውስጥ አንውደቅ!
       
       "የሚሰማ ጆሮ ያለው ቢኖር ይስማ" ማር.4:23

ለሌሎችም እንዲዳረስ Share አድርጉ።

ለዛሬ የማይረሳ አጭር የምሳ መልዕክትም አለን

እንደምን አደራችሁ?

የዛሬው ቁርስ በዚህ መልኩ ተሰናድቷል።

ስለ ጌታችን ልደት ሊቃውንተ ቤተ ክርስቲያን ምን አሉ?

     3ኛ ቀን - ቁርስ ፫ [28/04/15]

👉 "ሰማይ ይስማ ምድርም ታድምጥ የሰማይም መሠረቶች ይደንግጡ። በአባቱ ፈቃድ ወረደ። በማርያም ዘንድ እንግዳ ሆነ። እግዚአብሔር በንጹህ ድንግልናዋ ተወለደ:: በእንስሳት በረት ተጨመረ። የንግሡንም እጅ መንሻ ተቀበለ ከእናቱ ጡት ምግብን እየለመነ እንደ ሕጻናት አለቀሰ። " የዲዮስቆሮስ ቅዳሴ

👉 "ወልድም ኃጢአት እንደበዛች ባየ ጊዜ በማይነገር በማይመረመር ግብር ወርዶ በእመቤታችን በቅድስት ድንግል ማርያም ማሕጸን አደረ። ዘጠኝ ወር ከአምስት ቀንም በማህጸኗ ተወሰነ። በርሷ አድሮ ሊዋሐደው የፈጠረውን ፍጹም ሥጋን በአብ በመንፈስ ቅዱስ ፈቃድ ከእርሷ ነሳ። ... የምናምንበት ሃይማኖታችን ይህ ነው። በሐሰት አልተወለደም በእውነት በሥጋ ተወለደ እንጂ። በሐሰት አልታመም በእውነት በሥጋ ታመመ እንጂ።" [ሃይማኖተ አበው ዘቅዱስ አትናቴዎስ]

👉 "እርሱ የቋንቋዎች ሁሉ ባለቤት ሲሆን ከማርያም አንደበት እንደሌለው ሕጻን ተወለደ።  እርሱ ከዓለማትና ፍጥረታት ሁሉ በፊት የነበረ ሲሆን የዮሴፍ ልጅ ተባለ። ሰማያዊ የሆነ እርሱ ግን የጥበቦች ሁሉ ጥበብ የሆነ ለሁሉ የሚበቃ ጥበብ አለ። [ቅዱስ ኤፍሬም]

እራት በዚህ መልኩ ተሰናድቷል

ስለ ጌታ ልደት ሊቃውንተ ቤተ ክርስቲያን ምን አሉ?

    እራት- ፪ [27/04/15]

👉 "በማሕጸን ሕጻናትን የሚፈጥራቸው እርሱ ሕጻን ሆነ። ብርሃንን የሚጎናጸፍ እርሱን በጨርቅ ጠቀለሉት። እንደ ምስኪን በድሃ ቤት አደረ። እንደ ንጉሥ እጅ መንሻን ያመጡለት ዘንድ ሐዋርያትን ላከ። ላም ጌታውን እንዲያውቅ የሚያደርገው እርሱ በበረት ተኛ እንደ ሕጻን አደገ።" [ቅዳሴ ዘዮሐንስ ወልደ ነጎድጓድ]

👉 "አቤቱ ጌታ ሆይ ምሕረትህ በየቀኑ የሚሆን ከሆነ በዚህች ልዩ በሆነችዋ በዛሬዋ ቀን ምንኛ ይበዛ! ቀናት ሁሉ ከዚህች ከምታንጸባርቀዋ ቀንህ በረከትን ያገኛሉና ሁሉም በዓላት ከዚህች ቀን ውበትና ጌጣቸውን ያገኛሉ። አቤቱ በዚህች የይቅርታህ ቸርነት የተደረገባትን ዕለት አብዛልን። ጌታ ሆይ ይህቺን ቀን ከቀናት ሁሉ አብልጠን እናከብራት ዘንድ እርዳን" [ድርሳነ ኤፍሬም ገጽ.135]

👉 "ምን እላለሁ? ምንስ እናገራለሁ? ከዘመን በፊት የነበረ እርሱ ትንሽ ሕጻን ሆኗልና እኔ ፈጽሜ አደንቃለሁ። ከሰማየ ሰማያት በላይ የሚሆን በዘላለማዊ ዙፋን የሚኖር እርሱ በበረት ተጣለ ከሥጋዌ ቀድሞ አይዳሰስ የነበረ አንድ እርሱ በምድራዊያን እጅ ተዳሰሰ። ኃጢአትን የሚያስተሠርይ እርሱን በጨርቅ ጠቀለሉት::" [ሃይማኖተ አበው ዘቅዱስ ዮሐንስ አፈወርቅ]

እንደምን አደራችሁ?

የዛሬው ቁርሳችን በጊዜ ተሰናድቷል።

ስለ ጌታችን ልደት ሊቃውንተ ቤተ ክርስቲያን ምን አሉ?

   ቁርስ-፪  [27/04/15]

👉 "ጌታ ሆይ እናከብራት ዘንድ ያተምካት ይህቺ የመጀመርያዋ ቀን ምስጉን ናት። ይህቺ ቀን ይቅርታህን ለሰው ልጆች ያሳየህባት ናት። በዚህች ቀን ፍጥረታትን ሁሉ ታድን ዘንድ ወረድህባት። ይህቺ ቀን ያረጀው ሰውነታችን እርጅናውን ጨርሶ ወጣት የሆነባት ናት። ይህቺ ቀን የበሰበሰው ፍጥረት በፍቅሩ ብዛት አዲስ የሆነባት ናት።" [ቅዱስ ኤፍሬም]

👉 "እንዲሁም ከመወለዱ አስቀድሞ ያሉትን ቀኖች ዘጠኝ ወር ጠበቀ። ከእርሷም በእውነት ሰው ሆኖ ተገለጠ። ማኅተመ ድንግልናዋን አልለወጠውም። የወለደችው እግዚአብሔር ቃልም እርሱ የደከሙትን ያጸናቸዋል፤ በማይነገር በማይመረመር በአካል ተዋሕዶ ሥጋን ለራሱ ገንዘብ አደረገ። የልደቱን ነገር ሰው ሊያውቀው ሊናገረው አይችልም። የአካል እድገት ፍጻሜ እስከሚሆንበት ዘመን ድረስ ጡት ጠብቶ በሥጋ በየጥቂቱ ማደግን ወደደ" ሃይማኖተ አበው ዘቅዱስ ዮሐንስ

👉  "የእስራኤል ንጉሥ በእስራኤል ልጅ አደረ የዳዊት አምላክ ከዳዊት ልጅ ሥጋ ለበሰ። የዕብራውያን ልጅ በዕብራውያን ማኅጸን ተጸነሰ። ለአብርሃም የእብራይስጥ ልሳን ያስተማረው። ከቀድሞም ያልሰማውን ልሳን እንዲናገር አፉን ጆሮውን የከፈተለት ከዕብራዊት ድንግል ተወለደ።" [አባ ጊዮርጊስ ዘጋስጫ: የሐሙስ አርጋኖን]

ስለ ጌታ ልደት ሊቃውንተ ቤተ ክርስቲያን ምን አሉ?
    
    እራት- ፩ [26/04/15]

👉 አባ ጊዮርጊስ ዘጋስጫ በመጽሐፈ ምስጢር እንዲህ አለ:- "በዚያ ከሰማያውያን ካህናት በወርቅ ማዕጠንት የዕጣኑን መዓዛ ይቀበላል። በዚህም ወርቅና ከርቤን ሽቱንም ከሰብዓ ሰገል ተቀበለ። በዚያ ኪሩቤልና ሱራፌል ከግርማው የተነሳ ይንቀጠቀጣሉ። በዚህም ማርያም አቀፈችው ሰሎሜም አገለገለችው። በዚያ የመብረቆች ብልጭልጭታ በፊቱ ይገላለጣሉ የእሳትም ወላፈን ከአዳራሹ ይወጣል። በዚህም አሕያና ላም በትንፋሻቸው  አሟሟቁት በዚያ የእሳት ዙፋን አለ በዚህም የደንጊያ በረት። በዚያ የዕብነ በረድ የሰማይ ንጣፍ በዚህችም የላሞች መጠጊያ በረት በዚያ  የትጉሃን ሥፍራ በሰማያት ያለች ኢየሩሳሌም አለችው። በዚህም የእንስሳት ጠባቂዎች ማደርያ በዓት አለው።" [መጽሐፈ ምስጢር የልደት ምንባብ ገጽ.90]

👉 "ዳግመኛም በልዑል ዙፋን ላይ ተቀምጦ ያለ እርሱ በበረት ተጣለ ሥጋ ሳይሆን የነበረ የማይዳሰስ ወልድ ዋሕድ ዛሬ ሥጋን በመዋሐድ ተዳሰሰ። ኃጢአትን የሚያስተሠርይ እርሱ በጨርቅ ተጠቀለለ።" [ሃይማኖተ አበው ዘቅዱስ ዮሐንስ አፈወርቅ]

👉 "ከሁሉ በላይ ባለ ጸጋ የሆነው አምላክ ስለ እኛ ብሎ በደኸየባት በዛሬዋ ዕለት ባለጸጋ ሰው ከድኾች ጋር ማዕድ ይቀመጥባት። ሳንለምን ሥጦታ የሆነው መድኃኒት በተሰጠን በዛሬዋ ዕለት ባለ ጸጋ ሰው ከድኾች ጋር ማዕድ ይቀመጥባት። ሳንለምን ስጦታ የሆነውን መድኃኒት በተሰጠን በዛሬዋ ዕለት በለቅሶ እና በዋይታ ሆነው ለሚለምኑን ምጽዋት እንስጥ።" [ድርሳነ ቅዱስ ኤፍሬም ሶርያዊ ገጽ.124]

ስለ ጌታችን ልደት ሊቃውንተ ቤተ ክርስቲያን ምን አሉ?

     ቁርስ- ፩ [26/04/15]

👉 "ይህቺ ቀን ነቢያት፣ ነገሥታት እና ካህናት የተደሰቱባት ናት ፣ የተነበዩት ትንቢት፣ የመሰሉት ምሳሌ እውን የሆነባት፣ የጠበቁትም ተስፋ የተፈጸመባት ናትና። ዛሬ ግን ድንግል ልጇ አማኑኤልን በቤተልሔም ወልዳለች።" [ድርሳነ ቅዱስ ኤፍሬም ሶርያዊ. ገጽ.111]

👉 "እግዚአብሔር ቃል ወደዚህ ዓለም ይመጣ ዘንድ ከንጽሕት ድንግል ማርያም ሥጋን ይዋሐድ ዘንድ ምን አተጋው። በጨርቅ ይጠቀለል በበረት ይጣል ዘንድ ከሴት(ድንግል) ጡት ወተትን ይጠባ ዘንድ በዮርዳኖስ ይጠመቅ ዘንድ ምን አተጋው? በፍዳ ተይዘን የነበርን እኛን ያድነን ዘንድ ለእኛ ብሎ አይደለምን::" [ሃይማኖተ አበው ዘእለእስክንድሮስ]

👉 "የማይደፈር ግሩም ነው። በእኛ ዘንድ ግን ትሑት ነው። የማይገኝ ልዑል ነው። በእኛ ዘንድ ግን አርአያ ገብርን ነሳ። የማይዳሰስ እሳት ነው። እኛ ግን አየነው ዳሰስነው። ከርሱም ጋር በላን ጠጣን።" [ቅዳሴ ማርያም]

ከዛሬ ጀምሮ  እስከ በዓለ  ልደት (ቅዳሜ) ድረስ በዓለ ልደቱን በማስመልከት ሊቃውንተ ቤተ ክርስቲያን ስለጌታችን ልደት ምን አሉ? በሚል  በየዕለቱ  በሥጋ ምግብ ሥርዓት ቁርስና እራት ሊቃውንት ያሰናዱልንን ቃለ እግዚአብሔር እንመገባለን። ስለ እኛ ሰው የሆነውን የአምላክን የልደቱን ነገር አስበን እንቆያለን! ተዘክሮተ እግዚአብሔርን ችላ አንበል!

ስለ ጌታ ልደት አስመልክቶ የጠዋት ቁርሳችን ከረፈደ  3:00 ሰዓት ላይ ይሰናዳል።