Mewda Media

ئه‌م دۆخه‌ى هه‌رێم به‌ پلان دروستكراوه‌.... مه‌ودا میدیا-

پسپۆڕێكى ده‌روونى و مامۆستاى زانكۆ سه‌باره‌ت به‌م دۆخه‌ى له‌ هه‌رێم دروست بووه‌ و پێنه‌دانى مووچه‌ و به‌رده‌وام بڵاوكردنه‌وه‌ى زانیاریی ناڕاست و متمانه‌ نه‌مان به‌ هه‌واڵه‌كان، رایده‌گه‌یه‌نێت "ئه‌وه‌ى رۆژهه‌ڵاتى ناوه‌ڕاست به‌ڕێوه‌ ده‌بات و ئه‌م بێ متمانه‌یه‌ى دروست كردووه‌ له‌ سه‌رووى هێزى ده‌سه‌ڵاتدارانى هه‌رێمه‌وه‌یه‌ و پلانێكى فره‌چه‌شنه‌".

د.شیرین حسێن، پسپۆڕى ده‌روونى و مامۆستاى زانكۆ بۆ مه‌ودا میدیا رایگه‌یاند "ئه‌م دۆچه‌ى ئێستاى هه‌رێم دروستكراوه‌ و كاریگه‌رى نه‌رێنى ده‌كاته‌ له‌ سه‌ر عه‌سابى تاك و ناسه‌قامگیریی ده‌روونى دروست ده‌كات، كه‌ ده‌بێته‌ مایه‌ى دروستبوونى چه‌ندین كێشه‌ى كۆمه‌ڵایه‌تى".

وتیشى "ئه‌مه‌ى كه‌ ده‌كرێت له‌سه‌رووى ده‌سه‌ڵاتى حزبه‌كان و ده‌سه‌ڵاتدارانى هه‌رێمه‌وه‌یه‌، ئه‌وه‌ى رۆژهه‌ڵاتى ناوه‌ڕاست به‌ڕێوه‌ ده‌بات و ئه‌م بێ متمانه‌یه‌ى دروست كردووه‌ له‌ سه‌رووى هێزى ئه‌وانه‌وه‌یه‌ و له‌ پێناو به‌رژه‌وه‌ندى به‌رژه‌وه‌نده‌كان گوێ نایه‌ن چى به‌سه‌ر تاكى كورد و كۆمه‌ڵگه‌ دێت".

ئاماژه‌ى به‌وه‌شكرد "ئه‌مه‌ پلانێكى ده‌روونى، سیاسى، كۆمه‌ڵایه‌تى و ئایینییه‌ كه‌ له‌ هه‌موو رۆژهه‌ڵاتى ناوه‌راستدت به‌رێوه‌ده‌چێت".

پ ح ع

كۆڕنیشینه‌كه‌ى كه‌لار كاركردن تێیدا سسته‌ و هۆكاره‌كه‌ى ئاشكرا ده‌كرێت .....مه‌ودا میدیا-

كاركردن له‌ كۆڕنیشینه‌كه‌ى كه‌لار به‌رده‌وامه‌، به‌ڵام كاره‌كانى به‌ شێوه‌یه‌كى سست ده‌ڕوات به‌ ڕێوه‌ و سه‌رۆكى شاره‌وانیی كه‌لاریش رایده‌گه‌یه‌نێت "هه‌موو كارێك كه‌ ئه‌نجام ده‌درێت زۆرجار كێشه‌ و كه‌موكورتى تێدا دروست ده‌بێت، كه‌ پێویسته‌ چاره‌سه‌ر بكرێن".

ئه‌كره‌م صاڵح، سه‌رۆكى شاره‌وانیی كه‌لار بۆ مه‌ودا میدیا رایگه‌یاند "هه‌موو ئه‌و كارانه‌ى كه‌ ئه‌نجام ده‌درێت زۆرجار كێشه‌ و كه‌موكورتى هه‌یه‌ و هه‌موو ئه‌وانه‌ پێویسته‌ چاره‌سه‌ر بكرێن، كه‌ جارى وا هه‌یه‌ له‌ كاتى كاركردندا گرفت دێته‌ پێش".

وتیشى "له‌ ئێستادا قۆناغى یه‌كه‌مى پرۆژه‌كه‌ كارى تێدا ده‌كرێت و به‌ ته‌واوبوونیشى هاوڵاتییان ده‌توانن سه‌ردانیی بكه‌ن و كاتى خۆیان له‌وێ به‌سه‌ر به‌رن، رووبه‌ره‌كه‌ى گه‌وره‌ و فراوانه‌ كه‌ سێ بۆ چوار كیلۆمه‌تر ده‌بێت".

له‌ باره‌ى كاتى ته‌واوبوونه‌كه‌شى باسى له‌وه‌كرد "نازانن چی كاتێك ته‌واو ده‌بێت، چونكه‌ كۆڕنشینه‌ى ده‌كه‌وێته‌ سه‌ر رووبارى سیروانه‌وه‌ ده‌بێت قه‌ره‌بووى جووتیاران بكرێنه‌وه‌ و رێڕه‌وى رووباره‌كه‌ش چاكبكرێت".

پ ح ع

کۆنگرەی یەکگرتوو و پرسی دەرکردنی ئەبوبەکرەکان و مەترسییەکانی دوای ئەنجامدانی کۆنگرە چین؟ ........ مه‌ودا میدیا-

بڕیاره‌ پێش كۆتایی ئه‌مساڵ و له‌ كاتى خۆیدا كۆنگره‌ى نوێى یه‌كگرتووى ئیسلامیی كوردستان ئه‌نجام بدرێت و ئه‌نجومه‌نى سه‌ركردایه‌تیى حزبه‌كه‌ش له‌ كۆتا كۆبوونه‌وه‌ى خۆیدا بڕیاری له‌ باره‌وه‌ داوه‌.

به‌ستنى كۆنگره‌ پشێوییه‌ك له‌ ناو یه‌كگرتوودا دروستده‌كات و بووه‌ته‌ مایه‌ى نیگه‌رانى و ناڕه‌زایه‌تى چه‌ند ئه‌ندامێكى سه‌ركردایه‌تى و لایه‌نگرانى، به‌هۆى ئه‌وه‌ى رێگه‌ نادرێت شه‌ش سەرکردەى باڵا و ئه‌ندامى شووراى حزبەکه‌ به‌شدارى له‌ كۆنگره‌كه‌ بكه‌ن به‌تایبه‌ت ئه‌بوبه‌كره‌كان، واته‌ ئه‌بوبه‌كر هه‌ڵه‌دنى، و ئه‌بوبه‌كر كاروانى كه‌ هه‌ر زوو ده‌نگى ناڕه‌زایه‌تیی خۆیان ده‌ربڕى و له‌و چوارچێوه‌یه‌دا ئه‌بوبه‌كر هه‌ڵه‌دنى رایگه‌یاند "به‌پێى په‌یڕه‌وى ناوخۆى حزبه‌كه‌یان ئه‌وان راسته‌وخۆ ئه‌ندامى كۆنگره‌ن و بڕیاره‌كه‌ به‌ ناپه‌یڕه‌ویى ده‌زانن" و ده‌شڵێت "بڕیاره‌كه‌ به‌ فلته‌رى صڵاحه‌دین به‌هادین، ئه‌میندارى گشتیی یه‌كگرتوودا تێپه‌ڕیوه‌".

هاوكات، هۆكاره‌كه‌شى بۆ هه‌ڵوێسته‌ نه‌ته‌وه‌ییه‌كانیان گه‌ڕانده‌وه‌.

هه‌روه‌ها به‌ راى ئه‌بوبه‌كر كاروانیش، به‌پێى پله‌كه‌ى له‌ ناو حزبه‌كه‌یدا بڕیاره‌كه‌ پێشێلكارى په‌یڕه‌وى ناوخۆیه‌ و پێچه‌وانه‌ى دروشمه‌كه‌یه‌تى كه‌ بانگه‌شه‌ى دادپه‌روه‌رى ده‌كات.

كاروانى كه‌ یه‌كێكه‌ له‌ ئه‌ندامانى ده‌سته‌ى دامه‌زرێنه‌رى یه‌كگرتوویش، ده‌ڵێت "یه‌كگرتوو هه‌ڵه‌یه‌كى مێژووى كرد و له‌ داهاتوودا باجه‌كه‌ى ده‌دات، چونكه‌ بڕیاره‌كه‌ نائومێدى دروست ده‌كات و، وه‌ حزبه‌كه‌ و خودى ئه‌مینداره‌كه‌شى پێی ده‌شكێت، كه‌ ئه‌مه‌ بۆ یه‌كگرتوو خۆش نییه‌".

له‌به‌رانبه‌ردا، لیژنەی هەڵبژاردنی ئەندامانی کۆنگرەی نۆیەمی یەکگرتوو له‌ روونکردنەوەیەکدا ئاماژه‌ى به‌وه‌كردووه‌ "ماوەی دوو ساڵە داخوازییەک هەیە لە لایەن کادر و رێکخستنەکانی یەکگرتووی ئیسلامیی کوردستان، لەبارەی پێویستی بوونی رێوشوێنی لائیحی سەبارەت بە کەمتەرخەمی و پابەند نەبوون بە ئەرکەکانی حزب و ئۆرگانەکان بۆ کۆنگرەی نۆیەم، لەم روانگەوە ئەنجومەنی جێبەجێکردن بڕیاریدا سێ پێوەرى هەبێت بۆ ئەندامێتی کۆنگرە، وەک سەرەتایی ترین ئەرکی ئەندام، كه‌ ئه‌وانیش، پابەندبوون بە بەشداریکردن لە ئیشتراکات و ئابوونە، پابەندبوون بە ئاڕاستە و مەنهەج لە لێدوان و کاردا، پابەندبوون بە ئامادەبوون لە کۆبوونەوەکان".

راشیگه‌یاندووه‌ "لێرەوە ئەو بەڕێزانەی پابەندییان نەبووە بەو سێ خاڵەی سەرەوە، مافی ئەندامێتی کۆنگرەیان نابێت، ئەمەش واتای دوورخستنەوەیان نییە لە حزب، هەر وەک بەشداری نەکردن لە کۆنگرەش کارێکی لائیحی و ئاساییە و سەدان کادری باڵا و خاوەن فەزڵ بە هۆی سنوورداربوونی ئەندامانی کۆنگرەوە، بە لائیحە و هەڵبژاردنیش بەشدار نابن لە کۆنگرە و زۆر بە ئاسایی مامەڵەیان لەگەڵ کردووە".

ئه‌بوبه‌كره‌كانیش ره‌تى ده‌كه‌نه‌وه‌ كه‌ پابه‌ندنه‌بووبێتن به‌ ئیشتراكات و ئابوونه‌وه‌ و ده‌شڵێن "ماوەی زیاتر لە پێنج ساڵە بە بڕیاری مەکتەب سیاسی میدیا و رێکخستنی یەکگرتوویان لێ قەدەغەکراوە و رێگه‌یان نه‌دراوه‌ قسە بۆ هیچ کۆڕ و کۆوبوونەوەیەکی حزبەکە بکەن".

له‌ لایه‌كى تریشه‌وه‌ باس له‌وه‌ده‌كرێت "دوورخستنه‌وه‌ و به‌شدارى نه‌كردنى ئه‌و كه‌سانه‌ له‌ كۆنگره‌، توركیا ده‌ستوه‌ردانى تێدا كردووه‌ و له‌ پشت ئه‌و بڕیاره‌ى یه‌كگرتووه‌وه‌یه‌".

ئه‌مه‌ له‌ كاتێكدایه‌، رۆژی سێشەممە 17ی 12ی2024 ئەمینداری گشتیی یەکگرتوو سەلاحەدین محەممەد بەهادین، لەسەر بانگهێشتنامەیەکی فەرمیی وەزارەتی دەرەوەی تورکیا سەردانی ئەنقەرەی کرد و چاوى به‌ ( د.نوح یڵمەز ) جێگری وەزیری دەرەوەی تورکیا كه‌وت.

له‌گه‌ڵ هه‌موو ئه‌وانه‌شدا، ئەمینداری گشتیی حزبه‌كه‌ هه‌وڵى ئاشتكردنه‌وه‌ى ئه‌و كه‌سانه‌ ده‌دات و له‌و نێوه‌نده‌دا بەیاوەری وه‌فدێك لە ئەندامانی ئەنجومەنی جێبەجێكردن و سەركردایەتی، سەردانی محەممەد رەئوفی كرد.

هه‌ر له‌و باره‌یه‌وه‌، مه‌ودا میدیا په‌یوه‌ندى كرد به‌ ئه‌بوبه‌كر هه‌ڵه‌دنییه‌وه‌، پێى راگه‌یاندین "له‌ ئێستادا هیچ قسه‌ و لێدوانێكى نابێت و چاوه‌ڕێى ده‌ستپێكردنى كۆنگره‌یه‌، تاوه‌كو بزانێت تائه‌وكاته‌ چی گۆڕانكارییه‌ك روو ده‌دات".

پ ح ع

ئه‌م قه‌ره‌بووكراوانه‌ رێگه‌یان پێده‌درێت زه‌وییه‌كانیان بكه‌ن به‌خانوو.....مه‌ودا میدیا-
له‌ كه‌لار چه‌ند پارچه‌ زه‌وییه‌ك وه‌ك قه‌ره‌بوو ده‌درێت به‌ جووتیار و خاوه‌ن باخه‌كانى نزیك گه‌ڕه‌كى كه‌لارى كۆن و باس له‌وه‌ ده‌كرێت ئه‌و زه‌وییانه‌ له‌ ئێستادا ناتوانرێت سوودیان لێببینرێت و بكرێن به‌ خانوو، به‌ڵام سه‌رۆكى شاره‌وانیى كه‌لار ره‌تى ده‌كاته‌وه‌.
ئه‌كره‌م صاڵح، سه‌رۆكى شاره‌وانیی كه‌لار بۆ مه‌ودا میدیا رایگه‌یاند "ڤرفتى ئه‌و زه‌وییانه‌ له‌گه‌ڵ تۆمارى خانووبه‌ره‌یه‌ و كه‌ پێویسته‌ زه‌وییه‌كانیان بۆ ئیفراز بكرێت، دواى ئه‌وه‌ ده‌بێت هه‌موویان هێڵكارییان بۆ بكرێت".
وتیشى "به‌ڵام هه‌ركه‌سێك بیه‌وێت و په‌له‌ى بێت ئه‌وان هاوكارى ده‌كه‌ن و رێگه‌ى پێده‌ده‌ن بیكات به‌ خانوو".
ئاماژه‌ى به‌وه‌شكرد "زۆرێك له‌ كاره‌كانى ته‌واو بووه‌ و به‌م نزیكانه‌ به‌ ته‌واوى رێگه‌یان پێده‌درێت به‌ فه‌ڕمیی خانووی تێدا دروستیكرێت".

ماڵێک لە هەولێر بەنایاسایی بەرهەمی شیرەمەنی دروستدەکردووه‌ و رۆژانە رەوانەی بازاڕى کردووە
قایمقامیەتی قەزای ناوەندیی هەولێر بڵاویكردووه‌ته‌وه‌ "ئەمڕۆ دواى گەیشتنى زانیاریى، کە ماڵێک لە گەڕەکى بەختیارى، بەشێوەیەکى نایاسایی و بەبێ گوێدانە یاسا و رێنماییەکان و جێبەجێکردنى مەرجە تەندروستییەکان، بەرهەمى شیرەمەنى وەک "پەنیر" دروستدەکرێت و رۆژانە رەوانەى بازاڕ دەکرێت و بەسەر هاوڵاتییاندا ساغ دەکرێتەوە".
راشیگه‌یاندووه‌ "لیژنەی پشکنینی قایمقامیەت گەیشتنە ماڵەکە و وێڕاى دەست بەسەرداگرتنى کەلوپەل و پێداویستییەکان، خاوەنى ماڵەکەش بەپێى یاسا و بە فەرمانى دادوەر دەستگیرکرا و رەوانەى دادگا کرا".

سنوورى بایکۆتكردن تابێت فراوانتر دەبێت.......... مه‌ودا میدیا-
سنوورى بایکۆتی مووچه‌خۆران بە هۆی دابەشنەکردن و دواكه‌وتنى مووچەوە تابێت فراوانتر دەبێت و کارمەندانی تەندروستیی گەرمیانیش ده‌وامكردنیان راگرت.
صڵاح حه‌سه‌ن، كارمه‌ندى ته‌ندروستیی گه‌رمیان بۆ مه‌ودا میدیا راگه‌یاند "ئەمڕۆ سێشەممە، کارمەندانی زۆربەی نەخۆشخانە و مەڵبەندە تەندروستییەکانی گەرمیان بایكۆتى دەوامیان كردووه‌ و نه‌چوونه‌وه‌ بۆ ده‌وام".
وتیشى "بڕیاریانداوه‌ تاوه‌كو مووچه‌كه‌یان دابه‌شنه‌كرێت به‌ره‌وام ده‌بن له‌ بایكۆت كردن".
ماوه‌ى چەند رۆژێکە بایکۆتكردنى ده‌وام لە سنووری پارێزگای سلێمانی بە هۆی دابەشنەکردنی مووچەوە ده‌ستیپێكردووه‌ و تابێت فراوانتر ده‌بێت و چه‌ندین ناوه‌ندى خوێندن و فه‌رمانگه‌ى جیاوازى حكومه‌ت ده‌رگایان به‌ رووى ده‌وامكردندا داخستووه‌.
ئه‌مه‌ له‌ كاتێكدایه‌، ئێستا له‌ مانگگى 12 داین و هێشتا مووچه‌خۆرانی هەرێمی کوردستان مووچەی مانگی 10یان وەرنەگرتووە.

عیراق بڕه‌ پاره‌یه‌كى تر بۆ مووچه‌ ده‌نێرێت........مه‌ودا میدیا-

بەپێی ئەو زانییاریانەی دەست مه‌ودا میدیا کەوتووە، وەزارەتی دارایی عیراق به‌ نیازه‌ لە پشکی هەرێمی کوردستان لە یاسای بودجە بڕى 400 ملیار دینار بكوازرێته‌وه‌ بۆ ئه‌وه‌ى بۆ مووچەی مانگەکانی 10 و 11 و 12 خه‌رج بكرێت.

هه‌ر به‌پێى زانیارییه‌كان، ماوه‌ى چەند رۆژێکە کۆبوونەوەى جددى لە وەزارەتی دارایی عیراق ده‌كرێت تاوەکو بەزوویی بگەنە ئەنجام، ئەگەر بگەنە ئەنجام بڕی 400 ملیار دیناری تر بۆ مووچەی سێ مانگى كۆتایی ئه‌مساڵ بەم زووانە دابیندەکرێت و خەرج دەکرێت.

ئه‌گه‌ر هه‌یه‌ هاوڵاتییانی کەرکوک و ناوچە دابڕێندراوه‌كان سەرژمێرییه‌كه‌یان بۆ هه‌ژمار نه‌كرێت...... مه‌ودا میدیا-

یاریدەدەری سەرۆکی ژووری ئۆپەراسیۆنی سەرژمێریی لە هەرێم رایده‌گه‌یه‌نێت "بۆ ئه‌نجامدانى قۆناغى كۆتایی سه‌رژمێریی پێویسته‌ ئه‌و هاوڵاتییانه‌ى خه‌ڵكى کەرکوک و ناوچە کوردستانییەکانی دەرەوەی ئیدارەی هەرێم بگه‌ڕێنه‌وه‌ شوێنه‌كانى خۆیان، به‌ پێچه‌وانه‌وه‌ دوور نییە سەرژمێرییەکە بە ناڕاست و ناتەواو هەژمار بکرێت".

شوان جەبار، یاریدەدەری سەرۆکی ژووری ئۆپەراسیۆنی سەرژمێریی داوا لە هاوڵاتییانی کەرکوک و ناوچە کوردستانییەکانی دەرەوەی ئیدارەی هەرێم ده‌كات بۆ قۆناغی کۆتایی سەرژمێریی بگەڕێنەوە شوێنەكانی خۆیان.

راشیگه‌یاندووه‌ "قۆناغی کۆتایی سەرژمێرییه‌كه‌ زۆر گرنگە، بۆیه‌ ده‌بێت ئه‌و خێزانانه‌ بگه‌ڕێنه‌وه‌، ته‌نانه‌ت ئه‌گه‌ر یه‌ك کەسیشیان لە ئەندامانی خێزانه‌كان بگەڕێتەوە شوێنی بنچینەیی خۆیان ئاساییه‌، بەڵام ئەگەر بە گشتی نەگەڕێنەوە، دوور نییە ئەم سەرژمێرییە، بە ناڕاست و ناتەواو هەژمار بکرێت".

هه‌واڵى ده‌ستگیركردنى مامۆستایه‌كى ئایینى له‌ سلێمانى ره‌تده‌كرێته‌وه‌
مامۆستای ئایینی تاهیر کەلەباشی، وتاربێژی مزگەوتی گەورەی پیرەمەگروون لە پارێزگای سلێمانی ره‌تى ده‌كاته‌وه‌ رفێندرابێت و ده‌ستگیركرا بێت و ده‌ڵێت "ئه‌و هه‌واڵه‌ هیچ بنەمایەکی نییە و بەردەوامه‌ لە کارەکەى".
ئه‌مه‌ له‌ كاتێكدایه‌، لە تۆڕە کۆمەڵایەتییەکان وا بڵاوکراوەتەوە کە مامۆستایەکی ئایینی لە سلێمانی بە ناوی مەلا تاهیر رفێندراوە و هه‌واڵه‌كه‌ش بە فراوانی بڵاوكرایه‌وه‌ كه‌ گوایە نزیکەی 50 چەکدار لە ماڵەکەی خۆیدا رفاندوویانه‌.
شایه‌نى باسه‌، ئه‌م مامۆستا ئایینییه‌ به‌شێكى دیارى وتاره‌كانى دژى سته‌ملێكردنى مییلله‌ت و ده‌سه‌ڵاتدارانى هه‌رێمى كوردستانه‌ و چه‌ندجارێكیش به‌شدارى خۆپیشاندانه‌كانى مامۆستایانى كردووه‌، كه‌ دژى پاشه‌كه‌وتكردن و دواكه‌وتنى مووچه‌كانیان ئه‌نجامیان ده‌دا.

ھۆکارەکانی ھەرزان نەبوونی نرخی سووتەمەنی ئاشکرا دەکرێت ..........مەودا میدیا-
سەبارەت بە ھەرزان نەبوونی نرخی سووتەمەنی و درێژەکێشانی بەو نرخە بەرزە، وتەبێژی بازاڕی سووتەمەنی سلێمانی چەند ھۆکارێک ئاماژە پێدەکات و رایدەگەیەنێت "ھێشتا لە بودجەدا ئەوە نەچووەتە بواری جێبەجێکردنەوە کە ھەرێم بتوانێت لە رێگەی سۆمۆوە نەوت بفرۆشێت و تاوەکو ئێستا نەکەوتوونەتە رێککەوتن، لە ئەگەری چوونە بواری جێبەجێکردنەوە بە دڵنیاییەوە کاریگەری دەبێت و نرخی سووتەمەنی دادەبەزێت".
رامیار رزگار، وتەبێژی بازاڕی سووتەمەنی سلێمانی بۆ مەودا میدیا رایگەیاند "کۆمەڵێک ھۆکار ھەیە لە پشت ھەرزان نەبوونی نرخی سووتەمەنی، کە یەکێک لەوانە پەیوەندی بە رێکخراوی ئۆپیکەوە، بەو پێیەی عیراق دووەم گەورەترین وڵاتە لە ھەناردەی نەوت لە لایەن ئەو رێکخراوەوە و لە ئێستادا عیراق باپەندە بەو کەمکردنەوەی ھەناردەی نەوتە کە بۆی دیاری کراوە، ھاوکات ھەناردەی نەوتی ھەرێمیش دەستی پێنەکردووەتەوە".
وتیشی "ئەگەرچی بەپێی ئەو مادەیەی پێکھاتوون لە یاسای ژمارە 111 و 112، کە تایبەتە بە یاسای نەوت و غاز و دەڵێت ؛سووتەمەنی موڵکی سەرجەم ھاوڵاتییانی عیراقە لە سەرجەم پارێزگاکان و دەبێت ئەوکەرتە بەھاوبەشی لەگەڵ حکومەت و ھەرێم و پارێزگاکان جێبەجێبکرێت؛ بەڵام لە ئێستادا کێشەیەک ھەیە لە نێوان حکومەتی ھەرێم و حکومەتی عیراق کە لە بودجەدا ھێشتا ئەوە نەچووەتە بواری جێبەجێکردنەوە کە ھەرێم بتوانێت لە رێگەی سۆمۆوە نەوت بفرۆشێت و تاوەکو ئێستا نەکەوتوونەتە رێککەوتن".
ئاماژەی بەوەشدا "لە ئەگەری چوونە بواری جێبەجێکردنەوە بە دڵنیاییەوە کاریگەری دەبێت و نرخی سووتەمەنی دادەبەزێت".
پ ح ع

ژماره‌یه‌ك له‌ كارمه‌ندانى گرێبه‌ستى ته‌ندروستى له‌ دامه‌زراندنیان به‌هه‌میشه‌یی بێبه‌ش ده‌بن و هۆشدارى ده‌ده‌ن ........مه‌ودا میدیا-
ژماره‌یه‌ك له‌ کارمەندانی گرێبەستی تەندروستی له‌ گەرمیان بەهۆی خاڵێکەوە له‌ فه‌رمانى دامه‌زراندنى فه‌رمانبه‌رانى گرێبه‌ست به‌ شێوه‌ی هه‌میشه‌یی، بێبه‌ش ده‌بن له‌ دامه‌زراندن و به‌گردبوونه‌وه‌ و ناڕه‌زایه‌تییه‌كانیان داوای چارەسەرکردنی ئه‌و گرفته‌یان ده‌كه‌ن.
سەڵاح حەسەن، یه‌كێك له‌ كارمه‌ندانى گرێبه‌ستى ته‌ندروستیى گه‌رمیان بۆ مه‌ودا میدیا رایگه‌یاند "ئەوەی وەزارەتی دارایی فەرمانی بە هەمیشەییکردنی فەرمانبەرانی گرێبەستی دەرکرد، لە خاڵی شەشەمدا کردوویەتی بە مەرج بۆ دامه‌زراندنى فەرمانبەرە گرێبەستەکە، دەبێت فەرمانی گرێبەستکردنی لە لایەن بەڕێوبەرایەتیی گشتیی بودجە لە وەزارەتی دارایی بۆ دەرچووبێت".
وتیشی "بەوپێیە بێت ئەوان کە ژماره‌یان 127 فەرمانبەری گرێبەستی تەندروستی گەرمیانین، به‌هه‌میشه‌ییكردن نایانگرێته‌وه‌، چونکە لەسەر بودجەی پەرەپێدان بە گرێبەست دامەزراون نەک لەسەر بەڕێوبەرایەتیی گشتیی بودجە لە وەزارەتی دارایی".
روونیشیكرده‌وه‌ "ئەمه‌ غه‌درێكى گه‌وره‌یه‌ دەرهەق بە ئەوان کە تیایاندایە 13 ساڵ خزمەتی هەیە و لەکاتی شەڕی داعش و بڵاوبوونەوەی کۆرۆنادا بەردەوام بوون لە خزمەت و دانەبڕاون".
له‌ باره‌ى هه‌وڵه‌كانیشان بۆ به‌ ه‌مه‌وه‌ هاتنى داواكارییه‌كه‌یان، باسى له‌وه‌كرد "داواكارییه‌كانیان گه‌یاندووه‌ته‌ وه‌زاره‌تى ته‌ندروستی و به‌ڵێنیان پێدراوه‌ كه‌ پاڵپشتیان بن و داواكارییه‌كه‌یان به‌رز بكه‌نه‌وه‌ بۆ ئه‌نجومه‌نى وه‌زیران".
زیاتر وتى "جگە لە ئەوان، فەرمانبەری تری گرێبەست زۆرن کە ئەوانیش فەرمانی بەڕێوبەرایەتیی گشتیی بودجەیان نییە و لەسەر بودجەی پەرەپێدانن و هه‌وڵه‌كانیشان بۆ هه‌مووانه‌، ئه‌گه‌ریش به‌ ده‌م داواكارییه‌كانیانیشه‌وه‌ نه‌یه‌ن، هه‌ڵوێستى تریان ده‌بێت".
پ ح ع

بۆچى بودجه‌ په‌سه‌ند كرا و نرخى سووته‌مه‌نى دانه‌به‌زی؟ "هۆكاره‌كه‌ى بزانه‌".....مه‌ودا میدیا-
ئه‌گه‌رچى له‌ رابردوودا باس له‌وه‌ده‌كرا كه‌ بودجه‌ى عیراق په‌سه‌ند بكرێت نرخى سووته‌مه‌نى و به‌تایبه‌ت نرخى به‌نزین هه‌رزان ده‌بێت، به‌ڵام نه‌ك هه‌رزان نه‌بوو به‌ڵكو نرخه‌كه‌ى زیاتر به‌رزبووه‌وه‌.
د. غالب محه‌مه‌د، ئه‌ندامى پێشووى ئه‌نجومه‌نى نوێنه‌رانى عیراق بۆ مه‌ودا میدیا رایگه‌یاند "عیراق خۆى نه‌وتى خاو به‌رهه‌م ده‌هێنێت و به‌ سفر دۆلار ده‌یدات به‌ پاڵاوگه‌ى خۆى، كه‌ به‌ حوكمى ده‌یپاڵێوێت و به‌ حكومى ده‌یفرۆشێته‌وه‌ به‌ هاوڵاتییان".
وتیشى "به‌ڵام هه‌رێم نه‌وته‌ خاوه‌كه‌ ده‌دات به‌ پاڵاوگه‌ نایاساییه‌كانى خۆى به‌ نرخێكى هه‌رزان و به‌ نرخێكى گران ده‌یفرۆشنه‌وه‌ به‌ هاوڵاتییان له‌به‌ر ئه‌وه‌ى پاڵاوگه‌كان نزیكه‌ له‌ خۆیانه‌وه‌ و سووده‌كه‌ى بۆ خۆیانه‌".
روونیشیكرده‌وه‌ "له‌ یاسای بودجه‌ نرخى نه‌وت نه‌نووسراوه‌، به‌ڵام ئه‌گه‌ر حكومه‌تى هه‌رێم نه‌وت راده‌ست بكات، ئه‌وكاته‌ ده‌توانرێت داواى شایسته‌ى هه‌رێم بكرێت و له‌ سه‌ر بنه‌ماى نه‌وت له‌ عیراقه‌وه‌ بڕى هه‌رێمى كوردستان ده‌نێردرێت، به‌ڵام حكومه‌تى هه‌رێم پابه‌ند نابێت و نه‌وت راده‌ست ناكات".

عیراق رێگرى له‌ به‌ قاچاغ بردنى نه‌وت ده‌كات له‌ سنووره‌كانى ئێران و توركیاوه‌ .........مه‌ودا میدیا-

ئه‌ندامێكى پێشووى ئه‌نجومه‌نى نوێنه‌رانى عیراق رایده‌گه‌یه‌نێت "حكومه‌تى عیراق داواى له‌ ئێران و توركیا كردووه‌ كه‌ رێگرى بكات له‌ به‌قاچاغ بردنى نه‌وت و به‌رهه‌مه‌نه‌وتیه‌كانى تر له‌ سنووره‌كانیانه‌وه‌".

د. غالب محه‌مه‌د، ئه‌ندامى پێشووى ئه‌نجومه‌نى نوێنه‌رانى عیراق بۆ مه‌ودا میدیا رایگه‌یاند "رۆژانه‌ 320 هه‌زار به‌رمیل به‌ قاچاغ هه‌نارده‌ ده‌كرێت و زۆر ئیشیان له‌سه‌ر كردووه‌ و راگه‌یاندنه‌كانى عه‌ره‌بی و په‌رله‌مانتارانیان ئاگادار كردووه‌ته‌وه‌، تا گه‌شتنه‌ ئه‌وه‌ى حكومه‌تى عیراق به‌ڵینیدا رێگرى بكات".

وتیشى "دواى ئه‌وه‌ى حكومه‌تى عیراق رێكه‌وتنى ئه‌نجامدا له‌گه‌ڵ حكومه‌تى هه‌رێم، به‌ دۆزینه‌وه‌ى كۆمپانیایه‌كى بیانى بۆ رێكخستنه‌وه‌ى كه‌رتى نه‌وت، هه‌روه‌ها رێككه‌وتن له‌ سه‌ر ئه‌وه‌ى له‌ برى 36 دۆلار بڕى 16 دۆلار به‌ كۆمپانیاى به‌رهه‌مهێنه‌ر بدرێت".

ئاماژه‌ى به‌وه‌شكرد "دواى ئه‌وه‌ش بۆیان ده‌ركه‌وت به‌ قاچاغ بردنى نه‌وتى خاو و نه‌وتى ره‌ش و به‌رهه‌مه‌نه‌وتییه‌كان، وه‌ك به‌نزین و غاز و نه‌وتى سپى به‌رده‌وامه‌ و به‌ ترانزێتى ئێران و توركیا له‌و رێگه‌یه‌وه‌ به‌ قاچاغ هه‌نارده‌ ده‌كرێت".

د. غالب محه‌مه‌د، روونیشیكرده‌وه‌ "له‌به‌ر ئه‌وه‌ى ئه‌و مه‌رزانه‌ى ئه‌و سنوورانه‌ له‌ ژێر كۆنترۆڵى عیراقدا نییه‌، بۆیه‌ ناچار بووه‌ و ئێستا نووسراوى ئاراسته‌ى وه‌زاره‌تى ده‌ره‌وه‌ى كردووه‌ بۆ ئه‌وه‌ى ئه‌ویش وه‌زاره‌تى ده‌ره‌وه‌ى ئێران و توركیا ئاگادار بكاته‌وه‌ و رێگرى بكرێت، چونكه‌ ئه‌وه‌ نایاساییه‌ و ده‌بێت له‌ لایه‌ن كۆمپانیای سۆمۆوه‌ بفرۆشرێت، به‌ڵام ئه‌م جۆره‌ فرۆشتنه‌ له‌ لایه‌ن ده‌سه‌ڵاتدارانى هه‌رێمه‌وه‌ له‌ ده‌ره‌وه‌ى كۆمپانیای سۆمۆ، كه‌س نازانێت داهاته‌كه‌ى بۆ كوێ ده‌ڕوات".

سه‌باره‌ت به‌وه‌ى حكومه‌تى عیراق بۆچى ناتوانێت رێگرى له‌ به‌قاچاغ بردنى نه‌وت بكات، ئه‌وه‌ى خسته‌ڕوو "له‌به‌ر ئه‌وه‌ى مه‌رزه‌كان له‌ ژێر ده‌سه‌ڵاتى ئه‌واندا نییه‌، ناتوانن مه‌گه‌ر به‌و رێگه‌یه‌ى هێز بهێنن كه‌ ئه‌وه‌ش پێویستى به‌ ره‌زامه‌ندى دوو له‌سه‌ر سێى ئه‌ندامانى په‌رله‌مانه‌".

هۆكارى زیاتر گرانبوونى نرخى به‌نزین ئاشكرا ده‌كرێت..... مه‌ودا میدیا-

له‌ئێستا باس له‌ گرانبوونى نرخى به‌نزین ده‌كرێت بۆ هه‌ر لیترێك 25 دینارى چووته‌ سه‌ر و وته‌بێژى بازاڕى سووته‌مه‌نى سلێمانىش رایده‌گه‌یه‌نێت "به‌شێك له‌ هۆكاره‌كه‌ى بۆ ئه‌وه‌ ده‌گه‌ڕێته‌وه‌ كه‌ حكومه‌تى هه‌رێم ئێستا بۆ هه‌ر تۆنێك 10 دۆلار گرانتر نه‌وتى خاو ده‌دات به‌ پاڵاوگه‌كان و بازرگانانیش ناچارن نرخه‌كه‌ى زیاد بكه‌ن".

سه‌ربارى ئه‌وه‌ى نرخى به‌نزین له‌ به‌رزیدایه‌، به‌ڵام له‌ ئێستادا نرخه‌كه‌ى زیاتر به‌رز ده‌بێته‌وه‌ و بۆ هه‌ر لیترێك 25 دینارى تر زیاتر بووه‌ و نرخى لیترێك به‌نزینى نۆرماڵ له‌ 925 دیناره‌وه‌ بووه‌ته‌ 950 دینار.

له‌و باره‌یه‌وه‌ رامیار رزگار، وته‌بێژى بازاڕى سووته‌مه‌نى سلێمانى بۆ مه‌ودا میدیا رایگه‌یاند "به‌شێكى هۆكاره‌كه‌ى بۆ نه‌بوونى مه‌نه‌فێس و بۆجه‌ر له‌ ناوه‌ڕاست و باشوورى عیراق بۆ هه‌رێمى كوردستان ده‌گه‌رێته‌وه‌ و به‌شێكى دیكه‌ى گرانى نرخى نه‌وتى خاوه‌ له‌ رێگه‌ى حكومه‌تى هه‌رێمه‌وه‌ كاتێك ده‌یدات به‌ پاڵاوگه‌كان".

وتیشى "ئێستا حكومه‌تى هه‌رێم بۆ هه‌ر تۆنێك له‌ نه‌وتى خاو 10 دۆلار گرانتر ده‌یدات به‌ پاڵاوگه‌كان و ئه‌وه‌ش كاریگه‌رى گه‌وره‌ ده‌خاته‌ سه‌ر نرخى به‌نزین و گرانبوونى".

عەلی باپیر: لە بڕیاری بایكۆتى په‌رله‌مان پەشیمان نابینەوە
عەلی باپیر، سەرۆكی كۆمەڵی دادگەریی كوردستان لە چوارچێوه‌ى كۆبوونەوەیەكدا كه‌ لەگەڵ کاندیده‌كانى حزبەكەی بۆ هەڵبژاردنی پەرلەمانی كوردستان ئه‌نجامیدا، ئاشكرایكرد "لە بڕیاری بایكۆتی پەرلەمانی دیزاینكراو، هەرگیز پەشیمان نابنەوە".

بڕیارێكى تایبه‌ت بۆ گه‌شتیاران ده‌ركرا ... مه‌ودا میدیا-
وەزارەتی گواستنەوەی عیراق رایده‌گه‌یه‌نێت "لە رۆژانی سەرژمێریدا گەشتە ئاسمانییەکان بەردەوام دەبن و لە رێگەی تکتی فڕۆکەکانیانەوە رێگە بە گەشتیاران دەدرێت لەکاتی قەدەغەی هاتوچۆ لە ناوشاردا هاتوچۆ بکەن".
مەیسەم سافی، وتەبێژی وەزارەتی گواستنەوەی عیراق ئاماژه‌ى به‌وه‌كردووه‌ "لە رۆژانی قەدەغەی هاتوچۆی تایبەت بە سەرژمێریی گشتی، گەشتە ئاسمانییەکان لە فڕۆکەخانەکانەوە بەپێی خشتەی گەشتە ئاسمانییەکان بەردەوام دەبن".
راشیگه‌یاندووه‌ "گەشتیاران دەتوانن تکتی فڕۆکە و پاسپۆڕت بەکاربهێنن بۆ تێپەڕبوون لە خاڵەکانی پشکنین".
روونیشیكردووه‌ته‌وه‌ "بۆ ئه‌و مه‌به‌سته‌ش لەگەڵ دەزگا ئەمنییەکان هەماهەنگن بۆ ئاسانکاری لە جووڵە و هاتوچۆكردن".

ئەحمەد حاجی رەشید، ئه‌ندامى سه‌ركردایه‌تى كۆمه‌ڵى دادگه‌رى كوردستان ده‌ڵێت "پێیان وتین، کورسیتان بۆ زیاد دەکەین، وتمان، کورسی خۆتان بۆ خۆتان".
ده‌شڵێت "به‌ڵگه‌ى ته‌واوه‌تیمان هه‌یه‌ كه‌ ئه‌و په‌رله‌مانى كوردستان دیزاین كراوه‌".
ئه‌مه‌ له‌ كاتێكدایه‌، كۆمه‌ڵى دادگه‌رى كوردستان بڕیاریداوه‌ به‌شدارى ئه‌م خوله‌ى په‌رله‌مانى كوردستان نه‌كات و سووریشن له‌ سه‌ر بڕیاره‌كه‌یان.

ده‌سته‌یی دادوه‌ریی له‌ باره‌ى كۆى تانه‌كان له‌سه‌ر هه‌ڵبژاردن بڕیاریدا....مه‌ودا میدیا-

وتەبێژی کۆمیسیۆن رایده‌گه‌یه‌نێت "لە کۆی 41 تانە كه‌ لە سەر هەڵبژاردنی پەرلەمانی کوردستان پێشكه‌شكرابوون، ئەمڕۆ شه‌ممه‌، دەستەی دادوەریی 38 تانەی یەکلایی کردەوە و هه‌موویانى رەتکردەوە".

جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عیراق ئاشكراشیكرد "لە ماوەی 7 رۆژدا له‌ لایه‌ن ئەنجومەنی کۆمیسیارانه‌وه‌ وەڵامی هه‌موو تانەکانی درایه‌وه‌ و پاشان بۆ دەستەی دادوەریی نێردران".

وتیشى "دەستەى دادوه‌ریی کاری ئەنجومەنی کۆمیسیارانی بە پەسند دانا و هه‌موو ئەو تانانەی رەتکردەوه‌".

وته‌بێژه‌كه‌ى كۆمیسیۆن روونیشیكرده‌وه‌ "سێ تانه‌ ماوه‌ ئه‌وانیش لەم هەفتەیەدا دەستەی دادوەریی یەکلاییان دەکاته‌وه‌".

له‌ 41 تانه‌ كه‌ له‌ هه‌ڵبژاردن دراوه‌، 28 تانه‌یان نێردراون بۆ دەستەی دادوەریی
جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عیراق ئاشكرای كرد "كۆى گشتى ئه‌و تانانه‌ى لە هەڵبژاردنی پەرلەمانی کوردستان دراون 41 تانه‌یه‌ و 28 تانه‌یان بۆ دەستەی دادوەریی نێردراون و لە 10 رۆژدا یەکلایی دەکرێنەوە".
وتیشى "پاش ئه‌وه‌ى هه‌موو تانەکان یەکلایی كرانه‌وه‌، ئەنجومەنی کۆمیسیاران ئەنجامی هەڵبژاردن پەسند دەکات".
ئەمڕۆ هەینی بە رووداوی راگەیاند، "لە کۆی 41 تانە کە لە هەڵبژاردنی پەرلەمانی کوردستان دراون، 28یان رەوانەی دەستەی دادوەری کراون. ئەو 13 تانەیەش کە ماون بەرایین و وەڵامەکانیان ئامادە دەکرێت، لە رۆژانی داهاتوودا رەوانەی دەستەی دادوەرییان دەکەین."

عیراق له‌ باره‌ى مووچه‌ و داهاته‌وه‌ هۆشدارى ده‌داته‌ هه‌رێم .... مه‌ودا میدیا-
عیراق له‌ باره‌ى پابه‌ند نه‌بوونى حكومه‌تى هه‌رێم به‌ رێنماییه‌كان له‌ چوارچێوه‌ى مووچه‌ و داهاتى نانه‌وتییه‌وه‌ هۆشداری ده‌داته‌ هه‌رێم.
به‌پێى ئه‌و زانیارییانه‌ى ده‌ست مه‌ودا میدیا كه‌وتووه‌، وردبینى له‌ لیستى مووچه‌ بۆ مانگى 10ى مووچه‌خۆرانى هه‌رێم، له‌ لایه‌ن وه‌زاره‌تى دارایی عیراق ته‌واوبووه‌ و وه‌زاره‌ته‌ داوای داهاتی نانەوتی ئەمساڵ و ئەو قەرزانەى كردووه‌ كه‌ ساڵی رابردوو بە حكومەتی هەرێمی داوە، هاوكات وه‌زیرى داراییش به‌ نووسراوێك ئاگادار كراوه‌ته‌وه‌ كه‌ حكومه‌تى هه‌رێم پابه‌ندى به‌شێك له‌ رێنماییەکانى بەغدا نەبووە.
هه‌ر به‌پێى زانیارییه‌كان، داواكارییه‌كه‌ى عیراق له‌ نووسراوێكدایه‌ بۆ رەوانەكردنی داهاتی نانەوتی چوار مانگی رابردووی ئەمساڵ و سه‌رجه‌م ئەو قەرز و پێشینانەی كە ساڵی رابردوو بە هەرێمی كوردستان دراوە بۆ مووچە كە زیاتر لە چوار ترلیۆن دینارە، له‌ ئێستاشدا به‌غدا چاوەڕێی هەرێمه‌ تاوه‌كو وەڵامی نووسراوەكە بداتەوە.
هه‌روه‌ها بە راپۆرتێکیش تەیف سامى، وه‌زیرى دارایی عیراق ئاگادار کراوەتەوە، کە هەرێم پابەندى بەشێکى رێنماییەکانى بەغدا نەبووە.

كه‌ى كابینه‌ى نوێى حكومه‌ت پێكده‌هێندرێت؟ ....مه‌ودا میدیا-

پرۆسەی ھەڵبژاردن بۆ خولی شەشەمی پەرلەمانی کوردستان کۆتایی ھاتووە و دەرگای تانەدانیش بە رووی پرۆسەکە داخراوە و ئێستا کاتی پێکھێنانی کابینەی نوێى حکومەتی ھەرێمی کوردستانە.

لە رۆژی 20ی 10ی 2024، پرۆسەی دەنگدانی گشتی بۆ خولی شەشەمی پەرلەمانی کوردستان بەڕێوەچوو، و دوای 10 رۆژیش، لە30ی ھەمان مانگ، کۆمیسیۆنی باڵای سەربەخۆی ھەڵبژاردنەکانی عیراق ئه‌نجامی کۆتایی ھەڵبژاردنی راگەیاند و رۆژی دواتریش دەرگای بە رووی تانەدان لە پرۆسەکە لەلایەن لایەنەسیاسییەکان و کاندیدەکانەوە کردەوە، کە بە وتەی وتەبێژی کۆمیسیۆن، سێ تانە لەسەر ئەنجامەکان تۆمارکراون، بەجۆرێک دوو لە تانەکان لە نووسینگەی دهۆک و دانەکەی تریان لە نووسینگەی سلێمانی تۆمارکراوە، لە هەولێریش هیچ تانەیەک تۆمار نەکراوە.

بەپێی ئەنجامی کۆتایی کۆمیسیۆن باڵای سەربەخۆی ھەڵبژاردنەکانی عیراقیش، پارتی دیموکراتی کوردستان بە 39 کورسی یەکەمی هەڵبژاردنەکەیە و یەکێتیی نیشتمانیی کوردستان بە 23 کورسی دووەمە و بە 15 کورسیش جووڵانەوەی نەوەی نوێ سێیەمە، بەدوای ئەوانیشدا یەکگرتووی ئیسلامیی کوردستان 7 کورسی، رەوتی هەڵوێست چوار کورسی، کۆمەڵی دادگەریی کوردستان سێ کورسی، بەرەی گەل دوو کورسی و گۆڕان و هاوپەیمانیی هەرێمی کوردستانیش هه‌ریه‌كه‌یان، یەک کورسییان بەدەستهێناوە.

ئێستا كاتی پێکھێنانی حکومەتی نوێیە و ھاوڵاتییان لە چاوەڕوانی ئەوەدان بە زووترین کات ئەم کابینە نوێیەی حکومەت پێکبھێندرێت و لایەنەسیاسییەکان بێ گوێدانە بەرژەوەندییە حزبییەکانیان و لە سەربنەمای بەرژەوەندیی نەتەوەیی رێکبکەون.
لەوچوارچێوەیەشدا، بەپێی ئەو زانیارییانەی دەست مەودا میدیا کەوتووە، مەکتەبی سیاسیی پارتی دیموکراتی کوردستان، به‌ مه‌به‌ستى پێکهێنانی کابینەی دەیەم، لیژنەیەکی دانوستاندن لەگەڵ لایەنەسیاسییەکان پێکده‌هێنێت.

هه‌ربه‌پێى زانیارییه‌كان، لەم رۆژانەدا مەکتەبی سیاسیی یه‌كێتى کۆدەبێتەوە و بڕیاری یەکلاکەرەوە دەدات، كه‌ لە پێكهێنانى کابینەی نوێى حكومه‌تدا یه‌كێتى مەرجەكانى چی دەبن؟.

ئه‌مه‌ له‌ كاتێكدایه‌، تاوه‌كو ئێستا كه‌ زیاتر له‌ 15 رۆژ به‌ سه‌ر هه‌ڵبژاردنى په‌رله‌مانى كوردستاندا تێپه‌ڕیوه‌ و هیچ كۆبوونه‌وه‌ و دانوستاندنێك له‌ نێوان لایه‌نه‌سیاسییه‌كان ئه‌نجام نه‌دراوه‌ و دیاریش نییه‌ كه‌ى كابینه‌ى ده‌یه‌مى حكومه‌تى هه‌رێمى كوردستان پێكده‌هێندرێت؟، به‌پێى چاوه‌ڕوانكراوییه‌كانیش پێ ناچێت به‌ ئاسانى و به‌م نزیكانه‌ حكومه‌ت پێكبهێدرێت.

پاڵاوگه‌یه‌كى ئاو له‌ سه‌ر رووبارى سیروان دروستده‌كرێت ... مه‌ودا میدیا-

له‌ كاتێكدا ئێستا پرۆژه‌ى پاڵاوگه‌یه‌كى ئاو له‌ ناحیه‌ى باوه‌نوورى سه‌ر به‌ قه‌زاى كه‌لار له‌ بوارى جێبه‌جێكردندایه‌، وه‌ك قۆناغى دووه‌م له‌ ناو قه‌زاى كه‌لاریش، له‌ سه‌ر رووبارى سیروان یه‌كه‌یه‌كى پاڵاوگه‌ی ئاو دروستده‌كرێت.

سالار عه‌زیز، وته‌بێژى به‌ڕێوه‌به‌رایه‌تیی ئاوى ده‌وروبه‌رى گه‌رمیان بۆ مه‌ودا میدیا رایگه‌یاند "دواى ئه‌وه‌ى له‌ قۆناغى یه‌كه‌مدا توانرا یه‌كه‌یه‌كى پاڵاوگه‌ى ئاو له‌ ناحیه‌ى باوه‌نوور كه‌ له‌ ماوه‌ى رابردوودا به‌هۆى قه‌یرانى داراییه‌وه‌ وه‌ستابوو، بخرێته‌وه‌ كار، هه‌نگاو بۆ جێبه‌جێكردنى قۆناغى دووه‌م ده‌نێن".

وتیشى "قۆناغى دووه‌م دروستكردنى یه‌كه‌یه‌كى پاڵاوگه‌ی ئاوه‌ له‌ سه‌ر رووبارى سیروان له‌ ناو قه‌زاى كه‌لار".

ئاماژه‌ى به‌وه‌شكرد "ئامانج له‌ دروستكردنى ئه‌و یه‌كه‌ پاڵاوگانه‌، ئه‌وه‌یه‌ له‌و رێگه‌یه‌وه‌ ئاوێكى خاوێن و ته‌ندروست بدرێته‌ هاوڵاتییان".

له‌ كاره‌باى 24 كاتژمێریی نزیك ده‌بینه‌وه‌ .... مه‌ودا میدیا-
وته‌بێژى وه‌زاره‌تى كاره‌باى هه‌رێم رایده‌گه‌یه‌نێت "له‌ ئێستادا سه‌رقاڵى جێبه‌جێكردنى قۆناغى دووه‌مى دانانى پێوه‌رى زیره‌كن و له‌م قۆناغه‌دا زیاتر له‌ 400 هه‌زار هاوبه‌ش له‌خۆ ده‌گرێت". وتیشى "به‌ ته‌واوبوونى ئه‌و قۆناغه‌ش هه‌نگاوێكى زیاتر له‌ كاره‌باى 24 كاتژمێریی نزیك ده‌بینه‌وه‌".
له‌ ماوه‌ى رابردوودا له‌ پرۆژه‌یه‌كدا حكومه‌تى هه‌رێمى كوردستان بڕیاریدا به‌ دانانى پێوه‌رى زیره‌ك بۆ ماڵان و باسله‌وه‌ كرا، له‌و رێگه‌یه‌وه‌ رێژه‌ى پێدانى كاره‌با به‌ هاوڵاتییان زیاتر ده‌بێت.
ئومێد ئه‌حمه‌د، وته‌بێژى وه‌زاره‌تى كاره‌باى حكومه‌تى هه‌رێمى كوردستان بۆ مه‌ودا میدیا رایگه‌یاند "دانانى پێوه‌رى زیره‌ك به‌ دوو قۆناغ ده‌ستیانپێكرد كه‌ له‌ قۆناغى یه‌كه‌مدا له‌ ساڵى 2019، یه‌ك ملیۆن و 400 هه‌زار هاوبه‌ش به‌شدارییان پێكرا و له‌ ئێستادا سه‌رقاڵى جێبه‌جێكردنى قۆناغى دووه‌من كه‌ زیاتر له‌ 400 هه‌زار هاوبه‌ش له‌خۆ ده‌گرێت و چاوه‌ڕێن ره‌زامه‌ندى له‌ ئه‌نجومه‌نى وه‌زیران بگه‌ڕێته‌وه‌".
وتیشى "ئامانج له‌ دانانى پێوه‌رى زیره‌ك زیاتر كردنى كاتژمێره‌كانى كاره‌بایه‌ به‌ هاوڵاتییان و له‌ نێویدا كردنى كاره‌با به‌ 24 كاتژمێریی كه‌ پێوه‌رى زیره‌ك به‌شێكه‌ له‌و سیستمه‌ كه‌ پریپه‌یده‌".
ئاماژه‌ى به‌وه‌شكرد "له‌ رێگه‌ى پێوه‌ره‌كه‌وه‌ ده‌توانن ته‌واوى داتا و زانیارییه‌كانیان ده‌ستبكه‌وێت و بگه‌نه‌ ئه‌و ئه‌نجامه‌ى كه‌ به‌ ئاسانترین شێوه‌ پرۆژه‌ى سیستمى پریپه‌ید جێبه‌جێبكه‌ن".

ئاگاداری
دوای گفتوگۆ لەگەڵ بەڕێز قائیمقامی قەزای پێنجوێن لەپێناو سەلامەتی قوتابیان و خوێندکاران بڕیارماندا بەهۆی ئەو شەپۆلە باران بارینەی ناوچەکەی گرتووەتەوە، سبەی یەک شەممە (٢٠٢٤/١١/٣) پشوو ئەبێت لەسەرجەم ناوەندەکانی خوێندن لە سنوری بەڕێوەبەرێتیمان .
‌ بەڕێوەبەرێتی پەروەردەی پێنجوێن

ئاگاداری....
لەبەر نەگونجانی کەش و هەواو سەلامەتی گیانی مامۆستایان و خۆێندکاران و منداڵان و پشت بەستن بە پێشبینی کەشناسی و پاش وەرگرتنی رای بەڕێز قائیمقامی قەزای شارەزوور و بەپێ ی ئەو دەسەڵاتەی پێماندراوە بڕیارماندا سبەی (٣-١١-٢٠٢٤) لەسەرجەم ناوەندەکانی خۆێندن بکرێتە پشوو ،
دوو سبەی (٤-١١-٢٠٢٤) دەوام ئاسایی دەبێتەوە .
بەهیوای سەلامەتی بۆ هەموو لایەک ...

نەبیل حمەصاڵح عزیز
بەڕێوەبەری پەروەردەی شارەزوور

سبه‌ی له‌سه‌رجه‌م ناوه‌نده‌کانی خوێندنی سنووری په‌روه‌رده‌ی شارباژێڕ پشووه‌..

به‌ ڕاوێژ له‌گه‌ڵ به‌ڕێز قائیمقامی قه‌زای شارباژێڕو ره‌چاوکردنی سروشتی شارباژێڕو له‌ پێناو پاراستنی گیانی مامۆستایان و قوتابیان و خوێندکاراندا، سبه‌ی له‌ سه‌رجه‌م ناوه‌نده‌کانی خوێندن پشوو ده‌بێت...

خوای گه‌وره‌ هه‌موو لایه‌ک پارێزراو بکات..

ئاگاداری
دوای گفتوگۆ لەگەڵ بەڕێز قائیمقامی قەزای سیدصادق لەپێناو سەلامەتی قوتابیان و خوێندکاران بڕیارماندا بەهۆی ئەو شەپۆلە باران بارینەی ناوچەکەی گرتووەتەوە، سبەی یەک شەممە (٢٠٢٤/١١/٣) پشوو ئەبێت لەسەرجەم ناوەندەکانی خوێندن .
‌ بەڕێوەبەرێتی پەروەردەی سیدصادق

یه‌كه‌م پارێزگا سبه‌ینێى كرده‌ پشوو ...... مه‌ودا میدیا-
پارێزگاری کەرکوک فه‌رمانى كرد كه‌ سبه‌ینێ له‌ پارێزگاكه‌یدا بكرێته‌ پشوو و ئه‌وه‌ش بە پشتبەستن بە راپۆرتی کەشوهەوا و بارینی بارانی بەخوڕ دێت لە سەرتاسەری پارێزگای کەرکوک.
لە راگەیه‌ندراوێکى پارێزگاى كه‌ركوكدا كه‌ ئەمشەو 2ى تشرینى دووه‌مى 2024، بڵاوكراوه‌ته‌وه‌، هاتووه‌ "رێبوار تەها مستەفا، پارێزگاری کەرکوک فەرمانی به بەڕێوەبەرایەتیی گشتیی پەروەردەی کەرکوک کرد سبەی یەکشەممە، دەوامی فەڕمیی لە سەرجەم قوتابخانە بنەڕەتی، ناوەندی و دواناوەندییەکانی کەرکوک لە سەرتاسەری کەرکوک رابگرێت، جگە لە خوێندکارانی تاقیکردنەوەکانی خولی سێیەم".
ئه‌وه‌ش هاتووه‌ "پارێزگار فەرمانیشی كرد بە راگرتنی دەوامی فەڕمیی لە زانکۆ و پەیمانگە حکومیی و ئەهلییەکان، لەپێناو سەلامەتی قوتابیان و خوێندکارانی خۆشەویستمان".
پ ح ع

نوێترین زانیاریی له‌ سه‌ر لیستى مووچه‌ى مانگى 10 ......... مه‌ودا میدیا-
ئه‌و تێبینیانه‌ى وەزارەتی دارایی عیراق هه‌یبوو لە سەر لیستی مووچە بۆ مانگی 10، له‌ چارەسەر كردندان و بڕیارە لە دوو رۆژى داهاتوودا لیسته‌كه‌ بەشێوه‌ى ئەلیکترۆنی و کاغەز رەوانەی بەغدا بکرێتەوە.
به‌پێى ئه‌و زانیارییانه‌ى ده‌ست مه‌ودا میدیا كه‌وتووه‌، كه‌ لە وەزارەتى دارایى هەرێمه‌وه‌ هاتووه‌، ماوه‌ى یه‌ك هەفتەیە ئه‌و تێبینیانه‌ چارەسەر ده‌کرێت كه‌ به‌غدا هه‌یبوو له‌ سه‌ر لیستى مانگى 10 و به‌و هۆیه‌شه‌وه‌ گه‌ڕاندبوویه‌وه‌ بۆ حكومه‌تى هه‌رێم.
هه‌ر به‌پێى زانیارییه‌كان، بڕیارە لە ماوەی دوو رۆژى داهاتوودا لیسته‌كه‌ بەشێوه‌ى ئەلیکترۆنى و کاغەز جارێکی تر ره‌وانه‌ى بەغدا بكرێته‌وه‌.
ئه‌مه‌ له‌ كاتێكدایه‌، دواى ئه‌وه‌ى حكومه‌تى هه‌رێم لیستى مووچه‌ى بۆ مانگى 10 له‌ ماوه‌ى رابردووه‌ ره‌وانه‌ى به‌غدا كرد، بەڵام بەهۆى ئه‌وه‌ى به‌غدا تێبینى لەسەر لیستەکە هه‌بوو گه‌ڕێندرایه‌وه‌ هەرێمى کوردستان.

وه‌زیرى په‌روه‌رده‌ سبه‌ینێ ده‌كاته‌ پشوو؟ .........مه‌ودا میدیا-

سه‌باره‌ت به‌وه‌ى سبه‌ینێ بكرێته‌ پشوو یاخود نا، وەزیری پەروەردەی هەرێم پارێزگار و سەرپەرشتیاری ئیدارەسەربەخۆکانى سەرپشک کرد.

ئاڵان حەمە سەعید، وەزیری پەروەردەی حكومه‌تى هەرێمى كوردستان ئاماژه‌ى به‌وه‌كردووه‌ "‏له‌به‌ر ئه‌وه‌ى پێشبینی ده‌کرێت باران بارین له‌ سەرجەم پارێزگاکانی هەرێمی کوردستان به‌لارێژەیه‌كى بەرز بێت، بۆیه‌ پارێزگار و سەرپەرشتیاری ئیدارەسەربەخۆکان سەرپشک کران، له‌وه‌ سبه‌ینێ پشوو بێت یاخود ده‌وامى فه‌ڕه‌میی لە ناوەندەکانی خوێندن".

ئەمەش دواى ئه‌وه‌ دێت، كە بەپێی پێشبینییەكانی كەشناسی لە ئەمشەوەوە تاوەكو ئێواره‌ى سبه‌ینێ رۆژی یه‌كشەممە شەپۆلێكی بەهێزی بارانبارین ناوچەكانی هەرێم دەگرێتەوە و شاره‌زایه‌كى بوارى كه‌شناسیش پێشنیارى ئه‌وه‌ى كردبوو كه‌ سبه‌ینێ بكرێته‌ پشوو.

فەرمانگە پەیوەندیدارەکانی ئه‌م شاره‌ دەخرێنه‌ حاڵەتی ئامادە باشییەوە ... مه‌ودا میدیا-
به‌هۆى ده‌ستپێكردنى فێستیڤاڵی هه‌نار، هاتوچۆی هەڵەبجە فەرمانگە پەیوەندیدارەکانی شاره‌كه‌ دەخاتە حاڵەتی ئامادە باشییەوە و پەیامێکێش بۆ هاوڵاتییان بڵاو دەکاته‌وه‌.
بەڕێوەبەرایەتیی هاتوچۆی پارێزگای هەڵەبجە، لە بەیاننامەیەکدا داوا لە دانیشتووان و شۆفێرانی سنووری پارێزگاكه‌ دەکات، لەپێناو گەشەپێدانی ڤیستیڤاڵی هەنار، کار ئاسانی زیاتر بۆ هاتوچۆ و هاتنی میوانەکانی دەرەوەی پارێزگا بكرێت.
داواش ده‌كات، کەمترین ئامرازەکانی گواستنەوە بەکاربهێندرێت لە شەقامەکان، ئۆتۆمبێل و ماتۆرسکێل رانەگرن، تاسیمای جوانی و میواندۆستی هەڵەبجە و هەڵەبجەییەکان زیاتر بسەلمێنین، هەوڵبدەین هەموان رێنوێنی میوانەکان بین.
راشیگه‌یاندووه‌ "هاوکاریتان بۆ هێزەکانی پاراستنی ئاسایش و کارمەندانی هاتوچۆ ، جێگەی رێزە".
بڕیارە سبەینێ پێنجشه‌ممه‌، دەیەمین فێستیڤاڵی هەنار لە پارێزگای هەڵەبجە دەستپێبکات و ماوه‌ى سێ رۆژ بەردەوام دەبێت.

سه‌رۆكى په‌رله‌مان هه‌ڵده‌بژێردرێت....مه‌ودا میدیا-
ماوه‌ى نزیكه‌ى ساڵێكه‌ په‌رله‌مانى عیراق بێ سه‌رۆكه‌ و بڕیاره‌ رۆژى پێنجشه‌ممه‌ بۆ یه‌كلاییكردنه‌وه‌ى ئه‌و پرسه‌ دانیشتن ئه‌نجام بدرێت، ئه‌ندامێكى په‌رله‌مانیش ده‌ڵێت "ئه‌مجاره‌ش دڵنیایی نییه‌ كه‌ سه‌رۆك هه‌ڵده‌بژێردرێت و پرسه‌كه‌ كۆتایی دێت".
دارا سێكانیانی، ئه‌ندامى په‌رله‌مانى عیراق بۆ مه‌ودا میدیا رایگه‌یاند "باسله‌وه‌ ده‌كرێت‌ كه‌ رۆژى پێنجشه‌ممه‌، په‌رله‌مان دانیشتنى خۆى سه‌باره‌ت به‌ هەڵبژاردنی سەرۆكی په‌رله‌مان ئه‌نجام بدات و ئه‌و پرسه‌ یه‌كلایی بكرێته‌وه‌".
له‌ باره‌ى هه‌موارى په‌یڕه‌وى ناوخۆش، ئاماژه‌ى به‌وه‌كرد "له‌ رابردوودا نیاز هه‌بوو په‌یڕه‌وى ناخۆى په‌رله‌مان هه‌موار بكرێته‌وه‌ و كه‌سى نوێ بۆ وه‌رگرتنى پۆستى سه‌رۆكه‌كه‌ى كاندید ببێت".
وتیشی "له‌ئێستادا كه‌ بڕیار دراوه‌ هه‌موار نه‌كرێته‌وه‌، هه‌ر ئه‌و دوو كاندیده‌ى پێشووتره‌ و دیار نییه‌ كه‌ ئه‌مجاره‌ش ده‌توانن ده‌نگى پێویست به‌ده‌ستبهێنن و پۆسته‌كه‌ وه‌ربگرن یاخود نا، ئه‌وه‌ش رۆژى پێنج شه‌ممه‌ ده‌رده‌كه‌وێت".
روونیشیكرده‌وه‌ "چونكه‌ له‌ ماوه‌ى رابردوودا چه‌ندجارێك دانیشت له‌ باره‌ى هه‌ڵبژاردنى سه‌رۆكى په‌رله‌مان كراوه‌ و ده‌نگ دراوه‌، به‌ڵام هیچ یه‌كێك له‌و كاندیدانه‌ نه‌یانتوانیوه‌ ده‌نگى پێویست به‌ده‌ستبهێنن".
ئه‌مه‌ له‌ كاتێكدایه‌، له‌ 14ى تشرینى دووه‌مى ساڵى رابردووه‌وه‌ كه‌ محه‌مه‌د حه‌لبووسى، له‌ پۆستى سه‌رۆكى په‌رله‌مان دوورخرایه‌وه‌، به‌هۆى ناكۆكی نێوان سوننه‌كان نه‌توانراوه‌ پۆسته‌كه‌ پڕ بكرێته‌وه‌ و بۆ جێگره‌وه‌شى هه‌ر یه‌ك له‌ مه‌حمود مه‌شهه‌دانى و سالم عیساوى كاندیدن.

كه‌شوهه‌وا ده‌كه‌وێته‌ ژێر كاریگه‌رى گۆڕانكارییه‌كى گه‌وره‌وه‌ ....مه‌ودا میدیا-
شارەزایه‌كى بواری کەشناسی رایده‌گه‌یه‌نێت "عیراق و هەرێمی کوردستان، دەکەوێتە ژێر کاریگەری نزمەپاڵەپەستۆی دەریای سپی ناوەڕاست و نزمەپاڵەپەستۆی چڕی دەریای سوور، وه‌ هاتنی شێیه‌کی زۆر بۆ سەر ناوچە جیاجیاکان، ئه‌وه‌ش چڕبوونەوەی هەوری پڕ زیاتر دروستدەکات".
سالار حاجی عەلی، شارەزا لە بواری کەشناسی بۆ مه‌ودا میدیا راشیگەیاند "له‌ رۆژى 31ى ئه‌م مانگه‌، دەستپێکردنی هاتنی سەرەتای شەپۆلەکەیە زۆر بەلاوازی بە هەوری تەنک بۆ ئەگەری باران خۆی دەردەخات تاوه‌كو رۆژی 1ى مانگى داهاتوو، دواتر قووڵبوونەوەی بۆ رۆژانی تر و زیاتر چڕ ده‌بێته‌وه‌".
وتیشى "له‌ رۆژی 2ی11، شەپۆلەکە بەرەو چالاکبوون ده‌ڕوات و له‌ رۆژ 3ی مانگ، قووڵبوونەوەی شەپۆلەکەیە کەهاتنی نزمەپاڵەپەستۆی دەریای سوور و نزمە پاڵەپەستۆی دەریای سپی ناوەڕاست بەرەو یەک ئاڕاستە بۆ لوتکەی سێ گۆشە دەچن دواتر یەک دەگرن هەورە برووسکە و تەرزە و بارانی بەخور دەبارێت".
ئاماژه‌ى به‌وه‌شكرد "به‌ هاتنی ئەم شەپۆلە بە بڕی جیاواز باران دەبارێت لە ناوچە جیاجیاکان هەوری تەواو و هەورەبرووسکە و بارانی بەخوڕ لە ناوچە شاخاوییەکان رێژەکەى زۆر زیاتر دەبێت، لەگەڵ دابەزینی بارستەهەوای ساردی جەمسەری باکوور بەرەنگی سەوز و چینێکی زەرد وا دەکات دابەزینی پلەکانی گەرما و رێژەی دابارین جار جار زیاد بکات، لە ناوچە سنوورییەکانیش بەفر ببارێت، لە ناوچە شاخاوییەکان و لە نێو شارەکان باران دەبارێت، وه‌ خێرایی بای بارشت جار جار ئەگەری زیاد بوونی هەیە".
ئه‌و شاره‌زایه‌ى كه‌شناسى زیاتر وتى "له‌ رۆژی 4ى 11، کاریگەری شه‌پۆله‌كه‌ بەرەو لاوازی دەڕوات و له‌ رۆژی 5ی 11 کۆتاییپێدێت، وه‌ رێژەی ئەم بارانە لەبەر گۆڕانکاری خێرایی کەشوهەوا ناتوانرێت دیاریبکرێت".
"سەبارەت به‌ بارانی پەڵەش لە بەشێکی زۆری ناوچەکان ئەگەری بارانی پەڵە هەیە، بارانی پەڵە پێویستی بە بارانی لەسەرخۆیە، ئەم رێژەیه‌ى كه‌ دەبارێت، رێژەکە زۆرى ناچێتە ژێر خاکی زەوی لەبەر ئەوەی بارانی بەخوڕە، دەبێت بە لافاو و بە چەمەکان یان رووبارکان دەڕژێتە خوارێ بۆ بەنداوه‌کان" سالار حاجى عه‌لى واى وت.
پ ح ع

یه‌كه‌م زانكۆ فه‌رمانى ده‌ستبه‌كاربوونى بۆ مامۆستاكانى ده‌ركرد ......... مه‌ودا میدیا-

ئه‌مڕۆ 28ى تشرینى یه‌كه‌مى 2024، زانکۆی پۆلیتەکنیکی دهۆک، فەرمانی دەستبەکاربوونی بۆ مامۆستا وانەبێژه‌كانى ده‌ركرد، له‌ ئه‌مڕۆوه‌ وه‌ك مامۆستاى گرێبه‌ست حساب ده‌كرێن".

سەرکەوت رەشید، لێپرسراوى راگەیاندنی زانکۆی پۆلیتەکنیکی دهۆک ئاشكرایكرد "زانكۆكه‌یان فەرمانی دەستبەکاربوونى بۆ ئه‌و مامۆستا وانه‌بێژانه‌ى كه‌ کراون بە گرێبەست ده‌ركردووه‌".

وتیشی "ژماره‌یان 567 مامۆستایه‌ و لە 43 بەشی زانکۆ و پەیمانگەکانی پۆلیتەکنیکی دهۆک لە هه‌ر یه‌ك له‌ بەشەکانی تەندروستی، پزیشکی، کشتوکاڵ، کارگێڕی و تەکنەلۆژیای زانستی، وانە دەڵێنەوە".

ئاماژه‌ى به‌وه‌شكرد "دواى ته‌واوكردنى كارى بایۆمەترى، كه‌ ئێستا مامۆستایان سه‌رقاڵى ئه‌وه‌ن، راستەوخۆ دەتوانن دەست بە دەوام بکەن و لە رۆژەی دەرچوونى ئه‌م بڕیارەوه‌ كه‌ ئه‌مڕۆیه‌ بۆیان حساب دەکرێت".

نوێترین زانیاريی له‌ باره‌ى راگەیاندنى ئەنجامى کۆتایى هەڵبژاردن ئاشكر ده‌كرێت ...مەودا میدیا-

کۆمیسیۆن، رایده‌گه‌یه‌نێت "پێشبینی دەکرێت ئەنجامى بەرایى و کۆتایى خولی شەشەمی هەڵبژاردنى پەرلەمانى کوردستان هاوشێوەبن".

عیماد جەمیل، سەرۆکی تیمی راگەیاندنی کۆمیسیۆنی هەڵبژاردنەکانی عیراق وتیشی "هیچ وادەیەک بۆ راگەیاندنى ئەنجامى کۆتایى هەڵبژاردنەکە دیارینەکراوە، بەڵام ئامادەکاریی دەکەن بۆ راگەیاندنى ئەنجامى کۆتایى".

ئاماژەی بەوەشکرد "کە ئەنجامى کۆتایی هاوشێوەى ئەنجامە بەراییەکانە و گۆڕانکارییەکى ئەوتۆ لە ژمارەى کورسییەکان روو نادات".

نرخی کارەبای موه‌لیدە بۆ ئه‌م شوێنانه‌ دیاریكرا..... مه‌ودا میدیا-

کارەبای سلێمانی، نرخی کارەبای موه‌لیدەی ستییەکانی بۆ مانگی 10 راگه‌یاند و ئاشكرایكردووه‌ "بۆ هەر کیلۆوات ئاوەرێک کارەبای موه‌لیده‌ بە 260 دینار دەبێت".

له‌ راگه‌یه‌ندراوێكدا بەڕێوەبەرایەتیی گشتیی کارەبای سلێمانی رایگه‌یاندووه‌ "لیژنەی باڵای دیاریکردنی نرخی کارەباى کۆمەڵگاکانى نیشتەجێبوون (ستییەکان)، ئەمڕۆ یەكشەممە کۆبوونەوەیەکی سازکرد و تیایدا نرخی کیلۆواتی کارەبای موه‌لیدەی بۆ مانگی تشرینی یەكەم (10) دیاریکرد، کە بریتییە لە (260) دینار بۆ هەر کیلۆواتێک".

ئه‌وه‌ش هاتووه‌ "لە مانگی رابردوودا نرخی هەر کیلۆوات ئاوەرێک 253 دینار بووە بە گوێرەی نرخی گازوایل".

روونیشیكردووه‌ته‌وه‌ "پێویستە سەرجەم ستییەکانی سنووری پارێزگای سلێمانی پابەندبن بەنرخەکەوە، بە پێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە".

دابەشکردنی ئاو رادەگیرێت ........ مه‌ودا میدیا-

به‌هۆى گۆڕینی پەمپی ژمارەی دوو، پڕۆژەی ئاوی خاس لە قەڵادزێ دابەشکردنی ئاو رادەگرێت و بۆ ئه‌و مه‌به‌سته‌ش، پرۆژه‌كه‌ هاوڵاتییان ئاگادار دەکاتەوە.

لە ئاگادارییەکدا پڕۆژەی ئاوی خاس بڵاویكردووه‌ته‌وه‌ "هاوڵاتییانی قەڵادزێ ئاگادار ده‌كه‌ینه‌وه‌، سبەینێ دووشەممە 28ی تشرینی یەکەمى 2024، بەهۆی گۆڕینی چێک ڤاڵڤی پەمپی ژمارە (دوو) لە بەشی ئاوەرگری پڕۆژەی ئاوی خاس، دابەشکردنی ئاو دەوەستێت".

یەکێتی هەنگاوەکانی بۆ تەوتینی مووچە چڕ دەکاتەوە ...... مەودا میدیا-

پەرلەمانتارێکی عیراق لە فراکسیۆنی یەکێتی رایگەیاند "سبەینێ لەگەڵ وەزارەتى دارایى و بانکەکانى رەشید و رافیدەین بۆ کردنەوەى لقى بانکەکان و تەوتینى مووچە کۆدەبنەوە".

کاروان یاروەیس، ئەندامی پەرلەمانی عیراق وتیشی "وەک فراکسیۆنى یەکێتى گفتوگۆ لەگەڵ بانکەکانی رەشید و رافیدەین دەکەن، کە لقى بانکەکانیان لە سلێمانى و هەڵەبجە و ئیدارەکانى گەرمیان و راپەڕین بکەنەوە".

باسی لەوەشکرد "هەموو بانکە حکومییەکانى عیراق رێپێدراون، لقى بانکى لە پارێزگا و ناوچەکان بکەنەوە".

ئاماژەی بەوەشکرد "تەوتین لە رێگەى بەغداوە دەکرێت، قۆناغى یەکەم کردنەوەى لقى بانکە حکومییەکانە، دواتر تەوتینکردنى مووچەخۆران".

کاروان یاروەیس ئەوەشی خستەڕوو "لە ئێستادا لقى بانکى بازرگانی (تى بى ئاى) لە سلێمانى هەیە و داوایان لێدەکەن لە پارێزگاى هەڵەبجە و ئیدارەکانى گەرمیان و راپەرینیش لقی بانکەکەیان بکەنەوە".

هەرێم لیستی مووچە رەوانەی بەغدا دەکات ....... مەودا میدیا-

به‌پێى زانیارییه‌كان، ئەمڕۆ لیستى مووچەى مانگى 10ى فەرمانبەرانى هەرێم رەوانەی بەغدا دەکرێت.

به‌پێى زانیارییانه‌ى ده‌ست مه‌ودا میدیا كه‌وتووه‌، بڕیارە سبەینێ لیستی مووچەی فەرمانبەرانی هەرێم بدرێتە بەڕێوەبەرایەتیى ژمێرکارى عیراق، بۆ ئەوەى رەزامەندى لەسەر تەرخانکردنی پارەى مووچە بۆ مانگی 10 بدرێت.

هەر سەبارەت بە مووچە، ئێوارەی ئەمڕۆ وەفدێکی وەزارەتی دارایی هەرێمی کوردستان سەردانی بەغدا دەکات.

بەغدا بەردەوام دەبێت لە رەوانەکردنی مووچە ........ مەودا میدیا-

پەرلەمانتارێکی عیراق رایگەیاند "بەغدا بەردەوام دەبێت لە ناردنی مووچەی مووچەخۆرانی هەرێم".

نەرمین مەعروف، ئەندامى ليژنەی دارایی لە پەرلەمانی عیراق "مووچەی مانگەكانی 10 و 11 و 12ی ئەمساڵ بێ كێشە دەنێردرێت".

وتیشى "پەرلەمان بودجەی سێ ساڵی پەسند كردووە، حكومەت تەنها خشتەی بودجەی 2025، بۆ پەرلەمان دەنێرێت".

نەرمین مەعروف ئەوەشی خستەڕوو "لە بودجەی 2025دا مووچەی فەرمانبەرانی هەرێمی كوردستان جێگیر كراوە و كێشەی نابێت".

دابه‌شكردنى مووچه‌ى مامۆستایانى گرێبه‌ست دواخراوه‌؟ .... مه‌ودا میدیا-

ئه‌گه‌رچى نوێنه‌رێكى مامۆستایانى گرێبه‌ست رایگه‌یاندبوو "ئه‌مڕۆ یه‌كه‌م مووچه‌ به‌ شێوه‌ی گرێبه‌ست وه‌رده‌گرن"، به‌ڵام باس له‌وه‌ده‌كرێت ئه‌مڕۆش مووچه‌كه‌یان دابه‌شناكرێت و تا كاتێكى نادیار دوا خراوه‌".

له‌و باره‌یه‌وه‌، كارۆغ عه‌بدوڵڵا، نوێنه‌ری مامۆستایانى وانه‌بێژ بۆ مه‌ودا میدیا رایگه‌یاند "له‌ ماوه‌ى رابردوویشدا هیچ بڕیارێكى وانه‌بووه‌ كه‌ ئه‌مڕۆ مووچه‌كه‌یان دابه‌شده‌كرێت".

وتیشى "تاوه‌كو ئێستا دیار نییه‌ كه‌ كه‌ى مووچه‌ وه‌رده‌گرن".

ئه‌مه‌ له‌ كاتێكدایه‌، له‌ پێش هه‌ڵبژاردن حكومه‌تى هه‌رێمى كوردستان به‌ڵێنی به‌ مامۆستایان دابوو كه‌ له‌گه‌ڵ دابه‌شكردنى مووچه‌ى مانگى نۆى مووچه‌خۆران، مووچه‌ى ئه‌وانیش دابه‌شده‌كرێت، به‌ڵام تاوه‌كو ئێستا دابه‌شنه‌كراوه‌.

كاره‌با بكرێته‌ 24 كاتژمێریی، چى سوودێكى بۆ هاوڵاتییان ده‌بێت؟ ...مه‌ودا میدیا-

كاره‌باى نیشتمانى چۆن ده‌كرێته‌ 24 كاتژمێریی؟ وته‌بێژى وه‌زاره‌تى كاره‌باى هه‌رێم، هه‌موو ورده‌كارییه‌كان و سووده‌كانى بۆ هاوڵاتییان ده‌خاته‌ڕوو.

ئومێد ئه‌حمه‌د، وته‌بێژى وه‌زاره‌تى كاره‌باى هه‌رێمى كوردستان رایگه‌یاند "كاتێك كاره‌با ده‌كرێته‌ 24 كاتژمێریی پێویسته‌ سه‌ره‌تا تۆڕى كاره‌با پاك بێت و تواناى به‌رگه‌گرتنى هه‌بێت یان به‌هێز بكرێت، وه‌ گرفته‌كان لاببرێن و چاكبكرێن، پاشان بڕى به‌رهه‌م هه‌بێت، دواتر قۆناغ به‌ قۆناغ كارى له‌سه‌ر ده‌كرێت تاوه‌كو سه‌رجه‌م شاره‌كانى هه‌رێمى كوردستان ده‌گرێته‌وه‌".

وتیشى "له‌ ئێستادا سه‌نته‌رى شارى ئامێدی كراوه‌ته‌ 24 كاتژمێریی، له‌به‌ر ئه‌وه‌ش ئامێدى هه‌ڵبژێردراوه‌ چونكه‌ ناوچه‌كه‌ بچووكه‌ و تۆڕه‌كه‌شى خاوێنه‌ له‌ رووى دابه‌شكردنه‌وه‌ و هاوبه‌شانیشى سنوورداره‌".

ئاماژه‌ى به‌وه‌شكرد "سوودى كاره‌باى 24 كاتژمێریی ئه‌وه‌یه‌ كاتێك هاوڵاتیی به‌پێى بڕى به‌كارهێنانى كاره‌با پاره‌ بدات، كاره‌كانى رێكده‌خاته‌وه‌ و كه‌مترین كاره‌با به‌كارده‌هێنێت و به‌فیڕۆدانى كاره‌با نامێنێت، به‌ناراسته‌وخۆ هۆشیارى تاك له‌ به‌رانبه‌ر به‌كارهێنانى كاره‌با زیاتر ده‌بێت".

مەزڵوم کۆبانێ: پەیوەندیمان بە هێرشەکەی سەر ئەنکەرەوە نییە....مه‌ودا میدیا-

فەرماندەی گشتیی هێزەکانی سوریای دیموکرات رایگەیاند "ماوەی چوار رۆژە دەوڵەتی تورکیا بەشێوەیەکی دڕندانە خەڵک و دامەزراوە مەدەنییەکان لە باکوور و رژهەڵاتی سوریا بۆردومان دەکات".

مەزڵوم کۆبانێ، وتیشی "هێزەکانی سوریای دیموکرات هیچ چالاکییەک لە باکووری کوردستان و تورکیا ئەنجام نادەن، بەڵام ئەگەر هێرشەکانی تورکیا لەسەر رۆژئاوای کوردستان بەردەوام بێت بێ وەڵام نابێت".

مەزڵوم کۆبانێ، ئەوەشی خستەڕوو "کە هەڵوێستی ئەمه‌ریکا و روسیا لە بەرانبەر هێرشەکانی تورکیا لاوازن".

ماوەی چوار رۆژە تورکیا بە بیانووی پەیوەندی بە رووداوەکەی ئەنکەرە، هێرشێکی بەربڵاوی بۆ سەر رۆژئاوای کوردستان دەستپێکردوووە و بەوهۆیەوە دەیان کەس لە ژن و منداڵ و پیر و گەنج بوونەتە قوربانی و دەیان دامەزراوە و خانوو و شەقام، بۆردوومانکراون.

فڕۆکەخانەی نێودەوڵەتیی موسڵ دەکرێتەوە ... مەودا میدیا-

وەزیری گواستنەوە و گەیاندنی عیراق رایگەیاند "سەرەتای ساڵی 2025 فڕۆکەخانەی نێودەوڵەتیی موسڵ بە رووی گەشتیاراندا دەکرێتەوە".

رەزاق موحەیبەس سەعداوی، وەزیری گواستنەوە و گەیاندنی عیراق وتیشی "سەدا 86ی کارەکانی دروستکردنی فڕۆکەخانەکە تەواو بووە و کارکردن تێیدا بەردەوامە".

سەعداوی، ئەوەشی خستەڕوو "کە محەمەد شیاع سوودانی، سەرۆک وەزیرانی عیراق لە نزیکەوە چاودێری کارەکانی دروستکردنی فڕۆکەخانەی موسڵ دەکات".

وەزارەتی گواستنەوەی عیراق ده‌ستپێكردنه‌وه‌ى گه‌شته‌ئاسمانییه‌كانی راگه‌یاند
دوای ئه‌وه‌ى به‌هۆى هێرشه‌كانی ئی.سرائ.یل بۆ سه‌ر ئێران، عیراق سه‌رجه‌م گه‌شته‌ئاسمانییه‌كانی هه‌رێمی كوردستان و عیراقى راگرت، وەزارەتی گواستنەوەی عیراق رایگه‌یاند "گەشتەئاسمانییه‌کانی عیراق و هەرێمی کوردستان دەستیانپێکردەوە".

ده‌سه‌ڵاتی فڕۆكه‌وانیی ئێران، گه‌شته‌ ئاسمانییه‌كانی ده‌ستپێكرده‌وه‌
ئه‌مه‌ له‌ كاتێكدایه‌، پێشتر وتەبێژی دامەزراوەی فڕۆکەوانیی ئێران رایگه‌یاند "هه‌موو گه‌شته ئاسمانییه‌کانیان لەسەرجەم فرۆکەخانەکانی ئێران، تاوه‌كو کاتیکی نادیار هه‌ڵوه‌شاندووه‌ته‌وه.

كاتى دابه‌شكردنى مووچه‌كه‌یان ئاشكرا كرا ...مةودا میدیا-
نوێنه‌رێكى مامۆستایانى گرێبه‌ست كاتى وه‌رگرتنى یه‌كه‌م مووچه‌یان به‌ شێوه‌ى گرێبه‌ست ئاشكرا ده‌كات و هۆكارى دابه‌شنه‌كردنى مووچه‌كه‌شیان له‌گه‌ڵ وه‌زاره‌تى په‌روه‌رده‌دا ده‌خاته‌ڕوو.
عه‌لى ره‌ئوف، نوێنه‌رى مامۆستایانى گرێبه‌ست بۆ مه‌ودا میدیا رایگه‌یاند "مووچه‌ى مامۆستایانى گرێبه‌ست بۆ مانگى نۆ له‌ رۆژانى یه‌كشه‌ممه‌ و دووشه‌ممه‌ دابه‌شده‌كرێت".
وتیشى "ئه‌گه‌رچى بڕیار بوو مووچه‌كه‌یان له‌گه‌ڵ وه‌زاره‌تى په‌روه‌رده‌ دابه‌شبكرێت، به‌ڵام به‌هۆى نه‌بوونى نه‌ختینه‌ دابه‌شنه‌كرا".
ئاماژه‌ى به‌وه‌شكرد "به‌ڵێنیان پێدراوه‌ بۆ مانگه‌كانى داهاتوو له‌گه‌ڵ دابه‌شكردنى مووچه‌ى وه‌زاره‌ته‌كان به‌ تایبه‌ت وه‌زاره‌تى په‌روه‌رده‌ مووچه‌یان پێبدرێت".
ئه‌و نوێنه‌ره‌ى مامۆستایانى گرێبه‌ست، روونیشیكرده‌وه‌ "بۆ شایسته‌داراییه‌كانی هه‌ردوو مانگى حه‌وت و هه‌شت كه‌ه‌ پێش ئه‌وه‌ى ببنه‌ گرێبه‌ست و تاوه‌كو ئێستا پێیان نه‌دراوه‌، له‌ مانگى 11دا به‌شێوه‌ی مه‌قتوعه‌یه‌ واته‌ به‌ نیوه‌یی وه‌ریده‌گرن واته‌ ئه‌گه‌ر مامۆستایه‌ك شایسته‌داراییه‌كه‌ى 400 هه‌زار دینار بێت، ئه‌وا 200 هه‌زار دینار پێده‌درێت، به‌ڵام هه‌ردوو مانگه‌كه‌ به‌یه‌كه‌وه‌ وه‌رده‌گرن".

نوێترین زانیاریی له‌ باره‌ى ناردنى لیستى مووچه‌ى مانگى 10.... مودا میدیا-
وه‌زاره‌تى دارایی عیراق ده‌ڵێت "له‌ چاوه‌ڕوانى حكومه‌تى هه‌رێمن لیستى مووچه‌ى مانگى 10یان بۆ ره‌وانه‌ بكه‌ن"، وه‌زاره‌تى دارایى هه‌رێمیش رایده‌گه‌یه‌نێت "ناردنى لیست ده‌كه‌وێته‌ سه‌ره‌تاى هه‌فته‌ى داهاتووه‌وه‌".
به‌پێى ئه‌و زانیارییانه‌ى مه‌ودا میدیا ده‌ستى كه‌وتووه‌، تاوه‌كو ئێستا وه‌زاره‌تى دارایی عیراق لیستى مووچەى مانگی 10 له‌ لایه‌ن حكومه‌تى هەرێمى كوردستانه‌وه‌ بۆى نه‌نێردراوه‌ و له‌ چاوەڕوانى ئه‌وه‌دایه‌ لیسته‌كه‌ى به‌ده‌ست بگات و پاش كۆتاییهاتن به‌ دابەشکردنى مووچەی مووچەخۆرانی خۆی، راستەوخۆ پارەى مووچەى هەرێم ره‌وانه‌ بكات.
هاوكات، وەزارەتى دارایى حکومەتى هەرێمیش ئاشكرایكردووه‌ "بەهۆى ئەوەى لیستەکە بە تەواوى ئامادەنەکراوە، ره‌وانه‌كردنى لیستى مووچەى مووچه‌خۆرانى هه‌رێمى كوردستان دەکەوێتە سەرەتاى هەفتەى داهاتووه‌وه‌".

یەکێتی لەبارەی ته‌وتینى مووچە بڕیاریدا........مودا میدیا-

بافڵ جەلال تاڵەبانى، سەرۆکى یەکێتی رایده‌گه‌یه‌نێت "پێداگرى دەکەن لەسەر پەیامى راستکردنەوەى حکومڕانى و گێڕانەوەى هاوسەنگیى هێز و پابەندبوون بەو بەڵێنانەی بە خەڵکیان داوە، بە تایبەتی ئەوەی پەیوەندی بە ژیان و گوزەرانی هاوڵاتییانەوە هەیە، لەناویشیاندا پرسی (تەوتین)ی مووچە".

ئه‌مڕۆ پێنجشه‌ممه‌ 24ى تشرینى یه‌كه‌مى2024، ئەنجومەنى سه‌ركردایه‌تیی یەکێتیى نیشتمانیى کوردستان بە سەرۆکایەتیى بافڵ جەلال تاڵەبانى، سەرۆکى حزبەکە کۆبووه‌وه‌ و له‌ باره‌ى ناوه‌ڕۆكى كۆبوونه‌وه‌كه‌ش راگه‌یه‌ندراوێكیان بڵاوكرده‌وه‌.

دەقى راگەیەندراوەکە:

ئەمڕۆ ٢٤ی ١٠ی ٢٠٢٤ ئەنجوومەنی سەرکردایەتی یەکێتیی نیشتمانیی کوردستان بەسەرپەرشتی بافڵ جەلال تاڵەبانی، سەرۆکی یەکێتیی نیشتمانیی کوردستان کۆبووەوە.

کۆبوونەوەی سەرکردایەتی کە لە هۆڵی کۆبوونەوەکانی مەکتەبی سیاسی لە سلێمانی سازکرا، بە ساتێک وەستان بۆ گیانی پاکی شەهیدان دەستیپێکرد و تەرخانکرا بۆ هەڵسەنگاندنی ئاکامی هەڵبژاردنی پەرلەمانی کوردستان و سەرکەوتنی یەکێتی لەدووقاتکردنی دەنگەکانی و گەشانەوەی گیانی سەوزکردنی سیاسەت و دیموکراتی لە کوردستاندا.

سەرەتای کۆبوونەوەکە بافڵ جەلال تاڵەبانی وێڕای پیرۆزبایی لە گەلەکەمان و دەستخۆشی لە هەڤاڵان، هۆکاری سەرکەوتنی گەڕاندەوە بۆ یەکگوتاری و یەکڕیزیی سەرکردایەتی و هیمەتی هەڤاڵانە لە کەمپینە پڕ جۆش و خرۆشەکانیان کە رۆحی بەرزی یەکێتی بوونیان زیندووکردەوە، بە تایبەت لەناو کوڕان و کچانی لاودا، وتیشی: ئەم جۆش و خرۆشە هانمان دەدات پێداگری بکەین لەسەر پەیامی راستکردنەوەی رێڕەوی حکومڕانی و گێڕانەوەی هاوسەنگی هێز و پابەندبوون بەو بەڵێنانەی بە خەڵکە خۆشەویستەکەی خۆمانمان داوە، بە تایبەتی ئەوەی پەیوەندی بە ژیان و گوزەرانی هاووڵاتیانەوە هەیە، لەناویشیاندا پرسی (تەوتین)ی مووچە. ئاماژەی بەوەشدا سەرکەوتنمان هەر لەسەر ئاستی هەرێم و عیراق نییە، بەڵکو ئێستا یەکێتیمان گەڕاندۆتەوە بۆ قۆناغی سەرۆک مام جەلال لە قورسایی سیاسی و دیپلۆماسی لە دونیادا.

کۆبوونەوەی سەرکردایەتی وێڕای جەختکردنەوە لە هەڵسەنگاندنی بابەتیانەی کۆی پرۆسەی هەڵبژاردن دەستخۆشی لە کەمپینی نوێباو و داهێنەرانەی یەکێتی بە سەرۆکایەتی بافڵ جەلال تاڵەبانی کردەوە، کە نەک هەر گەرم و گوڕیدا بە هەڵمەتە سەوزەکەمان بەڵکو دیمەنێکی شارستانی و دیموکراتی جوانی بە هەڵبژاردنی خولی شەشەمی پەرلەمان کوردستانیش بەخشی.

سەرکردایەتی پێزانینی بێپایانی خۆی بۆ جەماوەری کوردستان دەربڕی سەبارەت بەو متمانەی بە یەکێتییەکەی خۆیانیان دایەوە و جەختی لەسەر ستراتیژی گەڕانەوە بۆ پرەنسیپەکانی سەرۆک مام جەلال کردەوە کە هەمیشە لە خزمەتی خەڵکی بەوەفای کوردستاندا درێغی نەکات، بۆ ئەو مەبەستەش ئۆرگانەکان و هەڤاڵان راسپێردران وزە و توانای خۆیان بخەنە خزمەت ئەو دیدگایەی کە بافڵ جەلال تاڵەبانی لە کەمپینی هەڵبژاردندا ناوی لێنا (کوردایەتی نوێدەکەینەوە) لەسەر بنچینەیەکی سەردەمیانە کە خزمەتی راستەقینە بە کۆمەڵانی خەڵکی کوردستان بکات.

كاتى كۆتاییهاتنى سه‌رماكه‌ ئاشكرا ده‌كرێت .....مه‌ودا میدیا-
سه‌باره‌ت به‌م شه‌پۆله‌ سه‌رمایه‌ى چه‌ند رۆژێكه‌ هه‌رێمى كوردستانى گرتووه‌ته‌وه‌، شارەزایه‌كى بواری کەشناسی باس له‌وه‌ ده‌كات، سبه‌ینێ كاریگه‌رییه‌كه‌ى له‌ سه‌ر هه‌رێمى كوردستان نامێنێت".
سالار حاجی عەلی، شارەزا لە بواری کەشناسی بۆ مه‌ودا میدیا ایگەیاند "ماوەی چەند رۆژێکە بارستە هەوایەکی ساردی جەمسەری باکوور دابەزیوە بەسەر ئاسیا و بەشێکی ئەورووپا و دواتر رووی لە ناوچەکانی هەرێمی کوردستان کردووە، وه‌ پلەکانی گەرما چەند پلەیەک رووی لە دابەزین کردووە و لە هەندێک ناوچەی شاخاوی چەند پلەیەک چووه‌تە ژێر سفرەوە، لە ناوچە سنوورییەکانیش لە چەند ناوچەیەک بەفر باریوە".
روونیشیكرده‌وه‌ "بۆ ئەمشەو 24ی مانگ بۆ رۆژی 25ى مانگ بارستەهەواساردەکە لە سەر هەرێمی کوردستان لادەچێت، بەڵام به‌ هۆی بەفر بارینی ناوچە سنوورییەکان پلەکانی گەرما چەند پلەیەک نزم دەبێتەوە، هاوکات شەوانە کەش سارد دەبێت، دواتر لە ناوچەکانی تر بەرەو باشوور پلەکانی گەرما چەند پلەیەک روو لە بەرزبوونەوە دەکه‌ن".
ئاماژه‌ى به‌وه‌شكرد "لەگەڵ ئەوەشدا لە سەر وێنە نەخشەکانی جیهان کە تایبەته‌ بە کەشوهەوا، پێدەچێت کۆتایی مانگی 10 بۆ سەرەتای مانگی 11، شەپۆلێکی باران بارینی لاواز بۆ مامناوەند روو لە ناوچە جیاجیاکانی عیراق و هەرێمی کوردستان بکات".
پ ح ع

نەم سەلماند لە سێدارە بدرێم
عه‌لی حه‌مه‌ساڵح، سه‌رۆكى ره‌وتى هه‌ڵوێست رایده‌گه‌یه‌نێت "487 هەزار و 963 دەنگ لە نێو ئامێری فەرزی دەنگ ساختەکاریان پێکراوە".
ده‌شڵێت "لە دەنگی لایەنی ناڕازی سڕاوەتەوە و خراوەتە سەر دەسەڵات و شه‌ریکەکانی، ئه‌گه‌ر نه‌م سه‌لماند، با له‌ سێدارە بدرێم".

كاره‌باى هه‌رێمى كوردستان ده‌كرێته‌ 24 كاتژمێریی ....مه‌ودا میدیا-
وته‌بێژى وه‌زاره‌تى كاره‌باى هه‌رێم رایده‌گه‌یه‌نێت "كاره‌با له‌ هه‌رێمى كوردستان ده‌كرێته‌ 24 كاتژمێریی و له‌ ئێستاشدا هه‌نگاوى بۆناوه‌ و رۆژانه‌ له‌ ژێر چاودێریدایه‌"، ده‌شڵێت "له‌ سه‌ره‌تاوه‌ تاوه‌كو ئێستا نزیكه‌ى 80 هه‌زار هاوبه‌ش سیستمى پریپه‌یتیان بۆ كراوه‌ و فراوانیش ده‌كرێت".
ئۆمێد ئه‌حمه‌د، وته‌بێژى وه‌زاره‌تى كاره‌باى هه‌رێمى كوردستان بۆ مه‌ودا میدیا رایگه‌یاند "وه‌زاره‌ت به‌پێى ئه‌و پلانه‌ى دایناوه‌ ئامانجێتى كاره‌باى هه‌موو ناوچه‌كانى هه‌رێمى كوردستان بكاته‌ 24 كاتژمێریی و بۆ ئه‌وه‌ش وه‌ك ده‌ستپێك چه‌ند شوێنێكى له‌ شاره‌ جیاوازه‌كان كردووه‌ به‌ 24 كاتژمێریی".
وتیشى "ئه‌وه‌ش له‌ چوارچێوه‌ی پرۆژه‌ى پریپه‌یت دایه‌ و هێشتا له‌ قۆناغى ئه‌زموونیدایه‌، بۆیه‌ رۆژانه‌ له‌ رێگه‌ى به‌ڕێوه‌به‌رایه‌تییه‌كانى كاره‌باى ئه‌و ناوچانه‌وه‌ چاودێری ده‌كرێت، تاوه‌كو بزانن كاریگه‌رى و لێكه‌وته‌كانى چییه‌؟".
ئاماژه‌ى به‌وه‌شكرد "له‌پاش ئه‌وه‌ى زانرا كه‌ پرۆچه‌كه‌ كێشه‌ى ته‌كنیكى نییه‌ و تواناى به‌رده‌وامى هه‌یه‌، هه‌روه‌ها بڕى پاره‌دان له‌ لایه‌ن هاوڵاتییانه‌وه‌ به‌ هه‌ردوو سیستمى كاره‌باى نشتیمانیی و موه‌لیده‌ ئه‌هلییه‌كانه‌وه‌ كه‌متره‌، یان چه‌ند بوارێكى تر له‌وانه‌ نه‌مانى ئه‌و موه‌لیدانه‌ له‌ ناو گه‌ڕه‌كه‌كان و پاككردنه‌وه‌ى ژینگه‌ و گه‌ڕانه‌وه‌ى پاره‌ى ئه‌مپێر بۆ هاوڵاتیی، هه‌موو ئه‌وانه‌ ده‌ریبخات كه‌ پرۆژه‌كه‌ سه‌ركه‌وتووه‌، ئه‌وا پلان داده‌نرێت بۆ ئه‌وه‌ى فراوان بكرێت".
روونیشیكرده‌وه‌ "له‌ سه‌ره‌تاوه‌ تاوه‌كو ئێستا نزیكه‌ى 80 هه‌زار هاوبه‌ش سیستمى پریپه‌یتیان بۆ كراوه‌ و رۆژانه‌ له‌ رێگه‌ى تیمه‌كانه‌وه‌ داتا و زانیارییه‌كان كۆده‌كه‌نه‌وه‌، ئه‌گه‌ر گونجاو بوو وه‌زاره‌ت ورده‌ ورده‌ به‌پێى ئه‌و پلانه‌كه‌ى كه‌ هه‌یه‌تى له‌ كارى چاكسازیى، له‌ تۆڕه‌كه‌ له‌ باشتركردنى ته‌كنیكى و زیاد كردنى به‌رهه‌م، وه‌ پشتبه‌ستن به‌و فیدباكه‌ى وه‌ریده‌گرێته‌وه‌ دیراسه‌ى ده‌كاته‌وه‌، ئه‌وكاته‌ ده‌توانرێت سیستمه‌كه‌ په‌ره‌ى پێبدرێت و فراوان بكرێت".
پ ح ع

قوربانییه‌كانى بانگه‌شه‌ى هه‌ڵبژاردن ئاشكرا ده‌كرێن ........مه‌ودا میدیا-

لێپرسراوى سه‌نته‌رى فریاكه‌وتنى سلێمانى ریده‌گه‌یه‌نێت "له‌ سنوورى سلێمانیدا له‌ ماوه‌ى ده‌ستپێكى بانگه‌شه‌ى هه‌ڵبژاردن تاوه‌كو كۆتایی هاتنى پرۆسه‌كه‌، سێ كه‌س بوونه‌ته‌ قوربانى".

سامان نادر، لێپرسراوى سه‌نته‌رى فریاكه‌وتنى سلێمانى بۆ مه‌ودا میدیا رایگه‌یاند "له‌ ماوه‌ى ده‌ستپێكى بانگه‌شه‌ى هه‌ڵبژاردن تاوه‌كو ئێستا كه‌ پرۆسه‌ى هه‌ڵبژاردن ته‌واو بووه‌ ته‌نیا سێ كه‌س بوونه‌ته‌ قوربانى".

وتیشى "له‌و سێ كه‌سه‌دا یه‌كێكیان گیانى له‌ده‌ستداوه‌ كه‌ گه‌نجێكى ته‌مه‌ن 22 ساڵان بوو، وه‌ دووانیان برینداربوون و بارى ته‌ندروستییان جێگیره‌ و ره‌وانه‌ى ماڵه‌وه‌ كراون".

روونیشیكرده‌وه‌ "ره‌نگه‌ كه‌سانى تریش هه‌بووبێت، به‌ڵام ئه‌وه‌ى فریاكه‌وتنى لێ ئاگادار كراونه‌ته‌وه‌ و پێیان گه‌شتووه‌، ته‌نیا ئه‌و سێ كه‌سه‌ بوونه‌".

ئه‌مه‌ له‌ كاتێكدایه‌، له‌ ماوه‌ى رابردووشدا مێردمنداڵێك له‌ ناحیەی قەسرۆکى سه‌ر به‌ قه‌زاى شێخان، له‌ كاتى لێكردنه‌وه‌ى پۆسته‌رى بانگه‌شه‌دا به‌هۆى ئه‌وه‌ى چوارچێوه‌ ئاسنییه‌كه‌ى پۆسته‌ره‌كه‌ به‌ر كاره‌با كه‌وت، كاره‌با گرتى و گیانى له‌ده‌ستدا.

عەلی حەمەساڵح، سه‌رۆكى ره‌وتى هه‌ڵوێستى نشتیمانیی رایده‌گه‌یه‌نێت "بە به‌ڵگەوه‌ ده‌یسه‌لمێنن كه‌ ئه‌م هەڵبژاردنە دەستکاری کراوە و لە هەولێر و دهۆک ساختەکاریی گەورە دژی رەوته‌كه‌یان كراوە".
ده‌شڵێت "تەنیا لە یەک بنکەدا 20 کەس ده‌نگى به‌وان داوه‌ و سوێند ده‌خۆن، کەچی هه‌شت دەنگ ده‌ركه‌وتووه‌ كه‌ به‌ ره‌وتى هه‌ڵوێست درابێت".

ئه‌و ژنه‌ى له‌ ناو كاندیده‌كانى ژندا زۆرترین ده‌نگى به‌ده‌ستهێناوه‌ (لاوێن مه‌حمود)ه‌ له‌ سه‌ر لیستى یه‌كێتى
لە بازنه‌ى سلێمانی له‌ ناو كاندیده‌كانى ژندا (لاوێن مه‌حمود) له‌ سه‌ر لیستى یه‌كێتیی نشتیمانیی كوردستان زۆرترین ده‌نگی به‌ده‌ستیهێناوه‌ كه‌ 6111 ده‌نگه‌.
به‌ دواى ئه‌ویشدا كاندیدى نه‌وه‌ى نوێ (هێشوو غه‌ریب)ه‌ كه‌ 4101 ده‌نگه‌ و دواتریش (هه‌ڵاڵه‌ مه‌حمود) له‌ سه‌ر لیستى یه‌كگرتوو كه‌ ژماره‌ى ده‌نگه‌كانى 3322 ده‌نگه‌، له‌ پاش ئه‌ویش له‌ سه‌ر لیستى كۆمه‌ڵ (هێرۆ عه‌تا)یه‌ كه‌ 2128 ده‌نگى به‌ده‌ستهێناوه‌ و له‌ سه‌ر لیستى پارتیش(كه‌ژان محه‌مه‌د) دێت به‌ 1656 ده‌نگ.

ژماره‌یه‌كى ترى خانه‌نشینان مووچه‌ به‌هاوتاكراوى وه‌رده‌گرن.....مەودا میدیا-

لیژنەی ھاوبەشی ھەردوو حکومەتی ھەرێم و عیراق سەرقاڵی تێپەڕاندنی سەرجەم بڕیار و خاڵەکانی یاسای ژمارەی نۆی خانەنشینی عیراقن و وتەبێژی خانەنشینانی کوردستانیش رایدەگەیەنێت "ئەوانەی قۆناغی دووەمی ھاوتاکردنی خانەنشینان دەیانگرێتەوە مووچەی مانگی 11 بە ھاوتاکراوی وەردەگرن".

مامۆستا سادق عوسمان، وتەبێژی خانەنشینانی کوردستان بۆ مەودا میدیا رایگەیاند "لە ئێستادا ئەو لیژنەھاوبەشەی کە لە سێ ئەندامی حکومەتی ھەرێم و چوار ئەندامی حکومەتی عیراق پێکھاتووە، کار لەسەر جێبەجێکردنی بڕیار و خاڵەکانی یاسای ژمارە نۆی خانەنشینی عیراق دەکەن".

وتیشی "بۆ ئێستا چەند بڕگەیەکی جێبەجێکراوە و ھەندێک لە خاڵەكانیان تێپەڕاندووە، وەک قۆناغی یەکەمی ھاوتاکردنی خانەنشینان و لێبڕینی خانەنشینی لە مووچە کە لە 7%ەوە کرا بە 10%".

ئاماژەی بەوەشکرد "ئێستاش کار لەسەر ئەوە دەکەن کە تەمەنی خانەنشینی بکرێت بە 60 ساڵی یان 63 ساڵی، ھەروەھا قۆناغی دووەمی خانەنشینان کە ئەوانەی پێش ساڵی 2014 دەگرێتەوە و ھێشتا رێنماییەکان بە تەواوی نەھاتووە، بۆیە لیژنەکە کار لەسەر ئەوە دەکەن، وە دەنگۆی ئەوە ھەیە مووچەی مانگی 11 بەھاوتاکراوی پێیان دەدرێت".

به‌غدا بڕی 200 ملیار دیناری تر بۆ هه‌رێم ده‌نێرێت....مەودا میدیا-

ئەندامێکی لیژنەی کشتوکاڵ لە ئەنجومەنی نوێنەرانی عیراق رایدەگەیەنێت "وەزارەتی دارایی عیراق دڵنیایی پێداون تاوەکو کۆتایی ئەم مانگە بڕی 200 ملیار دیناری تر وەک پارەی گەنمی جووتیارانی ھەرێمی کوردستان رەوانە بکات".

غەریب ئەحمەد، ئەندامی لیژنەی کشتوکاڵ لە ئەنجومەنی نوێنەرانی عیراق بۆ مەودا میدیا رایگەیاند "لە بەردەوامی ھەوڵەکانیان لە بارەی کێشەی دواکەوتنی ناردنی پارەی گەنمی جووتیارانی ھەرێمی کوردستان، وەزارەتی دارایی عیراق دڵنیایی پێداون بڕی 200 ملیار دیناری تر رەوانەی ھەرێم بکات".

وتیشی "ئەو بڕە پارەیەش تاوەکو کۆتایی ئەم مانگە دەخرێتە سەر ھەژماری حکومەتی ھەرێمی کوردستان".

ئاماژەی بەوەشکرد "لە دوای ناردنی ئەو بڕە پارەیە لە بەغداوە نزیکەی 88 ملیار دیناری تر دەمێنێتەوە کە بۆ جووتیارانی ھەرێمی کوردستان بنێردرێت".

کۆمسیۆن كاتى راگه‌یاندنى ئه‌نجامه‌ به‌راییه‌كانى پێشخست
مه‌ودا میدیا-
جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانى عیراق ئاشكرایكرد "ئێواره‌ى ئه‌مڕۆ دووشه‌ممه‌ لە کاتژمێر 4:30 خولەک ئەنجامی بەرایی هەڵبژاردنی پەرلەمانی کوردستان لە کۆنگرەیەکی رۆژنامەوانییدا رادەگەیەنین".
له‌ كاتێكدا پێشتر وا بڕیاربوو كاتژمێر 6:00 ئێواره‌، كۆمیسیۆن ئه‌نجامى به‌رایی رابگه‌یه‌نێت، به‌ڵام كاته‌كه‌ى پێشخستووه‌.

ئەمڕۆ نرخی زێڕ ئاستێکی مێژوویی نوێی تۆمارکرد ... مه‌ودا میدیا-

ئه‌مه‌ بۆ چه‌ندینجاره‌ نرخى زێڕ له‌ به‌رزبوونه‌وه‌دا ئاستی مێژوویی نوێ تۆمار ده‌كات و ئه‌مڕۆش بۆ جارێكى تر ئاستێکی مێژوویی نوێی تۆمارکرد.

ئەمڕۆ دووشەممە 21تشرینى یه‌كه‌مى 2024 نرخی ئۆنسەیەک زێڕ بە 2731 دۆلار مامەڵەی پێوە دەکرێت، كه‌ ئەمەش بەرزترین ئاسته‌ بۆ نرخی زێڕ لە مێژوودا.

یه‌كێك له‌ هۆكاره‌كانى ئه‌م به‌رزبوونه‌وه‌ به‌رده‌وامه‌ى نرخى زێڕ ئه‌وه‌یه‌ كه‌ ئەگەری هه‌یه‌ بانکی ناوەندیی ئەمه‌ریکا سوودی بانكیی زیاتر كه‌مبكاته‌وه‌.

فەتحوڵڵا گولەن، رابەری بزووتنەوەی گولەن (خزمەتی توركیا ) لە ویلایەتە یەكگرتووەكانی ئەمه‌ریكا لە تەمەنی 83 ساڵیدا کۆچی دواییکرد.

بافڵ جەلال تاڵەبانی، سەرۆکی یەکێتیی نیشتمانیی کوردستان ئەم وێنانه‌ى بڵاوکردووەتەوە و نووسیویەتی: "لەگەڵ قوبادی برام دوای دەنگدان هاتین بۆ مەزارەكەت، سوپاسمانكردیت بۆ هەموو ئەوەی بە كوردستانت بەخشی و دڵنیاییشماندا رێبازەكەت بەردەوامە و بەرنامەكەت جێبەجێدەكەین".