Ethiopian Trading Businesses Corporation (ETBC)

የኮርፖሬሽኑ ሥራ አመራር ቦርድ አባላት ጉብኝት አደረጉ

የኢትዮጵያ ንግድ ሥራዎች ኮርፖሬሽን ሥራ አመራር ቦርድ አባላት የካቲት 08/ 2017 ዓ.ም በኮርፖሬሽኑ ጉብኝት አካሄዱ።

የቦርድ አባላቱ በአዲስ አበባ ከተማ በተለያዪ ቦታዎች የሚገኙ የኮርፖሬሽኑ ይዞታዎች ያሉበትን ሁኔታ፣ ዘርፎችና የሥራ ክፍሎች ያሉበትን የሥራ እንቅስቃሴ እና በግንባታ ላይ ያሉ ፕሮጀክቶች ያሉበትን ደረጃ ተዘዋውረው ጎብኝተዋል።

የኢትዮጵያ ንግድ ሥራዎች ኮርፖሬሽን ምርትና አገልግሎቱን በማስተዋወቅ ላይ ይገኛል

ኮርፖሬሽኑ በፌዴራል ህብረት ሥራ ኮሚሽን አዘጋጅነት በአዲስ አበባ ኤግዚቢሽን ማዕከል ጥር 29/ 2017 ዓ.ም በተከፈተው ኤግዚቢሽንና ባዛር ላይ ምርትና አገልግሎቱን ለሕብረተሰቡ በማስተዋወቅ ላይ ይገኛል።

ኮርፖሬሽኑ በተጨማሪም ከአምራች የህብረት ሥራ ዪኒየኖች ጋር የንግድ ትስስር በመፍጠር ላይ ይገኛል።

ኤግዚቢሽንና ባዛሩ ለሚቀጥሉት አምስት ቀናት ለህዝብ ክፍት ሆኖ ይቆያል።

ኮርፖሬሽኑ እና ኮሚሽኑ የመግባቢያ ስምምነት ተፈራረሙ

የኢትዮጵያ ንግድ ሥራዎች ኮርፖሬሽን ዋና ሥራ አስፈጻሚ በኃይሉ ንጉሴ እና የፌዴራል ማረሚያ ቤት ኮሚሽን ኮሚሽነር ጄኔራል የኑስ ሙሉ ሁለቱ ተቋማት አብረው በሚሰሯቸው ስራዎች ላይ ጥር 22/ 2017 ዓ.ም የመግባቢያ ስምምነት ፊርማ በፌዴራል ማረሚያ ቤት ኮሚሽን አከናወኑ።

ስምምነቱ የታራሚዎችን የቀለብ አቅርቦት ችግርን ለመፍታት እንደሚያስችል የተገለጸ ሲሆን ኮርፖሬሽኑ ወቅታዊና ጥራት ያለው ምርት ለኮሚሽኑ እንደሚያቀርብ መግባባት ላይ ተደርሷል።

በስምምነት ፊርማው ወቅት ከሁለቱም ተቋማት የተውጣጡ አመራሮች ተገኝተዋል።

ለሽያጭ ሰራተኞች ስልጠና በመሰጠት ላይ ይገኛል

በኮርፖሬሽኑ የኢንዱስትሪና ግብርና ንግድ ዘርፍ ለአትክልትና ፍራፍሬ ሽያጭ ሰራተኞች ከጥር 14-15/ 2017 ዓ.ም ቄራ በሚገኘው የዘርፉ ዋና መ/ቤት ስልጠና በመሰጠት ላይ ይገኛል፡፡

ስልጠናው በሙያ ሥነምግባር፣ በደንበኞች አያያዝ፣ በምርት አያያዝና እንክብካቤ፣ በኮርፖሬሽኑ የውስጥ መመሪያ እና በካይዘን ጽንሰ ሃሳብና አተገባበር ዙሪያ ላይ ያተኮረ  ሲሆን 40 ሰራተኞች በሁለት ዙር ስልጠናውን በመውሰድ ላይ ይገኛሉ፡፡

የስልጠናው ዓላማ ኮርፖሬሽኑ ተግባራዊ ባደረገው በአዲሱ መዋቅር መሰረት ከተለያዩ የሥራ ክፍሎች ወደ ኮንቴይነር ሽያጭ ለተመደቡ ዋናና ረዳት ሰራተኞች ስለስራው ተገቢውን ግንዛቤ እንዲይዙና ተግባርና ኃላፊነታቸውን በአግባቡ እንዲወጡ ለማስቻል ነው፡፡

የኮርፖሬሽኑ የዳይሬክተሮች ቦርድ ሰብሳቢ ጉብኝት አደረጉ

የኢትዮጵያ ንግድ ሥራዎች ኮርፖሬሽን የዳይሬክተሮች ቦርድን በሰብሳቢነት ለመምራት በቅርቡ የተሾሙት የተከበሩ ካሳሁን ጎፌ (ዶ/ር) የንግድና ቀጣናዊ ትብብር ሚኒስቴር ሚኒስተር የኮርፖሬሽኑን የሥራ እንቅስቃሴ ጥር 13/ 2017 ዓ.ም ጎበኙ፡፡ በጉብኝቱ ላይ ከንግድና ቀጣናዊ ሚኒስቴር የመጡ አመራሮችና የኮርፖሬሽኑ የበላይ አመራሮች ተገኝተዋል፡፡

በጉብኝቱ በአዲስ አበባ ቃሊቲ አካባቢ የሚገኘውን የኢንዱስትሪና ግብርና ንግድ ዘርፍ ሽያጭ ማዕከል እና ሳሪስ የሚገኘውን የቴክኒክና ሎጀስቲክ አገልግሎት ዘርፍ ተካተዋል፡፡

በጉብኝቱ በተጨባጭ ያሉ ችግሮችና መወሰድ ያለባቸው እርምጃዎች ላይ የቦርድ ሰብሳቢው አቅጣጫዎች አስቀምጠዋል፡፡

በኮርፖሬሽኑ የግማሽ ዓመት አፈጻጸም ላይ ያተኮረ ግምገማ ተደረገ

የኢትዮጵያ ንግድ ሥራዎች ኮርፖሬሽን የ2017 በጀት ዓመት ያለፉት ስድስት ወራት የእቅድ አፈጻጸም ግምገማ በዘርፍ፣ በዳይሬክቶሬትና በዋና ክፍል ደረጃ ተገመገመ፡፡

ግምገማውን የመሩት የኮርፖሬሽኑ ዋና ሥራ አስፈጻሚ አቶ በኃይሉ ንጉሴ አፈጻጸሙ ከተያዘው እቅድ አንጻርና በትርፍ ደረጃ ጥሩ አፈጻጸም መሆኑን ገልጸው፤ ኮርፖሬሽኑ ካለው አቅም አኳያ ግን አፈጻጸሙ መታየት እንዳለበትና ጉድለቶች ላይ ትኩረት አድርጎ መወያየት እንደሚገባ አሳስበዋል፡፡ አያይዘውም ሂደት ላይ ሳይሆን ውጤት ላይ ያተኮረ ሃሳብ ከቤቱ እንዲነሳ አቅጣጫ ሰጥተዋል፡፡

የኮርፖሬሽኑን የግማሽ ዓመት እቅድ አፈጻጸም ያቀረቡት በኮርፖሬት እቅድ ዝግጅትና ኮሚዩኒኬሽን ዳይሬክቶሬት ዳይሬክተር ተወካይ እንደገለጹት በመሰረታዊ የፍጆታ ምርቶች ግዢ 659, 147 ኩንታል ምርት ግዢ ለማከናወን ታቅዶ 316, 070 ኩንታል ምርት በመግዛት እቅዱን በመጠን 48 በመቶ እና በዋጋ 68 በመቶ ማከናወን ተችሏል፡፡

የፍጆታ ምርት ስርጭትን በተመለከተ 696,310 ኩንታል ምርት ለገበያ ለማቅረብ ታቅዶ 382, 466 ኩንታል ምርት ለሽያጭ ቀርቧል፡፡ አፈጻጸሙም በመጠን 72 በመቶ እና በዋጋ 86 በመቶ ሆኗል፡፡

የውጭ ሃገር ሽያጭ/ ኤክስፖርትን በተመለከተ ደግሞ በግማሽ ዓመቱ ከ400 ሺ ኩንታል በላይ የተለያዩ የብርዕ፣ ጥራጥሬ፣ የቅባት እህሎችና ቡና ለውጭ ገበያ ለማቅረብ ታቅዶ ከ 400 ሺ ኩንታል በላይ ምርት በመላክ እቅዱን በመጠን 100 በመቶ እና በዋጋ 131 በመቶ ማሳካት ተችሏል። በዚህም ከ 27 ሚሊየን የአሜሪካን ዶላር በላይ የውጭ ምንዛሪ ማግኘት ተችሏል።

ገበያ ማረጋጋትን በተመለከተ በግማሽ ዓመቱ ለአምራቹ ምርትና ለፋብሪካዎች የገበያ እድል ከመፍጠር አኳያ ከ 270 ሺ ኩንታል ምርት በላይ ግዢ ተፈጽሟል፡፡ ሸማቹን ህብረተሰብ በዋጋ ንረት ተጎጂ እንዳይሆን ከገበያ ዋጋ ከ713 ሺ ብር በላይ ቅናሽ ያለው ምርት በማቅረብ ገበያውን ለማረጋገት ጥረት ተደርጓል፡፡

የቀረበውን የእቅድ አፈጻጸም ተከትሎ በርካታ ጥያቄዎችና አስተያየቶች ተነስተው ምላሽና ማብራሪያ ተሰጥቶባቸዋል፡፡

አዲስ ተመድበው የመጡ የኮርፖሬሽኑ የበላይ አመራሮች ትውውቅና ጉብኝት አካሄዱ

የኢትዮጵያ ንግድ ሥራዎች ኮርፖሬሽንን ለመምራት የተመደቡ ዋናና ምክትል ሥራ አስፈጻሚዎች በዘርፍና በዳይሬክቶሬት ደረጃ ካሉ አመራሮች ጋር ትውውቅ አድርገዋል፡፡

የኮርፖሬሽኑ ዋና ሥራ አስፈጻሚ አቶ በኃይሉ ንጉሴ፣ የእህልና ቡና ንግድ ዘርፍ ም/ ዋና ሥራ አስፈጻሚ አቶ መሃመድ ሸምሱ እና የኢንዱስትሪና ግብርና ንግድ ዘርፍ ም/ ዋና ሥራ አስፈጻሚ ወ/ሮ ዮሚ አበጀ ከኮርፖሬሽኑ የዘርፍ እና ዳይሬክቶሬት ሃላፊዎች ጋር ትውውቅ አድርገዋል፡፡

የበላይ አመራሮቹ በተጨማሪም በኮርፖሬሽኑ ስር ባሉ ዘርፎች ያለውን ሃብትና የሥራ እንቅስቃሴ ጎብኝተዋል፡፡ አቃቂ አለም ባንክ የሚገኘው የ2ቢ + ጂ+ 10 ሚክስድ ህንጻና የማቀዝቀዣ ግንባታ፣ ቃሊቲ የሚገኘው የቡና ማእከል፣ ቃሊቲ የሚገኘው የቴክኒክና ሎጀስቲክስ አገልግሎት ዘርፍ እና በኢንዱስትሪና ግብርና ንግድ ዘርፍ የቃሊቲ ሽያጭ ማእከል፣ ሳሪስ የሚገኘው የእህልና ቡና ማበጠሪያ አገልግሎትና ጋራዥ በጉብኝቱ ተካተዋል፡፡

የበላይ አመራሩ በስራ ቦታዎች ላይ ያሉ ነባራዊ ሁኔታዎችን አስመልክቶ ከሚመለከታቸው የሥራ ኃላፊዎችና ሰራተኞች ጋር ሰፋ ያለ ውይይት አድርጓል፡፡

ስምንት የመንግሥት የልማት ድርጅቶች የኢትዮጵያ ኢንቨስትመንት ሆልዲንግን በይፋ ተቀላቀሉ

አዲስ አበባ፤ ታህሳስ 24/2017(ኢዜአ)፡- ስምንት ተጨማሪ የመንግሥት የልማት ድርጅቶች የኢትዮጵያ ኢንቨስትመንት ሆልዲንግን በይፋ ተቀላቅለዋል።

ድርጅቶቹ የኢትዮ ፖስታ፣ ኢትዮ ኢንጅነሪንግ ግሩፕ፣ የኢትዮጵያ የኢንዱስትሪ ግብዓቶች ልማት ድርጅት፣ የኢትዮጵያ ምድር ባቡር ኮርፖሬሽን፣ የኢንዱስትሪ ፓርኮች ልማት ኮርፖሬሽን፣ የኢትዮጵያ ልማት ባንክ፣ የኢትዮጵያ ኤሌክትሪክ ኃይል እና በኢትዮ ፋርማ ግሩፕ ስር ተጠሪ የሆኑት የብሔራዊ የእንስሳት ጤና ጥበቃ ኢንስቲትዩትና ሺልድ ቫክስ ናቸው።

በተካሄደው ይፋዊ የመቀላቀያና የትውውቅ መርሐ ግብር ላይ የኢትዮጵያ ኢንቨስትመንት ሆልዲንግ ዋና ሥራ አስፈጻሚ ብሩክ ታዬ(ዶ/ር)፣ የሆልዲንጉ የቦርድ አባልና የኢትዮ ቴሌኮም ዋና ስራ አስፈጻሚ ፍሬሕይወት ታምሩ እንዲሁም የልማት ድርጅቶች ኃላፊዎች ተገኝተዋል።

የኢትዮጵያ ኢንቨስትመንት ሆልዲንግ ዋና ስራ አስፈጻሚ ብሩክ ታዬ(ዶ/ር)፤ የኢትዮጵያ ኢኮኖሚ ማሻሻያ አካል ሆኖ የተመሰረተው የኢትዮጵያ ኢንቨስትመንት ሆልዲንግ በስሩ 40 የልማት ድርጅቶችን በባለቤትነት እያስተዳደረ መሆኑን ገልጸዋል።

የመንግሥት የልማት ድርጅቶችን የኮርፖሬት አስተዳደርና ትርፋማነት በማሻሻል የተሳካ ስራ እያከናወነ መሆኑንም ተናግረዋል።

ሆልዲንጉ የሀገር ሀብት ከሀገር ዕዳ ይበልጣል የሚል መርህ እንዳለው ጠቅሰው፥ ለዚህም የመንግሥት የልማት ድርጅቶች ያላቸውን ሀብት አውቆ፣ በአግባቡ ማስተዳደርና ለሀገር ጥቅም ለማዋል በትኩረት እየተሰራ ነው ብለዋል።

የኢትዮጵያ ኢንቨስትመንት ሆልዲንግ ምክትል ዋና ስራ አስፈጻሚ ሀብታሙ ኃይለሚካኤል፤ ሆልዲንጉ የልማት ድርጅቶችን በንግድ እሳቤ ውጤታማ ማድረግ፣ በሀገሪቱ የሚገኙ የመንግስት ሀብቶችን የማስተዳደር፣ የመምራትና የማልማት ኃላፊነት እንደተሰጠው ገልጸዋል። በዚሁ መሰረት ከዚህ ቀደም በመንግሥት ይዞታና የልማት ድርጅቶች አስተዳደር ስር የነበሩ ስምንት የልማት ድርጅቶችን መቀላቀሉን ገልጸዋል።

የመንግሥት የልማት ድርጅቶቹ በዘርፍ፣ በምርት መጠን፣ በጂኦግራፊያዊ ተደራሽነት ብዝኃነት ያለው ኢንቨስትመንትን እንዲያስፋፉ ትኩረት መሰጠቱን አንስተዋል። የመንግሥት የልማት ድርጅቶቹ በቀጣይ ገቢ ማመንጨት፣ ትርፋማነትን ማሳደግ እና ጠንካራ ቁመና እንዲኖራቸው አስፈላጊው ድጋፍ ይደረጋል ብለዋል።

ኮርፖሬሽኑ በህዳር ወር 105,223 ኩንታል ምርት ለገበያ አሰራጨ

ኮርፖሬሽኑ በ2017 በጀት ዓመት ህዳር ወር 36,253 ኩንታል እህል፣ ቡና፣ ፍጀታ ዕቃ፣ አትክልትና ፍራፍሬ በብር 382,423,308 ግዢ ፈጽሟል፡፡ በአጠቃላይ ባለፉት አምስት ወራት ደግሞ 196,143 ኩንታል በብር 1,219,500,779 መግዛት ችሏል፡፡

ኮርፖሬሽኑ በህዳር ወር ከገዛቸው ምርቶች ውስጥ ለሀገር ውስጥ ፍጆታ የሚዉሉ ልዩ ልዩ የኢንዱስትሪ ምርቶችና የግብርና ዉጤቶች የሚገኙበት ሲሆን 21,769 ኩንታል በብር 312,688,471 ግዢ ተፈጽሟል፡፡

ሽያጭን በተመለከተ ኮርፖሬሽኑ በህዳር ወር በሀገር ውስጥ ገበያ እና በኤክስፖርት ለመሸጥ ያቀደው የእህል፣ ቡና፣ የፍጆታ ዕቃ እና አትክልትና ፍራፍሬ ምርት መጠን 89,198 ኩንታል በብር 675,641,104 ሲሆን በዚህ ወቅት 105,223 ኩንታል ምርት በብር 829,273,386 በመሸጥ ዕቅዱን በመጠን 118 በመቶ እንደዚሁም በዋጋ 123 በመቶ ከእቅድ በላይ አከናውኗል፡፡

ኮርፖሬሽኑ ባለፉት አምስት ወራት በሀገር ውስጥና በውጭ ገበያ 1,322,682 ኩንታል የብርዕና አገዳ እህል፣ ጥራጥሬ፣ የቅባት እህል፣ ቡና፣ የኢንዱስትሪ ፍጀታ ዕቃዎች፣ አትክልትና ፍራፍሬ በብር 7,948,428,231 ለመሸጥ አቅዶ 655,557 ኩንታል ምርት በብር 3,736,292,595 በመሸጥ አፈፃፀሙ በመጠን 50 በመቶ በዋጋ 47 በመቶ ሆኗል፡፡

በህዳር ወር ለሽያጭ የቀረበውን የእህልና ቡና አፈጻጸም ብቻ ብንመለከት 52,640 ኩንታል እህል፣ ቡና፣ ሲሚንቶና የምግብ ዘይት በብር 276,885,300 ለመሸጥ ዕቅድ ተይዞ 89,365 ኩንታል እህል፣ ቡና፣ ሲሚንቶና የምግብ ዘይት በብር 633,542,053 በመሸጥ በመጠን 170 በመቶ፤ በዋጋ 229 በመቶ ለማከናወን ተችሏል፡፡

“ወጣቶችን ያማከለ የፀረ-ሙስና ትግል፣ የነገን ስብእና ይገነባል!’’

የዘንድሮው የዓለም የጸረ-ሙስና ቀን በአለም አቀፍ ደረጃ ለ21ኛ ጊዜ "Uniting with Youth Against Corruption: Shaping tomorrow's Integrity"

በሚል መሪ ቃል በአባል ሃገራት ይከበራል፡፡ በተመሳሳይ ቀኑ በኢትዮጵያ “ወጣቶችን ያማከለ የፀረ-ሙስና ትግል፣ የነገን ስብእና ይገነባል!’’ በሚል መሪ ሀሳብ እየተከበረ ይገኛል፡፡

የተባበሩት መንግሥታት ድርጅት ጠቅላላ ጉባኤ የሙስና ወንጀልን በጋራ ለመከላከልና ለመዋጋት እ.ኤ.አ ኦክቶበር 31 ቀን 2003 የፀረ-ሙስና ኮንቬንሽን ያጸደቀ ሲሆን ኢትዮጵያም ከ1999 ዓም ጀምሮ ኮንቬንሽኑን አጽድቃለች፡፡

የፌዴራል የሥነ-ምግባርና ጸረ-ሙስና ኮሚሽን መግለጫ እንደሚያመለክተው በኢትዮጵያ የዓለም አቀፍ የጸረ-ሙስና ቀንን ስናከብር መሪ ቃሉን በእለቱ ከማሰብ በዘለለ በሃገራችን ከፍተኛውን ቁጥር የሚይዙት ወጣቶች ራሳቸውን በሥነ-ምግባር በማነጽ፣ ሙስና በሃገር እድገትና ልማት ላይ የሚያስከትለውን ጉዳት በግልጽ በመረዳት ሙስናን በጽናትና በባለቤትነት ስሜት ለመታገል ቃልኪዳን የሚገቡበት ቀን ነው፡፡

በመሆኑም በሃገራችን 70 በመቶ የሚሆነው የህብረተሰብ ክፍል ወጣት በመሆኑ የዘንድሮው የጸረ ሙስና ቀን ወጣቱን መሰረት ያደረገ መሆኑ የጸረ ሙስና ትግሉን ውጤታማ እንደሚያደርገው ተመልክቷል፡፡

ሙስና ግለሰብን፣ ቤተሰብንና ተቋማትን የሚጎዳና የሀገርን አንድነትና ህልውና የሚያናጋ ውስብስብ አደገኛ ወንጀል ከመሆኑም ባሻገር ልማት በሚፈለገው ልክ እንዳይፈጥን መሰናክል በመሆን ዘርፈ ብዙ የመልካም አስተዳደር ችግሮችን የሚያስከትል ነው፡፡

ከሙስና የፀዳች ኢትዮጵያን እዉን ለማድረግ በሚሰራው ስራ ሁሉም የድርሻውን መወጣት አለበት፡፡

"የሴቷ ጥቃት የእኔም ነው፤ ዝም አልልም"

ከህዳር 16 እስከ ታህሳስ 1 ድረስ የሚቆየው ዓለም አቀፍ የፀረ-ፆታዊ ጥቃት ቀን ወይም የነጭ ሪባን ቀን የንቅናቄ መርሀ ግብር "የሴቷ ጥቃት የእኔም ነው፤ ዝም አልልም" በሚል መሪ ሃሳብ በኢትዮጵያ ለ19ኛ ጊዜ በተለያዩ ክንውኖች እየተከበረ ይገኛል።

በሴቶችና ሕፃናት ላይ የሚፈፀሙ ጥቃቶች ከጊዜ ወደ ጊዜ መልኮቻቸውና የአፈፃፀም ስልቶቻቸው እየተቀያየረ በመምጣቱ ጥቃትን በመከላከልና በማስቆም ረገድ ሁሉም የመተባበር ኃላፊነት አለበት።

ለ16 ተከታታይ ቀናት በሚቆየው የንቅናቄ መርሃ ግብር በሃገር አቀፍ ደረጃ በዋነኝነት የህብረተሰቡን አመለካከት መለወጥ፣ ጥቃት በሚፈፅሙ አካላት ላይ አስተማሪ እርምጃ እንዲወሰድ ማድረግ፣ ተጎጂዎች ፍትህና እንክብካቤ እንዲያገኙ ማስቻል እንዲሁም የአንድ ማዕከል (One stop service) እና ጊዜያዊ ማረፊያ/ከለላ (Shelter) አገልግሎት የሚሠጡ ማዕከላትን መደገፍና ማጠናከር የሚያስችሉ ተግባራት እንደሚከናወኑ የተለያዩ መረጃዎች ይጠቁማሉ።

የኢትዮጵያ ንግድ ሥራዎች ኮርፖሬሽን በጥቅምት ወር 2017 በጀት ዓመት የተለያዩ የኦፕሬሽን ስራዎችን አከናውኗል፡፡ በተለይም በግዢና ሽያጭ የተከናወኑ አበይት ስራዎች የሚከተለውን ይመስላሉ፡፡

የግዥ ዕቅድ አፈፃፀም

ኮርፖሬሽን በ2017 በጀት ዓመት ጥቅምት ወር 137,754 ኩንታል በብር 710,727,655 የእህል፣ ቡና፣ የፍጆታ ዕቃ፣ የአትክልትና ፍራፍሬ ምርት ለመግዛት አቅዶ 20,320 ኩንታል በብር 140,283,873 ገዝቷል፡፡

ኮርፖሬሽኑ በአጠቃላይ ባለፉት አራት ወራት 361,155 ኩንታል እህል፣ ቡና፣የኢንዱስትሪ ፍጆታ ዕቃዎች፣ አትክልትና ፍራፍሬ በብር 2,022,287,311 ለመግዛት አቅዶ 159,890 ኩንታል ምርት በብር 1,308,693,245 የገዛ ሲሆን አፈፃፀሙ በመጠን 44 በመቶ በዋጋ ደግሞ 65 በመቶ ሆኗል፡፡

የአጠቃላይ ሽያጭ አፈጻጸም

ኮርፖሬሽኑ በጥቅምት ወር በሀገር ውስጥ ገበያ እና በኤክስፖርት ለመሸጥ ያቀደው የእህል፣ ቡና፣ የፍጆታ ዕቃ እና የአትክልት እና ፍራፍሬ ምርት መጠን በኩንታል 93,867 በብር 726,857,104 ሲሆን 105,883 ኩንታል በብር 764,635,507 በመሸጥ ዕቅዱን በመጠን 113 በመቶ እንዲሁም በዋጋ 105 በመቶ አከናውኗል፡፡

ኮርፖሬሽኑ ባለፉት አራት ወራት በሀገር ውስጥና በዉጭ 1,233,483 ኩንታል የብርዕና አገዳ እህል፣ ጥራጥሬ፣ የቅባት እህል፣ ቡና፣የኢንዱስትሪ ፍጀታ ዕቃዎች፣ አትክልትና ፍራፍሬ በብር 7,272,787,127 ለመሸጥ አቅዶ 550,334 ኩንታል በብር 2,909,284,810 በመግዛት አፈፃፀሙ በመጠን 45 በመቶ በዋጋ ደግሞ 40 በመቶ ሆኗል፡፡

በአጠቃላይ በጥቅምት ወር በሀገር ውስጥ 54,640 ኩንታል እህል፣ ቡና፤ ሲሚንቶና የምግብ ዘይት በብር 289,149,300 ለመሸጥ ዕቅድ ተይዞ 91,211 ኩንታል እህል፣ ቡና፣ ሲሚንቶና የምግብ ዘይት በብር 604,083,965 በመሸጥ በመጠን 167 በመቶ፤ በዋጋ 209 በመቶ ለማከናወን ተችሏል፡፡

ኤክስፖርትን በተመለከተ በጥቅምት ወር በአጠቃላይ 2,668 ኩንታል ያልታጠበ ቡና በብር 38,952,000 ለመሸጥ ዕቅድ ተይዞ 1,080 ኩንታል በብር 43,517,367 በመሸጥ በመጠን 40 በመቶ በዋጋ 112 በመቶ ተከናውኗል፡፡

በቆሎን ለምግብነት መጠቀም ያለው ጥቅም

በዓለም ላይ በሰፊው እየተመረቱ ለምግብነት ከሚውሉ እህሎች መካከል በቆሎ አንዱ ሲሆን በአገራችንም በብዙ አካባቢዎች እየተመረተ ለሰው ምግብነት እንዲሁም ለመኖነት የሚያገለግል የእህል አይነት ነው፡፡

በቆሎ በውስጡ ለሰው ልጅ አስፈላጊ የሆኑ የተለያዩ ቫይታሚኖችና ንጥረ-ነገሮች ያሉት ሲሆን ከነዚህ ውስጥ፡-

- ቫይታሚን፡- ቫይታሚን ቢ እና ቫይታሚን ሲ
- ማዕድን፡- ፎስፈረስ፣ ማግኒዥየም፣ ማንጋኒዝ፣ ዚንክ፣ ኮፐር፣ ብረት እና ሰሊኒየም የተባሉ ለሰውነታችን አስፈላጊ የሆኑ ማዕድናት እና ንጥረ-ነገሮች አሉት
- ቃጫ፡- ለምግብ ሥርአተ-ልመት አስፈላጊ የሆነውን (Dietary Fiber) በበቂ መጠን ይይዛል፡፡

በቆሎ ቅባት እና ሶድየም (ጨው) በዝቅተኛ መጠን የያዘ በመሆኑ ለጤና በጣም ተስማሚ ነው፡፡

የበቆሎ ዱቄት በቂጣ፣ በገንፎ፣ በቂንጬ መልክና ከስንዴ ጋር በመደባለቅ ለዳቦ፤ እንዲሁም ከጤፍ ጋር ተቀላቅሎ ለእንጀራ የሚያገለግል ሲሆን የተለያዩ የህብረተሰብ ክፍሎች እንደ ባህላቸውና የአመጋገብ ሥርዓታቸው ለተለያዩ ምግቦች ማባያነት ይጠቀሙበታል፡፡

የኢትዮጵያ ንግድ ሥራዎች ኮርፖሬሽን ለህብረተሰቡ ፍጆታነት የሚውሉ የተለያዩ የእህል ዓይነቶች፣ አትክልትና ፍራፍሬዎች፣ በፋብሪካ የተቀነባበሩ የኢንዱስትሪ ውጤቶችን ለገበያ በተመጣጣኝ ዋጋ በማቅረብ ገበያ የማረጋጋት ስራ ይሰራል፡፡ በተጨማሪም የተለያዩ ምርቶች ላይ እሴት በመጨመር የተጠቃሚውን ህብረተሰብ ፍላጎት ለማርካት ሰፊ ጥረት በማድረግ እያደረገ ሲሆን፤ የበቆሎ ዱቄትን በ5ኪ/ግ በአንዱስትሪና ግብርና ውጤቶች መሸጫ መደብሮች (ኢትፍሩት) አቅርቧል፡፡ በቀጣይም ምርቱን በ10፣ 25 እና 50 ኪ/ግ አማራጭ የሚያቀርብ ይሆናል፡፡

የኢትዮጵያ ኢንቨስትመንት ሆልዲንግስ የኮርፖሬሽኑን የሩብ ዓመት እቅድ አፈጻጸም ገመገመ

የኢትዮጵያ ኢንቨስትመንት ሆልዲንግስ የኢትዮጵያ ንግድ ሥራዎች ኮርፖሬሽንን የ2017 በጀት ዓመት የመጀመሪያ ሩብ ዓመት እቅድ አፈፃፀም ህዳር 09/ 2017 ዓ.ም ገመገመ፡፡ በእቅድ አፈፃፀሙ ዉጤት ላይ በርከት ያሉ ጥያቄዎች ተነስተዉ መልስና ማብራሪያ የተሰጣቸው ሲሆን በጥሩ አፈፃጸም ከታዩት ዉስጥ በቅድመ ዝግጅት ወቅት የተሰሩ ሥራዎች፣ የፕሮጀክቶች አፈፃፀምና የደረሱበት ደረጃ በተለይ የአቃቂ ቃሊቲ ባለማቀዝቀዛ መጋዘንና ሁለገብ ህንፃ ግንባታ፣የቢሮ ኦፊስ ሌይአዉትና ግንባታ፣ በአዎንታና በጥሩ አፈፃፀም ተወስደዋል፡፡

በሌላ በኩል አጠቃላይ የሩብ አመቱ የግዥና ሽያጭ አፈፃፀም ከዕቅድ አንፃር አነስተኛ በመሆኑ በቀጣይ ሩብ ዓመት መሻሻል እንዳለበት አስተያየት ተሰጥቷል፡፡

የኢትዮጵያ ኢንቨስትመንት ሆልዲንግስ ከፍተኛ የሥራ ኃላፊዎች ከእቅድ አፈጻጸም ግምገማው በተጨማሪ የኮርፖሬሽኑን የስራ እንቅስቃሴና የፕሮጀክቶችን አፈጻጸም በአካል በመገኘት ተመልክተዋል፡፡

የኢትዮጵያ ንግድ ሥራዎች ኮርፖሬሽን ተጠሪነቱ ለኢትዮጵያ ኢንቨስትመንት ሆልዲንግስ መሆኑ ይታወቃል፡፡

ባለፉት አምስት ዓመታት በአገር አቀፍ ደረጃ በተገኙ ስኬቶች፣ ተግዳሮቶችና ቀጣይ ዕቅዶች ዙሪያ ውይይት ተካሄደ

ባለፉት አምስት ዓመታት በብልጽግና ፓርቲ በአገር አቀፍ ደረጃ በተገኙ ትሩፋቶች፣ ተግዳሮቶችና የወደፊት አቅጣጫዎች ዙሪያ የኮርፖሬሽኑን ሠራተኞች ያሳተፈ አጠቃላይ ውይይት ኅዳር 7 ቀን 2017 ዓ/ም ቦኮርፖሬሽኑ የጎተራ መሰብሰቢያ አዳራሽ ተካሂዷል፡፡

“የሀሳብ ልእልና ለሁለንተናዊ ብልጽግና” በሚል መሪ ቃል በተካሄደው ውይይት ላይ የመወያያ ጽሑፍ ያቀረቡት የኢንሥኮ ኮርፖሬት ጽ/ቤት ኃላፊ አቶ ይርጋሸዋ ተሸመ፤ የብልጽግና ፓርቲ ህዝባዊ የለውጥ ፍላጎትን ተከትሎ የህብረ ብሔራዊ ፓርቲ ምሥረታ ፍላጎትን መነሻ አድርጎ እንደ አገር የጋራ መግባባትን ለመፍጠር በሚያስችል መልኩ መደመርን መሠረት በማድረግ መመስረቱን አስታውሰው፣ ፓርቲው ባለፉት አምስት ዓመታት በርካታ የውስጥና የውጭ ፈተናዎችን በብልሃት በማለፍ ዘርፈ ብዙ አገራዊ ድሎችን ለመጎናጸፍ መቻሉን አስረድተዋል፡፡

የተገኙትን ድሎች ለማስቀጠል ሁሉም ዜጋ የጋራ ህልምን በመሰነቅ የዜጎች ክብርን፣ ሰብዓዊ እመርታን እና ሀገራዊ ልዕልናን መዳረሻ በማድረግ መሥራት እንደሚገባው የገለጹት ኃላፊው፤ ለዚህም ከመንግሥት፣ ከፌዴራል ከፍተኛ አመራሮች እና ከመንግሥት ሠራተኛው በሚጠበቁት ሚናዎች ዙሪያ ሚና ገለጻ አድርገዋል፡፡

የቀረበውን ጽሑፍ ተከትሎ የተካሄደውን ውይይት የመሩት የኮርፖሬሽኑ ዋና ሥራ አስፈጻሚ አቶ አቻ ደምሴ፤ ሁሉም ዜጋ በተቋምም ሆነ በአገር ደረጃ መጪውን ትውልድ ጭምር መለወጥ የሚያስችል ተሻጋሪ የሆነ የጋራ ህልም ይዞ ሊሠራ እንደሚገባው አጽዕኖት ሰጥተዋል፡፡

ኢኮኖሚያዊ አቅምን በመገንባት የትናንት ልዩነቶችን አስወግዶ በሁሉም መስክ ለውጥ ለማምጣ መሠራት እንዳለበት ያሳሰቡት ዋና ሥራ አስፈጻሚው፤ እንደ ተቋም ሠራተኛውና አመራሩ እመርታዊ ለውጥ ለማምጣት አልሞ መሥራት እንዳለበት፤ ለዚህም ከዕቅድ በላይ በእጥፍ መሠራት እንዳለበት አሳስበዋል፡፡ ብልጽግናና ለማምጣት ግንባር ቀደም ሚና የሚጫወት፣ ነገን አሻግሮ የሚያይ፣ የስነ ምግባር ብልሹነትን የማይታገስ፣ አቅም ያለውና በአስተሳሰብ የጋራ ህልም ይዞ እመርታዊ ለውጥ ለማምጣት የሚሠራ አገልጋይ አመራር መኖሩ አስፈላጊ መሆኑን አስረድተዋል፡፡

ሠራተኛውም የጋራ ህልምን እውን ለማድረግ ጊዜን በውጤታማነት መጠቀም፣ በጋራ ትብብርና በመሰናሰል መሥራት፣ ለዘመናዊ አሠራር በተለይም ለዲጂታላይዜሽን ሰፊ ቦታ መስጠት፣ በፖቲካዊ የሪፎርም እንቅስቃሴዎች ውስጥ የጋራ በሆኑ ጉዳዮች ላይ ተሣትፎ ማድረግ እንዲሁም ሠላምን ለማስፈን የራሱን አስተዋጽዖ ማድረግ እንደሚገባው አጽዕኖት ሰጥተዋል፡፡

በመድረኩ የተለያዩ ሃሳቦች ከታሳታፊዎች ተነስተው ውይይት ተደርጎባቸዋል፡፡

በሩብ ዓመቱ ገበያን ለማረጋጋት የተከናወኑ ዋና ዋና ተግባራት

ለአምራቹ ምርት የገበያ እድል ከመፍጠር አንፃር:-

የመጀመሪያ ሩብ ዓመት በአብዛኛው የክረምት ወቅት እንደ መሆኑ መጠን ምርት ወደ ገበያ በብዛት አይቀርብም፡፡ ነገር ግን ከፍተኛ ግዥ ማከናወን ባይቻልም 61,271 ኩንታል እህል ፣ 13,539 ኩንታል ፍራፍሬና አትክልት ከምርት አቅራቢዎች ግዥ ማከናወን የተቻለ ሲሆን ብር 267,920,812 ዋጋ ያለው 22,732 ኩንታል የፋብሪካ ምርቶች ግዥ ተከናዉኗል፡፡

የአቅርቦት እጥረትንና የዋጋ ንረት ለመከላከል የተደረገ ጥረት:-

ለመንግሥት ሠራተኛው፣ ለማረሚያ ቤቶችና ሌሎች ሸማች የህብረተሰብ ከፍሎች ብር 90,262,796 ዋጋ ያለው 7,576 ኩንታል ጤፍ፣
ብር 84,102,167 ዋጋ ያለው 11,115 ኩንታል አትክልትና ፍራፍሬ፣
ብር 389,647,042 ዋጋ ያለው 2,473,600 ሊትር የምግብ ዘይት፣
ብር 126,125,621 ዋጋ ያለው 3,884 ኩንታል ስኳር፣
ብር 82,317,309 ዋጋ ያለው 5,425 ኩንታል ልዩ ልዩ የፍጆታ ሸቀጦች ለህብረተሰቡ በማሰራጨት የገበያ ዋጋ ለማረጋጋት ጥረት ተደርጓል፡፡ በተጨማሪም

ብር 7,630,892 ዋጋ ያለው 2,317 ኩንታል በቆሎ ለምግብ ፋብሪካዎች ተሠራጭቷል፤ እንዲሁም የሲሚንቶ አቅርቦት እጥረትና ዋጋ መናርን ለመከላከል ከፋብሪካዎች ብር 5,673,726 ዋጋ ያለው 5,218 ኩንታል በቀጥታ በመረከብ ለተጠቃሚው በተመጣጣኝ ዋጋ ማስራጨት ተችሏል፡፡

የኮርፖሬሽኑ የሸማች ገበያን ማረጋጋት አስተዋፅኦ በገንዘብ ሲመዘን፡-
በሩብ አመቱ ፓልም የምግብ ዘይት፣ ጤፍ፣ የስንዴ ዱቄት ወዘተ ከገበያዉ ዋጋ በጠቅላላ ብር 549,501,568 ቅናሽ በማድረግ ገበያዉን ለማረጋጋት ጥረት ተደርጓል፡፡ በዚህም ሸማቹን ህብረተሰብ ተጠቃሚ ማድረግ ተችሏል፡፡

የኮርፖሬሽኑ የሩብ ዓመት አፈጻጸም ተገመገመ

የኮርፖሬሽኑ የ2017 በጀት ዓመት የመጀመሪያው ሩብ ዓመት የእቅድ አፈጻጸም የኮርፖሬሽኑ ዋና ሥራ አስፈጻሚ፣ ምክትል ሥራ አስፈጻሚዎችና የዋና ክፍል ኃላፊዎች በተገኙበት ተገመገመ፡፡

በሩብ ዓመቱ አጠቃላይ የምርት ግዢ አፈጻጸም 62 በመቶ ሲሆን የምርት አቅርቦት ስርጭት ደግሞ 61 በመቶ ነው፡፡ በሩብ ዓመቱ ለገበያ ከቀረቡት ምርቶች መካከል እህልና ቡና፣ ለፍጆታ የሚውሉ የፋብሪካ ምርቶች፣ አትክልትና ፍራፍሬ በዋነኝነት ተጠቃሽ ናቸው፡፡ ወደ ውጪ ከተላኩ ምርቶች 853, 200 የአሜሪካን ዶላር ገቢ በሩብ ዓመቱ ማግኘት ተችሏል፡፡

በተጨማሪም የአቅም ግንባታ ስልጠና፣ የዲሲፒሊን ግድፈት ባሳዩ ሰራተኞች ላይ የእርምትና የማስተካከያ እርምጃ፣ የካፒታል ፕሮጀክቶች አፈጻጸም፣ የሪፎርም ስራዎች፣ የማህበራዊ ድጋፍ፣ የደረቅ ጭነት ማጓጓዝና የኦፕሬሽን ተሸከርካሪዎች እንቅስቃሴ በእቅድ አፈጻጸሙ ከተካተቱት ክንውኖች ውስጥ ይገኙበታል፡፡

የአፈጻጸም ግምገማውን የመሩት የኮርፖሬሽኑ ዋና ሥራ አስፈጻሚ አቶ አቻ ደምሴ የሩብ ዓመቱ አፈጻጸም ከእቅዱ አንጻር ዝቅተኛ መሆኑን ጠቅሰው በቀሪዎቹ ሁለት ወራት ያልተሰሩ ስራዎችን በደንብ በመለየትና በማጠናቀቅ በግማሽ ዓመቱ ከፍተኛ ውጤት ለማስመዝገብ መረባረብ እንደሚገባ አሳስበዋል፡፡

በግምገማው ዘርፎችና ዋና ክፍሎች በሩብ ዓመቱ በነበራቸው አፈጻጸም የነበረባቸውን ድክመትና ክፍተት በዝርዝር እንዲያቀርቡ ተደርጎ ውይይት ተካሂዶበታል፡፡

በዛሬው ዕለት በጅማ ከተማ የተመጀመረውና እስከ ነገ የሚቀጥለው አጠቃላይ የሠራተኞች መድረክ

በክልል ከተሞች የተካሄዱ የአጠቃላይ ሠራተኞች የውይይት መድረኮች

በ2016 በጀት ዓመት አፈጻጸምና የ2017 በጀት ዓመት እቅድ ላይ ያተኮረ መድረክ ተካሄደ

በኮርፖሬሽኑ የ2016 በጀት ዓመት ዕቅድ አፈጻጸምና የ2017 በጀት ዓመት እቅድ የትኩረት አቅጣጫዎች ላይ ያተኮረ ዓመታዊ መድረክ በኮርፖሬሽኑ ጎተራ አዳራሽ ጥቅምት 15 እና 16 ቀን 2017 ዓ/ም ተካሂዷል፡፡

የውውይት መድረኩ በዋነኝነት በቀጣይ ለውጦችን ለማምጣት የሚያስችል የጋራ ግንዛቤን በመያዝ ያልተፈቱ ችግሮችን በተቀናጀ መንገድ በመፍታት ከእስካሁኑ የላቀ ውጤት ማስመዝገብ በሚቻልባቸው መንገዶች ዙሪያ መላ ሠራተኛውን ባሳተፈ መልኩ ለማወያየት ታስቦ የተዘጋጀ ነው፡

ኢንሥኮ ከየት ወደ የት በሚል ርዕስ የኮርፖሬሽኑን አጠቃላይ ጉዞ፣ የተገኙ ውጤቶችና ያጋጠሙ ዋና ዋና አገራዊና ተቋማዊ ተግዳሮቶችና ማለፍ የተቻለባቸውን ስልቶች እንዲሁም እስካሁን የተገኙ ተቋማዊ ስኬቶችን ለማስቀጠል ከማን ምን ይጠበቃል በሚለው ጉዳይ ላይ የኮርፖሬሽኑ ዋና ሥራ አስፈጻሚ አቶ አቻ ደምሴ ሰፊ ገለጻ አድርገዋል፡፡

በቀዳሚው ዓመት በዓለምና በአገር አቀፍ ደረጃ ከዋጋ ንረትና ከጸጥታ ችግር ጋር የተያዙ ችግሮች እንዳጋጠሙ ያስታወሱት ዋና ሥራ አስፈጻሚው፤ አመራሩና ሠራተኛው ባደረጉት ርብርብ ውጤታማ ሥራዎች መሠራታቸውንና በዚህም እንዳለፉት ዓመታ አትራፊ ሆኖ መቀጠል መቻሉን አስረድተዋል፡፡ በገበያ ማረጋጋት፣ በምርት ግዢ፣ አቅርቦትና ሽያጭ ውጤታማ ሥራዎች መከናወናቸው፣ ያልተጠናቀቁ የኦዲት ሥራዎች ተቀባይነት ባለው የኦዲት አስተያየት መጠናቀቃቸው እንዲሁም ቀደም ሲል በተደረገው የማሻሻያ ጥናት መሠረት በ2017 የአዲስ መዋቅር በመተግበሩ ኮርፖሬሽኑ ተልዕኮዎቹን በአግባቡ ለመወጣት የሚያስቸውን አቅም የሚያጎለብት መሆኑን ዋና ሥራ አስፈጻሚው አስረድተዋል፡፡

የኮርፖሬሸኑ ከፍተኛ አመራሮች፣ የዘርፍ ሥራ አስፈጻሚዎች፣ የሥራ መሪዎችና ሠራተኞች በተገኙበትባና ለሁለት ቀናት በተካሄደው መድረክ የኮርፖሬሽኑ የ2016 ዋና ዋና ዕቅዶች አፈጻጸም፣ በካይዘን ሥራዎች ትግበራ እና በ2017 በጀት ዓመት እቅድ የትኩረት አቅጣጫዎች ላይ ገለጻዎች ተደርገው ውይይት ተደርጎባቸዋል፡፡

የኢትዮጵያ ንግድ ስራዎች ኮርፖሬሽን በዋና መ/ቤትና በዘርፍ የሚገኙ አመራር እና ሰራተኞች ብሄራዊ የሰንደቅ ዓላማ ቀንን አከበሩ::

የኮርፖሬት ጽ/ቤት ኃላፊ ተወካይ የሆኑት ወ /ሮ ፋንታዬ ወንድሙ ዕለቱ በመላ ኢትዮጵያ ያለን ዜጎች በሰንደቅ ዓላማ ፊት ቆመን ቃለ መሃላ በመፈፀም ለሀገራችንና ለሰንደቅ ዓላማችን ያለንን ክብርና ፍቅር ዳግም የምንገልጽበትና የሀገራችንን አንድነትና ሉዓላዊነት ለማስጠበቅ ቃላችንን የምናድስበት ነው ሲሉ መልእክት አስተላልፈዋል::

17ኛው የብሔራዊ ሰንደቅ ዓላማ ቀን በሀገር አቀፍ ደረጃ "ሰንደቅ ዓላማችን ለብሔራዊ አንድነታችን፣ ለሉዓላዊነታችንና ለኢትዮጵያ ከፍታ!” በሚል መሪ ቃል በዛሬው ዕለት እየተከበረ ነው፡፡

የኢትዮጵያ ንግድ ሥራዎች ኮርፖሬሽን ባለፉት ሁለት ወራት የገበያ ዋጋ መናርን ለመከላከል በግዥና በስቶክ ያለ ምርት በተመጣጣኝ ዋጋ በማቅረብ ገበያውን ለማረጋጋት ጥረት አድርጓል፡፡ በዚህ ረገድ ኮርፖሬሽኑ ያከናወናቸው ዋና ዋና ተግባራት እንደሚከተለው ቀርበዋል፡፡

>> ለመንግሥት ሠራተኛው፣ ለማረሚያ ቤቶችና ሌሎች ሸማች የህብረተሰብ ከፍሎች 3,054 ኩንታል ጤፍ በብር 37,589,371

>> 7,294 ኩንታል አትክልትና ፍራፍሬ በብር 51,529,544

>> 601,800 ሊትር የምግብ ዘይት በብር 64,442,446

>> 7,198 ኩንታል ስኳር በብር 51,215,171

>> 16,344 ኩንታል ልዩ ልዩ የፍጆታ ሸቀጦች በብር 117,643,868 ለህብረተሰቡ በማሰራጨት የገበያ ዋጋ ለማረጋጋት ጥረት ተደርጓል፡፡

በተጨማሪም በግንባታው ዘርፍ እየገጠመ ያለውን ከፍተኛ የሆነ የስሚንቶ አቅርቦት እጥረትና ዋጋ መናር ለመከላከል ከፋብሪካዎች 1,600 ኩንታል በቀጥታ በመረከብ ለተጠቃሚው በተመጣጣኝ ዋጋ ማስራጨት ተችሏል፡፡

በአጠቃላይ ኮርፖሬሽኑ ባለፉት ሁለት ወራት ለገበያ ባቀረበው ምርት በወቅታዊ ገበያ ቢሸጥ ብር 1, 292, 871, 759 ሊያገኝ የሚችለውን በብር 1, 182, 584, 964 በመሸጥ 110, 286, 795 ብር ከገበያው ቅናሽ በማድረግ ህብረተሰቡን ተጠቃሚ አድርጓል፡፡

የኮርፖሬሽኑ ያለፉት ሁለት ወራት አፈጻጸም ተገመገመ

የኢትዮጵያ ንግድ ሥራዎች ኮርፖሬሽን ያለፉትን ሁለት ወራት ማለትም የሐምሌና ነሐሴ ወራት ዋና ዋና የእቅድ አፈጻጸም ተግባራትን በማኔጅመንት ደረጃ መስከረም 10/ 2017 ዓ.ም ገመገመ፡፡

የእቅድ አፈጻጸም መድረኩን የመሩት የኮርፖሬት ፋይናንስ ዘርፍ ም/ዋና ስራ አስፈጻሚ አቶ አለበል ሞላ እና የኢንዱስትሪና የግብርና ውጤቶች ንግድ ዘርፍ ም/ዋና ስራ አስፈጻሚ አቶ ቀጸላ ሸዋረጋ ሲሆኑ ባለፉት ሁለት ወራት በግዢና ሽያጭ ክንውን ከእቅድ በታች አፈጻጸም መታየቱ ተመልክቷል፡፡

ኮርፖሬሽኑ በ2017 በጀት ዓመት የሐምሌና ነሐሴ ወራት 63ሺ 832 ኩንታል የእህል፣ ቡና፣ ፍጆታ እቃ፣ አትክልትና ፍራፍሬ ምርት በብር 312, 218, 960 ግዢ ያካሄደ ሲሆን ሽያጭን በተመለከተ በሁለት ወራት 232ሺ 844 ኩንታል ምርት በብር 1, 603, 237, 188 ሽያጭ ፈጽሟል፡፡

በውይይት መድረኩ ለታየው ዝቅ ያለ አፈጻጸም ከነባራዊ ውጫዊ ምክንያቶች ባለፈ ወደ ውስጥ ማየትና ክፍተቶችን በትክክል መለየት እንደሚገባ የተገለጸ ሲሆን በቀጣይ ጊዜያት የማካካሻ እቅድ በማውጣት የተቀመጠውን እቅድ ለማሳካት ርብርብ ማድረግ እንደሚያስፈልግ አጽንኦት ተሰጥቷል፡፡

በተለይም በየደረጃው ያለው አመራር የመሪነት ሚናውን በአግባቡ እየተወጣ ስለመሆኑ ራሱን ሊፈትሽ እንደሚገባና ሁሉም ፈጻሚ ከአዲሱ መዋቅርና ምደባ ጋር ራሱን በማዋሃድ ወደ ስራ መግባት እንዳለበት ማሳሰቢያ ተሰጥቷል፡፡

የእህልና ቡና ንግድ ዘርፍ በአዳማ ግብይት ማዕከል ለሚገኙ 217 የጉልበት ሰራተኞች አዲሱን ዓመት በማስመልከት የእንኳን አደረሳችሁ ስጦታ አበርክቷል፡፡

የማኅበራዊ ትስስር ገጾቻችችን በመቀላቀልና ድረገጻችንን በመጎብኘት የምርትና አገልግሎት መረጃዎችን በቀላሉና በፍጥነት ያግኙ፡፡
ድረገጽ፡- https://www.etbc.com.et
ፌስቡክ፡- https://www.facebook.com/etbcofficial
ቴሌግራም፡- https://t.me/etbcinfo
አስተያየትዎን በኢሜይል አድራሻችን [email protected] ያድርሱን፡፡

የኢንሥኮ ዋና ሥራ አስፈጻሚ አቶ አቻ ደምሴ የ2017 አዲስ ዓመት መልዕክት

የማኅበራዊ ትስስር ገጾቻችችን በመቀላቀልና ድረገጻችንን በመጎብኘት የምርትና አገልግሎት መረጃዎችን በቀላሉና በፍጥነት ያግኙ፡፡
ድረገጽ፡- https://www.etbc.com.et
ፌስቡክ፡- https://www.facebook.com/etbcofficial
ቴሌግራም፡- https://t.me/etbcinfo
ዩትዩብ ቻነል፡- https://www.youtube.com/@etbcinfocom4858
አስተያየትዎን በኢሜይል አድራሻችን [email protected] ያድርሱን፡፡

የኢትዮጵያ ንግድ ሥራዎች ኮርፖሬሽን እና የራስ ቴአትር አመራርና ባለሙያዎች የ2017 አዲስ ዓመትን በማስመልከት ጳጉሜ 4 ቀን 2016 ዓ/ም በጋንዲ፣ ዘውዲቱ፣ የካቲት 12፣ ራስ ደስታና እና ምኒልክ ሆስፒታሎች በመገኘት ለወላድ እናቶችና ህሙማን የእንኳን አደረሳችሁና ስጦታ የማበርከት ሥነ ሥርዓት አካሂደዋል፡፡

የማኅበራዊ ትስስር ገጾቻችችን በመቀላቀልና ድረገጻችንን በመጎብኘት የምርትና አገልግሎት መረጃዎችን በቀላሉና በፍጥነት ያግኙ፡፡
ድረገጽ፡- https://www.etbc.com.et
ፌስቡክ፡- https://www.facebook.com/etbcofficial
ቴሌግራም፡- https://t.me/etbcinfo

አስተያየትዎን በኢሜይል አድራሻችን [email protected] ያድርሱን፡፡