Uyidan chiqayotganda otib ketilgan hokim
2003-yilning 25-sentyabrida Qashqadaryo viloyatining Yakkabog‘ tumani hokimi Panji Choriyev noma’lum kishilar tomonidan otib ketilgan. Hodisa marhumning uyi yonida ro‘y bergani aytiladi.
“Panji Choriyev otib o‘ldirilgan kuni hokimlar uchun qurilgan xizmat uyidan paxta bo‘yicha “razbor”ga ketayotgan bo‘lgan. Ayoli va bolalari serialga qiziqqan shekilli, uni kuzatib chiqmagan. O‘sha yillari televideniyeda mashhur serial berilardi. Ko‘pchilik televizor tagidan qimirlamay, serial ko‘rardi. O‘g‘riliklar ham ko‘p bo‘lgan o‘sha paytda.
Hokimning xizmat uyi suv ta’minoti korxonasiga yaqin, ammo tuman markazidan chekkaroq, ovloqroq hududda bo‘lgan. Panji Choriyev eshigining oldida egilib, oyoq kiyimining bog‘ichini bog‘layotganda bo‘ynidan ikki marta otilgan va o‘sha yerda o‘lgan.
Qotillikni bajargan shaxs o‘q ovozini pasaytiruvchi moslamadan foydalangan deyishadi. Sababi o‘q ovozi hech kimga eshitilmagan. Hatto ko‘chada kutib turgan haydovchisi ham hokimning xotini ovozidan so‘ng, voqeadan xabar topgan”, deydi qotillik voqeasi sodir etilgan paytda tumanda faoliyat yuritgan yakkabog‘lik suhbatdosh.
Suhbatdoshning ta’kidlashicha, qotillik voqeasi sabab o‘sha yili Yakkabog‘da deyarli barcha erkaklar jinoyatni sodir etishda gumonlanib, so‘roq qilingan.
“Qotillikni ochish uchun bir emas, ikki emas, uchta guruh kelgandi. Avval Toshkentdan kelgan guruh hech narsani aniqlay olmagach, yana bir guruh vodiydan kelgan. Undan so‘ng umuman boshqa bir guruh kelib, qotillik voqeasini o‘rgangan. Ko‘pchilikni so‘roq qilgan.
Jinoyatni ochish uchun Yakkabog‘ tumanida deyarli barcha erkaklar so‘roq qilinib, ayrimlar uzoq, ba’zilar esa qisqa muddat davomida hibsxonada ushlab turilgan. Shuncha urinishlarga qaramay qotillikni kim sodir qilgani ochilmasdan qolgan deyishadi.
Odamlar orasidagi yana bir taxminga ko‘ra, o‘sha yillari Panji Choriyev bilan qarama-qarshilikka borgani aytilgan M.B. ismli mansabdor va uning ukasi qotillikda ayblanib, qamalgan. Bu mansabdor tuman va viloyatda IIB boshlig‘i, respublikada GAI boshlig‘i bo‘lib ishlagan.
U hokimdan Yakkabog‘dagi neft-bazaning boshlig‘i unga tegishli odam ekanini, uni ishdan olmasligi kerakligini uqtirgan. Hokim esa bu tumanga u rahbar ekanini, kadrlar masalasini o‘zi hal qilishini aytgan deyishadi. O‘sha mansabdor va ukasi uzoq muddat “o‘tirib” chiqishgan, shu bois ayrim yakkabog‘liqlar qotil aynan shular deb bilishadi”, deydi u.
Boshqa bir manba Choriyev korrupsiyaga aralashishni istamagani uchun otib ketilgani, bu mahalliy mafiyaning ishi bo‘lganini ta’kidladi.
Marhum hokimni tanigan va qotillik voqeasiga qadar viloyatda katta lavozimlarda ishlagan yana bir suhbatdoshga ko‘ra, hokimga qilingan suiqasd o‘sha paytda Bosh prokuratura nazoratiga olingan bo‘lgan.
“Panji Choriyev qotillik voqeasidan avval viloyatining Bahoriston tumanida ham rahbarlik qilgan. O‘sha voqea sodir bo‘lgach, holat Bosh prokuratura tomonidan o‘rganildi. Ammo tafsilotlar yopiqligicha qoldi. Qotil kim, nega o‘ldirgan degan savollarga hozirgacha tayinli javob yo‘q”, deydi u.
Ma’lumot uchun, marhum Panji Choriyev 1964-yilda tug‘ilgan. 1992-yili Toshkent moliya institutini (iqtisodchi) tamomlagan. 1996-yili Prezident huzuridagi Davlat va jamiyat qurilishi akademiyasida tahsil olgan. Qashqadaryo viloyati moliya boshqarmasi boshlig‘i, viloyat hokimining kadrlar masalasi bo‘yicha o‘rinbosari lavozimlarida ishlagan. 2003-yil fevralida Yakkabog‘ tumani hokimi etib tayinlangan. Oxirgi lavozimida atigi yetti oygina ishlay olgan.
@blogeruzofficial
