Adoni Gospel channel

" እርስ በርሳችሁ በኃጢአታችሁ ተናዘዙ። ትፈወሱም ዘንድ እያንዳንዱ ስለ ሌላው ይጸልይ፤ የጻድቅ ሰው ጸሎት በሥራዋ እጅግ ኃይል ታደርጋለች።" ያዕ 5፥16


አንዳችን ለአንዳችን ስንጸልይ እግዚአብሔር የደከሙትን ያበረታል፣ የዛሉትን ያፀናል፣ የወደቁትን ያነሳል፣ ተስፋ የቆረጡትን ያስቀጥላል። ስለዚህ ቅዱሳን ሁላችሁ በእግዚአብሔር ፊት በጸሎት ስትሆኑ አስቡኝ። እግዚአብሔር በመልካም ያስባችሁ!!!!

✍አዶኒ

አቤቱ ጌታችን መድኃኒታችን ኢየሱስ ክርስቶስ ሆይ አንተ ሁሉን ታውቃለህ።

ባህሩን ረግጠህ የምትረማመድበት ዛሬም የብዙውን ሰው መከራና ችግር ጭንቀትና ውጥረት ተረማመድበት ሰላምህን አስፍንበት። በዚህ ሰዓት በሀሳብ ማዕበል ለሚናጡ፣ ልባቸው የታወከባቸውን ሁሉ ሰላም ለእናንተ ይሁን በሚለው አሳራፊ ቃልህ ተገለጥላቸው። የሚያነቡትን እንባ አባሽ፣ የተሰበሩትን ጠጋኝ፣ የወደቁትን አንሺ፣ የታሰሩትን ፈቺ፣ የታመሙትን ፈዋሽ የሆንክ ጌታ ሁሉ ይፈልጉሃልና ለሁሉ መፍትሔ ሆነህ ና። የነገሩህን የማትረሳ፣ የጠየቁህን የማትነሳ አንተ ረድዔታችን ሆይ ዛሬ ታስፈልገናለህ። ሁሉ ለጨለመበት፣ በር ሁሉ ለተዘጋበት፣ የሚሰማው ላጣ የሚጎበኘው ለቸገረው ሁሉ የአንተ ታዳጊ እጅ ትዘርጋ። ባወራው የሚረዳኝ ብናገረው ንግግሬ የሚገባው የለም ብሎ በዝምታ ተሸብቦ ለተቀመጠው ሁሉ የሚገላግለውን ብርሃንህን ፈንጥቅለት። አንገት የደፋውን ሁሉ በስምህ ቀና አርገው። ዋይታና ሀዘን በሰው ሁሉ ቤት ገብቷል አንተ ለሁሉ ዘንበል በል። አንተ አልፋውም ኦሜጋውም መፍትሔ ነህ፣ አንተ ፊተኛውም ኋለኛውም መድኃኒት ነህ ቅረበን። የመኖር ውሉ የጠፋባቸውን ነግቶ አልመሽ፣ መሽቶ አልነጋ ያላቸውን፣ በነፍሳቸው የቆሰሉትን፣ ልባቸው በውስጣቸው የፈሰሰችባቸውን ከአንተ ውጪ ታዳጊ የሌላቸውን ሁሉ ዛሬ ተገናኛቸው። ለእነዚህ ሁሉ ልጆችህ እንደ ሳንራዊቷ ሴት ወዳለችበት እንደሄድህ ዛሬም ወደነዚህ ልጆችህ በፍቅርህ፣ በምህረትህ፣ በቸርነትህ ሂድላቸው። አቤቱ ጌታዬ ኢየሱስ ክርስቶስ ሆይ ተመስገን። አሜን!!!

✍አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

"እምነታችሁ የት ነው?"
    (ሉቃ 8፥25)


       የለበስነው ስጋ የሚታይ መደገፊያ፣ የሚዳሰስ መታመኛ ይፈልጋል። ለዚህ ነው በእግዚአብሔር ከመታመናችን ይበልጥ በሚገጥሙን ማዕበልና ወጀቦች የምንፈራው። ሰው መሆን የአሁንን ብቻ እንድንመለከት ያደርገናል እምነት ግን ከዛሬ አሻግረን እንድናይ ያደርገናል።

      እምነት ማጣት ዛሬ ላይ እንድዘገይ ትላንት በሕይወታችን ያየነውን የእግዚአብሔርን እጅ ያስረሳናል። ሐዋርያቱ በጀልባቸው ላይ በገጠማቸው ማዕበል ምክንያት ትላንት ያዩትን የጌታን ተዓምር ዘነጉት።
ይህ ታሪክ ዛሬ ለእኛ ትልቅ ጠቀሜታ አለው.  ኢየሱስ በዚህ ሁኔታ ውስጥ የነበረው ሰላም ደቀ መዛሙርቱ ካጋጠሟቸው ፍፁም ብጥብጥ ጋር ሲነፃፀሩ ማየት የሚያስደንቅ ነው።  ኢየሱስ ደቀ መዛሙርቱን ስለ እምነት ማነስ ስለገሰጻቸው ከመጀመሪያው ጀምሮ የሆነውን ያውቅ ነበር።  በዚያን ጊዜ፣ ደቀ መዛሙርቱ በእግዚአብሔር ከመታመናቸው የበለጠ ማዕበሉን ፈሩ። 

        ጊዜ ጥሩ ሲሆን እግዚአብሔርን መታመን ይቀላል።  ነገር ግን ጊዜዎች አስቸጋሪ ሲሆኑ በእግዚአብሔር መታመን የበለጠ አስፈላጊ መሆኑን ማስታወስ አለብን።  ስንፈራ ወይም ስንጨነቅ በኢየሱስ ላይ ያለን እምነት ምን ያህል ደካማ እንደሆነ ራሳችንን እያጋለጥን ነው። 

        ሕይወትን መተንበይ አይቻልም። በመንገዳችን ላይ አውሎ ነፋሶች ይኖራሉ፤ ነገር ግን ነገሮች ያልተረጋጉ እና እርግጠኛ ያልሆኑ ሲመስለን የእግዚአብሔር የማይለወጥ ባህሪ ጠንካራ መሰረት ይሰጠናልና በእርሱ ልንደገፍ ይገባል።  ጌታችን ኢየሱስ በመንፈሱ በውስጣችን አለ እስከ አለም መጨረሻም ከእኛ ጋር ይኖራል። 

        አቤቱ ጌታችን መድኃኒታችን ኢየሱስ ክርስቶስ ሆይ እያለፍንበት ያለው ማዕበል፣ እያንገላታን ያለው ወጀብ ከብዶናልና ይህንን ጊዜ የምናልፍበትን ጥንካሬ እንድትሰጠን እንለምንሃለን። ማዕበሉን ፀጥ የሚያደርገው ቃልህን በማዕበላችን ላይ አውጅበት። ከመጣብን መከራ ይታስተምረን ያሰብከውን ቁምነገር አስጨብጠን ካንተ ጋር መተላለፍ አይሁንብን። በመከራ ውስጥም በፍቅር ስለምትጠብቀን ተመስገን።

✍አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

"ማርታ ግን አገልግሎት ስለ በዛባት ባከነች፤ ቀርባም። ጌታ ሆይ፥ እኔ እንድሠራ እኅቴ ብቻዬን ስትተወኝ አይገድህምን? እንኪያስ እንድታግዘኝ ንገራት አለችው።" ( ሉቃ 10:40)

ሁልጊዜ ማስተዋል ያለብን ጥሩ በልክ ይመዘናል እንጂ ልክ በጥሩ አይመዘንም። ማርታ የምታደርገው ነገር ጥሩ ነው የማርያም ተግባር ግን ልክ ነው። ጌታ ኢየሱስ ማርታ የምታደርገውን ተግባር አልነቀፈም ማርያም ግን የተሻለውን እያደረገች ነው። ማርያም ከእግሩ ስር ሆና ቃሉን መስማት፣ እርሱን መውደድና ማምለክ ጀምራለች። ከጌታ ጋር መሆን እርሱን የማወቅና በእርሱ የመተማመን ምስጢር ነው።

      እንደ ማርታ በስራ ተጠምዳችሁ ይሆን? ቢዚ ናችሁ? ሰዎች፣ ሁኔታዎች ከጌታ ፊት እንድትርቁ ግፊት እያረጉባችሁ ነው? ጌታ ከእኛ ጋር ጊዜ ማሳለፍ ይፈልጋል። ሊመክረን፣ ሊገስጸን፣ የልቡን ሊነግረን ይፈልጋል። እኛ ግን እንደ ማርታ በጓዳ ነን። እኛ በጊዜያዊ ነገር ተጠምደናል። እንደ ማርያም ፊቱን ልንፈልግ የልቡን ሃሳብ ልናደምጥ ጊዜ ልንመድብለት ይሻል። ጊዜ የለኝም ያላለንን ጌታ ጊዜ አንንፈገው።  በሰላም እደሩ

🙏አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

  
የናፍቆት ስፍራችን እግርህ ስር ነው

       ዛሬ ዓለማችን ላይ ሕይወትን ቀላል ለማድረግ ብዙ ባለሙያዎች በየምርምር ጣቢያው በራቸውን ዘግተው ቀመር ሲቀምሩ ደረስንበት የሚሉትን ሲሞክሩ ይውላሉ። ለክርስቲያን ሕይወት ቀላል የሚሆነው ከአገር አገር እየዞረ መስራቱ ስጋውን በምቾት ማደላደሉ ላይ ሳይሆን ከእግዚአብሔር እግር ስር ቁጭ ማለቱ ነው።

በእግዚአብሔር እግር ስር ቁጭ ስትሉ በዓለም ያለው ርኩሰት፣ ክፋት ያመልጣችኋል። የእግዚአብሔር እግር ስር የሚፈስ የቃሉ ጅረት አለ።

ቃሉ እናንተ የማትደርሱበትን የሕይወታችሁን ክፍል እንኳ ዘልቆ ይደርሳል። ርካታን ይሰጣችኋል።

እግሩ ስር ትልቅ በረከት አለ። ሩት ቦዔዝ እግር ስር ተኝታ የቦዔዝን መቤዠት እንዳገኘች ሁሉ ጌታ እግር ስር ቁጭ ብለን የቃሉን ፍሪዳ በልተን ልባችን ተማርኳል ዘላለማዊ ሕይወትን አጭደናል።

እግሩ ስር ትቢያ ሳይሆን በረከት አለ። ራሳችንን በፍቅር አዋርደን ከእግሩ ስር መዋልና ማደር ስንጀምር እግዚአብሔር በጊዜው ከፍ ከፍ ያደርገናል።

  "እንግዲህ በጊዜው ከፍ እንዲያደርጋችሁ ከኃይለኛው ከእግዚአብሔር እጅ በታች ራሳችሁን አዋርዱ"
(1ኛ ጴጥ 5፥6 )

      አቤቱ ጌታ ሆይ ከእግርህ ስር ኑሯችንን ደስታችንን አርግልን። ማርያም የማይቀሟት በጎ እድልን ያገኘችው እግርህ ስር ቁጭ ብላ ነው። የማንቀማው በጎ እድላችን እግርህ ስር ነውና አታሳጣን። የቃልህ ድርቅ አያግኘን በእግርህ ስር መረስረስ ይሁንልን። አቤቱ በምትወደው ልጅህ በኢየሱስ ክርስቶስ ስም ለመንኩህ! አሜን

🙏አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

ላረጀው ጥያቄያችሁ
እግዚአብሔር አዲስ መልስ ነው!

ለሞተው ነገራችሁ
ክርስቶስ ትንሳኤያችሁ ነው!

ተመስገን

“ከበደሌ ፈጽሞ እጠበኝ፥ ከኃጢአቴም አንጻኝ፤”
— መዝሙር 51፥2

አባት እግዚአብሔር ሆይ በአንተ ፊት የተራቆትነው በፊትህ የተገለጥነው ልጆችህ ፊትህን ሽተን መጥተናል ዘንበል በልልን ዓይኖችህን በእኛ ላይ አድርጋቸው ልብህን ክፈትልን።

አቤቱ ጌታ እግዚአብሔር ሆይ በተለያዩ ርኩሰቶች፣ በደሎች፣ የኃጢአት ልምምዶች ረክሰናል የአንተን ፈቃድ ትተን ለፍቃዳችን የተገዛን በስጋና ደም ሀሳብ የተዋጥን ሆነናል እባክህ ይቅር በለን ቀድሰን ጸጋህን አብዛልን።

ከምንጓዝበት የኃጢአት መንገድ እንድትመልሰን ከዚህ የኃጢአት ልምምድ በቃ ብለህ እንድመልሰን እጃችንን ይዘህ እንድታወጣን እንናፀንሃለን።

አቤቱ እግዚአብሔር ሆይ ሀሳባችን በውስጣችን ረክሷል፣ አንደበታችን በፊትህ ረክሷል፣ ድርጊታችን አንተን የሚያሳዝን ሆኗል በፊትህ መልካም ነገር የለንምና እባክህ ልባችንን ቀድሰው ልባችንን እንድታጥበው እንማፀንሃለን።

በሕይወታችን ስፍራ ነስተንሃል ቅድሚያ ስፍራውን ሁሉ ለሰው፣ ለገንዘብ፣ ለቁስ፣ ለኃጢአት ሰጥተናል እባክህ ጌታ ሆይ ይቅር በለን። አንተን ብቻ በደልኹ እንዳለ አንተን ብቻ በድለናል አንተን ብቻ አሳዝነናል እባክህ እንደልቤ እንዳልካቸው አገልጋዮችህ እንደልብህ እንድንሆንልህ በቅድስና እንድንመላለስ አንተን በሕይወታችን ማክበር እንዲሆንልን እባክህ በነገር ሁሉ አግዘን እርዳን።

የድፍረት ኃጢአት እንዳይገዛን ጥለነው ወደመጣነው የጨለማ ህይወት እንዳንመለስ ልባችን በዓለም እንዳይሸፍትብን ጸጋህን አብዛልን። አቤቱ የጀመርነውን የሞት መንገድ ሳንጨርሰው እንደ ጳውሎስ መሀል ገብተህ አጨናግፈው አዲስ ሕይወትን ከአንተ ጋር አስጀምረን አሸንክታባችንን አስጥለን።

ከማንፈልገው ግን ካጠመደን እስራት ልባችንን ዓይኖቻችንን ለርኩሰት አሳልፎ የሰጠ ይህንን መንፈስ ከወንድና ከሴት ልጆችህ ሁሉ አንሳ የቅድስናን መንፈስ አፍስስብን። አንተን አንተን ማለትን አብዛልን። ከበረዶ ይልቅ ነጭ የምታደርግ፣ ነፍስን ማንፃት የምትችል እግዚአብሔር ሆይ አንተ ብቻ ነህና ከኃጢአት ከበደላችን በልጅህ በኢየሱስ ክርስቶስ ስም ለየን። ሁሉ ሲሆን ለአንተ ክብር ይሁን!

🙏አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

ሠላማችን ሆይ


             አንዳንድ ጊዜ በሕይወታችን ላይ የሚከሰቱት ሁከቶች ምንጫቸው ምን እንደሆነ ግራ ይገባናል። ሁሉ አለን ስንል ምንም እንደሌለን ይሰማናል።  ጥሩ ቤት አለኝ፣ ጥሩ ገቢ አለኝ፣ የተሟላና ጤና አለኝ፣ የሚያስመሰግን ሙያ አለኝ፣ መኪና እየቀያየርኩ እነዳለሁ፣ ጥሩ መዝናኛ ቦታዎች አሳልፋለሁ፣ ብዙ ትምህርቶችን ከሀገር ውጪ የተማርኩ፣ በውበት ቢባል ቁንጅናን የተላበስኩ በጠቅላላው በሚታየው ነገር ጎደለኝ የምለው ምንም ነገር የለም። ይሄ ሁሉ አለኝ  ነገር ግን ሰላም የለኝም የሚሉ ሰዎች በርካታ ናቸው። በጥሩ ስጋዊ ምቾት ውስጥ ሰላም እንደ አየር ያጠራቸው፣ ከቅኝት እንደወጣ ሙዚቃና እንደተዘበራረቀ ኖታ ሰላም በማጣት ሕይወታቸው የታወከባቸው ብዙ ናቸው።

          ይህ ሁሉ ምቾት የአንዱን የሰላም ቦታ ሊተካ አይችልም። ሰላም የሌለው ሰው ቀለሙን በጨረሰ ብዕር የመፃፍ ያህል ውስጡ ባዶ ይሆናል። ሰላም ከሕይወታችን ሲሟጠጥ ነፍሳችን በውስጣችን ትሟሟለች፣ መንፈሳችን ይደርቃል። ለዚህ መፍትሄው ሰላምን የማግኛ አምስት ዘዴዎች የሚሉ የዓለም ማስታገሻዎችን ማግበስበስ አይደለም።

          ጌታችን “ሰላምን እተውላችኋለሁ፥ ሰላሜን እሰጣችኋለሁ፤ እኔ የምሰጣችሁ ዓለም እንደሚሰጥ አይደለም። ልባችሁ አይታወክ አይፍራም።” (ዮሐንስ 14፥27) ብሎናል። ወዳጆች ዓለም ሰላም አላት ነገር ግን ሰላሟ ኦርጂናል ሳይሆን ፎርጂድ ነው። የዓለም ሰላም የሚሄድ ግን የማይከርም፤ የሚያረግርግ ነገር ግን የማይፀና ነው። አልፎ አልፎ የሚመጡ ሰላሞች አገኘን ስንል እናጣቸዋለን፤ ደረስን ስንል እንርቃቸዋለን፤ ጨበጥን ስንል እንበትናቸዋለን።
ሰላምን ማንም አይሰጣችሁም ሰላም የግል ንብረቱ የሆነለት ጌታችን ኢየሱስ ክርስቶስ ነው።

      ሕይወታችን ወደዛም ወደዚህም ማማተር የለባትም ሰላሟ የሞተላት የቀራንዮ ሙሽራ ኢየሱስ ክርስቶስ ነው። ሰላማችሁን የትኛውም ነገር ላይ አትመስርቱ። ሰላሜ ልጄ ነው ስትሉ ልጃችሁ ሲታመም ሰላማችሁን ታጣላችሁ፤ ሰላሜ ስራዬ ነው ስትሉ ከስራችሁ ሲዘጋ ወይም ስትባረሩ ሰላማችሁ ይከስማል፤ ሰላሜ ገንዘቤ ነው ካላችሁ ገንዘብ የምትጠብቁት እንጂ የሚጠብቃችሁ ስላልሆነ ሰላም አይሰጣችሁም፤ ሰላሜ እገሊትና እገሌ ናቸው ካላችሁ እነርሱ ሲለይዋችሁ ሰላማችሁ አብሮ ይለያችኋል።

         ወዳጆቼ ሰላምን በጦርነት አታመጧትም፣ በጠረጴዛ ላይ የሃሳብ መንሸራሸር ሰላምን አትጨብጧትም፣ ጥሩ የሰላም ዜማ በማቀንቀንም አታገኟትም። ሰላምን የትም አትገዟትም ነገር ግን ሰላማችን የእጁ ስጦታ ሳይሆን እርሱ ራሱ ነው።  “እርሱ (ክርስቶስ ኢየሱስ) ሰላማችን ነው" (ኤፌሶን 2፥14-15) ብሏልና። ሰላማችን ክርስቶስ ነው። ከራሳችን ጋር ያስታረቀን፣ ከእግዚአብሔር አብ ጋር ያስታረቀን፣ ከተፈጠርንበት ዓላማ ጋር ያስታረቀን ብቸኛ ሰላም መድኃኔዓለም ነው። ዋጋ ብንከፍል የማንከስርበት ውድ ሕይወታችን ጌታችን ኢየሱስ ክርስቶስ ነው።
         
        አቤቱ የሰላም አለቃ ጌታችን ኢየሱስ ክርስቶስ ሆይ በዚህ ሰዓት ሰላም ላጡ ሁሉ ሰላም ሁንላቸው።
                         

✍አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
              

ጸሎት

የርኅራኄ አባት የመጽናናትም ሁሉ አምላክ የሆነ የጌታችን የኢየሱስ ክርስቶስ አምላክና አባት እግዚአብሔር የሚያነባ እንባችሁን ይመልከትላችሁ፤ የልባችሁን ጩኸት ይስማላችሁ፤ የከበዳችሁን አንዳች ሸክም ያቅልላችሁ።

     አቤቱ እግዚአብሔር ሆይ እኛ የማናየውን የሰዎችን የችግር ጓዳ ታያለህ፤ ለኛ የማይታየንን በሰዎች ልብ ውስጥ ያለውን እንቆቅልሽ ታውቃለህ፤ የእንባቸውን ምክንያት ታስተውላለህ እባክህ ፈዋሽ አይኖችህ ፊትህን በሚሹት ላይ ሁሉ ትረፍ።

    አቤቱ በመከራ የሚያልፉትን፣ በማጣት የሚያልፉትን፣ በጉድለት የሚያልፉትን፣ በጭንቀት የሚያልፉትን፣ በብዙ ውጣ ውረድ ውስጥ የሚያልፉትን፣ በመንፈሳዊ የህይወት መዛል የሚያልፉትን፣ በተስፋ መቁረጥ ውስጥ የሚያልፉትን፣ በመንፈሳዊ ህይወታቸው ቀና ቀና ማለት የከበዳቸውን ሁሉ ረድዔትህ ትድረስላቸው፤ በሚያበረታው መንፈስህ ጎብኛቸው። በምትወደው ልጅህ በጌታችን በኢየሱስ ክርስቶስ ስም ተማጸንኩህ።

                  ✍አዶኒ

Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X
               @adonigospel

    አሁንስ ተስፋዬ ማን ነው? እግዚአብሔር አይደለምን? መዝ 39:7


        ብዙ የባከኑ ዘመኖችን አሳልፈናል። ተስፋዬ ብለን የያዝናቸው ነገሮች እንኳን ለእኛ ለራሳቸውም ተስፋ የማይሆኑትን ነው። ዲቪን ተስፋ አድርገን ኖረናል፣ ከብታሙን ዘመዳችንን ተስፋ አድርገን ኖረናል፣ ስልጣናችንን ተስፋ አድርገን ኖረናል፣ ውበቴ የእንጀራዬ ምንጭ ነው ብለን ተስፋ አድርገን ኖረናል፣ ጉልበቴ ውሎ ይግባ ብለን ጉልበታችንን ተስፋ አድርገን ኖረናል፣ እውቀታችንን ተስፋ አድርገን ኖረናል። ነገር ግን እነዚህ ሁሉ በራሳቸው የቆሙ አይደሉም። እነዚህ ሁለ ከእኛ በፊት የነበሩ ከእኛም በኋላ መኖር የሚችሉ አይደሉም። ሁሉም ይጨነግፋሉ። ነገሮች ተስፋ ቢስ እንደሆኑ ስንወስን በሩን በእግዚአብሔር ፊት ዘጋነው ማለት ነው።
 
        ወዳጆቼ ችግሮቻችሁን፣ ምኞቶቻችሁን፣ እቅዳችሁን ሁሉ ወደ እግዚአብሔር ውሰዱ። በሕይወታችሁ ተስፋ እንደሌላችሁ ወደሚሰማችሁ ደረጃ ከደረሳችሁ እምነታችሁን በግልጽ ችላ ብላችኋል ወይም በእግዚአብሔር ፈቃድ ውስጥ ያልሆነ ነገር ተስፋ ስታደርጉ ነበር ማለት ነው። ስለዚህ አሁንስ ተስፋዬ ማነው? ለምትሉ ተስፋችሁ እግዚአብሔር ብቻ ነው።

        እግዚአብሔር ለእናንተም ከእናንተም በኋላ ለሚኖረው ትውልዳችሁ እንኳን ተስፋ ይሆናል። በግርግም ውስጥ በመጠቅለያ የተጠቀለለ ሕፃን የእግዚአብሔርን መንግሥት በምድር ላይ ምልክት አድርጎ የሰው ልጆችን እጣ ፈንታችንን ለወጠው።

        ተስፋ አድርገናቸው የነበሩ ነገሮች አሁን አንዳቸውም የሉም። እግዚአብሔር ግን አለ። ልባችሁን ከፈለጋችሁት በእግዚአብሔር ላይ ጣሉት።

✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

          እኔ አሳርፋችኋለሁ

“እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።” — ማቴዎስ 11፥28


     ብዙዎችን ስለት ይዘን፣ ጥይት ተኩሰን፣ በድንጋይ ወግረን አልገደልን ይሆናል፤ ነገር ግን ጆሮ በመስጠት ከችግራቸው ሊወጡ የሚችሉትን ሰዎች ጆሮ በመንፈግ ገለናቸዋል። እንባቸውና ንግግራቸው ሕይወታችንን ይረብሸናል ብለን ጆሯችንን ከአገልግሎት መስጫ ክልል ውጭ አድርገንባቸዋል። እኛም ያልሞትነው እኛም የተረፍነው የምንተነፍስበት ስፍራ ቦኪም የሆነ ጌታ ስላገኘን ነው። ወዳጆቼ ለሰዎች የምናወራው ማበርቻ ቃል ባይኖረን እንኳ ችግራቸውን የሚሰማ ጆሮ ልንነፍጋቸው አይገባም።

         ከፍጥረት ውስጥ በቃል የሚበረታ፣ በቃል የሚፅናና፣ በቃል የቆመ ከሰው ውጪ የለም። እግዚአብሔር በቃሉ ከሚያጽናናው ፍጥረት ውስጥ የሰው ልጅ ብቸኛው ነው። ቃል ይጠግናል ቃል ያቆማል።

         ዛሬም በደጃችን የሚያደምጣቸውን የሚሹ በርካታ ወገኖች አሉ። የተበደሉ መንግስት እንዲሰማቸው፣ የታመሙ ሀኪም እንዲሰማቸው፣ የተቸገሩ ወዳጅ እንዲሰማቸው ይፈልጋሉ። ማረፊያ ያጣች ነፍስ ብዙ ናት።

         ሰውነታችን በእጅጉ ሲደክመን የጤና ባለሙያዎች የአካል ብቃት እንቅስቃሴ ማድረግ፣ ጤናማ የአመጋገብ ዘይቤን መከተል፣ በቂ እረፍት ማድረግ አለባችሁ፣ በቀን ውስጥ ከሰባት እስከ ስምንት ሰዓት መተኛት አለባችሁ  ብለው ይመክሩናል። ይህ ጥሩና ተገቢ ምክር ነው። ነገር ግን የሰው ልጅ በእንቅልፍ፣ በእንቅስቃሴና በአመጋገብ የማይፈታ ጉድለት አለበት።

        መንፈሳዊው የሕይወት ክፍላችን በጤና ባለሙያ ሳይሆን በክርስቶስ ብቻ ይታከማል። ጌታችን ኢየሱስ ክርስቶስ ዓለም በፊዚካል ጤና ባለሙያዎች የማታውቀውን መንፈሳዊ ዕረፍት የሚሰጥ ብቸኛ መድኃኒት ነው። ጌታችን ኢየሱስ ክርስቶስ ፈጣሪያችን እንደመሆኑ መጠን ያውቀናል። ድክመታችንን፣ ስብራታችንን፣ ትግላችንን ያውቃል። የሚያስፈልገን እረፍት ጎናችንን አልጋ ላይ በማሳረፍ የሚቀረፍ ሳይሆን ወደ ኢየሱስ ክርስቶስ በመቅረብ የሚፈታ ድክመት ነው ያለን።

       ወደ ነፍሳችን ጥልቀት የሚደርስ እረፍት መስጠት የሚችለው ጌታችን ኢየሱስ ክርስቶስ ብቻ ነው። ወደ ክርስቶስ ስንጠጋ የእረፍት ፕሮግራም አውጥቶ አይሰጠንም እርሱ ራሱ ሌላ የማያስመኝ እረፍት ይሆነናል። ሰው ሻይ ቡና ሊጋብዛችሁ ከዛም ከፍ ሲል ምሳ ሊጋብዛችሁ ይችላል ጌታ ኢየሱስ ብቻ ወደ ራሱ ይጋብዛችኋል።

      ጌታችን ኢየሱስ በከተማው የተከበሩትን፣ በስልጣናቸው ስመ ጥር የሆኑትን፣ በሀብታቸው የታወቁትን ሳይሆን በሕይወታቸው የደከሙትን፣ በዚህ ዓለም የቆሰሉትን፣ በሰው የተገለሉትን፣ አለም አይጠቅሙም ብላ ጡረታ ያወጣቻቸውን ወደ እርሱ እንዲመጡ ጋበዛቸው።

       ጌታ ኢየሱስ ክርስቶስ የዋህ በልቡም ትሁት ነውና እንድንከተለው ራሳችንን በእትሱ ላይ እንድንመሰርት ሕይወታችንን በእርሱ ላይ እንድናንፅ ይፈልጋል። ዛሬም ወዳጅ የምትፈልጉ ኑ ወደ ክርስቶስ፣ ማረፊያ ያጣችሁ አዕምሯችሁ የባከነ ሃሳባችሁ አልጨበጥ የምትኖሩለት ዓላማ ጥፍት ያላችሁ፣ ሁሉ የጉም ዝግን የሆነባችሁ ኑ ወደ ክርስቶስ እርሱ ብቻ እውነተኛ አሳራፊያችሁ ነው።

      ✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

አንተ ክርስቶስ ሆይ

የማናውቀውን ስላወክልን፤

የተረሳነውን ያስታወስከን፤

የማናየውን ያየህልን፤
የምንረግጠውን ቀድመህ የረገጥክልን፣ እሾህ አሜኬላውን ያስወገድክልን፤

የሞትነውን ሕይወት የዘራህብን፤

ከጠፋንበት ፈልገህ ያገኘኸን፤

ከጠላት መንጋጋ ፈልቅቀህ ያወጣኸን፤

ለክፉ መደበቂያ ዋሻችን፣ ለእኛ መሰማሪያ ለምለማችን ነህ፤

ተመስገን! ክብር ሁሉ ለአንተ ይሁን!

✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

“አንተም አምላክህን እግዚአብሔርን በፍጹም ልብህ በፍጹምም ነፍስህ በፍጹምም ኃይልህ ውደድ።”
  — ዘዳግም 6፥5


      እግዚአብሔር የምናመልከው ብቻ ሳይሆን የምንወደው አምላክ ነው። ሰዎችን ከአንገት በላይ በሆነ መውደድ፣ በጊዜያዊ ፍቅር፣ በጥቅም ፍቅር፣ ስሜታዊ በሆነ ፍቅር ልንወዳቸው እንችላለን። እግዚአብሔርን ግን በእነዚህ መውደድ ልንወደው አንችልም። እግዚአብሔርን ፍፁም ነውና ፍፁም በሆነ ልብ፣ ፍፁም በሆነ ነፍስ፣ ፍፁም በሆነ ኃይል ልንወደው ይገባል።

        እግዚአብሔርን በፍፁም ኃይል መውደድ ማለት  ከፍተኛ መጠን ያለው ኃይላችንን ለመንግስቱ ዓላማ ማዋል ማለት ነው። ደምና ላብ ከእንባ ጋር እስኪቀላቀል ማገልገልና መውደድ አለብን። እግዚአብሔር እኛን የወደደን የልጁን ደም አፍስሶ ነው። ደም ላፈሰሰልን ጌታ በሳምንት አንድ ቀን የምንሰጠው ጊዜ አይበቃውም ደማችን እስኪፈስ አጥንታችን እስኪከሰከስ ድረስ ልናገለግለው ልንወደው ይገባል።
       ክርስትና ስም ሳይሆን ተግባር ነው። በመስዋዕት የተጀመረ ሕይወት እንደመሆኑ መጠን የሚቀጥለውም በመስዋዕትነት ነው። አንድ ሰው ትርፍ ለሌለው ነገር ገልበቱን አያፈስም ጉልበቱን የሚያፈስለት ላቡን የሚያዘራለት ነገር ቅድሚያ የሚሰጠው ነገር መሆኑን ያሳያል። ጉልበታችንን ከእግዚአብሔር በላይ አፍስሰን የምንወደው ነገር ሊኖር አይገባም። ለእግዚአብሔር መንግስት እንደመትጋትና ካሎሪን እንደማቃጠል አስደሳች ነገር የለም።

         የክት ልብስ በዓል ሲደርስ ወይም አንዳንድ ፕሮግራሞች ሲኖሩን አውጥተን የምንለብሰው ልብስ ነው። እግዚአብሔር እንደ ክት ልብስ ለአንዳንድ ቀን ሳይሆን ዕለት ዕለት የምንለብሰው የምናጌጥበት የምንኖረው ነጩ ሸማችን ነው።

         እግዚአብሔርን በየቀኑ ውደዱት። መውደዳችሁን ቃሉን በመስማት ደሞም በመታዘዝ ግለፁት። እግዚአብሔርን በፍፁም ኃይሉ ወድዶ ልቡ የተሰበረ፣ ተስፋው የጨለመ፣ ወድዶ የተከዳ የለም። ዕለት ዕለት ራሳችንን በእርሱ እናስደግፈው እርሱን መውደድን እንለማመደው።

          እግዚአብሔርን በጨከነ ፍቅር የመውደድ ቀን ይሁንላችሁ!!!


                  ✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

የክርስቶስ ኢየሱስ የቆሰሉት እጆቹ ይዳብሷችሁ። አሜን

“እንዲሁም፥ ጐበዞች ሆይ፥ ለሽማግሌዎች ተገዙ፤ ሁላችሁም እርስ በርሳችሁ እየተዋረዳችሁ ትሕትናን እንደ ልብስ ታጠቁ፥ እግዚአብሔር ትዕቢተኞችን ይቃወማልና፥ ለትሑታን ግን ጸጋን ይሰጣል።”
  — 1ኛ ጴጥሮስ 5፥5

      " ትሕትና ክፋት ከሞላባቸው ዓይኖች የምትከልል ጋሻ ናት።"

        ትህትና ልብን የሚያስውብ ልብስ ነው። ትህትናን የለበሰ በሁሉ ፊት ሞገስ ያለውና ያጌጠ ነው። ትሁት ሰው ምስጋናም ሆነ ትችት፣ ማግኘትም ይሁን ማጣት በህይወቱ ውስጥ ምንም ዓይነት ትርምስ አይፈጥርበትም። ለእርሱ ሰማይም ምድርም፣ ከፍታም ዝቅታም፣ መጥገብም መራብም ሁለቱም አንድ ናቸው።

  ትሁት ሰው ራሱን ከሰው በላይ የሚያደርግ ሳይሆን ከእኔ አንተ ከእኔ አንቺ የተሻልሽ ነሽ የሚል ነው። በእውቀቱ የማይታበይ፣ በሐብቱ የማይኮራ፣ በውበቱ ትዕቢት የማይዘው ነው።

     አፈር ፍሬያማ የሚሆነው የምድር ውዳቂዎች ሲጣሉበት ነው። በትህትና ራሱን ዝቅ ያደረገ ሰው ዝቅተኛ ቦታን ስለተቀበለ ማንም ሊጎዳውና ሊያዋርደው አይችልም። ይበልጥ ዝቅ ባልን ቁጥር ፍሬያማና ደስተኛ እንሆናለን።

     ትህትና ከእግዚአብሔር የቁጣ ቀን የምትሰውረን ዋሻ ናት። እግዚአብሔር ትሁታንን ይወዳል። ጸጋን የሚያበዛልን እግዚአብሔርን ወደኛ ዘንበል የሚያደርግልን ትሁት ልብን ስንይዝ ነው።

      አቤቱ ትሁቱ ጌታ ክርስቶስ ሆይ ትህትናን አልብሰን።

✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

‘“የጌታ መልአክ ግን በሌሊት የወኅኒውን ደጅ ከፍቶ አወጣቸው”— ሐዋርያት 5፥19

        እግዚአብሔር የደስታ ቀን ወዳጅ ብቻ ሳይሆን የክፉ ቀንም ነው። ሰው የታሰረን ለመጠየቅ ጊዜ አጣሁ ሲል ጌታ ግን አስቸኳይ ስራዬ ወዳጄን መጠየቅ ነው ብሎ ከተፍ ይላል። ሰው ለታሰረ ሰው ዋስ መሆን ሲያቅተው ጌታ ግን እስረኛውን ሊፈታ ይመጣል።
   
       ሕይወት ጀርባ ስትሰጠን መልኳ ሲወይብብን በሚያስፈራ ጨለማ ውስጥ ስትከተን ወዳጅ ያልናቸው ሁሉ ከጨለማው ጋር ያብራሉ እግዚአብሔር ግን በጣም ጨለማ በሆነ ጊዜ ውስጥ ስንገኝ እንኳ ሊያድነን ጨለማችንን አልፎ ይመጣል።

      ሰው ማፅናኛ ቃል ሲነሳን እግዚአብሔር የእጃችንን ሰንሰለት ያወልቃል፣ ብረቱን ይሰብራል፣ ተስፋ መቁረጣችንን ይቆርጣል።

      ከግዞት ነፃ ያወጣናል፣ ከተተበተብንበት ፈትቶ ወደ ሕይወት እቅድ ሊያንቀሳቅሰን ይፈልጋል።

      አቤቱ እግዚአብሔር ሆይ ተአምር የምትሰራ አምላክ ስለሆንክ አመሰግንሃለሁ። መውጪያ መንገድ ማየት በማንችልበት ጊዜ እንኳን እንዴት ሁኔታውን እንደምትለውጥ ታውቃለህና ስለዚህ ጥበብህ አመሰግንሃለሁ። በአንተ በታላቅ ኃይልህ በአስደናቂው ስምህ በጌታችን በኢየሱስ እንታመናለን ክብር ለአንተ ይሁን።

                         ✍አዶኒ


Telegram👉 @adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

በቤታችሁ

     እግዚአብሔር የከበደውን ያቅልላችሁ።
     እግዚአብሔር የጠፋውን ሰላም ይመልስላችሁ።
     እግዚአብሔር የታመመውን ይፈውስላችሁ።
     እግዚአብሔር የራቀውን ያቅርብላችሁ።
     እግዚአብሔር የቀረበውን ክፉ ያርቅላችሁ።
     እግዚአብሔር ፍቅርን ያብዛላችሁ።
     እግዚአብሔር የደስታን ጸጋ ያፍስስላችሁ።
     እግዚአብሔር ክርስቶስን ይግለጥላችሁ።
     እግዚአብሔር እንደልቡ ይስጣችሁ።
     እግዚአብሔር እንግዳ ሆኖ ይጎብኛችሁ።
     እግዚአብሔር ማረፊያ ይሁናችሁ።
       
                   አሜን!


✍በአዶኒ
   
Telegram👉 t.me/adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

የምንጠብቀው ተስፋችን
ጌታችን ኢየሱስ ክርስቶስ


ክብሩን ትቶ ለመሞት መጣ ዳግመኛ ሙታንን ሊያስነሳ እኛንም ሊወስደን ይመጣል።

በስጋ ሲመጣ ንግስናውን ተጠራጠሩ ንጉስ መሆኑንም ጠየቁ፤ ዳግም ሲመጣ ዓለም ሁለ እርሱ የነገስታት ንጉስ የጌቶች ጌታ መሆኑን ያውቃል።

የእሾህ አኪልልን ደፋ፤ ዳግመኛ ሲመጣ የክብር አክሊልን ይደፋል።

የባሪያን መልክ ይዞ በድህነት መጣ፤ ዳግመኛ በስልጣን ይመጣል።

የዋህ ሆኖ በኃጢአተኞች መሀል ለመገኘት መጣ፤ ዳግመኛ በክብር ይመጣል።

ማራናታ
አሜን ጌታ ኢየሱስ ሆይ ቶሎ ና!

✍በአዶኒ
   
Telegram👉 t.me/adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

በድጋሚ የተለጠፈ

             " አራት ቀን ለመኖር
        አምስት ቀን አትጨነቅ "

መዲናችን አዲስ አበባ ላይ ታክሲ በመጋፋት የሚደርስብንን መንገላታት ታክሲው ውስጥ ስንገባ በታክሲው ጣሪያ ላይ የተለጠፉት ጥቅሶች መንገላታታችንን ያስረሱናል። ከምወዳቸው ጥቅሶች መሐል " አራት ቀን ለመኖር አምስት ቀን አትጨነቅ" የሚል ነው።

      እውነት ነው ከምንኖርበት የምንጨነቅበት ይበልጣል። ከቻላችሁ ቀን ተበድራችሁ ኑሩ እንጂ ቀን ተበድራችሁ አትጨነቁ። ስትኖሩ ማድረግ የምትችሉት ነገር እንዳለ ሁሉ ማድረግ የማትችሉት ነገር አለ። ማድረግ የምትችሉትን በእውቀታችሁ በጥበባችሁ ትከውኑታላችሁ፤ ማድረግ የማትችሉትን ብርቱ ክንድ ላለው ጌታ ትተውታላችሁ። መፀለይ እየቻላችሁ አትታገሉ።

          የስራ ባልደረባችሁን ዛሬ አልመጣም ሸፍንልኝ (ተክተኸኝ ስራልኝ) ትሉታላችሁ። መፀለይ እግዚአብሔር በናንተ ፋንታ ባቃታችሁ ጉዳይ ላይ ጣልቃ ገብቶ እንዲሰራላችሁ መጠየቅ ነው። ስለዚህ ፀልዩ ጉዳያችሁን ይስራላችሁ።

       በህይወታችሁ የሚያስጨንቅ ነገር አለ ግን ደግሞ እግዚአብሔርም አለ፤ በኑሯችሁ ብዙ ሸለቆ አለ ግን ደግሞ እግዚአብሔርም አለ፤ በቤታችሁ ብዙ ችግር አለ ግን ደግሞ እግዚአብሔርም አለ። እግዚአብሔር ተአምረኛ አምላክ ነው። እርሱ ውሃን ሰንጥቆ መንገድ የሚያበጅ አምላክ ነው። የተደፈነውን አላንቀሳቅስ የሚለውን ጉዳያችሁን ተረማምዳችሁ የምታልፉበት ድልድይን ያበጅላችኋል። እግዚአብሔር ድንጋዮችን ማዘለል የሚችል ጌታ ነው። እንደተራራ ከፊትህ የተጋረጠውን ጉዳይህን እንደዳማ ጠጠር አዘልሎ ያሳልፍሀል።

       እግዚአብሔር የታመመውን ብቻ አይደለም የሞተውንም የሚያስነሳ መለኮት ነው። ችግርህ ታሞ ቢሆን ያድንልሃል። ጠፋ፣ አከተመ፣ ከሰረ የምትለውን እንኳ ህይወት ዘርቶ ሊያቆምልህ ይችላል። እግዚአብሔር በእጁ መዳፍ ተዓምር የጨበጠ አባት ነው።

       እግዚአብሔር የመርዶክዮስን ፀሎት ለመመለስ፣ የመርዶክዮስን ጉዳይ ለመከወን ንጉሱን እንቅልፍ ነስቶ አሳደረው። ሲነጋ ታሪክ ገልብጦ ሟቹን ሙሽራ፣ ተራውን ሰው ባለ ማዕረግ አደረገው። ያንተንም ያንቺንም ጉዳይ እግዚአብሔር የሚከውንልህን ሰው እንቅልፍ ነስቶ ያስፈፅምልሀል። ያስጨነቀህን ጉዳይ ገልብጦ ያልጠበከውን ከፍታ ይሰጥሀል። ልብህን ከወደቀችበት አንስቶ በሰገነት ያኖራታል። ወፎቹ ስለ ቀጣዩ ምግባቸው አይጨነቁም። እኛም ስለማንኛውም ነገር መጨነቅ የለብንም። አትጨነቁ እግዚአብሔር ምቹ ነው።

“ነገ ለራሱ ይጨነቃልና ለነገ አትጨነቁ፤ ለቀኑ ክፋቱ ይበቃዋል።” — ማቴዎስ 6፥34

✍በአዶኒ
   
Telegram👉 t.me/adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X

ተመስገን

“አንተ አምላኬ ነህ አመሰግንህማለሁ። አንተ አምላኬ ነህ፥ ከፍ ከፍ አደርግሃለሁ፤ ሰምተኸኛልና፥ መድኃኒትም ሆነኸኛልና አመሰግንሃለሁ።”
  — መዝሙር 118፥28

        አንደበቴን አንተ ፈጥረሃል፤ እስትንፋስህንም አንተ ሰተኸኛል። ስለዚህም በሰጠኸኝ አንደበት፣ በፈጠርከው እስትንፋስ አንተን ብቻ አመሰግንሃለሁ። አንተን ብቻ እባርክሃለሁ፣ አንተን ብቻ ከፍ ከፍ አደርግሃለሁ።

        አንተ አምላክ ስትሆን በስጋ ተዛመድከን፣ አንተ ትልቅ ስትሆን በእኛ ልክ ወደእኛ መጣህ፣ አንተ ጌታ ስትሆን የባሪያን መልክ ያዝህ፣ አንተ ሰማይና ምድርን በመዳፍህ ጨብጠህ የያዝህ ስትሆን በክፉዎች እጅ ተያዝህ፣ ዓለምን ሁሉ በሰከንድ ውስጥ አቅልጠህ ማጥፋት ስትችል በትህትና ዝቅ አልህ እንደ ወንበዴም ተቆጠርህ ይህ ለኔ ልዩ ፍቅር ነውና አመሰግንሃለሁ።

        አቁሳይ በሆነች አለም መድኃኒት የሆንከኝ፣ ክፉ በሆነች አለም ላይ ደግ የሆንክልኝ፣ ሲርበኝ አጉራሽ፣ ሲበርደኝ አቄፊዬ፣ ሲጠማኝ እርካታዬ፣ ስቸገር ሀብቴ የሆንክልኝ አንተን የናዝሬቱ ኢየሱስን አመሰግንሃለሁ።

        ጥቂት ለመንኩህ አብዝተህ ሰጠኸኝ፣ ትንሽ አንኳኳው ብዙ ደጅ ከፈትክልኝ ስለማይቆጠር ስጦታህ ስለማይከፈል ውለታህ አመሰግንሃለው።

       ብዙ ዘመን አሳዘንኩህ፣ ብዙ ዘመን በደልኩህ አንተ ግን ብዙ ዘመን ራራህልኝ፣ ብዙ ዘመን ይቅር አልከኝ፣ ሁሉን ይቅር ብለህ ተሸከምከኝ። ዛሬም ጽኑ ታማኝ፣ ቋሚ ወዳጅ፣ እውነተኛ አፍቃሪ ሆነህ ከእኔ ጋር ስላለህ አመሰግንሃለሁ።

       በቸር አውለኝ፣ ቅጥር ሰርተህ ጠብቀኝ፣ በደምህ ጋርደኝ። አሜን
      
✍በአዶኒ
   
Telegram👉 t.me/adonigospel

   Whatsapp👉 https://chat.whatsapp.com/BnTcBA0mML6E7gakQUIJ8X