🌹ትንሹ ሔኖክ

❤ አንቺ ነሽ እናቴ

🌹ትንሹ ሔኖክ

ወላዲተ አምላክ ድንግል የኔ እናት
እንደ አንቺ ማን አለ ነፍሴን ያስደሰታት
ሰላምና እረፍት ጤና የሚገኘው
መድኃኒት ከሆነው ከፍቅርሽኮ ነው
ጊዜው እየሄደ ቀኑ እየጨለመ
ኃጥያትን በመውደድ ሁሉ እየጠመመ
እውነት እርህራሄ ሃይማኖት ተገፍቶ
እንሰሳ ሲወደድ የሰው ልጅ ተጠልቶ
አንዱ ለአንዱ በሽታ ችግር በሆነበት
ፍቅር መተሳሰብ እምነት ከጠፋበት
ከጨለማ ጊዜ ከሚያስጨንቅ አለም
ከአንቺ ፍቅር ሌላ የሚያሳርፍ የለም
እናም የኔ እናት ንጽህተ ንጽሂቷ
ለነፍሴ ጠባቂ ሁኚ መሰረቷ
ከማስመሰል ውሸት ከክፋት ጠብቂኝ
ቂም በቀል ጥላቻን ከልቤ አርቂልኝ
ትላንት እንዳለፈ ዛሬም ያልፋልና
ወደ ታች እንዳልሄድ ሁሌ አድርጊኝ ቀና
የላይኛው ቤቴን ዘወትር አሳስቢኝ
ልጄ በርታ እያለሽ በጎውን አሳዪኝ
ዲያቢሎስ በወጥመድ ምትሀቱ አታሎ
ጠልፎ እንዳይጥለኝ ጠቅምሀለው ብሎ
በክፋቱ ስራው ዘብዝቦ ዝብዝቦ
እንዳይዘብትብኝ ጭፍራውን ሰብስቦ
ቀድሞ እንዳሸነፍሺው በንጹህ ልቦና
ባዶ እንዳስቀረሺው በፍጹም ትህትና
ይህን መልካም ምግባር ጸጋሽን አልብሰሽ
ነፍሴን አስመልጪያት ቀሚስሽ ስር ከተሽ

❤ እናቴ! ሁሌም ለነፍሴ የሚጠቅመኝን የሚበጀኝን የሚያዋጣኝን እያደረግሽ ዛሬ አድርሰሺኛል። እኔ ነገን ፈጽሞ ማሰብ አልፈልግም። ሁሌም በህይወቴ የምናፍቀውና ለመኖር የምጓጓበት ምክንያት ቢኖር ትላንት ያደረግሺልኝንና ዛሬም እያደረግሺልኝ ያለውን ነገር አንቺን ለሚወዱና እውነትን ለሚኖሩ ልጆች ለመንገር ነው።

❤ ሁሌም አይኖቼ ሲበሩ ልቦናዬ ወደ ኃላ ይጓዙና በመንገዴ ለነፍሴ ምግብ መጠጥ ልብስ ጫማ ሆነሽ ያደረግነውን ጉዞ በማሰብ እጅግ ደስ እሰኛለሁ። እኔ ለአንቺ ባልገባም አንቺ ግን "ልጄ እሱን ለኔ ተወው" ብለሽ ከነ ንግስና ክብርሽና የብርሀን ልብስሽ ዝቅ ብለሽ እኔ ትንሽ ኃጥያተኛ ደሀ ቆሻሻ፣ አለምና ሰው የናቁና የጠሉኝ፣ ለምንም የማልጠቅመውና ሰው ለመባል ብዙ ነገር የሚጎድለኝን ትንሽ ፍጡር ልጄ ነህ አልሺኝ። እናም እናቴ ባልገባሽም አንቺ ከወደድሺኝ በደስታና ቡ
በምስጋና እስከ ዘልዓለም የአንቺ መሆንን እመርጣለሁ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ ንቃ

🌹ትንሹ ሔኖክ

ወዳጄ አስተውል! ሁሉም ነገር ከእግዚአብሔር ህግ ውጭ ለማድረግ ስታስበውና ስታደርገው እጅግ በጣም ደስ የሚል ነው። እርሱ ይህን ይህን አትፈጽሙ ብሎ የተናገራቸው ነገሮች ለኛ የማይጠቅሙንና ነገ ውሎ ሲያድር ይዘውብን የሚመጡት መዘዝና ክፍያቸው "ምን ነው ይህን ለምን ፈጸምኩ" ብለን የምናማርርበትና ህይወታችንን መውጫ ወደ ሌለው ችግር መከራና ስቃይ የሚከቱ ናቸው።

❤ ነገር ግን እኛ ዛሬ በራሳችን ያሰብነውን ነገር መፈጸማችንን እንጂ ነገ ላይ የሚመጣብንን አናውቅምና ሁል ጊዜ ኃጥያትን ለመፈጸምና ከእርሱ ትዕዛዝ ውጭ ለመጓዝ እንፈጥናለን። ወዳጄ! ሁሉም ሰው ዛሬ የሚያደርገው ነገር ነገ የሚያመጣበትን መዘዝ ቢያውቅ አንድም ጠማማ ነገርን ባላደረገ ነበር።

❤ አዎ ወዳጄ! ጾም ጸሎት ስግደትና ምጽዋትን መፈጸም ለእግዚአብሔር ብለን የምናደርጋቸው። እርሱ በግዴታ ደስ እንድናሰኘው ስለፈለገና ነጻነታችንን ሊያሳጣን ፈልጎ ያወጣቸው ህጎች ናቸው ብለን እናስባለን። ለዛም ነው እነዚህን ለመፈጸም ባሰብን ቁጥር ተራራ መግፋት የሚሆንብን።

❤ ነገር ግን እነዚህን በማድረጋችን በሰውነታች በቤታችን በስራችንና በኑሯችን ሁሉ የምናገኘውን ሰላም ጤና ደስታ እረፍት ረድኤት በረከትና መልካም ነገር ሁሉ አናስበውም። ስለዚህ ዲያቢሎስ እነዚህን ተራራ አድርጎ ይጽፍብንና ያለልክ መብላት መጠጣት መዝፈን መደነስ መስረቅ ማጭበርበር መዋሸት ቂም በቀል ጥላቻ ተንኮል ክፋት ምቀኝነትና በአጠቃላይ የሱ የሆነውን ሁሉ ስንፈጽም የምናገኘውን ቅጽበታዊ ደስታ ያሳየናል።

❤ ነገር ግን በእነዚህ ነገሮች ምክንያት ራሱ የሚያመጣብንን የችግር የመከራ የስቃይ የለቅሶ የምሬት ብዛት አያሳየንም። እኛም መግባታችንን እንጂ ከገባን በኋላ ያለውን ነገር አናውቅምና የምናየውና የምናደርገው ነገር እንዳሰብነው፣ እንዳየነውና እንደሰማነው ደስ የሚልና የሚጠቅም ይመስለንና እንፈጽመዋለን።

❤ ከዛም መግባታችንን ያወቀው ራሱ ዲያቢሎስ ይኸው ልጄ ያልካት ነፍስ እኔን ሰምታና ፈቃዴን ተከትላ ይህን ፈጽማለች። ከዚህ በኋላ እሷ የኔ ገንዘቤ ናት ብሎ ወደ እግዚአብሔር ያማለከትብናል። እግዚአብሔርም ይህን በተመለከተ ጊዜ እያዘነ ከጥፋታችን እስክንመለስ በትዕግሥት ይጠብቀናል። ያኔ እኛን ጠላታችን ዲያቢሎስ በግልጽ ያገኘናል።

❤ የሱ ደስታ የኛ ስቃይ ነውና በእጁ ከገባን በኋላ በበሽታ በደዌ በችግር በሀሳብ በጭንቀትና እሱ በወደደው መንገድ በቤታችን በስራችን በቤተሰባችን በትዳራችን በገንዘባችን በአጠቃላይ በኑሯችን እጁን እየከተተ እንዳሻው ይጫወትብናል።

❤ እኛም ሁሌ ከእግዚአብሔር ውጭ ነገሩን ያደረግንበትን ቀን እየረገምን፣ ምን ነው በታገስኩ በጠበቅኩ በማለት እየተጸጸትን በለቅሶ በቁጭት በሀዘን በእሳት ውስጥ እንኖራለን። ዛሬ የሰው ልጅ ህይወት ይሄ ነው። ወዳጄ ከእግዚአብሔር ህግ ውጭ ሆነው ደስተኛ ባለጠጋ ጤነኛ ዝነኛ ትልቅና ስኬታም የሚመስሉህና እነሱም ነን የሚሉ ሰዎች ሁሉ ቤታቸው ስራቸውና ውስጣቸውን ብትመለከት በፍጹም አንተ እንደምታስበውና እነሱም እንደሚሉት አይደለም።

❤ ወዳጄ ከእግዚአብሔር ፈቃድ ውጭ ያለ ሀብት ገንዘብ ስልጣን እውቀት ሀይል ጉልበትና የአለም ነገር ሁሉ እን ደመና ነው። ያዩታል እንጂ አይጨብጡትም አይዳስሱትም። ለዚህም ነው ጠብ ባለበት ከሚገኝ ጮማና ቁርጥ ይልቅ በጸጥታ የተገኘች ጥሬ ትበልጣለች ሲል መንፈስ ቅዱስ በጥበበኛው ልጁ አድሮ የተናገረው። እናም ወዳጄ ዛሬ ደስ የሚያሰኝህ ነገር ኋላ የሚያመጣብህን ለቅሶ፣ ያለ ህጉ የምትበላ የምትጠጣው የሚያመጣብህን በሽታ፣ ያለ ፈቃዱ የምታደርገው ድርጊት ሁሉ ኋላ የሚያደርስብህን መከራና ስቃይ፣

❤ ከትዕዛዙ ውጭ የምትሄድበት መንገድ የሚያርስህ ከመቃብርህ ቦታ መሆኑን አስተውለህ ላለፈው ድርጊትህ ንሰሀ በመግባት፤ ለዛሬና ለሚመጣው ደግሞ ቅዱስ ስጋና ክቡር ደሙን በመቀበል ተዘጋጅተህ ከእግዚአብሔር ጋር ለመኖር ወስን። አይምሰልህ! ህይወትህ በሰከንዶች በሚጠር ነገር ወደ ባዶነትና ለቅሶ የሚለወጥ ነው። አለኝ የምትለው ነገር ሁሉ አንተን ለመሸሽ ደቂቃዎች አይወስድባቸውም።

❤ ይህን የነገርኩህን ባታደርግ ግን የፈለገ ብታለቅስ፣ ብታዝን፣ ብትጨነቅ፣ ብትወድቅ ብትነሳ፣ ገንዘብ ለቤተክርስቲያን ብትሰጥ ባትሰጥ፣ አንተ ደስታዬ ሰላሜና ጤናዬን ይመልሱልኛል፤ ረድኤት በረከትና መልካም ነገርን ያመጡልኛል ብለህ የምታስበውን የትኛውንም ነገር ብታደርግ የሚስተካከል ነገር አይኖርም።

❤ ወዳጄ አስተውል! እግዚአብሔር ከአንተ የሚፈልገው አንተን ብቻ ነው። አንድ ልጁን ልኮ በህማም አልፎ በመስቀል የተሰቀለው ለአንተ ነው። አስቀድማችሁ መንግስቱይ እሹ ሄላው ሁሉ ይጨመርላችኋል ያለው ለዚህ ነው። አንተ በእሱ ፈቃድ ከኖርክ አንተን ማብላት ማጠጣት ማልበስ ጤናህን ደስታህን ሰላምህን መጠበቅና አንተን በሁሉ ነገር ከፍ ከፍ ማድረግ የሱ ስራ ይሆናል። ያን በማድረጉ እሱም ደስተኛና ተመስጋኝ ይሆናል። እከሌን አታዩትም እግዚአብሔር እንዴት እንደሚያኖረው እየተባልክ በአንተ ምሳሌነት ብዙ የጠፉ እህት ወንድሞችህን ልጆቹን ይሰበስብብሀል። እሱን አምኖ የተጎዳ አንድም ፍጡር የለም🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

✝️
ወዳጄ! ትላንትና ላይ ሆነህ ዛሬህ የሚያሳስብህ የምትፈራውና የምትጨነቅበት ነበር። ነገር ግን ሁሉ እንዳልከው አልሆነም። እንዲሁ ዛሬ ስለ ነገህ የሚስጨንቅህና እንዴት እሆን ይሆን የምትለው ብዙ ነገር አለ። ነገር ግን እግዚአብሔር ነገንም እንደ ዛሬ ያደርስህና በቸርነቱ እንደሚገባት ያኖርሀል።

🌹ትንሹ ሔኖክ

❤ እግዚአብሔር ሀያል ነው

🌹 ትንሹ ሔኖክ

ወዳጄ እግዚአብሔር ለሁሉ እንደ ድካሙ፣ እንደ ትዕግስቱ፣ እንደ ማስተዋሉ፣ እንደ መገፋቱ፣ እንደ መጠላቱ፣ እንደ መቸገሩ፣ እንደ ማጣቱ፣ እንደ መዋረዱ፣ እንደ መናቁ፣ እንደ መገለሉ፣ እንደ ድካሙ፣ እንደ የዋህነቱ፣ እንደ ቅንነቱ፣ እንደ ርህራሄውና እሱን እንደ መፍራትና እውነትን ለመኖር እንደ መጣሩ ዋጋን ይከፍላልና ፈተናው በበዛብ፣ ችግር በበረታብህና መከራ በጸናብህ ጊዜ ክፉ ሀሳብን በማሰብ ብልግናና ኃጥያትን በማድረግና የእሱን ትዕዛዝ በመተላለፍ አታሳዝነው።

❤ ወዳጄ! ሀዘን ችግር መከራና ፈተናን ጸንተህ ካለፍካቸው ኋላ በሚያሰጡህ ዋጋ የምታገኘው ሰላም ደስታ ጤና እረፍት ጥበብ እውቀትና በረከት "አምላኬ ይህ ለኔ አይገባም ብለህ በደስታ ታለቅሳለህና" ተስፋ በመቁረጥና ኃጥያትን በመስራት በጊዚያዊ ፈተና የዘላለም ዋጋህን አትለውጥ።

❤ በርግጥ ዲያቢሎስ አንተን ነዝንዞና ገዝግዞ ከመጣል ሌላ ስራ የለውምና በነገ በጠባ፣ በጠዋት በቀን በማታ በለሊት ጠባይ ባህሪና መንገዱን እየለዋወጠ በብዙ ይፈትንሀል። ስለዚህ አንተም በእነዚህ ጊዚያት ማስተዋል ጥበብ ትዕግሥት እምነት ሀይልና ጽናት ይሆንህ ዘንድ እግዚአብሔር አምላክህን ተግተህ ስለ ነፍስህ አሳስበው።

❤ ወዳጄ! ደሀ በርሀብ በችግር በማጣት ቢፈተን፤ ባለጠጋ በጥጋብ በገንዘብና በማግኘት ይፈተናል። ደስ የሚል የመሰለህ ሁሉ ደስ የሚል አይደለም፣ መልካም የመሰለህና ጓጉተህ የምትመኘውም እንደምታስበው መልካም አይደለም፣ ዘወትር እግዚአብሔርን ስጠኝ የምትለው አብዛኛው አንተን ከሱ የሚነጥልህና የሚያጠፋህን ነገር ነው። ምንም ነገር በሩቁ በሰዎች ዘንድ ስታየው ደስ የሚል መልካም በጎና ጠቃሚ ይመስልሀል። ነገር ግን ቀርበህ ስታየውና በእጅህ ሲገባ አንሶ የሚታይህ ነው።

❤ ስለዚህ ወዳጄ! ወደ አንተ የሚመጣና የማይመጣውን፣ የሚጠቅምና የማይጠቅምህን፣ ወደ ኪስህ ቤትህና ህይወትህ የሚገባና የሚወጣውን እግዚአብሔር የፈቀደውና እሱ የመረጠልህ እንዲሆን በቤትህ በነፍስህ በልብህ በአእምሮህ በሰውነትህና የአንተ በሆነ ነገር ሁሉ ላይ እግዚአብሔርን ሹመው።

❤ እርሱ ያመኑትን ሁሉ ከመናቅ አንስቶ አክብሯቸዋል፣ ከትንሽነት አንስቶ ታላቅ አድርጓቸዋል፣ ከወደቁበት አንስቶ ከፍ ከፍ አድርጓቸዋል፣ ከችግር አውጥቶ ባለጠጋ አድርጓቸዋል፣ ከደካማነት አንስቶ ሀያል አድርጓቸዋል፣ ከብቸኝነት አውጥቶ ህዝብ አድርጓቸዋል፣ ከባርነት አንስቶ ንጉስ አድርጓቸዋል፣ ከባዶነት አንስቶ ሙሉ አድርጓቸዋል፣ ካለማወቅ አንስቶ ጥበበኞች አድርጓቸዋል፣ ከድንቁርና አውጥቶ እውቀተኞች አድርጓቸዋል፣ ከመገፋት ጠብቆ ተወዳጅና ተደናቂ አድርጓቸዋል። እንዲሁ በተቀራኒ ነን ያሉትን አዋርዷቸዋል። በራሳቸው የተመኩና በገዛ ማስተዋላቸው የተደገፉትን በቅጽበት ከመኖር ወዳለመኖር ለውጧቸዋል።

❤ እናም ወዳጄ! ዛሬ እንደ ትላንትህ እንዳልሆነ ሁሉ ነገህም እንደ ዛሬ አይሆንም። ዛሬ በዙሪያህ ያሉ ሰዎችና የሚገጥሙህ ፈተናና የህይወት ገጠመኞች ነገ በአንተ ህይወት ምንም ማድረጋ የማይችሉ በድኖችና በምናብህ እያሰብክ በእግዚአብሔር ስራ የምትደነቅባቸው ታሪኮችህ ይሆናሉና ዛሬን እንደ መጨረሻ ቀን በማሰብ ምሬት፣ ንዴት፣ ብስጭት፣ የመረረ ሀዘን፣ ቁጭት፣ እልህ፣ ጸጸት፣ ተስፋ መቁረጥ፣ ቂም በቀል ጥላቻና ክፋት ተንኮልን ከአንተ አርቃቸው።

❤ ደግሞም! እግዚአብሔር ርቆኛል አትበል። እርሱ የሚጠላውን በመውደድ፣ ቃሉን ባለማድመጥ፣ ህጉን ባለማክበርና ትዕዛዙን ባለመፈጸም የተውከው የሸሸኸውና የራቅከው አንተ እንጂ እሱ አልራቀህም። እንደምትለው ለደቂቃ ቢተውህ ጠላትህ በሰከንድ ባጠፋህ ነበር። ዙሪያህን በማስተዋል አልተመለከትክም እንጂ እሱ ከምትተነፍሰው አየር ጀምሮ በአንተ ህይወት የለሌበት ነገር የለም።

❤ የሌለ የመሰለህ እንደ ባህር ከሰፋው የእርሱ ስራ ይልቅ እንደ ነጥብ የሆነችውን የዲያቢሎስ ስራ በማየትህና በቁስና ከንቱ የአለም ነገር የሚያስፈራራና የሚያስጨንቅህ የሰይጣንን ድምጽ መስማት በመውደድህ ነው። እግዚአብሔር ሀያል ነው። ስሙም እግዚአብሔር ነው ✝️

✝️ ስለ ሁሉ እግዚአብሔር የተመሰገነ ይሁን🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ተመለሺ

የንጽህና ህይወትሽ እጅጉን ያማረው
ውበት ደምግባትሽ ልቤን የማረከው
ትህትና ፍቅር ፍሬዎችሽ ሆነው
የተራበው አዳም በአንቺ የጠገበው
የአብቃል ማደሪያ የተዋህዶ ኮከብ
ለነፍስ ይበጃታል በስርሽ መሰብሰብ
ጸሀይ የወጣብሽ የብርሀን መገኛ
አይናችን ነሽ ማርያም ለታወርን ለኛ
አለም በቅናቷ ክፋት የጠላችሽ
መድኃኒት ሆኖ ነው የታቀፍሺው ልጅሽ
አረመኔው ገዳይ ሄሮድስ ሞቷልና
ተመለሺ እናቴ ሀሰት ጠፍቷልና
አስራትሽ የሆነች የስደትሽ ፍሬ
ፍቅር አንድነትን የጠላች ሀገሬ
ወደ እምዬ ኢትዮጵያ ባክሽ ተመለሺ
ምግባር ሃይማኖቷን ሞገሷን መልሺ

🌹ትንሹ ሔኖክ

❤ አለምና ተዋናዮቿ

🌹 ትንሹ ሔኖክ

ወዳጄ በዚህች አለም የሚኖሩ ሰዎች በአንድነት ተዋናዮች ከሆኑ ዘመናት አልፈዋል። እግዚአብሔርን በመፍራትና በመረጋጋት በአንድ ማንነት ጸንቶ በምድር በረከትና ሰማያዊ አክሊልን ከመቀናጀት ይልቅ፤ በጊዜ ቦታና ሁኔታ ማንነትና ባህሪን በመለዋወጥ ራስን እያታለሉ የዲያቢሎስ እቃ ሆኖ መኖር እንደ ብልጠት፣ እውቀት፣ ስልጣኔና ባለጠግነት የተቆጠረበት ጊዜ ነው።

❤ ጠዋት አስታራቂ የነበረው ሰው ከሰዓት ሲሳደብና ሲዝት፣ ከሰዓት ምስኪን አሳዛኝና መልካም የነበረው ሰው ማታ አውሬ ክፉ ጨካኝ አረመኔ ሆኖ ታገኘዋለህ። እየተቅለሰለሰ እየሳቀና እየቀለደ አብሮህ ሲጫወት የነበረው ሰው ወዲያው ሲከስህ ሲበሳጭብህና አይኑ ደም ለብሶ ሊያጠፋህ ሲጣደፍ በአይኖቹ ውስጥ ጥላቻና በቀልን ትመለከታለህ።

❤ ደግሞ! የኔ ሰው ሚስጥረኛዬ ጓደኛዬና ቤተሰቤ ነው ብለህ ብዙ ነገር ያሳየኸውና ያጫወትከው ሰው አንተ የማትወድ የማትፈልግና የሚጎዳህን ነገር በደስታ ሲያደርግና ምንም እንደማያውቅህ እንደ እንግዳ ሲያሳድድህ ታገኘዋለህ።

❤ ወዳጄ! አዎ ይሄ ስጋ የለበሱ አጋንንቶች እንጂ የሰዎች ጊዜ አይደለም። ፍቅር፣ ሰላም፣ እናት አባት፣ እህት ወንድም፣ ባል ሚስት ልጅነት ሁሉ ትወናና ብዙ ጉድ የያዘ ሆኗል። ለራስህ ህግ አውጥተህና ድንበር አበጅተህ በጣም በስርዓትና በምግባር ጸንተህ በሃይማኖት የምትኖር ካልሆነ ከዚህ የድራማ ወረርሺኝ ማምለጥ ፈጽሞ አትችልም። እንደውም መሪ ተዋናዩ አንተ ትሆናለህ። ያው እንደ ዛሬ እኔና አንተ ማለት ነው።

❤ ወዳጄ እስቲ ልጠይቅህ! ራስህን ከአንተ በላይ የታዘበ ማን አለ። በውሸትህ
በማስመሰልህና ለብቻህ ስትሆን በምታደርጋቸውና በሰዎች ፊት ባለህ ባህሪ ራስህን ስንቴ ትታዘበዋለህ። ቆይ እስቲ ንገረኝ አርቲስት ተብለው ገንዘብ ከሚሸለሙ በብዙ እጥፍ እንደምንበልጣቸው አላሰብክምን። እነሱ ጽሁፍ ተሰጥቷቸው በብዙ ልምምድ ይተውናሉ። እኛ ግን ያለምንም ልምምድ በሰከንዶች በሚፈጠር ገጠመኝ በእውነት ህይወት በቀላሉ ያለ ስህተት እንተውናለን።

❤ ድሮ ልጅ እያለሁ ወላጅ እናቴ በሰከንዶች ባህሪዋ ጸባዩዋና ንግግሯ ሲቀየር እንዴት ቻለችው ብዬ በጣም እገረምባት ነበር። ከዛ ግን ከፍ ስል የሰው ሁሉ መግባቢያ ቋንቋ ሆኖ አገኘሁት። ቂም በቀል ጥላቻን በልብ ይዞ አብሮ መብላት መጠጣት መሳቅ መጫወት። ክፋት ተንኮልና ጥፋትን እየተመኙለት ለሰውየው በጎ መምከር። ብቻ በአጠቃላይ በዚህ ዘመን ሰይጣን በምድር በእያንዳንዳችን ላይ እንጂ በሲኦል እንደሌለ ግልጽ ነው።

❤ ሀዘናችን የከንፈር፣ ሳቃችን የጥርስ፣ ቤተሰብ ጓደኝነታችን የስም፣ መልካምነት ሃይማኖተኝነታችን የታይታ፣ አብሮ መብላት መጠጣታችን የክፋት፣ ምክር ተግሳጽ ሰጪነታችን የቅናት፣ በጎ ድርጊታችን ሁሉ የጥቅም። አቤት በሽታ። አለመታደል ማለት እንዲህ ነው። ሰው ሆኖ ተፈጥሮ እንደ እንሰሳ መኖር። የውሸት ኖሮ የእውነት መሞት።

❤ አቤቱ በልቡ ክፋትን ተሞልቶ በአንደበቱ መልካም ነገርን ከሚናገር ክፉ ወዳጅ ጠብቀኝ። እሺ እሺ፤ አዎ ልክ ነህ እያለ በውሸት ክፋትን ከሚፈጽም አስመሳይ ወዳጅ ዘመድ ጓደኛ ሆኖ ስርን ከሚምስ ክፉ ሰውረኝ። ይህን ዘመን ያለ አንተ ቸርነት፣ ያለእናትህ አማላጅነት፣ ያለቅዱሳኖችህ እርዳታ ማን በራሱ መልካም ስራና ጥረት ይሻገራል። ፈጽሞ ያለ አንተ ተውሎ የሚታደርበት ዘመን አይደለም🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ገብረ መንፈስ ቅዱስ

🌹 ትንሹ ሔኖክ

እምነት ሃይማኖቱን በስራ የገለጠ
ቃልኪዳኑ በዝቶ ፍቅሩ የጣፈጠ
በምድር ተፈጥሮ በንጽህና የኖረ
ጨቅላ ሆኖ ገና ገድልን የጀመረ
ጸጉር ልብስ ሆኖለት ገላውን ሸፍኖ
በጫካ የኖረ አምላኩን ተማምኖ
የዝቋላ ንጉስ የኢትዮጵያ ወዳጅ
ክፉ ጠላቶቿን ሁሉንም አሳዳጅ
ገብረ መንፈስ ቅዱስ ታላቁ አባታችን
እጅግ ደስ ይለናል ልጅህ በመሆናችን

❤ ወዳጄ የቅዱሳን አባቶቻችን ገድላቸው የተጻፈልን እንድናመልካቸው አይደለም። እኛ አንድ አምላክ አለን እርሱም እግዚአብሔር አብ፣ ወልድ ኢየሱስ ክርስቶስና መንፈስ ቅዱስ ነው። ቅዱሳን ለኛ ብዙ ጥቅምና ዋጋ አላቸው። የክርስትናን ህይወት በተለይ በዚህ ዘመን እንዴት በጥበብ መኖር እንደምንችል ያስተምሩናል። ከዛ ባለፈም በቃልኪዳናቸው ይረዱናል ይደግፉናል ያማልዱናል።

❤ ይህ ለኛ ለምናምንና እነሱ ለወደዱት ይሆናል። ለኔ አባቴ ገብረ መንፈስ ቅዱስ ያደረጉልኝን ጽፌ ተናግሬ አልጨርሰውም። ለእርድ የተዘጋጀሁት በእለተ ቀናቸው ነበር። ግን አራጁን ታራጅ አደረጉት። ተመስገን 🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ ህይወትህ የአንተ መሆኗን አትርሳ

🌹ትንሹ ሔኖክ

❤ ጌታችንና መድኃኒታችን ኢየሱስ ክርስቶስ በስጋ በምድር ሳለ በሚሄድበት የሚሄዱ፣ በሚውሉበት የሚውሉ፣ በሚያድርበት የሚያድሩ በርካታ ሰዎች ነበሩ። ከአምስት ገበያ ህዝብ በላይ ይከተለውም ነበር። ታድያ ከእነዚህ መሀከል ወደውትና አምነውት ይከተሉት የነበሩት እርሱ ራሱ የመረጣቸው ቅዱሳን ሐዋርያት፣ ሰባ ሁለቱ አርድእትና ሰላሳ ስድስቱ እንስት ቅዱሳኑ በነበሩ።

❤ ሌሎች ከሚከተሉት አንዳንዶቹ በትምህርቱ የተደሰቱና የሚወዱት መስለው ልባቸው ጥላቻን የተሞሉና ስህተትን የሚፈልጉበት ጸሐፍት ፈሪሳውያንና የሙሴ ህግ መምህራን ነበሩ። ሌሎቹ ደግሞ ይሄ እኛ የምናውቀው የአናጢው የዮሴፍ ልጅ አይደለምን እያሉ በመናቅ ለማሾፍና ለመቀለድ የሚከተሉት ነበሩ። ሌሎቹ ደግሞ እንዲሁ ሰው ስለተከተለው በመጠራጠርና የሚሰራው ታምራትን ለማየት ብቻ የሚከተሉት ነበሩ።

❤ ሌሎች ደግሞ ይሄ ሌባ አጭበርባሪና ሀሰተኛ መሲህ ነው። ስለዚህ መጨረሻው ምን እንደሆነ ሲዋረድ እንይ ብለው የሚከተሉት ነበሩ። ሌሎች ደግሞ ከበሽታ ይፈውሳል ስለተባለ የታመሙ ቤተሰብ ወዳጅ ዘመዳቸውን ይዘው የሚከተሉት ነበሩ። ሌሎች ደግሞ ምግብ ይመግባል ሲባል ሰምተው ለመመገብ የሚከተሉት ነበሩ። ታድያ ከዚህ ሁሉ ህዝብ መሀከል በመስቀል ላይ በተሰቀለ ጊዜ ከስሩ የተገኙት አስቀድሞ እሱ ይወደው የነበረው ወንጌላዊ ዮሐንስ እናቱ ቅድስት ድንግል ማርያምና መቅደላዊት ማርያም ናቸው።

❤ ወዳጄ! ይህ በክርስቶስ ምሳሌነት ለየትኛውም የሰው ልጅ መማሪያ ይሆን ዘንድ የተጻፈ የእውነት ቃል ነው። ዛሬ በዙሪያህ ያሉትን ሰዎች በማስተዋል ብትመለከታቸው ከላይ በተጠቀሰው ማንነት ውስጥ ተቀምጠው ታገኛቸዋለህ።
ነገር ግን ይህን ለማወቅ አንተ ከእውነት ጋር የጸናህ ሰው መሆን አለብህ።

❤ ለምሳሌ እኔን በጣም የሚወዱኝ የሚያከብሩኝና በኔ በትንሹ አድሮ ባለቤቱ በሚጽፋቸው ጽሁፎች ራሳቸውን የለወጡ ከሱስ የወጡ፣ ከክፋት የተመለሱ፣ ትዳራቸውን ያስተካከሉ፣ ራስን ከማጥፋት የተመለሱ፣ ንሰሀ በመግባት የቆረቡና ከብዙ ብዙ የህይወት የስህተት መንገድ የተመለሱ ብዙ ሰዎች በተለያየ መንገድ በህይወታቸው የሆነውን ያጋሩኛል።

❤ ደግሞም አጠገቤ ሆነው የሚጠሉኝ፣ የሚንቁኝ፣ የሚያጣጥሉኝ፣ ከኔ ጋር ጸብ፣ ስድብ፣ ክርክር፣ እልህ መጋባት፣ የሚፈልጉ። ለምን አይቼው፣ ለምን ድምጹን ሰምቼ፣ እሱ ሌባ፣ አጭበርባሪ፣ አስመሳይ ክፉ ሰው ነው የሚሉና ብዙ ብዙ የሚያወሩ ብዙ ሰዎች አሉ። ደግሞም ከሩቅ ሰላምታ ውጭ አንድ ደቂቃ አብረውኝ ሳይቀመጡ ብዙ ብዙ የሚሉ ብዙ ሰዎችም አሉ። ነገር ግን እነዚህ ሁሉ እነሱ የመሰላቸው፣ የገመቱትና ነው ብለው ያሰቡትን እኔን በማሰብ ከምናባቸው ጋር ይታገላሉ እንጂ አንዳቸውም እኔን ፈጽሞ አያውቁኝም።

❤ ደግሞም የሚወዱኝም ሆነ የሚጠሉኝ በቀን ውስጥ በህይወቴ የማደርገውን የነፍስም ሆነ የነፍስ ስራዬን ፈጽሞ አያስተጓጉሉም። ደግሞም የሚጨምሩልኝም ሆነ የሚቀንሱብኝ ነገር የለም። ወዳጄ በሰዎች መወደድ መጠላት መከሰስ መወንጀል መሰደብ መናቅ መገፋት የህይወት መንገድ ፍሬ ነው። ትልቁ ስህተትህ የሚሆነው የሚወዱህ የሚያደንቁህና መልካም የሆኑልህ ሰዎችን ስታገኛቸው ደስታና ኩራት ተሰምቶህ ቆመህ ከእነሱ ጋር ጊዜ ስታሳልፍ ከመንገድህ መዘግየት።

❤ የሚጠሉህ፣ የሚነቅፉህ፣ የሚከሱህ፣ የሚወነጁልህና ስምህን የሚያጠፉ ሰዎች ሲገጥሙህ ቆመህ የምትናደድ የምትበሳጭ የምታዝን እልህ የምትገባ የምትሳደብና ለእነሱ መልስ የምትሰጥ ከሆነ ነው። ሁለቱም አንተን ከመንገድህ ያዘገዩሀል። ዛሬ መፈጸም የሚገባህን ለነገ ለከነገ ወዲያ ያሳድሩብህና ባለእዳ ትሆናህ።

❤ ደግሞም ሰዎች ይህን የሚያደርጉት ስላላወቁኝ ነው ብለህ ለማስረዳት ለማግባባት ለማሳመንና መልካምነትህን ለማሳየት አትድከም። ሰዎች እውነትን ስላዩ ወይም መልካምነትን ስላወቁ ብቻ አይወዱህም። በሰው ልብ ውስጥ ያለው ቅናት ምቀኝነት ቂም ጥላቻ ንጽጽር ፉክክር በአጠቃላይ ዲያቢሎስ ነውና አንተ እንደምታስበው ሰዎች እንዲረዱህና እንዲያውቁህ ማድረግ አትችልም። ብዙዎች እያወቁህና መልካሙን ነገር አይተው እንዳላየ በመሆን በክፋት ይነሳሉና።

❤ አየህ! እነዛ ሰዎች በእውነት መልካም ከሆኑ በመጀመሪያ አንተን አውቀው ይከተሉሀል ይወዱሀልም። ወዳጄ! የሚከተሉህና አጠገብህ ያሉ ሰዎች ሁሉ የወደዱህና የአንተን መልካም ነገር ማየት የሚፈልጉ አይደሉም። ለምን አብረውህ እንዳሉ ለማወቅ በመንፈሳዊ ህይወትህ ብትበረታ በቀላሉ ታውቃቸው ነበር።

❤ ወዳጄ! በፍጹም ሰውን ተስፋ አታድርግ፣ አትመን፣ የልብ የውስጥህን እንዲያውቅ አታድርግ፣ ቤትህንና የአንተ የሆነውን ነገር ሁሉ ከሰው ሰውር። ደግሞም ሁል ጊዜ መልካም ሀሳብ ካላቸው፣ ከሚያደምጡህ ከሚወዱህና ስታገኛቸው ደስታና ሰላም ከሚሳም ሰዎች ጋር ብቻ ይሁን ንግግርና ግንኙነትህ።

❤ ጥርጥር፣ ጭቅጭቅ፣ ክርክር፣ ቀልድ፣ ፌዝ፣ ጨዋታ ከሚወዱ። የበላይ ልሁን፣ እኔን ብቻ አድምጠኝ፣ እኔ ልምራህ፣ እኔ አውቅልሀለው፣ እኔ ትክክል ነኝ፣ ሁሉ ነገርህን ልወቅ፣ የምታደርገውን ሁሉ ንገረኝ፣ በእኔ ፈቃድና ፍላጎት ተጓዝ፣ ደስታዬንና ሰላሜን ጠብቅ፣ ወደዚህ ሂድ፣ ወደዚህ አትሂድ፣ ለምን ሳትነግረኝ ይሄን አደረግክ እያሉ ነጻነትህን ከሚነጥቁህና ነገርህን ከሚያናንቁ፣ ከሚያጣጥሉ፣ ከሚነቅፉ፣ ከሚንቁህና ለአንተ ያላቸው አመለካከትና ቦታ የወረደ ከሆነ ሰዎች ፈጽሞ ራቅ ተዋቸው እርሳቸው። ግዴታ የሚያገናኝህ ስራ ወይም ጉዳይ ካለ ደግሞ እንደ ቁም ሬሳ ቆጥረህ የሚያደርጉትን ነገር ከቁም ነገር አትቁጠር። እንደ አእምሮ በሽተኛ ወይም ገና እንዳላደጉ ህጻናት አስባቸው።

❤ እኔ እንዲህ ያሉ ብዙ ሰዎች በህይወቴ ውስጥ በሰፊው ጊዜ ገጥመውኛል ዛሬም ብዙ አሉ። እንደውም እነሱን ደስ እንዲላቸው ሳገኛቸው የሚያደርጉት ነገር እየረበሸኝ እንደሆነ እተውንላቸውና ደስ ሲላቸው አይቼ በውስጤ እስቃለሁ። ከአይኔ ዞር ባሉ ቅጽበት ትዝ አይሉኝም።
ወዳጄ ክርስቲያን በክርክር በጭቅጭቅ በእልህ በጉልበትና በሀይል ማንንም ሰው ማሸነፍም ሆነ ማሳመን አልተፈቀደለትም። የሚወዱህ እንኳን ወደዱህ የሚጠሉህም እንኳን ጠሉህ። አንተ ብቻ በተለየ የምትወደውም ሆነ የምትጠላው አይኑር። ሁሉን በአግባብና በስርዓት ፈጽም። ሁሌም አንተ የሚመለከትህን ብቻ አድርግ።

❤ ወዳጄ! አንተ እለት እለት የምትሰራው ስራ ያለህ፣ በማስተዋል የምትመራ ብልህ፣ በጥንቃቄ የምትጓዝ በሳልና በጽናት የምትራመድ አለት ሁን እንጂ ማንም በፈለገውና ደስ ባሰኘው ሰዓት በሚናገርህና በሚያደርገው ድርጊት በቀላሉ የምትሸረሸር አፈር አትሁን። ህይወትን ብቻህን ጀምረህ ብቻህን እንደምትፈጽማት ፈጽሞ አትርሳ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

"ከአዲስ ወዳጅ የከረመ ጠላት ይሻላል።"

🌹ትንሹ ሔኖክ

" ወዳጅህን ተቆጣው ወይ አላደረገም ይሆናል፤ ቢያደርግም እንዳይደግም ተቆጣው
                   ሲራክ፥ 19

🌹ትንሹ ሔኖክ


❤ ወዳጄ! የሰው ልጅ ትልቁ በሽታው ምኞት ነው። እንኳን የማይጠቅመውን የአለም ቁስና የሰው ነገር ይቅርና መንፈሳዊውን ምንኩስና እንኳን መመኘት ትልቅ ኃጥያት ነው። ምንም ነገር እግዚአብሔር በፈቀደው መንገድ ሲፈጸም መልካም ነው። እሱ ለሁሉ እንደ አቅሙና እንደ መጠኑ የሚገባውን ጸጋ ሰጥቷል። በረሀ በዓት ዘግቶ የሚጸልየው፣ በቤተክርስቲያን መቅደሱ የሚያገለግለውና በከተማ ከሰዎች ጋር እየኖረ ህጉን በመፈጸም ደስ እያሰኘው የሚኖረውም ሰው በእሱ ዘንድ የተወደደና የተመረጠ ልጁ ነው።

❤ አንዱ የአንዱን ፈተና መቋቋም አይችልምና ሁሉም በቦታው ጸንቶ ቢኖር መልካም ነው። ምኞት ነፍስን ወደ ስደት ታወጣለች። ሰው የማያደርገውና ለሱ ያልተፈቀደለትን ይመኛል። በመቀጠልም ምኞቱ የተፈቀደላቸውን ሰዎች በማየት ወደ መቅናት ያድጋል። ቅናት ደግሞ የኃጥያት ሁሉ መሰረት ናትና ወደ ጥፋትና የነፍስ ሞት ትወስዳለች። ለዛም ነው ዛሬ በረከት ለማግኘት በሚል ክፉ የዲያቢሎስ ሀሳብ ተነሳስተን ንሰሀ ሳንገ፣ ሳንቆርብና ልባችንን ንጹህ ሳናደርግ በየገዳም እየዞርን ገዳማትና በሷ የሚገኙ ከአለም የተለዩ ልጆቹን ወደ ፈተና ከተን በቀድሞ የተከበሩና የተቀደሱ ቦታዎችን በማርከስ መንፈስ ቅዱስ እንዲርቀን ያደረግነው።

❤ በዚህም ምክንያት ፍሬው መራራ ሆኖ ከጫፍ እስከጫፍ በርሀብ ጦርነት መከራ ስቃይና ለቅሶ እለት እለት የምናልቀው። ወዳጄ! አንተ በእውነት እምነት ቢኖርህ፣ ልብህ ቢቀናና እግዚአብሔርን ብትፈራ የእግዚአብሔር እውነተኛ መቅዱሱ አንተ ነበርክ። በንሰሀ ኖረህ በቅዱስ ስጋና ክቡር ደሙ ማህተብ ቢኖርብህ አንተ በሄድክበት ሁሉ በረከት ትሆን ነበር። ደግሞም ከተማ አቋርጠህ መሄድ ሳይጠበቅብህ አጠገብህ ያለችው ቤተክርስቲያን ደብርህ ጸበሏ መድኃኒት፣ ወንጌሏ ህይወት፣ ቅዳሴዋ የነፍስህ ምግብ ይሆንህ ነበር።

❤ አጠገብህ ያለችው ማርያምን ሳታምን እሩቅ ያለችው ጋር ያሰደደህ ክፉ ጠላትህ ዲያቢሎስ ነው። አዎ ሁሉም እንደ ቦታ ቃልኪዳናቸው የመንፈስ ቅዱስ ስጦታቸው ይለያያል። ነገር ግን አንድ እግዚአብሔር፣  አንድ ድንግል ማርያምና አንድ ቅዱሳን ነው ያሉት። ክርስቲያን በመንፈስ ቅዱስ ካልታዘዘ በመዞር የሚያገኘው በረከት የለም። አንተ ሰው! መጀመሪያ አስቀድመህ ውስጥህን አንጻ፣ ልብህን አቅና፣ እጅህን አንጻ ያኔ እግዚአብሔርን በሁሉም ቦታና ጊዜ በህይወትህ ሁሉ ታየዋለህ።

❤ ግን አስተውል! ሌብነት ውሸት ክፋት ተንኮል ዘረኝነት ቂም በቀል ጥላቻ እልህ ትዕቢት ቅናት ምቀኝነት ባለበት የትኛውም ቦታ የዲያቢሎስ ድራማ እንጂ የመንፈስ ቅዱስ ስራ አይገለጥም። እግዚአብሔር ሰው አይደለም በብልጭልጭ ዲኮር፣ በትወና፣ በዝግጅት ድምቀት፣ በውሸት እምባና በደረቅ አምልኮተ አታታልለውም። እርሱ ሁሌም ልባቸው ከቀናና ከንጹህ ፍቅር ባለቤቶች፣ ራሳቸውን ዝቅ ካደረጉት ጋር ነው።

❤ እነሱ ባሉበት ሁሉ አብሯቸው አለ። በሄዱበት ይሄዳል፤ በምንም ቦታና ሁኔታ ውስጥ አይተዋቸውም። እነዚህም በሰው ቤት ተንቀው ተገፍተው በመከራ ያሉ። አንዳንዶቹም በልብሳቸው፣ በሰውነታቸውና በብዙ ምክንያት የተገለሉና ባሉበት ሆነው መቅደሱን የሚናፍቁ ናቸው። ወዳጄ እግዚአብሔርን እስክታውቀውና ፍቅሩን እስኪገልጥልህ ድራማና ትወና ህይወት ይመስልሀል። ራሱ ክርስቶስ እንደተናገረው፥ ዛሬም አንተ ሰው አስቀድመህ ውስጥህን አጥራ እልሀለው። የውስጡን ብታጠራ የውጩ አንተ ሳትነካው በራሱ ይጠራል።

❤ አንተ የወሰድከውን መልሰህ፣ የበደልከውን ይቅርታ ጠይቀህ፣ በንሰሀ ታጥበህ፣ ቅዱስ ስጋና ክቡር ደሙን ተቀብለህ፣ ልብህን በማቅናት፣ ውስጥህን ብታጠራ ዛሬ በውስጥህም በውጭም ተራራ ያከለው ችግርህና ፈተናህ ሁሉ በራሱ ከአንተ ዞር ይላል። ነገር ግን አንተ የምትፈልገው ውስጥህ ቆሽሾና ተበላሽቶ የውጩ እንዲጠራልህ ነው። ይህ ፈጽሞ የማይሆንና የማይታሰብ ነው። እንዲህ ያሉትን አይሁድ ጌታ እናንተ አትገቡ ወይም ሌላ ሰው አታስገቡ ብሎቸዋል።

❤ ዛሬ እኔና አንተም እንዲሁ ነን። አምነን ህጉን ፈጽመን መዳን ስላልቻልን። ያመኑና የጸኑትን በማጥላላት በመንቀፍ በመክሰስ በመቀለድ በማፌዝ በመወንጀል በሀሜት በአድማ በሰበብና በምክንያት እየተፈታተንን በጥርጥር እንዲወድቁ እናደርጋለን። ለነገሮች ሁሉ ተጠራጣሪና ሰበበኞች ነን። በፍጹም እግዚአብሔር የፈቀደው ይሆናል፣ ይሳካል የሚል የእምነት ቃል አናወጣም። ስትን ማሳት፣ ተጠራጥረን ማጠራጠር፣ ወድቀን መጣል፣ ሰንፈን ማስነፍ እንጂ ጸንተን ማጽናት፣ አምነን ማሳመን፣ ጠንክረን ማጠንከር የሚባል የክርስቲያን ባህሪ የለንም።

❤ በላፉት አምስት አመታት ውስጥ ቤተሰቦቼ ጓደኞቼ የስራ ባልደረቦቼ ትልልቅ የሚባሉ የቤተከርስቲያን ዘማሪና አገልጋዮች እንዲሁም ታዋቂና ዝነኛ የተባሉ ሰዎች በብዙ መንገድ ተገናኝትን ነበር። ሁሉም የማደርገውን ከማጥላላት ከመንቀፍና ከማጠራጠር እንዲሁም የት ትደርሳለህ የሚል የዲያቢሎስ የቅናት ንግግርን ከመናገር ውጭ አንዳቸውም የሚያበረታ ነገርን አልተናገሩኝም። እግዚአብሔር ይመስገን እኔም ከኔ በምግባር ያልበለጠኝና እምነት ጽናትና ሃይማኖቱን በስራ ሲከውን የማላየውን ሰው ምክርና ሀሳብም ሆነ ንግግሩን ፈጽሞ ስለማላደምጠው የዕለት ስራዬን እየሰራሁ ዛሬ ደርሻለሁ። ስለ ነገም እግዚአብሔር ያውቃል።

❤ ወዳጄ ሰዎች ቀና ንግግር፣ መልካም ሀሳብና ለአንተ የሚጠቅም አስመስለው ብዙ መርዝ ክፋትና ቅናታቸውን የሚገልጹበትን ወጥመድ ይዘረጋሉ። ዲያቢሎስ በፊት ለፊት ያልቻላቸውን ሰዎች እነሱ የሚወዱት፣ የሚያከብሩትና ይሰሙታል ብሎ ያሰበውን ሰው በመጠቀም መካሪ አድናቂ አሳቢ ሆኖ በመምጣት በማዘናጋትና በማጠራጠር ከመንገዳቸው ያስቆማቸዋል። ስለዚህ ሰውየው ትልቅ ስለሆነ ስላልሆነ፣ አገልጋይ ስለሆነ ስላልሆነ፣ የተማረ ስለሆነ ስላልሆነ፣ ታዋቂ ስለሆነ ስላልሆነ ሳይህን ንግግሩና ምግባሩ አንድ የሆነ ነው አይደለም ብለህ ሰውን አድምጠው።

❤ በቤቱ በአካባቢው በስራው ያለውን ማንነት አጥና። ያኔ ያን ሰው በአንድ ስጋ ሁለት ሰው ሆኖ ታገኘዋለህ። የምግባር ሰዎች ሁሌም አንድ ሰው ናቸው። እነሱም ከንግግር ይልቅ ምግባር ሲናገር ማየትን ይወዳሉ🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

ከክርክር ይርቅ ዘንድ ለሰው ክብሩ ነው፤ ሰነፍ ሁሉ ግን እንዲህ ባለ ነገር ይጣመራል።

መጽሐፈ ምሳሌ፥ 20

ከላይ የቀጠለ....

❤ ባቀረብኩትም ነገር ሁሉም በጭብጨባና በአድናቆት አላስጨርስ ብለውኝ ነበር። ታድያ ካለቀ በኋላ አንተ ነህ ሌላ ሰው ነው እያሉ ይገረሙ ነበር። አየህ አስቀድሜ ብነግራቸውና ቢያውቁ በመናቅ በማጣጣልና በብዙ ወጥመድ እንደሚጥሉኝ አውቅ ነበር። ቤተሰቦቼም ጭምር ጠላቶቼ መሆናቸውን ከልጅነቴ አውቅ ነበር። ከመድረኩ በኋላ በትልልቅ የቴሌቪዥን ፕሮግራሞችና በፕሮግራሙ ላይ በነበሩ ታዋቂ አርቲስትና ጸሐፊዎች በጣም ብዙ ቦታ ግጥምና ወጎች እንዳቀርብ ግብዣና የማቅረብ እድል መጥቶልኝ ነበር። እኔ ግን ዛሬ ድረስ የአንዳቸውንም አልቀበልም።

❤ አየህ ወዳጄ! ከሰው ጋር አብረህ ኑር እንጂ ማንም ሰው ያለ ጊዜው የተሰጠህን ጸጋ ሊያውቅ አይገባም። ደግሞ አለም እኔ ባስቀመጥኩላት መመሪያና እግዚአብሔር የአንተ ጊዜ ነው ባለኝ ጊዜና መንገድ ሄጄ እገዛታለሁ እንጂ። እሷ በማጓጓት በማድነቅና ብዙ መደለያና እድል ሰጥታ በሷ ፍላጎትና በሰዎች ስሜታዊ መክርና ጭብጨባ በስሜት ተነድቼ የጠላቴ ዲያቢሎስ ወጥመድ ውስጥ አልገባም።

❤ ወዳጄ! ሰማይና ምድርን ጨምሮ ሁሉ የተፈጠሩት በአባቴ ነው። ጊዜም ቢሆን በእሱ መዳፍ ውስጥ ነው ታድያ ምን የሚያስቸኩለኝና የሚያስገበግበኝነገር አለ። እሱ ለኔ ያለውን ሁሉ አዘጋጅቶና አመቻችቶ ነው የፈጠረኝ። የኔ ስራ እለት እለት በሱ ፈቃድ መኖር ነው። ምንም የሚቀድመኝ፣ የሚያመልጠኝም ሆነ የማላየው ነገር አይኖርም። በእሱ ዘንድ የራስ ጸጉሬ ራሱ የተቆጠረ ነው።

❤ እግዚአብሔር ይመስገን እስከ ዛሬ ምንም የጎደለብኝ፣ ያጣሁት፣ የቸገረኝ፣ የሚቆጨኝና የሚጸጽተኝ አንድም ነገር የለም። እንደውም በራሴ ፈቃድ ምኞትና ፍላጎት እየተታለልኩና ፈጽሞ መታመን የማይገባውን የሰውን ልጅ እያመንኩ ከህጉ እየወጣሁ ራሴን የጎዳሁና እሱንም ያስቸገርኩት እኔ ነኝ እንጂ በሱ በኩል ሁሉ መልካም ነው። ስለ ነገም ቢሆን የሚያጓጓኝ ነገር የለም። የኔ ስራ ጠዋት ነግቶ አይኔ ሲበራ አምላኬ እግዚአብሔርን ማመስገን፣ ለእናቴ ማርያም መዘመር፣ ስሟን ማወደስ፣ ፍቅሬን በሰጠችኝ ጸጋ መግለጽ፣

❤  አባቴ ቅዱስ ሚካኤልን ያሳለፍነውን እያስታወስኩ ማመስገን፣ መሳቅ፣ መደሰት፣ እንዲሁም እንደ ቃልኪዳናቸውና ክብራቸው ቅዱሳኑን ማክበር ነው እንጂ የሰውን ክፉና ደግ ስራ ሲያወሩ መዋል፣ ስለቤት መኪናና ፈጽሞ ለማይሞላ የአለም ቁስ መጨነቅ፣ እከሌ እከሌ እያሉ በሀሜት መዋል፣ በማያገባኝና በማይመለከተኝ ነገር ሁሉ ገብቶ መጨነቅ ማውራትና መፈትፈት የኔ ስራዬም ሆነ የሚጠቅመኝ ነገር አይደለም። ማንም ቢሆን የስራውን ያገኛልና እኔ የሚጠቅመኝና የሚበጀኝን ስለማውቅ ያን ማሰብና ማድረግ ምርጫዬ ነው።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ ህይወትን ከብዙ በጥቂቱ እንዲህ እኖራታለሁ

🌹ትንሹ ሔኖክ

❤ በህይወቴ በጣም በዙ ክፋትና ተንኮልን ያደረጉብኝና ብዙ ውሸት አውርተውብኝ የያዝኳቸው ብዙ ሰዎች ነበሩ። እናም እነሱ የፈለጉት ያደረጉትን ሁሉ ስላወቅኩ ይህን ይህን እንዳደረጋችሁ አውቃለሁ እንድላቸውና ያደረጉትን እንድነግራቸው። ከዛም መጨቃጨቅ መከራከር መመላለስ ነበር። ያላወቁት ነገር እኔ ሰውን የምታገሰው ሰውየው ክፉ ስላደረገ ወይም ስላደረገ አለመሆኑን ነው።

❤ የትኛውም ሰው ወደ ህይወቴ ሲገባ በተለይ ውሸታምና አስመሳይ ሲሆን እግዚአብሔር በሱ የሚያስተምረኝ ብዙ ነገር አለ። ስለዚህ የሚሰራውን ክፋት፣ በኔ ያለብትን ቅናትና በልቡ ያለውን ጥላቻ ባውቅም ትምህርቴን ሳልጨርስ ከኔ ህይወት እንዲወጣ አልፈልግም። ታድያ ይህ ሲሆን ሰውየው ሞኝ እንደሆንኩና የሚያደርገውን እንዳላወቅኩበት ያስብና ብዙ ድራማ ይሰራል። ታድያ ትምህርቴን በጨረስኩ በማንኛውም ደቂቃ በሰከንዶች እረሳዋለሁ። በህይወት እንዳለ እንኳን አልቆጥረውም።

❤ ግን እሱ ይህን አያውቅም። እኔም በአንደበቴ ይህን አድርገኸኛል ብዬ ክፉ አልናገረውም። ለኔ ሰው ማለት የሚነበብ መጽሐፍ ማለት ነው። መጽሐፍን አንብቤ በውስጡ ያለውን ታሪክ የሚጠቅመኝን ወስጄ እንደምጠቀመውና በዛ ታሪክ ውስጥ ያሉ ሰዎች ማንነትም ሆነ ድርጊት በእኔ ላይ የሚፈጥረው ምንም ነገር እንደሌለ ሁሉ። ዛሬ አጠገቤ ያለ የትኛውም ሰው ከመጽሐፍ ገጾች እንደ  አንዱ ገጽ ነው። ጥሩም ቢሆን መጥፎ ታልፎ ወደ ሌላ ገጽ ይኬዳል።

❤ እርግጥ ነው በመጽሐፍ ውስጥ የሚያስደስቱ፣ የሚያስቁና ልብን የሚመስጡ ቦታዎች አሉ። ልክ እንደዚሁ የሚያሳዝኑ የሚስለቅሱና የሚያናዱም ቦታዎች አሉ። ግን መጽሐፍ ነውና ከአንዱ ስሜት ወደ አንዱ ስሜት ገጹን በመከተል ይታለፋል። ጓደኛ ወዳጅ ቤተሰብም ሆነ ዘመድ ጋር እንዲሁ ጥሩ ጊዜ ደስ የሚሉ ትዝታዎች ይፈጠራሉ። ደግሞም አሳዛኝና የሚናዱ ብዙ የፈተና ጊዜዎችም በእነዚህ ሰዎች ይመጣል። ታድያ የኔ ምርጫ ቆሞ ለምን እንዲህ ታደርጋለህ ማለት፣ ወይም ከዛ ሰው ጋር ክርክር ጭቅጭቅ ምልልስ እልህ ስድብና ጸብ ውስጥ መግባት አይደለም።

❤ እንደውም በተቃራኒው ምንም እንዳልመሰለውና እንዳላወቀ ሰው ሆኜ ከዛ ሰው መራቅና በብልሀት ከህይወቴ ማስወጣት ነው። ምክንያቱም ቀጣዩን የደስታ የሰላም የእረፍትና የምስጋና የህይወቴን ገጽ ማንበብ ፈልጋለሁ። ብዙ ሰዎች ከአመታት በኋላ እየደወሉና እየጻፉ አባክህ ይቅር በለኝ ያኔኮ ያወቅክብኝ አልመሰለኝም። ዛሬ እንደ አንተ አይነት ሰው ለህይወቴ ያስፈልገኛል ይላሉ። እኔ የህይወት የመጨረሻ ገጽ ላይ ደርሼ ወደ ኋላ እንድመለስ ይጠይቁኝማል።

❤ ለኔ ህይወት አንድ መጽሐፍ ነው ያላት። እሱም በየዕለቱ አዲስ ገጽ፣ አዲስ ታሪክ፣ አዲስ ገጠመኝ የተሞላች። አይደለም ዓመታትን ወደ ኋላ ይቅርና የትላንቱን ገጽ ደግሜ ማንበብ አይፈቀድም። ምክንያቱም የትላንት ትላንት ተነቧል። ዛሬ የዛሬ ብቻ ነው። ለዚህም ነው ህጻን አዋቂ፣ እብድ ጤነኛ፣ ሀብታም ደሀ ሳልል በህይወቴ የሚገጥመኝን የትኛውንም ሰው በማክብርና በፍጹም ፍቅር በቅንነት እንደ ትልቅ የህይወቴ እንግዳ የማስተናግደው። እሱ እኔን እንደ ሞኝ ጅል ፋራና እሱ በወደደው መንገድ የማሰብ መብት አለው።

❤ ሊያጭበረብረኝ ሊሰርቀኝ ሊያዋርደኝና ሊያሾፍብኝ ቢሞክርና ያወቀኝ መስሎት በውሸት በሀሜት በክፋትና ተንኮል ያሻውንም ቢያደርግ እኔ እሱን እንደ ትልቅ እንግዳ ከማየት የሚከለክለኝ ነገር የለም። ምክንያቱም እኔ እሱን የማየውም ሆነ ወደ ህይወቴ የማስገባው እንደ አንዷ የመጽሐፍ ገጽ ነው። ስለዚህ እሱ የሚያደርገው ነገር ሁሉ መዘዙና የሚያዘጋጀው ወጥመድ ይዞ የሚያንፈራፍረው ራሱን ነው። ምክንያቱም እኔ እሱን ገጽ አስር ላይ ጨርሼው ገጽ አስራ አንድ ላይ ወደ ሌላ ባለ ታሪክ እሄዳለሁ። እሱ ለኔ እከሌ የሚባል ሰው ነበረ ብዬ የማወራው ባለታሪክ እንጂ በየቀኑ የሚያስበውንና የሚያደርገውን የእየተከታተልኩ ራሴን የሚረብሸኝና የሚያስጨንቀኝ ሰው አይሆንም።

❤ ከእኔ ጋር በመሆኑ ሁሌም በየቀኑ ሀሳቡ ድርጊቱና ሁኔታው የሚያሳስበኝና የሚያስጨንቀኝ ሰው ቢኖር ራሴ (ትንሹ ሔኖክ) ብቻ ነኝ። ሌላው ሰው ሁሉ የተወለድኩ ቀን አብሮኝ የተወለደ፤ የምሞትም ቀን አብሮኝ በኔ ሳጥን የሚገባ አንድም ሰው የለም። እናት አባት ወዳጅ ዘመድ ጓደኛ ሁሉ በእግዚአብሔር ፈቃድ በተለያየ ምክንያት፣ በገጠመኝና በተለያየ ጊዜና ሁኔታ ወደ ህይወቴ መጥቷል፤ ልክ እንደ አመጣጡም ወጥቶ ይሄዳል። ታድያ እንዴት ያለው እብድ፣ ሞኝ፣ መሀይም፣ በሽተኛና፣ ከንቱ ብሆን ነው እከሌ መጣ እከሌ ሄደ፣ እከሌ እንዲ አደረገልኝ እከሌ ይህን ፈጸመብኝ ብዬ ራሴን ደስ የማሰኘውም ሆነ የምጎዳው።

❤ ደግሞስ ሰው በሚናገረኝ በሚያደርገኝና በሚያስበኝ ነገር የምናደድ የምበሳጭ የማዝንና የምጨነቅ ምን ለማትረፍ ነው። ሰው ማለት አምላኩን የሰቀለ መሆኑ እንዴት ይጠፋኛል። የትኛውም ሰው በሳቅ በአድናቆትና በምስጋና የመጀመሪያ ቀን ሲተዋወቀኝ ያንኑ ቀን እኔ የሚታየኝ የመጨረሻ ቀን ስድቡ ክሱ ጥላቻው ንቀቱና ግልምጫው ነው። ከሰው ጋር መግባባትም ሆነ መቀራረብን የምወደው አንደም የአምላኬን ትዕዛዝ ለመፈጸም፣ ሁለትም ትዕግስት ማስተዋልና ጥበብ የሚገኘው ከሰው ጋር በመኖር ውስጥ በመሆኑና የነፍስ መጽሐፌ በየቀኑ የማረና የምጓጓለት እንዲሆን ብዙ አስመሳይ ውሸታም አጭበርባሪ ትዕቢተኛ እልኸኛ ክፉ አረመኔና ጨካኝ ባህሪ ያላቸው ሰዎችን መጨረሻ ማየት ደስ ስለሚያሰኘኝ ነው።

❤ በህይወቴ አንድ ነገርን ተምሪያለሁ እሱም ሰው ደግ ቢሆን ለራሱ፤ ክፉም ቢሆን በራሱ ላይ ነው። እኔ ራሴን እንዴት ማስደሰት፣ ማበርታት፣ ማጠንከር፣ መንከባከብ፣ ማጽናናትና ከክፉ መጠበቅ እንዳለብኝ ከልጅነቴ ጀምሮ እናቴ ወላዲተ አምላክና አባቴ ቅዱስ ሚካኤል አስተምረውኛልና አጠገቤ ሰው ኖረ አልኖረ ምንም የሚጨምርልኝም ሆነ የሚያጎድልብኝ ነገር የለም። እንደውም ብዙ ደስ የሚያሰኙኝ ፕሮግራሞቼና የሚጠቅሙኝ ልምምዶቼ የሚቋረጡት አጠገቤ ሰው ሲኖር ነው።

❤ ወዳጄ ሰዎች ወይ የአንተን መልካም ነገር ተቀብለው ላይፈጽሙ ወይ ደግሞ እነሱ የሚጠቅምህን አዲስ የህይወት ልምምድ ላያስተምሩህ ትልቅ ጉዳይና እውቀት እንዳላቸው ይጠሩህና እንደ እንሰሳ ምግብ በመብላትና መጠጥ በመጠጣት እንዲሁም እንደ ወራጅ ውሀ ወሬና ሀሜት በማስወራት ጊዜህን ይጨርሳሉ። ወዳጄ ሰው ለሰው የኃጥያት የክፋት የተንኮልና የብልግና መንስኤ በሽታ እንጂ መድኃኒት አይደለም።

❤ አንተ ለነፍስ የሚጠቅመውን ልምምድ ብትነግረው እሱ ምንም ሳይኖረው ያጣጥልብሀል። ለዚህ ስል ለነፍስም ሆነ ለስጋ የሚጠቅሙኝን ልምምዶች ፈጽሞ በሰው ፊት አላደርጋቸውም። ለማንምም አልነግራቸው። እናትና አባቴ እህት ወንድሞቼና ጓደኞቼን ጨምሮ የኔ ነው ይሉኝ የነበሩ ሰዎች ጸሀፊና ገጣሚ መሆኔን ያወቁት ሁለት ሺህ እንግዶች በተጠሩበት መድረክ ላይ ስሜ ተጠርቶ ግጥም ላቀርብ ስወጣ ነበር። አጠገባቸው ተቀምጬ ስሜ ሲጠራ እነሱ ሌላ ሔኖክ ይጠብቁ ነበር። ተነስቼ ወደ መድረኩ ስሄድ አይናቸውን እያሹ ማመን አቅቷቸው ነበር።

" አባ ለምን ከሰው ይሸሻሉ?"

🌹ትንሹ ሔኖክ

እሱ ሌባ ሆኖ አትስረቁ ይላል
ጥላቻን ተሞልቶ ፍቅርን ይሰብካል
በውሸት በተንኮል ሀሜት እያጣላ
አስታራቂ ይሆናል ክፋት እየበላ
ንግግሩን መልካም ቃሉን አሳምሮ
ስንቱን አስለቀሰ ጠማማውን መክሮ
እኔ አለው ከጎንህ በርታ በርታ እያለ
ስንቱን ወጥመድ ከቶ እሱ ኮበለለ
አንተ የሀገሬ ሰው እውነቱን ልገርህ
የኔ ያልከው ሰው ነው የነፍስ ጠላትህ
የውስጥ የልብህን ቤትና ጓዳህን
ያወቀ ነው ክፉ የሚያውቅ ሚስጥርህን

❤ "አባ ለምን ከሰው ይሸሻሉ" ቢሏቸው። "ልጆቼ እኔ ከሰይጣን ነው እንጂ ከሰው አልሸሸሁም" አሉ። "እንዴት?" አባታችን ቢሏቸው። "ሰይጣን ወዳጅ ዘመድ ጓደኛ፣ ለኔ የሚያስብ፣ የሚወደኝ፣ የሚጨነቅልኝ፣ የሚቆረቆርልኝ፣ የሚያደንቀኝ፣ አመስጋኝ መስሎ የሚቀርበኝ በሰው ላይ አድሮ ነው" አሉ ይባላል።

❤ ወዳጄ በሩቅ የምታየው፣ ቤትህ የማይገባ፣ ከአንተ ጋር የማይነጋገር፣ ሰላምታ የማትለዋወጠው፣ ምንህንም የማያውቅ ሰው ጠላትህ አይደለም። እሱ ምንም ቢያደርግ አንተ ምን ትሆናለህ። ትልቁ ጠላትህ አጠገብህ ያለ፣ አብረህ የምትበላ የምትጠጣና ሚስጥርህን የምትነግረው ጓደኛዬ፣ ቤተሰቤ፣ ወዳጄ፣ የኔ የምትለው ሰው ነው።

❤ ወዳጄ እግዚአብሔር ይመስገን እኔ እንደዛ የምለው አንድም ሰው የለም። በዚህም ይኸው ላለፉት አምስት አመታት በየቀኑ አምላኬን ከማመስገንና እውነትን በደስታ ከመናገር አቋርጬ አላውቅም። ነገር ግን ሊያገኙኝ ፈልገው ያገኘኋቸው በሺዎች የሚቆጠሩ ሰዎች ሁሉ አንድ የሚያደርጋቸው ነገር ቢኖር ሁሉም የኔ በሚሉትና አምነው ብዙ ነገርን ባደረጉት ወዳጅ ዘመድ ጓደኛና ቤተሰብ እንደተግዱ መናገራቸው ነው።

❤ ወዳጄ ማንም ይሁን ማን ሰውን ማመን የሚባል ነገር የለም። የገዛ እናትና አባትህም ቢሆኑ በስርዓት በህግና በምግባር መቀራረብ እንጂ እናቴ ናት አባቴ ነው የሚባል ነገር የለም። ብዙዎች በገዛ እናት አባት እህት ወንድሞቻቸው የደረሰባቸውና እየደረሰባቸው ያለው መከራ ሌላ ሰው የሚያደርግባቸው አይደለም። ይህ ለምን ሆነ ብትል። ጾም ጸሎትና ስግደትን የማያውቃ። ዘወትር በንሰሀ የማይኖርና የእግዚአብሔርን ህግ የማይፈጽም ሰው ዲያቢሎስ በፈለገው ጊዜና ሰዓት የሚጠቀመው እቃው ነው።

❤ ስለዚህ ነገርህን ከየትኛውም ሰው መሰወርና ከሁሉም ጋር በስርዓትና በጥንቃቄ መኖር ብቻ ከመከራ ይጠብቅሀል። የማምናቸው የምወዳቸውና ለእነሱ የማስብ ሚመስላቸው ብዙ ሰዎች አሉ። እኔ ግን አብሪያቸው ያለሁት አንድ የሚያደርገን የእግዚአብሔር ህግ እስከተጠበቀ ድረስ እንጂ ፈጽሞ አያውቁኝም አላውቃቸውም።

❤ ለኔ ጓደኛዬ ወዳጄ ቤተሰቤም የሆነና እኔዲሆን የምፈልገው አንድም ሰው የለም። የማምነውም ሆነ የኔ የምለው እግዚአብሔር አምላኬ፣ እናቴ ወላዲተ አምላክና ቅዱሳን እናት አባቶቼን ነው። በዚህን ጊዜ ሰው ማለት እንደ ሳሙና ተሙለጭላጭ ነው። ጠዋት ሰው ከሰዓት አውሬ ይሆናል። እያለቀሰ እርዳታህን ጠይቆ እየሳቀና እየዘበተ በአደባባይ ይከስሀል ይወነጅልሀል። ወዳጄ የኔ ከምትለውና ከምታምነው ሰው ተጠንቀቅ🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ! ትዕቢት ውድቀትን ትቀድማለች። ሰው የመውደቂያ ጊዜው ሲደርስ ትዕቢት፣ ቁጣ፣ ንቀት፣ እልህ፣ ስድብ፣ ዛቻ፣ ፉከራ፣ ብስጭት ያበዛል። እኔ ነኝ አዋቂ፣ እኔ ነኝ ቆንጆ፣ ያለ እኔ ሰው የለም፣ እኔን ብቻ ስሙኝ ይላል። የለቅሶ ጊዜው ሲቀርብም ሳቅ ቀልድ ጨዋታ ተንኮልና ክፋቱን ያበዛል🙏

🌹ትንሹ ሔኖክ

በጠገብህበትም ወራት የተራብህበትን ወራት አስብ፤ በተድላህም ወራት የችግርህም ወራት አስብ።

🌹መጽሐፈ ሲራክ፥ 18

❤ ችኩል ሰው ሁሉ ግን ለመጉደል ይቸኩላል
                 ምሳሌ፥ 21

🌹 ትንሹ ሔኖክ

በዚህ በመጽሐፍ ቅዱስ ክፍል "የሰው መንገድ ሁሉ በዐይኑ ፊት የቀናች ትመስለዋለች እግዚአብሔር ግን ልብን ይመዝናል።" ይላል። ወዳጄ ዛሬ እኔና አንተን ጨምሮ በጥፋትና ኃጥያት መንገድ የሚጓዘው የሰው ልጅ ሁሉ የሚያደርገው ስራ መልካምና እግዚአብሔር የሚወደው ነው ለማለት የማይደረድረው ምክንያት የለም።

❤ ዘፋኙ ስለዘፈን ጥሩነት፣ ሌባው የመስረቅን በጎ ጥቅም፣ በቀለኛው በቀል ጀግንነት እንደሆነ፣ ዘረኛው የዘረኝነት መልካምነቱን፣ ውሸታምና አስመሳዩም የእነዚህ ባህሪያቶችን ጥቅም ለማስረዳት ብዙ ሲናገር ይደመጣል። ለዚህም ነው ሰው ሁሉ የሰውን ኃጥያትና ስህተት የሚያይበት መነጽር እንጂ ራሱን የሚመለከትበት መስታወት የለውምና የሱ የሆነው ሁሉ ልክ እንደሆነ ያስባል።

❤ ወዳጄ! ለሰው ልጅ መስታወት የሚሆነው የእግዚአብሔር ህግ ነው። አስርቱ ትዕዛዛትና ስድስቱ ቃላተ ወንጌልን ላወቀና ለመፈጸም የሚጥር ሰው መንፈስ ቅዱስ በውስጡ ስለሚያድር ሁሌም ራሱን እያስተማረ በንሰሀና በእግዚአብሔር ፍቅር በህጉ ይኖራል።

❤ ዛሬ የኛ ኑሮ የችኮላና ጥድፊያ ነውና እድሚያችን ሁሉ በጉድለት ያልቃል። ኖሮን እንደሌለን፣ ተሰጥቶን እንዳልተሰጠን፣ አግኝተን እንዳላገኘን ሁሌ በምኞትና በድካም ኖረን ወደ አፈር እንመለሳለን።

❤ ወዳጄ እግዚአብሔር ለኛ የሆነውን የሚበቃንና የሚጠቅመንን የሰጠን ገና ከእናታችን ማህጸን ስንወጣ ነበር። ነገር ግን እሱ የሰጠንን ለማየት በእሱ ህግና ስርዓት ወስጥ መኖር ይገባናል። እኛ ግን ጠላታችን ዲያቢሎስ በልጅነታችን ስድብ ቀልድ ፌዝ እልህ ጸብ ክርክር ጭቅጭቅ ጥላቻ ሌብነት ዘፈን ዳንስ ጭፈራ ሀሜትና የሱ የሆኑ ህጎችን በጨዋታ መልክ አስተምሮ የተሰጠንን እንዳናውቅ አደረገን።

❤ ሰው የምትባሉት ወይም ጥሩ ህይወት የሚባለው ይሄ ሲኖራችሁ ነው ብሎ ጎዶሎ መሆናችንን በድራማው ቢነግረን ቅናት ምቀኝነት ክፍፍል ጥላቻን በልባችን አሳደረብንና ገንዘቡ ሆንለት። ስለዚህ እሱ ያለንን ለማግኘት የምንቸኩል ሆንን። ታድያ መቸኮላችን ያለንን ለማጣትና ለመጉደል ሆነ። ዛሬ ትንሹ ትልቁ፣ ህጻን አዋቂ፣ ደሀ ባለጠጋው ሁሉ ጎድሎበት ለመሙላት በደመነፍስ ይጣደፋል።

❤ ውሻን ስጋ በእንጨት አንጠልጥለው እያሳዩ ወደ ወጥመድ እንደሚወስዷት ዲያቢሎስም ቁስና ገንዘብን ዛሬ ታገኛለችሁ፣ ደርሳችኋል፣ እቺን ፈጽሙ እያለ ኃጥያትን እያሰራ ከነፍስ ምግባር ነጥሎን ወደ ሞት ባህር ካስገባን ቆይተናል። ከቁርጭምጪሚታችን ጀምሮ አንገታችን ድረስ ባህሩ ቢያሰጥመንም እኛ የምናየው የተንጠለጠለውን እንጂ ልጆቼ ልትሞቱ ነው የሚለውን የእግዚአብሔርን ድምጽ አይደለም። እንግዲህ መቸኮላችን ለጥፋታችን የሆነብን አሳዛኝ ሰዎች ሆነን ዘመኑ ሊፈጸም ደቂቃዎች ቀርተውናል። እንዲሁ ከላይ ስንታይ ትልልቅ፣ አዋቂ፣ እድሜ የጠገብን፣ ሽበት የወረሰን፣ የወረቀት እውቀት የደረደርን፣ አፋችን ሲናገር አስተዋይና ሙሁር ብንመስልም በእውነት ምግባር ስንመዘን ለምንም የማንሆን ገለባዎች ነን🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ይዋል ይደር

🌹ትንሹ ሔኖክ

ወዳጄ! ምንም ነገር ሲውል ሲያድርና ሲከርም ጣዕሙ ጠባዩና ማንነቱ ዛሬ እንዳስቀመጥከው አይሆንም። ስለዚህ በህይወትህ መልካምም ሆነ መጥፎ ነገርን ባየህና በሰማህ ጊዜ ቶሎ ለውሳኔ አትቸኩል። ከጊዜ በኋላ ስህተት ያልከው ትክክል፤ ትክክል ነው ያልከው ስህተት ሆኖ ታገኘዋለህ።

❤ ትላንት ያለእሱ ወዳጅ ዘመድ ቤተሰብ የለኝም ያልከው ሰው ዛሬ ጠላትህና አሳዳጅህ አንተም ለማየት የማትፈልገው ሰው ይሆናል። ጓጉተህና ብዙ ለፍተህ ያገኘኸው ስራህ ዛሬ ተራ ነገር ሆኖብህ አምላኬ ከዚህ ገላግለኝ የምትለው ይሆናል። ወዳጄ ዛሬ ደስታህንም ሆነ ሀዘንህን በልክ አድርገው።

❤ ያስደሰተህን ለማመስገን፣ የጠላኸውን ክፉ ለመናገርና የመሰለህን ለመግለጽ አትቸኩል። ከስሜትህ ይልቅ ራሱ የነገሩ እውነት እንዲናገር ጊዜ ስጠው። ወዳጄ! አንደበቱና ምግባሩ የተጣጣሙለት ሰው ከጠፋ ዘመናት አልፈዋል። በእያንዳንዳችን አንደበት በከንቱ የሚነገረው ቃል ሁሉ መዓት ሆኖ እየዘነበ ጎርፉ ሁሉን እንደንግግሩ በስሜት ማዕበል ጠርጎ እየወሰደው ነው።

❤ እናም ወዳጄ! ሰዎች ሲያመሰግኑህ ሲያወድሱህ ሲያደንቁህ ሲያከብሩህና ከፍ ከፍ ሲያደርጉህ ጎርፉ በርህ ላይ ደርሷልና ለራስህ አልቅስ እንጂ ደስ አይበልህ። ደግሞም በነቀፉህ በጠሉህ በከሰሱህ ስምህን ባጠፉና በራሳቸው ግምት ያሻቸውን ማንነት በሰጡህ ጊዜ እግዚአብሔርን አመስግነህ ደስ ይበልህ።

❤ ወዳጄ በትላንቱ የማይጸጸት ሰው የለም። የሰው ልጅ ለሚናገረው ቃልና ለሚያደርገው ድርጊት በጣም ችኩል ነውና ስሜትህ ሰዎች በሚሉህና በሚያደርጉት ነገር አይናወጽ። አንተ ብቻ ሁሉን ጊዜ ወስደህ፣ በማስተዋል መርምረህ፣ በትዕግስት አሽተህ፣ በምግባር ተናገር። ይህ ሲሆን አጠገብህ ሰው ኖረ አልኖረ፣ ገንዘብ ኖረህ አልኖረህ፣ የሚጠሉህ የሚከሱህ የሚያሙህና ስምህን የሚያጠፉ ኖሩ አልኖሩ፣ ሰው ወደደህ ጠላህ አንተ ዘወትር በሰላም በደስታና በጤና ብዙ ዘመናትን ትኖራለህ። እግዚአብሔር የተመሰገነ ይሁን🙏

🌺 እናቴ ማርያም ውድድድ የምታደርኝ ትንሹ ሔኖክ ነኝ🌹

❤ የፍየሎች ዘመን

🌹ትንሹ ሔኖክ

በፍየሎች ዘመን በግ ሆነህ ስትገኝ
በጥላቻ መሀል ፍቅርን ስትቀኝ
ከቀልድ ከፌዝ ይልቅ ቁምነገር ካወጋህ
በአንድነት ተስማምቶ ሁሉ ነው ሚጠላህ
ብልግናና ክፋት ለመስራት ካልወጣህ
እንደ እነሱ ሆነህ ነፍስህን ካላጠፋህ
እንደ ሞኝ እንደ ጅል በሽተኛ ተቆጥረህ
በሄድክበት ሁሉ በሰው ትገፋለህ
እናም የኔ ወዳጅ ተጓዝ በተጠንቀቅ
ዘመኑን አስተውል በወጥመድ አትውደቅ
ነፍስን ሚያስጨንቀው የፍየሎች እድሜ
ከወራት አጭር ናት ጎዶሎዋ ጳጉሜ

❤ ወዳጄ! ምንም አይነት ምክንያት አንተነትህን አይለውጠው። እምነት ምግባር ሃይማኖትህን አጥብቀህ በተግባር ፈጽማቸው። ስለሰው ብለህ እውነትን ጥርጥር ውስጥ አትክተት። ሁሌም ለራስህ የታመንክ፣ በአቋምህ የጸናህ፣ ተስፋህን በእግዚአብሔር ላይ ያደረግክ ጤነኛ ሰው ሁን። ዛሬ የምታየውና የምትሰማው እንዲሁም በህይወትህ የሚሆነው ነገር ሁሉ ነገ ፈጽሞ አይኖርም። ክፋትና የክፋት ስራ ሁሉ እድሜው አጭር ነው።

❤ በሚያልፍ ፈተናና በሚለወጥ ቀን የማይጠፋ ህመምን እንዳያገኝህ ከንጽጽር ፉክክር ውድድርና የማይጠቅምህ እልህ ነፍስህን ለያት። ትላንት አለም ጠባቸው የሮጡ፣ በብልጠታቸው ብዙዎችን የቀደሙና እግዚአብሔር በማይወደው መንገድ ተጉዘው ብዙ ሲናገሩ፣ ሲዘፍኑና ሲጨፍሩ የነበሩ ሁሉ አሁን ጠፍጣፋ ድንጋይ ተዘግቶባቸው በሁለት ሜትር ቦታ ጸጥ ብለው ከተቀመጡ አመታት አልፈዋል። ወዳጄ ይህ የፍየሎች ዘመን ነው። በግ መሆን ወንጀል ነውና ነገርህን ሰውር። አልያ እንኳን ሰው ሳር ቅጠሉ ሁሉ በጠላትነት ይነሳብሀል።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ተዋህዶ ሃይማኖቴ

🌹ትንሹ ሔኖክ

ወዳጄ! ምላስህ ከድርጊትህ አይቅደም። የአንተ ትክክለኛ ጊዜ እስኪመጣ ድረስ ነገርህን ሰውረህ ሰዎች እንደሚያወቁህ እያሰቡ እንዲኖሩ አድርጋቸው። ዝቅ ማለትና ትንሽ ሆነህ መታየት ከብዙ ወጥመድ ይሰውርሀልና ትልቅ መባልና በሰዎች መከበርን አትውደድ። ቅድስት ኤልሳቤጥ መጸነሷን ሰውራዋለች። ይህም የሆነው አንደም እግዚአብሔር ነውሯን በክብር ስለለወጠላት ለማመስገን፤ አንደም የሰጣት ስጦታ ደርሶ ራሱን እስኪገልጥ ድረስ ከጊዜ ላለመቅደም ነው።

❤ ወዳጄ! ወዳጅና ጠላትህን አንተ ፈጽሞ አታውቀውም። የሰው ትልቁ ጠላቱ የራሱ አንደበት ነው። አንደበቱን የሚገዛ ከተማ ከሚገዛ ይበልጣል የተባለውም ለዚህ ነው። ወዳጄ ወንጌል ማለት የኢየሱስን ስም መጥራት አልያም የእመቤታችንን የቅዱሳኑን ስም እየጠሩ ያማረ ቃል መናገር አይደለም።

❤ ከትዕዛዛቶቹ አንዱ የጌታ አምላክህን ስም በከንቱ አትጥራ ይላል። ከነብያት ጀምሮ በመጽሐፍ ቅዱስ የተጻፈልህ የቅዱሳን ታሪክ ያን እየተናገርክ እንድትኖር አይደለም። እነሱ ምን ማድረግና እንዴት መኖር እንደሚገባህ ምሳሌ ሆነው ያስተማሩህ ናቸው። ወንጌል ማለት ዛሬ ናት። እሷም እውነት ናት።

❤ ዛሬ በነፍስ በስጋ ሳለህ እውነትን ብትኖራትና ሃይማኖትና ምግባርህ ያማረ ቢሆን የአንተም መንገድ ለሌሎች መማሪያ ምሳሌ ይሆናል። አልያ አንተ ንፉግና ምግባርህ የጠመመ ክፉ ሆነህ ሳለ አብርሀም ልጁን ለእግዚአብሔር ለመሰዋት ፈቀደ ብለህ በእንባ ብታስተምር ወንጌልነቱ ምንድን ነው።

❤ አየህ ወዳጄ በዚህ ዘመን ያማረ ቃል የሚናገሩ፣ ብዙ የመጽሐፍ ቅዱስ ታሪኮችን የሚናገሩ፣ ኢየሱሴ፣ ማርያም፣ ገብርኤል፣ ሚካኤል እያሉ በየአደባባይ የሚያስተምሩ የሚዘምሩ የሚከራከሩ የሚነቃቀፉ የሚሰዳደቡ የሚናናቁ ብዙ ናቸው። እነሱ ወንጌልን ተናገርንና ሰበክን ይላሉ። ነገር ግን ይህ ድርጊት በራሱ የወንጌል ተቃራኒ ነው።

❤ ወዳጄ ወንድምህን በበጎ ሀሳብ፣ በመልካም ምግባርና በቀና ልቦና በፍቅር አስተምረህ ታሸንፈዋለህ እንጂ ወንጌል በንግግርና ባማረ ትወና ፍሬን አታፈራም። ክርስቲያን እውነትን ያያታል ይሰማታል፣ ሰምቶ ይፈጽማታል፣ ከዛም እሷ ራሷ አፍ አውጥታ መናገር ትጀምራለች።

❤ ነገር ግን ይህ የአፈ ቀላጤ፣ አስመሳይ፣ አጭበርባሪ፣ በአጠቃላይ የሀሰትና የዲያቢሎስ የክፋት ጊዜ ነውና ሰው በንግግሩ እንጂ በምግባሩ ቀና መሆንን አይፈልግም። የእግዚአብሔርና የቅዱሳኑን ስም በመጥራት፣ የሚያማምሩ ቃላት በመናገርና የውሸት እንባን በማፍሰስ ሰውን እያሳተና ወደ ወጥመድ እየከተተ ወንጌል ሰራሁ እግዚአብሔርንም ደስ አሰኘሁ ይላል። እንግዲህ ጊዜ ሁሉን እስኪገልጥ መታገስና መሰወር መልካም ነው።

❤ ወንጌል እውነት ናት፤ መገኛ አድራሻዋ ሀይማኖት፣ መገለጫዋም በጎ ምግባር ነው። ይህም በተዋህዶ የተገለጠ ነው። እኔ ይህን በኦርቶዶክስ ተዋህዶ ሀይማኖት ውስጥ አግኝቻለሁ። እግዚአብሔር ይምስገን ✝️

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ በሰው ላይ አትፍረድ

🌹 ትንሹ ሔኖክ

ወዳጄ እግዚአብሔር ሰውረን የምንሰራውን ኃጥያት በግንባራችን ቢጽፈው ወይም ድምጽ አውጥቶ በሄድንበት ሁሉ የሚናገረው ቢሆን ከእኔ ጀምሮ ከቤቱ የሚወጣ ማን ይገኝ ነበር። አየህ ወዳጄ! እግዚአብሔር ታጋሽና ፍጥረቱን የሚወድ ነውና ምንም ብንበድልና ብናጠፋ አንዴ የሰጠንን ዘመን እስክንፈጽም ይጠብቀናል።

❤ ወዳጄ! የሰዎችን ስህተት ለማጉላት፣ ጥፋታቸውን ለመናገርና ኃጥያታቸውን ለመግለጥ አትቸኩል። በርግጥ በዚህ ዘመን ሰውን ማማት፣ መክሰስ፣ መወንጀልና ስም ማጥፋት እንደ እውቀት ስልጣኔና ጽድቅ ይቆጠራል።

❤ ወዳጄ እግዚአብሔር የአንተን ኃጥያት እንደሰወረልህ አንተም ወንድም እህትህ ስተው አልያም አጥፍተው ብትመለከት ወደ ህይወትና ትክክለኛ መንገድ እንዲመለሱ ምክንያቱ ሁናቸው እንጂ በቁጣ፣ በክስ፣ በስድብ፣ በማስፈራራት፣ በቀልድና በፌዝ በስራቸው እንዲሳቀቁና ከእግዚአብሔር ተለይተው እንዲርቁ አታድርግ።

❤ ወዳጄ! የስጋ እናት ልጇ ሌባ ይሁን አመጸኛ፤ ዱርዬም ይሁን ሱሰኛ ሌላ ሰው ሲነካባት አትወድም። እግዚአብሔርም ልጆቹ በኃጥያት ቢወድቁና ቢስቱ እርሱ እራሱ ሲገስጽ ሲቀጣና ሲነቅፋቸው እንጂ ሌላ ማንም ሲነካበት አይወድም። ምክንያቱም በእሱ ዘንድ ንጹህ የለምና።

❤ እናም ወዳጄ! የኃጥያተኛን ኃጥያቱን ብትናገር ሸክሙን አንተ ትወስዳለህ ሀብትም ትሆነዋለህ። አንተ ግን ያለህ ይወሰድብሀል፤ ስለ ፍርድህም ይፈረድብሀል። እግዚአብሔር ልጆቹን ቢዘልፍ ቢገስጽና ቢቀጣ እንዲመለሱ ነው። እኔና አንተ ግን ሰዎች እንዲዋረዱና እንዲጠፉ ነው ፍላጎታችን። እናም ወዳጄ በራስህ እንዲሆን የማትፈልገውን በወንድምህ ላይ አታደርግ🙏

👉 ወዳጆቼ ትንሹ ሔኖክ ነኝ እያሉ ለአመታት ብዙ ማጭበርበርና ክፉ ድርጊት የሚፈጽሙ ሰዎች አሉ። ልታገኙኝ የምትፈልጉ ትክክለኛው የፌስቡክ አካውንቴ ይህ "የማርያም ሔኖክ" የሚለውና ሌላኛው "Henok Worku" የሚለው ነው። በዛ ላይ መልዕክት ስትልኩ ትክክለኛውን የቴሌግራም ቻናሌን ሊንክ እልክላችኋለሁ። ክፋት የዲያቢሎስ ነው ያን ማስቆም አይቻልም። መጠንቀቅ ግን መልካም ነው🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ እናቴ ውድድ አደርግሻለሁ

🌹ትንሹ ሔኖክ

ማርያም የኔ እናት! ሁሌም ልቦናዬ አንቺን ባሰበ፣ ህሊናዬ ንጽህናሽን ባስተዋለ፣ ጆሮዬ ስለትህትናና ፍቅርሽ በሰሙ፣ አይኖቼ ስዕልሽን በተመለከቱና አንደበቴ ስምሽን በጠራ ጊዜ ነፍሴ የሚሰማትን ደስታ የምገልጽበት ቃል የለኝም።

❤ እናቴ! አንቺኮ ልጅሽ ክርስቶስ በተሰቀለ ጊዜ ያን ልብ የሚሰነጥቅ ሀዘን በልብሽ ይዘሽ በስርሽ የተሰበሰቡ ሐዋርያትን ታጽናኚያቸው ነበር። ታድያ እኔስ ነፍሴ ዘወትር የምትጽናና የምትደሰተው በአንቺ አይደለምን።

❤ እመቤቴ! እኔ አንቺን ከሚጠሉና ስምሽን መጥራት እንደ ነውር ከሚቆጥሩ ቤተሰቦች ተገኝቻለሁ። ስለአንቺ የሰማሁት ከስድብና ከንቀት ውጭ ሌላ ነገር አልነበረም። ነገር ግን በህገ ልቦና አስተምረሽ ፍቅርሽን አቀመስሺኝ።

❤ እናቴ! አንቺ ምን የሚነቀፍና የሚጠላ ነገር ይገኝብሻል። እንኳን የሰው ልጅ ሰይጣን እንኳን በአንቺ ላይ የሚያነሳው ነውር የለም። እናቴ! ቅዱስ ዳዊት በመዝሙሩ በአንቺ የሚኖሩ ሁሉ ደስ ይላቸዋል ይላል። እውነት ነው እኔ ሁሌም በአንቺ ደስ እያለኝ እኖራለሁ።

❤ እናቴ! አሁን በኋላ ዛሬ ወይም ነገ አልያም የፈጠረኝ እሱ በጻፈልኝ በዚያች ቀንና ሰዓት ነፍሴ ወደ አንቺ ወደ ውድ እናቷና በፍጹም ፍቅሩ ወደ ሚወዳት አባቷ ልጅሽ ኢየሱስ ክርስቶስ ስጋዬም ወደ አፈርነቷ ትመለሳለች። አለምና በሷ ያለውን ጨምሮ እኔ ራሱ የራሴ አለመሆኔን በሚገባ አውቂያለሁ። ለካስ ራስን ሙሉ በሙሉ ለእግዚአብሔር አሳልፎ መስጠት ህይወት ነው። እናቴ አንቺን የያዘ ሰው በአንቺ የማይሆንለት ምን አለ። እጅግ በጣም እንደምትወጂኝ አውቃለሁ። እኔም ከአንቺ በላይ ውድድድ አደርግሻለሁ። ሁሌም ፍቅሬን እንድገልጽልሽ ስለምታደርጊኝም አመሰግንሻለሁ🙏።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ወዳጄ እግዚአብሔር ከአንተ ጋር አለ

🌹ትንሹ ሔኖክ

❤ ወዳጄ ነገ ሌላ ቀን ነውና ዛሬ በህይወትህ እየሆነ ባለው ነገር የምትበሳጭ የምታዝን የምትጨነቅ የምትፈራና ተስፋ የምትቆርጥ አትሁን። ዲያቢሎስ አጠገብህ ያሉና የኔ የምትላቸውን ቤተሰብና ጎደኞችህን እቃ አድርጎ በብዙ ይፈትንህ ያስጨንቅህ ይረብሽህ ይንቅህ ይሰድብህ ይቀልድብህና ያሾፍብህ ይሆናል።

❤ ነገር ግን ወዳጄ! ይህን ከሚያደርግብህ ጠላትህ ዲያቢሎስ ክፋትና የሰዎች መጥፎ ድርጊት ይልቅ በዚህ ሁሉ ውስጥ ዛሬም የሚጠብቅህ አምላክህ እግዚአብሔር ሀይሉ ሊያስገርምህ፣ ፍቅሩ ሊያስደንቅህና በአንተ ያለው ተስፋ ሊያበረታህ ይገባል። እኔ ከወለዱኝ እናት አባት እህት ወንድሞቼ ጀምሮ በቤተሰብ ወዳጅ ዘመድ ጎረቤት ሰዎች ሁሉ የተናቅኩና እንደ ሰው የማልቆጠር ልጅ ነበርኩ።

❤ ወዳጄ! ኃጥያትን መስራትህ፣ እግዚአብሔር የሚጠላውን ማድረግህና በጥፋት መንገድ መገኘትህ እግዚአብሔር ለአንተ ያለውን ፍቅር አይቀይረውም። እርሱ ኃጥያትን እንጂ ኃጥያተኛውን ሰው ጠልቶ አያውቅም። ግን ከነ ኃጥያትህ ወደ መንግስቱ ሊያስገባህም አይችልም። ወዳጄ! እኔም ከአንተ በብዙ የጠፋሁ ወንደምህ ነኝ። ነገር ግን እግዚአብሔር አልተወኝም። ንሰሀ ብገባና አባቴ ብለው በደስታ ተቀብሎኛል።

❤ ወዳጄ! ዘወትር ስለአንተ የምታነባ እናትህ ወላዲተ አምላክና አለምና በሷ ያለውን በመጥላት ስለራሳቸው ሳይሆን ስለእግዚአብሔር ፍቅር ብዙ መከራና ስቃይን ተቀብለው የጽድቅ አክሊልን የተቀናጁ እልፍ አእላፍ እናት አባቶች እንዳሉህ አትርሳ።

❤ ወዳጄ ብዙዎቹ አስቀድመው ከእኔና አንተ በከፋ ኃጥያት ውስጥ ይኖሩ የነበሩ መሆናቸውን በግልጽ ተናግረዋል። እናም ወዳጄ አንተ እንደምትለውና እንደ ምታስበው እግዚአብሔር ከአጠገብህ ባይኖር ከጠፋህ በሰነበትክ ነበር። ወዳጄ እኔ ሰው ነኝ መልካምነትን ባሳይህ ወይም ብታገስህ ለኔ መልካም እስከሆንክ ድረስ ብቻ ነው። እግዚአብሔር ግን የፈጠረህ ልጁ ነህና በፍጹም ፍቅሩ ይወድሀል።

❤ ወዳጄ! ዛሬ በኑሮ ተፈትነህ፣ በሰዎች ብዙ መከራ ደርሶብህ፣ የኔ የምትለው አንድም ሰው ስለሌለህ ተጨንቀህ፣ና አዝነህ ይሆናል። ወዳጄ እመነኝ እንደዛ ከሆነ አንተ ያለህ እግዚአብሔር ነውና ደስ ይበልህ። በዚህ ምድር ወዳጅ ዘመድ ጓደኛና ቤተሰብ የሚያጽናናቸው ሰዎች ያልታደሉ ናቸው። እግዚአብሔር የሚጽናናውና ወላዲተ አምላክ ለብቻው የማትተወው ሰው ፍጹም እድለኛ ነው።

❤ ወዳጄ! ሰው ምን ያደርግልሀል፤ ምንስ ያደርግሀል። እናም ወዳጄ! ይህ እስኪገባህ ዲያቢሎስ ሰው የለህም እግዚአብሔርም ጠልቶሀል እያለ በብዙ ያስጨንቅሀል። ወዳጄ እኔ በስም አላውቅህም፣ በአካልም አታውቀኝም ነገር ግን እውነት እልሀለው እግዚአብሔር ለሰው ልጅ ያለውን ፍቅር ሳውቅ የሰው ልጅን በፍጹም ልቤ ወድኩት። እናም ወዳጄ የምሰጥህ ገንዘብ ወይም አሁን ያለህበትን ችግር ማጥፋት ባልችልም በፍጹም ልቤ እንደምወድህ እወቅ። ለዚህም ነው ይህን እውነት የምጽፍልህ። ደግሞ እግዚአብሔር አለኝ እያለክ ጠላትህ ሰይጣንን ዝም አኘው።

❤ ወዳጄ! አንተ ግን ዛሬ ንሰሀ ግባ ወደ እግዚአብሔር ተመለስ። እርሱ ከመጀመሪያም አልተወህም። ርቀኸውና ሸሽተኸው የሚጠቅሙህ መስሎህ በጣላቶችህ እጅ የወደቅክ አንተ ራስህ ነህ። ወዳጄ አይዞህ በርታ እግዚአብሔር ከአንተ ጋራ ነው።

❤ ወዳጄ! እሱ ዝም የሚልህ አንተ አባቴ መመለስ ፈልጋለሁ ብለህ በተግባር መራመድ እስክትጀምርና ዲያቢሎስና በክፋት የተነሱብህ ሰዎች ክፋታቸውን እስኪጨርሱ ነው። ይህ ከህነ በኋላ እርሱ በተዋረድክበት ያከብርሀል፣ በተናቅክበት ከፍ ከፍ ያደርግሀል፣ ባዘንክበት ያስደስትሀል፣ እንባህን ያብስልሀል፣ በሰደቡህ በገፉህ በቀለዱና በተሳለቁብህ ሰዎች ፊት በሞገስ አቁሞ አንገታቸውን ያስደፋቸዋል። እናም ወዳጄ እግዚአብሔር እያንዳንዷ እርምጃህን ያያልና ተስፋ አትቁረጥ።

❤ አንተ እጅ ካልሰጠህ እርሱ በፍጹም አሳልፎ አይሰጥህም። ወዳጄ ትዕግሥትን ስጠኝ በለው። የአንተ ጊዜ እስኪመጣ በእምነት ጽና፤ እውነት እልሀለሁ ዛሬህ ለነገህ ብዙ የምትማርበት፣ ለብዙዎች ማስተማሪያ የሚሆንና እግዚአብሔርን የምታመሰግንበት ታሪክህ ነውና በእምነት ጽና🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አምላኬ ዘወትር አመሰግንሀለው

🌹ትንሹ ሔኖክ

ወዳጄ! ጭቃ በደንብ ተረግጦ ካልቦካ ቤት ብትለስነው አይዝም፣ የምትፈልገውን እድሜ አይኖርም፣ ውበትም አይኖረውም። ነገር ግን በደንብ ተደርጎ ለቀናት የተቦካን ጭቃ ጭድ እየነሰነሱ ቢለስኑት ዘመኑ ረጅም አገልግሎቱ መልካም ነው።

❤ ወዳጄ! የሰው ልጅም እንዲሁ በህይወት ሳለ በመከራ ፈተናና ችግር ካልተፈተነና ያንን በጽናት በእምነትና በተስፋ መወጣት ካልቻለ በነፍሱም ሆነ በስጋው ሙት ይሆናል። ወዳጄ! ፈተናና ችግር አንተን ይሰሩሀል፣ ያበረቱሀል፣ ያተጉሀል፣ የእግዚአብሔርን ሀይልና ለሰው ልጅ የተሰጡትን ጥበብና ጸጋዎች እንድታገኝ ያደርጉሀል።

❤ ወዳጄ! መከራ ፈተና ችግርና ስቃይን ተቋቁሞ ሁሌም በትዕግሥት የሚኖር ሰው አንደበቱ የሚጣፍጥ፣ ንግግሩ መልካም፣ ሀሳቡ መድኃኒት፣ ምክሩ ህይወት፣ ተግሳጹ መንገድ፣ ፍቅሩ እውነት በአጠቃላይ እግዚአብሔር ከእርሱ ጋር ነውና ፍሬው ሁሉ ያማረና ጣፋጭ ነው።

❤ ወዳጄ! እንዲህ ያለው ሰው ለራሱ ነፍስ የሚያስብ ወይም በስጋ ተመችቶት የሚኖር ሰው አይደለም። ይልቁኑ እለት እለት ፈተና መከራና ስቃይ የሚደራረቡበት ነው። እናም ወዳጄ በምድር ሰው ሆነህ መኖርን ትሻ እንደሆነ መከራና ፈተናን በፍቅር ልትወዳቸው ይገባል። ደግሞ ሰው በራሱ ፈቃድና ምኞት ተስቦ ከእግዚአብሔር ህግ መውጣቱ ይፈትነዋል እንጂ እግዚአብሔር ማንንም አይፈትንም።

❤ ወዳጄ! እጅግ በጣም በድህነትና በችግርና ውስጥ ስላደግኩ ሁሌ አዲስ አመት ሲመጣ እቅዴ አምላኬ ካለፈው አመት በብዙ እጥፍ የሚበልጥ ፈተና መከራና ችግር ስጠኝ፤ ነገር ግን መጨረሻው በአንተ አሸናፊነት የምጨርሰው ይሁን እላለሁ። በዚህ ቤተሰቦቼን ጨምሮ ጓደኞቼ በጣም ይቀልዱብኝ ይናደዱብኝና ይበሳጩብኝም ነበር።

❤ በርግጥ ልክ ነው! የጥጋብ የስኬትና የምቾት አመት አድርግልኝና ቤትና መኪና ልግዛ ብሎ ለሚያቅድ ሰው ይህን መናገር እብደት ነው። ነገር ግን እነሱ በፈተና ውስጥ ያለውን በረከትና የጸጋ ስጦታ አያውቁትም። እኔ እግዚአብሔር የተጨነቁ የሚያርፉበት፣ ያዘኑ የሚጽናኑበት፣ የተናቁ የተገፉ የተጠሉ የተዋረዱና አለምና ሰው የሚያሳድዳቸው እህት ወንድሞቼ የሚያርፉበት ቤት እንዲያደርገኝ ነው ጸሎቴ።

❤ ይህም ያለ መከራ ፈተናና ጽናት ፈጽሞ አይሆንም። ወዳጄ! ለስጋቸው ቤት የሰሩ መቼ በሰሩት ውስጥ በሰላም ኖሩ። በክፋትና ኃጥያት በግፍ በሰበሰቡት ብር የሰሩት ቤት ለቅሶ ምሬት በሽታና ስቃይ ነው የሆነባቸው። የገዙትም መኪና ወደ መቃብራቸው ነው የወሰዳቸው። ሰው ከእግዚአብሔር ውጭ ምንም ቢሰራ በከንቱ ደከመ።

❤ ወዳጄ! እግዚአብሔር ያለው ሰው ሁሌም ጤነኛና ሀብታም ነው። ነገር ግን ሀብቱን በቁስ ፍቅር የታወሩ ሰዎች ሊያዩትና ሊያውቁት አይችሉም። እነሱ የለበሰውን ልብስና ጫማ ጥራትና ዋጋ፣ የሚኖርበትን ቤት ስፋትና ጥበት፣ በዙሪያው ያሉ ሰዎችን ማንነት እንጂ የእግዚአብሔርን ጸጋ ማየት አይችሉም።

❤ ሙታን ከሞተ ነገር ውጭ ህያው የሆነና የዘልዓለም ነገርን ማየት አይችሉም። የሰው ልጅ ካወቀበትና በሚገባ ከተጠቀመበት ሀብቱ መከራ ፈተናና ችግር እንጂ የወረቀት ገንዘብ ወይም የእግዚአብሔር ነጻ ስጦታ ሆኖ ሳለ በስግብግብነት በጊዚያዊነት የሚኖረው ቁስ አይደለም። አምላኬ ስለ ፍጹም ፍቅርህ አመሰግንሀለው🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ለበጎ ነው

🌹 ትንሹ ሔኖክ

አንተ ያልከው ሊሆን የፈቀድከው ላይቀር
በራሴ ተጉዤ ለምን እንዲሁ ልክሰር
ከቤትህ እርቄ ከቃልህ ወጥቼ
ነፍሴ ተሰቃየች ፍቅርህን ጠልቼ
አምላኬ ጌታዬ ባክህ ይቅር በለኝ
ልጅህ አድርግና ከእቅፍ አሳርፈኝ
አንተ ያልክልኝ ጊዜ ቀኔ እስኪመጣ
በትዕግስት አጽናኝ ከቃልህ ሳልወጣ
መከራው ቢበዛ አለም ብትጠላኝ
ባላት ነገር ሁሉ አምርራ ብትጎዳኝ
አባት አለኝ ብዬ ስምህን ስጠራ
ሁሉን አልፈዋለሁ አንዳችም ሳልፈራ
እውነትን እናዳልኖር አሳዳጄ በዝቷል
ወዳጄ የመሰለኝ ጠላት ሆኖብኛል
ጥርሱን እያሳየ በሳቅ ሚደልለኝ
ጓደኛ ነኝ ይላል ከጉድጓድ ሊጥለኝ
ደግሞም በዚህ ምኞት ፍላጎቴ
ፈተና ሆነዋል ለጽናት እምነቴ

❤ ወዳጄ! ቅዱስ ያዕቆብ በአንደኛ በመልዕክቱ "እግዚአብሔር ማንንም አይፈትንም" ይላል። በሃይማኖት የሚገኝ ፈተናና መከራ ዋጋ እንደሚያሰጥም ይመሰክራል። ወዳጄ ፈተናን ለታገሳትና ጸንቶ ለተወጣት እንቁ ናት። ነገር ግን ለሆድና ለስጋህ ስትል በተንኮል በአራድነት በክፋትና በማስመሰል በራስህ ምኞት ያመጣኸውን ፈተና እግዚአብሔር እንዳመጣብህ የምታስብ ከሆነ ዝቅ ብሎ መልሶ እንዲህ ይልሀል "በከንቱ የሚወቅስና የሚጠራጠር ሰው ከእግዚአብሔር ዘንድ ምንም የሚያገኝ አይምሰለው"። አየህ እግዚአብሔር ሁሌም በፍጹም ልባቸው የሚወዱት ሰዎች የሚጠይቁትን አይከለክላቸውም።

❤ ከቀን ወደ ቀን ፈተና ጸባይና መልኩን እየቃያየረ ይመጣል። ነገር ግን እግዚአብሔር ሁሉን አዋቂ ነው። ነገር ሁሉ ለበጎ ነው። ይህን ቃል በተግባር ስኖረው ብዙ ነገሮችን አትርፌበታለሁ። የሆነው ሁሉ ለበጎ ነው። ተመስገን። መቼም ቢሆን መቼ እስከ ዕለተ ሞቴ የምሬት ቃልን እንዳልናገር አምላኬን አምነዋለሁ። እንባዬን ለእናቴ ለድንግል ማርያም ስለፍቅሯና ስለማይነገር እናትነቷ ከእግሯ ስር አፈሳለሁ።

❤ አለም ለላይኛው የደስታ ወይም የለቅሶ ጉዞ መንገድ ከመሆን ውጪ ምንም እንዳልሆነችና ምንም እንደሌላት በማየቴ እግዚአብሔርን አመሰግነዋለሁ። በርግጥ እውነተኛዋ መንገድ ቀጭንና ጠባብ ናት ቤተሰብም ሆነ ጓደኛ ይዘው መሄድ አይችሉም። ሁሉ እንደፈቃዱና እንደ ስራው እንዲኖር ተፈቅዶለታል ✝️

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ በልቅሶ የሚዘሩ በደስታ ይለቅማሉ
          መዝሙር፥ 125

🌹 ትንሹ ሔኖክ

❤ ወዳጄ እኛ እውነትን ለማወቅና መልካሙን መንገድ ለመከተል አልፈለግንም እንጂ በምድር ህይወታችን እንዴትና ከማን ጋር መኖር እንደሚገባን የቀደሙ ነብያት፣ ነገስታት፣ ሐዋርያትና ቅዱሳን አባቶቻችን ሁሉን በሚገባ ጽፈውና አዘጋጅተውልን አልፈዋል።

❤ ወዳጄ አድምጠኝ! ወላዲተ አምላክ ቅድስት ድንግል ማርያም ዘመኗ ሁሉ የመከራ የችግር የለቅሶና የሀዘን ነበረ። ስምኦን በቤተ መቅደስ ባገኛት ጊዜ ይህ ህጻን ለፍጥረት ሁሉ የመዳን ምክንያት ይሆናል፤ አንቺ ግን በነፍስሽ ሰይፍ ያልፋል ብሎ የሚገጥማትን መከራ አስቀድሞ ነግሯት ነበር።

❤ እናም ገና ልጇን ወልዳ አራስ ሳለች ዲያቢሎስ በሄሮድስ አድሮ ያንን ረጅምና አስጨናቂ በረሀ በስደት ተጉዛለች። በመንገድ ቢርባትና ቢጠማት በሰዎች እያደረ በመከልከል መከራን አጽንቶባታል። በወንበዴና ሽፍታ ተመስሎ በመዝረፍና በማሰቃየትም እንባዋን አስፈስሷል። ልጄን ገደሉብኝ ስትል ብዙ አልቅሳለች። ደግሞም ጊዜው በደረሰ ጊዜ በሀሰት ፍርድ ይዘው ሲሰድቡት፣ ሲተፉበት፣ ሲገርፉትና በስተመጨረሻም በመስቀል ሲሰቅሉት እንባዋ እንደ ጎርፍ ፈሷል። ሀዘኗም ሰይፍ ሆኖባታል።

❤ ወዳጄ ታድያ ያ ሁሉ የለቅሶ መከራና የስቃይ ኑሮዋ ለኛ ለሰው ልጆች ዘር ነበረ። ያ ባይከፈልልን ኖሮ ዳግም ሰው ባልሆንን ነበር። እንግዲህ እመቤታችን ከመከራዋ ይልቅ በልጇ ምክንያት ከገሀነብ የወጡትን የሰው ልጆች ባየች ጊዜ ፍሬዋ መልካምና ደስ የሚያሰኛት ሆኖ ዛሬ ድረስ እውነትን በሚኖሩ ልጆቿ ትለቅመዋለች።

❤ ወዳጄ! ዛሬ ክፋትን ተሞልተን፣ በተንኮል፣ በቅናት፣ ምቀኝነት፣ በእልህ፣ በትዕቢት፣ በገንዘብና ጉልበታችን በመመካት በየእለቱ በራሳችንና በሰዎች ላይ የምንሰራው ክፉ ስራና ኃጥያታችን፤ ዛሬ ደስ እያለን የምናደርገውና እንደ እውቀት ብልጠትና አራድነት ቆጥረን የምንዘራውን ዘር ኋላ በለቅሶ የምናጭደው ይሆናል። ዛሬ ሁሉም የትላንት የሳቅ ዘሩን በለቅሶ እያጨደ ይገኛል።

❤ ደግሞም! እግዚአብሔርን በመፍራታቸው፣ እውነትን በመፈለጋቸው፣ ቅንነት፣ የዋህነት፣ በጎነት፣ ሩህሩህነትና ትእግስትን ገንዘብ በማድረጋቸው በቤተሰብ ጎደኛና አጠገባቸው ባለ ሰው ብዙ መከራና ስቃይን የሚቀበሉ፤ በድህነታቸው፣ በችግራቸው፣ በማጣታቸው፣ ባለመማራቸውና ወዳጅ ዘመድ ስለሌላቸው በሰዎች የተናቁ፣ የተገፉ፣ የተዋረዱ፣ ሀቃቸው ላባቸውና የድካማቸው ፍሬ ተወስዶባቸው የተጣሉ፤

❤ ስለ መልካምነታቸው ክፋት፣ ስለየዋህነታቸው ጭካኔ፣ ስለመታዘዛቸው ስድብ፣ ስለፍቅራቸው ውርደትና ጥላቻን የተመለሰላቸው ሁሉ በለቅሶ የኖሩባት እያንዳንዷ ቀናቸውን እግዚአብሔር እንደ ዘር ቆጥሮ በጊዜው በደስታ በክብር በሰላም ያኖራቸዋል። በእውነት ይህ ሲሆን በአይንቼ አይቻለሁ።

❤ በርግጥ ዛሬ በመብላት፣ መጠጣት፣ ዘፈን፣ ዳንስ፣ ጭፈራ፣ ብልግና ክፋት ተንኮልና የኃጥያት መንገድ ደስ እያላቸው የሚዘሩ፤ ሌብነት ማጭበርበር ውሸትና ማስመሰልን ልብሳቸው ያደረጉ እንጂ በለቅሶ መዝራትን የሚመርጡ ጥቂቶች ናቸው። ወዳጄ መንፈስ ቅዱስ በቅዱስ ዳዊት አድሮ በደስታ የሚዘሩ በለቅሶ፣ በለቅሶ የሚዘሩ ደግሞ በደስታ እንደሚለቅሙ ይናገራል። አምላኬ ነፍሴ በስጋዬ እስካለች በለቅሶ እንድዘራ እምነት ተስፋ ትዕግሥትና ጽናትን ስጠኝ🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ጉረኛ

አለማወቅ ማወቅ፤ ማወቅ እብድ ተብሎ
ሀሰት ተሸለመች፤ እውነት በእስር ውሎ
ብልግናና ክፋት፤ በሁሉ ተወደው
ሙሁር ይባላሉ፤ ጽድቅ ላይ አድመው
ቂም በቀል ጥላቻ፣ ቅናት ምቀኝነት
መካሪዎች ናቸው፤ በሁሉ ሰው ህይወት
ይህን ሁሉ አይቼ፤ ብቻ መሆን ብመርጥ
ጉረኛ ነው አሉ፤ ልቤን ለክፉ ባልሰጥ

🌹ትንሹ ሔኖክ

❤ ብልጡ ሰው

🌹ትንሹ ሔኖክ

የሚበላው መስሎት ሁሉን ነክቶ ነክቶ
አንድም አልተረፈው ምግቡ ተበላሽቶ
እዚህ እዚያ እያለ በከንቱ መዞሩን
ጽድቁ አደረገው ብልግና ክፋቱን
በልብስ በጫማ ገላውን ሸፍኖ
በዘይት በቅቤ እላዩን ለስኖ
በትህትና ፊደል ቃሉን አሳምሮ
ሰው ይመስላል ሲያዩት በጥላቻ ከብሮ

አይ ዘመን አይ ጊዜ እጅጉን ይገርማል
ማወቅ መሰልጠኑ ራስን ማጥፋት ሆኗል

ስለራሱ ማያውቅ ግራ የገባው ሰው
ይመክራል ይዘክራል ሰሚ ብዙ አለው
ቅናት ምቀኝነት ልቡን ሞልቶ ሳለ
ተቆርቋሪ ይመስላል ከፈጣሪው ያለ
በልቡ በቤቱ ግፍ እንደ ጎርፍ ሆኖ
መልካም ሰው ይመስላል በራሱ ጨክኖ

ፈጣሪ እንደ ሰው ሞኝ እየመሰለው
ራሱን ያታላል ክፋቱን ወደደው
አይ የዚህ ዘመን ሰው እጅግ ያሳዝናል
የውሸት እየኖረ የእውነት ይሞታል
በቅዱሳን ምክር በነብያት ትንቢት
ተጽፏል መንገዱ ተገልጻለች እውነት

✝️ አይ የሰው ልጅ! እድሜው ከፍ ባለ ቁጥር ከክፋትና ዲያቢሎስ ጋር ያለው ቁርኝት እየጨመረ የክፋት መሳሪያ ይሆናል። በሁላችን ግንባር ዝሙት፣  የገንዘብ ፍቅርና ትዕቢት የሚል ጽሁፍ ተጽፏል። ግን እኛ የምንቀባው ቅባትና የውሸት ሳቃችን ይህን የሚሸፍንልን ይመስለናል።

❤ አንዱ አንደኛውን መናገርና መውቀስ ያልቻለው ሁላችን አንድ በመሆናችን እንጂ የዚህን ዘመን ሰው ክፋት ብልግናና ኃጥያት ለማየት የተለየ ጻድቅ መሆን አያስፈልግም።

❤ ውሸት ቋንቋችን፣ ማስመሰል ጠባያችን፣ እብደት ደስታችን፣ ክፋት ሀሳባችን፣ ብልግና ስራችን መሆኑንን በመስማማታችን የእግዚአብሔር ፍርድ እስኪፈጸምብን እንደ እንሰሳ እየኖርን ነው። ይህም በመጽሐፍ የተጻፈው የትንቢት ቃል እንዲፈጸም ነው ✝️

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

✝️ ተክለሃይማኖት አባቴ

የስላሴ ተክል የወንጌል አርበኛ
ብርሀን የሆንከን ለደከምን ለእኛ
ባለ በጎ ምግባር የትሁታን አባት
ተጋድሎህ አብርቷል በሰማይ ሰማያት
በስደቷ ጊዜ ነፍሴን አስጠግተህ
አበርትተሀታል በፍቅርህ አጽናንተህ
በጸበልህ አጥበህ ወንጌልን መግበህ
በእምነት አጸናኸኝ በእቅፍህ ከተህ

🌹ትንሹ ሔኖክ

❤ እንደ እኔ ማን በደለ

🌹ትንሹ ሔኖክ

ወዳጄ እኔ ማለት በዘመኔ ሁሉ ኃጥያት በመስራትና እግዚአብሔር ደስ የማይሰኝበትን ነገር በመፈጸም የኖርኩና ዛሬም ድረስ ከኃጥያት መለየት ያልቻልኩ ከንቱ ሰው ነኝ። ሁሌም ለጸሎት ስቆም በጊዜው አራድነት ብልጠትና እውቀት መስለውኝ የሰራኋቸው ስራዎቼ ከፊቴ መጥተው ይደቀናሉ።

❤ ብዙ ጊዜ እነሱን ደስ ለማሰኘትና እንዲወዱኝ እንዲቀርቡኝና እንዳይጠሉኝ ስል ስለእነሱ እግዚአብሔር የሚጠላውን ነገር ያደረኩላቸው ሰዎች ሁሉ ዛሬ ከእኔ ጋር የሉም። ብዙዎቹም መልካም ባልሆነ መንገድ ከህይወቴ ወጥተዋል። ነገር ግን ዘወትር እያሳዘንኩትና እየበደልኩት የኖርኩት እግዚአብሔር ዛሬም ፍቅሩ ሳይቀንስ፣ ቸርነቱና ምህረቱ ሳይለየኝና ረድኤትና በረከቱን ሳያጎድልብኝ አብሮኝ አገኘሁት።

❤ እናም ነፍሴ ይህን ባስተዋለች ጊዜ አምርራ ተጸጸተች። የታሉ እነዛ የሮጥክላቸው፣ እንቅልፍ ያጣህላቸውና የደከምክላቸው ሰዎችና ሁኔታዎች ብላ ጠየቀችኝ። እኔም መልስ አጣሁ። ታድያ ጸጸቱ ሲብስብኝ "ትንሹ ሔኖክ አንተ ለእግዚአብሔር የምተገባ አይደለህም። እሱ ንጹህ ቅዱስ ቸር የዋህና መልካም አባት ሆኖህ ሳለ አንተ ግን ጥሩ ልጁ ልትሆን አልቻልክም። ስለዚህ አንተ የእግዚአብሔር ልጅ ልትባል አይገባህም" ብዬ በራሴ ፈርጄ ከእግዚአብሔር ለመለየት ወሰንኩ።

❤ ታድያ ጸሎቴን አቁሜ ተኛሁ። ለሊት ሆኖ ሳለ አንድ ነገርን ተመለከትኩ። አንድ በብርሀን እጅግ የደመቀና ሁኔታውን መግለጽ የማልችለው ሰው መሳይ ነገር ከፊቴ ቆሞ ልጄ ሲል ጠራኝ። እኔም በጣም በመቀንጠቀጥና በፍራቻ ከፊቱ ቆሜ ዝም አልኩኝ። እርሱም ደግሞ ትንሹ ልጄ አድምጠኝ። አንተ ለኔ የምወድህ ልጄ ነህ። እርግጥ ነው በኃጥያት መኖርህን አውቃለሁ። ነገር ግን እኔ የፈጠርኩህ አምላክህ መሆኔን አስተውል። አንተ በኃጥያት ብትገኝም ያን ኃጥያት እንድትሰራ ዲያቢሎስ የዘረጋብህንም ወጥመድ አውቀዋለሁ።

❤ ልጄ እኔ ልጆቼን ለምን ኃጥያት ሰራችሁ ብዬ ከስሼም ሆነ ተቆጥቼ አላውቅም። ይልቅ ልጆቼ ስለምን ንሰሀ ገብታችሁ ወደ እኔ አልቀረባችሁም ስል ዘወትር እወቅሳችኋለሁ። ልጄ አንተ ከሰው የተበደርከው ገንዘብ ትንሽ ወይም ብዙ ቢሆን እንደ ገንዘቡ መጠን መቀጮህ ይለያያል። እኔ ግን የቱንም ያህል ብትበድሉኝና ኃጥያትን ብትሰሩ እንደገና ልጆቼ የማደርጋችሁ በነጻ ንሰሀ ነው።

❤ ልጄ የሰው ልጅ እንደዚህ በኃጥያት ሲኖርና በመከራ ችግርና ፈተና ሲሰቃይ ላየ እኔ አልታረቅም ወይም ብዙ ዋጋ ክፈሉኝ ያልኳችሁ ነው የሚመስለው። ነገር ግን በእውነት ወደ እኔ መቅረብና እውነተኛ ሰላም ጤናና ደስታችሁን ማግኘት የጠላችሁት እናንተ ናችሁ።

❤ ይህም ኃጥያትን በመውደዳችሁና በራሳችሁ ጥበብ እውቀት ክፋት ተንኮልና ጠማማ መንገድ ሄዳችሁ ኑሯችሁን የምታስተካክሉ፣ ደስታችሁን የምታገኙና ከእህት ወንድሞቻችሁ የምትበልጡ መስሏችሁ እኔ የምጠላውን በማድረግ በመደሰታችሁና ንሰሀ መግባት አለመፈለጋችሁ ነው። ደግሞም ከነ ኃጥያትና ቆሻሻችሁ ሳትታጠቡና ከክፉ ሳትለዩ አንተ አባቴ ነህ፣ ይህን አድርግልኝ፣ ይህን ፈጽምልኝ ትላላችሁ።

❤ ደግሞም በአፋችሁ የምትወዱኝ ትመስላላችሁ። ስራችሁ ሁሉ ግን እኔና ልጆቼን ማሳደድ ነው። ልጄ እስቲ ንገረኝ አንተስ ብትሆን እንግዳ ቤትህ ጋብዘህ እጁን ሳታስታጥብ መዓድ ታቀርብለታለህን። ታድያ ለምንድን ነው ለኔ ሲሆን እሱ ቸር፣ መሀሪና ሩህሩህ ነው ብላቹ የማይገባውንና ትክክል ያልሆነውን የምትፈጽሙት። ስለምን ሰውን እያከበራችሁ እኔና የኔ የሆነን ነገር ታቀላላችሁ።

❤ ልጄ ኃጥያትህን አሳይቶ ጸሎት ያስቆመህ ጠላትህ ዲያቢሎስ ነው። እኔ ጥፋትህን በማወቅህና ወደ እኔ ለመቅረብ በመፈለግህ ደስ ተሰኝቻለሁ። ነገር ግን ይህ ጠላትህ ደጋግሞ ፈትኖ እንዳይጥልህ ንሰሀ ግባና ንጹህ ልጄ ሁን። ከዛ በኋላ የኃጥያትህ ደሞዝ ለሱ ይሰጠዋል። አንተ ራስህን ነጻ ታደርጋለህ። ነገር ግን ልጄ አደራህን ወደ ቀደመ ጥፋትህ እንዳትመለስ" አለኝና ከአጠገቤ ስውር አለ።

❤ እኔም ደንግጬ ከእንቅልፌ ነቃሁ። ፊት ለፊት የእናቴ ማርያምን ስዕል አየሁና እንባዬ ፈሰሰ። ድምጹም እየተመላለሰ አበረታኝና ተነስቼ ጸሎቴን አደረግኩ። ወደ ንሰሀ አባቴም በመሄድ ንሰሀ ገባሁ። ከዛን ቀን በኋላ ነፍሴ ከጸጸትና ከፍርሀት ነጻ ሆነች። ሸክሜም ቀለለልኝ። እውነትን ለመናገርም እምነትን አገኘሁ። እግዚአብሔርንም ደስ እያለኝ ዘወትር እያመሰገንኩ። ቅዱስ ስጋና ክቡር ደሙን በመቀበል በሰላም ኑሮዬን እኖራለሁ። እግዚአብሔር ይመስገን🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ እግዚአብሔር ሀይሌ ነው

🌹ትንሹ ሔኖክ

በጎ ወዳጅ መስሎ በሽንገላ ቀርቦ
በልቡ ክፋትን ጥላቻን አንግቦ
ዛሬ ነገ ጣልኩት እያለ ሲጠብቅ
በአፉ እየደለለኝ በልቦናው ሲስቅ
በቆፈረው ጉድጓድ እሱ ራሱ ገብቶ
ባዘጋጀው ወጥመድ በስራው ተመቶ
እንደ ሀሳብ ምኞቱ አምላኬ ሲከፍለው
እንባዬን አፍስሼ ለራሴ አለቅሳለው
ቅንነት ሞኝነት አለማወቅ መስሎት
በእውነት ላይ የቀለደ ሀሰት አስደስቶት
በአንደበቱ መልካም ደጉን እያወራ
ከጀርባዬ ሲያሾፍ እያለኝ ጅል ፋራ
ሁሉን ከላይ የሚያይ ልብን ሚመረምር
ቅን ፈራጅ የሆነ ቃሉን ማይቀያይር
በሰማይ ዙፋኑ በክብር ተቀምጦ
ከንቱ አደረገው ፍቅሩን ሀይሉን ገልጦ

✝️ እግዚአብሔር ሀይሌና ጋሻ መከታዬ ነው። የሚያስደነግጠኝ የሚያስፈራኝ የሚያሸንፈኝስ ማን ነው። ጠላቶቼ በለመለሙና ከፍ ከፍ ባሉ ጊዜ አልፈራም አልጨነቅም አልደነግጥም። እነርሱ ጠዋት ታይቶ ወዲያው እንደሚጠፋ እንደ ጠዋት ጤዛ፣ ደግሞም ወዲያው አብበው ወዲያው እንደሚደርቁ የሳር አበቦች ናቸው🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ነጻ አውጣን

🌹ትንሹ ሔኖክ

ፍጡነ ረድኤት የእውነት ወታደር
የጽናት ምልክት ታማኝ ለእግዚአብሔር
የኢትዮጵያ ገበዝ ሊቀ ሰማዕታት
ለክፉ ጠላቷ ጥፋት ያልሰጠሀት
ልጆቿ ፍቅርህን ክብርህን ረስተን
ከጉድጓድ ቆመናል ለጣኦት ተገዝተን
ብልግና ጥላቻ ልባችንን ሞልቶ
ሰይጣን ነግሶብናል እውነትን አስቶ
በተሰጠህ አክሊል ቃልኪዳንህ ብለህ
ባክህ ነጻ አውጣን ክፉውን ደምስሰህ

🌹ትንሹ ሔኖክ

❤ አስቀድመህ ራስህን መርምር

🌹ትንሹ ሔኖክ

✝️ አንዲት ሴት ደወለችልኝና በጣም እያለቀሰች ብዙ መከራ እያሳለፈች  እንደሆነ ስትነግረኝ ላገኛት ቀጠሮ ያዝንና አንድ ቤተክርስቲያን ተገናኘን። ታድያ በተገናኘን ጊዜ ባል እንዳላትና ከሱ ሶስት ልጆች እንደወለደች ነገረችኝ። አስከትላም የምትነግረኝ ነገር ሁሉ እሷ ንጹህና ለትዳሯ መልካም እንደሆነች፤ እሱ ደግሞ እጅግ ጨካኝና አረመኔ ለሷና ለልጆቹ እንደማያስብ አድርጋ ነው።

❤ ያው እንዳዝናላትና እሷ የምትለኝ ሁሉ እውነት እንደሆነ እንዳስብ በጣም በማልቀስና ልብን በሚያሳዝኑና አንጀት በሚበሉ ቃላትና ድምጽ ነበር የምታወራኛ። ነገር ግን ከአንደበቷ ከክስ ጥላቻና ክፋት ውጭ በልቧ እሷ የምትለው ማንነት እንደሌለ ለመረዳት ጊዜ አልወሰደብኝም ነበር።

❤ ምክንያቱም የምታወራው ስለትዳሯና ስለልጆቿ አባት አይመስልም። ደግሞስ እሱ ማለት እሷ መሆኗን ረስታዋለች። ደግሞም በእውነት እግዚአብሔርን እንደምትፈራ፣ ልጆቿን እንደምትወድና እውነተኛ ክርስቲያናዊ ሴት ለባሏ ስትል የጸለየችው ጸሎት፣ እግዚአብሔርን በንሰሀ ሆነ የጠየቀችው ጥያቄ እንዲሁም እኔስ ጥፋቴ ምን ይሆን ብላ ራሷን የመረመረችበት ጊዜ የለም።

❤ ታድና ንግግሯን ስትጨርስ ችግር የለውም ባልሽን እኔ ላግኘውና የሚሆነውን እንመልከት አልኳት። በዚህን ጊዜ በጣም ደነገጠች። እሷ የጠበቀችው በነገረችኝ ታሪክ በማዘን ገንዘብ እንድሰጣት ነበር። ደግሞም ዝም ብዬ ስላደመጥኳት በወጥመዷ የገባሁ መስሏት ነበር። ታድያ በጣም ደነገጠች። ምነው አልኳት። አይ እሱኮ በጣም ክፉ ሰው ነው አለችኝ። እሱን አንቺ አልሽ። ይልቅ ስልኩን ስጪኝ አልኳትና ብዙ ሳታስቸግረኝ ስልኩን ተቀበልኳት። እንደማያወራኝና ከሰማ እንደሚናደድ ብዙ ብዙ ነገር ነገረችኝ። እንግዲህ የሚሆነውን አብረን እናያለን ብዬ ተለያየን።

❤ ከቀናት በኋላ ባሏን ደወልኩና ተቀጣጥረን ተገናኘን። አስቀድሜ የቴሌግራም ቻናሌን ልኬለት ስለነበር እሱም ሊያገኘኝ ፈልጎ ነበር። ከተገናኝን በኋላ ስለትዳር ስለልጆች አነሳሁበት። እሱም ሚስትና ልጅች እንዳሉት ነገረኝ። ኋላም እንደው ብትመክረኝ አለና ስለ ባለቤቱ አጫወተኝ። የሚገርመው በሱ ዘንድ እሷን አንድ ጊዜ እንኳን በጥላቻ ክስ አላነሳትም። ነገር ግን ዲያቢሎስ በእሷና በቤተሰቦቿ እንደሚፈትነውና ያላትን ብዙ ክፉ ባህሪያት ነገረኝ። እናም ይህን የሚያደርገው ዲያቢሎስ እንደሆነ አውቃለሁ እና ባለቤቴን ከሱ ለመለየት ምን ላድርግ ሲል ጠየቀኝ።

❤ ማድረግ የሚገባውን ብዙ ከተመካከርን በኋላ እጅግ ደስ ብሎት ተለያየን። ከዛም ለሷ ደወልኩላትና እንዳገኘሁት ስነግራት ወዲያው ስልኩን ዘጋች። በስልኳም ብሎክ አደረገችኝ። እኔም በሁኔታው ስቄ እግዚአብሔርም ስላስተማረኝ ትምህርት አመስግኜ ዝም አልኩ።

❤ ወዳጄ እንግዲህ ይህ የዚህ ዘመን ሰዎች እውነታ ሆኗል። እጅግ ክፉ አስመሳይ አረመኔ ጨካኝ ንፉግና የዲያቢሎስ ባሪያ የሆኑ ሰዎች በየአደባባዩ ለክስና ለመውቀስ ይወጣሉ። እነሱ እንደተበደሉ እንደተጎዱ እንደተጨነቁና መከራ እንደ ደረሰባቸው በመምሰል። የዋህ ቅን ጨዋና መልካም መስለው በሚያሳዝን ቃል እንባቸውን እያፈሰሱ ይናገራሉ።

❤ ሰውም እነሱን በማመን በእነሱ ብዙ መከራ ችግር የደረሰበትና በመከራ ውስጥ ባለው ሰው ላይ በጭፍንና በጥላቻ ይፈርዳል። ይህን ከልጅነቴ ጀምሮ በቤተሰቦቼና በአካባቢዬ ሳይ ነው ያደኩት። ደግሞ ወደ ብዙ የሚጽፉልኝና ሊያገኘኙኝ የሚፈልጉ ሰዎች መልካም ነገርን ስናገርና እውነትን ስጽፍ በጣም ሞኝ ጅል የዋህ፤ ካለቀሱና የሚያሳዝን ታሪክ ከነገረኝ ቶሎ ገንዘብ የምሰጣቸው ሀብታምም እመስላቸዋለሁና ሊያታልሉኝ ብዙዎች በየቀኑ ይሞክራሉ። እኔ እንደ እነሱ ያለው ደሀ መሆኔን አለማወቃቸው ያስቀኛል።

❤ ወዳጄ ቀድሞ እንባው የሚፈስ፣ አንጀት የሚበላ ቃልን የሚናገር፣ በአንደበቱ ክስ ምሬትና ተስፋ መቁረጥ የሚናገር፣ እንድታዝንለትና እንድትራራለት የሚጥር ሰው በውስጡ እጅግ ክፉ አስመሳይ እልኸኛ ጨካኝና አረመኔ ሰው ነው። እውነት እልሀለው በእውነት የተበደሉ፣ ቅን፣ የዋህና መልካም የሆኑ ሰዎች እየተበደሉ ተበደልን፣ እየተገፉ ተገፋን፣ ብዙ መከራና ስቃይ እየደረሰባቸው ለሰው መናገር ይፈራሉ።

❤ እነዚህ ሰዎች የሚያምኑትን ሰው አግኝተው ሲማከሩ ስለበደላቸው ሰው ጥላቻና ክስ አይናገሩም። እንደውም እውነተኛ ስሜታቸውን መናገራቸው ራሱ ኃጥያት ይሆንን ብለው ያስባሉ። እንዲህ ያሉ ብዙ ሰዎችን አግኝቻለሁ። ዛሬም ከብዙ ፈተናና መከራ ወጥተው እህት ወንድም የሆኑኝ ብዙ ናቸው።

❤ ወዳጄ ምን ግዜም ራሱን ንጹህ፣ መልካም፣ የዋህ፣ ደግ፣ በጎ፣ ለሰዎች ብዙ ያደረገ፤ ነገር ግን በሰዎች ብዙ መከራን እያሳለፈ እንደሆነ የሚነግርህን ሰው ዛሬ ይልቁኑ አሁን ራቀው። ይህ ሰይጣን እንጂ ሰው አይደለም። ክርስቲያን ሁሌም ራሱን በመወቅስና ነፍሱን በመገሰጽ ወንድሙን ከጥፋት ይጠብቃል እንጂ የወንድሙን በደል በመናገር ራሱን ንጹህና ጻድቅ ለማስመሰል አይጥርም። ብዙ በጻፍኩ ደስ ባለኝ ነበር። ነገር ግን ዘር ያለ ጊዜ አይዘራም🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ሰላሜ

የፈጠረኝ እርሱ ሊያኖረኝ በቃሉ
ተኩላዎች ከበቡኝ ወዳጄ እያሉ
ክፋትና ተንኮል ልባቸው ተሞልቶ
ሳቄ ቢያናዳቸው ጥላቻቸው በዝቶ
ቅንና የዋሁን ተግቶ ሚጠብቀው
ምስኪኑን ከጨካኝ ክፉ ሚሰውረው
ጤናና ደስታዬ ሰላሜን ጨምሮ
ዛሬም ያኖረኛል ጠላቴን አባሮ

❤ እግዚአብሔር ያለው ሰው ምን ይሆናል?

🌹ትንሹ ሔኖክ

❤ ወዳጄ ዛሬ ለነገ ደሞዝ ናት

🌹ትንሹ ሔኖክ

ጊዜው እየሄደ ቀኑ እየጨለመ
ስለ ክፉ ስራው የሰው ልጅታ ታመመ
ዛሬ የሚሰራው ነገ ሊያስለቅሰው
ከክፋት ጋር መዋል ብልጠቱ መሰለው
አለማወቅ ማወቅ ቢሆን በዘመኑ
እጅግ ያሳዝናል በራስ መጨከኑ

❤ ወዳጄ! ነገ በብዙ ታለቅሳለህና ዛሬ በክፋት፣ ተንኮል፣ ብልግና፣ ፌዝ፣ ቀልድ፣ ጨዋታ፣ ቂም፣ በቀል፣ ጥላቻና በሰው የመከራ ህይወት ደስ አይበልህ። ደግሞም ማጣት፣ መቸገር፣ መታመም፣ መውደቅህ አይቀርምና ዛሬ በእህል ግፍ አትስራ፣ በደከሙ ላይ አትዘብት፤ ሰው፣ ገንዘብ፣ ወዳጅ ዘመድ የላቸውም ብለህ ድሆችና ምስኪኖችን አትናቅ። እግዚአብሔር የፈቀደው ነውና የሆነው በአካሄዳቸው በአነጋራቸውና በሚያሳዩት ባህሪ በሰዎች ላይ አትቀልድ አታሹፍ አትሳቅ።

❤ ወዳጄ ቅዱስ ዳዊት እጅግ የተናቀና በገዛ አባቱ ጭምር የተረሳ በጣም አጭር ተብሎ የሚቀለድበት እንደ ሰው የማይቆጠር ትንሽ ብላቴና ነበር። ሙሴም ኮልታፋና ሀሳቡን በንግግር መግለጽ የማይችል ነበረ። ዘኪዎስ በሰዎች እንደ ንፉግና ድሆችን ነጣቂ ይቆጠር ነበር። ነገር እነዚህ ሁሉ ዛሬ የእግዚአብሔር ውድ ልጆቹ፤ ፍቅሩንና ሀይሉን የገለጠባቸው ሆነዋል።

❤ ወዳጄ! መቼስ በዚህ ዘመን የአለም ስልጣኔ፣ የኔና አንተ እውቀት ብልጠትና አራድነት ሰዎችን በማማት በመስደብ በማጥቃት በብልግናና ክፋትን በመስራት ነው። ዛሬ ስንቆም ነገ መውደቃችንን ረስተን ከእኔ በላይ ሰው የለም እንላለን።

❤ እናም ወዳጄ ከላይ የገለጽኩልህን ያደረገ ሁሉ ወዮታ አለበት። ስለዚህ ነገህ ሳይቀድምህ ዛሬ ለራስህ አልቅስ። እግዚአብሔር እንደ ሰው በየደቂቃው ባይገስጽህ ዛሬ እውነቱን ነግሮሀልና በንሰሀ ታጥበህ በእንባ አለም ስልጣኔ ያለችው የክፋት ስራ ትተው ዘንድ አሳስብሀለው። ወዳጄ እንግዲህ ብትፈጽምም ባትፈጽምም መስማትህ ለፍርድ በቂ ነውና ነፍሳችንን እለት እለት የሚያጠፋት ይህን የሞት መንገድ እንድንተው እነግርሀለው።

❤ አልያ ዛሬ የምታርጋት እያንዳንዷ ንግግርና ስራህ ኋላ እጥፍ ሆኖ መቶ ፍሬ አፍርታ ትጠብቅሀለች። በአጨዳ ዘመን ብታለቅስም ሆነ ብታዝን ብትጨነቅ አንዳች የምትለውጠው አይኖሩም። ጠጠር ዘርተህ በቆሎ አይሆንልህም። ብዙዎች እንደ ቀልድ እየሳቁ የተከሉትን እያለቀሱ መንቀል አቅቷቸው በከንቱ አልፈዋል🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ በአንቺ የሚኖሩ ሁሉ ደስ ይላቸዋል

🌹ትንሹ ሔኖክ

እመቤቴ ማርያም አዛኝቷ እናቴ
መከራ አልጣለኝም ሆነሺኝ ህይወቴ
ጸጋና በረከት ሰላም የሞላበት
መሶቤ ያጠግባል ፍቅርሽ የበዛበት
የህመሜ ፈዋሽ ሀኪሜ የሆንሺኝ
መድኃኒቴ አንቺ ነሽ ጤናን የሰጠሺኝ
እድሜዬን በሙሉ እናቴ እያልኩሽ
የልብ የውስጤን ሁሉ እያማከርኩሽ
ከብዙ ፈተና ከወጥመድ አምልጬ
ይኸው ዛሬ ደረስኩ ቃልሽን አድምጬ
አብረን ያሳለፍነው ያረግሺልኝ ነገር
ነፍሴ ደስ ይላታል ፍቅርሽን ስናገር
እንኳን ቀና ብዬ ይህን ስጠኝ ልለው
የሚጠፋን ገንዘብ ቁስን ልለምነው
አንቺን እናቴ አርጎ የሰጠኝ ፈጣሪሽ
ጣምሽን አቅምሶ ያስደሰተኝ ልጅሽ
ስህተቴን ጥፋቴ ኃጥያቴን ሳይቆጥር
እድሜ ስለሰጠኝ ለአንቺ እንድዘምር
ተመስገን አምላኬ ተመስገን እላለሁ
እንዲሁ አስፈጽመኝ አጽናኝ እለዋለሁ
የአለምን ክብር ሀብቷን ሁሉ ነስቶኝ
ትንሽ ልጅሽ አርጎ ከአንቺ ጋራ ያኑረኝ

❤ እናቴ ለኔ ወሩ ሙሉ የአንቺ ቀን ነው። አዎ! ቀንሽ ቀኔ፣ ልደትሽ ልደቴ፣ ታሪክሽ ታሪኬ፣ መከራሽ መከራዬ፣ ደስታሽ ደስታዬ ህይወትሽ ህይወቴ ነው። እምዬ! አምላኬ የኔ የምለውን ሁሉ በአንቺ ስለለወጠልኝ ዘወትር አመሰግነዋለሁ። "በአንቺ የሚኖሩ ሁሉ ደስ ይላቸዋል" መዝ፥ 86 ✝️።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አምላኬ የሚቀድመውን አስቀድምልኝ

🌹ትንሹ ሔኖክ

ወዳጄ ጌታችንና መድኃኒታችን ኢየሱስ ክርስቶስ፤ በስጋ በተገለጠባቸው ዓመታት ከቦታ ቦታ እየተዘዋወረ እውነትን ሲናገር፣ የታመሙትን ሲፈውስና ነፍስን ደስ የሚያሰኘውን የወንጌሉን ቃል ሲያስተምር ብዙ ህዝብ ይከተለው ነበር። ደግሞም ጌታ ሆይ አስተምረን፣ ምከረን፣ ምራን እያሉ የሚለምኑት ብዙዎች ነበሩ።

❤ እሱ ግን በሰዎች ልብ ያለውን ያውቅ ነበርና ሁሌም በጠየቁት ጊዜ እናንተ የምትፈልጉኝ የምትበሉትን ስለሰጠኋችሁና ከደዌ ስለፈወስኳችሁ እንጂ በእውነት ቃሌን አምናችሁና የእግዚአብሔር ልጅ መሆኔን አውቃችሁ አይደለም ይላቸው ነበር።

❤ ታድያ ይህ እውነት ሆነና እነዛ እንደ አንተ ያለ ሰው አላየንም እያሉ ስር ስሩ ሲከተሉት የነበሩ ሁሉ በሐሰት ክስ ተይዞ በጲላጦስ ፊት ለፍርድ በቆመ ጊዜ ስቀለው ስቀለው እያሉ ጮሁ። ደግሞም በመገረፉ ደስ አላቸው፣ ሳቁ ተሳለቁ ምራቃቸውንም ተፉበት። ወዳጄ እኔና አንተም ያኔ በጊዜው ብንኖር የእነሱ መሪ እንደምንሆን የዛሬ ስራችን ይናገራል።

❤ ወዳጄ እውነት እልሀለው ዛሬ የሚስቁልህ ነገ የሚስቁብህ፣ ያዘኑልህ የሚመስሉ ነገ የሚያሳዝኑህ፣ የሚወዱህ የሚመስሉ ነገ የሚጠሉህ፣ የሚያከብሩህ የሚመስሉ ነገ የሚያዋርዱህ፣ ወዳጅ የሚመስሉ ነገ የሚያሳድዱህ፣ እንደ አንተ ያለ ሰው የለም የሚሉ ነገ አይኑን ማየት አንፈልግም ይጥፋልን የሚሉ።

❤ የሚያደንቁህና የሚያወድሱህ ነገ የሚሰድቡህ፣ ዛሬ ቤተሰቤ ያልካቸው ነገ የነፍስ ጠላቶችህ፣ ጓደኞቼ የምትላቸው ነገ የመከራ የስቃይና የለቅሶህ ምክንያት የሚሆኑ ናቸው። እነዚህ ሁሉ በእኔ ህይወት ተፈጽመዋል። ነገ በአንተም የሚቀር አይደለም። እናም ወዳጄ ትላንት ባሳየህ ምህረቱ፣ ዛሬ በሚያኖርህ ቸርነቱና ነገን በሚያዘልቅህ ፍቅሩ ፈጽሞ ወደ ማይለወጠው እግዚአብሔር በንሰሀ ትመለስ ዘንድ አሳስብሀለው።

❤ እኔስ ነፍሴ የዳነችውና ዛሬ ከሆነባት ይልቅ የሆነላት አስደንቋት በሰላም በደስታና በምስጋና ያለችው የሚቀድመውን በማስቀደሟ ነው። እርሱም ንሰሀ ገብታ የጌታዋን ቅዱስ ስጋና ክቡር ደሙን በመቀበሏ። አሁን አስቀድማ መንግስቱን መርጣለች ሌላው ሁሉ ዳረጎቷ ነው። ወዳጄ የአንተ ነገር ቢያሳዝነኝ ይህን እውነት ጻፍኩልህ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ እንደሚጠፉ እንስሶች መሰልን

🌹ትንሹ ሔኖክ

ወዳጄ እስቲ ይህን አስተውለህ አድምጠኝ። እንግዲህ ዛሬ ሰው መርጦ ባልተወለደበት ብሔሩ፣ ሳይደክምበት በተሰጠው ቋንቋ ሲመካና አንዱ ከአንዱ መለያያ አድርጎ ሲጠፋፋ እንመለከታለን። በርግጥ የቋንቋ መሰረቱ ክህደትና ኃጥያት ነው። ይህም በባቢሎን ዘመን የሰው ልጆች ግንብ በመገንባት ስላሴን ለመውጋት ቢያስቡ አንድ የነበረ ቋንቋቸው ተቀይሮ መግባባት ተስኗቸዋል።

❤ ታድያ ዛሬ የሰው ልጅ ቆንቋን እንደ እውቀት ስልጣኔና ሃይማኖት መቁጠሩ ከመንፈስ ቅዱስ የመለየቱ ማሳያ ነው። ወዳጄ እንግዲህ ዛሬ እኔና የሰዎችና እንሰሳት መብታቸው ተጣሰ፣ የሚገባቸው እንክብካቤ አልተደረገላቸውም ብለን የመብት ተሟጋቾች ሆነናል። ነገር ግን ከተፈጠርንበት አላማ በመውጣት ከክብራችን የተዋረድንና የኛ ባልሆነ የመከራ ህይወት የተገኘን ራሳችንን ግን ረስተናል።

❤ ወዳጄ አየህ! እኔና አንተ የተፈጠርነው ለመብላት መጠጣት፣ ለዳንስ ለጭፈራ፣ ለክፋት ብልግና፣ ለለቅሶ መከራ፣ ለኃጥያት እርኩሰት አልነበረም። እግዚአብሔር ልጆቼ ሁኑ። እኔን በማመስገን፣ ስሜን በመቀደስ በሰላም በጤና በደስታ በምስጋና ኑሩ ብሎ ነበር የፈጠረን። ነገር ግን እኛ ፈጽሞ የዚህ ተቃራኒ በመሆናችን ይኸው በለቅሶ የተጀመረ ህይወታችን በለቅሶ ይፈጸማል።

❤ ታድያ ወዳጄ! ለዚህ ነው የሰው ልጅ ረክሶ ጫማና ልብስ የተወደደው። እውነት ለመናገር ከእኔና አንተ በላይ የታመመ ያበደ የጠፋ የረከሰና ግራ የገባው ፍጡር ማን አለ። አለመታደል ማለት እንዲህ ነው። ሰው ሆኖ ተፈጥሮ ከእንሰሳ ማነስ። መንፈስ ቅዱስ በቅዱስ ዳዊት አድሮ ማስተዋልን ያጣ የሰው ልጅ እንደሚጠፉ እንስሶች መሰለ ያለን እኔና አንተን ኖሯል ለካ። አይ የሰው ልጅ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አባቴ
ከማህጸን ጀምሮ እስከ ዛሬዋ ቀን
ነፍሴን የጠበቅካት በኑሮዋ ዘመን
እናት አባት ሆነህ ከጉያ ከተኸኝ
ሲከፋኝ ስጨነቅ ቀርበህ ያጽናናኸኝ
በቀናው ጎዳና በቅን መንገድ መርተህ
ብዙ ያስተማርከኝ ልቦናዬን ከፍተህ
ዘወትር በተስፋ በደስታ ምኖረው
ሚካኤል አባቴ አንተን አምኜ ነው

አንተ ለኔ ✝️😍🌹
🌹ትንሹ ሔኖክ

❤ እግዚአብሔር ሲቀጣ

🌹ትንሹ ሔኖክ

❤ ገንዘብ አለህ ግን ለነፍስህም የሚጠቅም ነገር ላይ ልትጠቀመው አትችልም።
❤ ትዳር አለህ ግን መግባባት መተሳሰብ ፍቅር ሰላም አይኖርህም።
❤ ልጆች አሉህ ግን አይታዘዙህም፣ አያደምጡህም፣ አያከብሩህም፣ እርስ በእርሳቸውም አይግባቡም።
❤ ስልጣን አለህ ነገር ግን መረጋጋት እረፍት ሰላም አይኖርህም።
❤ ብዙ ወዳጅ ዘመድ ጓደኛ አለህ ነገር ግን አንድ እንኳን የልብህን የሚረዳ ሰው አይኖርም።
❤ ምግብ መጠጥ በቤትህ ሞልቷል ነገር ግን እሱን የሚበላ ጤና የለህም። ልጆችህም እንደዛው።
❤ ለመምረጥ እስክትቸገር በቁምሳጥንህ ጫማና ልብስ ሞልቷል ነገር ግን ሁሌም የሚያምርብህን አታውቅምና መግዛት እንጂ ለመልበስ አትችልበትም።
❤ ሀብት አለህ ነገር ግን እንዲሁ እቃ በመግዛትና ለማይረባ ነገር በማውጣት ታቃክነዋለ።
❤ ሲያዩህ ደስተኛ፣ የተሳካለትና ጥሩ ህይወት የምትኖር ለመምሰል ብዙ ትጥራለህ ነገር ግን በጎዳና በሚተኙ ሰዎች ሰላም ነጻነትና እንቅልፍ ትቀናለህ።
❤ ስምህና በሰዎች ዘንድ ስለአንተ ብዙ መልካም ነገር ይባላል። ነገር ግን ፍርሀት ድብርት ጭንቀት ዘወትር ያሰቃይሀል።
❤ በየሄድክበት አስተማሪ ተናገሪ አዋቂ ለመሆን ብዙ ትናገራለህ። ነገር ግን ለራስህ ግራ ገብቶህ ብቻህን መሆንን የምትፈራ አሳዛኝ ሰው ትሆናለህ።
❤ በሰው ህይወት ገብተህ አስተያየት ስትሰጥና ስትመክር እንደ አንተ ያለ ትልቅ ሰው የለም ትባላለህ። ነገር ግን ለራስህ ምንም የማታውቅ የጨለማ ሰው ትሆናለህ።
❤ በትምህርት ላይ ትምህርት፣ በስራ ላይ ስራ በመደራረብና ብዙ ነገሮችን በመጀመር በጣም ቢዚና ውድ ሰው ለመባል ትደክማለህ ነገር ግን ለነፍስህም ሆነ ለስጋህ የሚጠቅመውን የማታውቅ እውር ትሆናለህ።
❤ ብዙ ክፍል ያለው ቤት ትሰራለህ ነገር ግን ኦና ይሆናል።
❤ ያጎረስከው ይነክስሀል፣ የሰበሰብከው ሁሉ መጥፊያህ ይሆናል።
❤ ብዙ ታግበሰብሳለህ ነገር ግን ያጠራቀምከው ሁሉ በወንፊት ላይ ይሆንና አለኝ ያልከው ሁሉ መና ይቀራል።
❤ ልጆችህ ለሱስ ክፋት ለብልግናና ለአለም እርኩሰት ነፍሳቸውን የሰጡ ይሆናሉ።
❤ ግን ወዳጄ ይህ ሁሉ ተፈጽሞ እስክታየው ድረስ አይንህ እያየ አይመለከትም፣ ጆሮህም እየሰማ አያስተውልም። በመጨረሻም ነበረኝና ነበርኩ እያልክ በጸጸት ለቅሶና መከራ የምትኖር ከንቱ ሰው ትሆናለህ።

✝️ ወዳጄ ይህ አጠገቤ በነበሩ እልፍ ሰዎች ሲፈጸም በአይኔ አይቻለሁ። ሰዎች እግዚአብሔር እየቀጣቸው መሆኑን ባለማወቃቸው የተነሳ እራሳቸውን እንደ ጻድቅ፣ የእግዚአብሔር ልጅ፣ አገልጋይ፣ ንጹህና መልካም ሰው አድርገው ያስባሉ። ነገር ግን እሱ በኑሮ ህይወት ቤታቸው ሲቀጣቸው ማስተዋል አይችሉም። መቼስ እሱ አስቀድሞ ለመንግስቱ ከለያቸው ጥቂት ልጆቹ በስተቀር ይህን የሚያውቅ የለም።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አለማመኔን እርዳው

🌹ትንሹ ሔኖክ

የአስራ አንደኛ ክፍል ተማሪ እያለሁ ነው። ሁሌም ከትምህርት ስንለቀቅ አራት ኪሎ ቅድስተ ቅዱሳን ማርያም ቤተክርስቲያን እገባና የተወሰኑ ደቂቃዎችን እቀመጣለሁ። ታድያ አንድ ቀን ቁጭ ብዬ ሳለ እናቴ ስልክ ደወለችልኝና አባቴ መታመሙን ነገረችኝ። እኔም እናቴ አንቺ ቅደሚልኝ ብዬ በጣም ፈጥኜ ወደ ቤት ሄድኩኝ።

❤ ቤት ስደርስ አባቴ ስኳሩ ከፍ እንዳለና እንዳመመው ነገረችኝ። እጅግ ደሀና ለመታከሚያ የሚሆን ገንዘብ ስለሌለን አባቴን "ወርቁ በእግዚአብሔር እመን እሱ ያድንሀል። ደግሞም ጠዋት ጸበል ሄደን እንጠመቅ እናቴ ማርያም ለኛ ለትንንሾቹ ልጆችህ ስትል ታድንሀለች አልኩት"። እሱ ግን በጣም ተበሳጨብኝ። ቤት የነበሩም ሁሉ በዚህ ሰዓት ጸበል ትላለህ አሁን ፖሊ ክሊኒክ እንውሰደው ብለው ላዳ ኮንትራት ጠሩ።

❤ ከዛም ባለ ላዳው መጣና ይዘነው ወደ መኪናው ገባን። ታድያ በጊዜው የላዳ ሹፌሩ ጫት እየቃመ ነበር። በጉንጩ ውስጥ የተወጠረው ጫት ብዙ ነው። ደግሞ መኪናዋ ቁልፍ የላትም ገመድና ገመድ አገናኝቶ ነው የሚያስነሳት። ከቤተሰቦቼ ይህን ያስተዋለ አንድም ሰው አልነበረም።

❤ መኪናው ተነስቶ ፖሊ እንደደረስን ሀኪሙ እንዲቀመጥ አዘዘ። በዚህን ጊዜ ሰው ሲበዛ ከአንድ የግቢው ዛፍ ስር ሄጀ ተቀመጥኩና ይህን አሰብኩ። የሰው ልጅ የፈጠረውና ህይወት የሆነው አምላኩና እለት እለት የሚያኖረው እግዚአብሔርን አላምንም ይላል። ነገር ግን በሱስና ክፋት ደንዝዞ ራሱን የሳተን ሰውና በአግባቡ እንኳን የማይሰራ መኪናን አምኖ ይጓጓዛል። በዚህን ጊዜ የኔን እምነት ተመለከትኩና በራሴ አፈርኩ።

❤ ወደ አባቴም ተመልሼ በገባሁ ጊዜ "አንተ ብዙ ጊዜ በቃ አሁን መሞቴ ነው እያልከን በህይወት ኖረሀል። ደግሞም ዶክተሮችና ብዙ ሰዎች በቃ አሁን አበቃለት አይተርፍም ብለውህ በህይወት ተርፈሀል። ታድያ ይህን ሁሉ ያደረገልህ እግዚአብሔር መሆኑን አውቀህ በፍጹም እምነት ወደ እሱ የምትቀርበው መቼ ነው?። ግን እመነኝ እኔ ተምሬ ተመርቄ ስራ ይዤ ወንድሞቼን እስካስተዳድር እንደማትሞት እናቴ ማርያም ቃል ገብታልኛለች አልኩት።

❤ እሱም አንተ ነህ ለኔ ስለ እግዚአብሔር የምታስተምረኝ እያለ ከፊቱ ዞር እንድል ነገረኝ። ወዳጄ እንግዲህ የሰው ልጅ እምነቱ ከፈጠረው አምላክ ይልቅ ሱስ ባሰከረውና በአለም የክፋት እውቀት በሰለጠነ ሰው ላይ ነው። እኔም ከዛን ቀን ጀምሮ የእምነት ትርጉሙ ገባኝ። ለካስ እግዚአብሔርን አላምነውም ነበረ ብዬ እርሱ በእምነት እንዲያጸናኝ መለመን ጀመርኩ።

❤ ታድያ አመታት አልፈው ትምህርቴን ጨርሼ ተመርቄ ስራ ይዤ ለአመታት ቤተሰቦቼን አስተዳደርኳቸው። አባቴም አባትነቱን ተጠቅሞ ቢያታልለኝም ብዙ ጊዜ ጸበል እየወሰድኩት ስኳሩ የኖርማል ሰው ነው እስኪባልና ሀኪሞቹ እስኪደነቁ ታምር ሆነለት። ነገር ግን በድብቅ በልቡ የነገሰ ዲያቢሎስ በእኔ በገዛ ልጁ ላይ በክፋት አስነሳውና በመጨረሻም በከንቱ ሞተ።

❤ ወዳጄ እኔ በህይወቴ ሀዘን ጸጸት አላውቅም። እንዲህ ቢሆን ኖሮ የሚል ሀሳብም በእኔ ዘንድ የለም። መሆን የሚገባው ሁሉ እንዲሆን የተፈቀደ ነው። ነገ የሚሆነውም እንደዛው። ያው ብዙ ብልጥና አራዳዎች ቢመጡም መጨረሻቸው እንደ አባቴ ሞት ነው። እኔ ለአባቴ ፈጽሞ አላለቀስኩም። ትክክለኛውን ነገር በትክክለኛው ሰዓት ማድረግ የነፍሴ ህግ ነው። እሱም ያን እድል እግዚአብሔር በብዙ እጥፍ ሰጥቶት ነበር ግን መፈጸም አልፈለገም።

❤ በትላንት ነገር ፈጽሞ ራሴን አልወቅስም። የሰው ልጅ ሁሉ ፈቃድ አለው። አሳትና ውሀውን የመምረጥ መብቱ ላይ እግዚአብሔር እንኳን ጣልቃ አይገባም። ለሰው እውነትን መንገርና ቀናውን መንገድ ማሳየት የክርስቲያን ግዴታው ሲሆን ያንን የመቀበል የመፈጸምና የማድረግ መብቱ ግን የሰውየው ነው።

❤ ወዳጄ እግዚአብሔር እንደፈጠረህ ፈጽሞ አትርሳ። ደግሞም ሰማይ አይኑ ምድርም የሱ መሆኗን አትዘንጋ። በገነዘብና በሰውም አትደገፍ ሁለቱም በራሳቸው መቆም አይችሉም። ግን አንድ እውነት ልንገርህ እግዚአብሔርን ብትፈልገው ታገኘዋለህ። ብታምነው ብዙ ታምርን ያደርግልሀል። አያየኝም ካልክ ግን ለራስህ ፈቃድ ይተውሀል። ወዳጄ እኔም እግዚአብሔር ጸሎቴን ሰምቶ ዝም የምልበት ጊዜ እንደ ደረሰ ይታወቀኛል። እግዚአብሔር መልካሙን መሬት እስኪያዘጋጅ ዘርን ማስቀመጥ መልካም ነው🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ እመቤቴ እናቴ የኔ ምግቤ አንቺኮ ነሽ። ሰላሜ በመሆንሽ በልቤ በቤቴ በህይወቴ ሁሉ ደስተኛ ነኝ። እናቴ እባክሽ የልቤን የሚገልጽልኝና አንቺን የማመሰግንበትን መንገድ ግለጪልኝ። በራሴ ብዙ ሞከርኩ ግን ሁሉ ያንስብሻል። አምላኬ አባክህ ለእናትህ ያለኝን ፍቅር የምገልጽበትን ጸጋ ስጠኝ🙏😍እባክህ✝️

🌹ትንሹ ሔኖክ

❤ አለማመኔን እርዳው

🌹ትንሹ ሔኖክ

የአስራ አንደኛ ክፍል ተማሪ እያለሁ ነው። ሁሌም ከትምህርት ስንለቀቅ አራት ኪሎ ቅድስተ ቅዱሳን ማርያም ቤተክርስቲያን እገባና የተወሰኑ ደቂቃዎችን እቀመጣለሁ። ታድያ አንድ ቀን ቁጭ ብዬ ሳለ እናቴ ስልክ ደወለችልኝና አባቴ መታመሙን ነገረችኝ። እኔም እናቴ አንቺ ቅደሚልኝ ብዬ በጣም ፈጥኜ ወደ ቤት ሄድኩኝ።

❤ ቤት ስደርስ አባቴ ስኳሩ ከፍ እንዳለና እንዳመመው ነገረችኝ። እጅግ ደሀና ለመታከሚያ የሚሆን ገንዘብ ስለሌለን አባቴን "ወርቁ በእግዚአብሔር እመን እሱ ያድንሀል። ደግሞም ጠዋት ጸበል ሄደን እንጠመቅ እናቴ ማርያም ለኛ ለትንንሾቹ ልጆችህ ስትል ታድንሀለች አልኩት"። እሱ ግን በጣም ተበሳጨብኝ። ቤት የነበሩም ሁሉ በዚህ ሰዓት ጸበል ትላለህ አሁን ፖሊ ክሊኒክ እንውሰደው ብለው ላዳ ኮንትራት ጠሩ።

❤ ከዛም ባለ ላዳው መጣና ይዘነው ወደ መኪናው ገባን። ታድያ በጊዜው የላዳ ሹፌሩ ጫት እየቃመ ነበር። በጉንጩ ውስጥ የተወጠረው ጫት ብዙ ነው። ደግሞ መኪናዋ ቁልፍ የላትም ገመድና ገመድ አገናኝቶ ነው የሚያስነሳት። ከቤተሰቦቼ ይህን ያስተዋለ አንድም ሰው አልነበረም።

❤ መኪናው ተነስቶ ፖሊ እንደደረስን ሀኪሙ እንዲቀመጥ አዘዘ። በዚህን ጊዜ ሰው ሲበዛ ከአንድ የግቢው ዛፍ ስር ሄጀ ተቀመጥኩና ይህን አሰብኩ። የሰው ልጅ የፈጠረውና ህይወት የሆነው አምላኩና እለት እለት የሚያኖረው እግዚአብሔርን አላምንም ይላል። ነገር ግን በሱስና ክፋት ደንዝዞ ራሱን የሳተን ሰውና በአግባቡ እንኳን የማይሰራ መኪናን አምኖ ይጓጓዛል። በዚህን ጊዜ የኔን እምነት ተመለከትኩና በራሴ አፈርኩ።

❤ ወደ አባቴም ተመልሼ በገባሁ ጊዜ "አንተ ብዙ ጊዜ በቃ አሁን መሞቴ ነው እያልከን በህይወት ኖረሀል። ደግሞም ዶክተሮችና ብዙ ሰዎች በቃ አሁን አበቃለት አይተርፍም ብለውህ በህይወት ተርፈሀል። ታድያ ይህን ሁሉ ያደረገልህ እግዚአብሔር መሆኑን አውቀህ በፍጹም እምነት ወደ እሱ የምትቀርበው መቼ ነው?። ግን እመነኝ እኔ ተምሬ ተመርቄ ስራ ይዤ ወንድሞቼን እስካስተዳድር እንደማትሞት እናቴ ማርያም ቃል ገብታልኛለች አልኩት።

❤ እሱም አንተ ነህ ለኔ ስለ እግዚአብሔር የምታስተምረኝ እያለ ከፊቱ ዞር እንድል ነገረኝ። ወዳጄ እንግዲህ የሰው ልጅ እምነቱ ከፈጠረው አምላክ ይልቅ ሱስ ባሰከረውና በአለም የክፋት እውቀት በሰለጠነ ሰው ላይ ነው። እኔም ከዛን ቀን ጀምሮ የእምነት ትርጉሙ ገባኝ። ለካስ እግዚአብሔርን አላምነውም ነበረ ብዬ እርሱ በእምነት እንዲያጸናኝ መለመን ጀመርኩ።

❤ ታድያ አመታት አልፈው ትምህርቴን ጨርሼ ተመርቄ ስራ ይዤ ለአመታት ቤተሰቦቼን አስተዳደርኳቸው። አባቴም አባትነቱን ተጠቅሞ ቢያታልለኝም ብዙ ጊዜ ጸበል እየወሰድኩት ስኳሩ የኖርማል ሰው ነው እስኪባልና ሀኪሞቹ እስኪደነቁ ታምር ሆነለት። ነገር ግን በድብቅ በልቡ የነገሰ ዲያቢሎስ በእኔ በገዛ ልጁ ላይ በክፋት አስነሳውና በመጨረሻም በከንቱ ሞተ።

❤ ወዳጄ እኔ በህይወቴ ሀዘን ጸጸት አላውቅም። እንዲህ ቢሆን ኖሮ የሚል ሀሳብም በእኔ ዘንድ የለም። መሆን የሚገባው ሁሉ እንዲሆን የተፈቀደ ነው። ነገ የሚሆነውም እንደዛው። ያው ብዙ ብልጥና አራዳዎች ቢመጡም መጨረሻቸው እንደ አባቴ ሞት ነው። እኔ ለአባቴ ፈጽሞ አላለቀስኩም። ትክክለኛውን ነገር በትክክለኛው ሰዓት ማድረግ የነፍሴ ህግ ነው። እሱም ያን እድል እግዚአብሔር በብዙ እጥፍ ሰጥቶት ነበር ግን መፈጸም አልፈለገም።

❤ በትላንት ነገር ፈጽሞ ራሴን አልወቅስም። የሰው ልጅ ሁሉ ፈቃድ አለው። አሳትና ውሀውን የመምረጥ መብቱ ላይ እግዚአብሔር እንኳን ጣልቃ አይገባም። ለሰው እውነትን መንገርና ቀናውን መንገድ ማሳየት የክርስቲያን ግዴታው ሲሆን ያንን የመቀበል የመፈጸምና የማድረግ መብቱ ግን የሰውየው ነው።

❤ ወዳጄ እግዚአብሔር እንደፈጠረህ ፈጽሞ አትርሳ። ደግሞም ሰማይ አይኑ ምድርም የሱ መሆኗን አትዘንጋ። በገነዘብና በሰውም አትደገፍ ሁለቱም በራሳቸው መቆም አይችሉም። ግን አንድ እውነት ልንገርህ እግዚአብሔርን ብትፈልገው ታገኘዋለህ። ብታምነው ብዙ ታምርን ያደርግልሀል። አያየኝም ካልክ ግን ለራስህ ፈቃድ ይተውሀል። ያኔ ተንቀሳቃሽ ሬሳ ትሆናለህ🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አቤቱ በመንግስትህ በመጣህ ጊዜ አስበኝ።

🌹ትንሹ ሔኖክ

ወዳጄ እስከ መቼ የራሳችንና የሰው ነፍስ እያጠፋን እንኖራለን። አየህ በክርስትና ሰውን በአንደበትህ፣ በተንኮል፣ በክፋት፣ በውሸት ከምትገድለው ይልቅ በሰይፍ መግደል እጅጉን ይሻላል። ወዳጄ በእግዚአብሔር ፊት ስትቀርብ በአንደበትህ የገደልካቸው ሰዎች ለፍርድ እንደሚቆሙ አታውቅምን።

❤ ወዳጄ! ሰውን እንኳን ባላየኸውና ባልሰማኸው በስማ በለው ልታማው ይቅርና በአይንህ ያየኸውና በጆሮ የሰማኸውን እንኳን የመናገር መብት የለህም። አየህ ወዳጄ! ወንድምህ ስቶ ብታገኘው ታለቅስለታለህ እንጂ በጥፋቱ ደስ ተሰኝተህ አትዘብትበትም።

❤ ዛሬ ግን ሁላችን ስራችን ሁሉ የሰዎችን ነገር መጎልጎል ሆነ። በዚህም በውሸት በቅናት በምቀኝነት በየቀኑ በአንደበታችን የብዙ ሰው ነፍስ እናጠፋለን። ወዳጄ! ይህ ዛሬ ስነግርህ እንደ ቀልድ የምትሰማው ነገር በህይወትህ እያስከፈለህ ያለው ዋጋና ነገም የሚያስከፍልህን ብታውቅ ለራስህ ባለቀስክ ነበር።

❤ ግን ምን የደረግ ውሸት ስትደጋገም እውነት፤ ኃጥያትም ስትደጋገም ጽድቅ ነኝ ትላለች። ዛሬ ትልቁም ትንሹም፣ ተማሪ አስተማሪ፣ መምህር ምዕመኑ ሁሉ ለእግዚአብሔር ያለውን ፍቅርና ተቆርቋሪነት የሚያሳየው የወንድም እህቱን ስህተት በመናገር ሆኗል። ከዚህ የባሰ የጥፋት ዘመን ከወዴት ይመጣል።

❤ የሰው ልጅ ጠላት ዲያቢሎስ እኛን እርስ በእርስ ስም እየሰጠ እያባላ እሱ ግን መካሪ አስታራቂ መስሎ ይጫወትብናል። ታድያ ከዚህ ትውልድ ማን ይድናል። አቤቱ በመንግስትህ በመጣህ ጊዜ አስበኝ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ሰላሜ ነሽ
ለተራበ ምግብ ለተጠማ መጠጥ
ያዘነን አጽናንታ ሰላም የምትሰጥ
ከጸሀይ ጨረቃ በብዙ አብርታ
አዲስ የምታደርግ በንሰሀ አንጽታ
ቢወዷት ቢወዷት ከቶ ማትጠገብ
የልብ የውስጥን ሁሉን የምታነብ
የመንገዴ መሪ የአይኔ ብርሀኗ
ኪዳነ ምህረት ነች የነፍሴ ሰላሟ

🙏እናቴ የነፍሴ ሰላሟ አንቺ ነሽ
🌹ትንሹ ሔኖክ

❤ ወዳጄ እግዚአብሔርን ፍራ

🌹ትንሹ ሔኖክ

ወዳጄ እባክህ እግዚአብሔርን ፍራ። እስቲ ጸሀይና ጨረቃን ተመልከታቸው። ከተፈጠሩ ጀምሮ እሱ ባስቀመጠላቸው ጊዜና ሰዓት ቃሉን በማክበር በመውጣት መግባታቸው ይኸው ዛሬ ድረስ እንደተከበሩ፣ እንደተደነቁ፣ እንደተወደዱና እንደተናፈቁ እለት እለት ይኖራሉ።

❤ ወዳጄ የሚጠፋውን የአለም ገንዘብ ስትወድና ለራሱ የማያውቀውን የሰውን ልጅ በመፍራት ዘመንህን በከንቱ መጨረስህ አያሳዝንህምን?። ወዳጄ ብታስተውል ኖሮ እድሜ ልክህን የምትለፋለትን ነገር እግዚአብሔር በደቂቃ ይሰጥህ ነበር። ነገር ግን እርሱን አለማመንህና በህጉ ለመኖር አለመፈለግህ ዛሬም ተንከራታች አደረገህ።

❤ ወዳጄ እስቲ ልጠይቅህ! በእውነት እግዚአብሔርን መፍራት፣ ክፋትን መሸሽ፣ ኃጥያትን መጥላት፣ ቂም በቀል ጥላቻን መራቅና ቅን የዋህና ደግ መሆን በእውነት ሞኝነት አለማወቅና ፈሪነት ነውን?። አለም ይህን ማለቷ ህመሟ ምን ያህል እንደጠናባትና መጥፊያዋ መድረሱን ማሳያ ነው። ታድያ ወዳጄ አንተ ከእብድ ጋር ታብዳለህን።

❤ ወዳጄ እስቲ እራስህን ታዘበው። እድሜህን፣ ሀሳብ ንግግርና ስራህን ወደ ኋላ ተመልክተህ አጢነው። በእውነት ይህ ህይወት የሰው ህይወት ነውን? እግዚአብሔርን ብትፈራና መልካሙን መንገድ ብትከተል የሚያስጨንቅህ ወይም ዋጋን የሚያስከፍልህ ማን ነው?

❤ ነገር ግን ማስመሰል፣ እልህ፣ ቂም፣ ጥላቻ፣ ዘፈን፣ ዝሙት፣ ስድብ፣ ሀሜት፣ ዳንስ፣ ጭፈራና የክፋቱ ስራ ሁሉ ብዙ መከራና ስቃይን የሚያመጣብህ፤ በኑሮህም ብዙ ችግሮችን የሚፈጥርብህና ዋጋ የሚያስከፍልህ ሆኖ ሳለ፤ አንተ ግን በደስታ ትፈጽመዋለህ።

❤ ወዳጄ ሰዎች ገንዘብ ቢኖርህ እስከምትጨርሰው አብረውህ ይሆናሉ፣ ድግስ ብትደግስ ተሰብስበው ይበላሉ፣ ስልጣን ወይም ዝና ቢኖርህ በዙሪያህ ተሰብስበው ይስቃሉ ይጫወታሉ። ነገር ግን የወለደችህ እናትህ እንኳን ብትሆን ለአንተ የታዘዘውን መርፌ አትወጋልህም።

❤ ወዳጄ እኔ ይህን እውነት ከልጅነቴ ጀምሮ በመናገሬ፤ ከወላጆቼና ከቤተሰቦቼ ጀምሮ በአካባቢዬና በሰዎች ስጠላ ስሰደብ ስናቅ ስገለል አድጊያለሁ። ግን ወዳጄ! እግዚአብሔር ከእኔ ጋራ ነውና ዘወትር ደስተኛ ነኝ። ወዳጄ ግድ የለም እንደ እድሜህ፣ እንደ ስጦታህ እግዚአብሔርን ደስ ለማሰኘት ኑር። ከእሱ ውጭ ኖረህ ምን አተረፍክ?

❤ ወዳጄ አንተ ስራህን የሱን ህግ መጠበቅ፣ ትዕዛዙን ማክበርና ደስ የሚያሰኘውን ማድረግ ስታደርግ፤ እሱ ደግሞ የአንተን ቤት፣ የአንተን ኑሮ፣ የአንተን ህይወት፣ የአንተን ዛሬና የአንተን ነገ ሁሉ ይሰራልሀል። ወዳጄ አንተ በራስህ ሄደህ አምትሰራው ፎቅ እሱ የሚሰራልህ የሸራ ቤት ይሻልሀል። ወዳጄ እኔ ምንም ብል የሚሰሙኝ ከመቶ አንድ ወይም ሁለት ሰዎች እንደሆኑ ግልጽ ነው።

❤ ምክንያቱም መልካም ነገርን ስለሰማኸው ብቻ መለወጥ አትችልም። እሱ አስቀድሞ ለመንግስቱ የመረጣቸው ብቻ እውነትን ሲሰሙ የሰሙት ቃል ነፍሳቸውን ይወቅሳቸዋል፣ ወቀሳውም ወደ ጸጸት ይፈጥርባቸዋል፣ ጸጸትም ወደ ንሰሀ ይመራቸዋል። ከዛም ንሰሀ አስገብቶ በቅዱስ ስጋና ክቡር ደሙ አትሞ ወደ መንግስቱ ይቀላቅላቸዋል። ይህ የእሱ ስራ ነው። እኔ እውነትን መናገር ብቻ ነው ስራዬ🙏✝️❤

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ የለሊቱ እውነታ

🌹ትንሹ ሔኖክ

ከአመታት በፊት ነው። ብዙ ጊዜ ለሊት ሲሆን ከቤቴ ወንበር ይዤ በመውጣት በሬ ጋር ተቀምጦ ማንበብ፣ መጻፍና በጸጥታው ነፍሴን ደስ ማሰኘት፤ አንዳንዴም በገና መደርደር እወዳለሁ። ታድያ አንድ ለሊት እንዲሁ ለማድረግ በገናዬን ታቅፌ ወንበሩ ላይ ተቀምጬ ሳለ ከኋላዬ የሆነ ነገር ክብድ አለኝና ፊቴን ሳዞር አንድ ሰው ራቁቱን ከኋላዬ ባለው ቀጭን መንገድ ላይ ቆሞ ተመለከትኩ።

❤ ወዲያው በእጆቼ ሶስት ጊዜ አማተብኩና ቆሜ እመለከተው ጀመር። ለተወሰኑ ደቂቃዎች አይኑን ፍጥጥ አድርጎ ከቆየ በኋላ ወደ እኔ መጠጋት ጀመረ። እኔም አንተ ከእኔ ጋራ ነህና ክፉውን አልፈራም እያልኩ በልቦናዬ መጸለይ ጀመርኩ። ታድያ ጥቂት ብርሀን ወዳለበት ስትወጣ ከጎረቤታችን አንድ ሴትዮ ሆና አገኘኋት።

❤ ደግሜ አማተብኩኝ። በዚህን ጊዜ ከዚህ ሰፈር አንተ ብቻ አቃትከኝ አይደል አለችኝ አይኖቿን አፍጥጥ። ይገርማል እርቃነ ስጋዋን መሆኗ ብቻም ሳይሆን ሰውነቷን የሚያብረቀርቅ ነገር ተቀብታለች። መልስ ልሰጣትም አልፈለኩምና ደግሜ አማተብኩኝ። ምን አስሬ ታማትባለህ ብንችልማ ኖሮ ድሮ ነበር የምናጠፋህ አለችኝ።

❤ በጣም የሚገርመው ሴትየዋ በሰፈሩ ድል ባለ ድግስ ዝክር የምትዘክር፣ ሰዎችን የምትመክር የምታስታርቅና እንደሷ ያለ ክርስቲያን ማንም የለም የተባለላት ናት። እናም ቀጠለችና ብዙ ከሰደበችኝ በኋላ እኔ ብቻ መሰልኩህ እንዲህ የማደርገው እከሌ እከሌ ብላ ፈጽሞ የማልጠብቃቸው ሰዎችን ስም ጠራችልኝ። እንዲሁም ብዙ ሚስጥርንም ነገረችኝ። በመጨረሻም አንድ ቃል ሳልናገራት ደግሜ ሳማትብ ወደ ራሷ መለስ አለችና እያለቀሰች እባክህ ለልጆቼም ሆነ ለሰው ይህን እንዳትናገርብኝ አለችኝና በጉልበቷ ተንበርክካ ወደ መጣችበት ተመለሰች።

❤ እኔም ወንበሬን አንስቼ ወደ ቤቴ ገባሁ። የሆነው በህልሜ ነው በእውኔ የሚለውን ለማረጋገጥ የጸሎት መጽሐፍ አነሳሁ። ነገር ግን እውነት መሆኑን አመንኩ። አሁን ይህ ምን ተብሎ ለማንስ ይነገራል እያልኩ ከራሴ ጋር ስማከር ሰነበትኩ። ለቀናትም እንቅልፍ ያሳጣኝ ጉዳይ ሆነ። በመጨረሻም ወላዲተ አምላክ እንድትረዳኝ ጠየቅኳት።

❤ መልሱም ይህን ለሰው በመናገሬ እኔም ሆንኩ እግዚአብሔር የምናኘው ጥቅም የለም። በተቃራኒው ሌሎች ሰዎች ቢሰሙም ከወሬና ሀሜት የዘለለ የሚጠቅማቸው ነገር የለም። ደግሞ ብናገርስ አብዛኛው ወገኖቿ ነቸውና ለሁሉ በጊዜው የሚከፍለው እርሱ እስኪፈርድ በዝምታ ለመቆየት ወሰንኩ። ለነገሩ እኔ ማነኝና የሰውን ሀጥያት በመናገሬስ የኔን ኃጥያት አላቃለው።

❤ የሰዎችን ክፋትና መጥፎ ነገር ባይም ለማስተማር አልያም ከስህተት መንገዳቸው ለመመለስ ካልሆነ ሰውን ለማሳጣትና ለማዋረድ የምሮጥ ሰው አይደለሁም። ለዛም ነው ዲያቢሎስ ሁሌም የሰዎችን ክፋትና ኃጥያት የሚያሳየኝ። ነገር ግን ሁሌም ቢሆን እኔ የሰዎችን ስህተትና ኃጥያት ለመግለጽ ከተነሳሁ እግዚአብሔር እኔን አንተ ማነህና ብሎ እንደሚያዋርደኝ ስለማስብ ለራሴ ስል ስለሰው ከፋት መናገርን አልመርጥም። ደግሞም የሰውን ስህተት በመናገር የጸደቀ ቅዱስ የለም።

❤ ታድያ ከሁለት አመት በኋላ ያቺ ሴትዮ በጣም ታማ ተሰቃይታ መሞቷን ሰማሁ። እኔም አሁን ይህን እውነት ሊገለጽ ጊዜው መሆኑን አመንኩበት። አይ ዲያቢሎስ ለሚጠፋ ምድራዊ ሀብት ገንዘብና ቁስ ሲል በሰው ልጅ ላይ እንዳሻው ይጫወትና መጨረሻም ራሱ ደዌ ሆኖ ያሰቃየዋል። እንግዲህ አለመታደል ማለት ይሄ ነው። ለሊት በብርዱ ራቁቱን የሚሄደው ሰው ብዛት እግዚኦ የሚያስብል ነው።

❤ በርግጥ ይህ የዘመን ፍጻሜ ነውና ከዚህ በብዙ ብዙ ክፉ ስራ ያገኘኋቸው ቤተሰቦቼን ጨምሮ ብዙዎች ናቸው። እንግዲህ ጨለማን የመረጠ ኑሮው ስራው ቤቱ ህይወቱ ሁሉ ጨለማ ይሆናል። እርሱ ክርስቶስ ቀን ሳለ በብርሀን ተመላለሱ ብሏል። እኛ ግን በልባችን ያለው ሀሳብ፣ ከአንደበታችን የሚወጣው ቃልና ድርጊታችን ሁሉ ጨለማ ነው። እናም በምድሩም በሰማዩም ተንከራታች የሆን ገለባ ትውልዶች ሆነናል። አዎ ለገዛ ነፍሳችን አላዘንም፣ ጠላታችንም አይራራልንም፣ እግዚአብሔርም ፊቱን አዙሮብናል። ስለዚህ የመንገዳችንን ፍሬ እየበላን እንገኛለን። ሰው ከፈጠረው ከተጣላ ማን ያስጥለዋል። ለዛ ነው እኛን ጨምሮ አለም ሁሉ ግራ የገባት።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ የእውነት ጊዜ

🌹 ትንሹ ሔኖክ

ወዳጄ ክርስቶስ በስጋ ተገልጦ አደባባይ ወጥቶ ህዝቡን ማስተማር በጀመረበትና ለእግዚአብሔር መንግስት የሚገቡ ልጆቹን በሰበሰበበት የሶስት አመት ከሶስት ወር ቆይታው በጊዜው ውሸትና ኃጥያት ምድርን እጅጉን ያስጨነቁበት ነበር።

❤ ይህም ከነገስታቱ ጀምሮ ህዝቡ በእግዚአብሔር ላይ በማመጽ የክህደትና የክፋት ወሬዎች የተንሰራፉበትና ክርስቶስን እርሱ የእግዚአብሔር ልጅ ነው ብሎ የሚናገር ቢኖር ያለውን ሁሉ ነጥቀው ከከተማ የሚያስወጡበት ህግ ጭምር ወጥቶ ነበር።

❤ ወዳጄ ታድያ አንተ ይህን ለምን አነሳህ ትለኝ እንደሆነ፥ በርግጥ በመጽሐፍ የተነገረና የተጻፈው ይፈጸም ዘንድ ጊዜው መድረሱን የሚያውቁ ከስጋ ይልቅ ነፍሳቸው የበለጠባቸው እንዲሁም እውነትን በመኖር በህይወታቸው ዋጋ የሚከፍሉ ጥቂቶች ናቸውና ዝምታ ይሆናል መልሴ።

❤ አየህ ወዳጄ ዛሬ ውሸት ውጭ ውስጡን፤ ትልቅ ትንሹን ተቆጣጥራለች። ብልግናና ኃጥያትም ሀብት ገንዘብ ስልጣንና ዝናን ይዘዋል። እውነትና እውነተኞች መጠላት ብቻም ሳይሆን በሄዱበት ሁሉ ጨቋኝና አሳዳጃቸው ብዙ ነው። ግን ይህ የሆነው ዛሬ በመሀከላችን እውነት በህይወት በመኖሯና የምትገለጥበት ጊዜ በመድረሱ ነው።

❤ አዎ ለሆዳቸው የተገዙ፣ መብላት መጠጣትና መዳራት ደስታቸው የሆነ፣ ልብስ ጫማ ቁስና ገንዘበን አምላካቸው ያደረጉ፣ ትዕቢትን የተሞሉ፣ ክፋት ተንኮል ቅናት ምቀኝነትና ዘረኝነት ያወራቸው፣ በልባቸው ፈራ እግዚአብሔር የሌለ አስምሳይና ድራመኛ የሆንን ብዙዎቻችን ይህን ከቶ ማየትም ሆነ ማወቅ አንችልም።

❤ ያኔ በጊዜው ህዝቡ በመቅደስ ክርስቶስን ለመደብደብ እንደተሰበሰቡ ሁሉ። እኛም ዛሬ በአለባበሳችን በአነጋገራችን በሀሳብ ድርጊትና ምኞት ፍላጎታችን ሁሉ እግዚአብሔርን ከቤታችን እንዲወጣ አድርገናል፤ በአደባባይም ሁሉ በእሱና በእውነተኞች ላይ እየዘበትን ነው። ግን ይህ ለኛ አይታወቀንም። ምክንያቱም እኛ በራሳችን አይን ውስጥ ያለውን ግንድ ትተን በሰዎች አይን ውስጥ ያለውን ጉድፍ አጉልተን እንመለከታለን።

❤ እናም ወዳጄ! እኛ ለራሳችን ጻድቅ የእግዚአብሔር ልጆች ነን። ይህ ማንነታችንም በመጽሐፍ ቅዱስ ራሱ ክርስቶስ ይህ ህዝብ በአፉ ይወደኛል በልቡና በምግባሩ ግን አምርሮ ይጠላኛል ሲል የተናገረው ነው። አዎ ወዳጄ! በዚህ ዘመን እግዚአብሔርን የሚወድ ሰው ንሰሀ ገብቶ የጌታ ቅዱስ ስጋና ክቡር ደሙን የተቀበለ ነው። በርግጥ ለክፋት ስራቸው ሲሉ በድፍረትና ከዲያቢሎስ ጋር ህብረት አድርገው የቆረቡም ቀላል የሚባሉ አይደሉም።

❤ ቢሆንም ሰው የሚመለከተው ስለ ራሱ ነውና ራስህን አድን። እንግዲህ የወይኑ ጌታ የዘራው መልካም ዘርና ጠላት ዲያቢሎስ በለሊት የቀላቀለው እንክርዳድ አብበው መታጨጃቸው ጊዜ ደርሷል። እውነት ሁሉን ትለያለ። ፍሬውን ወደ ጎተራ ገለባውንም ወደ እሳት ትጨምራለች። ጆሮ ያለው ይስማ🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ውብ እኮ ነሽ

🌹ትንሹ ሔኖክ

በንሰሀ ታጥቦ ልቡን ለሰበረ
ነፍሱን በትህትና በእውነት ለመከረ
ክፋትን በመጥላት ሰላም ለሚናፍቅ
ምግባሩን አቅንቶ ኃጥያትን ለሚንቅ
የፍጥረታት ጌታ የአለሙ መድኃኒት
ስጦታ አድርጎ ለሰው ሚሸለምሽ
ጥበብና ጸጋ ሁሉን የሰጠሽ
የትንሹ እናት ፍጹም ውብ እኮ ነሽ

❤ እናቴ! አቤትት መአዛሽ፣ አቤት ጠረንሽ፣ አቤት ፍቅርሽ፣ አቤት እርህራሄሽ፣ አቤት እናትነሽ፣ አቤት የዋህነትሽ፣ አቤት ቸርነትሽ፣ አቤት በረከትሽ፣ አቤት ረድኤትሽ፣ አቤት ሰላምሽ፣ አቤት ደስታሽ።

❤ እናቴ እኔስ ዘመኔን ሙሉ ከአንቺ ጋር ኖርኩ እናም የምትጠገቢ አይደለሽም። ሰው እንዴት አንቺ ኖረሺው ያስባል፣ ኩፉንስ እንዴት ይፈራል፣ ደግሞስ በአለምና በሰዎች ስራና በኑሮ እንዴት ይጨነቃል። በእውነት እንዲህ ያለው ሰው በአንደበቱ እንጂ በነፍሱ ገና አላወቀሽም ማለት ነው።

❤ የኔ እናት! ስለ እኔና ስለ አንቺ የምናገረው ብዙ ነበረኝ ነገር ግን የዛ ጊዜው በጣም ገና ነው። ስለ ውበትሽ ብቻ ለመናገር ሺህ አመታት የሚበቁኝ አይደሉም። እንኳን ስለሌላው። አምላኬ ግን እንዴት ቢወደኝ ነው አንችን የሰጠኝ። እግዚአብሔርን ሁሌም የምጠይቀው ይህን ብቻ ነው። አንቺን ሸልሞ ያንበሸበሸኝን ምክንያት ሁሌም ለማወቅ እየጓጓሁ እኖራለሁ❤✝️🌹

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ሸንጋዮች ዘመናቸው ግማሽ አይሞላም
   መዝሙር፥ 54

🌹ትንሹ ሔኖክ

ወዳጄ መቼስ የሰው ልጅ በምድር የሚኖርበት እንድሜ ስንት እንደ ነበር በእውነተኛው መጽሐፍ መጽሐፍ ቅዱስ በሚገባ ተቀምጦ ይገኛል። ዘጠኝ መቶ፣ አምስት መቶ እያለ ዛሬ ሰላሳና አርባ ደርሰናል። ይህ ለምን ሆነ ብለህ መጠየቅህ የማይቀር ነው። ነገር ግን ሁሌም አኔና አንተ መልስ የምንሰጠው ራሳችንን ነጻ ለማድረግ ጊዜው ነው ዘመኑ ነው በማለት ነው።

❤ ወዳጄ እኛ ምንም እንበለው ምን እውነታውን አይለውጠውም። አየህ ወዳጄ! የሰው ልጅ ከእግዚአብሔር ህግ በወጣ፣ ትዕዛዙን በናቀና ቃሉን መጠበቅ ሳይችልና በራሱ ማስተዋል ሲደገፍ እግዚአብሔር የዛን ሰው እድሜ ያሳጥረዋል። ለዛም ነው ከእግዚአብሔር ህግ የሚወጡ ሰዎች ነገር ሁሉ ቶሎ የሚሳካላቸው፣ የሚፈጥኑት፣ የሚቸኩሉትና ቶሎ የሚያገኙትና ሁሉን የሚያግበሰብሱት። ምክንያቱም ልክ እንደ እስራኤላውያን ሊያጠፋቸው ሲፈልግ አስቀድሞ የጠየቁትን ይሰጣቸዋልና።

❤ ወዳጄ! እኔና አንተ ማለት በጣም ሸንጋዮች ነን። ሁሉ ነገራችን ሽንገላ ነው። ሳቃችን ጨዋታችን ፍቅራችን ንግግራችን አለባበሳችን ሰው ፊት የምናደርገው ድርጊትና መንገዳችን ሁሉ ሽንገላ ነው። በልባችን ስንት ቂም በቀል ጥላቻ ሞልቶ፤ ጊዜ ስላልፈቀደልን በይሉኝታ እየኖርን እንጂ በአይን ብቻ የምንጠላቸውና ብንችል ዛሬን ልናጠፋቸው የምንፈልጋቸው ብዙ ሰዎች አሉ።

❤ አየህ ወዳጄ እግዚአብሔር ቸር ነውና ለጻድቁም ለኃጥኡም ጸሀይን ያወጣል። እኔንም አንተንም የእለት እንጀራ ይሰጣናል። ወዳጄ በዚህን ዘመን ገና ጡት መጥባት ያልጨረሰው ህጻን እንኳን ሽንገላላ ላይ ጎበዝ ነው። በጥርሳችን ሳቅ በማስመሰል ስንት ክፋት እንደፈጸምን በእውነት እግዚአብሔር አይቶናል።

❤ አዎ ወዳጄ! ለዛም ነው በሽታ የሌለበት፣ የማይጨነቅ፣ የማይፈራ፣ በሀሳብ የማይሰቃይ፣ መከራ ፈተና ችግርና ለቅሶ የሌለበት ሰው በዚህ ዘመን ልታገኝ አትችልም። የሽንገላ ሌላኛ ወንድሙ ውሸት ነው። ስለዚህ እድሚያችን ሁሉ የውሸት ነውና ልጆቻችን ስራችን ቤታችን ሁሉ በጀንበር የሚጠፋ የስቃይ መሳሪያ ሆኖብናል።

❤ አየህ ወዳጄ! የዘመናችን ማጠር የሚያስረዳው ሌላኛው ምሳሌ ህጻናት አዋቂ ሆነው ቅሰፈኝ ቅሰፈኝ በሚያስብል የክፋት ንግግራቸው እያደነቅን በየሚዲያው እናያቸዋለን። እነዚህ ልጆች በአስራ አምስት አስራ ስድስት አመታቸው ሁሉን አየነው ይላሉ። በሀያዎቹ ላይ ባለትዳርና የልጆች አባት። ከዛም በሰላሳ አረጁ ተብለው ወይም መኖር ሰለቸን ብለው ወደ ሞት ይጎርፋሉ። አየህ ወዳጄ እንግዲህ ይህ ነው የሽንገላ ውጤቱ። ሳይጀምሩ መጨረስ።

❤ ወዳጄ! እግዚአብሔርን የሚፈራና በህጉ የሚኖር ሰው ግን ዘመኑ ሁሉ የለመለመ ነው። እርሱ ሁሉን በጊዜና በመጠኑ እየሰጠ በወንዝ ዳር እንደተተከለች ዛፍ ፍሬውን እየሰጠ በምስጋና ይኖራል። ግን እንዲህ ያለ ሰው በየዘመኑ እንደ ሞኝ አላዋቂ ፈሪ የሚታይ ነው። እርሱን የሚጠብቀው ቅንነቱና የዋህነቱ ብቻ ነው። ለኛ ይሄ እጅግ ሞኝነት ነው። እኛ የአንድ ጀንበር ሰዎች ነን። ስሜታችን አፍንጫችን ላይ የሆነ። ዛሬ አርሰን፣ ዛሬ ዘርተን፣ ዛሬ አጭደን፣ ዛሬ መሰብሰብ የምንፈልግ የምኞት ሸንጋዮች🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ እናቴ! ሁሌም ድንቅ የሚለኝ ነገር ቢኖር በነጋ ቁጥር አንቺን ለማመስገን የሚሆኑ ቃላትን ፈልጌ ማጣቴ ነው። ኑሮዬ ህይወቴና መፈጠሬን ሳስብ አንቺን ቀድሞ ባያዘጋጅልኝ አንዳቸውም እንደማይሆኑ እረዳለሁ። ስዕልሽን ሳይ፣ ስምሽን ስጠራና ሳስብሽ የሚሰማኝ ደስታና ሰላም ነፍሴን እርፍ ያደርጋታል።

🌹ትንሹ ሔኖክ

❤ እልህ

🌹 ትንሹ ሔኖክ

ወዳጄ በህይወቴ ሁሉ በበሽታ ችግር ሀሳብ ጭንቀትና መከራ ሲሰቃዩ የተመለከትኳቸው እልኸኛ ሰዎችን ነው። በሀገራችን በቤታችንና በአካባቢያችን እንደ ትልቅ ጠቃሚ እርስት ሁላችን የወረስነው ነገር ቢኖር ትዕቢትና እልህን ነው። በዚህም ምክንያት ነገር ከያዝን የማንለቅ፣ ተራ የሆኑ ጉዳዮችን አጉልተን የምንመለከትና በማያገባንና የኛ ባልሆነ ጉዳይ ዘው ብለን በመግባት በህይወታችን ሁሌም ዋጋ የምንከፍል ምስኪኖች ነን።

❤ አዎን! ትልቁም ትንሹም እኔ አዋቂ ነኝ ይላል። ደግሞም ዝም ማለት፣ መተው፣ መታገስና ራስን ዝቅ ማድረግ ለኛ የፍርሀትና የሽንፈት ምልክት ነው። የኛ ትህትናና ፍቅር ነጠላ ለብሰን ወደ ቤተክርስቲያን ገብተን የምንተውንባት ደቂቃ ብቻ ናት። ዳግም ሰው የሆነው በመስቀሉ ሀይል በእርቅ መሆኑን እየተናገርን እንኳን የበደሉንን ይቅር ልንላቸው ይቅርና እኛው የበደልናቸውን ለማጥፋት እንቅልፍ የሌለን በሽተኞች ነን።

❤ እንኳን ትልልቁ ህጻናቱ እንኳን እልህ ይዟቸው በሳግ ሲታነቁ ሳይ በርግጥ የዘመን ፍጻሜ መሆኑን ለመረዳት የሚከብድ አይሆንም። "እልህ ምላጭ ያስውጣል" ብለው የክፋትና የጥፋት ምሳሌ ቢያስቀምጡልን እኛም እውቀት ሀይልና አሸናፊነት መስሎን በእልህ ለአመታት የገነባነውን በደቂቃዎች እናፈርሳለን። በብዙ ውጣ ውረድ በዋጋ የሰበሰብነውን በነጻ እንበትናለን።

❤ አዎን! ዛሬ እንደ ቅጠል የሚረግፈው የሰው ልጅ በእልህ መጋባትና ይቅርታን መጥላት ምክንያት ነው። ወዳጄ ለራሳችን ጠላት የሆንነውና እግዚአብሔር ከኛ የራቀው በራሳችን ምክንያት ነው። ምክንያቱም እልኸኛ ሰው በልቡ ቂም ክፋት ተንኮልና በቀል አለ። አዎ ምንም እንኳን በአፋችን ፍቅር ቢሞላና በማስመሰሉ የተካንን ቢንሆንም የኛ ልብ እንዲህ ነውና በገሀድ የሚታየው እውነታ እሱ ሆኗል።

❤ አጠገቤ ያሉ ብዙ ሰዎች አውቀው ጥፋት ያጠፉ በእነሱ እንድናደድ ወይም እልህ እንድጋባቸው ይፈልጋሉ። ወዳጄ እልህ ውስጥ ገባህ ማለት ሰይጣን ተቆጣጠረህ ማለት ነው። ታድያ ያኔ ወደ እውነተኛ የህይወት መንገድ ለመመለስ እድልህ በጣም ጠባብ ነው። ምክንያቱም እልህ ጥላቻን፣ ጥላቻ ክፉ ሀሳብን፣ ክፉ ሀሳብ ኃጥያትን፣ ኃጥያት ደግሞ ሞትህን ያፋጥኑታል። ስለዚህ የክፋት ስራህ ጽድቅ ነው የምትል ልበ ደንዳና ትሆናለህ።

❤ እኔ ይህን ፈጽሞ እጠየፈዋለሁ። ለምን መሰለህ! ዛሬ የሚሰድብህ የሚበድልህ የሚያናድድህም ሆነ የሚፈታተንህ ሰውም ሆነ ሁኔታ ነገ ፈጽሞ አይኖርም። ስለዚህ ኋላ በሚያልፍ ነገር ትዕግስት በማጣት ነፍስህን መጉዳት ተገቢ አይደለም። እናም ወዳጄ አንተን ከማይፈልጉህና ከማትመቻቸው ሰዎች ጋር ያለህን ግንኙነት አቁመው። ክርክር ጭቅጭቅ ወሬ ሀሜት ጥርጥር የሚወዱትንም ከአንተ አርቃቸው።

❤ የሚያሳድዱህ የሚከሱህ የሚነቅፉህ የሚተቹህ የሚከታተሉህና አንተን በማሳጣት የሚደሰቱትን አያየህ እንዳላየህ፣ ሰምተህ እንዳልሰማ በማለፍ ታገሳቸው። ምክንያቱም እንዲህ ያሉ ሁሉ ለአንተ ብዙ የነፍስ ዋጋ ያሰጡሀል። ወዳጄ! መንገድ ዳር የወደቀን ቆሻሻ በእግርህ ብትረግጠው እሱ ያቆሽሽሀል እንጂ አንተ አታቆሽሸውም። እንዲህ ላሉ ሰዎችም የምትሰጠው የትኛውም ምላሽ መልሶ አንተን ይጎዳሀል።

❤ ወዳጄ! ክርስቲያን ሁሌም ራሱን ለአምላኩ አሳልፎ ይሰጣል። ያኔ በሱ ላይ ለሚነሱበት ጠላቶቹ እግዚአብሔር ለሁሉ እንደ ቋንቋ ስራና ባህሪያቸው በሚገባ ስለአንተ መልስ ይሰጣቸዋል። እልኸኛና ነገርን የሚወድ ሰው በእሳት ይጫወታል። ያው በእሳቱም ራሱ ይጠፋል። ዛሬ አጠገቤ እልኸኛ በመሆናቸው የሚወደዱ የሚፈሩ የሚከበሩና የሚደነቁ ብዙዎች ናቸው። እነዚህ በእሳት ዳር የሚዞሩ ቢራቢሮዎች ናቸው። ወይ አሁን፣ ወይ በኋላ፣ አልያ ደግሞ ነገ ወደ እሳቱ መግባታቸው አይቀርም። ስራቸው ተነቅሎ ሊጠፉ ሰከንዶች ቀርቷቸዋል። እነሱ ግን ይህን አያስተውሉም።

❤ ወዳጄ መልካም ብትሆን ለራስህ ነው። ከፉም ብትሆን በራስህ ነው። እልህ ዲያቢሎስን ክብሩን አሳጥቶ ወደ ጥልቅ አስጥሎታል። እልኸኛ ቂመኛ አስመሳይ ውሻትም ቅናተኛና ተንኮለኛ ሰውም የሰይጣን ታናሽ ወንድም ነው። መጨረሻውም በሽታ መከራ ችግር ውድቀት መዋረድ ማጣት መቸገርና ገሀነም ነው።

❤ ወዳጄ ሰው ሰው የሚባለው በአካሉ ሳይሆን በምግባሩ ነው። ምንም እንኳን በአለባበስህና ባማሩ ቃላቶችህ ሰዎችን ብታታልላቸው እግዚአብሔር በጊዜው ሁሉን ይገልጥብሀል። ይህ በጓደኞቼ በቤተሰቦቼና አጠገቤ በነበሩ ሁሉ ሲሆን እያየሁ ዛሬ ደርሻለሁ። ወዳጄ ንሰሀ ግባና እለት እለት በጾም በጸሎትና በስግደት ሆነህ ለነፍስህ አልቅስላት። እኔ ይህን ፈጽሚያለሁ። ባይገባኝም ምርጫ የለኝምና የጌታዬን ቅዱስ ስጋና ክቡር ደም ተቀብያለሁ። ጊዜው ደርሷልና🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ጊዜ ለኩሉ
ብቻ ተጀምሮ ብቻ ለሚያልቅ ህይወት
ሰው በሰው ይቀናል የእሱ ላይሆንለት
ከአምላክ የተሰጠው ሳያውቅ ስጦታውን
ሳይኖር ሞተ ይባላል ሳይጠቀም ሀብቱን
ለኔም በልጅነት ቢያሳውቀኝ ሀብቴን
እጅጉን ወደድኩት መናቅ መጠላቴን
ጊዜ ቅን ፈራጁ ሁሉን እስኪያጠራው
ደሀ ብሎ ይስደበን እውነተኛ ደሀው

🌹ትንሹ ሔኖክ

❤ እናቴ ማርያም ለኔ ስጦታዬ ነሽ

🌹ትንሹ ሔኖክ

ከድሀ ቤተሰብ በስጋ ብፈጠር
ነፍስን ለማስቀጠል በማጣት ብችገር
ለምን ይህን አረክ ብዬ አላማርርም
በሚጠፋ ነገር አምላኬን አልከስም
እንደውም እንደውም በጣም ደስ እያለኝ
ተመስገን እላለሁ ደሀ ስላረገኝ
እናቱን እናቴ አድርጎ የሰጠኝ
በድህነቴ ነው መውደዱን ያሳየኝ
ሁሉን ያላት ንግስት ማርያምን ሸልሞኝ
እድሜዬን በሙሉ አመስጋኝ አረገኝ
ለአእምሮዬ እውቀት ለልቤ ማስተዋል
ለጉልበቴ ሀይል ፍቅሯ ሆኖልኛል
በደከመኝ ጊዜ ምርኩዝ የሆነችኝ
በጭንቀቴ ወራት አቅፋ ያጽናናችኝ
ብራብ ምግብ ሆና በልቼ ማልጠግባት
ስሟን እየጠራሁ ነፍሴን ያቆየኋት
እቺን የመሰለች እንቁ እናቱን ሰጥቶኝ
ተመስገን እንኳንም ከድሀ አስገኘኝ
እንኳን ሀብት ስጠኝ ልለው ቀና ብዬ
ይህም በዝቶብኛል ለኔ እንደ ስራዬ
እሱ ለወደደው ልዩ ሽልማቱ
ድንግል ማርያም ናት ብቸኛ እናቱ

❤ እናቴ ማርያም! ሁሌም እለት እለት ከእንቅልፌ ስነቃ ለነፍሴ አንድ ነገርን እነግራታለሁ። ነፍሴ ሆይ እናትሽኮ ወላዲተ አምላክ ናት። የሷ ነሽ ማለት ትርጉሙን ለአንቺ አልነግርሽም። እናም ነፍሴ ሆይ እንኳን ደስ አለሽ። እግዚአብሔርንም ደስ እያለሽ አመስግኚው። ምክንያቱም የሚጠፋውን የአለም ቁስና ከንቱ ነገር ሳይሆን የገነት መክፈቻ ቁልፍ የሆነች እናቱን ሰጥቶሻልና።

❤ ነፍሴ ሆይ አንቺ ደሀ አይደለሽም። ደሀማ ወላዲተ አምላክ የሌለችው። ክፉና ደጉን መለየት ያልቻለ። በስሜትና በስጋ ፍላጎቱ የሚነዳ። እግዚአብሔር ሁሉን ሰጥቶት ሳለ እንደ ጎደለበት አስቦ ዘወትር በከንቱ የሚደክም ነው። የአለምን ቁስና የማይረባውን ከንቱ የሰዎች ምስጋና ሰብስቦ በእግዚአብሔር ፊት ራቁቱን የሚቆም እርሱ ነው ደሀ።

❤ ነፍሴ ሆይ! እግዚአብሔር አንቺን በስጋ ደሀ ቢያደርግሽ ትንሽ ከጠገብሽ ከሱ እንደምትለዪና እንደምትጠፊ ስለሚያውቅ ነው። ደግሞም ከሱ ሌላ በእውነት አንቺን የሚያውቅሽና የሚያስብልሽ ማን አለ። ስለዚህ እሱ የሰጠሽና የሚያኖርሽ ኑሮ ሁሉ ትክክልና የሚጠቅመሽ ነው።

❤ እስቲ ንገሪኝ ቆይ አንቺ በምን ስራሽ ነው እናቱን እናትሽ እንድትሆን ያስደረገው። አየሽ እሱ ለአንቺ ያለው ፍቅር በቃላት የሚገለጽ አይደለም። አንቺስ ብትሆኚ በሷ ሰላምሽን ጤናሽን ደስታሽን ተስፋሽን ብርታትሽን አላገኘሽምን። ስለዚህ ነፍሴ ሆይ ዘወትር ደስ እያለሽ እግዚአብሔርን አመስግኚ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ልጄ እግዚአብሔር አያየኝም እንዳታል
         የጋሽ ማንያዘዋል ምክር

🌹ትንሹ ሔኖክ

ልጅ እያለሁ አንድ ጋሽ ማንያዘዋል የተባሉ በጣም የሚወዱኝ የግቢያችን ትልቅ አባት ነበሩ። እናም አንድ ቀን ለቤታችን ውሀ የምንቀዳው ከእነሱ ስለነበረና ውሀ ለመቅዳት ሀያ አምስት ሳንቲምና ባልዲ ይዤ ወደ ቤታቸው ሄድኩኝ።

❤ በጊዜው እሳቸው ከበሩ ደጃፍ መቀመጫ አውጥተው ተቀምጠው ነበረ። እናም የኔ ደቦጭ መጣህ ብለው አቅፈው ግንባሬን ሳሙኝና በል የምነግርህ ነገር ስላለ ውሀውን ቀድተህ እቤት አስቀምጠህ ተመለስ አሉኝ። እኔም እርጋታቸው፣ ቅንነታቸውና የሚነግሩኝ መልካም ታሪኮች ደስ ስለሚሉኝ ውሀውን ቀድቼ እቤት አስገባሁና ጃኬት ለብሼ ሄጄ እግራቸው ስር ተቀመጥኩ።

❤ እጃቸው ላይ ባለው መፋቂያ ጥርሳቸውን እየፋቁ ሰራተኛቸውን ጠሯትና በይ ለልጄ ጥርሱን የሚያጫውትበት ጥሬ አምጪለት አሏት። አሷም ተዘፍዝፎ የተቆላ የሚጣፍጥ ሽንብራ በሳህን አምጥታ ሰጠችኝ። በል ልጄ እየቆረጠምክ አድምጠኝ አሉና ንግግራቸውን ጀመሩ

❤ በል ልጄ ስማኝ! እኔ አሁን ብዙ ልጆችን ወልጄ የልጅ ልጅም አይቻለሁ። እንደምትመለከተውም ልጆቼ ትልልቆች ናቸው። ይህ ሁሉ የሆነው ግን በእግዚአብሔር ፈቃድና በቸርነቱ እንጂ እኔ ለእንደዚህ ያለ ክብር የምበቃ አልነበርኩም። ልጄ አደራህን እግዚአብሔር አያየኝም፣ አይሰማኝም፣ አያውቅብኝም ወይም ዝም አለኝ ብለህ እሱ የማይወደውና የሚጠላውን ነገር አታድርግ።

❤ ይገርምሀል ቤተሰቦቼና ጓደኞቼን ጨምሮ ብዙ ሰዎች በህይወታቸው ያገኙት የስራቸውን ውጤት ነው። እኔም ቢሆን ዛሬ እንደዚህ መሆኔን አትመለከት በማወቅም ሆነ ባለማወቅ ለሰራኋቸው ስህተቶች በሚገባ ተቆንጥጫለሁ። ዛሬም ቢሆን በልጆቼ እየተቀጣሁ ነው። አየህ ልጄ እግዚአብሔር ሁሉን እንደተመለከተና እንዳወቀ የገባኝ መከራና ስቃዩ በመጣብኝ ጊዜ ነው።

❤ ልጄ በልጅነት፣ በወጣትነትና በጉርምስና ጊዜ እግዚአብሔር አንተን ለማስረዳት ለማሳመን ወይም ለማስተማር ከአንተ ጋር ሙግት አይገጥምም። ምክንያቱም ያኔ አንተ ሁሉን ያወቅክ፣ ሁሉን የተረዳህ፣ አስተዋይ፣ ብልጥና አራዳ ነኝ ብለህ ነው የምታስበው። እግዚአብሔር ዝም ሲልህ እሱን ለማታለል ብዙ ድራማ ትሰራለህ።

❤ ነገር ግን በእያንዳንዷ ቀን የምትሰራት ስራ ተመዝግባ ትቀመጥልሀለች። ማንም አላወቀብኝም ብለህ በድብቅ በሰዎች ላይ የምትሰራው ክፉ ስራ ሁሉ እጥፍ እየሆነ ወደ አንተ ይመጣል። እናም ልጄ ያኔ ኃጥያትህን አምርረህ ትጠላታለህ። በሰው ላይ ስትፈጽም ደስ ያሰኘህ፣ የኮራህበት፣ የቀለድክበትና የተመጻደቅክበት ክፋትህ ወደ አንተ ስትዞር ሞትህን ትመኛለህ።

❤ ልጄ አደራህን አንተ ሁሌም እግዚአብሔር እያየህ እንደሆነ አስበህ ኑር። መልካም ቅን የዋህ ታዛዥ ብትሆን በዘመንህ ሁሉ እግዚአብሔር ከአንተ ጋር ይሆንና ከመከራ ከችግርና ከነፍስ ስቃይ ይጠብቅሀል። ልጄ ሰው ሁሉ ጥሩ ለብሶ፣ ልጅ ወልዶ፣ ገንዘብ ቤትና ንብረት አፍርቶ ስታይ ፈጽሞ አትቅና አትመኘውም።

❤ ምክንያቱም እነዚህ ሰዎች ቤትና ህይወት ውስጥ ብትገባ ያለው መከራ ችግር ፍርሀት ጭንቀት ለቅሶ ሀዘን ምሬት ነው። የኛም ቤት እንዲሁ ነው። ልጅ ከልጅ፤ ወላጅ ከወላጅ አይስማማም። ምክንያቱም ሁሉም ባለፈ ህይወቱ የሰራው ይከፈለዋል። እናም ልጄ አድመጠኝ! ሰይጣን በገንዘብ በሴት በምግብና በልብስ በጫማ ደልሎ እያጓጓ ከእግዚአብሔር ይለይሀል።

❤ ስለዚህ የኔ ልጅ! አንተ ሁሌም እግዚአብሔርን በመፍራት፣ ህጉን በመጠበቅና ትዕዛዙን በመፈጸም እለት እለት ነፍስህን እየመረመርካት ኑር። ኋላ በፍጻሜ ዘመንህ እንደ እኔ የምትጸጸትና የምታዝን አትሆንም። ልጄ ሆይ ምግብ በመብላት መጠጣት፣ ልብስ በመልበስ በማጌጥ፣ በመጠጥ ዳንስ ጭፈራ፣ በወሬ ሀሜት አሉባልታ፣ በክፋት ተንኮል ምቀኝነት፣ በቂም በቀል ጥላቻ፣ በምድራዊ ሀብት ገንዘብ ቁስ ሲደሰቱ ሲመጻደቁና ሲዝናኑ የምታያቸውን ሰዎች እጅጉን እዘንላቸው እንጂ እነሱን መሆን አትመኝ አታድንቃቸውም። እነዚህ ኋላ ብዙ መከራ ፈተና ለቅሶ በሽታና ፍዳ የሚጠብቃቸው ናቸው።

❤ እንዲህ እንዲህ እያሉ እየመከሩኝ እኔም ቆሎውን መቆርጠሙን ረስቼ አንገቴን ቀና አድርጌ በተመስጦ እየሰማኋቸው ሳለ። በመሀል አይ የኔ ነገር አንተን አንድ ፍሬ ልጅ ጓደኛዬ አድርጌ አደርቅሀለሁ አይደል። በል መሽቷል ቆሎህን በኪስህ ያዝና ወደ ቤት ሂድ። ሌላ ጊዜ ደግሞ እንጫወታለን። የሰማኸውን እግዚአብሔር በልቦናህ ይጻፍልህ አሉና ግንባሬን ስመውኝ ወደ ቤት ሸኙኝ። እኔም ወደ ቤት ከሄድኩ በኋላ እግሬን ለመታጠብ ውሀ በመቀነሻ ይዤ ወጣሁና ሰማይ ሰማዩን እየተመለከትኩ እሳቸው የተናገሩኝን አባቴ ከሚያወራቸው ታሪኮችና ከማውቃቸው የሰፈራችን ሰዎች ጋር እያነጻጸርኩ፤ ሳድግ እሳቸው ያሉኝን ለመፈጸም እግዚአብሔር እንዲረዳኝ እየተመኘሁ እግሬን መታጠብ ጀመርኩ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ፈጥኖ ደራሼ

🌹ትንሹ ሔኖክ

በጨነቀኝ ጊዜ ግራ በተጋባው
ድረስልኝ ብዬ ከልቤ ስጠራው
ጓደኛ ቤተሰብ ሆኖኝ መከታዬ
ብዙ አድርጎልኛል ሆኖኛል ጥላዬ
እለቱን ጠብቆ ፈጥኖ እየደረሰ
በምልጃው በፍቅሩ እንባዬን አበሰ
እኔ ስለነገ ጭራሽ አላስብም
በፍቅሩ እስካለሁ ከቶ አልጨነቅም
የችግሬ ደራሽ የነፍስ አስታዋሼ
ቅዱስ ሚካኤል ነው ፈጣኑ ደራሼ
በኃጥያት ብኖርም ምግባር ቢጎድለኝም
የመላዕክት አለቃ ፈጽሞ አይተወኝም

✝️ ልጅ ስለአባቱ እንዲያውቅና እንዲመሰክር ለኔ ያለኸኝ አንተ ነህና ያደረግክልኝ፣ የሆንክልኝን፣ የሰጠኸኝንና እንዴት ከማህጸን ጀምሮ ከሞት ጠብቀህ ዛሬን እንዳደረስከኝ የምናገርበትና የምመሰክርበት ጊዜ ሩቅ አይደለም። እንዲሁም የተጻፈው እውነተኛ የህይወት ጉዟችንን የሚገልጸው መጽሐፍ አንተ ባልክ ጊዜ መውጣቱ አይቀርም። ከኔ ይልቅ አንተ ትክክለኛ ጊዜና ቦታን ማውቅ ትችላለህና ለአንተ ሁሉን ሰጥቻለሁ ✝️

🌺 እናቴ ማርያም ውድድድ የምታደርገኝ ትንሹ ሔኖክ ነኝ 🌹

❤ እናቴ ናት ስል የማላፍርብሽ። ዘመኔን በሙሉ ደስ የምሰኝብሽ። የብቻ ቤተሰቤ አድርጌሽ ብዙ ያተረፍኩብሽ። ሳስበውምና ስናገረው ነፍሴን የሚጣፍጣት ብዙ ታሪክ አብርን ያሳለፍን፤ በፍጹም ልቤ የምወድሽ አንቺም እንደ አይን ብሌን የምትሳሺልኝ ጣፋጯ እናቴ እመብርሀን። መኖሬን ምወደው በአንቺ ነው❤

🌹ትንሹ ሔኖክ

❤ ለሴሰኛ ሰው እህሉ ሁሉ ይጣፍጠዋል

🌹ትንሹ ሔኖክ

እርግጥ ነው ይህ ትውልድ ቁም ነገሩ እውቀቱ ስልጣኔና ክብሩ እህል ነው። መብላት መጠጣት ከዛም መሰሰን የህይወት ግቡ ከሆነ ሰንብቷል። መጽሐፍ ከልክ በላይ የሚበላ ሰው የእግዚአብሔር ጸጋ ከእርሱ ትርቃለች ይላል። እውነት ነው የዚህችን አለም ጣዕም የለመዱ ሰዎችን እውነተኛወን የመንፈስ ቅደስ ሚስጥር አያገኙም። ከእነሱ የሰው ባህሪ መጠበቅ በወንፊት ውሀ እንደመቅዳት ነው።

❤ ያለ ፈተና ጸጋ፤ ያለ ድካም ዋጋ አይገኝም። ስለዚህ ሆዳቸውን ስርዓት በማስያዝ በጾም በጸሎት ራሳቸውን የሚገዙ ሰዎች የተሰወረ ሚስጥርን የመረዳት ጥበብ ከእግዚአብሔር ዘንድ ያገኛሉ። ነገር ግን እድሜ ልካቸውን ቁርስ እየበሉ ስለምሳ የሚያወሩ፣ በልተው ከሆዳቸው ወጥቶ የተጣለውን ምግብ እንደ ቁም ነገር በአድናቆት የሚያወሩና ነገ ስለሚያርዱት በሬ ስለሚቆርጡት ጮማና ስለሚጠጡት መጠጥ የሚጨነቁ ሁሉ ከሚበሉት እህል የማይሻሉ የቁም ሬሶች ናቸው።

❤ እነዚህም ሰዎች የራሳቸውን ኃጥያት ለመመልከትና ተጸጽቶ ንሰሀ ለመግባት ሩቅ ናቸው። ስለዚህ ስራቸው ሁሉ ወሬ ሀሜት ጸብ ክርክር ጭቅጭቅ ንትርክ አድመኝነት ክስ ተንኮል ክፋት ቅናት ምቀኝነት ነው። ደግሞም ነፍሳቸውን በስጋ ፍላጎት ስላሸነፏት ዘወትር ብልግናና መሰሰን ደስታቸው ነው።

❤ በሰው ህይወት ገብቶ በወሬ ሰውን ማጋጨት መለያየት፣ ወዳጅ አስታራቂ እየመሰሉ የሰዎችን ቤት መሰርሰር፣ የሰዎችን ታሪክ መመርመርና በሰዎች ላይ መፍረድ እንደሚያስከብራቸውና እውቀት እንደሆነ ያስባሉ። ኧረ እንደውም ራሳቸውን ፈጣሪ በማድረግ ሰዎችን እከሌ ኃጥያተኛ ነው ይህን ይህን ፈጽሟል በማለት የሰውን ስራ ሲቆጥሩና በዙሪያቸው በተሰበሰቡ እንደ እነሱ ባሉ የቁም እሬሶች በማሳደም ሰውን ለማሸማቀቅና አንገት ለማስደፋት ይጥራሉ።

❤ በዚህ ስራቸውም ብዙ የእግዚአብሔር ልጆችን አጥምደው ከቤቱ ያሸሻሉ። እንግዲህ እነዚህ መጽሐፍ እንዳለ ሴሰኝነታቸው የሴት ወይም የዝሙት ብቻም አይደለም። ይልቁንስ ከዚህም የከፋው ከዲያቢሎስ ጋር የሚሰስኑ ናቸው። ሀሳብና ድርጊታቸው ሁሉ የክፋትና የጥፋት ነው። ይህም ስጋቸውን በጾም ጸሎትና ስግደት ለማድከም የማይፈልጉ ናቸው።

❤ እነዚህ ሰዎች የሌሉበት ቤተሰብ ቤተክርስቲያንና ቤት የለም። በየሰፈሩ በየመንደሩ በስራ ቦታ ሁሉ አሉ። እነሱ ያዛሉ ነገር ግን ያሉትን እነሱ ሲፈጽሙ አይታዩም። ሰውን አያደምጡም ግን እነሱ ሁሌ ተናጋሪ ናቸው። የሚተማመኑት በልባቸው ክፋትና በዙሪያቸው ባሉ እውር ተከታዮቻቸው ነው። በአፋቸው ሲናገሩና ከውጭ ላያቸው ግን እነሱ የእግዚአብሔር ልጆች፤ ጠንካራና ጽኑ ክርስቲያኖች፣ ለሰዎች ህይወት የሚቆረቆሩ ደግና ሩህሩህ ናቸው። ነገር ግን በእያንዳንዱ ንግግርና ድርጊታቸው ጀርባ የተደበቀ ጥቅም ጥላቻ ቂም ገንዘብን መውደድና የስጋ ሀሳብ አላቸው።

❤ እንዲህ ያሉ ሰዎች እኔ በተገኘሁበት ቦታ ሁሌም በቀላሉ አውቃቸዋለሁ። በሳቃቸው በንግግራቸው በቃላቸው በአረማመዳቸው በአለባበሳቸውና በሚያደርጉት ነገር ሁሉ አውቃቸዋለሁ። እነሱም ይህን ስለሚያውቁ አስቀድመው ከእኔ ጋር ወዳጅ ለመሆን ብዙ ይጥራሉ። እኔም እቀርባቸዋለሁ። ታድያ እንደ እነሱ እንደማልሆን ሲያውቁ እያታለልኳቸው እንደሆነ ይገባቸውና ያላቸውን አቅም ሁሉ ተጠቅመው ስሜን ማጥፋት ማሳደም ማስፈራራት መዛትና መጮህ ያበዛሉ።

❤ ግን ለኔ ጩኸታቸው ሁሉ የውሻ፤ ልባቸው ሁሉ የፈሪ መሆኑን ጠንቅቄ አውቃለሁ። ምክንያቱም ከኔ ከተገናኙ የእስከ ዛሬ የክፋት ስራቸው ክፍያ ጊዜ ደርሷል ማለት ነው። ይሄ ከቤተሰቦቼ ጀምሮ በህይወቴ የኖርኩት ነው። አቅማቸው ሁሉ የሆድ ነውና ቀድመው በሆድ ለመያዝና ለማዘናጋት ያገኙትን ሰው ሁሉ መጋበዝ ማብላት ማጠጣትና ድግስ ደግሰው መጥራት ይወዳሉ።

❤ ምክንያቱም በሚያዘጋጁት ነገር ላይ የሚፈልጉትን መርዝ ጨምረው ሰውን በቀላሉ መቆጣጠር ስራቸው ነው። እኔ ግን ከኔ ጋር ያለው ማን እንደሆነ ጠንቅቄ አውቀዋለሁ። ስጋው ያሸነፈው ሰው ስጋውን ያሸነፈ ሰው ሲያይ ከፍርሀትና ጭንቀት ውጭ ሌላ ምርጫ የለውም። እነሱ ስለመንፈስቅዱስ ስራና ስለ እውነት የሚናገር ሰው እሳት ይሆንባቸዋል። ከስጋ የሆነ ሁሉ ስጋ ነው።

❤ እነሱ የሚጣፍጣቸውና የሚወዱት እህልና የአለም ከንቱ ወሬ ነው። ወንዱ ሴቷን፤ ሴቷ ወንዱን በክፋት ወጥመድ የሚጥሉት በስጋ የሚጣፍጠውን ሁሉ በማቅረብና ያማረ ያሉትን ከንቱ ወሬ በማውራት ነው። ይህም የሴሰኝነት መገለጫ ነው። ነገር ግን ይህን ማን ያስተውለዋል። ወዳጄ አሁን የገለጽኩት እንኳን ቢገባህ በዙሪያህ የማትገምታቸው ብዙ አስመሳዮችን ባወቅካቸው ነበር። ነገር ግን እኛም የዚሁ ሰለባ በመሆናችን እውር እውርን ሊያውቅ አይችልም።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ገበሬ እርፍ ይዞ ወደ ኃላ አይመለስም

🌹ትንሹ ሔኖክ

ወዳጄ ዛሬ በህይወት በመኖርህና በመቆምህ አጠገብህ ብዙ ሰዎች ይኖራሉ። አየህ መኖርህ ሰበሰባቸው እንጂ ነገ ብትወድቅ፣ ችግር ቢገጥምህና በእውነት ብትፈልጋቸው የምታገኛቸው እነዚህን አይደለም። ይህን ጊዜ በሚገባ ያሳይሀል። ወዳጄ አንተ እለት እለት የምታሳልፈውን ህይወት ከአንተ ሌላ ማን ያውቀዋል። አየህ ሰዎች አለባበስህን፣ ፎቶህን፣ ንግግር ጨዋታና ሳቅህን አይተው የፈለጉትን ያስባሉ።

❤ በእነሱ ሚዛን መዝነው ወይ ለመቅረብ የሞክራሉ አልያ ዝም ብለውህ ያልፋሉ። ግን አንተ ለሰዎች የምታሳየውና ሰዎች እንዲያወቁ የምታደርገው ሁሉ እውነተኛ አንተነትህ አንዳልሆነ ግልጽ ነው። ምክንያቱም በዚህ ዘመን ሰው ለሰው ጠላት፣ አጥፊና እሾህ ሆኗልና ሁሉም በማስመሰል ኑሮውን ይታገላል።

❤ ወዳጄ በርግጥ እውነተኛ ስሜትና ማንነትህን ለሰዎች አሳይ አልልህም። ደግሞም ውሸትና ማስመሰልን ውደድም አልልህም። አንድ የምነግርህ አውነት ቢኖር በህይወት መኖርህና መቆምህን አልያም እንደ ቀረቤታቸው ጥቅምና ፍላጎታቸውን አስቀድመው ከከበቡህ አለምና ሰዎች ይልቅ በህይወት የሚያኖርህና ያቆመህ እግዚአብሔርን አክብር።

❤ አየህ ወዳጄ እርሱ በደስታ በሀዘንህ፣ በማግኘት ማጣትህ፣ በጤና ህመምህ ሁሉ ከአንተ አይለይም። ደግሞም ቃሉን ብትሰማ፣ ህጉን ብትጠብቅ፣ ትዕዛዙን ብታከብርና ፍጹም ልጁ ብትሆን ሰላም እየሰጠህ በህይወት ኖረህ ብቻ ሳይሆን በስጋ ሞተህ በነፍስህ እስከ ዘልዓለም አብሮህ ይኖራል።

❤ ወዳጄ እኔ በእውነት በህይወቴ ከሆነውና ከተፈጸመው የሚጠቅምህን ዘወትር እጽፍልሀለው። በዙሪያዬ የሚወዱኝ የሚያደንቁኝ የሚያከብሩኝ የሚያሞጋግሱኝና እኔን ከአንተ የሚለየኝ ሞት ነው ያሉኝ ሺዎች ነበሩ። ነገር ግን በአንድ ጀንበር እንደ ጉም የበተናቸው የውሸት ጅራፍ ጮሆ ነበር።

❤ ወዳጄ መጽሀፍ ሰውን የታመነ እርጉም ነው ይላል። ሌላም የሰውን ልጅ ውደደው እንጂ አትመነው። እናም ወዳጄ እኔን ያጸናኝና እንደ ማዕበል የመጣውን ፈተና ያሳለፈኝ ምን እንደሆነ ታውቃለህ። ከልጅነቴ ጀምሮ ዘወትር ወደ ቤተክርስቲያን መሄድና እለት እለት በህይወቴ የሚሆነውን ለእግዚአብሔር ለእናቴ ማርያምና ለቅዱሳኑ መናገር መውደዴ ነበር።

❤ አንድም ቀን በህይወቴ የሚሆነውን እውነትና በልቤ ያለውን ምስጢር ለሰው ተንፍሼ አላውቅም። ስለዚህ ሁሌም ሰዎች በተለወጡብኝ ጊዜ እግዚአብሔርን አመሰግነዋለሁ። ምክንያቱም እንደማያውቁኝ ማወቄ ለኔ ደስ ያሰኘኛል። ደግሞም የሚሄዱ ሰዎች ገና ሲመጡ ያስታውቃሉ።

❤ ፍቅራቸው አቀራረባቸው ሳቅ ጨዋታ ስሜታዊነታቸው ሁሉ የሚረብሽና ብዙ ድራማዎች የበዙት ነው። በአንድ ጊዜ ከአንተ በላይ እኔ አውቅሀለው ይላሉ። በሚያስቅም በሚያሳዝንም ታሪካቸው ሆድ ውስጥ መግባት፤ ችግርህ ችግሬ፤ ጠላትህ ጠላቴ ነው ማለት ይጀምራሉ።

❤ ብቻ ተረጋግቶና እለት እለት ከአምላኩ ጋር እየተመካከረ የሚኖር ሰው መጥተው የሚሄዱና ትወና ኑሯቸው የሆኑ የመጨረሻ ዘመን ሰዎችን በቀላሉ ለመለየት አይከብደውም። ብቻ አፍን ዘግቶና ልብን አዘጋጅቶ እውነት እስክትገለጥ መጠበቅና መታገስ ነው። ምክንያቱም የተከደነ መከፈቱ የተሰወረ መገለጡ አይቀርም።

❤ በዚህች አምስት አመት የጽሁፍ ቆይታዬ የታዘብኩት ብዙ ነው። አብረው የታዘቡም እንዳሉ እርሱ እግዚአብሔር ያውቃል። ገበሬ እርፍ ይዞ ወደ ኋላ አይመለስም ይላል ራሱ የቃል ባለቤት ኢየሱስ ክርስቶስ። እናም እኔ ጉዞዬ ገና ረጅም ነውና እየታዘብኩ ወደ ፊት ቀጥላለሁ። ለለቅሶም ሆነ ለመሳቅ አልቆምም። ደስታዬንም ሆነ ሀዘኔን እየሄድኩ አጣጥማቸዋለሁ። ወዳጄ ከእግዚአብሔር ጋር ጀምሮ ያልጨረሰ የለም🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አይ አንቺ አለም

🌹 ትንሹ ሔኖክ

የፈጠረኝ ጌታ በቃሉ ሊያኖረኝ
ሁሉ በእርሱ ሊሆን ምንስ አስጨነቀኝ
አንተ ጎበዝ ጀግና ብላ እየጮኸች
ልቤን ምታሞቀው አለም አታላይ ነች
በሚያምሩ ቃሎቿ ድራማዋ አስታ
ስንቱን አጥፍታለች ከመቃብር ከታ
ራሷን ቀባብታ በውጭ ለሚያያት
በጣም የምታምር እጅግ አጓጊ ናት
እሷን ተከትለው ስሜት የነዳቸው
ሞት ነው ያተረፉት በገዛ ስራቸው
እሷ ግን ዘንድሮም ምን እንደማታውቅ
በማስመሰል አለች ፊቷ ሞልቶ በሳቅ
በፈጠራ ታሪክ ትምህርቷ መርዛ
ሁሉን ታረክሳለች በቁስ አደንዝዛ
አንዱን የን ጀግና አንዱን ፈሪ እያለች
በስልጣኔ ስም ሰይጣን ታደርጋለች
ፈራ እግዚአብሔር ያለው በጎና መልካሙን
ኋላ ቀር እያለች ታጠፋለች ስሙን
ምግባሩ የቀና ደግ ሰውን ካየች
ፈተና እያበዛች ታሰቃየዋለች
ይህን ሁሉ ክፋት ተንኮሏን ስትፈጽም
ከፈጠራት በቀር ሰው አላወቃትም
ሁሉን በጇ ይዛ ሁሉን አስከትላ
ስትዘብት አየኋት ፈጣሪ ነኝ ብላ
ትዕቢት ፉከራዋን ይህን ሁሉ እያየሁ
በእግዚአብሔር ትዕግስት ሁሌ እገረማለሁ
እሷም ስታዘባት በጣም ተበሳጭታ
ታስፈራራኛለች ጮክ ብላ ዝታ
አንተ ሞኝ ፋራ ደደብ እያለችኝ
ግጠመኝ እያለች ዙሪያዬን ዞረችኝ
የፈጠረኝ እርሱ ከአንቺ ያበጃጀኝ
ይግጠምሽ በሀይሉ እኔስ ደካማ ነኝ
ጉልበቴ እውቀቴ እስትንፋስ ህይወቴ
አምላኬ ነው ለኔ ሀይልና ብርታቴ
ሰማይና ምድርን በቃሉ ያጸና
ይፈርዳል አይቀርም ጊዜው ይድረስና
የሰማይ ወፎችን ርሀብ ያስታገሰ
የምድር አበቦችን ውበት ያለበሰ
ውቅያኖስ ባህሩ በመዳፉ የሆነ
አምላኬ ፍጹም ነው ለቃሉ የታመነ

✝️ አይ አንቺ አለም የፈጠረሽን ረስተሽ ፈጣሪ ነኝ ማለትሽ ሳያንስ ልጆቹን በገዛ አባታቸው ላይ አሳምጸሽ ይዘሽ መጥፋትሽ ዘመንሽን ያሳጥረዋል🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ከኔ ህይወት

🌹ትንሹ ሔኖክ

ወዳጄ እኔ የራሴ ሀገር፣ የራሴ ንጉስ፣ የራሴ ንግስትና ብዙ ብዙ የህይወት ህግ ያለኝ ሰው ነኝ። ወንጀል ሰርተሀል ብሎ ሌላ ሶስተኛ ወገን መጥቶ እንዲናገረኝ፣ እንዲይዘኝ፣ እንዲያስረኝና እንዲቀጣኝ ፈጽሞ አልፈቅድም። ምክንያቱም ራሴን በሚገባ የመወንጀል የመክሰስና የመቅጣት ልምድ አለኝ። መሸለምና ማስደሰትም ጭምር። ይህ የሚሆነው ግን በትክክለኛና በእውነት መንገድ ነው።

❤ በራሴ ህይወት ላይ ያወጣኋቸው ብዙ ህጎች አሉኝ። እነዚህ ህጎች ሁሌም ራሴን ከብዙ ውሸታም፣ አስመሳይ፣ አጭበርባሪ፣ አታላይ፣ ክፉ፣ ጨካኝና አረመኔ ሰዎች የምጠብቅባቸው ናቸው። ደግሞም ከላይ የጠቀስኳቸውን ባህሪ ያላቸውን ጨምሮ ሌሎች በብዙ እጥፍ ከሰይጣን የከፉ ሰዎች በህይወቴ ገጥመውኛል። ነገር ግን ሁሉም በህጎቹ ተይዘው ከህይወቴ ተባረዋል።

❤ ወዳጄ ከህጎቼ አንዱን ላጋራህ። ለምሳሌ ከየትኛውም ሰው ጋር ፈገግ ማለትና መሳቅ ምርጫዬ ነው። ነገር ግን የምስቀው ሰውየው ስላሳቀኝ፣ ስላዝናናኝ ወይም ስለተመቸኝ አይደለም። ብልጠቱና አራድነቱ እየጎዳው መሆኑ የሚያስቀኝ ሰው አለ፣ ክፋቱ ነገ የሚያደርስበትን መከራ ሳይ የሚያስቀኝ ሰው አለ፣ ሊያታልለኝ ብዙ ሲሞክር የሚያስቀኝ ሰው አለ፣

❤ ውሸቱ የሚያስቀኝ ሰው አለ፣ ማስመሰሉ የሚያስቀኝ ሰው አለ፣ ትዕቢቱ የሚያስቀኝ ሰው አለ፣ ጉራው የሚያስቀኝ ሰው አለ፣ አዋቂ ለመባል ሲዘባርቅ የሚያስቀኝ ሰው አለ፣ ክፋቴን ነቃብኝ አልነቃብኝ ብሎ ሲንተባተብ የሚያስቀኝ ሰው አለ፣ ነገ ጠላቴ ሊሆን ዛሬ ሲያንደንቀኝ የሚያስቀኝ ሰው አለ፣ እሱ በፈለገው መንገድ የሄድኩለት መስሎት ደስ ሲለው የሚያስቀኝ ሰው አለ፣ ሞኝ አድርጎ ሲመለከተኝ የሚያስቀኝ ሰው አለ እናም ሌላ የሚያስቀኝ ብዙ አይነት ሰው አለ።

❤ አየህ ወዳጄ! በኔ ህይወት የመሳቅ ትርጉሙ ብዙ ነው። ነገር ግን ያ የምስቅለት ሰው የዋህ ስለሆንኩ ወይም በጊዜው የሚነግረኝ ከንቱ ነገር የሚያስቀኝ ይመስለዋል። ወዳጄ በህይወትህ ምን ጊዜም ቢሆን አንተ ምን እየተሰማህና ምን እያሰብክ እንደሆነ ሰዎች እንዲያውቁ አታድርግ። ብቻ እነሱ በራሳቸው ግምት እንዲጓዙ አድርጋቸው።

❤ እኔን ወላጅ እናት አባት፣ እህት ወንድም፣ ወዳጅ ዘመድ ጓደኞቼ፣ ጎረቤት የስራ ባልደረቦቼና አጠገቤ የነበሩ ሁሉ ጠንቅቀው እንደሚያውቁኝ እርግጠኞች ነበሩ። ምክንያቱም ሁሌ የሚያዩት የተለመደችውን ፈገግታና ለሁሉ እሺ ብሎ መታዘዝን ነበረ። ሁሉም እሱኮ ጨዋ መልካምና ልዩ ልጅ ነው ይላሉ። ነገር ግን የሚናገሩትና የሚሰሩት ለየቅል ነበረ።

❤ እኔ ግን የምስቅላቸውም ሆነ እሺ ብዬ የምታዘዛቸው እነሱ እንደሚያስቡት ሆኜ አልነበረም። እናም ትክክለኛው ጊዜ በመጣ ጊዜ ፈጽሞ እንደማያውቁኝ በሚገባ አሳይቻቸዋለሁ። ያንን ላለማመን ብዙ የደከሙና ሊታገሉኝ የሞከሩ ብዙዎች ናቸው። ግን ጅብ ካለፈ ወሻ ጮኸ ሆነዋል። አየህ ወዳጄ ቤተሰቦቼም ሆኑ በዙሪያዬ የነበሩ ጓደኞቼ በልባቸው የነበረውን ክፋት ቅናትና ምቀኝነት ስለማውቀው ከእግዚአብሔር የተሰጠኝን ጸጋዬን በፍጹም አላሳየኋቸውም ነበር።

❤ ምክንያቱም ገና በልጅነቴ ጸጋዬን ለኔ የሰጠኝ እግዚአብሔር ስለሆነ ያሰብኩትን እንደማሳካ አውቀው ነበር። እነሱ ደግሞ የኔን ነገር እየተከታታሉ ማጣጣል፣ መናቅና መሳነስ ደስታቸው ነበር። ከእግዚአብሔር አምላኬ ጋር ያለኝን ግንኙነት፣ ለአላማዬ ያለኝ ጽናት፣ ለሃይማኖቴ የነበረኝን ቆራጥነትና ለውሸት ክፋትና እግዚአብሔር የማይወዳቸውን ነገሮች ለሚፈጽሙ ያለኝን አመለካከት ፈጽሞ የሚያውቅ የለም።

❤ እኔ በስጋ ዝምድናም ሆነ በጓደኝነት ፈጽሞ አላምንም። ደግሞም ብዙ ጊዜ አብሮ በቆየ ወዳጅነትና አብሮ በመብላት መጠጣት ይሉኝታ አልታሰርም። ለኔ ወላጅ ቤተሰቦቼን ጨምሮ ሰው ሁሉ አንድ ሰው ነው። ሰውን እግዚአብሔርን በመፍራትና ባለመፍራት፤ ትዕዛዙን በመፈጸምና ባለመፈጸም፤ ህጉን በመጠበቅና ባለመጠበቅ፤ ቃሉን በማክበርና ባለማክበር በተግባሩ ነው ወዳጅም ጠላትም አድርጌ የምመለከተው።

❤ ልጅ እያለሁ ወላጅ አባትና እናቴ በሃይመኖቴና በእውነት ከመጡና ከውሸት ጋር ካገኘኋቸው ለየትኚውም ፍርድ አሳልፌ እንደምሰጣቸውና ቅጣቱንም እኔ ፈጽም ከተባልኩ ደስ እያለኝ እንደምፈጽምባቸው ስነግራቸው ይቀልዱብኝ ነበር። ያው ጊዜው ደረሰና እነሱ በሀሰት በሃይማኖቴ ሲያሳድዱኝ እኔ ስለእውነት ለማህተቤ ተሰድጃለሁ። ብዙ መከራና ስቃይንም ተቀብያለሁ። ሁሌም የሚያሳዝነኝና የማለቅሰው በማስመሰል ዘመኑን ለሚጨርስና ክፋት ውሸትና ኃጥያትን የሚያደርግ ሰው በህይወት ቆሞ ስመለከት ነው። እንዲህ ያለ ሰው ሲሞት ደስ ይለኛል እንጂ አላለቅስም አላዝንምም። ለዛ ነው በአባቴ ቀብር ላይ ያልተገኘሁት። በህይወት ኖሮ እግዚአብሔርን ከጠላና እለት እለት ኃጥያትን እያደረገ የገሀነም ዘመኑን ከሚያረዝም ዛሬ መሞቱ እጅጉን መልካም ነው። ምክንያቱም እዳውን ይቀልለታል። ቢኖርም ለራሱም ለሰውም ጥፋት ነው።

❤ እኔ በህይወቴ የምፈራው አንድ ነገር ነው እርሱም ከእግዚአብሔር ህግ መውጣት ብቻ። ራሱን እንደ ሀይለኛ ጉልበተኛ ጨካኝና አረመኔ የሚያስብ ሰው በጣም ያስቀኛል። ምክንያቱም ያን ያደረገው በውስጡ ያለ ክፉና ፈሪው ዲያቢሎስ እንደሆነ አያውቅም። እርሱ ደግሞ በእውነት ፊት መቆም አይችልም። ብዙ ሰዎች ዝተውብኝ ያሉበት ድረስ ሄጃለሁ ነገር ግን ሸሹኝ እንጂ ያደረጉት ነገር የለም። ለኔ ሞት ማለት የሰርግ ቀኔ ነው። ውሸት ከሆነችው አለም ወደ እውነት አለም የመሄጃ ልዩ መንገድ ነው።

❤ ለዛ ደግሞ ሁሌም በሚገባ ተዘጋጅቼ እኖራለሁ። ነገር ግን ሞት ራሱ እኔን ሲያየኝ ይሸሸኛል ምክንያቱም እሱ ሁሌም አለምን የሚወዱ፣ እባክህ አትምጣብኝ ብለው የሚለምኑትና የሚፈሩት ላይ ነው ሀይሉ የሚሰራው። እኔ ደግሞ እሱ ለአምላኬ የሚላክ ተላላኪ እንጂ በራሱ ምንም ሀይልም ሆነ አቅም እንደሌለው በሚገባ አውቀዋለሁ።

❤ ህጎቼን በጣም እወዳቸዋለሁ። ሁሌም እጠብቃቸዋለሁ። አንድ ነገርን አውቃለሁ እርሱም ሰይጣን ፈጽሞ ህግን፣ ህግ ያላቸውና ህግን የሚጠብቁ ሰዎችን አይወድም። ህግ ያለው ሰው በቀላሉ ወጥመድ ውስጥ አይገባም። ስለዚህ ሰዎች ይጠሉታል ይከሱታል ያሙታል። ምክንያቱም እሱ ካለ የጊዜ ጉዳይ እንጂ ማንነታቸውን እንደሚያጋልጥ ጠንቅቀው ያውቃሉ።

❤ ወዳጄ ሰው ቢወድህም ሆነ ቢጠላህ፣ ቢቀርብህም ሆነ ቢርቅህ፣ ቢያከብርህም ሆነ ቢያዋርድህ፣ ቢደግፍህም ሆነ ቢከሰህ፣ ከንፈሩን ቢመጥልህም ሆነ ባይመጥልህ የሚጠቅህም ሆነ የሚጎዳህ አንድም ነገር የለም። ምክንያቱም ሰው ሁሉ ከጥቅሙ አንጻር ነው የአንተን ነገርና አንተን የሚመለከተው። ስለዚህ ሰውን ሳይሆን ራስህንና የፈጠረህ አምላክህን ደስ ለማሰኘት ኑር። ይህ ለኔ በህይወቴ ተሳክቶልኛል።

❤ ብቻ አንተ ለሰዎች ክፋት ክፋትን አትመልስ። ዘወትር እስፖርት መስራት፣ መጸለይ ማንበብና ረዘም ያለ ጊዜ ወስደህ ራስህን ማዳመጥ የህይወትህ ልምምድ ይሁን። የሰዎችን የትኛውም ድርጊት እንደ ቁም ነገር ወስደህ ነፍስህን አትበጥብጣት። ወደዱኝ ብለህም አትረብሻት። ይልቅ ከትላንት ዛሬ፤ ከዛሬ ነገ የሰውና የአለም ክፋትና ተንኮሏ እየባሰ ስለሚሄድ አንተም እለት እለት ነፍስህን መንከባከብና አጥርህን ማጠንከርህን አትርሳ። አልያ የአንድ ቀን መዘናጋት ለአመታት ወደ ኋላ ያስቀርሀል። ወዳጄ እኔን ብዙ አውቀዋለሁ የሚሉ እንጂ  የሚያውቀኝ አንድም ሰው የለም 🙏👉✝️

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ሙታን ሙታንን ይከተላሉ

🌹 ትንሹ ሔኖክ

ወዳጄ ሰዎችን ጅማሪያቸውን አይተህ ለምስጋና ለአድናቆት ለውዳሴና ለምስክርነት አትቸኩል። ይልቅ እነዚህን ነገሮች የጀመሩትን ጨርሰው ለሚያሳዩህ ሰዎች አድርገው። ነገር ግን ለእነሱም ቢሆን በውዳሴ ከንቱ ትጥላቸዋለህ እንጂ ይህን በማድረግህ የምትጠቅማቸው አንድም ነገር የለም።

❤ አየህ ወዳጄ! ሰዎች ምን ጊዜም ሲጀምሩ ወይም ሲቀርቡህ በጣም መልካም፣ ደግ፣ ሩህሩህ፣ የዋህ፣ እግዚአብሔርን የሚፈሩ፣ እውነት የሚወዱ፣ ኃጥያትን የሚጠሉ፣ ለአንተ አሳቢ፣ የአንተ አድናቂ፣ ከአንተ ብዙ መማርና ማወቅ የሚፈልጉ መንፈሰዊ ሰዎች መስለው ነው።

❤ ገና ስታገኛቸው ብትናገራቸው አይናደዱም፣ ብታጠፋ ችግር የለም ይሉሀል፣ አንተ እስክትደነቅና እግዚአብሔር አሁን ገና እውነተኛ ሰው ሰጠኝ እስክትል በብዙ ብዙ ነገር ያስገርሙሀል። ይህ የሚሆነው አንተ ፈጽሞ እስክታምናቸውና ቤትህንና ልብህን እስክትከፍትላቸው ነው።

❤ ታድያ ይህን ካረጋገጡ በኋላ ከመጀመሪያ ቀን ጀምሮ በልባቸው የክፋት መዝገብ የመዘገቡትን ሁሉ አንድ በአንድ እያወጡ ይነግሩሀል። የዋህነታቸው በብልጠት፣ መልካምነታቸው በክፋት፣ ሩህሩነታቸው በጭካኔ፣ ፍቅራቸው በጥላቻ፣ አክብሮታቸው በንቀት፣ መንፈሳዊነታቸው በሰይጣንነት ይቀየርብሀል።

❤ "ያኔ ዝም ያልኩህኮ" እያሉ ያደረግከውን ሁሉ እያነሱ ምን ያህል የቂም በቀል በሽታ ተመራዦች መሆናቸውን ያሳዩሀል። እናም ወዳጄ የገዛ ቤተሰቦችህም ቢሆኑ ሰዎችን ፈጽሞ አትመናቸው። መቼም ቢሆን "አሁንስ አበዛኸው" ብሎ በበቀል የማይነሳብህ አምላክህ ነውና እሱን በፍጹም ልብህ እመነው።

❤ ወዳጄ በእኔ ህይወት ጀምረው የጨረሱ ሰዎች አልገጠሙኝምና ሁሌም የማመሰግን የማደንቅ የማወድስና የምዘምረው ለፈጠረኝ አምላኬ እግዚአብሔር፣ ሁሉን ለሆነችኝ ማርያም እናቴ፣ አባት ለሆነኝ ቅዱስ ሚካኤል፣ ሚስጥረኛዬ ለሆነው ቅዱስ ገብርኤል፣ አርአያ ምሳሌና ጀግናዬ ለሆኑት አባቴ አቡነ ተክለሃይማኖት፣ አቡነ ገብረመንፈስ ቅዱስ፣ ቅድስት አርሴማና ብዙ እናት አባቶቼ ነው።

❤ ለኔ ሰው ሆኖ ጀግና የሆነ አንድም የለም። ጀግና ማለት የጀመረውን የሚጨርስ፣ እግዚአብሔርን የሚፈራ፣ ነፍሱን አድኖ ለሌሎች መዳን ምክንያት የሆነ፣ ትዕግስትና ማስተዋልን ገንዘቡ ያደረገ፣ በመንገዱ ሁሉ እግዚአብሔርን የሚያስቀድም፣ በጊዜ ሁኔታ እሱነቱ የማይለዋወጥ ነው። ይህም ያለ እግዚአብሔር ፈቃድ ሰው ብቻውን ሊያደርገው አይችልም።

❤ በዚህ ዘመን ጀግኖች የሚባሉት ክፋት ተንኮል ቅናት ምቀኝነት ብልግና እብደት ጭካኔን የተሞሉ። ዘፈን ዳንስ ጭፈራና የአለም ከንቱ ነገርን ህይወታቸው ያደረጉ የቁም ሙታን ናቸው። ስለዚህ ሙታንን የሚከተል ሁሉ እርሱ በቁሙ የሞተ ሬሳ ነው። ይህን ክርስቶስ በማቲዎስ ወንጌል ይከተሉት ከነበሩ ለአንዱ ደቀመዝሙር በሚገባ የተናገረው ነው🙏✝️

👉 በየእለቱ መልዕክት እንዲደርሶ "ትንሹ ሔኖክ" የሚለውን የቴሌግራም ቻናሉን ይቀላቀሉ።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ጌታ ሆይ...

🌹ትንሹ ሔኖክ

በንሰሀ ታጥቦ እንደተዘጋጀ
ጌታ ሆይ ና ይላል ፍርድህን መች አወቀ
ስጋና ደምህን አምኖ ተቀብሎ
ልጅህ መሆን ሳይመርጥ አባቴ ነህ ብሎ
በትንሽ ትልቁ ሁሉ እያማረረ
በክፋት ብልጋና ሁሉ እየሰከረ
በቃልህ እያሾፈ አትመጣም ወይ ይላል
የህይወት ቃልህን እውነትን መች ያውቃል

🙏 እኔ ግን አምላኬ ይህን ልጠይቅህ...

የሰው ልጅ በአንተ ላይ እንዲህ እየቀለደ
የመስቀል ስቃይህን ሁሉ እያዋረደ
በማስመሰል ኑሮ በቃልህ ዘብቶ
ፍቅርህን ሲያቀለው በሀሰት ተግባብቶ
አይተህ እንዳላየ ሰምተህ እንዳልሰማህ
እኛን ዝም ማለት መኑ ነው ያዋጣህ

ክፋት በልብ ይዘን ይቅር በለን ስንል
ንሰሀ ሳንገባ ከመቅደስ ስንውል
መድኃኒቱን መውሰድ መዳን እየጠላን
በአንተ ላይ ስንዘብት ስምህን እየጠራን
እኛ እንዳሳደድንህ በማታ በቀኑ
አይሁድ በጊዚያቸው በአንተ መች ጨከኑ

ስለ ፍቅርህ ብሎ ተዘጋጅቶ ኖሮ
ከልቡ ላይ ክፋት ጥላቻን አባሮ
ከአንተ ጋር መኖርን ነፍሱ በመናፈቅ
በስጋና ደምህ ነፍሱን በማስታረቅ
ለጥቅሙ ሳይል ወደ አንተ በመምጣት
ተመስገን የሚልህ ስምህን በመጥራት
ለሰማዩ ጉዞ ትኬት የቆረጠ
ማን አለ አምላኬ አንተን የመረጠ

✝️ ጌታዬ ሰዎች "ጌታ ሆይ ቶሎ ና!" ይላሉ። አንተ እውነተኛና ቅን ፈራጅ መሆንህን መች አወቁ። አንተ ልጆቼ ወደ ንሰሀ የምትመለሱበትና ነፍሳችሁን የምታዘጋጁበት ጊዜ ሰጠኋችሁ ትላለህ። እኛ ደግሞ በኃጥያት መኖሩን ወደነው ጭራሽ ምን ጊዜ ያስፈልጋል ቶሎ ና እያልን እንዘብትብሀለን። አምላኬ ትዕግሥትህ ቢያስደንቀኝም ፍርድህን እንደ ልቤ ባልከው ቅዱስ ዳዊት ላይ አይቻለሁና ሁሌም እፈራሀለው። ሳይዘጋጁ አንተን መጥራት ቅሰፈኝ ማለት እንደሆን በሚገባ ገልጸሀል። ጌታዬ እኔ ና አትምጣ አልልህም። ምክንያቱም አንተ ሁሉን በራስህ ጊዜ ትፈጽማለህ። ደግሞም ተሳስተህ አታውቅም። እኔን ግን እንዳልዘናጋ አድርገኝ ✝️🙏

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ አንተ ለኔ...

🌹ትንሹ ሔኖክ

አንተን መበደሌን ጥፋቴን ባውቀውም
ለነፍሴ ሚበጃት ሌላ አላገኘሁም
ቅንና በጎውን ለሞት የማትሰጥ
በጊዜ ሁኔታ ፍቅርህ ማይለወጥ
ከቁጣ ምህረትህ እጅጉን የበዛ
ፈጽሞ ያልተውከኝ እንዲሁ እንደዋዛ
የልብ ሚስጥረኛ ወዳጄ ያደረግኩህ
እጅግ ደስ እያለኝ ነፍሴን የሰጠሁህ
የመኖሬ ምክንያት ፍጻሜዬም የሆንክ
በመስቀል ተሰቅለህ እዳዬን የከፈልክ
የስጋዬ ጤና የነፍስ መድኃኒቴ
አንተ ነህ አምላኬ ተስፋና ህይወቴ
ምንም አጭር ብትሆን የምድር ቆይታዬ
በቃልህ እመራለሁ ሁነኸኝ ጥላዬ
አይተህ ዝም ብትል ትዕግስትህ ቢበዛም
ስጋዬን እያሰብኩ ቃልህን አልረሳም
አንተን ባልይዝ ኖሮ በሰዎች ብታመን
አፈር ትቢያ ነበርኩ ይሄን ጊዜ ዛሬን
ወዳጅ ያልኩት ጠላት አሳዳጄ ሲሆን
ጓደኛ ቤተሰብ እንደ ጉም ሲበተን
ልጄ ልጄ ብለህ መከታ የሆንከኝ
አምላኬ አንተ ነህ ፍቅርህን ያሳየኸኝ
እኔም ለኔ ላልኖር ዘወትር ላስደስትህ
በእድሜዬ ጥራለሁ ልሆን ፍጹም ልጅህ

✝️ አምላኬ አንተ ለኔ አንተ ነህ። የምወድህ እውነተኛ አባቴ በመሆንህ፤ ልጅህ መሆንን የፈለግኩት ሁሌም እውነትን እንድኖር ስለምታጸናኝ፤ የምታዘዝህ በትዕዛዛቶችህ ውስጥ ክፋት ተንኮልና ጥላቻ ስለሌለ፤

❤ ከአንተ መለየት የማልፈልገው ሁሉ የአንተ በመሆኑ፤ ዘወትር የማመሰግንህ የልቤን ስለምታውቅና ደስ ስለምታሰኘኝ፤ የምከተልህ አለምና ሰዎች ብዙ እየከሰሱኝ አንተ ግን ሁሌም ቅን ፈራጅ በመሆንህ ነው። ጌታዬ ነፍሴኮ ልሂድ ብትል እራሱ ከአንተ ሌላ የምታውቀው ነገር የለም። ደግሞስ ወደ ማን ትሄዳለች። ሰዎች ስላገኟት ደስተኛ የሆኑ መስለው ስቀው ቢቀበሏት በቀናት ትሰለቻቸዋለች።

❤ አለምም ነይ ነይ ትላታለች ነገር ግን ከመብላት መጠጣት ዳንስ ጭፈራ ወሬ ሀሜትና ክፋት ሌላ በውስጧ ለሷ የሚበጃትን ነገር አልያዘችም። ይኸው ይህን ሁሉ አመት አንድ ቀን ሳትሰለች በደስታ እናት አባት እህት ወንድም ወዳጅ ዘመድ ጓደኛዋ ሆነህ አለህ። እሷ የኔ የምትለው አንድ ሰው እንኳን በምድር የላትም። ደግሞም አትፈልግም። አንተና እናትህ ለሷ ከበቂ በላይ ሆናችሁላትል። ነፍሴ እግዚአብሔርን አመስግኚ ✝️❤🙏🌹

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ቅድስት ስላሴ

🌹ትንሹ ሔኖክ

የአብረሀም እንግዳ በረከትን ሰጪ
ክፉውን ንፉጉን ዳቢሎስን ቀጪ
ቃል ብቻ ተናግረው ሰማይን ያጸኑ
ይሁን ይሁን ብለው ሁሉን የፈጠሩ
ልብን ኩላሊትን የሚመረምሩ
ተስፋ የቆረጠን በፍቅር የሚጠሩ
ያዘነን አጽናንተው እረፍት የሚሰጡ
ሰላምን ለፍጥረት ሁሌ የሚያድሉ
አምልኮና ስግደት ክብርና ውዳሴ
ምስጋና ይገባል ለቅድስት ስላሴ

✝️ ሰላሴ ቤታችንን ልባችንን ኑሯችንን ህይወታችንን ሁሉ ይጎብኙ። ለሀገራችን ሰላምና ፍቅርን ያድሉን። በዙሪያችን ከከበቡን ክፉ አስመሳይ መርዝ ተኩላዎች ይጠብቁን። ይህን ዘመን ለድህነት ያድርጉልን። ከማይጠቅመን ነገር ሁሉ ይለዩን። የምድር መላዕክት የሰማይ ሙሽሮች ያድርጉን። እያጓጓች ከምታጠፋን አለም ይሰውሩን። በጊዜ ፍቅር ጣዕማቸውን ያቅምሱን። ለሚያልፈው አለም የማያልፈውን እንዳናጣ ይጠብቁን🙏

🌺 ማርያም እናቴ ውድድድ የምታደርገኝ ትንሹ ሔኖክ ነኝ🌹

❤ አይ ሰው መሆን

🌹ትንሹ ሔኖክ

ወዳጄ ግድ የለም ታገስ። የራቀው መቅረቡ፣ የቀረበው መራቁ፣ መልካም የመሰለህ ክፉ፤ ክፉ ነው ያልከው መለወጡ፤ የኔ ናቸው ያልካቸው የአንተ እንዳልሆኑ፣ አውቃቸዋለሁ የምትላቸውን እንደማታውቃቸው፣ መልካም ናቸው ያልካቸው አውሬ ፤ ነፍሴን እሰጥላቸዋለሁ ያልካቸው የነፍስህ ጠላቶች፤

❤ እውነተኞች ናቸው ያልካቸው ሀሰተኞች፣ ሀሰተኞች የምትላቸው እውነተኞች፤ ጠንካራ ናቸው ያልካቸው ደካሞች፣ ደካሞች የምትላቸው ጠንካሮች፤ የዋህ ናቸው ያልካቸው አረመኔዎች፤ ደግ ናቸው ያልካቸው ክፉዎች፤ ቸር ናቸው ያልካቸው ንፉጎች፤ መንፈሳዊ ናቸው ያልካቸው ሰይጣኖች፤ ዱርዬ የምትላቸው የእግዚአብሔር ልጆች፤

❤ ውስጥ ናቸው ያልካቸው ውጭ እንደሆኑ፤ ውጭ ናቸው የምትላቸው ውስጥ እንደሆኑ፤ እግዚአብሔርን ያውቃሉ ያልካቸው እንደማያውቁት፤ አያውቁትም የምትላቸው በሚገባ እንደሚያውቁት፤ በሰው የተጠሉት በእግዚአብሔር እንደሚወደዱ፤ በሰው የተወደዱት በእግዚአብሔር እንደተጠሉ፤ ፊተኞች ኋላኞች፤ ኋለኞች ፊተኞች እንደሆኑ፣

❤ አለን ያሉት እንደሌሉ፣ የለንም ያሉት እንዳሉ፤ ጠፍተናል ያሉት እንደዳኑ፤ ድነናል የሚሉት እንደጠፉ፣ አዋቂ የምትላቸው እንደማያውቁ፤ አያውቁም የምትላቸው እንደሚያውቁ፤ ደሀ የምትላቸው ባለጠጎች፤ ባለጠጋ ያልካቸው ድሆች፤ ንቀህ ብዙ የዘለፍካቸው የከበሩ፤ አክብረህ ያደነቅካቸው የተናቁ እንደሆኑና ሌላም ብዙ ብዙ ነገር አንተ ከምትለውና ከምታስበው ተቃራኒ እንደሆኑ የምታይበት ጊዜ ሩቅ አይደለም። እሱም እግዚአብሔር እደሜ ከሰጠህ ነው።

❤ አየህ ወዳጄ! በዚህች አለም የሚጠቅምህ አንድ ነገር ቢኖር በማያገባህ አለመግባትና ለወሬና ለንግግር አለመፍጠን ነው። ወዳጄ የምታውቅ መስሎህ እንጂ የምታውቀው አንደም ነገር የለም። አየህ ስጋ ስጋ ነውና እውሩ አይን ሲያይ ያየን፤ በአለም የክፋት ሙዚቃ የደንቆረ ጆሯችን ሲሰማ የሰማን መስሎን፤ ያን እንደ እውቀት ይዘናል።

❤ ነገር ግን እግዚአብሔር የውስጥ አይንህንና ጆሮህን ቢያበራልህ ከቤት ባልወጣህ ነበር። እናት አባት በልጆቻቸው፤ ሚስት በባሏ፤ ባል በሚስቱ፤ ልጆች በወላጆቻቸው፤ ወንደም በወንድሙ፤ እህት በእህቷና የሰው ልጅን ክፋት ብትመለከት መኖርን በጠላህ ነበር። ግን እግዚአብሔር ይህን ለሚወዳቸው ልጆቹ ብቻ፤ እንዴትና በምን ውስግ እያኖራቸው እንደሆነ እንዲያወቁ ያሳውቃቸዋል።

❤ አየህ ወዳጄ ይሄ ሙት ስጋችን! ሆዳችንን የሚሞሉልንና የሚያበላ የሚያጠጣንን ወዳጅ ቤተሰብ የአንተ ሰው ነው ይለናል። በነፍሳችን እየሞትን መሆኑን እየነገረና እየሰመጥንበት ያለውን ክፋት የሚነግርህን ሰው ግን ጠላታችሁ ነው ይለናል። ወዳጄ ዛሬ የቁም ሬሳ የሆነው በመብል ነው።

❤ ዛሬም ድረስ ሰው ሰውን በክፋት የሚያጠምደው በመብልና መጠጥ ነው። ለዛ ነው ከፉ ሰዎች ድግስ ያበዛሉ። ድግስም ይወዳሉ። ምክንያቱም ወዳጅ ደግና ሩህሩህ መስለው በፈለጉት ሰው ሰውነትና ህይወት ውስጥ በቀላሉ ይገባሉ። ይህን ከልጅነቴ ጀምሮ በዙሪያዬ ከነበሩ እጅግ ክፉ ሰዎች፣ ደብተሮችና ጠንቋዮች አይቻለሁ። ከቤተሰቦቼም ጭምር። ወዳጄ እኔ በህይወቴ ስለ ምግብና መጠጥ እንደሚያወራ ሰው የምርቀው የለም።

❤ እነዚህ ሰዎች ትልቁ ቁም ነገራቸውና ከሰው የሚወቃቀሱት ከጉሮሮ እንደወረደ ለሚቆሽሽ ነገር መሆኑን እረስተው አንተን ጭምር ማጓጓት ይፈልጋሉ። በልጅነቴ ሁሌም ከአባቴ የሚያጋጨን ይሄ ነበር። መጾም መጸለይ መስገድ ጸበል መጠመቅና እውነትን መናገር የሚጠሉ ሰዎች መደበቂያና ቁም ነገራቸው ሆድ ነው።

❤ መቼስ አፍ ኖሮት አልተናገረም እንጂ የኛ ሆድ ያልበላውና ያልጠጣው ምን መርዝ አለ። አንዳንዴም እየጮኸ በቋንቋው የኛ የምንላቸውና ያመናቸው ሰዎች እያበሉን ያለውን መርዝ ሊነግረን ይሞክራል ግን አንሰማውም። የኔ እንደዛ ነበረ። የሚያሳዝነው ዛሬም ድረስ ጠላታችን የተሸሸገው በሆዳችን መሆኑን አለማወቃችን ነው።

❤ መቼስ የኛን ወዳጅና ጠላት የሚለይልንና እከሌ መልካምና ደግ ነው የምንለውን የሚነግረን ሆዳችን ከሆነ ሰንብተናል። እናም ጠላቶቻችንን ወዳጅ ዘመድ ጓደኛ ቤተሰብ አድርጎ የሚጠቅሙንና ለነፍስ የሚበጁንን ለሱ አይመቹትምና ክፉ ናቸው ብሎ ያራርቀናል። አይ ሆድ በእውነት አንተን ማን ያሸንፍሀል።

❤ ሰዎች አጠገቤ ሆነው ስለሆድ ሲያወሩ ከእሬሳ እንጂ ከሰው ጋር እንዳልተቀመጥኩ አየዋለሁ። ምክንያቱም መናገር ካለበትም ስለመብል መናገር የሚችለው የእለት እንጀራን ለሁሉ የሚሰጥ እግዚአብሔር ብቻ ስለሆነ። ደግሞ ሰዎች ካበሉ በኋላ የመልስ ግበዣ ይጠብቃሉ።

❤ ለዛም ነው ሰዎች ሁሌም ሲፈልጉ ቤተክርስቲያን እቀጥራቸዋለሁ። ብዙዎቹ አይመቻቸውም። የእነሱ ምርጫ ካፌ ሆቴል ወይም ቤታቸው ይሆናል። ምክንያቱም በቤተክርስቲያን የነፍስ እንጂ የስጋ ምግብ የለምና ለዲያብሎስ አይመቸውም። ደግሞም የሆድ ድግስ ባለበት የነፍስን ጉዳይ መረበሽ በጣም ቀላል ነው።

❤ ወዳጄ ነፍስ ፈጽሞ ጸጥታና ጥሞና ትወዳለች። ለዛ ነው በአባታችን ሆይ የተጀመረ ዝክር በብዙ ወሬ ሀሜትና ሳቅ ጨዋታ እንዲሁም በዳንስ የሚፈጸመው። ወዳጄ ነፍስና ስጋ ፈጽሞ የሚስማሙ አይደሉም። ብዙ ሰዎች ትልቅ ድግስ ይጠሩኝና በዛ እንዳስተምር ወይም እንድዘምር እንደሚፈልጉ ይነግሩኛል። እኔም ከድግሱ እቀራለሁ ሰዎቹንም ብሎክ አደርጋቸዋለሁ።

❤ ወዳጄ የእግዚአብሔር ቃል የዝግጅት ማድመቂያ ወይም የአስመሳዮች መደበቂያ ድራማ አይደለም። ሆድ የሰበሰባቸው ሚሊዮኖች መሀከል ቆሞ ከመናገር ንሰሀን የምትፈልግ አንዲት በስጋ የተጎሳቆለች ነፍስን በጎዳና ማጽናናት ህይወት ነው። የሰው ልጅ የጠፉትን ሊፈልግ መጥቷል። ካሉት ዘጠና ዘጠኝ በጎች ይልቅ ጠፍታ በምትገኝ አንዲት ነፍስ እርሱ ደስ ይሰኛል። ከስጋ የሆነ ስጋ ነው።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹

❤ ነፍሴ አስተውዪ
ቀን በቀን ሲተካ ጊዜ እየነጎደ
እውነትን መከተል በማን ተወደደ
ከአምላኩ ተስማምቶ መኖር እየቻለ
ኃጥያትን ሲከተል ችግር ላይ ተጣለ
ነፍስን አረጋግቶ በሰላም መኖርን
ሞኝነት ነው አሉ መንፈሳዊነትን
በክፋት ብልግና ሲባክኑ መዋል
ስልጣኔ ተብሎ ፍጥረቱ ሰይጥኗል

🌹ትንሹ ሔኖክ

❤ ዘመኑን አላስተዋላችሁምን?

🌹ትንሹ ሔኖክ

ወዳጄ ክርስቶስ ጸሀፍት ፈሪሳውያንና የሙሴ ህግ መምህራንን "እናንተ በጠዋት ሰማዩ ቀልቷልና አይዘንብም፤ ደግሞም ከሰዓት ሰማዩ ቀልቷልና ዝናብ ይዘንባል ትላላችሁ። ታድያ የሰማዩን መቅላት በማየት የዝናቡን መዝነብ የምታውቁ ስትሆኑ እንዴት ምልክቶችን በማየት ዘመኑን ማወቅ አቃታችቹ" ይላቸዋል።

❤ ወዳጄ ይህ ቃል የተነገረው ለቀደሙት ከመሰለህ እጅጉን ታሳዝናለህ። ይልቅስ ዛሬ ሁሉን አዋቂ፣ ተንታኝና አስረጅ ነን ለምንል። በዘመን ፍጻሜ ላይ ሆነን የአለምን ብልጭልጭ ነገርና ክፋት በማሰብ ብቻ የእግዚአብሔርን የንሰሀ ጥሪ መስማት ላቃተን ለኛ መሆኑን እንድታስተውል ይህን እጽፍልሀለው።

❤ ወዳጄ ይህ ዘመን ለእውነትና እውነተኞች እጅግ አስጨናቂና አስቸጋሪ ነው። ምክንያቱም አባቱ ዳኛ ልጁ ቀማኛ የተባለለት። የዲያቢሎስ የግብር ልጆቹ ለፈቃዳቸው ተላልፈው የተሰጡበት የጨለማ ጊዜ ነው። እናም ወዳጄ በዚህን ጊዜ ያለንሰሀ የሚኖርና ራሱን አዘጋጅቶ በስጋ ወደሙ ከብሮ የማይኖር ሁሉ በጎርፍ መወሰዱ አይቀርም።

❤ ወዳጄ በዚህን ጊዜ ሰው ለምን ክፉ ሆነ፤ እከሌ ይህን ፈጸመብኝ፣ ለምን እግዚአብሔር ይህን አያደርግም የምትልበት አይደለም። ምክንያቱም እኔና አንተም ስንመረመር ከዚያው ወገን መሆናችን እውነት ነው። እንዴት ለምን ትለኛለህ። እግዚአብሔርን ብንፈልገውማ ኖሮ ዛሬ ንሰሀ ገብተን ወደ ቅዱስ ስጋና ክቡር ደሙ ለመቅረብ በቂ ምልክቶችን አይተናል። ነገር ግን የኛ ፍላጎት በማስመሰልና ምክንያት በመደርደር የጀመርናትን የኃጥያት ስራችንን እግዚአብሔር እንዲወድልንና እሱንም አለምንም ደስ ማሰኘት ነው።

❤ አየህ ወዳጄ ይሄ የአይሁድ ህይወት ነበር። ለዚህም ነው ቅዱስ ዮሐንስ ተልኮ እንዲያጸዳ ኋላም ክርስቶስ ለአለም እንዲበራ የተደረገው። አየህ ዛሬም ይህ የጽዳት ዘመን ነው። ግን ይህን ያስተዋለ ማን አለ?። ይልቅ አንዱ አንዱን በመክሰስ በመወንጀል በማሳደድና በመግደል ላይ ተጠምደናል። እናም አረም ነንና ልንነቀል ከጫፍ ላይ ደርሰናል።

❤ መቼስ እርሱ ልጆቹን እንዴት መጠበቅ እንዳለበትና በቤቱ የተሰገሰጉና ልጆቹ ላይ ተጣብቀው መሰናክል የሆኑትን ሊለይ ሰይፉን ካነሳ ሰንብቷል። እንግዲህ ከንሰሀ በስተቀር ከእግዚአብሔር የበቀል ሰይፍ የሚያስመልጠን እውቀት ስልጣን ብልጠት ወዳጅ ዘመድና ሀይል እንዳለ እናያለን። ንጉስም በሀይሉ ብዛት አይደንም ያለው የቅዱስ ዳዊት የመንፈስ ቅዱስ ቃል ይፈጸም ዘንድ ግድ ነው።

🌺 እናቴ ማርያም ውድድድ የምታደርገኝ ትንሹ ሔኖክ ነኝ🌹