မြန်မာစွယ်စုံသတင်း

ကယ်လီဖိုးနီးယား တောမီး ဆက်လက်လောင်ကျွမ်းနေတာကြောင့် Los Angeles က မီးသတ်သမားတွေ ဆက်လက် ငြှိမ်းသတ်နေရပြီး သေဆုံးသူဦးရေ တိုးနိုင်

11.January.2025

ကယ်လီဖိုးနီးယား တောမီးဟာ ၄ ရက်ဆက်ပြီး သောကြာနေ့မှာလည်း လောင်ကျွမ်းနေတာကြောင့် Los Angeles က မီးသတ်သမားတွေ ဆက်လက် ငြှိမ်းသတ်နေရဆဲ ဖြစ်ပါတယ်။ အခုအချိန်ထိဆို ဒီတောမီးကြောင့် သေဆုံးရသူ အနည်းဆုံး ၁၀ ယောက်ရှိနေပြီး နေအိမ်လည်း ထောင်နဲ့ချီ ပျက်စီးနေပြီလို့ သတင်းမှာဖော်ပြပါတယ်။

လောင်ကျွမ်းနေတဲ့ တောမီးတွေကို နေရာ အတော်များများ မှာမီးသတ်သမားတွေ ထိန်းချုပ်နိုင်ပေမယ့် မီးကတော့ ဆက်လက် လောင်ကျွမ်းနေဆဲဖြစ်ပါတယ်။

ယခုအခါ လေလည်း နည်းနည်းငြိမ်လာပြီ ဖြစ်တဲ့ အတွက် မီးသတ်ရာမှာ ရဟတ်ယာဉ်တွေ သုံးလာနိုင်တာဖြစ်ပြီး သောကြာနေ့ မနက်အထိ ရေဖြန်း ငြှိမ်းသတ်ဖို့ လုပ်လာနိုင်ပြီ ဖြစ်ပါတယ်။

အပျက်အစီးတွေကြားထဲ စစ်ဆေးတဲ့အချိန်မှာတော့ သေဆုံးသူ အရေအတွက် တိုးလာ နိုင်ခြေရှိတယ်လို့လည်း အာဏာပိုင်တွေက သတိပေးထားပါတယ်။

တောမီးအန္တရာယ် အတွက် ဗဟိုအစိုးရဘက်က တုံ့ပြန်ဆောင်ရွက်နိုင်ရေး ဒေသခံ အရာရှိတွေနဲ့ သမ္မတဂျိုးဘိုင်ဒန် ဆွေးနွေးခဲ့တယ်လို့ သမ္မတအိမ်ဖြူတော်က ပြောပါတယ်။

ရခိုင်ပြည်နယ် နယ်နိမိတ် ပုသိမ် ရွှေသောင်ယံအနီးရှိ မကျီးဇင်ရွာကို AA ပူးပေါင်းမဟာမိတ်တပ်များ သိမ်းပိုက်

10.January , 2025

ရခိုင်ပြည်နယ်နဲ့ နယ်နိမိတ်ထိစပ်နေတဲ့ ဧရာဝတီတိုင်း၊ ပုသိမ်မြို့နယ်၊ ရွှေသောင်ယံမြို့၊ မကျီးဇင် တိုက်နယ်အဆင့် ကျေးရွာကို အာရက္ခတပ်တော် (AA) နဲ့ မဟာမိတ်တပ်တွေက တိုက်ခိုက် သိမ်းပိုက်လိုက်တယ်လို့ ရှေ့တန်း စစ်ရေးသတင်းအရင်းမြစ်တွေဆီက သိရပါတယ်။

အာရက္ခတပ်တော် (AA) နဲ့ မဟာမိတ်ပူးပေါင်းတပ်ဖွဲ့တွေက ဇန်နဝါရီ ၂ ရက်က စတင်ပြီး ပင်လယ်ကမ်းရိုးတန်းအတိုင်း ပုသိမ်မြို့နယ်ထဲကို ထိုးစစ်ဆင်တိုက်ခိုက်နေရာ မနေ့ ဇန်နဝါရီ ၉ ရက်က မကျီးဇင်တိုက်နယ်အဆင့် ကျေးရွာကို တိုက်ခိုက်သိမ်းပိုက်လိုက်တာလို့ ဆိုပါတယ်။

စစ်ရေးသတင်းအရင်းအမြစ်တယောက်က “မှန်တယ်၊ AA က ထပ်သိမ်းယူတာ။ AA နဲ့ မဟာမိတ်တပ်တွေ သိမ်းသွားတဲ့ မကျီးဇင်ကျေးရွာက ရွာကြီးပါ။ တိုက်နယ်ဆေးရုံနဲ့ အထက်တန်းကျောင်းလည်းရှိတယ်။ စစ်ကောင်စီတပ်ဘက်ကလည်း ရွာစဉ်တလျှောက် ခုခံပေမဲ့ တရွာပြီးတရွာ နောက်ဆုတ်လာရတဲ့ အနေအထားကို တွေ့နေရပါတယ်” လို့ ပြောပါတယ်။

ရွှေသောင်ယံမြို့ထဲက ကုလားချောင်းမှာ စစ်ကောင်စီတပ်နဲ့ အာရက္ခတပ်တော် (AA) တို့ ဆက်လက် တိုက်ပွဲအပြင်းအထန် ဖြစ်ပွားနေပြီး စစ်ကောင်စီက စစ်ကူအင်အား အများအပြားနဲ့ ခုခံတိုက်ခိုက်နေကာ မကျီးဇင်နဲ့ ကုလားချောင်းက ဒေသခံတွေ ရွှေသောင်ယံမြို့ပေါ်ကို တိုက်ပွဲရှောင်နေရတယ်လို့ ဆိုပါတယ်။

ရွှေသောင်ယံဒေသခံတယောက်က “တိုက်ပွဲက ရွှေသောင်ယံမြို့အနီးက ကုလားချောင်းမှာ ဖြစ်နေတာ။ စစ်ကောင်စီဘက်က စစ်ကူတွေ မနည်းဘူး တက်လာတာတွေ့ရတယ်။ ရွာတော်တော်များများကို AA တပ်တွေက သိမ်းထားတာ ဟုတ်တယ်” လို့ ပြောပါတယ်။

အာရက္ခတပ်တော် (AA) နဲ့ မဟာမိတ်တပ်တွေက ဇန်နဝါရီ ၁၀ ရက်အထိ ဧရာ၀တီတိုင်း၊ ပုသိမ်မြို့နယ်၊ ရွှေသောင်ယံမြို့ထဲက ကမ်းခြေဒေသတွေဖြစ်တဲ့ ကျောက်ချွန်၊ ချောင်း၀ချိုင်၊ အမော်ကြီး၊ မကျီးဇင် စတဲ့ကျေးရွာ အများအပြားကို သိမ်းပိုက်လိုက်ပြီလို့ သိရပါတယ်။

ဒါ့အပြင် လက်ရှိ မကျီးဇင်တံတားကို အာရက္ခတပ်တော် (AA) က ကျော်ဖြတ်တိုက်ခိုက်ပါက ချိုင်လယ်၊ ဘောမိ စတဲ့ကျေးရွာတွေဆီ ရောက်ရှိမှာဖြစ်ပြီး စစ်ကောင်စီက မကျီးဇင်တံတား အနီးမှာ နေရာယူထားတယ်လို့ ဒေသခံတွေဆီက သိရပါတယ်။

ကယ်လီဖိုးနီယားပြည်နယ် လော့စ်အိန်ဂျလိစ်မြို့အနီးတဝိုက် ဆိုးရွားစွာ လောင်ကျွမ်းနေတဲ့ တောမီးဟာ ဟောလီးဝုဒ်တောင်တန်းတွေအထိ ကူးစက်ပျံ့နှံ့

9.January.2025

အမေရိကန်နိုင်ငံ၊ ကယ်လီဖိုးနီယားပြည်နယ်၊ လော့စ်အိန်ဂျလိစ်မြို့အနီးတဝိုက် ဆိုးရွားစွာ လောင်ကျွမ်းနေတဲ့ တောမီးဟာ ဇန်န၀ါရီလ ၈ ရက်၊ မနေ့က ဟောလီးဝုဒ်တောင်တန်းတွေအထိ ကူးစက်ပျံ့နှံ့သွားခဲ့ပြီး လူငါးဦးထက်မနည်းသေဆုံးကြောင်း၊ အိမ်ခြေရာနှင့်ချီ ပျက်စီးပြီး မီးသတ်အရင်းအမြစ်တွေနဲ့ ရေပေးဝေရေးတို့ကို ကန့်သတ်ချက်ထက်ကျော်လွန်အထိ တိုးမြှင့်ပေးခဲ့ရကြောင်း သိရပါတယ်။

ခြောက်သွေ့ပြီး ဟာရီကိန်းလေပြင်းတိုက်ခတ်မှုကြောင့် မီးငြှိမ်းသတ်ရေးကို အဟန့်အတားဖြစ်စေခဲ့ပါတယ်။

ဇန်နဝါရီ ၇ ရက်မှ စတင်လောင်ကျွမ်းခဲ့တဲ့ အဆိုပါတောမီးဟာ ခြောက်သွေ့နေတဲ့မြေပြင်တလျှောက် သစ်ပင်တွေ၊ လူနေအိမ်တွေကို ကူးစက်နေတာကြောင့် ဒေသခံတစ်သိန်းကျော်ကို ဘေးလွတ်ရာရွှေ့ကြဖို့ အာဏာပိုင်ဝွေက အမိန့်ထုတ်ခဲ့ပါတယ်။

ဇန်နဝါရီ ၈ ရက် ညနေပိုင်းက ဟောလီးဝုဒ်တောင်တန်းအထိ တောမီးကူးစက်ခဲ့ကြောင်း ဒေသဆိုင်ရာ မီးသတ်ညွှန်ကြားရေးမှူးချုပ် Kristin Crowley က သတင်းစာရှင်းလင်းပွဲမှာ ပြောကြားခဲ့ပါတယ်။

လော့စ်အိန်ဂျလိစ်နယ်မြေအတွင်း တောမီးလောင်ကျွမ်းမှု အရေအတွက် ခြောက်ခုအထိ တိုးလာခဲ့ပါတယ်။

မကွေးတိုင်း စလင်းမြို့အနီး တော်လှန်ရေး တပ်ဖွဲ့ဝင်များ ရောက်ရှိလာပြီး ခရီးသွား ပြည်သူများကို စစ်ရေး လုံခြုံရေးအရ စစ်ဆေးမှုများ ပြုလုပ်ခဲ့

5.January.2025

မကွေးတိုင်း၊ စလင်းမြို့အနီး တော်လှန်ရေး တပ်ဖွဲ့ဝင်များ ရောက်ရှိလာပြီး ခရီးသွား ပြည်သူများကို စစ်ရေး လုံခြုံရေးအရ စစ်ဆေးမှုများ ပြုလုပ်ခဲ့ကြောင်းခဲ့ကြောင်း ပြည်သူ့ကာကွယ်ရေးတပ်ဖွဲ့ကပြောပါတယ်။

စလင်းမြို့နယ် ပြည်သူ့ကာကွယ်ရေးအဖွဲ့က ပြည်သူလူထု သွားလာရေး အဆင်ပြေစေရန် စလင်းမြို့အနီးသွားရောက်၍ စလင်း-‌ဆင်ဖြူကျွန်းကားလမ်းပိုင်းကို အသုံးပြုနေသော ခရီးသွား ပြည်သူများကို စစ်ရေးလုံခြုံရေးအရ စစ်ဆေးမှုများ ပြုလုပ်ခဲ့ကြောင်း သိရသည်။

စလင်းမြို့မှ ပြည်သူများ အနေဖြင့်လည်း စလင်း ပကဖ မှ စစ်ရေးလုံခြုံ‌ရေးအရ အချိန်နှင့် တပြေးညီ ထုတ်ပြန် ကြေညာချက်များကို စောင့်ကြည့်လိုက်နာပေးရန် မေတ္တာရပ်ခံကြောင်း စလင်းမြို့နယ် ပြည်သူ့ကာကွယ်ရေးတပ်ဖွဲ့က ပြောဆိုသည်။

ဆီးရီးယားနိုင်ငံရှိ အာဆတ်နန်းတော်နဲ့ ဗျူဟာတောင်ကုန်းချိတ်ဆက်ထားရှိတဲ့ စစ်ရေးသုံးဥမင်လိုဏ်ခေါင်းကွန်ရက်ကို
ဖော်ထုတ်တွေ့ရှိထား

ဒမတ်စကက်၊ 5.January.2025

ဆီးရီးယားနိုင်ငံ ဒမတ်စကက်မြို့တော်ကာကွယ်သွားဖို့ စစ်ရေးအစီအမံတစ်ခုအဖြစ် ဖောက်လုပ်ထားတဲ့ ဥမင်လိုဏ်ခေါင်းကွန်ရက်တခုကို ရှာဖွေတွေ့ရှိထားတယ်လို့
လက်ရှိ ဆီးရီးယား အာဏာပိုင်တွေကပြောပါတယ်။

ဒမတ်စကက်မြို့တော်ကို အပေါ်စီးမှ မြင်နိုင်တဲ့ ဗျူဟာကုန်းဖြစ်တဲ့ ကာစီယန် (Qasyun) တောင်ရဲ့ တောင်စောင်းမှာ ဖောက်လုပ်ထားတဲ့ ဥမင်လိုဏ်ခေါင်းကွန်ရက်ဟာ ဆီးရီးယားမြို့တော်အား ကာကွယ်သွားဖို့ စစ်ရေးအစီအမံတစ်ခုဖြစ်ပြီး အဲဒီလိုဏ်ခေါင်းထဲကနေ သမ္မတအိမ်တော်အထိ ချိတ်ဆက်ထားတာ ဖော်ထုတ်တွေ့ရှိရပါတယ်။

အေအက်ဖ်ပီသတင်းထောက်တစ်ဦးက မြင်တွေ့ခဲ့ရတဲ့ အဆိုပါဥမင်လိုဏ်ခေါင်းတွေဟာ ပြီးခဲ့တဲ့ဒီဇင်ဘာ ၈ ရက်က အတိုက်အခံအင်အားစုတွေရဲ့ ဖြုတ်ချခံခဲ့ရတဲ့ သမ္မတဟောင်း ဘတ်ရှာအယ်လ်အာဆတ်အစိုးရရဲ့ လျှို့ဝှက်ချက်တွေထဲမှာ အကျုံးဝင်ပါတယ်။

“ဒမတ်စကက်ကို လွတ်မြောက်စေခဲ့ပြီးနောက် ရီပက်ဘလစ်ကန်အစောင့်တပ်ရဲ့ ကြီးမားကျယ်ပြန့်လှတဲ့ စစ်တန်းလျားတွေထဲကို ကျနော်တို့ ဝင်ရောက်ခဲ့ကြကြောင်း” အာဆတ်ကို ဖြုတ်ချခဲ့တဲ့ အတိုက်အခံမဟာမိတ်မိတ်အဖွဲ့မှ အင်အားကြီးအစ္စလာမ်မစ်အဖွဲ့ဖြစ်တဲ့ Hayat Tahrir al-Sham (HTS) တပ်အရာရှိ မိုဟာမက်အဘူဆလမ်က ပြောပါတယ်။

အဲဒီနေရာတွေကို သူတို့သိမ်းပိုက်မိချိန်တော့ အာဏာရှင် အာဆတ်ဟာ မော်စကိုမြို့အထိ ထွက်ပြေးသွားခဲ့ပြီဖြစ်ပါတယ်။

“တောင်ကုန်းတောင်စောင်းတစ်ခုပေါ်ကနေ သမ္မတနန်းတော်ဆီသို့ဦးတည်တဲ့ ကြီးမားရှည်လျားလှတဲ့ ဥမင်လိုဏ်ခေါင်းကွန်ရက်ကို ကျနော်တို့တွေ့ရှိခဲ့ပါတယ်” လို့ ဆလမ်က ဆက်ပြောပါတယ်။

အာဆတ်အုပ်ချုပ်စဉ်အတွင်း ကာစီယန်တောင်ဟာ လက်ဖြောင့်စနိုက်ပါသမားတွေအတွက် အသင့်တော်ဆုံးနေရာဖြစ်ခဲ့ပြီး ဒမတ်စကက်မြို့နေ ပြည်သူတွေကို အကန့်အသတ်မရှိ ထိန်းချုပ်နိုင်တဲ့နေရာဖြစ်ခဲ့ပါတယ်။ အဲဒီတောင်ကနေ မြင်ကွင်းကောင်းကောင်းနဲ့ သမ္မတနန်းတော်အပါအဝင် တခြားအစိုးရအဆောက်အဦတွေကို လိုသလို အမိန့်ပေးကွပ်ကွဲနိုင်ပါတယ်။

မြို့တော်တံခါးဝကနေ သူပုန်တွေထိန်းချုပ်ထားတဲ့နယ်မြေတွေထဲအထိ နှစ်ပေါင်းများစွာ အမြောက်တွေနဲ့ ပစ်ခတ်ခဲ့တာလည်း ဒီတောင်ပေါ်မှပဲ ဖြစ်ပါတယ်။

အာဆတ်ခေတ်က စစ်သားတွေ ခိုအောင်းစရာ သီးသန့်အခန်းကျယ်တွေပါတဲ့ ကတုတ်ကျင်းနှစ်ခုရှိ အစောင့်တပ်စခန်းအတွင်းသို့ အေအက်ဖ်ပီသတင်းထောက်တစ်ဦးက ဝင်ရောက်လေ့လာခဲ့ဖြစ်ပါတယ်။ အဲဒီဗုံးခိုကျင်း(ကတုတ်ကျင်း)တွေထဲမှာ ဆက်သွယ်ရေးပစ္စည်းတွေ၊ လျှပ်စစ်မီး၊ လေဝင်လေထွက်စနစ်နဲ့ လက်နက်တွေ အပြည့်အစုံ တပ်ဆင်ထားပါတယ်။

ဒါ့အပြင် ခဲယမ်းမီးကျောက်တွေ သိုလှောင်ထားနိုင်ဖို့ တခြားရိုးရှင်းတဲ့ဥမင်လိုဏ်ခေါင်းတွေကိုလည်း တူးဖော်ထားပါသေးတယ်။

ဒီလောက်အထိ စီမံထားတဲ့ကြားက အတိုက်အခံအင်အားစုတွေဟာ သူတို့ရဲ့မြောက်ပိုင်းအမာခံနယ်မြေထဲမှ မြို့တော်အထိ ရက်သတ္တနှစ်ပတ်မပြည့်ခင် ချီတက်လာတဲ့ကာလအတွင်း အာဆတ်သစ္စာခံစစ်သားတွေ၊ တင့်ကားတွေနဲ့ တခြားစစ်သုံးကိရိယာတွေကို စွန့်လွှတ်ခဲ့ရပြီး ဆီးရီးယားအစိုးရစစ်တပ်တစ်ခုလုံးဟာ ဖရိုဖရဲနဲ့ ပြိုလဲသွားခဲ့ပါတယ်။

အခုအခါမှာတော့ အဲဒီအစောင့်တပ်ဖွဲ့စခန်းထဲမှာ အာဏာရသူပုန်ဟောင်းတွေဟာ ဘတ်ရှာအယ်လ်အာဆတ်နဲ့ သူ့ဖခင်တို့ရဲ့ ရုပ်ပုံတွေကို ပစ်မှတ်ထားပြီး သေနတ်ပစ်လေ့ကျင့်ဖို့ သုံးနေကြပါတယ်။

အာဆတ်ခေတ်က တင့်ကားတွေနဲ့ လက်နက်ကြီးတွေဟာ ကျောက်တုံးအမိုးခုံးပေါ်မှာ အထိုင်ချထားဆဲဖြစ်ပါတယ်။

၂၀၁၁ ခုနှစ်ကတည်းက စတင်ခဲ့တဲ့ ဆီးရီးယားနိုင်ငံမှာ နှစ်ရှည်လများ ပြည်တွင်းစစ်အတွင်း အာဆတ်ရဲ့ ပြိုင်ဘက်တွေ ထိန်းချုပ်ထားတဲ့ အရပ်သားနေထိုင်ရာဒေသတွေကို တိုက်ခိုက်ဖို့ အာဆတ်အစိုးရဟာ ရဟတ်ယာဉ်တွေ (ဒါမှမဟုတ်) လေယာဉ်တွေနဲ့ ဗုံးကြဲတာ၊ စက်သေနတ်နဲ့ တိုက်ခိုက်တာတွေ ရှိခဲ့ပါတယ်။

အဲဒီလို အရပ်သားတွေအပေါ် အဆိုပါနည်းလမ်းသုံးပြီး တိုက်ခိုက်ခဲ့တဲ့အာဆတ်ကို ကုလသမဂ္ဂက ရှုတ်ချခဲ့ပါတယ်။

ဒဂုံမြို့သစ်တောင်ပိုင်း ၁၈ရပ်ကွက်တွင် မီးလောင်မူဖြစ်ပွား

====================================
ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်၊ အမှတ်(၁၈)ရပ်ကွက်၊ အောင်မင်္ဂလာလမ်းတွင် ဇန်နဝါရီလ ၅ရက် ၀၄ ၂၀ အချိန်ခန့်ကနေအိမ်မီးလောင်မှုဖြစ်ပွားကြောင်းသတင်းရရှိခဲ့သည်။

သတင်းအရ ဒဂုံမြို့သစ်(တောင်ပိုင်း)မြို့နယ်မီးသတ်စခန်းမှ မီးသတ်ယာဉ်အုပ်စုမှ ထွက်ခွာငြိမ်းသတ်ခဲ့ရာ ၀၄ ၂၈ အချိန် မီးထိန်းနိုင်ခဲ့ပြီး ၀၄ ၃၀အချိန် မီးငြိမ်းသတ်နိုင်ခဲ့ကြောင်း မီးသတ်တပ်ဖွဲ့မှသတင်းထုတ်ပြန်ထားပါသည်။

ပဲခူးတိုင်းအရှေ့ခြမ်း စစ်တောင်းမြစ်အရှေ့ဘက်ကမ်းတိုက်ပွဲ
အတွင်း တော်လှန်ရေးရဲဘော် ၁၀ ဦး ကျဆုံးခဲ့ပြီး ၂ ဦးဒဏ်ရာရ

4.January , 2025

ပဲခူးတိုင်းအရှေ့ခြမ်း၊ ရေတာရှည်မြို့နယ် စစ်တောင်းမြစ်အရှေ့ဘက် ရေလွှဲကျေးရွာနဲ့ ပိန္နဲပင်ကျေးရွာမှာ စစ်ကောင်စီတပ်တွေနဲ့ ဖြစ်ပွားခဲ့တဲ့ တိုက်ပွဲအတွင်း တော်လှန်ရေးရဲဘော် ၁၀ ယောက် ကျဆုံးခဲ့ပြီး ၂ ယောက် ဒဏ်ရာရခဲ့တယ်လို့
တော်လှန်ရေးရဲဘော်တွေကပြောပါတယ်။

ဇန်နဝါရီ ၃ ရက် ညနေ ၄ နာရီဝန်ကျင်က တိုက်ပွဲဖြစ်ခဲ့တာဖြစ်ပြီး ကျဆုံးသွားတဲ့ရဲဘော်တွေဟာ စစ်တောင်းမြစ်အရှေ့ခြမ်း ပူးပေါင်းစစ်ဆင်ရေးအဖွဲ့က ရဲဘော်တွေဖြစ်တယ်လို့ တိုက်ပွဲမှာပါတဲ့ ရဲဘော်တယောက်က ပြောပါတယ်။

“စစ်တပ်စစ်ကြောင်းက ကရင်ချောင်းတံတားကနေထိုးလာတာ၊ ရေလွှဲရောက်လာတယ်။ ကျနော်တို့အဖွဲ့တွေက ပိန္ဒဲပင်ဘက်မှာ၊ အဲဒီမှာ ထိတွေ့တိုက်ပွဲဖြစ်တာ။ စစ်တပ်ကနှစ်ဖွဲ့ခွဲပြီး စစ်ကြောင်းထိုးလာတာ၊ အဲဒီမှာ ကျနော်တို့ဘက်ကတဖွဲ့က ကြားညပ်ပြီး ပိတ်မိသွားတယ်။ ရဲဘော် ၁၀ ယောက် မြင့်မြတ်စွာအသက်ပေးလိုက်ရတယ်”

တိုက်ပွဲအတွင်းကျဆုံးသွားတဲ့ ရဲဘော်တွေရဲ့ အလောင်းတွေလည်း ပြန်မရဘူးလို့ သူက ဆက်ပြောပါတယ်။

“လက်နက်တွေလည်းဆုံးရှုံးသွားတယ်။ ရဲဘော် ၂ ယောက်ဒဏ်ရာရတယ်။ ကျနော်တို့ အဖွဲ့တွေလည်း နောက်ဆုတ်ပေးထားရတယ်၊ တိုက်ပွဲဖြစ်နေတာတော့ ခုနေနဲ့ဆို ၃ ရက်ရှိပြီ။ မနက်ကထိ အပြန်အလှန်ပစ်ကြသေးတယ်။ ခုကငြိမ်နေတယ်။ စစ်တပ်ဘက်ကတော့ အကျအဆုံး သေချာမသိရသေးဘူးလိုသိရပါတယ်။

ထောင်ဒဏ် ငါးနှစ် ချမှတ်ခံရသည့် သရုပ်ဆောင် သင်ဇာဝင့်ကျော် ပြန်လည် လွတ်မြောက်

4.January.2025

လိင်အသားပေးဓာတ်ပုံနှင့်ဗီဒီယိုများအား လူမှုကွန်ရက်မှ အခကြေးငွေရယူပြီး ဖြန့်ဝေသည့် စွဲချက်ဖြင့် အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃ (က) ဖြင့် ထောင်ဒဏ် ငါးနှစ် ချမှတ်ခံရသည့် သရုပ်ဆောင် သင်ဇာဝင့်ကျော် ဇန်နဝါရီ ၄ ရက်က ပြစ်ဒဏ်လွတ်ငြိမ်းခွင့်ဖြင့် ပြန်လည် လွတ်မြောက်လာကြောင်း အနုပညာရှင် အသိုင်းအဝိုင်းထံမှ သိရသည်။

သရုပ်ဆောင်မော်ဒယ် သင့်ဇာဝင့်ကျော်ကို အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃(က)ဖြင့် ၂၀၂၂ ခုနှစ် ဒီဇင်ဘာ ၂၃ ရက်က ထောင်ဒဏ် ငါးနှစ် ချမှတ်ခဲ့ခြင်း ဖြစ်သည်။

သရုပ်ဆောင် သင်ဇာဝင့်ကျော် ပြန်လည်လွတ်မြောက်လာခြင်းနှင့် ပတ်သက်၍ သရုပ်ဆောင် ညီနန္ဒ က "Welcome back Nyimalay" ဟု လူမှုကွန်ရက်စာမျက်နှာမှာ ရေးသားထားသလို တခြားသော အနုပညာရှင်အသိုင်းအဝိုင်းမှ နီးစပ်သူများကလည်း လူမှုကွန်ရက်စာမျက်နှာများတွင် အသီးသီး ရေးသားထားသည်ကို တွေ့ရသည်။

သရုပ်ဆောင် သင်ဇာဝင့်ကျော်ကဲ့သို့ အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃(က)ဖြင့် ထောင်ဒဏ်ချမှတ်ခံထားရသည့် မော်ဒယ် နန်းမွေ့စံလည်း ပြစ်ဒဏ်လွတ်ငြိမ်းခွင့်တွင် ပါဝင်သည်ဟု သတင်းထွက်ပေါ်ခဲ့သော်လည်း ၎င်းလွတ်မြောက်ခြင်း ရှိ မရှိ မသိရှိရသေးပေ။

မော်ဒယ်နန်းမွေစံသည် ၂၀၂၂ ခုနှစ် စက်တင်ဘာ ၂၇ ရက်က အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃(က)ဖြင့် ထောင်ဒဏ် ၆ နှစ်ချမှတ်ခံခဲ့ရသည်။

မိတ္တီလာမြို့ ကျီတော်ကုန်းရပ်ကွက်မှာ သားအမိ ၂ ဦး နေအိမ်အတွင်း အသတ်ခံရ

30.December.2024

မန္တလေးတိုင်း၊ မိတ္တီလာမြို့၊ ကျီတော်ကုန်းရပ်ကွက်၊ ဝမ်းတော်ပြည့်တိုးချဲ့နယ်မြေ ၈ မှာ သားအမိတော်စပ်သူ အမျိုးသမီး ၂ ဦး အသတ်ခံခဲ့ရတယ်လို့ ဒေသခံတွေကပြောပါတယ်။

အသတ်ခံရသူများမှာ အဆိုပါရပ်ကွက်နေ မိခင်ဖြစ်သူ အသက် ၅၃ နှစ်အရွယ် ဒေါ်တင်ဝင်းနဲ့ သမီးဖြစ်သူ အသက် ၁၉ နှစ်အရွယ် မခိုင်သင်းတို့ဖြစ်ပြီး ဒီဇင်ဘာ ၂၉ ရက် မနေ့ည ၇ နာရီခွဲခန့်မှာ နေအိမ်အတွင်းရှိနေချိန် အသတ်ခံခဲ့ရတာဖြစ်ပါတယ်။

သတ်ဖြတ်ခံရသူ အမျိုးသမီး ၂ ဦးမှာ ရင်ဘတ်၊ လည်ပင်းအပါအဝင် ခန္ဓာကိုယ်တွေမှာ ထိုးသွင်း၊ လှီးဖြတ် ဒဏ်ရာတွေနဲ့ နေရာမှာပဲသေဆုံးသွားတယ်လို့ သိရပါတယ်။

အခင်းဖြစ်ပွားစဥ် နေအိမ်အတွင်း အော်ဟစ်သံတွေကြားရလို့ ဘေးပတ်ဝန်းကျင်နေအိမ်တွေက လာရောက်ကြတာကြောင့် ကျူးလွန်သူတွေက ထွက်ပြေးခဲ့ရာ ပြည်သူတွေက ဝိုင်းဝန်းဖမ်းဆီးနိုင်ခဲ့တယ်လို့ ဆိုပါတယ်။

ဖမ်းမိထားသူတွေဟာ တောင်သာမြို့နေသူ အသက် ၁၉ နှစ်အရွယ် ခန့်ဇော်ဟိန်း၊ တပ်ကုန်းမြို့နေသူတွေဖြစ်တဲ့ အသက် ၂၂ နှစ်အရွယ် ထက်မင်းခန့်၊ အသက် ၂၀ အရွယ် စွမ်းပြည့်ပိုင်တို့ ၃ ဦးဖြစ်တယ်လို့ သိရပါတယ်။

ဖမ်းဆီးရမိထားသူတွေကိုတော့ ပြည်သူတွေက ရဲစခန်းကိုအပ်ပေးလိုက်ပြီး သေဆုံးသူတွေရဲ့ အလောင်းတွေကိုတော့ ဒေသခံပရဟိတအဖွဲ့ဝင်တွေက မိတ္တီလာပြည်သူ့ဆေးရုံကိုပို့ဆောင်ပေးခဲ့ကြရတယ်လို့ သိရပါတယ်။

ဂွမြို့မှာရှိနေတဲ့ စစ်ကောင်စီစခန်းအားလုံးကို အာရက္ခတပ်တော် AA က ချေမှုန်းသိမ်းပိုက်နိုင်ခဲ့ပြီး ရခိုင်သို့ သွားသည့်စစ်ကူများကိုလည်း ကြားဖြတ်တိုက်ခိုက်နိုင်ခဲ့

29.December, 2024

ဂွမြို့မှာရှိတဲ့ စစ်ကောင်စီစခန်းအားလုံးကို ဒီဇင်ဘာ ၂၉ ရက်နေ့မှာ ချေမှုန်းသိမ်းပိုက်နိုင်ခဲ့တယ်လို့ အာရက္ခတပ်တော် AA ရဲ့ ပြောခွင့်ရသူ ဦးခိုင်သုခက သတင်းထုတ်ပြန်ပါတယ်။

ဧရာဝတီတိုင်းကနေ ရခိုင်ပြည်နယ်ကို စစ်ကူသွားတဲ့ စစ်ကောင်စီစစ်ကြောင်း ကြားဖြတ်အတိုက်ခိုက်ခံရလို့ အယောက် ၅၀ ကျော် သေဆုံးဒဏ်ရာရခဲ့တယ်လို့ စစ်ကောင်စီတပ်နဲ့ နီးစပ်သူတွေဆီက သိရပါတယ်။

မြို့ကို စွန့်လွှတ်လိုက်ရပြီဖြစ်တဲ့ စစ်ကောင်စီတပ်တွေကတော့ ကစဉ့်ကလျားနဲ့ ထွက်ပြေးနေကြပြီး အာရက္ခတပ်တော်က လိုက်လံရှင်းလင်းနေရတယ်လို့ သိရပါတယ်။

“ဂွမြို့ကနေ ကစဉ့်ကလျား ဆုတ်ခွာထွက်ပြေးနေတဲ့ စစ်ကောင်စီတပ်ဖွဲ့တွေကို ကျနော်တို့ အာရက္ခတပ်တော်က လိုက်လံချေမှုန်းတိုက်ခိုက်လျက်ရှိပါတယ်။ အကြမ်းဖက် စစ်ကောင်စီဘက်က စစ်ကူအင်အားတွေထပ်ဖြည့်ပြီး ဂွမြို့အနီးတဝိုက်ကို ပြန်လည်ဝင်ရောက်ဖို့ ကြိုးစားနေတာတွေ ရှိတဲ့အတွက် တချို့နေရာတွေမှာ တိုက်ပွဲတွေ ဆက်လက်ပြင်းထန်နေတာရှိပါတယ်။”

စစ်ကောင်စီဘက်ကတော့ လေကြောင်းတိုက်ခိုက်မှုတွေကို ဆက်ပြီးလုပ်ဆောင်နေသလို ရေတပ်ကနေလည်း လက်နက်ကြီးနဲ့ပစ်ခတ်တာတွေ ဆက်ရှိနေတယ်လို့လည်း ဦးခိုင်သုခက ပြောပါတယ်။

အာရက္ခတပ်တော်အနေနဲ့ ဂွမြို့ကို သိမ်းပိုက်လိုက်နိုင်တာကြောင့် တပြည်နယ်လုံးမှာ သိမ်းပိုက်ဖို့ စစ်တွေမြို့နယ်၊ ကျောက်ဖြူမြို့နယ်နဲ့ မာန်အောင်မြို့နယ်တို့ပဲ ကျန်ရှိပြီး စစ်ရေးအရ အသာစီး ရယူထားနိုင်ပြီဖြစ်တဲ့ အာရက္ခတပ်တော်က နိုင်ငံရေးအရ ဆွေးနွေးဖြေရှင်းဖို့ အသင့်ရှိတယ်လို့ ဒီဇင်ဘာ ၂၉ ရက်နေ့မှာ ထုတ်ပြန်ပါတယ်။

ဒီဇင်ဘာ ၂၇ ရက် မနက်အစောပိုင်းက ဧရာဝတီတိုင်းကနေ ရခိုင်ပြည်နယ်၊ ဂွမြို့ကိုသွားတဲ့ ဂွ- ငသိုင်းချောင်း ကားလမ်း ဝတိန်ကျေးရွာအနီးမှာ ဂွမြို့တိုက်ပွဲကို စစ်ကူသွားတဲ့ စစ်ကောင်စီစစ်ကြောင်း ကြားဖြတ်တိုက်ခံရတာဖြစ်တယ်လို့ ဆိုပါတယ်။

စစ်ကောင်စီတပ်နဲ့ နီးစပ်သူက “စစ်ကူစစ်ကြောင်း ဖြတ်တိုက်ခံရတာမှန်တယ်။ အားလုံး အယောက် ၅၀ ကျော်ဆိုတာ သိရတယ်။ ဘယ်လောက် သေတယ်၊ ဘယ်လောက် ဒဏ်ရာရတယ် ဆိုတာတော့ မသိသေးဘူး” လို့ ပြောပါတယ်။

အဲ့ဒီ ကြားဖြတ်တိုက်ခိုက်ခံရတဲ့ စစ်ကောင်စီစစ်ကြောင်းမှာ အဓမ္မစုဆောင်းခံထားရတဲ့ တပ်သားသစ်တွေ ပါပြီး အင်အား ၂၀၀ ကျော်နဲ့ စစ်ကူထွက်လာတာဖြစ်တယ်လို့ သိရပါတယ်။

စစ်ကောင်စီစစ်ကြောင်း ကြားဖြတ်အတိုက်ခံရပြီးနောက် ဝတိန်ကျေးရွာနဲ့ မြင့်ဟန်စေတီအကြားကို ရေကြည်မြို့အခြေစိုက် စစ်ကောင်စီ အမြောက်တပ် အမတ ၃၄၄ ပစ်ကူပေးပစ်ခတ်ခဲ့တယ်လို့ သိရပါတယ်။

ပြီးခဲ့တဲ့ နိုဝင်ဘာလအတွင်းကလည်း ရခိုင်ပြည်နယ် ဂွမြို့ကို စစ်ကူပို့ခံရတဲ့ ဟင်္သာတမြို့အခြေစိုက် ခလရ ၁၈ တပ်ရင်း၊ အိမ်မဲမြို့အခြေစိုက် ခလရ ၆၃ ၊ ခလရ ၅၁ နဲ့ ရန်ကုန်၊ လှိုင်သာယာအခြေစိုက် ခမရ ၅၃၂ တပ်က စစ်ကောင်စီတပ်သားအင်အား ၂၀၀ နီးပါး ဂွမြို့နယ်၊ သံခဲချိုင်ကျေးရွာ ကမ်းခြေအနီးနဲ့ကင်းပုံကျေးရွာအနီးမှာ ကြားဖြတ်အတိုက်ခံခဲ့ရပြီး စစ်ကောင်စီတပ်သား ၁၀၀ ကျော် သေဆုံးခဲ့သေးတယ်လို့ သိရပါတယ်။

ဘန်ကောက်မှ တောင်ကိုရီးယားသို့ ပျံသန်းလာသော Jeju လေကြောင်းလိုင်း ခရီးသည်တင်လေယာဉ် ဘီးချမရဘဲ ဆင်းသက်စဉ် ပြေးလမ်းခြံစည်းရိုးနှင့်တိုက်ကာ ပေါက်ကွဲမှုဖြစ်၊

29.December.2024

ထိုင်းနိုင်ငံ၊ ဘန်ကောက်မှ တောင်ကိုရီးယားသို့ ပျံသန်းလာသော Jeju လေ ကြောင်းလိုင်းမှ ခရီးသည်တင်လေယာဉ် ဘီးချမရဘဲ ဆင်းသက်စဉ် ပြေးလမ်းခြံစည်းရိုးနှင့်တိုက်ကာ ပေါက်ကွဲမှုဖြစ်ပေါ်ကြောင်း တောင်ကိုရီးယားမီဒီယာများမှ သတင်းထုတ်ပြန်ပါတယ်။

ယနေ့ နံနက်ပိုင်း Jeju လေကြောင်းလိုင်း၏ Boeing 737-800 လေယာဉ်၊ လေယာဉ်အမှတ် 7C2216 သည် တောင်ကိုရီးယားနိုင်ငံ၊ Muan အပြည်ပြည်ဆိုင်ရာ လေဆိပ်တွင် လေယာဉ်ဘီးများ ချမရဘဲ ဆင်းသက်လာစဉ် ပြေးလမ်းအဆုံး ခြံစည်းရိုးနံရံနှင့် တိုက်မိကာ ပေါက်ကွဲ မီးလောင်ခဲ့ကြောင်း၊ လတ် တလော ၂၈ ဦးသေဆုံးပြီး ၂ ဦး အသက်ရှင်လျက် ကယ်ဆယ်နိုင်ကာ မီးသတ်ကားများက သွားရောက် ငြိမ်းသက်နေဆဲဖြစ်ကြောင်း ကိုရီးယား သတင်းများက ဆိုသည်။

လက်ရှိတွင် လေဆိပ်ကို ပိတ်ထားပြီး ကယ်ဆယ်ရေးနှင့် မီးငြိမ်းသတ်ရေး လုပ် ငန်းများကို တောင်ကိုရီးယား အာဏာပိုင်များက ဆောင်ရွက်လျက်ရှိကြောင်း၊ လေယာဉ်တွင် ခရီးသည် ၁၇၅ ဦးနှင့် လေယာဉ်အမှုထမ်း ၆ ဦးလိုက်ပါကြောင်း သိရှိရသည်။

ယခုနောက်ဆုံး ဝင်ရောက်လာသော သတင်းများအရ လေယာဉ်ပေါက်ကွဲမှုကြောင့် လေယာဉ်ပေါ်လိုက်ပါသူ ၁၇၉ ဦးသေဆုံးဖွယ်ရှိပြီး ၂ ဦးသာ အသက်ရှင်ကြောင်း တောင်ကိုရီးယား Yonhap သတင်းဌာနက သတင်းဖော်ပြသည်။

ရုရှားနိုင်ငံ ကာ့စ်ခ် ဒေသမှာတပ်စွဲထားတဲ့ မြောက်ကိုရီးယားတပ်ဖွဲ့တွေဟာ ကြီးကြီးမားမား ဆုံးရှုံးမှုတွေ ကြုံတွေ့နေရတယ်လို့ ယူကရိန်းသမ္မတ ပြောကြား

28.December , 2024

ရုရှားနိုင်ငံ ကာ့စ်ခ် ဒေသမှာတပ်စွဲထားတဲ့ မြောက်ကိုရီးယားတပ်ဖွဲ့တွေဟာ ကြီးကြီးမားမား ဆုံးရှုံးမှုတွေ ကြုံတွေ့နေရပြီး သူတို့နဲ့အတူ တိုက်ခိုက်နေတဲ့ ရုရှားတပ်ဖွဲ့တွေက ကာကွယ်စောင့်ရှောက်မှုမပေးဘူးလို့ ယူကရိန်းသမ္မတ ဗိုလိုဒီမီယာ ဇလန်စကီး က ဒီဇင်ဘာ ၂၇ ရက် သောကြာနေ့မှာ ပြောကြားခဲ့ပါတယ်။

မြောက်ကိုးရီးယားစစ်သားတွေ ပါ၀င်တဲ့ ကာ့စ်ခ်ဒေသ တိုက်ပွဲတွေနဲ့ပတ်သက်တဲ့ အသေးစိတ် အချက်အလက်တွေလည်း ရှိထားပြီး သူတို့ရဲ့ ဆုံးရှုံးမှုတွေက သိသာထင်ရှားလွန်းတယ်လို့ ဆိုပါတယ်။

ရုရှားတပ်တွေဟာ မြောက်ကိုးရီးယားတွေကို အကာအကွယ်အနည်းဆုံးနဲ့ တိုက်ပွဲထဲကို စေလွှတ်ခဲ့ပြီးတော့ မြောက်ကိုရီးယားတွေဟာ သုံ့ပန်းအဖြစ် အကျဉ်းချခံရမှာကို ရှောင်လွှဲနိုင်ဖို့ အလွန်အကျွံတွေ လုပ်နေတယ်လို့ ဇလန်စကီးက သူ့ရဲ့ ညစဉ် ဗွီဒီယိုမိန့်ခွန်းမှာ ပြောကြားခဲ့ပါတယ်။

မြောက်ကိုရီးယားစစ်သားတွေနဲ့ပတ်သက်ပြီး အစီရင်ခံစာတွေ တက်လာတာမှာ ယူကရိန်းတပ်ဖွဲ့တွေက သူတို့ကို ဖမ်းဆီးနိုင်ခဲ့ပေမယ့် သူတို့မှာ ဒဏ်ရာပြင်းပြင်းထန်ထန် ရရှိထားပြီးတော့ သူတို့ရဲ့အသက်ကို ကယ်လို့မရခဲ့ဘူး။ ဒါဟာ အာဏာရှင်တွေ ရူးသွပ်မှုရဲ့ ဥပမာတခုပဲ လို့ ယူကရိန်းသမ္မတ ဇလန်စကီးက ပြောပါတယ်။

ရုရှားစစ်တပ်နဲ့ မြောက်ကိုရီးယား ကြီးကြပ်သူတွေဟာ ဒီမြောက်ကိုရီးယားတပ်ဖွဲ့တွေရဲ့ အသက်ရှင်သန်မှုကို အာမခံပေးဖို့ စိတ်ဝင်စားမှုမရှိဘဲ သူတို့တွေကို ဖမ်းမိဖို့ မဖြစ်နိုင်အောင်လည်း အားလုံး ပြင်ဆင်ထားပြီး သူတို့တပ်ဖွဲ့တွေကပဲ သူတို့ကို ကွပ်မျက်ပစ်လိုက်တဲ့ သာဓကတွေ ရှိတယ်လို့လည်း ဇလန်စကီးက ပြောဆိုပါတယ်။

ကိုရီးယားလူမျိုးတွေဟာ ဥရောပကတိုက်ပွဲတွေမှာ အသက်မဆုံးရှုံးသင့်ဘူးလို့လည်း ဆိုပါတယ်။ ဒါဟာ တရုတ်အပါအဝင် ကိုရီးယားရဲ့ အိမ်နီးချင်းနိုင်ငံတွေအပေါ် လွှမ်းမိုးနိုင်တဲ့ကိစ္စ ဖြစ်ပြီး တကယ်လို့ စစ်ပွဲမချဲ့ထွင်သင့်ဘူးလို့ တရုတ်က စိတ်ရင်းမှန်နဲ့ ပြောတာဆိုရင် ပြုံယမ်းအပေါ် သင့်လျော်တဲ့ ဖိအားပေးဖို့ လိုအပ်တယ်လို့လည်း ဇလန်စကီးက ပြောပါတယ်။

ဩဂုတ်လက ယူကရိန်းတပ်ဖွဲ့ဝင်တွေ ဝင်ရောက်သိမ်းပိုက်ထားတဲ့ နယ်စပ်က ရုရှားနိုင်ငံ ကာ့စ်ခ် ဒေသမှာ မြောက်ကိုရီးယား တပ်ဖွဲ့ဝင် ၁၂,၀၀၀ လောက်ရှိကြောင်း ယူကရိန်းနဲ့ အနောက်နိုင်ငံ ထောက်လှမ်းရေး အစီရင်ခံစာတွေမှာ ဖော်ပြထားပါတယ်။

အခုသီတင်းပတ် အစောပိုင်းမှာ မြောက်ကိုရီးယားနိုင်ငံသား ၃၀၀၀ ကျော် သေဆုံး ဒါမှမဟုတ် ဒဏ်ရာရခဲ့တယ်လို့လည်း ယူကရိန်းသမ္မတ ဇလန်စကီးက ပြောပါတယ်။

Photo: KCNA via REUTERS

အိန္ဒိယဝန်ကြီးချုပ်ဟောင်း မန်မိုဟန်ဆင်း ၉၂ နှစ်မှာ ကွယ်လွန်

နယူးဒေလီ၊ ဒီဇင်ဘာ ၂၇

အိန္ဒိယဝန်ကြီးချုပ်ဟောင်းဖြစ်ခဲ့သူ ဆစ်ခ် (Sikh) လူမျိုးထဲမှ ရှားရှားပါးပါး ဝန်ကြီးဖြစ်ခဲ့သူ မန်မိုဟန်ဆင်းဟာ အသက် (၉၂) နှစ်အရွယ်မှာ ကျန်းမာရေးအခြေအနေအရ ဒီဇင်ဘာ ၂၆ ရက်၊ မနေ့က ရုတ်တရက် သတိလစ်သွားပြီးနောက် နယူးဒေလီမြို့၊ All India ဆေးရုံသို့ အရေးပေါ်ပို့ဆောင်ခဲ့ပေမဲ့ ကွယ်လွန်သွားခဲ့တယ်လို့သိရပါတယ်။

ဝန်ကြီးချုပ်အဖြစ် တာဝန်ယူခဲ့စဉ်က မကြုံစဖူး စီးပွားရေး တိုးတက်မှုအတွက် အိန္ဒိယကို ထိန်းကျောင်းပေးခဲ့ပြီး သန်းပေါင်းရာနဲ့ချီတဲ့ ပြည်သူတွေကို ဆင်းရဲတွင်းထဲမှ ဆွဲခေါ်ကယ်တင်နိုင်သူအဖြစ် ချီးကျူးခံခဲ့ပါတယ်။

စကားပြောရင် ခပ်တိုးတိုးပဲ ပြောတတ်တဲ့ မန်မိုဟန်ဆင်းဟာ အိန္ဒိယရဲ့ အအောင်မြင်ဆုံးခေါင်းဆောင်တွေထဲမှ တစ်ဦးဖြစ်ခဲ့ပြီး ဝန်ကြီးချုပ်ရာထူးကို ဒုတိယသက်တမ်းအထိ ဆက်လက်ထမ်းဆောင်ခွင့်ရခဲ့တာပါ။

"အိန္ဒိယမှာ အထူးခြားဆုံးသော ခေါင်းဆောင်တွေထဲမှ တစ်ဦးဖြစ်တဲ့ ဒေါက်တာမန်မိုဟန်ဆင်းကို ဆုံးရှုံးလိုက်ရခြင်းအတွက် ဝမ်းနည်းကြေကွဲကြောင်း လက်ရှိဝန်ကြီးချုပ် နရိန္ဒရာမိုဒီက ပြောကြားခဲ့ပါတယ်။

အခု ပါကစ္စတန်နယ်မြေထဲပါသွားခဲ့တဲ့ တစ်ချိန်က ဗြိတိသျှအုပ်ချုပ်တဲ့ အိန္ဒိယဘက်ခြမ်းရှိ ဆင်းရဲတဲ့မိသားစုမှ မွေးဖွားလာသူ ဒေါက်တာဆင်းဟာ အောက်စဖို့ဒ်သို့ မသွားရောက်မီ ကမ်းဘရစ်ခ်ျ (Cambridge) တက္ကသိုလ်မှာ နေရာတစ်နေရာရရှိဖို့ ဖယောင်းတိုင်မီးနဲ့ စာကျက်ခဲ့ရပြီး “အိန္ဒိယ၏ ပို့ကုန်နှင့် လွတ်လပ်စွာ ကုန်သွယ်မှုကဏ္ဍဆိုင်ရာစာတမ်း"ဖြင့် စီးပွားရေးပါရဂူဘွဲ့ကို ရယူခဲ့ပါတယ်။

ရခိုင်ပြည်၊ အနောက်ပိုင်းတိုင်းစစ်ဌာနချုပ်မှ ဖမ်းဆီးရရှိထားသော ရာပေါင်းများစွာသော စစ်သုံ့ပန်းများကို AA က ဆေးဝါးကုသပေးပြီး ကောင်းမွန်စွာ ထိန်းသိမ်းစောင့်ရှောက်ထား

27.December.2024

ရခိုင်ပြည်၊ အနောက်ပိုင်းတိုင်းစစ်ဌာနချုပ်မှ ဖမ်းဆီးရရှိထားသော ရာပေါင်းများစွာသော စစ်သုံ့ပန်းများကို AA က ဆေးဝါးကုသပေးပြီး ကောင်းမွန်စွာ ထိန်းသိမ်းစောင့်ရှောက်ထားကြောင်း AA က ဓာတ်ပုံ၊ ဗီဒီယိုမှတ်တမ်းများနှင့်တကွ သတင်းထုတ်ပါတယ်။

AA က ဒီဇင်ဘာလ ၂၀ ရက်နေ့မှာ အနောက်ပိုင်းတိုင်းစစ်ဌာနချုပ်ကို သိမ်းပိုက်ပြီးနောက် အဆိုပါ ဓာတ်ပုံနှင့် ဗီဒီယိုများကို ထုတ်ပြန်ခဲ့ခြင်းဖြစ်ပြီး စစ်သုံ့ပန်းများကို စတင်ဖမ်းဆီးချိန်က ဒုတိယတိုင်းမှူး ဗိုလ်မှူးချုပ်သောင်းထွန်းနှင့် တိုင်းဦးစီးချုပ် ဗိုလ်မှူးချုပ် ကျော်ကျော်သန်းတို့မှာ သံခြေကျင်းခတ် ခံထားရသည့် ဓာတ်ပုံများကို ထုတ်ပြန်ခဲ့တာဖြစ်ပါတယ်။

နောက်ပိုင်းတွင် စစ်သုံ့ပန်းများကို လိမ္မော်ရောင်ဝတ်စုံများ ဆင်မြန်းပေးထားပြီး ကောင်းမွန်စွာ ကျွေးမွေးထားသည်ကို တွေ့ရှိရသည်။

စစ်သုံ့ပန်းအဖြစ် ဖမ်းဆီးခံထားရသော အနောက်ပိုင်းတိုင်းစစ်ဌာနချုပ် တိုင်းဦးစီးချုပ် ဗိုလ်မှူးချုပ် ကျော်ကျော်သန်းက "အာရက္ခတပ်တော်အနေနဲ့ လက် လွတ်စပယ် မလုပ်ပါဘူး။ ဥပဒေနဲ့အညီပဲ ဆက်ဆံပါတယ်။ အာရက္ခတပ်တော်က သုံ့ပန်းတွေကို သုံ့ပန်းဥပဒေနဲ့အတိုင်းထိန်းသိမ်းထားရှိပါတယ်။ သူတို့တွေဆီမှာရှိတဲ့ ရိက္ခာ ဆေးဝါးတွေနဲ့ အစားအစားအသောက်တွေကို အစွမ်းကုန် ပြုစု ထိန်းသိမ်းစောင့်ရှောက်ပေးပါတယ်" ဟု ပြောဆိုထားသည်။

အနောက်ပိုင်းတိုင်းစစ်ဌာနချုပ်မှ ဒဏ်ရာရရှိထားသော စစ်သုံ့ပန်းများကို AA တပ်တော်က ကောင်းမွန်စွာ ဆေးဝါးကုပေးထားသည်ကိုလည်း AA ၏ ထုတ်ပြန်ချက်တွင် မြင်တွေ့ရသည်။

ဗဟန်းမြို့နယ်ရှိ အလှကုန်စတိုးဆိုင် လုယက်မူဖြစ်ကာ
ဆိုင်ရှင်အမျိုးသမီးကို ဓားဖြင့် ထိုးသတ်မှုဖြစ်ပွား

26.December.2024

ဗဟန်းမြို့နယ် ဆရာစံမြောက်အရှေ့ရပ်ကွက်၊ ဆရာစံလမ်းရှိ အလှကုန်စတိုင်းဆိုင်အတွင်း လုယက်ကာ ဆိုင်ရှင်အမျိုးသမီးကို ဓားဖြင့် ထိုးသတ်မှု ဒီဇင်ဘာ ၂၆ ရက် နံနက် ၈ နာရီခွဲခန့်က ဖြစ်ပွားခဲ့ကြောင်း သိရှိရသည်။

အဆိုပါ ဓားဖြင့် ထိုးသတ်မှုတွင် AK Cosmetic ဆိုင်ရှင်ဖြစ်သူ မအေးအိခိုင် (၃၅) နှစ်သည် ဆိုင်ဖွင့်ရန် ပြင်ဆင်နေစဉ် လမ်းလျှောက်လာသည့် အမျိုးသားတစ်ဦးက ဆိုင်အတွင်းဝင်ရောက်ကာ ဖြစ်စဉ်ကျူးလွန်သွားခြင်းဖြစ်ကြောင်း ကနဦးမေးမြန်းမှုအရ သိရသည်။

အဇာဘိုင်ဂျန်လေကြောင်းလိုင်းက လေယာဥ်တစီး ကာဇက်စတန်မှာ ပျက်ကျခဲ့ပြီး ၃၈ ဦးသေဆုံး

26.December.2024

အဇာဘိုင်ဂျန်လေကြောင်းလိုင်းက လေယာဥ်တစီး
ကာဇက်စတန် မြို့ Aktau အနီးမှာ ဗုဒ္ဓဟူးနေ့က ပျက်ကျသွားခဲ့တဲ့အတွက် လူ ၃၈ ယောက် သေဆုံးသွားခဲ့တယ်လို့ တာဝန်ရှိသူတွေက သတင်းထုတ်ပြန်ပါတယ်။

အဇာဘိုင်ဂျန် တာဝန်ရှိသူတွေနဲ့ အစည်းအဝေးမှာ ဒုတိယ ဝန်ကြီးချုပ် ကားနတ် ဘိုဇမ်ဘေ့ဗ် Kanat Bozumbaev က အသေအပျောက်စာရင်းကို အခုလို ပြောခဲ့တာ ဖြစ်ပါတယ်။

လေယာဥ်ပေါ်မှာ လေယာဥ်အဖွဲ့သား ၅ ဦးအပါအဝင် ပါသွားသူ ၆၇ ယောက်ရှိပြီး လူ ၂၉ ယောက် ရှင်ခဲ့တယ်လို့ ကာဇက်စတန် အရေးပေါ် ဝန်ကြီးဌာနက တယ်လီဂရမ်လူမှု စာမျက်နှာမှာ သတင်း ထုတ်ပြန်ပါတယ်။ ဒီ ရှင်ကျန်ခဲ့သူတွေထဲမှာ ကလေး ၂ ယောက်လည်း ပါဝင်ကြပီး၊ ဆေးရုံတင်ထားတယ်လို့ ဝန်ကြီးဌာနက ရုရှား နိုင်ငံတော်ပိုင် သတင်းဌာန RIA Novosti ကို ပြောပါတယ်။

လေယာဥ်က အဇာဘိုင်ဂျန် မြို့တော် ဘာကုကနေ ရုရှားနိုင်ငံ ကော့ကေးဆပ် မြောက်ပိုင်း Grozny ကို ပျံသန်းသွားခဲ့တာပါ။ ဒါပေမဲ့ ငှက်က လေယာဥ်ကို ဝင်တိုက်ပြီးတဲ့အခါမှာတော့ လေယာဥ်မှူးတွေက အရေးပေါ် ဆင်းသက်ဖို့အတွက် Aktau မြို့ဘက်ကို လမ်းကြောင်း ပြောင်းခဲ့တာ ဖြစ်တယ်လို့ ရုရှား အရပ်ဘက်လေကြောင်း ဌာနကို ကိုးကားပြီး RIA Novosti က ပြောပါတယ်။

လိုင်းပေါ်မှာ ပျံ့နေပြီး၊ မိုဘိုင်းဖုန်းတွေနဲ့ ရိုက်ကူးတဲ့ ဗွီဒီယိုတွေမှာတော့ လေယာဥ်က စိုက်ဆင်းသွားပြီး၊ မြေပြင်ကို ပျက်အကျမှာ မီးလုံးကြီးတွေ တက်သွားတာ တွေ့ရပါတယ်။ ကာဇက်စတန် အရာရှိတွေ အပြောအရ၊ လေယာဥ်ပေါ် ပါသွားကြသူတွေထဲမှာ အဇာဘိုင်ဂျန်နိုင်ငံသား ၄၂ ယောက် ရုရှား ၁၆ ယောက် နဲ့ ကရစ်ဇက်စတန် နိုင်ငံသား ၃ ယောက်ပါဝင်ကြပါတယ်။

Photo::ကာဇက်စတန်မှာပျက်ကျသွားတဲ့ အဇာဘိုင်ဂျန်လေကြောင်းလိုင်းလေယာဉ် (ဒီဇင်ဘာ ၂၅၊ ၂၀၂၄)

ဆီးရီးယားနိုင်ငံရဲ့ လက်ရှိတရားဝင်ခေါင်းဆောင်ဖြစ်လညတဲ့
အာမက် အယ်လ်ရှာရာဟာပြန်လည်ဖွဲ့စည်းလိုက်တဲ့
ကာကွယ်ရေးဝန်ကြီးဌာနလက်အောက်မှာ ပြည်တွင်းလက်နက်ကိုင်အဖွဲ့အားလုံး စုစည်းဖို့ သဘောတူညီမူရရှိ

ဒမတ်စကက်၊ 25.December.2024

ဆီးရီးယားနိုင်ငံရဲ့ လက်ရှိတရားဝင်ခေါင်းဆောင်ဖြစ်လညတဲ့
အာမက် အယ်လ်ရှာရာဟာပြန်လည်ဖွဲ့စည်းလိုက်တဲ့
ကာကွယ်ရေးဝန်ကြီးဌာနလက်အောက်မှာ ပြည်တွင်းလက်နက်ကိုင်အဖွဲ့အားလုံး စုစည်းဖို့ သဘောတူညီမူရရှိ
ထားကြောင်း ဆီးရီးယားအစိုးရသစ်က တရားဝင် သတင်းထုတ်ပြန်ပါတယ်။

အယ်လ်ရှာရာနဲ့ လက်နက်ကိုင်အဖွဲ့ခေါင်းဆောင်တွေအကြား တွေ့ဆုံမှုအရ “အုပ်စုအသီးသီး ဖျက်သိမ်းပေးရေးနဲ့ ကာကွယ်ရေး၀န်ကြီးဌာနရဲ့ ကြီးကြပ်မှုအောက်မှာ စုစည်းပေါင်းစပ်သွားဖို့ သဘောတူညီချက်တစ်ရပ် ဖော်ဆောင်နိုင်ခဲ့ကြောင်း” အစိုးရသစ်ရဲ့ ဒီဇင်ဘာ ၂၄ ရက် ရက်စွဲနဲ့ သတင်းထုတ်ပြန်ချက်ထဲမှာ ဖော်ပြထားပါတယ်။

ဒါပေမဲ့လည်း ဆီးရီးယားအရှေ့မြောက်ပိုင်းရှိ ကာ့ဒ်ဦးဆောင်တဲ့ အမေရိကန်ကျောထောက်နောက်ခံပြု ဆီးရီးယားဒီမိုကရက်တစ်တပ်ဖွဲ့ (SDF) အဖွဲ့ကတော့ အထက်ပါသဘောတူညီချက်ရဲ့ အစိတ်အပိုင်းထဲမှာ မိမိတို့မပါဝင်ကြောင်း ကြေညာခဲ့ပါတယ်။

ဘတ်ရှာအယ်လ်အာဆတ်ရဲ့ စစ်တပ်မှ ဘက်ပြောင်းလာတဲ့အရာရှိဟောင်းတွေကို သုံးပြီး ဝန်ကြီးဌာနကို ပြန်လည်ဖွဲ့စည်းမယ်လို့ ဝန်ကြီးချုပ် မိုဟာမက်အယ်လ်ဘတ်ရှာက ပြီးခဲ့တဲ့သီတင်းပတ်က ပြောကြားခဲ့ပြီးဖြစ်ပါတယ်။

“အာဆတ်အစိုးရ ပြုတ်ကျပြီးကတည်းက ဒါဟာ ဆီးရီးယားမှာ အရေးအကြီးဆုံး ဖွံ့ဖြိုးတိုးတက်မှု ဖြစ်ကောင်းဖြစ်နိုင်ပါတယ်” လို့ အယ်လ်ဂျာဇီးယားသတင်းဌာနမှ Resul Serdar က ဒမတ်စကက်မြို့မှ သတင်းပေးပို့ထားပါတယ်။

အယ်လ်အာဆတ်အစိုးရ ပြုတ်ကျသွားပြီး ချက်ချင်းဆိုသလိုပဲ နိုင်ငံတဝန်းမှ အတိုက်အခံလက်နက်ကိုင်အဖွဲ့တွေဟာ ဒမတ်စကကက်မြို့ထဲကို လှိမ့်ဝင်လာခဲ့ပြီး တချို့ကလည်း မြို့တော်ရဲ့ မတူညီတဲ့ နယ်မြေအစိတ်အပိုင်းတွေကို ပိုင်ဆိုင်ကြောင်း ထုတ်ဖော်ပြောဆိုနေကြရာမှ အခုလိုသဘောတူညီမူရရှိခဲ့တာလဲဖြစ်ပါတယ်။

တောင်ကိုရီးယား သမ္မတ ယွန်းဆွတ်ယိုးက စစ်အုပ်ချုပ်ရေးကို ရုတ်တရက်ထကြေညာခဲ့ပေမယ့် လွှတ်တော်က မဲခွဲပယ်ချလိုက်လို့ အမိန့်ကိုညတွင်းချင်းပြန်ရုတ်သိမ်းခဲ့ရတဲ့ တောင်ကိုရီးယား သမ္မတ ယွန်းဆွတ်ယိုး နှုတ်ထွက်ရေး ဆန္ဒပြမှုမြင်ကွင်းများ။

PHOTO - Reuters

#မြန်မာစွယ်စုံသတင်း #southkorea #InternationalNews

တောင်ကိုရီးယားပါလီမန်က သမ္မတ၏ စစ်အုပ်ချုပ်ရေး အမိန့်ကို ပယ်ဖျက်

တောင်ကိုရီးယားစစ်သားများ လွှတ်တော်အဆောက်အအုံမှ ပြန်လည်ထွက်ခွာနေ

ဆိုလ်း 3.December.2024

တောင်ကိုရီးယားသမ္မတ Yoon Suk Yeol ၏ စစ်အုပ်ချုပ်ရေး အမိန့်ကို တောင်ကိုရီးယား ပါလီမန်က အရေးပေါ် အစည်းဝေးခေါ်ယူပြီး ပယ်ဖျက်ကြောင်း ကြေညာလိုက်ရာ စစ်အုပ်ချုပ်ရေးအမိန့် ပျက်ပြယ်သွားကာ တောင်ကိုရီးယားစစ်တပ်က ပါလီမန် အဆောက်အအုံမှ ပြန်လည် ဆုတ်ခွာသွားပြီဖြစ်သည်။

ယနေ့ညပိုင်းတွင် တောင်ကိုရီးယားသမ္မတက ရုတ်တရက် စစ်အုပ်ချုပ်ရေး ကြေညာခဲ့ခြင်းဖြစ်ပြီး တောင်ကိုရီးယား ပါလီမန်က သမ္မတ၏ စစ်အုပ်ချုပ်ရေး အမိန့်ကို ပယ်ဖျက်ကြောင်း လွှတ်တော်မတ် ၁၉၀ က မဲပေး၍ ပယ်ဖျက်ခဲ့ကြောင်း၊ လွှတ်တော်တွင် အမတ်နေရာပေါင်း ၃၀၀ ရှိသည့်အနက်မှ လွှတ် တော် မတ် ၁၉၀ က သမ္မတ၏ စစ်အုပ်ချုပ်ရေး အမိန့်ကို လွှတ်တော်တွင် မဲပေး၍ ပယ်ဖျက်ကြောင်း ကြေညာခြင်းဖြစ်သည်။

တောင်ကိုရီးယားသမ္မတ၏ မိခင်နိုင်ငံရေးပါတီဖြစ်သော People Power ပါတီက သမ္မတ၏ စစ်အုပ်ချုပ်ရေး ကြေညာမှုသည် မှားယွင်းပြီး ယင်းစစ်အုပ်ချုပ်ရေး အမိန့်ကို အတိုက်အခံ လွှတ်တော်မတ်များနှင့်အတူ တားဆီးသွားမည်ဖြစ်ကြောင်း ကြေညာသည်။

တောင်ကိုရီးယားသမ္မတက ဇနီးသည်၏ အကျင့်ပျက်ခြစားမှု၊ ဝန်ကြီးများ၏ အကျင့်ပျက်ခြစားမှုကို စုံစမ်းစစ်ဆေးရန် ငြင်းပယ်ခဲ့ပြီး သမ္မတနှင့် လွှတ်တော်ကြား နိုင်ငံတော်ဘတ်ဂျက်ကို အတည်ပြုရန် သဘောမတူညီမှုများ ဖြစ်ပေါ်လာပြီးနောက် သမ္မတက တစ်ဖက်သတ် စစ်အုပ်ချုပ်ရေး ကြေညာခဲ့ခြင်းဖြစ်သည်။

တောင်ကိုရီးယားလွှတ်တော်တွင် အတိုက်အခံ လွှတ်တော်အမတ်များက နေရာ အများစု လွှမ်းမိုးထားရာ သမ္မတအနေဖြင့် စွပ်စွဲပြစ်တင်ဖြုတ်ချခံရမည့် အခြေ အနေ ဖြစ်ပေါ်နေကြောင်း သတင်းများက ဆိုသည်။

ထိုင်းနိုင်ငံတွင် တရားမဝင်အလုပ်သမား ဖမ်းဆီးရေးဆောင်ရွက်ရာမှ မြန်မာအလုပ်သမား ၁၆၁ ဦးဖမ်းဆီးခံရ

ဘန်ကောက်။ နိုဝင်ဘာ ၁၁

ထိုင်းနိုင်ငံအတွင်း တရားမဝင်အလုပ်သမားဖမ်းဆီးရေးကို သက်ဆိုင်ရာတာဝန်ရှိသူများက နိုဝင်ဘာ ၇ ရက်တွင် ထပ်မံဆောင်ရွက်ခဲ့ရာ မြန်မာလုပ်သားများအပါအဝင် တရားမဝင်အလုပ်သမား ၂၈၇ ဦး ဖမ်းဆီးခံရကြောင်း သိရသည်။

ထိုင်းနိုင်ငံမှ သက်ဆိုင်ရာတာဝန်ရှိအဖွဲ့များသည် ရွှေ့ပြောင်းလုပ်သားအများအပြားနေထိုင်သည့် ခရိုင်၂၅ ခရိုင်ရှိနယ်မြေ ၃၀ ကို အဓိကထားပြီး ဝင်ရောက်စစ်ဆေးမှုများပြုလုပ်ရာမှ ထိုသို့ဖမ်းဆီးရမိခဲ့ခြင်းဖြစ်သည်ဟု ထိုင်းနိုင်ငံဘက်က လာသောသတင်းများအရ သိရသည်။

တရားမဝင်အလုပ်သမားအဖြစ်ဖမ်းဆီးရေးဆောင်ရွက်ချက်အရ အလုပ်သမားများတွင် မြန်မာအလုပ်သမား ၁၆၁ ဦး ၊ ကမ္ဘောဒီယား အလုပ်သမား ၇၅ ဦး နှင့်လာအိုအလုပ်သမား နှစ်ဦးပါဝင်ကြောင်း သိရသည်။

ထို့အပြင် လူဝင်မှုကြီးကြပ်ရေးဥပဒေအရ ပြစ်မှုကျူးလွန်သူ ထိုင်းလူမျိုး ၄၉ ဦး တို့ကို စစ်ဆေး တွေ့ရှိကြောင်းသိရှိရသည်ဟု ထိုင်းသတင်းကဆိုသည်။

သက်ဆိုင်ရာ ထိုင်းတာဝန်ရှိသူများအနေဖြင့် ဖမ်းဆီးရမိသည့် တရားမဝင်လုပ်သားများကို ဥပဒေအရဆက်လက်အရေးယူသွားမည်ဖြစ်ကြောင်းသိရသည်။

ချောင်းဆုံမြို့နယ် ကမာဘိုကျေးရွာတွင် မီးလောင်ကျွမ်းမှုဖြစ်ပွား

ချောင်းဆုံ၊ နိုဝင်ဘာ ၁၀

မွန်ပြည်နယ် မော်လမြိုင်ခရိုင်ညချောင်းဆုံမြို့နယ်၊ ကမာဘိုကျေးရွာတွင် နိုဝင်ဘာလ ၁၀ရက် ည၇ နာရီကျော်ခန့်က
နေအိမ်များ မီးလောင်မှုဖြစ်ပွားနေကြောင်း ဒေသခံများထံမှ သိရသည်။

သတင်းအရ ချောင်းဆုံမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ မုဒွန်းနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ ရွာလွတ်နယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ကြကြောင်းသိရသည်။

အဆိုပါ မီးကူးစက်လောင်ကျွမ်းမှု ဖြစ်စဥ်ကြောင့် နေအိမ် ၃ လုံး မီးလောင် ဆုံးရှုံးခဲ့ပြီး ည ၈နာရီကျော်အချိန်ခန့်၌ မီးငြိမ်းသွားပြီဖြစ်ကြောင်း သိရသည်။

တိုက်ကြီးမြို့နယ် ရန်ကုန်- ပြည်လမ်းပေါ်တွင် ရပ်ထားသော(၆)ဘီးကုန်တင်ယာဉ်အား မီနီအိုးဝေမှ အရှိန်မထိန်းနိုင်ပဲ ၀င်တိုက်မိ

ရန်ကုန်။ နိုဝင်ဘာ ၉

ရန်ကုန်တိုင်းဒေသကြီး၊ တိုက်ကြီးမြို့နယ်၊ တာဂွကျေးရွာ၊ ရန်ကုန်- ပြည်လမ်းပေါ်တွင် နိုဝင်ဘာလ ၇ ရက် ညပိုင်းက
ရပ်ထားသော(၆)ဘီးကုန်တင်ယာဉ်အား မီနီအိုးဝေမှ အရှိန်မထိန်းနိုင်ပဲ ၀င်တိုက်ရာမှ ယာဉ်ပေါ်ပါလူ(၂)ဦးညပ်နေကြောင်း သတင်းရရှိခဲ့သည်။

သတင်းအရ တိုက်ကြီးမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများဆောင်ရွက်ခဲ့ကြပြီး ယာဉ်ပေါ်ပါကျား(၂)ဦး ထိခိုက်ဒဏ်ရာ(မစိုးရိမ်ရ) တို့အား မိုးစေတနာပရဟိတသူနာတင်ယာဉ် နှင့်နိဗ္ဗာန်ချမ်းသာမဂ်လာအသင်း လူနာတင်ယာဉ်တို့ဖြင့် တိုက်ကြီးမြို့နယ် ပြည်သူ့ဆေးရုံကြီးသို့ ပိုဆောင်ပေးခဲ့ကြောင်းသိရသည်။

မော်လမြိုင်-မုဒုံလမ်းဘေးရှိ မင်းသန့်စက်သုံးဆီဆိုင် မီးလောင်မှုဖြစ်ပွားခဲ့ပြီး မီးလောင်မူဖြစ်စဥ်မှ ထိခိုက်ဒဏ်ရာရရှိသူများထဲမှ တစ်ဦး သေဆုံး

မော်လမြိုင်၊ နိုဝင်ဘာ ၈

မွန်ပြည်နယ်၊ မော်လမြိုင်မြို့၊ ရိုးဂိုးကျေးရွာ၊ မော်လမြိုင်-မုဒုံလမ်းဘေးရှိ မင်းသန့်စက်သုံးဆီဆိုင် မီးလောင်မှုဖြစ်ပွားခဲ့ပြီးမီးလောင်မူဖြစ်စဥ်မှ ထိခိုက်ဒဏ်ရာရရှိသူများထဲမှ ဆီဘောက်ဆာယာဉ်မောင်းဖြစ်သူ အမျိုးသား သေဆုံးသွားကြောင်း သိရသည်။

ယာဉ်မောင်းအမျိုးသားမှာ မီးလောင်မှုကြောင့် အနီရောင်အဆင့် မီးလောင်ဒဏ်ရာများရရှိခဲ့ပြီး မော်လမြိုင်ဆေးရုံကြီးတွင် ဆေးကုသနေစဉ် နိုဝင်ဘာ ၈ရက်နေ့၊ နံနက် ၅နာရီအချိန်ခန့်က သေဆုံးသွားကြောင်း ကယ်ဆယ်ရေးအဖွဲ့ဝင်တစ်ဦးက ပြောသည်။

နိုဝင်ဘာလ ၇ ရက်နေ့ ညနေ ၅ နာရီအချိန်ခန့်က မင်းသန့်ဆီဆိုင်အနောက်ဘက်ရှိ ဆီလှောင်ကန်ပေါက်ကွဲရာမှ မီးလောင်ကျွမ်းမှု စတင်ဖြစ်ပွားခဲ့သည်။

မီးလောင်ကျွမ်းမှုကို ငြိမ်းသတ်နေစဉ် ဆီဘောက်ဆာယာဉ် ပေါက်ကွဲမှု ထပ်မံဖြစ်ပွားခဲ့သည့်အတွက် မီးသတ်သမား ၁၁ ဦး၊ လူမှုကယ်ဆယ်ရေးအဖွဲ့ဝင် ၁၂ ဦး၊ ဆီဘောက်ဆာယာဉ်မောင်း အပါအဝင် ဆီဆိုင်မှဝန်ထမ်းတစ်ဦး ထိခိုက်ဒဏ်ရာရရှိခဲ့ကြသည်။

ထိခိုက်ဒဏ်ရာရရှိသူများကို မော်လမြိုင်ဆေးရုံကြီးတွင် တက်ရောက်ဆေးကုသမှုခံယူနေရကြောင်း သိရသည်။

ဓာတ်ပုံ-ဘိုဘိုဝင်း

မလေးရှားနိုင်ငံ ကာဂျန်းမြို့ရှိ အငှားအိမ်ရာတခုမှာ
မြန်မာအမျိုးသမီး ၁ ဦးအသတ်ခံရမှုဖြင့် သံသယရှိ မြန်မာနိုင်ငံသား ၅ ဦးကို ဖမ်းဆီးစစ်ဆေးနေ

8.November , 2024

မလေးရှားနိုင်ငံ၊ ကာဂျန်းမြို့ရှိ အငှားအိမ်ရာတခုမှာ မြန်မာအမျိုးသမီးတယောက် အသတ်ခံခဲ့ရတဲ့ ဖြစ်စဉ်နဲ့ ပတ်သက်ပြီး သံသယရှိ မြန်မာနိုင်ငံသား ၅ ယောက်ကို မလေးရှားရဲတပ်ဖွဲ့က ဖမ်းဆီးထိန်းသိမ်းထားကြောင်း Malay Mail သတင်းမှာ ဖော်ပြပါတယ်။

ကာဂျန်းခရိုင်ရဲချုပ်ရဲ့ ပြောကြားချက်အရ အမျိုးသမီး ၂ ယောက်အပါအဝင် အသက် ၂၈ နှစ်နဲ့ ၄၅ နှစ်ကြားအရွယ်ရှိ သံသယရှိသူ ၅ ယောက်ကို နိုဝင်ဘာ ၆ ရက် နေ့လယ် ၁ နာရီနဲ့ ညနေ ၆ နာရီခွဲအချိန်ကြားမှာ ဘန်ဒါတက်နိုလိုဂျီနဲ့ စီမန်ယိဧရိယာတွေမှာ သီးခြားစီ ဖမ်းဆီးရမိခဲ့တာ ဖြစ်ပါတယ်။

အမျိုးသမီးတယောက် သွေးအိုင်ထဲမှာ သေဆုံးနေတာကို မြင်တွေ့ထားတဲ့အကြောင်း အသက် ၅၂ နှစ်အရွယ် ဒေသခံ အမျိုးသားတယောက်ရဲ့ ရဲစခန်းကို ဖုန်းဆက်သတင်းပေးမှုအရ နိုဝင်ဘာ ၆ ရက်၊ မနက်အစောပိုင်း ၁ နာရီ ၉ မိနစ် အချိန်မှာ ရဲတပ်ဖွဲ့အနေနဲ့ အခင်းဖြစ်ပွားရာနေရာကို သွားရောက်စစ်ဆေးခဲ့ရာမှာ အသက် ၄၀ အရွယ် မြန်မာ အမျိုးသမီးဟာ သူ့ရဲ့အခန်းထဲရှိ အိပ်ရာပေါ်မှာ ဓားဒဏ်ရာ ၁၂ ချက်နဲ့ သေဆုံးနေတာကို တွေ့ရှိခဲ့ပါတယ်။

အခင်းဖြစ်ပွားရာနေရာမှာ ဓားတချောင်းနဲ့ သံသယရှိ အမျိုးသားတယောက်ရဲ့ အဝတ်အစားတွေကိုလည်း ရဲတပ်ဖွဲ့က သိမ်းဆည်း ရရှိထားပါတယ်။

ဒါ့အပြင် အငှားအိမ်ရာမှာ အခန်းနီးနားချင်းလည်းဖြစ်၊ မျက်မြင်သက်သေလည်းဖြစ်တဲ့ နာဇရွန်က သေဆုံး အမျိုးသမီးရဲ့ အခန်းဘက်မှာ အသံတွေ ပွက်လောရိုက်နေတာကို ကြားခဲ့ရပြီး အဲဒီအမျိုးသမီးရဲ့ အော်ဟစ်အကူအညီ တောင်းသံကိုလည်း ကြားခဲ့ရတဲ့အကြောင်း၊ လူသတ်တရားခံလို့ ယုံကြည်ရတဲ့ အမျိုးသားတယောက် အဆောက်အဦထဲ ကနေ ဓားကိုင်ထွက်ပြေးသွားတာကိုလည်း မြင်တွေ့ခဲ့တဲ့အကြောင်း ပြောပါတယ်။

သေဆုံးအမျိုးသမီးရဲ့ ရုပ်အလောင်းကို ဆာဒါန်းဆေးရုံမှာ ခွဲစိတ်စစ်ဆေးရာမှာတော့ ဝမ်းဗိုက်မှာ နက်ရှိုင်းတဲ့ ထိုးသွင်းဒဏ်ရာတွေကြောင့် သွေးထွက်လွန် သေဆုံးခဲ့တာ ဖြစ်နိုင်တယ်လို့ ယူဆထားပါတယ်။

လူသတ်မှုကျူးလွန်ရခြင်းရဲ့ နောက်ကွယ်က အကြောင်းရင်းဟာ မနာလိုဝန်တိုမှုကြောင့် ဖြစ်နိုင်တယ်လို့ ရဲတပ်ဖွဲ့က သုံးသပ်ထားပြီး အခုလက်ရှိမှာတော့ သံသယရှိသူအားလုံးကို ပြစ်မှုဆိုင်ရာ ပုဒ်မ ၃၀၂ အရ စုံစမ်းစစ်ဆေးမှုတွေ လုပ်ဆောင်နေပါတယ်။

အခုဖြစ်စဉ်နဲ့ပတ်သက်ပြီး သတင်းတစုံတရာ ရရှိပါက နီးစပ်ရာရဲစခန်းကို အကြောင်းကြားပေးဖို့လည်း ကာဂျန်းခရိုင်ရဲချုပ်က ဒေသခံပြည်သူတွေကို တိုက်တွန်း ပြောကြားထားပါတယ်။

Source/ Photo: Malay Mail

သမ္မတဟောင်းထရမ့် ရွေးကောက်ပွဲ အနိုင်ရ
ရှိခဲ့ပြီး အမေရိကန်ပြည်ထောင်စု၏ ၄၇ ယောက်မြောက် သမ္မတဖြစ်လာ

6.November.2024

အမေရိကန် ရွေးကောက်ပွဲမှာ ဒီမိုကရက်တစ်သမ္မတလောင်း ဒုသမ္မတ Kamala Harris ကို သမ္မတဟောင်း Donald Trump က အနိုင်ရလိုက်တာကြောင့် သမ္မတသက်တမ်း ၄ နှစ် တာဝန်ယူခွင့်ရတော့မှာ ဖြစ်ပါတယ်။

သမ္မတရွေးချယ်ရေး ပြည်နယ် အထူးကိုယ်စားလှယ်မဲ စုစုပေါင်း ၅၃၈ မဲမှာ အနိုင်ရဖို့ အနည်းဆုံး ၂၇၀ ရဖို့ လိုအပ်ပြီး၊ အခုမဲတွေ ရေတွက်ပြီးချိန်အထိ သမ္မတဟောင်းထရမ့်က အနည်းဆုံး ၂၇၇ မဲ ရထားပြီး အနိုင်ရခဲ့တာ ဖြစ်ပါတယ်။

သမ္မတဟောင်းထရမ့် ရွေးကောက်ပွဲ အနိုင်ရလိုက်တာကြောင့် အမေရိကန်သမိုင်းမှာ ပထမဆုံး သမ္မတဟောင်းတဦး သမ္မတသက်တမ်းနောက်တကြိမ်အတွက် အနိုင်ရသူအဖြစ် မှတ်တမ်းတင်နိုင်တော့မှာ ဖြစ်ပါတယ်။

ယခုရွေးကောက်ပွဲအနိုင်ရလဒ်ကြောင့် သမ္မတဟောင်းဒေါ်နယ်ထရမ့်သည် လာမည့် ၂၀၂၅ ခုနှစ် ဇန်နဝါရီလ ၂၅ ရက်နေ့တွင် သမ္မတအဖြစ် ကျမ်းသစ္စာကျိန်ဆို၍ အိမ်ဖြူတော်တွင် လေးနှစ်သက်တမ်းကို ဒုတိယအကြိမ် ထပ်မံထမ်းဆောင်ရတော့မည် ဖြစ်သည်။

အမေရိကန်သမိုင်းတွင် သမ္မတသက်တမ်းနှစ်ကြိမ်ကို ဆက်တိုက်မဟုတ်ဘဲ အနိုင်ရခဲ့သူ နှစ်ဦးသာ ရှိခဲ့ပြီး ဒေါ်နယ်ထရမ့်က တစ်ဦးဖြစ်သည်။

ယင်းကြောင့် ဒေါ်နယ်ထရမ့်မှာ သမ္မတဂရိုဗာကလီးဗ်လန်းလက်ထက် ၁၈၉၂ ခုနှစ်နောက်ပိုင်း ဆက်တိုက်မဟုတ်သည့် သမ္မတသက်တမ်းနှစ်ကြိမ်ကို တာဝန်ထမ်းဆောင်ခွင့်ရသည့် ပထမဆုံးအမေရိကန်သမ္မတ ဖြစ်လာသည်။

ထရမ့်သည် အမေရိကန်သမ္မတအဖြစ် ၃ ကြိမ်ယှဉ်ပြိုင်ရာတွင် ၂ ကြိမ်အနိုင်ရခဲ့သူဖြစ်ပြီး အမျိုးသမီးများနှင့် ပြိုင်ဆိုင်ခဲ့သည့် နှစ်ကြိမ်စလုံးတွင် အနိုင်ရယူခဲ့သည်။ ယင်းမှာ အမေရိကန် ပြည်ထောင်စုတွင် အမျိုးသမီးများကို သမ္မတအဖြစ် တင်မြှောက်ရန် အဆင်သင့်မဖြစ်သေးသည့် သဘောဟု ဝေဖန်မှုများလည်းရှိနေသည်။

“အမေရိကန်နိုင်ငံကို ပြန်ကြီးကျယ်လာအောင် လုပ်မယ်”ဟူသည့် ကတိပေးချက်နှင့် ပြိုင်ဘက်ဖြစ်သူ အမေရိကန်နိုင်ငံခြားရေးဝန်ကြီးဟောင်း ဟီလာရီကလင်တန်ကို ၂၀၁၆ ခုနှစ်တွင် အနိုင်ယူခဲ့သော်လည်း ၂၀၂၀ ရွေးကောက်ပွဲတွင်မူ ဂျိုးဘိုင်ဒန်ကို အရေးနိမ့်ခဲ့သည်။

ယခု ၂၀၂၄ ရွေးကောက်ပွဲတွင် ထရမ့်က “အမေရိကန်နိုင်ငံကို ပြန်ကြီးကျယ်လာအောင် လုပ်မယ်”ဟူသော ကြွေးကြော်သံဖြင့် ဒုတိယသမ္မတကမ်မလာဟဲရစ်နှင့် ယှဉ်ပြိုင်အနိုင်ရခဲ့ပြန်သည်။

ယခုနှစ် ရွေးကောက်ပွဲအကြို မဲဆွယ်ကမ်ပိန်းကာလအတွင်း ဒေါ်နယ်ထရမ့်ကို လုပ်ကြံရန် ကြိုးပမ်းမှု နှစ်ကြိမ်အထိ ရှိခဲ့ခြင်းမှာလည်း ထူးခြားမှုတစ်ခုဖြစ်ခဲ့သည်။

နောက်ထပ် ထူးခြားမှုတွေကိုလည်း ဆက်လက် ဖော်ပြသွားမှာ ဖြစ်ပါတယ်။

စပိန်နိုင်ငံမှာ မိုးသည်းထန်ပြီးရေကြီးမှုကြောင့် သေဆုံးသူ ၁၅၈ ဦးအထိ မြင့်တက်လာ

1.November , 2024

စပိန်နိုင်ငံမှာ မိုးသည်းထန်ပြီးရေကြီးမှုကြောင့် သေဆုံးသူ ၁၅၈ ဦးအထိ မြင့်တက်လာတယ်လို့ သတင်းရရှိပါတယ်။

ဗလင်စီယာမှာ ၈ နာရီကြာ မိုးသည်းထန်မှုကြောင့် ရေကြီးမှုတွေ ဖြစ်ခဲ့ပြီး ဗုဒ္ဓဟူးနေ့မှာပဲ သေဆုံးသူ အရေအတွက် ၉၀ ရှိခဲ့တာ ဖြစ်ပါတယ်။

ဒါဟာ တနှစ်စာရွာတဲ့ မိုးရေချိန်ပမာဏကို ၈ နာရီအတွင်း ရွာသွန်းခဲ့တာဖြစ်တယ်လို့လည်း မိုးလေဝသပညာရှင်တွေက ခန့်မှန်းထားပါတယ်။

ဒီရေကြီးမှုမှာ လူသေဆုံးမှု များပြားတာနဲ့ပတ်သက်ပြီး ဖွံ့ဖြိုးတယ်ဆိုတဲ့ ဗလင်စီယာမှာရှိတဲ့ ဆင်ခြေဖုံးဒေသမှာ နေထိုင်သူတွေလည်း သဘာဝဘေးနဲ့ပတ်သက်ပြီး သတင်းအပြည့်အစုံ မရရှိမှုကြောင့် သေဆုံးခဲ့ရတယ်လို့ ရိုက်တာက ဖော်ပြပါတယ်။

အတိုက်အခံပါတီကတော့ မက်ဒရစ်မြို့မှာလည်း အစိုးရရဲ့ သတိပေးချက်ထုတ်ပြန်မှု နှောင့်နှေးတာနဲ့ ကယ်ဆယ်ရေးလုပ်ငန်းတွေလည်း နှေးကွေးတယ်ဆိုပြီး ဝေဖန်ထားပါတယ်။

လက်ရှိအချိန်မှာ ရေကြီးမှုကြောင့် သေဆုံးသူ ၁၅၈ ယောက်အထိ ရှိလာခဲ့ပြီး ဗလင်စီယာမှာပဲ စံချိန်တင်သေဆုံးမှု ၁၅၅ ယောက်ရှိခဲ့ကာ အနောက်ပိုင်းမှာ ၂ ယောက် သေဆုံးတယ်လို့ စာရင်းရထားပါတယ်။

ဗလင်စီယာမှာရှိတဲ့ ပိုင်ပေါ်တာမြို့မှာပဲ သေဆုံးသူ ၄၀ အထိ ရှိခဲ့ပြီး မြစ်ကမ်းဘေးနဲ့ နီးစပ်တဲ့မြို့တွေမှာ သေဆုံးသူ ပိုများပါတယ်။

ကြာသပတေးနေ့က အလုပ်သမား ၁,၂၀၀ ကျော်က ရှာဖွေမှုမှာ ပါဝင်ခဲ့ပြီး ဒရုန်းတွေနဲ့လည်း ရှာဖွေကယ်ဆယ်ရေးတွေ ဆောင်ရွက်ခဲ့ပါတယ်။

အသက်ရှင်ကျန်ရစ်သူတွေကို အဓိက ကယ်တင်ဖို့ အရေးကြီးတယ်လို့ ဝန်ကြီးချုပ် ပက်ဒရို ဆန်းချက်က ဆိုပါတယ်။

စပိန်နိုင်ငံ ရေကြီးမှုဟာ ၁၉၇၃ ခုနှစ်နောက်ပိုင်း အဆိုးရွားဆုံးရေကြီးမှု ဖြစ်ခဲ့သလို လူသေဆုံးမှုလည်း အများဆုံးဖြစ်ခဲ့ပြီး ၁၀ စုနှစ် ၅ ခုအတွင်း ဥရောပရဲ့ အဆိုးရွားဆုံး သဘာဝဘေးအန္တရာယ် ဖြစ်ပါတယ်။

Source-Reuters

စပိန်နိုင်ငံ‌တောင်ပိုင်းနဲ့ အရှေ့ခြမ်းဒေသတွေမှာ မိုးသည်းထန်ပြီး ရေကြီးရေလျှံမှုတွေကြောင့် ၉၅ ဦးထက်မနည်း သေဆုံး

စပိန်နိုင်ငံ‌တောင်ပိုင်းနဲ့ အရှေ့ခြမ်းဒေသတွေမှာ မိုးသည်းထန်ပြီး ရေကြီးရေလျှံမှုတွေကြောင့် ၉၅ ဦးထက်မနည်း သေဆုံး
ခဲ့ပြီး အိုးအိမ်တွေ ပျက်စီးဆုံးရှုံး ရသလို လမ်းပမ်းဆက်သွယ်ရေးလည်း ပြတ်တောက်သွားပါတယ်။

စပိန်နိုင်ငံ‌တောင်ပိုင်းနဲ့ အရှေ့ခြမ်းဒေသတွေမှာ အင်္ဂါနေ့ကစလိုက်တဲ့ မိုးသည်းထန်မှုဟာ ဗုဒ္ဓဟူးနေ့ အထိ ဆက်သွားပြီး ရေကြီးရေလျှံမှုတွေဖြစ်ခဲ့တာပါ။

ကယ်ဆယ်ရေးအဖွဲ့တွေဟာ ရဟတ်ယဉ်တွေ သုံးပြီး အိမ်တွေပေါ် ပိတ်မိနေသူတွေကို ကယ်ထုတ်ရသလို မော်တော်ယဉ်တွေပေါ် ပိတ်မိနေသူတွေကို လည်း ရာဘာလှေတွေနဲ့ ကယ်ထုတ်ကြရပါတယ်။ သေဆုံးအရေအတွက်ဟာ ၉၂ ဦးအထိရှိသွားပြီလို့ စပိန်အရှေ့ခြမ်း Valencia ဒေသ အရေးပေါ်ကယ်ဆယ်ရေးဌာနက အတည်ပြုပါတယ်။

အနီးအနားမှာရှိတဲ့ Castilla La Mancha ဒေသမှာလည်း နှစ်ဦးသေဆုံးတယ်လို့သိရပြီး တောင်ပိုင်း Andalusia ဒေသမှာလည်း တဦးသေဆုံးပါတယ်။ Vaencia ဒေသ Utiel မြို့မှာတော့ လူ ၆ ဦးသေဆုံးပြီး အတော်များများပျောက်ဆုံးနေတယ်လို့ မြို့တော်ဝန် Ricardo Gabaldon က ပြောပါတယ်။ သေဆုံးသူတွေအတွက် သုံးရက်ကြာ ဝမ်းနည်းပူဆွေးမှုအဖြစ် ကြာသပတေးနေ့ကစလို့ စပိန်အစိုးရ ကြေညာသတ်မှတ်ပေးပါတယ်။

ကယ်ဆယ်ရေးလုပ်သားတွေနဲ့စစ်သား တထောင်ကျော်ကို ရေလွှမ်းမိုးရာဒေသကို ဖြန့်ကြက်စေလွှတ်ထားသလို ကယ်ဆယ်ရေးပူးပေါင်းဆောင်ရွက်နိုင်ဖို့ အကျပ်အတည်းကာလ စီမံမှုကော်မတီတရပ်ကိုလည်း စပိန်ဗဟိုအစိုးရက ဖွဲ့ပေးထားပါတယ်။

Valencian ဒေသ သမ္မတ Carlos Mazon ကတော့ လမ်းပမ်းဆက်သွယ်ရေးထိခိုက်ပြီး မော်တော်ယဉ်တွေလည်း ပျက်စီး ကုန်တာကြောင့် ဒေသခံတွေ ကိုယ့်နေအိမ်မှာပဲ နေကြဖို့ တိုက်တွန်းနေပါတယ်။ လျှပ်စစ်မီးပြတ်တောက်မှုကြောင့် ကယ်ဆယ်ရေးလုပ်ငန်းတွေလည်း နှောင့်နှေးနေတယ်လို့ငိရပါတယ်။

Photo::စပိန်နိုင်ငံ ဗယ်လဲန်စီယာမြို့မှာ ရေစီးနဲ့မျောကပါလာတဲ့ကားတွေနဲ့ မီးရထားလမ်းပျက်စီးနေတဲ့အခြေအနေ

မရမ်းကုန်းမြို့နယ် အမှတ်(၈)ရပ်ကွက် မီးသတ်တပ်ဖွဲ့ဌာနချုပ်အနီး မီးလောင်မှု ဖြစ်ပွား

22.October.2024

ရန်ကုန်မြို့၊ မရမ်းကုန်းမြို့နယ် အမှတ်(၈)ရပ်ကွက် မီးသတ်တပ်ဖွဲ့ဌာနချုပ်အနီး ဝါယာရှော့ဖြစ်ကာ တိုက်အိမ်တစ်လုံး မီးလောင်မှုဖြစ်ပွားခဲ့ပြီး နေအိမ်တစ်ခုလုံး မီးလောင်ကျွမ်းခဲ့ကြောင်း သိရသည်။

မရမ်းကုန်းမြို့နယ်၊ အမှတ်(၈)ရပ်ကွက်၊ ဓနသိဒ္ဓိလမ်းမှ နှစ်ထပ်တိုက်တစ်လုံးသည် ယနေ့(အောက်တိုဘာ၂၂ရက်) နံနက် ၄နာရီခန့်တွင် ဝါယာ ရှော့မှတစ်ဆင့် မီးစတင်လောင်ကျွမ်းခြင်းဖြစ်သည်။

" မီးမလောင်ခင်လေးမှာ လျှပ်စစ်မီးက လာလိုက်ပျက်လိုက်နဲ့ ၅ကြိမ်ဖြစ်တယ်။ မိုးကလည်း ရွာနေတော့ လျှပ်စစ်ဝါယာရှော့ဖြစ်မှာကို ကြောက်နေတာ။ သိပ်မကြာဘူး ဓနသိဒ္ဓိလမ်းဘက်ကနေ မီးခိုးလုံးတွေ တက်လာတာပါ"ဟု မရမ်းကုန်းမြို့နယ်၊ အမှတ်(၈)ရပ်ကွက်၌ နေသူတဦးက ပြောသည်။

မီးလောင်မှုဖြစ်သည့်နေရာသည့် မြန်မာနိုင်ငံမီး
သတ်တပ်ဖွဲ့ဌာနချုပ် ရှိသည့်နေရာနှင့် ၅ မိနစ်ခန့် ကားမောင်းလျှင်ရောက်သော်လည်း မီးသတ်ကားများသည် နံနက် ၆နာရီကျော်မှ ရောက်ရှိလာခဲ့သည်ဟု ဒေသခံများက ပြောသည်။

မီးသတ်တပ်ဖွဲ့မှ ၆နာရီ ၃မိနစ်မှ မီးသတင်းရပြီး သမိုင်းနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ ရန်ကင်းမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မရမ်းကုန်းမြို့နယ်မီးသတ်စခန်းမှ မီးငြှိမ်းသတ်ယာဉ်(၃)စီး ထွက်ခွာကာ မီးငြှိမ်းသတ်ခဲ့ကြောင်း၊ ၆နာရီ ၂၇ မိနစ်တွင် မီးထိန်းနိုင်ပြီး ၆နာရီ၃၅မိနစ်၌ မီးငြိမ်းကြောင်း ထုတ်ပြန်ထားသည်။

ဓနသိဒ္ဓိလမ်း၌ နေသူများကမူ နံနက် ၄နာရီကတည်းက စတင်လောင်ကျွမ်းတာ အိမ်က အကြီးကြီးဗျ။ နှမြောစရာပဲ။ အိမ်တွင်း စက်မှုလုပ်ငန်းလည်း လုပ်နေတဲ့အိမ်။ အကုန်ကုန်တာပဲ"ဟု မီးလောင်မှုကို သွားရောက်ကြည့်ရှုခဲ့သူတစ်ဦးက ပြောသည်။

ရန်ကုန်-မန္တလေးအမြန်လမ်းမကြီးပေါ်တွင် ဘီးပေါက်၍ ရပ်တန့်ထားသော ယာဉ်အား လားရာတူနောက်မှ မောင်းနှင်လာသော ယာဉ်မှ ဝင်တိုက်မိလို့ ၂ဦးသေဆုံး

====================================
ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် (၂၄၃/၅)နှင့် (၂၄၃/၆) ကြားတွင် အောက်တိုဘာ ၂၂ရက်
၊ ၀၅ ၃၄ အချိန်ခန့်က ဘီးပေါက်၍ ရပ်တန့်ထားသော FUSO ယာဉ်အား လားရာတူနောက်မှ မောင်းနှင်လာသော SOJEN ယာဉ်မှ ဝင်ရောက်တိုက်မိမှုဖြစ်ပွားကြောင်း သတင်းရရှိသဖြင့်ဘုရားတောင်အမြန်လမ်းမီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြောင်းသိရသည်။

အဆိုပါဖြစ်စဉ်ကြောင့် SOJEN ယာဉ်ပေါ်ပါ ကျား (၆)ဦးနှင့် မ(၈)ဦး စုစုပေါင်း (၁၄)ဦးအနက် ကျား(၁)ဦးနှင့် မ(၁)ဦး (သေဆုံး)၊ ထိခိုက်ဒဏ်ရာရရှိသူ ကျား(၁)ဦးနှင့် မ(၁)ဦး (စိုးရိမ်ရ)၊ ကျား(၄)ဦးနှင့် မ(၆)ဦး (မစိုးရိမ်ရ)တို့အား ဘုရားတောင်အမြန်လမ်းမကြီးရဲစခန်းမှယာဉ်ဖြင့် နေပြည်တော် ကုတင်(၁၀၀၀)ဆေးရုံသို့ ကူညီပို့ဆောင်ပေးခဲ့ပါကြောင်းနှင့် FUSO ယာဥ်ပေါ်ပါ ကျား (၄)ဦး ထိခိုက်ဒဏ်ရာရရှိမှု မရှိကြောင်း မီးသတ်တပ်ဖွဲ့မှ သတင်းထုတ်ပြန်ပါတယ်။

ရွှေပြည်သာမြို့နယ်အတွင်း မိုးသည်းထန်စွာရွာသွန်းပြီး လေပြင်းတိုက်ခတ်မှုကြောင့် နေအိမ်အချို့ အမိုးလန်ခြင်းများဖြစ်ပွား

21 .October .2024

ရန်ကုန်တိုင်းဒေသကြီး ရွှေပြည်သာမြို့နယ်တွင် လေပြင်းတိုက်ခတ်မှုကြောင့် နေအိမ်အချို့ အမိုးလန်ခြင်းများဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်။

အောက်တိုဘာ ၂၁ ရက် နံနက် ၃ နာရီခန့်တွင် ရွှေပြည်သာမြို့နယ်အတွင်း မိုးသည်းထန်စွာရွာသွန်းပြီး လေပြင်းတိုက်ခတ်မှုကြောင့် အမှတ်(၁၉)ရပ်ကွက်၊ နှင်းပန်းလမ်းရှိ နေအိမ်များ အမိုးလန်ခြင်း၊ ရေနစ်မြုပ်ခြင်းများဖြစ်ပွားခဲ့ခြင်းဖြစ်သည်။

" ညက လေတော်တော်တိုက်တယ်။ အိပ်လို့တောင် မရတော့ဘူး။ လေကတော်တော်ကြမ်းတော့။ မိုးကလည်း တော်တော်ကောင်းတယ်" ဟု ရွှေပြည်သာမြို့နယ်တွင် ကုန်စုံဆိုင်ဖွင့်လှစ်ထားသူတစ်ဦးက ပြောကြားသည်။

အဆိုပါဖြစ်စဉ်နှင့် ပတ်သက်ပြီး ရွှေပြည်သာမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် အိမ်ထောင်စုများအား ဘေးလွတ်ရာသို့ ရွှေ့ပြောင်းပေးခြင်းလုပ်ငန်းများ ဆောင်ရွက်ခဲ့ကြောင်း သိရသည်။

အောက်တိုဘာ ၂၀ ရက်ညပိုင်းတွင် ရန်ကုန်တိုင်းဒေသကြီးအတွင်း ညလုံးပေါက်မိုးသည်းထန်စွာ ရွာသွန်းမှုများဖြစ်ပွားခဲ့ရာ မြို့နယ်အများအပြားတွင် ရေကြီးရေလျှံမှုများ ဖြစ်ပွားခဲ့ကြောင်း သိရသည်။

ရန်ကုန် - ပုသိမ်လမ်းမကြီးပေါ် ပန်တိုင်နဲ့ မဲဇလီကြားထဲက ကွေ့မှာ ခရီးသည်ယာဉ်တစ်စီး တိမ်းမှောက်မှုဖြစ်ပွား

21 .October .2024

ရန်ကုန် - ပုသိမ်လမ်းမကြီးပေါ် ပန်တိုင်နဲ့ မဲဇလီကြားထဲက ကွေ့မှာ ခရီးသည်ယာဉ်တစ်စီး တိမ်းမှောက်မှုဖြစ်ပွားပြီး ခရီးသည်အချို့ ဒဏ်ရာရရှိခဲ့ကြောင်း သိရသည်။

အောက်တိုဘာ ၂၁ ရက် နံနက်ပိုင်းတွင် ရန်ကုန်-ပုသိမ်လမ်းမကြီး၊ ပုသိမ်ဘက်မှ ရန်ကုန်ဘက်သို့ မောင်းနှင်လာသည့် ကံထူးအောင် ခရီးသည်တင်ယာဉ်မှာ ပန်တိုင်နှင့် မဲဇလီကြားတွင် တိမ်းမှောက်ခဲ့ခြင်းဖြစ်ကြောင်း သိရသည်။

“ပုသိမ်ကနေ ရန်ကုန်ကို မောင်းလာတဲ့ခရီးသည်တင်ကားပါ။ ပန်တိုင်နဲ့ မဲဇလီကြားထဲက ကွေ့မှာ မှောက်တာ။ ယာဉ်ပေါ်မှာ ခရီးသည်လေးဆယ်လောက်တော့ပါတယ်” ဟု အခင်းဖြစ်ရာသို့ ရောက်ရှိခဲ့သည့် ကရုဏာကမ်းလက်လူမှုကူညီကယ်ဆယ်ရေးပရဟိတအသင်းမှ တာဝန်ရှိသူတစ်ဦးက ပြောကြားသည်။

အဆိုပါယာဉ်တိမ်းမှောက်မှုကြောင့် ယာဉ်မောင်း၊ ယာဉ်နောက်လိုက်နှင့် ခရီးသည်အချို့ဒဏ်ရာရရှိခဲ့ပြီး ဒဏ်ရာများမှာ ပြင်းထန်ခြင်းမရှိကြောင်း သိရသည်။

အခင်းဖြစ်ပွားရာသို့ မီးသတ်တပ်ဖွဲ့နှင့် ယာဉ်ထိန်းရဲတပ်ဖွဲ့ဝင်များမှ လာရောက်ခဲ့ကြောင်း သိရသည်။