دقائق من ذهب(وطني)❤️

مسالخير حبايبنا دفعة 2025 ❤
كتير سألوني شو الشغلات يلي ممكن نساويها قبل ما نبلش درس
وحدة من هي الشغلات انك تطلع عأسئلة الدورات السابقة لعدة اسباب:
◀️مشان تعرف نمط الاسئلة بكل مادة قبل ما تبلش دراستها وتاخد فكرة عامة عن كيفية طرح السؤال مشان تعرف كيف تدرس وعشو تركز
◀️بتقيم حالك بالمادة قبل ما تدرسها مشان تعرف اذا اساسك جيد او ضعيف بهي المادة يعني فيه طلاب مشالله عليها ممكن تحل كذا سؤال بالمادة من معلوماتها السابقة وهيك بتطمن (يعني بتكسر رهبة الوطني شوي🤣)
◀️تتعرف عالفقرات المهمة يلي كل السنة عم يتم التركيز عليها مشان تعطيها الاهتمام الاكبر خلال دراستك

ولهيك حاول هالفترة تفتح ملفات اخر كم دورة وتاخد نظرة سريعة عالاسئلة وكمان بتعرف شمولية النوط لانه كل سؤال موضح اجابتو من النوطة 👇
https://t.me/golden_minutes/1335

✅دورة تشرين 2024 - الكتلة الأولى (هنا)
✅دورة تشرين 2024 _ الكتلة الثانية (هنا)
✅ دورة أيار 2024 - الكتلة الأولى (هنا)
✅ دورة أيار 2024 - الكتلة الثانية (هنا)
✅ دورة تشرين 2023 - الكتلة الأولى (هنا)
✅ دورة تشرين 2023 - الكتلة الثانية (هنا)
✅ دورة آذار 2023 - الكتلة الأولى (هنا)

#سوادس_الدفعة_2025
#سلسلة_التعريف_بالوطني

بداية بعتذر عن تقديم ايا خطة دراسية لجماعة هي السنة بالوقت الحالي....لسا بكير كتير هلا فيكم تاخدو بريك طويل اسمعوا فيه تجارب الي قبلكم وجمعو مصادركم وحددو نقاط الضعف وشو ناويين تعملو هي السنة(عمل، الماني، لغة طبية، تخطيط قلب، خطبة وزواج😁🙈)..رح انزل 3 خطط شاملة أن شالله لجميع فئات الطلاب.
حرام تطلع من السنة بس بالوطني....اللهم اني قد بلغت ❤️

#داخلية_صدرية ☑️🔥🔥☑️

المرجع كافي ووافي كامتحان
اما كفهم وترميم رح تتعذبو فيه كون مافي شرح زيادة ومكتفيين بذكر الأساس، خاصة طلاب حلب المنهاج مختصر كتير عندكن لهيك في عذاب بترميم المادة.

في امراض اخر القسم متل الاسبستوس وتغبر الرئة بتوجع الراس (قراءة سريعة لا تخافو منن)

تمييز الانصباب الرشحي عن النتحي #هام جدا ومن الأمور الغير مشروحة بالمرجع وسؤال فحص سنوي كمان
الربو COPD ذات رئة السل هدول اساس الصدرية وحلوين كتير بمعرفة الباثولوجي فين

نوطة الميدبوس الصدرية شملت كلشي حكيتو ابتداء من التشريح فيزيو باثولوجي.... بحيث نخلص المادة مرتاحين منها فهم وبصم مع تنويه عالهام الخارجي
خلي بالك هي المادة من أهم أساسات الإسعاف لجماعة الداخليات....والقلبية طبعا عماد الحالات بالمجمل.
من يريد التوسع مصادر التوسع ذكرتها بالبوستات السابقة.
الصدرية تحتاج 5 ايام
عدد الأسئلة 10ل 12 سؤال

بنصحك ببناء اساس قوي ومتين بهيك ايام حتى تدخل الاختصاص بقاعدة قوية 👌❤🤞

رح نمشي بمواد دموية كلية رثوية بإذن الله بين المسا وبكرا 👌

جهزو وراقكم .....😌🔥
بالتوفيق 🔥❤

#سوادس_الدفعة_2025
#سلسلة_التعريف_بالوطني
#داخلية_هضمية☑️🔥☑️
رح نزيد عدد البوستات اليومية مشان تتعرفو عالمواد اسرع ونبلش ننزل برنامج لتحسنو تبلشو فيه وتمشو عليه عالمرتاح ❤️
ماتاكلو هم الوقت لسا مريح ورح نسرع الوتيرة بناء على طلبكم  ☑️💚
الهضمية مرجع كافي وبدها مراجعة كون الأسئلة دقيقة شوي

التفريق بين الحبن الرشحي والنضحي مهم أيضا وسؤال امتحان تقريباً سنوي
حمى البحر المتوسط موضوع مشترك بين الجراحة والعامة والهضمية ادرسوه كمان

بعد هدول روحو عالجراحة العامة بتلاقو ترابط كتير كبير وعلمو الشي الخلافي بيناتن مشان ماتضيعو وقت بين الكتلتين على شي دارسينو بالباطنة
الهضمية تحتاج ١٠ ايام
الجراحة بدها ٨ ايام
بالنسبة للترميم المادة بصراحة ضخمة وعادة اسئلتها اقرب للبصم
نوط الميدبوس عملت نوطة للهضمية وشملنا فيها إضافات خارجية مهمة مع وضع كامل مرجع الهضمية دافيدسون ضمن النوطة مع الشوامل 🤞❤
إضافة إلى ترميم النوطة بفقرات هامشية للفهم وربط المعلومات والتعمق بفيزلوجيا المرض.
الجراحة العامة منحكي عليها مع الجراحات...
لأي سؤال ماتترددو وانا جاهز ❤️
رح اكتر منشورات هالفترة مشان الي حابب يزبط امورو ويبلش بالدراسة
عينكن عالقناة
بالتوفيق ❤❤❤

مسالخير حبايبنا دفعة ٢٠٢٥
خبرونا شو بتحبو ننشر هالفترة
واكتبولي بالتعليقات شو عندكم اسئلة ❤

#سوادس_الدفعة_2025
رح نبلش تعريف بالكتلة الاولى مادة مادة
رابط مهم اخر البوست
أمر أخر خطة الدراسة والدراسة فعليا لسا بكير عليهن تقريبا لنص الشهر حتى نبلش مع بعض بوضع خطة وونمشي خطوة خطوة كما العادة مع طلاب 23 24
#سلسلة_التعريف_بالوطني
#داخلية_قلبية ☑️🔥🔥🔥☑️
المادة الدسمة والمحببة واكتر وحدة عليها شغل 💪
مادة فهمية بالدرجة الأولى....البصم فيها مضيعة للوقت ومستحيل حرفيا 😁🤞
المرجع يحتاج لترميم وتفسير المبهم وإكمال النواقص الهامة
إضافة انو المادة لازم تندرس مع الأطفال خاصة الامراض الخلقية كون في ترابط كبير فيها
مع قسم الجراحة القلبية بتطلعو مسكرين المادة فهم وبصم 🤞🔥
طبعا هاد الشي رح ياكل جهد ووقت إضافي اذا حابين تتوسعو بالمادة من كذا مصدر سواء منهج الشام او امبوس وغيرن ....
طيب شو الحل دكتور بدنا شي شامل وفهمي ويغنينا عن ايا مصدر تاني ؟؟!!!
بحب خبركن انو هاد السؤال هو محور وهدف فريقنا #الميدبوس❤👍
تحضير نوط على مستوى رفيع بحيث نضمن أشمل مرجعية لدى الطالب (مرجع + توضحيات+ إضافات هامة+ شوامل واخيرا ماهو مهم من دورات الجامعات)

لهيك جبنالكن الحل مع نوطة الميدبوس داخلية قلبية....🤞❤
حوالي 150 صفحة تغنيك عن ايا مصدر اخر بإذن الله
موضحين الفقرات المهمة من الاقل أهمية من الفقرات الفهمية مشان تسهيل إعادة الدراسة 😉💙وهيك بتكونو ختمتو كلشي قلبية بالوطني حتى الي اساسو ضعيف فيها
مواضيع المادة والترميم اذا حبيت تدرس مرجع 👇👇❤❤
ممكن تقرأ سريعاً منهاج د ملحيس وماردنلي للمواضيع الدسمة متل القصور والACS (منهاج حلب)
الصمامات متوسطة الأهمية وناقصها كم شغلة كملن من المصادر الي ذكرناهن مسبقا ☑️
شوف اول بوست هنا عن الترميم
الضغط والتامور والشغاف جيدات بالمرجع
اضطراب النظم اقل أهمية (بس العلاج فين كتير مهم)
أطفال القلبية لا تستبحر فيه احفاظ الأساسيات ولا تدخل بالتفاصيل كتير.
الآفات الخلقية تدرس حصرا اطفال مع داخلية وهذا الأمر موجود بنوطة الاطفال ميدبوس.

المدة اللازمة لانهاء القلبية بكل مراجعها هي 12 - 15 يوم
عدد الأسئلة 12 ل15 سؤال
مع دورات الوطني بتطلعو خالصين المادة، مع قسم الأدوية الخاص فيها بتطلعو مسكرينها ☑️🔥
عملت قناة فيها مراجع مادة القلبية بالتفصيل (درستن بالحرف وكانو كنز عظيم بالنسبة إلي)
رابط القناة ...
https://t.me/CardiologywithNasser

وللفائدة اكتر رح اعمل كورس الكتروني قلبية احترافي عالمي اعتمادا على نوطة الفريق مع اهم الاضافات من المصادر المذكورة بالقناة إضافة تاسيس فيزلوجي سوية ومرضية وباثولوجي المادة.
على تطبيق SMLE قريبا.
لأي سؤال فيكن تتواصلو على حسابي الشخصي بوصف القناة❤

بالتوفيق ❤️❤️

#سوادس_الدفعة_2025
#البوست_الذهبي_السابع
بوست اخر عن أهمية حل الييورلد الي سبق وذكرت عنو ببوست سابق
الي سألو عن الفرق بين نوعي الستيبات
ماهو الفرق بين step 1و step 2؟🧐

🖊يظن البعض أن الstep1 هو عبارة عن القسم النظري للمواد المتعلقة بالطب (وليس الأمراض والعلاجات)
أي أن الستيب1 يركز على الكيمياء الحيوية، والتشريح المحض، وخواص الجراثيم

❌في الحقيقة هذا الظن خاطئ.

✅الصحيح: أن step 1 يركز على فهم المرض ككونه وحدة مستقلة (فمن يطلع على uworld الخاص بstep1 يجد أنه عبارة عن حالات مرضية ) . يجب عليك أن تفهم: كيف حصل المرض، أين حصل، ولماذا حصل، وكيف يعالج

📪أما الْstep 2 فهو يهدف إلى فهم "العرض" و فهم مشكلة المريض والتعامل معها وما هي الإجراءات المطلوبة في حال كنت في موقف مشابه

🤓مثال: مريض أتى بشكاية ألم صدري، ويعطيك معلومات توجهك نحو الخناق المستقر أو الاحتشاء
في سؤال الستيب 1 يسألك: مالذي حصل حتى وصلنا للاحتشاء (الجواب أن تراكم الكوليسترول في الدم يؤدي إلى تفاعلات في الأوعية الدموية، ثم تتضيق هذه الأوعية نتيجة تكاثر الخلايا البالعة والخلايا العضلية الملساء ، ثم تتشكل العصيدة الشريانية التي قد تتمزق ويتحول التضيق إلى انسداد ومنه تحصل أعراض الاحتشاء، ولعلاج المرض نحن بحاجة ‘إلى حل الخثرة أو تخفيف نقص الأوكسيجين على القلب ... الخ)

🔴في سؤال الستيب 2: مريض أتى بشكاية ألم صدري، صفاته كذا وكذا، ماهو الإجراء الأفضل الذي يجب فعله
وهنا يجب أن تفهم مقاربة العرض وأن تكون مستجمعا ومستحضرا البروتوكولات المعتمدة للقيام بأفضل مقاربة (بحيث تكون الكلفة الاقتصادية منخفضة، ولا يتم تفويت حالة طارئة ويموت المريض أو يتضرر نتيجة تفويت تشخيصه)
ويكون جواب السؤال السابق: تخطيط وصورة صدر

قناة جمعت فيها ملفات يوورلد وفيديوهات b&b مع ملفات ستيب 1&2
https://t.me/+9TbzF3LNPCZlNDg0

مسا الخير واهلاً وسهلاً بكل طلاب دفعتنا الجديدة ولكل الدفعات بالقناة ❤️❤️

هاد البوست موجه لدفعة 2025 بشكل خاص ومنتمنى يوصل للقلب متل مانو طالع من قلوبنا ❤️

لان نحنا كنا طلاب متلكن وحاسين فيكن وبنعرف حالة الضياع والتشتت بالمصادر اللي ممكن يصيب الطالب في بداية السنة .. وخاصة بعد الضجة الكبيرة حول دورة تشرين الاخيرة وتضارب كلام الطلاب ..

ولانه منآمن انو ضروري جدا خلق الثقة بين الطالب والمصدر اللي ليعتمده من دون شك أو توتر وهاد حقه الطبيعي انو يسأل ويتأكد بنفسه كمان قبل ما يبلش السنة ..

حبينا نشارككن بعض من تجارب طلاب الدفعة السابقة لحتى يوصلكن جزء من المحبة والتقدير اللي كان يوصلنا يوميا عالخاص ❤️

وان شاء الله بعد صدور النتائج رح نشارك معكن عشرات التجارب من طلاب دفعة 2024 الاوائل

ومتل ما قدرنا نبني علاقة أساسها الثقة والمحبة مع الطلاب اللي قبلكن ونتبادل شغفنا المشترك بالطب .. كمان منطمح انو نكوّن صلة قوية معكن .. وتأكدوا تماما انو رح نكون خير عون الكن .. ونساعدكن ونقدم النصيحة والدعم النفسي ايمت ما احتجتوه ..

واليوم لان أهم شي الشفافية بيناتنا رح نناقش بعض الاتهامات والادعاءات المغلوطة اللي صدرت من بعض الطلاب دون ذكر أسماء ..

بعض الاشاعات اتهمنا انو النوط تجارية وغير كافية للوطني متناسية كل التعب يلي انبذل فيها .. فرضا لنمشي بنفس فكرة صاحب الاشاعة .. اليوم اذا فعلا هاد هدفنا فينا ببساطة ننشر النوط فقط ونشيل المسؤولية عنا كل السنة .. وما نتابع مع حدا وما نخصص كل هالوقت عحساب حياتنا الشخصية لننزل بوستات يومية وملفات دورات مجانية ونضل متابعين عالخاص وعالغروب يوميا للمساعدة بكل حرص واهتمام عدا عن توفير نوط مجانية او هدايا لاكتر من 1500 طالب خلال السنة (بين نوط، اكواد، كورسات...) ومنعتبر هالشي واجب ومسؤولية علينا ..

نحنا هدفنا قبل ما نكون فريق للوطني .. انو نكون اخوة ونتحلى بالانسانية ونقدم المساعدة بعيدا عن اي اهداف ربحية واساسا اي مردود اغلبه بكون لتغطية التكاليف والتطوير وتوسيع العمل ومجرد تعويض بسيط ماحدا منتظره او عم يعيش منه ..

وخلال السنة رح تتأكدوا من هاد الموضوع وانشالله ما رح نقصر معكن بشي ❤️

عدا عن انو نوط الفريق هي مانها مجرد مصدر لاجتياز امتحان وبس وانما هدفها تبني اساس قوي وطبيب متكامل تراعي جميع المستويات ووفرنا الخيار للطالب ميد او ميني بحسب الوقت المتاح معه

والاسئلة الخارجية او الخلافية كانت خارجية عن جميع المصادر ومن حشو مقررات الجامعات وهاد الشي اشبه بعلم الغيب للتنبؤ فيه

وجود اسئلة خلافية هو امر عم يزيد دورة عن دورة وخاصة بالكتلة التانية وهالشي مانو ذنب لا على طالب ولا فريق واكيد نحن ضد هيك نمط من الاسئلة

ومع ذلك الشمولية كانت مقبولة وجيدة مو بالمبالغة والتهويل يلي حصل من البعض وملفات الحل خير دليل سبق ونشرنا ملف اول كتلة وغدا للتانية

ولأنه عم نقرا أفكاركن وبنعرف مخاوفكن صار لازم نختم البوست بالاجابة عهاد السؤال 😉

هل رح تكون شمولية النوط المحدثة أعلى ونضيف تحديثات وأفكار من مقرر دمشق والخ ....؟؟

الجواب : اي نعم 😌 ورح تكون النوط المحدثة خارقة جدا انشالله وبمستوى شمولية واضافات تتناسب مع اكبر عدد من الاسئلة الخلافية والصعبة اللي ممكن تجي بالامتحان طبعا الى جانب تأسيسكن خلال السنوات وترميم الثغرات خلال هالفترة

مع محاولة اختصار الحشو وتلخيص غير المهم مع التقيد بالمرجع ليكون بأفضل صورة ممكنة

وان شاء الله عملنا سنة عن سنة رح يكون افضل ونتعلم من اي اخطاء ونستفيد من اقتراحات الجميع

وبالختام .. نحنا مالنا بصدد الدفاع عن انفسنا ولا لنكسب اي حدا لصفنا.. لانو شغلنا بالاخر هو خدمة الكن وكل شخص بيختار المصدر يلي بريحه .. أعمالنا خلال السنة والجهد اللي رح تشوفوه من طرفنا كفيل باثبات هاد الشي انشالله وأكيد انتو بالاخير أصحاب الرأي ونحنا من هلأ لنهاية السنة انشالله ما رح تشوفو غير كل خير مننا تجاهكن ❤️

كل الحب من فريقكن ميدبوس ❤️❤️❤️❤️

وهي كمشة سكرينات شوفوهن وخلونا نبلش هالسنة الحلوة بكل طاقة وحماس 🔥🔥🔥

بعتذر من جماعة دفعة 2024 تاخرت بالرد لاني مسافر + جهازي عطل مع الاسف
رح رد عليكم بس شغلة يوم ان شالله
طلاب 2025 رح نكفي بالتعريف عن المواد والتأسيس بكرا ان شالله ورح نزل بوست عن الييورلد

دكاترتنا الغوالي من كافة الدفعات ❤️

سوادس الدفعة 2025 الجدد يلي انضموا عالقناة
كيفكن جميعا و كيف الحماس للسنة السادسة 💔🔥

اكيد اغلبكن لسا ما بلش دراسة وعم يراقب من بعيد (مع انو في قسم نيردات بلش بالسر 😶😂)

لهيك حبيت كون معكن بهالفيديو التعريفي يلي بحكي فيه نقاط و امور عن فريقنا بتهم كل طالب مقبل عالسنة السادسة:

⁉️مين هوي فريق الميدبوس و شو بميزو عن بقية المصادر؟

⁉️شو انواع نوط الميدبوس واعمالنا وشو الفروقات بيناتن؟

⁉️شو التحديثات و المفاجآت يلي مخبايينها لدفعة 2025؟

🛑بالنسبة #لدفعة_2024 اكيد ما نسيناكن و حكيت ببداية الفيديو عن #دورة_تشرين الاخيرة ويلي صار فيها و رايي بالاسئلة بعد اطلاعي عليها كلها

كتار منكن انظلمو بالاسئلة و اكيد بتستاهلو مستوى افضل يتناسب مع تعبكن و جهدكن ....بس متل ما بقولو الفحص حظ و نصيب و انشالله بتلاقو تعبكن قدامكن بس تداومو بالمشافي و تقدمو خدمة طبية حقيقية للمرضى❤️❤️

والضربة كانت جماعية على الكل وبالتالي الانخفاض بالمعدلات رح يكون لكامل الدفعة دون استثناء

⭐️ رح اترككن مع الفيديو و بالتوفيق جميعا❤️
https://www.youtube.com/watch?v=8L3vn9R3sp0

🔘 روابط مفيدة أخرى مفيدة

⭐️ فيديو تعريفي سابق شامل بالامتحان الوطني:
https://youtu.be/ucaJ_03kQo4?si=2id3krBLJx44iGlm

⭐️ كيفية وضع خطة دراسة للامتحان الوطني (دور اول و ثاني و ثالث):
https://youtu.be/s0qUzpm-7_8?si=5kydS_XaF4yAvtHC

فيديو هام للدكتور زين حول دورة تشرين والضجة حولها وشوية كلام ودعم للمرحلة القادمة

مع تعريف عن الوطني ومين هو ميدبوس واهدافه وقصة الفريق ليتعرفوا علينا اكتر السوادس يلي انضموا من جديد ❤️❤️

رابط اليوتيوب
https://www.youtube.com/watch?v=8L3vn9R3sp0

المرضان لا يتركو حالو بحجة المناعة بعد يومين رح تقويه
خدو أدوية مسكنة اضربوا ابر بحال في استطباب لااااا تبرك تتفرج على حالك مرضان وتقول يلا شو ما طلع معي بكرا منيح .....عبدهور حالك هيك وتضيع سنة من عمرك مشان فيروس يرى مجهريا فقط.👍❤

مرحبا ياجماعة ❤❤
الي متوتر كتير لدرجة ماعبيقدر يركز ويدرس وقلة تركيز واضحة عليه .....تابع التعليقات

+ ايا سؤال انا جاهز
كل التوفيق يارب ❤❤

#سوادس_الدفعة_2025
#البوست_الذهبي السادس
السلام عليكم ❤
حكيت كتيييير عن الييورلد واهميتها خلال السنوات السريرية رابعة خامسة سادسة
البعض مالو سمعان فين والبعض مالو عرفان كيف يمشي فين لهيك هاد البوست تعريفي شامل عنو
هو بنك أسئلة شامل
يشمل جميع المواد والتخصصات
السؤال فيه مختلف عن أسئلة امتحاناتنا....بكون عادة بصيغة قصة سريرية اجاك مريض بسوابق كذا وكذا بياخد أدوية كذا جاء اليوم بشكاية كذا ....بالفحص السريري والمخبري تبين لدى المريض وجود (وبكتبلك قيم التحاليل والموجودات)
البنك في قمة الفخامة والروعة
ايا حدا حابب يمشي ضمن أكاديمية موجهة بالتفكير والتحليل المنطقي في المقاربة السريرية نصيييييحة لوجه الله الييورلد هو اساسك لازم يكون مضمون

البنك عبارة عن نوعين ....basic و clinical بتوافق مع الستيب 1و2 على الترتيب وبتوافقو مع اول 3 سنين عنا بسوريا واخر 3 سنيين على الترتيب.

طبعا نحن بهمنا حاليا الستيب 2 وهو النوع السريري الي بتماشى مع السادسة.

بقادم البوستات رح احكي اكتر عن الفرق بين الستيب 1 و 1 بإذن الله.
إضافة رح نزل ملفات عن الترجمة الطبية ومصطلحاتها ان شالله.
الي عرفني عليها طبيب الله يجزيه الخير وكنت بوقتها سنة تالتة بدايتها ويومها حكيتو ونصحني فيها بشدة
طريقة التفصيل بالحالات شرحها الدكتور أحمد فران من كذا سنة ورح نزل رابط الفيديو الي بحب يشوفو ويعرف ترتيبة الأسئلة وليش مهمة كل هاد
https://www.facebook.com/share/p/gKAnfLDSPEbmKgLn/?mibextid=oFDknk
الفيديو قديم نعم بس المهم تعرفو الزبدة من أهمية حالات اليوورلد الي عبحكي عنها من دهر مضى 😁❤
قناة فيها ملفات UWORLD
https://t.me/+9TbzF3LNPCZlNDg0
كل التوفيق. ❤❤

تفريغ المعلومات الرئيسية بدورات جراحة الصدر طرطوس 22 23 24 و متفرقات
دعوة لصاحب الصور
الله يوفقكم جميعا
#نصائح_الختام_2024

مساء الخير 😌❤
#سوادس_الدفعة_2025
#البوست_الذهبي الخامس

بعيد وبكرر رسائل عن الترميم الدراسي

عبحاول قدر الامكان انزل رسائل بهالخصوص لكترة الأسئلة والاستفسارات
هاد بوست لجماعة #السريريات_الروابع_والخوامس 😁 حتى مايزعلو من جماعة basic الي شملناهن الرسالة الماضية
بالمرحلة السريرية يفضل يكون التركيز على السريريات سواء( العملي _ ستاجات ) و النظري ( مراجع و علامات ) لانو هالسنتين هنن الأساس ببناء المرحلة القادمة و عليهم بيرتكز الامتحان الوطني و الاختصاص لاحقا .
معلومات السنين ال٣ الأولى مو كلها بتهمك و الهام منها رح يتكرر بوقته و بس لزمتك معلومة بتبحث عنها في حال كانت مو موجودة لكن فكرة الترميم الشامل و اعادة كل المواد هي فكرة صعبة و رح تستنزف الكثيير من وقتك اللي بتحتاجه للمرحلة القادمة
⭕⭕ الأفضل و الأكثر توفرا و تنظيما هي مصادر دراسة #الستيبات كونها معدة بطريقة تغطي بتعتمد على ربط المواد مع بعضها و مع الحياة العملية. وطبعا حكينا عن مصادر تانية ورح انزل مراجع مهمة تانية لاحقا

دراسة الستيبات قائمة على ٣ أمور :
🔵 كتب ( أهمها ال first aid _ master board  the _وحكينا عنن سابقا

🔵 فيديوهات ( board a d beyond ) و واوزموزيز......كمان نزلت رابط قناة بالمحتوى

🔵 بنوك الاسئلة ( U word ) و امبوس.

الاسلس و الأكثر فائدة لحدا بدو بس ياخذ المعلومات و يرمم و ما بدو يقدم امتحانات الستيبات هنن الفيديوهات ( وسطيا المادة بين ٧ الى ١٠ ساعات ) و هنن خيار ممتاز للدراسة مع منهاج الجامعة للأساسي و بيعطوا اضافة كبيرة في حال الطالب قرأ كل المواد منها و خصوصا اذا ضاف عليهم شي ثاني (متل first aid ) او شوية اسئلة u word.

⭕⭕ من الخيارات الثانية للدراسة هنن الأطباء #المصريين و محاضراتن :
في عدد كبيير من الدكاترة المصريين صار عندن قنوات على اليوتيوب عم ينزلوا عليها متل د طارق عبد الحميد

⭕⭕ الفكرة الأخيرة :
السنة السادسة هي سنة واسعة و اذا حسيت انو في عندك مشاكل ببعض المواد فممكن ترمم فيها أيضا بدايتها
⭕⭕ باختصار :
الرابعة و الخامسة ركز على موادك بشكل اساسي و حاول تتوسع فيهم من مصادر خارجية بحيث تبني اساس علمي قوي للسادسة و للاختصاص .
بالبوست القادم رح احكي شوي عن الييورلد واتوسع فيه مع رابط فيديو لإحدى الأطباء الي كان الو فضل بتوجيهي لبنك اليوورلد...❤❤❤
كترت بوستات التعريف بس حط ببالك انو كل كلمة بكل بوست هو طريقة حياة نافعة من خبرة ونصائح الكبار.... بتحب ترسمها بشكل صحيح متل ماعبقلك بتحب تضيع السنة بدون فائدة
لأي سؤال ماتنسو حسابي الشخصي لايا شي ببالكن 😌❤
بالتوفيق ❤❤

السلام عليكم 😍😌❤
#محتوى_تطبيق_SMLE
#تعاريف_2025
رح نحكي عن اولى تحركاتنا وتحضيراتنا لهي السنة وهي حركت مميزة من العيار الثقيل 💪❤
شخص الو باع طويل مع الطلاب من السنة التحضيرية....10 سنين خبرة بالتدريس بأسلوبو المتميز.....شاف تطبيقنا الاولي وصار عندو ايمان فيه نعملو منصة شاملة متكاملة مايطلع الطالب من براتو......وعلى هاد الأساس تم الاتفاق 😎🔥❤
منرحب بعضو فريق SMLE الجديد
الدكتور مهند عجم ❤❤
🔵 مقيم طب أطفال سنة 3 بمشفى حلب الجامعي.

🔵 حاصل على شهادة International foundation of medicin (IFOM) بقسميه الbasic وال clinical ❤️.

🔵 اجتاز امتحان الدخول للاختصاص الطبي في الامارات (Emree).

🔵 حاصل على شهادة TOEFL.

🔵 مدرس لطلاب التحضيري بخبرة 10 سنوات.
كلمة من الدكتور لطلاب 2025:
بتشرف بالانضمام لكادر فريق SMLE لنضيف اجمل لمسة للعلم اعتماداً على مبادئ ال keywords المميزة لكل مرض حتى ماننساه مهما تراكمت علينا المعلومات
ونتعلّم حسب أحدث الguidelines والمراجع الحديثة بالطريقة التعليمية المميزة حسب الجامعات العالمية (اخدت الطريقة من كورسات موقع coursera العالمي بعد ما اخدت عدة كورسات و شهادات الحمدلله منهن)

شو رح يكون دورو ضمن التطبيق ؟؟؟؟!!!!
قلنا في بوست سابق انو التطبيق صار منصة طبية شاملة تقريبا....رح يضم اهم الكورسات المطلوبة والي بحتاجها الطالب....بحيث يلاقي كلشي بدو ياه ضمن نفس التطبيق.....
د مهند رح يكون معكم بعدة كورسات ومن العيار الثقيل...ويستلم مايلي
⭕⭕ السنة التحضيرية
⭕⭕ اللغة الطبية الانكليزية
⭕⭕ كورس التعديل في الامارات emree
⭕⭕ التوليد والنسائية ضمن مشروع الوطني

وهيك بكون خلصنا اول بوستات الشراكة وافصحنا عن جزء مهم من محتوى النسخة الحديثة من تطبيق SMLE....إلى بوست اخر واخبار جديدة أخرى

وشكرا 😁❤

cases for paces 2015g.pdf

جماعة #سوادس_الدفعة_2025
ملف ظريف بفيدكن بالستاجات باخذ القصة السريرية والفحص السريري
فيو مسائل سريرية حلوين كتير خفيف نضيف بلغة طبية مبسطة جدا
مصدر إضافي لبنك الأسئلة UWORLD
ذكرت بالبوستات السابقة رابط قناة عبجمع فيها كلشي مفيد عن الييورلد وفيديوهات B&B لما تضيعو فين هي رابطها....
https://t.me/+9TbzF3LNPCZlNDg0

رح نبدأ التعريف بالوطني بدءاً من البوست القادم ان شالله
بالتوفيق ❤❤

السلام عليكم 🤞❤
#سوادس_الدفعة_2025+ طلاب مرحلة basic
#البوست_الذهبي الرابع
#ماقبل_السريريات

مشان نشكل كل السنوات بدون ماحدا يزعل ....السنوات الاولى بوست الكم

بوست مخصص لجماعة السنوات الأولى basic + الي بدو يرمم بالسادسة خاصة والروابع والخوامس

ايام الجامعة وبحكم اني جديد بعالم الطب (مافي حدا من طرفي بالكلية ابدا) كنت دوما اسأل الي اكبر مني شو هي المواد الي بتهمني لبعدين؟؟؟ شو هنن أساسيات الطب؟؟
اكيد حوالي 40 مادة اول 3 سنين مو كلن مهمين لدرجة اهتم بالجميع بنفس الدرجة بالاخير مااعرف شو هو المهم والي ممكن يلزمني فيما بعد!!!

بعد أسئلة كتير واستفسارات رح اعطيكن الزبدة وبلا تتعذبو متلي 😁😢

مواد الطب الأساسية اللازمة للسريريات هي الفيزيو👈 باثو 👈أدوية
هدول ال3 ااذ درستن منيح رح تطلع باني قاعدة طبية بعقلك بشكل كتير كبير ومهم 😁👌💙
وتُدرس بنفس الترتيب 👍✌️يعني الي بدو يرمم يبلش فيزيو بعدها ينتقل باثو وهكذا 👌🤝

منجي عالمراجع 💪
الفيزيو عندكن العملاق غايتون والأفضل كوستانزو طبعا 🔥🔥 والي بدو مختصر اكتر كتاب BRS

بالنسبة للباثو في الباثوما المعروف عند الاغلب..... وفي Rubbins أوسع واشمل

بالنسبة للمداواة (علة المعظم😂💔)
الاهم مرجع لبينكوت.... البديل Katzung وفي عندكن الكابلان فارما....

منحكي عن باقي المواد.... تشريح نسج كيميا حيوية احياء دقيقة طبعا مواد حلوة ومهمة وبتجي درجة تانية بالاهمية حسب رأيي كل الي سألتن الأكبر مني ✌️

بالنسبة للتشريح ادرسو الشي المطلوب منكم والمكرر.... بتحبو تتوسعو لا حرج بس لا تغوصو فيه.... بكرا الي بدو بدخل جراحة يتوسع بشو مابدو.... شأد مادرست التشريح رح ينتسى بدون ممارسة صدقاً وبحكم الجميع 😅، بتحبو التوسع توسعو بس ركزو بالاخير الشي المطلوب منكم + فقرات محببة للدكتور
مراجع التشريح سنل، غرايز....

النسج مادة حلوة وبدخلك بجو الطب والأعضاء وهيك.... افضل مرجع على الإطلاق جانكويرا بدون منازع ✌️🔥

الباقي ادرسو من مقرراتكم + فقرات مهمة كافي برأيي وخدو الزبدة من كل مادة

بالاخير رح تطلعو ومعكم الأساسيات من كل مادة شأد مادرستوها والاستبحار بكون بعالم الاختصاص فيما بعد ✌️🔥💙

بتمنى تلاقو الفائدة والخلاصة الشافية من هالبوست.... ولأي سؤال جاهز ان شالله

اغلب المراجع الي ذكرتها بتشوفوها هون
https://t.me/Syrian_Arab_Republic_Library/801

ماتنسو هاشتاغ #سوادس_الدفعة_2025 رح تلاقو فيه كل كلشي نزلتو الكن

بالتوفيق يارب واذكرونا بدعوة ☺️💙🤗

كتاب يعادل الستيب 2
للدكتور كونراد فيشر الغني عن التعريف ❤️

السلام عليكم 🔥🔥🔥
#سوادس_الدفعة_2025
#البوست_الذهبي الثالث
أصدقائنا طلاب السادسة هلأ بلشت سنتكم والكل فايت متحمس وبدو يخربها دراسة وفهم وحالات وجولات مشافي وعمليات وقثطرةوتخطيط... الخ
بدايةً هدوا شوي، كتير ناس كانت هيك وأخر شي طلعت من السادسة متل ما فاتت فيها 😷
هذا البوست هو مجرد اقتراح خطة دراسية لحتى تبني معرفة طبية جيدة بالسادسة وترمم ما سبق بطريقة جيدة.... يعني بوست علمي بحت للناس يلي بدها تفهم وترمم وتكون مشروع طبيب/ة ناحج/ة 😌😍🔥
بعد هاد البوست رح نبدأ السلسلة التعريفية الخاصة بالوطني مادة مادة ان شالله ❤
واذا في شي ببالكم حابين نشرحو قبل انا جاهز
بداية لا تستعجلو لسا في وقت منيح للدراسة واختار المصدر لهيك استمتعوا بوقتكم واطلعو مشاوير ......😁💙

الخطة الأساسية الترميمية لكل طالب:

1. دراسة كتاب Master the Boards (MTB):
هو كتاب موجَّه لاجتياز امتحان المعادلة الأمريكية step 2، لا تغركم الكلمات المنمقة، الكتاب سهل الدراسة وحلو وسلس (سهل ممتنع)....
ليش اخترت هالكتاب بالذات؟
الكتاب سهل، بجاوبك عل الأسئلة المحورية (امتى أتوجه/أشك بالمرض؟ شو أفضل اختبار بدئي لازم تعملو؟ شو أدق اختبار لتشخيص المرض؟ شو خط العلاج الأول؟)، وهي المعلومات لازم تكون عندك عن كل مرض....
+ الكتاب معه فيديوهات شرح الو (شرح سريري أكثر من آليات مرضية) مشجعة جداً على الدراسة، وفي حال الواحد مالو خلق يقرأ الكتاب برأيي مشاهدة الفيديوهات تغني عن قسم كبير من الكتاب وهو شي كافي (أحسن ما تقول بدي التنين ومالك خلق أبداً، وما تمشي بشي بالأخير، شيء أفضل من لاشيء).. طبعاً الفيديوهات مع الكتاب بكون ممتاز وأفضل....وبديل فيديوز الكتاب اكيد فيديوز B&B ممتازين....شوف الرابط بالأسفل  
هاد المحور الأساسي بالدراسة إذا بتلحقوه بالذات بالداخلية بكون ممتاز جداً.
اديش لازم ادرس منه باليوم؟ 1-3 فيديوهات (واحد يكفي، 3 خارق، المادة كلها بتكون 10 فيديو مثلاً).

2. إذا بدك تطبق معلوماتك على حالات سريرية فعليك بأسئلة الستيب 2 (uworld)، هي دورات الفحص يلي حكينا عنو فوق، هي الأسئلة سريرية بحتة وورا كل حالة في حلها وشرحها...
أفضل مصدر للحالات السريرية هية هي الأسئلة، بتطبق المعلومات يلي تعلمتها بالMTB وبتعلمك كيف تفكر وكيف تتصرف وبتعطيك قاعدة نظرية قوية (فيها معلومات إضافية طبعاً).....
طيب أديش لازم حل منها؟ برأيي كل يوم 1-3 حالات فقط، لا تعمل سوبر مان وبدك تحل عشر حالات باليوم، رح تفرش صدقني ومارح تكمل... حالة باليوم كافية مع الاستمرارية لأشهر، خير الأعمال أدومها وإن قل.
ملاحظة: هي الأسئلة عددها يسعى للانهاية😂 يعني كل سنة بينزل بكل مادة بلاوي أسئلة، فلا تفكر أنك بدك تخلصها كلا، لا الفكرة بس تحل كل يوم عدد من الحالات إلى أن تضيق بك الدنيا والوطني يكبسك وقتا بتصير بتحل أسئلة وطني.

3. بحال مريت بأمراض/معلومات ما عرفت تفسيرها أو شرحها أو آلياتها (ورح تمر بكتير هيك مواقف، هاد الشي الطبيعي) راجع اي مصدر (أسوأ الأحوال ويكيبيديا بكفي، لا تعقدوها كتير)، في مصادر مفيدة بهالمجال أهمها first aid step 1/ غوغل

4.فيك تستعين بمصادر إلكترونية...منحكي عنها لاحقا

إذا طلعت بهالمصادر بتكون وحش وبترمم بلاوي وبتكون عم تبني حالك بشكل صح. والله يعطيك ألف عافية يارب 😌

بالنهاية.. الله يوفقكم يارب ويسرلكم ويبارك بأوقاتكم، نحن بحاجة لأطباء فهمانة ومنعول على كل دفعة تستفيد من يلي قبلها علمياً ومعلوماتياً لحتى تكون كل دفعة أحسن من يلي قبلها وهذا ما نتمناه 😇
روابط مهمة:
🔵🔵قناة فيها ملفات UWORLD وB&B
https://t.me/+9TbzF3LNPCZlNDg0

🔵🔵قناة عبنزل فيها فيديوهات ترجمة لغة طبية من اليوورلد وتقويتها اعتمادا على خبرة كبيرة وتكنيك لغوي مميز
https://t.me/Dr_Mohanad_Ajam_English

🔵🔵 رابط الكتاب MTB بالأسفل.....
ولا تنسونا من صالح دعائكم
لأي سؤال ماتنسو حسابي الشخصي جاهز للرد بايا وقت....
بالتوفيق ❤❤

بوست ثاني قوي جدا لطريقة من وجهة نظري هي الأفضل والي اتبعوها مئات الطلاب وكانت نقطة تحويل بمسرتهم الطبية بفضل الله وكرمه....وهي طريقة دراسة وترميم المواد بشكل اكاديمي وبناء على مراجع عالمية معتمدة لامتحانات التعديل في بريطانيا(mrcp) واميركا (ستيبات)
مع روابط ومراجع هاااااامة جدا 😌❤
بعد شوي ......⏳🔥⏳

#سوادس_الدفعة_2025
#البوست_الذهبي الثاني

كلام من إحدى الطلاب الأوائل الله يجزيه الخير واضافات من عندي يساعدكم بالدراسة ان شالله 🌸

🔵 بالنسبة لاختيار المصادر للفحص الوطني...
أولاً ادرس من مصدر أساسي ولكن لا تحصر نفسك بمصدر وحيد..... بالتالي بقدر ما بتنوع دراستك بقدر ما بتترسخ المواضيع المهمة وبتصير عندك روتينية... .
وهالنقطة اكثر ما تكون بمراحل الدراسة الباكرة متل هلأ يعني شهر تاسع عاشر ..
المصادر الأخرى المقترحة (المحاضرات الجامعية / UpToDate / ميدسكيب / كتب الستيبات /ايا مرجع / امبوس ...الخ) واكيد ما بقصد انو تقروا كلشي من المصادر الاضافية جنب الاساسي .. اكيد لا، هالشي بس للمواضيع المهمة او غير المفهومة بالمصدر الرئيسي الي اخترته.... تمام 😌👌❤️

🔵 بالنسبة للمصدر الأساسي للدراسة فمن جهتي وهاد رأي الاغلب بفضل مايتغير خلال السنة لعدة أسباب ومنها الناحية النفسية ومضيعة الوقت والذاكرة البصرية.... 🤙 اعتمدو ملخص كافي أو مرجع من هلأ وامشو عليه ولا تغيرو ولا تقارنو حالكم بغيركم لما تدخلو بدوامة هو عبدرس احسن مني وضميرو مرتاح اكتر.... 🤗و الذاكرة البصرية كتير مهمة..والاهم انك تراجع من محل ما درست، المرور عنفس الصفحات بيساعد الذاكرة على ترسيخها بشكل تلقائي.... وتلخيص بعض الأفكار أمر حلو ومفيد وبرسخ بالذهن!! والأهم من هيك تلخص فقرة طويلة ببعض العبارات والملاحظات التي تغني عن قراءة الفقرات الطويلة... وهيك بتكسب وقت لغير فقرات اهم بدها دراسة شاملة 👌ركزو هالشي ببالكن ولخصو الهام من كل بحث😅🔥
كم شغلة حابب احكي فين أيضا....
1- مهم كتير انك تلخص بنفسك وتعلم المعلومات الجديدة بالنسبة الك أو الي انت بتلاقيها مهمة، مو الي غيرك بيلاقيها جديدة أو مهمة بنظره... لهيك مو شي غريب انو الواحد ما يستفيد من ملخصات غيره رغم انها مفيدة أحياناً.

2- الوش الأول للدراسة هو الأهم، فبقدر ما بتدرس وبتفهم اول مرة حتسترجع هالمعلومات الي درستها وقت المراجعة وان كانت المراجعة قصيرة.. انت بس بتكون عم تنكش المعلومات الموجودة اصلا، وبكون صار عندك كم كبير من المعلومات التراكمية..
ركزو المعلومة الصح ولا تستبحرو كتير.... بكرا بالاختصاص الوقت بحر ماتخاف.... هلا وقت ترميم وبناء شخصية طبيب مع تحصيل أعلى علامة 😉😇

3 المراجعة من المصدر الي درسته حصراً او الملخص الي اشتغلته بايدك ... اما المراجعة من ملخص مختلف بصراحة مخوطرة وأذى دراسي بعتبرها... رح تمرق عالمعلومات كأنها جديدة وبتاخد معك وقت اكتر من مصدرها الأساسي الي دارسو!!! لهيك حكينا لخصو من البداية على مصدرك المعتمد وريح راسك من التغيير فيما بعد 🤗😊

الوطني بصم + فهم...

كل ماقريت وفهمان كتير هاد شي بتحول معك لبصم لاحقا....وبضل نسبة ١٠٪ هدول مالن حلة بدن بصم بصم بصم 😂🙄
لهيك تكرار قراءة المعلومة من كذا مصدر بعتبرو دماغنا موضوع تحويل من الفهم للبصم.... لهيك قلنا اول دور دور فهمي بحت وليس دور للبصم يااخوان 😉👌🌺

واخيرا انتو اعملو على عليكم و التوفيق من رب العالمين.. توكلو عليه وكترو الدعاء بدون ملل الكم ولرفقاتكم‌ ولكم بالمثل إن شاء الله🖤
حكينا السادسة طويلة وفيك تفتح معها مشروع لغة عمل ترميم ستيبات تخطيط قلب تقوية اللغة الطبية....
لا تغيرو مصدركم ولا تقارنو مع حدا بعيدها للمرة الالف 🤗👌هالشي ضرر وتأنيب ضمير وعذاب نفسي اكتر ما يكون إفادة!!! 😑
وماتنسو شغلة لا يكلف الله نفسا إلا وسعها😅🤗كل واحد فينا مختلف بمقدار تحمل وبذل الجهد والاستطاعة وبأسلوب مختلف عن التاني .
الالتزام بالبرنامج امر ضروري.... بس معلش لو صار اضطراب ببعض الايام لا حرج بتعوضوها بغير أيام مع شوية التزام تاني 🤗لا تخلو هالشي يأثر على نفسيتكم 😅اهم شي النفسية ياجماعة 😁😊.
لأي سؤال فيكن تتواصلو على حسابي الشخصي 🖤

بالتوفيق الكم جميعاً 💜💜

#مصادر_توسع_ترميم_وطني ❤❤
#سوادس_الدفعة_2025
#البوست_الذهبي الاول 🔥👌🔥
روابط قنوات مهمة نهاية البوست

كتار طلاب حابين يغتنمو السادسة بتوسيع معلوماتن بمختلف المواد ومن مصادر موثوقة عالمية
انا شخصيا بشجع هاد الشي كون سنة طويلة وضروري واحد يقوي لغتو الطبية والسريريات والمحاكمة العقلية🤞❤
بصراحة المصادر كتيرة ومتنوعة (كابلان فيرست ايد تورنتو MTB فيديوهاتB&B....)

رح اذكر مصادر باللغتين مع اني بشجع الإنكليزي لتقوي لغتك الطبية وبعدين منكفي بالبوست التاني

#المصدر_العربي هو منهاج الشام متوسعين فيه و غني عن التعريف

#المصدر_الانكلش هو الامبوس (مكتبة طبية ضخمة على شكل تطبيق عالموبايل/لابتوب فيو كلشي عن الطب وببلش بالتعريف بالمرض لمحات نسيجية فيزيولوجية وباثولوجي إلى الأعراض واستقصاءات وعلاج بالتفصيل وبشكل كتير مرتب وبتضمن صور شعاعية وترسمية وفيديوهات لفهم الفقرات👌❤️)

#مصدر_ثالث ممكن ترجعلو هو منهاج جامعتك لأي مادة أو فقرة انت بتحب تتوسع فيها وتذكر معلوماتها طبعا ااذا كنت مشتغل عليها كويس خلال سنواتك السابقة

طبعا برجع بعيد لا تدرسو وتضيفو كلشي لما تضيعو ويزيد عليكن حمل المراجعة خدو الأساسيات وبعدا ادخلو بالتفاصيل....

#روابط_هامة
ملفات مصدر العربي
https://t.me/NationalExamFiles/2665

قناة #خاصة عملتها انا جمعت فيها كلشي فيديوهات B&B مع روابط للستيبات وملفات مهمة عن هذا الامر....
https://t.me/+9TbzF3LNPCZlNDg0

بوست تاني مع روابط هامة للترميم والتأسيس بانتظاركم 😌🔥❤
بالتوفيق ❤

البوست المرغوب.....🔥🔥🔥
بوست رقم 1 قوي جدا عن مصادر التاسيس والترميم خلال السنة السادسة 😌❤
بعد شوي قيد تجهيزه 😍😍😍

#سلسلة_التعريف_بالوطني 🔥🔥🔥
#سوادس_الدفعة_2025
اول شي خلينا نكسر حاجز المصطلحات الخاصة بالوطني حتى مانضيع ونستلم الموضوع من أولو شوي شوي
كلام مهم بنهاية البوست المهتم بالمراجع الطبية😌🔥👌❤

بسم الله 🤗❤️

1- #الشوامل (وهي دورات الوطني)
تحل كاملاً مع دراسة كل مادة خلال السنة(فترة الستاجات) ومع كل إعادة ولا تهمل لانو الفحص طويل وبدو مرونة بالحل لهيك بدن تكرار......حطو براسكن ساعتين باليوم لحل اسئلة الشوامل أو بعد ماتخلص المادة بتفرم الاسئلة الخاصة فيها بيوم خاص
(اما البنوك غير مهمة فهي عمل طلابي... )

2-أسئلة #الجامعات صارت مهمة بالفترة الأخيرة اخر سنتين ويفضل الاطلاع عليها بعد قرار تغيير البنوك ورح يطول الشرح عنها لاحقا

3- #نماذج الوزارة شغلة 50 صفحة حلوين وسهلين ولازم ينحلو لاراحة الضمير بنزلو قبل الامتحان بفترة

4-#قبل_الفحص حط ببالك مراجعة مرتين ليلي بدو معدل فوق ال90 (بفترة الانقطاع تقريبا)

5-#المراجعة من المصدر الي اعتمدتو اول مرة ولا تغير إطلاقا بكل الأدوار مرجع يعني مرجع ميدبوس يعني ميدبوس✔️❤️مشان الذاكرة البصرية رح تفرق معك بورقة الامتحان جدا 😉👍👌

6-#اول دور هو دور الفهم والتلخيص (علمو الشائع من كل فقرة بعدا ادخلو بالتفاصيل) (لا تغلط وتبصم هلأ رح تندم لانو ببساطة قسم 100صفحة بجي منو ١٠ أسئلة لهيك البصم هون غلط وبنتسى) وهو الأطول وحل فين الشوامل(فترة الستاجات أو قبل بشهر من نهايتها ممتاز جدا) متل ماحكينا بحيث تلخص 90% من مواد الوطني  ☑️ جرعات أدوية فيزيو للكب ....👌ومقدمة تشريح صار يجي منها بالاونة الأخيرة متل الأذنية
اما تاني دور هو للبصم وهون بتحس حالك نسيان كلشي فيكن تقولو وبببلش الجد بمعدل ساعات بيصل ل١٢ ساعة باليوم .... علم الشغلات البصمية مشان قبل الفحص تعيدن...

7- #معدل الدراسة اليومي والي بفضلو هو 4 ساعات يوميا (مافي شي اسمو ساعة ساعتين والله لا حدا يخرط عليكن يعني لتحمي دماغك بدك ساعة يااخي 😂😁) وزيدن شوي شوي لفترة الانقطاع مع يوم الجمعة عطلة وفياش واطلعو غيرو جو معلش(اكتر سنة بطلع فيها مشاوير هي السادسة🤞😅) وكلو لازم يكون منظم مع ضرورة الدراسة اليومية بالمعدل المذكور  ☑️🤗وطبعا باقي اليوم متروك الك للستاج.لغة ألمانية، شغل،ترميم بعض المواد،أدوية، دورة ECG وغيرها....

8-#ركزو المهم + الشائع هدول مكررات دوما 👍☑️

9-فترة #الانقطاع = هي آخر 4 أشهر قبل الفحص يعني بالشهر 5/6 وهون لازم تكون ملخص كلشي وعرفان شو تدرس وشو للكب مشان ترتاح بالمراجعة اكتر

10 -حط #برنامج اسبوعي وعدد ايام معين لدراسة كل مادة (رح نبلش كيفية الدراسة وعدد أيامها ومصادرها وخطط دراسية لاحقا بحيث ماتاخد وقت على حساب غيرها ومع شو تندرس
علامة ال90 بدها خبرة التنقل بين الصفحات والمرور السريع عالشي المهم 🔥🔥🔥👌👌

11 -#هام_جدا في فترات بالسنة تعتبر فترة برود الهمة للطالب متل شهر رمضان أو الأعياد... هون  فيك تستبدل حل الدورات على الدراسة النظرية وتريح حالك (أو تعمل متلي عملت رمضان كلو عطلة ورواق وعبادة لاني بلشت وضغطت حالي قبلو بحيث وصلت لعندو تقريبا مخلص ٧٥٪ من المواد)

12-مافي شي اسمو #إعادة كاملة لكلشي قبل الامتحان راجع فقرات الشوامل الأكثر تكرارا مع الشوامل وحاج والجداول مهمة بكل المراجع ولا تهمل إطلاقا وسؤال فحص حتى يثبت العكس 👍👌

13 -البداية المفضلة هي داخليات ثم أطفال ثم جراحات وعيادات ونسائية (خلص قسم الباطنة مع أطفالها مع جراحتها متل هضمية باطنة أطفال جراحة عامة مع بعض لانو في ترابط كبير بيناتن)

14 -#المقابلات عيف يوم يومين قبل المقابلة ولا تعطيها اهتمام كبير تترك الوطني مشانها ☑️👌😅

15 - كل يوم #بتقرأ حالات سريرية من Uworld / Amboss تماشيا مع مادتك الي عبتدرسها اربع خمس حالات يوميا ممتازين عااالمدى الطويل ورح تفرق معك علميا، اهتميت بهاد الجانب ضمن تطبيق SMLE منحكي عليها لاحقا ❤️👌☑️

اخيرااااااااااا 🔥🔥 السنة طويلة واذا مانظمت وقتك فيها رح تبلش تحس بتأنيب الضمير والملل والخوف وهاد مو لصالحك ابدا

رح نكفي ان شالله بالتعريف عن كل مادة بالتفصيل ومنين ندرس وشو الاهم الي بستاهل ندرسو
الي عندو استفسار ممكن تتواصلوا معي على حسابي الشخصي ❤❤
رسالة ضخمة عرطلة من العيار الثقيل قادمة بخصوص اهم المراجع الطبية العالمية🔥🔥
انتظروني 😇💙
بالتوفيق 🔥🔥
رابط قناتي لمتابعة سلسلة التعريف
https://t.me/golden_minutes

هااام جدا 🔥😎
السلام عليكم 👋
تحياتنا للجميع
#بوست_مساعد_عينية
بما انو قرب موعد الامتحان للكتلة التانية..... فحبينا نوفر مادة العينية مجانا للجميع إن شاء الله ..... ومنذكركن بأنو العمل عبارة عن بنك دورات مادة العينية مع مقارنات شاملة للمنهاج🤩 .. يعني هوي تجميع لأفكار الدورات تبع الامتحان الوطني ضمن فقرات .... بحيث صار العمل هوي اصغر محتوى مكثف لمادة العينية وبيحتوي على أهم الافكار الامتحانية..بحيث اذا درستوه بتكونو قادرين بإذن الله على حل جميع دورات العينية الواردة بالامتحان الوطني تقريبا...لكن ننصح أي طالب بعد الانتهاء من دراسة البنك انو يرجع ويحل الدورات لحتى يتعلم على النمط كسؤال وجواب وليس فقط فقرات هامة 👌🤓
منتمنى تشاركو العمل مع زملاءكن حتى الكل يستفيد من هاد الموضوع 🔥😍
أي استفسار نحنا جاهزين ولمعلومات تفصيلية أكتر بتلاقوها ببداية القناة 🌼
رابط المعرف للتواصل مع الفريق @Teameyes

الرابط المجاني للانضمام للمحتوى
https://t.me/+hSQSki38wUc5OGM0

لا تنسونا من دعائكم جزاكم الله كل خير.
بالتوفيق للجميع يا رب 💜

وكلمة مني....فيكم تستفيدو من بنك العينية المرفق بكورس العينية على تطبيق SMLE, اضافة بتوفر بقية محتوى الكتلة الأولى عليه.

#سوادس_الدفعة_2025
السلام عليكم 🔥❤️
الف مبروك انتهاء امتحاناتكم للسنة الخامسة ودخولكن المحطة الأخيرة وهي السنة السادسة الوطني 😇🤞

بداية معكن زميلكن ناصر جزه را.
مقيم داخلية قلبية بمشفى حلب الجامعي على مشارف السنة الثالثة
من مؤسسي فريق الميدبوس للسنة السادسة
مؤسس فريق SMLE الشامل لطلبة الطب
ومن اوائل الدفعة الحمدلله والثالث عالدفعة بالوطني ❤️

هي القناة صار عمرها حوالي سنتين تم انشائها بهدف مساعدة طلاب الوطني خطوة بخطوة والرد على استفساراتكم واسئلتكم بكل مايتعلق بالوطني والسريريات او بسنوات الbasic

رح تشوفو كتير منشورات بهي القناة رح ارجع عيد صياغتها من جديد مع نصائح جديدة بتهم طالب الوطني خاصة واكون معكن بمنشورات تعريفية عن الوطني ونفصل بالمواد وخطط دراسية متعددة مع طرق تنظيم الوقت واستثمار السنة بأقصى فائدة منها باقل جهد وتأنيب ضمير 👌😉

المهم هلا ريحو حالكن شوي لسا بكير نحكي بشكل مفصل ....
الوطني سنة حاسمة وطوييييييلة وبدها شوية تنظيم وقت حتى نغتنمها بالترميم والعمل الخارجي واللغة والخطبة والزواج وغيرها 😁😍😌

هاد المنشور تمهيدي تسلو فيه لوقت نجهز فيديو تعريفي عن السادسة وتفصيلاتها

⭕⭕ كيفية تحصيل علامة ال90 واكن من اوائل الدفعة ❤️🔥🔥

1- الدراسة أول بأول وبشكل يومي حتى لو ساعة واحدة معلش
اعتمد مصدرك الأساسي واحذف الحشو وضيف عليه ماهو مهم من مصادر الطب العالمية (رح نذكرها بمنشورات قادمة)
رمم المواد الضعيف فيها من هيك مصادر وتوسع بالفقرات الغامضة لا حرج (سنة الفصفصة للمواد 😅😇😍❤️)

2- مراجعة سريعة بشكل أسبوعي او بعد نهاية كل المادة

3- اختبار الذات (يوميا)بما تم دراسته سواء من Uworld وغيره من بنوك الاسئلة العالمية

4- باتباع مع سبق فالمراجعة النهائية (دور تاني بالاشهر قبل الامتحان)رح تكون بأبسط شكل وأقل جهد ووقت والامور رح ترتبط ببعضها تلقائياً
5-استعينو ببعض الزملاء الي عندن تجربة سابقة ناجحة وبالقنوات الخاصة بالوطني المقدمة محفزات للدراسة وبعدو عن الاشخاص المثبطين والقنوات الي بتنزل أسئلة من كوكب زحل 😁😅👌

6-ماسبق مو يعني تخلي يومك ٢٤ ساعة دراسة!!!! لا ابدا يااخي.....نظم وقتك وهاد المهم ....روح مشاوير شوف رفقاتك غير جو اشتغل بعمل ما.. قوي لغتك الطبية, قوي حالك بقراءة التخطيط والاشعة، الماني...ساوي سهرات مع الشباب 😌😊 ساوي الي بدك ياه بس بعقلانية وبدون ما تهدر شي على حساب شي تاني

دراسة يومية ساعتين تلاتة احسن من ١٠ ساعات يومين بالأسبوع.....قليل مستمر خير من كثير متقطع

7- ...هدي امورك واعصابك ....لا تقول لسا بكير بكرا ببلش....بلش بكير وبرواق.. ايام بتمضى خلي تمضى وانت مرتاح البال وباعصاب هادئة وبضمير راضي عن تصرفاتك خلال السنة

بدي ابلش بسلسلة تعريفية عن مواد الوطني ومصادر الترميم والدراسة وأهمية كل مادة مقارنة بغيرها 👌👍❤️
عينكن عالقناة ولاي سؤال انا بالخدمة على حسابي الشخصي
https://t.me/golden_minutes

بالتوفيق للجميع ❤️❤️