«Дин насиҳатдур»

Бахтиёр эканингни кўрсатишга, исботлашга уринган кунинг бахтсизлик кунингдир.
Said Komil

@din_nasixatdur

Ўлим тугата олмайдиган алоқаларни хиёнат тугатади. Бу ҳаётда кишилар фақатгина ажралиш учун учрашишади. Ҳаётнинг энг гўзал сифати, у ҳеч нарсага қарамасдан давом этади!

@din_nasixatdur

РАҲМАТ
Раҳматни яратди. Уни юз қисмга бўлди. Шу юз қисмдан бир қисмини ерга туширди.
Ердаги махлуқотлар, инсонлар, жинлар, ҳайвонлар ана шу бир қисм билан бир бирига раҳм қилади.
Тўқсон тўққиз қисмини Ўзининг ҳузурида олиб қолди. Қиёмат куни бандаларига ана шу тўқсон тўққиз қисми ила раҳм қилади....!

Роббимиз ҳақида гапирдим дўстлар....!
Abdulqodir Samarqandiy

@din_nasixatdur

Муҳаббат_бу..
Урва ибн Масъуд Сақафий Ҳудайбиядан қайтгач, шерикларига деди: "Эй қавм! Аллоҳга қасамки, Кисро, Қайсар ва Нажоший каби кўп подшоҳлар ҳузурида бўлдим. Аммо Аллоҳга қасамки, Муҳаммаднинг асҳоби Муҳаммадни ҳурматлаганидек бирор подшоҳни асҳоби ҳурматлаганини кўрмадим. Аллоҳга қасамки, у балғам туфласа-ю, бир кишининг кафтига тушса, балғам билан юзи-ю терисини ишқарди. Агар буйруқ қилса, уни бажаришга шошиб қолишарди. Таҳорат олса, таҳорат сувини талашиб, уришиб кетаёзардилар. Агар гапирса унинг олдида овозларини пасайтирардилар. Ҳурматлаганлари учун юзига тик қарамасдилар".

Ибн Қаййим, "Зодул маъод"

@din_nasixatdur

«Намознинг маъноси, Аллоҳ Таолога тасбеҳ, таъзим ва шукр қилишликдир. Яъни, ЖАЛОЛига қараб сўз ва феъл билан «СУБҲАНАЛЛОҲ» дея тақдис этмоқ.
Ҳам КАМОЛига қараб лафзан ва амалан «АЛЛОҲУ АКБАР» дея таъзим қилмоқ.
Ҳам ЖАМОЛига қараб қалбан, лисонан ва баданан «АЛҲАМДУЛИЛЛАҲ» деб шукр этмоқдир.

Демак тасбеҳ, такбир ва ҳамд, намознинг данаклари ҳукмидадир. Шундандирки, намознинг ҳаракатлари ва зикрларида шу уч нарса, унинг ҳар рукнларида бўлади. Ҳам шунинг учун, намоздан сўнг, намознинг маъносини таъкидлаш ва кучайтириш учун, мана шу муборак калималар, ўттиз уч мартадан такрорланади. Намознинг маъноси мана шу лўнда хулосалар билан таъкидланади.»

«Намознинг ҳикматлари» китобидан.
@din_nasixatdur

ЎҒЛИМНИНГ ЎЛИШИНИ ИСТАР ЭДИМ!
Муҳаммад ибн Халаф айтади:
“Иброҳим Ҳарбийнинг ўн бир ёшли ўғли бор эди. Иброҳим унга қуръонни ёдлатди, фиқҳни ўргатди. Сўнгра сал вақт ўтиб ўғли вафот қилди. Мен унга таъзия изҳор қилиш учун келдим. Иброҳим менга деди:
-Ўғлимнинг вафот қилишини истаган эдим!
Мен дедим:
-Эй Абу Исҳоқ! Сен дунё олими ва мусулмонлар фақиҳи бўлсанг. Қуръонни ёдлаган, фиқҳни ўрганган боланг ҳақида ҳам шундай дейсанми?!
Иброҳим деди:
-Ҳа! Туш кўрибман. Тушимда қиёмат қоим бўлган эмиш. Бир қанча болачалар қўлларида сув идиши билан кишиларга сув тарқатиб юришибди. Жуда ҳам иссиқ эди. Ўша болалардан бирига дедим:
-Менга ҳам сув бер!
Болача деди:
-Сиз менинг отам эмассиз!
Мен сўрадим:
-Сизлар кимсизлар?
Болача деди:
-Бизлар дунёда эрта вафот қилган болалармиз. Оталаримиз ортда қолишди. Биз уларни бу ерда кутиб олиб сув бераяпмиз!
Мен шунинг учун ўғлимнинг вафот қилишини истаганман!”.

Аллоҳ бандаларини гоҳида мусибатга ҳозирлайди. Бу ҳам Унинг раҳматидандир. Ана шунда Аллоҳнинг қадари ва мусибатлари бандаларининг елкасига тушганида улар ўзларида сабр ва матонат топишади. Оддий кечаси кўрган тушлари билан, масжидда эшитган бир мавъизалари билан ҳаётга бўлган қарашлари ўзгаради. Кўчада бир воқеани кўриб ҳаётлари тубдан ўзгаради.
Бир дўстим айтиб берган эди. У ошқозонидан шикоят қилиб шифохонага борибди. Ўзича: “Бало ҳам чўзилиб кетди, эй Роббим, қачонганча давом этади?!”, дебди. Сўнгра у ётган хонага кимёвий муолажа бериш учун бир беморни олиб киришибди. Уни вакцина кўринишида беришибди. Беморнинг ранги ўзгариб икки соатдан кейин ота-онаси кўтариб олиб чиқиб кетибди. Дўстим ўз ҳолатига шукр қилиб Аллоҳга ҳамд айтибди. Аллоҳ юборган рисолани фаҳмлабди. Бу дарс унинг ёдида қолибди. “Унинг дарди қаерда-ю, менинг дардим қаерда. Қорнимда озгина оғриқ бор эди. Бу оғриқ кимёвий муолажа олдида ҳеч нарса экан!”, деб ўйлабди.

Иброҳим Ҳарбий роҳимаҳуллоҳ ўғлига ўлимни орзу қиладиган даражада содда бўлмаган. Аммо Аллоҳ таоло унга қадар воқе бўлганида собит туришга ундайдиган рисолани туш кўринишида юборган.
Иброҳим Ҳарбий роҳимаҳуллоҳ замонасининг энг фақиҳ олимларидан эди. Буюк луғат олими Саълаб айтади: “Мен Иброҳим Ҳарбийни эллик йилдан бери луғат ва наҳв мажлисларида кўраман!”.
Абу Бакр Хатиб айтади:
“Иброҳим Ҳарбий илмда имом эди, зоҳидликда пешво эди, аҳкомларни кўра билар эди, ҳадисларни ёд билар эди, иллатли ҳадисларни ажрата билар эди, адабиётда даҳо эди, кўп луғат соҳиби эди. Ғариб ҳадислар ҳақида ва бошқа мавзуларда китоблари ҳам бор. Асли Марвдан!”.

Аллоҳнинг рисолаларига бепарво бўлманг. Аллоҳ гуноҳ қилганингизда қалбингизни безовта қилиб Ўзига қайтармоқчи бўлади. Олдингиздан жаноза ўтади, қайсидир оятни эшитасиз, уни худди ўзингизга нозил бўлгандек ҳис қиласиз, бир муносабат билан қайсидир ҳадисни эшитасиз, қайсидир беморни кўриб ўзингизни заифлигингизни ҳис қиласиз, дўстингиз хиёнат қилганида Аллоҳдан ўзга омонлик йўқлигини биласиз, суюкли инсонингиз ташлаб кетганида ҳамма ташлаб кетса ҳам Унинг сизни ташламаслигига ишонасиз. Булар аслида рисолалардир...
Аллоҳнинг олдида нақадар фақирсиз!
Аллоҳ нақадар сиздан беҳожат!
Аммо сизни юқоридаги каби рисолалар билан Ўзига қайтармоқчи бўлади!
Мана шу бахт!
©Abdulqodir Polvonov
@din_nasixatdur

ЧИРАНМАНГ!
Оддий ҳаёт кечиринг. Тиришиб нима қиласиз?!
Кўрпангизга қараб оёқ узатинг. Киши кучи етмайдиган нарсага қўл чўзса яланғоч кўринади.
Бугун кўпчилик инсонлар ҳашамат ортидан югуриб ўзларини қийнашмоқда.
Ўз пулингизга олинган эски телефон қарзга олинган янги телефондан яхшироқ.
Сизни қарзга кўмадиган ҳашаматли тўйдан оддий ва камчиқим ўтказилган, сизни қарздор қилмайдиган тўй яхшироқ.
Қарзга ботиб подшоҳлардек тўй қилсангиз ҳам одамлар бир кунгина тўйингизни мақташади. Кейин тамом. Бўйнингизга жилов янглиғ илинган қарзни тўлаб юраверасиз!
Қарз олиб сафарга чиқманг. Майли сизни "бечора сафарга ҳам чиқолмайди" десинлар. Баъзилар турли умрага олиб борадиган фирмалар ҳисобидан, қарзга умрага кетишаяпти. Бир неча ой ўтиб ҳам қарзни бермасдан юрганлар бор. Ҳақдорлар сўкиб юрибди. Шу керакми сизга?!
Қарзга кийим олиб кийманг. Майли сизни "бечора янги кийим ҳам сотиб ололмайди" десинлар.
Ёдингиздан чиқмасин, зўрма-зўракилик эшикдан кириб келса хотиржамлик деразадан чиқиб кетади!
©Abdulqodir Polvonov

@din_nasixatdur

Шайх Муҳаммад Арифий айтадилар;
"Тахорат қиласан, исроф қиласан.
Ҳижоб ўрайсану, атир сепасан.
Таҳажжуд ўқийсану, биродаринг билан аразласан.
Рўза тутасану, ғийбат қиласан.
Садақа қиласану, миннат қиласан.
Кўзингни оч!!
Солиҳ амалларингни тешик халтага солма"

@din_nasixatdur

СЕВАДИ...
Агар мендан сўрасангиз:
- Муҳаббатдаги энг гўзал нарса нима?
Мен айтаманки:
- Омонлик ва хотиржамлик!

Бунда кимдир сизнинг қўлингиздан эмас, қалбингиздан тутганини ҳис қиласиз...
Омонлик бу- бировга сизни хароб қиладиган имконни берасиз, аммо бутун борлиғингиз билан у сизга ҳатто гул ҳам отмаслигига ишонасиз...
Ораларингда нима бўлмасин, у сизга оддий шабада ҳам озор етказишини истамайди...
Ораларингда бўлиб ўтган уруш-жанжалларга қарамай унинг олдида қадрли бўлиб қолаверасиз...
Омонлик дегани кимнидир ўзингиздаги энг чуқур нуқта томон бошлайсиз. Худди китобнинг саҳифаси каби унга очиласиз. У худди кўзларини эҳтиёт қилгани каби сизнинг сирларингизни сақлашига ишонасиз...
Омонлик дегани бу кимгадир заиф нуқтангизни кўрсатасиз. Ҳаётда ўзингизни турли зарбалардан ҳимоя қилиш учун кийган совутингизни унинг олдида ечасиз. Сўнг унинг ўша заиф нуқтангизни босмаслигига, жароҳатингизга бармоғини суқмаслигига ишонасиз...
Омонлик дегани бу очилиш. Очилган кишингиз сизнинг бу очилган жойингизни сизга қарши ишлатмаслигидир. Унга ишониб қўлингизни берасиз. Қўлингизни қўйиб юбормаслигига бутун борлиғингиз билан ишонасиз. У билан гарлашганда худди ўзингиз билан гаплашгандек ҳис қиласиз ўзингизни. Унга ўзингизни оқлашга мажбур бўлмайсиз, масалани унга тушунтиришга мажбурият ҳис қилмайсиз. Чунки у сизни тўғри тушунишига ишонасиз...
Гарчи сизнинг таъбирингиз сизга хиёнат қилсада, унинг фаҳми хиёнат қилмайди. Сўзларингиз хато кетсада, унинг нияти хато кетмайди. Унинг елкасига бош қўйиб хижолатсиз йиғлай оласиз. Ўзингизни заиф сезмайсиз. Синиб парчаланган қалбингизни унга топширасиз. У қалбингизни даволашига инонасиз...
Туйғуларингиз қандай бўлса шундайлигича яшайсиз. Ташвишланасиз, ғазабланасиз, рашк қиласиз, ўзингиз билан ўзингиз овора бўлиб қоласиз. Аммо буларнинг барига қарамай у сизни севишига ишонасиз!

@din_nasixatdur

ЖИННИМИСАН ЖУНАЙД?!
(Фақат Сенга ибодат қилиб Сендан ёрдам сўраймиз)
Жунайд Бағдодий роҳимаҳуллоҳ тушида нидо эшитди:
- Тур эй Жунайд! Бандамга ёрдам бер!
Жунайд сўради:
- У бандангни қаердан топаман эй Роббим?!
Яна нидо эшитди:
- Уловингни мин. У қаерда тўхтаса уни ўша ердан топасан!

Жунайд Бағдодий таҳорат қилиб уловини миниб йўлга чиқди. Вақт бомдодга яқинлашиб қолган эди. Бағдод кўчаларини айланиб-айланиб улов бир масжиднинг олдида тўхтади.
Жунайд ҳалиги кишини масжид ичида бўлса керак деб ичкарига кирди. Ичкарида бир аъробий Аллоҳга йиғлаб илтижо қилар, ташвишларини аритишини, хатоларини кечиришини сўрар эди. Жунайд қидириб юрган кишиси шу эканлигини билди ва юз динор чиқариб унга берди. Ҳалиги аъробий пулни олиб йиғлаб яна Аллоҳга ҳамдлар айтди. Сўнгра Жунайдга раҳмат ҳам айтмасдан, орқасига қарамасдан кетиб юборди.
Жунайд унга деди:
- Ҳой биродарим! Агар пул етмаса яна кел. Мен Бағдодда бўламан. Мени Жунайд Бағдодий дейишади. Кишиларга айтсанг топиб беришади!
У орқасига ўгирилиб деди:
- Эй Жунайд! Сен жиннимисан?!
- Нега энди жинни бўлар эканман?!
- Мен учун сени уйқудан уйғотиб менинг эҳтиёжимга сени мусаххар қилган, Бағдод кўчаларида сени ортимдан югуртирган Зотни қўйиб сенга дардимни айтайми?!

Abdulqodir Polvonov
@din_nasixatdur

Олий ва онгли фиқҳ будир:
"Бизнинг наздимизда илм - фиқҳда рухсат топишдир. Йўлни тор олишни ҳамма ҳам эплайверади".

Суфён Саврий раҳимаҳуллоҳ

@din_nasixatdur

Ҳаммамиз кўринганимиздан ёмонроқмиз. Аммо бу биз учун Аллоҳнинг пардасидир.
Бунинг исми сатр...

Аллоҳим! Биздан сатрингни кўтарма. Акс ҳолда шарманда бўламиз ё Роббим!

AbdulqodirPolvonov
@din_nasixatdur

Эҳтиёт бўлинг!
Қалбингиз тубига етиб боришга ҳамма ҳам муносиб эмас. Биргина хатокор зиёратчи кириб қалбингизни вайрон қилиши мумкин!

©Abdulqodir Polvonov
@din_nasixatdur

ТАФАККУР
Агар болангизга ҳалол-ҳаромни, дунё-охиратни ўргатмас экансиз, истаганингизни ўргатаверинг. Улар барибир одам бўлишмайди!

Мени масжидга кириб ибодат қилаверишимни, сиёсатни тарк қилишимни исташади. Мактабда эса фарзандимга исломни ёмон кўрсатишади. Натижада фарзандим масжидни устимга ағдаради!

Бу умматнинг кучи тўп, танк ёки милтиқда эмас, балки тақводор мўъмин ёшларидадир!

Ҳаёт иймон ва курашдан иборатдир. Шу иккиси билан сифатланганларга ғалаба ёр бўлади!

Қуръон харита, ақл ва компасдир. Иймон эса унинг йўлини ёритувчи чироқдир!

Сен араб, сен турк деяверсак араб ҳам, турк ҳам қолмайди. Чаноққалъада бирлашганимиз каби бирлашсак инглиз ҳам, француз ҳам қолмайди!

Менга қулоқ солинг, агар ислом фақатгина намоз, Қуръон қироати ва тасбиҳдан иборат бўлганида Абу Айюб Ансорийнинг қабри Истанбулда бўлмас эди!

Сионизм бу тимсоҳ. Юқори жағи Америка, пастки жағи Европа, ақли Исроил, танаси эса ичимиздан туриб уларга ёрдамлашаётган хоинлардир!

Бир ярим миллиард мусулмон саккиз миллионли яҳудийларни йўқотиш учун абобил қушларини кутаяпти. Аллоҳга қасамки, агар абобил қушлари келса бизни тошбўрон қилар эди!

Қизил денгиз Фиръавннинг қабри бўлгани каби Ўрта ер денгизи ҳам Исроилнинг қабри бўлади!

Америка долларини Ислом динорига алмаштириш халқаро кучлар мезонида атом бомбасини ихтиро қилишдан ҳам муҳимроқ ва таъсирчанроқдир!

Зийрак мусулмон ҳодисаларга эмас, улар ортида мақсад қилинаётган фитналарга назар солади!

Сиёсатга қизиқмайдиган мусулмонни исломга қизиқмайдиган сиёсатчи бошқаради!

Нажмиддин Эрбакан
Abdulqodir Polvonov

@din_nasixatdur

АЛИ ТАНТОВИЙ ДУРДОНАЛАРИДАН

Модомики овозим фойда берар экан, қамчимни ишлатмайман. Модомики жим туришим фойда берар экан, овозимни ишлатмайман.

Қизиқ! Садақа қилаётганимизда чўнтагимиздаги энг майда пулни қидирамиз, Аллоҳдан сўраганимизда эса Фирдавс жаннатини сўраймиз.

Хурсанд бўлганингда энг яхши кўрган инсонингга боғланасан. Хафа бўлганингда эса сени энг кўп яхши кўрадиган кишига боғланасан. Икки ҳолатда ҳам улар битта инсон бўлиши қандай гўзал!

Узр сўраганларнинг барчаси ҳам хатокор ёки заиф бўлишмайди. Узр сўраш нодир сифат бўлиб фақат вафоли инсонлардагина топилади.

Агар ватан қаҳрамонлари қабрда бўлса, мардлари қамоқда бўлса, ўғрилари саройда бўлса дунё билан хайрлашавер!

Масжид имоми хато қилганида унинг хатосини тузатадиган киши топилмай, хонанда куйлаганида у билан қўшилиб охиригача куйлайдиганларнинг топилиши ажиб ишдир!

Ғарб даҳо эмас. Биз ҳам аҳмоқ эмасмиз. Улар фақатгина омадсиз инсонни омадга эришгунга қадар қўллашади. Биз эса омадли инсонга қарши токи у муваффақиятни бой бергунича курашамиз!

Олдига кир бўлиб келиб покиза бўлиб қайтадиган , заиф бўлиб келиб кучли бўлиб қайтадиган дўстингнинг борлиги гўзалдир!

@din_nasixatdur

Танамиздаги энг катта мўъжизалардан

Яратган Эгамнинг танамизда яратган энг катта мўъжизалардан бири ДНК бўлса, бири бармоғимиз учларидир.

Одам алайҳиссаломдан бошлаб бугунги кунгача сайёрамизда яшаб ўтган ва яшаётган инсонлардан бирортасининг ДНКси ва бармоқ учлари сизникига ёки меникига ўхшамайди.

Фараз қилайлик, бирорта моҳир рассом ёки дизайнерга 20 та одамнинг бармоқ изларини чизишни топширсак, у берилган вазифанинг мураккаблигидан ҳеч қачон бу ишни уддалай олмайди.

Шунинг учун ҳам жиноятчини аниқлашда бармоқ изларидан фойдаланилади.

Сиз ўзига хос, бошқа ҳеч кимда айнан кўринишда учрамайдиган аъзоларга эга инсонсиз. Тасаввур қиляпсизми, 7 ярим миллиард инсонлар ичида сиз ўзига хоссиз.

ДНК эса сиз ўйлаганингиздан-да анча мураккаб тузилган экан.

Ҳужайрамиз ядросида жойлашган, авлоддан-авлодга ўтиб келаётган ирсий ахборотни сақловчи асосий манба бу - ДНК спиралидир.

Бугун олимлар аниқлаган энг катта маълумотлар базаси бу ДНКдир. Игнанинг учидек ҳажмдаги ДНК ичидаги маълумотларни китоб қилиб ёзиладиган бўлса, биздан Ойгача бўлган масофа орасини 500 марта тўлдирадиган китоблар жамланмаси ҳосил бўлар экан.

Хўш, оддий кўз билан кўриб бўлмайдиган ҳужайранинг ичидаги ирсий ахборотни сақловчи ДНК ичига шунча маълумот қаердан келиб қолди?! Шунча маълумотни ўзида қандай сиғдириб турибди?!

Аллоҳ таоло ДНКга ана шундай хусусиятни бермаса, ақлсиз молекула ўзича ҳеч нарса қила олмайди!

Инсон ДНКси жуда аниқ бўлиб, кичик ўзгариш ҳам сизни бутунлай янги қиёфага айлантириши мумкин.

Аждоддан авлодга ташқи тузилиш, юриш-туриш, кўз, соч ранги каби кўплаб ўхшашликлар ДНК орқали ўтади. ДНК занжирининг икки тарафида жойлашган моддалар шу даражада жойлашганки, улар ҳар бир инсоннинг шахсий коди бўлиб хизмат қилади.

Отангизга, онангизга, бобонгизга нега ўхшашингизни, бўйингиз, қадам ташлашингиз, овозингиз, қарашингиз, юз ифодангиз нега уларникига ўхшаб кетишини энди тушунгандирсиз?

Биргина ДНКнинг ўзи эволюция назариясини, яъни одам меҳнаткаш маймундан пайдо бўлган деган назарияни ёлғон, сохта эканини, тентакнинг гапи эканини кўрсатади.

Чунки ҳар бир тирик жонзот ўзига хос ДНКга эга бўлиб, агар уни Буюк Холиқ ўзгартирмаса, ДНК ўзича вақт ўтиши билан ўзгариб, ундаги кодлар бошқача тузилишга эга бўлиб қолмайди!

Нозимжон Ҳошимжон тайёрлади

@din_nasixatdur

Ризқ рақамлар билан эмас, барака билан ўлчанади.
Abdulhodiy Yusuf

@din_nasixatdur

ҚОРБОБО.
Салом Қорбобо!
Биринчи бор сиз ҳақингизда эшитганимда гўдак эдим. Менга хабар беришган эдики, сиз янги йил кечаси мўридан совғалар тўла қопингиз билан уйга кириб бизга ўйинчоқлар берар экансиз. Табиийки, ўша оқшом уйимизнинг мўриси бўлмасада сизни интизор бўлиб кутдим. Ҳатто хаёлимга келмабтики, сизнинг кийикларингиз ва аравангиз мўри тугул уйимиз томида ҳам сиғмас экан.
Муҳими сиз келмадингиз. Мен ўзимча уйимизда мўри ёки бошқа шароитлар бўлмагани учун келмадингиз деб ўйлаганман ўшанда. Сиз ҳақингизда менга сўзлаб берган устозимизга ўша кеча сизни шифтга қараб қанчалар интизорлик билан кутганимни айтиб бердим. У менга деди:
- Қорбобо фақат мўридан келади-да!
Мен устозимга дедим:
- Уйларида мўри бўлган болалар ўйинчоқларга муҳтож эмас!
Устозим менга даҳшат ила боқиб деди:
- Қорбобога бир мактуб ёзиб уни пайпоғинг ичига солиб қўй. Унга бу мулоҳазангни айт!
Табиийки, мен сизга мактуб ёзишга қарор қилдим. Аммо пайпоқларимнинг бари йиртиқ эди. Бутун пайпоғим йўқ экан. Сўнг сизга мактуб битиш фикридан қайтдим.
Ўша кеча онамдан менга совға сотиб олишларини сўрадим. Онам авлиё. Аммо у киши ҳақиқий авлиё. Сиздек эмас. Кўп намоз ўқийдилар. Қуръон тиловат қиладилар. Уйга мўридан эмас, эшикдан кирадилар. Онам менга:
- Иншааллоҳ бир ҳафтадан сўнг ўйинчоқ сотиб олиб бераман, дедилар.
- Нега бир ҳафтадан сўнг?
- Чунки биз бошқаларга ўхшамаслигимиз лозим.
- Бошқалар ким? Уйларида мўри борларми?
- Йўқ! Бошқалар деганим қорбобонинг борлигига ва мўридан тушишига ишонадиганлар!
- Кийиклар ва аравачи?
Онам табассум қилиб меърож воқеасини айтиб бердилар. Жаброил алайҳис салом Маккага келиб Муҳаммад алайҳис саломни Буроққа миндириб Байтул Мақдисга олиб кетадилар.
Одам алайҳис саломнинг биринчи осмонда эканликларини, Иброҳим алайҳис саломнинг еттинчи осмонда эканликларини, Мусо алайҳис саломнинг биз учун эллик вақт намозни беш вақтга тушишига сабабчи бўлганликларини айтиб бердилар.
Ўша кундан бошлаб сизнинг кийикларингизга эмас, Буроққа иймон келтирдим, ишондим.
Катта бўлдик. Шифтга, мўрига қарамайдиган бўлдик. Чунки тепадан тушадиган ягона нарса Ийсо алайҳис салом эканлар. У киши мўридан эмас, самодан тушадилар. Уйимизга эмас, Димашқдаги оқ минора устига тушадилар. У киши ўйинчоқлар халтаси билан эмас, Дажжолни ўлдирадиган ўқ билан тушадилар. У кунда ўйнашга вақт бўлмайди.
Катта бўлдик. Англадикки, Ийсо алайҳис салом бизники эканлар. Сизники эмас. Йўқса Ватиканга ёки Санкт Петербургга тушар эдилар. Катта бўлиб англадикки, кийиклар учмас экан. Осмонимизда учадиган ягона нарса F-16 самолётлари ва гўдакларимизни осмонга учириб юборган Cy-35 самолётлари экан.
Катта бўлиб билдикки, гарчи Рум Европа иттифоқи ёнида бўлса ҳам Рум экан. Форс гарчи оловга ибодат қилмасада форс экан.
Катта бўлиб билдикки, сизлар ёлғончи экансизлар. Чунки Байтулаҳмнинг болалари Ғазонинг болаларини қатл қилинишига рози эмас экан.
Қорбобо! Бизникига келманг! Чунки "Рафаҳ йўлаги" сиз учун ёпиқ. Уйларимизда мўри йўқ. Диёримизда ўзи уй ҳам қолмади. Болалар бугун уйларида эмас, зеро уйлари ҳам портлаб йўқ бўлди. Улар чодирларда. Уларга ўйинчоқ эмас, совуқдан ўлмасликлари учун адёллар керак. Умар ўлган. Сафар қилиб ўзингизни қийнаманг. Кийикларингизга азоб берманг. Биз фарзандларимизга Буроқ, Жаброил алайҳис салом ҳақида, Ийсо алайҳис салом ҳақларида, уларнинг ўйинчоқ бергани эмас, фарзандларимиз тинч яшаши учун Дажжолларни ўлдиришга келишлари ҳақида сўзлаб бермоқдамиз!

Адҳам Шарқовий.
"ал-Жазира қораламалари".

Abdulqodir Polvonov
@din_nasixatdur