هۆنراوە و پەخشانی کوردی چەم و چیا

تەعبیری خەونێکی ئاڵۆز

بەشی حەوتەم

دوێنێ شەو لە خەونمدا،
قش قش ڕووحی پەپوولەیەک
لە نێو قیلی قەهر و ڕەق و قیندا دەکوڵی.
کە ڕاپەڕیم،سەری بڕاو
لەسەر تەرمی سەربڕاوی خۆی دەگریا.
تەرمی بێسەر
سەری بڕاوی خۆی دەبرد بە دیاری
بۆ سوڵتانی نادیاری
دریای فرمێسک.
گرین قاقا پێدەکەنی و پێکەنین گوڕگوڕ دەگریا.
ئەسپی ڕەشی سەرکەشی ئاسمانی شەو دەیحیلاند.
شیعرێک، پڕ بە زاری هەموو دەریاکان دەخرۆشا:
<ئینسانییەت بەستوویەتی لە مەڵبەندی بەستەڵەکی کفری تفهەڵاویشتنی ژێری سیفری
موتڵەقی مینهای بێبڕانەوە.
بەستوویەتەوە زنجیری کەڕڕەی قافیە،
دەست و پێی شێعری زەردی گەڵاڕێزان.
پاییزێکی زۆر ناخۆشە.
نابارێ شەکراوی بزە لە هیچ هەورە سپیلکەیەک.
نابارێ پەڕی نەستەڕەن لە باڵی هیچ فڕندەیەک.
کڕێوەی گەڵای پەنجەیە و ڕەهێڵەی بارانی فرمێسک.
تەمتوومانی شڵەژانە و تۆقینی زراوی زەندەق.
گەردەلوولی هەناسەیەکی درێژە.
لە بادیەی سینەیەکی زۆر بەتاسە.
پاییزێکی زۆر ناخۆشە،
زۆر ناخۆشە،
زۆر ناخۆشە
شەختە لێیداوە تەماتەی دڵی بێستانی تەڕاوەت.
دۆک لێیداوە ترێڕەشەی دارە مێوی باخی ئەوین. شەختە لێیداوە هەناری ترش و شیرینی باخی ژیان
پشتاوپشت دەگەڕێنەوە عەقرەبەکانی ئینتزار
شل بوونەوە پێچ و مۆرەی بزووتنەوە>

درێژەی هەیە👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی شەشەم

تەلەڤەزۆن فیتووی لێدەدا
بۆ ئەسپی تینووی خەیاڵێکی پووچی پێچەڵاوپووچ.
بۆمبێکی ساعەتیان لە نێو ڕادیۆکەمان دانابۆوە.
بۆمبێکی ساعەتیان لەژێر زمانی من دانابۆوە
بۆمبێکی ساعەتی لە نێو کاتژمێری باغەڵێکم.
دوو بۆمبی ساعەتی لە نێو گلێنەی دوو چاوەکانم.
دوو بۆمبی ساعەتی لە نێو لۆکەی هەرتک گوێچکەکانم.
بۆمبێکی ساعەتی گەورە لە نێو مێشکم.
بۆمبێک لە نێو باغچەکەمان.
بۆمبێک لە بەر دەرکی حەوشەی
دەرک و فام و تێگەیشتن.
بۆمبێک لە نێو بارەلۆکەی هەوری سپی.
بۆمبێک لە نێو بارەڕەژی هەورێکی ڕەش.
بۆمبێک لە نێو بووکەشووشەی منداڵێکی سەرەتایی.
بۆمبێک لە نێو گرێپووچکەی پەروەندەیەکی جینایی.
بۆمبێکی ساعەتی بچووک.
لە نێو بۆمبێکی گەورەتر.
بۆمبێک لە سەر ڕێگەی مێژوو.
بۆمبێک لە ژێر نەخشەی کۆنێ جوغرافیا.
بۆمبێکی زۆر گەورە لە ژێر مەعنای قووڵی شێعری باران.
بۆمبێکی زۆر گەورە لە ناو کۆشکی هەتاو.
گەورەترین بۆمبی ساعەتی ئاتۆمیان
لەنێو بەردی
کاتژمێری
دڵی پڕم
دانابۆوە...

درێژەی هەیە 👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی پێنجەم

دوو دووپشک پەپوولەیەکیان دەکرماند.
چوار چوارپێ پێشەیان دەکرۆشت.
دەستفرۆشێک،دەستی دەفرۆشت.
قەسابێک،زگی خۆی دەدڕی
نەججاڕێکیش، پەنجەرەیەکی ساز دەکرد،
لە ئێسقانی کارژۆڵەیەک.
مارێک لە سەر هێلکە کەو پاپۆکەی خواردبوو.
هەڵۆی مەرگ!
قەرەپووڵی بۆمبی خووشەیی هەڵداویشت،
بە سەر بووکی بەدبەختیدا.
لە ژێر دیواری تەم و تۆز،
دوو بێچووە مەیموونی بزۆز،
کایەیان دەکرد پێکەوە
بە شووشە مەڕمەڕی تازەی دوو چاوی شین،
لە سەر گێلاسی دوو گوارەی دوو گوێچکەی هەڵپچکڕاوی
کیژێکی سەر و قژ ئاڵۆز.
زڕدایکێک،ئەنگوتکی دڵی زڕکچەکەی لە تیر دەدا.
ڕێوێکی پیر، بێچووە گورگێکی شیر دەدا.
کتکێکی ڕەش، قاچکی بێچوەکەی خۆی دەخوارد.
ورچێک،
بازەڵێنی دەکرد،
بە دەم و لووتی هەناسەی هەستی سەربەستی.
لاوێک،
شەقی لە کاژیلکەی سەری دایک و بابی دەدا.
کوندێک،
لە سەر دار هەناری سینەی کونکونتر لە سی نەی
لە سەر دوو هێلکەی کڵۆڵی، هەڵنیشتبوو.
دوو هەژدیها،
لە قاپێلکەی لە دایکبوونی پیلانێکی زۆر گەورە،
سەریان تازە هێنابوەدەر.
گژەبا،بە ژێی زێتاری دارتێلەکان،
ئاهەنگی مەرگی لێدەدا.
زمانم وەسیمی ڕووتی هەستێکی گیان سووتێن کەوت و
بوو بە کلژی دووپشکی ڕەش.
بوو بە گۆچان.
بوو بە مار و بوو بە هەژدیهای بێئامان

درێژەی هەیە 👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی چوارەم

نینۆکی پلووسکی خوێن و
قژی سووری، تاڤگەی بەراوەژووی گڕ بوو
گوێچکەکانی کونە مێرووی پیتی مۆرس و
زاری هێلانە زەرگەتە و ژەنگەسوورەی
تەوس و تیس و تانە و بوختان و درۆ بوو.
کلکی پرسی دووپشکی دوژمنایەتی و
هەناسەی ڕەشی دووکەڵی پشوو سوار بوون.
لەپی دەستی،
جێگە مۆڵی گورگ و بەراز و ڕێوی بوو.
لاقەکانی تاکو ئەژنۆ بە عەردا ڕۆ چووبوونە خوارێ.
چاوەکانی گۆمی خوێن بوو،
جێگەی مەلە و قڕنە گۆمەی دێوەزمە و ڕمۆزنە.
نووشتەی ئەسکەناسی بە مل ڕەشەگادا هەڵدەواسی.
زەنگوڵەی دەکردە گوارەی گوێچکەی کەلـلە شێری شەرزە و
بە کلکی گوێدرێژدا هەڵیداوەسی.
ئاوری بە خاک دەگۆڕێوە و
بای دەفرۆشت و ئاوی دەکڕی
قڕقڕۆچکەی عەنقای عەشقی هەڵدەلۆشی و
دەڵەمەی هێلکە قەقنەسی سەرهەڵدانەوەی هەڵدەقوڕاند.
دانەکانی پێکەنین و لێوی بزەی
وەبەر چەرخی کەڵپی بێ‌بەزەیی دەدا.
بە تەبەنەی شاخە مار و
داوەدەزووی جاڵجاڵوەکە،
کڵاوی ونبوونی دەچنی، بۆ سەغرەجن

درێژەی هەیە👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی سێیەم

دوێنێ شەوێ لە خەونمدا،
دەنێو جەرگەی دڵی دەردا،
ددانی دەردێکی تازە چزووی دەردا.
کە ڕاپەڕیم،
زەوی زاری ئاوەڵە کرد،
گوڵاڵەیەک دەنێو گولـلە و پووکە و خوێندا سەری هەڵدا.
دەستی دڕوو ڕادەوەشا بە گژەبا،
بۆ تەهنیەت بە خێوی شەو
دوێنێ شەوێ لە خەونمدا،
دێوەزمە جەرگ و دڵی منی دەخوارد.
پەنجەی براکەمی دەکرۆشت.
بە هاوریشمی پرچی خوشکم
دەم و پەلی دەستڕێوە.
بە ئێسکی پەراسووی باوکم،
دانەکانی دەئاژنێوە.
کە ڕاپەڕیم
_با_ لە کووچە، لانکی بەتاڵی ڕادەژاند.
جادووگەرێک لە کەلاوە
مەشکەی خوێنی خەڵکی دەژاند.
بە پەتکی ماری زمانی،
پەڕەسللێرکەی دەخنکاند.
تۆکوولەکەی زمانی خەڵکی دەترووکاند.
پەڕوباڵی هەڵفڕینی هەڵدەپڕووزاند
تەسبیحێکی بە چنگاڵی دەستەوە بوو
نا... ببوورن
ملوێنکێکی لە ملدا بوو،
دەنکەکانی کەلـلەی سەری بنیادەم بوو.
بنێشتی نەرمایی گوێجکەی منداڵێکی ساوا دەچوو.

درێژەی هەیە 👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی دووهەم

دوێنێ شەوێ لە خەونمدا،
پەیتا پەیتا،
قوڕقوشمیان لە گەرووم دەکرد.
کە ڕاپەڕیم،
خرم خرم ددانی ڕقهەڵگرتنم دادەکرۆشت.
دوێنێ شەوێ لە خەونمدا،
چەقۆی کۆ کەڵاشکم دەجوو،
لە بەر تاڵی بە دەم و چاوی داوەڵما تف دەکردەوە.
بۆ تەعبیری ئەم خەونە چوومە لای هەتاو،
هەتاو پێکەنی و چی نەکوت.
دوێنێ شەوێ لە خەونمدا چیا بۆ دەریا دەگریا.
بۆ تەعبیری ئەم خەونە چوومە لای هەور
هەور بە سەر مندا گریا و هیچی نەکوت.
دوێنێ شەوێ لە خەونمدا،
تەرمم لە سەر بێشکەی شەپۆلان ڕادەژا.
بۆ تەعبیری ئەم خەونە چوومە لای باوکم.
باوکم ڕۆیی و هیچی نەکوت.
دوێنێ شەوێ لە خەونمدا،
گورگێکی گەڕ،
بە کلکی ڕێوێکی گەڕۆڵ،
شمشاڵی بۆ شوان لێدەدا.
شوانیش خرپ بۆی خەوتبوو.
چوارپێ کارتی داوەتی دەبرد بۆ شەگەل؛
_ئێمە لێمان گێڕانەوە،
بۆ هاتنی ئێوەی بەڕێز
بۆ زەماوەندی <ددان> و <گۆشتی تازە>.
ڕۆژ:نادیار.
کاتژمێریش:دیاری نەکراو._
ئەو خەونەم بۆ شوان گێڕاوە.
گۆچانی لە مل مەڕێک کرد،
سەری بڕی و کەوڵی کرد و
جەرگ و دڵ و سێپەلاکی خوارد و کوتی:
ئەمەش تەعبیری خەونەکەت!

درێژەی هەیە👇

#قاسم_موئەییدزادە #هەڵۆ

https://t.me/chamochya

تەعبیری خەونێکی ئاڵۆز

بەشی یەکم

پریش پریش،
لە ژێر هەوری بارانی بۆمباردوماندا.
پەراش پەراش،
لە مەڵبەندی سەرکوتبوون لە سەرهەڵداندا
غەریب غەریب،
لە غوربەتی ئینسانییەتی ئینساندا.
تاساو تاساو،
لە حالەمێک فیمابەینی ئیمکان و غەیرە ئیمکاندا
شەقاو شەقاو،
لە شوێنی سانۆی شینێکی بێنیشاندا
ڕووناک ڕووناک،
تاریکترین نوختەی ڕەوان دەدۆزمەوە و
دەقیق دەقیق
ژمارە ڕەمزی کلیلی ئەم زاویە ڕەمزاوییە دەبنەوە و
ژمار ژمار،
وەریدەگێڕمەوە بە پیت.
نوختە نوختە،
بە پێنووسی نووکی عەنقا،
دڵۆپ دڵۆپ،
بە جەوهەری خوێنی هەڵۆ،
وەرەق وەرەق،
لە پەرتووکی باڵی هوما،
ڕستە ڕستە،
ڕەسمولخەتی ڕەسمی لە ڕەسمە دەرچوونی هۆنراوەیەک دەهۆنمەوە و
وشە وشە،
بە خۆڵەمێشی قەقنەسیش،
هەودا هەودا،
ئەمڕا وشکی دەکەمەوە و
حەیران حەیران،
هاودەنگ دەگەڵ
سۆزی سازی باڵندەی باڵ سەوزی شەپۆل،
شەپۆل شەپۆل،
هاودەنگ دەگەڵ
ئاهەنگی شەقژنی فڕقژنی گریان،
ڕەوان ڕەوان،
لە نێو جەرگ و دڵ و گۆشت و پێست و ئێسک و خوێنی خوێنما دەیخوێنمەوە.
قورتم قورتم،
ژەهری هەلاهەلی شەوگار
دەخۆمەوە و
لێکدا لێکدا،
لە تەسمیەی سەمای باڵ و پەڕ لێکدانێک بۆ باڵگرتن.
هەپروون هەپروون،
لە شەقامی قامی فەیز و فەوزی فەنا،
ئاڵۆز ئاڵۆز،
خەونێکتان بۆ دەگێڕمەوە و
شەقار شەقار،
بۆشتانی لێکدەدەمەوە!

درێژەی هەیە👇

#قاسم_موئەییدزادە #هەڵۆ

https://t.me/chamochya

ئەوە ئایشەگوڵم دەڵێ:ئەمن وەڕەزم وەڕەزی دە بەحرانم.
گوێ‌ماسیلکەی دەم چۆمانم
کەروێشکەی پێی سوارانم
غوڵامی دوازدە ئامۆزایانم
بن‌پشکی حەوت برایانم
خوارزای بیست و چوار خاڵانم
هەموویان بشۆنەوە بە شۆرتنێ
لەسەر گیایەکەی مردنێ
ئەمن نامێنمەوە لە چاوڕشتنێ

بەڵام ڕۆژێکی ناسکەسواری خۆ نابینم هەر وەدەزانم سەرشین و قەلەندەر و بابان‌وێرانم
سوارۆ هەی سوارۆ مەڕۆ لە من بەتەنێ.

#بەیتی_کوردی
#گۆرانی_ژنان

https://t.me/chamochya

#چی_بۆ_چی؟

چاوەکەم، داخۆ بزانی من، کە چاوم بۆ چییە؟
یان زوبان و دەست و پێ و بیر و هەناوم بۆ چییە؟

چاو کە فرمێسکم بڕێژێ و دابنیشێ چاوەڕێت
کۆڕی برژانگ بێ بە جاڕووی کاتی هاتن، تۆزی پێت

بیر، کە تۆی تێدا بنیشی تاکوو ڕۆژی مردنم
جا زووبان بۆ ناڵەناڵ و شین و شیوەن کردنم

پێت بڵێم بۆ چیمە ئازیز، هێز و هەستی دەست‌وپێ
پێ کە وەیلان بێ لە شوێنت، دەس کە داوێنت گرێ

گوێ کە مزگێنی وساڵت لە زوبانت با بە دڵ
دڵ، کە غەم‌خواری غەمت بێ تاکوو ڕۆژێ بێ بە گڵ

وەرنە بۆ چیمە لەشی ناساز و سەرباری ژیان
یاخۆ چی لێ کەم، لەپێ گۆشت و ڕەگ و پێس و سوقان؟

تۆ نەمێنی بۆ بمێنم؟ ژینی تاڵم بۆ چییە؟
یاخۆ ئازاری بێ‌خەم و خۆف و خەیاڵم بۆ چییە؟

بۆم بمێنە، با بمێنم وەک سەهۆڵ و خۆرەتاو
پڕ لە داخت با لەسەر خۆم قەترە قەترە بم بە ئاو

#عەباس_کەمەندی


https://t.me/chamochya

#کتێبی_کوردی

گێله پیاو (صوتی)-به‌شی 15
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

#کتێبی_کوردی

گێله پیاو (صوتی)-به‌شی 14
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

#کتێبی_کوردی

گێله پیاو (صوتی)-به‌شی 13
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

#کتێبی_کوردی

گێله پیاو (صوتی)-به‌شی 12
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

بیست و هەشتی ڕەزبەر، هاوکات لەگەڵ ساڵیادی کۆچی دوایی هونەرمەندی مەزنی کورد، مامۆستای ئاواز و مەقامی کوردی،

نەمر #تاهیر_تۆفیق


https://t.me/chamochya

غوبار و تۆزی ئاوێنە بە ئاوی ڕوون نەبێ ناچێ
مەگەر من هەر بە مەی فیکرێ بە حاڵی ڕۆحی شەیدا کەم...

🔘مەلەکشا

@chamochya

غەزەل بەر تەسکە بۆ هاواری عاشق خۆزگە ئەمتوانی

لە هیجران و فیراقی گوڵ فوغانێ بولبول ئاسا کەم!

#جەلال_مەلەکشا

https://t.me/chamochya

#کتێبی_کوردی
#کتێبی_سه‌وتی
گێله پیاو (صوتی)-به‌شی 11
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

#کتێبی_کوردی
#کتێبی_سه‌وتی
گێله پیاو (صوتی)-به‌شی 10
نووسه‌ر: عه‌زیز نه‌سین
وه‌رگێڕ: عه‌بدوڵڵا حه‌سه‌ن‌زاده

https://t.me/chamochya

بێ شوعاعی شەمسی ڕوخسارت لە بۆ کێ
حەل دەبێ

هەندەسەی خاڵی سەحیفەی عاریزی حیکمەت نومات

#ناری

https://t.me/chamochya

سەد و نۆ

🌸 «حقاً» لە ڕەقیب ئەو بەر و دەرگانە حەرامە
لەو دێوە، کە ئەم تەختی سولەیمانە حەرامە

مەبەستی لەوەیە بەدکار وەک دێو و بەردەرگای یاریش وەک تەختی حەزرەتی سولەیمان وایە،‎ حەزرەتی سولەیمانیش دێو و درنجی هەموو بەستبووەوە، لەبەر ئەوە دروست نییە بەدکار ڕێی‎ بکەوێتە بەڕدەرگای ماڵی یار.

🌸 «قیل»ێکی زەعیف: ئاهی حەزین ئیزنە لە عیشقا
گریانی بە کوڵ، ناڵەیی مەستانە حەرامە

قیلی زەعیف: لە ئیستیلاحی شەرعدا بەو قسانەی زانایانی شەرع دەڵێن زۆر جێگەی باوەڕ نەبن.‎
واتە: فتوایەک هەیە زۆر جێگەی باوەڕ نییە، دەلێ دروستە بۆ دڵدار هەناسەی خەفەتباری‎ هەڵکێشێ، بەڵام گریانی بە کوڵ و ناڵەی مەستانە ئەو قسەی تیا نییە کە نارەوایە.

🌸 سووتانی بە بێ دەنگییە ئادابی مەحەببەت
وەک بولبول ئەم ئەفغانە بە پەروانە حەرامە

ئاداب: شێوە.
ئەفغان: هاوار و ناڵەناڵ.‎
واتە: داب و نەریتی خوشەویستی ئەوەیە دڵدار بێدەنگ بۆ خۆی بسووتێ و دڵداری راستەقینەی‎ وەک پەروانە حەرامە بۆی وەک بولبول دەس بکا بە ناڵەناڵ.

🌸 وا دەربەدەرە دڵ، وەتەنی سینەمی ون کرد
لەو شێرە خوێڕی بووە ئەم لانە حەرامە

واتە: دڵ بەجۆرێک بە دوای یاردا وێڵ بووە نیشتمانی سینەمی ون کردوە، تازە ئیتر لانەی دارم لە شێری خوێڕی بووی دڵم حەرامە و نابێ بگەڕێتەوە بۆی، چونکە ئەگەر شێری تەواو دەبوو بە دەردی خۆیەوە دەیساچاند و بەدوای یاردا خوێڕی نەدەبوو، خوێڕیبوونەکەی نیشانەی ئەوەیە یارای هەڵگرتنی دەردی دڵ نەبوە.

🌸 دەیوت کە بەڕەهمەن: مەهی ڕۆی ئەم سەنەمەم دی
گەر بت ئەمە بێ، خزمەتی بتخانە حەرامە

بەڕەهمەن: پێشەوای ئایینی بەڕاهمایی.
واتە: کە گەورەی ئایینی بتپەرستانی بەڕاهمایی ڕووی وەک مانگی یاری دی، وتی ئەگەر بت ئەمە بێ، حەرامە ئیتر خزمەتی بتخانە بکەم و پێویستە ئەم بپەرستم.

🌸 من پادشەهی عیشقم و هەر داغی جنوونم
تاجی سەرە، باقی کە لە دێوانە حەرامە

واتە: من لە مەیدانی عیشقدا ئەوەندە شێت بووم،ڕبووم بیە،پادشا، بەلام لە جیاتی!تیاجی پادشایەتی، تەنها داخی شێتیم ناوەتە سەر سەر، چونکە شت لەو داخە بەولاوە هیچیتر ناگرێتە خۆی و هیچ بەرگێک لەبەر ناکا.

🌸 هەر «کۆکەن» و «مەجنوون»ە کوڕی کێو و بیابان
غەیری کون و قوژبن کە لە فەرزانە حەرامە

کۆکەن: فەرهادی شیرین.
مەجنوون: مەجنوونی لەیلا.
فەرزانە: خاوەن عەقڵ و تێگەیشتوو.
واتە: ئەوەی دڵی زیندوو بێ و گرفتاری دەردی عیشق بووبێ، دەبێ لە تاو قسەی بەدکاران، وەکوو فەرهادی کۆکەن بداتە کێو یا وەک مەجنوونی لەیلا وێڵی دەشت و بیابان ببێ؛ چونکە لە کون و قوژبنی کێو و بیابان بەولاوە حەرامە لێی. یا، لەبەر ئەوە کە پیاوی تێگەیشتوو ناچارە ئەگەر نەداتە کێو و بیابان، دەمی خۆی بگرێ و کەنارەگیری بکا و غەیری کون و قوژبن لە خۆی حەرام بکا.

🌸 بێ داغی نەدامەت دڵ و بێ دەردی ئەسەف جان
لەم کالیبەدە دڵ، لە دڵ ئەو جانە حەرامە

نەدامەت: پەشیمانی. کالیبەد: قەوارەی لەش.
واتە: ئەگەر دڵ داخی پەشیمانی پێوە نەبێ و گیان توو بووبێ، حەرامە قەوارەی لەش دڵی تێدا بێ و دڵ گیانی لەبەردا بێ

🌸 خوێناوی جگەر، گۆشەیی «بَیْتُ الحَزَن»ێ بوو
مەحوی! بەسە، مەیلی مەی و مەیخانە حەرامە

واتە: مەحویا ئەگەر خوێناوی جگەرو کونجی مەیخانەیەکت دەسگیر ببێ بەستەو لەوە بەولاوە ئارەزووی مەی و مەیخانە کردن حەرامە لێت؛ چونکە دەتوانی لە جیاتی مەیخانە لەو کونجی خەفەتخانەیەدا بکەوی و لە بریتیی مەی، خوێناوی جگەر بخۆیتەوە.

شێعری مەحوی لێکدانەوەی مەلاعەبدولکەریم مودەڕیس

@chamochya