ဆီသို့ - Towards

❐ တွဲကားဖြင့် ပုံဖျက်လာသော စစ်ကောင်စီတပ်သားများကို တော်လှန်ရေးအင်အားစုက ခြုံခိုတိုက်ခိုက်၊ စစ်ကောင်စီတပ်သား ၅ ဦး သေဆုံးမှုရှိ။

ဖေဖော်ဝါရီ ၁၉၊၂၀၂၅။

မကွေးတိုင်း၊ အထက်မင်းလှမြို့နယ်၊ ရှမ်းတပ်စခန်းအနီး၊ ပုသိမ်-မုံရွာ ကားလမ်းမတစ်နေရာတွင် တွဲကားများဖြင့် ပုံဖျက်လာသော စစ်ကောင်စီတပ်ဖွဲ့ဝင်များအား တော်လှန်ရေးပူးပေါင်းတပ်များက ခြုံခိုတိုက်ခိုက်ရာ ၅ ဦး သေဆုံးခဲ့သည်။

ဖေဖော်ဝါရီ ၁၇ ရက်တွင် အဆိုပါ တွဲကားဖြင့် ပုံဖျက်လာသော စစ်ကောင်စီတပ်ဖွဲ့ဝင်များကို အထက်မင်းလှမြို့နယ် ပြည်သူ့ကာကွယ်ရေးအဖွဲ့ နှင့် ပြည်သူ့လွတ်လပ်ရေးအဖွဲ့ /ပြည်သူ့လွတ်လပ်ရေးတပ်မတော်(PIO/PLA) ပူးပေါင်းတပ်များက တိုက်ခိုက်ခဲ့ခြင်းဖြစ်သည်။

တိုက်ပွဲတွင်း စစ်ကောင်စီဘက်က MA 15 အလတ်စားစက်သေနတ်၊ RPG၊ ၄၀ မမ ဗုံးပစ်လောင်ချာ နှင့် ဒရုန်းများ အသုံးပြုကာ ပြန်လည်ခုခံတိုက်ခိုက်ခဲ့သော်လည်း စစ်ကောင်စီတပ်သား ၅ ဦးထပ်မနည်း ဒဏ်ရာရကာ ပြန်လည်ဆုတ်ခွါသွားကြောင်း သိရသည်။
နောက်ဆက်တွဲ သတင်းပေးမှုများအရ စစ်ကောင်စီတပ်သား ၅ ဦး သေဆုံးခဲ့ကြောင်း အထက်မင်းလှ ပကဖ က အတည်ပြုထားသည်။

ထို့ပြင် ဖေဖော်ဝါရီ ၁၈ ရက်တွင်လည်း အထက်မင်းလှမြို့နယ် ၊ပုသိမ်-မုံရွာကားလမ်းပိုင်း ၊ရှမ်းတပ်ကြီးရဲစခန်းမှ ချီတက်လာသော စစ်ကောင်စီတပ်များနှင့် တော်လှန်ရေးပူးပေါင်းတပ်များ ထိတွေ့တိုက်ပွဲဖြစ်ပွါးရာ စစ်ကောင်စီဘက်မှ ၃ ဦးထပ်မနည်း ဒဏ်ရာရခဲ့သည်။

ပြီးခဲ့သည့် ဇန်နဝါရီ ၁၇ ရက်တွင်လည်း သရက်မြို့၊ ကပစ ၁၂ မှ စစ်ကူလက်နက်များတင်ဆောင်လာသော စစ်ကားသည် မင်းလှမြို့၊ ထန်းကိုင်း ကျေးရွာအနီးတွင် မတော်တဆပေါက်ကွဲမှုဖြစ်ကာ လိုက်ပါလာသည့် စစ်ကောင်စီတပ်သား ၈ဦးတွင် ၂ ဦးသေ၊ ၆ဦး ပြင်းထန်ဒဏ်ရာရရှိခဲ့ကြောင်း ထုတ်ပြန်ထားသည်။

ပုသိမ်-မုံရွာကားလမ်း အနီးတွင် နေထိုင်သောပြည်သူများသည်လည်း စစ်ကောင်စီနှင့် ပူးပေါင်းဆောင်ရွက်ခြင်း၊ တပ်ဖွဲ့ဝင်များအား ပုံဖျက် သယ်ဆောင်ပေးမှုများအား မပြုလုပ်ကြရန် အထက်မင်းလှ ပကဖ က အသိပေးထားသည်။

ဓာတ်ပုံ - Upper Minhla P.D.F

❐ PHOTO NEWS: ရွှေဘိုမြို့နယ် လူ့အခွင့်အရေးဆိုင်ရာဝန်ကြီးဌာနနှင့် ရွှေဘိုမြို့နယ် သပိတ်အင်အားစု တို့ပူးပေါင်း၍ ရွှေဘိုမြို့နယ်တွင် အခြေခံလူ့အခွင့်အရေးအမြင်ဖွင့်သင်တန်းကျင်းပပြုလုပ်ခဲ့သော ပုံရိပ်များ။

ဓာတ်ပုံ - ရွှေဘိုမြို့နယ် သပိတ်အင်အားစု

❐ "ပြည်ထောင်တွေ အမှန်စုတဲ့ တကယ့် ပြည်ထောင်စု"
မောင်မောင်မြင့် ရေးသည်။

ပြည်ထောင်စုနေ့ဆိုတာဟာ ဒီနေ့ခေတ် မြန်မာနိုင်ငံသား အားလုံးနီးပါး ငယ်စဉ်ကတည်းက ယဉ်ပါးခဲ့ကြတဲ့ နေ့တနေ့ ဖြစ်ပါတယ်။ အထူးသဖြင့် မြန်မာ့ဆိုရှယ်လစ်လမ်းစဉ်ပါတီအစိုးရရဲ့ တပါတီအာဏာရှင်ခေတ်တလျှောက်မှာဆိုရင် ပြည်ထောင်စုအလံကို တိုင်းနဲ့ ပြည်နယ်တွေအနှံ့ ကုန်းကြောင်း၊ ရေကြောင်း၊ လေကြောင်းအားဖြင့် သယ်ဆောင်ပြီး၊ ညအိပ်ရပ်နားရာ မြို့တိုင်းမှာ ပွဲလမ်းသဘင်တွေကို ခြိမ့်ခြိမ့်သဲ ကျင်းပလေ့ရှိခဲ့တာကြောင့် ဒီနေ့ဟာ လူတိုင်းရဲ့ စိတ်ထဲမှာ မှတ်မှတ်ထင်ထင် စွဲကျန်ရစ်ခဲ့ပါတယ်။

ပြည်ထောင်စုနေ့နဲ့အတူ “တိုင်းရင်းသားစည်းလုံးညီညွတ်ရေး” နဲ့ “ပင်လုံစာချုပ်” ဆိုတဲ့ စကားရပ်တွေကိုလည်း အမြဲတမ်း ကြားရလေ့ရှိပါတယ်။ ပြည်ထောင်စုနေ့ဆိုတာဟာ အင်္ဂလိပ်ကိုလိုနီအဖြစ် မနေလိုကြတော့တဲ့ တိုင်းရင်းသားတွေက တောင်တန်းနဲ့ ပြည်မ အတူတကွ လွတ်လပ်ရေး ယူကြမယ်ဆိုတဲ့ ကတိကဝတ်ကို ပင်လုံမြို့မှာ အတူတကွ လက်မှတ်ရေးထိုးခဲ့ကြတဲ့နေ့ ဖြစ်လို့ စည်းလုံးညီညွတ်မှုရဲ့ ပြယုဂ်တခု ဖြစ်ခဲ့ပါတယ်။ စစ်မှန်ပြီး လူမျိုးစွဲ ဘာသာရေးအစွဲတွေ ကင်းစင်တဲ့ ပြည်ထောင်စုကြီးတခု ပေါ်ပေါက်ရေးကို ရည်သန်တဲ့ ဒီ ပင်လုံစာချုပ်ဟာ အဲဒီအချိန်က မြန်မာနိုင်ငံရဲ့ အကြီးမားဆုံး နိုင်ငံရေးအင်အားစုကြီး ဖြစ်ခဲ့တဲ့ ဖဆပလအဖွဲ့ချုပ် ဥက္ကဌ ဦးအောင်ဆန်းနဲ့တကွ တိုင်းရင်းသားခေါင်းဆောင်ကြီးတွေရဲ့ ရင်တွင်းဖြစ် ပဋိဉာဉ်စာချုပ်တခု ဖြစ်တယ်လို့ ဆိုနိုင်ပါတယ်။

ဒါပေမဲ့ ပင်လုံစာချုပ်ကို အခြေခံကာ လွတ်လပ်ရေး ရယူလိုက်ပြီး နောက်မှာတော့ မြန်မာနိုင်ငံမှာ စည်းလုံးညီညွတ်ရေး ပျက်ပြားလာခဲ့ပြီး ပင်လုံစာချုပ်ရဲ့ အနှစ်သာရကလည်း တဖြည်းဖြည်း လျော့ပါးလာခဲ့ပါတယ်။ အကျိုးဆက်အားဖြင့် နှစ်ရှည် ပြည်တွင်းစစ်ပွဲကြီး စတင် ဖြစ်ပွားခဲ့ပါတယ်။ ဆင့်ပွားအကျိုးဆက်အနေနဲ့ ပင်လုံစာချုပ်ရဲ့ အနှစ်သာရဖြစ်တဲ့ ဖက်ဒရယ်စနစ် ဖော်ဆောင်ရေးလုပ်ငန်းစဉ်တွေ နှောင့်နှေးရပ်တန့်သွားခဲ့ရပါတယ်။ ဒီဖြစ်ရပ်အတွက် အစိုးရက လက်နက်ကိုင်တိုင်းရင်းသားအင်အားစုတွေကို ခွဲထွက်ရေးသမားတွေအဖြစ် ပုံဖော်ခဲ့သလို၊ တိုင်းရင်းသားတွေကလည်း အစိုးရကို လူမျိုးကြီးဝါဒ ကျင့်သုံးတယ်လို့ စွပ်စွဲခဲ့ပါတယ်။ ဘာပဲပြောပြော အဲဒီခေတ်ဟာ ဒီမိုကရေစီခေတ် ဖြစ်တဲ့အလျောက် နိုင်ငံရေးနည်းလမ်းတွေအားဖြင့် တောင်းဆိုညှိနှိုင်းနိုင်ခွင့်တွေ ရှိခဲ့ပါတယ်။

ပင်လုံစာချုပ်ကို လက်မှတ်ရေးထိုးခဲ့ကြတဲ့ ကချင်း၊ ချင်းနဲ့ ရှမ်းလူမျိုးတွေသာမက ကရင်၊ ကယား၊ မွန်နဲ့ ရခိုင်လူမျိုးတွေ ပါဝင်တက်ရောက်ခဲ့ကြတဲ့ "ပြည်နယ်ပေါင်းစုံညီလာခံ" တရပ်ကို ၁၉၆၁ ဇွန်လမှာ ကျင်းပခဲ့ပြီး တောင်းဆိုချက် ၅ ရပ်ကို ချမှတ်တောင်းဆိုခဲ့ပါတယ်။ အဲဒါတွေကတော့ ~
(၁) ပြည်မကို ပြည်နယ်တနယ်အဖြစ် ဖွဲ့စည်းရေး
(၂) လွှတ်တော် ၂ ရပ်ကို အာဏာတူပေးရေး
(၃) လူမျိုးစုလွှတ်တော်မှာ ပြည်နယ်တိုင်းရဲ့ ကိုယ်စားပြု ကိုယ်စားလှယ်ဦးရေ ညီမျှစေရေး
(၄) ပြည်နယ်တွေကနေ ပြည်ထောင်စုဗဟိုအစိုးရထံ မိမိတို့ဆန္ဒအလျောက် လွှဲအပ်ထားတဲ့ အာဏာတွေကလွဲလို့ ကျန်အာဏာများကို ပြည်နယ်တွေထံ ပေးအပ်ရေး
(၅) ပြည်နယ်တိုင်းမှာ ပြည်ထောင်စုဖွဲ့စည်းပုံအခြေခံဥပဒေနဲ့ မဆန့်ကျင်တဲ့ သီးခြား ဖွဲ့စည်းပုံအခြေခံဥပဒေ၊ ဥပဒေပြုလွှတ်တော်၊ အစိုးရနဲ့ တရားရုံးများ ထားရှိရေး ~ စတာတွေပဲ ဖြစ်ပါတယ်။

ဒါ့အပြင် ဒီညီလာခံရဲ့ အကျိုးဆက်အဖြစ် ၁၉၆၂ ခုနှစ် ဖေဖော်ဝါရီလ ၂၄ ရက်နေ့နဲ့ မတ်လ ၁ ရက်နေ့များမှာ "ဖက်ဒရယ် နှီးနှောဖလှယ်ပွဲ" ကို ရန်ကုန်မြို့မှာ ကျင်းပခဲ့ပါတယ်။ ဒါပေမဲ့ မတ်လ ၆ ရက်နေ့အထိ ကျင်းပဖို့ စီစဉ်ထားတဲ့ ဒီနှီးနှောဖလှယ်ပွဲ မပြီးစီးခင် မတ်လ ၂ ရက်နေ့မှာ ဗိုလ်ချုပ်နေဝင်း ခေါင်းဆောင်တဲ့ စစ်တပ်က အာဏာသိမ်းလိုက်ပါတယ်။ ဒီအခါမှာတော့ ပင်လုံစာချုပ် ချုပ်ဆိုခဲ့ရာမှာ အခြေခံအဖြစ် ယုံကြည်ထားခဲ့ကြတဲ့ "ဒီမိုကရေစီရေး၊ အမျိုးသားတန်းတူရေးနဲ့ ကိုယ်ပိုင်ပြဋ္ဌာန်းခွင့် အခွင့်အရေး" တွေဟာလည်း ဒီအာဏာသိမ်းမှုနဲ့အတူ ရေစုန်မျောသွားခဲ့ရပါတယ်။

See more...

❐ နယ်မြေစိုးမိုးမှုနဲ့ တော်လှန်ရေးအနာဂတ်

အဖိုးထိုက်တန်သော ပတ္တမြားရတနာများထွက်ရှိရာ ကမ္ဘာကျော်မြို့ထဲသို့ တော်လှန်ရေးတပ်ဖွဲ့ဝင်များ ဝင်ရောက်သိမ်းပိုက် အောင်ပွဲခံချိန်တွင် ဒေသခံပြည်သူများစွာက သပြေပန်းများကမ်းကာ အိုးစည်ဗုံမောင်းများတီးလျက်ပျော်ရွှင်စွာကြိုဆိုကြသည်။ ယင်းမြင်ကွင်း ရုပ်သံကို လူမှုကွန်ရက်မှကြည့်ရှုသူများမှာ မျက်ရညိလည်လောက်သည်အထိ ကြည်နူးပီတိဖြစ်သည်ဟု မှတ်ချက်ပြုကြသည်။ ယင်းသို့ဆိုလျှင် ဒေသခံပြည်သူများ၏ရင်ထဲ ၊ ရဲဝံ့စွန့်စားစွာတိုက်ပွဲဝင်ခဲ့ကြသော ရဲဘော်တို့၏ ရင်ထဲတွင် မည်မျှလောက် ကျေနပ်ခံစားနေကြမည်နည်း။

ပြီးခဲ့သည့် ၂၀၂၄ ခုနှစ်အတွင်း မြန်မာပြည်ရှိလက်နက်ကိုင်တော်လှန်စစ်၏ ချိန်ခွင်လျှာသည် စစ်ကောင်စီအပေါ်လျှော့ကျသွားပြီး တော်လှန်ရေးတပ်ဖွဲ့များအပေပါ်အလေးသာလာသည်။ မြန်မာပြည်အရှေ့မြောက်ဘက်ရှိ အထင်ကရခရိုင်မြို့ လားရှိုးကို MNDAAက သိမ်းပိုက်ထားနိုင်ပြီး အနောက်ဘက်အကျဆုံး နယ်စပ်မြို့မောင်တောနှင့် အမ်းမြို့များလည်း AAလက်အောက်ရောက်သွားသည်။ လှပသောငပလီကမ်းခြေရှိရာ သံတွဲ ၊ ကမ္ဘာကျော်ပတ္တမြားထွက်ရာ မိုးကုတ်တို့သည်လည်း အာဏာသိမ်းစစ်တပ်အုပ်ချုပ်ရေးကလွတ်မြောက်သွားကြသည်။ အမျိုးသားညီညွတ်ရေးအစိုးရ -NUG ၏ ထုတ်ပြန်ချက်အရ မြို့နယ်ပေါင်း( ၄၈)မြို့ကို တော်လှန်ရေးအဖွဲ့များကအပြီးသတ်သိမ်းပိုက်ထားနိုင်ပြီး (၉၆)မြို့ကို စိုးမိုးထားသည်ဟုဆိုသည်။ NUG နှင့်လေ့လာသူများ၏ အဆိုအရ မြန်မာပြည်အလယ်ပိုင်း အညာဒေသ မြို့နယ်များ၏ ကျေးရွာအများစုကို တော်လှန်ရေးတပ်ဖွဲ့များက ထိန်းချုပ်ထားသည်၊ အဓိက လမ်းပိုင်းများကို စိုးမိုးထားသည်။ စစ်ကောင်စီက မြို့ပေါ်ကွက်ကွက်လေးမျှသာ အုပ်ချုပ်နေရသည်ဟု ဆိုသည်။

နယ်မြေထိန်းချုပ်မှုနှင့်စပ်လျဉ်း၍ တော်လှန်ရေးအင်အားစုများ၏ ထုတ်ပြန်ချက်များကိုသာကြည့်၍ ပြောဆိုပါက မမျှတရာကျနေပအုံးမည်။ စစ်ကောင်စီ၏ ထုတ်ပြန်ချက်များကလည်း သူတို့နယ်မြေများ မည်မျှဆုံးရှုံးသွားကြောင်း ဖော်ပြနေသည်။ အနီးဆုံးအနေဖြင့် စစ်ကောင်စီကောက်ယူထားသော သန်းခေါင်စာရင်းအစီရင်ခံစာအရ မြန်မာနိုင်ငံရှိမြို့နယ်ပေါင်း ၃၃၀အနက် သန်းခေါင်စာရင်းလုံးဝမကောက်နိုင်သည့် မြို့နယ် ( ၅၈) မြို့ရှိပေသည်။ တစိတ်တပိုင်းသာ ကောက်ယူနိုင်သည့်မြို့နယ်က (၁၂၇)မြို့နယ်ရှိသည်။ စစ်ကောင်စီစာရင်းကောက်နိုင်သည့် မြို့နယ်က( ၁၄၅) ရှိသည်။ ထို့ကြောင့်မြန်မာနိုင်ငံရှိ မြို့နယ်များ၏ ၅၆ရာခိုင်နှုန်းကိုသာ စစ်ကောင်စီကထိန်းချုပ်ထားနိုင်ပြီး မြို့နယ် ၃၈ရာခိုင်နှုန်းကိုတစိတ်တပိုင်း ထိန်းချုပ်ထားပြီး ၁၇ရာခိုင်နှုန်းစစ်ကောင်စီက လုံးဝလက်လွှတ်လိုက်ရသည်။ ပြီးခဲ့သည့် ၂၀၁၄ခုနှစ် သန်းခေါင်စာရင်း အစီအရင်ခံစာနှင့် နှိုင်းယှဉ်ကြည့်ပါက စစ်ကောင်စီက မြို့နယ်များကို မည်မျှလက်လွှတ်လိုက်ရကြောင်း ထင်ရှားပေသည်။ စစ်တပ်အာဏာသိမ်းပြီးနောက် စစ်ကောင်စီက တိုင်းပြည်ကိုအုပ်ချုပ်နိုင်ခွင့်မရှိကြောင်းလည်း သက်သေပြနေသည်။ ယင်းအစီရင်ခံစာက စစ်ကောင်စီအတွက် "ကိုယ်ပေါင်ကိုယ် လှန်ထောင်း"သည့် အရှက်ရစရာ အမဲစက်ဖြစ်နေပေတော့သည်။

မြို့သိမ်းတိုက်ပွဲသတင်းများသည် ကြားရသူအဖို့ အားတက်ဖွယ်ရှိသော်လည်း ဒေသခံများအတွက်မူ စိုးရိမ်စရာအချက်များလည်း ရှိတတ်ကြသည်။ မြို့သိမ်းပြီးနောက် ရှုံးမဲမဲသည့်စစ်တပ်၏ လေကြောင်းရန်ကို ကြောက်ရသောကြောင့်ဖြစ်သည်။ ထိုပြဿနာများကို ရင်ဆိုင်ကျော်လွှားရန် တာဝန်ရှိ တော်လှန်ရေးအဖွဲ့အစည်းများက ပြည်သူများနှင့် ပူးပေါင်းကာ စနစ်တကျစီမံနိုင်ဖို့လိုသည်။

မြို့သိမ်းပြီဆိုကတည်းက စစ်ကောင်စီ၏ အုပ်ချုပ်ရေးယန္တရားကို ဖယ်ရှားလိုက်နိုင်သဖြင့် အခြားအုပ်ချုပ်ရေး ယန္တရားကိုအစားထိုးရပေမည်။ ယင်းအုပ်ချုပ်ရေးတာဝန်ရှိသူများသည် မြို့၏ စီးပွါးရေး၊ ကုန်စည်စီးဆင်းမှု၊ လမ်းပန်းဆက်သွယ်မှုများအတွက်လည်း တာဝန်ရှိပေသည်။ ခေတ်ပျက်နေချိန် တောမီးလောင် တောကြောင်လက်ခမောင်းခက်ဆိုသည့်အတိုင်း ဒုစရိုက်မှုများပေါများတတ်သည်။ သာဓကအားဖြင့် TNLAထိန်းချုပ်ထားသောမိုးကုတ်မြို့တွင် ဓားပြမှုများပေါများလာကြောင်း သတင်းများအရ သိရသည်။ ယင်းကဲ့သို့ အုပ်ချုပ်ရေး၊ တရားဥပဒေစိုးမိုးရေး လုပ်ငန်းစဉ်များကို ထိထိရောက်ရောက်ကိုင်တွင်နိုင်ရန် အရည်အချင်းပြည့်ဝသော၊ ပြည်သူကယုံကြည်မှုရှိသော ၊ ပြည်သူအပေါ် သစ္စာရှိသော ပုဂ္ဂိုလ်များကို နေရာပေး၍ ပြည်သူ့အသံကိုနားထောင်ရန် လိုအပ်နေသည်။

See more...

BORN IN BURMA
(Towards Media Present)

ပုံပြင်မဟုတ်တဲ့ အရာတစ်ခု၊ ရက်စက်မှုတွေ၊ သွေးတွေ မျက်ရည်တွေနဲ့ ရေးသားနေရတဲ့ ခရီးရှည်တစ်ခု နဲ့ ပေတရာ ပေါ်က မခြောက်သေးတဲ့ သွေးတွေ အကြောင်း သီဆီုထားတဲ့ သီချင်းတစ်ပုဒ်ကို ပရိသတ်ထံ ယူဆောင်ခဲ့ပါပြီ။

Sam (BIBA) ရဲ့ Born in Burma အမည်ရ သီချင်းလေးပါ။

သီချင်းလေးကို နားထောင်ပြီးရင်တော့ မြန်မာနိုင်ငံမှာ လူဖြစ်ရတာ သိပ်ကို ကံကောင်းတဲ့ နေ့တွေ ဆီသို့ ရောက်ဖို့ အတူတူကြိုးစားကြရအောင်လားဗျာ။

🎥 Watch now!

#BornInBurma #Sam_BIBA #Sam
#TowrdsMedia #Music #MusicVideo

❐ လေးနှစ်ရာသီ မြန်မာပြည်

(ဆီသို့စာစဥ် အတွဲ ၆ အမှတ် ၂၀ ထွက်ရှိပါပြီ)

လွန်ခဲ့သော လေးနှစ်တာကာလ ဤနေ့ ဤ ရက်မှ အစပြုကာ မြန်မာနိုင်ငံတော်သည် အမှောင်တိုက်တွင်း စုန်းစုန်းမြုပ်ခဲ့ရသည်။ နိုင်ငံကို စီမံအုပ်ချုပ်နိုင်စွမ်း နကန်းတစ်လုံးမှ နားမလည်ဘဲ ခိုးသားဓားပြ အတွေးအခေါ်ဖြင့်ပင် လက်နိက်ရှိလျင် အာဏာရမည် ဟူသော အတွေးအခေါ်ဖြင့် အကြမ်းဖက် စစ်တပ်သည် နိုင်ငံ့အာဏာကို ပြည်သူပြည်သားများလက်မှ ဓားပြတိုက်လုယူခဲ့သည်။ ထိုလုယူမှုကို လည်း တရားဝင် သယောင် ယနေ့တိုင် အမျိုးမျိုးအဖုံဖုံသော လီဆည် သက်သေများဖြင့် ကြိုးပမ်းနေဆဲဖြစ်သည်။

အာဏာသိမ်းမှုသည် လေးနှစ်တိုင်ခဲ့ပြီ။ ထိုလေးနှစ်တာ ကာလတွင်း မယိမ်းမယိုင် မတိမ်းမစောင်းသော သတ္တိများဖြင့် တော်လှန်ပြည်သူများကို ချီးကျူး ဂုဏ်ပြုရင်း တော်လှန်လူငယ်များ၊ တော်လှန် အနုပညာရှင်များ၊တော်လှန်ရဲဘော်များ၏ အမှတ်တရ စကားသံများဖြင့် ယခုတစ်ပတ် အတွက် စာစဥ်ကို ထုတ်ဝေလိုက်ရပါသည်။

ယခုတစ်ပတ် စာစဥ်တွင် လည်း ဆီသို့၏ဟန် ဆီသို့၏ မာန်တို့ကို လျော့ပါးစေခြင်းမရှိဘဲ ဆီသို့ပရိသတ်များ အတွက် တော်လှန်ခွန်အားဖြစ်စေမည့် ဆောင်းပါး ၊ ကဗျာ ၊ အမှတ်တရ စာများဖြင့် တင်ဆက်ထားပါသဖြင့် ဖတ်ရှုဝေဖန် နိုင်စေရေး အတွက် တင်ဆက်ပေးလိုက်ရပါသည်။

အပြည့်အစုံအား ကောမန့်တွင် ဖတ်ရှုနိုင်ပါသည်။

#ဆီသို့စာစဥ်အတွဲ၆အမှတ်၂၀ #Towards
နိုင်ငံတော်သစ်ဆီသို့ မျှော်ရည်၍

❐ "ကြောက်မက်ဖွယ်ရာ မန္တလေးညများ"

- အေဗယ်လင်း

ကျွန်မမွေးရပ်မြေကို (၂) နှစ်ကျော်အကြာမှာ ပြန်ရောက်ဖြစ်ခဲ့ပါတယ်။ မွေးရပ်မြေကို ရောက်လာတာတောင် "အရင်ကမန္တလေးကို လွမ်းလိုက်တာ" လို့ ပြောရတဲ့အထိ ပြောင်းလဲမှု‌တွေက အများကြီးပါပဲ။ ဒါပေမယ့် ကောင်းတဲ့ ပြောင်းလဲခြင်းမျိုးတော့မဟုတ်ပါ။ ပြည်သူမကြိုက်တဲ့ စစ်တပ်အုပ်ချုပ်မှုအောက်ရောက်နေတာဆိုတော့လည်း ဘယ်ကောင်းနိုင်ပါတော့မလဲ...

◾အတိတ်ကမန္တလေး

လွန်ခဲ့သော သုံး၊ လေးနှစ် ကာလများကဆိုရင် မန္တလေးညတွေဟာ အလွန်ကိုမှ ပျော်စရာကောင်းခဲ့ပါတယ်။ ညသန်းခေါင်ယံအချိန်ထိတိုင်အောင် မန္တလေးရဲ့အထင်ကရနေရာတွေဖြစ်တဲ့ ကျုံးဘေး၊ စားသောက်ဆိုင်ကြီးတွေ၊ လက်ဖက်ရည်ဆိုင်တွေ၊ ညအခါမှဖွင့်တဲ့ လမ်းဘေးစားသောက်ဆိုင်ငယ်တွေမှာ စည်ကားနေတတ်တဲ့အပြင် လမ်းမပေါ်တွေမှာဆိုရင်လည်း လူငယ်တွေအများအပြား ရှိနေတတ်ကြပါတယ်။

ညနက်ပိုင်းဘောလုံးပွဲရှိတဲ့ရက်တွေမှာဆိုရင် လက်ဖက်ရည်ဆိုင်၊ စည်ဘီယာဆိုင်တိိုင်းလိုလို သူ့ပရိတ်သတ်နဲ့သူ ပြည့်နက်နေတာပါ။ လူငယ်တွေသာမက လူကြီးပိုင်းတွေဟာလည်း ညလုံးပေါက်ဆိုသလို ဘောလုံးပွဲတွေကိုအားပေးလေ့ရှိပါတယ်။ ဘောလုံးပွဲ အလွန်စိတ်ဝင်စားတဲ့ ကျွန်မအဖေဟာဆိုရင်လည်း ညဥ့်နက်ဘောလုံးပွဲရှိပြီဆို မအိပ်တော့ဘဲ မနက် လေး၊ ငါးနာရီထိုးထိ စောင့်နေတတ်ပါတယ်။ အကြောင်းကတော့ ဘောလုံးပွဲပြီးတာနဲ့ နံနက်စောစော မဟာမြတ်မုနိဘုရားကြီးကို အာရုံမှာ ရွှေဆိုင်းကပ်လှူပြီးဖူးမျှော်ချင်လို့ပါတဲ့။ ညနက်သန်းခေါင်ယံကနေ အာရုံတက်ချိန်အထိတောင် လုံခြုံခဲ့တဲ့ မန္တလေးမြို့ကြီးပါ။

မန္တလေးမြို့ရဲ့ အဓိကလမ်းမကြီးတွေထဲက တခုဖြစ်တဲ့ (၇၃) လမ်း ခေါ်  မိန်းလမ်းမကြီးပေါ်မှာဆိုရင်လည်း အကျီဆိုင်ကြီးတွေ၊ စားသောက်ဆိုင်တွေ၊ အရုပ်ဆိုင်တွေ၊ ဖန်စီပစ္စည်းဆိုင်တွေ များစွာရှိပါတယ်။ ဆိုင်ကယ်မြို့တော်ဖြစ်တဲ့အလျောက် ရက်ကြီး၊ ခါကြီးတွေမှာဆိုရင် ညအချိန် (၁၂) နာရီကျော်တဲ့အထိ မိန်းလမ်းတလျှောက် ဆိုင်ကယ်တွေအပြည့်နဲ့ လမ်းကြပ်နေတတ်ပြီး ဆိုင်တွေကလည်း ဝယ်သူများလွန်းတဲ့အတွက် ညနက်အချိန်ထိတောင် ဖွင့်ခဲ့ကြပါတယ်။

"ဒါ အရင်က မန္တလေးပါ..."

See more...

❐ PHOTO NEWS : ဒီဇင်ဘာလ ၂၅ရက်တွင်ကျရောက်သည့် ခရစ်စမတ်ပွဲတော်နေ့တွင် ရန်ကုန်တိုင်း၊ဗိုလ်တထောင်မြို့နယ်ရှိ စိန့်မေရီကာသီဒြယ်တွင် ဝတ်ပြုသူများ၊ လာရောက်လည်ပတ်သူများဖြင့် စည်ကားနေသည်ကိုတွေ့ရစဉ်။

ဓာတ်ပုံ - ဆီသို့

ထောင်နှင့်ကြောင်

ဗိုလ်ချုပ်မှူးကြီးမင်းအောင်လှိုင်နှင့်အဖွဲ့ရဲ့ ထမင်းစားဖိတ်ကြားမှုကြောင့် မောင်သိန်းဖေတစ်ယောက် ဆိတ်ဖလူးရနံ့သင်းတဲ့ အင်းစိန်တောရမှာ နှစ်ပေါက်အောင်သတင်းသုံးလိုက်ရပါသေးတယ်။ ထမင်းစားဖိတ်တယ်ဆိုတာကလည်း နာမည်နဲ့လိုက်အောင် ထမင်းပဲစားခဲ့ရတာပါ။ ဟင်းကတော့ ဟင့်အင်းပါ။ ဦးပုညရဲ့ ရေသည်ပြဇာတ်ဝထ္ထုထဲက ရေသည်‌ယောက်ျားသာ အင်းစိန်တောရရောက်ခဲ့ရင် ဂျင်‌ပဲ့‌ချင်းပေါက်ရမယ့်အခန်းတောင် မရောက်ဘဲဖြစ်သွားနိုင်တယ်။

လူထက် ပြဿနာရှိတာက ကြောင်။ စာဖတ်သူဟာ ကြောင်ချစ်တဲ့သူမဟုတ်ချင်မှ ဟုတ်မယ်။ မောင်သိန်းဖေကတော့ ဒီသတ္တဝါများနဲ့ ပလူးပလဲသိပ်လုပ်ချင်တဲ့သူမဟုတ်ပါ။ သူတို့ရဲ့အဖြစ်က‌တော့ နှစ်ထပ်ကွမ်းဒုက္ခရှင်များဖြစ်ပါတယ်။ တိရိစ္ဆာန်ဖြစ်သည့်အထဲမှာမှ အနေဆင်းရဲ အစားဆင်းရဲနဲ့ "ဇာတိချက်ကြွေ ထောင်ထဲနေ" ဖြစ်နေရတယ်။ ပိန်လိန်ဖျော့ခွေနေရှာပြီး ရှိရှိသမျှအသံညှစ်လို့ "တညောင်ညောင်" နဲ့ အစာတောင်းနေရတဲ့ သူ့တို့ဘဝကိုမြင်တဲ့အခါ "ကိုယ့်မှာသူ့ကိုမြင်ပါများတော့ စိတ်မှာချစ်ကျွမ်းဝင်" ရပါတော့တယ်။

❐ ပဲရှင်းတဲ့ ပဲဟင်း
အဆိုပါအင်းစိန်တောရမှာ တရက်ထမင်း၂ခါကျွေးရှာပါတယ်။ မနက်ပိုင်းထမင်းအတွက်ဟင်းကတော့ "ပဲဟင်း"ပါ။ နေ့တိုင်း ပဲဟင်းပါ။ တစ်နှစ် ၃၆၅ရက်လုံး ပဲဟင်းပါ။ ပဲဟင်းဆိုလို့ ပဲတော့ သွားရှာမကြည့်လိုက်ပါနဲ့။ ဦးစံလင်းကမှ ဓမ္မစေတီခေါင်းလောင်းကိုရှာတွေ့ရင်တွေ့ပါဦးမယ်။ ပဲဟင်းဆိုတာထဲ မယ်မယ်ရရပဲတော့တွေ့မှာမဟုတ်ပါ။

ဒီကမ္ဘာကကြောင်တွေ ပဲဟင်းခွက်လိုက်မော့မသောက်တာတော့ သေချာတယ်။ ဒီတော့ကြောင်တွေ မနက်ပိုင်း ဥပုဒ်စောင့်ကြပေါ့။

❐ တာလပေါ
မနက်ပိုင်းမှာက သိပ်အဆင်မပြေပေမယ့် ‌ညနေပိုင်းမှာ တည်ခင်းဧည့်ခံတာကတော့ ဖွယ်ဖွယ်ရာရာပါ။ တစ်ပက်တာ ၇ရက်မှာ ၃ရက်က "တာလပေါဟင်းရည်"ပါတဲ့။ ဆန်၊ ငါးရံ့၊ကန်စွန်းရွက်၊ ချဉ်ပေါင်၊ မျှစ်ပြုတ်၊ ဆူးပုတ်၊ မျင်ငါးပိ၊ စပါးလင်၊ ပင်စိမ်း၊ ငရုတ်သီးစိမ်းတောင့် ... ဒါတွေနဲ့ အင်မတန်စားကောင်းတဲ့ဟင်းပါ။ ရှယ်ပါ၊ ဘားအံ့ဘက်ရောက်ခဲ့တုန်းက စားခဲ့တဲ့ရတဲ့ "ကရင်တာ‌လပေါ"ဟင်းကို ပြောနေတာပါ။ အင်းစိန်မှာကျွေးတာတော့ ခုနကအမျိုးအမည်‌တွေပါတဲ့ "ကရင်တာလပေါ" မဟုတ်ပါ။ ဘာမှမပါတဲ့ ရေလုံပြုတ် "အင်တာလပေါ" ဖြစ်ပါတယ်။ ဆိုခဲ့ပါအတိုင်း တစ်ပက်ကို ညနေ ၃ရက်သုံးဆောင်ခွင့်ရရှိခဲ့ပါတယ်။

ကိုယ်ကတော့ တာလပေါ အသာမျှောပေမယ့် ကြောင်တွေကတော့ ဘယ်ရလိမ့်မှာ။

❐ ကွကျဥ/ အသား
ကျန်လေးရက်မှာတော့ ကြက်ဥ၂ရက်ကျွေးရှာပါတယ်။ ကြက်ဥက အပြုတ်ပါ။ ဘာမှလုပ်နေစရာမလိုပါ။ ခွာစားရုံပါပဲ။ ခွာစားရုံအပြင် ဂေါ်လီလိမ့်လို့ပဲရပါမယ်။ ကြက်ဥစားတဲ့ ကြောင်တွေ‌တော့ အများအပြားတွေ့ခဲ့ရတယ်။ ကြက်ဥနေ့ဆိုရင်တော့ ကြောင်တစ်ကိုက်-ကိုယ်တစ်ကိုက်ပါပဲ။ ကြက်ဥမစားချင်တဲ့ကြောင်တွေ ငတ်ရုံ။

နောက်ဆုံးကျန်တဲ့၂နပ်စာကတော့ ရှယ်ပါ။ ရှယ်ဆို ငါးဟင်းနဲ့ကြက်သားဟင်းလေ။ ကြက်တစ်ကောင်မှာ ခြေထောက်တွေ၊ခေါင်းတွေလည်း စားစေချင်လို့ ထင်ပါရဲ့၊ ကျွေးရှာပါတယ်။ ကြက်တစ်ကောင်ကို အတုံး ၃၀လောက်ရအောင်ပိုင်းဖြတ်ပြီး မစားရမရှိရလေအောင် လူအယောက်၃၀စာ‌ကျွေးပါတယ်။

အိုး ဒီလိုအချိန်ဆိုရင်တော့ ကြောင်လေးတွေထီပေါက်တာပါပဲ။ တစ်ပက်လုံးငတ်ခဲ့သမျှ အသားလေးတစ်ဖက်ရရ နှစ်ဖက်ရရနဲ့ ဖြေပေါ့။ အဲ... အဲ့မှာ ငတ်တဲ့ကြောင်ကတော့ အူစိုဖို့ နောက်တစ်ပက်ထပ်စောင့်ချေတော့။ (နောက်တော့ ကြက်ဥ/ကြက်သားဈေးကြီးလို့ ငါးပြောင်းကျွေးတယ်လို့ ၄လပိုင်းက လွတ်လာသူတွေ ပြောပြတယ်)

မဖြစ်စလောက်အသားတုံးလေးကို ကြောင်တွေအများကြီးနဲ့ ဝေစားမျှစားလုပ်ဖို့ဆိုရင် အနံ့တောင်ခံလိုက်ရမှာမဟုတ်ဘူး။ အိမ်ကပါဆယ်လာတဲ့သူတွေကျတော့ အိမ်ချက်ဟင်းလေးပါတော့
ဒီလိုအသားတုံးတွေကို ကော်ဖီနဲ့ပြန်လဲကြတယ်။ ကော်ဖီ၂ထုပ်လောက်ပေးရင် သူ့အသားကိုယ်ရတယ်။ ဒီနည်းနဲ့ပဲ ကြောင်ချစ်သူများက ကြောင်များရဲ့သမုန္ဓရာ ဝမ်းတစ်ထွာအတွက် ဖြေရှင်းပေးကြရတယ်။

❐ သခင်
လူဆိုတော့လည်း အမျိုးမျိုးအထွေထွေမဟုတ်လား။ သားရေ/သမီးရေ နဲ့ ကြောင်ချစ်ကြသူတွေရှိသလို ဘယ်သူပြောလို့ပြောမှန်းမသိ 'ကြောင်မွှေးက ဘာဖြစ်တက်တယ်/ညာဖြစ်တက်တယ်' နဲ့ ဆိုသူများကလည်း တစ်အုပ်စုပါ။ အမှန်တကယ်တော့ ကြောင်အမွှေးက လူကို ဘာအန္တရာယ်မှမဖြစ်စေပါဘူး။ ကြောင်အရေပြား (Dander) ပြဿနာရှိနေတာမျိုး၊ ဆီး/သွားရည်ထဲက Proteins တစ်မျိုးကပဲ Asthma ရှိသူအနည်းငယ်ကို သက်ရောက်စေတာပါ။ သက်ရောက်စေတယ်ဆိုတာကလည်း ဆေးလိပ်ငွေ့ကို ရှုမိတာလောက်ထိတောင် အန္တရာယ်မပေးပါဘူး။
ဒါပေမယ့်လည်း ... ။ ကြောင်တွေကတော့ ခြေလှမ်းမှားသွားရင် အချို့လူပုဂ္ဂိုလ်များရဲ့ လက်ဝါးစာကို ခံရရှာပါတယ်။

❐ လွတ်ငြိမ်း
အဆောင်တစ်ဆောင်ကို ကြောင်အကောင်ရေ ၁၀၀ကျော်ရှိတယ်။ မွေးလာတာနဲ့ ငတ်လို့ သေသွားတာနဲ့ ။ ကြောင်ဦးရေက သူ့ဟာသူတာ့ ပြန်မျှနေတယ်။ ပုံမှန်အစာကျွေးနေတဲ့သခင်က သူလွှတ်တဲ့ရက်‌ရောက်လို့ ပြန်သွားတဲ့အခါ ကြောင်တစ်သိုက်သခင်အသစ်ရှာရပြန်ပြီ။ လူတွေလွတ်ရက်ရှိကြပေမယ့် ကြောင်တွေက လွတ်ရက်မရှိ-ထောင်တစ်သက်။

See more..

❐ KNDF အမှတ် (၈)
ဗျူဟာမှ ဦးဆောင်ကာ “တွဲလက်ပူးပေါင်း ဗျူဟာ (၈) စစ်ကြောင်း” ကမ်ပိန်း ပြုလုပ်။

ဒီဇင်ဘာ ၆၊ ၂၀၂၄။

ကရင်နီအမျိုးသား ကာကွယ်ရေးတပ် KNDF အမှတ် (၈) ဗျူဟာမှဦးဆောင်ကာ “တွဲလက်ပူးပေါင်း ဗျူဟာ(၈)စစ်ကြောင်း” ကမ်ပိန်းအား ပထမဆုံးအကြိမ်အဖြစ် ပြုလုပ်ကြောင်းသိရသည်။

ကမ်ပိန်းကာလသည် နိုဝင်ဘာလ ၂၈ရက်နေ့မှ ဇန်နဝါရီလ ၂၈ ရက်နေ့အထိ ရက်ပေါင်း (၆၀) ပြုလုပ်သွားမည်ပြီးမဲလက်မှတ် ပုံစံဖြင့်‌ရောင်းချသွားမည်ဖြစ်သည်။ 

မဲလက်မှတ်တစ်စောင်လျှင် မြန်မာငွေကျပ် ၂၀၀၀၀ ဖြစ်ပြီး ပထမဆုအနေဖြင့် ပေ ၆၀ ပတ်လည်‌မြေကွက် တစ်ကွက်၊ဒုတိယဆု အနေဖြင့် စိန်နားကပ် (၁) ရံ၊တတိယဆု အနေဖြင့် ဆိုင်ကယ်တို့ဖြင့် ကံထူးနိုင်မည်ဖြစ်ကာ ပြည်တွင်း၊ပြည်ပရှိ မိဘပြည်သူများမှ k pay, Nug pay, Sdb pay နှင့် Wave pay တို့ဖြင့် ပါဝင်ထောက်ပံ့နိုင်ပါကြောင်း အသိပေးထားသည်။ 

အမှတ် (၈) ဗျူဟာသည် ရဲဘော်များ၏ ကျန်းမာရေးနှင့် ကြံ့ခိုင်ရေးအတွက် ဆေးဝါးနှင့်ရိက္ခာများ စသည်များကို ဖြည့်တင်းပေးနိုင်ရန် လုပ်ဆောင်လျက်ရှိပြီး လက်ရှိတွင် စစ်ဝတ်တန်ဆာနှင့် လက်နက်ခဲယမ်းများ လိုအပ်လျက်ရှိသည်။

အဆိုပါ လိုအပ်ချက်များကို ဖြည့်ဆည်းပေးနိုင်ရန်အတွက် “တွဲလက်ပူးပေါင်း ဗျူဟာ (၈) စစ်ကြောင်း” ကမ်ပိန်းအား ပြုလုပ်ခဲ့ကြောင်းသိရသည်။ 

ကမ်ပိန်းသည် ယနေ့ ဒီဇင်ဘာ ၆ ရက်မြောက်နေ့ရောက်ရှိပြီဖြစ်သော်လည်း ရရှိမှုပမာဏမှာ ၀.၈% သာ ရှိသေးသောကြောင့် ပြည်တွင်းပြည်ပရှိ တော်လှန်ပြည်သူများအနေဖြင့် တတ်နိုင်သည့်ဘက်မှ ဆက်လက်ပါဝင်ပေးကြပါရန်လည်း ဗျူဟာ (၈) စစ်ကြောင်းမှ တောင်းဆိုထားသည်။ 

https://www.wlmf.org/projects/tactical8operation

သတင်းဓာတ်ပုံ - Credit

The Moment - အခိုက်အတန့် [Episode – 3]

တော်လှန်ရေးခရီးရှည်တလျှောက်ကို ဖြတ်သန်းလာကြရင်း ရယ်မောဖွယ်ရာတွေ၊ နာကြည်းမုန်းတီးဖွယ်ရာတွေ၊ ဝမ်းနည်း စိတ်ပျက်မိတာတွေ... စတဲ့ အခိုက်အတန့် (Moment) လေးတွေကို ပြန်ပြောင်းပြောကြရင်း စိတ်အမောတွေဖြေဖျောက် မှားခဲ့မိတဲ့ အမှားတွေ သင်ခန်းစာယူရင်း ရှေ့ဆက်သွားမယ့် တော်လှန်ခရီးအတွက် ခွန်အားသစ်တွေ ဖြစ်စေဖို့ ရည်ရွယ်တင်ဆက်တဲ့ The Moment အစီအစဥ်မှ ကြိုဆိုပါတယ်။

ÒThe MomentÓ အစီအစဥ် ရဲ့ တတိယပိုင်း အပိုင်း (၃) အနေနဲ့တော့ မြေပြင် တက်ကြွလှုပ်ရှားသူ လူငယ် (၂) ဦးဖြစ်တဲ့ ကိုလရိပ် နဲ့ နန်းကေတို့ရဲ့ တော်လှန်ရေးကာလ အမှတ်တရလေး တွေ အကြောင်း ပြန်ပြောင်း ပြောကြားချက်တွေကို နားဆင်ရမှာ ဖြစ်ပါတယ်။

နားဆင်သူ ပရိတ်သတ်များအနေနဲ့လည်း တော်လှန်ခရီးတလျှောက်က မိမိတို့ရဲ့ အမှတ်တရဖြစ်ရတဲ့ အခိုက်အတန့်လေးတွေရှိရင်လည်း မျှဝေပေးကြဖို့ ဖိတ်ခေါ်လိုက်ရပါတယ်။

Youtube မှ ကြည့်ရှုရန် - https://youtu.be/OxOBGbXO6uY?si=oQ0i5sAFs2Z6QgQo

္Facebook မှ ကြည့်ရှုရန် - https://www.facebook.com/share/v/w1fpBe8GoUjvaQRh/

#TheMoment #အခိုက်အတန့်
#Episode_3 #LaYeik #NanK
#Podcast
#Towards #ဆီသို့

❐ PHOTO NEWS: တောင်ကိုရီးယားစစ်သားတွေ စစ်တန်းလျားပြန်ပြီ။

ဒီဇင်ဘာ ၃၊ ၂၀၂၄။

စစ်အုပ်ချုပ်ရေးအမိန့်ကို ဖျက်သိမ်းကြောင်း တောင်ကိုရီးယား အမျိုးသားပါလီမန်က အတည်ပြုဆုံးဖြတ်ပြီးနောက် တောင်ကိုရီးယားစစ်သားများ ပါလီမန်အတွင်းမှ ဆုတ်ခွာနေသည့်မြင်ကွင်းများကိုတွေ့ရစဉ်။

သတင်းဓာတ်ပုံ - Credit

❐ PHOTO NEWS: နိုင်ငံတကာ အမျိုးသမီးများအပေါ် အကြမ်းဖက်မှု ပပျောက်ရေးနေ့ Online campaign လှုပ်ရှားမှု PSLF/TNLA ရဲဘော်၊ ရဲမေများ ပြုလုပ်။

နိုဝင်ဘာ ၂၅၊ ၂၀၂၄။

သတင်းဓာတ်ပုံ - PSLF/ TNLA News

❐ အမျိုးသားနေ့ ဖြစ်တဲ့ တန်ဆောင်မုန်းလပြည့်ကျော် ဆယ်ရက်နေ့ဟာ နီးကပ်လာခဲ့ပါပြီ.မြန်မာ့နိုင်ငံရေးသမိုင်းကြောင်းအတွက် ကြီးစွာသော နိုးကြားမှုတွေဖြစ်စေခဲ့တဲ့ ဒီနေ့ဟာ မြန်မာတစ်မျိုးသားလုံးရဲ့ စုစည်းညီညွတ်မှုကို ဖြစ်စေခဲ့တဲ့ နေ့လည်းဖြစ်ပါတယ်။

ယနေ့အချိန်ကာလမှာလည်း တစ်မျိုးသားလုံးအတွက် တူညီတဲ့ ဘုံသဘောတူညီချက်တွေနဲ့ နိုင်ငံရေးလမ်းကြောင်းကို ဖော်ဆောင်ဖို့လိုအပ်နေပြီ ဖြစ်ကြောင်းပြောကြားထားတဲ့ အမျိုးသားအောင်ပွဲနေ့နဲ့ နိုင်ငံရေး ဦးတည်ချက် အမည်ရ Podcast ကိုယခုတစ်ပတ် အတွက် ဆီသို့မှ တင်ဆက်ပေးလိုက်ရပါတယ်။

YouTube - https://www.youtube.com/@SiTho-Towards-Media

SoundCloud - https://soundcloud.com/towards-podcast

❐ အမျိုးသားနေ့
(သို့မဟုတ်)
ကျောင်းသားကျေးဇူး

၁။
"အိုးဝေတဲ့ညံညံ ရွှေဒေါင်းပျိုတောင်ညိုဦးမှာလ
ကျူးရင့်မြည်သံ။
အောင်ပွဲရယ်ခံ နိုင်ငံတဲ့သာရေး။
ရွှေဗဟိုရ်စည်တော်ရွမ်းချိန်မို့
ခွန်းမျိုးဆက်တေး။''

''ခွန်းဆက်''- မင်းသုဝဏ်
(၁၉၄၈၊အိုးဝေနှစ်လည်မဂ္ဂဇင်း)

၂။
ဆရာပါရဂူက "ရေစီးကြောင်းသည် ရှေ့သို့ စီးမြဲ စီးနေသည်။နောက်ပြန်ဆုတ်ရိုး ထုံးစံမရှိပေ။ ရှေ့သို့စီးသွားသော လမ်းကြောင်း၌ အကယ်၍ ကျောက် ဆောင်ဖြစ်စေ၊ တခြား အဟန့်အတားတခုခုဖြစ်စေ ပိတ်ပင်ကာဆီး ထားနေမည်ဆိုလျှင်လည်းကွေ့ပတ်ပြီးလမ်းကြောင်း ရှာလျက် ရှေ့သို့သာ စီးသွားပေလိမ့်မည်။''လို့ ဆိုဖူးတယ်။

ဆရာဒဂုန်တာရာကတော့"အစဉ်အလာဟောင်းသည် အစဉ်အလာသစ်ကို ကျေးဇူးပြုသည်။ထို အစဉ်အ လာသစ်သည် ကြာညောင်းသွားသောအခါ နောက်အစဉ်အလာတခု ဖြစ်လာသည်။ ယင်းအစဉ်အလာသည် ရှေးက အစဉ်အလာက ကျေးဇူးပြုသောကြောင့် ဖြစ်ထွန်းလာခြင်းဖြစ်သည် ။ယင်းသမိုင်းဗေဒအမြင်ဖြင့်ကြည့်မှသာလျှင်သမိုင်း၏ တိုးတက်မှု၊ ဆုတ်ယုတ်မှု၊ လှုပ်ရှားမှု၊ ခေါင်းဆောင်မှုကို ထင်ရှား စွာ တွေ့နိုင် သည်။ ထိုအခါမှသာလျှင် အစဉ်အလာ ၏ ကျေးဇူး ပြုခြင်းကို နားလည်နိုင်မည်။''လို့ ရေးခဲ့ဖူးတယ်။

ဆရာတို့ရဲ့ရေစီးကြောင်းသဘောတွေ၊ အစဥ်အလာသဘောတွေကို နာယူစောကြောရတဲ့အခါမှာ နှစ်လိုခဲ့မိတယ်။အမျိုးသားနေ့အကြောင်းလေ့လာရတဲ့အခါ ဆရာတို့အမြင်အပေါ်ကနေ အခြေပြုဆင်ခြင်မိတာလည်းဖြစ်ရပါတယ်။

၃။
အောက်ဗမာပြည်က အင်္ဂလိပ်နယ်ချဲ့အောက် အရင်ကျရောက်ပြီး အထက်ဗမာပြည်က နှစ်၅၀လောက်အကွာ ၁၈၈၅ မှာကျတယ်။ဗမာဘုရင် ပါတော်မူတယ်ပေါ့။တတိုင်းပြည်လုံး နှစ်၁၀၀ ကျော်လောက် ကိုလိုနီဖြစ်ခဲ့တာလို့ အကြမ်းဖျင်းဆိုနိုင်တယ်။

ခေတ်သစ် ဗမာ့နိုင်ငံရေးရဲ့အစကိုတော့ ဝိုင်အမ်ဘီအေ (YMBA)ကလို့ပြောရမယ်ထင်မိတယ်။ဗုဒ္ဓကလျာဏယုဝအသင်း( Young Man Buddhist Associ tion)ဖြစ်တယ်။တဆက်တည်း ဗမာပြည်ကျောင်းသားလှုပ်ရှားမှုရဲ့ဗွေဆော်ဦး တိုက်ပွဲခေါ်သံလို့ ဝိသေသပြုချင်ရင်၁၉၂၀ ပထမကျောင်းသားသပိတ်ကို ရည်ညွှန်းရမယ်ဆိုချင်မိတယ်။တဖက်ကပြောရင် ဗမာပြည်ကျောင်းသားနိုင်ငံရေးရဲ့အစလို့လည်းပြောနိုင်မယ်။

ထပ်ပြောရရင် နယ်ချဲ့ကိုလိုနီအောက် နှစ်များစွာပြားပြားဝပ်နေကြရရာကနေ အမျိုးသားထုတရပ်လုံးကို နိုးကြားစေခဲ့တာမို့ အမျိုးသားနေ့၊ အမျိုးသားအောင်ပွဲနေ့လို့သတ်မှတ်ခံရတဲ့ လှုပ်ရှားမှုကြီးလည်းဖြစ်တယ်။

ပြန်ကြည့်ရင် ဗြိတိသျှကိုလိုနီအဖြစ် ၁၈၉၄တုန်းက ဗမာပြည်မှာ ကောလိပ်ပဲရှိတယ်။အိန္ဒိယက ကာလကတ္တားတက္ကသိုလ်လက်အောက်ခံမျှဖြစ်တယ်။ဝိုင်အမ်ဘီအေနဲ့ ပညာရေးအမြင်ကြီးသူတွေဦးဆောင်ပြီး ကောလိပ်အဆင့်ကနေ တက္ကသိုလ်အဆင့်ကိုမြှင့်ပေးဖို့ တောင်းတယ်။

၁၉၀၉ ကနေတောင်းလာလိုက်တာမှာ ၁၉၁၆ကျ ရန်ကုန်မှာတက္ကသိုလ်တခုဖွင့်ဖို့ကျတယ်။ဘုရင်ခံ ကရက်ဒေါက် က ပညာမင်းကြီး မက်ဟန်တာ ဦး ဆောင်တဲ့ ရန်ကုန် တက္ကသိုလ်အက်ဥပဒေ ရေးဆွဲရေးကော်မတီကို ဖွဲ့စည်းတယ်။တာဝန်ပေးတယ်။

ရန်ကုန်တက္ကသိုလ် အက်ဥပဒေမှာ ပြည်သူလူထုက လက်မခံနိုင်တာတွေထဲကမှ အဓိက အချက်တွေကိုကြည့်ရင် -
(၁) ဗမာနိုင်ငံမှာ ရန်ကုန်တက္ကသိုလ်တခုပဲရှိရမယ်။
(၂) တက္ကသိုလ်မှာ ကျောင်းအိပ် ကျောင်းစား ကျောင်းသားတွေကိုပဲ တက်ခွင့်ပြုပြီးနေ့ကျောင်း သားတွေကို တက္ကသိုလ် တက်ခွင့်မပြု။
(၃) တက္ကသိုလ်စတက်တဲ့ တနှစ်ကို အကြိုသင်တန်းအဖြစ် ကျောင်းတက်ရမယ်၊ အဲ့ဒီတနှစ်အတွင်းမှာတက္ကသိုလ်က သဘောကျတဲ့သူများကိုပဲ နောက်တနှစ်မှာ တက္ကသိုလ်တက်ခွင့်ပြုမယ်၊သဘောမကျတဲ့သူတွေကို တက္ကသိုလ်ပထမနှစ် ဆက်တက်ခွင့်မပြု...ဆိုတဲ့ အချက် ၃ချက်ကိုတွေ့ကြရမယ်။

( ၁။ အကြိုသင်တန်းတက်တဲ့ကျောင်းသားတွေအဖို့က ဘာမှရေရာမှုမရှိ
၂။ တက်ခွင့်မရရင် အကြိုသင် တန်းကာလ ကုန်ကျစရိတ်က အလကားကုန်တာ၊
၃။ ကျောင်းတက်ခွင့်ရသူတွေ အနေနဲ့ကျလည်း မလိုအပ်ဘဲ တက္ကသိုလ်တနှစ်တက်ရတဲ့ စရိတ် ပို ကုန် ကျတာပဲအဖတ်တင်တယ်)

ချုပ်လိုက်ရင် ဗြိတိသျှကလုပ်တဲ့ ရန်ကုန်တက္ကသိုလ်အက်ဥပဒေက သာမန် လူလတ်တန်းစားနဲ့ဆင်းရဲ သား သားသမီးတွေကိုတက္ကသိုလ် မတက်ရောက်နိုင်အောင် ရေးဆွဲထားတာလို့ နားလည်ခဲ့ကြတယ်။

အစရှိသဖြင့်မှာ အဲဒီကျောင်းသားနဲ့ ပြည်သူကို အ ခြေမခံတဲ့ တက္ကသိုလ်အက်ဥပဒေထဲ သဘောမတူတာ များစွာရှိခဲ့တယ်။

ဒါကြောင့်ပဲ ဝိုင်အမ်ဘီအေအဖွဲ့နဲ့ကျောင်းသားပြည်သူတွေက ရန်ကုန်တက္ကသိုလ်အက်ဥပဒေကိုဆန့်ကျင်ကန့်ကွက်ခဲ့ကြတယ်။

ဒါပေသိ ရေးတဲ့အဖွဲ့က၁၉၂၀ ခုနှစ် ဩဂုတ်လ (၂၈) ရက်နေ့မှာ အဲဒီဥပဒေကိုအတည်ပြုပစ်တယ်။ဗမာဘုရင်ခံရော၊အိန္ဒိယဘုရင်ခံချုပ်ကပါသဘောတူလက် မှတ်ထိုးပြီး ဒီဇင်ဘာပထမပတ်ထဲမှာအတည် ပြုပြဌာန်းတယ်။

ရန်ကုန်တက္ကသိုလ် တရားဝင် ဖွင့်လှစ်ပွဲကို ဒီဇင် ဘာလ (၇) ရက်နေ့ကျ ကျင်းပမယ် ကြေညာတယ်။

ရန်ကုန်တက္ကသိုလ်အက်ဥပဒေပါအချက်တချို့ကို လက်မခံကြောင်းသိရက်နဲ့ဇွတ်ပြဌာန်းတာဖြစ်တယ်။

၁၂၈၂၊တန်ဆောင်မုန်းလဆုတ် ၈ရက်၊သီပေါမင်းပါတော်မူနှစ်လည်နေ့မှာ ရွှေတိဂုံ အနောက်တောင် စနေထောင့်မှာရန်ကုန်ကောလိပ်ကျောင်းသား ကိုဘဦး ဦးဆောင်တဲ့ကျောင်းသား၁၁ယောက်က အမြုတေအဖြစ် စုစည်းဆွေးနွေးပြီးသပိတ်မှောက်ကော်မတီဖွဲ့တယ်။၂၆ဦးထိရှိခဲ့တယ်။ယူနီဗာစတီ သပိတ်မှောက်ကောင်စီပေါ့လေ။

See more...

❐ ဆီသို့စာစဉ် အတွဲ (၆) အမှတ် (၁၅) ကို ကရင်နီအမျိုးသားများကာကွယ်ရေးတပ် ဗျူဟာအမှတ် ၂ (KNDF-B02) ထံ Freelance Volunteer Myanmar ရဲဘော်များ၏ အကူအညီဖြင့် ထုတ်ဝေခဲ့ပါသည်။

စာစဉ်အား အွန်လိုင်းမှတဆင့် ဖတ်ရှုရန် >>> https://towardsmedia.com/p/atwe6-amhat15-788990

တရုတ်-မြန်မာနယ်စပ် ကံပိုက်တည်မြို့ရှိ နယ်စပ်ဥမင်လှိူင်ခေါင်းတွင် ကချင်အမျိုးသားအလံတော်လွှင့်တင်။ ကချင်အထူးဒေသ ၁ တခုလုံး KIA ထိန်းချုပ်ထား။

၂၀၂၄ ခုနှစ်၊ နိုဝင်ဘာလ ၂၁ရက်။

❐ ဆီသို့ရဲ့ အပတ်စဉ်သတင်းစာ အတွဲ ၅၊ အမှတ် ၁၀ ထွက်ရှိလာပါပြီ။

ပြီးခဲ့တဲ့ တစ်ပတ်တာကာလမှာ မြန်မာနိုင်ငံတွင်း ဘာတွေဖြစ်ခဲ့လဲ၊ ဘာတွေပြောင်းလဲသွားလဲဆိုတဲ့ သတင်းအနှစ်ချုပ်တွေကို စုံစုံလင်လင် တင်ဆက်ထားပါတယ်။

အပြည့်အစုံအား ဖတ်ရှုရန် >>> https://www.facebook.com/share/p/17WQQ95htm/

❐ ဆီသို့ရဲ့ အပတ်စဉ်သတင်းစာ အတွဲ ၅၊ အမှတ် ၉ ထွက်ရှိလာပါပြီ။

ပြီးခဲ့တဲ့ တစ်ပတ်တာကာလမှာ မြန်မာနိုင်ငံတွင်း ဘာတွေဖြစ်ခဲ့လဲ၊ ဘာတွေပြောင်းလဲသွားလဲဆိုတဲ့ သတင်းအနှစ်ချုပ်တွေကို စုံစုံလင်လင် တင်ဆက်ထားပါတယ်။

အပတ်စဉ်သတင်းစာ ဖတ်ရှုရန် >>> https://www.facebook.com/share/p/15JwYgCfXV/?mibextid=WC7FNe

နိုင်ငံတော်သစ်ဆီသို့ မျှော်ရည်၍

❐ ထားဝယ်တွင် တပ်စွဲထားသော စစ်ကောင်စီစခန်းကို သိမ်းပိုက်ရာ စစ်ကောင်စီတပ်သား ၁၅ ဦးသေဆုံးပြီး လက်နက်ခဲယမ်းများ သိမ်းဆည်းရရှိ။

နိုဝင်ဘာ ၃၊ ၂၀၂၄။

သတင်းအပြည့်အစုံဖတ်ရှုရန် >>> https://www.facebook.com/share/p/17saBhoyni/?mibextid=WC7FNe

❐ နောင်ချိုမြို့၊ ဆမ္မဆယ်ကျးရွာကို စစ်ကောင်စီက (၃)ကြိမ်လာရောက်၍ ဗုံးကြဲချတိုက်ခိုက်၊ ဒေသခံများထိခိုက် သေဆုံး။

နို၀င်ဘာ ၃၊ ၂၀၂၄။

သတင်းအပြည့်အစုံဖတ်ရှုရန် >>> https://www.facebook.com/share/p/19Pqmo7uMT/?mibextid=WC7FNe

❐ အကြမ်းဖက် စစ်ကောင်စီရဲ့ အနိုင်အထက် ပြုမှုတွေ၊ မတရားမှုတွေကို တွန်းလှန်တိုက်ခိုက်လာခဲ့တာ လေးနှစ်နီးပါးကာလကို ရောက်ရှိလာပြီဖြစ်ပေမယ့် မြေပြန့် ဒေသ ပြည်မက လူတွေအတွက် ခက်ခက်ခဲခဲ တွန်းလှန်နေရတဲ့ အယူအဆ တစ်ခု ရှိပါတယ် ။ အဲ့ဒါကတော့ တစ်ပြည်ထောင်ဝါဒ ပါပဲ။ အလွယ်ပြောရမယ် ဆိုရင်တော့ ပြည်မက လူတွေနဲ့ တိုင်းရင်းသားတွေရဲ့ အယူအဆ လိုလားချက်တွေဟာ ထပ်တူညီတယ်ဆိုတဲ့ အတွေးအခေါ် ပါပဲ။ ဒီအတွေးအခေါ် ဖြစ်ပေါ်လာအောင်လည်း စစ်အာဏာရှင် အဆက်ဆက်ဟာ နှစ်ပေါင်းများစွာ ရိုက်သွင်းလာခဲ့တာပါ။ ဒီလို အတွေးအခေါ်ကို ဖြိုဖျက်ဖို့ ကြိုးပမ်းထားတဲ့ ဖျောက်ဖျက်ပစ်ရမည့် အရိုးဆွဲနေသော တိုင်းရင်းသားများအပေါ် အမြင်များ။ အမည်ရ Podcastကို ယခုတစ်ပတ် အတွက် ဆီသို့မှ တင်ဆက်လိုက်ရပါတယ်။

Podcast နားဆင်ရန် >>> https://youtu.be/OMDQB62RsFI

SoundCloud >>> https://on.soundcloud.com/EzJjN479RhePekhL7

#ဖျောက်ဖျက်ပစ်ရမည့်အရိုးဆွဲနေသောတိုင်းရင်းသားများအပေါ်အမြင်များ
#Podcast #ဆီသို့ #Towards

နိုင်ငံတော်သစ်ဆီသို့ မျှော်ရည်၍

❐ စစ်ကောင်စီသည် ၂၀၂၄ ခုနှစ် အောက်တိုဘာလအတွင်း မင်းတပ်မြို့နယ်၌ လေကြောင်းတိုက်ခိုက်မှု ၇၇ကြိမ် ပြုလုပ်ခဲ့ကြောင်း CDF-Mindat မှသတင်းထုတ်ပြန်။

နိုဝင်ဘာ ၂၊ ၂၀၂၄။

သတင်းအပြည့်အစုံ ဖတ်ရှုရန် >>> https://www.facebook.com/share/13iFbhcqUw/?mibextid=WC7FNe

❐ ၂၀၂၁ နွေဦးတော်လှန်ရေးမှာ ပြည်သူအများကို တော်လှန်စိတ်ဓာတ် အမြဲ မပြတ် သွတ်သွင်းပေးနိုင်ခဲ့ခြင်းတွေထဲက အကြောင်းရင်းတစ်ခုကတော့ နည်းပညာပါပဲ။ နည်းပညာအကူအညီနဲ့ပဲ အရင့်အရင် ခေတ်အဆက်ဆက်က မလုပ်ဆောင်နိုင်ခဲ့တဲ့ သတင်းစကားဖြန့်ဝေမှုတွေကို လုပ်ဆောင်နိုင်ခဲ့ရင် ပြည်သူအများရဲ့ တော်လှန်ရေး ရေချိန်ကို မြင့်တက်စေခဲ့တာပါ။

ဒါ့အတူ စစ်ကောင်စီဘက်ကလည်း ပြည်သူအများရဲ့ နည်းပညာ ရပိုင်ခွင့် အခွင့်အရေးတွေကို ဖိနှိပ်ရင်း သတင်းစီးဆင်းမှုကို ကန့်သတ်ဖို့ တားဆီးဖို့ စဥ်ဆက်မပြတ် ကြိုးပမ်းနေဆဲပါ။

ဒီတစ်ပတ် Podcastမှာတော့ နည်းပညာနဲ့ တော်လှန်ရင်း ဆောင်ရ ရှောင်ရမယ့် အရာတွေကို အလေးအနက် ပြောကြားပေးထားတဲ့ လုံလုံခြုံခြုံ ရှင်သန် တော်လှန်ပါ မိတ်ဆွေ အမည်ရ Podcast တစ်ပုဒ်ကို ဆီသို့မှ တင်ဆက်ပေးလိုက်ပါတယ်။

တော်လှန်ရေး ကာလ ဒစ်ဂျစ်တယ်လုံခြုံရေးအတွက် မသိမဖြစ် သိသင့် တဲ့ အကြောင်းအရာတွေကို တင်ဆက်ပေးထားတာ ဖြစ်လို့ မိမိ ဝန်းကျင်က သိသင့် သိထိုက်သူများ ကို သိရှိစေရန် မျှဝေပေးဖို့လည်း တောင်းဆိုပါရစေ။


နိုင်ငံတော်သစ်ဆီသို့ မျှော်ရည်၍