تنمية وردية♡.

علمتني قطتي ان:

_ مش محتاجه اعمل حاجه الفِ بيها الانتباه، واني اعيش ع طبيعتي
_ لما اصحي من النوم مقومش اجري، وادي فرصه لنفسي افوق
_ اني احاول احافظ علي هدوئي ومسيبش اي حاجه تأثر فيا
_ المكان اللي محسش انه مكاني، اسيبه وامشي فورًا لو هيهدد سلامي النفسِي
_ مديش فرصه لحد يفرض وجوده عليا، انا اللي اختار مين يكون موجود في حياتي
_ مافيش حاجه دايمه، سواء الافضل او الاسوأ، كل شئ بيمُر
_ اهتم برفاهيتي بشكل يومي، ومفوِتش فرصه ولو بسيطه استمتع فيها
_ اخد وقتي في الاكل والشرب واستمتع بيهم، مش تقضية واجِب
_ اتقبل نفسي واكون فخوره بيها
_ عشان اكون محبوبه، لازم احب نفسِي الاول
_ اهتم بالعطاء
_ اكون علي طبيعتي بغض النظر عن نظرات الناس وارائهم
_ في كل يوم، اتعلم شئ جديد "الفضول له جانب ايجابي في التعليم"
_ اني احاول اكفي نفسي ومسيبش فراغ يخليني اخد قرارات غلط لملء الفراغ
_ التفويض امر مهم، حاضر طول الوقت بتستهلك من طاقتنا
_ كده كده المهام هتتنفِذ، يبقي تتنفِذ برواقه
_ استثمار جزء من الوقت للاستمتاع بالحياه
_ يكون عندي مرونه واتعلم التكيُف
_ الحياه اقصر من اننا نشاركها مع حد بيستهلك طاقتنا
_ احاول اوفر لنفسي نومه مُريحه وهاديه
_ محتاجه اقول لا زي مابقول حاضر
_ اتجنب الصراعات والمشاكل، مش كل حاجه تستاهل تاخد من وقتنا
_ اهتم بالبيئه اللي عايشه فيها واخلي البيت مكان مريح ليا
_ حرص ولا تخوِن
_ الصبر والعِند في السعي مُهمين
_ معظم الوقت احساسنا بيكون صح، بلاش نكدب نفسنا
_ استمتع بحب الناس اللي حواليك ليا واخد جرعتي منها
_ الاهتمام بالنفس وجمالها شئ ضروري مش ترفيهي
_ مخفش اسمي الحاجه بمسمياتها الصحيحه واكون صريحه
_ لو محتاجه مساعده، هطلب ده، ومش هعتمد ع نفسي طول الوقت
_ اني اتعلم الصمت، واسمع اكتر ما اتكلم
_ احافظ علي صحابي عشان الصداقه مبتتعوضش
_ مديش الاشياء الماديه اهميه اكبر من حجمها
_ اكون متواضعه، اسامح نفسي، ومبطلش احاول

وده كان مُلخص سريع لكتاب "فكر وتصرف كأنك قط" 💘
#تنمية_وردية /~

يعني مكفاكيش انك عملتي خطة يناير اوفر وغير منطقيه ومنفذتيش منها حاجه، لا البجاحه بقي انك بتكرري نفس الخطه لـ فبراير، يابت استنصحي وخلي عندك مرونه في التفكير 🤌🏻💘

خطة فبراير الصح تبقي تجهيز لرمضان وبس، اجهز ازاي؟
جهز جسمك: اهتم بصحتك عشان تقدر تعبد الله حق عباده
جهز يومك: ضيف عادات دينيه في اليوم زي ورد الاستغفار، بودكاست ديني
جهز روحك: صلح علاقتك بالقران
وهكذا ♡..

اي حاجه تانيه هتحطيلها اولويه صدقيني مش وقتها خالِص '))
اشطر كتاكيت شجعوا نفسكم وابدأوا تخطيط يلا 🎀

بيني وبينكُم كده انا زمان لما كنت بتابع الناس بتوع النصايح والتخطيط كنت بحس بفشل رهيب، لا انا اتعلمت برمجه ولا خدت عشرومية كورس ولا خلصت الف كتاب، فـ كنت بحس ان مافيش امل مني حتي للمحاوله، لما ركزت مع نفسي وبدأت اقدر انجازاتي الصغيره، عززت ثقتي بنفسي، بقيت بشوف انجازات غيري ادعيلهم بالبركه لكن مستحيل اتهَز بفضل الله، وعشان كده انا بقيت انفلونسر مع ان دي مكنتش خطتي الحقيقه، عشان تعرفوا ان انا وانتوا ناس طبيعين، واننا عايشين عشان نحاول، وان اي محاوله ولو بسيطه تستحق المكافأه، احنا اشطر كتاكيت 💘

ومايزالُ عبدي يتقرّبُ إليَّ بالنوافل حتّى أُحبه💗

"إذا لم تنجح الخطة أ، فالأبجدية تملك
٢٨ حرفًا آخر، ابقَ هادئًا فقط♡."

نصيحتي المُفضله♡

صيام يوم الإسراء والمعراج سنة ولا بدعة ؟

ج/ لأجل اليوم= بدعة.

من كانت له عادة صيام فوافقت اليوم= لا بأس.

الشيخ أحمد سالم

نبهوا بعض ياجماعه ♡

وُجب التنبيه..

قال بن باز رحمه الله:
أن ليلة الإسراء والمعراج لم تُحفظ ولَم يُسجلّها النبي ﷺ بـِ موعدٍ،
ولم تُسجل في الأسانيد بِـ تاريخٍ

ولا يُثبت أنها وقعت في شهر رجب.

هذا اليوم ليس له فضيلة خاصة بصيام، ولا تخص ليلته بقيام،
ولا يجوز تخصيصها بعملٍ معين ولو كان خيرًا لسبقنا إليه
النبي ﷺ لا يوجد صيام، فصيام ليلة الإسراء والمعراج من البدع المحدثة.

_وذكر..

لـ آيه سامي

"لو أن الناس كلما إستصعبوا أمرًا تركوه ، ماقام للناس دنيا ولا دين"
_عمر بن عبدالعزيز.

في قاموس الناجحِين، هاء الهزِيمه تُنطق عينًا♡

اهم استثمار، استثمارك في نفسِك ♡!

♡

قصَدتُكَ من كل الجهاتِ مناديًا
اجرني من القيدِ الذي شدّ معصمي
أعدني لنفسي كم تغربتُ حائرًة
احِن لضوءٍ في سمائك مُنعمِ♡

محاولات الناس مُختلفه، حد بيحاول يصحي بدري، حد بيحاول يشرب مياه، حد بيحاول يلتزم في الصلاه، حد بيحاول يستمر علي الرياضه، ومهما كانت بساطتها فـ هي تحت بند جهاد النفس، ولما توصلها تستحق يتقال عليها انجاز، بطل تقلل من محاولاتك وقدر انجازاتك الصغيره ♡

#تنمية_وردية /~

متقعدش تستني الشغف، خلي الشغف هو اللي يجيلك!

لو قعدت تأجل في مذاكرتك لحد ماتحس بالشغف تجاه اللي وراك يبقي مش هتبدأ خالِص، لكِن لو بدأت اللي وراك حالًا وقومت رميت نفسك وسط الكتب، مع اول فصل هتخلصُه هيجيلك شغف وحماس رهيب بسبب الإنجاز اللي إنجزته يخليك تاخد الفصل اللي بعده واللي بعده وهكذا : )

فـ لو فعلًا عايز تخلص اللي وراك، قوم حالًا ♡
#تنمية_وردية ~

صباح الخيِر .. إقرأ أذكَاركِ لتحفَظك الملائِكه ، وكُن مُطمئناً .

#أذكار_الصباح ..☁️💚

تَعَلَّم الإتمام♡

أن تُتِمَّ ما بدأت، وتُنجز ما خَطَوت، وتُكمل ما خَطَّطتَ له! لا تكن مبتورًا، منقوصًا، أشتاتًا هنا وهناك، في الطّريق ستختلف الرّؤىٰ، ستتغيّر الأحداث، قد تَترُك أمرًا وتأخذ آخر، لا تنسَ؛ بعضُ التَّرك إتمام، لكن أدرِك متى تترُك ومتى تُمسك، متى تُكمل ومتى تقف!

- قصي العسيلي.

وقت التحصين ❤️

نسختَك في المستقبل هي نتايج أفعالك دلوقتِ 🌸

مش هتبقي مُثقف في المستقبل وانتَ مش قادر حتي تقرا كل يوم ٥ دقايق
مش هتبقي ناجِح في مجالك في المستقبل وانتَ مش بتسعي فيه من دلوقتِ
مش هتبقي صحتك كويسه في المستقبل وانتَ مش عايز تلعب رياضه او تاكل صحي
مش هتبقي احسن نسخه منك، والنسخه القديمه قاعده تحت البطانيه مش عايزه تعمل حاجه.

لو عايز فعلًا شخصيه أحسن في المستقبل، فـ انسب وقت تشتغل فيه علي نفسك هو دلوقتِ حالًا، عشان كل يوم بيعدي من عمرك هيفرق معاك بعدين بإذن الله ♥️ ..

#تنمية_وردية ~

طبعًا النهارده اتقسمنا لاتنين، جزء الحماس خده وخد كل القرارات وجدد كل الاشتراكات، وجزء عاش يوم النهارده زي امبارح وكان متوقع انه هيصحي انسان جديد، واحب اديكم نصيحه صغيره كده للزمن، مينفعش تخطط ولا تاخد قرار وانت متحمس اوي كده لازم تكون هادي وتفكر بمنطقيه، وتغيير التاريخ مش هيخليك انسان جديد، انت محتاج تتحرك عشان تتغير وشكرًا ♥.

من الحاجات اللي برشحلكُم تعملوها انكم تكتبوا رسايل لنفسكم المستقبله 🩷

مضمون الرساله بيختلف من شخص للتاني، انا بالنسبالي بحب اقول لنفسي السنه اللي فاتت مرت ازاي، وايه اللي نفسي اكون محققاه وانا بقرا الرساله دي السنه الجايه، وكلمتين تشجيع لنفسي في حالة إني حققت اهدافي وكلمتين تهوين لو محققتش:))

انصحكم بيها فكره لذيذه 🌸

اوعي الانجازات اللي بينشروها دي تحبطِك او تحسسك انك معملتيش حاجه، محاولاتك طول السنه انجاز، مقاومتك للمعاناه انجاز، انك لسه عايزه تخططي وتحاولي من جديد انجاز، مش مهم مين وصل لايه مش بتاعتنا خالِص، نركز مع نفسنا والسنه بتاعتنا ونستعين بالله وبس ♥

١٥ فكرة لأهداف ٢٠٢٤ ♡

١- اظبُط نومك وقوم بدري
"اكتب مهامك من بليل، خلي ليك روتين صباحي، جهز فطار رايق، حط نيه انك بتقوم بدري عشان تستفيد بوقتك، واعمل ده كله ليه؟ عشان يومك هيبقي اطوَل وفيه بركه اكتر" لو معرفتِش نظم وقتك علي حسب نظام يومك، مش هنضيع عمرنا ع حِس اننا بنحاول نظبط نومنا.

٢- إقرأ كتب في مجالات مختلفه "قارئ اليوم ، قائد الغد"

٣- لو عندك موهبه طورها، ولو مافيش موهبه يبقي هدفك تكتشفها
خلي عندك مرونه في التعليم والتطور، مش قادر علي كورسات، فيه يوتيوب، فيه كتب، فيه بودكاست فيه مشاهير بتنزل محتوي يفيد مجالك، متمسكش في طريقه معينه وتقف عليها.

٤- ظبَط الجانِب الديني عندك
"الصلاه في ميعادها، يبقي ليك ورد قران، تنتظم علي قراءة سورة البقرة، ورد اذكار يومي، اذكار الصباح والمساء، تتعلم علوم شرعيه، تحفظ قرآن، تتعلم سيره، تقرا عن أنبياء الله، تتعلم فقه، تشترك في قنوات دينيه او بيدجات تذكرك طول الوقت بالدين وحط في دماغك ادومها وإن قل، مش بالكميه بالاستمراريه وقسم علي السنه كلها"

٥- امشي علي نظام صحي
"هتظبط جسمك ونفسيتك، هتريح معدتك، شعرك وبشرتك هيتحسنوا بشكل ملحوظ"

٦- انزل جيم او العب رياضه في البيت
احنا بننزل جيم عشان نطلع الطاقه السلبيه اللي جوانا، جسمنا يبقي قوي كده مش ماشي بالمراهيم وانتَ لسه في العشرينات، هتعمل شيب محترم لجسمك، وافتكر العقل السليم في الجسم السليم.

٧- مارس عادة الإمتنان
هتجيب دفتر، وكل يوم هتعمل مربع اسمه مربع الامتنان هتكتب فيه كل يوم ممتن لإيه، ادي فرصه لنفسك تبص لنعم ربنا وتبقي شخص ايجابي وراضي عن حياتك.

٨- خصص كل يوم من وقتك تحمد ربنا
الحاجه اللي ملهاش توقيت بتتنسي، خلي فيه وقت معين في يومك وعدد معين للذِكر والحمد من الاذكار اللي نسيناها من كتر الشكوى، عشان كده محتاجين نهتم بيها "لئن شكرتم لأزيدنكم"

٩- اتعلم لغه جديده او طور لغه حاليه عندك
واللي اتعلمته مارسه في حياتك ومع صحابك، او شاركه وفيد بيه غيرك ده هيساعدك في ان المعلومات اللي اتعلمتها هتثبت اكتر بإذن الله، هات كتب صغيره وسهله للغه اللي بتتعلمها.

١٠- انوي قبل اي فعل
النيه تحول العاده لعباده، خلي نواياك كلها لله، جبت هديه لحد حط نية ادخال السرور، انفق مما تحب واعزم حد علي حاجه بتحبها، نضفت البيت حط نيه اماطة الاذي عنهم، عملت شاي لابوك حط نية اطعام، مليت ازايز المياه حط نية السقيه وبر الوالدين، وعدد النوايا في كل فعل، مش بس هتاخد ثواب انتَ كمان هتلاقي نفسك حابب تعمل حاجات كنت بتنفر منها عشان تاخد الثواب.

١١- ادخِر ولو جزء بسيط
حتي لو مش عايزه تشتري حاجه معينه، حتي لو هتحوشي ١٠ج، الادخار من الحاجات اللي بتربي النَفس وبتعلمها المسؤولية.

١٢- بطل تشوف بدايل للمشي
احنا للاسف بقينا بنستسهل كل حاجه حتي في مشاويرنا، تكاتك ومواصلات ..الخ، المشي رياضه مهمه جدًا وفي نفس الوقت سهله، كمان اغلب الناس المهلمه قالت ان افكارها والالهام بيجيلنا أثناء المشي، فـ حاول تنتظم علي الرياضه دي ونوفر فلوس المواصلات نجيبلنا بيها مكافأه "صحيه"

١٣- اشرب مياه
ايوه شرب المياه فعلًا هدف لإنه مهم جدًا لصحتك وجسمك وشعرك وبشرتك وعقلك كمان، واقرا عن فوايد شرب المياه هتتفاجئ، وعشان احنا مش متعودين علي العاده دي فـ هنحطها هدف، هنشتري ازازة مياه شكلها حلو تبقي معانا ع طول، ناخد ازازه معانا واحنا خارجين، ونحطه في متتبع العادات بتاع الشهر.

١٤- دون يومياتك
التدوين من العادات اللي علماء كتير اوي شكروا فيها وقالوا انها بتحسن النفسيه وبتساعد في التطور، انت لما بتعيش يومك فيه حاجات كتير ممكن متلاحظهاش لكن مع التدوين هتلاحظ ايجابيات اليوم، وهتلاحظ اخطائك وتتعلم منها.

١٥- استغل السوشيال ميديا لصالحك
السوشيال ميديا مش بس فيسبوك وانستجرام، فيه يوتيوب وده حرفيًا كنز فيه كل حاجه بندور عليها بس لو بحثنا، فيه كمان Yt music نسمع منه بودكاست واحنا في المواصلات او قبل النوم، تابع ناس ملهمه ومحتواها مفيد، اقرا مقالات في مجالك او في مجال جديد، حاوط نفسك بالناس والمصادر اللي هتساعدك تنجح وتطور من نفسك.

خليك منطقي في تخطيطك، مش ضروري تحقق كل حاجه السنه دي، تريَس عشان الزحمه والضغط هيخلوك مستحيل تستمر، الاستمراية اهم من الكميه وادومها وان قل حطهم ديمًا ادام عنيك، بلاش حماس في التخطيط، الحماس في الوقت ده هيضُرك، اهدي واستوعب ان ادامك ١٢ شهر تقسم عليهم براحتك وانها سنه واحده بس مش نهاية العمر♡

لو كملت البوست للاخر، اثبت حضورك بدعوه حلوه:))

#تنمية_وردية /~

..

٧ نقاط مهمين عشان تحقق اهداف السنة الجديدة ♥️

١- حطي اهداف منطقيه.
بلاش الاهداف اللي تحبطك في اخر السنه دي، يعني لو انا بروح جيم هيبقي منطقي اني احط هدف للوزن المثالي، لكن لو عمريما اتمرنت، يبقي المنطقي ان يكون هدفي اروح الجيم اصلًا.

٢- ركزي علي الإستمرارية مش النتيجة.
هدف انك تقراي كل يوم افضل من هدف انك توصلي لعدد معين من الكتب، هدف انك تنشري محتوي بانتظام افضل من هدف انك توصلي لعدد فولورز معين.

٣- متخافيش من الخساره.
اللي يخاف م العفريت يطلعله، طول مانتِ خايفه تجربي مجالات جديده عشان متخسريش او تفشلي، عمرك ماهتعملي حاجه جديده، واللي عمره مافشل عمره مانجَح.


٤- خليكِ مسؤوله.
اجبري نفسك تمشي علي خطتِك، واستوعبي انها مش هتمشي معاكِ حلو طول الوقت، طبيعي هيكون فيه عقبات وظروف، وقتها ضروري تكملي لو عايزه فعلًا توصلي لحاجه.

٥- النوايا.
حقيقي فكرة انك تعملي الطبيعي بتاعِك بس بتاخدي عليه ثواب عشان غيرتي نيتك فكره عظيمه ضروري تستغلها في كل حاجه، في اهدافك وطموحاتك، فرق بين إنك عايزه شهرة بس نيتك انك تبقي مشهوره وخلاص، وعايز شهرة عشان تسيبي اثر للناس، مش بس هتفرق في الثواب دي هتفرق في البركه والتيسير كمان بإذن الله❤️‍🩹.

٦- اتعلمي ضبط النفس.
ربي نفسِك، كلنا عارفين إنك لو عايزه حاجه هتعمليها بس بمزاجِك، عشان كده مش هنخلي نفسِنا تمشينا علي هواها، ومش كل حاجه بتطلبها بتتنفِذ، جهاد النفس اعظم جهاد، متبطليش تحاولي.

٧- اعمل في صمت ودع النجاح يحدث ضجيج.
من الحاجات اللي كلنا جربناها وندمنا عليها مشاركة الاهداف او الطموحات، حرفيًا بتقف وايًا كانت الاسباب عشان ده مش موضوعنا بس مش شايفه مبرر لمشاركتك اهدافك وطموحاتك طالما هي لسه مجرد كلام علي الورق، نفذي وبعدين شاركي، خطواتك لنفسِك، نجاحك للجميع.

وبس كده بتمنالكم سنه سعيده باذن الله وتحققوا كل احلامكم ♥♡
#تنمية_وردية /~

صباح الخير ♥️
ايام ثقال انا عارفه، لكن عدينا بالاصعب منها وكنا وقتها فاكرينها مش هتعدي، عشان هي علي طول بتعدي بتوفيق ربنا وكرمه ولطفه بعباده، احسن الظن بالله وكل اللي جاي خير بإذن الله🌸

وقت التحصين♡

♡

عيطي! عيطي وواجهِي مشاعرك الحزينه، عشان لو فضلتي تهربي من مشاكلك هتفضل تطاردك لحد ماتفتكري إنها اختفِت، وتكون المفاجأه إنها متراكمه جواكِ، فـ تلاقي نفسك بتنهاري من اقل الاسباب وتستغربي نفسِك، طلعي اللي جواكِ متخزنيش مشاعر حزينه، عيطي، اكتبي احزانك، اتنططي لحد ماحيلك يتهَد، شخبطي بكل قوتِك، سجلي مشاكلك في ريكورد وامسحيها، صلي ركعتين واسجدي بعد الصلاه قولي كل الكلام الملخبط اللي جواكِ، اتخلصي من السلبيات اللي جواكِ عشان تعرفي تعيشي خفيفه♡

وقت التحصين♡

في فترة الامتحانات بتبقي مضغوط وعايز تخلَع فـ تهرب فـ تقع في فخ بص العصفوره🐦'

قاعد بتذاكر فـ يقولك هو احنا مش هنخس؟ هو احنا مش هننزل جيم؟
تيجي نظبط يومنا؟ تيجي نتعلم انجليزي؟ طب تيجي نحضر كورس ..الخ

فـ تسيب مذاكرتك وتلاقي نفسك قاعد بتفكر كيف تتعلم اللغه الانجليزيه في ٥ دقايق ،ولا قاعد بتعمل سيرش علي خلطة تخسسك ١٥ كيلو في ساعتين!
وبعد ماتخرج من الفجوه اللي حشَرت نفسك فيها تلاقي الامتحان بكره : )

وعشان منقعش في المشكله دي، ورقه وقلم يتحطوا جنبَك واي فكره تجيلك تكتبها ، عشان لما تيجي تضحك علي نفسك ان الأفكار دي هتنساها تقولها لا ياحبيبتي احنا هنكتبها اهو ولما اخد الاجازه نبقي نحقق كل احلامنا ان شاء الله، لكن دلوقتِ التركيز يكون علي الدراسه ♡

عشان ده وقت مذاكره ، مذاكره وبس :)))
#تنمية_وردية /~

الحياه هتختلِف لما تخرجي من زون الضحيه، لما تستوعبي ان العالم كله بيعاني زيك مش انتِ الوحيده المضطهده، لما تفهمي ان الطبيعي ان الايام حلوه ومُره، لما تبطلي تشتكي كإن محدش عنده مشاكل غيرك، لما تركزي في حياتك ويبقي عندك هدف تعيشي عشانه، هروبك من مشاكلك مش هيحلها، هيركِنها، وهتفضل مستنياكِ لحد مانتِ برده اللي ترجعي عشان تحليها، فـ وفري وقت وابدأي اعدلي حياتِك عشان نفسك مش عشان حد ♡

#تنمية_وردية /~

في اللحظة التي عرفتُ فيها قيمة نفسي، ولمستُ مواطن الجمال داخلي،

أدركتُ أنني شخصٌ يستحق الكثير،
وأن فُتات المشاعر لا تليق بي، وأن الأشخاص الذين يجهلون جوهري لا يستحقون وجودي في حياتهم،

وأنني مكسبٌ لمن في حياتي، وأنني صديقٌ رائع وحبيبٌ عظيم،

وأنه على الرغم من وجود الأفضل مني،
إلا أنني أمتلك البصمة الأكثر عمقًا،
التي لا تُنسى،
والتي لن تجدَها عند أحدٍ غيري.

- إيمان العوني

إن من يعرِف قدرَ نفسِه
يعِز عليه
أن يمضي في سُبُل لا تنتمي إليه♡

" وكانَ سَعْیكُم مَّشْكُورًا"

ايه المشكور السعي أم النتيجة؟
= السعي
لو سعيك حقيقي فأنت حصلت على النتيجة خلاص♥

- د/عبد الرحمن ذاكر.

Live stream finished (1 hour)

https://t.me/+6IYpxTgdyws4YWU0

Live stream started

«إذا قامت السَّاعة وفي يدِ أحدِكم فسيلةٌ فليغرسها»

السعي ثم السعي ثم السعي وفي اسوأ الظروف :))
انتَ مطالب لحد اخر نفس فيك تسعي وتعمل اللي عليك، عشان من رحمة ربنا عليك انك مش محاسب علي اي نتايج، انتَ هتؤجر عشان ذاكرت مش عشان نجحت، وهتؤجر عشان سعيت في شغل حلال مش عشان المنصِب، وهتؤجر لطلب العلم مش عشان الشهاده اللي هتاخدها ..

اوعي اليأس يتملِك منك، اليأس مش في قاموسنا ♡
#تنمية_وردية ~

اي حد بيحفظ قرآن ضروري يشوف الفيديو ده♡.

وقت التحصين♡

♡

شرح كامل لبلانر ٢٠٢٥ ♡

https://www.facebook.com/share/p/FajbZPoYbpDLYrnE/

وقت التحصين♡

♡

انا اتظلمت كتير في حياتي ومن اقرب الناس، واتخدعت في كمية صداقات ميتعدوش، عشت قصص لما حد بيسمعها عني بيتنَح، بس انا بفضل الله اخترت نفسي، اخترت اثبت لنفسي اني استاهل الاحسن، واخترت اكون مكسب لاي حد يعرفني وخساره علي اي حد خرج من حياتي، اخترت مبقاش ضحيه وابطل صياح، ومجريش ورا انتقام او اكسب تعاطف الناس بالصعبانيات، اخترت اعيش فخوره بنفسي وبسلامي الداخلي وبحبي لنفسي وللحياه، واكون القويه اللي كسبت خبره في حياتها، مش المظلومه اللي المشاكل كسرتها، وانتِ كمان في ايدك تختاري دورك في قصتك♥

#تنمية_وردية ~

هلا بالخميس💖 ..
شاركونا خميسكم أو اي شئ إيجابي حصل خلال الأسبوع :))🌸

https://www.facebook.com/share/p/sj3VPmsvxU4NGhJQ/

انت بأفعالك دلوقتِ بتحدد نتايج بعدين 💗!

فـ لو عايز تقضي الشتا بتشرب هوت شوكلت وتخلص مسلسلات تمام
ولو عايز تقضي الشتا بتتحدي نفسك وبتحرك جسمك وبتشوف مهامك تمام

لكن الاتنين مستقبلهم مش واحد :))
خد قرارك بس اتحمل نتايجه ♡

#تنمية_وردية ~

‏يتعافى المَرء بكونه
مؤمن مُقاوم،
مُدرك أن ليس للإنسان إلا ما سَعىٰ.") 💙

❤️

وقت التحصين♡

عصر السرعه حولنا لناس متسرعه في كل حاجه في حياتنا من غير مانحس :')

فـ بقينا بناكل بسرعه، بنشتغل بسرعه، بنذاكر بسرعه، وعايزين ننجح كمان بسرعه
وعشان كل اللي حوالينا بيشجعنا علي ده زي فيديوهات :

ازاي تتعلم لغه في ٢٤ ساعه
طريقة تحضير بسكوت الثانيه ونص
اتقان مهاره معينه في ٣ ايام بس
.. الخ من اللي يحسسك ان النجاح ممكن نوصله بكره علي الساعه ١٠ كده!

وعشان كل ده مش طبيعي، نتايج مزيفه ونجاح وهمي فـ لازم نستوعب اننا واقعين في فخ محتاجين نركزله كده عشان نقوم منه، فـ هنعمل ايه؟

الصبر بالتصبر
عايز تصبر مارس الصبر، وممارسة الصبر تبدأ من الصلاه ♡

أول حاجه هتبدأ تمارسها براحه هي الصلاه، وبعدين تكمل بقي باقي حياتك، تاكل براحه، تبطل تشوف ريلز وفيديوهات قصيره، تشتغل بإتقان، تدرس بتأني، تقرأ مقالات طويله تأثر فيك وهكذا :))

هتلاحظ نتايج غير متوقعه بالمره، الصلاه هتفرق في نفسيتك، مش هيجيلك عسر هضم، هتلاقيه وقت زياده في يومك، بركه في رزق، توفيق في دراسه ومن ده كتير بإذن الله ♡♡

مستحيله؟ لا مش مستحيله طالما اللي قبلك وصلولها.
#تنمية_وردية

متضغطش علي نفسك عشان تعيش حياه مش بتاعتك!

كل الفلوجز والفيديوز اللي بنشوفها علي السوشيال ميديا بتبقي عباره عن حياة ناس تانيه، الحياه دي ممكن نشوفها عشان نقتبس منها فكره، نطلع منها بمعلومه، ناخد منها طاقه مؤقته، لكن مش عشان نضغط بيها علي نفسنا ونجلد بيها ذاتنا ..

عارف انت ليه مش عارف تعيش زيهم؟
عشان انتَ انتَ، بحياتك، بشغلك، بدراستك، بظروفك، بصحتك

واحده بتصحي الفجر بتفطر في كافيه وتلعب تمارين وتروح الشغل وترجع تعمل الغدا وتنضف البيت وتتشقلِب عالحيط، حبيبتي الله اكبر عليها صحتها تسمَح بكده، فـ لو هطلع بحاجه من الفلوج ده هي اني اهتم بصحتي عشان تسِع مهامي لاخر اليوم، مش اني لما اشوفها اقول علي نفسي فاشله ومش نافعه لمُجرد اني عايزه اعيش حياه فوق طاقتي وصحتي وظروفي:))

لازم قبل ماتحط اهدافك ومهامك وتخطط، اعرف مقدرتَك
انا صحتي تجيب لحد فين؟ لو صحتي اقل هتبقي خطتي احسنها ازاي
بدل ما يبقي الهدف اقرا عشرتلاف كتاب وانا عندي خمول، يبقي الهدف اني اشوف حل للخمول، ومجرد ما صحتي ترُد فيا ده هيبقي اول انجاز عملته مش تمهيد لخطوه 🎀

الانجازات مش بس قراءة الكتاب، والميداليات، والشهادات
عادي يبقي انجازك انك صحتك بقت احسن، انك بطلت اكل من بره، انك بتاخد الفيتامينات كل يوم، انك بتشرب مياه وهكذا 🌸

عيد حساباتك ورتب اولوياتك، وعيشها صح 💗
#تنمية_وردية ~

بحاول مبطلش احاول♡

«إذا قامت السَّاعة وفي يدِ أحدِكم فسيلةٌ فليغرسها»

السعي ثم السعي ثم السعي وفي اسوأ الظروف : )
انتَ مطالب لحد اخر نفس فيك تسعي وتعمل اللي عليك، عشان من رحمة ربنا عليك انك مش محاسب علي اي نتايج، انتَ هتؤجر عشان ذاكرت مش عشان نجحت، وهتؤجر عشان سعيت في شغل حلال مش عشان المنصب، وهتؤجر لطلب العلم مش عشان الشهاده اللي هتاخدها ..

اوعي اليأس يتملِك منك، اليأس مش في قاموسنا♡
#تنمية_وردية ~

في كلِّ مرّة يمنع الله عنك شيئًا فيها؛ تذكَّر أمرين فقط:

"فخشينا أن يُرهقهما."
"فأردنا أن يُبدلهما ربُّهما خيرًا منه." ❤️

وقت التحصين ❤️

لا أجيد المنافسة، ستجدني دائمًا
في الطرق الخالية
أتسابق مع نفسي التي كنتُ عليها بالأمس.
عيني لا تلمح غيري.💗

- فاطمة رحيم.

وقت التحصين ❤️

ازاي المفروض استمر علي حاجه رغم انعدام الشغف؟

فقدان الشغف اللي بنعلقه بشغلنا ده بحسه وهم
حاجه اخترعناها عشان نريح ضميرنا واحنا قاعدين عالكنبه زعلانين إننا ورانا حاجات نعملها ومعملنهاش ..

ايه هو الشغف بقي، اصلًا؟
الشغف هو الحماس الشديد وده بنحسه لما المخ بيفرز هرمون الدوبامين اللي هو مسئول عن السعاده، وتفتكر فيه انسان طبيعي هيعيش متحمس علي طول؟ الاجابه لا!

فـ انتَ مش مضطر في كل مره هتذاكر او تشتغل او تعمل حاجه وراك، تستني لما شغفك يجي بالسلامه وتحس بالحماس عشان تبدأ 🤌🏻

نحن قومٌ بنشتغل وندرس وإحنا فاقدين الشغف ومع أول إنجاز بنحسه لما نخلص شابتر او عدد صفحات معينه سبحان الله مخك يفرز الدوبامين فـ يديك الحماس انك تكمل 🏋🏻‍♀️

فـ لما تسأل حد مبتذاكرش ليه ويقولك فقدت الشغف احدفه بالكتاب وقوله قوم ياض بلاش دلع شوف اللي وراك، لا بهزر طبعًا متحدفش حد بالكتاب عيب احدفه بالكشكول اخَف 😂♥️

#تنمية_وردية ~
بحاول مبطلش احاول♡

وقت التحصين ❤️

بما إن الفيسبوك بقي كله أخبار سلبيه، ونفسيتنا كلنا بقِت فالارض ومش عارفين نسعي ونشوف شغلنا وندرس بسبب الضغوط النفسيه اللي بنتعرضلها، عملتلكم جروب يهون علينا الحياه، الجروب ده هدفه اننا منبطلش نحاول، واننا نشارك محاولاتنا مهما كانت بسيطه، عشان لما نحس بالاستسلام ونشوف غيرنا بيقوم، نقوم معاه ونحس بالدعم 💗🌸🎀

تقدروا تنوروني هنا:
https://www.facebook.com/share/g/vCs3zjedFgeZSB5Y/

ليه إحنا محتاجين قراءة سورة الكهف، بل ويُستحب قراءتها؟

=سورة الكهف تنجي من أعظم فتنة (فتنة الدجال)؛ إذن فهي تنجي مما دونها من الفتن.

لأن الفتن متتالية وبتتزايد، فأنت كل أسبوع محتاج نور عشان تقدر تقاوم، وأنت لو مش معاك نور=مش هتقدر تقاوم الفتن دي؛ فإحنا محتاجين زاد أسبوعي من النور، وهي سورة الكهف.

- د. أحمد عبد المنعم.

سمعتُ النبيَّ صلَّى اللهُ عليه وسلم يقولُ في بعضِ صلاتهِ : اللهمَّ حاسِبني حسابًا يسيرًا ، فلمَّا انصرف قلتُ : يا نبيَّ اللهِ ما الحسابُ اليسيرُ ؟ قال : أنْ ينظرَ في كتابهِ فيتجاوزَ عنه ، إنَّه من نوقِشَ الحسابَ يومئذٍ يا عائشةُ هلكَ ، وكلُّ ما يصيبُ المؤمِنَ يكفِّرُ الله عزَّ وجلَّ به عنه حتَّى الشوكةُ تشوكهُ
الراوي : عائشة أم المؤمنين

♡

اول مابحِس اني بدأت أمِل من شئ، بفتكِر ع طول احساسي أول مره، وافتكِر اد ايه كنت مشتاقه اني اوصلها او اخدها، ودعائي بيها والالحاح اد ايه انا عايزاها ولو خدتها حياتي هتبقي احسن، بعدها بلاقي نفسي أدركت النعمه اللي معايا كإني لسه بحصُل عليها جديد، اوعي الشيطان ينسيكِ نعم ربنا عليكِ وتملي منها او تعتبري وجودي تحصيل حاصل♡

#تنمية_وردية~

لو مش عارف تستمر علي عاده معينه، اعرف إنك محدد كميه كبيره عليك:))

ابدأ بالبسيط ..
حتي لو هتقرأ كل يوم صفحه او صفحتين من كتاب مُفيد
حتي لو هتسمع بودكاست ٥ دقايق
حتي لو هتشوف فيديوز مهمه مُدتها قصيره
المهم تستمر، ومع الإستمراريه هتوصَل لنتايج مكنتش تتوقعها أبدًا :)♥️

الشاعر ابن المعتز بيقول "لا تحقرن صغيرة ، ان الجبال من الحصي"♡
#تنمية_وردية

*متخلوش ليلة تعدي عليكم من غير ما تقولوا أخر آيتين من البقرة :*

*«آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ كُلُّ آمَنَ بِاللَّهِ وَمَلَائِكَتِهِ وَكُتُبِهِ وَرُسُلِهِ لَا نُفَرِّقُ بَيْنَ أَحَدٍ مِّن رُّسُلِهِ وَقَالُوا سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ (285) لَا يُكَلِّفُ اللَّهُ نَفْسًا إِلَّا وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلَا تُحَمِّلْنَا مَا لَا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ» (286)*

*أجرها أعظم مما تتخيل.💘*

أفكلما اشتهيت اشتريت؟ فمتى تتعلم الصبر؟
أفكلما خلوت عصيت؟ فمتى تتعلم التقوى؟
أفكلما تعبت استرحت؟ فمتى تتعلم المقاومة؟
أفكلما يسر لك تماديت؟ فمتى تبدأ التوبة؟

قال أحد الصالحين: إذا دعتك نفسك إلى معصية فحاورها حواراً لطيفاً بهذه الآية :
{ قل أذلك خيرٌ أم جنّة الخُلد التي وُعِد المتقون ﴾

انا بفكرك بوعدك لنفسك بإنك مش هتأجل مذاكرتك تاني وتزنق نفسك زي كل سنه، وانك هتحاول تخلص اللي وراك أول بأول، الفرصه لسه ادامك لو عايز فعلًا تغير طريقتك في الدراسه ♡

وقت التحصين ❤️

‏أن تُقر أعيُننا بأزواجٍ وبيوتٍ وذريةٍ صالحةٍ يُحبها اللّٰه ورسولِه ♡
ورفيقٍ صالح، نأمنُ معهُ على الدين والدُّنيا معًا يارب ♡

نصايح عامه للجامعه الجزء التاني ♡

١- خدي معاكي اكل للقطط والكلاب في الجامعه واكليهم ولو مرتين فالاسبوع "في كل كبد رطبة أجر"

٢- خدي معاكي لانش بوكس وحطي فيه فطار صحي وخدي مج حراري حطي فيه مشروبك المفضل ووفري فلوس الاكل من بره لحاجات بتحبيها.

٣- اتصوري في الكليه براحتك ومتتكسفيش ، الصور دي هتبقي ذكري حلوه بعدين.

٤- اشتركي في اي جمعيات أو اي عمل تطوعي أو خيري وسيبي بصمتك.

٥- خططي لـ يومك من بليل.

٦- اسمعي بودكاست فالمواصلات.

٧- لو في استطاعتك اعملي هدايا كل فتره ووزعيها علي زمايلك وقت الامتحانات او وقت فيه ضغط في الدراسه بنية إدخال السرور علي قلب مسلم، ولو اكل حطي نية اطعام.

٨- خدي معاكي ازازة مياه كبيره واهتمي بشرب المياه طول اليوم.

٩- استمتعي باللحظات اللطيفه في الهوا البارد ومنظر الشجر وريحة الجو الجميل وبلاش تحطي في دماغك ان الجامعه مكان وحش عشان تعرفي تكملي.

١٠- اهتمي بمذاكرتك ارجوكي وبلاش تمشي ورا اللي بيرددوا مبنذاكرش وهنسقط.

١١- نظمي وقتك واهتمي بالسناك انه يكون صحي وقت المذاكره، وخليه فيه دايمًا مكافأه بعد كل انجاز هتعمليه عشان تتحفزي تكملي.

١٢- افطري قبل ماتنزلي وانتي بتتفرجي علي كرتون وهدي أعصابك.

١٣- متبالغيش بالاهتمام بلبسك، البسي اللي يريحك.

١٤- اعملي اهداف ترفيهيه كل شهر تخفف عنك توتر الجامعه وضغط الدراسه.

١٥- في لحظات كتير مش هترجع تاني، سيبي التليفون من ايدك وعيشي اللحظات دي.

١٦- صاحبه واحده بتحبك من قلبها احسن من عشرومية صاحبه وكل يوم حوار شكل.

١٧- الصلاه مهمه ومينفعش تتأجل لما نروح.

١٨- شيلي من دماغك الحُب والإعجاب وده عايزني عشان صدقيني كل ده مش هيكلفك غير جهد ووقت وطاقه وممكن يوصلك لمراحل فيها حرمانيه، نصيبك جايلك كده كده.

١٩- عادي تروحي الجامعه لوحدك، تحضري المحاضره لوحدك.. الخ، بلاش توقفي حياتك علي صحبتك عشان حياتك مهمه.

٢٠- واخيرًا متأجلش سعادتك لنقطة الوصول واستمتع برحلتك، كده كده هتوصل بإذن الله فـ عالاقل توصل وانت عايش ايام سعيده وذكريات لطيفه في حياتك.

أتمني البوست يكون ساب أثر إيجابي ليكُم ، سنه سعيده وبالتوفيق 🫰♥️
#تنمية_وردية ~

positive vibes ♡