Muhammad Sameh @saicohat Channel on Telegram

Muhammad Sameh

26 Jan, 17:47

شركات الموبايلات اخترعت الـ Flash SMS عشان لو فيه كوارث زي زلازل او فياضانات تقدر توصل لكل الناس عن طريق انها تبعت رسالة تظهر قدامك من غير اي مقدمات.

انك تستخدم ميزة زي كدا في عرض دعائي او إعلاني هي حاجة في قمة الرخص وحاجة غير مقبولة بالمرة.

ومع الوقت الـ Flash SMS هتفقد قيمتها ومحدش هيهتم بيها خالص.

1,411

Muhammad Sameh

25 Jan, 15:53

بعد ما تعمل آخر تحديث للآيفون واخر تحديث لتروكولر هتخش من الاعدادات

Setting > Apps > Phone > Call Blocking & identifications

وتفعل كل الاختيارات بتاعت تروكولر وبالذات آخر اختيار ده، والف مبروك عليك!

2,068

Muhammad Sameh

25 Jan, 15:51

لو معاك ايفون فأكيد انت بتعاني عشان تطبيق TrueCaller مش بيشتغل كويس على الـ iOS، بس الكلام ده اتغير في آخر تحديث!

تروكولر نزل ليه تحديث جديدة بيخليه يشتغل بشكل كويس على الآيفون بداية من iOS 18.2.1، بس للأسف بقت ميزة مدفوعة، بس الجميل ان اشتراك الفاميلي بـ250 جنيه في السنة وبيشتغل على ٥ اجهزة يعني الواحد هيقف عليه الاشتراك ب٥٠ جنيه بس في السنة وده يعتبر ولا حاجة.

لو مهتم هسيبلك طريقة التفعيل في الرسالة الجاية.

2,139

Muhammad Sameh

22 Jan, 12:47

رسائل تفعيل الـ Wi-Fi Calling بدأت توصل للمستخدمين 💫

3,796

Muhammad Sameh

20 Jan, 15:53

انستجرام غيرت مقاساتها وتخلت عن المقاس المربع الشهير الي كانت متميزة بيه، وده للأسف كابوس لكل مصممين الجرافيك عشان للأسف هيضطروا يغيروا كل التصميمات الي كانت معموله قبل كدا!

المقاس الجديد هيكون بنسبة 4:5 او 1080x1350 وده الي هنعتمده في كل التصميمات بس خلي بالك انك لو حبيت تعمل جريد فيه اكتر من بوست بيكملوا بعض ان المساحة الآمنة هي بنسبة 3:4 او 1350*1015 وده الي بيظهر برا وباقي التصميم بيتاكل فمتحطش فيه اي بيانات مُهمة.

انا عملتلك تمبلت جاهز مجاني تقدر تستخدمه في تصميماتك ومتوضح فيه المساحة الآمنة، هتلاقيه موجود في الرسالة الجاية!

4,554

Muhammad Sameh

20 Jan, 08:43

النهاردة التفعيل الرسمي للـ Wi-Fi Calling !

ولو متعرفش ايه الخدمة دي هي فهي مخصصة للناس الي معندهمش شبكة في المناطق الي هما فيها، وببساطة هي بتستخدم الوايفاي عشان تحسن قوة الشبكة.

لما تعمل مكالمة ماسنجر او واتساب فالطرفين بيستخدموا الانترنت عشان المكالمة تتم صح، دلوقتي مع الـWi-Fi Calling بيستخدم نفس الكونسبت، لو الشبكة عندك مش كويسة هو هيستخدم الوايفاي بدل ابراج الإشارة الي في المنطقة عشان يحّسن من الشبكة وده بيتم بشكل تلقائي بدون اي برامج خارجية.

كدا ناقص الـ5G يشتغل بشكل رسمي ونبقى زي الفُل!

4,098

Muhammad Sameh

19 Jan, 09:22

بمناسبة المساحات الإعلانية😂

4,499

Muhammad Sameh

19 Jan, 07:24

ومش بس تيكتوك!

4,103

Muhammad Sameh

19 Jan, 07:18

تم حظر تطبيق TikTok الآن في الولايات المتحدة

4,115

Muhammad Sameh

18 Jan, 15:06

لو حاسس ان المساحات الإعلانية في فيسبوك مش كفاية 🤏

فحابب أبشرك انهم ضافوا مساحة إعلانية جديدة في الكومنتات😂

4,401

Muhammad Sameh

17 Jan, 17:55

ليه بنفقد الشغف في تحقيق اهدافنا؟

كام مرة قلت انك هتبقى انسان جديد وهتطور من نفسك وتتعلم مهارات جديدة بس بتمل في نص المشوار ومش بتكمل، النجاح دايمًا بيعتمد على الاستمرارية وده الي معظم الناس بتفتقده.

هرمون الدوبامين وهو المسؤول عن السعادة بيبقى في اعلى مستواياته لما بتحدد هدف جديد، بتفكر في النجاح والعائد الي هتوصله لما تحقق الهدف ده
لو قلنا مثلًا ان هدفك هو انك تشتري ايفون جديد، مجرد تفكيرك في الايفون هيخلي مستوى الدوبامين بتاعك يعلى جدًا وهتبقى سعيد

بس لما تبدأ شغل فعلي وتمشي في خطوات انك تشتغل عشان تجيب فلوس وتشتري الايفون مستوى الدوبامين بيرجع للمعدل الطبيعي وبالتالي الحافز الي كان موجود عندك اختفى ومعظم الناس بتستسلم في النقطة دي.

لو عصرت على نفسك لمونة وكملت مشوارك في تحقيق الهدف وحوشت تمن الموبايل مستويات الدوبامين في جسمك هتعلى تاني بس بمجرد ماتشتري الموبايل وتستعمله شوية اللمعة الي كانت في عينك هتختفي وهتتعود على النجاح الي وصلتله.

ممكن تقيس المثال ده على اي هدف سواء كان تعلم مهارة او سلعة معينة عاوز تقتنيها وهكذا.

السر في تحقيق الهدف انك متملش في النص، حاول تبني عندك مفهوم الاستمرارية مش الكمالية، حاول تقسم هدفك الكبير لأهداف صغيرة عشان تستمع في الرحلة بتاعتك بقدر الامكان، وافتكر دايمًا ان قليل مستمر خير من كثير متقطع.

4,469

Muhammad Sameh

15 Jan, 14:05

تريكايه بسيطة مكنتش اعرفها في واتساب ، لو ضغطت ضغطة مطولة على علامة + هيفتحلك نافذة سريعة لارسال الصور!

هتوفرلك حوالي ٣ ضغطات.

5,746

Muhammad Sameh

08 Jan, 11:00

بحس ان النظام الرأسمالي عمل جريمة شنيعة في نفوس الناس لما حول الشغل والوظيفة من وسيلة لتلبية الاحتياجات الأساسية لأنه يبقى غاية في حد ذاتها.

الضغط الي حصل من المنافسة الشديدة بين الناس خلت الوظيفة هي المقياس في تحديد نجاح الشخص والمقياس بتاعه في المجتمع.

مع الوقت الناس نسيت ان النجاح هو انك تبني بيت دافي، تبنى علاقتك بربك وتعبده، تعزز علاقاتك الاجتماعية بالناس الي حواليك.

للأسف الشغل بقى جزء أساسي من الهوية، والمجتمع بتاعنا بقى مشوه متجرد من الإنسانية، وبقينا بنلف في عجلة ملهاش نهاية.

8,060

Muhammad Sameh

07 Jan, 11:20

فريق التسويق بتاع Dell صحي من النوم وقرروا انهم الأسماء بتاعه الفئات بتاعتهم XPS - Latitude - Inspiron، مش عاجبينهم وعاوزين يعيدوا التسمية، والأسماء الجديدة هتبقى

Dell - Dell Pro - Dell Pro Max

بجد مش هزار، الخبر ده حقيقي 😂

7,121

Muhammad Sameh

07 Jan, 09:27

دي باقي الاسعار، ملناش دعوة بيها😂

6,779

Muhammad Sameh

07 Jan, 09:26

لو حد كان نايم وفاته المؤتمر بتاع انڤيديا "زيي كدا" فتعال اقولك هو قالب الدنيا ليه!

انڤيديا اعلنت عن جيل الـ5XXX وبصراحة مش فارق معايا فيهم غير RTX 5070 الي على كلامهم انه هيقدم نفس اداء الفلاجشيب بتاعهم 4090 بنص السعر!!

يعني بـ550$ للنسخة الستوك هتاخد اداء 4090! مش عارف عملوا كدا ازاي في المعمارية الجديدة بس ده خبر حلو جدًا للجيمرز بس مش عارف ممكن يفيد المصممين الي عاوزين يشتغلوا ذكاء اصطناعي و comfyui ولا لأ عشان دي اكيد فيها لعبة مش اداء خام خالص.

متحمس جدًا الكارت ده ينزل ونشوف ليه مراجعات هل فعلًا الكلام ده هيكون صح ولا ايه!

6,771

Muhammad Sameh

06 Jan, 22:36

يا حلويات الـ 5G ❤️

5,693

Muhammad Sameh

05 Jan, 20:00

بقالي فترة كبيرة بشوف زملاء بيعانوا من اصابات بسبب عادات غلط بنعملها اثناء الشغل والقعدة على المكاتب.

الأعمال المكتبية فعلًا مريحة، بس قاتله على المدى البعيد وبتسبب مشاكل كتيرة جدًا واحيانًا بتحتاج لتدخل جراحي عشان نعالجها وده عدى عليا كتير فوق ما تتخيلوا.
دي شوية نصايح اي حد بيضطر انه يقعد على مكتب فوق الـ6 ساعات يوميًا لازم يهتم بيها:

🔹صدقني مش هتبقى مبسوط وانت نفسك تشتغل بس مش قادر بسبب اعصاب اليد وده شئ منتشر جدًا، بلاش نشتغل بالـTouch pad نهائيًا وبلاش نشتغل بماوس سئ، استثمر في ماوس من براند محترم وياريت يكون Vertical mouse "هسيبلكم شكله في الكومنتات" عشان قدر الامكان نقلل الضغط على اعصاب اليد.

وفيه قطعة بلاستيكية اسمها Wrist rest دي بتتحط على مسند يدك تحت الماوس عشان تقلل الاحتكاك "وهسيب شكلها برضه في الكومنتات"

🔹التهابات اعصاب الرقبة يا جماعة المها مميت جدًا واعرف ناس عانت بسببها كتير، بلاش نوطي ظهرنا ورقبتنا واحنا شغالين ونحافظ ان ظهرنا يكون مفرود طول الوقت وبلاش نوطي واحنا ماسكين الأيباد او القلم وبنرسم، انا عارف ان القعدة الصحية مش هتبقى مريحة في الأول بس لما تتعود عليها هترتاح اكثر بكتير.

🔹الكرسي ثُم الكرسي ثُم الكرسي، الكرسي هو اهم قطعة في السيتب بتاعك، اختار كرسي يكون مريح وفيه قطع تدعم القطنية والظهر.

🔹مرة كمان بلاش نوطي ظهرنا ونعمل Arch واحنا شغالين ياجماعة الكلام ده مُهم جدًا

- اختار سندات زراع مريحة وخلي دراعك تكون قدر الامكان على السنادات
- خلي رجلك تكون على الارض بشكل مريح او هات مسند للقدمين
وفيه قطع بتتجاب وتتركب للكرسي عشان تدعم الظهر وتكون مريحة وانت قاعد على الكرسي

🔹 ارجوك اشتري نضارة Anti Blue light وخليك لابسها طول مانت قاعد قدام شاشة عشان تقلل الزرقاء على عينك وتحافظ على بصرك قدر الإمكان.

🔹 مع النظارة عشان تتجنب جفاف العين بسبب النظر الكتير للشاشات اشتري قطرة مرطبة للعين وخليها جنبك واستعملها بشكل دوري

🔹انت كشخص مُبدع أو شخص بيقوم بأعمال مكتبية زي التصميم او البرمجة او كتابة المحتوى وخلافه عينك ونظرك هما راس مالك، شاشة بألوان كويسة وسطوع عالي هو استثمار مهم جدًا واهم كمان من الجهاز الي انت شغال عليه.

🔹اظبط ارتفاع المكتب الي انت قاعد عليه بحيث ان لما تحط ايدك على المكتب وتكون بتكتب على الكيبورد دراعك ومرفقك يكون عامل زاوية 90

🔹كل نص ساعة ياريت نقوم من على المكتب لمدة 5 دقايق نعمل فيهم اي حاجة بعيد عن الكمبيوتر والموبايل والمكتب، قوم اشرب او اتمشى اعمل اي حاجة وبلاش نمسك الموبايل في الخمس دقائق دول.
ولما تسمع الأذان قوم اتوضى وصلِ في وقتها، الصلاة تمارين ممتازة هتساعد جسمك انه يستريتش.

🔹الرياضة، نزولك الجيم هيحل 90% من مشاكل ظهرك الي انت بتشتكي منها وهيبقى زي Firewall ليك ووقاية من اضرار العمل المكتبي، وهيفيدك جدًا على الصعيد النفسي عن تجربة شخصية، ده غير انه هيعزز ثقتك بنفسك وحقيقي هيغيرلك حياتك بالكامل، بلاش الحجج بتاعت انا يومي مليان ومفيش وقت عشان اي حد ممكن يوفر ساعة من يومه لمدة 5 ايام في الاسبوع، يا اخي اعتبرها اوفر تايم في الشغل.

اتمنى البوست ده يوصل لأكبر عدد ممكن، احنا صحتنا هي راس مالنا وهنتسأل عنها يوم القيامة، المهنة دي بتقتل بالبطئ وفي النهاية القرار في ايدك انت.. ربنا يحفظ الجميع.

5,998

Muhammad Sameh

05 Jan, 12:43

طيب يا جماعة أنا جايلكم ورقبتي قد السمسمة 🤏

اسعار ادوبي للطلاب الحمد لله زي ماهي، الغلطة من عندي انا ☝️

سعر ادوبي الـ477ج ده عرض لأول سنة، ومن السنة الي بعدها السعر بيتحول لـ800ج وساعتها احنا بنقفل الاكونت وبنعمل اكونت جديد.

انا شوفت السكرين وفاتني موضوع الخصم ده، المهم احنا زي ما احنا "حاليًا" الشهر بـ477 فقط، يارب ميكونش حد من ادوبي شاف البوست 😂

5,176

Muhammad Sameh

05 Jan, 12:11

🦋

4,966

Muhammad Sameh

04 Jan, 22:48

تحديث ١:

عملت اكتر من شكوى في اورنج لكن كلهم بيتقفلوا بدون حل مرضي، لما طلب من قسم الشكاوى انه يوريني نسخة من العقود بتاعت الخطوط دي، كالمتوقع لقيت التوقيع بتاعي منزور، والموظف موقع الناحية التانية بفورمة فمش قادر اعرف اسمه.

صعدت الموضوع لمرة تاني للشكاوى وبلغتهم اني هاخد اجراء قانوني تواصلوا معايا مرة تانية بمكالمة مربع ساعة الملخص بتاعها كالآتي.

١- اعمل تنازل عن الخطوط التانية
٢- لو عاوز تعمل اجراء قانوني اتفضل
٣- مش هقدر أحاسب الموظف عشان هو مش موجود في اورنج
٤- بالنسبالي أوراقك سليمة صورة بطاقتك موجودة وامضتك موجودة
٥- احنا صح وانت اعلى ما في خيلك اركبه.
٦- لما طلبت تفريغ الكاميرات قالي مش هوريك تسجيل الكاميرات عشان السجلات بتنمسح كل ٣ شهور

لما طلبت من الموظف انه يسيب الشكوى مفتوحة رفض وقالي هقفلها عشان بالنسبالي الشكوى دي خلصت، حتى رفض انه يديني اي نوع من أنواع التعويض مع اني مش فارق معايا الفلوس ودي آخر اهتماماتي بس حتى دي رفضها.

كلمت الجهاز القومي لتنظيم الاتصالات - مصر والموظفة الي ردت عليها بتقولي اعمل تنازل عن الخطوط بعدها كلمنا!!

مش فاهم حقيقي فيه ايه، يعني بالنسبالكم حل المشكلة اني أتنازل عن الخطوط ؟؟ وبالنسبة للكارثة الي حصلت دي اني تم تزوير توقيعي من قبل موظف في شركة اورنج ده عادي؟ اصل حرفيًا مفيش حد يقدر يعمل كل غير موظف لان صورة البطاقة معاه ، وافتراضًا ان حد سارق بطاقتي وده محصلش فلازم الموظف يطابق الصورة بالشخص الي قدامه، ده معناه انه لو مكانش موظف فالموظف نفسه متواطئ.

5,854

Muhammad Sameh

04 Jan, 19:53

لو متعرفش فمارك قرر يلعب تاني في انستجرام، والمرادي التغيير هيكون في الـ Highlights!

زي ما احنا من متعودين ١٠ سنين الهايلايتس في انستجرام بتظهر على شكل دوائر جنب بعضها، بس دلوقتي الهايلايتس هيكون ليها Tab خاصة بيها زي الريلز بالظبط!

مش عارف ليه القرار ده بس اتمنى يرجعوها عشان كدا حرفيًا هتفقد قيمتها.

4,840

Muhammad Sameh

02 Jan, 12:33

لسته الموبايلات المتاحة في السوق حاليا ضمان محلي
Samsung A05
Samsung A06
Samsung A05s
Samsung A15
Samsung A16
Samsung A25
Samsung A34
Samsung A35
Samsung A55 في منه دولي
Samsung S23 Fe في منه دولي
Samsung S24 Fe
Samsung S24 Ultra في منه دولي كتير
Samsung Z Fold 6 في منه دولي كتير

Oppo A3x
Oppo A3
Oppo Reno 12F 4G
Oppo Reno 12F 5G
Oppo Reno 12
خلي بالك اوبو كلها في منها دولي ومحلي

Realme P1 Pro
ده الجهاز الوحيد من ريلمي ال مش هتلاقيه غير بضمان محلي .. كل الأجهزة الباقية معظمها دولي ف المحلات .. في التوكيل هتلاقي موبايلات ريلمي بضمان بس اغلى 15% من اسعار السوق .. منتظرين من ريلمي مصر توزع موبايلاتها الضمان في المحلات .

HONOR X5b
HONOR X5b Plus
HONOR X6b
HONOR X7c
HONOR X9b في منه دولي ومحلي
HONOR X9c
HONOR 200
HONOR 200 Pro

Vivo Y03
Vivo Y19s
Vivo Y28
Vivo V40 Lite
Vivo V40

Infinix Smart 9
Infinix Hot 50i
Infinix Hot 50

Xiaomi Redmi A3 في منه دولي ومحلي
Xiaomi Redmi 14C
Xiaomi Poco C75
Xiaomi Redmi 13
Xiaomi Redmi Note 13 4G فيه منه دولي ومحلي
Xiaomi Redmi Note 13 Pro 4G

دي كدا معظم موديلات السوق المحلية المشهورة المنتشرة الي متقلقش لو اشتريت اي حاجه منهم بعد القرار مش هتدفع ضريبة .

لو جهازك شغال قبل القرار اي كان نوعه مش هتدفع ضريبه .

معظم الموبايلات الدولي الي ف السوق تم فتحها وتفعيلها .. وفي موديلات كتير اختفت من السوق وريلمي اكتر شركه موديلاتها اختفت واعتقد هترجع بضمان بسرعه زي اوبو ما عملت ف الرينو 12F و A3 .

6,421

Muhammad Sameh

31 Dec, 22:04

بحب افكركم اننا مسلمين موحدين بالله؛ ليس لنا أعياد إلا عيد الفطر وعيد الاضحى ❤️

ما بداية السنة إلا مجرد تغيير ارقام ليس إلا.

6,510

Muhammad Sameh

30 Dec, 22:25

صباح الخخخخخخخخخير 🦋

8,147

Muhammad Sameh

30 Dec, 14:53

🚨نزل قرار من شوية بتأجيل فرض رسوم على تحويلات انستا باي لمدة ٣ شهور قابلين للتمديد.

لو متعرفش فالتحويل على انستا باي مش مجاني اصلًا، بس من ساعة ما نزل من 2022 كان كل سنة بينزل قرار بتأجيل فرض الرسوم، وكان من المفترض ان ببداية 2025 يتم فرض رسوم، المرادي نزل تأجيل جديد بـ٣ شهور قابلين للتمديد.

هل بعد الـ٣ شهور دول ممكن نشوف رسوم جديدة لأنستا باي؟ ده الي هنعرفه في شهر مارس!

هسيبك قايمة الرسوم الي المفروض يتم فرضها في اول كومنت.

7,367

Muhammad Sameh

30 Dec, 10:37

الچيم والرياضة بشكل عام مش رفاهية لمصممين الجرافيك والفريلانسرز، دي من اساسيات الشغلانة واهم من جهاز الكمبيوتر بتاعك، ولو مش بتعملهم فانت بتحكم على نفسك تطلع معاش قبل الأربعين.

ومتقولش أنا مش فاضي ومعنديش وقت، مش الساعة الي في اليوم هي الي هتبوظلك شغلك، وجع الضهر وأضرار العمل المكتبي مش هزار، اللهم بلغت.

6,783

Muhammad Sameh

25 Dec, 12:57

من الحاجات الي بحبها في السمارت هوم، ان لو خيالك واسع شوية تقدر تقدر تعمل اي حاجة انت عاوزها!

كمثال ده فيديو لحد عمل اوتوميشن لسباقات F1، مركب شريط ليد سمارت حوالين السقف ومن خلال الشريط ده يقدر يتابع السباق من غير ما يشغله اصلًا، كل عربية ليها لون وبيشوف الاضاءة بتاعت الشريط اكن العربيات بتسابق بعضها Real Time.

قدر يعمل كدا عن طريق API بتقدمه F1 بيعرف العربيات فين بالظبط على مضمار السباق، وحول الكلام ده لشريط الليد بتاعه، وبالمناسبة الراجل ده اصلًا مش مبرمج، ولو تعمقت في الـ Smart Home هتعرف ان دي حاجة بسيطة وتقدر تعمل اكتر من كدا بكتير!

لو عاوز تعرف تفاصيل اكتر ازاي الراجل ده قدر يعمل كدا فده لينك البوست الأصلي .

7,113

Muhammad Sameh

24 Dec, 15:03

من عادتي مع ادوبي ان اي تحديث سنوي بينزل للبرامج بتاعتها بستنى عليه كام شهر لحد ما يبقى مستقر ويعتمد عليه، لأن الشركة عندها ماضي سئ مع التحديثات وعدم استقرار برامجها وده شئ كلنا عارفينه ومتعايشين معاه.

الجديد بقى انه كل شوية يطلعي النافذة دي عشان احدث البرامج غصب عني ولا كأني بستعمل كراك ومش شاري البرامج، وكمان لما تقفلها هتقعد تطلعلك كل شوية وتقرفك في شغلك.

مستوى جديد من البجاحة اول مرة اشوفه!

7,190

Muhammad Sameh

21 Dec, 08:33

تطبيق Google Wallet هيكون متاح في مصر بداية من يناير القادم، وده يعتبر نسخة الاندرويد من Apple Pay!

زي ما قولتلكم قبل كدا، بمجرد ما اول خدمة دفع لا تلامسي تخش مصر هتلاقي باقي الخدمات جايه وراها على طول، برضه سامسونج باي هتلاقيها مسألة وقت وتحصل الباقي، بس عمومًا جوجل باي يغني عنها.

7,731

Muhammad Sameh

19 Dec, 21:51

لو مش عارف الفرق بين باقة برميوم وبرميوم+ ممكن تشوف تدوس على الكلام الازرق ده وهيطلعلك الشرح ❗️

6,617

Muhammad Sameh

19 Dec, 21:45

على غير العادة خصم مفاجئ ٧٠٪ على اشتراكات Freepik السنوية النهاردة بس!

حرفيًا الخصم ده اكبر من خصم البلاك فرايداي الي كان ٥٠٪ بس فلو فاتك عرض البلاك فرايدياي يا بختك يا هناك!

لو اشتركت سنة في الـ Premium هتقف عليك بـ33 يورو بدل 108 ودول تقريبًا 1750 جنيه مصري.

ولو اشتركت سنة في الـ +Premium هتقف عليك بـ75 يورو بدل 252 ودول تقريبًا 3960 جنيه مصري.

الباقتين بيدعموا الستوكات البريميم بعدد لا نهائي و مزايا الذكاء الاصطناعي من فري بيك، لكن الفرق بين الأتنين بيكون في عدد الكرديتس الخاصة بمزايا الذكاء الاصطناعي في السنة.

مع العلم ان اشتراك فري بيك بيشتغل على 3 اجهزة في نفس الوقت يعني ممكن تقسم فلوسه مع 2 صحابك وساعتها الواحد هيدفع 590 جنيه.

لو مش معاك جروب تشترك معاه ممكن تشوف في الكومنتات وان شاء الله تلاقي، وشوف اول كومنت قبل ما تشترك.

العرض هيخلص مع نهاية يوم ٢٠ ديسمبر.

تركاية صغيرة وانت بتدفع: لما ييجي يطلب منك الرقم الضريبي حط اي ٩ ارقام عشوائية ومش هيضيفلك فلوس في الضريبة.

6,378

Muhammad Sameh

19 Dec, 13:46

لو رجع بيا الزمن عشان ادي لنفسي نصيحة واحدة بس هتكون "قليل مستمر خير من كثير متقطع".

*️⃣ لو استثمرت في نفسك 30 دقيقة يوميًا بعد مرور سنة هتكتشف انك بقيت شخص تاني تمامًا؛ أنا ضيعت وقت كتير من حياتي تحت شعار ان ده مش الوقت المناسب او اني مستني حدث معين يحصل عشان ابدأ في حاجة جديدة، ولقيت ان الوقت عدى من غير ما اخد بالي وانا لسا واقف مكاني متحركتش حتى.

*️⃣ اشتغل بالمتاح معاك وخلي ده مبدأ حياتك كلها، عاوز تخس بس مش عارف تروح الجيم؟ خلاص أتحرك في البيت وقلل اكل من برا.. طب بتروح الچيم ومش معاك فلوس لأكل دايت؟ خلاص متوقفش تمرين بس في نفس الوقت متعكش في الاكل واقطع سكر وعيش وأمورك تمام، وعلى رأي المثل نص العمى ولا العمى كله.

*️⃣ متستناش الظروف المثالية، عشان ببساطة مفيش وقت مثالي. السعة وراء المثالية والكمال هو مقبرة الرجال، عملت بروچيكت بس شايف انه دون المستوى؟ انشره وحسّن في الي بعديه. خايف من فرصة او وظيفة جديدة؟ ارمي نفسك برا دايرة الراحة وهتلاقي ان خوفك مكانش له داعي ودي كانت اوهام من دماغك.

*️⃣ متتكسفش انك تسأل حد على معلومة انت مش عارفها، بالعكس اغلب الناس هتلاقيها عاوزه تساعدك بجد عشان هما في وقت من الأوقات كانوا مكانك وملقيوش حد يساعدهم.

*️⃣ ركز على هدف واحد ومتشتتش نفسك بمليون حاجة عشان في الاخر مش هتعمل منهم اي حاجة، وحط اهدف صغيرة سهلة التحقيق وخلي كل هدف منهم مرتبط بالي قبله، وفي نفس الوقت متدورش على الربح السريع، كلنا بنشتغل عشان الفلوس ده اكيد، بس متستعجلش حاجة وهي مش وقتها.

النصايح دي على قد ماهي بسيطة بس هتفرق معاك كتير، أنا شخصيًا كان نفسي حد يقولهالي من ٨ سنين بس للأسف كنت لوحدي، بس دلوقتي انت مش مضطر تكون لوحدك.

6,750

Muhammad Sameh

19 Dec, 12:43

بصوا أنا جبت ايه 👀

5,266

Muhammad Sameh

16 Dec, 23:36

لما باجي اشتري حاجة جديدة بحط في بالي قاعدة مهمة اسمها 80/20 او "مبدأ باريتو".

🎯القاعدة دي بتقولك أن 80% من النتايج بتتحقق بـ 20% من المجهود، في حين ان الـ20% من النتايج بيتحققوا بـ80% من المجهود.

*️⃣ وقت ما بشتري سلعة جديدة، مش بدور على اعلى حاجة موجودة في السوق وبدور على المنتج الي هيقدملي 80% جودة بسعر كويس، عشان لو حبيت اوصل للـ20% الباقيين وتبقى 100% جودة هضطر ادفع 5 أضعاف‼️

◀️ مثلًا لو اشتريت موبايل ممكن اجيب موديل السنة الي فاتت او الي قبلها كمان، ده هيديني أقصى استفادة ممكنة مع اكبر توفير.

*️⃣ وبرضه لو ركزت في اللبس هتلاقي ان 20% من اللبس بتاعك انت بتلبسه في 80% من الوقت، في حين ان فيه لبس من كتر ما اتنسى فهو مش بيتلبس أصلا‼️

*️⃣ حتى في العلاقات الشخصية، لو بصير هتلاقي ان 80% من حياتك بتمحور حوالين 20% من الأشخاص الي تعرفهم، وباقي الـ80% من الأشخاص بيمثلوا باقي حياتك.

💡تقدر تطبق المبدأ ده في كل حياتك والأمثلة لا تعد ولا تحصى، ده حتى 80% من يومك هتلاقي انك بتقضيه في 20% من مساحة بيتك.

*️⃣ لما تفهم المبدأ ده هتعرف أنك تعرف تحدد أولوياتك وتستثمر وقتك ومجهودك في الحاجات الي هتسبب تأثير ونتايج كبيرة في حياتك وبعد كدا اتفرج على التغيير في إنتاجيتك❗️

6,332

Muhammad Sameh

13 Dec, 12:29

جمعتكم مباركة، كنت عاوز أوضح حاجة بخصوص الكومنت ده.

من ساعة ما بدأت رحلتي في مشاركة المواضيع الي تهمني وكتابة المحتوى وده وضع على عاتقي مسؤولية كبيرة أنا بحاول اكون قدها، بس مع الوقت الموضوع بقى مرهق جدًا.

أنا بستقبل في اليوم من 50~60 رسالة، عايز تعليقات الفيسبوك وتعليقات قناة التليجرام.

لو افترضنا ان الإجمالي بتاعهم حوالي 100 رسالة، وكل رسالة احتاجت مني 5 دقايق رد فقط، في الحقيقة الوقت بيكون اكتر من كدة، فكدة يوميًا أنا محتاج 500 دقيقة يعني حوالي 8 ساعات في اليوم للرد على الاستفسارات فقط من غير اي حاجة تانية.

وللأسف من دايمًا بيكون متاح معايا الوقت ده خصوصًا اني موظف وعندي اسرة وحياة تانية برا مواقع التواصل الاجتماعي.

ده غير ان للاسف اغلب الرسائل بتيجي على في السبام ومش بيجيلي حتى اشعار بالرسالة، بس عمومًا أنا اسف وهحاول اكثف المجهود في الفترة الجاية عشان اقدر على الاستفسارات كلها.

ولو اي حد بعت رسالة وشك انها دخلت سبام في الماسنجر ممكن يعملي منشن في اي بوست على الفيسبوك او التليجرام بحيث اني أنتبه للرسالة.

6,746

Muhammad Sameh

12 Dec, 20:54

مبروك يا شباب، اخيرًا Apple Pay على كروت التموين ❤️

6,884

Muhammad Sameh

12 Dec, 20:22

امبارح وصلني الابديت المنتظر للأيفون 16 بيوضح بشكل قاطع الاسباب اللي مخلية شركة زي ابل هي حارس البوابة وبتغرد في سرب لوحدها.. ان الشركة عندها قدرة عظيمة ع استقراء المستقبل والاستقواء ع الحاضر!

*️⃣ سنة 2017 نزل اول معالج NPU من ابل في الايفون 8.. ولحسن الحظ في نفس السنة نزل البيبر اللي وصلنا للوضع الحالي attention is all you need واللي كان البداية لل Transformer networks
التيم اللي كان مسئول عن تصميم الNPU في ابل كان عنده قدرة عظيمة ع الاستقراء والاستبصار لاهمية الورقة وده حرفيًا اللي حصل، البيبر ده غيرت فعلًا العالم وبسببها طلع ChatGPT وكل الموديلز الموجودة اللي انت شايفها دلوقتي!
هنا بقى عملت ابل ايه في 2017 ؟
عادي جدًا الشركة عملت اعادة تصميم للNPU في معالجاتها بحيث يكون صالح للاستخدام لما ابل تنتقل بشكل كلي لمعالجاتها وتسيب انتل وال M1 اللي نزل في 2020 يكون عنده المقدرة يشغل النوعية دي من الشبكات العصبية بشكل طبيعي تمامًا.. وعشان كدا apple intelligence اللي لسا نازل السنة دي بيدعم الM1 اللي نزل من اكتر من ثلاث سنين بشكل طبيعي في الوقت اللي لسا الشركات زي Intel وAMD و Qualcomm بدأوا يضيفوا الNPU لمعالجتهم السنة دي والاعتماد الكلي مازال برده ع نيفيديا في مقابل ابل بتبنبي سيرفراتها باستخدام معالجاتها من M وفي تعاون حاصل بين ابل وبbroadcom لعمل معالج مخصص للسيرفرات!!!

*️⃣ النقطة التانية وهي الاهم بالنسبالي هي اصرار ابل ع انها متكونش جزء من الفقاعة والمهيصة الموجودة حاليًا..
لما نزل ChatGPT بدأ الترويج بالاقتراب من AGI وانه خلاص اصبح حلم سهل المنال وع اساسه اتحرق مليارات الدولارات لحد الان في سوق الAI من مختلف الشركات ع امل ان يكون في منتج مستدام.
حجم الحرق والهبل الحاصل في السوق يوريك ان الشركات دي معندهاش رؤية واضحة في مقابل موديل openAI عاملاه باشتراك ب٢٠٠ دولار شهريًا، بترد عليها ميتا بموديل مجاني مفتوح المصدر تقدر تستخدمه مجانا "في غير الاستخدامات التجارية" اداءه ينافس chatGPt 4o الاقوى من openAI!
واصبح التوجه حاليًا من الشركات دي لمين اللي هيضيف شوية Featurs للمستخدم وتحس انها خرجت من دور الريسيرش لمين اللي هيعمل افضل بيزنس موديل قائم بذاته يقدر يكون صالح للمستخدم العام وابتعدنا عن الهدف الاساسي هو بناء الAGI. لان فكرة اصلا انك تبني AGI من خلال الWord prediction ده من اعبث مايكون.

*️⃣ هنا بتظهر رؤية ابل بشكل واضح مرة تانية وقدرتها ع الاستقراء المستقبلي والاستقواء ع الحاضر..
ابل مدخلتش سوق الLLM لكن رؤية الشركة كانت احنا ليه اصلا نحرق فلوس في تكنولوجي فيها مشاكل كتير وغير مستقرة ومحتاجة حلول اكبر غير متاحة حاليًا!
ابل ع عكس كتير من منافسينها فهي مش مهتمة خالص بإنها تعمل AGI، وبتشوف إن ده هدف مش واقعي وشبه عبثي. يعني جياناندريا المسئول عن شغل الماشين ليرنينج في ابل ليه تصريح حلو فعلا:
اللي فاكر إنك لما تscale التكنولوجيا الحالية هيخلينا نوصل لـ AGI تبقى ساذج جدًا:""
فالاستقراء للمستقبل واستبصاره كان واضح جدًا.. وهنا يجي دور ابل في الاستقواء ع الحاضر.
ابل عملت الApple Intelligence بأفضل طريقة ممكنه. انا مش دافعة فلوس ومش مستثمرة في العك اللي بيحصل ده- ابل انسحبت من الحملة التمويلية لopenAI- لكن انا هعمله بإني ابل!

*️⃣ الApple Intelligence هنا هيكون عبارة عن slm موديل بسيط هيكون هو سيري الجديدة وشكرًا للسنين اللي استثمرنا فيها الNPU من 1017 من وقت ماطلعت البيبر عملنا شغل عظيم نقدر نشغل الموديلز البسيطة دي ع معالج التليفون الصغير ده!!
طيب محتاج معالجة اقوى وشغل مكثف؟ هنا يجي دور"الاستقواء بإن انا ابل" تعالوا ياجماعة احنا عملنا UI كاملة الموديلز بتاعتكم هتبقى جزءمن النظام والمستخدم يقدر يستخدمها مجاني ومش هتعرفوا الداتا بتاعته الا لو دخل اكونته واشترك معاكم بفلوس وهتسيبوا الموديلز بتاعتكم مجاني عندي ومش هدفع فلوس. موافقين؟

*️⃣ هتقولي ايه ده ازاي؟ابل مش هتدفع حاجه؟ ابل هي اللي بتاخد اصلًا😃😃😃
ابل بتاخد من جوجل بشكل سنوي ٦ مليار دولار مقابل ان ابل تخلي بحث جوجل هو الافتراضي ع سفاري وفي الSpotlight search!
الاتفاقية تمت مع openAI وحاليًا في تفاوض مع claude وGemini انهم يكونوا جزء من الApple Intelligence زي مانت شايف في الڤيديو اللي سايبه ليك في البوست.. انه الموديل عنده المقدرة انه يقرأ محتوى الايميل ويرد عليه وتكتبله عادي بأي لغة وهو هيبعت لChatGPT ويديك الرد فإنتوا احرقوا مليارات براحتكم ياجماعة وانا عندي البلات فورم بتاعتي مش هدي نيفيديا ولا هدفع في المهيصة الحاصلة دي🔥🔥

رابط المقال على فيسبوك

6,814

Muhammad Sameh

12 Dec, 09:42

كل الشكر والتقدير للـ 20 واحد الي ببعتلهم ميمز على 💬 قناة الواتساب ودايمًا بيعملوا ريآكت عليها، هياكلوا في فرحي مرتين

قناة الواتساب:
😎 Muhammad Sameh

4,893

Muhammad Sameh

11 Dec, 19:50

نبذة عن مستوى ذكاء اصدقائي:

5,542

Muhammad Sameh

11 Dec, 18:49

المشكلة مش من عندك انت، سيب الراوتر في حاله ارجوك 🥺

6,036

Muhammad Sameh

10 Dec, 15:30

أنا اسف

7,106

Muhammad Sameh

10 Dec, 07:51

صباح الفل، CIB و بنك مصر كلهم اشتغلوا Apple Pay خلاص ومن غير تغيير الRegion ، الباقي في السكة مسألة وقت بس ❤️

6,920

Muhammad Sameh

05 Dec, 22:18

ابلكيشن google photos الأقرب إلى قلبي عامل 2024 wrapped، خشوا اتفرجوا عليه!

8,101

Muhammad Sameh

05 Dec, 20:19

خدنا الـ eSIM واتبسطنا…
مستعدين بقى للـ 🦋🦋🦋؟

معادنا بكرة ان شاء الله، او بعد الساعة ١٢.

8,442

Muhammad Sameh

05 Dec, 15:52

دايمًا الألوان في الشاشات بتختلف عن الالوان في الطباعة، وده لأن الالوان على الشاشات الرقمية بتكون بنظام اسمه RGB أما في الطباعة بتكون بنظام CMYK في معظم الحالات؛ ومن هنا اتولدت شركة PANTON؛ بانتون جت وقالتلك انا هعمل نظام جديد للألوان تفهمه الشاشات ومكن الطباعة في نفس الوقت عشان احل مشكلة اختلاف الالوان دي واللون الي هتشوفه على الشاشة هو اللون الي هيتطبع وعملتلك مكتبة لونية تقدر تحملها على برامج التصميم أو تشتريها مطبوعة عشان تشوف اللون قدام عينك.

على مدار 25 سنة من اول سنة 2000 حتى الآن كانت بانتون بتختار لون واحد مميز كل سنة يبقى واجهة للسنة دي وبيحدد توجه الموضه والفاشون وبيبقى زي تريند للمصممين والرسامين أنهم يستخدموا اللون ده في أعمالهم

تم اختيار بانتون عام 2025 وكان من نصيب PANTONE 17-1230 واسمه Mocha Mousse.

وده اكتر لون بيعبر عن الي احنا فيه دلوقتي ❤️

3,948

Muhammad Sameh

05 Dec, 10:55

سيبك انت من الـ eSIM وخليك معانا شوية 🦋

3,805

Muhammad Sameh

05 Dec, 09:03

تخيل معاك 3 خطوط eSIM وموبايلك اتملى وعاوز تفرمته، الفورمات الواحد هيكلفك 800 جنيه 🤡

3,580

Muhammad Sameh

05 Dec, 09:01

فيه خبرين واحد حلو والتاني وحش، الحلو ان خلاص الـeSIM بقت موجودة في كل الفروع وتقدر تشتريها.

الوحش انها ب270ج وكل مرة هتفرمت موبايلك او تشتري موبايل جديد هتحتاج تروح الفرع وتدفع 270ج تاني 😂

كمان مدة صلاحية الـQR Code هي 5 ايام فقط، يعني لو جيت شريحة ومعملتش سكان في ٥ ايام هتحتاج تروح تشتري واحدة تاني، الله يا بلدنا الله ❤️

ماهي اكيد مش هتسلك للأخر كدا، لازم تطلع فيها حاجة.

3,522

Muhammad Sameh

05 Dec, 08:52

صباح الخير

*️⃣ النهاردة ال E-SIM اشتغلت من كل الشبكات والكل عمال يكتب فمجاتش على بن سامي بقى ميكتبش؛ ولا مكتبش يعني ... شوية نصايح كده.

*️⃣ أول شيء لازم تعرفه إن مصر لأسباب أمنية واقتصادية وسبوبة ومصلحة قررنا نحط التاتش المصري على تقنيات الكوكب شغال بيها من زمن والتاتش هو إن شريحة E-SIM لا يمكن نقلها من جهاز لآخر وإنها بفلوس كل مرة... يعني ايه بقى وهيفرق ايه ركز معايا.

*️⃣ مثلاً فكرت تغير تليفونك؟ هتضطر تروح الفرع تشتري تاني شريحتك وتدفع 300 جنية؛ طيب فرمت الموبايل؟ هتدفع 300 جنية تاني وتروح الفرع... فخد بالك يا برنس هتدفع كل شوية فلوس.

*️⃣ مشكلة تروح الفرع دي كارثية في نقطة إنك كده لو بتفكر تفرمت الموبايل فدا مينفعش يتم غير وإنتا قصاد الفرع؛ لإنك هتبقى بدون اتصال لغاية تروح الفرع. هتقولي طيب والكوكب بيعملوا ايه هقولك بينزلوا الشريحة من ابلكيشن شركة الاتصالات... مهي مش شريحة؛ الشريحة في موبايلك مدمجة يا برنس دا مجرد "كود وشوية سطور" بتقول للشريحة اللي جوا دي تتصل إزاي بالشبكة وبياناتك. فأكنك بتعمل تحميل لملف Txt باختصار

⬅️⬅️ طيب بن سامي بينصح بإيه بقى؟

1️⃣ شريحتك الأساسية تسيبها شريحة عادية... انتا مثلاً اتصالات تسيب الشريحة زي ما هي وتروح الفرع تشتري الشرايح الإضافية ليكن هتجيب وي وفودافون و أورانج بحيث ال 3 يبقوا في موبايلك E-SIM وتتنقل بينهم ب لمسة؛ دا مفيدة لسببين الأول إن شريحتك الأساسية موجودة دائماً وثانياً لو روحت مكان التغطية فيه وحشة تتنقل للشبكات الثلاثة الآخرين بدون ما تفصل شريحتك الأساسية؛ لإنك لو حولت شريحتك الأساسية ل E-SIM هتقفلها عشان تنقل للشبكات الأخرى.

⬅️ طبعاً كل ما سبق لا يسري على الهواتف اللي تقدر تشغل 2 شريحة E-SIM زي الآي فون الأمريكي.

2️⃣ ثانياً بما إنك تحويل الشريحة أرخص من عمل رقم جديد... فنزل برنامج My NTRA وخش برقم موبايلك وأدخل الخدمات وشوف أرقامك اللي باسمك في شركات الاتصالات؛ ممكن تلاقي رقم انتا ناسيه ولا حد بيلبسك مصيبة وشاري رقم على اسمك؛ حول يا باشا واسحب الأرقام دي لموبايلك E-SIM بدل ما تشتري جديد.

*️⃣ الخلاصة هي سيب شريحتك الأساسية عادية وافتح My NTRA وشوف خطوطك الثانية واقلب دول ل E-SIM

*️⃣ وآخر شيء نبارك لكل الناس اللي معاهم آي-فون؛ الناس دي (وأنا جزئياً منهم عشان معايا آي فون وسامسونج)؛ لقد هرمنا؛ الآي فون بقى أخيراً 2 شريحة... بعد انتظار 7 سنين من ساعة الآي فون X واحنا منتظرين E-SIM يا جدعان؛ لقد هرمنا وورمنا؛ خلاص مش محتاجين نشيل موبايل بزاير مع الآي فون عشان نضيف رقم فيه إضافي؛ ياااااه يا عبد الصمد.

بس يا سيدي وأديني رغيت في نفس الموضوع مهي مجاتش عليا 😁

😁

3,033

Muhammad Sameh

04 Dec, 17:14

تعرف انك لو فتحت الفوتوشوب وجيت جنب اسم اي لاير وكتبت .png هتحفظ نسخة مُفرغة من اللاير ده لوحده بشكل تلقائي وهتلاقيها في فولدر اسمه design-assets جنب الـ PSD بتاعك؟

لو متعرفش فأديك عرفت، عشان تفعل الميزة دي هتختار:
File > Generate > Imagge assets

طبعًا بعد ما تسمي اللايرات بتاعتك وتصيف عليها .png

3,361

Muhammad Sameh

30 Nov, 16:46

تحذير ‼️

في بوستاتي او اي بوستات على الفيسبوك عمومًا ممكن تلاقي ناس حاطه لينكات تليجرام في التعليقات، اللينكات دي بتبقى Spam للأسف، وكلها بتكون نصب ان مكانتش هاك او اختراق.

عمومًا محدش هيعرف يخترقك غير لما انت تديله الإذن انه يعمل كدا، متفتحش لينكات انت مش عارف مصدرها او مش واثق في الي بيبعتهالك، خصوصًا لو لينكات تليجرام في كومنتات.

👨‍💻 اكونتي على فيسبوك

4,853

Muhammad Sameh

30 Nov, 15:36

🛑 فيه خبر مش مؤكد ان بكرة هيتم تفعيل الـ eSIM في كل الشركات في مصر، معظم الفروع وصلهم إيميل رسمي بتفعيل الخدمة بداية من بكرة.

*️⃣ لو الـeSIM على رقمك الحالي هتكلف 270 جنيه ولو على رقم جديد 330 جنيه.

4,738

Muhammad Sameh

28 Nov, 15:07

بتشتغل 8 ساعات عشان تعيش 4.
بتشتغل 6 أيام عشان تفرح بيوم واحد اجازة.
بتشتغل 8 ساعات عشان تاكل في 15 دقيقة.
بتشتغل 8 ساعات وتنام 5 ساعات بالعافية.
تفضل شقيان طول السنة عشان تاخدلك أجازة أسبوع أو اتنين.
تشتغل عمرك كله عشان لما تكبر تطلع على المعاش.

وفي الآخر تلاقي نفسك بتعد آخر أنفاسك، وتكتشف إن الحياة ما كانتش غير نكتة سخيفة، بتنسى فيها نفسك مع الوقت.

بقينا متعودين على عبودية المال والمجتمع لدرجة إننا مش حاسين بالسلاسل حوالينا‼️

الحياة قصيرة جدًا، عيشها على طريقتك!

4,990

Muhammad Sameh

28 Nov, 13:35

لو خدت بالك دلوقتي الايموچيز بتتحرك لما تتبعت لوحدها في رسالة واتساب، وبقى شكلها اكبر شوية.

تحديث خفيف ولطيف، والحق يقال واتساب شادين حيلهم جامد في التحديثات، او النقش مش عارف 😂

4,746

Muhammad Sameh

28 Nov, 13:11

لو جالك فيروس الفدية او تعرف حد جاله فيروس الفدية فالبوست ده مهم ليك.

كاسبر سكاي وهوا من افضل برامج الـAnti-virus على الساحة عامل عرض قوي جدًا ويعتبر ببلاش!، اشتراك سنة كاملة سعره بيوصل لـ62 جنيه بس لأفضل باقة عنده!!

لو جبت الاشتراك الي بيشتغل على ٢٠ جهاز هيكلفك ١٢٥٠ج ، يعني الجهاز الواحد هيكون بـ٦٢.٥ جنيه، ارخص من ساندوتش شاورما فراخ سوري صغير من غير شيدر.

ولو مش عارف تجمع ٢٠ جهاز ممكن تاخد الاشتراك الي بيشتغل على ١٠ اجهزة وهيكون بـ٩٦٥ جنيه، الجهاز الواحد هيكلف ٩٧ جنيه تقريبًا، يعني ببلاش.

وخلي بالك ان الاشتراكات دي للسنة مش للشهر!

اللايسنز دي بتشتغل الويندوز، الماك، الأندرويد، والايفون كمان. يعني حماية متكاملة لكل اجهزتك فرصة عظيمة مش هتفضل موجودة وقت كتير! أمّن نفسك قبل ما تلبس فيروس فدية وملفاتك كلها تطير.

لو بتدور على ناس معاك بص بصه على كومنتات الفيسبوك هنا وجمع جروب وتوكلوا على الله.

وربنا ما يجيب لحد فيروسات ابدًا.

4,876

Muhammad Sameh

27 Nov, 21:57

فاضل على الحلو تكة خلاص يا شباب🤏

أنا مش فاهم بس منطق الشركات دي، أنا عامل خدمة إلكترونية، ليه أحطها في منتج ملموس😂

4,629

Muhammad Sameh

25 Nov, 22:57

*️⃣ لما بتاخذ شاور دماغك بتفكر في الفطار مش في سريان الماء الي بينعشك.
*️⃣ لما بتاكل الفطار انت بتفكر في الشغل مش في ريحة الاكل الجميلة والقهوة.
*️⃣ لما بتشتغل انت بتفكر في الوقت الي هتخلص فيه، ومش بتحمد ربنا على نعمة الشغل.
*️⃣ وانت راجع من الشغل بتفكر في البيت بس مش بتحمل ربنا على المناظر الطبيعية وشكل الغروب.
*️⃣ ولما ترجع البيت بتفكر هتعمل ايه بكرة ومش بتحمد ربنا على نعمة الأمان واهلك الي حواليك.

⭕️ امتى فعلًا هتبدأ تعيش، دايمًا دماغك مشغولة بالمستقبل وبتخليك تنسى تستمتع باللحظة والنعم الي محاوطاك في كل حتة‼️

أدي نفسك فرصة تتدبر في نعم الله، مش جايز تبقى اخر فرصة تستمتع بيهم؟

5,175

Muhammad Sameh

22 Nov, 07:40

Copy nothing 👌

6,693

Muhammad Sameh

21 Nov, 14:22

مساء الفل، مبحبش اطلب طلبات شخصية على القناة هنا لكن محتاج يشتري المنتج ده من UK 🇬🇧، حد نازل مصر قريب يقدر يساعدني ويجيبه معاه؟

2,202

Muhammad Sameh

20 Nov, 06:57

⛔️ رسميًا: زيادة أسعار كروت الشحن وباقات الإنترنت بنسبة 15٪ بداية من أول يناير المقبل، بسبب ارتفاع أسعار الوقود.

3,424

Muhammad Sameh

20 Nov, 00:04

حاجة غريبة جدًا إن فيه نسخ مختلفة منك بتعيش في عيون الناس اللي حواليك.

فيه اللي يشوفك هادي ومبتتكلمش خالص، وفيه اللي يشوفك رغاي ومبتبطلش كلام. ناس بتشوفك غامض وكاريزما، وناس تانية بتشوفك اجتماعي وودود. لكن الحقيقة إن ولا واحدة من الشخصيات دي هي شخصيتك الحقيقية. حتى الصورة اللي انت واخدها عن نفسك اتكونت من ذكرياتك، مخاوفك، وأحلامك.

شخصيتك مش حاجة ثابتة تقدر تحددها، لكنها رحلة مستمرة بتكتشفها يوم بعد يوم بالطريقة اللي قررت تعيش بيها. عمرها ما كانت بتحدد عن طريق نظرة الناس ليك، ولا حتى بالصورة اللي في دماغك عن نفسك.

إنت اختياراتك، الحب اللي بتديه، والحياة اللي بتبنيها، ويمكن أكتر حاجة بتخليك إنسان بجد إنك تكون مش محطوط في قالب معين او صورة واحدة.

3,562

Muhammad Sameh

19 Nov, 09:18

طبعًا كلنا عارفين الفراشة دي معناها ايه 🦋

3,750

Muhammad Sameh

19 Nov, 09:17

🦋

3,622

Muhammad Sameh

18 Nov, 17:23

بمناسبة الـ AI الجديد بتاع فري بيك، دي فرصة حلوة نشرح ازاي الاشتراكات الجديدة بتاعته بتشتغل، زي ما لاحظنا ان فري بيك دلوقتي بيتوسع وبيحط مزايا كتير في الذكاء الاصطناعي، فقام فاصل خطط الاشتراك بتاعته لـ٣ خطط، الي تهمنا منهم خطتين هو البريميوم والبريميوم +.

⬅️ الخطتين دول هيفتحولك تحميل لانهائي من Freepik وكمان موقع Flaticon الخاص بالايقونات بحد اقصى 100 تحميل في اليوم، وكل حساب ممكن تدخل عليه بـ 3 اجهزة في نفس الوقت.

*️⃣ وكمان هيدولك وصول لكل مميزات الذكاء الاصطناعي، وهنا هيكون الفرق بين الخطتين، فري بيك عملت نظام اسمه "كريدتس"، ودي زي الكوينز كل ما تحتاج تعمل حاجة في الذكاء الاصطناعي هيسحب شوية منها لحد ما الكريدتس بتاعتك تخلص ومش هتقدر تستخدم الـ Ai لحد ما تجدد الاشتراك بتاعك السنة الجاية.

1️⃣ الباقة البريميوم بتديك 216 الف كريديت
2️⃣ البريميوم+ هتديك 540 الف كريديت.

💡 التريكاية هنا ان مش كل حاجة في الـAi بنفس السعر، على سبيل المثال لو عملت صورة هتستهلك 1 كريديت اما لو احتجت تعمل Upscale لصورة هتستهلك 72 كريديت، فلازم تكون حذر وانت بتستخدم الكريدتس بتاعتك.

⬅️ كمثال الميزة الجديدة الي بتعمل بيها كاركتر ليك كل كاركتر هتعمله هيستهلك 5500 كريديت!

وفي الجدول الي تحت هتلاقي المنيو الكامل بتاع فريبيك، الف هنا.. اقصد قراية سعيدة :"D

4,030

Muhammad Sameh

18 Nov, 16:01

بشرى سارة من البنك المركزي!
خلال شهرين بس هنقدر نبعت تحويلات من الخليج لمصر بالجنيه المصري عن طريق انستاباي.

3,275

Muhammad Sameh

18 Nov, 09:19

Muhammad Sameh pinned «»

0

Muhammad Sameh

17 Nov, 22:41

نوعية الرسايل دي هي الي بتديني دعم اني اكمل، حقيقي بتبسط جدًا لما أشوفان حد حريص انه يدعمني بأي شكل سواء بريآكت او كومنت او رسالة.

اللهم أجعل هذا العمل خالصا لوجهك الكريم و أبعد عنا شر الكبر و الرياء 🤲

3,101

Muhammad Sameh

17 Nov, 18:07

لو عاوز تشترك في ادوبي فدي اضمن وارخص خطة ممكن تشترك فيها، لو انت طالب او معاك ايميل طلاب فدلوقتي عرض البلاك فرايداي وصل والشهر بـ382 جنيه.

العرض ساري من دلوقتي لحد يوم ٢٩ نوفمبر، ولو مش معاك ايميل طلاب ففيه خصم برضه 50% على الاشتراكات العادية والشهر هيكون بـ684 جنيه بدل من 1396.

العروض دي سارية فقط للمشتركين الجدد، اعمل اكونت جديد واشترك بيه، ونصيحتي ليك مفيش اضمن من الاشتراك الرسمي المباشر، بلاش موزعين وتجار عشان متندمش، واحنا اتلسعنا ٣ مرات بدل مرة واحدة في الموضوع ده، خليك في المضمون.

3,189

Muhammad Sameh

17 Nov, 14:15

لو حابب تشترك في العرض ممكن تستخدم لينك الريفير الخاص بيا، ولما تشترك هيديك خصم ٢٠٪ اضافي والاجمالي هينزل لـ 75$!
https://bit.ly/3ZbzUz4

3,365

Muhammad Sameh

17 Nov, 14:03

لو عاوز تعمل موقع خاص بيك تعرض عليه اعمالك فده انسب وقت ممكن!

شركة Hostinger لإستضافة المواقع عامله خصم ٨٥٪ على خدماتها الشهر ده، خطة الأربع سنين بـ94$ + 3 شهور مجانيين + + دومين مجاني لأول سنة ممتازة جدًا!

ده غير ان تكون ايميلاتك هتكون بأسمك بدل Gmail زي الأيميل ده كدا [email protected] ودي حاجة بتزود احترافيتك بشكل كبير جدًا.

بلاش تغلط غلطتي تاخد السنة الواحدة عشان بعد ما تخلص السنة هتلاقي ان التجديد بحوالي 115$ ومفيش اي طريقة لإضافة عروض، خد الاربع سنين مرة واحدة وهتوفر كتير جدًا وكدا كدا الدومين والاستضافة دول حاجات ثابتة معاك هتجددها كل سنة.

بصراحة عرض ميتفوتش!

3,851

Muhammad Sameh

14 Nov, 17:37

مساء الفل، اشتراك ادوبي التركي سعره زاد اكتر من ٤ أضعاف!

السعر الجديد اتغير من 282 ليرة لـ 1,156 ليرة/الشهر، يعني السنة هتقف عليك بحوالي ٢٠ الف جنيه مصري😂

فلو مشترك في ادوبي لتركي ايام ما كان رخيص خلي بالك عشان ماتزعلش في تجديد الاشتراك، عشان اغلب الناس كانت مشتركة ايام البلاك فرايداي والتجديد بتاعه هيبقى كمان كان يوم.

اضمن حاجة دلوقتي هي الاشتراك الرسمي المصري من ادوبي مباشر، من غير شركات ولا موزعين، وانصحك تستنى شوية لحد عروض البلاك فرايداي الي هتبقى يوم ٢٠ نوفمبر الحالي

4,539

Muhammad Sameh

13 Nov, 18:22

لينك التحميل كان فيه مشكلة وعدلتها، Happy Downloading 🫡

4,991

Muhammad Sameh

13 Nov, 15:43

الي معاهم ماك هيتدلعوا الفترة الجاية 🤩

4,244

Muhammad Sameh

12 Nov, 19:27

تريكايه وفرت عليا وقت كتير جدًا في التصميم ‼

4,445

Muhammad Sameh

10 Nov, 00:59

ايه الحاجة الي ممكن تبان غالية لكنها فعلًا تستاهل فلوسها؟

5,102

Muhammad Sameh

09 Nov, 16:04

Share your phone layout 📱

5,792

Muhammad Sameh

03 Nov, 17:36

ماهو هشغله نت يعني هشغله نت 🤬

7,550

Muhammad Sameh

02 Nov, 21:40

الفترة دي واحد صاحبي بينقل لمكان جديد، وحقيقي اول مرة أشوف حاجة زي كدا!

مبدأيًا المنطقة جديدة ومفيهاش انترنت ارضي وهيضطر يعتمد على الانترنت الهوائي، مش دي المشكلة؛ مفيش تغطية للإنترنت الهوائي والشبكة ضعيفة، ومش دي المشكلة برضه.

المشكلة ان الشقة مش بيشتغل فيها الـGPS، ايوة دي ما انت قريت كدا 😂

بمجرد ما تخش من باب العمارة اللوكيشن بيقف معاك تمامًا.. الموضوع ده في اي شبكة أنا جربته من كل الشبكات ومن اكتر من موبايل ولابتوب.

المشكلة انه مش بيقف عند آخر نقطه انت كنت شغال فيها، انا مثلًا طلعني برا المنطقة خالص ورجعني البيت تاني، مع ان أنا بيتي في المعادي والشقة دي في التجمع أصلًا 🤯

وبمجرد ما تطلع من العمارة اللوكيشن بيشتغل عادي خالص، طيعًا الموضوع ده مسبب مشكلة كبيرة، مش هتعرف تعمل اي حاجة بتعتمد على اللوكيشن سيرفس، زي مثلا انك تطلب اوبر او تجيب حاجة من اب ابلكيشن زي طلبات او غيره.

موضوع غريب ومش لاقيله تفسير 😂

7,007

Muhammad Sameh

31 Oct, 18:52

جوجل ضاف تحديث جديد في خانات البحث لـ Short videos، عشان يغطي على سيرش التيكتوك.

أنا شايفها اضافة ممتازة، عشان لما تسيري على جوجل هيجبلك نتائج البحث من كل المنصات زي انستاجرام وتيكتوك ويوتيوب، على عكس سيرش التيكتوك الي مقتصر على منصة واحدة فقط.

شابوه جوجل 🙌

6,603

Muhammad Sameh

31 Oct, 18:17

يوم عظيم اليوم — اتخذ Telegram خطوته الأولى نحو أن يصبح منصة فيديو 📺

🤬 حتى الآن، كانت مقاطع الفيديو في القنوات تُعرض بنفس التنسيق الذي تم تحميلها به، وغالبًا ما يتطلب الأمر من المستخدمين الانتظار وتنزيل غيغابايت فقط لمشاهدة مقطع قصير ☹️

◀️ مع تحديث اليوم، ستقوم خوادم Telegram بضغط مقاطع الفيديو الشائعة إلى خيارات جودة متعددة وتحسينها للبث. الآن، عندما تشاهد مقطع فيديو، يقوم Telegram تلقائيًا باختيار الجودة الأكثر ملاءمة بناءً على سرعة الاتصال لديك ⚙️

👏 ونتيجة لذلك، أصبحت مشاهدة مقاطع الفيديو على Telegram الآن تجربة أكثر سلاسة! يتضمن تحديث شهر أكتوبر المزيد من الميزات التي تعيد تعريف المراسلة

5,752

Muhammad Sameh

27 Oct, 21:54

مساء الفل؛ أنا مارست سلطاتي الديكتاتورية وقفلت النشر على الجروب إلى حين آخر.

عندنا جروب تابع للقناة اسمه Sameh’s Discussions 😎 بعيدًا عن النرجسية الي في اسم الجروب 😂

الهدف منه هو دعم الاستشارات التقنية، لو حد عنده اي استفسارات ممكن يشاركها على الجروب ده والي عنده الحل هيجاوب عليه، وده فعلا بيحصل بشكل فعّال وكلنا بنستفيد وانا شخصيًا اول المستفيدين.

بس مش هنقدر نعمل كدا لو الجروب اتملى نقاشات وخلافات سياسية وعقائدية ياليت نضع كل حاجة في نصابها الصحيح ويفضل الجروب ده للدعم الفني، ويا شباب حطوا في عين الاعتبار ان معانا بنات في الجروب فمتاخدوش راحتكم زيادة عن اللازم

شكرًا لتفهمكم 🙏

6,355

Muhammad Sameh

27 Oct, 11:46

خلينا نكون متفقين ان ده اسوأ تحديث ماسنجر عملته، حرفيًا بوظ نسخة الويب خالص.

7,005

Muhammad Sameh

26 Oct, 17:15

يا جماعة الخير،
زي ما قولت من شوية لو انستا باي عاوزه تقفل الوايفاي هتقفله على الناس كلها مرة واحدة، مش هيشتغل عند بعض الناس وناس لا، ولا هيقعد يعلق شوية ويشتغل شوية.

مشكلة الوايفاي بتاعت انستا باي دي باينة جدًا انها مشكلة خاصة بشركة الوايفاي نفسها وفي اغلب الظن هي مشكلة DNS، حلها بسيط جدًا اي برنامج VPN يغير الـ DNS زي مثلًا 1.1.1.1 بتاع Cloudflare.

حمل البرنامج وشغله وهتلاقي انستا باي فتح عندك عادي خالص.

7,620

Muhammad Sameh

24 Oct, 07:02

ابتداءًا من الجمعة الجاية ١ نوڤمبر مش بتاعت بكرة هيتم تفعيل التوقيت الشتوي في مصر.

وده معناه ان الخميس الجاي لما الساعة تبقى 12:00 بالليل لازم ناخد كل ساعات البيت ونظبطها تبقى 11:00 بإختصار الوقت أتقدم ساعة، بالمناسبة كدا رجعنا تاني مش ماشيين مع توقيت السعودية وبقينا بدري ساعة عنهم، فلو شغلك الساعة ١٠ بتوقيت السعودية فده معناه انك هتبدأ ٩ بتوقيت مصر.

بالتالي مواعيد الصلاة اختلفت عن الي احنا متعودين عليه، ودي مواعيد الصلاة الجديدة بكرة بعد تفعيل التوقيت الشتوي وهتختلف دقايق من محافظة لمحافظة.

هنفضل ماشيين بالتوقيت الشتوي لمدة 6 شهور تقريبًا وهنرجع للتوقيت الصيفي بتاعنا في آخر يوم خميس من شهر ابريل.

6,442

Muhammad Sameh

23 Oct, 07:38

قريبًا 💀

5,364

Muhammad Sameh

22 Oct, 19:51

بووست لله يا محسنين؛ عاوزين ننزل ستوريز وننشر علم اكتر

لو انت مشترك تليجرام بريميوم وعاوز تدعم القناة عشان تشوف محتوى اكتر دي ده ممكن تعمل بووست للقناة من هنا 👇

6,144

Muhammad Sameh

22 Oct, 08:04

بصوا لقيت مين معمول ليه اعلان Sponser ؟ 🌝

5,430

Muhammad Sameh

21 Oct, 19:29

..

6,102

Muhammad Sameh

21 Oct, 08:06

Smartest smart switch ever ✨

5,041

Muhammad Sameh

20 Oct, 17:37

بقالي اسبوع بجرب القطعة دي وحقيقي رهيبة!

ده سمارت سويتش بيركب جوا وش الكهرباء بتاعتك عشان تحولها سمارت، فيه منها بتتباع في مصر عادي ووفيه أنواع زي الي في الصورة متقدمة اكتر بتتجاب من علي اكسبريس.

أنا بجربه بقالي اسبوع وحقيقي تحفة، دلوقتي اعرف افتح لمبة السقف بتاعتي من الموبايل او من خلال صوتي، وكله بيبقى في نفس اللحظة من غير اي تأخير.

🔍 ده ڤيديو فيه شرح للقطعة ولينك الشراء اول لما ركبتها

5,834

Muhammad Sameh

19 Oct, 19:58

💬واتساب اعلنوا من فترة عن ميزة المنشن جوا الستوريز

هتقدر تعمل منشن لأي حد صاحبك ومش مش هيبان لأي حد غيره وهيجيله نوتفكيشن بالمنشن.

🔍 فايدة المنشن انه هيقدر يعمل شير للستوري دي عنده، او يعمل لايك عليها.

الميزة دي كانت متاحة في واتساب بيتا وحاليًا بتنزل لكل الناس بالتدريج.

5,168

Muhammad Sameh

19 Oct, 09:21

كان عندك كام سنة لما عرفت انك ممكن تستخدم الكيبورد كآلة حاسبة جوا اي شات عادي؟

4,405

Muhammad Sameh

18 Oct, 07:50

⭕️ فيه تسريبات شبه مؤكدة ان اسعار الاتصالات هتزيد في خلال شهر.. بالتالي اسعار الانترنت هتزيد بالتبعية، والله اعلم هتزيد بنسبة كام.❗️

*️⃣ لو شغلك على الإنترنت كله أنا اقترح عليك انك تحول لباقة إنترنت سنوية، الباقات دي أعلنت عنها وي من حوالي سنة.

💡فكرتها انك بدل ما بتدفع فلوس كل شهر، لا تندفع مرة في السنة وهتاخد الكوتا كلها وخلصها في شهر خلصها في سنة بقى انت حر.

◀️ في الجدول ده أنا وضحتلك كل اسعار الباقات والكوتا بتاعتها ونسبة التوفير لو دفعت سنوي بدل شهري، الباقة دي هتبقى اختيار كويس عشان لو الانترنت زاد فانت مأمن نفسك ودافع لمدة سنة قدام.

بخصوص الكلام على السرقة في الكوتا وأنها هتخلص في شهرين الكلام ده مش مؤكد؛ وانت عموما لو هتسرق في السنوي هتتسرق برضه في الشهري، وكدا كدا هتدفع عشان دي سلعة أساسية ومش هتعرف تعيش من غيرها.

⭐️ لو مشترك تليجرام برميوم وعاوز تدعمني عشان تشوف محتوى اكتر زي ده تقدر تعمل Boost مجاني للقناة من هنا

4,949

Muhammad Sameh

18 Oct, 07:29

🦋

4,252

Muhammad Sameh

17 Oct, 15:08

ربِح البيع إن شاء الله.
ربِح البيع إن شاء الله.

5,463

Muhammad Sameh

17 Oct, 12:15

خصم ٧٠٪ على اشتراكات Freepik السنوية للمصممين النهاردة بس!

لو اشتركت سنة في الـ Premium هتقف عليك بـ33 يورو بدل 108 ودول تقريبًا 1750 جنيه مصري.

ولو اشتركت سنة في الـ +Premium هتقف عليك بـ75 يورو بدل 252 ودول تقريبًا 3960 جنيه مصري.

الباقتين بيدعموا الستوكات البريميم بعدد لا نهائي و مزايا الذكاء الاصطناعي من فري بيك، لكن الفرق بين الأتنين بيكون في عدد الكرديتس المتاحة لك في السنة.

مع العلم ان اشتراك فري بيك بيشتغل على 3 اجهزة في نفس الوقت يعني ممكن تقسم فلوسه مع 2 صحابك وساعتها الواحد هيدفع 590 جنيه.

لو مش معاك جروب تشترك معاه ممكن تشوف في الكومنتات وان شاء الله تلاقي، وشوف اول كومنت قبل ما تشترك.

تركاية صغيرة وانت بتدفع: لما ييجي يطلب منك الرقم الضريبي حط اي ٩ ارقام عشوائية ومش هيضيفلك فلوس في الضريبة.

5,853

Muhammad Sameh

17 Oct, 08:19

معلومة ممكن تكون مُهمة للبعض، لو انت بتستعمل متصفح انترنت وبتفتح مليون Tab مع بعض زي حالاتي ممكن تستخدم اختصار ctrl+tab و ctrl+shift+tab عشان تتنقل بين التابات بسرعة.

*️⃣ لو عاوز تفتح تاب جديدة هتدوس ctrl+T
*️⃣ كمان لو عاوز تقفل التاب الي انت واقف عليها هتدوس ctrl+W
*️⃣ لو قفلت تاب بالغلط وعاوز ترجعها تاني ctrl+Shift+T

❗️بالمناسبة اختصار ctrl+w بيشتغل تقريبًا على اي برنامج، زي فوتوشوب واليستريتور وحتى على برنامج الفايلز بتاع الويندوز.

⭐️ لو مشترك تليجرام برميوم وعاوز تدعمني عشان تشوف محتوى اكتر زي ده تقدر تعمل Boost مجاني للقناة من هنا

4,677

Muhammad Sameh

14 Oct, 13:19

Modern Problems require modern solutions.👌

5,129

Muhammad Sameh

12 Oct, 18:02

هتلاقوني طالعلكم من كل حتة 😂

التليجرام زي ماهو الأساس وفيه المفيد كله، الواتساب او ماسنجر دول عشان الانتشار بس؛ فلو انت موجود على تليجرام ومش على الباقي متقلقش مش هيفوتك حاجة.

🔗 قناة ماسنجر للأخبار السريعة والتحديثات
—-
🔗قناة واتساب ودي بتاعت الميمز والهلس بس

6,160

Muhammad Sameh

saicohat Telegram Channel (Arabic)

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh

Muhammad Sameh