News Ambassador Media

ဗိုလ်မှူးကြီး စောချစ်သူ အပါ BGF ခေါင်းဆောင်အချို့ကို ဖမ်းဝရမ်းထုတ်ဖို့ ထိုင်း DSI ပြင်ဆင်

ဘန်ကောက်၊ ဖေဖော်ဝါရီ ၁၁
News Ambassador

ကရင်ပြည်နယ် နယ်ခြားစောင့်တပ် BGF ခေါင်းဆောင် ဗိုလ်မှူးကြီး စောချစ်သူအပါအဝင် အရာရှိအချို့ကို ဖမ်းဝရမ်းထုတ်ရန် ထိုင်းနိုင်ငံ၏ အထူးစုံစမ်းစစ်ဆေးရေးအဖွဲ့ DSI က ပြင်ဆင်လျက်ရှိကြောင်း သိရသည်။

BGF ထိန်းချုပ်နယ်မြေ ရွှေကုက္ကိုလ်တွင် နိုင်ငံခြားသားများ လူကုန်ကူးခံရမှုအတွက် သက်သေအထောက်အထားများရရှိထားပြီးနောက် DSI သည် ဗိုလ်မှူးကြီး စောချစ်သူ၊ တပ်နယ်မှူး ဗိုလ်မှူးစောမုတ်သုန်၊ တပ်ရင်းမှူး ဗိုလ်မှူးစောတင်ဝင်း အပါအဝင် ထိပ်ပိုင်းအရာရှိအချို့ကို ဖမ်းဝရမ်းထုတ်ရန် ရှေ့နေများနှင့် တိုင်ပင်ဆွေးနွေးမည်ဖြစ်ကြောင်း ထိုင်းအခြေစိုက် ပြည်တွင်းသတင်းဌာနများက ဖော်ပြကြသည်။

ယနေ့ ဖေဖော်ဝါရီ ၁၁ ရက်နေ့တွင် DSI ၏ လူကုန်ကူးမှုတားဆီးရေးအဖွဲ့ခွဲသည် အဆိုပါကိစ္စရပ်အတွက် အစိုးရရှေ့နေများနှင့်တွေ့ဆုံဆွေးနွေးမည်ဖြစ်ကြောင်း ထိုင်း PBS သတင်းဌာနက ဖော်ပြထားသည်။

အဆိုပါကိစ္စနှင့်ပတ်သက်၍ နောက်ဆက်တွဲအခြေအနေများကိုတော့ မသိရသေးပေ။

ယခုရက်ပိုင်းအတွင်း ကရင်ပြည်နယ်အတွင်းရှိ BGF နှင့် DKBA တို့ ထိန်းချုပ်ရာ ရွှေကုက္ကိုလ်၊ ဘုရားသုံးဆူအပါအဝင် ကျောက်ခတ်ဒေသတို့၏ နိုင်ငံခြားသားများ ပြန်ပေးဆွဲ နှိပ်စက်ခံရပြီး ကျာဖြန့်ငွေလိမ်ဂိုဏ်းအတွက် ခိုင်းစေခံရသည့် အမှုအခင်းများ ဆက်တိုက်ထွက်ပေါ်လာလျက်ရှိသည်။

ထိုင်းအစိုးရက ယင်းကို တားဆီးသည့်အနေဖြင့် မြဝတီ၊ ဘုရားသုံးဆူအပါအဝင် နယ်စပ်နေရာ ၅ ခုကို လျှပ်စစ်မီး၊ အင်တာနက်နှင့် စက်သုံးဆီရောင်းချမှု ဖြတ်တောက်ခဲ့သေးသည်။

ဓာတ်ပုံ- BGF တပ်မွေးနေ့ပွဲတခုတွင် တွေ့ရသည့် စောချစ်သူ

ညက မိုးကုတ်ကို စစ်ကောင်စီတပ် လေယာဉ်ဖြင့် ဗုံးကြဲသဖြင့် ဒေသခံ ၅ ဉီး သေဆုံးပြီး ၁၉ ဉီး ဒဏ်ရာရ

မိုးကုတ်မြို့၊ ဖေဖော်ဝါရီ ၁၀
News Ambassador

ဖေဖော်ဝါရီ ၁၀ ရက်နေ့ ညသန်းခေါင်အချိန်တွင် မန္တလေးတိုင်း မိုးကုတ်မြို့ကို အာဏာသိမ်းစစ်တပ်က လေကြောင်းဖြင့် ဗုံးကြဲတိုက်ခိုက်ရာ ဒေသခံ ၅ ဉီး သေဆုံးပြီး ၁၉ ဉီး ထိခိုက်ဒဏ်ရာရခဲ့ကြောင်း သိရသည်။

ညသန်ခေါင်ယံအချိန်က မိုးကုတ်မြို့အနောက်ပိုင်းတွင် အာဏာသိမ်းစစ်တပ်က Y8 လေယာဉ်ဖြင့် ဗုံး ၂၈ လုံး ကြဲချတိုက်ခိုက်ခဲ့ခြင်းဖြစ်ကြောင်း ဒေသခံထံမှ သိရသည်။

“၁၂ ထိုးပြီးတာနဲ့ စကြဲတာပဲ။ နာရီဝက်လောက်တော့ ကြာမယ်ထင်တယ်။ စုစုပေါင်း ၂၈ လုံး ကြဲတယ်။ လေယာဉ်နဲ့ပတ်ပြီး ၇ ကြိမ်လောက်ကြဲတယ်”ဟု ဒေသခံတဉီးက ပြောသည်။

တိုက်ခိုက်မှုကြောင့် မိုးကုတ်မြို့အနောက်ပိုင်းရှိ ကျောက်မျက်တူးဖော်ရေးလုပ်ကွက် ဝင်းထရံလုပ်ကွက်အတွင်း ကျရောက်ပေါက်ကွဲခဲ့ပြီး ဒေသခံ အမျိုးသား ၅ ဉီး သေဆုံးပြီး အမျိုးသမီး ၅ ဉီးအပါအဝင် ၁၄ ဉီး ထိခိုက်ဒဏ်ရာရခဲ့ကြောင်း TNLA ကလည်း သတင်းထုတ်ပြန်လာသည်။

တိုက်ပွဲတစုံတရာမရှိဘဲ အာဏာသိမ်းစစ်တပ်က TNLA သိမ်းပိုက်ထိန်းချုပ်ထားသည့် မိုးကုတ်မြို့ကို ဗုံးကြဲတိုက်ခိုက်ခဲ့ခြင်းဖြစ်ကြောင်း သိရသည်။

ထိုင်းတွင် စစ်ရှောင်နှင့် PDF များအတွက် အလှူခံနေသည့် မြန်မာလူငယ် ၄ ဉီးကို ထိုင်းမျိုးချစ်အဖွဲ့က ရဲတိုင်၍ ဖမ်းဆီးခိုင်း

စမွတ်ဆာခွန်၊ ဖေဖော်ဝါရီ ၉
News Ambassador

ထိုင်းနိုင်ငံ စမွတ်ဆာခွန်ခရိုင်၊ ကထွန့်ဘင်မြို့တွင် စစ်ဘေးရှောင်များနှင့် PDF များအတွက် အလှူခံနေသော မြန်မာလူငယ် ၄ ဉီးကို ထိုင်းမျိုးချစ်အဖွဲ့က ရဲခေါ်၍ ဖမ်းဆီးခိုင်းခဲ့ကြောင်း သိရသည်။

ယနေ့မနက် ၉ နာရီခန့်က ကထွန့်ဘင်မြို့ရှိ ကုန်းကျော်တံတားတခုတွင် မြန်မာ လူငယ် အမျိုးသား ၃ ဉီးနှင့် အမျိုးသမီး ၁ ဉီးတို့သည် ယင်းသို့အလှူခံနေစဉ် ထိုင်းမျိုးချစ်အဖွဲ့ရောက်ရှိလာပြီး တားမြစ်ကာ ထိုင်းရဲတပ်ဖွဲ့ကို ဖုန်းဆက်တိုင်တန်း၍ ဖမ်းဆီးခိုင်းခဲ့ကြောင်း သိရသည်။

“ရဲတွေလာခေါ်သွားပါတယ်။ မနက်တုန်းကဖြစ်တာ။ ဗီဒီယိုထဲမှာတော့ ထိုင်းမျိုးချစ်အဖွဲ့ရောက်လာပြီး ဒါမင်းတို့နိုင်ငံမဟုတ်ဘူး။ မင်းတို့လုပ်ချင်တိုင်းလုပ်မရဘူးဆိုပြီး ပြောသွားတယ်” ဟု ထိုင်းရောက် မြန်မာများအရေး ကူညီဆောင်ရွက်နေသူ ၁ ဉီးက ပြောသည်။

ထိုင်းမျိုးချစ်အဖွဲ့ကို ထိုင်းမဘသ အဖွဲ့ဟုလည်း ခေါ်ဆိုကြပြီး ၎င်းတို့သည် ထိုင်းနိုင်ငံသို့ ရောက်ရှိနေသော မြန်မာများကို ပစ်မှတ်ထားကာ တိုင်တန်းဖမ်းဆီးခိုင်းနေသည့် အဖွဲ့အစည်းတခုဖြစ်သည်။

ဖမ်းဆီးခံလိုက်ရသော မြန်မာလူငယ် ၄ ဉီးမှာ မည်သူမည်ဝါ၊ မည်သည့်အဖွဲ့က ဖြစ်သည်ကို ဆက်လက်စုံစမ်းဆဲဖြစ်သည်။

ပုံစာ- မနက်က အခင်းဖြစ်ပွားချိန် ထိုင်းမျိုးချစ်အဖွဲ့က ရိုက်ကူးထားသော ဗီဒီယို
https://newsambassador.org/%e1%80%91%e1%80%ad%e1%80%af%e1%80%84%e1%80%ba%e1%80%b8%e1%80%90%e1%80%bd%e1%80%84%e1%80%ba-%e1%80%85%e1%80%85%e1%80%ba%e1%80%9b%e1%80%be%e1%80%b1%e1%80%ac%e1%80%84%e1%80%ba%e1%80%94%e1%80%be%e1%80%84/

ကျောက်ကြီးတွင် စစ်မှုထမ်းဉပဒေအရ ခိုင်းစေခံရသည့် စစ်ကောင်စီတပ်ဖွဲ့ဝင် ၄ ဉီး KNU ထံ အလင်းဝင်

ကျောက်ကြီး၊ ဖေဖော်ဝါရီ ၆
News Ambassador

ပဲခူးတိုင်း၊ ကျောက်ကြီးမြို့နယ်(လယ်ဒိုမြို့နယ်) တွင် စစ်မှုထမ်းဉပဒေအရ ခိုင်းစေခံရသည့် စစ်ကောင်စီတပ်ဖွဲ့ဝင် ၄ ဉီးသည် KNU ထံ အလင်းဝင်ခဲ့ကြောင်း သိရသည်။

ဖေဖော်ဝါရီ ၄ ရက်နေ့က စစ်ကောင်စီတပ် ခမရ−၅၈၄ တပ်ရင်းမှ ဒုတပ်ကြပ် ညီညီလွင် တပ်သား ကိုမြင့်ဝင်း၊ မျိုးမင်းသက် နှင့် စောအေးဖရေ တို့ (၄) ဦးသည် KNU လက်အောက်ခံ ၊ ကရင်အမျိုးသားလွတ်မြောက်ရေးတပ်မတော် (K.N.L.A) တပ်ရင်း (၉) ထံသို့ လက်နက်များနှင့်တကွ အလင်းဝင်ခဲ့ခြင်းဖြစ်ကြောင်း KNU က သတင်းထုတ်ပြန်လာသည်။

၎င်းတို့ ၄ ဉီးသည် စစ်ကောင်စီတပ်၏ ပေါ်တာဆွဲခံရပြီး စစ်မှုထမ်းနေရသူများဖြစ်ကြောင်း ထုတ်ပြန်ချက်အရ သိရသည်။

အလင်းဝင်စဉ် ယူဆောင်လာသော MA-4 တွဲပစ် လောင်ချာ (၁) လက်၊ MA-1 (၂) လက်၊ ကျည် (၇၅) တောင့် နှင့် ကျည်ဘောက် (၃) ဘောက်တို့ကို အပ်နှံခဲ့ကြောင်း၊ ၎င်းတို့ကို တစ်ဉီးလျှင် ငွေကျပ် ၁၀ သိန်း စီ ပြန်လည်းချီးမြှင့်ခဲ့ကြောင်း ထုတ်ပြန်ချက်အတွင်း ဖော်ပြထားသည်။

မြန်မာသို့ လျှပ်စစ်မီး-အင်တာနက်-စက်သုံးဆီ ရောင်းချမှု စတင်ဖြတ်တောက်၊ ဘတ်ငွေ သန်း ၆၀၀ ခန့် ဆုံးရှုံးမည်ဟု ထိုင်း ပြည်ထဲရေးဝန်ကြီးပြော

ဖေဖော်ဝါရီ ၅
News Ambassador

ယနေ့မနက် ၉ နာရီ ၁၀ မိနစ်မှစ၍ ထိုင်းနိုင်ငံက မြန်မာနိုင်ငံဘက်အခြမ်း မြဝတီ၊ ဘုရားသုံးဆူ၊ တာချီလိတ်မြို့များသို့ လျှပ်စစ်မီး၊ အင်တာနက်နှင့် စက်သုံးဆီ ရောင်းချမှု စတင်ဖြတ်တောက်လိုက်ပြီဖြစ်သည်။

ထိုင်းနိုင်ငံ၏ ပြည်ထဲရေးဝန်ကြီး Anutin Charnvirakul ကိုယ်တိုင် ပြည်နယ်လျှပ်စစ်ရုံးသို့ သွားရောက်၍ လျှပ်စစ်မီးဖြတ်တောက်မှုကို ယနေ့ စတင်ပြုလုပ်ခဲ့ခြင်းဖြစ်သည်။

ယင်းသို့ ရောင်းချနေမှုများဖြတ်တောက်လိုက်သည့်အတွက်လည်း ထိုင်းနိုင်ငံအနေဖြင့် နှစ်စဉ် ဘတ်ငွေ သန်း ၆၀၀ ခန့် ဆုံးရှုံးမည်ဖြစ်ကြောင်း ပြည်ထဲရေးဝန်ကြီး က ပြောကြားခဲ့သည်ဟု ထိုင်းသတင်းဌာနများတွင် ဖော်ပြထားသည်။

ကျာဖြန့်လုပ်ငန်းတိုက်ဖျက်ရေးအတွက် ထိုင်းနိုင်ငံက မြန်မာဘက်အခြမ်းသို့ ရောင်းချနေသည့် လျှပ်စစ်မီး၊ အင်တာနက်နှင့် စက်သုံးဆီများဖြတ်တောက်ရန် ယမန်နေ့က ပြုလုပ်ခဲ့သော ထိုင်းအစိုးရအဖွဲ့ အမျိုးသားလုံခြုံရေးကောင်စီအစည်းအဝေးတွင် အတည်ပြုဆုံးဖြတ်ခဲ့ခြင်းဖြစ်သည်။

ထိုင်းဘက်က ယင်းသို့ ဖြတ်တောက်လိုက်သည့် ယနေ့မနက်မှာပင် တာချီလိတ်မြို့၊ မြဝတီမြို့၊ ဘုရားသုံးဆူမြို့များ၌ ဒေသခံပြည်သူများ စက်သုံးဆီအပြိုင်အဆိုင်ဝယ်ယူနေကြကြောင်း မြေပြင်သတင်းများအရ သိရသည်။

ပုံစာ- လျှပ်စစ်မီးဖြတ်တောက်ရန် PEA ရုံးသို့ ရောက်ရှိနေသည့် ထိုင်းပြည်ထဲရေးဝန်ကြီး ( Khaosod Image )

မနက်ဖြန်မှစ၍ မြဝတီအပါ နေရာ ၅ ခုကို ထိုင်းဘက်က လျှပ်စစ်မီး၊ စက်သုံးဆီ၊ အင်တာနက် ရောင်းချမှု ရပ်ဆိုင်းမည်

မြဝတီ၊ ဖေဖော်ဝါရီ ၄
News Ambassador

ကျာဖြန့်လုပ်ငန်းများကို နှိမ့်နှင်းသည့်အနေဖြင့် မြဝတီမြို့ရှိ ရွှေကုက္ကိုလ်မြို့သစ်အပါအဝင် နယ်စပ်တလျှောက် နေရာ ၅ ခုကို ထိုင်းနိုင်ငံဘက်က လျှပ်စစ်မီး၊ အင်တာနက်နှင့် စက်သုံးဆီ ရောင်းချနေမှု ဖြတ်တောက်မည်ဖြစ်သည်။

ယနေ့ ဖေဖော်ဝါရီ ၄ ရက်နေ့က ပြုလုပ်သော ထိုင်းအစိုးရ အမျိုးသားလုံခြုံရေးကောင်စီ NSC အစည်းအဝေးတွင် ယခုကဲ့သို့ ဖြတ်တောက်ရန် ဆုံးဖြတ်ချက်ချခဲ့ခြင်းဖြစ်ကြောင်း ထိုင်းနိုင်ငံ ဒုတိယဝန်ကြီးချုပ်နှင့် ကာကွယ်ရေးဝန်ကြီး Phumtham Wechayachai က ပြောကြားခဲ့သည်။

ယနေ့အစည်းအဝေးတွင် ဝန်ကြီးချုပ် ပေထောင်တန်ရှင်နာဝပ်အနေဖြင့် အဆိုပါ ဆုံးဖြတ်ချက်အပေါ် အပြည့်အဝထောက်ခံခဲ့ကြောင်း ထိုင်းသတင်းဌာနတခုဖြစ်သော Khaosod က ဖော်ပြလာသည်။

“ကျမအနေနဲ့ တုံ့ဆိုင်းနေစရာမရှိပါဘူး။ ကျမတို့ ပြည်သူတွေကို ကျိန်းသေ ကာကွယ်ရမယ်။ ဒီကိစ္စဟာ ကျမတို့ ပြည်သူတွေနဲ့ ထိုင်းနိုင်ငံရဲ့ ပုံရိပ်အပေါ် သက်ရောက်မှုအရမ်းကြီးမားပါတယ်။ ပြတ်ပြတ်သားသားလုပ်ဖို့ အချိန်ရောက်ပြီ” ဟု ဝန်ကြီးချုပ်က ပြောကြားခဲ့သည်ဟု သိရသည်။

ထိုင်းနိုင်ငံက လျှပ်စစ်မီး၊ အင်တာနက်နှင့် စက်သုံးဆီရောင်းချနေမှုဖြတ်တောက်မည့် နေရာများမှာ မြဝတီ-မဲဆောက် နယ်စပ် ၊ မယ်ဆိုင်-တာချီလိတ်နယ်စပ်၊ ဘုရားသုံးဆူနယ်စပ်တို့ ဖြစ်ကြောင်း ထိုင်းသတင်းတွင် ဖော်ပြထားသည်။

ပြီးခဲ့သည့် ရက်ပိုင်းက တရုတ်နိုင်ငံ ပြည်သူ့လုံခြုံရေးဝန်ကြီး Liu Zhongyi သည် ထိုင်းနိုင်ငံသို့ ရောက်ရှိလာပြီး အစိုးရအဖွဲ့နှင့်တွေ့ဆုံကာ မြန်မာ-ထိုင်းနယ်စပ်၊ ထိုင်းဘက်အခြမ်းမှနေ၍ မြဝတီမြို့ ရွှေကုက္ကိုလ်ဘက်သို့ သွားရောက်မျှော်ကြည့်ခဲ့သေးသည်။

ကရင်ပြည်နယ် နယ်ခြားစောင့်တပ် နာမည်ခံ ၊ စစ်ကောင်စီလက်အောက်ခံ ဗိုလ်မှူးကြီးစောချစ်သူ အုပ်ချုပ်ရာ ရွှေကုက္ကိုလ်မြို့ရှိ ကျာဖြန့် အွန်လိုင်းငွေလိမ်ဂိုဏ်များသို့ တရုတ်နိုင်ငံသား ရုပ်ရှင်မင်းသားတစ်ဉီး၊ မော်ဒယ်တစ်ဉီးအပါအဝင် တရုတ်အများအပြား လူကုန်ကူးခံရသည့်ဖြစ်စဉ်အပြီး ယခုကိစ္စရပ်များ ဆက်တိုက်ဆိုသလို ဖြစ်ပွားခဲ့ခြင်းဖြစ်သည်။

ကရင်ပြည်နယ် မြဝတီမြို့ ၊ ရွှေကုက္ကိုလ်၊ ဘုရားသုံးဆူ အပါအဝင် နယ်စပ်တလျှောက်ရှိ မြန်မာဘက်အခြမ်း မြို့များမှာ ထိုင်းနိုင်ငံထံမှ လျှပ်စစ်မီး၊ အင်တာနက်နှင့် စက်သုံးဆီများ ဝယ်ယူအသုံးပြုနေခြင်းဖြစ်သည်။

ရွှေဘို ပကဖ ထံသို့ ခမရ ၁၂ မှ တပ်သားသစ်အဖြစ် စုဆောင်းခံရသူ ၁ ဉီး လက်နက်နှင့်တကွ အလင်းဝင်

ရွှေဘို၊ ဖေဖော်ဝါရီ ၂
News Ambassador

မန္တလေးတိုင်း၊ ရွှေဘိုမြို့နယ်တွင် စစ်ကောင်စီတပ်၏ တပ်သားသစ်အဖြစ် စုဆောင်းခံရသူ ၁ ဉီး လက်နက်နှင့်တကွ မြို့နယ် ပကဖ ထံ အလင်းဝင်ခဲ့ကြောင်း သိရသည်။

ပြီးခဲ့သည့် ဇန်နဝါရီ ၂၀ ရက်နေ့က စစ်ကောင်စီတပ်ရင်း ခမရ ၁၂ မှ တပ်သားသစ်အသစ် စုဆောင်းခံထားရသူ ၁ ဉီးသည် လက်နက်နှင့်တကွ အလင်းဝင်လာခြင်းဖြစ်ကြောင်း မြို့နယ် ပကဖ က သတင်းထုတ်ပြန်လာသည်။

၎င်းသည် ရွှေဘိုမြို့နယ် တိုက်နယ် ၆ အတွင်း စစ်ကောင်စီတပ်၏ ပေါ်တာဆွဲခြင်းခံရသူဖြစ်ကာ အလင်းဝင်ရောက်စဉ် MA3 သေနတ် (၁)လက်၊ ကျည်ဘောက် (၄) ခု၊ ၅.၅၆ ကျည် (၁၀၈)တောင့်၊ လက်ပစ်ဗုံး (၄)လုံးတို့ကို အပ်နှံခဲ့ကြောင်း ထုတ်ပြန်ချက်အရ သိရသည်။

အလင်းဝင်ရောက်လာသူအား ဂုဏ်ပြုဆုငွေ ထိုက်သင့်အားလျော်စွာ ချီးမြှင့်မည်ဖြစ်ပြီး လူ့အခွင့်အရေးနှင့်အညီ ကောင်းမွန်စွာ ထိန်းသိမ်းထားရှိကြောင်း ရွှေဘို ပကဖ က ဆိုထားသည်။

တပ်ရင်းမှူးအပါအဝင် ၂၉ ဉီး ဖမ်းဆီးရမိခဲ့သော မဲပလီဗျူဟာကုန်း စခန်းသိမ်းတိုက်ပွဲရုပ်သံ BPLA ထုတ်ပြန်

သထုံ၊ ဖေဖော်ဝါရီ ၂
News Ambassador

မွန်ပြည်နယ် ၊ ဘီးလင်းမြို့နယ် အတွင်းရှိ စစ်ကောင်စီတပ်အထိုင် မဲပလီ ဗျူဟာကုန်းစခန်းကို ဖေဖော်ဝါရီ ၁ ရက်နေ့ မနက် ၁၁ နာရီတွင် တော်လှန်ရေးတပ်များက အပြီးသတ်သိမ်းပိုက်ရရှိခဲ့သည်။

စခန်းသိမ်းတိုက်ပွဲတွင် စစ်ကောင်စီတပ်မှ တပ်ရင်းမှူးအပါအဝင် စစ်သုံ့ပန်း ၂၉ ဉီးကို ၊ ဟောင်ဝစ်ဇာလက်နက်ကြီး ၂ လက်၊ လက်နက်ငယ်များ ၊ ခဲယမ်းများနှင့်အတူတကွ ဖမ်းဆီး/သိမ်းဆည်းရမိခဲ့ပြီး တော်လှန်ရေးတပ်ဘက်ကလည်း KNLA ရဲဘော် ၁ ဉီးနှင့် FFD ရဲဘော် ၁ ဉီးတို့ ကျဆုံးခဲ့ကြောင်း ကနဉီး သတင်းသိရထားသည်။

တိုက်ပွဲသတင်းအပြည့်အစုံကိုတော့ သက်ဆိုင်ရာတပ်ဖွဲ့များက ထုတ်ပြန်လာခြင်းမရှိသေးပေ။

စခန်းသိမ်းတိုက်ပွဲကို ကရင်အမျိုးသားလွတ်မြောက်ရေးတပ်မတော်(KNLA)၊ ပြည်သူ့ကာကွယ်ရေးတပ်မတော်(PDF)၊ ဗမာပြည်သူ့လွတ်မြောက်ရေးတပ်တော်(BPLA)နှင့် Force for Federal Democracy(FFD)တို့ပါဝင် တိုက်ခိုက်ခဲ့ကြောင်း သိရသည်။

လက်နက်ခဲယမ်းရှာရန် အညာသို့ထွက်သွားသော CDF-KKG ရဲဘော် ၄ ဦး ယနေ့တိုင် သတင်းပြန်မရသဖြင့် ကျဆုံးဟု သတ်မှတ်

ဖေဖော်ဝါရီ ၂
News Ambassador

လက်နက်ခဲယမ်းရှာဖွေရန်အလို့ငှာ အညာဒေသသို့ ခရီးထွက်ခွာသွားသော Chinland Defense Force (Kalay-Kabaw-Gangaw) CDF-KKG ၏ ဒုတပ်ရင်းမှူး အပါအဝင် ရဲဘော် ၄ ဉီးကို ကျဆုံးဟုသတ်မှတ်၍ အမိန့်စာပြန်လိုက်ပြီဖြစ်ကြောင်း မိခင်တပ်ရင်းမှ သိရသည်။

CDF – KKG တပ်ရင်း ၆ မှ ဒုတပ်ရင်းမှူး ဇင်မင်းထွန်း၊ တပ်ခွဲမှူး နိုင်မင်းဟိန်း၊ ရဲဘော် အော်ကိုကိုလင်း (ခ) လပြည့် နှင့် ရဲဘော် စိုင်းမင်းထက်တို့သည် တပ်ရင်းအတွက် လက်နက်ခဲယမ်းရှာဖွေရန်အလို့ငှာ ပြီးခဲ့သည့် ၂၀၂၄ ခုနှစ် ဩဂုတ် ၆ ရက်နေ့က အညာဒေသသို့ ခရီးထွက်ခွာသွားခဲ့ပြီး ယနေ့တိုင် သတင်းတစုံတရာ ပြန်လည်ကြားရခြင်း မရှိတော့ကြောင်း တပ်ဖွဲ့တာဝန်ရှိသူထံမှ သိရသည်။

“အညာဒေသမှာ လက်နက်ခဲယမ်း သွားရှာဖွေရင်း အဆက်အသွယ်ပြတ်သွားခဲ့တာ ။ ဘာသတင်းမှလည်း ဒီကနေ့အထိ ထပ်မကြားတော့ဘူး။ သူတို့ကို စောင့်နေရင်း သတင်းစုံစမ်းနေလို့ ကြာသွားပြီး အခုမှ ကျဆုံးလို့ သတ်မှတ် ထုတ်ပြန်လိုက်တာပါ” ဟု တပ်ဖွဲ့တာဝန်ရှိသူက ပြောသည်။

စတင်ထွက်ခွာသွားစဉ်ကတည်းက ယနေ့အထိ သတင်းတစုံတရာပြန်မကြားတော့ဘဲ မည်သို့မှလည်း စုံစမ်း၍မရတော့ကြောင်း ၊ အလောင်းများလည်း ပြန်မရကြောင်း သိရသည်။

ယင်းအတွက် ၎င်းတို့ ၄ ဉီးကို ၂၀၂၄ ခုနှစ် ဩဂုတ် ၆ ရက်နေ့ကတည်းက ကျဆုံးသည်ဟု သတ်မှတ်လိုက်ပြီး ကျဆုံးခဲ့ခြင်းအတွက်လည်း မိသားစုဝင်များနှင့်ထပ်တူ ဝမ်းနည်းကြောင်း CDF – KKG က သတင်းထုတ်ပြန်ထားသည်။

ပေါက်မြို့နယ် သရက်ကန်ရွာ လေယာဉ်ဖြင့် ဗုံးကြဲခံရပြီး အရပ်သား ၃ ဉီး သေဆုံး

ပေါက်၊ ဖေဖော်ဝါရီ ၁
News Ambassador

မကွေးတိုင်း၊ ပေါက်မြို့နယ်ရှိ သရက်ကန်ရွာကို ယနေ့မနက်အစောပိုင်းတွင် အာဏာသိမ်းစစ်တပ်က လေယာဉ်ဖြင့် ဗုံးကြဲတိုက်ိခုက်ခဲ့ကြောင်း သိရသည်။

ယနေ့မနက် ၁၂ နာရီ ၄၀ မိနစ်ခန့်က သရက်ကန်ရွာဘက်တွင် တိုက်ပွဲတစုံတရာမရှိဘဲ အာဏာသိမ်းစစ်တပ်က တိုက်လေယာဉ်တစီးဖြင့် ဗုံးကြဲတိုက်ခိုက်ခဲ့ခြင်းဖြစ်ကြောင်း ဒေသတွင်း သတင်းရင်းမြစ်များထံမှ သိရသည်။

ဗုံးကြဲမှုကြောင့် သရက်ကန်ရွာမြောက်ပိုင်းရှိ နေအိမ်များပေါ်သို့ ဗုံးသီးကျရောက်ခဲ့ပြီး အရပ်သား ၃ ဉီး သေဆုံးကာ နေအိမ် ၈ လုံး ပျက်စီးခဲ့ကြောင်း ပေါက်မြို့နယ် မြောက်ပိုင်း ကျေးလက်ဒေသ ပျောက်ကြားတပ်ဖွဲ့ ၏ ထုတ်ပြန်ချက်အရ သိရသည်။

လေကြောင်း တိုက်ခိုက်ခံရမှုကြောင့်‌ သေဆုံးသွားသူ ၃ ဉီးတွင် ၂ ဉီးမှာ သရက်ကန်ရွာသား ကိုဇော်လင်းစိုးနှင့် ၎င်း၏ဇနီးတို့ဖြစ်ပြီး ကျန် ၁ ဉီးမှာ ပခုက္ကူမြို့နယ် သံဘိုရွာမှ သရက်ကန်ရွာသို့ အလုပ်လာလုပ်သော ကိုဝက်ကြီးဆိုသူ ဖြစ်ကြောင်း We love myaing အဖွဲ့က သတင်းထုတ်ပြန်ထားသည်။

ကိုဇော်လင်းစိုးနှင့် ဇနီးဖြစ်သူတို့နေအိမ်ပေါ်သို့ ဗုံးသီးတည့်တည့်ကျသဖြင့် အလောင်းများလည်း တစစီဖြစ်သွားသည်ဟု ဆိုထားသည်။

နွားထိုးကြီးတွင် စကစစစ်ကြောင်း ကြားဖြတ်တိုက်ခိုက်ခံရပြီး အသေ/အပျောက် များ

နွားထိုးကြီး၊ ဇန်နဝါရီ ၃၀
News Ambassador

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်တွင် စစ်ကောင်စီစစ်ကြောင်းတစ်ခု ကြားဖြတ်တိုက်ခိုက်ခံရပြီး အသေအပျောက်များပြားခဲ့ကြောင်း သိရသည်။

နွားထိုးကြီးမြို့နယ်၊ ပြင်စည်ရွာမှ ထွက်လာသော စစ်ကောင်စီ ဗိုလ်မှူး ရန်လင်းအောင်နှင့် ဗိုလ်ကြီး အောင်ဇော်မင်း ဦးစီးသည့် စစ်ကောင်စီ တပ်မ-၉၉ လက်အောက်ခံ ခမရ (၁၄၊ ၁၅) နှင့် ရဲတပ်ရင်း ပူးပေါင်းအင်အား (၅၀) ခန့်ပါ စစ်ကြောင်းကို ဇန်နဝါရီ ၃၀ ရက်နေ့မနက်က မြတောင်ရွာနှင့် စိန်ပန်းကန်ရွာအကြားတွင် တော်လှန်ရေးတပ်များက ကြားဖြတ်တိုက်ခိုက်ခဲ့ခြင်းဖြစ်သည်။

စစ်ကြောင်းကို မြင်းခြံခရိုင် PDF တပ်ရင်း (၄၊ ၁၀) ပူးပေါင်းအဖွဲ့တို့က ကြားဖြတ်တိုက်ခိုက်ခဲ့ခြင်းဖြစ်ပြီး တိုက်ပွဲတွင် စစ်ကောင်စီ အဖွဲ့ဝင် ဗိုလ်ကြီး အောင်ဇော်မင်း၏ အလောင်း အပါအဝင် ၂၁ လောင်း သိမ်းဆည်းရရှိထားကြောင်း အမှတ် ၁ စစ်ဒေသ က သတင်းထုတ်ပြန်လာသည်။

စစ်ကောင်စီ ဗိုလ်မှူး ရန်လင်းအောင် မှာလည်း ထိခိုက်‌ဒဏ်ရာဖြင့် ဆုတ်ခွာရင်း သေဆုံးကြောင်း ကောက်ချက်ချ ဖော်ပြထားသည်။

စစ်ကောင်စီတပ်ဖွဲ့ဝင် ၈ ဉီးကိုလည်း သုံ့ပန်းအဖြစ် ဖမ်းဆီးရမိခဲ့ပြီး MA-1 သေနတ် (၃) လက်၊ MA-2 (၄) လက်၊ MA-3 (၆) လက်၊ MA-4 (၂) လက်၊ MA-5 (၁) လက်၊ MA-11 (၆) လက်၊ G-3 (၁၂) လက်၊ G-4 (၂) လက်၊ BA-94 (၁) လက်၊ ၆၀ မမ ပြောင်းတို (၁) လက်၊ ပြောင်းရှည် (၁) လက်နှင့် ၆၀ မမ ဗုံးသီး (၂၉) လုံး၊ အီနာဂါ (၅) လုံး၊နာနတ်သီးဗုံး (၉) လုံး၊ ၉ မမ ကျည် (၃၀၅) တောင့်၊ ဦးထုပ် (၁၀) လုံး တို့ကို သိမ်းဆည်းရမိခဲ့ကြောင်း ထုတ်ပြန်ချက်က ဆိုသည်။
တိုက်ပွဲအတွင်း စစ်ကောင်စီတပ်က MI 35 တိုက်ခိုက်ရေးရဟတ်ယာဉ်ဖြင့် ၃ ကြိမ် ပစ်ခတ်တိုက်ခိုက်ခဲ့ကြောင်း ဆိုသည်။

ရွှေဂူတံတားစစ်ဆေးရေးဂိတ်နှင့် စခန်းကုန်းကို တိုက်ခိုက်သိမ်းယူ မီးရှို့

ထားဝယ်၊ ဇန်နဝါရီ ၃၀
News Ambassador

တနင်္သာရီတိုင်း၊ ထားဝယ်ခရိုင်၊ ရှင်မုတ္ထီးကျေးရွာအနီးရှိ စစ်ကောင်စီတပ်အထိုင် ရွှေဂူတံတားစစ်ဆေးရေးဂိတ်နှင့် စခန်းကုန်းကို တော်လှန်ရေးတပ်များက တိုက်ခိုက်သိမ်းယူမီးရှို့ဖျက်ဆီးခဲ့ကြောင်း သိရသည်။

အဆိုပါ စခန်းကို ဇန်နဝါရီ ၂၉ ရက်နေ့ မွန်းလွဲပိုင်း ၂ နာရီတွင် တော်လှန်ရေးတပ်များက ဝင်ရောက်တိုက်ခိုက်ခဲ့ခြင်းဖြစ်ပြီး အပြန်အလှန်ပစ်ခတ်မှု ၅ နာရီခန့်ကြာမြင့်ခဲ့ကြောင်း တိုက်ပွဲတွင်ပါဝင်သည့် ဒူရကစစ်ကြောင်းက သတင်းထုတ်ပြန်လာသည်။

တိုက်ပွဲအတွင်း စစ်ကောင်စီတပ်ဘက်က ၅ ဉီး ထက်မနည်း သေဆုံးပြီး ၄ ဉီးကို သုံ့ပန်းအဖြစ် ဖမ်းဆီးရမိခဲ့ကြောင်း ထုတ်ပြန်ချက်အရ သိရသည်။

ယင်းအပြင် စစ်ကောင်စီတပ်ထံမှ ငါးကြင်းမြှီးစက်သေနတ် ၁ လက်၊ MA 4 သေနတ် ၁ လက်၊ MA 3 သေနတ် ၃ လက်၊ MA 2 သေနတ် ၁ လက်၊ MA 1 သေနတ် ၄ လက်၊ ၆၀ မမကွန်မန်ဒို စိန်ပြောင်း ၁ လက်၊ ၁၄ နင်းမိုင်း ၄ လုံး၊ လက်ဗစ်ဗုံး ၄ လုံး၊ လိပ်ခုံးမိုင်း ၅ လုံး၊ လက်ကိုင်ဖုန်း ၈ လုံးနှင့် စစ်အသုံးအဆောင်ပစ္စည်းများ သိမ်းဆည်းရမိခဲ့ကာ စခန်းကုန်းကို မီးရှို့ဖျက်ဆီးနိုင်ခဲ့ကြောင်း သိရသည်။

တိုက်ပွဲတွင် တော်လှန်ရေးတပ်များဖြစ်သော ဒူရကစစ်ကြောင်း၊ ဓဝယ်အမျိုးသားလွတ်မြောက်ရေးတပ်တော်၊ ရေဖြူပြည်သူ့ကာကွယ်ရေးတပ်ဖွဲ့၊ ဖက်ဒရယ်ဓူဝံကြယ် ဒရုန်းတပ်ခွဲ၊ ဒေါင်းညီနောင်စစ်ကြောင်း တပ်ခွဲ ၁ တို့က ဝင်ရောက်တိုက်ခိုက်ခဲ့ကြောင်း သတင်းထုတ်ပြန်ထားသည်။
https://newsambassador.org/%e1%80%9b%e1%80%bd%e1%80%be%e1%80%b1%e1%80%82%e1%80%b0%e1%80%90%e1%80%b6%e1%80%90%e1%80%ac%e1%80%b8%e1%80%85%e1%80%85%e1%80%ba%e1%80%86%e1%80%b1%e1%80%b8%e1%80%9b%e1%80%b1%e1%80%b8%e1%80%82%e1%80%ad/

ထိုင်းတွင် မြန်မာကလေးငယ် ၁၉၀ ကျော် ပညာသင်ကြားနေသော ကျောင်းတခု ဖမ်းဆီးခံရ

ထိုင်း၊ ဇန်နဝါရီ ၂၉
News Ambassador

ထိုင်းနိုင်ငံ ၊ စူရတ်ဌာနီခရိုင်တွင် မြန်မာကလေးငယ် ၁၉၀ ကျော်ကို ပညာသင်ကြားပေးနေသော ကျောင်းတခု ယနေ့မနက်က ဖမ်းဆီးခံရကြောင်း သိရသည်။

အဆိုပါကျောင်းတွင် မြန်မာကလေးငယ် ၁၉၀ ကျော်ကို မြန်မာကျောင်းဆရာ/မ ၄ ဉီးက ပညာသင်ကြားပေးနေကြောင်း သိရသည်။

ထိုင်းအစိုးရ၏ ခွင့်ပြုချက်မပါဘဲ တရားမဝင်ဖွင့်လှစ်ထားသောကျောင်းဟု အာဏာပိုင်းများက ဆိုထားပြီး ယနေ့ ဖမ်းဆီးမှုတွင် ကျောင်းသုံးစာအုပ် ၃၁ အုပ်ကို သက်သေအဖြစ် သိမ်းဆည်းခဲ့ကြောင်း ၊ လက်ရှိတွင် အားလုံးကို ရဲစခန်းသို့ ပို့ဆောင်ထားကြောင်း ထိုင်းရဲတပ်ဖွဲ့ကဆိုသည်။

ကလေးငယ်များ၏ မိဘမှာ မြန်မာရွှေ့ပြောင်းလုပ်သားများဖြစ်ပြီး Koh Phangan အတွင်း အလုပ်လုပ်ကိုင်နေသူများဖြစ်ကြောင်း ဆိုသည်။

ကျောင်းလခအနေဖြင့် မြန်မာကလေးငယ်များမှာ တလလျှင် ထိုင်းဘတ်ငွေ ၃၀၀ မှ ၅၀၀ အကြား ကျသင့်ကြောင်း ထိုင်းသတင်းဌာနအချို့က ဖော်ပြကြသည်။

ထိုင်းနိုင်ငံရောက် နိုင်ငံခြားသားများအနေဖြင့် ထိုင်းအစိုးရက ထုတ်ပေးသော ဝက်ပါမစ်(အလုပ်ဗီဇာ)မရှိဘဲ အလုပ်လုပ်ခွင့်မရှိပေ။

ဓာတ်ပုံ- Khoasod English

ညောင်လေးပင်မြို့အဝင်ရှိ စကစ နှင့် ပျူ ပူးပေါင်း ဂိတ်စခန်းအချို့ကို ဝင်ရောက်တိုက်ခိုက်၊ စကစအရာရှိ ၁ ဉီးအပါအဝင် ၃ ဉီး သေဆုံး ဟုဆို

ညောင်လေးပင်၊ ဇန်နဝါရီ ၁၈
News Ambassador

ပဲခူးတိုင်း၊ ညောင်လေးပင်မြို့အဝင်ရှိ စစ်ကောင်စီနှင့် ပျူစောထီး ပူးပေါင်းတပ်စခန်းတခုကို တော်လှန်ရေးတပ်များက ဝင်ရောက်တိုက်ခိုက်ခဲ့ကြောင်း သိရသည်။

ပြီးခဲ့သည့် ၁၆ ရက်နေ့ မနက် အစောပိုင်း ၁နာရီကျော်ခန့်က ညောင်လေးပင်မြို့အဝင် ကြံဘိုကုန်းကျေးရွာနှင့် မုက္ခမူ‌ကျေးရွာ ရှိ စစ်ကောင်စီ တပ်ရင်း ခမရ(၂၀)လက်အောက်ခံစစ်သား နှင့် ပျူစောထီးပူးပေါင်း ဂိတ်စခန်း၊ အထိုင်စခန်းများကို တောကျီးကန်း တပ်ရင်း၊ ၃၇၀၃ တပ်ရင်း၊ တော်ဝင်ဒေါင်းတပ်ရင်း ၊ Spring warriors တပ်ရင်းနှင့် ၁၈၀၅ Drone တပ်ရင်းတို့က တို့ က ဝင်ရောက်တိုက်ခိုက်ခဲ့ခြင်းဖြစ်ကြောင်း တော်ဝင်ဒေါင်းတပ်ရင်းမှ သိရသည်။

တိုက်ပွဲအတွင်း စစ်ကောင်စီနှင့် ပျူများဘက်မှ အရာရှိ ၁ ဉီးအပါအဝင် ၃ ဉီး သေဆုံးကြောင်း တော်ဝင်ဒေါင်းတပ်ရင်းက ဆိုသည်။

ယင်းအပြင် စစ်ကောင်စီတပ်ထံမှ MA-3 သေနတ်တစ်လက်နှင့် ကျည် ၁၈ တောင့်၊ MA-11 သေနတ်တစ်လက်နှင့် ကျည် ၂၅ တောင့် ၊ ကာဘိုင်သေနတ် တစ်လက်နှင့် ကျည် ၄၀ တို့ကို သိမ်းဆည်းရမိခဲ့ကြောင်း သိရသည်။

တိုက်ပွဲအတွင်း တော်လှန်ရေးတပ်များဘက်မှ အကျအဆုံး မရှိခဲ့ကြောင်းပါ သိရသည်။

ကျောက်ဂူဒေသကို စစ်ကောင်စီ လေယာဉ်ဖြင့် ဗုံးကြဲသဖြင့် အရပ်သားပြည်သူ ၃ ဉီး သေဆုံး

ရပ်စောက်၊ ဇန်နဝါရီ ၁၇
News Ambassador

ရှမ်းပြည်နယ်တောင်ပိုင်း ရပ်စောက်မြို့နယ်အတွင်းရှိ ကျောက်ဂူဒေသကို စစ်ကောင်စီတပ်က လေယာဉ်ဖြင့် ဗုံးကြဲတိုက်ခိုက်သွားရာ ဒေသခံအရပ်သားပြည်သူ ၃ ဉီး သေဆုံးခဲ့ကြောင်း သိရသည်။

ဇန်နဝါရီ ၁၆ ရက်နေ့ နေလည် ၁၂ နာရီခွဲခန့်တွင် တစ်ကြိမ်၊ ညနေ ၄ နာရီခန့်တွင် တစ်ကြိမ်၊ စုစုပေါင်း ဗုံးသီး ၅၀ ကျော် ကြဲချ၍ တိုက်ခိုက်ခဲ့ခြင်းဖြစ်ကြောင်း ဓနုပြည်သူ့လွတ်မြောက်ရေးတပ်တော်(DPLA) ထံမှ သိရသည်။

ဗုံးကြဲတိုက်ခိုက်ခံရမှုကြောင့် အရပ်သား ပြည်သူ အမျိုးသမီး ၂ ဦး၊ အမျိုးသား ၁ ဦး စုစုပေါင်း ၃ ဉီး အသက်ဆုံးရှုံးခဲ့ရပြီး ကလေး ၁ ဦးအပါအဝင် ၁၃ ဦး ထိခိုက်ဒဏ်ရာရှိခဲ့ကြောင်း သိရသည်။

ကျောက်ဂူဒေသတွင် အာဏာသိမ်းစစ်ကောင်စီတပ် PNO ပြည်သူ့စစ်ပူးပေါင်းတပ်ဖွဲ့နှင့် တော်လှန်ရေးတပ်များအကြား ထိတွေ့တိုက်ပွဲ ဆက်တိုက်ဖြစ်ပွားနေခြင်းဖြစ်သည်။

ကျောက်ဂူဒေသတိုက်ပွဲကြောင့် ဒေသခံ ထောင်နှင့်ချီ၍ စစ်ဘေးရှောင်နေရကြောင်း သိရသည်။

တော်လှန်ရေးတပ်များ ထိန်းချုပ်ထားသည့် ခမ်းပတ်နှင့် မော်လူးမြို့တို့ကို စစ်ကောင်စီ လေယာဉ်ဖြင့် ဗုံးကြဲ ရဲဘော် ၁ ဉီးနှင့် အရပ်သား ၄ ဉီး သေဆုံး

အင်းတော်၊ ဇန်နဝါရီ ၁၇
News Ambassador

ကချင်ပြည်နယ်နှင့် စစ်ကိုင်းတိုင်းအစပ် အင်းတော်မြို့နယ်အတွင်းရှိ မော်လူးမြို့ကို ယမန်နေ့ညသန်းခေါင်ခန့်တွင် အာဏာသိမ်းစစ်တပ်က လေယာဉ်ဖြင့် ဗုံးကြဲတိုက်ခိုက်ခဲ့ကြောင်း သိရသည်။

ယမန်နေ့ည ၁၁ နာရီ ၄၅ မိနစ်ခန့်က မော်လူးမြို့ကို စစ်ကောင်စီက လေယာဉ်ဖြင့် ဗုံး ၃ လုံး ကြဲချတိုက်ခိုက်သွားခြင်းဖြစ်ကြောင်း ဒေသခံထံမှ သိရသည်။

“မော်လူးမြို့ မြမာလာရပ်ကွက်က စည်ပင်ရုံးနားကို ကြဲသွားတာ။ ၃ ဉီး သေတယ်” ဟု ဒေသခံက ပြောသည်။

သေဆုံးသူ ၃ ဉီးမှာ ဈေးသည်အမျိုးသမီး ၁ ဉီးနှင့် ခရီးသွားပြည်သူ အမျိုးသား ၂ ဉီးတို့ဖြစ်သည်ဟု သတင်းထွက်ပေါ်လျက်ရှိသည်။

မော်လူးမြို့ကို ပြီးခဲ့သည့် ၂၀၂၄ ခုနှစ် ဒီဇင်ဘာလအတွင်းတွင် တော်လှန်ရေးတပ်များက သိမ်းပိုက်ထိန်းချုပ်ထားခဲ့ခြင်းဖြစ်သည်။

အလားတူ ယမန်နေ့ကလည်း စစ်ကိုင်းတိုင်း တမူးခရိုင် ခမ်းပတ်မြို့ကို အာဏာသိမ်းစစ်တပ်က လေယာဉ်ဖြင့် ဗုံးကြဲတိုက်ခိုက်ရာ တော်လှန်ရေးရဲဘော် ၂ ဉီးနှင့် အရပ်သား ကလေးငယ် ၁ ဉီးတို့ သေဆုံးခဲ့ကြောင်း သိရသည်။

ခမ်းပတ်မြို့ အမှတ် ၁ ရပ်ကွက်နှင့် ကနန်ဘုန်းကြီးကျောင်းတို့ကို စစ်ကောင်စီက ဒီဇင်ဘာ ၁၆ ရက်နေ့ ည ၈ နာရီကျော်ခန့်တွင် ဗုံးကြဲတိုက်ခိုက်ခဲ့ခြင်းဖြစ်သည်။

ခမ်းပတ်မြို့ကိုလည်း ၂၀၂၃ ခုနှစ် နိုဝင်ဘာလအတွင်း တော်လှန်ရေးတပ်များက သိမ်းပိုက်ထိန်းချုပ်ထားခဲ့ခြင်းဖြစ်သည်။

Photo- ဒေသခံ

အမ်းမှ ထွက်ပြေးလာသော စစ်ကောင်စီတပ်ဖွဲ့ဝင် ၁၂ ဉီးကို ထပ်မံဖမ်းဆီးရမိ

ငဖဲ၊ ဇန်နဝါရီ ၁၆
News Ambassador

ရခိုင်ပြည်နယ် အမ်းမြို့နယ်မှ ထွက်ပြေးလာသော စစ်ကောင်စီတပ်ဖွဲ့ဝင် ၁၂ ဉီးကို မကွေးတိုင်း ငဖဲမြို့နယ်အတွင်း ထပ်မံဖမ်းဆီးရမိခဲ့ကြောင်း အရှို(ချင်း) CDF အဖွဲ့က ထုတ်ပြန်ကြေညာလာသည်။

ဇန်နဝါရီ ၁၃ ရက်နေ့က အမ်းမြို့နယ် ကြက်ရေစမ်းရွာအနီး တပ်စခန်းမှ ထွက်ပြေးလာသော စစ်ကောင်စီတပ်ဖွဲ့ဝင် ၅ ဉီးကို ငဖဲမြို့နယ် ဂုတ်စည်းရိုးရွာအနီး တားဆီးပိတ်ဆို့ရာ လက်နက်ချအညံ့မခံဘဲ ပစ်ခတ်ဖမ်းဆီးခဲ့ကြောင်း၊ စစ်ကောင်စီတပ်ဖွဲ့ဝင် ၅ ဉီးအနက် ၂ ဉီးကို ပြင်းထန်ဒဏ်ရာဖြင့် ဖမ်းဆီးရမိခဲ့သော်လည်း ကုသမှုခံယူနေစဉ်အတွင်း ဆုံးပါးခဲ့ကြောင်း အရှို(ချင်း) CDF အဖွဲ့က ဆိုသည်။

ဇန်နဝါရီ ၁၄ ရက်နေ့ကလည်း အမ်းမြို့နယ် တောင်ဇောက်ရွာအနီး တိုက်ပွဲမှ ထွက်ပြေးလာသော စစ်ကောင်စီတပ်ဖွဲ့ဝင် ၁၀၀ ခန့်ကို ငဖဲမြို့နယ် ရှောက်တောင်ရွာအနီးတွင် တားဆီးရာ လက်နက်ချအညံ့မခံသဖြင့် တိုက်ပွဲဖြစ်ပွားခဲ့ကြောင်း ထုတ်ပြန်ချက်အရ သိရသည်။

တိုက်ပွဲအတွင်း စစ်ကောင်စီတပ်ဖွဲ့ဝင် ၃ ဉီး သေဆုံးပြီး ၈ ဉီးကို သုံ့ပန်းအဖြစ်ဖမ်းဆီးရမိခဲ့ကြောင်း အရှို(ချင်း) CDF အဖွဲ့က ဆိုထားသည်။

ဇန်နဝါရီ ၁၃ နှင့် ၁၄ နှစ်ရက်တာအတွင်း စစ်ကောင်စီတပ်ဖွဲ့ဝင် ၁၂ ဉီးကို အရှင် ဖမ်းဆီးရမိခဲ့ပြီး လက်နက်ငယ် ၁၅ လက်၊ စိန်ပြောင်း ၁ လက်၊ ခဲယမ်း နှင့် အသုံးအဆောင်များ သိမ်းဆည်းရရှိခဲ့ကြောင်း သိရသည်။

AA ၏ ထိုးစစ်ကြောင့် ရခိုင်ပြည်နယ်အတွင်းမှ ကစင့်ကလျားထွက်ပြေးလာသော စစ်ကောင်စီတပ်ဖွဲ့ဝင်များကို အရှို(ချင်း) CDF အဖွဲ့က မကြာခဏဆိုသလို ဖမ်းဆီးရမိနေလျက်ရှိသည်။

ဆောမြို့မရဲစခန်းမှ စစ်ကောင်စီတပ်ဖွဲ့ဝင် ၅ ဦး လက်နက်နှင့်တကွ အလင်းဝင်

ဆော၊ ဇန်နဝါရီ ၈
News Ambassador

မကွေးတိုင်း၊ ဆောမြို့မရဲစခန်းမှ စစ်ကောင်စီတပ်ဖွဲ့ဝင် ၅ ဉီးသည် တော်လှန်ရေးတပ်ဖွဲ့ထံသို့ လက်နက်အပ်၍ အလင်းဝင်လာခဲ့ကြောင်း သိရသည်။

ဆောမြို့မရဲစခန်းမှ လောင်းရှည်တိုက်နယ်ရဲစခန်းသို့ ထွက်လာသော စစ်ကြောင်း၏ စစ်ကောင်စီအဖွဲ့ဝင် ၅ ဦးသည် ဇန်နဝါရီ ၆ ရက်နေ့တွင် ဂန့်ဂေါခရိုင် PDF တပ်ရင်း ၃/၅ ထံသို့ လက်နက်အပ်၍ အလင်းဝင်လာခြင်းဖြစ်သည်ဟု NUG အမှတ် ၁ စစ်ဒေသ ဘက်က သတင်းထုတ်ပြန်ခဲ့သည်။ သို့သော် အဆိုပါ ၅ ဉီး ၏ အသေးစိတ်အချက်အလက်များကိုမူ မသိရသေးပေ။

၎င်းတို့ ၅ ဉီးသည် MA-1 သေနတ် (၁) လက်၊ MA-3 သေနတ် (၁) လက်၊ MA ကျည် (၄၃၂) တောင့်၊ လက်ပစ်ဗုံး (၃) လုံး၊ MA ကျည်အိမ် (၉) ခုကို အပ်နှံခဲ့ကြောင်း သိရသည်။

ဇန်နဝါရီ ၂ ရက်ကလည်း ဆောမြို့မရဲစခန်းမှ ရဲတပ်သား ၁ ဦးသည် ဂန့်ဂေါခရိုင် PDF တပ်ရင်း-၂ ထံသို့ G-3 (၁) လက်၊ 7.62 ကျည် (၅၀) တောင့်၊ ကျည်အိမ် (၂) ခုဖြင့် အလင်းဝင်ရောက်ခဲ့ကြောင်း စစ်ဒေသ ၁ က ထုတ်ပြန်သည်။

ဇန်နဝါရီ ၄ ရက်နေ့ကလည်း ဆောမြို့နယ်၊ ရင့်ရဲချောင်းရွာအနီး (ဖျင်ချောက်အရှေ့ဘက်)၌ ဂန့်ဂေါခရိုင် PDF တပ်ရင်း ၃/၅ အဖွဲ့က နယ်မြေရှင်းလင်းရေးလုပ်စဉ် စစ်ကောင်စီတပ်ဖွဲ့ဝင် ၄ ဦးကို ဖမ်းဆီးရမိပြီး MA-1 (၂) လက်၊ MA ကျည် (၄၀၇) တောင့်၊ အီနာဂါ (၂) လုံး၊ လက်ပစ်ဗုံး (၁) လုံး၊ နင်းမိုင်း (၁) လုံး၊ MA ကျည်အိမ် (၇) ခု၊ ကျည်ကာဦးထုပ် (၂) လုံး၊ ကျည်ကာအင်္ကျီ (၃) ထည်၊ ကျောပိုးအိမ် (၃) လုံး၊ စစ်ယူနီဖောင်း (၂) ထည်၊ ဖုန်း (၅) လုံး၊ ရေဘူး (၁) ဘူး၊ ဓား (၁) လက် သိမ်းဆည်းရမိခဲ့ကြောင်း သိရသည်။

၎င်းနေ့တွင်ပင် လောင်းရှည်ဒေသ လှော်ကားရွာအနီး ဖိုးခြင်းထောင်ကုန်း၌ ဂန့်ဂေါခရိုင် PDF တပ်ရင်း-၆ အဖွဲ့က နယ်မြေရှင်းလင်းရေးလုပ်စဉ် ထွက်ပြေးသွားသော စစ်ကောင်စီ အဖွဲ့ဝင် ၂ ဦးထံမှ MA-1 (၁) လက် (မောင်းတုံး ပျက်စီး၊ စပရိန် မကောင်း၊ ကျည်အိမ်အောက်ပိတ်မပါ) သိမ်းဆည်းရမိခဲ့ကြောင်း ထုတ်ပြန်ချက်အရ သိရသည်။

ဒီဇင်ဘာ ၃၁ ရက်နေ့ကလည်း လောင်းရှည်ဒေသ၊ ရင့်ရဲချောင်းရွာအနီး ကစဉ့်ကလျားထွက်ပြေးကြသော စစ်ကောင်စီစစ်ကြောင်းကို ဂန့်ဂေါခရိုင် PDF တပ်ရင်း ၃/၅/၆ ၊ မကွေးတိုင်း ဒရုန်းတပ်ဖွဲ့၊ စလင်းမြို့နယ် တိုက်ခိုက်ရေး ပူးပေါင်းအဖွဲ့တို့က ပစ်ခတ်တိုက်ခိုက်ရာ စစ်ကောင်စီဘက်မှ ၂ ဦး သေဆုံးပြီး ၁ ဦးကို ဒဏ်ရာဖြင့် ဖမ်းဆီးရမိခဲ့ကြောင်း သိရသည်။

အဆိုပါနေ့ ဖြစ်စဉ်တွင် စစ်ကောင်စီတပ်ထံမှ MA-2 (၂) လက်၊ MA-3 (၁) လက်၊ G-3 (၁) လက်၊ ကျည်အိမ် (၁၄) ခု၊ G-3 ကျည် (၆၄) တောင့်၊ MA ကျည် (၂၅၀) တောင့်၊ အီနာဂါ (၅) လုံး၊ ၆၀ မမ ဗုံးသီး (၃) လုံး၊ Equipment (၂) ခု၊ ကျောပိုးအိတ် (၃) ခု၊ ရေဘူး (၁) ဘူး၊ စစ်ယူနီဖောင်း (၂) စုံ၊ ရဲယူနီဖောင်း (၁) စုံ သိမ်းဆည်းရမိခဲ့ကြောင်း သိရသည်။

ပုဂံမှ စစ်ကောင်စီရဲတပ်ဖွဲ့ဝင် ၁ ဉီး စက်သေနတ်တစ်လက်နှင့်အတူ ရေစကြို PDF ထံ အလင်းဝင်

ရေစကြို၊ ဇန်နဝါရီ ၇
News Ambassador

မန္တလေးတိုင်း ၊ ပုဂံဒေသ ညောင်ဉီးမြို့ ဆေးရုံတွင် တာဝန်ကျနေသော စစ်ကောင်စီရဲတပ်ဖွဲ့ဝင် ၁ ဉီးသည် ရေစကြိုတောင်ပိုင်းပြည်သူ့ကာကွယ်ရေးတပ်ဖွဲ့ Southern YSO PDF ထံသို့ လက်နက်နှင့်တကွ အလင်းဝင်လာခဲ့ကြောင်း သိရသည်။

အဆိုပါ အသက် ၁၉ နှစ်အရွယ် ရဲတပ်သား နေသူအောင် ဆိုသူသည် ညောင်ဉီးမြို့ ကုတင် ၁၀၀ ဆေးရုံတွင် လုံခြုံရေးတာဝန်ကျနေသူဖြစ်ပြီး မိခင်တပ်ရင်းမှာ မိတ္ထီလာမြို့ ရဲတပ်ရင်း ၃၅ ဖြစ်ကြောင်း သိရသည်။

ပြီးခဲ့သည့် ဇန်နဝါရီ ၄ ရက်နေ့က ရေစကြိုတောင်ပိုင်းပြည်သူ့ကာကွယ်ရေးတပ်ဖွဲ့ Southern YSO PDF အဖွဲ့ထံသို့ ပါးရီ စက်ကလေး သေနတ်အမျိုးအစား ခေါ် 81 သေနတ် တစ်လတ်၊ကျည်ဘောက်၂ခု၊7.62 ကျည် အတောင့်၅၀ တို့နှင့်အတူ လက်နက်အပ်အလင်းဝင်ရောက်လာခဲ့ခြင်းကြောင်း တပ်ဖွဲ့ဘက်က သတင်းထုတ်ပြန်လာသည်။

အလင်းဝင်လာသော ရဲတပ်သား နေသူအောင် ကို ဆုငွေ ကျပ်သိန်း ၄၀ ချီးမြှင့်ပြီး ၎င်းနေထိုင်လိုသော အရပ်သို့ ဘေးကင်းလုံခြုံစွာ ပို့ဆောင်ပေးထားပြီးဖြစ်ကြောင်း Southern YSO PDF က ဆိုသည်။

Southern YSO PDF အဖွဲ့ ထံသို့အလင်းဝင်ရောက်လာသော စကစ တပ်သား အများအပြားရှိခဲ့ပြီး အချို့မှာ ၎င်းတို့‌ နေထိုင်လိုရာအရပ်၌ လည်းကောင်း၊ အချို့မှာ အာဏာရှင်တော်လှန်ရေး လုပ်ငန်းစဉ်များ၌လည်းကောင်း ပူးပေါင်းပါဝင်နေသည်ဟု ထုတ်ပြန်ချက်တွင် ဖော်ပြထားသည်။

ရခိုင်ဒေသတိုက်ပွဲမှ ထွက်ပြေးလာသော စစ်ကောင်စီတပ်ဖွဲ့ဝင် ၁၁ ဉီးကို ထပ်မံဖမ်းဆီးရမိ

အမ်း၊ ဇန်နဝါရီ ၅
News Ambassador

ရခိုင်ပြည်နယ်၊ အမ်းမြို့နယ်အတွင်း AA ၏ ထိုးစစ်ကြောင့် ထွက်ပြေးလာသော စစ်ကောင်စီတပ်ဖွဲ့ဝင် ၁၁ ဉီးကို ထပ်မံဖမ်းဆီးရမိခဲ့ကြောင်း ချင်းကာကွယ်ရေးတပ်(အရှို)က သတင်းထုတ်ပြန်လာသည်။

ဇန်နဝါရီ ၃ ရက်နေ့မှ ၄ ရက်နေ့အထိ ၂ ရက်တာအတွင်း အဆိုပါ စစ်ကောင်စီတပ်ဖွဲ့ဝင် ၁၁ ဉီးကို ဖမ်းဆီးရမိခဲ့ခြင်းဖြစ်ကြောင်း သိရသည်။

၎င်းတို့သည် အမ်းမြို့နယ် ဆင်ခုံတိုင်ကျေးရွာနှင့် တောင်ဇောက်ကျေးရွာအနီးရှိ စစ်ကောင်စီတပ်စခန်များမှ ထွက်ပြေးလာသူများဖြစ်ကြောင်ကိုလည်း ချင်းကာကွယ်ရေးတပ်(အရှို)က သတင်းထုတ်ပြန်ထားသည်။

စစ်ကောင်စီတပ်ဖွဲ့ဝင် ၁၁ ဉီးနှင့်အတူ လက်နက်ငယ် ၉ လက်၊ ခဲယမ်းအချို့ သိမ်းဆည်းရမိခဲ့ကြောင်း ဖော်ပြထားသည်။

ပြီးခဲ့သည့် ဒီဇင်ဘာ ၂၅ ရက်နေ့မှ ၂၇ ရက်နေ့အထိ ၃ ရက်တာအတွင်းတွင်လည်း ရခိုင်ဒေသစစ်ပွဲများမှ ထွက်ပြေးလာသော စစ်ကောင်စီတပ်ဖွဲ့ဝင် ၁၇ ဉီးကို ချင်းကာကွယ်ရေးတပ်(အရှို)က ဖမ်းဆီးရမိခဲ့သေးသည်။

အာရှလမ်းမကြီးနှင့် အနန်းကွင်းဗျူဟာ တိုက်ပွဲ ၇ ရက်အတွင်း စစ်ကောင်စီအများအပြား ကျဆုံး

မြဝတီ၊ ဇန်နဝါရီ ၄
News Ambassador

ကရင်ပြည်နယ် အာရှလမ်းမကြီးကို စိုးမိုးရန်နှင့် အနန်းကွင်းဗျူဟာသို့ အင်အားဖြည့်ရန် ချီတက်လာသော စစ်ကောင်စီစစ်ကြောင်းကို တော်လှန်ရေးတပ်များက ပိတ်ဆို့တိုက်ခိုက်ခဲ့ကြောင်း သိရသည်။

၂၀၂၄ ခုနှစ် ဒီဇင်ဘာ ၂၈ ရက်မှ ၂၀၂၅ ခုနှစ် ဇန်နဝါရီ ၃ ရက်နေ့အထိ ၇ ရက်တာကာလအတွင်း တောင်ပိုင်းစစ်ဒေသ၊ ပြည်သူ့ကာကွယ်ရေးတပ်မတော်(PDF)ပူးပေါင်းအဖွဲ့ နှင့် စစ်ကောင်စီတပ်တို့ ထိတွေ့တိုက်ပွဲ ၁၄ ကြိမ်ဖြစ်ပွားခဲ့ပြီး ၎င်းတိုက်ပွဲများအတွင်း စစ်ကောင်စီတပ်သား (၇၃) ဦးသေဆုံး၍ (၇၅)ဦးနှင့်အထက် ဒဏ်ရာရရှိခဲ့သည်ဟု တောင်ပိုင်းတိုင်း စစ်ဒေသထံမှ သိရသည်။

မြဝတီ - ကော့ကရိတ် အာရှလမ်းမကြီးအား ပြန်လည်စိုးမိုးရန် အင်အားဖြည့်ရောက်ရှိလာသော အောင်ဇေယျစစ်ကြောင်းနှင့် ပြည်သူ့ကာကွယ်ရေးတပ်မတော် ဗျူဟာ ၃၂၊ ဗိုလ်တာဘော ဦးဆောင်သော KNLA တပ်ရင်း ၂၈ ပူးပေါင်းစစ်ကြောင်းတို့ နေ့စဉ်နီးပါးထိတွေ့မှုဖြစ်ပွားနေပြီး စစ်ကောင်စီဘက်က အထိနာနေသည်ဟုလည်း တောင်ပိုင်းတိုင်းစစ်ဒေသက သတင်းထုတ်ပြန်ထားသည်။

ထို့အပြင် ရိက္ခာနှင့် စစ်ကူလမ်းကြောင်းဖြတ်တောက်ခံထားရသည့် အနန်းကွင်းဗျူဟာစခန်းသို့ ဝင်ရောက်ရန်ကြိုးပမ်းနေသော စစ်ကောင်စီ၏ တပ်ကူ သံတွဲစစ်ကြောင်းကိုလည်း ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ အထူးစစ်ဆင်ရေးတပ်ဖွဲ့ (SOF)၊ နဂါးနီစစ်ကြောင်း၊ KNLA တပ်ရင်းများနှင့် ရောင်နီဒရုန်းအထူးတပ်ဖွဲ့၊ Dawna Dragon၊ Cloud Wings ဒရုန်း ပူးပေါင်းအဖွဲ့တို့က ကြားဖြတ်၍တားဆီးပိတ်ဆို့ရာ စစ်ကောင်စီတပ်သားများ ထိခိုက်ကျဆုံးမှုများပြားခဲ့သည်ဟု SOF တပ်ဖွဲ့ထံမှ သိရသည်။

အဆိုပါတိုက်ပွဲသည် ဒီဇင်ဘာ ၃၀ ရက်နေ့မှ ဇန်နဝါရီ ၂ ရက်နေ့အထိ ၄ ရက်ဆက်တိုက်ဖြစ်ပွားခဲ့ပြီး စစ်ကောင်စီတပ်ဘက်က သေဆုံးသူ ၄၀ ခန့်နှင့် တော်လှန်ရေး ရဲဘော် ၃ ဦး ကျဆုံးကာ ၁၅ ဦးထိခိုက်ဒဏ်ရာရရှိခဲ့သည် ဟု သိရသည်။

ယင်းအပြင် လက်နက်ခဲယမ်း ၃၀ ကျော် သိမ်းဆည်းရမိခဲ့ကြောင်းသိရသည်။

စစ်မှုထမ်းဉပဒေအောက်က အိမ်ပြေးများ

ဒီဇင်ဘာ ၃၁၊ ၂၀၂၄
News Ambassador

အာဏာသိမ်းစစ်တပ်က စစ်မှုထမ်းဉပဒေပြဌာန်းလိုက်ပြီးနောက်ပိုင်း ပြည်ပကို ရရာနည်းလမ်းပေါင်းစုံနဲ့ ထွက်ပြေးတိမ်းရှောင်ကြတဲ့ မြန်မာလူငယ်တွေနဲ့ သူတို့ရဲ့ ကိုယ်စီကိုယ်စီ အခက်အခဲတွေ၊ အဆင်မပြေမှုတွေကပဲ သူတို့ကို ဝိုင်းရံပိတ်ဆို့နေပေမယ့် ဒီလမ်းကိုပဲ တခုတည်းသော ရွေးချယ်စရာအနေနဲ့ လျှောက်လှမ်းနေရတဲ့ အကြောင်းအရာတွေ၊ ဒါတွေကို အခုရုပ်သံဗီဒီယိုအထဲမှာ ကြည့်ရှုရမှာဖြစ်ပါတယ်။

https://www.youtube.com/watch?v=8mN35P-a4_A

ပခုက္ကူတွင် စစ်ကောင်စီတပ်ဖွဲ့ဝင် ၄ ဉီး ပစ်ခတ်တိုက်ခိုက်ခံရပြီး သေဆုံး

ပခုက္ကူ၊ ဒီဇင်ဘာ ၃၁
News Ambassador

မကွေးတိုင်း ၊ ပခုက္ကူမြို့တွင် စစ်ကောင်စီတပ်ဖွဲ့ဝင်များ စီးနင်းလိုက်ပါလာသော မော်တော်ယာဉ်တစီး ပစ်ခတ်တိုက်ခိုက်ခံရပြီး ၄ ဉီး သေဆုံးခဲ့ကြောင်း သိရသည်။

ယမန်နေ့ ဒီဇင်ဘာ ၃၀ ရက်နေ့ ညနေ ၄ နာရီကျော်ခန့်က ပခုက္ကူမြို့ ၊ စက်မှုဇုန်ဂိတ်မှ စစ်ကောင်စီတပ်ဖွဲ့ဝင်များသည် မြို့ထဲသို့ပြန်လာစဉ် စက်မှုဇုန် ၁ လမ်းအတွင်း၌ ပစ်ခတ်တိုက်ခိုက်ခံရခြင်းဖြစ်ကြောင်း သိရသည်။

တိုက်ခိုက်ခံရမှုကြောင့် ယာဉ်ပေါ်ပါ စစ်ကောင်စီတပ်ဖွဲ့ဝင် ၄ ဉီး စလုံး သေဆုံးခဲ့ပြီး ၎င်းတို့ထံမှ MA 3 ( ၄ ) လက် ၊ ကျ-ည်ဘောက် ( ၈ ) ခု ၊ ကျ-ည် ( ၁၆၈ ) တောင့် နှင့် ဖုန်းတစ်လုံး သိမ်းဆည်းရရှိခဲ့ကြောင်း သိရသည်။

ဖြစ်စဉ်နှင့်ပတ်သက်၍ ပခုက္ကူမြို့နယ်အခြေစိုက် ပြည်သူ့ကာကွယ်ရေးတပ်ဖွဲ့ Young Force UG ၊ Pakokku People Defense Force နှင့် Pakokku Ranger တို့မှ ပူးပေါင်းဆောင်ရွက်ခဲ့ခြင်းဖြစ်ကြောင်း ထုတ်ပြန်လာသည်။


စစ်ဆင်ရေးတွင် တော်လှန်ရေးရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း ဖော်ပြထားသည်။

မန္တလေး PDF က စစ်ကိုင်းတိုင်းအတွင်း တပ်မဟာ အသစ် ၁ ခု ဖွဲ့စည်း၍ စစ်ရေးအရှိန်မြှင့်မည် ဟုဆို

မန္တလေး၊ ဒီဇင်ဘာ ၃၀
News Ambassador

ပြည်သူ့ကာကွယ်ရေးတပ်မတော် (မန္တလေး PDF ) သည် လာမည့် ၂၀၂၅ တွင် စစ်ကိုင်းတိုင်းအတွင်း တပ်မဟာအသစ်တခု ဖွဲ့စည်း၍ စစ်ရေးအရှိန်မြှင်တင်သွားမည်ဟု ယနေ့ ထုတ်ပြန်ကြေညာလာသည်။

“လာမည့် ၂၀၂၅ ခုနှစ်တွင်လည်း စစ်ကိုင်းတိုင်းဒေသကြီး၌ ပြည်သူ့ကာကွယ်ရေးတပ်မတော် (မန္တလေး)၏ တပ်မဟာအသစ် တစ်ခုဖွဲ့စည်း၍ စစ်ဆင်ရေးအရှိန်အဟုန်ကို တိုးမြှင့်ဖော်ဆောင်သွားမည်ဖြစ်သည်” ဟု ထုတ်ပြန်လာခြင်းဖြစ်သည်။

အသစ်ဖွဲ့စည်းမည့် စစ်ကိုင်းတပ်မဟာတွင် လာရောက်ပူးပေါင်းမည့် စစ်သည်တော်များနှင့် မိတ်ဖက်တော်လှန်ရေးတပ်ဖွဲ့များကို ကြိုဆိုဖိတ်ခေါ်ပါကြောင်း မန္တလေး PDF က ကမ်းလှမ်းထားသည်။

စစ်ကိုင်းတိုင်းဒေသကြီးရှိ တော်လှန်ရေးတပ်ဖွဲ့များနှင့်လည်း စစ်ဆင်ရေးများကို ဟန်ချက်ညီညီ ပူးပေါင်းဆောင်ရွက်သွားရန် အဆင်သင့်ရှိသည်ဟုလည်း ၎င်းတို့၏ ထုတ်ပြန်ချက်တွင် ထည့်သွင်း ဖော်ပြထားသည်။

မန္တလေး PDF သည် ရှမ်းမြောက်ဒေသရှိ ညီနောင်မဟာမိတ်အဖွဲ့နှင့်ပူးပေါင်းကာ စစ်ဆင်ရေးများ ပြုလုပ်ခဲ့ပြီး လက်ရှိတွင် မန္တလေးတိုင်း မတ္တရာမြို့နယ်နှင့် ရှမ်း(မြောက်)အစပ် နောင်ချိုမြို့နယ်တို့၌ စစ်ရေးလှုပ်ရှားမှုများ ပြုလုပ်လျက်ရှိသည်ဟု သိရသည်။

တောင်သာတွင် လ္ဘက်ရည်သောက်နေသည့် လေတပ်ဗိုလ်ကြီး ပစ်ခတ်ခံရပြီး သေဆုံး

တောင်သာ၊ ဒီဇင်ဘာ ၂၉
News Ambassador

မန္တလေးတိုင်း တောင်သာမြို့နယ်တွင် လ္ဘက်ရည်ထိုင်သောက်နေသော စစ်ကောင်စီလေတပ်ဗိုလ်ကြီး ပစ်ခတ်ခံရပြီး သေဆုံးခဲ့ကြောင်း သိရသည်။

ယနေ့မနက် ၇ နာရီ ၁၅ ခန့်က တောင်သာမြို့နယ်တွင် စစ်ကောင်စီလေတပ်မှ ဗိုလ်ကြီးကြည်ဖေလင်း ဆိုသူသည် တပည့်တဉီးနှင့်အတူ လ္ဘက်ရည်သောက်နေစဉ် ပစ်ခတ်ခံရခြင်း ဖြစ်ကြောင်း သိရသည်။

ဖြစ်စဉ်နှင့်ပတ်သက်၍ ပြည်သူ့လွတ်မြောက်ရေးတပ်မတော် PLA အမှတ် ၈၁၅ တပ်ဖွဲ့ (အနောက်မြောက်စစ်ဒေသ) က ၎င်းတို့လက်ချက်ဖြစ်ကြောင်း အတည်ပြုထုတ်ပြန်ထားသည်။

ဖြစ်စဉ်နှင့်ပတ်သက်၍ အသေးစိတ်အချက်အလက်များကိုတော့ ထုတ်ပြန်လာခြင်း မရှိသေးပေ။

ဂွကျပြီးနောက် နိုင်ငံရေးဆွေးနွေးရန် အသင့်ရှိကြောင်း AA စတင် ဖိတ်ခေါ်

ဒီဇင်ဘာ ၂၉
News Ambassador

ရခိုင်ပြည်နယ်ရှိ မြို့နယ်အများစုကို သိမ်းပိုက်ပြီးနောက် နိုင်ငံရေးဆွေးနွေးပွဲစတင်နိုင်ရန် AA က စတင်ဖိတ်ခေါ်လိုက်ပြီဖြစ်သည်။

ရခိုင်ပြည်နယ်အတွင်းရှိ ကျောက်ဖြူ၊ မာန်အောင်၊ စစ်တွေတို့မှလွဲ၍ ကျန်တပြည်နယ်လုံးကို သိမ်းပိုက်ရရှိထားသည့် AA သည် ယနေ့ ဒီဇင်ဘာ ၂၉ ရက်နေ့ ညနေပိုင်းတွင် နိုင်ငံရေးဆွေးနွေးပွဲ ဖိတ်ခေါ်ချက်ကို ထုတ်ပြန်လာခြင်းဖြစ်သည်။

ဂွမြို့ကိုပါ သိမ်းပိုက်ရရှိပြီဟု AA ပြောရေးဆိုခွင့်ရှိသူ ခိုင်သုခ က သတင်းမီဒီယာအချို့သို့ အတည်ပြု ဖြေကြား ပြောဆိုပြီး နာရီပိုင်းအတွင်းမှာပင် အဆိုပါ ထုတ်ပြန်ချက်ထွက်ပေါ်လာသည်ဟု ဆိုရင်လည်း မမှားပေ။

ထုတ်ပြန်ကြေညာချက်ကို ကြည့်ပါက “မိမိတို့သည် လက်ရှိ မြန်မာနိုင်ငံ၏ ပြည်တွင်းရေး အခင်းအကျင်း၊ အဖြစ်အပျက်များကို စစ်ရေးဖြင့် ဖြေရှင်းသည်ထက် နိုင်ငံရေးနည်းလမ်းဖြင့် ဖြေရှင်းရန် အမြဲတန်း အသင့်ရှိကြောင်း ” ဖော်ပြထားသည်ကို တွေ့ရသည်။

၂၀၂၃ နိုဝင်ဘာ ၁၃ ရက်နေ့မှစတင်ခဲ့သော ရခိုင်ဒေသအတွင်း ထိုးစစ်များသည် ဒေသအတွင်းရှိ လူမျိုးပေါင်းစုံ လွတ်မြောက်ရေးကို အဓိက ရည်ရွယ်ပြီး အဖိနှိပ်ခံ မြန်မာပြည်သူလူထုတစ်ရပ်လုံး စစ်အာဏာရှင်စနစ်အောက်မှ လွတ်မြောက်ရေးအတွက်လည်း တိုက်ရိုက်အထောက်အကူပြုမည်ဟု အကြွင်းမဲ့ ယုံကြည်သည်ဟု ဖော်ပြထားသည်။

အဖိနှိပ်ခံ မြန်မာပြည်သူလူထုတရပ်လုံး လိုလားတောင့်တသော နိုင်ငံရေးမျှော်မှန်းချက်များ တစ်လုံးတဝတည်း ရရှိစေရေးအတွက် မားမားမတ်မတ် ဆက်လက်ရပ်တည်ပြီး မြန်မာပြည်တွင်းမှ တိုင်းရင်းသားညီအကိုများ၏ အကောင်းဆုံးသော ညီအကိုမိတ်ဆွေအဖြစ် ဆက်လက်ရပ်တည်သွားမည်ဟု AA က ဆိုထားသည်။

တောင်ကိုရီးယား လေယာဉ်မတော်တဆမှု သေဆုံးသူ ၁၂၀ ကျော်လာပြီး ၂ ဉီးသာ ကယ်ဆယ်ထားနိုင်

မူအန်း၊ ဒီဇင်ဘာ ၂၉
News Ambassador

ယနေ့မနက်က ဖြစ်ပွားခဲ့သော တောင်ကိုရီးယားလေယာဉ်မတော်တဆမှုတွင် သေဆုံးသူ အရေအတွက် ၁၂၀ ကျော်အထိ ရှိလာပြီး အသက်ရှင်လျက်ကယ်ဆယ်နိုင်သူ ၂ ဉီးသာရှိသေးကြောင်း ဒေသတွင်း သတင်းများအရ သိရသည်။

ယနေ့မနက် ၁ နာရီခွဲခန့်က ထိုင်းနိုင်ငံ ဘန်ကောက်မြို့မှ ပျံသန်းသွားသော ကိုရီးယားလေကြောင်းလိုင်း ဂျယ်ဂျူး မှ ခရီးသည်တင် လေယာဉ်တစီးသည် တောင်ကိုရီးယားနိုင်ငံ မူအန်းအပြည်ဆိုင်ရာလေဆိပ်သို့ ဆင်းသက်စဉ် မနက် ၉ နာရီ ၇ မိနစ်ခန့်၌ မတော်တဆမှုဖြစ်ခဲ့ခြင်းဖြစ်သည်။

လေယာဉ်သည် လေဆိပ်သို့ ဆင်းသက်စဉ် ဘီးထုတ်မရဖြစ်ပြီး ပြေးလမ်းပေါ် တရွတ်ဆွဲသွားကာ ပြေးလမ်းအကျော်ရှိ ကွန်ကရစ်ခြံစည်းရိုးကို ဝင်ရောက်တိုက်မိပြီး မီးလောင်ပေါက်ကွဲခဲ့ခြင်းဖြစ်သည်။

လေယာဉ်ပေါ်တွင် ဝန်ထမ်း ၆ ဉီးနှင့် ခရီးသည် ၁၇၅ ဉီး၊ စုစုပေါင်း ၁၈၁ ဉီး လိုက်ပါလာပြီး ကိုရီးယားစံတော်ချိန် မွန်းလွဲ ၂ နာရီ ၄၇ မိနစ်နောက်ဆုံးရရှိသော စာရင်းများအရ သေဆုံးသူ ၁၂၂ ဉီးနှင့် ကယ်ဆယ်ထားနိုင်သူ ၂ ဉီးသာရှိသေးကြောင်း၊ ခရီးသည်များတွင် ထိုင်းနိုင်ငံသား ၂ ဉီးသာ ပါဝင်ပြီး ကျန်အားလုံး တောင်ကိုရီးယားနိုင်ငံသားများဖြစ်ကြောင်း ဒေသတွင်း သတင်းက ဆိုသည်။

ကယ်ဆယ်ထားနိုင်သူ ၂ ဉီးမှာ လေယာဉ်ဝန်ထမ်း အမျိုးသမီး ၁ ဉီးနှင့် ခရီးသည် အမျိုးသမီး ၁ဉီးတို့ ဖြစ်ကြောင်း သိရသည်။
အာဏာပိုင်များကမူ လေယာဉ်ပေါ်ပါလာသူ အားလုံးနီးပါး သေဆုံးနိုင်ခြေရှိကြောင်း ကောက်ချက်ချပြောဆိုထားကြသည်။

ဓာတ်ပုံ- Yonhap News Agency

ပုပ္ပါးတောင်မကြီးပေါ်ရှိ ဆက်သွယ်ရေးစခန်းစောင့် စကစများ တိုက်ခိုက်ခံရပြီး အရာခံဗိုလ် ၁ ဉီးနှင့် ရဲဘော် ၁ ဉီး သေဆုံး

ကျောက်ပန်းတောင်း၊ ဒီဇင်ဘာ ၂၈
News Ambassador

မန္တလေးတိုင်း၊ ကျောက်ပန်းတောင်းမြို့နယ် ပုပ္ပါးတောင်မကြီးပေါ်ရှိ ဆက်သွယ်ရေးစခန်းတွင် တာဝန်ကျနေသော စကစတပ်သား ၃ ဦးကို ဝင်ရောက်တိုက်ခိုက်ပြီး ၂ ဉီး ဖမ်းဆီးနိုင်ခဲ့ကြောင်း Myingyan Black Tiger (MBT) က သတင်းထုတ်ပြန်လာသည်။

ဒီဇင်ဘာ ၂၇ ရက်နေ့ ညနေ ၆ နာရီခန့်က အဆိုပါ ဆက်သွယ်ရေးစခန်းကို Myingyan Black Tiger (MBT) နှင့် Popa Guerilla Force (PGF) အဖွဲ့တို့က လျှပ်တပြက်ဝင်ရောက် စီးနင်းတိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြထားသည်။

ဖြစ်စဉ်တွင် စစ်ကောင်စီတပ်၏ အရာခံဗိုလ်အဆင့်ရှိသူ ၁ ဉီးနှင့် တပ်သားအဆင့် ၁ ဉီးတို့ကို ဖမ်းဆီးနိုင်ခဲ့ပြီး ကျန် ၁ ဉီး မှာ ပြည်သူများအကြား ထွက်ပြေး လွတ်မြောက်သွားခဲ့ကြောင်း ဖော်ပြထားသည်။

၎င်းစစ်ဆင်ရေးအတွင်း MA 11 သေနတ်တစ်လက်၊ UZI သေနတ်တစ်လက် နှင့် ခဲယမ်းအချို့ သိမ်းဆည်းရရှိခဲ့ကြောင်း သိရသည်။

ဖမ်းဆီးရမိသူ ၂ ဉီးမှာ ခုခံထွက်ပြေးသောကြောင့် မဖြစ်မနေ ပစ်ခတ်ရှင်းခဲ့ရသည်ဟု Myingyan Black Tiger (MBT)အဖွဲ့က ဆိုထားသည်။

နယ်စပ်ဂိတ်ရှိရာ ကန်ပိုက်တီမြို့ကို KIA က တိုက်ခိုက်သိမ်းပိုက်ပြီး ကချင်အထူးဒေသ ၁ ခုလုံးကို စိုးမိုးထားနိုင်

ကန်ပိုက်တီ ၊ နိုဝင်ဘာ ၂၀
News Ambassador

ကချင်ပြည်နယ်၊ တရုတ်နယ်စပ်ဒေသတွင် နောက်ဆုံးကျန်ရှိသော စစ်ကောင်စီတပ် စိုးမိုးရာ ကန်ပိုက်တီမြို့ကို ယနေ့ညနေတွင် KIA နှင့် မဟာမိတ်များက တိုက်ခိုက်သိမ်းပိုက်လိုက်ပြီဖြစ်ကြောင်း သတင်းရင်းမြစ်များထံမှ သိရသည်။

ယနေ့ မနက်ပိုင်းတွင် တိုက်ပွဲစတင်ခဲ့ခြင်းဖြစ်ပြီး ညနေတွင် အပြီးသတ်သိမ်းယူနိုင်ခြင်းဖြစ်ကြောင်း သတင်းရင်းမြစ်က ပြောသည်။

“ဒီညနေအထိကို ရထားတဲ့သတင်းအရဆို နယ်စပ်ဂိတ်ပေါက်အထိ ရှင်းလင်းရေးလုပ်နေပြီ။ ညနေ ၅ နာရီနောက်ပိုင်းပေါ့နော်။ ဒီတော့ သိမ်းလိုက်နိုင်ပြီလို့ အကြမ်းဖျဉ်းပြောရမယ်။ မနက်က ရထားတဲ့ သတင်းအရဆို ကန်ပိုက်တီက ဝိုင်းပဲဝိုင်းထားသေးတာ။ ဒီမနက်မှာ ကန်ပိုက်တီမှာရှိတဲ့ စစ်ကောင်စီတပ်တွေဘက်က ပစ်ခတ် ပစ်ဖောက်တာတွေလုပ်တယ်ပြောတယ်။ ပြီးတော့ ညနေမှာ ၂ ဖက်တိုက်ပွဲဖြစ်ပြီး သိမ်းလိုက်တယ်ဆိုပြီး သတင်းထပ်ဝင်လာတယ်” ဟု သတင်းရင်းမြစ်က ပြောသည်။

ကန်ပိုက်တီသည် ကချင်ပြည်နယ်တွင်း မြန်မာ-တရုတ်နယ်စပ်ဂိတ်ပေါက်များအနက် စစ်ကောင်စီ နောက်ဆုံးထိန်းချုပ်ထားသော နေရာဖြစ်ပြီး ယခုဆိုလျှင် ပြည်နယ်အတွင်း နယ်စပ်ဂိတ်အားလုံး KIA လက်အောက်သို့ ကျရောက်သွားပြီဟု ဆိုရမည်ဖြစ်သည်။

လိုင်ဇာရှိ သတင်းရစ်မြစ်တဉီးကလည်း “ကန်ပိုက်တီက သိမ်းလိုက်ပြီ။ ဟုတ်တယ်။ ဒီဘက်မှာတော့ ဒီည လေကြောင်း တိုက်ခိုက်မှု သတိထားရမယ်” ဟု ပြောသည်။

လက်ရှိတွင် KIA က စစ်ကောင်စီနှင့် လက်အောက်ခံ ပြည်သူ့စစ်များ ကြီးစိုးထိန်းချုပ်ခဲ့ရာ ကချင်အထူးဒေသ ၁ တခုလုံးကို သိမ်းယူနိုင်ခဲ့ပြီဟု ဆိုရမည်ဖြစ်သည်။

စစ်ကောင်စီ၏ အတင်းအဓမ္မ တပ်သားသစ်စုဆောင်းခံရသူ (၆)ဦး ဒေါနတပ်ရင်းထံအလင်းဝင်

နိုဝင်ဘာ ၊ ၁၈
News Ambassador

စစ်ကောင်စီတပ်၏ အတင်းအကြပ် တပ်သားသစ်အဖြစ်စုဆောင်းခံရသူ ၆ ဉီးသည် ပြည်သူကာကွယ်ရေးတပ်မတော် ၊ တောင်ပိုင်းတိုင်းစစ်ဒေသခွဲ၊ အမှတ်(၃)၊ ဗျူဟာ(၃၃)၊ ဒေါနတပ်ရင်းနယ်မြေအတွင်းသို့ အလင်းဝင်ရောက်ခဲ့ကြောင်း သိရသည်။

အလင်းဝင်တပ်သား(၆)ဦးတွင် (၁)ဦးသည် MA1 (၁)လက် ၊ ကျည်ဘောက်(၃)ဘောက် ၊ ကပစကျည် ၅.၅၆ (၁၆၁)တောင့် ယူဆောင်လာခဲ့ကြောင်း ဒေါနတပ်ရင်းက သတင်းထုတ်ပြန်လာသည်။

၎င်းတို့ ၆ ဉီးမှာ တပ်သားဝေဖြိုး (ကိုယ်ပိုင်အမှတ်-ရေ ၅၀၈..၊ တပ်သား/၁၄၊ တရက) တပ်သားဖြိုးမင်းအောင် (ပစ-၁၀၆၅..၊ခလရ ၂၇၃) စစ်မှုထမ်းအပတ်စဉ်-၂ တပ်သားကရင်လေး (ပစ-၁၀၆၇..၊ခလရ ၂၇၃) စစ်မှုထမ်းအပတ်စဉ်-၂ တပ်သားရဲမင်းမောင်(ပစ-၂၀၂၆..၊ခလရ၂၇၃) ၊ စစ်မှုထမ်းအပတ်စဉ် - ၁ တပ်သားသန်းတိုးအောင် (ပစ-၁၀၀၈..၊ခလရ၂၇၃) စစ်မှုထမ်းအပတ်စဉ် - ၁ တပ်သားဖြူဖွေး (ပစ-၁၀၀၇..၊ခလရ၂၇၃) စစ်မှုထမ်းအပတ်စဉ် - ၁ တို့ဖြစ်ကြောင်း ထုတ်ပြန်ချက်တွင် ဖော်ပြထားသည်။

ရွှေဘို-မြစ်ကြီးနားလမ်းတွင် စစ်ကောင်စီက ဒရုန်းဖြင့် ဗုံးကြဲသဖြင့် ခရီးသွား ဘုန်းကြီး ၁ ပါးအပါအဝင် ၄ ဉီး သေဆုံးပြီး ၁၀ ဉီး ဒဏ်ရာရ

ကန့်ဘလူ၊ နိုဝင်ဘာ ၁၈
News Ambassador

ယနေ့မနက် က စစ်ကိုင်းတိုင်း ကန့်ဘလူမြို့နယ်၊ ရွှေဘို-မြစ်ကြီးနားလမ်းပိုင်းတွင် စစ်ကောင်စီတပ်က ဒရုန်းဖြင့် ဗုံးသီးကြဲချတိုက်ခိုက်သဖြင့် ခရီးသွားဘုန်းကြီးတပါး ပျံလွန်တော်မူပြီး နောက်ထပ် ပြည်သူ ၃ ဉီး သေဆုံးကာ ၁၀ ဉီး ဒဏ်ရာရခဲ့ကြောင်း သိရသည်။

ယနေ့ မနက် ၇ နာရီခွဲခန့်တွင် ကန့်ဘလူမြို့နယ် တောင်ခြမ်း၊ ရွှေဘို-မြစ်ကြီးနားလမ်းပိုင်းတစ်နေရာကို ဇီးကုန်းသကြားစက်အထိုင် စစ်ကောင်စီတပ်နှင့် ပျူများက ပထမအကြိမ် Drone ဖြင့် ဗုံးသီး ၃ လုံး၊ မနက် ၈ နာရီ မိနစ် ၂၀ ခန့်တွင် နောက်ထပ် ဗုံးသီး နှစ်လုံး စုစုပေါင်း ဗုံးသီး ၅ လုံး ကြဲချတိုက်ခိုက်ခဲ့ရာ ခရီးသွားမော်တော်ယာဉ်ဘေးသို့ ကျရောက်ပေါက်ကွဲပြီး ယာဉ်ပေါ်ပါ ဘုန်းကြီးတစ်ပါး နှင့် အမျိုးသား ၂ ဦး၊ အမျိုးသမီးတစ်ဦး စုစုပေါင်း ၄ ဦး ထိမှန်သေဆုံးခဲ့ကြောင်း၊ ယင်းအပြင် နောက်ထပ်ခရီးသွားပြည်သူ ၁၀ ဦး ထိခိုက်ဒဏ်ရာရရှိခဲ့ကာ ကားနှစ်စီး ပျက်ဆီးခဲ့ကြောင်း ကျွန်းလှ-ကန့်ဘလူတက်ကြွလှုပ်ရှားသူများအဖွဲ့က သတင်းအတည်ပြုထုတ်ပြန်လာသည်။

ထိခိုက်သေဆုံးသွားသည့် ဘုန်းကြီးတစ်ပါးနှင့် ပြည်သူ ၃ ဦးမှာ ငွေတိုးမန်း ခရီးသည်ကားဖြင့် လိုက်ပါလာသည့် ခရီးသွားပြည်သူများ ဖြစ်ပြီး အမည်နှင့် နေရပ်လိပ်စာများကို ဆက်လက်စုံစမ်းနေကြောင်း ဖော်ပြထားသည်။

စစ်ကောင်စီတပ်နှင့် ပျူစောထီးများသည် ကန့်ဘလူမြို့နယ်နှင့် ကျွန်းလှမြို့နယ်တို့တွင် ပြည်သူပိုင်နေအိမ်များအား စစ်ကြောင်းထိုးမီးရှို့ပြီး ပြည်သူများသတ်ဖြတ်ခြင်း၊ ရွာများအားပစ်မှတ်ထားပြီး Drone ဗုံးသီးချခြင်း၊ ပျူသင်တန်းတက်ရန် ပြည်သူများအားအတင်းအဓမ္မဖမ်းဆီးခေါ်ဆောင်ခြင်းများကို လုပ်ဆောင်နေသည်မှာ ၂ ပတ်ကျော်ကြာမြင့်ခဲ့ပြီဖြစ်ပြီး ၎င်းတို့ ဖမ်းဆီးခေါ်ဆောင်သွားသည့် ပြည်သူ (၁၃၀) ခန့်မှာ ယနေ့အထိ ပြန်လည်လွတ်မြောက်လာခြင်းမရှိသေးကြောင်း ဖော်ပြထားသည်။
ယင်းအပြင် နိုဝင်ဘာ ၁၆ ရက်နှင့် ၁၇ ရက်နေ့တို့တွင် ကန့်ဘလူမြို့နယ်၊ အလယ်ခုံရွာ၊ ကျွန်းလှမြို့နယ် ရွာကုန်းကြီးနှင့် လိပ်ဆင်းတောင်ရွာတို့အား တိုက်ပွဲဖြစ်ပွါးခြင်းမရှိဘဲ စစ်ကောင်စီဘက်မှ တိုက်လေယာဉ်ဖြင့် နှစ်ရက်ဆက်တိုက် လေကြောင်းတိုက်ခိုက်ခဲ့သဖြင့် ရွာကုန်းကြီးရွာမှ နေအိမ် ၃ လုံး မီးလောင်ပျက်ဆီးပြီး လိပ်ဆင်းတောင်ရွာမှ နေအိမ် ၆ လုံး၊ ကားဝပ်ရှော့မှ ကား ၇ စီး၊ ကင်ဒါကားတစ်စီး၊ ဆိုင်ကယ်တစ်စီးတို့ ထိခိုက် ပျက်ဆီးခဲ့ကြောင်း၊ ယင်းအပြင် နွားတကောင်နှင့် ခပေါင်းရုံရွာမှာ ဦးမောင်နိုင် ဆိုသူတို့ ဗုံးစထိမှန် အသက်သေဆုံးခဲ့ကြောင်း ထုတ်ပြန်ချက်အတွင်း ဖော်ပြထားသည်။

ဖယ်ခုံရှိ ဘန်ကောက်စစ်ဘေးရှောင်စခန်း ထပ်မံ ဗုံးကြဲခံရ

ဖယ်ခုံ၊ နိုဝင်ဘာ ၁၈
News Ambassador

ယနေ့ နိုဝင်ဘာ ၁၈ ရက် နေ့လည်ပိုင်းက ရှမ်း(တောင်)၊ ဖယ်ခုံမြို့နယ်၊ ရီနွဲ့ကျေးရွှာအုပ်စု၊ လအိကျေးရွှာအနီးရှိ၊ ဘန်ကောက် စစ်ဘေးရှောင်စခန်းကို စစ်ကောင်စီတပ်က လေယာဥ်ဖြင့် ထပ်မံဗုံးကြဲတိုက်ခိုက်ခဲ့ကြောင်း သိရသည်။

နေ့လည် ၁၁ နာရီ ၃၀ မိနစ်အချိန်တွင် ၎င်းစစ်ဘေးရှောင်စခန်းကို တိုက်လေယာဥ် (၂) စင်းဖြင့် ပေါင် ၅၀၀ ပါသော ဗုံးဖြင့်(၁) ကြိမ်၊ ပေါင် ၂၀၀ ရှိသောဗုံးသီးဖြင့် (၂)ကြိမ်၊စုစုပေါင်း ဗုံး (၅) လုံး လာရောက်ကြဲချခဲ့သည်ဟု သိရသည်။

ဗုံးကြဲတိုက်ခိုက်မှုကြောင့် စစ်ဘေးရှောင်စခန်းနှင့် ၎င်းအနီးတဝိုက်ရှိ ပြည်သူများ၏ တဲ၊ နေအိမ်၊ ဘာသာရေး ဘုရားကျောင်း၊ စပါးကျီ များနှင့် လူတချို့ ထိခိုက်ဒဏ်ရာရရှိခဲ့ကြောင်း မိုးဗြဲ PDF ၏ သတင်းထုတ်ပြန်ချက်အရ သိရသည်။

ပြီးခဲ့သည့် စက်တင်ဘာ ၅ ရက်နေ့ကလည်း စစ်ကောင်စီတပ်သည် ဘန်ကောက်စစ်ဘေးရှောင်စခန်းကို လေယာ​ဥ် ဗုံးကြဲတိုက်ခိုက်ခဲ့ရာ အသက်မပြည့်သော ကလေးသူငယ်နှင့်အမျိုးသမီးအပါအဝင် လူ (၁၀) ဦးခန့် သေဆုံးခဲ့ရသည်။

စက်တင်ဘာ ၅ ရက်နေ့ ဖြစ်စဥ်နောက်ပိုင်း စစ်ဘေးရှောင်အများစုမှာ အခြားနေရာသို့ ပြောင်းရွှေ့နေထိုင်ခဲ့ကြသော်လည်း၊ အချို့ စစ်ရှောင်များမှာ ရွှေ့ပြောင်းရန်အခက်ခဲရှိကြသဖြင့် ဆက်လက်ကျန်ရှိ​ေနခြင်းဖြစ်သည်ဟု သိရသည်။

ပုလဲမြို့သိမ်းစစ်ဆင်ရေး စစ်ကောင်စီ ၂၅ ဦး အရှင်းဖမ်းမိပြီး ဗိုလ်နဂါး၏ ရဲဘော် ၉ ဦး ကျဆုံးခဲ့

ပုလဲ၊ နိုဝင်ဘာ ၁၇
News Ambassador

ပြီးခဲ့သည့်ရက်ပိုင်းအတွင်းက ဆောင်ရွက်ခဲ့သည့် စစ်ကိုင်းတိုင်း၊ ပုလဲမြို့သိမ်းစစ်ဆင်ရေးအတွင်း စစ်ကောင်စီတပ်ဖွဲ့ဝင် ၂၅ ဦး အရှင်ဖမ်းဆီးရမိခဲ့ပြီး ဗိုလ်နဂါးဦးဆောင်သော BNRA မှ ရဲဘော် ၉ ဦးလည်း ကျဆုံးခဲ့ကြောင်း သိရသည်။

နိုဝင်ဘာ ၁၁ ရက် မနက် ၄ နာရီခွဲခန့်မှစ၍ ပုလဲမြို့သိမ်းစစ်ဆင်ရေးကို စတင်ခဲ့ခြင်းဖြစ်ပြီး ၄၈ နာရီ ခန့်အကြာတွင် ပုလဲမြို့ပေါ်ရှိ စစ်ကောင်စီနောက်ဆုံးခံတပ်ဖြစ်သော မြို့နယ်ထွေအုပ်ရုံးနှင့် မြို့မရဲစခန်းတို့ကို ထိန်းချုပ်နိုင်ခဲ့ကာ ပုလဲမြို့အား သိမ်းပိုက်နိုင်ခဲ့ကြောင်း တော်လှန်ရေးတပ်ဘက်က သတင်းထုတ်ပြန်လာသည်။

စစ်ကောင်စီ၏ လေကြောင်းပစ်ကူအများအပြားကြားမှ အချိန်တိုအတွင်းထိန်းချုပ်နိုင်ခဲ့ခြင်းဖြစ်ပြီး ဆက်လက်ထိန်းချုပ်ထားနိုင်ရန် အဘက်ဘက်မှ ပြင်ဆင်ကြိုးစားဆောင်ရွက်ခဲ့ကြောင်း၊ စစ်ကောင်စီလက်အောက်ခံ နမခ ၊ တံတားဦးလေတပ်၊ ရှမ်းတဲလေတပ်၊ မကွေးကလခ တို့မှ လေကြောင်းပစ်ကူအခေါက်ရေ (၇၀) ကျော် ပစ်ကူပေးသည့်ကြားမှ ပုလဲမြို့အား တိုက်ခိုက်သိမ်းပိုက်ထိန်းချုပ်နိုင်ခဲ့သော်လည်း ဝေဟင်ဖြင့်တပ်အင်အား စစ်ကူချခြင်း၊ ဝေဟင်မှ ပစ်ကူပေးခြင်းများကို ဖြတ်တောက်ရန်ခက်ခဲသောကြောင့် နိုဝင်ဘာလ ၁၄ ရက် စစ်ဆင်ရေးစတုတ္ထရက်မြောက်ညနေပိုင်းတွင် မြို့ပေါ်မှ ပြန်လည်ဆုတ်ခွာပေးခဲ့ရကြောင်း သိရသည်။

စစ်ဆင်ရေးအတွင်း BNRA မှ ကျဆုံးရဲဘော် ၉ ဦး၊ BNRA မှထိခိုက်ဒဏ်ရာရ ၁၀ ဦး၊ GZA မှ ၁ ဦး ရှိခဲ့ကြောင်း သိရသည်။

စစ်ဆင်ရေးအတွင်းတွင် စစ်ကောင်စီတပ်ဖွဲ့ဝင် သုံ့ပန်း (၂၅) ဦးထိန်းသိမ်းနိုင်ခဲ့ပြီး စစ်သုံ့ပန်းဥပဒေနှင့်အညီ ထိန်းသိမ်းလျှက်ရှိကြောင်း၊ "အများစုမှာ ဘန်ကာအတွင်း လက်ပစ်သီး" ထည့်ခံရသည့် ထိခိုက်ဒဏ်ရာများကြောင့် ဆေးကုသမှုခံရလျက်ရှိကြောင်း ထုတ်ပြန်ချက်အရ သိရသည်။

စစ်ဆင်ရေးအတွင်း စစ်ကောင်စီတပ်ထံမှ MA1 (၅)လက် ၊ MA2 (၂)လက်၊ MA3 (၄)လက်၊MA4ထောက်တွဲ (၁) လက်၊ G3(၆)လက်၊ G4(2)လက်၊ ပစ္စတို MA5 (၁)လက်၊ M9ဗုံးသီး (၆၀)လုံး၊ လက်ပစ်ဗုံး (၂)လုံး ၊ တိုက်မိုင်း (၃)လုံး၊ နင်းမိုင်း (၁)လုံး၊ လက်ပစ်စနစ်တံ (၆)ခု၊ တိုက်မိုင်ဖြူး (၃)ခု၊ G3ကျည်နှင့် ကပစ ၅.၅၆ကျည် အများအပြား၊ G3ကျည်ဘောက်အပို (၄)ဘောက်၊ MA အပိုကျည်ဘောက် (၂၉ )ဘောက် တို့ကိုသိမ်းဆည်းရမိခဲ့ကြောင်း သိရသည်။

ပုလဲမြို့သိမ်းစစ်ဆင်ရေးကို ဗမာအမျိုးသားတော်လှန်ရေးတပ်မတော် (BNRA) မှ ဦးဆောင်၍ Generation Z Army (GZA) နှင့် ရေစကြိုမှ Southern Yesagyo (SYSO) တို့ ပါဝင်တိုက်ခိုက်ခဲ့ကြောင်း သိရသည်။

နောင်ချိုတွင် တိုက်ပွဲပြင်းထန်ပြီး စစ်ကောင်စီတပ် တပ်ရင်းမှူးအပါအဝင် တပ်ဖွဲ့ဝင်များ သေဆုံး

နောင်ချို၊ နိုင်ဝင်ဘာ ၁၆
News Ambassador

ယနေ့ နိုဝင်ဘာ ၁၆ ရက်နေ့တွင် ရှမ်းပြည်နယ်မြောက်ပိုင်း၊ နောင်ချိုမြို့၌ တိုက်ပွဲဆက်လက်ပြင်းထန်ခဲ့ပြီး စစ်ကောင်စီတပ်၏ တပ်ရင်းမှူးအပါအဝင် တပ်ဖွဲ့ဝင်များ သေဆုံးခဲ့ကြောင်း TNLA ကသတင်းထုတ်ပြန်လာသည်။

နောင်ချိုမြို့၊ တောင်ခမ်းရှိ စစ်ကောင်စီ အမြောက်တပ်စခန်း (၃၅၄) နှင့် (၉၀၂) တွင် တိုက်ပွဲပြင်းထန်စွာဖြစ်ပွားခဲ့ခြင်းဖြစ်ပြီး တိုက်ပွဲအတွင်း စစ်ကောင်စီတပ် တပ်မ(၁၁) ခမရ (၂၁၃) တပ်ရင်းမှူး ဗိုလ်မှူး၊ ဗိုလ်ကြီး အဆင့်ရှိသူနှင့် တပ်သားများ သေဆုံးခဲ့ကြောင်း ထုတ်ပြန်လာခြင်းဖြစ်သည်။

ယင်းအပြင် စစ်ကောင်စီတပ်၏ လက်နက်ခဲယမ်းများ နှင့် စစ်အသုံးအဆောင်ပစ္စည်းများလည်း သိမ်းဆည်းရမိခဲ့သည့်အပြင် လက်နက်ခဲယမ်းနှင့်အတူ စစ်ကောင်စီတပ်ဖွဲ့ဝင်(၄)ဉီးကိုလည်း သုံ့ပန်းအဖြစ်ရရှိခဲ့ကြောင်း ထုတ်ပြန်ချက်က ဆိုသည်။

ရှမ်းပြည်နယ်တောင်ပိုင်း ရပ်စောက်-ကျောက်ဂူမှ နောင်ချိုမြို့နယ်အတွင်း စစ်အင်အားဖြည့်တင်းရန် ကြိုးပမ်းနေသည့် စစ်ကောင်စီတပ်မှ ထိုးစစ်ဆင်လာသောကြောင့် တိုက်ပွဲဖြစ်ပွားခဲ့ခြင်းဖြစ်သည်ဟုလည်း ဆိုထားသည်။

နောင်ချိုမြို့ရှိ တောင်ခမ်းအမြှာက်တပ်စခန်းကို ထိန်းချုပ်နိုင်ရန် စစ်ကောင်စီတပ်သည် ရှမ်းပြည်နယ်တောင်ပိုင်း ရပ်စောက်-ကျောက်ဂူမှတစ်ဆင့် စစ်အင်အားဖြည့်တင်းနေပြီး လေကြောင်းမှတစ်ဆင့်လည်း စစ်လက်နက်ခဲယမ်းများ ဖြည့်တင်းနေကြောင်း ဆိုထားသည်။

စစ်ခေါင်းဆောင်ကို မကြာခဏ သရော်ပြောဆိုသည့် ငါးမင်းဆွေကို စစ်ကောင်စီက ဖမ်းဆီး

ရန်ကုန်၊ နိုဝင်ဘာ ၉
News Ambassador

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ကို လူမှုကွန်ရက်တွင် မကြာခဏ သရော်ပြောဆိုလေ့ရှိသည့် ငါးမင်းဆွေကို စစ်ကောင်စီက ဖမ်းဆီးအမှုဖွင့်လိုက်ကြောင်း သိရသည်။

"ကျနော့ကို ကျိုက်ထိုရဲစခန်းမှူးက လာခေါ်တယ်။ လာခေါ်တဲ့အကြောင်းက ရန်ကုန်၊ လှိုင်မြို့နယ်မှာ ကျနော့ကို ၅၀၅ (က) နဲ့ အမှုဖွင့်ထားပါတယ်တဲ့။ အဲဒီကိစ္စနဲ့ကျနော့်ကို လာခေါ်တာပေါ့ဗျာ။ ကျနော့ကို ရန်ကုန်ပို့မှာပေါ့ဗျာ။ ၅၀၅ (က) နဲ့ ကျနော့ကို တရားစွဲထားတယ်ဗျ။ အဲ့ဒီလိုတော့ အကြမ်းဖျဉ်းသိရတယ်ဗျ။ အသေးစိတ်‌တော့ ဘာမှမသိရဘူး။ ကျနော်လိုက်သွားရမယ်ပေါ့ဗျာ။ ချစ်လှစွာသော မြန်မာများအားလုံးကို ကျနော် နှုတ်ဆက်ပါတယ်” ဟု ငါးမင်းဆွေက ၎င်း ရဲစခန်းသို့ သွားရောက်ဖမ်းဆီးမခံခင် နောက်ဆုံးအနေဖြင့် လူမှုကွန်ရက်မှတဆင့် ပြောကြားခဲ့သည်။

ရန်ကုန်တိုင်း၊ လှိုင်မြို့နယ်၊ လှိုင်မြင့်မိုရ်အိမ်ယာနေ ဦးမင်းဆွေ(ခေါ်) ငါးမင်းဆွေသည် လူမှုကွန်ရက်စာမျက်နှာများပေါ်တွင် ငါးမင်းဆွေ အမည်ရသော ဖေ့ဘွတ်အကောင့်ဖြင့် “စစ်ဗိုလ်ချုပ်မှူးကြီးတဲ့ သူ့လက်ထက်မှာ အောင်ပွဲရတဲ့ စစ်ပွဲတပွဲမှမရှိဘူး” “ကိုရည်မွန်က တဖြည်းဖြည်းနဲ့ နေပြည်တော် ရောက်လာတော့မယ် အကိုလှိုင် ” “အကိုလှိုင်က တရုတ်ကပြန်လာရင်တော့ တကယ်ကြမ်းတော့မှာလို့ ယူဆပါတယ်” စသည့် ရေးသားပြောဆိုမှုများအပါအဝင် အာဏာသိမ်းစစ်တပ်ကို သရော်ရေးသားမှုများအတွက် ယခုကဲ့သို့ ဖမ်းဆီးလိုက်ခြင်းဖြစ်ကြောင်း စစ်လော်ဘီတယ်လီဂရမ်ချန်နယ်များမှ တဆင့်သိရသည်။

ငါးမင်းဆွေသည် ယခင် NLD အစိုးရလက်ထက်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ယင်းကဲ့သို့ပင် သရော်ပြောဆိုခဲ့ပြီး စစ်တပ်လော်ဘီလုပ်ခဲ့သည်။

ဗီဒီယို_စစ်တပ်လော်ဘီတယ်လီဂရမ်းများတွင် ဖော်ပြထားသော ငါးမင်းဆွေ၏ ဗီဒီယို

ဖယ်ခုံအရှေ့ဘက်ရှိ ကျေးရွာတခုကို စစ်ကောင်စီ ဗုံးကြဲသဖြင့် ဒေသခံ ၂ ဉီး သေဆုံး

ဖယ်ခုံ၊ နိုဝင်ဘာ ၉
News Ambassador

ယမန်နေ့ညက ရှမ်းပြည်နယ်တောင်ပိုင်းနှင့် ကရင်နီပြည်နယ်အစပ်၊ ဖယ်ခုံမြို့နယ် အရှေ့ဘက်အခြမ်းရှိ ကာလကျေးရွာကို စစ်ကောင်စီတပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ ဒေသခံ ၂ ဉီးသေဆုံးပြီး အပျက်အစီးများရှိခဲ့ကြောင်း ဒေသခံထံမှ သိရသည်။

ယမန်နေ့ည ၁၁ နာရီခန့် တိုက်ပွဲတစုံတရာမရှိဘဲ ဖယ်ခုံမြို့နယ်အရှေ့ဘက်အခြမ်းရှိ ကာလရွာ (အရှေ့)ကို လေကြောင်းဖြင့် ၄ ကြိမ် ဗုံးကြဲတိုက်ခိုက်ခဲ့ရာ ဒေသခံ အမျိုးသမီး ၁ ဉီးနှင့်အမျိုးသား ၁ ဉီးတို့ သေဆုံးကြောင်း သေဆုံးသူ ၁ဉီး၏ မိသားစုအသိုင်းအဝိုင်းမှ သိရသည်။

ယင်းအပြင် နေအိမ်တချို့နှင့် ကား ၃ စီးလည်း ထိခိုက်ပျက်စီးခဲ့ကြောင်း သိရသည်။

ယနေ့ မနက်ကလည်း မိုးဗြဲမြို့နယ်၊ နိုးကိုးစံပြကျေးရွာထဲကို စစ်ကောင်စီက လက်နက်ကြီးဖြင့် ပစ်ခတ်ရာကျေးရွာအတွင်း ကျရောက်ပေါက်ကွဲပြီး အရပ်သား ၆ ဉီး ဒဏ်ရာရခဲ့ကြောင်း သိရသည်။

ဓာတ်ပုံ- CJ

ပုလဲမြို့နယ် ဇီးဖြူကုန်းပျူစခန်း ကို
ဒရုန်းဖြင့်တိုက်ခိုက် ၊ အရာရှိတစ်ဦးအပါအဝင် ၁၀ ဦး ထိခိုက် (ရုပ်/သံ)

ရန်ကုန် ၊ အောက်တိုဘာ ၇
Newsambassador

စစ်ကိုင်းတိုင်း ပုလဲမြို့နယ်ရှိ ဇီးဖြူကုန်းပျူစခန်းကို ၄ ရက်ဆက်တိုက် ဒရုန်းဖြင့် တိုက်ခိုက်ခဲ့ရာ စစ်ကောင်စီအရာရှိ ၁ ဦးအပါအဝင် ၁၀ ဦး အပြင်း အထန်ထိခိုက်ခဲ့ကြောင်းဗမာအမျိုး သား တော်လှန်ရေး တပ်မတော် က ပြောကြားသည် ။

ဇီးဖြူကုန်းပျူစခန်းကိုဗမာအမျိုး သား တော်လှန်ရေး တပ်မတော် (BNRA) နည်းပညာ တပ်ရင်းမှ
နိုဝင်ဘာ ၁ ရက်နေ့မှစပြီး နိုဝင်ဘာ ၄ ရက် နေ့ထိ ဒရုန်းစစ်ဆင်ရေးပြုလုပ် ခဲ့ကြောင်း ၊၄ ရက်တာစစ်ဆင်ရေးအတွင်း စစ်ကောင်စီအရာရှိတစ်ဦးအပါအဝင် စုစုပေါင်း ၁၀ဦး ထိခိုက်ဒဏ်ရာရရှိခဲ့သည်ဟု BNRAကဆို သည်။

KNU ၏ အထွေထွေအတွင်းရေးမှူးချုပ် ပဒိုစောတာဒိုမှူးက မူ မြောက်ပိုင်းမှ လက်နက်ကိုင်တပ်ဖွဲ့များနှင့် ပတ်သက်၍ “မြောက်ပိုင်းနဲ့ပတ်သက်ရင်တော့ ကျနော်တို့မှာ စိန်ခေါ်မှုရှိပါတယ်။ တောင်ပိုင်းနဲ့မြောက်ပိုင်းအကြား ဆက်သွယ်မှုဒီနေရာမှတော့ ပွင့်ပွင့်လင်းလင်းပြောဖို့ကတော့ အခက်အခဲရှိတယ်။ အားလုံးသိတဲ့အတိုင်းပဲ နိုင်ငံရေးအနေအထားက။ ဒါပေမဲ့ တိုင်းရင်းသားတွေအားလုံး တနိုင်ငံလုံးမှာရှိတဲ့ ပြည်သူလူထုတွေနဲ့ ကျနော်တို့ တခြားပြည်နယ်က ဖြစ်ပေါ်ဖို့ကြိုးစားနေတဲ့ တိုင်းအခြေပြုပြည်နယ်ဘက်ကို ဉီးတည်နေတဲ့ ဖက်ဒရယ်စနစ်ထဲမှာ ပါနေတဲ့ ဖြေရှင်းမှုတွေကအစ အခြေခံတွေနဲ့ဉီးတည်ချက်တွေက တခုတည်းဖြစ်တယ်လို့ ယေဘုယျပြောလို့ရပါတယ်” ဟု သတင်းစာရှင်းလင်းပွဲတွင် ပြောခဲ့သည်။

ဗိုလ်ချုပ်မှူးကြီး မင်းအောင်လှိုင်သည် ယခုတခေါက် တရုတ်ခရီးစဉ်တွင် တရုတ်နိုင်ငံဝန်ကြီးချုပ် လီချန်နှင့် တွေ့ဆုံမည်ဟု သတင်းထွက်ပေါ်နေပြီး မည်သည့် သဘောတူညီချက်များ အပေးအယူများ ပြုလုပ်ရရှိခဲ့မည်ကိုတော့ မသိရသေးပေ။

အာဏာသိမ်းပြီး ၃ နှစ်ကျော်ကာလအတွင်းတွင် ယခုခရီးစဉ်သည် ဗိုလ်ချုပ်မှူးကြီးမင်းအောင်လှိုင်၏ တရုတ်နိုင်ငံသို့ ပထမဆုံးအကြိမ်လည်းဖြစ်သည်။

တရုတ်နှင့် ဆက်သွယ်ရေးလမ်းကြောင်းများ ရှိနေသော်လည်း တော်လှန်ရေးအုပ်စု၏ အသံကို နားထောင်ပေးမှုအပိုင်းတွင် စိန်ခေါ်မှုရှိနေဟု NUG ပြော

နိုဝင်ဘာ ၆
News Ambassador

တရုတ်နှင့် NUG အကြား ဆက်သွယ်ရေးလမ်းကြောင်းများရှိသော်လည်း ၎င်းတို့၏အသံကို တရုတ်ဗဟိုအစိုးရဘက်က နားထောင်ပေးမှု အပိုင်းတွင် အကြီးအကျယ်စိန်ခေါ်မှုရှိနေကြောင်း နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။

နိုဝင်ဘာ ၅ ရက်နေ့က NUG နှင့် KNU ၊ KNPP ၊ CNF တို့ ၏ ပူးပေါင်းသတင်းစာရှင်းလင်းပွဲတွင် NUG ၏ နိုင်ငံခြားရေးဝန်ကြီး ဒေါ်ဇင်မာအောင်က အထက်ပါအတိုင်း ပြောကြားခဲ့ခြင်းဖြစ်သည်။

“NUG အနေနဲ့လည်းပဲ တရုတ်နဲ့ဆက်ဆံရေး ချန်နယ်တွေရှိလားမေးရင် ရှိတယ်လို့ပြောလို့ရတယ်။ သို့သော် ဒီချန်နယ်တွေက အသံတွေကို ပေကျင်းအနေနဲ့ ဘယ်လောက်အထိနားထောင်သလဲ ဆိုတာကတော့ ကျမတို့မှာ အခုထိ အကြီးအကျယ်စိန်ခေါ်မှုရှိနေဆဲပဲ ဖြစ်ပါတယ်။ “ ဟု ၎င်း ကပြောသည်။

တရုတ်အစိုးရ၏ တရားဝင်ဖိတ်ကြားချက်အရ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် တရုတ်နိုင်ငံ ကူမင်းမြို့တွင်ပြုလုပ်မည့် ၈ ကြိမ်မြောက် မဟာမဲခေါင်ဒေသခွဲ စီးပွားရေးပူးပေါင်းဆောင်ရွက်မှု ခေါင်းဆောင်များအစည်းအဝေး (GMS) ကို တက်ရောက်ရန် တရုတ်နိုင်ငံသို့ ထွက်ခွာသွားသည့် နိုဝင်ဘာ ၅ ရက်နေ့မှာပင် ယခု သတင်းစာရှင်းလင်းပွဲကို တော်လှန်ရေးအုပ်စုဘက်က ပြုလုပ်ခဲ့ခြင်းဖြစ်သည်။

တရုတ်နိုင်ငံသို့ စစ်ခေါင်းဆောင်သွားရောက်မှုသည် နိုင်ငံတော်အဆင့် ဖိတ်ကြားမှုမဟုတ်ဘဲ ဒေသတွင်း ဖိုရမ်တခုကို တက်ရောက်သည့် သဘောသာဖြစ်ကြောင်း နိုင်ငံခြားရေးဝန်ကြီး ဒေါ်ဇင်မာအောင်က ပြောခဲ့သော်လည်း နိုင်ငံ့ခေါင်းဆောင်အနေနဲ့ တရုတ်က စစ်ကောင်စီခေါင်းဆောင်ကို‌ ဖိတ်ကြားခဲ့ခြင်းဖြစ်သလို အစည်းအဝေးကို ဉီးဆောင်ကျင်းပမည့်သူမှာလည်း တရုတ်နိုင်ငံ၏ နိုင်ငံတော်ကောင်စီဝင် ဝန်ကြီးချုပ် လီချန်ဖြစ်နေသည်။

ပြီးခဲ့သည့် ရက်ပိုင်းကလည်း တရုတ်-မြန်မာနယ်စပ်တွင် တော်လှန်ရေးတပ်များဘက်က စစ်ရေးအောင်ပွဲများ ဆက်တိုက်ရယူခဲ့ပြီး တရုတ်ဘက်က နယ်စပ်ဂိတ်များကို ပိတ်ခဲ့သည်။ တရုတ်နှင့် မြန်မာ အကြားနယ်စပ်ဂိတ် ၁၅ ခု ခန့်ရှိသည့်အနက် တစ်ဝက်ခန့်ကို ပိတ်ခဲ့ပြီး တချို့ကို ကုန်သွယ်မှု တင်းကြပ်ကန့်သတ်ခဲ့ခြင်းဖြစ်သည်။ အထူးသဖြင့် စစ်ကောင်စီကို ဆန့်ကျင်တိုက်ခိုက်နေသည့် ညီနောင်မဟာမိတ်အဖွဲ့ထံ ကုန်စည်စီးဆင်းမှု ပြတ်တောက်စေရေးအတွက် ဖြစ်သည်။

UWSA ၏ ဝဗဟိုအစိုးရနှင့် တရုတ်နိုင်ငံခြားရေးဝန်ကြီးဌာန အထူးကိုယ်စားလှယ်တို့၏ အစည်းအဝေးမှတ်တမ်း ပေါက်ကြားလာမှုတွင်လည်း တရုတ်က စစ်ကောင်စီဘက်မှနေ၍ အပြည့်အဝရပ်တည်ကြောင်း ဖော်ပြထားသည်ကို တွေ့ရသည်။

နိုဝင်ဘာ ၅ ရက်နေ့ သတင်းစာရှင်းလင်းပွဲတွင်မူ ဒေါ်ဇင်မာအောင် က “တရုတ်ကိုနားလည်တယ် နယ်စပ်ဒေသ တည်ငြိမ်လိုတယ် ဆိုတာကို ကျမတို့ ကောင်းကောင်းနားလည်တယ်။ ဒါပေမဲ့ ဒါဟာ ကျမတို့ ဆေးမြှီးတိုနဲ့ ကုလို့ရတဲ့ကိစ္စတော့ မဟုတ်ဘူး။ စောနက ရှေ့မှာ ကျမတို့ ပြောသွားသလို နိုင်ငံရေးဆွေးနွေးပွဲတွေမှာ မကြာခဏ ပြောသလို ကျမတို့ဟာ sustain ဖြစ်တဲ့အဖြေကိုတော့ ရှာဖို့လိုတယ်။ ဒါကို တရုတ်အစိုးရ ကိုယ်တိုင်ကိုလည်းပဲ နားလည်စေချင်တယ်။ ကျမတို့ဖြစ်နေတဲ့ တိုက်ပွဲတွေက ရှေရှည်အဖြေ အာမခံနိုင်တဲ့အဖြေကို ရှာနိုင်ဖို့တိုက်ပွဲဝင်နေတာဖြစ်တယ်။ ဆေးမြှီးတိုလောက်နဲ့တော့ ခဏခဏ ဒီမတည်ငြိမ်မှုတွေကို ဖြစ်စေတယ်။ မြန်မာပြည်ရဲ့သမိုင်းကြောင်းကို ပြန်ကြည့်မယ်ဆိုရင်လည်းပဲ မြန်မာနိုင်ငံအတွင်းမှာ ဖြစ်နေတဲ့ နိုင်ငံရေးမတည်ငြိမ်မှုတွေ မကြာခဏအာဏာသိမ်းတဲ့ သံသရာတွေ ဒါတွေကို ကျော်လွှားနိုင်ဖို့ဆိုရင် ကျမတို့ ရေရှည်စနစ်ပြောင်းနိုင်တဲ့ အာမခံချက်ပေးနိုင်တဲ့ စစ်တပ်နိုင်ငံရေးမှာ မပါတဲ့ စနစ်ပြောင်း တော်လှန်ရေးဖြစ်ရမယ်၊ တိုင်းရင်းသားတွေအတွက်ဆိုလည်း ဖက်ဒရယ်စနစ်ကို အာမခံတဲ့ စနစ်မျိုး ဖြစ်ရမယ် ၊ ဒီလိုအဖြေကိုရဖို့ဆိုရင် ဟိုကဖိအားပေး ဒီကဖိအားပေး ဆိုရုံနဲ့တော့ ကျမတို့ တရုတ်အတွက်လည်း အကျိုးရှိတဲ့ အဖြေဖြစ်လာမှာမဟုတ်ဘူးဆိုတာ ကျမတို့မြင်မိပါတယ်။ ဒါကြောင့် ဒီဖိအားက မရှိရင်တော့ ကောင်းတာပေါ့။ မရှိရင်တော့ တော်လှန်ရေးမြန်မြန်ပြီးမယ်၊ ဒီဖိအားကြောင့် ကျမတို့ ပိုပြီးတော့ ရုန်းရတယ်။ လူထုရဲ့စိုးရိမ်သောကတွေကို တက်စေတယ်” ဟုလည်း ပြောကြားခဲ့သည်။

လက်ရှိတွင် မြောက်ပိုင်းက တိုင်းရင်းသားလက်နက်ကိုင် တပ်ဖွဲ့များကို တရုတ်က NUG PDF တို့နှင့် မပူးပေါင်းရန် ၊ အနောက်နိုင်ငံများသို့ သွားလာ ဆက်ဆံခြင်းမပြုရန် စသည့် စည်းမျဉ်းများဖြင့် တင်းကြပ်ထားသည်ကို တွေ့ရသည်။

ဖီမော်အထက်ပိုင်းရှိ ကန်ဖန်း(Kang Fang) ရွာကို KIA တို့ သိမ်းပိုက်၊ စကစနှင့် ပြည်သူ့စစ်များက လက်နက်များကို ချောင်းထဲပစ်ချပြီး ထွက်ပြေးသွားသဖြင့် လိုက်လံဆယ်ယူခဲ့ရ

ပန်ဝါ၊ နိုဝင်ဘာ ၄
News Ambassador

ကချင်ပြည်နယ် ဖီမော်ဒေသ အထက်ပိုင်းရှိ ကန်ဖန်း(Kang Fang) ကျေးရွာကို ယနေ့ညနေပိုင်းတွင် KIA နှင့် မဟာမိတ် တော်လှန်ရေးတပ်များက တိုက်ခိုက်သိမ်းယူခဲ့ကြောင်း သိရသည်။

အဆိုပါ ကျေးရွာတွင် စစ်ကောင်စီတပ်နှင့် ဇခုန်တိန့်ယိန်း၏ ပြည်သူ့စစ်တပ်ဖွဲ့ဝင်များရှိပြီး တိုက်ခိုက်စဉ် ၎င်းတို့ ထွက်ပြေးသွားခဲ့ကြောင်း သတင်းရင်းမြစ်၏ ပြောပြချက်အရ သိရသည်။

“ဖီမော်ရဲ့ အထက်ပိုင်းမှာရှိတဲ့ ရွာလေး။ ဒီညနေမှာ သိမ်းလိုက်ပြီ။ ကန်ဖန်းရွာထဲဝင်သော ဒေသခံတွေကြိုဆိုကြတယ်” ဟု သတင်းရင်းမြစ်က ပြောသည်။

၎င်းတို့သည် ကိုင်ဆောင်သော လက်နက်များကို ချောင်းအတွင်း ပစ်ချခဲ့သဖြင့် လိုက်လံဆယ်ယူခဲ့ကြောင်း သတင်းရင်းမြစ်က ဆိုသည်။

ကန်ဖန်းရွာကို သိမ်းယူပြီး တော်လှန်ရေးရဲဘော်များကို ဒေသခံပြည်သူများက ကြိုဆိုမှုပြုလုပ်ခဲ့ရာ ယင်းကို စစ်ကောင်စီတယ်လီဂရမ်ချန်နယ်များတွင် ပြစ်တင်ရေးသားနေသည်ကို တွေ့ရသည်။

ဓာတ်ပုံ- CJ (ပေးပို့)

ဇခုန်တိန့်ယိန်း၏ သားဖြစ်သူ ဇခုန်ယိန်းဆောင် ကျာဖြန့်လုပ်ငန်းနှင့်ဆက်စပ်ပြီး တရုတ်ဘက်တွင် ဖမ်းဆီးခံရ ဟုဆို

ပန်ဝါ၊ နိုဝင်ဘာ ၄
News Ambassador

ကချင်ပြည်နယ် အထူးဒေသ ၁ ပန်ဝါမြို့အခြေစိုက် စစ်ကောင်စီလက်အောက်ခံ ပြည်သူ့စစ်နှင့် နယ်ခြားစောင့်တပ်၏ လက်ရှိ ခေါင်းဆောင် ဇခုန်ယိန်းဆောင် သည် တရုတ်နိုင်ငံဘက်သို့ ဝင်ရောက်တိမ်းရှောင်စဉ် ဖမ်းဆီးခံလိုက်ရကြောင်း ဒေသတွင်းရှိ သတင်းရင်းမြစ်များက သတင်းပေးပို့လာသည်။

ပန်ဝါမြို့ကို KIA နှင့် တော်လှန်ရေးတပ်များက ဝင်ရောက်တိုက်ခိုက်သိမ်းပိုက်စဉ် ဇခုန်ယိန်းဆောင်သည် ကန်ပိုက်တီ နယ်စပ်မှတဆင့် တရုတ်နိုင်ငံဘက်သို့ ထွက်ပြေးတိမ်းရှောင်သွားခဲ့ခြင်းဖြစ်ပြီး တရုတ်အာဏာပိုင်များ၏ ဖမ်းဆီးခြင်းကိုခံရခြင်းဖြစ်ကြောင်း ကန်ပိုက်တီဒေသရှိ သတင်းရင်းမြစ်က ပြောသည်။

“သူ အဖမ်းခံရတဲ့ကိစ္စ ဉီး ဇခုန်တိန့်ယိန်းတို့ဘက်က သတင်းဖုံးထားတယ်။ ပြီးတော့ တရုတ်နဲ့ညှိပြီးပြန်ဆွဲထုတ်မယ်ဆိုတဲ့ သတင်းမျိုးကြားတယ်။ ဒါပေမဲ့ စစ်ဆေးလိုက်တော့ သူက ကျာဖြန့်လုပ်ငန်းတွေပါ လုပ်ထားတဲ့ဟာပါတော့ တရုတ်ဘက်က ဒါကိုတော့ ခွင့်မလွှတ်ပေးလောက်ဘူးလို့ ထင်တယ်” ဟု ကချင်ပြည်နယ်ရှိ စစ်ရေးသတင်းရင်းမြစ်တဉီးက ပြောသည်။

ကချင်ပြည်နယ် ကန်ပိုက်တီနယ်စပ်ရှိ သတင်းရင်းမြစ်ထံမှ ရရှိသော သတင်းအရလည်း ဇခုန်ယိန်းဆောင် သည် တရုတ်နိုင်ငံဘက်ထွက်ပြေးစဉ် ဖမ်းဆီးခံရခြင်းဖြစ်ကြောင်း ဆိုသည်။

ဇခုန်ယိန်းဆောင် နှင့် သူ၏ ဖခင် ဇခုန်တိန့်ယိန်းသည် ကြံ့ခိုင်ရေးပါတီ၏ လွှတ်တော်အမတ်ဟောင်းများဖြစ်ပြီး စစ်ကောင်စီနှင့်လက်တွဲကာ KIA ကို တိုက်ခိုက်နေခြင်းဖြစ်သည်။
လက်ရှိတွင် ဇခုန်ယိန်းဆောင်၏ ဖခင် ဇခုန်တိန့်ယိန်းအပါအဝင် မိသားစုဝင်များ တရုတ်ဘက်သို့ ထွက်ပြေးတိမ်းရှောင်နေပြီး ၎င်းတို့ထိန်းချုပ်စိုးမိုးခဲ့ရာ ဒေသများအထဲတွင် ကန်ပိုက်တီနယ်စပ်ဒေသတခုမှလွဲ၍ ကျန်ဒေသအများစုသည် KIA နှင့် တော်လှန်ရေးတပ်များလက်သို့ ကျရောက်နေပြီဖြစ်ကြောင်း သိရသည်။

ဓာတ်ပုံ_ CJ ( ပေးပို့)

ကျောက်တံခါးမြို့နယ်အတွင်း တိုက်ပွဲဖြစ်ပွားပြီး စစ်ကောင်စီ ၃ ဉီး သေ

ကျောက်တံခါး၊ ‌နိုဝင်ဘာ ၄
News Ambassador

ပဲခူးတိုင်းဒေသကြီး၊ ကျောက်တံခါးမြို့နယ်၊ ဆင်ရိုးခင်ကျေးရွာတွင် တပ်စွဲထားသော စစ်ကောင်စီတပ်ကို နိုဝင်ဘာ ၁ ရက်နေ့က ဝင်ရောက်တိုက်ခိုက်ခဲ့ကြောင်း တောင်ပိုင်းစစ်ဒေသ က သတင်းထုတ်ပြန်လာသည်။

တောင်ပိုင်းစစ်ဒေသ အမှတ် ၂ စစ်ဒေသခွဲ၊ တပ်ရင်း ၃၇၀၂၊ အထူးကွန်မန်ဒိုတပ်ရင်း ရိုးမ ၂ စစ်ကြောင်းနှင့် KNLA တပ်ရင်း ၉ ပူးပေါင်းတပ်ဖွဲ့တို့က နိုဝင်ဘာ ၁ ရက်နေ့တွင် ဝင်ရောက်တိုက်ခိုက်ခဲ့ခြင်းဖြစ်ပြီး စစ်ကောင်စီတပ်သား ၃ ဦးသေဆုံးခဲ့ကြောင်း ထုတ်ပြန်ချက်အရ သိရသည်။

တိုက်ပွဲတွင် စစ်ကောင်စီတပ်၏ G3 ၁ လက်၊ G3 ကျည် ၁၇၄ တောင့်၊ G3 ကျည်ဘောက် ၃ ခု၊ ကိုးလုံးကျည် (၂၉) တောင့် နှင့် အခြားလက်လုပ်သေနတ်များကို သိမ်းဆည်းရမိခဲ့သည်ဟုလည်း သိရသည်။

တိုက်ပွဲပြီးသွားပြီးနောက် စစ်ကောင်စီတပ်သည် ဆင်ရိုးခင်ကျေးရွာအတွင်းသို့ လက်နက်ကြီးများပစ်ခတ်ခဲ့ရာ ပြည်သူ ၂ ဦး ထိခိုက်ဒဏ်ရာရရှိခဲ့ကြောင်းပါ ထုတ်ပြန်ချက်တွင် ဖော်ပြထားသည်။

စကစနှင့် ပြည်သူ့စစ်စခန်းအချို့ကို ထပ်မံသိမ်းပိုက်ရရှိပြီး မြန်မာ-တရုတ်နယ်စပ် ဖီမော်မြို့ကို KIA ထိန်းချုပ်

ချီဖွေ၊ နိုဝင်ဘာ ၂
News Ambassador

ကချင်ပြည်နယ်၊ မြန်မာ-တရုတ်နယ်စပ်၊ ချီဖွေမြို့နယ်၊ ဖီမော်ဒေသရှိ စစ်ကောင်စီနှင့် ဇခုန်တိမ့်ယိန်းတို့၏ ပြည်သူ့စစ်ပူးပေါင်းတပ်စခန်းအချို့ကို ယနေ့တွင် KIA နှင့် မဟာမိတ်များက သိမ်းပိုက်ရရှိပြီး မြို့ကို ထိန်းချုပ်နိုင်ခဲ့ကြောင်း သတင်းရင်းမြစ်ထံမှ သိရသည်။

ဖီမော်ဒေသ လဂွေကျေးရွာ (မဂွေဇ ဟုလည်း ခေါ်) ရှိ စာသင်ကျောင်းအတွင်း တပ်စွဲထားသော စစ်ကောင်စီတပ်စခန်းကို ယမန်နေ့နိုဝင်ဘာ ၂ ရက်နေ့ကလည်းကောင်း၊ မြန်မာ-တရုတ်နယ်စပ်ရှိ BP 7 ဂိတ်စခန်းကို ယနေ့မွန်းလွဲပိုင်း ၁ နာရီခန့်တွင် ထပ်မံသိမ်းပိုက်ရရှိခဲ့ပြီး ဖီမော်မြို့ကို ထိန်းချုပ်နိုင်ခဲ့ခြင်းဖြစ်ကြောင်း ဒေသခံ သတင်းရင်းမြစ်က ပြောပြသည်။

“ခလရ ၂၉၈ ထိုင်တဲ့ BP 7 ကို ဒီနေ့ရတယ်။ အဲ့ဒီက ဒုရင်းမှူးကို အရှင်ဖမ်းမိတယ်လို့လည်း သတင်းကြားထားတယ် ” ဟု သတင်းရင်းမြစ်က ပြောသည်။

စစ်ကောင်စီလက်အောက်ခံ ဇခုန်တိမ့်ယိန်း၏ နယ်ခြားစောင့်တပ်ဖွဲ့ BGF တပ်ရင်း ၁၀၀၁ ဌာနချုပ်ကို အောက်တိုဘာ ၃၁ ရက်နေ့တွင် တိုက်ခိုက်သိမ်းပိုက်ခဲ့သည်ဟု သတင်းထွက်ပေါ်ခဲ့သော်လည်း ယင်းမှာ ၁၀၀၁ ၏ ဌာနချုပ်အဟောင်းသာဖြစ်ကြောင်း သတင်းရင်းမြစ်က ဆိုသည်။

၁၀၀၁ စခန်းမှ စစ်ကောင်စီနှင့် ပြည်သူ့စစ်များ ပြောင်းရွှေ့သွားသော ပန်ဝါဗျူဟာကုန်းနှင့် မြို့ကိုလည်း KIA နှင့် မဟာမိတ်များက သိမ်းယူထားခဲ့ပြီးဖြစ်သည်။
ဗီဒီယို- လဂွေစာသင်ကျောင်းစခန်းကို သိမ်းပိုက်ပြီးစဉ် ( CJ - ပေးပို့)

ဂန့်ဂေါမြို့ မြောက်ခင်ရန်း ပျူစောထီးရွာမှ ထွက်လာသော အင်အား ၂၀၀ ခန့်ပါ စစ်ကြောင်းကို ဗုံးကြဲတိုက်ခိုက်
(ရုပ်/သံ)

ရန်ကုန်၊နိုဝင်ဘာ ၂
Newsambassador

မကွေးတိုင်း ဂန့်ဂေါမြို့နယ်မြောက်
ခင်ရန်း ပျူစောထီးကျေးရွာ မှ ထွက် လာ သော အင်အား ၂၀၀ခန့်ပါ စစ် ကြောင်းကို နိုဝင်ဘာ ၁ရက်နေ့ မနက်
က ဂန့်ဂေါခရိုင်ဒရုန်းတပ်ဖွဲ့ မှ ဗုံးကျဲတိုက်ခိုက်ခဲ့သည်ဟု ဂန့်ဂေါခရိုင်ဒရုန်းတပ်ဖွဲ့ က ပြောကြားသည် ။

အဆိုပါတိုက်ခိုက်မှုကြောင့် စစ်ကောင် စီ တပ်ဘက်မှ ၂ ဦးသေ ဆုံးပြီး ‌‌‌‌‌၁၀ ဦးခန့် ထိခိုက်ဒဏ်ရာရရှိကြောင်း ကနဦး သတင်းများအရ သိရသည် ။

မြောက်ခင်ရန်းပျူစောထီးကျေးရွာက အင်အား ၂၀၀ ဝန်းကျင်ရှိစစ် ကြောင်း သည် ကလေး - ဂန့်ဂေါလမ်းမကြီး အရှေ့ဘက်နဲ့ အနောက်ဘက် စစ်ကြောင်းနှစ်ကြောင်းခွဲပြီး တောင်ခင်ရန်းဘက်ကို စစ်ကြောင်းထိုးရာကနေ နှစ်ဖက်တိုက်ပွဲ ဖြစ်ပွါးခဲ့ခြင်းဖြစ်သည်ဟုသိရသည် ။

ပခုက္ကူတွင် စစ်ကောင်စီတပ်သား ၂ ဉီး လက်နက်နှင့်တကွ အလင်းဝင်

ရေစကြို၊ နိုဝင်ဘာ ၁
News Ambassador

မကွေးတိုင်း၊ ပခုက္ကူမြို့ စက်မှုဇုန်စစ်ဆေးရေးဂိတ်တွင် တာဝန်ကျနေသည့် စစ်ကောင်စီတပ်သား ၁ ဉီးနှင့် မြောက်လူးကန်စခန်းတွင် တာဝန်ကျနေသော စစ်ကောင်စီတပ်သား ၁ ဉီးတို့သည် ပြီးခဲ့သည့် အောက်တိုဘာ ၁၇ ရက်နေ့က အလင်းဝင်လာခဲ့ကြောင်း Southern YSO PDF က သတင်းထုတ်ပြန်လာသည်။

ပခုက္ကူစက်မှုဇုန်စစ်ဆေးရေးဂိတ်တွင် တာဝန်ထမ်းဆောင်နေသော ပခုက္ကူမြို့ ခလရ ၂၅၉ တပ်မှ တပ်သား ပြည့်ဖြိုးအောင် နှင့် ပခုက္ကူမြို့နယ် မြောက်လူးကန်အထိုင်စခန်းတွင် တာဝန်ထမ်းဆောင်နေသော စလင်းမြို့ ခလရ ၂၅၅ တပ်မှ တပ်သား ကောင်းမင်းခန့် တို့သည် ရေစကြိုတောင်ပိုင်းပြည်သူ့ကာကွယ်ရေးတပ်ဖွဲ့ Southern YSO PDF အဖွဲထံသို့ အလင်းဝင်လာခြင်းဖြစ်ကြောင်း သိရသည်။

၎င်းတို့သည် MA1 သေနတ် ၂ လတ်၊ကျည်ဘောက် ၆ ဘောက်၊ ကျည်ဆန် ၁၂၀ တိုနှင့်အတူ လက်နက်အပ် အလင်းဝင်ရောက်လာခြင်းဖြစ်ကြောင်း ထုတ်ပြန်ချက်အရ သိရသည်။

လက်နက်အပ်ဝင်ရောက်လာသော ရဲဘော် ၂ ဦးကို တစ်ဦးလျှင် ငွေ ကျပ် သိန်း ၄၀ ချီးမြှင့်ခဲ့ကြောင်း ဆိုထားသည်။

ယခုအချိန်ထိ Southern YSO PDF အဖွဲ ထံသို့ အလင်းဝင်ရောက်လာသော စကစတပ်သား အမြောက်အမြားရှိနေပြီဖြစ်ပြီး အချို့ကို ၎င်းတို့နေထိုင်လိုရာအရပ်သို့ ပို့ဆောင်ပေးထားကာ အချို့မှာလည်း စစ်အာဏာရှင်တော်လှန်ရေးလုပ်ငန်းများအတွင်း ပူးပေါင်းပါဝင်ဆောင်ရွက်နေကြောင်း ထုတ်ပြန်ချက်အရ သိရသည်။

ဟားခါးအနီးရှိ စစ်ကောင်စီတပ်စခန်းတခုကို ချင်းတော်လှန်ရေးတပ်များ သိမ်းပိုက်၊ စကစ ဗိုလ်မှူး အပါအဝင် ၄ ဦး အရှင်ဖမ်းမိ

ဟားခါး၊ အောက်တိုဘာ ၃၀
News Ambassador

ပြီးခဲ့သည့် အောက်တိုဘာ ၂၈ ရက်နေ့က ချင်းပြည်နယ် ဟားခါးမြို့အနီး ဟားခါး-ထန်တလန်လမ်းရှိ Kiamtlang စစ်ကောင်စီ တပ်စခန်းကို တိုက်ခိုက် သိမ်းပိုက်ခဲ့ကြောင်း ဟားခါး CDF က ကြေညာသည်။

Chinland Defense Force - Hakha နှင့် Chin National Army တို့ ပူးပေါင်း၍ စစ်ဆင်ရေး Operation Rung အမည်ဖြင့် တိုက်ပွဲဖော်ဆောင်ခဲ့ခြင်းဖြစ်ကြောင်း သိရသည်။

စခန်းသိမ်းတိုက်ပွဲတွင် စစ်ကောင်စီတပ်ဘက်မှ စစ်သား ၁၅ ဦး သေဆုံးခဲ့ပြီး ဗိုလ်မှူးအပါအဝင် ၄ ဦး အရှင်ဖမ်းမိခဲ့သည်ဟု ဆိုသည်။

ယင်းအပြင် MA1 ငါးလက်၊ MA2 တစ်လက်၊ MA3 နှစ်လက်၊ MA11 တစ်လက်၊ ကျည်‌ဘောက် ၄၂ခု၊ မိုင်း နှင့် ခဲယမ်းများလည်း သိမ်းဆည်းရရှိခဲ့ကြောင်း CDF က ထုတ်ပြန်အသိပေးထားသည်။

ချင်းပြည်နယ် ဟားခါးနှင့် ထန်တလန်အကြားတွင် ပြီးခဲ့သည့်ရက်ပိုင်းအတွင်း တိုက်ပွဲဆက်တိုက်ဖြစ်ပွားခဲ့ပြီး နှစ်ဘက်အကျအဆုံးရှိကြောင်း သိရသည်။

ကရင်နီပြည်တွင် ကယန်းအမျိုးသားတပ်မတော် ဟူ၍ တပ်ဖွဲ့သစ်တခု ထပ်မံ ဖွဲ့စည်း

ကရင်နီ၊ အောက်တိုဘာ ၂၉
News Ambassador

ကရင်နီပြည်နယ်တွင် ကယန်းအမျိုးသားတပ်မတော် ဟူသော တပ်ဖွဲ့အသစ်တခုကို ဖွဲ့စည်းလိုက်ကြောင်း သက်ဆိုင်ရာ တပ်ရင်းတပ်ဖွဲ့က သတင်းထုတ်ပြန်လာသည်။

ကယန်းအမျိုးသားတပ်မတော်အနေဖြင့် ကယန်းတိုင်းရင်းသားများနေထိုင်ရာ လွိုင်ကော်ဒေသ၊ ဒီမော့ဆိုဒေသ၊ မိုးဗြဲဒေသ၊ ဖယ်ခုံဒေသနှင့် အခြား ကယန်းဒေသများရှိ ပြန့်ကျဲနေသော ကယန်းလက်နက်ကိုင်တပ်ဖွဲ့တို့ကို တစုတစည်းတည်း ပြန်လည်ပေါင်းစည်းသွားမည်ဖြစ်ပြီး စစ်ကောင်စီကို တိုက်ပွဲဝင်သွားမည်ဟု သတင်းထုတ်ပြန်ချက်အတွင်း ထည့်သွင်းဖော်ပြထားသည်။

စစ်ကောင်စီကို တိုက်ပွဲဝင်နေသော တခြားသော လက်နက်ကိုင်အဖွဲ့များနှင့်လည်း လက်တွဲတိုက်ပွဲဝင်သွားမည်ဟု ထုတ်ပြန်ချက်အတွင်း ဖော်ပြထားသည်။

NUG ကိုလည်း ပြည်ထောင်စုအစိုးရအဖြစ် အသိအမှတ်ပြုပြီး စစ်အာဏာရှင်အမြစ်ပြတ်ချေမှုန်းရေးအတွက် ပူးပေါင်းဆောင်ရွက်သွားမည်ဟုလည်း ဆိုထားသည်။

ကယန်းအမျိုးသားတပ်မတော် ကို တပ်ရင်း ၈ ခုဖြင့် စတင်ဖွဲ့စည်းကြောင်း သိရသော်လည်း မည်သူ/ မည်သည့်လက်နက်ကိုင်အဖွဲ့အစည်းများဖြင့် ပေါင်းစပ်ဖွဲ့စည်ထားသည်ကိုတော့ အသေးစိတ်ထုတ်ပြန်လာခြင်း မရှိသေးပေ။

ကရင်နီပြည်တွင် ကယန်းပြည်သစ်ပါတီ ဟူ၍ လက်နက်ကိုင်တပ်ဖွဲ့တခုရှိသော်လည်း စစ်ကောင်စီ နှင့် တိုက်ပွဲဖြစ်ပွားခြင်းတော့ မရှိပေ။

ပြီးခဲ့သည့် ရက်ပိုင်းကလည်း ကယန်းပြည်သစ်ပါတီ၏ လူငယ်ရေးရာကော်မတီက ထုတ်ပြန်ခဲ့သော ကြေညာချက်တစောင်တွင် လက်ရှိ ဖယ်ခုံ မိုးဗြဲစသည့်ဒေသများကို ကယန်းပြည်နယ် ဟူ၍ သတ်မှတ်သော အသုံးအနှုန်းပါဝင်ခဲ့ရာ ယင်းအပေါ် ပြောဆို ဆွေးနွေး အငြင်းပွားမှုများ ရှိခဲ့သေးသည်။

ဇခုန်တိမ့်ယိန်း၏ ၁၀၀၃ စခန်းဌာနချုပ်ကို KIA နှင့် တော်လှန်ရေးတပ်များ ထပ်မံသိမ်းပိုက်

ပန်ဝါ၊ အောက်တိုဘာ ၂၁
News Ambassador

ကချင်ပြည်နယ် ၊ ဆဒုံးနှင့် ကန်ပိုက်တီအကြားရှိ စစ်ကြိုင်ကျေးရွာအခြေစိုက် ၁၀၀၃ နယ်ခြားစောင့်တပ်စခန်း ဌာနချုပ်ကို ယနေ့ညနေတွင် KIA နှင့်တော်လှန်ရေးတပ်များက သိမ်းပိုက်ခဲ့ကြောင်း သတင်းရင်းမြစ်ထံမှ သိရသည်။

မြန်မာ-တရုတ်နယ်စပ်မြို့ ကန်ပိုက်တီနှင့် ၅ မိုင်ခန့်အကွာတွင်ရှိနေသည့် ၁၀၀၃ ဌာနချုပ်ကို ယနေ့ညနေ ၅ နာရီခန့်တွင် သိမ်းယူနိုင်ခဲ့ခြင်းဖြစ်ပြီး နယ်မြေရှင်းလင်းရေး ဆက်လက်လုပ်ဆောင်နေကြောင်း သတင်းရင်းမြစ်က ဆိုသည်။

“တိုက်နေတာ ၂ ရက်ကျော်ပြီ။ ဒီနေ့ညနေပဲ ရလိုက်တယ်” ဟု သတင်းရင်းမြစ်က ဆိုသည်။

စစ်ကောင်စီလက်အောက်ခံ ဇခုန်တိမ့်ယိန်း ဉီးဆောင်သည့် နယ်ခြားစောင့်တပ်စခန်း ဌာနချုပ် နှင့် ပန်ဝါြမို့၊ နယ်ခြားစောင့်တပ် ၁၀၀၂ ဌာနချုပ်တို့ကိုလည်း KIA နှင့် တော်လှန်ရေးတပ်များက သိမ်းပိုက်ထားပြီးဖြစ်သည်။

ပန်ဝါမြို့ကို သိမ်းပိုက်ပြီးချိန်မှစ၍ တရုတ်ဘက်ကလည်း နယ်စပ်ဂိတ်များကို ပိတ်ထားခဲ့သည်။

မနက်က ကောလင်းနယ် ဉက္ကံရွာကို စစ်ကောင်စီ လေယာဉ်ဖြင့် ဗုံးကြဲသဖြင့် အမျိုးသမီး ၃ ဉီး သေပြီး ၇ ဉီး ခန့် ဒဏ်ရာရ

ကောလင်း၊ အောက်တိုဘာ ၂၁
News Ambassador

ယနေ့မနက်က စစ်ကိုင်းတိုင်း ကောလင်းမြို့နယ် အနောက်ခြမ်းရှိ ဉက္ကံကျေးရွာကို အာဏာသိမ်းစစ်တပ်က လေကြောင်းဖြင့် ဗုံးကြဲတိုက်ခိုက်ခဲ့ကြောင်း သိရသည်။

မနက် ၁၀ နာရီခွဲခန့်က ဉက္ကံကျေးရွာကို အာဏာသိမ်းစစ်တပ်က တိုက်လေယာဉ်ဖြင့် ဗုံးကြဲပစ်ခတ်တိုက်ခိုက်ခဲ့ခြင်းဖြစ်သည် ကျေးရွာရှိ အရပ်သားနေအိမ်အချို့ပေါ်သို့ ကျရောက်ပေါက်ကွဲခဲ့ကြောင်း တိုင်းဒေသကြီး ပကဖ ထံမှ သိရသည်။

တိုက်ပွဲတစုံတရာဖြစ်ပွားခြင်းမရှိဘဲ တိုက်လေယာဉ်ဖြင့် ၃ ကြိမ်ပျံဝဲ၍ ဗုံးသီး ၆ လုံးကြဲချတိုက်ခိုက်ရာ ၅ လုံး ပေါက်ကွဲခဲ့ခြင်းဖြစ်ကြောင်း သိရသည်။

အဆိုပါ လေကြောင်းတိုက်ခိုက်မှုကြောင့် အရပ်သား အမျိုးသမီး ၃ ဉီး သေဆုံးပြီး ၇ ဉီဂ ထိခိုက်ဒဏ်ရာရခဲ့ကြောင်း မြေပြင်သတင်းရင်းမြစ်ထံမှ စုံစမ်းသိရသည်။

ဥက္ကံရွာသည် စစ်ရှောင်ပြည်သူအများအပြား လာရောက်နေထိုင်ရာ ကျေးရွာဖြစ်ကြောင်း သိရသည်။

ဓာတ်ပုံ-တိုင်းဒေသကြီး ပကဖ

မြဝတီ-ဝေါ်လေလမ်းရှိ ကာကင်းစခန်း ၃ ခုကို စစ်ကောင်စီတပ် စွန့်ခွာ

မြဝတီ၊ နိုဝင်ဘာ ၂၀
News Ambassador

ကရင်ပြည်နယ် မြဝတီမြို့နယ်၊ မြဝတီ-ဝေါ်လေ ကားလမ်းပေါ်ရှိ ကာကင်းစခန်း ၃ ခုကို အာဏာသိမ်းစစ်ကောင်စီတပ်က စွန့်ခွာသွားကြောင်း သိရသည်။

မြဝတီ-ဝေါ်လေ ကားလမ်း၊ ဘလယ်ဒိုကျေးရွာရှိ ကာကင်းစခန်း ၃ ခုကို ယနေ့တွင် အာဏာသိမ်းစစ်ကောင်စီတပ်က စွန့်ခွာသွားသဖြင့် တော်လှန်ရေးပူးပေါင်းတပ်များက စခန်းကို သွားရောက်ရှင်းလင်းခဲ့ကြောင်း Venon စစ်ကြောင်း က သတင်းထုတ်ပြန်ထားသည်။

ပြီးခဲ့သည့် ၁၇ ရက်နေ့က လေးကေ့ကော်မြို့သစ်အနီးရှိ စစ်ကောင်စီတပ်အထိုင် စွယ်တော်ကုန်း အမြှောက်စခန်းကို တော်လှန်ရေးတပ်များက ပူးပေါင်းတိုက်ခိုက်သိမ်းပိုက်ခဲ့ပြီးဖြစ်သည်။