Dr.Suzan El-Shaf3y...د.سوزان الشافعي

★ خناقة قبل الفرح !!
------------------
ـ تفتكري الشَّيطان عايز النَّاس تتجوِّز ؟!..😈
ـ طبعًا لأ..ليه ؟؟
ـ علشان تشيع الفاحشة و الزِّنا بين النَّاس.. لأن الشاب إذا ماعرفش يشبع رغبته في الحلال هيشبعها فين ؟؟..في الحرام 😒
ـ علشان كده نيجي قبل الفرح
ويشتغل الشَّيطان بينهم😈 والخناقات تشتغل بين أهل العروسين ..
ـ يتخانقوا حتَّى على مكان الفرح ..كل واحد عايزه في مكان و يقولك أصل احنا معازيمنا كتير ..😤
ـ أو على ليلة الحنَّة 🙄وما أدراك ما ليلة الحنَّة واللي بيحصل فيها 🤨🥴
ـ و يهلكوا نفسهم في التَّفاصيل الكتير قبل الفرح ( الكوشة..الورد..البوفيه..
التَّصوير ..البوكيه..الدفتر اللي هيمَضُّوا فيه المعازيم 😰 ) إيه كل ده 😲🥴!!!
ـ و طبعًا كل دي مصاريف🙄 ..

ـ نيجي في الفرح 👰🤵
ـ لو بصيتِ على أهل العروسين أو البنت و المُقربين منها .. أخواتها و أصحابها.. شُوفي شكلهم عامل ازاي 🤔
ـ ما تحسيش إنُّهم فرحانين.. همَّ غرقانين في كل التَّفاصيل دي..الحاجات دي ضيعت فرحتهم و كانت باب للخناقات..😒

#دكتورة_سوزان_علمتني

زمان الناس كانت بتعمل الأفراح عشان تتبسط .. دلوقتي بقى كله بيتخانق قبل الفرح على حاجات تافهة

*الاستعداد بالدُّعاء في ليلة النِّصف من شعبان*
-------------------------
وأنتِ بتدعي، قسِّمي الدُّعاء لدعاء دُنيَوي ودُعاء أُخْرَوي..

في أمور الدُنيا:-
اطلبي من اللَّه -عزَّ وجَّل- :-
١. يُجْبُر بِخاطرك.
٢. يرضيكِ باللي هوَّ كاتبهولك (حتَّى لو مش اللي إنتِ عايزاه؛ لإن اللي ربّنا كاتبه، أكيد هوَّ الخير)..

وفي أمور الآخرة:-

*عَلِّي سَقف طَلباتك خالص*

ماتبصيش لنفسك ولا لحالك..
ماتبُصيش لعباداتك..
ماتبصيش لتقصيرِك..
ولكن بُصي على إنِّك بتطلبي من "الغَنيّ الكريم"..
فاطلبي رضا اللَّه الودود..
اطلبي الفردوس الأعلى..
اطلبي لذة النَّظر إلى وجه اللَّه الكريم..
اطلبي صُحبة الرسُول -عليه الصَّلاة والسَّلام- في أعلى عليين وصُحبة سائر النبيين والصِّديقين والشُّهداء والصَّالحين وحَسُن أولئك رفيقا…

وخلِّي بالك ربّنا بيقول:- "ادْعُونِي أسْتَجِبْ لَكُم"..
يعني لمَّا تدعي أكيد هيستجيب بس احنا اللي مش بنفهم الاستجابة..
يعني إيه؟
إجابة اللَّه للدعاء بتبقى في صورة من ٣:-
١. يُعطيكِ ما تَطلبين.
٢. ⁠يَدفع عنكِ من الشَّر مثلها.
٣. ⁠يدخرها لكِ في الآخرة، ويقولك دعيتِ بالشَّيء الفلاني وأنا منعته وادَّخرت الدَّعوة دي ليكِ...دلوقتي تطلبي إيه؟
وقتها هتقولي للَّه -عزَّ وجلَّ- "مادخُلش النَّار يارب.. مش كده؟؟"

فادعي ادعي ادعي..
لا يُمكن هتبقي خسرانة..

#المُجيب_الغنيّ_الكريم.
#دكتورة_سوزان_علمتني

تهنئة وتذكرة بمناسبة ليلة النصف من شعبان

لما بنجيب بيت جديد ونعزم الناس فيه على أكل ده بيبقى سنة عن النبي (صلى الله عليه وسلم)

فيه ليلة مهمة جاية يوم الخميس وهي ليلة النصف من شعبان

والليلة بتبدأ من غروب الشمس إلي طلوع الفجر

إحياء الليلة بيبقى فيه أي عمل صالح زي صلاة ، قرآن ، دعاء ، ذكر ...

طيب إيه الأفضل فيهم ؟؟

الأفضل إللي ربنا يفتح عليكِ بيه ... يعني شوفي قلبك حاضر في إيه فيهم وربنا يفتح علينا كلنا ويتقبل 🙏

#دكتورة_سوزان_علمتني

★اللي ملوش خير في أهله.
------------------------
⚠️ اوعي تُحطِّي نفسك في ميزان ⚖️ مع أم خطيبك أو زوجك ..إنتِ في كفَّة وهيَّ في الكفَّة التَّانية..😶 خليكِ ذكيَّة 🤔

ـ ما هو حاجة من اتنين..يا إمَّا هوَّ واحد عنده دين أو ما عندوش ..
ـ لو هوَّ عنده دين مش هيكسر قلب أمه و يسمع كلامك ..و في الحالة دي إنتِ هيبقى موقفك وحش جدًا..🌚
ـ يا إمَّا هيسمع كلامك إنتِ و هيكسر قلب أمه 💔.. و في الحالة دي اوعي تفرحي 🫥 لإن اللي هيبيع أهله علشان سواد عيونك هيبيعك إنتِ في أول سوق كانتو يقابله 😵‍💫
ـ المثل بيقول:-
" اللي مالوش خير في أهله مش هيبقى له خير فيكِ "...

⚠️ و لو كان متخانق أو مُختلف مع حد من أهله (أمه.. أبوه... أخته...)...اوعي تتدخلي بينهم مالكيش دعوة😶 ..
ـ ما تجيش إنتِ وتولَّعي الدُّنيا و تحرَّضيه على أهله 😠
ـ حاولي تهدِّيه..
قوليله :ـ
" استهدى باللَّه كده و ما تخليش الشَّيطان يدخل بينكم وحاول تتكلم معاهم بهدوء.."
بس كده و ما تتدخليش 🤐🤫

#دكتورة_سوزان_علمتني

هتخسري كتير أوي لو حطيتي نفسك في كفة وأهل جوزك في كفة

★خليكِ ناصحة.
--------------------
مَن فطَّر فِيه صَائمًا كَان لَهُ مَغفِرة لذُنُوبِه وعِتق رَقبَتِه مِن النَّار ، وَكَان لَه مِثل أجرِهِ مِن غَير أنْ يُنتَقَص مِن أجرهِ شَيء.
قلنا :-
يارسُول اللَّه: ليس كلنا نجد ما نُفطر به الصائم ، فقال رسُول اللَّه -ﷺ- : " يُعطِي اللَّه هَذا الثَّواب مَن فطَّر صَائمًا عَلى مذْقَة لبَن أو تَمرَة أو شَربٍة مِن مَاء ، ومَن أشْبَع صَائمًا سَقَاهُ اللَّهُ مِن حَوضِي شَربةً لا يَظمَأ حتَّى يَدخُل الجَنَّة "

مذقَة لبن=شوية لبن.

لمّا تكوني صايمة، أو إنتِ و صاحبتك صايمين أو ساعة المغرب عرفتِ إن صاحبتك صايمة..
خُدي ثواب إفطار صائم🏆
و لو علي حاجة بسيطة🍬
استني لمَّا أجيبلك ميَّه 💦
استني لمَّا أجيبلك علبة عصير🧃
استني لمَّا أجيبلك باكو بسكويت🍪

حتَّى كانوا معودينَّا و إحنا صغيرين، لمَّا نبقي صايمين و هنخرج، ناخد معانا ساندويتش عشان لو فطرنا في الشَّارع
لا يمكن ناكل السندويتشات بتاعتنا
نبدل السندويتشات مع بعض عشان ناخد ثواب إفطار صائم↔️
بس ماتبقيش إنتِ عارفة إن صاحبتك عاملة ساندويتش فراخ 🍗و إنتِ تديلها ساندويتش جبنة بيضا بتاعك😅
اعمليها بنية *إفطار صائم*
و قادر ربنا يبعتلك رزقك💗

حتَّى لو قاعدة في البيت و عندك صاحبتك أو أي حد بيزورك و عرفتِ إنُّه صايم، و ماعندكوش أكل⬅️اكسري صيامه بأي حاجة و لو كُوباية عصير، بسكوته، أقليلك بيضة🍳، ميَّه ساقعة🧊...أي حاجة


في ناس ناصحة، دايمًا يبقى معاها في شنطتها حاجات
بونبوني، كيس شيبسي صغير، إزازة ميَّه...
تقولوا شايلة أوفة😅
خليكِ ناصحة..ما هوَّ ممكن الأذان يأذن و تبقوا على كوبري..

#دكتورة_سوزان_علمتني

متضيعيش الثواب ده وخليكِ ناصحة

خلي طوب الأرض وكل الناس تدعيلك ... ماحدش عارف مين اللي دعوته مستجابة

#دكتورة_سوزان_علمتني

★اتيكيت القعدة مع العريس..(٢)
---------------------------------


# المشية:-
ـ خلصنا القعدة و ماشيين..لازم آخد بالي وأمشي بشكل لائق...
ـ ما ينفعش آلاقيكِ ماشية متشنكلة في دراع مامتك " يلَّا يا ماما "🥴..أو ساندة على كتف أخوكِ..أقفي و امشي عدل ..كده ما ينفعش..

#مضغ اللبان:-
ـ ممنوع منعًا باتًا مضغ اللبان لا في قعدة مع العريس ..و لا درس علم في الجامع ..و لا في مكان عام ولا في الشَّارع ولا في وسط ناس غُرب ..
ـ مضغ اللبان ده مش في أي وقت .. عايزة تمضغي لبان يبقى في بيتكم..
ـ وفي فرق بين بنت متربيَّة بتمضغ لبان ورقَّاصة بتمضع لبان 🌚
⚠️ شكلك وإنتِ بتمضغي اللبان بيدي انطباع عنك و عن بيتك و عن تربيتك ..

ـ للأسف دلوقتي بقينا نشوف رجال بيمضغوا لبان 🫣 ..أنا أعرف والد عروسة رفض عريس وقال :-
" أجوز بنتي لواحد بلبانة و أبو أحفادي يبقى بلبانة !!😠

# الكلام عن العلاقات السَّابقة :-

❌ مبدئيًّا كده ممنوع منعًا باتًا الكلام عن العلاقات السَّابقة إلَّا العلاقات الرسميَّة (خُطوبة أو زواج)..
ـ دي حاجات شخصية مالوش حق يعرف إذا كان عندك علاقات ولَّا لأ ( غير رسمية) ..

ـ لمَّا ييجي يسألك على طول تغيري الموضوع..😉
ـ في واحد لمَّا تقوليله :-
"مافيش حاجة رسمي"..
ـ يقولك:-
" أنا عايز اللي مش رسمي ده😉..معقولة قلبك ما دقش لحد!! ...قوليلي ؟..و مين و كان فين؟؟..
ـ لمَّا تلاقي واحد بيلح كده و مُصمم يعرف و بالتَّفاصيل..اعرفي إنُّه واحد شكَّاك وموسوس وحُطِّي عليه علامات استفهام؟‼️
ـ وفي منهم علشان يخليكِ تحكي يستدرجك..يقولك :-
" احنا لازم نصارح بعض بكل حاجة وإنتِ كمان من حقك تعرفي عنِّي كل حاجة "..
ـ و يبتدي يحكي عن علاقاته هوَّ الأول😉 علشان تقعي إنتِ بلسانك 🫢
ـ ده لو قولتيله مثلاً :ـ
" ابن خالتي كان بيحبني لكن حصل مشاكل و الموضوع ما كملش.. و هوَّ دلوقتي اتجوز خلاص"..
ـ لو حصل واتجوزتوا و قابلتِ ابن خالتك ده في مناسبة و سلمتِ عليه، هيطلَّع عينك شك وأسئلة..
ـ " هوَّ بيبصلك كده ليه؟ مانزلش عينه من عليكِ ..اتكلمتوا في إيه؟".. و هتبقى ليلة مش فايتة و كله بسببك.🌚😏

#دكتورة_سوزان_علمتني

"مُناسبة الإسراء والمِعراج"
--------------------------
بالنِّسبة للنَّاس اللي هتاخد برأي إن يجوز الاحتفال بليلة الإسراء والمِعراج..
ممكن تستغلِّي اليوم ده إنِّك تتكلِّمي عن الإسراء والمِعراج..
يعني مثلاً :-
-جوزك يجيب تورتة؛ فولادك يسألوا:-
"إيه يا ماما؟ جايبين تورتة ليه؟"
"أصل دي ليلة الإسراء والمِعراج يا ولاد"
"يعني إيه الإسراء والمِعراج يا ماما؟"
⬅️ فتبدئي تحكي وتكلِّميهم وتشرحي..

ودايمًا هاتي الحلويات اللي بيحبُّوها في الليلة دي (شيكولاتة، تورتة، بسبوسة،…..) علشان ترتبط مناسبة الإسراء والمِعراج بذكرى حلوة في ذهنهم..

-ممكن برضه تجمعي إخواتك عندك أو عند مامتك واللي عايز يصوم، يصوم، وكل واحد يجيب صنف أكل أو حلويات وتاكلوا مع بعض وتبدأوا تكلِّموا ولادكم عن الإسراء والمِعراج..

اتلكِّكوا علشان تتكلموا عن الإسراء والمِعراج..
تقولي مثلاً للخادمة اللي بتساعدك:-
"ما تتأخريش بكرة علشان عندي عزومة"..
"خير يا فندم"؛ "أصلي عازمة إخواتي بكرة علشان الإسراء والمِعراج"
"يعني إيه يا فندم" ⬅️ فتبدئي تتكلِّمي معاها..

لازم تتعلِّمتي يعني إيه الإسراء والمِعراج وتعرفي إن الأحاديث اللي وردت عنها كلها صحيحة في البخاري، ولازم تعلِّمي اللي حواليكِ..

علشان مايجيش حد مش فاهم يقولك لأ دي مش معجزة ده حِلم، وماتبقيش عارفة ترِدي..
ولَّاحد يقولك أنا مؤمن بالإسراء لإنُّه ذُكر في القرآن، لكن المِعراج لأ⬅️ تردي تقولي إيه؟؟

ربنا يعلِّمنا ويفهِّمنا..

#الإسراء_والمِعراج.
#دكتورة_سوزان_علَّمتني

لو متكلمناش عن الإسراء والمعراج هيتنسي ومحدش هيعرف عن المعجزة دي مع الوقت

★ باحب المُصَارعة ★
----------------
ـ لمَّا تشوفي اتنين بيضربوا أو بيشتموا بعض في الشَّارع.. ما تعوديش نفسك إنِّك تقعدي تتفرجي ..بتتفرجي على إيه 🙄🌚
ـ ما تسمحيش لعيونك تشوف حاجة كده ولا ودانك تسمع كلام زي ده..

ـ و البنات اللي بتتفرج على أفلام العنف ☠️ يبقى الفيلم أو المسلسل كله شتائم و هيَّ قاعدة تضحك 🙄
ـ دبحوا الرجل و طلعوا كبده 😵‍💫 و تقولك: -
" أصلي أنا باحب المُصارعة 😳"..إيه ده !!

ـ المفروض إنِّك لمَّا تشوفي المشاهد دي تدوري وشك و ما تقدريش تشوفيها... 🙈

ـ حافظي على عينيك👀 ..حافظي على ودانك👂..حافظي على أحاسيسك..

# إنتِ كده بتفسدي شُعورك..بتفسدي ذوقك .. بتفسدي أحاسيسك كأنثى🧕 المفروض إنَّها تكون رقيقة..☺️

#دكتورة_سوزان_علمتني

متتعوديش إنك تسمعي الشتائم والألفاظ ويبقى ده بالنسبة لك عادي

"التَّاريخ الحقيقي للإسراء والمِعراج"
-----------------------
# رحلة الإسراء و المِعراج حصلت امتى ؟؟

● في اختلاف هى حصلت امتى بالضبط ..لكن هل الاختلاف ده هيفرق في كون رحلة الاسراء و المعراج *معجزة* ؟؟.. لأ طبعاً..
ـ بالنسبة للأرقام والتَّواريخ فهى ماتفرقش معانا في حاجة خالص (بالذَّات في السِّيرة)..

● أرجح الأقوال إن " الإسراء و المِعراج " حصلت في ليلة ٢٧ رجب من العام العاشر (١٠) للبعثة .. و سمى " بعام الحزن"...

ـ اخدنا فى المدرسة أنه سمى عام الحزن لحزن الرسولﷺ لوفاة السَّيدة خديجة و عمه أبي طالب..لكن مش هوَّ ده السبب فى التسمية..

ـ احنا عارفين إن الرسُول ﷺ قعد ١٣ سنة في مكة (قبل الهجرة) ..و بعد كده هاجر و قعد ١٠ سنين في المدينة..

ـ ففي العام العاشر(١٠ )من البعثة كان الرسُولﷺ بقاله ١٠ سنين بيدعو الناس و كل اللى آمنوا به (٤٠ ) واحد بس 😔 و هوَّ ﷺ قد أُرسِل للعالمين..
ـ فيأسﷺ تمامًا من أهله (أهل مكة) انهم يصدقوه..

ـ ففكر إنُّه يدعو خارج مكة و فعلاً خرج منها و راح الطَّائف..

ـ راح الطَّائف و كان عنده أمل إن أهل الطَّائف يقفوا معاه لأن فى صلة نسب بتجمعه معهم (بنى ثقيف )من ناحية الأم ..

ـ لكن للاسف سخروا منه ﷺ و سلَّطوا عليه العبيد و الإماء يحدِّفوه بالطُّوب لدرجة ان رجله ﷺ بدأت تنزِل دم !!🥺 و أصابوا زيد بن حارثه (مولاه ) اللى كان معاه ..

ـ راح رسول اللهﷺ و جلس في بستان ل(عُتبة بن رَبيعة) و قعد يبكي يبكي و يدعي "اللهمَّ إليك أشكو ضعف قوتي و قلَّة حيلتي و هواني على النَّاس" ..( دعاء من أروع ما يُمكن، يمشي على أي واحدة فينا، دعاء رائع )

ـ و لما جه يرجع ، قريش رفضت تدَخله مكة إلَّا لمَّا حد يضمنه(كان لسه الإسلام مفيش فيه حد قوي يقدر يضمنه) فضمنه واحد من المشركين..

ـ فلكِ أن تتخيلي حالة الرسُول ﷺ كانت عاملة إزاي؟!😔 لا عارف يبلَّغ جوَّا و لا عارف يبلَّغ برَّة..و اغلقت أبواب الدعوة تمامًا في وجهه..

ـ فحزن رسول اللهﷺ حزناً شديداً لانغلاق أبواب الدعوة تمامًا..و مش بس لوفاة السيدة خديجة و عمه أبو طالب ..فسمى العام العاشر بعام الحزن...

ـ هنا جاءت رحلة الإسراء و المعراج للتَّسرية و التَّكريم لرسول اللهﷺ ...

ـ و كأن الله سبحانه و تعالى بيقول له: " تعالي يا مُحمد إذا كان قد كذبك أهل الأرض فقد صدقك أهل الأرض و السَّماء
إذا كان لم يعرف قدرك أهل الأرض و قومك، تعالي هنوريك مكانك فين ..مش في الأرض بس، في الأرض و في السَّماء "..🤍

ـ هيَّ دي معجزة الإسراء و المِعراج ...
ـ احكوا القصص دى لاولادكم أو افتحى اى كتاب سيرة و احكيلهم منه..

#دكتورة_سوزان_علمتني

امتى حصلت معجزة الإسراء والمعراج بالضبط؟

اتعودي تصبري وماتنتظريش السكن والمودة والرحمة والسند من زوج أو أب أو أم أو أولاد ... إحنا عندنا السكن والمودة والرحمة والسند من الله عز وجل ... اشكيله همك وادعي وكوني متأكده إنه الوحيد اللي مش هيسيبك تنامي ودمعتك على خدك

#دكتورة_سوزان_علمتني

*افردي ظهرك*
------------
كبنت أو سيدة، الصَّح إنِّك تقعدي إزاي؟

حاجتين لازم تراعي وضعهما:-
١. ظهرك.
٢. ⁠رجليكِ.

-أولاً ظهرك :-
ماتقعديش ساندة ظهرك على ظهر الكرسي، لأ بتطلعي قدام شوية قوتبقي فاردة ظهرك مش مِأتِّبة 😅
مافيش واحدة فينا مامتها ما قالتلهاش:-
"افردي ضهرك وأنتِ قاعدة".. 😂😂

ثانياً رجليكِ:-
لازم تضُمي رجليكِ على بعض وبعدين تجيبيهم على جنب.. ماينفعش أبدًا تقعدي ورجليكِ مفتوحة وبعيدة عن بعض خصوصًا لو في مكان مفتوح ومافيش مثلاً ترابيزة تداري رجليكِ..
-طيب أنا لمَّا بضُمهم على بعض بسرح وبيبعدوا عن بعض 😳
*يبقى شنكليهم في بعض، يعني مثلاً حُطِّي رجلك الشِّمال ورا رجليكِ اليمين وجيبهم على جنب..

#دكتورة_سوزان_علمتني

وانتي قاعدة وسط ناس .. ظهرك ورجلك لازم يبقى ليهم شكل معين

★ الحلَّة على مين ؟! ★
-----------------
ـ مرة واحد بيكلِّمني... هوَّ بنته بتتجوز ، بيقول لي :ـ
" المفروض هنقعد مع أهل العريس علشان نتفق على التَّفاصيل ..أقول إيه ؟ أنا ماعرفش.. ما عملتش كده قبل كده !!

ـ قعدة الاتفاق دي اللي بيتفقوا فيها على المهر و الشَّبكة.. والفرح على مين؟ و الحلَّة على مين؟ و الكنكة على مين ؟و الحاجات دي كلها🥴😵‍💫😂

# إمتى نتكلِّم في الحاجات دي ؟؟
ـ نقعد نتكلِّم في الحاجات دي بعد ما يمر وقت كويس أوي من فترة الخُطوبة ..
ـ ويكون العروسة وأهلها و العريس وأهله اتطمنوا إن الموضوع حلو و هنكمِّل فيه..
ـ ساعتها نقعد و نتفق مش قبل كده ..

ـ ليه يا دكتورة سوزان؟ علشان نبقى على نور 🤔
ـ " درءًا للمشاكل ".. مش نستنى لمَّا نعرف الأول الولد كويس ولَّا لأ..والبنت تنفع ولَّا لأ 🙃

ـ هيَّ الفكرة لمَّا الفلوس بتدخل في الموضوع لازم يحصل اختلاف في وجهات النَّظر ..و لمَّا بيحصل اختلاف من الأول كده بيتخانقوا..🙄

ـ وبالتَّالي.. فترة الخُطوبة دي هتبقى عملية شد و جذب بين الطرفين..صح ؟

#دكتورة_سوزان_علمتني

الكلام في تحديد المهر والشبكة والحاجات دي بيبقى إمتى؟

★سلسة الجواز و سنينه:ـ
(٩)المَهر.
------
# المَهر:-
١ـ ليس هناك حد لقلة المهر أو كثرته ( يعني مافيش أكبر مهر و لا أقل مهر ) ، لكن يُشترط أن يكون شيئًا له قيمة بغض النظر عن قلَّته أو كثرته إذا تراضى عليه المتعاقدان...

ـ تيجي البنت تقولك:- موافقة موافقة يا بابا و خلاص 🥴 (طبعًا ما هو الحب أعمى🙈)
ـ يا بنتي ده مكتبلكيش مهر؟؟
-أنا موافقة محدش له دعوة🌚 (طالما هيَّ موافقة خلاص !!)

# قولنا مسألة الجواز دي
" مسألة عقلية🧠"..شيلي قلبك من الموضوع خالص..
ـ و سواء عرفتي تشيلي قلبك ولَّا لأ فالأم و الأب همَّا اللي يتكلموا في الحاجات دي.
مش إنتِ أبدًا..مفهوم؟

٢ـ يُستحب تخفيفة تيسيرًا للزَّواج...
ـ بنشوف دلوقتي ناس بيغالوا في المهور بيقولك ٥٠ ألف شبكة و ٥٠ ألف مهر !!..
ـ إزاي شاب متخرج يقدر يجيب كل ده ،إزاي؟
ـ و طبعًا ده من الشَّيطان...لإنُّه مش عاوز النَّاس تتجوز عشان تشيع الفاحشة و الزنا..
ـ ولمَّا ما يعرفش الشاب إشباع الرغبة في الحلال هيشبعها في إيه؟..في الحرام ..
ـ ونتيجة المصاريف و الالتزامات المرهقة..أتحدى دلوقتي تلاقي اتنين بيتجوزوا وأهلهم بيفرحوا ..
ـ أنا عاوزاكِ تشوفي أهلهم و تشوفي البنت و أهلها و المقربين لها وإخواتها قبل الفرح بيبقوا عاملين إزاي؟
ـ مشغولين وقلقانين ( الكاميرا ،الفيديو ، الكوشة و الورد..الخ) ..إيه الكلام ده...ليه كل ده؟

# أعظم النِّكاح بركة ⬅️أيسره مؤونة..
ـ يعني كل ما النِّكاح المهر بتاعه كان قليل،كل ما فيه بركة أكتر ..
ـ ييجي واحد يقولك:- "لأ المهر ده بيعلي سعر البنت.." سعر البنت؟🙄
ـ يقولك :- " أيوة، كل ما تبقى بنت ناس كل ما مهرها يبقى عالى؟!!
ـ جبتوا الكلام ده منين ؟😵‍💫
ـ بنت سيدنا و سيد اللي خلِّفونا ،بنت سيد الخلق 》السَّيدة فاطمة ..مهرها كان إيه؟
ـ كان درع سيدنا عليّ (ماكنش عنده حاجة) و قَبِله الرسُول ﷺ..
ـ مش بقولك كده عشان تروحي تقولي لباباكِ، بابا أنا عاوزة مهري درع🥴 أو مش عاوزة بيت...مش هنعمل كده
بس إيه؟...بالعقل..
ـ في عائلات لغاية دلوقتي تيجي تقولك :-
"إحنا بنشتري راجل و المهر اللي إنتوا هتدفعوه"..لا يمكن يقولوا
هتدفع كام و الحاجات دي..🫢..

ـإمتى نتكلم في الكلام ده؟
بعد ما فترة الخطوبة تمر..يعني يمر منها جزء كويس قوي ، والعروسة و أهلها و العريس وأهله يطمنوا إن الموضوع حلو و هنكمل فيه، ساعتها نقعد و نتفق مش قبل كده ..درءًا للمشاكل..
ـ هى الفكرة لمَّا الفلوس بتخش في الموضوع لازم يحصل اختلاف في وجهات النظر و لمَّا بيحصل اختلاف من أول مرة ، فترة الخطوبة دي هتبقي عملية شد و جذب بين الطرفين...صح؟

#دكتورة_سوزان_علمتني

قيمة المهر مش في كميته، ولكن في البركة بتاعته

عايزة قلبك يبقى في إيدك ... يتفتح في الوقت المناسب مع الشخص المناسب ... علشان مايتكسرش
#دكتورة_سوزان_علمتني

★سلسلة الجواز وسنينه:-
( ٨) المَهر
------------
*ما هو المهر؟
المَهر في اللغة العربية اسمه: الصَّداق..

*طيب إيه هو حُكمه؟
يعني هل هو فرض ولَّا رُكن ولَّا شرط؟
⬅️ عند الجمهور (يعني ٣ مذاهب من المذاهب الأربعة):-
المَهر ليس بشرط ولا برُكن..
علشان كده تلاقي ناس تقولك:-
"ده إدَّالها مَهر رُبع جنيه"⬅️ ينفع العقد كده؟
أيوه، ينفع عند جمهور الفُقَهاء..
⬅️عند المالكية (مَذهب الإمام مالِك):-
المَهر رُكن من أركان عَقْد الزَّواج، يعني لا يجوز للعريس أن يشترط في العقد إنُّه هيتجوِّزها بشرط مايدفعش مَهر..
⬅️كده العقد صحيح (إيجاب وقبول وأبوها موافق وفي شاهديّ عَدل ولا يوجد موانع شرعية) لكن الشَّرط باطل..
يعني لو رَفَعِت عليه قضية بعد الزَّواج تُطالب فيها بالمَهر وجوزها قال للقاضي إنُّه كاتب شرط مايدفعش مَهر، القاضي هيقول:-
الشَّرط ده باطل وعلى الزوج إنُّه يدفعلها مَهر..
طيب قد إيه المَهر ده؟
حاجة اسمها "مَهر المِثل"؛ يعني يشوف اللي زيَّها في السِّن والمستوى الاجتماعي والاقتصادي بيدفع لها مَهر قد إيه في عُرف النَّاس حولها ويدفَع لها مثله..
وإحنا في مصر ماشيين برأي المالكية؛ يعني لازم مَهر..

طيب تعالوا بقى نشوف من وجهة نظر الدِّين ما هو الغَرَض من المَهر...؟

*تعريف المَهر:-
"هو ما تُعطَاهُ المرأة لِحِلِّية الاستمتاع بها حتَّى تطيب نفسُها وترضى بقوامة الرَّجُل عليها.
المَهر واجب على الرجل وحَق للمرأة وليس لوَلِيِّها ولا أقرب النَّاس ليها إنُّه يأخذ منه شيئًا إلَّا برضاها"..
قال تعالى:-
"وَآتُوا النِّسَاءَ صَدُقَاتِهِنَّ نِحْلَة فَإن طِبْنَ لَكُم عَن شَيءٍ مِنْهُ نَفْسًا فَكُلُوهُ هَنِيئًا مَرِيئًا"
-آتوا= أعطوهم، وهنا الأمر على الوجوب (يعني: فرض)
-صدُقاتهنّ= أجورهنّ (أي مهورهنّ)
نِحلة= عَطِيَّة أو هدية.
⬅️يعني المَهر ده بندِّيه للعروسة شخصيًّا مش علشان تتجهِّز بيه..
إحنا بقى عندنا المَهر بيروح من إيد العريس لإيد باباها ويتفرَّع بعد كده شوية عند النجَّار وشوية عند المنجِّد ووووو…..
لكن شَرعًا⬅️ العريس عليه كل حاجة..
لكن الأعراف عندنا في مصر إن المَهر يستخدمه أهل العروسة للمُساهمة في تجهيزها..
وبالتَّالي المفروض البنات مايطلبوش من أهلهم ما لا يُطيقون.. يعني اللي يشتريه بابا وماما، تشكُريهم عليه وتبوسي إيديهم كمان..
وكمان أهل العروسة ما يطلبوش من العريس ما لا يُطيق.. نقدَّر إنُّه لسه شاب في بداية حياته وتُبقَى طلباتنا معقولة..

#دكتورة_سوزان_علمتني

★ هو ده الدِّين وبس ؟!
-----------------
ـ في ناس بتشوف إن اللي هيَّ تعرفه في الدِّين هوَّ بس الصحيح .. و غيره لأ 🙃 و ده جهل منهم بالحاجات اللي فيها اختلاف بين المذاهب(المسائل الخلافية ).

ـ فتلاقيها بتعلق و تنتقد كل من يخالفها..
ـ مثلاً تلاقيها تشوفك وإنتِ بتصلِّي تقولك:-
" حبيبتي إيديك في وضع القراءة لازم تبقى تحت شوية لا فوق شوية 🙄..و كأنُّه هو ده الوضع الصح الوحيد و غيره غلط...

ـ أصلًا وضع اليدين وقت القراءة دي"مسألة خلافية"..
ـ فممكن يختلف وضع اليدين باختلاف المذهب ..و دي كلها هيئات لا تُبطل الصَّلاة..

# و بما إنَّها مسألة خلافية يبقى معنى كده⬅️ إن إنتِ صح وأنا كمان صح.. " فما تغلطينيش"..🫥

ـ علشان كده لازم تتعلِّمي علشان ماحدش يضحك عليكِ وينكد عليكِ في عيشتك 🫣

#دكتورة_سوزان_علَّمتني

اتعلمي الدين صح عشان محدش يطهقك في عيشتك

★ الصَّلاة مش فرض؟!!★
-------------------
ـ للأسف في ناس بنشوفها تقولك:-
" الصَّلاة اللي بيصليها المسلمون دي خمس مرات ركوع و سجود دي مش فرض علينا احنا..دي كانت فرض علي الرسُّول ﷺ و الصَّحابة بس"...😵‍💫

ـ تقوليلهم:-
" طيب { وَأَقِمِ ٱلصَّلَوٰةَ طَرَفَيِ ٱلنَّهَارِ }
[سُورَةُ هُودٍ: ١١٤] دي إيه ؟
ـ يقولوا:-
" ماهُوَّ المقصود بالصَّلاة هنا:- "الدُّعاء"..🙄

ـ و إحنا للأسف بنسمع الهزيان و التَّخريف ده و بنروح نكرَّره و ننقله للنَّاس ..و نقولهم:-
"دول بيقولوا كذا و كذا 🌚"..

ـ هو أي حد يقول أي حاجة أروح أقولها..(يعني لو سواق ميكروباص شرحلي ازاي تتعمل عملية اللوز ..أروح أنا أنقل كلامه ده ؟!)
ـ مش في حاجة اسمها تخصص ؟!..لو عايزة تعرفي عن عملية اللوز روحي لدكتور أنف وأذن مش سواق ميكروباص و تنقلي كلامه كمان 😡....

ـ مش كل من هب ودب يعمل داعية و كمان يفتي في الدِّين..
ـ للأسف دلوقتي خلُّوا الدِّين مهنة من لا مهنة له...

ـ لا مانع إن إحنا ندعو إلي اللَّه لكن عن علم ..
و"مانفتيش"..

ـ و لازم نتعلِّم كمان علشان محدش يضحك علينا و يقول لنا كلام فارغ و نصدقه...

# تعريف أي عبادة في كتب الفقه بيبقى من شقين :ـ
ـ تعريف لُغوي يعني ⬅️ معناه في اللغة ..
ـ تعريف شرعي يعني⬅️ المقصود به في الشَّرع ..

# الصَّلاة :ـ
ـ لُغويًّا هى ⬅️ الدُّعاء..
ـ شرعًا هى ⬅️الإتيان بأفعال مخصوصة في أوقات مخصوصة مبتدئة بالتَّكبير و مُنتهية بالتَّسليم ..

#دكتورة_سوزان_علَّمتني

لازم تعرفي تردي على الناس اللي بتألف في الدين وتقول ان الصلاة حركات رياضية

شهر رجب ... كلمة رجب من التعظيم ...ألا إن لكم في أيام دهركم لنفحات فتعرضوا لها .... أروا الله من أنفسكم خيرا ... ادعو دايما اللهم بارك لنا في رجب وشعبان وبلغنا رمضان
#دكتورة_سوزان_علمتني

★سلسلة الجواز وسنينه:-
( ٧) المُؤَخَّر
------------
*هو إيه هو المَهْر وإيه المُؤخَّر؟
-تعالوا نِدِّي مثال علشان نفهم الموضوع..
العريس ووالد العروسة اتَّفقوا مع بعض على إن المَهْر مثلاً (١٠ قروش)..
والد العروسة يقوله:
"معاك منهم كام دلوقتي؟"
"معايا ٧ قروش يا عمي"
"خلاص يا ابني، يبقى ال ٧ دول هيبقوا مُقَدَّم المهر وال ٣ الفاضلين هيبقوا المُؤخَّر"
⬅️ يبقى كده المؤخر ده جزء من المَهْر وتم تأخيره تسهيلاً للزواج..
المُؤخَّر ده هيبقى في ذمة الزوج؛ يعني "دَيْن" عليه في رقبته..
-لو طلَّقها⬅️ لازم يدفع لها المُوَخَّر..
-طيب لو تُوفى⬅️ لازم الأرملة تاخد المُؤخَّر بتاعها الأول قبل تقسيم التركة وبعدين تاخد كمان نصيبها في التركة (أَلَا وَهوَ الثُمْن لو كانت مخلِّفة أو الرُّبع لو مش مخلِّفة).. حتّى لو المُؤخَّر ده هيبقى كل ما كان يملك الزوج إللي تُوفِّى..
يعني لو كان كاتبلها مُؤخَّر نص مليون جنيه ولمّا تُوَفِّى كان لا يملك غير نص مليون جنيه⬅️ تاخدهم أرملته..
-طيب والوَرَثة؟
مش هياخدوا حاج خالص خلاص..

وللأسف دلوقتي بنشوف مهازل..
يإما أهل المُتوفَّى مش بيرضوا يدُّوها المُؤخَّر، يا إما بيدُّوها المؤخر لكن مش بيدُّوها نصيبها في التَرِكة من الميراث..

فلازم نفهم إن المُؤخَّر ده جزء من المهر وإنه من حق الزوجة وإنه دَيْن على الزوج..

-في ناس تقعد تقول:
"أنا هطلب مُؤخَّر كبير علشان أربط العريس ومايطلقش بنتي"
أولاً: في جوازات بتقف علشان المُبالغة في المُؤخَّر.
ثانياً: شوفوا أي واحدة عايزة تطلق وجوزها مش راضي بتعمل إيه؛ بتقول هتنازل لك عن المُؤخَّر بس طلَّقني.. صح؟!!
يبقى المُؤخَّر مش بيضمن استمرارية الجواز ولا حاجة..

وربنا يدِّينا الفهم..

#دكتورة_سوزان_علمتني

أنهي أهم .. المؤخر ولا المهر؟

★ ما تاخديش راحتك ★
-----------------
ـ لمَّا تبقي قاعدة في مكان ما ينفعش تحطِّي شنطتك على التَّرابيزة أدامك..حطِّيها جنبك..
ـ لحسن حد ياخدها !! 😵‍💫
ـ خلاص حُطيها على رجلك...

ـ ولمَّا تيجي تقعد تلاقيها تاخد راحتها على الآخر ..و ترجَّع ظهرها لورا 🫠 (تقولي عمرهم ما شافوا كرسي مُريح في حياتهم‼️..😵‍💫)..
# في فرق إنِّك تكوني قاعدة في مكان وإنِّك تكوني قاعدة في البيت 😠🌚 ما يصحش تاخدي راحتك أوي كده...

ـ ولا ينفع كمان تحطِّي إيدك على التَّرابيزة..( مرة شوفت عروسة في فرحها ساندة إيديها على التَّرابيزة اللي بيكتبوا عليها الكتاب( و حاطة إيديها على خدها بتتفرج 🫣 🙄) ..
ـ هيَّ مبسوطة مش زعلانة و قاعدة تكلم النَّاس و تشاورلهم ..هاي باي👋👋 😏
ـ على فكرة عيب جدًا إنِّك تقعدي تحركي إيديك و تشاوري وإنتِ بتتكلمي كده..
ـ لو ما بتعرفيش تتكلمي من غير ما تحركي إيديك (بتتكلم بإيديها 👐 في فعلًا ناس كده..)
ـ خلاص شبِّكيهم و حُطِّيهم على رجلك 😁

#دكتورة_سوزان_علَّمتني

لازم تاخدي بالك وإنتي قاعدة في أي مكان من قعدتك وحركتك

★ سلسلة الجواز و سنينه:-
(٦)الشُّروط في عقد الزَّواج.
-------------------------
ـ الشُّروط في عقد الزَّواج هتلاقيها موجودة كبند مطبوع فى عقد الزَّواج ..
ـ وده بيتكتب فيه الشُّروط اللي بيطلبها أي من الزوجين وعلى الطَّرف الآخر الوفاء بيها ..
ـ مثلاً ..
- مايخرجنيش من بلدي.
- إنُّه يخلِّيني أشتغل.
- إن العصمة تبقى في إيدي.
يعني( أنا ممكن أنهي الزَّواج في أي لحظة و هوَّ مايقولش لأ)
- إنُّه ما يتجوزش عليَّا.

ـ تنقسم الشُّروط إلى:-
- شروط صحيحة.
- شروط باطلة.-

ـ يعني إيه شروط صحيحة؟
ـ يعني ⬅️ لا تُحل حرامًا و لا تُحرم حلالا..
ـ زي إنُّه مايسفرهاش أو تكون العصمة في إيديها..
ـ دي شروط صحيحة يجب الوفاء بها و لو راحوا للقاضي له إنُّ يفرق بينهم و يفسخ العقد لعدم الوفاء بالشَّرط..ودي شروط لا تُحل حرامًا و لا تُحرم حلالا ..

ـ و في شروط باطلة..مثلا:-
ـ أنا هتجوزك و كل حاجة بس بشرط ممنوع الجماع في ال weekend ينفع كده؟ لأ ماينفعش..
ـ أو شرط لو هتكون زوجة تانية تشترط إنُّه يطلق مراته..لا يجوز..مش بس لا يجوز و يَحرُم كمان ..

ـ لمَّا يروحوا للقاضي يقول لهم :-
العقد صحيح و الشرط باطل ..فبالتَّالى لا يَحكم بفسخ العقد لإن الشَّرط باطل..

ـ و في أحوال بيبقي الشَّرط باطل و العقد كمان باطل..زي إيه؟
ـ الزَّواج لمدة مُعينة مُحددة الصيف مثلاً 🙃 و بعد كده ينتهي الجواز و كل واحد فينا يروح لحاله و هدفعلك مهر وكده..
ـ ده اسمه زواج " المتعة " مُحدد بمدة مُعينة و ده مُحرم عندنا -أهل السُّنة-..و مُباح عند الشِّيعة..

ـ و في حالات تانية ..
ـ احنا عندنا لا يجوز لزوج طلق زوجته ٣ مرات إنُّه يرجَّعها لعصمته إلَّا اذا تزوجت غيره..صح..
ـ ييجي بقى ناس عايزين يحلوا المشكلة دي.. فيتفق الزوج مع واحد إنُّه يتزوج طليقته و بعدين يطلقها علشان تحل له مرة أخرى ...و بنسميه " مُحَلِل " 🙄
ـ رسُول اللَّهﷺ بيسميه:-
" التَّيس المُستَعار "..🌚

ـ طبعًا التَّحايل ده ماينفعش و ما ينفعش ترجع لزوجها الأولانى إلَّا لو هيَّ اتجوزت واحد تاني زواج حقيقي و بعد كده حصل و طلَّقها .

ـ لو المُحلِل ده مارضيش يطلَّقها مع إنُّهم كاتبين شرط في عقد الزَّواج إنُّه يطلَّقها بعد ٢٤ ساعة مثلاً..
ـ لو راحوا للقاضي علشان يفسخ العقد..هيقول الشَّرط باطل..

ـ من ضمن الشُّروط الغريبةو الطَّريفة 🤔 ..
ـ أب اشترط إن مُؤخر الصَّداق لبنته يبقى وزن مُعين من الدهب لأن قيمة العملة بتقل مع السنين 😯
ـ الجواز مش كده يا ولاد...مش بقرة و بيبعها..مش صفقة..هيَّ مش صفقة..🙄

#دكتورة_سوزان_علمتني

لازم تعرفي تسايسي القرد ... يإما مش هتعرفي تعيشي لأن الدنيا فيها المؤدب وإللي مش مؤدب وأصحاب الأمراض النفسية ... والمسايسة بتبقى بالكلمة الطيبة
#دكتورة_سوزان_علمتني

*الصِّيام في رَجَب*
---------------
*ما هي الأشهُر الحُرُم؟
-الأشهُر الحُرُم: ٣ سَرْد (يعني ٣ ورا بعض) وواحد فُرْد (يعني لوحده)
ال٣ السرد هم: ذو القعدة وذو الحِجّة ومُحَرَّم
والفَرْد هو: شهر رَجَب

*طيب يا ترى إيه حُكم الصيام في الأَشهُر الحُرُم؟
-دي "مسأَلَة خِلافية":
يعني بعض العلماء قالوا صيام الأشهُر الحُرُم صيام مَسنون، وبعض العلماء قالوا صيام الأشهُر الحُرُم مَكروه..

*يبقى إيه حُكم صيام شهر رَجَب؟
-شهر رجب من الأشهُر الحُرُم وبالتالي صيامه مسألة خلافية..

*طيب لو أنا أخدت بالرأي إنه من الصِّيام المَسنون؟
-خلاص يبقى ممكن تصوميه كله أو كل اثنين وخميس فيه أو زي ما تحبِّي..
يعني يتساوى في ذلك أوِّل رَجَب و ١٠ رَجَب و٢٠ رَجَب و٣٠ رَجَب..

*يعني مافيش فَضْل مُعيَّن زيادة لصيام (١) رَجَب؟
-لأ مافيش

*طيب مثلاً تيتا بتصوم أوِّل رَجَب من أيّام سعد زغلول؛ لو لاقيتها صايمة ماقولش لها إن مافيش فضل مُعيّن لصيام (١) رَجَب وإن كده هي بتعمل بِدعة وكُل بِدعة ضَلالة وكُل ضَلالة في النَّار؟
-وتقولي لها كده ليه؟ هو مش إحنا قُلنا إن صِيام رَجَب ممكن تاخدي برأي إنه من الصِّيام المَسنون؛ وبالتالي جِدِّتك لو صامت اليوم ده هل هي كده كَفَرت؟!!
ماتسيبيها تصوم وتقوليلها كمان تدعيلك وهي بتفطر..

ربنا يُعطينا الفهم ويرزقنا لين القلب ❤️

#دكتورة_سوزان_علمتني

الكلام اللي بيطلع عن فضل صيام أول رجب ده إيه أصله؟

★ حُكم الاحتفال برأس السَّنة الميلادية ؟
----------------------
ـ في دكتورة عايشة في كندا (من بناتي اللى كانوا بيحضروا معايا) بتقول لصاحبتها:-
" تصوري بناتي عايزين يحتفلوا بالكريسماس و راس السَّنة !! "..
قالتلها:-
" طيب خلِّيهم يحتفلوا بإنِّك تكلِّميهم عن سيدنا عيسى عليه السَّلام"...
ـ عجبتني الفكرة 👌🏻

ـ في فرق بين رأس السَّنة الميلادية (٣١ ديسمبر) و بين أعياد المسيحيين ( ٢٥ ديسمبر أو ٧ يناير)..في خلط عند النَّاس بين الاحتفال برأس السَّنة الميلادية و بين الكريسماس..
ـ أنا هنا بتكلِّم عن رأس السَّنة ماليش دعوة بالكريسماس ده عيد المسيحيين ...

ـ رأس السَّنة الميلادية (٣١ ديسمبر) ما هو إلَّا تقويم بيتحسب من سنة ميلاد سيدنا عيسى عليه السَّلام (زي التَّقويم الهجري عندنا بيتحسب من سنة هجرة رسُول اللَّهﷺ )..
ـ احنا ما نعرفش يوم ميلاد سيدنا عيسى لكن اتفق العالم على إن الاحتفال بيه ٣١ ديسمبر تخليدًا لميلاد سيدنا عيسى في رأس السَّنة الميلادية..


ـ طيب ينفع احتفل برأس السَّنة الميلادية (ميلاد سيدنا عيسى) في ديننا ؟
ـ مبدئيًا كده الاحتفال هوَّ ⬅️اظهار الفرحة و السرور لحدوث نعمة ..
ـ لكن الاحتفال في ديننا له شرطان:-
ـ أن يكون سبب الاحتفال و طريقة الاحتفال توافق تعاليم الدِّين ..
ـ الاحتفال بميلاد سيدنا عيسى أو أي نبي من الأنبياء لا يتعارض مع الدِّين.. قياسًا على ما فعله رسُول اللَّهﷺ...
ـ قال رسُول اللَّهﷺ: ﴿أَنَا أَوْلَى النَّاسِ بعِيسَى ابْنِ مَرْيَمَ﴾..(حديث في البخاري)
ـ ولمَّا رسُول اللَّهﷺ راح للمدينة وجد اليهود بيصوموا يوم عاشوراء ( يوم نجَّى اللَّه سيدنا موسى من فرعون ) فقالﷺ : ﴿ نَحْنُ أَوْلَى بمُوسَى مِنكُم فأمَرَ بصَوْمِهِ﴾..

ـ طريقة الاحتفال ..
- في واحدة قريبتي بتيجي ليلة رأس السَّنة تعزم عيلتها كلها و تعمل إطعام للفقراء..هل التَّصرف ده في حاجة تتعارض مع الدِّين..لأ..
- ناس تانية (مالناش دعوة بيهم) بتعصي ربنا و تسكر و تعمل حاجات كلها لا توافق ديننا..فطبعًا ده لا يجوز..🌚

ـ مش احنا بنتكلِّم عن رسُول اللَّهﷺ يوم المولد النَّبوي و عن الهجرة في رأس السَّنة الهجرية..نفس الكلام لسيدنا عيسى عليه السَّلام...

ـ استغلُّوا فرص المناسبات دي علشان تتكلِّموا مع أولادكم عن الأنبياء..
ـ ما تخلُّوش أولادكم يجيبوا المعلومات من كتب الغرب اللي بيكتبها اليهود واللي كلها مغالطات..أو من أصحابهم النَّصارى..

#دكتورة_سوزان_علَّمتني

الناس اللي بتتصور مع بابا نويل  والناس اللي بتكفرهم

*رأس السَّنة*
-----------

ـ هو فى فرق بين رأس السنة و الكريسماس أو اعياد المسيحيين ؟

ـ ساعات بنلاقي مسلمين يجيبوا شجرة الكريسماس و بابا نويل يديهم هدايا ويعملوا حفلات فى رأس السَّنة..
ـ طيب هو دة يمشي في الدِّين عندنا؟

# رأس السنة الميلادية (٣١ ديسمبر) ما هو إلا تقويم بيبتدى من السنة اللى اتولد فيها سيدنا عيسى عليه السلام..( بالسنة مش بالشهر)..
ـ زى عندنا كدة التقويم الهجرى بيبتدى من السَّنة اللي هاجر فيها النَّبي ﷺ .
ـ يعنى الاثنين تقويم..

ـ أنا هنا بتكلِّم على ٣١ ديسمبر (اللي هوَّ رأس السَّنة) ما بتكلمش علي ٧ يناير و ٢٥ ديسمبر اللى هم اعياد المسيحيين..
ـ لكن للاسف الأمور عند بعض الناس داخلة في بعضها..مش عارفين الفرق بين رأس السَّنة و الكريسماس بتاعهم.

# اللي يهمنا فى الموضوع دة و اللى أنا طلباه منك و ، انك تعلمي اولادك و تتكلمي معاهم عن سيدنا عيسى عليه السلام ...
ـ للأسف كل المعلومات اللي أولادنا بيجوا يسألونا فيها و إحنا نحتاس همَّ جيبنها منين؟
من أصحابهم النَّصارى.

ـ و في ناس للاسف بتيجي تقولك سيدنا عيسى ده بتاع المسيحيين !! كل الأنبياء و الرُّسل تبعنا ولازم نبقى عارفينهم..

ـ إنتم مش عارفين إن في حديث فى البخارى ..قال رسول اللهﷺ :-
﴿ أَنَا أَوْلَى النَّاسِ بِعِيسَى ابْنِ مَرْيَم﴾..
ـ تعرفوا ان سيدنا عيسى عليه السلام ذكر في القرآن ٢٥ مرة..
ـ هو النَّبي الوحيد(سيدنا عيسى ) اللي جه اسمه، صفته، نسبه، حمله، و ولادته و أمُّه فى القرآن ..

ـ إحنا المفروض ننتهز
المناسبات عشان نتكلم و نعرفهم مين سيدنا عيسى و مين السيدة مريم...

#دكتورة_سوزان_علَّمتني

لما كل الناس تكون بتحتفل برأس السنة، استغلي الفرصة وكلمي ولادك عن سيدنا عيسى عشان يتعلموا الكلام الصح عنه

الجواز رزق ... والله لو ربنا كاتبهولك هيجيبلك ولو كنت في قمقم ... بس للأسف إحنا إيمانا باللي في إيدينا أكبر من إيمانا باللي في خزائن ربنا
#دكتورة_سوزان_علمتني

★سلسلة الجواز وسنينه:-
(٥) طاعة الزَّوج.
------------
# من أعظم القربات إلى اللَّه ⬅️ حُسن تبعُّل المرأة لزوجها.

ـ أنا دايمًا باقول لبناتي: ـ
"يوم مايتقفل عليكِ إنتِ و زوجك باب اعرفي إن باب للجنَّة اتفتحلك" ..اوعي تقفليه🫠
ـ في ٣ أبواب للجنَّة لازم تضمنيهم و تحرصي عليهم..
١ـ باب رضا الزوج.
٢ـ باب الشكر.
٣ـ باب الصبر ..

١ـ باب رضا الزوج..
ـ حُسن التَّبعل هو باب للتقرب إلى اللَّه..
ـ التَّبعل هو ⬅️ حرص المرأة على رضا زوجها..
ـ حرصها على رضاه يكون بلبسها ، بكلامها ، بتصرفاتها ، بقعدتها ، بطبخها...
ـ ومن أسهل الطُّرق للتقرب إلى اللَّه هو:-
"التَّزيُّن لزوجك"..

ـ احرصي إن المكان اللي بيقعد فيه يكون زي الفل (ما تبقيش إنتِ مهتمة بالصالون و نضافته و ترتيبه و سايبة أوضة المكتب اللي هو بيقعد فيها مكركبة) ..
ـ لازم ما يقعش نظره على حاجة تضايقه و لا يشم رائحة تضايقه..

ـ طيب أنا في حاجات مش باحب أعملها (الطبخ مثلاً )..🤔🥴
ـ معلش إنتِ هتيجي على نفسك و تقفي تطبخي😰 مش علشان هو بيعاملك كويس ..لا..إنتِ بتعاملي ربنا... بتعملي كده تقربًا للَّه ..

# هو إنتِ فاكرة دخول الجنَّة حاجة سهلة ؟!! ولَّا فاكرة إن دخول الجنَّة هيبقى بقيام الليل بس و حفظ القرآن بالقراءات العشر🙄

ـ إنتِ في حاجتين لازم تضمنيهم و يبقوا في جيبك لدخول الجنَّة:-
ـ رضا أمك وأبوك.
ـ رضا زوجك ..

ـ قال رسُول اللَّهﷺ :-
﴿ لَو كُنْتُ آمِرًا أحَدًا أنْ يَسْجُدَ لِغَيرِ اللَّه لَأمَرتُ المَرأَةَ أنْ تَسْجُدَ لزَوجِهَا﴾..

ـ بالنسبة للزوجة :-
ـ طاعة الزوج مقدمة على طاعة الوالدين..
- يعني لو أم طلبت من بنتها تروحلها و يكون الزوج مأكد عليها ما تخرجش بالليل مثلاً 😏..
- عليها طاعة الزوج تقربًا إلى اللَّه..الدِّين بيقول كده..
ـ بالنسبة للزوج :-
ـ طاعة الوالدين مُقدمة على طاعةالزوجة..
- لو طلبت الأم من ابنها حاجة و زوجته مش موافقة عليها 😏..عليه طاعة أمه..الدِّين بيقول كده .
ـ و في الحالة دي إنتِ لازم تفرحي إنُّه عنده دين و بار بأمه لإن اللي مالوش خير في أهله مش هيكون له خير فيكِ..

٢ـ باب الشُّكر..
اذا كان الزوج صالحاً..﴿لَئِنْ شَكَرتُم لأزِيدَنَّكُم ﴾...تقربك إلى اللَّه هنا إنِّك تحمدي ربنا وتشكريه على نعمته و فضله..

٣ـ باب الصَّبر..
ـ طلع الزوج في مشاكل هنا التَّقرب إلى اللَّه هيبقى بالصبر و الاحتساب على الابتلاء..
ـ لكن تصبري الصبر الجميل يعني ما تقعديش تشتكي و تحكي لكل النَّاس ( طبعاً في حاجات بنحتاج فيها للنصيحة )..
ـ اصبري و اطلبي من اللَّه وحده ، كلميه و قوليله:-
" يارب ماليش غيرك "..
ـ أكثري من الاستغفار و التَّقرب من اللَّه -عزَّ وجلَّ-..

ـ واوعي تروحي لموضوع الطلاق على طول ..اصبري..
ـ واوعي تنصحي صاحبتك أو أختك أو حتَّى بنتك إنَّها تتطلق..حاولوا دايمًا الإصلاح حتَّى و لو بإنُّهم يبعدوا عن بعض شوية..

#دكتورة_سوزان_علمتني

أحد طرق الوصول لرضا الله هو رضا الزوج.. بس مش دايما بيبقى سهل

بطانية لكل مواطن.
------------------------
دلوقتي أنا عاوزة أرفع شعار
"عاوزين بطانية لكل مواطن"
قولوا لولادكم....
مش بيلمُّوا مع بعض عشان يجيبوا دبدوب لعيد ميلاد تُوتي....
خلِّيهم يلمُّوا و يجيبوا للدادة بتاعة المدرسة.
يقولوا للمدرسة مثلًا عاوزين نجيب بطاطين عشان البرد
البطاطين دي من أموال الزَّكاة
تطلع و لا ماتطلعش؟!
تطلع ياولاد.
و اللي لسه الزكاة بتاعته باقيلها ٣ شهور
إخراج الزكاة..يجوز مُقدَّمًا
ولَّا لا يجوز؟
يجوز..مش قلنا يجوز مُقدَّمًا
خرَّجوا دلوقتي... علشان البرد ياولاد ...
قولوا الفكرة للنَّاس..
علي رأي واحدة قاعدة بتفكَّر
بتقول لي:-
في المكتب هعمل حاجة كدا
في مخدات بالكهرباء ، تحطِّيها تسخن بالكهرباء.
فبتقول لي:-
هجيب واحدة ، مخدة بالكهرباء، و أحطها علي المكتب..
فكل اللي هيجي هيقول:- اللَّه دي سخنة و يحط إيده عليها
إيه دي؟
(شوفوا إزاي عاوزة تفتح كلام)
إيه دا؟ دفيت ، إحنا بقي عاوزين ندفِّي النَّاس...هات بقي نجيب بطاطين..
فأنا بقول:-
قولي الفكرة بس لأولادكم
قولي الفكرة لأولادكم في المدارس ، في الشُّغل
و خلُّوا الأولاد يحسُّوا بالنَّاس ... يحبُّوا يعملوا حاجة.
و لو حتَّى يجمَّعوا من مصروفهم من أصحابهم ثمن بطانية (حلو).
*"كونوا كالشَّمس للدُّنيا و كالعافية للأبدان"*
صحصحوا أولادكم.

#دكتورة_سوزان_علمتني

عايزين نرفع شعار "بطانية لكل مواطن" في البرد الشديد اللي موجود اليومين دول

★ بيضحكني ★
---------
ـ باشوف بنات بتضحك بصوت عالٍ.. "هاهاهاهاهاي "🤣 و تكون في مكان عام ، أو في الشُّغل أو في وسط ناس غُرب 🫣 و تقولك أصله بيضحكني و دمُّه خفيف 🌚

⚠️ إيه ده !! لازم تعرفي تتحكمي في نفسك..

ـ طريقة الضحك مع أخواتك في البيت غير طريقة الضحك بره البيت، غير طريقة الضحك في الشُّغل ، غير طريقة الضحك في وسط ناس غُرب 🙃

ـ لمَّا تكوني في وسط ناس غُرب يبقى الابتسام أفضل من الضحك..خليكِ تقيلة كده و الابتسامة على وشك..

# على فكرة الضحك ده محسوب عليكِ حتَّى في الفقه عندنا..
ـ يعني الابتسام غير الضحك غير القهقهة و له علاقة بصحة الصَّلاة 🤔

ـ " الابتسام " هو ( إظهار الأسنان فقط)..⬅️ لا يُبطل الصَّلاة

ـ " الضحك " هو( أن تُسمِعي نفسك فقط).. ⬅️
يُبطل الصَّلاة عند بعض المذاهب و لا يُبطل عند البعض( مسألة خلافية )

ـ " القهقهة" هيَّ( أن تُسمِعي الغير)..⬅️
تُبطل الصَّلاة عند الجمهور(٣ من ٤)
ـ و عند أبي حنيفة ⬅️ تُبطل الصَّلاة والوضوء 🫣

# و الضحك عندنا لابد أن يكون في حدود ..
١- ألَّا يكون متواصلاً ( الهزار المُستمر )..

٢- ألَّا أكون سببًا للضحك.. يعني ما يكونش أنا اللي بيضحكوا عليَّا (خصوصًا لمَّا أكون في وسط ناس غُرب)..

٣- طريقة الضَّحك..يعني ما أضحكش بصوت عالٍ و فاتحة بوقي على الآخر و كَفَّك و كلام من ده 🤚..
ـ رسُول اللَّهﷺ كان يضحك حتَّى تُرى نواجذه ( الضروس)..
ـ نواجذه مش أمعاؤه 🥴..

# فلازم ناخد بالنا و نعرف إن طريقة ضحكنا محسوبة علينا..

#دكتورة_سوزان_علمتني

طريقة الضحك بتاعتك بتدل على حاجات كتيرة أوي

ماتنسوش إنكم بنات .... بنات يعني صدر حنين.... اتعودي إنك تستوعبي إللي أدامك ... إنك تطبطبي عليه ... إنك تطمنيه ... وابتدي بأهل بيتك ... الأقربون أولى بالمعروف

#دكتورة_سوزان_علمتني

★ سلسلة الجواز وسنينه:-
(٤) الجواز ستر.
-------------
عبَّر اللَّه -عزَّ وجلَّ- في كتابه الكريم عن العلاقة بين الزَّوجين بقوله تعالى:-
" هُنَّ لِبَاسٌ لَكُم وَأَنْتُمْ لِبَاسٌ لَهُن"..

*يعني إيه لباس؟
-يعني:-
الشَّيء الذي يلتصق بالجسم (يعني الهدوم) بكل ما يحمله ذلك من معنى معنوي كمان..
*يعني إيه؟
-يعني اللباس ده ستر.. يعني حماية.. يعني زينة.. يعني دفء..
يبقى لازم السِّت تكون كده بالنِّسبة لجوزها وهو كده بالنِّسبة لها..
يبقى المقصود باللباس "أن يستر كل منهما الآخر ويحمي كل منهما قرينه من أي مؤثرات تحُط من كرامته وعزته أو تُفسد أخلاقه أو تؤذي مشاعره؛ وهذا مُنْتهى المودة والرَّحمة.."

يبقى السِّت اللي تيجي تشتكي لأصحابها من جوزها، دي شكلها إيه؟
السِّت اللي بتتريق على جوزها..
السِّت اللي بتفضح جوزها.. تفضحه إزاي يعني؟
"أنا هروَّح بقى علشان ألحق أطبخ الكُشري؛ أصلنا مش بناكل لحمة ولا فراح غير يوم واحد في الأسبوع"⬅️ كده بتفضح جوزها..
الكلام ده مايتقالش لحتَّى أقرب النَّاس ليكِ، أُمِّك.. لمَّا تيجي مامتك تسألك عاملة إيه؟
الحمد للَّه يا ماما كله حلو (إلَّا لطلب نصيحة.. لكن فضفضة لأ)..
لمَّا واحدة تيجي تشتكيلك من جوزها⬅️ اوعي تديها فرصة؛ أنتم كده بتغتابوا جوزها وبتديها فرصة تفضحه وشريكة معاها في الإثم.. فلمَّا تيجي تشتكيلك، قوليلها:-
" لأ بلاش تقولي الكلام ده عليه.. اصبري وماتضيَّعيش ثواب الصبر بالشَّكوى والغيبة.."
ولا الزُّوج يشتكي زوجته ولا يتريق عليها مع أصحابه..
"هيَّ فالحة في حاجة!!! هيَّ بتعرف تعمل حاجة".
ليه كده!!! ليه تفضحها كده؟!!!

*طيب افرضي كنت أنا سكن له وهوَّ ماكنش سكن ليَّا؟
-اصبُري واتعوِّدي ماتنتظريش مُقابل من حد.. ولا زوج ولا أب ولا أم ولا أخوات ولا صديق.. اتعوِّدي اخلصي النِّية في كل حاجة للَّه-عزَّ وجلَّ- وتشكي همِّك إلي اللَّه اللطيف وتبقي متأكِّدة إنُّه الوحيد اللي مش هيسيبك تنامي ودمعتك على خدك وإنُّه هيعوضك.. إن مكانش بهداية جوزك فهيبقى بحاجة تانية.. توفيق في العبادة، ولاد أبرار، توفيق في الشُّغل، صحة، قُبول بين النَّاس، بركة في الرِّزق..
السَّكن والمودة والرَّحمة اللي عندنا وبنشع بيها على النَّاس واخدينها أصلاً من اللَّه-عزَّ وجلَّ-..
"اللهمَّ اقذف في قلوبنا رجاءك، واقطع رجاءنا عمَّن سواك، حتَّى لا نرجو سواك ولا ندعو سواك ولا نشكو لسواك"

#دكتورة_سوزان_علمتني

اللي عايزين يتجوزوا عشان يتستروا .. افهموا الدين شرح الستر بين الزواجين ازاي

★ حاجات ما تتقالش ★
-------------------
ـ بيجيلي بنات في فترة الخطوبة تقول لي:-
"يا دكتورة سوزان ..خطيبي جاي يقوللي كلام كده
يعني🤭 لبسك حلو ، وحشتيني، أنا باحبك و إنتِ؟، ويقعد يسألني إنتِ حاسة بإيه ماهو لازم أعرف مشاعرك 🫣 أعمل إيه معاه؟"..

ـ ما تروحيش إنتِ تُردي و تقوليله: ـ
"ده أنا ما بانامش الليل من حبك 🌚"..
ـ لأ طبعًا..ما يصحش ..ليه؟ .." أدبًا و حياءً"..

ـ بس هو مصمم و بيلح و كل شوية يقول لي:ـ
" قولي لازم تقولي حاسة بإيه ؟🥴

ـ اهربي وقوليله:-
" المشاعر دي حاجات ما تتقالش تتحس بس"..
ـ " أيوه تتحس بس برضو عايز أسمعها منك "..🙄
ـ " من فضلك ما تحرجنيش أنا باتكسف من الكلام ده "🫠
ـ و على طول تغيري الموضوع و تهربي ..😂

#دكتورة_سوزان_علمتن

كلام مينفعش خطيبك يقولوهولك وانتي مينفعش تصديه وتحرجيه

هل الخروج مع خطيبي لوحدنا مباح؟

★سلسلة يا دبلة الخطوبة :-
(١١) خُدي بالك.
-------------------
لمَّا يتقدملك عريس ومبدئيًّا كويس⬅️
عُضِّي عليه بالنَّواجذ.
يعني مافيش عريس يتقدملك ويكون مبدئيًّا كويس إلَّا وتسعِي بكل ما أوتيتِ من قوة إن الموضوع يكمل..
-هتقوليلي:-
"خايفة يطلع مش كويس"
هقولك ٣ حاجات:-
١. صلِّي استخارة.. وكُوني على تمام الثِّقة والإيمان باللَّه -عزَّ وجلَّ- إن ربنا مش هيبهدِلِك..
٢. ⁠دايماً قلبك في إيدِك.. ماتتعلَّقيش بحد، علشان لو ربنا ما أرادش إن الموضوع يكمل، قلبك مايتكسرش..
٣. ⁠مراحل الجواز من أول ما يتقدِّملك عريس مرورا بفترة التَّعارف فالخُطوبة فكتب الكتاب فالزَّواج⬅️ ممكن خمسين حاجة تحصل تخلِّي باباكِ ومامتك يقولوا لأ مش هنكمِّل الموضوع.. فسيبيها على اللَّه وثقي في اللَّه إن لو الموضوع فيه خير هيكمل بإذن اللَّه ولو مافيهوش خير مش هيكمل بإذن اللَّه..

*واوعي تحسِّسي خطيبك إنِّك مُتديِّنة أكتر منه أو تنصحيه في الدِّين بشكل مباشر..
-طيب ما المعلومة دي لازم يعرفها..
*بس مش مِنِّك..

مثال:-
عايز يمسك إيدِك وأنتم مخطوبين، وإنتِ عارفة إن ده لا يجوز.
قوليله:-
-"بيتهيألي كده حرام"
فيقولك:-
- حرام ليه؟
قوليله:-
سمعت كده واللَّه أعلم، ما تسأل في الحكاية دي أحسن.. اسأل مثلاً خطيب الجمعة بعد صلاة الجمعة..
بس كده.. بذكاء ولباقة..

#دكتورة_سوزان_علمتني

خدي بالك من الغلطة دي اوعي تعمليها مع خطيبك

★ اسمها سارة ★
------------
ـ لازم تتعلِّمي تصاحبي أولادك..الدُّنيا مش هتمشي بالأوامر 🙃

ـ ابنك داخل البيت مبسوط و بيصفَّر 🫠 ما تجيش إنتِ تقوليله:-
" بتصفَّر على إيه؟ على خيبتك مش تروح تذاكر أحسن 🫣" ..ما ينفعش كده..
ـ لقيتيه لابس و متشيك و هينزل ..تيجي حضرتك تنكدي عليه وتقوليله:-
" ماتتأخرش بعد السَّاعة ١٠ وإلَّا هاقفل الباب و خلِّيك قاعد تحت " 😡..إيه ده...مش بالطَّريقة دي يكون الكلام.!!!!

ـ صاحبيه..قوليله كلمة حلوة .." إيه الشِّياكة دي كلها ..ربنا يبسطني زي ما إنتَ مبسوط كده يارب..يا بختها 😉" 💕..

ـ و لو سألتيه رايح فين بالطَّريقة الوحشة دي..هتلاقيه يرد عليكِ وحش برضو ويقولك:- "ماحدش له دعوة "..!!
ـ في طريقة تتكلمي معاه بيها..
ـ " إنتَ نازل حبيبي؟
ـ أيوة يا ماما..
ـ رايحين السينما ولَّا النَّادى؟
ـ لسة مش عارف يا ماما.
ـ طيب يا حبيبي حاول ما تتأخرش..
ـ هو كده برضو ما قالش رايح فين..لكن لمَّا يرجع بقى..خُدي وأدِّي معاه في الكلام..
ـ اسأليه:-
" اتبسطتوا يا حبيبي؟..
ـ الحمد للَّه يا ماما.
ـ رحتوا فين ؟..
ـ رحنا أكلنا سلطة في محل ..
ـ و شبعتوا بالسَّلطة بس؟
ـ آه الحمدللَّه.
ـ مش قلتلك ابقى خُدني معاك الأماكن الحلوة دي على الأقل أعرف أعملكم السَّلطة دي في البيت ..طيب و مين اللي كانوا معاك ؟..
ـ كريم وأحمد و صالح و أخت صالح ..
ـ ما شاءاللَّه حلو أوي و اسمها إيه أخته..؟
ـ اسمها سارة يا ماما...
ـ تليفونه رن و هوَّ في الحمام مثلاً..مين يا ترى 🤔 ؟" سارة "..!!
ـ اوعي تسأليه مين دي سارة اللي بتكلمك ؟ أو حتَّى تعرَّفيه إنِّك شُوفتي الاسم ..
ـ قوليله:-
" سمعت تليفونك رن حبيبي شوفه" ....
ـ علشان يرجع يحكي معاكِ براحته...🤩

# كده تكون التَّربية بالمُصاحبة مش بالأوامر..
ـ و المُصاحبة عايزة من الأمهات: "خُلق و طُولة بال"..
ـ صاحبيهم علشان مانخافش من ولادنا و لا نخاف عليهم..

#دكتورة_سوزان_علمتني

ابنك اللي طول اليوم تزعقيله عشان بيتأخر بره ومش بيذاكر مش ده الحل معاه

★سلسلة يا دبلة الخطوبة :-
(١٠) اتكلِّمي مع خطيبك
-------------------
*هل مُباح إني أتكلِّم مع خطيبي؟
-على حسب البيئة اللي إنتِ عايشة فيها..
يعني في بيئات لا تسمح بالموضوع ده خالص..
وفي بيئات لمَّا العريس بيروحلهم البيت بعد الخطوبة، بيقعدوا معاهم وبيبقى الكلام عام والمخطوبة بتسمع رد خطيبها وهو بيسمع تعليقها لكن في وسط أهلها..

وفي بيئات الأب أو الأم بتقعد معاهم شوية في الأول وبعدين تستأذن وتسيبهم يقعدوا مع بعض يتكلِّموا..

*طيب لو أنا من البيئات اللي بتسمح إننا نتكلِّم مع بعض لوحدنا، وهو مثلاً قال لي:-
"وحشتيني، يا ترى أنا كمان وحشتك؟"
أرد أقول إيه؟
-اعملي نفسك مكسوفة وابتسمي ابتسامة خفيفة وقوليله:-
"ماتكسفنيش بقى"☺️☺️
طيب لو قالي:-
"يعني وحشتك؟"
-"افهمها إنتَ بقى"
-"طيب افرضي أنا غبي ومش بفهم"
-"لا متقولش على نفسك كده.. هقوم أعملك الشاي" وتغيَّري الموضوع..

ولازم تقدري تفرقي بين الكلام الخارِج والتَّعبير عن الشُّعور بأدب..
الكلام الخارج طبعاً ماتسمحيش بيه، وبأدب ومن غير عصبية..
لكن التَّعبير عن الشُّعور عادي، زي مثلاً:
وحشتيني.. لبسك حلو أوي النَّهارده.. إيه الإيشارب الحلو ده⬅️ بس ابتسمي ابتسامة كسوف كده وعلَّقي تعليق بسيط زي ميرسي/ ربنا يخليك/ ربنا يكرمك.. بس وخلاص..

كل دي حاجات مافيهاش حاجة..

لو جه قالك:-
تعالي اقعدي جنبي..
خلِّيكِ قاعدة في مكان باباكِ أو مامتك يبقوا شايفينكم فيه وقوليله:-
تعالى إنت اقعد جنبي.. فطبعاً هيتكسف..
دايماً كده تعاملي بذكاء ولباقة..

#دكتورة_سوزان_علمتني

ايه الحدود في الكلام والمعاملات مع خطيبك عشان متغضبيش ربنا وتبقي متكلمة معاه

★سلسلة يا دبلة الخطوبة :-
(١٠) ريَّحي خطيبِك
-------------------
دورِك في فترة الخطوبة إن تخلِّي خطيبك يحبك ويموت فيكِ.. تحسِّسيه إن إنتِ اللي كان بيدوَّر عليها.. يبقى مطَّمِّن معاكِ ومش قادر يستغنى عنِّك..

طيب إزاي؟
حسِّسيه إنِّك مُهتمَّة بيه.. إزاي؟
حافظة بياخد كام معلقة سكر في الشاي، بيحب الشاي بلبن ولَّا بنعناع، بيحب كيك شيكولاتة ولَّا ڤانيليا..
معزوم عندكم في البيت، يلاقيكِ عاملاله الأكل اللي بيحبه..

لمَّا بيتكلِّم مش بتعارضيه..
*طيب افرضي بيقول حاجات غلط؟
-فوِّتي.. طالما مش في الدين، يبقى مش مهم..
خليه يرتاحلك ويتكلِّم معاكِ براحته..
لو قعدتِ تصلَّحي له كلامه، هتتخانقوا كتير وفي الآخر -لو هو عايز يتجوِّزك وشايفك لُقطة بالنسبة له هياخدك على قد عقلك وبعد الجواز هتتخانقوا وتوصلوا لحيطة سد..
لكن لو نجحتِ تخلِّيه يحبك، هو بعد كده هيبقى حريص بعد الجواز مايعملش الحاجات اللي بتضايقك (بدافع الحُب)..

خلِّيه هو يحبِّك وحسِّسيه إنِّك بتموتي فيه وماتقدريش تعيشي من غيره⬅️ وده طبعاً مش الواقع؛ لإن زي ما اتفقنا "قلبك في إيدِك، يتفتح للشخص المناسب في الوقت المناسب.
طيب ما ده الشخص المناسب..
⬅️لأ دي لسه خطوبة؛ يا تكمل ياماتكملش.. لو فتحتِ قلبك، مش هتشوفي العيوب ومش هتحكمي صح على الأمور..
الجواز عملية عقلية بحتة.. والحب بييجي بعد الجواز بالعشرة الطيبة..

#دكتورة_سوزان_علمتني

دورك أثناء الخطوبة بيكون تدريب ليكي على القوامة لبعد الزواج

★بتسقفي في الأفراح ازاي؟!
----------------------------------
ـ بنشوف في الأفراح.. لمَّا يكون في حد بيغني و يقول للبنات اللي موجودين:-
" يللا سقفوا " ، فبيسقفوا 👏.. مبسوطين 🤩..تمام..لكن بيسقفوا ازاي بقى 🤔

ـ أحب أعلمك وأقولك :-
"إن التصفيق يشمل تحريك مفصل واحد بس و هو الرِّسغ 🥴😏"..يعني نسقف كده 👏

ـ لكن نيجي نشوف بقى البنات بيسقفوا ازاي؟!!🫣 ⬅️ كل عضلة في جسمها بتتحرك و هيَّ بتسقف مش كل مِفصل بس🌚 ..و اسمها آل يعني ماشية مع الموسيقى💃😉

⚠️ على فكرة الحاجات دي بتبين مستواكِ إيه ..😶

ـ أنا لمَّا باشوف البنات واقفين يسقفوا باعرف البنت دي جاية من بيت شكله إيه !..باعرف البنت المتربية من اللي مش متربية..
# و كل ده من مجرد الطريقة اللي بتسقفي بيها...

#دكتورة_سوزان_علمتني

البنات لما بيروحوا الأفراح ..

★سلسلة يا دبلة الخطوبة :-
(٩) المشاكل الصحيَّة.
-------------------
مش كل المشاكل الصحيَّة بتتقال للعريس..
في أمراض مش بتأثر على الزَّواج ولا الحياة الزَّوجية سواء للرجل أو للمرأة..
وفي أمراض تانية لازم طبعًا تتقال.
بس السؤال بقى:
تتقال إمتى وتتقال ازاي؟

إمتى؟
انتظري لمَّا العريس يعرفك ويعرف دينك وأصلك وأخلاقك، ويعرف إنِّك حنيِّنَة..
ساعتها هيقدر يوزان ويختار، هل يقدر يتجوِّزك ويستحمل المرض اللي عندك قصاد مميزاتك كلها؟ ولَّا مش هيقدر..
لكن ماينفعش قبل ما يشوفك ويعرفك تقوليله على المرض اللي عندك..
في واحدة كان كل ما يتقدِّم لها عريس، قبل ما يشوفها، تسأل مامتها أو باباها:-
"قُلتم له أنا عندي إيه"⬅️ فطبعًا مافيش حد بيقبل..
فالمواضيع مش بتتاخد قفش كده..

ازاي⬅️ بتتقال وسط الكلام.. مش على هيئة عايزة أعترف لك باعتراف..

مرة واحدة بنت ناس أوي وجميلة أوي بس كان عندها كهرباء زيادة بسيطة في المخ، اتقدِّم لها عريس وأُعجَب بيها جدًا وارتاح لها جدًا..
وبعدين قرر يتمم الخطوبة فباباها قال له -بالرَّاحة كده- إن بنته عندها كهرباء زيادة في المخ وماشية على دواء للموضوع ده..
فالعريس كان مُعجب بالبنت حدًا وشايف فيها مميزات كتير أوي فرد وقال:-
مافيش مشكلة يا عمي..
وراح دوَّر على الإنترنت ولقى إن الموضوع ده لا يتعارض مع الجواز والخلفة في شيء وخطب البنت وتمم الجوازة..

الخلاصة:-
مافيش حد كامل..
ودايمًا الموضوع بيبقى موازنة بين المميزات والعيوب.. بس نِدِّي لبعض فرصة..

#دكتورة_سوزان_علمتني

لو انتي عندك مشكلة صحية .. تقوليها لخطيبك ولا لأ؟

★ سلسلة يا دبلة الخطوبة :-
(٧) ٢- خطيبي والتَّدين.
------------------
ـ في حاجات ممكن تعرفي منها اذا كان خطيبك مُتدين ولَّا لأ ..

ـ داخل عليكم رمضان و عايزة تعرفي إذا كان مهتم و بيصلِّي التَّراويح ولَّا لأ..
- ما تروحيش تقوليله:-
- "إنتَ بتصلِّي التَّراويح فين ؟"😶 يمكن عمره ما راح يصلِّي ..
- قوليله:-
- "إنتَ بقى بتقضي يومك ازاي في رمضان.. بروجرامك إيه يعني؟ "..
- يقولك:-
- "أبدًا..باروح الشُّغل و بعد الفطار باتفرج على التليفزيون شوية وأنام بدري علشان أروح الشُّغل تاني يوم ..الجو بيبقى حر جدًا "..

- هو كده ماجابش سيرة التَّراويح خالص 😶
- ما تروحيش إنتِ تقوليله:-
- " لا ده أنا باصلِّي التَّراويح في المسجد وراء الشِّيخ الفلاني..وتهجد للفجر..و...🙄"..و تقولي:-
- "أصلي باشجعه..😏"
- لا احنا عايزينه يبقى على راحته خالص فما تعارضيهوش خلِّيه يطمنلك ..

ـ جاي بيحكيلك إنُّه في واحد خبطله العربية و اتخانق معاه و شتمه و ضربه في الشَّارع😤
- اوعي تقوليله:-
- " ليه كده ما تستعوض ربنا.. "
- هيقولك:-
-"لا إنتِ على نياتك ما بتعرفيش تاخدي حقك "
-" لا أنا ماحبش جوزي يتخانق كده في الشَّارع"..
- هو كده مش ممكن يحكيلك حاجة و هيعمل حساب كل كلمة هيقولها ليك 🤐


ـ لو عايزة تعرفي أخلاقه..بيعمل إيه لمَّا يتنرفز؟..بيكظم غيظ أو لأ.؟.
- اعزميه يتفرج على ماتش كرة عندكم وراقبيه..
- شوفيه بيشجع ازاي ؟
- بيشجع بأدب وأخلاق
- و لَّا بيشتم..ولمَّا بيفرح و فريقه يكسب بيعمل إيه؟ بيهلل ولَّا بيرقص و لو خسر بيعمل إيه؟
- اللي بيشتم عمَّال على بطال ده يبقى عنده دين ؟؟🤔

ـ لو هو دايمًا في كلامه بيجيب سيرة النَّاس و بيسخر منهم و بيتكلم على النَّاس وحش..فين الدِّين هنا ؟؟
ـ لو إنتِ بينتِ إنِّك مش عاجبك هيمثل عليكِ و يقول:-
" استغفر اللَّه..أنا عارف إنِّك مش بتحبي كده و يبقى حريص معاكِ"..
ـ إنتِ غيري الموضوع و خلاص..

ـ قال عنده شقة ملكه و بعدين نكتشف إنَّها شقة ورثة مش ملكه..يعني كذَّاب..
🛑 اوعي تتجوِّزي كذَّاب ..

ـ واوعي تقولي:-
" ما أنا لازم أقول له الحاجات اللي مش عاجباني فيه علشان يغيرها"..🙃
ـ هو عاوز يتمم الزَّواج فهيمثل عليكِ لغاية ما تمضي و بعدين يقولك:-
" عاجبك ولَّا مش عاجبك 😟"
ـ و بعدين ترجعي تعيطي و تقولي:-
" اتغير و ما كانش كده 😥"..لا هو كان كده بس كان بيمثل عليكِ.." كل خاطب كاذب"..

# أنا باعرفك الحاجات دي مش علشان تسيبيه لمَّا تعرفيها.. لأ..لكن علشان تبقي عارفة الحقيقة و تحطيها في قائمة الإيجابيات و السلبيات اللي بتقيِّميه على أساسها..
ـ و تحطي في بالك برضو إنُّه إنتِ مش كاملة و لا خنساء هذا العصر..

ـ إنتِ قبل ما تقيِّميه على إنُّه بيغتاب النَّاس أو بيكذب أو بيشتم لازم تكوني إنتِ كمان مش بتعملي الكلام ده..مش كده ولَّا إيه ؟! 🌚..

#دكتورة_سوزان_علمتني

علامات تاخدي بالك منها .. تعرفي بيها خطيبك متدين بجد ولا بيمثل

★ ما بيسمعوش الكلام !!
----------------------
ـ الأمهات بتيجي تشتكي إن الأولاد ما بيسمعوش الكلام 😟
ـ ما بيسمعوش الكلام علشان إنتِ مش مصاحباهم 🫣 مش قال لك:-
" لاعبه سبع وأدِّبه سبع وصاحبه سبع ؟! "
صاحبيهم..

ـ بعد البلوغ ما فيش تربية ..التَّربية بتبقى حتَّى البلوغ اللي هو بين ١٢ أو ١٣ سنة..ده السِّن اللي ممكن تقولي فيه اعملي ده و اعملى كده 🗣️ ..
ـ لكن بعد البلوغ ما فيش أوامر..ما فيش تربية🙄 أمال فيه إيه؟ في مُصاحبة بس ..
ـ المُصاحبة دي عايزة خُلق و طُولة بال..
ـ يعني اللي إنتِ عاوزاه منها تاخديه منها بالمُصاحبة مش بالأوامر ..

ـ يعني لابسة بلوزة أنا عايزاها تغيَّرها..مش بالأوامر :-
" امشي روحي غيري البلوزة الحمراء و البسي البُنِّي "🙄..لا..
ـ تقوليلها:-
" حلوة أوي بس إيه رأيك لو تجربي البُنِّي يمكن تبقى أحلى"..😉

ـ ابنك داخل البيت مبسوط و بيصفَّر 🫠 ما تجيش إنتِ تقوليله:-
" بتصفَّر على إيه ؟ على خيبتك مش تروح تذاكر أحسن 🫣" ..ليه كده..
ـ صاحبيه قوليله:-
" يا سلام ربنا يبسطني زي ما إنتَ مبسوط "
كلمة حلوة كده..

ـ أو يكون نازل ..تصرخي فيه و تقوليله:-
" ما تتأخرش بعد السَّاعة ١٠ و إلَّا هاقفل الباب و خليك قاعد تحت " 😡
ـ لكن ممكن تقوليله:-
" إنتَ نازل حبيبي؟
ـ أيوه يا ماما..
ـ رايحين السينما ولَّا النَّادي؟
ـ لسه مش عارف يا ماما.
ـ طيب يا حبيبي حاول ما تتأخرش..
ـ هو كده ما قالش رايح فين..لكن لمَّا يرجع بقى..خُدى وادِّي معاه..اسأليه:-
-اتبسطُّتوا يا حبيبي؟
-الحمد للَّه يا ماما.
ـ رحتوا فين ؟..
-رحنا أكلنا سلطة في محل .
ـ و شبعتوا بالسَّلطة بس؟
ـ آه الحمدللَّه.
ـ و مين كان معاك ؟
-كريم وأحمد و سارة أخت أحمد مثلاً..🤔
ـ تليفونه رن.. "سارة" ..
تقوليله:-
-تليفونك رن ..
ما تعرفيهوش إنِّك شُفتِ الاسم..علشان يرجع يحكي معاكِ براحته...🤩

ـ في أمهات تانية بتحب تريح دماغها...تدخل البنت أوضتها و تتكلم في التليفون لغاية الفجر..و بعدين تشوف البنت عنيها تعبانة من العياط و لمَّا تسألها:-
"مالك؟"..
تقول لها :-
"مافيش حاجة...عندي حساسية في عيني..😶🙃
ـ تيجي الأم تقولك:-
"بلا هم أنا تعبانة و عايزة أريح دماغي"🙄..

ـ بعد كده ترجع تعيط لمَّا تكتشف إن البنت طلعت بتحب واحد😏 " اللي حب و لا طالش "..
ـ كنتِ فين إنتِ ؟ كنتِ فين من ده كله‼️ 😡 ..

# لازم تعرفي إن بعد البلوغ ما فيش تربية بالأوامر..في مُصاحبة بس.. و المُصاحبة عايزة من الأمهات "خُلق و طُولة بال"..

#دكتورة_سوزان_علمتني

الأمهات بتشتكيلي من ولادهم وبناتهم إنهم مش بيسمعو كلامهم .. ليه؟

*سلسلة يا دبلة الخطوبة *
(٧) ١- خطيبي والتَّدين.
--------------
إزاي أعرف إن خطيبي أو حتَّى زميلي أو زميلتي في الشُّغل مُتدينين؟
للأسف معظم الناس بتحكم إمَّا:-
-بالشَّكل أو المظهر العام.. لابسة حجاب تبقى مُتدينة.. مربِّي ذقنه يبقى مُتدين..
⬅️أيوه دي حاجات مهمة بس مش دي اللي أقيِّم بيها اللي قدامي..
أو
-بالعبادات....ده بيصلِّي وبيصوم..
⬅️هو إحنا إيه؟
مش إحنا مسلمين؟
يبقى أكيد بنصلِّي وبنصوم
فلمَّا واحدة تقولك عندي ليكِ عريس مُتدين وبيصلِّي وبيصوم، كإنَّها بتقولك بالظبط:-
ده نظيف أوي وبيغسل وشه كل يوم 😏😏

طيب أقيِّم دين خطيبي إزاي:-
١. قال رسُول اللَّه -صلَّى اللَّه عليه وسلَّم- :-
٢. "إنَّمَا بُعثْتُ لِأُتَمِمَ مَكَارِمَ الأَخْلَاق."
وبالتَّالي لازم تركزي في أخلاقه.
أخلاق=دين.
شوفيه بيعامل مامته وباباه إزاي؟
لمَّا بيزعل بيعمل إيه؟
لمَّا بيفرح، بيفرح إزاي؟
زمايله في الشُّغل بيقولوا عليه وعلى أخلاقه إيه؟

٢. عايزة تتأكِّدي إنُّه فعلاً بيصلِّي ولَّا بيقول كده بس أو بيصلِّي قدامك بس علشان عايز يتجوِّزك؟
بتعملي حاجة بسيطة جدًا، بتعزميه على الشَّاي عندكم قبل آذان المغرب بنص ساعة.. يعني مثلاً لو المغرب السَّاعة ٦، اعزميه على ٥:٣٠ ولمَّا المغرب يأذِّن، اوعي تقوليله:-
"تحب تصلِّي؟" أو تجيبيله سجادة صلاة من نفسك أو تقوليله:-
"عن إذنك هروح أصلِّي المغرب"⬅️ اوعي تعملي الحاجات دي..
طيب أعمل إيه؟
قوليله:-
"عن إذنك هقوم أجيب حاجة حلوة ناكلها أو هجيب عصير"
وقومي صلِّي المغرب إنتِ..
ممكن هو لو فعلاً مواظب على الصَّلاة هيقولك:-
"طيب ممكن سجادك صلاة علشان أصلِّي المغرب على ما تعملي الشَّاي؟"
أو لمَّا يسمع الآذان يقولك:- "هنزل بس أصلِّي المغرب في الزَّاوية اللي تحت وأطلع"..
أمَّا لو مش مواظب على الصَّلاة أو مش بيصلِّي، هيفضل قاعد يتكلم ومش هيفرق معاه لمَّا آذان العشاء يأذِّن..

#دكتورة_سوزان_علمتني

خطوات تعمليها عشان تعرفي خطيبك ده متدين ولا بيمثل عليكي

★ بتوضا في ساعة ★
------------------
ـ علاج الوسواس سهل جدًا و علمولنا رسُول اللَّهﷺ 🤍⬅️ إنِّنا نخالفه و نعمل العكس..

ـ ممكن تلاقي بنتك دخلت الحمام قعدت نص ساعة 🫤 بتعملي إيه يا بنتي كل ده..!!
"بتوضا" ..🥴
ـ أو دخلت أوضتها و قعدت نص ساعة أو ساعة إلَّا ربع تصلِّي 😶..إيه ده ؟!
"وسواس"..

ـ هو إيه اللي بيحصل معاها ؟
ـ لمَّا بتيجي تتوضأ.. تقعد تسأل نفسها (الوسواس):-
" أنا غسلت إيدي ولَّا لأ..اتمضمضت ولَّا لأ..غسلت رجلي ولَّا لأ..🫣"
ـ الوسواس بيشككها في كل حاجة فتقعد تعيد و تزيد ..
ـ أو في الصَّلاة تقعد تقول:- "دي الركعة الثالثة أو الرابعة 🤔 لا الثالثة 🫣 و تقعد ساعة إلَّا ربع بتعيد فى الثالثة "..

# الحل اللي علمه لنا رسُول اللَّهﷺ هو إنِّنا نعمل عكس ما يوسوس لنا ..
ـ يعني إيه ؟
ـ يعني لمَّا يجيلك في الوضوء يقولك : -
"ياترى غسلت إيدي ولَّا لأ...لو ما غسلتهاش كده صلاتي مش مقبولة " ⬅️ اوعي تعيدي الوضوء اعملي العكس و قولي لنفسك:-
" أنا غسلتها ". ..و ما تعيديش وضوءك..
ـ جالك في الصَّلاة " صليت ٣ أو ٤ ⬅️ مع إنِّنا اتعلمنا نبني على الأقل لكن في حالة إنِّك موسوسة خالفيه و قولي أنا صليت ٤ ركعات..

ـ كتير من الموسوسين بيبانوا بالذَّات في موضوع الصَّلاة و الوضوء ..
ـ تلاقيها لسة متوضية و تروح تعيد الوضوء 🙃 تقوليها :-
" يا بنتي إنتِ مش لسة متوضية معانا ..نقضتِ وضوءك يعني ؟ "..
ـ تقولك " لا ..أنا بتوضأ لكل صلاة".." ليه هو عندك عذر؟".." لأ..أحسن برضو..ده نور على نور " 🥴 ...

⚠️ الموضوع ده في منتهى الخطورة ..ليه ؟
ـ لإن الوسواس هيفضل يقنعك إنِّك تتوضي لكل صلاة..و طبعًا كلنا بيجيلنا وقت مش هنعرف نتوضأ.. غير متاح في المكان اللي احنا فيه مثلاً ..و وقت الصَّلاة دخل🫣
ـ و في الحالة دي(موسوسة) إنتِ مش هتصلي 😡"...
ـ كده الوسواس وصل للي هو عاوزه..😔

ـ الناس اللي بتقول: -
" الوسواس بيوسوس لنا علشان نعمل الذنوب معقولة يوسوس لنا علشان نحسن الوضوء و الصلاة" 🙃 ‼️
ـ طبعًا ممكن لإنُّه بيفضل يقنعك إنِّك تتوضي كل صلاة علشان فىيالآخر تكون النتيجة إنِّك مش هتصلي 😔

ـ و المريض اللي بيعاني من الوسواس.بيعاني في كل حاجة في حياته..
ـ يبجي وإنتِ واقفة مستنية الأوتوبيس رايحة شغلك يقولك :-
" يا ترى قفلت باب الشقة بالمفتاح ولَّا لأ "😵‍💫 قولي لنفسك:- " قفلتها".
" يا ترى قفلت البوتاجاز ولَّا لأ.." قولى لنفسك:-
" قفلتيه."
خالفيه واوعي ترجعي ❌.."
ـ "طيب كده الشقة هتتسرق".. سيبيها تتسرق .. "هتتحرق" سيبيها تتحرق..
ـ المهم إنتِ ما تمرضيش 👍

⚠️ كلامي للأمهات:-
" خلُّوا بالكم من ولادكم..لمَّا يقولوا لكم أتوضا لكل صلاة ..تاخدوا بالكم و تقوليلها:-
" لا يا حبيبتي طالما لم ينتقض وضوءك"..اكسري الموضوع ده عندها...
ـ و علموهم يخالفوا الوسواس، يعملوا عكس ما بيوسوس ليهم..

#دكتورة_سوزان_علمتني

★سلسلة يا دبلة الخطوبة:-
(٦) أهل خطيبي.
----------
ـ قال رسُول اللَّهﷺ :-
﴿ إذَا جَاءَكُم مَن تَرْضَون دِينَهُ وَخُلُقَهُ فَزَوِّجُوه﴾..
ـ هل معنى كده.. إن البنت اللي والدها أستاذ في الجامعة ووالدتها وكيل وزارة ينفع تتجوز من ابن السِّت اللي بتساعدهم في البيت ووالده بيشتغل ساعي بسيط حتى لو ابنهم ده مُتدين و بيحفظ قرآن🤔 ؟؟

ـ طبعًا لأ...ليه ؟ ⬅️ لإن مافيش كفاءة اجتماعية 🙃
ـ "مَن تَرْضَونَ دِينَهُ" ..فين ؟ ⬅️ في مستواكِ الاجتماعي..

ـ ⚠️أنا دائمًا باقول:-
" لو إنتِ بتاكلي على سُفرة خُدي واحد بياكل على سُفرة زيك..لو بتاكلي على طبلية خُدي واحد بياكل على طبلية زيك ما تاخديش واحد بياكل على سُفرة لإنُّه مش هينفع "..
ـ⚠️ الجواز يا ولاد مش واحد وواحدة..الجواز أسرة في أسرة ..عيلة في عيلة..

ـ علشان كده لازم تعرفي إذا الشَّخص اللي هيتقدملك ده مُناسب و في مستواكِ الاجتماعي ولَّا لأ ( قبل حتَّى ما ياخد فرصة يقولك أنا مُعجب بيكِ ) ..لازم يكون أهلك ينفع يوافقوا عليه..
ـ⚠️ واعرفي إن الجوازة اللي أهلك مش موافقين عليها لا يمكن ربنا يبارك فيها..و إياكِ تكسري قلب أهلك بالجواز..

ـ قال رسُول اللَّهﷺ:- ﴿ تَخَيَّرُوا لِنُطَفِكُم، فَانكِحُوا الأَكفاءَ، وَنَكِّحُوا إليْهم ( تَزَوَّجُوهُم وَتَزَوَّجُوا مِنهُم)﴾..
ـ الأكفاء..الكفاءة يعني ⬅️في كفاءة دينية و كفاءة اجتماعية وكفاءة ثقافية ..

ـ جاتلي بنت بتقولي:-
إن هيَّ بكالوريوس علوم متقدملها واحد ما بيعرفش يقرأ و يكتب ..🙃
ـ قلتلها:-
" ماما قالت إيه ؟"
ـ "قالتلي:-
اسألي الدكتورة سوزان وأنا هوافق على رأيها" ..
ـ قولتلها:-
" أنا مش موافقة"..
ـ قالت:-
" ماما كمان مش موافقة "..
ـ طبعًا ما ينفعش..ليه ؟
ـ لإن هنا ما فيش كفاءة ثقافية..الأفكار مختلفة تمامًا..هتتفاهموا ازاي..🤔
ـ و غير كده ..احنا عندنا الزَّواج في ديننا فيه حاجة اسمها " القوامة" ⬅️ يعني تبقى " الكلمة كلمته" ..
ـ وإنتِ مش ممكن هتخلِّي الكلمة كلمته إلَّا إذا "كان مالي عينك "..و ده مش هيحصل وإنتم أفكار مختلفة جدًا..

# " تَخَيَّرُوا لنُطَفِكُم "..
ـ النُّطفة هيَّ⬅️ الحيوان المنوي من الرجل و البُويضة من المرأة..( يعني اختار و شوف بتتجوِّز مين و بتجوِّز بنتك لمين )..

ـ حديث :- ﴿ قال رسُول اللَّهﷺ: "إيَّاكُم وَخَضْرَاء الدِّمَن"..
ـ قالوا:-
"وَمَا خَضْرَاءُ الدِّمَن يَا رسُولَ اللَّه "..
ـ قال:- " المَرأَةُ الحَسْنَاءُ فُي المَنْبَتِ السُّوء "﴾..
ـ حسناء يعني امرأة كويسةمش يعني حلوة في الشَّكل....
ـ يعني مثلاً البنت كويسة لكن أبوها تاجر مخدرات و والدتها في السجن 🫣..تنفع.. لأ ما تنفعش..

ـ جاتلي بنت بتحكيلي إن أخوها عايز يخطب بنت فنان كبير لكن مامتها رافضة علشان الوسط اللي فيه عيلتها وهو بيحبها أوي...

ـ أنا كنت أعرف البنت دي هيَّ مُلتزمة و كويسة ..قولتلها:-
" هيَّ البنت كويسة ادُّوها فرصة "...
ـ بعد كده قالتلي إن الموضوع ما نفعش..لإن عيلتها في أي اجتماع يحطُّوا خمرة و بيشربوا خمرة و بيرقصوا و كده ..
ـ هيَّ دي خضراء الدِّمن ..المرأة الحسناء في المنبت السُّوء...

# الكفاءة و المكانة الاجتماعية لا تعني بالضرورة الغنى و الفقر.. و يتم التَّعرف عليها عن طريق " الأبوين "...
ـ يعني مش بالحسابات في البنك ..و الغنى و الفقر..
ـ إنتِ ساعات تقابلي ناس على قدهم لكن أفاضل كده و بيعرفوا يتكلموا..و تلاقي السِّت طيبة مش متعلمة لكن ست أصيلة كده و تفهم في الأصول..
ـ و نقابل ناس تانية أغنياء لكن ما تعرفش تتفاهم معاهم خالص..آخر هرجلة و طريقة كلامهم مش كويسة..

ـ" يتم التَّعرف على الكفاءة الاجتماعية عن طريق الأبوين"..يعني ما ينفعش إنتِ اللي تحددي المكانة الاجتماعية ..لازم حد كبير.
ـ أو تقولي:-
" أنا مالي بأهله أنا هتجوِّزه هو " 🥴 لا ما ينفعش..

#دكتورة_سوزان_علمتني

لازم تركزي ان مستوى خطيبك الاجتماعي يكون متناسب مع مستوى عيلتك .  لا أعلى ولا أقل

★سلسلة يا دبلة الخطوبة :-
(٥)الخطوبة والأمراض النفسية .
-----------------------------------
ـ ينبغي مراعاة الحالة الصحية و النفسية للخطيبين..يعني إيه الكلام ده؟
ـ مهم جدا في فترة الخطوبة إن هيَّ تعرف إذا هو متزن ولا لأ ، و هو كمان يعرف اذا هى متزنة ولا لأ ..
ـ مبدئيًّا لازم تعرفي إن في فرق بين الأمراض العقلية و الأمراض النفسية..
ـ المرض العقلي ⬅️ دائم..مش بيخف ..بتلاقيه طول عمره يدخل المستشفى شوية و يخرج شوية ..قاعد ما بيشتغلش ..
ـ المرض النفسي ⬅️ بييجي على شكل نوبات تقعد عنده أسبوع ، ١٠ أيام ، شهر ، شهرين..و بعدين تختفي الأعراض تمامًا و يرجع واحد زي الفل..

ـ النوبة ممكن تتكرر كل شهرين ،كل ٦ شهور،كل سنة أو سنتين و ده بيكون على حسب الضغوط اللي بيتعرض لها..

ـ للأسف عندنا في مصر بيتعاملوا مع المرض النفسي كأنه جنون و مش بيعالجوه..

ـ أو تلاقي كتير من الأهالي بنتهم كانت حياتها ماشية عادي و فجأة مش عايزة تروح شغلها و موقفة حياتها
يقولوا:-
" أصلها زعلت جامد و اتخانقت مع أخوها بعدها قعدت ساكتة في أوضتها فقلنا تقعد في البيت ترتاح..أو أصل هي معمول لها عمل أو عليها عفريت 🥴"..دي حالات اكتئاب .."

ـ طيب و فيها إيه ما احنا كلنا عندنا اكتئاب قومي عادي يعني🥴 😁.."

ـ لأ الاكتئاب هو ⬅️ اللي يوقفلك حياتك و لا تروحي شغل و لا تشوفي ناس و لا تذاكري أو أم تسيب ولادها و مش عايزة تعمل لهم حاجة..ده اكتئاب لازم يتعالج..

ـ و ساعات بنشوف أهالي بتلجأ للشيوخ و بعد زيارات للشيخ بنلاقي الولد بقى كويس...
ـ دي حالات بسيطة و ربنا رفع عنه الابتلاء ..رايح جاي على الشيخ لغاية ما الحالة لوحدها راحت مش الشيخ اللي عالجه...و ده من جهل الناس...

ـ علشان كده فترة الخطوبة مهمة جدا..أنا ما بحبش الكروتة.. خصوصا للعرسان اللي بيكونوا جاهزين..أو بيشتغل بره و جاي عايز يتجوز بسرعة 😏
ـ و المصيبة الكبرى بقى اللي بيتجوزوا عن طريق النت..لإن المحادثات دي مش بتبين حاجة ..
ـ إنتِ لمَّا تسأليه سؤال لازم تشوفي تعبيرات وجهه علشان تعرفي إذا بيكذب أو لأ..
ـ و اوعي تقوليلي سكايب و شاشة و كاميرا و كلام من ده لإن هو قاعد جاهز للمقابلة و مستعد للتصوير...🫠 دي حاجة خطيرة جدا...

ـ يعني البنت بتبقى مخطوبة بالسنين و بتشوفه كل شوية و تقولك حاسة إني ماعرفهوش..فما بالك عن طريق النت🥴

ـ و للأسف أنا أعرف بنات في فترة الخطوبة كانت الفترة اللي فيها هو كويس و بعدين بعد ما اتجوزوا حصلت 😔
ـ و للأسف ساعات بتبقى أمه عارفة حالته و تقول:- "الجواز هيصلحه "..الجواز ما بيصلحش حد ...😔

#دكتورة_سوزان_علمتني

من أهم النقط اللي تركزي عليها في فترة الخطوبة . الاتزان النفسي

★ لازم تتعلِّمي.
---------------
ـ لازم تتعلِّمي دينك..
ـ زمان كان طلب العلم "سُنة" كنا بنقولكم اتعلموا يا أولاد علشان تعرفوا تصلُّوا صح و تتوضوا صح و هكذا..

ـ لكن دلوقتي طلب العلم أصبح "فرض عين " على كل واحدة فيكم ..عارفين ليه؟
ـ علشان ما حدش يضحك عليكم و يستعبطكم ..علشان ما تتجننيش كمان🥴

ـ علشان ما تجيش تقولى:-
" أنا رحت سألت الشيخ الفلاني فقال لى وضوءك صحيح لكن واحد تانى قال لى لازم أعيد الوضوء..كده صلاتي صحيحة ولَّا لأ..حجي صحيح ولَّا لأ 🥴و هكذا..

ـ زمان كانت النَّاس مش بتتعلم لكن الدُّنيا كانت ماشية معاهم كويسة..ليه؟..
ـ علشان ما كانش في البلبلة اللي حاصلة دلوقتي 🙃
ـ ماكانش في شيوخ بتفتي في الفضائيات و ناس بتفتي في كل مكان وفتاوى طالعة و فتاوى نازلة....
ـ وللأسف دلوقتي نتيجة لكده بنشوف ناس بتبعد عن الدِّين خالص😔
ـ تقول له:-
" يا ابني صلِّي".. يرد يقولك:-
" عايزنى أصلِّي علشان أبقى زي الشيخ الفلاني..يا عم ده كل واحد فيهم بيقول حاجة..واحد يقولك أيوة و التَّاني يقول لأ..دول مش متفقين على حاجة..يا عم دين إيه..يلَّا "..😔

ـ أنا مش طالبة منك تاخدي أصول فقه او علوم شريعة ..
ـ أنا بس طالبة منك على الأقل تسقطي الفرض اللي عليكِ...
ـ تبقي عارفة ازاي تتوضي، تبقي عارفة إمتى تغتسلي و إمتى لأ ، تبقي عارفة الفرق بين الحيض و الاستحاضة، تبقي عارفة إمتى الحيض عندك بيبتدي و إمتى ينتهي...

ـ إنتوا ما بتعرفوش علشان واخدنها سماعي " أنا سمعت كده " ..ازاي كده ..ده ما ينفعش...

#دكتورة_سوزان_علمتني.

فيه أساسيات في الدين لازم تتعلميها عشان متتجنيش بسبب كترة البلبلة اللي حوالينا

★ سلسلة دبلة الخطوبة:-
(٤) رؤية المخطوبة.
------------------
تعالوا الأول نفتكر شوية حاجات كده مهمة..
*أولاً:-
يعني إيه مسألة خِلافية؟
-يعني:
١. فيها أكثر من رأي.
٢. ⁠كل الآراء صح.
٣. ⁠باخد فيها بالأحوط.
٤. ⁠لا إنكار فيها (يعني ماينفعش آخد برأي وفي نفس الوقت أغلَّط النَّاس اللي بتاخد بالرأي الثاني)

*ثانياً:-
إزاي أختار الأحوط؟
بالنِّسبة للعوام (يعني مش العلماء) الأحوط هو إمَّا:
١. مذهب المُفتي للبلد اللي أنتِ فيها.
٢. ⁠ما فيه مصلحة.
٣. ⁠ما يفعله النَّاس.

*ثالثاً:- يعني إيه رأي الجمهور؟
-إحنا عندنا ٤ مذاهب ل ٤ أئمة وهي:-
١. مذهب الشَّافعية (الإمام الشَّافعي).
٢. ⁠مذهب الحنفية (الإمام أبو حنيفة).
٣. ⁠مذهب الحنابلة (الإمام أحمد بن حنبل).
٤. ⁠مذهب المالكية (الإمام مالك).

فلمَّا نقول عن مسألة مُعينة دي فيها إجماع⬅️ يعني الأربع مذاهب اتفقوا على نفس الرأي في هذه المسألة..
ولمَّا نقول:- "رأي الجمهور"⬅️ يعني اتفاق ٣ مذاهب من ال٤ على نفس الرَّأي..

طيب بالنِّسبة لموضوعنا النَّهارده وهو رؤية المخطوبة، يعني خلاص اتخطبنا أو قرأنا الفاتحة، أو حد رشَّح واحدة للواحد وعايز يشوفها الأول.
طيب يحق له يشوف إيه منِّي؟
⬅️دي مسألة خلافية..

عنِ المُغيرةِ بنِ شُعبةَ أنَّه خطب امرأةً فقال النَّبيُّ -صلَّى اللهُ عليهِ وسلَّمَ-:- "انظُرْ إليْهَا فَإنَّهُ أحْرَى أنْ يُؤدَمَ بَينَكُمَا.."
(يؤدم بينكما= يحصل المُوافقة والمُلائمة بينكما)
واختلف العلماء في "انظر إليها"، يا ترى الخاطب مسموح له ينظر لإيه؟
لا يحل للخاطب إلَّا الإطِّلاع على القدر المُباح به شرعًا ⬅️ القدْر المُباح به شرعًا هو ده اللي فيه اختلاف..
⬅️الجمهور:- لا ينظر الخاطب في المخطوبة إلَّا الوجه والكفين..
طيب ما أنا لو مش مُنتقبة هبقى مبينة كده كده الوجه والكفين..
ما هو الرجل الأجنبي عن المرأة (أجنبي يعني مش من المحارم) لازم يغض البصر، يعني لو بيتكلم مع المرأة لازم يغُض البصر.. يعني إيه؟ هل يكلمها ووشه في الأرض؟⬅️ لأ، بس مايكلمهاش إلا لضرورة زي الطبيب أو الموظف أو البائع… إلخ؛ ولمَّا يبُص في الحالات دي مايقعدش يتمعَّن في ملامحها ويركز في تفاصيل وشها.. هو ده غض البصر المقصود..
طيب الخاطب؟ لأ ممكن يركِّز شوية بس بأدب ومن غير ما يحرجها.. يعني مايبحلقش ولا يسبِّل زي ما بنقول بالعامية..
ولو مُنتقبة: يجوز ينظر لوجهها وكفيها مرة واحدة فقط..
⬅️الحنفية:- أجازوا النَّظر إلى القدمين أيضًا
⬅️ الحنابلة:- "يجوز أن ينظر الخطيب إلى ما يظهر من الخطوبة عند القيام بالأعمال وهي ٦ أعضاء (الرأس والوجه والرقبة واليدين والقدمين والساقين) لأن الحاجة داعية إلى ذلك"..
طيب هيشوف إزاي؟ (طريقة الرُؤية):-
⬅️ "إمَّا بالنَّظر المُباشر من الخاطب للمخطوبة إلى الوجه والكفين والقامة (يعني يشوفها مرة زي ما تقعد مع أبوها وأخواتها، يعني مثلاً تلبس حاجة تحت الركبة وتبين شعرها مرة واحدة فقط)
وفي رأي تاني بيقولك لأ، مع الأيام دي مع خربان الذمم، واحد ييجي مرة واتنين وتلاتة وبعدين يقول لأ مش هكمِّل، فمش كل ما واحد هييجي يتقدم هتقعد قدامه مرة من غير حجاب.
فقالوا:-
إن الأحسن الخاطب يبعت حد من أهله زي أمه أو أخته يشوفوا العروسة من غير حجاب..
ومش بتيجي صريحة كده.. يعني مش هيقولها ماما هتيجي بكرة علشان تشوفك من غير حجاب.. لأ..
بتلاقي مامته مثلاً بعد قراءة الفاتحة تكلم مامتك وتقولها:-
"ممكن آجي أشرب معاكِ القهوة بكرة الصبح؟" ⬅️فخلاص كده مامت العروسة بتفهم تلقائيًّا إن مامت العريس جاية تشوف بنتها من غير حجاب..

الحاجات دي بتفرق أوي..
يعني لما الخطيب ييجي يقولك عايز أشوف شعرك ⬅️حاجة، ولما مامته تتصل بشياكة تقول عايزين نيجي نزوركم بكرة نشرب الشاي ⬅️حاجة تانية خالص.. وبتبيِّن الدين والتربية والأخلاق بتاعت الشخص ده وعائلته..

#دكتورة_سوزان_علمتني

ايه الحاجات اللي ممكن يشوفها الخاطب من المخطوبة في الحدود الشرعية؟

★ سلسلة دبلة الخطوبة:
(٣)خطيبتي مُتدينة..
------------------
ـ ما هي مُقومات الخِطبة في الدِّين بالنِّسبة للمرأة ( يعني عاوز أخطب واحدة اختارها على أي أساس) ؟ :- ..
ـ قال لنا رسُول اللَّهﷺ (حديث)⬅️ : ﴿ تُنْكَحُ المَرْأَةُ لِأَرْبَع.. إمَّا لمَالِهَا أو لِحَسَبِهَا (عيلتها) أو لِجَمَالِهَا أو لِدِينِهَا..فَاظفَرْ( اكسب) بِذَاتِ الدِّينِ تَرِبَتْ يَدَاك﴾..
ـ تَربَت يداك يعني ⬅️ إن لم تفعل ستُعاني الفقر (في يديك تراب)..
ـ يبقى بالنِّسبة للمرأة رسُول اللَّهﷺ قال نختار ذات الدِّين..

ـ طيب ما هيَّ مُقومات الخِطبة بالنِّسبة للرجل ؟
ـ قال رسُول اللَّهﷺ:-
(حديث)⬅️﴿ إذَا جَاءَكُم مَنْ تَرْضَونَ دِينَهُ وَ أمَانَتَهُ فَزَوِّجُوه ..إلَّا تَفْعَلُوا تَكُنْ فِتْنَة فِي الأَرْضِ وَفَسَاد كَبِيْر﴾..و في رواية أخرى ﴿ مَنْ تَرْضَونَ دِينَهُ وَخُلُقَهُ فَزَوِّجُوه﴾...
ـ في واحد راح لحسن البصرى (من التَّابعين) و سأله أجوز بنتي لمين؟ قال له:-
يجوِّزها للي عنده دين..ليه ؟
ـ علشان إذا أحبها أكرمها و إن كرهها لم يظلمها..
ـ يعني بالنِّسبة للرجل..الدِّين و الأمانة والخُلق..

#و في حاجات لازم تاخدي بالك منها في الخاطب لإن مش كل من كان مظهره التَّدين هو فعلاً مُتدين..
ـ يعنى مثلاً إنُّه( الخاطب) يكون عنده رحمة ( حنين).. لإن الدِّين رحمة و القسوة مش من الدِّين ..يعني لازم يكون عنده رحمة من باب الدِّين و تدينه مش بس علشان بيحبك..
ـ ساعات بنشوف ناس في مظهرها مُتدينة لكن مع أهل بيته قاسي..ده مش من الدِّين.
ـ وإنتِ هتعرفي ده من كلامه معاكِ لإنِّنا اتفقنا إنُّه يطمِّنلك فيحكيلك على طبيعته ..

ـ يعني لو جه يقولك إنُّه كان لازم يودِّي مامته للدكتور و أجل الميعاد علشانك 😏 ما تفرحيش أوي🥴 و تقولي بيحبني أكتر من مامته🤨
# و اعرفي كويس:-
"إن اللي يبيع أهله علشانك هيبيعك في أول سوق كانتو هيقابله "🫣

ـ كمان لازم تعرفي تتعاملي ازاي مع أهله ..
ـ يعني زعلتِ من مامته، قالتلك كلمة ما عجبتكيش ، تروحي تشتكيله هو ليه؟ هيعمل إيه ؟ يروح يتخانق مع مامته يعني ؟يمكن هيَّ ست كبيرة و عصبية..
ـ المشكلة عندك إنتِ ..إنتِ اللي لازم تعرفي تكسبي أهله و تعرفي ازاي تتعاملي معاهم ..

ـ لازم تعرفي تتعاملي مع كل النَّاس و تكسبيهم .. العاقل و المجنون، المتربِّي واللي مش متربِّي ( و تحطي حتَّى لو كان قرد في جيبك)..

#دكتورة_سوزان_علمتني

ازاي اعرف إن خطيبي أو خطيبتي متدين؟؟؟

★ وقت المُصيبة..
--------------
ـ عند حدوث الابتلاء من فقد عزيز أو فلوس ضاعت أو حتى ابتلاء في علاقات اجتماعية أي حاجة تعكنن عليكِ.. وقتها لو قلتِ:-
" ليه ؟ " تُبقي " ضعتِ " 🫣🫢

ـ علشان كده باعلمك عند حُدوث الابتلاء و خصوصًا لمَّا يبقى الابتلاء صعب 😥 إنِّك تدعي ربنا و تقوليله:-
" يارب قوِّيني "..🤲🏻 علشان ما تغلطيش مش بس علشان تتحملي الابتلاء..
ـ ﴿ لَا يُؤَاخِذُكُم اللَّهُ بِدَمعِ العَيْنِ أو بِحُزنِ القَلبِ وَلَكِن يُؤَاخِذُكُم بِهَذَا 👅( اللسَان)﴾
ـ فإنتِ إذا أصابكِ حزن عندك حاجتين مسموح تعمليهم ⬅️ ابكي زي ما إنتِ عايزة بعينيكِ 😭 و احزني زي ما إنتِ عاوزة بقلبك 💔 لكن ما تنطقيش بما يُغضب اللَّه..ممنوع..

ـ علشان كده أنا عاوزاكوا حديد 💪 لإن التُّقل جاي ..و الابتلاءات جاية.. و الفتن جاية..الدُّنيا مش بمبي 🩷😏

ـ رسُول اللَّهﷺ علِّمنا و قال لنا إن الدُّنيا دي دار امتحان .. دار ابتلاء ..دار بلاء..الدُّنيا دي مافيش فيها راحة..

#دكتورة_سوزان_علمتني

دايما بقول للي بيحضروا عندي "عاوزاكوا حديد .. عشان لسه التقيل جاي ورا" جملة لازم تحفظوها في وقت الابتلاء

★سلسلة"يا دبلة الخطوبة"
(٢) معرفة الطِّباع
------------
ـ الحكمة من الخطوبة ⬅️ أن يتعرف كل طرف على أخلاق و طباع و ميول الطَّرف الآخر " بالقدر المسموح به شرعًا " ليطمئن إلى أنَّه يمكنه "التَّعايش بسلام وآمان مع الطَّرف الآخر 🤓"..

ـ بنشوف بنات قاعدة لخطيبها على الواحدة..فتيجي تقول له:-
"أنا مش باحب تتكلم مع بنات كتير"..أو " لازم تصلِّي وحياتي صلِّي 🙏😊"..
ـ و هو يقول لها:- حاضر🫡..اوعي تصدقي😏🤥
ـ هو بيقولك كده علشان عايزك تمضي و تكملي لإنُّه متقدملك و بيحبك و شايف إنِّك مناسبة له..لكن أول ما تمضي هيرجع لطبيعته على طول..

ـ إنتِ دورك في الخطوبة إنِّك تعرفيه على حقيقته ..ازاي ؟🤔
ـ إنِّك تخلِّيه يطَّمنلك فيبقى على طبيعته معاكِ..بإنِّك ما تنتقديش اللي هوَّ بيعمله حتى لو هوَّ بينتقدك..( علشان لو كل شوية تقوليله:-
"ما تعملش كده" ....هيبتدي يمثِّل عليكِ و تتفاجئي بحقيقته بعدين )..

ـ لمَّا ييجي يحكيلك مثلاً إنُّه كان مع أصحابه و اتعرَّف على بنات و شربوا سجائر(دخنوا) 🙄 هيكون ردِّك ايه ؟
ـ طبعًا ما ينفعش تقوليله:-
" كده غلط وأصحابك ما تعرفهمش تاني 😡" لإنُّه كده مش هيكون أبدًا على طبيعته معاكِ.
ـ و كمان ما ينفعش تمدحيه و تقوليله:-
" ما شاء اللَّه" ..مثلاً 🫣..قوليله:-
" سُبحان اللَّه ساعات الواحد بيتدبس في حاجات كده يعني "..😏 ..
ـ إنتِ كده فهمتِ وعرفتِ موقفه من البنات و من التَّدخين..

ـ ييجي يحكيلك:-
" أنا اتخانقت مع واحد كسر عليَّا في الطَّريق قلتله:- تعالى يا ابن كذا و كذا و ضربته بوكس بهدلته 🙄.. "إيه ده إنتَ بتشتم" طبعًا ما تقوليش كده ..
ـ لكن إنتِ كده عرفتِ إنُّه بيشتم و بيتخانق و يضرب..

ـ عايزة أعرف بيصلِّي أو لا..الكلام ده ما يكونش بالسُّؤال المُباشر..
ـ لمَّا ييجي يحكيلك إنُّه بعد الفطار في رمضان بيقعد يتابع المسلسلات و يقولك:- "بعد الفطار الواحد ما بيقدرش يتحرك" 🙄يبقى ده ينفع تسأليه على التَّراويح 🤨..

ـ الشَّطارة إنِّك تعرفي تكسبي ثقته و ده بإنِّك تبيِّني له إنِّك عاملة له حساب.. ازاي؟ بإنِّك تهتمي ببعض التَّفاصيل الصغيرة ..
ـ مثلاً..عرفتِ إنُّه بيحب الشَّاي بالنعناع تحرصي إنِّك تقدميله نعناع مع الشَّاي هيقدر لك هو ده..
ـ جالك و قعد عندكم تسأليه " افتحلك الشِّباك ولَّا التَّكييف"..بيكح شوية " إيه ده إنتَ أخدت برد ولَّا إيه 🥴"..

🔆 هو كده يطمِّنلك وإنتِ تركزي و تعدِّي العيوب و المميزات اللي عنده و يظهرلك على حقيقته..

#دكتورة_سوزان_علمتني

من الحاجات المهمة أثناء فترة التعارف في الخطوبة، التأكد إنه يمكن العيش بسلام وطمأنينة بعد الزواج

سلسلة عايزة أتجوِّز
"يا دبلة الخطوبة":-
(١) الخطوبة ليه؟
--------------------------
ـ الإسلام لا يمكن يخلِّي واحد يروح يتجوِّز واحدة (على مشمهم كده خبط لزق ) من غير ما يعرفوا بعض ..

ـ الإسلام لازم يديهم فرصة هيَّ تعرفه و هوَّ يعرفها.. و مش بس كده.. لازم كمان هيَّ تطمِّن إن هو ده اللي هتقدر تعيش معاه..و هوَّ يطمِّن إن هيَّ دي اللي هتريَّحه..☺️😊

ـ طيب الكلام ده يتم ازاي ؟ ⬅️ عن طريق " الخطوبة"..
ـ الخطوبة دي يعني إن في موضوع زواج ممكن يتم و ممكن لأ..
ـ علشان كده الإسلام قال:- "تتم في أضيق الحدود" ..و ده عكس اللي بيحصل دلوقتي 🙄
ـ النَّاس دلوقتي بتعمل خطوبة كبيرة زي الفرح 🫤 و بعدين البنت تلاقي فترة الخطوبة كلها خناقات و مع ذلك الأب يقول:-
" ما ينفعش نفسخ الخطوبة ..ما هو مش بعد كل اللي عملناه 😠"..
ـ و في حالة تانية تلاقي الأم تقولك:-
" أصل الخطوبة عندنا زواج "..فبالتَّالي تسمح لبنتها تخرج مع الشَّاب لغاية ما يعرفوا بعض كويس و بعدين يتخطبوا 🫤 ينفع كده ؟ ده حلال ولَّا حرام ؟‼️
ـ الكلام ده عندك إنتِ مش في الدِّين . .

ـ لازم نحط موضوع الخطوبة في إطاره الشَّرعي و نعرف دوره إيه ..

ـ⚠️ في الدِّين "الخطوبة مش معناها زواج" ..علشان كده بأقول للأمهات طمنوا ولادكم..
ـ قوليلها:-
"حبيبتي احنا هنلبس دبل بس علشان النَّاس ..لإنُّه هيبقى داخل خارج علينا و تاخدي إنتِ كمان فرصة تعرفيه "..

ـ الخِطبة هيَّ ⬅️ إظهار الرَّغبة في الزَّواج من امرأة مُعينة "وإخبار وليِّها بذلك"
و قد يتم الإعلان من الخاطب مباشرة أو بواسطة أهله ..

ـ بيقولك:-
"وإخبار وليِّها "..يعني أهلها لازم يعرفوا..مايجيش واحد يضحك على البنت و يخرج معاها من ورا أهلها و يقولها:-
" ما احنا بنخرج نتعرَّف على بعض كإنِّنا مخطوبين 😠..!!"

ـ الحكمة من الخطوبة ⬅️ أن يتعرف كل طرف على أخلاق و طباع و ميول الطَّرف الآخر..
ـ يعني أركز علشان أعرف بيحب إيه..بيكره إيه..إيه اللي بينرفزه..إيه اللي بيبسطه..
ـ بس أعرف الحاجات دي مش علشان أغيرها للحاجات اللي أنا بحبها..لا..علشان تتعودي عليها..لإن مافيش حد بيتغير..حتى لو قالك هيتغير علشانك .. 🥴
ـ يعني مش بيصلِّي و يقولك:-
- هصلِّي علشان خاطرك..
"ما تصدقيش"...ونفس الكلام بالنِّسبة للبنت لو قالت إنَّها مش هتعمل حاجة علشان خاطرك..
"ما تصدقش "..

ـ " كل خاطب كاذب"..اوعي تفتكري إنُّه علشان كل شوية يتصل بيكِ في فترة الخطوبة و كلام حلو و كده إن ده هيستمر بعد الجواز ..ما تجيش تقولي اتغير بعد الزَّواج لإن هو ده الطبيعي😁..

#دكتورة_سوزان_علمتني