1 апта – кемі 1 кітап 📚

19. Тахауи ақидасының шархы (А. Бәбирти, аударған С. Шакизада)

• Діни
• 208 бет
• 📈
• 09.12.2024

Сахих хадистерде “Менің үмметім 73 ағымға бөлінеді — біреуінен басқасы тозақта” делінген. Ол дегеніміз пайғамбар (с.а.у) және сахабаларының жолын ұстанғандар, яғни әһлі сунна уәл-жәмаға ғана жәннатқа кіреді екен. Тура жолдан тайып кетпес үшін шама-шарқымыз жеткенше Аллаһты дұрыс танып-білуіміз қажет. Ең бастысы, ақидамыз (сеніміміз) дұрыс болуы керек. Имам Әбу Жағфар Тахауи ақидасымен жүретін болсақ, адаспайтынымыз ислам ғұламалары арасында бір ауыздан келісілген.

Ұсынылып отырған кітап имам Тахауидің "Ақида әл-Тахауия" түсініктемесінің аудармасы. Оқу барысында Тахауи сеніміндегі барлық мәселелер Құран және хадиспен, логикалық дәлелдермен бекітілгеніне куә боламыз. Түсінікті және өте жақсы аударылған екен. Жарыққа шыққанына енді 1 ай болыпты. Дініміздегі қиын болып көрінген, талас-тартыс тудыратын мәселелер жеңіл ашылған. Сіз бен біз секілді қарапайым оқырман да түйсініп, ұға алады.

Шархты оқып отырып, менде бір ғана сұрақ туындады. Әлмисақта Аллаһ тағала “Мен сендердің Раббыларың емеспін бе?” дегеніне біз “Иә, әрине. Сен біздің Раббымызсың” деп куәлік еттік. Болды. Табиғат ағайдың “әлмисақта әр адамға тағдыры көрсетіліп, кейін жадынан шығарылады” дейтіні жайлы ештеңе жазылмапты…

“Бұл кітапты кім және не үшін оқу керек?” деген сауалға Тахауи мәтінінің түсіндірмесін қазақ тіліне аударып, оқырманға тарту еткен Сырым Шакизада бауырымыздан артық ешкім жауап бере алмас:

————————————————————

«Шын мәнінде ең абыройлы да ардақты, саналы жаратылыс адам үшін усул әд-дин, яғни дін негіздері аса қажетті әрі өте маңызды білім саласы. Себебі мұнда әрбір ғылымның өзегі әрі барлық бақыттың қайнар көзі саналатын Алланы тану мәселесі қозғалған. Жын мен адамзат осы үшін жаратылған. Құрандағы «Мен жындар мен адамзатты тек қана Маған құлшылық етсін деп жараттым» [51:56] деген аятты сахаба, тәржуман әл-Құран атанған ибн Аббас «Мені танып, білу үшін жараттым» деп тәпсірлейді. Бір бәдәуи араб сұрап келген кезде, пайғамбар ﷺ Оны, яғни Алланы тануды «ілімнің бастауы, өзегі» деп атаған. «Маған ілімнің көпшілік біле бермейтін сырларын үйретші», – деген бір кісінің өтінішіне Пайғамбар ﷺ одан ілімнің негізін сұрайды. Ол кісі: «Ілімнің негізі, бастауы не?», – деп сұраған сәтте, Алла елшісі ﷺ: «(Барлық) ілімнің бастауы – Алланы тану», – деп жауап береді.
⠀
Ілімнің қадір-қасиеті ондағы зерттелетін тақырыпқа байланысты. Алла Тағала күллі жаратылыс атаулыдан мәртебесі мен дәрежесі жоғары, ұлы болғандықтан, сәйкесінше Ол жайында терең білім алу, үйрену де өте маңызды әрі құрмет пен мақтау мадаққа ең лайықты ілім саналады. Бұл ілімді үйренбей, Алланы танымай ақыретте азаптан құтылуға яки биік дәрежелерге жетуге ешбір мүмкіндік жоқ.
⠀
Нұр-Мүбарак университеті жанындағы Әбу Ханифа ғылыми-зерттеу орталығында дайындалған жаңа туындыда Әбу Жағфар ат-Тахауидың сенім мәселелеріне қатысты жазған мәтіндері талданады. Көпшілік мұсылман жұртшылығына белгілі болған бұл мәтінге қаншама ғасырлар бойы ислам ғалымдары тарапынан түсіндірмелер жазылып жатыр. Еңбекте ханафилік ғұлама Әкмәлуддин әл-Бәбиртидің түсініктемесі негізге алынып, қазақ тілінде ұсынылып отыр. Кітап дін мамандарына, докторанттар мен магистранттарға, студенттерге және ақида мәселелеріне қызыққан оқырманға арналған.
⠀
P.S Сіздер оқып шаршамасаңыздар, біз жазып шаршамаймыз»

————————————————————

18. Старик и море (Э. Хемингуэй)
⠀
• Повесть
• Бет: 96
• Баға: 8.5/10
• Дата: 04.12.2023
⠀
1 ай үзілістен кейін оралуым, челленджді қайта қолға алуым үшін оқуға жеңіл әрі қысқа туынды іздедім. Таңдауым американдық танымал жазушы Э. Хемингуэйдің 1952 жылы жарық көрген “Старик и море” повестіне түсті. Біраздан бері “оқу керек еді” деп жүрген кітабым. Алланың қалауымен екі-үш сағатта бас көтермей оқып тастадым. Қызық факт: автор Э. Хемингуэй осы еңбегі үшін 1954 жылы Нобель сыйлығының лауреаты атаныпты. Яғни, “Старик и море” шығармасы оны әлемге әйгілі еткен екен.
⠀
Кітапта, аты айтып тұрғандай, Сантьяго есімді балықшы қария өмірінің бір бөлшегі көркем түрде баян етіледі. Әсіресе, қармағына іліккен ең үлкен балықпен бірнеше күн алысқаны керемет сипатталады. Көп спойлер жазбаймын. Балықшы атамыз жеңіске жете ме әлде балығы құтылып, сәтсіздікке ұшырай ма, қазірге құпия бола тұрсын. Әркім өзі оқып, ғажап сценарийге куә болар деп үміттенемін.
⠀
Хемингуэй өз еңбегі жайлы “Мен шынайы қарияны, шынайы балақайды, шынайы теңіз бен шынайы балықтарды көрсетуге тырыстым” дейді. Расымен, кейіпкерлердің сезімдері мен уайым-қайғыларын тереңінен аша біліпті. Оқу барысында түрлі эмоцияларды бастан кештім. Сезіне алдым. Қайсар балықшыға сүйсіндім, жанкүйер болдым, сосын балаша қуандым, сосын сары уайымға салындым…
⠀
Көптің көңілінен шыққан бұл туындыда тәрбиелік мән де бар. Кейіпкердің табандылығы мен өзін-өзі бағалауы және немересіндей балақаймен достық қарым-қатынасы көпке өнеге һәм үлгі аларлық екен. Сәтсіздіктерге берілмеуі, сүйікті ісімен айналысуы, жақсылықтан үміт үзбеуі жанашыр оқырманды бей-жай қалдырмайды. Ер жігітке ауадай қажет осы мақтан тұтарлық құндылықтар оқушыға шабыт беріп, санасын сілкіндіре алады деп ойлаймын. Жеке маған позитивті әсер етті.
⠀
Оқуға ұсынам ба?!
⠀
Әлбетте, барша оқырман қауымға қуана ұсынамын. Жас жағынан шектеу жоқ. Неғұрлым ерте оқысаңыз, өзіңізге пайдалы. Балықшы қарттың ойы мен әңгімелерінде ғибрат бар, өмірлік сабақ алуға болады.
⠀
P. S
⠀
Желтоқсанның 4-не оқып бітіргем, рецензия кеш шығып жатыр. Айып етпеңіздер :)

Рецензия шықпаған мерзім 1 айға жуықтапты. Күтіп жүргендер бар ма?!

Жобаның тоқтап қалуына басты себеп (сылтау) – сырқаттанып, ауруханаға түскем. Содан бері дұрыстап кітап оқи алмадым. Денсаулығың сыр берсе, ештеңе қызық болмайды екен. Жеке өмірімде де ауыр сынақтар орын алып, жаңғақтай шашылып қалдым…

Жалпы, челленджді қайта қолға алғым келеді. Мотивация берем десеңіз, мархабат 🫂🤍

Сәлем! Жын-шайтандар жайлы кітап бар ма жалпы?!

1 апта – кемі 1 кітап 📚 pinned «Жоба аясында оқылған кітаптар тізімі: 1. Әлемді 80 күнде шарлау – 9/10 (Ж. Верн) 2. Игрок – 8/10 (Ф. Достоевский) 3. Тысяча сияющих солнц – 9/10 (Х. Хоссейни) 4. Тәуекел (А. Кенжалы) 5. Мүмкіндік (А. Орақбаев) 6. Шерлоктың басынан кешкендері – 9.5/10 (А.К.…»

17. Өлгендер қайтіп келмейді (Б. Соқпақбаев)

• Роман
• Бет: 352
• Баға: 6/10
• Дата: 05.11.2023

“Өлгендер қайтіп келмейді” кітабы – балалар мен көптеген жасөспірімдердің сүйікті жазушысы, “Менің атым Қожа”, “Балалық шаққа саяхат” сынды керемет туындылар авторы Бердібек Ыдырысұлы Соқпақбаевтың көрнекті еңбектерінің бірі. Соғыс және одан кейінгі қиын-қыстау, таршылық заманмен қабаттас келген бір жігіттің өмірбаяны іспеттес. Үш бөлімнен тұратын романда автор оқырманды бас кейіпкермен 14-15 жасар бозбала шағында таныстырып, 20 жылдай соның және жақындарының басынан кешкендері мен тіршілігін көркем суреттейді.

Шығармаға берген төмен (6/10) бағамды байқаған боларсыз. Көптің көңілінен шыққан бұл кітап маған онша өтпеді. Оқуға тілі жеңіл, бірақ екінші бөлімнен соңына дейін өзімді қинап оқыдым. Сюжетінің қызығы аз, Еркін есімді қарадомалақ ауыл баласының өмірі мен есейуі баяндалған екен. Оның мінезі, әрекеті мен шешімдері балаларға өнеге деп айта алмаймын. Әсіресе жасөспірімдерге пайдасынан зияны.

Иә, ол отбасына қамқор, батыл, табанды және өте намысшыл жігіт. Алайда тағдыр тәлкегіне ұшырайтын сын сағаттарда тез беріліп, нәпсіден оңай жеңіледі. Мәселен, ұнататын құдашасы басқа жігітпен жүріп кетсе, өзіне қол жұмсағысы келеді. Қажет емес сәтте қырсықтық танытып, қызба мінезінен үнемі опық жейді. Ойланбастан кереғар әрекеттерге көп барады. Ең сорақысы, өзіне біршама жақсылығы өткен кісінің тоқалына есі ауып, қойнына жатып шығады. Әйелі бола тұра, күйеуі бар туған құдашасын зинаға шақырады. Құдашасы қарсы болғанда мінез көрсетіп, қонаққа келген үйінен қоштаспай, “ренжіп” шығып кетеді…

Қан қысымым көтеріліп, кітаптың ортасынан жауып қоймауыма “6 апта – 6 кітап” марафон аясындағы жауапкершілігім сеп болды. Соңына дейін оқып, сюжетінен толық хабардар болып, талқылауға қатысу мен рецензия жазу міндетім еді. Сондықтан өзім қаламасам да, үйтіп-бүйтіп романды 4 күнде тәмамдадым.

Ұнаған әсерлі тұстары жоқ емес, аз да болса, тілге тиек еткен жөн. Автор балалар жазушысы болғандықтан, кітап тілі түсінікті, алғашқы бөлімін зудыратып жеңіл оқыдым. Сөйлемдері қысқа әрі нұсқа. Кейіпкердің балалық шағына керемет саяхат жасадым. Жартысынан кейін жалығып, Еркіннің ересек өмірінен артық ақпараттар көбейіп, роман созылып кеткенін түсіне бастадым.

Дегенмен Еркіннің бірбеткей мінезіндегі кейбір жері ұнамды. Қорған ауылында мұғалімдік еткен жылы әділдікті арқау қылып, директор мен өзге меңгерушілерге “қырсығуы” мақтауға лайық әрекет. Қырқынан шықпаған нәрестесі мен қызылшамен ауырған қызының өмірден озуы – эмоция тұрғысынан маған ерекше әсер етіп, денем түршігіп кеткен сәт.

Бұл кітапты балаларға емес, бұрын кітап оқып көрмеген ересек адамдарға ғана оқуға кеңес берер едім. Жоғарыда айтқанымдай, романды оқыған оң мен солын айыра алмайтын жасөспірімдерде теріс түсінік қалыптасуы мүмкін. “Нағыз өмір туралы кітап” деп сипаттапты бір оқырманым, білмеймін, менің түсінігімдегі “нағыз өмір” өзгеше…


Ал сізге бұл роман ұнады ма?! Несімен ұна(ма)ды? Оқуға кеңес бересіз бе?

16. Собака Баскервилей (А. К. Дойл)

• Детектив, криминал
• Бет: 232
• Баға: 9.5/10

Есіңізде болса, “Записки о Ш. Х” топтамасының соңында атақты ізкесуші залым Мориартимен бетпе-бет келіп, автор сол кітабын “Шерлок із-түзсіз жоғалып, өлді” деп бітіргендей еді. Содан кейінгі туынды осы. Шерлок Холмс қалай тірі қалғаны оқырман үшін беймәлім әрі қызық, “осы кітапта айтар” деп күткем, бекер екен. Бұнда Мориартимен болған қақтығыс туралы ештеңе жазылмапты. Хикая Ш. Х мен дәрігер Ватсон екеуі Бейкер стриттегі үйде отырған жерінен басталып кетеді. Бәлкім, Шерлоктың сарқырама жанынан жоғалып, қалай аман қалғаны турасында келесі “Возвращение Ш. Х” топтамасында баян етілетін шығар. Соған үміттімін мен :)

“Собака Баскервилей” повесі – көрнекті ағылшын жазушысы Артур Конан Дойлдың танымал тыңшы Шерлок Холмс пен дәрігер Ватсон жайлы жазған ең әйгілі еңбегі. 1902 жылы жарық көрген және бұл кітап желісімен бірнеше елде фильмдер түсірілген. “Топ детективті романдар” тізімінде алдыңғы қатардан ойып тұрын орын алады.

Кітап сюжетіне жұмбақ жағдайда қайтыс болған сэр Чарльз Баскервиль өлімін тергеу және батпақты мекен ететін алып, қара ит негізге алынады. Аңыз бойынша ақсүйек Баскервиль әулетін реті келсе нән ит тас-талқан етеді-міс. Чарльздің де о дүниеге аттануына сеп болған аңыздағы батпақ иті болуы бек мүмкін. Оны сүйікті тыңшымыз бен сенімді досы тергеу барысында анықтауға тырысады…

Сюжеті өте қызық, Камбербэтч ойнаған сериалдағы эпизодқа онша ұқсамайды. Мистикасы бар, бірден баурап алып, ойландырып әкетеді. Арты не болады екен деп, сарыла күтіп отырасыз. Бас алмай оқи бересіз, оқи бересіз. Басқа хикаялардағыдай емес, бұл жолы әскери-дәрігер Ватсонды іс жүзінде бағалайсыз. Себебі қылмыс болған жерге Шерлок алдымен жақын досын жібереді. Өзі басқа тірліктерін реттеген боп, сырттай бақылайды. Солай автор оны тасада ұстап, Ватсонды басты назарға алады. Ол Шерлок сияқты дедукцияның қас майталманы емес, баяу ойланады. Шешімдерін ширақ шығара алмайды. Көрегендігі мен байқампаздығы да орташа, өзіміз секілді қарапайым адам. Оның пайымдауы мен тұжырым шығару жылдамдығы жай адамдікіндей, демек, оқырман да өзін тергеуші сезіне алады…

Сіз де сезініп көріңіз, жас ерекшелігі жоқ, барша оқырман қауымға арналған кітап бұл. Детектив жанрына қызығушылық танытқандарға ойланбастан осы повесті ұсынар едім. Қазірше маған ең қатты ұнаған қылмыс әшкерелеу болды, авторға үлкен алғыс! Ыңғайы келсе, совет өкіметінің түсірген фильмін қарау керек, мақтап жатыр жұрт.


“Собака Баскервилей” повесін оқығансыз ба? Өтті ме?!


Дата: 01.11.2023


P.S осымен Шерлок туралы оқуды тоқтата тұрам 😉

15. Записки о Шерлоке Холмсе (сборник)

• Детектив
• Бет: 294
• Баға: 8.5/10

Ішіне әйгілі ізкесуші Шерлок Холмс және дәрігер Уотсон жайлы 11 әңгіме кірген “Записки о Ш. Х” атты топтаманы бітірдім. Осы апта оқыған үшінші кітабым. Артур Конан Дойлдың “Приключения Ш. Х”-тан кейінгі екінші кітап-топтамасы ғой. Барлық хикая ұнады дей алмаймын. Мысалы, “Обряд дома Месгрейвов” деген әңгіменің қызығынан шыжығы басым көрінді. Онша түсіне алмадым.

Хикаялардың хронологиясы сақталмағаны да аздап ыңғайсыздық тудырды. Алғаш әшкерелеген қылмыстық істерін есіне алып, Холмс өз аузымен Уотсонға айтып береді.

Дегенмен Шерлоктың жанкүйерлеріне бұл топтаманы оқу керек, себебі:
1. Бір ісінде данышпан Холмс болжау мен тұжырым жасауда қателеседі. Бақытына орай, ешкім зардап шекпейді.
2. Туған ағасы Майкрофт тұңғыш рет пайда болады. Холмстың айтуынша, ағасы өзінен өткен дарынды, көреген, қырағы екен. Бірақ өте жалқау, ешкімге пайдасы не зияны тимей, өзімен-өзі жүретін адам. Оның көреген екеніне хикая барысында дәрігер Уотсонның да көзі жетеді. Кейбір шиіленіскен қылмыс кезінде Шерлок ағасымен ақылдасып тұрады екен.
3. Топтамадағы соңғы (“Последнее дело Холмса”) әңгіме бұзақы һәм аса қауіпті қылмыскер Мориарти жайлы болады.

Мориартиді ең бірінші сериалдан көргем, қызық кейіпкер. Сериалдағы іс-әрекеттеріне “қалай сонда?” деп таң қаласың, сену қиын. Алайда кітапта автор шіли олай әсерілемейді. Әрекеттері мен шешімдеріне артық сұрақ жоқ, ойға қонымды себеп таба аласың. Сериалдағыдай “супермен” емес. Сол үшін авторға көп рақмет!

Иә, Мориарти өзінше гений, математик, өте талантты және дарынды тұлға. Өкініштісі, қабілеттерін теріс жолда қолданады. Оның кәсібилігі мен біліктілігіне ізкесушінің өзі таңданады, лайықты қарсылас екенін мойындайды. “Еуропаның ең қауіпті қылмыскері” деп сипаттайды. Себебі Шерлок Холмс сәтсіздікке ұшырап, анықтай алмаған барлық қылмыстың артында осы кісі тұрған екен. Соның ғажап жоспарларымен жасалған. Сондықтан болар, Мориартиді қолға түсіріп, түрмеге қамау – тыңшылық қызметінің мәні деп сенеді Холмс.

Автор соңында Шерлок пен Мориарти сарқырама қасында қақтығысып, бірге жардан құлап, із-түссіз жоғалып кеткенін жазады. Шерлок жайлы қылмыстық оқиғалар жазудан ығыры шығып, соңғы бөлімде “өлді”-ге санап, әңгімелерін аяқтағысы келген шығар.

Алайда Артур К. Дойл бұдан кейін тағы 5 кітап жазды. Сүйікті оқырмандарының ықпалымен басқа кітапта Шәкең тірі боп шығарайын деп тұр ғой. Енді қалай тірі қалғаны және Мориартимен тартыстары келесі бөлімдерін оқып шығуға ынталандырып жатыр.

Спойлер жазбауыңызды сұраймын :)


Дата: 22.10.2023

📌 «1 AПТА – 1 КІТАП» кітап оқу мен рецензия жазу марафоны!

СТАРТ: 30.10.2023

Тұрақты кітап оқуды және оқығаныңызға пікір (рецензия) жазуды үйренесіз ✅

• Телеграмда өтеді, ақылы.
• Ұзақтығы: 6 апта
• Кітап саны: 6 әдеби шығарма (бірге таңдаймыз)
• Әр жексенбі зумда талқылау (қатысу шарт емес)
• Жексенбіге дейін рецензия жазып, тапсыру (шарт)
• Үздіктер түрлі кітаптармен марапатталып, кітапал клуб командама іріктеледі.

Марафонға тіркелу дүйсенбі басталады. Қатысушы саны шектеулі, дайын болыңыздар 😉

Марафонға қатысты сұрақтарыңыз болса, жауап берейін 👇🏻

Қандай әдеби кітап ұсынасыз?! Топ5 қандай?

Қазақ/орыс/шетел әдебиетінен…

Келесі ай болатын кітап оқу марафонында сол көркем шығармаларды оқып, рецензия жазатын боламыз ✅

14. Знак четырёх (А. К. Дойл)

• Повесть, Детектив, криминал
• Бет: 152
• Баға: 9/10

Ағылшын жазушысы, дәрігер-криминалист Артур Конан Дойлдың кезекті детективті повесін оқып шықтым. Әдеттегідей керемет хикая, жалықтырмайтын сюжет, танымал тыңшының таң қаларлық дедукциясы, анализі, ой өрісі мен шешімдері.

Бұл – детектив Шерлок Холмс жайлы жазылған автордың 2-кітабы, (біріншісі “Этюд в багровых тонах”) бұдан басқа 5 жинағы және 2 повесі бар. Ақырындап барлығын оқып шығамын, бұйырса. Мазмұндама баспасы аударған “Приключения Ш. Х” әңгімелер жинағын да оқығам. Сол арқылы ізкесуші Шерлок Холмс мырзамен танысып, шынайы жанкүйері атандым. Дәрігер Уотсон екеуі жайлы кез келген шығарманы сүйіп оқып, фильмдерін қызыға қарай беретін хәлге жеттім.

Кейде атақты детектив-консультантқа жаным ашиды. Ойлаңызшы, бүкіл өмірін тек қылмыстарды әшкерелеуге, қиын мәселелерді шешуге, үнемі анализ жасап, ойлану арқылы өз миын “зорлауға” арнаған. Ауыр һәм қызықты қылмыстық істер болмаған күндері тыным таппайды. Миына азық бермесе, яғни жұмыссыз қалса, жүйкесі тозып кетеді. Оны басу өзіне кокаин, морфий секілді жасанды үдеткіштер егеді. “Дайте мне сложнейшую проблему, неразрешимую задачу,
запутаннейший случай – и я забуду про искусственные стимуляторы”, – дейді тыңшы бір сөзінде.

Жоғарыда айтқанымдай, “Знак четырех” повесі қатты ұнады. Көмекшім парақтаудан шаршамағанда, ешнәрсеге алаңдамай, бір-екі отырыста-ақ оқып бітіретін кітап. 9/10 деген баға қойдым. Сюжетінен түсінгенімді жазуға ниетім жоқ. Жалпы, жоғалған әшекейге толы сандықты іздейді. Кісі өлімі, ұрлық, түрмеден қашу, достық, сатқындық, қылмыскерді қуу т.с.с дегеннің бәрі бар шытырманға толы әңгіме ғой.

Повесть дәрігер Уотсон әйелі мисс Мэри Морстенмен қалай танысқаны, арада сезім ұшқыны пайда болғаны, үйленуге ұсыныс жасағаны және Мэри келісім бергені жайынан да хабардар етеді. Өкініштісі, бас кейіпкеріміз үйлі болуға үзілді-кесілді қарсы. Өмір бойы жалғыз боп өтуді таңдаған. Себебі, әйел адамға деген сезім, эмоциялар саналы ойлануға кедергі дейді. Ләззат сыйлайтын сүйікті криминал жұмысына нұқсан келтіреді-міс. Сол үшін де аяп кетемін 😔


Дата: 20.10.2023


Сұрақ:

Сізге таңдау берілсе, Шерлок Холмс өмірін сүрер ме едіңіз?!

Мәселен, мен Шерлоктың кейіпінде бір жылға дейін өмір сүруге қарсы болмас едім. Қызық қой :)

Оқып жүрген кітаптарым:

1. Знак четырёх (А. К. Дойл) – әлем әдебиеті
2. Жүрек төрінен орын алған теңдессіз тұлға (Ғ. Тобашев аударған) – руханият
3. Ted Talks. Слова меняют мир – ораторлық
4. Инноватор бол (Ави Йориш) – идея

Сіз қандай кітап оқып жүрсіз?!

13. Этюд в багровых тонах (А. К. Дойл)

• Повесть, Детектив
• Бет: 168
• Баға: 9/10

“Этюд в багровых тонах” – 1887 жылы жарық көрген Артур Конан Дойлдың детективті повесі. Шығармада атақты ізкесуші Шерлок Холмс пен оның досы дәрігер Д. Уотсон тұңғыш рет пайда болады. Шерлок жайлы көбірек оқығысы келетіндерге дәл осы туындыдан бастау ұсынылады. Автор бұл повесті 27 жасында небәрі 3 аптада жазып шыққан екен. Данышпан тыңшы жайлы оқыған екінші кітабым, біріншісі “Приключения Ш. Х”. Күткенімдей, повесть көңілден шықты, жоғары бағаладым.

Кітап тура сериалдағыдай Холмс пен Уотсон ортақ таныстары арқылы табысып, Бэйкер Стрит 221Б мекен-жайына көрші боп орналасуымен басталады. Әскери дәрігер қызметінде болған Уотсон жаңа көрші танысының тыңшы-консультант екенін дереу аңғара қоймайды. Холмс та өзі жайлы айтқанды жаны сүймейді. Тек араларында бір-біріне деген құрмет басым болады.

Бірнеше күннен кейін Шерлок Холмстың немен айналысатыны дәрігер көршісіне айқындалып, полицейлермен қосылып, екеуі қиын әрі түсініксіз қылмысты әшкерелеуге мұқият кіріседі. Бұл қылмыстық хикая Камбербэтч ойнаған сериалда экранизацияланған. Егде жасқа келген такси жүргізуші жолаушыларына 2 таблетка ұсынып, біреуін ішкізетін эпизод ше?! Міне сол оқиға, дәлірек айтқанда сондай қылмыс осы повесте суреттелген. Алайда кітаптағы қылмыстың сюжеті мүлдем басқа. Қылмыскер басқа, оның қылмыс жасау мотиві сериалдағыдан мүлдем өзгеше һәм әлде-қайда мәндірек…

“Миыма тек жұмысыма қажет ақпараттарды сақтаймын. Қажет емесін тез ұмытам. Мысалы, жер күнді айналатынын мен білмеймін. Маған ол қызық емес, мусор. Жұмысыма да керегі жоқ, сондықтан ол ақпарат қазір-ақ миымнан шығып кетеді” дейді тыңшы Шерлок. Осыдан оның ешқандай тума талант немесе гений емес, өз-өзімен көп жұмыс жасайтын, өзіне не керегін білетін, өз ісін сүйетін, үнемі өзін шыңдап отыратын еңбекқор, азарт адамы екенін түсінеміз.

“Этюд в багровых тонах” повесін оқуды баршаға кеңес берем. Көпшілікке ұнайтынына сенімдімін. Бұйырса, танымал тыңшы анықтайтын қылмыстар жазылған кітаптардың барлығын оқып, рецензия жазып шығу ойда бар. Жетеу-ақ қалыпты. Келесі кезекте “Знак четырёх” повесі 😉


Дата: 16.10.2023


Шерлок Холмс кейіпкерімен кітап арқылы танысқансыз ба? Сериал әлде кітап? Қай кітаптарды оқығансыз?

12. Қаржы қағидалары (Д. Жігітбек)

• Қаржы сауаты
• Бет: 214
• Баға: мильёрд)

Өмірім жақсы жаққа өзгеруіне себепкер болған бауырым әрі ұстазым Данияр Русланұлының “Қаржы қағидалары” атты кітабын кеше тәмамдадым. Екінші қайтара оқуым, алғаш рет 1.5 жыл бұрын электронды нұсқада оқып шыққан едім.

Дәкенің кітап жазу стилі, бір қарағанда қиын көрінген дүниелерді оқырманға жеңіл жеткізуі бөлек қой. Туындылары әр оқыған сайын басқа қырынан ашыла береді. Былтыр осы кітапты оқып, Аллаһтың қалауымен қосымша 110К тапқаным есімде. Мен үшін қомақты қаржы еді. Сол кезде “табысыңды емес, табыс көздерін арттыруды көзде” деген ақылы сұмдық әсер етіп, өміріме дереу қолданып, кітап сатып алуға кеткен ақшаны 1-ақ аптада бірнеше есе қылып шығарып алғам. Бұл жолғы оқу барысында мүлдем өзгеше ойлар мен тың идеялар келіп, тағы да мүмкіндіктер көре алдым. Шүкір!

Мәселен, “Қанша табатының маңызды емес. Қандай қаржылық әдеттерің бар, сол маңызды” деген терең ойды алайықшы. Маған ең ұнаған әрі эгома қатты ұрған инсайт болды. Себебі биыл табысым 3 есе өссе де, 6 айлық қауіпсіздік қорым жоқ. Үй, көлік немесе саяхат дегендерге жинап жатқаным да жоқ. “Паркинсон” заңының, яғни табысың қанша болса, шығының да соған теңесуге тырысады дегеннің дәлелі боп жүрмін. Болмысы кедей адамның тірлігі ғой бұл. Дұрыс қаржы әдеттерін әлі қалыптастыра алмағам, ақшадан тезірек айырылғым кеп тұрады екен. Бұл инсайт қаржылық жағдайыма анализ жасауға, жинақырақ болуыма септігін тигізеді деп сенем.

Тағы бір назарыма ерекше іліккен ой: “Қаржылық емес проблемаларды қаржымен жабуға тырысқан кезде қаржылық проблемалар пайда болады”

Шынымен ғой, мысалы, жұмысты сылтауратып, ата-анамыз бен отбасымызға онша көңіл бөлмейміз. Сапалы уақыт арнамаймыз. Содан өзімізді кінәлі сезінеміз. Проблема ма? Проблема. Оның орнын қымбат, бренд сыйлық әперіп, соңғы үлгідегі айфон мен умраға жолдама сыйлау арқылы, яғни ақшамен толтырғымыз келеді. Сөйтіп, ақшаға еш қатысы жоқ проблеманы ақшамен шешуге тырысамыз. Көбіне таныс жағдай деп ойлаймын. Негізі, шешім: ол кісілерге жай ғана арнайы уақыт бөліп, бірнеше минуттық әңгімесін мұқият тыңдау еді ғой.

Дәл осы сынды инсайттар “Қаржы қағидалары” кітабында толып тұр. Дәкең өзін “қаржы эксперті емеспін” деп таныстырса да, кітабындағы лайфхактар мен кеңестердің бәрі тиімді, миға қонымды. Қысқасы, “рабочий” методтар ғой. Іс жүзінде тәжірибе, тексерістен өткен қағидалар. Ақшаға көзқарас, үнемдеу өнері, қарыз және одан құтылу жолдары, биржадағы инвестиция, рухани интеллект, табыс көзі секілді сан қилы тақырыптардың автор жілігін шағып, майын ағызған екен.

Ақша көзі жайлы айтайыншы, соңғысы болсын. Бай адамды көрсек, табыс көзін тапқан деп жатамыз. Сол табыс көзі не және оны қайдан, қалай табамыз дегенге де Данияр мырза әдемі жауап береді. “Табыс көзі – өзің” дейді. Осыны санамызға мықтап бекітіп алсақ игі. Табыс артқанын қаласаң, өзіңді шыңда, ізден, әрекет пен тәуекел ет, жауапкершілік ал дегені ғой…

Ұнады маған кітап, қатты ұнады. Заметкіме 1-2 табысымды көбейтетін идея түртіп алдым және соларды жүзеге асыруға асықпын. Оған қоса, автордың ақылы телеграм арнасына қосылғам, ол жақта да қаржы тақырыбы қозғалып жатыр.

Жалпы, ақша деген әр жерде шашылып жататын жеміс сияқты екен. Көбіміз соны теріп алуға ерінеміз немесе жинап алу әдісін білмейміз. Ауыр ма?) “Қаржы қағидалары” кітабы – еріншектерге мотивация, әдісін білмейтіндерге справочник қой.

Барша оқырманға оқуға кеңес беремін. Міндетті түрде оқыңыздар. Дамыңыздар. Байыңыздар 🤲

Кітапты КітапалШым дүкенінен тапсырыс беріп, алдыртсаңыз болады. Бағасы 5000 тг. Бүгін жұмалық жеңілдік бар, 5%


Дата: 12.10.2023


Енді сіз төменге пікір қалдырыңызшы. Қаржы қағидаларын оқыдыңыз ба? Қандай инсайт алдыңыз? Басқаларға ұсынар ма едіңіз?

934 болыппыз. 1000-ға жеткізіп тастаймыз ба?!

Ол үшін ұнаған рецензияны арнаңызға бөліссеңіз жеткілікті.

Бірге болғандарыңызға рақмет 🙌

11. Норвежский лес (Х. Мураками)

• Роман
• Бет: 382
• Баға: 7/10

“Норвежский лес кітабын оқып шықтым” деп айтуға ыңғайсызданады екенсің. Оған тағы рецензия жазу – қиын шаруа. Себебі романда төсектегі қарым-қатынас, +18 сахналар (детально), ішімдік пен шылым, суицид жайлы өте көп жазылған 🤦🏻‍♂️ Меніңше, осы тұрғыдан Мураками мырза тым шектен шығып, туындысын былықтырып жіберген секілді немесе бұл сияқты романдар біздің менталитетке қайшы. Екіншісі дұрыс-ау, өйткені шетелдік оқырмандардың пікірлерін қарасам, бәрі есінен танып жатыр…

Өмірінен мән таппай, үнемі мұңайып жүретін, бала кезден психологиялық жаралары бар, суицидке куә болған немесе анда-санда өз-өзіне қол жұмсағысы келетін, менталды және рухани әлсіз жасөспірімдерге “Норвежский лес” кітабын үзілді-кесілді оқуға болмайды.

Романға Норвегиядағы орманның еш қатысы жоқ. Атауы әйгілі “The Beatles” тобының “Norwegian Wood” әнінен алынған екен. Бас кейіпкер Ватанабе сол әнді естіп қалып, шамамен 20 жыл бұрынғы студенттік шағын еске түсіреді.

Жалпы, роман өте ауыр, депрессивті. Антиутопия десек те болады. 18-20 жасар Токиолық студент Ватанабе және оның жақын құрбы-құрдастарының күнделікті өмірі, бір-бірімен қарым-қатынасы, сезімдері, проблемалары, жаралары һәм уайымдары жайлы. Кейіпкер студенттердің бәрі дерлік психикалық тұрғыдан сау емес, минустары көп, жиі “қуады”. Бірі досының суицидіне, екіншісі әпкесі мен жігітінің өзіне-өзі қол жұмсауына куә болған. Тағы біреуі ата-анасынан мейірім көрмей, 20 жасында екеуінен де айырылған. Рэйко деген әйелдің травмасын тіпті айтуға ауыз бармайды. Барлығының құмарлықтары мен құштарлықтары бар. Ұнағаны, олар өз қалаулары мен сезімдерін бір-біріне ашық айтады. Бір-бірін түсініп, қолдауға тырысады. Кейбір әрекеттері (ішу, +18) анайы болса да, іштей тек жақсылық тілеп тұрады. Поддержканың маңызын ұғасың.

Ерекше риза болғаным, автор сол қарапайым студенттердің жұпыны өмірінен керемет әңгіме өрбітеді. Ары-қарай не болады екен деп қызыға оқи бересің, жалықпайсың. Харуки атмосферасына бір кірсең, шығу қиын екен. Бас кейіпкеріміз Ватанабе Наоко үшін емделу орталығына барған 1 ғана күнді 52 бетке сипаттап, қызықтырып жазыпты. 52 БЕТ, КАРЛ!!! Маэстро ғой 👏

Дегенмен кітаптың сюжеті біркелкі, ешқандай “уау, мен бұны күтпедім ғой” дейтін жері жоқ, таңқалатын сәттер де жоқ, тым қарабайыр. Соңы да мен үшін эмоциясыз біте салды. Сондықтан 7/10 деген баға бердім. Сюжет онша емес, тек автордың жазу шеберлігіне осындай баға. Оған қоса, +18 әңгімелердің көптігі де бағама әсер етіп тұр.

Тағы айтам, депрессия мен апатия боп жүрген жастар бұны оқымасын. Жасы +25, отбасылы, психологияға қатты қызығатын, өмірден не қалайтынын білетін жандар бұл кітаптан керегін алады деп ойлаймын. Фильмі бар екен, егер шіли ұятсыз болмаса, қарап шығу керек.


Дата: 11.10.2023


Осы кітапты оқығандар, оқиын деп жатқандар ойларымен бөліссінші. Кітап жайлы пікірлеріңіз маған да қызық 🙌

Қалғандардан бір-бір реакция болса 🤍

10. Думай и богатей (Н. Хилл)

• Жеке даму
• Бет: 344
• Баға: 9.5/10

Американдық автор Наполеон Хилл бұны жазу үшін 20 жыл арнап, жетістігімен тарихта қалған Форд, Э. Карнеги, Рузвельт, Рокфеллер, Эдисон, Бэлл секілді 500-ге жуық өз заманының атақты данышпандарымен танысып, әрқайсысының өмірі мен жетістік жолдарын мұқият зерттеген екен. Содан “кез келген адам байи (жетістікке жете) алады, ол үшін ойлау жүйесін дұрыс бағытқа өзгерту қажет” деген тұжырымға келіп, тұлғалық даму жанрындағы ең мықты һәм әлемдік бестселлер кітаптардың бірі “Думай и богатей” жарыққа шықты.

Кітаптың алғашқы тараулары әйгілі “Секрет” документалды фильмін еске түсіреді. Бұнда да жетістікке жету үшін қарапайым “ҚҰПИЯ”-не білсең, жеткілікті дейді. Бірақ қандай құпия екенін дәл ашып айтпайды. Ол нәрсе “Думай и богатей” кітабында жасырын екен. Адам оған дайын болса ғана, оқу барысында құпияны байқап, түсінеді-міс. Кітапта аты аталған танымал адамдардың бәрі әлгі құпияны өмірлерінде қолданып, жеңімпаз атаныпты.

Жетістік жолы:

Бейсана – Елестету – Арман – Қалау – Сенім – Арнайы білім – Жоспар – Әрекет – Табандылық – Нәтиже;

Байлық немесе жетістікке жеткіміз келсе, сол жайлы көп ойлауымыз керек екен. Өміріміз қалай өзгеретінін елестете бергеніміз дұрыс. Ой – дән. Оны біз егіске егіп, қарайлап жүреміз. Уақыт өте келе дәніміз ағаш боп өсіп, жеміс береді.

Асыл дінімізде де бұл нәрсе бар ғой. Құдси хадисте Алла Тағала “құлым Мен жайлы қалай ойласа, сондаймын”, – деп айтады емес пе?! Жаратушымызды ризық-несібе арттырушы деп, Ол жайлы үнемі жақсы ойда болсақ, жеңімпаз етуі Оған түк емес.

“Жетістікке, арман-мақсатқа жетудің қарапайым құпияларының бірі – мақсатың нақты және соны нереально қатты қалауың қажет” дегендей сөйлем бар кітапта.

Біз оны сәл басқаша түсінеміз:

Мейірімді Аллаһ Тағала құлына бір нығмет, ризық-несібе бергісі келсе, алдымен сол нығметті оның ойына қиял, арман ретінде салады. Кейін ол арман мақсатқа айналады. Сосын соны жүзеге асыруды құлына қатты қалатады, ресурстар жіберіп, орындалуын сәтін салады. (Одан кейін адамның реакциясына қарайды: “өз арманым, өзім қалағандықтан, дұға еткендіктен, күндіз-түні еңбектеніп, маңдай термен жеттім” дей ме, әлде “Аллаһ берді” дей ме?! Өзім десе, ризығын кесеп, тәкаппарлықтан тазартады. “Құдай беріп жатыр” десе, арттырады…)

Демек, арман да, қалау да Аллаһтан. Кітапты оқыған кезде автордың Құдайға сенбейтінін ескерейік. Керегін аламыз, керек емесін өзіне қалдырамыз.

Жалпы, “Думай и богатей” бестселлері маған ұнады, жоғары баға бердім. Кей жерлерін онша түсінбедім және кей тұстарын қайта қарап, практикалық жаттығуларын орындау қажет деп таптым. Сондықтан бұл кітапты міндетті түрде бірнеше қайтара оқимын. Бір оқып, сөреге қоя салатын емес, әрдайым жұмыс үстелінде тұратын туынды екен. Қазіргі “успешный успех” жайлы тренингтердің негізі осы кітап-ау. Анығын Аллаһ білуші!

Дата: 04.10.2023

P.S өткен аптада бітірген кітабым, рецензияны 2-ші рет оқыған соң жазам ба деп ойлап едім)

Ағатай-ау, қайда жоғалып кеттіңіз?) 1 апта өтіп кетті. Сізді сағынып қалдық 😁