Ёсць пытанне

Ці трэба супрацоўнічаць з расейскай дыяспарай? Адказы з сацыялагічнага апытання

Ці камунікуюць беларусы_кі і расейцы_кі ў замежжы? Ці карысна магчымая супраца беларускіх дэмакратычных сілаў і расейскай апазіцыі? Генадзь Коршунаў шукае адказы ў даследаванні ініцыятывы «Ёсць пытанне». Яно прайшло ў верасні 2024 і ахапіла 532 чалавекі прадэмакратычных поглядаў. Галоўныя высновы:

📌 Ад 35% да 70% апытаных у залежнасці ад краіны пазначылі, што побач ёсць шмат расейцаў_ак (выключэнне — Польшча). Аднак досведу камунікацыі з імі мала: «камунікуем досыць часта» — толькі 8%.

📌 Больш за 2/3 рэспандэнтаў_к не змаглі нічога сказаць пра супрацу беларускай і расейскай дыяспар. Амаль столькі ж не ведаюць, ці будзе такая супраца карыснай для беларусаў_к.

📌 А ці будзе карысна развіваць адносіны беларускіх дэмсілаў і расейскай апазіцыі? За тое, што такая супраца можа прынесці плён, выказаліся 21% апытаных, тое, што яна будзе не вельмі карыснай, а то і шкоднай для беларусаў_к, адзначылі 20%.

👉 Чытайце артыкул цалкам.

Ці санкцыі адштурхоўваюць беларусаў_к ад еўрапейскага выбару?

Чэргі на мяжы Беларусі і ЕС, санкцыі і складанасці ў атрыманні візаў — ці гэта адштурхоўвае ад Еўрасаюза і ці становіцца РФ больш прывабнай для падарожжаў і працы?

Пераможцы «Лабараторыі даследаванняў» ЦНІ разам з ініцыятывай «Народнае апытанне» паспрабавалі знайсці адказы. Для гэтага быў выкарастаны апытальны эксперымент: ён дазваляе ўбачыць, як мяняюцца пазіцыі рэспандэнтаў_к пасля нейкага ўздзеяння, напрыклад, «напамінаў» пра пэўныя падзеі. Вось некалькі высноваў:

📌 «Пазітыўныя» навіны пра Расію (напр., адукацыйныя гранты) амаль не ўплываюць на вобраз і жаданне будучай супрацы з ЕС.

📌 А вось пасля «негатыўнай» інфармацыі пра ЕС (напр., цяжкасці з атрыманнем візаў) рэспандэнты_кі больш арыентуюцца на саміх сябе, але не глядзяць у бок Расіі.

📌 Пераважная большасць (70-80%) пры любым раскладзе абірае ЕС.

👉 Чытаць артыкул цалкам

Як вы ацэніваеце стан беларускай дыяспары, ці трэба беларускім НДА супрацоўнічаць з украінскімі і расейскімі і паміж якімі групамі беларусаў_к ёсць супярэчанні? Новае апытанне

Ініцыятыва «Народнае Апытанне» запускае чарговае даследаванне прадэмакратычных беларусаў і беларусак. Новая анкета прысвечана шэрагу пытанняў як для беларусаў_к замежжа, так і для тых, хто жыве ў Беларусі. Як вы адаптуецеся ў новай краіне, як бы вы ацэнілі стан беларускай дыяспары, ці трэба ёй развіваць супрацоўніцтва з украінскімі і расійскімі НДА і не толькі. Асобныя блокі даследавання месцяць пытанні пра тое, ці існуюць адрозненні і супярэчанні паміж рознымі групамі беларусаў і беларусак, а таксама пра некаторыя палітычныя погляды.

Удзельнічайце на зручнай вам платформе!
👉 Прайсці апытанне ў Telegram
👉 Прайсці апытанне ў Viber

📌 Каб прайсці новае апытанне, можа спатрэбіцца выдаліць бот і адкрыць/падпісацца на яго зноў.

📌 Спасылкі на Народнае Апытанне прызналі «экстрэмісцкімі матэрыяламі». Што мы прапануем для вашай бяспекі.

Амаль палова лічыць, што ў 2020 варта было перайсці да сілавых дзеянняў, столькі ж не згодныя, што пратэст прайграў. Вынікі апытання

Трэці год запар Цэнтр Новых Ідэй разам з «Народным апытаннем» ладзяць даследаванне аб стаўленні прадэмакратычных беларусаў і беларусак да пратэстаў 2020-2021 гадоў. Сёлета ў інтэрнэт-апытанні з 18 па 30 ліпеня паўдзельнічалі 318 чалавек у Беларусі і 701 — у іншых краінах. Вось галоўныя вынікі.

📌 Доля тых, хто не расчараваўся ў сваіх дзеяннях у 2020, не змяншаецца ў параўнанні з апытаннямі ў 2022 і 2023 гадах. Больш за 90% рэспандэнтаў_к дзейнічалі б так жа, як і тады, ці больш актыўна.

📌 Палова апытаных дагэтуль аспрэчвае ідэю аб тым, што пратэсны рух 2020 года атрымаў паразу. Яшчэ 46% хутчэй згодныя з гэтым тэзісам.

📌 Амаль палова апытаных (44%) лічыць, што ў 2020-м годзе трэба было пераходзіць да сілавога супраціву. Гэта 3-я па папулярнасці прычына, чаму пратэсты не дасягнулі сваёй мэты.

Даведацца больш пра вынікі апытання можна ў артыкуле Генадзя Коршунава па спасылцы.

Што вы думаеце пра падзеі жніўня 2020 праз 4 гады? Новае апытанне

Ініцыятыва «Народнае Апытанне» запускае новую хвалю даследавання прадэмакратычных беларусаў і беларусак. Анкета прысвечана чарговай гадавіне падзей, што адбыліся пасля прэзідэнцкіх выбараў у жніўні 2020 года. Што беларусы і беларускі думаюць пра тыя падзеі праз 4 гады і як за гэты час змянілася іх грамадскае і прыватнае жыццё? Як паўплывалі падзеі 2020 года на ўспрыманне беларусаў як нацыі?

Частка апытання прысвечана таму, якую стратэгію для электаральнай кампаніі 2025 года мусяць абраць беларускія дэмакратычныя сілы.

Удзельнічайце ў апытанні на зручнай для вас платформе!
👉 Прайсці апытанне ў Telegram
👉 Прайсці апытанне ў Viber

📌 Для таго, каб прайсці новае апытанне, можа спатрэбіцца выдаліць бот і адкрыць/падпісацца на яго зноўку.

📌 Нагадваем, што спасылкі на Народнае Апытанне прызналі «экстрэмісцкімі матэрыяламі». Што мы прапануем для вашай бяспекі.

Якія ініцыятывы найбольш карысныя для Беларусі?

Абапіраючыся на дадзеныя Народнага Апытання, Генадзь Коршунаў аналізуе стаўленне беларусаў і беларусак да суб’ектаў беларускага дэмакратычнага руху. Для чарговага артыкула былі выкарыстаныя два даследаванні Цэнтра новых ідэй і Народнага Апытання. Першае прайшло з 9-га да 17-га чэрвеня 2024, другое — з 18-га да 29-га чэрвеня 2023 года. У абодвух апытаннях было некалькі аднолькавых пытанняў.

Некаторыя высновы:
📌 Першыя тры месцы, як і год таму і фактычна з тым жа самым узроўнем вядомасці, займаюць Полк імя Кастуся Каліноўскага, кіберпартызаны і праваабарончы цэнтр «Вясна». Іх ведаюць практычна 9 з 10 апытаных ці больш.

📌 ByPol згубіў 10 п.п. за апошні год. Хутчэй за ўсё, мы маем выпадак не «забыцця», а «адмаўлення» ініцыятывы праз падзеі з электаральнай рассылкай у плане «Перамога».

👉 Чытаць цалкам і глядзець інфаграфіку
👉 Чытаць без VPN

«Кардынал», «ваяр», «агентура». Якімі словамі беларусы апісваюць лідараў дэмсіл — расказваем і паказваем

Генадзь Коршунаў распавядае пра тое, як прадэмакратычныя беларусы і беларускі ўспрымаюць лідараў дэмакратычных сіл і якімі словамі апісваюць іх. Базай для гэтага сталі даныя апытання, якое праводзілі Цэнтр новых ідэй і «Народнае апытанне».

Для візуалізацыі мы абралі «воблака словаў» (tag cloud, word cloud). Гэты метад адлюстроўвае словы-характарыстыкі з улікам колькасці іх выкарыстання: чым часцей слова ўжываецца, тым больш яно на малюнку.

Што атрымалася? Напрыклад, у вобразе Святланы Ціханоўскай дамінуе яе статус прэзідэнткі і лідаркі, а Зянон Пазняк можа быць ахарактаразаваны як «сівая нацыянальная легенда».

Паглядзець на аблокі словаў і прачытаць артыкул.

Чаму беларусы і беларускі (не) галасавалі на выбарах у Каардынацыйную Раду, і што яны думаюць пра яўку. Вынікі постэлектаральнага апытання ў графіках

Яшчэ раз падводзім рэзультаты нашага чэрвеньскага апытання прадэмакратычных беларусаў і беларусак пра выбары ў Каардынацыйную раду — у візуалізаванай форме. У апытанні паўдзельнічалі 313 рэспандэнтаў і рэспандэнтак з Беларусі і 662 — з іншых краін.

📌 Толькі 11% беларусаў і беларусак унутры краіны прагаласавалі на выбарах у КР. У замежжы такіх 57%.

📌 Большасць апытаных прынялі рашэнне ўдзельнічаць у галасаванні ці адразу пасля абвяшчэння аб тым, што выбары будуць (58% у Беларусі і 47% у замежжы), ці пасля з'яўлення спісаў для галасавання (13% у Беларусі, 30% у замежжы).

📌 Рашэнне НЕ галасаваць на выбарах у КР было прынята ў асноўным ці пасля абвяшчэння тэхнічных асаблівасцяў галасавання (34% у Беларусі, 31% у замежжы), ці адразу пасля абвяшчэння аб тым, што выбары будуць (16% у Беларусі і 18% у замежжы).

Вынікі цалкам у выглядзе графікаў можна паглядзець па спасылцы.

Сем тэзісаў па выніках даследавання пасля выбараў у КР

Генадзь Коршунаў аналізуе дадзеныя апошняй хвалі «Народнага апытання» пра выбары ў Каардынацыйную раду. У апытанні з 9 па 17 чэрвеня паўдзельнічалі 975 чалавек, 313 — у Беларусі, 662 — у замежжы.

📌 Выніковай яўкай задаволены ці хутчэй задаволены 13% апытаных, расчараваны ці хутчэй расчараваны — 40%. 36% рэспандэнтаў і рэспандэнтак не здолелі ацаніць узровень яўкі, яшчэ 11% увогуле яе не ведаюць.

📌 Галоўнай прычынай паўдзельнічаць у галасаванні для дыяспары стала жаданне прыняць удзел у палітычным жыцці РБ (45% апытаных), дадатковай — выканаць свой грамадзянскі доўг (16%). Рэспандэнты і рэспандэнткі ў Беларусі ў першую чаргу хацелі падтрымаць канкрэтныя палітычныя сілы (29%), а таксама выказаць пратэст супраць рэжыма Лукашэнкі (26%).

📌 Галоўнай прычынай, якая адштурхнула ад ідэі прыняць удзел у галасаванні, стала хваляванне наконт бяспекі (сваёй і блізкіх) — 55% у Беларусі і 19% у замежжы.

Поўную версію з графікамі чытайце на сайце (ці тут без VPN).

Чаму вы (не) галасавалі на выбарах у Каардынацыйную Раду і якія эмоцыі перажывалі апошнім часам? Заклікаем прыняць удзел у нашым новым апытанні

У новай хвалі даследавання мы працягваем аналізаваць медыяспажыванне, вядомасць палітычных дзеячаў і грамадзянскіх ініцыятыў і давер да іх з боку прадэмакратычнай часткі грамадства. А таксама пытаемся, чаму беларусы і беларускі (не) галасавалі на выбарах у Каардынацыйную Раду і што яны думаюць пра яўку. Асобны блок анкеты — пра эмоцыі, якія рэспандэнты і рэспандэнткі перажывалі апошнім часам, стаўленне да некаторых пасылаў беларускіх уладаў і не толькі.

Удзельнічайце ў апытанні на зручнай для вас платформе!

👉 Прайсці апытанне ў Telegram
👉 Прайсці апытанне ў Viber

📌 Нагадваем, што пасылкі на Народнае апытанне прызналі «экстрэмісцкімі матэрыяламі». Што мы прапануем для вашай бяспекі.

У топ-3 — Ціханоўская, Латушка, Вячорка. Каго ведаюць і каму давяраюць прадэмакратычныя беларусы і беларускі?

Абапіраючыся на даныя даследавання «Народнага Апытання», Старшы даследчык Цэнтра Новых Ідэй Генадзь Коршунаў разглядае ўзроўні ведаў і даверу да беларускіх палітыкаў з боку прадэмакратычнага сегмента беларускага грамадства.

📌 Безумоўнай лідаркай была і застаецца Святлана Ціханоўская. Яе ведае 96% рэспандэнтаў і рэспандэнтак, давярае — 85%. Другое месца ў Паўла Латушкі (89% ведаюць, 65% давяраюць), трэцяе — у Франака Вячоркі (72% і 36% адпаведна).

📌 Далей ідуць Валер Сахашчык і Зянон Пазняк — яны знаёмыя 2/3 выбаркі. Пры гэтым Сахашчыку давярае палова з тых, хто яго ведае, а вось Пазняку — толькі 37%.

📌 Апытанне паказвае, што пры адсносна невысокай вядомасці некаторыя асобы маюць даволі высокі узровень даверу сярод рэспандэнтаў і рэспандэнтак. Гэта, напрыклад, Аліна Коўшык, Вольга Гарбунова, Валер Кавалеўскі.

👉 Чытаць артыкул
👉 Чытаць без VPN

86% ведае пра выбары, 55% з іх плануе галасаваць (але не ўсе ўпэўнены ў бяспецы), «Каманда Латушкі і Рух "За свабоду"» — у лідарах. Вынікі апытання пра выбары ў КР

З 5 па 11 траўня мы запыталіся ў прадэмакратычных беларуса_к у краіне і замежжы, што яны ведаюць і думаюць пра выбары ў Каардынацыйную Раду. Важна адзначыць, што адказы збіраліся да публікацыі інструкцыі аб тым, як галасаваць. Вось галоўныя вынікі:

📌 86% рэспандэнтаў і рэспандэнтак ведаюць (ці хаця б чулі) пра выбары ў КР. Але ўнутры РБ працэнт тых, хто не чуў пра падзею, у тры разы вышэй (24% супраць 8%).

Сярод тых, хто ведае пра выбары (і ў РБ, і ў замежжы):
📌 39% ведаюць ці хутчэй ведаюць пра асаблівасці галасавання па спісах. Пры гэтым большасць (58%) не мае меркавання наконт абранай сістэмы для галасавання.

📌 64% лічаць выбары важнымі і патрэбнымі (16% думаюць наадварот).

📌 55% плануюць ці хутчэй плануюць прыняць удзел у галасаванні, яшчэ 19% пакуль не вызначыліся. Сярод тых, хто прайшоў апытанне з РБ, лічбы іншыя: 34% і 29% адпаведна.

📌 58% лічаць, што ўдзел у выбарах будзе бяспечным. Сярод рэспандэнта_к з РБ такіх толькі 40%, столькі ж абралі «цяжка адказаць».

📌 31% прагаласавалі б за спіс «Каманда Латушкі і Рух "За свабоду"», далей ідзе «Блок Пракоп'ева — Ягорава» з 10%. Спіс «Наша справа» падтрымалі б 6% рэспандэнта_к, «Еўрапейскі выбар» — 5%, «Моладзевы наступ» і «Незалежныя беларусы» — па 4%. 23% яшчэ не вызначыліся з выбарам.

👉 Падрабязнасці ў графіках.

Што вы думаеце пра выбары ў Каардынацыйную Раду і за каго збіраецеся галасаваць? Запускаем новае апытанне

У новай хвалі апытання мы даследуем медыяспажыванне, вядомасць палітычных дзеячаў і грамадзянскіх ініцыятыў і давер да іх. Асобная частка анкеты датычна выбараў у Каардынацыйную Раду. Усё для таго, каб даведацца, ці сочаць за імі беларусы і беларускі, ці лічаць важнымі і за каго збіраюцца галасаваць.

Удзельнічайце ў апытанні на зручнай для вас платформе!

👉 Прайсці апытанне ў Telegram
👉 Прайсці апытанне ў Viber

📌 Спасылкі на Народнае апытанне прызналі “экстрэмісцкімі матэрыяламі”. Што мы прапануем для вашай бяспекі.

🙌 Сачыце за вынікамі апытанняў на нашых пляцоўках, якія не маюць “экстрэмісцкага” статусу — Instagram і сайт.

Тэма палітвязняў кранае нават прыхільнікаў Лукашэнкі

Мы даведаліся ў прадэмакратычных беларусаў і беларусак, што яны думаюць пра сітуацыю з палітзняволенымі ў Беларусі. У нашую выбарку трапілі рэспандэнты, якія прынамсі часткова падтрымліваюць дзейнасць Лукашэнкі. Некаторыя высновы з даследавання:

🔸 Абсалютная большасць (82%) рэспандэнтаў цікавяцца навінамі пра палітзняволеных. Нават сярод тых, хто так ці інакш падтрымлівае дзейнасць Лукашэнкі, ёсць пэўная частка (33%), якой цікавы навіны пра палітвязняў.

🔸 Большасць, каля 60%, (разам з тымі, хто так ці інакш падтрымлівае Лукашэнку) адчувае жаль, боль і спачуванне адносна палітзняволеных.

🔸 Самая папулярная дзейнасць у падтрымку палітзняволеных - распаўсюд інфармацыі, так рабіла палова (51%) рэспандэнтаў. 38% нічога не рабілі ў падтрымку.

🔸 Негледзячы на папулярнасць тэмы. Палова рэспандэнтаў не ведае, дзе знайсці інфармацыю аб дапамозе палізняволеным. Пры гэтым 69% (з тых, хто сочыць за навінамі аб палітычных рэпрэсіях) гатовы працягваць/пачаць рабіць нешта ў падтрымку палітвязняў у будучыні.

🔸 Рэспандэнты даволі часта абмяркоўваюць сітуацыю з палітзняволенымі са сваімі блізкімі. Палова ўзгадвае гэтую тэму не радзей, чым раз у тыдзень. Нават 44% тых, хто часткова ўхваляе дзейнасць Лукашэнкі, не радзей, чым раз на месяц размаўляюць са сваімі блізкімі пра палітвязняў.

🔸 Толькі 8% НЕ сутыкаліся з рэпрэсіямі. У большасці апытаных быў ці асабісты досвед рэпрэсій, ці хтосьці з блізкага кола ці знаёмых сутыкаліся з рэспрэсіямі. Таксама большасць тых, хто часткова ўхваляе дзейнасць Лукашэнкі, сутыкалася з рэпрэсіямі асабіста, ці гэты досвед мелі іх знаёмыя ці калегі.

🔸 Няма адзінага меркавання, што варта рабіць палітзняволеным у турмах. Толькі 15% лічыць, што трэба выкарыстоўваць усе магчымасці, ісці на любыя ўмовы, прапанаваныя дзейнай уладай, каб выйсці з-за кратаў. Палова лічыць, што ёсць умовы, на якія нельга ісці нават дзеля вызвалення, альбо дамаўляцца з дзейнай уладай бескарысна, таму ні на якія ўмовы ісці нельга.

👉 Падрабязнасці ў графіках

💸 Якія ёсць праблемы і патрэбы беларускіх прадпрымальнікаў і прадпрымальніц за мяжой?

Калі ў вас ёсць уласны бізнес ці вы з'яўляецеся індывідуальным прадпрымальнікам / прадпрымальніцай у краінах Еўропы, то запрашаем прыняць удзел у апытанні!

Асацыяцыя беларускага бізнесу за мяжой (ABBA), Цэнтр новых ідэй і Case праводзяць маніторынг беларускага бізнесу ў краінах Еўрасаюзу. Вось, пра што ўжо паспелі даведацца ў межах першай хвалі даследавання.

Навошта ўдзельнічаць?

Вынікі даследавання будуць выкарыстаны пры распрацоўцы рэкамендацый для інстытутаў, якія вызначаюць умовы вядзення бізнесу мігрантамі з Беларусі.

🙌 Ваш удзел у апытанні будзе спрыяць паляпшэнню ўмоваў для беларускага прадпрымальніцтва ў краінах ЕС! Таксама ABBA прапануе бонусы ўдзельнікам і ўдзельніцам апытання!

📌 Спасылка на апытанне

✅ Адзіны дзень галасавання і выбары ў Каардынацыйную раду. Ці сочаць за гэтымі падзеямі прадэмакратычныя беларусы?

На мінулым тыдні мы запыталіся ў прадэмакратычных беларусаў і беларусак унутры краіны і за мяжой, ці сочаць яны за выбарамі ў Каардынацыйную раду і за "парламенцкімі выбарамі" і што плануюць рабіць у "адзіны дзень галасавання".

🔸 Рэспандэнты ў Беларусі больш сочаць за "парламенцкімі выбарамі" (61%), чым за выбарамі ў Каардынацыйную раду (23%). Пры гэтым 47% штосьці чулі пра выбары ў КР, а 30% увогуле не ведаюць пра гэтую падзею.

🔸 Дыяспара менш сочыць за "парламенцкімі выбарамі" (49%), але крыху больш, чым беларусы ўнутры краіны, цікавіцца выбарамі ў КР (36%). Аднак амаль палова беларусаў за мяжой адказалі, што не асабліва сочаць як за парламенцкімі (44%), так і за выбарамі ў КР (45%).

🔸 79% рэспандэнтаў унутры краіны дакладна ці хутчэй не пойдуць галасаваць на "парламенцкіх выбарах", палова з іх байкаціруе гэтыя выбары, 21% не галасуюць, бо абраныя дэпутаты ні на што не ўплываюць.

🔸 15% плануюць прыйсці на ўчасткі, бо заўжды галасуюць і так выказваюць сваю грамадзянскую пазіцыю ці хочуць пазбегчы фальсіфікацыі менавіта з іх бюлетэнем.

🔸 65% беларусаў унутры краіны кажуць, што пазіцыя дэмакратычных сілаў не ўплывае на іх стаўленне да "адзінага дня галасавання".

👉 Падрабязнасці ў графіках

🔥 Што вы думаеце пра выбары? Новае апытанне!

Вяртаемся да вас з новым апытаннем! Раскажыце, ці сочыце вы за “парламенцкімі выбарамі” у Беларусі і выбарамі ў Каардынацыйную Раду? Да якіх палітычных актараў ёсць давер?

Удзельнічайце ў апытанні на любой платформе

👉 Прайсці апытанне ў Telegram
👉 Прайсці апытанне ў Viber

📌 Спасылкі на Народнае апытанне прызналі “экстрэмісцкімі матэрыяламі”. Што мы прапануем для вашай бяспекі.

🙌 Сачыце за вынікамі апытанняў на нашых пляцоўках, якія не маюць “экстрэмісцкага” статусу - Instagram і сайт.

Вынікі году ад Народнага апытання 💜

За год адбылося шмат усяго і добрага, і ня вельмі. На жаль, спасылкі на Народнае апытанне прызналі экстрэмісцкімі, падрабязней пра новы статус і парады па бяспецы тут.

✨ З добрага - мы выпусцілі шмат апытанняў і даследаванняў разам з іншымі арганізацыямі, запусцілі новы сайт, ды і прынамсі добрая частка нашай аўдыторыі працягвае заставацца з намі.

Якія даследаванні мы паспелі зрабіць:

🟠Нацыянальная ідэнтычнасць прадэмакратычных беларусаў

🟠Даследаванне медыяспажывання

🟠Як ацэньваюць сістэму адукацыі Беларусі прадэмакратычныя беларусы

📌 Маніторынг настрояў прадэмакратычных беларусаў і давер да палітыкаў, які мы аднаўляем тры гады можна паглядзець на сайце.

Даследаванні ў партнёрстве:
З Цэнтрам новых ідэй

🟠Трэнды лічбавай трансфармацыі беларускага дэмакратычнага супраціву

🟠Барометр беларускіх гарадоў 2023

З Асацыяцыяй беларускага бізнесу за мяжой (ABBA):

🟠Прадпрымальніцкая актыўнасць беларусаў у эміграцыі

🎄Мы віншуем нашых падпісчыкаў і падпісчыц з Калядамі і Новым годам! Спадзяемся, наступны год будзе лепшым, і добрых навінаў будзе больш! 🫶

📱 Лічбавізацыя беларускага супраціву. Глядзіце вынікі даследавання на новым сайце Народнага апытання

Цэнтр новых ідэй зрабіў даследаванне пра лічбавізацыю беларускага супраціву. Значная частка даследавання пабудавана на выніках анлайн-апытання прадэмакратычных беларусаў, якое наш праект правёў у чэрвені 2023. Вынікі ў графіках тут.

📌 Самая вядомая лічбавая ініцыятыва — «Кіберпартызаны» (90%). Другое месца заняў ByPol (тады адзіны) з 87%.

📌 Найбольш карыснымі для Беларусі рэспандэнты лічаць працу «Кіберпартызанаў» і «Беларускага Гаюна» (81% і 66% адпаведна). А ў ByPol і плана «Перамога» розніца паміж тымі, хто ведае ініцыятывы і лічыць іх карыснымі, — больш за 30%. Верагодна, праз скандалы вакол праектаў.

📌 Пятая частка рэспандэнтаў удзельнічала ў кампаніях BySol. Столькі ж апытаных не гатовы казаць пра свой унёсак у пералічаныя праекты. Самай папулярнай актыўнасцю стала фінансавая падтрымка (34%), 28% дасылалі інфармацыю пра праекты сябрам.

📌 70% рэспандэнтаў згодны, што анлайн-платформы — добры канал сувязі беларусаў у краіне і эміграцыі. 43% лічаць, што дэмсілам трэба больш думаць пра афлайн-дзеянні ў Беларусі. На пытанне, ці могуць лічбавыя праекты паўплываць на сітуацыю ў РБ, 49% адказалі станоўча, 30% — негатыўна.

🔥 Мы таксама рады паведаміць, што ў нас з’явіўся новы сайт, дзе вы можаце бяспечна сачыць за даследаваннямі Народнага апытання https://narodnae-apytanne.info

👉 Спасылка на вынікі даследавання на сайце

Ёсць пытанне pinned «Спасылкі на «Народнае апытанне» прызнаны экстрэмісцкімі, але ў нас ёсць рашэнне Магчыма, вы заўважылі, што мы змянілі спасылкі на нашыя сацыяльныя сеткі і назву. На жаль, у гэтага ёсць нагода 👇 Што здарылася? Спасылкі на сайт, Telegram-канал, Telegram і…»

Спасылкі на «Народнае апытанне» прызнаны экстрэмісцкімі, але ў нас ёсць рашэнне

Магчыма, вы заўважылі, што мы змянілі спасылкі на нашыя сацыяльныя сеткі і назву. На жаль, у гэтага ёсць нагода 👇

Што здарылася?

Спасылкі на сайт, Telegram-канал, Telegram і Viber-боты прызнаны судом Ленінскага раёну г. Мінска «экстрэмісцкімі матэрыяламі».

Што гэта значыць?

Гэта значыць, што захоўванне і распаўсюд матэрыялаў з сайта, Telegram-канала, Telegram і Viber-ботаў Народнага апытання можа пагражаць вам у Беларусі адміністратыўнай адказнасцю.

Што трэба зрабіць для сваёй бяспекі зараз? Пакрокавыя інструкцыі:

📌 Viber-бот

Калі вы знаходзіцеся ў Беларусі і праходзілі нашыя апытанні ў Viber-боце, мы прапануем:

1️⃣ Наладзіць двухфактарную аўтарызацыю. Як гэта зрабіць, чытайце тут

2️⃣ Выдаліць бот. Для гэтага трэба націснуць на карцінку бота ў спісе чатаў, і выбраць “Удаліць чат” сярод прапанованых дзеянняў.

3️⃣ Калі вы памятаеце, з кім дзяліліся спасылкай на бот, знайсці гэтыя паведамленні і выдаліць іх.

4️⃣ Падпісацца на новы бот! Мы стварылі новыя боты, дзе вы можаце бяспечна праходзіць апытанні! Вы можаце абраць, куды далучацца ў Viber ці ў Telegram

📌 Telegram-бот

Калі вы наведваеце Беларусь і падпісаны на Telegram-бот, то прапануем:

1️⃣ Выдаліць бот і пачысціць гісторыю, каб не засталося слядоў. Інструкцыя

2️⃣ Калі вы дзяліліся з вашымі кантактамі спасылкай на бот, напішыце narodnae_apytanne_bot у радок пошука і выдаліце ўсе паведамленні

3️⃣ Падпісацца на новы бяспечны бот у Telegram!

📌 Telegram – канал

Калі вы чытаеце нас з Беларусі ці наведваеце Беларусь:

1️⃣ Адпішыцеся ад канала, чытайце нас праз пошук

2️⃣ Калі вы дзяліліся з вашымі кантактамі спасылкай на наш канал, напішыце “Народнае апытанне” у радок пошука і выдаліце ўсе паведамленні. Паўтарыце пошук са словамі “Народный опрос”

3️⃣ Абавязкова чысціце кэш Telegram і радок пошуку. Як гэта зрабіць чытайце тут

4️⃣ Падпішыцеся на нас у Instagram. Наш акаўнт у Instagram не набыў «экстрэмісцкі» статус і застаецца бяспечнай крыніцай інфармацыі.

📌 І канешне, нагадваем, што мы не збіраем ніякія асабістыя дадзеныя. Усе ўдзельнікі апытанняў і падпісчыкі застаюцца ананімнымі. Падрабязней пра нашую бяспеку тут

🙌 Чаму вашая падтрымка вельмі важная?

Народнае апытанне існуе дзякуючы ўдзельнікам апытанняў у Беларусі і за яе межамі! Для нас важны кожны рэспандэнт і рэспандэнтка, толькі з вамі мы можам працягваць нашыя даследванні!

Калі вы таксама лічыце нашую працу карыснай, калі ласка, падтрымайце нас падпіскай на бот у Telegram ці Viber і на наш Instagram-акаунт!

🫶 Дзякуй, што вы з намі! І застаемся на сувязі!