Abdulla Oripov she'rlari

OGOHLIK

Qora kunlar keldi ko'hna diyorga,
Ustoz yig'lay-yig'lay ayladi xitob:
– Mayli suvga oqsin, singsin devorga,
Nodonning qo'liga tushmasin kitob.

Yengdi ma'rifatni manfur jaholat,
O'zbekda qatag'on davri boshlandi.
Qodiriy muxlisi qilindi g'orat,
Cho'lponni o'qigan otib tashlandi.

Yillar o'tib ketdi, ozodmiz shukur,
Lekin sen ogoh bo'l, ma'rifatli jon.
Hali tirik yurar kalamush qurg'ur,
Ko'zlari yiltillab turibdi sichqon...

✍Abdulla Oripov
@Abdulla_Oripov_sherlari

МАНГУЛИК
Ўзбекистон Республикасининг Биринчи Президенти Ислом Каримов хотирасига

Бир хабар тарқалди,

Ярим тун эди,

Гўё ғам селига ботдим, йўқолдим.

Кимдир йўлбошчидан айрилдик деди,
Мен-чи, азиз дўстдан айрилиб қолдим.

Кимнинг хаёлига келмишдир ахир,
Бирдан қулаб тушса буюк бир чинор.
Алам бўғзимизда аччиқ ва тахир,
Бу ғамнинг на чеки —€“ чегараси бор.

Кетди ногаҳонда айтмай бирор сўз,
Ҳижрон оловига барчани ташлаб.
Ўзбек осмонида сўнди чўнг юлдуз,
Катта-ю кичикнинг кўзини ёшлаб.

Биз — ноқис бандалар, ўйламай гоҳо,
Бошимиз силаган қўлни тишладик.
Юз йиллаб тескари айланди дунё,
Ўз эмас, ўзгалар учун ишладик.

Биз — ожиз бандалар, англамай туриб,
Бировнинг забонин санадик афзал.
Шу юрт даҳоларин билиб ва кўриб,
Бегона зотларга ясадик ҳайкал.

Босқин тепамизда турар эди зил,
Уни таг-тубидан бузмоқ шарт эди.
Асрий вайронанинг ўрнида дадил,
Янгича мамлакат тузмоқ шарт эди.

Фоний бу дунёнинг баланд-пастига,
Теран назар ташлаб ўтди бу Инсон.
Миллат қадри дея яшаб аслида,
Халқининг дардига бўлолди дармон.

Бугун жудолик бор гар қалбимизда,
Лекин ғурур яшар ҳавас қилгулик.
Абадият ўсди кўз олдимизда,

Шундоқ ёнимиздан ўтди Мангулик.

Islom Karimov xotirasiga Abdulla Oripov!

@Abdulla_Oripov_sherlari

Абдулла Орипов шеъри.
Салима Якубова ўкиди.

@Abdulla_Oripov_sherlari

Мухлислар эътиборига!

2024 йилнинг январь ойларида шоиримиз Абдулла Ориповнинг "Буюк соддалик" ва "Уммон бўйидаги ўйлар" китоблари оиласи томонидан нашр эттирилди. Китобларини топа олмаётган мухлисларнинг кўпдан кўп мурожаатларини инобатга олган холда, қуйидаги икки китобни сотувга ўзимиз қўйдик. Иккита китоб 100 минг сўм. Етказиб бериш (Тошкент шаҳри ичида) билан биргаликда. Хоҳловчилар бўлса Абдулла Орипов группасига https://t.me/+VHu5t9peOq5lMOuq

@oripovaruxsora
990001686 рақамига
мурожаат қилишлари мумкин.

@Abdulla_Oripov_sherlari

Абдулла Орипов

              НАМОЙИШ

Осмони фалакда чиқди фармойиш:
“Сомончи йўлида ўтсин намойиш!

Қатнашсин катта-ю кичик давлатлар,
Барча қитъалардан барча миллатлар”.

Чиндан кўрик бўлди ғоятда катта,
Олам йиғилганди ахир парадда.

Найзасин кўтариб Африка ўтди,
Там-там овозлари самони тутди.

Улар кийиб олган турфа либосин,
Бири филин минган, бири қўтосин.

Осиё етаклаб болаларини,
Аравага ортган бомбаларини.

Бизникилар ўтди хушнуд ва ғолиб,
Пахта чаноғини қўлига олиб.

Ўтдилар, дейишиб акани опа,
Жинсни фарқлай олмай қолган Европа.

Турли ўйиннинг ҳам борлиги дуруст,
Ракетаси билан қўрқитди ўрис.

Ҳамма ёқни босган турли штаблар,
Режиссёрлик қилди ўзи — Штатлар.

Томоша охирлаб қолди-ку қарийб,
Оҳ, ҳеч ким ўтмади китоб кўтариб.

✍🏻2015 йил 4 май

@Abdulla_Oripov_sherlari

Bugun shoir Nurmuhammad Abduzoirning tug‘ilgan kuni munosabati bilan tabriklaymiz. Shoirga ijod zavqi tark etmasligini tilab @Abdulla_Oripov_sherlari kanali.

* * *
Ҳар кун шоирларга ўқийсан лаънат
шеър ёзгани боис май ичиб, сарҳуш.
Абдулла Орифга қиларсан таъна,
сўнг Рауф Парфига ўқталасан мушт.
"дуруст ёзолмасди ичмаса улар,
демак, ёлғон эрур ёзган-чизгани"
дейсан-у,
ичингда бир шоир ухлар
умрини тамаки,
майдан қизғаниб.
ғўра машқларимни этарсан хатм,
гарчи,
сен  ҳақдамас бирор мисраси,
барибир излайсан ўзингни бетин, 
сўнг дуо этарсан:
сўздан қисмасин.
"ёз дейсан-а, ота, ёз" дейсан тағин,
қўшмасдан "мени ҳам" деган жумлани.
о, кўнглинг қандай соф,
эзилар бағир —
ёруғ сўз излайман тунлар мунграниб...
қулоққа қуярсан бир гапни тугал:
"ёзгил,
ёзмасанг-да ичмагил шароб".
эҳтимол, бир куни бардошим тугаб,
шароб лабларимни этгайдир тавоф,
ўкинма, сен айтган шоирлар жиндай
ичса-да буюкдир. мен эса мулзам:
нимани дўндирдим ҳушёр ҳолимда,
дуруст ёзармидим ичганимда ҳам?!

2021

Нурмуҳаммад АБДУЗОИР

https://t.me/Nurmuhammad_Abduzoir

@Abdulla_Oripov_sherlari

Абдулла Орипов

   ХАЛОЙИҚ ХОҲИШИ

Қудуқ қаздинг чўл ўртасида,
Суви ширин, албатта, текин.
Тенги йўқдир унинг аслида,
Биров ичмас бу сувни лекин.

Шиддат билан оқади дарё,
Кўприк қурдинг ба ҳаққи савоб.
Бирор кимса ўтмади аммо,
Қолиб кетди гўёки сароб.

Қора тунда ёқдинг-ку гулхан,
Келгайми, деб бирор йўловчи.
Бироқ ҳечким ўтмади йўлдан,
На бир ҳайвон ва на бир овчи.

Шеърлар ёздинг бамисли олов,
Яхшиларни куйладинг роса.
Қизиқмади ва лекин биров,
Ўқимади шеърингни кимса.

Тилла дўкон очдинг бир куни,
Бирданига ўзгарди олам.
Кутган экан халойиқ шуни,
Босиб кетди тумонат одам.

✍2016 йил 10  октябрь, Хьюстон.

@Abdulla_Oripov_sherlari

***
Dunyoda har ishning bordir o'z gali,
Olis xotiralar hamroh ishimga.
Shoirlik yodimdan chiqqan mahali
Cho'ponlik yillarim tushar esimga.

Qo'ylar suruvini haydayman barho,
Sibazg'a chalaman bazida beg'am.
Suruvim ichida ko'raman goho
Meni cho'pon degan kimsalarni ham.

📝 Abdulla Oripov
1975

@Abdulla_Oripov_sherlari

***
Deydilar, it hurar
-- O'tadi karvon,
Ranju balolardan
Yonmasin joning
Lekin alam qilar,
Bir umr giryon
Itlar to'dasidan
O'tsa karvoning.

📝Abdulla Oripov
1980
@Abdulla_Oripov_sherlari

Abdulla Oripov sheʼri
Xushmatov Mamadiyor o‘qidi.

@Abdulla_Oripov_sherlari

ABDULLA ORIPOV

            AVLIYOLAR

Dedilar, qaydadir, Shambala yoqda
Aziz avliyolar ruhi yasharmish.
Ular qo'llar emish bizni yiroqda,
Tibet tog'laridan gohi osharmish.

Gohida Yassaviy, Naqshband gohi
Namoyon bo'larmish biror makonda.
Nechog'lik keng erur Alloh dargohi,
Sir-u sinoat ko'p vaqt-u zamonda.

Deysan, ular ruhi kezarkan beshak,
Bilmasmi, to hanuz kutmoqda xalqi.
Oh, buyuk tilsimga keltirmagil shak,
Ular yonginangda yuribdi balki.

2009-yil 4-yanvar
@Abdulla_Oripov_sherlari

Абдулла Орипов

ВАЪДАЛАР

Мен қўрқаман Янги йилга
                       Шеърлар битмоқдан,
Ўқувчимга йўқ нарсани
                       Ваъда этмоқдан.
Айтилдими — бажарилса
                      Ваъда ва тилак,
Йўқса, бир йил кўздан йироқ
                      Юрмоқлик керак.
Ваъда бериб айтамиз биз:
                      Йўқолгай нифоқ,
Меҳнат қилган катта-кичик
                      Бўлиб иттифоқ.
Қарабсизки, қай бировлар
                      Аҳдни бузгайлар,
Зум ўтмайин ўзларича
                        Режа тузгайлар.
Ваъдамиздан ўрин олар
                        Албатта виждон,
Янги йилда, деймиз, ҳар ким
                        Бўлгай покдомон.
Лекин риё бир бурчакда
                        Пойлаб туради.
У ҳам энди кимларнидир
                       Йўлдан уради.
Шуҳратпараст, лўттибозга
                        Ўрин йўқ сира!
Ҳар биримиз бўлажакмиз
                        Соф ва бокира!
Янги йилда ана шундай
                        Янграр сўзимиз,
Эртаси-чи, лўттибозмиз
                        Баъзи биримиз.
Дўсту ёрга меҳримизни
                        Этамиз изҳор,
Сўнг йил бўйи бегонадир
                       Кимларга дийдор.
Янги йил-чи, барчасига
                        Қарагай кулиб,
Кела берар, кета берар
                       Ишончга тўлиб.
Қаримайман, мангу ёшман
                       Деганнинг, бироқ,
Қасамига бовар қилмас,
                       Солмагай қулоқ,
Ундайларнинг кўзин жиндек
                       Ёшлаб ўтар у,
Сочларига бир тола оқ
                       Ташлаб ўтар у.

✍1986

@Abdulla_Oripov_sherlari

Абдулла Орипов

Хуш келибсан, Янги йил!

Яна келдинг ҳадяга тўлиб,
Кутмоқдайдик сени интизор.
Қадамингдан миннатдор бўлиб
Зарра-зарра тўкилади қор.
Хафамасмиз бобо йилдан ҳам,
Қувонтирди у бизни қанча:
Конфетини кўришдик баҳам
Ва қўшиқлар ўргандик анча.
Ниҳол ўсди, қурилди қаср,
Фазоларга қилдик сафарлар.
Ўша йили туғилди ахир
Бизнинг қанча ўринбосарлар.
Сени асло унутмагай дил,
Хайр энди, хайр, йил бобо.
Симобдайин типирлар кўнгил,
Янги йилга энди марҳабо,
Энди уни қутлаб зиёда
Манзилига жадал элтамиз.
Кирмоқ учун кечки кинога
Ўн олтига тезроқ етамиз.
Йўл оламиз мактабга қатор
Бу йил энди биринчи карра.
Мактаб йўли, дўстлар, фазокор
Парвозидан кам эмас зарра.
Боғчаларга эмаклаб оз-оз
Яна келар янги қисмимиз.
Улғаяди ёшимиз бир оз,
Ўзгармайди аммо исмимиз.

1965

✍ Абдулла Орипов

@Abdulla_Oripov_sherlari

Abdulla Oripov she'ri
Ijrochi : Kamoliddin Ergashev

https://t.me/Abdulla_Oripov_sherlari

Vaqt

Sen birovga yaxshilik qilsang,
Qaytishini kutmagil aslo.
Abadiyat yonida, bilsang,
Unitilish bordir doimo.

Vaqt go'yoki qilko'pirik, undan
Ikki emas, bir o'tiladi.
Seni eslab unitmay yurgan
Odamlar ham unitiladi.

Abdulla Oripov
2013. 21-dekabr
@Abdulla_Oripov_sherlari

ILG‘OR ISHCHI VA CHAQQON MUXBIR QISSASI

Ishchi tongda turib olib 
Qurilishga boradi.
G‘isht teradi, tosh yo‘nadi, 
Shag‘alini qoradi.

Qo‘l ishda-yu, ammo o‘zga 
Xayol kezar boshida, 
Bog‘chadagi qizchasining 
Lentasi yo‘q sochida.

Telpagini yo‘qotibdi, 
O‘yinqaroq kenjasi. 
Yangisini obber, — deydi, 
Yig‘lab chiqdi kechasi.

Biroviga papka kerak, 
O‘ylab hamma-hammasin, 
Ishchi shu kun ikki hissa 
Bajaradi normasin.

Kun yarmidan og‘may turib 
Muxbir kelib qoladi, 
Ilg‘or, — deya uni, darrov 
Suratini oladi.

Ertasiga gazetada 
Xabar chiqar bir quloch: 
“U yangi yil sharafiga 
Mehnat qildi...” Na iloj!

Gazetani o‘qib ishchi 
Kulibgina qo‘yadi, 
Ilg‘orligin sababini 
Yangi yilga yo‘yadi.

Kunlar bir-bir o‘tib borar 
Qamchilashib otini.
Vaqti yetib bir kun uning 
Tug‘ib qolar xotini.

Kim ham axir toleidan 
Quvonmaydi bu chog‘da.
O‘g‘il ko‘rdik, deb qo‘yadi, 
Og‘zi uning qulog‘da.

O‘lmay bir kun katta bo‘lsa 
Odam bo‘lar chaqaloq.
Ammo hozir boqish kerak, 
Och qolmasin baqaloq.

Axir jinday chiqim kerak, 
O‘ylab hamma-hammasin, 
Ishchi shu kun uch baravar 
Bajaradi normasin.

Ertasiga gazetada 
Xabar chiqar bir quloch: 
“Baliqchilar kuniga u 
Mehnat qildi...” Na iloj!

Gazetani o‘qib ishchi 
Kulibgina qo‘yadi. 
Ilg‘orligin sababin 
Baliqchiga yo‘yadi.

Kunlar yana o‘tib borar 
Bir-birini quvlashib, 
Hozirchalik yomon emas 
Yashaydilar quvnashib.

Ammo odam hayotida 
Bordir kunning qorasi, 
Ajal yetib bir kun uning 
Qazo qilar onasi.

Marhum degan o‘zi borib 
Kirmaydi-ku qabrga.
Chiqim kerak ko‘mishga-yu, 
Mayda-chuyda tadbirga.

Onasining o‘lishini 
Qaydan bilmish u g‘arib, 
Yo‘qsa avval ozroq narsa 
Qo‘ymasmidi jamg‘arib.

Qabr ustiga lavha kerak... 
O‘ylab hamma-hammasin, 
Ishchi endi to‘rt baravar 
Bajaradi normasin.

Kun yarmidan og‘may turib, 
Muxbir kelib qoladi. 
Peshqadamni qaqqaytirib 
Suratini oladi.

Ertasiga gazetada 
Xabar chiqar bir quloch: 
“May bayrami sharafiga 
Mehnat qildi...” Na iloj!

Gazetani endi ishchi 
Bir burchakka otadi.
Bu maqtovga nima deysiz? 
O‘ylab boshi qotadi.

Uyda bundoq ta’ziya-yu, 
Bu yoqda bu masxara.
Nahot odam ahvolini 
So‘ramasa tasqara.

Endi ish ham qolib ketib 
So‘ka boshlar g‘urbatni: 
“Bilamiz-ku biz ham axir 
Bayramlarga hurmatni.

Shu zamonning og‘ushida 
Yetdik biz ham voyaga. 
Qalblarimiz limmo-limdir 
Qancha-qancha g‘oyaga.

Mayli, bahor bayramidek 
Yashnataylik olamni, 
Lekin, uka, yoshlik qilib 
Ranjitding-ku odamni”.

O‘ylab hamma-hammasini 
Xullas tinchi yo‘qolar, 
Xumparni bir boplay, — deya 
Gazetaga yo‘l olar.

Keyin bilsa muxbirning ham 
Bor ekan o‘z nolasi, 
Chiqim uchun yozgan ekan, —
Tuqqan ekan xolasi.

1968

@Abdulla_Oripov_sherlari

Абдулла Орипов

ХАТОЛАР

Ватерлоода хато қилди Наполеон  —
Жаҳонгирнинг қайтди шу кун омади.
Мана ўтса ҳамки неча бир замон,
У ҳақда гапирмаган одам қолмади.

Бобом пайғамбарлар қасоси учун
Гоҳо осийларнинг олди бошини.
Уни қарғадилар хатоси учун,
Ҳамон отмоқдалар таъна тошини.

...Хато қилган бўлсам кечиргин, болам,
Юз йил давомида чўзаверма, бас.
Кўриб турибсан-ку, мен оддий одам,
Наполеон эмасман, Темур ҳам эмас!

✍1968

@Abdulla_Oripov_sherlari

✍ Абдулла Орипов
🎤 Жуватхонова Дилдора
@Abdulla_Oripov_sherlari

O'zbekiston Qahramoni,
O'zbekiston Xalq shoiri,
Abdulla Oripovga bag'ishlanadi.

She'r va ijro muallifi:
Xursandbek Ro'zmetov

@Abdulla_Oripov_sherlari

Bemor

Bemor sho'rlik ko'nikkan butun
Og'riqlarning sherikligiga.
Tongda ko'zin ochganda har kun
Shukur qilar tirikligiga.

Ko'rib ketar o'nta shifokar,
Har tomandan tekshirar qarab.
Bitta gapni eshitib o'n bor.
O'n xil tashxis qo'yarlar, ajab.

Hamshira qiz uh tortar sekin,
Balki uning sabri ham bitdi.
Dardi sinov derdilar, lekin
Bu galgisi cho'zilib ketdi.

Abdulla Oripov
2014-yil 19 dekabr
@Abdulla_Oripov_sherlari

AJR
Yomon tushlar ko‘rsang,
Bosinqirasang,
“Alhamdu”ni aytgil,
Qochadi shayton.
Falakdan nisbangni
O‘ylab qarasang,
Sen ham hazilakam
Emassan, Inson!!!
Seni yaratgandi
Aslida Alloh,
Bosh bo‘lasan, deya
Farishtalarga.
Lekin tinch yurmading
Arshda ham, e voh,
Aralashib qolding
Har xil ishlarga.
Allohning qoshida
Bo‘lsang ham iqror.
Ajringni goh uzib,
Uzolmagansan.
Kechirmayin desa
Ibodating bor,
Kechirayin, desa
Tuzalmagansan.

✍️ Abdulla Oripov

@Abdulla_Oripov_sherlari

10-dekabr O'zbekiston Respublikasining madhiyasi qabul qilingan kun.

***
Serquyosh, hur o‘lkam, elga baxt, najot,
Sen o‘zing do‘stlarga yo‘ldosh, mehribon!
Yashnagay to abad ilmu fan, ijod,
Shuhrating porlasin toki bor jahon!

Oltin bu vodiylar — jon O‘zbekiston,
Ajdodlar mardona ruhi senga yor!
Ulug‘ xalq qudrati jo‘sh urgan zamon,
Olamni mahliyo aylagan diyor!

Bag‘ri keng o‘zbekning o‘chmas iymoni,
Erkin, yosh avlodlar senga zo‘r qanot!
Istiqlol mash’ali, tinchlik posboni,
Haqsevar, ona yurt, mangu bo‘l obod!

Oltin bu vodiylar — jon O‘zbekiston,
Ajdodlar mardona ruhi senga yor!
Ulug‘ xalq qudrati jo‘sh urgan zamon,
Olamni mahliyo aylagan diyor!

Mutal Burxonov musiqasi,
Abdulla Oripov she’ri.

@Abdulla_Oripov_sherlari

Абдулла Орипов     

   ЎЗБЕК  ҚОМУСИ

Мен бечора бир одамман,
Эртанги куним,
Не бўлишин билмайдиган ожиз бандаман.
Еру осмон ўртасида топмаган қўним,
Ботинимда ботмон тошу зоҳир хандаман.

Ёлғизликнинг рутубатли кўчаларида,
Не-не олтин фаслларим ўтди жунжикиб.
Шеъриятнинг тунд қоронғу кўчаларида
Йироқ-йироқ юлдузларга боқдим энтикиб.

Иғво, ҳасад, фитна билан тўлган бу ҳаёт,
Ҳар онимда мингта этди бир ҳасратимни.
Хира туман орасида буткул коинот,
Ғира-шира илғар эдим мамлакатимни.

Эслар эдим Бухорийни, Яссавийни ҳам,
Ҳа, ҳа, айри тушмаганди хотиротимдан,
Фақат улар чалинарди кўзимга мубҳам,
Лекин сира кетмас эди хаёлотимдан.

Ҳам Темурбек, ҳам Улуғбек, Алишер, Бобур,
Сизлар тузган ул салтанат — Салтанат бўлди.
Улуғ тарих Туркистонга чўнг гувоҳ эрур,
Давлат эдик, давлат эдик, у давлат бўлди!

Эмикдошим, ай, қардошим, қулоқ тут менга,
Ушбу кўҳна каҳкашонда мағрур тутгин бош
Сен заминга лойиқдирсан, замин ҳам сенга,
Сеникидир энди бу ер, сеники қуёш.

Қўлингда эрк, бошда ялов, тилингда сурур,
Ватанинг бор, бола-боқчанг, ор-номусинг бор,
Ўзбекистон деб аталган муқаддас ҳудуд,
Ўз Давлатинг, Мамлакатинг, ўз Қомусинг бор.

✍1992

@Abdulla_Oripov_sherlari

Абдулла Орипов

ТУРМУШ  ТАШВИШЛАРИ

(Ҳазил)

Турмуш ташвишлари,
Турмуш ташвишлари,
Биз сендан баландроқ тура олсайдик,
Биз сендан баландроқ юра олсайдик,
Балки ўнғаярди дунё ишлари,
Турмуш ташвишлари,
Турмуш ташвишлари.

Хотин иш буюрар,
Бола йиғлайди,
Боғча деб қайгадир югурмоқ даркор.
Балки шу ташвишлар бўлмаса эди,
Шоир бўлармидим анча улуғвор.
Турмуш ташвишлари,
Турмуш ташвишлари.

Қассоб оғайним бор —
Қароқчи — "пират".
Суякни қўшмаса кўнгли тўлмайди.
Ахир, қофияни еб бўлмас "брат".
Наҳот сен бўлмасанг турмуш бўлмайди,
Турмуш ташвишлари,
Турмуш ташвишлари.

Улуғ режалар бор менда ҳам ахир,
Хусусан, бир ишни битказмоқ даркор.
Унда қаҳрамоним ёвқур фазогир.
Кошкийди, сен шуни билсанг, нобакор
Турмуш ташвишлари,
Турмуш ташвишлари.

Шириндир шу ҳаёт,
Холи фироқдан.
Майли, битмасин ҳеч унинг ишлари,
Ҳаволаб кетсак гоҳ
Тортсин оёкдан,
Турмуш ташвишлари,
Турмуш ташвишлари.

✍1973

@Abdulla_Oripov_sherlari

10-dekabr O'zbekiston Respublikasining madhiyasi qabul qilingan kun.

***
Serquyosh, hur o‘lkam, elga baxt, najot,
Sen o‘zing do‘stlarga yo‘ldosh, mehribon!
Yashnagay to abad ilmu fan, ijod,
Shuhrating porlasin toki bor jahon!

Oltin bu vodiylar — jon O‘zbekiston,
Ajdodlar mardona ruhi senga yor!
Ulug‘ xalq qudrati jo‘sh urgan zamon,
Olamni mahliyo aylagan diyor!

Bag‘ri keng o‘zbekning o‘chmas iymoni,
Erkin, yosh avlodlar senga zo‘r qanot!
Istiqlol mash’ali, tinchlik posboni,
Haqsevar, ona yurt, mangu bo‘l obod!

Oltin bu vodiylar — jon O‘zbekiston,
Ajdodlar mardona ruhi senga yor!
Ulug‘ xalq qudrati jo‘sh urgan zamon,
Olamni mahliyo aylagan diyor!

Mutal Burxonov musiqasi
Abdulla Oripov she’ri
@Abdulla_Oripov_sherlari

​​СЎЗБОҚАР

  Улуғ шоир Абдулла ОРИФга

От боқардим тоғда бир пайтлар,
Қўйинда нон, қўлда калтагим.
Тасаввурда қирчанғи байтлар –
Бироз ғўра, бироз калтабин.

Чигирткага тутардим қулоқ,
Севинардим ёмғирда ивиб.
Эргашарди кучугим – Сўйлоқ,
Сўлагига ёпишиб чивин.

Гоҳо бўкиб ичганда қимиз,
Тоғлар боқар гўё қари дев.
От минардим эгар-жабдуқсиз,
Қадим туркий саллотларидек.

На бир ташвиш гарданимга юк,
На бир қайғу кўтарганди қад.
Афт-ангори бужмайган, хунук
Қояларга қўйиб муҳаббат,

Оёқлаган тойдай гижинглаб,
Сойга эниб, ошиб қирлардан.
Қалпоғимни маҳкам ғижимлаб
Шеър ўқирдим овлоқ ерларда.

Одамлардан олисда эдим,
Тоза, жўшқин, чайир, чўрткесар.
Бир думалаб шаҳарга келдим,
Маъюс, ҳалим, сарсон, юрткезар.

Таваккал деб ташладим қуръа,
Ҳавасимга санчилди тикан.
Кўрдим бунда подадан кўра,
Таёқ тутган чўпон кўп экан.

Ҳайратимни амаллаб енгдим,
Соддаликни отдим сидириб.
Тоғда уюр боқардим, энди
Сўз боқаман юрак едириб.

Қимиз эмас, азоб ичаман,
Кўчаларда тентийман – саёқ.
Вақт ямлайман жилла тежамай,
Гўё сира тугамас ҳаёт.

Ижара уй бағрига босар,
Сигор тутар, хаёлим пўрим.
Юмдалайди кўксимни роса,
Тоғларини соғинган бўри.

Деразани очаману шарт,
Ойга қараб увлайман ўксиб.
Қайтиш – уят, қолиш эса дард,
Тағин бадтар тамаки бурқсир.

Юпатаман сийпалаб уни,
Қилгандайин айбидан соқит.
Бўлмайдида жигарим, хуним,
Шаҳарда – от, тоғда сўз боқиб.

У кўнмайди, ғашиқар ўчкор,
Кенглик завқи бошлайди хуруж.
Билагимда ёввойи куч бор –
Тумшуғига тушураман мушт!

Кечир, Жондор, ётма буралиб,
Чида! Яша! Бу ўчмас ёзиқ.
Суғиролмас биров, юрагим –
Шеър бағрига қоқилган қозиқ!

Тоғда уюр боқардим, энди
Сўз боқаман юрак едириб...

Жонтемир

@Jontemir_t

https://t.me/Abdulla_Oripov_sherlari

Абдулла Орипов

ВИЖДОН

Жаҳон шоирлари виждон ҳақида
Азалдан минг-минглаб байтлар ёзмишлар.
Виждон-ку, аслида собит ақида,
Кимлардир бу йўлдан гоҳо озмишлар.

Балки виждон дея тинмай чекиб оҳ,
Ҳайқириб юрмайди ҳар қандай одам.
Топилгай боболар ҳикматларин гоҳ,
Шунчаки насиҳат дегувчилар ҳам.

Қай битта нарсага муҳтож бўлса гар,
Энг аввал ўшанга топингай инсон.
Майли, уммон қадар ё зарра қадар,
Ҳар нечук қалбларда бор бўлсин виждон.

Магар кетар бўлса виждон бош олиб,
Иймон ҳам у билан бирга кўчгайдир.
Буткул марду номард таянчсиз қолиб,
Чоҳ узра чирпирак бўлиб учгайдир.

Девлар қутулгандек Сулаймон ўлиб,
Бетизгин туйғулар ҳар ён югургай.
Қалб деган истеҳком посбонсиз бўлиб,
Энг аввал нафс унга ўзини ургай.

Ҳақиқат аталмиш равшан қуёшни,
Очиқ дийдаларки, илғамас кўриб.
Авлиё дегайлар сўқир авбошни,
Адолат ўрнини эгаллар фириб.

Иложин топсалар ҳар қандай онда
Эл-юртни чалғитиб қўярлар осон.
Гар ҳакам бўлсалар бирор майдонда,
Мағлубни ғолиб деб этарлар эълон.

Куппа-кундуз куни киприк қоқмасдан
Ёлғон сўзлай бошлар даҳолар ҳатто.
Кимлардир умрида бир шам ёқмасдан,
Машъал бўлмоқликни қилгайлар даъво.

Виждон кетган жойда албатта бир кун,
Илондек қўзғолур бўҳтон ва туҳмат.
Бу ёруғ оламда одамзод учун
Бормикан улардан ортиқроқ кулфат.

Виждонсиз кимсага дуч келган нафас
Кофир ҳам дод солгай: Асрагил, ё Рабб!
Оддий Бисмиллони билмайдиган кас
Илтижо қилгайдир қиблага қараб.

Виждондан айрилиб қолган фурсатда
Бошланар тож-тахтга ружу дафъатан,
Не-не зукко халқлар қолиб ғафлатда,
Тўзғиб кетажакдир бутун бир Ватан.

Ҳа, ўзинг ёрлақа, яратган Эгам,
Иблис юракларга қутқу солмасин.
Виждондан мосуво этмагин ҳеч ҳам,
Токи у хотирот бўлиб қолмасин.

✍1994

@Abdulla_Oripov_sherlari

МЕНГА ХУШХАБАР АЙТ...

Менга хуш хабар айт, ёлғон бўлса ҳам…
Дарду машаққатлар ўтгайдир бари,
Ўксима, оёққа тургайсан, деб айт.
Умрингнинг фараҳбахш, тотли онлари
Ҳали олдиндадир, кўргайсан деб айт.

Менга хуш хабар айт, ёлғон бўлса ҳам...
Дўстларинг бордир-ку ҳали дунёда,
Сени кулфатларда қолдирмас деб айт.
Ёвузлик бўлса ҳам ҳаддин зиёда
Сени чангалига олдирмас, деб айт.

Менга хуш хабар айт, ёлғон бўлса ҳам…
Олис муҳаббатинг юрибди дегил.
Сарғайган дафтарин варақлаб пинҳон,
У сени тушида кўрибди дегил.

Менга хуш хабар айт, ёлғон бўлса ҳам…

Абдулла Орипов
@Abdulla_Oripov_sherlari

АБДУЛЛА ОРИПОВ


ЗАМОНЛАР

Ўзимизнинг гап, деб бошлайди сўзин,
Кўрсатгич бармоғи лабида турар.
Эшикдан бир лаҳза узмайди кўзин,
Кимдир кириб қолса, мавзуни бурар.
Одамлар тўп жойдан қочар минг қадам,
Ҳатто, радиони тинглайди пинҳон.
Магар, об-ҳаводан гап кетса, шу дам
Дейди: – Газетани ўқинг, ўртоқжон.
Бирор таъзияга бориб қолса гоҳ,
Тиловат қилмайди, мўлтирар гирён.
Ҳеч кимса кўрмаган чекканини оҳ,
Собиқлар тўйига бормас ҳеч қачон.
Кундузи Қомусдан кўчирма олиб,
Чорлар огоҳликка яхши-ёмонни.
Тунлари кўрпага бурканиб олиб,
Қироат қилади йиғлаб, Қуръонни.
Шу қадар шафқатсиз эдингми, ҳаёт,
Қўлим ёқангдадир, Маҳшаргача то.
Қуёндек беюрак, қушдек бесабот,
Соқов қилганмидинг халқимни, Шўро.
Болажон, сен бундай кунларни кўрма,
Шукур, сеникидир замона бу пайт.
Мағлублар сингари бош эгиб юрма,
Сен энди ғолиблар қўшиғини айт.

АҚШ. Хьюстон. 17.10.2015 @Abdulla_Oripov_sherlari

Абдулла Орипов
Ўзбекистон қахрамони, Ўзбекистон халқ шоири

ТАБИАТ

Узоқларда қолди туғилган уйим,
Ажиб болалигим қолди узоқда.
Қолди ҳаммопишга кўмилган ўйим,
Қолди сингилларим бари йироқда.
Энди мен эслайман кўзларимда нам,
Ўша йилларимнинг оташ сеҳрини.
Қўмсаб талпинаман гоҳи-гоҳи дам
Мунис сингилларим маьюс меҳрини,
Шундай пайтда ўзинг айлагил шафқат,
Сингил бўла қолгил, менга, табиат.

Ақлим танидиму қошимда шу кун,
Жасур акаларим сафини кўрдим.
Уларнинг бари ҳам ботир ва дуркун,
Мен улар сафига шеьр билан кирдим.
Энди мен эслайман кўзларимда нам,
Ўша давраларнинг оташ сеҳрини.
Қўмсаб талпинаман гоҳи-гоҳи дам,
Жасур акаларим ажиб меҳрини.
Шундай пайтда ўзинг айлагил шафқат,
Ака бўла қолгил, менга, табиат.

Ўтган кунларимга боқиб мунтазир,
Соғинчдан ёнади ёнган бу жоним.
Афсуски, ёнимда эмассиз ҳозир,
Донишманд устозим - сиз, Отажоним.
Энди мен эслайман кўзларимда нам.
Ҳикматли сўзларнинг оташ сеҳрини.
Қўмсаб талпинаман гоҳи-гоҳи дам,
Донишманд отамнинг шафқат, меҳрини.
Шундай пайтда ўзинг айлагил шафқат,
Ота бўлақолгил менга, табиат.

Мен азиз онамни тупроққа қўйдим,
Ҳали тинган эмас кўздаги ёшим.
Олис кечалари ҳижронда куйдим.
Энди қай сийнага қўяман бошим.
Энди мен эслайман кўзларимда нам,
Она деган сўзнинг қайтмас сеҳрини.
Қўмсаб талпинаман ҳар зум, ҳар қадам
Онам оғушини, онам меҳрини.
Шундай пайт ҳам ўзинг айлагил шафқат,
Она бўла қолгил менга, табиат.

1966

@Abdulla_Oripov_sherlari

​​O’ZBEKISTON BAYROG‘I

Har qanday lashkarning ham
O’z tug‘i, yalovi bor,
Sen qaysi saltanatdan,
Sen qaysi davlatdan kam.
Qo‘rg‘onlar qatorida
Bir qo‘rg‘onsan ustuvor,
Vallamat, tug‘dor yurtim,
Muhtasham Respublikam.

O’ylayman, ha, olamda
Nisbiy erur ko‘p holat,
Zamona g‘alviridan
Har narsa o‘taverar.
Tarix uchun va lekin
Kim ham bergay kafolat,
Yakka inson bir yo‘lchi:
Kelaru ketaberar.

Qadim-qadim zamonda
Yunonlik haykaltarosh,
Bir san’at yaratibdi,
Maqsadi - bir burda non.
Haykal esa asrlar
Sinoviga bermish dosh,
Bugun uni ko‘klarga
Ko‘tarar butkul jahon.

Ko‘zni kattaroq ochib
Boqsang bu muammoga,
Alam qilgulik qadar
Kam yashar inson zoti,
Faqatgina xalq sohib
Bardavom bu dunyoga,
Asragay har kas nomin
Faqat xalqning hayoti.

Sanasang hodisot mo‘l
O’zbekning tarixida,
Har biriga bir noma
Yoki doston bitgulik.
Ne zotlar oqmagan bu
Asrlar arig‘ida,
Har biri bitta xalqning
G‘ururiga yetgulik.

Barchaga ayon erur
Men aytgan ushbu gaplar,
To hanuz asablarni
Ezg‘ilar bu shum o‘tmish.
Moziyga o‘qtin-o‘qtin
Sochsak hamki g‘azablar,
Lekin ayting, o‘zbekning
Qo‘lidan kim ham tutmish?

Bir kuni yovqur shoir
Ya’ni Turdi Farg‘oniy,
Bo‘ltak bo‘lgan bu xalqqa
Birlash deb qildi xitob.
Bejavob qolaberdi
Uning dardli so‘rog‘i,
O’sha-o‘sha zamin kar,
O’sha-o‘sha gung oftob.

Bugun zimdan nazar sol
Sen mana bu bayroqqa,
Mayliga bir daqiqa
Unutgin turfa kekni.
Shu bayroq nomimizni
Eltdi yiroq-yiroqqa,
Shu bayroq birlashtirdi
Parokanda o‘zbekni.
1984

Abdulla Oripov

@Abdulla_Oripov_sherlari

Abdulla Oripov
,, Sevgisiz odam'' she'ri

Abdurahmonov Abbos ijrosida

@Abdulla_Oripov_sherlari

ЯРАДОР БЎРИ

Ярадор бўрини кўрганман бир бор,
Тоғнинг этагида, дарё бўйида.
Тинмай жароҳатин яларди жондор,
Қон оқар, дарё ҳам оқар қуйида.

Мен ўша бўрини кузатдим узоқ,
Ғинг этмас, шунчалар метин бардоши.
Шом чўкди, юлдузлар сочдилар бодроқ,
Жасур бўрининг ҳам ботди қуёши.

Овозим борича ўкраб юбордим,
Кимга қойил қолиб, қарғайин кимни?
Тишлаб лабларимни, қонимга қордим,
Унутдим бир нафас инсонлигимни.

Ерга урди мени шунча йил ҳаёт,
Қолмади бирорта тош отмаган кас.
Илма-тешик бўлди вужудим, ҳайҳот,
Шунда ҳам ғанимлар тинч турган эмас.

Қўлимни узатдим фалакка ногоҳ,
Менинг гуноҳларим не эди, Эгам?
Бу ноқис дунёга боқиб чекдим оҳ,
Фақат эзгулик деб кўтардим қалам.

Қабоҳат елкамдан турди-ку босиб,
Наҳот тақдир ҳукми шундан иборат?
Бўйнимга кўз ёшдан шодалар осиб,
Дод солдим бўлмади зикрим ижобат.

Менинг фарёдимга тўлди – ер-само,
Азобим қадарли олисдир йўлим.
Иродам йўқмиди тошчалик ҳатто,
Битта бўричалик топмадим ўлим.

© Abdulla Oripov

@Abdulla_Oripov_sherlari

Abdulla Oripov she'ri.
G‘olibjon Dilmurodov o‘qidi.
"Birinchi muhabbatim"
@Abdulla_Oripov_sherlari

Абдулла Орипов

Тоифалар

Сизга баб-баробар ёқмасман  сўзсиз,
Гарчи шеър ёзаман ёқмоқ қасдида.
Бирингиз нарвоннинг тепасидасиз,
Иккинчингиз эса унинг пастида.

Бир жойдан чиқмаган фикрингиз асло,
Бирингиз тегирмон, иккинчингиз дон.
Мен-чи, тегирмончи кимсаман гўё,
Гапим уқтиролмай ўртада сарсон.

Бирингизга ёқар офтобли кунлар,
Бирингиз ёмғирли кунга ошиқсиз.
Бирингизда мудом ҳасратли унлар,
Бошқангиз ҳамиша кўнгли очиқсиз.

Сиз шайдо ва лекин фарқингиз анча,
Дилингиз турлидир, ҳатто қоришиқ,
Бир вақтнинг ўзида, урунмай қанча,
Айтиб беролмасман икки хил қўшиқ.

Балки қалбларингиз англамоқ учун,
Йиллар ўтиб кетар секин ва оғир.
Келишиб олгайсиз, иншоаллоҳ, бир кун,
Қолмас орангизда жумбоқ билан сир.

Ҳозир-чи, дардингиз турфадир мутлоқ,
Рози ҳам бўлмайсиз мендан шу фурсат.
Бировингиз учун кўринсам-да оқ,
Иккинчингиз учун қораман фақат.

2016 йил 16 март

✍Абдулла Орипов

@Abdulla_Oripov_sherlari

​MANSUR JUMAYEV IJODI

O‘zbekiston Yozuvchilar uyushmasi a'zosi, Yozuvchilar uyushmasi bo‘lim boshlig‘i, iste'dodli shoir Mansur Jumayev 33 yoshida vafot etdi.
Mansur Jumayev Qashqadaryo viloyati Mirishkor tumanida 1991-yil 17-fevralda tug‘ilgan. O‘zbekiston davlat jahon tillari universitetining Xalqaro jurnalistika fakultetini tamomlagan.
U O‘zbekiston Yozuvchilar uyushmasida Adabiy targ‘ibot va tadbirlarni uyushtirish bo‘limi boshlig‘i lavozimida faoliyat yuritayotgan edi.
Shoirning “Oq orzularim”, “Hayrat qo‘shiqlari”, “Hazrati ishq” nomli she‘riy to‘plamlari nashr etilgan. Yaqinda “Izlam” turkumida “Biz kutgan fasl” nomli she‘riy to‘plami chiqqan edi. Bu uning oxirgi kitobi bo‘lib qoldi.
Shoir “Ota yurt”, “Oldinda bir yo‘l bor...”, “Sujud”, “Bolalik”, “Mening xatolarim”, “Esingdami, aka...”, “Ertak haqida ertak”, “Hayrat qo‘shig‘i”, “Kitobsevar qizga”, “Yigirma birinchi asr tabibi”, “Yo‘lovchi qo‘shig‘i”, “Senga deganim” singari Vatanga, el-yurtga muhabbat, insoniy va ilohiy tuyg‘ular baland pardalarda kuylangan sheʼrlari bilan sinchi sheʼrxonlarning qalbidan joy olgan.
   Bir qator asarlari rus, ingliz, turk, ozarbayjon, tojik, qoraqalpoq va boshqa tillarga tarjima qilinib, nufuzli xorijiy nashrlarda eʼlon qilingan. Turli yillarda “Yoshlik”, “Sharq yulduzi” jurnallarida, “Yangi O‘zbekiston”, “Hurriyat”, “Kitob dunyosi” va boshqa markaziy nashrlarda sheʼr, hikoya, esse va publitsistik maqolalari chop etilgan. Jumladan, “Xon qizining hovlisida kechgan mushoira”, “Kichkina odamning ulkan qalbi”, “Uyqudagi go‘zallar mehmoni”, “Ulug‘ Attor va jajji jiyancham”, “Adiblari ardoqlangan yurt”, “Bulbul qachon baland sayraydi?”, “Velosipedni qaytadan kashf etamiz!” singari badiiy publitsistik maqolalari o‘quvchini befarq qoldirmadi.
Mansur Jumayevning “Alfa”, “Arilar ko‘zyoshi” kabi hikoyalari nafaqat yurtimiz ommaviy axborot vositalarida, balki rus, ozarbayjon va boshqa xorijiy tillarga tarjima qilinib, adabiy-badiiy jurnallarda chop etilgan.
O‘zbekiston Yozuvchilar uyushmasi jamoasi va ko‘p sonli a'zolari Mansur Jumayevning oilasi va yaqinlariga hamdardlik bildiradi.

O‘zbekiston Yozuvchilar uyushmasi Axborot xizmati

ЎТМИШДАН ЭРТАКЛАР

2019 йил Австралияда ӯрмон ёнғинлари бӯлди

Болаликнинг боғлари ёнди
яшил қитъа ўрмонларидай,
лабларимга май тутди ҳаёт —
ўта аччиқ май.

Шундан бери учолмадим бот,
шундан бери кафтимдадир жон,
оёғингга ёпишдим, ҳаёт,
ўтдан қочган каоласимон.

Одамларга боқдим умидвор,
гарчи бари нораста, сабий,
ҳар сув тутган касни билдим ёр,
ташна, куюк кенгуру каби.

Эсимдадир:
апрелми ё май,
тутун мисол ўсди зоримиз,
яшил қитъа ўрмонларидай
ёниб кетди буғдойзоримиз.

Зир югурди отам тўрт томон,
оғаларим чопди ёнига:
ўт қўйганди қай бир мусулмон,
мусулмоннинг дастурхонига.

Отам сўкди,
онам йиғлади,
момом узоқ қарғади айтиб;
оғаларим қора пайкалга
бир дона дон сепмади қайтиб.

Бир болакай ўлди ичимда,
муштдек танда ўсди бир одам:
буғдойзорга қўшилиб шунда
ёнган эди болалигим ҳам.

Энди мавзу — нон-сув, ризқу рўз,
энди гўдак хаёллар абас,
энди синчков боқиб турган кўз,
бошқа эди,
олдинги эмас.

Ўша йили қишнинг бўрони
лашкар суриб келганида тик,
дориланган уруғлик донни
тегирмонда тортиб егандик.

Айтолмасман нонга навбат ҳам
тингламоқни кас-нокасини...
ўлчаб берар эди сўнг онам
"магазиннинг буханкаси"ни.

Унутмайман
ўз ҳаққин отам
итга элтиб ташлаган онни,
еб қўйгандим ахир мен нодон
Қоравойга аталган нонни.

Эсимдадир яхмалак йўллар,
ғичир-ғичир эски ароба,
калиш,
чопон,
қизарган қўллар,
темир сувдон — бўйим баробар.

Маош нима билмасдик,
шунча —
ишласа ҳам қайдадир отам;
иситмалаб йиқилмагунча
айтмас эдик дардимизни ҳам...

Кўпга келган тўйдир,
меҳмондир,
бари ўтди,
бироқ,
не қилай,
болаликнинг боғлари ёнди
яшил қитъа ўрмонларидай.

Шундан, балки, тўлишган сабот
қайғуни ҳам қаршилар тикка,
ўтиш оғир аммо,
эй ҳаёт,
тирикликдан тирикчиликка...

Димоғларни ёндирсин атр,
ёндир,
ҳаёт,
ғамнинг барини,
олов тутиб ёқиб қизартир
келинларнинг тандирларини,

бахтдан ёндир мудом кўзларни,
кўнгилларни ёқсин муҳаббат,
ўтга солиб тобла сўзларни...
болаликни ёндирма фақат!

Фақат шуни сўрайман,
ҳаёт,
тоза ҳислар ёнмасин дерман;
шам ёқажак гугуртни, ҳайҳот,
ёмонларнинг қўлига берма!

Тошкент, 2020.

© Мансур Жумаев

Ishonish qiyin, dabduristdan Mansur Jumayevni berib qo‘ydik. Akamizning ohirati obod bo‘lsin. Oila a'zolariga sabr bersin. 😢

Taʼziya

   O‘zbekiston Yozuvchilar uyushmasi jamoasi isteʼdodli shoir, uyushma aʼzosi Mansur Jumayevning vafoti munosabati bilan oilasi va yaqinlariga chuqur hamdardlik bildiradi.

O‘zbekiston Yozuvchilar uyushmasi Axborot xizmati

SHAROF RASHIDOV XOTIRASIGA

Marhumlar hayotdan erurlar yiroq,
Demakki, yiroqlar xushomaddan ham.
Makru nayranglarin qo‘ymaydi biroq,
Toki hayot ekan Nobakor Odam.

Ularning turfa xil odatlari bor,
Avval ganjlarini ko‘mgay tuproqqa.
So‘ng birdan o‘zlarin his etib nochor,
Gavharim qayda deb tushgay titroqqa.

Dunyoda har kimga qismat yor emish,
Kimdir toj kiygaydir, kimlardir kuloh.
Go‘yoki Alisher sizga ham dermish:
Siyrating darveshu suvratingdir shoh.

Ezgulik niqobin yuziga tortgan
Manfur bir maydonda surgandingiz ot.
Kimdir o‘z padarin bir pulga sotgan,
Qo‘l-oyoq kishanda, talangan bisot.

O’ychan ko‘zingizda ne g‘am bor edi,
Kelajakmidi yo moziyning shoni?
O’zbek-ku, bir erkka intizor edi,
Sizni ado qildi ming bir armoni.

Erksevar ellarning orzusin yoqlab,
Xayol dengizida tunlar suzgansiz.
Istiqlol so‘zini yurakda saqlab,
Siz qafas ichida gullar tuzgansiz.

Shoirman, bo‘ynimda she’rning gunohi,
Sohibin asraydi Saltanat makkor.
Ochko‘z, amalparast kimsalar gohi
Adolat menman deb topgay e’tibor.

Ularning dastidan notinch el, zamon,
Tanimay qolursan oq-qorani ham.
Chalg‘itib kelganlar topganda imkon,
Hattoki Temuru Boyqaroni ham.

Odildir - kim elni boshlagan baxtga,
O’zi o‘tda yonib, yo‘lni ochganlar.
Lekin intilarkan toj ila taxtga,
Vo ajab, ko‘pincha dordan qochganlar.

Qulluq, Sharof ota, ming bora qulluq,
Boqiy O’zbekiston sizga ham yodgor.
Bugun u istiqlol shavqiga to‘liq,
Xizmatingiz eslar takror va takror.

Ilohi, har kimga bersinu to‘zim,
But bo‘lsin Vatanning metin qo‘rg‘oni.
Sizni qo‘llab turar O’zbegim - o‘zim,
Va, yurtning posboni - jasur o‘g‘loni!

Sulton bo‘lmasangiz, Sharof ota, gar,
Yashardingiz qalam qo‘ldoshi bo‘lib.
Poklikka, vafoga timsol muqarrar,
Xursanoy ayaning yo‘ldoshi bo‘lib.

1992 yil 2 noyabr

Abdulla Oripov

@Abdulla_Oripov_sherlari

СЕВГИ ЎЛИМИ..

Ёмғир тинмай ёғди кун бўйи,
Ёмғирли кун каби эзилди дардим.
Яйдок кучаларда жим юрган куйи,
Сенинг изларингни ахтардим.

Уфқларда эса аччик бир туман,
Менинг кузларимга қуярди заҳар.
Увишган қалбимни сокинлик билан,
Эзар эди бўм- бўш бу шахар.

Энди сен тутмассан асло қулимни,
Утган севгим учун очмассан аза.
Оҳ, қандай ўлим бу севги ўлими,
Унга на кабр бор ва на жаноза.

А.ОРИПОВ. 1967 йил.
@Abdulla_Oripov_sherlari

Абдулла Орипов
САЛОМ–АЛИК

Умримдан минг марта розиман, бироқ
Гоҳида кўксимни ортиқ керибман.
Ёшлик – ғўрлик экан, англамай, кўпроқ
Катта шайтонларга салом берибман.

Вақтнинг тезлигига ҳайрон қоламан
Ва кулиб қарайман бунинг барига.
Энди ёшим улуғ, алик оламан
Кичик шайтонларнинг саломларига.

09.03.2015
@Abdulla_Oripov_sherlari

#chellenj
Buxoro shahar
16-maktabning 6-"B"sinf o'quvchisi Sodiqova Rayhona Abdulla Oripovning 80 yilligiga
bag'ishlab aytdi.
@Abdulla_Oripov_sherlari
Ona tilim sheri

Абдулла Орипов
ОНА ТИЛИМ


Минг йилларким булбул каломи
Ўзгармайди, яхлит ҳамиша.
Аммо шўрлик тўтининг ҳоли
Ўзгаларга тақлид ҳамиша.

Она тилим, сен борсан, шаксиз,
Булбул куйин шеърга соламан.
Сен йўқолган кунинг, шубҳасиз,
Мен ҳам тўти бўлиб қоламан!

@Abdulla_Oripov_sherlari

КЎПЧИЛИК

Қанча шарқ шоири йиғлаб ёзди шеър,
Турфа маъно берар ҳар битта сўзи.
Фурқат карвонимдан адашганман, дер,
Аслида, адашган карвоннинг ўзи.
Буюк Брунони ёқдилар ўтда,
Қуёшни марказдир дегани учун.
Миллионлаб насорон боқди сукутда,
Инсон рад этганди илмнинг кучин.
Ўрис Сахаровни ўртага олиб,
Хўрлади, улуғ зот кўтармади бош.
Во ажаб, ҳаммани ҳайратга солиб,
Ўзбек аёли ҳам отиб қолди тош.
Менинг кўпчилигим, сендан айланай,
Сени жаҳонгирлар судрашган узоқ.
Орангда яшаган даҳолар талай,
То ҳануз йўлингга қўярлар тузоқ.
Ким кимни айбларди тарих қаърида,
Деймизки, мукаммал эмасдир олам.
Бордир одамзоднинг луғатларида,
«Лаънати бир қавм» деган сўзлар ҳам.
Аллоҳ тепамизда турибди қараб,
Асло поймол бўлмас ҳақнинг ҳуқуқи.
Шоир, қадам босгин тегрангга қараб,
Гоҳо бир одамга шеърингни ўқи!

18.06.2015
Абдулла Орипов

@Abdulla_Oripov_sherlari

Абдулла Орипов


                       ***
                   (Ҳазил)

Оқ қоғоз, юзингга сирим айтаман,
Мени бу сафар ҳам тинглагил, дўстим.
Кеча битта ўзим сайр этиб чаман,
Бир гўзал дилбарнинг домига тушдим.

Оқ қоғоз, оқ қоғоз, сенинг юзингда
Қанча гўзалларнинг тасвирлари бор.
Аммо минг йил ўтиб, келиб ўзингга
Бундай гўзал юзин кўрмабсан зинҳор.

Турардим қошида беҳис, безабон,
Андиша босарди елкамдан оғир.
Нетай, шеър бағишлаб қизга ўша он,
Байт айтдим ўзимни тутолмай охир.

У мени тинглади мисли нилуфар,
Ақиқ лабларида тер шабнам эди.
Лекин қайрилди-ю, шоир бўлсанг гар,
Шеърингни қоғозга бориб айт, деди.

Оқ қоғоз, юзингга сирим айтаман,
Мени бу сафар ҳам тинглагил, дўстим.
Кеча битта ўзим сайр этиб чаман,
Бир дилбар гўзалнинг домига тушдим..

✍🏻1979

@Abdulla_Oripov_sherlari

Абдулла Орипов
Қизларим

Ўғил-ку, эгилган қаддингни тутиб,
Қулатмай тургувчи таянч-тиргакдир.
Қизинг-чи, ҳаттоки ўзни унутиб
Бошга қўниб турган қушдай сергакдир.

Нимани истасанг, пилдираб қизинг
Ўша он олдингга шай қилиб қўйгай.
Унга қувонч эрур борлигинг – ўзинг,
Кўриб кўзи билан меҳрингга тўйгай.

Қайдандир сен томон отилса бир тош
Зарбаси теккайдир энг аввал унга.
Шод бўлсанг, севинчдан кўзларида ёш,
Алёрлар айтади ўша хуш кунга.

Ел тегса, иссиғинг чиқса ногаҳон
Мисоли ўтда у ёниб кетгайдир.
Йиғласа, фалакка дастлаб, бегумон
Унинг илтижоси бориб етгайдир.

Гўдак чоғиданоқ қўғирчоқ ўйнаб,
Ҳаётни яратиш туғма хислати.
Яхлит мўъжиза у, қарасанг ўйлаб,
Жаъм унда онанинг бор фазилати.

Келгай-ку балоғат ёши ҳам тайин,
Умрнинг мунис бир палласи етгай.
Ўша кун тиззангга қўйиб манглайин
“Раҳмат, Отажон”, деб сени  тарк этгай.

Энди-чи, ёнида жуфти муносиб,
Қумридек сайр этиб юриши яхши.
Пайт келиб, боласин бағрига босиб,
Ота, - деб эшикдан кириши яхши!

Қизларим шоҳ байтдир мумтоз ғазалдан,
Фаришта юрармиш қиз бор хонада.
Бежиз айтмаганлар, азал-азалдан
Қизнинг ҳақи кўпроқ ота-онада.
23.11.2010.

@Abdulla_Oripov_sherlari

Muallim


Muallim haqida soʻzim ushbudir:
Muallim kamolot ichra koʻzgudir.
Oʻqidim Gerodot, tarixni koʻp bor,
Forobiy, Danteni takror va takror.
Barini oʻqidim, lol qoldi aqlim,
Bariga ustozsan oʻzing, muallim.
Alisher qalbiga solgan sehr-fayz
Sensan,ey muallim, ustoz Abul-Lays.
Qutlugʻ xonadonda qutlugʻ kalom bu,
Hamid Olimjon bu, Gʻafur Gʻulom bu.
Buyuk Temur sendan topgandir taʼlim,
Sen shundoq, aziz zot, aziz muallim.
Rost aytsam, oʻzingsan eng avval daho,
Sen hayot ganjida durri bebaho.
Ulugʻ ayyomingda sheʼriy kalom bu,
Shogirdlar nomidan qutlugʻ salom bu .

✍ @Abdulla_Oripov_sherlari

Abdulla Oripov hayoti va ijodiga nazar. Shoirning yangi to‘plamlari nashrdan chiqdi.

@Abdulla_Oripov_sherlari

***
Dunyoda har ishning bordir o'z gali,
Olis xotiralar hamroh ishimga.
Shoirlik yodimdan chiqqan mahali
Cho'ponlik yillarim tushar esimga.

Qo'ylar suruvini haydayman barho,
Sibazg'a chalaman bazida beg'am.
Suruvim ichida ko'raman goho
Meni cho'pon degan kimsalarni ham.                

📝 Abdulla Oripov
                 1975
@Abdulla_Oripov_sherlari

Ertaga 17:00 da Milliy kutubxonada bo’ladigan she’riyat kechasiga tayyorgarlik ketmoqda!

Qahramon Shodmonqul Salom!

“Mutolaa” da she’riy konsertlar davom etadi!

O‘zbekiston Qahramoni, O‘zbekiston xalq shoiri Abdulla Oripov xotirasiga bag‘ishlangan adabiy-maʼrifiy tadbir hamda “Buyuk soddalik” va “Ummon bo‘yidagi o‘ylar” kitoblari taqdimotidan fotolar.

Muallif – Ahmad To'ra.O‘zbekiston Qahramoni, O‘zbekiston xalq shoiri Abdulla Oripov xotirasiga bag‘ishlangan adabiy-maʼrifiy tadbir hamda “Buyuk soddalik” va “Ummon bo‘yidagi o‘ylar” kitoblari taqdimotidan fotolar.

Muallif – Ahmad To'ra.
@Abdulla_Oripov_sherlari

Ustozning qizi Ruxsora Oripova
@Abdulla_Oripov_sherlari

TAKLIFNOMA

  18-sentabr kuni soat 16:00da Yozuvchilar uyushmasida O‘zbekiston Qahramoni, O‘zbekiston xalq shoiri Abdulla Oripov xotirasiga bag‘ishlangan adabiy-maʼrifiy tadbir hamda “Buyuk soddalik” va “Ummon bo‘yidagi o‘ylar” kitoblari taqdimoti bo‘lib o‘tadi. Tadbirga barchani taklif etamiz.

O‘zbekiston Yozuvchilar uyushmasi Axborot xizmati

@Abdulla_Oripov_sherlari

МЕНГА ХУШХАБАР АЙТ...

Менга хуш хабар айт, ёлғон бўлса ҳам…
Дарду машаққатлар ўтгайдир бари,
Ўксима, оёққа тургайсан, деб айт.
Умрингнинг фараҳбахш, тотли онлари
Ҳали олдиндадир, кўргайсан деб айт.

Менга хуш хабар айт, ёлғон бўлса ҳам...
Дўстларинг бордир-ку ҳали дунёда,
Сени кулфатларда қолдирмас деб айт.
Ёвузлик бўлса ҳам ҳаддин зиёда
Сени чангалига олдирмас, деб айт.

Менга хуш хабар айт, ёлғон бўлса ҳам…
Олис муҳаббатинг юрибди дегил.
Сарғайган дафтарин варақлаб пинҳон,
У сени тушида кўрибди дегил.

Менга хуш хабар айт, ёлғон бўлса ҳам…

Абдулла Орипов
@Kundaliknoma